Mu makuru mashya yatanzwe na MINISANTE kuri uyu wa Gatanu, agaragaza ko kuva ku ya 01 kugeza ku ya 08 Ugushyingo mu bipimo 1390 nta numwe wigeze wandura Icyorezo cya Marburg, ndetse babiri bavurwaga bakize.

Abanduye bose hamwe bari 60 mu bipimo byose byafashwe uko ari 7408, abakize ni 51 biyongeraho babiri bari bakivurwa mu gihe abapfuye ari 15 gusa.

Minisiteri y’Ubuzima igaragaza kandi ko abakingiwe ari 1710, ubariyemo 81 bahawe urukingo mu cyumweru gishize.

MINISANTE ikomeza ivuga ko nubwo bimeze bityo, ingambo zo gukomeza kwirinda zigikomeje.

Uwakize icyorezo cya Marbrg agomba kwirinda kuko aba ashobora kwanduza

Mu butumwa yanyujije kuri X, Minisiteri y’Ubuzima yavuze ko n’ubwo virusi ya Marburg ikira, hari bimwe mu bice ivamo itinze birimo amatembabuzi y’imbere mu jisho, amasohoro n’amashereka bityo abakize Marburg basabwa kwirinda imibonano mpuzabitsina idakingiye, kujugunya agakingirizo ahantu hashyira abandi mu kaga ko kwandura no konsa umwana.

MINISANTE ivuga ko ibi bigomba kubahirizwa kugeza igihe ibipimo byo kwa muganga bizemeza burundu ko nta virusi ikiri muri ibyo bice.

Umuyobozi ushinzwe Iterambere ry’Abakozi bo kwa Muganga muri Minisiteri y’Ubuzima mu Rwanda (MINISANTE), Dr. Nkeshimana Menelas, avuga ko abakira Icyorezo cya Marburg, hari ibice by’umubiri iyi Virusi itindamo mu gihe gishobora kugera no ku mwaka n’ubwo uyirwaye aba atagaragaza ibimenyetso.

Dr. Nkeshimana Menelas avuga ko nubwo umuntu avurwa Marburg akira yamaze kuzahara ibintu byose bigakira ariko hakagira ibice by’umubiri Virusi ishobora gusigaramo mu gihe kirenze umwaka.

Dr. Nkeshimana avuga ko nubwo iyo Virusi iba yarasigaye mu bice by’umubiri bitavuze ko umuntu arwaye, afite umuriro n’ibindi bimenyetso aba ameze nk’abandi bantu bazima batarwaye ariko iyo Virusi iba iri muri byo bice nko mu jisho no mu masohoro.

Ati “Habaye uburangare abo bantu bashobora kwanduza, kuko bisaba ko uwakize Marburg agakenera kujya kwivuza indi ndwara abaganga bagomba kwitwararika, niyo mpamvu dusaba abakize iyo ndwara kwitwararika bakimakaza isuku, n’ibindi byafasha mu gukumira ko bakwanduza, abakize tuzakomeza kubakurikirana kugeza ku mwaka kuko bashobora kugira ibindi bibazo nubwo bidakabije”.

Uwakize Virusi ya Marburg ashobora kugira ibibazo by’imboni bituma uwayikize atabasha kubona neza, kugira ingaruka z’umunaniro ukabije, hahandi umuntu ubona yaracitse intege imbaraga yagiraga atari zo agifite, kubabara mu ngingo, mu mitsi, ibibazo by’agahinda gakabije.

Dr. Nkeshimana avuga ko abakira iyi Virus babwirwa ko bashobora kwanduza biturutse kuri iyo Virusi iri mu masohoro no mujisho imbere ndetse bakomeza no kubakurikirana mu gihe cy’umwaka.

Mu bipimo 186 byafashwe kuri uyu wa Kane tariki 31 Ukwakira 2024, nta muntu mushya wanduye ndetse ntawapfuye.

Inkingo zatanzwe ni 11 mu gihe muri rusange izimaze gutangwa ari 1629.

Minisiteri y’Ubuzima yatangaje kandi ko guhera tariki ya 1 Ugushyingo 2024, amakuru mashya kuri Virusi ya Marburg, azajya atangazwa buri cyumweru bitandukanye n’uko yatangazwaga buri munsi.

MINISANTE, yagaragaje ko umuntu mushya wanduye ari umwe mu bakurikiranwaga n’uwari uherutse kwandura. Uyu yabonetse mu bipimo 352 byafashwe kuri uyu wa Gatatu tariki 30 Ukwakira 2024.

Ntawapfuye ndetse inkingo zimaze gutangwa ni 1618 harimo 5 zatanzwe kuri uyu wa Gatatu.

MINISANTE, yagaragaje ko uyu muntu mushya wanduye, ari umwe mu bakurikiranwaga, bahuye n’uwari uherutse kwandura.

Kugeza ubu abarimo kuvurwa Marburg ni batatu, ndetse ntawapfuye, mu gihe uyu wanduye yabonetse mu bipimo 97 byafashwe.

Minisiteri y’Ubuzima kandi igaragaza ko abahawe inkingo uyu munsi ari 55, mu gihe inkingo zimaze gutangwa muri rusange ari 1465.

Ntawapfuye, nta n’uwanduye mushya mu bipimo 68 byafashwe kuri uyu munsi, mu gihe abakivurwa ari babiri (2).

Raporo ya Minisiteri y’Ubuzima kandi igaragaza ko inkingo zimaze gutangwa ari 1410 harimo 108 bakingiwe kuri uyu wa Gatanu.

Uyu muntu akaba yiyongereye ku wundi wari uri kuvurwa, bituma abari kwitabwaho kugeza ubu baba babiri.

Minisiteri y’Ubuzima yatangaje ko ntawapfuye ndetse n’umubare w’amaze gukingirwa ari 1284 biyongereyeho 57, baruhawe kuri uyu wa Gatatu.

Nta murwayi mushya wabonetse kuri uyu munsi, nta n’uwapfuye azize icyo cyorezo.

Inkingo zimaze gutangwa ni 1227, harimo abantu 78 bakingiwe kuri uyu wa Kabiri.

Amakuru mashya MINISANTE yatangaje kuri kuri Virusi ya Marburg, agaragaza ko ntawapfuye, nta n’uwanduye mushya wabonetse ahubwo muri babiri bavurwaga, hakize umwe, undi akaba ari we usigaye avurwa.

Minisiteri y’Ubuzima kandi igaragaza ko kugeza ubu, inkingo zimaze gutangwa ari 1149 ubariyemo 79 bakingiwe kuri uyu munsi.

Ntawapfuye, nta n’uwanduye mushya wabonetse kuri iki cyumweru tariki 20 Ukwakira 2024.

Raporo ya Minisiteri y’Ubuzima kandi igaragaza ko kugeza ubu, inkingo zimaze gutangwa ari 1070.

MINISANTE itangaza ko hashingiwe ku ishusho rusange y’Icyorezo cya Marburg mu Rwanda n’imbaraga zashyizwe mu guhangana na cyo, kugitsinda biri hafi.

Minisitiri w’Ubuzima, Dr Sabin Nsanzimana

Yabivuze kuri iki Cyumweru tariki 20 Ukwakira 2024, mu kiganiro we n’Umuyobozi Mukuru w’Ishami ry’Umuryango w’Abibumbye ryita ku Buzima (OMS/WHO), Dr. Tedros Adhanom Ghebreyesus, bagiranye n’itangazamakuru, cyagarukaga ku buryo bwo guhangana n’icyorezo cya Marburg.

Minisitiri Dr. Nsanzimana yavuze ko mu byumweru bibiri bya mbere icyorezo kicyaduka, hari umurwayi w’umugabo w’imyaka 27 bikekwa ko ari we wa mbere wanduye iki cyorezo bakurikiranye, nyuma yo guhuza ubushakashatsi butandukanye bwamukozweho, bagasanga ijanisha rigera kuri 97% ribereka ko icyorezo cyaraturutse ku nyamaswa y’agacurama.

Minisitiri Nsanzimana yagaragaje ko mu makuru babonye, ari uko uwo murwayi yagiye ahantu mu buvumo, bigakekwa ko ari ho yahuriye n’ako gacurama.

Yavuze ko aya ari amakuru y’ingirakamaro ku nzego z’ubuzima, mu rwego rwo kubasha gukurikirana iki cyorezo ndetse n’ibindi byashobora kwaduka mu buryo bumwe na cyo.

