Ni ibirori byitabiriwe n’abasaga Magana atatu biganjemo Abanyarwanda batuye mu mujyi wa Brazzaville n’inshuti zabo, abagize guverinoma, abahagarariye ibihugu byabo muri iki gihugu ndetse n’Imiryango mpuzamahanga n’abandi bayobozi mu nzego zitandukanye muri Congo.

Umushyitsi mukuru yari Nyakubahwa Jean Claude Gakosso, Minisitiri w’ububanyi n’amahanga, Francophonie n’abanyecongo batuye mu mahanga.

Mu ijambo yagejeje ku bari bitabiriye uyu muhango, Ambasaderi w’u Rwanda muri Congo, Parfait Busabizwa yavuze ko uyu munsi ari umunsi ukomeye mu mateka y’u Rwanda.

Yagarutse ku rugamba rwo kubohora u Rwanda, aho Ingabo za RPA zari zirangajwe imbere na Gen. Maj. Paul Kagame zavanye igihugu mu mwijima, zigahagarika Jenoside yakorewe abatutsi none ubu u Rwanda rukaba rugeze ku rwego rwiza mu iterambere.

Yakomeje avuga uko mu gihe cy’imyaka irindwi ishize, ubukungu bw’u Rwanda bwazamutse mu nzego zose z’ubuzima, avuga ko igipimo cy’imibereho myiza y’abaturage kigeze ku rwego rushimishije, ati: “ariko n’ubwo hari ibyagezweho, u Rwanda rukomeje urugendo rwo kuzamura urwego rw’uterambere”.

Ambasaderi Busabizwa yashimiye Leta ya Congo ku mubano mwiza ifitanye n’u Rwanda, anashimira Abanye-Congo, urugwiro bakirana buri Munyarwanda ubagannye.

Abitabiriye uyu muhango basusurukijwe n’itsinda ryitwa Suite Compagnie, mu mbyino gakondo zo muri Congo ndetse umuhanzi Cyusa Ibrahim n’itorero Inganzo ngari, mu njyana y’indirimbo n’imbyino Nyarwanda zijyanye n’umunsi wo kwibohora.

Inzu zatashywe

Abagize iyo miryango bashimira cyane Politiki ya Leta yo gushyira umuturage ku isonga, kuko ari yo yatumye abatishoboye bubakirwa izo nzu, bagashimira Perezida wa Repubulika Paul Kagame wazanye iyo miyoborere igamije guhesha agaciro Umunyarwanda.

Mu marira y’Umunezero abahawe inzu bagaragaje, bavuze ko ibyago bibaho bya mbere bibangamira umuntu ari ukutagira aho kuba, n’aho ubonye mu bushobozi bucye ukabaho nabi utagira icyizere cy’uko buza gucya bimeze.

Umwe yagize ati, "Maze imyaka 16 n’umugabo wanjye tuzerera, tuba mu nzu ziva kuko nizo zabaga zijyanye n’ubushobozi bwacu, ubu turanezerewe bitavugwa, natwe tugiye gukora cyane turihire abana bacu amashuri kuko tubonye aho kuba uzi kubaho ntaho ugira ukinga umusaya"?

Undi mubyeyi agira ati, "Ese mwari muziko buriya ntaho kwicara twagiraga? None tubonye intebe nziza zo kwicaramo, tubonye aho kurara heza, mu gihe ubuzima bwacu bwari bwuzuye intimba n’agahinda kubera kubura aho tuba, turashimira Perezida Kagame watugejeje kuri ubu buzima tukaba natwe tugiye kubaho nk’abandi, abana bacu bagakaraba bagacya".

Umuyobozi w’Akarere ka Muhanga Kayitare Jacqueline avuga ko kubakira abo baturage, byabatwaye ubushobozi butari bucye, ariko ku bufatanye n’abanyamadini n’amatorero n’abandi bafatanyabikorwa basoje icyiciro cya mbere cy’inzu 20 zuzuye mu Kagari ka Gifumba, hakaba hazakomeza kubakwa n’izindi 30 mu cyiciro gikurikiyeho.

Avuga ko usibye izubatswe muri Gifumba, abagize Inama y’Igihugu y’abagore mu Karere ka Muhanga bubakiye inzu indi miryango 12, hakaba kandi n’abubakiwe inzu 30 hirya no hino mu Karere.

Agira ati, "Izi nzu za Gifumba zatwaye asaga miliyoni 160frw, turashimira abitanze ngo zuzure, kuko batumye tubasha guhesha agaciro aba babyeyi babanaga n’abana babo mu buzima butaboroheye, none twishimirire ko twesheje uyu muhigo".

Depite Kalinijabo Bartheremy avuga ko guhabwa inzu zo guturamo, bikwiye kubera abazihawe umusingi wo kwiteza imbere, no kwaguka mu bitekerezo kugira ngo nabo bagire uruhare mu kubaka Igihugu.

Agaruka ku kamaro ko Kwibohora Depite Kalinijabo yavuze ko ari umwanya wo kwisanzura mu bikorwa by’iterambere, kugira Igihugu buri wese yibonamo nta vangura iryo ari ryo ryose, ahubwo Igihugu kigatanga amahirwe angana kuri bose, kuko ariko kwibohora nyakuri bikagaragarira mu bikorwa bitandukanye birimo no kuzamurwa mu bushobozi ku batishoboye.

Agira ati, "Kwibohora ni ukwibuka igihango dufitanye n’izahoze ari ingabo za RPA Inkotanyi, baba abakiri mu nshingano, abazisoje cyangwa abatakiriho bitanze ngo u Rwanda rwongere kuba Igihugu gihesha agaciro umuturage wacyo".

Inzu 20 zahawe abaturage batishiboye zifite agaciro ka Miliyoni 160frw, imwe ikagira ibyumba bitatu, uruganiriro, igikoni n’ubwiherero bwiza, n’ibigega by’amazi bya meterokibe eshatu, hakaba hanateganyijwe kubakirwa irerero ry’abana.

Abahawe izo nzu kandi bazafashwa kubona aho bakorera mu isoko rya Nyabisindu riri hafi yo kuzura, banafashwe gukomeza kwikura mu bukene kugira ngo nabo babashe kwigirira akamaro no kukagirira Igihugu muri rusange.

Akadiho mu birori byo #Kwibohora31 muri Nigeria

Ni ibirori byari byuje akanyamuneza n’ibyishimo ku babyitabiriye, bikaba byahurije mu murwa mukuru wa Nigeria, Abuja, abaturutse hirya no hino muri iki gihugu, ku nsangamatsiko igira iti “Intambwe mu ntego”.

Ambasaderi w’u Rwanda muri Nigeria, Bazivamo Christophe, yibukije ko umunsi wo Kwibohora ari ipfundo rikomeye mu mateka y’u Rwanda, ndetse n’umusingi w’u Rwanda rushya, rufite intego n’icyerekezo.

Yagize ati “Kwibohora ni intambwe idasubira inyuma. Mbere na mbere byari uko nta Munyarwanda ukwiye kuba umunyamahanga ku gihugu cye. Ikindi, Kwibohora ni mu mutwe. Nk’uko Nyakubahwa Perezida Kagame akunze kubitwibutsa, Kwibohora nyako ni ugukora igifitiye inyungu abaturage”.

Yakomeje agira ati “Imyaka 31 ishize ni ubuhamya bw’ibishoboka. Mu miyoborere myiza ya Perezida Kagame, twahisemo kuba umwe, kwihesha agaciro no kugira intego, kandi ibi ntibigarukira ku Rwanda gusa. Ni muri urwo rwego u Rwanda rwaguye amarembo ku Banyafurika bose no ku miryango ya ‘Commonwealth na Francophonie’, ndetse n’abandi bose aho kujya mu Rwanda bidasaba Visa, abandi bakayibona bahageze. Hamwe n’umuhate w’Abanyarwanda mu gukora, ibi bituma ubukungu bwacu buzamuka ku buryo bwihuse”.

Amb. Bazivamo avuga ko Kwibohora ari intambwe idasubira inyuma

Ambasaderi Bazibamo yaboneyeho akanya ko gushima umubano mwiza hagati y’u Rwanda n’amahanga, cyane cyane igihugu cya Nigeria, aho haherutse gusinywa amasezerano mu bijyanye n’imisoro n’amahoro.

Yagize ati “Umubano w’u Rwanda na Nigeria urivugira, ejobundi kuri 27 Kamena 2025, twasinyanye amasezerano yo gukuraho umusoro ku bicuruzwa byishyuye umusoro mu gihugu kimwe (Double Taxation Avoidance Agreement). Iyi ni intambwe ikomeye mu kwagura ubucuruzi hagati y’ibihugu byombi, ndetse no gukuraho imipaka mu bukungu.’’

Ambasaderi Bazivamo yasoje ashimira Abanyarwanda baba muri Nigeria, uburyo bakomeje guhesha ishema u Rwanda no kurumenyekanisha muri iki gihugu, bimakaza indangagaciro na kirazira z’umuco nyarwanda.

Ibirori byo #Kwibohora31 muri Nigeria byaranzwe no gucinya akadiho, ubusabane, naho abanyamahirwe batsindira impano zinyuranye za RwandAir ifatanyije na Ambasade, harimo amatike abiri y’indege yo gusura u Rwanda.

Byari ibyishimo ku bitabiriye iki gikorwa

Inshuti z’u Rwanda muri ibi birori

Ni ikibazo yabajije ku mugoroba wo kuri uyu wa 04 Nyakanga 2025, ubwo yaganiraga n’abitabiriye igitaramo cyo kwibohora akabagaragariza ko Kwibuhora ari urugendo rutarangira kuko imyaka 31 ishize abagishakira u Rwanda inabi bakiriho.

Perezida wa Repuburika yabajije ati “U Rwanda rwakoze iki? Urwanira kubaho baramwamagana? Ariko niko Isi imeze baramwamagana, intambara yabaye muri Congo ntawe utayumva, ese hari umwaka wigeze ushira na rimwe tudasubiyemo ikibazo cy’Interahamwe na FDLR ziri hakurya hariya, turabeshya se turahimba? Twahwemeye se kugaragaza ko muri aka Karere harimo Ingengabitekerezo isa neza n’ibyabaye hano mu Rwanda abantu bakicwa, byaravuzwe birandikwa ariko bigera aho bikarigita bikazima.”

Perezida Kagame avuga ko yagaragarije kenshi abayobozi mu Karere bafata mikoro bagashishikariza abaturage kwica abantu, cyane cyane abavuga ururimi rw’Ikinyarwanda bicwa muri Congo, kandi ko ibyo ntaho bihuriye n’u Rwanda kuko si rwo rwabiteye.

Perezida wa Repuburika Paul Kagame

Agira ati, “Bishoboka bite kuvuga ngo ibyo tuvuga bijyanye n’umutekano bigenda bigahinduka amabuye y’agaciro? N’uyu munsi babimenye tuzahangana nabo abaturega ko uko twirinda tunarinda Igihugu cyacu bitwaje amabuye y’agaciro, nibo biba amabuye ya Congo, abo muri ibyo bihugu bikize birirwa bivuga ubusa nibo biba”.

Avuga ko abitwaza ko Kagame navuga bazamujyana ahantu ntabyo bateze kuko ntaho bamukura, kandi ko nta n’aho bamujyana, kabone n’abo bitwaza ibihano ku bayobozi bakuru b’u Rwanda ko nabo batazi ibyo bakora.

