Abahinga muri Greenhouse baba bizeye umusaruro utubutse batitaye ku kirere

Koperative yitwa ’Tuza Bwisige’ ihinga imboga n’imbuto mu Mudugudu wa Murambi, Akagari ka Mukono, Umurenge wa Bwisige w’Akarere ka Gicumbi, yahinze imboga za puwavuro muri greenhouse ya metero 14 kuri 36, ikaba yiteze umusaruro ufite agaciro ka Miliyoni 32Frw mu mezi atatu bazamara basarura.

Mukandahiro Drocelle ukuriye iyo koperative, avuga ko badashobora kubona umusururo ungana utyo mu gihe bahinze ku gasozi mu murima usanzwe, kabone n’iyo haba ari ku buso burenga hegitare yose.

Mukandahiro agira ati "Mbere y’iyi greenhouse twahingaga ku gasozi, imvura yaba yaguye ikabitwara mu gishanga, izuba ryaba ryavuye bikuma ntitugire icyo dusarura, twahingaga ku buso bungana na 1/2 cya hegitare"(are 50, mu gihe greenhouse bafite yo ari are 5 gusa).

Yungamo ko bafite ibiti 1800 bya puwavuro muri iyo greenhouse, aho buri giti kigomba gusarurwaho nibura ibiro 8 mu mezi atatu kizamara kikabona guhundura, mu gihe ikiro cya puwavuro kigurwa amafaranga atari munsi ya 2,000Frw, bakaba biteze kubona umusaruro utari munsi ya Miliyoni 32 z’Amafaranga y’u Rwanda.

Ni inyungu bavuga ko itubutse kuko nibakuramo igishoro bakoresheje kitarenga mMliyoni imwe n’ibihumbi 200Frw, buri munyamuryango muri 51 bagize iyo koperative akaba ashobora gutwara amafaranga ibihumbi 600Frw, ahwanye n’umushahara w’ibihumbi 200Frw ku kwezi kandi bitabasaba kwirirwamo buri munsi.

Umukozi w’Umushinga wa Leta wiswe Green Gicumbi ushinzwe guteza imbere ubuhinzi bwihanganira imihindagurikire y’ikirere, Théogène Ntakirutimana, avuga ko ubuhinzi bwo muri greenhouse buba bwizewe ko umusaruro witezwe ugomba kuboneka igihe cyose, kuko budashingira ku miterere y’ikirere(hanze y’iyo nzu).

Ntakirutimana ati "Guhinga muri greenhouse birinda ibihingwa guhura n’ibibazo byo hanze cyane cyane indwara, kandi ukabigenera intungabihingwa zikwiriye nk’amazi, urumuri n’umwuka, kandi bukaba ari ubuhinzi bukemura ikibazo cy’ubutaka kuko ku buso buto cyane havaho umusaruro mwinshi."

Ntakirutimana avuga ko umuntu wese uhinga muri greenhouse asabwa mbere ya byose kugirana amasezerano n’abazagura umusaruro we, mu rwego rwo kwirinda ko ibyo yejeje byazapfa ubusa.

Umuyobozi w’Umushinga Green Gicumbi, Jean Marie Vianney Kagenza, avuga ko n’ubwo buri muntu mu Rwanda atapfa kwigondera inzu ya greenhouse ishobora kubakwa n’igishoro kirenga Miliyoni 20Frw, hari imishinga ya Leta itera inkunga ubwo buhinzi kandi umuntu akihutira kwishyura iyo nguzanyo, n’iyo yaba yejeje inshuro imwe gusa.

Kagenza asaba buri Koperative y’abahinzi mu Rwanda kubaka nibura greenhouse izabarinda kurumbya imyaka, akaba ndetse ashishikariza urubyiruko n’abagore batagira igishoro n’ingwate kwishyira hamwe bakagana ikigega BDF, Minisiteri y’Ubuhinzi n’Ubworozi na ’Ireme Invest’ ya Rwanda Green Fund, bagahabwa igishoro.

Perezida Kagame akomeje guhakana ibyo u Rwanda rushinjwa byo gushyigikira umutwe wa M23, aho avuga ko abo barwanyi n’ubwo barwanira ukubaho kw’Abatutsi bavuga Ikinyarwanda mu Burasirazuba bwa DRC, batateye icyo gihugu baturutse mu Rwanda ahubwo ngo bagiyeyo bavuye muri Uganda.

Umukuru w’Igihugu avuga ko n’ubwo Leta iyobowe na Trump yakomatanyije ibijyanye n’ubukungu, politiki n’umutekano mu masezerano u Rwanda rwagiranye na DRC, hazabaho ingaruka zikomeye mu kuyashyira mu bikorwa.

Avuga ko igifite akamaro ari ukureba inyungu ku mpande zose (gutanga no guhabwa), aho gukomeza gushinja u Rwanda kuko ngo ikibazo cy’umutekano muke mu Burasirazuba bwa Congo kitatewe n’u Rwanda, ahubwo ngo gifite umuzi muremure w’amateka y’imipaka yaciwe n’abakoloni.

Perezida Kagame avuga ko raporo z’impuguke z’Umuryango w’Abibumbye zishinja umutwe wa M23 n’u Rwanda guteza umutekano muke muri Congo no kuyisahura amabuye y’agaciro, zigoreka uburyo ikibazo giteye kuko ngo zitibanda ku ngengabitekerezo ya Jenoside ikwirakwizwa na FDLR na Leta ya Congo iyishyigikiye.

Perezida Kagame ati "Mushobora kudushinja gukora ibyo ari byo byose tugomba kugira ngo FDLR idateza u Rwanda ibibazo, ariko ntabwo mwarushinja ibijyanye n’aho iyi ntambara yaturutse kuko buri wese arahazi, aba ba M23 narabivuze ubushize, baturutse muri Uganda, ntabwo baturutse hano."

Yakomeje agira ati "Ikibazo cyacu muri make ni iki: FDLR yabaye ikibazo kuva kera, ni ikibazo na n’ubu kandi izakomeza kuba ikibazo n’ejo hazaza mu gihe ikomeje kubaho ibangamiye u Rwanda. Nta ruhushya rw’umuntu uwo ari we wese dukeneye ngo turinde Igihugu cyacu."

Avuga ko u Rwanda ntaho ruhuriye no guteza ibibazo abavuga Ikinyarwanda bisanze ku butaka bwa Congo "bakaba barimo kwirukanwa ku butaka bw’icyo gihugu na Leta yabo", aho ababarirwa mu bihumbi bahungiye mu Rwanda.

Perezida Kagame ashima ko hari andi masezerano hagati ya Leta ya Congo na M23 arimo kumvikanwaho muri Qatar, kugira ngo ibibazo by’imbere muri Congo bikemuke, kandi uruhare runini rurenga 75% ngo ni aho rushingiye.

Amasezerano y’i Washington "ntabwo ari Leta zunze Ubumwe za Amerika zizayashyira mu bikorwa, FDLR nikomeza kuba hariya, n’ikibazo ni ko kizakomeza kuhaba, amasezerano arahari, twe tuzakora ibyo twemeye uko bishoboka kandi tuzabikora ari uko n’abandi buzuza uruhare rwabo."

Perezida Kagame ku bijyanye n’aho Abanyarwanda bageze mu Kwibohora, avuga ko Igihugu kigeze aho gikwiye kuba kiri, n’ubwo buri wese ngo akeneye gukora cyane kugira ngo yibone aho yifuza.

Perezida Kagame ku bijyanye n’abavuga ku buzima bwe, yasubije ko nta wagombye kwibaza ku buzima bw’undi kuko ngo ntawe ubaho iteka, n’ubwo we rimwe na rimwe ngo yagira ikibazo cy’ubuzima aterwa n’imicungire y’abo ashinzwe kuyobora.

Abaturage bari bishimye, aho bataramiwe na Senderi Hit

Umunyamuryango wa RPF Inkotanyi, akaba n’umuturage w’Akarere ka Nyagatare, Murenzi Alexis, avuga ko ubu ari bwo bakibona ubwigenge no Kwibohora nyako, ashingiye ku iterambere n’umutekano abona, aho byose ngo byateguriwe i Gikoba muri Santimetero.

Murenzi wari umwe mu bafashe urugendo rugana i Gikoba agira ati "Aha duhagaze (tugiye gutangirira urugendo) hari ku gasozi ari mu nyamaswa, hari mu rwuri ariko murahabona Sitade nziza twahawe na Perezida wa Repubulika Paul Kagame, tukaba tumushimira ndetse n’Ingabo zari iza APR kubera umutekano n’Iterambere twagezeho."

Intambara zabereye i Gikoba n’impamvu Perezida Kagame yahashyize indake

Umuyobozi w’Ingoro y’Amateka y’Urugamba rwo guhagarika Jenoside, akaba n’Umuyobozi w’abasura Umuhora mugari w’ayo mateka, Médard Bashana, avuga ko Perezida Kagame yabaye muri iyo ndake kuva muri Nyakanga 1991 kugera muri Kamena 1992, ubwo yimuraga ibirindiro akabijyana ku Murindi w’Intwari muri Gicumbi.

Perezida Kagame ngo yaje i Gikoba kubera imihindukire y’Urugamba rwo kubohora u Rwanda, bava ku bitero shuma bagana ku gufata ubutaka bw’u Rwanda kugira ngo babuhanganireho, nyuma y’uko Leta ya Habyarimana ivuze ko Uganda icumbikiye abayirwanya bitwikiriye ijoro.

Bashana ati "Inkotanyi twiyemeje ko batadutsimbura, kugeza ubwo batakaza ubushake bwo kuza kuturwanya, ubwo twebwe turasohoka dutangira guhangana na bo, ni bwo Perezida Kagame yaje gutegeka aba Ofisiye be gucukura indake hano i Gikoba hanyuma ayinjiramo, asaba n’abandi kubikora gutyo."

Umunyamabanga wa Leta muri Minisiteri y’Ububanyi n’Amahanga ushinzwe Umuryango wa Afurika y’Iburasirazuba, General (Rtd) James Kabarebe, mu mwaka ushize wa 2014 yavuze ko ari we wubatse iyo ndake ya Gikoba, ku busabe bwa Perezida Kagame wari umuyobozi w’urugamba rwo kubohora Igihugu.

Rtd Gen Kabarebe yagize ati "Jyewe icyo gihe nayoboraga umutwe w’abarinda Umugaba w’Ingabo (Perezida wa Repubulika), ni nanjye wacukuye iyi ndake yabagamo."

Tugarutse kuri Bashana uyobora Ingoro y’Amateka y’Urugamba rwo guhagarika Jenoside, avuga ko aho i Gikoba habereye urugamba rukomeye rwagize ibitero bihabwa amazina ya Rukokoma1, Rukokoma 2 na Simusiga, ngo byamaze amezi atandatu bidasiba n’umunsi umwe.

Bashana ati "Ni ibitero byafataga umunsi wose, icyumweru cyose, ukwezi kose, kumara igihe cy’amezi atandatu badasibye n’umunsi n’umwe kuva muri Nyakanga 1991, biza gutuma aka gataka kangana n’ibilometero 7 kuri 3.8 Inkotanyi zikagumana, kuko icyari igisirikare cya Perezida Habyarimana, Ex FAR, cyari cyananiwe."

Gikoba iherereye mu bice byitwa Gishuro, Kaborogota, Gikoba, Shonga, Ndego na Karama, akaba ari ho Inkotanyi zagumye, zitangira gutsinsura ibirindiro 50 byari byarashyizweho na Ex FAR.

Abantu bari benshi

Ex FAR imaze kubona ko idashoboye kwirukana Inkotanyi i Gikoba, ngo ni bwo yatangiye kwishyira mu mutuzo ivuga ko ari agataka gato cyane kangana na santimetero, kuva ubwo hahabwa izina rya ‘Santimetero’.

Bashana avuga ko Ingabo za FPR zimaze gufata ubutaka bunini cyane bw’u Rwanda mu gice cy’Amajyaruguru n’Iburasirazuba, ari bwo Umugaba w’Ikirenga, Perezida Paul Kagame, yafashe icyemezo cyo kwimurira ibirindiro ku Mulindi(i Gicumbi).

Abaturage basabwa gusura Gikoba

Umuyobozi w’Intara y’Iburasirazuba, Pudence Rubingisa, asaba abaturage gusura Gikoba kenshi mu rwego rwo kwisubizamo ubutwari no kwigira ku Nkotanyi.

Rubingisa yagize ati "Aka gasantimetero duhagazeho ni ho haturutse ubutwari bw’Ingabo zari iza RPA-Inkotanyi, ziyobowe na Perezida wa Repubulika, kandi babikora bagenda n’amaguru nk’uko twabikoze, babohora Igihugu dufite uyu munsi."

Minisitiri w’Ubuhinzi n’Ubworozi, Dr Mark Cyubahiro Bagabe, akaba ari imboni y’Akarere ka Nyagatare, ashimangira ko Gikoba yabaye site yo kwitorezaho kwagura urugamba rwo kubohora Igihugu, ndetse akaba ari n’ishuri ry’Ubutwari n’ishingiro ry’Ubumwe no Kwigira by’Abanyarwanda.

Ati "Kuhasura no kuhasobanurira abato ni ugusigasira umurage wo Kwibohora n’ubwigenge bwacu, uru rugendo rw’amaguru rufite isomo riremereye, rutwibutsa inzira y’amaraso, ubwitange n’ubudahemuka."

Indaki ya Perezida Kagame

Dr Bagabe avuga kandi ko Nyagatare ari indorerwamo y’iterambere ry’icyaro, kuko ngo ako Karere gakomeje kugaragaza ko ubuhinzi n’ubworozi bukorwa n’umuturage bishobora kuba inkingi y’iterambere rirambye, hashingiwe ku mishinga yo kuhira ku buso bugari.

Umuyobozi w’Akarere ka Nyagatare, Gasana Stephen ashima ko aka Karere kabaye irembo ry’urugamba rwo kubohora u Rwanda, kakagira bimwe mu bimenyetso by’urwo rugamba bizashingirwaho mu kubungabunga ayo mateka, kuyigisha abato no kuyabyaza umusaruro binyuze mu bukerarugendo.

Bakoze urugendo rwerekeza i Gikoba

AMAFOTO - Reba uko byari byifashe i Nyagatare mu rugendo rwo #Kwibohora31 rugana aho Inkotanyi zafashe bwa mbere. https://t.co/E0U34EIdhq pic.twitter.com/yHg8x8yJpZ

— Kigali Today (@kigalitoday) July 3, 2025

Abayobozi b’Akarere ka Nyagatare hamwe n’abaturage b’ako Karere bahagurukiye kuri Sitade, aho bagiye gukora urugendo rw’ibirometero 21 berekeza i Gikoba, bakaba baza kuhahurira n’itsinda ry’abaturage b’Umurenge wa Mutenderi mu Karere ka Ngoma, na bo bahagurukira i Kagitumba aho urugamba rwatangiriye ku itariki ya 01 Ukwakira 1990.

Umuyobozi w’Ingoro y’Amateka y’Urugamba rwo guhagarika Jenoside, Medard Bashana, akaba ari n’Umuyobozi w’abasura Umuhora mugari w’ayo mateka, avuga ko uru rugendo rw’amaguru rugamije kuzirikana ku buryo Inkotanyi zatangiye urugamba rwo kubohora Igihugu nta bikoresho bihagije nk’imodoka zifite.

Guverineri w’Intara y’Iburasirazuba, Pudence Rubingisa witabiriye uru rugendo yavuze ko urugendo rwo #Kwibohora31 rwiswe ‘Liberation Walk’ rugamije kuzirikana, kwishima ndetse no kumara amatsiko by’umwariko abakiri bato bagiye kureba aho urugamba rwo kubohora Igihugu rwatangiriye no kugira ngo bongere kuzirikana baniyibutse ko aho bavuye ariho bubakira umusingi w’aho bagana.

Naho umuyobozi w’Akarere ka Nyagatare, Gasana Stephen yavuze ko bateguye urugendo rwo #Kwibohora31, kubera ko bishimira kuba aka Karere karabaye amarembo y’urugamba rwo kubohora Igihugu ndetse n’ibimaze kugerwaho mu rugendo rw’iterambere.

AMAFOTO - Reba uko byari byifashe i Nyagatare mu rugendo rwo #Kwibohora31 rugana aho Inkotanyi zafashe bwa mbere. https://t.co/E0U34EIdhq pic.twitter.com/yHg8x8yJpZ

— Kigali Today (@kigalitoday) July 3, 2025

Minisitiri w’Ibikorwa Remezo, Dr Jimmy Gasore

Ku mugoroba wo ku wa Kabiri tariki 01 Nyakanga 2025, Urwego rw’Igihugu rushinzwe kugenzura imikorere y’inzego zimwe z’imirimo ifitiye Igihugu akamaro (RURA), rwatangaje ko habayeho izamuka ry’ibiciro bya lisansi kuva ku mafaranga 1633Frw kugera ku 1803Frw, rikaba ari izamuka ry’amafaranga 170Frw kuri litiro.

Ibiciro bya mazutu na byo byazamutseho amafaranga 110Frw kuri litiro, kuko byavuye ku mafaranga 1,647Frw bigera ku 1,757Frw.

Izi mpinduka zibaye nyuma y’amezi hafi atanu, kuko ibiciro biheruka ari ibyo ku itariki ya 09 Gashyantare 2025, biturutse ku mwanzuro w’Inama y’Abaminisitiri yateranye ikemeza impinduka mu bijyanye n’imisoro, harimo n’umusoro ku nyongeragaciro uzajya utangwa n’abacuruzi b’ibikomoka kuri peteroli.

RURA ivuga ko hari izamuka ry’ibiciro by’ibikomoka kuri peteroli ku isoko mpuzamahanga, ariko ko Guverinoma y’u Rwanda yarazigamye ibikomoka kuri peteroli bihagije mu bubiko, kandi izakomeza gucunga neza ubukungu muri rusange.

Dr Gasore, Minisitiri w’Ibokorwa Remezo, yatangarije kuri Televiziyo y’Igihugu ko ibiciro bya lisansi byiyongereyeho 10%, ariko nta mpinduka ku bijyanye n’ibiciro by’ibindi bicuruzwa na serivisi ku ruhande rwa Leta bigiye guhita bishyirwaho, ariko ku ruhande rw’abikorera impinduka ngo zizabaho n’ubwo zizaba zidakanganye.

Dr Gasore atanga urugero avuga ko mu rugendo rwa moto rw’amafaranga 500Frw haba hazakoreshwa lisansi y’amafaranga 200Frw, bivuze ko kuri urwo rugendo umumotari ngo agomba kongeraho amafaranga atarenga 20 kuri ayo 500Frw.

Dr Gasore yagize ati "Kuba hiyongereyeho icyo giceri cya 20Frw, hari aho umumotari ashobora kubona atari ngombwa kuyasaba umugenzi akayareka."

Ibiciro by’ibiribwa na byo, nk’uko Minisiteri y’Ubucuruzi n’Inganda(MINICOM) ibiteganya, ku kiro ngo ntabwo hagombye kongerwaho amafaranga arenze 6Frw ku muceri hamwe n’amafaranga 4Frw ku birayi.

MINICOM ivuga ko irimo gukurikiranira hafi abacuruzi bashobora kuzamura ibiciro uko bishakiye, kugira ngo badateza itumbagira ry’ibiciro ritagira impamvu.

Ibiciro bya mazutu na byo byazamutseho amafaranga 110Frw kuri litiro, kuko byavuye ku mafaranga 1,647Frw bigera ku 1757Frw.

Izi mpinduka zibaye nyuma y’amezi hafi atanu, kuko ibiciro biheruka ari ibyo ku itariki ya 09 Gashyantare 2025.

RURA ivuga ko hari izamuka ry’ibiciro by’ibikomoka kuri peterori ku isoko mpuzamahanga, ariko ko Guverinoma y’u Rwanda ikaba yarazigamye ibikomoka kuri peterori bihagije mu bubiko, kandi izakomeza gucunga neza ubukungu muri rusange.

Abanyeshuri ba Kaminuza y’u Rwanda

Iyi gahunda igamije kugeza ku bamotari ubwishingizi bise "Nkunganire Shoferi" bugamije kugoboka umushoferi/umumotari ukoze impanuka igahitana umuntu, cyangwa mu gihe uwo mumotari arwaye akamara byibuze amajoro atanu mu bitaro.

Ubu bwishingizi kandi buzajya bugoboka umushoferi/umumotari mu gihe agize ubumuga bwa burundu no mu gihe we cyangwa uwo bashakanye, cyangwa umwana we bitabye Imana.

Umuyobozi wa Prime Life Insurance, Innocent Habarurema, agira ati "Umuntu utanga amafaranga 3000Frw, iyo we cyangwa umufasha we atabarutse, twishyura umuryango we amafaranga 500,000Frw, iyo amaze amajoro atanu mu bitaro tumuha ingemu ya 25,000Frw, iyo agonze umuntu akitaba Imana, ya mafaranga 500,000Frw ajya mu isanduku ya Leta duhita tuyamwishyurira."

Habarurema avuga ko iyo umumotari agize ibyago agapfusha umwana, ahita ahabwa ubufasha bw’amafaranga 200,000Frw, kandi mu gihe uwo muryango ugize ibyago hagatabaruka abarenze umwe, ubufasha bwikuba n’uwo mubare w’abitabye Imana.

Umuntu ukimara kwishyura ubwishingizi (guhera ku mafaranga 3,000Frw), ako kanya ahita ahabwa ubufasha kuri telefone ye bitarenze iminota 5 mu gihe agize ibyago.

Ni amafaranga y’ubwishingizi bwa buri kwezi kuko iyo kurangiye yishyura andi y’ukwezi gukurikiyeho, ariko akirinda kugira uko yasimbuka kuko bimusaba gutekereza iminsi 30 kugira ngo ahabwe ubufasha atishyuriye igihe.

Gusa hari n’abishyura ubwishingizi burenze amafaranga ibihumbi bitatu kugira ngo n’ibyo agenerwa byiyongere, kuko nk’uwishyura ibihumbi 10Frw, iyo yitabye Imana, umuryango we ngo uhabwa amafaranga miliyoni 2 n’ibihumbi 500Frw.

Umunyeshuri wa Kaminuza ugiye gukangurira abashoferi gufata ubu bwishingizi azajya ahabwa amafaranga amutunga mu gihe akiri ku ishuri, ariko yaba yararangije kwiga, abakiriya azana muri ubwo bwishingizi azajya ahabwaho umugabane we.

Umwe mu banyeshuri batoranyirijwe gukora uwo murimo wo gushaka abafata ubwishingizi bw’ubuzima, Irankunda Gilbert, ashima ko atazarangiza kwiga ajya "kwanduranya" kuko ngo abakiriya bahari hirya no hino mu Gihugu.

Mugenzi we Joselyne Uwayisaba, na we agira ati "Tugiye kumenya uburyo hanze ku isoko ry’umurimo byifashe, gusa tugiye kongera abafata ubwishingizi mu Rwanda bave ku rugero rwa 2% bariho, bagere nko kuri 40% cyangwa 50% byibura. Ni ugushishikariza abamotari ibyiza by’ubwishingizi kuko ibinyabiziga byabo birabufite ariko ubuzima bwabo ntabwo bushinganye."

Umwarimu muri Kaminuza y’u Rwanda, Ishami ryigisha Imari n’Ubucuruzi, Dr Benjamin Mudaheranwa, avuga ko ku ikubitiro batoranyije abanyeshuri 78 bagiye kurangiza kwiga, ariko ko barimo gushakira n’abandi imirimo mu bikorera hirya no hino mu Rwanda.

Dr Mudaheranwa agira ati "Dukeneye abikorera kugira ngo baze batwereke ibibazo bafite dufatanyirize hamwe kubikemura, kuko akamaro kacu ni ugukora ubushakashatsi bukemura ibibazo."

Umuyobozi w’Ishami rya Kaminuza y’u Rwanda ryigisha Imari n’Ubucuruzi, Dr Joseph Nkurunziza, avuga ko hari abanyeshuri barenga 1000 bari kurangiza bagiye kujya ku isoko ry’umurimo, haba aho bagenda bishakira ubwabo cyangwa bazashakirwa na Kaminuza.

Dr Nkurunziza akangurira uwize muri Kaminuza y’u Rwanda wese ufite ikigo gitanga imirimo, guha barumuna be akazi n’imenyerezamwuga nk’uburyo bwo gushimira ishuri yizemo.

Ubuhinzi bwo muri greenhouse butanga umusaruro urihejuru cyane

Umushinga SAIP wahurije abahinzi b’icyitegererezo mu Karere ka Rwamagana ku wa Gatanu, basobanura uburyo ubutaka bwabo busigaye butanga umusaruro uhagije amasoko y’u Rwanda n’ubwo imvura yaba itaguye, kuko bakoresha uburyo bwo kuhira imyaka no guhinga mu nzu zitwa “greenhouses”.

Uwitwa Namahoro Olive uhinga imboga n’imbuto mu Kagari ka Murehe, Umurenge wa Muyumbu, mu Karere ka Rwamagana, avuga ko yahingaga inyanya mu murima usanzwe akeza ibiro(kg) bitarenga 200-300 ku isizeni yazo imara amezi 6, hakavamo amafaranga atarenga ibihumbi 200Frw.

Nyuma yaho yaje kubona inkunga ya SAIP yo kubaka greenhouse ifite intambwe ya metero 8 kuri 30 (ubuso butangana na ¼ cy’ubwo yahingagaho mbere yaho), akaba asaruramo ibiro birenga 4,500 by’inyanya zigurishwa amafaranga atari munsi ya 1000Frw/kg.

Ni amafaranga arenga 4,500,000Frw abona mu gice cy’umwaka, mu kindi gice na bwo akabona nk’ayo iyo yahahinze indi myaka yasimburanye n’inyanya.

Namahoro avuga ko ubu yishyurira ishuri abana be batatu amafaranga arenga Miliyoni imwe n’ibihumbi 500Frw, abikesheje ubuhinzi bw’imboga n’imbuto, haba muri greenhouse cyangwa inyuma yayo mu murima usanzwe, ariko bikamusaba gushingirira za mboga kandi akuhira.

Namahoro agira ati “Murabizi ko kugira abana bafite uburere ari intego, mfite abana nishyurira ishuri amafaranga ibihumbi 500 buri gihembwe, za toni z’inyanya nasaruye ni zo zivamo ibyo byose hamwe n’ibindi bikenerwa mu buzima bwa buri munsi.”

Namahoro mu nzu ahingamo inyanya

Namahoro avuga ko hari uburyo buhendutse bwafasha abifuza gushora imari kugera ku musaruro nk’uwo abona, “budashobora kurenga igishoro cy’Amafaranga y’u Rwanda Miliyoni 3.5Frw.”

Iyakaremye Valens na we uhinga imboga n’imbuto mu Murenge wa Rukomo w’Akarere ka Nyagatare, avuga ko ubwo yakoreshaga arozwari(arosoire) mu kuhira ku buso bungana na ½ cya hegitare, yezaga toni 2(2,000kg) z’inyanya cyangwa izindi mboga.

Avuga ko ubu asigaye yuhira akoresheje imashini yahawe na SAIP ndetse akihatira gukurikiza inama ahabwa n’abahanga mu buhinzi, byatumye abona umusaruro urenga ibiro(kg) 4,500 by’inyanya mu isizeni.

Iyakaremye avuga ko iyo asimbuje imboga mu murima akahahinga ibigori, abona umusaruro ugera kuri toni 7(7,000kg), aho atarenzaga toni 3 igihe yahingaga ategereje imvura gusa.

Umushinga SAIP uhamagarira ababyifuza bose gushora imari mu bihinzi aho bashobora kuhira bakoresheje imirasire y’izuba, cyangwa bagakodesha imashini zuhira zahawe bamwe muri ba rwiyemezamirimo.

Umukozi ushinzwe Ubuhinzi mu gashami k’Ikigo gishinzwe Iterambere ry’Ubuhinzi n’Ubworozi(RAB), gashinzwe gushyira mu bikorwa imishinga yatewe inkunga (SPIU), Emile Rurangwa, avuga ko abifuza gushora imari mu buhinzi ubu bafite amahirwe y’uko ibiribwa birimo kugenda bihabwa agaciro gakomeye, kandi ko batazahomba kubera ikoreshwa ry’ikoranabuhanga harimo no kuhira.

Bamwe mu bahinzi-borozi bafashijwe na SAIP mu Ntara y’Iburasirazuba bishimira ibyo bagezeho

Rurangwa avuga ko mu Rwanda ubu hari imishinga 230 y’ubuhinzi yahawe inkunga ya SAIP kuva muri 2019, kugira ngo ibe icyitegererezo cy’abandi bahinzi mu Rwanda bashaka kuvugurura imikorere.

Umuyobozi w’Akarere ka Rwamagana, Radjab Mbonyumuvunyi, avuga ko imirima y’abahinzi-borozi bafashijwe na SAIP igiye kuba amashuri yo kwigisha abandi bahinzi, kugira ngo bave mu mikorere isanzwe idatanga umusaruro.

Ati “Iyi mirima iratubera imirima-shuri, aho tuzajya tujyana abahinzi tukaberekeraho ngo dore uko babigenza, dore kuri iyi hegitare umuntu yahinze neza ibigori aranuhira, none arimo gusarura toni 6 wowe ugisarura 3, nawe bikore nka we’, ni cyo kintu tuzashyiramo imbaraga.”

Mbonyumuvunyi avuga ko kuba Akarere ka Rwamagana kagoswe n’ibiyaga bya Muhazi na Mugesera ari amahirwe azabyazwa umusaruro, ku bufatanye n’umushinga SAIP uzarangira mu mwaka utaha wa 2026, hakaba ngo hazashakwa imashini zuhira imirima zikoresheje amazi y’ibyo biyaga.

Meya Radjab Mbonyumuvunyi

Nyirandegeya Esperance na Mukakimanuka Laurence batuye mu Kagari ka Kabeza, Umurenge wa Nyamiyaga mu Karere ka Gicumbi, ni bamwe muri abo babyeyi.

Nyirandegeya w’imyaka 46 y’amavuko, umubyeyi w’abana batanu avuga ko abana be bamaze gucuka bagakura, yari azi ko aruhutse imirimo yo kwita ku bana bato ahubwo agatangira imishinga y’iterambere ry’urugo rwe.

Nyamara, bidateye kabiri umukobwa we w’imfura yahereye ko abyara imburagihe, maze amuzanira umwuzukuru ngo amurere.

Bukeye, Nyirandegeya wari utangiye kwibaza uko azita kuri icyo kibondo, yabonye mu mudugudu w’iwabo abaturanyi bajyana abana mu irerero ryitwa ’urugo mbonezamikurire (ECD)’, yumva arasubijwe kuko imirima yari yarabaye indare kubera kudahingwa, nta tungo yagiraga kuko atari kubona umwanya wo kuryitaho.

Nyirandegeya yahise ajyana umwuzukuru we muri ECD, aho yirirwa(uwo mwana) ahabwa serivisi zikomatanyije zirimo ifunguro ryuje intungamibiri rimurinda kurwaragurika, agakorerwa isuku, akaruhuka, akarindwa, akarengerwa ndetse agahabwa inyigisho zimukangura ubwonko.

Umukobwa wa Nyirandegeya (nyina w’umwana wirirwa muri ECD) wari urangije amashuri yisumbuye, we yabonye ibiraka i Kigali ubu ni ho yibera.

ECD yarenze kuba irerero ry’abana ihinduka n’ishuri ry’ababyeyi

Kuri ECD, ntabwo hagiyeyo abana gusa, ahubwo ababyeyi babo na bo bafata umunsi umwe buri cyumweru bakajyayo, aho baherwa ubumenyi n’inyigisho zibafasha guhinga ibiribwa bikungahaye ku ntungamubiri, ndetse no korora amatungo cyane cyane amagufi.

Nyirandegeya, nyuma yo kugana ECD agiye kwiga no kwihugura, ubu afite imirima n’uturima tw’igikoni mu rugo, ibiti by’imbuto hamwe n’amatungo arimo inka n’inkwavu, byose bikaba ari ibivamo ifunguro ryujuje intungamibiri.

Kuri ECD kandi ni ho ababyeyi baherwa serivisi zirimo kwiga imyuga ibateza imbere nko kuboha uduseke, kudoda no gufuma imipira y’imbeho, bakitoza kubaka uturima tw’igikoni, gukora isuku no gufungura indyo yuzuye, kandi byose bakabikora bizeye umutekano w’abana babo kuko baba begeranye.

Nyirandegeya agira ati "Kugeza ubu ingo zacu nta kibazo cy’imirire mibi zigifite kuko nta rugo rutagira akarima k’igikoni n’igiti cy’imbuto. Nta rugo rudafite inkoko zitanga amagi cyangwa inkwavu zitanga inyama, kandi turahinga tukabona ibiribwa bihagije."

Avuga ko uduseke baboha na two twabaye imari ishyushye muri Nyamiyaga, aho umuntu ubishyizemo umwete ngo atabura udeseke 10 aboha buri kwezi, tukamuhesha amafaranga atari munsi y’ibihumbi 30Frw.

Ububoshyi bw’uduseke bakorera muri ECD ni umwuga bashimira kandi kuba utuma ababyeyi batabonaga neza kubera izabukuru bahumuka, cyane ko banatozwa kurya imboga n’imbuto zuje vitamini ituma bareba neza.

Mugenzi we babana mu itsinda, Mukakimanuka Laurence w’imyaka 60 y’amavuko, areresha muri ECD abuzukuru batatu yasigiwe n’abakobwa be bashatse.

Mukakimanuka agira ati "Aba bana ntabwo nari kubashobora, kuko navaga kwahirira inka cyangwa guhinga ngasanga inzara yabishe, ariko aho ECD iziye nabonye uko njya guhinga no kwita ku matungo, ubu dufite inka ikamwa litiro 8 ku munsi, tukagira inkwavu, bwaki yabaye amateka iwacu."

ECD yo mu rugo rw’umuturage

Mukankusi Angelique ufite ECD iwe mu mudugudu wa Kimiko, Akagari ka Cyuru Umurenge wa Rukomo mu Karere Gicumbi, yakoze uturima tw’imboga mu rugo, ahatera ibiti by’imbuto, ahinga ibirayi n’ibijumba by’umuhondo bikungahaye kuri vitamini, hamwe n’ibishyimbo bifite ubutare(fer) biribwa n’umubyeyi utwite bigatunga umwana uri mu nda.

Mukankusi yoroye inka, ingurube n’inkoko bimuha ifumbire y’imirima n’uturima tw’imboga, akabona inyama, amagi, amata n’amafaranga, ku buryo ngo adashobora kubura indyo yuzuye mu rugo iwe yafasha abana be batanu n’abandi 15 b’abaturanyi baza kwirirwa muri ECD buri munsi.

Mukankusi w’imyaka 40 y’amavuko avuga ko atararwaza bwaki mu rugo iwe, akaba yarahindutse mwarimu w’abaturanyi be baza baherekeje abana, bakahava bamenye guhinga no gutegura indyo yuzuye.

Indyo yuzuye, nk’uko abahanga mu mirire(nutritionists) babisobanura, igizwe n’ibitera imbaraga (ibinyabijumba n’ibinyampeke), ibyubaka umubiri(inyama, amagi, amata, ibishyimbo n’amashaza), hamwe n’ibirinda indwara bigizwe n’imbuto n’imboga.

Abajya gusura urugo mbonezamikurire rwa Mukankusi bavayo bamenye kandi gukora isuku y’umubiri w’umwana n’iy’amafunguro, aho basanga agatanda ko kubikaho amasahane yogejwe, hakaba n’ibikoresho(filters) byo kuyungurura amazi yo kunywa.

Igwingira mu bana rirenda gucika kubera ECD

Umujyanama w’Ubuzima mu mudugudu wa Miyange, Akagari ka Mataba, Umurenge wa Nyamiyaga w’Akarere ka Gicumbi, Mukamanzi Marie-Rose, avuga ko kurwanya imirire mibi byari bigoye muri buri rugo iyo hataza ECD, bitewe n’uko hari imiryango ikennye idafite ibyatunga umubiri byuzuye.

Mukamanzi avuga ko icyiza cy’urugo mbonezamikurire(ECD) ari uko buri mubyeyi azana ibyo yejeje mu rugo rwe, babihuriza hamwe bigatanga indyo yuzuye, ndetse bakahamenyera guhinga no gutegura amafunguro yujuje intungamibiri.

Mukamanzi agira ati "Mu mwaka wa 2019 mu mudugudu iwacu, abana twarabapimaga ugasanga bari ku kigero cya 45% mu mirire yujuje intungamibiri, ariko ubu turi ku rugero rwa 85% mu buzima bwiza bw’abana."

Umunsi wahariwe imbonezamikurire wageze ku rwego rw’Umurenge

Ikigo cy’Igihugu gishinzwe Imikurire no kurengera Umwana(NCDA), ku bufatanye n’Umuryango w’Ubumwe bw’Uburayi(EU), batangije ku mugaragaro umunsi wahariwe kuzirikana ku mbonezamikurire y’abana bato ku rwego rw’Umurenge, ubusanzwe wizihirizwaga ku rwego rw’Akarere.

NCDA isaba abaturage, Abayobozi b’inzego z’ibanze, abikorera, amadini n’amatorero kongera uruhare mu itangwa rya servise mbonezamikurire zikomatanyije, hagamijwe kubaka umwana w’Umunyarwanda umeze neza mu gihagararo, mu mitekerereze no mu mibanire ye n’abandi, kandi ushobora kwiteza imbere no guteza imbere umuryango n’Igihugu muri rusange.

Iki gikorwa cyabereye mu rwunge rw’Amashuri(GS) Nyinawimana, mu murenge wa Nyamiyaga mu Karere ka Gicumbi ku wa Kane tariki 12 Kamena 2025, nyuma y’uko abayobozi babanje gusura ingo mbonezamikurire(ECD) z’abana bato mu Kagari ka Kabeza.

NCDA ivuga ko mu rwego rwo kugira umwana ushoboye guteza imbere Igihugu, agomba gukurikiranwa kuva agisamwa mu nda y’umubyeyi, uwo mubyeyi agasabwa kwipimisha inda kwa muganga nibura inshuro 8, hamwe no gufata indyo yuzuye.

Umwana wamaze kuvuka na we agomba konka neza nta kindi kintu agaburirwa kugera ku mezi atandatu y’ubukure, noneho agatangira guhabwa ifunguro ryunganira ibere rigizwe n’indyo yuzuye irimo n’ibikomoka ku matungo, yagira imyaka 3 y’ubukure akajyanwa muri ECD.

Minisitiri w’Uburinganire n’Iterambere ry’Umuryango(MIGEPROF), Consolée Uwimana, ari kumwe n’Umuyobozi Mukuru wa NCDA, Assoumpta Ingabire ndetse na Ambasaderi w’Umuryango EU mu Rwanda, Belen Calvo Uyarra, basuye ingo mbonezamikurire y’abana bato mu Murenge wa Nyamiyaga, banafatanya n’ababyeyi kubagaburira.

Ingabire wa NCDA agira ati "Turimo gushaka icyatuma abana bongera ubwitabire, kugira ngo abana bagire amahirwe Leta yabageneye yo gukura neza haba mu bwenge, mu gihagararo, ndetse no mu mbamutima, tukaba rero dushishikariza buri wese kumva uruhare rw’ingo mbonezamikurire y’abana bato, serivisi n’akamaro kazo."

Kugeza ubu NCDA irabarura abana bangana na 1,156,590 bari mu ngo mbonezamikurire y’abana bato zirenga 31,000, bakaba bari ku kigero cy’ubwitabire kingana na 78% by’abana bose mu Rwanda bafite hagati y’imyaka 3-6 y’amavuko.

Minisitiri w’Uburinganire n’Iterambere ry’Umuryango, avuga ko Gahunda ya Leta yo kwihutisha itermanere, NST2 izagera muri 2029 izasiga abana bafite igwingira mu Rwanda bari munsi ya 15%, bavuye kuri 33.1% Igihugu cyari kigezeho muri 2020.

Minisitiri Uwimana ati "Twumvise akamaro ka ECD, tukaba dusaba ababyeyi b’abana bagejeje ku myaka 2 y’amavuko kubajyana muri ECD, kandi ibyo abo bana bakorerwa bagezeyo bagakomeza kubikorerwa bageze mu rugo iwabo."

Minisitiri Dr Bizimana asanga abica bakoresheje ikaramu n’ibiganiro ari bo bicanyi babi

Minisitiri Bizimana avuga ko hari abanyamakuru b’Ijwi rya Amerika (VOA) na BBC nka Etienne Karekezi, Eric Bagiruwubusa na Ali Yusuf Mugenzi, ndetse n’Abanyapolitiki barimo Paul Rusesabagina na Victoire Ingabire, "bakomeje kwica bakoresheje inyandiko hamwe n’ibiganiro bakora, bitwikiriye imiryango (NGOs) iharanira uburenganzira bwa muntu".

Minisitiri Bizimana yaganirije imiryango itari ya Leta ihuriye ku kurwanya Jenoside, kuvura ibikomere no kubaka amahoro, mu mugoroba wo Kwibuka wabereye ku rwibutso rwa Jenoside rwa Kigali ku Gisozi, ku wa Kabiri tariki 10 Gicurasi 2025.

Yagize ati "Abica bakoresheje ikaramu n’ibiganiro ni bo bicanyi babi, mu nkambi zari muri Congo hashinzwe imiryango itari iya Leta(NGOs) y’Abanyarwanda igendera mu ngengabitekerezo yo gupfobya no guhakana Jenoside yakorewe Abatutsi. Ni ko amaradio nka BBC Gahuzamiryango, Ijwi rya Amerika, izitwaga Gatashya na Hirondelle, yatangiye gushingwa mu nkambi muri Congo."

Ati "Mu banyamakuru bashatse akazi muri ayo maradio, hari ba Ali Yusuf Mugenzi, Etienne Karekezi, Augustin Hatari n’ubwo ejobundi twagize amahirwe Ijwi rya Amerika rigahagarara. Etienne Karekezi ni we wahaye akazi abantu bitwa ba Eric Bagiruwubusa udatinyuka kuvuga Jenoside."

Bashyize indabo aharuhukiye abazize Jenoside ku rwibutso rwa Kigali

Dr Bizimana avuga ko nyuma yo guhagarara kw’ijwi rya Amerika, Eric Bagiruwubusa ubu ngo yafunguye umuyoboro wa YouTube agakomeza kwigisha imyumvire ye.

Avuga ko Ali Yusuf Mugenzi wayoboye ibiganiro kuri BBC ajya ku mbuga nkoranyambaga, akagira ati ’RPF ndayanga!’

Ati "Waba Umunyamakuru hanyuma ukavuga ko wanga icyiciro (runaka) cy’Abanyarwanda, umunyamakuru ufite urwango abaho! Ntabwo uba ukiri umunyamakuru!"

Avuga ko Etienne Karekezi na we yagiye yihishira nyamara mu gihe cya Jenoside ngo yarahaye ikiganiro Nzabahimana wari Minisitiri w’Ubucuruzi, cyarimo guhakana Jenoside yakorewe Abatutsi mu buryo bweruye, kuko ngo bavugaga ko ibice byarimo ingabo za Leta (Ex FAR) hari amahoro kandi ari ho Jenoside yari ikomeje kuba.

Minisitiri Bizimana asaba imiryango itari iya Leta kwamagana Abanyamakuru, Abanyapoliki hamwe n’Urubyiruko rukomoka ku bakoze Jenoside, rurimo gushinga imiryango ivuga ko iharanira uburenganzira bwa muntu, kuko ngo ari bo barimo guteza u Rwanda kugirana ibibazo n’amahanga.

Avuga ko Sosiyete nyarwanda yabayeho muri Jenoside "itazajenjekera abantu nka Ingabire Victoire ushinga NGOs nyamara ari politiki akora, Rusesabagina ufungura NGO nyamara ari politiki ibyihishe inyuma, hakabamo n’andi ma foundations nk’iyitwa Lantos imuha ibihembo, maze ngo tubyihorere nyamara bashinze ishyaka rya Politiki."

Dr Bizimana asaba ubufatanye n’imiryango itari iya Leta mu kwamagana abakomoka ku babyeyi bakoze Jenoside, ngo bashinga imiryango yo gukomeza guhisha ibyaha bya ba se, barimo amashyirahamwe nka Jambo Asbl, Rwandan Rights na African Great Lakes Action Network (AGLAN), yo ngo inabeshya ko igizwe n’abarokotse Jenoside "nyamara abayishinze, Alice na Claude Gatebuke ari Abahutu."

Minisitiri Bizimana akomeza asaba abagize imiryango Aegis Trust, Never Again na Interpeace kugendera ku kuri kw’amateka, kubakira kuri uko kuri hamwe no kugusobanurira abaterankunga bashaka gukora ikosa ryo kugusimbuka ngo bahite bagera ku bwiyunge bwihuse.

Umuyobozi w’Umuryango Interpeace uharanira Amahoro, Frank Kayitare,
avuga ko bateguye guhurira hamwe no gutumira Minisitiri w’Ubumwe bw’Abanyarwanda n’Inshingano Mboneragihugu, nk’imiryango ishinzwe kubaka amahoro, kugira ngo bumve icyo bakora cyakunganira Leta mu byo ikora.

Kayitare avuga ko mu bushakashatsi bafatanyijemo na MINUBUMWE mu mwaka ushize wa 2024, basanze Abanyarwanda iyo bari mu bandi, barenga ibikomere by’ubudaheranwa, ariko baba bari bonyine mu ngo bagafatwa n’ubwigunge, agahinda gakabije n’ubwoba bw’uko ibyababayeho bishobora kugaruka.

Kayitare yagize ati "Iyo bari bonyine mu ngo bitekerezaho kurusha kuba barenga ibikomere bibagora iyo bahuye n’abandi mu muganda, muri gahunda z’akazi n’ahandi, ni yo mpamvu twahuriye hano, byaduhaye gahunda yo gutangira komora ibikomere mu miryango no gufasha ababyeyi kuganira n’abana babo."

Umukozi wa Aegis Trust, Mutesi Lydie, avuga ko umukoro we ari ukurushaho kugaragaza ukuri no gutahura imiryango itari iya Leta iri muri gahunda zo gupfobya no guhakana Jenoside yakorewe Abatutsi mu 1994.

Mu Rwanda bene izi manza zisanzwe zijya mu nkiko z’ubucuruzi, mu bahuza ndetse no mu kigo cy’Abakemurampaka b’amakimbirane ashingiye ku bucuruzi cyitwa (Kigali International Arbitration Center/KIAC).

Umunyamabanga Mukuru wa KIAC, Victor Mugabe, avuga ko Inama Mpuzamahanga y’Abakemurampaka b’imanza z’Ubucuruzi (ICCA), yahisemo guhuriza mu Rwanda abakemurampaka bo mu bihugu bya Afurika kugira ngo bigire kuri KIAC, nk’ikigo cya gatatu muri Afurika mu buhanga bwo gukemura impaka z’ubucuruzi mpuzamahanga.

Mugabe avuga ko Inama ya ICCA ibereye i Kigali ishobora kuzagira u Rwanda icyicaro nyafurika kiri mu bya mbere mu gukora uyu murimo kinyamwuga, rukarusha Misiri na Afurika y’Epfo, bitewe n’uko ruha agaciro gakomeye ishoramari ryigenga, rinoze kandi ryihuse.

Mugabe atanga urugero ku mushoramari ushobora gushinga mu Rwanda uruganda rukora imyenda, uza agakenera kugura imashini zidoda hanze y’Igihugu, agatuma rwiyemezamirimo (w’Umunyarwanda) kuzimuzanira, wa rwiyemezamirimo ntiyubahirize amasezerano bagiranye.

Mugabe ati "Uwo rwiyemezamirimo ashobora kuzana imashini zitujuje ubuziranenge, ariko iyo amasezerano bagiranye avuga ko baziyambaza abakemurampaka, baraza bakabikemura mu ibanga rikomeye. Ibyo ntabwo bigira ingaruka mbi, birihuta, kandi ibikorwa by’ubucuruzi bigakomeza."

Avuga ko abakemurampaka baba bafite ubumenyi bukomeye mu bya tekiniki kurusha abacamanza mu nkiko z’ubucuruzi, kuko ngo baba basobanukiwe n’imikorere y’urugomero rw’amashanyarazi rwateje impaka (ni urugero) kurusha abanyamategeko.

Ati "Mu bakemurampaka haba harimo abahanga mu bwubatsi, mu buhinzi, mu ibaruramari n’ahandi."

Perezida w’Urukiko rw’Ikirenga Mukantaganzwa Domitille

Urukiko rwo ruba ruziyambazwa gusa mu gutera kashe mpuruza ku cyemezo cyafashwe n’abakemurampaka mbere y’uko gitangira gushyirwa mu bikorwa, "noneho inkiko tuzirekere ibyaha bikomeye cyane, ariko ibibazo by’ubucuruzi bize mu buhuza n’ubukemurampaka."

Butare Emmanuel, umwavoka, umukemurampaka akaba n’umuhuza, avuga ko ahora mu mpaka zijyanye n’ubucuruzi, ariko izajyanywe mu nkiko ngo nta musaruro zatanze nyuma yo guteza igihombo cy’igihe n’amafaranga ku mpande ziburana.

Kuva mu kwezi kwa Nyakanga 2024 kugera muri Gicurasi 2025 (nk’uko byanditswe na KT Press), imanza 2,445 mu Rwanda zakemuwe binyuze mu buhuza n’ubukemurampaka, mu gihe 230 zajyanywe mu nkiko z’ubucuruzi. .

Perezida w’Urukiko rw’Ikirenga, Domitille Mukantaganzwa hamwe na Minisitiri w’Ubutabera akaba n’Intumwa Nkuru ya Leta, Dr Emmanuel Ugirashebuja, na bo bemera ko ubukemurampaka butanga umusaruro wihuse kandi worohereza abashoramari gukomeza imirimo.

Mukantaganzwa, mu ijambo rifungura Inama mpuzamahanga ku bukemurampaka, yavuze ko ubukemurampaka mu Rwanda bwahawe agaciro gakomeye haba mu kubahwa kw’ibyemezo bwafashe ndetse no mu kubishyira mu bikorwa.

Mukantaganzwa yagize ati "Mu gihe ubukungu bwacu bugenda buba urusobe, ishoramari rikaba rigenda ryiyongera, ubucuruzi nyambukiranya mipaka na bwo bukaba burimo kwaguka, hakenewe ubukemurampaka bwizewe kandi bwihuse, kuko bufasha izamuka ryihuse ry’Ubukungu, icyizere cy’abashoramari kikiyongera, ndetse no kwishyira hamwe kw’ibihugu bigashoboka."

Minisitiri w’Ubutabera akaba n’Intumwa Nkuru ya Leta, Dr Emmanuel Ugirashebuja, ashimangira ko ubukemurampaka mpuzamahanga bukenewe cyane muri iki gihe Umugabane wa Afurika washyizeho Isoko rusange ry’ubuhahirane(AfCFTA).

Umuyobozi Mukuru wa RSSB, Regis Rugemanshuro, yabisabye abitabiriye umuganda aho urwego ayobora rwifatanyije n’abaturage bahinga icyayi b’i Kinihira mu Karere ka Rulindo, bakaba bashimirwa kuba bishyura Mituelle buri mwaka bose hakiri kare.

Rugemanshuro avuga ko gahunda aba baturage ba Koperative yitwa ASSOPTHE bihaye yo gutangira mituelle ku gihe hamwe no kwizigamira muri Ejo Heza ikwiye kubera urugero rwiza Abaturarwanda bose, kuko ubuzima butazagorana ubwo umwaka wa mituelle uzaba utangiye mu kwezi gutaha.

Perezida w’iyo Koperative, Uwanyirigira Léocadie, avuga ko abanyamuryango 5396 ba ASSOPTHE bose bajya bishyurirwa hakiri kare Ubwisungane mu kwivuza(Mituelle) na Ejo Heza buri mwaka, ku buryo ngo uku kwezi kwatangiye kwa Kamena kuzajya kurangira bose bamaze kwishyura mituelle ya 2025-2026.

Umunyamuryango w’iyo Koperative, Nkunzimana Isaie, agira ati "Ese hari umuntu ukorera umushahara wabura mituelle! Twebwe nta muntu ukirembera mu rugo, abana nta we usiba ishuri kuko umuntu wese ufashwe ako kanya ahita ajya kwivuza, nta muntu ujya kwa muganga ahetswe."

Regis Rugemanshuro wa RSSB ashimira abanyamuryango ba ASSOPTHE kuba ari aba gatatu mu Gihugu mu gutanga Ubwisungane mu kwivuza hakiri kare, ndetse akaba yatumye buri wese kubwira abandi ati "Niba uzi umuntu utari muri mituelle umushake akande *195#."

Rugemanshuro avuga ko umuntu wishyuye ubwisungane mu kwivuza ubu yongerewe amahirwe y’uko hari imiti myinshi hamwe n’insimburangingo ashobora kwishyurirwa, akaba ashobora kubagwa impyiko no kuvurwa kanseri.

Umwaka wa mituelle wa 2024-2025 ugiye kurangira abamaze kwishyura Ubwisungane mu kwivuza mu Rwanda bageze kuri 97.9%, akifuza ko mu mwaka utaha wa 2025-2026 abazishyura barenga urwo rugero.

Umuyobozi w’Akarere ka Rulindo Wungirije ushinzwe Imibereho myiza, Théophile Mutaganda, yizeza ko kuba abaturage bose bizigamira mu itsinda ryo kubitsa no kigurizanya (ibimina), bizabafasha kurangiza ukwezi kwa Kamena 2024 bose bamaze kwishyura mituelle.

Umuganda wakorewemo ubukangurambaga bwo kwishyura mituelle wabereye ku misozi ya Karegamazi, Umurenge wa Kinihira mu Karere ka Rulindo, aho RSSB yafatanyije n’abaturage gukora umuhanda Magezi-Mutoyi ureshya n’ibirometero 6, ukaba uzafasha abaturage kugeza umusaruro w’ibihingwa byabo ku masoko n’icyayi kugera ku ruganda rugitunganya rwa SORWATHE.

Dusabe Thérèse ubu ubarizwa mu Buholandi, asabirwa gufatwa akazanwa mu Rwanda kugira ngo abazwe amaraso y’izo nzirakarengane "zishwe ku bwe", kuko ari we wayoboraga ikigo Nderabuzima cya Butamwa.

Umutangabuhamya warokokeye Jenoside i Butamwa yagarutse inshuro nyinshi kuri Dusabe Thérèse n’umukobwa we Ingabire Victoire, na we ushinjwa gutagatifuza umubyeyi we akoresheje inshuti ze z’i Butamwa.

Kabanda Alphonse avuga ko mu gihe cya Jenoside yageze ubwo ahungira hakurya muri Kamonyi, nyuma y’uko Dusabe yirukanye Abatutsi bari bamuhungiyeho mu kigo Nderabuzima cya Butamwa, akabateza Interahamwe zikabica.

Yagize ati "Navuye aha Thérèse amaze kubirukana, ahamagaye Interahamwe ngo zibatware, ubwato twambukiyemo, tumaze kwambuka Interahamwe zabuteye grenade, abantu bose ba hano barabarimbura, abarokokeye aha ntabwo bagera ku 10, ndetse abakuru bo ntibarenga batanu."

Kabanda avuga ko uku gupfira gushira kwatijwe umurindi n’uruzi rwa Nyabarongo ruzengurutse Umurenge wa Mageragere, ku buryo ngo abaruguyemo bahunga cyangwa bihishe mu gishanga cyawo baruta kure umubare 1200 w’Abashyinguwe mu rwibutso rw’i Mageragere.

Minisitiri w’Ubuzima, Dr Sabin Nsanzimana, na we avuga ko Dusabe Thérèse wayoboraga Ikigo Nderabuzima cya Butamwa yatukishije izina rya Minisiteri y’Ubuzima, akaba ngo yarageze aho yitwa "Muganga w’Urupfu."

Dr Nsanzimana ati "Iri ni ipfunwe ku rwego rw’ubuzima, twaje aha kugira ngo tugaye abaganga babi ’Titulaire wahoze aha’(Dusabe Thérèse), ariko tunashime abaganga beza bakomeje kwitanga haba muri biriya bihe bibi kugeza n’uyu munsi, kuko turacyafite umubare muto w’abaganga ariko barihangana."

Dr Nsanzimana asaba abakora mu nzego z’ubuzima kugendera ku mahame atatu: kuba umuntu(kugira ubumuntu), kuba umuganga ndetse no kuba umubyeyi, kugira ngo buri wese azasige inkuru nziza ku isi.

Asaba abakiri bato kwirinda abashukanyi babasaba kugira uwo banga cyangwa bica, kuko ngo ubwicanyi nta muntu n’umwe bwigeze buhira ngo amare kabiri.

Umwe mu bahaye ikiganiro abakozi b’inzego z’ubuzima bari i Mageragere mu gikorwa cyo Kwibuka ku nshuro ya 31 Jenoside yakorewe Abatutsi, ni Rtd Lt. Col. Fred Nyamurangwa wari muri ’Batayo eshatu z’Inkotanyi zahagurutse i Butaro muri Burera zije kunganira abasirikare 600 bari muri CND, kugira ngo babohore Kigali.

Rtd Lt Col Nyamurangwa avuga ko bageze ku musozi wa Rebero bibagoye, akaba ari ho hashyizwe ivuriro ryo kujya bafashirizamo indembe z’Abatutsi barokokeye mu bice bitandukanye bikikije Kigali, harimo n’abavaga muri Butamwa.

Minisitiri Cyubahiro Bagabe avuga ko u Rwanda rugiye kongera umukamo rufatiye urugero kuri Brazil

Muri gahunda ya kabiri ya Guverinoma (NST2) izarangira muri 2029, Leta irashaka ko amata aboneka mu Rwanda yaba angana na litiro Miliyoni 10 ku munsi, kugira ngo Abaturarwanda babone ayabahagije, kuko buri muturage kugeza ubu anywa atarenze litiro 82 ku mwaka.

Dr Bagabe avuga ko ibitekerezo, ubumenyi n’ubunararibonye byateza imbere iyi gahunda, bizava mu nama mpuzamahanga iteraniye i Kigali, ikaba iri kwiga ku kongera umukamo mu bihugu bya Afurika (IDF Regional Dairy Conference Africa), ikazasozwa hizihizwa Umunsi mpuzamahanga wahariwe amata ku itariki ya 01 Kamena 2025.

Minisitiri Bagabe avuga ko aborozi b’inka mu Rwanda bazamenyera muri iyi nama impamvu inka iva hanze itanga umukamo urenga litiro 40 ku munsi, ariko yagera mu Rwanda "niba ari ukubera kurara habi, kutagaburirwa neza cyangwa ikirere itamenyereye", igatangira gutanga amata atarenga litiro 20 ku munsi.

Ati "Mu Rwanda, umukamo uracyari hasi cyane ku buryo buri nka itarenza litiro 10 ku munsi(muri rusange), bitavuze ko hari n’abageza kuri litiro 40 ku munsi(inka imwe), ariko murumva ko iryo tandukaniro ari rinini cyane."

Inama yitabiriwe n’abantu b’ingeri zitandukanye

Yungamo ko uyu musaruro muto uva ku buryo umworozi yita ku nka ye, ariko hakaba n’impamvu y’uko inka zitwa ’frisone(ifirizoni)’ zitanga umukamo mwinshi ubusanzwe ziva hanze mu bice by’isi bikonja, akaba ari yo mpamvu MINAGRI igiye kwerekeza mu bihugu nka Brazil, u Buhinde, Kenya n’ahandi hari inka zisa n’inyambo ziba ahari ikirere gishyuha giteye kimwe n’icy’u Rwanda.

Perezida w’Ihuriro nyarwanda ry’aborozi b’inka zitanga umukamo(RNDP), Musiime Umurungi Florence, avuga ko Inama ya IDF yitabiriwe n’aborozi 350 bo mu Rwanda, bakaba bazahava buri wese amenye uburyo bwo kongera ingano y’amata inka ze zitanga.

Umuyobozi w’Ihuriro mpuzamahanga ry’aborozi b’inka zitanga umukamo (International Dairy Federation), Gilles Froment, yizeza aborozi bo mu Rwanda ko iri huriro rizabahuza n’abandi bari hirya no hino ku Isi bafite ubunararibonye mu bworozi bw’inka zitanga umukamo mwinshi kurusha izindi ku Isi.

Froment avuga ko kugeza ubu inka zo mu bwoko bwa Holstein(ifirizoni) ziva i Burayi, Amerika na Oseyaniya hakonja, ari zo zitanga umukamo mwinshi kurusha izindi ku Isi, kuko hari ishobora gukamwa litiro 48 ku munsi, ariko bikaba bimaze kugaragara ko ikirere cy’u Rwanda kitazoroheye, ari yo mpamvu MINAGRI igiye kuvana icyororo ahandi.

Indi ngingo iri kwigwaho mu nama ya IDF ijyanye no kubona ibiryo by’amatungo bihagije inka zitanga umukamo, kuko akenshi ngo zitabwaho n’abantu bakuze badafite imbaraga zo kubishaka.

MINAGRI ivuga ko igiye gufasha urubyiruko guhinga ubwatsi ahatwikiriye aho badakenera ubutaka, ahubwo hakoreshwa ikoranabuhanga ryo kubuhinga mu bikarayi biterekwa kuri za etajeri (hydrophonic fodder).

Ikigega Mpuzamahanga giteza imbere ubuhinzi(IFAD) kivuga ko cyahaye amabanki yo mu Rwanda igishoro kingana na miliyoni 120 z’Amadolari ya Amerika (ararenga amafaranga y’u Rwanda miliyari160), ashobora kwifashishwa n’abifuza inguzanyo yo kororora inka zitanga umukamo no kuzishakira ubwatsi.

Agakiriro ka Gisozi kongeye gushya

Aha mu gakiriro ka Gisozi hamaze kwibasirwa n’inkongi y’umuriro inshuro zirenga 5 mu myaka itandukanye.

Tariki 3 Kamena 2019, inkongi yafashe igice cy’agakiriro ka Gisozi, ahacururizwaga imbaho n’ibikoresho byo mu nzu, harimo matela, imbaho zo mu bwoko bwa Ribuyu, amasanduku yo gushyinguramo, amatelefoni, amaradiyo n’ibindi.

Tariki 29 Kamena 2019 hashize iminsi 26 gusa, indi nkongi yongeye kwibasira agakiriro ka Gisozi, ifata igice cyari haruguru y’umuturirwa witwa UMUKINDO, aho hasigaye agace gato ugereranyije n’ahari hamaze gushya.

Hahiye igice cy’ahitwa muri ADARWA

Tariki 17 Kanama 2021, inkongi y’umuriro yongeye kwibasira aka gakiriro, ahakorerwa ibikoresho bitandukanye byo mu nzu, ububiko bw’imbaho, hakaba harahiye na za matora.

Tariki 12 Gashyantare 2023, inkongi y’umuriro yongeye kwibasira agakiriro ka Gisozi, ahabikwamo imbaho. Iyi nkongi yabaye ahagana saa tanu z’ijoro, abantu bamaze gutaha.

Tariki 23 Gicurasi 2023, inkongi y’umuriro nanone yibasiye igice cy’aka gakiriro ahakorerwa hakanacururizwa ibikoresho bitandukanye byo mu nzu, birimo intebe, ameza, ibitanda n’ibindi.

Kugeza ubu ntiharamenyekana icyateye inkongi y’uyu munsi ndetse n’agaciro k’ibyangiritse.

Polisi yatabaye

Mukasine Emelienne ukorera ubuvumvu mu Mudugudu wa Muhingo, Akagari ka Kavumu, Umurenge wa Ruhango muri Rutsiro, hamwe na bagenzi be 33 babihuguriwe, bavuga ko mbere yaho abagore bari abanzi b’inzuki kuko batari bazi akamaro kazo mu guteza imbere urusobe rw’ibinyabuzima no gutanga ikiribwa gikungahaye ku ntungamubiri (ubuki).

Mukasine yagize ati "Bitewe n’ikirere uko cyagenze neza (iyo hatari mu bukonje bwinshi), mu muzinga wa kizungu (igisanduku) havamo ibiro nka 40-45 by’ubuki, nyuma y’iminsi 15 ugakuramo ibindi biro 45, urumva rero nta mpamvu utagera ku iterambere."

Mukasine asaba abazi kwikorera imibare gukuba ibiro nibura 80 by’ubuki bwa buri kwezi buboneka mu muzinga, hamwe n’amafaranga nibura ibihumbi 4Frw agurwa buri kiro, bigahwana n’amafaranga 320,000Frw ku kwezi.

Mukasine avuga ko buri muvumvu yoroye nibura inka ya kijyambere muri Rutsiro, akitabira gahunda za Leta zose nka Ejo Heza, Ubwisungane mu Kwivuza, kwishyurira abana amashuri bakarangiza Kaminuza, ndetse hagasaguka ayo kwizigamira.

Ndashyikirwa Medard na we ukorera ubuvumvu mu Murenge wa Gahara mu Karere ka Kirehe, avuga ko mu mizinga 60 yeramo ubuki buri minsi 10 (umwe umwe) atajya aburamo amafaranga arenga miliyoni ebyiri n’ibihumbi 500Frw ku mwaka, ahwanye n’ibihumbi 208 nibura ku kwezi(kuri buri muzinga).

Umuyobozi wungirije ushinzwe Ubukungu mu Karere ka Rutsiro, Emmanuel Uwizeyimana, akangurira abaturage kwitabira ari benshi umwuga w’ubuvumvu, nyuma yo kumva uburyo ababukora barimo gutera imbere.

Ubuki burashakwa cyane mu Rwanda (isoko ntirishobora kubura)

Nyirakamineza Chantal washinze uruganda rutunganya ubuki n’ibibukomokaho mu Karere ka Rutsiro (Rutsiro Honey) kuva muri 2018, avuga ko kugeza ubu batunganya toni 45 z’ubuki ku mwaka, nyamara uruganda rufite ubushobozi bwo gutunganya toni 180 ku mwaka.

Agira ati "Izo toni 45 ni zo tubasha kubona zivuye mu borozi b’inzuki, dukorana n’amakoperative yabo mu turere twa Rutsiro, Rubavu, Karongi na Ngororero,...ariko ntibivuze ko aborozi b’inzuki ari bake, ahubwo bakeneye ubukangurambaga, kuko ubuvumvu ari umwuga utagoranye kandi wabangikanya n’ibindi."

Nyirakamineza avuga ko ubuki buramutse bubonetse ku bwinshi, igiciro cyabwo cyagabanuka kandi abantu bakitabira kubunywa mu cyayi n’igikoma, bugasimbuzwa isukari (dore ko bwo bushimwa kuba ari umuti n’urukingo aho guteza indwara).

Bwasimbura isukari

Mu kwizihiza Umunsi mpuzamahanga wahariwe inzuki, Komisiyo y’u Rwanda ikorana na UNESCO hamwe n’abavumvu bafashe umwanya basogongera ubuki bwa Gishwati-Mukura bufite umwimerere wo kuba nta bindi bavangamo.

Ubuki bubamo Zinc yongera ubudahangarwa bw’umubiri, igafasha uruhu rw’umuntu kongera kwiteranya rugakira vuba iyo rwakomeretse, hakabamo na Phosphorus ikorana na calcium mu gukomeza amagufa.

Muri rusange kurya ubuki ngo bifasha umubiri kurwanya mikorobe n’udukoko dutera indwara, bukavura inkorora n’uburwayi bwo mu muhogo, bugafasha umubiri kugarukana vuba imbaraga bitewe n’isukari karemano ibubamo.

Ni nde waba umuvumvu, ubuvumvu bukorwa bute, bukorerwa he?

Abavumvu hamwe n’Umuyobozi muri Komisiyo y’u Rwanda ikorana na UNESCO, Enjeniyeri Dominique Mvunabandi uyobora Ishami ry’Ubumenyi, Ikoranabuhanga na Inovasiyo, bavuga ko nta muntu ubishaka utaba umuvumvu mu Rwanda, kandi nta hantu atakorera uwo mwuga.

Icyo bisaba, ni ukwgeka umutiba w’inzuki ahantu hari ibimera byinshi inzuki zihovamo, akenshi bakaba bakunze kwegeka mu ishyamba aho inzuki zifite ubwinyagamburiro bunini bw’ibimera(nature), aho zinyunyuza umutobe n’intsinda mu ndabyo .

Ni yo mpamvu Enj. Mvunabandi agira inama abifuza gukora ubuvumvu bose kwifashisha cyane cyane amashyamba manini ya Pariki z’u Rwanda nka Gishwati-Mukura, Ishyamba ry’Ibirunga, irya Nyungwe na Pariki y’Akagera, kuko ho hari ubusitani bunini cyane butarimo imiti yica udukoko(inzuki) mu mirima.

Enj. Mvunabandi ati "Abavumvu barinda iyi Pariki (Gishwati-Mukura) kuko ari ho inzuki zabo zihova, imibereho yabo ni ho ishingiye, ubuki kandi wumvise ko ari igicuruzwa gikomeye, ubuvumvu umuntu wese yabukora ariko by’umwihariko abantu baturiye ibyanya bikomye."

Inzuki zitariho ntitwarya-Umushakashatsi

Uruyuki ni umuhuza ukomeye w’ikimera cy’ikigabo n’ikigore kuko rutwara intsinda(pollen) zigereranywa n’intanga ngabo, aho rwo ruba rwibereye mu guhova ariko rukavana intsinda ku rurabo rw’ikigabo ruzijyana ku rurabo rw’ikigore, bigatuma rwa rurabo iyo ruhungutse hasigara urubuto.

Ishami ry’Umuryango w’Abibumbye rishinzwe Ibiribwa n’Ubuhinzi(FAO) hamwe na UNESCO, bavuga ko kororoka kw’ibimera bishingiye ku bahuza batwara intsinda, ab’ingenzi bakaba inzuki, ariko hakaba n’abandi barimo ibinyugunyugu, inyoni, uducurama n’umuyaga.

FAO n’abandi bashakashatsi bavuga ko ibihingwa birenga 90 ku isi bibangurirwa n’inzuki, inyoni n’utundi dusimba, kandi ko umusaruro w’imbuto n’imboga wagabanuka cyane hatabayeho utwo dusimba.

Umushakashatsi ku bijyanye n’ibinyabuzima, akaba ari Umwarimu muri Kaminuza y’u Rwanda, Dr Venuste Nsengimana, agira ati "Inzuki zitabayeho ziriya mbuto murya nk’imyembe, avoka na biriya bishyimbo n’ibigori, ntabyo mwabona."

Uruyuki rufite uruhare rukomeye mu kubungabunga ibidukikije kuko rutuma imisozi ihora itwikirijwe ibimera n’ibiti bihumanura umwuka abantu bahumeka, bigahangana n’imihindagurikire y’ibihe kandi bigahesha isi muri rusange kugira ubwiza n’uburanga, bikaba akarusho iyo ari ubusitani butewemo indabo.

Umunsi wahariwe inzuki muri uyu mwaka wa 2025 washyiriweho insanganyamatsiko igira iti "Bee inspired by nature to nourish us all (wagenekereza uti "Uruyuki rwitaweho rwatugaburira twese".

Abanyarwanda n’Abanyazimbabwe bakomeje ubufatanye mu by’imari

AMIR ivuga ko uretse kumenyakanisha u Rwanda, bagiye gufasha ibigo by’imari by’u Rwanda n’amasosiyete atanga serivisi z’ikoranabuhanga, kwigira ku yandi yo mu karere no hanze yako.

AMIR ivuga ko yateguranye na ZAMFI inama izabera ku nshuro ya mbere hanze y’u Rwanda(i Harare) ku itariki ya 12 na 13 Kamena 2025, ikazitabirwa n’abasaga 500 biganjemo abafite ibigo by’imari hamwe n’abayobozi b’amashyirahamwe yabyo ku mugabane wa Afurika, abayobozi mu nzego za Leta, ndetse n’abashoramari.

Ni ubwa gatatu iyi nama ngarukamwaka igiye guterana, ariko inshuro ebyiri zatambutse ikaba yarabereye mu Rwanda, aho ngo yatanze ibisubizo ku bibazo by’ikoranabuhanga mu by’imari, kandi ibigo bitandukanye bikaba byarabonye umwanya wo kwiga no gusinyana amasezerano y’ubufatanye.

Umuyobozi Nshingwabikorwa wa AMIR, Jackson Kwikiriza, avuga ko iyi nama igamije guteza imbere Urwego rw’Imari Iciriritse rw’u Rwanda, hashingiwe ku ikoranabuhanga mu by’imari, ubufatanye bw’akarere, gukurura abashoramari, gukemura ibyuho biri mu miterere y’ishoramari mu by’imari iciriritse, hamwe no kurwanya ibyaha by’ikoranabuhanga mu by’imari (cyber threats).

Iyi nama izagendera ku nsanganyamatsiko igira iti "Ejo hazaza hadaheza muri serivisi z’imari binyuze mu ikoranabuhanga,” izagendera ku ntego eshatu nk’uko Kwikiriza yakomeje abisobanura.

Agira ati “Intego ya mbere ni ugukurura abashoramari binyuze mu kubamurikira serivisi z’imari zitangwa mu Rwanda, hifashishijwe ikoranabuhanga hamwe no gufasha Igihugu kubona abashoramari n’amafaranga bituruka hanze."

Kwikiriza akomeza agira ati "Intego ya kabiri ni ukumurikira uyu mugabane ibigo by’ikoranabuhanga mu by’imari bikorera mu Rwanda, kugira ngo byigaragaze kandi bikurure abakiriya baturuka mu bindi bihugu bya Afurika."

Intego ya gatatu, nk’uko Umuyobozi wa AMIR akomeza abisobanura, ni uguteza imbere ubumenyi n’ubufatanye, aho ibigo by’imari iciriritse by’u Rwanda, birimo na za SACCO, bizagira amahirwe yo kwigira ku bindi byo mu karere hamwe no gukorana n’ibigo by’ikoranabuhanga byo muri Afurika.

Kwikiriza avuga ko muri uko guhura hazabaho ubufatanye n’amasezerano hagati y’ibigo by’ikoranabuhanga mu by’imari byo mu Rwanda n’abandi, ndetse no kongera ikoreshwa rya serivisi z’imari mu Rwanda binyuze mu kuzamamaza.

Akomeza avuga ko hakenewe ingamba zafasha kuziba icyuho cy’abitabira serivisi z’imari bagera hafi kuri 96% (bose bafite konti muri banki), ariko bakaba badashobora gusaba inguzanyo no gukoresha ikoranabuhanga mu kwishyurana.

Ati "Hakenewe kongera imikorere binyuze mu gusakaza serivisi z’ikoranabuhanga mu by’imari zorohereza abantu."

Ingamba z’umutekano w’Ikoranabuhanga mu by’imari

Kwikiriza avuga ko uko serivisi z’ikoranabuhanga mu by’imari ziyongera, ari nako ikibazo cy’umutekano wazo kuri murandasi kirushaho kuba urusobe, ari yo mpamvu mu nama izabera i Harare hatumiwemo inzego zishinzwe kugenzura no gufata ibyemezo bijyanye no gukumira ibitero by’ikoranabuhanga bikoresha murandasi.

Jackson Kwikiriza asanga asanga iki gikorwa kizafasha abashoramari ku mpande zombi

Bitewe n’uko serivisi z’imari zidaheza zivugwaho guteza imbere ubukungu n’imibereho y’abaturage ku Isi, mu biganiro bizabera muri Zimbabwe hazumvwa ubuhamya bw’abafite ibisubizo bigezweho byateza imbere ikoranabuhanga mu by’imari iciriritse.

Hazaba harimo serivisi z’imari zikoreshwa telefoni, isesengura rishingiye ku bwenge bw’ubukorano(AI), umutekano mu by’ikoranabuhanga, byose ngo bimaze kugeza benshi kuri serivisi z’imari binyuze mu kugabanya igiciro hamwe no gukora mu buryo bwizewe.

Inama yo muri Zimbabwe irateganya kandi kwiga ku buryo hakubakwa serivisi z’imari zigerwaho na bose, by’umwihariko ku baturage batari mu ikoranabuhanga batuye mu bice by’icyaro, mu rwego rwo kubahiriza Intego z’Iterambere Rirambye (SDGs) zigira ziti "Leave no one behind".

Murebwayire Josephine warokokeye mu Iseminari nto ya Ndera

Iyi seminari yibutse ku wa Gatandatu tariki 17 Gicurasi 2025, abari abasaseridoti, abaseminari, abakozi bahakoraga hamwe n’abandi bahaguye bazize Jenoside yakorewe Abatutsi mu 1994.

Mu bihumbi hafi bitatu byari byahahungiye harimo Murebwayire Josephine, uvuga ko yihishe munsi y’uruyuzi akisanga ari we wenyine warokotse n’ubwo nyuma yaho ngo yaje no kubona abana batatu bakuwe mu mirambo ari bazima, hamwe na Ntaganira Vincent wari uhahungiye avuye i Ruhanga(muri Rusororo).

Murebwayire avuga ko yageze muri icyo kigo ari kumwe n’umuryango we ku itariki ya 8 Mata 1994, nyuma ku ya 9 y’uko kwezi haza abayobozi basaba imbaga y’abari bahahungiye gutaha, babizeza ko bazabarindira mu ngo.

Murebwayire avuga ko abari abayobozi b’iyo Seminari barimo Musenyeri Havugimana André wari Padiri Mukuru hamwe na Padiri Econome witwaga Ananiya Rugasiya, banze ko izo mpunzi zitaha mu ngo, ndetse banga no kwerekana Abatutsi bari bazihishemo bituma baraswa, aho Padiri Ananiya yahise agwa aho.

Ntaganira Vincent wahungiye i Ndera avuye i Ruhanga

Murebwayire avuga ko abicanyi bahise baza batemagurira abantu mu kibuga bari bahungiyemo ari benshi, akaba ari we wenyine ngo wisanze yakomeretse hamwe n’undi mwana amaraso yari yagiyeho, ariko hari n’abandi bana ngo yaje kubona i Byumba aho Inkotanyi zabajyanye kubavura.

Murebwayire agira ati "Ku itariki 11 Mata ni bwo byabaye karundura, batemaguriye abantu muri kiriya kibuga twari twuzuyemo. Byageze nimugoroba ndakanguka, ndebye abo twari kumwe bose babatemye mu mutwe, ngira ngo baraza gukanguka nkanjye."

Ati "Bantemye mfatanye n’umwana wanjye ngira ngo na we ari bubeho, ndahaguma ariko noneho mbona ntabwo bikunze, ndahaguruka ndagenda ariko ndebye hose mbona harakinze, mbona Padiri Bosco(ubu ni Musenyeri) arambwira ati ’aha barakwica, injira aho mu ruyuzi."

Urwo ruyuzi rwari ahantu hubatswe urwibutso muri icyo kigo cy’amashuri ya Seminari, ni rwo Murebwayire ngo yihishemo abicanyi baramubura, nyuma yaho aza kuhava ajya mu bwiherero bunuka, akajya abona bagenzi be bari bahunganye batwikwa, ivu rigatabwa mu rwobo rwari rwacukuwe hafi yaho.

Murebwayire avuga ko umwana witwa Cesar ubu wagiye kuba mu Busuwisi ari we watangiye kujya amuha ibyo kurya no kunywa kugeza ubwo Inkotanyi zije ku itariki ya 01 Gicurasi 1994, zimujyana i Byumba kumuvura.

Bibutse Abatutsi baguye mu iseminari nto ya Ndera

Ati"Abana banjye 6 na Papa wabo na basaza banjye n’akana twareraga, bose bari aha (mu rwibutso rwa Seminari ya Ndera), nta mwana nasigaranye, nasigaye mpagaze ntya."

Musenyeri Havugimana warashwe yanze gutanga Abatutsi

Uyu musaza w’imyaka 82 y’amavuko, avuga ko ku itariki ya 9 Gicurasi 2025 muri Seminari nto ya Ndera hari hahungiye abantu benshi bavuye mu bice bikikije Umurenge wa Ndera, abantu benshi bagera hafi ku 3,000 bari buzuye uburyamo n’amashuri.

Avuga ko hari abari binjiranye ibikoresho byashoboraga kwifashishwa mu bwicanyi babanje gusakwa barabitanga, ariko ko ubwo yari avuye mu bitaro by’abarwayi bo mu mutwe(CARAES Ndera) gushaka imiti yo kuvura impunzi zari zaje zakomeretse, yabonye hinjira ikamyoneti(imodoka) yuzuye abicanyi.

Musenyeri Havugimana ati "Binjiye bafite intwaro, hazamo n’uwaje afite imbunda arasa arasa arasa! Ati ’nimuzane Abatutsi bahungiye hano’, ubwo bari bazi neza ko bahari, ni bwo tubabwiye tuti ’ibyo murumva bishoboka! Hari abantu bagomba gupfa! Ubwo se bahunze iki!"

Musenyeri André Havugimana wayoboraga Seminari nto ya Ndera yaragijwe Mutagatifu Vincent de Paul

Musenyeri Havugimana avuga ko abo bicanyi bageze mu kibuga gihari bamushoreye we na Padiri Econome Rugasiya, bamenya ko uwo Econome afite imfunguzo z’uburyamo n’amashuri byahungiyemo abantu, bamurasa isasu rihinguranya ijisho n’ubwonko hamwe n’irindi ku kuguru, agwa aho.

Musenyeri Havugimana avuga ko na we bakomeje kumushorera bamubaza aho yashyize Abatutsi, baza kumurasira imbere y’icyumba yabagamo, amasasu amwe afata mu rutugu rw’iburyo andi mu rubavu rw’ibumoso, akaba yarongeye gutora akenge abona ari mu bitaro i Kanombe aho yaje kuva ajyanwa i Bujumbura, na ho aza kuhava ajya kwivuriza i Burayi.

Musenyeri Havugimana wavukiye i Muhanga ahitwa mu Gasenyi mu mwaka wa 1943, avuga ko kuba yarabyawe n’umuryango w’abakirisitu, akaba ari imfura ya se mu bana batanu, akemera kwitangira abantu aba Padiri, atari gutatira icyo gihango.

Padiri Vedaste Nsengiyumva uyobora Seminari nto ya Ndera, avuga ko bakomeje kwigisha izo ndangagaciro z’ubunyarwanda n’iz’ivanjiri ntagatifu zitemerera umuntu uwo ari we wese kugirira nabi mugenzi we, kandi zigatoza abanyeshuri urukundo.

Umunyeshuri uyobora abandi mu Iseminari nto ya Ndera, Shema Ncogoza Charly, na we ashimangira ko biga kubaha ukubaho k’umuntu, kwirinda gusebanya cyangwa gutukana, ahubwo bagatozwa urukundo no gufashanya.

Umuyobozi Mukuru w’Urwego rw’Igihugu rushinzwe Uburezi bw’Ibanze(REB), Dr Nelson Mbarushimana, avuga ko ubu amateka ya Jenoside yakorewe Abatutsi yatangiye kwigishwa kuva mu mashuri y’incuke nyuma yo kuvugurura integanyanyigisho.

Dr Mbarushimana avuga ko abarimu babishoboye bamaze guhugurwa ku bufatanye na MINUBUMWE, hakaba ibitabo byanditswe n’abantu batandukanye byunganira inyigisho zashyizweho na REB zijyanye no gukunda Igihugu, gukunda umurimo no kuba imfura baharanira kubana n’abantu bose mu mahoro.

Abana baratozwa gukina Golf

Umukino wa Golf ubusanzwe witabirwa n’abantu batarenga 4 mu kibuga kirimo umwobo umwe, aho bahirika agapira gato bakoresheje inkoni ifite ipfundo hasi, iyo ka gapira kinjiye muri wa mwobo ku nshuro ya mbere umuntu agateye ari kure, bimuhesha amanota kurusha abarimo gukina na we.

Bibasaba gukina bagendagenda mu gihe kingana n’amasaha ane n’igice iyo ari bane, cyangwa amasaha abiri n’igice iyo bakinnye ari babiri.

Umuyobozi wa NCBA, Maurice Toroitich, avuga ko mu rwego rwo guteza imbere uyu mukino mu gihe kirambye, umuryango nyarwanda muri rusange, cyane cyane abana, na bo bakwiye kuwiyumvamo bagafashwa kuwitabira.

Toroitich agira ati “NCBA irifuza ko umukino wa Golf waba uw’abaturage, ntugaragare nk’umukino w’abantu bake, tugomba guha amahirwe abantu bashobora gukina neza kandi bakerekana impano zabo uko babishoboye.”

Toroitich avuga ko hari n’abaturage badafite ubushobozi bwo kwitabira uwo mukino, byatumye banki ayobora yishyurira ubwisungane mu kwivuza (mituelle de santé) abagera ku bihumbi 3, barimo abazagira uruhare mu gutera ibiti mu kibuga cya Golf no mu nkengero zacyo.

Avuga kandi ko uretse amarushanwa y’umukino wa Golf azajya ahuza abaturage bo muri aka karere ka Afurika y’Iburasirazuba mu bihugu bya Kenya, Uganda, Tanzania n’u Rwanda, mu bibuga bya Golf byaho hazaterwa ibiti bigera kuri Miliyoni 10 bitarenze umwaka wa 2030.

Batangije na gahunda yo gutera ibiti mu bibiuga bya Golf

Umuyobozi Mukuru wa Rwanda Ultimate Golf Course Ltd, Gaston Z. Gasore, avuga ko nta marushanwa y’abana yari asanzwe abaho, ariko ubu ngo bagiye gutangira kuyakora bahereye ku irushanwa ryo Kwibuka ku nshuro ya 31 Jenoside yakorewe Abatutsi, riteganyijwe kuri uyu wa Gatandatu tariki 17 Gicurasi 2025.

Ati “Ntabwo twateza imbere umukino wa Golf tudahereye ku bana, ni muri urwo rwego twashatse abafatanyabikorwa, aho NCBA yemeye kuzajya ikora amarushanwa inshuro ebyiri mu mwaka. Ubu dusinyiye ko muri Kamena hazaba icyiciro cya mbere, icya kabiri kikazaba muri Nzeri 2025.”

Ikibuga cya Golf i Kigali kiri ku buso bwa hegitare 52, gifite imyobo 18 (ari yo bibuga 18), cyatunganyijwe n’Urwego rw’Igihugu rushinzwe Ubwiteganyirize mu Rwanda (RSSB), kugira ngo u Rwanda ruteze imbere ubukerarugendo bushingiye ku mukino wa Golf.

U Rwanda rutangiye kumenyekana kuri uyu mukino, aho mu kwezi kwa Gashyantare k’uyu mwaka wa 2025 rwakiriye amarushanwa y’ibihugu 16 yitabiriwe n’abakinnyi 285, mu mikino yiswe ‘Rwanda Open’.

Umunyarwanda ni we wegukanye ibihembo bya mbere haba kuri icyo kibuga no muri Kenya, aho yitabiriye andi marushanwa nyuma yaho.

Golf ni umukino uhesha akayabo uwawutsinze kuko muri Rwanda Open uwa mbere yahawe Amadolari ibihumbi 9 (ahwanye na Miliyoni 12Frw), mu gihe uwabaye uwa mbere muri Kenya Open yahembwe Amadolari ibihumbi 150 (arenga Amafaranga y’u Rwanda Miliyoni 200).

Gusa, kwinjira mu muryango w’abakina Golf na byo birahenze kuko guhera ku mwana urengeje imyaka itanu yishyura/yishyurirwa ibihumbi 250Frw ku mwaka, yaba yigiye hejuru gato akishyura ibihumbi 400Frw, yakongera kwigira hejuru gato akishyura amafaranga ibihumbi 600Frw ku mwaka, kugeza ku muntu mukuru wishyura Miliyoni 4 Frw buri mwaka.

Umuyobozi Mukuru wa Rwanda Ultimate Golf Course yashimiye NCBA kuba igiye guteza imbere umukino wa Golf ihereye ku bana, ariko ko n’ikibuga cyari cyambaye ubusa ubu kigiye guterwaho ibiti kubera ubufatanye n’iyo banki.

VIDEO – Umwana ufite imyaka irindwi y’amavuko umaze imyaka ibiri akina Golf, yatanze ubuhamya bw’uburyo yatangiye kuyikina atazi ibyo ari byo, ariko ubu akaba ageze ku rwego rushimishije muri uwo mukino aho ndetse yitabira n’amarushanwa.
Yasangije abandi urugendo rwe muri uwo… pic.twitter.com/UXfjc57Cr3

— Kigali Today (@kigalitoday) May 16, 2025

Abanyeshuri basobanuriwe uko abantu bakwiye kugenda mu muhanda

Izi nzego zizihije icyumweru mpuzamahanga cyahariwe umutekano wo mu muhanda kuva tariki 12 kugera ku ya 18 Gicurasi 2025, zamagana impanuka zihitana abanyamaguru n’abagenda ku magare barenga 200 buri mwaka mu Rwanda, nk’uko imibare ya Polisi ibivuga.

Urugero ni uko mu myaka ya 2019, 2020 na 2021 impanuka zibera mu muhanda zahitanye Abaturarwanda 2,103 (bivuze abarenga 700 buri mwaka), kandi abagenda n’amaguru bakaba barenga 32%, bahwanye na 224, hatabariwemo abakiriho ariko bafite ubumuga bwatewe n’izo mpanuka.

Ubukangurambaga bwakorewe abiga mu mashuri ya Mutagatifu Ignace na Kigali Christian School i Kibagabaga, ndetse na Groupe Scholaire Kacyiru, aho abanyeshuri basobanuriwe kandi berekwa uburyo bakwiye kugendera mu muhanda birinda mu gihe bajya cyangwa bava kwiga.

Umuvugizi wa Polisi mu Mujyi wa Kigali, CIP Wellars Gahonzire, avuga ko abagenda n’amaguru akenshi imodoka na moto bibagonga bitewe n’uko byabasanze mu muhanda cyangwa byabaturutse inyuma batabibonye, agasaba ko bajya bagendera mu nzira zabo(akenshi zigizwe n’amapave) ibumoso bw’umuhanda aho ikinyabiziga kiza umuntu yakibonye.

Mu kwambuka umuhanda na bwo ngo abenshi bagongerwa ahatari imirongo y’umweru yitwa ’zebra crossing’, cyangwa abihutira kwambukira muri iyo mirongo batabanje guhagarara ngo bateguze ibinyabiziga.

CIP Gahonzire ati "Umunyamaguru iyo abonye ko imodoka yahagaze ni bwo yambuka, akambuka yihuta ariko atiruka kandi adafatanye na mugenzi we, atambaye ’ecouteurs’, atagenda avugira kuri telefone, abanyeshuri bo hari abo tuboba bakinira mu muhanda, ibyo bishobora guteza impanuka."

Icyakora, ku rundi ruhande, n’ubwo ari itegeko, hari n’abatwara ibinyabiziga bagera ku mirongo ya ’zebra crossing’ batareka ngo umunyamaguru abe ari we ubanza kugenda.

Amashuri afite abana bambukiranya imihanda asabwa kugira umuntu ubaherekeza akaba ari aho bambukira mu gihe bava cyangwa bajya kwiga.

CIP Gahonzire avuga ko abanyamagare na bo babujijwe gutwaraho ibintu biremereye cyane cyangwa bitwarika nabi mu muhanda, gufata ku modoka mu gihe bari ahantu haterera, kugenda hatabona nyuma ya saa kumi n’ebyiri z’umugoroba, ahubwo bagasabwa kubisa imodoka bakagendera ku ruhande rw’umuhanda.

Umuryango HPR ushima uruhare gahunda zitandukanye zirimo iyiswe ’Gerayo Amahoro" zagize mu kugabanya impanuka zibera mu muhanda, ariko ugasaba ko aho abanyamaguru bambukira hakongerwa kandi hagashyirwa amatara yabagenewe.

HPR isaba kandi ko mu mihanda miremire inyura mu nsisiro hakongerwamo ibituma ibinyabiziga bigabanya umuvuduko, cyane cyane aho abagenzi bambukira, ndetse ko hakwiye kongerwa ubufatanye n’abafatanyabikorwa mu bukangurambaga bwigisha abaturage.

Umuhuzabikorwa w’imishinga ya HPR, Nadine Niwemfura, akomeza agira ati "Twasabye ko Leta yakongera inzira z’abanyamaguru aho zitari, ndetse ikazishyira mu igenamigambi mu gihe hakorwa inyigo z’imihanda."

Umunyeshuri witwa Bugingo Tony Tresor wiga imibare mu mwaka wa Gatanu w’amashuri yisumbuye muri Saint Ignace Kibagabaga, avuga ko abana n’urubyiruko ari bo bafite ibyago byinshi byo guhitanwa n’impanuka zibera mu muhanda, ahanini bitewe no kutamenya kwirinda.

Padiri Emile Nsengimana uyobora icyo kigo cy’amashuri avuga ko barimo kwitegura gushinga itsinda(club) ry’abanyeshuri bashinzwe ubukangurambaga ku mutekano wo muhanda n’uburyo imihanda ikoreshwa.

Raporo iheruka yo muri 2019 yakozwe n’Ishami ry’Umuryango w’Abibumbye ryita ku buzima (OMS), igaragaza ko ku rwego rw’Isi abangana na 1/2 cy’abahitanwa n’impanuka zibera mu muhanda ari abagenda n’amaguru, ku magare no kuri moto.

OMS ikavuga ko impanuka zo mu muhanda zikomeje kuza imbere mu bitwara ubuzima bw’abantu benshi ku Isi, aho mu mwaka wa 2023 zahitanye abantu miliyoni imwe n’ibihumbi 190.

Ubuhinzi bubungabunga ubutaka butanga umusaruro mwiza, aho ikijumba gishobora kuruta ubunini umwumbati

Ubu buryo bushya bw’imihingire buri muri gahunda ya Minisiteri y’Ubuhinzi n’Ubworozi (MINAGRI), hamwe n’abafatanyabikorwa barimo Ishuri rikuru ry’u Rwanda ryigisha Ubuhinzi bubana neza n’Ibidukikije(RICA), aho umusaruro ugomba kuboneka hatabayeho kurima no guhindura ubutaka intabire.

MINAGRI ifite intego yo kugera nibura kuri hegitare ibihumbi 100 mu mwaka wa 2029 zihinzwe mu buryo bubungabunga ubutaka, aho kugeza ubu mu Rwanda abahinzi bafite hegitare 1,100 zihora zitwikirije isaso kandi zitajya zirimwaho amasinde n’intabire.

Umuyobozi wa gahunda z’Umuryango Tearfund Canada, umwe mu yigize CFGB,
Anja Oussoren, avuga ko imihingire itangiza Isi ari itegeko ry’Imana, kugira ngo abantu n’ibindi binyabuzima bikomeze kubaho mu buryo burambye.

Oussoren agira ati "Ibi byakorwa bateza imbere ubuhinzi butangiza ubutaka, batera ibimera bibutwikira birimo ibiti by’imbuto ku nkengero z’imirima, ubuhinzi bubana n’ibisimba n’ibiti bivangwa n’imyaka. Muri make bukaba ubuhinzi bushingiye ku bisubizo bitangwa na kamere y’Isi(nature)".

Barigishwa uko ubwo buhinzi bukorwa

Umuyobozi ushinzwe gahunda n’ubuhuzabikorwa mu muryango CFGB, Matthew Van Geest, avuga ko uyu muryango utanga inkunga y’ubuhanga mu by’ubuhinzi, uzakomeza gufasha abahinzi bafite ubutaka buto kugira ubumenyi hamwe no gufata neza igishoro gito babasha kubona.

Van Geest ati "Ubufasha mu bya tekiniki butangwa na Foodgrains bwunganirwa n’uko hari abajyanama mu by’ubuhinzi, igishoro gito abahinzi basanzwe bifitiye, kuko dukorana n’abahinzi bato bafite ubutaka buto, ku buryo inkunga nto cyane mu bya tekiniki bahabwa bayibyaza umusaruro mwinshi."

Ubuhinzi bubungabunga ubutaka bukorwa bute?

Umuhuzabikorwa w’ubuhinzi bubungabunga ubutaka mu kigo cyitwa Peace and Development Network (PDN), Josiane Nyiramugisha, avuga ko ubu buhinzi budatwara umwanya munini n’igishoro cyinshi ku bahinzi, cyane ko bo ntacyo baba bashoye mu mirimo yo kurima amasinde n’intabire.

Nyiramugisha avuga ko baharura ubutaka bagakuraho ibyatsi gusa, bagacukura umwobo bateramo igihingwa, maze umurima wose bakawutwikiriza isaso izawufasha guhora uhehereye amazi atunga igihingwa ntavemo, ya saso ikaba ifumbire, ikarinda ko ibyatsi bimeramo ndetse ikanarinda umurima gutwarwa n’isuri.

Bagaragaje akamaro k’ubwo buhinzi

Uyu murima kandi ugomba guhingwamo imyaka ihora isimburanywa(rotation), kugira ngo udusimba n’indwara zasizwemo n’ibishyimbo (ni urugero), bibanze bishire muri uwo murima mu gihe hatewemo indi myaka itibasirwa n’indwara zifata ibishyimbo.

Ubuhinzi bubungabunga ubutaka kandi(n’ibindi bidukikije muri rusange), bwibanda cyane cyane ku ifumbire y’imborera n’imiti itarimo ibinyabutabire, kuko byangiza ubutaka bikica n’udusimba tw’ingirakamaro mu buhinzi no ku rusobe rw’ibinyabuzima.

Umukozi w’Ishami ry’Umuryango w’Abibumbye rishinzwe ibiribwa ku Isi (PAM/WFP), Makuza Richard, avuga ko gutanga ibiribwa gusa aho bagize ibyago bituruka ku ntambara cyangwa ku biza bidahagije, ahubwo icyerekezo gishya PAM yihaye ngo ni ukwifatanya n’inzego zose zikora ku buhinzi buhangana n’imihindagurikire y’ibihe.

Makuza avuga ko kuba u Rwanda rwitwa Igihugu cy’imisozi 1000(myinshi) ihanamye kandi ihora yibasirwa n’isuri, hatagize igikorwa ngo hatezwe imbere ubuhinzi bubungabunga ubutaka, iminsi iri imbere itaba myiza ku Baturarwanda.

