Si ko hahoze, kuko kera hari ’Biryogo’ nk’ahandi hose, ariko ubwo u Rwanda rwiteguraga kwakira inama y’Abakuru b’ibihugu na za Guverinoma bo mu Bihugu bivuga Icyongereza - CHOGM mu ri 2022, u Rwanda rwubatse ibikorwa remezo by’imihanda, inzu, ariko ntirwibagirwa no kongera aho abantu bidagadura, bakisanzura kakahava.

Ni bwo hashyizweho imihora ibiri - itanyurwamo imodoka - Car Free zone, umwe uba Kisimenti ushyirwamo utubari, undi ujya i Nyamirambo mu Biryogo.

Uyu wa Biryogo wari ufite umwihariko. Ahasizwe kaburimbo, hashushanyijwe amabara meza, hasigwa amarangi, maze ibintu bihindura isura.

Ikindi gikomeye, nuko aha ngaha ho, ryari ihuriro ry’abanywa akadasembuye, ari na yo mpamvu nta bisakuza, byigeze biharangwa, nta cupa ryigeze rikomana n’irindi, yewe nta n’urundi rugomo rwigeze ruharangwa.

Amakuru y’umuhora wundi byavukiye rimwe ku Kisimenti yo, mbaye nyazigamye, ariko abakunda ibyiza, abakunda umuco n’abifuriza ineza urubyiriko, abashyizeho gahunda ya Tunyweless bo bazi impamvu iyo nzira ya Kisimenti itakomeje.

Mu marangi rero ho haracyahari, ndetse umunsi ku wundi harushaho kunguka abakunzi baza bagana amaresitora ahari arimo nk’iyitwa Macoco na Issa Cafe, yamamaye nka "Visit Rwanda", ariko ko si ho honyine.

Igikundiro cyaho kiva ku bidasanzwe bihaboneka, harimo ipilawo yanditse izina, urebye iakba ari na yo cyita rusange cyaho.

Hari rero n’igikoma kirimo margarine na chocolat cyamenyekanye cyane ku izina "Jakarta", ariko abakuze bakakita "Ruvubatabakambwe", kuko nabo ntibahatangwa.

Mu marangi, haba kandi za nyama umuntu afata akumva atamiye agashyitse, zizwi nk’Igiti, iyo ikaba ari mushikaki ivuguruye.

The vert abenshi bita teveri, na yo ntiyabura mu Marangi, ndetse na Mukaru, ka Tangawizi bavuga ko ngo kongera imbaraga z’abagabo, hakaba kandi ikawa, Chapati, Sambusa n’Ubugari.

Hari kandi n’umuceri w’Isami, uyu w’ibara ryenda kuba icyatsi kibisi, hakaba inyama zitetse mu bitunguru, agatogo ndetse na boilo bikunzwe cyane n’abantu baza bafite appetit baturutse kuri Pele Stadium n’ahandi.

Uburyohe bwo mu Marangi buturuka no ku miterere yaho, aho urya mugenzi wawe akuri inyuma nta kibazo, nawe ategereje ko bamuhereza ibye, kuko abantu babaye benshi bakabura aho bicara.

Ariko ibi ntibivuze ko bakira abantu nabi, ahubwo usanga buri wese uhafite business arushanwa na bagenzi be kubwira abakiriya ati "nimuze tubahe dufite ibiryo biryoshye kurusha abari aha bose."

Umukiriya umwe yagize ati "Usanga bashaka kuguterura."

Mu Marangi, ni ahantu hasohokera ingeri zose, kandi buri wese akabona ibimubereye, uko umufuka we ungana, kandi ni ahantu benshi bajya kugira ngo baruhure umutwe, n’ubwo haba abantu benshi.

Umukiriya umwe yagize ati "mu minsi yashize, iyo utajyanaga umukunzi wawe mu Marangi mwashoboraga kubipfa."

Abasitari barimo nka Bruce Melodie, The Ben, ugira gutya ukabona murahahuriye. Wa musore w’Umunyamerika wageze i Kigali agakundwa cyane I Show Speed, na we yarahasohokeye maze agubwa neza.

Abakerarugendo basohokera mu Marangi bakirebera umuco nyarwanda ugaragara muri uyu muhora, aho Abanyarwanda berekana ko batarira mu gikari, kuko bafite umuco wo gusangira.

Aha, ngo abasore n’inkumi babyiruka baturutse za Kimironko, Remera n’ahandi mu bice by’Umujyi bajya baza bakahagorobereza, maze ugasanga saa yine z’ijoro baracyataramye.