Ibirori byo kwibohora byitabiriwe n’imbaga y’abanyarwanda ndetse n’abanyamahanga batuye cyangwa bakorera mu Rwanda

Abibeshye ku Rwanda bakubiswe inshuro u Rwanda rubaha inzira yo gusubira iwabo
Perezida Kagame kandi yavuze ko abigize abakire bagatanga amasomo ku Rwanda nta shingiro bafite kuko nta n’umwe ukwiriye kwigisha Abanyarwanda uburyo babaho, kuko ari ubucucu bucuramye ahubwo, kandi ko abatumva ubutumwa atanga bakwiye kwitegura kuzabwumva nabi cyangwa neza.

Agira ati, “Ibyabaye Isi yose irebera abacanshuro bakava mu Burayi, abandi banyafurika b’injiji bagahaguruka bakajya gufasha ubuyobozi bwica abaturage babwo, bagafasha interahamwe zamaze abantu hano, none no ngo nibo bashaka kuduha amasomo, ariko murabizi ibyo baboneye i Goma na Bukava kuko ntabwo bari baje kurwana na M23 ahubwo bari baje gutera u Rwanda ariko muzababaze uko byagenze”.

Yongeraho ati, “Uko byagenze rero ni uko twagombaga kubikora, abantu nk’abo mwabonye nyuma yo kubona ko ntacyo badukoraho, twabahaye inzira banasubira iyo baturutse. Twabahaye inzira tubaha umutekano ku buryo bagera iwabo amahoro, ariko bazaga gushira iyo bagerageza bagahatiriza. Ntabwo ari urwenya, ndababwira ko abadashaka kumva niba bafite ukundi bashaka tuzabireba. Byatubayeho rimwe kandi rimwe ni ryinshi ntibizongera ukundi.”

Kagame avuga ko n’abitwaza ko bafite imbaraga n’ubushobozi bwo gutera u Rwanda ubwoba, u Rwanda rwababwiye ko n’ubwo babikeka gutyo ruzakoresha ubushobozozi buhari kugeza aho bishoboka ariko ntihagire uruhagarara hejuru, kuko Abanyarwanda bashobora kugenda kirometero zisaga 2.000 n’amaguru barwana kandi bagakemura ibibazo byarwo.

Perezida Kagame asaba ko abadashaka gukorana n’u Rwanda barureka, n’ayo mafaranga yabo bakayajyana aho bashaka, n’uko bifuza kuyatanga, n’ubwo narwo ruyakeneye, ariko ko nta mafaranga akenewe yo koshya Abanyarwanda kandi ko ntaho ayo mafaranga yabo bazayajyana ngo akoreshwe neza kurusha uko u Rwanda ruyakoresha.

Urugamba rwo kwibohora, umurage w’abanyarwanda
Perezida Kagame avuga ko n’abatari bakavuka igihe urugendo rw’urugamba rwo kubohora Igihugu rwatangiye, bakuze bakajya muri iyo nzira, kandi ko ari urugendo rwatangiye rudafite aho ruzarangirira.

Agira ati, “Ibyinshi biri imbere uyu munsi impamvu yawo wibukwa ntabwo ari ukuvuga ibishya tutazi, ni ukutwibutsa byinshi tuzi, ibibi n’ibyiza n’impamvu yabyo, kugira ngo buri wese yisange mu ruhare akwiriye kuba afite kugira ngo ibyiza by’uyu munsi abe ari byo bishyirwa imbere”.

Yongeraho ati, “Impamvu mvuga inkomoko ntavuga iherezo ndasubiramo ko n’abatari bakavutse, aho bavukiye bagakura bagomba kujya mu nzira y’igikorwa nk’iki ngiki, ni nabo batuma gukomeza kuko abantu, njye nawe n’abandi twese tugira iherezo ariko ntabwo Igihugu kigira iherezo, kugira ngo rero kitagira iherezo nibyo navugaga ko n’uvutse uyu munsi aho akuriye ajya muri ya nzira bigakomeza”.

Avuga ko mu myaka 31 ishize mu Rwanda hari ubusa n’abariho batakiriho, ababishe nabo bari muri ubwo busa bw’Igihugu kuko ntabwo waba uri muzima wiha agaciro unagafite, ngo ubuze abantu nkawe ubuzima.

Agira ati, “Uyu munsi utwibutsa ngo dufite inshingano ko ibyabaye bitari bikwiriye kubaho bitazasubira kuko rimwe byabaye kuri twe ni kenshi, rimwe ni kenshi katasubira. Hari ubwo umuntu abwira abantu ntibumve kuko bagira amatwi ntibumve bakagira ubwenge ntibatekereze, kandi nta na rimwe ntabibabwira ko ibyatubayeho bitazasubira kandi si ibyo ngomba gutegera ubyumva arabyumva, utabyumva biramureba baba abari mu Rwanda cyangwa abari hanze yarwo cyangwa se batari n’Abanyarwanda”.

Perezida Kagame avuga ko n’abatari bakavuka igihe urugendo rw’urugamba rwo kubohora Igihugu rwatangiye, bakuze bakajya muri iyo nzira, kandi ko ari urugendo rwatangiye rudafite aho ruzarangirira.

Agira ati, “Ibyinshi biri imbere uyu munsi impamvu yawo wibukwa ntabwo ari ukuvuga ibishya tutazi, ni ukutwibutsa byinshi tuzi, ibibi n’ibyiza n’impamvu yabyo, kugira ngo buri wese yisange mu ruhare akwiriye kuba afite kugira ngo ibyiza by’uyu munsi abe ari byo bishyirwa imbere”.

Yongeraho ati, “Impamvu mvuga inkomoko ntavuga iherezo ndasubiramo ko n’abatari bakavutse, aho bavukiye bagakura bagomba kujya mu nzira y’igikorwa nk’iki ngiki, ni nabo batuma gukomeza kuko abantu, njye nawe n’abandi twese tugira iherezo ariko ntabwo Igihugu kigira iherezo, kugira ngo rero kitagira iherezo nibyo navugaga ko n’uvutse uyu munsi aho akuriye ajya muri ya nzira bigakomeza”.

Avuga ko mu myaka 31 ishize mu Rwanda hari ubusa n’abariho batakiriho, ababishe nabo bari muri ubwo busa bw’Igihugu kuko ntabwo waba uri muzima wiha agaciro unagafite, ngo ubuze abantu nkawe ubuzima.

Agira ati, “Uyu munsi utwibutsa ngo dufite inshingano ko ibyabaye bitari bikwiriye kubaho bitazasubira kuko rimwe byabaye kuri twe ni kenshi, rimwe ni kenshi katasubira. Hari ubwo umuntu abwira abantu ntibumve kuko bagira amatwi ntibumve bakagira ubwenge ntibatekereze, kandi nta na rimwe ntabibabwira ko ibyatubayeho bitazasubira kandi si ibyo ngomba gutegera ubyumva arabyumva, utabyumva biramureba baba abari mu Rwanda cyangwa abari hanze yarwo cyangwa se batari n’Abanyarwanda”.

Abitabiriye ibirori banejejwe n’ijambo Perezida Kagame yavuze

Ijambo Perezida Kagame yavuze ryanyuze imbaga y’abari aha, banyuzagamo bakamuha amashyi menshi igihe yabaga avuze ikibakora ku mutima kurushaho, cyangwa ikijyanye n’indangagaciro z’Abanyarwanda, ubudaheranwa n’ishyaka ryo gukomeza ubutwari bwaranze abitangiye igihugu.

Ibirori byaranzwe kandi byaranzwe no kwidagadura ndetse no gusabana.

Kwidagadura mu birori byo kwibohora

Kwidagadura mu birori byo kwibohora

Nyakubahwa First Lady Jeannette Kagame

Kwidagadura mu birori byo kwibohora

Perezida Kagame yabivugiye mu kiganiro n’itangazamakuru, cyabaye kuri uyu wa Gatanu tariki 4 Nyakanga ku munsi wo kwibohora wizihijwe ku nshuro ya 31.

Perezida Kagame yagarutse ku masezerano y’amaharo u Rwanda ruherutse gusinyana na RDC, ashimangira ko mu gihe icyo gihugu cyaba kitubahirije ibiyakubiyemo, bizagira ingaruka ku byo u Rwanda rwiyemeje gukora.

Ati “Amasezerano yo arahari, hari ibyo abayashinzwe bemera gukora buri umwe ku giti cye cyangwa se gukorera hamwe, ntabwo rero iteka abantu bose bavugisha ukuri no mu byo bemeye ku mugaragaro, ariko navuga ku ruhande rw’u Rwanda ko ibyo twemeye ko bishoboka, ariko bihera ku by’abandi nabo bakora ibyo twemeranyijwe”.

Perezida Kagame avuga ko abandi nibadakora ibyo impande zombi zemeranyijweho bizagira ingaruka, kuko u Rwanda narwo ruzashyira mu bikorwa ayo masezerano ari uko impande zombi bireba zayubahirije.

Perezida Kagame yashimangiye ko aya masezerano natubahirizwa cyangwa ntabashe gushyirwa mu bikorwa hazashakwa indi nzira, igihe ubundi buryo butaraboneka u Rwanda ruzakomeza gukora ibishoboka byose kugira ngo rurinde Abanyarwanda n’Igihugu, aho kubura umutekano bitewe n’uko abandi batujuje amasezerano.

Abajijwe icyo u Rwanda ruzakora igihe RDC itazasenya umutwe wa FDLR, yasubije ko ruzakomeza guhangana n’iki kibazo uko bisanzwe.

Ati “Repubulika Iharanira Demokarasi ya Congo nidasenya FDLR nk’uko bikubiye mu masezerano, bizasaba u Rwanda gukomeza guhangana n’iki kibazo rukoresheje uburyo rusanzwe rubikoramo”.

Gusenya FDLR ni imwe mu ngingo zikubiye mu masezerano u Rwanda na RDC byashyizeho umukono i Washington ku wa 27 Kamena 2025.

Uyu mwanzuro wafashwe nyuma y’uko u Rwanda rugaragaje ko uyu mutwe wiganjemo abagize uruhare muri Jenoside yakorewe Abatutsi mu 1994, wahawe rugari muri RDC kandi biteje ikibazo ku mutekano warwo.

Ati “Ikibazo cya FDLR nikiramuka kidakemuwe kandi twarashyizeho uburyo bwo guhangana na yo mu masezerano, ibyo bizaba bivuze ko FDLR izakomeza kubaho, n’ikibazo kizakomeza kubaho kandi u Rwanda ruzakomeza gukora icyo rukwiriye gukora mu gihe FDLR iri hafi n’imipaka yacu. Nta bufindo bushobora gukoreshwa (mu gukemura ikibazo), ahubwo igikenewe ni ugukora icyo ukwiriye gukora mu gukemura ikibazo.”

Aya masezerano akubiyemo ko u Rwanda na RDC bemeranyijwe kubaha ubusugire bwa buri gihugu no gukumira amakimbirane, guhagarika imirwano, kwambura intwaro no gushyira mu buzima busanzwe imitwe itari iya Leta yitwaje intwaro.

Harimo gushyiraho itsinda rihuriweho rigenzura ibijyanye n’umutekano, gufasha mu gucyura impunzi, gushyigikira ubutumwa bw’Ingabo za Loni ziri muri RDC (MONUSCO) no gushyiraho uburyo bw’imikoranire mu by’ubukungu mu karere.

Mu bindi byasinywe, harimo ko RDC igomba kwita ku biganiro biri gukorwa hagati yayo na AFC/M23, birimo kuba bigizwemo uruhare n’umuhuza ari we Leta ya Qatar, kandi ko impande zombi [u Rwanda na RDC] zigomba gushyigikira ko bigera ku musozo bigatanga n’umusaruro witezwe.

RDC yasabwe kandi kugira uruhare mu gucyura mu mutuzo kandi ku bushake no mu buryo buhesha icyubahiro impunzi.

Donald Trump ubwo yakiraga ba Minisitiri b’Ububanyi n’Amahanga b’ibihugu byombi, yasabye ko amasezerano ya Washington yashyirwa mu bikorwa, bidakozwe gutyo ingaruka zabyo zikaba nyinshi.