Yizeza ko bazafatanya na Leta y’u Rwanda haba mu guhugura abaturage no gushakisha inkunga mu bafatanyabikorwa batandukanye, muri gahunda ya Guverinoma y’imyaka itanu (NST2) izagera muri 2029.

Ibiganiro birimo kubera i Kigali byiga ku buhinzi bubungabunga ubutaka, byitabiriwe n’impuguke hamwe n’abaterankunga barenga 80 baturutse mu bihugu by’u Rwanda, u Burundi, Tanzania, Kenya, Ethiopia, Tchad, Burkina Faso, Cameroon, Repubulika Iharanira Demokarasi ya Congo(DRC), Canada, Niger, Bangladesh, Uganda na Leta Zunze Ubumwe za Amerika(USA).

Umugishwanama wa CFGB mu bya tekiniki, Jean Twiringiyumukiza, avuga ko bazanyuzamo bakajya gusura bamwe mu bahinzi babungabunga ubutaka barimo ishuri rya RICA, bakazagaruka bafata ingamba zijyanye n’ubujyanama, hamwe n’uko bashakisha igishoro cyo guteza imbere ubuhinzi bubungabunga ubutaka.

Abakekwaho kwiba izo nka batawe muri yombi

Umuvugizi wa Polisi mu Mujyi wa Kigali, CIP Wellars Gahonzire, yavuze ko ibikorwa byo gushakisha irengero ry’izo nka nyuma yo gutungirwa agatoki na Kigali Today, byatumye zifatirwa mu Murenge wa Gikomero, Akagari ka Gicaca mu Midugudu ya Ntaganzwa na Nyagasozi.

Raporo kuri "Operation yo gufata abajura b’inka", ivuga ko inzego z’ibanze ari zo zatanze amakuru ko mu Midugudu ya Ntaganzwa na Nyagasozi hari abajura b’inka.

Polisi ivuga ko ifatanyije n’izindi nzego z’umutekano, yakoze icyo gikorwa cyo gufata abakekwaho ubwo bujura, barimo uwitwa Iradukunda Shema w’imyaka 22 y’amavuko, akaba yafatanywe inka 2.

Ba nyiri izo nka zibwe, umwe ni Kayirebwa Diane w’imyaka 28 uvuga ko yari amaze ukwezi yibwe, akaba atuye mu Murenge wa Rusororo, Akagari ka Gasagara mu Mudugudu wa Rugagi.

Undi wibwe inka, ikaba yafatiwe kwa Iradukunda, ni Gatera Theonetse w’imyaka 40 y’amavuko, yari amaze ibyumweru 3 yibwe, akaba atuye mu Murenge wa Rusororo, Akagari ka Kinyana, Umudugudu wa Kinyana.

Undi ukekwaho ubujura bw’inka ni Bangamwabo Jean Claude w’imyaka 22, akaba yafatanywe inka imwe y’uwitwa Sayinzoga Gérard w’imyaka 68, atuye mu Murenge wa Rusororo, Akagari ka Gasagara mu Mudugudu wa Rugagi.

Abibwe basubijwe inka zabo

Polisi y’Igihugu ivuga ko hari n’uwitwa Rutinywa Théonetse w’imyaka 36 ukurikiranyweho ubufatanyacyaha n’abo baturage bashinjwa ubujura.

Polisi y’Igihugu ivuga ko inka zafashwe zamaze gushyikirizwa ba nyirazo, ndetse ko abakurikiranyweho ibyo byaha by’ubujura bw’inka ubu bafungiye muri sitasiyo ya Gikomero.

CIP Gahonzire agira ati "Aba bajura tubafite kuri sitasiyo ya Gikomero, ariko nka Polisi tukaba dukomeje iperereza kugira ngo dufate n’abandi baba bihishe inyuma y’ubu bujura, kuko dufite n’andi makuru ko hari abandi bakoranaga, kugira ngo na bo batabwe muri yombi."

CIP Gahonzire yatanze ubutumwa ku bajura n’abandi bose babitekereza, avuga ko ’nta mwanya bafite muri iki Gihugu cy’u Rwanda’, kuko Polisi ngo ikorana ku buryo uwiba ikintu akajya kugihisha mu wundi murenge cyangwa mu kandi Karere aba yikoza ubusa.

CIP Gahonzire asaba abaturage gutanga amakuru byihutirwa no gukomeza gukorana n’inzego z’umutekano, kugira ngo abagizi ba nabi bajye bafatwa.

Yishimiye kongera kubona inka ye

Ibikorwa byo gushakisha izo nka byatangiye yuma y’inkuru Kigali Today yatangaje ku Cyumweru tariki 11 Gicurasi 2025, ivuga kuri ubwo bujura.

Aka gasantere kitwa ’i Rwanda’ gahuriweho n’utugari twa Gasagara na Kinyana mu Murenge wa Rusororo w’Akarere ka Gasabo, ngo kahawe iryo zina n’umucuruzi witwaga Ndagije wahimbwe ’Castar wa Rwanda’, ahagana mu myaka ya 1967-1968.

Inkuru bijyanye:

Gasabo: Abatuye i Rwanda barataka abajura b’inka

Mu ijoro ryo ku wa Kabiri bucya ari ku wa Gatatu tariki 7 Gicurasi 2025, abajura batwaye inka y’uwitwa Sayinzoga Gerard utuye muri ako gace mu ma saa saba z’ijoro.

Umugore wa Sayinzoga yaganiriye na Kigali Today agira ati "Muri iryo joro nka saa sita n’iminota 45 nari nabyutse mbona inka irahari njya kuryama, ariko nyuma nongeye gusubira hanze nsanga inka yagiye, nuko mbwira umugabo nti byuka tujye gushakisha inka bayitwaye."

Uretse kwa Sayinzoga, ahandi bamaze kwiba inka mu gihe kitarenze amezi atatu ni kwa Shyaka Valens, kwa Nsengiyumva ndetse no kwa Gatera Théoneste, bose batuye muri aka gace.

Gatera avuga ko abajura bamwibye inka mu ijoro ryo ku ya 26 Gashyantare 2025, kandi muri iyo minsi na bwo ngo hari abaturanyi be babiri bibwe inka mu matariki ya mbere y’uko kwezi, na nyuma yaho batwara izindi z’abaturanyi be batatu, byose bibera mu gace kamwe k’ikibaya cy’i Rwanda no mu misozi ihegereye.

Gatera avuga ko mu mezi atatu yonyine ashize abajura bamaze kwiba inka zirenga umunani muri ako gace, agasaba ko inzego z’ubuyobozi n’umutekano zabafasha gukurikirana no kumenya irengero ry’izo nka, hamwe no guhindura uburyo bwo gucunga umutekano.

Ati "Ubwo abaturage bari bacyikorera irondo nko muri za 1998-1999 twarakurikiranaga ibyo twibwe abajura tukabafata, ariko aho haziye irondo ry’umwuga, badusaba amafaranga kandi hashobora kuba harimo n’ibyitso by’abo bajura. Turasaba ko badusubirizaho irondo ryacu."

Abenshi muri aba bajura b’inka bamaze gufatwa-Polisi y’Igihugu

Umuvugizi wa Polisi mu Mujyi wa Kigali, CIP Wellars Gahonzire, avuga ko ikibazo cy’ubujura bw’amatungo cyane cyane inka zo mu mirenge ya Rusororo, Nduba, Rutunga, Gikomero na Jali cyari gikomeye cyane mu mezi y’Ugushyingo n’Ukuboza 2024, ndetse na Mutarama 2025, ariko ubu ngo abenshi barafashwe bashyirwa mu magororero.

CIP Gahonzire avuga ko mu bafashwe harimo abitwaga abatemezi baranga inka aho ziri, hakaba abajya kuziba, abazibaga n’abatwara inyama kuri moto, ndetse n’abazicuruza muri za busheri (boucherie). Inyinshi muri izo nka ngo zajyanwaga ahitwa Bukure mu Karere ka Gicumbi.

CIP Gahonzire avuga ko kuva mu kwezi kwa Gashyantare kugeza ubu, abajura baba basigaye batarafatwa ari bake cyane, kandi bitewe n’uko uruhererekane rwabo rwacitse, iyo umuturage wibwe yihutiye kubivuga, bamufasha gukurikirana inka zibwe zikaboneka, aho atanga ingero ku zagaruriwe i Rulindo n’i Bukure muri Gicumbi.

Yagize ati "Ibikorwa byo gufata abajura n’abanywa ibiyobyabwenge birakomeje, icyo dusaba ni ugutanga amakuru ku gihe bakirinda guhishirana, kuko hari ababa bafitanye isano cyangwa banga kwiteranya."

CIP Gahonzire avuga ko Polisi ikomeje gushakisha abibye inka ya Sayinzoga mu ijoro ryo ku wa Gatatu saa saba, n’ubwo ngo yatinze cyane kubivuga, kuko yabimenyesheje ubuyobozi hashize amasaha arenga 12 saa munani z’igicamunsi.

Gusa, ngo hari igihe abaturage ubwabo ari bo biyibisha inka bakabeshyera abandi bajura, cyane cyane abafitanye amakimbirane n’abo bashakanye.

CIP Gahonzire yizeza ko bagiye kongera abakora irondo, aho umuturage utabasha kwishyura amafaranga y’umutekano na we yagira uruhare mu kurara irondo, ariko cyane cyane abantu bagasabwa gutanga amakuru yihutirwa y’ikintu cyose bazi cyangwa babona cyahungabanya umutekano.

Izina i Rwanda ryo muri uyu mudugudu ryazanywe n’umucuruzi witwaga Ndagije wahimbwe ’Castar wa Rwanda’ mu myaka ya 1967-1968, nk’uko bisobanurwa na Bugingo Modeste watuye i Rwanda kuva mu mwaka wa 1973.

Bugingo avuga ko ako gace kari gasanzwe kitwa Cyabatanzi (kuko uwo musozi kariho wose ari ko witwa), ariko bitewe n’uko ngo habonekaga ibintu by’ibanze hafi ya byose abaturage babaga bakeneye nk’umunyu, ibibiriti, isabune, ndetse bakahava bisengereye inzoga zigezweho n’iza gakondo, byatumye Castar ahita i Rwanda kuko ngo habonekaga ibintu byose byabaga bivuye hirya no hino mu Rwanda.

Bugingo agira ati "Umuntu yashoboraga kuhabona akantu kose yakenera k’ibanze bitamusabye kujya i Kigali kuko ari ho habanje umujyi, icyo gihe umuntu wari uhafite akabari n’utwo ducuruzwa twose tw’ibanze yari Ndagije(yarapfuye) ariko bakamuhimba akazina ka ’Castar wa Rwanda’ kuko yari afite ibigango."

Iby’uko iryo zina ’Rwanda’ ryazanywe na Castar byemezwa kandi n’umukecuru witwa Mwitakuze Odette uvuga ko yavutse ku ngoma y’Umwami Musinga, akaba agira ati "Hiswe i Rwanda n’umucuruzi wiyitaga ’Gasitari(Castar)."

Ni agace kandi ngo karimo amabuga menshi inka zashokeragaho bitewe n’amasoko y’amazi yari ahari, kakeramo imyaka y’amoko atandukanye kubera uburumbuke bw’ubutaka bwaho, abaturage bakahashimira ko hihagije mu bintu byose by’ibanze byaboneka mu gihugu cy’u Rwanda.

Ni ingengo y’Imari yiyongereyeho asaga miliyari 1,216 Frw ugereranyije n’iy’umwaka wa 2024/2025, yarengaga miliyari 5,816 Frw, bitewe ahanini n’iyo mirimo yo kwihutisha iyubakwa ry’ikibuga cy’indege, kwagura ibikorwa bya Sosiyete y’Indege z’u Rwanda (Rwandair), hamwe no guteza imbere ubwiteganyirize bw’abakozi nyuma y’amavugurura yabayeho.

Minisitiri Murangwa avuga ko amafaranga yo gushyira muri iyo ngengo y’Imari akomoka imbere mu Gihugu azagera kuri miliyari 4,105.2Frw, inkunga z’amahanga zingane na miliyari 585.2 Frw mu gihe inguzanyo z’amahanga zizangana na miliyari 2,151.9 Frw.

Depite Bitunguramye Diogène yashimye ko Ikibuga cy’Indege cya Kigali kirimo kubakwa mu Bugesera kigiye kurangira mu mwaka utaha nyuma y’imyaka icyenda kimaze gitangiye gukorwa, kuko imirimo yatangiye mu mwaka wa 2017.

Depite Bitunguramye yagize ati "Ikintu nashimye ni ukuba Ikibuga cy’Indege cya Kigali kiri i Bugesera kizubakwa kikarangira, ndetse n’uko tuzahabwa umuhanda wa kaburimbo ugihuza n’Umujyi wa Kigali (uhinguka i Masaka ahari ububiko bw’ibicuruzwa biva ku byambu)."

Depite Bitunguramye yabajije niba icyo kibuga cy’Indege kizaba gifite uwo muhanda umwe gusa ugihuza na Kigali, aza kumarwa amatsiko ko hari indi izaba igishamikiyeho, irimo uva i Kabuga unyura i Nyakariro ugahinguka ahitwa Kabukuba, ndetse n’usanzwe wa Kicukiro- Nyanza-Nyamata.

Minisitiri Murangwa yagize ati "Ntabwo tugomba kugira umuhanda umwe ujya kuri kiriya kibuga cy’indege, hari imihanda itatu, umwe unyura ku Karere ka Bugesera, hari undi unyura i Nyamata, hakaba n’undi wa Kabuga-Masaka.

Minisitiri w’Imari n’Igenamigambi avuga ko umuhanda wa Kicukiro-Nyanza-Bugesera na wo bazawagura (ku ruhande rwa Bugesera ni ho ukiri muto), hanyuma hakazabaho gushyiramo bisi zizajya zorohereza abagenzi bajyayo n’abavayo kugenda mu buryo bwihuse.

Abadepite n’Abasenateri bagaragaje impungenge batewe n’uko ahazanyuzwa ibyo bikorwa remezo byose bizajya bisaba kwimura abaturage nta ngurane bahawe, maze Minisitiri w’Imari abasubiza ko icya mbere kizajya kibanza gukorwa ari ugutanga ingurane kuri abo baturage.

Imirimo yo kubaka Ikibuga cy’Indege cya Kigali i Bugesera yatangiye muri 2017, nyuma y’amasezerano yasinywe muri Nzeri 2016 hagati ya Leta y’u Rwanda n’ikigo cy’Abanya-Portugal cyitwa Mota-Engil Engenharia e Construção África, S.A.

Byari byateganyijwe ko kizuzura mu mwaka wa 2019, ariko imirimo yaje guhagarara mu kwezi kwa Mata k’uwo mwaka kugira ngo hakorwe impinduka mu mushinga.

Mu kwezi k’Ukuboza 2019, Sosiyete Qatar Airways yinjiranye muri uwo mushinga imigabane ingana na 60%, ndetse hateganywa ko ikibuga kizajya cyakira abagenzi miliyoni 7 ku mwaka mu cyiciro cya mbere, hamwe n’abagera kuri miliyoni 14 mu cyiciro cya kabiri kizaba cyarangiye muri 2032 .

Hari inzu nyinshi zubatswe hadakurikijwe igishushanyo mbonera

Umugenzuzi Mukuru w’Imari ya Leta, Alexis Kamuhire, yabitangaje ubwo yarimo kugeza ku Nteko Ishinga Amategeko(Imitwe yombi), Raporo ku micungire n’imikoreshereze by’umutungo wa Leta y’umwaka w’Ingengo y’Imari warangiye ku itariki 30 Kamena 2024.

Kamuhire yasobanuye ibibazo birimo kugaragara mu ishyirwa mu bikorwa ry’igishushanyo mbonera cy’Umujyi wa Kigali, akavuga ko hamwe na hamwe barimo gutuza abantu mu buryo bunyuranije n’ibyo icyo gishushanyo mbonera kigaragaza.

Avuga ko Umujyi wa Kigali ushinzwe gutegura inyigo z’ibishushanyo mbonezamiturire, gutunganya site zo guturaho no gutanga impushya zo kubaka, ariko igenzura ryakozwe ngo ryasanze hari ibyangombwa 6,176 byo kubaka ahagomba kubakwa byatanzwe hatabanje gukorerwa bishushanyo by’imiturire(physical plan).

Iryo genzura kandi ngo ryasanze inyigo z’ibishushanyo by’ahagenewe imiturire zakozwe n’Umujyi wa Kigali zitarenga 49% by’ubuso bwose bw’uyu mujyi, bwagenewe imiturire bungana na hegitare 8,361.

OAG ikavuga ko hari n’ibishushanyo 19 muri 30 by’imiturire byagaragaye ko bifite ingingo zidahuje n’Igishushanyo mbonera cy’Umujyi wa Kigali.

Umugenzuzi Mukuru w’Imari ya Leta akomeza avuga ko hari ibibanza byo guturaho bigera ku 6,242 biri aho Igishushanyo mbonera cyageneye ibishanga, amashyamba, mu manegeka (hahanamye), ahari insinga z’umuriro w’amashanyarazi mwinshi ndetse n’aho amatiyo y’imyanda anyura.

Kamuhire agira ati “Kuba ibyo bibanza byarubatsweho inzu kandi haragenewe ibindi bikorwa, bishobora kuzateza igihombo haba ku ruhande rwa Leta cyangwa se na ba nyiri izo nzu bubatse muri ibyo bibanza.”

Urwego rw’Ubugenzuzi Bukuru bw’Imari ya Leta ruvuga kandi ko rwakoze ubugenzuzi bwa serivisi z’imyubakire mu turere umunani twunganira Kigali [ari two Musanze, Muhanga, Huye, Rusizi, Rubavu, Nyagatare, Rwamagana na Bugesera].

Uru rwego ruvuga ko ubwo bugenzuzi bwagaragaje ko imijyi yo muri utwo turere, ifite ibishushanyo mbonera ariko bitagaragaza ibice bibigize(sectorial master plans) bizakorerwamo ibikorwa byihariye nk’ubukerarugendo, imikino, ubuhinzi, amashyamba n’ibindi bikorwa remezo.

OAG ikavuga ko 84% by’ibyangombwa by’ubutaka bw’abaturage bimuwe kubera inyungu rusange, kugeza ubu bitarandikwa ku turere n’Umujyi wa Kigali, bigaterwa n’uko serivisi z’imiturire zitaratungana neza.

REMA hamwe na Polisi y’Igihugu bivuga ko izi ngamba zizatangira gushyirwa mu bikorwa nihamara gutorwa Itegeko rigenga ikoreshwa ry’umuhanda, ryunganiwe n’Iteka rya Ministiri rizaba ririshamikiyeho, rishyiraho uburyo bwo gusuzuma imyotsi iva mu binyabiziga.

Umushinga w’iri tegeko rigenga ikoreshwa ry’umuhanda wemejwe n’Inama y’Abaminisitiri yo ku wa 17 Mata 2025, ukaba uzatorwa n’Inteko ishinga Amategeko (Umutwe w’Abadepite) mbere y’uko hatangizwa ubu buryo bushya bwo gupima imyotsi iva mu binyabiziga.

Minisiteri y’Ibidukikije, ibinyujije muri REMA, yamaze gutangaza ko muri uku kwezi kwa Gicurasi 2025 u Rwanda ruzatangiza uburyo bushya bwo gupima imyotsi iva mu binyabiziga, mu rwego rwo kurwanya ihumana ry’umwuka, kubungabunga ubuzima bw’abantu no kubaka Iterambere rirambye.

Mu by’ingenzi byanduza umwuka uhumekwa mu Rwanda, nk’uko REMA ibisobanura, ku mwanya wa mbere haza imyotsi iva mu binyabiziga bitasuzumishijwe ku gihe, hagakurikiraho imyotsi iva mu gutwika amashyamba, imyanda n’ibiyorero, ndetse n’imyotsi ituruka ku icanwa ry’amakara n’inkwi.

Umuvugizi wa Polisi y’u Rwanda, ACP Boniface Rutikanga, asaba ababangamiwe n’imyotsi iva mu binyabiziga kuba bihanganye, kugira ngo amategeko abanze anoze uburyo Contrôle Techniques zizajya zipima ibinyabiziga bihumanya umwuka duhumeka.

Uburyo ihumana ry’umwuka ryangiza ubuzima bw’abantu

Raporo yitwa Air Quality Life Index (AQLI) ikorwa n’Ikigo Energy Policy Institute cya Kaminuza ya Chicago (EPIC), igaragaza uburyo imyuka ihumanya ikirere, cyane cyane iyitwa PM2.5, igabanya igihe abantu babaho ku isi, cyane cyane abana bato, abantu bashaje, abafite uburwayi bw’ibihaha cyangwa umutima, ndetse n’abagore batwite.

Mu ndwara zikomoka kuri iyi myuka ku isonga haza iz’ubuhumekero, kuko ngo iteza ububabare mu bihaha no mu muhogo, asima (asthma) n’ibibazo bihoraho byo guhumeka, bronchitis na emphysema zituma ibihaha bitongera gukora neza.

Imyotsi y’ibinyabiziga inateza kandi indwara z’umutima n’imitsi, aho kuyihumeka ngo bishobora gutuma umuvuduko w’amaraso wiyongera kubera izo ndwara zifata mu miyoboro yayo.

Iyi myotsi y’ibikomoka kuri peterori nka benzene (itwara indege), ishobora kandi gutera kanseri, cyane cyane iy’ibihaha, ikanateza ibibazo ku bagore batwite kuko ngo bashobora kubyara imburagihe cyangwa abana bakavuka bapfuye, nk’uko Raporo ya Air Quality Life Index ya 2024 ikomeza ibigaragaza.

Ibi byuka ngo bishobora no kugira ingaruka ku mikurire y’ubwonko bw’abana bato, kugabanuka k’ubudahangarwa bw’umubiri ntubashe guhangana n’indwara, cyane cyane izandura, ndetse n’ibibazo by’ubwonko(stress), umunaniro ukabije, hamwe no kugira ingorane mu myigire no mu kazi, cyane cyane ku bantu baba ahantu iyo myuka yiganje.

Uwitwa Venancie Mukamabano utuye mu karere ka Kicukiro, avuga ko yigeze gukorera ahantu hari umwuka wanduye mu gakiriro agakuramo inda eshatu (imbyaro 3), ariko nyuma y’aho ahagarikiye kujyayo atwite ngo yaje kubyara umwana muzima(akaba ari we afite wenyine).

Ikigo cy’u Rwanda gishinzwe Ubuzima(RBC) kivuga ko kitakwemeza iby’ubu bushakashatsi bwa AQLI bw’uko abagore batwite iyo bahumetse umwuka wanduye bakuramo inda, bitewe n’uko nta nyigo yihariye u Rwanda rurabikoraho.

Gusa, mu ngamba zo kugabanya ihumana ry’umwuka rituruka ku myotsi y’ibinyabiziga u Rwanda rukomeje gushyira mu bikorwa, harimo iyo guha amahirwe ibinyabiziga bikoreshwa n’amashanyarazi, bikagenda bisimbura gahoro gahoro ibikoresha lisansi na mazutu.

Kugera mu kwezi k’Ukwakira k’umwaka ushize wa 2024, mu Rwanda hari hamaze kubarurirwa ibinyabiziga bikoreshwa n’amashanyarazi birenga 7,000 nk’uko bitangazwa n’Ikigo cy’Abadage gishinzwe Iterambere mpuzamahanga (GIZ) mu mushinga wacyo wiswe Changing Transport.

Ikigo cy’Igihugu gishinzwe Ubumenyi bw’Ikirere (Meteo Rwanda), cyatangaje ko hagati ya tariki 4-6 Gicurasi 2025, hateganyijwe imvura nyinshi cyane ishobora guteza ibiza henshi mu Gihugu

Meteo-Rwanda ivuga ko iyo mvura izagwa cyane cyane mu Mujyi wa Kigali, Intara y’Amajyaruguru, iy’Iburengerazuba ndetse no mu Turere twa Muhanga, Nyaruguru, Nyamagabe, Huye, Rwamagana, Ngoma na Kirehe.

Itangazo rya Meteo-Rwanda rigira riti "Dushingiye ku iteganyagihe ry’iminsi icumi ryasohotse ku wa 30 Mata 2025, rigaragaza ko imvura iziyongera hagati ya tariki ya 5 na tariki 10 Gicurasi 2025, METEO RWANDA iramenyesha Abaturarwanda bose ko kuva tariki 04 kugeza tariki 06 Gicurasi 2025, mu Rwanda hateganyijwe imvura nyinshi"

Iki kigo gishinzwe Ubumenyi bw’Ikirere kivuga ko muri iyi minsi itatu hateganyijwe imvura izaba iri hagati ya milimetero (mm) 20 na 50 ku munsi.

Meteo Rwanda yatangaje ko ingaruka zizaterwa n’iyi mvura zirimo imyuzure mu bishanga no mu bibaya, inkangu, isuri n’iriduka ry’imikingo ahahanamye hatarwanyijwe isuri, ndetse n’izizaterwa n’inkuba.

Umuturage wahisemo kwitwa Mukamusoni Veneranda utuye mu murenge wa Kigarama mu karere ka Kicukiro, akaba aturiye ruhurura imanuka ku musozi wa Rebero, aratanga ubuhamya. Ni ruhurura ivana itaka mu misozi ikarisuka ahitwa mu Rwampara mbere yo guhinguka muri ‘Rond point’ nini y’ahitwa mu Kanogo.

Mukamusoni w’imyaka 55 y’amavuko, yavukiye mu Kigarama cya Kicukiro, ahabyirukira abona abaturage bambukiranya imidugudu ya Byimana na Bwerankori n’amaguru, ndetse bakaba barahingaga mu mabanga y’iyo misozi yombi, ariko ubu si ko bimeze.

Mukamusoni agira ati “Mu mwaka wa 1999 aho hantu ubona twahambukaga n’amaguru, nta ruhurura yari ihari rwose, waratambukaga gutya n’amaguru ugafata hakurya, nta byo kuvuga ngo urasimbuka. Amazi yaciye iyi ruhurura ni akomoka ku nyubako n’imihanda byashyizwe ruguru iriya ku Irebero.”

Mukamusoni na bagenzi be baturiye iyo ruhurura bavuga ko ikibazo cyatangiye gukomera kuva mu myaka nka 10 ishize, kuko ari bwo ishyamba ryari ririmo gutemwa hubakwa imihanda hanashyirwa inyubako nini zirimo amashuri, inzu z’ubucuruzi n’imidugudu igezweho, ndetse n’ibyanya by’imyidagaduro.

Iyo ruhurura imaze guca umukoki wa metero hafi 10 z’ubugari n’izindi nk’izo z’ubujyakuzimu, yatumye inzego z’ibanze zitangira gusaba Mukamusoni na bagenzi be kwimuka, kuko aho batuye ubu habaye amanegeka, inzu zimwe zarashenywe abaturage bagenda batishyuwe, ariko n’izindi ngo zihari zidahari.

Ruhurura imaze kwica babiri mu myaka ibiri ishize, ikomeje gutera impungenge

Iyo ruhurura y’amazi amanuka ku Irebero ikomeje gutera impungenge abaturage bo mu midugudu ya Byimana na Bwerankori aho ikiraro cyambukiranya iyo midugudu yombi cyatangiye kuriduka.

Uwitwa Emmanuel Simugomwa ukunze kunyura kuri icyo kiraro avuga ko bahora mu muganda wo kugisana, ariko bikanga bikaba iby’ubusa.

Simugomwa agira ati “Dufite ubwoba ko iki kiraro cyazaridukana abantu, Mu biti 12 bikigize, bibiri gusa ari byo bifashe ku butaka kandi nabwo burimo kuriduka.”

Hepfo yaho mu isantere yitwa Nangumurimbo, umucuruzi uturiye ruhurura ivana amazi ku Irebero avuga ko imbere y’iduka rye hamaze gupfira abantu babiri mu myaka ibiri ishize, aho amazi yabatembanye akanatwara ibintu bitandukanye birimo za moto.

Agira ati “Umumotari yaparitse moto hano imbere y’iwanjye, imvura yarimo kugwa, amazi ahita ayitwara arayiheba burundu. Hashize nk’amezi abiri haje umuntu, nabwo amazi ahita amutembana, twamubonye hariya hepfo ya CGEM yarapfuye, kandi ubwo hari n’undi iyi ruhurura yari yatwaye mu mwaka wabanje.”

Abaturage bo muri ako gasantere bavuga ko batewe impungenge n’uko amazi ava ku Irebero n’ahandi, ahahurira akabateza imyuzure biturutse ku kuba ruhurura yarakozwe nabi igashyirwamo amakorosi.

Hepfo yo kuri Nangumurimbo mu Rwampara, ni ho buruhukiro bw’itaka n’ibindi bintu byose birimo ibiti, amabuye n’ibikoresho by’abantu byatwawe bifungira ikiraro cy’umuhanda wa kaburimbo uva i Gikondo CGM wambukira kuri ‘Cercle Sportif’.

Byabaye ngombwa ko Umujyi wa Kigali uhashyira imashini ishinzwe gusibura ruhurura kugira ngo imihanda n’ibindi bikorwa remezo bitarengerwa.

Kigali yabyaza ruhurura amashanyarazi ifatiye urugero kuri Tbilisi ho muri Georgia

Umujyi wa Tbilisi, umurwa mukuru w’igihugu cya Georgia i Burayi bw’iburasirazuba, wubatse ku buryo amazi y’imvura amanuka muri ruhurura (drainage systems) abyazwa amashanyarazi. Ubu buryo bushingiye ku ikoreshwa ry’ingomero nto (mini-hydro power plants) hamwe n’ububiko bw’izo ngufu muri za bateri(batteries).

Amazi y’imvura igwa mu mihanda, ku mbuga no ku bisenge by’inzu muri uwo mujyi akusanyirizwa muri za ruhurura n’impombo zabugenewe (stormwater channels), agahita ayoborwa mu ngomero nto ahari imashini zitwa turbines zikaraga zikabyara ingufu z’amashanyarazi(hydroelectricity).

Umuriro uva muri izo turbines ubikwa muri bateri nini (large-scale batteries) kugira ngo ukomeze gukoreshwa no mu gihe imvura itagwa, bikaba bituma Umujyi ubona umuriro mu buryo buhoraho.

Mu Rwanda na ho hari icyakorwa

Umwarimu muri Kaminuza y’u Rwanda, Prof François Naramabuye, impuguke mu bijyanye n’Ibidukikije, avuga ko gusakara cyangwa gukurungira imisozi (gusiza no gushyira kaburimbo cyangwa sima hasi), birimo guteza amazi y’imvura gutemba atwara ubutaka n’ibindi bikorwa bifite imbaraga nke, aho gucengera mu nda y’imisozi kugira ngo bireme amasoko.

Ibi bikaba byazateza kugabanuka kw’amazi mu mariba no gutuma amasoko amwe n’amwe akama burundu.

Kubera iyo mpamvu ngo Abanyarwanda bakwiye gushyira mu bikorwa ingamba zafashwe mu mwaka wa 2007 zijyanye no gukoresha neza ubutaka.

Izi ngamba zatumye hashyirwaho gahunda yo kubaka inzu zigerekeranye kugira ngo ku butaka buto bushoboka abantu bahature ari benshi, “cyane ko ngo hari henshi ubutaka bukomeye bukaba bushobora kwikorera inzu zigeretse inshuro zirenga 10.”

Prof Naramubuye agira ati “Mu myaka ishize inzego zitandukanye zirimo izishinzwe ubutaka, ibidukikije, ubuhinzi n’izindi, zagiye zikora inyigo nyinshi cyane, ubuhanga burahari ahubwo ikibura ni ukubusakaza bahereye ku igerageza.”

Ati “Nk’urwo rugero utanze rwo gufata amazi, ukayashyira ahantu ukayabika ku buryo yakomeza kuba isoko yo mu mariba cyangwa se ukaba wayakoresha mu kubyara ingufu. MINAGRI yo yabiteguye kera cyane, ibijyanye no kubika amazi(akoreshwa mu buhinzi).”

Prof Naramabuye avuga ko inzego zishinzwe kwigisha abantu(amashuri) zikwiye kugira icyo zikora kugira ngo abantu bize babashe kubona imirimo, bafatiye ingero ku byo Tbilisi, Morocco (Marrakesh) n’ahandi bakora.

Umuyobozi w’imishinga y’ingufu zisubira mu Rwego rushinzwe Ingufu(REG), Jean Marie Vianney Uwizerwa, avuga ko kubyaza amashanyarazi za ruhurura bigomba kubanza gukorwaho ubushakashatsi mbere y’uko bitekerezwa kuba byashyirwa mu bikorwa.

Ati “Ibyo bintu birasaba ko bikorerwa ubushakashatsi, ubu kano kanya nta kintu nakwizeza pe, wareba ubuhaname bw’aho hantu ko bwaba bumeze nk’ubwa Kigali, ukareba niba imiturire y’aho babikora iteye nk’iyo muri Kigali, ibyo byose ubushakashatsi bukabigaragaza.”

Uwizerwa avuga ko ingomero nto zemerwa mu Rwanda zigomba kuba zitanga amashanyarazi ari munsi ya kilowati 1000, kandi nk’uko bigaragazwa n’Ishami ry’Umuryango w’Abibumbye ryita ku Iterambere ry’Inganda (UNIDO), ruhurura isuka litiro 50 z’amazi mu isegonda yabasha gucanira ingo zigera kuri 50 kuko iba itanga ingufu zingana na kilowati 10(kW).

Abayobozi batandukanye muri PSF bunamiye inzirakarengane zazize Jenoside

Mbere y’igikorwa cyo Kwibuka cyabereye i Gikondo aho urwo rugaga rukorera, ku wa 25 Mata 2025, PSF yabanje kuremera abatishoboye barokotse Jenoside mu Karere ka Kicukiro, inkunga y’Amafaranga y’u Rwanda Miliyoni eshanu yiyongera ku mabati 1000 yari yatanze, kugira ngo abarokotse Jenoside babashe gusanirwa inzu zasenyutse.

Umuyobozi wungirije wa PSF mu Mujyi wa Kigali, Rugera Jeannette, avuga ko n’ubwo iyo nkunga atari nini, biyemeje kujya bayitanga buri mwaka ku batishoboye barokotse Jenoside, bagamije kubafasha gusana inzu zabo zigenda zisenyuka uko imyaka ishira.

Umuyobozi Nshingwabikorwa w’Akarere ka Kicukiro, Mutsinzi Antoine, ashima iyi nkunga avuga ko izabafasha gusana inzu 30 zirimo kwitabwaho muri uyu mwaka, mu nzu 150 z’abarokotse Jenoside zose zikeneye gusanwa.

Mutsinzi yagize ati "Hakenewe ingengo y’imari igera kuri miliyoni 40, ni yo tukirimo gukusanya mu bafatanyabikorwa batandukanye, aho ubu tugeze kuri miliyoni 15, inkunga PSF iduhaye iriyongera ku mabati 1000 baduhaye, turabashimira."

Abagize Inama y’Ubuyobozi ya PSF basuye urwibutso rwa Jenoside rwa Kigali ku Gisozi, aho bunamiye banashyira indabo ku mva zishyinguyemo abarenga ibihumbi 250 bazize Jenoside yakorewe Abatutsi mu 1994.

Mu mugoroba wo Kwibuka wabereye i Gikondo nyuma yaho, Perezida w’Urugaga PSF, Jeanne Françoise Mubiligi yavuze ko bibuka abari abikorera bazize Jenoside, barimo abishwe na bagenzi babo, kandi ko uru rugaga rukomeje kurwanya amacakubiri, ivangura n’ingengabitekerezo ya Jenoside, ruharanira Ubumwe bw’Abanyarwanda.

Mubiligi ati "Abari abacuruzi bifatanyije na Leta yakoze Jenoside, haba mu gutanga amafaranga n’intwaro, gutanga imodoka, gushyiraho ibitangazamakuru nka RTLM, Kangura n’ibindi byigisha amacakubiri."

Ati "Ni yo mpamvu twiyemeje Kwibuka buri mwaka mu rwego rwo kunamira no guha icyubahiro bagenzi bacu bari abacuruzi n’imiryango yabo, bari muri miliyoni irenga y’abatutsi bishwe muri Jenoside."

Mubiligi ashimira Leta iyobowe na Perezida Kagame hamwe n’Inkotanyi muri rusange zabohoye Igihugu, akavuga ko Urugaga rw’Abikorera rwashingiye kuri uwo mutekano rubasha kubaka Iterambere nk’uko rigaragara mu nzego zose.

Perezida wa PSF, Jeanne Françoise Mubiligi (hagati), hamwe n’abandi bayobozi muri icyo gikorwa

Umwe mu bikorera warokotse Jenoside, Sadate Munyakazi, avuga ko iyo Jenoside itanga isomo ry’uko "hatazongera kumvikana umuntu wabuze ubuzima bwe, wapfushije abe cyangwa wambuwe ibye hagendewe ku macakubiri n’ingengabitekerezo ya Jenoside."

Munyakazi ati "Intego ya mbere ni ukubaho, kubaho kw’abantu bashyize hamwe batagira urimbura undi ni cyo gisubizo cy’iterambere ryacu. Ese ubu twagira iterambere turimo kurimbura abantu runaka, dufite urwango cyangwa turimo kwigisha ikibi! Intego yanjye rero ni ukwigisha urwo rukundo, ubumwe tukabugira ubwacu."

Minisitiri w’Ubucuruzi n’Inganda (MINICOM), Prudence Sebahizi, yasabye abikorera kuba urumuri, bakagira amahitamo meza bazirikana ko haramutse habayeho amahitamo mabi, "amateka azabitubaza."

Minisitiri Sebahizi yakomeje agira ati "Tugeze aho twese tumenya ko kubaka Igihugu bikorwa na ba nyiracyo, nta wundi muntu uzaturuka hanze aje kubaka u Rwanda, muri Minisiteri yacu twumvisha abantu ko ubukungu bw’Igihugu bushingiye ku bikorera."

Ati "Ni twebwe Igihugu gihanze amaso n’ubwo amahanga yavuga ngo ’ntabwo tubakorera ibyo twagombaga kubakorera’, iyo tuzi ko ari twe twigize ntabwo biduhungabanya, ubwo butumwa bujyane no kumva ko dukunda Igihugu, tugomba gufatanya hagati yacu tukacyubaka uko tucyifuza."

Umuryango Ibuka, muri gahunda yo Kwibuka abari abikorera bazize Jenoside yakorewe Abatutsi, wasabye abantu kudahishira abakirimo kwidegembya bakoze Jenoside, hamwe no gutanga amakuru ku hantu hakiri imibiri itarashyingurwa mu cyubahiro.

Urugaga Nyarwanda rw'Abikorera(PSF) rwageneye abatishoboye barokotse Jenoside bo mu Karere ka Kicukiro, inkunga y'amafaranga y'u Rwanda Miliyoni eshanu yiyongera ku mabati 1,000 yatanzwe n'urwo rugaga muri uyu mwaka, kugira ngo babashe gusanirwa inzu zasenyutse.

Umuyobozi… pic.twitter.com/b4gzGdbE3A

— Kigali Today (@kigalitoday) April 25, 2025

VIDEO - Umuyobozi Nshingwabikorwa w'Akarere ka Kicukiro, Mutsinzi Antoine, yashimye inkunga y’Amafaranga Miliyoni eshanu n’amabati 1,000 bagenewe n’Urugaga rw’Abikorera (PSF) mu Mujyi wa Kigali, avuga ko izabafasha gusana inzu 30 zirimo kwitabwaho muri uyu mwaka, mu nzu 150… pic.twitter.com/5NsIsweE1J

— Kigali Today (@kigalitoday) April 25, 2025

Antony Twahirwa aganira n’abanyamakuru

Iteganyagihe ry’Itumba rya 2025 (Werurwe, Mata, Gicurasi), ryagaragaje ko imvura izacika hagati ya tariki 10-20 Gicurasi 2025 henshi mu Gihugu, uretse mu turere twa Rusizi na Nyamasheke ho yateganyaga gucika hagati ya tariki 20-30 Gicurasi 2025.

Abahinzi bo mu Turere twa Bugesera na Nyagatare, hamwe mu ho imvura ikunze gucika kare, bagaragaza icyizere ko n’ubwo ibishyimbo bikiri ururabo kubera gutinda kw’imvura y’Itumba ry’uyu mwaka yatumye batera batinze, ibyo bihingwa byerera igihe gito bizatanga umusaruro uhagije.

Uwingeneye Françoise utuye i Rilima mu Bugesera agira ati "Icyizere kirahari rwose ko ibishyimbo bizera kuko imvura irahari. Ubu turarya umushogoro, bifite uburabyo, biramutse bibonye byibura imvura nka 3(kugwa gatatu) byakwera kuko imvura isanzwe icika mu matariki nka 13-15 y’ukwa gatanu."

Uwingeneye avuga ko iyo imvura igwira igihe isanzwe itangira kubonekamo mu mpera za Gashyantare, ibishyimbo ubu byari kuba bifite imiteja, byenda kwera.

Aho ibishyimbo bigeze byera

Umuhinzi ukorera mu Karere ka Nyagatare witwa Antoine Hategekimana, avuga ko impungenge bazifite ku bigori kuko byo byera bitinze.

Hategekimana avuga ko iki gihembwe cy’Itumba rya 2025 nta bigori bizaboneka, "kereka wenda imvura ikomeje ikarangiza ukwezi kwa Gicurasi kose."

Umuyobozi ushinzwe Iteganyagihe n’uko rishyirwa mu bikorwa mu kigo Meteo-Rwanda, Antony Twahirwa, avuga ko imvura y’Itumba igihari kugera mu mpera z’ukwezi kwa Gicurasi k’uyu mwaka.

Twahirwa yaganirije Abanyamakuru bakora ku bidukikije(REJ), ubwo basuraga Meteo Rwanda ku wa 24 Mata 2025, agira ati "Kugeza ubu turabona ko imvura izageza mu mpera z’ukwezi kwa gatanu, n’ubwo hari igihe ikirere cyivumbagatanya kigatanga imvura nyinshi, abahinzi bagire icyizere, turacyabona ko ikirere kigifite imvura."

Meteo-Rwanda ivuga ko ubupimiro bw’iteganyagihe burenga 300 ifite hirya no hino mu Gihugu kugeza ubu, butuma amakuru itanga arushaho kwizerwa.

Ivuga kandi ko nyuma ya RADAR hazazanwa n’igipurizo(balloon) mu kwezi kwa Nzeri k’uyu mwaka wa 2025, kikaba gifatira amashusho y’iteganyagihe ku butumburuke bwa kilometero 32 mu kirere cy’Isi.

Ikusanyamakuru ryakozwe n’uwo muryango ufatanyije n’impuguke mu buzima bw’imyororokere, Dr Anicet Nzabonimpa, rivuga ko 50% by’abagore n’abakobwa bo mu cyaro bakigorwa no kubona cotex, bigatuma bifashisha ibice by’imyenda bishobora kubateza indwara ziva ku isuku nke.

Mu gukora iryo kusanyamakuru hari aho basanze ipaki imwe ya cotex igurwa amafaranga abarirwa hagati ya 1000Frw-1500Frw, kandi ingo zo mu cyaro usanga zigizwe n’abantu benshi, ku buryo urugo rushobora gukenera arenga 8,000Frw buri kwezi yo kugura cotex.

Dr Nzabonimpa agira ati "Ibyo bikoresho by’isuku (cotex) birahenze cyane, kandi ku isoko ntabwo ziboneka, mu giturage ushobora kugera mu isantere itagira umuntu n’umwe uzicuruza, bigasaba kugenda ibirometero byinshi ujya kuzishaka cyangwa gukoresha ibishwange by’imyenda ishaje mu gihe cy’imihango."

Dr Nzabonimpa asaba ko isuku mu gihe cy’imihango igomba kwinjira muri politiki zitandukanye z’Igihugu, kuko ngo hari abana basiba ishuri kubera ipfunwe ry’uko abantu baza kubona biyanduje kubera imihango.

Avuga ko mu giturage iyo umubyeyi cyangwa umukobwa abonye ifaranga, adashobora kuriteganyiriza igihe cy’imihango, bitewe n’uko aba akeneye ifunguro mbere y’ibindi, kandi abenshi nta kazi baba bafite.

Umukobwa witwa Tuyishimire Clarisse w’imyaka 18 y’amavuko utuye i Nyaruguru, ashimangira ikijyanye n’ibiciro bya cotex bigikomereye abangavu by’iwabo, bigatuma hari abahora bakenyeye imipira y’imbeho kugira ngo nibiyanduza bitagaragara.

Nyinawabo wa Tuyishimire, Mukashyaka Jeannette, na we avuga ko kubera kubura amikoro, abenshi mu babyeyi bo mu cyaro badakoresha cotex, bakaba baragumye ku bitambaro n’ibice by’imyenda ishaje bahora babimesa buri gihe uko babikoresheje.

Mu ngaruka ziterwa n’uku kutabona cotex mu buryo bworoshye, nk’uko Save Generations Organization (SGO) ibisobanura, harimo indwara ziterwa n’umwanda, ihungabana kubera ipfunwe ry’uko abantu bamubonye afite amaraso ku mwenda, ndetse no gusigara inyuma mu iterambere k’umugore n’umukobwa.

Umuhuzabikorwa wa SGO, Igihozo Mireille, agira ati "Igiciro cya biriya bikoresho ntabwo cyigeze kigabanuka n’ubwo muri 2019 Leta yabikuriyeho umusoro wa TVA(18%), amafaranga 1000 bigurwa hari abatayabona, cyane cyane abo mu cyaro.
Umugore wo mu cyaro asiba ku mirimo (cyangwa ku ishuri) nibura iminsi 50 mu mwaka kubera kubura ibikoresho by’isuku mu gihe cy’imihango."

Dr Regis Hitimana ushinzwe Ubuzima bw’Umwana n’Umubyeyi mu Kigo gishinzwe Ubuzima mu Rwanda(RBC), avuga ko ikoreshwa ry’ibindi bintu bitari cotex mu gihe cy’imihango y’umugore cyangwa umukobwa rifite ingaruka, ’kuko amaraso(y’imihango) ari ibiryo bya mikorobe ziteza indwara.’

Bishimiye inka bahawe

Abayobozi b’ibigo bigize RWVCA batanze izo nka ku barokotse nyuma yo gusura urwibutso rw’i Ntarama ku wa Kane tariki 17 Mata 2025, aho baganirijwe ku mateka yarwo ndetse bakaba bunamiye Abatutsi bahashyinguye barenga ibihumbi bitandatu.

Perezida wa RWVCA, Hadji Abdu Karemera, avuga ko abarokotse Jenoside b’i Ntarama bakeneye iterambere rishingiye ku kongera ibimera (ibiti by’umwihariko), akaba ari yo mpamvu batanze inka kugira ngo zibahe ifumbire y’ibyo biti.

Agira ati "Turakangurira abari aha kongera gutera ibiti kugira ngo babone imvura n’umwuka mwiza, ibiti bifate imyuka mibi y’inganda ziriho zivuka (icyo bita carbon credit). Ubu turibuka twiyubaka, abarokotse rero ni umwanya mwiza wo kwiyubaka, tubahaye inka zizatanga ifumbire, aho bazayijugunya hose bazahatere igiti."

Ati "Hari abashobora gutera amaronji, avoka cyangwa izindi mbuto ziribwa, ariko bagatera n’ikindi giti gifata imyuka mibi kandi kizamufasha kubona imbaho ubwo kizaba gikuze. Inka rero zizabahesha amata n’ifumbire y’ibyo biti hamwe n’indi myaka”.

Bahamya ko inka bahawe zizabafasha kwiteza imbere

Karemera avuga ko Abanyarwanda barenga miliyoni imwe birirwa mu dukiriro hirya no hino mu Rwanda, ubuzima n’imibereho y’ingo zabo bikaba bishingiye ku giti, kandi ngo barimo gukoresha ibiti batateye, akaba yifuza ko buri wese yatera nibura ibiti bitanu kandi akabyitaho kugeza bikuze.

Ati "Turifuza ko Leta yaduha imisozi dushobora guteraho ibiti byinshi bifasha Igihugu kugarukana ubuzima, duhereye kuri aka Karere ka Bugesera twajemo. Ni akarere kakomeje kwibasirwa n’amapfa kuva mu gihe cya Jenoside bituma kagira inzara y’igihe kirekire."

Karemera yishimiye kubona ibihamya bya Jenoside yakorewe Abatutsi, aho ku rwibutso rw’i Ntarama hari ibimenyetso byari bifitwe n’abicanyi (nk’intwaro bakoresheje) ndetse n’imyambaro yari yambawe n’abishwe muri Jenoside, ariko hakaba n’ibiti by’imivumu nka kimwe mu biranga umurage w’Abanyarwanda bo hambere.

Avuga ko n’ubwo badafite ubushobozi bwo gutanga inka ku barokotse Jenoside bose, ariko ngo ntihazabura abafatira urugero kuri iki gikorwa, na bo bagakomeza kuremera abandi bacitse ku icumu rya Jenoside batishoboye.

Karemera yunamira abatutsi barenga ibihumbi bitandatu bashyinguwe mu rwibutso rw’i Ntarama

Kanzayire Epiphanie warokotse Jenoside, akaba ari mu bahawe inka, ashima ko yongeye kumva mu rugo hari ikintu gihari kuko ngo haba hari irungu n’ubwigunge budasanzwe, kandi imibereho y’urugo rwe ikaba igiye guhinduka.

Undi wahawe inka ni Tuyishimire Jean de Dieu, ugira ati "Ubu dufite gahunda yo gutera mu rugo ibiti byera imbuto, nk’ubu njye maze gutera ibiti 12 bya avoka, imyembe n’amaronji, urumva ko niba mbonye ifumbire yo kuzabifumbira, ni amata abyaye amavuta."

Umuyobozi wungirije w’Akarere ka Bugesera ushinzwe Imibereho myiza, Yvette Imanishimwe, avuga ko imiryango ine yahawe inka za RWVCA, nizamuka ikava mu bukene, hazaba hazamutse abantu benshi bayishamikiyeho.

Ubuyobozi bw’Urwibutso rwa Ntarama buvuga ko Abatutsi bari baratujwe mu Bugesera bahungiye ku Kiliziya y’i Ntarama(yaje kuba urwibutso), kuko ngo bari barahakiriye mu mwaka wa 1992 ubwo bari batangiye kugirirwa nabi bitwa ibyitso by’Inkotanyi, aho bibwiraga ko bazongera kuhakirira nka mbere.

Muri urwo rwibutso haracyarimo imwe mu mibiri y’abahiciwe, aho imitwe yabo bigaragara uko yagiye imenagurwa, ndetse imwe yarekewemo imyambi yaterwaga n’abicanyi. Amaraso y’abana biciwemo aracyari ku nkuta, ibikoresho byakoreshejwe mu kubica ndetse n’imyambaro bamwe bari bambaye, na byo biracyabitse muri urwo rwibutso.

Visi Meya Yvette Imanishimwe, ashyira indabo ku mva y’Abatutsi biciwe i Ntarama

Karemera aganiriza abagize RWVCA hamwe n’abayobozi mu Karere ka Bugesera

Karemera ku bigabiro by’i Ntarama, arasobanura akamaro k’ibiti mu Bugesera

Minisitiri w’Intebe, Dr Edouard Ngirete

Ikigo NISR kivuga ko abakene mu Rwanda ubu bangana na 27.4%, mu gihe abari mu bukene bukabije basigaye ari 5.4% by’abaturage bose, nyuma y’igabanuka ry’ubukene rigera kuri 12.4%, ndetse n’igabanuka ry’ubukene bukabije ku rugero rwa 5.9%, kuva muri 2017 kugera muri 2024.

Minisitiri w’Intebe Dr Ngirente yashimye iyi raporo, avuga ko ari igihamya cy’uko u Rwanda rwagize impinduka nziza mu mibereho y’abenegihugu, ashingiye ku kuba icyiciro cy’abakene cyaragabanutse kuva kuri 39.8% muri 2017 kigera kuri 27.4% mu 2024.

Ashima kandi ko ubukene bukabije bwagabanutse kuva kuri 11.3% muri 2017 kugera kuri 5.4% muri 2024, ndetse no kuba Abanyarwanda barenga miliyoni 1.5 baravuye munsi y’umurongo w’ubukene.

Minisitiri w’Intebe Dr Ngirente avuga ko mu myaka irindwi yo gushyira mu bikorwa Gahunda ya mbere ya Guverinoma (NST1) kuva muri 2017-2024, u Rwanda ku bufatanye n’abafatanyabikorwa, bageze ku ishoramari rinini, ari na ko bateza imbere imibereho myiza y’abaturage, cyane cyane inkunga y’ingoboka hamwe n’imirimo yo muri VUP yagiye ihabwa abaturage b’amikoro make.

Uyu muyobozi wa Guverinoma y’u Rwanda yakomeje agira ati “By’umwihariko, kwihutira kuzahura ubukungu nyuma ya COVID-19, byatanze amahirwe menshi y’akazi, cyane cyane ku rubyiruko n’abandi bafite imbaraga zo gukora.”

Yungamo ko mu myaka ine ishize nyuma ya COVID-19, ubukungu bwazamutse ku gipimo kiri hejuru ya 9.1% buri mwaka, bikaba ngo byaratewe n’imigendekere myiza y’ibyiciro bitandukanye by’ubukungu bw’Igihugu.

Avuga ko, bitewe n’iri zamuka ry’ubukungu, Abanyarwanda ubu bashobora kubona indyo yuzuye, kwivuza neza, kwigisha abana no kugira imibereho myiza muri rusange.

Bimwe mu byagaragajwe muri EICV7

Uturere 14 muri 30 dufite abakene benshi barenze igipimo cyo ku rwego rw’Igihugu cya 27.4%, aho Nyamagabe ifite abagera kuri 51.4%, Gisagara 45.6%, Rusizi 44.2%, Nyanza 43.3%, Nyamasheke 42.8%, Rutsiro 40.8%, Nyaruguru 39.7%, Kamonyi 39.7%, Rubavu 38.8%, Karongi 38.2%, Kayonza 36.6%, Nyagatare 36.4%, Ngoma 30.9% ndetse na Ngororero ifite 30.2% bakennye.

Mu zindi mbogamizi iki cyegeranyo kigaragaza harimo kuba ibikorwaremezo by’amazi byaregerejwe ingo hafi ya zose mu Rwanda ku rugero rwa 90%, ariko abishimira ko babona amazi neza bakaba ari 45%.

Iki cyegeranyo kivuga ko abaturage bangana na 72% bagerwaho n’amashanyarazi(bavuye kuri 34% muri 2017), mu gihe abafite telefone zigendanwa ari 85%, bavuye kuri 67% muri 2017.

Ni igikorwa cyitabiriwe n’abayobozi batandukanye

Minisitiri w’Intebe avuga ko n’ubwo u Rwanda rugeze kuri byinshi byiza, hakiri urugendo rurerure rwo kugera ku gihugu kitarangwamo ubukene. Hakaba hakenewe ishoramari mu burezi no kongerera abaturage ubumenyi, kugira ngo bazabashe guhangana ku isoko ry’umurimo ryo mu gihe kiri imbere.

Avuga ko Leta izakomeza gushora imari mu nzego z’ingenzi zirimo guha abaturage amashanyarazi, amazi n’isukura, ndetse n’ubuvuzi.

Dr Ngirente avuga ko ubu bushakashatsi buhuriranye no gutangira ishyirwa mu bikorwa rya Gahunda ya Kabiri ya Guverinoma(NST2) hamwe n’icyerekezo 2050, ndetse ko ibyabuvuyemo bizagira uruhare mu gukurikirana aho u Rwanda rugeze mu Ntego z’Iterambere Rirambye (SDGs).

CSP Thérèse Kubwimana avuga ku kamaro ka Halfway Homes

RCS ivuga ko Halfway Home ya mbere yubatswe mu Karere ka Rwamagana, biteganyijwe ko izatangira imirimo muri uyu mwaka wa 2025, ikaba ifite ubushobozi bwo gucumbikira abagororwa 2500.

Umuvugizi wa RCS, CSP Thérèse Kubwimana yabitangaje mu kiganiro yagiranye na KT Radio kuri uyu wa Gatanu tariki 11 Mata 2024, cyavugaga ku buryo abarangije igifungo cya Jenoside babanza gutegurwa mbere yo gusubira mu muryango nyarwanda.

Kubwimana yari kumwe n’abayobozi b’imiryango Interpeace (uharanira kubaka amahoro) hamwe na “Dignité en Détention (DDE), ukaba ari umuryango uharanira agaciro k’abantu bari mu magororero.

Umuyobozi nshingwabikorwa wa DDE, Odette Mukansoro, avuga ko abakoze ibyaha bya Jenoside bari mu igororero bose bajya baganirizwa hakabamo abemera kuzajya mu matsinda y’ubumwe n’ubwiyunge yiswe ‘Mvurankuvure’, agizwe n’abarokotse Jenoside hamwe n’ababakoreye ibyaha, kugira ngo bamenyanye kandi bomorane ibikomere, ariko hakaba n’abafungurwa batabanje gutegurwa no kwerekwa abarokotse Jenoside.

Odette Mukansoro

Umuyobozi muri Interpeace ushinzwe ibikorwa by’uwo muryango, Margret Mahoro, yatangaje ko bagiye gushyira imbaraga mu kumenya abafungiwe icyaha cya Jenoside, hakamenyekana ibyifuzo bya buri muntu ugiye gufungurwa n’uburyo bitazateza ihungabana abarokotse bamubonye bwa mbere.

Mahoro agira ati “Hari icyo tuzakora ariko dusaba ubufatanye bw’inzego, ni ukumenya aba bantu bafungiye icyaha cya Jenoside, n’ubwo atari benshi cyane, mbere y’uko abarangije igihano bafungurwa. Hazakorwa ‘screening’(isuzuma) kugira ngo tumenye ngo uyu muntu asohotse yifuza iki! Hari ufungurwa ntashake gusubira aho yakoreye icyaha, nagende ariko bye kuba kubera ko afite icyo ahunga.”

Mahoro avuga ko inzego nizihuriza kuri iki kibazo, hazamenyekana niba umuntu wafunguwe akajya gutura ahandi bitaratewe n’uko yasize abambuye imitungo, ndetse ko ari na ngombwa guhuzwa n’abo yakoreye icyaha cya Jenoside bakaganirizwa bari hamwe, kugira ngo habeho ubwiyunge n’ubusabane, nk’uko bikorerwa abari mu matsinda ya Mvurankuvure.

Mahoro avuga ko hari urwenya yumvise ariko rufite igisobanuro gikomeye, aho umuntu ngo yafunguwe nyuma akaza kwitabira umuganda, agatungurwa no kuwuhuriramo n’uwo yakoreye icyaha cya Jenoside.

Ati “Uwo warokotse Jenoside kubona umuntu ufunguwe byabaye nko gukubitwa n’inkuba kuko nta tangazo ryatanzwe ry’uko uwo muntu azafungurwa, ntabyo yamenye, urabyumva icyakurikiyeho ni ukuvuza induru. Ariko ufunguwe aramutse yarateguwe agaherekezwa, byarushaho gutegura abo asanze kuko umuntu umaze imyaka 15 afunzwe kumubona mu Kiliziya cyangwa ahandi, ntabwo byabura kuguhungabanya!”

Margret Mahoro

Ibi birashimangirwa n’umwe mu barokotse Jenoside yakorwe Abatutsi mu Murenge wa Maraba w’Akarere ka Huye, uvuga ko kutabanza guhuzwa n’abamuhemukiye byamutezaga indwara y’umutwe udakira hamwe n’urwango rwo kutababarira, bikagera ubwo bimuviramo kubura ubudahangarwa bw’umubiri no kunanuka.

Uyu muturage agira ati “Icyatumaga nanuka mbere yo kwiyunga n’abampemukiye, byari ibitekerezo byinshi by’abanjye nabuze, natekereza n’ibintu nari mfite, nkumva ntaye ubwenge, umutwe ugahora undya! Ikibazo nari mfite ni uguhura na wa muntu wankoreye icyaha, naba mukubise amaso umutwe ukandya ku buryo ibinini bya ‘paracetamol’ ari byo byari bintunze.”

Umuvugizi wa RCS, CSP Thérèse Kubwimana, avuga ko hari ubufatanye bw’inzego zirimo Minisiteri y’Ubumwe bw’Abanyarwanda n’Inshingano Mboneragihugu(MINUBUMWE), hamwe na Minisiteri y’Ubutegetsi bw’Igihugu (MINALOC), mu gutegura abagiye gufungurwa hamwe no kumenyesha abarokotse baziranye, kugira ngo “umuntu atazajya abona undi wafunguwe amuguye hejuru.”

CSP Kubwimana akomeza agira ati “Halfway tuyigeze ku rwego rwa nyuma tuyubaka, n’ubwo itazajyamo abakoze Jenoside gusa kuko hari n’ibindi byaha biremerereye umuryango nyarwanda, bituma umuntu ashobora kugaruka ugahungabana Nk’umuntu wagufatiye ku ngufu umwana w’imyaka itanu ntabwo byapfa kukorohera kubyakira.”

Halfway home yuzuye i Rwamagana

Ati “Icyo kigo rero abantu bazajya bakinyuramo bamenyerezwe umuryango nyarwanda (abo bagiye kubana), nko kubanza kujya mu muganda hamwe n’abandi, mu kazi, mu bukwe, ariko akazajya atahamo kugira ngo arangize igihano sosiyete yaramumenyereye nk’umuntu ugiye kukirangiza.”

RCS n’abafatanyabikorwa bayo bavuga ko uretse gutegura abarangiza ibihano mu magororero kwakirwa neza mu muryango nyarwanda, hari n’ubumenyi barimo gusohokana bakuye mu mashuri y’imyuga n’ubumenyingiro bwabafasha guhita biyubaka, abaturage bazababona bakaba bashobora kubakira nk’abakozi bashoboye akazi.

Minisitiri w’Intebe, Dr Edouard Ngirente aganiriza ab’i Musanze

Ibi Minisitiri w’Intebe yabitangarije muri Kaminuza y’u Rwanda, ishami rya Busogo mu Karere ka Musanze, aho yifatanyije n’abaturage muri ako karere Kwibuka ku nshuro ya 31 Jenoside yakorewe Abatutsi mu 1994.

Minisiteri y’Ubumwe bw’Abanyarwanda n’Inshingano Mboneragihugu (MINUBUMWE), ibitse ibipimo byakorwaga n’icyari Komisiyo y’Ubumwe n’Ubwiyunge, bigaragaza ko mu mwaka wa 2020 icyo gipimo cyari kigeze kuri 94.7% kivuye kuri 92.5% muri 2015 na 82.3% muri 2010.

Ibyo bipimo kandi bikavuga ko 99% by’Abanyarwanda, bashyize imbere Ubunyarwanda kandi bakomeye ku ndangagaciro zibwimakaza, 94.6% basobanukiwe amateka Igihugu cyanyuzemo, ndetse ko 97.1% bemeza ko babanye neza kandi bafatanya mu buzima bwa buri munsi.

Ibi birashimangirwa n’itsinda ryitwa ’Twitaneho’ ry’Abanyarwanda batuye mu Kagari ka Rungu, Umurenge wa Gataraga, Akarere ka Musanze, bishyize hamwe muri gahunda yiswe Mvurankuvure y’umuryango mpuzamahanga uharanira Amahoro witwa Interpeace.

Ni itsinda rigizwe n’abarokotse Jenoside yakorewe Abatutsi mu 1994 hamwe n’abayikoze ariko bihannye bakabisabira imbabazi, abatari bari mu Gihugu mu gihe iyo Jenoside yakorwaga ndetse n’abari abasirikare bavuye ku rugerero.

Ni igikorwa cyitabiriwe n’abatari bake

Umwe mu bagize iryo tsinda witwa Semikore Céléstin, avuga ko nyuma yo gufungurwa ubwo yari arangije igihano cy’ibyaha bya Jenoside yakoze akabisabira imbabazi, inyigisho yahawe hamwe no kumuhuza n’abo yahemukiye ngo byaramutinyuye kandi bimukiza ivangura yari yaje azanye avuye muri gereza.

Semikore yagize ati "Natinyutse kubana n’abarokotse Jenoside, na bo banyiyumvamo turabana turasabana, ubu nta kibazo gihari. Mbere ya Mvurankuvure nari Semikore ucisha make ariko ukomera kuri Kamere. Iyo kamere yashoboraga gutuma ngambanira umuntu nkamuhemukira, ariko ubu nagize impuhwe n’urukundo hamwe no kubana neza n’abandi, nubaha ikiremwamuntu."

Semikore avuga ko umutima w’ubwicanyi yari yarawize mu mashuri, aho ngo bigishwaga ivangura ry’amoko na Leta zariho mbere y’umwaka wa 1994.

Iryo tsinda ry’Ubumwe n’Ubwiyunge ririmo kandi Uwase Christine warokokeye Jenoside muri Kiliziya ya Sainte Famille i Kigali, ariko i Gataraga ya Musanze akaba yarahaburiye murumuna we wari uhatuye, kugeza n’ubu ngo ntabwo barabona umubiri we.

Uwase ubu uganira akanyuzamo akamwenyura, avuga ko atari ko yari ameze mu myaka 2 ishize atarajya mu itsinda ry’Ubumwe n’Ubwiyunge, kuko icyo gihe ngo yahoraga ari umusinzi ugira amahane akarwana, ndetse ngo nta n’ubwo yari yakababariye abamwiciye abo mu muryango we.

Uwase ati "Nari umunyamahane kandi ngatukana, nkanywa inzoga za yose kubera agahinda na ‘stress’ naterwaga n’abanjye naburiye muri Jenoside."

Iri tsinda ry’abaturage ba Rungu rivuga ko nyuma y’ibyumweru 15 bamaze biga kubana no kubabarirana, ndetse no guharanira kuba umwe, ubu bishyize hamwe batanga amafaranga 1300 ku kwezi buri wese, bakaba bamaze kugira ikiraro cy’intama 25 mu gihe kitarenga imyaka ibiri iryo tsinda rimaze rishinzwe

Iyo hagize umwe muri bo urwara baramugoboka muri wa musanzu batanga buri kwezi, kandi uko umwaka ushize bagabana ubwasisi basaguye kugira ngo bizihize ubunani badafite ikibazo.

Biyemeje kujya bahana abakwe n’abageni, bahora bagendana iyo hagize gahunda zisaba abaturage gukorera hamwe, ndetse no muri gahunda yo Kwibuka ku nshuro ya 31 yabereye muri Kaminuza y’u Rwanda i Busogo bari bari kumwe.

Minisitiri w’Intebe, Dr Ngirente, avuga ko nta kizahungabanya Ubumwe bw’Abanyarwanda ngo cyongere guteza Jenoside ikorerwa Abatutsi, kuko Abanyarwanda ngo bamaze kumva inyigisho bahawe na Leta.

Ati "Ubumwe bw’Abanyarwanda twabugezeho ku kigero kiri hejuru cyane, ariko n’ako gake kabura tugashakishe. Tujya tubona muri za raporo aho umuntu abyuka agatema inka y’undi amaguru akayisiga aho."

Ati "Hari ugenda agatema urutoki rw’uwarokotse Jenoside atagamije kwiba kuko atabijyana, ntabwo bireba inzego za Leta gusa, ahubwo uwo mutima mubi ushaka kugaruka kuri Jenoside tuwurwanye twese icyarimwe."

Bamwe mu bagize itsinda ’Twitaneho’ bari bavuye Kwibuka i Busogo kuri uyu wa Kabiri

Ni ubuhamya yatanze ku mbaga y’abitabiriye itangizwa ry’icyunamo no kwibuka ku nshuro ya 31 Jenoside yakorewe Abatutsi mu 1994, ikaba ari gahunda yayobowe na Perezida wa Repubulika, Paul Kagame hamwe na Madame Jeannette Kagame, kuri uyu wa Mbere tariki 07 Mata 2025.

Freddy Mutanguha wavukiye i Burundi mu mwaka wa 1976, aho ababyeyi be bari bamaze imyaka itatu bahungiye "kubera kwicwa kw’Abatutsi kwakozwe mu Rwanda n’ubutegetsi bwariho muri 1973", ntabwo yagize amahirwe yo kurerwa n’ababyeyi bombi, kuko se yaje kugwa i Burundi azize impanuka, asiga umubyeyi atwite inda ya mushiki we ubu barokokanye.

Kuva i Burundi bagaruka mu Rwanda

Mutanguha avuga ko umubyeyi (mama) we bari basigaranye yaje kugaruka mu Rwanda ubuhunzi bumugoye, bashyikira iwabo w’uwo mubyeyi mu cyahoze ari Komine Bwakira mu Karere ka Karongi, ariko nyuma aza gushaka undi mugabo ahari muri Komine Mushubati, ubu ni mu Karere ka Rutsiro.

Aho i Mushubati ngo ni ho yamenyeye amoko(Abahutu, Abatutsi n’Abatwa), kuko amashuri ngo yakoraga raporo ya buri gihembwe, bigatuma mwarimu aza akabahagurutsa ashaka kumenya ubwoko bwa buri mwana.

Mutanguha ati "Icyo gihe nigaga mu mwaka wa kabiri w’amashuri abanza, nabanje kujijinganya, maze mwarimu anturuka imbere andya ikinyunguti ku itama ambwira ati ’mama wawe ni mwarimu hano ukaba utazi ko uri Inyenzi!"

Avuga ko muri icyo gihe urubyiruko rwigishwaga ubugome mu mashuri, ndetse ko imyandiko yabaga mu bitabo n’ubwo harimo imigani y’inyamaswa, habaga harimo urwango.

Ku ishuri ngo bagiraga isomo ryo kwiga imyuga inyuranye yo gukora ibikoresho byifashishwa mu buzima bwa buri munsi nk’imihini, inkoni, imyuko n’ibindi, ndetse no gucura ibyuma, kugeza ubwo muri 1994 byahinduriwe umumaro bitangira gukoreshwa nk’intwaro ya Jenoside.

Mutanguha avuga ko ubwo Jenoside yari itangiye, yagiye i Mushubati kuri Komine y’iwabo asanga hahungiye Abatutsi benshi, ariko barimo gusabwa bajya mu yindi Komine yitwaga Mabanza ngo abe ari ho barindirwa, agarutse abibwira ababyeyi be, ariko nyina amubwira ko byarangiye, bamaze kugotwa bagiye kwicwa.

Avuga ko yahasanze Interahamwe zitwaje ’Imihembezo’ zimaze kwica umugabo witwaga Rwandekwe, maze bukeye bwaho uwari Burugumestre Ignace Bagirishya (ubu yagizwe umwere n’inkiko zo mu Bufaransa), ategeka ko bakuraho "umwanda" avuga abatutsi bo muri Komine yayoboraga.

Umubyeyi(nyina) wa Mutanguha ngo yamugiriye inama yo kujya kwihisha ku mukecuru utarahigwaga witwaga Kankindi, wamurangiye inshuti ye yitwaga Peter ko ari ho yakirira, ajyayo, akaba ari ho nyina yakomeje kujya amusura.

Ati "Aho ni ho mama yansangaga aje kunsura, ariko byageze ku itariki 13 Mata 1994 aza noneho ubona ko yahindutse mu maso, azana amatunda turasangira, andeba mu maso arambwira ati ’mwana wanjye nurokoka uzabe umugabo’, arahaguruka aragenda ati ’ngiye kureba abandi’", ni bwo amuheruka we n’umugabo na bashiki be bane.

Kuva i Mushubati bahungira ku Rutare rwa Ndaba

Ibitero ngo byakomeje kwiyongera muri ako gace, we na mushiki we na bo bagiye kwicwa, yumva ijwi ry’umuntu ubatabariza ati "abo bana nyina yabakuye i Burundi bashobora kuba ari Abarundi", bava aho bahungira kwa nyinawabo wabaga hafi yo ku Rutare rwa Ndaba(muri Karongi), yari yarashatswe n’umugabo utarahigwaga.

Mutanguha avuga ko uwo mugabo byaje kumugora gukomeza kurinda umugore we n’abo bana bari bamuhungiyeho, ahitamo kubagira inama yo guhungira aho batazwi, ariko abaha indangamuntu ye yari yanditswemo amazina y’abana be bitwaga Albert na Ukwibishaka.

Mutanguha ati "Byabaye ngombwa ko mpindura amazina, ngenda nitwa Albert, mushiki wanjye na we akitwa Ukwibishaka."

Kuva ku Rutare rwa Ndaba kugera i Kaduha

Mutanguha na mushiki we bafashe inzira berekeza i Kaduha(ubu ni muri Nyamagabe), ahari harahungiye impunzi "z’abahutu" zavuye hirya no hino mu Gihugu, hakaba ari agace kitwaga ’Zone Turquoise’ karindwaga n’ingabo z’Abafaransa.

Bagezeyo babana n’izo mpunzi hamwe n’abanyeshuri bo mu ishuri ry’Ubuhinzi ryitwaga EAV ngo bari baratojwe ubwicanyi, muri bo haza kubonekamo umwana umuzi atangira kumuhamagara mu mazina ye ya nyayo ati "Mutanguha Freddy", impunzi zitangira kumugiraho ikibazo, arahaguruka arahunga na none asigayo mushiki we.

Kuva i Kaduha yerekeza i Kigali

Yahunze agana ku Gikongoro, ati "ntabwo nari nzi ko Inkotanyi zahagaritse Jenoside, kandi hari hageze mu kwezi kwa Nyakanga hagati muri 1994, ndagenda nambuka umugezi wa Mbirurume, mpageze mpura n’abasirikare b’Inkotanyi babiri mbabwira ibyanjye, barambwira bati "ubu ntugipfuye."

Yababwiye ko ashaka kujya i Kigali bamutegera imodoka ya "Croix Rouge" iramuzana imugeza kuri Gare mu Mujyi wa Kigali, atekereza aho ajya yibuka ko hari sewabo wari utuye i Gikondo(CGEM), agezeyo asanga baramwishe, hasigaye ari mu itongo, ariraramo(ku gasozi).

Avuga ko ubwo yari aryamye muri iryo tongo yatangiye gutekereza cyane, mu gahinda kenshi no kwibaza uko azongera kubona mushiki we, bwarakeye asubira kuri gare mu Mujyi wa Kigali ahasanga umusore wari umushumba mu bice by’iwabo, amujyana mu bandi bantu b’i Mushubati bari baraje i Kigali kera.

Nyuma yaho Mutanguha yaje guhura na sewabo wari uvuye i Burundi, amubwiye ko yasize mushiki we mu mpunzi i Kaduha, sewabo amuhuza n’umusirikare w’Inkotanyi wamujyanye bajya kumushaka baramubona.

Mutanguha na mushiki we bongeye guhura, abona ubuzima butangiye kugaruka, asubira mu ishuri ariga ararangiza, akaba ashimira u Rwanda ati "Leta yatubereye umubyeyi ishyiraho ikigega FARG n’ubundi bufasha."

Ati "Nyakubahwa Perezida wa Repubulika, ndagira ngo mbashimire, umusingi Inkotanyi zaduhaye, ni igihango gikomeye tutazigera dutatira, zaduhaye icyizere cyo kubaho. Twabaye abagabo, rya jambo rya mama, ubu ndi umugabo narashatse, mfite abana batanu."

Muri uku gutanga ubuhamya, Mutanguha yahise ahindura ururimi avuga mu Cyongereza ati "This memorial provides historical clarity" bivuze ngo "Uku kwibuka biratanga amateka y’ukuri."

Abanyeshuri ba Well Spring Academy baha abana bari muri ECD amata

Ni gahunda abanyeshuri bo muri Well Spring Academy (ishuri riri i Nyarutarama mu Mujyi wa Kigali) bavuga ko bazakomeza nyuma yo kumva ko buri mwaka hari abangavu batwita batabishaka, bamwe baba badashoboye kurera abana babyaye, bitewe n’uko bakomoka mu miryango itishoboye.

Lys Marie Umuratwa wiga mu mwaka wa Gatanu w’amashuri yisumbuye muri Well Spring Academy, ni umwe mu bayoboye abanyeshuri bagenzi be ku gitekerezo cyo gukusanya inkunga yo gufasha abana batishoboye, n’ubwo ngo batari bazi aho bahera batanga ubwo bufasha.

Babanje kubaririza banakora ubushakashatsi, baza kurangirwa Irerero ry’Abana bato(ECD) riri mu Mudugudu wa Ibuga, Akagari ka Karugira, Umurenge wa Kigarama mu Karere ka Kicukiro, batangira gukusanya inkunga.

Ni ECD irimo abana b’incuke 105 ako kagari kubakiwe n’Umuryango witwa ‘Hope and Homes for Children’, aho abana bavuka ku bangavu no ku bandi babyeyi batishoboye, harimo n’abafite ubumuga, bafashirizwa kubona ubumenyi bw’ibanze mu gihe abo babyeyi babo na bo baba barimo kwiga imyuga yatuma bongera kwiyubaka.

Umuratwa agira ati "Twebwe twagize umugisha wo kugira ababyeyi bafite ubushobozi, ni bwo twatekereje icyo twakora maze tugurisha ‘gateau’ twashoboraga gukoresha mu birori, habonekamo amafaranga yo kugura ibi biribwa, imyambaro n’inkweto byo gufasha abana bavuka ku babyeyi batishoboye."

Umuratwa yirinze gutangaza agaciro k’iyi nkunga ariko ngo ibiro 80kg by’isukari hamwe n’ibiro 100kg by’ifu y’igikoma, imyambaro n’inkweto byakusanyijwe, ngo bizasindagiza abo bana mu gihe hazaba harimo gushakwa indi nkunga.

Umuratwa avuga ko iyi gahunda yo gufasha abana batishoboye itazahagarara, kandi ko akangurira urubyiruko bagenzi be bavuka ku babyeyi bishoboye hirya no hino mu Rwanda, kwiha iyo ntego.

Umuyobozi w’abanyeshuri bo muri Well Spring Academy mu bijyanye n’imyemerere (Homonier), Nshuti Rutagwera Elie, avuga ko bashingiye kuri Bibiliya, Matayo 20:28, havuga ko Umwana w’umuntu ataje gukorerwa, ahubwo yaje gukorera abandi.

Uwitwa Umuhoza Charlotte wabyaye afite imyaka 19 y’amavuko, uvuga ko adafite ubushobozi bwo gutunga abana be babiri yasigiwe n’Umunya-Uganda wabaye umwarimu i Gikondo akaza guta akazi, ku buryo uwo muryango we utazi aho aherereye.

Umuhoza utunzwe n’ibiraka byo kumesera abantu, avuga ko hari igihe we n’abana be babiri barimo ufite amezi arindwi y’ubukure, batabona icyo bafungura n’aho kurara, bigatuma barara ku gasozi iyo hatabonetse umugiraneza wo kubacumbikira.

Ndayishimiye Théogène ushinzwe Iterambere ry’Ubukungu(CEDO) mu Kagari ka Karugira, avuga ko hari abangavu babyariye iwabo bagikeneye gufashwa kubona ibibatunga, bitewe n’uko badafite icyo bakora, harimo n’ababashije kwihugura mu myuga yabatunga ariko batarabona imirimo.

Umukozi w’Umuryango Hope and Homes for Children ushinzwe ubuvugizi no gushakisha inkunga, Paradis Dukoshe, avuga ko kugeza ubu bafite abana barenga 400 mu bigo bya ECD hirya no hino mu Gihugu binahugura abangavu babyariye iwabo, bakaba bakeneye ubufasha butandukanye, cyane cyane abafite ubumuga.

Dukoshe agira ati "Abana bafite ubumuga hamwe n’aba babyawe n’abangavu baracyahura n’ihohoterwa ndetse n’akato, usanga umubyeyi akeneye aho asiga umwana kugira ngo ajye gushakisha ibitunga urugo. Ni yo mpamvu dushyiraho ibi bigo, ntabwo dufite inkunga ihagije, dukeneye abafatanyabikorwa."

Dukoshe avuga ko ahangayikishijwe n’umubare munini w’abangavu yumva baterwa inda buri mwaka badafite uwafabasha kurera abo bana, mu gihe inkunga z’amahanga zigenda zigabanuka, "bikaba ari ngombwa kwigira, bihereye mu rubyiruko rungana nk’abo muri Well Spring Academy."

Abayobozi b’inzego zifatanya na MINAGRI guteza imbere gahunda yo kuvugurura ubuhinzi (PSTA 5), biyemeje gukora ubuhinzi bubungabunga ubutaka

RICA, MINAGRI hamwe n’umuryango utari uwa Leta witwa ’Mennonite Central Committee’ ndetse n’Ishami ry’Umuryango w’Abibumbye rishinzwe Ibiribwa ku Isi (World Food Programme Rwanda WFP/PAM), bahurije hamwe abafatanyabikorwa mu nama y’Igihugu yiswe ’National Conservation Agriculture Symposium’.

Iyi nama yari ibaye ku nshuro ya mbere, yasuzumye ingamba zihamye kandi zirambye zo kwita ku butaka no kubusigasira, kugira ngo bugumane umwimerere wabwo ibihe byose.

Ni inama yakiriwe n’Ishuri RICA ku wa 28 Werurwe 2025, ikaba yarahurije hamwe inzobere n’impuguke mu by’ubuhinzi, inzego za Leta n’iz’Abikorera, abafatanyabikorwa mu iterambere, abahinzi babigize umwuga hamwe n’amashyirahamwe afite aho ahurira n’ubuhinzi.

Umuyobozi Mukuru Wungirije muri RICA, ushinzwe ubushakashatsi no kwagura ubuhinzi bubungabunga ubutaka, Dr Ndambe Nzaramba Magnifique, avuga ko kugira ngo ubutaka bw’u Rwanda bukomeze gutanga umusaruro, abantu bakwiye kwirinda kurima amasinde no kubuhindura intabire, ahubwo bagasabwa kubutwikiriza ibisigazwa by’imyaka nyuma yo gusarura, hamwe no gusimburanya ibihingwa.

Dr Nzaramba ati "Mu mahame y’ingenzi y’ubu buhinzi butangiza ubutaka, icya mbere ni ukutarimagura ubutaka kuko bibuteza umwuma (imyaka yateweho igahita yuma) ndetse n’intungabihingwa ziburimo zigapfa."

Baganirije abitabiriye iki gikorwa ku buhinzi butangiza uutaka

Ati "Iri hame rya mbere ryo kutarimagura ubutaka rikubiyemo gukoresha uburyo bwo kudahinga (no-till), cyangwa guhinga gake (minimum-till) mu gihe cyo gutera imbuto no kurwanya ibyatsi byangiza, bidasabye guhingagura umurima wose. Ibi bituma habaho kwiyongera kw’ibinyabuzima mu butaka kandi bukagumana umwimerere wabwo, bukabika amazi igihe kirekire, ndetse bikagabanya n’isuri."

Guhorana ubutaka butwikiriye

Ihame rya kabiri, nk’uko Dr Nzaramba akomeza abisobanura, ni ukugira ubutaka buhora butwikiriye. Ibi bikubiyemo gutera ibihingwa bitwikira ubutaka mu bihe bitandukanye by’ihinga, gusiga ibisigazwa by’imyaka mu murima nyuma yo gusarura, no gukoresha isaso (mulch) aho bishoboka.

Gutwikira ubutaka bigabanya isuri, intungabihingwa zikagumamo, ubutaka bukabika amazi ku buryo bifasha abahinzi guhangana n’amapfa.

Dr Nzaramba ati "Ugomba gutwikiriza ubutaka ibyasigaye mu mirima (ibishogoshogo cyangwa ibikenyeri) nyuma yo gusarura, wajya no gutera imbuto ukirinda kuyishyira kure cyane harenze santimetero (cm) 5 munsi y’ubutaka, kuko uba urimo kuyitsikamira uyibuza kumera."

Gusimburanya imyaka mu murima (crop rotation)

Ihame rya gatatu ni ugusimburanya ibihingwa mu bihe bitandukanye by’ihinga (crop/plant rotation) cyangwa kuvanga imyaka itandukanye mu murima umwe (intercropping).

Iyi mikorere ifasha kongera intungagihingwa mu butaka, kubugira bwiza, bikajyana no kongera umusaruro, bikanafasha gukumira kwiyongera kw’indwara n’ibyonnyi.

RICA hamwe na PAM/WFP bivuga ko bizafatanya na Leta y’u Rwanda kuvugurura ubuhinzi, hakagenderwa ku mahame yo kurinda ubutaka gukomereka no gutakaza umwimerere wabwo.

Dr Nzaramba avuga ko ubu buryo bushya bwo guhinga bumaze kugaragaza ko umusaruro wikuba inshuro zibarirwa hagati ya 5-6, iyo ubutaka butarimwe, bwatwikiriwe kandi hakoreshejwe imbuto nziza no kuburinda ifumbire n’imiti birenze urugero.

Ubuhinzi burinda abantu imvune no guhomba amafaranga yabo

Abahinzi, cyane cyane abagore birirwaga mu mirima, ntabwo bazongera gutakaza igihe kinini muri iyo mirimo, bikazabafasha kuzigama amafaranga n’umwanya bari gukoresha mu gutegura intabire.

Umuhinzi uhagarariye abandi mu Murenge wa Nasho mu Karere ka Kirehe, Gakuba Jonas, avuga ko ubutaka bwabo butagisharira, bitewe no gusimburanya imyaka hamwe no gusasira.

Gakuba agira ati "Impamvu nshimira ubu buhinzi bubungabunga ubutaka ni uko hari igishoro cyinshi bwagabanyije, nta kurima umurima uritura amasinde, kubagara na byo ntibikomeye kubera ko wa murima twawusasiye, nta byatsi bimeramo cyane."

Hegitare zirenga ibihumbi 100 muri 2029 zizaba zihingwaho neza

Abayobozi muri MINAGRI bavuga ko imihingire itangiza ubutaka, izafasha Leta y’u Rwanda kugera ku ntego za gahunda ya gatanu yo kuvugurura ubuhinzi, yiswe Strategic Plan for Agriculture Transformation(PSTA5) yatangiye muri 2024 kugera muri 2029.

Umunyamabanga Uhoraho muri Minisiteri y’Ubuhinzi n’Ubworozi, Dr Olivier Kamana

Umuyobozi Mukuru muri MINAGRI ushinzwe Ubuhinzi buvuguruye, Dr Patrick Karangwa, agira ati "Dufite intego yo kugera nibura kuri hegitare ibihumbi 100
(muri 2029) zihinzwe mu buryo bubungabunga ubutaka. Ubu aho tugeze ni kuri hegitare zigera nko kuri 1,100, turifuza kuzikuba inshuro zitari munsi ya 100."

Dr Karangwa avuga ko hafi 1/2 cy’utugari twose mu Rwanda hari uturima tw’icyitegererezo, abantu bazajya bareberaho ubuhinzi bubungabunga ubutaka, ndetse ko kugeza ubu abahinzi barenga ibihumbi 21 hirya no hino mu Gihugu, bamaze kwigishwa kuzatoza abandi ubwo buhinzi, nk’uko bisobanurwa n’Ikigo RAB.

Dr Karangwa ashima ko gukora ubuhinzi bubungabunga ubutaka birimo kurwanya isuri no kurinda ubutaka kumagara no gukayuka, aho buhorana ubuhehere kubera gutwikirwa, kandi bugatanga umusaruro kuko imyaka ihora isimburana n’indi mu mirima, isaso y’ibyatsi biyikomokaho na yo ikaba ifumbire.

Uruhare rw’abafatanyabikorwa

Umuhuzabikorwa wa gahunda zo kwihaza mu biribwa mu muryango Mennonite Central Committee(MCC), Thomas Habanabakize, avuga ko bashyize ingufu n’ubushobozi mu gushyigikira no guteza imbere ubuhinzi bubungabunga ubutaka.

Habanabakize avuga ko imirima shuri (Farm Field School) yashyizweho hirya no hino mu gihugu, aho buri murima uhuriza hamwe abahinzi 30 bagahabwa amahugurwa, nyuma bagakoresha ubwo bumenyi mu mirima yabo bwite, ari na ko buri wese atoza abaturanyi be nibura batanu.

Ati "Kuva mu myaka 10 ishize, ubu buryo bwatanze umusaruro mwiza, turimo gukorera mu turere icyenda turimo Nyaruguru, Nyamagabe, Karongi na Rutsiro, kandi turatekereza kwagura tukagera i Kayonza, Ruhango, Burera n’ahandi. Abahinzi benshi twakoranye babonye ko umusaruro wabo wiyongereye, bitewe no gukora ubuhinzi bubungabunga ubutaka."

Umuryango WFP hamwe n’abahinzi bakorana na wo, bavuga ko ubu buhinzi bumaze kugaragaza ko ari bwo bwonyine bwafasha abaturage guhangana n’ibiza no kuboneza umusaruro, ari yo mpamvu WFP yishyize hamwe n’abashinzwe kubuteza imbere.

Umukozi wa WFP Rwanda, Richard Makuza, avuga ko uretse ubutabazi batanze mu gihe cy’ibiza by’amapfa n’imyuzure, banafashije abahinzi bato barenga 127,000 bagize amakoperative 425 hirya no hino mu gihugu, kubona amasoko no gufata neza umusaruro bejeje".

WFP kandi, ishingiye ku ngaruka z’imihindagurikire y’ikirere, yakoranye na Leta muri gahunda zo kubaka ubushobozi bw’abahinzi bwo guhangana n’ibiza hamwe n’imihindagurikire y’ikirere, bituma bakomeza kubona umusaruro no mu gihe baba bahuye n’ibibazo.

Ibi byatumye WFP ibona ko gukora no gushishikariza abantu ubuhinzi bubungabunga ubutaka, ari yo nzira n’igisubizo byizewe.

Makuza ati "Ni yo mpamvu twakusanyije inkunga yo gushyigikira imishinga y’ubuhinzi bubungabunga ubutaka, tukaba twaratangiriye ku mishinga y’igerageza mu turere dutanu. Ubu twinjiye mu cyiciro gishya cyo gushyigikira gahunda zihuje n’intego za PSTA5."

Umuyobozi w’Ikigo cyigisha ubuhinzi bubungabunga ubutaka ’Center for No-Till Agriculture (CNTA) cyo muri Ghana, Dr Kofi Boa, agaragaza uburyo uturere tugwamo imvura nyinshi two mu musozi mirere y’u Rwanda twibasirwa n’isuri, igatwara ubutaka bwiza nyuma yo kubugira intabire.

Inyigo yakozwe muri Gicurasi 2022 n’Urwego rushinzwe Umutungo Kamere w’Amazi mu Rwanda, RWB, ku bufatanye n’Umuryango Mpuzamahanga wita ku kubungabunga Ibidukikije (IUCN), yagaragaje ko hegitari 1,080,168 z’ubutaka bw’u Rwanda (zingana na 45% by’ubuso bwose bw’ubutaka bw’Igihugu), ziri mu byago byo kwibasirwa n’isuri(ahanini bitewe n’imirimo y’ubuhinzi ibukorerwaho).

Umuyobozi wa WFP Rwanda, Andrea Bagnoli

Iyo nyigo ikavuga ko u Rwanda rutakaza toni Miliyoni 27 z’ubutaka burumbuka buri mwaka kubera isuri, ari na ko biteza imigezi, ibishanga n’ibiyaga kuzuramo isayo no kubangamira imirimo y’ubuhinzi mu bishanga, ndetse bigateza igihombo kirenga Miliyari 1,000 z’Amafaranga y’u Rwanda buri mwaka.

Mulanda Juma, Uhagarariye MCC mu Rwanda no mu Burundi

Laura Vandergriendt, ukuriye ibijyanye no gutera inkunga muri MCC Canada

Guhinga mu mirima isasiye ni kimwe mu buryo bwo guhangana n’imihindagurikire y’ibihe

Abakomisiyoneri basabwa gukora kinyamwuga birinda kubeshya ababagana

Uwitwa Mutesi Emelyne wari utuye ku Gisozi kugera mu kwezi kwa Mutarama 2025, ubu akaba yarimukiye i Gasanze mu Murenge wa Nduba, ni umwe mu bashinja abakomisiyoneri kudakoresha ukuri, iyo barangira abakiriya inzu n’ibibanza byo gukodesha cyangwa kugura.

Mutesi avuga ko yashatse inzu ikodeshwa amafaranga ibihumbi 130Frw muri uwo murenge akayibura, nyuma yo kumara iminsi ibiri azengurukana n’abakomisiyoneri, akaba ngo yarabishyuye amafaranga ibihumbi 23Frw yitwa aya ’circulation’ cyangwa ’visite’, ku nzu zose bamweretse mbere yo kugira iyo ashima.

Mutesi yagize ati "Umukomisiyoneri arakujyana akakwereka inzu ugasanga iyo yakubwiye ntabwo ari yo, iba ari mbi, agahita akubwira ati ’ngwino nkwereke indi hirya aha, akakuzengurukana, Kigali yose mukayimaza amaguru."

Umubyeyi wa Mutesi witwa Musabwayire Théodosie, na we akomeza agira ati "Umukomisiyoneri akubwira ko inzu agiye kuguha ari igitangaza, wagerayo ugasanga ni mbi, akakubwira ngo ’ni ibyumba bitatu’, wagerayo ugasanga ni bitatu koko, ariko biba ari utwumba duto cyane utashyiramo n’igitanda, twebwe icyo dukeneye ni uko baba abanyakuri."

Uwitwa Nshimiyimana Eric wiyemeje gukora ubukomisiyoneri mu buryo bwa kinyamwuga, avuga ko yatangiye kubikangurira abandi, mu rwego rwo kwirinda kwakira indonke mu gihe baba bataratanga serivisi ku bakiriya babo.

Nshimiyimana washinze Ikigo cyitwa Gia Property Talk, agira ati "Twebwe twagiye gukora uyu mwuga tubanje kubyiga, ntabwo twabyutse mu gitondo ngo tuvuge ngo tubaye aba ’brokers (abakomisiyoneri)’. Twabonye seritifika zabyo dutangira no kujya dufasha abandi tubereka ingaruka ziri mu kwakira indonke, utaratanga serivisi umukiriya akeneye."

Nshimiyimana avuga ko umukomisiyoneri wahawe amafaranga n’abasuye igicuruzwa bashaka kugura cyangwa gukodesha (nk’inzu, imodoka n’ibindi), ariko batabonye iyo serivisi, aba atakaje abakiriya bose bashamikiye kuri abo batabonye ibyo bakeneye.

Nshimiyimana afite icyemezo (seritifika) cy’Urugaga RWAREB, ndetse akaba yarabanje kwiga mu kigo gitoza abantu kuba abakomisiyoneri b’umwuga, cyitwa ’Kigali Institute of Professional Brokers (KIPB).

Umuyobozi wa KIPB, Jonas Bugingo, avuga ko umukomisiyoneri w’umwuga agomba kuba afite ikarita imuranga na nimero yahawe n’urugaga RWAREB, nyuma yo kumara kwiga amasomo amara amezi atatu, harimo amategeko agenga umutungo ugurwa cyangwa ukodeshwa, hamwe no kwitoza kubwiza abantu ukuri.

Bugingo agira ati "Umuntu wakurangiye wese ntabwo ari umukomisiyoneri, umukomisiyoneri w’umwuga agomba kuba yarandikishije ubucuruzi bwe muri RDB, kandi afite icyemezo cya RWAREB. Bariya bitwa abakomisiyoneri bagakwiye kuba abakozi b’abakomisiyoneri ariko na bo bagomba kuba barabyize kandi bafite ibigo babarizwamo, kuko ubukomisiyoneri ni umwuga nk’indi."

Bugingo avuga ko umukomisiyoneri w’umwuga arangira umuntu inzu (cyangwa undi mutungo) yamaze kuyibonaho amakuru ahagije, ku buryo atirirwa asaba umukiriya amafaranga ya ’circulation’ na ’visite’.

biro Urugaga rw’Abahuza rukoreramo ku Kicukiro

Ku bijyanye n’ibiciro byakwa n’abakomisiyoneri b’umwuga, ku mutungo ukodeshwa cyangwa ugurwa amafaranga atarenze ibihumbi 200Frw, umukiriya ngo yishyura 10% by’icyo kiguzi, ariko waba urengeje ibihumbi 200Frw, ayo kwishyura umukomisiyoneri akagenda agabanuka kugera kuri 1.5% by’ikiguzi cy’uwo mutungo.

Bugingo akavuga ko umuntu wakodesheje inzu y’amafaranga ibihumbi 130 ku kwezi atagomba kurenza ibihumbi 13Frw(10%) by’umukomisiyoneri, kandi ngo abo bakomisiyoneri b’umwuga barahari hose mu Rwanda.

Hari amavomero hirya no hino mu gihugu adaheruka amazi

Mu binubira kutagerwaho n’amazi hari abaturage b’i Ruhanga mu Murenge wa Rusororo, mu Karere ka Gasabo, bavuga ko hashize umwaka batagira amazi meza n’ubwo bubakiwe ibigega n’imiyoboro.

Uwitwa Fulgence Karekezi utuye i Ruhanga yaganiriye na RBA, agira ati "Hashize umwaka tutabona amazi, agera ku rugo nka rumwe abandi bakayabura. Dufite ikigega ariko nta mazi ajyamo, iyo aje akomereza mu miyoboro akagera kuri bamwe."

Umubyeyi wari kumwe na Karekezi, na we yagaragaye kuri Televiziyo y’Igihugu, mu kiganiro ‘Waramutse Rwanda’, yerekana ko ku mavomo y’amazi abaturage bahawe hameze ibyatsi, nk’ikimenyetso cy’uko badaheruka kuyavomaho.

Mu bandi batagira amazi ariko bo harimo n’abatagira ibikorwa remezo byayo, hari abo mu mirenge ya Nduba na Jabana mu Karere ka Gasabo.

Umuyobozi Mukuru ushinzwe Amazi, Isuku n’Isukura muri Minisiteri y’Ibikorwa Remezo (MININFRA), Maniraruta Gemma, avuga ko kuba imiyoboro y’amazi hari aho ibasha kuyageza ku baturage iyo bayoherejemo (atari i Ruhanga gusa), ari amahirwe Leta igiye guheraho isaranganya ku baturage bose amazi make abasha kuboneka.

Maniraruta ati "Reka mbanze nihanganishe abaturage b’i Ruhanga, gusa kuba amazi abasha kuhagera gake gake ni icyerekana ko yahagera. Icyo nakubwira ni uko dufite amazi make(aturuka ku nganda ziyatunganya), hari n’atakakarira(ameneka) mu nzira, kuko muri litiro 100 z’amazi ava ku isoko ku baturage hagera litiro 60, izindi 40 ziba zatakariye mu ipfumuka ry’amatiyo n’ibindi."

