Chelsea yegukanye UEFA Conference League

Uyu mukino wabereye mu Mujyi wa Wroclaw muri Pologne mu ijoro ryo kuri uyu wa Gatatu tariki 28 Gicurasi 2025, ukaba umukino Chelsea yagiye gukina ikiri mu mwuka wo gukatisha itike y’Irushanwa rya UEFA Champions League ry’umwaka utaha, nyuma yo kurangiriza ku mwanya kane muri Shampiyona y’u Bwongereza.

Iyi Kipe yo muri Espagne yinjiye mu mukino mbere, ndetse ku munota wa cyenda wonyine nk’uko yabigenje mu mikino ibiri yari yabanje bahuyemo na Fiorentina, Umunya-Maroc, Abdessamad Ezzalzouli afungura amazamu ku mupira yari ahawe na Isco Alarcon, igice cya mbere kirangira ari 1-0.

Mu gice cya kabiri, abakinnyi b’umutoza, Enzo Maresca bagarutse mu yindi shusho maze Cole Palmer Germaine atanga imipira ibiri yabyaye ibitego bya Enzo Jeremiahs Fernandez na Nicholas Jackson ku munota wa 65 n’uwa 70.

Ku munota wa 83, Jadon Sancho Malik yatsinze igitego cya gatatu ku mupira yari ahawe na Keinan Dewsball-Hall, mbere y’uko Umunya-Ecuador, Moises Caicedo Isaac atsinda igitego cya kane ku munota wa 90 amaze kwakira neza umupira wa Enzo Fernandez, umukino urangira ari ibitego 4-1.

Hamwe n’iki gikombe kimaze imyaka ine yonyine gikiniwe bwa mbere, Chelsea yanditse amateka yo kuba ikipe ya mbere mu mateka itwaye ibikombe mu marushanwa ane asumba ayandi ku Mugabane w’i Burayi ariyo Champions League ibitse inshuro ebyiri, Europa League na Cup Winners’ Cup na byo ibitse inshuro ebyiri buri kimwe.

Cole Palmer yahembwe nk’umukinnyi mwiza w’umukino

Aha hiyongereyeho UEFA Conference League yatwaye uyu munsi, kikaba igikombe cya mbere gikuru kuva umuherwe w’Umunya-Amerika, Todd Boehly n’abo bafatanyije yagura iyi kipe bakayisimburamo Roman Abramovic ukomoka mu Burusiya mu 2022.

Aya mateka yo gutwara ibi bikombe byose yari atari yakorwa n’ikipe nimwe, ku muntu yakozwe n’umutoza w’Umunya-Portugal, José Félix Mourinho watwarange Champions League na Inter Milan, Europa League na Manchester United ndetse na Conference League muri AS Roma yo mu Butaliyani.

Mu makipe yo mu murwa mukuru wa Londres ubarizwamo na Arsenal yabaye iya kabiri muri shampiyona, muri uyu mwaka w’imikino amakipe atatu yegukanye ibikombe aho Tottenham Hotspur yatwaye UEFA Europa League, Crystal Palace igatwara FA Cup mu gihe Chelsea yegukanye UEFA Conference League.

Real Betis yatsindiwe ku mukino wa nyuma

Byari agahinda kuri Anthony

Wari umukino usoza indi yose yo mu mwaka w’imikino wa 2024/2025, aho warimo n’ibirori byo kwishimira ibikombe bitatu APR FC yegukanye.Uyu mukino wabimburiwe n’akarasisi ka gisikare n’indi myiyereko y’abafana, hakurikiraho umwanya w’abahanzi barimo Dr Jose Chameleone na Eric Senderi.

Umuhanzi Jose Chameleone na murumuna we Weasel Manizo bafatanye ifoto na APR FC mbere y’umukino

Iminota ibanza y’umukino yaranzwe no gukinira cyane mu kibuga hagati, umupira ukinirwa ku muvuduko wo hasi, gusa APR FC ibifashijwe na Ruboneka Jean Bosco, Niyomugabo Claude, Mugisha Gilbert na Mohammadou Lamine Bah igacishamo ikarema uburyo bw’ibitego, icyakora ba myugariro ba Musanze FC bahagarara neza barabazibira.

Kapiteni Niyomugabo Claude imbere y’umuyobozi wa APR FC

Ku munota wa 20 w’umukino, APR FC yashoboraga gufungura amazamu kuri penaliti umusifuzi Twagirumukiza Abdoul yatanze nyuma y’uko Mukengele Christian ategeye Cheick Djibril Ouattara mu rubuga rw’amahina, icyakora uyu Munya-Burkina Faso ananirwa kuyishyira mu nshundura ahubwo ikurwamo n’umunyezamu, Nsabimana Jean de Dieu uzwi nka Chaolin.

Nyuma y’iminota 10 yonyine Ouattara ahushije penaliti, Ruboneka Jean Bosco ku mupira yahawe na Nshimirimana Ismael ‘Pitchou’ yahise ahagurutsa abafana ba APR FC ku gitego cy’ishoti riremereye cyane yatereye muri metero nka 35 uvuye ku izamu, maze igice cya mbere kirangira APR FC iyoboye n’igitego 1-0.

Ruboneka na Mugisha bishimira igitego cya mbere

Umutoza Habimana Sosthène wa Musanze FC yagarukanye impinduka mu gice cya kabiri, akura mu kibuga Munyurangabo Leonidas amusimbuza Bizimana Valentin; ibintu byahise bitanga umusaruro maze ku munota wa 49 Mchelenga Rachid yakira neza umupira wa Kamazi Achraf, agomborera Musanze FC nubwo hari habanje kwikanga ko yari yaraririye.

Nyuma yo kwinjizamo Taddeo Lwanga na Hakim Kiwanuka basimbuye Nshimirimana Ismael ‘Pitchou’, Ruboneka Jean Bosco yongeye gutanga ibyishimo muri Stade Amahoro atsindira APR FC igitego cya kabiri na none hanze y’urubuga rw’amahina, nyuma yo kwakira umupira wa Djibril Ouattara amaze guhererekanya neza na Mugisha Gilbert.

Ku munota wa 76, Ruboneka Jean Bosco yatsinze igitego cya gatatu mu buryo busa n’ubundi bwose cyo hanze y’urubuga rw’amahina, aho yarekuye ishoti riremereye maze umunyezamu Nsabimana Jean de Dieu ananirwa kugumana umupira, bihita bigira uyu musore w’imyaka 26 y’amavuko umukinnyi wa mbere utsindiye APR FC ibitego bitatu muri uyu mwaka w’imikino.

Nshimirimana Ismael Pitchou watanze umupira wavuyemo igitego cya mbere

Umukino warangiye ari ibitego 3-1, APR FC ihita yuzuza amanota 67 aho irusha Rayon Sports amanota ane, mu gihe Musanze FC yagumanye amanota 34, imbere y’amakipe yamanutse mu Cyiciro cya Kabiri ari yo Vision FC yamanukanye amanota 21 na Muhazi United yatsinzwe n’Amagaju FC bari bahanganye mu rugamba rumwe ibitego 2-1, maze imanukana amanota 30.

Uretse kwishimira Igikombe cy’Amahoro n’icy’Intwari, APR FC yegukanye muri uyu mwaka, iyi Kipe y’Ingabo yandikishije igikombe cya 23 cya shampiyona mu myaka 30 ishize, kikaba n’icya gatandatu itwaye yikurikiranya kuva mu 2020.

Abafana bari bitwaje imyambaro igaragaza ko batwaye igikombe

Abafana bari baje gushyigikira APR FC ku bwinshi

Nkulikiyimana Nganji, Aly Enzo Hamon, Kayibanda Claude bahamagawe mu Amavubi bwa mbere, Kagere Meddie agaruka ku rutonde

Uru rutonde rugaragaraho abanyezamu batatu, abugarira 10, abakina mu kibuga hagati barindwi n’abasatira barindwi, rwashyizwe ahagaragara mu gitondo cyo kuri uyu wa Gatatu tariki 28 Gicurasi 2025.

Rutahizamu wa Namungo FC, Kagere Meddie w’imyaka 38, yongeye guhamagarwa nyuma y’imyaka ibiri adakinira Amavubi, mu gihe Aly Enzo Hamon ukinira Angoulême Charente Football Club yo mu Bufaransa, Nkulikiyimana Darryl Nganji ukinira FCV Dender EH yo mu Bubiligi, na Kayibanda Claude Smith wa Luton Town yo mu Bwongereza, ari yo masura mashya arirmo kuri iyi nshuro.

Ngwabije Brian Clovis wa Blois Foot 41 yo mu Bufaransa, kuri ubu umaze kuzuza imyaka 26 y’amavuko, na we yongeye guhamagarwa ku rutonde rugaragaraho abakinnyi batandatu ba APR FC na batatu ba Rayon Sports FC, akaba n’amakipe abiri yonyine yo mu Rwanda yaserukiwe mu Ikipe y’Igihugu, mu gihe abandi 18 bose bakina hanze y’u Rwanda.

Abanyezamu batatu bahamagawe bagizwe na Ntwari Fiacre (Kaizer Chiefs FC), Ishimwe Pierre (APR FC) na Buhake Clement Twizere (Ullensaker/Kisa).

Ba myugariro 10 barimo Niyomugabo Claude (APR FC), Aly Enzo Hamon (Angoulême CFC), Omborenga Fitina (Rayon Sports), Uwimana Noe (Virginia Tech Soccer), Mutsinzi Ange (Zira Futbol Klubu), Manzi Thierry (Al Ahli Tripoli), Niyigena Clément (Apr FC), Nshimiyimana Yunus (APR FC), na Kavita Phanuel (Bermingham Legion FC).

Abakina mu kibuga hagati bagizwe na Nkulikiyimana Darryl Nganji (FCV Dender EH), Bizimana Djihâd (Al Ahli Tripoli), Mugisha Bonheur (Stade Tunisien), Ruboneka Jean Bosco (APR FC), Muhire Kevin (Rayon Sports), Kayibanda Claude Smith (Luton Town/England), na Manishimwe Djabel (Naft Al Wasat).

Ababarizwa mu gice gisatira barimo Kagere Meddie (Namungo FC), Gitego Arthur (Clube Ferroviário Da Beira), Rafael York (ZED FC), Nshuti Innocent (Sabail Fk), Ngwabije Brian Clovis (Blois Foot 41) Mugisha Gilbert (APR FC) Jojea Kwizera (Rhode Island FC) na Biramahire Abeddy (Rayon Sports).

Kagere Meddie [N⁰5] yaherukaga mu Ikipe y’Igihugu Amavubi muri 2023

Nta gihindutse, abasore b’Amavubi ba mbere barahaguruka kuri uyu wa Gatandatu tariki 30 Gicurasi 2025. Nta myitozo bazakorera mu Rwanda, ahubwo bazahita berekeza muri Algeria aho bazahurira na bagenzi babo batazafasha guhagurukira i Kigali.

Umukino w’u Rwanda na Algeria uteganyijwe tariki ya 5 Kamena 2025, saa mbiri z’ijoro, ukazabera muri Algeria ku kibuga cya Chahid Hamlaoui Stadium giherereye mu mujyi wa Constantine, mu gihe hagitegerejwe kureba ko hemezwa niba bakina umukino wa kabiri wakinwa tariki ya 09 Kamena 2025.

Ni umukino witezweho kuzafasha cyane Umutoza Adel Amrouche uzaba ukinira mu gihugu avukamo, kuko azaba abura amezi atatu ngo yongere guhura na Nigeria iheruka kumutsindira i Kigali ibitego 2-0, mu mukino w’umunsi wa gatandatu wo gushaka itike y’Igikombe cy’Isi cya 2026, kizabera mu bihugu bya Leta zunze Ubumwe za Amerika, Canada na Mexique.

Brennan Johnson atsinda igitego cya Tottenham Hotspur

Ni umukino wabaye mu ijoro ryo kuri uyu wa Gatatu tariki 21 Gicurasi 2025, kuri Stade ya Nuevo San Mamés Barria mu Mujyi wa Bilbao muri Espagne, ahari hahanzwe amaso aya makipe yombi atarirwaye neza muri Premier League, akaba yari ahuriye ku ntego yo kurengera umwaka wayo nibura atwara Igikombe cyo ku rwego rw’umugabane.

Mu gice cya mbere , Manchester United yabonanaga neza yaremye uburyo bwinshi ugereranyije na Spurs ariko abakinnyi nka Amad Diallo babura uko bashyira mu izamu uburyo amashoti abiri agana mu izamu iyi kipe yabonye muri atanu yateye muri rusange. Ku ruhande rwa Spurs nayo rutahizamu Dominic Ayodele Solanke na Richarlison bagowe no gufungura amazamu yari ahagazemo Umunya-Cameroun, André Onana Onana, mu mashoti atatu ikipe yabo yateye arimo rimwe ryaganaga mu izamu.

Amad Diallo yahushije uburyo bwari kuvamo igitego Manchester United

Icyakora Spurs itabonye uburyo bwinshi mu gice cya mbere, binyuze ku Munya-Pays de Galles Brennan Price Johnson yafunguriye amazamu ku mupira yahawe na Pape Matar Sarr maze Luke Shaw ananirwa kuwukuraho birangira uruhukiye mu rushundura, Umusifuzi w’Umudage, Félix Zwayer asoza iki gice iyi kipe y’i Londres iri imbere y’iy’i Manchester n’igitego 1-0.

Brennan Johnson watsinze igitego

Manchester United yagarutse mu gice cya kabiri yotsa Tottenham Hotspur igitutu ku mipira yubakiraga hagati mu kibuga, igashyirwa mu mpande mbere yo guhindurwa mu ruhuga rw’amahina, ndetse umunota wa 60 w’umukino usanga imaze guhererakanya umupira inshuro 241 kuri 90 ya Tottenham Hotspur, gusa Rasmus Winther Højlund na Mason Mount bananirwa n’igikorwa cya nyuma.

Byari agahinda kuri Manchester United

Nyuma y’uko umutoza Ange Postecoglou akoze impinduka zasize Kapiteni Son Heung-Min asimbuye Richarlison, Manchester United yabonye uburyo bukomeye bwashoboraga kuyigomborera buturutse ku mupira Bruno Miguel Fernandes yateye maze Umunyezamu Guglielmo Vicario ananirwa kuwugumana, mbere no Rasmus Højlund asongamo n’umutwe gusa Micky Van de Ven avaniramo umupira ku murongo.

Umupira Micky Van de Ven yakuriyemo ku murongo mu gice cya kabiri, ni amwe mu mahirwe menshi Manchester United yahushije muri uyu mukino

Umutoza Ruben Filipe Marques Amorim yakoze impinduka zashobokaga zose, yinjizamo Alejandro Garnacho Ferreira, José Diogo Dalot Teixeira a Joshua Orobosa Zirkizee byongera imbaraga mu busatirizi, icyakora ifirimbi ya nyuma ivuga Tottenham Hotspur yegukanye intsinzi n’Igikombe ku gitego 1-0.

Tottenham Hotspur yegukanye igikombe cya gatatu cya Europa League yaherukaga mu 1984

Umutoza wa Tottenham Hotspur Ange Postecoglou wavuze ko mu mwaka we wa kabiri ahantu atwara igikombe, abikoze no kuri iyi nshuro

Tottenham Hotspur yahise ikora amateka yo kwegukana igikombe kuva mu 2008 ubwo yatwara English League Cup “Carabao Cup”, ndetse ihita inakatisha itike y’imikino ya UEFA Champions League y’umwaka utaha.

Kapiteni wa Manchester United Bruno Fernandes amaze kwambikwa umudali w’umwanya wa kabiri

Tottenham Hotspur yongeye gutwara igikombe icyo aricyo cyose bwa mbere kuva mu 2008

Umukino urangiye abakinnyi bashimiye umunyezamu Watabaye inshuro nyinshi

Byari ibyishimo kuri kapiteni Heung-Min Son umaze imyaka icumi muri Tottenham Hotspur akaba atwaye igikombe ku nshuro ya mbere

Myugariro Christian Romero yahembwe nk’umukinnyi mwiza w’umukino

Gutwara igikombe byatumye Tottenham Hotspur izakina UEFA Champions League mu mwaka utaha 2024-2025

Ibyishimo by’abatoza ba Tottenham Hotspur

Hirwa Jean de Dieu na Iracyadukunda Eric ntibahaye Rutahizamu, Biramahire Abeddy ubwinyagamburiro

Ni umukino wari wasubitswe ugeze ku munota wa 57 kubera umutekano muke wakomotse ku byemezo by’abasifuzi bitanyuze Abafana ba Rayon Sports, nyuma Ishyirahamwe rya Ruhago mu Rwanda rikanzura ko ugomba gusubukurirwa aho wari ugeze, kandi nta bafana.

