Minisitiri Amb. Gatete amaze gusinyana masezerano na Yasser El-Gamal uhagarariye Banki y’Isi mu Rwanda.

Kuri uyu wa mbere tariki 5 Kamena 2017, nibwo aya masezerano yashyizweho umukono. Hakazakorwa umuhanda ureshya na kilometero 130, uzahera mu Karere ka Ngoma kugera i Nyanza ugakomeza i Bukavu muri Repubulika iharanira Demokarasi ya Congo.

Uyu muhanda wari warangiritse ku buryo abaturuka muri utu turere bakoreshaga amasaha menshi, ubundi bakanyura n’inzira y’i Kigali kugira ngo bagere aho bifuza.

Iyubakwa ry’uyu muhanda rizakorwa mu bice bibiri, igice cya mbere cya kilometero 66 kizaturuka i Kibugabuga kikagera i Gasoro muri Nyanza. Ikindi gice gisigaye cya Ngoma-Bugesera kikazaterwa inkunga na Leta y’u Buyapani.

Minisitiri w’Imari n’Igenamigami, Amb. Claver Gatete yavuze ko gukora uyu muhanda bizorohereza urujya n’uruza rw’abantu n’ibintu mu Karere k’Afurika y’Iburasirazuba.

Yagize ati “kubaka umuhanda Ngoma-Nyanza bizorohereza abantu n’ibintu mu karere k’Afurika y’Iburasirazuba, ari abava muri Tanzania baza mu Rwanda bagakomeza muri DRC.”

Minisitiri Gatete yavuze ko uyu muhanda uzafasha abantu bagera mu bihumbi 500 bazawukoresha n’abandi 500 bazakora mu iyubakwa ryawo.

Indi mihanda izakorwa hifashishijwe iyo nkunga y’imyaka itanu ya Banki y’isi ni umuhanda Kagitumba-Kayonza-Rusumo wa kilometero 208, umuhanda wa Huye-Kibeho wa 68km n’indi mihanda yo muri Kigali ya kilometero 80.

Umuyobozi wa Banki y’Isi mu Rwanda, Yasser El-Gamal yashimye u Rwanda uko rubungabunga imihanda.

Ibiciro mu mijyi byiyongereho 7.3%

Imibare yatangajwe n’Ikigo cy’Igihugu cy’Ibarurishamibare (NISR) igaragaza ko ibiciro by’ibiribwa n’ibyo kunywa bidasembuye byazamutse ku kigereranyo cya 7.7% muri Mata uyu mwaka mu gihe muri uko kwezi mu 2016 byazamutse ku gipimo cya 7.3%.

Ukuzamuka kuri icyo kigereranyo cyatewe n’ibiciro by’ibiribwa n’ibinyobwa bidasembuye byazamutse ku kigereranyo cya 15.8%.

Inzu, amazi, umuriro w’amashanyarazi na gazi bizamuka ku gipimo cya 2.2% mu gihe iby’ubwikorezi byazamutse ku kigereranyo cya 6.1%.

Ikigo gishinzwe ibarurishamibare gitangaza ko ibiciro mu mijyi byiyongereho 7.3% mu gihe mu byaro ari 15.9% ugereranije n’ukwezi kwa kane muri 2017.

Ibyo kurya no kunywa byo mu gihugu imbere byazamutse ku kigereranyo cya 0.3% naho ibikomoka hanze bizamuka ku kigero cya 0.4% mu gihe ibijyanye n’ingufu byo byiyongereho 0.6%.

Kuva muri Werurwe 2017 ni bwo gazi yazamutse ku isoko yiyongeraho 200RWf aho igura 1100RWf ivuye kuri 900RWf ku kiro bikaba biteye impungenge abasanzwe bayikoresha ku buryo bashobora kongera gusubira gukoresha amakara n’inkwi.

Ibi biciro bitangajwe mu gihe igiciro cya essence cyagabanutseho 20RWf bikaba bitanga icyizere ko bizazana impinduka nziza ku giciro cy’ubwikorezi n’ibiribwa muri rusange mu kwezi kwa Gatanu 2017.

Umuyobozi mukuru w’Agateganyo wa Imbuto Foundation Umutoni Sandrine ashyikirizwa sheki y’amadolari ibihumbi 30 asaga Miliyoni 25 Frw

Aya mafaranga azifashishwa mu kwishyura amafaranga y’ishuri, amafunguro n’amacumbi y’ abana 100 bakomoka mu miryango itishoboye.

Frederic Sohier uhagarariye iyi sosiyete mu Rwanda, ashyikiriza iyi nkunga Umuyobozi Mukuru w’Agateganyo wa Imbuto Foundation Sandrine Umutoni, yavuze ko bayitanze mu rwego rwo kugira uruhare mu iterambere ry’aho bakorera.

Iyi sosiyete ubusanzwe icunga iminara 770 ikoreshwa mu itumanaho igakoresha abakozi 1500 mu gihugu hose.

HIS kandi igira uruhare mu gutera inkunga abaturage mu bikorwa by’ uburezi, ingufu, ibidukikije no kubongerera ubushobozi.

Iyo nkunga ije nyuma y’indi ingana n’ibihumbi 15 by’amadolari asaga miliyoni 12.5 Frw, iyi sosiyete iherutse gushyikiriza Imbuto Foundation yo gukoresha mu kongerera ubumenyi abazahugura abandi muri gahunda bise Mentorship.

Umuryango Imbuto Foundation washinzwe na Madame Jeannette Kagame muri 2001. Umaze gufasha abana b’ abakobwa n’abahungu ibihumbi bitandatu mu myigire y’amashuri yisumbuye na kaminuza.

Tour du Rwanda ubu isigaye izenguruka mu duce dutandukanye tw’igihugu

Bernard Nsengiyumva, umusaza w’imyaka 64 wakinnye amarushanwa yo gusiganwa ku magare atandukanye avuga ko mu myaka 1977 ari ho amarushanwa atandukanye yatangiye gutegurwa.

Muri yo harimo isiganwa rya Tour de Kigali ryaberaga mu Mujyi wa Kigali, Tour de l’Est ryaberaga mu Burasizuba (Rwamagana-Kirehe), Tour des Volcans (Cyanika-Ruhengeri na Gisenyi) na “Ascension des Milles Collines” ryavaga i Kigali ryerekeza i Butare (Huye).

Mparabanyi Faustin, na we wakinnye umukino w’amagare avuga ko isiganwa ryiswe Tour du Rwanda, ryazengutse igihugu ryabaye bwa mbere mu mwaka wa 1988 ryitabirwa gusa n’Abanyarwanda.

Tour du Rwanda isigaye yitabirwa n’amakipe atandukanye yaturutse mu bihugu byo hirya no hino ku isi

Ariko mu mwaka wakurikiyeho (1989), ishyirahamwe ry’isiganwa ry’amagare ryatumiye abo muri Uganda, u Burundi, Repubulika iharanira Demokarasi ya Kongo (Zaire), Kenya na Tanzaniya ariko Aba-Tanzaniya ntibitabira.

Kuva mu 1990 Tour du Rwanda ntiyongeye kuba kugeza mu mwaka w’i 2000.

Mparabanyi avuga ko icyatumye ihagarara ari ibibazo igihugu cyari kirimo byiyongereho ko amakuru yavuze n’ubutegetsi bwa Habyarimana ko Fred Rwigema wafatwaga nk’umwanzi mukuru w’igihugu yakurikiranye Tour du Rwanda yo mu 1990.

Hagati ya 2001 na 2008, iri rushanwa ryagukanwe n’Abanyarwanda uretse muri 2006 Umunya-Kenya Peter Kamau yabanyuze muri rihumye yegukana umwanya wa mbere.

Muri 2009, Tour du Rwanda yemewe n’Ishyirahamwe Mpuzamahanga ry’Umukino w’Amagare (UCI-Union Cycliste Internationale) ishyirwa ku ngengabihe z’amarushanwa yo ku mugabane w’Afurika.

Kujya ku rwego mpuzamahanga byatumye rirushaho kwitabirwa n’amakipe ava mu bihugu by’Afurika, u Burayi ndetse n’Amerika.

Mbere abasiganwaga ku magare mu Rwanda bagendaga mu mihanda imeze nka gutya

Abakina umukino w’amagare 85 bo mu makipe 17 biteganyijwe ko bazitabira Tour du Rwanda ya 2016 izatangira tariki 13-20 Ugushyingo 2016.

Abakinnyi nka Areruya Joseph, Ruhumuriza Abraham, Jean Bosco Nsengimana n’abandi bashobora gukora amateka ku nshuro ya 3 bakegukana iryo rushanwa rizitabirwa n’abakinnyi babigize umwuga bafite amazina akomeye?

Abakinnyi bagekanye Tour du Rwanda

1988: Celestin Ndengeyingoma
1989: Omar Masumbuko
1990: Faustin Mparabanyi
2001: Bernard Nsengiyumva
2002, 2003, 2004 and 2005: Abraham Ruhumuriza
2006: Peter Kamau (Kenya)
2007: Abraham Ruhumuriza
2008: Adrien Niyonshuti
2009: Adil Jelloul (Maroc)
2010: Danel Teklehaimanot Girmazion (Erithrea)
2011: Kiel Reijnen (USA)
2012: Darren Lill (Afurika y’Epfo)
2013: Dylan Girdlestone (Afurika y’Epfo)
2014: Valens Ndayisenga
2015: Jean Bosco Nsengimana

Banki Attijariwafa yo muri Maroc yaguze COGEBANQUE

Ni umuhango wabereye mu Mujyi wa Kigali, mu biganiro Ikigo cy’Igihugu gishinzwe Iterambere (RDB) cyagiranye n’abashoramari bo muri Maroc.