Maniraruta avuga ko buri gace ko mu Rwanda abaturage batagombye kubura amazi ngo icyumweru cyose gishire, akaba asaba abamaze igihe kingana gutyo kujya bihutira kubivuga (babaza WASAC), kandi bagashaka ibikoresho byo kuyabika (amajerikani menshi) mu gihe bayabonye.

Yungamo ko uretse kuba bagiye kwihutira gusaranganya amazi, hari n’imishinga mishya irimo gukorwa igiye kugeza amazi meza aho atari cyangwa aho bafite make, harimo uwa Karenge uzayageza ku batuye i Rwamagana na Gasabo (by’umwihariko i Ruhanga no mu bice bihakijije).

Maniraruta avuga ko abaturage b’i Jabana na Nduba(Gasanze), na bo barimo kubakirwa ku Gisozi muri Ntora ibigega bibaha amazi, umushinga Leta y’u Rwanda ifatanyijemo n’Ikigo cy’Abayapani gishinzwe Iterambere (JICA).

Umuryango mpuzamahanga ufatanya na Leta gukwirakwiza amazi, isuku n’isukura, WaterAid, urasaba ubufatanye bw’inzego zitandukanye kugira ngo ibice bitarimo amazi mu Rwanda bibashe kuyabona byihuse.

Umuyobozi wa WaterAid mu Rwanda, Vestine Mukeshimana, asaba ko ikibazo cyo kutagira amazi mu baturage gikwiye gufatwa nk’ibyihutirwa cyane, aho yunga mu busabe bw’Umuryango w’Abibumbye, uvuga ko amazi n’ubwiherero ari uburenganzira bw’ibanze bwa muntu.

Mukeshimana agira ati "Turahamagarira Leta n’abandi bose bafatanya na yo kumva uburemere bw’iki kintu, kubera ko kubura amazi ntabwo bigarukira kuri uriya muntu gusa, ahubwo harimo igihombo gishobora kwirindwa, kubera ko wa muturage utabonye amazi araza kurwara, hari amafaranga yari gukorera iyo aza kuba atarwaye, hari umwana wasibye ishuri..."

Mukeshimana avuga ko kugira ibikorwa remezo by’amazi ariko bitayatanga nta cyo byaba bimaze, agasaba Leta ingengo y’imari ihagije yo kwihutira kugeza amazi meza ku baturage, hadategerejwe umwaka cyangwa imyaka.

Ibarura rusange rya gatanu ry’abaturage n’ingo ryakozwe muri 2022, rivuga ko 82% by’ingo mu Rwanda zegerejwe amazi meza byibura kuri metero zitarenga 500, aho mu mijyi bari ku rugero rwa 96% mu gihe mu cyaro bari kuri 77%.

MININFRA na WaterAid bivuga kandi ko birimo gukorana n’inzego zose zibishinzwe, kugira ngo ibyogogo n’amasoko y’amazi mu Rwanda bibungabungwe, ndetse ko imigezi, ibiyaga n’ibishanga na byo bigomba kutamenwamo ibishingwe cyane cyane ibisigazwa by’ibikoresho by’ikoranabuhanga.

· Umujyi wa Kigali uvuga ko imiryango hafi 3,000 yimuwe mu manegeka nta ngurane ihawe itazubakirwa, kuko ngo ubutaka bukiri ubwabo

· Leta ivuga ko kwimura abantu igitaraganya nta ngurane bahawe, kwari ugukiza ubuzima bwabo.

Imvo n’imvano yo kwimurwa mu manegeka

Kwinuba ko nta ngurane bahawe byatangiye kuva mu mwaka wa 2019 ubwo himurwaga abari batuye mu bishanga by’i Kigali kugira ngo bibe ibyanya b’ubukerarugendo.

Hari bamwe baje kubakirwa mu midugudu y’i Karama na Kanyinya muri Nyarugenge, Gikomero na Rutunga mu karere ka Gasabo ndetse n’i Busanza muri Kicukiro, abandi baratatanye.

Mu kwezi kwa Gicurasi k’umwaka wa 2023 ubwo abaturage barenga 135 bahitanwaga n’ibiza mu Ntara z’Iburengerazuba, Amajyepfo n’Amajyaruguru, ngo habonetse impamvu ihesha abashoramari ubutaka bw’ubuntu, nk’uko bisobanurwa na Jean Bosco Nizeyimana (si ryo zina rye nyakuri) wari utuye mu Gatsata.

Urugero Nizeyimana arutanga ku basenyewe mu kagari ka Nyamabuye, Umurenge wa Gatsata, mu Karere ka Gasabo, ahari Koperative yitwa Icyerekezo ikorerwamo n’amagaraje.

Nizeyimana avuga ko iyi koperative igizwe n’abahoze bakorera mu gishanga cya Nyabugogo, nyuma yo kwimukira haruguru y’umuhanda, ubutaka ngo bwatangiye kuyibana buto, ku buryo “abayihagarariye ariko utapfa kumenya aho bavuye, bazaga bakakubaza amafaranga ushaka kugira ngo bakwishyure, wababwira bagahita bigendera nta kindi bavuze.”

Uwitwaga Martine Mukanyangezi (witabye Imana) yabasabaga miliyoni 200Frw bo bakamubwira ko bazamuha miliyoni 120Frw, mu gihe umuturanyi we witwa Perpetue bamubwiraga ko bazamuha miliyoni 150Frw nk’ingurane ku mitungo ye.

Nizeyimana agira ati “Habonetse impamvu yo kuhatwarira ubuntu nyuma y’uko urukuta rugwiriye abantu mu Gatsata nk’uko byari byagenze ku Gisozi, iriya Koperative irashaka aho yagurira ibikorwa byayo, ahandi ikahashyira ubusitani n’amashyamba bikikije kiriya gishanga cyabo, urabona ko barimo kukigira pariki.”

Ati “Bihutiye gusenya aho bakeneye kuko urabona hariya iwacu ni mu mafaranga, iyo baza kuba bimura abaturage kubera ibiza bari guhera hirya yaho muri Rubonobono hadahanamiye igishanga cyabo, kuko hari ubuhaname burenga 90% mu gihe hariya iwacu ubuhaname bwaho ari nka 30% (nawe ijisho rirabikwereka).”

Nizeyimana avuga ko abo bashoramari bakoresheje inzego z’ibanze mu gusenyera abaturage, ubutaka bwabo ubu bakaba bamaze kubushyiramo ubusitani n’amashyamba.

Ubwo yimuraga abaturage mu kwezi kwa Gicurasi 2023, uwari Umunyamabanga nshingwabikorwa w’Umurenge wa Gisozi mu karere ka Gasabo, hari abo yabwiraga ko atazabitangira (ngo bamwirukane ku kazi) kuko atari Yesu.

Uwo muyobozi w’Umurenge yatunguye bamwe mu baturage begereye akabande ko mu Mudugudu witwa Byimana, Akagari ka Musezero, abamenyesha ko bitarenze amasaha 48 bagomba kuba bavuye aho batuye, kuko inzu zabo zigiye gusenywa.

Ku munsi wakurikiyeho uwo Gitifu yazanye n’abandi bakozi b’umurenge baha abo baturage amafaranga, ba nyiri inzu bagahabwa imperekeza y’ibihumbi 90Frw, abapangayi bagahabwa ibihumbi 30Frw kuri buri rugo.

Ku munsi wakurikiyeho inzu zimwe na zimwe zegereye ako kabande zahise zishyirwa hasi, ku buryo uwatindaga gusohoka bahitaga bayimusenyeraho.

Ibibanza izo ngo zari zituyeho bifite ibyangombwa bigaragaza ku gishushanyombonera cy’Umujyi wa Kigali (Master Plan), ko ari ubutaka bwagenewe imiturire(residential), ariko mu kwisobanura, abayobozi bavugaga ko inzu ari zo zidakomeye, n’ubwo hasenywe zimwe izindi zigasigara, kandi ziri muri zone imwe y’imiturire.

Nyuma yaho gahunda yo kwimura abantu mu manegeka yatangiye gukurikizwa mu bice bitandukanye by’Umujyi wa Kigali kuri bamwe mu batuye ahegereye ibishanga n’imibande, ndetse no mu duce tumwe na tumwe two ku micyamo y’imisozi ihanamiye ibyo bishanga.

Jeannette Mukashyaka w’imyaka 37 y’amavuko, yumvise abayobozi bamubwira ko inzu ze zigiye gusenywa ajyana abana be 4 mu nshuti ze kubacumbikisha kure yaho, kugira ngo ibyo bidakorwa babireba.

Ba bana baragarutse basanga iwabo habaye amatongo, ibikoresho byo mu nzu bimaze iminsi ibiri ku gasozi, inzu yo gucumbikamo yarabuze, bamwe baraturika bararira.

Icyo gihe Ubuyobozi bw’imirenge bwababwiraga ko buzahita bububakira inzu zigezweho mu bibanza bahoze batuyemo, ndetse ko buzabakodeshereza kugeza ubwo bazabona aho kuba, ariko baheruka ayo bahawe bakigenda.

Nyamara abaterankunga barimo Banki y’isi, Nordic Development Fund, Climate Investment Fund na Global Environmental Facility, bari batanze amafaranga arenga miliyoni 170 z’Amadolari ya Amerika (ni miliyari 238 z’Amafaranga y’u Rwanda), kugira ngo ibishanga by’i Kigali bigarurwemo urusobe rw’ibinyabuzima, ari na ko bibyazwa amafaranga y’ubukerarugendo (Eco-Parks).

Abaturage bo iyo bimurwaga “ahashyira ubuzima bwabo mu kaga” bahabwaga imperekeza yitwa inticantikize, nk’uko biri muri raporo ya Minisiteri ishinzwe Ubutabazi MINEMA yo kwimura abantu mu Gihugu hose mu gihe cy’imvura y’umuhindo wa 2024, yagaragazaga ko himuwe ingo 3,875 zahawe imperekeza y’Amafaranga 140,578,000Frw (ahwanye na 36,278Frw kuri buri rugo).

INGARUKA ZO KUDAHABWA IMPEREKEZA

Abana bataye iwabo

Rutaganira Tharcisse w’imyaka 72 y’amavuko, avuga ko mu bana be bane yabanaga na bo mu rugo, babiri bigaga amashuri abanza bataye iwabo, akaba atazi aho baherereye nyuma yo gusenyerwa inzu yabagamo mu Byimana ku Gisozi hamwe n’izindi 14 ngo zakodeshwaga amafaranga arenga ibihumbi 250Frw ku kwezi.

Rutaganira n’umufasha we batunzwe no kugurisha udutebe(duto) na twa etajeri bakora mu mbaho barangura mu Gakiriro ka Gisozi ku mafaranga ibihumbi bitanu, aho ngo bungukamo amafaranga atarenga ibihumbi bibiri ku munsi.

Bavuga ko iyo nyungu ari yo bavanamo ifunguro ry’uwo munsi hamwe n’ayo kwishyura inzu imeze nk’iyenda kubagwira (kuko inkuta zasadutse), ifite icyumba kimwe na ‘salon’, yubatswe mu kabande hafi ya ruhurura.

Rutaganira avuga ko atarasenyerwa yaryaga nibura kabiri ku munsi kandi agafungura ibyo ashaka, ariko kuri ubu ngo umwuma wo kunywa amazi yonyine arenza ku ifunguro ritujuje intungamubiri, ngo bigiye gutuma asezera kuri iyi si.

Rutaganira yagize ati “Uravuga ibyo kurya, ntabyo mperuka! Reba umugore wanjye yari afite ibiro birenga 60 ariko ntabwo ubu yapima ibirenga 30, ni inzara.”

Rutaganira avuga ko mu minsi ishize uburwayi bwari bumwishe habura gato, iyo batajya mu ishyamba kumwahirira ibyatsi, kuko ngo kwa muganga ahaheruka bakibona amafaranga yo kwishyura ubwisungane mu kwivuza (mituelle de santé).

Kurara ubusa, kurwara ihungabana(trauma)

Ku wa Kane tariki 23 Mutarama 2025, uwitwa Bimenyimana Yves w’imyaka 48 y’amavuko, yatashye saa mbiri z’umugoroba avuye mu kazi k’ubwubatsi (aho akora ubuyede) asanga abana be barimo kotsa ibigori basoromye mu itongo ry’iwabo, iyo hataboneka umugiraneza, buri wese muri abo bana yari kurarira ikigori kimwe kimwe cy’umubeya (kitarakomera).

Bimenyimana atuye mu Mudugudu wa Rukeri, Akagari ka Ruhango, Umurenge wa Gisozi mu Karere ka Gasabo (Umujyi wa Kigali), hafi y’aho bamusenyeye inzu yabagamo hamwe n’izindi umunani zakodeshwaga amafaranga arenga ibihumbi 200Frw ku kwezi, ndetse na butiki umugore yacururizagamo.

Umubyeyi w’abo bana we yari yagiye gusura abavandimwe ku buryo byashobokaga ko ataha bamugaburiye, ikibazo cyari gisigaranye umugabo we wagiye mu kazi agasanga imbabura abana bokerejeho ibigori yazimye.

Bimenyimana yaje avuga ko nta mahaho y’uwo munsi atahanye kubera ko batigeze babahemba, bakaba basabwe gutegereza nyuma y’iminsi ibiri.

Bimenyimana yamaze kumva umunyamakuru umubaza ibijyanye n’imibereho ye nyuma yo gusenyerwa, ahita afatwa n’isereri yicara hasi ntiyongera kugira icyo avuga.

Uwase Kevine w’imyaka 15 y’amavuko, akaba ari we mukuru mu bana batandatu ba Bimenyimana, avuga ko atari ubwa mbere bari bagiye kurara batariye, kuko ngo akenshi se ataha nta kintu afite, hari ubwo aba yabuze abamuha akazi.

Umuyobozi w’Umujyi wa Kigali, Samuel Dusengiyumva, ubwo yari amaze gutorerwa kuyobora Umuryango FPR-Inkotanyi ku rwego rw’Umujyi mu gihe cy’imyaka itanu iri imbere, mu matora yabaye ku cyumweru tariki 09 Gashyantare 2025, yavuze ko azarwanya ihungabana mu baturage, kandi bakaba bagomba guhabwa ijambo mu bibakorerwa.

Dusengiyumva yaganiriye n’abanyamakuru agira ati "Tuzagenda tugabanya ibijyanye n’ubwigunge ndetse n’ihungabana kuko ubona ko na ryo rigenda riba ryinshi, ariko kandi abaturage bazagira uruhare mu gufata ibyemezo aho ibitekerezo byabo bigera mu nzego z’ibanze, ku buryo ari byo dushingiraho dukora akazi."

Guta ishuri kw’abana

Mu basenyewe ku Gisozi na none hari uwitwa Kayitesi Solange, umupfakazi wasigiwe abana babiri b’abahungu mu mwaka wa 2017.

Kayitesi, ubwo yasenyerwaga ku itariki ya 16 Gicurasi 2023, byabaye ngombwa ko umwana we mukuru witwa Gihozo Didier w’imyaka 17 ava mu ishuri kugira ngo afashe nyina gushaka ibyatunga urugo.

Uwo muryango ubu ukodesha inzu y’icyumba kimwe na salon ku mafaranga 20,000Frw, mu nzu ishobora kuba yabagwira kuko itagira sima kandi imaze gusenywa n’ibiza kenshi mu gihe cy’imvura.

Gihozo avuga ko rimwe na rimwe ajya gusena imbaho mu Gakiriro ka Gisozi, ubundi akirirwa akora ibiraka byo gutegura amafunguro muri za resitora, nk’uko twamusanze arimo guhata ibirayi.

Umuyobozi w’Urwunge rw’Amashuri rwa Kariyeri ku Gisozi, Alexandre Hakuzimana, avuga ko ubwo imiryango isaga 700 yimurwaga mu kwezi kwa Nzeri 2023 mu mudugudu wa Kanyinya mu Kagari ka Ruhango, abana barenga 400 bigaga kuri icyo kigo batangiye gusiba ishuri.

Hakuzimana agira ati “Ababyeyi b’abo bana bagiye baza gusaba ibyangombwa byo kwimukira ahandi, hari n’abagiye bagenda batabisabye ariko nyuma aho bagiye kwiga bakabagarura, tugasabwa kubihanganira kubera ibura ry’ibikoresho bimwe na bimwe.”

Mu kiganiro yahaye Abasenateri ku wa Gatatu tariki 19 Gashyantare 2025, Minisitiri w’Uburezi, Joseph Nsengimana, yavuze ko ku rwego rw’Igihugu hari abana ibihumbi 140 bari mu gihe cyo kwiga mu mashuri abanza ariko batari mu ishuri, hakaba ngo haragiyeho gahunda yo kubasubiza mu ishuri.

Ubucuruzi bw’akajagari no kwicuruza

Dusubiye kuri Kayitesi Solange, Umubyeyi wa Gihozo, agira ati "Mu basenyewe, ubu ababyeyi bamwe, utazunguza avoka ku gataro arara ku muhanda ategereje abagabo. Rwose ababyeyi baricuruza ku buryo n’amafaranga 1,000Frw uyakira kugira ngo uramuke. Ese iyo bareka kutwubakira bakaduha n’igishoro byibuze!"

Mu bemera ko bicuruza harimo uwitwa Mukashema Speciose (si ryo zina rye nyakuri) w’imyaka 37, akaba afite abana 5 umugabo yamutanye nyuma yo gusenyerwa, n’ubwo ngo bari basanzwe batabanye neza.

Muri abo bana 5 umwe w’umukobwa wigaga muri GS Sainte Famille, yatsindiye kujya kwiga i Nyamasheke abura ubushobozi bwo kujyayo, akaba ngo yirirwa aryamye mu rugo ategereje abagabo bamusura kugira ngo bamuhe amafaranga, ariko na we hari ikiguzi agomba gutanga: Kuryamana na bo.

Mukashema yatangaga ubu buhamya yicaye hasi ku gasima ku ibaraza ry’aka butiki kari ku muhanda wo muri karitiye, acuruza imyembe ku mifungo, ku gafuka yashashe hasi imbere ye, buri mufungo w’imyembe itatu awugurisha amafaranga 100Frw.

Mukashema yagize ati “Umukobwa wanjye uri mu rugo ntabwo aratwita, Imana iracyamurinze ariko bishobora no kuba kubera ubuzima bubi, umuntu arabiteganya ko byabaho. “

Ati “Maze nanjye mukuru abantu baranshuka, kuko reba iyi myembe nta na 1,000Frw yagurwa, ni ukwirirwa nicaye ku muhanda, ntabwo umuntu yampa amafaranga ngo nanirwe kumuha ibyo ashaka (kuryamana na we).”

Hakurya yo ku Gisozi mu Gatsata, ku mucyamo w’umusozi wa Jali, igice kinini cyakuwemo abaturage kuva mu kwezi kwa Nzeri k’umwaka wa 2023, barimo umukecuru Mukamazimpaka Anastasie w’imyaka 64, akaba yari atuye mu Mudugudu wa Mpakabavu mu Kagari ka Nyamabuye.

Mukamazimpaka w’umupfakazi kuva mu 1994, ubu atuye mu Mudugudu witwa Hanika uri hepfo y’aho yasenyewe, akaba avuga ko yari afite inzu imuhesha amafaranga arenga ibihumbi 80 ku kwezi kandi adakodesha.

Ahimuwe abaturage hatewe ibiti

Mukamazimpaka watuye mu Gatsata kuva mu mwaka wa 1982, avuga ko ubu nta kindi afite yaheraho yongera kwiyubaka, ariko mu rwego rwo kwanga kwirirwa yigunze mu rugo, yirirwaga ku muhanda acuruza bombo ku nkoko(agataro gato).

Mukamazimpaka avuga ko mu bari abaturanyi be basenyewe hari abirirwa muri Gare ya Nyabugogo babunza ibicuruzwa ku gataro, ibikorwa Umujyi wa Kigali utemera bitewe n’uko ari ubucuruzi bw’akajagari buteza umutekano muke.

Ibi yabivugaga mu kwezi k’Ugushyingo kwa 2024, haruguru ye hari izindi ngo zirimo urwa Ngendahayo Jean w’imyaka 68 y’amavuko zarimo kwimurwa ikubagahu, nyuma y’uko uwari umuturanyi wabo yapfushije abana babiri bagwiriwe n’umukingo.

Abo baturage bavuga ko icyo gikuta cyaguye ku bantu bitewe n’uko cyari cyubatswe nabi kandi kitagira sima, kubera iyo mpamvu ngo ntabwo byagombaga kwitirirwa amanegeka no gutuma abantu basenyerwa igitaraganya badafite aho berekeza.

Ngendahayo ufite umugore n’abana batanu, bamwe biga muri Kaminuza abandi mu mashuri yisumbuye, avuga ko yajyaga abishyurira amashuri nta kibazo, ariko ngo bahise bahagarika kwiga nyuma yo gusenyerwa inzu babagamo hamwe n’iz’abapangayi zabaheshaga ibihumbi 160Frw ku kwezi, hakiyongeraho amafaranga bavanaga mu gucuruza amazi.

Gutakaza akazi no kugakora nabi kubera kwimukira kure

Mu basenyewe hari abagiye gutura kure y’akazi bakoraga, barimo Samuel Sibomana wavuye mu Gatsata akajya gukodesha hejuru ku musozi wa Jali, aho bamwe bo mu muryango we n’abaturanyi badafite imbaraga zo kumanuka no guterera umusozi baza gukorera muri Nyabugogo cyangwa bataha.

Sibonama avuga ko inzira banyuramo bataha nimugoroba ica mu ishyamba no mu matongo y’aho bahoze batuye, na yo ibateje ikibazo, ku buryo umuntu wibeshye ntatahane n’abandi ngo ahura n’abajura bakamwiba bakaba banamwica. Ibi bigatuma hari abatinya kuva i Jali baza gukorera muri Nyabugogo.

Hari abagiye bafashe imyenda muri banki

Uwitwa Muhire Erneste wari ufite inzu mu mudugudu wa Byimana, avuga ko afite ideni ry’Umurenge SACCO (Saving Coperative) wa Gisozi rirenga miliyoni 4Frw yari yarahawe atanze ingwate y’inzu bashenye.

Ubuyobozi bw’Umurenge SACCO mu Karere ka Gasabo buvuga ko abataragiye kwisobanura ku mpamvu batarimo kwishyura imyenda bahawe, ngo bamaze gushyirwa ku rutonde rwa ba bihemu mu ikoranabuhanga rishinzwe kugaruza abaheranye imyenda y’amabanki (CRB).

Umuyobozi w’Imirenge SACCO mu Karere ka Gasabo, Fulgence Nkeragutabara, avuga ko hari abasenyewe ku Gisozi bafite umwenda wa miliyoni 9Frw bagiye gusobanura ko iyo mpamvu yatumye batongera kubona ubwishyu neza, ku buryo ngo bahawe amahirwe yo kujya bishyura make make.

Nkeragutabara avuga ko Imirenge SACCO yo muri ako karere ikomeje ibarura ry’abantu ku giti cyabo hamwe n’amatsinda y’ibimina yananiwe kwishyura, bitewe no kuba barimuwe mu manegeka.

Uretse kuba bamwe baraheranye imyenda y’amabanki, hari n’abatarasubiye inyuma kureba imiterere y’imisoro bakwa ku butaka bwabo, nyamara ikigo cy’Imisoro n’Amahoro (Rwanda Revenue Authority) cyo kivuga ko gikomeje kubabarira.

Hirya no hino mu mirenge ya Gisozi, Gatsata, Nduba na Remera mu Karere ka Gasabo, Kigarama muri Kicukiro na Gitega muri Nyarugenge, abaturage basenyerwa badafite aho berekera bagiye bitabaza inzego zitandukanye ngo zibarenganure, ariko bikaba iby’ubusa.

Umujyi wa Kigali uvuga ko abimuwe bose kuva muri Gicurasi 2023 kugera tariki 10 Mutarama 2025 bamaze kuba imiryango 9,889 harimo 2,865 bari batuye mu nzu zabo, hamwe n’imiryango 7,024 yakodeshaga.

Amahame y’imiryango irengera impunzi n’abimukira kubera ibiza (OIM na FEMA)

Umuryango Mpuzamahanga urengera abimukira (International Organization for Migration IOM) hamwe n’Ikigo cya Leta zunze Ubumwe za Amerika gishinzwe Ubutabazi (Federal Emergency Management Agency FEMA), bivuga ko uburyo bwo kwimura abaturage batuye ahantu habateza ibyago bwifashisha amategeko, hashingiwe ku Isesengura ry’akaga bashobora kuhagirira kubera imiterere y’ako gace.

Inzego za leta (ibigo bishinzwe imiturire, abahanga mu by’imyubakire cyangwa inzego zishinzwe guhangana n’ibiza) babanza gukora inyigo y’aho hantu, nyuma hagasohoka itangazo rya Leta rigaragaza ako kace nk’ahantu hateje akaga.

Hashyirwaho amabwiriza adasanzwe cyangwa itegeko rigamije kurinda umutekano w’abo baturage, hakanarebwa ibijyanye n’uburenganzira ku mutungo wabo.

Nyuma habaho kubitangariza abaturage mu nama rusange n’ibiganiro ubuyobozi bukorana na bo kugira ngo hatangwe ibisobanuro ku mpamvu zo kwimurwa, uko bizakorwa n’icyo bazahabwa, n’uko Leta izatanga ubufasha mu by’amategeko hamwe n’ubujyanye no kwimurwa.

Hashingiwe ku mategeko ya buri gihugu, biba ngombwa ko abaturage bahabwa ingurane yaba iy’amafaranga, inzu nshya zo guturamo ahantu heza, hamwe n’aho bagomba kuba bacumbitse by’igihe gito.

Hari igihe abaturage barwanya iyi gahunda bavuga ko ingurane bahawe idahagije, bikabyara imanza cyangwa imyigaragambyo.

Icyo gihe Leta ishobora gukoresha amategeko yifashishije ibyemezo by’inkiko na Polisi, haba ari mu gihe cy’ibiza bikomeye cyane hakitabazwa n’izindi nzego z’umutekano, ba baturage bakimurwa ku ngufu, kandi za nzu zigasenywa kugira ngo hatagira abantu bongera guturamo.

Nyuma yaho Leta itanga ubufasha ku bimuwe, harimo amacumbi, imirimo yo kubafasha kwitunga aho bimukiye nk’uburyo bwo gutangira ubuzima bushya.

Inteko Ishinga Amategeko y’u Rwanda yaritabajwe

Mu Kwezi k’Ugushyingo 2024, Impuzamiryango iharanira Uburenganzira bwa Muntu, CLADHO, yatangaje ko imaze kwandikira Inteko Ishinga Amategeko n’Umujyi wa Kigali inshuro zirenga ebyiri kuva ku itariki 24 Gicurasi 2023, isaba ko kwimura abaturage ahari amanegeka byashingira ku iyubahirizwa ry’uburenganzira bwa Muntu.

CLADHO yasabaga ko hasuzumwa ingingo ya 13 y’Itegeko Nshinga ivuga ko Umuntu ari umunyagitinyiro n’indahungabanywa, Leta igomba kumwubaha, kumurinda no kumurengera.

Hari n’ingingo ya 18 ivuga ko umuryango ari wo shingiro kamere ry’imbaga y’Abanyarwanda, ndetse n’ingingo ya 34 ivuga ko umuntu afite uburenganzira ku mutungo bwite kandi uwo mutungo we ukaba utagomba kuvogerwa.

CLADHO ivuga ko izi ngingo hari aho zirengagijwe, kuko ngo abantu bimurwa mu buryo bw’ingufu kandi nta handi ho kujya bafite, abana bato bakaba bashobora kuhagirira ingaruka.

Umunyamabanga Nshingwabikorwa wa CLADHO, Dr Safari Emmanuel, akavuga ko kuba nta myiteguro yigeze ikorwa yo guteguza abantu kwimuka, bitera ihungabana kandi byatumaga abana bahagarika kwiga.

Dr Safari ati "Inteko yaratowe, Abadepite barimo barasura Igihugu cyose, turagira ngo bagere aho abantu bari kandi n’aho bataragera bahagere, bahe abantu uburenganzira bwabo."

Inteko yabikozeho iki?

Visi Perezida ushinzwe imiyoborere mu Nteko Ishinga Amategeko, Umutwe w’Abadepite, Musa Fazil Harelimana yasuye abaturage bimuwe mu manegeka ku Gisozi ku Cyumweru tariki ya 09 Gashyantare 2025, bamutura ibibazo byatewe no kwimurwa badahawe ingurane, abasezeranya ko azabaha igisubizo mu gihe kitarenze icyumweru kimwe uhereye uwo munsi.

Icyo gihe cyarageze Depite Harelimana asubiza umunyamakuru mu butumwa bugufi kuri telefone agira ati “Muraho neza, ku byerekeye kwimurwa kubera kwirinda ibyashyira mu kaga ubuzima birateganyijwe, kuko Leta ifite inshingano yo kurengera ubuzima.”

Ati “Igisubizo ni uko abatishoboye muri bo n’ubundi hakurikizwa uko abujuje ibisabwa baterwa inkunga n’inzego z’ibanze, atari uko bimuwe ahubwo kubera ko ari uko batishoboye. Ubuyobozi bw’akarere bwarabibasobanuriye igihe kirekire, umenya barashakaga kumva gusa ibinyuranye n’ibyo bari barasobanuriwe.”

Umujyi wa Kigali urabivugaho iki?

Ubuyobozi bw’Umujyi wa Kigali bwahisemo gutanga ibisubizo mu nyandiko, nyuma yo gusaba umunyamakuru kwandika na we ibyo yifuza kubaza. Dore ibibazo n’uko byasubijwe:

Umunyamakuru: Ese ko aba baturage bimuwe abayobozi b’imirenge babizeza ko bazakomeza kubishyurira ubukode kugeza ubwo bazubakirwa inzu nziza, kuki bitakomeje?

Umujyi wa Kigali: Imiryango yimuwe yahawe ubufasha bwo gukodesha buhwanye n’Ukwezi kumwe (Frw 30.000) ku mupangayi ndetse n’amezi atatu (Frw 90.000) kuri ba nyirinzu. Aya mafaranga abafasha kuva mu buzima bwo kuba wabuze aho uba ako kanya, ukisuganya ngo ushake ahandi, ukomeze kubaho.

Ntabwo abimuwe bagomba gukomeza gukoderesherezwa. Kubera iki?

Kubera ko n’ubwo baba bategereje ko Umujyi wa Kigali uza kubibutsa kwimuka ahashyira ubuzima mu kaga, ubundi ni bo baba bagomba kwibwiriza kuhimuka. Nta muntu ukwiriye gutura ahashyira ubuzima mu kaga abibona. Ikindi kandi, abahafite ubutaka bukomeza kuba ubwabo.

Ntabwo babwamburwa. Baba bashobora kubukoresha ibijyanye n’uko hameze, nko kuhatera ibiti, kuhubaka inzu zikomeye, n’ibindi byaba bihuje n’igishushanyo mbonera.

Umunyamakuru: Hari ingengo y’Imari bari barabateganyirije, yanganaga ite? Yararangiye yose?

Umujyi wa Kigali: Nta ngengo y’imari ntakuka tugira ijyanye no gufasha abantu bagize ibibazo byo kwimurwa ahashyira ubuzima mu kaga, kuko imibare nyayo iba itazwi.

Ahashyira ubuzima mu kaga harahinduka buri mwaka (ndetse na buri gihe cy’imvura).

Umunyamakuru: Abaturage bazubakirwa ryari? Hehe?

Umujyi wa Kigali: Nk’uko byavuzwe haruguru, ntabwo abimuwe ahashyira ubuzima mu kaga bubakirwa. Hubakirwa gusa abadafite ubushobozi bwo kwibonera aho baba.

➔ Abimuwe muri utwo duce ariko bakaba batari bahatuye, ahubwo barahakodeshaga, bahabwa amafaranga yo gukodesha y’ukwezi kumwe (Frw 30.000) atuma bava aho bakodeshaga hashyira ubuzima mu kaga bagatangira gushaka ahandi bajya gukodesha. Ubundi, kirazira, gukodesha ahashyira ubuzima mu kaga.

➔ Ba nyirinzu bafite izindi nzu, bajya gutura muri izo ziri ahadashyira ubuzima mu kaga. Abatazifite, batangira kubaho bakodesha.

➔ Abari ba nyirinzu badafite ubushobozi bwo gutangira kubaho bakodesha, kandi bigaragara rwose, ni bo bashakirwa uburyo bwo gutuzwa. Gusa, ubushobozi bwo kubatuza bose na bwo ntibuhita buboneka.

Ahagaragara mu ibara ry’umuhondo ni ahashenywe inzu

Muri gahunda isanzwe yo gufasha abatishoboye, Ubuyobozi bw’Umujyi burateganya gutuza imwe mu miryango yimuwe itishoboye. Uyu mwaka wa 2024 /2025 hemejwe Imiryango 104 yimuwe ahashoboraga gushyira ubuzima bwabo mu kaga (HRZ), izahabwa aho gutura.

Umunyamakuru: Ubutaka bwabo basabwa gukomeza kubusorera nyamara nta kintu bemerewe kubukoresha, amaherezo yabwo azaba ayahe? Ko bavuga ko nta bushobozi bakibona bwo kwibonera n’ifunguro, aho bazabona ay’imisoro ku bukode bw’ubutaka?

Umujyi wa Kigali: Nk’uko byavuzwe, aba bantu ubutaka bukomeza kuba ubwabo. Ni na yo mpamvu babusorera. Ufite ubukene butuma atabasha gukomeza gusorera ubutaka bwe, yandika asaba gusonerwa imisoro, akagaragaza impamvu.

Umunyamakuru: Minisitiri w’Intebe yavuze ko icyihutirwaga ari ugukiza ubuzima bw’abantu, hanyuma bakazashakirwa uburyo bwo gutura neza kandi bidatinze, ku buryo Umuyobozi wazabarangarana agomba guhita yegura, none hashize imyaka ibiri, ibi ntibizatuma abayobozi beguzwa? Ese ubundi ababibazwa ni bande?

Umujyi wa Kigali: Ibyo Minisitiri w’Intebe yasabye birakorwa. Abaturage bimurwa ahashobora gushyira ubuzima bwabo mu kaga mu buryo bwihuse, iyo bigaragaye ko byihutirwa bahita bahabwa amafaranga y’ubukode yasobanuwe, abafasha kwimukira mu bundi buzima.

Abatishoboye, inzego z’ibanze zibashyira mu bandi bagomba gukomeza gushakirwa ubufasha

Umunyamakuru: Ni uruhe rwego rubazwa ibijyanye n’imiturire y’amanegeka, rwatumye abaturage barinda gusenyerwa imitungo yabo, bigatuma amategeko yicwa?

Umujyi wa Kigali: Buri muturage wese arebwa no kudatura ahashyira ubuzima bwe n’ubw’abe mu kaga. Inzego za Leta n’Umujyi wa Kigali zikomeza gukora ubukangurambaga bwibutsa abantu kudatura ahashyira ubuzima mu kaga, kutahakodesha, no kutahubaka. Abaturage batumviye izi nama, iyo bibaye ngombwa, Umujyi wa Kigali ugena igihe cyo kubimura.

Umunyamakuru: Dore Itegeko Nshinga rivuga ko Umunyarwanda ari indahangarwa, umutungo w’umuntu ari ntavogerwa, umuryango ni wo shingiro ry’Igihugu (ugomba kubahwa no gusigasirwa),...none abana bamwe bavuye mu ishuri, imiryango yaratatanye, abari bafite amadeni muri banki babuze icyo bishyura...

Umujyi wa Kigali: Buri mwana wese afite uburenganzira bwo kwiga. Inzego z’ibanze zikomeza kugenzura ko nta bana bakurwa mu ishuri, cyane ko kwiga ari ubuntu.

Ababyeyi badafite ubushobozi bwo kubonera abana babo ibikoresho n’imyambaro by’ishuri, Umujyi wa Kigali urabibashakira. Gutura ahashyira ubuzima mu kaga ntibyakubashisha kwishyura ideni rya banki, ahubwo byatwara ubuzima bwawe cyangwa ubw’abawe.

Ni ingenzi ko Abanyarwanda tubyumva kimwe. Udafite amagara, n’imishinga y’iterambere ntiwayikora.

Umunyamakuru: Ese kuvuga ko aho bavuye ari mu manegeka byashingiye ku bihe bipimo?

Umujyi wa Kigali: Hashingiwe ku murongo watanzwe ndetse n’imyanzuro yafashwe mu nama zitandukanye z’Ubuyobozi bw’Umujyi wa Kigali, hakozwe ibi bikurikira:

Gukangurira abaturage binyuze mu biganiro mbwirwaruhame mu nteko z’abaturage, mu bitangazamakuru bitandukanye ko imiryango ituye ahantu hafite ubuhaname bukabije (buri hejuru ya 50%); ahantu hafite ubuhaname buri hagati ya 30% na 50% yarubatse bidakurikije amabwiriza ajyanye n’imiterere yahoo, mu mbago z’igishanga (buffer zone ya 20m) no hafi ya za ruhurura ziteje akaga muri metero 5, igomba kwimuka mu rwego rwo kurengera ubuzima bw’abaturage.

Umunyamakuru: Hari abo inzu zabo zitashenywe kandi bari abaturanyi b’abasenyewe (ndetse banatuye aho bigaragara ko ari mu manegeka arushijeho kuba mabi), bigaragara ko hari indi mpamvu yari ibyihishe inyuma). Ikijyanye n’abashakaga gushora imari muri ubwo butaka bw’abasenyewe kigeze he?

Umujyi wa Kigali: Birashoboka ko ushobora gukurirwaho inzu, iy’umuturanyi wawe yo igasigara, bitewe n’aho mutuye n’uburyo mutuye. Hari inzu ziba zitubatse kimwe, ariko hari na metero ziba ziri hagati y’inzu n’ikibazo gishyira ubuzima mu kaga. Urugero, Ruhurura. Uko byagenda kose, hari aho ahashyira ubuzima mu kaga haba hagarukira, kandi abasigara badakuriweho inzu baba basa n’abaturanyi b’abo zakuweho.

Umunyamakuru: Hari Abanya-Norvège bashakaga kubaka mu butaka bw’abasenyewe mu Byimana, Musezero, Gisozi, icyo gihe Gitifu w’Umurenge wa Gisozi yabwiye abaturage bari bimuwe ko bazatuzwa nk’uko abo kuri Mpazi bubakiwe. Byahereye he?

Umujyi wa Kigali: Iyo hari abashoramari bashaka kubaka ahantu runaka, baraza bakerekana umushinga wabo. Iyo uhuza n’igishushanyo mbonera, bahabwa uburenganzira bwo kubaka, hanyuma bakagura ubutaka bw’aho bagiye gushyira umushinga, cyangwa se bakanimura abahatuye iyo bahari.

Inkubiri yo kwimura abaturage nta ngurane ku mpamvu z’ibiza yabaye rusange muri Afurika muri 2019-2020

Imwe mu mijyi yo muri Afurika u Rwanda rwakurikije mu kudatanga ingurane ku bimuwe mu manegeka, ni iyo mu bihugu nka Mozambique, Senegal, Nigeria, Tanzania, Madagascar, Kenya n’ahandi, aho abaturage bimuwe ku gahato kubera ibiza nk’imyuzure, imiyaga, imyuka mibi cyangwa kuba ari ahantu hahanamye.

Ahitwa i Beira muri Mozambique hibasiwe n’inkubi y’umuyaga yiswe Idai muri 2019, ikaba yarateye imyuzure yatumye abantu barenga 100,000 bimurwa mu ngo zabo, Leta ikaba itaratanze ingurane ku bavuye mu byabo.

Hari abagerageje kugaruka mu gace kabo, ariko basanga Leta yaragafashe nk’ubutaka butagomba kongera guturwaho.

Na none kuva mu myaka ya 2012-2020, i Dakar muri Senegal hateye imyuzure mu turere twa Pikine na Guédiawaye, aho imvura nyinshi yashenye inzu z’abaturage mu duce dukikije uwo mujyi.

Leta yaje kumera nk’ikangutse muri 2020, itegeka ko bamwe mu batuye ahari hatuwe nabi bimurwa, ariko nta mafaranga cyangwa ubufasha bahawe, bituma bamwe bimukira mu bice bihendutse byo mu nkengero z’uwo mujyi bajya gukora akajagari gashya, abandi basigaye bakaba kugeza ubu badafite aho kuba.

Mu mwaka wa 2021 i Lagos muri Nigeria hibasiwe n’imyuzure mu gace ka Lekki na Bariga biturutse ku mvura nyinshi ndetse no kuzamuka kw’inyanja ya Atlantique yatumye Leta ishishikariza abantu kwimuka mu bice bimwe by’uwo mujyi.

Abaturage bo mu gace ka Lekki bavanywe mu byabo nta mperekeza bahawe, kandi amazi y’inyanja yakomeje gutwara ubutaka bwabo. Leta yabasabye kwimukira kure y’inkengero z’amazi, ariko ntiyabaha aho kuba hashya.

Hafi y’u Rwanda muri Tanzania, i Dar es Salaam, hateye imyuzure mu gace ka Jangwani mu mwaka wa 2020, na ho hakaba nta bufasha buhagije bwatanzwe, bituma benshi basigara nta ho gutura bagira abandi bimukira mu bindi bice by’umujyi bitazwi Leta ikaba itaramenya aho baherereye.

Minisitiri w’Intebe w’u Rwanda

Mu kiganiro Minisitiri w’Intebe, Dr Edouard Ngirente, yagiranye n’Itangazamakuru ku wa Gatanu tariki 6 Ukuboza 2024, yavuze ko ibyo kubanza guha umuturage amafaranga mbere yo kumwimura mu biza byaba ari byiza, ariko kubarekera aho bari kandi METEO-Rwanda yatanze umuburo, bivuze ko “Guverinoma yaba itita ku baturage.”

Dr Ngirente avuga ko nta buryo bwihutirwa Leta iba ifitiye abimurwa ahantu habateza ibyago, kuko bigira inzego binyuzwamo nko gutanga amasoko, ibigomba kugurwa, inyubako, n’ibindi ibikoresho, ku buryo utabwira umuntu ngo ’guma aho’ kandi ashobora gupfa hamwe n’umuryango we.’

Igishanga cya Nyabugogo, hakurya ni ku Gisozi ahimuwe abaturage

Imibare y’abimuwe

Abanyeshuri bo muri ES Kanombe EFOTEC, ni bamwe batangiye gutegurwa kwitabira PISA

Isuzumabumenyi rya PISA (Program for International Student Assessment), risanzwe ritegurwa buri myaka 3 kuva muri 2000, rikaba rikorwa n’Umuryango mpuzamahanga witwa OECD, uvugurura politiki z’Ubukungu n’Imibereho y’abaturage.

U Rwanda rumaze imyaka 3 rwitegura iri rushanwa, akaba ari ku nshuro ya mbere ruzaba rurikoresheje mu kwezi kwa Mata k’uyu mwaka wa 2025, mu mashuri 213, rikazitabirwa n’abanyeshuri 35 muri buri shuri, bahwanye na 7,455 hose mu Gihugu.

Umuyobozi Mukuru wa NESA, Dr Bernard Bahati, agira ati "Iri suzuma rireba abantu bake, rikaba riri mu buryo bw’ubushakashatsi kugira ngo turebe ngo ’ni gute uburezi bw’u Rwanda buteye ubugereranyije n’ahandi ku Isi, kuko ejobundi ushobora kurangiza amasomo yawe ukajya mu mahanga."

Ati "Iri suzumabumenyi rireba uko umunyeshuri ugeze ku myaka 15-16 ashobora gukoresha imibare, siyansi n’indimi(Icyongereza) yize mu gukemura ibibazo by’ubuzima busanzwe. Bitandukanye n’ibyo mwarimu we asanzwe amubaza amusaba gusobanura."

Dr Bahati avuga ko impamvu ikizamini cya PISA kibazwa umwangavu cyangwa ingimbi y’imyaka 15-16 y’amavuko, biterwa n’uko kuri icyo kigero ari bwo umuntu aba atangiye guhitamo kujya mu buzima busanzwe bwo hanze y’ishuri, cyangwa gukomeza kwiga, nyuma yo kurangiza uburezi bw’ibanze bw’imyaka nibura icyenda ku ntebe y’ishuri.

Ni ikizamini kireba niba umunyeshuri ugiye mu buzima busanzwe azashobora kwibeshaho, cyangwa se yaba ahisemo gukomeza kwiga, akamenya ibyo yakwiga bijyanye n’ubushobozi bwe.

Urugero Dr Bahati yatanze, ni urw’ifoto y’umuntu yashyizwe ku mupira bambara cyangwa ku rupapuro, aho ishobora gusohoka mu icapiro imeze nk’iyo mu ndorerwamo. Umuntu wireberamo, ugutwi kwe kw’iburyo kuboneka mu ndorerwamo ari ukw’ibumoso.

Dr Bahati yatanze umukoro ku biga mu Ishuri ryisumbuye ry’i Kanombe ryitwa EFOTEC, abasaba guhitamo igisubizo nyacyo mu mashusho atandukanye mu gihe baba barimo kuyarebera mu ndorerwamo.

Umunyeshuri muri EFOTEC witwa Ingabe Petia Jordine w’imyaka 16, akaba yiga mu mwaka wa Gatatu w’amashuri yisumbuye, avuga ko imibare yize arimo kuyikoresha azigama amafaranga asaguka iyo iwabo bamutumye kugura ibintu ku isoko, kugira ngo azabone igishoro ubwo azaba arangije kwiga.

Ingabe ati "Mu rugo bashobora kuntuma karoti ku isoko, nkaba nzi ko ikilo kimwe cyazo kigurwa amafaranga 300, ni urugero, nzajya aho kigurwa make kuri ayo kugira ngo nzajye kurangiza kwiga nanjye mfite iduka ryanjye(butike)."

Abanyeshuri baganirijwe kuri PISA

Umuyobozi wa EFOTEC, Monica Tumukunde, asaba abanyeshuri bo muri icyo kigo bazakora ikizamini cya PISA, kutareba inyuguti gusa mu byo biga, ahubwo umuntu ugiye kugira icyo akora agomba kubanza gutekereza no kwita ku byo abona.

Isuzuma rya PISA rizitabirwa n’ibihugu 91 byo ku migabane yose igize Isi, harimo bitanu byo muri Afurika, ari byo Kenya, Maroc, Zambia, Egypt n’u Rwanda.

Amarushanwa amaze gukorwa inshuro umunani kuva mu mwaka wa 2000, abanyeshuri bo muri Singapore ni bo bamaze kuyatsinda ari benshi kurusha ibindi bihugu, bikazatuma gahunda nyinshi z’uburezi ku Isi zifatira urugero ku myigishirize yo muri icyo gihugu.

Umuyobozi Mukuru wa NESA, avuga ko n’ubwo nta gihembo giteganyijwe ku bazakora isuzuma rya PISA, bagomba kwishimira ko bazaba bahesheje ishema Igihugu cyabo.

NESA ivuga ko imyitozo abanyeshuri bazakora PISA barimo ntaho ihuriye na gahunda isanzwe y’imyigishirize mu Rwanda, ndetse ko iryo suzumabumenyi nta cyo rizahungabanya kuri iyo gahunda.

Perezida Kagame yasabye Abanyarwanda kurwanya abashaka kubasubiza muri Jenoside

Perezida Kagame yabitangarije imbere y’Abanyarwanda barenga ibihumbi 8 bahagarariye abandi, cyane cyane abatuye mu Mujyi wa Kigali, mu rwego rwo kubashimira kuba baramugiriye icyizere bakongera kumutora mu mwaka ushize wa 2024.

Umukuru w’Igihugu avuga ko amahanga akomeje gushinja u Rwanda uruhare mu ntambara ibera muri Congo, akaba yaratangiye kurufatira ibihano yirengagije uruhare rw’abasize bakoze Jenoside mu Rwanda, ndetse ko yemera uburenganzira bwabo ntahe agaciro ibisobanuro by’u Rwanda.

Avuga ko intambara yatangiye muri Congo muri 2022 ntaho u Rwanda ruhuriye na yo, ko atari rwo rwayitangiye ahubwo ngo ifite inkomoko igenda ikagera ku mateka yo guca imipaka nabi, aho abavuga Ikinyarwanda bamwe bisanze bari i Masisi muri Congo, abandi i Kisoro muri Uganda.

Perezida Kagame akavuga ko abashaka kwirukana abo bantu muri Congo bagombye no kubaha ubutaka bwabo batuyeho, kuko ngo biri mu burenganzira bwabo, "iyo utabubahaye baraburwanira."

Perezida Kagame ababazwa n’uko ’interahamwe’ zasize zikoze Jenoside mu Rwanda zongeye guhabwa imbaraga, ndetse amahanga akaba arimo kuziha uburenganzira bwo guhungabanya umutekano w’u Rwanda.

Ati "Hari izo(interahamwe) ubushize twahawe n’abarwana muri Congo, abo bantu bishe abantu hano. Uwo mwumva witwa Gakwerere yishe abantu, yishe abavandimwe, ariko si we gusa, hari n’abandi baguye ku rugamba, ariko iyo ubavuze barakubwira ngo ’abo ni bangahe?’ Gakwerere wamubaramo abantu benshi, kuko ni ingengabitekerezo yo kwicana."

Perezida Kagame yakomeje avuga ko izo ’nterahamwe’ ari zo zishe abantu muri Goma n’ahandi ku manywa y’ihangu, ariko abaziburanira bakavuga ngo ’bemera uburenganzira bwa muntu (human rights)’ bwa bamwe, bagera ku bavuga Ikinyarwanda n’Abanyarwanda ngo ’bakwiriye gupfa’.

Ati "Ukabona ko wanshyira muri abo ngabo nkabyemera! Washyira abantu mu bagomba gupfa bagategereza ko uza kubica! Byose ko ari ugupfa se nanone! Napfa ndwana na we, ntabwo wansanga ndi aho gusa ngo ntegereje ko uza kunyica, ndakwica nanjye ahubwo!"

Perezida Kagame avuga ko atari mu bemera inyigisho (za Yesu muri Bibiliya) zivuga ngo "Nibagukubita umusaya umwe uhindukize ubahe n’undi’, ushaka kukwica ni byiza ko wamurwanya nawe."

Urugamba rwo kwizirika umukanda

Umukuru w’Igihugu asaba Abanyarwanda kwitegura kurwana urugamba rwo kwiteza imbere bizirika umukanda, haba mu gukomeza kubaka ibikorwa remezo, guteza imbere uburezi, ubuhinzi n’ubworozi, gufasha abatishoboye ndetse n’imibanire n’ibindi bihugu.

Perezida Kagame ati "Biraza kutuvuna, biradusaba icyo bita mu Giswayire ’kufunga mukanda’, ni ukwitegura inzara kugira ngo ipantaro wambaye itagwa kubera ko washonje."

Perezida Kagame avuga ko amateka y’Abanyarwanda agoye ku buryo abitwa inshuti(partners), batangisha ukuboko kumwe bakambura bakoresheje ukundi, "ugasanga ntupfuye cyangwa ngo ukire, aho baba bifuza kuguhorana batyo, ariko ubemereye ukarangara ho gato no gupfa ntacyo bibabatwaye."

Umukuru w’Igihugu avuga ko ubushake butagomba kubura bwo kuziba icyuho cy’ibihano amahanga arimo gufatira Igihugu, binyuze mu gukora cyane no kwirinda uburangare.

Ishyirahamwe ry’Ibigo by’Imari mu Rwanda (AMIR) hamwe n’Ikigo cyorohereza abantu kubona serivisi z’Imari (Access to Finance Rwanda/AFR), ni byo bizayobora ikigega MLF, ku bufatanye n’inzego zirimo Minisiteri y’Imari n’Igenamigambi (MINECOFIN), Banki Nkuru y’u Rwand(BNR) hamwe n’Ikigega cy’Ingwate(BDF).

Impamvu y’iki kigega ngo iraterwa n’uko abagore n’urubyiruko ari bo bibasiwe n’ubukene kuko batabasha kubona igishoro cyo kwikorera, konti zabo mu bigo by’imari na Mobile Money bikaba biriho ubusa, nk’uko bisobanurwa na Jackson Kwikiriza, Umuyobozi Nshingwabikorwa wa AMIR.

Kwikiriza agira ati "Abantu uburyo bizigamira biracyari hasi, ni yo mpamvu ibigo by’imari bigitanga inguzanyo ku nyungu yo hejuru kuko bidafite amafaranga ahagije, hemejwe ko hazashyirwaho ubukangurambaga mu kuzamura ubwizigame haba mu Banyarwanda ubwabo, mu makoperative cyangwa muri ya matsinda ari hirya no hino mu Gihugu."

Ati "Turashaka ko hajyaho ikigega ku rwego rw’Igihugu, noneho hakabaho gushakisha hirya no hino amafaranga ajya mu bigo by’imari, yaba ava mu bashoramari, mu mishinga itandukanye, yaba n’ay’inguzanyo, tukayahuriza hariya noneho bikorohereza ibigo by’imari kubona amafaranga ahendutse."

Inyigo yakozwe na AMIR muri 2024 igaragaza ko abagore bafite konti muri banki cyangwa mu bigo by’imari bito ari 2,793,004, ariko ababashije gusaba inguzanyo ari 261,191.

Bivuze ko konti z’abagore barenga miliyoni 2 n’ibihumbi 500 zafunguwe ariko ntizijyeho amafaranga, cyangwa akaba anyuzwaho gusa bahita bayabikuza.

Birajyana n’uko Abaturarwanda hafi miliyoni 7(miliyoni 6.9) bafite konti za Mobile Money/Airtel Money, bakaba bazikoresha banyuzaho amafaranga ariko ntawe ubasha kuyabika kuri Mocash, nk’uko inyigo ya AMIR ikomeza ibigaragaza.

Abafite konti ziriho ubusa barimo Dusabe Clementine ucuruza imboga mu Mujyi wa Kigali, avuga ko yifuje kwagura igishoro cye kuva mu myaka 10 ishize, kikava ku bihumbi 100Frw ariko ngo byaramunaniye, nyamara afite amahirwe yo kubona inguzanyo muri banki.

Dusabe w’imyaka 45 y’amavuko, yaganiriye na Kigali Today agira ati "Mfite konti ebyiri muri banki no muri SACCO ariko sinjya mbona amafaranga yo kuzibitsaho, kuko inyungu mbona nyishyira mu kimina, ikaba ari yo nkoresha mu rugo mu kubona icyo ngaburira abana no kubishyurira ishuri."

Dusabe avuga ko afite icyangombwa cy’ubutaka yajyana muri banki kikamubera ingwate, ariko ngo harabura umuntu umutera imbaraga zo kujya gushaka igishoro cyo kwagura ubucuruzi bwe.

Mu zindi mpamvu Ishyirahamwe ry’Ibigo by’Imari rivuga ko zitera abagore n’urubyiruko kutabona igishoro, harimo kubura ingwate, abo bigaragara ko ntaho yigeze atunga amafaranga menshi kandi nta cyizere cy’uko azacunga neza inguzanyo mu gihe yaba ayihawe, cyane cyane urubyiruko kuko badatura ahantu hamwe.

Hari n’ikibazo cy’uko abagore n’urubyiruko bari mu buhinzi, abenshi ngo badashobora kubona inguzanyo bitewe n’uko ibyo bahinga nta cyizere kiba gihari cy’uko bizera, kandi n’iyo byeze bidatanga amafaranga mu buryo buhoraho.

Hari n’abo AMIR ivuga ko batagira konti muri banki ndetse n’abatazi gusoma no kwandika (batazi gukoresha ikoranabuhanga mu by’imari).

Jackson Kwikiriza, Umuyobozi Nshingwabikorwa wa AMIR

Ku kibazo cyo kutabona ingwate, ikigega BDF cyizeza ko muri uyu mwaka hazaboneka igera kuri miliyari 30Frw, kigasaba imirenge SACCO gushishikariza abanyamuryango bahombejwe na COVID-19 gusaba inguzanyo yo kwiteza imbere bashingiye kuri iyo ngwate.

Hirya no hino mu Gihugu harabarurwa ibigo by’imari byiganjemo imirenge SACCO bigera kuri 457.

Umuyobozi Mukuru muri MINECOFIN ushinzwe Urwego rw’Amabanki n’ibindi bigo, Cyrille Hategekimana, avuga ko ubukangurambaga busaba abagore n’urubyiruko gufata inguzanyo, buzibanda ku bafite imishinga mito n’iciriritse muri iyi myaka itanu ya gahunda ya Guverinoma (NST2).

Abajyanama b’ubuzima muri ECD bategurira abana amafunguro, bakabagaburira berekera ababyeyi uko bagomba kubigenza mu ngo

Umushinga SAIP (Sustainable Agriculture Intensification and Food Security Project), uhabwa inkunga y’ikigega mpuzamahanga cyita ku biribwa no kuboneza imirire (Global Agriculture and Food Security Program/GAFSP), mu rwego rwo kongera umusaruro w’ubuhinzi, kuwushakira amasoko no kwihaza mu biribwa.

Amarerero y’abana bato(ECD) yabaye amashuri ababyeyi babo bigiramo gutegura indyo yuzuye, hanyuma bakajya gushyira mu bikorwa ibyo bize bifashishije ibijumba by’umuhondo bikungahaye kuri vitamine A, amagi hamwe n’imboga n’imbuto bahinga mu rugo.

Mu mwaka wa 2019, ni bwo SAIP yatangiye gufasha abaturage bo mu mudugudu wa Bicumbi, Akagari ka Bicumbi, Umurenge wa Mwulire mu Karere ka Rwamagana, ishingiye ku kuba urugo ruri mu cyiciro cya mbere cyangwa icya kabiri cy’ubudehe, kandi rufite abana bugarijwe n’imirire mibi.

Umwe mu babyeyi barerera muri ECD yo mu rwunge rw’Amashuri rw’i Bicumbi, Uwamariya agira ati "SAIP yatubereye umutabazi w’abana bacu kuko umwana yari ageze ku myaka ibiri y’ubukure, ariko afite ibiro bitandatu (byenda kungana nk’iby’umwana ukivuka), sinari nshoboye kumugaburira, uretse ko n’abandi bana banjye bakuru bari baratinze gukura kubera ubukene."

Nyuma y’uko SAIP imwigishije gutegura indyo yuzuye n’uburyo bwo guhinga kinyamwuga, ikamwubakira uturima tw’igikoni ndetse ikamuha inkoko n’ibiti by’imbuto, Uwamariya avuga ko ubu abana be ntawe ukirwara bwaki.

Umujyanama w’Ubuzima uhagarariye abandi mu Murenge wa Mwulire mu Karere ka Rwamagana, Mukankubana Verena, avuga ko nyuma yo kwigisha gutegura indyo yuzuye no kugaburira abana ku marerero, abajyanama b’ubuzima bakomereza mu ngo kureba uko ababyeyi bashyira mu bikorwa ibyo bigishijwe.

Abana bahabwa indyo yuzuye kandi ababyeyi biteguriye nyuma yo kubihugurirwa

Mukankubana agira ati "SAIP yahaye ababyeyi imbuto y’ibijumba by’umuhondo (bifite vitamin A), ibaha inkoko, imigina y’ibihumyo, ndetse basabwa kugira ibiti nibura bitatu by’imbuto hamwe n’insina z’imineke, byibura eshatu kuri bwa buso buto bwo mu rugo."

Ati "Umubyeyi azi ko agomba gushyira igi ku ifunguro ry’umwana mu rugo kandi azi ko agomba gushyiraho urubuto byanze bikunze, turabakurikirana, ubu tuvugana mu Karere ka Rwamagana ku bijyanye n’igwingira turi kuri 11%(imibare yakuye ku nzego z’ubuzima muri ako karere)."

Ubushakashatsi ku mibereho y’ingo(DHS) bwakozwe n’Ikigo cy’Ibarurishamibare NISR mu mwaka wa 2019-2020, buvuga ko mu Karere ka Rwamagana, igwingira mu bana bari munsi y’imyaka 5 y’amavuko ryari ku rugero rwa 22%.

Umuyobozi w’Akarere ka Rwamagana, Radjab Mbonyumuvunyi, avuga ko uretse mu ngo, mu mirima migari na ho SAIP yabaye igisubizo mu kwihaza mu biribwa, kuko itera inkunga imishinga yo kuhira ku buso buto no kubaka inzu zihingwamo zitwa ’greenhouses’.

Inyinshi muri izi greenhouses (zirenga 80) ziri mu gishanga cyitwa Nyirabidibiri gikora ku Mirenge ya Gahengeri, Mwulire, Nzige na Rubona, kikaba kiri ku buso burenga hegitari 285, kigahingwamo imboga n’imbuto ziribwa n’abaturage b’i Rwamagana n’i Kigali, bakanasagurira amasoko yo mu mahanga.

Mbonyumuvunyi agira ati "Icyo gishanga cyonyine cyahesheje akazi abaturage barenga 1,000 bo muri aka Karere, nta rugo rwo muri iriya mirenge rufite umwana uri mu mirire mibi."

Muri rusange, mu turere 20 tw’u Rwanda umushinga SAIP wakoreyemo kuva mu mwaka wa 2019 kugeza ubu, abaturage 241,694 ngo bamaze gufashwa kuva mu mirire mibi, aho ingo 9,641 zahawe inkoko 38,564 zitera amagi.

SAIP ivuga ko yanatanze imigina 85,541 y’ibihumyo mu ngo 8,515, ibiro(kg)
30,305 by’imbuto y’ibishyimbo bikungahaye ku butare byahawe ingo 6,536, biterwa kuri hegitare 736,125.

Abana barigishwa gukaraba intoki mu kwimakaza isuku

Hatanzwe n’imbuto ya soya ingana n’ibiro 12,000 mu ngo 1,200, hamwe n’ingemwe 6,715,000 z’imigozi y’ibijumba by’umuhondo zahawe abaturage 7,818.

Uyu mushinga uvuga kandi ko wubakiye abaturage uturima tw’igikoni 14,402 harimo 402 tw’icyitegererezo, uhemba abafashamyumvire bita ku bana kuva ku bafite amezi 6 y’amavuko kugera ku mezi 23(hafi imyaka ibiri).

Meya Mbonyumuvunyi yemeza ko SAIP yabaye igisubizo mu kwihaza mu biribwa

Muri ibyo bibazo hari amakimbirane hagati y’abashakanye, inda ziterwa abangavu, abana bata imiryango y’iwabo bakajya mu muhanda, ubusinzi n’ibiyobyabwenge ndetse n’ubukene muri rusange.

Mu birori byo kwizihiza Umunsi mpuzamahanga w’umugore mu Karere ka Gasabo, uwitwa Yankurije Betty yatanze ubuhamya ari kumwe na Uwihanganye Claude bashakanye, aho avuga ko gusinda k’uwo mugabo we kwari kugiye gusenya urugo.

Uwihanganye na we akavuga ko yumvaga kunywa inzoga n’ibindi biyobyabwenge ari ukwibera mu munezero mwinshi (muri free), ku buryo ngo amafaranga yose yabaga yakoreye yayagemuraga mu kabari, bikagera n’ubwo afata inzoga z’imyenda(amadeni) akanagurisha ibikoresho byo mu nzu.

Uwihanganye avuga ko yaretse ibiyobyabwenge nyuma y’uko agiye gusengera muri Jubilee Revival Assembly, kwa Pasiteri Julienne Kabanda,
aho yararitswe n’umugore we hamwe n’umuryango w’iryo torero witwa ’Grace Room Ministries’, kuko yari yumvise ko haza kubera tombola.

Uwihanganye yagize ati "Nagiye nkurikiye tombola ariko isaha yari igeze yo kwakira Yesu nk’umwami n’umukiza, numva babwiriza ngo ’kureka ibiyobyabwenge’, none ubu urugo rwanjye rumeze neza, sinabeshyera hano imbere y’abantu bangana gutya."

Uyu mugabo n’umugore we bari mu bashimiye Pasiteri Julienne Kabanda ku kuba umuryango yashinze wa ’Grace Room Ministries’ warabafashije
gukira ubusinzi bwari bugiye kubasenyera cyangwa gupfakaza umwe muri bo.

Pastor Kabanda ari mu bagore bashimiwe kuba baragize uruhare mu kubanisha neza imiryango. Abayobozi bakaba bamuhaye igikombe cy’ishimwe n’indabo, hamwe n’abandi barimo abamotari b’abagore, abagore bagize amakoperative y’ubuhinzi hamwe n’Inama y’Igihugu y’Abagore(CNF).

Umuyobozi Nshingwabikorwa w’Akarere ka Gasabo, Bayasese Bernard, agira ati "Ururabo twatanze ni ukongera kwibutsa rwa rukundo hagati y’abagize umuryango (umugore, umugabo n’umwana), wabonye ko ari indabyo z’ibimera zitoshye, bivuze ko urukundo rwagombye gukomeza rutoshye kugira ngo umuryango ukomeze kubaho umeze neza."

Bayasese avuga ko mu cyumweru kimwe akarere kari kamaze kitegura kwizihiza Umunsi mpuzamahanga w’umugore, hamwe n’abafatanyabikorwa bako babashije kunga(kubanisha neza) imiryango 51 mu 1320 basanze ifitanye amakimbirane mu Karere kose.

Bayasese ati "Turacyafite byinshi byo gukora, tuzifashisha umugoroba w’Umuryango, hari gahunda nyinshi aho abitegura kubana (nk’umugore n’umugabo) ari bo bazibandwaho muri uku kwezi kwa Werurwe, kwahariwe kwita ku mugore."

Kubona umuryango utekanye

Senateri Cyitatire Sosthène wifatanyije n’Akarere ka Gasabo kwizihiza Umunsi mpuzamahanga w’umugore, asaba abafatanyabikorwa bako gushaka ibisubizo byazana amahoro mu muryango kuko biwushoboza kurera abana neza, bigakumira ubuzererezi no kuba abangavu babyarira iwabo.

Senateri Cyitatire avuga ko kwirukana abangavu batwite bituma bamwe bahitamo guta abana babyaye, aho mu kigo cy’ababikira b’Abakalikuta i Kigali ngo hari abana babarirwa mu bihumbi batawe ku muhanda n’ababyeyi babo nyuma yo kubabyara.

Avuga ko hari n’abana bafatirwa mu biyobyabwenge bakajyanwa mu bigo ngororamuco, bagaruka imiryango yabo ikabinuba igira iti "cya kigoryi cyagarutse", bigatuma babisubiramo.

Senateri Cyitatire avuga ko ibyinshi muri ibi bibazo bikomoka ku makimbirane y’abashakanye, aho agira ati "Umwana wabonye se akubita nyina, ntabwo yongera kubaha uwo mubyeyi, ndetse hari n’ababyiruka bavuga ko na bo nibakura bazajya bakubita abo bashakanye."

Insanganyamatsiko y’umunsi mpuzamahanga w’umugore muri uyu mwaka igira iti "Abagore ni ab’agaciro none n’ejo." Senateri Cyitatire akabasaba kwitinyuka bagakorera ingo zabo batitaye ku myumvire yagiye ibaheza inyuma.

MUA Femme ije mu gihe isi yizihiza umunsi mpuzamahanga w’umugore kuri uyu wa 08 Werurwe 2025, aho abagore bahawe umwihariko wo kubunganira kugira ngo imirimo y’ubucuruzi bakora, ibangikana no kwita ku ngo zabo, idahungabanywa n’uko babuze ubafasha.

Kubera MUA Femme, umugore ufite imodoka ikagirira ikibazo mu nzira cyangwa uwo imashini ihagaze gukora ari mu kazi, inzu cyangwa ibindi yashinganishije muri MUA Insurance byangiritse, ahamagara nimero itishyurwa 2323, bakamutabara mu gihe cyihuse.

Gafaranga Aisha ushinzwe gukurikirana abakiriya b’iyo Sosiyete, ’Customer Experience Officer (CEX)’, yagize ati "Ushobora guhaguruka hano ugiye kureba umwana mu rugo, imodoka ikagirira ikibazo mu nzira, igakwamira mu muhanda, duhamagare kuri nimero itishyurwa(2323), mu minota itarenze 20 tuguhe indi modoka ikugeza mu rugo, hanyuma dusigare dukurikirana ibibazo bindi."

MUA Femme izagabanya ikiguzi cya serivisi z’ubwishingizi(discount) zijyanye no kwita ku mitungo y’abagore yagize ibibazo bikomeye cyane, ugereranyije n’icyo abandi bantu bafite ubwishingizi muri rusange bahabwa.

MUA Femme yatangijwe ku wa Gatanu ubanziriza Umunsi Mpuzamahanga w’Umugore, ku bufatanye n’Ikigo ’Le Village de la Femme’ gitanga ubushobozi ku bagore, haba mu kubahugurira gukora ubucuruzi no kubafasha kubona igishoro muri banki.

MUA Femme ije ikenewe nk’uko bisobanurwa n’Umuyobozi Nshingwabikorwa wa Le Village de la Femme, Aretha M. Rwagasore, uvuga ko hari ibibazo bya tekiniki byinshi bahura na byo mu kazi no mu ngendo z’imodoka bakabura uwo bitabaza, kandi byo nta bwishingizi bifatirwa.

Rwagasore agira ati "Ibyo bibazo turabigira buri munsi kandi nta n’umuntu tuba dufite duhamagara, aho imodoka yanga kwaka, wazamura ikirahure kikanga kuzamuka, kandi ibyo nta bwishingizi bisabirwa, ndirwariza ngahamagara umukanishi, imodoka ikaguma aho mu muhanda, ariko ubu twumvise ko tuzajya twitabaza MUA ikabidufashamo."

Rwagasore avuga ko imitungo ye y’imodoka n’inzu agiye kuyishinganisha muri MUA, ndetse ko azakangurira abagore bagenzi be barenga 250 yigishije kwiyambanza MUA Femme.

MUA Femme ivuga ko ije kuziba icyuho cyo kubura ubutabazi bwa tekiniki butajya butangwa na serivisi z’ubwishingizi ku bantu bagiriye ibibazo mu kazi no mu nzira, bukazajya buhabwa abagore nta kiguzi batanze.

Mireille Umwali, umwe mu bagize Inama y’Ubutegetsi ya MUA Insurance, avuga ko serivisi za MUA Femme zizafasha abagore gukora batekanye, bitewe n’agaciro iyi Sosiyete ibaha nk’ababyeyi b’umuryango.

Umwali avuga ko umugore wagize ikibazo cy’imodoka yapfuye(ni urugero), mu gihe izaba iri mu igaraje, MUA Insurance izajya imutiza indi yaba akoresha nibura mu gihe cy’iminsi itanu.

MUA Insurance itanga ubwishingizi ku bintu bitandukanye muri rusange (General Insurance), havuyemo ibijyanye n’ubuvuzi hamwe n’ubuzima bw’abantu, aho inzu yo guturamo isanzwe ngo kuyishingira bitarenza amafaranga ibihumbi 150Frw nyirayo yishyura ku mwaka.

Abafashijwe kuhira ntibakigira impungenge nubwo imvura itagwira igihe

Uyu mushinga uterwa inkunga n’ikigega mpuzamahanga cyita ku biribwa no kuboneza imirire (Global Agriculture and Food Security Program/GAFSP), watumye ibiribwa (cyane cyane imboga n’imbuto) bitabura ku masoko y’Iintara y’Iburasirazuba, aho izuba rikunze kwibasira.

Umpfuyisoni Bernadette utuye mu mudugudu wa Kiramuruzi II, Akagari k’Akabuga, Umurenge wa Kiramuruzi mu Karere ka Gatsibo, ni umwe mu bakoresheje inkunga ya SAIP bashobora guha amasoko yo muri ako karere n’ahandi mu Rwanda, umusaruro munini w’imboga n’imbuto ndetse n’ibikomoka ku matungo.

Mu mwaka wa 2022, SAIP yahaye Umpfuyisoni uburyo bwo kuhira hakoreshejwe ingufu z’imirasire y’izuba, zizamura amazi avuye mu iriba bafukuye mu kabande zikayageza mu cyuzi cyacukuwe hejuru ku musozi, ya mazi akagaruka yuhira imirima n’amatungo.

Umpfuyisoni wahawe uwo mushinga wo kuhira ufite agaciro ka Miliyoni 20 z’Amafaranga y’u Rwanda, avuga ko mbere yahingaga imboga ku buso butarenga 1/4 cya hegitare, ubu ageze kuri hegitare eshatu ziteyeho ibiti 340 bya avoka, iby’amaronji birenga 200 hamwe n’iby’imyembe birenga 500, muri byo hakaba hari igishobora kweraho imyembe 1,200, umwembe umwe ukagurwa amafaranga 300Frw.

Iki gishoro ni cyo cyatumye Umpfuyisoni yagura imishinga y’ubuhinzi n’ubworozi, aho afite pepinyeri z’ibiti by’imbuto, urutoki rw’imineke, ibigori n’ibindi, hamwe n’ubworozi bw’inka 13 z’inzungu zitanga nibura amata ageze kuri litiro 100 ku munsi.

Umpfuyisoni ngo nta kibazo akigira cy’ubwatsi n’amazi y’inka ze

Umpfuyisoni yoroye n’inkoko zirenga 2,000 zitera amagi, inkwavu 300 ndetse n’ibishuhe, imbata, inkanga, inkware n’inuma byose hamwe birenga 500, bitanga ifumbire mu mirima, inyama, amagi n’icyororo ku babikeneye bose.

Buri munsi akoresha abakozi batari munsi ya 50 ba nyakabyizi n’abandi 8 bahoraho, ubutaka akoreraho burenga hegitare eshatu, bukaba buhorana itoto ugereranyije n’ahandi muri ako gace kamwegereye.

Umpfuyisoni agira ati "Uyu mushinga wo kuhira hakoreshejwe ingufu z’imirasire wazanye iterambere muri byose(all in one bisobanurwa ngo ’byose muri kimwe’), nkaba nshimira cyane SAIP kuri ubu bufasha yaduhaye."

Amasoko y’i Gatsibo na Kigali arimo ibiribwa byavuye kwa Umpfuyisoni

Uwitwa Nyanzira Yvonne utuye mu mudugudu w’Ikiyogori, Akagari k’Akabuga, Umurenge wa Kiramuruzi, avuga ko yajyaga kurangura imbuto iyo bigwa mu masoko ya Rwagitima na Kabarore, kuko mu rya Kiramuruzi ngo nta bicuruzwa byabonekagamo.

Ibiti by’imbuto bya Umpfuyisoni biruhirwa bigahora bitoshye

Ubu Nyanzira hamwe na bagenzi be bahinira hafi kwa Umpfuyisoni bakarangura ibyo bashaka, bakajya kubigurisha mu masoko yo hirya no hino muri Gatsibo, hakaba n’imodoka yuzuye ibiribwa ihora ibizana i Kigali buri cyumweru.

Nyanzira agira ati "Jyewe na bagenzi banjye 9, tuza kurangura imbuto hano, byaratworoheye cyane kuko kuzibona hafi bitadusaba amafaranga y’itike y’umuntu n’ubwikorezi, ubu turunguka neza. Mu gishoro cy’Amafaranga ibihumbi 50Frw simburamo inyungu ya 15Frw ku munsi."

Nyanzira avuga ko amasoko yo muri Gatsibo yari yarabuze ibicuruzwa, ariko ubuhinzi n’ubworozi byatejwe imbere n’umushinga SAIP ngo byatumye habonekamo imyaka, ku buryo hari n’ayavuye ku kurema umunsi umwe akaba arema kabiri mu cyumweru.

Guhingisha imashini kugira ngo basiganwe n’imvura

Mu Ntara y’Iburasirazuba, inshuro imvura iboneka zirabaze ku buryo iya mbere ishobora kugwa umuhinzi utarashyira imbuto mu butaka bimuteza kurumbya bikomeye, kuko akenshi imvura icika imyaka itarera.

Amasoko y’Iburasirazuba arimo kubona ibicuruzwa kubera iterambere ryo kuhira ry’Umushinga SAIP

N’ubwo imvura y’Itumba ry’uyu mwaka wa 2025 yatinze kugwa kuko ngo itajyaga irenza tariki ya 15 Gashyantare itaragwa, ubu i Gatsibo na Nyagatare bamaze gushyira imbuto mu butaka babifashijwemo n’imashini zihinga (mechanisation) zatanzwe na SAIP.

Uwitwa Mpambara Joseph utuye i Kiramuruzi yahawe amafaranga ya SAIP arenga Miliyoni 90Frw, na we yishyiriraho Miliyoni 18Frw, akaba yaraguze imashini ebyiri zihinga.

Abahinzi b’i Gatsibo na Nyagatare baramuhamagara akajya kubahingira, uwo munsi bakarara barangije guhinga no gutera mu mwanya w’aho abahinzi bashoboraga kumara ukwezi kuri uwo mushike.

Mpambara agira ati "Ahantu hashobora guhingwa n’abakozi 50 mu gihe kingana n’ukwezi kose, iyi mashini ihahinga mu gihe kitarenze icyumweru. Ubwo se bazajya kuguha ubwo buhinge imvura itaracitse!"

Avuga ko ibiciro byo gukodesha imashini ihinga biri hasi cyane y’iby’abahingisha amasuka, kuko aho nyiri umurima yishyura abahinzi amafaranga ibihumbi 150Frw, imashini yo ihahinga ku mafaranga ibihumbi 80Frw."

Ubworozi bw’inkoko buteye imbere

Akarere kabonye abashoramari bigisha abandi

Umuyobozi w’Akarere ka Gatsibo, Richard Gasana, avuga ko abahinzi n’abanyenganda bafashijwe na SAIP kugera ku bikorwa by’indashyikirwa bazabera abandi baturage urugero, hakavukamo abandi bashoramari benshi.

Ati "Jye numva mu by’ukuri icyo twakora ari iyamamaza bikorwa kugira ngo abaturage babibone kandi babibonere ku bantu babikora, kandi tukifashisha imishinga nka SAIP. Hari n’indi mishinga turimo dukora kugira ngo tugire ba Bernadette na ba Mpambara benshi."

Abafite imishinga bazahabwa inkunga muri SAIP ya kabiri

Umuyobozi wa SAIP, Jean Hitimana, avuga ko uyu mushinga ushyirwa mu bikorwa n’Ikigo gishinzwe Iterambere ry’Ubuhinzi n’Ubworozi(RAB), icyiciro cyawo cya kabiri kirimo gukoresha inkunga ingana na Miliyoni 20 z’Amadolari ya Amerika, yatanzwe na GAFSP akaba acungwa na Banki y’Isi(WB).

Hitimana agira ati "Muri SAIP ya kabiri tuzongerera agaciro ibyakozwe mu ya mbere, kandi twatanze itangazo, abantu batanga ibitekerezo by’imishinga. Iyo twatoranyije twarabamenyesheje, ubu bari gutegura iyi mishinga, bazayizana tuyisesengure noneho tubatere inkunga."

Hitimana avuga ko muri Miliyoni 20 z’Amadolari bemerewe na GAFSP, 51% byayo bamaze kuyahabwa, kandi muri yo bamaze gukoreshamo 35% yatumye bagera muri kimwe cya kabiri cy’ibikorwa byose bateganya, ndetse ko hari n’ibyo barangije bijyanye no kubaka ibikorwa remezo byo kuhira ku buso buto, igisigaye akaba ari ukubibyaza umusaruro.

Guhingisha imashini ngo birabungura

Abahinzi 6 bubakiwe uburyo bukoresha imirasire y’izuba mu kuhira, mu gihe 49 bahawe imashini zikoresha lisansi na mazut zifasha kuzamura amazi mu mirima iri ku buso bwa hegitare 600. Izo hegitare ziyongera ku 1,000 zatangiye kuhirirwa muri SAIP ya mbere.

Muri rusange SAIP ya mbere yo mu myaka ya 2018-2023, hamwe n’iya kabiri irimo gushyirwa mu bikorwa kuva muri 2024-2026, izarangira ifashije abahinzi-borozi ibihumbi 45 bo turere 20 kwihaza mu biribwa no gusagurira amasoko.

Hitimana avuga ko iyi ntego izagerwaho hakoreshejwe uburyo bwo kuhira ku buso buto(Small Scale Irrigation Technology), hamwe no guteza imbere ubuhinzi bw’imboga n’imbuto (Horticulture) bukorerwa mu nzu zitwa ’greenhouse’.

SAIP ivuga ko abifuza gukora imishinga y’ubuhinzi bwo kuhira ku buso buto, guhingisha imashini no gushinga inganda zitunganya umusaruro w’ubuhinzi n’ubworozi, bakomeje guhabwa inkunga nyunganizi (matching grant) ibarirwa muri 70% by’umushinga, nyirawo na we agashoramo 30% asigaye.

Uyu mushinga kandi utanga inkunga y’amatungo magufi (inkoko) ku miryango ifite abana bari munsi y’imyaka 5 hamwe n’imbuto z’ibihingwa bikungahaye kuri vitamine n’ubutare, birimo imigozi y’ibijumba by’umuhondo, imigina y’ibihumyo n’uturima tw’imboga.

Izuba Iburasirazuba ryabaye igisubizo cyo kurwanya amapfa

Aba bafatanyabikorwa hamwe n’urubyiruko rw’Intore zishoje urugerero, bazafatanya gukora ubukangurambaga busaba abaturage bajyaga bishyurirwa ubwisungane mu kwivuza, kugira ibyo bigomwa.

Umuyobozi Nshingwabikorwa wungirije w’Akarere ka Gasabo, Regis Mudaheranwa yagize ati «Abafatanyabikorwa bajye batanga amafaranga y’ubwisungane mu kwivuza ku munota wa nyuma ku muntu byamaze kwemezwa ko yayabuze, kugira ngo bitagomesha abashaka kwishyura Mituelle, kandi nibanamufasha bajye bamusaba kugira igice yishyura na we, atari ukuyamutangira yose.»

Ubuyobozi bw’Akarere ka Gasabo busaba ko abaturage bakorerwa ubukangurambaga cyane bakaba ari bo biyishyurira ubwisungane mu kwivuza, hanyuma inkunga bamwe bajyaga bahabwa ikabagenerwa nk’igishoro cy’ubucuruzi bajya bavanamo ayo kwiyishyurira ubwo bwisungane.

Imibare y’ubudehe y’umwaka wa 2024/2025, igaragaza ko akarere ka Gasabo gatuwe n’abaturage 688,628.

Akarere ka Gasabo kari kihaye intego y’uko muri abo baturage bose 578,184 bagomba kwishyura ubwisungane mu kwivuza, ariko umwaka ukaba ugiye kurangira abishyuye ari 473 411, bahwanye na 81.9%.

Imirenge itatu yesheje umuhigo wa 100% ni Gisozi, Kimihurura na Kimironko, ikaba yahawe ibyemezo by’ishimwe na sheki y’amafaranga y’u Rwanda miliyoni imwe.

Umunyamabanga Nshingwabikorwa w’Umurenge wa Kimihurura, Ndanga Patrice, avuga ko bamaze gukemura mu buryo bwa burundu ikibazo cy’abaturage bajyaga bakererwa kwishyura imisanzu y’ubwisungane mu kwivuza.

Ndanga avuga ko bigiriye inama yo gusura abatuye Akarere ka Gisagara mu Majyepfo, bavanayo isomo ryo gushinga muri buri mudugudu itsinda rifasha buri rugo kwizigamira hakiri kare amafaranga make make azavamo ubwisungane mu kwivuza.

Ndanga yagize ati « Buri mudugudu twawubwiye ko ugomba kugira itsinda, bagira igitabo bandikamo abaturage bose bagomba kwishyura mituelle, bakanafunguza konti muri SACCO, buri muturage akajya afata amafaranga make make agenda yizigamira, umwaka ukajya kurangira afite ubwishyu bw’umuryango we. »

Umwe mu bafatanyabikorwa b’Umurenge wa Kimihurura, Paul Jules Ndamage uyobora Kaminuza ya Kigali, yizeza ko bazagira uruhare runini mu gufasha abaturage kugera ku bwisungane mu kwivuza.

Uruhare rw’Ugerero rw’Inkomezabigwi

Urubyiruko rurangije amashuri yisumbuye rwitwa Intore z’Inkomezabigwi(icyiciro cya 12) mu murenge wa Kimihurura, nk’uko n’ahandi mu Gihugu byagenze, bamuritse ibikorwa by’urugerero bari bamazemo amezi abiri, birimo n’icyo gukangurira abaturage kwishyura ubwisungane mu kwivuza.

Uru rubyiruko ruvuga ko ibikorwa rwakoze bifite agaciro kangana na 1,897,000(Frw), birimo ubukangurambaga busaba abantu gutanga Mituelle, kugira isuku, kuryama mu nzitiramubu iteye umuti, kwizigamira muri Ejo Heza, kwibumbira mu makoperative, kugana ibigo by’imari, gusaba abaturage kwitabira ibiganiro bibera mu midugudu hamwe no kubaha abayobozi.

Ubuyobozi bw’Akarere ka Gasabo buvuga ko urugerero rutarangiye, ahubwo ngo rugomba gukomereza mu bikorwa biteza imbere umutekano n’imibereho y’abaturage, harimo kurwanya igwingira, ibiyobyabwenge, ubuzererezi no kwicuruza.

Muri uyu murenge kandi bamwe mu bafatanyabikorwa batangije ikigega cyiswe Kimihurura Development Initiative (KDI) kizajya gikusanyirizwamo inkunga yo kunganira ibikorwa by’iterambere, hadategerejwe ubufasha buturutse ahandi.

ibikorwa by’urugerero no gutangira umwaka wa Mituelle muri Kimihurura, byizihijwe mu mikino n’imyidagaduro, hamwe n’ikiganiro ku muco w’ubutore cyatanzwe na Rugemintwaza Nepo wabaye Komiseri muri Komisiyo y’Igihugu y’Itorero, uvuga ko Abanyarwanda bose batangiye guca akenge bafite inshingano zo kurinda no guteza imbere Igihugu.

Iyi mpanuka ikomeye yabereye i Rulindo yahitanye benshi

Muri uku kwezi, habaye impanuka nyinshi, ariko ikomeye cyane yabaye ku munsi wa kabiri w’Icyumweru, hari tariki ya 11 i Rulindo, ahitwa ku Kirenge.

Aha ku Kirenge cya Ruganzu, bisi nini y’Ikigo International yataye umuhanda igenda yibirindura ku musozi, ku buryo abantu 21 muri 53 bari bayirimo bahise bitaba Imana, abasigaye bagakomereka bikomeye.

Polisi y’u Rwanda, Ishami rishinzwe Umutekano wo mu muhanda (Traffic Police), ivuga ko abashoferi batangiye gupimwa amaraso yabo ngo harebwe niba hatarimo ibiyobyabwenge, kuko ngo biteza ubuzima bwo mu mutwe kudakora neza mu gihe umuntu atwaye ikinyabiziga.

Umuvugizi wa Traffic Police, SP Emmanuel Kayigi, mu kiganiro yagiriye kuri Radio Rwanda ku wa 28 Gashyantare 2025, yagarutse ku mushoferi wahagaritswe n’abapolisi atwaye bisi akanga guhagarara, bikaza kugaragara ko yari yafashe ibiyobyabwenge (ibi byabaye mu kwezi kwa Mutarama 2025).

SP Kayigi yagize ati "Mwarabibonye ko uwirukankanaga iyo bisi byagaragaye ko yagiye afata ibiyobyabwenge birimo icy’urumogi mu bihe bitandukanye, nta handi bigaragarira ni mu maraso kuko abantu barasuzumwa."

Tugarutse kuri zimwe mu mpanuka zikomeye zabaye muri Gashyantare 2025, hari iyo ku wa Gatandatu tariki 15 Gashyantare 2025, yabereye kuri Shyorongi mu Murenge wa Kanyinya mu Karere ka Nyarugenge, aho bisi nto (Minibus) yagonze ikamyo hagapfa umuntu umwe abandi 18 barakomereka.

Na none mu gitondo cyo ku wa Gatanu tariki 21 Gashyantare, mu Murenge wa Rugarika mu Karere ka Kamonyi, habereye impanuka y’imodoka ya Minibus (Hiace) yari itwaye Abanyeshuri, ikaba yaragonzwe n’ikamyo ya Fuso yari itwaye imbaho.

Icyo gihe abanyeshuri batanu (5) barakomeretse bikomeye abandi 13 na mwarimu wabo bakomereka byoroheje, aho ngo byaje kugaragara ko umushoferi w’ikamyo yari yanyweye ibisindisha.

Ku Cyumweru tariki 23 Gashyantare 2025 ku Nyundo mu Karere ka Rubavu, imodoka ya Coaster yari itwaye abagenzi 15, yakoze impanuka, batanu bahasiga ubuzima, abandi barakomereka, bajyanwa mu bitaro bya Gisenyi.

Bukeye bwaho ku wa Mbere tariki 24 Mutarama, ahagana saa munani z’ijoro, i Musanze mu Murenge wa Muhoza, imodoka y’ivatiri yarimo abantu batanu, yagonze igiti abantu 3 bahita bitaba Imana, abandi 2 barakomereka bikomeye.

Ingamba zirimo gufatwa

Umuvugizi w’Ishami rya Polisi rishinzwe Umutekano wo mu muhanda, SP Emmanuel Kayigi, aganira na Kigali Today, yavuze ko ibigo bitwara abagenzi n’ibifite amakamyo atwara ibintu bitandukanye, byasabwe kugura utwuma dupima ko umuntu yanyweye ibisindisha(alcohol test).

SP Kayigi asaba kandi ibigo bifite ibinyabiziga kujya bitanga imirimo ku muntu werekanye icyangombwa cy’ubuzima bwe, hamwe n’icyemezo cy’umukoresha wa nyuma, kugira ngo hamenyekane imyitwarire ye.

Ubutabazi bw’ibanze

SP Kayigi avuga ko abantu bize gukora ubutabazi bw’ibanze bakenewe cyane ahantu habereye impanuka, kugira ngo bajye bagira abo baramira mu gihe imbangukiragutabara(ambulance) iba itarabageraho.

Umuryango HPR ufatanya na Leta kurwanya impanuka zibera mu muhanda, uvuga ko hari umushinga w’imyaka ibiri witwa FAIR watangiye muri 2023, aho abanyeshuri biga mu mashuri yisumbuye barenga 1666 bamaze guhugurirwa gukora ubutabazi bw’ibanze, bashobora kuba bakwitabazwa ahabereye impanuka.

Bamwe mu bagize inzego zifite aho zihuriye no kurwanya impanuka baganiriye ku buryo barwanya impanuka zibera mu muhanda

Umuyobozi Nshingwabikorwa wa HPR, Dr Innocent Nzeyimana, avuga ko hateguwe integanyagisho(Curriculum) irimo amasomo y’ubutabazi bw’ibanze hamwe n’uburyo abantu bakwirinda impanuka, akaba asaba ko ayo masomo yakongerwa mu yo abanyeshuri biga mu mashuri.

Umunyeshuri wiga mu Kigo ’Saint Ignace’ i Kibagabaga, Dukunde Gratia Kesley, avuga ko abanyeshuri ari bo bantu benshi mu Gihugu bafite ibyago byo guhitanwa n’impanuka bitewe n’ingendo nyinshi bakora kandi batajijukiwe, kubera iyo mpamvu ngo bakeneye ku bwinshi amasomo ajyanye no kwirinda hamwe no gukora ubutabazi bw’ibanze.

Hagati aho Polisi iburira abantu babona ahabereye impanuka bakajya gucuza(kwiba) abakomeretse n’abapfuye, cyangwa abatangaza ku mbuga nkoranyambaga amashusho ateye ubwoba, ko bihanwa n’amategeko.

Ikindi, ngo umushoferi ukekwaho gukoresha ibiyobyabwenge, abamuzi basabwa kumutungira agatoki Polisi, kugira ngo ajyanwe kwa muganga gupimwa mbere yo kwemererwa kujyana ikinyabiziga mu muhanda.

Imbangukiragutabara zateguriwe kugera ahabera impanuka

Minisiteri y’Ubuzima(MINISANTE), ivuga ko hirya no hino mu Gihugu hari imbangukiragutabara(ambulances) 28 zateguriwe kugera byihuse ahantu habereye impanuka, zikaba zunganirwa n’izindi zigiye ziri kwa muganga mu bice bitandukanye by’Igihugu.

MINISANTE na Polisi bisaba abagera bwa mbere ahabereye impabuka kujya bihutira guhamara nimero zitishyurwa 113 ya Polisi cyangwa 912 ya ambulance.

Mike Ogbalu wa PAPSS na Dr Karusisi wa BK nyuma yo gusinya amasezerano

Iri koranabuhanga rimaze kugezwa muri banki 150 zo mu bihugu bya Afurika, rifasha umuntu ugura ibintu na serivisi mu kindi gihugu kitari icye, kwishyura mu mafaranga y’iwabo, ndetse n’uwakira ayo mafaranga akayakira mu ifaranga ry’iwabo.

Umuyobozi Mukuru wa Banki ya Kigali, Dr Diane Karusisi, yagize ati "Umuntu woherereje Amafaranga y’u Rwanda undi uri muri Ghana, amugeraho ari mu ma Cedi (ifaranga ry’icyo gihugu), ntabwo bizamusaba kubanza kuyavunjisha mu Madolari cyangwa mu Mayero, nta n’ubwo ayo mafaranga abanza guca muri banki yo muri Amerika cyangwa iy’i Burayi."

Dr Karusisi yakomeje agira ati "Ufata amafaranga yawe y’Amanyarwanda ukagura ibintu muri Nigeria cyangwa muri Kenya, na bo bakayakira mu ifaranga ry’iwabo, kandi mwabibonye ko byihuta", bitwara amasegonda, aho umuntu akoresha BK App cyangwa ’Internet Banking’.

Umuyobozi Mukuru wa PAPSS, Mike Ogbalu, avuga ko uretse kwihuta, iri hererekanya rihendutse kuko ’niba woherereje umuntu uri mu kindi gihugu Amadolari ya Amerika 200, bagukata atarenga Amadolari abiri."

Ogbalu avuga ko abacuruzi bajya kugura ibintu na serivisi mu bindi bihugu bya Afurika, ubu baretse kwikorera ibifurumba by’amafaranga no kugenda bavunjisha muri buri gihugu bagezemo, bikaba bibahaye akanya ko gushyira umutima ku bucuruzi aho guhangayikishwa n’umutekano w’amafaranga yabo.

Banki ya Kigali ivuga ko ubu bufatanye buyihesheje kuba iya mbere mu burasirazuba bwa Afurika ikoresheje ubu buryo bwa PAPSS, bituma abakiriya babasha kohereza no kwakira amafaranga mu buryo bwihuse, bwizewe, kandi buhendutse ku mugabane wose.

Ubu bufatanye buje mu rwego rwo gushyira mu bikorwa intego z’Isoko rusange rya Afurika (AfCFTA), rigamije gukuraho imbogamizi mu rujya n’uruza rw’abantu n’ibintu kuri uyu mugabane.

Muri make, dore inyungu ku bakiriya ba za banki ziri muri PAPSS

Kwishyurana ako kanya – Amafaranga ahita agera ku muntu ako kanya, bikagirira akamaro abacuruzi n’abantu ku giti cyabo, mu gihe baba barimo kwishyurana cyangwa gufashanya mu bundi buryo.

Igabanuka ry’ikiguzi – Kohereza amafaranga bihendutse kurusha uburyo busanzwe bwo kwishyurana ku rwego mpuzamahanga.

Ubucuruzi butagira imbogamizi – Abantu bashobora kohereza no kwakira amafaranga mu ifaranga ry’iwabo.

Umutekano w’amafaranga mu gihe cyo kwishyurana – Umuntu yemeza amakuru y’uwakira amafaranga mbere yo kuyohereza, bikagabanya amakosa no kwibeshya ku wayohererejwe.

Kohereza amafaranga mu madevize atandukanye – Uretse amafaranga y’ibihugu byo muri Afurika, PAPSS inemera kwishyurana mu Madolari ya Amerika (USD).

Banki ya Kigali ivuga ko iyi gahunda iyihesha kuba ku isonga mu gutanga ibisubizo by’imari bishingiye ku ikoranabuhanga, ndetse ikazamura uruhare rw’u Rwanda mu mpinduka z’ubukungu rugira muri Afurika.

PAPSS na yo ivuga ko kuba imaze gutangira gukorera mu bihugu 14 bya Afurika, kandi bikaba bikomeje kwiyongera, ari intambwe ikomeye mu gufasha abatuye uyu mugabane kwihuriza mu ikoranabuhanga ry’imari bibonamo bose.

Reba ibindi muri iyi video:

Perezida Kagame muri IFF2025

Ni Ihuriro rivugwaho kuba ryitabiriwe n’abanyemari bo hirya no hino ku Isi, cyane cyane Abanya-Singapore hamwe n’abayobozi bashinzwe gufata ibyemezo bagera kuri 2,500, barimo abiyiziye mu Rwanda n’abandi baryitabiriye hakoreshejwe Ikoranabuhanga.

Iri huriro kandi ryashyizeho umushinga witwa ‘The Next-Gen Digital Payments Infrastructure Project’, uzayoborwa na Banki Nkuru z’u Rwanda na Ghana, ukaba ushinzwe kwiga uburyo ihererekanya ry’amafaranga hagati y’abatuye Umugabane wa Afurika ryakoroha, kandi rikaba rigomba kuba rihendutse.

Perezida Kagame ashimira iryo huriro riteraniye i Kigali ku nshuro ya kabiri, avuga ko ryahinduye u Rwanda igicumbi cy’ishoramari rishingiye ku ikoranabuhanga, nyuma y’ibikorwa remezo n’ubumenyi mu gukoresha ikoranabuhanga, bimaze kugerwaho mu Rwanda.

Perezida Kagame avuga ko ku mugabane wa Afurika muri rusange, hamwe no mu Rwanda by’umwihariko, imishinga y’ikoranabuhanga mu by’imari, yifashisha cyane Mobile Money, izaba yinjiriza abaturage Amadolari ya Amerika asaga Miliyari 40 mu mwaka wa 2028.

