Urukingo rwa COVID-19 rwatangiye kugeragezwa (Ifoto: AP)

Dr Mihigo Richard, umukozi wa OMS ushinzwe inkingo n’ibikorwa byo kurwanya Covid-19 ku mugabane wa Afurika, yabivuze mu kiganiro yagiranye na Kigali Today ku mugoroba w’itariki ya 01 Nyakanga 2020.

Yabivuze nyuma y’uko igerageza rya mbere ry’urukingo rwiswe Ox1Cov-19 ryatangiriye muri Afurika y’Epfo mu cyumweru gishize, bikaba biteganyijwe ko rizakomereza no mu bindi bihugu.

Mu minsi ishize Abanyafurika bamwe barimo n’ibyamamare bamaganiye kure iby’igeragezwa ry’urukingo rwa Coronavirus muri Afurika.

Ni nyuma y’uko umuyobozi w’Ishami ry’Ubuvuzi mu Bitaro bya Cochin i Paris, Prof Jean Paul Mira n’uw’Ubushakashatsi mu Kigo gishinzwe Ubuzima n’Ubushakashatsi mu by’Ubuvuzi mu Bufaransa (Inserm), Prof. Camille Locht, batanze igitekerezo cy’uko urukingo rwa Bacille Calmette-Guérin (BCG) rwakorwagaho ubushakashatsi rwageragerezwa muri Afurika.

Hari mu kiganiro bagiriye kuri Televiziyo ya LCI yo mu Bufaransa, ariko hahise havuka impaka ndetse bamwe mu Banyafurika bamaganira kure abo bashakashatsi b’Abafaransa.

Dr Richard Mihigo

Dr Mihigo avuga ko kuri iyi nshuro nta mpungenge abantu bakwiye kugira ku rukingo ruri kugeragezwa kuko rwizewe.

Ati “Amakuru [y’abamagana inkingo] yarakwirakwiriye cyane ku mbuga nkoranyambaga abahanga mu bya Siyansi b’Abafaransa bamaze kubivuga. Uretse igerageza ryatangiye muri Afurika y’Epfo, nta rindi gerageza ryigeze rikorwa muri Afurika. Icyo nshaka kubwira abantu ni uko iyo igerageza rikozwe hakurikizwa amategeko akomeye cyane ku buryo ubuzima bw’abaturage bushyirwa imbere.”

Yongeraho ko “Icyo ari ikintu OMS ikomeyeho cyane mu gukorana n’ibihugu bitegura izo nkingo ku buryo ubuzima bw’abaturage bushyirwa imbere, ku buryo nta mpamvu yo kugira ubwoba bw’urukingo.”

OMS ivuga iki kuri Covid Organics, umuti wa Madagascar?

Dr Mihigo avuga ko ubuvuzi gakondo bwemerwa kandi bugashyigikirwa na OMS, kuko hagaragaye indwara nyinshi zishobora kuvurwa hakoreshejwe ubuvuzi gakondo, hakaba “hari n’imiti ya gakondo yageragejwe neza kandi izwiho kugira ubuziranenge ikaba ishobora gukora neza” nk’uko Dr Mihigo abivuga.

Umuti unyobwa Madagascar yashyize ahagaragara witwa Covid Organics uba uri mu macupa muri ubu buryo

Dr Mihigo Richard avuga ko umuti wa Covid Organics wavumbuwe na Madagascar bigoye guhita wemezwa nk’umuti ushobora kuvura Covid-19. Icyakora ngo OMS iri gukorana n’iki gihugu kugira ngo hakorwe ubushakashatsi bwimbitse kuri uwo muti mbere y’uko wemezwa.

Kugeza ubu ku isi yose hari inkingo zigera ku 130 ziri gukorwaho ubushakashatsi, 17 muri zo zikaba ari zo zatangiye kugeragezwa mu bihugu byinshi byo mu Burayi, u Bushinwa na Leta zunze Ubumwe za Amerika.

Igerageza rya mbere ryatangiye ku mugabane wa Afurika mu gihugu cya Afurika y’Epfo ngo “riratanga icyizere ko urugendo rwo gushakisha urukingo ruri kugenda neza”. Gusa nanone Dr Mihigo yibutsa ko kubona urukingo bifata igihe kirekire ku buryo bigoye kuvuga igihe urukingo rushobora kubonekera.

Gusa ngo ibipimo bya mbere biragaragaza ko urwo rukingo rushobora gukora rukanafasha abantu.

Hari n’ibindi bihugu muri Afurika byiteguye gutangiza igeragezwa ry’urukingo kugira ngo haboneke ibihugu byinshi inkingo zageragerezwamo ku buryo umunsi urukingo ruzaboneka rushobora kugirira Abanyafurika akamaro.

Dr Dre n’umugore we Nicole Young bari mu nzira zo gutandukana

Nicole Young yatanze inyandiko zisaba gatanya ku wa mbere tariki 29 Kamena 2020, avuga ko bagiranye ibibazo bidashobora gutuma bakomeza kubana nk’umugabo n’umugore.

Dr Dre n’umugore we baherukaga kugaragara mu ruhame bari kumwe mu kwezi kwa kabiri kwa 2020 mu gitaramo cyo kumurika imideri cyitwa Tom Ford Fashion Show, ariko icyo gihe nabwo byagaragaraga ko batameranye neza kuko nta rukundo bagaragarizanyaga mu ruhame nk’uko byahoze mu myaka yashize.

Mu kwezi kwa Gicurasi 1996 nibwo basezeranye, nyuma y’amezi menshi bari mu rukundo, ubu bakaba bafitanye abana babiri bakuru, umuhungu witwa Truice w’imyaka 23 n’umukobwa w’imyaka 19 witwa Truly.

Hari amakuru avuga ko Dr Dre n’umugore we mbere y’uko babana, batigeze bagirana isezerano rizwi nka “prenuptial agreement” rigaragaza ingano y’umutungo buri wese yafata ku mitungo ya mugenzi we igihe baba basabye gatanya cyangwa umwe muri bo apfuye.

Ibi bivuze ko Dr Dre adafite ububasha bwo kugena uburyo imitungo ye izagabanywa ngo havemo iyegurirwa umugore niyemererwa gatanya.

Uretse abana babiri yabyaranye n’umugore we uri gusaba gatanya, Dr Dre yabyaye abandi bana bane, abakobwa babiri (Tyra Young na La Tanya Danielle Young) ndetse n’abahungu babiri (Marcel na Curtis) yabyaranye n’abandi bagore yakundanye na bo.

Mu mwaka wa 2019, Ikinyamakuru Forbes Magazine cyari cyatangaje ko Dr Dre abarirwa miliyoni 800 z’amadolari, ku buryo yari ku mwanya wa kabiri ku rutonde rw’abahanzi b’injyana ya Hip-hop bakize cyane.

Dr Dre yatunganyije imiziki y’abahanzi bakomeye barimo 2Pac, Snoop Dogg, Eminem, 50 cent, The Game na Kendrick Lamar.

Mu nama ya Komite Nyobozi y’uwo muryango yateranye ku wa Gatanu tariki 26 Kamena 2020 i Rusororo ku cyicaro gikuru cy’umuryango, Umukuru w’Igihugu yavuze ko ibi buri gihe biganirwaho ahantu henshi abantu bahurira, haba mu mwiherero, mu mushyikirano, mu nama z’umuryango FPR Inkotanyi zisanzwe no mu zindi nzego za Leta, ku buryo abantu bakwiye kuba bumva ko bishoboka kugera ku cyo bashaka kandi bakakigeraho mu buryo bwa nyabwo.

Yatanze urugero rw’ibihugu byagiye bigera ku byo bishaka bitewe n’intego byagiye byishyiriraho, yibutsa by’umwihariko abakiri bato ko kugera ku byo umuntu ashaka bisaba kwiha intego, kandi umuntu akuzuza inshingano ze atanyuze mu nzira z’ubusamo.

Ati “Abagera ku byo bashaka ni abuzuza ibyo bagomba gukora mu byo baba barahisemo gukora, mu nshingano baba barihaye. Ni abafite ikinyabupfura, ni abakora ibintu uko bikwiriye kuba bikorwa, ni abafata inshingano utabikoze uko byari bikwiye kuba bikorwa hakagira ubimubaza, bakagenda bapima intambwe batera bashakisha n’uburyo bwabashoboza no kugera ku bindi”.

Yunzemo ati “Niko bimera, nta nzira z’ubusamo, nta nzira zindi wanyuramo ugenda uhunga ibikomeye ngo ntuhangane na byo ugahora ushaka ibyoroshye ngo hari inzira yoroshye abantu banyuramo bakagera ku byo bashaka. Ntayo ibaho, n’iyo ibayeho ibaho rimwe n’ibyavuyemo ntibiramba”

Perezida Kagame yavuze ko abakiri bato (abari munsi y’imyaka 45) bakwiye kwiga hakiri kare gukosora amakosa yakozwe n’abababanjirije kuko bidakozwe igihugu cyaba gifite ibyago mu gihe kiri imbere.

Ati “Nizere ko umunsi ku wundi, icyumweru ku kindi, ukwezi, umwaka ku wundi hari icyo mwaba mwiga cyatuma murushaho gutanga umusanzu ku buzima bwiza bw’igihugu kiri imbere kurusha abababanjirije uko byagenze cyangwa se kurusha uko bimeze ubu, ibintu bikaba byarushaho kwihuta uko bikwiye”

Yavuze ko kubiganiraho bidahagije gusa, ahubwo bikwiye no kugaragara mu bikorwa ndetse n’ibyavuye muri ibyo bikorwa ku buryo hagaragara intambwe igihugu gitera.

Yabivuze mu ijambo yagejeje ku bitabiriye umuhango wo guherekeza Pierre Nkurunziza witabye Imana mu byumweru bibiri bishize.

Ni umuhango wabereye muri sitade Ingoma y’i Gitega, ukaba witabiriwe n’abantu babarirwa mu bihumbi biganjemo abambaye imyenda yera.

Perezida Ndayishimiye yavuze ko “we n’Abarundi bazakomeza gukurikiza umurage wo gukunda igihugu basigiwe na Perezida Nkurunziza, nk’uko na we yabikoze agera ikirenge mu cy’abamubanjirije”

Yagize ati “Ntituzagutererana, tuzakomeza kugera ikirenge mu cyawe nk’uko nawe wageze ikirenge mu cy’abatuboneye izuba nka Ntare Rushatsi, Mwezi Gisabo, Rwagasore, Ndadaye, n’izindi mfura z’u Burundi”.

Umurambo wa Nkurunziza wavanywe mu bitaro urinzwe cyane

Denise Nkurunziza, umufasha wa Perezida Nkurunziza yavuze ko umugabo we aherekejwe n’imirimo myiza yakoze. Denise Nkurunziza yasubiyemo amagambo yavuzwe na Nkurunziza ubwe, avuga ko “ikibi atari ugupfa ahubwo ari ugupfira igihugu nabi, umuryango ukawupfira nabi".

Yagize ati “Nimureke dushime Imana kuko agiye atigeze aduhemukira kandi ntiyahemukiye n’igihugu, iyo aba yarahemutse tuba dufite ipfunwe ariko turi hano tudafite ipfunwe kuko arangije (urugendo rwe) amahoro"

Yashimangiye ko Perezida Nkurunziza yakoze ibikorwa byinshi bimuherekeje ku buryo yanagize urupfu rw’amahoro.

Uretse Abarundi babarirwa mu bihumbi bitabiriye umuhango wo gusezera kuri Pierre Nkurunziza, kumusezera byanitabiriwe na Minisitiri w’intebe wa Tanzania, Kassim Majaliwa ndetse na Madamu wa Perezida wa Zambia.

Denise Nkurunziza yashimangiye ko Pierre Nkurunziza aherekejwe n’imirimo myiza yakoze

Minisitiri w’Intebe wa Tanzania yakomoje ku bikorwa byakozwe na Perezida Nkurunziza avuga ko muri byo harimo kubanisha u Burundi na Tanzania, anavuga ko bibabaje kuba agiye atagejeje u Burundi mu Muryango w’Ubukungu w’Ibihugu bya Afurika y’Amajyepfo (SADC) kandi yari yarabisabye.

Yijeje Perezida Ndayishimiye ko Tanzania izamufasha kugira ngo u Burundi bwemerwe muri uwo muryango.

Nyuma y’imihango yo gusezera bwa nyuma Pierre Nkurunziza, umurambo we urashyingurwa mu irimbi ryihariye rimaze iminsi mike n’ubu rikaba ricyubakwa i Gitega.

Kumusezeraho byitabiriwe n’abantu babarirwa mu bihumbi

Ibihugu by’u Rwanda, Kenya, Tanzania na Uganda byari byifatanyije n’u Burundi mu kababaro byururutsa amabendera yabyo kugeza muri kimwe cya kabiri, akaza kongera kuzamurwa Perezida Nkurunziza amaze gushyingurwa.

Abana bavukanye Coronavirus bari kwitabwaho aho bashyizwe mu kato

Hari abana bake bagiye bavuka bakandura Coronavirus, ariko aho byagiye biba ngo bayanduraga nyuma yo kuvuka, binyuranye n’uko byagenze kuri abo bana batatu b’impanga bayivukanye muri Mexique.

Umunyamabanga ushinzwe ubuzima muri Leta ya San Luis Potosí aho abo bana bavukiye, Mónica Liliana Rangel Martínez, yavuze ko "Byaba ari ibintu bidashoboka kuvuga ko abo bana banduye ubwo barimo bavuka"

Impuguke mu by’ubuzima ziri kugenzura niba iyi ndwara abo bana barayanduriye mu ngobyi y’umubyeyi wabo ubwo yari akibatwite.

Ababyeyi babo ubu bari gupimwa coronavirus, abakuriye urwego rw’ubuvuzi bakavuga ko bashobora kuba bari bamaze igihe baranduye ariko nta bimenyetso bagaragaza.

Babiri muri abo bana (umuhungu umwe n’umukobwa umwe), ngo barimo koroherwa aho bari gukurikiranwa n’abaganga mu bitaro byo muri Leta ya San Luis Potosí, ariko undi mwana w’umuhungu we ngo ari kuvurwa indwara yo mu myanya y’ubuhumekero.

Umuvugizi w’urwego rw’ubuvuzi muri iyo Leta yatangaje ko bakiri kugenzura ngo hamenyekane impamvu abo bana bavukanye Coronavirus, kuko “nta handi hazwi ku isi byari byarigeze bigaragara”

Kuva umuntu wa mbere wanduye coronavirus yagaragara muri Mexique tariki ya 28 Gashyantare 2020, harabarurwa abayanduye basaga 191,000.

Imibare ya Kaminuza ya Johns Hopkins yo muri Amerika igaragaza ko abarenga 23,000 bamaze kwicwa n’icyo cyorezo, naho abarenga 143,000 bakaba ari bo bamaze kugikira.

Uru rukingo ruri mu igerageza, abahanga barwise Ox1Cov-19, bakaba bari kureba niba rushobora gukingira umubiri w’umuntu Covid-19, abantu ba mbere bakazaruterwa muri iki cyumweru.

Muri Afurika y’Epfo abantu 80,000 bamaze kwandura iki cyorezo, kikaba kimaze guhitana abagera ku 1,674.

Profeseri Shabir Madhi w’umuhanga mu by’inkingo muri kaminuza ya Wits, ni we uyoboye igerageza ry’uru rukingo muri Afurika y’Epfo, ubushakashatsi bafatanyijemo na kaminuza ya Oxford yo mu Bwongereza hamwe na Oxford Jenner Institute yarukoze.

Avuga ko mu cyumweru gishize aribwo batangiye gusuzuma abo bazakoreraho igerageza, akavuga ko aba mbere baterwa urwo rukingo muri iki cyumweru.

Abagiye gukora igerageza ry’urwo rukingo bavuga ko rwabanje kugenzurwa no kwemezwa n’ikigo cya Leta ya Afurika y’Epfo gishinzwe kwemeza ibikoreshwa mu gihugu.

Mu Bwongereza ngo rumaze guterwa abantu bagera mu 4000, rukaba ruri no kugeragezwa muri Brazil ndetse hakaba hanateganywa irindi gerageza ryagutse muri Leta zunze ubumwe za Amerika, aho ruzageragerezwa ku bantu 30,0000

Abashakashatsi bakoze uru rukingo bavuga ko isuzuma ryakozwe muri laboratoire rigaragaza ko bimwe mu birugize bishobora kwica iyi virusi, bakavuga ko bizeye ko nirugera mu mubiri w’umuntu ruzabasha kuwuha ubudahangarwa ku buryo virusi ya SARS-CoV-2 itera indwara ya Covid-19 itawuhangara.

Abari gukora iri gerageza kandi bavuga ko izo nkingo zigaragaza ko nta ngaruka zigira, n’ubwo zishobora gutera guhinda umuriro, kuribwa umutwe no kubabara akaboko by’igihe gito.

Mu kwezi gushize, aba bashakashatsi basabye leta ya Kenya ko uru rukingo rugeragezwa ku bantu 400, inzego zibishinzwe muri Kenya zikaba zitaremeza ko igeragezwa ritangira.

Kugeza ubu mu bice bitandukanye by’isi hari gukorwa inkingo z’ubwoko busaga 100 za Covid-19.

Sheikh Hitimana Salim

Sheikh Hitimana abitangaje mu gihe ubwami bwa Arabia Saoudite bwafashe icyemezo cy’uko umutambagiro mutagatifu muri uyu mwaka wa 2020 uzitabirwa n’abantu bake kuri ubu bari muri Arabia Saoudite, Abayisilamu bazaba baturutse mu mahanga bakaba batazemererwa kujya mu mutambagiro.

Mufti w’u Rwanda ati “Ntabwo ari ubwa mbere gusubika ibikorwa by’umutambagiro bibayeho, amateka atugaragariza ko bimaze gusubikwa inshuro zirenga 40 kuva isi yaremwa bitewe n’impamvu zitandukanye nk’indwara z’ibyorezo zagiye zigaragara mu bihe byashize, intambara zaranze kariya karere aho wasangaga ziteza ibibazo by’imyiryane y’imiryango, hagati y’amoko, hagati y’ibihugu, hari igihe umuntu ugiye i Macca yabaga adatekanye kubera kugaragaramo abambuzi n’ibisambo, hari ibibazo by’umutekano mukeya icyo gihe ntabwo higeze hakorwa umutambagiro mutagatifu.”

Abanyamahanga babujijwe kujya mu mutambagiro mutagatifu mu gihe mu Rwanda hari Abayisilamu bagera kuri 20 bari bamaze kugaragaza ko bafite ubushake bwo kuzajya mu mutambagiro muri iyi mpeshyi.

Umutambagiro mutagatifu ni igikorwa cyatangijwe na Abraham afatanyije n’umuhungu we Ismail. Mufti w’u Rwanda avuga ko Intumwa y’Imana Muhamad ari we waje gutangiza ku mugaragaro icyo gikorwa mu mwaka wa 9 wa Hijiri (ugendeye ku ndangaminsi y’Abayisilamu) umutambagiro mutagatifu ukaba ukorerwa i Macca mu ngoro yubatswe na Abraham n’umuhungu we Ismail.

Mufti w’u Rwanda yasabye Abayisilamu bo mu Rwanda kudacika intege cyangwa ngo bagire agahinda kuko igikorwa cy’umwemeramana iyo agitekereje hakavuka izindi mbogamizi Imana itabura kumushima. Yabasabye kandi gukomeza kwirinda icyorezo cya COVID-19 kugira ngo kirangire vuba ibikorwa by’Abayisilamu birimo n’umutambagiro mutagatifu bizasubukurwe vuba ku Bayisilamu bose.

Uyu mutambagiro usanzwe witabirwa n’abantu benshi baturutse hirya no hino ku isi (Ifoto: Reuters)

Ni icyemezo Arabia Saoudite yafashe mu rwego rwo kwirinda coronavirus, ku buryo umubare muto w’abantu baba muri icyo gihugu ari wo uzemererwa kuwujyamo nk’uko ubwami bw’icyo gihugu bwabitangaje.

Byari byitezwe ko abantu bagera kuri miliyoni ebyiri bashobora kujya i Macca n’i Medina mu mpeshyi y’uyu mwaka mu mutambagiro mutagatifu uhuza Abayisilamu.

Mu bihe bisanzwe, uyu mutambagiro ni kimwe mu bintu bikomeye ku ngengabihe y’umwaka y’abayisilamu, ariko abantu bake bo mu bindi bihugu baba muri Arabia Saoudite ni bo bazemererwa kuwukora.

Ubutegetsi bwa Arabia Saoudite bwatangaje ko kubuza abanyamahanga kujya i Macca n’i Medina ari bwo buryo bwonyine bazashobora kubahiriza amabwiriza abuza abantu kwegerana kugira ngo babarinde kwandura coronavirus.

Arabia Saoudite imaze kugira abantu 161,005 banduye coronavirus ikaba imaze kwica 1,307 ariko mu mpera z’icyumweru gishize bakuyeho amategeko asaba abantu kuguma mu ngo zabo.

Umuyisilamu wese ubishoboye ategetswe gukora umutambagiro i Macca nibura inshuro imwe mu buzima bwe, nk’imwe mu nkingi eshanu z’idini ya Islam.

Abajya muri uwo mutambagiro baterana bazengurutse Kaaba (ikintu cyubatse mu musigiti munini) bagasengera hamwe, bongera kwiyibutsa impamvu itumye bari ku isi.

Dr Sabin Nsanzimana

Umwe ngo yagaragaye mu Karere ka Kicukiro, undi agaragara mu ka Nyarugenge, ariko ngo bashobora no kuba baturuka hamwe ariko bakorera ku maseta atandukanye ku buryo biza kugaragazwa n’igikorwa cy’igenzura cyitwa ‘clinical investigation’ cyatangiye cyo kumenya aho bakuye ubwandu n’imiryango yabo igapimwa, nk’uko Dr. Nsanzimana yabivuze.

Igikorwa cyo gushakisha abantu bose bahuye n’abo bamotari kugira ngo bapimwe cyatangiye.

Umuyobozi wa RBC avuga ko abamotari n’abatega moto bakwiye kubahiriza amabwiriza bashyiriweho kuko umumotari ashobora kwanduza umugenzi cyangwa umugenzi akaba ari we wanduza umumotari ku buryo buri wese akwiye gukaza ingamba zo kwirinda.

Uretse kwambara agatambaro mu mutwe mbere yo kwambara ingofero irinda impanuka (casque) ndetse no gukaraba umuti wica udukoko, umuyobozi wa RBC asaba abatega za moto kujya buri gihe bishyura hifashishijwe ikoranabuhanga kuko bifasha mu kumenya umuntu wese wageze kuri moto igihe havutse ikibazo.

Ati “Uburyo buhari bwo kwishyura hifashishijwe ikoranabuhanga ni bumwe mu budufasha nk’abaganga kugira ngo tumenye umuntu wese wakandagiye kuri moto. Hari abatabyubahiriza bazi ko biborohereza ariko ugasanga ahubwo bibateye ikibazo. Uwakandagiye kuri moto turaza kumushaka dushingiye ku kureba uwayigiyeho, uburyo yishyuye n’aho ari. Izo ngamba Leta iba yarashyizeho ziba ari ukugira ngo nihavuka ikibazo nk’iki tuzamenye uko tugishakira igisubizo.”

Umuyobozi wa RBC avuga ko ikibazo cyagaragaye kuri abo bamotari babiri kidasobanuye ko abamotari ari bo banduza abagenzi. Gusa abasaba kwitwararika ku ngamba zashyizweho by’umwihariko bakaba bafite umuti wo gukaraba intoki kandi wizewe.

Ati “Wa muti ushyirwa kuri moto ugomba kuba wizewe. Hari abo twumvise bashyiramo amazi bakawufungura cyane nk’aho ari uwo kwerekana. Si uwo kwerekana ni uwo kukurinda.”

Imwe muri izo ngamba ni ugufunga amashuri mu gihugu hose, bikavugwa ko kuyafunga byahaye icyuho abangiza abana bakabatera inda kuko kubabona byoroshye mu gihe amashuri atarafungurwa.

Imibare yatangajwe na Minisiteri y’ubuzima igaragaza ko mu ntara imwe gusa abana b’abakobwa babarirwa mu 4000 batewe inda kuva umwaka wa 2020 utangiye.

Amashuri muri iki gihugu yafunzwe hagati mu kwezi kwa gatatu, mu rwego rwo kubahiriza ingamba guverinoma ya Kenya yari imaze gufata mu rwego rwo kwirinda ikwirakwira rya Covid19.

Inzego z’ubuyobozi muri Kenya zihangayikishijwe ni uko ku bana benshi, ababateye inda ari abo bafitanye amasano y hafi cyangwa abitwa inshuti z’imiryango yabo.

Ubuyobozi kandi buravuga ko imibare y’abana batewe inda ishobora kuba iri hejuru cyane, kuko kenshi abana baterwa inda ariko ntibivugwe.

Abayobozi b’intara 47 zigize Kenya basabye guverinoma y’iki gihugu gukora iperereza ryimbitse kuri iki kibazo cy’ubwiyongere bw’inda ziterwa abana bakiri bato.

Kenya iri mu bihugu biza ku imbere ku rwego mpuzamahanga mu kugira abana benshi baterwa inda bakiri bato, hakaba havuka abana basaga 82 ku nda 1000 ziba zatewe abana bakiri bato.

Ikoranabuhanga ni bumwe mu buryo bwifashishwa n’abatekamutwe

Mu kiganiro yahaye Televiziyo Rwanda, Shema Akilimali yavuze ko batekereza ko byatewe n’uko abantu bari batangiye gukoresha ikoranabuhanga cyane, nk’imwe mu ngamba zari zashyiriweho kurwanya ikwirakwira rya Coronavirus.

Yagize ati “Kuva mu kwezi kwa gatatu twakiriye abantu baje gutanga ibirego 80 bibwe kuri Mobile Money, tukaba twarafashe abantu 46 bari kuburanishwa, hakaba haribwe miliyoni 12 z’amafaranga y’u Rwanda. Icyo kibazo cyagiye kizamuka cyane kurusha ibindi bihe byose twagiye duhura na byo.”

Hari amayeri menshi abakora ubujura hifashishijwe ikoranabuhanga bakoresha biba amafaranga y’abantu kuri Mobile Money nk’uko Eugene Kanamugire ushinzwe kurwanya uburiganya muri MTN abivuga.

Muri ayo mayeri ngo harimo kuba umuntu yohererezwa ubutumwa kuri telefoni bugaragaza ko yoherejwe amafaranga kuri Mobile Money, nyuma uwabwohereje akamubwira ko yohereje amafaranga yibeshye asaba ko bakongera kuyamwohereza.

Abantu benshi bagiye bagwa muri uwo mutego, babona ubutumwa bagahita bohereza ayo mafaranga batabanje kureba kuri konti zabo ko ayo mafaranga yagezeho koko, bikarangira bohereje amafaranga yabo ku bajura.

Hari n’abiba konti za WhatsApp z’abantu bifashishije ikoranabuhanga bagatangira kuzikoresha basaba amafaranga mu izina rya nyiri iyo konti ya WhatsApp.

Kanamugire ati “Abantu babatwara za WhatsApp umuntu (wibye WhatsApp) agatangira kohereza ubutumwa ku nshuti z’umuntu wibwe WhatsApp abasaba amafaranga ati nagize ikibazo umwana wanjye yakoze impanuka nimva mu nama ndayagusubiza, umuntu akaba arayohereje nyuma akaza gusanga uwo yoherereje amafaranga ari umujura.”

Akomeza avuga ko hari abacuruza serivisi z’ibigo by’itumanaho bazwi ku izina ry’aba “Agent” bafatanya n’abajura mu kwiba amafaranga kuri Mobile Money, aho umu Agent yohereza umuntu ubutumwa bwo kubikuza amafaranga akamuhamagara amusaba gushyiramo umubare w’ibanga kugira ngo arebe ko amafaranga ye atagiye kuko ikoranabuhanga rya MTN ryagize ikibazo.

Kanamugire asaba abakoresha serivisi ya Mobile Money kwirinda kugira uwo babwira umubare wabo w’ibanga cyangwa kuwandika muri telefoni igihe babonye ubutumwa bubikuza amafaranga atari bo bayabikuje, avuga ko nta mukozi wa MTN ushobora guhamagara umukiriya amusaba kwandika umubare we w’ibanga ku butumwa buje muri telefoni ye atazi aho buturutse.

Umuyobozi ushinzwe kurwanya ibyaha bikorwa hifashishijwe ikoranabuhanga muri RIB asaba abaturarwanda bose kwihutira kumenyesha RIB igihe batekewe umutwe kuko byoroha kubafasha kugaruza amafaranga yabo iyo bahise babivuga, ariko bikaba bishobora kugorana iyo batinze kubivuga.

Ni igitabo gishya cya John Bolton wahoze ari umujyanama mu by’umutekano wa Perezida Donald Trump, kivuga ko Trump yasabye Perezida w’u Bushinwa Xi Jinping kumufasha ngo azatsinde amatora ateganyijwe mu mpera z’uyu mwaka, ubutegetsi bwa Trump bukaba buri kugitambamira ngo kitagera mu nzu z’amasomero y’ibitabo.

Icyo gitabo cyiswe ’The Room Where It Happened’, cyangwa, ’Icyumba Byabereyemo’ biteganyijwe ko kizatangira kugurishwa tariki 23 z’uku kwezi kwa Kamena, ariko mu ijoro ryo ku wa gatatu Minisiteri y’Ubutabera ya Amerika yasohoye ibwiriza ryihutirwa ry’umucamanza rihagarika gusohora iki gitabo.

Icyo gitabo kigaragaza ko mu nama ya G20 yabaye mu kwezi kwa gatandatu k’umwaka ushize, Perezida Trump na Xi JinPing w’u Bushinwa bagiranye ibiganiro, uw’u Bushinwa yinubiraga ko hari Abanyamerika banenga u Bushinwa bavuga ko hari intambara y’ubutita.

Gusa ngo mu buryo butangaje Trump yahinduye ikiganiro akiganisha ku matora ya 2020 ashima ubushobozi bw’ubukungu bw’u Bushinwa, anasaba Xi ko yamufasha agatsinda ayo matora.

Trump yasabye Xi ko u Bushinwa bwafasha mu kugura umusaruro wa soya n’ingano w’abahinzi bo muri Amerika, Xi Jinping amaze kubyemera Trump amwita umutegetsi ukomeye mu mateka y’u Bushinwa.

Abahinzi bagira uruhare runini mu matora kandi bashyigikiye ku bwinshi Trump mu matora ya 2016.

Trump yahamagaye mu kiganiro cya Fox News avuga ko Bolton wanditse icyo gitabo yishe amategeko kandi ari kuvuga amakuru y’ibanga rikomeye ataherewe uburenganzira.

Bolton yagiye kuba umujyanama wa Trump mu kwa kane 2018 ahava mu kwa cyenda 2019 avuga ko yahisemo gusezera, ariko Perezida Trump we yavuze ko yamwirukanye kuko hari ibyo batumvikanyeho.

Mu bindi bivugwa muri icyo gitabo ni uko Perezida Trump atari azi ko Ubwongereza bufite intwaro za kirimbuzi. Iby’izo ntwaro byagarutsweho n’umukozi wa Leta y’Ubwongereza mu nama yamuhuje na Theresa May wari minisitiri w’intebe, mu 2018.

Muri iyo nama Trump ngo yaratangaye agaragaza ko atari azi ko u Bwongereza bufite intwaro kirimbuzi kandi ngo ntibyari ugutebya. Kuri ibyo hiyongeraho kuba hari ubwo Trump yabajije John Kelly wari ukuriye ibiro bye niba Finland iri mu Burusiya.

Icyo gitabo cy’amapaji 577 kinagaragaza ko mu mwaka ushize wa 2019 mu nama yabereye i New Jersey, Trump yavuze ko abanyamakuru ba bimwe mu bitangazamakuru akunze kuvuga ko bitangaza amakuru y’ibinyoma bagomba kuvuga uwabahaye amakuru cyangwa bagafungwa, akaba yaranavuze ko bakwiye kwicwa.

Umudemocrate Joe Biden uzahatana na Trump mu matora ya 2020 yatangaje ko niba ibivugwa muri icyo gitabo ari ukuri Donald Trump yarenze ku nshingano afite ku baturage ba Amerika.

Mbere y’uko arahira habanje kuba isengesho ryo kumusabira.

Musenyeri wa Diyosezi ya Gitega Simon Ntamwana yamusabye gukora ibishoboka byose kugira ngo acyure impunzi, kandi yongere afungure amarembo kugira ngo hongere habeho imigenderanire n’ubuhahirane hagati y’u Burundi n’ibihugu by’amahanga.

Yasubiyemo indahiro iteganywa n’ingingo ya 107 y’itegeko nshinga ry’u Burundi, avuga ko atazatezuka ku masezerano y’ubumwe bw’Abarundi, ku itegeko nshinga rya Repubulika y’u Burundi n’andi mategeko, kandi ko azaharanira ineza y’Abarundi n’u Burundi akubahiriza ubumwe bw’Abarundi, amahoro n’ubutabera kuri bose.

Evariste Ndayishimiye yarahiriye kuyobora u Burundi

Yanarahiriye kurwanya ibitekerezo by’ivanguramoko no guharanira uburenganzira bwa muntu.

Abarundi babarirwa mu bihumbi bambaye amashati y’ibitenge bitabiriye umuhango w’irahira rye.

Abaturage bambaye amashati y’ibitenge bitabiriye umuhango w’irahira

Nta bakuru b’ibihugu by’amahanga cyangwa abandi bayobozi bavuye hanze y’u Burundi benshi bitabiriye uwo muhango kubera icyorezo cya Covid-19, icyakora byitabiriwe n’abayobozi batandukanye bahagarariye ibihugu byabo mu Burundi.

Mu babyitabiriye bavuye hanze y’u Burundi harimo visi Perezida wa Tanzania Samia Suluhu na Jakaya Mrisho Kikwete wahoze ari Perezida wa Tanzania. Hari kandi abaminisitiri b’ububanyi n’amahanga b’ibihugu bya Guinée Equatoriale na Congo Brazaville ndetse n’intumwa ya Perezida wa Misiri.

Amafoto yafashwe muri ibyo birori agaragaza abantu bamwe batambaye udupfukamunwa bicaye mu myanya y’icyubahiro, mu gihe hari abakomeje kwikanga icyorezo cya Covid-19 bakeka ko bashobora kwandurira muri ibyo birori.

Umuhango w’irahira rye witabiriwe na Visi Perezida wa Tanzania Samia Suluhu (wicaye imbere hagati) na Jakaya Kikwete (wambaye karuvati) wahoze ayobora Tanzania

Stade yabereyemo irahira rya Perezida Gen. Ndayishimiye

Amafoto: Ntare House

Aha hari tariki ya 05 Kanama 2019 ubwo mu gihugu hose hatangizwaga icyumweru cy’irangamimerere kigamije gushishikariza abaturage kwandikisha irangamimerere yabo ku gihe. Icyo gihe ku rwego rw’igihugu iki Cyumweru cyatangirijwe mu Karere ka Kirehe, mu murenge wa Kigarama, Akagari Ka Kiremera (Ifoto: MINALOC)

Ibi bivuze ko hari serivisi z’irangamimerere zatangirwaga ku rwego rw’umurenge zigiye kujya zitangirwa no ku bitaro n’ibigo nderabuzima, harimo kwandikisha abavutse no kwandikisha abapfuye.

Hemejwe kandi iteka rya Perezida rigena inshingano z’umunyamabanga nshingwabikorwa w’akagari, akaba yahawe ubushobozi bwo kwandika abavukiye n’abapfiriye ahandi hantu hatari mu bitaro n’ibigo nderabuzima.

Mu kubandika ngo azajya ashingira ku makuru yahawe n’umuyobozi w’umudugudu kandi bigakorwa ku bantu bari bafite irangamimerere rizwi.

Mbere y’uko iteka rya Minisitiri ryemezwa, Josephine Mukesha uyobora ikigo cy’igihugu gishinzwe indangamuntu yari yabwiye The New Times ko bahuguye abantu babiri muri buri bitaro n’ibigo nderabuzima.

Muri Tanzania amashuri ashobora gufungura mu mpera z’uku kwezi (Ifoto: NMG)

Yanatanze ibwirizwa rivuga ko ibikorwa byose, iby’imibereho y’abaturage n’iby’ubukungu byari byarahagaritswe kubera ingamba zo gukumira Coronavirus bisubukurwa.

Perezida Magufuli yabitangaje kuri uyu wa kabiri mu muhango wo gusubika ibikorwa by’inteko ishinga amategeko mu gihe hategerejwe amatora rusange mu kwezi k’Ukwakira.

Yongeye gushimangira amagambo ye avuga ko igihugu cye cyarinzwe COVID-19 n’Imana, aya magambo akaba yarateje impaka mu minsi ishize.

Ku wa mbere Minisitiri w’intebe wa Tanzania Kassim Majaliwa yatangaje ko mu gihugu cye hagaragaye abarwayi 66 ba Coronavirus mu ntara 10 kuri 26 zigize igihugu.

Abanyeshuri bigaga mu mwaka wa nyuma n’abo muri Kaminuza bari basubukuye amasomo tariki ya 01 Kamena 2020, ariko abo mu bindi byiciro bakomeza kuguma mu ngo.

Guinea na yo igiye gufungura amashuri

Perezida Alpha Condé wa Guinea na we yatangaje ko ingamba zashyiriweho kurwanya ikwirakwira rya COVID-19 zigiye koroshywa.

Mu ijambo yagejeje ku baturage b’igihugu cye kuri uyu wa mbere, yavuze ko insengero zizafungurwa tariki 28 Kamena 2020 mu bice bitagaragayemo COVID-19.

Abanyeshuri bagombaga gukora ibizamini n’abo muri za Kaminuza bazasubukura amasomo tariki 29 z’uku kwezi kwa Kamena.

Gusa ngo muri icyo cyiciro cya mbere cyo gusubukura amasomo, guhana intera no kwambara agapfukamunwa bizakurikizwa.

Muri Guinea hamaze kugaragara abarwayi ba COVID-19 bagera ku 4,572 abagera kuri 26 bakaba barahitanywe na yo.

Kwambara agapfukamunwa muri Guinea ni itegeko, ndetse abaturage bashyiriweho isaha ntarengwa ya saa tanu yo kuba bageze mu ngo.

Evariste Ndayishimiye ashobora kurahira ku wakane

Umuvugizi wa Guverinoma y’u Burundi ntiyemeje cyangwa ngo ahakane ayo makuru, ahubwo asubiza umunyamakuru wambubajije kuri iyi ngingo, yagize ati “ufite amakuru”.

Umwe mu banyamakuru bari mu Burundi yabwiye BBC ko bamenyeshejwe ko bakwitegura uwo munsi w’irahira rya Evariste Ndayishimiye uzabera mu murwa mukuru wa Politiki mu Ntara ya Gitega.

Ku wa Gatanu w’icyumweru gishize, Urukiko rushinzwe kurinda Itegeko Nshinga mu Burundi rwanzuye ko igihe cy’inzibacyuho kidakenewe, nyuma y’urupfu rwa Perezida Pierre Nkurunziza, rwemeza ko uwatorewe kumusimbura yarahira vuba bishoboka.

Ku wa Gatandatu w’icyumweru gishize, Evariste Ndayishimiye yavuze ko Pierre Nkurunziza agiye gusimbura “yamuteguye bihagije, ndetse yamweretse ibyo yari akeneye kumenya byose”.

BBC yabonye ubutumwa bivugwa ko ari ubw’abakuru b’ishyaka riri ku butegetsi CNDD-FDD, butumira abo muri iryo shyaka ku nzego z’amakomini kuzajya muri uwo muhango bambaye imyenda iranga iri shyaka.

Ndayishimiye w’imyaka 52 ugiye kurahirira kuyobora u Burundi ni Umunyamabanga Mukuru w’ishyaka CNDD-FDD kuva mu 2016, umwanya yasimbuyeho Pascal Nyabenda kuri ubu uyoboye inteko ishinga amategeko.

Kuva muri 2006 yagizwe Minisitiri w’Ubutegetsi bw’Igihugu, nyuma agirwa umujyanama mu bya gisirikare wa Perezida Pierre Nkurunziza.

Iryo tegeko rigenga amatora ntiryemerera abakandida bigenga kwiyamamaza mu matora, kugeza ubu uwiyamamaza mu matora wese akaba yagombaga kuba aturutse mu ishyaka ryemewe mu gihugu.

Inteko ishinga amategeko ya Afurika y’Epfo igomba kuba yahinduye iryo tegeko mu gihe kitarenze imyaka ibiri.

Umwanzuro w’urukiko uravugwaho kuba ugiye guhindura isura ya politiki muri Afurika y’Epfo, kuko abaturage b’icyo gihugu bazaba bashobora noneho kwiyamamaza mu matora yaba ay’ibanze n’ayo ku rwego rw’igihugu batabanje kunyura mu mashyaka.

Kugeza ubu, abanyamuryango b’amashyaka ni bo bonyine bari bemerewe guhatana mu matora, ariko mu matora ataha abakandida bigenga bazaba bemerewe guhatana.

Umwanzuro w’urukiko rushinzwe kurengera itegeko nshinga uraha amahirwe abaturage yo kubaza inshingano uwo batoye mu gihe atazubahirije, kandi bigakorwa adakingiwe ikibaba n’ishyaka kabone n’ubwo ryaba rifite imbaraga.

Umuryango New Nation ni wo watanze ikirego mu rukiko ugaragaza ko itegeko rigenga amatora “rihonyora uburenganzira bwa muntu bwo kugira amahitamo bwite muri politiki”.

Abasesengura ibya politiki ya Afurika y’Epfo bavuga ko abaturage bagejeje igihe cyo gutora muri icyo gihugu kenshi batenguhwa n’amashyaka ku buryo abitabira amatora bagiye bagabanuka mu myaka ya vuba aha.

Hari abavuga ko demokarasi ya Afurika y’Epfo ishingiye ku mashyaka atatu, ANC riri ku butegetsi, n’andi abiri atavuga rumwe na leta, bamwe mu baturage bagashinja ayo mashyaka kudashyira mu bikorwa ibyo yizeza abaturage.

Mu Burundi hashyizweho iminsi irindwi yo kunamira Nkurunziza (Ifoto: AFP)

Nkurunziza witabye Imana afite imyaka 55 y’amavuko, mu kwezi kwa munani k’uyu mwaka wa 2020 nibwo yagombaga guhererekanya ubutegetsi na Gen Maj Evariste Ndayishimiye watsinze amatora, ariko mu ntangiriro z’iki cyumweru yitabye Imana biturutse ku guhagarara k’umutima nk’uko Guverinoma y’u Burundi yabitangaje.

Inama idasanzwe y’abaminisitiri yateranye kuri uyu wa kane iyobowe na Visi Perezida wa mbere, Gaston Sindimwo, ikaba igamije kuganira ku hazaza h’u Burundi muri ayo mezi abiri Pierre Nkurunziza yari asigaje ngo asoze manda ye.

Mbere y’uko iyo nama y’abaminisitiri idasanzwe iterana, umuvugizi wa Guverinoma y’u Burundi Prosper Ntahorwamiye yari yabwiye ishami rya BBC rikorera mu karere k’ibiyaga bigari (BBC Great Lakes) ko bakiri kwiyambaza urukiko rushinzwe kurengera itegeko nshinga mu kureba ugomba gusimbura Pierre Nkurunziza, avuga ko bizafata iminsi mike.

Nubwo hataramenyekana ugomba gusimbura Pierre Nkurunziza ku buyobozi bw’igihugu, itegeko nshinga ry’u Burundi mu ngingo yaryo ya 121 rivuga ko iyo umukuru w’igihugu yitabye Imana cyangwa akagira ibindi bibazo bituma adashobora gukomeza kuyobora, asimburwa na Perezida w’inteko ishinga amategeko akayobora inzibacyuho, ku buryo Pascal Nyabenda uyiyoboye kuri ubu ari we wagombye kumusimbura.

Pierre Nkurunziza yiteguraga guhererekanya ubutegetsi na Gen Major Evariste Ndayishimiye mu kwezi kwa munani, ku buryo hari abibaza niba kumuha ubutegetsi bizakorwa mbere y’igihe cyari giteganyijwe ngo hataba icyuho mu gihugu.

Ibiro ntaramakuru by’Abafaransa AFP byatangaje ko byahawe amakuru n’umuyobozi utashatse gutangazwa amazina avuga ko abaminisitiri atari bo bazagena ugomba kuyobora, ahubwo bizagenwa n’akanama gashinzwe kwita ku bibazo bidasanzwe gakorera mu biro bya Perezida.

“Mu by’ukuri, ntabwo ari inama y’abaminisitiri izafata icyemezo ku kigomba gukorwa...ibintu byose byamaze gufatwaho umwanzuro n’ako kanama gakorera mu biro bya Perezida” niko uwo muyobozi utavuzwe amazina yabwiye AFP.

Ako kanama ngo kagizwe n’abasirikari b’abajenerali bafite ijambo rinini mu butegetsi bw’u Burundi.

Gusa ngo haracyari n’ibibazo bikigaragara birimo ubucucike muri za gereza zo hirya no hino mu Rwanda, n’imanza zitinda kurangizwa by’umwihariko iz’Inkiko Gacaca.

Perezida wa Komisiyo y’inteko ishinga amategeko ishinzwe ubumwe bw’Abanyarwanda, uburenganzira bwa muntu no kurwanya Jenoside, Hon. Mukamana Elisabeth, yavuze ko impamvu ituma izo manza z’Inkiko Gacaca zitarangizwa biterwa n’uko hari izitariho kashe, ku buryo bigorana kumenya niba urubanza rwarubahirije amategeko, hakaba n’ikibazo cy’abagomba kwishyura imitungo ariko badafite ubushobozi.

Hon. Mukamana Elizabeth

Minisiteri y’Ubutabera ngo yasobanuriye abadepite bagize Komisiyo y’inteko ishinga amategeko ishinzwe ubumwe bw’Abanyarwanda, uburenganzira bwa muntu no kurwanya Jenoside, ivuga ko Guverinoma iri kuganira iki kibazo n’izindi nzego bireba hagamijwe kugishakira umuti kugira ngo abarokotse Jenoside bangirijwe imitungo babone ubutabera kuko icyo kibazo kimaze igihe kirekire.

Ku bijyanye n’ubucucike mu magereza, raporo ya Komisiyo y’igihugu y’uburenganzira bwa muntu ya 2018/19 igaragaza ko ubucucike mu magereza muri uwo mwaka bwari ku rugero rwa 124%.

Gusa hari ingamba zagiye zifatwa hagamijwe kubugabanya, zirimo iyo gusubika igifungo ku byaha bidakabije cyane ku buryo umuntu yajya akurikiranwa ari hanze cyangwa agakora imirimo nsimburagifungo.

Hari izindi ngamba ziteganyijwe zirimo kwambika abakurikiranyweho ibyaha agakomo kazwi nka “bracelet électronique” umuntu yambikwa, inzego z’umutekano zikabasha kumukurikirana adafunze kugira ngo adatoroka.

Mu mwaka wa 2018/19, Komisiyo y’igihugu y’uburenganzira bwa muntu yakurikiranye ibirego 1328 by’ihohoterwa ry’uburenganzira bwa muntu, birimo ibirego 473 bingana na 35.62% byayigejejweho mu mwaka wa 2018/19 n’ibirego 855 bingana na 64.38% byari bigikurikiranwa mu mpera z’umwaka wa 2017/18.

Mu birego iyo Komisiyo yakurikiranye muri uwo mwaka wa 2018/19, ibiza ku isonga ni 338 by’uburenganzira ku mutungo bingana na 25.45%, iby’uburenganzira ku butabera 280 bingana na 21.08%, iby’uburenganzira ku burezi 125 bingana na 9.41%, ibyo kumenya ababyeyi no kurerwa na bo 56 bingana na 4.22%, ndetse n’iby’uburenganzira bwo kwandikwa mu bitabo by’irangamimerere 53 bingana na 3.99%.

Muri ibyo ibirego, 1081 bingana na 81.40% byarangije gukorerwa iperereza bishyikirizwa inzego ngo zibikemure. Mu birego byashyikirijwe inzego, ibigera kuri 864 bingana na 79.93% byabonewe ibisubizo, naho ibindi 217 bingana na 20.07% ngo ntibirabonerwa ibisubizo.

Inteko rusange y’umutwe w’abadepite yasabye ko Komisiyo y’igihugu y’uburenganzira bwa muntu yajya igaragariza inteko ishinga amategeko umutwe w’abadepite ibibazo byose bireba u Rwanda byagaragajwe n’akanama k’umuryango w’Abibumbye gashinzwe Uburenganzira bwa Muntu, ndetse n’ingamba zihari zo kubikemura.

Iyo Komisiyo kandi yasabwe kwihutisha gushyiraho uburyo bw’ikoranabuhanga mu kwakira no gukurikirana ibirego yakira, kugira ngo ibashe kubikurikirana mu buryo bwihuse.

Dr. Uzziel Ndagijimana, Minisitiri w’Imari n’Igenamigambi

Ni ikigega cyatangijwe ku wa mbere tariki 08 Kamena 2020, kikaba ari igisubizo ku bikorera bakunze kugaragaza ko icyo cyorezo cyabadindije mu mikorere, bagasaba ko leta yabagoboka kugira ngo babashe gukomeza ibikorwa byabo.

Minisitiri w’Imari n’Igenamigambi Dr. Uzziel Ndagijimana, avuga ko ikigega cyashyiriweho kuzahura ubukungu bw’igihugu cyatangiranye imari itubutse ya miliyari 100 z’amafaranga y’u Rwanda, ariko ngo haracyashakishwa n’andi ku buryo cyazageza nibura kuri miliyari 200.

Mu bagezweho n’ingaruka za COVID-19 rugikubita, harimo abo mu rwego rw’ubukerarugendo n’amahoteli bitewe n’uko amakompanyi menshi y’indege yahise ahagarika ingendo.

Nsengiyumva Barakabuye ayobora ihuriro ry’abafite amahoteri mu Rwanda, aherutse kubwira Kigali Today ko “abandi bumvise ingaruka za COVID-19 ubwo umurwayi wa mbere yagaragara mu Rwanda, mu gihe amahoteli yo yari yatangiye kubyumva bitewe n’uko abo yakira harimo n’abaturuka hanze y’u Rwanda batari bakiza kubera indege zitari zikigenda”.

Barakabuye yongeraho ko akurikije uko ikibazo kimeze “bizafata igihe kirekire kugira ngo ibintu bijye mu buryo, haba ku rwego rw’igihugu no ku rwego mpuzamahanga”.

Ibikorwa birimo inganda n’amahoteli byarasubukuwe nyuma y’uko Guverinoma y’u Rwanda yoroheje ingamba zari zashyizweho zo kurwanya no gukumira COVID-19.

Abasubukuye ibikorwa ku ikubitiro bagaragaje ko hari ibyangiritse byinshi bizatuma kongera kubyutsa ibikorwa byabo bigorana, ariko Perezida wa Repubulika Paul Kagame abizeza ko Leta izakora uko ishoboye ngo ifashe Abanyarwanda n’abikorera kugira ngo babashe gukomeza ibikorwa byabo.

Icyo gihe Perezida Kagame yagize ati “Leta izakomeza gukora ibishoboka byose ngo ifashe Abanyarwanda muri ibi bihe bitoroshye. Ingamba zarafashwe n’izindi zizafatwa kugira ngo abikorera bubake uburyo bakomeza gukora muri ibi bihe”.

Nyuma y’igihe gito Perezida Kagame yijeje abikorera ubufasha, kuri uyu wa mbere tariki 08 Kamena 2020 Leta y’u Rwanda yatangije ikigega kizafasha abikorera guhangana n’ingaruka za COVID-19. Ni ikigega Minisitiri w’Imari n’Igenamigambi Dr. Uzziel Ndagijimana avuga ko kizafasha abikorera mu byiciro bitandukanye.

Ati “Abazafashwa ni ibikorwa byose byahungabanyijwe n’ubukungu, inzego zitandukanye, amasosiyete manini, amato, aciriritse ndetse n’amato cyane.

Igipimo ngenderwaho ni ukureba uburyo icyorezo cyatumye ubucuruzi bw’urwego runaka bumanuka cyane ugereranyije n’umwaka washize ku buryo nibura bigera kuri 50% y’agaciro k’ibyacurujwe”.

Amafaranga yashyizwe muri icyo kigega cyo kuzahura ubukungu bwadindijwe n’icyorezo cya COVID-19, ngo ari mu ngengo y’imari y’umwaka wa 2019-2020 ndetse n’iya 2020-2021 nk’uko Minisitiri Ndagijimana abivuga.

Icyakora ngo si buri kigo kizahabwa ubufasha kuko hashyizweho ibizakurikizwa mu gutoranya abafashwa.

Ati “Sosiyete isaba ubufasha bunyuze muri iki kigega igomba kuba n’ubundi yari ihagaze neza mbere y’icyorezo, ntabwo ari umwanya wo gukemura ibibazo n’ubundi byariho mbere y’icyorezo, ni ugukemura ibibazo byatewe n’icyorezo”.

Minisitiri Ndagijimana yongeraho ko mu bindi bishingirwaho ari ukureba niba sosiyete “yari isanzwe yitwaye neza, icuruza neza, yishyura neza imyenda ya banki, yishyura neza imisoro ariko ubu ikaba yarakomwe mu nkokora n’icyorezo, iyo ikaba ifashwa kongera kuzamuka”.

Ikindi ngo hazajya harebwa na gahunda y’ibikorwa sosiyete isaba ubufasha ifite muri iki gihe, harebwa icyo izakora kugira ngo ibikorwa byongere bizamuke mu gihe yaba imaze kugurizwa amafaranga.

Ibyo ngo biri muri gahunda yo kugira ngo abantu badatakaza imirimo, aho bishoboka ikongerwa, kandi sosiyete yahawe amafaranga ikaba igaragaza ko mu gihe gito yaba imaze kugera nko kuri 75% y’ubucuruzi yari ifite mbere.

Dr. Ndagijimana ati “Ni amafaranga yo kugira ngo uve mu kibazo watewe n’icyorezo ugaruke ku gipimo cyiza wari uriho mbere ndetse no kurenzaho”.

Minisitiri w’Imari n’Igenamigambi Dr. Uziel Ndagijimana (iburyo), na Ambasaderi w’Umuryango w’Ubumwe bw’Uburayi mu Rwanda, Nicola Bellomo

Amafaranga u Rwanda rwahawe ari mu rwego rw’inkunga ya miliyoni 460 z’amayero, Komisiyo y’Umuryango w’Ubumwe bw’Uburayi yemereye u Rwanda muri Nzeri 2014, ikazafasha Guverinoma y’u Rwanda muri gahunda yo guteza imbere imibereho myiza y’abaturage n’ubuhinzi, hagamijwe kuzahura ubukungu bwashegeshwe n’ingamba zo kwirinda icyorezo cya COVID-19.

Ayo masezerano yasinywe ku wa mbere tariki 08 Kamena 2020 hagati ya Minisitiri w’Imari n’Igenamigambi Dr. Uzziel Ndagijimana ku ruhande rw’u Rwanda, na Ambasaderi w’Umuryango w’Ubumwe bw’Uburayi mu Rwanda Nicola Bellomo.

Minisitiri Ndagijimana yavuze ko “ingaruka za COVID-19 ku bukungu n’imibereho myiza byatumye u Rwanda rufata ingamba zisumbuyeho zigamije kwihaza mu biribwa, kugabanya ubukene no guteza imbere ubukungu budaheza”.

Iyo nkunga izashyirwa mu bikorwa byibanda ku bufasha bw’amafaranga n’ibiribwa bigenewe abaturage no guteza imbere ubuhinzi hagamijwe kwihaza mu biribwa, ikaba ari gahunda izagera ku miryango nibura 630,000 ikeneye ubufasha bwihutirwa.

Minisitiri Ndagijimana yongeraho ko inkunga u Rwanda rwahawe igaragaza icyizere n’umubano mwiza uri hagati y’Umuryango w’Ubumwe bw’Uburayi na Guverinoma y’u Rwanda.

Ambasaderi w’Umuryango w’Ubumwe bw’Uburayi mu Rwanda avuga ko “iyo nkunga ari imwe mu nkunga zitangwa muri gahunda yagutse izwi nka ‘Team Europe response’, igaragaza ubufatanye uwo muryango ufitanye n’ibihugu by’inshuti by’umwihariko mu guhangana n’icyorezo cya COVID-19.

Inkunga u Rwanda rwahawe izatangwa mu byiciro bibiri. Icyiciro cyambere kizatangwamo miliyoni 36 z’amayero, icyiciro cya kabiri gitangwemo miliyoni 15.5 z’amayero, azatangwa mu gihe cy’imyaka ibiri y’ingengo y’imari, uwa 2019-2020 ndetse n’uwa 2020-2021.

Uretse iyo nkunga ya miliyoni 52 z’amayero, Umuryango w’Ubumwe bw’Uburayi wanahaye indi nkunga ya miliyoni 1.8 y’amayero imiryango itari iya leta isanzwe yita ku mibereho myiza y’abaturage, kugira ngo ayifashe guhangana n’ingaruka za COVID-19.

Nyuma yaho haje n’abandi bari mu byiciro bitandukanye bose hamwe babarirwa muri 80 binjiriye ku mupaka wa Kagitumba, bakaba ari bamwe mu Banyarwanda 130 Minisitiri w’Ububanyi n’amahanga wa Uganda Sam Kutesa yatangaje ko bazarekurwa mu ntangiriro z’iki cyumweru, akaba yarabivugiye mu biganiro biherutse guhuza intumwa z’u Rwanda na Uganda.

Ibiganiro byari byahuje impande zombi ndetse n’abahuza bo mu bihugu bya Angola na Repubulika iharanira Demokarasi ya Congo, bikaba byarabaye hifashishijwe ikoranabuhanga rya Video Conference tariki 4 Kamena 2020.

Muri ibyo biganiro byabaye mu cyumweru gishize, Minisitiri w’ububanyi n’amahanga n’ubutwererane Dr. Vincent Biruta wari uyoboye intumwa z’u Rwanda yavuze ko hari intambwe yatewe mu gushyira mu bikorwa amasezerano ya Luanda, ariko anavuga ko Uganda ikomeje gufunga no guhohotera Abanyarwanda.

Minisitiri Sam Kutesa wari uyoboye intumwa za Uganda muri ibyo biganiro yavuze ko Uganda ko mu kwezi kwa Gicurasi hari Abanyarwanda basaga 130 bari bafungiwe muri Uganda barekuwe, hakaba hari hagikurikizwa ibiteganywa kugira ngo bashyikirizwe u Rwanda, dore ko byagaragaye ko bari bafunzwe barengana.

Icyo gihe yavuze ko bazashyikirizwa u Rwanda hagati yo ku wa mbere no ku wa kabiri anasaba abayobozi bireba mu Rwanda kuzaba bahari kugira ngo bakire abo Banyarwanda.

Gusa icyo gihe Kutesa yavuze ko hari abandi Banyarwanda 310 yavugaga ko bakoze ibyaha bikomeye bazakomeza gufungwa, amakuru arebana na bo Uganda ikazayasangiza u Rwanda.

Abanyarwanda barekurwa kuri uyu wa mbere tariki 08 Kamena 2020 baraba babaye icyiciro cya gatatu cy’Abanyarwanda barekuwe na Uganda, icya mbere kikaba cyarimo Umunyarwanda Réné Rutagungira uvugwaho kuba umwe mu Banyarwanda bafashwe mbere bagafungirwa muri gereza zikorerwamo ibikorwa by’iyicarubozo ku Banyarwanda.

Biteganyijwe ko aba Banyarwanda barekuwe na Uganda kuri iyi nshuro bashyirwa mu kato i Kayonza ku cyicaro cya kaminuza y’u Rwanda, ishami rya Rukara.

Bagera ku mupaka bagahabwa udupfukamunwa bakabona kwinjira mu Rwanda

Icyiciro cya nyuma cy’abaje kuri uyu wa mbere cyahageze ahagana saa mbili z’umugoroba. Cyari kigizwe n’abantu 13 abaje bose hamwe bakaba ari 80

Babiri muri bo ubwo bavuganaga n’itangazamakuru, bavuze ko batababariwe nk’uko abayobozi ba Uganda babivuga ahubwo ko bashoje ibihano bakatiwe n’urukiko.

Hakizimana Innocent yari yarakatiwe imyaka ibiri. Yafunzwe mu 2018 akaba aje arangije igihano. Iyi myenda yambaye ngo ni iyo babambitse babasohoye muri gereza

Mbarushimana Jean Bosco

Mbarushimana Jean Bosco w’imyaka 26 y’amavuko akomoka i Musanze akaba yarafatiwe muri Uganda mu 2019 yagiye gusura inshuti ye.

Mbarushimana yakatiwe amezi 26 y’igifungo akaba aje ayarangije. Avuga ko ubuyobozi bwa Uganda bubeshya ko bababariwe ariko mu by’ukuri ngo bari barangije ibihano.

Aho bari bafungiye naho ngo bari babayeho mu buzima bubi, batotezwa, bagakubitwa, bagahingishwa ndetse bagakoreshwa n’indi mirimo itandukanye y’agahato.

Biteganyijwe ko abakiriwe ku wa mbere ku mupaka wa Kagitumba bakurikirwa n’ikindi cyiciro cy’abakirwa kuri uyu wa kabiri, ariko bo bakakirirwa ku mupaka wa Cyanika uherereye mu Majyaruguru y’u Rwanda.

Amafoto&Video: Roger Marc Rutindukanamurego

Uturere dufite amashuri make twagiye tugenerwa ibyumba byinshi, muri two hakaba harimo aka Nyagatare kazubakirwa ibyumba 1240, aka Gasabo kazubakirwa ibyumba 1074, aka Rubavu kazubakirwa ibyumba 1201, ndetse n’aka Gatsibo kazubakirwa ibyumba 1193.

Ni ibintu Minisitiri w’Uburezi Dr. Valentine Uwamariya avuga ko bizagabanya ubucucike mu mashuri ku gipimo gishimishije.

Agira ati “Ku mwaka wasangaga duteganya ibyumba bitageze no mu 3000. Kuba tugiye kubaka ibyumba ibihumbi 22 mu gihe gito bifite ikintu kinini bivuze kuko wasangaga mu ishuri harimo ubucucike harimo abana 80, hari n’aho babaga barenga bagera mu 100, ku buryo nitumara kubona ibi byumba twizera ko ubucucike buzagabanuka ku kigero gishimishije ku buryo bizagera mu nsi ya 60”.

Ibyumba by’amashuri biri kubakirwa amashuri yo mu byiciro bitandukanye harimo ay’incuke, abanza n’ayisumbuye. Minisitiri w’Uburezi avuga ko Minisiteri ayobora itahita imenya imibare nyayo y’uko ubucucike buzagabanuka mu mashuri, kuko bizaterwa n’umubare w’abana bashya bazakirwa mu mwaka wa mbere.

Biri kubakwa mu gihe amashuri mu Rwanda yabaye ahagaze kubera icyorezo cya COVID-19, bikaba biteganyijwe ko azongera gufungura mu kwezi kwa Nzeri 2020.

Icyakora abari mu mirimo yo kubyubaka bavuga ko bizeye ko icyo gihe bizaba byaruzuye, nk’uko bivugwa na Ingenieur Rwangabo Samuel.

Ati “Ikigaragara icyizere kirahari. Imirimo igeze kuri 50.3% nta kibazo mu kwezi kwa cyenda imirimo izaba yarangiye ukurikije umuvuduko dukorana”.

Ibyumba by’amashuri biri kubakwa muri gahunda y’umushinga wa Banki y’Isi uzubaka ibisaga ibihumbi 11, bikazubakwa ku nguzanyo ya miliyari 126 z’amafaranga y’u Rwanda.

Hari n’undi mushinga wa Guverinoma y’u Rwanda uzubaka ibyumba ibihumbi cumi na kimwe na magana atanu na bine (11,504), uyu wo ukaba warateganyirijwe ingengo y’imari ya miliyari zibarirwa muri 86.

Mu mishinga basanze itaragenewe amafaranga harimo iyerekeranye no gusana ibyangijwe n’ibiza

Ibi byatangajwe tariki 05 Kamena 2020, ubwo abagize Inteko Ishinga Amategeko basuzumaga ingengo y’imari u Rwanda ruzakoresha mu mwaka wa 2020/2021.

Ni icyuho abagize Komisiyo y’Inteko Ishinga Amategeko Ishinzwe Ingengo y’Imari n’Umutungo w’Igihugu yasanze mu mbanzirizamushinga y’iyo ngengo y’imari, bakavuga ko hakenewe miliyari zisaga 210 kugira ngo icyo cyuho kivemo, nk’uko Omar Munyaneza, Perezida wa Komisiyo y’ingengo y’imari n’umutungo w’igihugu abivuga.

Muri iyo mishinga harimo n’iyo mu rwego rw’ubuvuzi, ikoranabuhanga n’ibindi bikorwa by’iterambere Perezida wa Repubulika Paul Kagame yemereye Abanyarwanda hirya no hino mu gihugu.

Abagize Inteko Ishinga Amategeko bagaragaza ko kuba nta ngengo y’imari yateganyirijwe iyo mishinga biteye impungenge, by’umwihariko ku mishinga y’ubuvuzi n’ikoranabuhanga kandi riri kwifashishwa cyane muri iki gihe.

Ni byo basobanuye bati “Ujya kwivuza umuti usabye akaba atari wo baguha, baguha uwo uhasanze ntibaguha umuti ujyanye n’uburwayi bwawe. Ibi rero bishobora kugira ingaruka ku mitangire ya serivisi ariko bikagira ingaruka no kuri iriya gahunda nziza ya mituweli ku buryo iki kibazo kigomba kwitabwaho mu maguru mashya”

“Ibintu byose ni ikoranabuhanga, none twabuze amafaranga y’umutekano w’ikoranabuhanga. Abantu bakongera bakabirebaho ku buryo n’amafaranga yaboneka kuko tudafite umutekano w’ikoranabuhanga twaba dukomerewe cyane” nk’uko abagize Inteko Ishinga Amategeko babivuga.

Mu mishinga itagaragarizwa ingengo y’imari harimo iyubakwa ry’ibitaro bya Ruhengeri, iyubakwa ry’ibyanya by’inganda, amazu y’abatishoboye ndetse no gusana ingomero n’ibiraro byangiritse.

Hari Abadepite bagaragaje ko kuba hari imishinga yo guteza imbere ibice by’icyaro itaragenewe ingengo y’imari nk’imihanda n’ibiraro bishobora guteza ibindi bibazo bikomeye mu baturage mu gihe ibibazo bishingiye ku mihindagurikire y’ibihe byakomeza kwiyongera.

Perezida wa Komisiyo y’ingengo y’imari n’umutungo w’igihugu avuga ko abadepite bagize iyo komisiyo bahuye n’inzego zitandukanye zirimo na Minisiteri y’Imari n’igenamigambi.

Munyaneza avuga ko Minisitiri w’Imari n’Igenamigambi Uzziel Ndagijimana “Yagaragarije abagize Komisiyo ko hashingiwe ku bushobozi buhari kandi hanashingiwe ku byuho byumvikana abashinzwe Komisiyo bamugaragarije ko bikwiye kwitabwaho, ko hari ibizitabwaho kurusha ibindi mu gihe cyo kunoza umushinga w’itegeko rigena ingengo y’imari y’umwaka wa 2020/21”

Ingengo y’imari y’umwaka wa 2020/21 ingana na miliyari 3,245.7 ivuye kuri miliyari 3,017.1 yari yakoreshejwe mu mwaka wa 2019/20 ikaba yariyongereyeho miliyari 228.7

Amafaranga y’ingengo y’imari azava imbere mu gihugu yagabanutseho miliyari 147.6 kuko mu mwaka wa 2020/21 hateganywa miliyari 1,421.4 mu gihe mu mwaka ushize wa 2019/20 hari hateganyijwe miliyari 1,569.

Icyakora Inteko Ishinga Amategeko yatangaje ko biteganyijwe ko amafaranga y’abaterankunga aziyongera akaba yaziba ibyuho bimwe na bimwe byagaragajwe mu ngengo y’imari ya 2020/21.

Bolsonaro ushinja OMS kubogama avuga ko ashobora kugera ikirenge mu cya Perezida wa Amerika agahagarika imikoranire na OMS

Abivuze nyuma y’uko OMS iburiye Guverinoma z’ibihugu ku kaga gashobora gukurikirana no guhagarika ingamba zo gukumira icyorezo cya COVID-19 zirimo n’iyo kuguma mu rugo zari zashyiriweho kugabanya ikwirakwira ry’icyo cyorezo.

“Ndababwiza ukuri, Leta zunze ubumwe za Amerika zahagaritse imikoranire na OMS, natwe turi kubyigaho mu gihe kiri imbere. OMS igomba gukora itabogama cyangwa tuzahagarike gukorana na yo natwe” uku niko Perezida Bolsonaro yabibwiye abanyamakuru imbere y’ibiro bye ku wa Gatanu tariki 05 Kamena 2020.

Mu kwezi gushize kwa Gicurasi nibwo Perezida Donald Trump wa Leta zunze Ubumwe za Amerika yavuze ko igihugu cye kigiye guhagarika imikoranire na OMS, ayishinja kuba igikoresho cy’u Bushinwa bwagaragayemo Coronavirus bwa mbere.

Perezida Bolsonaro na we yakunze kugaragaza ko Coronavirus atari icyorezo gikomeye cyatuma abaturage babuzwa gusohoka, akanenga abayobozi basabye abaturage kuguma mu ngo. Yanakunze guhamagarira abaturage b’igihugu cye gukoresha imiti ya Chloroquine na Hydroxychloroquine yemeza ko ifasha mu guhangana na COVID-19.

Atangaje ko ashobora guhagarika gukorana na OMS nyuma gato y’uko Brazil itangaje ko abamaze guhitanwa na Coronavirus muri icyo gihugu basaga 35,000, kugeza ubu kikaba ari icya gatatu ku rutonde rw’ibifite abantu benshi bishwe na Coronavirus nyuma ya Amerika n’u Bwongereza.

Ku wa kane Minisitiri w’ubuzima wa Brazil yari yatangaje ko imibare y’abandura Coronavirus yazamutse ikagera ku 600,000 igahitana abagera ku 1,437 mu masaha 24.

Ku wa Gatanu tariki 05 Kamena 2020 nabwo inzego z’ubuyobozi zatangaje ko hapfuye abantu 1,005 ariko Perezida Bolsonaro akomeje gusaba ko amabwiriza yo kuguma mu rugo avanwaho vuba “kuko idindira ry’ubukungu riteye impungenge kurusha Coronavirus.”

Icyorezo cya COVID-19 muri Amerika y’Amajyepfo giteye impungenge cyane, hakaba habarurwa abantu basaga miliyoni kimaze guhitana, nk’uko OMS ibitangaza.

Mu gihe Brazil na Mexique biza ku isonga mu kugira ubwandu bushya, icyo cyorezo kiri no gusakara mu bihugu nka Peru, Colombia, Chile na Bolovia.

Benshi mu bayobozi b’ibihugu bya Amerika y’Amajyepfo bafashe ingamba zo kurwanya ikwirakwira ry’icyo cyorezo kurusha Perezida Bolsonaro. Gusa bamwe mu banyapolitiki bari bashyigikiye gahunda yo kuguma mu rugo mu kwezi kwa Werurwe na Mata, bari gusaba ko ibikorwa by’ubucuruzi byongera gufungura kuko inzara n’ubukene bikomeje kwiyongera.

Tariki 18 Mata 2020, ubwo Minisitiri w’Ubuzima Dr. Daniel Ngamije yari kuri Televiziyo y’u Rwanda yasobanuye ingamba nshya z’ubwirinzi bwa COVID-19 zasabaga buri muturarwanda kwambara agapfukamunwa.

Yagize ati “Ingamba nshya turi gushishikariza Abanyarwanda muri iyi minsi ni uko twese twashaka udupfukamunwa. Hari inganda zemerewe kudukora tukazaba tuboneka ku isoko ku giciro giciriritse, igihe usohotse ugomba kugenda ukambaye, bimaze kugaragara no ku isi hose ko gafasha kurinda ubwandu.”

Nyuma y’iminsi mike inganda zari zabiherewe uburenganzira zatangiye kudukora tunakwirakwizwa mu gihugu hose. Gusa hashize ibyumweru bigera kuri bibiri abadukora barabihagaritse, kuko mu bubiko harimo udusaga miliyoni eshatu twabuze abaguzi kugeza ubu. Ni igihombo babarira mu mafaranga y’u Rwanda asaga miliyari.

Swaib Munyawera uhagarariye abashoye imari mu gukora udupfukamunwa (Mask Investment) yagize ati “Hari ibyo twasabwaga kugira ngo tubashe gukora udupfukamunwa, ibyo byasabye ishoramari umuntu atari asanzwe afite mu ruganda ku buryo hari igihombo cya miliyari imwe na 200 kuko ufashe miliyoni eshatu z’udupfukamunwa ukazikuba n’amafaranga 400 tugurisha (agapfukamunwa kamwe), usanga bihagaze miliyari imwe na miliyoni 200 z’abashoramari bashoboye gutabara igihe byari ngombwa.”

Igihombo cy’abo bashoramari ngo giterwa ahanini n’uko udupfukamunwa bakora hari abandi badukora batabyemerewe, ndetse hakaba n’udupfukamunwa twaguzwe mbere abantu bagitangira kutugura no kugeza ubu bakaba bakitwambaye.

Ku kibazo cy’abaturage bambara agapfukamunwa igihe kirekire kurenza icyo kagenewe, hari abavuga ko babiterwa n’ubukene ku buryo uwabashije kukagura atita ku minsi yagenwe kagomba gukoreshwa, nk’uko Nyirinkwaya Callixte abivuga.

Ati “Ufite umuryango w’abantu batanu, ubwo bigusaba 2500 buri cyumweru kandi numva ngo (agapfukamunwa) kambarwa iminsi itanu gusa. Ayo mafaranga wayakura he?”

Hari n’abavuga ko uretse no kukambara igihe kirekire hari n’abatabasha kukigondera ku buryo bapfundikanya udutambaro bagakora akantu ko kwikinga ku munwa ngo badahanwa kubera ko batambaye agapfukamunwa.

Sam Kamugisha ushinzwe inganda muri Minisiteri y’Ubucuruzi n’Inganda aherutse kubwira Televiziyo y’Igihugu ko hari ingamba zafashwe zirimo kugeza utwo dupfukamunwa ku baturage ku rwego rw’imirenge, gusaba inganda kugabanya ingano y’udupfukamunwa zikora, ndetse no gutekereza kutugeza ku masoko yo hanze y’u Rwanda.

Hari abaturage babwiye Kigali Today ko mu gihe bitashoboka ko udupfukamunwa Leta itubaha ku buntu, nibura igiciro cyatwo cyagabanuka cyane ku buryo bakagura amafaranga 50, kahenda ntikarenze 100.

Ni ibintu ariko bisa nk’ibigoranye kuko abari bemerewe kudukora bagaragaza ko badushoyeho imari nyinshi, kubera amabwiriza bari bashyiriweho n’ikigo cya Rwanda FDA mbere y’uko bemererwa kudukora. Muri ayo mabwiriza harimo kugura imashini, imyambaro n’inkweto abakozi bambara bari ku kazi, ndetse n’imiti (hand sanitizers) yica udukoko bakoreshaga bari mu kazi.

Minisitiri w’Ubutegetsi bw’Igihugu Prof. Shyaka Anastase

Mu kiganiro yagiranye n’itangazamakuru ry’igihugu kuri uyu wa kane tariki 04 Kamena 2020, yavuze ko ikibazo gikomeye ku buryo hakwiye no gufatwa ingamba zidasanzwe.

Ati “Ni ibintu bikomeye bijyanye no kurinda ubuzima bwabo. Mu minsi ibiri ukabona abantu basaga 20 mu gace kamwe kangana amara (gato), ni ikibazo ubundi gikomeye cyane. Turabizi Abanyarusizi ubundi bakunda gucuruza no gushaka amafaranga, ariko babe babishyize ku ruhande barinde ubuzima bwabo.”

Minisitiri Shyaka avuga ko abatuye muri Rusizi bakwiye kubahiriza izo ngamba nshya baguma mu ngo kuko nta kiruta ubuzima bwabo, anabizeza ko badakwiye gutinya inzara kuko bazafashwa na Leta.

Imirenge ya Kamembe, Mururu, Nyakarenzo n’igice cya Gihundwe ni yo yashyizwe muri gahunda ya Guma mu rugo izamara ibyumweru bibiri.

Ku ikubitiro abarwayi bashya bari babonetse i Rusizi bari mu byiciro by’abacuruzi n’abashoferi bambukiranya imipaka gusa, ariko ngo bimaze kugaragara ko Coronavirus yageze no mu baturage basanzwe ari na yo mpamvu hafashwe izo ngamba nshya nk’uko Umunyamabanga wa Leta muri Minisiteri y’Ubuzima Dr Tharcisse Mpunga abivuga.

Yagize ati “Ku itariki ya mbere (Kamena 2020) twabonye abarwayi batanu, umunsi ukurikiyeho tubona barindwi, ejo (ku wagatatu tariki 03 Kamena 2020) tubona 12. Batanu twabonye mbere na barindwi bakurikiyeho, twabonaga ari abantu bagiye bakora ingendo zambukiranya imipaka, ariko imibare y’ejo yatweretse ko byarenze imipaka bigera mu baturage kuko abo bantu 12 ntaho bahuriye n’abo bantu bagiye hanze, bigaragaza ko indwara yavuye mu bambukiranya imipaka igera mu baturage.”

Dr. Mpunga avuga ko ibi bihangayikishije kuko kuri uru rwego byakorohera Coronavirus gukwirakwira muri iki gihe ingendo zasubukuwe.

Minisitiri w’Ubutegetsi bw’Igihugu Prof. Anastase Shyaka yatangaje ko Abanyarusizi bakwiye kubahiriza amabwiriza mashya bashyiriweho kuko biri mu nyungu zabo n’izigihugu muri rusange, kuko uburemere bw’icyorezo muri ako karere buruta ubwabaye ahandi hose mu gihugu.

Tariki 02 Kamena 2020 nibwo inama idasanzwe ya Guverinoma yemeje ko ingendo zihuza Intara n’Umujyi wa Kigali zisubukurwa mu gihugu hose, uretse mu turere twa Rusizi na Rubavu. Uretse akarere ka Rusizi, ingendo zijya mu Karere ka Rubavu na zo ntizahise zifungurwa, ariko ho izi ngamba nshya ntizakajijwe.

Dr. Tharcisse Mpunga avuga ko kugeza kuri uyu wa kane mu Karere ka Rubavu hamaze kuboneka umuntu umwe wanduye Coronavirus, kandi na we ngo ni umuturage wagezeyo avuye i Rusizi.

Minisitiri w’Ubutegetsi bw’Igihugu avuga ko nta kibazo gikomeye kirahagaragara cyatuma hafatirwa ingamba zisumbuyeho, ariko nanone akavuga ko nibigaragara ko hari ikibazo giteye amakenga bizakorwa, agasaba Abanyarubavu kwitwararika kugira ngo bitazagera kuri urwo rwego.

Inama yabaye hifashishijwe ikoranabuhanga

Yabivuze muri gahunda y’ibiganiro byahuje intumwa z’ibihugu by’u Rwanda na Uganda ndetse n’iz’ibihugu bihuza ari byo Angola na Repubulika Iharanira Demokarasi ya Congo (DRC) ziga ku kibazo cy’umwuka utameze neza hagati y’u Rwanda na Uganda, ibiganiro byabaye kuri uyu wa Kane tariki 04 Kamena 2020.

Muri ibyo biganiro byabaye hifashishijwe ikoranabuhanga, intumwa z’u Rwanda ziyobowe na Minisitiri w’Ububanyi n’Amahanga n’Ubutwererane Dr. Vincent Biruta mu gihe iza Uganda ziyobowe na Minisitiri w’Ububanyi n’Amahanga w’icyo gihugu Sam Kutesa.

Minisitiri Biruta yavuze ko u Rwanda rutewe impungenge n’uko Uganda ikomeje kurenga ku bikubiye mu masezerano ya Luanda, anavuga ko hari ingero zibigaragaza.

Mu ngero yatanze harimo kuba tariki 18 Gicurasi 2020 abagore babiri b’Abanyarwandakazi barajugunywe ku mupaka w’u Rwanda na Uganda babaye intere bitewe n’uko bari bahohotewe n’inzego z’umutekano muri Uganda.

Yanagaragaje ko Uganda ikomeje kwanga kurekura Abanyarwanda bafungiye muri icyo gihugu mu buryo bunyuranyije n’amategeko, ndetse n’imitwe ihungabanya umutekano w’u Rwanda ikaba ikomeje gukorera ku butaka bwa Uganda nta nkomyi.

Gusa ngo nyuma y’iperereza ryakozwe ku Banyarwanda bafungiwe mu magereza atandukanye muri Uganda, ngo basanze hari abagera ku 130 bazashyikirizwa u Rwanda mu cyumweru gitaha banyujijwe ku mipaka ya Kagitumba na Mirama, nk’uko Minisitiri Kutesa yabivuze.

Gusa yongeyeho ko hari abandi Banyarwanda 310 bafungiye muri Uganda, avuga ko bakurikiranywe n’ubutabera bwa Uganda.