Abo bashoramari baje baherekeje umwami Mohamed VI watangiye uruzinduko rw’iminsi itatu mu Rwanda, kuva ku mugoroba wo ku ya 18 Ukwakira 2016.

Iyi banki iguze COGEBANQUE ni iya Sosiyete nini yo muri Maroc yitwa SNI (Societe Nationale d’Investissement) y’umwami wa Maroc Mohamed VI.

Iyo sosiyete muri 2012 yari ifite umutungo wa miliyari hafi 70 z’Amadolari y’Amerika, abarirwa muri miliyari zirenga ibihumbi 56RWf.

Serge Kamuhinda, umuyobozi ushinzwe ibikorwa muri RDB yatangaje ko bishimiye iki gikorwa cyo gusinya ayo masezerano.

Banki Attijariwafa ifite icyicaro gikuru i Casablanca, yagabye amashami mu mijyi ikomeye yo ku mugabane w’u Burayi na Aziya.

Muri iyo mijyi harimo nka Londres (u Bwongereza), Paris (u Bufaransa), Buruseli (u Bubiligi), Madrid na Barcelone (Espagne), Milan (U Butaliyani), Shangai (u Bushinwa).

Iyi banki ifite kandi amashami mu bihugu by’Afurika birimo Mali, Ghana, Tuniziya, Senegali na Mauritaniya.

Kuba iyi banki iguze COGEBANQUE yatangiye gukorera mu Rwanda mu w’i 1999, ifite amashami 15 mu gihugu hose, bizagira ingaruka nziza ku mikorere y’urwego rw’amabanki mu Rwanda by’umwihariko no ku bukungu bw’igihugu muri rusange.

Abashoramari ba Maroc batangiye gushora imari mu Rwanda kuva muri 2014. Baguze sosiyete y’ubwishingizi ya CORAR ihinduka Saham Group.

Oda Gasinzigwa atorewe kuba umudepite muri EALA

Gasinzigwa wabaye Minisitiri w’Uburinganire n’Iterambere ry’Umuryango kugeza muri Werurwe 2016 yinjiye mu Nteko ya EALA nyuma yo gutsinda Callixte Kanamugire wabaye umuyobozi wungirije w’akahoze ari Akarere ka Kacyiru.

Gasinzigwa yatsindiye uyu mwanya ku majwi 71 kuri 75.

Yatorewe uyu mwanya asimbura Hon. Christophe Bazivamo watorewe kuba Umunyamabanga Mukuru Wungirije w’uyu muryango, ushinzwe Imari n’Ubutegetsi muri Kanama uyu mwaka.

Uyu mudepite mushya ukomoka mu Muryango wa FPR-Inkotanyi atowe mu gihe Hon. Bazivamo asimbuye, yari asigaje umwaka umwe ngo arangize manda ye y’imyaka itanu.

Gasinzigwa ageze kuri uyu mwanya nyuma yo kuba Minisitiri w’Uburinganire n’Iterambere ry’Umuryango no gukora imirimo itandukanye mu Rwego rw’Igihugu rugenzura ishyirwa mu bikorwa ry’ihame ry’uburinganire n’ubwuzuzanye (GMO), hagati ya 2004 na 2008.

Minisitiri w’Intebe Anastase Murekezi yihanganishije umuryango wa Senateri Mucyo

Minisitiri w’Intebe, Anastase Murekezi yatanze ubu butumwa abinyujije ku rubuga nkoranyambaga rwa twitter ku gicamunsi cyo kuri uyu wa Kabiri tariki 04 Ukwakira 2016.

Minisitiri w’Intebe yagize ati “Guverinoma y’u Rwanda ibabajwe n’urupfu rwa Senateri Jean de Dieu Mucyo wakoreye cyane u Rwanda, twihanganishije umuryango we.”

Minisitiri w’Intebe abinyujije ku rubuga rwe rwa Twitter yihanganishije umuryango wa Nyakwigendera Senateri Mucyo

Ubu butumwa buje nyuma y’ubw’Inteko Ishingamateko, Umutwe wa Sena, nayo yasohoye itangazo rifata mu mu gongo umuryango wa nyakwigendera.

Jean de Mucyo yitabye Imana azize urupfu rutunguranye ubwo yagwaga ku masikariye yo ku Nteko Ishingamategeko bakihutira kumujyana kwa muganga ku bitaro byitiriwe Umwami Fayscal ariko agahita yitaba Imana.

Nyakwigendera yakoze imirimo ikomeye nyumaya Jenoside yakorewe Abatutsi mu 1994, irimo kuba Minisitiri w’Ubutabera, Umushinjacyaha Mukuru wa Repubulika ndetse n’Umunyabanga Nshingwabikorwa wa Komisiyo y’Igihugu ishinzwe kurwanya Jenoside (CNLG).

Muri Gicurasi 2015, Mucyo yatorewe kwinjira muri Sena, akaba yari amaze umwaka hafi n’igice muri izo nshingano.

Uyu mugabo w’imyaka 55 akomoka mu Ntaray’Amajyepfo, Akarereka Huye. Asize umugore n’abana bane, abahungu batatu n’umukobwa.

Umuhango wo kumuherekeza mu cyubahiro ugomba kuba muri iki cyumweru ariko igihe ntikiratangazwa.

Senateri Mucyo Jean De Dieu yitabye Imana mu gitondo cyo kuri uyu wa mbere

Amakuru amaze kumenywa na Kigali Today avuga ko Mucyo yazize urupfu rutunguranye muri iki gitondo ubwo yagiraga impanuka yo kugwa ku kazi bamugeza kwa muganga agahita yitaba Imana.

Itangazo ribika nyakwigendera Senateri Mucyo Jean De Dieu ryaturutse muri Sena

Uyu mugabo w’imyaka 55 yatorewe kwinjira muri Nteko Ishingamateko, Umutwe wa Sena tariki 29 Gicurasi 2015 akaba yari amaze umwaka hafi n’igice muri uwo mwanya.

Jean de Dieu Mucyo yamenyekanye cyane muri politiki yo mu Rwanda nyuma ya Genocide yakorewe Abatutsi mu 1994.

Iyi foto yafotowe ku cyumweru (tariki ya 02 Ukwakira 2016) ubwo nyakwigendera Senateri Mucyo Jean De Dieu yari ari mu nama y’abakomoka mu karere ka Huye

Mucyo yashinzwe imirimo ikomeye irimo kuba Minisitiri w’Ubutabera n’Umushinjacyaha Mukuru wa Repubulika ndetse n’ Umunyamabanga Nshingwabikorwa wa Komisiyo y’Igihugu ishinzwe kurwanya Jenoside (CNLG).

Uyu mugabo uvuka mu Ntara y’Amajyepfo yabaye kandi Umuyobozi w’Akanama kari gashinzwe gucukumbura uruhare rwa Leta y’Abafaransa muri Jenoside yakorewe Abatutsi mu 1994 yasohoye raporo yayo muri Kanama 2008.

Imirimo yakoze

1980-1985: Minijust ashinzwe imishahara y’abakozi

1991-1994: UNICEF na DAF muri EMUJECO

1994-2003: Umusirikare avamo afite ipeti rya Kapiteni

1995-1999: Diregiteri muri Minijust, Umucamanza mu rukiko rwa gisirikare

1999-2003: Minisitiri w’ubutabera n’imikoranire y’inzego

2003-2006: Umushinjacyaha mukuru wa Repubulika

2006-2007: Yayoboye Komisiyo ku ruhare rw’Abafaransa muri Jenoside

2008-2015: Umunyamabanga Nshingwabikorwa wa CNLG

Gicurasi 2015-Ukwakira 2016: Senateri mu Nteko Ishinga Amategeko y’u Rwanda

U Rwanda rwifatanyije n’Abanya-Isiraheli mu gushyingura Shimon Peres

Minisitiri Mushikiwabo abinyujije ku rubuga rwa twitter yavuze ko yagiye kwifatanya na Isiraheri nk’intumwa y’umukuru w’igihugu.

Yagize ati “Ndi i Yerusalemu nk’intumwa ya Perezida Kagame mu muhango wo gushyingura Shimon Peres mu rwego rwo gufata mu mugongo Abanya-Isiraheli.”

Shimon Peres wabaye Perezida wa Isiraheli yitabye Imana kuwa 28 Nzeri 2016.
Ni nyuma yo kumara ibyumweru arwaye bikomeye.

Arashyingurwa ku musozi witwa Mount Herzl, i Yerusalemu kuri uyu wa Gatanu tariki 30 Nzeri 2016.

Urupfu rwa Shimon Peres rukimenyekana, u Rwanda rwoherereje ubutumwa bw’akababaro mu rwego rwo kwifatanya n’abaturage ba Israel, bafata nk’umwe mu batumye igihugu cya Isiraheli kibaho.

U Rwanda na Isiraheli bifitanye umubano mwiza washimangiwe n’uruzinduko rwa Minisitiri w’Intebe wa Isiraheli, Benjamin Netanyahu wasuye u Rwanda muri Nyakanga uyu mwaka.

Abayobozi batandukanye bo ku isi bitabiriye umuhango wo gushyingura Shimon Peres

Mu ruzinduko rwe abayobozi b’ibihugu byombi bashyize umukono ku masezerano y’ubufatanye mu nzego zitandukanye.

Umuhango wo guherekeza mu cyubahiro Shimon Peres witabiriwe n’abakuru b’ibihugu batandukanye, barimo Perezida wa Leta Zunze Ubumwe z’Amerika Barak Obama, n’Umuyobozi wa Palestina, Mahmoud Abbas.