Umukuru w’Igihugu ariko agasaba abashoramari b’imishinga y’ikoranabuhanga mu by’imari, kwita ku byiciro by’abaturage bakiri inyuma mu iterambere, cyane cyane abagore bakora ubucuruzi buciriritse.

Yagize ati "Ubudaheza mu bijyanye n’imari buracyarimo imbogamizi kuko hari abayikeneye, cyane cyane abagore bakora ubucuruzi butanditse. Dukeneye kubona iyi nama nk’ubutumire bwo gushyira amikoro yacu ahakenewe, ndetse no gufashanya kuri buri wese."

Avuga ko bitewe n’uko urubyiruko rwo kuri uyu mugabane rumaze kugira ubumenyi mu ikoranabuhanga, ndetse n’umubare w’ibigo by’ikoranabuhanga mu by’imari ukaba umaze kwikuba gatatu, Afurika ngo ishobora guhatana n’indi migabane igize Isi mu guhanga udushya kandi ikagera ku ntsinzi.

Ihuriro rya IFF (Inclusive Fintech Forum 2025) ryitabiriwe n’abanyemari barimo Umunya-Zambia, Evelyn Kaingu, ufite ikigo cy’imari cyitwa Lupiya gitera inkunga imishinga mito, cyane cyane iy’abagore, kugera ku gishoro cy’Amadolari ya Amerika 500(akaba asaga Amafaranga y’u Rwanda ibihumbi 700).

Kaingu yizeza ko iki kigo cye gifite imari shingiro ingana na Miliyoni 50 z’Amadolari ya Amerika, kigiye kwagurira amarembo mu Rwanda, aho abagore bafite imishinga mito n’iciriritse bazajya bahabwamo 40% y’igishoro cyatanzwe.

Ku ruhande rw’u Rwanda na ho, amabanki manini nka BK, I&M na BPR Bank, akangurira abakiriya bayo kwitabira gufata inguzanyo kandi batagombye kujya ku cyicaro cyangwa ku ishami rya banki, kuko hari ikoranabuhanga (app) bifashisha bagahita babona ayo mafaranga.

Ikigega cy’Ingwate BDF, na cyo giheruka gutangaza ko hari Amafaranga y’u Rwanda arenga Miliyari 30Frw yahawe imirenge SACCO, kugira ngo abakiriya bayo hirya no hino mu Gihugu bafite imishinga mito n’iciriritse babone igishoro cyabateza imbere.

Babitangaje mu muhango wo guha impamyabumenyi ku nshuro ya 8 abanyeshuri 100 barangije kwiga Ubuforomo n’Ububyaza mu Ishuri Rikuru rya Kiliziya Gatolika ryigisha Ubuvuzi ry’i Ruli mu Karere ka Gakenke (Ruli Higher Institute of Health - RHIH), ku wa Gatanu tariki 21 Gashyantare 2025.

Uwitwa Mushimiyimana Claudine, umubyeyi wa Kwihangana Christian, avuga ko yatanze amafaranga arenga miliyoni 9 kuri uwo mwana we urangije kwiga Ubuforomo muri RHIH, bikaba byaramusabye kugurisha inzu (yaguzwe amafaranga miliyoni 12).

Na none umubyeyi wa Mfurayase Honoré, na we urangije kwiga muri RHIH, uvuga ko mu myaka itatu umwana we amaze yiga ubuforomo muri icyo kigo, yamutanzeho amafaranga arenga miliyoni 8Frw.

Sindikubwabo Théogène(uwo mubyeyi wa Mfurayase) avuga ko kugira ngo yishyurire umuhungu we mu Ishuri ry’Ubuforomo n’Ububyaza, byamusabye kugurisha inka nkuru 3 n’inyana nto 5, hamwe n’ishyamba ritewe ku buso bungana na hegitare imwe.

Sindikubwabo waje i Ruli mu itangwa ry’impamyabumenyi avuye mu Karere Muhanga, Umurenge wa Kiyumba, Akagari ka Ruhina, avuga ko ku byangombwa bisabwa n’ishuri bifite agaciro ka miliyoni imwe n’ibihumbi 650Frw ku mwaka, arenzaho andi mafaranga arenga ibihumbi 500 y’itike, imyambaro, ayo kwivuza n’ayo kwimenyereza umwuga k’umunyeshuri.

Sindikubwabo agira ati "Ayo mafaranga ni menshi pe, batagize icyo bakora, abanyeshuri biga ubuforomo n’ububyaza bahagije ntabo babona mu Rwanda."

Mfurayase Honoré na we yakomeje yunganira umubyeyi we, avuga ko n’ubwo bishyurirwa amafaranga menshi y’ishuri, iyo barangije kwiga bakajya mu kazi, umushahara bahembwa ungana n’ibihumbi 200Frw ngo ni muto cyane.

Mfurayase agira ati "Kugira ngo ngaruze miliyoni hafi 10Frw umubyeyi yantanzeho bizansaba gukora nk’imyaka 10, bisaba ko bareba ikiguzi umuntu yatanze bakareba no ku isoko ry’umurimo, kuko ubaye warasabye umwenda ntabwo washobora kuwishyura."

Abaforomo n’ababyaza bavuga kandi ko umubare muto wabo mu kazi utuma bavunika cyane, kuko badafite uburyo basimburana ngo bagire igihe cyo kuruhuka gihagije.

Sendika y’Abaforomo n’Ababyaza mu Rwanda ivuga ko abanyamuryango bayo ari bake, aho batarenga ibihumbi 13 mu Gihugu mu gihe hakenewe byibura abagera ku bihumbi 20.

Gahunda yo gukuba kane umubare w’abiga ubuforomo n’ububyaza

Minisiteri y’Ubuzima(MINISANTE) iheruka kubona inkunga ingana n’amafaranga y’u Rwanda miliyari 3 na miliyoni 850 yo gufasha Leta gukuba kane mu myaka ine(4x4) umubare w’abiga Ubuforomo n’Ububyaza, akaba yaratanzwe n’Urwego rw’Ubwiteganyirize mu Rwanda (RSSB) mu kwezi k’Ugushyingo 2024.

Icyo gihe Umunyamabanga wa Leta muri MINISANTE, Dr Yvan Butera, yavuze ko ubusanzwe abaforomo n’ababyaza barangizaga kwiga buri mwaka batarengaga 100, ariko uruhare rwa RSSB ngo ruzatuma hasohoka abagera kuri 600 buri mwaka.

Cardinal Kambanda ashima Abaforomo

Mu gutanga impamyabumenyi ku barangije kwiga muri RHIH, Arikiyepiskopi wa Kigali, Antoine Cardinal Kambanda, ashimira uruhare rw’abaforomo n’ababyaza mu kuramira ubuzima bw’abantu, kuko ngo na Papa Francisco kuri ubu urembeye mu bitaro by’i Roma byitwa Gemelli, ari mu maboko y’abaforomo n’abaforomokazi.

Cardinal Kambanda yagize ati "Papa wacu Francisco murabizi ko ari mu bitaro arwaye, ari mu maboko y’abaforomo n’abaforomokazi, kandi twese abakuru n’abato, abaciye bugufi n’abanyacyubahiro, iyo ubuzima bwahungabanye tuba turi mu maboko yanyu, (nyamara) abaforomo n’ababyaza baracyari bake kandi bakenewe, akazi karahari."

Dr. Nicodeme Hakizimana aganiriza abanyamakuru barengera ibidukikije ku bujyanye no kurengera abafite ubumuga bw’uruhu

Umubyeyi ufite akanyangingo (gene) gatera ubumuga bw’uruhu, wenda kitwa (a) ntoya kagira intege nke, hamwe n’agafite imbaraga kadatera ubumuga bw’uruhu (kitwa A), aba yirabura kuko ya A iganza a, ariko atazi ko ashobora kubyara umwana ufite ubumuga bw’uruhu mu gihe ahuye n’umeze nka we.

Ubusanzwe, buri muntu agira utunyangingo tubiri (AA), kandi nta na kamwe gashobora gutera ubumuga bw’uruhu. Icyakora hari n’ugira (Aa) bivuze ko afite akanyangingo gakomeye katatera ubumuga bw’uruhu n’akoroshye gashobora gutera ubumuga.

Iyo umugabo n’umugore bombi bafite ubumuga bw’uruhu(aa), bisobanura ko abana bose bazabyara bazaba bafite ubumuga bw’uruhu(aa), kuko umwe yatanze (a) n’undi atanga (a), ariko iyo umwe afite (AA) undi akagira(aa), nta mwana n’umwe ufite ubumuga bw’uruhu bazabyara kuko bose bazaba bafite (Aa).

Ni mu gihe ababyeyi bombi iyo bafite (Aa) n’ubwo birabura nta n’umwe muri bo ufite ubumuga bw’uruhu, (A) iganza (a), bashobora kubyara abana bafite ubumuga bw’uruhu(aa) iyo umwe yatanze (a)n’undi agatanga(a), ariko hakaba hashobora kuvuka n’abadafite ubumuga iyo umwe muri bo cyangwa bombi batanze ya A.

Umuyobozi Nshingwabikorwa wa OIPPA (Organisation for Integration and Promotion of People with Albinism), Dr Nicodème Hakizimana, avuga ko hari igihe ababyeyi bagira utunyangingo dutera ubumuga bw’uruhu batabizi, kandi ngo kudutanga ngo nta kintu umuntu yakora kugira ngo abyirinde.

Dr Hakizimana avuga ko ibindi byago Abanyarwanda n’Abanyafurika muri rusange bafite, ari uko nta Laboratwari ipima utunyangingo tw’abafite ubumuga bw’uruhu rwera(Albinism) ibarizwa kuri uyu mugabane.

Icyakora na none abafite utunyangingo dutera ubumuga bw’uruhu ngo ni bake cyane, kuko Ibarura Rusange ry’abaturage n’imiturire ryo muri 2022, rivuga ko abafite ubumuga bw’uruhu mu Rwanda bageraga kuri 1,860 muri miliyoni zirenga 13 z’abatuye iki Gihugu (n’ubwo habaruwe abafite ubwo bumuga barengeje imyaka 5 y’amavuko).

Abafata umuhanda Kigali-Huye Nyamagabe, bashobora kwibwira ko babonye byose iyo banyuze mu mujyi wubatsemo ibiro by’Akarere ka Nyamagabe, umurenge wa Gasaka.

Ntabwo ari ko bimeze kuko hirya y’umuhanda wa kaburimbo, uwagambiriye gusura akarere ka Nyamagabe agasubira I Kigali asobanukiwe neza iki gice cy’icyaro, aba agifite urugendo rurerure, rushobora no kumusaba kurara, akagaruka mu gitondo yashize amavunane n’urukumbuzi.

Umwe muri iyo mirenge, ni Mugano, umurenge ugabana n’akarere ka Karongi mu ntara y’Uburengerazuba.

Kujya I Mugano, iyo ugeze Nyamagabe waba ufite amahitamo abiri; kwambukiranya umurenge wa Gasaka, ukajya muri Kibumbwe, ugakomereza I Kaduha mbere yo gukikira umugezi wa Nzavu ugana mu Kigarama, mu kabande k’imisozi ya Sovu.

Haramutse hari ikibazo, wava Gasaka ugakomeza mu Cyanika, hanyuma ugakomereza I Musange, ugaterera ujya I Kaduha, mbere yo gukatira I Mugano.

Icyakora, muri iyi minsi ngo izo nzira zose zaba zidashoboka, kubera iyi mihanda yombi idakoze, aho abagenzi bafite imidoka nini bagomba kuzigura, bakava Gasaka bagakomereza I Tare, maze bagakatira mu Gasarenda Gasarenda, bagaca mu murenge wa Kamegeri, Kibirizi, Uwinkingi, Buruhukiro, Musebeya, Mushubi na Kaduha, ikabona kugera i Mugano. Ibi ngo biri gutuma urugendo rufata amasaha atanu kuva Nyamagabe ujya Mugano.

Emmanuel Dushimimana w’imyaka 30 y’amavuko, utuye mu mudugudu wa Kigarama, Akagari ka Sovu, Umurenge wa Mugano mu Karere ka Nyamagabe, ni umwe mu bemeza ko bataragera I Nyamagabe ku cyicaro cy’akarere, ku buryo n’umuhanda wa Kaburimbo ngo awumva mu makuru.

Umusaza baturanye w’imyaka 66 y’amavuko, Nambajimana Alfonse, avuga ko aheruka i Nyamagabe mu myaka irenga mirongo itatu. Icyo gihe hari hakitwa Gikongoro.

Imiterere ya Mugano ituma abaturage baho basigara mu iterambere. Dushimiyimana Alphonse w’imyaka 66, iyo umubajije amaradiyo akunda, yongeramo n’atakibaho.

Yagize ati "Hano twumva Radio Rwanda, KT Radio, Muhabura, iriya Radio y’i Butare(Salus) hamwe na Radio Mariya, ariko cyane dukunda kumva Radio nkuru, ari yo Radio Rwanda."

Akoyiremeye Jacqueline w’imyaka 40 y’amavuko avuga ko kuba umuhanda ujya i Mugano utarakorwa, bibateza igihombo cyo kugera mu Mujyi wa Nyamagabe bahenzwe, akaba ari byo ngo bituma abantu baho babaho nta terambere bazi.

Akoyiremeye agira ati "Kugira ngo uve hano ugere ku Karere kacu i Nyamagabe bisaba gutega moto y’amafaranga ibihumbi 10Frw, kugaruka na bwo bikaba andi mafaranga ibihumbi 10Frw. Umwana watsindiye kujya kwiga i Nyamagabe bisaba kumutegera moto 2 zica ibihumbi 20Frw kugenda n’ibindi bihumbi 20Frw kugaruka. Mwadukorera ubuvugizi bakadukorera umuhanda, bakaduha n’imodoka."

Mu ngaruka zo kuba i Mugano nta modoka itwara abagenzi igerayo kubera umuhanda mubi, harimo kuba nta bikorwa by’ishoramari ry’abikorera bagira, bahereye ku bigo by’imari, kuko uretse Umurenge SACCO ngo nta yindi banki bazi.

Abaturage b’i Mugano bavuga ko kuba kure y’ibiro by’Akarere n’izindi nzego nkuru, bituma birinda ibibazo byabateza kujya gusaba serivisi aharenze ubushobozi bw’Akagari, Umurenge, Ikigo Nderabuzima cyangwa Urukiko rw’Ibanze, kuko ari byo bibegereye.

Umunyamabanga Nshingwabikorwa w’Umurenge wa Mugano, Mukama Janvier, avuga ko umuhanda ugerayo ushobora kuzatangira gukorwa mu mwaka w’ingengo y’Imari wa 2025/2026.

Mukama yagize ati "Imbogamizi ya mbere tugira ni umuhanda, uramutse ubonetse ibindi byose nta kibazo. Umuyobozi wa LODA(ikigega gutera inkunga imishinga y’inzego z’ibanze) yarahasuye, hatagize igihinduka mu kwezi kwa Nyakanga k’uyu mwaka wa 2025 uzajya mu ngengo y’imari yo gukorwa."

Mukama avuga ko nta serivisi n’imwe umuturage w’i Mugano ashobora kuburira mu nzego z’ibanze zimwegereye, ngo bitume yirushya ajya ku Karere n’ahandi.

Bemeza ko amatungo magufi yabakuye mu bukene byihuse

Iryitangiye Dahlia w’imyaka 68 y’amavuko, avuga ko afite imbaraga nyinshi zitangana n’imyaka afite, kuko ngo arya neza ifunguro ryuzuye ririmo imboga yahinze mu rugo iwe, ibishyimbo n’umuceri yeza mu masambu ye, abikesheje ifumbire n’amafaranga akura mu ngurube imwe yahawe mu kwezi k’Ukuboza 2023.

Iryitangiye utuye mu mudugudu wa Rwintare, Akagari ka Mbogo, Umurenge wa Gikonko mu Karere ka Gisagara, avuga ko iyo ngurube yabyaye ibibwana 8 ubwa mbere, ubwa kabiri ibyara 12 n’ubwa gatatu ibyara 12, akuramo ibibwana bibiri abiha umuturanyi we mu rwego rwo kwitura abamugabiye, nk’uko umushinga ubiteganya.

Iryitangiye agurisha buri kibwana cy’ingurube amafaranga atari munsi y’ibihumbi 25Frw, akaba abona nibura ibihumbi 250Frw buri mezi atatu, ayakuye kuri iyo ngurube yahawe n’umushinga PRISM, atabariyemo ayo avana mu ifumbire agurisha n’iyo afumbiza imirima ye.

Iryitangiye agira ati "Mbere yaho nari umihinzi usanzwe, nakorora akagurube ngahita nkagurisha, ariko kugeza ubu aho nezaga ibiro 30 by’ibishyimbo harimo kwera ibiro bitari munsi ya 100."

Iryitangiye avuga ko mu mwaka umwe amaze yoroye iyo ngurube, yashyize isima mu nzu anavugurura isakaro ryayo, akaba yarashyizeho amabati mashyashya.

Amasomo yitwa GALS atuma buzuzanya bakagera ku bukire

Umuturanyi we hirya yaho mu Mudugudu wa Rwatano, Ntambara Jean Bosco w’imyaka 30 y’amavuko, ufite umugore n’abana 2, avuga ko urugo rwe rwahawe ingurube 2 muri Werurwe 2023.

Ashingiye ku masomo y’ubuhinzi n’ubworozi, hamwe n’uburyo bwo kwiteza imbere uhereye kuri bike we n’umugore bigishijwe, bagurishije ibibwana bya za ngurube havamo umushinga wo kwerekana filime utanga nibura 1,500Frw ku munsi, ubucuruzi bwa avoka hamwe no guhinga kinyamwuga, aho ngo yeza toni y’ibigori mu mirima yajyaga ivamo umusaruro utarenga ibiro 300kg kubera kudafumbirwa.

Manishimwe Alice w’imyaka 29 y’amavuko hamwe n’umugabo we Nteziryayo w’imyaka 30, batuye mu mudugudu wa Cyivugiza, Akagari ka Gabiro, Umurenge wa Gishubi w’Akarere ka Gisagara, bakaba barahawe inkoko 10 muri Kanama 2024, bigishwa n’amasomo arimo uburinganire no kwiha icyerekezo, yitwa Gender Action Learning System(GALS).

Kugeza ubu izo nkoko ngo zimaze kubahesha isambu iguzwe amafaranga arenga miliyoni imwe, inka imwe, ingurube 2, ihene 2 hamwe n’inkoko 15, ndetse n’ubuhinzi mu mirima yeramo ibiro(kg) 300 by’ibishyimbo na 400kg by’ibigori, nyamara ngo barezaga ibiro bitarenga 70(kg) mbere yo kubona ifumbire ituruka ku matungo bahawe.

Manishimwe avuga ko bahawe imishwi 6 y’amasake n’iy’inkokokazi 4, zimaze gukura bagurishamo amasake 3 (ibihumbi 15Frw imwe imwe), bagura impfizi y’ingurube ikuze ikajya ibangurira iz’abaturanyi babo, zabyara bakabitura ikibwana buri wese, ku buryo bamaze guhabwa ibibwana 35 by’ingurube.

Ingurube ya Iryitangiye yaramuzamuye kubera kororoka vuba

Buri kibwana bakigurisha amafaranga atari munsi y’ibihumbi 30Frw, akaba ari ho bavanye amafaranga yo kugura umurima, hamwe n’inka bakuye mu gukomeza korora neza za nkoko. Ihene zo bazigabiwe na PRISM.

Manishimwe avuga ko ubu bagiye kubaka uruzitiro rw’inzu yabo hamwe no gucuruza imyaka ibarirwa mu matoni beza, kubera gufumbiza imborera iva ku matungo.

Uyu mushinga w’inkoko, bitewe n’umusaruro utanga kandi mu gihe gito, byatumye abaturage 39 bo mudugudu wa Akasemabondi, Akagari ka Nyaruteja, Umurenge wa Nyanza mu Karere ka Gisagara, bishyira hamwe bubaka ikiraro cy’inkoko bashyiramo imishwi 450, kugira ngo ubwo bworozi bukomeze gukorwa mu buryo burambye.

Girinka y’abafite amikoro make

Nyirahabimana Jeannine wo muri iryo tsinda ry’i Nyaruteja, avuga ko umushinga
wa PRISM(Partnership for Resilient and Inclusive Small Livestock Markets)
utaraza ngo ubaheshe amagi yo kurwanya imirire mibi, muri ako gace hatari habuze abana 30 mu 100 barwaye bwaki.

Umufashamyumvire wa PRISM mu Murenge wa Gikonko, Kayitesi Marie Grâce, avuga ko amatungo magufi ari guhabwa abaturage arusha inka kunguka, ashingiye k’uwitwa Narayisabye Sarah wahawe ingurube imwe ikabyara izo agurisha amafaranga angana na miliyoni imwe mu gihe kitarenze amezi atandatu yari ayimaranye.

Kayitesi agira ati "Aya matungo magufi yo uyorora mu gihe gito, ku butaka buto, ntasaba guhingira ubwatsi cyane ko abakene nta masambu baba bafite, inka ntabwo yororoka vuba, ntabwo wahabwa inka uragira amezi atandatu ngo izavemo amafaranga ageze kuri miliyoni."

Bigishwa guhinga imboga no gutegura indyo yuzuye

Uyu mushinga wa PRISM ushyirwa mu bikorwa n’Ikigo Gishinzwe Iterambere ry’Ubuhinzi n’Ubworozi mu Rwanda (RAB), ukaba utanga inkoko, ihene, intama n’ingurube, ndetse abahawe ayo matungo bakaba bafashwa kubaka ibiraro, uturima tw’igikoni n’ibigega by’amazi.

PRISM yashinzwe na MINAGRI ifatanyije n’Ikigega Mpuzamahanga giteza imbere Ubuhinzi n’Ubworozi, IFAD, hamwe n’abandi bafatanyabikorwa, mu mwaka wa 2021, hagamijwe guteza imbere imibereho myiza mu miryango ifite amikoro make.

Ibarura rusange rya Gatanu ryakozwe n’Ikigo cy’Ibarurishamibare(NISR) muri 2022, ryagaragaje ko kugeza icyo gihe mu Rwanda hari ingo zifite amikoro make zigera kuri 205,924.

Umuyobozi wungirije w’Akarere ka Gisagara ushinzwe Imibereho myiza, Denise Dusabe, avuga ko mu baturage 10,993 b’amikoro make bari muri ako Karere, ari ho hazatoranywamo abahabwa ayo matungo magufi kabone n’ubwo PRISM izaba yararangije imirimo yayo.

Umuhuzabikorwa wa PRISM, Nshokeyinka Joseph, avuga ko uyu mushinga uzamara imyaka itanu kuva muri 2021, uzasoza ufashije imiryango 26,355 kwikura mu bukene hamwe no kurwanya imirire mibi.

Nyuma y’imyaka ine imaze, PRISM yatanze inkoko ku miryango 15,984, harimo n’abahawe ihene ebyiri ebyiri cyangwa intama, ndetse n’imiryango 6,651 yahawe ingurube, ariko bitewe n’uko aborojwe mbere bagiye bitura bagenzi babo, ubu imiryango irenga ibihumbi 28 imaze kubona amatungo magufi.

Nshokeyinka agira ati "Bamwe bamaze kurenza inkoko 10 bahawe, aho bageze ku nkoko 100, hari n’abafite 200 cyangwa 300, wabara n’amagi babona buri cyumweru ugasanga harimo amafaranga menshi. Harimo n’abamaze kugera ku bundi bworozi bw’inka cyangwa se abashaka imirima bahingaho imboga imbuto n’ibindi."

Batangiye kwishyira hamwe kugira ngo bakore umushinga urambye

Nshokeyinka avuga ko abo baturage bose bakorana na PRISM nta kibazo cy’imirire mibi bagifite, ndetse ko abagera kuri 13% biyongereye ku bafite radio, abakoresha telefone biyongereyeho hafi 20%, abafite intebe mu rugo biyongereyeho 15%, ndetse n’abaguze ibitanda n’imifariso byo kuryamaho.

Aho uyu mushinga PRISM ukorera mu turere 15 two mu Majyepfo, Iburengerazuba n’Amajyaruguru, hanubatswe amavuriro mato n’amasoko by’amatungo, ndetse n’amabagiro 10 y’ingurube.

Umusaruro wariyongereye kubera ifumbire ikomoka kuri ayo matungo

Ntibavuga rumwe ku myambarire y’ab’ubu

Mu bice bihuriramo abantu benshi by’Umujyi wa Kigali, hagaragara abafite imyambarire itandukanye bitewe ahanini n’ikigero cy’imyaka buri muntu agezemo, idini asengeramo cyangwa imico avana mu miryango yabayemo.

Abatikwiza mu myambarire

Umucuruzi w’imyambaro mu Mujyi wa Kigali, ahitwa kwa Rubangura, avuga ko guhisha ibice by’umubiri byose bitakigezweho kuko ngo ari ibya kera, bigomba guharirwa abakuze.

Uyu mukobwa uri mu kigero cy’imyaka 30, yari yambaye ipantaro ya ‘Jeans’ y’umutuku imufashe, yayitebejemo isengeri y’umweru izamuka igahisha imoko z’amabere gusa, igice cyo hejuru mu gituza no mu bitugu nta kintu yambaye.

Agira ati "Abakiri bato twumva ko ibyo kwambara tukikwiza ari iby’isi ya kera, ariko ab’ubu zavuyeho(isoni), ni cyo gihe tugezemo ariko akenshi bituruka ku byo tubonana abanyamahanga basura u Rwanda."

Uwitwa Muhorakeye na we warimo gucuruza imyenda hafi aho, avuga ko kugaragaza ingingo zimwe na zimwe ku bagore n’abakobwa biterwa no gushaka kureshya abagabo n’abahungu kugira ngo babarangarire, bibaviremo kubifuza no kubashakaho ubushuti.

Umudozi w’imyenda witwa Mutoni we yari yambaye agapira k’umukara gahisha ibice byo hasi by’amabere, hejuru mu gatuza nta kintu yambaye, hamwe n’ijipo isa n’icyatsi kibisi ndende inyuma, ariko imbere ikagira icyo bita ‘pasura’ igaragaza ikibero cyose cy’ukuguru kw’ibumoso.

Mutoni avuga ko yambara imyenda y’uburyo bwose bitewe n’uko aba arimo kumurikira abakiriya be imideri igezweho, bashobora kuba bakwifuza kugura.

Mutoni uri mu kigero cy’imyaka 25-30 y’amavuko agira ati “N’ubwo hari abantu bashobora kumbona nambaye gutya bakabifata nabi, akenshi hari igihe biduha abakiriya, araza akambwira ati ‘iyi style’ ndayishaka.”

Abambara bakikwiza

Umubyeyi witwa Uwimbabazi Agnès wari wambaye ijipo ndende y’igitenge hamwe n’umupira uhisha amaboko, yanateze igitambaro mu mutwe, avuga ko umukobwa/umugore wambaye ibigera hasi kandi agakingiriza umubiri we ahereye hejuru mu gituza, biba bimubereye kandi bidashobora kumukoza isoni.

Uwimbabazi w’imyaka 51 y’amavuko agira ati "Biragatsindwa kubona umuntu w’umubyeyi wiyubashye, ari kumwe n’abuzukuru, arebwa n’abakwe n’abakazana, ariko ukabona ibibero biri hanze!"

Uwimbabazi avuga ko abafite amadini abasaba kwambara bakikwiza bakwiye kurinda uwo muco w’idini ryabo, ariko n’Abanyarwanda muri rusange bakaba bagomba kurinda umuco wabo ugizwe n’indangagaciro zo kwiyubaha.

Undi mubyeyi witwa Annonciate Mukamusoni w’imyaka 60 y’amavuko, wari wambaye ikanzu isa n’icyatsi kibisi irekuye kandi ihishe umubiri we kuva mu ijosi kugera hasi ku maguru, hafi y’ubugombambari, avuga ko imyambarire nk’iyo yakuze ari yo abonana ababyeyi, bituma na we ayikunda.

Yagize ati “Nkatwe ababyeyi iyo tubonye abana bambaye ubusa biratubabaza, biradukomeretsa kandi nta cyo kubikoraho twabona, baratubwira ngo ni igihe cyabo. Biriya bintu ntabwo ari byiza, ntabwo ari byo bituma ubona umugabo kuko uwagushaka kubera kwambara kuriya na we nta cyo aba ari cyo.”

Hategekimana Vincent w’imyaka 48 y’amavuko, we avuga ko hari abakobwa cyangwa abagore abona bambaye amajipo/amakanzu magufi cyane ku buryo ‘utamusaba kunama ngo atore ikintu gitakaye hasi ngo abyemere, bitewe n’uko yaba yishyize hanze’.

Hategekimana avuga ko hari n’abasore cyangwa abagabo abona bambarira amapantaro hepfo y’ikibuno, aho baba bavuga ko ari ubusitari, nyamara ngo bihabanye n’umuco w’Abanyarwanda nk’uko wivuguruye kugeza ubu. Avuga ko kuba kera batambaraga ibikwiriye umubiri wose ngo byaterwaga n’uko nta myenda yari ihari kandi ari ikibazo rusange.

Hategekimana agira ati "Mfite umwana w’umusore ufite imyaka 20 y’amavuko, namubwiye ko umunsi yambariye ipantaro munsi y’ikibuno, atagomba kungerera mu rugo."

Icyifuzo cy’Umukuru w’Igihugu

Mu masengesho ngarukamwaka yo gusabira Igihugu yabaye ku Cyumweru tariki 19 Mutarama 2025, Perezida wa Repubulika, Paul Kagame, yavuze ko bidakwiriye kubona mu muryango nyarwanda habamo abantu bagenda biyambitse ubusa, kuko ngo bihabanye n’umuco.

Umwe wese ngo yambara bitewe n’ikimunyuze

Perezida Kagame yagize ati "Njya mbibona, nkurikirana ibintu no ku mbuga nkoranyambaga, abana bato bambara ubusa bakajya ku muhanda, uwambara ubusa se ararata iki twese tudafite, nta dini ribaho ryo kwambara ubusa, nta muryango ubaho wo kwambara ubusa!"

Ati "Ariko burya kwambara ubusa ntabwo ari bwa busa, burya bambaye ubusa no mu mutwe, ni ubusa buri mu mutwe ni cyo kibazo, ni ho bishingira. Mbwira rero ukuntu wakwemerera Umuryango nyarwanda kubaho gutyo! N’ubwo twicaye hano turi mu nzego zitandukanye, inshingano tuzaba twuzuza ni izihe, Abanyarwanda ni uko turera, ni uko turerwa!"

Umuyobozi wungirije wa GMO

Ubwo yarahiriraga gutangira inshingano ku wa Gatatu tariki 29 Mutarama 2025, Umugenzuzi Mukuru wungirije mu Rwego rushinzwe kugenzura iyubahirizwa ry’Uburinganire (GMO), Agnès Muhongerwa, yiyemeje kurwanya umuco wo kwambara ubusa mu Banyarwanda, kuko ngo ari uwo bakuye ahandi.

Muhongerwa avuga ko ikibazo cy’imyambarire giterwa n’imico itandukanye Abanyarwanda bakura hanze no ku banyamahanga basura u Rwanda, ariko ngo ntibikwiye kuba ari umuco w’Abanyarwanda.

Dusengiyumva Samuel yatorewe kuyobora FPR mu Mujyi wa Kigali

Akimara gutorwa, Dusengiyumva yabwiye itangazamakuru ko agiye gushyira imbaraga nyinshi mu gukangurira abaturage kwitabira kugira uruhare mu bibakorerwa, guteza imbere serivisi n’imibereho myiza ishingiye ku buzima, kwiga kw’abana hamwe no kwita ku muryango.

Yagize ati "Tuzagenda tugabanya ibijyanye n’ubwigunge ndetse n’ihungabana, kuko ubona ko na ryo rigenda riba ryinshi, ariko kandi abaturage bazagira uruhare mu gufata ibyemezo aho ibitekerezo byabo bigera mu nzego z’ibanze, ku buryo ari byo dushingiraho dukora akazi."

Dusengiyumva avuga ko Umujyi wa Kigali muri iyi myaka itanu iri imbere uzaba ufite ibyanya by’ubukerarugendo, imihanda myinshi n’inyubako zigezweho, ariko byose ngo bizaba ari iterambere ry’abatuye uyu Mujyi.

Biro Nyobozi irangije Manda y’imyaka 5 yari igizwe na Dusengiyumva Samuel usanzwe ari Perezida(Chairman) akaba na Mayor w’Umujyi wa Kigali, Zulfat Mukarubega wari Visi Perezida yasimbuwe na Nshimiyimana Haruna, wabonye amajwi 452 ahwanye na 77%.

Komite Nyobozi y’Umujyi wa Kigali yatowe iri kumwe n’umukambwe Tito Rutaremara

Dr Niyonsenga Jean De Dieu wari Umunyamabanga yasimbuwe na Kayitesi Marcelline, watowe n’abantu 493 bahwanye na 84.3% by’inteko itora.

Uretse Biro Nyobozi, hatowe n’abantu bane bayobora za Komisiyo zigizwe n’iy’Imiyoborere myiza, Imibereho myiza, Ubukungu n’Ubutabera, hamwe na batatu b’urubyiruko bari muri Komite Nyobozi y’uyu muryango FPR-Inkotanyi ku rwego rw’Umujyi wa Kigali.

Mu rubyiruko rugize Komite Nyobozi y’Umujyi wa Kigali hatowe Cyusa Dieudonné, Rucaca Pacifique na Ingabire Josepha.

Niyitanga Irené yatorewe kuyobora Komisiyo y’Ubukungu n’amajwi 492 ahwanye na 84.1% by’abatoye, Nkurunziza Samuel yatorewe kuyobora Komisiyo y’Imibereho myiza n’amajwi 412 ahwanye na 70.4%, Tetero Solange yatorewe kuyobora Komisiyo y’Imiyoborere myiza n’amajwi 433 ahwanye na 74%, mu gihe Me Nyamaswa Raphael yatorewe kuyobora Komisiyo y’Ubutabera n’amajwi 420 ahwanye na 72%.

Inteko itora y’Umujyi wa Kigali

Umukambwe Tito Rutaremara wahagarariye Umunyamabanga Mukuru wa FPR-Inkotanyi muri ayo matora, yasabye abayobozi n’abanyamuryango muri rusange kumenya gusubiza no gukemura ibibazo batarinze guhamagara ku buyobozi bukuru bw’umuryango, kuko ngo baba bazi imikorere yawo.

Yagize ati "Mugomba kuba aba kada(cadre), kuko umukada yumva ingengabitekerezo y’umuryango, ni we usesengura ibitekerezo, ni we ubyiga, ni we ubitanga, izo nyigisho zikwiye kuzabaho mu bayobozi bose kugira ngo bahinduke abakada, ntibibe bya bindi by’izina gusa."

Rutaremara wagize uruhare mu kubohora Igihugu, avuga ko kera bakiri ku rugamba, "washoboraga kumva umukada wa FPR uri muri Australia avuga kimwe n’uri muri Uganda, cyangwa uri muri Zaïre" n’ahandi kandi batabigiyeho inama, ariko ubu ikibazo cyose kibaye ngo buri wese ahamagara ku cyicaro cy’Umuryango i Rusororo, nyamara ibisubizo biri muri we.

Rutaremara avuga ko biteye isoni kubona Abanyamuryango ba FPR-Inkotanyi b’i Kigali habamo abarwaza abana bwaki, atari uko babuze ibyo kurya ahubwo ari uburangare bw’ababyeyi batamenya niba umukozi atari we wabyiririye.

Tito Rutaremara

Uretse mu Mujyi wa Kigali, hirya no hino mu Ntara na ho hiriwe amatora y’Abayobozi b’Umuryango FPR-Inkotanyi ku rwego rw’Intara, akaba yaje akurikirana n’amaze igihe akorwa yahereye ku rwego rw’umududu.

Dusengiyumva Samuel yongeye gutorerwa kuyobora Umuryango FPR-Inkotanyi ku rwego rw'Umujyi wa Kigali. Ari mu bari bagize Biro Nyobozi irangije Manda y'imyaka itanu aho yari asanzwe ari Perezida(Chairman) akaba n’Umuyobozi w'Umujyi wa Kigali. Yakoranaga na Zulfat Mukarubega wari… pic.twitter.com/mwpYYn7jbO

— Kigali Today (@kigalitoday) February 9, 2025

VIDEO - Morale yari ku rwego rwo hejuru mu matora ya Komite Nyobozi ya FPR-Inkotanyi ku rwego rw'Umujyi wa Kigali. Dusengiyumva Samuel ni we watorewe kuyobora Umuryango wa FPR Inkotanyi mu Mujyi wa Kigali.
Credit: Murenzi Abdallaziz pic.twitter.com/FinPJHlnTG

— Kigali Today (@kigalitoday) February 9, 2025

Minisiteri y’Uburezi yagiranye inama n’abafatanyabikorwa barimo Ishami ry’Umuryango w’Abibumbye ryita ku bana UNICEF na Leta y’u Bwongereza bafata ingamba zizafasha abana bafite ubumuga, abakobwa n’abandi bose batagira amikoro kubona uburezi bakeneye ntawuhejwe.

Ihuriro ry’aba bafatanyabikorwa ryabereye i Kigali kuri uyu wa 6 Gashyantare, ryagaragarijwemo ibibangamiye gahunda y’uburezi budaheza mu Rwanda, birimo kuba abana bafite ubumuga badafite uburyo buborohereza kwigana n’abandi, abakobwa bakennye bata ishuri bilababera impamvu yo gutwara inda zitateganyijwe, ubukene bukabije mu miryango n’ibindi.

Umuyobozi w’Ishami ry’Uburezi muri UNICEF, Charles Avelino, agira ati “Hari abana bafite ubumuga, hari abakobwa, ndetse n’abana batuye kure y’ibigo by’amashuri. Ku bana bafite ubumuga, ikibazo cya mbere ni uko badafite ubushobozi bubageza ku ishuri cyangwa ububafasha kwiga neza.”

Ati “Hari abana bafite ubumuga bwo kutumva, ku buryo iyo nta muntu ubitaho batajya ku ishuri, kandi n’iyo bagiyeyo ntibashobora kwiga neza kuko batumva ibyo mwarimu avuga.”

Umuyobozi ushinzwe Uburezi muri UNICEF, Charles Avelino

Avelino avuga ko n’abafite ubumuga bw’ingingo basigara inyuma kuko rimwe na rimwe batabasha kugera ku ishuri, bitewe n’uko ibigo bigamo bidafite uburyo buborohereza kugerayo,. Ahanini usanga batanafite imbago cyangwa utugare tw’abafite ubumuga (wheelchairs).

Avuga ko abarimu na bo badafite uburyo bwo kumenya amakuru ku bana bafite ubumuga mu mashuri yabo, cyane cyane abafite ibibazo byo kutumva.

Ikindi kibazo yakomeje agaragariza inzego zifatanya na UNICEF, ni uko ngo abana bafite ubumuga bwo kutumva bakeneye inkunga y’utwuma dufasha kumva(hearing aids) kuko ababyeyi babo badafite ubushobozi bwo kutubagurira.

Ati “Dufite gahunda yo kuganira uko ibi bikoresho byaboneka kugira ngo bigirire abana akamaro. Turi kuganira kuri izi ngamba zose, tukareba n’uburyo bwiza bwo gufasha abarimu kumenya aba bana ndetse no gutanga ubufasha bwihariye.”

UNICEF ivuga ko izakorana n’abafatanyabikorwa barimo FCDO, Cambridge Education, Ikigo cy’Igihugu Gishinzwe Uburezi (REB) na MINEDUC muri rusange, kugira ngo bakemure ibi bibazo.

Ikigo cy’Igihugu gishinzwe Ubuzima mu Rwanda, RBC, na cyo ngo kizafasha gukusanya amakuru ku bana bafite ubumuga n’ibikoresho bakeneye, kuko ari cyo gifite ibipimo bifasha kumenya ubwoko bw’ubumuga, inyunganirangingo n’insimburangingo zikenewe.

Avelino agira ati “Iyo tumaze kumenya ibi, hari gahunda (Program) itanga inkunga yo gushaka ibi bikoresho.”

Iyi nkunga yaba ije ikenewe cyane nk’uko bisobanurwa n’Umuyobozi w’Ikigo cy’Urubyiruko rufite ubumuga bwo kutumva no kutavuga (CJSM) kiri mu Murenge wa Ngoma, Akarere ka Huye, Frère (Fr) Pierre Claver Bizoza.

Fr. Bizoza avuga ko utwuma dufasha kumva duhenda kuko hari akagurwa amafaranga y’u Rwanda hafi miliyoni imwe, hakaba n’akagurwa Amayero ibihumbi bitandatu (akaba ahwanye n’Amafaranga y’u Rwanda hafi miliyoni 10.

Fr. Bizoza avuga ko bibasaba guhora bashaka abaterankunga b’abana bafite ubumuga bwo kutumva no kutavuga, kugira ngo ababyeyi babo basigarane inshingano zo kubishyurira amafaranga y’ishuri na yo ngo ataboroheye, kuko arenga ibihumbi 92Frw ku gihembwe.

Ambasaderi w’u Bwongereza mu Rwanda, Alison Torpe, avuga ko gahunda y’icyo gihugu iteza imbere uburezi budaheza mu Rwanda, yiswe Learning and Inclusion for Transformation (LIFT), izatuma buri mwana wese mu Rwanda abona uburezi bufite ireme, hatitawe ku miterere ye, igitsina cyangwa ubushobozi bwe.

Torpe agira ati “Icyerekezo cy’u Bwongereza ni ugufasha abakobwa benshi n’abana bakeneye ubufasha by’umwihariko, barimo abafite ubumuga n’abahuye n’ibibazo bishingiye ku makimbirane n’ingaruka z’imihindagurikire y’ikirere, kugira ngo bajye ku ishuri kandi babone ubumenyi bufatika.”

Minisitiri w’Uburezi, Joseph Nsengimana, na we avuga ko guhuriza hamwe kwa Leta y’u Rwanda, Ambasade y’u Bwongereza, UNICEF na Cambridge Education, ari intambwe ikomeye mu rugendo ruzatuma uburezi budaheza bubaho kuri buri mwana mu Rwanda.

Minisitiri Nsengimana avuga ko abana benshi, cyane cyane abakobwa, abafite ubumuga n’abakomoka mu miryango ikennye badashobora kubona amahirwe yo kwiga nk’abandi, bitewe n’ubushobozi buke, ibikorwaremezo bidahagije, ubuke bw’abarimu hamwe n’imibereho mibi ibangamira amashuri.

Minisitiri Nsengimana ati “Twese turi hano kuko twanze kwemera izo mbogamizi.”

Umwe mu bafite ubumuga bwo kutabona wabashije kwiga akarangiza Kaminuza, Mugisha Jacques, avuga ko gahunda y’uburezi budaheza yari isanzwe ivugwa mu magambo ariko itagaragara mu bikorwa, bitewe n’uko ngo hakiri umubare munini w’abafite ubumuga batiga.

Eugene Ubalijoro

BK Group Plc) ivuga ko ishimiye byimazeyo Reynolds ushoje inshingano ze, ngo zakozwe neza ndetse akaba yaragize uruhare rukomeye mu kwiyongera k’umusaruro w’iyi banki mu myaka ishize.

Itangazo rya BK Group Plc rigira riti "Komite Nyobozi hamwe n’abakozi bose ba banki bamwifurije ibyiza byinshi mu rugendo rwe rw’ejo hazaza."

Ishyirwaho rya Ubalijoro ryemejwe n’Inama y’Ubutegetsi ya BK Group Plc, umunyamigabane wa Banki ya Kigali.

Eugene Ubalijoro ni Umunyarwanda ufite ubunararibonye bw’imyaka irenga 30 mu kuyobora inganda zikora ibinyobwa, aho yatangiriye umwuga we mu Rwanda.

Muri iyo myaka, Ubalijoro yakoze muri Heineken International mu myanya itandukanye ijyanye n’ubucuruzi n’ubuyobozi muri Afurika yo munsi y’ubutayu bwa Sahara, i Burayi no muri Amerika.

Ubalijoro yanabaye Umuyobozi mu nama z’ubutegetsi za Heineken n’amasosiyete bafatanyije mu bihugu bya Sierra Leone, Panama, Bahamas, Saint Lucia, Costa Rica, Jamaica na Suriname.

Mu kwezi kwa Kanama 2020, Ubalijoro yagiye gukorera Molson Coors Beverage Company, uruganda rukomeye rw’ibinyobwa muri Amerika y’Amajyaruguru, rufite icyicaro i Chicago, aho yabaye umwe mu bayobozi b’ishami ry’Amerika(USA) nka Visi Perezida w’akarere k’Uburasirazuba, akorera i Dallas, Texas.

Yabaye kandi Umuyobozi w’Inama y’Ubutegetsi ya Revolver Brewery, ishami rya Molson Coors Beverage Company rikorera i Granbury muri Texas.

Ku itariki ya 1 Mata 2024, Eugene Ubalijoro yasezeye ku mirimo ye mu nganda z’ibinyobwa, ahitamo kwibanda ku kuyobora inama z’ubutegetsi zitandukanye ku rwego mpuzamahanga hamwe no kujya yitabira imikino mu bihugu by’u Rwanda no mu Bufaransa.

Eugène Ubalijoro afite impamyabumenyi y’icyiciro cya Kabiri cya Kaminuza mu Bucuruzi (Bachelor of Science in Business Administration) yakuye i Georgetown Washington DC muri Amerika mu mwaka wa 1986, hamwe n’impamyabumenyi y’icyiciro cya gatatu cya Kaminuza (MBA) yavanye muri Kaminuza ya Sherbrooke muri Canada mu 1989.

Barahugurwa ku kibazo cy’ubuzima bwo mumutwe mu Karere k’Ibiyaga Bigari

ICGLR na Minisiteri y’Ububanyi n’Amahanga y’u Rwanda (MINAFFET) barahugura inzego za Leta, imiryango itari iya Leta hamwe n’ishingiye ku kwemera, aho bazamara iminsi ine bahugurirwa i Kigali mu Rwanda, kuva ku wa Kabiri tariki 04 Gashyantare 2025, biga ku ngamba zabafasha gukemura amakimbirane mu miryango, aturuka ahanini ku ntambara abantu baba baranyuzemo.

ICGLR ivuga ko mu bihugu bya Uganda, u Rwanda, u Burundi na Repubulika iharanira Demokarasi ya Congo(DRC), aho izajyana aya mahugurwa muri uku kwezi kwa Gashyantare 2025, hari umubare munini w’abaturage bafite ihungabana ryakomotse ku bihe by’intambara banyuzemo, bikaba byaba impamvu y’ihohotera rishingiye ku gitsina n’amakimbirane.

Impuguke ya ICGLR-RTF, Dora Byamukama wabaye Umudepite muri Uganda, avuga ko abakozi b’inzego z’ubuvuzi, abahanga mu bijyanye n’ubuzima bwo mu mutwe, abanyamategeko n’abashinzwe imibereho mu miryango y’abantu, badakwiye kwirengagiza ikibazo cy’ubuzima bwo mu mutwe, mu gihe babonye ibimenyetso ku muntu ufite imyitwarire idasanzwe.

Byamukama agira ati "Hari ibyabaye mu Karere birimo amakimbirane n’intambara, iyo uri impunzi cyangwa warigeze kuba yo n’iyo byaba imbere mu Gihugu, uko byagenda kose biteza ibibazo byo mu mutwe, murabyibuka no muri Covid-19 twabonye ibibazo nk’ibi. Hari ihohoterwa ribera mu ngo, byose dukeneye kubyitaho mu rwego rwo kubaka amahoro."

Mugenzi we Dr Mukasa Moses Bwesige, urimo guhugura, avuga ko iyo abantu bigeze kunyura mu bihe by’intambara, bakomeza kugira amakimbirane mu mitima yabo, ibyo bibazo bikaba bishobora kubyutsa andi makimbirane akomeye mu gihe haba hatabayeho gahunda z’isanamitima.

Ubushakashatsi bwakozwe n’Ikigo gishinzwe Ubuzima mu Rwanda, RBC, mu mwaka wa 2018, bugaragaza ko mu baturarwanda bose muri rusange, 20.50% bafite ikibazo cy’ihungabana ariko byagera mu barokotse Jenoside imibare ikagera kuri 52.2%.

Umuyobozi muri RBC ushinzwe agashami k’Ubuzima bwo mu mutwe, Claire Nancy Misago, avuga ko umuntu wagiriwe nabi(wahohotewe) arangwa no kwigunga, agahinda gakabije, kwiyanga n’ibindi kandi bikagira ingaruka mbi ku mibanire ye n’abandi.

Umuyobozi w’Umuryango ’Institute for Community Based Socio-therapy’, wita ku gusana imibanire y’abantu, Karangwa Diogène, avuga ko bagiye gukora igenamigambi ry’ibikorwa bireba buri rwego mu Rwanda, kugira ngo abafite ibibazo by’ubuzima bwo mu mutwe bose mu Gihugu bagerweho.

Ibiro bya Minisiteri y’Ububanyi n’Amahanga bishinzwe Umugabane wa Afurika, byamenyesheje abakozi ba ICGLR n’imiryango mpuzamahanga irimo uw’Abadage ushinzwe ubutwererane, GIZ na Ambasade y’u Buholandi, ko Leta y’u Rwanda ikomeje ingamba zo kurwanya ihohoterwa rikorerwa abagore n’abakobwa, ifatanyije na ICGLR.

Perezida Paul Kagame na Madamu Jeannette Kagame

Uyu muhango ngarukamwaka witabiriwe kandi n’abayobozi bakuru b’igihugu ndetse n’imiryango y’intwari z’igihugu mu byiciro byose.

Ku gicumbi cy’intwari haruhukiye intwari z’Imanzi zirimo Maj. Gen. Fred Gisa Rwigema n’umusirikare utazwi, hakaba n’intwari z’Imena.

Icyiciro cy’Imena kirimo Umwami Mutara III Rudahigwa, Michel Rwagasana, Agatha Uwilingiyimana, Felicite Niyitegeka ndetse n’Abanyeshuli b’i Nyange.

Icyiciro cy’intwari z’ingenzi cyo nta bantu barashyirwamo.

Umunsi w’intwali z’igihugu wijihirijwe mu tugali twose tw’u Rwanda, aho abanyarwanda barase ubutwari bwaranze izi ntwari, ndetse bavuga n’ibikwiye kuranga intwari z’iki gihe, aho u Rwanda rwimirije imbere iterambere ry’igihugu.

Uyu munsi, habaye n’ikiganiro cyatambutse kuri Televiziyo y’u Rwanda, cyitabiriwe na Col. Migambi Désiré wo mu Ngabo z’u Rwanda, Umunyamabanga Uhoraho muri Minisiteri y’Uburinganire n’Iterambere ry’Umuryango (MIGEPROF), Mireille Batamuliza, hamwe na Ruhumuriza Anselme ushinzwe Imibereho myiza mu Nama y’Igihugu y’Urubyiruko(NYC).

Muri icyo kiganiro, Ruhumuriza yavuze ko Urubyiruko rufite ishimwe rikomeye rutura intwari z’u Rwanda zatabarutse n’izikiriho, ndetse na Perezida Kagame by’umwihariko, aho anasezeranya ko biteguye kurwanira Igihugu.

Ruhumuriza yagize ati "Mu izina ry’Urubyiruko mpagarariye, turashimira cyane isoko Inkotanyi, Intwari z’u Rwanda zadufukuriye, iyo dufite aho tuvoma, tukavoma amazi meza atumara inyota, tugira ubuzima bwiza."

Ruhumuriza avuga ko Urubyiruko rw’u Rwanda ubu ruhagaze ahantu heza haruha umwanya wo kuzirikana ku cyuya n’amaraso byamenwe n’Intwari z’u Rwanda kugira ngo rube ruriho, ndetse n’icyo uru rubyiruko na rwo rusabwa.

Ruhumuriza avuga ko ibyiza byose bigira igiciro, abantu bakaba bagomba kubanza kubaha icyo giciro, hanyuma na bo bagahinduka bakaba icyo giciro.

Ati "Urubyiruko rw’uyu munsi dufite umukoro, Intwari z’u Rwanda zaturemyemo imitekerereze mizima, ari yo kwirinda kwitandukanya ndetse n’ubumwe by’urubyiruko rw’u Rwanda, mu by’ukuri duhagaze neza kandi turiteguye."

Ruhumuriza yasubiye mu magambo yavuzwe n’umwana w’imyaka 9 mu gitaramo gisingiza Intwari cyabanjirije umunsi nyirizina w’Intwari z’u Rwanda, ko "abashaka kwigimba u Rwanda nibakora ku mbarutso bazabona icyo Inkotanyi tuzabakorera, ni ukubereka ko tutari guhangana na bo mu magambo, urugamba niruza Umutoza w’ikirenga arahari!"

Col. Migambi Désiré yagarutse ku kamaro k’intekerezo y’ubutwari n’ubumwe, intekerezo y’ubusugire, iy’Ubukungu(amata n’inka), Ikinyarwanda gihuje Abanyarwanda no kuba "Benimana", ari zo ndangagaciro zabaga zikomeje kandi zubaka Umuryango nyarwanda, "nyuma hakaba haraje umurage w’abadahemuka."

Umunyamabanga Uhoraho muri MIGEPROF, Mireille Batamuliza, avuga ko Umuryango nyarwanda ubu witeguye kubyara no kurera intwari binyuze mu gutoza abariho kumenya ko Intwari z’u Rwanda zabayeho zitari ibivejuru, ahubwo ngo zari abantu nk’abandi, ariko zigirwa zo n’umuryango.

Umunyamabanga Nshingwabikorwa w’Urwego rushinzwe Intwari z’Igihugu(CHENO), Déo Nkusi, agaruka ku nsanganyamatsiko y’uyu mwaka igira iti "Ubutwari n’Ubumwe bw’Abanyarwanda, Inkingi z’Iterambere", aho avuga ko ibi nibishingirwaho Abanyarwanda ngo bazakora byinshi kandi birambye.

Ku gicumbi cy’Intwari z’Igihugu i Remera mu Mujyi wa Kigali ubu hamaze kubakwa inzu ibitse Amateka y’Intwari z’u Rwanda, ikaba yaragenewe kwigisha ayo mateka, ariko hakanabera imihango itandukanye ijyanye na byo.

Mu bindi bishya birimo kuhakorerwa hari ukuvugurura imiterere y’ibimenyetso n’imva, ndetse no gutera ibiti n’indabo bifitanye isano n’amateka y’ubutwari mu Rwanda.

Amafoto ya: Eric Ruzindana

Reba ibindi muri iyi video:

Agnes Muhongerwa, umuyobozi mushya wa GMO

Muhongerwa ari mu bayobozi baherutse gushyirwaho na Perezida wa Repubulika, Paul Kagame, akaba ari Umugenzuzi Mukuru wungirije ushinzwe Kurwanya Akarengane n’Ihohoterwa bishingiye ku buringanire muri GMO.

Mu masengesho ngarukamwaka yo gusabira Igihugu yabaye ku Cyumweru tariki 19 Mutarama 2025, Perezida Kagame yatangaje ko bidakwiriye kubona mu muryango habamo abantu bagenda biyambitse ubusa, kuko bihabanye n’umuco.

Perezida Kagame kandi yasabye inzego gukumira ibibazo byugarije umuryango nyarwanda, birimo ibiyobyabwenge, amakimbirane n’urugomo byiganje mu ngo cyane cyane iz’abashakanye bamaranye igihe gito.

Ku bijyanye no kwambara ubusa, Muhongerwa yagize ati "Ikibazo cy’ihohoterwa cyangwa se ikijyanye n’umuco mu gihugu, ubona ko hagiye hazamo imico itandukanye, u Rwanda rwaragutse, abazamo ni benshi kandi n’Abanyarwanda baragenda. Ibyo kwambara ubusa ni imico bagiye bavana mu bihugu by’amahanga ariko bidakwiye kuba ari umuco w’Abanyarwanda."

Ati "Icyo tuzakora dufatanyije n’izindi nzego ndetse n’Umuryango by’umwihariko, ni ukugaruka ku burere bw’abana hashingiwe ku muco."

Muhongerwa avuga ko bazajya mu mashuri no mu Itangazamakuru kwigisha umuco no kurwanya ihohoterwa, nk’uko yabisabwe na Perezida w’Urukiko rw’Ikirenga ubwo yari akimara kwakira indahiro ye.

Perezida w’Urukiko rw’Ikirenga yamushinze kugenzura uko inzego zitandukanye zirimo gukumira no kurwanya ihohotera rishingiye ku gitsina mu bigo(cyane cyane mu mashuri) no mu miryango.

Mukantaganzwa yibukije ko Urwego rushinzwe kugenzura iyubahirizwa ry’Uburinganire n’Ubwuzuzanye bw’abagore n’abagabo mu iterambere ry’Igihugu(GMO), rufite inshingano ikomeye yo gukurikirana uko ihame ry’uburinganire no kurwanya ihohotera rishingiye ku gitsina byubahirizwa mu nzego zose, hagamijwe kurandura akarengane ako ari ko kose mu byiciro bitandukanye by’Abanyarwanda.

Mukantaganzwa avuga ko Umugenzuzi Mukuru wungirije wa Gender ushinzwe kurwanya akarengane n’ihohotera bishingiye ku gitsina, afite mu nshingano kwakira no gusuzuma ibibazo by’abaturage bijyanye n’akarengane n’ihohotera bishingiye kuri gender.

Yagize ati "Ndasaba Umugenzuzi Mukuru wungirije wa Gender ushinzwe kurwanya akarengane n’ihohotera bishingiye ku gitsina, gukorana n’izindi nzego mu bukangurambaga bukangurira Abanyarwanda kumenya uruhare rwabo mu gukumira ihohotera rishingiye ku gitsina no gufasha abahohotewe."

Mukantaganzwa avuga ko ibi bizashoboka mu gukorana n’ibigo by’amashuri bakigisha abanyeshuri kwimakaza uburinganire n’ubwuzuzanye mu mibereho n’imibanire yabo, hamwe no kurwanya ihohotera rishingiye ku gitsina.

Mukantaganzwa asaba kandi GMO gukorana n’inzego zibishinzwe kugira ngo urugero rwo guhana abakoze ibyaha by’ihohotera, ibyo gusambanya abana n’icuruzwa ry’abantu, rwiyongere.

Yibutsa uru rwego ko rugomba gukomeza gukora ubuvugizi no gufatanya n’inzego zibishinzwe, kugira ngo abangavu baterwa inda bakabyara bakiri bato babashe gusubizwa mu buzima busanzwe, bahabwe serivisi z’isanamutima kandi basubizwe mu mashuri.

Umuyobozi Mukuru wa GMO, Umutoni Gatsinzi Nadine, avuga ko bazanasuzuma niba inyigisho zihabwa abagiye gushakana na nyuma yaho zikirimo gutangwa neza, kugira ngo hamenyekane impamvu y’amakimbirane mu bashakanye, cyane cyane abamaze igihe gito bashinze ingo.

Ibi Perezida Kagame yaraye abibwiye Inama idasanzwe y’Abakuru b’Ibihugu bya Afurika y’Uburasirazuba(EAC)yaraye iganiriye ku kibazo cy’Intambara ibera muri Congo, aho yabasabye kuticara ngo barebere.

Perezida Kagame asaba bagenzi be n’abandi bose bireba kubanza kumva neza imiterere y’ikibazo, aho gukomeza gushimana, buri wese yigira mwiza ariko ngo akurikirana inyungu ze aho gushyira imbere inyungu rusange nk’Abanyafurika y’Iburasirazuba.

Perezida Kagame avuga ko mu minsi ibiri cyangwa itatu ishize u Rwanda rwatakaje abantu barenga 10, hanakomereka ababarirwa mu magana kubera ibitero by’amasasu byaturutse i Goma, ariko byo ngo azabyikemurira nta kabuza.

Perezida Kagame asobanura ko impamvu y’ibyago by’intambara yugarije abaturage mu burasirazuba bwa Congo ihera mu myaka irenga 20 ishize, kubera iyo mpamvu amahanga akaba ngo atagomba kuvuga ko iriya ntambara itunguranye.

Perezida Kagame agira ati "Bakuye abantu mu byabo, barabishe, barabatoteza umunsi ku wundi kubera icyo bari cyo. Dufite impunzi zimaze imyaka irenga 20 hano, zarirukanywe muri Congo zoherezwa mu Rwanda zitwa Abatutsi, bityo ngo bakwiye kuba mu Rwanda, ntabwo bakwiye kuba hariya."

Ati "Hanyuma ibintu nk’ibyabaye mu cyumweru gishize byadutse, tugatangira kwigira nk’abatunguwe, bikavugwa ngo duteje abantu akaga. Mbese gukandamiza abantu, kubica no kubakura mu byabo ntibigize icyaha cyo gushyira abantu mu byago? Twe nk’Abanyafurika y’Iburasirazuba twicara hano, hanyuma turabikoraho iki!"

Perezida Kagame avuga ko ingabo z’amahanga zarunzwe ku bwinshi muri Congo, harimo MONUSCO, SAMIDRC, abacancuro, u Burundi na "FDLR yabiyunzeho", kandi buri wese ngo ari aho arebera, bidakwiye gutuma ’abantu bigiza nkana bavuga ko batumva ibibazo bimaze imyaka myinshi hariya mu burasirazuba bwa Congo.

Umukuru w’Igihugu yagaragaje ko atishimiye mugenzi we wa Afurika y’Epfo, Cyril Ramaphosa, utarashatse ko ingabo za EAC ziza kugarura amahoro muri Congo, kuko ngo zitakoraga ibintu nk’uko abyifuza, ahitamo kuzana iza SADC ’zifatanya n’umutwe wa FDLR wasize ukoze Jenoside mu Rwanda’.

Aha ni ho Perezida Kagame ahera asaba Abakuru b’Ibihugu bigize Umuryango wa Afurika y’Uburasirazuba kutaba indorerezi.

Perezida William Ruto ni we watumije iyo nama

Ruto yasomye itangazo mu gitondo cyo kuri uyu wa 27 Mutarama 2025, avuga ku bibazo bihungabanya amahoro muri Congo biteye impungenge zikomeye, kuko ngo hari ibyago byugarije abaturage bitewe n’ibikorwa bya gisirikare, birimo no gufunga ikirere cy’indege mu Mujyi wa Goma.

Perezida Ruto akaba avuga ko yaganiriye na Perezida wa Congo, Félix Antoine Tshisekedi hamwe na Perezida w’u Rwanda, Paul Kagame, ahamagarira impande zose bireba guhagarika byihuse ibikorwa by’ubushyamirane nta yandi mananiza.

Perezida Ruto akomeza agira ati "Ndashimangira ko impande zose zifite inshingano yo gutanga ubufasha kugira ngo ibikorwa by’ubutabazi bigere ku baturage bari mu kaga, kandi nkangurira impande zombi gukoresha inzira z’amahoro mu gushakira umuti iyi ntamabara."

Yakomeje agira ati "Nk’umuyobozi w’Umuryango w’Ibihugu by’Afurika y’Iburasirazuba (EAC), ndahamagarira impande zose zigize Amasezerano y’Amahoro y’i Luanda hamwe n’abavandimwe banjye, Perezida Félix Tshisekedi na Perezida Paul Kagame, bombi twavuganye muri iri joro, kumva no gushakira amahoro abaturage bo mu karere kacu no ku muryango mpuzamahanga."

Perezida Ruto avuga ko nyuma yo kugisha inama Abakuru b’Ibihugu bigize EAC, bemeranyijwe ko bagiye guhurira mu Nama Idasanzwe mu gihe kitarenze amasaha 48, mu rwego rwo gutegura ahazaza h’aka karere k’ibiyaga bigari.

Perezida Ruto avuga ko umuryango EAC witeguye gushimangira ubufatanye n’Umuryango wa Afurika Yunze Ubumwe, Umuryango wa Afurika y’Amajyepfo(SADC), hamwe n’Umuryango w’Abibumbye, mu gukangurira impande zishyamiranye guteza imbere ibiganiro.

Alain Mukuralinda ahamya ko umutekano w’u Rwanda urinzwe

Kuba abayobozi ba Congo bavuga ko bazakuraho Ubutegetsi buriho mu Rwanda, ngo ntabwo byagakwiye kwibazwa ku mpamvu u Rwanda rwafashe ingamba z’ubwirinzi, nyamara ibikorwa by’igisirikare cya Congo n’abo bafatanyije birimo gukorerwa ku mipaka y’u Rwanda.

Mukuralinda waganiraga na RBA yagize ati "Ubwabo bahora bavuga ko bazarasa u Rwanda, bavuga ko barwanya Leta iyoborwa na Perezida Kagame, hanyuma rero uragira ngo u Rwanda n’abayobozi barwo bayobowe n’Umukuru w’Igihugu n’umugaba Mukuru w’Ingabo, bicare baturame!"

Umutekano w’u Rwanda urarinzwe

Ku kibazo cyo kuba intambara irimo kugenda isatira imipaka y’u Rwanda, Mukuralinda yijeje ko umutekano w’u Rwanda urinzwe, ariko ko abaturage bagomba kumvira ibyo abayobozi babo babasaba, baba aba gisivile cyangwa aba gisirikare.

Yagize ati "Umutekano ku nkiko z’u Rwanda urarinzwe, ngira ngo mwabonye amashusho, amafoto, abantu mu Mujyi wa Gisenyi bajya mu kazi kabo nta kibazo, ndetse aho imipaka ifunguriwe barambuka, ni urujya n’uruza, abashaka kwambuka bajya muri Congo n’abashaka kuza, nta kibazo gihari."

Icyakora ngo hari ibyo u Rwanda rwumvise ko umupaka muto w’i Rubavu witwa ‘Petite Barrière’ Congo yawufunze, ariko kuri ’Grande Barrière’ ho harafunguye, kandi ko icyaba cyose kijyanye n’uwarasa ku butaka bw’u Rwanda, abigamibiriye cyangwa atabigambiriye, Abanyarwanda bahita babimenyeshwa.

Ifungwa rya za Ambasade

Ku kibazo cy’uko Congo Kinshasa yategetse abakozi ba ambasade yabo i Kigali ndetse n’ab’u Rwanda bari basigaye i Kinshasa gutaha bose, Mukuralinda avuga ko ibi bishimangira icyemezo cyari cyarafashwe cyo kwirukana Ambasaseri w’u Rwanda muri Congo.

Mukuralinda akavuga ko icyo gisubizo kitajya mu nzira yo gukemura ibibazo bihari bijyanye n’umutekano muke mu burasirazuba bwa Congo.

Ati "Ni ibyo nakubwira ngo ese ko birukanye Ambasaseri w’u Rwanda, ikibazo cyarakemutse! Hari ibyo nakubwira ko gufata ibyemezo by’akataraboneka bitagize icyo bimara mu gukemura ikibazo."

Avuga ko impamvu z’ikibazo zihari, zizwi kandi ngo zihora zisobanurwa, ariko ko atari zo Congo ishingiraho ifata ibyemezo, kuko ngo hari amasezerano u Rwanda rwari rufitanye na yo mu guhahirana, mu by’ubucuruzi aho indege ya Rwandair yajyagayo, ariko ibyo byose birahagarikwa.

Avuga ko icyo cyemezo cyo gucyura abakozi ba ambasade ku mpande zombi n’ubwo atari cyiza ngo kizubahirizwa, ndetse n’ibindi byazakurikiraho u Rwanda rukazabyakira, ariko Congo ikaba igomba gutekereza ko ntacyo byarukoraho.

Ati "Ibyo ni byo tuvuga ko bigamije kwegeka ku Rwanda ibibazo by’ibibera hariya, ariko ntawe biyobya, ntawe bibeshya, kuko amakuru ya hariya abera ku mugaragaro, kuba warahisemo kuvuga ukundi ukabyegeka ku Rwanda, ni uburenganzira bwawe."

Ibirego ntacyo bivuze ku Rwanda

Mukuralinda avuga ko Congo ihindaguranya imvugo ku kibazo cya M23, kuko hari aho yemeza ko uyu mutwe ugizwe n’Abanyekongo, ku rundi ruhande ikavuga ko M23 itabaho ahubwo ari u Rwanda rwitwikira uwo mutaka, ariko ngo ibyo abantu bose barabyumva bakagira uburyo babyitwaramo.

Mukuralinda asubiza ikibazo cy’imiryango mpuzamahanga isaba u Rwanda kureka gufasha M23, avuga ko atari byo bikemura ikibazo kandi rwakomeje kubisabwa kuva kera mu myaka 20-30 ishize, kandi iyo miryango ubwayo ngo ntivuga rumwe kuri icyo kibazo, ashingiye ku matangazo yatanzwe na Afurika yunze Ubumwe, u Burayi na Leta zunze Ubumwe za Amerika.

Icya mbere avuga ko batavugaho rumwe ni ikijyanye n’imvugo z’urwango, aho Intumwa yihariye y’Umunyabanga Mukuru w’Umuryango w’Abibumbye (UN) ngo ihora igaragaza ko ibikorwa bibera mu burasirazuba bwa Congo bishobora kuzavamo Jenoside mu gihe byaba bititondewe.

Kuba mu itangazo ry’Umuryango w’Ubumwe bw’i Burayi(interuro imwe), risaba Leta ya Congo kudafatanya n’umutwe wa FDLR, ahandi bikaba kwamagana u Rwanda, ibyo na byo ngo ntibyumvikana.

Ibyo amahanga yirengagiza

Mukuralinda yakomeje asobanura ibikomeje kwirengagizwa n’amahanga kuri Congo, birimo kuba Leta y’icyo gihugu ikoresha abacanshuro mu ntambara, ndetse ngo igafatanya n’ingabo z’amahanga mu kurwanya abantu bazira uko bavutse.

Yungamo ko ikindi cyirengagizwa ari umubare munini w’imitwe iteza umutekano muke muri Congo, ariko umwe gusa wa M23 ukaba ari wo barwanya.

Mukuralinda ku bijyanye n’ibivugwa ko abayobozi ba FDLR barimo uwitwa Gen. Omega bishwe, avuga ko yaba yihuse agize icyo abivugaho mu gihe "Leta ya Congo ikorana n’uwo mutwe", cyangwa impuguke za UN na bo nta cyo barabivugaho.

Nta mpunzi ziraza

Mukuralinda avuga ko umubare munini w’abantu bambuka baza mu Rwanda atari impunzi, ahubwo ari abasanzwe bakora ingendo hagati y’ibihugu byombi, bakaba bagaragara ku bwinshi ku mupaka wa ’Grande Barrière’ bitewe n’uko kuri ’Petite Barière’ hafunzwe.

Gusa, kuva aho imirwano itangiye gukara muri Goma, umuntu wese ushinzwe mu buryo buziguye cyangwa butaziguye, ibijyanye n’impunzi mu Rwanda ari maso kugira ngo mu gihe hagize uwaza yakirwe.

Bibaye ahagana saa kumi n’imwe z’umugoroba kuri uyu wa Gatandatu tariki 25 Mutarama 2025, biturutse ku gusudira icyuma kirekura imyotsi cyitwa echappement.

Rutaremara yisobanuye agira ati "Urabona echappement iba isohokamo lisansi, buriya ntihabuze uburyo lisansi yarimo isohoka igakubitana n’ibishashi byo gusudira, bigahita bikongeza imodoka."

Rutaremara avuga ko imodoka nto yarimo gusudirwa ari yo ikongeje inini byari kumwe."

Rutaremara yizeza ba nyiri imodoka ko bashobora kuzashumbushwa kuko igaraje ngo rifite ubwishingizi.

Avuga ko imodoka nini yari iparitse iruhande rw’iyari irimo gukorwa ari iy’umwe muri ba Ambasaderi b’u Rwanda mu gihugu atibuka.

Polisi y’u Rwanda yihutiye kuzimya iyo nkongi itarafata izindi nyubako zari hafi aho.

Uwitwa Mukunzi Jean de Dieu wari waje gukoresha imodoka muri iryo garaje riri i Remera avuga ko yabonye bagerageza kuzimya, bakoresheje twa kizimyamoto duto, ariko bikanga bikaba iby’ubusa.

RSSB ivuga ko hashingiwe ku lteka rya Perezida ryongera umubare w’amafaranga ya pansiyo n’ay’ibyago bikomoka ku kazi, amafaranga fatizo ya pansiyo azazamuka kuva kuri 13,000 Frw, kugera kuri 33,710 Frw.

RSSB yakomeje itanga ingero zerekana uko izo nyongera ku bindi byiciro zizakorwa nyuma y’izi mpinduka, aho abanyamuryango bafataga 20,000 Frw bazongererwa kugera kuri 47,710 Frw.

Abanyamuryango bafataga 50,000 Frw ku kwezi bazongererwa bagere kuri 92,710Frw, abakiraga 100,000Frw bazahabwa 155,210 Frw, abafataga 500,000 Frw bazongererwa bagere kuri 580,210 Frw, mu gihe abakiraga 1000,000 Frw bazongererwa bagere kuri 1,095,210 Frw.

Izi mpinduka zizagera no ku bindi byiciro by’Abanyamuryango bose nk’uko RSSB yakomeje ibisobanura.

Umuyobozi wa BDF Vincent Munyeshyaka, asaba abafite ubucuruzi buto n’ubuciriritse cyane cyane urubyiruko, abagore n’abafite ubumuga barimo abahombejwe na COVID-19, kugana imirenge SACCO bagafata iyo nguzanyo izishyurwa hiyongereyeho 8% by’inyungu ku mwaka.

Yagize ati "Ni gahunda yashyizweho na Leta y’u Rwanda mu rwego rwo kuzahura Ubukungu no gushyigikira ishoramari rishya rigenda rivuka. Dufite miliyari 30Frw, muri yo dufite Miliyari 5Frw tugomba gukoresha kuva ubu(Mutarama) kugera muri Kamena 2025, tukazatangira kwakira ubusabe bwa za SACCO mu minsi iri imbere nyuma y’ubukangurambaga turimo."

Imirenge SACCO yo mu Mujyi wa Kigali ni yo isabwa gutanga inguzanyo nyinshi ku banyamuryango bayo, bitewe n’uko 80% by’imirimo y’ubucuruzi ari ho ikorerwa.

Mu nguzanyo zatanzwe mu mezi 18 ashize kugera mu Kuboza 2024, Umujyi wa Kigali waje inyuma cyane y’utundi turere ku rugero rwa 7%, by’inguzanyo zose zatanzwe n’imirenge SACCO.

Umuyobozi wa SACCO ya Gisozi, Mapendo Olive, ni we wenyine BDF ishimira mu mirenge SACCO yo mu Karere ka Gasabo, kubera kuba yarashishikarije abacuruzi bakorera mu Gakiriro, gufata inguzanyo nyuma y’uko BDF ibahaye ingwate.

Mapendo avuga ko inguzanyo zafashije abakorera mu Gakiriro no mu nkengero zaho bagera kuri 511 kwagura ibikorwa byabo, hamwe no kongera kuzahuka k’ubukungu nyuma ya Covid-19, kandi ko Miliyoni 972 zatanzwe nk’inguzanyo zirimo kwishyurwa neza.

Mugenzi we uyobora SACCO ya Muhima muri Nyarugenge, Marie Chantal Twagirimana, avuga ko amagana y’abacuruzi bakorera muri kariya gace yahinduye imiterere yaho babikesha ikigega BDF, kandi ko azarushaho gushaka abandi bacuruzi baza gufata inguzanyo.

BDF isaba za SACCO kwibanda ku bafite imishinga itangiza ibidukikije, buri wese agahabwa igishoro kitarenze Miliyoni 5Frw azishyurwa bitarenze imyaka itanu, hakibandwa ku bagore, urubyiruko n’abafite ubumuga, bo bahabwa ingwate ya BDF igera kuri 75% by’ayo basabye muri SACCO.

Vincent Munyeshyaka uyobora BDF

Mu kiganiro BDF yagiranye N’abayobozi b’imirenge SACCO ku wa 22 Mutarama 2024, Munyeshyaka yavuze ko mu yandi mabanki n’ibigo by’imari na ho abantu bemerewe kuvuga ko BDF izababera ingwate, maze bagasaba inguzanyo kandi bakayihabwa.

Ikigega BDF kivuga ko mu myaka 13 kimaze gishinzwe, cyatanze ingwate ingana na Miliyari 92 z’Amafaranga y’u Rwanda, bikaba byaratumye ibigo by’imari byemera guha abakiriya babyo inguzanyo ingana na Miliyari 228Frw.

Harageragezwa uburyo bisi itazajya irenza iminota 10 muri gare za Kigali

Ikigo cy’Abayapani gishinzwe ubutwererane mpuzamahanga (JICA), cyatanze ama Yen (amafaranga akoreshwa muri icyo gihugu) angana na Miliyoni 650 (hafi Miliyari 5 na Miliyoni 760Frw), akaba arimo gukora nka nkunganire muri iki gihe bisi zirimo guhaguruka muri gare zitujuje abagenzi.

Mu gihe iyi gahunda izamara ibyumweru bibiri kuva tariki 16 Mutarama 2025, ba nyiri imodoka zitwara abagenzi baribaza niba bazakomeza guhabwa nkunganire yabarinda gukerereza abantu muri gare no ku byapa.

Iyi nkunganire ya JICA yatumye umushoferi wa bisi ubu asabwa guhaguruka muri gare bitarenze iminota 10 mu gitondo na nimugoroba, ariko mu masaha y’amanywa ubwo abagenzi baba ari bake mu nzira, akaba atagomba na bwo kurenza iminota 15 ahagaze muri gare.

Umuyobozi wa kimwe mu bigo bitwara abagenzi cyitwa Royal Express, Jules Cesar Ndabaganje, yavugiye kuri Televiziyo y’u Rwanda ko amasezerano bagiranye na JICA asaba ko bisi ikora ingendo 11 ku munsi, kuva muri gare ya Nyanza kugera mu Mujyi rwagati wa Kigali, aho kuba ingendo 7 mu gihe nta nkunganire bahawe.

Ndabaganje avuga ko kongera izi ngendo bijyanye no gufasha abagenzi kwihutira kubona bisi zibatwara, birimo kwishyurwa na nkunganire yatanzwe na JICA, ariko ko hakwiye no kurebwa uburyo izi modoka zitwara abagenzi zibona inzira zihariye, zitabyiganiye n’ibindi binyabiziga mu muhanda.

Ati “Ibyo byose bikwiye kurebwaho kugira ngo wa mugenzi ahagurukire ku gihe kandi agere iyo ajya ku gihe, kandi bizafasha benshi kwitabira kugenda muri ubu buryo, ariko noneho ku ruhande rw’ibigo bitwara abagenzi hagomba kugira n’ikindi kiguzi cyiyongeraho, kugira ngo ikigo gikomeze gukora. Iyo nkunganire itangwa na JICA iramutse itabonetse habamo igihombo.”

Umuvugizi w’Umujyi wa Kigali, Emma Claudine Ntirenganya, avuga ko igerageza ririmo gukorwa ari ryo rizatanga ibisubizo by’ibikwiye gukorwa, harimo n’ikijyanye na nkunganire, hakazarebwa urugero rw’ikenewe n’uburyo byagenda kugira ngo iboneke.

Ntirenganya avuga ko hazanarebwa uburyo bwo guharira bisi zitwara abagenzi ibisate by’imihanda byazo, hamwe no kwagura amahuriro y’imihanda, kugira ngo bisi zibashe kwihuta zitabangamiwe n’umubyigano w’ibinyabiziga.

Hazarebwa kandi igihe ibyo byemezo byazatangira gushyirwa mu bikorwa, bitewe n’uko ibyagaragajwe bizaba birimo kwigwaho, ariko bikaba ngo ari imyanzuro yo muri gahunda ya kabiri ya Guverinoma(NST2) izamara imyaka itanu kuva muri 2024-2029.

Impuguke mu bijyanye n’Iterambere ry’imijyi, Umwarimu muri Kaminuza y’u Rwanda, Dr Ernest Uwayezu, avuga ko mu bihugu byateye imbere na ho nkunganire ijya itangwa, ku modoka zitwara abagenzi mu buryo bwa rusange mu masaha baba atari benshi, kugira ngo abantu badakererwa muri gahunda zabo.

Gusa nyine abenshi muri ibyo bihugu ngo bamaze kwitabira ubu buryo aho kwishakira ibinyabizga byabo byihariye, kuko baba bazi neza igihe baza kubona imodoka ku cyapa no muri gare, ndetse n’igihe bagerera iyo bajya.

Ubusanzwe mu Mujyi wa Kigali mbere y’uko iri gerageza rishyirwaho, abagenzi binubira ko imodoka zitinda guhaguruka muri gare, aho bamwe ngo bashobora kumara amasaha atatu bicaye mu modoka cyangwa ku cyapa, abandi bagahitamo gutega moto zibatwara ikiguzi gihenze.

Gahunda Umujyi wa Kigali n’Urwego Ngenzuramikorere(RURA) bari bashyizeho mbere y’igerageza riri gukorwa, ni uko mu masaha abagenzi baba ari benshi muri gare cyangwa ku byapa, bisi itagombye kurenza iminota 15 itarabageraho, ariko mu masaha cyane cyane aya ku manywa ubwo baba ari bake, bisi ntirenze imonota 45 itarabageraho.

Trump yameze kujya gusezera kuri Biden urangije manda

Trump yageze muri White House aherekejwe n’imodoka nyinshi mu mihanda, yabanje gukurwamo urubura rwatewe n’ubukonje bukabije.

Capitol Rotunda yaherukaga gukoreshwa mu kurahira k’Umukuru w’Igihugu wa USA witwaga Ronald Reagan mu mwaka wa 1985, bitewe n’ubukonje bwari bukabije icyo gihe.

Ahandi kurahirira mu nzu imbere byabereye ni mu cyumba cya Sena ya Amerika, cyakoreshejwe n’uwari Perezida wa USA wari umaze gutorwa, William Howard Taft, mu mwaka wa 1909.

Ubusanzwe imihango y’irahira ry’Umukuru w’Igihugu wa USA ibera ku marembo y’ibiro bye White House, yitwa West Front, hari imbuga nini cyane ihuriramo abantu benshi, nk’ikimenyetso cyo gukorera mu mucyo no kwerekana ko habayeho ihererekanya risesuye ry’ubutegetsi.

Perezida Donald Trump arahita ashyira umukono ku myanzuro 10 ijyanye no gukumira abimukira muri USA, harimo kwimurira ahandi abageze mu Amerika mu buryo butemewe, gukaza umutekano ku mipaka no guhindura izina ry’ikigobe(golf) cya Mexico kikitwa Ikigobe cya Amerika.

Trump, Madamu we Melania ndetse na Visi Perezida mushya James David Vance, babanje kujya gusengera mu rusengero rwitwa St John Episcopal Church ruri hafi ya White House i Washington DC, nyuma bajya gusezera kuri Perezida Joe Biden na Kamara Harris barangije manda y’imyaka ine.

Muri bake bakomeye bitabiriye ibirori by’irahira rya Donald Trump harimo abayobozi bazakorana na we, abahoze ari abakuru b’Igihugu cya USA bakiriho, ndetse n’abaherwe barimo Elon Musk na Jeff Bezos.

Capitol

Laboratwari ya mbere muri Afurika ipima ubuziranenge bw’ingofero zambarwa n’abagenda kuri moto yashyizwe muri RSB, ikaba yarafunguwe ku itariki 11 Ukuboza 2024 na Minisitiri w’Ibikorwaremezo, Dr Jimmy Gasore, ari kumwe n’abayobozi mu nzego zitandukanye.

Aba bayobozi barimo David Richards uyobora umuryango mpuzamahanga ufatanya n’u Rwanda kugenda neza mu muhanda, ’FIA Foundation’.

Umuryango urengera ubuzima witwa Healthy People Rwanda(HPR), ni wo ushinzwe gufatanya na MININFRA mu bukangurambaga bwiswe ’Tuwurinde’(umutwe) hakubiyemo gukora ubushakashatsi ku bitera impanuka, kwereka abamotari, abatumiza kasike n’abandi bose bagenda kuri moto, akamaro ko gukoresha kasike yujuje ubuziranenge.

Mu kiganiro Umuyobozi wa HPR, Dr Innocent Nzeyimana, yagiranye na Kigali Today, yavuze ko n’ubwo kwambara kasike yari isanzwe iboneka mu Rwanda ’biruta ubusa’, ngo yagiye kuzipimisha muri RSB agasanga nta n’imwe ifite ubushobozi bwo kurinda byuzuye umuntu ugenda kuri moto.

Dr Nzeyimana ati "Zose(impagararizi zazo) zarapimwe, nta n’imwe yatambutse mu bipimo byose. Inyinshi ni izimeneka rwose aho ukubita ku kintu igashwanyuka cyane(kimwe mu bipimo bisuzuma ubukomere).Ibyo rero bikagaragaza ko zitarinda abantu byuzuye, n’ubwo kuyambara biruta ubusa."

Uyu muyobozi avuga ko buri ngofero ikorerwaho ibipimo birenga 5, aho zose hari aho zinyura zerekana ko zishoboye kurinda umuntu impanuka, ariko hakaba ibindi bipimo zitabasha kurokoka bitewe n’imiterere hamwe n’ireme ry’ibikoze iyo kasike.

Dr Nzeyimana avuga ko ingofero n’ubwo yanyura mu bipimo 4 ariko ikananirwa kunyura muri kimwe gisigaye, ifatwa ko itujuje ubuziranenge bukenewe, kabone n’ubwo cyaba ari ikibazo kirebana n’umugozi unyuzwa munsi y’akananwa waba ufite akabazo, cyamgwa ikindi kintu abantu bakumva ko ari gito.

Uyu muganga avuga ko hapimwe amoko 14 y’ingofero zose zageze mu Rwanda, kandi na ba nyirazo barabisobanurirwa ko batazongera kwinjiza mu Gihugu kasike zitujuje ubuziranenge.

Ubwo yafunguraga Laboratwari ipima ubuziranenge bw’izi ngofero, Minisitiri w’Ibikorwaremezo yavuze ko kasike nshya zirenga 2,000 zatanzwe n’Umuryango FIA Foundation kuva muri Gicurasi 2024, hamwe n’izo abashoramari bagenda batumiza hanze zujuje ubuziranenge, zizagenda zisimbuzwa gake gake izisanzweho zidafite ubushobozi bwo kurinda abagenda kuri moto.

Umuyobozi w’ikigo Ampersand gifite moto z’amashanyarazi, Emmanuel Hakizimana, ashima ko izi ngofero zamaze kugezwa mu Gihugu zabaye zisonewe mu gihe kitazwi, ibitemewe akaba ari ukuzana izindi zitujuje ubuziranenge.

Hakizimana yagize ati"Erega n’ubwo ducuruza, twemera ko umutekano w’umumotari wacu ndetse n’uwo atwaye ugomba kuba wizewe, ni cyo twese twemera, nta mpaka na zimwe dufite aho umuntu yavuga ngo ’ndarenganye’, gusa MININFRA iratwumva ikaduha n’iyo ’grace period (igihe cyo gusonerwa)."

Hakizimana avuga ko kugeza ubu mu bubiko bw’ikigo ayobora hari ingofero zirenga 1,000 zitegereje abaguzi, akaba ngo yizeye ko igihe cyo gusonerwa kizarangira zose zaratanzwe.

Donald Trump ugiye kuyobora Amerika

Nk’uko abyemera kandi yabikoze kuri manda ye ya mbere kuva muri 2017-2021, Donald Trump arateganya kuzamura imisoro(kugera kuri 60%) ku bicuruzwa byinjira muri Amerika, bivuye hanze yayo(cyane cyane ibivuye muri Canada no mu Bushinwa kuko ari ho hava byinshi).

Ibi Trump azabikora mu rwego rwo guteza imbere abikorera bo mu gihugu cye (USA), ku buryo ibiva hanze azabishyiriraho amaniza, bitume inganda z’ibihugu bitandukanye byo ku Isi zitangira gukora bike cyangwa zihagarike gukora, bitewe n’uko gutakaza isoko ry’abaturage ba USA barenga Miliyoni 300.

Habyarimana agira ati "Izo ngamba n’iyo yazifatira ibicuruzwa biva mu Bushinwa gusa, byagira ingaruka kuri twese muri rusange, ibihahwa imbere muri Amerika bivuye hanze yayo byahita bizamura ibiciro(bitewe no gusabwa imisoro y’ikirenga), natwe ibyo tuvanayo twajya tubigura bihenze."

Ati "Ibyo twoherezayo na byo aho kugira ngo tuzabivanemo amafaranga menshi, hari abazavuga bati ’bitewe n’imisoro ingana gutya, twebwe nta kintu twacuruza muri USA ahubwo tuzashaka ahandi ducuruza’, ibyacu tuvana muri Afurika n’ahandi bijya muri USA bizaba bike cyangwa se binabure isoko mu gihe gito, ubwo hazaba hashakwa ahandi bijya."

Iyi mpuguke mu bijyanye n’ubukungu ivuga ko Abanyafurika bashobora kungukira mu kuba Trump atabaha agaciro gakomeye, bitume u Bushinwa bwiharira isoko ryo kuri uyu mugabane, aho abashoramari babwo benshi batazongera kwerekeza amaso muri USA, ahubwo ngo bazaza gukorera muri Afurika.

Avuga ko Amerika ari yo yaberaga ibindi bihugu byo ku Isi urugero, mu gukora ubucukuzi bufunguye kuri bose (ibiva hanze n’ibikorerwa imbere mu gihugu), ariko mu gihe yaba itabyubahirije, ibindi bihugu bizatangira na byo gukumira ibicuruzwa biva ahandi.

Ibi ngo bizatuma nta higanwa mu bucuruzi ryongera kubaho, bamwe mu bacuruzi (cyane cyane ab’imbere muri buri gihugu) biharire isoko, batangire kuzamura ibiciro uko bishakiye, ari na ko bakora ibidafite ubuziranenge.

Ati "Iyo habayeho ihiganwa risesuye ry’ibicuruzwa biva hanze n’ibikorerwa imbere mu gihugu, tubona ibintu ku giciro cyiza bidahenze. kandi byujuje ubuziranenge."

Mu bicuruzwa u Rwanda rwohereza muri USA harimo ibikomoka ku buhinzi nk’imbuto, imboga, ikawa n’icyayi, ariko rukaba runahabwa inkunga inyuzwa mu kigega mpuzamahanga cy’ubutwererane, USAID, igashorwa mu bikorwa biteza imbere imibereho myiza y’abaturage b’amikoro make.

Habyarimana avuga ko imishinga iterwa inkunga na USAID mu Rwanda izagabanuka, n’ubwo hari izakomeza bitewe n’uko iba yarashyizweho umukono kandi ikaba imara imyaka myinshi, hatitawe ku muntu uzaba ayobora USA icyo gihe.

Habyarimana yibuka ko mu gihe Trump yayoboraga USA muri manda ya mbere, hari porogramu zijyanye n’ubuzima zadindiye, cyane cyane iyo kurwanya malaria na SIDA.

Icyakora, bitewe n’uko abantu bahinduka, ngo nta kintu Abanyarwanda bakora kugeza ubu, usibye gutegereza ariko bazi neza ko "amazi atakiri ya yandi, ari ukoga magazi."

Ikibazo cyo kudakora kwa Mobile Money bivugwa ko cyamaze amasaha arenga 12 kuva saa ine z’ijoro ryo ku wa 14 Mutarama kugera saa ine z’amanywa ku wa 15 Mutamara 2025, nyamara cyari kugeza mu gitondo saa kumi n’imwe(5h00).

Umucuruzi wa butike mu karere ka Musanze yaganiriye na Kigali Today agira ati “Nagiye guhaha maze nishyuye biranga baramfatira, akazi kanjye karapfa, kugeza aho byabaye ngombwa ko nguza amafaranga ya kashi ku muntu tutari dufitanye gahunda. Icyaba cyiza ni uko abatekinisiye ba MTN bajya batumenyesha mbere amafaranga tukaba tuyafite kashi(cash), jye nta message nari nabonye.”

Umucuruzi wo muri iyo butike we yavuze ko icyamuteye igihombo ari ukuba yatangaga ibintu(nk’ibyo kunywa) mbere yo kwishyuza, bituma abakiriya bamwe bari bafite amafaranga kuri Mobile Money bahatinda(bahafatiwe), nyuma baza kugenda batishyuye.

Yagize ati “Bansigiye nimero zabo, ubu ndaza gufata umwanya mbahamagare. Hari Ibiza gukunda cyangwa byange bitewe n’umuntu uwo ari we kuko harimo n’ababikoreye ubushake bazi neza ko bidakunda (kwishyura bakoresheje MoMo). Jyewe nari nabonye ubutumwa mbere yaho ariko ikibazo ni ugutinda, kuko bavugaga ko ari ukuva saa ine z’ijoro kugera saa kumi n’imwe za mu gitondo, ariko byageze na saa mbiri bitarakunda.”

Umumotari ukorera mu Mujyi wa Kigali avuga ko hari abagenzi yatwaye atabanje kubabaza niba bitwaje amafaranga mu ntoki, bakaba batandukanye na we bamwizeza ko baza kumwishyura mu gihe ikoranabuhanga rya MoMo ryaba rigarutse, ariko ngo ntabafitiye icyizere.

Yagize ati “Nari maze gutwara abagenzi 5 nibagiwe kubabaza niba bitwaje amafaranga mu ntoki, twageragayo bakambwira ko bayafite kuri MoMo, bose bamfitiye amafaranga 5,000Frw, ariko ntabwo nahamya ko nimbahamagara bose baza kuyampa.”

Ntabwo ari we wenyine kuko hari n’abandi bamotari bataka igihombo batewe no gutwara abagenzi batavugaga mbere y’igihe ko bafite amafaranga kuri Mobile Money (MoMo).

Ababihombeyemo cyane ni abamotari bakoresha moto z’amashanyarazi kuko bo bishyura bateri zisharijwe bakoresheje MoMo.

Kugera hafi saa sita z’amanywa kuri uyu wa Gatatu, ikoranabuhanga rya Mobile Money ribafasha kwishyura ryari ritarongera gukora, bikaba byabateje kwirirwa ubusa kuko nta cyo bakoraga.

Mu bari bategereje bateri zisharijwe kuri sitasiyo y’ikigo Spiro ku Gisozi hari uwagize ati “Iki ni ikibazo gikunze kugaruka kuko iyo MTN igize ikibazo ‘Connetions’ zikanga, muri Spiro ntacyo mwavugana.”

Sosiyete y’Itumanaho, MTN, yari yatanze ubutumwa bugufi buvuga ko mu ijoro ryo ku wa 14-15 Mutarama 2025 kuva saa ine z’ijoro kugera mu gitondo saa kumi n’imwe MoMo iza kuba idakora kubera imirimo yo kunoza no kwagura serivisi zayo.

MTN ivuga ko iyi mirimo yo ‘kuva mu bwiza ujya mu bundi’ itari kubura kugira ibyangirikiramo.

Minisitiri Bizimana yasabye ko abagomba kwitabira Urugerero baza bose

Imibare itangwa na Minisiteri y’Uburezi igaragaza ko abanyeshuri barangije amashuri yisumbuye mu mwaka wa 2023/2024 bari 91,713, ariko MINUBUMWE ikavuga ko abiyandikishije kwitabira Urugerero rw’Inkomezabigwi, icyiciro cya 12, ari 69,270.

Mu gutangiza ibikorwa by’urugerero by’Intore z’Inkomezabigwi, Minisitiri Bizimana yagize ati "Ubwitabire ni cyo kibazo gikunze kugorana cyane, bivuze ko abana barangije amashuri yisumbuye bakeneye gukomeza amakuru na za kaminuza bagomba gukora urugerero bose, ariko dufite abataza."

Yongeraho ko kugira ngo ubwitabire burusheho kwiyongera, habayeho Itorero ritegura urugerero, aho bamaze iminsi 3 bategura ibyo bazakora na gahunda bazagenderaho, kugira ngo hatazabaho gusiba.

Minisitiri Bizimana avuga ko abatazitabira ibikorwa by’urugerero, inzego z’ibanze (mu midugudu) zigomba gukorana n’ababyeyi, urwo rubyiruko rugashakwa rukajyanwa aho abandi bari, ariko ngo ntihagomba gukoreshwa imbaraga cyangwa agahato, ahubwo asaba ko byanyuzwa mu kubasobanurira.

Akomeza avuga ko ibikorwa by’urugerero, birimo gutanga umusanzu ukomeye mu iterambere ry’Igihugu n’imibereho myiza y’abaturage, aho mu mwaka ushize wa 2024 abanyeshuri barangije amashuri yisumbuye (urugerero rwa 11), bakoze ibikorwa bifite agaciro k’Amafaranga y’u Rwanda arenga Miliyari ebyiri.

By’umwihariko mu Murenge wa Runda w’Akarere ka Kamonyi, aho MINUBUMWE yatangirije Urugerero rudaciye ingando (bazajya bakora bataha iwabo), Minisitiri Bizimana yashyize ibuye ry’ifatizo ahazubakwa Isoko rya kijyambere mu Kagari ka Kabagesera.

Uretse iryo soko, urubyiruko rw’i Runda rwahaye MINUBUMWE inyandiko y’imihigo ruzesa, irimo uwo kubaka irerero ry’abana bato, icyumba mpahabwenge, inzu 11 z’abatishoboye, kwigisha imirire iboneye, gukora imihanda n’uturima tw’igikoni hamwe n’ubukangurambaga ku kwirinda ibiyobyabwenge n’inda ziterwa abangavu.

Minisitiri Bizimana yashyize ibuye ry’ifatizo ahazubakwa Isoko rya kijyambere mu Kagari ka Kabagesera

Minisitiri Dr Bizimana yabasabye kongeraho ikijyanye no kurwanya ingengabitekerezo ya Jenoside, kuko ngo irimo gusenya ubumwe bw’Abanyarwanda.

Uwitwa Bigirimana Janvier urimo gukora urugerero rudaciye ingando mu Murenge wa Runda, avuga ko n’ubwo barangiza kwiga ayisumbuye bafite inyota yo gushaka amafaranga, agomba kwitabira ibi bikorwa kuko ari inyungu rusange y’abariho n’abazavuka.

Mugenzi we, Niyonkuru Patience, avuga ko urugerero rufasha bamwe kudahera mu bwigunge iwabo, abandi bikabarinda ingeso mbi zirimo ubusambanyi n’ibiyobyabwenge, ari na ko bashyira mu bikorwa ibyo bize.