Ibiganiro byabaye kuri uyu wa kane ni byo bya mbere bibaye nyuma y’ibyari byahuje abakuru b’ibihugu byombi byabereye ku mupaka wa Gatuna-Katuma tariki 21 Gashyantare 2020, ibyo biganiro bikaba byaranitabiriwe n’abakuru b’ibihugu bya Angola na Repubulika iharanira Demokarasi ya Congo.

Amafoto: Muzogeye Plaisir

Uhereye kuwa Kabiri tariki 20 Mata 2020, Abanyarwanda bashobora kumva indirimbo zibarirwa muri miliyoni 60 ziri mu mu bubiko bwa Apple, bitabaye ngombwa ko bazibika muri mudasobwa na telephone zabo.

Apple Inc yatangaje ko serivisi zayo za App store, Apple Arcade, Apple Music, Apple Podcasts na iCloud, ubusanzwe zitari zifunguriwe Abanyarwanda zafunguwe mu bindi bihugu 20, byinshi muri byo bikaba ari ibyo ku mugabane wa Afurika harimo n’u Rwanda.

Umuyobozi wungirije wa Apple ushinzwe serivisi ya Apple Music, Oliver Schusser, yatangaje ko bishimiye kugeza serivisi nyinshi za Apple ku bantu bo mu bihugu byinshi, akavuga ko bizeye ko abakiriya ba Apple bazavumbura za porogaramu nyinshi bazishimira zirimo iz’imikino n’umuziki.

Ibihugu bya Afurika byafunguriwe izo serivisi zose ni u Rwanda, Côte d’Ivoire, Repubulika iharanira Demokarasi ya Kongo, Gabon, Libya, Morocco na Zambia.

Mbere y’uko izi serivisi zifungurirwa Abanyarwanda, abafite ibikoresho by’ikoranabuhanga bya Apple mu Rwanda bishyuraga serivisi za App Store n’iz’umuziki bifashishije za aderesi z’amahanga, bakishyura bifashishije amakarita ya ‘credit cards’ bishyuriraho hifashishijwe ikoranabuhanga, serivisi bishyuye bakazishyura ku giciro cy’i Burayi usanga kiri hejuru cyane ugereranyije n’icyo muri Afurika.

Gufungura izo serivisi mu bihugu bya Afurika bizahendukira abafite ibikoresho bya Apple banabashe kuzishyura mu mafaranga y’u Rwanda.

Ibi byaguriye amarembo Apple ku buryo serivisi zayo ubu ziboneka mu mihugu 175 zigakoreshwa n’abasaga miliyoni 500 buri cyumweru.

Minisitiri w’Ubuzima Dr. Daniel Ngamije

Ubusanzwe umuntu yasabwaga kwambara agapfukamunwa igihe ari ahantu hashobora gutuma ahura n’abandi bantu, kugira ngo kamurinde mu gihe mu bo bahura haba harimo uwanduye Coronavirus.

Mu kiganiro Minisitiri w’Ubuzima yahaye Television y’u Rwanda yavuze ko byagaragaye ko kwambara agapfukamunwa ku buryo buhoraho ari imwe mu ngamba byagaragaye ko zizewe cyane mu guhashya icyorezo cya Covid-19.

Yagize ati “Abantu bambare udupfukamunwa baba bari mu rugo cyangwa bagiye muri za gahunda zemewe zituma umuntu ava mu rugo kuko bimaze kugaragara ko kukambara ku buryo buhoraho ari uburyo bwizewe bwo kwirinda”.

Minisitiri w’Ubuzima yavuze ko aya mabwiriza azatangira gushyirwa mu bikorwa kuva kuwa Mbere w’icyumweru gitaha, kuko inganda zatangiye gukora udupfukamunwa ku buryo buri muntu azajya akabona hafi kandi katamuhenze.

Imibare ya Minisiteri y’ubuzima yo kugeza kuri uyu wa Gatandatu tariki 18 Mata 2020, hagaragaye undi muntu umwe wanduye Coronavirus mu bipimo 712 byafashwe mu masaha 24, bituma umubare w’abanduye ugera 144.

Hanakize abarwayi bashya bane, bituma umubare w’abamaze gukira ugera kuri 69.

Minisitiri w’Ubuzima yavuze ko imibare y’abandura Coronavirus mu bihugu bya Afurika ikiri mikeya ugereranyije n’uko bimeze mu bindi bihugu, ariko avuga ko bidasobanuye ko abantu badakwiye kwirara.

Ati “N’abana n’abantu bato barandura bagapfa, ni ukuvuga ko buri gihugu kigomba kunoza gahunda yo guhangana n’iyi ndwara nk’uko twafashe izi ngamba zose zo kugira ngo abantu basuzumwe bamenye uko bahagaze, abatanduye birinde, abanduye bavurwe basubire mu miryango ari uko bigaragaye ko nta bwandu bagifite”.

Iyo nama yagombaga kuba kuri uyu wagatatu tariki 15 Mata 2020, abakuru b’ibihugu baganira ku ngamba ibihugu by’akarere bifite mu guhangana n’icyorezo cya COVID-19.

Ni inama yagombaga kuba mu buryo bw’ikoranabuhanga rya ‘videoconference’, ariko yasubitswe ku munota wa nyuma bisabwe na Repubulika ya Sudan y’Epfo, nk’uko Umunyamabanga Mukuru w’Umuryango wa Afurika y’Uburasirazuba, Libérat Mfumukeko yabitangaje abinyujije kuri Twitter.

Mfumukeko yatangaje ko indi tariki inama izaberaho izatangazwa nyuma.

Iyo nama yasubitswe mu gihe imibare y’abarwara COVID-19 igenda yiyongera mu bihugu bigize uyu muryango. Imibare yo kugeza kuri uyu wa gatatu tariki 15 Mata 2020, igaragaza ko u Burundi bumaze kugira abarwayi batanu, Kenya 216, u Rwanda 134, Sudani y’Epfo bane, Tanzania 53, na Uganda 55.

Iyi nama yagombaga no kwiga ku ngengo y’imari y’uwo muryango, ndetse n’ingaruka COVID-19 izagira ku bukungu n’imibereho by’abaturage b’Umuryango wa Afurika y’Uburasirazuba.

Ibikoresho byatangiye kugezwa mu bihugu bya Afurika

Ni icyiciro cya kabiri cy’inkunga y’ibikoresho bikwirakwizwa n’indege yahagurukiye Addis Ababa muri Ethiopia ejo ku wakabiri, itwaye ibikoresho birimo udupfukamunwa, uturindantoki, imyenda yifashishwa n’abaganga bari mu rugamba rwo kurwanya Covid-19, ibyuma bitanga umwuka (ventilators) n’ibikoresho byifashishwa mu gupima umuriro.

Ubuyobozi bw’Ishami ry’Umuryango w’Abibumbye ryita ku Buzima OMS/WHO, bwatangaje ko muri ibyo bikoresho harimo n’ibyatanzwe na Minisitiri w’Intebe wa Ethiopia Dr. Abiy Ahmed, n’umuryango Jack Ma Foundation w’umuherwe Jack Ma, mu rwego rwo kurwanya no gukumira COVID-19 muri Afurika.

Umuryango wa Afurika yunze Ubumwe ni wo uri kwifashishwa mu gutanga ibyo bikoresho ku bihugu bya Afurika, binyuze mu Kigo cya Afurika gishinzwe kurwanya no gukumira indwara (Africa CDC).

Umuyobozi Mukuru wa OMS, Dr. Tedros Adhanom Ghebreyesus, avuga ko ibyo bikoresho byatanzwe biri muri gahunda yagutse yo gutanga ibikoresho ku bihugu 95.

Yashimiye Umuryango wa Afurika yunze Ubumwe, Guverinoma za Leta zunze ubumwe z’Abarabu na Ethiopia, Jack Ma Foundation n’abandi bafatanyabikorwa ba OMS bakomeje gufasha kugira ngo haboneke ubushobozi bwo gukumira no kurwanya COVID-19 muri Afurika.

Ibyo bikoresho birimo ibyo kwipfuka mu maso bigera kuri miliyoni, ndetse n’ibindi bikoresho by’ubwirinzi bivugwa ko bihagije mu kurinda abakora mu nzego z’ubuzima kuri ubu bita ku barwayi basaga 30.000 ku Mugabane wa Afurika, hakabamo n’ibikoresho byo muri laboratwari byifashishwa mu gusuzuma ibipimo byafashwe ku barwayi.

Moussa Faki Mahamat, uyobora Komisiyo ya Afurika yunze Ubumwe, yavuze ko Afurika iha agaciro imbaraga abafatanyabikorwa bayo [Ishami ry’Umuryango w’Abibumbye ryita ku Buzima OMS/WHO, Ishami ry’Umuryango w’Abibumbye ryita ku Biribwa WFP, Jack Ma Foundation na Minisitiri w’Intebe wa Ethiopia], bashyira mu bikorwa byo kurwanya COVID-19 muri Afurika.

Yavuze ko Umuryango wa Afurika yunze Ubumwe uzakomeza guhuza ibikorwa n’ubushobozi uko bikwiye, kugira ngo ibihugu bigize uwo muryango bigire ubushobozi bwo kubona ibyangombwa nkenerwa mu gukumira no guhashya COVID-19.

Kuva Leta itangaje ingamba zo gukumira ikwirakwira ry’icyo cyorezo abantu bose basabwe kuguma mu ngo, kereka abafite impamvu zumvikana zabasaba gukora ingendo, ariko ngo bimaze kugaragara ko hari ababeshya abapolisi ku mpamvu zatumye bava mu ngo.

Umuvugizi wa Polisi y’u Rwanda, CP John Bosco Kabera

Umuvugizi wa Polisi y’u Rwanda, CP John Bosco Kabera, mu kiganiro yagiriye kuri Television y’igihugu, yavuze ko ababeshya abapolisi bafatiwe ingamba zizatuma abantu badakomeza kuva mu rugo nta mpamvu zumvikana bafite.

Yagize ati “Ushaka kunanura amaguru ayananurire mu rugo, urushye aruhukire mu rugo, ushaka kuganira na we aganire n’uwo babana cyangwa akoreshe telefoni. Uwo bizananira burundu akarenga ku mabwiriza akajya kubeshya polisi, twashyizeho ingamba zo kubaherekeza no kugenzura kugira ngo tumenye ukuri kwa buri wese. Abo tuzasanga babeshya bazafatwa, bazafungwa ndetse bacibwe amande”

Umuvugizi wa Polisi yanavuze ko abakomeza kugendesha ibinyabiziga polisi igiye kubafasha kuguma mu rugo no kubahiriza amabwiriza ibacyura iwabo ibinyabiziga byabo bigafatirwa kugeza igihe cyatanzwe kirangiye.

Abazakomeza kutubahiriza amabwiriza yashyizweho mu rwego rwo gukumira iki cyorezo ngo bazajya bafatwa nk’abashaka kwandura no kwanduza abandi.

Imirimo y’ubuhinzi yo irakomeza ariko na yo igakorwa hubahirizwa amabwiriza yo kwirinda Coronavirus, ndetse n’abatwara ibinyabiziga bigemura ibiribwa bakaba batagomba kurenga babiri mu kinyabiziga.

Polisi yanihanangirije abantu bose bahamagara umurongo wa 114 washyiriweho gutangirwaho amakuru ajyanye na Coronavirus bakawukoresha babaza ibiterekeranye.

Abazongera kuwuhamagara bavuga ibyo utagenewe ngo bagiye kujya bafatwa bakurikiranwe n’amategeko.

Itangazo urwo rugaga rwasohoye risaba abayoboke b’amadini n’amatorero kudakuka imitima.

Urwo rugaga rwasabye abanyamadini gusangiza no gusobanurira abayoboke bayo ayo mabwiriza kugira ngo birinde. Rwanabasabye gusobanurira abayoboke kwirinda amakuru ashobora kubayobya akwirakwizwa ku mbuga nkoranyambaga.

Musenyeri Antoine Kambanda

Umuyobozi w’urwo rugaga Musenyeri Antoine Kambanda uyobora Arki-episkopi ya Kigali, yibukije abayoboke b’amadini n’amatorero ko amakuru yizewe kuri iki cyorezo atangwa n’inzego zibifitiye ububasha zirimo Ministeri y’ubuzima, ikigo cya RBC gishinzwe iby’ubuzima ndetse n’ishami ry’Umuryango w’Abibumbye ryita ku Buzima (OMS).

Amadini n’amatorero yasabwe gukora ubukangurambaga mu buryo bwose bushoboka by’umwihariko akangurira abayoboke kwirinda ingendo zitari ngombwa bakaguma mu ngo, kwirinda gukoranaho no guhana ibiganza, ndetse no gukaraba intoki neza kandi kenshi.

Abayobozi b’amadini n’amatorero basabwe gushyira imiti isukura intoki ahahurira abantu, ndetse n’ababyeyi bagasabwa kwibutsa abana gukurikiza amabwiriza y’isuku yatanzwe na Guverinoma y’u Rwanda.

Musenyeri Kambanda avuga ko amadini n’amatorero asengera abagezweho n’ingaruka z’iki cyorezo, akanasaba Imana ngo igihagarike kandi imurikire abashakashatsi kugira ngo babone umuti wacyo.

Umunyarwandakazi Alice K Cyusa uba mu mujyi wa South Bend wo muri Leta ya Indiana muri Leta zunze ubumwe za Amerika, avuga ko ubuzima busa n’ubwahagaze kuko za resitora zose n’amashuri (amato n’amakuru) yose yabaye afunze.

Uretse ibyo kandi abantu barenze 10 ngo ntibemerewe kuba bari kumwe, ndetse bakaba barasabwe gukaraba intoki kenshi no kuguma mu ngo.

N’ubwo Amerika ari igihugu cy’igihangange ngo gitewe ubwoba n’icyorezo cya Covid-19 nk’uko Cyusa akomeza abivuga. Ati “Nk’aha hari muganga wanjye twavuganaga ambwira ko turamutse tugize ibyago abantu barenze igihumbi bagafatwa, ibitaro bitanu biba muri uyu mujyi w’abantu 150,200 bitabasha kubakira ku buryo byaba ari ingorane zikomeye.”

Alice Cyusa uba muri Amerika

Muri Amerika na ho ibintu bihuza abantu benshi byarahagaze ku buryo insengero zifunze, ariko kugeza ubu ngo “nta Munyarwanda uri yo urafatwa n’icyo cyorezo” nk’uko Cyusa abivuga.

Yongeraho ko abaturage bafite ubwoba bwinshi ku buryo bahaha ibintu byinshi byo gukoresha mu gihe kirekire, batekereza ko mu minsi iri imbere bashobora kubuzwa gusohoka mu mazu yabo.

Ati “Mu masoko ibintu nta bihari abantu barahashye cyane bisaba ko hashyirwaho abantu b’umutekano kugira ngo abahaha batarwana kuko hari igihe barwana bapfa impapuro z’isuku ni zo nabonye barwanira cyane, ikindi imiti isukura intoki yica udukoko ntushobora kuyibona.”

Gusahurira mu nduru

Kugeza ubu abaturage bagabanyirijwe ubwinshi bw’ibyo bashobora guhahira ingunga imwe, ku buryo nko ku mata, umugati n’amagi ntawemerewe guhaha ibirenze bibiri.

Uretse kuba abantu bahaha ibintu byinshi byaba ibikoresho byo kwifashisha mu ngo n’ibikoresho by’isuku ngo batazabibura, hari n’abari batangiye kubirangura bagamije kuzabigurisha ku mafaranga menshi byatangiye kubura.

Ku mata, amagi n’umugati ntawemerewe kugura ibirenze bibiri

Cyusa agira ati “Hari abasore babiri bavukana baranguye imiti isukura intoki, agacupa kamwe kagura idolari rimwe n’ama senti 50, batangira kukagurisha nk’amadorari 50 cyakora ubuyobozi buza kubimenya. Ntabwo byoroshye kuba wahaha waba ushaka umuceri, waba ushaka amazi, turizera wenda ko iki cyorezo kirangira vuba abantu bagasubira kubaho nk’uko byari bisanzwe.

Abarenze ku mabwiriza yo kuguma mu ngo bacibwa amande

Nadine Shimo uba mu mujyi wa Lille mu Bufaransa na we avuga ko ubuzima busa n’ubwahagaze muri icyo gihugu, kuko amaresitora n’ibikorwa by’ubucuruzi budakenerwa umunsi ku munsi byafunzwe, ndetse n’abakozi bagasabwa gukorera mu ngo aho bishoboka.

Ibi byose ngo bigamije kugabanya ikwirakwizwa rya Covid-19 ku buryo abaturage bahawe amabwiriza yo kuguma mu ngo uyarenzeho agacibwa amande.

Ati “Kugira ngo usohoke, ugomba kuba ufite uruhushya ruriho impamvu zitumye usohoka. Ni ukuvuga usohotse ku mpamvu itari kuri urwo ruhushya ucibwa amande y’ama Euro 135 (asaga gato 135.000 uyavunje mu Manyarwanda) kugira ngo abantu bagerageze kuguma mu rugo badakwirakwiza virus”

Mu mijyi myinshi urujya n’uruza rwarahagaze nk’uko bigaragara aha mu Butaliyani (ifoto: Gulfnews)

Mu Bufaransa kandi kimwe no mu bindi bihugu bitandukanye byugarijwe n’iki cyorezo ku mugabane w’u Burayi, ngo bashyizeho gahunda yo kugabanya abakozi ku kazi ku buryo bakora basimburana.

Gusa Leta ngo yashyizeho uburyo bwo gufasha abaturage kubona ibyo kubatunga no kubona ubundi buryo bwo kubaho.

U Butaliyani buri mu bihugu byugarijwe cyane na Coronavirus (Ifoto: AFP)

Uwo mugabo yashyizwe mu kato mu gihe ari gukurikiranwa n’abaganga, umugore we na we akaba yarishyize mu kato, kandi ntazi uburyo umugabo we yanduye iyo virus.

Uyu mugabo yabwiye abakurikirana ibikorwa by’ubuzima mu majyaruguru y’u Bwongereza ko yanduye nyuma y’urugendo rw’ibanga yagiriye hanze y’u Bwongereza agiye guca inyuma umugore we.

Uyu mugabo utatangajwe amazina ari mu kigero cy’imyaka 30. Ajyana n’iyo nshoreke ye mu Butaliyani ngo yari yabwiye umugore we ko agiye mu rugendo rw’akazi [k’ubucuruzi] mu Bwongereza, umugore we akaba ataramenye uburyo umugabo we yageze mu Butaliyani.

Akiva mu Butaliyani yijyanye ku bitaro afite ibimenyetso bya coronavirus birangira basanze arwaye Covid-19.

Uwo mugabo uvugwaho kuba ari umukire unafite akazi kamusaba gukora ingendo z’indege cyane, yabwiye abaganga ko inshoreke bajyanye mu Butaliyani ari umugore ariko yanga kuvuga izina rye.

Umugore we ubu yishyize mu kato mu nyubako batuyemo mu majyaruguru y’u Bwongereza.

Ikinyamakuru The Sun cyanditse ko uyu mugabo ari we uri kuvugwa cyane n’abayobozi b’inzego z’ubuzima mu Bwongereza, “ikibazo cye kikaba cyari kuba gisekeje iyo kitaba gikomeye.”

Uyu mugabo yemeje ko urugendo rwe mu Butaliyani rwari urwo guca inyuma umugore we kandi yemeza ko umugore we atari azi ko ari ho yagiye.

Uwo mugore ngo atekereza ko umugabo we yanduye Coronavirus muri urwo rugendo rw’akazi yamubeshye ko yagiyemo mu Bwongereza.

N’ubwo uyu mugabo yabwiye abaganga ibyabaye byose, yavuze ko nta kintu na kimwe cyatuma avuga iyo nshoreke ye bari bajyanye mu Butaliyani.

Avuga ko yari yakoze ibishoboka byose ngo umugore we atarabukwa iby’urugendo rwe mu Butaliyani, ariko ntiyatekereza ku cyorezo cya Covid-19 yashoboraga guhurirayo na cyo.

Gusa kuri ubu ngo ashima Imana ko yabashije gusubira mu gihugu cye ingendo z’indege zitarahagarikwa kuko byari kumusaba ibindi bisobanuro.

Uyu mugabo kuri ubu ahangayikishijwe n’uko icyaha yakoze cyo guca inyuma uwo bashakanye kiri kumenyekana kurusha uko ahangayikishijwe n’ubuzima bwe.

U Butaliyani ni cyo gihugu ku mugabane w’u Burayi cyibasiwe cyane n’icyorezo cya Covid-19, abagera ku 2,158 bakaba bamaze gupfa muri icyo gihugu. Umukuru kurusha abandi mu bapfuye ni uw’imyaka 95 mu gihe umuto kurusha abandi ari uw’imyaka 39.

Ubuyobozi bw’uyu muryango bwabitangaje bubinyujije kuri Twitter, nyuma y’uko u Rwanda ruwandikiye rusaba ko iyo nama ndetse n’izindi zose zisaba ubwitabire bw’ibihugu binyamuryango zaba zisubitswe.

Itangazo ryashyizweho umukono na Minisitiri w’Ububanyi n’Amahanga n’ubutwererane, Dr. Vincent Biruta, ryibutsaga ubuyobozi bw’uwo muryango ko ibihugu byinshi ku isi, birimo n’ibigize EAC, byafashe ingamba zo kugabanya ingendo no guhagarika cyangwa gusubika zimwe mu nama mpuzamahanga byari kwakira, mu rwego rwo kwirinda no gukumira icyorezo cya Coronavirus.

Iri tangazo rivuga kandi ko Leta y’u Rwanda yagabanyije ingendo z’imbere no hanze y’igihugu ku bayobozi, ku buryo byagira ingaruka ku mubare w’abasabwa kwitabira inama za EAC.

U Rwanda rwari rwasabye ko aho bishoboka, izindi nama zakorwa hifashishijwe uburyo bw’ikoranabuhanga bwa video conference.

Due to the outbreak and rapid spread of the Novel Coronavirus #Covid_19 the East African Community has postponed the 21st EAC Summit until further notice. All other meetings and activities of EAC that require large gatherings have also been suspended. pic.twitter.com/HzZoRm7EYv

— East African Community (@jumuiya) March 13, 2020

Inama ya 21 y’abakuru b’ibihugu bigize EAC yari iteganyijwe mu kwezi kwa 11 umwaka ushize, ariko yimurirwa mu kwezi kwa kabiri uyu mwaka wa 2020.

Tariki 22 z’ukwezi gushize kwa kabiri nabwo uyu muryango watangaje ko iyi nama yari iteganyijwe kubera Arusha tariki 29/02/2020 yongeye gusubikwa bisabwe na Sudani y’Epfo, kugira ngo ibanze ishyireho guverinoma.

Claude Muhayimana (Ifoto: Internet)

Uwo munyarwanda witwa Claude Muhayimana wahawe ubwenegihugu bw’u Bufaransa mu 2010 azatangira kuburanishwa tariki 29 Nzeri kugeza tariki 23 Ukwakira 2020, nk’uko byatangajwe n’ishyirahamwe CPCR, ry’imiryango iharanira ko abakoze Jenoside mu Rwanda baburanishwa.

Iryo shyirahamwe rikorera mu Bufaransa ryatangaje ko Muhayimana akurikiranyweho ubufatanyacyaha mu mugambi wa Jenoside yakorewe Abatutsi no mu byaha byibasiye inyokomuntu.

Tariki 4 Kamena 2013 nibwo CPCR yatanze ikirego, dosiye ye yoherezwa mu rukiko mpanabyaha (Cour d’Assise) rw’i Paris mu Bufaransa tariki 9 Ugushyingo 2017. Nyuma y’imyaka itatu nibwo Muhayimana agiye kugezwa imbere y’inteko iburanisha, igihe CPCR igaragaza ko ari kirekire cyane ugereranyije n’igihe ikirego cyatangiwe.

Ishyirahamwe CPCR rifite intego yo gutanga ibirego ku bantu bose bakekwaho ibyaha bya Jenoside yakorewe Abatutsi baba mu Bufaransa, rikaba ridahwema kugaragaza ikibazo cyo gutinda mu kuburanisha imanza z’abakurikiranyweho ibyaha bya Jenoside bari mu Bufaransa.

CPCR yanatangaje ko dosiye z’abandi Banyarwanda babiri bakekwaho ibyaha bya Jenoside zagejejwe mu rukiko mpanabyaha rwa Paris. Abo ni Sosthène Munyemana, ubu akaba ari umuganga mu mujyi wa Villeneuve-sur-Lot mu Bufaransa, ndetse na Laurent Bucyibaruta wahoze ari Perefe mu Rwanda, ubu akaba ari mu kiruhuko cy’izabukuru muri Komini ya Saint-André-lès-Vergers.

CPCR yatanze ikirego cya Munyemana mu 1995, icya Bucyibaruta gitangwa mu 2000 ariko bombi barajuriye.

CPCR ivuga ko itumva impamvu ubutabera bw’u Bufaransa budatangira kuburanisha abo bantu ku gihe, ikagaragaza ko hari impungenge z’uko bishobora kurangira bamwe mu bakurikiranyweho ibyo byaha batorotse.

Izindi manza zaburanishijwe n’Ubufaransa ni urwa Pascal Simbikangwa wahoze mu barinda Perezida mbere ya Jenoside yakorewe Abatutsi, akaba yarahanishijwe igifungo cy’imyaka 25 mu mwaka wa 2014. Uyu yarajuriye ariko aratsindwa.

Mu mwaka wa 2016 nabwo Octavier Ngenzi na Tito Barahira bahoze ari ba Burugumesitiri mu Burasirazuba b’u Rwanda bahanishijwe igifungo cya burundu nyuma yo guhamwa n’ibyaha bya Jenoside n’ibyibasiye inyokomuntu.

Komisiyo y’igihugu ishinzwe kurwanya Jenoside igaragaza ko Muhayimana yari umwe mu bayobozi b’interahamwe muri Kibuye, nk’umushoferi, akaba yaratwaraga Interahamwe aho zabaga zigiye kwica, ndetse na we ubwe ngo akaba yarishe abantu muri Jenoside.

Urubuga rusanzwe rwa Irembo ni uku rugaragara

Ibi byose bizatangirwa ku rubuga rushya rwiswe IremboGov 2.0 rwakorewe mu Rwanda nk’uko ubuyobozi bw’Irembo bwabitangarije mu kiganiro n’abanyamakuru cyamurikiwemo urwo rubuga rushya tariki 12 Gashyantare 2020.

Serivisi za Irembo ziboneka mu bice byose by’igihugu, ku buryo abaturage bazifashisha basaba serivisi zitangwa na Leta zirimo inyandiko n’ibyemezo birimo iby’amavuko, ibyo gushyingirwa, n’ibikoreshwa mu nkiko.

Abaturage bahawe serivisi binyuze kuri urwo rubuga bavuga ko ruborohereza, ariko hari serivisi zarutangirwagaho mu buryo butanoze, ibyo minisitiri w’ubutegetsi bw’igihugu Prof Anastase Shyaka yise ‘agasupu’.

Yagize ati “Bahoze bavuga ibyangombwa bisaza, icyangombwa cy’uko wapfushije umuntu bakakubwira ngo genda ushake ikindi cya kindi cyarashaje kandi umuntu ntiyazutse, ugasanga bibaye agasupu. Umuntu agasaba icyangombwa cy’uko umwana yavutse ari aho ntiyapfuye bati umwana yaravutse ariko icyangombwa kirashaje cyagombaga kuba ari amezi atatu none wowe wakizanye nyuma y’amezi atanu ugasanga na byo ni agasupu.”

Urubuga rushya rwa IremboGov 2.0 ruraboneka kuri murandasi

Ibi bibazo ni byo urubuga rushya rwa IremboGov 2.0 rwamuritswe rugiye gukemura. Kuri ibyo hiyongeraho kuba ruzarushaho korohereza abaturage kubona serivisi batavunitse, bitandukanye n’uko byagendaga hakoreshejwe urubuga rwa Irembo 1.0 rwari rusanzwe, nk’uko Keza Faith, umuyobozi mukuru wa Irembo abivuga.

Ati “Inzego zakoraga ku giti cyazo. Nk’ushaka gutanga ubutaka bwe ku wundi muntu, urwego rubishinzwe rukamusaba ibintu byinshi bitangwa n’urundi rwego. Urundi rugero, hari igihe ujya gusaba icyemezo cy’uko uri ingaragu wamara kugisaba ku Irembo bakagusaba kujya mu mudugudu wawe gushaka abantu bakuzi. Mukajya ku rundi rwego rwa Leta bakagusinyira ko bakuzi bakabona kuguha icyangombwa kandi ibyo byose ntabwo byakagombye kuba bimeze gutyo. Ibisabwa ku muturage, niba Leta ibifite duhuze izo nzego zibifite zivugane ziguhe serivisi ushaka igihe uyishakiye utagombye kuzizengurukamo.”

Umuyobozi mukuru wa Irembo (ibumoso), Minisitiri w’Ikoranabuhanga na Inovasiyo (hagati) na Minisitiri w’Ubutegetsi bw’Igihugu (i buryo) mu kiganiro n’abanyamakuru cyamurikiwemo IremboGov 2.0

N’ubwo serivisi zatangwaga mu buryo bw’ikoranabuhanga, ngo byari igice kuko umuturage yasabaga serivisi agafata n’umwanya wo kujya gufata icyemezo yasabye.

Uru rubuga rushya rwa IremboGov 2.0 rwatangiranye serivisi 22 za Minisiteri y’Ubutegetsi bw’Igihugu (MINALOC), zizatangwa hifashishijwe ikoranabuhanga 100%, ibyemezo byasabwe bigahererekanywa hagati y’inzego hadakoreshejwe impapuro nk’uko Minisitiri Ingabire Paula w’Ikoranabuhanga na Inovasiyo abivuga.

Yagize ati “Izo serivisi 22 ziri ku IremboGov 2.0 zizajya ziboneka mu buryo [bw’ikoranabuhanga] bwa e-Certificate. Niba watanze email yawe uzajya ubona icyo cyemezo muri email. Niba watanze nomero ya telefoni uzajya uhabwa ubutumwa bukwereka aho wanyura kugira ngo ubone cya cyemezo. Kubera iryo koranabuhanga, nta rugendo umuntu azaba agikora, n’anakenera gukoresha icyo cyemezo mu gusaba indi serivisi, ntabwo azaba akeneye ko gisohoka ku rupapuro [Printing], icyo akora ni ukuyongera mu buryo bw’ikoranabuhanga ku byangombwa asabwa kugira ngo ahabwe indi servisi.”

Mu bindi urubuga rushya rwa IremboGov 2.0 rwamuritswe ruzafasha, harimo koroshya inzira umuntu yanyuragamo asaba serivisi, umuntu akazajya anyura mu nzira eshatu gusa ari zo gusaba, kwemeza ibyo wasabye no kwishyura. Imbuga zombi, Irembo 1.0 na IremboGov 2.0 zirakomeza gukora kugeza ubwo serivisi zose ziri ku Irembo 1.0 zizaba zamaze kwimurirwa ku IremboGov 2.0.

IremboGov 2.0 rugiye kurushaho korohereza abaturage kubona serivisi batavunitse

Umuyobozi mukuru wa Irembo yavuze ko bagiranye ubufatanye mbere na mbere na MINALOC ku rubuga rwa IremboGov 2.0, bitewe n’uko serivisi z’iyo Minisiteri zirimo ibyemezo by’amavuko, iby’ingaragu n’iby’abashyingiranywe biza ku isonga mu bisabirwa ku Irembo, bikaba byihariye 20% ya serivisi zose zisabwa kuri urwo rubuga.

Ikindi kandi mu bakozi 3000 binjira mu makonti yabo kuri urwo rubuga buri munsi bafasha abaturage, 60% yabo ngo babarizwa muri MINALOC, hakiyongeraho ingingo y’uko iyi Minisiteri ishaka gutanga serivisi zayo zose hifashishijwe ikoranabuhanga.

Kuva mu mwaka wa 2015 Irembo ritangijwe, ritangirwaho serivisi 98 za Leta, ibintu byorohereza Abanyarwanda miliyoni umunani n’abanyamahanga bandi basabira serivisi zitandukanye kuri urwo rubuga.

Abatawe muri yombi barimo umugore umwe n’umukozi bavuga ko ari uwa MTN wambaye umupira w’umuhondo uriho n’ibirango bya MTN

Ni abagabo n’abasore 14 bakomoka mu Murenge wa Nyakarenzo mu Karere ka Rusizi, ndetse n’umugore umwe na we washatse muri uwo murenge, bibumbiye mu itsinda ry’abatekamutwe bitwa ‘Abameni’ bavuga ko rimaze igihe kinini rikorera i Nyakarenzo.

Batawe muri yombi mu bihe bitandukanye uhereye tariki 28 Mutarama 2020, umwe muri bo w’imyaka 25 akaba yavuze ko biba abantu bakoresheje simukadi (sim card) za MTN zikoreshwa n’abayifasha gutanga serivisi za MoMo hirya no hino mu gihugu.

Yagize ati “Bazanaga ziriya simukadi bakanyereka uko umuntu atekereza nomero ya telefoni ugatomboza ureba amafaranga ari kuri konti ya MoMo y’iyo nomero. Ushyiramo icyemezo [nk’ubikuza] ugashyiramo ibihumbi 10 byakwemera ugashyiramo 20 byakwemera ugakomeza kugeza uguye ku mubare w’amafaranga uwo muntu afite kuri konti ye ya MoMo”.

Akomeza agira ati “Umuntu iyo afite nk’ibihumbi 75, uhita umwohereza ubutumwa bugaragaza ko yakiriye ibihumbi 74, ukamuhamagara umubwira ko amafaranga ayobye umusaba kuyagusubiza, yabikora nyuma akaza gusanga ari amafaranga ye yagiye”.

Izo simukadi bakoreshaga mu kwiba abantu amafaranga kuri konti zabo za MoMo, ubusanzwe imwe ngo igura ibihumbi bitanu, ushaka kuyigura akerekana indangamuntu na numero y’ubucuruzi izwi nka TIN number, kugira ngo yemererwe gutanga servisi za Mobile Money ku bazishaka.

Aba batawe muri yombi ariko ngo baziguraga badatanze ibyo byangombwa babifashijwemo n’umugore bafunganywe, wavuze ko yaziguraga ku mu kozi wa MTN ku giciro cyo hejuru, hanyuma uwo mugore akaziha bagenzi be b’Abameni babanje kumuha agashimwe.

Agira ati “[Uwo naziguragaho] yarambwiye ngo bitagombye kumurushya kuko nta byangombwa namuhaye, simukadi arayimpera ibihumbi 10. Mu kuzitanga sinakurikiranaga icyo abo nazihaye bazikoresha, njye nakurikiranaga ubukomisiyoneri nirebera amafaranga bampaga kuri buri simukadi nagurishije. Amafaranga y’ubukomisiyoneri nariye ni nk’ibihumbi 50, simukadi natanze zo ntiziri munsi ya 45 cyangwa 50”.

Uwo mukozi bavuga ko ari uwa MTN wabahaga izo simukadi bitanyuze mu nzira zemewe na we yatawe muri yombi. Ngo yakoreraga ikompanyi yitwa PhoneCom ifitanye amasezerano y’imikoranire na MTN, akaba yari ashinzwe kugeza izo simukadi ku bazishaka.

Marie Michelle Umuhoza, Umuvugizi wa RIB, yavuze ko uretse icyaha cy’uburiganya, aba bose uko ari 15 banakurikiranyweho ikindi cyaha cyo kurema umutwe w’abagizi ba nabi.

Ati “Bakurikiranyweho ibyaha bibiri, icyo kwihesha ikintu cy’undi hakoreshejwe uburiganya gihanishwa igifungo kiri hagati y’imyaka ibiri n’imyaka itatu n’amande ari hagati ya miliyoni ebyiri kugeza kuri miliyoni eshanu.

Umuvugizi wa RIB yavuze ko uretse icyaha cy’uburiganya, Abameni banakurikiranyweho icyaha cyo kurema umutwe w’abagizi ba nabi

Banakurikiranyweho icyaha cyo kurema umutwe w’abagizi ba nabi nk’uko babyivugira ko bari ‘Abameni’ b’abatekamutwe. Igihano ni igifungo kiri hagati y’imyaka irindwi kugeza ku myaka 10, ariko hakaba n’ibindi bintu twakwita impamvu nkomezacyaha, aho ushobora gusanga igihano ari igifungo kiri hagati y’imyaka 15 na 20”.

Kugira ngo ubujura aba bantu bakora bumenyekane byatewe nuko hari umuntu wari umaze kwibwa amafaranga 500.000 kuri Mobile Money binyuze muri ubu buryo.

Uwo ngo yatanze ikirego kuri RIB sitasiyo ya Kicukiro agaragaza na nomero zamuhamagaye zitangira gukurikiranwa kugeza bamwe bafashwe.

Umuvugizi wa RIB avuga ko hari abatarafatwa kugeza ubu, agasaba abantu bose kugira amakenga igihe hari umuntu ubahamagaye ababwira ko yayobereje amafaranga kuri numero zabo.

Mbere yo kugira uwo wohereza amafaranga ngo uba ukwiye kubanza kureba kuri konti yawe ko yagezeho koko, kandi ukirinda gutanga imibare y’ibanga ukoresha mu gihe hagira uyigusaba.

Umuyobozi wa Polisi y’u Rwanda DCG Dan Munyuza yabivuze kuri uyu wa kane tariki 23 Mutarama 2020, mu muhango wo gutangiza ihuriro ry’urubyiruko rw’abakorerabushake mu gukumira no kurwanya ibyaha ryitabiriwe n’abagera ku 1500 baturutse mu ntara zose z’igihugu.

Uru rubyiruko ruhagarariwe mu bice byose by’igihugu, rwagiranye amasezerano y’imikoranire na Polisi y’u Rwanda mu 2015. Urwo rubyiruko rwagize uruhare mu bikorwa byinshi birimo iby’iterambere no gukumira ibyaha, nk’uko umunyamabanga mukuru w’urubyiruko rw’abakorerabushake mu gukumira no kurwanya ibyaha Bayisenge Twahirwa Eric yabigaragaje.

Yagize ati “Turavuga ngo nkunda u Rwanda ntabwo iba ku munwa, ahubwo iba mu bikorwa. Nk’umwaka ushize wa 2019 twubatse imirima y’igikoni irenga ibihumbi ijana na mirongo itatu (130.000) mu guhangana n’ikibazo cy’igwingira n’imirire mibi mu bana. Twakoze ubukangurambaga bwo kwigisha gutegura indyo yuzuye, kwirinda amakimbirane mu miryango, kudaterana inda mu rubyiruko... Mu mwaka ushize twasubije abana barenga 1700 mu ishuri bari barataye, twubaka amazu arenga 600, dusana arenga 3000. Ni ibikorwa bikorwa n’urubyiruko rubikora rubikunze”

N’ubwo uru rubyiruko rwagize uruhare runini mu bikorwa byahinduye ubuzima bw’abaturage, umuyobozi wa Polisi y’u Rwanda DCG Dan Munyuza yavuze ko umubare wabo ukiri muke.

Kuri ubu babarirwa mu bihumbi 380, ku buryo hari intego yo kongera uyu mubare umwaka wa 2020 ukazarangira bageze nibura kuri miliyoni nk’uko umuyobozi wa Polisi y’u Rwanda yabivuze.

Ati “Baracyari bake. Icyifuzo ni uko Abanyarwanda bishyira bakizana ntawe uhungabanya umutekano wabo. Kugira ngo ibyo tubigereho ni uko dukomeza kongera umubare wabo. Mu ntego dufite ni uko uyu mwaka uzarangira nibura umubare wabo ugeze kuri miliyoni kuko uko tuba benshi ni nako umusaruro ugaragara tukagera kuri byinshi bigamije kubungabunga umutekano w’igihugu cyacu no guhashya ibyaha ibyo ari byo byose byahungabanya umutekano.”

Umunyamabanga mukuru w’urubyiruko rw’abakorerabushake mu gukumira no kurwanya ibyaha yavuze ko hari icyizere cy’uko intego ya Polisi izagerwaho. Ibi ngo abyemeza ahereye ku ngamba n’ubundi bafite z’uko umukorerabushake umwe akora ubukangurambaga butuma yinjiza abandi babiri bashya, mu cyo bise “X plus two”.

Ati “Ubu noneho tugiye kuva kuri ‘X plus two’ tugere kuri ‘X plus four’ aho umukorerabushake umwe ashobora kwinjiza abandi bane bashya cyangwa batandatu cyangwa 10”.

Uru rubyiruko n’ubwo rukora akazi gakomeye mu gukumira no kurwanya ibyaha, ngo hari ubwo gutanga amakuru ku banyabyaha birugiraho ingaruka nk’uko byavuzwe na Solange Uwambajimana wo mu Murenge wa Kimonyi mu Karere ka Musanze.

Yatanze urugero rw’umukorerabushake mugenzi we wo mu Murenge wa Cyuve wigeze gutanga amakuru ku munyabyaha agaterwa ubwoba n’abo yari atanzeho amakuru ariko polisi ngo yamucungiye umutekano.

Umuvugizi wa Polisi y’u Rwanda, CP John Bosco Kabera, yavuze ko abakorerabushake mu gukumira no kurwanya ibyaha badakwiye kugira ubwoba mu gihe batanga amakuru ku banyabyaha, avuga ko Polisi ibari hafi mu gihe hagira uzizwa kuba yatanze amakuru.

Ati “Icyo twabizeza ni ubufatanye. Turabizi ko umuntu wenda gukora icyaha ataba yifuza ko amakuru amureba amenyekana cyangwa ngo atangwe, ariko turabizeza ko tubari hafi ntibagatinye gutanga amakuru y’abanyabyaha ngo ni uko abo bayatanzeho babareba nabi”.

Minisitiri w’umutekano Gen Patrick Nyamvumba wafunguye ihuriro ry’uru rubyiruko yashimye imikorere yarwo n’umusanzu rutanga mu kubaka igihugu. Yarusabye kongera imbaraga mu bikorwa byo kuzamura imibereho myiza y’abaturage n’iterambere, ariko rukabijyanisha no kugira umuco wo gukunda igihugu no kwimakaza indangagaciro z’umuco nyarwanda.

Abayobozi mu nzego zitandukanye bakurikiye imurikwa ry’ubushakashatsi bwa RICH

Ni ubushakashatsi bwamuritswe tariki 20 Mutarama 2020, bwakorewe mu bigo birindwi bya Isange One Stop Center bya Shyira, Gisenyi, Remera Rukoma, Kabgayi, Gitwe, Kabutare na Kacyiru, bukaba bwarakozwe kuva tariki ya mbere Mutarama kugeza ku ya 31 Ukuboza 2018.

Ubwo bushakashatsi bugaragaza ko benshi mu bahohotewe bangana na 67,9% bari mu kigero cy’imyaka iri hagati ya 10 na 17, mu gihe abandi bangana na 13% y’abahohotewe bari munsi y’imyaka itanu.

Ubwo bushakashatsi bwakorewe ku bana b’abakobwa 1,951, bukagaragaza ko abana bahohoterwa cyane n’abaturanyi n’inshuti z’imiryango ya bo. Ingero nyinshi z’ihohoterwa zigaragaza ko ribera cyane iwabo w’umwana wahohotewe, cyangwa aho awasambanyije umwana atuye n’ahandi hantu hatandukanye harimo ibihuru n’amazu atuzuye.

Umwe mu bana bakorewe ihohoterwa, w’imyaka 15 avuga ko yahohotewe na muramu we, ariko abura uwo yatura ikibazo cye.

Agira ati “Nagiye kuba kwa mukuru wanjye, muramu wanjye ni we wampohoteye antera inda. Nabibwiye mukuru wanjye turashwana, na mama ubwe yumva ko nsenyeye mukuru wanjye, ba papa barantererana nkomeza kwihangana sinakuramo inda Imana iramfasha ndayibyara”.

Agahinda k’uyu mwana agasangiye n’abandi bagenzi be benshi bahohoterwa, ubuzima bwabo bukajya mu kaga. Mugenzi we w’imyaka 16, na we avuga ku bibazo yahuye na byo nyuma yo gushukwa n’umusore w’imyaka 25 wahise amugira umugore.

Ati “Icyo gihe nari mfite imyaka 14 mpura n’umusore aranshuka anjyana iwabo amarana icyumweru. Iwacu baje kubimenya bamaze igihe banshaka barambuze, ariko bamvanyeyo yaranteye inda baramufata baramufunga. Ubu ishuri nahise ndivamo”.

Ubushakashatsi bwa RICH bugaragaza ihohoterwa ritandukanye ryagiye rikorerwa abo bana, ririmo kubakorakora, kubasambanya mu gitsina no mu kibuno, hakaba n’abasambayijwe mu kanwa n’ubwo ari bo bake.

Mu bakoze iryo hohotera 49,7% gusa ngo ni bo bashyikirijwe ubutabera, abandi barenga 50% bakaba batarigeze bahanwa.

Igitabo gikubiyemo ubushakashatsi bwa RICH

Ababyeyi bahishira abakorera abana ihohotera

Bamwe mu babyeyi bemera uruhare rwa bo mu gutuma abakora ibi byaha badahanwa, kuko bamwe babakingira ikibaba bagamije indonke bigatuma ubuzima bw’abana buhazaharira, nk’uko bivugwa na Rindiro Patrick w’i Barija mu karere ka Nyagatare.

Agira ati “Ababyeyi [bamwe], iyo umwana yatwaye inda ntibakurikirana uwayimuteye, ahubwo wa mwana baramwicaza niba ari umunyeshuri yarangiza kubyara igihe kikagera wa muhungu akazana indezo bakamuha wa mwana. Uruhare ni urwacu ababyeyi kuko ntidukurikirana uwakoze icyaha ahubwo tumukura mu cyaha tukamushakamo indonke”.

Minisitiri w’Ubutabera Johnston Busingye, avuga ko ababyeyi bakingira ikibaba abakoreye abana ihohotera bagomba guhagurukirwa, ndetse n’abataha ubukwe bw’umwana washyingiwe atagejeje igihe bakabibazwa.

Ati “Guhohotera ntibikwiye kurangwa mu gihugu cyacu, ufite ubwenge abireke. Ibyo byo mu miryango bisa nk’ibyahindutse ubucuruzi bw’umwana haba mu kumushyingira ari muto haba mu kubona yahohotewe, yatwise bagashaka kubyihutisha ngo ahite ahinduka umugore ari umwana, mu kwiyemeza twafashe iyo miryango yose iraza gukurikiranwa, na bariya bagiye kunywa izo nzoga baraza kutubera abatangabuhamya”.

Amadini n’amatorero ni inkingi ya mwamba mu guhangana n’ihohoterwa

Nubwo urwego rw’ubutabera rugaragaza ko ikibazo cy’abahohotera abana kigomba guhagurukirwa, Minisitiri w’Uburinganganire n’Iterambere ry’Umuryango, Solina Nyirahabimana, avuga ko abanyamadini n’amatorero bakwiye gushyiraho akabo mu guhangana n’iryo hohoterwa, kuko bafite ijambo ryatanga umusanzu mu kugikemura.

Ibi abivuga ashingiye ku rugero yabonye mu Karere ka Rutsiro, aho umugore yatoye umuco w’isuku nyuma y’uko umuvugabutumwa amubwiye ko “umwuka wera udakorana n’umwanda”.

Minisitiri Solina Nyirahabimana avuga ko amadini n’amatorero ahagurukiye ihohoterwa rikorerwa abana ryacika

Ati “Abanyamadini babyiyemeje hari ikintu kinini cyakorwa kuko bafite ababagana ari benshi kandi bagiye bitumiye. Hari aho twagiye muri Rutsiro tuhasanga urugero rw’umubyeyi warimo akora isuku bidasanzwe mu rugo bamubajije impamvu aravuga ati ‘najyaga nibaza impamvu muri iyi nzu tugira ibibazo, ejo bundi pasiteri yatubwiye ko umwuka wera udakorana n’umwanda’ ubwo rero ubutumwa bwaratambutse”.

Umuyobozi w’ihuriro ry’amadini n’amatorero akorera mu Rwanda, Musenyeri Antoine Kambana, asanisha iri hohotera n’amateka u Rwanda rwanyuzemo. Avuga ko kimwe n’uko bagiye bafatanya na Leta mu zindi gahunda, ubu bagiye kongera imbaraga mu bukangurambaga bwo kurwanya ihohotera, buzajya bukorerwa mu madini n’amatorero.

Musenyeri Antoine Kambanda uyobora RICH avuga ko bagiye gukora ubukangurambaga ku ihohoterwa rikorerwa abana

Ati “Iki kibazo giterwa mbere na mbere n’indangagaciro z’ubumuntu, indangagaciro z’Abanyarwanda zagiye zigabanuka, bitewe n’uburere buke n’ibihe bibi twabayemo nka Jenoside n’ubuhunzi. Twebwe rero abayobozi mu by’imyemerere kubera ukuntu batugana, turakora ubukangurambaga kugira ngo dutangire gukumira tunafasha abahohotewe”.

Ubu bushakashatsi ntibugaragaza neza ishusho y’ikibazo cy’abana basambanywa, kuko bwakorewe mu bigo birindwi gusa bya One Stop Center, mu gihe mu Rwanda kuri ubu hari ibigo bya Isange One Stop Center bigera kuri 44.

Iri huriro ry’amadini n’amatorero rigaragaza ko ubukangurambaga bugiye gukorwa buzajyana no gushaka uko hakorwa ubushakashatsi bwagutse bwagera kuri ibyo bigo byose biri mu gihugu.

Inama mpuzamahanga y’iterambere rirambye Perezida Kagame yitabiriye, iberamo ibiganiro bigamije kwihutisha iterambere ku rwego rw’isi bitangwa n’abantu batandukanye, barimo abafata ibyemezo mu bya Politiki, abanyenganda n’inzobere mu by’ikoranabuhanga.

Kuri uyu wakabiri Perezida Kagame yatanze ikiganiro muri iyi nama, agaragaza uko u Rwanda rwafashe ingamba zo kurengera ibidukikije no gutunganya imijyi mu rwego rwo guharanira iterambere rirambye, kandi bigakorwa mu bushobozi buke bwari buhari.

Yagize ati “Twatangiye mbere mu myaka nka 15 ishize. Umugambi wacu, politiki zacu ndetse no gushyira mu bikorwa ibintu bitandukanye twashoboraga gukora mu bushobozi buke twari dufite. Ikintu cyatumye bishoboka, icya mbere ni uko twabanje kureba ku baturage bacu. Mbere na mbere uburyo bazagerwaho n’ingaruka z’ibyemezo bitandukanye, zimwe muri izo [ngaruka] ukaba wazibonera ibisubizo ku zindi ntubibone.”

“Gusa hari ikintu cyashobokaga, twatangiye dukora ubukangurambaga mu buryo bworoheje, kuko abaturage bagerwaho n’ingaruka za buri munsi ziterwa n’ibintu bibabaho kubera ibyo bariye cyangwa bakora mu nzego zitandukanye. Twari dufite icyerekezo kireba kure.”

Perezida Kagame yasobanuriye abakurikiye icyo kiganiro ko u Rwanda rwatangiye iyi gahunda mu gihe amashyamba hafi ya yose yari yaratemwe, u Rwanda rukiyemeza gutera andi ku buryo amashyamba amaze kuzahurwa ku gipimo kirenga 10% mu gihe gito. U Rwanda ngo rwatangiye rureba ibintu bitarusaba amikoro menshi.

Ati “Twakomeje tureba ibintu byinshi twashoboraga gukora bitadusabye ikiguzi kiri hejuru. Nk’urugero twaciye ikoreshwa ry’amasashi, kandi mu kuyaca twarebye n’ikindi cyakorwa. Niba duciye amasashi, ni iki tuzasigara dukoresha kiyasimbura. Ni ibintu byatanze amahirwe y’ishoramari, ubucuruzi n’ibindi bikorwa bibyara inyungu mu gushaka ibisimbura amasashi.”

Umunyamakuru baganiraga yamubajije icyo andi mahanga yakwigira kuri gahunda y’umuganda ngarukakwezi u Rwanda rwatangiye. Perezida Kagame yavuze ko icyo Abanyarwanda bigiye mu byo banyuzemo ari uko bidahagije kuvuga ibyiza na politiki nziza gusa, mu gihe abantu badakora ibyo bakwiye kuba bakora. Ikiraje inshinga u Rwanda nk’uko yabisobanuye, ngo ni ukwerekana ko hari ibishoboka mu bushobozi bwose umuntu yaba afite.

Ati “Icyo twakoze mbere na mbere ni ukwerekana ko hari ibintu twakora mu bushobozi bwacu kugira ngo tuzane impinduka. Urebye ikibazo cyari ukwibaza niba dukeneye amafaranga y’abaterankunga cyangwa indi nkunga iyo ari yo yose ngo tubashe gusukura aho tuba. Tuza kuvuga ngo oya, dushobora gusukura aho dutuye kandi tukazana impinduka nziza. Ni uko byahindutse kandi bijya mu mitwe y’abantu, buri wese yabonye inyungu. Birumvikana ko ku ikubitiro abantu bose batabyumva cyangwa ngo babone inyungu yabyo, ariko iyo utangiye utangira kubyumvisha abantu ubereka n’inyungu zabyo, ukaba wagera ku rwego nk’urwo tugezeho ubu aho byahindutse umuco ko buri wa gatandatu wa nyuma w’ukwezi bitakiri ngombwa kubwiriza abaturage kujya mu muganda, bajyayo kandi bagakora ibikorwa bitandukanye mu gihugu hose, ntabwo ari mu mijyi gusa ni mu gihugu hose.”

Umukuru w’igihugu yibukije ko abayobozi bo ubwabo batazana impinduka mu gihe badahaye umwanya abaturage ngo bazigiremo uruhare, atanga urugero rw’uko u Rwanda rwashyizeho gahunda y’imihigo abayobozi mu nzego zose basinya ariko abaturage bayitanzeho ibitekerezo.

Yunzemo ko hakwiye kubaho uburyo bwo gufasha abaturage kugira ishusho y’uko igihugu cyangwa sosiyete zibaho kandi bakareba ahazaza, ari na byo u Rwanda rwakoze.

Perezida Kagame yasobanuye ko u Rwanda rwiyubatse ruhereye ku busa kuva mu myaka 25 ishize, avuga ko icyizere cy’ahazaza cyubakiwe ku rubyiruko, aho rubwirwa ko buri wese afite umusanzu yatanga ku gihugu.

Yavuze kandi ko Leta yashyizeho gahunda yo gutunganya imijyi yunganira uwa Kigali, ikabonekamo amahirwe yatuma abayituyemo by’umwihariko urubyiruko bayikoreramo aho kujya i Kigali, kuko byagaragaye ko abantu bashobora kugira imibereho myiza baba bari mu bice by’icyaro cyangwa mu mijyi.

Yatanze urugero rw’uko Leta yashoye amafaranga menshi mu buhinzi Abanyarwanda benshi bakesha imibereho, hashyirwaho ingamba zituma abantu bahinga bagasagurira n’amasoko aho guhinga ibibabeshaho gusa.

Ambasaderi Olivier Nduhungirehe yasabye Uganda kurekura n’abandi Banyarwanda benshi bafunzwe barengana

Umunyamabanga wa Leta muri Minisiteri y’Ububanyi n’amahanga ushinzwe ibikorwa by’umuryango wa Afurika y’Iburasirazuba, Ambasaderi Olivier Nduhungirehe yabivuze mu kiganiro cyihariye yagiranye na Kigali Today ku wa kabiri tariki 07 Mutarama 2020.

Yabivuze nyuma gato y’irekurwa ry’Abanyarwanda barindwi, bamwe mu bamaze igihe bafungiwe muri Uganda bashinjwa ibyaha birimo kuba intasi z’u Rwanda.

Ni mu gihe nyamara Leta y’u Rwanda yo idahwema kugaragaza ko Abanyarwanda batabwa muri yombi, bagakorerwa iyicarubozo, bazira kwanga kujya mu mitwe igamije guhungabanya umutekano w’u Rwanda, ishyigikiwe na Leta ya Uganda.

Ambasaderi Nduhungirehe yavuze ko kurekura abo Banyarwanda “ari ibintu byiza ariko bidahagije” Yanavuze ko hakiri kare kwemeza ko irekurwa ry’abo Banyarwanda ari intambwe nziza Uganda yateye mu gushyira mu bikorwa amasezerano y’amahoro Perezida w’u Rwanda n’uwa Uganda basinyiye i Luanda muri Angola.

Ati “Haracyari kare ngo tubivuge, tuzareba niba iki gikorwa kizakurikirwa n’ibindi kuko abantu tuvuga [barekuwe] ni abantu barindwi harimo na Réné Rutagungira uri mu ba mbere bafashwe mu 2017, ngira ngo ni ibintu byiza ariko bidahagije kuko Abanyarwanda bari muri Uganda bafashwe amaherere bakorerwa iyicarubozo bagera mu ijana barenga.”

“Icyo twifuza ni uko bose barekurwa bagasubira mu miryango yabo kuko imaze imyaka ibasaba, tukaba twifuza kandi ko na Uganda yahagarika ubufasha itanga kuri iyo mitwe yitwaje intwaro ibangamira umutekano w’u Rwanda” Ambasaderi Nduhungirehe.

Uretse umutwe wa RNC wakunze kuvugwaho kuba uhabwa inkunga na Uganda mu bikorwa byawo bihungabanya umutekano w’u Rwanda, Ambasaderi Nduhungirehe yavuze ko hari n’indi mitwe Uganda itera inkunga, ahereye ku rugero rw’abaherutse kugaba igitero mu Kinigi ho mu Karere ka Musanze cyahitanye abasivili 14 kigakomerekeramo 16.

Agira ati “Icyo gitero cyagabwe n’umutwe w’iterabwoba witwa RUD URUNANA ukorera mu Burasirazuba bwa Repubulika Iharanira Demokarasi ya Congo. Benshi mu bakigabye barishwe ariko hari abandi bahunze, ntibahungira muri Congo aho bari bavuye, ahubwo bahungira muri Uganda.”

Yungamo ati “Harimo Lieutenant Kabayiza Seleman wahungiye mu Karere ka Kisoro ari kumwe n’abandi babiri, bavanwa Kisoro bahungishirizwa Mbarara mu nyubako z’igisirikari cya Uganda muri Makindye, aho bavuye bajyanwa ku biro bikuru bya CMI i Mbuya muri Kampala. Twanditse ibaruwa tariki 14 Ukwakira, iminsi 10 nyuma y’igitero dusaba Leta ya Uganda gukora iperereza ngo inatwohereze abo bantu batatu, ariko kugeza n’ubu nta gisubizo turabona.”

Ambasaderi Nduhungirehe yavuze ko Uganda yakomeje kwirengagiza nkana ikibazo kiri hagati y’ibihugu byombi, kandi hari ibimenyetso bifatika bigaragaza ko bamwe mu bayobozi mu nzego zo hejuru muri Uganda bagira uruhare rutaziguye mu bitero bigabwa ku Rwanda.

Ati “Iperereza ryakorewe ahabereye ubwo bwicanyi [mu gitero cyo mu Kinigi], ryagaragaje neza ko icyo gitero cyari kiyobowe na Minisitiri Philemon Mateke wa Uganda ushinzwe ubutwererane mu karere, hari telefone z’abagabye igitero zafashwe zibigaragaza, hari n’ubuhamya bw’abafashwe batanze amakuru.”

Ambasaderi Nduhungirehe avuga ko “Ibyo ari ubushotoranyi bukabije ku Rwanda, kuko bitakiri mu rwego rw’imitwe mito irwanya Leta, ahubwo bigeze ku rwego rw’umuminisitiri muri Guverinoma ya Uganda uyobora igitero cy’iterabwoba cyahitanye Abanyarwanda 14 kigakomeretsa abandi 16.”

Ifungurwa ry’Abanyarwanda barindwi barekuwe rije nyuma y’iminsi mike Perezida Yoweri K. Museveni wa Uganda yohereje intumwa mu Rwanda, yagiranye ibiganiro na Perezida Kagame.

Ambasaderi Nduhungirehe yavuze ko bishoboka ko kurekurwa kwabo bifite aho bihuriye n’iyo ntumwa, ariko ashimangira ko icyo u Rwanda rwifuza ari ukubona Abanyarwanda bose bafungiwe muri Uganda barekurwa, ndetse n’inkunga zose iki gihugu kigenera imitwe irwanya u Rwanda zigahagarara.

Inkuru bijyanye:

Abanyarwanda barindwi bari bafungiye muri Uganda barekuwe

Iyi mbabura ikoranye umurasire iyo bayitetseho iba ishobora no kwinjiza umuriro muri telefoni

Ni imbabura yatekereje gukora mu rwego rwo kubungabunga ibidukikije, akemeza ko umuntu ashyiraho ikara rimwe rifite ingano y’igipfunsi, rikaba ryahisha ibyo kurya.

Ifite igice kirimo akamoteri gatanga umuyaga uhuha munsi y’ahajya iryo kara, ku buryo bitagombera kuyihungiza nk’uko bigenda ku zindi mbabura.

Ako gace ka moteri ni cyo gihangano Tumutuyimana yakoze, kugira ngo gakore kakaba gacomekwa ku mashanyarazi hifashishijwe umugozi ushyira umuriro muri telefoni.

Agira ati “Gasaba umuriro ungana volute (volts) eshanu nibura kugira ngo umuriro ugahagurutse gakore. Iyo ugashyizeho batiri ya telefoni cyangwa akuma kabika umuriro gashyira umuriro muri telefoni kitwa (Powe bank) iragakoresha”.

Tumutuyimana yageze aho atekereza gukora imbabura ye mu buryo bwatanga ibisubizo ku bibazo bicyugarije bamwe mu Banyarwanda, by’umwihariko abatuye mu bice bitarageramo amashanyarazi.

Ageze ku rwego rwo rwo kuba iyo mbabura yayikorana umurasire w’izuba na batiri, ikaba yakora bitabaye ngombwa kuyicomeka ku mashanyarazi, kandi iyo mbabura ubwayo ikaba yakwifashishwa mu gushyira umuriro muri telefoni no gucana itara ry’amashanyarazi. Gusa ngo aracyafite imbogamizi y’amikoro make atuma atabigeraho.

Imbabura Tumutuyimana akora zicomekwa ku mashanyarazi nyuma yo kubura ubushobozi bwo gukora izikoranye umurasire

Agira ati “Mbonye ubushobozi natangira gukora izo zikoranye n’akarasire gatoya ka volts 12, kakajya gashyira umuriro muri batiri ikoranye n’imbabura noneho batiri na yo ikaba yashyira umuriro muri telefoni ku muntu uri mu cyaro (utaragerwaho n’amashanyarazi) ndetse no kumucanira itara, kuko hari amatara akoresha umuriro wa volts eshanu, 12...”.

Tumutuyimana yamaze gukora imbabura z’igerageza zishobora gushyira umuriro muri telefoni no gucana itara rimwe.

Mujawamariya Jacqueline wo mu karere ka Rubavu waguze imwe muri zo yemeza ko ikora neza ku buryo anayicomekaho telefoni ikajyamo umuriro.

Agira ati “Narayikoresheje igihe kinini kandi ikora neza. Niba uguze imbabura isanzwe ugacana umufuka w’amakara ibyumweru bibiri, yo iyo uyikoresheje uwo mufuka uba ushobora kumara amezi atatu. Ikindi ni uko ikoranye n’umurasire ku buryo nyisharijaho telefoni nshyira umuriro muri telefoni”.

Kugeza ubu imbabura zishobora gushyira umuriro muri telefoni no gucana itara ry’amashanyarazi Tumutuyimana yabaye aretse kuzikora, kuko zimusaba gukoresha ibikoresho adafitiye ubushobozi.

Izo yakoze aguze ibikoresho mu Rwanda ngo imbabura yuzuraga imutwaye amafaranga y’u Rwanda ibihumbi 22, akavuga ko abonye uburyo bwo gutumiza ibyo bikoresho hanze bikamugeraho bidahenze n’igiciro cy’imbabura kitajya hejuru y’amafaranga y’u Rwanda ibihumbi 16.

Umushinga wo gukora izo mbabura yawutangiye ari umwe akiva ku ntebe y’ishuri, kuri ubu akaba yishimira ko watangiye gutanga akazi no kugira uruhare mu kubungabunga ibidukikije.

Kugeza ubu akoresha abakozi umunani akaba yarabigezeho muri gahunda y’intego afite “guhanga umurimo no gutanga akazi, ndetse no gufatanya na Leta muri gahunda yo kubungabunga ibidukikije, kuko uko batema amashyamba ari ko bikurura ubutayu”.

Uyu musore yatangiye no kwikorera amakara akora yifashishije ibishishwa n’ibisigazwa by’ibindi bintu atwika akongeramo igitaka cy’igishonyi, ku buryo bivamo amakara yemeza ko ari meza, ariko na yo ngo ntarayageza ku isoko kubera ikibazo cy’amikoro make.

Iyi mbabura ntikenera guhungizwa nk’uko bigenda ku zindi mbabura

Ku ruhande rwa Minisiteri y’Ubucuruzi n’Inganda (MINICOM) ifite mu nshingano ibyo guhanga imirimo no guteza imbere ibikorerwa mu Rwanda, Domina Hakuzimana ushinzwe guteza imbere guhanga imirimo muri iyo Minisiteri, avuga ko hari amahirwe mu kigega BDF gitera inkunga imishinga mito n’iciriritse yafasha Tumutuyimana kugera ku nzozi ze.

Agira ati “Hari amafaranga Leta iteganya yo gufasha abo ba rwiyemezamirimo anyuzwa muri MINICOM binyuze muri gahunda yo guteza imbere guhanga umurimo.

Rwiyemezamirimo nk’uriya ufite umushinga urimo agashya bigaragara ko wagirira akamaro n’abandi Banyarwanda, iyo adashoboye kwibonera ingwate ngo asabe inguzanyo muri banki Leta imuha ingwate binyuze muri BDF akishingirwa kugeza kuri 75%”.

Imbabura Tumutuyimana akora kuri ubu ziri mu byiciro bibiri nyuma yo kubura ubushobozi bwo gukora izishobora gushyira umuriro muri telefoni no gucana itara.

Zo zikora zicometswe ku mashanyarazi cyangwa hifashishijwe umuriro uva muri power bank, imbabura ikozwe mu cyuma n’ibumba ikagura ibihumbi umunani, mu gihe ikoze mu cyuma gusa igura ibihumbi 14 by’amafaranga y’u Rwanda.

Umuyobozi w’inama y’ubutegetsi ya Zigama CSS (hagati) yavuze ko mu mwaka utaha bazashyira imbaraga mu gutanga serivisi hifashishijwe ikoranabuhanga

Ibi byatangarijwe mu nama rusange ya 32 yabaye kuri uyu wa gatanu tariki 29 Ugushyingo 2019, yasuzumaga ibyagezweho muri uyu mwaka no gutegura igenamigambi ry’umwaka utaha.

Uko iterambere ryiyongera ni nako ibigo byinshi byiganjemo iby’imari bigenda bihindura imikorere y’uko bitanga serivisi ku babigana. Zigama CSS ni kimwe mu biri muri uyu murongo wo kujyana n’impinduka z’iterambere, aho cyiyemeje ko mu mwaka utaha kizashyira imbaraga mu gutanga serivisi zacyo hifashishijwe ikoranabuhanga. Ni ibintu bizatwara ingengo y’imari itari nto nk’uko umuyobozi w’inama y’ubutegetsi ya Zigama CSS, Dr. Ndahiro James abivuga.

Agira ati “Buri munyamuryango yabona serivisi ashaka adatelefonnye, adateze, aho ari hose akabyikorera. Tuzashyira ingufu mu guhugura abakozi bacu no kugura ibikoresho by’ikoranabuhanga byafasha mu guhangana n’ibyaha by’ikoranabuhanga kugira ngo turinde umutungo w’abanyamuryango.”

Dr. Ndahiro yongeraho ko hari na gahunda yo guha abanyamuryango telefoni zizabafasha kujyana n’iryo koranabuhanga, kuko “iryo koranabuhanga ushobora kurishyiraho ariko abo rigenewe badafite uburyo bwo kurikoresha ugasanga ntacyo ukoze.”

Mu mwaka wa 2019 Zigama CSS yungutse miliyari zisaga 10 z’Amafaranga y’u Rwanda, ivuye kuri miliyari icyenda mu mwaka wa 2018. Inyungu y’iki kigo cy’imari ngo yagiye izamuka buri mwaka ku gipimo kiri hejuru ya 20% uhereye muri 2017, ku buryo mu mwaka utaha giteganya inyungu ya miliyari zisaga 12.

Abanyamuryango ba Zigama CSS mu nama rusange ya 32

Zigama CCS kugeza ubu ifite imari shingiro ibarirwa muri miliyari zisaga 300 z’amafaranga y’u Rwanda, ikaba imaze gutanga inguzanyo za miliyari zisaga 200, mu gihe ubwizigame bw’abanyamuryango bayo na bwo busaga miliyari 200.

Dr. Ndahiro avuga ko ibi bituma nta munyamuryango ushobora kubura inguzanyo, akanavuga ko bishimira ko abahabwa inguzanyo bose bazishyura neza.

Ati “Icyo twishimira cya mbere ni uko abanyamuryango bacu bamaze kuba inararibonye mu bintu byo kwizigamira tukishimira ko bari no mu bantu bake bamaze kumenyera gufata inguzanyo no kuzishyurira igihe. Zigama CSS iri mu bigo bike mu gihugu bifite imyenda yaheze hanze. Biradushimisha iyo abanyamuryango bacu bafashe inguzanyo bakazishyura ku gihe kandi biteje imbere. Abantu batangiye baguza ibihumbi 50 cyangwa 30, ubu bamwe bageze muri miliyoni 15, biteje imbere n’imiryango yabo.”

Umuyobozi mushya wa Zigama CSS, Col. Corneille Emile Nkundimana yavuze ko inguzanyo zitangwa na Zigama CSS zishyurwa ku nyungu ya 13% ku bafashe inguzanyo itarengeje miliyoni eshanu, abafashe inguzanyo iri hejuru ya miliyoni eshanu bakishyura ku nyungu ya 15%.

Abanyamuryango batagira amacumbi bazafashwa kuyabona

Uretse gushyira imbaraga mu ikoranabuhanga, mu mwaka utaha Zigama CSS ngo izanashyira imbaraga mu kubonera amacumbi abanyamuryango bayo, hibandwa by’umwihariko ku batayafite, nk’uko Dr. Ndahiro yabivuze.

Zigama CSS igiye kwiyuzuriza inyubako yayo

Ati “Tuzashyira ingufu mu gushakira abanyamuryango bacu amacumbi cyane cyane abagiye kugira inzu bwa mbere, ni bo tuzaheraho. Dufatanyije n’izindi nzego za Leta tuzagerageza gufasha abanyamuryango bacu bato kugira ngo babone amacumbi yabo kuko ibintu by’ubukode abenshi baba batabishoboye.”

Dr. Ndahiro avuga ko batahita bamenya umubare w’abanyamuryango bazashakirwa amacumbi kuko bizaterwa n’umubare w’abayakeneye. Gusa ngo hari amafaranga ahagije ku buryo nta mpungenge z’uko hari uwabura iryo cumbi arikeneye.

Zigama CSS igenda itera imbere mu myaka imaze, ku buryo igiye kuzuza inyubako ya miliyari zisaga 13, ifatanyije n’ibindi bigo nka MMI na Horizon.

Ni inyubako ibyo bigo byose bizakoreramo ariko hakazasigara imyanya izakodeshwa abantu bazaba bakeneye kuyikoreramo.

Abakozi ba RHA n’aba MININFRA mu kiganiro n’abanyamakuru basobanura ibijyanye n’igishushanyo mbonera cy’imijyi yunganira uwa Kigali

Iki kigo cyabitangarije mu kiganiro cyagiranye n’abanyamakuru tariki 27 Ugushyingo 2019, gisobanura aho umushinga wo gutegura igishushanyo mbonera cy’imijyi itandatu yunganira uwa Kigali ugeze.

Ni igishushanyo mbonera gikorerwa imijyi itandatu ari yo Muhanga, Rubavu, Nyagatare, Musanze, Huye na Rusizi yashyizwe mu cyiciro cy’imijyi yunganira uwa Kigali.

Mu bihe bishize hakunze kumvikana abaturage binubira kuba aho batuye hakorewe ibishushanyo mbonera, bamwe bavuga ko ari uburyo bwo gukumira ab’amikoro make mu mujyi ugasigaramo abafite ubushobozi.

Ahagiye hakorerwa ibishushanyo mbonera bikaba ngombwa ko abaturage bimurwa na ho hakunze kumvikana abaturage binubira amafaranga y’ingurane babarirwa bavuga ko ari make, abandi bakinubira guhatirwa kwimukira mu nzu bubakiwe na Leta nk’ingurane y’aho bari batuye, nk’uko byagenze ku batuye muri Kangondo ya mbere n’iya kabiri hazwi nko muri ‘Bannyahe’ mu Karere ka Gasabo mu Mujyi wa Kigali.

Ikigo gishinzwe guteza imbere imiturire (RHA) kuri iyi nshuro cyatangaje ko nta muturage ugomba kwimurwa n’igishushanyo mbonera gitegurirwa iyo mijyi yunganira uwa Kigali, nk’uko bivugwa na Kampayana Augustin ushinzwe ishami ry’imiturire mu mijyi no mu cyaro.

Agira ati “Ntabwo twifuza ko igishushanyo mbonera kigira uwo kizimura. Turashaka ko kigufasha gutera imbere ariko udahungabanye. Niba wari utuye ahantu bakahateganyiriza inzu y’ubucuruzi, wowe wari uhatuye muri iyo nzu y’ubucuruzi uhabwa inzu yo guturamo hejuru [mu igorofa} cyangwa inyuma, imbere bahakorere ibindi. Umuturage ntakwiye kwimurwa ahubwo akwiye kwinjizwa mu bigiye kuhakorerwa kugira ngo bigabanye ihungabana ry’abantu n’ibintu.”

Kampayana Augustin avuga ko abaturage batagomba kwimurwa n’igishushanyo mbonera cy’imijyi yunganira uwa Kigali

Kuva mu 2013 hakozwe igishushanyo mbonera cya mbere cy’Umujyi wa Kigali, ariko hari aho byagiye biba ngombwa ko ibyubatswe hakurikijwe icyo gishushanyo mbonera byongera gusenywa hadashize n’imyaka icumi.

Gusa gusenya ibyubatswe hakurikijwe igishushanyo mbonera bisa nk’aho bitazahagarara kabone n’ubwo igishushanyo mbonera kiri gutegurwa ari icy’igihe kirekire.

Kampayana agira ati “No mu mategeko hari aho tuvuga ko igihe bizaba ngombwa inama njyanama y’akarere yagaragaza ibyo yifuza ko bihindurwa [ku gishushanyo mbonera] bigasuzumwa, ni cyo gituma tutavuga ngo igishushanyo mbonera ntikizahinduka. Igihugu cyacu kirihuta, hari ubwo ugera hagati ugasanga hari icyifuzwa kandi cyihutirwa gikeneye gushyirwa mu gishushanyo mbonera kitari kirimo.”

Kampayana asobanura ko ikibazo cyari cyarabaye kiri gukosorwa ari uguhuza imibare n’icyerekezo kirekire u Rwanda rufite, akavuga ko igishushanyo mbonera ari icy’imyaka 30 iri imbere kuko kigeza nibura mu mwaka wa 2050.

Gutunganya igishushanyo mbonera bizongera umubare w’abatura mu mijyi

Igishushanyo mbonera cy’imijyi itandatu yunganira uwa Kigali kiri gutunganywa mu rwego rwo gushyira mu bikorwa gahunda Guverinoma y’u Rwanda yihaye yo kwihutisha iterambere ry’imijyi no kongera umubare w’abaturage bayituramo.

Ibarura rya kane ku mibereho rusange y’ingo (EICV4) ryo muri 2013/2014, ryari ryagaragaje ko abatuye mu mijyi bagera kuri 17%, mu gihe ibarura rya gatanu ku mibereho rusange y’ingo (EICV5) ryakozwe muri 2016/2017 ryagaragaje ko abatuye mu mijyi ari 18%.

Igishushanyo mbonera cy’imijyi yunganira uwa Kigali cyasobanuriwe mu kiganiro n’abanyamakuru

Leta y’u Rwanda kuri ubu iri gushyira imbaraga mu guteza imbere imijyi yunganira uwa Kigali, ku buryo mu mwaka wa 2024 abatuye mu mijyi yo mu Rwanda bazaba bageze ku gipimo cya 35%, kandi babona serivisi zose zijyanye n’imiturire yo mu mijyi iteye imbere.

Igishushanyo mbonera cy’iyo mijyi kandi ngo kiri kuvugururwa kugira ngo abantu babashe gutura muri iyo mijyi no kuhashora imari, kugira ngo bigabanye umuvuduko w’abagana umujyi wa Kigali kuko biwutera ibibazo birimo imiturire y’akajagari n’abaturage batagerwaho na serivisi zinoze kubera ubwinshi bwabo.

Igishushanyo mbonera cy’iyi mijyi yunganira uwa Kigali kiri gutegurwa n’ikompanyi SURBANA JURONGO yo muri Singapore, igihugu kizwiho kuba cyarageze ku iterambere ritangaje kitagira umutungo kamere.

Abakozi b’ikompanyi SURBANA JURONGO itegura igishushanyo mbonera baravuga ko mu kugitegura bareba no ku bushobozi bw’abaturage baciriritse

Biteganyijwe ko icyo gishushanyo mbonera kizaba cyarangiye muri Gicurasi 2020. Abahagarariye iyo kompanyi bavuga ko mu kugitegura bareba ku mpande zose, kuva ku cyerekezo igihugu gifite kugera ku bukungu n’ubushobozi bw’umuturage wo hasi.

Bamwe mu bagize impunzi zavuye muri Libiya

Izo mpunzi zageze mu Rwanda mu ijoro ryo ku cyumweru rishyira kuri uyu wambere, zikaba ari icyiciro cya gatatu cy’impunzi 500 u Rwanda rwemeye kwakira zagiriye ibibazo muri Libiya.

Abo na bo bagiye kwiyongera ku bandi 189 bakiriwe mu nkambi y’agateganyo yaa Gashora iri mu karere ka Bugesera tariki 26 Nzeri 2019 na tariki 10 Ukwakira 2019, nkuko bivugwa na Minisiteri ishinzwe ibikorwa by’ubutabazi.

Impunzi 117 zageze i Kigali mu ijoro ryo ku cyumweru

Benshi mu bamaze kwakirwa mu Rwanda baturuka mu bihugu bya Eritrea, Somalia na Ethiopia.

Mu kwezi kwa Nzeri 2019 ni bwo u Rwanda rwemeye kwakira impunzi 500 mu zagiriye ibibazo muri Libya.

Muri icyo gihugu hari ababarirwa mu 2,000 babuze aho berekeza nyuma yo kubuzwa kwambuka inyanja ya Méditerranée ngo bajye i Burayi, bakaba bakomeje kugirira ibibazo muri Libiya.

Benshi mu mpunzi zamaze kugera mu Rwanda, bashima uburyo u Rwanda rwabakiriye, ariko na none bakavuga ko intego yabo ya mbere ari ukujya gutura mu bihugu biteye imbere byo ku mugabane w’Uburayi.

Ba rwiyemezamirimo batandatu ni bo batsindiye inguzanyo ya BK ya miriyoni 25 izishyurwa nta nyungu

Ba rwiyemezamirimo 13 ni bo bari bageze mu cyiciro cya nyuma cy’irushanwa, batandatu baje mu myanya y’imbere bakaba ari bo basaranganyijwe miliyoni 25 z’amafaranga y’u Rwanda, bazishyura nta nyungu bashyizeho.

Iri rushanwa ryasojwe ku mugoroba wo kuwa gatanu tariki 22 Ugushyingo 2019, ribaye ku nshuro ya gatatu, rikaba ryaratangiye rihatanamo ba rwiyemezamirimo bato bagera kuri 98.

Abatsindiye inguzanyo ya miliyoni 25 zitanzwe kuri iyi nshuro bavuze ko bishimiye kuba igiye kubafasha kwagura imishinga yabo, nk’uko bivugwa na Priscilla Ruzibuka washinze ikompanyi yitwa ‘Kipepeo-Kids’ ikora imyenda y’abana.

Priscilla Ruzibuka watsinze muri iri rushanwa avuga ko inguzanyo yahawe igiye kumufasha kwagura ubucuruzi bwe

Yagize ati “Kuba mu bantu batandatu batsindiye aya mafaranga ni ikintu gikomeye kuri njye. Twateganyije gukoresha aya mafaranga mu kwagura ubucuruzi bwacu mu mikorere, mu kugura ibikoresho n’amamashini. Ubu turi ikipe y’abakozi 10 ariko umwaka utaha tuzongeraho tube nka 15”.

Abageze mu cyiciro cya nyuma cy’iri rushanwa bose bamaze amezi atandatu bahugurwa n’ikigo ‘Inkomoko’ gitanga amahugurwa n’ubujyanama ku micungire y’imishinga.

Umuyobozi mukuru wacyo Julienne Oyler yavuze ko bishimira kuba muri ayo mezi abahuguwe barungutse ubumenyi bwabafasha guteza imbere imishinga yabo, kabone n’ubwo baba batagize amahirwe yo kubona inguzanyo bahataniraga.

Ku rundi ruhande, umuyobozi mukuru wa BK, Dr. Diane Karusisi, yavuze ko abageze mu cyiciro cya nyuma cy’irushanwa bose batsinze n’ubwo bose batagize amahirwe yo guhabwa inguzanyo.

