Ingingo ya 116 y’Itegeko Nshinga rya Repubulika y’u Rwanda iteganya ko Perezida wa Repubulika akimara kurahira, ashyiraho Minisitiri w’Intebe bitarenze iminsi cumi n’itanu (15).

Minisitiri w’Intebe atoranywa, ashyirwaho kandi akavanwaho na Perezida wa Repubulika, mu gihe abandi bagize Guverinoma na bo bashyirwaho na Perezida wa Repubulika amaze kugisha inama Minisitiri w’Intebe.

Abagize Guverinoma, ni ukuvuga Abaminisitiri, Abanyamabanga ba Leta n’abandi bayobozi bagenwa na Perezida wa Repubulika, na bo bashyirwaho bitarenze iminsi cumi n’itanu (15) nyuma y’ishyirwaho rya Minisitiri w’Intebe.

Uwari Umuvugizi wungirije wa Guverinoma, Alain Mukuralinda, avuga ko Perezida wa Repubulika atajya ategereza iriya minsi 15 kugira ngo ashyireho Minisitiri w’Intebe mushya n’abagize Guverinoma.

Mukuralinda, mu kiganiro yagiranye na Kigali Today kuri telefone, yagize ati "N’uyu mugoroba cyangwa ejo wabona (Perezida wa Repubulika) abikoze, arabanza agashyiraho Minisitiri w’Intebe, ushobora kubona agumishijeho uriya cyangwa akamuhindura, ubundi Guverinoma ikajyaho, icyo nzi ni uko adashobora kurenza iriya minsi(15) kuko ni itegeko."

Bamwe mu basesenguzi bakomeje kugaragaza ko hari amahirwe menshi y’uko Dr Edouard Ngirente agaruka kuyobora Guverinoma nshya muri iyi myaka itanu iri imbere.

Ikindi kigiye gukurikira irahira ry’Umukuru w’Igihugu, ndetse kizaba mbere y’ishyirwaho rya Guverinoma, ni itangira ry’imirimo y’abadepite bashya bagize Inteko Ishinga Amategeko.

Mbere yo gutangira imirimo, abagize Umutwe w’Abadepite bazarahirira imbere ya Perezida wa Repubulika cyangwa imbere ya Perezida w’Urukiko rw’Ikirenga, nk’uko biteganywa n’ingingo ya 66 y’Itegeko Nshinga.

Iyi ngingo igira iti "Mu ntangiriro ya buri manda y’abagize Inteko Ishinga Amategeko, inama ya mbere
ya buri Mutwe iharirwa itora rya Biro igizwe na Perezida na ba Visi Perezida. Itumizwa kandi ikayoborwa na Perezida wa Repubulika mu gihe kitarenze iminsi cumi
n’itanu(15) nyuma y’itangazwa ry’amajwi."

Mbere yo gutangira imirimo, abagize Biro nyobozi y’Inteko Ishinga Amategeko (Umutwe w’Abadepite)
babanza kurahirira imbere ya Perezida wa
Repubulika.

Amatora y’abandi bayobozi arakomeje

Muri uku kwezi kwa Kanama, ku itariki 16, mu Mujyi wa Kigali hazatorwa Umujyanama uhagararira akarere mu Nama Njyanama y’Umujyi wa Kigali, ndetse ibikorwa byo kwiyamamaza byo bikaba byatangiye kuri uyu wa 13 Kanama 2024.

Abajyanama bahagararira uturere tugize Umujyi wa Kigali bazatorwamo ugize Biro y’Inama Njyanama y’Umujyi hamwe n’ugize Komite Nyobozi y’Umujyi wa Kigali, bikazakorwa ku munsi w’itora imbere y’inteko itora.

Mu kwezi gutaha kwa Nzeri 2024 ku itariki 16, na bwo hateganyijwe amatora y’abagize Inteko Ishinga Amategeko, Umutwe wa Sena, bikaba bisobanurwa
mu Iteka rya Perezida wa Repubulika ryo ku wa 16 Kamena 2024.

Ibikorwa byo kwiyamamaza kw’abakandida mu matora y’Abasenateri biteganyijwe gutangira ku wa Mbere tariki 26 Kanama 2024, bikazasozwa ku wa Gatandatu tariki 14 Nzeri 2024.

Amatora y’Abasenateri 12 batorwa hakurikijwe inzego z’imitegekere y’Igihugu azaba ku wa 16 Nzeri 2024, mu gihe ku wa 17 Nzeri hazatorwa umusenateri umwe uhagarariye amashuri makuru ya Leta, hamwe n’Umusenateri umwe wo mu mashuri makuru yigenga.

Perezida Kagame yakiriye mugenzi we Sheikh Hassan Mohamud wa Somalia

Yabakiriye kuri uyu wa mbere tariki 12 Kanama 2024, nyuma y’uko bari baje kwifatanya no kumutera ingabo mu bitugu mu muhango w’irahira rye wabaye ku cyumweru tariki 11 Kanama 2024.

Bagiranye ibiganiro bitandukanye byiganjemo kurushaho kunoza umubano hagati y’Ibihugu na za Guverinoma zabo, hagamijwe ibikorwa by’iterambere ku mpande zombi.

Baganiriye ku guteza imbere umubano w’ibihugu byombi

Somalia n’u Rwanda bisanganywe umubano mwiza

Uwabimburiye abayobozi bakuru b’Ibihugu bakiriwe na Perezida Paul Kagame kuri uyu munsi ni Perezida wa Repubulika ya Congo Sassous N’Guesso bagiranye ibiganiro byibanze cyane ku mubano usanzwe uri hagati y’Ibihugu byombi.

Nyuma wo kwakira Umukuru w’Igihugu cya Repubulika ya Congo, Perezida Kagame yakiriye mu biro bye Mamadi Doumbouya wa Guinea wari wifatanyije n’Abanyarwanda n’inshuti zabo mu muhango w’irahira rya Perezida Paul Kagame.