Umukino watangiranye impinduka ku ruhande rwa Rayon Sports yasabwaga gukora ibidasanzwe mu gihe gito, maze Umunya-Mali, Adama Bagayogo n’Umurundi, Ndayishimiye Richard ntibirirwa bagaruka mu kibuga, ahubwo basimburwa n’Umunye-Congo Brazzaville, Prince Elenga Kanga Junior na Nshimiyimana Emmanuel ‘Kabange’.

Rayon Sports yatangiye iyi minota yotsa Bugesera FC igitutu, icyakora iyi Kipe y’i Burasirazuba ikomeza kugarira neza ndetse yimakaza umuvuno wo gucungira ku mipira itakajwe n’abakinnyi ba Rayon Sports babifashijwemo na Kapiteni Kaneza Augustin na bagenzi be Gakwaya Léonald, Ssentongo Farouk na Umar Abba.

Myugariro w’iburyo, Serumogo Ali Omar wari wahinduriwe umwanya yigizwa imbere

Umutoza Rwaka Claude yakomeje gukora impinduka kugera no ku bakinnyi atari yarigeze agirira icyizere muri uyu mwaka w’imikino, aho yahaye umwanya Umunya-Guinée Bissau, Adulai Jalo n’Umunya-Cameroun, Assana Nah Innocent mu mpinduka zafashije iyi kipe gukaza ubusatirizi mu minota 10 ya nyuma.

Ku munota wa 27 w’iyari igenwe uyu munsi, Bugingo Hakim yatsindiye Rayon Sports igitego cya mbere ku mupira wari uhinduwe na Assana Nah Innocent, itangira guhembera icyizere, kitamaze kabiri kuko nyuma y’iminota ine yongeweho, abasore b’umutoza Banamwana Camarade bakomeje guhagarara neza, umukino urangira begukanye intsinzi y’ibitego 2-1.

Uyu mukino wari wakajijweho umutekano, wanitabiriwe n’abayobozi mu nzego zitandukanye zirimo iza Leta n’izishinzwe umupira w’amaguru mu Rwanda bayobowe na Perezida wa FERWAFA, Munyentwari Alphonse, Umunyamabanga, Kalisa Adolphe ‘Camarade’ n’Umuyobozi w’Urwego rutegura Shampiyona y’Icyiciro cya Mbere mu Rwanda, Mudaheranwa Hadji Yussufu.

Igitego cya Bugingo Hakim nticyari gihagije ngo giheshe Rayon Sports amanota atatu ayigarura ku mwanya wa mbere

Gutsindwa kwa Rayon Sports kwayishyize ku mwanya wa kabiri muri Shampiyona n’amanota 59, ku rutonde rw’agateganyo ruyobowe n’Ikipe y’Ingabo z’Igihugu, APR FC n’amanota 61. Aya makipe yombi ahanganiye Igikombe cy’uyu mwaka asigaranye imikino ibiri yonyine.

Ssentongo Farouk utagaragaye cyane uyu munsi ahanganye na Serumogo Ali Omar

Umunyamabanga wa FERWAFA, Kalisa Adolphe ’Camarade’

Mudaheranwa Hadji Yussufu uyobora Rwanda Premier League

Ni umukino ugiye guhuza amakipe abiri yo mu Bwongereza asangiye inkuru, intego ndetse n’icyo arwanira muri uyu mwaka, ukabera mu rugendo rw’iminota 15 uvuye ku Ngoro Ndangamurage ya Guggenheim, ibilometero bibiri byonyine mu Burasirazuba bw’Umujyi ubarurwa mu yikuze cyane wa Bilbao mu gihugu cya Espagne.

Ni umwanya mwiza wo korosa uduhigo tubi n’amakosa yose yigaraguyemo muri iki gihe, cyangwa ukaba impamvu wo kugirwa urw’amenyo; bijyana agatoki ku kandi n’iherezo ry’amasezerano ya bamwe mu gihe hataboneka umutsindo.

Manchester United ya 16 ku rutonde na Tottenham Hotspur ya 17, amakipe abiri abanziriza ayamaze kumanuka mu Cyiciro cya Kabiri mu Bwongereza, uyu ni umwe mu mikino ya nyuma ugiye guhuza amakipe ahagaze nabi imbere mu bihugu byayo.

Mu mateka ya Premier League kuva yashyirwaho mu 1992, Tottenham Hotspur yari itarigera itsindwa imikino irenze 19 muri Shampiyona, icyakora kugera ku munsi wa 37, iyi kipe imaze gutsindwa imikino 21, inganya itanu, mu gihe yabashije gutsinda 11 yonyine.

Ibi kandi ntibitandukanye cyane n’iyi Kipe y’i Manchester imaze gutsindwa imikino 18, inganya icyenda maze itsinda 10 yonyine. Gusa igitangaje, ni yo Kipe rukumbi itaratsindwa umukino n’umwe mu marushanwa y’i Burayi muri uyu mwaka w’imikino.

Ni ku nshuro ya gatanu amakipe yo mu Bwongereza agiye guhurira ku mukino wa nyuma muri iki kiragano turimo, nyuma ya 2008 Chelsea itsindwa na Manchester United muri Champions League, 2019 Chelsea itsinda Arsenal muri Europa League, ndetse Tottenham Hotspur muri uwo mwaka itsindwa na Liverpool muri Champions League, mu gihe inshuro iheruka ari iyo muri 2021 Chelsea itsinda Manchester City ku mukino wa nyuma wa Champions League.

Abajijwe niba umwaka urura yagize muri Shampiyona y’u Bwongereza, utatwikirwa no kwegukana iki Gikombe cyo ku rwego rw’Umugabane, bikabera icyarimwe n’umusingi mwiza ku hazaza he hashya mu Ikipe y’Amashitani Atukura; Umutoza Ruben Filipe Marques Amorim yasubuje ko nta ho bihuriye, ko icyo arangamiye ari ugusozanya umwaka w’imikino ishema.

Ati “Ahazaza hashya kuri njye, ntekereza ko atari cyo kibazo. Ahubwo byaba bigiye kudufasha gusoza neza umwaka w’imikino. Abantu benshi bazarebera Ikipe yacu mu ndorerwamo zitandukanye kubera ko kwegukana Igikombe cyo ku rwego rw’Umugabane w’u Burayi ni ikintu cy’ingenzi cyane, gusa nta kintu bigiye guhindura ku mwaka wacu, ibyo abakinnyi bacu barabizi, Ubuyobozi burabizi ndetse bikaba n’ibidatandukanye ku bafana.”

Yongeyeho ko “Nanone gutwara iki Gikombe cy’i Burayi bishobora kubiba mu Ikipe yacu iyo mpumeko idasanzwe yo kubaka ahazaza. [...] Turi gukora ibyo dukwiriye kuba dukora, urugero njye naturutse mu Ikipe [Sporting Club de Lisbon] yizera ko kugira ngo ikomeze ibeho, igumane abakinnyi igomba kuba ikina muri Champions League. Aha rero biratandukanye. Ikipe yacu hano ishobora kwinjiza amikoro kandi ititabiriye Champions League kuko ni Ikipe nkuru, rero tugomba gukora ibintu mu buryo bukwiriye.”

Rutahizamu Solanke ni umwe mu bahanzwe amaso kuri Spurs

Ku rundi ruhande, Umutoza wa Tottenham Hotspur, Angelos Postekos uzwi nka Ange Postecoglou wasezererejwe umwaka wose kubera amapfa y’intsinzi muri Shampiyona y’u Bwongereza, yatangaje ko ahamanya n’umutima we wose ko yakwishimira kwegukana Europa League, aho kuza imbere mu makipe afite itike ya UCL, kuko iyi Kipe y’i Londres yabikoze inshuro nyinshi ariko ibikombe bigakomeza kuba inzozi.

Ati “Muzi igisobanuro cy’itike ya Champions League, icyo bisobanuye kuri buri kipe y’umupira w’amaguru kwerekeza muri iri rushanwa. Ni inyungu yigaragaza ndetse ubona amahirwe yo guhatana n’abeza ku Mugabane, gusa Tottenham yabaye kenshi muri iri rushanwa na mbere hose, nyamara imaze igihe kirekire nta Gikombe, ubwo rero urumva ikiri ingenzi kurenza ibindi byose.”

Manchester United igiye gukina uyu mukino iri mu byishimo byo kugaruka kw’abakinnyi bayo batatu b’ingenzi bakize imvune bayoboye na Myugariro w’Umunya-Portugal, José Diogo Dalot Teixeira, Umufaransa Lenny Jean-Luc Yoro n’Umuholandi Joshua Orobosa Zirkzee; bose bakoranye na bagenzi be imyitozo ibanziriza umukino kuri uyu wa Kabiri.

N’ubwo yahagurukanye na bagenzi be aje kubashyigikira i Bilbao, Umuholandi Matthijs De Ligt ntaza kugaragara muri uyu mukino, kimwe n’Umunya-Argentine, Lisandro Martíneza kubera ibibazo by’imvune.

Umunya-Suède ukinira Tottenham Hotspur, Lucas Erik Hogler Bergvall, ari kumwe na bagenzi be mu Bwami bwa Espagne ariko ntaza kugaragara muri uyu mukino, ni mu gihe Umunya-Sénégal, Pape Matar Sarr utararangije umukino ikipe ye iheruka guhuramo na Aston Villa y’i Birmingham we yagarutse yiteguye gukina.

Spurs idafite Dejan Kulusevski, James Daniel Maddison, Dane Scarlett, Timo Werner, Radu Dragusin na Lucas Bergvall nta gihindutse iraba ibifite Guglielmo Vicario mu biti by’izamu; Pedro Porro, Destiny Udogie, Criastian Romero na Mick Van de Ven mu bwugarizi; Yves Bissouma, Rodrigo Bentancur na Wilson Odobert hagati mu kibuga; Brennan Johnson, Dominic Ayodele Solanke na Kapiteni Son Heung-Min bayoboye ubusatirizi.

Byitezwe ko Umunya-Cameroun, André Onana Onana aza kuba ari mu biti by’izamu; Luke Shaw, Harry Maguire na Victor Nilsson Lindelof bagize inyabutatu y’ubwugarizi, Manuel Ugarte Ribeiro na Carlos Henrique Casemiro hagati mu kibuga bateganye na Patrick Dorgu na Noussair Mazroui, inyuma gato ya Amad Diallo cg Alejandro Garnacho Ferreira na Kapiteni Bruno Miguel Fernandes bari mu bitugu bya Rutahizamu, Rasmus Winther Højlund.

Kuva isaa tatu z’ijoro, umusifuzi w’Umudage Félix Zwayer araba atangiye guca urubanza rutabera rugomba gusiga Manchester United yongeye kwegukana Europa League yaherukaga muri 2016/2017 itozwa na José Félix Mourinho, cyangwa kigasiga Tottenham Hotspur ikoze amateka yo kwegukana igikombe cya mbere kuva mu 2008 ubwo yatwara English Football League izwi nka “Carabao Cup”.

Abafana bo mu Bwongereza batangiye kugera mu Mujyi wa Bilbao muri Espagne

Ibi bikubiye mu ibaruwa yo ku wa 15 Gicurasi 2025 abakinnyi b’iyi Kipe bandikiye Umuyobozi w’Umuryango wa Rayon Sports bunafite iyi kipe y’Abagore mu nshingano, ndetse bimenyeshwa Ishyirahamwe ry’Umupira w’Amaguru mu Rwanda, FERWAFA, na Minisiteri ya Siporo, MINISPORTS.

Muri iyi baruwa, aba bakinnyi baragaragaza ko mu bihe bitandukanye by’umwihariko tariki 24 Mata 2025, bagiranye inama n’Ubuyobozi bubizeza kubishyura amezi atatu [Gashyantare, Werurwe na Mata], icyakora ntibwagira icyo bubikoraho kugera n’ubwo hiyongereye n’ikirarane cya Gicurasi, wongereyeho n’ibirarane by’amezi abiri y’umwaka wabanje, yose hamwe akaba amezi atandatu.

Mu gika cya kabiri cy’iyi baruwa, aba bakinnyi bagize bati “Tubasaba kuduhemba bigendanye n’amasezerano mwagiranye na buri umwe wese, kuduha uduhimbazamusyi twatsindiye, kwishyura ibirarane by’umwaka washize by’amezi abiri, n’uduhimbazamusyi umunani kuko twagerageje guhesha ishema Umuryango wa Rayon Sports muyoboye, ariko nta gaciro mwabihaye.”

Aba bari n’abategarugori bakinira Rayon Sports bagaragarije ubuyobozi ko ubuzima bubakomereye cyane, bakaba basaba mu buryo bwihariye “Guha abanyamahanga amatike abasubiza iwabo nk’uko biri mu masezerano, cyane ko bari gusohorwa mu nzu.”

Iyi kipe ibitse Ibikombe bibiri bya Shampiyona y’u Rwanda mu Bagore biheruka gukinwa, yasoje isaba Ubuyobozi gukemura icyo kibazo bwangu mbere y’uko bashora ikirego mu nzego bireba. Bati “Tubasabye kuba mwadukemuriye ikibazo mu gihe kitarenze iminsi 15, bitaba ibyo tukiyambaza izindi nzego.”

Ikibazo cy’imishahara muri Rayon Sports WFC cyagarutsweho cyane ubwo iyi Kipe yatsindirwaga ku mukino wa nyuma w’Igikombe cy’Amahoro cy’uyu mwaka na Indahangarwa WFC ziyiturutse inyuma ibitego 4-2, aho bagaragaje intege nke muri uyu mukino n’inyifato iyi kipe itari imenyereweho kuva mu myaka ibiri ishize izamutse muri Shampiyona y’Icyiciro cya Mbere.

Ni Rayon Sports kandi ifite ihurizo rikomeye ryo kwishyura ukwezi kwa Mata ku bakinnyi bo mu Ikipe y’Abagabo, ndetse n’amezi abarirwa muri ane ku bagize itsinda rishinzwe tekiniki nk’abatoza, abaganga n’abandi bayikorera umunsi ku munsi; ibi bigakorwa bitanaburijemo urugamba rwo kwiruka inyuma y’Igikombe cya Shampiyona bahanganiye na mukeba wayo APR FC mu gihe habura iminsi itatu yonyine.

Ibaruwa yose abakinnyi ba Rayon Sports WFC banditse bishyuza imishahara n’uduhimbazamusyi:

IMPAMVU: GUTAKAMBA

Bwana Muyobozi w’umuryango wa Rayon

Twebwe abakinnyi ba Rayon WFC; tubandikiye tugirango tubagezeho ubusabe nyuma y’ibiganiro twagiranye mu bihe bitandukanye.nka tariki 23/4/2025 aho twavuganaga ko mutubereyemo imishahara y’amezi atatu(3 moins) ariyo ukwezi kwa 2, ukwezi wa 3, ndetse n’ukwa 4, none hagiyemo ukundi kwezi kwa gatanu, kandi mwatwemereye kuba mwakemuye ikibazo cy’uduhimbazamushyi 9 muduha 3 bivuze ko hasigaye 6, bityo tubayeho mubuzima bugoye, kuko twese ducumbitse tutirengagije n’uburyo bw’imibereho.

Bityo tukaba tubasaba kuduhemba bigendanye n’amasezerano mwagiranye na buri umwe wese, ndetse no kuduha uduhimbazamushyi twatsindiye, kwishyura ibirarane by’umwaka washize by’amezi abiri, n’uduhimbazamushyi 8 kuko, twagerageje guhesha ishema umuryango wa Rayon Sport muyoboye,ariko ntagaciro mwabihaye.

Guha abanyamahanga amatike abasubiza iwabo nk’uko biri mu masezerano cyane ko bari gusohorwa mu mazu.