Yavuze ko abahawe inguzanyo bakwiye gukomeza gukorana neza na banki, abatagize amahirwe yo kuyibona na bo bakabyaza umusaruro ubumenyi bungukiye mu mahugurwa y’amezi atandatu bahawe.

Umuyobozi wa BK yasabye abatabonye inguzanyo gukoresha ubumenyi bahawe mu kwagura imishinga yabo

Ati “Icyo dutegereje ku batsinze bose n’abakurikiye amahugurwa, ni ugushyira mu bikorwa ibyo bize muri aya mahugurwa y’amezi atandatu. Ntekereza ko bize byinshi bizabafasha kugeza ubucuruzi n’imishinga yabo ku rundi rwego. Ku batsinze turashaka ko batangira kubaka umubano na banki kugira ngo bagure ibikorwa byabo”.

Dr. Karusisi yongeyeho ko mu bageze mu cyiciro cya nyuma cy’irushanwa bose nta watsinzwe, kuko n’abatabonye amahirwe yo kubona inguzanyo “babonye amahirwe yo kubona amahugurwa yabafasha guhindura ubuzima bitewe n’uko bize uburyo bakora ibintu bikenewe n’abakiriya ku buryo ari ubumenyi bazakoresha mu buzima bwabo bwose”.

Abatagize amahirwe yo gutsindira iyi nguzanyo bavuze ko n’ubwo batatsinze bishimira ubumenyi bungutse, basaba ko bishobotse bakomeza guhabwa ubujyanama mu bucuruzi bwabo kandi umuyobozi mukuru wa BK yavuze ko bizakomeza gukorwa.

Ni ku nshuro ya gatatu habaye amarushanwa ya BK-Urumuri. Umuyobozi mukuru wa BK yavuze ko abayatsinze mu myaka ibiri ishize bishyura neza ku gipimo cya 95%.

Yongeyeho ko abahawe iyo nguzanyo bamaze kwagura imishinga yabo, avuga ko n’abatishyura uko bikwiye bari kuganirizwa kugira ngo harebwe icyakorwa ngo imishinga yabo ibyare inyungu zituma bishyura uko bikwiye.

Niyidukunda avuga ko abonye inkunga uruganda rwe rwagura imashini zatanga umusaruro mwinshi

Avuga ko amavuta atunganya nta ngaruka agira ku buzima, ariko hari abavuga ko ahenze “ku buryo atari buri wese wayigondera bitewe n’uko litiro imwe igura amafaranga y’u Rwanda 12.000”.

Ayo mavuta akora yagenzuwe n’ikigo cy’igihugu gishinzwe ubuziranenge. Niyidukunda washinze uruganda ruyakora yemeza ko nta ngaruka yatera uwayakoresheje, ahubwo afasha mu kuvanaho ibinure bitari ngombwa mu mubiri.

Agira ati “Hari amavuta menshi babuza abantu kurya kuko iyo uyacaniriye, uyatekesheje nk’ifiriti, hari igipimo ageraho akamera nk’uburozi. Ibyo bituma yangiza uyakoresheje nyuma yo kuyacanira akangiza ubuzima bwe, ariko aya avoka aba ari umwimerere kandi yo yinjira mu mubiri agahomora bya binure byose byatewe n’amavuta mabi yakoreshejwe mbere”.

Uruganda rubyaza avoka amavuta rwatanze akazi ku bakozi barindwi barimo bane bahoraho

Nubwo aya mavuta avugwaho kutagira ingaruka ku wayakoresheje, abashobora kuyigondera baracyari mbarwa kubera igiciro cyayo bamwe bavuga ko gihanitse, bagahuriza ku cyifuzo cy’uko hagira igikorwa kugira ngo n’umuturage uciriritse abashe kuyigondera abungabunge ubuzima bwe.

Ntagahoraho Gaston agira ati “Abashobora kugura ayo mavuta ni bake cyane. Icyakorwa ni uko [igiciro cy’ayo mavuta] cyasubirwamo abayakora bakakigabanya”.

Mukamurenzi Ange yungamo ati “Nk’abanyamakuru mukwiye kutuvuganira ibiciro bikajya hasi kugira ngo tujye tubasha kuyahaha natwe turye neza”.

Niyidukunda na we yemeza ko igiciro cy’amavuta akora kiri hejuru koko, ariko nanone akavuga ko imbaraga zishorwa mu kuyakora n’ubuziranenge bwayo ari byo bituma n’igiciro cyayo kiri hejuru.

Amavuta akorwa n’uruganda Avocare

Ati “Kugira ngo mbone litiro imwe haba hagiye ibiro byinshi bya avoka. Litiro imwe ngurisha 12.000Frw, nshobora kuyikuramo andi malitiro 10 nagurisha ku mafaranga igihumbi cyangwa ibihumbi bibiri, ariko njye ntabwo nashatse gukora byinshi byakwangiza abantu, nahisemo gukora bike byiza byafasha umuntu wangijwe n’amavuta mabi kugira ngo abeho neza”.

Umushinga wavuyemo uruganda rukora ayo mavuta, Niyidukunda avuga ko yawutangiye muri 2017, atangije ibihumbi 40 by’amafaranga y’u Rwanda yari avanye kuri buruse yahabwaga ari umunyeshuri wa kaminuza.

Nubwo ari umushinga ugenda ukura, nturabasha gutanga umusaruro mwinshi kuko kugeza ubu bakora litiro 100 z’amavuta mu kwezi.

Ibibuto bya avoka na byo bikorwamo amajyane yo kunywa mu cyayi

Uretse ayo mavuta, banakora amajyane mu bibuto by’izo avoka zibyazwa amavuta, Niyodukunda akavuga ko babonye inkunga cyangwa inguzanyo yafasha kwagura uruganda, n’igiciro cy’ayo mavuta gishobora kugabanuka.

Ba rwiyemezamirimo bahatana hamwe n’abakozi ba Inkomoko n’aba BK

Ni irushanwa ribaye ku nshuro ya gatatu, aho ikigo “Inkomoko” gitanga amahugurwa n’ubujyanama ku micungire y’imishinga gihugura ba rwiyemezamirimo bahatana, kugira ngo bagire ubumenyi buhagije mu gucunga imishinga mbere y’uko bahabwa inguzanyo na BK.

Ba rwiyemezamirimo 12, ni bo bageze mu cyiciro cyanyuma. Umwe muri bo witwa Habiyaremye Jean Marie Vianney, yanyuze mu buzima bwo mu muhanda mbere yuko aba rwiyemezamirimo utunganya amahembe y’inka akayakoramo imitako n’ibikoresho bitandukanye.

Kuri ubu afite uruganda rumwinjiriza miliyoni zisaga ebyiri ku mwaka utabariyemo ayo ahemba abakozi 12 akoresha n’ayo agura imashini nshya agenda yongera mu ruganda rwe.

Ni urugendo avuga ko rugikomeje, ari na yo mpamvu ahatana mu irushanwa rya BK-Urumuri ngo abone inguzanyo yo kwagura ibikorwa bye.

Habiyaremye yerekanaga bimwe mu byo akora mu mahembe y’inka

Ati “Ndashaka ko BK inguriza miliyoni eshanu, kuko nshaka gukora uruganda runini cyane rutunganya amagembe y’inka. Mfite abakiriya benshi bahoraho barimo ‘Rwanda Clothing’ itugurira ibipesu bikoze mu mahembe y’inka, abahanga imideri, dufite isoko muri Amerika na za ambasade za hano mu Rwanda. Ndashaka no gufungura amashani nibura 10 ducururizaho”.

Ba rwiyemezamirimo bari guhatanira kubona iyi nguzanyo bamaze igihe bakurikiranwa n’ikigo cyitwa “Inkomoko” gitanga amahugurwa n’ubujyanama ku micungire y’imishinga, mu rugendo rumara amezi atandatu.

Umuyobozi wacyo w’agateganyo, Olive Ashimwe, avuga ko muri urwo rugendo bafasha ba rwiyemezamirimo gutegura neza no gukurikirana ubucuruzi bwabo kugira ngo bwunguke.

Ati “Dukorana n’umuntu umaze nibura amezi atandatu acuruza, tukamufasha kumenya urujya n’uruza rw’amafaranga ye, kandi tukamuha umujyanama mu bucuruzi umukurikirana”.

Umwe muri ba rwiyemezamirimo yasobanuriraga abakemurampaka umushinga we

Ashimwe yongeraho ko bafasha umucuruzi kumenya niba akwiye inguzanyo koko, no kureba niba aramutse ayihawe itamugora kuyishyura bigatuma ubucuruzi bwe buhomba.

Irushanwa rya BK-Urumuri, ribaye ku nshuro ya gatatu, kuri iyi nshuro abazaza mu myanya y’imbere, BK izabasaranganya miriyoni 25 z’amafaranga y’u Rwanda, bazishyura nta nyungu bashyizeho.

Umukozi ushinzwe imenyekanishabikorwa muri BK, Nshuti Thierry, avuga ko batahita bamenya umubare w’abazasaranganywa ayo mafaranga, ariko asaba ko abazagira amahirwe yo guhabwa inguzanyo bazayishyura neza kugira ngo bagirirwe icyizere na banki.

Umuyobozi ushinzwe imenyekanishabikorwa muri BK yasabye abazahabwa inguzanyo kuzayishyura neza

Agira ati “Abakemurampaka baramutse basanze bose batsinze bagasanga izo miliyoni bazigabana bigakunda twazibasaranganya. Dusanze ari ibintu bigera ku bantu batanu twafungira kuri batanu. Mu byo bigishwa harimo kumenya gukorana banki.

Byaba bibaje umuntu aguhaye inguzanyo nta nyungu ntiwishyure bikakubuza kugira indi banki ukorana na yo”.

BK ivuga ko kuva mu myaka itatu ishize, iri rushanwa ryiswe BK Urumuri rimaze gushorwamo agera kuri miliyoni 180 z’amafaranga y’u Rwanda.

BK ivuga ko amafaranga ahabwa aba barwiyemezamirimo ari ayagenewe gusubizwa ku isoko hagamijwe gushimira abakiriya, akaba ari amafaranga aba yaravuye mu nyungu za BK ashorwa mu bikorwa byagirira umuryango akamaro.

Bimwe mu bicuruzwa byafashwe muri Operation Usalama

Ni igikorwa kigamije kurwanya ibyaha ndengamipaka cyabaye kuva tariki 30 Ukwakira kugeza tariki 04 Ugushyingo 2019.

Ibicuruzwa byafashwe byiganjemo amavuta y’amoko atandukanye, imyenda n’inkweto bya caguwa, ibiyobyabwenge by’ urumogi n’inzoga z’inkorano, ibiribwa bitujuje ubuziranenge byiganjemo inyama z’inka n’ibikorwa mu ifarini, imiti ikoreshwa mu buhinzi n’ubworozi n’ifumbire bitujuje ubuziranenge, imiti ivura abantu yacuruzwaga mu buryo butemewe n’amategeko, amabuye y’agaciro ya gasegereti yacuruzwaga mu buryo butemewe n’amategeko, ndetse n’ibiro birenga 27 by’insinga z’amashanyarazi zibwe mu kigo REG.

Umuyobozi mukuru ushinzwe kugenza no gukurikirana ibyaha mu rwego rw’igihugu rw’ubgenzacyaha (RIB), Jean Marie Vianney Twagirayezu, avuga ko “hafashwe abantu 46, barimo 10 bafashwe bakekwaho gucuruza no gukwirakwiza ibiyobyabwenge n’inzoga zitemewe, 16 bafashwe bakekwaho kwinjiza mu Rwanda no gucuruza ibicuruzwa bitemewe, abandi bafatirwa mu bindi bikorwa bitandukanye bitemewe”.

RIB yagaragaje ko abacuruza ibitujuje ubuziranenge bagaragaye mu buryo butatu, ari bwo guhimba no kwigana ibirango by’ibicuruzwa bisanzwe bifite ubuziranenge, gucuruza ibitemewe ku isoko ry’u Rwanda, n’abacuruza ibyarangije igihe.

Ibi ngo bigira ingaruka zitandukanye ku buzima bw’abantu no ku bukungu bw’igihugu muri rusange nk’uko Twagirayezu abisobanura.

Agira ati “Abacuruza ibintu bitemewe baca intege ababihimbye n’ababifitiye uburenganzira. Ugasanga badasora ku buryo bibangamira ubukungu bw’igihugu muri rusange. Ndetse ibyo bicuruzwa na none usanga bifite ingaruka ku buzima bw’abantu mu buryo butandukanye”.

Operation Usalama itegurwa ikanashyirwa mu bikorwa hashingiwe ku myanzuro yafashwe n’imiryango ya polisi y’ibihugu by’uturere tw’Uburasirazuba n’Amajyepfo ya Africa.

Ni igikorwa kigamije kurwanya ibyaha ndengamipaka birimo icuruzwa ry’ibiyobyabwenge, iry’abantu, iry’ibintu bitemewe n’amategeko, ubujura bw’insinga z’amashanyarazi, ubw’imodoka, ibyaha bibangamiye ibidukikije, ubujura bw’amabuye y’agaciro n’ibindi byaha byambukiranya imipaka.

Mu gihe bamwe mu bafashwe bakekwaho kwinjiza mu Rwanda ibicuruzwa bitemewe, ikigo cy’igihugu cy’ubuziranenge RSB kivuga ko u Rwanda rwasinyanye amasezerano n’ibindi bihugu byo mu karere ka Afurika y’Uburasirazuba, ku buryo nta gicuruzwa kitujuje ubuziranenge cyakwemererwa kunyura ku mipaka y’ibyo bihugu.

Igikeneye gushyirwamo imbaraga ngo ni ugucungira hafi ibyinjizwa mu gihugu binyujijwe mu nzira zitemewe, kuko ibyafashwe n’ubundi byinjijwe mu Rwanda bitanyujijwe ku mipaka.

Iki gikorwa Operation Usalama kibaye ku nshuro ya gatandatu cyateguwe kinashyirwa mu bikorwa n’inzego za Leta zirimo urwego rw’ubugenzacyaha RIB, Polisi y’igihugu, urwego rw’igihugu rushinzwe ubuziranenge RSB, urushinzwe kugenzura imiti n’ibiribwa FDA-MINAGRI, urwego rw’abinjira n’abasohoka, ikigo cy’igihugu gikwirakwiza amashanyarazi REG n’izindi nzego zitandukanye zibifite mu nshingano.

Umukuru w’igihugu yabivuze mu kiganiro yagiranye n’abanyamakuru kuri uyu wa gatanu tariki 08 Ugushyingo 2019 muri Village Urugwiro.

Kuwa mbere w’iki cyumweru ni bwo abadepite batandatu b’Ubwongereza bandikiye u Rwanda basaba ko Col. Byabagamba na Rusagara barekurwa, kubera ubuzima bwabo butameze neza.

Bombi batawe muri yombi muri 2014 ku byaha byo gukwiza ibihuha, guhindanya isura y’igihugu n’iya Leta, kuri Byabagamba hakiyongeraho icyaha cyo guhisha ibimenyetso no gusuzugura ibendera ry’igihugu.

Abo badepite bavuga ko ibyo byaha bigaragara ko ari ukunenga bidakorewe mu ruhame, ko igifungo cy’imyaka 21 kuri Byabagamba n’imyaka 20 kuri Rusagara "bihabanye" n’ibyo byaha bahamijwe.

Mu kiganiro yagiranye n’abanyamakuru kuri uyu wa gatanu Perezida Kagame yabajijwe icyo atekereza kuri iyo baruwa, abanza kuvuga ko atigeze ayibona.

Yagize ati “Mbere na mbere sinigeze nakira ibaruwa n’imwe. Iyo baruwa bivugwa ko nandikiwe nayumvise mu makuru, ku mbuga nkoranyambaga n’ahandi. Gusa wenda zimwe mu nzego za Leta zarayakiriye.

Mbere ya byose, ibaruwa igomba kuba yaratanzwe mu buryo butari bwo kuva mu ntangiriro. Wenda yari ibaruwa ifunguye ariko nandikiwe, ariko ntekereza ko yatanzwe mu buryo butari bwo kunyandikira ibaruwa ivuga ku butabera n’ibibazo by’imanza mu gihugu cyacu, ntabwo numva impamvu, simbona ishingiro”.

Itangazo ryashyizweho umukono na Minisitiri w’ubutabera Johnson Busingye risubiza abo badepite ryasohotse kuwa gatatu w’iki cyumweru, rivuga ko hari ubwo Leta ishobora kugira uruhare mu rubanza, ariko rikagaragaza ko ibyo biba gusa iyo yabisabwe n’inzego z’ubucamanza bireba.

Bitabaye ibyo ngo byaba “bidakwiye ko Leta igira icyo ivuga ku rubanza ruri kuba, gushaka kugena uko rucibwa, cyangwa kurugiramo uruhare”, nkuko abo badepite babisabaga.

Perezida Paul Kagame yongeye gushimangira ko abo badepite intambwe yambere bari bakwiye gutera ari ugusaba igihugu cyabo kuburanisha abakurikiranyweho ibyaha bya Jenoside igihugu cyabo gicumbikiye, kuko u Rwanda rumaze imyaka isaga 10 rusaba ko baburanishwa ariko ntibikorwe.

Perezida Kagame mu kiganiro n’abanyamakuru

Perezida Kagame ati “Iyo aba bantu baba mu by’ukuri bahangayikishijwe n’ubutabera buhabwa abantu, ntimutekereza ko ahantu ha mbere bari kugeza impungenge zabo ari mu rwego rw’ubutabera rw’igihugu cyabo?

Niba bahangayikishijwe n’ubutabera koko, bimeze gute ku butabera bw’Abanyarwanda bishwe muri Jenoside, ndetse n’abantu bayigizemo uruhare ku buryo butaziguye bicaye mu gihugu cyabo, kandi igihugu cyabo umuntu akaba yavuga ko kibarindiye umutekano, kuko ntekereza ko bahawe n’uburenganzira bwo gutura, bari hariya mu buryo bwemewe n’amategeko”.

Perezida Kagame yongeyeho ati “Abo badepite mu kibazo nk’iki bagombaga kubanza guhangayikishwa n’iki kibazo [cy’abakurikiranyweho ibyaha bya Jenoside bataburanishwa] kimaze imyaka irenga 10. Ntabwo nigeze numva ibaruwa yandikiwe umuntu uwo ari we wese ibaza uburyo ibyo bibazo biri gukurikiranwa.

Ntibigeze bandikira ukuriye ubutabera cyangwa bagenzi babo bo mu nteko ishinga amategeko ngo bababwire bati duhangayikishijwe n’ibi, none bari kwandikira Perezida.

Ntibanatekereza ko ari Perezida baha icyubahiro gike ibindi bihugu n’abayobozi babyo n’inzego zabyo. Ibyo ni byo twamenyereye ntabwo mbifiteho ikibazo. Tubaho ubuzima bwacu na bo bashobora kudutekereza uko babishaka nta kibazo mbifiteho”.

President Kagame yavuze ko abo badepite bibwira ko bari gukorera ubuvugizi Col. Byabagamba na Rusagara, kandi bari kurushaho gukomeza urubanza rwabo, avuga ko yabagira inama yo kutarukomeza kurushaho.

Yongeyeho ko ibyo abo badepite bakoze bigaragaza uburyo bafite aho bahuriye n’urwo rubanza, avuga ko azabiharira Minisitiri w’ubutabera n’abandi barebwa n’inkiko kuko we nta cyo afite yabikoraho.

Bosco Ntaganda

Mu kwezi ka karindwi uyu mwaka ni bwo Ntaganda wahimbwe izina rya “Terminator” yahamijwe ibyaha 18, birimo iby’intambara n’ibyibasiye inyokomuntu.

Ibyaha yahamijwe birimo gufata abakobwa n’abagore ku ngufu, guhindura bamwe abacakara no gukoresha imibonano mpuzabitsina ku gahato, kuri ibyo hakiyongeraho n’ibyaha byibasiye abasiviri no gushyira abana mu nyeshyamba, bikaba ari ibyaha yakoze ubwo yari umuyobozi mu nyeshyamba muri Kongo Kinshasa hagati ya 2002 na 2003.

Ni we muntu wa mbere uru rukiko ruhamije ibyaha byo guhindura abagore n’abakobwa abacakara b’imibonano mpuzabitsina.

Uru rubanza rwe rwatangiye muri Nzeri 2015 rusozwa muri Kanama umwaka ushize wa 2018.

Ntaganda mu rukiko

Imiryango inyuranye iharanira inyungu z’abagizweho ingaruka n’ibyaha biregwa Bosco Ntaganda, yari yasabye ko yahanwa mu buryo bukomeye kandi na yo igahabwa indishyi z’akababaro.

Mu 2013, Ntaganda yari mu mutwe wa M23 waje gucikamo ibice. Igice cye kimaze kotswa igitutu mu mirwano yabereye mu Burasirazuba bwa Kongo Kinshasa, yahungiye mu Rwanda yishyikiriza Ambasade ya Amerika i Kigali, na yo imwoherereza uru rukiko.

Ntaganda w’imyaka 46, ashinjwa ibyaha yakoze ari mu mutwe wa FPLC (Forces Patriotiques pour la Libération du Congo) wa Thomas Lubanga.

Lubanga we urukiko rwamukatiye igifungo cy’imyaka 14, nyuma yo guhamwa n’ibyaha birimo ibisa n’ibyo Ntaganda yahamijwe.

Dr. Nzabonimpa asaba ko ibijyanye n’ubuzima bw’imyororokere byajya biganirwaho no mu bikorwa byahurije hamwe abaturage

Ibi biravugwa mu gihe imibare y’abana baterwa inda zitateguwe ikomeza kuzamuka buri mwaka, ingimbi n’abangavu bakagaragaza ko hari ababyeyi batagira ubushake bwo kubaganiriza ku bijyanye n’ubuzima bw’imyororokere, bikabagusha mu bishuko bituma bamwe batwara izo nda.

Abagiye batwara inda muri ubu buryo bavuga ko byagiye bituruka ku kuba batarabonye amakuru mbere yuko bagera mu gihe cy’ubugimbi n’ubwangavu, babugeramo bagahura n’ababashuka babahaga amakuru atari yo, ko iyo umukobwa agiye mu mihango bwambere aba agomba gukora imibonano mpuzabitsina kugira ngo atazajya ababara, kandi adashobora guhita atwara inda.

Mu bagiye bahura n’iki kibazo harimo abo inzozi zabo zahagaze, kubera kubaho mu buzima bubi nyuma yo kubyara ndetse n’abahagaritse amashuri burundu.

Abana b’abakobwa bashobora guhura n’ibibazo nk’ibi baracyari benshi, kuko bemeza ko kugeza n’ubu hari ababyeyi batemera kuganiriza abana ba bo.

Umukobwa w’imyaka 15 twahisemo kwita Mukamana Dativa muri iyi nkuru, avuga ko inshuro zose yagerageje kuganiriza nyina ku bijyanye n’imyororokere yamwiyamaga avuga ko atangiye kuba inshinzi.

Ati “Hari igihe umubyeyi ugira icyo ukeneye kumubaza nk’ibyo by’imyororokere akumva ko ari ubushinzi, yakubwira ngo ugende ubikure ahandi nawe ukajya kubikura ahandi nyine nawe urabyumva”.

Uyu mukobwa kimwe na benshi mu nshuti ze ngo bagiye batungurwa n’imihango ya mbere ku buryo bayibonaga ntibamenye ibyo ari byo bikabatera ipfunwe.

Kirazira zidafite ishingiro

Hari amakuru menshi adafite ishingiro abana b’abangavu bavuga ko bagiye bahabwa na bagenzi babo, nko kuvuga ko umukobwa warwaye uduheri mu maso agomba gukora imibonano mpuzabitsina kugira ngo dukire, kuba umukobwa wabonye imihango yambere agomba gukora imibonano ngo atazajya ababara yayigiyemo, cyangwa kuba umuhungu udafite ubwanwa adashobora gutera inda.

Ni amakuru abana b’abakobwa bahererekanya hagati yabo kandi ashyira mu kaga gakomeye ubuzima bwa bo.

Hari abavuga ko kutaganiriza abana ku buzima bw’imyororokere ari “kirazira zidafite ishingiro zidakwiye guhabwa agaciro” bagendeye ku mpamvu ababyeyi batanga zituma bataganira n’abana.

“Mu Kinyarwanda hari amagambo menshi udashobora gutinyuka kuvuga. Ntakubeshye sinashobora kubiganiriza umwana. Wumva ari ngombwa ukumva ufite n’iryo shyaka ariko ukabura ahantu uhera icyo kiganiro ujya kukivuga”. Uku ni ko umubyeyi wo mu mujyi wa Kigali utashatse ko tuvuga amazina ye abivuga.

Kuri iyi ngingo, ababyeyi b’abagabo n’abagore ntibavuga rumwe k’ugomba kuganiriza umwana w’umukobwa watangiye kujya mu mihango.

Abagabo bavuga ko ari inshingano y’ababyeyi b’abagore mu gihe abagore na bo bavuga ko bibatera isoni bikwiye gukorwa n’ababyeyi b’abagabo.

Musonera Japhet wo mu karere ka Rulindo agira ati “Ibyubahiro by’abakobwa burya si nk’ibyabahungu. Umuhungu namutinyuka nkamuganiriza, ariko umukobwa w’inkumi koko wabihera he? Umukobwa aganira na nyina, ahubwo umuhungu akaganira na se nibura”.

Ku rundi ruhande ariko, ababyeyi babashije kurenga izi kirazira bakaganiriza abana, bavuga ko byagiye bitanga umusaruro, ariko by’umwihariko bikarema icyizere hagati y’umwana n’umubyeyi nk’uko byemezwa na Niyibizi Celestin wo mu karere ka Gicumbi.

Agira ati “Umwana w’umukobwa ahubwo iyo umubyeyi w’umugabo abimuganirije ahita atinyuka. Byatanze umusaruro uhagije iwanjye. Ubu umwana niyo agiye ahantu arambwira, yashaka kubaza nyina ikintu cyose abanza kumbaza kuko namutinyuye.

Maze kumuganiriza yabibwiye nyina, icyanshimishije ni uko yasetse nyina amubaza impamvu muganiriza ariko we ntamuganirize”.

Abana bagize amahirwe yo kuganirizwa ku buzima bw’imyororokere hakiri kare bemeza ko byabagiriye akamaro kanini, by’umwihariko mu kudashukwa n’abantu babaha amakuru atari yo kubera impinduka zibabaho mu gihe cy’ubugimbi n’ubwangavu.

Ni mu gihe abataragize ayo mahirwe bo bakunze guhura n’ibishuko by’ababashora mu busambanyi, by’umwihariko ku bakobwa, nyuma yo kubona imihango yambere.

Impuguke mu buzima bw’imyororokere, Dr. Anicet Nzabonimpa, avuga ko mu gihe hari ababyeyi bakomeje kugira imyumvire ituma bataganiriza abana, hakwiye gushyirwaho uburyo inyigigisho zijyanye n’ubuzima bw’imyororokere zajya zitangwa no muri gahunda zihuriza hamwe abaturage.

Agira ati “Nk’uko Minisiteri y’uburezi igenda ishyira mu nyigisho ibijyanye n’ubuzima bw’imyororokere, aya makuru akwiye kujya atangwa no mu biganiro bikorwa hirya no hino, haba mu nteko z’abaturage, mu mugoroba w’ababyeyi, mu gihe cy’umuganda, kugira ngo amakuru umwana ataboneye ku ishuri cyangwa umukobwa utiga ayavane ku babyeyi, ku baturanyi, ku mujyanama w’ubuzima, mu nzego z’ibanze n’ahandi hose yabasha kuyabona”.

Imibare y’abana baterwa inda zitateguwe igenda yiyongera uko imyaka ishira, kuko mu mwaka ushize habaruwe abana 19.000 batewe inda bakiri bato, bavuye ku 17.000 babarurwaga mu mwaka wa 2016.

Ni ikibazo gihangayikishije Leta y’u Rwanda, ihamagarira buri wese kugira uruhare mu kibonera umuti.

Ibibazo by’ubukene bw’Abapadiri n’imiterere mibi ya tumwe mu duce twa Amazonie bituma hari abakirisitu gatolika benshi batabona umupadiri wo kubasomera misa buri cyumweru.

Umwe mu myanzuro yafashwe n’iyi nama ya Sinodi gatolika ya 2019 uvuga ko abagabo “Bafite ingo zihamye kandi b’inyangamugayo bubashywe muri sosiyete kandi bitangira Kiliziya bashobora kugirwa Abapadiri nyuma yo guhabwa amasomo atangirwa mu iseminari kugira ngo babashe kuzuza inshingano z’Abapadiri.”

Uyu mwanzuro wa 111 watowe ku bwiganze bw’amajwi 113 ku majwi 43 y’abatarawushyigikiye, bivuze ko Papa Francis nashyira umukono ku nyandiko ikubiyemo imyanzuro yafatiwe muri iyi Sinodi abagabo bafite abagore mu gace ka Amazonie batangira kugirwa abapadiri.

Iyi nyandiko iragaragaza neza ko ibi bireba agace ka Amerika y’Amajyepfo ukuyemo ibihugu bya Argentine na Chile.

Inyandiko ikubiyemo imyanzuro yafatiwe muri iyi Sinodi igaragaza ko bifata amezi n’imyaka kugira ngo Abapadiri bagere mu duce tumwe bagiye gutanga amasakaramentu ya Ukarisitiya, Penetensiya cyangwa Ugusigwa kw’abarwayi.

Icyifuzo cy’uko abagabo bo muri Amazonie bafite abagore bagirwa Abapadiri cyatanzwe n’Abasenyeri bo muri Amerika y’Amajyepfo, kikaba kimaze igihe kinini gitambamirwa n’abatsimbaraye ku mahame ya Kiliziya.

Abakurikiranira hafi ibya Kiriziya Gatorika bavuga ko icyemezo cyo kwemerera abagabo bo muri Amazonie bafite abagore kuba Abapadiri ari intambwe ya mbere, ishobora kuzana impinduka muri Kiliziya zagera no mu bindi bice by’isi zihereye mu gace ka Amazonie.

Sinodi Gatolika ni inama ikomeye ku rwego rwa Kiliziya gatolika, ikaba ihuza Abepisikopi bava mu mpande zose z’isi ngo bungurane ibitekerezo ku hazaza ha Kiliziya Gatolika.

Iy’uyu mwaka yitabiriwe n’abarenga 200, baganira ku bibazo bitandukanye birimo iki cy’agace ka Amazonie muri Amerika y’Amajyepfo, ibibazo by’ihindagurika ry’ikirere, ibirebana n’abimukira ndetse n’ibirebana n’iyogezabutumwa.

Itsinda ry’abayobozi bahagarariye ibihugu byabo mu muryango wa Afurika yunze Ubumwe bari basuye inkambi ya Gashora icumbikiye impunzi zavuye muri Libya

Ibi bivuzwe mu gihe zimwe muri izo mpunzi zakiriwe mu Rwanda zivuye muri Libya zikomeje kugaragaza ko zishimiye uko zibayeho mu Rwanda, ariko zikagaragaza ko icyifuzo cyazo cya nyuma ari ukujya i Burayi.

Mu mpera z’ukwezi kwa cyenda nibwo icyiciro cya mbere cy’impunzi 66 zivuye muri Libya zageze mu Rwanda, mu gihe kitagera ku kwezi u Rwanda rwakira ikindi cyiciro cy’impunzi 123.

Bose uko ari 189 kuri ubu bari mu nkambi ya Gashora mu Karere ka Bugesera.
Benshi bavuga ko bishimiye uburyo babayeho mu Rwanda, ariko na none bakagaragaza ko batifuza kuhatinda kuko bagifite inyota yo kujya i Burayi.

Maharil Dawit ukomoka muri Eritrea agira ati “Ndashimira cyane Guverinoma y’u Rwanda yatwakiriye neza ituvanye mu bibazo bikomeye twarimo muri Libya, gusa ariko ndifuza ko banshakira igihugu kinyakira i Burayi kuko hari uburezi buri ku rwego rwo hejuru hakaba n’akazi. Gusubira mu gihugu cyanjye simbishaka kuko hari ubutegetsi bw’igitugu. Usubiyeyo bashobora kugufunga hagati y’imyaka itandatu n’icumi. Nta mahitamo mfite rero yo gusubira mu gihugu cyanjye”

Umuyobozi w’Ishami ry’Umuryango w’Abibumbye ryita ku Mpunzi (HCR), ushinzwe agace ka Afurika y’Iburasirazuba n’ibiyaga bigari, Clementine Awu Nkwete Salami, avuga ko batangiye ibiganiro n’ibihugu by’i Burayi, kugira ngo haboneke ibyakwemera kwakira izo mpunzi.

Clementine Awu Nkwete Salami (uri hagati wambaye ijipo) avuga ko hari ibihugu by’i Burayi byagaragaje ubushake bwo kwakira zimwe mu mpunzi zishaka kujya i Burayi

Uyu muyobozi avuga ko kugeza ubu hari ibihugu birimo n’u Busuwisi byemeye kuzakira, ariko bikaba bikiri bike ku buryo ubuvugizi bukomeje.

Agira ati “Guverinoma z’ibihugu bimwe zateye intambwe mu kwakira zimwe muri izo mpunzi. Gusa ibyemeye kuzakira biracyari bike ugereranyije n’umubare w’impunzi, ariko tuzakomeza kuvugana n’abafatanyabikorwa bacu, kugira ngo haboneke ibindi bihugu byazakira. Ni yo mpamvu navuze ko turi gushaka ibisubizo bitandukanye. Tuzabaganiriza tugenzure n’umutekano mu bihugu bakomokamo, ariko tunarebe niba bujuje ibisabwa ngo bakirwe mu bihugu by’i Burayi bifuza kujyamo. U Busuwisi ni kimwe mu bihugu byamaze kwemera kwakira bamwe, ibindi na byo ni bimwe mu bihugu bya Scandinavia”

Mu gihe HCR ikiri gushaka ibihugu byakwemera kwakira izo mpunzi, bimwe mu bihugu bya Afurika ngo bigiye kugera ikirenge mu cy’u Rwanda byakira zimwe mu mpunzi zikiri muri Libya.

Abasuye impunzi basobanuriwe uko zibayeho muri iyo nkambi

Abahagarariye ibyo bihugu mu muryango wa Afurika yunze ubumwe babivuze nyuma y’uko mu cyumweru gishize basuye inkambi yakiriye ibyiciro bibiri by’impunzi zimaze kwakirwa mu Rwanda, bakavuga ko bikwiye gutanga isomo no ku bindi bihugu bya Afurika.

Patrick Kapua uhagarariye Sierra Leone mu muryango wa Afurika yunze Ubumwe agira ati “Ibyo twabonye hano ni byo byatera ishyaka ibindi bihugu bya Afurika kugera ikirenge mu cy’u Rwanda. Nababwira ko nyuma y’uyu munsi muzatungurwa no kumva ko ibindi bihugu byinshi byemeye kwakira impunzi kubera iyi ntambwe u Rwanda rwateye. Ni na yo mpamvu twafashe icyemezo cy’uko Komisiyo ya Afurika yunze Ubumwe n’amakomite ashinzwe iki kibazo yaza akareba uko bimeze. Nidusubirayo tuzahita dukora ubuvugizi ku bihugu kugira ngo bifungure amarembo byakire abavandimwe na bashiki bacu bari mu kaga.”

Crisantos Obama Ondo uhagarariye Guinea Equatorial mu Muryango wa Afurika yunze Ubumwe na we yagize ati “Igihugu cye kiri gusinya amasezerano hagati ya HCR n’umuryango wa Afurika yunze Ubumwe. Mu gihe gito cyane Guverinoma ya Guinea Equatoriale izaba yasinye amasezerano yo kwakira impunzi, ariko kuri iyi nshuro si impunzi zivuye muri Libya, ahubwo twahisemo kwakira impunzi ziri mu nkambi muri Ethiopia.”

Kugeza ubu u Rwanda na Niger ni byo bihugu byonyine byari byarashyizeho uburyo bwa “Emergency Transit Mechanism” bwo kwakira impunzi ziri mu nkambi zo muri Libya. U Rwanda rwishimira ko rwabashije kuzivana mu kaga zarimo muri Libya, rukavuga ko abifuza kuguma mu Rwanda rwiteguye kubakira, ariko rudashobora gufata icyemezo ku mahitamo y’aho izo mpunzi zifuza kuba.

Zimwe muri izo mpunzi ziri mu Rwanda zishimira uko zakiriwe mu Rwanda

Inkuru bifitanye isano:

Impunzi zavuye muri Libya zirashima uko zibayeho mu Rwanda ariko ziracyatekereza kujya i Burayi

Izi mpunzi zakorewe ibibuga by’imikino itandukanye ibafasha kwidagadura

Benshi baravuga ko bahuye n’ibibazo byinshi mu rugendo ruva mu bihugu byabo berekeza ku mugabane w’i Burayi, nk’uko bivugwa n’umunya-Eritrea Ganat Nagasi w’imyaka 37 y’amavuko.

Uyu munya-Eritrea avuga ko yahunze igihugu cye nyuma y’uko ubuyobozi muri icyo gihugu bufunze umugabo we na we bagatangira kumuhiga bukware ngo afungwe bigatuma ahunga icyo yita “ubutegetsi bw’igitugu butita ku baturage” muri Eritrea.

Mu nzira yerekeza i Burayi yahuye na ba rushimusi benshi bamusabaga amafaranga kugira ngo bamufashe kugera muri Libya. Abayatanze barafashwaga, ariko abayabuze bakagirwa abacakara b’abo ba rushimusi, ab’igitsina gore bo bagasambanywa ku ngufu muri urwo rugendo rwose.

Kwerekeza muri Libya ariko benshi muri bo ntibyabahiriye. Abatarahuye n’impanuka z’ubwato mu nyanja ya Mediterranée bagiye bagera mu Butaliyani ariko bagafatwa bagasubizwa muri Afurika.

Abarokowe izo mpanuka n’abafatirwaga mu Butaliyani bose bacumbikirwa mu nkambi ziri muri Libya, ariko bavuga ko ubuzima muri izo nkambi bwari bubi kurusha ubwo bahunze mu bihugu byabo.

Nagasi agira ati “Libya ni ho hantu hatubereye habi cyane twebwe abantu b’igitsina gore b’abanya-Eritrea. Benshi muri twe bafashwe ku ngufu na ba rushimusi muri Libya, basaza bacu barakubitwa bakorerwa iyicarubozo, ni ahantu hatubereye habi cyane twarahababariye cyane.”

Izo mpunzi zivuga ko ubuzima mu nkambi zo muri Libya bwazigoye cyane, ku buryo bamwe bahapfiriye bazize iyicarubozo bakorerwaga ndetse n’inzara bicishwaga.

Umusore w’imyaka 24 ukomoka muri Ethiopia abisobanura agira ati “Izo nkambi zari gereza mbi cyane. Umuntu bamuhaga umugati umwe gusa ku munsi. Nta myambaro twari dufite, wasangaga abantu banduzanya igituntu, kubera kubaho mu bucucike abantu bamwe baryama hejuru y’abandi, hafi y’impunzi zose wasangaga zirwaye igituntu.”

Ngasi yungamo ati “Twari mu bigo batwakiriragamo ariko sinashobora gusobanura ibyatubayeho kuko byari ubunyamaswa bukabije, twafashwe ku ngufu, twakorewe iyicarubozo, ubuzima twabayemo muri Libya kubusobanura ntibyoroshye.”

Kugera mu Rwanda kw’izi mpunzi byongereye akanyamuneza ku maso yazo, n’ubwo hari abo bigaragara ko bakizahajwe n’ihungabana batewe n’ubuzima bushaririye babayemo muri Libya.

Urubyiruko ruba ruhugiye muri gahunda nyinshi cyane cyane imikino y’intoki (volleyball) n’amaguru (football) baba bakinira ku bibuga bubakiwe imbere mu nkambi bacumbikiwemo i Gashora mu Karere ka Bugesera. Kuba mu Rwanda barabigereranya no kuva mu mwijima ukajya mu rumuri.

Umusore w’imyaka 20 w’umunya-Eritrea abisobanura muri aya magambo, ati “Twahuye n’ibibazo byinshi. Twabaye mu bigo aho tutashoboraga kubona izuba. Abantu benshi barapfuye, benshi bakorewe iyicarubozo, ubu ndumva merewe neza hano mu Rwanda, nshobora kubona urumuri rw’izuba, mfite amahirwe yo kuba ndi hano hamwe n’abaturage b’u Rwanda, ubu ndumva igisobanuro cy’Ubunyafurika.”

N’ubwo bishimiye kugera mu Rwanda, baracyahanze amaso i Burayi

N’ubwo izi mpunzi zishimiye ubuzima zibayeho mu Rwanda, benshi baravuga ko icyifuzo cyabo cyo kujya i Burayi kitarasubizwa.

Abavuganye na Kigali Today bose bagiye bagaragaza ibihugu bifuza kujyamo birimo u Butaliyani, u Busuwisi, u Bwongereza n’u Bufaransa, bavuga ko “N’ubwo babayeho mu buzima bubi batifuza ko abazabakomokaho bazabaho muri ubwo buzima muri Afurika.”

Umugabo wo muri Somalia ufite umwana w’uruhinja muri iyo nkambi agira ati “Mu bihugu byacu uburezi buri hasi, uburenganzira bwa muntu kubwubahiriza ni ikibazo kandi n’imibereho yacu usanga iri hasi. Ntabwo twifuza ko abana bacu bazakurira muri ubu buzima. Twishimiye uko tubayeho mu Rwanda ariko ntitwifuza kuhatinda turashaka kujya i Burayi.”

Nta gisubizo kugeza ubu kiraboneka ku byifuzo by’izi mpunzi, cyangwa ngo hamenyekane neza niba hari ibiganiro biri gukorwa hagati y’ishami ry’umuryango w’abibumbye n’ibihugu bifuza kujyamo. Elise Vellachallane, ushinzwe guhuza Ishami ry’umuryango w’abibumbye n’izindi nzego mu Rwanda avuga ko bakeneye igihe kugira ngo bahindure imitekerereze.

Agira ati “Banyuze mu buzima bubi, kandi bizabafata igihe kinini kugira ngo batekereze andi mahitamo ku hazaza habo. Ni yo mpamvu turi kubafasha tubereka ko ahazaza heza atari ukujya i Burayi gusa. Abashaka kwiga bafite amahirwe yatuma biga kuko turashaka kubashyiriraho amashuri. Ahazaza heza hashobora kubahuza n’imiryango yabo, ahazaza heza hashobora kubasubiza mu bihugu byabo, impamvu zatumye bahunga zibaye zitakiriho tukabibafashamo, hari ibisubizo byinshi.”

Mu Rwanda hamaze kugera ibyiciro bibiri by’impunzi zavuye muri Libya. Icyiciro cya mbere cyaje ari impunzi 66, icya kabiri kiza ari impunzi 123. Abo bose bamaze kuza uko ari 189 biganjemo abanya-Eritrea kuko bagera ku 102. Biteganyijwe ko u Rwanda ruzakira icyiciro cya gatatu cy’impunzi 120 mu kwezi gutaha kwa cumi na kumwe.

Inkuru bifitanye isano:

Bimwe mu bihugu by’i Burayi byemeye kwakira impunzi zagiriye ibibazo muri Libya

Magufuli ashyigikiye ko Harmonize yakwiyamamariza kuba umudepite

Harmonize yemerewe guhatana mu matora y’abagize inteko ishinga amategeko ateganyijwe umwaka utaha.

Perezida Magufuli yagaragaje ko amushyigikiye nyuma y’uko aririmbye mu gitaramo cyari cyitabiriwe n’abayobozi bo ku rwego rwo hejuru muri Tanzania harimo na Perezida Magufuli ubwe.

Perezida Magufuli agaragaje ko ashyigikiye umuhanzi Harmonize mu gihe Guverinoma ya Tanzania ikomeje gukomanyiriza indirimbo z’abandi bahanzi muri Tanzania zivugwaho kuba zishishikariza urubyiruko ubusambanyi.

Ikinyamakuru Mwananchi cyatangaje ko Guverinoma ya Tanzania yagiye ifunga amaso ku ndirimbo za Harmonize, mu gihe iza bagenzi be, Diamond Platnumz na Rayvanny bahoranye muri Wasafi zakunze kwibasirwa, kugeza n’aho babuzwa kongera kuziririmba mu bitaramo bakoreye imbere mu gihugu.

Harmonize aherutse guhabwa ubutumire bwihariye agiye kuririmba mu birori byitabiriwe na Perezida Magufuli

Harmonize aherutse gushyira hanze indirimbo ivuga ibigwi Perezida Magufuli, amugaragaza nk’umuyobozi ukora cyane ufite ibitekerezo bigamije iterambere.

Harmonize si we muhanzi wa mbere uririmba waba ubaye Umudepite mu nteko ishinga amategeko mu Karere ka Afurika y’Iburasirazuba.

Mu bandi bahanzi babaye Abadepite mu karere harimo abahanzi nka Bobi Wine kuri ubu utavuga rumwe na Leta ya Uganda, Professor Jay muri Tanzania, na Judith Babirye waririmbye indirimbo yitwa Beera Nange.

Ni nyuma y’uko iyo miryango yakunze kunengwa kudakora ubwo buvugizi ku bibazo birimo n’izamuka ry’ikiguzi cya serivisi, benshi bemeza ko byakabaye bikorerwa ubuvugizi n’iyo miryango itari iya Leta. Gusa imwe muri iyo miryango igaragaza ko kudakora ubwo buvugizi, kenshi biterwa n’imbogamizi zo kudahabwa amakuru yakwifashishwa mu kubukora, nk’uko Mumpe Frank ukorera umuryango AJPRODHO-JIJUKIRWA abivuga.

Agira ati “Wumva nk’ikintu runaka ugashaka kugikoraho ubuvugizi, nk’urugero niba ari nk’ikigo cya Leta wumvisemo ibitagenda neza washaka gukora ubuvugizi wajya kubaza abagikoramo bakakwima amakuru.”

Bamwe mu bayobozi bo mu nzego za Leta bagaragaza ko ikibazo cyo kudahabwa amakuru kuri iyi miryango, giterwa n’uko imwe muri yo ikora mu buryo busa nko guhangana n’inzego za Leta. Abo bayobozi mu nzego za Leta bavuga ko imiryango ya Sosiyete sivile ikwiye kubanza kumva ko itari mu ihangana n’inzego za Leta.

Uretse imbogamizi yo guhabwa amakuru, hari abanenga imiryango ya sosiyete sivile kwanga gukora ubuvugizi nkana, kubera gutinya inzego zimwe na zimwe ziba zifite aho zihuriye n’ubwo buvugizi.

Imiryango imwe ntihakana ko iki kibazo kiriho, ariko n’aho bibaye kenshi ngo biterwa n’uko nta bimenyetso bifatika umuryango ushaka gukora ubuvugizi uba ufite byaherwaho mu gukora ubuvugizi, nk’uko Mwananawe Aimable uhuza ibikorwa by’umuryango Ihorere Munyarwanda Organisation (IMRO) abivuga.

Ati “Ubundi utinya ari uko ibyo uvuga bidafite gihamya. Ariko iyo bifite gihamya ukegera inzego bwite za Leta zibifite mu nshingano ntizibura kukumva. Ikindi kandi ukamenya n’abashobora gukora impinduka ku buvugizi ukora.”

Mu guhangana n’iki kibazo cyo gukora ubuvugizi budashingiye ku bushakashatsi, umuryango Ihorere Munyarwanda Organization ngo watangiye gahunda yo guhugura imiryango itari iya Leta, cyane cyane ikora mu rwego rw’ubutabera n’uburenganzira bwa muntu.

Mwananawe avuga ko bizeye ko ibi bizatuma iyo miryango ikora ubuvugizi bushingiye ku cyizere kandi butarimo ihangana hagati yayo n’inzego za Leta.

Umuyobozi wa Equity Bank Hannington Namara yerekanye uko iri koranabuhanga rikoreshwa kuri telefoni

Umuyobozi mukuru wa Equity Bank mu Rwanda Hannington Namara, avuga ko iri koranabuhanga rizohereza abakiriya bashaka kugira ibyo bagura cyangwa kwishyura serivisi, kuko byihuta kandi nta kiguzi umukiriya asabwa.

Ati “Wowe wishyura nta cyo baguca, umucuruzi ni we wishyura serivisi zo kwishyurwa vuba, kuko ubundi yagacuruje bakamuha amafaranga na we akayajyana kuri banki kuyabitsa yo”.

Kuva ubu kugeza mu mezi atandatu ari imbere, abacuruzi bakorana na Equity Bank muri ubu buryo bwo kwishyura ngo bazatanga iyi serivisi ntacyo bishyuzwa, ariko nyuma yaho ngo bazatangira kwishyuzwa 0.5% ku mafaranga bishyuwe binyuze muri iri koranabuhanga.

Gusa Namara avuga ko ari ikiguzi gitoya cyane, kuko uretse kuba bazaba bahawe umutekano usesuye ku mafaranga yabo, bazaba banakuriweho ingendo bakoraga bajya kuyabitsa kuri banki.

Umuraperi Riderman n’umushyushyarugamba Anita Pendo bazazenguruka igihugu mu bitaramo by’ubukangurambaga bwa Eazzypay

Ati “Ugereranyije ayo mafaranga 0.5% bazajya bishyura n’ikiguzi cyo kubitsa kuri banki, ugereranyije n’izindi ngorane bahura na zo ndakeka bagabanukirwaho 80% y’ikiguzi bagatanze mu kuyabitsa.

Iri koranabuhanga ritanga uburyo bwo kwakira amafaranga ku buryo adashobora guhira mu iduka rifashwe n’inkongi cyangwa ngo bayibe. Umutekano ni 100%”.

Kugeza ubu hari abacurizi 3600 bamaze gusaba gukorana na Equity Bank mu kwishyurwa muri ubu buryo, ariko intego ngo ni uko bakomeza kwiyongera kuburyo buri duka ryabukoresha.

Hannington avuga ko bafite icyizere ko ubu buryo bwo kwishyura buzitabirwa cyane, kuko ubwakoreshwaga hifashishijwe imashini izwi nka POS buhenze nk’uko abisobanura.

Imashini imwe ya POS umucuruzi yasabwaga kuba afite ngo yishyurwe hifashishijwe uburyo bw’ikoranabuhanga, igura amaEuro 316, ni ukuvuga asaga ibihumbi 318 by’amafaranga y’u Rwanda, mu gihe ikarita umukiriya ahabwa na banki ikorana n’izo mashini igura amadorari ya Amerika nibura 10, ni ukuvuga ibihumbi bisaga icyenda by’amafaranga y’u Rwanda.

Abakozi ba Equity Bank

Hannington ati “Icyiza cya EazzyPay ni uko icyo usabwa gusa ari telefoni yawe, kandi telefoni yose wayishyuriraho zaba izigezweho cyangwa iziciriritse”.

Equity Bank kugeza ubu ifite abakiriya babarirwa mu 600.000, ariko konti 350,000 zonyine ni zo zishobora gukoresha ubu buryo.

Ibi ngo biterwa nuko bukoreshwa kuri konti y’umuntu ku giti cye gusa budakoreshwa kuri konti zihuriweho n’abantu benshi.

Equity Bank ivuga ko mu rwego rwo kumenyekanisha ubu buryo bw’ikoranabuhanga yatangiye ubukangurambaga bw’amezi atatu buzazenguruka igihugu, abishyura babwifashishije bakazagira amahirwe yo gutsindira ibihembo bya buri cyumweru birimo amafaranga, televiziyo, telefoni na moto, ndetse n’igihembo nyamukuru cya miliyoni ebyiri n’igice kizatangwa nyuma y’ubu bukangurambaga.

Hari ababyeyi bavuga ko nta cyiza cya YouTube bagendeye ku mashusho bamaze igihe babona azenguruka ku mbuga nkoranyambaga. Amwe muri ayo mashusho ni ay’abana b’abakobwa basa nk’abivuga ibigwi kubera umubare munini w’abagabo n’abasore baryamanye, ibintu bifatwa nko kwamamaza ubusambanyi mu rubyiruko.

Niyomugabo Callixte avuga ko izo mbuga zisigaye zitanga urubuga ku bantu bararura urubyiruko kandi bidakwiye. Ati “Abana bacu bamaze kwangirika kubera kureba ibintu by’urukozasoni byirirwa kuri izo mbuga. Hakwiye gushyirwaho uburyo bwo gutoranya ibyerekwa abana bacu”

Ba nyiri izo mbuga zinyuzwaho ibintu bifatwa nk’urukozasoni biyita abanyamakuru n’ubwo hari abatemeranya na bo. Benshi muri abo ntibashatse kugira icyo bavuga ku byo baregwa byo kurarura abakiri bato, ariko bagenzi babo bakabanenga bavuga ko gutangaza ibidakwiye babiterwa no gushaka indonke.

Jerome Munyentwari, umwe mu bafite ibitangazamakuru bikorera kuri YouTube avuga ko hari amafaranga make ashobora no kuba menshi bitewe n’uko nyiri urubuga rwa YouTube yakoze, ikaba ari yo nyungu ba nyiri izo mbuga za YouTube bakurikira bakirengagiza ko gushyiraho ibidakwiye byasenya sosiyete.

Kugenzura ibitangazamakuru bikorera kuri internet biracyari imbogamizi ikomeye, haba mu Rwanda no ku isi yose muri rusange. N’ubwo bitoroshye ariko, Komiseri Edmund Kagire w’urwego rw’abanyamakuru rwigenzura, avuga ko iyo hari umuntu utanze ikirego kigaragaza ko hari umunyamakuru warenze ku mahame ngengamyitwarire y’abanyamakuru, ahamagazwa akagirwa inama.

Ati “Iyo hari umuturage ureze cyangwa abanyamakuru bakagaragaza ko uri kubasebya utangaza ibidakwiye turamuhamagara tukamugira inama tumwereka ko ari kurengera mu gutangaza ibidakwiye. Hari n’icyo kuba wabimenyesha urubuga rwa YouTube rukabikuraho, ariko twe ntidushobora gufunga urubuga rw’umuntu.”

Ikibazo cy’ibintu bifatwa nk’urukozasoni bitangarizwa ku rubuga rwa YouTube kuri ubu gisa nk’ikirenze ubushobozi bw’inzego zishinzwe itangazamakuru, kuko na zo ubwazo zigaragaza ko zitahita zikibonera umuti.

Umunyamabanga nshingwabikorwa w’inama y’igihugu y’itangazamakuru Peacemaker Mbungiramihigo, avuga ko uretse kuba abakora mu itangazamakuru bakeneye guhora bihugura, hanakenewe ivugururwa mu mategeko agenga itangazamakuru, ndetse n’abaturage bagahabwa inyigisho zatuma bagira ubushobozi bwo guhitamo ibyabagirira akamaro mu byo babona kuri YouTube.

Uretse ubujyanama urwego rw’abanyamakuru rwigenzura rutanga kugeza ubu, hari izindi nzego nk’urw’ubugenzacyaha na Polisi zikurikirana abakoze ibyaha byakorewe kuri Internet.

N’ubwo bimwe mu bitangarizwa ku rubuga rwa YouTube byatangiye kwamaganwa, urwego rw’abanyamakuru rwigenzura rugaragaza ko gutangiza igitangazamakuru kuri urwo rubuga bitabujijwe, mu gihe cyaba gitangaza ibifitiye akamaro abagikurikira.

Minisitiri Sezibera asaba amahanga guhana Abanyarwanda bakora ibyaha, bajya gukurikiranwa bakihakana u Rwanda

Yabivuze ku mugoroba wo ku itariki 09 Mata 2019, nyuma y’ibiganiro yagiranye n’itsinda ry’intumwa z’u Busuwisi ziyobowe na perezida w’inteko ishinga amategeko y’icyo gihugu, Marina Carribio Guscetti.

Ibiganiro byabo byibanze ku mubano w’ibihugu byombi, bikaba byabaye nyuma y’uko izo ntumwa zisuye Inteko Ishinga Amategeko y’u Rwanda, ndetse n’ibikorwa u Busuwisi buteramo inkunga mu Rwanda.

Izo ntumwa z’u Busuwisi zari zaje kwifatanya n’u Rwanda kwibuka ku nshuro ya 25 Jenoside yakorewe Abatutsi.

Mu gushaka kumenya aho u Busuwisi buhagaze mu gukurikirana no kohereza mu Rwanda abakurikiranyweho ibyaha bya Jenoside, Minisitiri w’Ububanyi n’Amahanga w’u Rwanda, avuga ko ari ikibazo kigihari haba mu Busuwisi no mu bindi bihugu by’i Burayi, nubwo hari bike byatangiye kubaburanisha no kubohereza mu Rwanda bikwiye gushimirwa.

Yanagaragaje ikibazo cy’abantu bakorana n’imitwe nka FDLR ikora ibyaha mu Rwanda bakurikiranwa bakavuga ko batakiri Abanyarwanda. Ati “Hari ibihugu ubona harimo abantu bakoze Jenoside, cyangwa bafatanyije n’imitwe irimo za FDLR yakoze Jenoside, wamukurikirana ati njye sinkiri Umunyarwanda, ndi umuturage w’igihugu runaka.”

Akomeza agira ati “Iyo bakora ibyaha bafatanya n’imitwe yitwara gisirikari ikorera ibyaha mu Rwanda, bajya gukurikiranwa bakaba Ababiligi, Abanyakanada,…ntabwo ibyo bishoboka uwo muntu niba ari umuturage w’igihugu runaka agakora ibyaha mu kindi gihugu agomba kubihanirwa n’icyo gihugu yita icye. Niba kandi icyo gihugu cyumva ko abikora nk’Umunyarwanda, ntikikamukingire ikibaba kivuga ngo kirakingira umuturage w’igihugu cyabo.”

Perezida w’inteko ishinga amategeko y’u Busuwisi yavuze ko igihugu cye gishyigikiye u Rwanda mu rugendo rwo kongera imbaraga mu gukurikirana abakurikiranyweho ibyaha, abishingiye ku kuba “U Busuwisi bwaragize uruhare mu gushyiraho Urukiko Mpuzamahanga ruburanisha Ibyaha bya Jenoside, bukanagira umuntu ukomeye wabaye muri urwo rukiko, Carla Del Ponte, wakurikiranaga by’umwihariko ibyaha bya Jenoside yabaye mu Rwanda.”

U Rwanda rwakunze gusaba ko ibihugu by’amahanga bishyiraho amategeko ahana abahakana n’abapfobya Jenoside, ariko ibihugu byinshi ntibigaragaza ubushake mu gushyiraho ayo mategeko. Minisitiri Sezibera yavuze ko amaherezo bizakorwa.

Ati “Amaherezo bazabikora, amaherezo y’inzira ni mu nzu. Hari ibihugu bitangiye kumva ko bigomba gushyiraho ayo mategeko. Ntabwo biraba byinshi, ariko nk’u Bubiligi, Minisitiri w’Intebe wabwo yavuze ko yifuza ko bayashyiraho. Turakangurira n’ibindi bihugu gushyiraho ayo mategeko cyane cyane duhereye ku bihugu by’umugabane wacu wa Afurika.”

Min Sezibera yagiranye ibiganiro n’intumwa z’u Busuwisi

Mu biganiro intumwa z’u Busuwisi zagiranye na Minisitiri w’Ububanyi n’Amahanga w’u Rwanda ngo banavuganye ko byaba byiza ku bihugu byombi ubufatanye bugeze no mu zindi nzego, by’umwihariko urw’ishoramari.

Dr. Sezibera yavuze ko umubano w’ibihugu byombi hari imyaka yigeze kugera ntiwamera neza bishingiye ku ngaruka za Jenoside yakorewe Abatutsi. Icyakora ngo kuva mu mwaka wa 2017, umubano watangiye kumera neza, ku buryo hari n’ubushake bwo kuwukomeza kurushaho.

Gare nshya ya Rwamagana

Babivuze tariki 11 Gashyantare 2019, ubwo hatahwaga gare ya Rwamagana bari bamaze imyaka isaga ine bategereje. Bavuze ko mu bihe by’izuba n’iby’imvura babangamirwaga kubera imiterere ya gare bahoranye, kuri ibyo hakiyongeraho urugendo bari basigaye bakora bava aho imodoka zabasigaga muri gare y’agateganyo bari barimuriwemo.

Uwitwa Mushumba Charles yagize ati “Aho twategeraga hari ivumbi wajyagayo ugasanga wanduye, kandi imodoka yagusigaga kure ku buryo umuntu yagombaga gutega igare kugira ngo agere mu mujyi”

Ibi binashimangirwa na Mukakalisa Immaculée uvuga ko abakecuru bagorwaga n’urwo rugendo ruva aho bategeraga imodoka cyane cyane mu masaha y’ijoro, kandi rimwe na rimwe ugasanga nta mafaranga yo gutega igare bafite.

Aha ni ho abagenzi bari basigaye bategera imodoka mu gihe gare yubakwaga

Gare ya Rwamagana yubatswe na Jali Holdings ku bufatanye n’Akarere ka Rwamagana. Nubwo yafunguwe ntiruzura nk’uko Col.Dodo Twahirwa uyobora Jali Holdings yabivuze. Yavuze ko yubatswe mu byiciro bibiri icya mbere kikaba ari cyo cyarangiye, mu kindi cyiciro hakazubakwa inyubako y’igorofa izakorerwamo ibikorwa by’ubucuruzi.

Nubwo kubaka gare ya Rwamagana bitararangira, abayituriye n’abayitegeramo imodoka ngo barayibonamo ibisubizo ku bibazo bari bamaranye imyaka isaga ine.

Bavuga ko abanyeshuri n’abarwayi bajya kwivuriza mu bitaro bya Rwamagana bagiye kujya batega bitabagoye, by’umwihariko “abaturiye gare bakaba barubakiwe ruhurura yabakijije amazi yajyaga abasanga mu ngo bakitabaza abantu bo kuyadaha”

Abagenzi barishimira ko batazongera guhura n’ivumbi cyangwa ibiziba muri gare

Umunyamabanga wa Leta ushinzwe gutwara abantu n’ibintu muri Minisiteri y’Ibikorwa remezo, Eng. Jean de Dieu Uwihanganye, avuga ko kubaka ibikorwa remezo bishya biri mu ngamba Leta ifite mu guteza imbere urwego rwo gutwara abantu n’ibintu.

Uretse kubaka gare n’imihanda, ngo hagenda hashakwa n’imodoka zitwara abantu neza.
Gare ya Rwamagana izuzura itwaye miliyari imwe na miliyoni zisaga magana atatu (1.300.000.000) z’amafaranga y’u Rwanda.

Eng. Uwihanganye asaba abagenzi n’abaturage b’i Rwamagana muri rusange gufata neza iyo gare, kugira ngo serivisi zizayitangirwamo zizarusheho kubateza imbere.

Ingabire anenga abagore ko badatanga uburere nk’ubwo bahawe

Ibi byavuzwe na Ingabire Marie Immaculee, umuyobozi w’umuryango Transparency International Rwanda, usanzwe ari n’umukada mu muryango FPR Inkotanyi, asaba abagize urugaga rw’abagore rushamikiye kuri FPR Inkotanyi mu murenge wa Kinyinya kuba umusemburo w’impinduka aho batuye.

Ati “Kuki igitsure twakuranye tutakigirira abana bacu? Kuki inama twagiriwe tutazigira abana bacu, kuki ubushuti twari dufitanye n’ababyeyi bacu tutabufitanye n’abana bacu? Harabura iki?”

Ingabire atanga urugero rw’inama yagirwaga n’umubyeyi we akiri umwangavu, yavuze ko bigaragara ko ikibazo cy’inda zitateguwe n’indi myitwarire mibi igaragara mu rubyiruko bikwiye kubazwa ababyeyi.

Ingabire aganiriza abagize urugaga rw’abagore rushamikiye kuri FPR Inkotanyi b’i Kinyinya

Ati “Ntangira amashuri yisumbuye mama yaratwicazaga akatubwira ko umukobwa ari nk’amata adasogongerwa. Ati mwari mwabona umuntu usogongera amata? Tugasanga ntawe koko. Ugakura uzi ko umukobwa ari nk’amata adasogongerwa wenda utanazi no gusogongera icyo ari cyo.”

Ingabire avuga ko ibintu nk’ibi ababyeyi badatinyuka kubibwira abana, uretse ko nta n’umwanya babagenera ngo babe babona uburyo bwo kubiganira kuko “n’iyo bageze mu rugo umwana ajya kuri telefoni ye n’umubyeyi akajya ku ye.”

Abagore b’urwo rugaga mu murenge wa Kinyinya bavuga ko bakozwe ku mutima n’inyigisho za Ingabire, bakemeza ko bagiye gukosora aho bitagendaga.

Abagize urwo rugaga biyemeje kwisubiraho bagatanga uburere bukwiye

Nadia Uwamariaya agira ati “Ababyeyi benshi ntabwo bagiye bahanura abana ba bo, twakuyemo inyigisho zizatuma twegera abana bacu tukabigisha cyane ko amafaranga twirirwa dushaka ataruta abana bacu twibyariye.”

Umuyobozi w’urugaga rw’abagore rushamikiye kuri FPR Inkotanyi mu murenge wa Kinyinya, Mukandengo Claudine uyobora, avuga ko bagiye kongera imbaraga mu bukangurambaga bukorerwa mu mugoroba w’ababyeyi kugira ngo ababyeyi basubire mu nshingano za bo z’uburezi aho guheranwa no gushaka imibereho.

Dr Sabin Nsanzimana avuga ko abakuze bafite VIH bagiye gushyirirwaho gahunda zibafasha kubaho neza

Dr Sabin Nsanzimana ushinzwe ibikorwa byo kurwanya SIDA mu kigo cy’igihugu cy’Ubuzima RBC, yabitangarije mu nama yo ku rwego rwo hejuru y’urugaga nyarwanda rw’abafite virus itera SIDA (RRP+) yavugaga kuri virus itera SIDA ku bageze mu zabukuru.

Mu myaka 15 ishize ntibyari byoroshye kwemera ko umuntu ufite virus itera SIDA yabaho indi myaka 10 nyuma yo kugerwaho n’iyo virus. Gusa ubuhamya bw’abayifite bugaragaza ukuri gutandukanye n’uko abantu babitekerezaga icyo gihe.

Iryivuze Isaie wo mu Karere ka Ngoma, umaze imyaka isaga 13 afite virus itera SIDA yabitanzemo ubuhamya bw’uko yiyitayeho kugeza ubu akaba yumva agikomeye.

Ygize ati “Igihe nagiriye virusi itera SIDA sinkizi, ariko muri 2003 ni bwo namenye ko nyifite, mu 2005 ntangira gufata imiti. Nta kindi nakoze, ni ukwakira ibisubizo, ukirinda kwiheba, ukumva inama ugirwa, ugafata imiti neza kandi ukirinda kwishyira mu kato.”

Iryivuze uri mu kigero cy’imyaka isaga 50 aracyakomeye, ndetse uretse kuba abyivugira biragoye kumukekaho virus ya SIDA.

We na mugenzi we Cyimana Edouard w’imyaka 56 bavuga ko kubana na virusi itera SIDA kandi ukagirira akamaro sosiyete bishoboka n’ubwo mu minsi yambere kwiyakira bibanza kugorana.

Dr. Sabin Nsanzimana avuga ko icyizere cyo kubaho ku muntu ufite virus itera SIDA cyiyongereye mu myaka 10 ishize, ku buryo kigera ku myaka 25 nyuma yo kugerwaho n’iyo virus.

N’ubwo bimeze gutyo hari ikibazo cy’uko abageze mu zabukuru bafata imiti barwara indwara zitandura zishamikiye kuri virus itera SIDA, ziza kubera gufata imiti ya virus itera SIDA igihe kirekire.

Dr Nsanzimana avuga ko hashyizweho icyiciro gikurikirana indwara zitandura zishamikiye kuri virusi itera SIDA nka Diabete, indwara z’umuvuduko w’amaraso n’iz’imiyoboro y’amaraso.

Ati “Izo ziza kubera umuntu akuze ariko nanone hari n’imiti tuzi ko yagendaga isa nk’ibiha icyuho, ikindi ni gahunda zihariye kugira n’abo bakuru niba bakoraga ibirometero 10 baza gufata imiti tuyibashyikirize hafi banashyirirweho ukubakurikirana byihariye.”

Icyiciro cy’abantu bafite imyaka 50 gusubiza hejuru bafite virusi itera SIDA nticyakunzwe gukorwaho ubushakashatsi, ku buryo no ku rwego mpuzamahanga nta mibare myinshi ihari nk’uko Dr Nsanzimana abivuga.

Ikizwi ni uko ku isi yose kuri ubu habarurwa abantu bafite virusi itera SIDA babarirwa muri miriyoni 37 zirengaho gato, mu Rwanda bakaba bari hagati y’ibihumbi 230 na 250 nk’uko bigaragazwa n’ubushakashatsi bwa UNAIDS.

Guverinoma y’u Rwanda ivuga ko izakomeza gushyiraho gahunda zigamije gukumira no kurwanya SIDA, ku buryo intego ari uguhashya SIDA mu 2030.

Urugaga nyarwanda rw’abafite virus itera SIDA (RRP+) rugizwe n’abanyamuryango ibihumbi 120 hirya no hino mu gihugu, bagenda biteza imbere binyuze mu mishinga bakorera mu mashyirahamwe babarizwamo.

Ni irushanwa ryatangiye mu mezi ane ashize, abaryitabiriye bakaba barahatanye mu byiciro bitandatu byo kugaragaza impano zitandukanye. Umuntu umwe wahize abandi muri buri cyiciro ni we wahembwe miriyoni y’amafaranga y’u Rwanda, abahembwe bakavuga ko babonye uburyo bwo kwagura impano za bo binyuze mu mishinga bari barananiwe gukora.

Maniraguha Carine watsinze mu cyiciro cy’ubuvanganzo yagize ati “Aya mafaranga ndayakoramo imishinga yo gukomeza guteza imbere ubusizi n’ubwanditsi. Nari naratangiye ikintu cyitwa ‘Ibanga Poetic Night’ gihuza abasizi n’abaca imigani, kandi kuba mbonye aya mafaranga nshobora gukora akantu nakwita isomero ngateza imbere umuco wo gusoma”

Uretse ibihembo byahawe abafite impano zihebuje, hanahembwe imishinga yahize iyindi yateguwe n’uru rubyiruko rwari mu irushanwa, bikaba ari kimwe mu byo rwigishijwe nyuma yo guhuriza hamwe muri Bootcamp abatoranyijwe mu bandi hirya no hino mu gihugu.

Aba bakoze umushinga w’ubusizi n’ubuvanganzo wanabonye igihembo, bavuga ko ubu bagiye gutanga umusanzu wa bo ku burezi bwo mu Rwanda kuko bazajya bandika ibitabo by’abana n’inkuru zakwifashishwa nk’imfashanyigisho mu mashuri abanza n’ay’incuke.

Madame Jeannette Kagame yashimye urubyiruko rwitabiriye irushanwa muri rusange, avuga ko n’ubwo bose batahembwe bidasobanuye ko badafite impano cyangwa batakoze imishinga myiza. Yasabye inzego zose, iza leta n’iz’abikorera gukomeza gukurikirana urwo rubyiruko, kuko hari byinshi rwatangamo umusanzu wa rwo ku bw’impano rufite.

Ati “Turabasaba gukomeza gukorana n’abahanzi bagera hafi kuri 600 twari kumwe muri iki gikorwa (cya Art Rwanda Ubuhanzi). Twagiye duhura na bo mu ntara twanyuzemo, mubahe umwanya mu bikorwa by’ubukangurambaga, ibyo guhugura abakuru n’abato n’imyidagaduro. Amazina ya bo n’aho babarizwa birahari”

Minisitiri w’umuco na Sporo, Nyirasafari Esperence yijeje ko uru rubyiruko ruzakomeza gukurikiranwa kugira ngo impano z’ubuhanzi rufite zitezwe imbere. Madame Jeannette yagiriye inama uru rubyiruko, arusangiza ubutumwa umukuru w’igihugu aherutse guha abahanzi, ababwira ko bafite impano zidasanzwe ariko bazaba abantu badasanzwe nibakomeza kurangwa n’umurava.

Abahatanye muri iri rushanwa bahatanaga mu byiciro bitandatu. Mu cyiciro cy’ubugeni no gushushanya (Plastic Arts) hahembwe Muhawenimana Maximilien, mu cyiciro cyo kuririmba no kubyina (Music and dance) hahembwa Shyaka Jean Pierre, mu cyiciro cy’imideri (Fashion) hahembwe Mukamihigo Jacqueline.

Mu cyiciro cyo gukina filimi n’amakinamico (Acting and Drama) hahembwe Uwumukiza Anuarite, mu cyiciro cyo gufata amashusho (Cinematography and Photography) hahembwa Munezero Chretien, naho mu cy’ubuvangazo hahembwa Maniraguha Carine.

Hanahembwe kandi imishinga itatu, uwitwa Fashion Art Center wo gutangiza ikigo cikora iby’imideri hagamijwe guteza imbere Made in Rwanda, umushinga wa RebaVisuals wo ujyanye no gufata amashusho, ndetse n’umushinga w’ubusizi n’ubuvanganzo, wo kwandika ibitabo by’imfashanyigisho ku bana bo mu mashuri y’inshuke.

Yabivuze kuri uyu wagatandatu tariki 15 Ukuboza ubwo hasozwaga irushanwa ryo gushakisha impano rya Art Rwanda Ubuhanzi 2018.

Yavuze ko ibyishimo by’umuhanzi biva mu buryo igihangano cye cyakiriwe, ku buryo “ibyishimo tugira iyo twumva, dusoma, tureba cyangwa dukoresha ibihangano bahanze, bikwiye kujyana n’uko tubafata kandi n’uko tubibafasha” nk’uko yabisobanuye.

Umuha “Iyo yicaye agafata umwanya wo kwandika, kuririmba, gushushanya, gutekereza umwenda wakundwa ntabwo aba yizeye ko muzabikunda, nyamara ntacika intege kugeza arangije igihangano cye kikagera ku rwego rushimishije”

Madamu Jeannette Kagame yavuze ko ubuhanzi ari ikintu buri muntu wese akenera mu buzima bwa buri munsi, ku buryo inzego zitandukanye zikwiye gukorana n’abahanzi bagera hafi kuri magana atandatu, bitabiriye irushanwa rya Art Rwanda Ubuhanzi bagakoreshwa mu bikorwa byo kwamamaza n’ubukangurambaga butandukanye.

Ati “Mubahe umwanya mu bikorwa by’ubukangurambaga, ibikorwa byo guhugura abakuru n’abato, imyidagaduro n’ibindi. Amazina ya bo n’aho babarizwa birahari”

Minisitiri w’ubucuruzi n’inganda Hakuziyaremye Soraya yatanze ishusho y’uko urwego ndangamuco ruhagaze ku isi, avuga ko ubuhanzi ku isi yose buzana miliyari zirenze 2300 z’amadolari, ariko muri Afurika rukaba rutaragira imbaraga “n’ubwo hari ibihugu nka Nigeria byinjiza miliyoni nka 800 z’amadolari buri mwaka avuye mu buhanzi”

Nawe yasabye ko abahanzi bashyigikirwa u buryo bwose kuko ubuhanzi ari kimwe mu byafasha muri gahunda y’igihugu yaa Made in Rwanda mu gihe ibyo bakora byamenyekana hanze y’igihugu.

Umuyobozi w’urwego rw’igihugu rw’iterambere RDB, Clare Akamanzi yavuze ko Leta y’u Rwanda ishyize imbere gufasha urubyiruko n’abandi bafite impano kugira ngo batungwe nazo. Mu byo Guverinoma iri gukora kugira ngo iteze imbere abafite impano, harimo gushyiraho ikigega cyo guteza imbere imishinga y’ikoranabuhanga no guhanga udushya ‘Rwanda Innovation Fund (RIF).

Iki kigega kizaba kirimo miliyoni 100 z’amadolari, kuri ubu leta ikaba imaze gushyiramo miriyoni 30, abikorera 30, izindi miriyoni 40 zikazatangwa na Banki Nyafurika itsura amajyambere nk’uko Akamazi abivuga.

Yanavuze ko hari uburyo bwashyizweho bufasha abahanzi kubona inyungu ku byo bakora, atanga urugero rw’ihuriro ry’Abanditsi rifasha abahanzi kubona amafaranga ku bikorwa bya bo.

Jeannette Kagame yijeje abahanzi ko ibyo bahanga bitazabura gukundwa, anabizeza ko bazakomeza guhabwa ubufasha. Gusa yabasabye kwitwara neza barangwa n’ikinyabupfura, indangagaciro zikwiye n’ubushishozi.

Yabasabye gukorera hamwe kugira ngo ijwi rya bo rizumvikane kurushaho, yifashishije impanuro baherutse guhabwa na president Paul Kagame ababwira ko “bafite impano zidasanzwe ariko bazaba abantu badasanzwe nibakomeza kurangwa n’umurava”

Mu gusoza iyi myitozo haba hari abasirikare bakomeye mu ngabo z’igihugu

Iyo myitozo irasozwa hagaragazwa uburyo intwaro zitandukanye, inini n’intoya zakoreshwa mu gutanga umusanzu kuri diviziyo y’abasirikari bari guhanana n’umwanzi.

Hakoreshwa intwaro zirasa mu buryo bwose, haba izirwanishirizwa mu kirere, izirwanishirizwa ku butaka, aho bishoboka hagakoreshwa n’izirwanishirizwa mu mazi.

Imyitozo yahabwaga ingabo zo muri Diviziyo ya gatatu y’ingabo z’u Rwanda ikorera mu Ntara y’Uburengerazuba iyoborwa na Maj. Gen. Alex Kagame.

Iyi myitozo ngarukamwaka ibaye ku nshuro ya gatatu. Iyaherukaga yabaye mu kwezi k’Ugushyingo 2017, ikaba yarakurikiwe na Perezida wa Repubulika Paul Kagame, ari nawe mugaba w’ikirenga w’ingabo z’u Rwanda.

Iyi nkuru turacyayibakurikiranira.

Ibiciro by’ibiribwa ku isoko byihagazeho kuri iki gihe

Umuyobozi mukuru wa NISR, Yussuf Murangwa yabivuze tariki 06 Ukuboza 2018, ubwo iki kigo cyamurikaga ubushakashatsi cyakoze ku mibereho y’abanyarwanda buzwi nka EICV bukozwe ku nshuro ya gatanu.

Ubu bushakashatsi bugaragaza ko inzego z’imibereho myiza y’abanyarwanda, imiturire, uburezi n’ubuzima zihagaze neza, ariko nta mpinduka nini yabayeho ku kijyanye n’ubukene.

Imibare ya EICV5 igaragaza ko Abanyarwanda 38.2% bafite ubukene, naho 16% bakaba bafite ubukene bukabije mu gihe ubushakashatsi buheruka bwa EICV4 bwagaragazaga ko abafite ubukene bari bari 39.1%, abafite ubukene bukabije ari 16.3%.

Minisitiri w’Intebe Dr. Eduard Ngirente yavuze ko ubuzima bw’Abanyarwanda budashimishije, asaba ko hashyirwamo imbaraga mu kubikosora

Umuyobozi mukuru wa NISR yavuze ko impamvu nta mpinduka nini yagaragaye mu kugabanya ubukene, kuko bwagabanutseho 0.9% gusa byatewe n’impamvu y’amapfa yibasiye u Rwanda mu mwaka wa 2016/17.

Akarere ka Nyamasheke kugeza niko gafite abaturage benshi bakennye bagera kuri 69.3% kakaba ari na ko gafite abaturage benshi bari mu bukene bukabije babarirwa muri 41.5%.

Guverineri Alphonse Munyantwari uyobora Intara y’Uburengerazuba ako karere kabarizwamo, yavuze ko hari ingamba zatangiye gufatirwa icyo kibazo.

Yagize ati “Ubuhinzi n’uburobyi mu kiyaga cya Kivu bigomba gutezwa imbere kurushaho, twari turiyo (mu Karere ka Nyamasheke) dutangiza umushinga uzatuma kubitsa, kugurizanya no kugera ku mari bigera ku bantu benshi ariko noneho tugakomeza no guhugura abaturage.”

Umuyobozi mukuru wa NISR, Yussuf Murangwa

Amapfa yibasiye u Rwanda yibasiye n’ibindi bihugu byo mu karere, ariko u Rwanda ruhagaze neza kuko ubukene bwagabanutse n’ubwo bitari cyane, mu gihe mu bihugu nka Malawi na Uganda ubukene bwiyongereye aho kugabanukaho na gato.

Minisitiri w’intebe Dr Edouard Ngirente yavuze ko buri wese akwiye kongera imbaraga mu byo akora kugira ngo “u Rwanda rugere ku ntego ya rwo yo kuba igihugu kitarangwamo ubukene.”

Minisitiri w’imari n’igenamigambi, Dr. Uzziel Ndagijimana yagaragaje ikibazo cy’uko inzego za leta n’izabikorera zitaramenya kubyaza umusaruro amakuru atangwa n’ikigo cy’igihugu cy’ibarurishamibare.

Yavuze ko izo nzego zikeneye kongererwa ubushobozi mu gusobanukirwa no gusesengura ayo makuru, ari na yo mpamvu NISR yatangije ikigo cy’amahugurwa kizajya gihugura abakozi ba leta kugira ngo bagire ubushobozi bwo gukoresha ayo makuru mu kazi ka bo ka buri munsi.

Ishyirwa ahagaragara ry’ubu bushakashatsi ryari ryitabiriwe n’abayobozi batandukanye

Raporo nshya yagaragaje ko ubukene mu baturage butagabanutse nk’uko byari byitezwe

Iyi raporo irerekana ko ikigero cy’ubukene hagati y’umwaka wa 2016 – 2017 na 2013 – 2014 cyagumye hamwe kuko cyazamutseho ibice 0.9 gusa, ibi rero mu bijyanye n’ibarurishamibare bikaba bivuze ko kitahindutse.