Perezida Kagame kandi yakiriye Sassou N’Guesso wa Repubulika ya Congo

Perezida Kagame kandi yanakiriye mugenzi we wa Somalia Sheikh Hassan Mohamud, nawe bagiranye ibiganiro byibanze cyane ku kurushaho kwagura umubano Ibihugu byombi bisanzwe bihuriyeho.

Sassou N’Guesso wa Repubulika ya Congo yitabiriye umuhango w’irahira rya Perezida Kagame

Perezida Kagame na Sassou N’Guesso bagiranye ibiganiro

Si abakuru b’Ibihugu gusa bakiriwe na Perezida Paul Kagame, kuko yakiriye na Minisitiri w’Ububanyi n’Amahanga wa Misiri, Badr Abdelatty n’itsinda bari kumwe ririmo Prof Magdi Habib Yacoub, umuganga w’inzobere w’indwara z’umutima wagize igitekerezo cyo kubaka ibitaro byihariye by’indwara z’umutima mu Rwanda.

Ministiri Badr Abdelatty yabonanye n’Umukuru w’Igihugu kuri uyu wa mbere nyuma y’uko yari amaze gushyira umukono ku masezerano y’ubufatanye na Leta y’u Rwanda binyuze muri za Minisiteri zirimo iy’Ububanyi n’amahanga hamwe n’iy’Ubuzima, ku mpande z’Ibihugu byombi.

Perezida Kagame yabonaye na Mamadi Doumbouya wa Guinea

Abakuru b’ibihugu byombi basanzwe bafitanye umubano urimo n’imigenderanire hagati yabo

Perezida Kagame yakiriye na Minisitiri w’Ububanyi n’amahanga wa Misiri Badr Abdelatty

Minisitiri Badr Abdelatty yari kumwe na Prof Magdi Habib Yacoub umuganga w’inzobere w’indwara z’umutima wagize igitekerezo cyo kubaka ibitaro byihariye by’indwara z’umutima mu

Ni ikiruhuko gitangajwe ku mugoroba wo kuri iki Cyumweru tariki 11 Kanama 2024, nyuma y’uko Abanyarwanda n’inshuti z’u Rwanda bazindukiye mu birori byo kwakira indahiro y’Umukuru w’Igihugu Paul Kagame, warahiriye kuyobora u Rwanda muri manda y’imyaka itanu iri imbere.

ITANGAZO pic.twitter.com/dIgQUeTdm9

— Ministry of Public Service and Labour | Rwanda (@RwandaLabour) August 11, 2024

Amateka ya Perezida Kagame afite isoko mu mateka yo kuva mu 1987, ubwo we n’abandi babanaga mu buzima bw’ubuhunzi mu Gihugu cya Uganda, bashingaga umuryango FPR Inkotanyi, Perezida Kagame akaba yari mu b’imbere muri FPR, uyu mutwe wa Politiki ukaba ari na wo watangiye kuganirirwamo uko impunzi zari mu mahanga zitahuka.

Perezida Kagame ashimirwa uruhare rwe mu kubaka ubushobozi bw’Igisirikare cy’u Rwanda

Nyuma ya Jenoside yakorewe Abatutsi u Rwana rumaze kubohorwa, Perezida Kagame yakomeje kuba mu batekerereza Igihugu uko u Rwanda rwakongera kwiyubaka. Uyu munsi Sitade Amahoro yakiriye ibirori byo kurahira kwe, ni gihamya cy’uko u Rwanda rumaze gutera imbere dore ko yavuguruwe ikuzura itwaye abarirwa muri Miliyali 200 Frw.

Mu myaka 30 ishize Sitade Amahoro yari inkambi y’impunzi z’Abatutsi bari barahungiyemo, ariko uyu munsi ni ikimenyetso ntakuka cy’iterambere ry’u Rwanda, gihamya uko Igihugu cyiyubatse kandi kinatanga icyizere cyo gukomeza gutera imbere k’u Rwanda n’Abanyarwanda.

Uko Stade Amahoro yagaragaraga mu 1994 n’uko igaragara ubu ubwabyo bitaga ubutumwa bw’aho Igihugu cyavuye n’aho kigeze

Muri Stade Amahoro ubwo haberagamo umuhango w’irahira rya Perezida Kagame

Ahereye ku rugero rw’iwabo, umusesenguzi Ignatius Kabagambe asanga hari byinshi byakozwe bigaragaza iterambere u Rwanda rugezeho, kubera imiyoborere ya Perezida Kagame, ku buryo we n’umuryango we babona ejo habo hazaba heza ndetse ko u Rwanda ari Igihugu gitanga icyizere ku bato n’uko bazagira imibereho myiza mu gihe kizaza.

Agira ati, “Ababyiruka biragaragara ko bazagira Igihugu cyiza kubera imiyoborere myiza yazanye impinduka mu buzima bw’abaturage, natwe abakuru twishimira kuba tubona imbuto nziza yabibwe igatuma impinduka nziza zikomeza kwigaragaza, kubera imiyoborere ya Perezida Kagame”.

Kabagambe avuga ko akiri umuhungu muto nko mu myaka itanu cyangwa irindwi ubwo hari mu myaka ya za 1970, yari mu nkambi y’impunzi ya Nakivale muri Uganda, aho akaba yarahagiriye amahirwe yo gukubita amaso Paul Kagame na we wari ugimbutse, wagaragaraga nk’umuntu n’ubundi utandukanye n’abandi bari mu kigero kimwe.

Abamenye Kagame mu myaka yo hambere bavuga ko yagaragazaga ibitekerezo biri ku rwego rwo hejuru

Avuga ko nyuma yaho muri za 1985 yongeye kubona Kagame icyo gihe yari mu basirikare bakuru bari bamaze kwinjira mu mutwe w’ingabo zaharaniraga kubohora Uganda (NRA), icyo gihe Kabagambe yari mu mashuri yisumbuye.