Perezida Kagame ageza ijambo ku bakuru b’ibihugu na guverinoma bitabiriye inteko rusange y’Umuryango w’Abibumbye

Ibi Perezida Kagame yabigarutseho mu ijambo yagejeje ku bakuru b’ibihugu na guverinoma bitabiriye inteko rusange y’Umuryango w’Abibumbye (UN) yateraniye ku cyicaro gikuru cyawo i New York, ku wa Kane tariki ya 22 Nzeli 2016.

Perezida Kagame agira ati “Inshingano zacu zo guharanira uburenganzira n’imibereho myiza by’impunzi n’abimukira bigomba kurangwa n’ubufatanye. Iki kibazo kigomba gushakirwa umuti ku buryo buhoraho kandi hakabaho no kwifatanya n’abari mu kaga igihe cyose. Ntabwo kizaba ikibazo gusa kuko ibihugu bikize byatangiye guhura n’icyo kibazo.”

Ibihugu by’Iburayi by’umwihariko bifite ikibazo cy’impunzi ziva mu bihugu by’Iburayi bw’Uburasizuba na Aziya biri mu ntambara. Siriya (Syria) ikaza ku isonga mu kugira impunzi nyinshi zishakira ubuhungiro mu Burayi.

Usanga ibihugu by’Uburayi bitabivugaho rumwe, bimwe bishaka kubakira mu gihe ibindi bitabikozwa. Perezida Kagame ashimangira ko u Rwanda ruzakomeza gukora inshingano zarwo zo kwakira no kwita ku mpunzi.

Mu Rwanda ubu habarurwa impunzi zigera ku bihumbi 164 na 561. Impunzi z’Abarundi ni ibihumbi 81 na 247 iz’Abanye-Kongo zisaga ibihumbi 74.

Perezida Kagame agaragaza ko u Rwanda ruhereye ku masomo rwakuye ku bihe byahise, hakabayeho ubushake bufatika bw’ibihugu, bigashyira imbere ya byose imibereho myiza y’abaturage. Ibyo byatuma bigera kuri byinshi kandi byiza.

Mu ijambo rye kandi yagarutse kuri politiki idaheza abari n’abategarugori. Yavuze ko abagore badahawe amahirwe yo gukoresha ubushobozi bwabo abagabo na bo ntacyo bageraho.

Mu ibarura rusange ry’abaturage n’imiturire rya 2012 rigaragaza abagore babarirwa muri 52 %, bagira uruhare mu iterambere ry’igihugu, kuva mu buhinzi kugeza mu buyobozi bukuru bw’igihugu.

Igihugu cy’u Rwanda kikaba ari cyo gihugu gifite umubare munini w’abagore bari mu Nteko ishingamateko, bangana na 63.9%.

Kubera gushyigikira iterambere ry’abagore, Perezida Paul Kagame akaba ari umwe muri ba mbasaderi ba UN muri gahunda yiswe “HeforShe”, igamije gushyigikira iterambere ry’umugore.

Kugeza ubu, u Rwanda ruri ku isonga mu mu kugira umubare munini ku isi w’abashyigikiye iyo gahunda, aho abarenga ibihumbi 155 bamaze gusinya bemeza ko bayishyigikiye.

Andi mafoto

Uko ubona ikibuga cy’indege cya Kanombe ukirebeye mu kirere

Kiza ku mwanya wa gatatu muri Afurika nyuma ya Jomo Kenyatta cyo muri Kenya na Kilimanjaro cyo muri Tanzaniya.

Ubushakashatsi bwakozwe na sosiyete yo muri Esipanyi (Espagne) yitwa “Forward Keys”, bugaragaza ko abagenzi bagana cyangwa bateganya kuza mu Rwanda banyuze ku Kibuga Mpuzamahanga cya Kanombe baziyongera.

Iyi Sosiyete igaragaza ko umubare w’abagana ibibuga by’indege by’Afurika y’Iburasizuba n’ubushobozi bwo kubakira wazamutse ku gipimo cya 11.2%, ugereranyije no mu mwaka wa 2015. Bigaterwa ahanini n’uko ibihugu byo mu majyaruguru y’Afurika bifite ibibazo by’umutekano muke; nkuko umuyobozi nshingwabikorwa wa Forward Keys, Olivier Jager abisobanura.

Agira ati “Dufite Afurika ebyiri, iy’Amajyaruguru ifite ibibazo by’umutekano muke n’iterabwoba , ibihugu biri munsi y’ubutayu bwa Sahara bimaze kubicaho aho Ethiopia yazamutse ku gipimo cya 9.6%, Tanzaniya 10.6%, Mauritius 11.6%, Kenya 14.9% na Afurika y’Epfo iri kuri 11.4%.”

Yakomeje avuga ko urebye uko ibintu bihagaze uyu munsi, hari icyizere cy’uko uwo muvuduko w’abagana ibibuga by’indege n’ubushobozi bwo kubakira bizakomeza gutera imbere mu mezi make asigaye ngo umwaka wa 2016 ngo urangire.

Imibare ikusanywa n’ibigo mpuzamahanga bigurisha amatike y’indege ishimangira ko izamuka ry’umubare w’abagenzi baga muri Afurika y’Iburasirazuba, kugeza mu mpera za 2016, uzazamuka ku gipimo cya 17.3%.

Ukurikije ingendo z’indege zakozwe mu mezi ane ya nyuma ya 2015 na 2016 mu Karere k’Afurika y’Ibusirazuba, Ikibuga cya Nairobi cyazamutse ku bipimo bya 0% na 2%, Kilimanjaro kuri 6% na 14% na ho Kanombe 13% na 5%.

Ukwiyongera kw’abagenzi baza mu Rwanda byatewe n’uko u Rwanda rwongereye imbaraga mu kwakira inama zikomeye rushyiraho n’ibikorwaremezo.

Hubatswe inzu y’inama iri ku rwego mpuzamahanga, Kigali Convention Center (KCC), kuvugurura Ikibuga cy’Indege cya Kanombe ndetse hubakwa amahoteli akomeye nka Radisson Blu, Marriot hotel n’izindi.

Kubera ibyo bikorwaremezo byubatswe mu mwaka wa 2016, u Rwanda rwakiriye inama zikomeye zirimo Inama y’abakuru b’ibihugu na guverinoma y’Umuryango w’Ubumwe bw’Afurika, inama y’ishoramari (Global investment Summit) n’inama zikomeye z’ubuhinzi nka “FARA”.

Ibi byitezweho ko bizakomeza mu gihe u Rwanda rwabonye umushoramari w’umunya-Portugal uzubaka ikibuga mpuzamahanga cya Bugesera ku kayabo ka miliyoni zisaga 800 z’amadolari.

Perezida Kagame ahamya ko u Rwanda rudatinya guharanira inyungu zarwo

Perezida Kagame yabitangarije mu kiganiro yahaye abanyeshuri bagera kuri 400 biga muri kaminuza ya Yale yo muri Leta Zunze Ubumwe z’Amerika, tariki ya 20 Nzeli 2016. Cyateguwe mu rwego rw’ikigega cyiswe “Coca Cola World Fund”.

Perezida Kagame avuga ko umubano w’u Rwanda n’ibindi bihugu waranzwe no kutumva ibintu kimwe. Ibivugwa ku Rwanda bitari byo bifatwa nk’ukuri. Ariko ashimangira ko ibyo bidakwiye kandi u Rwanda rudaseta ibirenge mu guharanira inyungu zarwo.

Yagize ati “Iyi si dipolomasi yo guhatirwa kwemera ibitari byo. U Rwanda ntirwigeze rubyemera. Iyo badukoze mu jisho, duhitamo kwihagararaho, tukarwanira ukuri byaba na ngombwa bikatugiraho ingaruka.”

Umukuru w’igihugu avuga ko umubano w’ibihugu bikomeye n’ibikiri mu nzira y’amajyambere wagombye kurangwa n’ubwubahane no guharanira inyungu z’ibihugu byombi hatabayeho kwikanyiza.

Perezida Kagame yahaye ikiganiro abanyeshuri babarirwa muri 400 bo muri Kaminuza ya Yale

Agaragaza ko kuba cishwa ha bitagira aho bigeze ibihugu biri mu nzira y’amajyambere. Ahubwo yaba igihugu gifite ubushobozi buke n’igifite bunini bikwiye guharanira inyungu zabyo mu bwubahane.

Atanga urugero avuga ukuntu ibihugu by’Afurika y’Iburasizuba byiyemeje guca imyenda yakoze izwi nka Caguwa. Byabikoze mu rwego rwo kongerera ubushobozi inganda no guhindura imyumvire y’abenegihugu kandi ibihugu byose bikazabyungukiramo.

Perezida kandi yagaye imyitwarire y’ibihugu bikomeye bishaka ko ibihugu bikishakashaka nk’iby’Afurika bigendera ku murongo wabyo kandi bitandukanye cyane.

Ati “Amerika n’ibindi bihugu bikomeye bifite ubushobozi bwo kurema isi nk’uko babishaka ariko hari izindi mbaraga zava mu bandi mukorana mu bwubahane ndetse umusanzu wabo ugahabwa agaciro.”

Iki kiganiro cyari gifite insangamatsiko igira iti “Akamaro k’ubufatanye bushingiye ku ndangagaciro mu guharanira umutekano, amahoro n’iterambere mpuzamahanga”.

Cyitabiriwe n’ababaye abaperezida nka Mary Robinson (Irlande) na Raila Odinga (Kenya) ndetse n’ambasaderi wa Amerika muri UN, Samanta Power n’abandi batanze ibiganiro.