Dr. Nsanzimana avuga ko bagikomeje ubushakashatsi kuri iki cyorezo, mu rwego rwo kumenya neza ubwoko bw’inyamaswa cyaturutsemo.

Yavuze kandi ko hari amakuru babonye agaragaza ko ubwoko bw’icyorezo nk’iki cya Marburg bwigeze kugaragara mu Karere u Rwanda ruherereyemo mu mwaka wa 2014.

Hashize iminsi itandatu nta murwayi mushya uboneka mu bipimo

Minisitiri w’Ubuzima, Dr Sabin Nsanzimana, yavuze ko hashize iminsi itanu nta muntu n’umwe wandura icyorezo cya Marburg mu Rwanda.

Minisitiri w’Ubuzima, Dr. Sabin Nsanzimana na Dr. Tedros Adhanom Ghebreyesus uyobora OMS bagiranye ikiganiro n’itangazamakuru

Minisitiri Dr. Nsanzimana yavuze ko mu bantu 62 bari banduye iki cyorezo, n’ubwo hari abagera kuri 15 cyahitanye, ariko abenshi bakize kuko ubu abakiri kuvurwa ari batatu gusa.

Minisiteri y’Ubuzima ivuga ko ikomeje ibikorwa byo gupima, by’umwihariko ku binjira mu Gihugu banyuze ku Kibuga Mpuzamahanga cy’Indege cya Kanombe, ku buryo bizera ko nta muntu wabaca mu rihumye.

Minisitiri Dr. Sabin Nsanzimana agaragaza ko nubwo icyorezo kitararangira, kuba hashize iminsi itandatu nta murwayi mushya uboneka bitanga icyizere, ariko bikanatanga umukoro wo kongera imbaraga ngo ubwandu budakomeza kwiyongera.

Ati “Biratanga icyizere nubwo icyorezo kitararangira, ariko bikanatuma dukomeza imbaraga zose kugira ngo ahaba hakiri icyuho, ahaba hakiri umuntu umwe wahuye n’urwaye tutaramenya tube twabasha kumugeraho, bityo tugere ku ntsinzi mu buryo budatinze”.

Minisiteri y’Ubuzima ivuga ko abakize iki cyorezo bazakomeza gukurikiranirwa hafi, kugira ngo harebwe ko nta bindi bibazo bahura na byo bo n’abo babana, kandi hirindwa ko bahabwa akato mu muryango.

Minisitiri Dr. Sabin Nsanzimana asaba Abanyarwanda kurushaho kwegera aba bakize Marburg, bakababa hafi kugira ngo bumve ko Umuryango Nyarwanda ubari hafi kuko banyuze mu bihe bitoroshye.

Ati “Twese tubashyigikire ndetse n’imiryango yabuze ababo, abenshi ni n’abaganga batuvuraga dukomeze kubihanganisha no kubaba hafi”.

Umuyobozi Mukuru wa OMS, Dr. Tedros Adhanom Ghebreyesus, yashimye intambwe u Rwanda rugezeho mu guhangana n’iki cyorezo, avuga ko ibikorwa byose bishingiye ku miyoborere myiza.

Ati “Ku munsi w’ejo nahuye na Perezida Kagame, kandi nasanze yiteguye gushaka ibisubizo kuri iki cyorezo. Ndagushimira cyane Perezida Kagame ku bw’ubuyobozi bwawe bwiza”.

Dr Tedros kandi yashimye uburyo u Rwanda rukoresha ikoranabuhanga mu gukurikirana no guhanahana amakuru kuri iki cyorezo, ku buryo ibikenewe gukorwa bihita byihutishwa. Uyu muyobozi yaboneyeho gusaba ibihugu byahagaritse ingendo hagati yabyo n’u Rwanda cyangwa bigahagarika ibikorwa by’ubucuruzi, ko ubu nta moamvu ihari yo kugumishaho izo ngamba.

Kugeza ubu mu barwayi 66 bagaragaweho ubwandu bwa Marburg, 15 barapfuye, 44 barakira naho batatu bakaba ari bo bakivurwa.

Minisiteri y’Ubuzima kandi igaragaza ko babiri muri aba bakivurwa ari bo bari bagaragaje ibimenyetso bikomeye cyane, ndetse ko bahawe ubuvuzi bwihariye, kandi na bo bakaba bari hafi gukira bagasezererwa mu bitaro.

.@WHO Director General @DrTedros on travel restrictions in relation to the Marburg Virus outbreak. pic.twitter.com/SYyIx8RCRU

— Ministry of Health | Rwanda (@RwandaHealth) October 20, 2024

Ntawapfuye kuri uyu munsi, mu gihe abarimo kuvurwa kugeza ubu ari abantu batatu gusa (3).

Minisiteri y’Ubuzima yatangaje kandi ko abakingiwe bamaze kuba 1070, ubariyemo 38 bahawe urukingo uyu munsi.

Minisiteri y’Ubuzima yatangaje ko hafashwe ibipimo 126.

Ntawapfuye, ndetse nta n’uwanduye mushya wabonetse kuri uyu wa Gatanu tariki 18 Ukwakira 2024.

Minisiteri y’Ubuzima yatangaje ko abakingiwe bamaze kuba 1032, ubariyemo 156 bahawe urukingo uyu munsi.

Ntawapfuye, nta n’uwanduye mushya wabonetse kuri uyu munsi, abarimo kuvurwa ni abantu bane (4).

Minisiteri y’Ubuzima yatangaje ko abakingiwe bamaze kuba 876, ubariyemo 49 bahawe urukingo uyu munsi.

Ntawapfuye, nta n’uwanduye mushya wabonetse kuri uwo munsi, abarimo kuvurwa ni abantu icyenda.

Raporo ya Minisiteri y’Ubuzima igaragaza ko inkingo zimaze gutangwa ari 856.

Ntawapfuye, nta n’uwanduye mushya wabonetse kuri uwo munsi, abarimo kuvurwa ni 17.

Raporo ya Minisiteri y’Ubuzima igaragaza ko inkingo zimaze gutangwa ari 771.

Mu bari barwaye, undi umwe yitabye Imana, abamaze gupfa baba 15. Habonetse undi muntu umwe wanduye, abarimo kuvurwa ni 21.

Raporo ya Minisiteri y’Ubuzima igaragaza ko inkingo zimaze gutangwa ari 708.

Minisitiri w’Ubuzima, Dr Sabin Nsanzimana, mu kiganiro n’itangazamakuru

Mu ngamba zari zafashwe mu cyumweru cya mbere icyorezo kicyaduka, hari ugusukura intoki, kwirinda gukora ku murwayi cyangwa uwishwe na Marburg, hamwe no kutajyana mu rusengero cyangwa mu rugo uwishwe n’iyo ndwara.

Hafashwe kandi ibyemezo byo kwirinda gusezera no guherekeza mu kivunge uwishwe na Marburg mu gihe cyo kumushyingura, kwirinda gusura abarwayi kwa muganga cyangwa gusura abanyeshuri ku ishuri.

Mu kiganiro yagiranye n’itangazamakuru ndetse n’imiryango itari iya Leta kuri iki Cyumweru tariki 13 Ukwakira 2024, mu rwego rwo kubagezaho ishusho y’uko indwara iterwa na virusi ya Marbug ihagaze mu Rwanda ndetse n’ibimaze gukorwa mu guhangana na yo, Dr Nsanzimana yagize ati “Hari ibyemezo byinshi byafashwe mu cyumweru cya mbere, ariko hari ibiri buhinduke n’ibiri bwiyongeremo. Igihe kirageze ngo twongere kubisubiramo, amabwiriza mashya tuzayabatangariza.”

Kuva aho Marburg imenyekaniye ko yageze mu Rwanda ku wa Gatanu tariki 27 Nzeri 2024, abantu 61 bamaze kuyandura, muri bo 14 bitabye Imana, 18 baravuwe barakira, mu gihe 29 bakiri kwitabwaho n’abaganga.

Minisitiri w’Ubuzima yatangaje ko mu minsi irindwi ishize hagaragaye abakize kurusha abahitanywe na Marburg, ndetse ko hari ibipimo byerekana ko imbaraga zashyizwemo ziri gutanga umusaruro.

Ati "Mu minsi itatu twarapimye dusanga nta muntu ugaragaraho uburwayi, ni ikintu cyiza ariko ntabwo byatuma twirara.’’