Perezida Kagame akomeje guhakana ibyo u Rwanda rushinjwa byo gushyigikira umutwe wa M23, aho avuga ko abo barwanyi n’ubwo barwanira ukubaho kw’Abatutsi bavuga Ikinyarwanda mu Burasirazuba bwa DRC, batateye icyo gihugu baturutse mu Rwanda ahubwo ngo bagiyeyo bavuye muri Uganda.

Umukuru w’Igihugu avuga ko n’ubwo Leta iyobowe na Trump yakomatanyije ibijyanye n’ubukungu, politiki n’umutekano mu masezerano u Rwanda rwagiranye na DRC, hazabaho ingaruka zikomeye mu kuyashyira mu bikorwa.

Avuga ko igifite akamaro ari ukureba inyungu ku mpande zose (gutanga no guhabwa), aho gukomeza gushinja u Rwanda kuko ngo ikibazo cy’umutekano muke mu Burasirazuba bwa Congo kitatewe n’u Rwanda, ahubwo ngo gifite umuzi muremure w’amateka y’imipaka yaciwe n’abakoloni.

Perezida Kagame avuga ko raporo z’impuguke z’Umuryango w’Abibumbye zishinja umutwe wa M23 n’u Rwanda guteza umutekano muke muri Congo no kuyisahura amabuye y’agaciro, zigoreka uburyo ikibazo giteye kuko ngo zitibanda ku ngengabitekerezo ya Jenoside ikwirakwizwa na FDLR na Leta ya Congo iyishyigikiye.

Perezida Kagame ati "Mushobora kudushinja gukora ibyo ari byo byose tugomba kugira ngo FDLR idateza u Rwanda ibibazo, ariko ntabwo mwarushinja ibijyanye n’aho iyi ntambara yaturutse kuko buri wese arahazi, aba ba M23 narabivuze ubushize, baturutse muri Uganda, ntabwo baturutse hano."

Yakomeje agira ati "Ikibazo cyacu muri make ni iki: FDLR yabaye ikibazo kuva kera, ni ikibazo na n’ubu kandi izakomeza kuba ikibazo n’ejo hazaza mu gihe ikomeje kubaho ibangamiye u Rwanda. Nta ruhushya rw’umuntu uwo ari we wese dukeneye ngo turinde Igihugu cyacu."

Avuga ko u Rwanda ntaho ruhuriye no guteza ibibazo abavuga Ikinyarwanda bisanze ku butaka bwa Congo "bakaba barimo kwirukanwa ku butaka bw’icyo gihugu na Leta yabo", aho ababarirwa mu bihumbi bahungiye mu Rwanda.

Perezida Kagame ashima ko hari andi masezerano hagati ya Leta ya Congo na M23 arimo kumvikanwaho muri Qatar, kugira ngo ibibazo by’imbere muri Congo bikemuke, kandi uruhare runini rurenga 75% ngo ni aho rushingiye.

Amasezerano y’i Washington "ntabwo ari Leta zunze Ubumwe za Amerika zizayashyira mu bikorwa, FDLR nikomeza kuba hariya, n’ikibazo ni ko kizakomeza kuhaba, amasezerano arahari, twe tuzakora ibyo twemeye uko bishoboka kandi tuzabikora ari uko n’abandi buzuza uruhare rwabo."

Perezida Kagame ku bijyanye n’aho Abanyarwanda bageze mu Kwibohora, avuga ko Igihugu kigeze aho gikwiye kuba kiri, n’ubwo buri wese ngo akeneye gukora cyane kugira ngo yibone aho yifuza.

Perezida Kagame ku bijyanye n’abavuga ku buzima bwe, yasubije ko nta wagombye kwibaza ku buzima bw’undi kuko ngo ntawe ubaho iteka, n’ubwo we rimwe na rimwe ngo yagira ikibazo cy’ubuzima aterwa n’imicungire y’abo ashinzwe kuyobora.

Reba ibindi muri iyio video:

Amafoto: Eric Ruzindana

Imiryango itishoboye yubakiwe inzu zigezweho

Minisitiri w’Umutekano Dr. Vincent Biruta, avuga ko havuwe kandi abaturage hafi ibihumbi 43, hakaba hanateganyiiwe ko abubakiwe, bazafashwa mu mishinga itandukanye y’iterambere irimo iy’ubworozi bw’inka n’amatungo magufi, n’ubworozi bw’amafi kugira ngo barusheho kwiteza imbere, bityo ibikorwa bya Polisi n’Ingabo z’Igihugu bikomeze kugira impinduka mu mibereho y’Abanyarwanda.

Agira ati "Ibikorwa turabibahaye, bishimangira ishusho y’ubufatanye hagati y’inzego z’ibanze, Police n’Ingabo, namwe mubibungabunge kuko hari ababihabwa bagahita bumva ko inzego z’umutekano zizaza no kubibasanira, namwe mugire uruhare mu kubifata neza kuko aribwo muzaba mugaragaje agaciro mubiha n’uko mwahinduye imyumvire".

Batubohoye ingoyi yo kuraraguza natwe tugiye Kwibohora ubukene: Abahawe inzu ba Ngororero

Abaturage bo mu miryango itishoboye mu Karere ka Ngororero bahawe inzu zo guturamo, bavuga ko babohowe ingoyi yo kuraraguza batagiraga aho bakinga umusaya, na bo bakaba bagiye gukora cyane bakibohora ingoyi y’ubukene.

Ubwo batahaga izo nzu mu Ngororero

Babitangarije muri icyo gikorwa cyo kubashyikiriza inzu zubatswe ku bikorwa bihuriwe n’inzego z’umutekano n’abaturage (Community outreach program), bihuza Ingabo na Polisi hagamijwe kwegera abaturage mu Karere ka Ngororero.

Izo nzu zubakiwe abatishoboye bo mu Murenge wa Gatumba mu Karere ka Ngororero, mu buryo bw’inzu zakira imiryango ibiri mu nzu imwe (Two in one), zashyizwemo ibikoresho byo mu nzu n’ibiryamirwa, ubwiherero bwo hanze, igikoni ubwogero, n’ibigega by’amazi.

Minisitiri Biruta wifatanyije n’Ubuyobozi bw’Intara y’Iburengerazuba n’Akarere ka Ngororero gutanga izo nzu, agaruka ku mpamvu abaturage bubakirwa, yagaragaje ko hagamijwe kubafasha kwiteza imbere, kuko umuturage utuye nabi adakora ngo agere ku iterambere rirambye.

Umuryango wa Nkurunziza Bonaventure na Murekeyisoni Jeanne wo mu Karere ka Ngororero, ugaragaza ko guhabwa inzu yo guturamo n’abana bane babyaye, ari nko kongera kuvugurura umubano w’abashakanye, no guha umutuzo abana bakaryama neza batabyigana.

Barashima Leta y’Ubumwe bw’Abanyarwanda itagira uwo isiga inyuma

Murekeyisoni n’umugabo we bagaragaza ko iyo ufite abana benshi mu kazu katabakwiriye, nta mutuzo kuri bo n’ababyeyi babo, kandi ko kubona inzu ari igishoro gikomeye cyo kwibohora ubukene.

Agira ati "Ubu tubohotse kuraraguza, tugiye noneho natwe kwiteza imbere, inzu ni ukuduha amahoro ntabwo tuzongera gutegereza ko abana baba badahari, agasambu dufite tukakabyaza umusaruro. Ni yo mpamvu dushimira Perezida Kagame watugejeje muri ibi bikorwa, narangiza iyi manda ye muzamubwire ko n’ubundi twiteguye kumutora, azirikana abana n’ababyeyi babayeho nabi nabo bagahindura ubuzima".

Mu rwego rwo kwizihiza isabukuru yo Kwibohora ku nshuro 31 kandi, abagize Komite Nyobozi y’Akarere bari kumwe n’inzego z’umutekano bifatanyije n’abaturage bo mu Murenge wa Rongi mu gikorwa cyo gutaha ku mugaragaro ikiraro cya Magarure, cyubatswe hagamijwe koroshya ubuhahirane hagati y’Akagari ka Gasharu n’aka Nyamirambo, kikaba kimwe muri 13 Minisitiri Biruta avuga ko byubatswe mu mezi atatu ashize.

Minisitiri Biruta arasaba Abanyarwanda gusigasira ibikorwa bagezwaho

Iki kiraro na cyo cyubatswe muri gahunda y’ibikorwa by’Ingabo na Polisi y’Igihugu bigamije gufasha abaturage mu mibereho myiza n’iterambere, byari bifite insanganyamatsiko igira iti "Ubufatanye bw’abaturage n’inzego z’umutekano mu Kwizihiza #Kwibohora31 n’imyaka 25 y’imikoranire na Polisi y’u Rwanda”.

Hari abagejejweho amazi meza

Inzu ziba zirimo n’ibikoresho by’ibanze

Abaturage baravuwe ku buntu

Bubakiwe n’uturima tw’igikoni

Muhanga hatashywe ikiraro

Ku ruhande rumwe, hari abatangiye akazi bavuye mu bwihisho kuko interahamwe zabageraga amajanja ngo zibice mu gihe cya Jenoside yakorewe Abatutsi, ndetse bafite agahinda ko gutakaza ababo bazira uko bavutse, akenshi batazi n’aho baguye.

Ku rundi ruhande, hari abari bamaze imyaka irenga ine mu rugamba rwo kubohora u Rwanda nyirizina, ariko rukaziramo n’inshingano zo guhagarika Jenoside mu bushobozi bucye bari bafite haba mu bikoresho n’abantu bacye.

Dr. Vincent Biruta, Minisitiri w’Umutekano mu Gihugu nawe afite ubuhamya bwa kiriya gihe, kuko yari mu Rwanda, akorera Minisiteri y’Ubuzima aho yayoboraga ishami ry’ubuvuzi bwigenga, ndetse yongererwa inshingano zo kuyobora by’agateganyo ishami rishinzwe indwara zandura

Biruta wari mu myaka y’ubusore bwe, yakoreraga igihugu n’ubwitange, ariko igihe kiza kugera imikorere iragorana kubera umwuka w’ivangura, itotezwa rishingiye ku myumvire ya Politiki, ku bwoko, ndetse no kwibasira abari mu mashyaka ya Politiki ataravugaga rumwe na Leta.

Ibi ngibi kandi byarimo n’ubwicanyi bufatwa nk’igeragezwa rya Jenoside mu bice bimwe na bimwe by’igihugu nka Bugesera na Kibilira n’ahandi. Harimo kandi n’abafunzwe bitwa ibyitso by’inyenzi, ku buryo bamwe bahasize ubuzima.

Dr. Biruta ubarizwa mu ishyaka rya PSD ndetse akaba anaribereye umuyobozi, avuga ko ibi ngibi byabaga bikurikiwe n’umwuka wo guhangana, hagati y’ishyaka ryari ku butegetsi rya MRND n’amashyaka yari ahanganye na yo maze bikarushaho gukara uko RPF Inkotanyi yarushagaho kotsa igitutu Leta yariho mu ntambara yo kubohora igihugu.

Biruta asobanura uko yari amerewe agira ati “ibyo nanyuzemo muri icyo gihe ku giti cyanjye byasaba ikiganiro cyihariye icyakora byonyine kuba nari mu bahigwaga bishingiye ku bwoko, ndetse byongeye nkaba mu ishyaka ritavuga rumwe n’iryari ku butegetsi ibyo byonyine byari bihagije, dore ko twese batwitaga inkotanyi, kandi mu Rwanda Inkotanyi byabaga bivuze umwanzi.”