Andi mafoto

Abadepite ba EU mu Nteko ishinga amategeko y’u Rwanda

Aba badepite bagize komisiyo ishinzwe uburenganzira bw’umugore n’umukobwa ndetse n’uburinganire, bageze mu Rwanda tariki 19 Nzeri 2016 .

Baje mu rwego rwo kungurana ibitekerezo ku ntambwe u Rwanda rwateye mu kongerera ubushobozi Umunyarwandakazi.

Bateganya kandi no gusangira ibitekerezo na bagenzi babo b’Abanyarwanda, ku ihame ry’uburinganire hagati y’umugabo n’umugore, kugira ngo aho iwabo bataragera babigireho.

Kuri uyu wa 20 Nzeri 2016 abo badepite bakiriwe na Perezida wa Komisiyo ishinzwe Politiki n’uburinganire , mbere yo kuganira n’ubuyobozi bw’ihuriro ry’abanyarwandakazi bari mu nteko ishingamateko (FFRP).

Uwimana Consolee umuyobozi wa FFRP, yagarutse ku nzira itoroshye abanyarwandakazi banyuzemo, kugira ngo bagere ku rwego bariho uyu munsi .

Yavuze ko mbere ya 1994 bahezwaga mu nzego zifata ibyemezo kubera ubuyobozi bubi, none ubu bashyizwe mu buyobozi , bagira uruhare rufatika mu byemezo bifatwa.

Yatanze urugero rw’itegeko rigenga izungura ry’ ubutaka rya 1999, ritanga uburenganzira bungana ku bahungu no ku bakobwa.

Mbere umugore cyangwa umukobwa, bari baravukijwe uburenganzira ku mitungo y’ababyeyi, bitandukanye na musaza we.

Uwimana yakomeje ashimangira ko, kwinjiza abagore mu nzego zifata ibyemezo nk’Inteko ishinga amategeko, byatanze umusaruro ku iterambere ry’igihugu muri rusange.

Bakiriwe na bagenzi babo b’abanyarwanda

Umuyobozi w’abadepite ba EU, Hon. Iratxe Garacia Perez yatangaje ko ari amahirwe akomeye bagize yo kuza gusura u Rwanda, kugira ngo barwigireho ibyo rwagezeho mu kubaka ubushobozi bw’abagore, ubukungu, politiki n’ibindi.

U Rwanda ni cyo gihugu cya mbere ku isi gifite abagore benshi bari mu nteko ishingamategeko bangana na 64 % .

Rukurikirwa na Bolivia yo ku mugabane w’Amerika, ifite 53.3%, mu gihe igihugu cyiza imbere ku mugabane w’iburayi ari Suwede ifite 43.6%.

Biteganyijwe ko abo badepite bazasoza urugendo rwabo tariki 23 Nzeli 2016.
Mu gusoza bazagirana ibiganiro na Guverinoma, imiryango itegamiye kuri Leta ndetse basure imishinga yo kongerera ubushobozi abagore

Ubwo Bazivamo yarahiraga

Bazivamo yarahiye kuri uyu wa kane tariki ya 08 Nzeli 2016, mu nama idasanzwe ya 17 y’abakuru b’ibihugu bya EAC yateraniye i Dar es Salaam muri Tanzania.

Iyi nama yigaga ku masezerano yo gusonera amahoro ku bicuruzwa byoherezwa mu muryango w’Ubumwe bw’Iburayi (EU) bivuye muri EAC. Yize kandi ku bibazo by’umutekano muke n’intambara byo mu Burundi na Sudani y’Epfo.

Akirahira, Perezida w’u Rwanda, Paul Kagame yashimiye Bazivamo inshingano nshya atangiye.

Liberat Mfumukeko, umunyamabanga mukuru wa EAC anyuze ku rubuga rwa “Twitter” na we yashimiye Bazivamo.

Bazivamo wari uhagarariye u Rwanda mu Nteko Ishingamateko y’Umuryango w’Afurika y’Iburengerazuba (EALA) yatanzweho umukandida na Leta y’u Rwanda yemezwa n’inama y’abaminisitiri bagize uyu muryango.

Uyu mugabo w’imyaka 55 wakoze imirimo myinshi kandi ikomeye mu Rwanda, kuri uyu mwanya asimbuye Liberat Mfumukeko wazamutse mu ntera akaba umunyamabanga mukuru wa EAC.

Bazivamo agiye kumara manda y’imyaka itatu ishobora kongerwa inshuro imwe. Abaye Umunyarwanda wa kabiri winjiye mu buyobozi bukuru bya EAC nyuma ya Dr. Richard Sezibera wasohoje neza manda ye y’imyaka itanu itavugururwa.

Bazivamo Christophe azarahirira kuba umunyamabanga waEAC wungirije

Uyu muhango uteganyijwe mu nama idasanzwe ya 17 y’abakuru b’ibihugu bigize EAC, izabera i Dar-Es Salaam muri Tanzania, iyobowe na Perezida wa Tanzania, Dr. John Pombe Magufuli, kuri uyu wa kane tariki ya 8 Nzeli 2016.

Bazivamo asanzwe ari umudepite mu nteko ishinga amategeko y’Afurika y’Iburasirazuba (EALA).

Yemejwe n’inama y’abaminisitiri bagize uyu muryango, nk’umunyamabanga mukuru wa EAC wungirije ushinzwe ubutegetsi n’imari, nyuma yo gutangwaho umukandida na Leta y’u Rwanda.

Nk’uko amategeko agenga uyu muryango abiteganya, uwemejwe kuri uyu mwanya, awumaraho imyaka itatu ishobora kongerwa inshuro imwe.

Bazivamo akimara kurahirizwa na perezida wa Tanzania uyobora uyu muryango muri iki gihe, azahita ahagarika inshingano zo guhagararira igihugu cye mu nteko ishinga amategeko (EALA), nk’uko amategeko abiteganya.

Abaye umunyarwanda wa kabiri ugiye mu buyobozi bukuru bwa EAC, nyuma ya Dr. Richard Sezibera wawubereye umunyabanga mukuru.

Itangazo ryasohowe n’ubunyamabanga bukuru bwa EAC, rivuga ko muri iyi nama idasanzwe hazasuzumwa raporo y’inama y’abaminisitiri, ku masezerano y’ubufatanye yo gusonera ibyo bihugu amahoro, ku bicuruzwa byoherezwa mu muryango w’ubumwe bw’Iburayi (EU), n’ibihugu bya EAC.

Biteganyijwe ko abakuru b’ibihugu bazagezwaho raporo y’inama y’abaminisitiri, ivuga ku kibazo cya Sudani y’Epfo yinjiye ku mugaragaro muri EAC tariki ya 5 Nzeli 2016.

Perezida Benjamin Mkapa, umuhuza mu kibazo cya politiki mu Burundi, nawe azatangaza aho ibiganiro hagati y’abarundi bigeze.

Perezida Kagame ategerejwe muri Leta ya California mu muhango wo kwizihiza umunsi wahariwe umuco Nyarwanda.

Uyu munsi uzaba tariki 24 Nzeri 2016, ufite insanganyamatsiko igira iti “umunsi Nyarwanda w’umuco, ishingiro ry’agaciro.” Uzitabirwa n’Abanyarwanda n’inshuti z’u Rwanda baturutse mu Mujyi wa San Francisco no mu Ntara ziyikikije.

Amakuru dukesha abategura uwo munsi, avuga ko uzaba ari umwanya wo kwishimira ubwiza bw’umuco Nyarwanda, n’uruhare wagize mu guhindura igihugu kigatera imbere ku muvuduko udasanzwe muri Afurika no ku isi muri rusange.

Hashingiye ku muco Nyarwanda wo hambere, u Rwanda rwishakiye ibisubizo nko gushyiraho Inkiko Gacaca mu gihe gito zaciriye imanza ibihumbi bisaga 100 by’abakekwaho Genocide mu gihe izo manza zari kuzafata imyaka ibarirwa mu 100.

Abanyarwanda baba hanze n’inshuti z’u Rwanda bazaboneraho umwanya wo kumenya indangagaciro z’umuco zihuza Abanyarwanda n’uburyo bahereye ku muco wabo bishakiye ibisubizo by’ingutu bijyanye n’ubutabera, imanza, ubumwe n’ubwiyunge, kurwanya ubukene n’imiyoborere n’ibindi nyuma ya Genocide yakorewe Abatutsi mu 1994.

Biteganyijwe ko abazawitabira, bazamurikirwa ibijyanye n’umuco nk’ubucuzi, ububoshyi, ububumbyi, ububaji n’imyambarire byo hambere.

Bazamurikirwa kandi uko ubuhinzi n’ubworozi Nyarwanda bwo hambere bwakorwaga n’uko bataramaga bya Kinyarwanda mu mbyino n’ibindi.

Ibirori bihuza Abanyarwanda baba hanze n’abayobozi bakuru b’igihugu byatangiye gutegurwa muri 2011. Byitabirwa n’Abanyarwanda basaga ibihumbi 33 bava imihanda yose.

U Rwanda ni kimwe mu bihugu bine byinjiye muri iri huriro kuri uyu wa mbere tariki 29 Ukwakira 2016, mu nteko rusange y’uwo muryango mpuzamahanga irimo kubera i Buenos muri Argentine.

Dr. Muganga Raymond, uyobora urugaga Nyarwanda rw’abahanga b’imiti

Umuyobozi w’Urugaga Nyarwanda rw’Abahanga mu by’Imiti (Rwanda National Pharmacy Council) Dr. Raymond Muganga, yavuze ko kwinjira ihuriro mpuzamahanga ry’abahanga mu by’imiti ari amahirwe akomeye kuri bo.