Bityo tubasabye kuba mwadukemurira ikibazo mu gihe kitarenze iminsi cumi n’itanu (15Jours), bitaba ibyo tukiyambaza izindi nzego bireba.

Tubaye tubashimiye.

Murakoze.

Bimenyeshejwe:

FERWAFA

Minisiteri ya Sport

Amavubi U20 yatsinze Zimbabwe

Uyu mukino wabaye kuri uyu Gatatu tariki ya 14 Gicurasi 2025, kuri Kigali Pelé Stadium kuva saa cyenda z’amanywa, nyuma y’uko ubanza wari wakiriwe n’u Rwanda tariki 11 Gicurasi kuri iyi Stade, warangiye rutsinze Zimbabwe ibitego 2-0.

Nk’uko byagenze mu mukino ubanza, Ikipe y’Igihugu y’u Rwanda yatanze iya Zimbabwe kwinjira mu mukino, irema uburyo bunyuranye bw’ibitego binyuze muri Mutuyimana Sandrine na Ishimwe Darleine basatiraga banyuze mu mpande, icyakora abarimo Gisubizo Claudette na Gikundiro Scholastique ntibabasha gufungura amazamu.

Nyuma yo gukomanga inshuro nyinshi imbere y’izamu rya Zimbabwe, ku munota wa 19 w’umukino ba myugariro bayo bateze Mutuyimana Sandrine wari wabacitse mu rubuga rw’amahina hikangwa penaliti, icyakora Umunyakamerunikazi, Innoncentia Njang Ntangt wasifuraga uyu mukino, yanzura ko nta kosa ryabayeho, bikomeza kuba 0-0.

U Rwanda rwakomeje guhererekanya neza umupira hagati mu kibuga, bagaragaza ukumenyerana, cyane ko muri 11 bari babanjemo, barindwi ari bo Umunyezamu, Maombi Joana, Ihirwe Regine, Ndayizeye Chance (Kapiteni), Uwase Fatima, Uwase Bonnette, Mutoni Jeannette na Gisubizo Claudette basanzwe bakinira APR WFC.

Mutuyimana Sandrine ahanganye na Nadia Semba wa Zimbabwe

Aba biyongeraho Ishimwe Darleine wa Forever WFC, Gikundiro Scholastique wa Rayon Sports, Mutuyimana Sandrine wa Inyemera WFC na Niyubahwe Amina wa Police WFC.

N’ubwo Abangavu b’Amavubi basatiriye cyane mu minota isoza igice cya mbere, ndetse bakabona kufura enye hagati mu mukino, Scholastique ntiyabashije kuzitsinda kuko inyinshi zaruhukiraga mu biganza bya Cotilda Chirinda, maze igice cya mbere kirangira ari bikiri 0-0.

Abangavu ba “The Mighty Warriors” nk’uko babatazira muri Zimbabwe, bagarutse mu gice cya kabiri biminjiriyemo agafu ugereranyije n’uko basoje icya mbere; ibintu byatumye Cassa Mbungo André utoza u Rwanda ahita akora impinduka, maze Kabavuke Fiona wa Kamonyi WFC asimbura Ishimwe Darleine, mu rwego rwo kongera imbaraga hagati mu kibuga.

Ku munota wa 86, u Rwanda rwafunguye amazamu ku gitego cy’umutwe cya Gisubizo Claudette nyuma y’umupira wari uzamuwe na Ihirwe Regine, icyakora abasifuzi banzura ko hari habayeho kurarira, umukino urangira ari 0-0 [2-1].

Zimbabwe yasezerewe

Abangavu b’u Rwanda bahise bakatisha itike y’icyiciro cya kabiri, aho bagomba guhura na ‘Kagoma z’Ikirenga’ za Nigeria mu mikino iteganyijwe muri Nzeri uyu mwaka.

Ibihugu 38 ni byo bihatanira imyanya ine y’abazahagararira Umugabane wa Afurika muri iki Gikombe cy’Isi, kizaba ku nshuro yacyo ya 12.

Abazabona itike iberekeza muri Pologne muri Nzeri 2026, bazaba basimbuye ibihugu bya Cameroun, Ghana, Maroc na Nigeria byari byaserukiye Afurika muri Columbia mu 2024, hamwe n’ibindi bihugu byo hanze 20.

Ni umwanzuro ukubiye mu mabaruwa Ubunyamabanga bukuru bwa FERWAFA bwandikiye aba basifuzi batatu umwe ku wundi tariki 05 Gicurasi 2025.

Aya mabaruwa afite impamvu yo “Gusezererwa mu basifuzi ba FERWAFA” nk’icyitarusange, arerekana ko Amida Hemedi na Mbarute Djihadi bombi bafatiwe mu cyaha cyo kugena uko umukino ugenda biciye mu buriganya, hafatwa umwanzuro wo kubahagarika burundu nyuma y’uguterana kwa Komisiyo Ishinzwe Imisifurire muri FERWAFA.

Iyi baruwa yasinyweho n’Umunyamabanga Mukuru wa FERWAFA, Kalisa Adolphe, iyandikiwe Amida Hemedi iragira iti “Nshingiye ku myanzuro ya komisiyo ishinzwe imisifurire mu Rwanda, yateranye ku wa 16 Ukuboza 2024, igafata umwanzuro wo kugusezerera mu basifuzi ba FERWAFA kubera impamvu z’imyitwarire yawe itari myiza, itajyanye n’indangagaciro z’abasifuzi, aho wagize uruhare mu guhuza abasifuzi n’abantu bakora “Match Fixing” ku mikino, nkwandikiye nkumenyesha ko utakiri mu basifuzi mu basifuzi ba FERWAFA kuva kuri iyi tariki.”

FERWAFA ivuga ko kuri Mbarute Djihadi we, yafashwe yakira amafaranga yakira amafaranga y’abantu bakora “Match Fixing”, mu gihe Uwimana Ally we yavuze ko yiyemreye ku giti cye ko “yashishikarije bamwe mu basifuzi gutega ku mikino yo mu Rwanda bagombaga gusifura.”

Ibi bihano byahawe aba basifuzi, bije mu gihe mu Rwanda by’umwihariko muri shampiyona z’icyiciro cya mbere, icya kabiri n’icya gatatu hamaze iminsi hariho ukutavuga rumwe ku byemezo bitandukanye by’imisifurire, bikaba byakekwaga ko bikomoka ku bikoresho by’ikoranabuhanga bidahari biganisha ku kwibeshya kudafite igaruriro, kugoreka amategeko nkana n’ubunyangamugayo buke bufitanye isano n’ibyo aba basifuzi batatu bahaniwe.

Mu bihe bitandukanye mu mupira w’amaguru mu Rwanda havugwamo ko uretse abasifuzi gusa, abayobozi b’amakipe, abakinnyi ndetse n’abatoza bagirana ibiganiro byo kugena uko imikino irangira haba ku mpamvu yo guhanahana amanota bitewe n’uko ikipe runaka iyakeneye bitewe n’ibihe irimo cyangwa hagamijwe no kubona amafaranga binyuze mu gutega (Betting).

Urugero ruheruka ku bakinnyi cyangwa abatoza, ni Mugiraneza Jean Baptiste Miggy wari umutoza wungirije wa Muhazi United wafashwe asaba myugariro wa Musanze FC Bakaki Shafiki ko yakwitsindisha bakina na Kiyovu Sports bikazayifasha kudasubira mu cyiciro cya kabiri, amwizeza ko azamujyanamo umwaka utaha w’imikino kuko yari kuzayitoza , ibintu bitamuhiriye kuko ubu yaciwe mu bikorwa byose bya ruhago umwaka wose.

Amida Hemed ari mu basifuzi bahagaritswe

Ikipe ya Police FC yatangiye umukino isatira cyane ugereranyije na Rayon Sports aho yanyuzaga imipira myinshi ku ruhande rw’ibumoso rwakinahaho Ishimwe Christian n’Umunya-Nigeria, Chukwuma Odili, icyakora ubwugarizi bwa Rayon Sports bukomeza kugarira neza.

Ibi ariko byabaye iby’akanya gato, kuko Rayon Sports yari ifite Ndikuriyo Patient mu biti by’izamu; Serumogo Ali, Bugingo Hakim, Nshimiyimana Emmanuel na Youssou Diagne ku murongo w’abugarira; Niyonzima Olivier Seif, Ndayishimiye Richard na kapiteni Muhire Kevin; Aziz Bassane, Rukundo Abdul-Rahman na Biramahire Abeddy ku murongo w’abasatira; yahise iyobora mu byerekeye guhererekanya umupira kuva ku munota wa munani w’umukino nubwo nta gitego byatanze.

Umukino wakomeje gukinirwa ku muvuduko wo hejuru, umusifuzi, Nsabimana Céléstin asifura amakosa menshi, bituma Ishimwe Christian wa Police FC n’Umunya-Cameroun, Aziz Bassane Koulagna wa Rayon Sports berekwa amakarita y’umuhondo, mu gihe Police FC kugera ku munota wa 22 yari imaze kubona koruneri eshatu ariko itabyaje umusaruro.

Umutoza Mashami Vincent wari wabanje Niyongira Patience mu izamu; Ashraf Mandela, Ishimwe Christian, David Chimezie na Ndizeye Samuel mu bwugarizi; ubutatu bwa Henry Msanga, Ngabonziza Pacifique na Nsengiyumva Siméon mu kibuga hagati; Chukwuma Odili, Mugisha Didier na Ani Elijah; yakomeje kuzibira Rayon Sports maze igice cya mbere kirangira bikiri 0-0.

Umutoza Rwaka Claude yatangiranye impinduka mu gice cya kabiri, Biramahire Abeddy utatanze umusaruro mu gihe cye mu kibuga asimburwa na Ishimwe Fiston, mbere gato y’uko Umurundi, Richard Kirongozi wa Police FC yinjira mu kibuga asimbuye Chukwuma Odili mu mpinduka zakomeje gutuma Rayon Sports isatira byisumbiyeho, gusa Ishimwe Fiston na Rukundo Abdul-Rahman bananirwa kubyaza umusaruro amahirwe babonaga.

Ku munota wa 67, Ishimwe Fiston wari wakomeje gukomanga yafunguriye Rayon Sports amazamu n’umutwe ku mupira wari uzamuwe neza na Nshimiyimana Emmanuel "Kabange" atsinda igitego cy’ingenzi kuko cyari gisubije iyi kipe ku mwanya wa mbere n’amanota 59.

Ku munota wa 78, Umurundi, Rukundo Abdul-Rahman yeretswe ikarita ya kabiri y’umuhondo ibyara itukura asohorwa mu kibuga nyuma y’ikosa yari akoreye Ndizeye Samuel. Ibi byatumye Rwaka Claude wari usigaranye abakinnyi 10 mu kibuga ahatirizwa gukora impinduka zo kugarira, aho Aziz Bassane na Ndayishimiye Richard basimbuwe na Omar Gning na Souleymane Daffé, umukino urangira Rayon Sports yegukanye amanota atatu y’ingenzi itsinze 1-0.

Iyi ntsinzi ya Rayon Sports yayisubije ku mwanya wa mbere ku rutonde rw’agatenyo rwa shampiyona ya 2024/2025 n’amanota 59, mu gihe isigaje imikino itatu na Bugesera FC, Vision FC na Gorilla FC, yayitwaramo neza ikegukana igikombe cya shampiyona nyuma y’imyaka itanu.

Mu wundi mukino wabereye kuri Stade y’Akarere ka Rubavu, igitego cya Mohamed Kyeyune n’icyitsinzwe na Shyaka Philbert byaburijemo icya Nizeyimana Jean Claude wa Rutsiro FC, maze bifasha Muhazi United gusohoka mu murongo utukura itsinze 21, ifata umwanya wa 13 n’amanota 30, isiga Amagaju FC ya 14 n’amanota 29 my gihe Vision FC iri ku mwanya wa nyuma n’amanota 20 mu murongo w’izimanuka mu Cyiciro cya Kabiri.

APR FC yatsinze Amagaju FC ifata umwanya wa mbere

Ni umukino APR FC yagiye gukina isabwa gutsinda ikaba ifashe umwanya wa mbere mu gihe Rayon Sports yari iwufite itari yakina.Umunya-Burkina Faso, Cheick Djibril Ouattara ntiyarindiriye ko iminota 15 yuzura, kuko ku wa 12 yahise afungura amazamu n’umutwe ku mupira mwiza wari uzamuwe na Ruboneka Jean Bosco bamaze kugirana ubwumvane mu kibuga, kiba igitego cya cyenda kuri uyu Rutahizamu nyamara yaraje mu mikino yo kwishyura ya shampiyona muri Mutarama 2025.

Iminota 15 yakurikiyeho na yo yaranzwe no kwiganza kw’Ikipe y’Ingabo z’Igihugu mu mikinire ndetse ibonamo igitego cyatsinzwe na Mugisha Gilbert, icyakora abasifuzi Nizeyimana Is’haq n’umwungiriza we Ndayisaba Saïdi banzura hari habayeho kurarira.

Igice cya mbere kigana ku musozo, ikipe ya Amagaju FC yagerageje kurema uburyo bw’ibitego binyuze muri Kapiteni Massudi Narcisse, Twizerimana Innocent na Rachid Mapoli, gusa Ruboneka, Lamine Bah na Nshimirimana Ismael ‘Pitchou’ bari hagati mu kibuga cya APR bakazibira imipira yose itaragera ku Murundi, Ndayishimiye Edouard wari uyoboye ubusatirizi, ibyatumye igice cya mbere kirangira APR FC iyoboje igitego 1-0.

Djibril Ouattara amaze gutsinda igitego

Ikipe ya Amagaju FC yinjiye mu gice cya kabiri ifite imbaraga zisumbuyeho hamwe n’umutoza wayo Niyongabo Amars wari umaze gihindura uburyo bwo gushaka ibitego banyuze mu mpande mbere yo kugeza umupira mu rubuga rw’amahina, gusa hakomeza kugaragaza icyuho cya rutahizamu Useni Ciza Seraphin ufite ibitego 11 gusa utari mu gihugu kubera gushaka ibyangombwa bimwerekeza mu igeragezwa i Burayi.

Myugariro Nshimiyimana Yunusu

Ku munota wa 58, APR FC yari yakomeje gukomanga yabonye igitego cya kabiri cyatsinzwe n’Umunya-Ouganda, Denis Omedi kuri penaliti yabonyetse ubwo Mugisha Gilbert yateraga umupira mu izamu maze myugariro Hakizimana Ipti-Hadji akawukozaho intoki, mbere y’uko Denis Omedi atsinda igitego cye cya gatandatu muri iyi shampiyona.

Ndayishimiye Edouard nk’uko yari yabigenje mu mukino ubanza mu Karere ka Huye, ku munota wa 85, yagomboreye iyi kipe yo mu Karere ka Nyamagabe igitego kimwe, gusa nyuma y’iminota umunani yonyine Mugiraneza Froduard wari winjiye mu kibuga asimbuye, ahita atsindira APR FC igitego cya gatatu.

Igitego cya Ndayishimiye Edouard nta cyo cyafashije Ikipe ya Amagaju FC kuko umusifuzi Nizeyimana Is’haka yahushye mu ifirimbi bwa nyuma APR FC igifite intsinzi y’ibitego 3-1, yuzuza amanota 58 ku mwanya wa mbere mu gihe Rayon Sports yahise ijya ku mwanya wa kabiri n’amanota 56 itegereje gukina umukino wayo na Police FC kuri iki Cyumweru kuva saa Moya z’umugoroba kuri Kigali Pelé Stadium.

Bizimana Ipti-Hadji ahanganye na Djibril Ouattara

Mu yindi mikino yabaye uyu munsi, Musanze FC iwayo yaguye miswi na Gasogi United igitego 1-1, Mukura VS&L iwayo ihanganyiriza na Bugesera FC igitego 1-1, mu gihe Marines FC nyuma y’igihe kirekire yongeye kubona amanota atatu y’ingenzi itsindiye Vision FC kuri Stade Umuganda ibitego 2-1.