Ibi rero, ngo byatumaga n’ubundi akazi gakorwa nabi, cyangwa no kuri bamwe katanakorwa. Agira ati “wabaga wumva hari aho bateye amagrenade muri karitsiye, ahandi hari abafunzwe...abandi ugasanga barangariye mu bitandukanye.”

Dr. Vincent Biruta

Icyakora ngo hari n’icyatumaga muri Minisiteri y’Ubuzima umwuka urushaho kuba mubi, aho Biruta agira ati “mu gihe cy’amasezerano ya Arusha, mu isaranganya ry’imyanya hari hateganijwe ko Minisiteri y’Ubuzima yagombaga guhabwa FPR Inkotanyi. Bamwe rero batangiye kugenda bavamo bishakishiriza akazi ahandi, bumva ko batazakorana na FPR, abandi bavuga bati nta kitubwira ko tuzaguma aha ngaha basa n’abategereje ikizaba.”

Mu by’ukuri ngo bamwe bumvaga batariho kuko bahigwaga, abandi bavuga ko Minisiteri igiye kujya mu Nkotanyi kandi batazakorana. Aha ni ho Biruta yongerewe inshingano nk’umuyobozi w’agateganyo ushinzwe indwara z’ibyorezo, ariko ngo harimo n’ibindi byuho muri Minisiteri.

Bigeze kuwa gatatu itariki 6 Mata 1994, Dr. Biruta yari yagiye ku kazi nk’uko bisanzwe, ariko nimugoroba indege yari itwaye Perezida Juvenal Habyarimana irahanurwa ubwo yiteguraga kugwa ku Kibuga cy’indege I Kanombe, abarimo bose barapfa, uhereye ku mukuru w’igihugu.

Hakurikiyeho amatangazo menshi, maze ku munsi ukurikiraho akazi karahagarara, hagakora gusa abo bahamagaraga kubera serivise zihutirwa nko kwa muganga n’ahandi. Icyakora Biruta yongeraho ati “hagendaga ababaga badafite icyo bikanga, naho ubundi benshi muri twe n’iyo baduhamagara ntaho twari kujya kuko twahigwaga.”

By’umwihariko, Biruta yari afite impamvu nyinshi zimubwira ko gusohoka kwaba ari ukwishyira mu kaga, kuko agira ati “aho nari ntuye ku Kimihurura ama grenade yaraye avuga. Hari hafi y’ikigo cy’abasirikare barindaga perezida bagize uruhare muri Jenoside, nturanye n’uwahoze ari Minisitiri Gasana Anastase...nta kintu cyari gutuma bampamagara ngo ngwino maze ngo numve nizeye ko naba amahoro ndamutse nsohotse.”

Ihurizo ryo gushaka abakozi, imiti n’ubuvuzi

Kigali imaze kubohorwa, nk’umuntu wari usanzwe mu mujyi, Biruta agira ati “usibye kujya kureba aho nari ntuye uko hari hameze no kureba uko umuryango wanjye wagaruka ngo tubashe kubona aho tuba, icyakurikiyeho ni ukujya kureba aho nakoraga uko hameze, niba hatarasahuwe cyangwa ngo hasenywe.”

Indi nshingano kandi, kwari ukureba uko ibitaro bimeze hamwe na serivise z’ubuzima, harimo n’imiti. Icyo gihe ngo bakoranaga n’ingabo za RPA zari zimaze kubohora igihugu zikabafasha aho bagenda hose.

Biruta avuga ko yanakomereje ku kureba ababa bararokotse Jenoside bashoboraga kuza ngo bafatanye bongere bubake bundi bushya urwego rw’ubuzima. Icyo gihe imirambo yari hirya no hino igomba gushyingurwa, hari impunzi, ndetse n’Abarokotse Jenoside bose bakeneye ubuvuzi.

Aha niho ngo iyo yamenyaga amakuru y’umuganga bamutumagaho akaza agasubira muri serivisi y’ibitaro yarimo, nawe agatanga amakuru y’ahari abaforomo n’abandi baganga nabo bakabasaba kugaruka ku kazi gutyo gutyo.

Aha kandi, imiryango itari iya Leta, harimo n’Ikigo Mpuzamahanga cyita ku Buzima OMS, UNICEF... yongeye kwigaragaza, maze bahera ku buvuzi bwihutirwa.

Mu bikoresho by’ubuvuzi, Biruta avuga ko koko hari imiti yari yarasahuwe, hakaba n’ibikoresho byangijwe cyangwa bigasahurwa, ariko ngo hari n’ibyo abakoze Jenoside batashoboraga guhungana.

Icyakora, ngo n’ubwo imiti yari yarasahuwe, hari iyo RPF yari isanzwe ikoresha mu gihe cy’urugamba rwo kubohora u Rwanda, ndetse n’ibikoresho, nabyo bikaba ari bimwe mu byo urwego rw’ubuzima bwahereyeho.

U Rwanda rwanze inkunga z’imiti yarangije igihe

Biruta asobanura aho imiti yavuye yagize ati “RPA yari ifite ubufasha butandukanye bwatumaga babona imiti, kandi ntabwo bavuraga ingabo gusa, banavuraga n’abarokotse Jenoside bagiye babagana. Bari bafite imiti y’ibanze. Harimo n’imiryango nterankunga yakomeje kuduha imiti n’ibikoresho, ndetse n’ibidakenewe ku buryo hari igihe cyageze bigomba guhagarikwa. Abatangaga ibikoresho bose twageze aho tukajya tubanza kureba ibyo ari byo tukareba niba bikenewe tukabyemeza bikagira uko biza. Mbere hari abazanaga ibyo babony.e n’ibyenda gusaza ari nko kubijugunya.”

Mu batangaga inkunga, harimo ngo n’abazaga bagashinga ihema mu kibanza bagatangira kuvura bakababwira ko umuntu ataza ngo atangire uko abonye. Agira ati “mu minsi ya mbere byari akajagari ariko bigenda bishyirwa ku murongo birakunda.”

Muri iki gihe cyose, ngo nta mushahara Biruta na bagenzi be bari bategereje, kuko ngo Banki nkuru y’igihughu, andi mabanki ndetse n’uburyo bw’imihembere nta byari bihari. Agira ati “twarebaga ubuvuzi, ibitunga abantu n’imibereho, ariko n’uwari kuba ayafite yari kumufasha muri bicye dore ko nta bucuruzi bwari ho. Abantu bakoze amezi macye bahembwa ibyo kurya.”

Guverinoma y’Ubumwe bw’Abanyarwanda igiyeho kuwa 19 Nyakanga 1994 niyo yatangiye gushyira ibintu mu buryo n’inzego zitangira gukora neza, imishahara na yo yongera gusubizwaho.

Aha ni naho Biruta wari umuyobozi (Director General) muri Minisiteri y’Ubuzima yatangiye gukorana n’abandu bayobozi muri Minisiteri batangira gushyiraho imirongo ngenderwaho, amategeko n’amabwiriza ya Minisiteri y’Ubuzima, maze ibigomba kujya mu nama y’Abaminisitiri bitangira kugezwayo.

Biruta yabaye Minisitiri w’Ubuzima muri Mata 1997, ariko mu 1999 aza kwimurwa ajya kuba Minisitiri muri Minisiteri y’ibikorwa remezo.

Icyakora, mu bintu byamushimishije cyane mu rwego rw’ubuzima, ni politiki nshya y’ubuzima n’ishyirwa mu bikorwa ryayo. Yibuka nka gahunda y’Abajyanama b’ubuzima, abakorerabushake bafasha abaturanyi babo mu midugudu, bakabagezaho imiti y’ibanze ndetse bakanabakurikirana igihe barwaye, bagakora ku buryo bagezwa kwa muganga amazi atararenga inkombe.

Harimo kandi na gahunda y’ubwisungane mu kwivuza aho buri wese ashobora kwivuza adahenzwe haba ku kigo nderabuzima no ku bitaro bikuru, n’izindi gahunda nyinshi zagiye zubakirwaho n’abamukurikiye, bakabinoza, bakabihuza n’igihe.

Mu buryo bwa rusange, Biruta avuga ko kuba yaraciye mu gihugu cyasenyutse burundu, ibyo bihe bigahita ubu ighugu kikaba cyariyubatse, gitangwaho urugero nko mu buzima, ikzere cy’ubuzima, kuvura abantu bose harimo na kanseri...iyo urebye igihe gito byakozwemo, usanga birenze n’ibyo abahanga basesenguraga, abantu bakaza kureba uko byakoretse, ni ibintu bishimishije.

No mu burezi, ubwaho, Biruta avuga ko habaye impinduka zikomeye, kuko cyera byari amahirwe, ariko ubu ngubu utaragiye mu ishuri ni we ukurikiranwa akabazwa impamvu.

Asanga ibyo u Rwanda rugeraho, rubikesha politiki itavangura. Agira ati “niba twarashoboye kugera aho tugeze duhereye ku busa, tukaba hari ibihugu tumaze gutambuka kandi bitaraciye mu bibazo twe twanyuzemo, bugaragaza ko n’ibyo dushaka kugeraho mu 2050 nabyo bizagerwaho.”

Amafoto ya George Salomo. Ushaka kureba andi maforo,kanda hano

Reba ibindi muri iyi video:

Gen. Mubarakh n’abandi bayobozi bamurikira abaturage amazi meza babagejejeho

Ibikorwa remezo byashyikirijwe abaturage birimo ibigega bibiri bifite ubushobozi bwo kubika metero kibe 20 z’amazi.

Hari n’umuyoboro w’amashanyarazi yifashishwa mu kuzamura ayo mazi aturuka ku isoko iri mu kiyaga cya Kibare, aho abaturage bari basanzwe bahavoma amazi atari meza nyuma yo gukora n’urugendo rurerure, bitewe n’ibura ry’amazi muri ako gace.

Gen. Mubarakh yabwiye abaturage ko iki gikorwa kibaye mu gihe Igihugu cyizihiza umunsi wo kwibohora ku nshuro ya 31, uzaba tariki ya 4 Nyakanga.

Ati "Ni gahunda idasanzwe yamaze hafi amezi atatu kandi ikora ku bikorwa bitandukanye, harimo n’ibikorwa by’ubuzima, kugira ngo imibereho y’aturage bacu igende neza".

Gen. Mubarakh avuga ko kuva mu ntangiriro y’iki gikorwa hahujwe imbaraga hagati y’Ingabo na Polisi by’u Rwanda, ubuyobozi bw’inzego z’ibanze, abaturage b’u Rwanda n’inzego z’umutekano zo mu bihugu by’Umuryango wa Afurika y’Iburasirazuba.

Abaturage bakize kuvoma ikiyaga

Gen. Mubarakh avuga ko intego y’inzego z’umutekano harimo kuzamura imibereho y’abaturage, hanitabwa ku kubungabunga umutekano n’umutuzo bishingira ku iterambere ry’Igihugu.

Ati "Muri aya mezi atatu ashize twiboneye ubwacu ishyirwa mu bikorwa n’icyerekezo byashyizweho na Nyakubahwa Perezida wa Repubulika akaba n’Umugaba w’ikirenga w’Ingabo z’u Rwanda, Perezida Paul Kagame".

Akomeza avuga ko icyerekezo cyatangiriye ku rugamba rwo kwibohora gishimangira ko inzego z’umutekano zacu, zigombga kuba inkingi n’iterambere ry’u Rwanda, zikorana bya hafi n’abaturage n’izindi nzego z’umutekano.

Gen. Mubarak avuga ko imikoranire hagati y’inzego z’umutekano n’abaturage, ari byo byagejeje Igihugu ku iterambere.

Yashimiye abaturage uruhare rwabo mu iterambere ry’Igihugu, abasaba kubungabunga ibikorwa remezo bahawe abasaba kubibyaza umusaruro kugira ngo bikomeze kubateza imbere.