Agira ati “Icyo gihe Kagame yari mu ngabo za Uganda, ndibuka ko namubonye mu bikorwa byo kwiyamamaza mu bice by’ahitwa Boma, icyo gihe ari mu basirikare bagaragazaga umurava mu kazi ke ku buryo imyitwarire ye yanteye kumutekerezaho cyane uko yitwaraga neza na n’ubu mbibona nk’ibiri kuba”.

Mu 1987 nibwo Kagame yahawe ipeti rya Major mu ngabo za Uganda. Icyo gihe yatangiye ubuzima bushya bwo kuva mu ngabo zari inyeshyamba, ahubwo aba umwe mu bayobozi bo mu ngabo za Uganda nk’umusirikare w’icyitegererezo. Icyo gihe u Rwanda rwari ruri hafi yo kugwa mu icuraburindi rya Jenoside yakorewe Abatutsi, yategurwaga n’ubuyobozi bubi bwa Perezida Habyarimana, yaje no guhagarikwa n’ubundi na Perezida Kagame n’ingabo yari ayoboye.

Inyubako ya Kigali Convention Centre ni umwe mu mishinga ihenze yazamuye agaciro k’u Rwanda mu ruhando mpuzamahanga

Kabagambe avuga ko mu myaka yakurikiye Jenoside yakorewe Abatutsi yaranzwe n’imibereho itoroshye kubera ko u Rwanda rwari rumaze gushegeshwa na Jenoside, gusa ntibyatinze kuko kubera imiyoborere ya Perezida Kagame, hanabayeho iterambere rikomeye.

Ntawashidikanya ko kurahira kwa Perezida Kagame uyu munsi muri Sitade Amahoro, ari indi sura nshya u Rwanda rwerekejemo mu ruhando mpuzamahanga ruyobowe na Perezida Kagame.

Mu ijambo yavuze nyuma yo kurahira, Perezida Kagame yatangaje ko iyi manda nshya ari iyo gukora cyane kugira ngo Abanyarwanda bagere ku bindi byinshi byiza mu myaka iri imbere.

Ashingiye ku kuba Abanyarwanda baragaragaje ibyishimo by’uko bazatora Kagame ubwo babaga bagira bati ‘Ni wowe’ asanga mu by’ukuri atari we wenyine, ahubwo ko ari we n’Abanyarwanda bose hamwe.

Mu ijambo yavuze nyuma yo kurahirira kuzuza inshingano aherutse gutorerwa, yagize ati “Ubu rero tugomba kongera kureba imbere ahazaza. Mu myaka 30 ishize twageze kuri byinshi kandi byiza, ariko nanone haracyari byinshi tutarageraho ariko tuzageraho mu myaka iri imbere”.

Yongeyeho ati “Iyi Manda nshya rero ni intangiriro yo gukora ibirenze kugira ngo ibyo twifuza tubigereho. Kuki se n’ubundi tutarenza ku byo twakoze? Kubitekereza ntabwo ari ukurota birashoboka, bizashoboka, twabikora kandi tuzabikora, icy’ingenzi muri byose turi hamwe turi umwe kandi ndagira ngo mbashimire cyane kongera kumpa icyizere ariko kandi munacyinshyigikiramo”.

Perezida Kagame yavuze ko Abanyarwanda bamuhaye amahirwe y’icyizere cyo kubakorera kandi ko ibyo bifuza byose bizagerwaho, bityo ko mu by’ukuri hari byinshi bagomba gukomeza gukemura no guhuriraho, kandi icyo cyizere bamufitiye na bo akaba akibafitiye.

Perezida Kagame yavuze ko ibihe byo kwamamaza byari ibyo kwishima, bigaragaza ko Abanyarwanda banyuzwe, bikagaragarira muri Miliyoni z’Abanyarwanda bitabiriye kwamamaza kandi bakanatora neza, atari mu mibare gusa ahubwo birenze ibyabonywe n’amaso.

Ati “Ukuri kurivugira, Abanyarwanda twagaragaje ubumwe n’intego duhuriyeho yo kwigenera ahazaza hacu, iki ni cyo tumaze imyaka yose ishize duharanira”.

Yashimiye abashyitsi bavuye kure na hafi bakaza kwifatanya na we mu byishimo byo kurahirira kuyobra Abanyarwanda, kandi ko bigaragaza imibanire myiza y’ibihugu baturutsemo n’u Rwanda, kandi abenshi bakaba bazi neza urugendo u Rwanda rwanyuzemo mu myaka 30 ishize.

Yavuze ko ibikorwa byo kwiyamamaza byagenze neza kandi Abanyarwanda bitabira amatora, bikaba bigaragaza uko bahisemo uko bifuza ahazaza h’Igihugu mu myaka izaza, kandi ko Politiki y’u Rwanda ibereye Umuryango Nyarwanda.

Yagize ati “Mu myaka 30 ishize u Rwanda rwagerageje gukora byinshi kandi byarakozwe kurusha uko byari biteganyijwe, bivuze ko ahashize h’u Rwanda hagaragaje amateka mabi ariko u Rwanda rwabirenzeho rurakora cyane”.

Ku bijyanye n’umutekano wo mu Karere u Rwanda ruherereyemo, Perezida Kagame yavuze ko amahoro atizana kuko ubundi bisaba gukora ibikwiye mu buryo burambye ngo agerweho, ibyo bikaba ntawe ukwiye kumva ko abantu babona amahoro igihe hatubahirijwe ibisabwa.

Yagize ati “Abantu bagomba kugira aho bahurira kugira ngo amahoro aboneke, ntabwo wabyuka mu gitondo ngo uvuge ngo amahoro araboneka muri ubu buryo, hakwiye kubaho inama no kugira ibyo baganiraho, iki ni igihe cyo gutekereza Isi tuzaraga abana bacu kuko hari byinshi biduhuza kuruta uko tubyibwira”.

Perezida Kagame yavuze ko atari ngombwa kumva ibintu kimwe, ariko ko ari ngombwa kubaha amahitamo ya buri wese, kuko bitagishoboka ko ibihugu by’ibihangange bigena ahazaza h’ibihugu bikiyubaka, kandi ngo ntibikwiye nubwo byaba bituruka ku gitutu.