Kuri ubu urugamba rwo kuguma mu Cyiciro cya Mbere rurareba cyane Vision FC ya nyuma n’amanota 20, Muhazi United ya 15 n’amanota 27, Amagaju FC ya 14 n’amanota 29, Marines FC ifite 30 ku mwanya wa 13, mu gihe Musanze FC na Bugesera FC ziri ku myanya ya 12 na 11 nk’uko zikurikiranye zinganya amanota 31.

Denis Omedi ahanganye nk’umukinnyi wa Amagaju FC

Umutoza wa Amagaju FC Niyongabo Amars ubu ari kurwana no kudasubira mu cyiciro cya kabiri

Mugiraneza Froduard yishimira igitego cya gatatu

Wari umukino urimo ishya mu minota ya nyuma

Rayon Sports yaje ifite ubutumwa bwo kwisubiza umwanya wa mbere yaraye yambuwe na mukeba wayo APR FC by’agateganyo, yari yakoze impinduka enye mu bakinnyi basanzwe babanza mu kibuga, zasize ba Nshimiyimana bombi [Fabrice na Emmanuel ], Serumogo Ally na Rukundo Abdul-Rahman babona umwanya.

Mbere y’uko amasegonda aba 40 y’umukino, Umunya-Cameroun, Aziz Bassane Koulagna yafunguye amazamu nyuma yo kwakira umupira mwiza cyane wa Ndayishimiye Richard yanyujije hagati ya ba myugariro ba Rutsiro FC, maze uyu musore witwaye neza mu mukino wose muri rusange nawe ntiyamutenguha atsinda igitego cya mbere.

Nyuma yo gutsindwa igitego, Rutsiro FC yatangiye kubaka uburyo bw’ibitego bushingiye ku guhererekanya umupira binyuze cyane muri Ndabitezimana Lazard, Kwizera Bahati Emilien, Mumbere Mbusa Jérémie, Kwizera Eric na Habimana Yves, icyakora bakabanirwa gutera mu izamu ryari ririnzwe n’Umurundi, Ndikuriyo Patient, maze umusifuzi Twagirumukiza Abdoul yanzura igice cya mbere Rayon Sports iyoboje igitego 1-0.

Mu gice cya kabiri, amakipe yombi yinjijemo bamwe mu bakinnyi bayo beza, nk’aho Niyonzima Olivier Seif na Bugingo Hakim binjiyemo basimbura Nshimiyimana Fabrice na Biramahire Abeddy ku ruhande rwa Rayon Sports, impinduka zongereye imbaraga kuri iyi kipe yasabwaga igitego cya kabiri ngo yizere intsinzi n’umwanya wa mbere.

Rukundo Abdul-Rahman yatsindiye Rayon Sports igitego cya kabiri kuri penaliti yabonetse ku ikosa ryakorewe Ishimwe Fiston, nubwo n’umunyezamu, Itangishatse Jean Paul yari yakurikiye umupira ku munota wa 74 w’umukino.

Nyuma y’uyu mukino wasozaga indi yose yo ku munsi wa 26 wa Shampiyona y’u Rwanda, Rayon Sports yasubiye ku mwanya wa mbere n’amanota 56, aho irusha APR FC ya kabiri inota rimwe aho ifite 55. Ni mu gihe Rutsiro FC yagumye ku mwanya wa gatanu n’amanota 37.

Ni nyuma y’umukino wo kwishyura wa ½ cy’irangiza wabereye kuri Stade ya Parc des Princes mu Murwa Mukuru w’u Bufaransa mu ijoro ryo kuri uyu wa Gatatu tariki 07 Gicurasi 2025, aho Isi ya ruhago yose yari itegereje kumenya usanga Inter ku mukino wa nyuma, biba akarusho ku Banyarwanda bitewe n’uko aya makipe yombi ari abafatanyabikorwa b’u Rwanda muri gahunda ya Visit Rwanda.

Arsenal nk’ikipe yasabwaga kubanza kwinjiza igitego mbere na mbere ngo kiyiheshe kugira ijambo ku mukino, yatangiranye umuvuduko wo hejuru, irema uburyo bufatika bwo gutsinda ibitego, gusa umunyezamu w’Umutaliyani, Gianluigi Donnarumma akomeza guhagarara gitwari mu biti bitatu by’izamu.

Ku rundi ruhande, abasore b’umutoza Luis Enrique batarimo kizigenza Ousmane Dembélé watangiye ku ntebe y’abasimbura kubera imvune n’ububanare byoroheje, bacungiraga ku mipira yatakazwaga na Arsenal ndetse bakayibyaza amahirwe akomeye mu bihe bitandukanye nk’aho Umunya-Georgia, Khvicha Kvaratskhelia yateye igiti cy’izamu ku munota wa 17, na Désiré Doué wateye umupira wa mbere ugana mu izamu ku munota wa 22.

Iminota 27 yari ihagije ngo Abafaransa bongere ikinyuranyo cy’ibitego nyuma y’uko Umunya-Espagne, Fabián Ruiz afunguye amazamu amaze gutegeka neza umupira wari uturutse kuri kufura maze Umunya-Ghana, Thomas Partey wa Arsenal ananirwa kuwuvanaho neza.

Havuyemo iminota mike ya nyuma y’igitego, PSG yongeye kwisanga mu mukino neza ndetse itangira guhererekanya umupira ku kigero cyo hejuru hamwe n’uruhare rw’abarimo Achraf Hakimi Mou, Khvicha Kvaratskhelia, João Neves, Fabián Ruiz na Vitinha, icyakora Désiré Doué na Bradley Barcola bananirwa n’igikorwa cya nyuma, igice cya mbere kirangira PSG iyoboye n’igitego 1-0 byari 2-0 mu mikino ibiri.

Igice cya kabiri cyanzitswe uburyo buremereye bwaremwaga bwaganutse, ndetse amakipe yombi by’umwihariko Arsenal, atangira gucungira ku mipira y’imiterekano, icyakora iki kigugu cy’i Londres kinanirwa kubibyaza umusaruro nk’imwe mu ntwaro zagiye zibafasha mu bihe bitandukanye hamwe n’umutoza ubishinzwe, Nicolas Jovel. Ku munota wa 68, icyizere cya Arsenal abafana batazira ‘Abarashi’ cyanze kuyoyoka nyuma y’uko Umunya-Portugal, Vitor Machado Ferreira Vitinha ananiwe kwinjiza penaliti PSG yari ibonye, Umusifuzi w’Umudage, Félix Zwayer yitabaje VAR agasanga umupira Achraf Hakimi Mou yari yohereje mu izamu wakozweho n’ikiganza cya Myles Lews-Skelly, mbere y’Umunya-Espagne, David Raya Martín ayijugunya muri koruneri.

Icyakora, ibi byishimo byabaye iby’akanya gato kuko Achraf Hakimi yahise abigira 2-0 ku munota wa 74, biba 3-0 uteranyije imikino yombi. Nyuma y’iminota ibiri yonyine, Bukayo Saka Ayoyinka Temitayo yahise agomboreramo Arsenal igitego kimwe, amaze kwakira neza umupira yahaye na Leandro Trossard winjiye mu kibuga asimbuye Gabriel Teodoro Martinelli Silva. Ibi ariko ntacyo byamaze kuko umukino warangiye PSG itsinze 2-1, isezereye Arsenal ku giteranyo cy’ibitego 3-1 mu mikino ibiri.

Iyi ntsinzi yahesheje Paris Saint Germain itike yo kuzakina umukino wa nyuma n’ikigugu cyo mu Butaliyani, Internationale de Milano yaraye isezereye FC Barcelona mu mikino ibiri y’ishiraniro yabonetsemo ibitego 13. Biteganyijwe ko umukino wa nyuma uzabera kuri Stade ya Allianz Arena i München mu Budage tariki 31 Gicurasi 2025.

Paris Saint Germain itarigera yegukana Igikombe cya UEFA Champions mu mateka yayo, yaherukaga ku mukino wa nyuma muri 2020 itozwa n’Umudage Thomas Tuchel, ubwo yatsindwaga na FC Bayern München.

Ni umukino watangiye ku isaha ya saa tatu z’ijoro kuri Stade yitiriwe Giuseppe Meazza i Milan mu Butaliyani, aho nk’uko byari byagenze mu mukino ubanza wabereye kuri Estadio Olimpico Lluis Companys i Barcelona mu cyumweru gishize, Inter yabanje gufungura amazamu iwayo ku gitego cyatsinzwe na Kapiteni Lautaro Martínez nyuma yo kwakira neza umupira yahawe na Denzel Dumfries ku munota wa 21 w’umukino.Nyuma y’iki gitego, FC Barcelona yatangiye gusatira bifatika, irema uburyo bwinshi bw’ibitego binyuze cyane muri Lamine Yamal,Pedri na Raphinha ariko bikarangira Ferran Torres na Dani Olmo bananiwe kubushyira mu nshundura.

Lautaro Martínez watsindiye Inter igitego cya mbere

Hagati aho ariko, abasore b’umutoza Simone Inzaghi na bo ntibari bicaye kuko abarimo Denzel Dumfries wazonze FC Barcelona mu mikino yombi, Henrikh Mkhitaryan na Marcus Thuram bakomeje gusatira, ndetse ku munota wa 45 w’umukino Kapiteni Lautaro Martínez yongera kwinjira mu rubuga rw’amahina ategwa na Pau Cubarsí, maze umusifuzi y’Umunya-Pologne, Szymon Marciniak nyuma yo kwishisha VAR asanga ikosa rikwiye penaliti.

Lamine Yamal yakoze ibishoboka ngo afashe FC Barcelona ariko biba iby’ubusa irasezererwa

Ni penaliti yinjijwe neza n’Umunya-Türkiye, Hakan Çalhanoğlu nk’ibisanzwe ku munota wa mbere w’inyongera ku gice cya mbere, FC Barcelona isigara isabwa ibitego bitatu kugira yerekeze ku mukino wa nyuma, igice cya mbere kirangira ari 2-0, bikaba 5-3 mu mikino ibiri.

Türkiye, Hakan Çalhanoğlu nyuma gutsinda igitego cya kabiri kuri penaliti

Ku munota wa 54, FC Barcelona ibifashijwemo na Eric García yagomboye igitego cya mbere ku mupira yahawe na Gerard Martín nyuma y’akazi keza kari gakozwe na Pedri bitanga ikizere ko kwishyura bishoboka nk’uko byagenze mu mukino ubanza.Ku munota wa 59, FC Barcelona yamazemo umwenda yari ibereyemo Inter, ku gitego cyatsinzwe na Daniel Olmo ku mupira yahawe na Gerard Martín wari abikoze ubugira kabiri.Ku munota wa 88, Raphinha yibwiye ko abishyizeho iherezo ubwo yatsindaga igitego cya gatatu icyakora ku munota wa gatatu w’inyongera ku gice cya kabiri Francesco Acerbi atsindira Inter icyo kunganya iminota isanzwe urangira ari ibitego 3-3 mu mikino ibiri ari 6-6 ,biba ngombwa ko hitabazwa iminota 30 y’inyogera .

Francesco Acerbi yishimira igitego cya gatatu yatsindiye Inter gituma banganya 3-3

Mu gace ka mbere k’iyi minota, Umutaliyani, Davide Fratessi yatsinze igitego cya kane ku munota wa 99 amaze kwakira neza umupira yahawe n’Umunya-Iran, Mehdi Taremi nyuma y’uko Umufaransa Marcus Thuram acenze ba myugariro ba FC Barcelona,aha ibitego biba 7-6, FC Barcelona ikomeza gushakisha uko yakwishyura ariko umunyezamu Sommer wa Inter akaba ibamba umukino urangira ari ibitego 4-3, igiteranyo gituma Inter igera ku mukino wa nyuma itsinze 7-6.

Fratessi yasanze abafana yishimira igitego cyagejeje Inter ku mukino wa nyuma

Inter yaherukaga kuri iki cyiciro mu 2023 ubwo yatsindwaga na Man City 1-0, izahura n’izava hagati ya PSG yo mu Bufatansa na Arsenal yo mu Bwongereza, zifite umukino wo kwisobanura kuri uyu wa Gatatu kuri Stade ya Parc des Princes, nyuma y’uko umukino ubanza wari wabereye kuri Stade ya Emirates i Londres wari warangiye PSG iboneye intsinzi hanze y’igitego 1-0 mu gihe uyu mukino wa nyuma uzabera kuri Stade ya Allianz Arena i München mu Budage tariki 31 Gicurasi 2025.

Byari agahinda kuri Raphinha

Marcus Thuram yihanganisha Lamine Yamal

Byari ibyishimo kuri Inter

Denzel Dumfries ari mu bafashije Inter

Ibi bikubiye mu butumwa Sadate yanyujije ku rukuta rwe rwa X mu gitondo cyo kuri uyu wa Mbere tariki 05 Gicurasi 2025, amasaha make Gikundiro itakaje Igikombe cy’Amahoro irushwa cyane na APR FC ibitego 2-0 mu mukino wasize mu gahinda abakunzi ba Rayon Sports bagikataje mu rugamba rwa Shampiyona bayoboye mu gihe habura imikino itanu yonyine.

Muri ubu butumwa bufunguye, Munyakazi Sadate yagaragaraje ko kubura iki gikombe, nta mukunzi wa Rayon Sports bitababaje. Nubwo bimeze bityo ariko, yashimangiye ko uyu ukwiriye kuba umwanya mwiza wo gushyira hamwe kw’Aba-Rayons nk’intwaro y’ingenzi kurusha ikindi gihe cyabanje.

Ati “Umugoroba w’ejo wabaye mubi kuri twese, ndabizi neza intsinzwi irababaza kandi igatera ibibazo ariko ndagira ngo mbabwire ko ubu aribwo GIKUNDIRO idushaka kandi idukeneye kurusha ibindi bihe byose.”

Yakomeje agira ati “Mureke dushyire ku ruhande ibidutanya twunge ubumwe turwane kugera kuwa nyuma. Ubuyobozi, abashinzwe ibya tekinike n’abakinnyi bakoze ibishoboka byose ariko ntibyakunda, mureke twe abakunzi tubagume inyuma tubashyigikire turwane kugera kuwa nyuma.”

Uyu mugabo ukunda kwifashisha cyane urubuga rwa X mu gutambutsa ibitekerezo bye bwite, yahamije ko Rayon Sports isanzwe ifite umutima w’uburwanyi.

Ati "Turi indwanyi, uyu si umwanya wo gucika intege cyangwa kwitana ba mwana ahubwo ni umwanya wo gushyira hamwe imbaraga zacu, inkunga dukomeze tuyitange nk’uko twarimo kubikora.”

Munyakazi Sadate ugaragaza impungenge z’uko umusaruro nkene wa Rayon Sports imbere y’abakeba babo ushobora gukoma mu nkokora iyi kipe mu mikino ikurikiyeho bijyanye n’intego z’iyi kipe muri uyu mwaka nk’uko byagiye byisubiramo mu bihe bitandukanye, aravuga ibi mu gihe Rayon Sports igihanganiye na APR FC Igikombe cya Shampiyona cy’uyu mwaka w’imikino.

Rayon Sports irasubira mu kibuga yesurana na Rutsiro FC itozwa na Gatera Moussa wagaruwe mu kazi ke nyuma yo gushinjwa umusaruro muke ku mikino wa 5-0 na APR FC. Izakurikizaho Vision FC, Bugesera FC, Gorilla FC na Police FC mu mukino wa nyuma, aho iyi kipe isabwa kuyitsinda yose ubundi igatwara igikombe cya Shampiyona.

Ni umukino watangiranye gusatira kwa APR FC no kubona imipira y’imiterekano irimo za kufura na koruneri bimwe mu byaranze intangiriro zawo, aho ibi byose byahawe agaciro na rutahizamu, Cheick Djibril Ouattara atsinda igitego cya mbere ku munota wa gatanu amaze kwandagaza ba myugariro ba Rayon Sports, nyuma y’umupira iyi kipe yatakarije hagati mu kibuga akawuzamukana yiruka cyane kugeza acenze Ndayishimiye Richard mu rubuga rw’amahina maze akareba uko umunyezamu Ndikuriyo Patient utari wafunze ipoto ahagaze, amutsinda igitego aho yari ari.