Bashyiriweho ibigega bizajya bibika amazi

Gen. Mubarakh yasabye abaturage bo mu Murenge wa Ndego gukomeza kurangwa n’isuku, no gukomeza mu cyerekezo cyiza cy’Igihugu cyabo.

Abaturage bo muri uyu murenge bavuga ko kwegerezwa amazi meza ari igikorwa kije kubakemurira ikibazo kinini bari bafite.

Nyinawabasindi Fautine avuga ko bari bafite ikibazo cy’amazi meza, kuko bavomaga mu kiyaga bagakurizamo kurwara indwara ziterwa n’umwanda.

Ufashijemahoro Marie na we avuga ko amazi y’ikiyaga yatumaga barwara inzoka, ndetse n’abana bagakerererwa ishuri, kubera urugendo rurerure bakoraga bajya kuvoma amazi y’ikiyaga.

Mu gusoza iki gikorwa, Gen. Mubarakh Muganga mu izina ry’ubuyobozi bw’Ingabo z’u Rwanda, yagabiye inka umukecuru Nimukuze Madeleine w’imyaka 70 na Mukansanga Perine, naho itorero ryasusurukije ibirori rihabwa ihene 10.

Yasabye itorero ko bazajya borozanya hagati yabo ndetse bakajya baguramo ibikoresho byo kujya bakomeza gususurutsa abantu mu birori bitandukanye.

Ibikorwa byashyikirijwe abaturage bo muri uyu murenge byuzuye bitwaye 147,560,980Frw. Uyu muyoboro uzaha amazi abaturage ibihumbi 3,000 ukazanaha ikigo cy’ishuri gifite abanyeshuri 2,625.

Gen. Mubarakh Muganga yasabye abaturage kuzafata neza ibikorwa remezo bashyikirijwe

Abaturage bari bishimye, aho bataramiwe na Senderi Hit

Umunyamuryango wa RPF Inkotanyi, akaba n’umuturage w’Akarere ka Nyagatare, Murenzi Alexis, avuga ko ubu ari bwo bakibona ubwigenge no Kwibohora nyako, ashingiye ku iterambere n’umutekano abona, aho byose ngo byateguriwe i Gikoba muri Santimetero.

Murenzi wari umwe mu bafashe urugendo rugana i Gikoba agira ati "Aha duhagaze (tugiye gutangirira urugendo) hari ku gasozi ari mu nyamaswa, hari mu rwuri ariko murahabona Sitade nziza twahawe na Perezida wa Repubulika Paul Kagame, tukaba tumushimira ndetse n’Ingabo zari iza APR kubera umutekano n’Iterambere twagezeho."

Intambara zabereye i Gikoba n’impamvu Perezida Kagame yahashyize indake

Umuyobozi w’Ingoro y’Amateka y’Urugamba rwo guhagarika Jenoside, akaba n’Umuyobozi w’abasura Umuhora mugari w’ayo mateka, Médard Bashana, avuga ko Perezida Kagame yabaye muri iyo ndake kuva muri Nyakanga 1991 kugera muri Kamena 1992, ubwo yimuraga ibirindiro akabijyana ku Murindi w’Intwari muri Gicumbi.

Perezida Kagame ngo yaje i Gikoba kubera imihindukire y’Urugamba rwo kubohora u Rwanda, bava ku bitero shuma bagana ku gufata ubutaka bw’u Rwanda kugira ngo babuhanganireho, nyuma y’uko Leta ya Habyarimana ivuze ko Uganda icumbikiye abayirwanya bitwikiriye ijoro.

Bashana ati "Inkotanyi twiyemeje ko batadutsimbura, kugeza ubwo batakaza ubushake bwo kuza kuturwanya, ubwo twebwe turasohoka dutangira guhangana na bo, ni bwo Perezida Kagame yaje gutegeka aba Ofisiye be gucukura indake hano i Gikoba hanyuma ayinjiramo, asaba n’abandi kubikora gutyo."

Umunyamabanga wa Leta muri Minisiteri y’Ububanyi n’Amahanga ushinzwe Umuryango wa Afurika y’Iburasirazuba, General (Rtd) James Kabarebe, mu mwaka ushize wa 2014 yavuze ko ari we wubatse iyo ndake ya Gikoba, ku busabe bwa Perezida Kagame wari umuyobozi w’urugamba rwo kubohora Igihugu.

Rtd Gen Kabarebe yagize ati "Jyewe icyo gihe nayoboraga umutwe w’abarinda Umugaba w’Ingabo (Perezida wa Repubulika), ni nanjye wacukuye iyi ndake yabagamo."

Tugarutse kuri Bashana uyobora Ingoro y’Amateka y’Urugamba rwo guhagarika Jenoside, avuga ko aho i Gikoba habereye urugamba rukomeye rwagize ibitero bihabwa amazina ya Rukokoma1, Rukokoma 2 na Simusiga, ngo byamaze amezi atandatu bidasiba n’umunsi umwe.

Bashana ati "Ni ibitero byafataga umunsi wose, icyumweru cyose, ukwezi kose, kumara igihe cy’amezi atandatu badasibye n’umunsi n’umwe kuva muri Nyakanga 1991, biza gutuma aka gataka kangana n’ibilometero 7 kuri 3.8 Inkotanyi zikagumana, kuko icyari igisirikare cya Perezida Habyarimana, Ex FAR, cyari cyananiwe."

Gikoba iherereye mu bice byitwa Gishuro, Kaborogota, Gikoba, Shonga, Ndego na Karama, akaba ari ho Inkotanyi zagumye, zitangira gutsinsura ibirindiro 50 byari byarashyizweho na Ex FAR.

Abantu bari benshi

Ex FAR imaze kubona ko idashoboye kwirukana Inkotanyi i Gikoba, ngo ni bwo yatangiye kwishyira mu mutuzo ivuga ko ari agataka gato cyane kangana na santimetero, kuva ubwo hahabwa izina rya ‘Santimetero’.

Bashana avuga ko Ingabo za FPR zimaze gufata ubutaka bunini cyane bw’u Rwanda mu gice cy’Amajyaruguru n’Iburasirazuba, ari bwo Umugaba w’Ikirenga, Perezida Paul Kagame, yafashe icyemezo cyo kwimurira ibirindiro ku Mulindi(i Gicumbi).

Abaturage basabwa gusura Gikoba

Umuyobozi w’Intara y’Iburasirazuba, Pudence Rubingisa, asaba abaturage gusura Gikoba kenshi mu rwego rwo kwisubizamo ubutwari no kwigira ku Nkotanyi.

Rubingisa yagize ati "Aka gasantimetero duhagazeho ni ho haturutse ubutwari bw’Ingabo zari iza RPA-Inkotanyi, ziyobowe na Perezida wa Repubulika, kandi babikora bagenda n’amaguru nk’uko twabikoze, babohora Igihugu dufite uyu munsi."

Minisitiri w’Ubuhinzi n’Ubworozi, Dr Mark Cyubahiro Bagabe, akaba ari imboni y’Akarere ka Nyagatare, ashimangira ko Gikoba yabaye site yo kwitorezaho kwagura urugamba rwo kubohora Igihugu, ndetse akaba ari n’ishuri ry’Ubutwari n’ishingiro ry’Ubumwe no Kwigira by’Abanyarwanda.

Ati "Kuhasura no kuhasobanurira abato ni ugusigasira umurage wo Kwibohora n’ubwigenge bwacu, uru rugendo rw’amaguru rufite isomo riremereye, rutwibutsa inzira y’amaraso, ubwitange n’ubudahemuka."

Indaki ya Perezida Kagame

Dr Bagabe avuga kandi ko Nyagatare ari indorerwamo y’iterambere ry’icyaro, kuko ngo ako Karere gakomeje kugaragaza ko ubuhinzi n’ubworozi bukorwa n’umuturage bishobora kuba inkingi y’iterambere rirambye, hashingiwe ku mishinga yo kuhira ku buso bugari.

Umuyobozi w’Akarere ka Nyagatare, Gasana Stephen ashima ko aka Karere kabaye irembo ry’urugamba rwo kubohora u Rwanda, kakagira bimwe mu bimenyetso by’urwo rugamba bizashingirwaho mu kubungabunga ayo mateka, kuyigisha abato no kuyabyaza umusaruro binyuze mu bukerarugendo.

Bakoze urugendo rwerekeza i Gikoba

AMAFOTO - Reba uko byari byifashe i Nyagatare mu rugendo rwo #Kwibohora31 rugana aho Inkotanyi zafashe bwa mbere. https://t.co/E0U34EIdhq pic.twitter.com/yHg8x8yJpZ

— Kigali Today (@kigalitoday) July 3, 2025

Umunyana Assoumpta Seminega wakoze kuri radio Muhabura

Mu kiganiro KT Radio yagiranye na Umunyana Assoumpta Seminega ubu tuye muri Canada, cyagarutse ku rugendo rwe n’uburyo yahisemo kujya kuba umunyamakuru kuri Radio Muhabura akiri umwana muto.

Umunyana avuga ko yagiye kuri Radio Muhabura mu 1992, aturutse mu Mujyi wa Kigali i Nyamirambo aho umuryango we wari utuye.

Ati “Nari ndangije amashuri yisumbuye icyo gihe hari inkundura y’amashyaka menshi n’ibinyamakuru birwanya ubutegetsi bwariho, icyo gihe ni naho ababyeyi banjye babafunze mbona sinzabasha gukomeza kaminuza mpita mba umunyamakuru”.

Yabanje gukorera ikinyamakuru bitaga ‘Le Flambeau’, ntiyabasha kuhakomereza akazi ahita ajya kuri Radio Muhabura.

Umunyana asobanura ko kuko icyo gihe yari muto ngo yiyumvagamo imbaraga zo gukora cyane, nibwo yahisemo kujya kuba umunyamakuru kuri Radio Muhabura.

Impamvu nyamukuru yatumye ajya gukora kuri Radio Muhabura, zaturutse ku buryo Leta ya Habyarimana yatoteje umuryango we ukabaho nabi kugeza ubwo papa we yirukanywe mu kazi, aho yakoraga muri Banki y’Ubucuruzi.

Ati “Bambwiye ko icyo gihe bamusohora mu kazi hari muri 1973 bamusohorana n’umukozi w’umuzamu barabafunga, baza gucika bajya i Burundi nyuma baza kugaruka bakomeza kubaho batotezwa”.

Umunyana avuga ko ikindi cyamuteye imbaraga na we zo kujya kurwanya ubutegetsi bwa Habyarimana, ari uko umuryango we yabonaga uba hanze mu buhungiro akabaza abayeyi be impamvu Se wabo na Nyinawabo badataha, bakamubwira ko bahunze ubuyobozi bubi bwabavanguraga n’abandi akumva bimubabaje.

Umunyana nubwo yabitekereje ntibyari byoroshye kugira ngo abashe guhita agera ku birindiro by’Inkotanyi, kuko yabanje gushaka abamufasha kugerayo.

Avuga ko muri icyo gihe yahuye n’abantu baraganira bamufasha kugera ahitwa mu Kaniga ubu ni mu Karere ka Gicumbi, aho Inkotanyi zari zarigaruriye icyo gihe.

Impamvu Umunyana yifuje gutanga umusanzu we mu itangazamakuru, ngo ni uko mu ishuri rya APACOPE yize ibijyanye n’indimi ndetse akaba yari azi kwandika cyane, icyo gihe ageze ku Mulindi abisabye Inkotanyi barabimwemerera.

Umunyana yavugaga amakuru kuri radio, ataba yavuze amakuru agakora ‘Animation’ ndetse bakanakina ikinamico. Mu rwego rw’umutekano w’abo yari yarasize ngo yakoreshaga izina rya Jeanine, rikaba ari izina atatekerejeho cyane kuko ari ibintu byaje ari muri Sitidiyo ya Radio Muhabura.