Ati “Ni nk’uko tutakwemera akarengane aho gaturuka hose haba kuri Afurika, twebwe Abanyafurika, twarwanyije akarengane kuva kera ntabwo dukeneye kwigishwa uko tubikora, kandi tugomba kwemera ko dukeneye kujyanisha Politiki yacu n’uburyo bw’ibyifuzo by’abaturage bacu”.

Yavuze ko icy’ingenzi ari uko abaturage babaho mu buryo bubahesha agaciro kandi ko ari ihame kutirengagiza izo nshingano, kuva igihe Afurika Yunze Ubumwe yavukiye ku kubaka ahazaza heza humvikanisha ijwi ry’Abanyafurika.

Perezida Kagame yavuze ko ari ngombwa gufata inshingano zo gushakira umuti ibibazo by’urubyiruko kandi ko ari ngombwa gufata ingamba ziteza bose imbere, kuko Afurika ari igicumbi kimwe cy’umuco w’amateka.

Stade Amahoro yari yakubise yuzuye

Kurikira ibindi muri izi Videwo:

Videwo: Richard Kwizera & Salomo George

Umuhango nyirizina wo kurahira wabaye mu masaha y’igicamunsi kuri iki Cyumweru, uyoborwa na Perezida w’Urukiko rw’Ikirenga, Dr. Ntezilyayo Faustin.

Perezida Kagame wari uherekejwe na Madamu Jeannette Kagame, afashe ku ibendera n’ukuboko kwe kw’ibumoso, yarahiye ati “Jyewe Kagame Paul, ndahiriye u Rwanda ku mugaragaro ko ntazahemukira Repubulika y’u Rwanda, ko nzakurikiza nkanarinda Itegeko Nshinga n’andi mategeko, ko nzakorana umurava imirimo nshinzwe, ko nzaharanira amahoro n’ubusugire bw’Igihugu, ko nzashimangira ubumwe bw’Abanyarwanda, ko ntazigera nkoresha ububasha mpawe mu nyungu zanjye bwite, ko nzaharanira ibyagirira Abanyarwanda bose akamaro. Nintatira iyi ndahiro nzabihanirwe n’amategeko. Imana ibimfashemo.”

Ni indahiro yakiriwe n’amashyi menshi y’abari bari muri Stade Amahoro, bishimira ko inshingano bamutoreye zo gukomeza kuyobora u Rwanda azemeye mu ruhame, abinyujije mu ndahiro.

Imbere ya Perezida w’Urukiko rw’Ikirenga, Perezida Kagame yashyize umukono ku nyandiko y’inshingano amaze kurahirira zo kuyobora u Rwanda muri manda y’imyaka itanu iri imbere

Nyuma yo gushyira umukono ku ndahiro, Perezida w’Urukiko rw’Ikirenga, Dr. Ntezilyayo Faustin, yashyikirije Perezida Kagame ibirango by’Igihugu bigizwe n’Itegeko Nshinga, ibendera n’ikirangantego cya Repubulika y’u Rwanda.

Ingabo z’u Rwanda zashimiye Umukuru w’Igihugu akaba n’Umugaba w’Ikirenga w’Ingabo z’u Rwanda, kuko ibyo bakenera mu kazi kabo abibagezaho

Umugaba Mukuru w’Ingabo z’u Rwanda, General Mubarakh Muganga, yashyikirije Perezida Kagame akaba n’Umugaba w’Ikirenga w’Ingabo z’u Rwanda, inkota n’ingabo nk’ibimenyetso byo kurinda ubusugire bw’Igihugu.

Perezida Kagame yakiriye n’Indirimbo y’Igihugu nka kimwe mu birango by’Igihugu. Mbere y’uko iyo ndirimbo yubahiriza Igihugu icurangwa, ingabo zarashe imizinga inshuro 21 nk’ikimenyetso cya gisirikare cy’icyubahiro mu bihabwa Umukuru w’Igihugu.

Babinyujije mu karasisi, banditse inyuguti C IN C (Commander In Chief), bivuze Umugaba w’Ikirenga w’Ingabo

Kurikira ibindi muri izi Videwo:

Videwo: Richard Kwizera & Salomo George

Amafoto: Eric Ruzindana/Kigali Today & Ibiro by’Umukuru w’Igihugu

Abanyarwanda benshi baherutse kugaragaza ko bishimiye gukomeza kuyoborwa na Perezida Kagame kandi ko bamufitiye icyizere, aho babigaragaje bamuhundagazaho amajwi angana na 99,18% mu matora y’Umukuru w’Igihugu yabaye tariki 14 na 15 Nyakanga 2024.

Kuri iki Cyumweru, abatuye i Kigali no mu tundi Turere, berekeje kuri Sitade Amahoro yavuguruwe ndetse ikongererwa ubushobozi, aho yakira ababarirwa mu bihumbi 45, bakaba baje kwirebera imbonankubone Perezida Kagame yongera kurahirira kubageza ku byiza byiyongera ku byo yagejeje ku Banyarwanda mu myaka ishize.

Bamwe mu bavuganye n’itangazamakuru bavuze ko bataryamye mu ijoro rishyira kuri iki Cyumweru kuko badashobora kuryama batarangije ubukwe bateguye.

Bamwe kandi bavuze ko bafata amatora y’u Rwanda nk’ubukwe, naho kurahira bikaba gutwikurura ari byo bifuza gukora kugira ngo basubire mu ngamba z’ibikorwa byo kubaka Igihugu no kugiteza imbere.

Si abanyarwanda gusa baje kwifatanya na Perezida Kagame muri ibi birori, kuko Abakuru b’Ibihugu na za Guverinoma 22, ba Visi Perezida batatu b’Ibihugu, ba Minisitiri b’Intebe babiri, Minisitiri w’Intebe Wungirije umwe, ba Perezida babiri b’Inteko zishinga Amategeko, Abayobozi batanu b’Imiryango Mpuzamahanga ndetse n’Imiryango yo mu Karere, n’izindi ntumwa nyinshi zitandukanye, na bo bitabiriye ibi birori.