Dr Nsanzimana yavuze ko mu barwayi ba Marburg 29 bari kwitabwaho n’abaganga, batatu barembye cyane, ariko ngo hari gukorwa ibishoboka byose ngo bahabwe ubuvuzi.

Umuyobozi w’Ishami ry’Umuryango w’Abibumbye ryita ku Buzima, OMS, mu Rwanda, Dr Brian Chirombo, asanga guhagarika ingendo no gukorana ubucuruzi n’u Rwanda atari ngombwa mu guhashya virusi ya Marburg.

Umuyobozi wa OMS mu Rwanda, Dr Brian Chirombo, yavuze ko guhagarika ingendo n’ibikorwa by’ubucuruzi n’u Rwanda atari ingenzi mu guhashya Marburg

Chirombo yagize ati “Ingamba zafashwe n’u Rwanda n’abafatanyabikorwa barwo zirahagije. Icyemezo cyo guhagarika ingendo ntacyo cyafasha, ahubwo gituma ubukungu bw’Igihugu burushaho kuzahara.’’

Kwitegura icyorezo cyakwaduka ubutaha

Minisitiri w’Ubuzima avuga ko hari inkingo nke zateganyirijwe abari ku ruhembe rwo guhashya Marburg, ariko bitaraba ngombwa gukingira abantu bose.

Ati "Tuzi uko yandura, tuzi abo dukurikirana. Vuba bidatinze tuzaba twayitsinze.’’

Avuga ko bitewe n’imiterere y’Isi, hari ibyorezo byinshi bishobora kuvuka ariko hakwiye kubaho imyiteguro yo guhangana na byo.

Minisitiri w’Ubuzima avuga ko ubutaha mu gihe ikindi cyorezo cyakwaduka, u Rwanda ruzaba rufite ibikoresho bihagije kandi bishoboye guhangana na cyo.

Ati "Uko tuzashobora gukora inkingo zihagije ni ko tuzaba dutekanye kurushaho.’’

Itangazamakuru n’imiryango itari iya Leta bitabiriye ikiganiro na Minisitiri w’Ubuzima kuri iki Cyumweru

Abantu 620 bamaze guhabwa urukingo, barimo 119 bakingiwe kuri uyu wa Gatandatu.

Kuva icyorezo cyagaragagara mu Rwanda kimaze guhitana abantu 14, abanduye bose bakaba ari 61, abari kuvurwa ni 29 naho 18 barakize.

Uko Virusi ya Marburg igaragara mu ikoranabuhanga

Kuri uwo munsi umuntu umwe yakize, abamaze gukira bose hamwe baba 16. Abanduye bashya babonetse ni batatu, abarimo kuvurwa Marburg ni 31.

Muri rusange indwara ya Marburg mu Rwanda imaze kuboneka mu bantu 61.

Ku wa Gatanu tariki 11 Ukwakira 2024, abantu 155 bakingiwe Marburg, abamaze gukingirwa bose hamwe baba 501.

Indwara ya Marburg mu Rwanda imaze kuboneka mu bantu 58. Abantu 13 muri bo barapfuye.

Minisiteri y’Ubuzima isobanura ko kuva hatangazwa ko indwara ya Marburg yageze mu Rwanda, abarwayi bashya n’abo bahuye bagiye baboneka muri bimwe mu bitaro byo mu Mujyi wa Kigali, bose bashyizwe mu kato kandi bitabwaho n’abaganga.

Ibipimo bifatwa bigaragaza ko iyi ndwara itakwiriye mu Gihugu.

Ku Cyumweru tariki 06 Ukwakira 2024 nibwo Minisiteri y’Ubuzima yatangiye gukingira abantu indwara ya Marburg, ikaba yarahereye ku bakozi bo kwa muganga n’abagiye bahura n’abarwayi.

Kugeza ku wa Kane tariki 10 Ukwakira 2024 abari bamaze gukingirwa ni 346.

Imibare itangazwa igaragaza ko u Rwanda ruhagaze neza mu guhashya icyorezo cya Marburg, dore ko hari n’abamaze guhabwa urukingo

Indwara ya Marburg mu Rwanda imaze kuboneka mu bantu 58. Abantu 13 muri bo barapfuye, 12 barakize, abandi 33 barimo kuvurwa.

Minisiteri y’Ubuzima isobanura ko kuva hatangazwa ko indwara ya Marburg yageze mu Rwanda, abarwayi bashya n’abo bahuye bagiye baboneka muri bimwe mu bitaro byo mu Mujyi wa Kigali, bose bashyizwe mu kato kandi bitabwaho n’abaganga.

Ibipimo bifatwa bigaragaza ko iyi ndwara itakwiriye mu Gihugu.

Mu Rwanda hatangiye gutangwa urukingo rwa Virusi ya Marburg, bitanga icyizere cyo kuyitsinda

Abandi bantu babiri banduye Marburg babonetse mu bipimo 268 byafashwe, umubare w’abamaze kugaragaraho Marburg bose hamwe baba 58.

Minisiteri y’Ubuzima yatangaje ko kuri uyu wa Kabiri abandi bantu bane bakize, abamaze gukira bose hamwe baba 12, naho abakirimo kuvurwa ni 33.

Dr Jean Damascène Iyamuremye ukuriye ishami rishinzwe kwita ku buzima bwo mu mutwe mu kiganiro yagiranye na Kigali Today yatangaje ko hari itsinda rishinzwe kwita ku bamaze gukira mbere y’uko boherezwa mu miryango yabo.

Iryo tsinda rikora ubujyanama mu by’ihungabana kugira ngo ukize iki cyorezo adataha afite ihungabana yatewe no kwandura iki cyorezo no gutekereza ko nataha umuryango we uzamuha akato.

Ati “ Akenshi usanga abo mu murango w’uwanduye bafite amakuru atari ay’ukuri kuri iki cyorezo noneho bakaba bamuha akato bibwira ko na nyuma yo gukira nabo bashobora kwandura kandi atari byo”.

Dr Iyamuremye avuga ko umurwayi wakize atahanwa mu muryango we hakoreshejwe imodoka isanzwe mu rwego rwo kutamutwara mu mbangukiragutabara abaturanyi n’umuryango we bakikanga ko atakize.

Icyakora ku muryango ufite ubushobozi ushobora kwitahanira umurwayi ariko nabo babanza kuganirizwa kugira ngo batamuha akato bakeka ko yabanduza.

Ati “ Iyo ari twe twamwitahaniye tukamugeza mu rugo turamuhobera tukamusezera nk’ikimenyetso cyo kwereka umuryango we ko atakwanduza kandi ko yakize neza, icyo gihe turabaganiriza tukababwira ibyo bagomba gukomeza kumufasha kugira ngo umubiri ugarure imbaraga”.

Dr Iyamuremye avuga ko uwanduye icyoreze yitwabwaho mu by’imitekerereze kuva akigera kwa muganga kugeza akize uwo cyahitanye nawe agaherekezwa hamwe n’umuryango we hakurikijwe amabwiriza yashyizweho na Minisiteri y’Ubuzima mu rwego rwo kwirinda ko hari abandi bakongera kwandura.

Ati “ Uwakize iki cyorezo umuryango uba ugomba kumwitaho ukamufasha kugarura imbaraga kandi agahabwa indyo ifite intungamubiri kuko umubiri we uba watakaje imbaraga niyo mpamvu dukora n’ubujyanama mu byihungabana ku muryango we kugira ngo umwiteho”.

Dr Iyamuremye avuga ko kuba imiti n’inkingo byarabonetse bizatuma umubare w’abandura ugabanuka ndetse n’umubare w’abapfa ukagabanuka ariko abantu bakagira uruhare rwo kwirinda kwandura bubahiriza amabwiriza yashyizweho na Ministeri y’Ubuzima.

Minisiteri y’Ubuzima yatangaje ko tariki 07 Ukwakira 2024 habonetse abandi bantu barindwi banduye icyorezo cya Marburg, bituma abamaze kugaragaraho icyo cyorezo bose hamwe baba abantu 56.

Kuri uwo munsi nta wakize nta n’uwapfuye, abamaze gukira bose hamwe bakomeza kuba abantu umunani.

Abarimo kuvurwa ni 36, abo cyahitanye ni 12 biganjemo abakozi bo kwa muganga.
Ku Cyumweru tariki 06 Ukwakira 2024 nibwo Minisiteri y’Ubuzima yatangiye gukingira abantu indwara ya Marburg, ikaba yarahereye ku bakozi bo kwa muganga n’abagiye bahura n’abarwayi.