Umunyana avuga ko kuri Radio Muhabura hatangirwaga ubutumwa bwo kurwanya akarengane, no kuvuga icyo Ingabo zari iza RPA zirwanira, gusa birindaga kuvuga ubutumwa buvangura Abanyarwanda, kuko bitari mu ntego z’urugamba rwo kubohora Igihugu.

Muri ubwo buzima babagamo avuga ko bahuraga n’ingorane zirimo imibereho, kuko wasangaga abenshi bari kuri urwo rugamba babaga baravuye mu miryango ikomeye, bakagorwa no guhindura ubuzima batamenyereye.

Ati “Najyaga nkumbura ibiryo by’i Kigali, gusa iyo twabonaga amafaranga twaguraga ubugari n’ibishyimbo tukarya. Gusa ikintu cyambabaje ni igihe twari twagiye kumesa mu kabande tugeze mu nzira imvura iratunyagira, ngorwa no kugera aho twabaga”.

Umunyana avuga ko tariki ya 5 Nyakanga 1994 Inkotanyi zaraye zifashe Kigali, nabo bahise binjira ku nyubako yakoreragamo Radio Rwanda icyo gihe.

Icyo gihe bakomeje gukoresha ibikoresho bakoreshaga bakiri ku rugamba, kuko ibyo muri Radio Rwanda bari barabisahuye.

Nyuma rero urugamba rurangiye yahise ahagarika imirimo akomeza kwiga Kaminuza. Kuri we yemera ko Radio Muhabura yagize uruhare rukomeye mu gutanga amakuru y’ukuri ku Banyarwanda, aho bamenyekanishaga impamvu y’urugamba rwo kubohora Igihugu bagakuraho ubuyobozi burangwa n’ivangura ndetse ikanatangaza amakuru y’ukuri.

Ati “Iyo Radiyo Muhabura iba idahari hari kubura amakuru ndetse na morali, kuko iri mu byafashije Inkotanyi gutsinda urugamba, cyane ko yatangazaga amakuru y’ukuri ku byaberaga ku rugamba ndese n’amateka yabaga yagoretswe na Radiyo Rwanda na RTLM tukayanyomoza”.

Reba ibindi muri iyi video:

Mweusi Karake

Kujya aho intwari zateguriraga urugamba rwo kubohora u Rwanda biri muri gahunda yo kwizihiza isabukuru y’imyaka 31 yo Kwibohora, umunsi nyirizina ukaba ari Iya Kane Nyakanga.

Mu kiganiro na KTRadiyo, Mwewusi Karake, wabaye umuyobozi wa porogaramu kuri Radio Muhabura yasobanuye ko iyi Radiyo yatangiye muri Werurwe mu 1991, mu gihe urugamba rwo kubohora u Rwanda rwo rwari rwaratangiye mu kwezi k’Ukwakira mu 1990.

Itangira byaturutse mu gitekerezo cya Komisiyo yo muri RPF ishinzwe ibijyanye n’ubukangurambaga, yatangiye ikorera mu Rugano rw’ibirunga, ahitwa mu gahinga, kuko byasabaga kuyishyira ahantu itagaragara. Yatangiye ifite ubushobozi bucyeya, itavuga neza, bayita ngo ni akavumvuri, ariko uko imyaka igenda, ubushobozi bukagenda bwiyongera ariko igenda irushaho kumvikana ahantu henshi. Guhera mu 1992, ngo yumvikanaga mu bihugu bitandukanye cyane cyane ibituranye n’u Rwanda nka Uganda, u Burundi, Tanzaniya n’ahandi.

Izina Muhabura rijya kwaduka, ngo hari mu gihe cy’amateka yo kwagura u Rwanda, aho umwami w’u Rwanda yatabaranye n’ingabo, maze akanjira Uganda, ndetse agafata igice kinini, kugeza ubwo yageze hafi ya Kampala.

Ku bw’amahirwe macye, umwami ngo yarwariye Malariya muri icyo gihuhgu cy’amahanga, maze ingabo zari kumwe na we zisanga zigomba kumucyura uko byamera kose atararemba ngo abe yagwa ishyanga, kuko cyaraziraga ku Mwami.

Aha rero bahuye n’ikibazo cyo kumenya u Rwanda iyo baturutse, kuko nta bikoresho biranga amayira nk’ibizwi uyu munsi byari bihari. Icyakora, umwe muri izo ngabo yaje kwereka bagenzi be igisozi kirekire babonaga mu mpezajisho, ababwira ko ari mu Rwanda agira ati, ‘ kiriya gisozi nitugenda tugisanga tukakigeraho, turaba tugeze iwacu.”
Niko byagenze, bagenda basanga icyo gisozi koko bagera mu Rwanda, bahera ubwo bakita Muhabura, kubera ko cyahabuye abahabye cyangwa se cyayoboye abari bayobye, kirabacyura. Igitekerezo cy’izina ry’iyo Radio nacyo ngo ni aho cyakomotse, kuko iyi Radiyo na yo, yaje igamije guhabure abahabye, kuyobora abari barayobye, bayoboke inzira nyayo.

Mu kwezi kwa Kamena 1992, ingabo za RPA zimaze gufata Byumba, Radiyo Muhabura yarimutse itangira gukorera ahitwa Bungwe, icyo gihe itangira gukora nka Radiyo nk’izindi abanyamakuru bagakora bari kumwe n’abatekinisiye. Nubwo Mwewusi yari yaraje ari umusirikare nk’abandi, ariko kubera ko itsinda rya mbere ryakoze kuri Radio Muhabura ryari abasirikare nawe yisanze ahawe inshingano zo kuyobora porogaramu zayo ndetse no kugenzura ibiganiro byayo, ariko akagira n’ibiganiro ategura ubwe, agahangana no kunyomoza amakuru yatangwaga na Radiyo z’ibihuha nka RTLM, na Radiyo Rwanda yabeshyaga amakuru y’urugamba, ndetse ikanabiba urwango.

Radio Muhabura rero yashyiraga imbere ubumwe bw’Abanyarwanda, nta na rimwe yavugaga Abatutsi cyangwa Abahutu, ahubwo yavugaga Abanyarwanda, icyo gihe yagiraga n’inshingano zo kubeshyuza ibivugwa na RTLM no kuri Radio Rwanda ikavuga amakuru y’ukuri, ariko ibinyujije no mu binyamakuru byandika mu ndimi zitandukanye yari ifite. Mu by’ukuri Muhabaura ngo ntabwo yari Radiyo gusa, ahubwo yagiraga byinshi ikora harimo ibyo kwandika, gukora za videwo n’ibindi.
Radiyo Muhabura kandi ngo yari ifite agaciro gakomeye, kubera ko byari bizwi ko ihigwa cyane, ku buryo iteka yashyirwaga hafi y’ahari ibirindiro by’ubuyobozi bukuru bw’ingabo (high command), kugira ngo irindirwe umutekano bikomeye. Radio Muhabura, yakoraga yimuka, ibikoresho byayo bakabyikorera ku mutwe bakabyimurira aho igiye gukorera, kuko yavuye mu Rugano, yimukira Bungwe, nyuma yimukira i Kaniga.
Bijyanye n’uko ubushobozi bwagiye buzamuka, Radiyo Muhabura ngo yagiye ivugurura imikorere, ku buryo nko mu gihe yakoreraga aho i Bungwe, imaze kubona abakozi benshi, yavuye ku biganiro biri mu Kinyarwanda gusa, yongeramo n’izindi ndimi harimo Igifaransa, Icyongereza, Igiswahili ndetse yongeramo n’imyidagaduro, harimo amakinamico, n’umwanya w’umuziki, abasirikare bagatura bagenzi babo indirimbo n’ibindi.

Mu 1993, mu gihe cy’imishyikirano y’amahoro ya Arusha, ngo nibwo Radio Muhabura yagize izina rikomeye, kubera ko Radio Rwanda na RTLM, zatangazaga amakuru abeshya abantu, ariko Radio Muhabura yo ikavuga inkuru mpamo.

Iyi Radiyo, ngo yari ifite umusirikare ushinzwe kuyoherereza amakuru y’uko ibintu byose byagenze mu mishyikirano, ku buryo abanyamakuru bayo bari barihaye iyo ntego, buri munsi bakaba badashobora kuryama badatangaje ibyabereye i Arusha n’ubwo byaza mu ijoro cyane, kandi bakabitangaza mu ndimi zose zakoreshwaga. Ayo makuru y’ibibera mu mishyikirano Radio Muhabura ngo yayatangazaga na mbere y’uko Radio Rwanda iyatangaza, bigatuma abantu bayumva mbere y’uko bumva ibyo Radio Rwanda na RTLM zitangaza.
Radio Muhabura ni yo yaje guhinduka Radio Rwanda guhera muri Nyakanga 1994, kubera ko abari bahunze bahunganye imodoka igenda ivugiramo Radio, babanza kuyishyira i Gitarama. Nyuma ibigize iyi adiyo ngo bayijyanye ku Gisenyi,ariko bakomeza kuvuga ko Radiyo Rwanhda ivugira i Kigali, ariko babeshya. Aha rero, Radiyo Muhabura yatangiye kumvikana yahindutse Radiyo Rwanda ivugira i Kigali, iyo yindi bahunganye yahise izima kubera ko nta minara yari igifite.
Abakoraga kuri Radiyo bajyaga biyita amazina y’amahimbano
Asobanura impamvu abanyamakuru bo kuri Radiyo Muhabura bahitagamo kudakoresha amazina yabo nyayo, Mwewusi yavuze ko byari mu rwego rwo kurinda umutekano w’imiryango baturukagamo, cyane cyane iya bagenzi babo bari baturutse mu Rwanda, kuko iyo amazina yabo nyayo amenyekana, byari kuba ikibazo.

Yagize ati, “ Ntitwakoreshaga amazina yacu, kuko icya mbere, ntabwo twari nk’abanyamakuru basanzwe bashaka kumenyekana, ariko nanone ku bantu bavaga hano mu Rwanda twagira ngo turinde imiryango yabo.”

Ku bijyanye n’uruhare iyo Radiyo yagize mu rugamba rwi kubohora u Rwanda, Mwewusi avuga ko bitashoboka gushyira ku munzani kugira ngo amenye uko uruhare rungana, ariko yemeza ko yari ifite inshingano nyinshi, harimo ubukangurambaga, kuvuga neza gusobanura intego y’urugamba n’ibindi.

Avuga ko Radiyo Muhabura yagize uruhare runini kuko yahuraga n’abashyitsi baje kureba uko urugamba rumeze. Yagize uruhare mu rugamba nk’uko n’izindi ngeri nyinshi z’abantu zagize uruhare mu rugamba, kuko ngo nta muntu umwe watsinda urugamba.

Mwewusi Karake nk’umuntu wakoze itangazamakuru muri icyo gihe cy’urugamba agira icyo avuga ku itangazamakuru rikorwa muri iki gihe cy’ikoranabuhanga, aho asanga abanyamakuru bamwe batagira ukwigengesera ngo bumve ingaruka zishobora gukurikira ibyo batangaza.

Mwewusi Karake nk’umuntu wakoze itangazamakuru muri icyo gihe cy’urugamba agira icyo avuga ku itangazamakuru rikorwa muri iki gihe cy’ikoranabuhanga.

Mwewusi avuga ko iyo arebye uko itangazamakuru rikorwa muri iki gihe, hari ibyo aribonamo bikamubabaza.