Muri raporo yashyizwe hanze kuri uyu wa kane tariki 06 Ukuboza 2018, yererekana ko urugero rw’ubukene ruri kuri 38.2 mu gihe mbere y’umwaka wa 2013 – 2014 rwari kuri 39.1

Minisitiri w’intebe w’u Rwanda Edouard Ngirente, yavuze ko ibivuye muri ubu bushakashatsi, ari impuruza isaba gukuba kabiri imbaraga zishyirwa mu kurwanya ubukene.

Yagize ati “Iyi ni impuruza isaba gukuba kabiri imbaraga dukoresha mu kurandura ubukene. Ntitugomba gukomeza gukora ibintu uko twabikoraga. Ibi birareba guverinoma, abanyarwanda bose, inzego z’abikorera, abafatanyabikorwa mu iterambere ndetse n’abanyamadini”.

Yongeyeho ko hari ikizere ko gahunda zishyirwa mu bikorwa hirya no hino mu gihugu zigamije kurandura ubukene no guteza imbere abanyarwanda zizatanga umusaruro.

Umuyobozi w’ikigo cy’ibarurishamibare Yussuf Murangwa avuga ko 70% y’impamvu zitera ubukene mu bice byinshi ari ibiribwa bidahagije n’ibiciro bihanitse.

Avuga kandi ko ubukene bugaragara mu Banyarwanda, uretse ibiribwa bidahagije, buterwa n’uko n’aho ibiribwa biboneka ugasanga bihenze ku buryo burenze ubushobozi bw’abaturage.

N’ubwo bimeze gutyo ariko amafaranga umunyarwanda yinjiza muri rusange ngo yikubye hafi kabiri mu myaka 10 ishize bikaba byarazamutse ku gipimo cya 7,5%.

Urwego rw’ubwubatsi ngo ruri mu byazamuye imibereho y’abanyarwanda, kuko muri iyi myaka hubatswe ibikorwaremezo byinshi byatanze akazi ku banyarwanda benshi.

Nyamasheke ku isonga ry’uturere twugarijwe n’ubukene

Ubu bushakashatsi bwakoze urutonde rw’uko uturere dukurikirana mubukene, maze Nyamasheke iza ku isonga ry’uturere duhagaze nabi n’amanota 69.3%, kagakurikirwa na Gisagara, Rulindo na Karongi, mu gihe Kicukiro yo ihagaze neza kurusha utundi na 11.4%, ibanjirijwe na Nyarugenge, Gasabo na Rwamagana.

Ku bijyanye n’ubukene bukabije, Nyamasheke nabwo iza mutumerewe nabi kuko ifite 41,5%, igakurikirwa na Nyaruguru, Gisagara na Rutsiro, naho mu turere duhagaze neza ku kugira ikigero gito cy’abafite ubukene bukabije Kicukiro nabwo ikaza ku isonga n’amajwi 3.3%, ikurikiwe na Gasabo na Nyarugenge na Rwamagana.

Ku bijyanye n’iterambere ry’ingo, ubushakashatsi bwerekanye ko mu 2017 ingo zibasha kubona interineti zigera kuri 17 mu gihe mbere ya 2006 bitashobokaga.
Ikindi cyazamutse cyane ni ugutunga amashanyarazi mu ngo kuko mbere ya 2006 byari kuri 4%, ariko mu 2017 bagera kuri 34%.

Insina ya FIA 17 ngo itanga umusaruro urenze uwarumenyerewe

Ni umushinga wa miriyoni 250 z’amafaranga y’u Rwanda, uzakorwa mu gihe cy’imyaka ibiri. Abahinzi bazahabwa insina za FIA 17 na FIA 25 zivugwaho kuzatanga umusaruro mwinshi uzatuma u Rwanda rurushaho kwihaza mu musaruro w’ibitoki rukaba rwanasagurira amasoko mpuzamahanga.

Minisiteri y’Ubuhinzi n’ubworozi igaragaza ko 23% by’ubutaka buhingwa mu Rwanda buhingwaho urutoki.

Gusa umuyobozi mukuru ushinzwe ubuhinzi muri iyo minisiteri, Charles Murekezi avuga ko kuba hari abahinzi bagihinga mu buryo bwa gakondo, bituma umusaruro uba muke, aho ku mwaka basarura toni eshanu gusa, mu gihe bakabaye basarura nibura toni 60.

Agira ati “Insina za gakondo usanga zivaho igitoki gipima hagati y’ibiro bibiri na bitanu ukaba utabona toni eshanu ku mwaka, kandi nk’inyamunyo nziza (injagi cyangwa imporogoma) ushyizemo ifumbire, ukayicira, ukayitaho ushobora kubona toni 60 kuri hegitari mu mwaka”

Uwo mushinga ku ikubitiro uzakorerwa mu mirenge imwe y’uturere twa Rwamagana, Gisagara, Muhanga, Karongi na Rubavu.

Umuyobozi w’ishami ry’umuryango w’abibumbye ryita ku biribwa FAO mu Rwanda, Dr Guabert Gbehounou, avuga ko abazahinga ubu bwoko bushya bw’insina bizaba ngombwa ko barandura izo basanganywe, ariko ngo bizakorwa ku bwumvikane ntawe uhutajwe.

Ati “Ntabwo tuza ngo tubategeke kuzihinga. Tubanza kureba niba ushaka kuvugurura urutoki rwawe, hanyuma tukakwereka ubwoko bushya bw’insina zaguha umusaruro tugusaba guhinga, ukabikora ubyihitiyemo”

Nubwo izo nsina zitezweho gutanga umusaruro mwinshi, Minisiteri y’Ubuhinzi n’ubworozi irizeza ko nta kibazo cy’isoko ry’uwo musaruro kizavuka kuko ibitoki byo kurya n’iby’imineke bikenewe.

Charles Murekezi yemera ko hashobora kuvuka ikibazo cy’isoko ry’ibitoki bivamo inzoga, bitewe n’uko zimwe mu nganda zenga urwagwa zafunze nyuma y’uko ikigo cy’igihugu gishinzwe ubuziranenge RSB kizisabye kuvugurura imikorere.

Gusa, Murekezi avuga ko MINAGRI izaganira na Minisitiri y’ubucuruzi ndetse na ba nyir’izo nganda kugira ngo icyo kibazo na cyo kibonerwe igisubizo.

Ku ikubitiro muri uyu mushinga, hazatangwa imibyare igera ku bihumbi 60 izahingwa mu turere dutanu.

Gusa FAO izawutera inkunga, yatangaje ko uretse imibyare y’insina, hazatangwa n’imbuto zitandukanye zirimo ibigori n’ibishyimbo, kugira ngo haboneke ubwoko bunyuranye bw’ibiribwa bwafasha mu kuvugurura indyo.

Min Dr Mutimura Eugene yababajwe no gusanga abanyeshuri bakora ikizami kimwe bicaranye ahita yirukana uwari uhagarariye ibizamini mu ishuri rya Kagugu

Ibi byatewe n’uko Minisitiri Mutimura yasanze abanyeshuri bakora ikizamini kimwe bagiye babicaranya ku buryo byari gutera bamwe gushaka gukoperana.

Minisitiri Mutimura kandi yahise yirukana abagenzuzi b’ibizamini batatu bari mu ishuri bagenzura imikorere y’ibizamini ariko batambaye amakarita agaragaza ibyo bashinzwe, ibintu ubusanzwe bitemewe mu kazi.

Yaboneyeho gusaba abahagarariye ibizami bya Leta ku bigo bitandukanye biri gukorerwaho, kwirinda icyo ari cyo cyose cyatuma abanyeshuri basarura aho batabibye muri ibi bizami

Ati “Nsanze abanyeshuri babiri bafite inyigisho zimwe bicaranye. Musabye ko adakora akazi yari ashinzwe dusaba undi kugakora. Ntabwo tumwirukanye ariko tumusabye ko yajya ku ruhande abandi bagakora ako kazi kuko ntiyagakoraga neza”

Yakomeje agira ati" Turasaba abashinzwe ibizami gukurikira neza bakareba niba abana bicaranye badakora ibizami bimwe, ndetse no mu byumba bakoreramo hakaba harimo umwanya uhagije, metero eshatu cyangwa ebyiri n’igice hagati y’umwana n’undi kuko ikibazo si umwanya n’intebe zirahari”

Bisengimana Bosco wari wungirije umuyobozi w’ibizami kuri iyi centre niwe wahise uhabwa inshingano zo kuyobora ibizamini, nyuma yo guhagarika mu nshingano uwari ubishinzwe.

Yanirukanye abagenzuraga imikorere y’ibizami batari bafite ibibaranga

Mu myaka yashize mu karere ka Gasabo hagiye hagaragara ibigo birimo abanyeshuri bakopeye, ahandi bagatanga ibizami bitari byo mbere y’uko bikorwa.

Umuyobozi w’akarere ka Gasabo wungirije ushinzwe imibereho myiza y’abaturage, Languida Nyirabahire, yavuze ko kuri iyi nshuro ibyo byose byagenzuwe ku buryo nta mpungenge zikwiye kubaho. Yavuze ko kuba hagaragaye abanyeshuri bari bicaranye byatewe no kwibeshya ku buryo n’aho byagaragaye byahise bikosorwa.

Abanyeshuri bakoreye kuri centre ya SOS Kagugu ni 153 bavuye mu bigo bitatu: Ecole technique SOS, World Vision Secondary School, na APAETA.

Ni abanyeshuri biga mu mashami atandukanye nka amashanyarazi, icungamari, computer Sciences, electronics, n’ishami rya electronics and telecommunications.

Min Dr Mutimura ajya gutangiza ibizamini ngiro yabanje kugira inama abanyeshuri anabifuriza intsinzi

Ataramenya ko hari abicaranye bahuje ikizami yafatanyije n’abandi bayobozi gushyikiriza abana ibizami

Umuyobozi w’Akarere ka Gasabo wungirije ushinzwe imibereho myiza yari mu bashyikirije abanyeshuri ibizami

Min Mutimura agenzura yaje gusanga hari abicaranyijwe bahuje ibizami

Ntibyamushimishije ahita afata umwanzuro wo guhagarika ababigizemo uruhare

imyicarire yakosowe abanyeshuri batangira ibizami

Bagaragazaga ko biteguye neza

Min w’Uburezi n’abandi bayobozi bafatanyije gutangiza Ibizami ngiro bisoza amashuri yisumbuye

Minisitiri muri @Rwanda_Edu Dr Eugene Mutimura atangiza ibizamini bya Practices bisoza amashuri yisumbuye, yahise ahagarika Mbonabucya Gerard wari ukuriye ibizami kuri centre ya SOS Kagugu, kuko yasanze hari abanyeshuri bakora ibizami bimwe bicajwe ku ntebe imwe. pic.twitter.com/JdIdUTvRxj

— Rutindukanamurego (@rutindukanamure) November 20, 2018

Munsi ya APACOPE hakunze kugaragara umuvundo ukabije w’amamodoka bigateza impanuka

Ni umuvundo ugaragara mu masaha ya mugitondo abantu bajya ku kazi, hagati ya saa sita na saa munani ndetse no mu masaha y’umugoroba nk’uko abatwara abinyabiziga n’abahaturiye babivuga.

Bizimana Damascene utwara abagenzi kuri moto agira ati “Imodoka ziba zinyuranamo kandi buri wese aba ashaka gutambuka muri ya masaha yo gutaha, usanga ntawe ushaka korohera undi ngo abanze atambuke”

Uretse abatwara ibinyabiziga babangamirwa n’umuvundo w’imodoka ugaragara muri aya masangano mu masaha yo gutaha no kujya ku kazi, abanyamaguru ngo barabangamirwa cyane kuburyo hari abashobora kumara iminota myinshi babuze uko bambuka, kubera ukuntu ibinyabiziga biba bitanguranwa gutambuka.

Mutoni Christine agira ati “Umuntu ashobora kumara iminota 15 ategereje ko imodoka zirangiza gutanguranwa kugira ngo yambuke. Moto ziragongana buri munsi kubera gutanguranwa, zikagonga n’abantu ukabona bibangamye cyane”

Mbere y’uko uyu muhanda uva mu mujyi werekeza Nyabugogo wagurwa, muri ayo masangano hahoze amatara bamwe bita “Feux rouges” yatangaga uburenganzira bwo gutambuka ku banyamaguru n’ibinyabiziga, bitewe n’icyerekezo biganamo.

Kuva uyu muhanda umaze gukorwa ayo matara ntiyasubijweho, ku buryo abawukoresha bifuza ko yasubizwaho kugira ngo bitange umutekano w’ibinyabiziga binyura muri uwo muhanda.

Ubuyobozi bw’umujyi wa Kigali bwatangaje ko aya masangano azasubizwaho “feux Rouges” nk’uko byahoze, ariko kuba zitarashyirwaho ngo byatewe n’uko igice cy’imwe cy’imihanda ihurira muri ayo masangano kitararangiza gukorwa.

Ingenieur Rwunguko Jean d’Amour w’umujyi wa Kigali agira ati “Iyo mihanda (ihurira kuri ayo masangano) iri mu mushinga w’imihanda iri kwagurwa mu mujyi wa Kigali, ikubiye mu mushinga mugari w’ibirometero 54 uzarangira mu kwezi kwa 10 k’umwaka utaha. Hazasubiraho ‘feux rouges’ igituma zitarasubiraho ni uko igice cy’umuhanda ujya kuri APACOPE kitararangira”

A Jam at Muhima round- about is causing some accidents. Much focus needed there @Rwandapolice pic.twitter.com/CoGBqiwAg7

— Rutindukanamurego (@rutindukanamure) November 16, 2018

Rwunguko avuga ko gushyira izo “feux rouges” muri ayo masangano bitazategereza ko uwo mushinga urangira, ahubwo ngo zizashyirwaho mbere umuhanda uca munsi ya APACOPE wamaze kuzura.

Mu gihe amasangano y’iyo mihanda atarashyirwaho amatara ayobora ibinyabiziga, ubuyobozi bw’umujyi wa Kigali busaba abakoresha iyo mihanda kwitwararika birinda impanuka bashobora kugiramo uruhare.

bayobozi ba MINEDUC bahamya ko kongerera imbaraga igifaransa ntaho bihuriye no kuba Louise Mushikiwabo yaratorewe kuyobora OIF

Dr. Eugene Mutimura uyobora iyo minisiteri yabivuze mu kiganiro iyo minisiteri yagiranye n’abanyamakuru tariki 25 Ukwakira 2018, isobanura ibyemezo yafashe ngo ireme ry’uburezi rikomeze gusigasirwa mu mashuri.

Minisitiri w’uburezi yavuze ko Igifaransa kimwe n’izindi ndimi nk’Ikinyarwanda, Igiswahili n’Icyongereza zisanzwe zigishwa mu mashuri n’ubwo zitigishwa ku rugero rungana, ku buryo kuba cyakongerwamo imbaraga bidakwiye kwibazwaho.

Yavuze ko icyemezo cya guverinoma kivuga ko aho bigaragara ko ururimi rw’Igifaransa rukwiye gukomeza gukoreshwa hashingiwe ku kuba rukenewe ku nyungu z’igihugu byakorwa rukongererwa imbaraga.

Ati “urugero niba dufite ingabo ziri mu butumwa bwo kubungabunga amahoro mu bihugu bivuga Igifaransa, hari gahunda ihamye yo kugira ngo bigishwe Igifaransa kugira ngo babashe kumvikana (n’abo bakorana cyangwa abaturage b’ibyo bihugu)”

Minisitiri w’Uburezi ntiyasobanuye urugero ururimi rw’Igifaransa ruzazamurwaho mu mashuri, ariko yavuze ko kucyongerera imbaraga bijyanye n’ibyo igihugu gikeneye muri iki gihe “nk’uko hafashwe gahunda yo gukoresha Igiswahili kubera ibihugu bituranye n’u Rwanda bigikoresha”

Umunyamabanga wa Leta muri MINEDUC ushinzwe amashuri abanza n’ayisumbuye Dr. Isaac Munyakazi na we yashimangiye ko kongerera imbaraga ururimi rw’Igifaransa “ntaho bihuriye no kuba Louise Mushikiwabo yaratorewe kuba umuyobozi wa OIF, ahubwo biri muri gahunda yagutse ya MINEDUC ijyanye n’ibyemezo Minisiteri ifata byo kugira ibihinduka mu burezi harimo n’indimi”

Ati “Igifaransa n’ubwo ari cyo cyavuzwe ntabwo ari cyo cyonyine cyaganiriweho, tuba twarebye n’uburyo twakongera imbaraga no mu zindi ndimi zose dukeneye kwigisha abana bacu, tukareba niba abarimu bafite amahugurwa ahagije mu kuzigisha tukareba niba hari n’imbaraga zikenewe kongerwamo kugira ngo turusheho guha abana ubumenyi bakeneye buzabagirira akamaro”

Kugeza ubu, ururimi rutangwamo amasomo mu mashuri yo mu Rwanda ni Icyongereza, Igifaransa kikaba kimaze imyaka itari mike cyigwa nk’isomo risanzwe. Icyemezo cya guverinoma kikaba gikwiye kuzareba n’uburyo bwo kuvugurura iyi myigishirize.

Abayobozi ba MINEDUC basobanuye ibyagendeweho mu gukora igenzura ryakorewe amashuri

Uretse abo barimu bazahanwa hari n’ibigo by’amashuri 156 bikeneye kwitabwaho by’umwihariko, birimo 108 bitemerewe gufungura imiryango mu kwezi kwa mbere k’umwaka wa 2019 bitaragaragaza ko byakosoye ibyo byasabwe na MINEDUC, ibigo 31 bigomba gukorerwa igenzura ndetse n’ibindi 17 bikeneye ubuvugizi bwihutirwa.

Dr. Eugene Mutimura uyobora iyi Minisiteri ari kumwe n’abandi bayobozi muri iyo Minisiteri yabitangaje mu kiganiro yagiranye n’abanyamakuru tariki 25 Ukwakira 2018.

Yagize ati “Hari abarimu badakora neza bazahagarikwa amezi atatu, hari abadakora neza bazirukanwa, hari n’abazihanangirizwa, harin’amashuri atazatangira igihembwe cyambere niba adahinduye ibyo twayasabye guhindura mu igenzura twakoze”

Amashuri atemerewe gufungura mu 2019 mbere y’uko agenzurwa ni ayo mu turere two hirya no hino mu Rwanda. Minisitiri Mutimura yavuze ko aho bazasanga bitarakosowe amashuri azafungwa burundu abanyeshuri bagashakirwa ibindi bigo boherezwamo.

Ati “Umunyeshuri ntabwo yahura n’ikibazo ikibazo abayobozi b’amashuri nibo bahura nacyo, kandi iyo bigenze gutyo abayobozi barakurikiranwa iyo bibaye ngombwa”

Mu barimu bazahanwa harimo abo byagaragaye ko basiba cyane mu kazi, abandi ari abasinzi mu gihe hari n’abagiye biba za mudasobwa ibigo by’amashuri byahawe.

Mu bindi bahanirwa harimo gucunga nabi ibikoresho n’umutungo w’ibigo by’amashuri, umwanda, imyigishirize mibi no kudakoresha neza za mudasobwa mu mashuri, ari na byo byagendeweho mu gushyira ibigo by’amashuri mu byiciro.

Iri genzura ryanarebye ikibazo cy’abana bava mu mashuri, Minisitiri Mutimura akaba yavuze ko imibare igenda ihinduka bitewe n’imbaraga abayobozi b’amashuri n’uturere bashyira mu kurwanya ko abana bata amashuri, abava mu ishuri bakaba babarirwa hagati ya 2 na 6%.

Minisiteri y’Uburezi yatangaje ko igenzura rizakomeza no mu yandi mashuri ataragenzuwe, inavuga ko amashuri yagenzuwe bagasanga ameze neza n’asubira inyuma azafatirwa ibyemezo.

Umuyobozi wungirije wa UTB n’umuyobozi ushinzwe amasomo bavuga ko ubushakashatsi bagiye kumurika bwafasha mu gukemura ibibazo byugarije isi

Buzamurikirwa mu nama mpuzamahanga y’iminsi ibiri, kuva tariki 24 kugeza kuri 25 Ukwakira 2018, izahuriza hamwe abashakashatsi n’inzego zifata ibyemezo kuva kuri uyu wa kane.

Nyuma y’uko gahunda y’intego z’ikinyagihumbi igeze ku musozo mu 2015, umuryango w’abibumbye washyizeho gahunda y’iterambere rirambye, inzego zose zihabwa umukoro wo kugira icyo zikora kugira ngo izo ntego zizagerweho.

Aha ngo niho Kaminuza ya UTB ifatanyije n’abashakashatsi ba JRIIE (Journal of Research Innovationand Implications in Education) bahereye bakora ubushakashatsi ngo batange umusanzu wa bo kuri iki kibazo, nk’uko bivugwa na Prof Dr. Tombola Gusatave ashinzwe amasomo muri UTB.

Ati “Kaminuza zigenda zireba uko zatanga ibisubizo kuri gahunda y’intego z’iterambere rirambye. Twarebye ku ntego ya kane y’ireme ry’uburezi muri ubu bushakashatsi kuko ibibazo byose, byaba ibiribwa, ikoranabuhanga, ubukerarugendo, imiyoborere, iyo ireme ry’uburezi rimeze neza birakemuka”

Abashakashatsi bo hirya no hino ku isi bagaragaza ko isi yugarijwe n’ibibazo bikomeye birimo n’imihindagurikire y’ikirere, bishobora gukoma mu nkokora ishyirwa mu bikorwa rya gahunda y’iterambere rirambye.

Gusa za leta z’ibihugu bimwe byiganjemo ibyateye imbere ntizikozwa ibisubizo bitangwa n’abashakashatsi mu guhangana n’ibyo bibazo, cyane cyane ku birebana n’ishyirwa mu bikorwa ry’amasezerano ya Paris yasinywe mu mwaka wa 2015, asaba ibihugu kugabanya ibyuka bihumanya byoherezwa mu kirere.

N’ubwo za leta zimwe zirengagiza nkana ibisubizo bitangwa n’abashakashatsi kuri iki kibazo n’ibindi byugarije isi muri rusange, Dr. Kabera Callixte wungirije ku buyobozi bwa UTB avuga ko bidaca intege abashakashatsi kuko baba bakoze akazi ka bo.

Agira ati “Twebwe nk’abashakashatsi twerekana ibikwiye gukorwa, abafata ibyemezo na bo bafite uruhare rwa bo mu gufata mu byagaragajwe n’ubushakashatsi ibishobora gufasha abaturage.

Ni uruhare rw’abantu bose, abayobora abihugu, abayobora imiryango itegamiye kuri za leta ndetse n’abashakashatsi gusenyera umugozi umwe bagamije kurengera umuturage”

Ubuyobozi bwa UTB buvuga ko inzego zifata ibyemezo zihaye agaciro ubu bushakashatsi byatanga umusanzu ukomeye mu guhangana n’ibibazo isi iri guhura na byo.

Inama izamurikirwamo ubu bushakashatsi ije ikurikira indi yari yabereye Arusha muri Tanzania mu kwezi kwa kabiri k’uyu mwaka, abashakashatsi 11 bo muri kaminuza zitandukanye bakaba barayimurikiyemo ubushakashatsi bugera kuri 16, bwamurikiwe abayitabiriye bo hirya no hino ku isi.

Abanyamuryango ba Sacco ya Gatenga barashima intambwe igezeho bakayisaba kwegera abaturage baciriritse

Aba banyamuryango bataha inyubako ya Sacco biyubakiye mu mpera z’icyumweru gishize, bavuze ko serivisi itanga zigeze ku bantu benshi byatuma inyungu babona zirushaho kwiyongera.

Sacco ya Gatenga imaze imyaka 9 ishinzwe, kugeza ubu ikaba ifite abanyamuryango bakabakaba 5700.

Inyungu zaturutse mu bwizigame bw’abo banyamuryango mu gihe cy’imyaka ine (kuva 2013 kugeza 2017) zatumye babasha kwiyubakira inyubako yo gukoreramo yuzuye itwaye miriyoni 80 yavuye mu nyungu z’iyo myaka ine.

Abanyamuryango ba Sacco ya Gatenga bubatse inyubako ya miriyoni 80

Abanyamuryango b’iyi Sacco bavuga ko intambwe Sacco ya bo igezeho ari nziza, ariko bakagaragaza ko hagikenewe ubukangurambaga mu baturage baciriritse kugira ngo na bo bagerweho na serivisi z’imari nk’uko Shyaka Imaculée abivuga.

Ati “Umuturage aba yibaza uko Sacco ikora, bakwiye kumanuka hasi bakabigisha kuko byatuma twongera umubare w’abanyamuryango n’inyungu zacu zikiyongera”

Bapfakurera Elias yungamo ati “Hari abanyamuryango bari hasi bacyitinya kuko inguzanyo ya Sacco bayibona bigoranye, ababishinzwe bakorohereza umuturage wo hasi kugira ngo nawe abone inguzanyo yiteze imbere”

Ubuyobobozi bwa Sacco ya Gatenga buvuga ko ibi bibazo biri mu nzira zo gukemuka, kuko muri gahunda y’ibikorwa by’imyaka itanu iri imbere harimo gukora ubukangurambaga bugamije kongera abanyamuryango, ndetse no kongera ibikorwa byatuma Sacco irushaho kubona inyungu nk’uko Uwumuremyi abivuga.

Ati “Turashaka kongera umubare w’abanyamuryango kuko ariwo mutungo wambere w’ikigo cy’imari ariko tukongera n’ubwizigame, ariko noneho inyubako turateganya kuyigereka hejuru hakajya hakorerwa ibindi bikorwa”

Sacco zagize uruhare mu guteza imbere abaturage

Kuva Sacco ya Gatenga itangiye gukora ngo yatanze inguzanyo zikabakaba miriyoni 690. Iziri hanze kugeza ubu ni miriyoni 106, ziri kwishyurwa neza ku kigero cya 96%, kane ku ijana zikaba ari zo zitishyurwa neza.

Umuyobozi w’akarere ka Kicukiro wungirije ushinzwe ubukungu n’iterambere ry’imari Mukunde Angelique, asaba izindi Sacco zo muri ako karere kugera ikirenge mu cy’iya Gatenga, kuko Sacco ebyiri mu 10 ziri muri ako karere ari zo zimaze kwiybakira inyubako zo gukoreramo

Uwumuremyi avuga ko bafite gahunda y’ubukangurambaga buzongera abanyamuryango n’ubwizigame

Minisitiri Nyirasafari yavuze ko ababyeyi ari bo bagomba gufata iya mbere mu kurinda abana kugwingira

Minisitiri Nyirasafari Esperance yabivuze muri gahunda y’ubukangurambaga bugamije kurwanya ikibazo cyo kugwingira n’imirire mibi mu bana bato, bwakorewe mu Karere ka Gakenke ku itariki 04 Ukwakira 2018.

Akarere ka Gakenke ni kamwe mu turere dufite abana benshi bagwingiye, ugendeye ku mibare yavuye mu ibarura rya DHS rigaragaza ku mibereho n’ubuzima bw’Abanyarwanda.

Iryo barura riheruka gukorwa mu mwaka wa 2015, ryagaragaje ko Akarere ka Gakenke kari ku mwanya wa gatandatu mu turere dufite abana benshi bagwingiye, Minisitiri Nyirasafari akavuga ko ababyeyi bakwiye gufata iya mbere mu guhangana n’icyo kibazo, bita ku mwana kuva agisamwa.

Agira ati “Umwana iyo umureze kuva agisamwa ukita ku mugore umutwite ntiyagwingira. Nk’uko ushora mu mushinga ukakubyarira inyungu, umwana na we ugomba kumushyiraho ibishoboka byose kugira ngo azungukire umuryango n’igihugu muri rusange”

Ababyeyi biyemeje kwikubita agashyi nyuma yo gukorerwa ubukangurambaga

Ibarura rya DHS ryari ryagaragaje ko 46% by’abana bari munsi y’imyaka itanu mu Karere ka Gakenke bagwingiye.

Umuyobozi w’ako karere Nzamwita Deogratias avuga ko bafashe ingamba z’uko mu biganiro byose ikibazo cy’imirire mibi kizajya kiganirwaho, ndetse bakanashyira ingufu mu ngo mbonezamikurire, ibikoni by’imidugudu n’izindi gahunda zatuma imirire mibi icika burundu muri Gakenke.

Ati “Mu gihe cya vuba, sinavuga ngo ni mu kwezi cyangwa icyumweru, ariko icyo twiyemeje ni uko nta mwana uzasigara afite imirire mibi mu karere kacu”

Akarere ka Gakenke, ni kamwe mu turere dufite ubutaka bwera cyane, ku buryo nta mpamvu ifatika yatuma abagatuye barwaza indwara ziterwa n’imirire mibi, nk’uko umuyobozi wako abivuga.

Ababyeyi bavuganye na Kigali Today, na bo ntibanyuranya n’umuyobozi wa bo, n’ubwo ku rundi ruhande batabasha gusobanura impamvu hari abakirwaza bwaki n’izindi ndwara zituruka ku mirire mibi.

Umuyobozi w’Akarere ka Gakenke avuga biyemeje guhangana n’ikibazo cy’imirire mibi

Gusa ngo bagiye kwikubita agashyi, ababyeyi batwite bajye bafata amafunguro arimo intungamubiri, ndetse n’abana bategurirwe ifunguro ririmo intungamibiri zikenewe zose.

Ubwo bukangurambaga bwarimo abandi bayobozi batandukanye, barimo umuhuzabikorwa wa gahunda y’imbonezamikurire y’abana bato, Dr Anita Asiimwe, ndetse na Minisitiri w’ubuzima Dr Diane Gashumba wasabye abaturage kwita ku bana, bakanitabira serivisi zo kuboneza urubyaro, kuko ari kimwe mu byabarinda izo ndwara z’imirire mibi.

Ndacyayisenga Jean Claude avuga ko batangiye gahunda zo kurwanya ibiyobybwenge ndetse no kurwanya inda zitateganyijwe babinyujije mu bukangurambaga

Urwo rubyiruko rwabitangaje muri Kongere rwakoze ku cyumweru tariki 30 Nzeri 2018, ruvuga ko ari intego rwihaye nyuma yo kubona ko hari umusanzu rugomba guha igihugu mu kugiteza imbere nk’uko urubyiruko rwakibohoye rwabikoze.

Ikibazo cy’ibiyobyabwenge n’inda zitateguwe mu rubyiruko ni bimwe mu bihangayikishije leta y’u Rwanda, ku buryo n’abayobozi mu nzego nkuru z’igihugu badasiba gusaba ko byahagurukirwa bigashakirwa umuti.

Umuyobozi w’urugaga rw’urubyiruko rushamikiye kuri FPR Inkotanyi rwo mu kagari ka Murama mu Murenge wa Kinyinya, Ndayisenga Jean Claude avuga ko bakora ubukangurambaga bafatanije n’inzego z’umutekano bakigisha urubyiruko binyuze mu nteko z’urubyiruko n’ibikorwa bategura mu bigo by’amashuri.

Hejuru y’ibyo ngo banifashisha n’ikigo nderabuzima cya Kinyinya mu guhugura urubyiruko ku buzima bw’imyororokere.

Ati “Usanga abatwara inda zitateguwe ahanini baba badasobanukiwe, kubera ubuzima bw’iki gihe butuma ababyeyi bahugira mu kazi ntibabone umwanya wo kuganiriza abana.”

Dusangumuhire Sandrine avuga ko bahugira mu bibateza imbere bigatuma batijandika mu biyobyabwenge

Guhangana n’ibiyobyabwenge n’inda zitateguwe urwo rubyiruko rwabihereye kuri bo ubwabo, aho abagize urugaga bibumbira mu makoperative n’amatsinda atandukanye kugira ngo rukore ibyaruteza imbere, aho guheranwa n’ibiyobyabwenge cyangwa izindi ngeso mbi.

Dusangumuhire Sandrine avuga ko amatsinda n’amakoperative bibumbiyemo atuma bahugira mu bikorwa biteza imbere igihugu.

Ubuyobozi bw’urugaga rw’urubyiruko rushamikiye kuri FPR Inkotanyi ku rwego rw’Akarere ka Gasabo bwemeza ko ikibazo cy’ibiyobyabwenge n’icy’inda zitatateguwe biteye inkeke muri ako karere, n’ubwo hatarakorwa ibarura ryagaragaza ishusho y’ibyo bibazo kugeza ubu.

Umuyobozi w’urwo rugaga ku rwego rw’Akarere ka Gasabo, Hakizimana Emmanuel, avuga ko bafatanije n’inzego z’umutekano bazakora ibarura kugira ngo bamenye uburemere bw’ikibazo biyemeje guhangana na cyo, bityo bafatanye n’izindi nzego kukirandura.

Ati “Ntabwo nakubwira ngo uyu mwaka tuzaba twarangije kubirandura burundu, ariko imbaraga turi gushyiramo turizera ko kigomba kugabanuka”

Urubyiruko rw’Inkotanyi rwiyemeje gufata iya mbere mu guca ibiyobyabwenge mu Karere ka Gasabo

Urugaga rw’urubyiruko rushamikiye kuri FPR Inkotanyi rwo mu kagari ka Murama mu Murenge wa Kinyinya ngo rufite icyizere cy’uko ruzagera kuri iyo ntego ruvuga ko itoroshye, bitewe n’uko ruherutse kuza ku isonga mu kwesa imihigo ku rwego rw’umurenge wa Kinyinya.

Umwanditsi w’imitwe ya politiki, imiryango itari iya leta n’imiryango ishingiye ku myemerere muri RGB, Jacqueline Kayitare, yabivuze nyuma y’umunsi umwe uru rwego rusohoye itangazo riburira Abanyarwanda n’abayoboke b’amadini n’amatorero by’umwihariko.

Iryo tangazo rivuga ko hamaze iminsi hagara inyigisho zerekeranye n’iyobokamana zitangwa n’abiyita abahanuzi zigatuma batwara abantu imitungo ya bo cyangwa bakabayobya.

Madame Kayitare yavuze ko ikibazo cy’ubwo buhanuzi “atari ikintu gishya kuko bigenda bikura” ariko na none avuga ko n’ubwo bimeze gutyo nta gikuba cyacitse.

Ikigamijwe ngo ni ugukangura abantu gushishoza no gushungura inyigisho bahabwa “kugira ngo umuntu n’ahabwa ibi bintu byitwa ubuhanuzi ajye amenya intego bifite n’ubutanga uwo ari we, kugira ngo bidakomeza kugusha abantu mu bibahungabanya kuko usanga umwuga w’ivugabutumwa warinjiriwe n’abamamyi bagamije inyungu za bo”

RGB ivuga ko ubwo buhanuzi budakorwa n’amadini n’amatorero, ahubwo bikorwa n’abantu ku giti cya bo n’ubwo baba bafite amadini n’amatorero abitirirwa.

Kuba hari ababikora ku giti cya bo batagira aho banditse muri RGB ngo bituma no kubakurikirana bigorana.

N’ubwo RGB idashaka kugaragaza abakora bene ubwo buhanuzi, yumvikanisha ko hari abazwi, ndetse ko ifite n’ubuhamya bw’abagiye bakorerwa ubwo buhanuzi.

Kayitare yabisobanuye agira ati “Birumvikana ko ibi bintu twabibonye kandi twabikurikiranye. Ubu sinahita nguha imibare cyangwa amazina y’ababikorewe ariko birumvikana ko tubibona kandi tubana na byo”

Kayitare akomeza avuga ko iyo bagize uwo bamenya bamushyikiriza inzego zibishinzwe agakurikiranwa, kandi ngo ibyo byarakozwe n’ubwo atashimye kugira uwo avuga washyikirijwe inzego zigomba kumukurikirana.

RGB ivuga ko hagiye gukomeza ubuvugizi ku Banyarwanda n’abaturarwanda basa n’abemera ubwo buhanuzi, ndetse no gukomeza kuburira abakora ubwo buhanuzi, abazakomeza kubirengaho bakaba bakurikiranwa.

Iyumvire ikiganiro Madame Kayitare yagiranye n’umunyamakuru wa Kigali Today

Abashinzwe uburinganire mu mashuri y’imyuga bari guhugurwa na WDA

Abahugurwa bazahabwa imfashanyigisho yateguwe na WDA izabafasha guhindura iyo myumvire by’umwihariko mu rubyiruko rw’abakobwa.

Abanyarwanda benshi bagenda basobanukirwa akamaro k’amashuri y’imyuga n’ubumenyi ngiro, ariko henshi mu gihugu usanga ayo mashuri yiganjemo abantu b’igitsinagabo ugeraranyije n’abigitsinagore.

Nyirakamana Genereuse ushinzwe igenamigambi no gukurikirana ibikorwa bya WDA, avuga ko imyumvire ku mashami buri gitsina cyiyumvamo ikiri imbogamizi ikomeye mu kubahiriza ihame ry’uburinganire mu mashuri y’imyuga.

Ati “Mu mitwe yacu haracyarimo imyumvire y’uko hari amashami agenewe abahungu n’andi agenewe abakobwa. Twakoze ubukangurambaga dushyiraho n’ishuri ry’imyuga ry’abakobwa gusa ariko dusanga bidahagije dutegura imfashanyigisho zivuga ku buringanire”

Abari guhugurwa barahugurwa hifashishijwe iyo nteganyanyigisho.

Nyirakanyana avuga ko nyuma yo gukora ubukangurambaga mu mashuri bazamanuka no mu baturage kubahindura imyumvire

Abakora mu bigo by’amashuri y’imyuga n’ubumenyi ngiro bavuga ko impamvu ituma abana b’abakobwa batitabira kugana amashuri y’imyuga n’ubumenyingiro, usanga ishingiye ahanini ku muco n’imyumvire y’Abanyarwanda.

kuva kera ngo bumvaga ko umukobwa adashobora gukora imirimo ifatwa nk’iy’abahungu cyangwa indi mirimo yose imusaba ingufu, nk’uko bivugwa na Byunga Sylver ushinzwe imibereho myiza y’abanyeshuri n’uburinganire muri IPRC Tumba.

Ati “Navuga ko ari umuco watuzinzitse wo kumva ko umukobwa kurira ipoto cyangwa kujya mu bindi bimusaba imbaraga atabishobora”

Kuri iki kibazo, Nyirakamana unashinzwe uburinganire mu bigo by’amashuri y’imyuga n’ubumenyingiro, avuga ko nyuma yo kwifashisha iyi nteganyanyigisho mu mashuri y’imyuga, ikizakurikiraho ari ukwegera abaturage.

Abaturage bazafashwa guhindura imyumvire kuko na bo ubwabo batarumva ko kohereza umwana mu mashuri y’imyuga bifite akamaro.

Agira ati “Ababyeyi na bo ubwabo ntibarabyumva, baracyafata amashuri y’imyuga nk’amashuri bagana mu gihe ahandi byanze. Twumva byazakomeza kugeza no hasi mu babyeyi twese tukumva impamvu yo kwitabira amashuri y’imyuga”

Byunga avuga ko impamvu ituma abakobwa batitabira imyuga ku bwinshi ishingiye ku myumvire ya kera y’uko umukobwa adashobora gukora ikintu kimusaba imbaraga.

Mu bibazo bica intege abana b’abakobwa bigatuma batitabira amashuri y’imyuga harimo n’ikibazo cy’uko bamwe mu bakabaye babaha akazi batabizeramo ubushobozi kimwe n’abahungu, byumwihariko mu myuga imwe n’imwe isaba imbaraga z’umubiri.

Gusa abari muri aya mahugurwa banabana n’abanyeshuri umunsi ku munsi bavuga ko icyangombwa atari imbaraga z’umubiri “uretse ko n’abakobwa bazifite” ahubwo ngo ni imbaraga zo mu mutwe abakoresha bakwiye kureba mbere na mbere.

Nsengiyumva yiteze ubuvugizi muri HOSO mu kurwanya inda ziterwa abana mu bigo by’amashuri

Ni kenshi havuzwe ikibazo cy’imicungire mibi y’umutungo w’ibigo by’amashuri hirya no hino mu Rwanda. Abayobozi ba bimwe mu bigo by’amashuri bashinjwa kuba badakurikirana, kugeza ubwo amafaranga akoreshwa nabi, ibikoresho bikangirika ibindi bikaburirwa irengero.

Abayobozi b’amashuri bemera ko iki kibazo kiriho, ariko nanone bakavuga ko kitabaturukaho kuko baba badafite ubumenyi mu bijyanye n’imiyoborere cyangwa imicungire y’umutungo, nk’uko bivugwa na Nsengimana Charles uyobora Groupe Scolaire Buye ryo mu karere ka Nyarugenge.

Agira ati “Abayobozi b’ibigo by’amashuri bose baba barize uburezi. Iyo hajemo ibyo gucunga imari, amasoko ya leta, kumenyekanisha imisoro, bisaba ubundi bumenyi no kubyigira.

Bivuze rero ko habayeho amakosa nk’ayo mu micungire, ntabwo [umuyobozi] wamutera ibuye kuko aba yagerageje mu byo yakoraga byose ariko akabura ubundi bumenyi kuri ibyo”

Abayobozi b’ibigo by’amashuri byo mu turere tugize umujyi wa Kigali babivuze kuri uyu wakane tariki 06 Nzeri 2018, ubwo batangizaga ku mugaragaro uyu muryango banashyiraho komite y’ubuyobozi bwa wo mu mujyi wa Kigali.

Abayobozi b’ibigo by’amashuri mu mujyi wa Kigali batoye komite ibahagarariye muri HOSO

Iki kibazo cy’imicungire mibi kimwe n’ibindi bishamikiye ku burezi mu bigo by’amashuri, ngo ni byo umuryango HOSO ugiye gukemura, nk’uko umuyobozi w’inama njyishwanama ya wo, Padiri Gatete Innocent uyobora ishuri rya Don Bosco ryo mu Gatenga abivuga.

Ati “Ibyo bibazo twashoboye kubikusanya tuvanamo gahunda tuzagenderaho mu gihe cy’imyaka irindwi, ariko mu myaka itatu yambere hari gahunda yo kubaka ubushobozi bw’abayobozi b’amashuri kuko babazwa byinshi.

Bacunga umutungo, barayobora, iterambere ry’aho bayobora usanga ribashingiyeho, bavugira rubanda, rero tuzashaka ukuntu twabubakira ubushobozi mu miyoborere”

Ikibazo cyo kutagira ubushobozi buhagije mu miyoborere n’imicungire y’amashuri, bamwe mu bayobozi b’ibigo by’amashuri bagisanisha n’ikibazo cy’ireme ry’uburezi ndetse n’icy’abana baterwa inda bakiri bato.

Ni ibibazo biteze ko umuryango wa bo ugiye kubafashamo mu kuzamura ijwi nk’uko Nsengimana Charles uyobora Groupe Scolaire Buye ryo mu karere ka Nyarugenge.

Padiri Gatete Innocent avuga ko HOSO igiye gukemura ikibazo cy’imicungire mibi y’umutungo mu bigo by’amashuri

Padiri Gatete avuga ko hazabaho guhuza ubuyobozi bw’amashuri n’uduce akoreramo kugira ngo habeho ubufatanye mu guhangana n’ibyo bibazo.

Gushyiraho inzego z’ubuyobozi bwa HOSO byatangiriye mu mujyi wa Kigali, bikazakomereza no mu zindi ntara z’u Rwanda, uhereye ku y’Uburasirazuba, aho abayobozi b’ibigo by’amashuri muri iyo ntara bazatora abazahagararira uyu muryango wa bo ku rwego rw’intara.

Abashyigikiye FPR-Inkotanyi batangiye kubyina intsinzi

FPR ikurikiwe na PSD ifite amajwi y’agateganyo 8.5% na PL ifite 7%. ishyaka Democratic Green Party na PS Imberakuri binganya amajwi angana na 4.5%.

Amajwi y’agateganyo yashyizwe ahagaragara nyuma y’uko igikorwa nyirizina cyo gutora cyatangiye tariki 2 Nzeri ku Banyarwanda baba mu mahanga na tariki 3 Nzeri ku Banyarwanda bari imbere mu gihugu.

Prof Kalisa Mbanda uyobora NEC, yavuze ko abakandida bigenga bo batagifite amahirwe yo kwinjira mu nteko ishinga amategeko.

Ati “Abakandida bigenga uko ari bane bose bafite amajwi makeya, ay’ejo [asigaye kubarurwa] ntacyo azahinduraho kugira ngo babe babona umwanya mu nteko ishinga amategeko.”

Dr. Vincent Biruta uyobora ishyaka PSD avuga ko kuba harajemo amaraso mashya mu matora y’uyu mwaka bifite icyo byahinduye kuko “amajwi n’iyo yaba make ariko agasaranganywa n’abahatana bose agira icyo ahindura ku ishusho y’amatora.”

Kugeza ubu amashyaka abiri, Democratic Green Party na PS Imberakuri ntarakatisha itike yo guhagararirwa mu nteko ishinga amategeko, kuko yombi afite amajwi 4,5%.

Aya mashyaka yombi ategereje ko amajwi 30% asigaye na yo abarurwa, ariko Dr. Frank Habineza uyobora Democratic Green Party ngo afite icyizere ko amajwi atanu ku ijana basabwa bazayuzuza.

Ati “Haracyari amahirwe kugira ngo tubone amajwi 5% atwinjiza mu nteko, hasigaye 30% atarabarurwa ku buryo tutaburamo atwinjiza mu nteko, tuzabonamo andi turenze ibice bitanu tubura.”

Uko amashyaka akurikiranye by’agateganyo

N’ubwo aya mashyaka agifite icyizere cyo kubona amajwi asabwa kugira ngo yinjire mu nteko ishinga amategeko, abayobozi ba yo bavuga ko baramutse batanabonye ayo majwi bakwemera ibyatangajwe na Komisiyo y’amatora, kandi ngo ntibyababuza gukomeza politiki.

Amatora arakomeza kuri uyu wa Kabiri hatorwa abadepite 26, barimo 24 bangana na 30% by’abagize inteko ishinga amategeko umutwe w’abadepite batorwa mu bagore.
batowe n’inteko ya bo itora igizwe n’abantu 131,400.

Haratorwa kandi abandi badepite babiri batorwa mu rubyiruko na bo bakaza gutorwa n’inteko ya bo igizwe n’abantu 262, ibyavuye mu matora ku buryo bw’agateganyo bikaza gutangazwa ku mugoroba wo kuri uyu wakabiri.

Hatagize igihinduka, amajwi FPR yabonye mu matora y’uyu mwaka yaba yenda kungana n’ayo yabonye mu matora ya 2013 angana na 76.2%. icyo gihe yari yifatanyije n’amashyaka ane ari yo PDI, PSR, PPC na PDC.

Uyu mwaka ho FPR yiyunze ku mashyaka atandatu ari yo PDI, PSR, PDC, PPC, UDPR na PSP.

Umuyobozi w’akarere ka Rwamagana avuga imirire mibi igaragara mu bana bavukana indwara zidakira bigoye kuyihashya burundu

Iki kibazo ku rwego rw’igihugu kigaragara ku gipimo cya 38%, akarere ka Rwamagana kakaba kageze kuri 25%. N’ubwo ari imibare idashimishije, nk’uko Mbonyumuvunyi Radjab uyobora ako karere abivuga, avuga ko hari intambwe bateye babifashijwemo n’uturima tw’igikoni ndetse n’igikoni cy’umudugudu.

Ati “Ntabwo wakwihandagaza ngo uvuge ngo birashimishije uri umuyobozi, kuko n’iyo yaba ari umwana umwe ufite imirire mibi, tuba tugomba kumwitaho kugeza igihe tumuvaniye mu mirire mibi.

Uturima tw’igikoni n’igikoni cy’umudugudu biri mu byafashije kuba Akarere ka Rwamagana kari mu tudafite ikibazo gikabije cyane cy’imirire mibi”

N’ubwo gahunda z’uturima tw’igikoni n’igikoni cy’umudugudu zivugwaho kugira uruhare mu kurwanya imirire mibi mu bana, hari ababyeyi bagaragaza ubukene n’imyumvire ikiri hasi nk’impamvu ituma muri aka karere hakigaragara imirire mibi.

Mukansanga Godelive avuga ko kuba hari ababyeyi “badashobora kwigondera ifi cyangwa inyama zo guha abana ari ikibazo gikomeye gituma abana bamwe bagaragaraho imirire mibi”

Gusa hari n’abavuga ko hari ikibazo cy’imyumvire ya bamwe mu babyeyi batarasobanukirwa, usanga barwaje indwara z’imirire mibi kandi batabuze ubushobozi, nk’uko umubyeyi witwa Musabyeyezu Mariya abivuga.

Umuyobozi w’akarere ka Rwamagana avuga ko bari mu rugamba rwo guhindura imyumvire y’abaturage bagitekereza muri ubu buryo, kuko ibikenerwa ngo umwana ave mu mirire mibi bidasaba ubushobozi buhambaye.

Uyu muyobozi avuga ko ikibazo cy’imirire mibi ari urugamba bagomba kurwana, ariko ngo ntabwo rwarangira ijana ku ijana kuko abana bafite ikibazo cy’imirire mibi bari mu byiciro bibiri bitandukanye.

Ati “Icyiciro kimwe tuzakirangiza ijana ku ijana ikindi ntabwo tuzarangiza. Icyo tuzarangiza ijana ku ijana n’icy’abana bafite imirire mibi ituruka ku mibereho y’ababyeyi n’uburyo bagaburira abana. Abo twizeye ko tuzabafasha bakava mu mirire mibi”

Umuyobozi w’akarere ka Rwamagana yongeraho ko icyiciro cya kabiri ari “icy’abana baba baravukanye indwara zihariye zirimo iz’umutima n’ubuhumekero, ugasanga bagaragaraho imirire mibi bitewe n’izo ndwara kuko kenshi ziba zidakira”

Abo na bo ngo bitabwaho muri gahunda zisanzwe zo kurwanya imirire mibi, ariko “bitewe n’uko baba barwaye indwara zidakira ngo nta cyizere kiba gihari cy’uko bene abo bana bava mu mirire mibi” nk’uko Mbonyumuvunyi abivuga.

Ikibazo cy’imirire mibi mu bana ntikireba akarere ka Rwamagana gusa gafite igikombe cy’imihigo y’imyaka ibiri ishize. Ni kimwe mu bihangayikishije u Rwanda, ku buryo umukuru w’igihugu adasiba gusaba ko cyashakirwa umuti mu buryo burambye.

Ingabo zitabiriye amahugurwa

Umuyobozi w’iyo myitozo Maj. Gen Innocent Kabandana yavuze ko ari imyitozo igamije gusuzuma no kongerera ubushobozi abasirikari bayitabiriye, ku buryo bazayirangiza bafite umushobozi bwo gutegura no gushyira mu bikorwa ubutumwa bw’Umuryango w’abibumbye bwo kubungabunga amahoro.

Umugaba mukuru w’Ingabo Gen. Patrick Nyamvumba yavuze ko yizeye neza ko abitabiriye iyo myitozo bazasangira ubunararibonye kugira ngo batange umusanzu mu kubungabunga amahoro hirya no hino ku isi.

Iyo myitozo yitabiriwe n’ibihugu bya Botswana, Gabon, u Budage, Malawi, Maroc, u Buholandi, Congo Brazaville, u Rwanda, Senegal, Leta zunze Ubumwe za Amerika, Zambia n’imiryango nk’Umuryango w’Abibumbyw (UN) na komite mpuzamahanga ya Croix Rouge.

Iyo imvura yaguye ikibuga cyimuriwemo gare kirekamo amazi, izuba ryacana na bwo ivumbi rikabangamira abagenzi

Kuri ubu abagenzi bategera imodoka mu kibuga gitoya kiri ku ruhande rw’umuhanda munini winjira mu Mujyi wa Rwamagana.

Imodoka n’abagenzi zinyuranamo, zimwe zisohoka izindi zinjira, uko imwe isohotse cyangwa yinjiye, akavumbi karatumuka bamwe mu bagenzi bakipfuka ku mazuru igihe cy’izuba, naho mu gihe cy’imvura ugasanga imodoka zirabatera ibyondo.

Aho ni ho ubuyobozi bwabaye bwerekeje abategeraga imodoka muri gare ya Rwamagana kugira ngo ibanze yubakwe.

Abagenzi n’abashoferi binubira icyo kibuga imodoka zisigaye zihagararamo. Bavuga ko uretse kuba ari gito nta hantu ho kwikinga izuba bateganirijwe, ndetse no mu gihe cy’imvura baranyagirwa kuko nta nzu ziri hafi bajya kugamamo.

Abagenzi n’abashoferi baribaza uko byagenda igihe imvura yatangira kugwa bagitegera aho gare yimuriwe.

Uretse abakata amatike bafite aho bakinga izuba abagenzi bo ntaho bateganyirijwe aho gare yabaye yimuriwe

Umwe mu bashoferi witwa Makuza Samuel ati “ Iyi gare iratubangamiye pe, dukeneye gutabarwa tukimurwa hano vuba."

Abagenzi na bo bavuga ko, iyo imvura yaguye banyagirwa kuko nta nzu ziri hafi y’aho basigaye bategera, ndetse izuba ryaba ryinshi bakicwa n’ivumbi.

Umuyobozi w’Akarere ka Rwamagana Mbonyumuvunyi Radjab, avuga ko imirimo yo kubaka gare ya Rwamagana igeze kure, ku buryo ibisigaye gukorwa ari byo bike.
Yizeje abagenzi ko igihe cy’imvura kitazagaruka bagitegera aho babaye bimuriwe.

Ati “Ndakwizeza ijana ku ijana ko igihe cy’imvura kitazaza tukiri hariya mu manegeka tuzaba turi muri gare nshyashya. N’ubu yarangiye harabura gushyiramo twa pave gusa. Ni ikintu kidashobora no gutwara iminsi irindwi, ntabwo imvura izagaruka tutarajya muri gare nshya”

Gare nshya iri kubakwa izaba yamaze kuzura mbere y’uko igihe cy’imvura gitangira

Akarere ka Rwamagana ni kamwe mu turere duke tw’Intara y’Uburasirazuba twari dusigaye tutagira gare nziza, Ubuyobozi bwako bukaba bwizeza abagatuye ko mu minsi mike iba yatangiye gukoreshwa.

Ibishyimbo bikungahaye ku butare ni bimwe mu byongererwa intungamubiri bikiri mu murima

Kongerera intungamubiri ibihingwa bikiri mu murima ni bumwe mu buryo bwatangiye gukoreshwa mu rwego rwo kurwanya imirire mibi mu Rwanda, kuri ubu iri ku gipimo cya 38% mu bana bato.

Leta y’u Rwanda n’imiryango imwe n’imwe itegamiye kuri leta ikomeje ubukangurambaga, bukorerwa ababyeyi kugira ngo bamenye kugaburira abana indyo yuzuye.

Gusa uretse mbere y’ubwo bukangurambaga, hari imiryango yatangiye ubushakashatsi kuri bimwe mu bihingwa ihereye ku bishyimbo n’ibijumba, hagamijwe kubyongerera intungamubiri bikiri mu murima.

Kwibanda ku bishyimbo n’ibijumba ngo ni uko ari ibihingwa biribwa n’Abanyarwanda benshi, nk’uko Dr. Kirimi Sindi, ukorera ikigo mpuzamahanga CIP gikora ubushakashatsi ku bijumba abivuga.

Ati “Bimwe mu bihingwa by’ingenzi mu Rwanda, ni ibishyimbo n’ibijumba. Bitewe n’uko bihingwa mu Rwanda hose, bikaba binaribwa n’abantu benshi, ni yo mpamvu twahisemo kubikoraho ubushakashatsi.

Ibyo bihingwa byongererwa intungamubiri bikiri mu murima, ibyo bivuze ko bifite intungamubiri nyinshi kuko ibijumba bifite vitamin A, ibishyimbo bikagira imyunyu ngugu y’ubutare na zinc, kandi izi ni zimwe mu ntungamubiri z’ingenzi ”

Ibijumba bikungahaye kuri vitamin A bimaze igihe bihingwa mu Rwanda, ariko imbuto ntiragera kuri bose

Ibyo bishyimbo n’ibijumba n’ubwo bikungahaye ku ntungamubiri, uburyo byongererwa intungamubiri bikiri mu murima abantu ntibabuvugaho rumwe.

Hari abakeka ko bishobora kugira ingaruka zitari nziza ku buzima, ariko Dr. Kirimi avuga ko abantu badakwiye kubigirira impungenge.

Ati “Ibihingwa byongerewe intungamubiri bikiri mu murima bimeze nk’ibindi bihingwa byose, kuko bibangurirwa mu buryo busanzwe.

Nta tandukaniro riri hagati y’ibyo bihingwa n’ibindi bisanzwe, uretse kuba biba bikungahaye ku ntungamubiri ugereranije n’ibisanzwe, ikindi ni uko umubiri ufata ibyo ukeneye gusa kabone n’iyo warya byinshi”

Akomeza avuga ko ibyo bihingwa ari byiza kurusha ibyongerewe intungamubiri mu nganda, aho umuntu ashobora gufata ikiribwa icyo ari cyo cyose akacyongerera intungamubiri ariko bikorewe mu nganda.

Ati “Wafata isukari cyangwa amavuta ukongeramo vitamine D, ukongeramo vitamini A, ariko ntabwo biba bipimye neza, biba bishoboka ko wafata ibirenze ibyo ukeneye”

Abagize sosiyete sivile n’imiryango yigenga bari gufatanya na leta gushaka icyarandura imirire mibi mu Rwanda

Ibyo bihingwa n’ubwo bivugwaho kuba byagira uruhare mu kurwanya imirire mibi, kubona imbuto zabyo ntibyorohera buri wese, ndetse n’iyo zibonetse ziba zihenze ugereranije n’izindi mbuto zisanzwe.

Munyakazi Jean Paul, Umuyobozi mukuru w’umuryango "Imbaraga" w’abahinzi n’aborozi mu Rwanda, avuga ko leta ikwiye gutangira gahunda yo gufasha abahinzi, kugira ngo izo mbuto zigere kuri benshi bashoboka.

“Leta ikwiye gushyiramo inkunga muri biriya bihingwa cyane cyane ku bishyimbo bikungahaye ku myunyu ngugu y’ubutare, kuko ku bihingwa bindi leta itanga inkunga kugira ngo byorohere abaturage kubigura”

Umuyobozi Mukuru ushinzwe ubuhinzi muri Minisiteri y’Ubuhinzi n’ubworozi, Dr Charles Murekezi, mu biganiro nyunguranabitekerezo byari byateguwe n’urugaga "Imbaraga" ku itariki 24 Nyakanga 2018, yavuze ko gahunda y’imyaka itandatu y’iyo Minisiteri izibanda ku nkingi zirimo ubushakashatsi n’iyamamazabuhinzi n’ubworozi, ku buryo abahinzi bazashwa muri iyo gahunda.

Ikibazo cy’imirire mibi mu bana ku rwego rw’igihugu kiri ku gipimo cya 38%, ariko hari intego yo kugabanya icyo gipimo ku buryo gisigara nibura kuri 5%.

Dr. Abdillahi Omar Bouh Umunyamabanga Nshingwabikorwa wa EASF

Ibyo byavuzwe n’umuyobozi w’ubunyamabanga bwa EASF, Dr. Abdillahi Omar Bouh, ubwo hatangizwaga inama y’iminsi ine y’impuguke za EASF ziteraniye i Kigali kuva tariki 24 Nyakanga 2018.

Izo mpuguke zizarebera hamwe ibyagezweho n’uwo mutwe zinaganire ku buryo warushaho gutanga umusaruro mu kubungabunga amahoro n’umutekano muri Afurika.

N’ubwo uwo mutwe ufite ibyo wagezeho wishimira, Dr. Abdillahi Omar Bouh uyobora ubunyamabanga bwawo, avuga ko hakiri imbogamizi y’amafaranga, bitewe ahanini n’uko umwaka w’ingengo y’imari wa bimwe mu bihugu udahura n’uw’ubunyamabanga bwa EASF.

Agira ati “Buri munyamuryango agomba gutanga umusanzu buri mwaka (...) gusa imwe mu mbogamizi dufite ni ukudahura k’umwaka w’ingengo y’imari y’ubunyamabanga bwa EASF utangira mu kwezi kwa mbere n’umwaka w’ingengo y’imari ya byinshi mu bihugu by’abanyamuryango bitangira umwaka w’ingengo y’imari mu kwezi kwa karindwi”

Akomeza avuga ko ikinyuranyo cy’amezi atandatu gituma habaho gukererwa, kuko bisaba gutegereza ko za guverinoma zemeza ingengo y’imari kugira ngo amafaranga aboneke.

Abitabiriye iyo nama ya 24 baturuka mu bihugu by’abanyamuryango b’uwo mutwe w’ingabo utabara aho rukomeye muri Afurika y’Uburasirazuba.

Maj Gen Charles Karamba ayifungura ku mugaragaro, yasabye impuguke zayiteraniyemo ku munsi wa mbere, kugira inama Abagaba b’ingabo b’ibyo bihugu, kugira ngo inzitizi zatuma uwo mutwe utagera ku ntego zawo zishakirwe umuti.

Yagize ati “Umutwe w’ingabo za Afurika y’Uburasirazuba zitabara aho rukomeye uzashobora kuzuza inshingano zawo n’ukora mu buryo buteganywa n’amategeko, ukabona ibikorwaremezo bikenewe, abakozi, ibikoresho, ndetse n’amafaranga.

Ni inshingano rero z’impuguke ziri hano kugira inama abagaba bakuru b’ingabo z’Akarere ka Afurika y’Uburasirazuba ku buryo bwo gushaka ibyo byose bikenewe n’uburyo byakoreshwa. Uyu munsi nizeye ko iyi nama izafasha mu kugera kuri izo ntego”

N’ubwo uwo mutwe w’ingabo uriho ukaba unashinzwe kubungabunga amahoro, agace ka Afurika y’Uburasirazuba kavugwaho kuba ari kamwe mu dufite ibibazo by’umutekano muke.

Dr. Abdillahi Omar Bouh yemera ko aka karere kari mu turangwamo umutekano muke, ariko ku rundi ruhande akanemeza ko gafite amahoro kuko iterambere rikagaragaramo ritashoboka katayafite.

Ati “Ni byo akarere kacu gafite ikibazo cy’umutekano muke, ariko nanone tuzi ko akarere kacu ari kamwe mu dukize, kuko twizera ko nta mahoro n’umutekano, nta n’iterambere rishoboka. Akarere ka Afurika y’Uburasirazuba kateye imbere.

Wareba byonyine Kigali ukuntu imeze, umubare w’Abaperezida bahaza, ejo byari u Bushinwa, uyu munsi ni u Buhinde, wenda n’ejo hazaza undi. Ibi bigaragaza umutekano uhari”

Umutwe w’ingabo z’akarere ka Afurika y’Uburasirazuba zitabara aho rukomeye uhuriweho n’ibihugu 10 by’abanyamuryango, ari byo u Burundi, Comoros, Djibouti, Ethiopia, Kenya, u Rwanda, Seychelles, Somalia, Sudan and Uganda.

Iyo nama izaberamo ibiganiro bizahuza inzego zitandukanye isozwe n’umuganda uzakorwa n’abayitabiriye, uzabera mu Murenge wa Gikomero wo mu Karere ka Gasabo ku itariki 28 Nyakanga 2018.

Igishushanyo mbonera cy’umujyi wa Rwamagana

Ni kenshi abatuye mu karere ka Rwamagana binubiye ko umujyi w’akarere ka bo udakura ku rugero rumwe n’indi mijyi mu Rwanda. Abazi uwo mujyi kera bemeza ko uri mu yambere mu Rwanda yari iteye imbere kubera ubucuruzi bwawukorerwagamo.

“Hano bahubatse mu 1934, ubucuruzi bwa ho bwari buteye imbere. Abarabu bari barahubatse ibikorwa, nyuma ya hano (i Rwamagana) bajya kubaka izaza ahitwa Karembo, bubaka Kabarondo, bubaka Kirehe, bubaka na Kiramuruzi. Mu 1933/4 abarabu batura hano i Rwamagana hari hakomeye, ariko reba uko hasigaye hameze ubu!”

Uku niko Rugwabiza Issa, umwe mu bageze mu zabukuru w’i Rwamagana yabisobanuye.

Abacuruzi ni bamwe mu bakunze kwinubira ko umujyi wa Rwamagana udatera imbere, ku buryo bamwe iyo bamaze kubona igishoro kinini, Rwamagana bayitera umugongo bakajya gukomereza ubucuruzi mu mijyi minini.

Fabrice Habanabakize agira ati “N’iyo urebye nk’i Kigali usanga mu bacuruzi bafite ubucuruzi bukomeye ku rwego rw’igihugu harimo abanya Rwamagana benshi, umuntu yakumva ko abonye amafaranga agahita afata icyemezo cyo kujya gukorera i Kigali”

Umunyamabanga nshingwabikorwa w’akarere ka Rwamagana, Kakooza Henry

Umunyamabanga nshingwabikorwa w’akarere ka Rwamagana, Kakooza Henry, avuga ko imbogamizi yatumaga uyu mujyi utajyanishwa n’igihe itakiriho, kuko icyaburaga ari igishushanyo mbonera cy’umujyi kandi ubu cyamaze kuboneka.

Nyuma yo kuboneka kwa cyo ngo mu mishinga y’ingengo y’imari y’umwaka wa 2018/19, hashyizwemo imishinga minini ijyanye n’umujyi wa Rwamagana, uhereye ku mihanda ya kaburimbo, iya laterite, amatara, amazi n’ibindi bikorwaremezo.

Kakooza agira ati “Ni ibyo bintu by’ingenzi turi gukora kugira ngo duhindure iterambere ry’umujyi wacu, kandi mu myaka ibiri cyangwa itatu iri imbere hazaba harahindutse byinshi mu iterambere ry’umujyi wa Rwamagana”

Umujyi wa Rwamagana ngo uzavugururwa werekeza mu gace katari gasanzwe karimo umujyi, ni ukuvuga mu duce twa Gishari na Nyarusange yo mu murenge wa Muhazi.

Umuyobozi w’akarere ka Rwamagana Mbonyumuvunyi Radjab avuga ko agace kazwi nka Buswayirini ko kazakomeza kuba inkengero z’umujyi, kuko kuhagurira umujyi bishobora kugorana kubera kwimura abantu n’ibikorwa bisanzwe bihari.

Ibyo ngo bisobanuye ko inyamaswa zishobora no kuburira abantu ko hari ibiza biri hafi kuba mu gace runaka, abantu bakitegura guhangana nabyo, cyangwa se bakanabihunga bitarabatwara ubuzima.

Iyumvire icyegeranyo kivuga ku buryo burambuye uko inyamanswa zishobora kuburira abantu ko hari ibiza biri hafi.

Ibijumba bikungahaye kuri Vitamine A byitezweho kurandura imirire mibi muri Rulindo

Ibi bijumba byatangiye guhingwa mu tugari tunyuranye tw’umurenge wa Buyoga, bikaba bihingwa n’abaturage bibumbiye mu matsinda anyuranye y’abahinzi muri uwo murenge.

Imbuto y’ibyo bijumba ngo bayihawe muri gahunda y’umushinga wo kurwanya imirire mibi mu bana n’ababyeyi, uhuriweho n’abafatanyabikorwa mu iterambere ry’uwo murenge.

Abahingira hamwe mu itsinda ryitwa “Jya mbere Muhinzi” ryo mu mudugudu wa Ryanyirakayobe mu kagari ka Butare, bemeza ko uretse kuba barabwiwe ko ibyo bijumba bikungahaye ku ntungamubiri, binaryoha ugereranyije n’ibyo bari basanzwe bazi.

Abatuye i Buyoga batangiye guhinga ibijumba bikungahaye kuri vitamini A

Musabyimana Alphonsine agira ati “Ibi bijumba nariyeho numva biryoshye, batubwiye ko bifite vitamini kandi wumva biryoshye kurusha ibisanzwe. Amavitamini bitanga harimo ayo gutuma uruhu rutoha, nkanjye nari umukecuru ariko ndizera ko ntangira kwiyuburura mu gihe gito”

Imigozi y’ibi bijumba bikungahaye kuri vitamin A aba bahinzi bayihawe n’umuryango “Imbaraga” w’abahinzi n’aborozi bo mu Rwanda, muri gahunda y’umushinga wo kurwanya indwara ziterwa n’imirire mibi uwo muryango ufatanyije n’abandi bafatanyabikorwa.

Amandazi akoze mu bijumba

Amandazi akoze mu bijumba yamaze gushya

Abahinga ibi bijumba mu murenge wa Buyoga bari batangiye kugira impungenge z’uko bashobora kuzabiburira isoko mu gihe baba bejeje byinshi.

Gusa hari andi matsinda y’abaturage yatangiye kwigishwa uburyo ibyo bijumba byakorwamo amandazi, kugira ngo umusaruro wa byo wongererwe agaciro mu bundi buryo aho guhombera abahinzi.

Abize gukora ayo mandazi bavuga ko abahinga ibyo bijumba bazajya babibagemurira bakabikoramo amandazi bagemura ku masoko, kugira ngo intungamubiri ziboneka muri ibyo bijumba zigere ku bantu benshi mu bazifashe mu mandazi.

Ibijumba babanza kubitigosa bakabona kubikoramo ubugari buvangwa n’ifarini nke kugira ngo bivemo amandazi

Rutayisire Theodore wo mu itsinda Twisungane mu buhinzi agira ati “Bahoraga barira ko babuze amasoko, ariko noneho ibyo bijumba bya bo twabibyaza umusaruro, ya mandazi twebwe tukayakora tukayakwiza mu masoko hose buri muturage akibona muri vitamin iba muri ibyo bijumba”

Umukozi w’umuryango Imbaraga ukurikirana ubuhinzi bw’ibyo bijumba, Munyaneza Jacques, avuga ko byeze ariko bikaba bitarasarurwa. Avuga ko kudasarurwa byatewe n’uko badafite ahantu hari amazi bakongera guhinga imigozi ya byo, kuri ubu kiri no gutuburwa.

Abahinzi ngo bifuza ko ubuyobozi bwabafasha kubona aho bayihinga kuko bayihinze ku musozi itakomeza gutanga uimbuto nziza kandi ikiri mu gihe cyo kuyitubura.

Aya mandazi na yo ngo aba arimo vitamini A nk’iyo mu bijumba

Umunyamabanga nshingwabikorwa w’umurenge wa Buyoga, Antoine Muhigiro, avuga ko ahantu hari amazi hanakozwe amaterase y’indinganire hateganyirijwe ubuhinzi bw’imboga. Gusa ngo inama bazakora tariki 02 Nyakanga 2018 n’abayobozi b’utugari izatanga igisubizo kuri icyo cyifuzo cy’abahinzi, bagashakirwa ahantu hari utugezi iyo migozi yahingwa.

Ubuhinzi bw’ibi bijumba, abaturage babufatanya n’ubw’imboga muri gahunda y’uwo mushinga wo kurwanya imirire mibi mu bana n’abagore.

Hari amatsinda y’abaturage yatangiye guhinga imboga ku buso bunini, abandi bakaba bazihinga ku turima tw’igikoni twakozwe muri gahunda y’uwo mushinga wo kurwanya imirire mibi. Abahinga izo mboga bavuga ko bamaze gusobanukirwa akamaro ka zo ku buryo nta funguro rya bo rikiburaho imboga.

Uretse gutanga imbuto y’imboga n’iy’ibijumba bikungahaye kuri vitamin A, abagenerwabikorwa b’uwo mushinga wo kurwanya imirire mibi mu murenge wa Buyoga banahabwa serivisi z’ubuvuzi, by’umwihariko abo mu cyiciro cya mbere bakorozwa amatungo magufi.

nahinze imboga mu rwego rwo kurwanya imirire mibi

Masine Juvenal ushinzwe gahunda z’umuryango “Imbaraga” avuga ko izi serivisi zitangwa muri uwo mushinga zatumye ikibazo cy’imirire mibi cyagaragaraga muri imwe mu miryango yo muri Buyoga kirangira.

Ati “Ubu batangiye kwiga ikoranabuhanga ry’ibanze ryo kuba bakora amandazi n’imigati muri biriya bijumba. Uko ibijumba bizakomeza kwiyongera niko abantu bazanatekereza niba hatajyaho uruganda rutunganya imigati, imitobe n’ibindi kuko na byo bivamo”

Uretse umuryango Imbaraga, uyu mushinga wo kurwanya imirire mibi mu bana n’ababyeyi uhuriweho n’abafatanyabikorwa batandukanye, barimo umuryango nterankunga w’abataliyani wa MLFM, uw’abaganga b’amatungo batagira umupaka b’ababirigi, ndetse n’ababikira beneyozefu bakorera muri Muyanza ho mu murenge wa Buyoga.

Ubuyobozi bw’uwo murenge buvuga ko uwo mushinga wunganiye leta mu guhindura ubuzima bw’abaturage, bijyanye n’icyerekezo u Rwanda rufite.

Ubuyobozi bwiza no kutajenjekera ruswa ni kimwe mu byatumye Uruganda rwa Volks Wagen rutinyuka gukorera mu Rwanda

Umuyobozi w’ibikorwa bya rwo muri Africa y’Epfo n’agace ko munsi y’ubutayu bwa Sahara, Thomas Schäfer, yavuze ko icyerekezo 2025 cy’uru ruganda ari ukugeza ibikorwa bya rwo mu bice bitandukanye by’isi.

Mu gihe hari benshi bibaza impamvu uru ruganda rwahisemo gukorera mu Rwanda, avuga ko byatewe n’imiyoborere myiza iri mu Rwanda.

Ati “Impamvu ntayindi ni ubuyobozi bwiza, kutajenjekera ruswa, iterambere ry’ubukungu, u Rwanda rurayoboye mu guhanga udushya n’ikoranabuhanga, Kigali iri ku isonga muri gahunda ya smart city, ariko icy’ingenzi kurusha ibindi, ni uko VW n’u Rwanda bisangiye icyerekezo”

Imodoka za VW zizajya ziteranyirizwa muri uru ruganda

Perezida wa Repubulika y’u Rwanda Paul Kagame ubwo yatangizaga ku mugaragaro ibikorwa by’uruganda rwa VolksWagen (VW) kuri uyu wa gatatu tariki 27 Kamena 2018, yavuze ko Africa idakeneye kuba ingarani y’imodoka zakoze.

Mu myaka ibiri ishize ni bwo hatangiye ibiganiro hagati y’uruganda VolksWagen na Leta y’u Rwanda binyuze muri RDB, ibiganiro byari bigamije gutangiza uruganda rwateranyiriza imodoka mu Rwanda.

Perezida Kagame yavuze ko mu Rwanda hari imodoka nyinshi zishaje, ku buryo mu gihe kiri imbere ikoranabuhanga rihujwe no guhanga udushya mu kugurisha no gusangira imodoka, bizafasha abantu kubona imodoka nshya zo gukoresha, bitabaye ngombwa ko baba batunze izabo bwite.

Yagize ati “Nyinshi mu modoka ziri mu mihanda yacu zirashaje, nyinshi zakozwe mu kinyejana gishize, zihumanya ikirere cyane kubera igihe zimaze ugereranyije n’imodoka nshya.

Africa ntabwo ikeneye kuba ingarani y’imodoka zakoze, cyangwa ikindi kintu cyose cyakoze (...) Ntekereza ko twebwe Abanyafrica, Abanyarwanda dukwiye ibyiza, kandi iyi ni inzira imwe yo kwerekana uburyo twabishobora.”

Perezida Kagame yavuze ko Africa idakwiye kuba ingarani y’imodoka zishaje

Ikompanyi CFAO icuruza ibintu bitandukanye birimo n’imodoka, ni yo izakora akazi ko guteranya, guhererekanya no gucunga imodoka za VW mu Rwanda, binyuze mu ishami ryayo mu Rwanda, CFAO Rwanda Motors.

Umuyobozi wa yo Zarak Khan yijeje u Rwanda n’akarere muri rusange ko bazashyira ku isoko imodoka nziza kandi zizewe.

Perezida Kagame yavuze ko ku ikubitiro bamwe batizeraga ko imodoka z’abadage zateranyirizwa mu Rwanda, ashima abagize uruhare kugeza ubwo izi modoka zitangira guteranyirizwa mu Rwanda.

Umukuru w’igihugu yavuze ko ibihugu bya Africa y’Uburasirazuba bikwiye kugira ubufatanye mu kubaka agace k’inganda, kugira ngo ibi bihugu bitere indi ntambwe yo kugira inganda zikora imodoka aho kugira iziziteranya.

Gusa ariko inkuru y’itangira ry’uruganda rwa VW mu Rwanda ngo ni inkuru nziza u Rwanda rwabarira amahanga. Perezida Kagame yagize ati “Uru ruganda rugaragaza mu buryo budashidikanywaho amateka mashya mu rugendo u Rwanda rwatangiye rwo guhindura ubukungu bwa rwo.

Akamaro karwo kandi kazanagera no kuri Africa muri rusange. Ahubwo reka nababwire, ibi bimpaye indi nkuru nziza yo kubara mu minsi mike iri imbere, dufite inama ya Africa yunze ubumwe nzayobora, bizaba ari ibyishimo kuri njye mbwira abantu iyi nkuru nziza”

Izi modoka zirakomeye kandi zirizewe

Uretse kuba imodoka z’uru ruganda zizagurishwa ku bazikeneye, runafite gahunda itari isanzwe yo kuzikodesha ku muntu wese wakenera imodoka yo gukoresha, akazajya ayitira yifashishije Application ya Telefoni yitwa Move App.

Imodoka za VW Polo zateranyirijwe mu Rwanda zizajya zigurishwa ku bihumbi 23,881 by’amadollars, izo mu bwoko bwa Passat zigurishwe ku bihumbi 37,674, Tiguan zigurishwe ku bihumbi 37,719, Amarok ku bihumbi 44,559, naho Teramont zigurishwe 48,156 by’amadollars ya Amerika.

Kureba andi mafoto menshi kanda AHA

Umunyamakuru wacu Cyprien Ngendahimana yagiranye ikiganiro na Elias Munyandaguza wari uhatuye mu gihe cya Jenoside kugeza n’ubu.

Aratuganirira atubwire icyatumye bishyira hamwe n’uko bafataga ikiremwamuntu icyo gihe, bitandukanye n’ibyo abenshi mu Banyarwanda batekerezaga.

Munyandaguza yahaye Kigali Today ubuhamya bw’uko bari babanye mbere ya Jenoside

Iyi burende ni yo yari igiye kurasa mu mudugudu wa Giheka ariko Inkotanyi ziyitanga itaragerayo

Minisitiri w’Ubutabera Johnston Busingye avuga ko amavugurura mu Nkiko z’ibanze atazatuma hari abashomera mu bacamanza

Minisitiri w’Ubutabera Johnston Busingye avuga ko iryo vugurura rizakorwa mu rwego rwo kunoza akazi k’urwego rw’ubutabera kugira ngo rutange serivisi nziza ku baturage.

Agira ati “Inkiko z’ibanze dufite ubu 60 tuzagira izo duhuza hasigare inkiko 41 bitewe n’uburyo abantu babona akazi zikora,n’umusaruro wavamo zimwe zihujwe n’izindi zizegereye”

N’ubwo izo nkiko zizahuzwa, abacamanza bazikoragamo ntibakwiye kugira impungenge z’uko babura akazi, kuko ahubwo hazakenerwa abandi biyongera ku bari basanzwe.

“Ntabwo mfite gahunda neza yo mu rukiko rw’ikirenga ariko ahubwo ngira ngo bazakenera n’abandi. Muri gahunda bakoze ntabwo harimo iyo gutuma abantu batakaza imirimo, ahubwo harimo iyo gukenera abandi bajya muri ziriya nkiko 41”

Ivugurura ryakozwe mu rwego rw’ubutabera kuva mu 2004 ngo ryahinduye byinshi mu nkiko, ku buryo umuyoboro wa internet wagejejwe mu nkiko zose na parike zose, kandi mu gihe gito ngo uzagezwa no kuri station za polisi.

Mu bindi biteganywa muri iryo vugurura harimo ishyirwaho ry’urukiko rw’ubujurire rutari rusanzweho. Urwo rukiko ngo ruzajya hagati y’urukiko rukuru n’urukiko rw’ikirenga, ku buryo ruzafasha kuburanisha imanza nyinshi z’ubujurire zagezwaga mu rukiko rw’ikirenga.

Urukiko rw’ikirenga rwo ruzaba “urukiko ruca imanza zatoranijwe, z’icyitegererezo kandi zifite icyo zivuze ku buzima bw’igihugu, ku buzima bw’abantu mu birebana n’imibanire yabo n’amategeko n’ubundi bujurire buke cyane bushobora kugera mu rukiko rw’ikirenga” nk’uko Minisitiri w’Ubutabera abisobanura.

Minisitiri Busingye avuga ko iryo vugurura rigiye gukorwa mu rwego rw’ubutabera rizatuma urukiko rw’ikirenga ruzajya rwakira imanza nkeya, rukazaba ahanini rushinzwe kurinda itegeko nshinga ry’igihugu.

Rwamurangwa Steven Umuyobozi w’Akarere ka Gasabo avuga ko bihaye umuhigo wo gushakisha ababyeyi batandukanye bakiyandikisha mu gitabo cy’Irangamimerere ku nyungu z’abana babo

Kubandika mu irangamimerere ngo ni imwe mu ngamba akarere kafashe zo guhangana n’ibibazo bigera ku bana birimo kubura ababitaho bikabaviramo,kurwara amavunja, kurwara bwaki ndetse abana b’abakobwa bagaterwa inda z’imburagihe.