APR FC yari yahisemo kubanza Ishimwe Pierre mu biti by’izamu; Byiringiro Jean Gilbert, [Kapiteni] Niyomugabo Claude, Nshimiyimana Yunusu na Niyigena Clément mu bwugarizi; Nshimirimana Ismaël, Ruboneka Jean Bosco na Mohamadou Lamine Bah mu kibuga hagati; Denis Omedi, Mugisha Gilbert na Cheick Djibril Ouattara, yatangiye guturisha umupira.

Hagati aho Rayon Sports yari ifite Ndikuriyo Patient mu izamu; Serumogo Ali, Bugingo Hakim, Omar Gning na Youssou Diagne ku murongo w’abugarira; Souleymane Daffé, Ndayishimiye Richard na [Kapiteni] Muhire Kevin; Aziz Bassane, Iraguha Hadji na Biramahire Abeddy ku murongo w’abasatira, yarangwaga no gutakaza umupira bya hato na hato, ari na ko abarimo Muhire Kevin banyerera mu kibuga hagati.

Djibril Ouattara yishimira igitego

Ku munota wa 29, Mugisha Gilbert yatsinze igitego cya kabiri nyuma yo kwakira umupira watangiriye mu biganza bya Ishimwe Pierre, uzamukanwa neza na Ouattara mbere y’uko Ruboneka Jean Bosco awuhindurira Mugisha Gilbert winjiye mu rubuga rw’amahina akaroba umunyezamu, Ndikuriyo Patient, APR FC yarusha Rayon Sports cyane ikomeza guha ibyishimo abakunzi bayo bari muri Stade Amahoro yari yuzuye ku kigero cya 90%.

Rayon Sports yahise ijya ku gitutu maze umutoza wayo asimbuza akuramo Souleymane Daffé hajyamo Niyonzima Olivier Seif nubwo wabonaga muri rusange , iyi kipe igowe no kwakira imipira ngo iyikine, dore ko igice cya mbere cyarangiye nta buryo bukomeye ibonye imbere y’izamu rya APR FC,yagisoje ifite ibitego 2-0.

Mugisha yishimira igitego cya kabiri yatsindiye APR FC

Amakipe yombi yagarutse mu gice cya kabiri asatirana bitandukanye no mu cya mbere cyari cyihariwe n’ikipe ya APR FC gusa, batangira gukina umukino ufunguye, icyakora uburyo bwa Rayon Sports bwinshi bugasanga abakinnyi barimo Biramahire Abeddy na Rukundo Abdul-Rahman wasimbuye Iraguha Hadji baraririye.

Mu minota ya 70 na 82, Rayon Sports yagerageje gusatira ndetse ibona uburyo bwinshi burimo za kufura na koruneri, gusa Muhire Kevin, Rukundo Abdul-Rahman, Bugingo Hakim na Adama Bagayogo wasimbuye Aziz Bassane ntibabubyaze umusaruro, iminota 90 ndetse n’itanu yongereweho irangira APR FC itsinze 2-0, ari inshuro ya gatatu itsindiye Rayon Sports ku mukino wa nyuma w’Igikombe cy’Amahoro; ibyo yaherukaga muri 2010.

APR FC yegukanye iki Gikombe mu gihe yari imaze imyaka umunani itagikoraho dore ko yagiherukaga muri 2017 ubwo yatsindaga Espoir FC igitego 1-0, mu gihe Rayon Sports yo igiheruka 2023 igikuye kuri Stade Mpuzamahanga ya Huye, itsinze APR igitego 1-0.

Uretse uyu mukino, Ikipe ya Indahangarwa WFC yegukanye iri rushanwa mu Bagore inyagiye Rayon Sports ibitego 4-2. Umwanya wa gatatu waraye wegunywe na Police FC itsinze Mukura Victory Sports et Loisirs igitego 1-0, mu gihe Police WFC yegukanye umwanya wa gatatu bigoranye itsinze Kamonyi WFC kuri za penaliti 4-3, mu mikino yombi yabereye kuri Stade ya Kigali yitiriwe Pélé kuri uyu wa 03 Gicurasi 2025.

Ni umukino Police FC yisanzeho nyuma yo gusezererwa na APR FC muri ½, mu gihe Mukura VS&L yasezerewe na APR FC.Nyuma y’iminota 11 yonyine y’umukino Umurundi, Kirongozi Richard yafunfuye amazamu ku ruhande rwa Police FC ku mupira wari uzamukanwe na Chukwuma Odili ku ruhande rw’ibumoso awuhindurira Kirongozi awushyira mu izamu mu buryo bwari bugoranye gutsinda kuko yari mu nguni ifunze ariko umunyezamu Ssebwato Nicholas ananirwa gukuramo umupira wisanze mu izamu.

Police FC yakoraga amakosa y’abarimo Umunyezamu, Niyongira Patience na ba myugariro be ariko ntabyazwe umusaruro, yakomeje gusatira izamu rya Mukura VSL icyakora imipira myinshi igaterwa hejuru y’izamu na Mugisha Didier, Iradukunda Siméon, Henry Msanga, Ssenjobe Eric na Chukwuma Odili wateye igiti cy’izamu ku munota wa 35, igice cya mbere kirangira bikiri 1-0.Umutoza, Afahmia Lotfi wari umaze gutsindwa mu gice cya mbere yatangiranye impinduka z’abakinnyi bane, aho Nsabimana Emmanuel “Balotelli”, Niyonizeye Fred, Rushema Chris, na Malanda Destin Exauce basimbuwe na Agyemin Mensah Boateng, Jordan Ndumbumba Nzau, Niyonzima Eric na Sunzu Bonheur, mbere y’uko Irumva Justin asimbura Uwumukiza Obed.

Izi mpinduka eshanu zaje hakiri kare, zongereye Mukura imbaraga mu busatirizi itangira kotsa Police FC igitutu. Ku munota 73, Irumva Justin yaguye mu rubuga rw’amahina agushijwe na myugariro David Chimezie hikangwa penaliti ariko Umusifuzi, Nsabimana Céléstin na Umutesi Alice wari uwa mbere w’igitambaro banzura ko nta kosa ryabayeho.Ibi byari mbere y’uko uyu Munya-Nigeria, Chimezie yongera gutega Mensah Boateng, maze hatangwa penaliti, iterwa na Sunzu Bonheur gusa umunyezamu, Niyongira Patience usanzwe ari mwiza mu kuri iyi mipira ayivanamo neza ku munota wa 85, bikomeza kuba 1-0.

Uyu Munye-Congo, Sunzu yongeye gutsinda igitego ahawe umupira na none n’Umunya-Ghana, Boateng, gusa yongera kubwirwa ko yaraririye, umukino urangira ari 1-0.Police FC yegukanye umwanya wa Gatatu mu gihe Igikombe cy’Amahoro giheruka ari yo yari yarakegukanye itsinze Bugesera FC ibitego 2-0 mu gihe Mukura VS yo yaherukaga kwegukana uyu mwanya muri 2023, ubwo yatsindaga Kiyovu Sports Club igitego 1-0.

Umukino wa nyuma utegerejwe kuri iki Cyumweru tariki 04 Gicurasi 2025 kuva saa Kumi n’Igice, aho Ikipe y’Ingabo z’Igihugu, APR FC izaba yakiriye Rayon Sports muri Stade Nkuru y’Igihugu, Amahoro, inyuma gato y’umukino, Rayon Sports y’Abagore izaba imaze kwakiramo Indahangarwa.

Abayobozi b’amakipe yose yegukanye ibikombe bahuriye mu ifoto y’urwibutso

Kuri uyu wa Kane tariki ya 01 Gicurasi 2025, ni bwo ku bibuga bitandukanye mu mu Mujyi wa Kigali hasozwaga imikino ngarukamwaka y’Irushanwa ry’Umunsi Mpuzamahanga w’Umurimo rya 2025, aho bakinaga umupira w’amaguru, Volleyball, Basketball, imikino ngororamubiri, koga na Table Tennis mu byiciro by’abagore n’abagabo.

Ni imikino yitabiriwe n’abayobozi bakuru batandukanye barimo Minisitiri wa Siporo, Madamu Nelly Mukazayire; Minisitiri w’Ubuzima, Dr. Sabin Nsanzimana; Minisitiri w’Abakozi ba Leta n’Umurimo, Amb. Christine Nkulikiyinka, Umunyamabanga wa Leta muri Minisiteri ya Siporo, Rwego Ngarambe, ndetse n’abayobora ibigo bya Leta n’ibyikorera bitandukanye.

Umukino wari witezwe n’abantu benshi, wari uw’ikipe y’Ikigo cy’Igihugu Gishinzwe Ingufu (REG) yari yakiriyemo iya RBC, itozwa na Banamwana Camarade usanzwe anatoza Bugesera FC ikina Shampiyona y’Icyiciro cya Mbere mu Rwanda, afatanyije na Mazimpaka André wahoze ari umutoza w’abanyezamu muri Rayon Sports.

Uyu mukino washyizwe muri ‘Category’, wabereye kuri Kigali Pelé Stadium, warangiye RBC inabitse Igikombe cya Shampiyona y’Abakozi cya 2024/2025 yatwariye i Huye muri Mutarama, yongeye kwisubiza n’icy’Umunsi w’Umurimo itsinze WASAC ibitego 4-0, birimo bibiri byabonetse mu gice cya mbere cy’umukino.

RBC yegukanye igikombe mu mupira w’amaguru

Uyu mukino wari ukurikiye uwari watangiye saa tatu mu Cyiciro cya Kabiri ‘Serie B’, WASAC n’Urwego rw’Igihugu rw’Iterambere (RDB), maze bikarangira WASAC yegukanye igikombe imaze kunyabika RDB igitego 1-0, nyamara yari yabonye ikarita y’umutuku mu minota ya nyuma.

Muri NPC Gymnasium i Remera, habereye umukino wa Volleyball; aho muri Category A, ya Immigration yatsinze iy’Ikigo cy’Igihugu cy’ibarurishamibare (NISR) amaseti 3-0.

Muri Category B, ikipe ya Minisiteri y’Ubuzima itsinda iya Minisiteri ya Siporo amaseti 3-0; naho mu Cyiciro cy’Abagore RBC yayoboye itsinda n’amanota 18 ishyikirizwa igikombe, igubwa mu ntege n’iy’Ikigo cy’Igihugu cy’Imisoro n’Amahoro (RRA) n’amanota 12, mu gihe WASAC yegukanye umwanya wa gatatu.

Muri Petit Stade i Remera habereye imikino ya Basketball, aho muri Category A Immigration yegukanye igikombe itsinze Sosiyete y’u Rwanda y’Ubwikorezi bwo mu Kirere (RwandAir) amanota 98-70, muri Category B Minisiteri ya Siporo itsinda WASAC amanota 59-41; mu gihe mu bagore REG yashyikirijwe igikombe nyuma yo kuyobora urutonde rwa Shampiyona n’amanota 12, ikurikirwa na RBC n’amanota 10 mu mikino yose.

NISR yegukanye igikombe muri Volleyball itsinze DGIE amaseti 3-0

Minisitiri Amb. Christine Nkulikiyinka, yashishikarije Abanyarwanda cyane cyane abakozi kugira umuco wo gukora siporo, kuko iruhande rwo kuba iganisha ku magara mazima, inashimangira gukorera hamwe, asaba ko uyu munsi ureba abakozi n’abakoresha wagombye kuba umwanya mwiza wo guhanga imirimo mishya.

Ati “Uyu munsi si uw’abakozi gusa, ahubwo ni n’uw’abakoresha. Twese turasabwa kunoza umurimo, tukawutanga neza, tugahora twihugura kugira ngo twongere umusaruro tugana ku iterambere ritagira uwo risiga inyuma.”

Yunzemo ati “Ubutumwa bw’uyu munsi, bujyanye n’insanganyamatsiko dufite kugera ku mpera z’uku kwezi k’umurimo, aho najya inama y’uko twese twashyira hamwe tugahanga imirimo, ariko atari imirimo ibonetse yose. Duhange imirimo myiza, isobanutse, irambye kandi ibyara umusaruro aho uyikora ashobora kubaho neza ndetse akiteza imbere adatandukiriye amategeko agenga umurimo.”

Iyi mikino yasojwe kuri uyu wa 01 Gicurasi 2025, yari ifite insanganyamatsiko igira iti “Siporo, inkingi y’umusaruro ku kazi”. Uyu munsi kandi wanabaye intangirio y’ukwezi kwahariwe umurimo kuzarangirana na Gicurasi 2025.

RBC nyuma yo gutsinda WASAC

Umunyamabanga wa Leta muri MINISPORTS, Rwego Ngarambe yaserukiye ikipe ye

Minisitiri w’Ubuzima, Dr. Sabin Nsanzimana akinira ikipe ye muri Volleyball

Minisitiri Nelly Mukazayire na Rwego Ngarambe bishimiye iyi mikino

Minisitiri Amb. Christine Nkulikiyinka yahamije ko umunsi w’umurimo utareba abakozi gusa

Abafana babonye ibyishimo

Gicumbi FC yagarutse mu Cyiciro cya mbere nyuma y’imyaka itatu

Ni umukino ab’i Gicumbi baje gukina basabwa amanota atatu yonyine [intsinzi yuzuye], bagahita buzuza amanota icyenda yagombaga guhita ayihesha kuzamuka mu Cyiciro cya Mbere mu buryo budasubirwaho.

Iyi kipe yo mu Ntara y’Amajyaruguru yari yarakusanyije amanota atandatu mu mikino ine yabanje, yaje kubigeraho itsinda La Jeunesse ibitego 2-0, byinjijwe na Ngondo Stephane na mugenzi we Peter.

Ni mu gihe undi mukino wahurije, AS Muhanga na Etoile de l’Est, warangiye iyi kipe yo mu Majyepfo itsinze iyo mu Burasirazuba igitego 1-0 kuri Stade y’Akarere ya Muhanga.

Ibi byatumye Gicumbi yuzuza amanota icyenda, ikagubwa mu ntege na AS Muhanga n’amanota arindwi, mu gihe Etoile de l’Est na La Jeunesse zinganya amanota atanu; ibisobanuye ko n’ubwo batsinda umukino wabo rukumbi usigaye batakuzuza amanota icyenda nk’ayo Gicumbi ifite ubu, aho nibura amenshi ashoboka kuri bo ari umunani.

Iyi Kipe yo mu Majyaruguru yaherukaga mu Cyiciro cya Mbere mu 2021/2022, umukino usoza iya kamarampaka izakirwa na Etoile de l’Est kuri Stade y’i Ngoma, mu gihe AS Muhanga iwayo izaba yakiriye La Jeunesse tariki 04 Gicurasi 2025, hashakwa uzaherekeza Gicumbi FC mu Cyiciro cya Mbere.

Aziz Bassane ahanganye na Rushema Chris

Ni umukino wabaye kuri uyu wa Gatatu tariki 30 Mata 2025 muri Stade Amahoro, nyuma y’uko umukino ubanza wari wabereye i Huye warangiye amakipe yombi aguye miswi igitego 1-1.

Rayon Sports yinjiye mu mukino yotsa Mukura VS igitutu, ndetse mu minota ine ya mbere iyi kipe batazira ‘Gikundiro’, yari imaze kugerageza uburyo bubiri bukomeye imbere y’izamu rya Mukura, nk’ubwo Biramahire Abeddy yacitse ba myugariro ariko akazibirwa n’Umunyezamu, Nicholas Ssebwato, mbere gato y’ubundi bwahushijwe na Aziz Bassane Koulagna, myugariro Rushema Chris akora akazi ke neza.

Mu minota 16, Mukura yigaranzuye Rayon Sports mu buryo bwo kugumana umupira no gusatira izamu, uburyo buremereye buba ubw’Umunya-Ghana, Mensah Boateng Agyemin wararitse ba myugariro ba Rayon Sports bose agasigarana n’Umunyezamu, Ndikuriyo Patient, ananirwa gufungura amazamu umupira woherezwa muri koruneri itagize icyo ibyara gifatika.

Biramahire Abeddy wafashije Rayon Sports kugera ku mukino wa nyuma atsinda Mukura mu mikino yombi

Ku munota wa 34, rutahizamu Biramahire Abeddy yateye umutambiko w’izamu amaze kunyura mu rihumye ubwugarizi bwarimo Abdul Jalilu, Ishimwe Abdoul na Rushema Chris; haba icyikango ko Rayon Sports yaba ifunguye amazamu.