Kuri uwo munsi nta wakize nta n’uwapfuye, abamaze gukira bose hamwe bakomeza kuba abantu umunani.

Abarimo kuvurwa ni 36, abo cyahitanye ni 12 biganjemo abakozi bo kwa muganga.

Ku Cyumweru tariki 06 Ukwakira 2024 nibwo Minisiteri y’Ubuzima yatangiye gukingira abantu indwara ya Marburg, ikaba yarahereye ku bakozi bo kwa muganga n’abagiye bahura n’abarwayi.

Ingamba zigomba kubahirizwa ahasengerwa zirimo gutanga ubutumwa bukangurira abayoboke kwirinda icyorezo cya Marburg mu nsengero n’imisigiti, gushyiraho uburyo bwo gukaraba intoki hifashishijwe amazi n’isabune cyangwa umuti wabugenewe no gupima umuriro abantu bose binjira mu nsengero n’imisigiti.

Harimo kandi gutanga ifunguro ryera mu buryo butuma abantu batagira ibyago byo kwandura Marburg no kwirinda kwegerana n’abantu bagaragayeho ibimenyetso cyangwa kwegera umubiri w’uwo yahitanye.

Birabujijwe gukorera imihango yo gusezera ku witabye Imana mu nsengero no mu misigiti.
RGB ivuga ko Abaturarwanda basabwa kwirinda kwegerana cyangwa se gukora ku bikoresho by’abantu bafite ibimenyetso bya Marburg, kwirinda kwegera umubiri w’uwahitanywe n’iyi virus cyangwa gutegura ikiriyo gihuza abantu ahabaye ibyago biturutse kuri Marburg.

Amakuru mashya yatangajwe na Minisiteri y’Ubuzima ku Cyumweru tariki 06 Ukwakira 2024 agaragaza ko abantu batatu bakize icyorezo cya Marburg, bituma abamaze gukira bose hamwe baba abantu umunani.

Abantu 49 ni bo bamaze kumenyekana banduye icyorezo cya Marburg mu Rwanda, barimo 12 bapfuye, 29 barimo kuvurwa n’abantu umunani bakize.

Nta muntu wishwe n’iki cyorezo cya Marburg ku Cyumweru tariki 06 Ukwakira 2024, nk’uko raporo ya Minisiteri y’Ubuzima ibigaragaza.

Kuri iki Cyumweru tariki 06 Ukwakira 2024 nibwo Minisiteri y’Ubuzima yatangiye gukingira abantu indwara ya Marburg, ikaba yahereye ku bakozi bo kwa muganga n’abagiye bahura n’abarwayi.

Marburg ni indwara yandura, itera umuriro mwinshi kandi ishobora guhitana ubuzima bw’uyirwaye. Iterwa n’agakoko ko mu bwoko bwa virusi, ikagira ibimenyetso by’ibanze bisa n’iby’izindi ndwara zitera umuriro nka malaria cyangwa tifoyide.

Ibimenyetso biranga indwara ya Marburg ni ukugira umuriro mwinshi, kubabara umutwe mu buryo bukabije, kubabara imikaya, kugira umunaniro ukabije , kuruka no gucibwamo.

Abantu 49 ni bo bamaze kumenyekana banduye icyorezo cya Marburg mu Rwanda, barimo 12 bapfuye, 29 barimo kuvurwa n’abantu umunani bakize.

Nta muntu wishwe n’iki cyorezo cya Marburg ku Cyumweru tariki 06 Ukwakira 2024, nk’uko raporo ya Minisiteri y’Ubuzima ibigaragaza.

Kuri iki Cyumweru tariki 06 Ukwakira 2024 nibwo Minisiteri y’Ubuzima yatangiye gukingira abantu indwara ya Marburg, ikaba yahereye ku bakozi bo kwa muganga n’abagiye bahura n’abarwayi.

Aba mbere bahawe urukingo rukumira virusi ya Marburg

Amakuru mashya yatangajwe na Minisiteri y’Ubuzima (MINISANTE) agaragaza ko nta muntu wishwe n’iki cyorezo cya Marburg ku wa Gatandatu tariki 05 Ukwakira 2024, nta n’uwakize, abamaze gukira baracyari batanu.

Impungenge ni nyinshi ku bagenda mu modoka rusange mu kwirinda Marburg

Umugenzi witwa Munyemana Jean Pierre waganiriye na Kigali Today, wari muri izo modoka, agira ati "Kubera ko tugenda dufashe aho abandi bafashe, bikiyongeraho ko izi modoka zijyamo abantu benshi bagenda begeranye cyane bakoranaho, ntabwo wabura kuhandurira."

Ati "Nta muntu bidateye impungenge, dore nk’aha ndahafashe nsizeho icyuya, n’undi araza ahafate, byanze bikunze arandura (indwara), abantu ni ugushyiramo bake ndetse hakaza izindi ngamba, niba ugiyemo ugakaraba intoki."

Mukeshimana Madeleine na we wari uvuye muri gare yo mu Mujyi yerekeza i Kagugu muri Kinyinya, asaba ko abagenda bahagaze baba babyihoreye muri iyi minsi, kugira ngo habanze hafatwe izindi ngamba.

Ati "Aha kuri ibi byuma umuntu aba afite ibyuya mu ntoki agakoraho, kandi na byo ari amatembabuzi yanduza, ari abirinda bashobora gushyiramo wenda iyo sanitizer (umuti wica virusi) umuntu akayihanaguza mu gihe yinjiye muri bisi, cyangwa wenda bagahitamo gushyiramo abantu bagenda bicaye gusa."

Shoferi w’iyo modoka izwi ku izina rya Shirumuteto cyangwa Yutong, avuga ko we aba yirinze kuko nta muntu wundi ukora kuri ‘volant’ ye, kandi ngo aba yabanje kuhatera umuti, akaba yizeza ko agiye kuwusabira n’abagenzi atwara.

Ntabwo birimo korohera ba nyirimodoka zitwara abagenzi mu buryo bwa rusange kugabanya umubare w’abazigendamo, kuko ngo bishobora kubahombya bitewe n’ikiguzi batanga ku kwita kuri iyo modoka, mazutu zinywa hamwe no guhemba abakozi.

Umunyamabanga Uhororaho muri Minisiteri y’Ibikorwa Remezo (MININFRA), Fidèle Abimana, avuga ko bagiye gushyiraho amabwiriza yo kwirinda Marburg, ariko adahuye neza neza nk’ayo kwirinda Covid-19.

Abimana yagize ati "Ibijyanye no kwegerana kw’abantu muri Yutong, ni ikibazo gikwiye kurebwaho, turimo turashyira hamwe amabwiriza tugomba guhuza na Minisiteri y’Ubuzima, gusa Covid-19 na Marburg birandukanye, ntabwo rero wavuga ngo turakora copy&paste, nitubisoza turaza kubitangaza."

Abimana avuga ko ba nyirimodoka zitwara abantu benshi, cyane cyane abagenda bahagaze begeranye kandi bafashe ku byuma, ngo bagomba gufatanya na Leta guhangana n’ibibazo bireba ubuzima bw’abantu.

Amakuru mashya yatangajwe na Minisiteri y’Ubuzima (MINISANTE) agaragaza ko undi muntu umwe yishwe n’iki cyorezo cya Marburg ku wa Gatanu tariki 04 Ukwakira 2024, yuzuza umubare w’abantu cumi na babiri bamaze gupfa. Abanduye biyongereyeho bane, abamaze gukira bo baracyari batanu.

Nubwo ahenshi hari urukarabiro ariko usanga hari n’abacunganwa n’abashinzwe umutekano kugira ngo babone gukaraba intoki

Ubusanzwe uwarwaye iyi ndwara agaragaza ibimenyetso birimo umuriro mwinshi, kuribwa umutwe, kubabara imikaya, kuruka no gucibwamo, ku buryo umuntu wese ubifite asabwa kubimenyesha inzego z’ubuzima kugira ngo ahabwe ubufasha.

Iyi ndwara yandura iyo habayeho guhura kw’amatembabuzi y’abantu babiri, barimo ufite virus ya Marburg, ariko kandi bikaba binashoboka cyane ko yakwirindwa, kuko kimwe mu ngamba zo kuyirinda harimo gukaraba neza n’isabune intoki, n’ibindi birimo kwirinda gukora mu maraso, amacangwe, ibyuya n’ibindi bishobora guturuka mu mubiri w’umuntu wagaragayeho iyo virusi.