Mu banyacyubahiro bitabiriye ibi birori harimo Andry Rajoelina wa Madagascal, Wavel Ramkalawan wa Seychelles, Dr William Samoei Ruto wa Kenya, João Lourenço wa Angola, Denis Sassou N’guesso wa Congo-Brazzaville, Gen Mamadi Doumbouya wa Guinée-Conakry, Gen. Clotaire Oligui Nguema wa Gabon, Faustin-Archange Touadéra wa Repubulika ya Santarafurika, Philippe Nyusi wa Mozambique, Perezida Sahle-Work Zewde wa Ethiopia, Samia Suluhu Hassan wa Tanzania, Ismaïl Omar Guelleh wa Djibouti, Hassan Cheikh Mohamoud wa Somalia, Salva Kiir Mayardit wa Sudani y’Epfo, Gen Abdel Fattah al-Burhane wa Sudani, Umwami Mswati III wa Eswatini, Perezida Mokgweetsi Masisi wa Botswana, Hakainde Hichilema wa Zambia, Emmerson Mnangagwa wa Zimbabwe, Perezida Nana Akufo-Addo wa Ghana, Umaro Sissoco Embaló wa Guinée-Bissau, Faure Essozimna Gnassingbé wa Togo.

Uretse abakuru b’ibihugu, hari n’abahagarariye ibihugu byabo barimo Maropene Ramokgopa Minisitiri w’Igenamigambi wa Afurika y’Epfo, Ousmane Sonko Minisitiri w’Intebe wa Sénégal, Jessica Rose Epel Alupo Visi-Perezida wa Uganda uri kumwe n’Umugaba Mukuru w’Ingabo za Uganda, Gen Muhoozi Kainerugaba, Patrice Trovoada Minisitiri w’Intebe wa Sao Tomé, Abdoulaye Diop w’Ububanyi n’Amahanga wa Mali, Olusegun Obasanjo wahoze ari Perezida wa Nigeria, Tiémoko Meyliet Koné Visi-Perezida wa Côte d’Ivoire, Ibrahim Boughali Perezida w’Inteko Ishinga Amategeko ya Algérie, Moussa Faki Mahamat Perezida wa Komisiyo y’Umuryango wa Afurika yunze Ubumwe na Louise Mushikiwabo Umunyamabanga Mukuru w’Umuryango Mpuzamahanga w’Ibihugu bikoresha ururimi rw’Igifaransa.

Tariki 18 Kanama 2017 ubwo Perezida Kagame aheruka kurahirira kuyobora u Rwanda, yatangaje ko gukorera Abanyarwanda ari ishema, ashima icyizere bakomeza kumugaragariza.

Yagize ati “Ndagira ngo mbashimire by’umwihariko, icyizere mwongeye kungirira. Ikiruta ariko, ni icyizere mwifitiye ubwanyu n’ikiri hagati yacu. Gukomeza kubakorera, ni ishema ryinshi kuri njye."

Bimwe mu byo Abanyarwanda bashimira Perezida Kagame harimo uburyo yagura umubano w’u Rwanda n’amahanga, ndetse u Rwanda akaruhesha ishema ku rwego mpuzamahanga. Abanyarwanda kandi bamushimira uruhare rwe mu mutekano u Rwanda rufite, kugeza ubwo rufasha ibindi bihugu by’amahanga kugarura umutekano muri ibyo bihugu.

Abahagarariye ibihugu byabo mu Rwanda bageze kuri Stade Amahoro ahagiye kubera Umuhango wo kwakira Indahiro ya Perezida wa Repubulika Paul Kagame

Icyimpaye Rosette benshi bamumenye ubwo yaserukanaga ikanzu y’umweru y’ubukwe mu gihe cyo kwiyamamaza. Ubu nabwo mu kurahira yaserukanye ikanzu iri mu mabara y’ibendera ry’Igihugu

Ku munsi wo gusoza ibikorwa byo kwiyamamaza i Gahanga muri Kicukiro ni uko yari yaserutse

Umukazana Germaine, umunyamakuru wa KT Radio (wambaye imyenda itukura) ni umwe mu bashyushyarugamba muri ibi birori

Umuhanzi King James asusurutsa abitabiriye ibirori

Akarasisi kari mu byashimishije abari muri Stade Amahoro

Amwe mu mafoto y’Abayobozi bakuru b’Ibihugu na Guverinoma bitabiriye uyu muhango:

Perezida wa Repubulika Paul Kagame na Madamu Jeannette Kagame ubwo bari bageze muri Stade Amahoro

Amafoto: Eric Ruzindana/Kigali Today, RBA & Ibiro by’Umukuru w’Igihugu

Bamwe baraye bahageze ku wa Gatandatu tariki 10 Kanama 2024, abandi bahagera kuri iki Cyumweru ku munsi nyirizina w’ibirori.

Perezida wa Zimbabwe, Emmerson Mnangagwa ari mu bageze i Kigali ku mugoroba wo ku wa Gatandatu, ndetse agirana ibiganiro na Perezida Kagame, byibanze ku kurushaho kwagura ubutwererane n’imikoranire myiza isanzwe hagati y’u Rwanda na Zimbabwe.

Perezida wa Santarafurika, Faustin-Archange Touadéra, na we yaraye ageze i Kigali aho yitabiriye ibirori by’Irahira rya Perezida Paul Kagame. Ubwo yari ageze ku kibuga mpuzamahanga cy’indege i Karombe, yakiriwe n’Umunyamabanga wa Leta muri Minisiteri y’Uburezi, Irere Claudette.

Perezida w’Inteko Ishinga Amategeko ya Algeria, Ibrahim Boughali, ni we waje nk’intumwa y’icyo gihugu mu birori byo kurahira kwa Perezida Paul Kagame.