Yagize ati “Urugaga rwacu nibwo rukivuka, kuba umunyamuryango wa FIP ni amahirwe akomeye kuri twe kuko bizadufasha kumenyana n’abandi no gukorana n’indi miryango itandukanye mu ntumbero yo guteza imbere umwuga wacu ku rwego mpuzamahanga n’u Rwanda by’umwihariko.”

Ihuriro mpuzamahanga ry’abaganga b’imiti rigizwe n’imiryango 139 iva mu bihugu bitandukanye ku isi irimo inzobere mu by’imiti n’imikoreshereze myiza yayo.

Mu nteko rusange y’uyu muryango yitabiriwe n’inzobere mu by’imiti 2200 zo mu bihugu 98, Umunyamabanga Nshingwabikorwa wa FIP, Luc Besançon yavuze ko bazafasha urugaga nyarwanda mu bijyanye n’amategeko no kongerera ubushobozi abarimu mu bya farumasi.

Mu itangazo ryasohowe n’urugaga nyarwanda rw’abahanga mu by’imiti, ubuyobozi bw’uyu muryango bushimangira ko hari byinshi bazungukura kwinjira mu ihuriro birimo nko kwigira ku yindi miryango ndetse no gutanga umusanzu wabo mu guteza imbere umwuga wabo.

Urugaga Nyarwanda rw’Abahanga mu by’Imiti rwashyizweho rufite abanyamuryango 600. Rwashyizweho muri 2013 ishinzwe gushyiraho amategeko agenga umwuga w’abaganga b’imiti no gutanga inama ku nzego za Leta ku bijyanye n’imiti

Umukobwa ngo ntagomba kubura salon mu bishyingizwa bye.

Ni saa yine z’amanywa, izuba ryo mu bihe by’impeshyi ntirikaze cyane. Umuhoza (si amazina ye) mu ikanzu y’umweru n’inkweto zishinguye na zo z’umweru n’umukunzi we wambaye ikoti n’inkweto by’umukara n’ishati y’umweru baritegura gusezerana imbere y’Imana.

Nyuma yo gusezerana, inshuti n’abavandimwe b’umuryango baherekeje umukobwa wabo. Umuhoza yicaye mu ivatiri n’umugabo we bageze ku musore bateregereje guhabwa ikaze n’umuryango w’umuhungu, imbere yabo haparitse imodoka itwaye ibishyingiranwa, ikigaragara cyane ni intebe, ameza n’akabati byo mu ruganiriro (salon).

Nubwo umukobwa ugiye gushyingirwa asabwa ibikoresho byinshi guhera ku masahani, amafuriya kugeza kuri matela, amashuka n’ibiringiti bitwara amafaranga atari make, Umuhoza nyuma yo kuraranganya amaso asubiza ko ari ukwiteganyiriza.

Icyakora, John Ndengeyingoma (amazina yahinduwe), umwe mu batashye ubukwe, agira ati “Kubonera umukobwa ushyingirwa byose bisiga umuryango mu bukene bukabije kuko umuryango usabwa kugurisha inka cyangwa isambu kugira ngo ubashe kugura ibishyingiranwa.”

Akomeza avuga ko ibishyingirwanwa by’umukobwa wo mu cyaro bitajya munsi y’ibihumbi 800, amafaranga yemeza ko ari menshi ku muryango wo mu cyaro udafite aho ukura hafatika.

Ibikoresho bijyanwa n’umukobwa mu rugo rushya bigenda bitandukana bitewe nk’uduce. Nko mu Karere ka Bugesera, ngo abakobwa bagiye gushinga urugo batwara amagare na televisiyo.

Umuyobozi w’Akarere ka Kamonyi Wungirije ushinzwe Imibereho Myiza y’Abaturage, Prisca Uwamahoro, yatangarije Kigali Today ko gusaba umuryango w’umukobwa ibintu bihambaye nka salon yo mu nzu ari umutwaro.

Agira ati “Ni umutwaro kuri njye ariko tuzaganira n’inzego z’ibanze kugira ngo duhindure iyo myumvire, imiryango yoroherezanye mu byo isaba kenshi na kenshi iba irenze ubushobozi bwayo.”

Uyu muyobozi ashimangira ko icyo kibazo cyo gusaba umuryango w’umukobwa kitari mu Karere kose ahubwo kiri mu Murenge wa Nyamiyaga uhana n’imbibi n’Akarere ka Bugesera aho abakobwa baho batwara ibintu bihambaye akemeza ko uwo muco ari ho ushoboka kuba ukomoka.

Dr Donald Kaberuka, wahoze ayobora BAD, arahabwa amahirwe yo gusimbura Dr Dlamini Zuma ku buyobozi bwa Komisiyo ya AU.

Amatora yo gusimbura Dr. Dlamini Nkosazana wari usanzwe kuri uwo mwanya yari yahataniwe n’abakandida batatu; Dr. Pelonomi Venson-Moitoi, Minisitiri w’Ububanyi n’Amahanga wa Botswana, Dr. Speciosa Kazibwe wabaye Visi Prezida muri Uganda na Agapito Mba Mokuy, Minisitiri w’Ububanyi n’Amahanga muri Equatorial Guinea yimuriwe muri Mutarama 2017 mu nama izabera muri Ethiopia.

Aya matora ataravuzweho rumwe na mbere yayo aho bimwe mu bihugu byashakaga ko asubikwa kubera ko abahatanira uwo mwanya badafite ubushobozi bwo kuyobora Komisiyo y’Umuryango w’Afurika yunze Ubumwe byarangiye nta n’umwe ubashije kubona amanota asabwa kugira ngo atorerwe uwo mwanya.

Nyuma y’ayo matora, imiryango irafunguye ku bandi bakandida bafite inyota yo guhatanira uwo mwanya.

Nk’uko bitangazwa na Jeune Afrique, Umunya-Senegali Abdoulaye Bathily yabaye uwa kane watangaje ku mugaragaro ko yinjiye mu bahatanira uwo mwanya. Nubwo afite ibigwi bikomeye mu bya politiki nk’uwabaye inshuro nyinshi Minisitiri ku bwa Abdou Diouf na Macky Sall ariko hibazwa niba ibihugu bitandukanye bishobora kumwumvikanaho akegukana uwo mwanya.

Icyakora, inzobere y’Umunyarwanda mu by’ubukungu, Dr. Donald Kaberuka, arahabwa amahirwe yo kwegukana uwo mwanya aramutse awuhataniye. Gufata uyu mwanya babishingira ku bushobozi yagaragaje ayobora manda ebyiri BAD kuva muri 2005 akayifasha gutera imbere ku muvuduko udasanzwe.

Gusa, mu myaka 10 yamaze muri BAD yitaye by’umwihariko ku guteza imbere ibikorwaremezo, ubuhinzi n’ibidukikije; imishinga yose ishorwamo akayabo ka miliyari 12.5 z’amadolari bituma BAD iza ku isonga mu bigo by’Imari bishora imari muri Afurika.

Uretse ibigwi bye muri BAD no kugira uruhare rukomeye mu kuzamura ubukungu bw’u Rwanda ubwo yari Minisitiri w’Imari (1997-2005), Dr. Donald Kaberuka ni we wakoze umushinga wo gushakisha amafaranga AU yakoresha avuye mu misoro yatangwa ku bicuruzwa bikenerwa cyane mu bihugu, raporo yishimiwe cyane n’abakuru b’ibihugu inashimangira bidasubirwaho ubushobozi bwo kuyobora AU ugereranyije n’abandi bakandida.

Dr. Kaberuka ntaravuga aho ahagaze, niba azatanga kandidature kuri uyu mwanya cyangwa atazayitanga, gusa ikigaragara ni uko aramutse ayitanze afite amahirwe menshi yo gutsindira uwo mwanya.

Dr. Kaberuka yize muri Kaminuza y’i Dar-Es Salaam muri Tanzania ibijyanye n’ubukungu akomereza amashuri ye mu Bwongereza aho yakuye diplome y’ikirenga (Doctorate).

Uyu mugabo w’imyaka 65 yakoze imirimo ikomeye itandukanye by’umwihariko ijyanye n’amabanki n’ubukungu.

Perezida w’u Rwanda Paul Kagame ubwo yakiraga Minisitiri w’Intebe wa Israel, Benjamin Netanyahu. Hari tariki 7 Nyakanga 2016.

Aka kanama gakuriwe na Avraham Neguise, nk’uko bitangazwa n’urubuga Ynews.com, gashinzwe gushyigikira ubushake bwa Minisitiri w’Intebe, Benjamin Netanyahu, bwo gukomeza umubano n’ibihugu bya Afurika, by’umwihariko u Rwanda.

Muri Nyakanga 2016 ni bwo Minisitiri w’Intebe wa Isiraheli yasuye u Rwanda nyuma yo guca muri Uganda, Kenya asoreza uruzinduko rwe muri Ethiopia.

Igihugu cya Isiraheli gihuje amateka n’u Rwanda, aho na cyo cyahuye n’ingorane za Jenoside yakorewe Abayahudi yahitanye inzirakarengane zirenga miliyoni esheshatu.

Agaruka kuri ayo mateka, Umuyobozi w’ako kanama, umudepite Avraham Neguise, yagize ati “Isiraheli n’u Rwanda byubakiye ku makuba abaturage babyo bahuye na yo [ya Jenoside], dushyize imbere ejo hazaza.”