Iki gikorwa cyaje gikurikiye uburyo butatu bwabonetse kuva ku munota wa 27, gusa Umunya-Cameroun, Aziz Bassane ntabubyaze umusaruro, igice cya mbere kirangira bikiri 0-0.

Amakipe yombi yagarutse mu gice cya kabiri yagabanyije gusatirana cyane, bashingira ku mupira wakinirwaga hagati mu kibuga. Ku munota wa 63, Kanamugire Roger yasimbuwe na Niyonzima Olivier Seif, nyuma yo kugongana na bagenzi be bagerageza gukiza izamu, asohorwa ku ngombyi y’abarwayi.

Nk’uko yabigenje mu mukino ubanza, Biramahire Abeddy yahagurukije Aba-Rayons bari muri Stade Amahoro, afungura amazamu nyuma y’umupira mwiza yacomekewe na Serumogo Ali ku ruhande rw’iburyo, bigizwemo uruhare rukomeye na Kapiteni, Muhire Kevin ku munota wa 73.

Omar Gning wari uhagaze neza mu bwugarizi bwa Rayon Sports

Rayon Sports igeze ku mukino wa nyuma mu Gikombe cy’Amahoro, yawuherukagaho muri 2023 ndetse iza kwegukana icyo gikombe itsindiye APR FC kuri Stade Mpuzamahanga ya Huye igitego 1-0, na ho Mukura yegukana umwanya wa gatatu ibifashijwemo na Hakizimana Zubert itsinze Kiyovu Sports igitego 1-0.

Ni mu gihe Mukura iheruka iki gikombe muri 2018, kikaba na kimwe rukumbi igira, ubwo yatsindaga Rayon Sports kuri za penaliti ku mukino wa nyuma.

Rayon Sports isanze mukeba wayo APR FC ku mukino wa nyuma w’Igikombe cy’Amahoro cya 2025, uteganyijwe kuba ku Cyumweru tariki 04 Gicurasi 2025 muri Stade Amahoro.

Serumogo Ali watanze umupira wavuyemo igitego

Abafana ba Rayon Sports bashyigikiye ikipe yabo kugera ku munota wa nyuma

Perezida w’Urwego rw’Ikirenga rwa Rayon Sports, Muvunyi Paul n’uwa Rayon Sports FC, Twagirayezu Thadée bishimiye kugera ku mukino wa nyuma

Umukino watangiye Police FC isatirana imbaraga, cyane ko yari ibizi ko niramuka idatsinze nibura igitego kimwe ihita isezererwa mu irushanwa, kuko umukino ubanza yari yakiriye wasize banganyije igitego 1-1, ibyashyiraga APR FC mu mwanya mwiza kubera itegeko ry’igitego cyo hanze.

Uburyo buremereye mu mukino bwabonetse ku munota wa Kabiri, ubwo Mugisha Didier yarekuraga ishoti riremereye cyane, icyakora umunyezamu, Ishimwe Pierre aba maso aryohereza muri koruneri. Kuva ubwo iyi Kipe y’Abashinzwe umutekano yakomeje kotsa igitutu iy’Ingabo binyuze cyane muri Byiringiro Lague, Ani Elijah na Ngabonziza Pacifique; gusa bikarangira bananiwe no gutsinda.

Ku munota wa 25, rutahizamu w’Umunya-Burkina Faso, Cheikh Djibrille Ouattara yatsindiye APR FC igitego, ku mupira wari uturutse muri koruneri yazamuwe neza na Ruboneka Jean Bosco, mbere gato y’uko Ouattara afungura amazamu akoresheje umutwe, anyuze mu rihumye ba myugariro ba Police FC, biba 1-0.

Kuva APR FC yabona igitego, yashyize imbaraga mu mukino wubakiye mu mpande zanyuragaho Mugisha Gilbert na Niyomugabo Claude ibumoso, ndetse na Djibrille Ouattara na Byiringiro Jean Gilbert iburyo; ibintu byagoye Police FC yari ifite abakinnyi batanu hagati mu kibuga na batatu mu bwugarizi, ibyatumye igice cya mbere kirangira APR iyoboje n’igitego 1-0.

Outtara na Clément bishimira intsinzi

APR yinjiranye imbaraga mu gice cya kabiri, ndetse ku munota wa mbere wacyo nyuma yo guhererekanya neza kwa Muhammadou Lamine Bah, Ouattara, Ruboneka na Byiringiro Gilbert; Umunya-Uganda, Denis Omedi yisanga imbere y’izamu wenyine ananirwa kubigira bibiri, akoresheje umutwe wahise uvanwamo n’Umunyezamu, Rukundo Onesime.

Ku munota wa 58 APR yashoboraga kwandika igitego cya kabiri cya Denis Omedi wacenze myugariro David Chimezie agasigarana n’umunyezamu bonyine, ariko ananirwa n’igikorwa cya nyuma. Nyuma y’iminota itatu Mugisha Gilbert na we yahushije uburyo bukomeye, nyuma y’umupira wari woherejwe mu rubuga rw’amahina na Ouattara.

Mashami Vincent, utoza Police, ku munota wa 65 yakoze impinduka zigamije gukangura ubusatirizi, maze Mugisha Didier na Bigirimana Abedi baha umwanya Iradukunda Siméon n’Umunya-Nigeria, Chukwuma Odili uri mu bari gufasha cyane ikipe ye muri iyi minsi.

Ku munota wa 76 kandi Byiringiro Lague na Ngabonziza Pacifique, baha umwanya Hakizimana Muhadjiri na Muhozi Fred, mu gihe Umunya-Mauritanie, Mamadou Sy yasimbuye Djibrille Ouattara ku ruhande rwa APR FC, mbere y’uko Lamine Bah asimbuzwa Umunya-Sénégal, Alioum Souané naho Denis Omedi aha umwanya Ndayishimiye Dieudonné Fils.

Byiringiro Lague ahanganye na Niyomugabo Claude

Izi mpinduka ntacyo zahinduye ku musaruro w’umukino nyirizina, uretse uburyo buremereye bwabonetse ku munota wa 91, ubwo Umurundi Henry Msanga, yateraga ishoti rikomeye mu izamu, ariko umunyezamu, Ishimwe Pierre agakora akazi gakomeye ko kuwohereza muri koruneri, umukino urangira Police FC isezerewe mu Gikombe cy’Amahoro itsinzwe igitego 1-0, kiba igiteranyo cy’ibitego 2-1 mu mikino yombi.

Ugusezerwa kwa Police FC gusobanuye ko umwaka w’imikino urangiye nta gikombe na kimwe yegukanye, nyamara ari yo yari ibitse Igikombe cy’Amahoro cy’umwaka ushize itsindiye Bugesera FC ku mukino wa nyuma, mu gihe APR FC imaze imyaka umunani itagikoraho, kuko igiheruka muri 2017 ubwo yatsindaga Espoir FC ku mukino wa nyuma igitego 1-0.

Umukino wa nyuma w’Igikombe cy’Amahoro cya 2025, uteganyijwe kuba ku Cyumweru tariki 04 Gicurasi 2025 muri Stade Amahoro, ukazahuza APR FC n’ikipe iza gukomeza hagati ya Rayon Sports na Mukura Victory Sports et Loisirs yo mu Karere ka Huye, zifitanye umukino wo kwisobanura kuva saa Moya n’Igice muri Stade Amahoro.

Bigirimana Abedi wari Kapiteni wa Police FC kuri uyu mukino

Uyu mukino amakipe yombi yaje gukina amaze kugendererwa n’Ubuyobozi Bukuru bwayo kuri buri ruhande, burangajwe imbere na Chairman wa APR FC muri iki gihe, Brig. Gen. Déo Rusanganwa ndetse n’Umuyobozi wa Polisi y’u Rwanda akaba n’Umuyobozi w’Icyubahiro wa Police FC, IGP Félix Namuhoranye, kuri Pelé stadium; bakaba babageneye ubutumwa bubasaba kwitwara neza no guhesha amakipe yabo ishema.

Ibi bikubiye mu itanganzo “RDB” yashyize hanze kuri uyu gatatu tariki 30 Mata 2025 aho ikipe ya Atlético Madrid izajya imenyekanisha ubucyerarugendo bw’u Rwanda binyuze mu makipe yayo yose abagabo n’abagore.

Aya makipe azajya yambara “Visit Rwanda” mugihe cy’imyitozo ndetse n’igihe ikipe yishyushya igiye gukina bikazatangira mu mikino iyi kipe isigaje uyu mwaka ngo shampiyona irangire ndetse no mugikombe cy’isi cy’amakipe.

Umuyobozi Mukuru wa RDB, Jean-Guy Afrika yatangaje ko ubu bufatanye bugamije gukomeza kugira u Rwanda igicumbi cy’ishoramari rishingiye ku bukerarugendo, ashimangira ko Atlético de Madrid ari umufatanyabikorwa urubereye.
Ati “Ubu bufatanye budasanzwe na Atlético de Madrid bugaragaza intumbero y’u Rwanda yo kuba igicumbi cy’ishoramari, ubukerarugendo, no guteza imbere imikino. Indangagaciro zo kwigira, ikinyabupfura, no kuba indashyikirwa iyi Kipe isanganywe, bihuza cyane n’indangagaciro z’Igihugu cy’u Rwanda n’intambwe idasubira inyuma.”

Yakomeje agira ati “Binyuze muri ubu bufatanye, dufite intego yo kwerekana u Rwanda nk’ahantu heza ku bashoramari, ahantu habereye ubukerarugendo ku Isi, hamwe n’urubuga rwo kurera impano no kwagura amahirwe ku rubyiruko rwo muri Afurika binyuze muri siporo.”

Aya masezerano u Rwanda rwasinyanye na Atlético de Madrid azamara imyaka itatu kuko azageza tariki 28 Kamena 2028.

Aya kandi ari mu cyiciro cya “Premium” akubiyemo ko Atlético de Madrid izajya yamabara amagambo “Visit Rwanda” ndetse anagaragare muri Stade y’iyi Kipe ya Riyadh Air Metropolitano kimwe no ku zindi mbuga z’ikipe n’abafana hagacishwa ubutumwa bukangurira abantu gusura u Rwanda.

Uretse Atlético de Madrid, u Rwanda rusanzwe rufitanye amasezerano n’andi makipe atatu akomeye ku Mugabane w’i Burayi, aho rwatangiranye na Arsenal FC yo mu Bwongereza muri 2018, hakurikiraho Paris Saint-Germain yo mu Bufaransa muri 2019, mbere yo gusinyana n’ikigugu cyo mu Budage, FC Bayern München.

VIDEO - Ikipe ya Atletico Madrid yo muri Espagne yinjiye mu bufatanye n'u Rwanda binyuze mu kwamamaza Visit Rwanda.
'Visit Rwanda' izajya igaragara ku myenda Atletico Madrid ikorana imyitozo n'iyo kwishyushyanya mbere y’umukino, ndetse biratangira gushyirwa mu bikorwa mu mikino… pic.twitter.com/xVPe0aLBVf

— Kigali Today (@kigalitoday) April 30, 2025

Muri uyu mukino wabereye wabereye kuri Stade ya Emirates, ku munota wa gatatu wonyine, Ousmane Dembélé yafunguriye Paris Saint-Germain amazamu ku mupira mwiza yari acomekewe na Khvicha Kvaratskhelia nyuma yo kwiremera amahirwe ku mupira yahawe na Nuno Mendes Tavares mbere y’uko awugarurirwa uturutse ku ruhande rw’ibumoso, Dembélé ahita yandika igitego cya cyenda muri Champions League y’uyu mwaka.

Paris Saint-Germain yakomeje gusatira kuko kugera ku munota wa 14 iyi Kipe yo mu Murwa Mukuru, Paris, yari yihariye umupira ku kigero cya 67%. Khvicha Kvaratskhelia yagoye Jurrien Timber mu buryo bugaragara, mu gihe Vitinha na Fabian Ruiz bagaragazaga icyuho cy’Umunya-Gahana, Thomas Partey wujuje amakarita atamwemereraga gukina hagati mu kibuga ha Arsenal.

Ku munota wa 30, Paris Saint-Germain yabonye uburyo bukomeye nyuma y’uko Ousmane Dembélé yacitse ba myugariro ba Arsenal, ahererekanya umupira na Désiré Doué ateye ishoti Umunyezamu, David Raya Martín ararokora, Fabian Ruiz yongejemo ugonga igiti cy’izamu nubwo yari yaraririye.

Arsenal FC nk’ikipe yari iri imbere y’abafana bayo, bakangutse kuva ku munota wa 39, binyuze muri Bukayo Saka waremaga uburyo butandukanye bw’ibitego, icyakora Umunyezamu, Gianluigi Donnarumma na ba myugariro bakomeza kwihagararaho nko ku munota wa mbere w’inyongera aho Gabriel Teodoro Martinelli Silva yasigaranye n’umunyezamu bonyine ariko bikarangira uyu Mutaliyani avanyemo umupira, igice cya mbere kirangira PSG iyoboje n’igitego 1-0.

Arsenal yinjiye mu gice cya kabiri neza nk’uko yarangije icya mbere, ndetse ku munota wa 47 Mikel Merino atsinda igitego nyuma ya y’umupira w’umuterekano wari izamuwe na Declan Rice, gusa umusifuzi Vincic abwirwa na VAR ko uyu Munya-Espagne yari yaraririye.Arsenal yakomeje gusatira, ari na ko Paris Saint-Germain na yo yugarira neza ikajya inyuzamo igasatira, umukino urangira Abafaransa basubiranye iwabo ishema ku ntsinzi y’igitego 1-0.

Ni inshuro ya mbere PSG iboneye intsinzi kuri Stade ya Emirates mu bihe bya vuba, kuko Arsenal iherutse kuyihatsindira ibitego 2-0 bya Kai Havertz na Bukayo Saka mu cyiciro cyo gukinira amanota n’imyanya "League Phase" wabaye tariki 21 Ukwakira 2024.

Umukino wo kwishyura uzabera kuri Stade ya Parc des Princes mu Bufaransa ku wa Gatatu tariki 07 Gicurasi 2025, aho izasezerera indi izahita ikatisha itike y’umukino wa nyuma uzabera i München tariki 31 Gicurasi 2025.

Ni icyiciro amakipe yombi agezemo afite intego zisa zo kwegukana iri rushanwa yirutse inyuma imyaka myinshi, ariko kugeza hakaba nta nimwe yari yaryegukana uretse gukina umukino wa nyuma inshuro imwe zose zatsindiweho. Uyu mwaka Arsenal yerekeje imbaraga zayo zose muri Champions League nyuma y’uko isezerewe mu marushanwa y’imbere mu Bwongereza, mu gihe PSG yo ivuga ko yegukana byose ikiniye iwabo, bityo ko icyo yerekejejo amaso cyane ari iki gikombe gihindi ibindi i Burayi.

Paris Saint-Germain yageze i Londres amahoro, iza nk’umushyitsi ariko w’umusangwa kuko atari ubwa mbere ihagenda muri iyi minsi dore ko yageze muri iki gihugu ubwo yasezereraga Liverpool muri ⅛, ndetse n’igihe yakuragagamo Aston Villa muri 1/4, mu gihe ubu hatahiwe kureba niba yabikora ku nshuro ya gatatu ihere mu mukino ubanza uteganyijwe saa Tatu z’ijoro.

Aba b’i Paris baje buri umwe mu buryo bwe nk’aho Umuyobozi w’Icyubahiro, kuva mu 2011, Umunya-Qatar, Nasser Al-Khelaifi yaje muri gari-ya-moshi aganira n’abafana, aho kuza mu ndege zihenze nk’uko asanzwe abigenza; igikorwa cyatangaje benshi.

Umukino wa Arsenal na Paris Saint-Germain, utegerejwe n’abantu benshi ku Isi by’umwihariko Abanyarwanda kuko baraba bahanze amaso ibi bigugu byesurana ariko bihuriye ku kuba byombi byamamaza ubukerarugendo bw’u Rwanda binyuze muri gahunda ya “Visit Rwanda” kuva muri 2018 na 2019 nk’uko akurikirana.