Hagati aho, Perezida Paul Kagame yasuye mu Marangi ubwo yari muri Siporo rusange muri Gicurasi 2022.

Mu Biryogo bazibukira urugendo rw’Umukuru w’Igihugu ku isoko rya Biryogo rya Kijyambere ryahise ritangira kubakwa, ubwo yavagwa mu Marangi, akahanyura, bakamubwira ko iryo soko ryafunzwe.

Ukwezi kumwe nyuma y’urwo rugendo, isoko rya kijyambere rya Biryogo ryahise ritangira kubakwa. Ubu riri hafi kuzura.

Amakuru mashya ku badaheruka muri Kigali, nuko ubu noneho uyu mujyi usigaye ufite ahantu ho kuruhukira, ntawe uri bukubaze ngo "urafata iki, turabaha iki"?

Uyu munsi, ahantu hakomye imodoka(car Free zone), ni ho habaye ihuriro ry’abashaka kwiganirira bisanzuye, ndetse bafite na internet y’ubuntu.

Kuri uyu mwanya, hiyongereyeho ndetse n’indi myanya yashyizwemo intebe mu busitani, naho usanga abantu bashobora kuharuhukira nta wubabangamiye.

Ubu noneho, hari n’indi myanya yari isanzwe izitije amabati, bigatera umwanda mu mujyi, none umujyi wafashe icyemezo cyo kuyakuraho, no gutunganya ibibanza bitarubakwa, bigashyirwamo ubusitani burimbisha umujyi.

Kigali ni indorerwamo y’u Rwanda ndetse na Afurika. Niyo mpamvu, isuku ari ikintu abayobozi bayo bitwararika.

Ku Cyumweru Tariki 15 Gashyantare, nibwo umuyobozi wanjye yamenyesheje gahunda y’urugendo ruzenguruka inkambi z’Impunzi z’abaturanyi, abavandimwe bahungiye mu Rwanda, bakaba bacumbikiwe mu Burasirazuba bw’u Rwanda, Akarere ka Kirehe na Gatsibo.

Ku wa Mbere mu gitondo nazindukanye n’abantu duhuje umwuga, maze umuhanda tuwurira kuwumara. Nsanzwe nzi inkambi z’Impunzi, ariko nari ntaragera i Mahama mu Karere ka Kirehe, ahacumbikiwe Abarundi n’Abanyekongo bahunze ibibazo by’intambara mu bihugu byabo. Amatsiko yari yose, dore ko byanze bikunze numvaga ndi buhasange amakuru meza.

Kugera mu nkambi, byarantunguye, kuko nari ntegereje kugenda nkakubitana n’urwererane rw’amashitingi ariho amashami abiri y’imikindo asobekeranye nk’uruziga, narwo rurimo ibiganza bibiri bibumbatiye igihimba cy’umuntu, byose biri hejuru y’ijambo UNHCR.

Aho twahingukiye, ni umudugudu wubakishije ibikoresho bisanzwe by’inzu zitimurwa bikoreshwa mu Rwanda, aho kakaba ari ku maduka y’inkambi ya Mahama.

Ubwo bambwiye amakuru rero nahise mbaza nti “noneho rero iyi ni downtown? Sindeba se iyi ari quartier commerciale? Ni umujyi da!”

N’ikimenyimenyi naje kumenya ko mu Bacuruzi bari aho, bari uwubatsemo iduka, aritangaho Miliyoni ebyiri z’Amafaranga y’u Rwanda. Ubu imari shingiro ye igeze kuri Miliyoni 12 Frw. Ayo ubaze mu Marundi y’iwabo, ni Miliyoni 24.38. Ariko ubuzima uyu mucuruzi yaboneye mu Rwanda, bwamuhaye icyizere ko azakomeza kwaguka, akanohereza ibicuruzwa mu Mahanga.

Mugenzi we hafi ye na we, ni umucuruzi w’ibinyobwa bya Bralirwa na Skol, inganda zizwiho kwenga ibinyobwa bikesha igitaramo.

Uyu nawe avuga ko n’ubwo abakiriya bamwe batashye, harimo n’abagiye batamwishyuye, ngo “nta ribi rwose ubuzima burakomeje.”

Muri uyu mujyi haba hari benshi, abakuru n’abato, buri wese ashaka kuganiriza abashyitsi baje, kubabaza amakuru y’I Kigali, kubabaza abanyamakuru bakunda…mebse, ni abaturage bagira urugwiro.