Perezida wa Ghana, Nana Akufo-Addo, na we yageze i Kigali aho yitabiriye ibirori by’Irahira rya Perezida Paul Kagame.

Ku Kibuga cy’Indege Mpuzamahanga cya Kigali, yakiriwe na Minisitiri w’Imari n’Igenamigambi, Yusuf Murangwa.

Perezida wa Togo, Faure Essozimna Gnassingbé, na we ari i Kigali aho yitabiriye ibirori by’Irahira rya Perezida Kagame. Ku Kibuga cy’Indege Mpuzamahanga cya Kigali yakiriwe na Minisitiri w’Ububanyi n’Amahanga n’Ubutwererane, Ambasaderi Olivier Nduhungirehe.

Visi Perezida wa Uganda, Jessica Alupo, yageze i Kigali anyuze ku Mupaka wa Gatuna. Yakiriwe n’Umunyamabanga wa Leta muri Minisiteri y’Ibidukikije, Dr. Claudine Uwera wari kumwe na Ambasaderi wa Uganda mu Rwanda, Maj Gen (Rtd) Robert Rusoke.

Umwami wa Eswatini, Mswati III na we yageze i Kigali aho yitabiriye ibirori by’Irahira rya Perezida Paul Kagame. Yaserutse mu myambaro gakondo ijyanye n’umuco w’icyo gihugu. Ageze ku Kibuga cy’Indege Mpuzamahanga cya Kigali, yakiriwe na Minisitiri w’Ububanyi n’Amahanga n’Ubutwererane, Amb. Olivier Nduhungirehe.

Visi Perezida wa Malawi, Dr Michael Usi , na we yageze muri gahunda y’ibirori by’Irahira rya Perezida Paul Kagame.

Ku Kibuga cy’Indege Mpuzamahanga cya Kigali yakiriwe n’Umunyamabanga wa Leta muri Minisiteri y’Uburezi, Irere Claudette.

Visi Perezida wa Malawi, Dr Michael Usi (uri imbere wahuje ibiganza) yaserukiye igihugu cye mu irahira rya Perezida Kagame

Olusegun Obasanjo wabaye Perezida wa Nigeria ubwo yari ageze i Kigali mu birori by’Irahira rya Perezida Paul Kagame, yakiriwe na Minisitiri w’Ubutabera, Dr Ugirashebuja Emmanuel.

Biteganyijwe ko ibirori byo kurahira kwa Perezida Kagame byitabirwa n’Abakuru b’Ibihugu na za Guverinoma 22, ba Visi Perezida batatu b’Ibihugu, ba Minisitiri b’Intebe babiri, Minisitiri w’Intebe Wungirije umwe, ba Perezida babiri b’Inteko zishinga Amategeko, Abayobozi batanu b’Imiryango Mpuzamahanga ndetse n’Imiryango yo mu Karere, n’izindi ntumwa nyinshi zitandukanye.

Kureba abandi banyacyubahiro bitabiriye ibi birori, kanda HANO

Reba ibindi muri izi Videwo:

Videwo: Richard Kwizera

Amafoto: RBA

Umuvugizi wa Polisi y’u Rwanda, ACP Boniface Rutikanga

Umuvugizi wa Polisi y’u Rwanda, ACP Boniface Rutikanga, yateguje Abanyarwanda ko imwe mu mihanda yo mu Mujyi wa Kigali ifungwa mu rwego rwo koroshya ingendo z’abashyitsi bitabira umuhango wo kurahira kwa Perezida wa Repubulika.

Ati “Turizeza Abanyarwanda ko ibintu biteguye neza kandi abantu bose batumiwe kujya kuri Stade Amahoro bagerayo nta nkomyi.”

ACP Rutikanga, yijeje Abanyarwanda ko umutekano ari wose. Yatangaje ko umuhanda uturuka ku kibuga i Kanombe – Giporoso- Gisimenti- Kwa Lando- Kigali Convention Centre (KCC) Gishushu ugakomeza kugera Camp Kigali ukoreshwa n’abayobozi.

Abatwara ibinyabiziga barajya bakoresha indi mihanda isigaye kandi haraba hari abapolisi babayobora mu yindi mihanda bagomba gucamo.

Umuvugizi wa Polisi y’u Rwanda, ACP Boniface Rutikanga, yateguje Abanyarwanda ko imwe mu mihanda yo mu Mujyi wa Kigali izafungwa mu rwego rwo koroshya ingendo z’abashyitsi bazitabira umuhango wo kurahira kwa Perezida wa Repubulika uzaba ku Cyumweru. #RBAAmakuru pic.twitter.com/ckCgruXbwv

— Rwanda Broadcasting Agency (RBA) (@rbarwanda) August 10, 2024

Umujyi wa Kigali na wo watangaje ibyerekeranye n’ikoreshwa ry’imihanda kuri iki Cyumweru, usaba abakoresha imihanda yo mu Mujyi wa Kigali kwihanganira guhagarikwa by’igihe gito mu gihe abashyitsi baba barimo gutambuka.

Akigera ku Kibuga cy’Indege Mpuzamahanga cya Kigali, General Muhoozi Kainerugaba yakiriwe n’Umugaba Mukuru w’Ingabo z’u Rwanda, Gen Mubarakh Muganga, nyuma yaho yakirwa n’abandi barimo General (Rtd) James Kabarebe.

General Muhoozi Kainerugaba, Umugaba Mukuru w’ingabo za Uganda akaba n’umuhungu wa Perezida Yoweri Kaguta Museveni, ni umwe mu bishimiwe cyane ubwo yasesekaraga i Kigali, dore ko akunze kuvuga ko ari ahandi hantu we afata nko mu rugo, ndetse Abanyarwanda akabafata nk’abavandimwe be.

Ku wa Mbere tariki 05 Kanama 2024 nibwo yatangaje ko azitabira irahira rya Perezida wa Repubulika, Paul Kagame abinyujije ku rubuga rwa X, avuga ko yishimiye gutangaza ko mu gihe cya vuba azaza gusura u Rwanda Igihugu cye cya kabiri.