Mu muhango wo gushyiraho ako kanama wabaye ku wa 1 Kanama 2016, Neguise yavuze ko ibihugu byombi bizatsura umubano mu nzego zitandukanye ndetse n’uwo mubano ugomba kugera hagati y’Inteko Nshingamateko.

Ambasaderi w’u Rwanda muri Isiraheli, Col. Joseph Rutabana, ashimangira ko ubushake bufatika bwo gukomeza kunoza umubano bunagaragarira mu mubano watangijwe n’Inteko zishinga Amategeko z’ibihugu byombi.

Ubwo Minisitiri w’Intebe Benjamini Netanyahu yasuraga u Rwanda, yagaragaje ko u Rwanda ruhagaze neza, hakaba hari byinshi igihugu cye cyakungukira mu mubano n’u Rwanda.

Yagize ati “Nshimishijwe n’ejo hazaza h’igihugu cyanyu n’ah’umugabane. Dufite ubushake bukomeye bwo gukorana mu nzego zitandukanye kugira ngo abaturage bacu bazagire ejo heza mu mutekano, iterambere ndetse n’amahoro arambye.”

Muri 2014, abaminisitiri bashinzwe ububanyi n’amahanga b’ibihugu byombi bashyize umukono ku masezerano y’ubufatanye mu kunoza umubano no guteza imbere ishoramari.

Iki gikorwa cyakurikiwe n’uruzinduko rwa Minisitiri w’Ububanyi n’amahanga ari kumwe n’itsinda ry’abashoramari 60 basuye u Rwanda banoza aho ibihugu byombi bizafatanya.

Muri Werurwe 2015 ni bwo u Rwanda rwashyizeho Amabasaderi uhagarariye inyungu z’u Rwanda muri Isiraheli.

Re Jackson yari kumwe na Perezida Kagame mu karere ka Rwamagana.

Rev. Jackson w’imyaka 65 uvuka mu Ntara ya Carolina y’Amajyepfo muri Leta Zunze Ubumwe z’Amerika, ni imwe mu mpirimbanyi z’amahoro zaharaniye ukwishyira ukizana kw’abirabura muri Amerika mu gihe cya Martin Ruther King.

Kuri uyu wa mbere tariki 13 Kamena 2016, yari mu Rwanda aho yitabiriye umuhango wo gufungura ibikorwa by’iterambere Sosiyete ikora ibinyobwa bidasindisha“Coca Cola” yageneye abatuye Akarere ka Rwamagana.

Yagize ati “Iyo Perezida Kagame ageze hano muvuza impundu, yakwinjira mu byumba by’Inama by’Umuryango w’ Ubumwe bw’Afurika (AU) abantu bakamuhanga amaso, yagera muri Loni abantu bose bakabanga amatwi bashaka kumva icyo avuga naho muri Amerika ni umuntu wubashywe cyane ndetse n’isi yose.”

Rev. Jackson yavuze ko Abanyarwanda bafite amahirwe yo kugira umuyobozi nka Perezida Kagame.

Past. Jesse afite ubunararibonye muri politiki dore ko yanabaye Umusenateri uhagarariye Akarere ka Columbia aba n’umwe mu bahataniraga kuba umukandida w’ishyaka ry’Aba-democrate hagati ya 1984 na 1988.

Avuga ko ibikorwa by’iterambere bigerwaho mu Rwanda bishingiye ku buyobozi bwiza n’icyekerezo cya Perezida Kagame.

Ati “Mwizere igihe cyose ubuyobozi bwiza mufite, Perezida (Paul Kagame) ni inyangamugayo, icyerekezo afite cyahinduye igihugu kiba igikomerezwa.”

Soyiete ya Coca Cola yahaye ibikorwa by’iterambere.

Perezida Paul Kagame yongeye kugaya raporo zishinja u Rwanda gushyigikira abarwanya ubutegetsi bwa Perezida w’u Burundi, Pierre Nkurunziza.

Ibi Umukuru w’Igihugu yabitangaje mu kiganiro yagiranye n’abanyamakuru batandukanye ku gicamunsi cyo kuri uyu wa Gatanu, tariki 13 Gicurasi 2016, nyuma gato y’uko Inama y’Ubukungu ku Isi (WEF) yaberaga mu Rwanda isojwe.

Yagize ati “Abandika (impuguke za Loni) raporo ku Rwanda, bakabaye bakora ibindi by’ingirakamaro aho kongera ibibazo bihari.”

Ku wa Kane, tariki 12 Gicurasi 2016 ni bwo indi raporo yakozwe n’impuguke za Loni ishinja u Rwanda gukomeza gutera inkunga abarwanya Leta ya Pierre Nkurunziza, yongeye gusohoka mu itangazamakuru mpuzahamanga.

Kuva mu mwaka ushize wa 2015, Perezida Nkurunziza ashaka kwiyamamariza kongera kuyobora u Burundi muri manda ya gatatu, abamurwanya bavuga ko ari ukwica Itegeko Nshinga ry’igihugu cyabo, hatangiye gututumba umwuka mubi wakuruye imyigaragambyo mu gihugu no gushaka guhirika ubutegetsi bwe.

Ibi byatumye abaturage babarirwa mu bihumbi 240 bahungiye muri Tanzaniya, Repubulika iharanira Demokarasi ya Kongo, Uganda ndetse n’u Rwanda rucumbikiye impunzi zigera ku bihumbi 100.

Impunzi ziri mu Rwanda zashakiwe ingengo y’imari ya miliyoni 94 z’amadolari yo kuzifasha kubaho mu gihe cy’umwaka.

Leta y’u Burundi yatangiye gushinja u Rwanda gutoza no guha inkunga y’ibikoresho impunzi z’Abarundi ziri ku butaka bwarwo, ivuga ko ziri mu barwanya Leta ya Nkurunziza, bagaba ibitero imbere mu gihugu.

Leta y’u Rwanda yo yahakanye ibi birego yivuye inyuma ndetse muri Gashyantare 2016, rutangaza ko mu rwego rwo kuvanaho urwikekwe, impunzi zose z’Abarundi ziri ku butaka bwarwo, zishobora kwimurirwa mu bindi bihugu.

Imibare itangazwa n’imiryango irengera uburenganzira bwa muntu, ivuga ko abantu bagera kuri 500 barimo abasirikare bakuru mu Burundi, bamaze kwicwa mu buryo buteye urujijo kuva izo mvururu zatangira.

Umuryango w’Abibumbye n’uw’Ubumwe bwa Afurika (AU) yagerageje gushaka uko ubwicanyi bwahagarara, isaba Leta ya Nkurunziza kwemera umutwe w’ingabo za AU zigera ku bihumbi bitanu zo kubungabunga umutekano w’abaturage ariko iyo leta ibitera ubwatsi.

Perezida Paul Kagame ashimangira ko ikibazo Abarundi bafite ari bo bacyitera aho kumva ko hari ahandi gituruka.

Perezida Nkurunziza yongeye gutorerwa kuyobora igihugu muri Nyakanga 2015. Aya matora ntiyavuzweho rumwe n’abatemeraga ko yiyamamariza manda ya gatatu kandi kuva ubwo, umutekano wabaye muke mu Burundi ndetse abantu barimo n’abasirikare bakuru, bakomeje kwicwa.

Yabitangarije mu ijambo rigufi ryafungura ikiganiro ku ruhare rw’inganda mu iterambere ry’abatuye isi by’umwihariko Afurika cyiswe “ Fourth industrial revolution” mu nama y’ubukungu ku isi (WEF) iteraniye i Kigali, kuri uyu wa Kane tariki 12 Gicurasi 2016.

Perezida Kagame atangaza ko iterambere ry’abaturage rigaragarira mu mahitamo yabo.

Umukuru w’Igihugu yavuze ko Afurika ifite amahirwe menshi yabyazwa umusaruro, byagerwaho habayeho ubufatanye butandukanye.

Yavuze ko bashoramari n’abandi bagomba gufungurirwa imiryango bafatanya n’abanyigihugu kuzamura ubukungu bw’ibihugu bwabo ariko kandi bagomba no kumva n’ibyo bakeneye, amahitamo yabo agahabwa agaciro.

Kenshi na kenshi iterambere ryumvikana mu nyito y’amafaranga, aha Perezida asobanura ko iterambere rirenze amafaranga ahubwo ari ubushake bafite n’ amahirwe bahabwa yo guhitamo icyo bashaka.

Yagize ati “Iterambere rirenze amafaranga, politiki nziza, ahubwo ubushake bw’abaturage, ubuzima babayeho n’amahitamo atandukanye bashora gukora umunsi ku wundi mu ngiro bivuze kugira politiki nziza zibaza abayobozi inshingano zabo, ubumwe…”

U Rwanda rwakiriye inama y’Ihuriro ryiga ku bukungu bw’Isi, kuri iyi nshuro bariga ku bukungu bwa Afurika.

Perezida Kagame yongeyeho ko iterambere ntiryagerwaho hatari umutekano ufatwa nk’inkingi ya mwamba ugomba kubungabunga bikomeye.

Iki kiganiro cyitabiriwe na Dr. Akinwumi Ayodeji Adesina, umuyobozi wa Banki Nyafurika itsura Amajyambere ashimangira ko kubona umuriro w’amashanyarazi ku baturage ari ishingiro ry’iterambere ikaba umuhigo bihaye bazongeramo ingufu mu myaka ine iri imbere.

Nubwo havugwa iterambere icyakora byagaragaye ko abagore n’abakobwa basigaye inyuma. Graca Machel wabaye umufasha wa Nelson Mandela akaba aharanira uburenganzira bw’abagore n’abana asaba ko iryo terambere ritasiga inyuma igitsina gore.