Nubwo bimeze bityo ariko, usanga hari abaturage batarasobanukirwa neza akamaro ko kwirinda icyo cyorezo bakoresheje uburyo bwo gukaraba intoki, kuko usanga nubwo ahahurira abantu benshi nko muri gare, mu masoko, amaduka ndetse na za resitora, hari ahateganyirijwe gukarabira intoki mbere yo kuhinjira, ariko hari abatabikora kubera imyumvire itandukanye yafatwa nko kudasobanukirwa ubukana bw’icyorezo cya Marburg.

Gukaraba neza n’isabune ni imwe mu ngamba zishobora gufasha abantu kwirinda icyorezo cya Marburg

Bamwe mu baganiriye na Kigali Today, bo mu Mujyi wa Kigali, bayitangarije ko basanga atari ngombwa gukaraba mu ntoki buri aho bagiye kwinjira hose, kubera ko kubikora cyane bishobora gutuma barwara indwara zirimo ibimeme no gukanyarara intoki.

Umwe muri bo twifuje kwita Hakizimana, yavuze ko umuco wo gukaraba intoki utamenyerewe cyane mu Rwanda, ku buryo uretse kuba binabagora ariko banatinya gukurizamo indwara ziterwa no guhora mu mazi.

Ati “Ntabwo ari umuco twamenyereye, ntabwo twatojwe gukaraba buri segonda, nshobora kuva mu rugo nakarabye umubiri wose, ariko kugera hano nkongera ngakaraba, nkagera hari hirya nkongera ngakaraba ntabwo twabitojwe.”

Hari n’abakora ibikorwa by’ubucuruzi bataritabira gushyira ubukarabiro imbere y’amaduka yabo

Mugenzi we twise Twizerimana ati “Erega tuba tunirinda, buriya ushobora gukaraba cyane ukarwara n’ibimeme mu ntoki, tekereza kuva mugitondo ukaraba ukagera nimugoroba ukaraba mu ntoki, ibimeme byaza mu ntoki kubera uba unakaraba amasabune atandukanye.”

Uwo twise Kwizera we ati “Kuba wava ahangaha ugakaraba isabune imwe aha, wagera hirya ugakaraba indi, rimwe na rimwe ugasanga habayeho no kuba washishuka intoki cyangwa warwara ibimeme kubera gukaraba ya masabune atandukanye utamenyereye, uba utagendanye n’amavuta ngo wisige nyamara kandi wiviriye mu rugo wisize amavuta wanakarabye, ukagera hirya ugasanga ukarabye gifura, ahandi ukarabye iy’amazi, ugasanga wasataguritse intoki.”

Kwanga gukaraba kwa bamwe mu baturage binemezwa n’abashinzwe kurinda umutekano wa zimwe mu nyubako nini zikorerwamo ibikorwa bitandukanye by’ubucuruzi mu Mujyi wa Kigali, ari nabo akenshi bahwiturira abantu gukaraba intoki mbere yo kwijira muri izo nyubako, bavuga ko hari abajya banga gukaraba intoki.

Gukaraba abantu babyibwirije hari abasanga atari umuco w’Abanyarwanda

Umwe mu bakorera mu Mujyi rwagati ati “Hari n’uza akubwira ati nari mvuye hirya nkarabye, ukamubwira ko gukaraba kenshi nta ngaruka zirimo, ugerageje kutabyumva tukamubwira tuti, noneho ba wisubiriye inyuma numara kubyumva neza ugaruke, ubwo akabona gukaraba.”

Mugenzi we ukorera mu nyubako ya CHIC ati “Hari n’ugenda agafata mu mazi ukabona mbese ari nko kurangiza umuhango kugira ngo yerekane ko akarabye, hagakwiye nk’umuntu ubishinzwe ugomba guhagarara hariya akaba ari cyo kintu akora cyo gukarabya abantu, kuko nka twe hari igihe tuba turimo gusaka abantu ari benshi hano, ntitubone umwanya wo kubasubizayo.”

Minisitiri w’Ubuzima Dr. Sabin Nsanzimana, aheruka gutangaza ko kugira ngo icyorezo cya Marburg kirusheho guhashywa, bisaba ubufatanye bw’inzego zose zirimo n’iz’abikorera.

Hari n’aho usanga hateretse indobo n’icupa ry’isabune ariko ari amazi cyangwa isabune byose nta kirimo bimeze gusa nk’umuteguro

Yagize ati “Ni naho amabwiriza amwe n’amwe azira, twirinda ko abantu bakwegerana cyane, kubwiriza abantu gukaraba kenshi, kuko iyi virusi, ni virusi ukoraho, ntabwo ari nka ya yindi twahumekaga nka Covid-19, ni aho ushobora gukora ku maraso cyangwa ku matembabuzi, nk’ibyuya, amacandwe n’ibindi bishobora kuva mu mubiri w’umuntu, niho iyo virusi iba iri.”

Mu rwego rwo gukomeza kwirinda no guhamgana n’icyorezo cya Marburg, Urwego rw’Igihugu rw’Iterambere (RDB), rwatangaje ko abashinzwe ahahurira abantu benshi nko mu mahoteli, resitora no kuri site z’ubukerarugendo basabwe kujya bapima umuriro, bagashyiraho ubukarabiro n’izindi ngamba zigamije kurinda ubuzima bw’abashyitsi n’abahakorera.

Ubuyobozi bwa RDB bwavuze kandi ko abasura u Rwanda banyuze ku kibuga cy’indege no ku mipaka yo ku butaka bazajya bapimwa umuriro kugira ngo harebwe niba nta cyorezo cy’indwara y’umuriro mwinshi iterwa na virusi ya Marburg bafite.

Hari abamaze kumva neza no gusobanukirwa akamaro ko gukaraba mu ntoki mu rwego rwo guhasha icyorezo cya Marbug ku buryo babikora bibwirije

Iki kigo cyasobanuye kandi ko uretse gupimwa umuriro, ku kibuga cy’indege no ku mipaka yo ku butaka hashyizweho ahantu ho gusukurira intoki, nk’ubundi buryo bwo gukumira ikwirakwira ry’iki cyorezo

Kugeza tariki 03 Ukwakira 2024 iyi virusi mu Rwanda yari imaze guhitana abantu 11, naho 21 nibo bari barimo kuvurwa, abayigaragayeho 5 bari bamaze kuyikira banasubiye mu miryango yabo, mu gihe abagera kuri 37 nibo bari bamaze kuyigaragaraho mu bipimo 1009 byafashwe.

Abamaze gupfa bazize icyo cyorezo ni cumi n’umwe, naho abantu 1009 basuzumwe iyo ndwara.

Tariki 27 Nzeri 2024 nibwo Minisiteri y’Ubuzima yatangaje ko mu bitaro bitandukanye byo mu Rwanda habonetse abarwayi bafite ibimenyetso by’indwara na virusi ya Marburg.

Iyi virusi ngo ntiyandurira mu mwuka, ahubwo yandura binyuze mu gukora ku maraso n’andi matembabuzi y’umuntu uyirwaye nk’ibyuya, amacandwe n’ibindi biva mu mubiri w’umuntu uyirwaye.

Mu bimenyetso biranga uburwayi bwa Marburg harimo kugira umuriro ukabije, kubabara umutwe bikabije, kubabara imikaya, gucibwamo no kuruka.

Mu rwego rwo kuyikumira no kuyirinda, abantu baragirwa inama yo kurangwa n’isuku bakaraba intoki, birinda no kwegerana cyane cyangwa gukora ku muntu wagaragaje ibimenyetso.

Abaganga n’abakora kwa muganga bagirwa inama yo kwitwararika, kuko mu gihe bikomerekeje n’ibikoresho byakoreshejwe ku barwaye iyo ndwara na byo bibanduza. Ishami ry’Umuryango w’Abibumbye ryita ku Buzima (OMS) ryongeraho ko n’umuntu wishwe n’iyi ndwara aba ashobora kwanduza uwamukoraho wese adakoresheje ibikoresho bimurinda mu buryo bwabugenewe.

Abamaze kumenyekana banduye biyongereyeho barindwi, bose hamwe baba 36, abarimo kuvurwa ni 25. Kugeza ubu ntawe biratangazwa ko yakize iki cyorezo.