MINUBUMWE ivuga ko kuva mu mwaka wa 2013 ubwo Perezida wa Repubulika, Paul Kagame, yatangizaga urugerero ku nshuro ya mbere kugeza ubu, ibyo bikorwa bimaze kwitabirwa n’urubyiruko 559,586.

Urubyiruko ni imbaraga z’Igihugu

Hatangijwe Urugerero rw’Inkomezabigwi, icyiciro cya 12

Ngoga Emmanuel wa RSSB

Umukozi wa RSSB ushinzwe ibigenerwa Abanyamuryango ba EjoHeza, Ngoga Emmanuel, avuga ko impamvu ubu bwizigame bw’igihe kirekire bwashyizweho, ari ukugira ngo Abaturarwanda bose bateganyirizwe izabukuru(pansiyo), aho kuyiha abakorera umushahara wa buri kwezi bonyine.

Ngoga avuga ko ibi byakozwe nyuma y’ubushakashatsi bw’Ikigo cy’Ibarurishamibare, NISR, muri 2020, bugaragaza ko Abaturarwanda 8% gusa ari bo bazigamirwaga, mu gihe 92% bari bafite ibyago byo kubura ikizabagoboka mu gihe baba bageze mu zabukuru cyangwa bahuye n’ibyago.

Ngoga avuga ko ubwitabire bw’abamaze kujya muri EjoHeza kugeza ubu bugeze kuri Miliyoni enye z’Abaturarwanda, kandi ko ikoranabuhanga rigifunguye ku muntu wese ushobora kwizigamira ajyanye n’ubushobozi bwe kandi ku bushake (bitari agahato).

Hari abaturage bakomeje gutaka bavuga ko bakwa uwo musanzu wa EjoHeza ku ngufu, aho ngo bategerwa ku bakoresha babo mu gihe cyo guhembwa, cyangwa kuri serivisi bagiye gusaba mu nzego z’ubuyobozi.

Hari n’uw’i Musanze ugira ati "Batwaka 1,500Frw kandi EjoHeza si itegeko kuyitanga, ni ubushake, na serivisi kugira ngo uyibone ni ikibazo, utayafite ni ukujya kuyashaka ukabona kugaruka kuyisaba. Kuyatanga ni inyungu kuri twe ariko ku buryo batagombye kukwima serivisi kuko baba bakudindije, hose barayasaba, no ku murenge."

Undi muturage wo mu Karere ka Gakenke yahamagaye kuri KT Radio, avuga ko yagiye gushakira umwana we w’uruhinja ubwisungane mu kwivuza(mituelle de santé), ku Kagari babanza kumutegeka gutanga ubwizigame muri EjoHeza.

Hari na mugenzi we w’i Nyamagabe wahamagaye avuga ko bakaswe amafaranga ku mishahara yabo mu ruganda rwa Gisovu i Karongi, babwirwa ko azaba ubwizigame bwa EjoHeza, barimurwa bajya mu ruganda rw’i Mushubi na ho bigenda bityo, ariko ngo bagerageza gushaka irengero ry’ayo mafaranga bakaribura.

Uwo muturage agira ati "Ayo mafaranga nta na rimwe ryigeze riza (kuri konti), jyewe narayabajije ariko twarayabuze bamwe, kandi ndashaje mfite imyaka 65, nabajije n’Abadepite ariko nta gisubizo nabonye."

Ngoga wa RSSB amaze kumva abaturage binuba, yagize ati "Ntabwo dushobora kuva muri studio (ya radio) tutavuze ibijyanye n’aho umuturage yimwa serivisi, kubera ko atizigamiye muri Ejo Heza, ibyo byaba ari ikibazo, ababikoze bakwiriye kubibazwa, ni ko tubyemera."

RSSB ivuga ko konti y’umuntu wese ari Indangamuntu, aho uwizigamira akanda *506# agakurikiza amabwiriza, bikaba atari ngombwa kubona inyemezabwishyu, ariko ushaka kureba aho ubwizigame bwe bugeze nanone akanda *506# muri telefone, agakurikiza amabwiriza, bakamuha ubutumwa bugufi bubimwereka.

RSSB ivuga ko yungukira buri munyamuryango wa EjoHeza ku mwaka amafaranga angana na 12% by’ayo yizigamiye, aho umuntu ufite amafaranga 1,000 (ni urugero), yisanga afite 1,120Frw nyuma y’umwaka, kandi na ya nyungu ikazamwungukira indi nyuma y’undi mwaka (icyo bita compounding).

RSSB ivuga ko nyuma y’imyaka 6 EjoHeza imaze igiyeho, hari abageze mu zabukuru (imyaka 55) batangiye guhabwa amafaranga y’iyo pansiyo, ariko ko iyo umunyamuryango agize ibyago akitaba Imana icyo gihe kitaragera, abo mu muryango we bahabwa ubwo bwizigame n’inyungu yabwo, ndetse bamwe batangiranye na yo kugeza ubwo yizihizaga imyaka 3 yari imaze ishinzwe, baragobokwa mu gihe cy’ibyago.

Ngoga avuga ko muri abo batangiranye na EjoHeza, hagendewe ku byiciro by’ubudehe, aho mu cya mbere n’icya kabiri uwamaze kugira ubwizigame nibura bw’amafaranga ibihumbi 15Frw, uwo mu cya gatatu ibihumbi 18Frw, uwo mu cya kane ibihumbi 72Frw, iyo yamaze nibura umwaka yizigamira, akagira ibyago akitaba Imana, umuryango we uhabwa ubwizigame yari agezeho n’inyungu yabukomotseho, ndetse bagahabwa na miliyoni imwe n’ibihumbi 250Frw yo guherekeza uwo muntu.

Muri rusange ariko, umuntu ugeze mu zabukuru amaze igihe gito yizigamira, ngo atwara ingunga imwe y’ubwizigame bwe mu gihe atarageza kuri miliyoni 4Frw, ariko iyo yayarengeje we ashobora gufata 25% byayo ingunga imwe, asigaye akajya ahabwaho make make buri kwezi kuzagera ku myaka 20 uhereye ku yo yafashe.

Uwitabye Imana afite ubwizigame muri EjoHeza, hakurikizwa itegeko ry’izungura rihera ku bashakanye, iyo adahari umwana ni we uragwa ibye, yaba adahari iryo rage rigahabwa undi wo mu muryango w’uwitabye Imana.

Ngoga avuga ko abantu bakatwa amafaranga 1,200Frw na 1,500Frw ku kwezi, barimo abahinzi b’icyayi, ari yo ahinduka bya bihumbi 15Frw n’ibihumbi 18Frw ku mwaka atangwa n’abari mu cyiciro cya mbere, icya kabiri n’icya gatatu cy’ubudehe.

Avuga ko ibi bitari bikwiye gukorwa kuko Abanyarwanda bose ngo batari ku rwego rumwe rw’ubushobozi, aho bamwe bari munsi yabwo abandi bakaba bafite uburenzeho.

Ngoga avuga ko n’ubwo habaho imihigo y’abayobozi mu kugira umubare munini w’abitabira EjoHeza, gutanga ubwo bwizigame bikwiye kuva mu bukangurambaga aho kuva ku gushyirwaho agahato.

Perezida Kagame mu kiganiro n’abanyamakuru

Umunyamakuru yamubajije ibijyanye n’impinduka muri Guverinoma zimaze gutuma hasimbuzwa Minisitiri w’Ubutegetsi bw’Igihugu (MINALOC), uw’Ubuhinzi n’Ubworozi (MINAGRI), uwa Siporo (MINISPORTS), uw’Ubucuruzi n’Inganda (MINICOM) ndetse n’uw’Imari n’Igenamigambi (MINECOFIN).

Perezida Kagame yagize ati “Impinduka ntiziraba ahubwo! Ubuyobozi bw’Igihugu buba bwifuza ko twakora ibintu neza nta guta igihe, bishobotse(hakabaho) no kugabanya icyo bidutwara, byose bigakubirwa hamwe.”

Perezida Kagame avuga ko amatora yabaye mu mwaka ushize wa 2024 hari hashize igihe impinduka zimeze nk’izituje, ariko n’ubundi zikenewe kugira ngo ibibazo biriho mu bijyanye n’ubuhinzi n’ubworozi, ubuzima, uburezi, ibikorwa remezo, ibyo mu rwego rw’abikorera n’ibindi, birusheho kwihuta no gukemurwa neza.

Avuga ko mu mikorere y’u Rwanda, icya mbere ashyira imbere ari abaturage, aho yibaza niba babona ibishoboka byose bikwiye, bijyanye n’amikoro ahari, cyangwa niba abashinzwe gufasha abaturage badakoresha amarangamutima, babitewe n’uko bagera ku nshingano bakibona cyangwa bakishyira hejuru kurusha kureba abaturage bashinzwe.

Perezida wa Repubulika ati “Iyo nabonye ko hari ikigomba guhinduka, ntabwo ntakaza umwanya, n’iyo naraye ngushyizeho kubera ko nta cyo nari nkuziho cyangiza, nkakibona umunsi ukurikiyeho, ndakuvanaho! Kuko si wowe mbona mbere mu kazi ahubwo ndabona Igihugu n’inyungu zacyo mbere na mbere.”

Perezida Kagame avuga ko umuyobozi cyangwa umukozi runaka, ashobora gushyirwa mu mwanya nta makuru yuzuye abantu bamufiteho, kuko aba yaragiye yihisha ariko akamenyekana yabanje kugeragerezwa mu kazi.

Umukuru w’Igihugu avuga ko imikorere y’inzego za Leta, igomba guhuzwa n’izikorera, kugira ngo Igihugu cyubakirwe ku muco mwiza.

Ni inama ihuje abari mu nzego z’umutekano mu bihugu byo mu muryango wa Afurika y’Uburasirazuba(EAC) bigize Umuhora wa Ruguru, ari byo u Rwanda, Kenya na Uganda, bakaba barimo gutegura kuzahurira i Kigali kw’Abakuru b’ibi bihugu mu minsi iri imbere.

Umuhora wa Ruguru washinzwe mu mwaka wa 2013, biturutse ku gitekerezo cy’Abakuru b’Ibihugu bateranye bakemeza ko hagomba kujyaho ubufatanye mu mishinga iteza imbere abaturage.

Umuyobozi muri Minisiteri y’Ingabo z’u Rwanda, mu Biro bishinzwe Ububanyi Mpuzamahanga mu bya Gisirikare, Lt. Col. Eugène Ruzindana, avuga ko ibihugu bigize uwo muhora bimaze guhura kenshi bisuzuma imishinga 14 iri mu masezerano byagiranye, harimo n’ujyanye n’umutekano w’abaturage.

Lt. Col. Ruzindana agira ati “Uyu munsi ibi bihugu byahuye nk’uko ari bine, inama igizwe n’inzobere mpuzamahanga, zikaba zisuzuma amasezerano ibi bihugu bifitanye, ku buryo iyi nama nirangira, raporo izashyikirizwa Urwego rwo hejuru kugira ngo ibyo twiyemeje mu bijyanye n’igisirikare bigerweho.”

Umuyobozi Mukuru muri Minisiteri y’Ingabo ushinzwe Imibanire mpuzamahanga, Brig. Gen. Patrick Karuretwa, akaba na Perezida w’Urukiko Rukuru rwa Gisirikare, yibukije ko inama y’ubushize yari yageze ku myanzuro irimo n’uwo kujya baganira bifashishije ikoranabuhanga, ariko ko guhura bari kumwe ari byo bikwiye kugira ngo inyandiko zateguwe zifatweho umwanzuro wemeranyijweho.

Brig. Gen. Karuretwa agira ati “Nabonye ko hari benshi bashinzwe iperereza hano, birampa icyizere ko iyi nama izatunganya neza izo nyandiko.”

Ibihugu byashinze Umuhora wa Ruguru, ukaba unyuzwamo ibicuruzwa byambukirizwa ku cyambu cya Mombasa, ni Kenya, Uganda n’u Rwanda, nyuma yaho muri 2018 haje kwiyongeraho Sudani y’Epfo, n’ubwo icyo gihugu kitigeze cyohereza intumwa mu nama irimo kubera i Kigali kuri iyi nshuro.

AKA KANYA - Intumwa z’ibihugu bigize Umuhora wa Ruguru (Northern Corridor Integration Projects Defence Cluster) ziteraniye i Kigali mu nama y’iminsi itatu igamije gusuzumira hamwe imishinga ifitiye akamaro abaturage bo mu bihugu byo mu muhora wa ruguru. Ni inama ihuje abari mu… pic.twitter.com/W4sBoThr2w

— Kigali Today (@kigalitoday) January 8, 2025

Uwera Flora w’imyaka 33 y’amavuko, ni umubyeyi ufite umugabo n’abana babiri, bakaba batuye i Rwamagana muri Nyakaliro. Avuga ko kuva arangije amashuri yisumbuye mu mwaka wa 2013 yabuze akazi, urugo rukomeza gutungwa gusa n’ibyo umugabo yahashye.

Nyuma y’imyaka 7, Uwera yiyemeje gukorera uruhushya rwo gutwara moto ararubona, atangira akazi atyo, ariko ngo byari bikomeye ndetse abamotari b’abagore cyangwa abakobwa bakaba icyo gihe batararengaga 6 mu Rwanda hose, nk’uko bisobanurwa n’uwitwa Daniel Ngarambe wigeze kubayobora.

Uwera avuga ko kubona moto y’amashanyarazi byamuteye gukunda umwuga w’ikimotari no kuwukundisha abandi, kuko bene izi moto ngo zitabasaba ubuhanga buhambaye n’imbaraga nyinshi.

Ati “Moto y’amashanyarazi iroroshye cyane, ntiremereye kandi ntabwo ikoresha imbaraga nyinshi, n’iyo waba utwite wayitwara nta kibazo. Abagenzi benshi baba bifuza gutwarwa n’umugore kuko batuziho ubwitonzi.”

Uwera avuga ko nta gihe arakorera munsi y’amafaranga ibihumbi 10Frw ku munsi muri uko gutwara abagenzi kuri moto, ku buryo ngo amaze no kwiyubakira inzu yo kubamo muri iyi myaka ibiri ishize.

Uko babona igishoro

Uwitwa Peninah Baraka uyobora abagore b’abamotari bagize itsinda ryitwa ‘Zamuka Mugore’, avuga ko kuva mu myaka ibiri ishize, aho moto z’amashanyarazi zitangiye kuza mu Rwanda ku bwinshi, ubu hari abamotari b’abagore barenga 60 kandi umubare wabo ukaba ukomeje kwiyongera.

Baraka agira ati “Twavumbuye ibanga tutari tuzi ko gutwara moto byoroshye, Polisi itubwira ko bishoboka ndetse ikadukoresha ibizami byihariye.”

Avuga ko icyatumaga batabona moto ari ubushobozi buke kuko abazihawe kugeza ubu ari abagore b’abakene, bakaba barazihawe ku bufatanye bw’ikigo Safi Universal Link(SUL) cyakoranye na BK Foundation, batanga moto ku bagore 20, nyuma yaho ngo hari n’ababonye inguzanyo ingana na miliyoni imwe n’ibihumbi 480Frw buri wese, ubu ngo barimo kurangiza kwishyura iyo nguzanyo.

Baraka avuga ko akomeje ubukangurambaga ku bagore, kugira ngo bitabire uyu mwuga wo gutwara abagenzi kuri moto, kandi n’udafite igishoro ngo hari banki ziyemeje kumuha inguzanyo ku nyungu nto kandi byoroshye kuyishyura.

Umumotari witwa Nsengiyumva Emmanuel utwara moto isharijwa n’amashanyarazi, avuga ko yatangiye kwigisha umugore gutwara moto kugira ngo bajye basimburana ku mirimo yose yaba iyo mu rugo hamwe n’uwo gutwara abagenzi kuri moto.

Moto zirimo kuza mu Gihugu

Ikigo Safi Universal Link (SUL) gicuruza moto kivuga ko uyu mwaka wa 2025 uzarangira kizanye mu Rwanda moto zirenga 4,500 z’amashanyarazi zishobora kugenda ibirometero 90-100 bateri itarashiramo umuriro, kandi iminota 30 kuri sharijeri ikaba ihagije kugira ngo bateri yuzure.

Umuyobozi muri iki kigo ushinzwe Ubucuruzi, Ndayishimiye Jerry, avuga ko abatwara moto z’amashanyarazi batazabura aho basharija kuko mu mujyi wa Kigali hamaze kuzura sitasiyo 13, ndetse ko hirya no hino mu ntara, ahacururizwa ibikomoka kuri peterori henshi hazaba hari n’ahacomekwa moto z’amashanyarazi.

Umukozi muri Minisiteri y’Ibidukikije ushinzwe ubukungu bushingiye ku bidukikije, Jean Pierre Nizeyimana, avuga ko indwara zitandura zirimo guterwa n’imyuka mibi cyane cyane iva mu binyabiziga bikoresha peterori, ikanyura mu myanya y’ubuhumekero y’abantu cyangwa igahumanya ibihingwa bafungura.

Nizeyimana avuga ko inyungu moto y’amashanyarazi irimo gutanga ku muntu uyikoresha, ikubye inshuro hafi eshatu kurusha ikoresha lisansi, aho umuriro wa bateri ugenze ibirometero 90 kuri moto y’amashanyarazi ugurwa amafaranga 1680Frw, mu gihe kuri moto inywa lisansi litiro y’amafaranga 1600Frw itarenza ibirometero 40.

Polisi y’u Rwanda yatangaje ko irimo gukoresha ikoranabuhanga ry’utudege tutagira abapilote (drones) mu kugenzura umutekano, ibyaha n’amakosa yo mu muhanda.

Iri koranabuhanga ryiyongereye ku rya cameras zikoreshwa mu kugenzura umuvuduko w’ibinyabiziga.

Umuvugizi wa Polisi y’Igihugu, ACP Boniface Rutikanga, yaganiriye na Kigali Today agira ati "Polisi ifite gahunda yo gukoresha drone mu bikorwa byayo bya buri munsi, ni mu rwego rwo kurushaho gukora neza, gutanga amakuru yihuse kugira ngo ubutabazi bukorwe neza kandi byihuse, ubwo ndavuga ubutabazi, kuzimya umuriro, ahari umubyigano w’ibinyabiziga Polisi ikahagera byihuse, ariko na none ikaba yareba n’ibindi bikorwa bifite aho bihuriye no kurenga ku mategeko, akazi kayo ni ugutanga amakuru hanyuma ababishinzwe bagakurikirana."

ACP Rutikanga avuga ko kugeza ubu drones zitaratangira kwandikira ibihano abatwara nabi ibinyabiziga, ariko ibyo bikaba bishobora kuzakorwa.

ACP Rutikanga avuga ko drones zatangiye kugenzura umutekano wo mu muhanda nk’uko zikoreshwa mu yindi mirimo, ariko akazatanga ibisobanuro birambuye mu gihe kiri imbere.

Umuvugizi wa Polisi avuga ko akamaro ka drone karimo kugenda kiyongera, aho muri iyi minsi ngo utwo tudege twafashije mu kurwanya ubucukuzi bw’amabuye y’agaciro butemewe muri za Rutongo, Kamonyi, Rwamagana n’ahandi, ndetse zerekana n’aho ibidukikije birimo kwangirika.

Ahandi drones zirimo gukoreshwa mu Rwanda ni mu bijyanye no gushyira amaraso abarwayi hirya no hino mu bitaro no mu bigo nderabuzima, kugeza intanga z’ingurube ku borozi bazo, ndetse no gufata amakuru ajyanye n’ikoreshwa ry’ubutaka.

Impanuka yabereye ahazwi nkokuri Rwandex

Ibinyabiziga byombi byavaga mu cyerekezo cy’i Remera bigana mu Mujyi wa Kigali, ubwo bari bagisohoka muri feux rouges zo kuri Rwandex bagiye kugera mu zindi zo ku muhanda uzamuka i Gikondo kwa Mironko, ikamyo yahise isekura inyuma kuri moto, umugenzi ahita agwa hasi irakomeza iramukandagira nk’uko bisonanurwa n’undi mumotari wabonye iyo mpanuka iba, Nsanzimana Hamisi.

Iyi mpanuka yateje umubyigano w’ibinyabiziga wamaze isaha irenga, ubwo hari hategerejwe imodoka yo gutwara umurambo.

Ababonye iyo mpanuka iba bavuga ko kutitondera uburyo bwo guhaguruka muri za feux rouges no kudahana intera kw’ibinyabiziga bishoreranye ndetse no kuba umumotari yaba ashobora kuba yagiye asesera hagati y’ibinyabiziga, ari byo bishobora kuba byateye impanuka. Uwo mumotari witwa Mukusa Innocent we ntacyo yabaye.

Umuvugizi w’Ishami rya Polisi rishinzwe Umutekano wo mu muhanda, SP Emmanuel Kayigi, yemeje iby’uru rupfu rw’umugenzi wo kuri moto, avuga ko iyo mpanuka yabaye saa tanu n’iminota 45 (11:45) aho ikamyo yagonze moto bituma umugenzi agwa mu mapine yayo ahita yitaba Imana.

SP Kayigi yagize ati "Impanuka yatewe n’uburangare ndetse no kudasiga intera ihagije ku binyabiziga bikurikiranye."

Ni yo ndamukanyo ye kuko ngo iyo adafite bombo, agenda yisegura ku mugore, umukobwa cyangwa umwana wese bahuye, cyangwa agahitamo kwirinda guhura na bo (kubakwepa).

Sabiiti agendana mu gikapu bombo z’amoko atatu ashingiye ku bo aziha. Abana ngo abaha izisanzwe nto, abakobwa n’abagore batamenyeranye akabaha izo ku gati, mu gihe abo bamenyeranye n’inshuti ze za hafi ngo azigenera bombo za ‘chocolat’.

Umunsi umwe ubwo yari yicaye mu cyumba cy’inama muri Hoteli i Kigali, umudamu w’umuyobozi yaraje yicara iruhande rwa Sabiiti, maze uyu Sabiiti ahita amenya icyo uwo mubyeyi ashaka, ni ko gukora mu gikapu akuramo bombo nka 6-7 arazimupfumbatisha, uwo mubyeyi ahita ahaguruka aragenda ajya gukomeza imirimo.

Babiziranyeho kandi ntabwo ari we wenyine, kuko ngo abenshi mu bayobozi, harimo n’abadepite, abasenateri, abayobozi b’ibigo n’ab’inzego z’ibanze, abashinzwe umutekano ku marembo n’imiryango y’inyubako z’ahahurira abantu benshi cyane cyane muri Kigali no mu bindi bice Sabiiti agendamo, bazi ko adashobora kubanyuraho atabahaye bombo.

Bamwita Candyman (umugabo wa bombo cyangwa ugendana bombo), abandi bakamwita Sabiiti Bombo. Sabiiti avuga ko buri kwezi yikora ku mufuka we akarangura bombo z’amafaranga atari munsi y’ibihumbi 65Frw, akaba ari umukiriya ukomeye w’amaduka y’i Remera na Kimironko.

Byaje bite?

Sabiiti avuga ko gutanga bombo yabitangiye ari muri Kenya mu mwaka wa 2000, akaba ngo arya bombo iyo arakaye zikamufasha kugabanya ubwo burakari.

Sabiiti agira ati « Iyo ndakaye nkarya bombo, uburakari burashira. Muri uriya mwaka naravuze nti ‘ubwo bimfasha uwabikorera abandi’. Hari igihe nyura ahantu nkabona umubyeyi akubise umwana, ngahita mbaha bombo, umwana agaceceka ndetse n’umubyeyi uburakari bugashira. Bombo nzifata nk’umuti wo gukemura by’akanya gato ikibazo cy’abantu bababaye. »

Ati « Abagore ni ababyeyi, ni bo batunze iyi si, mufata neza kugira ngo yishime, kandi iyo yishimye ibintu byose biratungana. Gusa hari nk’uwo mpa bombo akazanga, akavuga ati ‘uyu ni umurozi’, akayijugunya agira ati ‘aka kagabo karanshakaho iki!’ Ariko ubundi umugore wese tuzahura ntansabe bombo, uzamenye ko tutaziranye.»

Sabiiti akomeza avuga ko mu bagore aha bombo harimo n’abafite abagabo, kandi ngo abo bagabo babo barabizi ko ataba agamije kubikundishwaho, n’ubwo ngo hari umugabo wamwamaganye amubwira ati « Ntugiye kutumarira abagore!»

Ati « Gusa, impamvu mbikora ni uko ku isi ushobora gusigira abantu umurage, hari akantu gashobora gutuma umuntu avuga ati ‘Imana iracyabaho.’ »

Avuga ko hari n’abagabo ashobora guha bombo ariko ngo abanza gusaba uburenganzira umugore abonye hafi ye, kandi akazimuha ari uko uwo mugabo yabanje kumusekera cyangwa kumubwira neza.

Sabiiti avuga ko buri munsi agomba gukora ‘ikintu kizandikwa mu gitabo cy’ubugingo’, nko guha abantu utuntu tw’impano dutoduto turimo bombo, amafaranga cyangwa kwambutsa umuntu ahantu hateye ubwoba nko mu mahuriro y’imihanda, ku buryo ngo bishobora gutuma akababaro kamurimo gashira, cyane cyane abana n’abagore.

Sabiiti avuga ko ibi ari imyizerere yishyizemo ariko idashingiye ku idini, kuko iyo afashije abantu ngo yisanga yarabyibushye kandi asa neza.

Ati « Nagombaga kuba Pasiteri ariko nsanga naba mbeshya Imana kubera akayoga. Amaherezo ariko bazantwika (ashyigikiye ko umurambo we bazawutwika mu rwego rwo kurengera ibidukikije)."

Sabiiti agira ati "Abagore ni bo bazandirira, ntabwo bazanyibagirwa. Ubu ngira n’imizimu myiza imbwira igihe nzapfira.»

Uwajeneza mu bagore n’abakobwa bashima Sabiiti

Umunyamakuru ukorera Radio/Televiziyo yitwa Isango Star, Donatha Uwajeneza, avuga ko yahuye bwa mbere na Sabiiti mu mwaka wa 2016, bombi bakorera ikigo cyitwa Nation Media Group (yari ifite ikinyamakuru The East African na Radio Kfm).

Uwajeneza avuga ko Sabiiti ari mu bantu bamuzaniraga impano zitandukanye ariko akamufata nk’abandi, kuko atari we wenyine wamuhaga izo mpano zirimo ibyo kurya no kunywa yabaga yitwaje.

Sabiiti ngo yakomeje uwo mujyo wo kumuha bombo, ku buryo bitamusaba gutekereza byinshi ku mpamvu y’icyo gikorwa cyabaye nk’umuco.

Uwajeneza agira ati « Ni byiza, akaboko iteka karambuye hari icyo kigisha, ubona ko ku isi hakiri abantu beza », ku buryo na we ngo yigiriye inama yo gufasha abantu atazi, barimo umwana yishyurira ishuri bahuye inshuro imwe gusa muri 2023.

Uwajeneza agira ati « Mu mpera z’umwaka mba mfite abantu ngomba guha ibibatunga, ni gahunda twahanye n’abavandimwe banjye. »

Uwajeneza avuga ko ahantu Sabiiti atari ngo haba hagaragara icyuho, kuko ari umushyushya rugamba uba wicaye asetsa abo bari kumwe, « atanga ibyishimo, kandi niba ari ikintu gihenze kuri iyi si ni ibyishimo. »

Hari abagowe no kumenya aho bategera imodoka

RURA yashyizeho gahunda y’ingendo mu minsi mikuru isoza umwaka, kugira ngo abantu batazabura imodoka, akaba ari ingamba zirimo gukurikizwa guhera ku wa 23 kugera ku 24 Ukuboza 2024, hamwe no kuva ku wa 30 kugera 31 Ukuboza 2024.

RURA ivuga ko abagenzi bakoresha umuhora w’Amajyepfo (Kamonyi, Muhanga, Ruhango, Nyanza, Huye, Nyamasheke, Karongi, Ngororero, Gisagara, Rusizi, Rutsiro na Nyaruguru),
bazategera imodoka | Nyamirambo kuri Stade Pelé.

Abagenzi bakoresha umuhora w’Iburasirazuba (Rwamagana, Kayonza, Gatsibo, Nyagatare, Ngoma na Kirehe), bazategera imodoka muri Gare ya Kabuga.

Abagenzi bakoresha umuhora w’Amajyaruguru (Gicumbl, Nyagatare via Gicumbi, Rutindo,Musanze, Rubavu, Burera, Gakenke na Nyabihu) bazategera imodoka muri Gare ya Nyabugogo, mu gihe abagenzi bajya mu Bugesera, bazategera muri Gare ya Nyanza ya Kicukiro.

RURA igira iti "Abateganya gukora ingendo baragirwa inama yo gutegura ingendo zabo bagura amatike hakiri kare, mu rwego rwo kwirinda umuvundo, abakozi ba RURA n’ab’Umujyi wa Kigali, ndetse n’izindi nzego bireba bazaba bahari mu rwego rwo gufasha abagenzi gukora ingendo zabo."

Muri za gare abantu ni benshi

Gusa izi ngendo zo kuva mu Ntara ujya mu yindi wambukiranya Umujyi wa Kigali muri iki gihe cya Noheli, hari abo zitoroheye kuko bavuga ko batamenye iyo gahunda yashyizweho na RURA, bakaba barimo kujya gutegera imodoka i Nyabugogo bagombye kujya ahandi nk’i Nyamirambo, ndetse bagera muri gare bagasiragira batazi iyo berekeza.

Uwitwa Irasubiza Murara wavaga i Kayonza yerekeza i Musanze, yageze muri gare ya Kabuga ahagana saa kumi n’imwe n’igice ariko bwamwiriyeho akiri muri iyo gare, akaba yavugaga ko atabona imodoka zerekeza i Nyabugogo kubera kubura abamuyobora.

Irasubiza ni umwe mu bari bahagaze cyangwa bicaye mu kazu gatwikiriye ko muri gare, usaba ko kubera akavuyo k’abantu batazi aho berekeza, hagombye kubaho uburyo bwo kuyobora abagenzi, cyane ko atari asobanukiwe gahunda y’ingendo yashyizweho.

Undi mukobwa wavaga i Kabuga yerekeza i Muhanga, yari ahagaze muri gare ya Kabuga ategereje bisi imujyana i Nyabugogo gutegerayo, akaba atazi ko yagombaga kujya i Nyamirambo ahashyizwe site y’aberekeza mu bice by’amajyepfo y’Igihugu.

Uyu mukobwa yagize ati "Ubu ni bwo mbonye umwanya wo gutaha(i Muhanga), ngiye gutega ngere i Nyabugogo hanyuma mpite ntega ijya i Muhanga", ariko yamaze kumva ko atari ho agomba kwerekera agira ati "ntabwo nari mbizi."

Abakozi b’Umujyi wa Kigali barimo gukorera muri gare y’i Kabuga, baje kumurangira imodoka zijya i Nyamirambo, ariko agenda asa n’utabishaka kuko yabonaga bumaze kwira kandi imirongo ari miremire.

Ingendo zabagoye kubera kutamenya impinduka

Abandi bari bafite ikibazo cy’uko bashobora gutaha bwije cyangwa kurara i Kabuga, ni aberekezaga mu bice bitandukanye bihakikije nk’i Karenge muri Rwamagana, bari barimo kwiyandikisha kugira ngo bashakirwe imodoka.

Gusa muri za gare zo mu Mujyi wa Kigali harimo kugaragara abakozi b’inzego zishinzwe umutekano n’ingendo, ku buryo ahari imirongo miremire bahita bahashyira imodoka nyinshi kandi bakagenzura ko abashoferi batishyiriraho ibiciro bidasanzwe byo guhenda abagenzi.

Umuyobozi Nshingwabikorwa wa TIR, Apollinaire Mupiganyi

Iryo sesengura ryatangajwe ku wa 19 Ukuboza 2024, rivuga ko ibigo by’abikorera bihabwa amakuru ahagije ku itangwa ry’amasoko ya Leta mu Rwanda bitarenga 8.55%, bikaba ahanini ngo ari iby’abayobozi cyangwa abakozi bashinzwe gutanga amasoko.

Umuyobozi Nshingwabikorwa wa Transparency International Rwanda, Apollinaire Mupiganyi, avuga ko ingengo y’Imari ya Leta irenga 52% ikoreshwa binyuze mu itangwa ry’amasoko, ariko ayo mafaranga akajya mu maboko y’abashinzwe gutanga amasoko, imiryango yabo cyangwa bamwe mu batanze ruswa.

Mupiganyi yagize ati "Muri 2021 twabonye ruswa mu bikorwa remezo, irahari kuko uwatubwiraga ko yatanze amafaranga make yari Miliyoni 100Frw, uwatanze menshi akaba yarageraga kuri Miliyoni 120Frw ya ruswa, twareba muri rusange ruswa yatanzwe mu bikorwa remezo tugasanga yarageraga kuri Miliyari 14Frw muri uwo mwaka."

Transparency International Rwanda yasesenguye Raporo y’Umugenzuzi Mukuru w’Imari ya Leta ya 2022-2023, igaragaza ko kuva mu mwaka wa 2019-2023, Leta yahombye amafaranga angana na Miliyari 1,888 hamwe na Miliyoni 444, bitewe no gutanga amasoko mu buryo butanyuze mu mucyo.

Iryo tangwa ry’amasoko rigusha Leta mu bihombo, ngo rigaragarira ahanini mu bwubatsi no kwita ku mihanda, aho ba rwiyemezamirimo bahagarika iyo mishinga itarangiye, kuko baba baratsindiye isoko badashoboye gushyira mu bikorwa amasezerano bashyizeho umukono.

Ahandi hari ibihombo ni mu bigo bishinzwe ubuvuzi, mu masoko ya kijyambere yubatswe ku mipaka y’Igihugu ndetse no mu itangwa ry’amazi n’amashanyarazi, rikorwa n’ibigo bya WASAC na REG.

Abapiganira amasoko ya Leta bagera kuri 42.22% babwiye Transparency ko harimo gukoreshwa ikimenyane, icyenewabo na ruswa kugira ngo umuntu abashe guhabwa isoko ryo gukora imirimo runaka, yaba iyo gukora imihanda, kubaka cyangwa kujya kugurira Leta ibintu bitandukanye.

Mupiganyi agira ati "Hari amategeko asaba umuntu kutivanga mu bikorwa afitemo inyungu, ariko umuyobozi runaka cyangwa umukozi uri mu kanama k’amasoko ya Leta, aba afite amakuru, yarashyizeho ikigo cye cyihariye gipiganwa muri ayo masoko, ugasanga Umunyamabanga Nshingwabikorwa w’Akarere yashyizeho ikigo kiri mu mazina y’umugore we."

Umuryango Transparency International Rwanda uvuga ko u Rwanda rufite amanota make cyane mu gukoresha ingengo y’Imari yaganiriweho n’abaturage, aho abo baturage batamenya uburyo amafaranga yabo yakoreshejwe, nyamara biri mu byo amategeko abateganyiriza.

Francine Gatarayiha ushinzwe Ikoranabuhanga ryitwa Umucyo rinyuzwamo amakuru ku itangwa ry’amasoko ya Leta, avuga ko ubwo buryo bugomba kuba bufungukiye buri wese, ariko hakaba ibigo biba byarahejwe mu ipiganwa.

Gatarayiha agira ati "Hari uburyo dushobora gutangiira amakuru amwe n’amwe ntahite, tuvuge wenda nka sosiyete zahejwe mu masoko ya Leta, ikoranabuhanga rirazitangira ntabwo zishobora gupiganwa."

Gatarayiha avuga ko umuntu ukora mu kigo cyatanze isoko na we atemerewe gupiganwa, ariko ko mu gihe ikigo cye cyitabira ipiganwa cyanditse ku wundi muntu, iryo koranabuhanga ntabwo ribimenya, akaba ari yo mpamvu ryashyizweho kugira ngo ababibona batange amakuru ku badakwiye kwitabira iryo piganwa.

Gatarayiha avuga ko igihombo Leta igira nyuma yo gutsindira isoko kw’ibigo byapiganwe kiri hanze y’Ikoranabuhanga rya ’Umucyo’, n’ubwo isoko riba ryaratanzwe nabi rigahabwa umuntu utabishoboye.

Avuga ko urubuga rwa Umucyo ruzagera ubwo rwerekana niba habayeho ipiganwa risesuye cyangwa ritarabayeho, aho abantu bazajya bagaragaza inenge zabayeho mu itangwa ry’iryo soko, kugira ngo rihabwe ushoboye kubahiriza amasezerano ndetse n’uwatanze isoko abibazwe.

Gatarayiha agira ati" Impamvu dutangaza amasoko, ni ukugira ngo abantu bagire icyo bavuga ku byabaye."

Gatarayiha avuga ko nyuma y’uko ikoranabuhanga rya ’Umucyo’ rigiyeho, abantu babyishimiye kuko akazi ngo karimo kwihuta kandi nta mpapuro zigikoreshwa zatumaga abantu bibwa isoko bari gutsindira, n’ubwo ngo bitaragabanya ruswa ku rwego rushimishije.

Umuryango Transparency uvuga ko irimo gushaka uburyo wakorana n’Itangazamakuru n’indi miryango itari iya Leta, kugira ngo bahe ijambo umuturage ku itegurwa ry’ingengo y’Imari n’ishyirwa mu bikorwa ryayo, ari na ho itangwa ry’amasoko rigaragarira, ndetse no kureba abatsindiye amasoko niba babikwiye.

Transparency isaba ko amasoko atajyanye no kugura ibikoresho byo kurinda umutekano yose akwiriye kumenyeshwa abaturage, yaba ay’ikorwa ry’imihanda, gukwirakwiza amazi, amashanyarazi n’ibindi.

Transparency isaba ko abakeneye amakuru ku itangwa ry’amasoko ya Leta, cyane cyane Abanyamakuru n’abandi bakora ubuvugizi, bagomba koroherezwa kuyabona.

Abanyeshuri bo muri EP Cyamburara bishimiye kubona amashanyarazi bwa mbere mu kigo cyabo

Ibi bigo byatanze amashanyarazi akomoka ku mirasire y’izuba ku ishuri riri mu Karere ka Kayonza, ryajyaga rijya gushaka aho ricapisha impapuro z’ibizamini, mu rugendo rureshya n’ibirometero 35(km).

Mu mudugudu wa Cyamburara ahari ishuri ribanza(EP Cyamburara), mu Kagari ka Buhabwa, Umurenge wa Murundi mu Karere ka Kayonza, ni bamwe mu baturage mu Gihugu cyose barenga 23% bataragerwaho n’amashanyarazi, nk’uko Guverinoma y’u Rwanda ibisobanura.

Ubwo bari bakimara kubona ingufu z’imirasire y’izuba bahawe n’ibigo bikora ubwikorezi, abanyeshuri, abarezi n’ababyeyi barerera kuri EP Cyamburara, bazanye imizindaro ikoreshwa n’amashanyarazi mu kubyina umuziki ku nshuro ya mbere kuva muri 2003, ubwo iryo shuri ryashingwaga mu mudugudu witaruye cyane ibikorwa by’iterambere.

Uretse kubakura mu bwigunge, amashanyarazi y’imirasire bahawe ngo abaruhuye ingendo bakoraga bajya gucapisha no gutubura impapuro z’ibizamini by’abanyeshuri, mu rugendo rureshya n’ibirometero 35 kugera i Karubamba muri Rukara, aho umuntu atega moto ku mafaranga arenga ibihumbi 3.

Umuyobozi w’iryo shuri ribanza rya Cyamburara, Marora Ladislas, agira ati "Gutubura impapuro z’ibizamini cyangwa ibindi bikorwa bijyanye na ’papeterie’ zikoresha umuriro, byadusabaga kugenda ibilometero 35, ariko ubu turabikorera hano."

Marora avuga ko ikibazo basigaranye ari ukutagira mudasobwa zifasha abarezi n’abanyeshuri kwiga ikoranabuhanga, bakaba ngo basoza amashuri abanza biga mudasobwa mu mafoto ariko batarayibonesha amaso.

Bashimiye ababagobotse

Umwana witwa Abanabayo Odile wiga mu mwaka wa Gatanu agira ati "Nta mudasobwa tuzi, ntazo turabona, icyakora umbwiye gutanga ubusobanuro bwayo mu magambo(definition) nabukubwira", kuko biri mu gitaho cy’isomo bita SET(Science Elementary and Technology).

Umuyobozi w’ishami ry’Uburezi mu Karere ka Kayonza, Ntaganda Innocent, avuga ko nyuma y’amashanyarazi akomoka ku mirasire y’izuba, muri iryo shuri hazashyirwa icyumba mpahabwenge cy’ikoranabuhana, kandi abaturage bahaturiye bakaba bazatunga telefone zigezweho ari benshi, kuko babonye aho kuzisharija.

Umuyobozi w’Ikigo cy’ubwikorezi cya CMA CGM mu Rwanda n’i Burundi, Mulisa Fred, avuga ko gutwara ibintu mu modoka zigendera ku butaka, mu mato agenda mu mazi, ndetse no mu ndege ziguruka mu kirere, byose birekura imyuka ihumanya, igateza abantu kwibasirwa n’imihindagurikire y’ibihe.

Mu rwego rwo kugabanya ubukana bw’ibyo bibazo bateza, CMA CGM ndetse na bagenzi babo bitwa CEVA Logistics, biyemeje kugabanya iyo myuka ihumanya ikirere batanga amashanyarazi y’imirasire adahumanya, hamwe no gutera ibiti.

Mulisa agira ati "Uyu mushinga watwaye amafaranga y’u Rwanda miliyoni 11 n’ibihumbi 500, icyerekezo cy’iki kigo ni ukugabanya imyuka ihumanya ikirere bitewe n’uko twebwe hari ibyo twangiza, mu mwaka utaha turateganya gutera ibiti ibihumbi 10 dufatanyije na Minisiteri y’Ibidukikije."

Umwe mu bayobozi b’ikigo CEVA Logistics, Umuhoza Christa Bella, yongeraho ko mu mwaka utaha bazashakira EP Cyamburara mudasobwa zizashyirwa mu cyumba cy’ikoranabuhana.

Uretse gutera ibiti no gutanga ingufu z’imirasire ku mashuri, mu yindi mishinga ngarukamwaka ibi bigo bikora ubwikorezi mpuzamahanga byizeza u Rwanda, harimo uwo gushaka amakamyo akoresha amashanyarazi nk’uko byatangiye mu bindi bihugu aho bikorera.

Hashyizweho gahunda y’ingendo ku bazajya kwizihiza Noheli n’Ubunani

RURA yashyizeho ibice bitandukanye mu Mujyi wa Kigali abantu bazajya gutegeramo imodoka, bitewe n’uko ingendo zikorwa ari nyinshi mu mpera z’umwaka, ubwo abantu baba bajya kwizihiza iminsi mikuru ya Nohell n’Ubunani hirya no hino mu Gihugu.

RURA ivuga ko izo ngendo nyinshi zitera ibura ry’imodoka zitwara abagenzi mu buryo bwa rusange, ndetse n’umuvundo ukabije muri gare ya Nyabugogo.

Kubera iyo mpamvu hakaba hafashwe ingamba zizatangira gukurikizwa guhera ku wa 23 kugera kuri 24 Ukuboza 2024, hamwe no kuva ku wa 30 kugera kuri 31 Ukuboza 2024.

RURA ivuga ko abagenzi bakoresha umuhora w’amajyepfo (Kamonyi, Muhanga, Ruhango, Nyanza, Huye, Nyamasheke, Karongi, Ngororero, Gisagara, Rusizi, Rutsiro na Nyaruguru),
bazategera imodoka i Nyamirambo kuri Stade Pelé.

Abagenzi bakoresha umuhora w’uburasirazuba (Rwamagana, Kayonza, Gatsibo, Nyagatare, Ngoma na Kirehe), bazategera imodoka muri Gare ya Kabuga.

Abagenzi bakoresha umuhora w’amajyaruguru (Gicumbl, Nyagatare via Gicumbi, Rutindo, Musanze, Rubavu, Burera, Gakenke na Nyabihu) bazategera imodoka muri Gare ya Nyabugogo, mu gihe abagenzi bajya mu Bugesera, bazategera muri Gare ya Nyanza ya Kicukiro.

RURA igira iti "Abateganya gukora ingendo baragirwa inama yo gutegura ingendo zabo bagura amatike hakiri kare, mu rwego rwo kwirinda umuvundo, abakozi ba RURA n’ab’Umujyi wa Kigali, ndetse n‘izindi nzego bireba bazaba bahari mu rwego rwo gufasha abagenzi gukora ingendo zabo."

RURA isaba abazakora ingendo muri ibi bihe by’iminsi mikuru kwihanganira imbogamizi bashobora guhura na zo.

Enjeniyeri warimo yubakisha igorofa ku Gisozi, yaganiriye na Kigali Today agira ati “Hari ibigo bikomeye nzi aho ba kapita(abubakisha) batirirwa bajya gushaka abakozi, bashyira ibirango aho bagiye gukora umuhanda cyangwa kubaka inzu, mwebwe(abakozi) mukabyuka mujya gutera iperu, kapita akakubwira ati ‘twebwe duhemba buri minsi 15, uzampamo iminsi 5. Urakora ntukora?”

Uyu mwenjeniyeri avuga ko hari n’abubakisha bizwi ko abakozi babo bamara guhembwa, buri wese akaba agomba kumuha ku mafaranga yahembwe uwo munsi kugira ngo azemerwe umunsi ukurikiyeho. Ati“Ibyo utabikoze, bushobora gucya rwa rutonde wari uriho ntiwongere kurwisangaho.”

Uyu Enjeniyeri Munyehirwe Alphonse (si yo mazina ye ya nyayo), avuga ko yanga kwiteranya na ba kapita kugira ngo batamwicira akazi bagashyiramo abakozi badashoboye, cyangwa bakamwiba ibikoresho, n’ubwo ngo azashaka uburyo yashyirishamo abakozi bakora akazi ko kuneka, kugira ngo ajye ahita asezerera uwo mu kapita akoresheje amayeri.

Ingero z’aho abubatsi bavuga ko bahuye na ruswaUwigeze kuba umuyede mu Karere ka Gatsibo aho bubakaga inzu y’uburiro bw’abanyeshuri(refectoire), avuga ko umuntu wese wahakoraga, uko ahembwe buri wa Gatandatu ngo yagombaga kugira amafaranga aha kapita.

Uyu muturage agira ati “Umuyede yagombaga gutanga amafaranga 1000Frw umufundi agatanga 2000Frw, uko uhembwe, kandi twari abakozi batari munsi ya 120, nawe bara ayo mafaranga yose wumve, hashize nk’imyaka ibiri iyo refectoire yubatswe.”

Undi mwubatsi yakomeje avuga ko mu mirimo yo gusenya sitasiyo ya lisansi yari iri mu Mujyi wa Kigali ahateganye n’umuturirwa wa KCT umanuka ujya kuri T2000, kapita yategekaga abakozi kumuha amafaranga bayanyujije ku mufundi w’inkoramutima ye (bamwita imandwa) kugira ngo batavumbura ko yariye ruswa.

Uyu mwubatsi ati “Uyu mufundi iyo wamuhaga amafaranga yahitaga akwandika ahantu, bwacya tugiye mu kazi ku wa Mbere kapita akaba afite rwa rutonde umufundi yamuhaye, akatubwira ngo tujye ku murongo, ukabona arimo kugenda atoranya abagiye batanga amafaranga kuri wa mufundi, ati ‘wowe tambuka uze, nawe ngwino, gutyo gutyo.”

Ati “Jyewe nasigaye nibaza nti ‘ese ko nari umutekenisiye wemewe kandi wubashywe hano, bigenze gute! N’uriya w’umuswa nirirwa mfasha utazi no gutera ikamba! Ariko ugasanga yatanze akantu kugira ngo bamwemere, wowe ugakata ukagenda.”

Hari undi mwubatsi uvuga ko mu gihe Sitade Amahoro yari itangiye kubakwa, yagiye kuhasaba akazi bamuca amafaranga 40,000Frw kugira ngo akabone.

Aba bubatsi bavuga ko abayobozi b’ingaga cyangwa amashyirahamwe yabo, n’ubwo baba bavuga ko babavuganira, ngo ni bo babaca amafaranga menshi kurusha kwihererana umukoresha bakamuha ku yo bahembwe.

Muri bagapita baganiriye na Kigali Today, ntawe uhakana ko ikibazo cya ruswa gihari ariko ngo ntabwo ari bose bayisaba kandi ngo ntabwo basaba menshi cyane.

Inzego ziyoboye abubatsi muri Kigali ntabwo zirabasha kuboneka ngo zisobanure ikirimo gukorwa mu kurwanya iyi ruswa izivugwaho.

Icyegeranyo cya Transparency International Rwanda

Umuryango Transparency International (TI) Rwanda mu cyumweru gishize wasohoye raporo yiswe Rwanda Bribery Index (RBI) y’umwaka wa 2024, igaragaza ko Urwego rw’abikorera, cyane cyane mu bwubatsi, ari ho hatekerezwa kubamo ruswa nyinshi kurusha izindi nzego mu Rwanda.

Uwayoboye ubu bushakashatsi, Rwego Albert ushinzwe gahunda z’Umuryango Transparency International Rwanda, avuga ko hari abakozi bo mu bwubatsi barimo guhabwa akazi babanje gutanga ruswa, bikaba byaratumye Urwego rw’abikorera ruza ku mwanya wa mbere muri ruswa, ku rugero rwa 13%.

Umuryango TI uvuga ko impuzandengo (ikigereranyo rusange) ya ruswa yatanzwe na buri muntu muri 2024 ari amafaranga 65,543Frw, mu gihe ingo nyinshi zigera kuri 58% zibona umushahara utarenga 30,000Frw ku kwezi, bivuze ko ruswa batanga ikubye inshuro ebyiri zirenga amafanga binjiza.

Nkundakozera utuye aho bita mu Gahuru hafi y’igishanga, avuga ko yashoboraga guterwa n’abagizi ba nabi ntabone uko yitabara bitewe no kuba mu kizima, ndetse ko mu rugo rwe bateguraga amafunguro hakiri kare kuko batagiraga uburyo bwo kumurika ninjoro.

Nkundakozera agira ati "Iriya mbabura na yo icyo imfasha ni ukurondereza inkwi ku buryo izo naguraga amafaranga 1500Frw zigashira mu minsi 3, ubu zigiye kujya zimara ibyumweru bibiri."

Twagirimana na we ashimira BK Foundation yabacaniye ikabaha n’imbabura za rondereza, ko abana bagiye gusubira mu masomo ninjoro, ndetse n’imbabura zikaba zizabarinda gukenera ibiti byinshi nk’imwe mu mpamvu yo guteza ubutayu no guhumanya umwuka abantu bahumeka.

Ubuyobozi bw’Akarere ka Nyanza burashimira BK Foundation yahaye abo baturage b’Umurenge wa Muyira imbabura zirondereza ibicanwa hamwe n’umuriro ukomoka ku mirasire y’izuba, ngo byatumye ingo zifite amashanyarazi muri ako karere ziyongeraho 2%.

Umuyobozi wungirije w’Akarere ka Nyanza ushinzwe Ubukungu n’Imari, Patrick Kajyambere, avuga ko abaturage bafite umuriro w’amashanyarazi muri ako karere ari 77%, by’umwihariko abo mu Murenge wa Muyira bakaba batarenga 66%.

Kajyambere ati "Iyi nkunga baduhaye yongereyeho 2% by’abafite umuriro w’amashanyarazi, by’umwihariko uyu Murenge ni wo ufite ubuso bunini muri aka Karere, ni uwa kabiri mu mirenge ifite amashanyarazi make nyuma ya Nyagisozi, akaba ari yo mpamvu twawibanzeho kugira ngo bagendane n’abandi."

Umuhuzabikorwa w’imishinga ijyanye n’Ingufu muri Minisiteri y’Ibikorwaremezo (MININFRA), Marion Nirere, avuga ko ubu Leta igeze ku rugero rwa 77% itanga umuriro w’amashanyarazi ku baturage bose mu Rwanda, kandi ko hari icyizere cy’uko bazaba bagezweho bose(100%) mu myaka 5 iri imbere.

Nirere avuga ko icyo gipimo kizagerwaho ku bufatanye n’inzego zitandukanye zishinzwe kunganira abaturage mu cyo bita ’Corporate Social Responsibility’ nka BK Foundation n’abandi.

Nirere agira ati "Mwabonye ko BK Foundation yaje gufatanya n’abikorera muri uyu Murenge wa Muyira, turabikangurira n’abandi kuzakomeza gufatanya na Leta, kugira ngo iyo ntego ibashe kugerwaho."

Umuyobozi wa BK Foundation, Ingrid Karangwayire, avuga ko ingo zahawe umuriro w’amashanyarazi n’imbabura ubu ari 141, ariko ko mu mwaka utaha wa 2025 na bwo bazageza ubwo bufasha ku yindi miryango.

Karangwayire yagize ati "Muzi ko BK group ifite ibigo 4 by’ishoramari bigizwe na Banki ya Kigali, BK Insurance, BK TechHouse na BK Capital, buri kigo rero muri ibyo byose kikaba kiduha(BK Foundation) 1% by’inyungu babonye igasubira gufasha abaturage."

BK Foundation yagize uruhare rwa 70% mu ngufu z’imirasire y’izuba n’imbabura byahawe abaturage b’i Muyira, bikaba bifite agaciro k’amafaranga y’u Rwanda miliyoni 37, mu gihe uruhare rusigaye rwabaye urw’Ihuriro ry’Abikorera batanga Ingufu mu Rwanda(Energy Private Developers/EPD).

Umuyobozi Mukuru (CEO) wa EPD, Serge Wilson Muhizi, arahamagarira abandi bafatanyabikorwa kwishyira hamwe n’iri huriro bagakorera abaturage ibikorwa bitandukanye bitagamije inyungu, atari mu bijyanye n’ingufu gusa, ahubwo ko bashobora no kububakira bakabavana mu miturire mibi.

Mu bukangurambaga ngarukamwaka bw’iminsi 16 yo kurwanya ihohotera rishingiye ku gitsina, bwatangiye kuwa 25 Ugushyingo kugeza kuwa 10 Ukuboza 2024, imiryango yaganirijwe ku nsanganyamatsiko igira iti“Twubake Umuryango uzira ihohotera”.

Ibarura rirebana n’imibereho y’abanyarwanda rizwi nka Rwanda Demographic and Health Survey(DHS) ryo mu 2019-2020, rigarahaza ko 46% by’abagore bigeze kubana n’abagabo, ndetse na 18% by’abagabo bigeze kubana n’abagore, bakorewe ihohoterwa ribabaza umubiri, kuryamana ku ngufu cyangwa gukomeretswa umutima n’uwo bashakanye.

Ubu bushakashatsi buvuga kandi ko muri abo bakorewe ihohoterwa, 41% by’abagore na 39% by’abagabo bafite inkovu n’ibikomere ku mubiri biturutse ku gukubitwa cyangwa kuryamana ku ngufu n’uwo bafashakanye.

Muri abo bahohotewe, abagore bari ku kigero cya 40% hamwe n’abagabo 38% bahisemo kwicecekera no kutagira uwo babibwira, mu gihe abandi bangana na 43% by’abagore hamwe na 40% by’abagabo, bagaragarije abaturanyi babo cyangwa imiryango ko bakorerwa ihohoterwa.

Umuryango Save Generations Organization uvuga ko mu bukangurambaga wanyujije mu itangazamakuru, imbuga nkoranyambaga n’ibiganiro wagiranye n’abaturage bo mu turere twa Kamonyi, Bugesera, Nyagatare na Gasabo aho ufite ibikorwa, abashakanye bamenye ko guhishira ihohoterwa bituma rikomeza kwiyongera.

Mu butumwa bwagejejwe ku barenga 700 batuye mu mirenge ya Rusororo na Ndera muri Gasabo ku wa 10 Ukuboza 2024, Sandrine Umukunzi ukorera Save Generations Organization yagize ati "Abaturage bitabiriye ubukangurambaga bagatanga ibitekerezo, twabonyemo ko abantu bahawe amakuru ahagije abafasha kumenya ihohotera."

Umukunzi abasaba gutangira amakuru ku gihe bagakorana n’inzego nka Isange One Stop Center, RIB na Polisi mu gihe babonye uwakorewe ihohoterwa, kugira ngo ahabwe ubufasha.

Uwihoreye Jeannette uhagarariye inshuti z’Umuryango, ari zo zigizwe n’abajyanama b’imiryango mu Murenge wa Ndera, avuga ko abashakanye bahohoterana bishingiye ku mitungo y’urugo, ariko hakaba n’ikibazo cy’abangavu basambanywa bitewe no gufatiranwa kuko baba bakiri abana bataruzuza imyaka 18.

Ubu bukangurambaga bwafatanyijwe no gupima virusi itera SIDA, aho ababwitabiriye banahawe ubujyanama n’ubufasha ku bibazo by’ubuzima bwo mu mutwe.

Ingabire Rosine uyobora Inama y’Igihugu y’Abagore mu Murenge wa Rusororo avuga ko kuba ibi bikorwa byaritabiriwe ari ikimenyetso ko abashakanye bazafata ingamba zo kwirinda no kurinda abo babana.

MIGEPROF n’abafatanyabikorwa bakomeje ubu bukangurambaga bwo kurwanya ihohotera rishingiye ku gitsina, basaba abaturage kwirinda ibisindisha nka kimwe mu bisembura ihohotera. 

RURA iherutse gutangiza uburyo bushya bwo kwishyura mu modoka zitwara abantu mu buryo bwa rusange, hakurikijwe urugendo umugenzi yakoze aho kwishyura amafaranga y’urugendo rwose

Ni bimwe mu byagarutsweho n’Umuyobozi mu Rwego Ngenzuramikorere (RURA), ushinzwe ibijyanye no gutwara abantu n’ibintu (Transport), Beata Mukangabo mu kiganiro ‘Ubyumve ute?’ cyatambutse kuri KT Radio ku wa Kabiri tariki 10 Ukuboza 2024.

Beata Mukangabo asobanura ko gutwara abantu mu buryo bwa rusange bunoze, bivuze kwishyura igiciro gikwiye, kugera iyo bajya ku gihe kandi bakagenda neza, umuntu akaba azi neza ko ataza gukererwa.

Ku kijyanye no kuba iyo gahunda koko ihari, Mukangabo yavuze ko ihari ariko ikiri mu rugendo, kuko ashingiye ku miterere y’ingendo za rusange mu bihugu byateye imbere, ababizi babona ko mu Rwanda urugendo rukiri rurerure.

Mukangabo ahereye ku mateka y’ingendo mu Mujyi wa Kigali n’ahandi mu Gihugu muri rusange, asobanura ko u Rwanda ruvuye kure cyane kuko mu myaka ya 2010 mu mihanda no muri za gare "hari hakiri utumodoka duto duto twinshi cyane."

Avuga ko mbere yaho gato ingendo zerekeza henshi cyane cyane mu Ntara nta zabagaho, kuko nta modoka z’abikorera zajyagayo, aho ngo bategerezaga bisi za ONATRACOM nka rimwe mu cyumweru.

Mukangabo avuga ko kugeza ubu mu Rwanda hari ibigo birenga 30 bitwara abagenzi, haba mu Mujyi wa Kigali no mu Ntara, imihanda ikaba yarakozwe, ndetse ko gukura k’Umujyi wa Kigali ubu kwatangiye kujyana no kunoza ingendo, nyuma y’aho Leta iguriye bisi nshya zirenga 200.

Mukangabo avuga ko izi bisi zatumye abagenzi bagabanuka muri za gare no ku byapa, ndetse ubu ngo hari impinduka ziri kubaho mu biciro mu rwego rwo gusubiza abagenzi binubiraga ko barengana, kuko uwagenze ikilometero kimwe yishyura kimwe n’ugenze ibirometero 10.

Mukangabo avuga ko iri gerageza (ry’ibiciro bigendanye n’urugendo buri wese yagenze) ritazasubira inyuma, aho buri cyapa imodoka igezeho, ikoranabuhanga rihita rigaragaza igiciro kigendanye n’urugendo rumaze gukorwa.

Beata Mukangabo, Umuyobozi w’ishami rishinzwe kugenzura serivisi zo gutwara abantu n’ibintu muri RURA

Mukangabo avuga ko ubu abagenzi barimo kwishimira iryo koranabuhanga ribishyuza urugendo bagenze gusa, aho umuntu ashobora guhagarara aho ashatse akaza kongera gufata indi modoka ikurikiyeho nta gihombo agize.

Ibibazo bigihari birakemuka bite?

Mukangabo avuga ko muri za gare hakiri ikibazo cyo kubona imodoka mu buryo bwihuse, aho nk’i Kabuga umugenzi ashobora kumara isaha muri bisi ategereje ko ihaguruka.

Ati "Jyewe kuva byatangira ntabwo ndi mu biro ndi muri gare, usanga hakiri ya myumvire, aho ubaza umushoferi uti, ’bisi ko idahaguruka?’ Akavuga ko ategereje kuzuza abantu 70 kuko ni wo mubare ntarengwa, ariko ubundi yagombye guhaguruka harimo na 35 (50%), hicayemo bariya gusa abandi akagenda abafata mu byapa."

Mukangabo avuga ko gutegereza kuzuriza abagenzi muri gare biteza umushoferi kuza kurenza urugero rw’abo bisi yemerewe gutwara mu gihe ageze ku byapa, ku buryo n’iyo bagize impanuka ngo ubwishingizi butabishyurira.

Mukangabo avuga ko RURA igitegereje ikoranabuhanga ribwira abagenzi bari ku byapa igihe bari buhamare, ariko bikazakorwa mu gihe bisi zizaba zabonye ibisate by’imihanda byihariye.

Hagati aho ariko RURA isaba ko umugenzi atagomba kurenza iminota 15 muri gare mu masaha ya mu gitondo cyangwa nimugoroba, ariko ko mu masaha abantu baba ari bake muri gare no ku byapa, ngo hagitegerejwe ko inzego zibyumvikanaho.

Minisitiri w’Ibikorwaremezo ari kumwe n’Umuyobozi wa FIA Foundation, David Richards ndetse n’uw’Urugaga Mpuzamahanga rushinzwe Imodoka(FIA), Muhammed Ben Sulayem President, bafunguye Laboratwari ipima ubuziranenge bwa kasike

Minisitiri w’Ibikorwaremezo, Dr Jimmy Gasore, ari kumwe n’abayobozi mu nzego zitandukanye, barimo uwa FIA Foundation, David Richards, bafunguye iyo Laboratwari iri mu Kigo Gitsura Ubuziranenge(RSB), ku wa Gatatu tariki 11 Ukuboza 2024.

Dr Gasore yagize ati "Iyi ni intambwe ikomeye u Rwanda ruteye, kuko ni yo Laboratwari ya mbere muri Afurika ifite ubwo bushobozi, izadufasha mu rugendo twatangiye rwo gupima ingofero nshya zinjira mu Gihugu, ku buryo abamotari bashya n’abatari bo bazaba bafite ingofero zujuje ubuziranenge ku isoko."

Dr Gasore avuga ko ingofero bahawe na FIA Foundation kuva muri Gicurasi 2024, hamwe n’izo abashoramari batumiza hanze zujuje ubuziranenge, zizagenda zisimbuzwa gake gake izisanzweho zidafite ubushobozi bwo kurinda umutwe w’umuntu ugenda kuri moto.

Minisitiri w’Ibikorwa Remezo avuga ko Ubukangurambaga bwiswe "Tuwurinde (umutwe)" bwatangiye muri Gicurasi uyu mwaka buzakomeza, kugira ngo abagenda kuri moto, abacuruzi ba kasike n’abazitumiza hanze, bitabire gukoresha izujuje ubuziranenge.

Umuryango urengera ubuzima witwa Healthy People Rwanda(HPR), ni wo ushinzwe gufatanya na MININFRA muri ubwo bukangurambaga bwo kwereka inzego zitandukanye, abamotari n’abandi bose bagenda kuri moto hamwe n’abashoramari, akamaro ko gukoresha kasike yujuje ubuziranenge.

Dr Innocent Nzeyimana uyobora HPR yagize ati "Nk’ubu hari ubushakashatsi twakoze, tuganira n’abakoresha moto, tureba uko bambara kasike n’igihe bazambara, uko kasike zimeze, dusanga hari iziteye ubwoba, zamenetse, zangiritse ariko ugasanga barazikoresha, nyamara zidafashe ubuzima bwabo."

Dr Nzeyimana avuga ko mu bantu bicwa n’impanuka zibera mu muhanda, 21% baba ari abagenda kuri moto, kandi bakazira kuba bakomeretse umutwe n’ubwo baba bambaye kasike.

Umumotari witwa Muyango Wellars yemeza ko kasike zisanzwe nta bushobozi bwo kurinda umutwe w’umuntu uyambaye, iyo habayeho impanuka.

Muyango agira ati "Kasike zisanzwe zirameneka cyane rwose, ubundi iyo umuntu akoze impanuka iriya kasike isanzwe iva mu mutwe, kandi iyo yituye hasi ihita ishwanyagurika."

Iyi Laboratwari izakumira ingofero z’abagenda kuri moto zinjiraga mu Rwanda zitujuje ubuziranenge

Hagendewe ku mabwiriza y’ubuziranenge bwa kasike za moto yitwa "RS 576:2024-Protective helmets for motorcycle and moped users Specification", yasohotse mu Igazeti ya Leta yo ku wa 19 Kanama 2024, muri Laboratwari y’Ikigo Gitsura Ubuziranenge, hashyizweho imashini zisuzuma ibintu bitandukanye kuri kasike y’umuntu ugenda kuri moto.

Mu bisuzumwa hari uguhonda kasike ku bintu bitandukanye, kugira ngo barebe ko izashobora kurinda umutwe w’umuntu uguye ahantu aho ari ho hose, kureba niba kasike itajabuka mu mutwe w’umuntu mu gihe moto isimbutse ahantu, hamwe n’uburyo ikandika(Compression) mu gihe hari ikintu kiremereye kiryamiye umutwe w’umuntu wakoze impanuka.

Bareba kandi ubukomere bw’umukandara unyuzwa munsi y’akananwa k’umuntu, niba uwo mugozi utamuniga cyangwa udacika byoroshye, bikaba byatuma kasike imuvamo.

Imbonerahamwe igaragaza inzego zihagaze mu byerekeranye na ruswa

Urwego rw’Abikorera ruvugwaho ruswa iri ku rugero rwa 13% bitewe ahanini n’abubatsi ngo batanga akazi ku bakozi ari uko babemereye kubakata ku yo bahembwe, mu gihe Polisi yo ivugwaho ruswa ingana na 9.40% bitewe ahanini n’abakoresha ibizamini byo gutwara ibinyabiziga.

Uwayoboye ubu bushakashatsi bwa Transparency, Albert Rwego, agira ati “Umuntu ajya gusaba akazi k’ubwubatsi kuri shantiye (aho bubaka), gapita akamubwira ko aza kumuhemba ibihumbi 5Frw ariko akaza kumukataho igihumbi."

Rwego avuga ko mu nzego zirimo kugenda zongera ikigero cyo kwakira ruswa harimo abakozi b’ibigo bya REG, WASAC n’Abacamanza.

Transparency International Rwanda yagaragarije inzego zitandukanye icyegeranyo yazikozeho kivuga kuri ruswa

Transparency International Rwanda ivuga ko muri rusange ruswa yatanzwe muri uyu mwaka wa 2024 irenga miliyoni 17 z’Amafaranga y’u Rwanda, akaba yaragabanutse ugereranyije n’umwaka ushize wa 2023, kuko icyo gihe ngo hatanzwe ruswa irenga miliyoni 22Frw.

Ikiguzi cya ruswa mu Rwanda muri rusange ngo kirangana n’amafaranga ibihumbi 65Frw isabwa buri muturage kugira ngo ahabwe serivisi, n’ubwo ngo isabwa na bake cyane bangana na 2%.

USAID Hinga Wunguke na Rugori Network ishinzwe guteza imbere abagore bari mu buhinzi, bagiranye amasezerano

Umuhinzi w’imboga n’imbuto mu Turere twa Nyamasheke, Muhanga na Ngoma, Nyiranzeyimana Juliet, ari mu bitabiriye ibiganiro byabereye i Kigali kuri uyu wa Kabiri tariki 10 Ukuboza 2024.

Nyiranzeyimana avuga ko ubu afite imirima y’imbuto n’imboga ku buso bwa hegitare 10, akaba yaratangiye ubuhinzi mu mwaka wa 2014 ubwo yari afite imyaka 20 y’amavuko, arangije kwiga amashuri yisumbuye mu bijyanye n’indimi n’ubuvanganzo.

Nyiranzeyimana avuga ko yatangiranye n’igishoro cy’amafaranga 5,000Frw yari yahawe n’ababyeyi kugira ngo agure icyo akeneye, arangura ibinyomoro abijyana i Karongi ku isoko, akomeza gukorana n’uwabiranguraga kugeza ubwo na we yigiriye inama yo kubihinga, asaba umurima muto iwabo atangira atyo ubuhinzi bw’imboga n’imbuto.

Nyiranzeyimana avuga ko yakomeje gukodesha imirima yo guhingaho, aho kugeza ubu asarura toni zirenga 10 z’imboga(intoryi, inyanya, karoti n’ibindi) buri gihe iyo yejeje, hamwe na toni zirenga 15 z’imbuto (amatunda, ibinyomoro, ‘watermelon’ na ‘concombre’).

Ibigo by’imari n’iby’ikoranabuhanga birizeza abahinzi igishoro ku nyungu nto

Nyiranzeyimana ucuruza imboga n’imbuto ku masoko yo mu Rwanda no mu babishora mu mahanga, avuga ko ashobora gusagura inyungu ingana n’amafaranga y’u Rwanda arenga miliyoni eshanu nyuma yo kwishyura ibikenewe byose, akaba ateganya kugura imodoka imutwarira umusaruro mu mwaka utaha wa 2025.

Nyiranzeyimana avuga ko afite abakozi bane bahoraho hamwe na ba nyakabyizi barenga 20, agakorana n’abahinzi 100 bahora bamusaba imbuto n’ubundi bufasha.

Nyiranzeyimana avuga ko yaje mu nama kumva uko yabona inguzanyo ku nyungu nto, adasabwe ingwate kuko ngo nta mitungo ye bwite afite, akaba yifuza byibura aho yabona amafaranga nka miliyoni 300Frw yo kwagurira ibyo akora mu tundi turere.

Nyiranzeyimana agira ati “Muri buri Karere mba mfitemo abakozi. Ubu nkeneye byibura nka miliyoni 300Frw kugira ngo mbashe guhinga ubutaka bwose mu Gihugu budahinze, kandi mbashe no guhaza amasoko, kuko isoko rirahari rinini cyane tudashobora guhaza.”

Inyanya za Nyiranzeyimana

Mu biganiro byahuje abafatanyabikorwa ba Leta y’u Rwanda mu bijyanye n’ubuhinzi, hari abahinzi bato bizigamira mu bimina bari baje kumva ibigo by’imari bishobora kubaha inguzanyo yoroshye kwishyura kandi badasabwe ingwate.

USAID ivuga ko yatanze miliyoni 28 z’Amadolari ya Amerika hamwe n’andi miliyoni ebyiri z’Amadolari yatanzwe n’abafatanyabikorwa bayo, akaba azafasha abahinzi bato cyane cyane abagore, urubyiruko n’abafite ubumuga kubona inguzanyo, kuva mu mwaka wa 2023 kugera muri 2028.

Umuyobozi wa USAID Hinga Wunguke mu Rwanda, Daniel Gies, avuga ko iyi gahunda yagiyeho mu rwego rwo kongera umusaruro w’ubuhinzi mu baturage b’amikoro make, bakabona intungamubiri zo kurwanya imirire mibi, kandi bakabikoresha inguzanyo zatanzwe ku nyungu iborohera kwishyura.

Iyi nguzanyo kandi ngo igomba kubafasha guhangana n’imihindagurikire y’ibihe, bakarinda ubutaka isuri kandi bagashaka uburyo bwo kuhira imirima ahari amapfa.

Daniel Gies wa USAID Hinga Wunguke

Gies agira ati “Ni yo mpamvu turi gukorana n’ibigo bishinzwe ikoranabuhanga nka BK TechHouse, kugira ngo babone mu buryo bworoshye imbuto n’ifumbire binyuze muri nkunganire, ariko intego nyamukuru ari ukubibona ku nyungu nto ivuye kuri 18% kugera kuri 12%.”

Umukozi wa BK TechHouse, Kayisire David, avuga ko ikoranabuhanga ryitwa ‘Smart Nkunganire’ rikoreshwa mu kubona inyongeramusaruro bakoranye n’Ikigo RAB, rigaragaza ko 70% by’abahinzi barenga miliyoni ebyiri n’ibihumbi 800 mu Rwanda bashobora kwishyura neza inguzanyo bahabwa.

Kayisire agira ati “Banki nyinshi ntabwo zari zizi amakuru y’abahinzi, zikorana rimwe na rimwe n’abantu bake kuko ari bo zizi, ariko ubu turashaka kubagezaho umubare wa miliyoni ebyiri zirenga z’abahinzi dufitiye amakuru twakwita ko yizewe. Niba rero ntangiye gukorana n’umuntu nizeye, nkabona ko ari umuntu unyishyurira ku gihe, nyuma y’imyaka ibiri n’izo nguzanyo zari zihenze zagenda zigabanuka.”

Umukozi ushinzwe gahunda ya ‘Nkunganire’ y’Ikigo gishinzwe Iterambere ry’Ubuhinzi n’Ubworozi(RAB), Egide Gatari, avuga ko kuba amakuru atangwa n’ikoranabuhanga rigaragaza imikorere ya buri muhinzi n’ibyo yifuza gushoramo imari, hari icyizere cy’uko ibigo by’imari bizatinyuka gushora amafaranga mu bahinzi.

Gatari avuga ko Leta yifuza kubona abahinzi bahabwa igishoro ku nyungu nto itagera ku mibare ibiri(munsi ya 10%).

Abafatanyabikorwa ba Leta mu bijyanye n’ubuhinzi bafashe ifoto y’urwibutso

Umuhinzi wifuza kunganirwa muri gahunda ya Hinga Wunguke, akaba ari urubyiruko, umugore cyangwa ufite ubumuga, abarizwa mu Karere ka Bugesera, Burera, Gakenke, Gatsibo, Karongi, Kayonza, Ngoma, Nyabihu, Nyamagabe, Nyamasheke, Ngororero, Rubavu cyangwa Rutsiro, areba amakuru ku mbuga z’ihuriro ry’Urubyiruko rukora ubuhinzi(RYAF), akabandikira cyangwa akabahamagara bakamufasha.

Abikorera bafite ubumuga bagaragaje imbogamizi zituma bakorera mu gihombo

Ibi babitangaje nyuma yo gutumirwa n’Urugaga rw’Abikorera mu Rwanda (PSF), rwabamurikiye inyigo yakozwe ku miterere y’ubucuruzi bw’abafite ubumuga mu Rwanda, ikaba igaragaza ko ubucuruzi bwabo bukiri hasi kuko nta kigo na kimwe kinini mu Rwanda gifitwe n’umuntu ufite ubumuga.

Hakizimana Gerard uhagarariye abikorera bafite ubumuga mu Karere ka Gasabo, ni umwe mu bagejeje ikibazo ku Rugaga PSF, arusaba ubuvugizi mu nzego zirimo Ikigo cy’Imisoro n’Amahoro (Rwanda Revenue Authority/RRA), kugira ngo mu gihe cyo gusoresha ku byo abacuruzi bunguka, hajye habanza kurebwa niba umuntu adafite ubumuga.

Bagaragaje imbogamizi bahura nazo mu bucuruzi bwabo bituma bkora bahomba

Hakizimana yagize ati "Numva ko umuntu ufite ubumuga yakagombye kugabanyirizwa imisoro bakabimuhera make, kugira ngo najya gucuruza bikunde, ariko si uko bisobanutse, twe dufite ubumuga iyo turanguranye n’umuntu udafite ubumuga, twembi tuvuye nko ku Gisozi tuje i Nyarugenge, hari amatike utanga arenze ay’abandi, hari ibikoresho ukoresha kurenza iby’abandi."

Akomeza agira ati "Turasaba PSF ko yatuvuganira kugira ngo bajye bamenya ibintu dutakaza mu nzira byinshi, kuko niba twagiye ku isoko ikintu nkakigura, ngafata umperekeza, ngafata ubintwaza, ndetse n’ubigeza ku isoko akabipanga, bose barahembwa, ayo mafaranga yose ntanga bituma tugera muri karitsiye twajya gucuruzanya n’umuntu udafite ubumuga ntibikunde."

Umuyobozi Nshingwabikorwa w’Umuryango Nyarwanda w’Abagore n’Abakobwa Bafite Ubumuga (UNABU), Gaudence Mushimiyimana

Umuyobozi Nshingwabikorwa w’Umuryango Nyarwanda w’Abagore n’Abakobwa Bafite Ubumuga (UNABU), Gaudence Mushimiyimana, arasobanura imbogamizi enye zugarije abacuruzi bafite ubumuga, zirimo kuba bamwe batarigirira icyizere, kutagira uburyo buborohereza gukorana n’abandi, kuba amakuru atabageraho ndetse n’imbogamizi zituruka ku miterere karemano y’imibiri yabo.

Mushimiyimana agira ati "Ntabwo dusaba isoko ryahariwe gucururizwamo n’abantu bafite ubumuga gusa, kuko byaba ari ukubaheza birenzeho, turasaba isoko buri wese yisangamo hakurikijwe ibyo akeneye."

Abikorera bafite ubumuga batangaje ibi nyuma yo kwerekwa icyegeranyo cyakozwe n’Urugaga rw’Abikorera mu Rwanda (PSF), muri 2024, cyerekana ko ibigo bifitwe n’abafite ubumuga mu Rwanda bigera ku 1,897, bikaba bikoresha abakozi 3,254 muri miliyoni enye n’ibihumbi 300 bafite akazi mu Rwanda, nk’uko bigaragazwa n’Ikigo cy’Ibarurishamibare mu Rwanda (NISR).

Umuyobozi Mukuru w’Icyiciro cyihariye cy’Abafite ubumuga, Abagore n’Urubyiruko muri PSF, Sekamana Thérèse

Raporo ya PSF ivuga ko imbogamizi zagaragajwe na bamwe mu bacuruzi bafite ubumuga hamwe n’izitavuzwe, biri mu bituma abafite ubumuga bitabira ubucuruzi baba bake, ndetse n’abafite ibigo bikora ubucuruzi hafi ya byose bikaba ari bito, aho nta gifite abakozi bahoraho barenga 60 mu Rwanda.

Umuyobozi Mukuru w’Icyiciro cyihariye cy’Abafite ubumuga, Abagore n’Urubyiruko muri PSF, Sekamana Thérèse, yizeza ko icyegeranyo bakoze kizagezwa ku nzego zibishinzwe zirimo Minisiteri y’Imari n’Igenamigambi (MINECOFIN), Minisiteri ishinzwe ubucuruzi (MINICOM) ndetse n’Ikigo cy’Imisoro n’Amahoro.

Sekamana agira ati "Rwanda Revenue ni abafatanyabikorwa bacu, ni Abanyarwanda, barifuza ko abantu bose batera imbere, ariko na bo kugira ngo bagire icyo bakora, ni ukubanza kubyerekana (kugaragaza imiterere y’ikibazo), kumenya ngo niba batanga amafaranga menshi ni angahe bishyura, ni hehe bishyura kugira ngo nkunganire nitangwa hamenyekane aho igomba gutangwa."

Umuyobozi Mukuru muri PSF ushinzwe ubuvugizi, Callixte Kanamugire

Sekamana asaba abacuruzi bafite ubumuga kuzitabira amahugurwa bazahabwa n’inzego zitandukanye, kuko ngo ari ho hazamenyekanira ibibazo biri mu mikorere yabo, akaba yabatumye kujya kurarika abandi mu bice byose batuyemo.

Umuyobozi Mukuru muri PSF ushinzwe ubuvugizi, Callixte Kanamugire, avuga ko gufasha abafite ubumuga kwitabira ubucuruzi ari benshi no kwinjira muri urwo rugaga, bidashobora kugerwaho hatabayeho gufashanya hamwe n’imikoranire ihamye.

QA Venue Solutions Rwanda ivuga ko Sitade Amahoro, nyuma yo kuvugururwa, ubu ifite ubushobozi bwo kwicarwamo n’abantu 45,548, ikagira ibyumba bigari 17 bishobora kuberamo ubucuruzi, imyanya(lounges) 8 yicaramo abifite n’indi 12 y’abanyacyubahiro(n’abo bari kumwe), ndetse n’ibyumba(lounges) bine by’uruganiriro ku bantu bafite amafaranga menshi.

Batambagijwe muri Sitade Amahoro

Iyi Sitade ifite kandi icyumba kinini cy’imikino y’abantu bafite ubumuga hamwe n’ikindi kiberamo inama gishobora kwakira ibiganiro n’abanyamakuru, ikagira ku ruhande sitade nto iberamo imikino ya Basketball ifite imyanya y’abantu barenga 1,000.

Umuyobozi wa QA Venue Solutions Rwanda, John Ntigengwa, agira ati “Uretse kuba Sitade Amahoro yaberamo umupira w’amaguru, urabona ko yakira imikino ngororamubiri, ifite ahagurishirizwa ibyo kurya, harimo ibyumba by’amaduka bigera kuri 17 bya metero kare zirenga 50, kuba abantu ibihumbi 45 baba barimo hano imbere, n’iyo waba ucuruza amazi na fanta murumva ubucuruzi burimo.”

Kimwe na BK Arena ifite imyanya ibihumbi 10, ikaberamo imikino itandukanye hamwe n’imyidagaduro, Sitade Amahoro na yo ntabwo yagenewe imikino gusa, ahubwo ngo yakodeshwa n’umuntu akajya yishyuza abaza kuhakorera ibitaramo bikomeye.

Bareba Zaria Courts

Zaria Courts igiye kurangira kubakwa na yo irimo hoteli, ikagira imyanya 23 yagenewe ubucuruzi, ifite ahacururizwa ibinyobwa by’abari muri siporo, ikibuga cya Basketball, ibibuga bibiri bya ‘mini-foot’, ifite aho abana bazajya bakinira, ifite piscine na gym, ndetse n’izindi gahunda zishobora gutuma abantu birirwa hariya bakanaharara, kuko imikino n’imyidagaduro bizajya bihabera ku manywa na nijoro.

Ntigengwa avuga ko izo nyubako z’imikino n’imyidagaduro zikeneye kwitabwaho no kurindwa mu buryo butandukanye, akaba yahaye ikaze ibigo bizobereye mu gukora iyo mirimo.

Umwe mu bashoramari b’Abanyarwanda weretswe icyo cyanya cy’imikino n’imyidagaduro, Munyakazi Sadate, avuga ko ari ahantu hakwiye gukorerwa ubucuruzi, imikino n’ubukerarugendo.

Ati “Nkiri muri Rayon Sports nakundaga kuvuga ko siporo twayigira uruganda rubyara amafaranga, ibi rero ni ukugira ngo baduhumure amaso, nk’urugero tubonye amahoteli hano, imwe ifite ibyumba 80 indi ifite ibyumba 40, dufite ibibuga bishobora kubyazwa umusaruro, n’iyo wareba iyi parikingi hano, hari ibintu byinshi ijisho ry’umucuruzi ryamuha.”

Batambagira kuri Sitade Amahoro

Munyakazi avuga ko muri kiriya cyanya cy’imikino n’imyidagaduro hari amahirwe menshi y’ubucuruzi kugera no ku bibanza bishobora gucururizwamo serivisi, imyambaro n’ibindi bintu cyangwa ibiribwa ku bahagenda.

Umuyobozi ushinzwe Ibikorwa mu Rugaga rw’Abikorera mu Rwanda (PSF), Faustin Karasira, avuga ko ibyo beretswe byari nko gufata irembo kugira ngo ubutaha bazaze basinya amasezerano yo gutangira gukora ubucuruzi bushingiye kuri BK Arena, Sitade Amahoro, Zaria Courts na Hoteli ya FERWAFA.

Hoteli ya FERWAFA

Babanje kuganirizwa

Ibinyabiziga bitandukanye byangirikiye muri iyi mpanuka yakomerekeyemo abantu babarirwa mu icumi

Impanuka nk’iyi y’imodoka itwara ibishingwe mu Gakiriro ka Gisozi yaherukaga kuba ku itariki 2 Ugushyingo 2019, na bwo ikaba yarabaye ari ku wa Gatandatu mu masaha y’umugoroba, imbere y’inyubako yitwa Umukindo mu muhanda unyura hagati y’inyubako z’Agakiriro.

Umunyamabanga Nshingwabikorwa w’Akagari ka Musezero mu Murenge wa Gisozi w’Akarere ka Gasabo, Egide Habumuremyi, avuga ko iyo mpanuka ikimara kuba nta wahise yitaba Imana n’ubwo harimo abakomeretse bikabije.

Habumuremyi yagize ati "Bambwira ko imodoka yacitse feri ikagonga ibinyabiziga byari mu muhanda, iyo mpanuka yakomerekeje abantu bagera ku 10, nta witabye Imana n’ubwo harimo abakomeretse bikabije, hangiritse n’ibinyabiziga byari biparitse n’ibyagendaga bitari bike, umubare wabyo ntabwo uramenyekana."

Umuturage utifuje ko amazina ye atanganzwa ariko ukorera mu Gakiriro ka Gisozi, avuga ko ibinyabiziga yabashije kubara byangiritse birenga 14 harimo imodoka 2, moto zisanzwe 8 hamwe n’ibimoto bitwara imizigo bigera kuri 4, akaba yabonye kandi inkomere zigera ku 8 zirimo uwacitse amaguru n’uwacitse ubugabo.

Umuyobozi w’Akagari ka Musezero avuga ko ubukangurambaga bukomeje bwo kuburira abakorera mu Gakiriro ka Gisozi kwigengesera, kuko iyo batagonzwe n’imodoka bibasirwa n’inkongi.

Habumuremyi yihanganishije abagize ibyago, asaba abafite ibinyabiziga kubikorera isuzumisha rihoraho nk’uko Polisi y’u Rwanda ihora ibikangurira abantu.

Mu yandi makuru, Umuvugizi wa Polisi y’u Rwanda ishami rishinzwe umutekano wo mu muhanda, SP Emmanuel Kayigi, yatangarije Kigali Today ko impanuka yabaye ari iy’imodoka Mitsubishi Fuso ya Company UBUMWE Cleaning Service yavaga FAWE yerekeza ku Kinamba igeze mu Gakiriro ka Gisozi igonga Moto enye za TVS Victors, Moto eshanu za Rifan , n’imodoka eshatu.

Muri iyo mpanuka hakomerekeyemo abantu umunani, batandatu muri bo bakomereka mu buryo bworoshye, naho babiri barakomereka bikomeye.

Abakomeretse batwawe ku bitaro bya CHUK, ku bitaro bya Kanombe no ku bitaro bya Kibagabaga.
SP Emmanuel Kayigi yavuze ko impanuka yatewe no kutaringaniza umuvuduko byakozwe n’umushoferi wari utwaye iyo modoka itwara imyanda.

Ishami ry’Umuryango w’Abibumbye rishinzwe Uburezi, Ubumenyi n’Umuco (UNESCO), tariki 03 Ukuboza 2024, ryatangaje ko rishyize Intore z’u Rwanda mu murage ndangamuco udafatika w’Isi.

Intore ni cyo kirango cya mbere cy’u Rwanda UNESCO ishyize mu murage ndangamuco udafatika w’Isi, bikaba byaremerejwe mu Nama ya 19 ya UNESCO iri kubera i Asunción muri Paraguay kuva tariki 2-7 Ukuboza 2024.

Intebe y’Inteko Nyarwanda y’Umuco n’Ururimi (RCHA), Amb. Robert Masozera, yagaragaye muri iyo nama ashima kandi asobanurira abayitabiriye, ko umuhamirizo w’Intore z’u Rwanda ari ikimenyetso cy’ubutwari, ukwigira n’ubufatanye biranga Abanyarwanda kuva mu mateka no mu mibereho yabo.

Amb. Masozera avuga ko kwandikwa kw’Intore z’u Rwanda mu murage w’Isi wa UNESCO, biha u Rwanda imbaraga zo gusigasira uwo murage no kuwuhererekanya mu bisekuru bizabaho mu bihe bizaza.

Umurage ndangamuco udafatika ni iki?

Jean Baptiste Ruzindana Rugasa ukurikiranira hafi ibijyanye n’ubuhanzi bushingiye ku muco Nyarwanda, asobanura ko guhamiriza kw’Intore ari ikintu umuntu atateruza intoki ngo agihe uwo bicaranye, kuko ari intekerezo n’imikorere igenda iba uruhererekane rudacika mu miryango y’Abanyarwanda kuva mu kinyejana cya 12.

U Rwanda rwashyize umukono ku Masezerano Mpuzamahanga ya Paris(mu Bufaransa) agamije kubungabunga umurage ndangamuco udafatika (Convention for the Safeguarding of the Intangible Cultural Heritage), ku itariki 17 Ukwakira 2003, aza kwemezwa burundu n’Iteka rya Perezida No 53/01 ryo ku wa 02/11/2012.

Ingingo ya 2 y’aya masezerano ivuga ko umurage ndangamuco udafatika ugizwe n’uruhererekane nyemvugo rutezwa imbere cyane cyane n’ururimi kavukire, imyiyereko gakondo ari na ho hagaragara Intore, imigenzo, imihango n’ibirori gakondo, ubumenyi n’imigenzereze ku bintu karemano, ndetse n’ubumenyingiro bushingiye ku bugeni n’ubuhanzi gakondo.

Rugasa yakomeje asobanura ko kwandikisha umurage ndangamuco udafatika ku rutonde rw’umurage w’Isi, bizagirira akamaro kanini Abanyarwanda, kuko UNESCO ihita itangira kumenyekanisha uwo murage no kuwurinda ku rwego mpuzamahanga.

Uyu murage kandi ngo urushaho kujya mu bikurura ba mukerarugendo, Abakozi bashinzwe kuwubungabunga bagahugurwa na UNESCO, ndetse ko imishinga y’iterambere ishamikiye kuri uwo murage itangira guterwa inkunga na UNESCO binyuze mu kigega cyayo.

Umutoza Mukuru w’Itorero ry’Igihugu (Urukerereza), Intore Massamba, ari mu bashimishijwe n’iki cyemezo cya UNESCO, avuga ko Abanyarwanda bazi guhamiriza neza hamwe n’abakora imigara, amayugi n’ibindi intore zikenera, bagiye kubona imirimo ari benshi haba imbere mu gihugu no hanze yacyo.

Massamba yagize ati "Mu Rwanda hagiye kuza abashakashatsi n’abanditsi, ariko noneho amatorero yacu abyina afite n’intore agiye kubona akazi kenshi cyane, isi igiye kuza kubashaka kugira ngo bajyane intore bazigaragaze, zerekane kandi zamamaze u Rwanda, kandi noneho n’izo ntore ubwazo zitahane akantu(amafaranga)."

Massamba avuga ko agiye gukangurira benshi kwigisha abana babo ubutore, badahera gusa ku ndangagaciro no ku kubyina imbyino zisanzwe, ahubwo guhamiriza bigatangira kwigishwa guhera hasi mu midugudu no mu mashuri, ku buryo ngo intore izajya ijya guhagararira u Rwanda ibikwiye.

Umunyamabanga Mukuru wa Komisiyo y’u Rwanda ikorana na UNESCO(CNRU), Albert Mutesa, ashimangira ko Intore zigiye gukenerwa hirya no hino ku isi habera iserukiramuco n’ibindi birori, ari na byo ngo bizatuma benshi mu Rwanda batangira kwiga imbyino no guhamiriza, ndetse no guteza imbere ubukorikori n’ubugeni bishingiye ku byo intore zikenera.

Mutesa agira ati "Ubu intore zigiye kujya zitumirwa, itorero ryashyirwa ahantu hatandukanye nko muri za ambasade, ku buryo igihe bavugiye bati ’turashaka itorero ry’u Rwanda’ intore zihita ziboneka hafi."

Mutesa avuga ko kugeza ubu hari ibintu birenga 900 bikirimo kwigwaho kugira ngo bibe byasabirwa kuba umurage ndangamuco w’u Rwanda ku rwego rw’isi, byiganjemo umwihariko w’Abanyarwanda nk’ubudehe, umuganda, umuganura n’ibindi bituruka mu muco Nyarwanda.

Kurikira ibindi muri iyi Video:

Video: Eric Ruzindana/Kigali Today

Umuyobozi Mukuru wa RSSB, Regis Rugemanshuro, avuga ko izi mpinduka zizweho neza, kandi ko ziri mu nyungu z’abanyamuryango

Umuyobozi Mukuru wa RSSB, Regis Rugemanshuro, ari kumwe na Minisitiri w’Imari n’Igenamigambi (MINECOFIN) hamwe na Minisitiri w’Abakozi ba Leta n’Umurimo (MIFOTRA), bavuze ko iyi gahunda igiye kugira uruhare mu kongera pansiyo ihabwa abari mu kiruhuko cy’izabukuru, guteza imbere ishoramari no kunganira gahunda ya Leta yo guhanga imirimo.

Ubusanzwe umukozi uzigamirwa muri pansiyo mu Rwanda yatangaga 3% by’umushahara mbumbe we, umukoresha we na we akamutangira andi 3% y’uwo mushahara bikaba 6%(yose hamwe), ariko guhera mu mwaka utaha wa 2025 uwo musanzu uzikuba kabiri ube 12%, ndetse ko muri 2027 hazatangira kujya hiyongeraho 1% kugera mu mwaka wa 2030.

Rugemanshuro yagize ati "Umuntu wahembwaga ibihumbi 50(ni urugero) bamukataga amafaranga 1,500Frw y’umusanzu wa pansiyo ku kwezi, uwahembwaga ibihumbi 100 yatangaga 3,200Frw", aya akaba ari yo azikuba kabiri.

Reba ibindi muri iyi Video:

Rugemanshuro avuga ko guhera muri Mutarama 2025 pansiyo ihabwa abari mu kiruhuko cy’izabukuru bizigamiye, izazamurwa bahereye ku bahabwa pansiyo y’amafaranga ibihumbi 13 ku kwezi.

Rugemanshuro avuga ko imibereho y’Abanyarwanda yagiye itera imbere ku buryo ngo igihe cyari kigeze ko imisanzu ya pansiyo izamurwa ikajyana n’iki gihe, kuko kuva mu mwaka wa 1962 ubwo ubwiteganyirize bwa pansiyo bwatangiraga, icyizere cy’ubuzima ngo cyari imyaka 47 ariko ubu kikaba ari imyaka 69, aho abarenza iyo myaka mu Rwanda ngo bakomeje kwiyongera.

Visi Perezida w’Ishyirahamwe ry’abafata Pansiyo mu Rwanda, Faustin Minani, avuga ko uburyo busanzwe bwo kubara pansiyo umuntu ahabwa buri kwezi ari ugufata umubare w’imyaka umuntu yakoze agakuba na 2% hanyuma agakuba n’umushahara mbumbe we w’ukwezi kumwe.

Yagize ati "Nkanjye niba narakoze imyaka 24 nyikuba na 2% nkabona 48%, ngakuba n’umushahara mbumbe nahabwaga ungana n’ibihumbi 500, nkabona ibihumbi 240 buri kwezi. Gusa iyo wakoze imyaka iri munsi ya 15 bayaguha ingunga(inshuro) imwe."

Rugemanshuro uyobora RSSB avuga ko umukozi uhembwa umushara mbumbe ungana na miliyoni imwe buri kwezi, natanga ibihumbi 80, ngo azajya ahembwa pansiyo y’ibihumbi 800Frw ku kwezi mu gihe azaba ari mu kiruhuko cy’izabukuru.

Leta ntabwo iratangaza ikigero cy’amafaranga aziyongera kuri pansiyo ihabwa abari abakozi bari mu kiruhuko cy’izabukuru bizigamiye, kuko ibi bizemezwa n’Inama y’Abaminisitiri.

Minisitiri w’Imari n’Igenamigambi, Yussuf Murangwa (hagati) avuga ko u Rwanda rwari rwaratinze kongera umusanzu wa pansiyo

Minisitiri w’Imari n’Igenamigambi, Yussuf Murangwa, avuga ko u Rwanda rwari rwaratinze kongera umusanzu wa pansiyo utangwa n’abakozi, kuko mu bihugu biri hafi y’u Rwanda nka Ethiopia umukozi usanzwe atanga 18% by’umushahara mbumbe we mu gihe uri mu nzego z’umutekano atanga 32%.

Minisitiri Murangwa avuga ko umukozi muri Tanzania atanga umusanzu wa pansiyo ungana na 20% by’umushahara mbumbe we, muri Uganda bagatanga 15% mu gihe i Burundi abakozi basanzwe batanga 10%, abashinzwe umutekano bagatanga 15%.

Reba ibindi muri iyi Video:

Minisitiri Murangwa avuga ko impamvu abari mu kiruhuko cy’izabukuru bahabwaga pansiyo nke ndetse n’ishoramari mu Rwanda rikadindira, biterwa n’umusanzu muke wa pansiyo uturuka mu bakozi bake cyane mu Rwanda batarenga 9%.

Kugeza ubu RSSB irabara amafaranga angana na miliyari 2,600Frw ari mu kigega cy’ubwizigame bwa pansiyo, akaba ashorwa mu bigo nka Banki ya Kigali kugira ngo ibone inguzanyo yo guha abakiriya bayikeneye, muri MTN, mu ruganda Ruliba, mu bwubatsi bw’amacumbi n’ahandi mu bigo bigera kuri 32 mu Rwanda, ndetse n’ayo Leta yagiye yiguriza mu mpapuro mpeshwamwenda.

Videos: Richard Kwizera

Perezida Félix Antoine Tshisekedi ntiyitabiriye iyi nama, ntiyanohereza n’intumwa imuhagararira

Iyi nama ngarukamwaka isanzwe ya 24 yateraniye i Arusha muri Tanzania, yitabiriwe n’Abakuru b’Ibihugu bitandatu mu munani bigize EAC, kuko Perezida Tshisekedi wa DR Congo na mugenzi we w’u Burundi, Evariste Ndayishimiye, batigeze bahakandagira. Icyakora u Burundi bwo bwahagarariwe na Visi Perezida, Prosper Bazombanza.