Yagize ati “Nzitabira ibirori by’irahira rya Afande Kagame, sinshidikanya ko ari byo birori bizaba bikomeye muri Afurika uyu mwaka. Urukundo nirwogere, (Rukundo Egumeho)”.

General Kainerugaba, yakunze kuvuga ko Perezida Kagame ari se wabo (Uncle) ndetse ubwo aheruka mu Rwanda Perezida Kagame akaba yaramugabiye inka z’inyambo.

Yibukirwa cyane ku kuzahura umubano hagati y’Ibihugu byombi dore ko wari warajemo agatotsi ndetse bamwe mu Banyarwanda bari bafite imirimo bakorera muri Uganda bakajya bafatwa bagafungwa ndetse bakanakorerwa iyicarubozo, ariko ibyo byose buza guhagarara.

General Kainerugaba ari mu bahabwa amahirwe yo gusimbura se Museveni ku butegetsi, aho akunze kugaragara mu bikorwa bya Politiki ndetse akagira n’abiganjemo urubyiruko benshi bamushyigikiye muri Uganda.

Reba uko byari byifashe ubwo Gen Muhoozi yasesekaraga i Kigali:

Reba ibindi muri izi Videwo:

Videwo: Richard Kwizera

Ubwo yari ageze ku Kibuga cy’Indege Mpuzamahanga cya Kigali, Perezida Salva Kiir yakiriwe na Gen (Rtd) James Kabarebe, Umunyamabanga wa Leta muri Minisiteri y’Ububanyi n’Amahanga ushinzwe Ubutwererane bw’Akarere.

Perezida Paul Kagame ararahirira kongera kuyobora u Rwanda muri manda y’imyaka itanu kuri iki Cyumweru tariki 11 Kanama 2024 nyuma yo gutsinda amatora yabaye tariki 14 na 15 Nyakanga 2024, ku majwi 99.18%.

Ni umuhango utegerejwe na benshi kuko Abanyarwanda bamugaragarije ko bishimiye kongera kuyoborwa na we kugira ngo akomeze abagezeho iterambere rirambye.

Ibi birori bibera muri Stade Amahoro biritabirwa n’abayobozi ndetse n’abanyacyubahiro batandukanye baturutse ku migabane itandukanye ndetse n’Abanyarwanda b’ingeri zose n’inshuti z’u Rwanda.

Perezida wa Guinée-Bissau, Umaro Sissoco Embaló, na we yageze i Kigali aho yitabiriye Irahira rya Perezida Paul Kagame.

Ubwo yari ageze ku Kibuga cy’Indege Mpuzamahanga cya Kigali, Perezida Umaro Sissoco Embaló yakiriwe na Minisitiri w’Imari n’Igenamigambi, Yusuf Murangwa.

Umugaba Mukuru w’Ingabo za Uganda, General Muhoozi Kainerugaba, yageze i Kigali ku gicamunsi cyo kuri uyu wa Gatandatu, aho yitabiriye ibirori by’Irahira rya Perezida Paul Kagame.

Reba uko byari byifashe muri iyi video:

Akigera ku ku Kibuga cy’Indege Mpuzamahanga cya Kigali, General Muhoozi Kainerugaba yakiriwe n’Umugaba Mukuru w’Ingabo z’u Rwanda, Gen Mubarakh Muganga.

Perezida wa Zimbabwe, Emmerson Mnangagwa, na we kuri uyu wa Gatandatu yahagurutse i Harare yerekeza i Kigali, aho yitabiriye ibirori by’Irahira rya Perezida Paul Kagame.

Ubwo yageraga ku Kibuga cy’Indege Mpuzamahanga cya Kigali, Perezida Mnangagwa yakiriwe n’Umuyobozi Mukuru w’Urwego rw’Igihugu rw’Iterambere, RDB, Francis Gatare.

Minisitiri w’Intebe wa Sénégal, Ousmane Sonko, na we yageze i Kigali, akaba yaje ahagarariye Perezida Bassirou Diomaye Faye mu birori by’Irahira rya Perezida Paul Kagame.

Visi Perezida wa Côte d’Ivoire, Tiemoko Meyliet Koné, na we yageze mu Rwanda aho yitabiriye ibirori by’Irahira rya Perezida Paul Kagame, yakirwa n’Umunyamabanga wa Leta muri Minisiteri y’Uburezi, Irere Claudette.

Perezida w’Inzibacyuho wa Gabon, Brice Clotaire Oligui Nguema, na we yageze i Kigali aho aje kwifatanya n’Abanyarwanda n’inshuti z’u Rwanda mu birori by’Irahira rya Perezida Paul Kagame.

Ku Kibuga cy’Indege Mpuzamahanga cya Kigali yakiriwe na Minisitiri w’Ububanyi n’Amahanga n’Ubutwererane, Amb. Olivier Nduhungirehe.

Minisitiri w’Intebe wa São Tomé et Príncipe, Patrice Émery Trovoada, yageze i Kigali aho yitabiriye ibirori by’Irahira rya Perezida Paul Kagame.

Ku Kibuga cy’Indege Mpuzamahanga cya Kigali, yakiriwe na Minisitiri w’Imari n’Igenamigambi, Yusuf Murangwa.

Perezida wa Guinée, Général Mamadi Doumbouya na we yageze i Kigali ku mugoroba wo kuri uyu wa Gatandatu, yakirwa na Minisitiri w’Umutekano mu Gihugu, Dr Vincent Biruta.

Perezida wa Seychelles, Wavel Ramkalawan, na we witabiriye Irahira rya Perezida Paul Kagame, kuri uyu wa Gatandatu yasuye Urwibutso rwa Jenoside rwa Kigali ruri ku Gisozi, yunamira inzirakarengane zazize Jenoside yakorewe Abatutsi.