Tariki 27 Nzeri 2024 nibwo Minisiteri y’Ubuzima yatangaje ko mu bitaro bitandukanye byo mu Rwanda habonetse abarwayi bafite ibimenyetso by’indwara na virusi ya Marburg.

Iyi virusi ngo ntiyandurira mu mwuka, ahubwo yandura binyuze mu gukora ku maraso n’andi matembabuzi y’umuntu uyirwaye nk’ibyuya, amacandwe n’ibindi biva mu mubiri w’umuntu uyirwaye.

Mu bimenyetso biranga uburwayi bwa Marburg harimo kugira umuriro ukabije, kubabara umutwe bikabije, kubabara imikaya, gucibwamo no kuruka.

Mu rwego rwo kuyikumira no kuyirinda, abantu baragirwa inama yo kurangwa n’isuku bakaraba intoki, birinda no kwegerana cyane cyangwa gukora ku muntu wagaragaje ibimenyetso.

Abamaze kumenyekana banduye ni 29 harimo n’abapfuye, abari kuvurwa ni 19.

Nta cyemezo kirafatwa cyo guhagarika gusura abagororwa mu kwirinda Marburg

Ubusanzwe mu Magororero uko ari 13 ari hirya no hino mu bice bitandukanye by’Igihugu, imfungwa n’abagororwa bagira umunsi umwe mu cyumweru wo gusurwa, aho kuri buri wa gatandatu w’icyumweru inshuti n’abavandimwe babishaka kandi babishoboye baba bemerewe gusura umuntu ufunzwe.

Nubwo bimeze bityo ariko usanga nk’iyo habaye ibihe bidasanzwe by’indwara by’umwihariko ibyorezo, hafatwa ingamba zidasanzwe zitandukanye zirimo guhagarika gusurwa ku mfungwa n’abagororwa mu rwego rwo kwirinda no gukumira ko hari ishobora guturuka muri urwo rujya n’uruza rw’abantu, bikagira ingaruka ku mubare w’abatari bake baba bafungiwe mu igororero.

Ubwo Minisiteri y’Ubuzima mu Rwanda (MINISANTE), yatangazaga ko mu Rwanda habonetse abarwayi bafite ibimenyetso by’indwara y’umuriro mwinshi iterwa na virus ya Marburg tariki 27 Nzeri 2024, bimwe mu bigo byatangiye gufata ingamba zitandukanye zirimo guhagarika urujya n’uruza rw’abantu mu rwego rwo kwirinda icyo cyorezo, bituma hari abibaza ko no mu magororero ariko bimeze.

Mu kiganiro cyihariye Kigali Today yagiranye n’umuvugizi wa RCS, CSP Therese Kubwimana, kuri uyu wa kabiri tariki 01 Ukwakira 2024, yavuze ko kugeza ubu barimo gukurikiza ingamba zo kwirinda zose nkuko zatangajwe na MINISANTE, ariko kandi ko gusura imfungwa n’abagororwa birimo gukorwa nkuko bisanzwe kuko no mu cyumweru gishize byakozwe.

Kugeza ubu gusura imfungwa n’abagororwa ntabwo birahagarikwa

Yagize ati “Kugeza uyu munsi ntabwo turavuga ngo gusura bihagarare, ngo cyangwa bazasura gutya, ariko turimo kubireba tubyigaho, dukurikije ibihari, kuko no gusurwa ku mugororwa nacyo n’ikintu gikomeye. Ubu harimo gukurikizwa amabwiriza ya MINISANTE asanzwe, isuku isanzwe ihari, buriya Covid-19 yasize itwigishije ibintu byinshi.”

Arongera ati “Ubundi ntabwo dusura buri munsi, buriya icyorezo cyatangajwe mu cyumweru gishize, isura ry’icyumweru gishize ryarakozwe, uyu munsi sinakubwira ngo ku wa gatandatu tuzasurisha cyangwa ntituzasurisha, kuko ntiturafata umwanzuro ariko kugeza uyu munsi nakubwira ngo gusura biremewe kuko ntituravuga ngo ntabwo byemewe, kubera ko dusura rimwe mu cyumweru.”

Ubuyobozi bwa RCS buvuga ko mu gihe hagira ikindi cyemezo cyaramuka gifashwe bazakimenyesha Abanyarwanda, ndetse n’impamvu yacyo, kugira babisobanukirwe, cyane ko gusura ari uburenganzira umugororwa agenerwa n’itegeko.

Icyorezo cya Marburg cyageze mu Rwanda gitunguranye bituma bimwe mu bigo bifata ingamba zitandukanye zirimo no guhagarika gahunda z’urujya n’uruza rw’abantu, ku ikubitiro ubuyobozi bwa Mount Kigali University, bwashyize itangazo hanze rivuga ko mu rwego rwo kwirinda ikwirakira ry’icyo cyorezo abanyeshuri bayo bagiye kumara icyumweru bigira ku ikoranabuhanga badahura mu buryo busanzwe.

Amabwiriza yashyizweho na Minisiteri y’Ubuzima

Ni amasomo bavuga ko azatangwa guhera ku wa 02 Ukwakira 2024 aho abarimu n’abanyeshuri bagomba kwifashisha ikoranabuhanga rya Microsoft Teams, abarimu n’abanyeshuri bashya bakazatozwa uko rikoreshwa.

Uretse amasomo ubuyobozi bw’iyo Kaminuza bwanatangaje n’indi mirimo isanzwe ihuza abanyeshuri n’abarimu irimo siporo yo koga nayo ibaye ihagaritswe kuva kuri iyo tariki.

Si Kaminuza ya Mount Kigali yonyine yahagaritse bimwe mu bikorwa byayo, kuko ibitaro bikuru bya Kaminuza bya Butare (CHUB), byahagaritse gahunda zirimo gusura abarwayi, ndetse umurwayi akaba asabwa kugira umurwaza umwe, ushobora gusimburwa.

Mu rwego rwo gukumira iyi ndwara, MINISANTE yashyize hanze amabwiriza agaragaramo ingingo y’uko ibikorwa byo gusura abarwayi mu mavuriro atandukanye byahagaritswe mu gihe cy’iminsi 14, hagamijwe kwirinda iyi ndwara.

Ni amabwiriza agena kandi ko uwapfuye azize iyi ndwara nta kiriyo kizajya gikorwa, mu gihe kumushyingura bizajya byitabirwa n’abatarenze 50.

Amabwiriza yashyizweho na Minisiteri y’Ubuzima

Uwishwe n’iyi ndwara kandi nta muhango wo kumusezera ku rusengero cyangwa ku Musigiti uzajya ukorwa, ahubwo uzajya ubera mu bitaro.

Abaturarwanda barasabwa gukomeza imirimo yabo nk’uko bisanzwe ariko bakita ku isuku no gukaraba intoki n’amazi meza n’isabune, nubwo hari aho bigenda bigaragara ko hari ikibazo cy’amazi ndetse n’isabune.

Kugeza tariki 30 Nzeri 2024, MINISANTE yari imaze gutangaza ko umubare w’abamaze kwicwa n’iyi ndwara mu Rwanda ugera ku bantu icyenda, mu gihe abanduye ari 27 naho abarimo kuvurwa bo ni 19.

Itangazo ryashyizwe ahagaragara na Minisiteri y’Ubuzima rivuga ko abamaze kumenyekana banduye ari 27 harimo n’abapfuye, abari kuvurwa ni 18.

Minisiteri y’Ubuzima yasabye Abanyarwanda kudakurwa umutima n’iki cyorezo ariko ibibutsa gushyira mu bikorwa ingamba zo kugira isuku, gukaraba intoki n’amazi meza n’isabune, no kwirinda gukoranaho.

Minisiteri y’Ubuzima iributsa Abanyarwanda bose ko uwakwibonaho ibimenyetso birimo kugira umuriro ukabije, kubabara umutwe bikabije, kubabara imikaya, gucibwamo no kuruka, yakwihutira kujya kwa muganga.

Marburg ifite ubukana bwo kwica uyirwaye ku rugero rubarirwa hagati ya 25% na 90% bitewe n’uburyo uwo muntu yihutishijwe kugera kwa muganga, agahabwa imiti itandukanye, kuko nta muti wihariye iyi virusi irabonerwa.

Itangazo ryashyizwe ahagaragara na Minisiteri y’Ubuzima rivuga ko abamaze kumenyekana banduye ari 26 harimo n’abapfuye, abari kuvurwa ni 18.