Yagize ati, “ Urumva njye nagiye ku rugamba ndi umugabo mfite abana n’umugore, ntabwo twajyaga gushaka ‘views’, ariko ubu hari ibintu wumva ku maradio, ku mbuga nkoranyambaga, ukavuga uti buriya uriya muntu yigez atekereza ku ngaruka z’ibi bintu”?

Mweusi avuga ko nubwo bigoye kubera ko amafaranga akenewe kandi ibyo bikaba ari ibintu byumvikana, ariko nibura abanyamakuru bajya bashyira ku munzani mbere yo kugira icyo batangaza, bakabanza kwibaza icyo bimariye ababumva.

Reba ibindi muri iyi video:

Abayobozi b’Akarere ka Nyagatare hamwe n’abaturage b’ako Karere bahagurukiye kuri Sitade, aho bagiye gukora urugendo rw’ibirometero 21 berekeza i Gikoba, bakaba baza kuhahurira n’itsinda ry’abaturage b’Umurenge wa Mutenderi mu Karere ka Ngoma, na bo bahagurukira i Kagitumba aho urugamba rwatangiriye ku itariki ya 01 Ukwakira 1990.

Umuyobozi w’Ingoro y’Amateka y’Urugamba rwo guhagarika Jenoside, Medard Bashana, akaba ari n’Umuyobozi w’abasura Umuhora mugari w’ayo mateka, avuga ko uru rugendo rw’amaguru rugamije kuzirikana ku buryo Inkotanyi zatangiye urugamba rwo kubohora Igihugu nta bikoresho bihagije nk’imodoka zifite.

Guverineri w’Intara y’Iburasirazuba, Pudence Rubingisa witabiriye uru rugendo yavuze ko urugendo rwo #Kwibohora31 rwiswe ‘Liberation Walk’ rugamije kuzirikana, kwishima ndetse no kumara amatsiko by’umwariko abakiri bato bagiye kureba aho urugamba rwo kubohora Igihugu rwatangiriye no kugira ngo bongere kuzirikana baniyibutse ko aho bavuye ariho bubakira umusingi w’aho bagana.

Naho umuyobozi w’Akarere ka Nyagatare, Gasana Stephen yavuze ko bateguye urugendo rwo #Kwibohora31, kubera ko bishimira kuba aka Karere karabaye amarembo y’urugamba rwo kubohora Igihugu ndetse n’ibimaze kugerwaho mu rugendo rw’iterambere.

AMAFOTO - Reba uko byari byifashe i Nyagatare mu rugendo rwo #Kwibohora31 rugana aho Inkotanyi zafashe bwa mbere. https://t.co/E0U34EIdhq pic.twitter.com/yHg8x8yJpZ

— Kigali Today (@kigalitoday) July 3, 2025

Hon. Dr. Rwigema Pierre Celestin

Icyakora, nyuma y’imyaka 31, abagize ikipe yahaye igihugu umurongo gikomeza kubakiraho baracyahari, kandi bavuga inkuru y’u Rwanda nk’aho yabaye ejo.

Dr. Pierre Celestin Rwigema, ni umwe muri abo bahawe amahirwe yo gukorera igihugu mu nzego zitandukanye kuva Leta y’Ubumwe bw’Abanyarwanda itangira kubaka igihugu kizira amacakubiri, kandi giharanira iterambere ridaheza muri Nyakanga 1994.

Imwe mu nkuru Rwigema yibuka cyane mbere y’ivanwaho ry’ingoma y’igitugu mu Rwanda, ni abantu bamushyizeho igitutu, bashaka kumwaka imisanzu yo gushinga Radiyo RTLM, imwe mu bitangazamakuru byamenyekanye mu guhembera urwango rwavuyemo Jenoside yahitanye abatutsi barenga miliyoni mu 1994.

Agira ati “nayoboraga Icapiro ryitwa Printer Set. Ryari rifite abakozi barenga 150, maze baza kunsaba imisanzu mu kigo nayoboraga, ndabahakanira, ndababwira nti niba mushaka kuvanga ubucuruzi na Politiki jyewe ndabivamo.”

Aha rero ngo byatumye batangira kumurwanya, ariko igitutu bakomezaga kumushyiraho gituma na we yiyemeza kujya mu ishyaka, kugira ngo agaragaze ibitekerezo bye. Rwigema yahisemo kuba mu ruhande rushyigikiye ko hashyirwaho Guverinoma ihuriweho n’amashyaka menshi, harimo na FPR Inkotanyi.

Ibyo byatumye yangwa cyane n’ubutegetsi bwariho, arahigwa, ariko mu gihe cya Jenoside aza guhungira muri Hoteli Milles Collines, maze mu gihe cyo kugurana impunzi, akurikira RPF, kuva ubwo atangirana na yo urugendo atajya yicuza.

Abaminisitiri bagiye kurahira mu modoka za lift

U Rwanda rwizihiza isabukuru yo kwibohora kuwa kane Nyakanga, itariki igihugu cyose cyari kimaze kubohorwa ingoma y’urwango n’amacakubiri, yari imaze gushyira mu bikorwa Jenoside yakorewe Abatutsi.

Kuwa 19 Nyakanga, ni bwo hashyizweho Guverinoma ihuriweho n’amashyaka menshi, nk’uko yari yaragenwe n’amasezerano ya Arusha, maze MDR nayo itoranya Rwigema nka Minisitiri w’Amashuri abanza n’ayisumbuye muri iyo guverinoma. Icyakora, amashyaka yijanditse muri Jenoside ntiyashyizwemo.

Rwigema yibuka inkuru igaragaza ubukene bwariho, dore ko n’uwari usanzwe yishoboye ibyo yari afite byari byasahuwe, byatwitswe, cyangwa se yabitaye ahunga. Agira ati "nta wari ufite ikoti, nta wari ufite imodoka. Abasirikare nibo badufashije batujyana mu mujyi mu maduka yari arinzwe maze tugura amakoti, umuntu agafata rimwe, cyangwa abiri yo kujyana mu kurahira. Imodoka nazo, bagiye badushakira izari aho mu mujyi. Twese twarazibonye cyangwa n’utarayibonye mugenzi we akamutwara.”

Imodoka bahaye Rwigema yayigenzemo iminsi, hanyuma aza kuyisubiza.

Icyo gihe ngo bararahiye, batangira imirimo bafite ubushake. Ariko basanga umwanda mwinshi cyane aho bagombaga kujya gukorera.

Yagize ati “Ibirahure byari byaramenaguritse, mu biro huzuyemo umwanda mwinshi, harimo za condoms kuko bahasambanyirizaga abagore...ibintu byose ari umwanda ukirwanaho ngo byibuze ubone aho wicara. Abakozi bari bafite gukunda igihugu guhambaye. Wibuke ko twagiye kurahira tubona imbwa zikiri kurya abishwe muri Jenoside.”

Mu kazi, ngo batangiye bashakisha abakozi, ku buryo na Minisitiri ubwe atagiraga umunyamabanga. Agira ati “ibyo by’abanyamabanga ni ibya vuba, kuvuga ngo urashaka uguhereza amazi ntibyabagaho. Warayitwazaga.”

Iki gihe rero, ihurizo rya mbere Rwigema yari afite, ni ukongera gufungura amashuri agatangira. Nyamara, ku ruhande rumwe ngo nta ntebe zari zihari kuko abavanywe mu byabo n’intambara bari barazimaze bazitekesha ibyo kurya, ndetse n’ibitabo barabikongeje.

Ku rundi ruhande, ngo hari ibice bitarimo abantu, bari bahunze, ku buryo gutangiza amashuri mu gihugu cyose icyarimwe bitari gukunda.

Rwigema agira ati “Gushyira itangazo kuri Radiyo rigira riti: amashuri yose mu gihugu natangire, ntibyari gushoboka.”

Muri Nzeli 1994, ni bwo Rwigema yasabye guverinoma ko imwemerera agatangiza amashuri, ariko agira ati “twabanje kugundagurana n’icyo gitecyerezo, bamwe babona ko bidashoboka, kandi koko ntibyari byoroshye. Hari ikibazo cyo kurwana n’abacengezi, hari za mine zitabye hirya no hino, tugatinya ko zazasimbukana abana.”

Icyo gihe ikintu kitaburaga mu nama y’Abaminisitiri, ngo ni ingingo irebana n’amahoro n’umutekano, ku mwanya wa kabiri hazaho ibijyanye n’uburyo Minisiteri zagombaga gukora, hakurikiraho ibijyanye n’uburezi.

Rwigema P. Celestin n’umwanditsi

Mu nama yabanje babiganiriyeho, ariko birangira nta mwanzuro bafashe, nuko barabisubika babishyira mu nama ikurikira. Icyo gihe na bwo Rwigema azana icyifuzo ko batangiza amashuri.

Icyo gihe nabwo ngo impaka zaravutse, ariko Perezida Paul Kagame wari visi perezida icyo gihe, asaba ko bamuha amahirwe akagerageza.

Agira ati “icyo gihe nyakubahwa Paul Kagame yarababwiye ati jyewe ntangira urugamba rwo kubohora igihugu, sinari nzi ko uyu munsi nzaba ndi visi perezida. None, na Rwigema mumuhe amahirwe agerageze, ibizakunda bikunde, ibinaniranye tuzamushyigikire.”

Kiliziya Gatolika yanditse urwandiko iti ‘turabyanze’

Rwigema amaze guhabwa uburenganzira bwo gutegura itangira ry’amashuri, yahamagaye abafatanyabikorwa mu burezi, barimo Kiriziya Gatolika, Abaporotestanti, Aba Islam n’ab’ibigo byigenga, barahura bamara amasaha atanu bajya impaka.

Agira ati “icyo gihe Musenyeri Wenceslas Karibushi yaje afite ibaruwa yateguwe n’inama y’Abasenyeri ivuga ko batemera itangira ry’amashuri kuko bidashoboka.”

Ingingo bashingiragaho ni ukuvuga ko batamenya uburyo bakwigisha abana bavuye Kenya na Uganda muri gahunda y’Icyongereza, ndetse na Burundi na Congo bavuga igifaransa, muri Tanzaniya mu Giswahili, mu gihe mu Rwanda hakoreshwaga Ikinyarwanda.

Icyo gihe ariko nyuma y’ibisobanuro n’ibitekerezo, Musenyeri Karibushi yavuze ko banyuzwe, ko bazamushyigikira, nuko Rwigema yumvise ko ashyigikiwe, ahita ashaka uburyo yatangira maze ahera Ruhengeli.

Kagiraneza Deus, wari Perefe wa Ruhengeli ni we wamwakiriye, maze bahana gahunda ko yakoresha abarimu bahari, akongeramo abanyeshuri bari mu mwaka usoza ayisumbuye, bakigisha, kuko na mbere habaga uburezi bw’aba A3 kandi bigakunda.

Bakomereje Byumba, afashwa na Perefe Col. Lizinde, ndetse na Musenyeri Serveliyani Nzakamwita, naho I Kibungo ahasanga Protais Musoni na Musenyeli Frederic Rubwejanga bose bakira igitecyerezo cyo gutangiza ishuri.

Amaze kurangiza aho hose, yahise ajya muri Gitarama, ajya Ruhango avugana n’umusirikare wahayaboraga, n’umugenzuzi w’Amashuri(Inspecteur d’arrondissement) witwaga Hategeka, nabo bemera kuzamufasha.

Amaze kuvugana n’abayobozi mu maperefegitura, Rwigema yahise ajya mu miryango itari iya Leta harimo UNICEF, GIZ, maze nabo abasaba inkunga yo kugira ngo amashuri abone uko atangira, baramwemerera.

Bamwe bahise batangira, bemerera na Minisitiri gufasha abarimu babaha ibyo kurya, birimo amavuta, umuceri, akawunga, n’ibindi.