Iyi nama yarangiye hifujwe ko ibiganiro by’amahoro bibera i Luanda (muri Angola) bihuza u Rwanda na Congo (DRC) byahuzwa n’ibya Nairobi (muri Kenya) aho imitwe irwanira muri Congo isanzwe ihurira na Leta y’icyo gihugu.

Guhuriza hamwe ayo masezerano, inyungu ku Rwanda

Mu kiganiro Kigali Today yagiranye n’umwarimu muri Kaminuza y’u Rwanda, akaba n’impuguke mu bya politiki n’imibanire y’ibihugu(Diplomatie), Prof. Ismael Buchanan, arasobanura inyungu zo guhuriza hamwe ibiganiro bya Luanda na Nairobi.

Prof Buchanan avuga ko kuba amasezerano ya Luanda areba u Rwanda na Congo mu gihe aya Nairobi areba Leta ya Congo n’imitwe irwanira muri icyo gihugu, yaba iy’imbere n’ivo hanze yacyo, aramutse ahujwe ngo byaba ari ukugaragaza ko ikibazo kitari hagati y’u Rwanda na Congo, ahubwo kiri hagati ya Congo n’uwari we wese waba uvugwa muri ibyo bibazo.

Prof Buchanan avuga ko gutandukanya ibyo biganiro byombi bisanzwe bigize impamvu yo kutarangira kw’intambara mu Burasirazuba bwa Congo (DRC), kuko imitwe nka M23 ivuga ko haba i Luanda cyangwa i Nairobi nta na hamwe ijya itumirwa, nyamara amasezerano avuga ko Leta ya Congo igomba kuganira n’imitwe yose irenga 120 irwanira muri icyo gihugu.

Ibi ngo bizaba impamvu yo gusaba Leta ya Congo kuganira n’iyo mitwe yose harimo n’uwa M23, nubwo Tshisekedi yari yaranze guhura na wo kuko awushinja kuba umutwe w’iterabwoba.

Ingaruka zo kuba DR Congo irimo kwivana muri EAC nyuma y’imyaka ibiri yemerewe kuba umunyamuryango

Prof Buchanan avuga ko Leta ya Congo yaba ishaka kwivana muri EAC, nyamara ngo bizayigora kuko itaratanga umusanzu wayo n’umwe nk’umunyamuryango, kandi ibirego ishinja u Rwanda bikazaba bitaye agaciro.

Raporo ya EAC ya 2023 igaragaza ko mu bihugu bifite ibirarane by’imisanzu myinshi y’uwo muryango, Leta ya Congo na yo irimo kuko itarishyura arenga miliyoni 14.2 z’Amadolari ya Amerika, kandi ngo izajya kwemererwa kwikuramo imaze kuyishyura yose (hiyongereyeho n’ayo muri 2024 atari munsi ya miliyoni 8 z’amadolari ya Amerika).

Icyakora Sudani y’Epfo ni yo ifite ibirarane byinshi itarishyura, aho igomba kwishyura miliyoni 30 z’Amadolari ya Amerika ($) kugera muri 2023, u Burundi na bwo bufite ideni rya miliyoni zirenga 15$, mu gihe u Rwanda rwari rufite ideni ry’amafaranga agera kuri miliyoni 7.3$ muri icyo gihe nubwo ngo rushobora kuba rwaramaze kwishyura.

Kuba Leta ya Congo itarahagarariwe mu nama y’abakuru b’ibihugu, ngo bishobora kuba byayigiraho ingaruka zo kwirukanwa, ariko ikabanza kwishyura ibyo isabwa byose birimo n’imisanzu yo kuba umunyamuryango wa EAC.

Prof. Buchanan agira ati “Ni ukuyihana(Congo) ku buryo yishyura ibyo itarishyura, kandi iyo utitabiriye inama inshuro zirenga 2&3, bafite uburenganzira bwo kugukura mu muryango ariko ukabanza ukishyura amadeni n’ibindi by’abandi urimo, ese kuki yanga kwitabira inama yarangiza ikajya kurega (u Rwanda) mu rukiko rwa EAC?”

Prof. Buchanan akomeza agira ati “Ibi birakwereka ko aho umuryango (wa EAC) n’imyumvire bigenda bigana ko atari heza, ariko ntibivuga ko kuba Congo yavamo umuryango utakomeza. Yego byagira icyo bihungabanya mu rwego rwa dipolomasi no kugira ya Afurika imwe twifuza, ariko kuvamo kw’igihugu kimwe ntabwo bibuza umuryango gukomeza.”

Prof. Buchanan ashima ko umuryango wa EAC wari umaze kugera kuri byinshi byiza birimo no kuba ibihugu biwugize byariyongereye bikaba umunani, abaturage bakaba bagenderana hakoreshejwe indangamuntu (ku bafite iz’ikoranabuhanga), kuba imbogamizi zidashingiye ku mahoro ya gasutamo zirimo gukemurwa, ndetse no kuba ingabo z’ibi bihugu zisigaye zitoreza hamwe.

Mu ngorane zigihari zugarije uyu muryango, ngo hari ukuba indangamuntu zitaremerwa kugenderwaho hose mu bihugu biwugize, ndetse no kuba ifaranga rimwe rikiri mu bitekerezo.

Minisitiri w’Ubutegetsi bw’Igihugu, Dr Patrice Mugenzi

Dr Mugenzi asaba abayobozi b’inzego z’ibanze kwegera abaturage bakabaha umwanya, bakumva ibibazo byabo, bakagira n’umuhate wo kubikemura mu buryo bwihuse, abaturage batarinze gusiragizwa.

Dr Mugenzi yahaye ikiganiro Kigali Today, avuga ko abaturage atari bo bagomba gusanga abayobozi ku Mirenge, ku Karere n’ahandi, ahubwo ngo abayobozi ni bo bagomba kubasanga aho batuye.

Dr Mugenzi yamaganye imirongo miremire y’abaturage ku biro by’ubuyobozi, aho abakozi cyangwa abayobozi baho ngo birangira batamenye igisubizo baha buri muturage.

Dr Mugenzi yagize ati «Twebwe icyo twifuza ni uko abayobozi basanga abaturage haba ku Murenge, mu Kagari n’ahandi, ariko ibibazo by’abaturage bigakemuka. Ikindi ni uko hari serivisi nyinshi zigenerwa abaturage zitabageraho. Bishoboka bite ngo umuturage ahabwe inka muri gahunda ya Girinka ariko akabanza gutanga amafaranga?»

Ati « Ibyo bintu birahari, akenshi niwumva abantu basezera, ni uko bakubwira bati ‘twagiranye ikibazo n’aba bayobozi ariko ntibabyitaho,’ ibyerekeranye n’ibyo (byo kugurisha serivisi) bigize ibyaha, ubwo byabazwa RIB(Ubugenzacyaha) nta cyo nabivugaho.»

Minisitiri w’Ubutegetsi bw’Igihugu avuga ko umuyobozi ukuriye abagurishije serivisi ku baturage na we aba agomba kubibazwa.

Dr Mugenzi avuga ko abayobozi b’Uturere twa Karongi na Rusizi beguye ku mpamvu zabo bwite ariko bamaze kubona ko badaha serivisi abaturage. Gusa ngo ntabwo ari inkubiri yiswe ‘Tour du Rwanda’ itangiye.

Ku wa 15 Ugushyingo 2024, nibwo uwari Umuyobozi w’Akarere ka Karongi, Mukase Valentine, hamwe n’uwari umwungirije ushinzwe iterambere ry’Ubukungu (FED), Niragire Theophile, ndetse na Dusingize Donatha wari Perezida w’Inama Njyanama, beguye ku mirimo bari bashinzwe.

Bidateye kabiri ku itariki 23 Ugushyingo 2024, uwari Umuyobozi w’Akarere ka Rusizi, Dr Kibiriga Anicet na Dukuzumuremyi Anne Marie wari umwungirije ashinzwe Imibereho myiza y’Abaturage(ASOC), ndetse n’uwari Umujyanama uhagarariye Inama y’Igihugu y’Abagore (CNF), witwa Jeanne Niyonsaba, na bo bahise batanga amabaruwa y’ubwegure bwabo.

Minisitiri w’Ubutegetsi bw’Igihugu avuga ko icyuho cyasizwe n’abayobozi b’uturere beguye cyasigayemo by’agateganyo abayobozi bungirije bakiri mu myanya yabo(Umuyobozi w’Akarere wungirije ushinzwe Iterambere ry’Ubukungu cyangwa ushinzwe Imibereho myiza) hamwe n’Inama Njyanama.

Ingingo ya 48 y’Itegeko ryo muri 2021 rigenga Akarere, ivuga ko iyo Umuyobozi w’Akarere n’abamwungirije bakuwe mu mirimo yabo icyarimwe, mu gihe kitarenze amezi atatu (3) uhereye ku munsi Umuyobozi w’Akarere n’abamwungirije bahagarikiye imirimo, Guverineri w’Intara ateranya Inama Njyanama y’Akarere idasanzwe ikitoramo uyobora Akarere by’agateganyo.

Minisitiri w’Ubutegetsi bw’Igihugu, Dr Patrice Mugenzi, ukiri mushya kuko yashyizweho na Perezida Kagame ku itariki ya 18 Ukwakira 2024, avuga ko ikimuraje ishinga cya mbere ari serivisi nziza zigomba guhabwa umuturage mu gihe cyose azaba ari muri iyi Minisiteri.

RAB yeretse abafatanyabikorwa ikoranabuhanga rya RwaSIS

MINAGRI ivuga ko abahinzi bahomba amafaranga y’u Rwanda abarirwa muri za miliyari, bitewe no gupfa gukoresha ifumbire batabanje kumenya intungabihingwa (imyunyungugu) ubutaka bukeneye, bigatuma umusaruro wari witezwe utaboneka.

Minisitiri w’Ubuhinzi n’Ubworozi, Dr Mark Cyubahiro Bagabe, avuga ko buri gihingwa ubu kizajya gihabwa ifumbire ijyanye n’imiterere y’ubutaka gihinzweho, nyuma y’uko mu Rwanda haje uruganda rukora ifumbire ishingiye kuri buri gace k’Igihugu.

Dr Cyubahiro agira ati, "Leta yacu yashoye menshi cyane kugira ngo ifumbire iboneke, hakiyongeraho imbuto n’imiti yica udukoko ndetse n’amazi, ariko kugeza ubu ntabwo turagera ku ntego y’umusaruro twifuza."

Dr Mark Cyubahiro, Minisitiri w’Ubuhinzi n’Ubworozi

Akomeza agira ati, "Mbese ni iki kibura! Muri ibyo bibura, igikomeye cyane ni uku gupfa guhinga abantu batabanje kumenya ibyo ubutaka bukeneye, cyane cyane ifumbire."

Umukozi w’Ikigo gishinzwe Iterambere ry’Ubuhinzi n’Ubworozi (RAB), wayoboye itsinda ryakoze ubushakatsi ku butaka buhingwaho hirya no hino mu Gihugu (kuva mu mwaka wa 2021), Athanase Cyamweshi Rusanganwa, atanga urugero ku gihingwa cy’umuceri avuga ko ushobora kwera kugera kuri toni 8-9 kuri hegitare, ariko kugeza ubu abahinzi bawo baracyarimo kweza toni 4-5 kuri hegitare.

Cyamweshi ashimangira ko ibi biterwa no kutamenya ingano y’ifumbire ikwiye gushyirwa muri ubwo butaka, hamwe no kutamenya niba bukeneye ishwagara (kuko hari ubwabaye aside).

Telesphore Ndabamenye, Umuyobozi Mukuru wa RAB

Umuhinzi ugiye gushyira ifumbire mu murima azajya ajya ku rubugashakiro rwa RwaSIS (https://rwasis.rab.gov.rw/ cyangwa kuri telefone akande *774# akurikize amabwiriza), ashyiremo nimero iranga ubutaka bwe (UPI) ahite abona amakuru ajyanye n’imiterere y’ubutaka, amugaragariza ikigero cy’isuri ibwugarije, igihingwa kiberanye na bwo, hamwe n’ikigero cy’ifumbire ubwo butaka bukeneye kugira ngo butange umusaruro.

Ikigo RAB cyafatanyije na bamwe mu bahinzi kugerageza imvange nshya y’ifumbire ijyanye n’imiterere ya buri butaka, ikaba itandukanye n’iyari isanzwe ikoreshwa inengwa kudatanga umusaruro.

Umuhinzi w’umuceri mu gishanga cya Rugeramigozi mu Karere ka Muhanga, Uzasabimana Vestine, avuga ko umusaruro babonaga kuri hegitare mbere yo gukoresha imvange nshya y’ifumbire utarengaga toni 3.5, ariko ubu ngo barimo kubona toni eshanu (5) kuri hegitare hakoreshejwe ifumbire ijyanye n’ubutaka bw’icyo gishanga.

Gaspard Twagirayezu, Umuyobozi Mukuru wa RSA

Minisitiri w’Ubuhinzi n’Ubworozi avuga ko bagiye kohereza mu bahinzi abafashamyumvire bo kubigisha gukoresha ikoranabuhanga rya RwaSIS, hamwe no kuberekera imikoreshereze mishya y’ifumbire.

Urubugashakiro (RwaSIS) rwubatswe ku bufatanye bwa MINAGRI n’inzego zitandukanye, zirimo Ikigo cy’u Rwanda gishinzwe iby’Isanzure (Rwanda Space Agency/RSA), cyakoze amakarita agaragaza imiterere ya buri butaka.

Kugabura ikawa (Barista) mu Rwanda, umwuga winjiza akayabo kandi ukeneye benshi bo kuwukora

Batsinda akorera mu nyubako ya CHIC i Kigali aho agabura ikawa, akavuga ko umukozi w’icyo kinyobwa (Barista) wabonye abakiriya benshi ngo ashobora gucyura inyungu y’amafaranga atari munsi y’ibihumbi 60 ku munsi mu gihe cy’ubukonje.

Batsinda ntabwo ari we ‘Barista’ wenyine ukorera mu nyubako ya CHIC (kuko hari imiryango irenga 3 itanga kawa), ndetse nta n’ubwo inyubako zose mu Rwanda zifite Ababarista hafi bashobora kugabura kawa.

Batsinda avuga ko atumiza i Nyamasheke ikawa y’intete ikaza ikaranze, akayishyira mu mashini isya igahinduka ifu, ya fu akayishyira mu yindi mashini iyivanga n’amazi, bikaza ari umutobe ushyushye wa kawa, akawuha abakiriya bamwishyura amafaranga y’u Rwanda 2,000Frw ku gikombe.

Abenshi ariko ni abamusaba kubavangira n’amata n’isukari, aho igikombe ahita akigurisha amafaranga 2,500Frw, akahava agurishije ibikombe bitari munsi ya 75 ku munsi.

Batsinda wahoze ari umukozi muri resitora mbere y’umwaka wa 2020 ubwo we n’abavandimwe be babiri bigiraga inama yo kwiga kuba Barista, agira ati “Umuntu arunguka kabisa, ikawa ushobora gufataho inyungu y’amafaranga nka 800Frw gutyo cyangwa 900Frw.”

Batsinda umaze imyaka hafi 5 akora uyu mwuga wo kuba Barista (kuva muri 2020), avuga ko atigeze awamamaza cyane uretse igihe yagiye ku ma radio no mu nshuti ze, nyamara ngo amaze kumenyekana cyane kubera ko abakiriya bakururwa n’impumuro y’ahacururizwa kawa, ku buryo ngo abenshi yabaciye ku nzoga.

Batsinda agira ati “Abantu benshi bamaze kumenyera kunywa ikawa pe, ariko hari n’abataramenya ko ihari n’ubwo bayikeneye, mu bihe by’imbeho iba ikenewe cyane. Gusa nkeneye no kwagura ibikorwa nkajya n’ahandi, hari henshi bakeneye kunywa kawa.”

Hirya ye hacururiza uwitwa Pascal Uwineza na we wahereye muri 2022 akora kandi agabura kawa, aho ajya mu maguriro (supermarkets) akarangura intete z’ikawa ikaranze, akazisya akanayivanga n’ibindi abakiriya bakeneye nk’amata, ubuki cyangwa isukari.

Uwineza avuga ko kuba barista atari umwuga umuntu yitekerereza ngo bucye ajya kuwukora, akaba arimo kuwiga, kandi ngo hakenewe amafaranga y’ishuri arenga ibihumbi 200 hamwe n’igishoro cyo kugura imashini n’aho gukorera, ku buryo bitajya munsi ya miliyoni 5 z’amafaranga y’u Rwanda.

Batsinda Sugira Blaise w’imyaka 26 y’amavuko yihebeye umwuga wo kugabura ikawa

Uwineza avuga ko umukozi wize neza kuba Barista ahembwa amafaranga agera ku 100,000Frw ku kwezi.

Abanywa kawa bayikundira iki?

Umukobwa witwa Rwigema wari uje kugura kawa aho bayikorera kwa Batsinda, avuga ko ayigura mu gihe cy’imvura cyangwa mu gitondo iyo hakonje, aho akururwa n’impumuro yayo, kandi yayinywa ivanze n’amata akirirwa aguwe neza, afite imbaraga zo gucuruza muri CHIC.

Rwigema ati “Ikawa iraryoha, uba wumva ihumura neza kandi icyiza cyayo wayinywa mu buryo bwinshi mu gihe waba utayikunda yonyine. Ushobora kuyinywa irimo amata, irwanya ibitotsi igatuma nita ku bakiriya neza.”

Umusore ugendana igikombe cya kawa mu ntoki aho agenda asomaho buri kanya, avuga ko kubura kw’ikinyabutabire cyitwa caffeine mu mubiri we bituma yumva atamerewe neza, ku buryo ngo nta mbaraga yabona zo kugira icyo akora mu gihe atabonye kawa.

Aho bigira kuba Barista n’impamvu ikawa itangiye kuyobokwa na benshi mu Rwanda

Uwitwa Mukamusinga Perpetue ni umwe mu bashinze ibigo bikora bikanagabura kawa, ariko akabifatanya no guhugura urubyiruko n’abagore bakiri bato gukora uwo mwuga w’abitwa Barista.

Mukamusinga ufite ikigo cyitwa Integrated Barista Training Center (IBTC), avuga ko mbere yo kumva akamaro k’umwuga wo kuba Barista, abantu bakwiye kubanza kumva akamaro ko kunywa kawa ku rugero rusabwa n’abahanga mu by’ubuzima bushingiye ku mirire.

Mukamusinga wabanje kuba umuforomo mbere yo gutangira umwuga wo kuba Barista no kubyigisha, avuga ko ikawa ari ikinyobwa mbaturamubiri gituma umuntu uri mu mirimo adashobora guhondobera cyangwa gucika intege.

Ikawa kandi ngo irinda umuntu kurwara umutwe cyane cyane uw’uruhande rumwe (migraine), ikarinda umuntu gutera guke k’umutima cyangwa umuvuduko muke w’amaraso (hypotension), ariko ikaba atari nziza ku bafite umuvuduko ukabije w’amaraso (kuko ifungura imijyana n’imigarura).

Mukamusinga avuga ko abantu bafite indwara y’igisukari mu mubiri (hyperglicémie) cyangwa diyabeti, ikawa ibafasha kubigabanya ndetse ikavura ibimenyetso by’izo ndwara birimo umwuma ukabije, kwihagarika buri kanya, umunaniro no kubona ibicyezicyezi mu maso (kutabona neza).

Avuga kandi ko ikawa ivura kugugara mu gihe umuntu atarimo kwituma neza, ikarinda uburibwe umugore uri mu mihango ndetse ko umuntu ufite uruhu rufite ibiheri, ibishishi, ibihushi n’ibindi ngo ashobora kwisiga umutobe w’ikawa cyangwa ibikatsi byayo, akagarukana itoto ku mubiri.

Aba Barista mu Rwanda baracyari bake

Mukamusinga avuga ko ikawa igira ifumbire nziza ku buryo imyaka yafumbijwe ibikatsi cyangwa ibishishwa byayo ngo ishisha neza, kandi ko inzu irimo impumuro y’ikawa ngo yirukana imibu n’ubwo bitabuza abantu kurara mu nzitiramibu.

Mukamusinga avuga ko kugira ngo ikawa ibashe kugirira umubiri akamaro kavuzwe, bisaba umuntu kwiga kuyitegura no kuyitanga, aho amara ukwezi yiga kuyisya, kuyitegura mu buryo butandukanye, kuyisogongera, isuku, kumenya uko akoresha ibigize ikinyobwa agiye gutanga, ndetse n’imyitwarire imbere y’abakiliya.

Mukamusinga agira ati “Hari abantu bazaga bakambwira ko ikawa bagabura nta musaruro itanga, akavuga ngo ‘ndagura ikiro kimwe ugasanga nkuyemo ibikombe bike’, bivuze ko abayitegura rimwe na rimwe barayangiza.”

Mukamusinga avuga ko kuva mu mwaka wa 2009 ubwo yatangiraga kuba Barista, amaze kwigisha abanyeshuri (bavuyemo aba Baristas) barenga 1,800, harimo abafite ubumuga bwo kutumva no kutavuga 17, ariko aba bose ngo baracyari bake cyane (nk’igitonyanga mu nyanja) ubagereranyije n’abakenewe mu Rwanda.

Mukamusinga avuga ko aba Baristas mu Rwanda bakiri bake, ashingiye ku buryo ahandi ku Isi banywa ikawa kandi bamenye akamaro kayo, aho inyigo yakoze igaragaza ko muri Finland buri muturage waho anywa ibiro 12 (kg) bya kawa ku mwaka, muri Norway 10kg, Iceland 10kg, Denmark 8.7kg, Netherlands 8.4kg.

Mukamusinga avuga ko hari urubyiruko rwinshi rurimo abakobwa babyariye iwabo bakeneye kwiga kuba Barista, ariko hakabura amikoro yo kwiyishyurira ikiguzi cy’ayo mahugurwa amara amezi abiri, ndetse ko aramutse abonye igishoro yashyiraho ibyumba byo kwimenyererezamo umwuga ku bo yigisha.

Gahunda ya Mastercard Foundation

Umwuga wo kuba Barista ni umwe mu yatewe inkunga na gahunda yitwa Hanga Ahazaza y’Umuryango ‘Mastercard Foundation’, uvuga ko watanze Amadolari ya Amerika agera kuri miliyoni 50$ (ahwanye n’amafaranga y’u Rwanda miliyari 70), aho imirimo ingana na 20,325 yahangiwe urubyiruko n’abagore bato kuva muri 2020 kugera muri 2024.

Iyi mirimo ikaba yarateje imbere ubukerarugendo n’amahoteli, kuko u Rwanda ngo rwinjizaga amadolari ya Amerika miliyoni 164 mbere y’icyorezo Covid-19, ariko uwo musaruro uza kwikuba hafi inshuro ishatu ugera ku madolari ya Amerika miliyoni 455 nyuma ya Covid-19 ubwo iyo mirimo yari imaze kuba myinshi.

Uyu muryango uvuga ko ukomeje gukorana n’ibigo bitandukanye birimo Inkomoko, GroFin, ESPartners, Education First (EF), Cornell University, Harambee Youth Employment Accelerator, ndetse na Vatel Rwanda, bizashyira mu bikorwa gahunda za Hanga Ahazaza ku rubyiruko n’abagore 300,000 kugera muri 2030, haba mu gutanga inkunga n’inguzanyo ndetse n’amahugurwa.

Umukozi muri Minisiteri y’Abakozi ba Leta n’Umurimo (MIFOTRA), ushinzwe kongera ubushobozi bw’inzego za Leta n’abikorera, Felly Nkusi, avuga ko barimo gukangurira abikorera gushora imari mu kubaka amashuri yigisha kuba Barista, nka kimwe mu byafasha Leta y’u Rwanda kuzaba yahangiye imirimo abagera kuri miliyoni imwe n’ibihumbi 250 mu myaka itanu iri imbere (2024-2029).

Nkusi avuga kandi ko barimo gushaka abafatanyabikorwa batera inkunga abakeneye kwiga imyuga itandukanye irimo uwo kuba Barista ariko batishoboye, ariko abashoboye na bo bagakangurirwa kwiyishyurira nk’uko bishyura mu yandi mashuri bisanzwe.

Nkusi ashima ko amaguriro y’ikawa ku mihanda yo mu Rwanda agenda yiyongera ku buryo bugaragara kandi buri guriro rikoresha abantu batari munsi ya 20.

Lincoln G. Downer wa Jamaica

Abakiriwe ni Amb. Lincoln G. Downer wa Jamaica, Nadeska Imara Cuthbert Carlson wa Nicaragua, Savvas Vladimirou wa Cyprus, Patricio Alberto Aguirre Vacchieri wa Chile, Jeanne Crauser wa Luxembourg na Mirko Giulietti wa Switzerland.

Abandi ba Ambasaderi bakiriwe n’Umukuru w’Igihugu kuri uyu wa Gatatu, ni Sahak Sargsyan wa Armenia, Jenny Isabella Da Rin wa Australia, Dag Sjöögren wa Suède na Ernest Yaw Amporful wa Ghana na Brig. Gen. Mamary Camara wa Mali.

Ambasaderi wa Jamaica mu Rwanda

Ambasaderi Lincoln G. Downer ufite icyicaro i Abuja muri Nigeria, avuga ko kuva aho Perezida Kagame asuriye igihugu cye muri 2022 ndetse na Perezida wa Jamaica akaba yaraje mu Rwanda muri uwo mwaka, ibihugu byombi byatangiye kwagura umubano.

Bashyize umukono ku masezerano yo kugirana inama mu bya politiki hamwe no guteza imbere ubukerarugendo, aho bemeranyijwe ubuhahirane no koroshya uburyo bwo gutwara ibicuruzwa by’u Rwanda bishobora kwambukirizwa muri Jamaica nk’igihugu gikora ku nyanja ya Caribbean.

Ambasaderi wa Suède mu Rwanda

Dag Sjöögren wa Sweden

Amb. Dag Sjöögren avuga ko umubano w’ibihugu byombi ufite inyungu mu guteza imbere ikoranabuhanga, guhangana n’ingaruka z’imihindagirikire y’ibihe hamwe no kurengera ubuzima.

Ambasaderi wa Cyprus mu Rwanda

Savvas Vladimirou wa Cyprus

Ambasaderi Savvas Vladimirou, avuga ko yaje gushaka uko yakubaka umubano w’ibihugu byombi ushingiye ku masezerano bazagirana kugira ngo habeho ubuhahirane n’ishoramari.

Ambasaderi Vladimirou yagize ati « Amwe mu masezerano naje gutegura ajyanye no kohererezanya abanyeshuri biga muri za kaminuza, bakajya babona buruse zo kwiga muri Cyprus.»

Ambasaderi wa Nicaragua mu Rwanda

Amb Nadeska Imara Cuthbert Carlson wa Nicaragua

Ambasaderi Nadeska Imara Cuthbert Carlson avuga ko aje gukomeza umubano ushingiye ku iterambere ry’ubuhinzi, ubukerarugendo n’amahuriro mpuzamahanga.

Ambasaderi wa Ghana mu Rwanda

Ernest Yaw Amporful wa Ghana

Ambasaderi Ernest Yaw Amporful avuga ko agiye kwimurira icyicaro cye mu Rwanda akava i Nairobi muri Kenya, aho yizeza ko azateza imbere ubuhahirane bw’ibicuruzwa bikorerwa mu bihugu byombi.

Ambasaderi wa Armenia mu Rwanda

Amb Sahak Sargsyan wa Armenia

Ambasaderi Sahak Sargsyan avuga ko ibihugu byombi bifitanye isano yo kuba bidakora ku nyanja kandi ari bito, bikazakomeza guteza imbere umubano ushingiye ku ikoranabuhanga mu burezi, kohererezanya ibicuruzwa no gukorana mu miryango mpuzamahanga.

Amb. Sargsyan ngo yishimira ko u Rwanda na Armenia byombi biri mu muryango mpuzamahanga w’ibihugu bikoresha ururimi rw’Igifaransa (Francophonie), aho yaje kurarikira Abanyarwanda kwitegura kuzitabira imikino y’uwo muryango izabera muri Armenia mu mwaka wa 2027.

Ambasaderi wa Luxembourg mu Rwanda

Jeanne Crauser avuga ko ari we Ambasaderi wa mbere w’icyo gihugu ufite icyicaro mu Rwanda, akaba yizeza ko azateza imbere uburezi no guhugura abantu mu bijyanye n’umurimo hamwe no guhangana n’imihindagurikire y’ibihe.

Jeanne Crauser wa Luxembourg

Amb. Crauser agira ati “Dufite ubunararibonye mu bijyanye n’ikoranabuhanga mu by’imari, no guhanga udushya, ibi bizatuma habaho gutsura umubano ushingiye ku gusurana kw’abaturage b’ibihugu byombi.”

Mbere yo kugeza ku Mukuru w’Igihugu inyandiko zibemerera guhagararira ibihugu byabo mu Rwanda, aba ba Ambasaderi babanje kuzereka Minisitiri w’Ububanyi n’Amahanga w’u Rwanda, Olivier J.P Nduhungirehe kuva ku wa Kabiri tariki 26 Ugushyingo 2024.

Patricio Alberto Aguirre Vacchieri wa Chile

Brig. Gen. Mamary Camara wa Mali

Amb Mirko Giulietti wa Switzerland

Ibi bijyana n’uko Ubugenzacyaha bw’u Rwanda (RIB) na bwo buvuga ko ingengabitekerezo ya Jenoside ikomeje kwiyongera, cyane cyane mu bavutse ahagana mu 1994 na nyuma yaho, aho abarenga 4,019 bayigaragaweho kuva mu myaka itanu ishize kugera ubu.

Umusaza witwa Karekezi Vincent, wari ufite imyaka 82, akaba yari atuye mu Karere ka Nyaruguru, Umurenge wa Muganza, Akagari ka Muganza, Umudugudu wa Muganza, ari na ho yari yararokokeye Jenoside yakorewe Abatutsi, yishwe tariki ya 18/08/2024 aratwikwa, umubiri usangwa mu isambu ye hafi y’ibiraro bye.

Uwitwa Ntashamaje Enatha wari ufite imyaka 51, wo mu Karere ka Ruhango, Umurenge wa Kabagari, umurambo we bawusanze mu rutoki munsi y’ishyamba tariki ya 19/08/2024 bigaragara ko na we yapfuye yishwe.

Umubyeyi witwa Uwimana Martha wari utuye mu Karere ka Nyaruguru, Umurenge wa Rusenge, Akagari ka Bunge, Umudugudu wa Bunge, yishwe mu ijoro ryo ku wa 14/08/2024, aho bamusatuye umutwe. Hari abantu barindwi bakekwaho kugira uruhare mu iyicwa rya Uwimana bahise bafatwa barafungwa.

Uwitwa Mukakanyamibwa Beatrice wavutse mu 1968, akaba yari uwo mu Karere ka Karongi, Umurenge wa Murundi, Akagari ka Kareba, Umudugudu wa Kibingo ari na ho yari atuye, yishwe anizwe mu ijoro ryo ku wa 04/08/2024, ndetse akaba ngo yarabanje gusambanywa. Iperereza ry’ibanze ryafashe abantu 14 bakekwaga kugira uruhare muri uru rupfu.

IBUKA ivuga ko yababajwe cyane n’uko nyuma y’iyicwa rya Mukakanyamibwa, uwari Umunyamabanga Nshingwabikorwa w’Umurenge ngo yatanze raporo mu nyandiko no mu magambo avuga ko uwo muntu asanzwe ari umusinzi kandi asambana (aho kwamagana ubwo bunyamaswa).

Umubyeyi witwa Pauline Nduwamungu wari utuye mu Karere ka Ngoma, Umurenge wa Rukumberi, yishwe aciwe umutwe tariki ya 15/11/2024, umutwe ujugunywa mu musarani, hakaba hari abafashwe bakekwaho kugira uruhare muri urwo rupfu, nubwo ngo iperereza rikomeje.

Umunyamabanga Nshingwabikorwa wa IBUKA, Naphtal Ahishakiye

Umunyamabanga Nshingwabikorwa wa IBUKA, Naphtal Ahishakiye, avuga ko ibi birimo guterwa n’ingengabitekerezo ya Jenoside iri mu Banyarwanda, ikaba ngo yari isanzwe igaragara mu bikorwa byo guhemukira abarokotse, kubabwira amagambo abakomeretsa no kubangiriza imitungo, ariko hatarimo kubica.

Ahishakiye yagize ati “Ikintu cya mbere cyakorwa ni uko abantu bose bagaragarwaho n’ingengabitekerezo ya Jenoside bahanwa by’intangarugero, n’ubu haracyagaragara amagambo akomeretsa abarokotse Jenoside n’ibindi ibikorwa bigaragaza ingengabitekerezo, ni byiza ko ibyo byaha bicukumburwa abantu byagaragayeho bagahanwa.”

Yongeyeho ati “Hakenewe no gukurikirana ko abantu bahanwe neza kuko ujya kureba ugasanga iyo umwaka urangiye abantu baketsweho ingengabitekerezo ya Jenoside, ugasanga bose baratashye, kandi wabonaga ibimenyetso bifatika bihari, ariko ugasanga barekuwe ku rwego rw’Ubushinjacyaha, abandi barekuwe ku rwego rw’inkiko z’ibanze, abantu bakwiye kubihagurukira.”

Umuvugizi w’Urwego rw’Igihugu rw’Ubugenzacyaha, Dr Thierry B. Murangira, avuga ko inzego z’ubutabera n’izishinzwe umutekano ubu ziri maso, kandi akibutsa ibigize icyaha cyo guhohotera uwarokotse Jenoside biri mu ngingo ya 12 y’Itegeko ryerekeye icyaha cy’ingengabitekerezo ya Jenoside.

Dr Murangira avuga ko guhohotera uwarokotse Jenoside ari cyo cyaha cyihariye 50% by’imanza zirenga 2,985 ziregwamo abagera ku 4,019 bakurikiranyweho ibyaha bifitanye isano n’ingengabitekerezo ya Jenoside, kuva mu mwaka wa 2019.

Abafite ingengabitekerezo ya Jenoside ni 21%, kuzimiza cyangwa gutesha agaciro ibimenyetso bya Jenoside byihariye 12%, kandi muri ibyo byose amagambo ashengura umutima akaza ku rugero rwa 73%.

Dr Murangira agira ati “Nubwo ryaba ijambo, uko ryaba rimeze kose, ntabwo rizihanganirwa!”

Umuvugizi w’Ubugenzacyaha avuga ko abafite imyaka iri hagati ya 31-40 y’amavuko ari bo benshi bakora ibyo byaha, hagakurikiraho abafite imyaka kuva kuri 41-50, ndetse ngo igitangaje hari n’abafite imyaka kuva kuri 14-17 bari ku kigero cya 17% (bangana na 684).

Dr Murangira avuga ko inzego z’ubutabera n’iz’umutekano zitazihanganira umuntu wese yaba ugaragaraho ingengabitekerezo ya Jenoside, ndetse n’uwibasira abarokotse Jenoside yakorewe Abatutsi

Umunyamabanga Uhoraho muri MINEMA, Philippe Habinshuti, yatangarije RBA ko hari uduce tw’Igihugu aho ubutaka bwamaze koroha cyane kubera imvura imaze iminsi igwa ndetse ikaba ikomeje, ku buryo ngo byateye impungenge z’uko abo baturage baridukirwa cyangwa bakaridukana n’imikingo(inkangu), abandi bagasenyerwa n’imyuzure cyangwa imivu y’amazi.

Habinshuti avuga kandi ko imvura iteganyijwe nk’uko MINEMA ibikesha ikigo cy’Igihugu cy’Iteganyagihe (METEO-Rwanda), izaba irimo inkuba ku buryo ngo bazafata ingamba z’umwihariko.

Habinshuti agira ati "Hari uturere, cyane cyane udukunze kugaragaramo ibyo bibazo (by’ibiza) tugera kuri 17, twaragenzuye, tureba ahantu hashobora kwibasirwa kurusha ahandi, aho ubona ko bitanakeneye imvura nyinshi, hagomba guhita hafatirwa ingamba."

Ati "Twasanze mu by’ukuri hari imiryango 1,143 ifite ikibazo gikomeye, aho ituye hakwiye guhita hafatirwa ingamba, izo ngamba zo kuhabakura ni ukubahungisha kuko ni ahantu ubona ko ubutaka bwatangiye kuriduka hejuru, inzu zimwe zatangiye gutemba, hatagize igikorwa rero wasanga abantu bari muri iyo miryango barenga 3,000 bagize ibibazo."

Habinshuti avuga ko abo baturage bazaba bimuwe by’agateganyo bagashyirwa ahantu ubuzima bwabo butari mu kaga, ndetse agasaba n’abandi inzego zitabonye, gukomeza kugenzura uburyo inzu zabo zimeze n’aho ziri, bagakumira hakiri kare.

Ingendo muri iki gihe cy’imvura na zo ngo ni izo kwitonderwa, aho MINEMA isaba ababyeyi bohereza abana ku ishuri cyangwa abarezi babohereza mu rugo, kumenya ko bagezeyo amahoro kandi batagiye mu mvura.

Mu turere dukunze kwibasirwa n’ibiza, utugize Umujyi wa Kigali tuza ku isonga aho abaturage baridukirwa n’imikingo, ndetse n’abo amazi y’imvura atembera mu nzu.

BNR ivuga ko ubukungu bw’u Rwanda bwakomeje kwihagararaho mu guhangana n’impinduka z’imbere mu Gihugu hamwe n’izo ku rwego mpuzamahanga.

Raporo y’Akanama ka BNR gashinzwe Politiki y’Ifaranga, ivuga ko ubukungu bw’u Rwanda bwazamutse ku rugero rwa 9.8% mu bihembwe bibiri bya mbere by’uyu mwaka wa 2024, kandi ko bwitezweho kuzamuka kurushaho mu gihembwe cya gatatu cy’uyu mwaka.

Muri rusange, ubukungu bw’u Rwanda ngo bwitezweho kuzamuka ku gipimo cya 8.3% muri uyu mwaka wa 2024.

Raporo y’Akanama ka BNR gashinzwe Politiki y’Ifaranga, ivuga ko ubukungu bw’u Rwanda bwazamutse

Ibyoherezwa mu mahanga byiyongereyeho 13.5% ugereranyije n’umwaka ushize, bitewe ahanini no kwiyongera kw’ibisanzwe bizanira u Rwanda amadevize birimo ikawa, amabuye y’agaciro n’icyayi, bikajyana n’uko ibiciro by’ibi bicuruzwa ku masoko mpuzamahanga na byo byazamutse.

Muri rusange, ibyoherezwa hanze byazamutse ku gipimo cya 4% mu mezi make ashize nubwo na none ngo habayeho kwiyongera kurushijeho kw’ibitumizwa hanze y’Igihugu byageze ku rugero rwa 6%.

Nubwo mu gihembwe cya gatatu cy’uyu mwaka wa 2024, ibyoherezwa hanze byazamutse kurusha ibyatumijweyo, muri rusange ibi bicuruzwa bigurwa mu mahanga ngo bikomeje guteza icyuho(igihombo) mu bucuruzi, kigera kuri 5.7% ugereranyije n’ibyoherezwa mu mahanga.

Ibi ngo bigaterwa ahanini no kuba u Rwanda rutarabasha kwihaza muri byinshi byakumira itumizwa ry’ibintu mu mahanga, ubigereranyije n’ibyoherezwayo, aho mu mezi icyenda ya mbere y’umwaka wa 2024 ikinyuranyo(igihombo) mu bucuruzi cyageze kuri 8.3%.

Iki gihombo ngo ni cyo gishobora gutsikamira amasoko y’ivunjisha, bikaba ari byo byatumye ifaranga ry’u Rwanda ritakaza agaciro ku rugero rwa 8.39% mu mezi 11 ya mbere y’uyu mwaka, ndetse byitezwe ko iki gipimo kizagera kuri 9.4% mu mwaka wose, nubwo kizaguma munsi y’uko byari bimeze mu mwaka ushize wa 2023.

Ibiciro byo byakomeje kuguma ku rugero rwemewe na BNR ruri hagati ya 2-8%, kuva mu gihembwe cya kane cy’umwaka ushize wa 2023 bikaba bigeze ku gipimo cya 4.1% munsi y’aho byari bigeze mu gihembwe cya gatatu cy’uwo mwaka.

Muri rusange ibiciro by’ibiribwa byo byaragabanutse ariko habaho izamuka ry’ibiciro by’ibicanwa ugereranyije n’uko byari hasi mu mwaka ushize.

BNR igaragaza ko ibiciro muri rusange byitezweho kuzamuka ku rugero rwa 4.6% muri uyu mwaka, kandi ko biteganyijwe kuzamuka kugera kuri 5.8% mu mwaka utaha wa 2025, hashingiwe ku miterere y’ikirere irimo gutuma habaho umusaruro muke w’ubuhinzi.

Ibi ariko ngo bishobora guhinduka mu gihe habaho ibibazo bitunguranye, haba mu gihugu imbere cyangwa hanze.

Intambara y’u Burusiya kuri Ukraine ngo ishobora kugira ingaruka zikomeye ku bukungu bw’Isi, kimwe n’amakimbirane ari mu Burasirazuba bwo Hagati, ndetse n’ibibazo biterwa n’imihindagurikire y’ikirere.

BNR yagumishijeho inyungu fatizo ya 6.5% kugira ngo ikomeze kuringaniza ibiciro

Akanama gashinzwe Politiki y’Ifaranga kavuga ko urwego rw’imari mu Rwanda rukomeje kutajegajega hashingiwe ku mutungo shingiro w’ibigo by’imari wazamutse ku gipimo cya 23.1% mu mezi icyenda ya mbere y’uyu mwaka.

Uku kwiyonera kw’imari shingiro kukanahuzwa n’igipimo cy’umusaruro mbumbe w’Igihugu(GDP), na cyo ngo cyazamutse mu buryo bugaragara.

Ikigero cy’igishoro amabanki afite (Capital Adequacy Ratio, CAR) kugira ngo ashobore guhangana n’ibibazo bitunguranye, kiri kuri 21.2%. Ni urugero ruri hejuru ya 15% rusabwa na Banki Nkuru y’Igihugu, kuko ngo bigaragaza ko ibyo bigo bifite ubushobozi buhagije bwo gutanga inguzanyo ku bazikeneye.

BNR ivuga ko ibigo by’imari bito, ubwiteganyirize kimwe n’Urwego rw’Ubwishingizi, na byo bikomeje gutera imbere.

Imiterere y’ubukungu bw’u Rwanda, ariko ngo iracyakeneye kureberwa mu buryo bwagutse, hashingiwe ku bibazo biri mu bukungu bw’Isi kuva ku ngaruka z’icyorezo cya Covid-19 hamwe n’intambara hagati y’u Burusiya na Ukraine, nk’uko ikinyamakuru KT Press cyabisesenguye.

Mu gihe za banki nkuru z’ibihugu ku rwego rw’Isi zikomeje gusubiza ibintu ku murongo zigamije kugabanya umuvuduko w’izamuka ry’ibiciro, ubukungu bw’Isi buteganyijwe kuzamuka ku gipimo cya 3.2% muri uyu mwaka hamwe n’utaha.

Muri Afurika yo munsi y’ubutayu bwa Sahara ho ubukungu buteganyijwe kwiyongeraho 3.6% muri uyu mwaka, hamwe na 4.2% mu mwaka utaha.

Igabanuka ry’ibiciro ryabayeho muri uyu mwaka wa 2024, harimo n’iby’ibikomoka kuri peteroli, rizakomeza kubaho hashingiwe ku kugabanya ingano y’ibisabwa hamwe no kuba ibihugu bicuruza peterori (OPEC) byariyemeje kongera umusaruro.

Ku rwego mpuzamahanga, byitezwe ko ibiciro bizagabanuka ku gipimo cya 5.8% muri uyu mwaka, ndetse no mu wutaha bikazajya hasi ku gipimo cya 4.3%.

Icyakora muri Afurika yo munsi y’ubutayu bwa Sahara, ibiciro ngo bizakomeza kuba hejuru ku rugero rwa 18.1% muri uyu mwaka, no kuri 12.3% mu mwaka utaha, bitewe cyane cyane n’ibibazo by’ubukungu muri bimwe mu bihugu bikomeye kuri uyu mugabane, birimo Angola, Nigeria, Ghana na Ethiopia.

Uwari Umushumba w’Itorero Ebenezer arafunzwe

Pasiteri Nkundabandi yari yarakatiwe n’Urukiko igifungo cy’imyaka 7 n’ihazabu y’amafaranga y’u Rwanda miliyoni 300, nyuma yo guhamwa n’ibyaha byo kunyereza umutungo no kugurisha ikintu cy’undi akagitangaho ingwate, ariko akaba atarahise afungwa kuva igihe urubanza rwasomewe ku itariki 29 Ukuboza mu mwaka ushize wa 2023.

Nkundabandi aregwa kugurisha imitungo y’itorero yayoboraga, irimo urusengero ruri i Giheka mu kagari ka Kagugu mu Murenge wa Kinyinya mu Karere ka Gasabo.

Uwunganira mu mategeko Pasiteri Nkundabandi, Me Bayisabe Erneste, avuga ko impamvu umukiliya we atahise afungwa biteganywa n’ingingo ya 60 y’Itegeko ryo muri 2019, ryerekeye Imiburanishirize y’Imanza z’Inshinjabyaha, ivuga ko ari ihame ko umuburanyi akurikiranywa adafunzwe, n’ubwo iya 80 ivuga ko Umucamanza afunga umuburanyi hari impamvu zikomeye.

Me Bayisabe ati “Ibyo byaha byo kunyereza umutungo no kugurisha ikintu cy’undi akagitangaho ingwate, babonye ko izo mpamvu zidakomeye Umucamanza aramufungura muri ya minsi 30, araburana mu mizi adafunzwe. Icyo gihe urukiko iyo rumukatiye igifungo akajurira, cya gihano cyo gufungwa ntabwo gishyirwa mu bikorwa.”

Me Bayisabe avuga ko urubanza rwa Pasiteri Nkundabandi ku bijyanye n’imitungo rushobora kuzaburanishwa mu mwaka wa 2026 kubera ubwinshi bw’imanza ziri mu nkiko.

Me Bayisabe yemeje kandi iby’amakuru y’uko umukiliya we ubu afungiwe i Bumbogo kuri Sitasiyo ya RIB ndetse ko yamusuye, ariko ubu icyo afungiwe akaba ari ibibazo afitanye n’umugore we, bijyanye no kumuhoza ku nkeke no guta urugo.

Kigali Today yaganiriye na Mutuyimana Clarisse washakanye na Nkundabandi, akaba avuga ko bategereje kumva impamvu Nkundabandi ataraburanishwa ku byaha byo guta urugo no kuruteza umutekano muke, kwanga kuruhahira no kuba imitungo y’urugo nta n’umwe umugabo yigeze amwandikaho.

Mutuyimana agira ati “Ndumva bamuhana kuko jyewe ntabwo nakomeza kubana na we rwose, urumva niba imitungo y’urugo yarayiyanditseho yose (100%), reba iyo mitungo barayifatiriye yose, abana ntabwo biga kandi njye nta ruhare nabigizemo, ndashaka uburenganzira bw’abana banjye kugira ngo mbone ibyo kubatunga.”

Mutuyimana uvuga ko Pasiteri Nkundabandi yari yarataye urugo, ngo yabonye uwo mugabo, “asimbuka igipangu saa tanu n’igice z’ijoro, abageraho mu nzu afite ibiziriko mu ntoki, aza abaririza mushiki we uba muri urwo rugo, amufata mu ijosi yenda kumuniga kuko ngo yicaye mu mitungo ye, ni bwo twahise dusakuza ahita yiruka asimbuka igipangu, abashinzwe umutekano bahita bamufata.”

Mutuyimana avuga ko yandikiye inzego zishinzwe umutekano yishinganisha, kuko ngo Nkundabandi n’ishuti ze bamuhoza ku nkeke ko bazamwica.

Hari n’Abanyetorero Nkundabandi yayoboye bavuga ko bitabashimishije kubona uwo mugabo atarafunzwe nyuma yo guhamwa n’ibyaha byo kugurisha imitungo y’Itorero Ebenezer, bagakeka ko yaba yaratanze ruswa.

Polisi y’u Rwanda ivuga ko dosiye ya Pasiteri Nkundabandi iri mu Bugenzacyaha (RIB). Kigali Today iracyagerageza kuvugana na RIB ku bijyanye n’ifungwa rya Pasiteri Nkundabandi.

Abitabiriye gutangiza 4G VoLTE

Gusa ntabwo ubu buryo bukora muri telefone zitwa karasharamye cyangwa gatushe, bisaba ko umuntu agura izigezweho zitwa ‘smartphone’, byibura iy’amafaranga 20,000Frw (kandi muri Airtel zirahari zitwa ‘Imagine Phone’ ziza zifitemo 4G LTE).

Ni uburyo bwari bumaze igihe gito bukoreshwa ariko abayobozi ba Airtel n’inzego za Leta zishinzwe ikoranabuhanga babutangije ku wa Kabiri tariki 19 Ugushyingo 2024.

Umuyobozi muri Airtel ushinzwe Amategeko, Rugambwa agira ati « Ku bantu bafite telefone zisanzwe zitwa karasharamye ntabwo bazashobora kugera kuri izi serivisi, izi serivisi zigera ku bantu bafite ‘smartphone’, kandi zifite 4G LTE muri zo, ni ikoranabuhanga ry’igihe kirambye.»

Umuyobozi wa Airtel-Rwanda, Emmanuel Hamez, avuga ko iyi serivisi yo guhamagara ukoresheje murandasi ya 4G ihendutse cyane, kuko kumara isaha uvugana n’undi ngo bingana nko kohereza amafoto atanu kuri Whatsapp, aho ugura ‘bundles’ za 3,000Frw, 5,000Frw cyangwa 10,000Frw, ukamara ukwezi uhamagara, wandika ‘messages’ kandi ukoresha murandasi (Internet) mu mirimo itandukanye.

Hamez avuga ko mu gihe umuntu aba arimo kuvugana n’undi bahamagaranye kuri telefone, murandasi ikomeza gukora nk’uko bisanzwe ku buryo imirimo yari irimo gukorwa idashobora guhagarara.

Emmanuel Hamez uyobora Airtel Rwanda

Airtel ivuga ko kugeza ubu hari abafatabuguzi bayo bagera ku bihumbi 700 bafite telefone zigezweho zishobora kwakira itumanaho rya 4G VoLTE.

Iki kigo cyihaye intego y’uko mu mezi 7-8 ari imbere nta telefone ya 2G (karasharamye) izaba igikoreshwa, kuko ngo iminara yamaze kuvugururwa ijyana n’igihe ndetse hongerwamo n’indi igera kuri 200, ku buryo itumanaho ryabo ngo ryasakaye hose Rwanda.

Hamez avuga ko ibyo bikorwa byashowemo Amadolari ya Amerika angana na Miliyoni 60$(akaba ahwanye na Miliyari 84 z’amafaranga y’u Rwanda), kandi ko ibigo by’imari byasabwe gutanga inguzanyo zo kwigurira ibikoresho bikorana n’ikoranabuhanga rigezweho.

Umuyobozi mu Rwego Ngenzuramikorere (RURA) ukuriye Ishami ry’Ikoranabuhanga, Charles Gahungu, ashimira Airtel kubera ko guhamagarana kuri telefone hakoreshejwe murandasi ya 4G LTE bihendutse, kandi bifasha amajwi kugenda neza ayunguruye, adacikagurika.

Umunyamabanga Uhoraho muri Minisiteri y’Ikoranabuhanga na Inovasiyo, Yves Iradukunda, avuga ko abaturage bakeneye kumva neza no gusobanukirwa ikoranabuhanga bagenda bagezwaho, kugira ngo ribafashe kwiteza imbere.

Iradukunda ati«Nyuma yo gutegura ibikenewe, kubona ibikoresho (by’ikoranabuhanga), hamwe no kugira abaturage bagomba guhabwa izo serivisi, ni byo bizageza iki gihugu ku iterambere. »

Uburyo bwo kohererezanya amafaranga bwo buzagumaho uko bisanzwe, ndetse umuntu ukoresha Airtel Money n’undi ukoresha MTN Mobile Money, na bo basigaye bahanahana amafaranga bakanze *182*1*2#

Airtel ivuga ko kugeza ubu itumanaho ryayo rimaze gusakara hose mu Rwanda ku rugero rungana na 95%, aho Abaturarwanda barenga miliyoni ebyiri bakoresha imiyoboro yayo.

Ibirayi biri mu biribwa byagiye bizamuka mu kugura amafaranga menshi, ibigaragara nko guta agaciro k’ifaranga ry’u Rwanda

Manigaba Phenéas w’imyaka 50 y’amavuko agira ati “Mu mwaka wa 2000 ikilo cy’ibirayi cyagurwaga amafaranga 30Frw, ndabyibuka neza, muri uwo mwaka nibwo ninjiye mu Mujyi wa Kigali, inzu y’ibyumba bibiri na ‘salon’ yakodeshwaga amafaranga 5,000Frw mu Gatsata, ku Giticyinyoni, Kimisagara n’ahandi, ariko ubu irakodeshwa atari munsi ya 60,000Frw-70,000Frw.”

Manigaba avuga ko imboga za dodo (ubu zigurwa amafaranga 100 cyangwa 200 ku mufungo), imbuto za avoka n’ibindi, ngo yajyaga ku baturanyi be akabihabwa ku buntu.

Icyo gihe kandi ngo mu cyaro nta mata bagurishaga, ndetse no mu mijyi akaba yaragurwaga amafaranga benshi mu baturage bashoboraga kubona, n’ubwo Manigaba atibuka neza uko litiro y’amata yagurwaga.

Umumotari wahisemo kwitwa Kalisa Alphonse watangiye gutwara abagenzi i Kigali mu mwaka wa 2010, avuga ko icyo gihe inzu y’icyumba kimwe na salon kuri ubu ikodeshwa amafaranga ibihumbi 50 ku kwezi, muri uwo mwaka ngo yari igeze ku mafaranga ibihumbi 30 ku Muhima n’ahandi hegereye cyane mu Mujyi rwagati wa Kigali.

Icyo gihe Kalisa yatwaraga umugenzi kuva mu Mujyi kugera i Remera muri gare ku mafaranga 800Frw, ariko ubu ngo umuntu utamuhaye nibura 1,500Frw ntiyakwemera guhaguruka.

Kalisa agira ati “Ntegereje amaherezo y’ibi bintu, gusa sinyazi!”

Ifaranga ry’u Rwanda ryagiye rita agaciro urigereranyije n’Idolari rya Amerika

Hari abaturage bari bugamye imvura ku biro by’ivunjisha mu Mujyi rwagati wa Kigali, na bo bajyaga impaka bibukiranya ko hari igihe Idolari rya Amerika ryigeze kuba rivunjwa amafaranga y’u Rwanda 320Frw mu mwaka wa 2002, rirazamuka rivunjwa 602Frw muri 2009, ubu rikaba rivunjwa amafaranga y’u Rwanda 1,400Frw.

Guverineri wa Banki Nkuru y’u Rwanda, John Rwangombwa, ubwo yari mu Nteko Ishinga Amategeko tariki 18 Ugushyingo 2024, yavuze ko ibintu bikomeje guhenda ku masoko cyane cyane ibiribwa, bitewe n’impamvu zitandukanye zirimo imihindagurikire y’ibihe iteza abahinzi kubura umusaruro, hamwe no kuba u Rwanda rugura ibintu byinshi hanze kurusha ibyo rwoherezayo.

Guverineri Rwangombwa yagejeje ku Nteko Ishinga Amategeko Imitwe yombi Raporo y’Ibikorwa bya Banki Nkuru y’u Rwanda

Guverineri Rwangombwa yagize ati “Mu mwaka ushize wa 2023 habayeho ikibazo cy’amapfa bitera ibura ry’ibiribwa, biba ngombwa ko hatumizwa ibiribwa byinshi aho twatanze miliyoni 600 z’Amadolari ku biribwa gusa, igisubizo kiri mu kongera ibyoherezwa hanze n’ibikorerwa mu Gihugu, mu gihe gito birabangamye ariko mu gihe kirekire aho ni ho hari igisubizo.”

Inteko Ishinga Amategeko y’u Rwanda ivuga ko Ikigo gishinzwe Ubumenyi bw’Ikirere, Meteo-Rwanda, kigomba gufashwa gutanga amakuru ahamye ajyanye n’iteganyagihe kandi Leta igateza imbere ubuhinzi budashingiye ku mvura.

Umuyobozi Mukuru w’Ikigo gishinzwe amasoko ya Leta mu Rwanda (RPPA), Joyeuse Uwingeneye, ubwo yari mu nama y’ibigo bishinzwe amasoko ya Leta muri Afurika, yavuze ko batangiye gutanga amasoko bibanze ku kugura ibikorerwa imbere mu Gihugu, kugira ngo barinde ifaranga ry’u Rwanda gukomeza gatakariza agaciro mu kugura ibintu bivuye hanze.

Abadepite n’Abasenateri ubwo bari mu Nteko Rusange tariki 18 Ugushyingo 2024 bagezwaho raporo y’ibikorwa bya Banki Nkuru y’u Rwanda

Mucyo Samuel wigaga muri ESTB Busogo i Musanze, yabaye uwa mbere wahawe igihembo na Minisitiri w’Uburezi

Nyuma y’uko abagera kuri 21.4% batazabona diplome, MINEDUC yemereye abifuza gusibira cyangwa kwiyandikisha kuzakora ibizamini by’abakandida bigenga (candidat libres) ko batangira kubisaba.

Minisitiri w’Uburezi, Joseph Nsengimana yagize ati “Umwana wese uzashaka gusubira kwiga mu wa gatandatu(wisumbuye) tuzabimufashamo, umuntu wese umuntu wese uzabishaka tuzabimufashamo.”

Ati “Icya kabiri hari uburyo abantu bafata ikizami batari mu ishuri, byitwa ‘Candidat libre’, abazabihitamo hari ibigo turi gukorana na byo kugira ngo bijye bifasha abo bana, natwe ubwacu nka Minisiteri hari za video twashyizeho kugira ngo zibafashe bitegure bongere bakore icyo kizamini. Ibyo ni ibintu 2 byafasha abo batashoboye gutsinda.”

Minisitiri w’Uburezi, Joseph Nsengimana, hamwe n’Umunyamabanga wa Leta muri MINEDUC, Irere Claudette, bayoboye gahunda yo gutangaza amanota y’abarangije amashuri yisumbuye

Mucyo Samuel wigaga muri ESTB Busogo mu karere ka Musanze, Dusengimana Emmanuel wigaga muri Kivu Hills mu Karere ka Rutsiro, hamwe na Rukundo Akili wigaga muri Ecole d’Art de Nyundo ni bo babimburiye abandi mu guhembwa nyuma yo kurusha abanda gutsinda ibizamini bisoza amashuri yisumbuye, byakozwe muri 2024.

Mucyo Samuel wahawe igihembo na Ministiri w’Uburezi, arangije kwiga ibijyanye no gutunganya amafunguro, akaba ngo ashobora kuvuza amata neza agihunduka ikivuguto cyangwa yawurute hamwe no gukora amandazi.

Hari na Mutesa Cedrick wigaga muri Rwanda Coding Academy, urangije amashuri yisumbuye, akaba ashobora gukora video ya laboratwari abantu bareba bakamera nk’abarimo gukora ibintu bya nyabyo.

Mutesa avuga ko azasoza amashuri ashobora gukora amashusho abantu bareba bakabasha kwiyigisha nta mwarimu bari kumwe ndetse no gukora ubuvuzi umuntu atarabyize ahubwo biturutse ku byo arimo kureba.

Ntawugashira Beatrice, Umubyeyi wa Mutesa avuga ko uyu mwana yabyirutse afata ibikoresho by’ikoranabuhanga by’ababyeyi akajya kuri murandasi agatangira gukora ubushakashatsi.

Ntawugashira ati “Umwana yakuze akunda ibintu by’ikoranabuhanga cyane, ababyeyi babona umwana afata mudasobwa cyangwa telephone yabo ntibakagire impungenge, burya wasanga ari ho hari impano ye, njye gufata telephone yanjye kuri we ni umugisha.”

Ministeri y’uburezi (MINEDUC) ivuga ko abanyeshuri bari biyandikishije gukora ibizamini bisoza amashuri yisumbuye muri uyu mwaka bageraga kuri 91,713, abakoze ibyo bizamini bakaba bari 91,298, bahwanye na 99.5% by’abari biyandikishije.

Ibyiciro by’imitsindire byashyizweo ni 7, aho icyitwa A cya mbere kigizwe n’ababonye amanota hagati ya 80%-100%, icyiciro cya B kirimo ababonye amanota hagati ya 75%-79%, icyiciro cya C kirimo ababonye hagati ya 70%-74%, icyiciro cya D kirimo ababonye hagati ya 65%-69%.

Ababonye hagati ya 60%-64% bashyizwe mu cyiciro cya E, abagize hagati ya 50%-59% bashyizwe mu cyiciro cyitwa S, mu gihe ababonye munsi ya 50% bahawe inyuguti ya F bivuga Fail(gutsindwa).

Abatsinze mu burezi rusange ni 38,016(ku kigero cya 67.5%), harimo abahungu 47.7% hamwe n’abakobwa 52.3%, abatsinze mu mashuri y’imyuga n’ubumenyingiro ni 29,542(96.1%) barimo abahungu 54.8% n’abakobwa 45.2%, mu gihe abatsinze mu bumenyi buganisha ku murimo (Professional Education) ari 4,188(98.1%) barimo abahungu 45.2% n’abakobwa 54.8%.

Baganiriye ku ruhare rw’amasoko ya Leta mu iterambere rirambye rya Afurika

Raporo y’ukwezi kwa Nzeri 2024 y’Ikigo cy’Igihugu cy’Ibarurishamibare(NISR), igaragaza ko u Rwanda rwahombye Amadolari ya Amerika angana na miliyoni 338.68(US$) mu kugura ibintu hanze yarwo, akaba arenga Amafaranga y’u Rwanda miliyari 470(Frw).

Iki cyuho hagati y’ibitumizwa n’ibyoherezwa mu mahanga cyabayeho nyuma y’uko u Rwanda rutumije hanze muri uko kwezi kwa Nzeri, ibicuruzwa bifite agaciro k’Amadolari ya Amerika miliyoni 642.09, mu gihe ibyo rwoherejeyo byari bifite agaciro ka miliyoni 303.42 z’Amadolari ya Amerika.

Icyakora ijanisha rya buri mwaka ry’iki cyuho(igihombo) hagati y’ibitumizwa mu mahanga n’ibyoherezwayo, ngo ryagabanutse ku rugero rwa 12.27% ugereranyije umwaka wa 2024 n’uwa 2023, nk’uko NISR ikomeza ibigaragaza.

Kuba Leta z’ibihugu bya Afurika zihomba akayabo k’amafaranga mu kugura ibintu hanze bidafite ireme, biza ari umwanda uhumanya ibidukikije, ayo mafaranga yagombye kuguma mu gihugu agateza imbere abagituye, byahaye APPN ingingo zikomeye zo kuganiraho mu nama yabereye i Kigali.

Iri huriro ryitwa African Public Procurement Network(APPN) rigizwe n’ibigo byo mu bihugu 44 bya Afurika, rimaze iminsi itatu i Kigali(kuva tariki 12-14 Ugushyingo 2024) mu nama ngarukamwaka ya 4, yigaga ku ruhare rw’amasoko ya Leta mu iterambere rirambye ry’uyu mugabane.

Kuzamura ubukungu n’imibereho myiza

Umuyobozi Mukuru w’Ikigo cy’u Rwanda gishinzwe Amasoko ya Leta(RPPA), Joyeuse Uwingeneye, akaba ari we wari umaze umwaka ari Perezida wa APPN, avuga ko icyuho cy’ibitumizwa hanze byinshi kurusha ibyoherezwayo, ari cyo gituma ifaranga ry’Igihugu ritakaza agaciro.

Uwingeneye agira ati "Turi gutanga amasoko ariko agamije guteza imbere ibikorerwa mu Rwanda, bivuze ngo turi kwirinda kuzana ibintu bivuye hanze, kuko agaciro k’ifaranga gatakarira mu kugura ibintu bivuye hanze."

"Usanga Leta itanga amafaranga ariko turi kuyohereza hanze, abasigaye imbere mu gihugu ya mirimo ntayo bazahanga, ndetse n’ibigo by’abikorera ntabwo bizigera bikura, turi gushakira akazi urubyiruko n’abagore, turashaka ko ibidukikije bibungabungwa, ubukungu bugatera imbere", Uwingeneye.

Uyu Muyobozi wa APPN avuga ko itangwa ry’amasoko ya Leta rigomba kuzamura Umusaruro mbumbe w’Igihugu kuva kuri 13% ririho kugeza ubu, ari na yo ntego APPN yihaye mu kubaka ubudahangarwa(resilience) bw’ubukungu.

Kurengera ibidukikije

Umuyobozi w’Ikigo gishinzwe Amasoko ya Leta muri Togo, Aftar Touré Morou, akaba n’Umunyamabanga Mukuru wa APPN, avuga ko iri Huriro ryabaye uburyo bwo gusangira ubunararibonye ku bisubizo by’iterambere rirambye muri Afurika.

Touré na Uwingeneye bavuga ko uyu mugabane udakwiye kuba ikimoteri cy’ibintu biza bishaje n’ibidafite ireme, bizanwa n’ubwato hamwe n’indege zikoresha ingufu zihumanya ikirere, kandi bigatangwaho amafaranga menshi.

Umushoramari mu bwubatsi, Sadate Munyakazi, umaze imyaka 18 apiganira amasoko ya Leta mu Rwanda, yitabiriye Ihuriro rya Kane rya APPN kugira ngo yumve uko agomba kugendera mu murongo w’iryo huriro, rivuga ko umushoramari uzatsindira isoko ari uwabanje kugaragaza uburyo azarengera ibidukikije.

Munyakazi agira ati "Imirimo y’ubwubatsi guhera ku gucukura, ni ukubangamira ibidukikije, isima ubwayo ibangamira ibidukikije, kubona za ’fer à beton’ ni ibidukikije biba byangiritse, ariko rero natwe twamenye ko nurangiza kubaka ruhurura uzayikikiza ibiti n’ibindi bimera."

Politiki nshya y’u Rwanda igenga itangwa ry’amasoko ya Leta

Mu Ihuriro rya Kane rya APPN i Kigali, u Rwanda rwaboneyeho kumurika
Politiki yarwo yo gutanga amasoko mu buryo burambye (yitwa Sustainable Public Procurement Policy Framework/SPP), ikubiyemo uburyo bw’ikoreshwa ry’ikoranabuhanga mu rwego rwo gukorera mu mucyo ku bapiganira amasoko ya Leta.

Iyi politiki kandi igamije kugenzura ko abashyira mu bikorwa imishinga ya Leta bita ku mibereho myiza y’abaturage, hamwe no kureba niba hatatanzwe isoko kuri serivisi n’ibintu byangiza ibidukikije.

Izi ni zimwe mu ngofero bivugwa ko zujuje ubuziranenge

Aya mabwiriza y’ubuziranenge bwa kasike za moto yitwa "RS 576:2024-Protective helmets for motorcycle and moped users Specification", yasohotse mu Igazeti ya Leta yo ku wa 19 Kanama 2024.

Ku wa Kabiri tariki 12 Ugushyingo 2024, RSB yasohoye itangazo rimenyesha ayo mabwiriza abantu bose, by’umwihariko abakoresha kasike za moto, abazikora, abazicuruza, ndetse n’abazitumiza mu mahanga, kwita ku zujuje ubuziranenge.

RSB yamaze kubaka laboratware ipima ubuziranenge bwa kasike, ndetse ikavuga ko abakozi bayo bitoje gukora uwo murimo nyuma yo kubona ko ingofero abamotari bafite zitarinda abantu gukomereka umutwe.

Mu byo basuzumira muri iyo laboratware hari ukuba kasike yatumijwe hanze ifite ikirango cyemewe ku rwego mpuzamahanga nka DOT cyo muri Amerika, ECE cy’i Burayi, Snell cy’Umuryango wigenga witwa Memorial, SHARP cy’u Bwongereza, AS/NZS 1698 cya Australia na New Zealand hamwe n’icyitwa JIS gitangwa n’Abayapani.

Ibindi birebwa hakoreshejwe imashini zashyizwe muri Laboratware ya RSB, ni uguhonda kasike ku bintu bitandukanye, kugira ngo barebe ko izashobora kurinda umutwe w’umuntu uguye ahantu aho ari ho hose.

Habaho no kureba niba kasike ishobora kujabuka mu mutwe w’umuntu mu gihe moto isimbutse ahantu, hamwe n’uburyo ikandika(Compression) mu gihe hari ikintu kiremereye kiryamiye umutwe w’umuntu wakoze impanuka.

Bareba kandi ubukomere bw’umukandara unyuzwa munsi y’akananwa k’umuntu, niba uwo mugozi utamuniga cyangwa udacika byoroshye, bikaba byatuma kasike imuvamo.

Muri iyo laboratware hari n’imashini ireba niba kasike izashobora kurinda umugenzi wo kuri moto mu miterere y’ikirere itandukanye, aho abagenzi bamwe bagera ahantu hashyushye cyangwa hakonje, kasike ikaba itamuteza ibibazo.

Bareba kandi imiterere y’ibirahure bya kasike n’uburyo bifasha uyambaye kubona neza imbere no mu mpande, ndetse n’uburyo imufasha guhumeka neza.

Kasike ya moto igomba kandi kuba itaremerera umugenzi, ariko ubwo bworohe bwayo butamuteza ibindi bibazo, ikamworohereza no kubona umwuka uhagije ariko imurinda umuyaga, ikanamurinda imirasire y’izuba hamwe n’urusaku.

Umuyobozi ushinzwe ireme ry’ubuziranenge n’itangwa ry’ibirango by’ubuziranenge ku bigo bishinzwe ubuziranenge mu Biro by’Umuyobozi Mukuru wa RSB, Samuel Mporanzi, yabwiye Kigali Today ko kasike zitujuje ibisabwa mu mabwiriza yatangajwe, zitagomba kongera kwinjizwa mu Gihugu no gucuruzwa.

Yagize ati "Abo dushaka kuvuga ni abinjiza ziriya ngofero n’abifuza kuzikorera mu Gihugu kuko ni cyo twifuza cyane, ariko noneho abazikoresha tuvuga cyane cyane ni abamotari, ushaka kugura ingofero nshyashya agomba kureba ziriya zujuje ibisabwa."

Mporanzi avuga ko kasike zisanzwe ku isoko n’izo abamotari basanganywe, inzego zibagenzura zizababwira uburyo bagenda bazisimbuza inshya buhoro buhoro, bigendanye n’uko zigenda ziboneka.

Mporanzi avuga ko Umuryango ushinzwe Ubuzima witwa Healthy People Rwanda(HPR) ari wo wagaragaje ko kasike abamotari basanganywe nta bushobozi bwo kurinda umutwe w’umuntu zifite, kandi ko n’ubu uwo muryango urimo kureba niba kasike nshya zirimo gusuzumirwa muri laboratwari zizagera ku ntego yifuzwa.

HPR ivuga ko mu bantu bicwa n’impanuka zibera mu muhanda, 21% baba ari abagenda kuri moto, kandi abenshi ngo bazira kuba bakomeretse umutwe n’ubwo baba bambaye kasike.

RSB yamenyesheje abarebwa n’ishyirwa mu bikorwa ry’aya mabwiriza y’ubuziranenge bwa kasike avugwa, kuyigana kugira ngo bahabwe ubufasha bwose bwa tekiniki bwakenerwa mu ishyirwa mu bikorwa ryayo.

Mu kwezi kwa Gicurasi 2024 Minisiteri y’Ibikorwa Remezo(MININFRA) yatangije ubukangurambaga bwo gufasha abagenda kuri moto, gukoresha kasike nshya zujuje ubuziranenge.

Abayobozi b’Ihuriro ry’ibigo bishinzwe amasoko ya Leta muri Afurika (APPN) mu kiganiro n’Abanyamakuru gitegura Inama ya kane y’iryo huriro igiye kubera i Kigali muri iki cyumweru

Umuyobozi Mukuru w’Ikigo gishinzwe Amasoko ya Leta mu Rwanda (Rwanda Public Procurement Authority/RPPA), Joyeuse Uwingeneye, akaba ari na we Perezida w’Ihuriro APPN, yabitangaje ku Cyumweru tariki 10 Ugushyingo 2024, ari kumwe n’abamwungirije kuri ubwo buyobozi, bashinzwe amasoko ya Leta mu bihugu bya Mali na Togo.

Uwingeneye avuga ko RPPA ku bufatanye na APPN hamwe n’ibigo mpuzamahanga by’imari nka Banki y’Isi, Banki Nyafurika ishinzwe Amajyambere (BAD), ’Islamic Development Bank’ ndetse na ’Agence Française de Développement’, bazemeza Politiki y’u Rwanda yo gutanga amasoko mu buryo burambye (Sustainable Public Procurement Policy Framework/SPP).

Iyi Politiki yemejwe n’Inama y’Abaminisitiri y’u Rwanda ku itariki 18 Ukwakira 2024, igamije gushyira mu bikorwa itangwa ry’amasoko ya Leta ku kiguzi gito, kugenzura ko abashyira mu bikorwa imishinga ya Leta bita ku mibereho myiza y’abaturage, ndetse no kureba niba hatatanzwe isoko kuri serivisi n’ibintu byangiza ibidukikije.

Uwingeneye yagize ati "Tugiye gutangira kugura(kwishyura) ibintu biri ku rugero rwa 0% mu kwangiza ibidukikije, tuzahera kuri mudasobwa, ngira ngo mwatangiye no kubona ibinyabiziga bitwarwa n’amashanyarazi."

Umuyobozi Mukuru wa RPPA, Joyeuse Uwingeneye

Politiki ya SPP iteganya ko imyubakire mu Rwanda na yo igomba kwerekana uburyo ibidukikije bitazangirika, haba mu buryo ibigize inyubako ubwayo byabonetse, kandi iyo nyubako ikaba ifite uburyo irondereza amazi n’ingufu zikenerwa n’abayituyemo cyangwa abayikoreramo.

Umuyobozi w’Ikigo gishinzwe Amasoko ya Leta muri Togo, Aftar Touré Morou, akaba n’Umunyamabanga Mukuru wa APPN, avuga ko Ihuriro ryabo rigiye guteranira mu Rwanda ku nshuro ya Kane, ari uburyo bwo gusangira ubunararibonye ku bisubizo by’iterambere rirambye muri Afurika.

Aftar Touré Morou, Umunyamabanga Mukuru wa APPN

Touré avuga ko uyu mugabane ukeneye kwishakamo ibisubizo byatuma udakomeza gutumiza ibintu hanze yawo, biza ari umwanda kuko ngo biba bishaje cyangwa nta reme bifite rituma bibasha gukoreshwa igihe kinini, bikazanwa n’ubwato hamwe n’indege zikoresha ingufu zihumanya ikirere, kandi bigatangwaho amafaranga menshi.

Touré yagize ati "Harebwa uburyo bwo kugura ibikorerwa imbere mu Gihugu, kuko Covid-19 yatwigishije kudategereza ak’imuhana(kaza imvura ihise), hakabaho kubaka uruhererekane rw’ibikorerwa kuri uyu mugabane, ibi ni byo duteganya kuganiraho."

Visi Perezida wa APPN, Umunya-Mali Alassane BA, na we avuga ko ihuriro ryabo kugeza ubu rigizwe n’ibihugu 44 byo kuri uyu mugabane, rizafasha guhanahana amakuru y’abakoreye ibyaha mu itangwa ry’amasoko ya Leta, kugira ngo babe bafatwa aho baba bari hose muri kimwe mu bihugu bigize uyu muryango.

Visi Perezida wa APPN, Alassane BA, mu kiganiro n’Abanyamakuru i Kigali

Politiki ya SPP mu Rwanda yagiyeho nyuma yo kuvanaho uburyo bwo kwakira inyandiko mu ntoki z’abapiganira amasoko, kuko ngo byabaga birimo ruswa no kwiba umutungo wa Leta, kandi bikiharirwa n’abantu bamwe, hakaba harashyizweho ikoranabuhanga ryiswe E-Procurement System (UMUCYO).

Uwingeneye uyobora RPPA, avuga ko gutanga amasoko ya Leta mu buryo bw’ikoranabuhanga kandi bubungabunga ibidukikije, bizahesha u Rwanda kuba igicumbi cy’ibigo by’icyitegererezo ku mugabane wa Afurika.

Uwingeneye avuga ko kugeza ubu bamaze kurenga urugero rwa 70% mu itangwa ry’amasoko rinyuze mu mucyo, n’ubwo bataragera ku 100% bitewe n’uko ngo hari udusoko duto tudasaba gupiganirwa mu gihe ari ukwishyura serivisi cyangwa ibintu byihutirwa.

Indi mpamvu yo kutagera ku rugero rwuzuye, ngo iraterwa n’imishinga minini Leta ifatanyamo n’abaterankunga, rimwe na rimwe baza hari amasezerano yasinywe n’undi rwiyemezamirimo utandukanye n’uzarangiza umushinga, akaza asaba ikiguzi kirenzeho.

Alice Wairimu avuga ko ibi biganiro byabereye mu muhezo kuva tariki 04-09 Ugushyingo 2024, byibanze ku ngingo eshatu zijyanye n’uruhare rw’abagore hamwe n’ubuhuza (mediation) mu gukumira Jenoside, bikaba byasojwe n’inama ku kurwanya irondabwoko rifatwa nk’impamvu muzi ihembera Jenoside.

Wairimu avuga ko ibi biganiro byatumiwemo impuguke, abarokotse Jenoside hamwe n’abashinzwe gukora ubuvugizi bo hirya no hino ku Isi, bakaba bakoze imyanzuro izashyikirizwa ibihugu cyane cyane aho Jenoside igaragara ko ishobora kongera kuba, bibanze ku gihugu cya Sudani.

Wairimu avuga ko ibiganiro byatangiye bihuza abagore bari hirya no hino ku Isi hakoreshejwe ikoranabuhanga, by’umwihariko abagore bavuga rikumvikana muri Sudani ngo bagaragaje ubushake bwo gukumira ibyaha bya Jenoside iwabo hifashishijwe gahunda y’imiryango irengera uburenganzira bwa muntu y’i Napoli mu gihugu cy’u Butaliyani.

Wairimu yagize ati «Abitabiriye ibyo biganiro barimo abagore bazwi b’abayobozi muri Sudani, bakaba bavuze ku ruhare rwabo mu kurwanya amagambo y’urwango mu miryango, bageze ku mwanzuro wo kurangiza imvururu mu gihugu cyabo, ndetse banasaba gushyirwa mu nzego zishinzwe gushaka amahoro. »

Wairimu avuga ko impamvu bakoreye ibi biganiro ku Gisozi ahari Urwibutso rwa Jenoside yakorewe Abatutsi, ari uko ngo bazi imbaraga hashobora kugira mu gukumira Jenoside ko yabera ahandi hose ku Isi, nk’uko intego y’Umuryango w’Abibumbye n’u Rwanda by’umwihariko ivuga ngo « Jenoside ntizongere kubaho ukundi ».

Umuyobozi Mukuru wa Aegis Trust (hirya iburyo) na Alice Wairimu Nderitu iruhande rwe (uwa kabiri uturutse iburyo)

Umuyobozi Mukuru w’Umuryango ‘Aegis Trust’ ushinzwe kwita ku Rwibutso rwa Jenoside rwa Kigali, Freddy Mutanguha warokotse Jenoside yakorewe Abatutsi, avuga ko ibiganiro bya UN byabereye mu Rwanda byatanze uburyo bwo kurushaho kugaragaza ukuri kwa Jenoside yakorewe Abatutsi mu Rwanda mu 1994.

Ibi biganiro byaberaga i Kigali ku gukumira Jenoside, byitabiriwe n’impuguke zirimo Prof Gregory Stanton wanditse igitabo kivuga ku ntambwe 10 zigize Jenoside, akaba avuga ko mu baburiye uwari Perezida Habyarimana ko mu Rwanda hazaba Jenoside na we yarimo, ariko uwo mukuru w’Igihugu ntiyagize icyo abikoraho.

Prof Stanton avuga ko yaje mu Rwanda bwa mbere mu mwaka wa 1988, abonye ko mu ndangamuntu z’abenegihugu handitsemo ubwoko bwa buri muntu, asaba uwari Perezida w’Urukiko rushinzwe kurinda Itegeko Nshinga, Joseph Kavaruganda na Perezida Habyarimana ubwe, guhagarika iyo gahunda y’amoko mu ndangamuntu, ariko ngo baramuhakaniye.

Prof Stanton avuga ko gutumira abagore bavuga rikijyana mu biganiro bigamije gukumira Jenoside ari ngombwa cyane, kuko ngo nta hantu na hamwe ku isi yigeze yumva umugore wateguye Jenoside.

Ibiro bishinzwe gukumira Jenoside mu Muryango w’Abibumbye bivuga ko imyanzuro y’ibiganiro byakorewe mu Rwanda izatangarizwa ibihugu byose ku Isi, kugira ngo za Leta zijye zikumira imvururu n’amacakubiri hakiri kare.

Serge Brammertz wa IRMCT

Inama y’Abakozi ba UN yitabiriwe na Minisitiri w’Ubumwe bw’Abanyarwanda n’Inshingano Mboneragihugu, Dr Jean Damascène Bizimana (wicaye imbere wambaye karuvati itukura)

Abahanga 16 mu gutubura imbuto bahawe impamyabumenyi

Umusaruro kuri hegitare ugiye kwikuba inshuro nyinshi, nk’uko bisobanurwa n’umwe mu bahawe impamyabumenyi, Gilbert Turikubwimana ugira ati “Imbuto y’ibirayi mu gihe ari uguhinga bisanzwe ubu abahinzi bageze kuri toni 10 kuri hegitare, ariko ubumenyi dufite ubu bugaragaza ko umuhinzi yakweza toni 25 z’ibirayi kuri hegitare.”

Mugenzi we Irankunda Gisèle Mignone uhugukiwe ibijyanye n’ubuhinzi bwa Soya, avuga ko uwayihinze neza ubu abasha kweza toni imwe n’igice, nyamara ibipimo yize bijyanye n’uburyo soya yera ngo bigaragaza ko aho yahinzwe neza umuntu ashobora kweza toni zirenga eshatu kuri hegitare.

Aba bagabo n’abagore barangije kwiga ubutubuzi bw’imbuto, Ikigo RICA cyabahawe na Tubura, bakaba bari basanzwe bakora mu bigo bizobereye muri uwo mwuga.

Umuyobozi wa One Acre Fund (Tubura) ku rwego mpuzamahanga, Eric Pohlman, avuga ko igihugu cy’u Buholandi nubwo gifite ubuso bujya kungana n’ubw’u Rwanda, ngo cyohereza hirya no hino ku isi imbuto z’ibihingwa cyatubuye.

Pohlman ati “Abahinzi benshi muri Afurika babona imbuto ivuye ahandi ku isi, ubu turimo kugira ubushobozi bwo kwibonera imbuto hano, kandi iyo urebye no mu Karere (u Rwanda rurimo) ubona ko hari icyuho, imbuto irakenewe cyane, nta mpamvu y’uko ibigo byinshi by’u Rwanda bidashobora kuziba icyo cyuho.”

Umuyobozi Mukuru wa RICA, Dr Ron Rosati, yizeza ko nyuma ya 16 bahawe impamyabumenyi, iki kigo kirimo kwihutira kongera abahanga mu bijyanye n’ubutubuzi bw’imbuto, kugeza ubu ngo bukorerwa kuri hegitare 109 mu gihe kitararenga imyaka ibiri iyo gahunda imaze igiyeho, kandi ngo harimo kuva amatoni menshi y’imbuto z’ibihingwa bitandukanye.

Dr Rosati ati “Ibigo bitubura imbuto ni ikintu gishya mu (Rwanda), icyari gikomeye ni ukubitangira, ubu rero turimo kwihutira gutanga abahanga benshi bakorera imbuto muri za Laboratwari.”

Ministeri y’Ubuhinzi n’Ubworozi(MINAGRI) yatangiye gahunda yo gutuburira imbuto mu Rwanda(mu myaka itanu ishize) nyuma y’uko abahinzi ngo bategerezaga izatumijwe hanze bagaheba, zikagera mu Gihugu zikererewe cyangwa zirwaye, bigateza igihombo no kurumba kw’imyaka.

Umuyobozi Mukuru muri MINAGRI ushinzwe ubushakashatsi ku buhinzi bugezweho, Dr Patrick Karangwa, avuga ko abahawe impamyabumenyi bitezweho gukora imbuto nziza kandi zitanga umusaruro wikubye inshuro nyinshi kurusha urimo kuboneka ubu.

Dr Karangwa ati “Kuba (mu myaka itanu ishize) tumaze gukuba inshuro eshatu imbuto twatumizaga hanze, ntabwo ibyo bihagije, tugomba no kugira imbuto nziza zifite ireme ridashidikanywaho, cyane cyane ko dushaka ko n’amasoko yo mu Karere abantu bazajya baza gushakira imbuto nziza mu Rwanda.”

Abayobozi muri One Acre Fund, RICA na MINAGRI

Dr Karangwa avuga ko u Rwanda rwifuza kuba mu bihugu bicuruza imbuto ku isoko mpuzamahanga, kugeza ubu ryitabirwa n’ibihugu bya Afurika ku rugero rungana na 2%.

MINAGRI ivuga ko ubutaka bw’u Rwanda buhingwa bungana na hegitare 802,000(Km2 8,020), hakaba hakenewe ikoranabuhanga n’udushya, guhera ku kugira imbuto nziza, kugira ngo butange umusaruro uhagije ku baturarwanda no kubasha gusagurira amasoko yo mu mahanga.

Maj Gen(Rtd) Albert Murasira mu nama n’abafatanyabikorwa

Maj Gen(Rtd) Murasira yabitangarije abanyamakuru mu nama MINEMA yagiranye n’abafatanyabikorwa bavuye mu nzego zitandukanye, kuri uyu wa Kane tariki 07 Ugushyingo 2024, hagamijwe gufatira hamwe ingamba zo guhangana no kubaka ubudahangarwa ku biza.

Maj Gen Murasira avuga ko amategeko ateganya ko umuntu ahabwa ingurane iyo ari ibikorwa remezo bisanzwe birimo gushyirwa ahari imitungo ye, ariko iyo habayeho ibiza ku muntu utuye mu manegeka, "uwo muntu ashobora guhabwa ingurane cyangwa ntayihabwe".

Gen(Rtd) Murasira avuga ko umuntu wituje mu manegeka hamwe n’uwifite uyatuyemo, nta bufasha bwo kubakirwa bagomba guhabwa.

Yagize ati "Abatishoboye tubashakira aho tugomba kububakira, cyane cyane abahuye n’ibiza, mwagiye mubona ingero z’abatuye ahantu umusozi ugenda wika, bene abo turabubakira, ariko abishoboye bagomba kwirwariza kuko aba afite n’ubwishingizi."

Minisitiri w’Ibikorwa by’Ubutabazi avuga ko undi muntu ushobora guhabwa ingurane ari uwo amanegeka yasanze aho atuye ’bitewe n’imiterere y’Igihugu, cyane cyane iyo byatewe n’imihindagurikire y’ibihe’.

Ati "Aho dushobora kukubakira nta yindi ngurane tuguhaye kuko nyine tuba tukubakiye, ariko aho ni mu rwego rw’ubutabazi, abandi bafite ubushobozi tubasaba kwimuka kuko ni mu rwego rwo gukiza ubuzima bwabo, cyangwa se mu gihe ufite ubwishingizi bukaba ari bwo witabaza."

Abayobozi mu nzego zitandukanye bitabiriye inama y’Abafatanyabikorwa ba Leta mu guhangana n’ingaruka z’ibiza

Minisitiri Gen(Rtd) Murasira asaba abubaka kujya babanza gukora isuzumangaruka ku bidukikije kugira ngo batagira abo bateza amanegeka, cyangwa niba na bo ubwabo aho bagiye kubaka hatazaba amanegeka.

Basabwa kandi gushaka ibyangombwa aho kwihererana abakozi b’inzego z’ibanze no kubaka inzu zateza ibibazo.

Minisitiri Murasira yasabye ubufatanye inzego zitandukanye zirimo imiryango mpuzamahanga hamwe n’iyo mu Gihugu imbere, gushyira imicungire y’ibiza muri gahunda za buri munsi.

Gen(Rtd) Murasira avuga ko ubudahangarwa bw’u Rwanda mu guhangana n’ibiza butaratera imbere, bitewe n’uko hakiri byinshi byangirika iyo ibiza bibayeho.

MINEMA ivuga ko ibiza bikunze kwibasira u Rwanda ari imyuzure, inkangu, umuyaga, inkuba, amapfa, imitingito, iruka ry’ibirunga, inkongi, ibikorwa bya muntu nko guhirima kw’inyubako cyangwa kugwirwa n’ibirombe, hamwe n’ibyorezo by’indwara mu bantu no mu matungo.

MINEMA yateguye iyi nama ifatanyije n’Amashami y’Umuryango w’Abibumbye(UN) akorera mu Rwanda, aho Umuhuzabikorwa wayo, Ozonnia Ojielo, yizeza ko gukumira no guhangana n’ibiza biri mu byo uwo muryango uzakomeza gufatanyamo na Leta y’u Rwanda.

Niyonteze (muremure wambaye agapira k’umukara), uri mu bashinze amashuri y’incuke mu Murenge wa Runda

Niyonteze Elina w’imyaka 66 y’amavuko hamwe na bagenzi be 12 bashinze ishuri ry’incuke i Gihara mu murenge wa Runda w’Akarere ka Kamonyi, nyuma y’aho muri 1988 bashinga irindi i Runda, biturutse ku itsinda ry’ikimina bise Abajyinama, ryabafashaga kubitsa no kugurizanya.

Abajyinama ubu barishimira ko icyo gitekerezo cyabo cy’uburezi bw’incuke cyabaye gahunda ya Leta ishyirwa mu bikorwa hose mu Gihugu.

Niyonteze wari umaze imyaka 10 mu burezi, avuga ko amashuri y’incuke yumvaga mu Rwanda mbere y’umwaka wa 1988 ari Ecole Belge (ryari mu Mujyi i Kigali), APACOPE (ku Muhima) na CARAFAGE (Muhanga), akaba atari agenewe buri mwana wese mu Rwanda, kandi yacungwaga na Minisiteri y’Ubuzima.

Niyonteze avuga ko batangiye bigishiriza abana mu ngo, bagakora ku mushahara wabo bagahemba abarimu bo kubafasha, nyuma haza umushinga ushamikiye ku bufatanye bwa Leta y’u Rwanda na Canada, ububakira ishuri ry’incuke ari ryo ryaje guhuzwa na Ecole Primaire (EP) bikavamo GS Gihara, mu gihe irya Runda ryahujwe na EP Runda ryo bari baryubakiwe n’Umuryango w’Ubumwe bw’u Burayi.

Niyonteze agira ati "Abajyaga gutangiza abana mu mwaka wa mbere w’amashuri abanza bazaga kurwanira abo bana bacu kuko Uburezi bw’incuke bwatumaga abana barangiza amashuri abanza ari abahanga cyane, kandi ni bo bavuyemo abaganga, abapadiri, abagoronome n’abandi bayobozi bakomeye."

Mu gihe bari batangiye gahunda yo gukwirakwiza amashuri y’incuke (Gardienne cyangwa Maternelle) mu Murenge wa Runda hose, abarimu b’iryo shyirahamwe ririmo Niyonteze, batangiye gushakwa hirya no hino mu Gihugu, kugira ngo bajye gufasha mu ishingwa ry’ayo mashuri.

Gahunda y’Uburezi bw’ibanze bw’imyaka 9 (Nine Year Basic Education/9YBE) itangira mu mwaka wa 2009, yaje gufata amashuri y’incuke yubatswe ku bwa Niyonteze na bagenzi be, iyahuriza hamwe n’abanza ndetse n’icyiciro cya mbere cy’amashuri yisumbuye, biba ibigo binini byitwa Urwunge rw’Amashuri (GS) Gihara hamwe na GS Runda.

Niyonteze avuga ko muri Nzeri 1988 i Gihara batangiranye n’abana 17, ubu bagakaba bategeze kuri 458, ndetse ku rwego rw’Igihugu hari amashuri y’incuke 4,051, yigamo abana 1,134,913, nk’uko raporo y’Uburezi ya 2022/2023 ibigaragaza.

Umuyobozi wa GS Gihara, Françoise Umwali avuga ko uwashaka kumenya akamaro k’amashuri y’incuke yabirebera mu gihe yari atarabaho, aho abana bajyanaga n’ababyeyi mu murima bakabarushya kandi bagatinda kumenya imibanire n’abandi hamwe n’amasomo y’ibanze.

GS Gihara mu mashuri ya mbere yatangirijwemo ay’incuke

Umwali agira ati "Amashuri y’incuke akangura akanateza imbere ubwenge bw’umwana akiri muto, umwana amenya kubana no gusabana n’abandi atigungiye mu rugo wenyine, atuma imibereho y’umuryango itera imbere, kandi umwana atangira hakiri kare kumva, kuvuga, kwandika no gusoma."

Umwali ashimira Niyonteze na bagenzi be kuba baratanze inyubako z’ishuri ry’incuke kandi ko abona abo basheshe akanguhe bagishoboye kwigisha no guhugura abarimu bato bakiri mu mwuga.

Baracyarota gushinga andi mashuri y’incuke n’ubwo bageze mu zabukuru

Niyonteze avuga ko n’ubwo bahaye amadini ya EPR na Kiliziya Gatolika ayo mashuri y’incuke kuko yari yubatse mu butaka bwayo, ubu aho amaze imyaka 6 mu kiruhuko cy’izabukuru, we na bagenzi be bagifite gahunda yo gushinga andi mashuri y’incuke adashamikiye ku yo bari barashinze.

Bavuga ko bakomeje itsinda ryabo ryo kubitsa no kugurizanya, ryaje kubyara umuryango wita ku barimu bari mu kiruhuko cy’izabukuru witwa Abajyinama, ukazabafasha gukomeza kugaragaza uruhare rwabo mu iterambere ry’Igihugu muri rusange.

Abajyinama ni wo bitezeho kubahuza n’abafatanyabikorwa babafasha gushinga amashuri, mu gihe ikimina cyo ngo kizakomeza kubafasha kugira imishinga yunganira umushahara wa pansiyo, nk’uko Niyonteze yakomeje aganira na Kigali Today.

Avuga ko ubworozi bw’inkoko akorera iwe mu Mudugudu wa Rubona, Akagari ka Muganza mu Murenge wa Runda, bumuhesha amafaranga asaga ibihumbi 100 ku kwezi iyo yamaze kwishyura ibisabwa byose, ndetse ko n’ibihumyo ahinga bimufasha kubona amafunguro atunga urugo.

Aba basheshe akanguhe bamaze kugera kuri 48 bishyira hamwe, bavuga ko uretse gushinga ishuri, bashaka no gukomeza kwerekana umusanzu wabo mu iterambere, harimo kwandika amateka y’Uburezi mu Rwanda no gutanga ubujyanama ku buryo bwakorwa neza.

Niyonteze agira ati "Hari abavuga ko Uburezi bwacu bwarwaye bwaki, kuko kera wasangaga amashuri yigenga yigamo ababaye abaswa mu mashuri ya Leta, ariko ubu byabaye imbusane."

Umuyobozi wungirije w’uyu muryango ‘Abajyinama’, Sylvain Mudahinyuka, avuga ko uretse kubafasha kuva mu bwigunge, bazashaka ababafasha gukomeza gutanga ubumenyi bwabo kugeza ubu ngo bwasinziriye.

Mudahinyuka avuga ko abari mu kiruhuko cy’izabukuru bahoze ari abarimu, bashobora gutangira guhugura abakiri muri uwo mwuga, ndetse ko n’abari abahanga mu bucuruzi bajya kugira inama amakoperative.

Amavuriro abiri agendanwa (mobile clinics)

Umuyobozi Mukuru w’Ikigo gishinzwe Ubuzima mu Rwanda (RBC), Prof Mambo Claude Muvunyi n’Umuyobozi ushinzwe ibikorwa by’ibitaro bya Aga Khan, Shekar Iyer bashyize umukono ku masezerano y’izo mpano zatanzwe na Minisiteri y’u Budage ishinzwe Ubutwererane mpuzamahanga (BMZ), kuri uyu wa Kabiri tariki 05 Ugushyingo 2024.

Shekar avuga ko izi mpano zifite agaciro k’amafaranga y’u Rwanda miliyoni 490, zizafasha gutanga serivisi z’ubuvuzi bufite ireme, cyane cyane ibijyanye no gukingira abaturage.

Yagize ati "Iyi nkunga yitezweho kuvugurura serivisi z’ubuvuzi kuri bose, kuko aya mavuriro yimukanwa azajya asanga abaturage aho batuye, bikazafasha Leta y’u Rwanda muri gahunda yo kugeza ubuvuzi kuri bose, ndetse no gufasha gukingira indwara zigenda ziyongera."

Prof Muvunyi wa RBC na Shekar wa Aga Khan bamaze gushyira umukono ku masezerano y’impano y’amavuriro yimukanwa na Frigo

Shekar yizeza ko Ibitaro bya Aga Khan bizakomeza gufasha Leta y’u Rwanda, haba mu gutanga abaganga b’inzobere no kongera Abenegihugu bari muri uyu mwuga, harimo abaforomo n’ababyaza.

Umuyobozi ushinzwe Ubutwererane muri Ambasade y’u Budage i Kigali, Philippe Taflinski, avuga ko Igihugu cye ari kimwe mu bikomeye i Burayi byiyemeje kugeza inkingo n’imiti ku Banyafurika, kikaba cyarahisemo ibitaro bya Aga Khan kuzashyira mu bikorwa gahunda zijyanye n’ubuzima z’u Budage muri Afurika y’Iburasirazuba.