Umunya-Slovenia, Slavko Vincic ni we watoranyijwe ngo asifure uyu mukino yungirijwe na bagenzi be: Tomaz Klancnik na Andraz Kovacic, naho Matej Jug akaba umusifuzi wa kane, Alen Borosak akaba uhagarariye VAR, hamwe n’Umuholandi, Dennis Higler.

Umunya-Espagne, Mikel Arteta utoza Arsenal uyu awubona nk’umukino ukomeye kurenza indi yose yewe n’uwo baherutse gusezereramo Real Madrid. Arsenal Arteta abona nk’agashyitsi kanyuze mu bikomeye ariko kagakomeza kuba ka kandi, arayisabira ko buri muntu wese winjira muri Stade ya Emirates kuza yiteguye urugamba, nk’uko yabitangarije itangazamakuru mbereho umunsi umwe ngo umukino nyirizina ube.

Ati “Ibyo twanyuzemo byose muri uyu mwaka w’imikino, n’uburyo twakemuyemo ibyo bibazo byose n’imbogamizi twahuye nazo maze kuri ubu Ikipe ikaba iri aha, mu makipe ane ya mbere i Burayi, ubwabyo bikumvisha imitekerereze, impumeko n’ishyaka tubifitiye riduharanya. Rero turi kwandika amateka uyu munsi, gusa dukeneye gukora ibyisumbuyeho.”

Yakomeje agira ati “Ejo rwose narabibabwiye kandi ibi nta gukabiriza kubirimo. Ubwo nababwiraga nti ‘Nyabuna, muzazane inkweto zanyu, ntimusige amakabutura yanyu, muzane imipira yanyu twambarire urugamba hanyuma twese dukinire uyu mupira hamwe. Murabizi murashaka ikintu cyihariye, ubwo rero hariya hantu hagomba guhinduka ikintu cyihariye, ikintu kitigeze kigaragara na mbere hose.”

Ku rundi ruhande, Luis Enrique utoza PSG abona uyu mukino nk’indi yose, atanga umuburo, ashimangira ko yiteguye gutahura ibihe by’ingenzi by’umukino aharanira kubibyaza umusaruro nk’intwaro ikomeye iganisha ku mutsindo.

Ati “Uyu ni umukino wa ½ wa UEFA Ligue Des Champions, ni umukino nk’indi, hazaba harimo abanyezamu babiri, impande ebyiri zihanganye, buri wese ashaka kwitwara neza agatsinda mugenzi we. Ndatekereza rero ko byose bizagenda neza ku ruhande rwacu, ni ingenzi cyane kumenya gutandukanya no kubara neza ibihe bitandukanye bizabaho mu mukino.”

Arsenal irakira uyu mukino yagaruye bamwe mu bakinnyi bayo barimo Mikel Merino Zazón na Benjamin William Whitena bakoranye imyitozo ya nyuma na bagenzi babo, mu gihe Umunya-Ghana, Thomas Partey ari we mukinnyi rukumbi ukumiriwe gukina uyu mukino bitewe n’umuziro wo kuba yurujuje amakarita y’umuhondo ku mukino batsinzemo Real Madrid kuri Estadio Santiago Bernabéu muri ¼.

Uyu muziro wa Thomas Partey uhuriranye n’imvune y’urubavu y’Umutaliyani ufite inararibonye muri iyi mikino, Jorge Luiz Frello Filho “Jorginho” wari usanzwe amukorera mu ngata. Umutoza Mikel Arteta kandi yemeje ko Riccardo Calafiori na we agifite iminsi hanze y’ikibuga, iruhande rwa Kai Lucas Havertz, Takehiro Tomiyasu, Gabriel Fernando de Jesus na mugenzi we Gabriel Magalhaes bose bagifite ibibazo by’imvune, mu gihe amakuru ava i Paris yemeza abakinnyi bose bameze neza.

Byitezwe ko Arsenal iza kuba ifite David Raya Martín mu biti by’izamu, Jurriën David Norman Timber, William Alain André Gabriel Saliba, Jakub Kiwior, na Miles Lewis-Skelly mu bwugarizi; Declan Rice, Mikel Merino na [Kapiteni] Martin Ødegaard hagati mu kibuga; mu gihe Bukayo Ayoyinka Temidayo Saka, Leandro Trossard, na Gabriel Teodoro Martinelli Silva baza kuba bayoboye ubusatirizi.

Ku rundi ruhande, Umutaliyani Gigio Donnarumma araba ari mu izamu, Achraf Hakimi Mou, Marquinhos Correa, William Pacho, na Nuno Mendes mu bwugarizi; Fabian Ruiz, Vítor Machado Ferreira “Vitinha”, João Pedro Gonçalves Neves hagati mu kibuga; mu gihe Bradley Barcola (cyangwa Désiré Doué), Khvicha Kvaratskhelia, na Ousmane Dembélé bagomba ari bo ba rutahizamu bagomba kwifashishwa.

Mu mboni za Opta izobereye mu bijyanye no gukusanya imibare, irabona iyi Kipe yo mu Murwa Mukuru Londres w’u Bwongereza nk’ifite amahirwe menshi yo kwegukana Ligue Des Champions y’uyu mwaka ku kigero cya 31.3%, ikagubwa mu ntege na FC Barcelona ifite 27.4%, hagataho Paris Saint Germain na 22%, mu gihe ikigugu cyo mu Butaliyani, Internazionale de Milano ifite 19.2%.

Iyi Stade ya Emirates amakipe yombi agiye guhuriraho, Arsenal iherutse kuyitsindiraho PSG ibitego 2-0 bya Kai Havertz na Bukayo Saka mu cyiciro cyo gushaka amanota [League Phase]" wabaye tariki 21 Ukwakira 2024. Paris Saint-Germain kandi ntabwo izi gutsinda Arsenal mu mikino itatu imaze kubahuza, dore ko yatsinzwe umwe uheruka, mu gihe indi ibiri bahuriyemo mu matsinda ya 2016, yarangiye aya makipe yombi anganyije.

Urugendo rurerure rw’iri rushanwa muri uyu mwaka, ruzasorezwa kuri Stade ya Allianz Arena i München tariki 31 Gicurasi 2025, ahazabera umukino wa nyuma uzahuza ikipe izava hagati ya Arsenal na PSG ndetse n’izakomeza gahati ya FC Barcelona na Inter de Milan zifite zigomba kwisobanura kuri uyu wa Gatatu i Barcelona, mu gihe imikino yo kwishyura iri hagati ya tariki 7-8 Gicurasi 2025.

U Rwanda rwisanze mu itsinda rimwe na Nigeria yarusezereye muri 1/2 mu 2023 ikanatwara igikombe

Ibi byamenyekanye binyuze muri tombola yabereye muri Hotel des Armées mu Murwa Mukuru wa Côte d’Ivoire, yanitabiriwe n’abayobozi bakuru muri Basketball Nyafurika bayobowe na Perezida wa FIBA Africa, Bwana Anibal Manave ari kumwe n’Umuyobozi w’uru rwego muri aka karere, Alphonse Bilé, yahurije hamwe ibihugu 12, ari na byo bizitabira iri rushanwa.

Ni ibihugu bigabanyije mu matsinda ane ari byo Côte d’Ivoire [izaba iri mu rugo], Mali, Sénegal, Nigeria, Angola, Cameroun, Ouganda, Mozambique, Misiri, Sudani y’Epfo, Guinée Conakry n’u Rwanda.U Rwanda rwisanze mu Itsinda rya kane aho ruri kumwe na Nigeria ibitse igikombe giheruka na Mozambique mu gihe irya mbere rigizwe na Côte d’Ivoire, Angola na Misiri, irya kabiri ririmo Mali, Cameroun na Sudani y’Epfo, mu gihe Itsinda rya Gatatu ririmo Sénégal, Ouganda na Guinée Conakry.

Ibi bihugu bizakina biharanira kuyobora itsinda kuko iya mbere muri buri tsinda izajya ihita ibona itike ya ¼ cy’irangiza mu gihe amakipe ya kabiri n’aya gatatu azajya akina indi mikino ya kamarampaka kugira ngo haboneke andi ane abona uburenganzira bwo gukina iki cyiciro, naho andi ane ya nyuma ahite asezererwa.

Biteganyijwe ko imikino izatangira kuva tariki ya 26 Nyakanga kugeza ku ya 3 Kanama 2025, rikazabera mu Nzu y’Imikino ya Palais des Sports de Treichville i Abidjan muri Côte d’Ivoire mu gihe Irushanwa riheruka ryakinwe mu 2023 ryari ryakiriwe n’u Rwanda, aho rwatsinzwe na Nigeria muri ½, rugasoreza ku mwanya wa kane rutsinzwe na Mali.

Kurangiza ruri mu makipe ane ya mbere, ni amateka u Rwanda rwari rukoze ku nshuro ya mbere, ari na yo yaruhesheje itike ya AfroBasket y’uyu mwaka, ndetse rwanahakuye uburenganzira bwo kwitabira amajonjora y’imikino ya Olympique yabereye i Paris mu Bufaransa mu mwaka ushize wa 2024.

Ni mu mpinduka zifuzwa, nyuma y’amavugurura yakozwe akanatangira kubahirizwa mu mwaka w’imikino 2024/2025, aho iri rushanwa ryitabiriwe n’amakipe 36 akina mu buryo bwo gushaka amanota agatondekwa kuva ku ya mbere kugeza ku ya 36 aho kuba amakipe 32 yakiniraga mu matsinda umunani aho nubwo ari irushanwa ryashyizwe mu isura nshya, ariko hakiri ibiri kunozwa mu nyungu z’amakipe, ihangana ryisumbuyeho rinyuze mu mucyo ndetse n’ireme ry’irushanwa muri rusange.

Ingingo eshatu z’amategeko zitezweho kuba zahinduka :

1. Gutera penaliti ku makipe yanganyije aho gukina iminota 30 y’inyongera “Extra-Time”

Iminota 30 y’inyongera yongerwaho mu gihe habuze utsinda hagati y’amakipe mu rwego rwo kureba uwatsinda ariko byakomeza kugorana hakitabazwa penaliti, ishobora gukurwaho maze mu gihe amakipe yanganya agahita ajya muri penaliti nyuma y’iminota 90 isanzwe y’umukino, aho iyi nama iri ku ruhembe rw’uyu mushinga ishimangira ko gukuraho ya minota 30 birinda abakinnyi umunaniro ukabije.

2. Gukinira umukino wo kwishyura mu rugo , ku ikipe yabonye umwanya mwiza kurusha iyo bagiye guhura [Home Advantage]

Iyi ngingo yemeza ko amakipe yaje mu munani ya mbere mu mikino yo gushaka amanota n’imyanya “League Phase”, ahita yerekeza muri ⅛ cy’irangiza, yajya ahabwa kwakirira iwayo imikino yo kwishyura mu rwego rwo guha agaciro imyanya aba yarabonye aho iri tegeko ryubahirizwaga muri ⅛ gusa, maze kuva muri ¼ kugera muri ½ hakabaho gutombora ibibuga hatitawe ku ikipe yarangije imbere y’indi mu mikino ibanza.

Kuri iyi ngingo, Ikipe ya Arsenal yo mu Bwongereza ni yo ku ikubitiro yanenze tombola y’ibibuga hatitawe ku ikipe yitwaye neza muri “League Phase”, nyuma y’uko itomboye gukinira umukino wo kwishyura wa ¼ cy’irangiza kuri Éstadio Santíago Bernabéu ya Real Madrid, nyamara yari yarabaye iya gatatu, mu gihe Real Madrid yakomeje bisabye kunyura muri kamarampaka, ibyanatumye n’ubundi muri 1/2 izasoreza ku kibuga cya PSG Stade ya Parc des Princes na yo yanyuze muri kamarampaka dore ko yari yabaye iya 15 mu gihe Arsenal yabaye iya gatatu.

Ibi kandi ntibitandunye n’ibya FC Barcelona na Inter, aho iyi kipe yo muri Espagne yasoreje ku mwanya wa kabiri, ariko muri ½ ikazasoreza mu Butaliyani, ibishyira Inter de Milan yabaye iya kane mu nyungu zisumbuyeho.

3. Guhura kw’amakipe aturuka mu gihugu kimwe

Mu buryo bukurikizwa ubu, bwemerera amakipe yo mu gihugu kimwe guhura hakiri kare, nk’uko byagenze kuri Paris Saint-Germain na Stade Brestois mu mikino ya kamarampaka; Bayern München na Leverkusen ndetse Real Madrid na Atlético de Madrid ahurira muri ⅛, ibintu bitabagaho mbere ya 2024-2025 kuko ahafi amakipe aturuka mu gihugu kimwe yahuriraga muri 1/4, aho muri aya mavugurura, hitezwe ko ubu buryo aribwo bwazagaruka.

Izi mpinduka, biteganyijwe ko zizigwaho n’Akanama gashinzwe Amarushanwa mu Mpuzamashyirahamwe y’Umupira w’Amaguru i Burayi mbere, nako gashyikirize ubusabe Komite Nyobozi y’iyi mpuzamashyirahamwe.

Ni amagambo yatangaje nyuma yo kunganya na Rayon Sports igitego 1-1 mu mukino ubanza wa ½ w’iri rushanwa wabereye kuri Stade Mpuzamahanga ya Huye ku wa 22 Mata 2025, aho uyu Munya-Tunisia uri mu mwaka we wa gatatu muri iyi kipe yavuze ko nubwo atari umusaruro wifuzwaga ku ikipe yakiniraga iwayo, ariko mbere na mbere bishimira kuba bari mu makipe ane yageze muri 1/2.

Ati “Kuri twe sinakubeshya kuba turi muri ½, ni intambwe nziza, ntabwo ari bibi, iruhande rw’amakipe makuru mu Rwanda, APR FC, Police FC, na Rayon Sports ,n’iyo tutagera ku mukino wa nyuma, ni byiza tuzakinira umwanya wa gatatu.”

Lotfi kandi yashimangiye ko biteguye kuzajya i Kigali mu mukino wo kwishyura bashaka intsinzi imbere ya Rayon Sports, uyu mutoza avuga ko yubaha.

Ati “Tubaye nta cyizere twifitiye, ntabwo twaza i Kigali. Uyu ni umukino wa mbere, nkuko nahandi bigenda, na we ujya iwabo. Tugomba kubyaza umusaruro amahirwe yacu. Tuzi ko Rayon Sports ari ikipe nziza, gusa twe tugomba kuza gukina amahirwe yacu.”

Uyu mugabo bivugwa ko yifuzwa na Rayon Sports kandi akaba yayitoza kuva mu mwaka w’imikino 2025-2026, yakomeje avuga ko mu mukino wo kwishyura hazatsinda umwiza kurusha undi.

Ati “Ndongera kubahamiriza ko umukino w’i Kigali ukinika, tuzagerageza kurema uburyo, ntituzacika intege kandi dufite igihe cyo kubitegura. Uzaba ari umukino mwiza rwose, hamwe na Rayon Sports, hazatsinde ubikwiriye niba ari twe, cyangwa ari Rayon Sports.”

Afahmia Lotfi kuri ubu uri ku mwanya wa gatandatu muri Shampiyona n’amanota 35, ibyo avuga bitandukanye n’ibyemeranyijweho mu gikorwa cyiswe umugoroba w’imihigo tariki 12 Kanama 2024, ubwo umwaka w’imikino wari ugiye gutangira, aho icyo gihe Mukura VS&L yahigiye kwegukana Igikombe cya Shampiyona [Kuri ubu amahirwe yayoyotse kuko irushwa amanota 15 n’iya mbere mu gihe hasigaye imikino itandatu] cyangwa bakegukana icy’Amahoro.

Papa Francis

Karidinali Kevin Farrell, Camerlengo w’Ibiro bya Papa yatangaje ko uyu Mushumba wa 266 wa Kiliziya Gatolika, yashizemo umwuka saa Moya n’iminota 35, ashimangira ko Kiliziya ishima ubwitange bwe no kunoza imirimo ye mu gihe cy’ubuzima bwe ku Isi, bwaranzwe n’ishyaka rikwiye yari afitiye ‘Ingoro ya Nyagasani.’