Iyi nama yo ku rwego rwo hejuru ku bukungu bw’isi iteraniye mu Rwanda igeze ku munsi wayo wa kabiri biteganyijwe ko izasozwa tariki 13 Gicurasi 2016.

Umuvugizi wa Polisi y’u Rwanda, ACP Celestin Twahirwa, yabwiye Kigali Today ko AIP Kandabaze yamaze kurasa CIP Mugabo Jean Bosco wayoboraga Sitasiyo ya Busogo ahita apfa nawe yikingirana mu nzu, abapolisi bagerageje kumukuramo abarasaho nabo baramusubiza ahita agwa aho.

ACP Twahirwa yavyze ko iperereza rigikorwa ku cyaba cyateye ubwo bwicanyi, ariko yemeza ko amakuru bamaze kubona kugeza ubu ari uko nta kibazo abo bombi bari basanzwe bafitanye.

Imirambo yombi yahise icyangwa mu buruhukiro bw’Ibitaro bya Ruhengeri. Ubuyobozi bufatanyije n’inzego z’umutekano na bo bakoresha inama abaturage yo kubahumuriza.

Kuri uyu wa gatatu tariki 5 Gicurasi 2016, ubwo yari amaze kugirana ibiganiro na Perezida Paul Kagame muri Village Urugwiro yatangaje ko ubucuti afitanye n’u Rwanda ari bwo ntandaro yo gutera inkunga uburezi mu Rwanda abinyujije mu Ishami ry’Umuryango w’Abibumbye rishinzwe guteza imbere Uburezi bw’Abana(UNICEF).

Perezida Kagame yakira Peter Kramer, Umuyoboziwa Hamburg Marines services company.

Yagize ati “Ubucuti bwihariye mfitanye na Perezida Kagame kuva mu myaka 10 ishize bwampaye umwanya wo kungurana ibitekerezo na we bishingiye ku iterambere. Ni yo mpamvu nshaka gutanga inkunga yanjye mu kubaka uburezi mu Rwanda.”

Uyu muyobozi w’ikigo kijyanye n’iby’amato manini yo mu nyanja, anayobora umuryango witwa Humbarg Society for Promotion of Democracy and International Law ndetse n’Ikigega cyitiriwe Nelson Mandela “Nelson Mandela Foundation”, yashinze ikigega ‘Schools for Africa’ gifasha guteza imbere uburezi mu bihugu 6 by’Afurika harimo n’u Rwanda.

Nk’uko bitangazwa n’Umunyamabanga wa Leta muri Minisiteri y’Uburezi, Olivier Rwamukwaya, ngo amaze gutera inkunga ibikorwa by’uburezi bifite agaciro ka miliyoni 13.5 z’amadolari y’Amerika kuva muri 2008.

Ifoto y’urwibutso.

Yongeraho kandi ko UNICEF ku inkunga ya Peter Kramer, iteganya kubaka amashuri y’incuke ndetse n’ayisumbuye y’icyitegererezo hirya no hino mu Rwanda agera ku 100.

Kuva muri 2008, UNICEF itanga infashanyigisho mu bigo by’amashuri bitandukanye. Kugeza ubu, u Rwanda rumaze kugera ku kigereranyo cya 97% by’abana bari mu mashuri mu myaka 22 gusa nyuma ya Jenoside yakorewe Abatutsi muri 1994.

Kugira ngo ibi bigerweho, hashyizwemo ingufu aho 20% by’ingengo y’imari ya buri mwaka angana hafi na miliyoni 494 z’amadolari kuri miliyari 2.47 z’amadolari k’ingengo yose y’igihugu yashyizwe mu burezi.

Peter Kramer yavuze kandi ko yitegura kongera inkunga mu bikorwa by’uburezi mu Rwanda, ariko ngo bikazaterwa n’ubufatanye hagati ya Leta na UNICEF.

Ikigega “Schools for Africa” cyatangijwe muri 2005, kikaba gitera inkunga uburezi mu bihugu by’u Rwanda, Angola, Zimbabwe, Malawi, Mozambique ndetse n’Afurika y’Epfo.

Kuri gahunda y’uruzinduko rwe, biteganyijwe ko azagera ku mupaka wa Rusumo tariki 06 Mata 2016 aho azafungura umupaka wa Rusumo (ikiraro gishya) uhuriweho n’ibihugu byombi.

Perezida Magufuli kuri uyu wa 6 Mata 2016 azasura u Rwanda.

Inkunga yo kubaka icyo kiraro yatanzwe n’Umuryango Mpuzamahanga w’Ubutwererane w’Abayapani, JICA.

Kandi azifatanya n’Abanyarwanda n’isi yose ku munsi wo gutangiza icyunamo cyo kwibuka ku nshuro ya 22 Jenoside yakorewe Abatutsi, umuhango uzaba tariki 07 Mata 2016.

Perezida Magufuli hamwe na mugenzi we w’u Rwanda, Paul Kagame, ndetse n’abafasha babo bazashyira indabo ku mva ishyinguyemo imibiri y’abazize Jenoside mu Rwibutso rwa Jenoside rwa Gisozi ndetse banacane urumuri rw’icyizere.

Biteganyijwe ko abo bakuru b’igihugu bazakora urugendo rwo kwibuka bakifatanya n’abaturage mu ijoro ryo kwibuka bikazabera kuri Sitade Amahoro i Remera. Mbere yo gusoza uruzinduko rwe azagirana ikiganiro n’abanyamakuru.

Perezida Magufuli yatorewe kuyobora igihugu cya Tanzaniya mu Ukwakira 2015 asimbuye Jakaya Mlisho Kikwete. Kuva yajya ku buyobozi bukuru bw’icyo gihugu, umubano w’ibihugu byombi warushijeho kuba mwiza.

Ubuyobozi bwe bumaze kuzana impinduka zikomeye muri Tanzaniya zirimo kurwanya ruswa n’imikoreshereze mibi y’umutungo wa Leta ndetse no gutangiza umuganda afatiye urugero ku Rwanda.

Uko Guinea Conakry yari yiteguye Perezida Kagame n’ubwuzu bwamwakiranye.

Muri uru ruzinduko rw’akazi rw’iminsi ibiri, rugamije gukomeza umubano w’ibihugu byombi, biteganyijwe ko abakuru b’ibihugu byombi bashyira umukono ku masezerano agera kuri atanu.

Perezida Paul Kagame na mugenzi we Alpha Conde wa Guinea.

Ambasaderi w’u Rwanda muri Guinea-Conakry, Stanislas Kamanzi, atangaza ko mu masezerano ashyirwaho umukono, harimo ajyanye no koroshya urujya n’uruza rw’abaturage b’ibihugu byombi. By’umwihariko, hakazifashishwa sosiyete y’indege y’u Rwanda “RwandAir” .

Perezida kagame yakiranywe ibyishimo byinshi muri Guinea Conakry.

Aba baturage ba Guinea bari bategereje kureba Perezida Kagame.

Ibi byanagarutsweho na Minisitiri wo gutwara abantu n’ibintu ndetse n’itumanaho muri Guinea, Oyé Guilavogui, wemeza ko Sosiyete y’indege y’u Rwanda RwandAir iteganya gufungura ingendo muri icyo gihugu, izoroshya urujya n’uruza rw’abaturage b’ibihugu byombi.

Yagize ati “U Rwanda rwavuguruye ibijyanye n’indege, ubu tugomba kubigiraho byinshi kuva twatangira kureba uko twakongera kubyutsa ikompanyi yacu ya “Air Guinea”. U Rwanda rufite ubunararibonye buzadufasha cyane.”

Perezida Kagame ubwo yari ageze i Conakry, yakiriwe na mugenzi we Alpha Conde.

Andi masezerano ashobora gushyirwaho umukono nk’uko Ambasaderi Kamanzi yabitangaje, ni ajyanye n’imiyoborere myiza, ubuhinzi n’ubukungu bushingiye ku ikoranabuhanga.

Uru rugendo rwa mbere Perezida Kagame akoreye muri Guinea ruzafasha by’umwihariko abaturage b’icyo gihugu bagera kuri miliyoni 1 n’ibihumbi 600 kwerekeza muri Afurika y’Iburasizuba, no mu Rwanda by’umwihariko.

Perezida Kagame, ubwo yari amaze kwakirwa na mugenzi we muri Guinea.

Minisitiri w’Ububanyi n’Amahanga w’u Rwanda, Louise Mushikiwabo, ari kumwe na Perezida Kagame muri uru ruzinduko rw’akazi.

Umwe bakozi bakuru ba Banki yabwiye Kigali Today ko Gilbert Mazimpaka yafashwe ku gicamunsi cyo kuri uyu wa 05 Gashyantare 2016 na Polisi, ku Biro Bikuru bya Banki ya Kigali ubwo yageragezaga kubikuza ayo amafaranga y’umukiriya wa KCB.

Abandi batatu bari kumwe na Mazimpaka, uyu mukozi ntiyabashije kubamenya.

Gilbert Mazimpaka ngo yahimbye sheki ya miliyoni 30.5Frw mu izina ry’umukiriya wa KCB, ayo mafaranga ayohereza ku yindi konti mpimbano muri BK.

Umukozi wa banki utifuje ko amazina ye atangazwa yabisobanuye agira ati “Ku wa Gatatu, uyu mugabo (Mazimpaka) yaje muri KCB afite sheki. Yasabye ko miliyoni 30.5Frw yoherezwa (transfert) ku yindi konti ye iri mu BK.”

Nyiri konti wa KCB akibona ubutumwa yahise abimenyesha KCB nk’umukiriya wabo na yo ibimenyesha BK ayo mafaranga ahita afatirwa.