Taflinski avuga ko kuva muri 2022, u Budage bwatangiye gufasha Abanyafurika kubona inkingo za Covid-19, ikaba itacyumvikana mu bantu, ariko ko hakenewe ibikorwaremezo n’ibikoresho bihagije byo gukingira ibindi byorezo bigenda bivuka, nka Marburg n’ubushita bw’inkende.

Bimwe mu byuma bikonjesha byahawe u Rwanda

Taflinski akomeza agira ati "U Rwanda na rwo (muri iyi gahunda yo guhangana n’ibyorezo) ruragenda rwerekana ubushobozi bwo kugira icyo rukora mu buryo bwihuse."

Taflinski avuga ko ubufatanye bwa Leta y’u Budage na Aga Khan bwageze kuri byinshi, aho kuva mu mwaka wa 2022 hari doze miliyoni imwe n’ibihumbi 400 z’inkingo za Covid-19, ibi bitaro byabafashije gutanga ku Baturarwanda.

Umuyobozi Mukuru wa RBC, Prof Mambo Claude Muvunyi, avuga ko imodoka zikoreshwa nk’amavuriro yimukanwa zije ziyongera ku zindi enye (4) bari bafite, hamwe na frigo ngo bigiye gufasha mu kurwanya indwara zitandura no gukingira abaturage.

Imodoka zikoreshwa nk’amavuriro yimukanwa zije ziyongera ku zindi enye zari zisanzwe zihari

Prof Muvunyi ati "Izi modoka ebyiri zifite ibikoresho byose byatuma dushobora kwegereza ubuvuzi abaturage bacu, mu kurwanya indwara zimaze iminsi ari ikibazo cyane cyane izitandura, tuzegera abaturage aho batuye kugira ngo tugabanye urugendo bakoraga bajya kwa muganga."

Prof Muvunyi avuga ko ibi byima bikonjesha imiti 20 bishya, bizafasha kubika neza inkingo zihabwa abana n’abantu bakuru mu bigo bito by’ubuvuzi (Health Posts) byegereye abaturage.

Minisitiri w’Ubuzima, Dr Sabin Nsanzimana, yatangaje ko Virusi ya Marburg mu birombe biri hafi y’i Kigali

Dr Nsanzimana avuga ko mu kwezi kwa Kanama na Nzeri ubwo iyo ndwara yadukaga mu Rwanda, kiba ari igihe uducurama turimo kubyara, aho tuba ducira amacandwe menshi.

Dr Nsanzimana avuga ko umuntu wakoraga muri icyo kirombe yatashye iwe arwaye ajya kwivuza arakira, ariko yanduza iyo virusi ya Marburg umugore we, waje kuvurirwa mu bitaro byitiriwe Umwami Faisal akitaba Imana, ndetse akanduza umuganga wari urimo kumwitaho unakora mu bitaro bya CHUK.

Minisiteri y’Ubuzima icyo gihe yavuze ko mu bakozi bo kwa muganga 29 banduye iyo virusi, abenshi bari abakora mu bitaro byitiriwe Umwami Faisal hamwe n’ibya Kaminuza (CHUK).

Dr Nsanzimana avuga ko umuntu wakoraga muri icyo kirombe yatashye iwe arwaye ajya kwivuza arakira ariko yanduza umugore we iranamuhitana

Dr Nsanzimana avuga ko amakuru baje kubona guhera kwa muganga basubira inyuma, basanze icyorezo cyaravuye ku muntu wandujwe n’uducurama tubarirwa mu bihumbi, tuba mu buvumo bw’ikirombe cy’amabuye y’agaciro aho yakoraga.

Dr Nsanzimana agira ati "Umuntu wakoraga muri icyo kirombe we yaje umubiri we warakoze ubwirinzi, ararwara arakira ariko ayanduza umugore we waje kwitaba Imana kuko ubudahangwa bw’umubiri we bwari bumaze kuba buke, biturutse ku kuba yari amaze ibyumweru bibiri abyaye."

Minisitiri w’Ubuzima avuga ko barimo gukurikirana ubuvumo n’ibirombe hose mu Gihugu, bareba ahari uducurama dukomokwaho na virusi ya Marburg, kuko ngo twose tudafite iyo virusi.

Dr Nsanzimana avuga ko barimo gukurikirana ubuvumo n’ibirombe hose mu Gihugu, bareba ahari uducurama dukomokwaho na virusi ya Marburg

Avuga ko agacurama gateza virusi ya Marburg kaba ari kanini, gafite umunwa muremure, karya imbuto kandi ngo kaba mu mwijima ahantu mu buvumo.

Dr Nsanzimana asaba Abaturarwanda kutagira agacurama bica cyangwa birukana bitewe no kumva ko duteza indwara, ahubwo ngo turazikumira kuko hari uturya imibu bigatuma abantu batibasirwa n’ibyorezo birimo icyitwa ’Dengue’ giterwa n’umubu.

Yagize ati "Uducurama turinda ibyorezo bituruka ku mibu, hari imibare igaragaza ko agacurama karya imibu igera ku bihumbi 100 mu ijoro rimwe, ibaze iyo mibu yose itariwe, ikirere cyacu cyakuzuramo imibu gusa, hari aho batwishe badukwamo n’indwara ziterwa n’imibu, zirimo iyitwa dengue."

Dr Nsanzimana asaba Abaturarwanda kutagira agacurama bica cyangwa birukana bitewe no kumva ko duteza indwara

Avuga ko hari Igihugu gituranye n’u Rwanda cyagerageje kwica uducurama ndetse kibishyira mu bikorwa, nyuma yaho ibyorezo byikuba inshuro eshanu kurenza uko byibasiraga abaturage mbere yaho.

Dr Nsanzimana avuga kandi ko uducurama ari two tubangurira ibihingwa bikabasha kwera imbuto z’ibiribwa, aho ijoro ngo rijya gucya agacurama kagenze ibirometero 60, kakaba kagenda kabangurira ibihingwa aho kageze hose.

Minisitiri w’Ubuzima avuga ko abantu baramutse bishe uducarama bakwicwa n’inzara, ndetse ko baba baduteje kororoka cyane mu buryo budasanzwe, bigatuma urusobe rw’ibinyabuzima rudashobora kuringaniza neza uruhererekane rw’ibiribwa.

Minisitiri Nsanzimana avuga ko abantu bazakomeza guhabwa urukingo rwa Marburg ari abafite aho bahurira n’abarwayi ndetse n’abakora mu birombe

Minisitiri Nsanzimana avuga ko abantu bazakomeza guhabwa urukingo rwa Marburg ari abafite aho bahurira n’abarwayi, ndetse n’abakora mu birombe aho bahurira n’uducurama dufite iyo virusi.

Itegeko No 72/2018 ryo ku wa 31/08/2018 rigena imitunganyirize n’imikorere by’imiryango ishingiye ku myemerere, mu ngingo ya 39, rivuga ko umutungo w’umuryango, impuzamiryango, ihuriro ry’impuzamiryango cyangwa minisiteriya byambuwe ubuzimagatozi, ucungwa hakurikijwe amategeko shingiro y’umuryango n’amategeko abigenga.

RGB ivuga ko nta jambo ifite kuri iyo mitungo kuko Itegeko riha amadini n’amatorero kwigenga ku ikoreshwa ry’imitungo yayo, kereka ahari ’abo byananira kugabana cyangwa kuyikoresha ibindi, bashobora kuyiyambaza’, nk’uko umukozi wa RGB yabisobanuriye Kigali Today.

Umwe mu miryango yambuwe ubuzima gatozi, ni Itorero Ebenezer Rwanda ryari rimaze hafi imyaka ibiri rihagarikiwe ubuyobozi kubera imikoreshereze mibi y’umutungo, aho uwari Umuyobozi waryo, Nkundabandi Jean Damascène, afunzwe aregwa kwihesha ikintu cy’undi, akagitangaho ingwate.

Bamwe mu banyamuryango ba Ebenezer Rwanda bashinjaga uwo muyobozi kugurisha imitungo y’iryo torero, by’umwihariko akaba ngo yari agiye kugurisha n’urusengero ruri i Giheka mu Kagari ka Kagugu, mu Murenge wa Kinyinya, mu Karere ka Gasabo.

Nyuma y’ifungwa ry’uwo muyobozi mu mwaka ushize wa 2023, iri torero ryaje gutora indi Komite y’inzibacyuho yayobowe na Tito Bizimana kugera mu kwezi k’Ukwakira k’uyu mwaka wa 2024 ubwo bamburwaga ubuzima gatozi.

Umwe mu bashinzwe inyubako z’iryo torero ritakibaho, avuga ko inteko rusange yanzuye ko bazareba umuryango ushingiye ku kwemera ufite amahame n’imyemerere iteye kimwe n’iyabo, bakimuriramo iyo mitungo ndetse bagasengana kugira ngo bakomeze kuyigiraho uburenganzira.

Yagize ati "Nta muntu turabiha ariko tugomba kugira aho twerekera, kugeza ubu nta cyifuzo turakora, urubanza rw’umuyobozi (Nkundabandi) na rwo rugomba kubanza kurangira kuko yarajuriye."

Itorero Ebenezer Rwanda ni umwe mu miryango 14 ishingiye ku kwemera yambuwe ubuzima gatozi na RGB ku itariki 18 Ukwakira 2024, mu gihe indi 4 yahagaritswe by’agateganyo kubera kutagira ubuzima gatozi, kandi ibyangombwa yari yarahawe bikaba byararengeje igihe.

RGB ivuga ko imiryango ishingiye ku kwemera yambuwe ubuzima gatozi bitewe no kutubahiriza Amategeko, imiyoborere mibi, amakimbirane y’urudaca mu bayoboke hamwe n’amacakubiri mu bayobozi bayo.

Iyi miryango yashinjwe kandi kubangamira umutekano n’ituze by’Abanyarwanda, kutubahiriza ubuzima, ubupfura, imico n’imyifatire myiza, ukwishyira ukizana n’uburenganzira bw’ibanze by’abandi.

Leta y’u Rwanda yashyikirije AU inyubako izakoreramo Icyicaro gikuru cy’Ikigo Nyafurika gishinzwe Imiti

Minisitiri w’Ubuzima, Dr Sabin Nsanzimana, yashyikirije iyo nyubako Komiseri wa Afurika yunze Ubumwe ushinzwe Ubuzima n’imibereho y’abaturage, Minata Samate Cessouma, kuri uyu wa Gatanu tariki 01 Ugushyingo 2024.

Dr Nsanzimana avuga ko iki kigo Nyafurika (AMA) mu Rwanda kizajya gisuzuma ubuziranenge bw’imiti ikorerwa kuri uyu mugabane hamwe n’iva hanze yawo, hakarebwa ingaruka yagira ku buzima bw’abantu.

Dr Nsanzimana avuga ko iki kigo Nyafurika (AMA) mu Rwanda kizajya gisuzuma ubuziranenge bw’imiti ikorerwa kuri uyu mugabane no hanze yawo

Dr Nsanzimana ati "Gusuzuma ubuziranenge bw’imiti no kuyikorera ubushakashatsi byakorwaga n’ibihugu ku giti cyabyo, ariko rimwe na rimwe ugasanga hari ibidafite ubwo bushobozi, imiti ikaba yakomeza gukwirakwizwa kuri uyu mugabane wacu idafite ubuziranenge."

Dr Nsanzimana avuga ko AMA izakorana n’ibigo bishinzwe imiti n’ibirirwa by’ibihugu bya Afurika, birimo n’icy’u Rwanda (Rwanda Food and Drugs Authority).

Minisitiri w’Ubuzima avuga ko AMA izongera urujya n’uruza rw’abasura u Rwanda, bazaba baje mu mirimo itandukanye irimo akazi gasanzwe muri icyo kigo, ndetse n’abaza mu nama hamwe no gukora ubushakashatsi mu by’imiti.

Minisitiri w’Ubuzima avuga ko AMA izongera urujya n’uruza rw’abasura u Rwanda

Dr Nsanzimana yakomeje avuga u Rwanda rubaye icyicaro gikuru cy’ubuziranenge bw’imiti muri Afurika, kandi ko ari inyungu ikomeye ku Banyafurika muri rusange, kuko ngo hari ibyo Igihugu kirimo gukora birimo gahunda ‘igeze kure’ yo kubaka inganda z’imiti n’inkingo.

Ati "Ibi byose biraza bigakora urusobe rw’ibizafasha u Rwanda kuba igicumbi cy’ubushakashatsi n’ubuziranenge mu bijyanye n’imiti n’ibiribwa ku mugabane wacu."

Komiseri wa Afurika yunze Ubumwe ushinzwe ubuzima, Minata Samate Cessouma avuga ko u Rwanda rwemerewe kwakira icyicaro cy’uyu mugabane mu bijyanye n’ubuziranenge bw’imiti n’ibiribwa, nyuma y’amarushanwa yitabiriwe ku nshuro ya nyuma n’ibihugu 9, akaba yarabereye i Lusaka muri Zambia mu mwaka wa 2022.

Komiseri wa Afurika yunze Ubumwe ushinzwe ubuzima, Minata Samate Cessouma

Minata avuga ko Ikigo AMA kizagira uruhare rukomeye mu gukorera imiti kuri uyu mugabane, hamwe no kuyikwirakwiza hirya no mu bihugu bya Afurika.

Yagize ati "Ni ngombwa ko twikorera imiti mu rwego rwo kwirinda idafite ubuziranenge, birajyana na gahunda y’Umuryango wa Afurika yunze Ubumwe y’uko bitarenze umwaka wa 2063 abaturage b’uyu mugabane bazaba bafungura neza ariko banafite ubuzima bwiza."

Icyicaro cya AMA mu Rwanda, kizakorera mu nyubako y’amagorofa umunani iherereye mu Mujyi wa Kigali. U Rwanda kandi rwatanze imodoka nshya abakozi b’iki kigo bazajya bifashisha mu kazi kabo ka buri munsi.

U Rwanda kandi rwatanze imodoka nshya zizajya zifashishwa n’iki kigo

Ku wa 5 Ugushyingo 2021 ni bwo Ikigo Nyafurika gishinzwe imiti, African Medicines Agency (AMA), cyatangiye gukora nyuma y’uko ibihugu bisinye amasezerano agena ko gishyirwaho.

U Rwanda rwemeje amasezerano agishyiraho ku wa 7 Ukwakira 2019. Kugeza muri Werurwe 2024, ibihugu 27 bya Afurika ni byo byari bimaze kwemeza ishyirwaho n’ikora ry’iki kigo.

Iki kigo kizafasha u Rwanda muri gahunda rwatangiye yo kuba igicumbi cya serivisi z’ubuzima

Umukozi muri RBC ushinzwe kwita ku buzima bwo mutwe no ku bafite virusi itera SIDA, Michel Gasana, avuga ko ubu bushakashatsi babukoze mu mwaka ushize wa 2023, aho basanze abanyeshuri bafite virusi itera SIDA bugarijwe cyane.

Agahinda gakabije ni ikibazo gikomeye gishobora kuba cyateza urupfu

Gasana agira ati "Iki kibazo kiraterwa n’ihohoterwa rishingiye ku gitsina, kubwirwa amagambo mabi kuko ku ishuri bamuvuga ngo ’arwaye SIDA’, hakaba n’ikibazo cyo kubura ibyo kurya."

Abandi bafite ikibazo cy’agahinda gakabije kivanze n’ubukene, nk’uko RBC n’abitwa ’abajyanama n’urungano’ babisobanura, ni abangavu n’ababyeyi bakiri bato bafite virusi itera SIDA, cyane cyane abo ababyeyi babo bahita birukana kubera gutwita cyangwa abo abagabo bataye.

Uwitwa Habumuremyi Yvonne, umujyanama w’urungano utuye i Janana, avuga ko we na bagenzi be na bo bamaze kwandura indwara y’agahinda gakabije bitewe n’uko abangavu n’abagore bato bamutura ibibazo bikamurenga, kuko ataba afite igisubizo hafi kirimo n’uko nta cyo kubafashisha yabaha ngo kibabuze kujya gukora uburaya.

Habumuremyi avuga ko abakobwa n’abagore bakiri bato, abatewe inda zidateganyijwe birukanywe mu miryango yabo cyangwa abari bafite abagabo bakabata, abavuye mu cyaro bagera mu Mujyi ubuzima bukabananira, aba bose iyo ibibazo bafite byiyongereyeho kuba bafite virusi itera SIDA, ngo bamutera agahinda gakabije.

Habumuremyi ati "Ugera mu rugo gusinzira bikanga, ukarara ubitekereza, ya shusho y’umwana ukuntu yabikubwiraga n’amarira ashoka mu maso, bisaba kujya kumuganiriza nawe wabanje kumva ko ufite imbaraga."

Umuyobozi wa porogaramu yo kurwanya virusi itera SIDA n’igituntu mu Rugaga Nyarwanda rw’Abafite virusi itera SIDA, RRP+, Odette Nyiramucyo, avuga ko bakurikirana 77% by’abafite iyo virusi mu Rwanda bafata imiti, ariko ngo ikibabaje ni uko muri bo urubyiruko rufite munsi y’imyaka 24 y’amavuko rutarimo, kubera kutiyakira.

Nyiramucyo yagize ati "Urubyiruko dufite rufata imiti ni ruke cyane kuko rutariyakira, twe dufata abamaze kwiyakira, muri bariya 77% twebwe dufite, nta na 45% b’urubyiruko barimo, kandi iyo umuntu yanze gufata imiti ibyuririzi byose bishoboka biramwibasira, iyo umuntu adafata imiti neza aba ari mu rupfu."

RRP+ ifite abajyanama b’urungano 4,459 bashinzwe gukurikirana abafite virusi itera SIDA bagera kuri 162,003, hamwe n’Umuryango Nyafurika w’Ivugabutumwa AEE ufite abagera kuri 1,384, bavuga ko aba bakorerashake babafasha ari bo bakwiye inkunga ya mbere yo kubavura no kububakira ubushobozi bwatuma bateza imbere imibereho y’abafite virusi itera SIDA mu Rwanda.

RRP+ na AEE bavuga ko abakorerabushake babo biganje mu mibare yatangajwe na RBC ko 32% by’abakozi mu bigo bifite abakozi barenga 100 bajya batekereza kwiyahura, mu gihe 63% by’abakozi basiba akazi batabibwiye abakoresha babo kubera ibibazo by’ubuzima bwo mu mutwe.

Umuganga ukorera AEE, Munyamisugi Damascène, avuga ko umushinga
"Igire-Ubaka Ejo" w’Ikigega cy’Abanyamerika USAID urimo kubafasha kubona imfashanyigisho zunganira abakorerabushake mu gihe bita ku babagana, kandi ko hari inkunga yo kwiga no guhangirwa imirimo ikomeje guhabwa ibyiciro byazahajwe n’agahinda gakabije gafatanyije na virusi itera SIDA.

RRP+ hamwe n’abakorerabushake bita ku bafite virusi itera SIDA, basaba RBC ingengo y’imari yafasha gukemura ibibazo bijyanye n’ubuzima bwo mu mutwe.

Iyi raporo yatangarijwe Inteko ku wa Gatatu tariki 30 Ukwakira 2024, ivuga ko ijanisha ry’abafungiye mu magororero y’u Rwanda ugereranyije n’abo yagenewe kwakira, ryagabanutse kuva kuri 140.7% mu mwaka wa 2022/2023 kugera kuri 134.3% muri 2023/2024.

Mu magororero afite ubucucike bw’abagororwa buri ku kigero gikabije, harimo irya Rwamagana riri kuri 159,2%, Rusizi riri kuri 158,6%, Nyarugenge ririmo ubucucitse buri ku rugero rwa 158%, Huye iri kuri 143.5% na Muhanga ikaba kuri 142,8%.

Perezida wa Komisiyo y’Igihugu y’Uburenganzira bwa Muntu (NCHR), Umurungi Providence, yagize ati "Mu bikorwa duteganya mu mwaka wa 2024/2025, tuzakomeza gushyira imbaraga mu bushakashatsi ku mpamvu zitera ubucucike mu magororero."

Komisiyo y’Uburenganzira bwa Muntu ivuga kandi ko mu igenzura yakoze muri za kasho 72 z’Ubugenzacyaha mu mwaka wa 2023/24, yasanze mu bantu 4,852 bari bazifungiwemo, harimo 4,821 (99,4%) bari bafite impapuro zibafunga, mu gihe 31 (0,6%) izo nyandiko ntazo bari bafite, kuko ari bwo bari bakigeramo.

Iyi Komisiyo ivuga kandi ko ibyaha bitatu birimo ubujura (buri ku kigero cya 62,5%), ibiyobyabwenge (8,5%) no kwangiza ibikorwa remezo (7,5%), biri ku isonga mu bituma abantu bajyanwa mu bigo binyurwamo by’igihe gito(Transit Centers).

Komisiyo y’Uburenganzira bwa Muntu ivuga ko muri ibyo bigo 28 binyurwamo by’igihe gito, yasanze harimo abantu 8,373 (abagabo 7,632, abagore 332, abahungu 365, abakobwa 44) ndetse n’abana bato 19 bari kumwe na ba nyina.

Baratekereza gukora inyigo igaragaza niba ibirunga byo mu Rwanda bidashobora gutungurana bikaruka

Umwarimu wigisha jewoloji(ibiri mu nda y’isi) muri Kaminuza y’u Rwanda, Prof Digne Rwabuhungu, akaba ayobora IGGP mu Rwanda, avuga ko kuba ibirunga byo mu Rwanda biri mu muhora wa Rift Valley wa Afurika y’Iburasirazuba urimo kugenda wiyasa, kandi bikaba bituranye n’ibya DR Congo bikiruka (Nyiragongo na Nyamuragira), hakenewe inyigo igaragaza niba ibyo mu Rwanda na byo bidashobora gutungurana.

Prof Rwabuhungu agira ati "Ibi birunga birasinziriye ariko bishobora kuba byakanguka, bitewe n’uko biri mu muhora wa Rift Valley ukirimo kugenda wiyasa. Tugomba gukomeza kubicungira hafi buri gihe, kuko icyatumye biruka kikiriho."

Gutandukana cyangwa gusekurana kw’ibitare byubatse Isi(umuntu yakwita imigabane), biteza imitingito no guhubangana kw’ibikoma bishyushye biri mu nda y’isi(amahindure), ku buryo ibyo bikoma bihita bishaka aho bitoborera horoshye, bigasohoka hanze ku butaka, ari ko kuruka kw’ibirunga.

Umugabane wa Afurika ugaragaza ko urimo kwiyasa(gutandukana) gake gake uhereye mu ihembe ryawo muri Djibouti na Somalia, ukanyura mu biyaga bya Albert (Rwicanzige), Kivu, Tanganyika na Malawi kugera muri Mozambique, aho igice cyawo cy’iburasirazuba gishobora kuzaba ikirwa ukwacyo.

Prof Rwabuhungu avuga ko iki gikorwa ari ikimenyetso cy’uko ibirunga biri mu gace k’Amajyaruguru y’Iburengerazuba bw’u Rwanda byasinziriye ariko bitazimye, n’ubwo bimaze imyaka myinshi bitaruka, aho atanga urugero rwo muri Norvège ko ikirunga cyaho cyamaze imyaka irenga 700 kitaruka, ariko ngo cyaje gutungurana gihagarika ibikorwa by’abantu.

Pariki za jewoloji mu Rwanda

Komite ya IGGP mu Rwanda yatangaje ibi nyuma yo gusura ibyanya bibitse umutungo kamere udasanzwe wo mu nda y’isi(jewoloji) no hejuru ku butaka, mu kwezi k’Ukwakira 2024, mu rwego rwo kuzageza kuri UNESCO icyifuzo cy’uko ibyo byanya byagirwa pariki za jewoloji.

Ibyanya byahereweho bikaba ari Igishanga cy’Urugezi kibitse nyiramugengeri, ibinyabuzima n’amazi atanga amashanyarazi ku Rwanda, hakaba ibiyaga bya Burera na Ruhondo hamwe n’Ubuvumo bw’i Musanze bugizwe n’imihora 9 ihora isurwa na ba mukerarugendo, hakaba hatuyemo ibinyabuzima bikorana n’umwijima cyane cyane uducurama n’ibihunyira.

Umukozi w’Urwego rushinzwe Iterambere (RDB) ushinzwe kuyobora abasura ubwo buvumo, Bahizi Edward, avuga ko abakurambere bihishagamo mu ntambara zo kwagura u Rwanda, iyo babaga bari kurwana n’umwanzi.

Ibi bigashimangirwa n’Ikigo cy’ubukerarugendo cyitwa RedRocks Community Arts kiri i Musanze, cyanditse ko ibitekerezo byo kurema u Rwanda byahereye i Buhanga mu Buhoma kwa Gihanga(umwami wa mbere w’u Rwanda), akaba ari ho haje guhinduka mu Ruhengeri cyangwa Musanze y’ubu.

Prof Rwabuhungu avuga ko impamvu bifuza ko ubu buvumo buba pariki ya Jewoloji, ari uko ngo ku Isi ubuvumo nk’ubu bwitwa Basaltic bukomoka ku iruka ry’ibirunga, ari buke cyane.

Ubusanzwe ubuvumo budakomoka ku iruka ry’ibirunga ngo ni ububa bwaracukuwe n’amazi y’imigezi cyangwa isuri ifite imbaraga, ku buryo abasha gutobora umusozi akawucamo umworera, bukaba bwitwa ‘castle’.

Prof Rwabuhungu avuga ko mu birunga nka Muhabura, Sabyinyo, Gahinga, Bisoke n’ibindi, hataramenyekana icyavuyemo amahindure yakoze ubuvumo bw’i Musanze.

Yabwiye abagize IGGP ati "Mukeneye kubimenya mushingiye ku binyabutabire bigize aha hantu, igihe buri kirunga cyarukiye, gusa bishobora kuba byose bitakorwa n’iri tsinda ryacu, ariko niba twifuza ko aha hantu hasurwa na ba mukerarugendo, dukeneye kugaragaza inyigo zahakorewe."

Mu gihe amahindure yamanukaga avuye ku iruka ry’ikirunga (birakekwa ko hashize imyaka ibarirwa muri miliyoni 65), ayo hejuru yashoboraga gukonja agafatana akuma, ariko ibikoma by’imbere muri yo byo bigakomeza gutemba, aho bivuye hagasigara imihora ari yo yaje kuba ubuvumo.

Prof Rwabuhungu avuga kandi ko ubu buvumo bw’i Musanze bukeneye gukorwaho inyigo zigaragaza uko bukwiye kubyazwa ubukungu burushijeho, hamwe no guteza imbere imibereho myiza y’abaturage.

Abahanga bavuga ko umugabane wa Afurika ushobora kuzacikamo ibi bice ukisatura unyuze mu kiyaga cya Kivu. Gusa ngo bishobora kuzafata igihe kirekire kugira ngo bibe

Ingemwe za avoka zikomeje kwifuzwa n’abaturage kubera uburyo avoka ihenze kandi ikenerwa cyane

Mu ngemwe z’ibiti zigera hafi kuri miliyoni 65 zizaterwa muri iki gihe cy’umuhindo wa 2024, Minisiteri y’Ibidukikije ibifashijwemo n’Umuryango mpuzamahanga wita ku bahinzi bato, One Acre Fund, uzwi ku izina rya Tubura, barateganya gutera ingemwe z’ibiti bivangwa n’imyaka zirenga miliyoni 25 hamwe n’iby’imbuto bingana na miliyoni imwe n’ibihumbi 500.

Ngendahimana Félicien na Mukankusi Josiane batuye mu Murenge wa Munyaga mu Karere ka Rwamagana, babyiganiraga gushaka ingemwe z’ibiti zo kujya gutera mu ngo zabo, ndetse bakumva ko batagomba kuzifatira ubuntu, aho bagura urugemwe rw’igiti cya avoka cyangwa icy’umwembe amafaranga y’u Rwanda ibihumbi bibiri.

Ngendahimana yagize ati “Turashaka avoka n’umwembe kuko avoka ku masoko ni zo zihenze, usanga imwe igurwa guhera ku 100Frw kuzamura, kandi usibye n’ibyo, ibi biti bitanga imbuto zirimo intungamubiri, bidufasha kurwanya imirire mibi”.

Mukankusi na we avuga ko iwabo muri Munyaga hajya haza abashoramari bakarangura igiti cyose cya avoka, ku buryo izo mbuto ngo zabaye imari ishyushye, ariko akababazwa n’uko yitabiriye Umuganda wo gutera ibiti atazanye amafaranga ngo ahite abigura.

Agatabo k’imihigo y’urugo kateguwe na Minisiteri y’Ubutegetsi bw’Igihugu (MINALOC) muri 2020, gasaba buri rugo mu Rwanda kugira ibiti bitatu by’imbuto, nubwo Minisiteri y’Ubuhinzi n’Ubworozi(MINAGRI) yo yasabye kubyongera bikagera nibura kuri bitanu, kandi bikaba bitagomba kuburamo avoka n’amatunda(maracuja), mu rwego rwo kurwanya imirire mibi.

Mu ntangiriro z’uyu mwaka wa 2024 Kigali Today yatangaje inkuru y’uko imbuto za avoka zabaye imari ishyushye ku masoko yo mu mahanga, aho Umuyobozi w’ishyirahamwe ry’abohereza mu mahanga imbuto, imboga n’indabo, yavugaga ko kilogarama imwe ya avoka zitwa Fuertés na Hass igurwa amafaranga y’u Rwanda arenga ibihumbi 12 ku masoko y’i Dubai.

Icyakora umuntu uzivanye mu Rwanda ku giti kiri i Munyaga muri Rwamagana cyangwa ahandi hitaruye umujyi, we arangura avoka mbisi ku mafaranga abarirwa hagati ya 100-120, ku muturage ufite igiti cyeraho imbuto za avoka zishobora no kugera ku bihumbi bitanu buri mwaka.

Kabayiza Lambert ukorera Tubura mu ishami rishinzwe gutegura ibiti, agira ati “Kubera ko ibi biti ari byiza bibanguriye, igihe cyose mu mwaka haba hariho imbuto, ni ukuvuga ngo ‘hari igihe haba hariho avoka zeze ndetse n’ibitumbwe bizera mu yandi mezi’, ku buryo mu gihe cy’amezi umunani mu mwaka kuri icyo giti haba hariho avoka.”

Umuyobozi Mukuru wa One Acre Fund-Tubura, Belinda Bwiza, avuga ko gahunda biyemeje muri uyu mwaka ari iyo gutera ibiti birenga miliyoni 25 bivangwa n’imyaka, hamwe n’ibitanga imbuto zirimo na avoka, kuko ari byo ngo byatuma bitabira kubirinda no kubyitaho.

Bwiza agira ati “Tuzi ko ibiti bifasha kugira ngo haboneke imvura ariko turashaka ko abahinzi babibonamo inyungu zitandukanye zirimo no kubona imihembezo y’ibishyimbo no kurumbura ubutaka.”

Umuryango Tubura uvuga ko mu biti miliyoni 100 umaze gufasha abaturage gutera hirya no hino mu Gihugu, ibivangwa n’imyaka byabashije gukura biri ku kigero cya 65%, bitewe n’impamvu zitandukanye zirimo imihindagurikire y’ibihe.

Minisitiri w’Ibidukikije, Dr Valentine Uwamariya, avuga ko hagiyeho imishinga ishinzwe gukurikirana ibiti byatewe kugira ngo bijye byitabwaho, ariko ko n’ababitera ari inshingano zabo gusubirayo kubibungabunga kugira ngo bitangirika cyangwa bikuma.

Dr Uwamariya ati “Aha muri iyi Ntara y’Iburasirazuba hari umushinga witwa TREPA (ushinzwe kwita ku biti byatewe) dukurikirana umunsi ku wundi, n’ubwo ataba jyewe ariko ababishinzwe mu Kigo cy’amashyamba baraza kenshi, ntabwo tuzaterera iyo kuko ni inshingano zacu.”

Minisiteri y’Ibidukikije hamwe n’abafatanyabikorwa barateganya gutera ibiti Miliyoni 65 muri uyu muhindo

Minisitiri w’Ibidukikije avuga ko abaturage basabwa kongera ibiti ku misozi no mu ngo aho batera iby’imbuto, ariko bagasabwa cyane kubibungabunga, ndetse ko nta wemerewe gutema igiti atabisabiye uruhushya mu nzego z’ibanze, kugira ngo babanze bamurebere ko kigeze gusarurwa.

Ishusho Minisiteri y’Ibidukikije mu Rwanda ivuga ko hose mu Rwanda bagomba gufatiraho urugero, ni iya Kiyovu cyangwa ahandi muri Kigali hagaragara inzu ziri mu biti byinshi.

Minisitiri w’Ibidukikije, Dr Valentine Uwamariya, hamwe n’abafatanyabikorwa, bateye ibiti i Munyaga mu Karere ka Rwamagana

Minisitiri w’Ibidukikije, Dr Uwamariya hamwe na Belinda Bwiza wa Tubura batangije gahunda yo gutera ingemwe z’ibiti miliyoni 65 i Munyaga muri Rwamagana

Muri za pepiniyeri hateguwe ibiti bisanzwe by’ishyamba, ariko hakaba n’ibivangwa n’imyaka, iby’imbuto n’iby’imitako, bizaterwa hagendewe ku nsangamatsiko y’uyu mwaka igira iti "Tera igiti, Ukibungabunge, Urengere Isi."

Minisiteri y’Ibidukikije ivuga ko kugeza ubu ubuso bw’u Rwanda bungana na 30% buteyeho amashyamba nk’uko igishushanyo mbonera kibiteganya, ariko ngo irifuza ko buri gace kose mu Gihugu kugera no mu ngo z’abaturage hagomba kuba hateye ibiti.

Minisitiri w’Ibidukikije, Dr Valentine Uwamariya, yagize ati "Tuvuze ibiti miliyoni 65 ariko hari n’ibindi bisanzwe bihari, hari ukubungabunga 30% y’ubuso buteweho amashyamba ariko bikongerwa."

Ati "Ubundi muri buri rugo hagombye kuboneka igiti ku buryo ureba Umujyi ukabona urimo amazu ariko harimo n’ibiti byinshi, turashaka u Rwanda rusa n’icyatsi kibisi."

Dr Valentine Uwamariya

Dr Uwamariya avuga ko kuba imvura y’Umuhindo y’uyu mwaka wa 2024 yaraguye itinze, biterwa n’uko ahenshi nta biti biyikurura, nk’uko n’Ikigo gishinzwe Ubumenyi bw’Ikirere, Meteo-Rwanda, gihora kivuga ko imvura iboneka ahantu bitewe n’imiterere yaho yihariye nko kuba hari amashyamba.

Dr Uwamariya yibutsa ko hari n’imihigo y’umuryango isaba buri rugo kuba rufite ibiti bitanu by’imbuto, ikaba ari gahunda icungwa na Minisiteri y’Ubuhinzi n’Ubworozi, ariko na yo yahurijwe hamwe n’iyo gutera ingemwe z’ibiti miliyoni 65 kuva muri iki gihe cy’umuhindo.

Umuyobozi Mukuru wa One Acre Fund-Tubura mu Rwanda, Belinda Bwiza, avuga ko bishimira kuba bamaze gutera mu Rwanda ibiti miliyoni 100 mu myaka irindwi ishize, ariko ko batarekera aho kuva u Rwanda rukirimo kwibasirwa n’ingaruka z’imihindagurikire y’ibihe.

Bwiza avuga ko bakomeje gahunda bihaye muri uyu mwaka wa 2024 yo gutera ibiti bivangwa n’imyaka hamwe n’iby’imbuto bingana na miliyoni 25, aho bakoresha abaturage bakabitera mu mirima yabo.

Minisitiri w’Ibidukikije, Valentine Uwamariya na Belinda Bwiza uyobora Tubura mu birori byo kwishimira ibiti byatewe no gutangiza gahunda yo gutera ibindi

Bwiza agira ati "Tuzi ko ibiti bifasha kugira ngo haboneke imvura, ariko turashaka ko abahinzi babibonamo inyungu zitandukanye zirimo kubona uduti two gushingirira ibishyimbo, kurumbura ubutaka n’ibindi."

Mu birori byabaye kuri uyu wa Gatanu tariki 25 Ukwakira 2024, byo kwishimira ibiti miliyoni 100 byatewe na Tubura, hamwe no gutangiza gahunda yo gutera ibiti miliyoni 65 muri iki gihe cy’umuhindo, abaturage batubura ingemwe z’ibiti bavuze ko izi gahunda zirimo kubavana mu bukene.

Gusa, ngo hakenewe gahunda ihamye yo kurinda no kwita ku biti birmo guterwa kugira ngo ikigero cy’ibyangirika kibe gito, nk’uko uwitwa Nkeragutabara Dede Leonard uri mu bashinzwe kurinda ishyamba ryatewe ku nkengero za Nyungwe abivuga.

Nkeragutabara agira ati "Abaturage bakeneye kwigishwa kwita kuri ibi biti kugeza bikuze, ndetse bakirinda kubitema igihe kitaragera(biteze)."

Nkeragutabara avuga ko iyo hadashyirwaho Ikigo Ultimate Forest Company cyita ku biti byatewe ku nkengero za Nyungwe, Pariki yari kuba yugarijwe bikomeye na ba rushimusi.

Imitako y’ibiti mu birori byo gutangiza gahunda yo gutera ingemwe z’ibiti miliyoni 65

Minisiteri y’Ibidukikije ivuga ko izafatanya na Tubura kumenya ibiti bifite akamaro karenze kurwanya isuri, nko kurumbura ubutaka no kubana neza n’imyaka, ndetse n’ibivamo ibikoresho bitandukanye.

Amashyamba ni kimwe mu bikorwa bizafasha u Rwanda kugabanya imyuka ihumanya ikirere ku rugero rwa 38% bitarenze umwaka wa 2030, mu rwego rwo kubahiriza amasezerano mpuzamahanga yashyiriweho umukono i Paris mu Bufaransa muri 2015, agamije gusubiza Isi umwimerere w’ubushyuhe budakabije yahoranye mbere y’umwaduko w’inganda mu kinyejana cya 18.

Iyi mashini ikoreshwa mu gupima gukomera kwa kasike mu kureba ko izashobora kurinda umutwe w’umuntu

Amabwiriza y’Ubuziranenge bwa kasike yashyizweho na RSB ifatanyije n’inzego zirimo Minisiteri y’Ibikorwa Remezo (MININFRA), Umuryango urwanya impanuka zibera mu muhanda (HPR) hamwe na ’Féderation International de l’Automobile (FIA) Foundation’, ateganya ibipimo bigera ku 10 bishingirwaho mu kwemerera kasike ya moto ikwiye gukoreshwa mu Rwanda.

Dore bimwe muri ibyo bipimo

Icya mbere kizitabwaho ni ukureba niba kasike ifite ikirango cyemewe ku rwego mpuzamahanga nka DOT cyo muri Amerika, ECE cy’i Burayi, Snell cy’Umuryango wigenga witwa Memorial, SHARP cy’u Bwongereza, AS/NZS 1698 cya Australia na New Zealand cyangwa icyitwa JIS gitangwa n’Abayapani.

RSB yamaze kubona Labaratwari ipima ubuziranenge bwa kasike za moto

Ibindi birebwa hakoreshejwe imashini zashyizwe muri Labaratwari ya RSB, ni uguhonda kasike ku bintu bitandukanye, kugira ngo barebe ko izashobora kurinda umutwe w’umuntu uguye ahantu aho ari ho hose.

Umuyobozi w’Ishami rishyiraho amabwiriza y’Ubuziranenge muri RSB, Emmanuel Gatera, agira ati "Hari imashini ireba ‘impact’, barapima bakareba igihe aguye mu muhanda hagati aharambaraye, cyangwa ku kintu gishobora kuba gishinze nk’ibuye, bikaba ari ibipimo dufata ariko tugendeye ku ibwirizwa ry’ubuziranenge ryatangajwe."

Mu bindi bipimo bifatwa hari uburyo kasike ishobora kuba yajabuka mu mutwe w’umuntu mu gihe moto isimbutse ahantu, ndetse n’uburyo ikandika (Compression) mu gihe hari ikintu kiremereye kiryamiye umutwe w’umuntu wakoze impanuka, hakaba hari umurongo ntarengwa ubuza kwegera umutwe kugira ngo udatsikamirwa.

Hari n’ibipimo bifatwa mu kureba imiterere y’ibirahure bya kasike n’uburyo bifasha uyambaye kureba neza

Bareba kandi ubukomere bw’umukandara unyuzwa munsi y’akananwa, kugira ngo mu gihe umuntu yawufunze neza hatabaho kumuniga cyangwa gucika, bikaba byatuma kasike imuvamo.

Hari n’imashini ireba niba kasike izashobora kurinda umugenzi wo kuri moto mu miterere y’ikirere itandukanye, aho bamwe bagera ahantu hashyushye cyangwa hakonje, kasike ikaba itamuteza ibibazo.

Bareba kandi imiterere y’ibirahure bya kasike n’uburyo bifasha uyambaye kureba neza imbere no mu mpande, n’uburyo imufasha guhumeka neza (itamuniga).

Hari ubuziranenge busabwa kasike mu kurinda umutwe w’umuntu

Kasike ya moto igomba kandi kuba itaremerera umugenzi ariko bwa bworohe butamuteza ibindi bibazo, ikamworohereza kubona umwuka uhagije ariko imurinda umuyaga, ikanamurinda imirasire y’izuba n’urusaku.

Gatera avuga ko hazajya hanarebwa niba kasike zifite ingano itandukanye ziba zujuje bya bipimo ku muntu wese wayambara, hanyuma akaba ari bwo hazabaho gutanga ibirango by’ubuziranenge.

Umuyobozi wa HPR (Healthy People Rwanda), Dr Innocent Nzeyimana, uri mu bafashije kubona imashini zipima ubuziranenge bwa kasike, arateganya gusaba inzego ko kasike zinjiye mu Gihugu zidapimwe zigomba kunyuzwa muri iyo Labaratwari, kandi kuri za gasutamo hagakumirwa ko izitujuje ubuziranenge zikomeza kuza.

Abahagarariye inzego zitandukanye zishinzwe gushyira mu bikorwa amabwiriza y’ubuziranenge bwa kasike za moto

Dr Nzeyimana yizeza ko azaba mu baharanira ko kasike zikorerwa mu Rwanda, mu rwego rwo kugabanya ikiguzi kizazamurwa no gupimisha ubuziranenge bw’izitumizwa hanze.

Dr Nzeyimana avuga ko mu bantu bicwa n’impanuka zibera mu muhanda, 21% baba ari abagenda kuri moto, kandi abenshi ngo bazira kuba bakomeretse umutwe n’ubwo baba bambaye kasike.

Umunyamabanga Uhororaho muri Minisiteri y’Ibikorwa Remezo, Fidèle Abimana, avuga ko ubufatanye bw’inzego zitandukanye buzanoza gahunda y’imikoreshereze ya kasike zujuje ubuziranenge, bitarenze uyu mwaka wa 2024.

Urubyiruko rw’i Kigali mu muganda wo gutera ibiti wabereye i Gahanga ku wa Gatandatu tariki 12 Ukwakira 2024

Abayobozi mu Mujyi wa Kigali bavuga ko muri iyi gahunda yiswe ’Igiti cyanjye’, urubyiruko ruzajya ruhabwa ibiti rubitere ariko habeho no gukurikirana imikurire yabyo, aho nyiri igiti azajya agisura kenshi akakibagarira kandi akakivomerera kugeza ubwo gikuze.

Umuyobozi Nshingwabikorwa w’Akarere ka Kicukiro, Antoine Mutsinzi, mu muganda w’urubyiruko wabereye i Gahanga ku wa Gatandatu tariki 12 Ukwakira 2024, yagize ati "(Ku giti) nibinashoboka wandikeho izina ryawe."

Umuyobozi Nshingwabikorwa w’Akarere ka Kicukiro, Antoine Mutsinzi

Mutsinzi avuga ko bahereye ku muhanda munini ujya mu Bugesera, ariko ko bifuza ko ibiti biterwa hose mu Karere ka Kicukiro, ku mihanda no mu ngo z’abaturage.

Umuvugizi w’Umujyi wa Kigali, Emma Claudine Ntirenganya avuga ko ibiti bizaterwa hirya no hino mu Gihugu bigomba kuba birimo iby’imbuto kugira ngo bifashe kurwanya imirire mibi.

Umujyi wa Kigali uvuga ko uzatera ibiti birenga miliyoni eshatu ku nkengero z’imihanda no mu ngo

Ntirenganya akomeza agira ati "Abantu baturiye imihanda, ni ukureba neza niba hagati yabo n’uwo muhanda hari ibiti, kuko bagomba gutanga intera ya metero 20 uvuye ku muhanda, uwo mwanya ukaba warahariwe ubusitani butewemo n’ibiti."

Ntirenganya avuga ko hazajya habaho gahunda zo gusura ibiti byatewe, kugira ngo harebwe umubare w’ibyakuze.

Iyi gahunda yiswe "Igiti cyanjye"

Avuga ko umuntu ushaka igiti by’umwihariko ashobora kujya ku biro bya buri Karere mu tugize Umujyi wa Kigali, bakamurangira pepinyeri yaguramo urugemwe rw’igiti amafaranga y’u Rwanda guhera kuri 500Frw.

Minisiteri y’Ibidukikije, ifite muri gahunda y’uko ubuso bw’Igihugu bungana na hegitare miliyoni ebyiri bugomba kuba buteweho amashyamba bitarenze umwaka wa 2030, yifuza ko Imijyi n’Imidugudu byo mu Rwanda biba mu ishyamba, ku buryo ubirebeye inyuma atabona inzu ahubwo hagaragara ishyamba.

Minisitiri w’Ubuzima, Dr Sabin Nsanzimana, mu kiganiro n’itangazamakuru

Mu ngamba zari zafashwe mu cyumweru cya mbere icyorezo kicyaduka, hari ugusukura intoki, kwirinda gukora ku murwayi cyangwa uwishwe na Marburg, hamwe no kutajyana mu rusengero cyangwa mu rugo uwishwe n’iyo ndwara.

Hafashwe kandi ibyemezo byo kwirinda gusezera no guherekeza mu kivunge uwishwe na Marburg mu gihe cyo kumushyingura, kwirinda gusura abarwayi kwa muganga cyangwa gusura abanyeshuri ku ishuri.

Mu kiganiro yagiranye n’itangazamakuru ndetse n’imiryango itari iya Leta kuri iki Cyumweru tariki 13 Ukwakira 2024, mu rwego rwo kubagezaho ishusho y’uko indwara iterwa na virusi ya Marbug ihagaze mu Rwanda ndetse n’ibimaze gukorwa mu guhangana na yo, Dr Nsanzimana yagize ati “Hari ibyemezo byinshi byafashwe mu cyumweru cya mbere, ariko hari ibiri buhinduke n’ibiri bwiyongeremo. Igihe kirageze ngo twongere kubisubiramo, amabwiriza mashya tuzayabatangariza.”

Kuva aho Marburg imenyekaniye ko yageze mu Rwanda ku wa Gatanu tariki 27 Nzeri 2024, abantu 61 bamaze kuyandura, muri bo 14 bitabye Imana, 18 baravuwe barakira, mu gihe 29 bakiri kwitabwaho n’abaganga.

Minisitiri w’Ubuzima yatangaje ko mu minsi irindwi ishize hagaragaye abakize kurusha abahitanywe na Marburg, ndetse ko hari ibipimo byerekana ko imbaraga zashyizwemo ziri gutanga umusaruro.

Ati "Mu minsi itatu twarapimye dusanga nta muntu ugaragaraho uburwayi, ni ikintu cyiza ariko ntabwo byatuma twirara.’’

Dr Nsanzimana yavuze ko mu barwayi ba Marburg 29 bari kwitabwaho n’abaganga, batatu barembye cyane, ariko ngo hari gukorwa ibishoboka byose ngo bahabwe ubuvuzi.

Umuyobozi w’Ishami ry’Umuryango w’Abibumbye ryita ku Buzima, OMS, mu Rwanda, Dr Brian Chirombo, asanga guhagarika ingendo no gukorana ubucuruzi n’u Rwanda atari ngombwa mu guhashya virusi ya Marburg.

Umuyobozi wa OMS mu Rwanda, Dr Brian Chirombo, yavuze ko guhagarika ingendo n’ibikorwa by’ubucuruzi n’u Rwanda atari ingenzi mu guhashya Marburg

Chirombo yagize ati “Ingamba zafashwe n’u Rwanda n’abafatanyabikorwa barwo zirahagije. Icyemezo cyo guhagarika ingendo ntacyo cyafasha, ahubwo gituma ubukungu bw’Igihugu burushaho kuzahara.’’

Kwitegura icyorezo cyakwaduka ubutaha

Minisitiri w’Ubuzima avuga ko hari inkingo nke zateganyirijwe abari ku ruhembe rwo guhashya Marburg, ariko bitaraba ngombwa gukingira abantu bose.

Ati "Tuzi uko yandura, tuzi abo dukurikirana. Vuba bidatinze tuzaba twayitsinze.’’

Avuga ko bitewe n’imiterere y’Isi, hari ibyorezo byinshi bishobora kuvuka ariko hakwiye kubaho imyiteguro yo guhangana na byo.

Minisitiri w’Ubuzima avuga ko ubutaha mu gihe ikindi cyorezo cyakwaduka, u Rwanda ruzaba rufite ibikoresho bihagije kandi bishoboye guhangana na cyo.

Ati "Uko tuzashobora gukora inkingo zihagije ni ko tuzaba dutekanye kurushaho.’’

Itangazamakuru n’imiryango itari iya Leta bitabiriye ikiganiro na Minisitiri w’Ubuzima kuri iki Cyumweru

RSSB, MINISANTE na KFHR bashyira umukono ku masezerano yo kwigisha abaforomo n’ababyaza

Ku wa Gatanu tariki 11 Ukwakira 2024, RSSB na MINISANTE basinyanye amasezerano n’Ikigo Mpuzamahanga cy’Ubuvuzi(ishami rya Afurika/IRCAD), hamwe n’Umuryango KFHR ufite Ibitaro byitiriwe Umwami Faisal, bikaba ari byo bizigisha abaganga n’abaforomo.

Amasezerano amwe RSSB yayagiranye na IRCAD, akaba afite agaciro k’amafaranga y’u Rwanda Miliyoni 150, akaba azatera inkunga ibikorwa byo guhugura abaganga mu kubaga mu buryo bugezweho budakomeretsa cyane ndetse n’abatera ikinya.

RSSB na IRCAD bamaze gushyira umukono ku masezerano yo guhugura abaganga babaga

Dr King Kayondo uyobora IRCAD Africa

Umuyobozi wa IRCAD Africa, Dr King Kayondo, avuga ko ubuhanga bwo kubaga bugezweho burimo kwigishwa abaganga baturuka hirya no hino muri Afurika, barimo n’Abanyarwanda, ari uguca agasebe gato kanyuzwamo ibyuma byinjira imbere mu mubiri kuhavura, bigatuma umurwayi atazahazwa n’igikomere kinini.

Dr Kayondo ati "Ibi bifasha umurwayi kuva mu bitaro vuba, akihutira gukira, agasubira ku kazi. Kuva dutangiye tumaze guhugura abakozi 350 bavuye mu bihugu 25, aho 30% muri bo ari Abanyarwanda, bazashyira u Rwanda ku mwanya mwiza w’ibihugu bifite ubushobozi bwo kuvura, ku buryo abantu batazongera kujya hanze cyane."

Andi masezerano afite agaciro k’amafaranga y’u Rwanda arenga miliyari 3 na miliyoni 700, RSSB yayagiranye na ‘Foundation’ y’Ibitaro byitiriwe Umwami Faisal(KFHR), akaba azafasha abiga ubuforomo n’ububyaza kwiga ari benshi kurushaho.

RSSB na MINISANTE bivuga ko ayo masezerano azongera umubare w’abanyeshuri bafashwa kwiga ubuforomo n’ububyaza muri za kaminuza n’amashuri makuru, ku buryo bazikuba inshuro zirenga enye ugereranyije n’abarangiza buri mwaka kugeza ubu.

Umuyobozi Mukuru wa RSSB, Regis Rugemanshuro

Umuyobozi Mukuru wa RSSB, Regis Rugemanshuro, avuga ko kubaga neza umurwayi agakira vuba kandi hadakoreshejwe imiti myinshi, hamwe no kuba abarwayi babona abaganga n’ababyaza bahagije bo kubavura, bizatuma uru rwego rutongera gusohora amafaranga menshi rwishyuraga imiti na serivisi zihabwa abanyamuryango barwo.

Rugemanshuro ati "Iyo utavuye umuntu neza agatinda mu bitaro, n’ubundi ni RSSB yishyura, amafaranga tumutangaho ariyongera. Iyo kwa muganga bafite umubare uhagije w’abakozi hamwe n’ubushobozi burenze, kubyara neza bigenda neza, amafaranga yatangwaga akaba macye, ibintu ni magirirane."

Umunyamabanga wa Leta muri MINISANTE, Dr Yvan Butera, avuga ko ubusanzwe abaforomo n’ababyaza barangizaga kwiga buri mwaka batarengaga 100, ariko uruhare rwa RSSB ngo ruzatuma hasohoka abagera kuri 600 buri mwaka.

Umunyamabanga wa Leta muri MINISANTE, Dr Yvan Butera, nyuma y’amasezerano ya RSSB n’abafatanyabikorwa

Dr Butera avuga ko bafite intego y’uko buri mwaka kaminuza n’amashuri makuru bizajya bisohora abaforomo n’ababyaza barenga 1400, ku buryo mu myaka ine Leta yazaba yazibye icyuho cy’abaforomo baburaga.

Sendika y’abaforomo n’ababyaza mu Rwanda ivuga ko abanyamuryango bayo bakomeje guhura n’imvune zo mu kazi, ziterwa n’uko umubare wabo utarenga ibihumbi 13 mu Gihugu, mu gihe hakenewe byibura abagera ku bihumbi 20.

Bamwe mu baforomo batangiye kwiga muri gahunda ya RSSB

Ikigo cya GS Rukaragata giherereye mu Murenge wa Runda mu Karere ka Kamonyi mu Majyepfo

Imbuga nkoranyambaga na bimwe mu bitangazamakuru byavuze ko Habumugisha yakubiswe n’abarezi be barimo Umuyobozi w’ikigo akajya muri koma(coma), ndetse bakamwangiriza ubugabo, gusa hari andi makuru avugwa atandukanye n’aya.

Umunyamakuru watangaje bwa mbere ko Habumugisha yakubiswe akajya muri koma, avuga ko uwo mwana batabonanye ngo baganire, akaba yarashingiye ku kiganiro yagiranye n’umuntu wo mu muryango w’uwo mwana hamwe n’ababyeyi be kuri telefone.

Mu bafunzwe bakurikiranyweho gukubita uwo mwana barimo Umuyobozi w’ikigo witwa Mukarubayiza Aloyisie, Ufiteyesu Yotamu(Umwarimu), Ndayambaje Fabien(Umunyamabanga w’ikigo), hamwe na Ndizihiwe Jean Bosco (Mwarimu akaba na Animateur w’ikigo).

Byagenze gute?

Umunyamakuru wa Kigali Today yasanze Habumugisha w’imyaka 13 y’amavuko ku ishuri aricara aramuganiriza, avuga ko ku wa Kane tariki 19 Nzeri 2024, yaje kwiga nk’uko bisanzwe ajya mu ishuri ariko umwarimu aza kumuhagarika imbere mu barimo gusakuza, ahageze aza no gusohoka hanze adasabye urushya, aho ngo yari agiye gucira.

Avuka ko yagarutse agasanga mwarimu yarakaye kurushaho, ahita amutuma kureba Animateur ngo abe ari we umwihanira, ariko amushatse mu kigo ngo aramubura, ni ko kujya ku gikoni gutegereza amafunguro aho kugaruka mu ishuri.

Habumugisha avuga ko yaje gusubira mu ishuri nyuma y’ifunguro rya ku manywa, mwarimu amubonye amenya ko atigeze abonana na Animateur, ni ko kujya kumwishakira.

Habumugisha avuga ko Animateur yaje akamusohora ariko bigoranye kugeza n’aho umwana uyobora abandi kuri iryo shuri witwa Twagirimana Lazaro, wiga mu wa Gatanu(P5) yabonye barwana, araza asa n’umutega umutego, amwicaza hasi.

Habumugisha ati "Twagirimana yabonye mpagaze Animateur yamfashe mu mashati mu ijosi, araza anyicaza hasi arambwira ngo ’reka kurwana na mwarimu. Nahahagurutse mbanje kugenza akabuno, ngenda mpunga inkoni!"

Aha ni ho Habumugisha avuga ko yakubitiwe akabura ubwenge, akajya muri koma mu gihe adashobora kumenya uko cyanganaga, ndetse ko muri uko kugaragurika hasi yanga ko bamukubita ku kabuno, inkoni yafashe igitsina cye cyari kimaze amezi ane gisiramuwe.

Tukiri aha, twabanje kubaza Twagirimana uvugwaho kwicaza mugenzi we hasi, avuga ko yabikoze amaze kubona ko uwo munyeshuri yananiye Mwarimu(Animateur) wamufataga ashaka kumusohora mu ishuri.

Twagirimana ati "Fabrice(Habumugisha) yari yafashe Animateur mu ijosi, yari yambaye agashati k’igitenge, ndamufata muryamisha hariya imbere y’ishuri yubitse inda, ariko nari nabanje kumubwira nti ’wirwana n’umwarimu."

Twagirimana yakomeje agira ati "Fabrice yarimo no gutuka Animateur ibitutsi biteye isoni, ati ’kanyoko wongere unkoreho, wo ga...nyoko we, ongera unkubite inkoni..! Noneho Teacher Bosco(Animateur) agira umuijinya ahita amukubita ku kibuno, kari agakoni gato, ariko Habumugisha we yari arimo yigaragura hasi."

Twagirimana avuga ko nta koma yabayeho nk’uko mugenzi we agenda abibwira abantu, kuko uwo mwanya avuga ko yayigiyemo akanakubitwa imigeri ku bugabo, yahise abyuka yiruka bakamufata bamujyana ku buyobozi bw’ishuri mu biro, yigenza.

Habumugisha we avuga ko yabaye nk’utaye ubwenge ubwo bamujyanaga ku biro, kandi agezeyo ngo bamuryamishije yubitse inda, Umuyobozi w’ishuri yongera kumukubita inkoni y’umugano ku kibuno ayiha n’abandi barimo umunyamabanga na mwarimu, na bo ngo baramukubita.

Habumugisha avuga ko yaje guhaguruka aho, agenda asaba imbabazi muri buri shuri ko atazongera kurwanya abarezi no kubasuzugura, ndetse aranagaruka mu biro by’Umuyobozi w’ishuri arabisinyira, asubira mu ishuri ariga, bagira ngo birangiriye aho.

Hageze gutaha, Habumugisha afata amakaye aramanuka ntawe umutwaye, anyura mu gasantere kitwa Kagina mbere yo gukika umusozi no kuwumanuka agana iwabo ku mucyamo ufite ubuhaname bukabije.

Kuri uyu musozi witwa Kigusa ni ho mukuru we yaguye avuye kuvoma mu kagezi kitwa Gasondoka kari hepfo gato y’iwabo, hari mu mwaka wa 2015 (ubuhamya bwa Papa we), nyamara Habumugisha yahamanutse ari wenyine afite imbaraga nk’uko abyivugira.

Yageze mu rugo ntiyagira icyo abwira umubyeyi we(nyina) hamwe n’abo bavukana, ndetse byari kuba birangiriye aho iyo Papa we wari waraye izamu kure y’urugo rwe adahamagara nyina w’uwo mwana, nyuma y’uko na we hari uwari umubwiye ko Habumugisha yakubiswe akagirwa intere.

Nyina wa Habumugisha, Mukamazimpaka Claudine, twamusanze mu rugo iwe i Kigusa, agira ati "Fabrice yaraje mu rugo aduhisha ko yakubiswe, twabimenye nka saa ine z’ijoro ari uko Papa we ahamagaye abaza ngo ’umwana ameze ate’, ariko jyewe yaje ambwira ko yavunitse ukuboko, ngira ngo ni bya bindi by’abana baba bakinnye, imyenda yasaga nabi, ndayimusaba kugira ngo nyimese."

Mukamazimpaka avuga ko ibyo kujya muri koma k’umuhungu we atabizi kandi atazi n’uwabivuze, ndetse ko ubugabo bw’umwana nta cyo yabonye yabuvugaho kidasanzwe n’ubwo umwana yamubwiraga ko yigaraguye inkoni igakubitaho.

Bwarakeye Habumugisha na se wari uhageze mu gitondo avuye ku izamu, bajya kurega ubuyobozi bw’ishuri kuri Sitasiyo ya RIB y’i Runda, urugendo rw’amaguru rwagera ku minota 40 kugira ngo ugere i Gihara aho bategera imodoka cyangwa moto bajya i Runda.

Bamaze gutanga ikirego kuri RIB i Runda, barahava bajya no kwa muganga ku bitaro by’Akarere by’i Remera-Rukoma gusuzumisha niba nta bikomere by’imbere mu mubiri umwana yavanye ku ishuri, bahavana icyemezo kivuga ngo ’ikizamini cyasuzumaga niba habayeho kuva k’ubugabo, kigaragaza ko nta byabayeho (reveals no positive findings).

Icyakora, kubera kugendesha amaboko ubwo yarimo kwigaragagura hasi akubitwa, byabaye ngombwa ko umubyeyi wa Habumugisha amugurira ibinini na pomade, amara iminsi ine avurwa.

Habumugisha yasibye ishuri iminsi ibiri, kuko ku wa Gatanu tariki 20 Nzeri 2024 bari bagiye kuri RIB no kwa muganga, bucya ari ku wa Gatandatu no ku Cyumweru, ku wa mbere tariki 23 Nzeri na bwo arasiba, asubira ku ishuri ku wa Kabiri tariki 24 Nzeri yakize kandi ari we ubyishakiye(amakuru twahawe na se).

Hagati aho, ubwo bari bavuye kwa muganga no kuri RIB ku wa Gatanu tariki 20 Nzeri 2024, mu masaha y’umugoroba Umuyobozi w’ishuri hamwe n’abarezi bari bafatanyije guhana Habumugisha, bamanutse umusozi wa Kigusa bajya kureba uwo munyeshuri iwabo, bahava basabye imbabazi ababyeyi ndetse bumvikanye n’uko bafatanya kumurera, ariko nyuma yaho ngo baguye mu kantu bumvise ko uwo muyobozi w’ishuri n’abo bari kumwe bafunzwe.

Se wa Habumugisha, Kanani Athanase, agira ati "Imbabazi nemeye kuzibaha, na bo bemeye ikosa bakoze bose badusaba imbabazi, jye numva ko n’ubu bagombye gutaha bagakomeza akazi ko kwigisha, baturerere abana rwose ntacyo dupfa."

Ababyeyi ba Habumugisha hamwe n’abarezi be bavuga ko imyitwarire ye mu gihe cyo guhanwa ari yo yatumye inkoni(umunyafu) ifata hamwe na hamwe ku bindi bice by’umubiri bitari ikibuno, aho se agira ati "Iyo njya kumukubita araguruka", nyina na we ati "Sinjya mushyikira", mwarimu ati "aranipfisha burundu", ndetse n’umunyeshuri mugenzi we akavuga ko kumuhana biba bimeze nk’intambara.

Umwarimu wigisha kuri iryo shuri avuga ko guhanwa kwa Habumugisha kudatandukanye n’uko abandi bahanwa, ahubwo ikibazo ngo cyakomejwe n’abantu bakabya bashaka abasomyi benshi b’ibinyamakuru byabo(views), ndetse n’umuntu woheje ababyeyi kujya gutanga ikirego batabanje kubiganiraho n’ishuri.

Undi mubyeyi urerera kuri iryo shuri ryigamo abana 1,188 kugeza ubu (ugize Komite y’ababyeyi), avuga ko kubera ingamba zafashwe n’ubuyobozi bwaryo, byatumye abana hafi ya bose batsinda ibizamini bosoza amashuri abanza (P6) n’icyiciro rusange (S3), umwe mu bari abakandida b’ibyo bizamini ni we wenyine utaratsinze.

Uwo mubyeyi avuga ko abarezi bahagamagaye itangazamakuru, byatewe no kutishimira umuyobozi w’ishuri ngo wahoraga abasaba kuzuza neza inshingano kugira ngo bagere ku musaruro wifuzwa, bakumva bibagoye bakamwinuba.

Ese ubundi inkoni(umunyafu) mu guhana umwana uremewe?

Abakozi b’inzego zitandukanye bavuga ko amategeko atabyemera kugira ngo hatabaho kugwa mu cyaha cyo gukubita no gukomeretsa cyangwa guhohotera umwana, ariko ubusanzwe abana banyuzwaho umunyafu(ku kabuno) nk’uko ababyeyi n’abarezi bo ku mashuri atandukanye twaganiriye babisobanura.

Mu nama y’Umushyikirano wa 2018, Perezida wa Repubulika, Paul Kagame, yavuze ko umwana ufite imyitwarire mibi akwiye guhanwa, byaba ngombwa akanyuzwaho akanyafu kugira ngo ababyeyi birinde kurerera Igihugu ibirara.

Yagize ati "Kera umubyeyi yafataga umunyafu agatsibura. Ubu mwagiye muri ya majyambere ari aho abyinirira buri kintu cyose…akana katumva kigize ikirara uragatsibura naho iyo ukaretse gutyo wororamo ikirara. Murashaka kubyara no kurera abana b’ibirara mukabana na bo…? Ni ko mushaka kurerera Igihugu!”

Turacyagerageza kumva icyo Urwego rw’Igihugu rushinzwe Ubugenzacyaha (RIB) ruvuga ku byaha byafungishije Umuyobozi w’ikigo cya GS Rukaragata, Umunyamabanga wacyo, Umwarimu hamwe na Animateur.

Umwe mu miryango y’abaregwa yabwiye Kigali Today ko Urukiko rw’Ibanze rwa Gacurabwenge rwafunguye abo bakozi b’ishuri rya Rukaragata uko ari bane ku wa Kane tariki 10 Ukwakira 2024, nyuma yo guhanishwa igifungo cy’amezi 5 gisubitse n’ihazabu y’amafaranga ibihumbi 100Frw buri muntu.

Abaforomo n’abaforomokazi bavuga ko ari bacye ugereranyije n’umubare w’abarwayi bashinzwe kwitaho

Uwo muforomokazi agira ati “Ku Cyumweru njya gusenga, nshobora kudomoka nkajya gusura abantu ariko sinjya kure kuko nkora njyenyine, nabe n’abaforomokazi bakora muri Leta bo bahabwa amasaha y’izamu n’aya ‘recuperation’, bashobora kugira aho bajya."

Uwo muforomokazi avuga ko ku bw’amahirwe abana be barakuze kandi nta handi afite urugo, ariko akibaza uburyo umuforomo cyangwa umubyaza waba afite urugo ashobora kurubonekamo bikamuyobera.

Umuyobozi wa Sendika y’Abaforomo n’Ababyaza, André Gitembagara, avuga ko mu bibazo bafite hari icyuho kinini giterwa n’uko abaforomo n’ababyaza ari bake cyane mu Gihugu, bigatuma abahari bakora amasaha menshi ku munsi kugira ngo bazibe icyuho cy’abadahari.

Gitembagara ati “Urebye umubare w’Abaforomo, Abaforomokazi n’Ababyaza bari mu kazi, turakabakaba hafi ibihumbi 13, ariko urebye abakenewe mu Gihugu ntabwo bajya munsi y’ibihumbi 20, ubibona ugeze mu bigo nderabuzima aho usanga umubyaza umwe uri ku izamu ari bubyaze ababyeyi nka batatu muri iryo joro."

Ati "Wareba ukabona umuforomo cyangwa umuforomokazi ari ku izamu wenyine nijoro, kandi ari bukore akageza saa sita z’amanywa, akajya kuryama akaza kugaruka kurara izamu. Ubwo buryo dukoreramo bujyanye n’ubucye bwacu, ni cyo kibazo cya mbere kidukomereye."

Avuga ko ikibazo kigaragarira mu bijyanye n’ireme rya serivisi abaforomo n’ababyaza batanga ku bigo nderabuzima no mu bitaro, aho abarwayi bajya binubira gutinda kwakirwa na muganga.

Ikibazo cya kabiri bafite ngo ni ikijyanye n’umushahara muto utuma abiga muri iki gihe badashishikarira ubuforomo n’ububyaza, aho abafite impamyabumenyi y’icyiciro cya kabiri cya Kaminuza (Bachelor’s degree) bahembwa umushahara utageze ku bihumbi 200Frw/kwezi, uyu ukaba wari ugezweho mu myaka hafi 10 ishize.

Ikindi kibazo ni ikijyanye n’uko hari abakorera kure y’ingo zabo, "aho usanga umuforomo, umuforomokazi cyangwa umubyaza akorera i Rusizi afite urugo i Kigali."

Gitembagara ati "Hashize nk’imyaka itanu tubivuga, ubundi ’mutations’ mu baganga ntizabagaho, wowe tekereza ’murashakanye nk’umugore n’umugabo, noneho umwe agiye hariya undi agiye hariya, ubwo se mwamenyana mute!"

Gitembagara avuga ko umushahara muto abaforomo n’ababyaza bahabwa, na wo utuma bajya gucumbika ahantu hahendutse kure y’aho bakorera, nyamara abarwayi bagombye kuba bafite muganga hafi yabo, cyangwa akoroherezwa kubageraho byihuse.

Iki kibazo ngo kirushaho gukomerera abakorera mu cyaro, bafata urugendo rurerure rw’amaguru buri munsi bajya cyangwa bava ku bigo nderabuzima no ku bitaro. Sendika bahuriyemo ikaba ikomeje kubasabira ubufasha bwiyongera ku mushahara.

Hari n’ikibazo cy’uko mu baforomo n’ababyaza bose mu Gihugu, 60% ari ababyeyi, bakaba barushaho gukomererwa n’akazi iyo atwite cyangwa yasize abana bato mu rugo. Kubera iyo mpamvu barasaba koroherezwa no kubakirwa amarerero ku bitaro no ku bigo nderabuzima aho bakora.

Gitembagara avuga ko Minisitiri w’Abakozi ba Leta n’Umurimo(MIFOTRA), yigeze gusobanura ibi bibazo by’Abaforomo n’Ababyaza mu Nteko Ishinga Amategeko, "barabyakira ariko ntabwo byarenze aho."

Mu Ihuriro rya 10 ry’Urugaga rw’Amasendika y’Abakozi mu Rwanda(CESTRAR) ryateranye tariki 4-5 Ukwakira 2024, Minisitiri w’Abakozi ba Leta n’Umurimo, Amb. Christine Nkulikiyinka, yavuze ko Leta y’u Rwanda izahanga imirimo ihoraho nibura miliyoni imwe n’ibihumbi 250 mu gihe cy’imyaka itanu iri imbere.

Uretse mu buforomo n’ububyaza hakiri icyuho cyo kubura abakozi, ahandi Leta ikunze kugaragaza cyane cyane ni mu bijyanye n’imyuga na tekiniki zitandukanye zo gukora ibintu bikenerwa mu buzima bwa buri munsi.

Abana 6 biga mu Ishuri Ribanza rya Cyobe mu Murenge wa Mbuye mu Karere ka Ruhango baherutse kugaragara bafata ibendera ry’Igihugu ubwo ryari rigiye gutwarwa n’umuyaga

Abo bana biga mu Ishuri ribanza rya Cyobe mu Murenge wa Mbuye, Akarere ka Ruhango, baherutse kurwana n’umuyaga waje ku kigo cyabo, tariki 02 Ukwakira 2024 ugasakambura igisenge cy’amashuri, unashaka kugwisha ibendera, ariko abo bana bihutira kurisigasira ngo ritagwa, kuko ngo bakekaha ko riguye hasi, Igihugu cyaba gitakaje icyizere.

Ihuriro HOSO rivuga ko ubutwari bw’abo bana bukomoka ku nyigisho z’Uburere mboneragihugu n’Ubutore baboneye mu kigo bigamo no mu miryango yabo, bikaba kandi ngo bigaragaza imiyoborere myiza y’Amashuri.

Itangazo ry’iri Huriro ry’Abayobozi b’Amashuri rigaragaza ko icyo cyemezo cyafashwe ubwo hasurwaga ishuri ribanza aba bana barererwamo, maze ryiyemeza ko uko ari 6, bazafashwa mu myigire yabo kugeza barangije amashuri yisumbuye.

Aba bana barwanye n’umuyaga wari ugiye kugusha ibendera ry’Igihugu

Umwana witwa Gisubizo Ernest wiga mu mwaka wa Kane w’amashuri abanza, ni we bagenzi be babonye yiroha mu mvura, atangira kurwana n’igiti kiriho ibendera, baramusanga bihutira kuramira igiti ririho kugira ngo kitagwa hasi.

Gisubizo yagize ati “Niyumvishaga ko ibendera riguye hasi Igihugu cyaba gitakaje icyizere, mpitamo kujya kurifata, rirananira na bagenzi banjye baza kumfasha kugeza igihe mwarimu aziye turaryururutsa turaribika."

Mu bakurikiye Gisubizo kuramira ibendera rw’Igihugu, harimo umwana w’umukobwa witwa Akimanimpaye Josiane wiga mu mwaka wa gatandatu w’amashuri abanza, uvuga ko yabikoze abona ari ubwitange nka bagenzi be banga gusuzuguza Igihugu.

Polisi y’Igihugu n’ubuyobozi bw’Akarere ka Ruhango baherutse guhemba aba bana

Ati “Numvaga ko ibendera nirigwa hasi ubukoroni bwongera bukagaruka, mpitamo kujya gufasha abandi. Ndashishikariza abana bagenzi banjye gukurana umuco wo gufashanya no gukorera hamwe, dukunda Igihugu".

HOSO itangaje ko izafasha aba bana kwiga nyuma y’uko Akarere ka Ruhango hamwe n’Ubuyobozi bwa Polisi y’Igihugu, na bo bagiye kubashimira ku wa Mbere tariki 07 Ukwakira 2024.

Aho ibendera ryari riri hashyizweho icyuma gishyashya

HOSO ivuga kandi ko izakorera ubuvugizi andi mashuri kugira ngo ubuyobozi bwayo bukomeze guteza imbere indangagaciro z’ubutwari, uburere, ubumenyi no guteza imbere Igihugu.

Iri Huriro risaba abarimo gufasha aba bana hamwe n’undi wese ubikunze, kunganira gahunda y’ifunguro ry’abana ku ishuri yiswe ’Dusangire Lunch’, kuko ngo na byo bigamije gufasha abana kuzaba intwari.

Itangazo rigira riti "Umusanzu wose umuntu yatanga, uko waba ungana kose, ni ishimwe rikomeye, ukaba wawunyuza kuri konti ya Mobile Money y’Umwarimu SACCO *182*3*10# ugakurikiza amabwiriza."

Inkuru bijyanye:

Ruhango: Bahembye abanyeshuri bafashe ibendera ry’Igihugu ngo ritagwa

MINISANTE yatangaje ko mu Rwanda hageze imiti n’inkingo byo guhangana na Marburg

Minisitiri w’Ubuzima, Dr Sabin Nsanzimana, avuga ko u Rwanda rwaraye rwakiriye inkingo za mbere za Marburg, zatanzwe na Leta zunze ubumwe za Amerika(USA).

Dr Nsanzimana yavuze ko urukingo bagiye guha Abanyarwanda rwasuzumwe neza, kandi rwizewe ko nta ngaruka ruzagira ku bakingirwa.

Ati “Uru rukingo rwa Marburg mu nkingo zose zimaze igihe zikorwa, ni rwo ruteye imbere kurusha izindi zose. Rwarakoreshejwe muri Uganda mu mwaka ushize, rwakoreshejwe muri Kenya no muri Leta Zunze Ubumwe za Amerika mu Mujyi wa Maryland.”

MINISANTE ivuga ko kugeza kuri uyu wa Gatandatu abantu 46 ari bo bagaragaje ko barwaye Marburg, muri bo 29 bakaba bari kuvurwa, mu gihe abandi 12 bamaze kwitaba Imana bazira iyo ndwara, abandi batanu barakize.

Minisitiri w’Ubuzima, Dr Sabin Nsanzimana, yagiranye ikiganiro n’abanyamakuru kuri iki Cyumweru cyibanze ku ngamba ziriho zo kurwanya icyorezo cya Marburg

Minisitiri w’Ubuzima avuga ko hari n’imiti ibiri yabonetse yo guca intege virusi ya Marburg ikanubaka ubudahangarwa bw’umubiri, na yo ikaba yatanzwe na Leta Zunze Ubumwe za Amerika nubwo ngo atari myinshi, ariko agashima abafashije kubona izo nkingo n’imiti yo korohereza abarwayi.

Dr Nsanzimana avuga ko akurikije uko ibintu byifashe kugeza ubu, asanga hari icyizere cy’uko virusi ya Marburg izarangira vuba, ahereye ku rugero rw’abantu batanu bamaze gukira iriya ndwara.

Ati “No kuri iki Cyumweru hari abandi bantu duteganya ko bari bukire, basezererwe batahe”.

Impungenge ni nyinshi ku bagenda mu modoka rusange mu kwirinda Marburg

Umugenzi witwa Munyemana Jean Pierre waganiriye na Kigali Today, wari muri izo modoka, agira ati "Kubera ko tugenda dufashe aho abandi bafashe, bikiyongeraho ko izi modoka zijyamo abantu benshi bagenda begeranye cyane bakoranaho, ntabwo wabura kuhandurira."

Ati "Nta muntu bidateye impungenge, dore nk’aha ndahafashe nsizeho icyuya, n’undi araza ahafate, byanze bikunze arandura (indwara), abantu ni ugushyiramo bake ndetse hakaza izindi ngamba, niba ugiyemo ugakaraba intoki."

Mukeshimana Madeleine na we wari uvuye muri gare yo mu Mujyi yerekeza i Kagugu muri Kinyinya, asaba ko abagenda bahagaze baba babyihoreye muri iyi minsi, kugira ngo habanze hafatwe izindi ngamba.

Ati "Aha kuri ibi byuma umuntu aba afite ibyuya mu ntoki agakoraho, kandi na byo ari amatembabuzi yanduza, ari abirinda bashobora gushyiramo wenda iyo sanitizer (umuti wica virusi) umuntu akayihanaguza mu gihe yinjiye muri bisi, cyangwa wenda bagahitamo gushyiramo abantu bagenda bicaye gusa."

Shoferi w’iyo modoka izwi ku izina rya Shirumuteto cyangwa Yutong, avuga ko we aba yirinze kuko nta muntu wundi ukora kuri ‘volant’ ye, kandi ngo aba yabanje kuhatera umuti, akaba yizeza ko agiye kuwusabira n’abagenzi atwara.

Ntabwo birimo korohera ba nyirimodoka zitwara abagenzi mu buryo bwa rusange kugabanya umubare w’abazigendamo, kuko ngo bishobora kubahombya bitewe n’ikiguzi batanga ku kwita kuri iyo modoka, mazutu zinywa hamwe no guhemba abakozi.

Umunyamabanga Uhororaho muri Minisiteri y’Ibikorwa Remezo (MININFRA), Fidèle Abimana, avuga ko bagiye gushyiraho amabwiriza yo kwirinda Marburg, ariko adahuye neza neza nk’ayo kwirinda Covid-19.

Abimana yagize ati "Ibijyanye no kwegerana kw’abantu muri Yutong, ni ikibazo gikwiye kurebwaho, turimo turashyira hamwe amabwiriza tugomba guhuza na Minisiteri y’Ubuzima, gusa Covid-19 na Marburg birandukanye, ntabwo rero wavuga ngo turakora copy&paste, nitubisoza turaza kubitangaza."

Abimana avuga ko ba nyirimodoka zitwara abantu benshi, cyane cyane abagenda bahagaze begeranye kandi bafashe ku byuma, ngo bagomba gufatanya na Leta guhangana n’ibibazo bireba ubuzima bw’abantu.

Geldof amaze imyaka 10 yohereza mu Rwanda imishwi yaturagiwe mu Bubiligi

Imurika rya VIV Africa ryahoze ryitwa ’Poultry Africa’, ribereye i Kigali ku nshuro ya kane, rikaba ryarahurije hamwe aborozi b’inkoko n’inka, abahinzi b’imboga n’imbuto hamwe b’abahanga mu kubiteza imbere bavuye mu bihugu 35 byo hirya no hino ku Isi.

Umubiligi witwa Pieter Geldof worora inkoko, yaje muri iyi nama n’imurikabikorwa (Expo), azanye imishwi ibihumbi bitanu izafasha abaturage b’amikoro make kurwanya imirire mibi.

Geldof umaze imyaka 10 yohereza mu Rwanda imishwi y’inkoko zitera amagi, avuga ko yagiye asura abaturage agasanga hari abashobora korora ariko badafite igishoro cyo kugura imishwi kugeza ubu igurwa amafaranga 1,350Frw (buri mushwi umaze umunsi umwe uturazwe).

Abatuye mu midugudu ya Gikomero na Karama bahawe imishwi 5000

Yagize ati "Na Minisitiri w’Ubuhinzi n’Ubworozi yabivuze ko 20% by’abaturage badafite ubushobozi bwo kwihaza mu biribwa, ndatekereza ko iyi ari nkunganire nziza ivuye hanze duhaye abaturage."

Umuyobozi w’Ikigo Agromex gikwirakwiza imishwi mu Rwanda, Dr Cesar Nsengiyumva, avuga ko iyahawe abaturage b’i Karama na Gikomero, izaba yatangiye gutanga amagi nyuma y’amezi ane n’igice, kandi ko bagiye gukurikirana izo nkoko kugira zitagira ibibazo.

Iyi midugudu yajyanywemo abahoze batuye ahashyira ubuzima bwabo mu kaga, isanzwe yarubatswemo ibikorwa remezo bifasha mu bworozi bw’inkoko, mu rwego rwo kurwanya imirire mibi.

Uwizeye Beata, uyobora Koperative yorora inkoko muri Gikomero, avuga ko izigera ku 2500 bahawe ziyongereye ku 2400 bari basanganywe, zigiye gutuma bavugurura imibereho.

Ni imishwi yitezweho gukemura ikibazo cy’imirire mibi mu gihe izaba imaze gukura

Buri muryango mu 112 ituye muri uwo mudugudu, wari usanzwe uhabwa amagi 10 ku kwezi, hanyuma bakagabana amafaranga y’inyungu buri mwaka yavuye mu kugurisha amagi, ariko ngo ntabwo byari bihagije.

Umuyobozi wa Koperative y’i Karama, Claver Habamenshi, we avuga ko inkoko bari barahawe zimaze imyaka hafi 2 zishwe n’indwara, nyamara ngo zarwanyaga imirire mibi cyane cyane mu bana.

Habamenshi agira ati "Inkoko zigihari hari abana zavanye mu mirire mibi nabonye abagera kuri 5, ariko n’abandi kuba batarahuraga n’icyo kibazo ni uko baryaga amagi, ubu turamutse tugize uhura n’icyo kibazo ntabwo twabona amagi yo kumwondora mbere y’uko izi nkoko 2500 zikura."

Umunyamabanga wa Leta muri MINAGRI, Eric Rwigamba atangiza imurika rya VIV Africa

Umunyamabanga wa Leta muri Minisiteri y’Ubuhinzi n’Ubworozi (MINAGRI), Eric Rwigamba, avuga ko hari abaturage batabasha kwihaza mu biribwa kubera kubura ubushobozi, ariko hakaba n’ikibazo cy’imyumvire y’abafite amatungo ariko badashora gufungura ibiyakomokaho.

Ati "Muri rusange abantu benshi mu Rwanda bashobora korora inkoko cyangwa urukwavu, umaze kubona ayo magi, iyo uteye indi ntambwe ukayagaburira umuryango wawe murushaho kugira ubuzima bwiza."

Rwigamba avuga ko bazaganira n’abafatanyabikorwa bitabiriye imurika rya VIV Africa, kugira ngo hashakwe ibiryo by’amatungo mu buryo burambye bwatuma ibiyakomokaho na byo birushaho kuboneka bidahenze.

Uru rusengero rwari ruherereye i Kanombe mu Mujyi wa Kigali ruherutse gusenywa kubera kutuzuza ibisabwa

Ntabwo ari rwo rwonyine kuko mu mpera za Kanama 2024, Minisiteri y’Ubutegetsi bw’Igihugu(MINALOC) yatangaje urutonde rw’inzu zasengerwagamo zigomba gusenywa ruriho izigera kuri 336, bitewe n’aho zikorera cyangwa uburyo zimeze, "bishyira ubuzima bw’abantu mu kaga."

MINALOC yavugaga ko igenzura ryasanze mu Rwanda hose hari inzu zisengerwamo 14,094, muri zo hakaba harafunzwe izigera kuri 9,880 kugera mu mpera za Kanama 2024, kubera kutuzuza ibisabwa, harimo izirenga 600 zitagomba kongera gufungurwa, zirimo 336 zigomba gusenywa burundu.

Minisitiri Jean Claude Musabyimana yagize ati "Ntabwo ari ibintu dukora mu buryo buhishe, na ba nyirazo murabivugana akakubwira ati ‘nanjye rwose iyi nzu ndumva umuti ari uko nayireka, ngategereza igihe nzakorera umushinga wo kubaka inzu nzima nahurizamo abantu.”

Iteka rya Minisitiri No 03/CAB.M/019 ryo ku wa 15/4/2019, rishyiraho amabwiriza ajyanye n’imitunganyirize y’imijyi n’imyubakire, riteganya uburyo inyubako isengerwamo igomba kuba yubatse, ibikoresho biyigize ndetse n’aho igomba kuba iri, akaba ari byo inzego zivuga ko zirimo kugenzura kugira ngo urusengero rwemererwe kwakira abantu.

Amabwiriza ari mu ngingo ya 15 y’iri teka ateganya ko imyubakire igomba kubungabunga ubuzima rusange bw’abaturage, gushimangira umudendezo n’imibereho
myiza y’abaturage hashyirwaho uburyo
bugena bukanagenzura ibishushanyo
by’inyubako.

Iyi ngingo kandi iteganya ko habaho igenzura ry’ubuziranenge bw’ibikoresho byubakishwa, kunoza isuku, gushyiraho uburyo bwo kumurika no kubona umwuka bukwiye, gufata neza ingufu no kwirinda inkongi z’umuriro, kwirinda ibiza bishingiye ku miterere y’ahantu, ku nyubako n’ibikorwa mu Rwanda.

Ingingo ya 16 y’iri teka ikomeza ivuga ko ibisabwa by’ibanze bijyanye n’imyubakire bigomba gukurikizwa mu gushushanya, gutegura umushinga w’inyubako no kuyubaka nk’uko biteganywa mu mabwiriza agenga imyubakire.

Muri ibyo bisabwa hari ukuba inyubako ifite imitere ihamye, ikomeye kandi ifite uburambe, yujuje ibisabwa mu mikoreshereze, irindiye abayirimo umutekano no guhangana n’ibiza.

Hari ukubahiriza amahame yo kurengera
ibidukikije, kuba nyabagendwa, imikoreshereze myiza y’umutungo
kamere, gukoresha neza ingufu z’amashanyarazi n’ingufu karemano, hamwe n’uburyo bunoze bwo gufata neza amazi y’imvura n’atemba.

Inyubako kandi igomba kugira urumuri n’ubuhehere karemano, kurangwa n’isuku n’isukura, hamwe no gushimangira uburambe binyuze mu
kwitabwaho.

Ingingo ya 17 y’iri teka ivuga ko ikoreshwa ry’ibikoresho by’ubwubatsi
bikomoka imbere mu gihugu, bitabangamira ibidukikije kandi bikenera ingufu nkeya mu kubikora no kubigeza aho bikenewe, rigomba kwibandwabo hakurikijwe ibikubiye mu mabwiriza y’imyubakire.

Ubusanzwe abagenzura insengero bajyaga bibanda ku bwiherero busukuye kandi buhagije, parikingi, umurindankuba, ibirinda urusaku kumvikana hanze y’urusengero, uburyo bwo gufata amazi yakoreshejwe n’ay’imvura, ubukarabiro, kwirinda inkongi hamwe no kuba urusengero rwinjiramo umwuka n’urumuri bihagije.

Guherekeza abishwe n’ibyorezo bisaba kwigengesera kugira ngo batanduza abandi

Itangazo rya MINISANTE rivuga ko iyo mihango izajya ibera ku bitaro ahabugenewe, kandi yitabirwe n’abantu bagenwe.

Iri tangazo rivuga ko igihe uwapfuye yazize Marburg, nta kiriyo gikorwa gihuza abantu benshi mu rugo
kugira ngo hirindwe ikwirakwira ry’icyorezo ku bagize umuryango n’ababatabara, kandi ko gushyingura uwazize Marburg byitabirwa n‘abantu batarenze 50.

Mu rwego rwo kwirinda ubucucike mu mavuriro, muri iyi minsi, gusura abarwayi mu mavuriro yose bibaye bisubitswe mu gihe cy’iminsi 14, umurwayi akaba yemerewe kugira umurwaza umwe ushobora gusimburwa.

Amavuriro yose asabwa kugena uburyo bwihariye bwo kwakira abaje bagaragaza ibimenyetso bisa n’ibya Marburg, hakoreshwa uburyo bwo kwirinda bwagenwe bwitwa “IPC”.

Abaturarwanda bose barasabwa gukomeza imirimo yabo nk’uko bisanzwe ariko bakita ku isuku no gukaraba intoki n’amazi meza n’isabune.

MINISANTE isaba abantu kwirinda kwegerana cyane no gukora ku muntu wagaragaje ibimenyetso, kandi bakagira umuco w’isuku harimo no gukaraba intoki.

Ibimenyetso by’ingenzi biranga
uburwayi bwa Marburg birimo umuriro ukabije, kubabara umutwe bikabije, kubabara imikaya, gucibwamo no kuruka.

Hagati aho MINISANTE yatangaje ko kuri iki Cyumweru abandi bantu babiri bitabye Imana bazize icyorezo cya Marburg, bakaba biyongereye ku bandi batandatu bari bapfuye mbere yaho.

Minisitiri w’Ubuzima, Dr Sabin Nsanzimana

Minisitiri w’Ubuzima, Dr Sabin Nsanzimana, yabitangaje mu kiganiro yagiranye n’Itangazamakuru kuri iki Cyumweru tariki 29 Nzeri 2024, avuga ko imibare y’abarwaye ikiri 20 ndetse n’abahitanywe n’iyi ndwara ari batandatu kugeza uyu munsi.

Yagize ati "Dufite abahuye n’abarwayi benshi, hafi 300 bashobora kwiyongera, mushobora kuba mwarahuye mukaramukanya cyangwa mubana mu nzu, ntabwo turarangiza kumenya aho ubwo burwayi bwaturutse, icyihutirwa ni ukumenya aho ubwo burwayi bugeze tukabuhagarika."

Minisitiri w’Ubuzima avuga ko abahuye n’abarwayi barimo gukurikiranwa, bagapimwa inshuro zirenze imwe, hakaba n’abo bavana aho bari bakabajyana ahandi ku mpamvu zo gushaka ibimenyetso vuba, kuko ngo iyi ndwara yigaragaza mu gihe kibarirwa hagati y’iminsi 2-21 nyuma yo gukora ku matembabuzi y’uyirwaye.

Marburg ifite ubukana bwo kwica uyirwaye ku rugero rubarirwa hagati ya 25%-90% bitewe n’uburyo uwo muntu yihutishijwe kugera kwa muganga, agahabwa imiti itandukanye, kuko nta muti wihariye iyi virusi irabonerwa.

Mu buryo yandura, hari ugukora ku matembabuzi y’uyirwaye, ntabwo yandurira mu mwuka, uwafashwe akaba atangira ababara umutwe, ahinda umuriro, acibwamo kandi aruka.

Minisitiri w’Ubuzima avuga ko hataragera igihe cyo gufata ingamba zidasanzwe, agasaba abantu kudakuka umutima kandi bagakomeza imirimo nk’ibisanzwe, kandi ngo barimo kwihuta cyane kugira ngo babashe guhagarika ikwirakwira ryayo.

Dr Nsanzimana avuga ko buri mugoroba bagiye kujya batangaza aho bageze bahangana na Marburg kugeza ubu bataramenya aho yaturutse n’igihe umuntu wa mbere mu Rwanda yaba yarayirwaye.

Ishami ry’Umuryango w’Abibumbye rishinzwe Ubuzima ryizeza u Rwanda ko rifite ibikoresho byo guhagarika Marburg vuba bishoboka rishingiye ku buryo ryagiye rirwanya iyo ndwara mu bindi bihugu aho yagiye ivugwa.

Virusi ya Marburg iherutse kumvikana mu Rwanda, imaze guhitana bamwe, abandi bararwaye

Iyi Ambasade yavuze ko serivisi zose zituma abantu bahura n’abakozi bayo,
zirimo izihabwa abafite ubwenegihugu bwa Leta zunze Ubumwe Amerika ndetse n’ibazwa (interviews) ku bashaka kujya muri icyo gihugu, zibaye zihagaze.

Abakorera iyo Ambasade mu Rwanda basabwa gukora akazi kabo bifashishije ikoranabuhanga kuva ku wa Mbere tariki ya 30 Nzeri kugeza ku itariki ya 4 Ukwakira 2024.

Ambasade ya Amerika(USA) yagize iti “Guverinoma y’u Rwanda yemeje ko hari abarwaye Marburg bari kwitabwaho. Bitewe n’uko iyi ndwara ya Marburg yandura, Ambasade ya USA i Kigali yasabye abakozi bayo bose gukoresha iya kure guhera tariki 30 Nzeri kugera ku wa 4 Ukwakira 2024.”

Minisiteri y’Ubuzima mu Rwanda(MINISANTE) yatangaje ko abantu batandatu mu Gihugu bitabye Imana bazize Marburg mu gihe hari abandi 20 bayirwaye.

Minisitiri w’Ubuzima, Dr Sabin Nsanzimana, yavuze ko abahitanwe n’iyi ndwara hamwr n’abayanduye biganjemo abakozi bo kwa muganga cyane cyane ahavurirwa indembe.

Dr Nsanzimana yavuze ko abitabye Imana barimo guherekezwa mu cyubahiro hirindwa ko hagira abantu bahandurira.

Dr Nsanzimana asaba Abanyarwanda kudakuka umutima ariko bakubahiriza ingamba zo guhangana n’iki cyorezo.

Abahinzi barataka igihombo batewe no gutinda kw’imvura y’Umuhindo

Imvura yaguye mu mpera z’ukwezi kwa Kanama no mu ntangiriro za Nzeri 2024, yatumye bamwe bibeshya batera imbuto mu mirima, none ngo yamaze kwangirikira mu butaka, ahandi imyaka yumye irimo kumera, bikabasaba kuzashaka indi mbuto n’ifumbire ndetse no gushaka amafaranga yo guha abakozi.

Umuhinzi wo mu Karere ka Nyagatare witwa Mutamba Jane, avuga ko yateye ibigori kuri hegitare 12, aho buri hegitare iterwaho ibilo 30, buri kilo cy’imbuto y’ibigori kikagurwa Amafaranga y’u Rwanda 1,135Frw, akaba arimo kubara igihombo cy’imbuto yonyine kirenga amafaranga y’u Rwanda ibihumbi 408.

Mutamba ati "Hambere aho hari ikivura cyadushutse kiragwa ari cyinshi turatera, mu by’ukuri abantu bose barateye, imbuto imaze ibyumweru bibiri mu butaka itaramera, ikigori kiba cyamaze gupfa, ibishyimbo biba byahirimbiye, n’aho imvura izagwira kubona indi mbuto bizagorana."

Mutamba avuga ko bari bamenyereye gutera ibigori mu kwezi kwa Nzeri kuko imvura iba yatangiye kugwa, bikera muri Gashyantare mu mwaka ukurikiyeho, none ubu ngo baheze mu gihirahiro kuko babona ko nibongera gutera indi mbuto izera ikererewe.

Umuyobozi w’Urugaga rw’Abahinzi mu Rwanda rwitwa Imbaraga rukorera mu Karere ka Musanze, Gafaranga Joseph avuga ko n’ubwo imvura yaboneka imyaka izera itinze, bibe ngombwa kuyisarura itarera neza kugira ngo badakererwa gutera ibindi mu gihembwe cy’ihinga B.

Gafaranga yagize ati "Ibigori bizera bitinze bigire ingaruka ku guhinga ibirayi, kubera ko uko tubitera nyuma ni ko bizadusaba kubisarura hakiri kare bitarera neza, kugira ngo twubahirize igihe cyo gutera ibirayi."

Gafaranga avuga ko imvura iramutse iguye mu gihe kiratenze ibyumweru bibiri biri imbere, igihombo kitaba kinini cyane kuko ngo bazasaba inzego zibishinzwe kugurisha umusaruro w’ibigori bikiri bibisi badategereje ko byuma, mu rwego rwo kwirinda kugurisha ibyumye bitujuje ibilo hamwe no kuzahinga ibirayi batinze mu gihembwe cy’ihinga B (ubusanzwe ntabwo bajya barenza itariki 29 Gashyantare batarabitera).

Mu gutera ibigori muri iki gihembwe cy’ihinga A, Gafaranga we ngo yagize amakenga agenda ashyira ikimenyetso aho yashyize ifumbire, ku buryo bitazamusaba gushaka indi, icyo yahombye akaba ari imbuto n’amafaranga yahaye abakozi gusa.

Kigal Today, ntirabasha kuvugana na Minisiteri y’Ubuhinzi n’Ubworozi (MINAGRI), kugira ngo hagaragazwe ingamba bafashe zijyanye no gutinda kw’imvura y’Umuhindo wa 2024.

Ikigo gishinzwe ubumenyi bw’Ikirere, Meteo-Rwanda, kivuga ko imvura y’umuhindo wa 2024 yatinze kugwa bitewe n’uko inyanja ngari z’u Buhinde na Pasifika zivamo ibicu bitanga imvura ubu zidashyushye cyane, ku buryo ngo byazagira ingaruka zo kutabona imvura ihagije.

Gusa Meteo-Rwanda ikavuga ko imvura imaze igihe itegerejwe cyane n’abahinzi iteganyijwe gutangira kugwa mu mpera z’iki cyumweru (week-end) zihera ku wa Gatanu tariki 27 Nzeri 2024.