Umuyobozi w’Akarere ka Gasabo Rwamurangwa Stephen yabibwiye abanyamakuru ku itariki ya 5 Kamena 2018 mu biganiro byari bigamije kubereka aho akarere kageze gashyira mu bikorwa imihigo y’umwaka w’ingengo y’imari wa 2017/2018.

Yagize ati “Hari ingo nyinshi zifite ibibazo bya gatanya byanyuze no mu nkiko. Kubera ibanga ribamo ba nyir’ubwite ntibashobora kubibwira ubuyobozi ngo biyandikishe mu bitabo by’irangamimerere.

Buriya n’ibibazo bimwe birimo iby’abana bava mu ishuri, iby’abarwara amavunja, iby’abana b’inzererezi bishamikiye aha. Kugira ngo dukore igenamigambi tuba tugomba kugira iyo mibare (y’abatandukanye)”

Imibare ituruka mu Karere ka Gasabo igaragaza ko kuva muri Nyakanga 2017 kugeza muri Kamena 2018, abakobwa babyariye iwabo ari 764, abakirwaye amavunja bazwi kugeza ubu bakaba ari batanu, ndetse hakaba n’abakigaragaraho ibibazo by’imirire mibi.

Umuyobozi w’Akarere ka Gasabo wungirije ushinzwe imibereho myiza y’abaturage, Languida Nyirabahire, yavuze ko abahuye n’ibyo bibazo bagiye bafashwa, by’umwihariko abarwaye amavunja,bagafashwa gutunganya inzu zabo “kuzikurungira cyangwa gushyiramo sima bakagurirwa n’ibiryamirwa kugira ngo baryame heza kuko ayo mavunja ubusanzwe bayaterwa n’umwanda”

Mu mwaka w’ingengo y’imari wa 2017/18 Akarere ka Gasabo gafite imihigo 86, ifite ingengo y’imari ya Miriyari 25 na ,Miriyoni zisaga 292 z’Amafaranga y’u Rwanda. Hejuru ya 95,3% by’iyo mihigo imaze gushyirwa mu bikorwa ku gipimo kiri hejuru ya 75%, indi yiganjemo iy’ubukungu ikaba itarashyirwa mu bikorwa ku gipimo gishimishije.

Umuyobozi w’Akarere ka Gasabo avuga ko ibyo byatewe ahanini n’uko akarere kari kahize imihigo myinshi ugereranije n’utundi turere, ariko anemeza ko hari impamvu iyo mihigo itagezweho uko byari biteganijwe.

Yatanze urugero rw’umuhanda Zindiro-Masizi-Birembo-Kami-Gasanze utarakozwe ku gipimo akarere kari kihaye, avuga ko ku ikubitiro hari gahunda yo kuwusana bisanzwe, ariko nyuma akarere kagirwa inama yo kuwukora kawutegurira kuzashyirwamo kaburimbo.

Ibyo ngo byatumye udasanwa nk’uko byari byateganijwe mbere, ahubwo ukorwa mu buryo bwagutse kandi byasabye kwimura abaturage bagonzwe na wo, biba ngombwa ko hashakwa amafaranga yo kubishyura mbere yo kubimura.

Inkingi y’ubukungu ni yo yarimo imihigo myinshi, kuko yarimo imihigo 56 ifite agaciro ka miriyari umunani na miriyoni zisaga 127 z’Amafaranga y’u Rwanda, bingana na 64% by’ingengo y’imari yose yari iteganijwe ku mihigo y’uyu mwaka w’ingengo y’imari.

Muri ibi biganiro Akarere ka Gasabo kanamuritse ingengo y’imari izakoreshwa mu mwaka wa 2018/2019, ingana na Miriyari 25 na Miliyoni zisaga 632 z’Amafaranga y’u Rwanda, aka karere kakaba karihaye intego yo kuzinjiza 51,5% by’iyo ngengo y’imari.

Minisitiri Johnston Busingye avuga ko nta munyarwanda uzemererwa gucuruza imbunda

Minisitiri Johnston Busingye yabitangarije mu kiganiro n’abanyamakuru tariki 29 Gicurasi 2018, nyuma y’uko bamwe mu batari bafite amakuru kuri iryo tegeko baketse ko ryaba ryorohereje umuntu wese ushaka gutunga imbunda cyangwa kuzicuruza.

Tariki 28 Gicurasi 2018 nibwo inteko ishinga amategeko yemeje ko ibyaha n’ibihano bijyanye no gutunga intwaro biri mu gitabo cy’amategeko ahana ibyaha mu Rwanda byimurwa bigashyirwa mu itegeko ryihariye rirebana na byo.

Ni itegeko rigena uburyo bwo kubona, gutunga, gutwara, gukora, gucuruza, kubika no guhabwa intwaro, amasasu y’ubwoko bwose, n’ibindi bikoreshwa ku ntwaro mu buryo ubwo ari bwo bwose.

Bamwe mu bumvise inyito y’iryo tegeko baketse ko gucuruza no gutunga intwaro bishobora kuba bigiye koroshywa, ariko Minisitiri Busingye yavuze ko uretse ibigo bicunga umutekano byasabye gutunga imbunda bikabyemererwa, undi muntu wakwifuza kuyitunga bitamworohera na gato.

Ati “Biragoye cyane ko umuntu cyangwa urundi rwego rudafite inshingano nk’izo (zo gucunga umutekano) rwanyura mu biteganywa n’amategeko kugira ngo ruzagere ku gutunga imbunda. Ibyo ni ukugira ngo abantu batazabyuka bagasanga muri butiki harimo umunyu, isukari, mu nguni hari imbunda”

Minisitiri Busingye yasobanuye ko niba mu itegeko ryo mu 2009 gutunga imbunda bitashobokaga, ubu noneho birushaho kudashoboka.

Iryo tegeko riteganya ibisabwa ku bifuza gucuruza cyangwa gukorera intwaro mu Rwanda, ariko kuva rishyizweho mu 2009 nta kompanyi cyangwa umuntu ku giti cye wari wasaba kubikora. Ibisabwa kugira ngo umuntu abyemererwe biragoye, ari na yo mpamvu Minisitiri Busingye yavuze ko n’ubwo bishoboka umuntu atanabura kuvuga ko bisa n’ibidashoboka.

Ati “[Kubyemererwa] ni nko gufata ingamiya ukayinyuza mu ijisho ry’urushinge, kuko ibisabwa ni urutonde rw’ibintu byinshi ku buryo ntekereza ko kubyuzuza byafata imyaka 10 bigafata n’indi 10 ntawe urabyuzuza”

Itegeko rirebana n’intwaro rifite amateka ahera mu 1979

N’ubwo bamwe mu Banyarwanda batari bazi iri tegeko rirebana n’intwaro u Rwanda rugenderagaho ubu, ni itegeko rifite amateka ahera mu mwaka wa 1979.

Icyo gihe ngo ryari iteka (Decret loi) ryaje kwemezwa mu mwaka wa 1982, ariko mu 2009 ayo mategeko yose yavanyweho hajyaho itegeko rishya rigena uburyo bwo kubona, gutunga, gutwara, gukora, gucuruza, kubika no guhabwa intwaro, amasasu y’ubwoko bwose, n’ibindi bikoreshwa ku ntwaro mu buryo ubwo ari bwo bwose.

N’ubwo iri tegeko ryashyizweho icyo gihe, Minisitiri Busingye yavuze ko nta muntu ku giti cye waba atunze intwaro.

Ati “Ibirebana n’umuntu ku giti cye nta we nzi, bivuze ko ashobora kuba ari nta we kugeza ubu, kuko nta ruhushya ndabona mu biro byanjye rwaba ari urwatanzwe mbere yanjye, rwaba urwatanzwe mpari, nta n’ubusabe burangeraho (...) umuntu hano yaba akeneye imbunda yo mu nzu ye kubera iki? Umutekano w’Abanyarwanda ni umutekano bagomba kumva ko bafite”

Iri tegeko ni rimwe mu yandi agera kuri 24 yashyikirijwe inteko ishinga amategeko, kugira ngo bimwe mu byaha n’ibihano biri mu gitabo cy’amategeko ahana ibyaha mu Rwanda byimurwe bishyirwe mu mategeko yihariye arebana na byo, harimo n’itegeko rirebana n’intwaro.

Igitabo cy’amategeko ahana ibyaha mu Rwanda ubusanzwe cyari gihurijwemo ikintu cyose cyitwa icyaha, bigatuma haba ingorane ku birebana n’ibyaha bifitanye isano n’amategeko amwe n’amwe yihariye.

Minisitiri Busingye asobanura ko wasangaga ibyaha n’ibihano biteganywa n’ayo mategeko mu gitabo cy’amategeko ahana ibyaha mu Rwanda ubusanzwe gifatwa nk’itegeko ngenga, kandi yo ari amategeko yihariye.

Minisitiri Busingye yavuze ko iryo tegeko ritazabangamira amasezerano mpuzamahanga u Rwanda rwashyizeho umukono, arebana n’uburyo intwaro ntoya zibaho mu bihugu, zigacungwa, zikanakurikiranwa kugira ngo zidahinduka ikibazo.

Umuhanda Gatuma - Gicumbi - Kigali wangiritse kubera imbvura

Igice cy’uwo muhanda cyaridutse ku cyumweru tariki 13 Gicurasi 2018 mu Murenge wa Cyumba wo mu Karere ka Gicumbi, ku buryo byagize ingaruka ku bakoresha uwo muhanda n’abatuye aho wangirikiye.

Umunyamabanga wa leta ushinzwe ubwikorezi muri MININFRA, Jean de Dieu Uwihanganye yavuze ko uwo muhanda wakomeje kuriduka, ku buryo imodoka nini zabaye zibujijwe kuwunyuraho ngo udakomeza kuriduka.

Yabitangarije mu kiganiro yagiranye n’abanyamakuru ku mugoroba wo kuri uyu wa Kabiri tariki 15 Gicurasi 2018, nyum y’umunsi umwe uwo muhanda wangiritse.

Ati “Twafashe ingamba, imashini n’abakozi bagiye gukora uwo muhanda batangiye gukora ku buryo nibura ku wambere wazaba wongeye kuba nyabagendwa n’imodoka nini ziwunyuramo”

Uho uwo muhanda wangirikiye hari imiryango umunani byagizeho ingaruka, nk’uko Minisitiri w’ibikorwaremezo, Ambasaderi Claver Gatete yabivuze. Yavuze ko ku bufatanye na Minisiteri y’ubutegetsi bw’igihugu, iyo miryango izaba yimuwe ikanahabwa indishyi.

Umunyamabanga wa Leta ushinzwe ubwikorezi muri MININFRA, Jean de Dieu Uwihanganye avuga icyo guverinoma iteganya kuri uyu muhanda

Cyakora imodoka ntoya n’izitwara abagenzi zo zirakomeza kuwunyuramo, inini zikazajya zinyura ku mipaka ya Cyanika na Kagitumba kugeza ku wambere ubwo uwo muhanda uzaba warangije gukorwa.

Mu gihe imvura ikomeje kugwa ikangiza ibikorwaremezo bitandukanye, hari abakemanga imyubakire y’imwe mu mihanda yagiye yangizwa n’ibiza, bavuga ko ikibazo kidakwiye kureberwa ku biza gusa, ahubwo cyareberwa no ku makompanyi aba yubatse iyo Mihanda.

Uwihanganye ati “Ubu ntushobora guhita umenya niba iki kibazo gishingiye ku bakoze umuhanda. Iyo umuhanda cyangwa ikindi gikorwaremezo cyubakwa, amazi ni cyo kintu cy’ingenzi cyitabwaho, ariko ibyo dushyira muri uwo muhanda bikamura amazi, bigenwa hashingiwe ku ngano y’imvura.”

Minisiteri y’ibikorwaremezo yatangaje ko hakorwa iperereza ku myubakire y’iyo mihanda, ariko ngo ikibazo nyamukuru gikwiye gushakirwa ku bwinshi bw’imvura yaguye mu mezi ane ashize.

Minisitiri Gatete yasobanuye ko ikibazo cy’iyangirika ry’uwo muhanda ndetse n’ibindi bikorwaremezo byagiye byangizwa n’ibiza bizatwara leta y’u Rwanda miriyari 24 kuva imvura itangiye kugwa kugeza mu kwezi k’Ugushyingo 2018.

Ayo mafaranga ngo abarirwa mu bikorwa bijyanye n’amashanyarazi, amazi, imihanda, imyubakire no gufasha abantu bahuye n’akaga. Gusa ngo hari n’ibyihutirwa bizatwara miriyari zisaga 5Frw azakora ibikorwa bitandukanye kugeza mu kwezi gutaha kwa Kamena 2018.

Minisiteri y’ibikorwaremezo yatangaje ko hagiye gushyirwa imbaraga mu gukora inyigo z’ibikorwaremezo hashingiwe kuri iyi mvura idasanzwe yaguye mu mezi ane ashize, kugira ngo ibiza nk’ibi bitazongera gutungurana.

Mu batanze ibiganiro harimo na Musoni Protais uyobora Panafrican Movement, Rwanda Chapter na Fode Ndiaye, umuhuzabikorwa wa UN Resident mu Rwanda

Yabivuze kuri uyu wa kane ku itariki ya 10 Gicurasi 2018 mu nama yiga ku buringanire yabaye muri gahunda y’inama ya Transforma Africa yaberaga i Kigali.

Mu mateka y’umugabane wa Africa, Ellen Johnson Sirleaf ni we mugore wa mbere wabaye umukuru w’igihugu, ayoboye Liberia. Uyu mugabane kuri ubu nta muperezida w’umugore n’umwe uhari kuko Sirleaf yamaze gusoza manda ye.

Inongee asanga icyo ari ikibazo gikomeye ku iyubahirizwa ry’ihame ry’uburinganire muri Africa.

Agira ati “Dufite ibihugu 54 muri Africa. Kimwe cya kabiri cya byo kibaye kiyobowe n’abagore, Africa yaba nziza cyane. Ku mpuzandengo, abagore barashoboye kurusha abagabo, ni abaganga, barahinga, bashobora gukora ibintu byinshi icyarimwe.

Minisitiri w’uburinganire n’iterambere ry’umuryango avuga ko uko ababyeyi bafata abana bigira ingaruka ku buringanire

“Dukeneye ubufatanye bw’umuryango wa Africa yunze ubumwe, dukeneye kubona nibura mu Baperezida bacu,kimwe cya kabiri ari abagabo ikindi ari abagore.”

Yakomeje avuga ko igikenewe ari uguhindura imyumvire, kuko “abantu benshi, baba abagore cyangwa abagabo batekereza ko abagore batashobora kuyobora ibihugu.”

Yasobanuye ko abafite iyo myimvire bayikomora aho bakuriye batigeze babona abagore mu buyobozi, bakababona gusa bateka cyangwa bakora isuku.

Ati “iyo umugore ari gukora isuku hari igihe utekereza ko ntacyo bivuze, ariko wabona umugabo ari gukora isuku mu ihoteri, ugatekereza ko ari byiza kuko abona amafaranga.”

Inama yiga ku buringanire ihurije hamwe abantu baturutse hirya no hino muri Afurika

Iki kibazo cy’imyumvire Minisitiri w’uburinganire n’iterambere ry’umuryango Nyirasafari Espérance na we yakigarutseho. Yavuze ko kuri ubu umugore n’umugabo bafite ijambo n’abana b’ibitsina byose bakaba biga.

Gusa ngo hari ibigikeneye kunozwa birenze guhabwa ijambo no kujyana abana mu mashuri.

Ati “Ababyeyi bagomba kwibutswa gushyira mu bikorwa ihame ry’uburinganire bahereye no ku buryo barera abana babo, uretse kubohereza ku ishuri bakanahabwa imirimo imwe kandi umugore n’umugabo bakumva ko basangiye inshingano zo guteza imbere urugo.”

Kimwe mu bikibangamiye cyane ihame ry’uburinganire mu bihugu bya Africa, ngo ni ikibazo cy’abana b’abakobwa baterwa inda bakiri bato kuko iyo batabonye ubufasha hakiri kare ubuzima bwabo burangirira aho.

Ambasaderi wa Suede mu Rwanda Jenny Ohlsson yavuze ko hakwiye kugira igikorwa, kuko ngo no mu gihugu cye,icyo kibazo cyabagaho ariko ubu ngo cyarakemutse burundu.

Yagize ati “Urugero muri Suede urubyiruko rushobora kubona imiti yo kuboneza urubyaro rutagombye kubaza ababyeyi.

"Uba ushobora kujya kwa muganga ugahabwa iyo miti ku buntu iyo uri muto, ikindi ni uko amashuri atanga inyigisho nyinshi, n’iyo udatinyuka kuganira n’ababyeyi ba we kuri iyo ngingo, uba ushobora kuvana amakuru ahagije ku ishuri.”

Ambasaderi wa Suede mu Rwanda avuga ko mu gihugu cye abana bato bemererwa kuboneza urubyaro hagamijwe kubarinda inda zitateguwe

Inama yiga ku buringanire yahurije hamwe abantu basaga 200 barimo abo muri za guverinoma z’ibihugu bya Africa, abafatanyabikorwa mu iterambere, ndetse n’imiryango ya leta n’itegamiye kuri leta.

Ni inama y’iminsi ibiri ifite insanganyamatsiko isaba guhindura imyumvire kugira ngo habeho iterambere, ibyo bise "Changing Dynamics, Accelerating Progress".

Biteganijwe ko abayirimo bazungurana ibitekerezo ku buryo bwo kuvanaho imbogamizi ku buringanire ndetse n’ibindi bibazo bikibangamira abagore n’abakobwa ku mugabane wa Africa muri rusange.

Umuyobozi wa RURA, Col. Patrick Nyirishema na Takayoshi Fukuyo (hagati) uhagarariye ikompanyi SEL

Ayo masezerano yasinywe kuri uyu wa Kane tariki 9 Gicurasi 2018 mu nama ya Transform Africa.

Ku ruhande rw’u Rwanda yasinywe n’umuyobozi w’ikigo ngenzuramikorere (RURA), Col. Patrick Nyirishema na Takayoshi Fukuyo wari uhagarariye ikompanyi Space Edge Lab (SEL).

Ayo masezerano yasinywe muri gahunda u Buyapani bufite yo guhugura aba ingenieurs bo muri Africa ku gutanga amakuru akenewe mu nzego zitandukanye by’umwihariko mu iteganyagihe.

Ku ikubitiro Abanyarwanda batandatu ni bo bazajya guhugurwa muri uyu mwaka. Bazahabwa amahugurwa yo gukora satelitte ntoya, ndetse n’ikoranabuhanga ry’iteganyagihe n’ubumenyi bw’ikirere.

Prof Nakasuka avuga ko hari intambwe yamaze guterwa mu ishyirwa mu bikorwa ry’uwo mushinga mu Rwanda, kuko muri Werurwe 2018 hakozwe igerageza rya mbere ku ikoreshwa rya Satellite mu Mujyi wa Kigali.

Hagaragajwe na kimwe bikoresho byifashishwa mu ikoranabuhanga satelitte

Yongeraho ko hari gahunda yo kubaka sitasiyo ya satellite mu Rwanda, bikaba byaranatangiye kuko iri kubakwa mu Karere ka Kicukiro mu Mujyi wa Kigali.

Umuyobozi wa RURA avuga ko ayo masezerano aziye igihe, kuko u Rwanda rwatangiye kwinjira mu ikoranabuhanga ry’ubumenyi bw’ikirere, ndetse no kurishyira mu mashuri no mu bikorwa by’abikorera.

Amasezerano nk’ayo yanasinywe ku ruhande rwa Smart Africa n’amakompanyi atanga serivisi z’ikoranabuhanga rishingiye kuri satellite, bikazatuma intego z’ibihugu bihuriye muri Smart Africa Alliance zo gushyiraho isoko rimwe mu by’ikoranabuhanga zigerwaho.

Umunyamabanga wa gahunda ya Smart Africa, Dr Hamadou Touré, yavuze ko ubunyamabanga bwa Smart Africa buzakomeza gutanga buruse zo kwiga ku Banyafurika bahanze udushya.

Prof. Nakasuka yavuze ko nibura buri mwaka Abanyarwanda batandatu bazajya bajya kwihugura mu Buyapani, ariko ngo umubare ushobora no kwiyongera kuko impande zombi zikiri mu biganiro.

Salissou Hassane Latifa wo muri Niger yegukanye Ms Geek Africa 2018 ahembwa sheki ya miliyoni eshatu z’amanyarwanda

Umushinga we w’agashya yahanze mu ikoranabuhanga watsinze indi mishinga, akaba yarahimbye App yitwa Saro, izafasha abayikoresha gutabaza serivisi z’ubutabazi kugira ngo bazimenyeshe aho bakoreye impanuka.

Iyo App kandi ngo izafasha abakora ubutabazi kohereza inama z’uko umuntu wagize impanuka yakorerwa ubutabazi bw’ibanze mbere y’uko abakora serivisi z’ubutabazi bagera aho impanuka yabereye.

Umushinga w’agashya w’uyu mukobwa watsinze indi mishinga y’abandi bakobwa bane bari bageranye ku cyiciro cya nyuma cy’irushanwa, ariko na yo ikaba yashimwe kuko “izagira uruhare mu gukemura ibibazo umugabane wa Africa ufite” nk’uko Angela Ngang’a, ukorera ikigo cy’ikoranabuhanga cya Microsoft akaba no mu bakemurampaka yabivuze.

Salissou Hassane Latifa yakoze ikoranabuhanga ryitwa Saro rifasha umuntu ukoze impanuka gutabarwa byihuse no guhabwa ubutabazi bw’ibanze

Muri batanu bageze mu cyiciro cya nyuma cy’irushanwa harimo Abanyarwanda babiri bakaba bakurikiranye ku mwanya wa kane n’uwa gatanu.

Hashize imyaka itanu itsinda ry’abagore n’abakobwa rizwi nka “Girls in ICT” ritegura irushanwa rya Ms Geek, rishishikariza abakobwa kwiga amasomo ya Science, Technologie, Engeneering na Mathematics (STEM), kugira ngo bifashishije ikoranabuhanga bagire uruhare mu gushaka ibisubizo by’ibibazo Africa ifite.

Mu mwaka ushize nibwo irushanwa rya Ms Geek ryagutse rijya ku rwego rw’umugabane wa Africa, ku buryo ribaye ku nshuro ya kabiri kuva rigiye kuri urwo rwego.

Abategura irushanwa rya Ms Geek Africa bavuze ko abari basabye kuryitabira basaga 200, hakaba harabaye amajonjora kugeza ubwo haboneka uwaryegukanye.

Salissou Hassane Latifa wegukanye iri rushanwa yatangajwe mu kiganiro cya nyuma cyitwa Women Summit cyasoje inama ya Transform Africa 2018.

Batanu barushanwaga barimo babiri b’Abanyarwanda

Umunyamabanga nshingwabikorwa wa gahunda ya Smart Africa, Dr. Hammadou Touré yavuze anashimangira ko intego z’iyi nama zagezweho uko byari byitezwe, kuko habaye ibiganiro byinshi ndetse hanasinywa amasezerano hagati y’imiryango isaga 600 yari yitabiriye Transform Africa.

Yavuze ko Smart Africa yonyine yasinye amasezerano arindwi y’ubufatanye, azihutisha gahunda ya Smart Cities in Africa, no kugeza umuyoboro wa internet kuri bose kugira ngo urubyiruko rubone uburyo bwo guhanga udushya.

Minisitiri w’ikoranabuhanga, Rurangirwa Jean de Dieu n’Umuyobozi wa Swift- Xi Kenji Fukuoka nyuma yo gusinyana amasezerano

Ayo masezerano yasinyiwe mu nama ya Transform Africa iri kubera i Kigali kuva ku wa mbere tariki 07 Gicurasi 2018.

Iyi kompanyi ya Swift-Xi ikorera mu Mujyi wa Kobe mu Buyapani, ikaba itanga serivisi z’ikoranabuhanga n’ubucuruzi burimo n’ubw’utudege tutagira abapilote (Drones).

Umuyobozi wa yo Kenji Fukuoka yavuze ko bazifashisha izo Drones mu kuvugurura imibereho ya bamwe mu Banyarwanda.

Yagize ati “Intego yacu nyamukuru, ni ugufungura isoko ryo mu Rwanda mu bijyanye n’utudege twa drones. Indi ntego ni ugukemura ibibazo by’imibereho y’abaturage dukoresheje drones, ariko nanone tugahanga akazi muri iki gihugu dukoresheje drones”

Iyi kompanyi ifatanyije n’ishuri ryitwa Kobe Institute of Computing ngo bakiriye abanyeshuri basaga 40 b’Abanyarwanda bahawe bourse na guverinoma y’Ubuyapani.

Aya masezerano yasinyiwe mu nama ya Transform Africa iri kubera i kigali

Minisitiri w’ikoranabuhanga, Rurangirwa Jean de Dieu, yavuze ko bishimishije kuba ubufatanye bw’impande zombi bugeze ku yindi ntera, yongeraho ko ikoranabuhanga ry’iyi kompanyi rizagira akamaro mu nzego zitandukanye z’ubuzima bw’Abanyarwanda.

Yagize ati “Tuzakorana na Swift-Xi duteza, twiyemeje gutegura amahugurwa ku rubyiruko rwacu, kandi turi gufatanya kugira ngo turebe uko iri koranabuhanga twarihuza n’ubuzima rusange, rigafasha urubyiruko, rikifashishwa mu buhinzi n’ahandi.

Ni amahirwe akomeye ku rubyiruko rwacu kubona ubumenyi no kubona imirimo, ariko nanone bikatugira sentre y’ikoranabuhanga muri Africa”

Uretse aya masezerano yasinywe hagati ya Minisiteri y’urubyiruko n’ikompanyi ya Swift-Xi, hanasinywe andi masezerano hagati ya Smart Africa n’ikigo cya Inmarsat n’ibindi bifatanyije nka Tillman Digital Cities na CivicConnect.

Ikigo cya Inmarsat gitanga serivisi zitumanaho rya satelite, amasezerano cyo n’ibindi bigo by’ikoranabuhanga byasinyanye na Smart Africa, akaba agamije kurushaho guteza imbere imijyi ya Africa muri gahunda yitwa Smart cities in Africa.

Umunyamabanga nshingwabikorwa wa TAS Dr Hamadu Toure yasinya amasezerano n’abayobozi b’ibigo by’ikoranabuhanga bishyigikiye Smart cities in Africa

Umuyobozi mukuru wa Imbuto Foundation Umutoni Sandrine avuga ko ibisubizo by’ibibazo urubyiruko rufite bigomba kuva mu rubyiruko

Yabisabye ku wa kabiri tariki 08 Gicurasi 2018, mu biganiro nyunguranabitekerezo muri gahunda y’inama ya Transform Africa iri kubera i Kigali.

Ibiganiro umuryango Imbuto Foundation wari wateguriye urubyiruko muri gahunda y’iyi nama, byari bishingiye ku nsanganyamatsiko igira iti “The New Lens: Know, Treat, Suppress”

Byari mu rwego rwo gutanga urubuga ku rubyiruko, kugira ngo rutange ibitekerezo by’uko hahangwa udushya mu ikoranabuhanga twafasha kurandura SIDA mu mwaka wa 2030.

Raporo y’ishami ry’umuryango w’abibumbye ryita ku bana UNICEF yo mu 2016, igaragaza ko 73% by’ubwandu bushya bwa virusi itera SIDA mu rubyiruko bugaragara muri Africa.

Iyi nama yari yitabiriwe n’abantu baturutse mu nzego zitandukanye z’igihugu

Umuyobozi w’Imbuto Foundation yavuze ko imibare y’ubwandu bushya iteye inkeke, na cyane ko biteganyijwe ko urubyiruko rwa Africa ruzaba rugera kuri miliyoni 750 mu mwaka wa 2060.

Yagize ati “Ntitwaterera iyo cyangwa ngo ntiduterwe ubwoba n’indwara ikomeje kwiyongera. Kurwanya SIDA birasaba ko twese duhagurukira kuyikumira no kuyishakira umuti.

Turi hano tubabwira ko mugomba kugira uruhare mu gushaka ibisubizo by’ibibazo bibugarije, mu gihe hifashishwa ikoranabuhanga kugira ngo ibyo bisubizo bijyane n’ibihe tugezemo”

Umuyobozi w’Imbuto Foundation yanavuze ko urubyiruko rukwiye guhabwa amakuru nyayo ku bijyanye n’ubuzima bw’imyororokere, kugira ngo rumenye uburyo rushobora gukumira ubwo bwandu bushya.

Gusa ariko Viateur Rurema, ukorera umuryango witwa Kigali Hope uvugira urubyiruko rubana na virusi itera SIDA, yagaragaje ko bamwe mu banyeshuri banduye baterwa ipfunwe no kujya gufata imiti igabanya ubukana bari ku ishuri, ku buryo na byo bikwiye gutekerezwaho.

Dr Nsanzimana Sabin Umuyobozi mukuru ushinzwe kurwanya SIDA muri RBC

Kuri icyo kibazo, Dr. Sabin Nsanzimana, ukuriye ishami rishinzwe gukumira SIDA mu kigo cy’igihugu gishinzwe ubuzima, RBC, yavuze ko icyo kibazo kizwi kandi hari ingamba zafashwe zo gutanga imiti y’igihe kirekire.

Yagize ati “Tuzi icyo kibazo kuva nko mu myaka itanu ishize, kandi hari ingamba zafashwe zo guha umurwayi ibinini by’igihe kirekire, ariko nanone tukigisha abayobozi b’ibigo by’amashuri gushyiraho uburyo bwafasha abanyeshuri gufata imiti mu buryo bw’ibanga”

Dr Nsanzimana yanavuze ko hari n’ubushakashatsi bukorwa bugamije kuvumbura imiti y’igihe kirekire bashobora gutera umuntu ufite ubwandu bwa SIDA.

Umuryango Imbuto Foundation weretse abitabiriye ibyo biganiro uburyo gahunda ya iAccelerator yatangijwe mu mwaka wa 2016, yatumye urubyiruko rwishakamo ibisubizo ku bibazo birwugarije bijyanye n’ubuzima bw’imyororkere.

Dr Nsanzimana yanavuze ko hari n’ubushakashatsi bukorwa bugamije kuvumbura imiti y’igihe kirekire yahabwa ufite ubwandu bwa SIDA

Muri byo harimo application yitwa Umbrella itanga amakuru ikanigisha abakobwa uko babara igihe cy’uburumbuke ndetse n’ikiganiro cyitwa Tubiganire Show cyigisha ababyeyi n’abana kugirana ibiganiro birambuye ku buzima bw’imyororekere n’imihindagurikire y’umubiri.

uhereye ibumoso Mr Strive Masiyiwa, Min Mukeshimana Gerardine na Dr Agnes Kalibata

Hirya no hino ku isi hari ubutaka bwo guhinga butabyazwa umusaruro, ariko ngo hejuru ya 60% y’ubwo butaka buri ku mugabane wa Afrika.Ibyo byavuzwe na Strive Masiyiwa uyobora ikompanyi mpuzamahanga y’ikoranabuhanga Econet, akaba n’umuyobozi w’abafatanyabikorwa b’inama yiga ku iterambere ry’ubuhinzi muri Afrika (AGRF),ubwo yitabiraga inama ya transform Africa kuri uyu wa mbere taraiki ya 7 Gicurasi 2018.

Ni mu kiganiro umuryango Nyafrica uharanira iterambere ry’ubuhinzi (AGRA) n’abafatanyabikorwa ba wo bagiranye n’abanyamakuru kuri uyu wa mbere, muri gahunda y’inama ya Transform Africa iteraniye i Kigali.

Strive Masiyiwa afatanyije n’umuyobozi wa AGRA, Dr. Agnes Kalibata, na Minisitiri w’ubuhinzi n’ubworozi Dr. Gerardine Mukeshimana ni bo bari bayoboye icyo kiganiro.

Masiyiwa yavuze ko uretse kuba hari ubutaka butabyazwa umusaruro, n’urubyiruko rutitabira ibikorwa by’ubuhinzi ku buryo ibi bizagira ingaruka zikomeye.

Ati “Hejuru ya 60% by’ubutaka bwo guhinga budakoreshwa ku isi, buri muri Afrika. Ndabaha indi mibare, Afrika ifite uburyo igaragaramo budasobanutse, benshi mu bahinzi barashaje, kuko usanga barengeje imyaka 60.

Bisobanuye ko abakiri bato muri Afrika batajya mu buhinzi, mu gihe biteganyijwe ko abaturage ba Africa bazikuba inshuro enye mu mpera z’iki kinyejana, hazaba hari Abanyafrika nibura miriyari enye, ibyo bishobora kuzaba ikibazo gikomeye”.

Strive Masiyiwa avuga ko urubyiruko rwa Africa rukwiye guhagurukira kugana ubuhinzi

Masiyiwa yavuze ko urubyiruko rwa Afrika rufite amahirwe menshi rutabyaza umusaruro, kuko nta na rimwe abantu baba abatuye imijyi n’abatuye mu byaro badakenera amafunguro.

Gusa ariko na none yavuze ko za leta z’ibihugu zikwiye gushyiraho politiki zoroshya ubuhahirane, kuko hari ubwo usanga igihugu kimwe cyihagije mu biribwa ikindi bituranye cyarabibuze.

Ati “Rimwe hari ubwo usanga n’umusaruro w’ibiribwa warabonetse, ariko ugasanga bitoroshye kuwucuruza ku mugabane. Ugasanga nk’Abanya-Malawi barejeje ibigori byinshi abaturanyi ba bo babikeneye, ariko hakaba nta buryo bw’ubuhahirane bushoboka hagati ya Malawi na Zambia cyangwa Zimbabwe kugira ngo ibyo bigori bigere aho bikenewe.

Birumvikana dukeneye politiki zifite akamaro, niyo mpamvu koroshya ubucuruzi hagati y’ibihugu bya Afrika bikenewe”

U Rwanda ruzakira inama ya AGRF 2018

Muri icyo kiganiro n’abanyamakuru hanatangajwe inkuru y’uko u Rwanda ari rwo ruzakira inama yiga ku iterambere ry’ubuhinzi muri Afrika (AGRF), ikazaba muri Nzeri 2018.

U Rwanda rwatoranijwe kwakira iyo nama, kubera gahunda z’ubuhinzi rwashyizeho zigamije kongera umusaruro, ibintu rwanashimiwe mu nama y’umuryango wa Afrika yunze ubumwe yabaye muri Mutarama uyu mwaka, nk’igihugu kiza ku isonga muri Afrika mu kugera ku ntego zo guteza imbere ubuhinzi.

Minisitiri w’ubuhinzi n’ubworozi Dr. Gerardine Mukeshimana yavuze ko ubuhinzi mu Rwanda,bwakemuye ikibazo cy’ibiribwa ku gipimo cya 90%

Minisitiri w’ubuhinzi n’ubworozi Dr. Gerardine Mukeshimana yavuze ko ubuhinzi mu Rwanda “bwakemuye ikibazo cy’ibiribwa ku gipimo cya 90%, ariko nanone ntabwo byatuma tudashyigikira umugambi wo guhahirana ibiribwa hagati y’ibihugu bya Afrika, kuko mu Rwanda tutabona umusaruro wa buri kintu kubera ubutaka buto dufite.

Ni yo mpamvu politiki zacu zishyira imbere kongera umusaruro no kuwuhunika, kugira ngo twizere neza ko dushobora gusarura byinshi bishoboka”

Strive Masiyiwa yemeza ko umugabane wa Afrika ufite ubushobozi bwo kugaburira indi migabane, mu gihe ubutaka bwo guhinga bwose bwabyazwa umusaruro ndetse n’abakiri bato bakiyemeza kwinjira mu mwuga w’ubuhinzi.

Col Ruhunga Jeannot avuze ko bagiye kongera imbaraga mu bugenzacyaha

Col. Ruhunga yabivuze tariki 18 Mata 2018, mu muhango wo guhererekanya ububasha hagati ya Polisi y’u Rwanda n’uru rwego rushya.

Yagize ati “RIB izashyira imbaraga mu guhangana n’ibyaha bikomeye bikoreshwa ikoranabuhanga, ibyaha bigendanye n’icuruzwa ry’abantu, ibiyobyabwenge, ruswa, kunyereza umutungo wa leta, ibihungabanya umutekano w’igihugu n’ibindi”

Yavuze ko n’ubwo RIB ari urwego rushya, abayobozi n’abakozi ba rwo atari bashya mu murimo w’ubutabera, avuga ko bizeye badashidikanya ko bazagera kuri byinshi babikesha ubufatanye bw’izindi nzego z’umutekano, ariko cyane cyane ku bufatanye n’abaturage.

UBugenzacyaha bwakuwe mu Nshingano za Polisi bushyirwa mu nshungano za RIB

N’ubwo RIB ishyize imbere guhangana n’ibyaha bikomeye, umunyamabanga mukuru w’uru rwego yavuze ko kugira ngo bigerweho hakenewe amahugurwa ajyanye n’igihe ndetse no gushaka abakozi bashoboye, ariko n’abatangiranye n’uru rwego bakarangwa n’ikinyabupfura n’ubunyangamugayo.

Ibirebana n’ubugenzacyaha byari bisanzwe bikorwa n’ishami rya Polisi rishinzwe kugenza ibyaha CID, ariko Perezide wa Repubulika Paul Kagame aherutse gushyiraho urwego rushya, ruzakorera muri Minisireri y’ubutabera rugahita rufata izo nshingano zari mu maboko ya CID.

Polisi y’u Rwanda yahererekanyije abari abapolisi b’abagenzacyaha 463 binjiye muri RIB, ndetse n’ibikoresho bifashishaga mu kugenza ibyaha byashyikirijwe urwego rwa RIB.

Abapolisi 463 nibo batangirana n’iki kigo

Inama y’abaminisitiri yateranye tariki 11 Mata 2018, ni yo yemeje Iteka rya Minisitiri w’Intebe rigena uburyo abakozi 463 n’ibikoresho byakoreshwaga n’ishami rya Polisi y’u Rwanda rishinzwe ubugenzacyaha byegurirwa Urwego rw’Igihugu rushinzwe Ubugenzacyaha.

Umuyobozi wa Polisi y’u Rwanda IGP Emmanuel Gasana, yavuze ko abari abapolisi binjiye muri RIB ari abakozi beza bazafasha RIB kugira ngo itangire ishinge imizi.

Ati “Bakoze akazi neza, bakorana ubwitange, ubunyamwuga n’ubunyangamugayo, ndetse nkanavuga ko bakoze akazi kenshi cyane. Ubu twari tugeza ahantu buri mwaka amadosiye ashyikirizwa ubushinjacyaha arenga ibihumbi 20, navuga ko ari ubwitange buhebuje”

IGP Emmanuel Gasana yizeje Umuyobozi wa RIB ko abapolisi yahawe ari abakozi beza bazamufasha kugera kuri byinshi

Minisitiri w’ubutabera Johnston Busingye yavuze ko u Rwanda ruteye intambwe mu rugendo rwimakaza ubutabera, haba mu Rwanda no mu ruhando mpuzamahanga. Yavuze ko ari urugendo rwatangiye tariki ya mbere Ukwakira mu 1990, ubwo urugamba rwo kubohora u Rwanda rwatangiraga.

Yavuze ko uru rwego rwashyizweho kugira ngo rukomereze mu murongo Polisi y’u Rwanda yarimo, ariko cyane cyane mu kongera imbaraga mu guhangana n’ibyaha birimo n’iby’inzaduka bikorwa hifashishijwe ikoranabuhanga.

Minisitiri Busingye yanavuze ko Minisiteri y’ubutabera izakora ibishoboka byose ngo urwego rwa RIB rwiyubake vuba kugira ngo rukore neza ibyo rugomba abaturage.

Ati “Tuzi twese ko muri urwego rushya kandi rukeneye kwiyubaka vuba bishoboka kugira ngo hatagira icyuho kivuka mu mirimo mugomba abaturage. Minisiteri izakora ibyo isabwa byose kugira ngo urwego rwiyubake vuba cyane”

Minisitiri Busingye yavuze ko ihererekanyabubasha ryabaye ritavanaho ubufatanye bw’inzego mu kubahiriza amategeko

Minisitiri Busingye yavuze ko ihererekanyabubasha ryabaye ritavanaho ubufatanye bw’inzego mu kubahiriza amategeko. Yijeje Abanyarwanda n’abaturarwanda umurimo unoze bazahabwa n’urwego rwa RIB, avuga ko abakozi b’uru rwego bazarangwa n’ubunyangamugayo, ubunyamwuga, ukuri n’ubwitange.

Nyuma y’ihererekanya bubasha bafashe ifoto y’urwibutso

Iyumvire iki cyegeranyo umenye ikihishe mu gutwi kwa muntu, gituma imibu ikunda kuduhira mu matwi, ndetse umenye niba hari umuntu uryohera imibu kurusha abandi.

Abaminisitiri b’ubucuruzi bumvikanye ku masezerano yo gushyiraho isoko rusange muri Africa

Umwanzuro wo gushyiraho gahunda y’isoko rusange muri Africa, Continental Free Trade Area wafashwe n’inama y’abakuru b’ibihugu muri Kamena 2015.

Ni gahunda imaze igihe iganirwaho n’abaminisitiri bashinzwe ubucuruzi mu bihugu bigize umuryango wa Africa yunze ubumwe, president wa Niger Mahamadou Issoufou akaba ari we wahawe inshingano zo kuyikurikirana.

Abo baminisitiri bongeye kuganira kuri iyi gahunda, nyuma y’iminsi abatekinisiye n’abanyamabanga muri izo minisiteri bayunguranaho ibitekerezo. Minisitiri w’ubucuruzi n’inganda w’u Rwanda, Vincent Munyeshyaka yavuze ko bamaze kumvikana kuri ayo masezerano ku buryo we asanga igisigaye ari ukuyasinya.

Ati “Tumaze kumvikana ku masezerano kandi turabona ibihugu byinshi byiteguye kuyasinya. Hari ibihugu bitewe n’amategeko ya byo byiteguye guhita bisinya, ariko hari n’ibindi bizabanza kujya kuganira n’inteko nshinga amategeko z’ibihugu bya bo kugira ngo basinye nyuma.

Tugomba kumvikana no kuri gahunda ibihugu bitasinye bizubahiriza bikarangiza gusinya mu gihe cyumvikanyweho”

Ayo masezerano azasinywa n’abakuru b’ibihugu na za guverinoma tariki 21 Werurwe 2018. N’amara gusinywa yitezweho kwagûra isoko ry’abacuruzi bo mu bihugu bya Africa.

Urugero ni uko abanyarwanda bari bafite isoko rya miriyoni 12 gusa, ariko nyuma y’isinywa ry’aya masezerano bakazaba bafite isoko rya Africa yose rigizwe n’abasaga miriyari imwe na miriyoni 200.

Abacuruzi batoya ariko barasa nk’abataribona muri iyi gahunda, bagasaba minisiteri y’ubucuruzi kubatekerezaho nk’uko Damiyani Ntihabose acuruza muri Mateus mu mujyi wa Kigali yabibwiye kigali Today.

Ati “Niba uko babivuga ariko bizagenda byaba ari byiza ariko inyungu n’ubundi iracyari iya ba bacuruzi bafite ubushobozi buhambaye, n’abacuruzi batoya babareba bakareba uko babagenza”

Minisitiri Munyeshyaka (iburyo) mu nama yahuje abaminisitiri b’ubucuruzi muri Afurika

Ministiri Munyeshyaka avuga ko uko byagenda kose abaturage ba Africa bazungukira byinshi kuri iri soko rusange ry’umugabane wa Africa, kuko nyuma yo kuyasinya hazabaho kureba niba ibihugu bitava mu miryango mito mito bihuriyemo, hagashyirwa imbaraga muri iri soko rusange rya Africa.

Agira ati “Ibihugu byinshi harimo n’icyacu biri mu miryango myinshi itandukanye, COMESA, EAC n’indi. Iri ni isoko rimwe kuri Africa ku buryo bizanatuma ibihugu tureba niba koko twakomeza kuba muri iyo miryango mitoya, niba tutashyira imbaraga muri uyu muryango munini uteza imbere Africa”

Ubucuruzi hagati y’ibihugu bya Africa byonyine kugeza ubu bungana na 15%, mu gihe igipimo cya 85% gisigaye usanga ibihugu bya Africa bikorana ubucuruzi n’indi migabane. Umugabane wa Africa kandi uracyafite uruhare ruto mu bucuruzi mpuzamahanga, kuko urebye ku byoherezwa mu mahanga kugeza ubu usanga uruhare rwa Africa ruri kuri 5.3%.

Byitezwe ko aya masezerano n’asinywa hazabaho ubufatanye, buzatuma umugabane wa Africa uzamuka mu bucuruzi mpuzamahanga.

Musanase Laure avuga ko yumvise ko iri hohoterwa rikorerwa abagore rihari ariko atarabona uwarikorewe

Benshi mu batanga ibyo birego kuri ubu ni abagore bamamaye kubera gukina filimi muri Amerika, basobanura ko bagiye banyura mu nzira y’inzitane kugira ngo bagere ku rwego bagezeho ubu.

Ababitangaza bashyira mu majwi umugabo witwa Harvey Weinstein wamenyekanye mu gutunganya filimi, bakavuga ko kugira ngo yemerere umugore cyangwa umukobwa gukina muri filimi ye, kenshi yamusabaga ko babanza kuryamana cyangwa akamufata ku ngufu.

Mu Rwanda na ho ibi byagiye bivugwa mu bakobwa bakina filimi, ariko biragoye kubona uvuga ko byamubayeho cyangwa akaba yakwerura akavuga ko azi uwo byabayeho.

Laura Musanase ukina yitwa Nikuze muri filimi y’uruhererekane yitwa City Maid agira ati “Ibyo bintu nigeze kubyumvaho ngitangira gukina filimi bakajya bambwira ngo abakobwa benshi bagitangira gukina filimi baba babonanye n’abatunganya filimi mu buryo butandukanye”

Akomeza agira ati “Ntabwo navuga ko bishimishije kuko niba ari umuntu ukunda ikintu akaza kugikora wowe nka Producer (utunganya amafilimi) ukaba wamusambanya kugira ngo akinishwe muri filimi, byaba bibabaje cyane.

Ku bwanjye abagore mbona ari abantu bashoboye, ntabwo twakabaye dufatwa muri urwo rugero kugira ngo akazi kaboneke”

Uretse abakina filimi, hari abandi bakobwa bemeza ko bitoroshye ko umukobwa yabona akazi mu nzego zimwe na zimwe adatanze ruswa ishingiye ku gitsina.

Umukobwa utashatse ko amazina ye atangazwa wavuganye na Kigali Today yagize ati “Usaba akazi umuyobozi, kugira ngo akaguhe, akabanza kugushaka ngo muryamane kugira ngo ako kazi ukabone.”

Mu minsi ishize umuryango Transparency International Rwanda urwanya ruswa n’akarengane, wasohoye raporo y’ubushakashatsi wakoze, ureba uko ikibazo cya ruswa gihagaze mu nzego za leta.

Ingabire Immaculee avuga ko abagore bagifite umuco wo guhishira ihohoterwa ribakorerwa

Ingabire Marie Immaculee uyobora uyu muryango avuga ko 94% mu babajijwe bagiye bavuga ko bumvise ko ruswa ishingiye ku gitsina iriho, ariko ngo ntawe utinyuka ngo avuge ko yayisabwe cyangwa yayitanze.

Agira ati “94% bavuga ko nibura bumvise ko iyo ruswa ihari, akaba atavuga wenda ngo iyo ruswa yasabwe runaka, akakubwira ngo hari n’abo nzi byabayeho. Ariko uko tuzi umuco Nyarwanda, rimwe na rimwe abo ngabo aba avuga ko azi, hari igihe usanga ubikubwira nawe arimo.”

Ubwo bushakashatsi bwakorewe mu nzego za leta gusa. Madame Ingabire avuga ko uwakora ubushakashatsi mu nzego z’abikorera wenda yasanga ikibazo gikomeye kurushaho.

Inzego zivugira abagore mu Rwanda zikomeje kubahamagarira guhaguruka bakarwanira uburenganzira bwa bo. Gusa hari n’abakobwa batiyizera mu bushobozi, usanga bumva ko bagomba gukoresha intwaro zose bafite kugira ngo babone akazi nk’uko Ingabire abivuga.

Muri izo ntwaro ngo niho usanga bamwe bahitamo gutanga n’imibiri yabo nka ruswa kugira ngo babone akazi, ibintu asanga bikwiye guhinduka kuko bikomeza gusuzuguza abagore.

Miss Rwanda 2018 muri studio za KT RADIO

Nyuma yo kwambikwa ikamba abantu bakoresha imbuga nkoranyambaga batangiye guhanagana ifoto [screen shot] y’amanota yagize mu bizami bya leta, bamwe bagashimangira ko atari we wari ukwiye kwambikwa ikamba ugereranyije n’ayo manota yagize.

Ibi byavugwaga hashingiwe ku kuba hagenderwa ku bintu bitatu mu gutora Miss Rwanda, ari byo umukobwa uhiga abandi mu bwiza, ubahiga mu bwenge, ndetse no mu muco [Beauty, Brain and Culture]

Inota rya hafi yagize mu masomo yakoze mu bizami bya leta ni inyuguti ya D, mu gihe amanota ashyirwa mu byiciro hakurikijwe inyuguti, uhereye kuri A ihabwa abagize amanota menshi.

Mu kiganiro KT Idols cya KT Radio cyatambutse tariki 03 Werurwe 2018, yavuze ko nta kintu yabona avuga ku bamunenze kubera ayo manota yagize.

Ati “Ntacyo nabona mbivugaho. Miss Rwanda igira ibyo ikurikiza wenda n’abandi bafite ibyo batekereza simbizi, gusa ariya manota ni yo nabonye ntabwo nabona byinshi mbivugaho”.

Amafaranga menshi yatunze mbere yo kuba Miss ni 12,000

Miss Rwanda 2018 avuga ko amafaranga menshi ye bwite yigeze gutunga mbere yo kwambikwa ikamba ari amafaranga y’u Rwanda 12,000. Kuri ubu agiye kujya ahembwa umushahara w’ibihumbi 800 buri kwezi mu gihe cy’umwaka.

Hari abavuga ko bigoye ko umuntu w’imyaka 18 utarigeza atunga amafaranga afatika yacunga neza uwo mushahara akawubyaza umusaruro. Gusa Iradukunda avuga ko n’ubwo uwo mushahara ukubye inshuro hafi 80 amafaranga menshi ye bwite yigeze gutunga bitazamunanira kuwucunga neza.

Ati “Ntabwo ari menshi ku buryo byananira kuyacunga. Hari utuntu uba wifuza kuba wakora ukavuga uti mbonye amafaranga nakemura utwo tubazo, nicyo bizamfasha mbere na mbere”

Gukamira mu kadobo

Miss Iradukunda Liliane ni we uhagaze areba mugenzi we akama

Mu gihe Miss Iradukunda na bagenzi be bari bagihatanira ikamba, hari ifoto yazengurutse ku mbuga nkoranyambaga igaragaza abo bakobwa bakamira mu kadobo ka “NOMI” kazamo isabune y’ifu.

Miss Iradukunda yemeje ko ari umwe mu bakobwa babiri bagaragara kuri iyo foto, avuga ko ikosa ritari rikwiye kubabarwaho cyangwa ngo ribarwe ku bategura Miss Rwanda, kuko akadobo bakamiyemo bagasanze mu rwuri atari bo bari bagatwaye.

Ati “Birashoboka ko ari amakosa ariko nanone ntabwo abantu bakwiye kuturenganya kuko tutagiye kureba ziriya nka twitwaje kariya kadobo, twagasanzeyo”

Miss Iradukunda yatowe mu birori byabaye ku mugoroba wa tariki 24 Gashyantare 2018. Gutorwa bye ngo byaramutunguye cyane kuko yabonaga abakobwa bose bahataniraga ikamba bari beza kandi bashoboye, ku buryo na we ubwe atahise yiyakira bakimara gutangaza ko ari we wegukanye ikamba.

Mupiganyi Appolinaire Umunyamabanga Nshingwabikorwa wa Transparency International

Ibi byatangajwe kuri uyu wa kane tariki 22 Gashyantare 2018 n’umunyamabanga nshingwabikorwa wa Transparency International Rwanda, Appolinaire Mupiganyi, ubwo uyu muryango wamurikaga raporo y’ubushakashatsi Transparency International yakoze ku buryo ibihugu bihagaze mu kurwanya ruswa mu mwaka wa 2017.

Ubu bushakashatsi bwakorewe ku bihugu 180 birimo n’u Rwanda, bukaba bushyira ibihugu ku gipimo kiri hagati ya 0 na 100. Igihugu kiri muri 0 kiba cyaramunzwe na ruswa mu gihe ikiri mu 100 kiba kitarangwamo na ruswa.

Raporo y’ubwo bushakashatsi igaragaza ko u Rwanda ruri ku gipimo cya 55 ku ijana, rukaba ari urwa 48 ku bihugu 180 byakoreweho ubushakashatsi.

Mu bihugu byo munsi y’ubutayu bwa Sahara ruza ku mwanya wa gatatu rusangiye na Cap Vert, uyu mwanya n’ubundi ukaba ari wo rwariho mu mwaka wa 2016.

Gusa ariko rwagabanyijeho imyanya ibiri ku rwego rw’isi kuko ubu ruri ku mwanya wa 48 mu gihe muri 2016 rwari ku mwanya wa 50.

Mupiganyi yavuze ko ari ibintu byiza, ariko agashimangira ko hagikenewe kongera umuvuduko mu kurwanya ruswa kuko igihari.

Yagize ati “Ruswa irahari nk’uko byagaragajwe no ku rwego rw’isi irahari, turacyafite intambwe yo gukora. Umwanya dufite ntituwishimiye ariko imbaraga zigenda zishyirwamo ku musaruro tugeraho n’ubwo tuzi neza ko hakiri byinshi byo gukora”

Kuzamura inota rimwe mu kugabanya ruswa ngo bizamura umusaruro mbumbe w’igihugu nibura ku gipimo cya 0.5% nk’uko ubushakashatsi bwabigaragaje.

N’ubwo leta y’u Rwanda ishyira imbaraga mu gukumira no kurwanya ruswa, umuvunyi wungirije ushinzwe kurwanya ruswa n’ibyaha bifitanye isano na yo, Musangabatware Clement, yavuze ko hakiri imbogamizi ikomeye y’uko abanyarwanda babarirwa muri 85% batagaragaza amakuru ya ruswa ngo abayitanze n’abayiriye bakurikiranwe.

Ubu bushakashatsi bwamuritswe kuri uyu wa Kane tariki ya 22 Gashyantare 2018

Hari amakuru yakunze kuvugwa ko kudatanga ayo makuru byaba bituruka ku kuba hari abayobozi mu nzego nkuru z’igihugu barya ruswa bikarangira badakurikiranwe.

Umuvunyi wungirije yavuze ko abo bayobozi “[ba minisitiri n’abanyamabanga ba leta muri za minisiteri] ntaho bahurira n’imicungire y’umutungo n’ubwo baba bafite uburyo bakurikirana.

Gusa n’ugaragaye muri ruswa ngo arakurikiranwa kuko urwego rw’umuvunyi rufite ishami ryihariye rikurikirana imyitwarire y’abo bayobozi”

Mu bihugu byo munsi y’ubutayu bwa Sahara, u Rwanda ruza ku mwanya wa gatatu rusangiye na Cap Vert, rukabanzirizwa na Botswana n’ibirwa bya Seychelles.

Igihugu cya Nouvelles Zelande kiri ku gipimo cya 89 na Danemark iri ku cya 88 ni byo biza ku isonga mu kurwanya ruswa, naho Syria iri ku gipimo cya 14, Soudan y’amajyepfo iri kuri 12 na Somalia iri ku gipimo cya 9 ku ijana bikaza ku myanya ya nyuma.

Minisitiri Kaboneka Francis avuga ko Ikoranabuhanga rizorohereza abaturage kujya babasha kubona serivise bakeneraga ku buyobozi batavuye aho bari

Ubwo buryo bw’ikoranabuhanga burafasha umuturage kumenya amakuru ku cyiciro cy’ubudehe abarizwamo, kwishyura mitiweli no kugeza ikibazo cye mu nzego nkuru z’igihugu byose akabikora yifashishije telefoni.

Kwishyura imisanzu y’ubwisungane mu kwivuza byakorerwaga muri za Sacco, naho umuturage ushaka kumenya amakuru ajyanye n’icyiciro cy’ubudehe abarizwamo akajya kuyabaza ku kagari cyangwa ku murenge.

Hari abaturage bavuga ko iyi nzira byanyuragamo hari ubwo yagoranaga cyane cyane ku babaga barimukiye mu duce runaka ku bw’impamvu zo gushaka imibereho nk’uko Uwemeyimana Jean Pierre abivuga.

Ati “Abantu bimuka iwabo bakajya gukodesha gufata mitiweri birabagora kuko umudugudu uba utabazi ngo umenye icyiciro umuntu arimo, bakagutuma kujya mu kagari k’aho wari utuye mbere, ugasanga utaye akazi no gusiragira rugeretse”

Izi mbogamizi ni zo ubu buryo bushya bw’ikoranabuhanga bwatangijwe na Minisiteri y’ubutegetsi bw’igihugu n’inzego zikorana na yo bugiye kuvanaho, nk’uko Minisitiri Francis Kaboneka uyobora iyi minisiteri yabibwiye abanyamakuru kuri uyu wakabiri tariki 20 Gashyantare 2018.

“Ibibazo bitandukanye muri Mitiweli byari bishingiye ku byiciro by’ubudehe twagiye dushaka umuti wa byo.

Umuntu yishyuraga akajyana inyemezabwishyu ku kigo cya RSSB, yagerayo bagatangira kumubaza icyiciro arimo, rimwe ugasanga atakizi bakamusaba gusubira ku murenge cyangwa ku kagari gusobanuza.

Muri iyi gahunda turashaka guca gusiragira ku biro, izo serivisi abaturage bakazibona bakoresheje telefoni za bo”

Abakoresha telefoni bazajya bakanda *909# ku murongo wa telefoni uwo ari wo wose, bakurikize amabwiriza ashobora gutuma babona amakuru ku byiciro by’ubudehe babarizwamo. Abashaka kwishyura mitiweli na bo bazajya bayishyura muri ubu buryo haba kuri Mobile Money, Tigo Cash na Airtel Money.

Abakenera izi serivisi baravuga ko ubu buryo bugiye kubashyira igorora.

Uwemeyimana ati “Abantu bagorwaga no kujya gutonda umurongo nk’umuntu uzindukira mu kazi akagakererwa, ariko niba ari uko bimeze umuntu yanishyura mitiweli ari no mu kazi ke kandi ntigapfe”

Uretse ikoranabuhanga rijyanye na mituelle n’ibyiciro by’ubudehe, Ministeri y’ubutegetsi bw’igihugu yanatangije irindi koranabuhanga rizajya rifasha abaturage kugeza ibibazo bya bo mu nzego zo hejuru, igihe byananiranye mu nzego z’ibanze.

Minaloc ifatanyije n’izindi Minisiteri mu gushyiraho iri koranabuhanga rizorohereza abaturage kubona serivise

Umuturage azajya atanga ikibazo anyuze ku rubuga rwa Ministeri y’ubutegetsi bw’igihugu, cyangwa yohereze ubutumwa bugufi kuri telefoni itishyurwa 5353.

Minisiteri ngo izajya yakira icyo kibazo igikurikirane kugeza umuturage abonye igisubizo bitabaye ngombwa ko asiragira mu nzego zinyuranye.

N’ubwo abaturage bishimira ubu buryo bw’ikoranabuhanga, barasaba inzego zibishinzwe kubukurikirana butazateza izindi ngorane.

Ministiri Kaboneka yavuze ko ubu ari uburyo bw’ikoranabuhanga butangiye gukoreshwa kandi bushobora kugira ibibazo, ariko ngo hari icyizere ko buzagabanya ibibazo kurusha uko bwabiteza.

Hashize amezi agera ku munani abo bahanzi [Junior na Darest] bagize itsinda rishya bise Juda Muzik bahagaritse gukorana na Clyn Vybz.

Umuhuzabikorwa w’ikompanyi Clyn Vybz ikora ibikorwa bifitanye isano na muzika, John Nzabanita

Nzabanita avuga ko yatunguwe no kubona ko abo bahanzi bafite undi muntu uri kubafasha mu gihe gutandukana kwa bo na Clyn Vybz bitarasobanuka, kuko hari amasezerano bari bafitanye ataraseswa.

Akomeza avuga ko intandaro yoguhagarika imikoranire yabaye indirimbo abo bahanzi bari bakoze ariko Producer Bob wayikoze n’ubuyobozi bwa Clyn Vybz bagasanga atari byiza ko bahita bayisohora.

Abo bahanzi ngo bahise babifata nk’ikibazo cy’ubushobozi bwabuze batangira gucika intege.

Nzabamwita agira ati “Nyuma yaho baje bavuga ko babaye bahagaritse umuziki, hashize igihe mbona hari undi muntu urimo kubafasha kandi hari ibintu bigomba kubanza gusobanuka.”

Mu bigomba gusobanuka Nzabamwita avuga ko harimo n’amafaranga miriyoni eshatu Clyn Vybz yatanze kuri abo bahanzi, “kuko amasezerano bari bafitanye yavugaga ko umuhanzi uvuye muri Clyn Vybz yishyura ibyo iyi kompanyi yamutanzeho”

Aba bahanzi bo bavuga ko nta masezerano yaba ayanditse cyangwa ayo mu magambo bigeze bagirana na Clyn Vybz, bakemeza ko bakoraga nk’abavandimwe kuko buri wese hari ibyo yigombwaga ku ruhande rwe.

Mu kiganiro KT Idols cya KT Radio cyo kuri uyu wagatandatu tariki 10 Gashyantare 2018, bavuze ko bajya guhagarika imikoranire na Clyn Vybz byabaye mu bwumvikane, banavuga ko ahubwo umuhuzabikorwa wa yo yabanje kubagora adashaka kubaha umwanya ngo baganire ku kibazo cy’amikoro babonaga cyari gitangiye kuvuka.

Junior yagize ati “Twamweretse imishinga y’ibyo dushaka gukora tumubaza niba ubushobozi buhari cyangwa budahari, agashaka kwihagararaho. Ndamubwira nti aho kwirya cyane tukimara tukazagera igihe tugashwana, reka tubihagarike nta kibazo, tuhava tubyemeranyijwe gutyo.”

Abo nibo bahanzi Junior na Darest bagize itsinda rishya bise Juda Muzik

Darest yungamo ati “Ikintu tutemeranyijweho, John yashatse gusaba inguzanyo muri banki yo gushora mu muziki wacu, ni cyo cyari igisubizo cyanyuma. Noneho inguzanyo agashaka kuyisaba mu izina rye bwite aho kuyisaba mu izina rya Clyn Vybz, turamubwira tuti birashoboka ko turi kukuvuna reka tubivemo”

Mu gihe ubuyobozi bwa Clyn Vybz buvuga ko umuntu ushaka gukorana n’aba bahanzi agomba kubanza kwishyura izo miriyoni eshatu amasezerano agaseswa, aba bahanzi bavuga ko nta deni bafitiye Clyn Vybz kuko uretse kuba nta masezerano bari bafitanye na yo, hari ibyo yabatanzeho ariko nabo hakaba hari ibyo bayitanzeho.

Kuri ubu Producer Bob ni we uri gufasha aba bahanzi, akaba yaranabakoreye indirimbo yitwa Wawundi bakoze nyuma yo gutandukana na Clyn Vybz.

Gusa Producer Bob avuga ko atari kubafasha nka Manager wa bo, ahubwo abafasha nk’uko yagiye afasha n’abandi bahanzi bafite impano kugira ngo abafashe kuzishyira ahagaragara.

Ati “Ni ubufasha busanzwe mbaha no gushyigikira impano nkayigeza aho yabona abayifasha muri gahunda yanjye yo gushyigikira umuziki nyarwanda”.

N’ubwo hari ukutumvikana hagati ya Clyn Vybz n’abahanzi abayikoreragamo, aba bahanzi barishimira ko ibikorwa by’iki kompanyi bikomeje gutera imbere, kuko ubu ifite inzu itunganya umuziki izatangira gukora mu minsi mike iri imbere.

Miss Rusizi ngo ntakurikiye amafaranga ku wo bazarushingana

Abivuze nyuma y’uko hasohotse impapuro z’integuza y’ubukwe bwa bo “Save The Date” abamenye ayo makuru bakaba baratunguwe n’ikinyuranyo kiri hagati ya Miss Teta n’umugabo bagiye kubana, kuko uwo mugabo amurusha imyaka igera kuri 24.

Uyu mugabo witwa Amany ubusanzwe ngo ni umucuruzi ukomeye mu Mujyi wa Kamembe w’akarere ka Rusizi, bikavugwa ko afite amafaranga menshi.

Bamwe mu bumvise inkuru y’ubwo bukwe bavuze ko bishoboka ko kuba Miss Teta yaremeye kubana n’uyu mugabo yakuruwe n’amafaranga afite.

Gusa mu kiganiro KT Idols cyatambutse kuri KT Radio tariki 10 Gashyantare 2018, Miss Teta yavuze ko kuba umugabo bagiye kubana amurusha imyaka myinshi atabiha agaciro cyane.

Ati “Kuvuga ngo umuntu arakuze, ngo nkurikiye amafaranga ntabwo mbiha agaciro. Kuba naremeye kubana na we si uko nari nyobewe uko angana. Icyo mpa agaciro ni uko mukunda.”

Uyu mukobwa yemeza ko agitangira gukundana n’uwo mugabo bagiye kubana byabanje kumutera ipfunwe kubera ikinyuranyo cy’imyaka ya bo bombi, ariko akemeza ko bitamaze igihe kirekire kubera ko yagendaga yumva ibitekerezo by’uwo mugabo bigatuma atangira kumukunda.

Miss Teta avuga ko amahitamo ari aye ku buryo umuryango we utari kwitambika mu rukundo rwe n’uwo bagiye kubana. Ati “Amahitamo aba ari ayanjye kandi umubyeyi ashyigikira umwana we akurikije uko yiyumva, niba naraberetse umugabo wanjye ntabwo bambwira ngo reka uyu fata uyu.”

Ku bijyanye n’uko urungano rwe rwafashe icyemezo cye, Miss Teta avuga ko amahirwe ari uko atagira inshuti nyinshi cyane cyangwa abantu bamwinjirira mu buzima, akavuga ko nta n’umwe ufite uburenganzira bwo kwivanga mu mahitamo ye.

Yambikwa ikamba rya Miss Rusizi yavugaga ko afite indoto zo kuzaba Miss Rwanda, ariko indoto ze zisa nk’izihagaze. Gusa ngo yumva ntakizamubuza gukomeza umushinga wo gufasha urubyiruko yamuritse ubwo yiyamamarizaga kuba Miss w’Akarere ka Rusizi.

Tariki 23 Werurwe 2018 ni bwo Miss Teta azasabwa, bukeye bwa ho tariki 24 WERURWE 2018 basezerane mu idini ya Islam.

Polisi ya Uganda yamaze guta muri yombi ukekwaho urupfu rwa Radio

Godfrey Wamala bakunda kwita Troy yatawe muri yombi na polisi ya Uganda mu ijoro ryo kuri iki cyumweru mu gace ka Kyengera ko mu karere ka Wakiso.

Wamala amaze gutabwa muri yombi yajyanywe kuri station ya polisi ya Katwe kuzuza dosiye ye mbere y’uko yoherezwa kuri Station ya Entebbe aho yakoreye icyaha.

Inkuru ya Daily Monitor iravuga ko umuyobozi wa station ya polisi ya Katwe yemeje amakuru y’iri tabwa muri yombi, ariko avuga ko amakuru yandi yatangwa n’umuyobozi wa polisi muri Kampala wakurikiranye ibikorwa byo guhiga uyu ukekwaho kwica Radio.

Atabwa muri yombi, Wamala yari kumwe n’inshuti ye. Abapolisi bamutaye muri yombi baravuga ko bamuta muri yombi yabemereye ko yari kumwe na Mowzey Radio, ndetse n’abandi bantu barimo David Washington Ebangit, Pamela Musiimire, uwitwa Hassan n’abandi bantu bari kumwe uwo munsi Radio akubitwa.

Ngo yabwiye abapolisi ko ibibazo bitangira bose bari bicaranye ku meza amwe.

Ibibazo ngo byatangiye ubwo Radio yasukaga inzoga kuri uwo Hassan bari bicaranye ku meza, na we ahita arakara ashaka kurwana ariko bombi barabakiza mbere yo gukozanyaho.

Mu bindi uyu watawe muri yombi yabwiye abapolisi bamutaye muri yombi, yavuze ko ubwo Radio n’uwo Hassan bari bicaranye ku meza bagiranaga ibibazo hari abantu atamenye baje bagatwara Radio bakamusunika hanze y’akabari, ariko bagenzi be barimo Washington bakomeza kwicara. Uyu watawe muri yombi avuga ko we yasohotse hanze agasanga Radio aryamye hasi mu muryango w’akabari ameze nk’uwapfuye.

N’ubwo uyu ahakana ko atakubise Radio, abayobozi b’akabari Radio kuri ubu bari mu maboko ya polisi, bashinja wamala kuba yarakubise Radio.

Gusa we avuga ko ubwo yageraga hanze agasanga Radio aryamye hasi ari bwo abantu bagiye kureba ibyabaye, Pamela na Washington n’abandi bari kumwe babona kumujyana kwa muganga.

Nyuma ngo yahise ataha hashize iminsi ibiri yumva ko Polisi iri kumuhiga bituma atangira kwihisha

Moses Sekibogo wahoze mu itsinda rya GoodLyfe yakubitiwe mu kabari kitwa De Bar kari mu mujyi wa Entebbe tariki 22 z’ukwezi gushize.

Yarakubiswe kugeza ubwo agira ikibazo ku bwonko ajya muri coma biza kumuviramo urupfu mu ijoro ryo ku wagatatu rishyira ku wakane w’icyumweru gishize.

Ku wagatanu nibwo inshuti, abavandimwe, abahanzi bagenzi be n’abafana be muri rusange bamusezeyeho, ashyingurwa ku wagatandatu w’icyumweru gishize.

Apotre Nkurunziza yemeza ko abakozi b’Imana bafite umuti nyawo Africa ikeneye ngo ive mu bibazo.

Apotre François Nkurunziza yabitangarije mu kiganiro Abavugabutumwa bagiranye n’Abanyamakuru basobanura ku ihuriro "Haverst Africa Apostolic Network" riri kubera mu Rwanda, kuri uyu wa Gatatu tariki 13 Nzeri 2017.

Iryo huriro rihuza abakozi b’Imana bakomoka muri Afurika n’ahandi ku isi. Abarigize ngo bahuje imyizerere n’intego yo gusarura imitima no guhindura imyumvire y’Abanyafurika binyuze mu butumwa bwiza.

Apotre Nkurunziza yashimangiye ko uwo muti ari ubutumwa bwiza budafunguye bagomba kubwiriza bahuje imbaraga.

Bamwe mu bavugabutumwa baje muri Harvest Africa bagiranye ikiganiro n’abanyamakuru.

Yagize ati “Iterambere ryose tubona ryatangiriye ku butumwa bwiza budafunguye. Amashuri, ibitaro n’ibindi byinshi tubona ni ho bituruka.

Yesu amaze gupfa ku musaraba ntabwo yasize Amadorari, yasize ijambo n’umwuka. Niba ijambo n’umwuka ari byo byaremye byose bikaba biturimo, bizabyara n’ibyo bifatika isi ikeneye.”

Iryo huriro riteranye ku nshuro ya gatatu, rikaba ryaritabiriwe n’ibihugu 14 byo ku Mugabane wa Afrika, wongereyeho Canada n’u Bwongereza.

Inshuro ebyiri zabanje ryabereye muri Kenya mu kwezi k’Ugushyingo 2015, muri Gicurasi 2017 ribera i Dar es Salam muri Tanzania.

Apotre Nkurunziza avuga ko mu nshuro ebyiri za mbere ryaragize akamaro kanini kuko risiga ubumwe aho ryabereye.

Ati “Mu myaka itatu ishize tumaze kubona abantu batashoboraga kujya hamwe ngo bakorere hamwe kandi bari mu gihugu kimwe, ariko ubu bari hamwe. Ahari ubumwe ibintu byose birashoboka.”

Harvest Africa ya gatatu yitabiriwe n’abantu bavuye mu bihugu 16.

Iryo huriro ngo ryabyawe n’iyerekwa ryitwa "Harvest Africa"ryahawe Apotre Nkurunziza mu mwaka wa 2015.

Uyu akaba asanzwe ari umuyobozi mukuru w’amatorero Bethel mu Rwanda n’ahandi ku isi.

Iryo huriro riteraniye mu Rwanda kuva tariki 11 kugeza tariki 19 Nzeri 2017, rikaba ari urubuga abaryitabira bahuriramo bubakana binyuze mu guhuza imbaraga.

Ibyo ngo bikorwa binyuze muri gahunda zitandukanye zirimo ibiterane binini, amahugurwa y’abakozi b’Imana n’inama z’abayobozi bakuru b’amatorero n’izindi nzego.

Ubuyobozi bw’iyo Minisiteri bwabitangarije mu kiganiro bwagiranye n’abanyamakuru kuri uyu wa mbere, tariki ya 20 Werurwe 2017.

Ikiganiro cyari kiyobowe na Minisitiri w’uburezi n’Abanyamabanga ba Leta

Bamwe mu banyeshuri barebwa n’iki cyemezo bavuga ko barenganijwe, bakanongeraho ko icyo cyemezo cya MINEDUC kigiye kubadindiza.

“Batubwiye ngo ni ikibazo cy’abarimu, mu ishami ry’Ubuvuzi abarimu batwigisha n’abigisha mu ishami ry’Ubuvuzi muri Kaminuza y’u Rwanda ishami rya Huye ni abarimu bamwe. Ntabwo numva impamvu batigeze bahagarika ab’i Huye ariko twe bakaduhagarika.”

Uku ni ko umwe mu banyeshuri biga muri Kaminuza y’i Gitwe ishami ry’uvuvuzi abisobanura.

Uretse abanyeshuri bavuga ko barenganijwe n’iki cyemezo, hari abayobozi b’amashuri na bo bagaragaje ko imyanzuro amashuri yabo yafatiwe itari ikwiye.

Muri abo harimo n’umuyobozi wa Rusizi International University, Dr. Pascal Gahutu, wandikiye Minisitiri w’intebe amusaba kurenganurwa.

Muri iyo baruwa yashimangiye ko Minisitiri w’uburezi amwanga, ku buryo guhagarika kaminuza abereye umuyobozi bifitanye isano n’urwo rwango.

Minisitiri w’uburezi Dr. Musafiri Papias Malimba yanze kugira icyo avuga kuri ibyo birego, ariko Umunyamabanga wa leta ushinzwe amashuri abanza n’ayisumbuye Isaac Munyakazi yashimangiye ko ibyo birego bigamije guhishira amakosa iyo kaminuza yakoze yo gushyira imbere inyungu z’ubucuruzi kurusha uburezi.

Yagize ati “Abakoze buriya bugenzuzi barimo abanyamahanga badafite aho bahuriye n’ibyo uriya [Dr. Gahutu Pascal] yita ikibazo afitanye na Minisitiri. Ninabo bagaragaje ibibazo biri kugaragara muri iriya kaminuza.

Nimukurikira n’amateka y’iriya kaminuza muzasanga ishyira imbere inyungu z’ubucuruzi kurusha amasomo.

Uzashyira imbere inyungu kurenza uko yaha uburezi abana b’Abanyarwanda, Minisiteri ntizigera imwihanganira”

Munyakazi avuga ko Rusizi International University kimwe n’izindi kaminuza zahagaritswe by’agateganyo yeretswe ibyo igomba gukosora, mu gihe yaba yamaze kubikosora ikazahabwa uburenganzira bwo gukomeza gukora.

Abanyamakuru bari biteguye gusubizwa ibibazo babajije.jpg

Kuba abanyeshuri biga ubuvuzi muri Kaminuza y’i Gitwe barahagarikiwe amasomo nyamara ishami ry’ubuvuzi muri kaminuza y’u Rwanda i Huye ntirihagarikwe kandi bigishwa n’abarimu bamwe, abo banyeshuri babifashe nk’akarengane.

Gusa Minisitiri w’uburezi yavuze ko ibyo bitaba urwitwazo, bitewe n’uko abo barimu mbere na mbere ari aba kaminuza y’u Rwanda kuko ari yo bafitanye amasezerano, bikaba atari byo kubitirira kaminuza y’i Gitwe.

Yagize ati “Ntabwo wambwira ngo 70% by’abarimu bawe ni abaza gutanga amasomo baturutse ahandi [part time] naho 30% bakaba ari bo bakora ku buryo buhoraho.

Abo barimu niba ari aba Kaminuza y’u Rwanda bafite inshingano ya mbere yo kuzuza ibyo basabwa no gukorera akazi ka bo muri Kaminuza y’u Rwanda.”

Minisitiri w’Uburezi yashimangiye ko nta kaminuza yarenganijwe, avuga ko izagaragaza ko hari ibyo yakosoye izahita ihabwa uburenganzira bwo kongera gukora.

Yanavuze ko abanyeshuri badakwiye kwinubira iki cyemezo, kuko kigamije kubaha ireme ry’uburezi rizabafasha guhatana ku isoko ry’umurimo.

Amashuri makuru na za Kaminuza zahagaritswe by’agateganyo ni enye, Rusizi International University (RIU) ifite icyicaro mu Karere ka Rusizi, na Singhad Technical Education Society-Rwanda (STES) ifite icyicaro mu Karere ka Kicukiro.

Hari kandi Mahtma Ghandi University-Rwanda (MGUR) ifite icyicaro mu Karere Gasabo, na Nile Source Polytechnic of Applied Arts (NSPA) ifite icyicaro mu Karere ka Huye.

Amashuri yahagarikiwe zimwe muri porogaramu z’amasomo yatangaga by’agateganyo, yo ni atandatu, akaba ari University of Technology and Arts of Byumba (UTAB), Open University of Tanzania (OUT), na University of Gitwe (UG).

Harimo kandi Jomo Kenyatta University of Agriculture and Technology (JKUAT), Institut Catholique de Kabgayi (ICK) na Institut d’Enseignement Superieur de Rugengeri (INES-Ruhengeri).

Abayobozi b’ibigo by’uburayi bikora ibijyanye n’ingufu ( Renewable Energy) baje kwiga isoko mu Rwanda

Abayobozi b’ibigo umunani byo ku mugabane w’Uburayi bagiranye ibiganiro n’ikigo cy’igihugu cy’iterambere RDB, n’urugagaga rw’abikorera kuri uyu wa mbere, kugira ngo berekwe amahirwe ari mu Rwanda y’ishoramari rishingiye ku ngufu z’amashanyarazi.

Ikigo cy’igihugu cy’iterambere RDB kivuga ko mu Rwanda abakoresha ingufu z’amashanyarazi babarirwa muri 27%, leta ikaba ifite intego yo kongera uwo mubare ku buryo mu 2018 bazaba bageze kuri 70% naho mu 2020 bakazaba bageze ku gipimo cya 100%.

Hari ababona iyi ntego nk’umuhigo ugoranye kuwesa bitewe n’igihe leta yihaye, ariko Dr Ivan Twagirashema ukuriye ishyirahamwe ry’amasosiyete yigenga akora ibijyanye n’ingufu z’amashanyarazi, yemeje ko bishoboka.

Yagize ati “Ubirebye ushobora kubona ari intego ziremereye ariko ku rundi ruhande hari ibintu byinshi byagiye bikorwa mu gihugu cyacu twatekerezaga ko bidashoboka kandi bikarangira bishobotse.

Kugera kuri iyo ntego birashoboka, hari amakompanyi yavuye i Burayi turi kuganira kugira ngo tuyahuze n’amakompanyi y’Abanyarwanda babashe kuzuzanya. Uburyo bwa mbere ni ubw’imirasire y’izuba. Hari amakompanyi ya hano amaze kumenyerwa ku isoko hano atanga umuriro abantu batagombye gutegereza ko ikigo cya REG kiwubagezaho”

Dr Ivan Twagirashema ukuriye ishyirahamwe ry’amasosiyete yigenga akora ibijyanye n’ingufu z’amashanyarazi, yemeje ko bishoboka.

N’ubwo ubu buryo bwo gutanga ingufu z’amashanyarazi aturuka ku mirasire y’izuba bushobora kwihutisha uyu muhigo, Dr Twagirashema avuga ko hakiri inzitizi y’uko imishinga y’ingufu z’amashanyarazi iba ikeneye amafaranga menshi. Gusa avuga ko abashoramari bo mu Rwanda nibifatanya n’ibyo bigo byo ku mugabane w’Uburayi bizihutisha iyo gahunda ya leta, kuko hazaboneka amafaranga menshi yo kubikora vuba.

Ambasaderi w’umuryango w’Ubumwe bw’ibihugu by’Uburayi mu Rwanda, Michael Ryan, yavuze ko uwo muryango wiyemeje gufatanya na leta y’u Rwanda muri gahunda yatangiye yo guteza imbere ingufu z’amashanyarazi.

Yagize ati “Umuryango w’ubumwe bw’Uburayi urifuza iterambere ry’ingufu muri iki gihugu, twashoye miriyoni ebyiri z’ama euro (1,747,600,000 Frw) nk’inkunga yo gushyigikira leta mu rugamba rwo guteza imbere urwego rw’ingufu.