Minisiteri y’Ubuzima yasabye Abanyarwanda kudakurwa umutima n’iki cyorezo ariko ibibutsa gushyira mu bikorwa ingamba zo kugira isuku no kwirinda gukoranaho.

Abaturarwanda bose barasabwa gukomeza imirimo yabo nk’uko bisanzwe ariko bakita ku isuku no gukaraba intoki n’amazi meza n’isabune.

Minisiteri y’Ubuzima iributsa Abanyarwanda bose ko uwakwibonaho ibimenyetso birimo kugira umuriro ukabije, kubabara umutwe bikabije, kubabara imikaya, gucibwamo no kuruka, yakwihutira kujya kwa muganga.

Marburg ifite ubukana bwo kwica uyirwaye ku rugero rubarirwa hagati ya 25% na 90% bitewe n’uburyo uwo muntu yihutishijwe kugera kwa muganga, agahabwa imiti itandukanye, kuko nta muti wihariye iyi virusi irabonerwa.

Mu buryo yandura, hari ugukora ku matembabuzi y’uyirwaye. Ntabwo yandurira mu mwuka, uwafashwe akaba atangira ababara umutwe, ahinda umuriro, acibwamo kandi aruka.

Minisiteri y’Ubuzima yatangaje ko buri mugoroba bagiye kujya batangaza aho bageze bahangana na Marburg kugeza ubu bataramenya aho yaturutse n’igihe umuntu wa mbere mu Rwanda yaba yarayanduriye.

Guherekeza abishwe n’ibyorezo bisaba kwigengesera kugira ngo batanduza abandi

Itangazo rya MINISANTE rivuga ko iyo mihango izajya ibera ku bitaro ahabugenewe, kandi yitabirwe n’abantu bagenwe.

Iri tangazo rivuga ko igihe uwapfuye yazize Marburg, nta kiriyo gikorwa gihuza abantu benshi mu rugo
kugira ngo hirindwe ikwirakwira ry’icyorezo ku bagize umuryango n’ababatabara, kandi ko gushyingura uwazize Marburg byitabirwa n‘abantu batarenze 50.

Mu rwego rwo kwirinda ubucucike mu mavuriro, muri iyi minsi, gusura abarwayi mu mavuriro yose bibaye bisubitswe mu gihe cy’iminsi 14, umurwayi akaba yemerewe kugira umurwaza umwe ushobora gusimburwa.

Amavuriro yose asabwa kugena uburyo bwihariye bwo kwakira abaje bagaragaza ibimenyetso bisa n’ibya Marburg, hakoreshwa uburyo bwo kwirinda bwagenwe bwitwa “IPC”.

Abaturarwanda bose barasabwa gukomeza imirimo yabo nk’uko bisanzwe ariko bakita ku isuku no gukaraba intoki n’amazi meza n’isabune.

MINISANTE isaba abantu kwirinda kwegerana cyane no gukora ku muntu wagaragaje ibimenyetso, kandi bakagira umuco w’isuku harimo no gukaraba intoki.

Ibimenyetso by’ingenzi biranga
uburwayi bwa Marburg birimo umuriro ukabije, kubabara umutwe bikabije, kubabara imikaya, gucibwamo no kuruka.

Hagati aho MINISANTE yatangaje ko kuri iki Cyumweru abandi bantu babiri bitabye Imana bazize icyorezo cya Marburg, bakaba biyongereye ku bandi batandatu bari bapfuye mbere yaho.

Minisitiri w’Ubuzima, Dr Sabin Nsanzimana

Minisitiri w’Ubuzima, Dr Sabin Nsanzimana, yabitangaje mu kiganiro yagiranye n’Itangazamakuru kuri iki Cyumweru tariki 29 Nzeri 2024, avuga ko imibare y’abarwaye ikiri 20 ndetse n’abahitanywe n’iyi ndwara ari batandatu kugeza uyu munsi.

Yagize ati "Dufite abahuye n’abarwayi benshi, hafi 300 bashobora kwiyongera, mushobora kuba mwarahuye mukaramukanya cyangwa mubana mu nzu, ntabwo turarangiza kumenya aho ubwo burwayi bwaturutse, icyihutirwa ni ukumenya aho ubwo burwayi bugeze tukabuhagarika."

Minisitiri w’Ubuzima avuga ko abahuye n’abarwayi barimo gukurikiranwa, bagapimwa inshuro zirenze imwe, hakaba n’abo bavana aho bari bakabajyana ahandi ku mpamvu zo gushaka ibimenyetso vuba, kuko ngo iyi ndwara yigaragaza mu gihe kibarirwa hagati y’iminsi 2-21 nyuma yo gukora ku matembabuzi y’uyirwaye.

Marburg ifite ubukana bwo kwica uyirwaye ku rugero rubarirwa hagati ya 25%-90% bitewe n’uburyo uwo muntu yihutishijwe kugera kwa muganga, agahabwa imiti itandukanye, kuko nta muti wihariye iyi virusi irabonerwa.

Mu buryo yandura, hari ugukora ku matembabuzi y’uyirwaye, ntabwo yandurira mu mwuka, uwafashwe akaba atangira ababara umutwe, ahinda umuriro, acibwamo kandi aruka.

Minisitiri w’Ubuzima avuga ko hataragera igihe cyo gufata ingamba zidasanzwe, agasaba abantu kudakuka umutima kandi bagakomeza imirimo nk’ibisanzwe, kandi ngo barimo kwihuta cyane kugira ngo babashe guhagarika ikwirakwira ryayo.

Dr Nsanzimana avuga ko buri mugoroba bagiye kujya batangaza aho bageze bahangana na Marburg kugeza ubu bataramenya aho yaturutse n’igihe umuntu wa mbere mu Rwanda yaba yarayirwaye.

Ishami ry’Umuryango w’Abibumbye rishinzwe Ubuzima ryizeza u Rwanda ko rifite ibikoresho byo guhagarika Marburg vuba bishoboka rishingiye ku buryo ryagiye rirwanya iyo ndwara mu bindi bihugu aho yagiye ivugwa.

Virusi ya Marburg iherutse kumvikana mu Rwanda, imaze guhitana bamwe, abandi bararwaye

Iyi Ambasade yavuze ko serivisi zose zituma abantu bahura n’abakozi bayo,
zirimo izihabwa abafite ubwenegihugu bwa Leta zunze Ubumwe Amerika ndetse n’ibazwa (interviews) ku bashaka kujya muri icyo gihugu, zibaye zihagaze.

Abakorera iyo Ambasade mu Rwanda basabwa gukora akazi kabo bifashishije ikoranabuhanga kuva ku wa Mbere tariki ya 30 Nzeri kugeza ku itariki ya 4 Ukwakira 2024.

Ambasade ya Amerika(USA) yagize iti “Guverinoma y’u Rwanda yemeje ko hari abarwaye Marburg bari kwitabwaho. Bitewe n’uko iyi ndwara ya Marburg yandura, Ambasade ya USA i Kigali yasabye abakozi bayo bose gukoresha iya kure guhera tariki 30 Nzeri kugera ku wa 4 Ukwakira 2024.”

Minisiteri y’Ubuzima mu Rwanda(MINISANTE) yatangaje ko abantu batandatu mu Gihugu bitabye Imana bazize Marburg mu gihe hari abandi 20 bayirwaye.

Minisitiri w’Ubuzima, Dr Sabin Nsanzimana, yavuze ko abahitanwe n’iyi ndwara hamwr n’abayanduye biganjemo abakozi bo kwa muganga cyane cyane ahavurirwa indembe.

Dr Nsanzimana yavuze ko abitabye Imana barimo guherekezwa mu cyubahiro hirindwa ko hagira abantu bahandurira.

Dr Nsanzimana asaba Abanyarwanda kudakuka umutima ariko bakubahiriza ingamba zo guhangana n’iki cyorezo.

Virusi ya Marburg uko igaragara mu byuma by’ikoranabuhanga

Umuyobozi w’Ishami ry’Umuryango w’Abibumbye ryita ku Buzima (OMS), Dr. Tedros Adhanom Ghebreyesus, yavuze ko OMS izatanga inkunga ku Rwanda kandi izafatanya na Guverinoma y’u Rwanda guhagarika ikwirakwira rya virusi no kurinda abantu kwandura iki cyorezo.