Umuyobozi Mukuru wa NISR, Yvan Murenzi, avuga ko bari basanzwe bakora ubushakashatsi bujyanye n’ibarura ry’abaturage, ariko uko ibihe bigenda bihinduka, ngo hari amakuru ahererekanywa mu buryo bw’ikoranabuhanga batajyaga bafata ngo basesengure.

Imibereho y’abantu bagenda bakira Amafaranga kuri Mobile Money, ingaruka z’imihindagurikire y’ibihe nk’imyuzure, amapfa, inkangu n’ibindi, amakuru anyuzwa ku mbuga nkoranyambaga n’andi, bigomba gusesengurwa hakamenyekana ingaruka n’impinduka byagize ku bantu no ku Gihugu muri rusange, nk’uko NISR ibisobanura.

Murenzi agira ati "Amakuru ava kuri serivisi za Mobile Money agenda agaragaza uko Ubukungu bugenda bwaguka, kandi ayo ni amakuru ahoraho menshi cyane, ibyo rero bisaba kunononsorwa neza no kumenya uko iterambere ry’Igihugu ryifashe."

Umuyobozi Mukuru wa NISR yakomeje asobanura ko amakuru kuri serivisi za Mobile Money, ayo ku mbuga nkoranyambaga, atangwa n’ibyogajuru bireba imihindagurikire y’ibihe hamwe n’andi, iyo nta bumenyi buhagije Igihugu kiyafiteho, ngo ashobora kutifashishwa neza.

Murenzi ati "Umuntu arimo kohereza ubutumwa(ni urugero), afite ibyo aguze kuri serivisi, haba harimo uruvange rwinshi cyane, kwitwararika kuyanonosora hamwe no kureba uko ahura n’ibyo tumenyereye, aho ni ho hitonderwa, ni amakuru y’abantu, kuba nta kuntu umuntu yayakoresha bitari byo ni ikintu twitwararika."

Umunyamabanga wa Leta muri Minisiteri y’Imari n’Igenamigambi (MINECOFIN), Tesi Rusagara, avuga ko amakuru ava ku Ibarurishamibare ari yo akwiye kuba ishingiro ryo gufata ibyemezo, guteza imbere politiki z’Igihugu hamwe no gutanga serivisi, niba Leta ishaka gukemura ibibazo by’abaturage.

Rusagara avuga ko Leta y’u Rwanda ikomeje kubaka ibikorwa remezo bigamije gukusanya, kubika no gusesengura amakuru, akajya ava mu bigo agera ku gikoresho cy’ikoranabuhanga buri muntu afite, bikamufasha kumva neza imikorere ya buri rwego rw’Igihugu.

Bimwe mu byo Ibarurishamibare ry’u Rwanda rimaze kugeraho nk’uko bisobanurwa n’uyu Munyamabanga wa Leta muri MINECOFIN, ni ukuba mu ibarura rusange ry’abaturage ryabaye muri 2022, harakoreshejwe amafoto y’ibyogajuru mu kumenya umubare w’ingo ziri mu Gihugu no korohereza abakarani b’ibarura kugabana imirimo.

Rusagara avuga ko Ibarurishamibare ryanafashije kumenya umubare w’abanyeshuri bitabira kwiga mu bigo byose biri mu Rwanda, bituma hafatwa ingamba zo gushakisha abarivuyemo no kubasubiza mu ishuri.

Umuyobozi w’Ishami rya BAD rishinzwe Ibarurishamibare, Dr. Babatunde Samson Omotosho, avuga ko amakuru asanzwe akusanywa hari byinshi asigaye akoreshwa mu igenamigambi ry’ibihugu, ariko hakaba n’andi menshi atari asanzwe ahabwa agaciro bagiye kwinjiza mu Ibarurishamibare.

Umwariwase ahinga ubwatsi bw’amatungo bitamusabye ubutaka

Uwitwa Felicia Umwariwase ukorera ikigo kidakoresha ubutaka mu guhinga ubwatsi bw’amatungo, kuko kibuhinga hejuru mu bimeze nk’ibikarayi bya aluminiyumu (aluminium) biterekwa kuri za etajeri(étagère), avuga ko ubuso bwa metero 3 kuri metero 4 bweramo ubwatsi buhagije inka 10 buri munsi.

Umwariwase avuga ko ikilo(kg) kimwe cy’ubwo bwatsi buhingwa ahatwikiriye(green house) kigurwa amafaranga y’u Rwanda kuva kuri 90Frw kugera ku 130Frw, kandi ko nyuma y’iminsi itatu ubwatsi bw’amafi n’inkoko buba bweze, mu gihe ubw’ihene, intama n’ingurube buboneka nyuma y’iminsi 6 butewe, ubw’inka bwo bukaboneka nyuma y’iminsi 7.

Umwariwase ati "Greenhouse ya metero 3 kuri 4 buri munsi uyisaruramo ubwatsi ubasha kugaburira itungo ryawe, iyo greenhouse iba ifite ubushobozi bwo kugaburira inka 10 ku munsi."

Ikigo Umwariwase akorera ni kimwe mu birenga 20 byaje kumurika ikoranabuhanga rihangana n’imihindagurikire y’ibihe, hamwe n’abandi bagaragaza uburyo bwo guhinga ukeza byinshi ku butaka buto, kurwanya indwara n’ibyonnyi by’ibihingwa hakoreshejwe imiti itarimo ibinyabutabire, ndetse no gutunganya ibiribwa byangirika vuba kugira ngo bibashe kubikwa igihe kirekire.

Aba bose bahuriye mu nama yiga ku ikoranabuhanga no guhanga udushya mu buhinzi iteraniye i Kigali kuva tariki 23-24 Nzeri 2024, ikaba yarateguwe n’Inama y’Igihugu y’Ubumenyi n’Ikoranabuhanga(NCST), ifatanyije na Minisiteri y’Ubuhinzi n’Ubworozi (MINAGRI), Minisiteri y’Uburezi(MINEDUC), Kaminuza y’u Rwanda n’izindi nzego z’Igihugu na mpuzamahanga.

Minisitiri w’Ubuhinzi n’Ubworozi, Dr Ildephonse Musafiri, avuga ko abahanga n’abashakashatsi bitezweho kugaragaza uko u Rwanda rwahangana n’ingaruka z’imyuzure, amapfa, indwara n’ibyonnyi ndetse no kugunduka k’ubutaka, kuko ari byo ngo bibangamiye iterambere ry’Igihugu no kwihaza mu biribwa.

Dr Musafiri ati "Turashaka kongera umusaruro uboneka kuri buri hegitare y’ubutaka buhingwa, turashaka kuhira kuko nta musaruro twabona muri iyi mihindagurikire y’ibihe hatariho kuhira, icya gatatu ni uko dushaka uburyo bwo kugabanya umusaruro wangirika nyuma yo gusarurwa."

Minisitiri w’Ubuhinzi n’Ubworozi, Dr Ildephonse Musafiri

Ati "Nta mpamvu yo guta igihe dusobanura ngo ’imvura yarabuze, ubushyuhe bwinshi, ibyonnyi birahari,..ahubwo ndifuza kumva uburyo twakomeza kugaburira abaturage bacu, uburyo umukamo wakwiyongera, uburyo amagi yakwiyongera, uburyo inyama zaboneka ku bwinshi n’ubwo hari ibyo bibazo by’ikirere."

Minisitiri w’Ubuhinzi n’Ubworozi avuga ko u Rwanda rufite amazi ahagije n’ubuso bwo bunini bukeneye kuhirwa burenga hegitare ibihumbi 500, ariko kugeza ubu ubwuhirwa bukaba butarenga hegitare ibihumbi 70, bitewe n’uko ibikorwa remezo byo kuhira bihenze cyane.

Dr Musafiri akaba yifuza ikoranabuhanga ryatuma igihugu gitangira kuhira bitagombereye kubaka ibyo bikorwa remezo bihenze.

Umunyamabanga Nshingwabikorwa wa NCST, Dr Eugène Mutimura, avuga ko mu mishinga 126 bateye inkunga, irenga 20 yahanze udushya kandi 15 muri yo ni ifite udushya mu bijyanye n’ubuhinzi n’ubworozi.

Dr Mutimura avuga ko iyo mishinga yahanze udushya irimo kwandikishwa mu bijyanye n’umutungo mu by’ubwenge, kandi yatangiye gukorana n’abahinzi hamwe n’inganda kugira ngo hatangire kubaho impinduka.

Dr Musafiri Ildephonse wa MINAGRI hamwe na Dr Eugène Mutimura wa NCST

I Kigali hateraniye Inama y’ikoranabuhanga no guhanga udushya mu buhinzi

Utwuma babambika kugira ngo babashe kumva

Mu 2023, nibwo Sabato yakiriwe n’Ikigo cy’Urubyiruko rufite ubumuga bwo kutumva no kutavuga (CJSM) kiri mu Karere ka Huye mu Murenge wa Ngoma, ubwo yari aje kwipimisha, gisanga adashobora kumva no kuvuga, kiramugumana.

Sabato ni umwe mu bana 133 bafite ubumuga bwo kutumva no kutavuga biga muri icyo kigo, aho babanza gufashwa kumenya amarenga no kwandika neza inyandiko isanzwe, mbere yo gutangira kwigana n’abandi badafite ubumuga.

Umuyobozi wungirije ushinzwe amasomo muri icyo kigo, Jean Paul Nshimiyimana, avuga ko kuva ku mezi atandatu y’amavuko y’umwana, umubyeyi we aba ashobora gukubita ku kintu gisakuza kugira ngo arebe ko umwana yikanga cyangwa ashyigukira hejuru.

Abana bafite ubwo bumuga barafashwa ugasanga bigana na bagenzi babo batabufite

Abandi kandi bagaragaza ko muri icyo gihe umwana aba amaze avutse, akaba yaba afite icyo kibazo uzamubwirwa no kujya inyuma ye ugashyiramo ikintu gisakuza nk’umuziki cyangwa ugashyiramo ikintu gifite ijwi rirerire ukabona ntacyo yikanze.

Nshimiyimana avuga ko hari n’abategereza igihe umwana atangirira kwiga kuvuga, aho uzagira ubumuga bwo kutumva no kutavuga amenyerwa ku gutangira ahamagara ’Mama’, mu gihe ubusanzwe atangira ahamagara ’Data, Baba cyangwa Papa’.

Umwana utazabasha kumva no kuvuga ngo ntashobora kwegura ururimi neza iyo ashatse kugira icyo avuga (kuko aba afite icyo bita inana), akaba akeneye kujyanwa kwa muganga, nk’uko Nshimiyimana abisobanura.

Umwarimu wigisha abanyeshuri bavanzemo abafite ubumuga n’abatabufite

Avuga ko ibitaro byakiriye abo bana batumva ntibavuge bihita bibohereza kuri CJSM, ahari imashini zipima ubwo bumuga, bakaba bahabwa udukoresho tubafasha kumva hamwe na serivisi z’uburezi, ariko bagafasha cyane utararenza imyaka itatu y’amavuko.

Frère (Fr) Pierre Claver Bizoza, ushinzwe gusuzuma amatwi muri icyo kigo, avuga ko nyuma yo gupima amatwi y’umwana ku mafaranga ibihumbi 16Frw, iyo basanze afite ubumuga basaba umubyeyi kumutegura kwiga muri icyo kigo n’ahandi bita ku bana bafite ibyo bibazo.

Fr. Bizoza avuga ko utwuma batanga duhenda, kuko agafasha kumva urusaku rw’ibintu ngo kagurwa amafaranga y’u Rwanda hafi miliyoni imwe, ariko mu gihe kongeweho igice gifasha kumva ijambo umuntu avuze ko kakagurwa Amayero ibihumbi bitandatu (akaba ahwanye n’Amafaranga y’u Rwanda hafi miliyoni 10).

Bafashwa kwiga imyuga idandukanye

Ibi ngo bisaba gushaka abaterankunga b’uwo umwana ufite ubumuga bwo kutumva no kutavuga, ababyeyi be bagasigarana inshingano zo kumwishyurira kuri iryo shuri yiga acumbikirwamo ku mafaranga ibihumbi 92Frw ku gihembwe.

CJSM ivuga ko abafite ubumuga bwo kutumva no kutavuga biga muri icyo kigo bafite ubushobozi bwo gukora neza ibikomoka ku bubaji, ku budozi, ku gufuma, ububoshyi no gutunganya imisatsi, ariko muri rusange abenshi ngo bakenera ababaha imirimo bakababura.

Ni mu gihe umushinga wa USAID wiswe "Feed the Future Rwanda Hanga Akazi (HA)" wizeza abafite ubumuga barangije amashuri yisumbuye asanzwe cyangwa ay’imyuga, ko uzabishyurira amahugurwa y’amezi atandatu bazahabwa mu bigo by’abikorera bizemera kubigisha ubuhinzi n’ubworozi hamwe no gutunganya ibibukomokaho.

Bimwe mu bikorwa n’abanyeshuri bafite ubumuga bwo kutumva no kutavuga

USAID ivuga ko iyi gahunda izamara imyaka itanu izafasha urubyiruko, abagore n’abafite ubumuga bagera ku bihumbi 23 kubona akazi kajyanye no gutunganya ibikomoka ku buhinzi n’ubworozi, hamwe no guhangira iyo mirimo abagera ku bihumbi 19.

Abemerewe guhatanira ubu bufasha ngo ni abarangije amashuri yisumbuye n’amakuru nyuma y’umwaka wa 2021, bazaba bariyandikishije ku rubuga rwa RDB rwitwa kora.rw.

Uwo mugenzi w’umugabo utashatse ko amazina ye atangazwa yagize ati "Nahagurutse iwanjye hafi aha saa saba n’igice, none dore saa munani n’igice zirageze tutarabona bisi itujyana mu Mujyi, birababaje cyane iby’imodoka."

Umubyeyi bari kumwe we avuga ko amaze ukwezi yaraje gutura ku Gisozi, ariko ngo arashaka gusubira i Nyamirambo aho yahoze akodesha, kuko ngo atajyaga amara iminota irenze itanu atarabona imodoka imujyana mu Mujyi.

Umunyamakuru wa Kigali Today yakomeje guhagarara ku cyapa, ku bw’amahirwe imodoka iboneka nka nyuma y’iminota 10, maze abagenzi bayinjiramo ibageza muri gare mu Mujyi ahaba hari bisi nyinshi ziparitse.

Izo bisi ziba ziri ku mirongo hakabanza imwe imwe, ariko na yo ikajya kuzura abagenzi barenga 80 hashize igihe kibarirwa hagati y’iminota 40 n’amasaha ane cyangwa atanu bitewe n’icyerekezo umuntu ajyamo, nk’uko umwe mu bashoferi bazo yabisobanuye.

Uwo mushoferi w’izigana muri Kicukiro avuga ko ashobora kumara iminota 30 abonye abagenzi nka 10 gusa, bigasaba byibura gutegereza amasaha ane kugira ngo abashe kuzuza umubare w’abo agomba gutwara.

Uwitwa Nshimiyimana Alpha yagize ati “Ni ko bimeze, muri gare ni ho abagenzi bamwe bari gutegerereza igihe kinini.”

Nshimiyimana yari amaze isaha n’iminota 20 irenga mu modoka itegereje kuzuza abagenzi bajya i Gikondo-Bwerankori, kandi yari itaragera igihe cyo guhaguruka kuko hari hakiri imyanya y’abagenda bicaye itaricaramo abagenzi, kugira ngo nyuma yaho hatangire kwinjira n’abagenda bahagaze.

Nshimiyimana avuga ko mu gitondo yategereje imodoka iva i Gikondo mu gihe kirenga amasaha abiri, ayibuze atega moto aza mu Mujyi kuri Banki, ashatse gusubirayo asanga atabona imodoka vuba ngo aze kongera kugaruka, ni ko gutega moto na none imusubiza i Gikondo hamwe n’iyongera kumugarura.

Nshimiyimana avuga ko nyuma yo gukora ingendo nyinshi kuri moto, yahisemo gutega imodoka imusubiza i Gikondo kuko amafaranga yamushizeho, ariko akaba yari afite impungenge z’uko ngo ashobora kwirukanwa ku kazi ka nimugoroba kubera gutinda mu modoka.

Yakomeje agira ati "Uyu munsi gahunda najemo byansabye amafaranga arenga ibihumbi bitandatu, kandi ku modoka ubwo nari gutanga nka 1700Frw abaye menshi, ubu rero mfite impungenge ko ndi bugirane ibibazo n’abo ku kazi, ubushize bari bagiye kunyirukana."

Nshimiyimana na bagenzi be bavuga ko uretse gutegereza amasaha menshi muri gare kugira ngo imodoka ibanze yuzure, hari n’isaha irenga bisi imara mu muhanda igenda ihagarara ku byapa, hakiyongeraho n’igihe ihagarikwa n’ibinyabiziga byinshi mu nzira.

Umusaza wageze mu bihugu by’i Burayi wari muri iyo modoka, avuga ko ahandi abagenzi baba bazi neza isaha bisi igomba guhagurukiraho n’igihe imara mu nzira, kugira ngo bubahirize gahunda bagiranye n’abantu.

Haba harimo igihombo kuri ba nyiri imodoka zigenda zitujuje abagenzi

Umwe muri ba nyiri imodoka zikorera i Kigali utashatse ko amazina ye atangazwa, avuga ko ziriya bisi ziba zaguzwe mu mafaranga y’inguzanyo, zikaba zinywa mazutu nyinshi, zikeneye kwitabwaho kandi abakozi bazikoresha bakeneye guhembwa, ku buryo guhagurutsa imodoka muri gare ituzuye abagenzi ngo kiba ari igihombo gikomeye.

Umukozi uhagarariye uwashoye imari mu kugura imodoka ati "Leta irashaka ko abagenzi babona imodoka nyinshi ntibatinde ku byapa no muri gare, nyamara biyibagiza ko izo modoka zisaba byinshi kandi nkunganire irimo kugenda ikurwaho."

Ati "Abagenzi bo muri Kigali ni nk’aho bakorera ahantu hamwe bagataha ahandi, bakaboneka amasaha make cyane mu gitondo na nimugoroba. Ku manywa usanga imodoka zigenda zirimo ubusa, kandi na mu gitondo imodoka irava i Kimironko yuzuye abagenzi yagera mu Mujyi ikagaruka itagira abantu."

Hari icyifuzo gitangwa n’abagenzi cyane cyane, cy’uko mu masaha ya ku manywa mu gihe abatega imodoka batakiri benshi, hajya hakoreshwa imodoka nto zitwara abantu bake, zuzura vuba kandi zitanywa mazutu nyinshi nka bisi nini.

Iki cyifuzo hamwe n’ibindi, umunyamakuru yabigejeje kuri Minisiteri ifite mu nshingano gutwara abantu n’ibintu(MININFRA), maze Umunyamabanga Uhororaho muri iyo Minisiteri, Fidèle Abimana, avuga ko bagiye kwicarana n’Umujyi wa Kigali hamwe n’Urwego Ngenzuramikorere, RURA, bakabishakira igisubizo vuba.

Abimana ati "Rwose turabikurikirana kuko serivisi nziza si uko abantu birirwa bicaye muri gare. Ubwo hagurwaga bisi z’inyongera kwari ukugira ngo abantu bagere iyo bajya bihuse, ubwo niba bitarimo kunozwa neza twaza kubiganiraho ku buryo twongera kubishyiramo ingufu."

Abimana avuga ko ikijyanye no gukoresha imodoka nto mu masaha abagenzi baba atari benshi, na cyo kiri mu byo bazaganiraho n’inzego zitandukanye hagamijwe kumenya uburyo byakorwa n’icyo bivuze mu myishyurire.

Minisitiri w’Intebe Dr. Edouard Ngirente mu muhango wo gutanga impamyabumenyi ku barangije kwiga muri RICA

Gahunda ya kabiri ya Guverinoma izamara imyaka itanu (2024-2029), yitezweho gukuba kabiri umusaruro w’ubuhinzi, hashingiwe ku buso bwuhirwa buzava kuri hegitari ibihumbi 71, zikagera kuri hegitare ibihumbi 131 zuhirwa.

By’umwihariko ibikorwa by’ubuhinzi bya Howard Buffet ubu bikorerwa mu Turere twa Bugesera (aho ishuri rikorera) na Nasho muri Kirehe hahoraga hibasirwa n’amapfa, ariko ubu hakaba ari ibigega by’imyaka kubera gahunda yo kuhira ku buso bunini.

Minisitiri w’Intebe, Dr. Edouard Ngirente, yashimiye ishuri RICA na Buffet warishinze, mu gikorwa cyabaye kuri uyu Gatanu tariki 20 Nzeri 2024, cyo gutanga impamyabumenyi ku nshuro ya kabiri ku banyeshuri 81 barangije kuryigamo muri 2024.

Uyu muhango witabiriwe n’abayobozi batandukanye

Aba baje biyongera kuri 75 bahawe impamyabumenyi ku nshuro ya mbere mu mwaka ushize wa 2023.

Dr Ngirente yagize ati "Mfashe uyu mwanya wo kugushimira nshuti yacu nziza, Howard Buffet ku bufatanye bwanyu na Leta y’u Rwanda. Duhaye agaciro umusanzu mutanga mu guteza imbere ubuhinzi, bimwe mu by’ingenzi biteza imbere umusaruro mbumbe w’Igihugu no kugabanya ubukene."

Dr Ngirente avuga ko muri 2050 u Rwanda ruzaba rufite ubuhinzi bugezweho butanga ibiribwa mu buryo burambye, kandi umusaruro ukazaba wariyongereye.

Dr. Ngirente na Dr Ron Rosati batanga impamyabumenyi ku munyeshuri urangije kwiga muri RICA

Avuga ko Inama mpuzamahanga nyafurika yiga ku biribwa iherutse kubera mu Rwanda, yagaragaje uko ubuhinzi burambye bukorwa, uburyo bwo kurumbura ubutaka, kubungabunga urusobe rw’ibinyabuzima no kongera ubudahangwa ku mihindagurikire y’ibihe.

Minisitiri w’Intebe avuga ko ishuri RICA ririmo gutoza abahanga bazashyira mu bikorwa izo gahunda, kandi ko adashidikanya ku bumenyi bahawe, akabasaba guhora bahanga udushya twafasha abahinzi bato kongera umusaruro no gufata neza ubutaka.

Uwitwa Rugenera Olivier wize ibijyanye no kuhira hamwe no gukoresha imashini, avuga ko abahinzi bazabona amakuru abafasha kongera umusaruro, haba mu kumenya aho bakoresha ifumbire n’ubwoko bw’iyo bakwiye gukoresha, hamwe no kubashishikariza guhinga ku buso kugeza ubu bukirimo gupfa ubusa.

Umuyobozi wa RICA, Dr Ron Rosati yasabye abarangije gufasha ubuhinzi bw’u Rwanda kugera ku musaruro wifuzwa

Umuyobozi wa RICA, Dr Ron Rosati, avuga ko ubuhinzi abanyeshuri bize buzafasha u Rwanda kongera umusaruro, ku buryo ibiribwa nibiboneka ku bwinshi ari byo bizatuma ibiciro byabyo ku masoko bitazamuka.

Yagize ati "Ubumenyi mwahawe burabaha guhangana n’ibibazo byugarije isi, kongera ibiribwa, kubungabunga ibidukikije hamwe n’iterambere ry’ubukungu, kandi ejo hazaza h’u Rwanda hashingiye kuri mwe."

RICA ni ishuri ry’icyitegererezo mu kwigisha ikoranabuhanga rigezweho mu buhinzi n’ubworozi ryashinzwe ku bufatanye bwa Guverinoma y’u Rwanda n’Umuryango Howard G. Foundation.

Abanyeshuri 81 nibo barangije kwiga muri RICA uyu mwaka

Iri shuri riherereye mu Mudugudu wa Gaharwa, Akagari ka Mwendo, Umurenge wa Gashora mu Karere ka Bugesera. Ryatangiye amasomo mu 2019.

Umuyobozi w’Urwunge rw’Amashuri rwa Shango, Valentine Nyirahabimana, aremeza ko iryo shuri koko ryibwe ibitabo byinshi (yanze kuvuga umubare) n’ubwo abarimu bo bavuga ko bigera ku 1000.

Nyirahabimana agira ati "Ntabwo turamenya aho byarengeye (ibitabo), byarabuze, ntabwo umubare nahita nywubona nonaha ariko ni byinshi, mureke tubanze tubikurikirane."

Nyirahabimana avuga ko arimo kwirinda gutanga amakuru menshi yabangamira iperereza, kuko ikibazo ngo bamaze kukigeza mu Bugenzacyaha no mu buyobozi bw’inzego z’ibanze.

Uwo muyobozi w’ishuri avuga ko barimo gushakira ibitabo byibwe mu bantu bakekwaho kuba barafashe imfunguzo bagafungura ububiko bwabyo, kuko nta hantu na hamwe hangijwe kuri iyo nzu cyangwa ku nzugi zayo. ngo ahubwo bisa n’aho abibye ibyo bitabo baje bagafungura bakongera bagafunga, ariko byose iperereza nirirangira bizamenyekana.

Hagiye kuba ubwirakabiri bw’ukwezi buzatuma gutukura

Ubu bwirakabiri, NASA, itangaza ko buzabonwa cyane n’abatuye imigabane y’u Burayi na Afurika, ndetse n’ibice binini bya Aziya na Amerika.

Ikinyamakuru the Independent cyo mu Bwongereza cyavuze ko abazareba ukwezi bazabona gutukura, kuko Isi izaba yitambitse hagati y’ukwezi n’izuba, itume gutanga urumuri ruke ruzaba ari umutuku ku bakureba.

Ubusanzwe muri kamere yako, ukwezi ntabwo kumurika, ahubwo kohereza ku isi urumuri rw’izuba, kuko kumeze nk’indorerwamo umuntu atunga ku zuba ikagarura urumuri ku bantu bataryitegeye.

Ubwirakabiri bw’ukwezi buzaba mu bihe kuzaba kugaragara kose ari uruziga rwuzuye, aho nyuma yo kwitambika kw’isi hagati yako n’izuba, ngo kuzasa n’umutuku aho igicucu cy’Isi kizaba kigera hose kuri ko.

Ni ubwirakabiri buzamara amasaha arenze abiri kuko buzatangira ahagana saa mbiri n’iminota 41 (8h41) z’ijoro ku isaha mpuzamahanga ya GMT, haba ari saa ine na 41 (10h41) ku isaha yo mu Rwanda, bukazagera saa 10:44 GMT (saa sita n’iminota 44 ku isaha y’i Kigali) bukirimo kuba.

Umwarimu w’ubugenge muri Kaminuza ya Warwick yo mu Bwongereza, Don Pollacco, yabwiye the Independent ko impamvu ubwirakabiri bw’ukwezi bumara igihe kirekire, biterwa n’uko igicucu cy’isi kiba ari kinini kurusha ubuso bwako.

Kugeza ubu Trump ntakibazo afite nk’uko inzego z’umutekano zabitangaje

Byabaye ku gicamunsi cyo kuri iki cyumweru tariki 15 Nzeri 2024, aho Trump yahise avanwa igitaraganya agahungishwa.

Umuvugizi we, Steven Cheung, yagize ati "Perezida Trump ni amahoro nyuma y’urufaya rw’amasasu rwumvikanye mu bice yari arimo, nta bindi twakongeraho muri aka kanya."

Umuhungu wa Trump, Donald Trump Jr yavuze ko Se ameze neza nta kibazo afite kandi inzego z’umutekano muri ako gace zataye ngaje muri yombi uwo muntu wakoze icyo gikorwa.

Ibiro bishinzwe Iperereza muri Leta Zunze Ubumwe za Amerika (FBI), byatangaje ko byatangiye gukora iperereza ryimbitse, gusa ariko amakuru akavuga ko urwo rufaya rw’amasasu rwumvikaniye hafi y’aho Trump yari aherereye, atari we wari ugenderewe ahubwo bisa nk’urugomo rusanzwe muri Amerika.

Visi-Perezida Kamala Harris, uhanganye na Trump mu matora ya Perezida ateganijwe mu Ugushyingo, yavuze ko yamenye iby’iryo sanganya kandi ko ashimira Imana kuba Trump ameze neza kandia fite umutekano.

Kamala Harris yavuze ko urugomo n’ihohoterwa muri Amerika nta mwanya bihafite.

Kugeza ubu ntacyo Donald Trump aratangaza icyo atangaza ku bijyanye n’urufaya rw’amasasu yumvikaniye hafi yaho yari ari.

Ibi bibaye hashize hafi amezi abiri umuntu witwaje imbunda agerageje guhitana Trump, ubwo yari mu bikorwa byo kwiyamamaza byaberaga muri Leta ya Pennsylvania, aramuhusha amukomeretsa ugutwi.

Perezida Putin yaburiye OTAN kutemerera Ukraine gukoresha misile ziterwa kure

Putin abitangaje nyuma y’uko ibitangazamakuru mpuzamahanga birimo CNN, bivuze ko Perezida wa Leta zunze Ubumwe za Amerika, Joe Biden, arimo gushyirwaho igitutu kugira ngo akureho imbogamizi zose zibuza Ukraine gukoresha intwaro zirasa imbere mu Burusiya.

Umunyamakuru yabajije Putin icyakorwa mu gihe byamaze kwemezwa ko Ukraine igiye kurasa imbere mu Burusiya cyangwa bikiri mu nzira zo kwemerwa, maze Putin avuga ko intambara yahita ihindura isura, kuko ngo yaba itakirimo kurwanwa na Ukraine ubwayo.

Putin avuga ko gukoresha intwaro zidahusha ku ntego zirasa ku ntera ndende kandi zakorewe mu bihugu by’u Burayi na Amerika, ari andi mateka y’intambara idahuye n’iyo amaze igihe arwana muri Ukraine.

Ati "N’abahanga barabyemeza ko igisirikare cya Ukraine kidafite ubushobozi bwo kurasa misile zigera kure hifashishijwe ubuhanga bugezweho kandi budahusha intego, ibyo bishoboka gusa iyo hakoreshejwe amakuru bahabwa na satelite, kandi ubwo bushobozi ntabwo Ukraine ifite, ahubwo yabuhabwa n’Uburengerazuba bw’Isi (Amerika n’u Burayi)."

Ikindi Putin avuga kandi ngo gikomeye, ni uko abahanga bashobora kurasa mu Burusiya imbere hakoreshejwe amakuru y’ibyogajuru (Satelite), abo na bo ngo Ukraine ntabo ifite, ahubwo ngo cyaba ari icyemezo cyo kwinjira kwa Amerika n’u Burayi mu ntambara, mu buryo bweruye.

Putin avuga ko mu gihe Ukraine yakoresha izi misile, intambara yahindura isura

Putin ati "Niba rero ari cyo cyemezo cyafashwe, ubwo intambara yaba ihinduye isura, bivuze ko ari OTAN yaba irimo kurwana n’u Burusiya."

Urubuga rwa X rw’Umuryango BRICS uhanganye na OTAN, ruvuga ko mu gihe izo misile zigera ku ntera ndende mu gihe zaba zirashwe mu Burusiya, Igihugu cy’u Bushinwa kiri ku ruhande rw’u Burusiya, na cyo ngo cyahita cyinjira mu ntambara, kandi ngo yaba ihindutse iy’Isi yose.

OTAN/NATO irashaka ko Ukraine yatsinda u Burusiya ikoresheje kubugabaho ibitero bya misile bigera imbere muri icyo gihugu, nyuma y’uko kwinjira mu Burusiya unyuze iyo ku butaka byanze, aho Ingabo za Ukraine zari zimaze kwigarurira ibice byinshi by’Intara ya Kursk zamaze kubivamo hapfuye benshi.

Miliyoni 143 Frw zimaze gukusanywa muri gahunda ya ‘Dusangire Lunch’

Iyi gahunda yatangijwe n’uwari Minisitiri w’Uburezi, Gaspard Twagirayezu ku itariki 12 Kamena 2024, imibare igaragaza ko ku munsi wa kabiri wo gutangira kw’amashuri tariki 10 Nzeri 2024, yari imaze guhabwa amafaranga 143,282,372 muri 315,212,372 ababyeyi n’izindi nshuti z’abana bari bemeye gutanga.

Umuyobozi Mukuru muri MINEDUC ushinzwe Politiki y’Uburezi, Rose Baguma, yibutsa ko iyi gahunda izakomeza mu gihe cyose abana bari ku ishuri, kandi kubaherayo ifunguro na byo bikaba bikeneye guhabwa imbaraga.

Baguma yagize ati "Icyizere cyo kubona umusanzu kiva ku bushake bw’Abaturarwanda bashyigikiye iyi gahunda kandi bifuje kugira uruhare mu kuyiteza imbere. Ibi birareba buri wese ubyifuza, umuntu ku giti cye, ibigo, sosiyete sivile n’amatsinda y’abantu."

Leta y’u Rwanda yemeye kwishyura 90% by’ifunguro ryo ku manywa (Lunch) ku bana biga barenga miliyoni 3 n’ibihumbi 900, isaba ababyeyi na bo gutanga nibura amafaranga 1,000Frw ku gihembwe, kuri buri mwana.

Iyi gahunda ariko MINEDUC yifuje ko n’undi wese ushyigikiye uburezi mu Rwanda, yatanga umusanzu abonye uko waba ungana kose, akawunyuza kuri konti ya Mobile Money y’Umwarimu SACCO *182*3*10# agakurikiza amabwiriza.

Kuva aho iyi gahunda yo kugaburira abana ku ishuri ku manywa itangiriye muri 2021, Minisiteri y’Uburezi ivuga ko ikigero cy’abana bata ishuri kimaze kugabanukaho 4%.

Umuvugizi Wungirije wa Guverinoma y’u Rwanda, Mukuralinda Alain Bernard avuga ko u Rwanda rutegereje kumva uko RDC izarwanya FDRL

Ibi byatangajwe n’Umuvugizi wungirije wa Guverinoma, Alain Mukuralinda, nyuma y’uko Minisitiri wa RDC ushinzwe Itangazamakuru, Patrick Muyaya, avugiye kuri televiziyo y’Abafaransa, France24, ku wa 10 Nzeri 2024, ko Congo n’u Rwanda bimaze kwemeranywa ku kurwanya FDLR no gucyura Ingabo z’u Rwanda.

Muyaya avuga ko habayeho guhura kw’impande zombi imbere ya Perezida wa Angola, João Lourenço wa Angola, bemeranywa kurwanya no kuburizamo (Neutraliser) FDLR.

Muyaya yagize ati "Ndatekereza ko ku itariki 14 Nzeri 2024 hazabaho inama ihuje za Minisiteri (z’Ububanyi n’Amahanga z’u Rwanda na Congo), igamije gusesengura raporo yakozwe n’impuguke z’ibihugu byombi."

Ati "Ntekereza ko turi mu nzira nziza yatuma tugera ku mahoro, kandi dukeka ko uruhande rw’u Rwanda rutubahirije ibyaganiriweho kuva kera, ubu noneho rwahitamo amahoro, kandi noneho ubu dushobora kuganira ku iterambere ry’agace k’Uburasirazuba bwa Congo hamwe no gutanga ibisubizo ku bibazo by’Abanyekongo."

Ku rundi ruhande, Umuvugizi wungirije wa Guverinoma y’u Rwanda, avuga ko Leta ya Congo ari yo ifite inshingano zo kuburizamo FDLR.

Agira ati, "Bavuze ko ari bo bazatanga gahunda y’uburyo bazayiburizamo, bashobora kuvuga ko bayirwanya ku giti cyabo cyangwa gufatanya n’u Rwanda, cyangwa gufatanya n’ingabo za Afurika y’Iburasirazuba (EAC)."

Mukuralinda akomeza agira ati "Twaba dutegereje kugira ngo bazabanze bagaragaze ngo, FDLR tuzayirangiza (neutraliser) gutya!’ Kuko barabyemeye, dushobora no gutungurwa batubwiye ko bashaka gufatanya na Guverinoma y’u Rwanda, aho baba badushyize igororora."

Mukuralinda avuga ko intambwe yise ’iteye ubwoba’ kandi ishimishije RDC yateye ari ukuba Minisitiri wabo w’Itangazamakuru, Patrick Muyaya, yemera inshuro zirenze imwe, kandi akabyemera no ku bitangazamakuru mpuzamahanga, ko bazarangiza ikibazo cya FDLR.

Avuga ko kuva kera Congo yamye ivuga ko FDLR idahari cyangwa ngo barashaje, ati "Ariko kuba bavuga ko bayiburizamo, ni uko bemera ko iyo FDLR ihari, kandi bikaba birimo kwemezwa n’abayobozi ba Congo batandukanye barimo na Perezida w’icyo gihugu."

Imirongo y’ababyeyi yari miremire ku mashuri n’ahakorera Umwalimu SACCO

Ababyeyi barerera mu mashuri ya Leta n’afatanya na yo ku bw’amasezerano, bose ubu basabwa kunyuza amafaranga y’ishuri muri Umwalimu SACCO, Ikigo cy’Imari gifite amashami abiri gusa i Kigali.

Byabaye ngombwa ko ubuyobozi bwa Umwalimu SACCO bwerekana uburyo bworohereza ababyeyi kwishyura, bwo gukoresha telefone ukanda *182*3*10*1*code y’umwana#, hanyuma ugakurikiza amabwiriza.

Ikibazo cyavutse nk’uko ababyeyi baganiriye na Kigali Today babisobanura, ni ukutamenya kode z’abana babo, bikaba ngombwa kubanza kujya kuzibaza ishuri, ariko hakaba n’abavuga ko n’ubwo buryo bwo kwishyura bakoresheje telefone ubwabwo butarimo gukunda.

Umubyeyi utuye i Kigali akaba arerera ku ishuri riri mu Karere ka Rutsiro, yahuye n’umunyamakuru avuye kwishyura kuri Umwalimu SACCO i Remera, agira ati "Gukoresha telefone narabikoresheje, maze hafi icyumweru cyose nishyura kuri kode byanga, nageze ubwo mpamagara muri MTN nabwo biranga, ubwo rero byarangiye ku kigo batubwira ko umuntu utari bwohereze iyi fagitire, umwana bahita bamwirukana."

Mu babuze kode harimo uvuga ko we na bagenzi be biriwe kuri Umwalimu SACCO ku Ishami rya Nyabugogo, akaba yagejeje saa kumi z’igicamunsi akiri ku murongo w’abashaka kwishyurira umwana ujya gutangira mu mwaka wa mbere w’amashuri abanza.

Uwo mubyeyi yagize ati "Reba kuva mu gitondo, izi saha ni zo banyakiriye mfite agahinja, ubu nibwo nkibona kode y’ishuri kugira ngo nze hano kwishyura, hanyuma ndasubira ku ishuri njye kwerekana inyemezabwishyu kugira ngo babone kwakira umwana."

Undi mubyeyi yahuriye n’umunyamakuru ku ishuri riri ku Gisozi mu Karere ka Gasabo, avuga ko na we yaje kuhatangiza umwana avuye kwishyura ku Mwalimu SACCO i Nyabugogo, aho avuga ko yamaze amasaha menshi ku murongo.

Ku ishuri uyu mubyeyi arereraho, abana bamwe barimo gukinira hanze abandi bari mu ishuri nta muntu urimo kubakurikirana kuko mwarimu wabo yari ahugiye mu kwakira amafaranga y’ishuri ahabwa n’ababyeyi, mu gihe abayobozi b’iryo shuri na bo bari bahugiye mu kwandika abaje gutangira mu mwaka wa mbere w’amashuri abanza n’ayisumbuye.

Mwarimu wari ufite urutonde rw’amazina y’abana, yakiraga amafaranga maze akereka umubyeyi aho ashyira umukono, kugira ngo bizabe gihamya isimbura inyemezabwishyu, bikarangirira aho.

Uyu mwarimu yagize ati "Abana bishyuye nta kibazo, ubu hasigaye ibikoresho ngomba kubasaba, hamwe n’imyirondoro yabo."

Ku cyicaro cya Umwalimu SACCO i Remera mu Mujyi wa Kigali na ho imirongo y’ababyeyi bategereje kwishyura yari miremire, bakaba barimo abo icyo kigo cy’Imari cyategeye imodoka ibavana i Nyabugogo, ahari umubyigano ukabije kurusha i Remera.

Abakozi ba Umwalimu SACCO baganiriye n’umunyamakuru (batari abashinzwe gutanga amakuru) bavuga ko abenshi mu babyeyi ari abafite abana bajya gutangira kwiga mu myaka ya mbere n’uwa kane w’amashuri yisumbuye, kuko abasanzwe bo bafite kode bishyuriraho ku bigo byabo.

Aba bakozi ba Umwalimu SACCO bavuga ko ibigo by’amashuri ari byo birimo gufasha icyo kigo cy’Imari gukusanya amafaranga y’ishuri, akaba ari ho ababyeyi barimo kwishyurira.

Ibi ariko hari abavuga ko birimo kubicira akazi barimo ababyeyi birirwa batonze imirongo ku ishuri hamwe n’abarimu bagakwiye kuba batangiye kwigisha no gukurikirana abanyeshuri.

Kigali Today iracyagerageza kuvugana n’inzego zibishinzwe zirimo Ubuyobozi bwa Umwalimu SACCO na Minisiteri y’Uburezi kuri iki kibazo ababyeyi bafite, cyo kutoroherezwa kwishyura amafaranga y’ishuri muri iri tangira ry’umwaka wa 2024-2025.

Iri ni itangazo Koperative Umwalimu SACCO iherutse gusohora risobanurira ababyeyi uburyo bwo kwishyurira abanyeshuri

Green City Kigali igereranywa na Paradizo

Umujyi wa Kigali urahamagarira abifuza gutura i Kinyinya n’abasanzwe bahatuye, gutangira gusaba impushya zo kubaka mu buryo buteganywa n’igishushanyo mbonera, cyangwa kwitegura kugura inzu zihendutse zigiye kuhubakwa.

Aka gace kazaba kagizwe n’inzu zigeretse zizubakwa ku butaka bungana na hegitare 600 mu midugudu ya Rusenyi, Ngaruyinka, Birembo, Taba, Binunga na Gasharu mu Tugari twa Murama na Gasharu, mu Murenge wa Kinyinya.

Inzu zaho zizajya zigurwa ku giciro gihendutse

Umuvugizi w’Umujyi wa Kigali, Emma Claudine Ntirenganya, avuga ko ibiciro by’inzu zaho bitarashyirwaho, ariko ko abatekinisiye basabwe gukora ibishoboka byose kugira ngo 40% by’inzu zibarirwa hagati ya 1700-2000 zizahubakwa, zigomba kuba zihendutse.

Umujyi uzabanira neza ibidukikije witwa ’Green City’

Ni Umujyi uzabanira neza ibidukikije

Hari igice kizaterwamo ishyamba rizitwa ’Kinyinya Forest Eco-Park’ riyungurura umwuka abantu bahumeka, kandi hakazaba inzira z’abanyamaguru n’iz’amagare, hakoreshwe imodoka rusange zitwara abagenzi, byose bigamije kwirinda kugendwamo n’ibinyabiziga byinshi bisohora imyuka ihumanya ikirere.

Inyubako zaho zigomba kubakwa mu buryo bwinjiza urumuri rwa kamere, mu rwego rwo kwirinda gucana amatara yo mu nzu ku manywa, hamwe n’uburyo burondereza umuriro w’amashanyarazi mu masaha y’ijoro.

Inzu zo muri Green City Kigali zizubakwa n’ibikoresho hatabayeho kwangiza ibidukikije

Inzu zigomba kubakwa hakoreshejwe ibikoresho byabonetse hatabayeho kwangiza ibidukikije, nk’amatafari akozwe mu ibumba ryo mu gishanga kihegereye, aho bitazasaba kwifashisha imodoka zitwara amatafari ziyavana kure, ubusanzwe zikoresha mazutu ihumanya ikirere.

Aya matafari kandi agomba kubumbwa no kumishwa n’ibikoresho byifashisha ingufu z’abantu n’iz’amashanyarazi (zisubira), hirindwa kurekura imyuka ihumanya no gukoresha ibiti byakomotse ku itemwa ry’amashyamba.

Ni Umujyi uzaba ufite serivisi zose zikenerwa mu buzima bwa buri munsi

Ibikorwa remezo byaho bizaba bifata amazi y’imvura, aho guteza isuri akazajya akoreshwa imirimo inyuranye, kandi hakazabaho gukoresha ingufu zisubira z’amashanyarazi n’imirasire y’izuba.

Hazakorwa ubusitani n’inzira z’amazi byabugenewe bituruka i musozi byerekeza mu kabande, mu rwego rwo gukumira isuri no gutwikira ubutaka mu kuburinda kuma.

Umujyi ufasha abawutuye kubaho neza batavunitse nko muri ’Paradizo’

Green City i Kinyinya izahangwamo imirimo igera ku bihumbi 50

Green City Kigali yo muri Kinyinya izabamo guhanga imirimo igera kuri 50,000, kandi 55% by’ubuso bwaho buzashyirwamo ibikorwa rusange byegereye abaturage nk’amashuri, amavuriro, amasoko, aho kuruhukira no gukorera siporo n’imyidagaduro.

Hazashyirwamo utuyira dushamikiye ku mihanda, tuzafasha abahatuye gutembera n’amaguru, bajya guhaha no gushaka serivisi zitandukanye zitari kure yabo, mu rugendo rutarenza iminota 15, nk’uko bisobanurwa n’Umuyobozi Mukuru ushinzwe Igenamigambi ry’imitunganyirize n’imiturire y’Umujyi wa Kigali, Enjeniyeri (Eng.) Marie Solange Muhirwa.

Uyu Mujyi uzaba wubatse mu buryo burengera ibidukikije

Ibikorwa rusange nk’amashuri n’amavuriro bizubakwa muri buri gace gato gafatwa nk’umudugudu, mu duce 18 tuzaba tugize Umujyi wose wa Green City Kigali muri Kinyinya.

Eng. Muhirwa avuga ko imiturire ya Green City Kigali, mu gihe yakorwa neza nk’uko biteganywa, izatanga icyerekezo cy’imiturire cyakurikizwa n’ahandi henshi mu Rwanda.

Abahatuye ntabwo bazimurwa n’ubwo bamwe bifuza ingurane bakahava

Ubuyobozi bw’Umujyi wa Kigali buvuga ko abatuye mu midugudu yavuzwe ko izashyirwamo Green City, basabwa kubaka inzu zigezweho zijyanye n’igishushanyo mbonera, keretse abatuye mu nzira z’amazi n’ahazashyirwa ibikorwa rusange nk’imihanda, amashuri cyangwa amavuriro.

Abahatuiye uyu munsi ntabwo bazimurwa, abafite ubushobozi bazubaka inzu zijyanye n’igishushanyo mbonera

Aba ni bo Umujyi wa Kigali uvuga ko bazahabwa ingurane ijyanye n’imitungo yabo mu gihe bimuwe, ariko abandi ngo bemerewe gushaka ibyangombwa byo kuvugurura inzu zikajyana n’igihe, kubaka inshya zigezweho cyangwa kugurisha bibaye ngombwa.

Kazungu Jacques utuye mu Kagari ka Murama muri Kinyinya, agira ati "Iyi miturire irajyana n’ubushobozi, bakubwira kubaka inzu igeretse, niba utaratunga miliyoni 20, wakubaka inzu igeretse isaba kubakwa na miliyoni 200 Frw gute! Ubwo rero jyewe ndumva nakwimuka!"

Undi wumva yahabwa ingurane akimuka kubera kubura ubushobozi, ni uwitwa Janvière Iranzi utuye mu Kagari ka Gasharu, akaba ahafite inzu nto yubatswe mu buryo bwa konoshi y’ibyumba bibiri na salon.

Uyu Mujyi uzaba urimo ibice bitandukanye birimo n’ahantu abantu bazajya baruhukira

Hino yaho mu Mudugudu wa Rusenyi mu Kagari ka Murama, hari inzu zegeranye zubatswe mu buryo bwitwa akajagari, hakaba hitegeye ibice bya Kibagabaga, Nyarutarama na Gacuriro.

Uwitwa Chantal (si ryo zina rye rya nyaryo) utuye muri uwo mudugudu, agira ati "Batubwiye ko nta we bazaha amafaranga, ariko uzashobora kubaka inzu bashaka, azayubake."

Umuvugizi w’Umujyi wa Kigali, Emma Claudine Ntirenganya, ashimangira ko umuntu ufite ubushobozi bwo kubaka inzu ihuye n’igishushanyo cya Green City azaguma aho atuye kandi agahabwa igihe kirekire cyo kwitegura, kuko ari igenamigambi rigera mu mwaka wa 2050.

Uyu Mujyi uzatanga icyerekezo cy’uburyo hakubakwa indi Mijyi nk’iyi hirya no hino mu gihugu

Ati "Bizatwara igihe kirekire, nta gahunda yo kwimura abantu ihari, ahagiye gutangirira umushinga w’icyitegererezo n’ubundi nta bantu bahatuye, gusa ku muntu utazashobora kubaka ashobora kwifatanya n’abandi, ariko ushobora no kuba wagurisha iyo bibaye ngombwa."

Ntirenganya avuga ko muri uko guhabwa igihe kirekire cyo gushyira mu bikorwa igishushanyo mbonera cya Green City, umuntu ashobora gutangira umushinga wo kubaka inzu igeretse ariko ntayubakire rimwe, akabanza iyo hasi, ubundi akazagenda yongeraho izindi uko abonye ubushobozi.

Inyandiko ya Guverinoma y’u Rwanda igena icyerekezo 2050, ivuga ko hirya no hino mu Rwanda hazashyirwaho uburyo bw’imiturire, bwerekana ahagomba guturwa n’ahagenewe gutangirwa serivisi, mu rwego rw’imikoreshereze inoze y’ubutaka.

Green City Kigali

Kugenderwa nabi mu muhanda ni bimwe abanyonzi bavuga ko bibateza impanuka zibahitana n’abo batwaye

Bamwe mu batwara amagare mu Mujyi wa Kigali bahamya ko nta munsi wijyana hadapfuye umuntu cyangwa abakomereka bazize impanuka zatewe no kugenda ku igare.

Uwitwa Nduwamungu Shadrack (ni ko twahisemo kumwita) umaze imyaka irenga itatu mu kazi ko gutwara abagenzi ku igare, avuga ko umunyonzi atajya ahabwa agaciro, cyane cyane abamotari ngo ni bo babitambika imbere bakabateza impanuka.

Nduwamungu twaganiriye akiri mu kazi ahagana saa moya z’ijoro, yagize ati "Buri munsi, buri mwanya, turabibona ariko tukabirenza amaso, hari ababa baguye mu muhanda ukabona Polisi ije gutabara, ariko ntabwo byaguca intege, ntabwo wahagarara ngo ugiye kubyinjiramo kandi bitakureba."

Kugenda nabi mu muhanda kw’abanyonzi nabyo biri mu bigira uruhare rukomeye mu mpanuka bahura nazo

Undi munyonzi twahisemo kwita Mbarubukeye, avuga ko kubyuka akajya kwirirwa anyonga igare mu runyuranyurane n’urusaku rw’ibinyabiziga mu mihanda y’i Kigali, akabona burije ntacyo abaye, ngo ni ibitangaza by’Imana.

Mbarubukeye ati "Turinzwe n’Imana, ntabwo bushobora kwira nta mpanuka ibaye y’igare, tuba tubona nta mahitamo yandi y’ibyo twakora, icyo twakwifuza ni uko Imana yadutabara ikaduhindurira akazi."

Umusaza w’imyaka 60 y’amavuko witwa Murwanashyaka Félix, waje aturutse ku Kamonyi, avuga ko abanyonzi kubera intege nke ngo bagerageza kwirinda impanuka, ariko ubwinshi bw’ibinyabiziga rimwe na rimwe bibagendera nabi, ngo ni ikibazo ku batwara n’abagenda ku magare.

Hari n’abapakira ibintu byinshi bakanagender ku muvuduko mwinshi

Murwanashyaka avuga ko igare ari kimwe mu buryo bwo gutwara abantu n’ibintu buhendutse mu Rwanda, ariko ngo bukwiye kwitabwaho, hakajyaho ingamba zo kurinda abarigendaho.

Mu kwezi kwa Nyakanga k’uyu mwaka wa 2024, Polisi y’u Rwanda yatangaje imibare y’abahitanywe n’impanuka hamwe n’abakomeretse bazize kugenda ku igare, ihereye muri Mutarama, ukwezi kwapfuyemo abantu 20, hanakomereka abagera ku 106.

Polisi ivuga ko yaje gufata ingamba zirimo kubuza abantu kugendera ku igare nijoro, bituma impanuka zigabanuka, kuko mu kwezi kwakurikiyeho kwa Gashyantare ngo hapfuye abantu 15, muri Werurwe hapfa 15, muri Mata hapfa 10, naho Gicurasi ngo hapfuye abantu 6 bazize impanuka y’igare.

Polis y’u Rwanda igaragaza ko muri Mutarama ya 2024, hapfuyemo abantu 20, hanakomereka abagera ku 106

Imibare y’abakomeretse na yo ngo yaragabanutse nyuma yo gufata ingamba, kuko muri Gashyantare hagaragaye 98, muri Werurwe hakomereka 80, muri Mata hakomeretse abantu 73, Gicurasi hakomereka 45, bazize impanuka y’igare.

Umuvugizi wa Polisi y’u Rwanda, ACP Boniface Rutikanga, avuga ko uretse kugenda nijoro hatabona, abatwara amagare barimo kugwa mu mpanuka bitewe no gutwara ibintu biremereye kandi bigendeka nabi mu muhanda.

ACP Rutikanga avuga ko abandi bateza impanuka z’amagare ari abayatwara nabi ku muvuduko ukabije ahantu hamanuka, rimwe na rimwe baba bahetse ibintu biremereye bituma igare ritabona feri mu gihe ashatse kugabanya umuvuduko.

Hari abatwara amagare banze gucika ku kugenda nijoro

ACP Rutikanga agira ati "Hari amabwiriza y’Inama Njyanama z’Uturere, agena igihe abatwara amagare bagomba kuba batashye, akagena n’uburyo bagomba kwitwara, ibyo barabizi."

ACP Rutikanga yongeye kwihanangiriza abatwara amagare bagenda bafashe inyuma ku modoka ahantu hazamuka, ko uwo Polisi ifashe wese ahita yamburwa igare atwaye kugira ngo abanze yisubireho.

Umuvugizi wa Polisi ajya inama y’uko utwara igare cyangwa urigendaho yagakwiye kwambara ibintu bishobora kumurinda ingaruka zikabije z’impanuka nka kasike, uturindantoki n’ibirinda amavi cyangwa ahandi hakunze gukomereka cyane iyo umuntu agize impanuka y’igare.

Polisi yihanangiriza abatwara amagare bagenda bafashe inyuma ku modoka ahantu hazamuka

Umuryango witwa Healthy People Rwanda/HPR, urwanya impanuka zibera mu muhanda, ujya inama yo kureba niba abatwara amagare na bo batajya bafatirwa ibihano, ariko hakabanza gahunda zo kubigisha kugenda neza mu muhanda.

Urugo rwa Uwimpaye Laure ucururiza akanaba muri Kontineri

Kigali Today yashatse kumenya uko iyo miryango yimuwe ibayeho, aho ituwe ndetse n’uko ubuzima bumeze muri rusange, maze bamwe bavuga ko imibereho itaboroheye ndetse aho twageze hari aho twasanze batuye mu mazu y’amanegeka kurusha ayo bakuwemo.

Mu rugendo rutoroshye umunyamakuru wa Kigali Today yasuye urugo rwa Kagoyire Anita (izina twamuhaye) wapfakaye, umugabo akamusigira abana babiri b’abahungu.
Mu kiganiro kirekire yagiranye na Kigali Today yavuze ko byabaye ngombwa ko umwana we mukuru w’imyaka 16 ava mu ishuri akajya gukora akazi ko mu rugo, kugira ngo afatanye na nyina kwishyura ubukode bw’inzu no gushaka icyo bafungura.

Uyu mwana twahaye izina rya Gisubizo Dieudonné, twasanze arimo guhata ibirayi mu rugo rw’umuntu umuhemba amafaranga 1,000Frw buri mugoroba iyo yakoze neza.

Arimo guhata ibirayi by’umuturanyi ngo abone udufaranga two guhahira iwabo

Gisubizo agira ati : "Iyo bampaye amafaranga, mpa mama ho make andi nkayashyira kuri simukadi, kugira ngo ubutaha nintagira icyo mbona, nzamuhe ayo mfite kuri simukadi."

Ati "Kwiga nabaye mbihagaritse, nari ngeze mu mwaka wa Gatandatu w’amashuri abanza, nabitewe n’ibibazo byabaga biri mu rugo nyuma yo kuza gutura hano. Najyaga ku ishuri mfite agahinda."

Uyu muryango ntabwo wagiye kure y’aho wahoze utuye, ubu bakodesha icyumba na salon ku mafaranga 25,000Frw, mu nzu itagira sima, ifite imiryango myinshi kandi ihora isenywa n’ibiza kenshi iyo imvura iguye.

Inzu Uwimpaye Laure acururizamo ni na yo atuyemo

Iwabo w’uyu mwana hamwe n’abaturanyi babo bimuwe mu mwaka ushize, ubuyobozi bw’umurenge bwababwiraga ko buzabishyurira ubukode bw’amafaranga 30,000Frw buri kwezi, kugeza ubwo bazubakirwa inzu igezweho izatuzwamo imiryango myinshi aho bahoze batuye.

Kugeza ubu ariko ngo baheruka amafaranga ibihumbi 90Frw y’amezi atatu bahawe ubwo inzu yabo yari ikimara gusenywa mu mwaka ushize wa 2023.

Mu nzu ibangikanye n’iwabo wa Gisubizo hari umwana w’umukobwa twahisemo kwita Tumushime, wigaga muri GS Kibingo i Nyamasheke, ubu akaba yaratsindiye kujya kwiga i Muhanga muri ’Collège Notre Dame’ i Ntarabana.

Ababyeyi ba Tumushime bakora imirimo y’ubuyede n’ubukarani, bavuga ko amafaranga babona yose ubu ashirira mu guhaha ibyo kurya no kwishyura ubukode bw’aho batuye, bakavuga ko ingaruka zo gusenyerwa zabateje kubura ubwishyu bw’amashuri y’abana.
Tumushime w’imyaka 15 ubu, avuga ko afite ubwoba ko nabura ibyangombwa byo kujya ku ishuri, ubuzima bwe buzaba bubi ndetse n’intymbero ze zikaba zitagishobotse.

Twaganiriye kandi n’undi twahaye izina rya Uwimpaye Laure wari ufite inzu abamo ku Gisozi, akagira n’iy’abapangayi ngo yamuheshaga amafaranga ibihumbi 200Frw buri kwezi, nyuma yo gusenyerwa ubu akaba acumbitse muri kontineri iteretse mu gasoko, aho acururiza ibishyimbo bitetse n’ibijumba byo ku mifungo.

Imbere mu nzu kwa Rutayomba, akingisha ibitambaro

Uwimpaye ufite abana babiri, umwe w’imyaka 10 y’amavuko hamwe n’uw’itanu, bombi ngo ntabwo bazajya ku ishuri bitewe n’uko atakibona amafaranga yo kubishyurira.

Uwimpaye yakomeza agaragaza ko kuba muri kontineri itagira idirishya bimuteza we n’abana kutabona umwuka uhagije wo guhumeka ninjoro, hakabaho no kwibasirwa n’ubushyuhe bukabije ku manywa hamwe n’ubukonje bukabije ninjoro.

Umusaza w’imyaka 71 y’amavuko, Rutayomba Thacien twasanze we n’umufasha we Mukamugema Marie Claire (bombi ni amazina twabahaye) barimo kubaza udutebe baza kuzunguza mu muhanda nimugoroba, bagira amahirwe uwo munsi ntibatwamburwe kuko ari abazunguzayi, ifunguro ry’umunsi ritagira ikindi kirengaho rikaba rirabonetse.

Mu nkengero z’inzu batuyemo ni uko hasa

Rutayomba na Mukamugema bari bafite inzu 15 zikodeshwa, ubu na bo bahindutse abapangayi, bakaba bakodesha inzu yenda kubagwaho ifite icyumba kimwe na salon, bakayishyura amafaranga ibihumbi 20Frw, bakabanamo n’abana babo babiri.

Mukamugema yagize ati "Kuva twasenyerwa nta muntu wo muri uru rugo urishyurirwa mituelle kubera ubushobozi buke. Twari dufite amazu, abapangayi batwishyura tukagira uko tubaho, none ubu uragira ngo tugire dute? Twarumiwe."

N’ubwo aba baturage ngo bari bafite icyizere cyo kuzabona aho kuba heza hadashyira ubuzima bwabo mu kaga, ngo si ko bikimeze kuko mu baturage Umujyi wa Kigali uvuga ko urimo guteganya guha inzu; abimuwe mu Gatsata, Gisozi, Remera n’ahandi kuva muri 2023 bo batarimo.

Umuvugizi w’Umujyi wa Kigali, Emma Claudine Ntirenganya, yabwiye Kigali Today ko inzu barimo kubaka mu Cyahafi (hafi yo kuri Mpazi) ari izo gutuzamo abimuwe mu butaka zubatswemo, hamwe n’abagiye kwimurwa mu bice bihegereye.

Yagize ati "Mu Cyahafi kuri Mpazi, inzu ziri kubakwa zizatuzwamo abari batuye muri buriya butaka, hiyongereho abandi batuye iruhande rwaho kuko hari hegitare 16 tuzahita twubakamo, abatuye muri izo hegitare na bo bazaza bature hariya hamaze kuzura."

Ati "Nihagira inzu zizasaguka, ni zo zizatuzwamo abandi bantu bashobora kuba bafite ibibazo, badafite ubushobozi, baba abimuwe mu manegeka cyangwa se ahandi hantu, ariko twabanje bariya."

Amafaranga abatunga bayakura mu gucuruza intebe babaza, iyo nta waguze ntibarya

Umujyi wa Kigali uvuga iki kuri uru susobe rw’ibibazo rwugarije abaturage bawo?

Mu kiganiro umunyamakuru wa Kigali Today yagiranye n’umuvugizi w’umujyi wa Kigali mu cyumweru gishize, yamubajije niba umujyi wa Kigali uzi uko abimuwe mu bihe binyuranye babayeho, ibibazo bafite n’uko bikemuka, avuga ko agiye kwegeranya amakuru yamara kuboneka akayaduha, cyakora twarinze dusohora iyi nkuru ayo makuru bataraduha. Igihe cyose bayaduha na yo tukazayabagezaho.

Abana bazigamirwa muri Kira Kibondo ya BK bakorewe umunsi mukuru

BK ivuga ko irimo gutanga serivisi z’imari zihendutse kandi zigera ku mukiriya atavunitse kuko benshi bakoresha telefone bizigamira, bafata inguzanyo, babikuza cyangwa bishyura ikintu cyose batarinze gutwara amafaranga mu ntoki.

BK ivuga ko abantu b’ingeri zose kuva ku w’amikoro make kugera ku wifite, uri mu cyaro cyangwa mu Mujyi, umwana cyangwa umuntu mukuru, bose bashobora kuganira ku bijyanye n’ubukungu bwabo bagira bati "Nanjye ni BK" nkoresha.

Ni muri urwo rwego abana batangiye kuzigamirwa bakiri bato bakorewe ibirori mbere yo gusubira ku ishuri, ndetse habaho no gutanga ibyemezo by’ishimwe ku bujuje imyaka 18 y’ubukure, ubu bemerewe gutangira gushora imari mu yo bazigamiwe kuko babaye bakuru.

Ishimwe Bienvenue Joelle w’imyaka 18 y’amavuko, akaba yiga muri INES Ruhengeri, avuga ko nava ku ntebe y’ishuri atazahangayika ashaka ibyo akora, kuko ababyeyi bamuzigamiye.

Mugenzi we witwa Edwin Sheja w’imyaka 19, avuga ko amaze imyaka irenga umunani azigamirwa kuri konti ya Kira Kibondo amafaranga ibihumbi 50Frw buri kwezi, ubu akaba arimo gutekereza kuyashora mu ikoranabuhanga kandi bikajyana no gukomeza kwiga.

Muri rusange abahawe ibyemezo by’ishimwe ni Ndamukunda Elie Gasana, Anais Teta, Ishimwe Bienvenue Joelle, Itete Ganza Alain Charman, Mugisha Denise, Bajeneza Anaclet, Igiraneza Alpha Patrick, Sheja Edwin, Nkuranga Teta Sania na Ihirwe Ndegeya Faisal.

Ubutumwa bw’ababyeyi n’abayobozi

Uwafashe ijambo mu mwanya w’ababyeyi bazigamira abana babo, Musanganire Marie Josée, avuga ko uyu muco wo guhera ku mwana w’imyaka itatu y’amavuko ari umwihariko wa BK, kandi wubaka mu bana uburyo bwo kwirinda gusesagura.

Musanganire ati "Hari amafaranga menshi usanga umuntu apfusha ubusa kubera ko atayafatiye gahunda, ariko iyo ufite konti uyashyiraho ejo ukazasanga yiyongereye, akenshi turaga abana ibintu byinshi bakuze bakabipfusha ubusa bigashira mu gihe gito, ariko iyo wamutoje kuzigama akiri muto bituma agira ubwenge bwo gucunga bya bintu umuhaye."

Umunyamabanga Uhoraho muri Minisiteri y’Uburinganire n’Iterambere ry’Umuryango (MIGEPROF), Mireille Batamuliza, ashimangira ko kuzigamira umwana birema umuryango w’ejo hazaza ushoboye kandi utekanye, bitewe n’uko uzaba ufite ubukungu.

Ati "Kera iyo umwana yabaga akuze wamuhaga umunani (umugabane we), ariko ubu umunani wa mbere ni ukumwigisha hanyuma ukamuha konti iriho igishoro yatangirana mu kwiga Kaminuza cyangwa guhanga umurimo, kuko wenda nta sambu ufite."

Umuyobozi Mukuru wa Banki ya Kigali, Dr Diane Karusisi, avuga ko konti ya Kira Kibondo yungukira umwana amafaranga angana na 8.5% by’ayo yazigamye buri mwaka.

Dr Karusisi ati "Umwana akura afite amafaranga ahagije kuri konti ku buryo ababyeyi bamurihira amashuri, kandi igihe cyose habaye ikibazo ya mafaranga bazigamye akabagoboka."

Banki ya Kigali ivuga ko gufungura konti ya Kira Kibondo umuntu agenda yitwaje icyemezo cy’amavuko cy’umwana hamwe n’amafaranga ibihumbi bitanu, ariko nyuma yaho akagenda ashyiraho ayo abonye yose, bigakorerwa umwana kuva ku bafite imyaka itatu y’amavuko.

MINAGRI yatangije umushinga wiswe RDDP2 ugamije guteza imbere ubworozi bw’inka zitanga umukamo

Nyirangirababyeyi Floride wari uhagarariye abo mu Karere ka Bugesera, yifuza ko inka atunze yava kuri litiro 5 ikamwa ku munsi igatanga nibura litiro 20 ku munsi, kubera iyo mpamvu agasaba gutererwa intanga z’icyororo gishya gitanga umukamo urushijeho.

Nyirangirababyeyi yagize ati "Dukeneye inka zifite umukamo kandi ba veterineri bakanoza uburyo bwo gutera intanga, hari igihe baza hashize nk’iminsi 3 umuntu amuhamagaye inka yamaze guta umurindo."

Bavuga kandi ko bakeneye ibigega bifata amazi y’imvura yo kuhirira amatungo ari na ko bibarinda isuri, bagashaka gufashwa kuvugurura ibiraro, guhabwa amahugurwa atuma bamenya uko bagaburira inka, bakanasaba imbuto y’ubwatsi bwihanganira imihindagurikire y’ibihe.

Aborozi b’inka zitanga umukamo basaba kandi kuzahabwa imodoka ibatwarira amata, hamwe no kubakirwa amakusanyirizo afite aho bakonjeshereza amata.

Umushinga wa ‘Rwanda Dairy Development Project (RDDP2)’, icyiciro cyawo cya kabiri, uzashyirwa mu bikorwa n’Ikigo giteza imbere Ubuhinzi n’Ubworozi (RAB) hamwe na ’Heifer International’ mu gihe cy’imyaka itandatu, hakazakoreshwa Amadolari ya Amerika miliyoni 100 n’ibihumbi 37 (akaba ahwanye n’amafaranga y’u Rwanda arenga miliyari 127).

Aborozi baturutse hirya no hino mu gihugu bitabiriye itangizwa ry’umushinga RDDP ya kabiri

MINAGRI ivuga ko uyu mushinga watewe inkunga n’Ikigega Mpuzamahanga giteza imbere Ubuhinzi n’Ubworozi (IFAD), uzafasha aborozi barenga ibihumbi 175 bo mu Turere 27 tw’Intara 4 zigize Igihugu, Umujyi wa Kigali na wo ukazakorerwamo ubucuruzi no gutunganya ibikomoka ku mata.

MINAGRI n’abafanyabikorwa bayo bavuga ko aborozi bazajya batererwa intanga z’inka zitanga umukamo mwinshi, bafashwe kubona ubwatsi n’amazi bihagije, hamwe n’ubumenyi bwo kwita kuri ayo matungo.

Umunyamabanga Uhoraho muri MINAGRI, Dr Olivier Kamana, avuga ko aborozi bazahabwa ubwoko bw’ibyatsi bitanga umukamo, ndetse n’ibisigazwa by’imyaka yeze mu mirima bizatunganywa bibikwe neza, kugira ngo bigaburirwe inka mu gihe cy’impeshyi.

Dr Kamana yizeza ko hazatangwa shitingi zishyirwa mu byobo bifata amazi y’imvura (dam sheets) mu rwego rwo kubika amazi y’inka ahagije, hamwe no kwirinda isuri.

Avuga kandi ko amakusanyirizo y’amata azongererwa ubushobozi bwo gukonjesha, kugura amata ku mworozi ku giciro kimunogeye, kandi ko hazatangwa inka zirenga ibihumbi 25 ku bafite amikoro make, muri gahunda ya girinka.

Umunyamabanga Uhoraho muri MINAGRI, Dr Olivier Kamana

Dr Kamana yakomeje agira ati "Uko igiciro cy’amata kizamuka ku mworozi, bituma uruhererekane nyongera gaciro rwose rutera imbere, uwo muturage udafite inka na we twizera ko bizarangira imugezeho kuko gahunda ya girinka irakomeje kandi murabona ko n’uyu umushinga uzayitera inkunga."

Uruganda Inyange rutunganya amata, ruvuga ko rukeneye litiro ibihumbi 850 ku munsi kugira ngo rubashe kuyatunganyamo ibicuruzwa bitandukanye birimo n’amata y’ifu.

MINAGRI na IFAD birateganya ko umushinga wa RDDP2 uzahesha imirimo urubyiruko ibihumbi 10 n’abagore ibihumbi 15, ikaba imirimo yiganjemo ubucuruzi, bakaba bashishikarizwa kuzakurikiranira hafi ibikorwa by’uwo mushinga kugira ngo badacikanwa.

Umuyobozi wa IFAD mu Rwanda n’i Burundi, Dagmawi Selassie, avuga ko miliyoni 40 z’amadolari bashoye muri RDDP1 yabyaye irindi shoramari ry’amadolari ya Amerika arenga miliyoni 80.

Umushumba w’Itorero Anglican mu Rwanda, Archbishop Dr Laurent Mbanda

Musenyeri Mbanda azaba yungirijwe na Visi Perezida wa mbere, ari we Mufti Sheikh Sindayigaya Musa uyobora Idini rya Islam, hamwe na ba Visi Perezida wa Kabiri ari bo Musenyeri Kayinamura Samuel w’Itorero Methodiste Libre ry’u Rwanda na Bishop Dr. Fidel Masengo wa Foursquare Gospel Church mu Rwanda.

Itangazo dukesha Ubuyobozi bwa Anglican mu Rwanda, rivuga ko Abajyanama ba Perezida wa RIC mu Rwanda ari Mgr Papias Musengamana wa Diyoseze Gatolika ya Byumba, Dr. Charles Mugisha na Bishop Dr. Gahungu Bunini.

Sheikh Sindayigaya Musa wa Islam azaba yungirije Musenyeri Mbanda

Mgr Kayinamura Samuel na Bishop Dr Masengo bari mu bagize komite y’uyu muryango

Uyu mukino wo guterana inyanya witabiriwe n’abarenga ibihumbi 22

Uyu mukino ngarukamwaka ukorwara buri wa Gatatu wa nyuma w’ukwezi kwa Kanama, ukorwa abantu baterana inyanya bikajyana no gukubita ibitwenge baseka kugeza ubwo Umujyi bawuhinduye umutuku.

Ni umukino umaze imyaka myinshi kuko watangijwe mu 1945 aho abawitabira baturutse mu bice bitandukanye by’Isi barwana baterana inyanya ziba zarangiritse.

Uyu mukino udasanzwe ufite amateka kuva mu 1945

Bivugwa ko uyu mukino wo guterana inyanya ari wo wa mbere uhuriza hamwe abantu benshi ku isi. Uretse kuba ugitangira warakorwaga mu buryo bwo kwishimisha, mu 2013 watangiye kuba ihuriro ry’ubukerarugendo ndetse n’umubare w’abaryitabira ugenda wiyongera.

Ibi byatumye hanashyirwaho ibiciro ku banyamahanga bitabira uyu mukino, aho bishyura amayero 15, ni ukuvuga abarirwa mu bihumbi 22 by’Amafaranga y’u Rwanda. Ni mu gihe abaturage ba Buñol bawitabira ku buntu.

Toni zigera ku 150 z’inyanya nizo zakoreshejwe muri uyu mukino

Ibiro nyaramakuru by’Abongereza, Reuters byatangaje ko toni 150 z’inyanya, arizo abitabiriye uyu mukino bakoresheje ndetse ko zimwe zinakurwa mu bihugu bituranye na Espagne.

Ni umukino uhuruza abantu baturutse hirya no hino ku Isi

Abasenateri bashinzwe kandi iyubahirizwa ry’amahame remezo ari mu ngingo ya 10 y’Itegeko Nshinga rya Repubulika y’u Rwanda.

Abasenateri batorerwa he?

Sena igizwe n’abasenateri 26, buri muntu agomba kuba afite nibura imyaka 40 y’amavuko, bakaba kandi bagomba kuba bahagarariye ibyiciro byose by’Abanyarwanda, bakaba batorerwa manda y’imyaka 5 nk’uko Itegeko ryo muri 2019 ribiteganya.

Barimo 12 baturuka muri buri Ntara n’Umujyi wa Kigali, aho Intara y’Iburengerazuba ivamo 3, iy’Amajyepfo ikavamo 3, iy’Iburasirazuba ikavamo 3, iy’Amajyaruguru ikavamo 2 (kuba bake biraterwa n’uko iyo Ntara ifite umubare muto w’abaturage), Umujyi wa Kigali ukaba uvamo Umusenateri umwe.

Harimo kandi Abasenateri 8 bashyirwaho na Perezida wa Repubulika, hakaba Abasenateri 4 baturuka mu mitwe ya politiki yemewe mu Rwanda uko ari 11, hakaba n’Abasenateri babiri bahagarariye amashuri makuru na za kaminuza(umwe ava mu mashuri makuru ya Leta, undi akaba aturuka mu mashuri makuru yigenga).

Abasenateri biyamamariza he, bagatorerwa he?

12 bahagarariye inzego z’Ubutegetsi (bavuye mu Ntara), batorwa n’Inama Njyanama z’Uturere na Biro nyobozi z’Inama Njyanama z’Imirenge yose igize Igihugu, bakiyamamariza muri buri Karere, akaba ari na ho ababatora baza gukorera icyo gikorwa, amajwi agakusanyirizwa ku biro bya buri Ntara.

Umuvugizi wa Komisiyo y’Igihugu y’Amatora (NEC), Moïse Bukasa Karani, avuga ko hari uburyo bwinshi uwifuza kuba umusenateri ashobora kwiyamamazamo, yajya kuri radio cyangwa kuri televiziyo runaka, yabishyira ku mbuga nkoranyambaga ze n’ahandi, ariko akitondera Itegeko rigenga amatora.

Bukasa akomeza agira ati "Uretse uko kwiyamamaza kwabo, twebwe nka NEC icyo tubafasha ni uko nibura umunsi umwe bazahura n’iyo nteko itora muri buri Karere, icyo gihe rero iyo bahuye baragenda bakiyamamaza, tukabaha iminota batagomba kurenza, hanyuma bo bagakomeza mu buryo bwabo."

Hari Abasenateri 4 bava mu mitwe ya politiki, bakaba batorerwa ku cyicaro cy’aho iyo mitwe ikorera ku bwumvikane bwayo, bitewe n’icyo buri mutwe uhuriyeho n’undi, mu gihe abahagarariye amashuri makuru na Kaminuza batorwa n’abarimu bagenzi babo (bikabera mu mashuri yegeranye mu gace runaka).

Abacuruzi bo muri iryo soko bagera hafi kuri 700 bavuga ko ku wa Gatanu tariki 23 Kanama 2024, batunguwe no kumenyeshwa (binyuze kuri radio yo muri iryo soko), ko bitarenze icyumweru kimwe kugera tariki 30 Kanama 2024, bagomba kuba barivuyemo bagashaka ahandi bajya gukorera.

Aba barimo Nsengiyera Jean de Dieu umaze imyaka 16 ucururiza muri iryo soko ibijyanye n’ibiribwa ndetse n’imyambaro, akaba agira ati "Twe baradutunguye, bagombaga kutumenyesha hakiri kare ko bakeneye iri soko, bakaduha integuza(préavis), yanditse tugashaka aho dukorera."

Nsengiyera avuga ko umucuruzi atajya apfa kubona ahandi yakwimukira. We na bagenzi be bagasaba guhabwa nibura igihe cy’amezi atandatu cyo kwitegura no gushaka ahandi muri uyu Mujyi wa Kigali bajya gukorera.

Bavuga ko icyumweru bahawe gishobora gushira hari abataravana ibicuruzwa byabo byose muri iryo soko, ndetse hakaba n’abavuga ko bafiti amadeni ya banki cyangwa se na bagenzi babo binyuze mu bimina.

Uwitwa Nyiraminani Claudine umaze imyaka 19 acururiza muri iryo soko rya Rwezamenyo, avuga ko impamvu basaba amezi atandatu, ari ukugira ngo ibimina bizabe byamaze kwishyura buri muntu bifitiye amafaranga, bitaba ibyo bamwe bakazagenda bambuye bagenzi babo.

Nyiraminani ati "Banyimuye muri iki cyumweru naba mpombye bikomeye, ibintu ntibyabona aho bijya, abana ntibajya ku ishuri, jyewe mfite umwenda w’ahitwa ku muzungu w’amezi atandatu, nkagira n’uwa banki w’imyaka itanu, ubu nari maze kwishyura imyaka ibiri, naba ngiye kuba bihemu n’umutungo wanjye nkawuhomba."

N’ubwo bavuga ko bimuwe hutihuti cyangwa ikubagahu, iryo soko rifite uruzitiro rw’amabati rumaze hafi imyaka ibiri ruteguza ko hagiye kubakwa, aho rwiyemezamirimo wariguze n’Akarere ka Nyarugenge ngo yababwiraga ko najya kubaka azabaha igihe gihagije cyo kwitegura.

Aba bacuruzi bavuga ko iryo soko rimaze imyaka itanu abariguze bagaragaza ko bagiye kuhashyira inyubako zigezweho ariko ntibabikore, kandi n’ubu ngo nta kimenyetso (igishushanyo mbonera) cyerekana ko kwimuka byihutirwa cyane.

Umuvugizi w’Umujyi wa Kigali, Emma-Claudine Ntirenganya, avuga ko bagiye gusuzuma niba rwiyemezamirimo waguze iryo soko ataba arenze ku masezerano yagiranye n’abaricururizamo mu gihe yaba abimuye vuba, kuko ngo yakabaye yarahashyize inyubako zigezweho.

Ntirenganya agira ati "Hano muri Rwezamenyo umuntu urimo ni rwiyemezamirimo, ntabwo ari isoko ry’Umujyi wa Kigali, birasaba kumenya ngo ’bari bafitanye amasezerano ameze gute’, icyo twebwe twifuza ni uko yakabaye yubaka ibintu bizima ariko akaba atarabikora."

Ntirenganya akavuga ko ikibazo kidashingiye ku kuba abo bacuruzi barahawe igihe gito cyo kwitegura kwimuka, ahubwo icyo bazareba ari ayo masezerano hagati ya rwiyemezamirimo n’abacuruzi.

Twavuganye n’uhagarariye rwiyemezamirimo waguze isoko rya Rwezamenyo, Jean Baptiste Dusabinema, avuga ko nta byinshi yavuga ku bijyanye no kwimura abo bacuruzi byihuse, kuko inzego z’ubuyobozi ngo zakiriye icyo kibazo zikazatanga igisubizo bitarenze kuri uyu wa Kabiri.

Sandrine Isheja yagizwe Umuyobozi wungirije wa RBA, Zephanie Niyonkuru akurwa mu nshingano

Isheja Butera yari asanzwe ayobora radiyo ya Kiss FM, akaba agiye kungiriza Cléophas Barore ku buyobozi bw’Ikigo cy’Igihugu cy’Itangazamakuru (RBA).

Iyi nama y’Abaminisitiri yateranye kuri uyu wa Gatanu tariki 23 Kanama 2024, yavanye kandi ku mirimo Zephanie Niyonkuru wari Umunyamabanga Uhoraho muri Minisiteri ya Siporo (MINISPORTS).

Zephanie Niyonkuru muri Mutarama 2023 nibwo yagizwe Umunyamabanga Uhoraho muri Minisiteri ya Siporo asimbuye Shema Maboko Didier wari wahagaritswe na Perezida Paul Kagame muri Nzeri 2022.

Inama y’Abaminisitiri yo kuri uyu wa Gatanu ikozwe ku nshuro ya mbere muri iyi Manda nshya y’imyaka itanu ya Perezida Kagame, ikaba yanemeje gahunda ya Guverinoma (NST2). Hafashwe kandi ingamba zo kwirinda ubushita bw’inkende (monkey pox).

Umujyi wa Kigali wasabye abafite cyangwa abashinzwe inyubako zihuriramo abantu benshi, zaba iz’abikorera cyangwa iza Leta, ku masoko, aho abagenzi bategera imodoka, ku nsengero n’ahandi, ko ari ihame kugira ubukarabiro rusange bukora, kandi abagana izo nyubako bakaba bagomba gukaraba intoki mbere yo kuzinjiramo, igihe cyose.

Itangazo ry’Umujyi wa Kigali rivuga ko ibi bizakorwa mu rwego rwo kwimakaza isuku ya buri muntu, cyane cyane iy’ibiganza, kuko bifasha kwirinda no kugabanya indwara, harimo iy’ubushita bw’inkende ivugwa henshi ku isi.

Umujyi wa Kigali wamenyesheje ba nyir’inyubako ko ubu hatangiye ubugenzuzi bwo kureba ko ahahurira abantu benshi hose hari ubukarabiro kandi bukora, kandi ko "abatubahiriza ihame ryo gukaraba intoki ku bantu bose babagana, bazahanwa hakurikijiwe amabwiriza y’lnama Njyanama y’Umujyi wa Kigali yo muri 2021."

Mu bice by’Umujyi wa Kigali twabashije kugeramo, hari inyubako nini z’ubucuruzi, za gare n’amasoko, aho ubukarabiro buheruka amazi mu bihe bya Covid-19, ndetse hakaba n’aho bwangiritse cyangwa bwavuyeho.

Umwe mu bakozi bashinzwe umutekano muri gare yo mu Mujyi wa Kigali (Downtown) avuga ko ataramenya neza impamvu ho ubukarabiro bwaho budakora.

Ahandi batinze gushyira ubukarabiro mu bice bihuriramo abantu benshi, ni i Nyabugogo ku marembo y’isoko rya Inkundamahoro, aho Ubuyobozi bwaryo buvuga ko ibikorwa remezo by’isuku byaho byari byarangiritse.

Umuyobozi w’Inama y’Ubutegetsi y’iryo soko, Nshogoza Seleman, agira ati "Ibikorwa bitanga amazi barimo barabisana, uyu munsi ni uwa kabiri(kuri uyu wa Gatanu), twari twavuganye ko babishyiramo amazi."

Nshogoza avuga ko baza gusaba abantu kongera gushaka indobo za ’kandagira ukarabe’ cyangwa umuti wa alukoro(sanitizer), bakajya babishyira ku rwinjiriro rwa buri duka.

Umuvugizi w’Umujyi wa Kigali, Emma Claudine, avuga ko nta rwitwazo ruhari rwo kuba abantu batashyiraho ubukarabiro cyangwa ubundi buryo bwo kwisukura, hagamijwe kwirinda ubushita bw’inkende hamwe no kugira isuku umuco.

Umukuru w’Igihugu avuga ko hari igihe abafatanyabikorwa ba Leta bemera gutanga amikoro ku mishinga mishya y’iterambere, ariko bakabanza gutegereza ko n’iyari isanzweho ishyirwa mu bikorwa bagaheba.

Yagize ati "Usanga ibyangombwa byose bihari, ariko icyagombaga gukorwa mu cyumweru kimwe, ukwezi kugashira kitarakorwa, wabaza umuntu akakubwira ngo ’tugiye kubikora’, ujya gutegereza ukwezi kubera iki."

Perezida Kagame avuga ko gukora ibintu imburagihe birangira hari inzego zivuga ko amikoro yabuze, nyamara zifite abakozi bafite ubushobozi bwo kubikora vuba bikarangira.

Yasabye abagize Guverinoma bagiyeho kwisuzuma bagakosora iyi mikorere batitaye ku babanenga mu gihe bakoze ibikwiriye, ariko mu gihe banengwa iby’ukuri bakikosora.

MINICOM na MIFOTRA ziherutse guhabwa Abaminisitiri bashya

Prudence Sebahizi ni we wagizwe Minisitiri w’Ubucuruzi n’Inganda (MINICOM), mu gihe Minisiteri y’Abakozi ba Leta n’Umurimo (MIFOTRA) yahawe Amb. Christine Nkulikiyinka.

Impuguke Straton Habyarimana avuga ko n’ubwo ikibazo cy’ibiciro ari cyo gihangayikishije benshi muri iki gihe, igikomeye kurusha ibindi ari icyuho kiri hagati y’ibyoherezwa mu mahanga n’ibitumizwayo, kuko ngo ari ho agaciro k’ifaranga gashingiye.

Habyarimana avuga kandi ko MINICOM ikeneye guhugura abacuruzi baherekeza ibicuruzwa biva hirya no hino mu Gihugu no hanze, bakitabira gukoresha ikoranabuhanga ribafasha gutumiza ibintu bikabasanga aho bari, kugira ngo igiciro cy’ingendo bakoze kitishyuzwa abaguzi.

Ati "Nta mpamvu yo gutega indege ngo ugiye kurangura amakanzu mu Bushinwa cyangwa amatisi muri Turukiya, hari uburyo bwo gukorana n’ababitumiza (Suppliers) kugira ngo nawe wishyure amafaranga make, ibicuruzwa bikatugeraho bitaduhenze."

Abatumiza ibintu mu mahanga bagirwa inama yo gukorana na sosiyete zibikurayo

Ashima ko Leta irimo gushakira abahinzi uburyo bwo kubika umusaruro igihe kirekire, ariko ko hakenewe n’uburyo burambye bwo kubashakira isoko kandi ribanogeye.

Ati "Kuko iyo uvuze ngo PAM irimo iragura ibigori byo kugemurira abantu bo muri Gaza (ni urugero), ibyo bigori kuki bitagurwa mu Rwanda kugira ngo wa Munyarwanda na we ayo madolari amugereho!".

Habyarimana avuga ko akenshi yumva ibigori byahinzwe n’Abanyarwanda bigurwa n’ibigo by’amashuri cyangwa byaragenewe kugaburirwa amatungo (inkoko), ariko na bwo ntihasobanurwe uko umusaruro uzasigara ugomba kubikwa n’abo uzahabwa.

Avuga ko hakenewe kujyaho urwego rw’abantu bashinzwe gushaka hakiri kare isoko ry’umusaruro, ryaba iriboneka hirya no hino mu Gihugu no hanze yacyo, mu rwego rwo guha icyizere abahinzi, aborozi n’abandi bafite ibyo bakora.

Hakenewe kandi kujyaho urwego rw’abantu bashinzwe gushaka hakiri kare isoko ry’umusaruro, ryaba iriboneka hirya no hino mu Gihugu no hanze yacyo

Iyi mpuguke mu bijyanye n’ubukungu ikomeza isaba MINICOM kongera kubyutsa ubucuruzi buto buto bwambukiranya imipaka, kuko ngo bwaheshaga imirimo benshi mu bagore n’urubyiruko.

Minisiteri ishinzwe umurimo yo yakora iki?

Habyarimana avuga ko Minisiteri y’Abakozi ba Leta n’Umurimo (MIFOTRA), ikeneye gufatanya n’izindi nzego, kugira ngo gahunda yo guhanga imirimo miliyoni imwe n’ibihumbi 500 buri mwaka igerweho mu buryo burambye, kuko ngo hari ukuyihanga hakaba no kuyifasha kugumaho.

Iyi Minisiteri kandi ngo ikeneye gufasha urubyiruko n’abagore kubona igishoro hadashingiwe ku ngwate, ahubwo hakarebwa ubwiza bw’umushinga buri muntu afite, hamwe no kumufasha gutegura uburyo amafaranga akoreshwa bidakozwe mu kajagari.

Gahunda yo guhanga imirimo miliyoni imwe n’ibihumbi 500 buri mwaka ikwiye kugerweho mu buryo burambye

Kuba Guverinoma nshya izashyira mu bikorwa gahunda y’imyaka itanu aho kuba irindwi nk’uko byari bisanzwe, ngo ni igihe gito gisaba Leta gutandukana n’imvugo ngo "Isoko ntiriratangwa cyangwa ngo haracyakorwa inyigo", mu rwego rwo kwirinda kudindiza imishinga y’iterambere.

Perezida Kagame yagenewe ubutumwa bw’ishimwe bw’abavuye muri Guverinoma n’abashya bayinjiyemo

Dr. Jean Chrysostome Ngabitsinze wari Minisitiri w’Ubucuruzi n’Inganda (MINICOM), yashimye Umukuru w’Igihugu wamugiriye icyizere akamugira umwe mu bagize Guverinoma.

Yagize ati "Ndabashimiye cyane Nyakubahwa Perezida wa Repubulika, kuba umwe mu bagize ’Cabinet’ ni amahirwe ntazibagirwa na rimwe, ni icyuhabiro cy’ubuzima bwose nzahora nzirikana iteka. Imana y’u Rwanda rwacu mukunda kandi mwitangira ikomeze ibagende imbere muri byose."

Aurore Mimosa Munyangaju wari Minisitiri wa Siporo

Aurore Mimosa Munyangaju wari Minisitiri wa Siporo, yavuze ko inshingano yari yarahawe cyabaye igihe cy’ubunararibonye mu buzima bwe azakomeza kuzirikana.

Yagize ati "Nyakubahwa Perezida wa Repubulika, Paul Kagame, mfashe uyu mwanya kugira ngo bashimire mbikuye ku mutima ku bw’igihe namaze nkorera Abanyarwanda n’u Rwanda ku buyobozi muhagarariye, ubwo nari Minisitiri wa Siporo. Mbashimiye icyizere mwangiriye, cyabaye igihe mu buzima cy’ubunararibonye nzakomeza kuzirikana."

Amb. Christine Nkulikiyinka wagizwe Minisitiri w’Abakozi ba Leta n’Umurimo

Amb. Christine Nkulikiyinka wagizwe Minisitiri w’Abakozi ba Leta n’Umurimo, yagaragaje ko yatewe ishema ryo kuba umwe muri Guverinoma y’u Rwanda akazakorana umurava mu nshingano yashinzwe.

Ati "Ni ishema rikomeye kuri njye kuba umwe mu bagize Guvernoma nshya! Ndashimira Nyakubahwa Perezida wa Repubulika, Paul Kagame, mbikuye ku mutima, ku cyizere akomeje kungirira. Niyemeje gukorana umurava nkuzuza inshingano nshya! Imihigo irakomeje!".

Prudence Sebahizi wagizwe Minisitiri w’Ubucuruzi n’Inganda (MINICOM), yavuze ko atewe ibyishimo no kuba Perezida Kagame yamugiriye icyizere kandi ko yiteguye gukorera Abanyarwanda.

Prudence Sebahizi wagizwe Minisitiri w’Ubucuruzi n’Inganda

Yagize ati "Ntewe ishema n’ibyishimo bikomeye kuba Nyakubahwa Perezida wa Repubulika, Paul Kagame, yangiriye icyizere nkagirwa Minisitiri w’Ubucuruzi n’Inganda w’u Rwanda. Niteguye gukorera Abanyarwanda, tuyobowe namwe mu bwitange n’ubunyangamugayo, munyizere."

Richard Nyirishema wagizwe Minisitiri wa Siporo, yashimye Umukuru w’Igihugu ndetse avuga ko yiteguye guteza imbere siporo.

Richard Nyirishema wagizwe Minisitiri wa Siporo

Yanditse ati "Murakoze Nyakubahwa Perezida wa Repubulika, Paul Kagame kubera iki cyizere mungiriye. Niyemeje kuzuza inshingano nahawe mu guteza imbere siporo tuyobowe namwe."

Dr. Doris Uwicyeza Picard, wagizwe Umuyobozi Mukuru w’Urwego rw’Igihugu rushinzwe Imiyoborere (RGB) asimbuye Dr Usta Kaitesi, yashimye Perezida Kagame ndetse ashimangira ko yiteguye kwitanga akorera Abanyarwanda n’Igihugu muri rusange.

Dr. Doris Uwicyeza Picard, wagizwe Umuyobozi Mukuru w’Urwego rw’Igihugu rushinzwe Imiyoborere (RGB)

Yagize ati "Nyakubahwa Perezida wa Repubulika, Paul Kagame, nciye bugufi kandi ibyishimo byansaze. Ndabashimiye ku bw’icyizere cy’inshingano nahawe, kandi nzazigeraho. Niyemeje kwitanga uko nshoboye mu gukorera Igihugu n’abaturage, buri gihe. Imihigo irakomeje kandi nzaharanira kuba indashyikirwa. Murakoze Nyakubahwa."

Abagize Guverinoma basanzweho na bo bashimiye Perezida wa Repubulika ku bw’icyizere bongeye kugirirwa banamwizeza ko bazakorana umurava imirimo bashinzwe, ubwitange no guharanira iterambere ry’u Rwanda.

Dr. Jean Chrysostome Ngabitsinze wari Minisitiri w’Ubucuruzi n’Inganda (MINICOM) nawe yashimye Umukuru w’Igihugu wamugiriye icyizere

Guverinoma y’u Rwanda muri iyi Manda y’imyaka itanu Perezida Kagame aherutse gutorerwa, igizwe n’Abaminisitiri 21, Abanyamabanga ba Leta icyenda hamwe n’Umuyobozi Mukuru umwe w’Urwego rushinzwe Imiyoborere mu Rwanda (RGB).

Dr. Ngabitsinze Jean Chrysostome

Dr. Ngabitsinze wayoboraga MINICOM kuva tariki 30 Nyakanga 2022, yasimbujwe Prudence Sebahizi wari Umuyobozi ushinzwe Imikorere n’Ubugenzuzi mu Bunyamabanga bw’Isoko Rusange rya Afurika (AfCTA).

Dr. Ngabitsinze ari mu bo Perezida Kagame yanenze ubwo yari amaze kwakira indahiro ya Minisitiri w’Intebe, Dr. Edouard Ngirente, hamwe n’iz’Abadepite, ku wa Gatatu tariki 14 Kanama 2024.

Icyo gihe Perezida Kagame yanenze abayobozi batamenya ibibazo biri mu nshingano zabo, ariko ikirushijeho kuba kibi ngo ni ’ukubimenya ntugire icyo ubikoraho’, ndetse no kudakorana kw’inzego, aho yatanze urugero ku bahinzi b’umuceri muri Rusizi bawejeje bakabura isoko.

Perezida Kagame ati "Narimo nshakisha amakuru kuri Internet, nza kubona ku mbuga nkoranyambaga abantu batabaza ko bahinze umuceri bareza, amatoni n’amatoni arababorana kuko adafite aho ajya, adafite abayagura."

Perezida Paul Kagame

Ati "Nafashe telefone ndabaza, nsanga uwari Minisitiri w’Ubuhinzi arabizi, nsanga uwari Minisitiri w’Ubucuruzi arabizi, uw’Ubutegetsi bw’Igihugu ntabizi cyangwa se arabizi, byose biri hagati, Minisitiri w’Intebe wagiyeho na we yari abizi igice."

Umukuru w’Igihugu ababazwa n’uko abaturage, nk’abo bahinzi bashoye imbaraga zabo n’amafaranga bigapfa ubusa, nyamara baba bakoze ibyo ubuyobozi bubatoza buri munsi.

Birakekwa ko umuceri weze i Rusizi mu kibaya cya Bugarama ugera kuri toni ibihumbi bitanu wabuze isoko, mu gihe abakawushakiye isoko bita cyane ku winjira mu Rwanda uva mu mahanga bafitemo inyungu.

Kuri uwo munsi Perezida Kagame yanenze abayobozi bishakira icyubahiro(VIP), abatumva abaturage bose bitewe na ruswa n’icyenewabo, yajya kumenya amakuru y’ibibazo bihari akayamenyera kuri murandasi aho kuyabwirwa n’inzego zibishinzwe.

Abahinzi b’umuceri mu Karere ka Rusizi bavuga ko bari mu gihombo cy’umuceri ugera muri toni ibihumbi bitanu weze ariko ukabura isoko

Perezida Kagame avuga ko Manda y’imyaka itanu ya Guverinoma hamwe n’iy’Abadepite yatangiye muri 2024, izaba iyo gukora cyane hagakemurwa ibibazo biri mu baturage.

Imifuka bayitwikirije ibyatsi ngo idakomeza kwangirika

Kanda HANO urebe urutonde rw’Abagize Guverinoma Nshya