Gusa, aha ntitwagombaga kuhatinda, kuko i Mahama hari byinshi byo kureba. Twigiye imbere, noneho ibyo twabonye ni agatangaza.

Hari ubworozi bw’inka nyinshi zibarirwa mu magana, kandi ba nyirazo barazikenura, bakazisukura, yewe! Ni nziza koko!

Izi na zo, ni iz’impunzi zatujwe i Mahama, zikaba zorowe n’abibumbiye muri Koperative bahuriyemo n’abaturanyi b’Abanyarwanda. Muri macye, uko badusobanuriye, I Mahama abaturage bakiriye izi mpunzi, babana na zo, bakorana na zo mu buzima bwa buri munsi. Ni yo mpamvu n’amahirwe u Rwanda rutanga bayasangira, nta mwiryane.

Izi nka, zibaha litiro zirenga 2500 z’amata ku munsi, bakagemura, bakisagurira, kugira ngo batarwana ubworo n’abana babo. Ikintu kigeze kubakoma mu nkokora, ni imvubu zabateraga zivuye mu ruzi rw’Akagera, zikabicira inka. Zabigize ubugira gatatu, zica inka munani, bahita barakara, batangira amarondo, maze izo nyangabirama zaza bakazitunga amatoroshi, bakazivuza imijugujugu zigasubira mu bizenga zimyiza imoso.

I Mahama, abana bariga, kandi bahurira mu ishuri n’Abanyarwanda babakiriye. Ishuri twagiyemo ririmo amashami, arimo na Coding. Hamwe rwose twagiye dusanga bari muri Programation, bakoresha za mudasobwa z’akataraboneka.

Ahandi naho twahasanze abari muri Laboratwari, bashimishijwe n’uko ibyo biga bidahera mu magambo, ahubwo bavuga bati iyo uvanze ibi na biriya bibyara ibi…Kubona ibyo bikora, abana baba bumva ari ibitangaza batari kubona mu mashuri y’iwabo, n’ubwo kuba mu buhunzi atari amahitamo yabo, ni amakosa y’ibihugu baturukamo.

Aya mashuri arimo n’abiga imideri. Ubu rero, umunyeshuri witwa Ganza, we ntashaka ko izina rye rizagarukira hafi. Azatangiza Ganza Fashion Shop, izajya yambika abakomeye. Mu Bakiriya yifuza kubona, ni Perezida Paul Kagame.

Hagati aho, impunzi z’I Mahama ntaho zihurira n’imyotsi. U Rwanda, igihugu kibungabunga ibidukikije, gikunda n’ubuzima bw’abantu.

Buri muryango wemerewe icupa rya gaz, bakoresha yashiramo bakarisubiza kuri depot, bakabaha irindi bityo bityo.

Mu by’ukuri, Mahama si inkambi, ni umudugudu ubu umaze kurengerwa n’ibiti. Abana bajya ku ishuri, abakuru bakirirwa mu mirimo bakorana n’abanyarwanda hanze y’inkambi.

Ni umudugudu nk’uko wabona indi yose, aho usanga amatungo magufi arimo ihene, inkoko n’inkwavu n’ibindi.

Amazi n’amashanyarazi ni uburenganzira bw’I Mahama nk’uko bimeze mu baturage babakiriye.

Ibi bikorwa byose kandi, biri no mu Nkambi ya Nyagiheke muri Gatsibo. Aha niho twasoreje urugendo, dusura uruganda rwa kaunga rwa Miliyoni zirenze magana abiri ruhuriweho n’impunzi z’abakongomani n’abanyarwanda babakiriye.

Aha rero abanyarwanda bari kumwe n’Abakongomani muri Koperative, ngo batunguwe no kubona abantu batazi guhinga. Ariko ubu ngo barabibigishije barabimenya. Ubu rero gahunda ni ugukorera cash, kuko imashini z’uruganda zo zagezemo.

Tumaze gusura ibitaro by’akataraboneka bya Gatsibo byakira abanyarwanda n’inshuti zabo z’abanyekongo bamaze hafi imyaka 30 mu Rwanda, uruzinduko twarusoreje mu bavumvu bo mu nkambi ya Gatsibo, batwambika imyenda yabugenewe, batwigisha guhakura, nuko twiririra ubuki bw’umwimerere turababwira tuti “muduhaye gumino. Tuzahora tugaruka.”