Mu ma saa saba z’amanywa, ni bwo Mazimpaka yinjiye muri banki ashaka kubikuza ayo mafaranga Polisi ihita imuta muri yombi.

Twashatse kumenya icyo Polisi ivuga kuri iki kibazo, Umuvugizi wa Polisi y’Igihugu mu Mujyi wa Kigali, Spt. Mbabazi Modeste, atubwira ko nta byinshi (details) barakimenyaho.

Nk’uko KCB ibitangaza, ubujura nk’ubu bumaze kuba inshuro zigera kuri eshanu mu mezi arindwi ashize.

Muri 2014, Umunya-Nigeria witwa Seheed Olalejan Adebayo afatanyije n’Umunyarwanda Ruzige Gasana John bashinze sosiyete ya baringa ikora ibijyanye no gutwara abantu, banyanganya miliyoni zigera kuri 130 z’amanyarwanda yoherezwaga n’abantu bava ku mugabane w’Uburayi bazakorera ingendo mu Rwanda.

Mu gitondo cyo kuri uyu wa Kabiri, tariki 26 Mutarama 2016, bamwe mu bagize itsinda ry’uyu mushinga wiswe GAFSP, babanje gusura ibikorwa biterwa inkunga n’umushinga ugamije guteza imbere ubuhinzi ku isi hose no kwihaza ku biribwa bise “Global Agriculture and Food Security Program.”

Umunyamabanga wa Leta muri MINAGRI, Tony Nsnganira, asobanurira iryo tsinda muri Prime Economic Zone.

Ibyo bikorwa birimo uruganda rutunganya amafunguro y’abana ruri kubakwa muri Prime Economic Zone mu Karere ka Gasabo, ku bufatanye bwa Leta y’u Rwanda n’abikorera. Bahise bakomereza urugendo mu Karere ka Rwamagana.

Barasura kandi umushinga wo kuhira imyaka imusozi uzakorerwa kuri hegitare 1.272, mu gihe hegitare 267 ubu zuhirwa, byitezweho umusaruro uhagije uva ku buhinzi mu bihe by’imvura ndetse n’izuba.

Andi matsinda ari gusura imishinga y’ubuhinzi bateye inkunga mu turere twa Nyanza, Rulindo ndetse na Karongi kugira ngo birebere uko yashyizwe mu bikorwa n’icyo yamariye abaturage.

Itsinda rya GAFSP basura uruganda ruzatunganya ibiryo by’abana.

Biteganyijwe ko basura imishinga yo kuhira imyaka iri mu turere 14 mu gihugu cyose. Iyi mishinga yabonye inkunga ingana na miliyoni 147 z’amadolari ya Amerika ahwanye na miliyari 111Frw .

Uyu mushinga uzakorerwa mu bihugu 60 ku isi hose, witezweho kuzagera ku bahinzi bato n’abacirirtse bagera ku miliyoni 10.

Uzatwara akayabo ka miliyari 1.5 y’amadolari ya Amerika azava mu baterankunga batandukanye nk’Ikigega cya Bill Gates, Leta Zunze Ubumwe z’Amerika, Canada, Koreya y’Amajyepfo, u Budage n’u Bwongereza.

Minisitiri w’Uburezi, Dr. Papias Musafiri yabimenyesheje Inama y’Abaminisitiri yateranye kuri uyu wa 16 Ukuboza 2015 muri Village Urugwiro iyobowe na Prezida wa Repubulika, Paul Kagame.

Mu mishinga 22 yatoranyijwe muri Afurika izaterwa inkunga na Banki y’Isi, itandatu ni iyo mu Rwanda ariko ku ikubitiro hazashyirwa mu bikorwa itatu ; nk’uko itangazo by’ibyemezo by’Inama y’Abaminisitiri ribivuga.

Iyo mishinga ni uwa Kaminuza Nkuru ishami ry’Ubumenyi n’Ikoranabuhanga ujyanye n’ikoranabuhanga rya internet (ACE-IOT).

Undi uzahita ukorwa na wo n’uwa Kaminuza Nkuru ishami ry’Ubumenyi n’Ikoranabuhanga uzibanda ku ngufu nk’iterambere rirambye (ACE-ESD) ndetse n’undi w’Ishami ry’Ubukungu n’ubucuruzi ujyanye n’ubumenyi mu ibarurishamibare (ACE- DS).

Indi mishinga yatoranyijwe ariko izashyirwa mu bikorwa nyuma n’ujyanye n’ubwikorezi ndetse n’imicungire y’ibikoresho (ACETraLogi), uw’udushya mu kwigisha imibare n’ubumenyi (ACE-ITLMS) ndetse n’ujyanye no guhuza ubutaka n’imicungire yabwo irambye ((ACE-SALUM).

Mu myaka 20 ishize, u Rwanda rwateye imbere mu burezi ushingiye ku mubare w’abanyeshuri bagannye kaminuza n’amashuri makuru ndetse n’umubare wazo wariyongereye cyane. Imibare y’umwaka wa 2014 itangazwa na Minisiteri y’Uburezi igaragaraza ko kaminuza n’amashuri makuru ari 45 zigagamo abanyeshuri ibihumbi 87 bisaga gato.

Iyi nama kandi yemeje Eng. Maj. Kalisa Claude nk’ Umuyobozi Mukuru mu Kigo cy’Igihugu gishinzwe guteza imbere ingufu ( EUCL) asimbuye kuri uwo mwanya Mbabazi Odette na ho Dr. Mbonye Manasseh agirwa Perezida w’Inama y’Ubutegetsi muri REG.

Mu rwego rwo gukomeza gukemura ikibazo cy’ingufu z’amashanyarazi, inama y’Abaminisitiri yemeje ko igiranye na Sosiyete Hakan Madencilik Ve Elektrik Uretim San. Tic. A.S yerekeye amasezerano yo kubaka Uruganda rutanga ingufu z’amashanyarazi zikomoka kuri Nyiramugengeri zingana na 80 MW no kugurisha ayo mashanyarazi.

Muri iyi nama yiswe “COP21” yatangiye kuri uyu wa mbere tariki 30 Ugushyingo 2015, abakuru b’ibihugu bayitabiriye basabwe gufata ingamba zizarinda isi n’abayituye ingaruka mbi z’imihindagurike y’ikirere.

Minisitiri Mushikiwabo yagiye aherekjwe na Minisitiri w’Umutungo Kamere, Dr. Vincent Biruta.

Minisitiri Minisitiri Mushikiwabo yitabiriye iyi nama aherekejwe na Minisitiri w’Umutungo Kamere n’ibidukikije, Dr. Vincent Biruta.

Minisitiri Biruta yari yatangaje ko muri iyo nama u Rwanda ruzakora ubuvugizi ku mafaranga agera kuri miliyari 100 bitarenze 2020, ibihugu bikomeye byemeye yo gutera inkunga imishinga yo kugabanya ingaruka z’imihindagurikire y’ikirere.

U Rwanda rwateye intambwe mu guhangana n’ingaruka z’imihandagurikire y’ikirere rubungabunga imigezi runatera amashyamba ku misozi.

Kugeza ubu hegitare ibihumbi 49 byamaze guterwaho amashyamba mu gihe muri 2015-2016 biteganyijwe ko hazaterwa hafi hegitare ibihumbi umunani.

Intego u Rwanda rwihaye ni uko 30% by’ubuso bw’igihugu bugomba kuba buteyeho ibiti mbere 2020 none ubu bigeze kuri 29.3%.

Umunyamabanga Mukuru w’Umuryango w’Abibumbye (UN), Ban-Ki-Moon yagaragaje ko ahangayikijwe n’ingaruka ziterwa n’ibyuka bihumanya ikirere.

Mu ijambo rye, Ban-Ki-Moon yavuze ko isi yugarijwe n’izamuka ry’ubushyuhe hatagize igikorwa mu maguru mashya abatuye isi bagira ikibazo gikomeye cy’ibiribwa no kubura amazi bitewe n’ingaruka z’imihindagurikire y’ikirere.

Abahanga mu by’ikirere bagaragaza ko habayeho kwiyongera k’ubushyuhe ku kigero kirenze degre ebyiri za serisiyusi (celius) byagira ingaruka mbi ku batuye isi. Umunyamabanga Mukuru wa UN abiheraho abasaba kugira icyo bakora.

Ati “Ejo hazaza h’abatuye isi hari mu maboko yanyu, intego yacu ni uguharanira impinduka, guhera ubu urugendo (inzibacyuho) ruratangiye….Dukeneye amasezerano ya Paris ko aba ay’isi kandi afatika.”

Ibihugu byateye imbere mu by’inganda nk’u Bushinwa, Leta zunze Ubumwe z’Amerika, u Buhinde, ibihugu by’Ubumwe bw’u Burayi biza ku isonga mu guhumanya ikirere byohereza ibyuka mu kirere, ariko bimwe bigaseta ibirenge mu kubahiriza amasezerano agenga igabanuka ry’ibihumanya ikirere.

Minisitiri w’Ububanyi n’amahanga w’u Bufaransa, Laurent Fabius, ahereye ku ngero zifatika zatewe n’imihindahurikire y’ikirere nk’imyuzure muri Bangadesh yunzemo ati “Ntidutsindirwa hano i Paris ni akababaro, nitugera ku masezerano afatika biratanga icyizere cy’ejo hazaza.”

Muri 2009 i Copenhague, ibihugu bitandukanye byiyemeje kugabanya ubushyushye ho degree ebyiri kugera mu mwaka 2100 no kuganya ibyuka bihumanya ikirere hagati 40% kugeza kuri 70% kugeza muri 2050.