Muri rusange biteganyijwe ko ibirori byo kurahira kwa Perezida Kagame byitabirwa n’Abakuru b’Ibihugu na za Guverinoma 22, ba Visi Perezida batatu b’Ibihugu, ba Minisitiri b’Intebe babiri, Minisitiri w’Intebe Wungirije umwe, ba Perezida babiri b’Inteko zishinga Amategeko, Abayobozi batanu b’Imiryango Mpuzamahanga ndetse n’Imiryango yo mu Karere, n’izindi ntumwa nyinshi zitandukanye.

Kureba abandi banyacyubahiro bitabiriye ibi birori, kanda HANO

Reba ibindi muri izi Videwo:

Videwo: Richard Kwizera

Amafoto: RBA

Ubwo Perezida Kagame yarahiriraga kuyobora u Rwanda tariki 18 Kanama 2017

Ni nyuma y’uko agiriwe icyizere n’Abanyarwanda bakamuhundagazaho amajwi mu matora yabaye tariki 14 na 15 Nyakanga 2024 akayatsinda n’amajwi 99.18%, atsinze abo bari bahatanye barimo Dr. Frank Habineza w’ishyaka DGPR hamwe na Philippe Mpayimana wari umukandida wigenga kuri uwo mwanya.

Ni ku nshuro ya kane Perezida Paul Kagame atorewe kuyobora u Rwanda kuko yatowe bwa mbere n’abaturage mu 2003, ayobora manda y’imyaka irindwi yarangiye mu 2010. Yongeye gutorwa muri manda y’imyaka irindwi yagejeje mu 2017, yongera kugirirwa icyizere n’abaturage bamutorera indi manda y’iyo myaka yagejeje mu 2024, aho hose akaba yaragiye akora indahiro mu muhango wabaga witabiriwe n’Abanyarwanda hamwe n’inshuti z’u Rwanda.

Bimwe mu by’ingenzi biba bikubiye mu ndahiro ya Perezida wa Repubulika, birimo kudahemukira Repubulika y’u Rwanda, gukurikiza Itegeko Nshinga n’andi mategeko, kurengera Itegeko Nshinga, hamwe no gushimangira Ubumwe bw’Abanyarwanda nta vangura iryo ari ryo ryose.

Ubwo aheruka kurahirira kuyobora u Rwanda mu mwaka wa 2017, Perezida Paul Kagame yarahijwe na Prof. Sam Rugege wari Perezida w’urukiko rw’Ikirenga icyo gihe.

Mu kiganiro yagiranye na RBA tariki 09 Kanama 2024, Prof. Sam Rugege yavuze ko umuhango wo kurahira kwa Perezida wa Repubulika ufite igisobanuro gikomeye.

Yagize ati “Uwo muhango ufite igisobanuro cy’uko umuyobozi yaba Perezida wa Repubulika yaba abandi bayobozi bakuru kugera ku bayobozi b’inzego z’ibanze, itegeko riteganya ko bagomba kurahira mbere yo gutangira imirimo yabo, ikigamijwe ni uko urahira agomba kugaragaza ko yumva neza uburemere bw’inshingano ahawe, kandi agasezeranya Abanyarwanda ko izo nshingano azazisohoza neza, azakorana umurava kugira ngo azigereho anazirenze.”

Nubwo mu Rwanda bidakorwa ariko usanga mu bihugu byinshi umukuru w’Igihugu arahira afashe ku gitabo kirimo Korowani (Qur’an) ku bafite imyemerere ishingiye ku idini ya Islam na Biliya ku bo imyemerere yabo yemera Kirisitu (Christ).

Prof Rugege avuga ko impamvu mu Rwanda bidakorwa ari uko nta tegeko ribisaba.

Ati “Icya mbere ntabwo bisabwa n’itegeko, Igihugu cy’u Rwanda ntabwo gishingiye ku idini, ni Leta idashingiye ku myemerere y’idini iryo ari ryo ryose. Nubwo amadini yemewe, nta dini rifite uburemere bwo kuba ryayobora imikorere y’Igihugu.”

Nyuma yo kurahira k’Umukuru w’Igihugu ahita ahabwa ibirango by’Igihugu birimo Itegeko Nshinga, Ibendera ry’Igihugu, Ikirangantego hamwe n’Inkota n’Ingabo, hagamijwe kumugaragariza inshingano ze.

Guhabwa Itegeko Nshinga bisobanura ko ari ryo risumba ayandi mu gihugu, kandi ko buri wese aba agomba kurikurikiza harimo na Perezida nubwo aba ari we muyobozi mukuru w’Igihugu, ariko aba agomba gukurikiza ibyo ritegeka, kuko itegeko rivuga ko igikorwa cyose kinyuranyije n’Itegeko Nshinga nta gaciro kiba gifite.

Ibendera ry’Igihugu ahabwa ni ikimenyetso cy’Igihugu, aho agiye hose akarihabona biba bivuze ko Igihugu gihari, bikaba ari ikimenyetso gihuza abenegihugu kikabatera ishema, bikaba bihuje n’intego y’Igihugu yo kugira ubumwe bw’Abanyarwanda.

Ikirangantego ahabwa ni ikimenyetso cy’ingenzi ku gihugu, cyane cyane ku mikoranire n’ibindi bihugu, kuko kiba kigomba gushyirwa ku nyandiko n’impapuro bahererekanya, kikaba n’ikimenyetso kigaragaza ko inyandiko kiriho yemewe mu gihugu kubera ko iba ivuye mu buyobozi bwemewe na Leta.

Inkota n’Ingabo bihabwa umukuru w’Igihugu iyo amaze kurahira bijyanye no gusigasira amahoro no guharanira ubusugire bw’Igihugu, bikagaragarira abenegihugu ko ari we mugaba w’ikirenga ushinzwe ubusugire bw’Igihugu no kukirinda.

Biteganyijwe ko umuhango wo kurahira kwa Perezida Paul Kagame ubera kuri Stade Amahoro ku Cyumweru tariki 11 Kanama 2024 ukitabirwa n’abayobozi bakuru b’Ibihugu bitandukanye, abayobozi ba za Guverinoma, n’abandi bayobozi bakuru mu nzego zitandukanye.