Ni ukuvuga amashanyarazi asanzwe, akomoka ku mirasire y’izuba ndetse n’ibindi byose biri mu rwego rw’ingufu z’amashanyarazi, turi hano kugira ngo dufashe gutanga ubutumwa ku bashoramari. Nibaza gushora imari ya bo hano ntekereza ko bizaba ari ubufatanye bwiza”

Ambasaderi w’umuryango w’ubumwe bw’ibihugu by’Uburayi mu Rwanda, Michael Ryan

Ikigo cy’igihugu cy’iterambere RDB kivuga ko mu myaka itanu ishize, u Rwanda rwanditse imishinga y’ishoramari isaga 60 y’abanyaburayi, ifite agaciro kabarirwa muri miriyoni 800 z’amadollars. 64% by’iyo mishinga ngo yari iyo mu rwego rw’ibikorwaremezo bishingiye ahanini ku mazi n’ingufu.

Abahagarariye amakompanyi y’ishormari yagiranye ibiganiro na RDB bageze mu Rwanda bavuye muri Uganda, bakazakomereza mu bindi bihugu bya Africa birimo Senegal na Nigeria muri iyo gahunda yo guteza imbere ingufu zishobora kuvugururwa.

Mukagashugi avuga ko abakora mu nzego nkuru z’igihugu barya ruswa bayiryana amayeri menshi ku buryo kuyibonera ibimenyetso bigorana

Byatangarijwe mu kiganiro urwego rw’inkiko mu Rwanda rwagiranye n’abanyamakuru, mu rwego rwo gutangiza icyumweru cyahariwe kurwanya ruswa mu nkiko, tariki 06 Gashyantare 2017.

Ni kenshi hagiye humvikana ikibazo cy’imishinga minini iri ku rwego rw’igihugu yadindiye kubera gucungwa nabi cyangwa kuyiryamo ruswa.

Abakunze kuvugwa muri ibyo bibazo ahanini usanga ari abayobozi bari mu nzego nkuru z’igihugu.

Kenshi usanga badatabwa muri yombi, nyamara hagira umuturage uciriritse ukekwaho gutanga ruswa agahita atabwa muri yombi.

Umushinjacyaha mukuru wungirije, Mukagashugi Agnes avuga ko kuba abo bayobozi bo mu nzego nkuru z’igihugu, bakunze kwita “Ibifi binini”, badafatwa ari uko barya ruswa bakoresheje amayeri.

Agira ati “Abo bitwa ‘Ibifi binini’ iyo bagiye kurya ruswa babanza bakabitekerezaho kandi bakabikorana amayeri menshi, ku buryo no kubona ibimenyetso by’iyo ruswa bigora ubugenzacyaha n’ubushinjacyaha.”

Mukagashugi akomeza avuga ko abaturage baciriritse bo hari n’igihe batanga iyo ruswa ku mugaragaro bakeka ko bitari bugire ingaruka zikomeye.

Ati “Nk’abamotari cyangwa abashoferi baba bumva ari ibintu byoroheje bakanabikora ku mugaragaro wenda bumva ko nta n’ikibazo gihari.”

Hari abakeka ko kutaburanisha “Ibifi binini” bivugwaho gucunga nabi umutungo wa Leta no kurya ruswa byaba biterwa n’uko biha abacamanza ruswa, na bo bakirengagiza ibimenyetso nkana.

Prof. Sam Rugege avuga ko hari abacamanza barya barya ruswa n’ubwo atari benshi

Perezida w’urukiko rw’ikirenga, Prof. Sam Rugege avuga ko ibyo abo batekereza atari byo kuko hari abafatwa kandi bagakurikiranwa n’amategeko.

Akomeza avuga ko ku byaha bimunga ubukungu bw’igihugu mu bari babikurikiranweho abagizwe abere ari 27%, naho kuri ruswa abagizwe abere bakaba 19%.

Ku bwe ngo “iyaba abacamanza birengagizaga ibimenyetso nkana, 81% by’abakurikiranwaho ibyaha bya ruswa ntibari kuba bahamwa n’ibyaha.”

Prof Sam Rugege yemera ko hari abacamanza n’abanditsi b’inkiko bagiye bafatirwa mu byaha bya ruswa nubwo ngo atari benshi.

Akomeza avuga ko ariko hari ingamba zafashwe mu rwego rwo kutajenjekera abakora mu rwego rw’ubutabera bahirahira kurya ruswa.

Muri izo ngamba harimo komite zo kurwanya ruswa zihuriyemo abacamanza, abanditsi b’inkiko n’abandi bakozi b’inkiko.

Hiyongeraho n’urwego rw’ubugenzuzi bw’inkiko rusuzuma zimwe mu manza rukareba uko ziciye, rwasanga zidasobanutse rugacukumbura rureba ko zitabayemo ruswa.

Kuva mu mwaka wa 2005 kugeza mu wa 2017 ngo hari abacamanza n’abanditsi b’inkiko 38 birukanwe bazira ibyaha bya ruswa.

Bamwe mu bakozi b’inkiko n’abanyamakuru bitabiriye ikiganiro

Mu cyumweru cyahariwe kurwanya Ruswa mu nkiko kizageza tariki 10 Gashyantare 2017, hazaba ibiganiro bihamagarira abacamanza, abanditsi b’inkiko n’abaturage muri rusange kwirinda ruswa no kuyirwanya.

KT Radio yumvikana ahantu hangana na 70% mu Rwanda hose

Ibyo bigaragazwa n’ubushakashatsi bw’ikigo cy’igihugu cy’imirimo imwe n’imwe ifitiye igihugu akamaro RURA cyashyize ahagaragara.

Radio Rwanda ni iyo iza ku isonga mu kumvikana ahantu henshi kuko yumvikana mu gihugu hose ku gipimo cya 98%.

Ibifashijwemo n’insakazamajwi za yo 25 ziri hirya no hino mu gihugu. Ikurikirwa na Radio Maria yumvikana ku gipimo cya 80% nayo ikaba ifite insakazamajwi enye.

Zikurikirwa na KT Radio na Radio Flash zombi zumvikana mu gihugu ku gipimo cya 70%.

KT Radio ifite insakazamajwi eshatu, imwe ku musozi wa Jari, indi i Huye n’indi iri i Nyarupfubire mu ntara y’Iburasirazuba. Nizo zituma yumvikana mu Rwanda ku gipimo cya 70%.

Iyi radio kandi inumvikana mu bihugu bituranye n’u Rwanda, mu bice bimwe na bimwe by’Uburundi, Uganda na Tanzania.

Uduce two mu Rwanda KT Radio yumvikanamo

Kugeza ubu mu Rwanda hari Radio zisaga 25. Uretse Radio Salus yumvikana ku gipimo cya 65, izindi nyinshi zumvikana ku gipimo cya 60% ndetse hakaba hari n’izitageza ku gipimo cya 20% ku rwego rw’igihugu.

Byari ibyishimo ku bitabiriye Umunsi Nyafurika w’Itangazamakuru. Photo/ Batamuriza Natasha

Ibi byavugiwe mu muhango wo kwizihiza umunsi nyafurika w’itangazamakuru wabereye i Kigali ku wa mbere tariki ya 07 Ugushyingo 2016.

Kuwizihiza byahujwe n’umushyikirano wiga ku iterambere ry’itangazamakuru, umushyikirano ngarukamwaka wari ubaye ku nshuro ya munani mu Rwanda.

Ibiganiro byavugiwe muri uwo mushyikirano byatunze agatoki itangazamakuru ryo muri Afurika, kuko hari inkuru nyinshi zibera muri Afurika, ariko abanyamakuru baho ntibabashe kuzitara.

Usanga ngo abanyamakuru bategereza kuzivana mu bitangazamakuru byo hanze y’Afurika; nkuko umwanditsi Kabral Blay Amihere, watangije televiziyo yitwa Africa 24 abivuga.

Agira ati “Umbajije uko itangazamakuru ryacu rihagaze nakubwira ko tukivuga inkuru twavanye mu bandi banyamakuru. Icya kabiri dufite itangazamakuru ridashoboye, riracyabura ubushobozi.

Nkubu hari amatora ari nko muri Ghana wasanga abanyamakuru ba Afurika badahari, ariko abavuye Washingiton, mu Bubirigi, i Paris n’ahandi bakaba bahari. Mbese haracyabura ubushobozi mu bitangazamakuru byo muri Afurika.”

Minisitiri w’ubutabera mu Rwanda, Johnston Busingye. Photo/ Batamuriza Natasha

Minisitiri w’ubutabera mu Rwanda, Johnston Busingye, ashimangira ko abanyamakuru bo muri Afurika bakwiye gufata iya mbere mu kwandika inkuru zo ku mu gabane wa bo.

Agira ati “Iyo ibitangazamakuru by’i Burayi bitangaza amakuru yo ku mugabane wa Afurika usanga byibanda mu kugaragaza amashusho y’ubukene bw’akarande, indwara, ubujiji, amakimbirane, ruswa n’ibindi.

Isura nziza y’umugabane wacu kenshi ntitangazwa, cyangwa yanatangazwa igatangazwa nabi. Ariko mu by’ukuri niba tudashobora kwitangariza amakuru yacu, ntekereza ko tutanakwiye kwijujuta igihe hari undi muntu uyatangaje mu buryo tutishimiye.

Ni inshingano yacu gutangaza amakuru yacu, ntabwo bikwiye kuba inshingano y’undi muntu.”

Abanyamakuru batandukanye bahamya ko kuba badashora gutara inkuru zo ku mugabane w’Afurika biterwa n’amikoro make y’ibitangazamakuru cyane cyane ibyigenga; nkuko Cheriff Moumina, ukuriye ihuriro ry’abanditsi bakuru b’ibitangazamakuru muri Afurika abisobanura.

Agira ati “Iyo umunyamakuru akora mu kigo cy’itangazamakuru, aba akeneye amasezerano y’akazi, iyo umwohereje kujya gutara inkuru muri Sudani uzi ko hari intambara, hari ibyibanze uba ugomba kumuha.”

Basanze inzitizi ikomeye itangazamakuru rifite ari amikoro. Photo/ Batamuriza Natasha

Eugene Hagabimana, uyobora Radio Salus yo mu Rwanda na we yemeza ko ubushobozi bw’ibitangazamakuru bukiri ikibazo.

Agira ati “Niba televiziyo nka CNN cyangwa France24 zifite abanyamakuru bazihagarariye hafi mu bihugu byose byo ku isi, Afurika ubwo bushobozi ikaba itabufite, urumva ni ikibazo. Tubavomaho amakuru kubera ko baturusha ubushobozi.”

Bamwe mu bashakashatsi bavuga ko kuba ibitangazamakuru bya Afurika bitihaza mu bushobozi biterwa nuko biba bidatanga amakuru meza yatuma bibona abafatanyabikorwa.

Ikindi ngo na bamwe mu babitangiza ntibabiha umurongo uhamye watuma babona amafaranga. Abafite ibitangazamakuru ariko ntibemeranya n’abo bashakashatsi.

Moumina yatanze igitekerezo cy’uko Leta z’ibihugu bya Afurika zikwiye kugenera ubufasha ibitangazamakuru kuko bidakozwe nta terambere byageraho.

Agira ati “Sinzi uko bigenda mu Rwanda cyangwa mu bindi bihugu, ariko mu gihugu cyacu buri mwaka hari ingengo y’imari guverinoma igenera ibitangazamakuru byigenga.

Ku buryo uyu mwaka twakoze ikigega cyo gufasha ibitangazamakuru kirimo miriyari nyinshi zizafasha ibitangazamakuru kwiteza imbere no guhugura abanyamakuru babyo, kuko bitabonye ubwo bushobozi nabyo ntibyabaho.”

Mu muhango wo kwizihiza umunsi nyafurika w’itangazamakuru hanamuritswe ibyavuye mu bushakashatsi bwa kabiri bugaragaza uko itangazamakuru rihagaze mu Rwanda.

Gerard Mbanda umuyobozi muri RGB ushinzwe itangazamakuru agaragaza uko itangazamakuru rihagaze. Photo/ Batamuriza Natasha

Ugereranyije ibipimo by’ubwo bushakashatsi n’ubuheruka muri 2013 ngo usanga ijanisha ry’amanota ryarazamutse.

Urugero ni nk’igipimo kirebana n’uburyo Abanyarwanda bishimira “Amategeko yorohereza ubwisanzure bwo gutanga ibitekerezo n’ubw’itangazamakuru” cyazamutseho 10.68% ugereranyije naho cyari kiri mu mwaka wa 2013.

kwizihiza uyu munsi byatangijwe n’Ijambo ry’Umuyobozi w’Ikigo cy’Igihugu cy’imiyoborere RGB, Prof Shyaka Anastase

Iki gikorwa cyabimburiwe n’ibiganiro ku ishusho ry’itangazamakuru muri rusange ku mugabane w’Afurika, no kurebera hamwe inzitizi zituma ridatera imbere, kugirango zivugutirwe umuti.

Ibiganiro birimo kubera kuri Marriot Hotel mu mujyi wa Kigali, ahahuriye abantu babarirwa muri 300, barimo abayobozi n’abanyamakuru bo mu Rwanda n’abo mu bindi bihugu.

Kuri gahunda y’ibiganiro, hanateganyijwe ikiganiro cya munani ku itangazamakuru mu rwego rw’igihugu, gutangiza ku mugaragaro urwego rusuzuma uko itangazamakuru rihagaze, kumurika imihigo y’intore z’impamyabigwi, no gutanga ibihembo ku banyamakuru, ibihembo bise Development Journalism Awards.

Hari kugaragazwa imbogamizi itangazamakuru ryo mu Rwanda rifite kugirango zivugutirwe umuti

Impamyabigwi ni abanyamakuru bitabiriye itorero ku rwego rw’igihugu, aho bakurikiye amasomo yo kujyanisha amahame y’itangazamakuru n’indangagaciro z’ubunyarwanda, kugira ngo babashe gukora akazi kabo bagamije kubaka aho gusenya.

Impamyabigwi ziramurika uruhare rwazo mu iterambere ry’ubukungu bw’abaturage nyuma y’umwaka bamaze babyiyemeje.

Umunsi ufite insangamatsiko igira iti “Itangazamakuru twifuza muri Africa” nk’uko bigaragara mu itangazo ryashyizwe ahagarara n’ikigo cy’igihugu cy’imiyoborere Rwanda Governance Board.

uyu munsi witabiriwe n’abayobozi b;’Ibitangazamakuru baturutse mu Rwanda no hanze, hamwe n’abanyamakuru

Bari kuganira ku gipimo cy’Itangazamakuru ryo mu Rwanda no kureba icyariteza imbere kurushaho

Umunyamakuru wa Kigali Today uri muri ibi birori aratugezaho mu majwi uko ibi birori biri kugenda.

Perezida wa Sena Bernard Makuza yavuze ko Senateri Mucyo asize icyuho muri sena no mu gihugu muri rusange

Senateri Mucyo yitabye Imana azize urupfu rutunguranye mu gitondo cyo kuri uyu wa mbere.

Perezida wa Sena yatangarije Kigali Today ko mu gitondo Senateri Mucyo yari muzima kuko yagiye ku kazi nk’ibisanzwe.

Gusa ngo ageze ku kazi yagize impanuka aragwa nyuma yo gutsikira ari na byo byamuviriyemo urupfu.

Yagize ati “Mu gitondo nk’uko bisanzwe yaje hano ku kazi, ariko aza kwikubita hasi atsikiye ku ibaraza azamuka duhita tumujyana kwa muganga.

Twagezeyo abaganga biteguye kumwakira nanjye nari mpari, bakora ibishoboka byose ariko byari byarangiye”

Benshi mu basenateri bakoranaga na Nyakwigendera Senateri Mucyo ntibashatse kugira icyo bavuga ku rupfu rwe kuko benshi wabonaga batarakira inkuru y’urupfu rwe.

Senateri Karangwa Chrysologue yatangarije Kigali Today ko Senateri Mucyo agiye hakiri kare.

Ati “Yari umugabo w’intangarugero, araducitse nta kindi nababwira ni ukubyihanganira ntakundi”.

Senateri Karangwa Chrysologue yavuzeko Senateri Mucyo agiye hakiri kare

Perezida wa Sena Bernard Makuza ni umwe mu bakoranye cyane na Senateri Mucyo Jean de Dieu, kuko banakoranye muri guverinoma Senateri Mucyo ari Minisitiri w’ubutabera, mu gihe Makuza Bernard yari Minisitiri w’intebe.

Avuga ko Mucyo yari umugabo witangiraga akazi cyane ku buryo kumubura ari igihombo gikomeye ku Rwanda.

Ati “Mubyukuri adusizemo icyuho kuko ni umubyeyi ufite abana, afite urugo, ariko ni n’umuntu witangiye igihugu mu mirimo myinshi yakoze.

Mu mirimo yose wabonaga ari umuntu utijana ukora akazi n’ubwitange bwinshi akamenya kubahiriza igihe kandi agakora ibishoboka ngo umurimo we utungane.
Ni akababaro ku gihugu, tubuze umuntu ufite ubwitange buzwi ku rwego rw’igihugu”.

Yakomeje agira ati “Yagiraga ibitekerezo byiza byubaka kandi ugasanga ari umuntu unezerewe ashaka ko n’abandi banezerwa.

Yakoranaga n’ abantu yumva ko hatabaho uwagira ikimubuza gutunganya neza umurimo we”

Mucyo Jean de Dieu yamenyekanye cyane muri politiki yo mu Rwanda nyuma ya Jenoside yakorewe Abatutsi mu 1994.

Yashinzwe imirimo ikomeye muri guverinoma irimo kuba Minisitiri w’Ubutabera, kuba Umushinjacyaha Mukuru wa Repubulika ndetse n’ Umunyamabanga Nshingwabikorwa wa Komisiyo y’Igihugu ishinzwe kurwanya Jenoside (CNLG).

Yanabaye umuyobozi w’akanama kari gashinzwe gucukumbura uruhare rwa Leta y’Ubufaransa muri Jenoside yakorewe Abatutsi mu 1994, akaba yitabye Imana afite imyaka 55.

Senateri Mucyo Jean Dieu yitabye Imana kuri uyu wa Mbere tariki ya 3 Ukwakira 2016, Imana imuhe iruhuko ridashira.

Yabivuze ku mugoroba wa tariki 29 Kanama 2016, ubwo yasozaga imurikagurisha ry’intara y’Iburasirazuba ryaberaga i Rwamagana kuva tariki 18/08/2016.

Yavuze ko abitabiriye iryo murikagurisha bagize amahirwe yo gusangira ubunararibonye, ariko baranacuruza cyane nk’uko na bo ubwabo babyemeza.

Abitwaye neza muri iri murikagurisha bahawe ibikombe by’ishimwe.

yagize ati “Abikorera babonye amahirwe yo kwiga no kuganira na bagenzi ba bo, banabona amahirwe yo gucuruza barunguka. Abantu bazanaga ibicuruzwa bigashira bagasubirayo kuzana ibindi byinshi na byo bigashira. Kuza hano mu imurikagurisha ntabwo ari uguta umwanya”

Iryo murikagurisha ribaye ku nshuro ya munani ariko kuva ritangiye abacuruzi bakomeye baryitabira ari mbarwa.

Sina Gerard, umuyobozi wa Entreprise Urwibutso ni umwe mu bacuruzi bakomeye baryitabiriye, ngo n’ayabanje yose yarayitabiriye.

We ngo ntiyumva ibintu kimwe na bamwe mu bacuruzi bakomeye batitabira amamurikagurisha aciriritse bitewe n’uko abona harimo inyungu nyinshi, zaba iz’ako kanya n’iz’igihe kirekire.

Ati “Imurikagurisha aho ryaba hose sinshobora kuhabura, kuva ku murenge kugera ku rwego rw’igihugu no hanze kuko nzi neza ko nta gihombo mvanamo.

Iyo ndeba bagenzi bacu mu bucuruzi batitabira gahunda nk’izi ntabwo tubyumva kimwe kuko iyo waje utabura akantu gashya wakwiga kagatuma unoza ibyo ukora, ndetse n’abandi bakagira ibyo bakwigiraho”

Benshi mu bamurikabikorwa bamurikaga ibikorerwa mu Rwanda byiganjemo inkweto, imyenda, intebe n’ibikomoka ku buhinzi n’ubworozi kuko byari no mu nsganganyamatsiko y’imurikagurisha.

Benshi mu bitabiriye imurikagurisha bahawe ibikombe mu rwego rwo kubashimira.

Umuyobozi w’urugaga rw’abikorera mu Burasirazuba, Habanabakize Fabrice avuga ko ryatumye ibikorwa by’abantu bitari bizwi bimenyekana, by’umwihariko abatangiye gukora inkweto zikorerwa mu Rwanda.

Yasabye ko abantu nk’abo bashyigikirwa ibyo bakora bikagurwa kugira ngo bibongerere imbaraga, ndetse bakajya bahabwa ubujyanama igihe hari aho batabinogeje neza.

Imurikagurisha ry’intara y’Iburasirazuba ritegurwa n’urugaga rw’abikorera ku bufatanye n’ubuyobozi bw’Intara. Guverineri w’Intara avuga ko hazarebwa uburyo ryamanuka rikagera no ku rwego rw’imirenge mu rwego rwo korohereza abamurikabikorwa.

Abagore bahuguwe bahawe amagare azabafasha mu ngendo zo gukurikirana amatsinda babarizwamo.

Uyu muryango wita ku bagore bafite ibibazo byaturutse kuri Jenoside yakorewe Abatutsi mu 1994 ndetse n’abandi bagore bo mu cyaro, ubahugura mu myuga itandukanye ndetse ukabaha amafaranga baheraho bakora amatsinda n’ibimina byo kugurizanya.

Cyakora mbere yo guhugurwa, ngo wasangaga ibyo bimina birimo ibibazo by’imicungire idahwitse, igatuma bidatera imbere.

Mukarukwaya Monika ati “Wasangaga dutanga amafaranga mu bimina tugatombora, abantu bose bamara guhabwa amafaranga bikaba byahita bisenyuka. Ubumenyi twungutse buzatuma turushaho kubibungabunga kandi dushake uburyo twabiteza imbere.”

Muhongerwa Florida na we yunzemo, ati “Hari ubwo mu matsinda abantu bazanagamo amakimbirane, bikagira ingaruka ku iterambere ryayo. Twize uburyo dushobora gukemura ayo makimbirane no kuyakumira, bizaduteza imbere.”

Umuyobozi wa Women for Women yasabye aba bagore kubyaza umusaruro ubumenyi bahawe.

Umuyobozi wa Women for Women mu Rwanda, Antoinette Uwimana, avuga ko ibyo bibazo byose ari byo byatumye abo bagore bategurirwa amahugurwa.

Ibyo ngo ni ukugira ngo n’igihe ubufasha bahabwa na Women for Women bwahagarara, habe hari abafite ubumenyi bwabafasha gukurikirana ayo matsinda, ndetse bakaba banakora ubukangurambaga ku bandi bagore kugira ngo bayagane.

Agira ati “Icyo tugamije ni ukubongerera ubushobozi kuko birashoboka ko hari igihe abaterankunga bacu bazahagarika inkunga, nibura bikaba aba bagore bakaba bafite ubushobozi bwo gucunga ayo matsinda.”

Umuryango Women for Women ukorera mu Rwanda kuva mu 1997. Ukorera mu turere twa Kayonza, Rwamagana, Kicukiro, Gasabo, Muhanga na Nyaruguru, ukaba warahuguye abagore batanu muri buri karere.

Mukarukwaya avuga ko nubwo inkunga za Women for Women zahagaragara, bafite icyizere cyo gutera imbere.

Watangiye ufasha abategarugori bahuye n’ibibazo bya Jenoside yakorewe Abatutsi mu 1994, uza kwagurira ibikorwa byawo no ku bagore bo mu cyaro muri rusange, ku buryo kugeza ubu umaze guhugura abasaga ibihumbi 69.

Koperative y’abatwara abagenzi ku magare i Rwamagana irashinja ubuyobozi kuyihombya miliyoni 5FRW.

Bavuga ko afatanyije na komite bayoborana bahombeje koperative umutungo mwinshi batazi neza umubare nyakuri; bakavuga ko ubarirwa muri miliyoni eshanu, nubwo na Komite Ngenzuzi yabo itagaragaza neza amafaranga yasohotse n’ayinjiye.

Mu nama bagiranye b’Ubuyobozi bw’Akarere ka Rwamagana kuri uyu wa 25 Kanama 2016, abanyamuryango b’iyo koperative n’uburakari bwinshi bagaragaje ko umuyobozi wabo yagiye yinjiza abanyamuryango bashya muri koperative imisanzu yabo akayishyira ku mufuka we aho kujya mu isanduku ya koperative.

Kugeza ubu, bavuga ko koperative ifite abanyamuryango basaga 800, ariko abatanze imisanzu yo kwinjira muri koperative ku buryo buzwi ngo ntibarenga 400, abandi bakaba baragiye binjira muri koperative bishyuye imisanzu ariko ntibahabwe kitansi igaragaza ko bishyuye koperative.

Abo banyamuryango banavuga ko umuyobozi wabo abeshya ko yagiye asohora amafaranga yo kwishyurira abanyamuryango imisanzu y’ubwisungane mu kwivuza kandi atari byo.

Ngo anavuga ko uwagize ibirori cyangwa ibyago hari amafaranga agenerwa nyamara hari abanyamuryango byagiye bibaho ayo mafaranga ntibayahabwe.

Kuri ibyo haniyongeraho umurima bivugwa ko koperative yaguze ahitwa i Nawe mu Karere ka Rwamagana, ariko igiciro waguzwe n’icyo uwo murima uzakoreshwa kikaba kitavugwaho rumwe.

Kwihangana Emmanuel ati “Mwadutangarije ko umurima mwawuguze miriyoni n’igice, none tugeze muri iyi nama mutubwiye ko mwawuguze ibihumbi 600, kandi mwawuguze mu cyaro, tuzubakayo? Tuzawumaza iki? Igiciro cya wo nyakuri ni ikihe.”

Umuyobozi wa COTRAVERWA amurikira abanyamuryango uko umutungo uhagaze yavuze ko koperative ibishyurira mituweri bamutera utwatsi.

Niringiyimana Jean Baptiste yungamo ati “Namenye ko uwo murima waguriwe umwe mu bari muri komite, ari na yo mpamvu hajemo amanyanga perezida atangaza ko waguzwe miliyoni n’igice, none hano bemeye ibihumbi 600. Abantu b’abagabo bangana gutya komite y’abantu barindwi igiye kuduhindura injiji?”

Umuyobozi w’iyo koperative, Mugiraneza Emmanuel, na komite bafatanyije kuyobora bamaze umwaka n’amezi arindwi ku buyobozi.

Avuga ko ibyo abanyamuryango bamurega ari ibinyoma, we akemeza ko ayo mafaranga y’imisanzu ya mitiweri, ayo gushyigikira abagize ibirori no gutabara abagize ibyago yagiye asohoka nubwo abanyamuryango babihakana. We abifata nko kumuteza urubwa akavuga ko abarumuteza ari abanyamuryango batuzuza inshingano zabo zo gutanga imisanzu muri koperative.

Cyakora, nubwo ahakana ibyo aregwa yumvikana nk’udafite amakuru afatika kuri koperative kuko atazi n’umubare w’abanyamuryango bayigize, akemera ko yagize uburangare mu kuyobora kubera kutabona amahugurwa.

Ati “Umubare w’abanyamuryango kuwumenya biragoye cyane, ariko abanyamuryango bujuje umugabane shingiro ni nka 461, ariko urebye abanyamuryango ba koperative barenga 800. Naho ubundi ibyo bavuga ni urubwa banteza barabeshya. Wenda nanjye nagize uburangare, ntabwo navuga ngo koperative iri mu nyungu, iracyari mu cyuho yatejwe n’abayoboye mbere yanjye.”

Ubwo burangare bunemezwa na Mukiza Ruzigura Moise, ushinzwe iterambere ry’amakoperative mu Karere ka Rwamagana. Avuga ko mu myaka irindwi amaze muri izo nshingano atigeze abona raporo n’imwe iturutse muri COTRAVERWA kandi yarayisuye kenshi akayisaba ko yatanga raporo ariko ngo nta n’imwe umuyobozi yigeze atanga.

Ati “Koperative twarayisuye kenshi, ibibazo abanyamuryango bagaragaje twagiye tubibonamo, umuntu akaba yavuga ko hari intege nkeya ziri muri Komite Nyobozi. Nta raporo batanga igaragaza ishusho ya Koperative n’ibibazo ifite n’ibyo badusaba kubafasha.”

Abanyamuryango ba COTRAVERWA bakoranye inama n’Ubuyobozi bw’Akarere ka Rwamagana tariki 25 Kanama 2016 kugira ngo ubuyobozi bw’akarere bubafashe kumvikana n’umuyobozi wabo.

Abanyamuryango ba COTRAVERWA basaba umuyobozi wabo kwegura.

Ni nyuma y’uko baherutse kugirana ubushyamirane n’uwo muyobozi bamusaba kubagaragariza uko umutungo wa koperative uhagaze bigatera imvururu zaje guhoshwa n’inzego z’umutekano, ari na bwo hafatwaga umwanzuro w’uko ubuyobozi bw’akarere bwabahuza kugira ngo bwumve impande zombi.

Muri iyo nama, benshi mu banyamuryango ba COTRAVERWA bagaragaje ko batagishaka umuyobozi wabo basaba ko yahita yegura abanje kumurikira koperative umutungo wayo hatabuzemo ifaranga na rimwe kuko ngo ntacyo yabamariye mu myaka ikabakaba ibiri amaze abayobora.

Uwo muyobozi yavuze ko mu gihe abanyamuryango baba batakimushaka atakwizirika ku buyobozi. Ati “Kwegura kwanjye ntabwo nabijyaho impaka rwose, nibemeza ko ngomba kwegura nzegura nta kibazo nta n’uwo mbangamiye.”

Abanyamuryango bagaragaje ko bafite impungenge ko umuyobozi wabo ashobora gutoroka, ariko inzego z’umutekano zibaha icyizere ko ntaho yajya.

Basabwe gukora urutonde rw’abanyamuryango bose, umuyobozi wabo na we asabwa gukora raporo igaragaza uko koperative ihagaze ku buryo tariki 02 Nzeri 2016 bazongera gukorana inama n’ubuyobozi bw’akarere kugira ngo ikibazo cyabo gifatweho umwanzuro.

Icyicaro Gikuru cya KOZIBI cyahindutse itongo.

Iyi koperative yari imaze imyaka igera kuri 28 ikorera mu Karere ka Rwamagana, ariko tariki 20 Nyakanga 2016 yarasheshwe nyuma y’aho bigaragariye ko yahuye n’igihombo kubera umutungo wayo usaga miliyoni 200 wanyerejwe n’abari abayobozi bayo.

Inteko rusange y’iyo koperative ni yo yemeje ko iseswa, ariko nyuma yo kuyisesa abari abanyamuryango basigaye mu gihirahiro cy’uko bazagaruza amafaranga yabo yanyerejwe, kuko bari bamaze kubwirwa ko abayanyereje badashobora gukurikiranwa mu nkiko bitewe n’uko ibyaha baregwa byashaje.

Habumugisha Jean de la Paix, ukora mu ishami rishinzwe ubugenzuzi mu Kigo cy’Igihugu gishinzwe Amakoperative, abibasobanurira yagize ati “Ibyaha byakozwe muri KOZIBI byakozwe mbere y’umwaka wa 2009 kandi abanyereje ayo mafaranga baregwaga icyaha cy’ubuhemu. Igitabo cy’amategeko ahana ibyaha mu Rwanda kivuga ko icyaha cy’ubuhemu gisazira imyaka itatu iyo kitakurikiranywe.”

Inkuru ko abanyereje umutungo wa KOZIBI badashobora gukurikiranwa mu nkiko yakiriwe nk’incamugongo ku banyamuryango.

Aha yasobanuraga ko ubugenzuzi iyo koperative yakorewe bwakozwe muri 2013, mu gihe ibyaha byari byarakozwe muri 2009, byumvikane ko muri 2013 ibyaha abanyereje ayo mafaranga bakurikiranyweho byari byamaze gusaza kuko bari batarakurikiranwa mu nkiko.

Abanyamuryango ba KOZIBI iyi nkuru bayifashe nk’incamugongo, bavuga ko batiyumvisha ukuntu umuntu yanyereza amafaranga y’abandi itegeko rikaba inzitizi mu kumukurikirana kandi ahari.

Ntezimana Malick ati “Kuvuga ngo umuntu yariye miliyoni zisaga 200 bamugeze mu rukiko ngo ntiyakurikiranwa ngo ikirego cyarashaje! Ubwo ni ukuvuga ko twe duhombye amafaranga yacu abayanyereje bahari! Amafaranga yacu ntiyahiye, nta mujura wayibye yanyerejwe n’abakozi kandi barahari.”

Guverineri Uwamariya yaremye agatima ababitsaga muri KOZIBI.

Guverineri w’Intara y’Iburasirazuba, Uwamariya Odette, avuga ko ikibazo cy’aba baturage cyamugezeho. Nubwo hakiri inzitizi mu mategeko ituma abanyereje umutungo w’iyo koperative badakurikiranwa, avuga ko hari icyizere ko abayibitsagamo batazahomba kuko ikibazo cyabo kiri kuganirwaho n’inzego bireba kugira ngo kibonerwe umuti.

Ati “Amategeko ashyirwaho n’abantu. Iyo ikibazo kivutse kikaba gifite inzitizi mu mategeko abantu bashobora kureba uburyo bundi bakiganiraho kigakemuka. Turemera ko abaturage bizigamye muri KOZIBI badakwiye guhomba, hari abari barafashemo imyenda batishyuye hari n’abanyereje amafaranga.”

Yungamo ati “Ni yo mpamvu icyo kibazo twashatse kucyigaho ku buryo bw’umwihariko n’inzego bireba, ndumva mfite icyizere ko bitazagenda burundu ngo abaturage bahombe hari igishobora gukorwa inzego zikoranye. Abaturage bakwihangana kuko turifuza kugisuzuma mu buryo bw’umwihariko duhereye aho cyari kigeze.”

KOZIBI yatangiye gukora mu mwaka wa 1988, ikaba yari ifite amashami mu mirenge ine y’Akarere ka Rwamagana.

Hari amakuru avuga ko abanyereje amafaranga y’iyo koperative baba barakingiwe ikibaba n’ubuyobozi bwariho ubwo yanyerezwaga, iyi ngo ikaba ishobora kuba ari yo mpamvu batakurikiranywe ku gihe nk’uko bamwe mu bari abanyamuryango b’iyo koperative babivuga.

Imurikagurisha ryiganjemo ibikorerwa mu Rwanda.

’Made in Rwanda’ ni politiki Leta yashyizeho yo kugabanya ibyo u Rwanda ruvana mu mahanga, hagatezwa imbere ibikorerwa mu Rwanda.

Iryo murikagurisha ribera mu Karere ka Rwamagana ririmo abamurika ibintu bikorerwa mu Rwanda nk’inkweto n’imyenda, intebe n’amakaro yo kubaka akorerwa mu ishuri rya IPRC East.

Umuyobozi w’Urugaga rw’Abikorera mu Ntara y’Iburasirazuba, Eng. Habanabakize Fabrice, avuga ko muri iryo murikagurisha hatekerejwe cyane gahunda yo guteza imbere ibikorerwa mu Rwanda, kugira ngo abikorera bayumve neza kandi bayigire iyabo.

Ati “Nk’abikorera, turifuza ko gahunda yo guteza imbere iby’iwacu tuyitangira ikatujya mu maraso, tubashe kwigira, u Rwanda rugere ku rwego twifuza kurugezaho.”

Abatuye Iburasirazuba bari guhaha ibintu bitandukanye muri iri murikagurisha.

Abatangiye gushyira mu bikorwa gahunda ya “Made in Rwanda” bari muri iryo murikagurisha, bavuga ko ishoboka kuko ibyo bakora bikunzwe cyane.

Nshimiyimana Olivier uhagararariye sosiyete yitwa Viato Nzuri ikorera inkweto mu Karere ka Gatsibo, ati “Iriya gahunda irashoboka kuko inkweto dukora zikunzwe cyane, iyo uzigereranyije n’izituruka hanze usanga izacu ziri gukundwa cyane.”

Guverineri w’Intara y’Iburasirazuba, Uwamariya Odette, avuga ko iri murikagurisha riri kuba ku nshuro ya munani rifite akamaro kanini kuko kuva ritangiye, ryagiye rituma abikorera barushaho kunoza ibyo bakora, ku buryo bashobora no kubijyana mu mamurikagurisha mpuzamahanga.

Agira ati “Harimo ibanga rikomeye kuko ugeze mu imurikagurisha umwaka wa mbere, usanga ibikorwa bye biri ku rwego runaka, ariko uko arushaho kurigarukamo agasangira amakuru n’abandi, arushaho kubinoza no kubiteza imbere.”

Guverineri Odette Uwamariya, avuga ko imurikagurisha ry’Intara y’Iburasirazuba rituma abikorera bunguka ubumenyi bwo kunoza ibyo bakora.

Imurikagurisha ry’Intara y’Iburasirazuba ryatangiye tariki 18/08/2016, rikaba rizamara iminsi 10.

Ritegurwa n’Urugaga rw’Abikorera ku bufatanye n’iyo ntara. Kugeza ubu, rikaba ririmo abamurika ibikorwa bya bo bagera ku 128 barimo Abanyarwanda 115, n’abanyamahanga 13 bo mu bihugu bya Uganda, Pakistan, Kenya, Ubuhinde n’ u Burundi.

Ibi bitoki byari bipakiye hejuru y’izi nyama ziri mu mifuka.

Umuvugizi wa Polisi y’u Rwanda mu Burasirazuba, IP Emmanuel Kayigi, yabivuze kuri uyu wa 23 Kanama 2013, nyuma yo gufata imodoka yari ipakiye inyama zarengejweho ibitoki n’inanasi mu rwego rwo kuyobya uburari.

Ati “Nta n’uwamenya ko hari harimo inyama muri iyi modoka kuko icyagaragaraga ni ibitoki byari biyuzuyemo. Wakwibaza niba umuntu ukora igikorwa nk’iki aba yatekereje ku buzima bw’abantu. Ni ugushyira imbere gushaka amafaranga ntibatekereze ku buzima bw’abo bagiye kugaburira.”

Akomeza avuga ko abatwara inyama muri ubwo buryo batiza umurindi abakora ubujura bw’amatungo, akavuga ko bagomba gucibwa amande bakanahanwa kugira ngo babicikeho.

Ubusanzwe inyama zitwarwa mu modoka yabugenewe ifite n’icyuma kizikonjesha kugira ngo zitangirika, kandi zikaba zifite n’ibyangobwa by’aho zabagiwe.

Nyir’izo nyama witwa Bizimana Marc yari azivanye mu isoko rya Ntunga mu Karere ka Rwamagana azijyanye i Kigali. Avuga ko afite resitora muri Kimironko akaba yari yaziguze agiye kuzitekera abakiriya be, nubwo we yemeza ko yaribuzijugunye kubera ko zari zatangiye kwangirika.

Ati “Nanjye ndabibona ko guteka izi nyama byagira ingaruka kuko zanaraye mu mifuka zangiritse, nta kindi nari kuzimaza uretse kuzijugunya. Mpuye n’igihombo cy’ibihumbi 580, mvanyemo isomo rikomeye.”

Bahise bazita mu cyobo kirekire ngo abaturage batazirya.

Izo nyama zajugunywe mu cyobo kirekire kugira ngo abaturage batazirya. Abavuganye na Kigali Today bashimye igikorwa Polisi yakoze kuko “abantu bajya muri resitora kurya ariko batazi uko inyama zabonetse n’uko zabazwe” nk’uko uwitwa Mutangana Innocent yabivuze.

Uwitwa Nkikabahizi Celestin na we yavuze ko abatwara inyama muri ubwo buryo bashobora guhumanya abantu, ahamagarira bagenzi be kujya batungira agatoki Polisi igihe babonye umuntu watwaye inyama mu buryo butemewe.

Polisi ikomeje guta muri yombi abantu bakekwaho ubujura bw’amatungo no gucuruza inyama mu buryo butemewe. Mu Karere ka Nyagatare hafungiwe abagera kuri 31, mu gihe mu ka Gatsibo hafungiwe abagera kuri 13.

Inama yahuje abayobozi mu nzego z’ibanze z’Iburasirazuba, ubuyobozi bw’intara na Guverineri wa BNR.

Guverineri w’iyo ntara, Uwamariya Odette yabivuze tariki 18 Kanama 2016 mu nama yahuje Guverineri wa Banki Nkuru y’Igihugu n’abayobozi mu nzego zitandukanye bo mu Burasirazuba, hagamijwe kwigira hamwe uko ibigo by’imari byarushaho kwegerezwa abaturage ariko n’imicungire yabyo ikanozwa.

Abacungamutungo ba za SACCO bagaragaje ko kuba zifitiwe imyenda myinshi ari ikibazo gishobora kugira ingaruka zirimo no kudindiza iterambere ry’ibyo bigo by’imari.

Kanamugire Wellars, uyobora SACCO ya Rwinkwavu mu Karere ka Kayonza, yagize ati “Amafaranga tuguriza abanyamuryango ava mu bwizigame, iyo batishyuye inguzanyo bigira ingaruka y’uko abandi banyamuryango bashobora kubura amafaranga yo kugurizwa.”

Guverineri Uwamariya yeruriye abayobozi bambuye za SACCO ko bazahagarikwa mu kazi nibatishyura.

Nsanzimana Darius, uyobora SACCO ya Muhazi mu Karere ka Rwamagana, yungamo ati “SACCO ni gahunda Leta yashyizeho kugira ngo abaturage begerezwe ibigo by’imari. Iyo unyereje umutungo wa SACCO uba wangisha abaturage politiki nziza ya Leta, abaturage ntibabona ko ari ikintu kibafitiye akamaro, ahubwo babona ko ari ikintu cyashyizweho kugira ngo ba bihemu bibonera amafaranga bashyira mu mifuka yabo.”

Abayobozi bo mu nzego z’ibanze mu Burasirazuba kugeza ubu bafite miliyoni zigera kuri 53 bambuye SACCO nk’uko Guverineri Uwamariya yabitangaje.

Aha ni ho ahera avuga ko n’abandi batarishyura bakwiye kwegera za SACCO bakavugana uburyo bazishyura, bitaba ibyo bagafatirwa ibindi byemezo birimo no kuba bahagarikwa ku kazi.

Ati “Kuba uri umuyobozi wagombye kuba intangarugero, wafata inguzanyo ukayishyura neza kandi ku gihe kuko n’utabikora ntuzagira imbaraga zo kwishyuza n’undi uyoboye utarashoboye kubahiriza ayo mabwiriza. Nibiba ngombwa hari n’abo tuzakura mu buyobozi nibananirwa kubahiriza icyo kintu cyo kuba inyangamugayo ngo bishyure amafaranga ya banki.”

Guverineri wa Banki Nkuru y’Igihugu, John Rwangombwa, avuga ko abahabwa inguzanyo ntibishyure babangamira urwego rw’imari.

Guverineri wa Banki Nkuru y’Igihugu, John Rwangombwa, avuga ko abantu bafata imyenda mu bigo by’imari ntibishyure ari ikibazo gikomeye, kuko bashobora gusenya iterambere ry’imari.

Nubwo icyo kibazo kitarafata intera ndende mu Rwanda, aravuga ko abafite imyenda bagomba kuyishyura kugira ngo ibigo byabagurije bitazagira ikibazo cyo kubura amafaranga biguriza abandi banyamuryango.

Mu bayobozi b’inzego z’ibanze zo mu Burasirazuba, abafitiye imyenda za SACCO harimo abo ku rwego rw’imidugudu, utugari n’imirenge. Guverineri w’Uburasirazuba akavuga ko intara igiye kubahagurukira ku buryo bishyura imyenda kandi mu gihe cya vuba.

Umuyobozi w’Akarere ka Rwamagana, Mbonyumuvunyi Radjab, asaba abaturage gushyira imbaraga mu kwicungira umutekano cyane ko ngo nta rondo ry’amanywa ribaho.

Uretse ubujura bw’amatungo bakorerwa mu masaha y’ijoro ngo hari n’ubwo bibwa ibikoresho byo mu ngo ku manywa y’ihangu kandi bikaburirwa irengero, bagasanga gutera imbere kwabo bigoranye mu gihe iki kibazo kitabonerwa umuti.

Ndagijimana Sylvestre ati “Nari norohe ingurube yagura nk’ibihumbi 80 bayibagiyeho batwara inyama banyiba n’intama ndabibura burundu.”

Nyirandikubwimana Odette yungamo ati “Bacunze nagiye gusenga ku cyumweru baza mu rugo utwo nari kurya baradutwara ari ku manywa, haciyemo umunsi umwe bagaruka nijoro nari mfite ihene zose barashorera. Twari dufite ubushobozi bwo kugira icyo tugeraho ariko ubujura buratubangamiye.”

Nubwo abatuye i Nyakariro bibwa bavuga ko bafite irondo rihoraho. Rimwe ngo rifata abo bajura ariko hakaba igihe barica mu rihumye ibyo bibye bakabinyuza aho ritari bikaba byaburirwa irengero nk’uko Uwizeyimana Esdras abivuga.

Ati “Bariba rimwe bigafatwa, ariko irondo kubera ko rikaze abajura baduca mu rihumye bagaca nk’ahandi hantu ibyo bibye bakabitwara.”

Umuyobozi w’Akarere ka Rwamagana, Mbonyumuvunyi Radjab, ntahakana iby’ubu bujura n’ubwo avuga ko budakunze kubaho.

Gusa, ngo n’iyo bibaye ibyibwe akenshi biragaruzwa ku bufatanye bw’inzego z’umutekano, agasaba abaturage kugira uruhare mu kwicungira umutekano, cyane cyane uwo ku manywa kuko nta rondo ry’amanywa riba rihari.

Agira ati “Ntabwo twahakana ko hari umuntu wakwibwa nk’ihene bibaho ariko si kenshi cyane, ariko iyo bibaye turakurikirana dufatanyije n’inzego z’umutekano menshi mu matungo aragaruzwa. Ubujura bushobora kubaho kumanywa bwo buragoye kubukumira kuko nta rondo ry’amanywa rihari, tugakangurira abaturage kugira uruhare mu gucunga umutekano.”

Nyakariro ni umwe mu mirenge y’Akarere ka Rwamagana ukunze kugaragaramo ubworozi bw’amatungo magufi, bikavugwa ko amatungo yibwa muri ako gace ashobora kuba ajya kugurishwa mu yindi mirenge kuko ayibwe ntafatwe aburirwa irengero burundu.

Gahunda y’Igiseke mu Burasirazuba yatangiranye n’abagore bari muri Komite y’inama y’igihugu y’abagore mu turere tugize iyo ntara.

Hari gahunda zashyiriweho gufasha abagore zirimo n’ikigega cya BDF kibishingira ku gipimo cya 75%, ariko bamwe babura ubushobozi bwa 25% asigaye kugira ngo bahabwe inguzanyo zabafasha kwiteza imbere.

Iyi ni imwe mu mpamvu zatumye gahunda y’Igiseke itekerezwa nk’uko Uwumukiza Francoise uyobora inama y’igihugu y’abagore abisobanura. Avuga ko buri mugore azajya yizigama uko yishoboye, ushaka inguzanyo akazajya ayibona n’uwabuze ingwate Igiseke kikamwishingira.

Agira ati “Hari abagore bagera mu ngo babwira abagabo ko babonye ababaha inguzanyo bakabura igishoro abagabo ntibabyumve, ugasanga bibangamiye umugore. Turifuza kubunganira kuri ayo mafaranga y’ingwate twifashishije gahunda y’Igiseke.”

Umuyobozi w’inama y’igihugu y’abagore asanga Igiseke kitazahomba kuko umushinga wacyo wizwe neza.

Gutangiza gahunda y’Igiseke mu Burasirazuba byatangiranye n’abagore bari muri komite y’inama y’igihugu yabagore mu turere tugize iyo ntara.

Abagize iyo komite bavuga ko iyo gahunda iziye igihe, bagasanga izakemura ibibazo byinshi ku bagore birimo n’ibyazitiraga iterambere rya bo nk’uko Uwamahoro Jovia uhagarariye inama y’igihugu y’abagore mu Burasirazuba abivuga.

Ati “Twajyaga tubona nk’umugore ugize ikibazo ugasanga uwo mwanya ni bwo abantu batangiye kwikora ku mufuka, rimwe ugasanga hari uwo biteye ipfunwe kuko nta cyo afite aributange.”

Mukankusi Flavia wo muri Komite y’akarere ka Kayonza yungamo ati “Usanga umugabo adashobora guha umugore icyangombwa cy’ubutaka ngo akijyane muri banki bamuhe inguzanyo kandi ubushobozi babufite. Kiriya giseke nigitangira abantu bakabona igishoro bazatera imbere.”

Gahunda y’Igiseke ije mu gihe hari ibindi bigega leta yagiye ishyiraho mu myaka yashize hagamijwe guteza imbere abagore, ariko byagiye bigwa mu gihombo kubera ibibazo by’imicungire mibi.

Uwumukiza avuga ko gahunda y’Igiseke ijya gutangizwa habayeho kugisha inama inzobere mu by’imicungire y’imari ku buryo nta mpungenge z’uko Igiseke kizahomba.

Igeragezwa ry’iyo gahunda ryatangiranye n’abagize komite y’inama y’igihugu y’abagore mu turere tw’intara y’Uburasirazuba, nyuma y’umwaka umwe abagore bose bakaziyinjizwamo hamaze kurebwa iterambere rya yo.

Abakora mu bwubatsi ngo bishyuzwa umusoro ku bikoresho baguriye abaturage, bo bakabura aho bawugaruriza.

Mu bikoresho abafite amakompanyi y’ubwubatsi bakoresha harimo ibikorwa n’inganda bagura mu bacuruzi bemewe, ariko hari n’ibyo bagura mu baturage kandi abenshi ugasanga atari abacuruzi bishyura umusoro nyongeragaciro uzwi nka TVA.

Ibyo ngo bituma abubatsi bagwa mu gihombo kuko iyo bagiye kwishyura umusoro mu kigo cy’Igihugu cy’Imisoro n’Amahoro (RRA) badasonerwa kuri ibyo bikoresho baguze mu baturage, kandi baba barabyishyuye ijana ku ijana batavanyemo umusoro wa TVA.

Twagirayezu Didas ati “Tugira imbogamizi nyinshi. Nk’iyo tugiye gukora imihanda hari ibikoresho tugura n’abaturage. Nk’itaka rya laterite usanga turigura n’umuturage utariyandikishije nk’umucuruzi wishyura umusoro nyongeragaciro.”

Gakway Felicien, ufite ikompanyi y’ubwubatsi yitwa SCGF, yungamo ati “Ya micanga, bya biti dukoresha mu bwubatsi babifataho 15% ugasanga tutabona uko tuyagaruza kuko abo tuba twabiguriye badatanga inyemezabuguzi.”

RRA ivuga ko hari abaturage bakora ubucuruzi bw’ibikoresho by’ubwubatsi ku buryo buhoraho, ugasanga badasora kandi binjiza amafaranga menshi ugereranyije n’abandi bacuruzi.

Komiseri Mukuru Wungirije wa RRA. Rugenintwari Pascal, atanga urugero rw’abafite ibirombe bicukurwamo amabuye n’umucanga, akavuga ko bakwiye kwiyandikisha ibikorwa byabo bikajya byinjiza imisoro mu isanduku ya Leta.

Komeseri Mukuru Wungirije wa RRA, Rugenintwari Pascal, avuga ko abaturage bacuruza ibikoresho by’ubwabatsi bakwiye kwiyandikisha nk’abacuruzi bemewe bakajya babisorera.

Cyakora anavuga ko umwubatsi waguze ibikoresho kuri bene uwo muturage akwiye gufatira 15% y’amafaranga yakabaye amwishyura kugira ngo atazagongwa n’umusoro.

Ati “Bariya bantu ntibiyandikisha mu bucuruzi kandi ugasanga amakamyo yirirwa atunda umucanga umwaka ugashira. Tubasaba kwiyandikisha mu buyobozi bw’imisoro kugira ngo bajye basorera ibikorwa byabo, ariko n’uwaguriye umuntu nk’uwo aba yishyira mu bibazo yagombye gufatira 15% kugira ngo na we yubahirize inshingano ze.”

Nubwo abubatsi bataka igihombo bahura na cyo kubera ibikoresho bagura mu baturage, RRA iranababurira kuko ubushakashatsi yakoze bwagaragaje ko abafite amakompanyi y’ubwubatsi badasorera abakozi babo cyangwa ngo babishyurire ubwishingizi kimwe n’ibindi bigo.

Umwe mu bo Gakwaya yahemukiye basuhuzanya nyuma yo kumubabarira.

Iyo Club itangirwamo inyigisho z’ubumwe n’ubwiyunge, igiye kumara imyaka ibiri itangiye muri gereza ya Rwamagana.

Izo nyigisho ngo ni zo zagiye zituma bamwe mu bagororwa bafungiwe Jenoside bava ku izima bakemera ibyaha, ababyemeye bakandikira imiryango bahemukiye bayisaba imbabazi bakanasaba guhuzwa na yo.

Umuyobozi w’iyo Club, Habimana Emmanuel na we ufungiwe ibyaha bya Jenoside, avuga ko abagororwa 616 bamaze kwandikira imiryango bahemukiye, ariko bose batarabasha guhura na yo kuko 17 bonyine ari bo babashije guhura n’imiryango bahemukiye nyuma yo kuyandikira bayisaba imbabazi.

Gakwaya Faustin apfukamye asaba imbabazi imiryango yiciye muri Jenoside nyuma yo kuyandikira ayisaba imbabazi agahuzwa na yo.

Abanditse basaba imbabazi na bo bemeza ko ari ikibazo gikomeye kuba barategereje imyaka isaga 20 kugira ngo basabe imbabazi, nk’uko uwitwa Ntawangundi Yozefu abyemeza.

Agira ati “Ni ikibazo gikomeye kuba umuntu amara imyaka irenze 20 afite mu mutima we ikintu yahishe umuryango. Abacyinangiye umutima barivuna bakanavuna n’igihugu, byaba byiza bikijije ipfunwe tubona mu miryango.”

Imibare y’abagororwa bandikira imiryango bahemukiye bayisaba imbabazi yatangiye kwiyongera, nyuma y’imyaka igera kuri ibiri Club yo kurwanya Jenoside imaze itangiye muri iyo gereza.

Abagororwa 17 bo muri gereza ya Rwamagana bamaze guhuzwa n’imiryango bahemukiye nyuma yo kuyandikira bayisaba imbabazi.

Hari abavuga ko bigoye kwemeza ko izo mbabazi basaba ziba zivuye ku mutima, ariko Habimana avuga ko mbere y’uko umuntu yandika asaba imbabazi abanza kuganirizwa hakarebwa niba koko afite umutima wicuza.

Ati “Kugira ngo bandikire iyo miryango barabanza bakatugana kugira ngo twumve koko ko bamenetse imitima bakabona kwandika. Nanjye ubwanjye nanditse nsaba imbabazi, ariko usanga yaramenetse umutima ababajwe n’icyaha cya Jenoside cy’indengakamere twakoze.”

Club yo kurwanya Jenoside muri gereza ya Rwamagana ikomeje gukora ubukangurambaga ku bagororwa bataratura ngo birege ibyaha bya bo.

Abayigize bavuga ko n’ubwo bafunzwe batabura gutanga ubutumwa ku bakoze Jenoside batarafatwa ngo baryozwe ibyo bakoze, bagasaba abakiyihakana gusubiza amaso inyuma bakatura ibyo bakoze bashize amanga.

Abasigajwe inyuma n’amateka barishimira ko basigaye basangira n’abandi kandi mbere bitarashobokaga.

Byavuzwe n’abo mu Murenge wa Kigabiro mu Karere ka Rwamagana tariki 15 Kanama 2016, ubwo basangiraga umuganura n’abandi baturage mu muhango bateguriwe na Kiliziya Orthodoxe mu Rwanda.

Amateka y’u Rwanda agaragaza ko bari baragizwe ibicibwa kuko bakumirwaga ahantu hose bashobora guhurira n’abandi.

Hari n’imvugo zabasebyaga zivuga ko ari Abanyamwanda batagira umuco, ibyo ngo bigatuma n’ahabaye ibirori babirebera ahitaruye kuko batabaga bemerewe kwegerana n’abandi.

Uwitwa Hategekimana Deogratias ati “Bavugaga ngo turi abanyamwanda ngo turya intama, haba habaye ibirori ugasanga turi hirya iyo, bakanywa bageza hasi ku bivuzo bagaterura cya kibindi bakatuzanira tukanyunyuza.”

Yungamo ati “Leta y’Ubumwe yakuyeho ibintu bibi byinshi kuko ntitukinenwa, nkaba nsaba Imana ngo izadukomereze iyi Leta kuko yatugejeje kuri byinshi.”

Bizihiriza hamwe Umuganura.

Mu Murenge wa Kigabiro abasigajwe inyuma n’amateka bafite itorero ry’imbyino n’indirimbo barihuriyemo n’abandi Banyarwanda batari muri icyo cyiciro.

Hari abavuga ko babyiruka babwirwaga ko bagomba kwirinda icyatuma bahura n’abasigajwe inyuma n’amateka, ariko ubu ngo basanga urwo rwango nta shingiro rwari rufite nk’uko Uwimana Euphrance abivuga.

Ati “Kera nta muntu wavangaga n’Abatwa. Nabonaga bagira iriba ryabo, twagiraga ibirori bakarara babyina sogokuru akabaha intama cyangwa ikirambu cy’inyana cyavutse. Barabahezaga ntabwo bahuraga n’abandi ariko ubu turasangira.”

Intambwe y’ubumwe n’ubwiyunge u Rwanda rugezeho ni yo yatumye abasigajwe inyuma bongera kujya ahabona.

Bashima Leta y’Ubumwe bw’Abanyarwanda yongeye guhuza Abanyarwanda nyuma ya Jenoside yakorewe Abatutsi mu 1994, bakavuga ko batazahwema gushyigikira iyo gahunda babinyujije mu mbyino n’indirimbo bakoresha mu itorero ryabo.

Tuyisenge Hamilcal Fidele uhuza ibikorwa bya Kiliziya Orthodoxw akaba n’imboni ya komisiyo y’ubumwe n’ubwiyunge muri iyo Kiliziya, avuga ko hakozwe byinshi kugira ngo ubumwe bushoboke, ariko ngo abantu ntibakwiye guterera iyo kuko ari urugamba rukomeza.

Abana bahawe amata n’umutsima w’amasaka nk’iimenyetso cyo kwizihiza umunsi w’umuganura.

Byavuzwe na Minisitiri w’Umuco na Siporo, Uwacu Julienne mu iserukiramuco Nyafurika ry’imbyino ryabereye i Mukarange mu Karere ka Kayonza kuri uyu wa gatatu tariki 3 Kanama 2016 ku munsi wa ryo wa gatatu.

Minisitiri Uwacu yavuze ko umuco wo gutarama no guhiga ukwiye kuba mu buzima bwa buri munsi bw’Abanyarwanda, aho kuba ku munsi w’umuganura gusa cyangwa indi minsi mikuru.

Abanye-Kongo na bo bitabiriye iserukiramuco Nyafurika ry’imbyino ryabereye i Kayonza.

Yagize ati “Tujye tugira n’ikindi gihe tudategereje umuganura duhure tuganire, duhige, byongera bwa busabane n’ubufatanye ndetse tukanasangira. Tujye tugira umwanya wo gusangira ibyiza by’umuco wacu kuko urakungahaye.”

Iryo serukiramuco ryitabiriwe n’ibihugu bitatu, u Rwanda, Repubulika iharanira demokarasi ya Congo na Misiri, abaryitabiriye bagaragaje imico y’ibihugu bya bo yari yiganjemo imbyino.

Abaturage b’i Kayonza bitabiriye iryo serukiramuco bavuze ko ari umwanya mwiza babonye wo kwibukiranya umuco waranze agace kitwaga Ubuganza.

Mu iserukiramucu hamuritswe inka z’Inyambo zororerwa mu Burasirazuba.

Bavuze ko umuco w’ako gace watumaga abagatuye bafatanya muri byose kandi bagasabana mu buzima bwa buri munsi nk’uko Rusanganwa Karoli yabivuze.

Ati “Ubuganza bwari iwabo w’inka bigatuma abantu ba ho baba abataramyi kandi bagafatanya muri byose ku buryo wasangaga ari ikintu kibaranga kidakunda kuboneka ahandi.”

Ni ku nshuro ya mbere Iserukiramuco Nyafurika ry’imbyino ribereye mu ntara kuko ryari risanzwe ribera i Kigali.

Guverineri w’Uburasirazuba, Uwamariya Odette, yavuze ko ari amahirwe ku batuye mu Burasirazuba kuko babonye umwanya wo gusangira umuco n’abo mu bindi bihugu byitabiriye iryo serukiramuco.

Mu iserukiramuco ryabereye i Kayonza hamuritswe umuco w’Abanyarwanda wa kera.

Yavuze ko mu iserukiramuco ritaha bazatumira ibindi bihugu bituranye n’Uburasirazuba kuko bisanzwe bifitanye umubano wihariye n’iyo ntara.

Iserukiramuco nyafurika ry’imbyino ryabereye i Kayonza ryahuriranye no kwizihiza umunsi w’umuganura ku rwego rw’intara y’Uburasirazuba.

Uretse imbyino z’ibihugu byaryitabiriye hanamuritswe inka z’inyambo zororerwa mu Burasirazuba, n’abana bahabwa amata n’umutsima w’amasaka nk’ikimenyetso cyo kwizihiza umunsi w’umuganura.

Abitabiriye iserukiramuco beretswe inyambo zororerwa i Kayonza.

Minisitiri w’Umuco na Siporo, Uwacu Julienne, yavuze ko gahunda ya FESPAD irimo kugenda neza, avuga ko ibyiza biyigaragaramo bidakwiye kujya bitegereza rimwe mu myaka ibiri.

Ati "Umuco wo gutarama no guhiga ni mwiza ntabwo dukwiye gutarama ku munsi w’umuganura gusa. Dukwiye kubyinjiza mu buzima bwacu bwa buri munsi."

Iri serukiramuco Nyafurika ry’imbyino mu Karere ka Kayonza ryitabiriwe n’amatorero yo mu bihugu bitatu, Rwanda, Misiri na RDC.

Abaturage baryitabiriye bishimiye kuba begerejwe iserukiramuco nk’iri.

Guverineri w’Intara y’Iburasirazuba, Uwamariya Odette, ashimira guverinoma yatekereje kumanura iri serukiramuco rikava ku rwego rw’igihugu rikagera no mu turere.

Mu bikorwa byaranze iri serukiramuco i Kayonza, harimo kumurikirwa inyambo, imbyino z’ibihugu no guha abana amata.

Amafoto:

Minisitiri w’Umuco na Siporo, Uwacu Julienne.

Abapolisi basoje ’Cadet’ basabwe kwitangira igihugu batizigamye.

Ibi babisabwe na Minisitiri w’Umutekano, Sheikh Mussa Fazil Harerimana, ubwo kuri uyu wa Gatanu tariki 29 Nyakanga 2016, yasozaga amahugurwa abo bapolisi bari bamazemo amezi 15 mu Ishuri ry’Amahugurwa rya Polisi riri i Gishari mu Karere ka Rwamagana.

Aba ‘Ofisiye’ bato barangije ayo mahugurwa bose hamwe ni 429 barimo ab’igitsina gore 55.

Muri bo, harimo 10 bo mu rwego rw’igihugu rushinzwe imfungwa n’abagororwa bahise bahabwa ipeti rya Assistant Inspector of Prisons, abandi bakaba ari abapolisi bahawe ipeti rya Assistant Inspector of Police.

Minisitiri w’Umutekano, Mussa Fazili yagenzuraga abapolisi mbere yo kubaha ipeti rya Assistant Inspector of Police (AIP).

Minisitiri Fazili yabibukije ko ipeti bahawe ari ryo ntangiriro yo kuba umu ofisiye mu nzego z’umutekano, kandi ngo umuntu uhawe iryo peti aba ahawe inshingano ziremereye.

Ati “Kuba ofisiye bijyana n’inshingano ziremereye. Ofisiye agomba kuba ikimenyetso cyo gukunda igihugu, kugikundisha abo ayobora n’abamugana bose, baba Abanyarwanda n’abanyamahanga."

Yakomeje agira ati "Kuba ofisiye ni igihango gikomeye. Ofisiye wese agomba guhora yiteguye kwitangira igihugu cye nta bugwari, kabone n’iyo byamusaba gutanga ubuzima bwe.”

Abarangije ayo mahugurwa barahiye indahiro ko batazatatira igihango bagiranye n’igihugu, bavuga ko inshingano bahawe bazazuzuza neza uko bikwiye.

Minisitiri Fazil yabwiye abarangije amahugurwa ko bagiranye igihango gikomeye n’u Rwanda n’Abanyarwanda.

Ababyeyi ba bamwe mu bapolisi barangije ayo mahugurwa bavuze ko bishimiye intera abana babo bateye, bavuga ko batewe ishema n’uko igihugu cyabahaye inshingano zikomeye.

Nyirarudodo Anastasie yavuze ko na we ashyigikiye ko umwana we yazitangira igihugu kugeza n’aho yahasiga ubuzima, gusa ngo azajya amuragiza Imana kugira ngo imufashe muri izo nshingano yahawe.

Ati “Ndumva nishimiye ko abana basoje amahugurwa. Ndabasabira ku Mana ngo bakore neza akazi kabo kuko twarabatanze ngo na bo bitangire igihugu. Iyo twabatanze na bo baba bemeye kuba intwari. Ku bw’ibyo rero, tubasabira ku Mana ngo ibashoboze ibyo bitangiye.”

Ayo mahugurwa yatangiye tariki 4 Gicurasi 2015. Ku ikubitiro yari yitabiriwe n’abanyeshuri 435, ariko batandatu muri bo ntibabashije kurangiza amahugurwa ku bw’impamvu zitandukanye, nk’uko Umuyobozi w’Ishuri, CP John Bosco Kabera yabisobanuye.

Mu barangije, harimo 14 b’abanyamahanga barimo babiri bo muri Namibia, babiri bo muri Uganda, n’abo muri Sudani y’Epfo 10, abandi bakaba ari Abanyarwanda.

Aba bapolisi basoje amahugurwa bishyuriye imisanzu y’ubwisungane mu kwivuza abaturage 92 bo mu Murenge wa Gishari mu Karere ka Rwamagana, bakaba baratanze n’isakaro ku baturage batatu bo muri uwo murenge.

Umuyobozi w’ishuri rya Polisi rya Gishari yavuze ko ibyo babikoze nyuma yo kwigishwa uruhare rwa Polisi mu iterambere ry’igihugu.

Abo mu miryango y’abarangije amahugurwa bari bagiye kubashyigikira.

Amata y’ihene agurwa menshi ariko umukamo uracyari mucye.

Mu 2013 ni bwo abagore bagera kuri 25 bo mu Karere ka Kayonza borojwe izo hene n’umuryango wa Women for Women, ariko bazihabwa baciwe intege n’abavugaga ko izo hene ntacyo zabamarira kuko kunywa amata y’ihene bitamenyerewe mu Rwanda.

Nyuma y’imyaka itatu bazihawe ngo batangiye kubona umukamo wa zo. Amata ya zo ngo afite isoko kandi igiciro cya yo gikubye inshuro zirenga ebyiri icy’amata y’inka, ubu bafite imbogamizi y’uko zidakamwa amata menshi kandi abayashaka ari benshi.

Nyirakayobe Dimitrie wo mu murenge wa kabarondo agira ati “Ntabwo zigira umukamo uhagije ariko isoko ry’amata rirahari. Abayabonye bafite ahantu bayagemura bakayagurira ku mafaranga 700.”

Izi hene ubwo zatangwaga muri 2013 abazihawe baciwe intege ariko ubu ngo zibafitiye akamaro kanini.

Nayigiziki Marcelline yungamo ati “Iyo ugize Imana ukabona nka litiro imwe uba uzi neza ko ufite amafaranga 700, mu gihe amata y’inka agura amafaranga 200 cyangwa 300.”

Umuryango Women for women uvuga ko zimaze kororoka. Clemence Bideri ukuriye ishami rishinzwe kubongerera ubushobozi avuga ko bagira inama abo bagore yo kugurisha zimwe muri izo hene, kugira ngo bagure izishobora kubaha umukamo wisumbuyeho.

Ati “Ubu bavukishije ihene nyinshi zikomoka ku zo twabahaye, turabashishikariza kujya bazigurisha ayo mafaranga bakayashora mu kugura izindi hene zitanga umukamo mwinshi.

Abana bahabwa amata y’ihene ngo ntibakirwara bwaki.

Aho gutunga ihene nyinshi zidatanga umukamo tubabwira ko wazigurisha zose ukagura imwe itanga umukamo mwinshi ukaba ariyo Worora.”

Uretse amata bungukira kuri izo hene ngo zanatumye bibumbira hamwe. Bakimara kuzihabwa ngo bahise bakora itsinda bakajya bazigama amafaranga buri cyumweru, bakayagura imyaka bakazongera kuyigurisha mu gihe igiciro cyiyongereye.

Ibyo ngo byarabafashije ku buryo ubu bafite amafaranga bashobora kugurizanya ufite umushinga akawukora.

Ihene yagaburiwe neza itanarwaye ngo ishobora gukamwa litiro ziri hagati y’enye n’eshanu ku munsi.

bi byavuzwe na bamwe mu baherutse kwitandukanya n’uyu mutwe bagataha mu Rwanda bitewe n’uko basanze ntacyo barwanira nk’uko babitangarije Kigali Today.

Abahoze ari abarwanyi ba FDLR bahawe amasomo mbere yo gusubizwa mu buzima busanzwe

Abitandukanyije na FDLR bavuga ko uwo mutwe urimo ubusumbane bukomeye ku buryo ari kimwe mu byatumye bitandukanya na wo. Sergent Major Ndinkabandi Jean Marie Vianney avuga ko abayobora uwo mutwe bohereza abana ba bo kwiga, mu gihe abavuka ku barwanyi bato birirwa batikirira mu mashyamba ya Congo.

Ati“Baba batubwira ngo twanyazwe igihugu tugomba kurwana tukagisubirana. Umuntu ararwana umwana we yamwohereje kujya kwiga, wowe uwawe ari mu ishyamba yirirwa abatundira amateke, ibyo bintu urumva bifite agaciro? Usanga uvunika bo bakagira inyungu”

FDLR kugeza ubu ifatwa nk’mutwe w’uwiterabwoba, ukaba uyoborwa na bamwe mu bakoze Jenoside yakorewe Abatutsi mu Rwanda. Ipfunwe baterwa n’iyo Jenoside ngo ni ryo rituma bangisha u Rwanda abagize uwo mutwe nk’uko Caporal Maniraguha Francoise wawinjiyemo afite imyaka 12 abivuga.

Ati “Abantu benshi baba muri FDLR bakoze Jenoside mu Rwanda. Aricara akakubwira ngo mu Rwanda haba Abatutsi gusa n’ujyayo uri Umuhutu bazakwica ariko ibyo ntabyo twahasanze ”.

Ndinkabandi avuga ko abana b’ababarwanira FDLR babuzwa kwiga ab’abayobozi bayo bakiga

Abitandukanyije na FDLR bakiri mu mashyamba ya Congo ngo babwirwaga ko nta mahoro n’umutekano biba mu Rwanda, ariko aho bahagereye ngo babonye itandukaniro rinini ugereranyije n’ibyo babwirwaga.

Caporal Maniraguha ati “Ubuzina bw’ishyamba n’ubwo mu gihugu buratandukanye cyane. Hano turaryama tugasinzira twashaka tukanakuramo imyenda, ntabwo twikanga umwanzi tuba twizeye umutekano”

Umuyobozi wa komisiyo y’igihugu yo gusezerera no gusubiza mu buzima busanzwe abari abasirikari, Sayinzoga Jean na we ahamagarira abakiri muri FDLR gutaha bagafatanya n’abandi Banyarwanda kubaka igihugu. Avuga ko imbaraga z’u Rwanda ari Abanyarwanda ku buryo iyo bapfiriye mu mashyamba ya Congo u Rwanda ruba ruhomba.

Uwo muryango ugizwe n’abapfakazi ba Jenoside yakorewe Abatutsi mu Rwanda mu 1994 usanzwe ufite imishinga minini, ariko ngo byagoranaga gukurikirana imicungire ya yo nk’uko umuyobozi w’uwo muryango Mukabayire Valerie abivuga.

Abanyamuryango ba AVEGA bahawe impamyabushobozi nyuma y’icyumweru bari bamaze bahugurwa ku bijyanye no gucunga imishinga no kuyiteza imbere

Bamwe mu banyamuryango na bo ngo bari basanzwe bafite imishinga iciriritse ariko kuyikurikirana no kuyicunga neza bikabananira bigatuma batabona inyungu zikwiye. Mukayisinga Agnes ati “Ubusanzwe ncuruza amasaka ariko wasangaga mbikora mu kajagari ku buryo igihe kigera bikangora kumenya gutandukanya inyungu n’igihombo nagize”

Fazili Claudine w’i Rwinkwavu yungamo ati “Ndacuruza ariko wasangaga ntita ku bakiriya neza ngo mbaguyaguye uko bishoboka, nkeka ko ari imwe mu mpamvu zatumaga ntabona inyungu nyinshi”

Mu bahawe aya mahugurwa harimo abari bataratinyuka gutangiza imishinga yabateza imbere bahise biha umugambi wo gushaka icyo bakora, ndetse n’abari bafite ibyo basanzwe bakora batahana umugambi wo kubinoza bagendeye ku bumenyi baherewe muri ayo mahugurwa.

Abanyamuryango ba AVEGA bahuguwe n’abarimu bo muri Kaminuza ya Mercer University yo muri Leta Zunze ubumwe za Amerika. Musonera Etienne wigisha muri iyo kaminuza avuga abahuguwe bakwiye gushyira mu bikorwa ibyo bize kugira ngo bizabagirire akamaro kuko iyo batabikoresheje bahita babyibagirwa.

AVEGA muri rusange ifite imishinga minini abanyamuryango ba wo badashobora kwicungira ubwabo nk’uko Mukabayire uyobora uwo muryango abivuga. Cyakora anavuga ko “n’ubwo badafite ubushobozi bwo kuyicunga ubumenyi bahawe bugiye kubafasha kurushaho gukurikirana bakamenya aho iyo mishinga idacunzwe neza”

Kugeza ubu ngo ufite abanyamuryango basaga gato ibihumbi 19. Umuyobozi wa wo avuga ko icyerekezo bafitiye abanyamuryango ari ugukomeza kongerera ubushobozi abagifite imbaraga zo gukora, abatagishoboye gukora na bo bakitabwaho by’umwihariko.

Icyicaro Gikuru cya KOZIBI cyahindutse nk’itongo nyuma y’ibibazo byatewe n’inyerezwa ry’umutungo.

Iyo koperative yari ifite amashami mu mirenge ine y’Akarere ka Rwamagana, ikaba yarahuye n’igihombo cyatewe n’inyerezwa ry’umutungo bikozwe na bamwe mu bayiyoboraga.

Bitangira, abanyamuryango ngo bajyaga kubitsa amafaranga bigakunda, ariko bajya kuyabikuza bakabwirwa ko bidashoboka.

Ntezimana Malick, utwara abagenzi kuri moto, wari umunyamuryango wa KOZIBI, avuga ko yabikije miliyoni n’ibihumbi 200 muri iyo koperative bukeye agiye kuyabikuza barayamwima.

Ati “Nari mfite akamoto gashaje ngurisha isambu kugira ngo ngure moto nshya nanjye niteze imbere. Amafaranga nayabikije ari ku mugoroba nsubiyeyo bambwira ko nta mafaranga ahari. Ikibazo kimaze imyaka itatu, nabuze amafaranga mbura n’uwo mbaza.”

Ntezimana Malick yagurishije isambu akabista muri KOZIBI ashaka kuza kuyabikuza ngo ajye kugura moto mu gitondo agarutse bamubwira ko nta mafaranga ahari.

Ikibazo Ntezimana yagize agihuriyeho na benshi mu bari abanyamuryango ba KOZIBI nk’uko Ruhumuriza Jonathan abivuga. Ati “Nabikijemo miliyoni eshatu ngenda mbikuzaho make hasigaramo ibihumbi 700, ngiye kuyabikuza barayanyima ngo banki yarahombye.”

Igihe abanyamuryango ba KOZIBI bari batangiye kwimwa amafaranga ya bo ngo babonaga iri mu marembera, iza no gufunga imiryango burundu tariki 30 Mutarama 2015.

Igenzura yakorewe n’Ikigo cy’Igihugu gishinzwe Guteza Imbere Amakoperative [RCA] ngo ryagaragaje ko hari miliyoni 210 zanyerejwe n’abari abakozi n’abayobozi b’iyo koperative nk’uko Habumugisha Jean de la Paix ukora mu ishami rishinzwe ubugenzuzi muri RCA abivuga.

Yongeraho ko hakozwe dosiye ishyikirizwa ubushinjacyaha, ariko Urukiko Rwisumbuye rwa Ngoma rugaragaza ko abaregwa kunyereza ayo mafaranga batakurikiranwa kuko ibyaha baregwa byashaje.

Bamwe mu banyamuryango ba KOZIBI nyuma yo kubwirwa ko abanyereje amafaranga yabo badashobora kubiryozwa kuko ibyaha baregwa byashaje base basaba ko iseswa.

Habumugisha ati “Ibyaha byakozwe muri KOZIBI byakozwe mbere y’umwaka wa 2009 kandi abanyereje ayo mafaranga baregwaga icyaha cy’ubuhemu. Icyo gihe igitabo cy’amategeko ahana ibyaha cyavugaga ko icyaha cy’ubuhemu gisazira imyaka itatu.”

Yungamo ati “Ubu hasohotse igitabo gishya cy’amategeko ahana ibyaha, icyo cyaha cyiswe icyaha cy’ubugome kikaba gisazira imyaka 10 iyo kitakurikiranywe mu gihe mbere kitwaga icyaha cy’ubuhembu gisazira imyaka 3.

Akomeza avuga ko “Ibyaha byakorewe muri KOZIBI byakozwe muri 2009 bigaragara ko kugeza muri 2012 byari byarashaje. Ubugenzuzi bwakozwe muri 2013 ibyaha byaramaze gusaza nubwo byashyikirijwe ubushinjacyaha.”

Abakekwaho kunyereza ayo mafaranga ubu nta muntu ushobora kubibaryoza mu gihe abenshi mu banyamuryango ba KOZIBI baririra mu myotsi bitewe n’uko iyo koperative yari ibabikiye amamiliyoni.

Bamwe muri bo babwiye Kigali Today ko bitumvikana ukuntu umuntu yanyereza umutungo wa rubanda ntawuryozwe ngo icyaha cyarashaje.

Murenzi ati “Kuvuga ngo umuntu yariye miliyoni zisaga 200 bamugeze mu rukiko ngo ntiyakurikiranwa ngo ikirego cyarashaje! Ubwo ni ukuvuga ko twe duhombye amafaranga yacu abayanyereje bahari! Amafaranga yacu ntiyahiye, nta mujura wayibye yanyerejwe n’abakozi!”

Abanyamuryango ba KOZIBI bavuga ko inyerezwa ry’ayo mafaranga ryabagizeho ingaruka zikomeye kuko hari abateganyaga imishinga y’iterambere ubu ikaba yaradindiye.

Habumugisha arasaba abanyamuryango ba KOZIBI kuregera indishyi mu nkiko zitari mpanabyaha kuko abanyereje amafaranga yabo batahanirwa ibyaha bakoze kandi byarashaje.

RCA ivuga ko nta kindi bashobora gukora kuri abo bakekwaho kunyereza ayo mafaranga, ikagira inama abanyamuryango ba KOZIBI gutanga ikindi kirego kiregera indishyi nk’uko Habumugisha abivuga.

Ati “Nubwo icyaha cyashaje uwanyereje amafaranga akaba adashobora kubihanirwa ariko ashobora gukurikiranwa mu nkiko zitari mpanabyaha ayo mafaranga akaba yagarurwa.”

Abanyamuryango ba KOZIBI nyuma yo kumva ibi bafashe umwanzuro wo gusesa iyo koperative, bashyiraho komite izakomeza gukurikirana ibibazo by’ayo mafaranga.

KOZIBI yatangiye gukora mu 1988. Mu gihe cya Jenoside yakorewe Abatutsi mu Rwanda yarahagaze ariko nyuma yaho yongera gufungura imiryango, ikaba isheshwe yari ifite amashami mu mirenge ya Karenge, Nzige, Mwurire na Rubona.

Amazi y’urugomero yaragabanutse cyane kandi ari yo bari bitezeho kuhuza imyaka.

Hashize iminsi humvikana abaturage bataka amapfa mu Karere ka Kayonza, cyane cyane mu bice bya Rwinkwavu, Mwili na Murundi.

Kuri ubu, abo baturage baravuga ko icyo kibazo kitagifite ubukana nka mbere nyuma y’aho Leta ishyiriyeho gahunda zo kubagoboka.

Umugwaneza Godelive, wo mu Kagari ka Nkondo, ati “Twahuye n’amapfa ariko Leta itwitaho iduha imirimo bakaduhemba ibigori n’ibishyimbo, haza na gahunda ya VUP iyo umuntu akoze bamuhemba amafaranga 1200 ku munsi, uko turi ntibikimeza nka mbere.”