Ati “Umwepiskopi wa Roma, Papa Fransisiko, yatashye mu rugo rwa Data. Ubuzima bwe bwose yakoreye Nyagasani na Kiliziya. Yatwigishije gushyira mu bikorwa imigenzo myiza y’Ivanjili mu budahemuka, no gukunda abantu bose, cyane cyane abakene n’intamenyekana. Twishimira urugero rwiza yaduhaye nk’umwigishwa w’ukuri wa Yezu, turagije Roho ya Papa Fransisiko urukundo n’impuhwe by’Imana Imwe mu Butatu Butagatifu.”

Uyu Mushumba usoje urugendo rwe ku Isi ku myaka 88 y’amavuko, yahisemo izina ry’Ubupapa rya Francis I, arikomoye kuri Mutagatifu Francis wa Assise wari Umufaratiri wo mu Butaliyani mu Kinyejana cya 12. Amazina yiswe n’ababyeyi be, ni Jorge Mario Bergoglio.

Uyu mushumba wari ufite ubwenegihugu bwa Argentine, Ubutaliyani n’ubwa Vatikani, yashoboraga kuvuga neza indimi z’Ikinya-Esipanye, Igitaliyani, ndetse n’Ikilatini. Izindi ndimi yisangagamo ni Icyongereza, Ikidage, Ikinya-Ukraine, Igifaransa ndetse n’Ikinya-Portugal.

Amateka y’ubuto bwa Papa Francis

Yavukiye mu Murwa Mukuru wa Argentine, Buenos-Aires, tariki 17 Ukuboza 1936 abyarwa n’ababyeyi b’Abataliyani bari abimukira muri icyo gihugu cyo muri Amerika y’Amajyepfo, hamwe n’abavandimwe be bane.

Bitewe n’uko atavukiye mu bakomeye, yakuriye mu buzima bworoheje. Yize amashuri mu Iseminari ya Villa Devoto mbere yo kwinjira mu muryango w’Abayezuwiti mu 1958. Yize kandi amasomo y’iby’ubumenyamuntu mu gihugu cya Chile mbere y’uko asubira mu gihugu cye cy’amavuko, kwiga amasomo nyobokamana.

Ubwo yari akiri umunyeshuri, Jeorge Bergoglio [Papa Francis] yigeze gukora akazi k’uburinzi, ndetse aba n’umukozi ushinzwe gukumira abateza akavuyo n’abavogera kamwe mu tubyiniro kari hafi ye, abazwi nka ba ‘Bouncers’. Aha kandi yakundaga kubyina imbyino yamamaye nka ‘Tango’ yadukanywe n’abaturage bo muri Río de la Plata, iwabo muri Argentina no muri Uruguay mu myaka ya 1880, igikorwa yifatanyagamo n’uwari umukobwa bakundanaga icyo gihe.

Urugendo rwa Papa Francis rwo kuba umuyobozi muri Kiliziya n’intego ze

N’ubwo byari bimeze bityo ariko, Papa Francis yari yarakuranye inzozi zo kuzaba umupadiri w’Umuyezuwiti, ndetse aza guhabwa ubwo busaseridoti yari yaraharaniye ku wa 13 Ukuboza mu 1969, nyuma y’imyaka icyenda agiye mu ishuri ry’umuryango w’Abayezuwiti ‘Society of Jesus’.

Yagiye azamuka mu ntera kugeza ubwo mu 1973 yagizwe uhagarariye umuryango w’Aba-Jesuites ku rwego rw’intara, mbere yo kugirwa Arikiyepiskopi wa Buenos-Aires muri Argentine.

Yanigishije amasomo y’ubumenyamuntu, ubuvanganzo, iyobokamana n’andi bifitanye isano mu Mujyi wa Buenos-Aires. Papa Francis kandi yaje kuba Karidinali amugizwe na Papa Yohana Pawulo wa II mu 2001, afite intego ngari zo kuvuganira abakene, gukemura ibibazo muri rubanda, kwicisha bugufi, kurwanya akarengane, ruswa no kwigira nyamwigendaho no kwigwizaho umutungo kwa bamwe.

Muri 2005, ubwo Papa Benedicto XVI yambikwaga ngo atangire imirimo, Papa Francis ni we wari wabaye uwa Kabiri, maze tariki 13 Werurwe 2013, nyuma yo kwegura kwa Papa Benedicto XVI tariki 28 Gashyantare 2025, Karidinali, Jorge Mario Bergoglio yarimitswe agirwa Umushumba wa 266 wa Kiliziya Gatolika ku Isi.

Ibyihariye kuri Papa Francis

Ubwo yari amaze guhabwa Inkoni y’Ubushumba, yari abaye umuntu utari umunyaburayi wari uhawe uwo mwanya mu myaka 1300.

Papa Francis yiyongereye ku rutonde rw’abandi bitabye Imana bakiri kuri izi nshingano. Aba barimo Papa Yohani Pawulo II (1978–2005), Papa Pawulo VI (1963–1978), Papa Yohani XXIII (1958–1963), Papa Piyo XII (1939–1958), aho abenshi baziraga uburwayi. Ntibyakunze kubaho ko abari kuri izi nshingano begura, kuko ubwo Papa Benedicto XVI yabikoraga, yari abaye uwa mbere mu myaka 600.

Ibyo Papa Francis yakoze mu gihe cye n’intego ngari yari afite

Papa Francis kuva yajya kuri uyu mwanya maze uruzinduko rwa mbere akarugirira ku kirwa cya Lampedusa, kimwe mu byagezweho n’ubukana bw’ikibazo cy’abimukira, yaranzwe no kwiyoroshya no kwicisha bugufi byagaragariye ahanini ko yanze gutura mu nzu n’ubundi zibamo abantu bo ku rwego rwe, nyamara we agahitamo kwibera mu zisanzwe cyane.

Yaranzwe kandi no kuvuganira abakene n’abatagira kirengera, bigera aho bamutazira “Igikomangoma cy’abakene n’amahoro.” Uyu kandi yaharaniye anashyigikira gahunda zo guhangana n’ihindagurika ry’ikirere, ahavuye inyito ya ‘Laudato Si’ yerekanaga uko ibihugu byifite byigize ba ntibindeba ku ngingo y’ihindagurika ry’ikirere, kandi ari byo birigiramo uruhare runini, bikegekwa ku bikennye.

Papa Francis yaharaniye Kiliziya ikomeye ku myemerere n’imigirire ya gikirisitu, ariko kandi yisanisha n’aho Isi iri kwerekeza. Yakoreshaga imbuga nkoranayambaga, cyane urwa X, aho afite abamukurikira basaga Miliyoni 18, akaba yakoreshaga konti ya @Pontifex.

Papa Francis kandi yaharaniye ubumwe bw’amadini yahoraga mu bwumvikane buke, cyane cyane n’abo badahuje imyemerere nka Isilamu, irya Kiyahudi, Abakirisitu b’Aba-Orthodox bo mu Burasirazuba bw’Isi n’andi.

Mu myaka isaga 12 yari amaze ari Umushumba wa Kiliziya Gatolika ku Isi, Papa Fransisiko yasuye ibihugu 68.

Iminsi ya nyuma y’ubuzima bwa Papa Francis ku Isi

Uyu Mushumba atabarutse amaze igihe ahangana n’uburwayi by’umwihariko ubw’imyanya y’ubuhumekero, impyiko n’amagufa. Yagiye abagwa inshuro nyinshi kuko raporo z’abaganga zivuga ko yari asigaranye igice gito cy’ibihaha kubera kubagwa, akaba yanagenderaga mu kagare k’abarwayi kubera indwara y’amavi itamwemereraga guhagaraga ngo ashingure igihe kirekire, ndetse n’iz’izabukuru.

Amatariki yibukwa cyane mu burwayi bwe, ni iya 22 Gashyantare 2025, ubwo ibiro bye byatangazaga ko akomeje kuremba cyane, ko yanashyizwe ku mashini zimufasha guhumeka.

Iminsi 38 yamaze mu bitaro yarangiranye n’itariki ya 23 Werurwe, ubwo yagaragaraga mu ruhame aseka ndetse anasuhuza abakirisitu bari bateraniye hafi y’aho yari ari ku ngazi y’ahitwa Gemelli. Yavuye i Roma icyo gihe asubira i Vatican kugira ngo akomeze kwitabwaho n’abaganga, cyane ko yari yasabwe gufata ikiruhuko cy’amezi abiri.

Ejo kuri Pasika ni bwo Papa Fransis yagaragaye ari muri ‘Pope Mobile, imodoka yifashishwa igihe Papa ari kuzenguruka mu mbaga y’abantu benshi, ndetse abifuriza umunsi mwiza w’izuka rya Kristu, mu butumwa bwa nyuma yatangiye imbere y’imbaga y’abasaga ibihumbi 50 bari baje guhimbaza Pasika ku rubuga rwa Bazilika yitiriwe Mutagatifu Petero.

Umuyobozi wa nyuma wahuye na Papa, ni Visi Perezida wa Leta zunze Ubumwe za Amerika, James David Vance, aho bagiranye inama yihariye muri Casa Santa Marta i Vatikani.

Abayobozi mu nzego zitandukanye basohoye ubutumwa bwo kwihanganisha Abakristu Gatolika hirya no hino ku Isi, uhereye kuri uyu James David Vance bahuye bwa nyuma, Umwami w’u Bwongereza, Charles III; Perezida wa Komisiyo y’Umuryango w’Ubumwe bw’u Burayi, Ursula von der Leyen; Minisitiri w’Intebe w’u Butaliyani, Giorgia Meloni.

Hari kandi Perezida w’u Bufaransa, Emmanuel Macron; Minisitiri w’Intebe w’u Buhinde, Narendra Modi; Minisitiri w’Intebe wa Leta zunzwe ubumwe z’Abarabu, Sheikh Mohammed bin Rashid Al Maktoum; Umwami wa Jordan, Abdullah bin Al Hussein n’abandi.

Hakurikiyeho iki?

Iyo Papa yitabye Imana, amategeko ateganya ko mu minsi iri hagati ya 15 na 20 ari bwo haba hamenyekanye umusimbura we. Ni itora rikorwa mu nzira izwi nka ‘Conclave’.

Ibikorwa by’amatora bitangizwa na missa idasanzwe ya mu gitondo. Nyuma y’iyo missa, hatangazwa amagambo agira ati “Extra Omnes” bivuze ngo “abandi bose basohoke”, maze Abakaridinali bakarahirira kubika ibanga.

Nyuma y’ibyo, Abakaridinali bose bafite munsi y’imyaka 80 cyangwa bemerewe gutora, bateranira muri Chapelle ya Sistine, yakiriye Conclaves zose kuva mu 1858.

Kuri ubu Abakaridinali batanu bahabwa amahirwe menshi yo kuramutswa Intebe y’Ubushumba bwa Kiliziya Gatolika ku Isi, ni Umunya-Philippines Luis Antonio Tagle; Umutaliyani Pietro Parolin; Umunya-Ghana Peter Turkson; Umunya-Hungary Peter Erdő n’Umutaliyani Angelo Scola.

Mahmadou Lamine Bah agerageza gutwara umupira umukinnnyi wa Etincelles FC

Uyu mukino watangiye APR FC yiharira umupira by’umwihariko mu kibuga hagati, icyakora ikananirwa kubaka ngo ireme uburyo bufatika bwabyara ibitego bitewe na ba myugariro ba Etincelles FC bahitaga babakorera amakosa.Ibi byatumye iyi kipe yo mu karere ka Rubavu ari yo ibona amahirwe ya mbere afatika mu mukino, ku ishoti ryari ritewe na Niyonkuru Sadjati, gusa rigasanga umunyezamu, Ishimwe Pierre ari maso mu biti by’izamu yakuyemo Umunya-Congo Brazzaville, Ndzila Pavelh.

Ku munota wa cyenda w’umukino, APR FC yafunguye amazamu kuri penaliti yinjijwe neza na rutahizamu,Djibril Ouattara ku ikosa ryari rimukorewe agushijwe hasi na Nsabimana Hussein,maze umunyezamu, Nishimwe Moïse ananirwa kuyikuramo.Tuyisenge Arsène utari uherutse kubona amahirwe yo kubanza mu kibuga muri APR FC, yagiye abona amahirwe menshi yashoboraga kubyara ibitego, hagati y’umunota wa cyenda n’uwa 24, ariko ananirwa n’igikorwa cya nyuma mu bihe bitandukanye.

Djiblil Ouatarra yishimira igitego

Ku munota wa 25, Umunya-Uganda, Robert Mukokhotya yateye ishoti riremereye cyane, nko muri metero 35 ariko umunyezamu Ishimwe Pierre atera ibipfunsi umupira uvamo , aba amahirwe ya kabiri aremereye yari abonetse ku ruhande rwa Etincelles FC.Myugariro, Nshimiyimana Yunusu wa APR FC yasabye gusimbuzwa ku munota wa 28 nyuma yo kugira imvune maze asimburwa n’Umunya-Senegal, Aliou Souané.Ku munota wa Etincelles FC yasimbuje , havamo Kwizera Aimable wasimbuwe na Uzabumwana Birarry.

Ku munota wa mbere w’inyongera muri itatu yongerewe ku gice cya mbere,Umunya-Burkina Faso, Cheikh Djibril Ouattara yatsinze igitego cya kabiri cye, nyuma ya koruneri yari itewe na Ruboneka Jean Bosco, Myugariro, Clément Niyigena ashyiraho umutwe mbere y’uko Ouattara awuhindurira icyerekezo yuzuza ibitego bye birindwi muri Shampiyona,igice cya mbere kirangira ari ibitego 2-0.

Igice cya kabiri cyatangiranye impinduka ku mpande zombi aho Niyonkuru Sadjati yahaye umwanya Umurundi, Frank ku ruhande rwa Etincelles FC, mu gihe Umunya-Ghana, Richmond Lamptey yasimbuye Muhamadou Lamine Bah kuri APR FC.Ku munota wa 49, Nsabimana Hussein yishyuriye Etincelles FC igitego cya mbere, nyuma y’uko Ismaïl ‘Pitchou’ yari amaze gukoresha mugenzi we Ruboneka Jean Bosco umupira ku kuboko, umusifuzi Ngabonziza Dieudonné ahita atanga penaliti.Ku munota wa 54, Frank wari winjiye mu kibuga asimbuye yisanze imbere y’izamu wenyine, ariko ananirwa kugomborera Etincelles FC igitego cya kabiri mu gihe ku munota wa 57, Tuyisenge Arsène yafunguye ikirenge cyane, ananirwa gutsindira APR FC igitego cya gatatu ku mupira wari uvuye muri koruneri.

Mahmadou Lamine Bah agerageza gutwara umupira umukinnnyi wa Etincelles FC

APR FC yahise ikora impinduka maze Tuyisenge Arsène, Mamadou Sy baha umwanya Mugisha Gilbert na Victor Mbaoma, iminota itatu mbere y’uko Hakim Kiwanuka asimbura Djibrille Ouattara, naho Denis Kaweesa asimburwa na Nizigiyimana Ismaïl ku ruhande rwa Etincelles FC.Izi mpinduka zahinduye umuvuduko w’umukino kuko APR FC yakinaga nk’ishaka kugarira;ibyahaga Etincelles FC ubwisanzure nubwo na yo nta bushobozi yagaragazaga bwo gukora ibyisumbuye ku guhanahana umupira baturutse mu mpande.Ishimwe Djabilu winjiye mu kibuga asimbuye yishyuriye Etincelles FC igitego cya kabiri ku munota wa 78, ku burangare bwa ba myugariro ba APR FC, biba 2-2.

Nyuma y’iminota 90 isanzwe y’umukino, hongerweho itandatu yaranzwe n’ubushake bwa APR FC yashakaga igitego cyo kuyisubiza umwanya w’icyubahiro.Umukino warangiye Ikipe y’Ingabo z’Igihugu iguye miswi na Etincelles FC ibitego 2-2, bituma itakaza umwanya wa mbere wari uriho Rayon Sports kuva itsinze Muhazi United ibitego 2-0 ikuzuza amanota 50, mu gihe APR FC yujuje 49.

Ku munsi wa 25 uzakinwa hagati y’itariki 25 na 27 Mata 2025, Etincelles FC izakira Rayon Sports kuri Stade Umuganda mu gihe APR FC izakirwa na Rutsiro FC.