Ruhengeri ibimburira abandi gutangiza amashuri

Nyuma y’uru rugendo rwo gutegura itangira ry’amashuri, hakurikiyeho gufungura imiryango, maze Rwigema arongera anyura aho yari yatangiriye mu Ruhengeri, bafungura amashuri.

Kagiraneza ubu usigaye yikorera, yatubwiye ko ibirori byo gufungura ishuri byabereye mu Gahunga k’Abarashi, mu Karere ka Burera, ariko naho ngo ntibyari byoroshye.

Agira ati: Mu Gahunga abacengezi baduteze Mines ngo icyo gikorwa gipfube...Ariko nari maze amezi macye mvuye mu myitozo ya RPA COMMANDOS baza kunyongera ho Course of Mining and demining...Naragiye utwo twose bateze,ndadutegura,ndadutahana mu modoka yanjye."

Rwigema agira ati “Byari ibirori bikomeye cyane byahuruje imbaga, n’abanyamakuru baza kureba uko amashuri atangira. Hari muri Nzeli 1994. Cyari igikorwa cya mbere gikomeye cya Guverinoma, kandi abantu babonaga ko bidashoboka. Ibigo bitatu byaratangiye, bakora akarasisi turareba, maze bucyeye tujya I Byumba, na Kibungo, nyuma dukomereza I Gitarama maze inkuru irasakara ngo ya Guverinoma itaramara n’amezi abiri yatangije amashuri. Bwarakeye njya mu nama ya guverinoma maze uwo munsi abaminisitiri barishima. Nta kindi twavuze uretse iby’itangira ry’amashuri.”

Aha rero, bwarakeye Rwigema ajya mu Bufaransa gusaba inkunga, maze Abafaransa bohereza indege ebyiri z’ibikoresho by’ishuri, amashuri agenda atangira gutyo.

Amaze gutangiza amashuri abanza, yakomereje ku mashuri yisumbuye, maze bakora isuzuma ryo kumenya aho buri munyeshuri yari agereje. Rwigema nabwo yibuka ko iki gihe yari ahanganye n’abashaka kujijisha, aho agira ati “hari abanyeshuri bashakaga kugira ngo bazafate diplome nk’abazitoragura, uwarangije uwa kane agashaka kujya mu wa gatandatu.”

Rwigema yemera ko icyo gihe impamyabumenyi zari zaratakaye, izindi zarahiye, ariko babakoresha ibizamini kugira ngo bamenye aho bafatira.

Ikindi cyagoranye ni uguhuza porogaramu z’abanyeshuri bize mu bihugu bitandukanye bakaba bari baje gukomereza mu Rwanda.

Uretse Ikinyarwanda, abanyeshuri bagombaga kwiga mu ndimi z’amahanga zirimo Icyongereza n’Igifaransa, ku buryo byasabye Rwigema gushyiraho amahugurwa y’igihe gito agenewe Abarimu, ubusanzwe bigishaga mu Gifaransa.

Yongeraho kandi ati “byabaye ngombwa ko njya Uganda maze nganira na Minisitiri waho w’Uburezi Col. Amanya Mushega, maze aduha abarimu ngo bahugure abantu mu Cyongereza.”

Col Amanya Mushega

Agira ati “byari bikomeye cyane, byaratuvunnye, ariko byageze aho birakunda, kandi byatumye Guverinoma irushaho kugirirwa ikizere. Uko nabikoze icyo gihe uwabinsubizamo uyu munsi sinabishobora. Nyuma ya Jenoside, gukura ababyeyi mu gihirahiro, ugakura abana mu kwiheba, ukabaha icyizere cy’ubuzima, ni ikintu cyiza cyane.”

Mu kwigisha Igifaransa n’Icyongereza, Rwigema yumvaga ko ari gushyira u Rwanda ku rwego mpuzamahanga, ariko ngo yaje gutungurwa no kumva hari abaminisitiri bamukurikiye bagiye bakuramo ururimi rumwe, abandi bakarugarura, bigahora bigundagurana.

Rwigema yarakomeje akurikira iby’uburezi na nyuma yo kugirwa Minisitiri w’intebe kuwa 30 Kanama 1995, aho yari asimbuye Faustin Twagiramungu, naho we asimburwa na Ngirabanzi Laurien wakomereje aho yari agereje.

Banki nkuru y’u Rwanda, umushahara wa mbere

Muri ibi bihe byose, Dr. Rwigema avuga ko nta mukozi wakoreraga umushahara, uretse ko bahabwaga ibyo kurya, buri mukoresha akamenya ibyo abakozi bo mu kigo ayobora bakeneye.

Icyo gihe, ngo hariho imiryango itagengwa na Leta yasukaga amatoni n’amatoni y’ibiryo, icyakora ngo nyuma yaje kuzamo akajagari Leta y’u Rwanda imwe muri yo irayihagarika.

Aha ni naho avuga ati “icyo gihe ndi Minisitiri w’Uburezi sinigeze mpembwa umushahara. Nta mafaranga yari ahari bari barayasahuye, yewe na Banki Nkuru y’u Rwanda nta yari ihari.”

Nyuma rero mu 1995, habaye icyo bise round table, yarimo Ikigega mpuzamahanga cy’Imari, ndetse n’abandi baterankunga, iyobowe n’Ishami ry’Umuryango w’Abibumbye rishinzwe iterambere, PNUD I Geneve mu Busuwisi.

Icyo gihe PNUD yari iyobowe na Johnson Sirleaf wigeze kuba Perezida wa Liberia. Mu ntangiriro za 1995 ni bwo yabaye, igira ibyo yemerera u Rwanda, ndetse haza kongera kuba iya kabiri mu mpera z’uwo mwaka, bareba uburyo ibyari byemejwe byashyizwe mu bikorwa.

Rwigema yibuka ko yajyanye n’abaminisitiri umunani, maze muri iyo nama hakava inkunga yatumye Banki nkuru y’u Rwanda yongera gufungura imiryango.

Agira ati “inoti mukoresha uyu munsi zatangiye kujyaho icyo gihe. Kugeza muri kiriya gihe abantu ntibahembwaga. Ukuntu babagaho ni Imana.”

Ibiganiro byo mu Rugwiro: Ntabwo yari inama yo guseka

Hamwe n’ibibazo byose byagendaga bigaragara mu nzego zose z’imirimo, Guverinoma yabonye ko igomba gushyiraho umurongo uhamye w’imiyoborere mishya, ibereye u Rwanda n’abanyarwanda.

Rwigema asanga iyo hadashyirwaho amahame agomba kubahirizwa n’inzego zose z’ubuyobozi, igihugu cyari gusenyuka. Ayo mahame remezo, imirongo migari y’imiyoborere yashyizweho kandi buri munyarwanda agomba kuyubahiriza.

Ibi biganiro byarimo abantu b’ingeri nyinshi, uhereye no mu bari bavuye muri Leta ya Habyarimana batijanditse muri Jenoside. Rwigema yibuka ko harimo n’abigeze gukorana na Perezida Juvenal Habyarimana nk’abiswe les camarades du 5 Juillet.

Aha ngo harimo n’abigeze mu mashyaka ya cyera nka l”UNAR, hagamijwe kubabaza uko bumva igihugu cyahabwa umurongo, bahereye ku mateka cyanyuzemo, kugira ngo bose bagire imyumvire imwe.

Aha Rwigema yagize ati “twaravuze, duterana amagambo, urwanga ruraturenga."

Bari barihaye umunsi mu cyumweru kuva Werurwe 1998, kugera Gicurasi 1999. Aho wasangaga RPF Inkotanyi ikurikira ikandika, ndetse n’abakozi ba Minisitiri w’Intebe bakandika.

Intumbero y’u Rwanda ya 2020, uruhare rw’amashyaka menshi, itegeko nshinga, kwegereza ubuyobozi n’ubushobozi abaturage, n’ibindi, ni aho byaganiriwe.

Twageze ku bya Gacaca impaka zirakomera

Muri ibi byose, Dr. Rwigema avuga ko nta ngingo n’imwe yari yoroshye. Bageze ku bijyanye no gushyiraho inkiko Gacaca zagombaga gucira abakoze ibyaha bya Jenoside imanza, birushaho gukomera, babura umurongo kuko ngo imanza zari imbere yabo zashoboraga kumara imyaka magana abiri zitararangira.

Agira ati “jyewe ubwanjye nageze aho ndahaguruka njya mu Budage no mu Buholandi gushakisha uburyo badufasha ngo iki kibazo tugikemure. Mu Budage barambwiye bati n’ubwo twabaha abacamanza, ntacyo byamara.”

Aha kandi kuri iki gitecyerezo ngo “wabonaga abantu barebana ay’ingwe, abantu bajya kunywa ka cyayi ukabona bamwe bari hariya abandi hariya. Ntabwo yari inama yo guseka.”

Icyakora, iyi ngingo yasigiye u Rwanda umwanzuro y’uko abanyarwanda bagomba gukemura ibibazo biciye mu biganiro, political dialogue.

Unity Club, Ndi Umunyarwanda

Mu gihe cye, ikindi kintu abona cyakomeje gutuma u Rwanda runzanzahuka, ni umuryango wa Unity Club washinzwe na Madame Jeannette Kagame, umufasha wa Perezida wa Repuburika Paul Kagame, uhuriwemo abayobozi.

Agira ati “Unity Club, ari nayo yatumye habaho gahunda ya Ndi Umunyarwanda, ndetse ikanashimira Abarinzi b’Igihango, yagize akamaro gakomeye mu kuzahura iki gihugu.
Rwigema yishimira ko mu gihe nka kiriya, yakoranye n’abandi bayobozi mu guha igihugu ituze, aho ngo wasangaga ajya ibihe na visi perezida w’icyo gihe, ari na we wabaye Perezida wa Repuburika Paul Kagame.

Yibuka ko icyo gihe, Kagame yashoboraga kujya Ruhengeri, we akajya Rubavu, hashira icyumweru bakagurana. Aho bajyaga ni ko babaga bahanganye n’abacengezi bahungabanyaga umutekano muri za Gitarama n’ahandi.

Perezida Jacques Chirac ashaka kwirukana u Rwanda muri Francophonie

Hagati aho, Rwigema yibuka ukuntu mu wa 1995, muri Guinee bashatse kwirukana u Rwanda muri Francophonie.

Muri yo nama Rwigema yari yitabiriye n’abo yari ayoboye, Perezida Chirac w’u Bufaransa ngo yatutse abayobozi b’u Rwanda, asoza avuga ngo u Rwanda rukurwe muri Francophonie ngo kuko rutavuga Igifaransa.

Abari aho bamushubije mu gifaransa cyiza bamubaza impamvu yumva u Rwanda rwasezererwa nk’aho yigeze yumva babasemurira ariko banamubwira ko gutuka abayobozi b’u Rwanda atari ikintu cyari gikwiye kwihanganirwa.

Jean Chretien

Icyo gihe abari aho, barimo ba Perezida Omar Bongo, na Nyasingmbe Eyadema ngo bakuranwe ijambo nabo bahagurukira abahagarariye u Rwanda ngo bahangaye gusubiza Perezida Chirac.

Rwigema ati “Alpha Omar Konare wa Mali ni we wadushyigikiye, abwira Chirac ko akwiye kudusaba imbabazi kuko yatutse u Rwanda. Arangije Jean Chretien wari Minisitiri w’intebe wa Canada, ndetse n’umuyobozi mu Bubiligi, Madame Laurette Onkelinx bose baradushyikira, hashyirwaho komite, itora umwanzuro ko u Rwanda ruguma muri Francophonie.”

Laurette Onkelinx

Rwigema yabaye Minisitiri w;intebe kuva muri Kanama 1995 kugera muri Gashyantare 2000.

Amafoto ya Dr. Rwigema yafotowe na Eric Ruzindana/Kigali Today