Bamwe mu batuye muri utwo duce twahuye n’amapfa, kubera izuba, bahawe imirima mu gishanga cya Rwinkwavu bari bamaze igihe barabujijwe guhinga kugira ngo kibanze gutunganywa.

Amazi agaburira icyo gishanga ava mu rugomero rwacukuwe ku rugabano rw’imirenge ya Murama na Kabarondo, ariko asa nk’ari gukendera kuko bigaragara ko yenda kugera ku ndiba y’urugomero.

Ibi ngo biteye impungenge abo baturage kuko babona ashobora gushira mu rugomero igihe cy’imvura kitaragera kandi n’ibyo bahinze muri icyo gishanga bitarera.

Habimana Fidele, wo mu Kagari ka Nkondo, ati “Iyo tubonye amazi tukuhira tuba twizeye ko tuzabona umusaruro, aya mazi twifuzaga ko nibura twayabona ukundi kwezi kugira ngo twuhire soya kuko ziracyari ntoya ntizirahaga ziracyakeneye andi mazi.”

Uretse gukoreshwa mu buhinzi, ayo mazi agomba gukoreshwa no mu kwita ku matungo yororerwa muri iyo mirenge itatu.

Umuyobozi ushinzwe Ubworozi mu Kigo cy’Igihugu cy’Ubuhinzi n’Ubworozi, RAB, Kanyandekwe Christine, tariki 18 Nyakanga 2016 mu kiganiro Ubyumva Ute cya KT Radio yavuze ko amazi y’urwo rugomero atakemura ikibazo kiri muri ako gace, avuga ko hashyizweho ubundi buryo bwo kurwunganira mu rwego rwo gukemura icyo kibazo mu buryo burambye.

Ati “Imirenge myinshi yagize ibibazo ikora kuri Pariki y’Akagera. Habayeho igikorwa cyo kuvana amazi mu [biyaga bya bya] Pariki yegerezwa abaturage, hari gucukurwa amadamu 12 manini azajya afasha mu gihe cy’izuba. Hazubakwa n’ibibumbiro kuko imwe muri ayo madamu ishobora guha amazi inka 5000, mu kwezi kwa cyenda azaba yamaze kubakwa.”

Nubwo amazi y’urwo rugomero yamaze kugabanuka cyane, abaturage bose ntibayaherwa rimwe ahubwo barayasaranganywa.

Buri murenge uyahabwa kabiri gusa mu cyumweru. Ibi byari byasabwe n’Umunyamabanga wa Leta ushinzwe Ubuhinzi muri Minisiteri y’Ubuhinzi n’Ubworozi, Tony Nsanganira, ubwo abo baturage barekurirwaga ayo mazi mu kwezi gushize.

Babisabwe tariki 15 Nyakanga 2016 n’umuyobozi wa Komisiyo y’igihugu yo gusezerera no gusubiza mu buzima busanzwe abari abasirikare, Jean Sayinzoga, ubwo yabashyikirizaga ibikoresho iyo komisiyo yabageneye kugira ngo bizabafashe mu myuga bize.

Aba ni bamwe mu bagize icyiciro cy’abahoze muri FDLR barangije kwiga imyuga i Kayonza

Bose hamwe ni 29 bakaba bari bamaze amezi atandatu biga imyuga y’ubudozi, ubwubatsi, gusudira n’ibijyanye n’amahoteri mu karere ka Kayonza.

Biyongereye ku bandi iyo Komisiyo yagiye yishyurira mu bihe bitandukanye kugira ngo bige imyuga yabafasha kwibeshaho nyuma yo kwitandukanya n’umutwe wa FDLR. Abarangije muri iki cyiciro bavuze ko bakurikije uko bakiriwe bakigera mu Rwanda basanga ntacyo bagereranya na leta y’u Rwanda.

Caporal Maniraguha Françoise ati “Leta ntacyo nayinganya. Nkigera mu Rwanda narebaga uko abandi babayeho nkumva niguje kwiga umwuga, ngiye kumva numva komisiyo irampamagaye ngo njye kwiga kudoda. Ndabona bizambeshaho n’umuryango wanjye”

Sergent Major Ndinkabandi Jean Damascene yungamo ati “Ibi biratuma nongera kubona ko ndi Umunyarwanda kimwe n’abandi. Kuba mu mashyamba nabagamo nta mwuga narinzi ubu nkaba ngiye kujya nkorera ifaranga bimpa icyizere ko nanjye ngiye gutera imbere”

Kimwe mu byo abarangije kwiga imyuga bishimiye ngo ni uburyo n’abafite abana bato batabujijwe amahirwe yo kwiga. Caporal Maniraguha yagiye kwiga afite umwana w’uruhinja, ariko ngo Komisiyo yitaye ku mwana we ndetse yita no ku mukozi wamusigaranaga igihe ari kwiga.

Agira ati “Barambwiye ngo uruhinja rwawe uzajyana na rwo ku ishuri ujyane n’ururera niba bishoboka. Ubu nabanaga n’umwana urera urwo ruhinja twese tubaho neza. Komisiyo yatwishyuriye byose, abana ntabwo dusangira bagira inkono ya bo, ngenerwa amata, buri kimwe cyose umwana aba akigenewe”.

Sayinzoga yabwiye abarangije kwiga ko leta y’u Rwanda ihora ishakira abaturage ba yo icyatuma batera imbere, ari na yo mpamvu na bo bigishijwe imyuga nyuma yo gutaha mu Rwanda bitandukanyije n’umutwe wa FDLR.

Abanyeshuri hamwe n’abarimu ba bo n’umuyobozi wa Komisiyo mu ifoto y’urwibutso

Yababwiye ko ari igihango bagiranye na leta abasaba gufata neza ibikoresho bahawe kandi bakabikoresha biteza imbere ubwabo n’igihugu muri rusange.

Komisiyo y’igihugu yo gusezerera no gusubiza mu buzima busanzwe abari abasirikari igenera ubufasha abitandukanyije na FDLR bagataha mu Rwanda. Mu bufasha bahabwa hongerewemo ubwo kubishyurira mu mashuri y’imyuga, nyuma y’aho bigaragariye ko hari abahabwa amafaranga ntabagirire akamaro.

Abagore bakorana na WfW batangiye kwikorera Yawuruti.

Abagore 25 ni bo bahawe ayo mahugurwa. Yawuruti na Foromaji bakaba babikorera mu ruganda ruto ruri mu kigo cya Women’s Opportunity Center basanzwe bakoreramo imyuga n’ubukorikori bigishijwe.

Ubusanzwe abagore bafashwa na WfW kuva mu mwaka wa 1997, bashishikarizwa kwibumbira mu makoperative. Abahawe ayo mahugurwa na bo bibumbiye muri koperative bise Twitezimbere, bakavuga ko ubwo bumenyi bushya bungutse ari indi ntambwe igiye kubageza ku iterambere.

Nayigiziki Marcelline ati “Inyungu turayitegereje kuko koperative yacu ni yo irangura amata na yo ikayaranguza uruganda, inyungu ikajya muri koperative. Tugiye kuba abakire.”

Nyirakayobe Dimitrie yungamo, ati “Uru ruganda ruzatuma dutera imbere kuko uretse kuba ari twe tururanguza amata, abanyamuryango ba koperative yacu bazajya banageza izi Yawuruti na Foromaji ku isoko.”

Bideri avuga ko batangiye gusaba icyemezo cy’ubuziranenge ku buryo bishobotse muri Nzeli bageza izo Yawuruti na Foromaji ku isoko.

Kuva batangiye uyu mushinga mu ntangiriro z’uyu mwaka wa 2016, abo bagore bafite ubushobozi bwo gutunganya litiro 300 z’amata ku munsi bakazibyaza Yawuruti na Foromaji.

Batangiye kubikora hari izindi nganda zisanzwe zibikora ariko ngo bafite icyizere ko ibyabo bizapiganwa neza ku isoko nk’uko Muhorakeye Monique ushinzwe gukurikirana ibikorwa byo gutunganya amata abivuga.

Ati “Yawuruti yacu abantu bayisogongeye barayikunda, ni yawuruti twumva dufitiye icyizere.”

Munezero Emmanuel na we ukorana n’abo bagore, avuga ko bafite akarusho ko gukora foromaji zo mu bwoko bwa “Mozzarella” bateka kuri pizza, mu gihe mu Rwanda bajyaga bakoresha izo mu bwoko bwa “Gouda”.

Yawuruti na Foromaji abo bagore bakora ntiziragezwa ku isoko kuko batarahabwa ibyangombwa by’ubuziranenge n’ikigo cy’igihugu gishinzwe ubuziranenge.

Bideri Clemence ukuriye ishami rishinzwe kubongerera ubushobozi muri Women for Women avuga ko batangiye kubisaba ku buryo bishobotse muri Nzeli 2016 baba babyemerewe.

Zimwe muri yawuruti bamaze gukora.

Abo bagore banatunganya ubunyobwa, ikaba ari indi myuga bamenye nyuma yo kwigishwa ubundi bukorikori burimo gukora imigongo no kuboha ibiseke, ndetse n’imyuga nk’ubudozi n’ubuhinzi bwa kijyambere.

Umuyobozi w’Akarere ka Kayonza, Murenzi Jean Claude, arizeza ko 2016 uzarangira uruganda rutunganya inyama rwaratangiye kubakwa.

Hari hashize imyaka igera kuri ibiri ako karere gafite uwo mushinga kagombaga gufatanya n’abikorera ariko kuwushyira mu bikorwa byarananiranye.

Gusa, umuyobozi w’ako Murenzi Jean Claude aravuga ko noneho urwo ruganda rugiye gutangira kubakwa, ku buryo umwaka wa 2016 uzarangira hari ikimaze gukorwa.

Ati “Inyigo y’uruganda tuyimaranye umwaka urenga, hatagize igihinduka mu kwezi kwa cumi cyangwa kwa cumi n’abiri ruzaba rutangiye kubakwa. Ibyangombwa byose twakenera ubu twabibona mu buryo bworoshye.”

Kuba urwo ruganda rwaratinze kubakwa Minisiteri y’Ubucuruzi n’Inganda ibibona nk’ikibazo kikiri mu bashoramari bo mu Rwanda.

Minisitiri François Kanimba, uyobora iyo minisiteri, avuga ko mu Rwanda hari abashoramari bafite amafaranga, ariko ngo usanga abenshi badakozwa ibyo gushora mu nganda.

Ati “Dufite abashoramari b’Abanyarwanda batari bake kandi bafite amafaranga, ariko abenshi bashora mu mazu, bake cyane ni bo bafite imishinga y’inganda. N’abo weretse umushinga ufatika barakubwira ngo ibintu by’inganda birarushya ntitubizi. N’abashyira hamwe ubushobozi ugasanga bashora mu mazu gusa cyangwa amahoteri.”

Umuyobozi w’Urugaga rw’Abikorere mu Ntara y’Ihurasirazuba, Fabrice Habanabakize, na we yemeza ko umusanzu wabo nk’abikorera uhari.

N’ubwo Umuyobozi w’Akarere ka Kayonza atanga icyizere ko uyu mwaka uzarangira urwo ruganda rwaratangiye kubakwa, abikorera babigenzemo gake bishobora kurangira uwo mushinga n’ubundi udashyizwe mu bikorwa.

Cyakora Habanabakize Fabrice, uyobora urugaga rw’abikorera mu Burasirazuba, na we aremeza ko rugiye kubakwa vuba.

Ati “Turifuza gufatanya n’abashoramari kandi tumaze kubabona, n’akarere karemera ko tuzafatikanya. Umwaka utaha uzatangira hari ibikorwa twatangiye ku buryo uzajya kurangira rugeze ahantu hashimishije.”

Imibare ya Minisiteri y’Ubuhinzi n’Ubworozi igaragaza ko Intara y’Iburasirazuba yihariye 40% by’inka zororerwa mu Rwanda. Gusa, aborozi ngo ntibabona inyungu ifatika kuko inka borora zijyanwa ku masoko yo hirya no hino bazitakajeho byinshi inyungu ikagarukira abaziguze.

Basanga urwo ruganda nirwubakwa bizatuma bakora ubworozi kinyamwuga kuko noneho bazaba bizeye isoko ribaha inyungu kandi rihoraho.

Mbere ngo byari bigoranye ku baturage kweza igitoki gipima ibiro 10 ariko ubu bashobora kweza n’igipima ibiro 100.

Hashize imyaka igera kuri itanu iyo ndwara ya Kirabiranya yibasira urutoki igeze i Rwimishinya mu Murenge wa Rukara. Ku ikubitiro ngo yabanje kubazengereza batarayimenya ariko abafashamyumvire b’ikigo cy’igihugu gishinzwe ubuhinzi (RAB) baza kubabwira ko ari Kirabiranya.

Abo bafashamyumvire babwiye abaturage ko kurwanya iyo ndwara bisaba gutema insina zafashwe kugira ngo zitanduza izindi. Abaturage na bo ngo bahise biyemeza kujya bahana umuganda wo gutema izo nsina no kuzitaba kugira ngo ubwandu budakwirakwira no mu yindi mirima, bituma bayitsinda.

Nshimiyimana Claver ati “Twakoze ibishoboka byose [Kirabiranya] turayitsinsura ku buryo iyo umuntu ayibonye mu murima we ahuruza abaturanyi bakamufasha kuyirandura.”

Abatuye i Rwimishinya ngo guhuriza imbaraga hamwe byatumye batsinsura Kirabiranya mu rutoki.

Nyiransengimana Verena yongeraho ko iyo hari umuturage wabonye Kirabiranya mu murima we, abandi baturage bamuha umuganda kuko badakumiriye ishobora no kugera mu yindi mirima.

Ati “Twese turahaguruka tukajya gutanga umuganda tugacukura icyobo dutabamo imibyare yanduye kirabiranya, kandi wa murima tukabanza kuwuha akato ku buryo abagura ibitoki batajyamo kubitema kugeza igihe tubonye ko Kirabiranya yashizemo.”

Uretse gushyira imbaraga mu guhangana na Kirabiranya, abatuye i Rwimishinya banavuguruye ubuhinzi bw’urutoki babifashijwe n’abo bafashamyumvire ba RAB.

Mbere y’uko bavugurura ubuhinzi, ngo byari bigoranye kweza igitoki gipima ibiro 10, ariko ubu ngo bashobora kweza icy’ibiro 100.

Nshimiyimana ati “Kera umugore yajyaga gutema igitoki ugasanga ingutiya ayikubise ku mutwe kubera ibishokoro, ariko ubu ashobora kujya mu rutoki yambaye kamambiri kubera ko urutoki tuba twararukoreye rufite isuku.”

Mukamwezi yungamo, ati “Mbese ni nk’ikoranabuhanga ryaje ryo gukorera urutoki ku buryo igitoki kiba gipima ibiro nka 80 cyangwa 100 kandi mbere uwezaga igipima ibiro 10 yabaga ari umugabo.”

Akagari ka Rwimishinya ni kamwe mu tweza ibitoki byinshi mu Karere ka Kayonza. Ubuyobozi bw’Akarere bushima igitekerezo abo baturage bagize, bugashishikariza abandi kubigiraho kugira ngo bongere umusaruro.

Tumwe mu tuzu tw’amazi twatangiye kwangirika tutarakoreshwa.

Hashize imyaka isaga itanu abo baturage begerejwe umuyoboro w’amazi ariko kuva wuzuye ngo bavomye iminsi mike amazi ahita abura.

Uwitwa Kagabirwa Annet, utuye muri Buhabwa, agira ati “Baduhaye imiyoboro y’amazi ariko twayavomye nk’amezi atatu baratubwira ngo yapfuye. Kuva icyo gihe kugeza n’ubu twarashobewe n’utuzu tw’amazi tumwe twatangiye kwangirika.”

Kugeza ubu, abo baturage bavoma amazi yo mu idamu bahuriramo n’inka kandi na yo ngo abona umugabo agasiba undi.

Bari begerejwe umuyoboro w’amazi ariko ngo hashize imyaka irenga ine batayabona.

Ijerekani y’ayo mazi ngo igura amafaranga 350 bitewe n’uko ayo madamu bayavomamo ari kure, umunyonzi wabashije kujya kuyavoma akayagurisha abaturage kuri icyo giciro nk’uko Nduwayezu Bernard abivuga.

Ati “Dufite ikibazo cy’inzara y’amazi, dukora urugendo rw’amasaha atatu tugiye gushaka amazi kandi na yo aba asa nabi kuko tuyavoma mu idamu. Ijerekani igura 350, nk’umuntu ufite amatungo ntabwo biba byoroshye kugira ngo azabone amazi.”

Aba baturage bavuga ko babwiwe ko ku isoko ya Nyabombe aho ayo mazi yaturukaga ariho havutse ibibazo. Basaba ko ikibazo kiri kuri iyo soko cyakemurwa kuko kutagira amazi bibagiraho ingaruka nyinshi by’umwihariko ku bana bato.

Murenzi ati “Isoko ya Nyabombe ibonetse ibibazo byagabanuka. Nk’ubu abana bajya kuvoma mu gitondo bakavayo batinze kandi bagomba kujya kwiga bigatuma bamwe basiba ishuri.”

Kutagira amazi ngo bigira ingaruka ku bana kuko bituma bamwe basiba ishuri bagiye kuvoma.

Ubuyobozi bw’Akarere ka Kayonza buvuga ko imashini zoherezaga ayo mazi ziyavanye ku isoko ya Nyabombe zagiye zinanirwa bitewe n’uko zakoreshaga mazutu, kandi aho zohereza amazi hafite ubutumburuke butari buto.

Umuyobozi w’Akarere ka Kayonza Wungirije ushinzwe Ubukungu, Uwibambe Consolee, avuga ko hafashwe icyemezo cyo gusimbuza izo mashini izindi zikoresha amashanyarazi, kandi biri kwihuta ku buryo uyu mwaka uzarangira abo baturage barabonye amazi.

Ati “Amashanyarazi yarahageze ku isoko. Icyo dutegereje ni pompe yo gusunika amazi kandi turi kubyihutisha. Uyu mwaka urajya kurangira amazi yagezeyo.”

Semwogerere yarahiye ko azubahiriza Itegeko Nshinga rya Repubulika y’u Rwanda n’andi mategeko.

Nyuma yo gukora indahiro ye yemeza ko azubahiriza Itegeko Nshinga rya Repubulika y’u Rwanda n’andi mategeko u Rwanda rugenderaho, Semwogerere yavuze ko yiruhukije kuko yari amaze imyaka igera kuri 14 yifuza kuba Umunyarwanda.

Yagize ati “Ndabishaka cyane kuba Umunyarwanda. Nari maze imyaka 14 nifuza kuba Umunyarwanda. Nanjye ubu nshobora gufatanya n’abandi [Banyarwanda] mu guteza imbere igihugu cyacu.”

Umugore wa Semwogerere wari usanzwe ari Umunyarwandakazi, Nyinawumuntu Teddy, yavuze ko yishimiye kuba umugabo we ahawe ubwenegihugu bw’u Rwanda. Kuba atari abufite ngo byatumaga hari gahunda z’igihugu umugabo we ahezwamo akabona biramubabaje.

Semwogerere yahise ahabwa icyangombwa kigaragaza ko abaye Umunyarwanda.

Ati “Ndishimye birenze. Ubundi hari gahunda zimwe za Leta nk’amatora n’izindi gahunda atajyaga yivangamo kuko atari abyemerewe agaragara nk’umunyamahanga. Byari imbogamizi kuko uba ushaka kujyana na mugenzi wawe muri gahunda zose ariko twe ntibyashobokaga. Ndashima Leta y’u Rwanda kuko noneho imwakiriye ubu abaye Umunyarwanda.”

Semwogerere asanzwe afite ibikorwa mu Rwanda birimo n’ishuri ryisumbuye yatangije mu Karere ka Kayonza.

Umuyobozi w’ako karere, Murenzi Jean Claude, avuga ko bishimishije kuba abanyamahanga basigaye bifuza kuba Abanyarwanda, avuga ko ibyo byashobotse kubera imiyoborere myiza irangajwe imbere na Perezida Paul Kagame.

Semwogerere nyuma yo guhabwa ubwenegihugu, akanyamuneza ku maso kari kose.

Yasabye Semwogerere kugira uruhare mu bumwe bw’Abanyarwanda n’iterambere ry’igihugu muri rusange.

Ati “Yari asanzwe afite ibikorwa hano ariko abikora nk’umunyamahanga. Ubwo abaye Umunyarwanda turamusaba gufatanya n’Abanyarwanda mu guteza imbere igihugu cyacu kandi agaharanira no guteza imbere ubumwe bw’Abanyarwanda nk’abandi Banyarwanda bose.”

Uyu mugabo wahawe ubwenegihugu bw’u Rwanda yasezeranye byemewe n’amategeko n’umugore w’Umunyarwandakazi.

Umugore wa Semwogerere ngo yishimiye ko agiye kujya ajyana n’umugabo we muri gahunda zose z’igihugu.

Yavuze ko u Rwanda ari igihugu cyiza cyane yishimiye guturamo no gukoreramo, agasaba abarusebya kujya baruzamo bakirebera amakuru y’ukuri kw’ibibera mu Rwanda aho kubeshywa n’abafite inyungu zabo.

N’ubwo iyo Parike yazitiwe hari inyamaswa nk’ibitera zisimbuka uruzitiro zikirara mu mirima y’abaturage zikabonera, hakiyongeraho n’izindi zasigaye hanze y’uruzitiro nk’impongo n’ingurube z’ishyamba, kandi icyo kibazo ngo kimaze igihe kinini ariko cyaburiwe umuti.

Ibitera bisohoka muri Parike bikajya konera abaturage kandi ngo bisuzugura abagore kuko byirukana abagiye kubirinda

Kagabirwa Annet ati “Ibitera, impongo n’ingurube biratwonera ubu urebye nta kintu dusarura. Birajya ku myumbati bigatigisa bikawukuramo, ntibisiga ikigori, ikirayi mu butaka birakura, mbese twarashobewe”

Abaturage bavuga ko bagejeje iki kibazo ku buyobozi incuro nyinshi, ariko igisubizo bagiye bahabwa ngo ni icyo kurinda ibyo bitera babyirukana mu mirima ya bo. Abo byoneye na bo ngo ntacyo bafashwa iyo bagejeje ikibazo cyabo ku buyobozi nk’uko Bernard Nduwayezu abivuga.

Ati “Iyo tubibwiye abayobozi baratubwira ngo ntabwo ibitera byishyurirwa muzajye mubyirukana kandi ntako umuntu atagira. Usanga umugabo ajyayo agasimburanwa n’umugore ntitugire ikindi dukora”

Abagore n’abana bajya kurinda imirima yabo ngo ibitera bitabonera birabasuzugura bikabirukankana nk’uko bivugwa na Mukamurenzi umwe mu bahinga aho.

Kagabirwa yungamo ati “Njye nabirinzeho ariko binsaba kujyayo nambaye ipantaro y’umugabo wanjye n’ikote n’ingofero kugira ngo zitambona ndi umugore zikansuzugura. Uzi ukuntu zisuzugura abagore? Cyane cyane ibitera ni byo bituzengereje”.

Aba baturage bavuga ko iyo bishyuje ibyo bonewe babwirwa ko ibitera bitishyurirwa bagasabwa kujya babyirukana mu mirima

Umuyobozi w’akarere ka Kayonza wungirije ushinzwe imari n’iterambere ry’ubukungu, Uwibambe Consolee, asa n’udahuza n’aba baturage ku buremere bw’iki kibazo. Abaturage bavuga babimenyesha abayobozi ariko ntihagire igikorwa.

Uruzitiro rwa Parike y’Akagera rwashyizweho mu rwego rwo gukemura ikibazo cy’inyamaswa zari zarayogoje abaturiye iyo Parike.

Ubusanzwe umuturage wonewe n’inyamaswa za Parike y’Akagera abimenyesha ubuyobozi bw’ibanze bukajya gupima ubuso yonewe, hanyuma hagakorwa raporo yoherezwa mu kigo cy’igihugu cy’ingurane (Special Guarantee Fund) cyishyura abangirijwe n’inyamaswa.

Abaturage b’i Buhabwa bo bavuga ko iyo bonewe n’ibitera batemererwa kwishyuza, bagasaba ko na bo bajya bishyurwa cyangwa hagashakwa uburyo bwo kubikumira bikajya biguma muri Parike.

Umuyobozi wa Islam muri Kayonza, Sheikh Nshimiyimana Mubarak,avuga ko ntawabameneramo ngo abashore mu bikorwa by’iterabwoba.

Yabivuze tariki 06 Nyakanga 2016 ubwo umuryango wa Islam mu Karere ka Kayonza wizihizaga umunsi mukuru wa Eid-Il-Fitr.

Yagize ati “Turi maso kuko ibikorwa by’iterabwoba n’ubutagondwa bashobora kubirahura mu mahanga bikagera hano [mu Rwanda]. Twafashe ingamba zo gushyira imbaraga mu nyigisho duha urubyiruko rwacu kandi tukazigenzura cyane kugira ngo hatazagira utumeneramo aturutse i mahanga akaza kutwigisha iterabwoba n’ubwiyahuzi.”

Urubyiruko rwa Islam mu Karere ka Kayonza na rwo ruvuga ko inyigisho ruhabwa zatumye rusobanukirwa ko abakora ibyo bikorwa atari aba Islam b’ukuri.

Islam ifatwa nk’umufatanyabikorwa ukomeye w’Akarere ka Kayonza.

Uwitwa Hakizimana Hassan ati “Ntariga biriya bya Boko Haramu nanjye numvaga ari aba Islam kuko baba bafite amazina ya Islam, ariko bamaze kudusobanurira nahise mbona ko iriya mitwe ntaho ihuriye na Islam.”

Urundi rubyiruko rwa Islam rwemeza ko iyo dini ari idini y’impuhwe ku buryo nta muyoboke wayo nyawe wakora ibitero byambura ubuzima mugenzi we.

Umuyobozi w’Akarere ka Kayonza, Murenzi Jean Claude, witabiriye uwo muhango yasabye urubyiruko rwa Islam gukomeza kwirinda uwarushora muri ibyo bikorwa by’ubwiyahuzi n’iterabwoba.

Yavuze ko iyo dini ikorana neza n’ubuyobozi bw’akarere haba mu buryo bw’umutekano n’imibereho myiza y’abaturage.

Ati “Niba hari abantu dufatanya mu kurinda umutekano w’abaturage, aba-Islam baza mu ba mbere. Kugeza ubu hari aba-Islam basaga ibihumbi 10 mu karere kandi bose bamaze kwishyura mituweri. Mu by’ukuri dukorana neza.”

Umuyobozi w’Akarere ka Kayonza, Murenzi Jean Claude, asaba urubyiruko rwa Islam kwirinda uwo ari we wese warushora mu butagondwa.

Idini ya Islam isanzwe ari umwe mu bafatanyabikorwa b’Akarere ka Kayonza mu iterambere. Mu byo ikora harimo gufasha urubyiruko kwiga imyuga binyuze mu mashuri yubatse muri ako karere, ndetse no gufasha abatishoboye mu buryo bunyuranye.

By’umwihariko abayoboke ba Islam mu Karere ka Kayonza bashimiwe kuba badakunze gufatirwa mu byaha kimwe n’abandi baturage nk’uko abahagarariye inzeho z’umutekano muri ako karere babyemeje.

Ngabonziza ni umwe mu bahinga ibijumba bikungahaye kuri Vitamine A akaba n’umutubuzi w’imigozi yabyo.

Ubuhinzi bw’ibi bijumba ubusanzwe biba bifite ibara ry’icunga rihishije (orange) ntibumaze igihe kinini butangiye gukorwa kinyamwuga mu Rwanda.

Ababukora ariko, bashingiye ku byo bumaze kubagezaho, baravuga ko burimo amafaranga ku buryo bushobora guteza imbere nyirabwo akaba yakora n’indi mishinga minini, nk’uko Habumuremyi Jean Marie Vianney abivuga.

Ati “Bajyaga bavuga ngo ‘inkorabusa ibagara ibijumba’. Hari n’ukuntu wajyanaga ibijumba ku isoko ukabura abaguzi ukabimena ukitahira, ariko ubu tugurisha ibijumba n’imigozi ugasanga bifite igiciro kiri hejuru ku buryo ushobora kubihinga ukaba wakubaka n’inzu.”

Habumuremyi avuga ko mu gihembwe kimwe cy’ihinga, ashobora kugurisha imigozi igeza kuri miliyoni umunani z’amafaranga y’u Rwanda, kandi ugasanga atarahaza abayikeneye bose. Ku bwe, ngo nta kindi gihingwa abona gishobora kumuha amafaranga nk’ay’ibijumba.

Ngabonziza Egide, na we uhinga ibyo bijumba, avuga ko mbere abahingaga ibijumba bafatwaga nk’ababuze icyo bakora, ariko ubu ngo bimufitiye inyungu ku buryo ataterwa isoni no kuvuga ko ari umuhinzi w’ibijumba.

Kera uwabagaraga ibijumba bamwitaga inkorabusa ariko ubu ngo si ko bimeze.

Nubwo abahinga ibyo bijumba bataraba benshi mu Karere ka Rwamagana, Habumuremyi yatangiye gutekereza umushinga w’uruganda ruzajya rubitunganya bigakorwamo ibisuguti (biscuits).

Kubaka urwo ruganda ngo byaratangiye mu Murenge wa Karenge, akaba ateganya kurwagurira ku muhanda munini wa kaburimbo kugira ngo ababikeneye bajye babibona bitagoranye.

Ati “Imashini zimwe zatugezeho, izindi turacyazitegereje. Ibijumba tuzajya tubitunganyiriza i Karenge, ariko gukora ibisuguti bizajya bibera mu rundi ruganda tugiye kubaka hafi ya kaburimbo.”

Iyo u Rwanda rutabohorwa ntibari gutekereza guhinga ibijumba

Zimwe mu mvugo za kera nk’ivuga ko ‘inkorabusa ibagara ibijumba’, zumvikanisha ibijumba nk’ibintu bitagiraga agaciro mbere. Abahinga ibyo bikungahaye kuri Vitamini A mu Karere ka Rwamagana, bavuga ko gukora ubwo buhinzi babikesha ubuyobozi bwiza u Rwanda rwagize nyuma yo kwibohora.

Imigozi y’ibi bijumba ngo na yo igurishwa ku mafaranga ashimishije.

Ngabonziza ati “Mbere umuntu yabaga ari nyamwigendaho, ariko uyu munsi Leta iduha amahugurwa ikatuzanira abafatanyabikorwa tuba dukorana na bo umunsi ku munsi, na bo bakaduhugura ubwenge bugafunguka. Muri make, kwibohora byaradufashije, mbere se hari ahantu wari warigeze kumva ko ibijumba byavamo ibisuguti?”

Uretse urwo ruganda ruzajya rutunganya ibijumba bigakorwamo ibisuguti, Habumuremyi ngo aranateganya kubaka agasoko kazajya kagurishirizwamo ibijumba kugira ngo abatabasha kurya ibyo bisuguti babashe kubona aho bagurira ibijumba byo kurya kuko bikungahaye ku ntungamubiri.

Aba bahinzi baravuga ko barimo gushyira imbaraga mu guhinga ibyo bijumba kinyamwuga, intego ikaba ari uguhaza isoko ry’u Rwanda ndetse byaba ibijumba n’ibyo bisuguti bazajya babikoramo, bakabigeza no ku masoko yo mu karere u Rwanda ruherereyemo.

Ambasaderi w’u Rwanda muri Leta Zunze Ubumwe za Amerika, Mathilde Mukantabana, yamaganye iyo raporo.

Ambasaderi w’u Rwanda muri Leta Zunze Ubumwe za Amerika, Mathilde Mukantabana, mu gitondo cyo kuri uyu wa 1 Nyakanga 2016, yamaganye iyi raporo n’ibiyikubiyemo, avuga ko ibivugwa ku Rwanda binyuranyije n’ukuri.

Raporo icyo gihugu cyasohoye tariki 30 Kamena 2016, ivuga ko u Rwanda rukomeje gukorerwamo ubucuruzi bw’abantu ndetse rukaba n’inzira banyuzwamo bajya gucuruzwa mu bindi bihugu.

Iyi raporo ivuga ko mu Rwanda hagaragara “ubucuruzi bw’igitsina”, bamwe mu bahungu n’abakobwa bakora akazi ko mu ngo bakoreshwa ubusambanyi bw’agahato kandi rimwe na rimwe ntibahembwe.

Ivuga kandi ko bamwe mu mpunzi z’Abarundi bahungiye mu Rwanda kuva mu mpera z’umwaka wa 2015, bagiye bashorwa mu bikorwa by’ubucuruzi bushingiye ku gitsina, bamwe bakajya gucuruzwa mu bihugu bituranye n’u Rwanda birimo na Uganda

Ambasaderi Mukantabana yamaganiye kure ibivugwa muri iyo raporo, avuga ko ishinja u Rwanda ibinyoma.

Yagize ati “Ibyo iyo raporo ivuga ku gihugu cyanjye ntaho bihuriye n’ukuri kuri mu gihugu. Ishingiye cyane ku nyungu z’udutsiko tw’abantu bafite inyungu za politiki.”

Ambasaderi Mukantabana avuga ko raporo zidasobanutse kandi zishingiye ku marangamutima zakomeje gukoreshwa n’abantu bashaka kwambika u Rwanda isura mbi birengagije ukuri nyako kuri mu gihugu.

Avuga ko Leta y’u Rwanda yashyizeho uburyo bufatika bwo kurinda no kwita ku mibereho myiza y’impunzi z’Abarundi.

Yagize ati “Imbaraga dushyira mu kwita ku bavandimwe bacu bo mu karere basaba ubuhungiro mu bice bitandukanye by’u Rwanda zishingiye ku ndangagaciro zacu kuva kera kurusha uko zashingira kuri raporo iyo ari yose yakozwe n’amahanga.”

Yongeraho ko Leta y’u Rwanda yanashyizeho ingamba zifatika zigamije kurinda abaturage bayo icyo kibazo cy’icuruzwa ry’abantu, agasanga iyo raporo ivuga ibinyuranye n’ukuri kuri mu gihugu.

Ku bwa Ambasaderi Mukantabana, ngo ibikubiye muri iyo Raporo birabangamira imbaraga isi yashyize mu kurwanya ubwo bucuruzi, u Rwanda rukaba runabifitemo ubushake kurusha na Leta Zunze Ubumwe za Amerika kuko rurinda abaturage barwo, by’umwihariko abagore n’abakobwa ngo badashorwa mu bucuruzi bw’abantu n’ihohoterwa rishingiye ku gitsina.

Ati “Namaganye nivuye inyuma iyi raporo, imyanzuro yayo ndetse n’ibirego by’ibinyoma biyishyigikira.”

Iyi Raporo ishyira mu majwi ibihugu bisaga 40 byo ku migabane ya Afurika, Uburayi na Aziya. Mu bindi bihugu byo ku mugabane wa Afurika bigaragazwa n’iyo Raporo harimo Namibia, Niger, Nigeria, Senegal, Sierra Leone, Afurika y’Epfo na Sudani zombi.

Ababyeyi, bagizwe incike na Jenoside yakorewe Abatutsi, batujwe i Fumbwe mu ifoto y’urwibutso n’abayobozi batandukanye.

Urwo rugo rwatashywe kuri uyu wa 30 Kamena 2016, ruje rwiyongera ku zindi zubatswe mu turere twa Nyanza, Kamonyi, Rulindo, Huye na Kayonza zatujwemo abandi babyeyi bagizwe incike na Jenoside yakorewe Abatutsi mu 1994.

Abatujwe mu rugo rw’i Fumbwe bavuga ko urwo rugo ari ikindi kimenyetso kibagaragariza ko Leta y’u Rwanda yitaye ku baturage bayo, by’umwihariko ababyeyi bagizwe incike na Jenoside.

Mukandoli Edissa ati “Turashima Perezida wacu na Madame we badukuye mu rwobo none ubu tubayeho neza. Twari mu buzima bubi [abakoze Jenoside] baratumariye inka batumarira imiryango, Kagame aratuzamura, aduha amata none anatugejeje aho turyama tukiruhutsa. Imana izamutubesherezeho.”

Uru ni rwo rugo ababyeyi bgizwe na Jenoside incike b’i Rwamagana batujwemo ahitwa i fumbwe.

Ababyeyi batujwe muri urwo rugo baturuka mu mirenge inyuranye y’Akarere ka Rwamagana. Umuyobozi wa AVEGA Agahozo, Mukabayire Valerie, avuga ko kubatuza hamwe ari ukugira ngo bitabweho bari kumwe kuko bitoroshye kubitaho bose batatanye.

Ati “Iyo umuntu ari mu nzu ye afite imyaka 80 nta kana afite, ntashobora kwitekera, ntashobora kwivomera amazi, ni yo mpamvu habayeho gahunda yo kubazana hamwe kugira ngo bitabweho bari hamwe, bakorerwe byose kuko baba batagishoboye kubyikorera.”

Inzu batujwemo irimo ibyangombwa by’ibanze byose.

Inzu abo babyeyi b’incike batujwemo yubatswe ku bufatanye bwa AVEGA n’umuryango mpuzamahanga w’Ubudage wita ku butwererane n’iterambere rirambye (GIZ).

Umuyobozi w’uwo muryango mu Rwanda, Bodo Immink, yavuze ko ingaruka za Jenoside yakorewe Abatutsi mu Rwanda zageze no ku Budage kuko hari abakozi 40 bakoreraga GIZ bazize iyo Jenoside.

Yavuze ko bazakomeza kwifatanya n’u Rwanda mu guharanira imibereho myiza y’abacitse ku icumu rya Jenoside, anashimira Leta y’u Rwanda intambwe imaze gutera mu kubaka igihugu nyuma y’imyaka 22 ishize.

Abo babyeyi banahawe n’ubundi bufasha n’abanyamuryango ba AVEGA.

AVEGA ivuga ko hari ababyeyi bagera kuri 400 bakeneye gutuzwa muri ubu buryo, kuri ubu hakaba hamaze kubakirwa 82 ku buryo hagikenewe ubushobozi kugira ngo n’abandi batuzwe hamwe.

Umuyobozi Wungirije mu Kigo cy’Igihugu cy’Imiyoborere,RGB, Ambasaderi Fatuma Ndangiza, yasabye abayobozi b’inzego z’ibanze gukomeza kuba hafi y’abo babyeyi batujwe muri iyo nzu.

Mu kiganiro n’abanyamakuru, Guverineri w’Intara y’Iburasirazuba aherutse kunenga abayobozi babuza abaturage kuvugana n’itangazamakuru.

Aba baturage bavuga ko hari abaherutse kuvugana n’abanyamakuru, Umunyamabanga Nshingwabikorwa (gitifu) w’Akagari ka Buhabwa n’abayobozi mu zindi nzego bababwira nabi.

Icyo gihe ngo gitifu w’akagari n’abo bayobozi bashinjaga abo baturage kuba ari bo bazanye abanyamakuru kandi batari basanzwe bagera muri ako gace.

Umwe muri bo aganira n’umunyamakuru wa Kigali Today, yagize ati “Abanyamakuru baraje badusanga hano nk’uko nawe uhadusanze. Ku mugoroba, gitifu w’akagari yaje gukoresha inama avuga ngo agomba kumenya umuntu wazanye abanyamakuru ngo ntibari basanzwe bagera muri Buhabwa.”

Undi muturage utarashatse ko amazina ye atangazwa yakomeje agira ati “N’ubu turimo kuvugana, dufite impungenge ko nibamenya ko twavuganye n’umunyamakuru bishobora kutumerera nabi.”

Kimwe mu byo abaturage bavuga ko ubuyobozi bwikanga bigatuma butorohera abavuganye n’itanganzamakuru, ni amafaranga yakusanyijwe n’abaturage ku munsi w’Umuganura wa 2015 hagamijwe kwishyurira imiryango itishoboye ubwisungane mu kwivuza, ariko bakaba bataramenye irengero ry’ayo mafaranga kuko abagombaga guhabwa izo mituweli batazibonye.

Umunyamabanga Nshingwabikorwa w’Akagari ka Buhabwa, Uwizeye Fred, uvugwaho kutorohera abaturage bavuganye n’itangazamakuru, avuga ko nta muturage w’ako kagari wigeze ahohoterwa kuko yavuganye n’itangazamakuru ndetse ngo nta n’uwo yigeze abuza kuvugana na ryo.

Ku kibazo cy’ayo mafaranga, Uwizeye avuga ko abaturage bayakusanyije ari ayo kubakorera ubusabane kandi ngo bwarakozwe.

Avuga ko amafaranga yo kwishyurira mitiweli iyo miryango ikennye yagombaga gutangwa n’ikigo cyakoraga ubucukuzi bw’amabuye y’agaciro ahitwa Kirimbari ariko kiza kwirukana abakozi bacyo batarabasha gutanga amafaranga bari bemereye akagari, bituma izo mituweli zitaboneka.

Murangira Saveri uyobora Umurenge wa Murundi urimo n’Akagari ka Buhabwa, avuga ko nta muntu n’umwe ukwiye kubuza umuturage kuvugana n’itangazamakuru, kimwe n’uko nta munyamakuru ukwiye kubuzwa kuvugana n’abaturage.

Ikibazo cy’abayobozi babuza abaturage kuvugana n’itangazamakuru cyagaragaye mu bice bitandukanye by’Intara y’Iburasirazuba.

Guverineri wayo, Uwamariya Odette, mu kiganiro aherutse kugirana n’abanyamakuru, tariki 7 Kamena 2016, yavuze ko abayobozi bimana amakuru n’ababuza abaturage kuvugana n’itangazamakuru bagomba kwisubiraho.

Icyo gihe, yagize ati “Kwimana amakuru ntabwo ari gahunda y’intara, iyo utayatanze itangazamakuru rirayishakira rimwe na rimwe rikayahabwa n’abatagombye kuyatanga.”

Yakomeje agira ati “Niba n’umuntu aguhamagaye kuri telefoni agusaba amakuru, yamuhe kuko ni kimwe mu bigufasha kumenyekanisha ibyo ukora. Aho [kwimana amakuru] biri bisubireho, dufite n’itegeko ridutegeka kuyatanga.”

Aba ni bamwe mu bana bigaga muri iri shuri ryahagaritswe.

Iryo shuri ryubakishije amatafari ya rukarakara ryigagamo abana basaga 100. Abanyeshuri baryigiragamo ariko bigiragamo bigaragara ko imirimo yo kuryubaka yari igikomeza.

Bigaragarira ku ko ibyinshi mu byumba byaryo bitarashyirwaho inzugi n’amadirishya, nta gishahuro kiraterwa kuri izo rukarakara nta n’agasima karimo, ku buryo abana bigiraga mu ivumbi kandi bicara ku ntebe zizwi nk’“urubaho” na zo zigaragara nk’izidahagije.

Umunyamabanga Nshingwabikorwa w’Umurenge wa Murundi, Murangira Saveri, avuga ko ba nyir’iryo shuri baritangije bafite gahunda yo guteza imbere agace ririmo kuko ari ahantu hatamaze igihe hatuwe.

Ishuri ryari ricyubakwa nubwo abanyeshuri bigiragamo.

Gusa ngo ubuyobozi bw’umurenge bwarikoreye igenzura, busanga ritujuje ubuziranenge bahita basaba ko rihagarika gukora.

Agira ati “Ni umuntu washatse kuzana amajyambere ariko natwe tumaze kurisura twasanze ritujuje ubuziranenge turarihagarika kugira ngo ribanze ryuzuze ibyangombwa. Ntabwo ari ishuri abana bakabaye bigiramo.”

Ibaruwa umurenge wandikiye iryo shuri urihagarika tariki 26 Gicurasi 2016, ariko ubwo twarisuraga tariki 16 Kamena 2016 twasanze abana biga.

Izi ni intebe abana bicaragaho mu mashuri na zo bigaragara ko zidahagije.

Umuyobozi waryo, Pastor Murenzi Joseph Sande, avuga ko baritangije nyuma yo kubona ko nta shuri ryigenga ryabaga muri ako gace, ku buryo hari ababyeyi boherezaga abana kwiga mu mashuri yigenga yo mu mujyi wa Kayonza mu bilometero bisaga 40.

Ati “Hari ishuri ryatangiye mbere amashuri yigenga adahari, ababyeyi bafite ubushobozi bakohereza abana babo kwiga i Kayonza (mu mujyi), abandi bakabohereza Nyagatare.

Abadafite ubushobozi badusabye ko twabafatira abana turavuga ngo aho kugira ngo bicare batiga twabafata nubwo tutararangiza kubaka, bakaba biga.”

Iyi ni ibaruwa ishuri ryandikiwe n’umurenge urihagarika.

Umuyobozi w’iri shuri buvuga ko bahagaritse ishuri nk’uko bari babisabwe n’ubuyobozi bw’umurenge.

Abana bagera ku 119 baryigagamo ngo bajyanywe mu ishuri rya Leta byegeranye na nyir’iryo shuri ryahagaritswe asabwa kubanza kurangiza imirimo yo kubaka.

Umunyamabanga Nshingwabikorwa w’Umurenge wa Murundi avuga ko iryo shuri ryasabwe gufunga kuko ritubatse, rikaba ritujuje ibisabwa.

Kubaka Gare ya Rwamagana, umwe mu mihigo yadindiye mu Karere ka Rwamagana.

Imihigo yadindiye cyane muri uyu mwaka w’ingengo y’imari wa 2015-2016 ubura iminsi mike ukarangira muri iyi Kamena, ni iyo kubaka gare no kugeza amazi mu gace kagenewe kubakwamo inganda.

Umuyobozi w’akarere, Mbonyumuvunyi Radjab, avuga ko ku muhigo w’amazi, hari amafaranga akarere kagombaga gutanga kandi ngo yari ahari, ayagombaga gutangwa n’ikigo cya WASAC bari bawufatanyije arabura, bituma amazi atagezwa muri ako gace.

Ku muhigo wo kubaka gare akarere kari gafatanyije n’ikigo cya RFTC, na bwo ngo akarere kagombaga kwimura abatuye aho gare izubakwa kandi ngo byarakozwe, RFTC ntiyubaka, nk’uko Mbonyumuvunyi abyemeza.

Umuyobozi w’Akarere ka Rwamagana, Mbonyumuvunyi Radjab.

Ati “Umuhigo wa gare wagize ibibazo by’inyigo n’impungenge ko ibiciro by’amafaranga imodoka zinjira muri gare zishyura bishobora guhinduka, bikaba ikibazo kuri bo.”

Mbonyumuvunyi avuga ko bagiranye ibiganiro na Minisiteri ifite ubwikorezi mu nshingano, ikigo ngenzuramikorere cy’imirimo imwe n’imwe ifitiye igihugu akamaro (RURA) ndetse na RFTC igomba kubaka gare, kandi ngo bageze ku mwanzuro mwiza ku buryo hasigaye kunoza inyigo, imirimo yo kubaka igatangira.

Ikigo cya RFTC na cyo cyemeza ko bamaze kugirana ibiganiro, nk’uko Umunyamabanga Nshingwabikorwa wacyo, Anita Mukamutoni abivuga. Ati “Nta kibazo gihari kugeza ubu, hari ibyo twagombaga kubanza kumvikanaho kandi ubu biri ku murongo.”

Akarere kamaze kwishyura ba nyir’izi nzu ziri aho gare igomba kubakwa ariko umufatanyabikorwa wagombaga kuyubaka ntaratangira.

Kuba iyo gare itarubakwa biracyabangamira abayikoresha, baba abashoferi n’abagenzi.

Umushoferi witwa Nkusi agira ati “Iyi gare iratubangamiye, cyane cyane mu gihe cy’imvura. Hari igihe usanga harimo n’ubucucike bukabije ku buryo umuntu abura n’uko aparika.”

Abagenzi na bo bavuga ko babangamiwe n’iyo gare, bagasaba ko hagira igikorwa.

Kalimba Martin ati “Igihe cy’imvura harekamo ibiziba, abagenzi tukabura aho twugama. N’imiparikire y’imodoka ntiba isobanutse, ntiwamenya ngo imodoka iyi n’iyi irajya hehe, mbese ni akavuyo.”

Muri iyi Gare ya Rwamagana harafunganye kandi ntikoze.

Ntitwabashije kuvugana n’ikigo cya WASAC ngo gitangaze icyo giteganya kuri uwo muhigo w’amazi, ariko Umuyobozi w’Akarere ka Rwamagana, avuga ko cyemeye kuwushyira mu ngengo y’imari y’umwaka utaha wa 2016 - 2017 uzatangira muri Nyakanga.

Umuyobozi wungirije wa IRDP avuga ko inkomoko y’amakimbirane yo mu miryango ihera mbere y’urushako.

Gushakana kw’abantu bataziranye neza no gukurikira imitungo ngo bikunze guteza amakimbirane mu miryango, iyo abantu babanye bagasanga ibyo bari bakurikiye mu rushako atari byo babonye.

Kuri uyu wa kane tariki 16 Kamena 2016, Bugingo Irené, umuyobozi wungirije wa IRDP yabitangaje nyuma y’uko abayobozi b’inzego zitandukanye mu Karere ka Rwamagana bari bamaze kumurikirwa ibyavuye muri ubwo bushakashatsi.

Habimana asanga bamwe mu babyeyi bagira uruhare mu makimbirane yo mu miryango iyo basumbanyije abana.

Yagize ati “Abantu bashakana bataziranye, ababyeyi bataziranye. Mwamara kubana ugasanga hari ibyo mudahuriyeho bigatangira kubateranya. Ikindi hari igihe umuntu ashaka undi akurikiye umutungo, wagerayo ugasanga nta mutungo afite cyangwa washize amakimbirane agatangira.”

Amakimbirane mu miryango ngo agaragara mu bice bitatu, harimo ayo hagati y’ababyeyi bombi, hagati y’ababyeyi n’abana no hagati y’abana ubwabo.

By’umwihariko amakimbirane hagati y’abana n’ababyeyi no hagati y’abana ababyeyi ngo bayagiramo uruhare, kubera gusumbanya abana, nk’uko Habimana Claude wiga muri Lycee du Lac Muhazi abivuga.

Abayobozi z’inzego zitandukanye mu karere ka Rwamagana bamurikiwe ibyavuye mu bushakashatsi bwa IRDP.

Ati “Nk’abana iyo bagiye ku ishuri bamwe ukabaha ibikoresho biruta iby’abandi usanga hajemo amakimbirane hagati y’abana bamwe bibaza impamvu bahawe ibikoresho bike, bakanibaza impamvu umubyeyi abasumbanya bikabyara amakimbirane.”

Bugingo avuga ko hakwiye gushyirwa imbaraga mu mugoroba w’ababyeyi, ibiganiro bihuza abashakanye mu nzego zitandukanye bigahabwa ingufu, ariko by’umwihariko abitegura gushakana bagahabw ainyigisho nyinshi mbere yo kubana kugira ngo iki kibazo gicike.

Umunyamabanga nshingwabikorwa w’Umurenge wa Gahengeri, Mbonyi Samson we avuga ko n’ubwo izo nyigisho n’ibiganiro bikwiye kongerwamo imbaraga ababyeyi bakwiye gutoza abana gukora bakiri bato.

Ati “Ababyeyi bakwiye gutoza abana gukora bakiri bato batazajyana ubunebwe mu rushako, kuko burya n’ubwo urugo rwubakiye ku rukundo inking ya kabiri ni umutungo.”

Ubu bushashatsi bwakorewe turere 11 tw’igihugu, mu bindi byagaragaye nk’ibikunze guteza amakimbirane mu miryango ngo harimo no kuba bamwe mu bashakanye basigaye baraheranwa n’akazi, ku buryo kuzuza inshingano z’ibanze z’urugo binanirana.

Ibigori na soya abaturage bongeye guhinga muri iki gishanga ntibirera ku buryo basaba ubufasha mu gihe bategereje ko byera.

Umunyamabanga wa leta ushinzwe ubuhinzi muri Minisiteri y’Ubuhinzi n’ubworozi, Tony Nsanganira, abivuze nyuma y’uko bamwe mu batuye i Rwinkwavu bagaragarije ko bafite inzara batewe no kubuzwa guhinga igishanga cya Rwinkwavu bakeshaga amaramuko.

Hari hashize hafi imyaka ibiri badahinga, bitewe n’uko amazi agera muri icyo gishanga yari yafunzwe ayoborerwa mu muyoboro umwe kugira ngo igishanga gitunganywe kizajye gihingwamo umuceri.

Ibyo ngo byatumye icyo gishanga kibura amazi abaturage ntibongera guhinga bituma bagira inzara nk’uko Ntakirutimana Anastase wo mu kagari ka nkondo abivuga.

Nsanganira yasabye ko leta yabagoboka kubera amapfa abugarije.

Ati “Umushinga wa RCCP ugitangira gutunganya igishanga amazi bayayoboreye mu muyoboro umwe igishanga cyose kiruma bitera inzara kuko tutongeye guhinga. Nk’iki gihe akadobo k’ibishyimbo kabaga kagura 700Frw ariko ubu karagura 1700Fre.”

Iyi nzara ngo yatumye bamwe mu baturage basuhuka, ku buryo hari imiryango yagiye muri Uganda inzu zigasigara zikinze, nk’uko bivugwa n’uwitwa Kubahoniyesu Elias.

Ati “Abantu bagiye bakinga inzu baragenda nta n’umuntu bazisigiye cyangwa ngo bazikodeshe, ugeze mu mudugudu wacu wa Kajevuba niho wabibona, bamwe baragiye i Bugande.”

Abaturage ubu bemerewe kongera guhinga mu gishanga cya Rwinkwavu, tariki 9 Kamena 2016 bongeye gufungurirwa amazi. Hashize igihe gito bahinzemo ibigori na soya, bakaba basaba ubufasha mu gihe bitarera.

Uyu muturage yemeza ko bamwe mu baturanyi be basuhukiye muri Uganda kubera inzara.

Nsanganira avuga ko abo bizagaragara ko bafite ikibazo bazahabwa imfashanyo y’ibiribwa, ariko bakazanahabwa imirimo izabafasha guhangana n’iyo nzara.

Ati “Dufite ikigega cy’igihugu kigoboka abahuye n’ikibazo cy’izuba. Imiryango bigaragara ko yahuye n’ikibazo dukora muri icyo kigega tukayigoboka, ariko abantu bahabwa ibiribwa bagahabwa n’indi mirimo kugira ngo batumva ko bahawe iby’ubuntu.

Iyo mirimo ni yo twizera ko ivamo ibizatuma iyo nzara batazongera kuyigira.”

Umurenge wa Rwinkwavu ni umwe mu mirenge y’Uburasirazuba ikunze kwibasirwa n’izuba ryangiriza abaturage. Mu rwego rwo guhangana n’icyo kibazo ubuyobozi bwatangiye gahunda yo gushishikariza abaturage kuhira.

Perezida Kagame n’abayobozi ba Coca Cola mu gufungura Ekecenter ya Gishari.

Babivuze tariki 13 Kamena 2016 nyuma y’uko Perezida wa Repubulika Paul Kagame yari amaze gutaha ku mugaragaro iyo Ekocenter yubatswe na Coca Cola n’abandi bafatanyabikorwa bayo.

Ekocenter ni umushinga uzafasha abaturage kubona serivisi zitandukanye zirimo amashanyarazi akomoka ku mirasire y’izuba, serivisi za internet n’amazi meza, ndetse ukaba waranatanze ibikoresho bigezweho by’ubuvuzi mu Kigo Nderabuzima cya Ruhunda.

Kuri ibyo haniyongeraho ikibuga cy’umupira w’amaguru cyubatswe i Ruhunda gifite amatara ashobora gutuma gikinirwaho na nijoro.

Coca Cola mu mushinga mugari wa Ekocenter yahaye abaturage b’i Gishari amazi meza.

Ubwo Perezida Kagame yasuraga ibikorwa by’uwo mushinga, Umuyobozi w’Ikigo Nderabuzima cya Ruhunda, Barahira Jerome, yavuze ko bahawe ibikoresho bigezweho birimo ibitanda n’izindi mashini nka ‘ecographie’ bizifashishwa mu buvuzi, by’umwihariko bikazafasha abagore bajya kubyarira muri icyo kigo nderabuzima.

Yanavuze ko bahawe amashanyarazi akomoka ku mirasire y’izuba ku buryo iyo umuriro usanzwe ubuze bitakiba ikibazo muri icyo kigo nderabuzima.

Abaturage bavuga ko izo serivisi begerejwe na Ekocenter zigiye gutuma bavuduka mu iterambere. Niyonsenga Christine ati “Mu kigo nderabuzima cyacu ubu urahasanga igitanda utasanga no muri CHUK, kandi n’amazi ubu tugiye kujya tuyabona asukuye mu gihe guteka aya WASAC byagoranaga kubera ikibazo cy’inkwi.”

Yahaye n’Ikigo Nderabuzima cya Gishari ibikoresho bigezweho mu buvuzi.

Ntakirutimana Fidele w’imyaka 95 we avuga ko kuva yabaho atigeze abona amajyambere nk’ayo bari kwegerezwa i Ruhunda. Ati “Imana yaduhaye Kagame ihabwe icyubahiro yarakoze.”

Umuyobozi Mukuru wa Coca Cola ku Isi, Muhtar Kent, yavuze ko u Rwanda ari igihugu kiri gutera imbere ku buryo nta muntu utakwishimira gufatanya n’u Rwanda muri urwo rugendo rw’iterambere.

Ati “U Rwanda ruri gutera imbere kandi Coca Cola yishimiye gufatanya n’u Rwanda muri urwo rugendo. […] Mperuka mu Rwanda mu mwaka wa 1998, ariko ubu ndabona impinduka nyinshi mu iterambere, ndashimira Perezida Kagame ku bw’imiyoborere myiza yazanye muri iki gihugu.”

Bubakiye Ekocenter igizwe n’ibikorwa bizabafasha kurushaho kwihuta mu iterambere.

Mu ijambo rye Perezida Kagame yashimiye Coca Cola n’abandi bafatanyabikorwa bagize uruhare muri uwo mushinga, avuga ko iterambere rirambye ritagerwaho hatabayeho ubufatanye bwa za guverinoma n’abikorera.

Ati “Intego z’iterambere rirambye isi yiyemeje umwaka ushize ntizagerwaho hatabayeho ubufatanye. Izo ntego ntizagerwaho hifashishijwe amafaranga ya Leta yonyine, ibi birasobanura impamvu hakenewe ubufatanye bwa za guverinoma, abikorera na sosiyete sivili kugira ngo izo ntego zigerweho.”

Muri iyo Ekocenter hatangirwamo izindi serivisi zirimo n’iza mudasobwa abaturage bajyaga babona ari uko bagiye kuzishaka mu mujyi wa Rwamagana.

Abayobozi ba Coca Cola bishimiye umubano n’ubufatanye bafitanye n’u Rwanda.

Perezida Kagame yabwiye abaturage ko kugira ngo ibyo bikorwa bibafashe kugera ku majyambere bakwiye kumenya kubikoresha, kandi bakabifata neza kugira ngo n’igihugu gikomeze gutera imbere muri rusange.

Abaturage bishimiye ibyo bikorwa.

Andi mafoto

Senateri Tito Rutarema yasabye abanyamuryango ba FPR kubaha umuturage kuko ari ’imana ya FPR’.

Babisabwe kuri iki cyumweru tariki 12 Kamena 2016 na Senateri Tito Rutaremara usanzwe ari na Komiseri muri FPR, mu nteko rusange y’iryo shyaka ku rwego rw’Intara y’Uburasirazuba yateraniye i Rwamagana.

Yagize ati “Umuturage ni imana ya FPR, ibyo dukora byose bigomba gushingira ku muturage kugira ngo atere imbere, turiho ku bw’umuturage kandi umuturage agomba kubahwa.”

Iyo nteko rusange yateranye mu gihe abanyamuryango ba FPR bavuga ko bagenda batera imbere babikesha impanuro bahabwa n’ubuyobozi bw’iryo shyaka.

Abanyamuryango ba FPR mu Burasirazuba barahamagarirwa gukora imishinga y’ishoramari.

Ngarambe Faro wo mu Murenge wa Kigabiro mu Karere ka Rwamagana, avuga ko amaze kuba umuhinzi wa kijyambere abikesha inyigisho n’ingendoshuri yagiyemo abifashijwemo na FPR.

Mu myaka 10 ishize ngo ntiyabashaga kwishyurira abana amashuri, ariko ubu abona amafaranga atari munsi y’ibihumbi 500 buri kwezi asarura mu rutoki yahinze.

Ati “Iyo turi mu mahugurwa badukangurira kwiteza imbere tuvugurura ubuhinzi n’ubworozi. Iyo nsaruye ibitoki ugereranyije sinabura nk’ibihumbi 500Frw ku kwezi”

Iterambere bamwe mu banyamuryango ba FPR bavuga ko bagezeho ngo ntirikwiye kuba ari bo rigarukiraho gusa, nk’uko Senateri Rutaremara yabibasabye.

Ngarambe Faro ngo yinjiza nibura ibihumbi 500 ava muri uru rutoki yahinze abikesha inama yungukiye muri FPR.

Mu Burasirazuba hagiye hagaragara ikibazo cy’amapfa bigatuma bamwe mu baturage barumbya.

Guverineri w’Uburasirazuba Uwamariya Odette, unakuriye FPR mu mu ntara, avuga ko abanyamuryango bagiye gukora ubukangurambaga ku baturage kugira ngo abaturiye ibiyaga n’imigezi buhire imyaka ya bo mu rwego rwo guhangana n’icyo kibazo.

Uretse guharanira icyateza umuturage imbere, abanyamuryango ba FPR mu Burasirazuba banasabwe kwishyira hamwe bagakora amakompanyi y’ishoramari [Investiment groups] kugira ngo barusheho kugira uruhare mu iterambere ry’igihugu.

Basabwe kubaka inzego kandi bagateza imbere ibikorwa bya leta, by’umwihariko bagafatanya n’umukuru w’igihugu kugira ngo arusheho guteza imbere Abanyarwanda.

Imbuto Foundation yongerera urubyiruko ubumenyi n’ubushobozi.

Ayo mahugurwa azibanda ku ngingo zitandukanye zirimo kuganiriza urubyiruko ku miyoborere n’iterambere. Ari kandi muri gahunda yo gutoza urubyiruko uwo muryango usanzwe ukora mu Rwanda kuva mu mwaka wa 2007, hagamijwe gutinyura urubyiruko, kurwigisha no kurwongerera ubushobozi.

Ayo mahugurwa azahabwa urubyiruko rubarirwa muri 650. Ari gutangwa mu byiciro ku bufatanye n’umuryango ‘Resonate’ usanzwe uhugura abagore mu bijyanye no kwiteza imbere kugira ngo babe umusemburo w’impinduka mu miryango yabo.

Icyiciro cya mbere cy’ayo mahugurwa cyahurije hamwe urubyiruko rugera ku 180. Rwasobanuriwe ibigize imiyoborere myiza n’indangagaciro zikwiye kuranga umuntu ufite icyerekezo kizima.

Ayla Schlosser wo muri Resonate aganira n’urubyiruko rwitabiriye ayo mahugurwa.

Buri wese mu bitabiriye ibyo biganiro asangiza bagenzi be indangagaciro ze akanasobanura impamvu yumva zikwiye kumuranga yifashishije ingero z’ibikorwa yagiye akora mu rwego rwo kuzisigasira.

Zimwe mu ndangagaciro bagiye basangizana zagarukaga ku kamaro ko kubaka umuryango ufite ubushobozi, gufasha abandi guhangana n’ingorane bahura na zo ndetse no guteza imbere ibiganiro bigamije amahoro.

Solange Impanoyimana na we wo muri Resonate asobanurira urubyiruko ku kiganiro cyo kubaza no gusubiza (interviews).

Umuryango Imbuto Foundation urizihiza isabukuru y’imyaka 15 muri uyu mwaka. Mu gihe umaze, wagiye ukora ibikorwa bigamije guteza imbere imiryango ikennye binyuze mu burezi, ubuvuzi n’izindi gahunda ziteza imbere imibereho myiza y’abaturage.

Buri mwaka uwo muryango utegura ihuriro ry’urubyiruko riganirirwamo ingingo zitandukanye zirimo iz’iterambere n’imibereho myiza y’abaturage, ubukangurambaga, guhanga imirimo, kwigira ndetse n’ubumwe n’ubwiyunge.

Bamwe mu bitabiriye ayo mahugurwa mu mwitozo wo guhagarara ku buryo bisubizamo intege zibafasha gukomeza ibyo barimo.

Uyu mwaka urubyiruko rwagiye ruhurizwa mu mahugurwa yo kurwongerera ubushobozi, hibandwa ku rubyiruko ruri mu myuga itandukanye n’abanyeshuri bo mu mashuri makuru na za kaminuza bari hagati y’imyaka 20 na 29 bo mu ntara zose n’Umujyi wa Kigali.

Aya mahugurwa kandi agamije gushishikariza urubyiruko kugira uruhare mu miyoborere, by’umwihariko abanyeshuri bakaba bahabwa amasomo yabafasha kwitegura kuzinjira mu mirimo inyuranye nyuma yo kurangiza amashuri.

Ubuyobozi bw’Intara y’Iburasirazuba bwagiranye ikiganiro n’abanyamakuru.

Yabivugiye mu kiganiro yagiranye n’abanyamakuru ku cyicaro cy’iyi ntara, ku mugoroba wo kuri uyu wa Kabiri, tariki 7 Kamena 2016, ari kumwe n’abayobozi b’uturere tugize iyo ntara na bamwe mu bakozi bayo.

Abanyamakuru babajije niba hari uwatanze itegeko ryo kudatanga amakuru mu bice bimwe na bimwe by’iyo ntara, kuko hari aho bagera bakimwa amakuru.

“Mu karere ka Ngoma biragoye kubona umuntu uguha amakuru. Uwo uyasabye akubwira ko umuyobozi w’akarere ari we ugomba gutanga amakuru, turibaza niba ari itegeko bahawe ryo kuyimana”, uku ni ko umwe mu banyamakuru yabajije muri icyo kiganiro.

Umuyobozi w’Akarere ka Ngoma, Nambaje Aphrodis, yavuze ko nta muyobozi n’umwe muri ako karere wahawe amabwiriza yo kwimana amakuru.

Umuyobozi w’Akarere ka Ngoma ni umwe mu bashyirwa mu majwi mu kwimana amakuru.

Ati “Nta muntu wahawe amabwiriza yo kwimana amakuru. Habaye hari umuyobozi umwe cyangwa babiri, byaterwa n’imyumvire ye kandi tumenye amazina ye twamusaba kujya atanga amakuru.”

Umuyobozi w’Akarere ka Ngoma agisobanura ibi, abanyamakuru bahise bamubwira ko na we ubwe adatanga amakuru kuko hari inshuro nyinshi abanyamakuru bagiye bamusaba amakuru akayabima.

Mu kwisobanura, yavuze ko hari ibitangazamakuru byinshi agaragaraho atanga amakuru, akavuga ko abo atayaha biterwa n’uko bayasabye.

Ati “Biterwa n’usaba n’uko ahabwa. Ushobora gusaba nabi ugahabwa nabi, ushobora gusaba ntunahabwe. Icyo nzi cyo ngaragara mu bitangazamakuru byinshi, abo se bo bayabona bate? Kuko na none, umuntu ntiyakubwira kuri telefoni ngo ni umunyamakuru utamubonye ngo upfe guhurutura umuhe amakuru.”

Guverineri Uwamariya yavuze ko itangazamakuru ari umufatanyabikorwa ukomeye ku buryo nta muyobozi ukwiye kwimana amakuru.

Guverineri Uwamariya yasabye abayobozi bimana amakuru kwisubiraho.

Ati “Kwimana amakuru ntabwo ari gahunda y’intara, iyo utayatanze itangazamakuru rirayishakira, rimwe na rimwe rikayahabwa n’abatagombye kuyatanga. Niba n’umuntu aguhamagaye kuri telefoni agusaba amakuru uyamuhe kuko ni kimwe mu bigufasha kumenyekanisha ibyo ukora.

Aho [kwimana amakuru] biri bisubireho, dufite n’itegeko ridutegeka gutanga amakuru.”

Muri abo bapolisi harimo abo mu bihugu bitanu bigize umuryango w’Afurika y’Uburasirazuba n’abo mu gihugu cya Danmark, bakaba bazahugurwa mu gihe cy’iminsi 10 mbere yo kujya mu butumwa bw’amahoro bw’umuryango w’Afurika yunze Ubumwe.

Abapolisi 45 bagize umutwe wo gutabara aho rukomeye mu mahugurwa yo kubungabunga amahoro.

Ikigamijwe muri ayomahugurwa ngo ni uguha abo bapolisi ubumenyi n’indangagaciro zikwiye kuranga umupolisi uri mu butumwa bw’amahoro.

Mu gutangiza ayo mahugurwa, Umuyobozi Wungirije wa Polisi y’u Rwanda ushinzwe Ibikorwa, DIGP Dan Munyuza, yasabye abitabiriye ayo mahugurwa kuzayakurikira kuko bazayaherwamo amasomo yabafasha gukora neza akazi ko kubungabungabunga amahoro.

Ati “Abapolisi bagiye mu butumwa bw’amahoro bw’Umuryango w’Afurika yunze Ubumwe bagomba guhugurwa neza kugira ngo bazabashe guhangana n’ingorane iyo ari yo yose bahurira na yo mu butumwa bwo kubungabunga amahoro.”

DIGP Munyuza yavuze ko Polisi y’u Rwanda ishyira imbaraga mu mahugurwa kuko byagiye bigaragara ko atanga umusaruro ufatika.

Ati “Tudahawe amahugurwa ahagije ntidushobora gukora akazi kacu neza, kandi ubushobozi buke ntibwatuma duhangana n’ibyaha biri kugaragara muri iki gihe.”

Mu bikorwa bikomeye abari mu butumwa bw’amahoro bakora harimo gukemura amakimbirane, ku buryo ayo mahugurwa azatuma abo bapolisi bamenya uburyo bwo guhangana n’ibiteza umutekano muke ku mugabane wa Afurika birimo icuruzwa ry’abantu n’ihohoterwa rishingiye ku gitsina.
Aganira n’abo bapolisi DIGP Munyuza yagize ati “Nyuma y’aya mahugurwa tubitezeho kugira ubushobozi bwo gukemura ibibazo nk’ibi no kugarura amahoro aho muzajya gukorera hose mu bihugu by’Afurika.”

Aya mahugurwa yateguwe ku bufatanye bw’umutwe wo gutabara aho rukomeye muri Afurika y’Uburasirazuba (EASF) n’ikigo cy’Abadage gishinzwe ubutwererane mpuzamahanga (GIZ).

Abapolisi bayarimo baturuka mu Birwa bya Comoros, Kenya, Denmark, Ethiopia, Uganda, Sudani n’u Rwanda.

Bazahugurwa ku mikorere y’Umuryango w’Afurika Yunze Ubumwe n’iy’umutwe wa EASF, banaganire ku bibazo bashobora guhurira na byo mu bihugu bagiye kubungabungamo amahoro.

Icyo cyemezo gifite agaciro k’imyaka ibiri (Kuva muri Kamena 2016 kugeza muri Kamena 2018) RwandAir igihawe nyuma y’igenzura rya IATA (IATA Operational Safety Audit).

Ishyirahamwe mpuzamahanga rishinzwe ingendo z’indege (IATA) ryongeye guha Rwandair icyangombwa kiyemerera kwagura ibikorwa.

Iryo genzura riri ku rwego mpuzamahanga riragenzura rikanasesengura imikorere y’ibigo bikora ubwikorezi bwo mu kirere. Rikorwa buri myaka ibiri, ikigo cyatsinze igenzura rya mbere kigahabwa icyemezo cya mbere cya IOSA.

Icyemezo cya mbere kiri ku rwego mpuzamahanga RwandAir yari yagihawe mu mwaka wa 2014.

RwandAir ivuga ko kongera kuyiha icyemezo bizatuma irushaho kuvugurura imikorere mu buryo burambye, ndetse ikazanakomeza guharanira gukurikiza ibipimo ngenderwaho bya IATA nk’uko Sonia Kamikazi, ushinzwe kugenzura ubuziranenge (Quality assurance) muri Rwandair, abivuga.

John Mirenge uyobora RwandAir yavuze ko guhabwa icyo cyemezo byaturutse ku murava n’ubwitange bw’abakozi bose ba RwandAir.

Mirenge avuga ko umutekano wo mu ndege ari kimwe mu by’ibanze ikigo cya RwandAir cyitaho cyane, bikaba binateganyijwe ko muri uku kwezi kwa Kamena icyo kigo kizakorerwa irindi genzura ku bijyanye n’umutekano mu ndege, kugira ngo gihabwe icyemezo cyitwa ISAGO (IATA Safety Audit for Ground Operations).

Kugeza ubu RwandAir ikora ingendo mu mijyi 17 mu Burengerazuba, Uburasirazuba n’Amajyepfo y’umugabane wa Afurika ndetse no mu gace ka Aziya yo hagati.

Nubwo RwandAir ari kimwe mu bigo by’ubwikorezi bwo mu kirere kimaze igihe gito gikora ugereranyije n’ibindi muri Afurika, kizwiho kubahiriza igihe, gutanga serivisi nziza ku bagenzi ndetse no kugira umutekano.

Mu rwego rwo kwagura ibikorwa byayo, biteganyijwe ko RwandAir izongera izindi ngendo esheshatu ku zo yakoreraga ku mugabane w’Afurika, ndetse igahita itangira no gukorera ingendo i Mumbai mu Buhinde na Guangzhou mu Bushinwa.

Mu kwagura ingendo zayo, RwandAir ngo izifashisha indege ebyiri nini za A330 ndetse n’izindi ebyiri za Boeing B737-800NG.

Babivuze mu biganiro bagiranye n’urubyiruko rwa Islam mu Karere ka Rwamagana tariki 05 Kamena 2016, hagamijwe kurukangurira kwirinda imitwe ikora ibikorwa by’ubwiyahuzi n’iterabwoba ivuga ko igendera ku mahame y’idini ya Islam.

Sheikh Abdul Karim Gahutu avuga ko abiyitirira Islam bakora iterabwoba ari abanzi bayo.

Sheikh Abdul Karim Gahutu uyobora umuryango ADEF w’ivugabutumwa mu idini ya Islam aganira n’urwo rubyiruko yavuze ko abavuga ko baharanira amahame ya Islam bica abantu ari abagome n’abanzi bakomeye b’iyo dini.

Ati “Ubu Islam n’ubugome ni ibintu bihabanye. Islam ni idini y’impuhwe, ni idini y’amahoro, ni idini y’ineza. Uvuga rero ko aharanira amahame ya Islam akandagira amategeko ya Islam, uwo ntaba ari umu Islam mu by’ukuri.”

Kuba hirya no hino ku isi humvikana imitwe igaba ibitero by’iterabwoba n’ubwiyahuzi yiyitira idini ya Islam ngo ni ikibazo gikomeye.

Ngo hari impungenge ko urubyiruko rw’idini ya Islam rushobora kwinjizwa muri ibyo bikorwa bibi.

Mu rwego rwo gukumira hakiri kare umuryango ADEF wateguriye urwo rubyiruko ibiganiro, bigamije kurusobanurira neza itandukaniro ry’idini ya Islam n’imitwe y’iterabwoba yiyitirira iyo dini.

Urubyiruko rwa Islam rurahamagarirwa kwirinda imitwe y’iterabwoba yiyitirira idini ya Islmma.

Sheikh Sindayigaya Moussa uyobora umuryango w’aba Islam mu Mujyi wa Kigali yavuze ko abagize iyo mitwe ari abanzi b’abantu bose harimo n’aba Islam ubwabo.

Ibi yabivuze yifashishije urugero rw’uburyo umutwe wa Boko Haram uherutse gushimuta abana b’ababakobwa basaga 200 bo mu idini ya Islam bakaba barakorewe ibikorwa bibi birimo no gufatwa ku ngufu.

Bamwe mu rubyiruko rwahawe ibyo biganiro bavuga ko bari bazi ko iyo mitwe ari iya Islam koko nk’uko Mbanzabugabo Sharif abivuga.

Gusa ngo bungukiyemo byinshi bahita banafata umugambi wo kurushaho kwegera abamenyi b’idini kugira ngo bajye bahabwa ibisobanura birambuye ku bijyanye n’umurongo nyawo w’idini ya Islam, nk’uko Hakizimana Hassan na we wahawe ibyo biganiro abitangaza.

Bamwe mu rubyiruko ngo bagira isoni zo kugana serivisi z’ubuzima bw’imyororokere ngo badahurirayo n’ababyeyi babo. (Photos: Cyprien Ngndahimana)

Youth Corner ni ikigo kigiye kubakwa ku kigo nderabuzima cya Nyamirama mu Karere ka Kayonza, kikazatangirwamo serivisi zirimo imikino n’isomero, wongeyeho serivisi z’ubukangurambaga ku buzima bw’imyororokere.

Serivisi z’ubuzima bw’imyororokere zatangwaga mu buryo bwa rusange, ku buryo bamwe mu rubyiruko baterwaga isoni no kuzigana ngo badahurirayo n’ababyeyi cyangwa abandi bantu bakuru babazi, nk’uko umwe mu rubyiruko, Munezero Esther abitangaza.

Agira ati “Uba ufite ubwoba ukavuga uti ese nimpurirayo na mama cyangwa abandi, n’ubwo basanga ntatwite barahita bavuga ko ndi umusambanyi.”

Juma Gerard yungamo agira ati “Iyo tugiye ku kigo nderabuzima kwipimisha tukahahurira n’ababyeyi cyangwa abaturanyi bagenda babivuga bigatuma tutajyayo, twanajyayo umuntu akagenda aseta ibirenge.”

Umuyobozi w’ikigo nderabuzima cya Nyamirama avuga ko Youth Corner yatekerejwe nyuma yo kubona ko urubyiruko rutitabira serivisi z’imyororokere.

Umuyobozi w’ikigo nderabuzima cya Nyamirama, Nsengiyumva Jacques avuga ko bakurikije isesengura bakoze, kutitabira izi serivisi ku rubyiruko biterwa n’uko zitangwa mu buryo bwa rusange, ari na yo mpamvu batekereje gushyiraho Youth Corner.

Ati “Kubera ko muri Youth Corner hazaba harimo gahunda zitandukanye, umuntu ashobora kuza aje gusoma ibitabo cyangwa gukina akinyabya akanisuzumisha.

Icyo gihe ntawe uzamwibazaho kuko bashobora gutekereza ko yari yagiye mu kigo gukina cyangwa kuganira n’urundi rubyiruko.”

Bamwe mu babyeyi bavuga ko urubyiruko rufite ibyo rwikeka rudakwiye kugira isoni zo kugana ibigo nderabuzima kugira ngo birugire inama, nk’uko Kamagabe Imakurata wo mu murenge wa nyamirama abivuga.

Kamagabe avuga ko umwana watinyutse kugana serivisi z’ubuzima akeka ko atwite aba ari intwari kuko aba ashaka kurengera ubuzima bwe n’ubw’umwana.

Ati “Umwana wagiye hariya hantu hari igihe aba yikeka ko atwite. Iyo yinjiyemo aba ari intwari ahubwo kuko aba ashaka gukurikirana ubuzima bwe n’ubw’umwana, nta soni bakwiye kugira.”

Undi mubyeyi witwa Bamurinde we asaba bagenzi be kudaha akato abana batinyutse kujya kwisumisha kuko byabagiraho ingaruka zikomeye.

Ikigo cya Youth Corner kizatangira kubakwa muri Nyakanga 2016. Kuri ubu hari gukorwa ubukangurambaga bugamije gushishikariza urubyiruko kwitabira serivisi z’ubuzima bw’imyororokere.

Yabivugiye mu kiganiro yagiranye n’abaturage b’Akarere ka Kayonza tariki 30 Mata 2016, asoza uruzinduko yakoreraga mu Ntara y’Iburasirazuba.

Perezida Kagame arizeza ko umuhanda Kagitumba-Kayonza-Rusumo ugiye gukorwa (Photo Plaisir Muzogeye)

Yagize ati “Umuhanda munini uva ku mupaka wa Uganda ukanyura hano ugakomeza ujya Rusumo uri mu nzira zo gukorwa bundi bushya. Iby’ibanze, ibyangombwa byose ubu biri ku murongo byagiye biboneka. Turawukorera kugira ngo muwurinde kandi muwukoreshe neza ubagire akamaro.”

Abashoferi bwukoresha bari bamaze igihe binubira ko washaje, by’umwihariko utari ukirangwaho ibyapa, ku buryo byagonganishaga abashoferi na polisi igihe bahagagaze bashyira abagenzi mu modoka cyangwa babakuramo.

Abaturage bakiranye ibyishimo inkuru y’uko umuhanda Kagitumba-Kayonza-Rusumo ugiye gusanwa (Photo Plaisir Muzogeye)

Umwe ati “Nta cyapa na kimwe gihari kuva hano (Kayonza) kugera Rusumo. Aho uhagaze hose iyo waramutse nabi hari igihe umupolisi akwandikira ngo ntiwemerewe kuhahagarara kandi nta byapa biri ku muhanda.”

Akomeza agira ati “Hari aho uba ubona guparika ku ruhande utabangamiye imikoreshereze y’umuhanda ukahahagarara uvana umugenzi mu modoka, polisi yakubona ikaba irakwandikiye, bimaze kumbaho kenshi.”

Umuhanda ugiye gukorwa bundi bushya wari warabaye muto ku buryo hari aho bigora imodoka kubisikana bigatera impanuka.