Ati "Minisiteri y’Ubuzima yatangaje ko hari abarwayi ba Marburg. OMS izakomeza kongera ubufasha ndetse ikorane na Guverinoma y’u Rwanda mu guhagarika ikwirakwira ry’iyi virusi mu kurinda abaturage bari mu byago."

OMS ivuga ko uwanduye iyi ndwara aba ashobora kugaragaza ibimenyetso mu gihe kiri hagati y’iminsi 2 na 21.

Ishami ry’Umuryango w’Abibumbye ryita ku Buzima rivuga ko iyi ndwara ari mbi cyane kuko ishobora kwica ku kigero cya 88% abayirwaye. Iyi ndwara ntigira umuti wagenewe kuyivura cyangwa urukingo, mu kuyivura ngo havurwa ibimenyetso hifashishijwe imiti itandukanye.

Minisiteri y’Ubuzima irakangurira abantu bose kugira isuku bagakomeza umuco wo gukaraba intoki, ariko ugaragaje ibimenyetso akihutira kujya kwa muganga.

Minisiteri y’Ubuzima yavuze ko ibimenyetso by’iyo ndwara ari umuriro mwinshi, kuribwa umutwe bikabije, kuribwa mu mitsi, kuribwa mu nda no kuruka, gusa iyo iyi ndwara yazahaje umurwayi ashobora kuva amaraso ahantu hanyuranye nko mu maso n’ahandi, ndetse hakaba n’abayitiranya na Ebola.

Iyi ndwara basanze yaraje iturutse mu nkende zinjijwe mu Budage bavuga ko zivuye muri Uganda. Ariko kuva icyo gihe iyi virusi yagiye ica no mu zindi nyamaswa, ikwira no mu bindi bihugu.

Amakuru yatangajwe na OMS avuga ko iyi ndwara imaze kugaragara mu bihugu bitandukanye. Mu mwaka wa 2012 abantu 15 muri Uganda barayanduye, muri bo bane barapfuye. Mu mwaka wa 2017 abantu batatu ni bo bayanduye irabahitana, mu mwaka wa 2005 mu gihugu cya Angola abantu 374 barayanduye, 329 irabahitana, mu mwaka wa 1998 na 2000 muri Repubulika Iharanira Demokarasi ya Congo (DR Congo) abantu 154 barayanduye, 128 irabahitana. Mu mwaka wa 1967 mu Budage abantu 29 baranduye, barindwi muri bo irabahitana.

Virusi ya Marburg uko igaragara mu byuma by’ikoranabuhanga

Minisitiri w’Ubuzima, Dr. Sabin Nsanzimana, mu butumwa yashyize ahagaragara kuri uyu wa Gatandatu tariki 28 Nzeri 2024, yasobanuye ko umubare munini w’abayirwaye n’abo yahitanye wiganje mu bakora kwa muganga, cyane cyane ahakora indembe.

Minisiteri y’Ubuzima, inzego za Leta zindi, n’abafatanyabikorwa, barimo gukorana mu gushakisha abahuye n’abo barwayi, ndetse n’abahuye n’abitabye Imana, kugira ngo na bo basuzumwe.

Iyi virusi yandurira cyane mu gukora ku maraso n’amatembabuzi y’uyirwaye, cyangwa gusangira ibikoresho n’imyambaro byakoreshejwe n’uyirwaye.

Minisitiri Nsanzimana yasobanuye ko uwanduye virusi, bishobora gufata hagati y’iminsi itatu kugera ku byumweru bitatu ataragaragaza ibimenyetso.

Ati "Ni indwara igira ubukana bwinshi, ku buryo uwahuye na yo agira ibyago byo kuba yamuhitana.Icyakora turimo gukora ku buryo abo ducyeka bapimwa kare, abagaragayeho ubu burwayi bagakurikiranwa kugira ngo twirinde ko hagira abaremba, cyangwa ko hagira abongera guhitanwa na yo."

Ibimenyetso biranga iyi ndwara ni umuriro mwinshi, kubabara umutwe, kuruka, gucibwamo, n’ibindi.

MINISANTE ivuga ko uwahuye n’uwarwaye iyi ndwara, bamushakira aho akurikiranirwa hari abaganga, kugira ngo barebe ko atagaragaza ibimenyetso, yanabigaragaza agahabwa ubuvuzi bukwiriye.

MINISANTE isaba abaturage kudakuka umutima no kubahiriza ingamba zo guhangana n’iki cyorezo, cyane cyane kwirinda gusangira ibikoresho n’umuntu ufite ibimenyetso bisa n’ibya Marburg.

Abantu kandi bagirwa inama yo gukaraba intoki bakoresheje amazi meza n’isabune, ndetse no gukoresha umuti wagenewe kwica udukoko uzwi nka Sanitizer, n’ibindi.

Minisiteri y’Ubuzima yihanganishije imiryango y’abahitanywe n’iki cyorezo, ibizeza ko Leta y’u Rwanda izakomeza kubaba hafi.

Mu itangazo yanyujije ku rukuta rwayo rwa Twitter, Minisiteri y’ubuzima yavuze ko ibimenyetso by’iyo ndwara ari umuriro mwinshi, kuribwa umutwe bikabije, kuribwa mu mitsi, kuribwa mu nda no kuruka. Abahanga bavuga ko iyo iyi ndwara yakuzahaje ushobora kuva amaraso ahantu hanyuranye nko mu maso n’ahandi, ndetse hakaba n’abayitiranya na Ebola.

Minisiteri y’ubuzima ikomeza ivuga ko iyi ndwara ikwirakwizwa no gukora ku maraso n’amatembabuzi y’abantu bayirwaye, cg se ikaba yakwanduzwa n’inyamaswa ziyirwaye. Gusa ishobora no kwandurira mu gukoresha cyangwa gukora ku bikoresho byakoreshejwe n’urwaye iyi virus nk’imyenda cyangwa amashuka n’ibindi.

Abaganga n’abakora kwa muganga bagirwa inama yo kwitwararika, kuko mu gihe bikomerekeje n’ibikoresho byakoreshejwe ku barwaye iyo ndwara na byo bibanduza. Ishami ry’umuryango w’abibumbye ryita ku buzima (OMS) yongeraho ko n’umuntu wishwe n’iyi ndwara aba ashobora kwanduza uwamukoraho wese adakoresheje ibikoresho bimurinda mu buryo bwabugenewe. Umuntu wanduye iyi ndwara aba ashobora kwanduza mu gihe cyose virusi ya Marburg ikimuri mu maraso.

OMS ivuga ko uwanduye iyi ndwara aba ashobora kugaragaza ibimenyetso mu gihe kiri hagati y’iminsi 2 na 21. Minisiteri y’ubuzima ivuga ko iyi ndwara idakwirakwizwa binyuze mu mwuka.

Minisiteri y’ubuzima yongeyeho ko harimo gukorwa iperereza ku cyaba gitera iyi ndwara, ndetse no gushakisha uwo ari we wese waba yahuye n’urwaye iyi ndwara ngo yitabweho n’abaganga, ndetse banasaba buri wese wagaragarwaho n’ibimenyetso by’iyi ndwara, kugana ivuriro rimwegereye cyangwa se agahamagara ikigo cy’igihugu gishinzwe ubuzima RBC ku 114.

Kugeza ubu ntiharamenyekana umubare w’abarwaye iyi ndwara, minisiteri y’ubuzima ikaba isaba abantu kudakuka imitima no gukomeza imirimo yabo, ariko bakita cyane ku bijyanye n’isuku.

Iri tangazo rishyizwe ahagaragara nyuma y’iminsi hacaracara amakuru avuga ko mu Rwanda hari indwara itaramenyekana ndetse hakaba n’abavuga ko hari abamaze guhitanwa na yo. Gusa mu itangazo rya minisiteri y’ubuzima ntiyavuze ko haba hari abamaze kwicwa n’iyo ndwara, cyakora yemeye ko hari abayirwaye barimo kwitabwaho n’abaganga.

Ishami ry’umuryango w’abibumbye ryita ku buzima rivuga ko iyi ndwara ari mbi cyane kuko ishobora kwica ku kigero cya 88% by’abayirwaye. OMS ikomeza ivuga ko iyi ndwara itagira umuti wagenewe kuyivura cyangwa urukingo, cyakora ngo havurwa ibimenyetso hifashishijwe imiti itandukanye.

Virus ya Marburg yavumbuwe mu 1967 mu gihugu cy’ubudage na Seribiya, nyuma iza gukwira hirya no hino mu bihugu binyuranye.