Perezida Kagame yasabye abaturage kujya bafata neza ibikorwa remezo nk’ibyo kugira ngo bibagirire akamaro. Yavuze ko hari abaturage usanga bahinga kugeza mu muhanda, cyangwa bajya kubaka bakavogera umuhanda ku buryo biwangiza.

Ati “[Umuhanda] uva hano (Kayonza) ujya i Kigali wo warakozwe, turabasaba kuwurinda neza. Ntabwo dushaka ko hari uwo tuzasenyera yubatse mu muhanda, umuhanda ntabwo ari uwo kubakamo. Iyo abantu bafite kwitonda ntabwo bakora ibintu ngo ejo abandi bagaruke babisenye.”

Umukuru w’igihugu yibubikije abaturage b’Akarere ka Kayonza ko kuba akarere ka bo gahuriramo imihanda iva muri Uganda na Tanzaniya ari amahirwe bafite. Yabasabye kuyabyaza umusaruro mu buryo bw’ubucuruzi bakorana n’abakoresha iyo mihanda.

Ubucuruzi muri uwo mujyi ngo bwatangijwe n’Abarabu mu mwaka wa 1934, nyuma n’Abahinde barawuyoboka ku buryo mu myaka yakurikiyeho, ubucuruzi bwari buteye imbere.

Agace kazwi ku izina rya ’Buswayilini’ ni ko karimo inyubako z’ubucuruzi cyane.

Abarabu bamaze guteza imbere ubucuruzi mu mujyi wa Rwamagana ngo bagiye bubaka indi mijyi n’udusantere tw’ubucuruzi tukiriho n’ubu, nk’uko Rugwabiza Issa wavukiye i Rwamagana mu 1926 abivuga.

Ati “Hano [i Rwamagana] Abarabu bahubatse mu 1934 bahashyira ubucuruzi buteye imbere. Bari barubatse ibikorwa kuko nyuma ya Rwamagana bubatse indi mijyi y’ubucuruzi i Zaza aho bita Karembo, bubaka Kabarondo, bubaka Kirehe, bubaka na Kiramuruzi barahereye i Rwamagana.”

Umujyi wa Rwamagana uri mu ya mbere yatangirijwemo ubucuruzi mu Rwanda ku buryo iyo umuntu awuvuze, hari abahita bawusanisha n’ubucuruzi. Gusa ubucuruzi bwaho ntibutera imbere ugereranyije n’uko bimeze muri myinshi mu mijyi yavutse nyuma yawo.

Nyinshi mu nyubako z’ubucuruzi mu gace ka ’Buswayilini’ ntizigira abazikoreramo.

Muzehe Rugwabiza we ngo asanga ubuyobozi bwa mbere ya Jenoside yakorewe Abatutsi mu 1994 bwaragize uruhare mu kudindiza ubucuruzi mu mujyi wa Rwamagana. Ati “Ubucuruzi akenshi wasangaga buri muri forode, ariko ahanini si cyo cyabusubije inyuma. Ubucuruzi bwananijwe n’ubuyobozi bw’icyo gihe kuko ibyo Abarabu bari barubatse, ubuyobozi bwarabisenye.”

Ku rundi ruhande ariko, hari abavuga ko “abifite” bakomoka mu mujyi wa Rwamagana ngo baba bagira uruhare mu kudindira k’ubucuruzi bw’uyu mujyi.

Perezida w’Urugaga rw’Abikorera mu Ntara y’Iburasirazuba, Habanabakize Fabrice, avuga ko bamwe mu bacuruzi b’i Rwamagana iyo babonye amafaranga, bahita bajya gukorera ahandi, bigatuma Rwamagana isigara inyuma mu bucuruzi.

Ati “Niyo urebye nk’i Kigali, usanga abacuruzi bakomeye ku rwego rw’igihugu harimo n’Abanyarwamagana benshi. Umuntu yumva ko abonye amafaranga ati ‘reka njye gukorera i Kigali’ ariko harageze ko abantu bumva ko ahantu atari ho hatanga amafaranga ahubwo abantu ari bo bashaka amafaranga.”

Perezida w’Urugaga rw’Abikorera mu Ntara y’Iburasirazuba, Habanabakize Fabrice.

Bamwe mu bacuruzi b’i Rwamagana ntibahakana ko hari bagenzi babo bamara gutera imbere bagahita bava i Rwamagana bakajya gukorera ahandi.

Abo twavuganye ntibifuje ko amazina yabo atangazwa, ariko bo batunga agatoki inzego z’ubuyobozi bavuga ko zidashyiraho ingamba zihamye zatuma ubucuruzi mu mujyi wa Rwamagana butera imbere.

Umuyobozi w’Akarere ka Rwamagana, Mbonyumuvunyi Radjab, avuga ko kudindira k’ubucuruzi mu mujyi wa Rwamagana byatewe n’uko hari abagiye babwinjiramo batabiteguye neza, bagahomba.

Cyakora, ngo hari gahunda yo kwegera abacuruzi bakagirwa inama kugira ngo bakore ubucuruzi bwabo kinyamwuga batere imbere na Rwamagana itere imbere muri rusange.

Umuyobozi w’Akarere ka Rwamagana avuga ko ubuyobozi buzegera abacuruzi kugira ngo bagirwe inama.

Ati “Abazi umujyi wa Rwamagana kuva kera bawuziho ubucuruzi bwari bukomeye, ariko bwagiye bukorwa rimwe na rimwe butateguwe neza. Iyo wakoze umurimo utawuteguye neza, kenshi uhura n’igihombo.”

Akomeza agira ati “Igikomeye ni ukwegera abacuruzi dufatanyije n’urugaga rw’abikorera bahuriramo tukabagira inama kugira ngo babukore neza babunoze, bubatunge n’imiryango yabo ndetse n’akarere kacu gatere imbere.”

Mu mujyi wa Rwamagana mu gice cyizwi ku izina rya ‘Buswayilini’ hagaragara inyubako nyinshi z’ubucuruzi zihora zifunze kandi inyinshi muri zo zigaragara nk’izishaje bitewe n’uko zubatswe n’Abarabu.

Abahatuye bavuga ko hari abagerageza kuzicururizamo ariko nyuma y’igihe gito bagafunga kubera kubura abaguzi.

Kuri uyu wa gatandatu tariki 30 Mata 2016 Perezida Kagame yakoreye umuganda mu Karere ka Kayonza, nyuma yo gusoza urugendo rw’iminsi itatu yari amaze agirira mu Ntara y’Iburasirazuba, harimo Akarere ka Ngoma n’urwasubitswe yagombaga gukorera Nyagatare.

Perezida Kagame akigera aho yaganiriye n’abaturage yakiranywe ibyishimo byinshi (Photo Plaisir Muzogeye)

Abaturage b’i Kayonza bavuze ko bishimiye gukorana umuganda n’umukuru w’igihugu, kuko bamwe ari ubwambere bari bamubonye imbonankubone, nk’uko uwita Kamari Isdras yabitangaje.

Yagize ati “Ntako bisa gukorana umuganda na Perezida wacu, ni ikigaragaza ko aba atwitayeho kandi adushakira ibyiza buri gihe. Twiteguye kumva impanuro ze no kuzishyira mu bikorwa.”

Imvura yatumye bamwe batageza ibibazo bya bo kuri Perezida mu gihe yari mu biganiro n’abaturage. Ariko ntacyo yari ivuze kuri bo kuko benshi bagaragazaga ko bafite ibibazo bashaka kumugezaho.

Perezida Kagame yakoranye umuganda n’abaturage b’i Kayonza (Photo Plaisir Muzogeye)

Ababashije kubaza byinshi mu bibazo bya bo byari bishingiye ku butaka. Bamwe bagaragaje ko bahugujwe amasambu bakabura ubarenganura.

Umukuru w’igihugu yasabye ko bamwe bahita basubizwa amasambu ya bo, asaba umuyobozi w’Akarere ka Kayonza Murenzi Jean Claude gushaka umunsi azaganira n’abaturage bose kugira ngo yakire ibibazo benshi batabashije kubaza kubera imvura.

Umuyobozi w’akarere yavuze ko bagiye gukurikirana ibyo bibazo mu buryo bwihuse nk’uko umukuru w’ighugu yabibasabye.

Abaturage baje kwakira umukuru w’igihugu bari benshi (Photo Plaisir Muzogeye)

Ati “Bisanzwe biri mu nshingano zacu gukemura ibibazo by’abaturage, ariko nk’uko Perezida wa Repubulika abisabye tugiye gukurikirana kugira ngo turebe uko byakemuka, atubwiye ko tubyitaho kugira ngo bikemuke.”

Gahunda y’umuganda usoza ukwezi kwa Mata Perezida Kagame yakoranye n’abaturage b’i Kayonza ni yo isoje urugendo rw’iminsi itatu yagiriraga mu ntara y’Uburasirazuba.

Yabivuze ku mugoroba wa tariki 28 Mata 2016 ubwo yaganiraga n’abavuga rikumvikana bo mu Ntara y’Iburasirazuba, avuga ko urubyiruko rudahinduye imyumvire, bikigoranye kugera ku iterambere u Rwanda rwifuza.

Perezida Kagame yababajwe n’urubyiruko rwahawe akazi i Nasho rukanga kujyayo ngo ni mu cyaro.

Perezida Kagame yavuze ko abo bantu Leta yabatanzeho amafaranga bajya kwiga mu mahanga, bavuyeyo Leta ibaha akazi bagombaga gukorera mu Murenge wa Nasho mu Karere ka Kirehe, bamwe banga kugakora ngo ntibaba mu cyaro.

Ati “Hari umushoramari w’Umunyamerika washoye amafaranga ye i Nasho bahakora umushinga wo kuhira. Yashyizemo n’ayo kubaka amazu abakozi bararamo asa neza benshi hano mutanafite.

Kubera ko dushaka ko n’ibyo Abanyarwanda babyigiraho bikabaha n’akazi, bafata abana b’Abanyarwanda Leta yigishije kugira ngo bajye muri ibyo, abo bana bacu babohereje gukorayo, bagezeyo bavuga ko badashobora kuhaba, ngo ni mu cyaro bo ni abo mu Mujyi i Kigali.”

Umukuru w’Igihugu avuga ko abanze gukora ako kazi bashobora kuba baba mu mazu mabi cyane ugereranyije n’ayo bagombaga kubamo i Nasho.

Ati “Ariko ugasanga umwana w’Umunyarwanda yinenaguzwa. Ngo ntiwaba aho gusa […] umuntu akumva ko ari igitangaza abantu baramutanzeho amafaranga y’igihugu.”

Ati “Bimure iyo mirima bayitware i Kigali? Njye ndashaka kuzahura na bo.”

Abavuga rikumvikana b’Iburasirazuba bavuze ko babajwe n’imico mibi urwo rubyiruko rwagaragaje rwanga gutanga umusanzu wo kubaka igihugu kandi cyarabigishije

Umukuru w’Igihugu yavuze ko abantu nk’abo badahinduye imyumvire n’imitekerereze, ngo biracyagoranye ko u Rwanda rugera ku iterambere.

Abavuga rikumvikana bavuze ko bibabaje kuba urubyiruko rutangiye gucika ku muco kugeza aho abantu Leta ibohereza kwiga bavayo bakanga gutanga umusanzu wabo ku gihugu, nk’uko Ngabonziza Agustini wo mu Karere ka Kirehe yabivuze.

Iradukunda Eugenie uhagarariye urubyiruko mu nama njyanama y’Akarere ka Kayonza, yavuze ko igiti kigororwa kikiri gito, atanga igitekerezo cy’uko abana bajya batozwa gukunda umurimo bakiri bato cyane.

Iradukunda yatanze igitekerezo cy’uko urubyiruko rwajya rutozwa rukiri mu mashuri abanza n’ay’incuke.

Yagize ati “Abana bajya bigishwa indangagaciro zo gukunda umurimo no kuwunoza, bakanigishwa umuco wo guhiga bakiri mu mashuri y’incuke n’abanza, ku buryo n’abagiye kwiga mu mahanga bajyayo bafite umuco wo gukora cyane banagaruka ntibinemfaguze akazi bakajya no mu byaro bagakora.”

Umuyobozi w’urugaga rw’abikorera mu Ntara y’Uburasirazuba, Habanabakize Fabrice, yabitangarije mu kiganiro Perezida Kagame yagiranye n’abavuga rikijyana bo muri iyi Ntara ku mugoroba wo kuri uyu wa kane tariki 28 Mata 2016.

Umuyobozi w’urugaga rw’abikorera mu Burasirazuba yasabye imbabazi mu izina ry’abikorera kuko batashoye imari muri EPIC Hotel kandi bari barabyiyemeje.

Yagize ati “Abikorera bari biyemeje gushora imari muri iyo hoteri barangije amafaranga bayashora mu yindi mishinga ya bo bwite ntibubahiriza ibyo bari biyemeje.”

Umushinga w’iyo hoteri watekerejwe mu rwego rwo kuzamura iterambere ry’Intara y’Uburasirazuba muri rusange ndetse no guteza imbere ubukerarugendo buyikorerwamo.

Guverineri wa yo, Uwamariya Odette yavuze ko iyo hoteri itangira kubakwa yari ifite ingengo y’imari hafi ya miliyari 14Frw, abikorera bari biyemeje kuyishoramo imari.

Perezida Kagame yanenze abikorera bo mu Burasirazuba avuga ko biyemeje inshingano barangije barazikwepa.

Gusa ngo si ko byagenze kuko aho igeze kugeza ubu uruhare runini rw’amafaranga amaze kuyitangwaho ari urwa leta nk’uko yabisobanuriye umukuru w’igihugu.

Ati “Tumaze gushoramo miriyari eshanu na miriyoni 200. Kuri ayo mafaranga 54% yavuye ku ngengo y’imari y’uturere tugize intara, 24% ni imigabane ya BRD, 19% ni imigabane ya RSSB naho abikorera bakaba bafite 3% kandi twarabonaga bakabaye bagiramo uruhare.”

Perezida Kagame yavuze ko buri Munyarwanda akwiye kurwana urugamba kugira ngo u Rwanda rutere imbere, anenga abikorera bo mu Burasirazuba biyemeje inshingano nyuma bakazikwepa.

Guverineri w’Uburasirazuba yavuze ko kugeza ubu abikorera bamaze gushora 3% yonyine muri Epic Hotel.

Ati “Ubundi hoteri yatangiye ari iy’abikorera leta yemera kubatera inkunga kandi byarakozwe. Kubona abikorera barasubiye inyuma bagakwepa, ntabwo ari umuco mwiza.

Ntabwo iyo urugamba rugeze bakubwira bati tujye ku rugamba kandi uzi ko ari urugamba rwawe ugomba kurwana, ntabwo watangira kuvuga ngo ndaribwa munda, ndumva ibitotsi bije ntabwo bibaho.”

Abikorera ngo biyemeje kwisubiraho. Gusa ngo baracyahura n’imbogamizi z’ibikorwa remezo nk’amazi, amashanyarazi n’imihanda bikiri bike mu ntara y’Uburasirazuba.

Umukuru w’igihugu yavuze ko leta idahwema gushaka uko yakemura ikibazo cy’ibikorwa remezo, ariko anavuga ko bidakwiye kuba urwitwazo kuko hari indi mishinga idindira abikorera bakabaye bagiramo uruhare ntibabikore, kandi ibyo kuyishoramo bidafitanye isano n’izo mbogamizi bagaragaza.

WOC ni ikigo cyashyiriweho gufasha abagore bo mu cyaro kwiteza imbere ariko babanje kwigishwa imyuga n’ubukorikori. Ku gicamunsi bateranira muri icyo kigo bagakora ubukorikori bw’imitako n’imirimbo.

Aba barakora imitako yitwa ’imigongo’ itakwa mu mazu

Mu byo bakora harimo amaherena, inigi n’impeta bakora mu masaro, hari ababoha ibiseke, ababoha imyenda mu budodo n’abayidoda ku mashini, abandi bagakora imitako inyuranye itakwa mu mazu.

Icyo kigo kigiye kumara imyaka itatu gitangiye gukora, abakorana aa cyo ku ikubitiro bavuga ko batakekaga ko byabagirira akamaro. Gusa ngo ubu batangiye kugira icyizere nyuma yo kubona ko bibona abaguzi nk’uko Mukeshimana Angelique ukora imitako mu masaro abivuga.

Agira ati “Ku munsi nshobora gukora amaherena agurishwa 2000Frw n’impeta igurishwa 2000Frw. Hari ibyo dukora abazungu bakabigura, ibindi hari abantu dukorana baza kubitwara bakajya kubigurisha mu mahanga. Maze kubona ko ari byiza byanatunga umuntu.”

Ibi ni bimwe mu bikorwa by’ubukorikori abagore bakorana na WOC bakoze bitegereje abaguzi.

Mukakanani Marie Gorette we ari mu itsinda rikora imitako yitwa “Imigongo” bataka mu mazu. Yemeza ko ubukorikori bakora bushobora guteza umuntu imbere, kuko nk’umugongo umwe ugura 6000Frw ashobora kwiyongera bitewe n’uko ungana kandi mu minsi itanu ashobora gukora imigongo 20.

Umuyobozi w’Akarere ka Kayonza, Murenzi Jean Claude avuga ko WOC ari amahirwe yegerejwe akarere hagamijwe kuzamura iterambere ry’umugore wo mu cyaro. Ubuyobozi ngo buzakomeza gukora ibishoboka kugira ngo ibikorwa by’abo bagore bibonerwe isoko ryagutse.

Ati “Dufite abantu bakorana babashakira amasoko y’ibikoresho bya bo mu Rwanda no hanze, ariko tuzakomeza kubimenyekanisha mu buryo bwose tunabinyuze mu itangazamakuru kugira ngo bibone isoko.”

Aba bo ni abo mu itsinda ryigishijwe kuboha ibiseke.

Ikigo cya Women’s Opportunity Center cyatangiye gukora muri Kamena 2013. Cyubatswe n’umuryango Women for Women International utegamiye kuri leta, mu rwego rwo, kugira ngo cyunganire gahunda z’iterambere uwo muryango wari waratangiye kugeza ku bagenerwabikorwa ba wo.

Umunyamabanga wa Leta ushinzwe Ubuhinzi muri Minisiteri y’Ubuhinzi n’Ubworozi, Tony Nsanganira, yabivuze tariki 26 Mata 2016 ubwo yasuraga ibikorwa by’iterambere ry’ubuhinzi n’ubworozi mu Karere ka Rwamagana.

Umunyamabanga wa Leta ushinzwe Ubuhinzi muri MINAGRI yasobanurirwaga uko zimwe mu mashini z’uruganda zizajya zikora.

Ibiryo by’amatungo bikorwa mu ruvange rw’ibintu bitandukanye birimo ibigori, soya, ibihwagari, n’izindi ntungamubiri amatungo akenera, ariko kubibona ngo bikaba bikigora aborozi bamwe.

Hari ababigura mu bacuruzi abandi bakabyivangira, ariko kenshi ngo biba bitujuje ubuziranenge nk’uko Nsanganira abivuga. Gusa, ngo icyo kibazo kiri mu nzira zo gukemuka, nyuma y’aho Leta ishishikarije abikorera kubaka inganda zakora ibiryo by’amatungo byujuje ubuziranenge.

Ati “Ibiribwa by’amatungo bitujuje ubuziranenge bitera ibibazo amatungo ntanatange umusaruro. Hagiyeho gahunda yo gushishikariza abikorera gushyiraho inganda zakora ibiryo by’amatungo byujuje ubuziranenge, nkaba mfite icyizere ko mu myaka mike iri imbere ibiryo by’amatungo bitazongera kuba ikibazo.”

Kugeza ubu u Rwanda rufite inganda eshatu zitunganya ibiryo by’amatungo zatangiye gukora. Nsanganira avuga ko zikiri mu ntangiriro kuko nta na rumwe rufite imyaka irenga itatu, ariko na Leta ngo iziba hafi kugira ngo izifashe gukemura ibibazo byihariye zaba zifite.

Ati “Mu minsi ishize abazitangije bahuguraga aborozi babereka akamaro k’ibyo biryo n’aho bitandukaniye n’ibidafite ubuziranenge.”

Mu bikorwa uyu muyobozi yasuye harimo n’ikigo cyitwa PRODEV Rwanda na cyo kiri kubaka uruganda ruzakora ibiryo by’amatungo, rukazatangira muri Kamena 2016.

Jean Paul Mutabikanwa uyobora icyo kigo yizeza aborozi ko urwo ruganda ruzakora ibiryo byujuje ubuziranenge kandi bihendutse “kuko rufite imashini zizajya zisukura ibintu bikorwamo ibyo biryo zikanavanamo ibyuma mbere y’uko bitangira kuvangwa.”

Inganda eshatu zitunganya ibiryo by’amatungo zatangiye gukora ziri mu turere twa Rwamagana, Bugesera na Musanze.

Hagiye kwiyongeraho izindi ebyiri zirimo urwo rwa PRODEV Rwanda na rwo ruri kubakwa mu Karere ka Rwamagana, n’urundi rugiye kubakwa mu karere ka Bugesera mu minsi iri imbere.

Mukakibibi Emilienne wo mu Murenge wa Munyiginya mu Karere ka Rwamagana ni umwe mu bagore bo mu cyaro bagerageje kwigobotora ubukene. Ibishingwe benshi bafata nk’umwanda abibyaza amakara akunguka nta faranga yashoye.

Aya ni amakara Mukakibibi akora mu bishingwe.

Ati “Twifashisha ibibabi by’ibigori, ibitiritiri, ibirere, ibihatirwa by’ibirayi cyangwa by’ibitoki, tukabitwika bikaba ivu tukabivanga n’igikoma cy’ifu y’imyumbati. Duhita tubishyira mu iforomo amakara akaboneka ku buryo ku munsi nkora amakara yuzuye agafuka k’ibiro 50.”

Agafuka kamwe k’amakara Mukakibibi ngo akagurisha amafaranga 8000. Uretse ibiro bitatu by’ifu y’imyumbati abarira agaciro k’amafaranga 1000, ngo nta kindi gishoro ashora muri ayo makara, kuko ibyo bishingwe abivana mu baturanyi bamwinginga kuko baba babona abakijije umwanda.

Nubwo akora amakara mu bishingwe, ngo yigishijwe indi myuga irimo gukora imisatsi, gushyira amarangi mu bitenge no kuboha ibikapu, ariko akabona kuyikora bimusaba igishoro atakwigondera ahitamo gukora amakara mu bishingwe kuko byo bitasabaga igishoro.

Ibishingwe abandi bafata nk’imbogamizi kuri bo, Mukakibibi abibyaza umusaruro abikoramo amakara.

Ayo makara kugeza ubu ngo amufasha guteza imbere urugo rwe n’abana bakabona amafaranga y’ishuri bitagoranye, kandi mbere byari umutwaro umukomereye.

Ati “Ndi umubyeyi w’abana batanu, ariko kubigisha byarangoraga cyane. Umwana bavuga ngo yatsinze ntibibe igisubizo ahubwo bikambera ikibazo. Ariko mperutse gutsindisha umwana ajya kwiga nta kibazo mu gihe bakuru be batsindaga ngahangayika.”

Gukora amakara mu bishingwe uyu mugore ngo yabihawemo amahugurwa n’umushinga wa Care International wafashaga mu bijyanye n’iterambere ry’umugore w’icyaro.

Gusa ngo aracyabura ubujyanama kugira ngo umushinga we ukomeze gutera imbere.

Kivuye avuga ko abantu bakeneye ubujyanama ku mishinga yabo, iyo begereye urugaga rw’abikorera bafashwa kububona.

Kwizera Kivuye Anitha ushinzwe ubujyanama mu by’ubucuruzi mu ihuriro ry’abagore ba rwiyemezamirimo, avuga ko iyo abantu bakoranye n’urugaga rw’abikorera, rubafasha kubona ubujyanama, bagakomeza gukora neza nta mbogamizi.

Ubuyobozi bw’Akarere ka Rwamagana buvuga ko Mukakibibi akwiye kuba urugero ku bandi bantu baheranwa n’ubukene, bavuga ko babuze igishoro baheraho bakora imishinga yatuma biteza imbere.

Umunyamabanga uhoraho muri Minisiteri y’Uburinganire n’iterambere ry’umuryango (MIGEPROF), Kamanzi Jacqueline, yabitangajwe mu kwibuka abana n’abagore bazize Jenoside yakorewe Abatutsi mu 1994, byabereye i Sovu mu Murenge wa Kigabiro mu Karere ka Rwamagana, kuri uyu wa gatatu tariki 20 Mata 2016.

Mu kwibuka abana n’abagore bazize Jenoside hashyinguwe imibiri y’abana batatu yari itarashyingurwa mu cyubahiro.

Yagize ati “Abanyarwanda bigishijwe urwango imyaka myinshi, bakwiye no kugira ikimwaro mu by’ukuri. Umunyarwanda wigisha umwana ubugome areba ibyatubayeho (muri Jenoside) uwo aba afite ikibazo. Dukwiye gushyira imbaraga mu burezi dutoza abana ibyiza tubangisha ikibi.”

Abana bavutse nyuma ya Jenoside bavuga ko bakuze bumva amateka ya Jenoside yakorewe Abatutsi mu 1994.

Umunyamabanga uhoraho muri MIGEPROF yavuze ko Umunyarwanda ucyigisha abana ingengabitekerezo ya Jenoside afite ikibazo.

Bamwe bavuga ko bagiye bagerwaho n’ingaruka z’iyo Jenoside cyangwa zikagera kuri bagenzi ba bo n’ubwo yabaye bataravuka, ku buryo icyo bashyize imbere ari ukurwanya bivuye inyuma Jenoside n’ingaruka ya yo.

Nikuze Germaine ati “Twakuze twumva ibya Jenoside tubona n’ingaruka byagize. Tugerageza kubaka igihugu cy’ejo hazaza turandura Jenoside kugira ngo twubake igihugu kitarangwamo Jenoside n’ingengabitekerezo yayo.”

Abana basabwe kwirinda ingebitekerezo ya Jenoside.

Abarokokeye i Sovu bavuga ko n’ubwo leta yagiye igerageza kubahoza no kubomora ibikomere batewe na Jenoside bagifite intimba ku mitima, bitewe n’uko hari imibiri ya bamwe mu Batutsi biciwe i Sovu kugeza n’ubu itaramenyerwa irengero ngo ishyingurwe mu cyubahiro nk’uko Mukasinawe Veronika abivuga.

Kampirwa Helene wo mu kagari ka Sovu we ati “Basaza banjye biciwe kuri uyu musozi ariko banze kunyereka aho babashyize, umugabo wanjye nayobewe irengero sinigeze mushyingura ngo nshire agahinda, n’indi miryango y’abavandimwe bacu barabahisha ntabwo baberekana, ubu narahebye nararekeye.”

Bamwe mu barokotse Jenoside bagabiwe inka.

I Sovu hiciwe Abatutsi benshi muri Jenoside ariko bose imibiri ya bo ntiraboneka ngo ishyingurwe mu cyubahiro. Kugeza mu rwibutso rwa Jenoside rwaho hashyinguye imibiri 620, irimo iy’abagore 350, abana 83 n’abagabo 187.

Karenzi Guido ni umwe mu bahigwaga muri Jenoside yakorewe Abatutsi mu 1994, akaba yarishwe bamurashe tariki 18 Mata 1994.

Ifoto ya Karenzi Guido yashyizwe mu Rwibutso rwa Jenoside rwa Mwulire.

Yari yahungiye i Mwulire ahahurira n’abandi batutsi benshi bari bahahungiye baturutse mu bice bitandukanye by’Akarere ka Rwamagana.

Bageze i Mwulire ngo Karenzi yabashyize hamwe abaremamo amakipe yagombaga guhangana n’ibitero by’Interahamwe byabateraga biturutse impande n’impande.

Ruterana avuga ko Karenzi Guido amaze kuraswa bahise bacika intege kuko bari babuze umuntu w’ingenzi.

Rutareka Jean Marie Vianney, wari kumwe na Karenzi, agira ati “Twahuriye hano i Mwulire aturemamo amakipe ahangana n’ibitero. Harimo ikipe irinze interahamwe ziturutse i Gishari, irinze iziturutse i Munyaga, mbese hari ikipe ireba ahashobora guturka ibitero hose.

Na we yabaga areba ko amakipe yose ari gukora, akarwana ubona afite ishyaka, yari umugabo cyane.”

Ubutwari bwa Karenzi no gushyira hamwe kw’abatutsi bari bahungiye i Mwulire ngo byatumye bamara iminsi Interahamwe zitarabatinyuka.

Baje kugira ibyago Karenzi apfa bamurashe tariki 18 Mata 1994, bacika intege Interahamwe zitangira kubica nk’uko Rutareka akomeza abivuga.

Ati “Yapfuye arashwe, amaze kugwa twifuza ko twanashira twese. Icyo gihe hapfuye abantu benshi cyane. Ntawe uba yaratunesheje iyo tugira nibura umuntu umwe udushyigikiye muri Leta kuko twirukanye uwari ‘Burigadiye’ wa Bicumbi tumwambura imbunda, twirukana abajandarume bariruka imodoka bari bajemo barayita.”

I Mwulire ngo haguye Abatutsi basaga ibihumbi 10. Abaharokokeye ngo bagenda biyubaka kandi bagaharanira gukemura ibibazo byatewe n’ingaruka za Jenoside nk’uko Mukaruzamba Aleta abivuga.

Ati “Tugenda twiyubaka kuko abenshi ubu turakora. Tumaze gusanira inzu abantu batanu kandi n’abana bagiye bacikiriza amashuri tugenda tubafasha kugira ngo bige imyuga.”

I Mwulire iyo bibuka ibihumbi 10 bihashyinguye banazirikana ubutwari bwa Karenzi bwatumye bamwe barokoka.

Uretse gufashanya mu buryo bunyuranye abarokokeye i Mwulire ngo bihaye intego yo kujya bakusanya amafaranga yo gusana no kwita ku nzibutso zibitse imibiri y’abazize Jenoside.

Ibyo ngo biri mu rwego rwo gukomeza komorana ibikomere no gusigasira amateka ya Jenoside kugira ngo atazibagirana.

Yabisabye urubyiruko rwo mu Karere ka Rwamagana, tariki 17 Mata 2016, ubwo yaruganirizaga ku mateka ya Jenoside yakorewe Abatutsi mu 1994 n’inkomoko y’amacakubiri yateye iyo Jenoside.

Senateri Tito Rutaremara yabwiye urubyiruko ko rushyize imbaraga hamwe nta cyarunanira.

Nubwo ayo macakubiri yagejeje u Rwanda kuri Jenoside yakorewe Abatutsi, hari abakomeje kuyihakana no kuyipfobya.

Benshi ngo babikora bandika amakuru y’ibinyoma bakwirakwiza bifashishije imbuga nkoranyambaga, urubyiruko rugasabwa kujya runyomoza ayo makuru kuko benshi mu barugize bakoresha izo mbuga nkoranyambaga, nk’uko Senateri Tito Rutaremara abivuga.

Ati “Urubyiruko rw’ubu, nta mwana urangiza amashuri yisumbuye atazi za Facebook. Ushobora kwandika ugashyira amakuru kuri interineti, ushobora no kwandika igitabo. Si ngombwa ngo wandike igitabo kizahabwa ibihembo byo kwandika, si ngombwa kandi ngo wandike mu Kinyarwanda cyiza cyangwa Igifaransa n’Icyongereza byiza, icya mbere ni ibitekerezo.”

Urubyiruko rwitabiriye ikiganiro cya Senateri Tito Rutaremara.

Urubyiruko rwinshi rugenda ruyoboka imbuga nkoranyambaga nka Facebook, Instagram na Whatsapp zikoreshwa mu guhanahana amakuru.

Izo mbuga zihuza abantu b’ingeri zose ku buryo n’abapfobya Jenoside yakorewe Abatutsi mu Rwanda bazikoresha bakwirakwiza ingengabitekerezo yabo.

Nyuma yo kuganirizwa, urwo rubyiruko rwiyemeje kuzikoresha mu gutanga amakuru y’ukuri kuri Jenoside yakorewe Abatutsi.

Shema Jean Bosco w’imyaka 19 yagize ati “Imbuga nkoranyambaga tugiye kuzibyaza umusaruro. Nk’uko abandi babona imbaraga zo kuzikoresha bapfobya Jenoside, natwe tugiye kongera imbaraga mu kuzikoresha tuvuga ukuri kuri Jenoside yakorewe Abatutsi.”

Senateri Tito yacaniye urubyiruko urumuri rw’icyizere.

Bagirinka Jeannette wo mu murenge wa Kigabiro we ntiyari asanzwe akoresha imbuga nkoranyambaga, ariko ikiganiro bahawe na Senateri Tito Rutaremara ngo cyatumye afata umwanzuro wo gutangira kuzikoresha kugira ngo abone uko yajya agaragaza ukuri ku mateka ya Jenoside.

Abavutse nyuma ya Jenoside bamenye igisobanuro cy’Umuhutu n’Umututsi

Bamwe mu bana bavutse nyuma ya Jenoside bitabiriye icyo kiganiro bavuga ko bari basanzwe bumva amagambo “Umuhutu n’Umututsi” agaruka kenshi igihe havugwa amateka ya Jenoside, ariko ntibamenye igisobanuro n’inkomoko byayo.

Ikiganiro bahawe na Senateri Tito Rutaremara ngo ni cyo cyatumye babona ibisobanuro birambuye kuri ayo magambo n’uburyo yagizwe iturufu mu mugambi wo kurimbura Abatutsi, nk’uko Shema Jean Bosco avivuga.

Ati “Ikintu nungutse gikomeye ntari nzi, ni ukumenya imvano yo kwita umuntu Umututsi cyangwa Umuhutu aho byaturutse, nabyumvaga gusa bikansiga mu rujijo ariko Muzehe Tito atuvanye muri urwo rujijo, tumenye byinshi ku mateka y’igihugu cyacu.”

Senateri Tito Rutaremana yasabye urubyiruko kurwanya amacakubiri.

Senateri Rutaremara yasabye bene abo kujya basura inzibutso n’ahandi habitse amateka ya Jenoside kugira ngo barusheho kuyasobanukirwa. Benshi biyemeje kujya basura inzibutso, ariko bakanaganiriza abasaza b’inyangamugayo kugira ngo barusheho gusobanukirwa byinshi ku bijyanye n’amateka y’u Rwanda.

Imbaraga z’urubyiruko ahanini ni zo zakoreshejwe muri Jenoside, bitewe n’uko rwari rwabibwemo amacakubiri n’ingengabitekerezo ya Jenoside.

Senateri Tito Rutaremara yasabye urubyiruko rw’iki gihe kujya rushishoza rukirinda abarushora mu macakubiri, ahubwo rugaharanira gukora cyane kugira ngo u Rwanda rukomeze gutera imbere.

Mu Kiliziya cya Musha mu Karere ka Rwamagana ni hamwe mu hantu hiciwe Abatutsi benshi muri Jenoside yakorewe Abatutsi mu 1994.

Abacitse ku icumu rya Jenoside b’i Musha bibumbiye mu murango "Musha Iwacu Heza" ubafasha kwiyubaka.

Uretse kuba bamwe barahahungiye bizeye kuharokokera n’abayobozi babakanguriraga kujyayo bababeshya ko ari ho babarindira birangira babishe.

Abo bamaraga kwica ngo bahitaga babashyira mu modoka bakajya kubajugunya mu birombe nk’uko Udahemuka Joseph abivuga.

Ati “Bashishikarije abantu bose guhungira ku Kiriziya mu rwego rwo kugira ngo bajye hamwe babone uko babica.

Bamaze kubica babajyanye mu cyobo gifite ubujyakuzimu bwa metero nka 80 kiri mu birombe tubasha kubakuramo muri 2011. Twavanyemo imibiri y’abantu ibihumbi 5 na 319.”

Abatutsi biciwe mu kiriziya cya Paruwasi ya Musha ngo bari benshi ku buryo bitashobokeye Interahamwe kubatwara bose ngo zijye kubajugunya mu birombe.

Bikino Ildephonse wari wihishe mu mirambo avuga ko mu kujya kujugunya iyo mibiri mu birombe Interahamwe zagendaga ziyishinyagurira, zikanakoresha akarimi keza zigamije kureba abatapfuye ngo zibamaremo umwuka.

Ati “Nyuma yo kwica abantu ikamyo yatangiye kujyana abantu mu birombe bamwe bakagenda babakurura hasi bavuga ngo ‘Abatutsi bararemera’ ubundi bagashuka abantu ngo uwumva ari muzima yigaragaze bamujyane kwa muganga yabiyereka bagahita bamwica.”

Nubwo Jenoside yakorewe Abatutsi i Musha yari ndengakamere, abacitse ku icumu baho ngo bafite icyizere cy’ahazaza. Bishyize hamwe bashinga umuryango bise “Musha Iwacu Heza” ukora ibikorwa bigamije ubumwe n’ubwiyunge no komora ibikomere by’abarokotse Jenoside.

Udahemuka Joseph uyobora uwo muryango avuga ko abacitse ku icumu bagenda biyubaka babifashijwemo n’uwo muryango hamwe n’izindi gahunda za leta zita ku barokotse Jenoside muri rusange.

Nubwo imibiri yari yajugunwe mu birombe yamaze gushyingurwa ngo haracyari ikibazo cy’uko imwe mu mibiri y’Abatutsi biciwe mu nkengero za Kiriziya ya Musha itigeze iboneka.

Abakabaye batanga amakuru y’aho iyo mibiri yajugunywe ngo ntibayatanga kubera ipfunwe.

Urwo rusengero rw’abaporoso ruri mu Kagari ka Nyagatovu mu Murenge wa Mukarange, mu gihe cya Jenoside rwahungiyemo Abatutsi basaga 200, Kanyangoga Thomas waruyoboraga atanga amabwiriza yo kubica baterwa amagerenade, nk’uko bamwe mu bacitse ku icumu babivuga.

I Kayonza bagenda bashyingura imibiri y’abazize Jenoside yakorewe Abatutsi ariko baracyafite ikibazo cy’imibiri y’abantu basaga 200 biciwe kuri Midiho yaburiwe irengero.

Kanyangoga uwo yakatiwe igifungo cya burundu, ariko yanze gutanga amakuru y’aho imibiri y’abo bantu iri n’abaturage baturanye n’urwo rusengero ntibayatanga, nk’uko umuyobozi w’akarere ka Kayonza Murenzi Jean Claude abivuga.

Agira ati “Turi gushyingura abacu mu cyubahiro ariko hari imibiri itaraboneka bitewe n’abantu binangiye gutanga amakuru.

Midiho hari abantu benshi bahaguye ariko kugeza ubu ntiturashobora kumenya aho baherereye, turasaba ko abantu batanga amakuru turebe uko twabashyingura mu cyubahiro.”

Senateri Mike Rugema ngo yibaza impamvu abo baturage baterekana aho iyo mibiri iri, agasanga abatahagaragaza bafite ingengabitekerezo ya Jenoside iri ku rwego ruhanitse.

Senateri Mike Rugema avuga ko abatagaragaza iyo mibiri bafite ingengabitekerezo ya Jenoside iri ku rwego ruhanitse.

Ati “Abantu bavuga ko batakoze Jenoside ariko bari aho biciraga abantu. Kuki tumaze imyaka 22 dusaba abantu kwerekana aho imibiri yajugunywe bakavunira ibiti mu matwi?”

Akomeza agira ati “Gushyingura ni umuco nyarwanda wo kubaha abatuvuyemo. [Abadatanga ayo makuru] iyo bapfushije bo bashyingura ababo. Kuki batifuza ko n’abandi bashyingura ababo? Iyo ni ingengabitekerezo ya Jenoside iri ku rwego ruhanitse.”

Senateri Rugema avuga ko abafite amakuru kuri iyo mibiri bakwiye kuyatanga hakiri kare, kuko n’iyo byatinda azamenyekana bitewe n’uko ikibazo cy’iyo mibiri kitazigera kizima

Hari abakeka ko hafi y’urwo rusengero haba hari icyobo cyajugunywemo iyo mibiri, abandi bakavuga ko ishobora kuba yarajyanywe mu kiyaga cya Muhazi ariko nta muntu n’umwe ushobora guhagarara kuri ayo makuru.

Umuti w’iki kibazo benshi bawutegereje mu baturage bari baturanye n’urwo rusengero mu gihe cya Jenoside, kuko ari bo bashobora kuba bafite amakuru y’ukuri kuri iyo mibiri.

Uyu muhanzi azwi mu ndirimbo nyinshi zivuga ku mateka ya Jenoside yakorewe Abatutsi mu duce dutandukanye tw’igihugu, ndetse n’izivuga ku ntambwe u Rwanda rwagiye rutera mu kwiyubaka nyuma ya Jenoside.

Munyanshoza yifatanyije n’ab’i kayonza kwibuka abiciwe i Mukarange anabemerera kubahangira indirimbo ivuga ku mateka ya Jenoside yahakorewe.

Ubwo abaturage b’Akarere ka Kayonza, ku wa 12 Mata 2016, bibuka ku nshuro ya 22 Jenoside yakorewe Abatutsi bari bahungiye kuri Paruwasi ya Mukarange, Munyanshoza yifatanyije na bo, ndetse abemerera kubahangira indirimbo ivuga ku mateka ya Jenoside yakorewe i Mukarange.

Ati “Mujya mwumva indirimbo zivuga ku mateka ya Jenoside yabereye mu bindi bice by’igihugu, ndifuza ko namwe muzamfasha tugahanga indirimbo ivuga ku mateka ya Jenoside yabereye hano i Mukarange ku buryo nitwibuka umwaka utaha izaba ihari.”

Ni ku nshuro ya mbere Munyanshoza yifatanya n’abatuye i Kayonza kwibuka, by’umwihariko Jenoside yabereye kuri Paruwasi ya Mukarange. Avuga ko mu myaka itaha nibamutumira mu zindi gahunda zo kwibuka azitabira ubutumire.

Abarokokeye i Mukarange bavuga ko ari amahirwe kuri bo kuba Munyanshoza yarabemereye kubahangira indirimbo ivuga ku mateka ya Jenoside yahakorewe, nk’uko Kibukayire Anonciata abivuga.

Ati “Nubundi duhora dusaba ko amateka ya Mukarange yakwandikwa, kubishyira mu ndirimbo rero ni uburyo bumwe bwo kubika ayo mateka tuzaba tubonye.”

I Mukarange ni hamwe mu habaye Jenoside ifite ubukana kuko abaharokokeye bavuga ko mu gihe kitagera ku cyumweru, abatutsi bagera ku bihumbi umunani bari bamaze kwicwa, nk’uko Padiri Kayisabe Vedaste aherutse kubitangamo ubuhamya.

Kuba iyo Jenoside yarakoranywe ubukana bwinshi ngo bituma abaharokokeye bifuza ko amateka y’aho yakwandikwa ndetse n’ibimenyetso bikabikwa neza, ari na yo mpamvu bavuga ko umusanzu wa Munyanshoza uziye igihe.

Mu gihe cya Jenoside yakorewe Abatutsi mu 1994 kuri iyo Kiriziya hari hahungiye Abatutsi bari hagati ya 3000 na 4000 nk’uko abaharokokeye babivuga.

Kiriziya ya Musha yiciwemo Abatutsi basaga 3000.

Bari bahahungiye bazi ko uwahungiye mu Kiriziya aticwa, ariko tariki 13/04/1994 ngo haje igitero cy’interahamwe n’abasirikari zirabica nk’uko Bikino Ildephonse waharokokeye abivuga.

Agira ati “Twahungiye ku Kiriziya turi benshi hagati y’ibihumbi bitatu na bine. Twari twafunze inzugi tariki 13 abasirikari baraza batera amagerenade ku miryango barayica baradusohora interahamwe zihinda mu bantu ziratemaaa, bigera ku mugoroba abantu bose bari hasi. Kugeza ubu sindabona abantu barenze bane barokokeye muri iyi Kiriziya.”

Abarokokeye i Musha n’abafite ababo bahaguye babibuka tariki 13 Mata.

Ubwicanyi bwakorewe Abatutsi bari bahungiye ku Kiriziya ya Musha bwakozwe n’interahamwe, zitijwe umurindi n’ababurugumestiri ba Komini Bicumbi na Gikoro n’abasirikari banabanje gutera amagerenade kuri iyo Kiriziya bagamije kwica inzugi za yo, kugira ngo babone uko basohora abari bayihungiyemo nk’uko Udahemuka Joseph abivuga.

Ati “Ababigizemo uruhare cyane ni burugumesitiri Bisengimana Paul wa komini, ariko yahawe inkunga ikomeye cyane na burugumesitiri Semanza Laurent wayoboraga komini Bicumbi bafatanya n’abapolisi n’abasirikari n’interahamwe, nibo bishe Abatutsi bari bahungiye ku Kiriziya.”

Mu kwibuka ku nshuro ya 22 mu rwibutso rwa Musha hashyinguwe imibiri 147 yiyongera ku 19,869 yari ishyinguyemo.

Abo baburugumestiri kimwe n’abandi bagize uruhare muri Jenoside ngo bakwiye kujya bagawa mu ruhame mu gihe cyo kwibuka nk’uko umuyobozi wa IBUKA mu Karere ka Rwamagana, Munyaneza Jean Baptiste abivuga.

Ngo ni ukugira ngo n’abakiri bato babamenye, hatazagira ubona aho amenera ashaka kugoreka amateka.

Mu kwibuka Jenoside yakorewe Abatutsi ku nshuro ya 22 mu rwibutso rwa Musha hashyinguwe imibiri 147 yiyongera ku yindi 19.869 yari ishyinguye muri urwo rwibutso.

Bikino avuga ko mu Batutsi basaga 3000 bari buhungiye mu Kiriziya ya Musha abo azi barokotse ari bane bonyine.

Umuyobozi wa IBUKA muri Rwamagana avuga ko ayo mateka akwiye kwandikwa akabikwa, agasaba abafite amateka kubimenyesha ubuyobozi kugira ngo bayatange yandikwe n’impuguke mu by’amateka zatangiye kwandika amateka ya Jenoside yakorewe muri aka karere.

Gatete Jean Baptiste yayoboraga Komini Murambi mu cyari Perefegitura ya Byumba mu gihe cya Jenoside, naho Senkware Celestin ayobora Komini Kayonza yo muri Perefegitura ya Kibungo.

Ndangamira avuga ko abatutsi b’i Mukarange bari babanje kwihagararaho banesha interahamwe zigobokwa na ba burugumesitiri Gatete na Senkware.

Ngo ni bo bahaye interahamwe ubufasha bituma tariki 12 Mata 1994 zibasha kwica imbaga y’Abatutsi bari bahungiye i Mukarange zibicana n’abapadiri bari banze kwitandukanya n’ababahungiyeho.

Nubwo abenshi bishwe kuri iyo tariki mbere ngo bari birwanyeho bahangana n’ibitero by’interahamwe baranazinesha nk’uko Ndangamira Faustin yabivuze kuri uyu wa 12 Mata 2016, ubwo bibukaga abazize Jenoside yakorewe Abatutsi baguye i Mukarange.

Ati “Abari baturutse i Kayonza na Kiyenzi twarabarwanyije turabanesha. Senkware aravuga ati ‘muraturwanyije muradutsinze? Tugiye kubereka’. Mu gitondo tariki 12 Mata ni bwo baje kwica.”

Abagabo n’abasore ngo barwanaga n’Interahamwe abagore n’abakobwa bakabashakira amabuye bakoreshaga kugeza bazitsinsuye.

Umuyobozi w’Akarere ka Kayonza, Jean Claude Murenzi, avuga ko bazakomeza kwita ku barokotse Jenoside no kwita ku nzibutso abishwe muri Jenoside baruhukiyemo.

Gusa, ba burugumesitiri Gatete na Senkware bamaze guha izo nterahamwe ubufasha bw’abasirikari n’amagerenade zarushije imbaraga abo batutsi zitangira kubica tariki 12 nk’uko Kibukayire Anonciata waharokokeye abivuga.

Ati “Twashyiraga abasore n’abagabo amabuye bakarwana n’ibitero barabitsinsura babigeza Gahushyi. Tariki 12 bya bitero byaje biri kumwe n’abasirikari batangira gutega amagerenade mu kibuga, abasore twabashyira amabuye bakwiruka bajya kubarwanya bakaba baguye muri gerenade tubona ko byarangiye batangira kutwica.”

Kwibuka i Mukarange byahuriranye no gushyingura mu cyubahiro imibiri 22 y’abazize Jenoside yabonetse itari yagashyingurwa.

Umuyobozi w’Akarere ka Kayonza, Murenzi Jean Claude, yavuze ko ubuyobozi buzakomeza kwita ku barokotse Jenoside mu rwego rwo kubafata mu mugongo, by’umwihariko hakanashyirwa imbaraga mu gutunganya inzibutso “kuko nta kindi inzirakarengane zishwe muri Jenoside zakorerwa kitari ukuzisubiza agaciro zishyingurwa mu cyubahiro kandi neza.”

Bashyingura mu cyubahiro imibiri 22 yabonetse.

Iyo mibiri yashyinguwe isanze indi isaga ibihumbi 12 ishyinguye mu Rwibutso rwa Mukarange. Umuyobozi w’Akarere ka Kayonza avuga ko hari gahunda yo kubaka urwo rwibutso kimwe n’izindi ziri muri ako karere kugira ngo zijyane n’igihe kandi zishobore kubika neza amateka ya Jenoside.

Uwo mudugudu ugizwe n’inzu 25, zikaba ari zimwe mu za mbere zubakiwe abarokotse Jenoside yakorewe Abatutsi mu 1994 kuko zubatswe mu mwaka 1997.

Akarere kabijeje ko bazasanirwa amazu vuba.

Iyo imvura yaguye batega amabase imbere mu nzu kuko zimwe muri zo ziva. Gusa ikibazo gikomereye benshi ngo ni uko abubatse izo nzu batazihaye umusingi (fondasiyo) kandi zubakishijwe amatafari ya rukarakara.

Amwe mu matafari yo hasi kuri izo nzu agaragara nk’atose, kandi yacukutsemo imyobo iterwa n’amazi y’imvura yinjirira mu gikuta kimwe agahingukiranya mu kindi anyuze imbere mu nzu bitewe n’uko izo nzu zidafite fondasiyo, nk’uko Murekatete Vestine na Murekatete Esperence bafite inzu muri uwo mudugudu babivuga.

Ibi bituma abatuye muri ayo mazu bahora bahagaritse umutima bakeka ko haguye imvura nyinshi ishobora zabagwira.

Murekatete Vestine ati “Mba numva imvura yagwa ku manywa gusa. Amatafari yose hasi yaratemye, iyo imvura igwa amazi yinjira mu nzu ari menshi. Iyo iguye nijoro ndara mpagaze umutima uhagaze mfite ubwoba ko inzu yatugwira.”

Kuba izo nzu zitagira fondasiyo n’amabati azisakaye akaba yarashaje ngo bigaragaza ko hakenewe ubufasha bwihutirwa bwo kuzisana, nk’uko Mukagihana Liberata uhagarariye AVEGA muri uwo mudugudu akaba anakurikirana ubuzima bw’abawutuyemo abivuga.

Ati “Amazi araza agapfumura mu nzu kubera ko nta fondasiyo. Tuba dufite impungenge ko amazi azaca hasi inzu zikagwa kubera ko amatafari yo hasi ajenga kandi amazi yagiye ayacamo ibinogo.”

Umuyobozi w’Akarere ka Rwamagana, Radjab Mbonyimuvunyi, avuga ko ayo mazu azasanwa ku bufatanye bw’akarere na FARG.

Umuyobozi w’Akarere ka Rwamagana, Mbonyumuvunyi Radjab, avuga ko amazu abo bapfakazi batuyemo yubatswe huti huti kugira ngo babone aho bakinga umusaya, bikaba byaratumye atubakwa mu buryo burambye. Cyakora ngo ubuyobozi bw’akarere bufatanyije n’ikigega FARG gifasha abacitse ku icumu ngo burateganya gusana ayo mazu.

Ati “Abarokotse Jenoside benshi ntibari bafite aho bakinga umusaya nyuma ya Jenoside, bituma amazu yubakwa mu buryo bwihuse ntiyakomera, kubera igihe amaze akaba yaratangiye kwangirika. FARG yatwemereye ko izaduha inkunga n’ubushobozi bw’akarere bukiyongeraho zigasanwa.”

Kimwe mu bitera ayo mazi asenyera abatuye muri uwo mudugudu harimo no kuba umuhanda ujya aho batuye utagira inzira z’amazi zayamanukana mu gishanga kiri hepfo yawo bigatuma asenyera abo baturage.

Umuyobozi w’Akarere ka Rwamagana avuga ko bagiye kwiga uko icyo kibazo cyakemuka. Nibasanga kirenze ubushobozi bw’akarere ngo haziyambazwa izindi nzego zirimo n’ikigo cy’igihugu gishinzwe iterambere ry’ubwikorezi, RTDA, kugira ngo uwo muhanda ukorwe neza.

Muri abo bana ngo hari abumvaga amateka ya Jenoside nk’inkuru zisanzwe ntibayahe agaciro cyane, bitewe n’uko yabaye bataravuka.

Abakiri bato ngo bafata kwibuka nk’ikimenyetso kibahamiriza ko Jenoside yakorewe Abatutsi yabayeho.

Cyakora, ngo ubuhamya n’ibiganiro bitangirwa muri gahunda zo kwibuka abazize Jenoside biba buri mwaka bigenda bibafasha kumva no kwemera ko Jenoside yakorewe Abatutse yabayeho koko.

Umuhoza Hebrine, w’imyaka 19, agira ati “Nta gihamya mfite ko Jenoside yabaye, nshobora kubyumva nka filimi kuko [igihe yabaga] ntari mpari. Ariko ibimenyetso bigenda biza buri mwaka uko twibuka ni ko tugenda twemera ko Jenoside yabaye, no ku mafilimi turabibona.”

Nubwo abo bana bavutse nyuma ya Jenoside bavuga ko amateka y’u Rwanda afite ikintu kinini avuze kuri bo, Mugabekazi wavutse nyuma gato y’uko Jenoside ihagarikwa avuga ko iyo bumvise ubwicanyi bw’indengakamere Abatutsi bakorewe muri Jenoside bituma bashaka kumenya uko ubwo bwicanyi bwatangiye n’icyabuteye.

Uyu mukobwa ufite imyaka 19 avuga ko amaze gusobanukirwa ko Jenoside yabayeho abikesha ubuhamya n’ibiganiro bitangwa mu gihe cyo kwibuka.

Ati “Iyo twumvise ubwicanyi ndengakamere bwabaye tugerageza kumenya uko byagenze n’uko abantu bishwe. Ntabwo uba wiyumvisha neza ukuntu umuntu yafataga umuhoro akaba yatema undi.”

U Rwanda ruribuka ku nshuro ya 22 Jenoside yakorewe Abatutsi mu nsanganyamatsiko yo kurwanya ingengabitekerezo ya Jenoside.

Kuba bamwe mu bana bavutse nyuma y’iyo Jenoside badasobanukiwe amateka yayo ngo bishobora kuba intandaro yo kubayobya.

Hari ababyeyi basanga abantu bakuru b’inyangamugayo bakwiye kujya bahuriza hamwe urubyiruko rukigishwa amateka yaranze u Rwanda, kugira ngo hatagira urumeneramo akarutoza ingengabitekerezo yasubiza u Rwanda mu icuraburindi nk’uko Muyombya Felecien w’i Rwamagana mu Murenge wa Kigabiro abivuga.

Nubwo bamwe mu bana badasobanukiwe ayo mateka, ngo nta ngengabitekerezo ya Jenoside ibarangwaho nk’uko bamwe mu babyeyi babihamya.

Muyombya we asanga abantu bakuru bakwiye kujya bahuriza hamwe urubyiruko bakarusobanurira amateka ya Jenoside kugira ngo hatazagira abaruyobya.

Bemeza ko iyo ngengabitekerezo isigaye mu bantu bakuru, ku buryo urubiruko rukwiye kwitwararika ku byo rubwirwa n’ababyeyi rukabamaganira kure igihe bashaka kurubibamo amacakubiri.

Buri mwaka mu gihe cyo kwibuka abazize iyi jenoside, humvikana ubuhamya bukubiyemo amateka yayo.

Gusa, kenshi usanga ubwo buhamya butabikwa ku buryo uwabutanze aramutse atakiriho, ayo mateka ashobora kwibagirana cyangwa umwimerere wayo ugatakara uko imyaka ishira indi igataha, nk’uko bamwe mu baturage babyemeza.

Aha ni ku Rwibutso rwa Jenoside yakorewe Abatutsi rwa Rutonde mu Karere ka Rwamagana.

Niyomugabo Callixte wo mu Karere ka Rwamagana ati “Ubuhamya abantu batanga none, uko babuvuga ndahamya ko mu 1995 na nyuma yaho gato atari ko bari kubuvuga. Ndahamya ko hari utuntu bagenda bibagirwa uko imyaka ishira.”

Nyuma y’imyaka 22 Jenoside ibaye, hari abana benshi bagiye bavuka. Uretse abagira amahirwe yo kubona ababasobanurira amateka ya Jenoside ngo hari n’abayumva nk’inkuru zisanzwe bitewe n’uko bumva avugwa mu gihe cyo kwibuka gusa. Bamwe bavuga ko bafite impungenge ko ayo mateka adasigasiwe batazashobora kuyasobanurira abazabakomokaho.

Mugabekazi Olive w’imyaka 21 ati “Amateka tumenya tuyabwirwa n’ababyeyi, ariko hari igihe tuzaba tutakibafite natwe abadukomokaho ntibamenye ibyabaye kuko ayo mateka ntiyasigasiwe ngo yandikwe. Twumva hakwiye kujyaho ikigo cyihariye cyandika amateka ya Jenoside kugira ngo abayatwigisha igihe bazaba batakiriho natwe tuzabashe kuyigisha abazadukomokaho.”

Mugabekazi wavutse nyuma ya Jenoside yakorewe Abatutsi, arasaba ko amateka yayo yasigasirwa.

Muhoza Hebrine w’imyaka 19 we agira ati “Kwigisha amateka ya Jenoside ntibikwiye kuba mu kwezi kwa kane gusa. Yego na ho tuhungukira byinshi, ariko birakenewe ko twabona ahantu twajya twigira amateka.”

Hafi buri mwaka mu gihe cyo kwibuka abazize Jenoside yakorewe Abatutsi mu Rwanda, hirya no hino mu turere humvikana ijwi ry’abayobozi b’Umuryango wa IBUKA basaba ko abafite ubuhamya kuri Jenoside bafashwa bukandikwa, aho bishoboka bukabikwa mu buryo bw’amashusho.

Umuyobozi wa IBUKA mu Karere ka Rwamagana, Munyaneza Jean Baptiste avuga ko kuba bidakorwa ngo byaba biterwa n’uko iyo gahunda zo kwibuka zirangiye abantu bahita bahugira mu bindi. Bityo, agasaba ko akarere kabishyira mu mihigo igomba gukurikiranwa umunsi ku munsi.

Umuyobozi wa IBUKA mu Karere ka Rwamagana, Munyaneza Jean Baptiste.

Ati “Bigaragara ko tubivuga bikibukwa cyane mu kwezi kwa kane kuko arib wo abantu baba bari muri gahunda zo kwibuka. Ni yo mpamvu dusaba ubuyobozi ko bijya mu muhigo kugira ngo bibe ibintu byanabonerwa ingengo y’imari kugira ngo bitazakomeza kuvugwa ariko nta gikorwa.”

Umuyobozi w’Akarere ka Rwamagana, Mbonyumuvunyi Radjab, avuga ko kubika amateka ya Jenoside bikwiye.

Ubuyobozi bw’aka karere ngo bugiye gufatanya na IBUKA gushaka abafite ubuhamya babutange bwandikwe, kugira ngo abazavuka mu bihe biri imbere bazasange hari aho bashobora kubona amateka y’iyo Jenoside.

Mu duce twinshi tw’igihugu n’Intara y’Iburasirazuba by’umwihariko, ayo mateka ntarakusanywa ngo abikwe mu buryo burambye. Cyakora mu Murenge wa Kigabiro wo mu Karere ka Rwamagana ngo batangiye kwandika amateka yaho no kuyabika mu buryo bw’amashusho, nk’uko Umuyobozi wa IBUKA muri ako karere abivuga.

Umuyobozi w’Akarere ka Rwamagana, Mbonyumuvunyi Radjab na we yemera ko kwandika amateka ya jenoside bikwiye.

Intego bafite ngo ni uko amateka y’agace kitwaga u Buganza kose yakwandikwa, kakaba kari kagizwe n’icyari Komini Rutonde na Komini Muhazi mbere ya Jenoside.

Ubusanzwe abanyeshuri biga muri bene ayo mashuri bajya muri ‘ghetto’ kugira ngo biborohere kwiga, kuko mu gihe bize bataha hari abajya bakora urugendo rw’amasaha 10 buri munsi n’amaguru kugira ngo bave mu rugo bagere ku ishuri no kuva ku ishuri basubira mu rugo.

GS Rwamagana Protestant ni rimwe mu mashuri y’uburezi bw’ibanze yigamo abana baba muri "ghetto".

Nsekayabo Jean Claude, wiga muri GS Rwamagana Protestant, agira ati “Impamvu yatumye nza muri ‘ghetto’ iwacu ni kure. Kuva ku ishuri njya mu rugo n’igare nkoresha amasaha abiri, urumva kugenda n’amaguru bifata hafi amasaha atanu cyangwa atandatu.”

Hari abanyeshuri biga mu mashuri y’uburezi bw’ibanze bava mu karere kamwe bakajya kwiga mu kandi bakurikiye amashami batabasha kubona mu mashuri yo mu turere bavukamo, bigatuma bakodesha ‘ghetto’ hafi y’ishuri ngo biborohere kwiga.

Mukamuganga Leoncie yiga mu ishuri ry’uburezi bw’ibanze mu Karere ka Rwamagana ariko akaba avuka mu Karere ka Ngoma.

Ni umwe mu bakobwa biga bataha muri ‘ghetto’ kandi ngo yabihisemo kuko iwabo ishami yashakaga kwiga ritari rihari.

Ati “Njye naje kwiga i Rwamagana njya muri ‘ghetto’ nkurikiye ishami rya MEG (Mathematics, Economics and Geography) kuko iwacu hari ishami rya HEG (History, Economics and Geography).”

Nubwo bimeze gutyo Ubuyobozi bw’Intara y’Iburasirazuba buherutse gufata icyemezo cyo guca ‘ghetto’ ku biga mu mashuri y’uburezi bw’ibanze.

Guverineri w’Iburasira, Odette Uwamariya, avuga ko "ghetto" zitemewe kuko zitera abana ingeso mbi zirimo n’ubusambanyi.

Guverineri w’Iburasirazuba, Uwamariya Odette, avuga ko abanyeshuri batemerewe kuzibamo kuko zituma bashorwa mu ngeso mbi, ari na yo mpamvu bahisemo kuzica.

Ati “Politiki dufite y’uburezi ntiteganya amacumbi ku bana biga mu mashuri y’uburezi bw’ibanze. Abana baragenda bakishakira aho bacumbika ha make bakajyanwa mu bucuruzi n’ubusambanyi, turagira ngo abantu badufashe ntabwo za ‘ghetto’ kuri abo bana zemewe.”

Abanyeshuri bajya muri ‘ghetto’ ababyeyi babo babizi

Abanyeshuri baba muri ‘ghetto’ twavuganye bemeza ko bajya muri ghetto ababyeyi babo babizi kuko “babafasha kwishyura ubukode bwazo bwa buri kwezi, ndetse bakanabaha ibyo kurya bibatungira muri izo ghetto.”

Abo twavuganye bavuga ko batakwirengagiza impungenge z’abayobozi, ariko na none ngo ikibazo cya ‘ghetto’ ntigikwiye kureberwa mu ishusho rusange kuko abazibamo bose atariko bagamije uburara.

Mukamuganga ati “Nk’ubu urabona mba muri ‘ghetto’ ndi umukobwa ariko sinemeranya n’abavuga ko umuntu wese uba muri ‘ghetto’ agira uburara. Njye nayijemo nje kwiga, icyo nzi ni uko ugira uburara muri ‘ghetto’ n’iwabo aba asanzwe yari abufit.”

Abanyeshuri barebwa n’icyo cyemezo cy’Ubuyobozi bw’Intara y’Iburasirazuba bavuga ko kiramutse gishyizwe mu bikorwa byabangamira benshi, ndetse bikaba byatuma bamwe bava mu ishuri nk’uko Ngirumpatse abivuga.

Ati “Icyo cyemezo gishyizwe mu bikorwa byabangama cyane. Hari imirenge myinshi usanga kugira ngo ugere ku kigo kiri mu burezi bw’ibanze bigusaba gukora urugendo rutari munsi y’amasaha abiri cyangwa atatu, ugasanga baciye ‘ghetto’ abenshi bishobora gutuma duhagarika kwiga.”

Guverineri Odette Uwamariya, we avuga ko hafatwa icyemezo cyo guca ‘ghetto’ z’abo banyeshuri ubuyobozi butirengagije ko hari imirenge usanga ari minini, ku buryo hari abana byagora kubona ishuri bigamo hafi yabo.

Gusa ngo basabye uturere gukora igenzura tukagaragaza ahari ikibazo cyihariye kugira ngo gishakirwe umuti.

Ati “Twumvikanye ko uturere dukora igenzura tukagaragaza ahari ikibazo cyihariye tugakorana n’Ikigo cy’Igihugu cy’Uburezi (REB) hakaba haba gahunda y’umwihariko yo gushakira abo bana aho bacumbika, kandi nibanahacumbika habeho uburyo bwo gukurikirana uburere bwabo.”

Izi ni zimwe muri "ghetto" abanyeshuri biga mu mashuri y’uburezi bw’ibanze batahamo.

Ntitwabashije kubona ababyeyi b’abana biga baba muri ‘ghetto’ ubwo twateguraga iyi nkuru, ariko bamwe mu babyeyi twavuganye na bo ngo basanga kwihutira guca ‘ghetto’ kuri abo bana atari cyo cyihutirwa kurusha kubanza kwiga uhereye mu mizi impamvu zibatera kwiga baba muri ghetto.

Mukamugema Constance ati “Ibyo ari byo byose hari abana ayo macumbi ashobora gutera uburara, ariko simpamya ko ari bose.

Ubuyobozi bukwiye kubanza kwiga impamvu abana bajya muri ayo macumbi kandi zigahabwa agaciro kuko hari abana ushobora gusanga barahisemo kujya mu icumbi kubera impamvu zumvikana.”

Gahunda y’amashuri y’uburezi bw’ibanze ni imwe muri gahunda zashyizweho hagamijwe guteza imbere uburezi kuri bose.

Nubwo ayo mashuri agamije gutanga uburezi kuri bose ahenshi usanga ari ishuri rimwe mu murenge, ku buryo hari abana bitorohera kurigeraho cyane cyane abatuye mu mirenge mini.

Umuvugizi wa Polisi y’u Rwanda mu Ntara y’Iburasirazuba, IP Emmanuel Kayigi, yatangaje ko abanyamabanga nshingwabikorwa b’imirenge ya Gahini mu Karere ka Kayonza, Nyarugenge mu Karere ka Bugesera na Kigarama mu Karere ka Kirehe (we arakekwaho ibyaha yakoreye mu Murenge wa Mahama), bamaze gutabwa muri yombi; bakaba bakurikiranweho gukoresha nabi no kunyereza amafaranga ya VUP.

Umuvugizi wa Polisi y’u Rwanda mu Ntara y’Iburasirazuba, IP Emmanuel Kayigi.

IP Kayigi yavuze ko mu batawe muri yombi kandi harimo n’abakozi b’imirenge bari bafite mu nshingano gahunda ya VUP igenewe gufasha abatishoboye, ndetse n’abaturage bakekwaho ubufatanyacyaha mu inyerezwa ry’ayo mafaranga.

Yagize ati “Abo bafunzwe bakekwaho kuba baragiye bafata amafaranga ya VUP bakayaha abantu bishoboye, abandi bakayaha abafite akazi kazwi mu nzego za Leta, abandi bakayaha abo bafitanye amasano, bakagenda babihimbira inyandiko.”

IP Kayigi avuga ko hari aho abayobozi bahimbaga lisiti za baringa zigaragaza ko hari imirimo y’amaboko yakozwe muri VUP igatangwaho amafaranga, “wakurikirana ugasanga iyo mirimo itarakozwe cyangwa yarakozwe n’umuganda”.

Inyerezwa ry’ayo mafaranga ryagaragajwe n’igenzura ryakozwe mu mwaka ushize wa 2015. Ntiharamenyekana umubare w’amafaranga yose yanyerejwe, ariko nko mu murenge wa Nyarugenge muri Bugesera ngo hanyerejwe agera kuri miriyoni 49Frw.

Mu Murenge wa Kigarama ho Umunyamabanga Nshingwabikorwa w’umurenge n’uwari ushinzwe VUP bakekwaho kuba barafashe amafaranga agera kuri miriyoni 15 y’abatishoboye bavuga ko bagiye kubagurira imodoka, hakaba hari hashize imyaka itatu abo baturage batabona ifaranga na rimwe ry’iyo modoka; ndetse ikaba yaranagurishijwe.

Polisi ivuga ko iperereza rigikomeje no ku bandi bayobozi bakekwaho uburiganya muri iyi gahunda.

Abatawe muri yombi bahamwe n’ibyaha, bahanishwa ingingo ya 325 n’iya 611 zihana abononnye, abarigisa umutungo wa Leta n’abakora inyandiko mpimbano.

Buri ngingo iteganya igifungo kiri hagati y’imyaka irindwi na 10, n’ihazabu y’amafaranga yikubye inshuro hagati y’ebyiri n’eshanu z’agaciro k’icyarigishijwe ku ngingo ya 325, ndetse n’ihazabu y’amafaranga kuva ku bihumbi 500 kugeza kuri miliyoni eshanu ku ngingo ya 611.

Umuhuzabikorwa wa AERG, Mirindi Jean de Dieu, yabisabye urubyiruko rusaga 200 rw’abarokotse Jenoside mu turere twa Rwamagana na Kayonza, kuri uyu wa Kabiri, tariki 29 Werurwe 2016, ubwo bahugurwaga ku kwihangira imirimo ngo biteze imbere.

Urubyiruko rusaga 200 rw’abarokotse Jenoside mu turere twa Rwamagana na Kayonza rwahawe amahugurwa yo guhanga umurimo.

Mu bayahawe harimo abarangije amashuri yisumbuye n’abagiye bayacikiza kubera ingaruka za Jenoside yakorewe Abatutsi mu 1994, kuko hari abareraga barumuna babo bikabaviramo gucikiza amashuri.

Mirindi avuga ko kubahugura bigamije kububakira ubushobozi no kubaha icyerekezo cyatuma biteza imbere.

Ati “Turashaka kubakira aba bana ubushobozi tubigisha kwihangira imirimo no kubafasha gukoresha duke bafite bakatubyaza inyungu. Hari abafite amasambu basigiwe n’ababyeyi babo, abo tubereka ko bishoboka ko n’ayo masambu bayakoresha bakayabyaza inyungu.”

Umuhuzabikorwa wa AERG, Mirindi Jean de Dieu.

Urubyiruko rwahuguwe ruvuga ko rwungutse byinshi bizatuma rutinyuka gushaka icyaruteza imbere, nk’uko Mushashi Devota wo mu Murenge wa Kigabiro mu Karere ka Rwamagana abivuga.

Gusa bamwe bagaragaza imbogamizi y’uko hari ubwo baba bafite ibitekerezo by’imishinga bakora ariko bakabura igishoro baheraho ndetse hakaba hari n’abagerageje kwegera ibigo by’imari byanga kubagirira icyizere, nk’uko Nsabimana Frederic Cyubahiro wo mu Murenge wa Munyaga mu Karere ka Rwamagana yabitangaje.

Ati “Baduhuguriye gutinyuka no kwigirira icyizere ariko dufite imbogamizi y’uko hari ubwo duhezwa muri banki kandi bitari bikwiye. Nakoze umushinga w’ubuhinzi bw’urutoki njya gusaba amafaranga muri SACCO, barayanyima bambwira ko nujuje ibyangombwa ariko batayampa ngo nshobora kunanirwa kuyishyura.”

Nsabimana avuga ko bagifite imbogamizi y’uko ibigo by’imari bitabizera kandi bafite imishinga myiza.

Umuhuzabikorwa wa AERG avuga ko batangiye gushakira ibisubizo icyo kibazo nubwo ubushobozi butaraboneka ku buryo buhagije.

Ati “Hari amafaranga agera kuri miliyoni 60 twashyize kuri banki ku buryo umwana ukoze umushinga mwiza ajya kuri banki bakamuha kuri ayo mafaranga yamara kuyabona akishyura kugira ngo afashe n’abandi.”

Aya mahugurwa ari muri gahunda y’icyumweru cyahariwe ibikorwa bya AERG na GAERG birimo gukorwa hirya no hino mu gihugu mu rwego rwo gutegura Kwibuka ku nshuro ya 22 Jenoside yakorewe Abatutsi.

Nyuma yo gutora abayobozi bahagarariye ishyirahamwe ryabo ku rwego rw’intara, bavuga ko bagiye kubona umurongo bakareka gukora ari ba “nyamwigendaho” ahubwo ko bazafatanyiriza hamwe kuzamura ubumenyi bw’umwuga bakora.

Uwamahoro udoda yizera ko ishyirahamwe ryabo nirikora neza, rizatuma bunguka kurushaho.

Uwamahoro Jacqueline udodera mu isoko rya Rwamagana avuga ko iryo shyirahamwe rikoze neza, ryahindura ubuzima bw’abadozi bakarushaho gukora bunguka.

Ati “Imana idufashije iri shyirahamwe rigakomera, ndabona hari byinshi ryatugezaho kuko umwuga wacu wanagira akamaro ugahabwa agaciro gasumbye ako wahabwaga.”

Kalisa Erneste we avuga ko yizeye ko iryo shyirahamwe rizamufasha guhura n’abandi badozi yakungukiraho ubumenyi kuko ubusanzwe ngo yakoraga ari nyamwigendaho.

Nubwo abadozi bishyira hamwe, hari isura mbi bamwe muri bo bambitse umwuga wabo, ku buryo hari ababagereranya n’abafundi kubera kubeshya no kutubahiriza gahunda.

Bamwe mu badozi b’Iburasirazuba, nyuma yo gushyiraho ishyirahamwe ribahuza.

Umuyobozi w’Urugaga rw’Abikorera mu Ntara y’Iburasirazuba, Habanabakize Fabrice, avuga ko kugira ngo abadozi batere imbere bagomba kubanza kwiyambura uwo mwambaro biyambitse utuma bamwe batagirirwa icyizere.

Ati “Abadozi bakundaga kubagereranya n’abafundi kubera kubeshya no kutubahiriza gahunda. Turabasaba guhindura iyo sura biyambitse kandi bagakunda umwuga wabo kuko hari abafite imyumvire ko ari abadozi kubera ko babuze ibindi bakora.”

Abadozi baganiriye na Kigali Today bemeza ko kwishyira hamwe kwabo bizatuma ayo makosa yo kubeshya no kutubahiriza gahunda bayacikaho, kuko abayobozi babo bazajya bahana abayafatiwemo kuko baba bahesha isura mbi abadozi muri rusange.

Perezida w’Urugaga rw’Abikorera mu Ntara y’Iburasirazuba, Habanabakize Fabrice.

Ishyirahamwe ry’abadozi ku rwego rw’igihugu ryatangiye mu mwaka wa 2014. Ryatekerejwe nyuma yo kubona ko hari abadozi benshi mu Rwanda ariko bakaba batagira aho bahurira.

Minisitiri w’Ubucuruzi n’Inganda, Kanimba François, aherutse kuvuga ko 15% by’abakora imirimo idashamikiye ku buhinzi, ubasanga mu budozi. Yavugaga ko baramutse bishyize hamwe, byakorohera Leta kubatera inkunga haba mu kububakira ubushobozi no kubaha amahugurwa.

Uwo mushinga watangiye gukorera muri iyo ntara muri Mata 2013, ukaba urangiranye na Werurwe 2016. Wari ufite intego yo guteza imbere imibereho myiza y’abaturage binyuze mu kubashishikariza kwihangira imirimo.

Hakizamungu Ephron wari ukuriye umushinga "Hand in Handa" avuga ko wafashije abatura guhanga imirimo mishya isaga ibihumbi 99.

Abagenerwabikorwa b’uwo mushinga basaga ibihumbi 100 babanje guhurizwa hamwe mu matsinda bahabwa amahugurwa yabafasha kwagura ibitekerezo byo guhanga imirimo nk’uko Hakizamungu Ephron wari ukuriye uwo mushinga abivuga.

Ati “Twabanje kubigisha ko mbere yo guhanga umurimo ubanza ukareba igikenewe aho ushaka gukorera. Hari nk’abashinze ‘salon’ yo kogosha bitewe n’uko babonaga badafite aho bogoshesha abana.”

Abagenerwabikorwa b’uwo mushinga bavuga ko wabafashije guhindura imibereho yabo. Ingabire Martine wo mu Murenge wa Nzige mu Karere ka Rwamagana yahuguriwe gukora amasabune, amarangi n’amavuta yo kwisiga. Ubumenyi yungukiye muri uwo mushinga bwamubereye akabando azajya agenderaho.

Ati “Uyu mushinga wampaye ubumenyi umbera n’akabando nzajye ngenderaho. Abana banjye nta kintu babuze, naguze amatungo, kandi uwantungura akambaza amafaranga ibihumbi 40 nayamwereka, mba mfite n’ayo nizigamye muri banki.”

Amagenerwabikorwa b’umushinga "Hand in Handi" bahamya ko wabafashije guhindura imibereho.

Ubuyobozi bw’Intara y’Iburasirazuba buvuga ko uwo mushinga wafashije intara gushyira mu bikorwa gahunda yo guhanga imirimo mishya buri mwaka nk’uko byavuzwe na Makombe Jean Marie Vianney, Umunyamabanga Nshingwabikorwa.

Nubwo uwo mushinga urangiye ubuyobozi ngo buzakomeza gukurikirana abo baturage bafashijwe guhanga imirimo kugira ngo iyo mirimo bahanze ibagirire akamaro ikagirire na bagenzi babo.

Ati “Tugiye gutora komite y’ihuriro ry’abafatanyabikorwa ku ntara. Tuzashyiraho umukozi uzakurikirana ibikorwa byose by’abafatanyabikorwa ku buryo azakomeza gukurikirana ibikorwa by’uyu mushinga kugira ngo bikomeze kugirira abaturage akamaro.”

Makombe avuga ko Intara y’Iburasirazuba ngo ifite gahunda yo kugabanya umubare w’abaturage bayo bari munsi y’umurongo w’’ubukene bakava kuri 15 bakagera kuri 12%.

Kugira ngo bigerweho ngo abaturage bakwiye gukomeza umuco wo kuzigama kugira ngo babone ubushobozi baheraho bahanga imirimo mishya.

Ibikoresho byibwa cyane ngo ni televiziyo na radiyo, ku buryo ababisigaranye muri ako gace ari mbarwa nk’uko abahatuye babivuga.

Barembejwe n’ubujura bwa amateleviziyo na radio.

Uwimana Emerita ati “Abajura baraza bakagutera mu nzu utwo wari ufite twose bakadutwara ugasigarariraho. Batwara za televiziyo, radiyo n’ibindi basanze mu nzu. Televiziyo zo barazimaze ntibyoroshye kubona uyisigaranye.”

Uretse kwibwa ngo hari igihe abajura biba umuturage bagasiga bamugiriye nabi, yanatabaza ntabone ubufasha mu baturanyi kuko abajura baba batangatangiye impande zose.

Aho bagiye kwiba ngo bafungirana abaturanyi baho mu nzu ku buryo bitaborohera gusohoka, n’ubigerageje bakamugirira nabi ku buryo ashobora no kuhasiga ubuzima.

Uwitwa Ngirumpatse, we ati “Hari uwo bateye baramwiba barangije baranamutema agerageje kubirukankana. Iyo ugiye gutabara mugenzi wawe usanga bagufungiranye mu nzu ukabura uko usohoka.

Hari umugabo witwa Yoweri yarasohotse bamukubita ibuye! Ntabwo wabona umuntu akwereka umuhoro ngo wibeshye usohoka.”

Abaturage bavuga ko nubwo abo bajura babayogoje hari abantu barara amarondo. Gusa, ngo imbaraga hari igihe usanga zidahagije ku buryo abaturage basaba ubuyobozi kubashakira ubundi buryo bwo guhangana n’icyo kibazo.

Umunyamabanga Nshingwabikorwa w’Umurenge wa Rubona, Bizumuremyi Pierre Celestin, yemera ko muri ako gace koko abajura bayogoje abaturage, ariko ngo hari ingamba babafatiye ku buryo bizeye ko zizatuma bigabanuka.

Ati “Ubujura bwo burahari ariko ni igikorwa twavuze ko tugiye gushyiramo imbaraga cyane cyane amarondo no gutanga amakuru hakiri kare bigashyirwamo imbaraga kugira ngo abantu bakomeze kwicungira umutekano. Ariko cyane cyane tugamije gushyiraho irondo ry’umwuga kuko ari bwo abakora irondo barikorana umwete n’ubushake.”

Gushyiraho irondo ry’umwuga ni kimwe mu byemezo byafashwe ku rwego rw’Intara y’Uburasirazuba hagamijwe guhangana n’ibishobora guhungabanya umutekano.

Iryo rondo rikorwa n’abantu bambaye umwambaro w’akazi kandi bagahabwa agahimbazamusyi buri kwezi kava mu misanzu abaturage bakusanya.