Israel Mbonyi ucuruza ’Switcoff’ avuga ko nk’urubyiruko, kwitabira Expo ari umwanya mwiza wo kugaragaza ko bashoboye

Iri murikabikorwa ryatangiye ku wa 25 Nyakanga 2024, rikaba ryaritabiriwe n’abamurika 448, barimo 329 bo mu Rwanda na 119 baturutse mu bihugu byo hanze.

Urugaga rw’Abikorera mu Rwanda (PSF), rugaragaza ko nibura ku munsi abantu babarirwa mu 5,000 ari bo binjira muri iri murikabikorwa, baje guhaha ndetse no kureba ibihamurikirwa.

Israel Mbonyi (si umuhanzi) akaba acuruza ikinyobwa cya ‘Switch Off’, ni ubwa mbere yitabiriye iri murikabikorwa aje kumurika icyo kinyobwa. Avuga ko intego nyamukuru yatumye yitabira imurikabikorwa ari ukugira ngo abantu bamenye ikinyobwa acuruza.

Ati “Twebwe impamvu twitabiriye ni ukugira ngo abantu barusheho kumenya iki kinyobwa, kuko bakeya babashije kukimenya baragikunze. Ni yo mpamvu twitabiriye iyi Expo kugira ngo abantu bose barusheho kumenya ko iki kinyobwa gihari kandi ari cyiza”.

Mbonyi yongeraho ko nk’urubyiruko uyu ari umwanya mwiza Leta y’u Rwanda iba yabahaye, bakabasha kugaragariza abaturarwanda ndetse n’abanyamahanga ibyo bakora.

Avuga kandi ko aya mahirwe anatuma babasha kugaragaza ko urubyiruko rwakuye amaboko mu mifuka bagakora, bakaba bafite ibikorwa n’imishinga ibyara inyungu babasha kumurikira abandi.

Ati “Aya ni amahirwe akomeye tugomba guharanira kudatakaza na rimwe, ndetse tukarushaho kujya twitabira amamurika nk’iringiri kandi dufite ibyo tumurika kugira ngo bibashe kugera hirya no hino. Amahirwe Igihugu kiba cyaduhaye ngo tubashe kwigaragaza tuba tuyabyaje umusaruro”.

Cyiza Rogers na we ni urubyiruko, akaba ari umunyabugeni ushushanya. Ni umwuga avuga ko yatangiye mu mwaduko w’icyorezo cya Covid-19, kandi ubu bikaba ari byo bimutunze.

Cyiza na we agaragaza ko nk’urubyiruko kwitabira imurikabikorwa bibafungura mu bitekerezo, ukaba kandi umwanya mwiza wo kugaragariza abantu ko urubyiruko rushoboye.

Cyiza Rogers avuga ko iminsi amaze yitabiriye Expo yungutse byinshi yakuye ku bantu bamusuye

Ati “Hari ibyo ngezeho, ariko hari urundi rugendo rurerure numva nshaka gukomeza nkagenda. Nk’ubu iminsi maze muri Expo, hari byinshi nigiye ku bantu nahuye na bo, ku buryo numva mfite inyota ko irangira nkajya gukora ibindi byinshi kandi byiza”.

Uretse uru rubyiruko rw’Abanyarwanda, Sana Aziza Ombeni, na we ni urubyiruko akaba yaraturutse muri Tanzania aje kumurika imyambaro ikorerwa muri icyo gihugu.

Kimwe na bagenzi be b’Abanyarwanda, Ombeni na we ashimira Igihugu cy’u Rwanda uburyo cyorohereza urubyiruko gukora ishoramari mu bikorwa bibyara inyungu, kandi na bo bagahabwa umwanya wo kugaragaza icyo bashoboye mu ruhando mpuzamahanga.

Sana Aziza Ombeni waturutse muri Tanzania, arashimira u Rwanda rworohereza abanyamahanga kuza gucururiza muri Expo

Agira ati “Ni inshuro ya gatatu nitabiriye iyi Expo, nkora urugendo rurerure nza hano, kuko nzi ko uyu ari umwanya mwiza wo kwerekana ibyo nkora. Aha haba hahuriye abantu benshi baturutse mu bihugu bitandukanye. Turashimira Leta y’u Rwanda yashyizeho uyu mwanya. Nzakomaza kujya nza n’izindi nshuro nyinshi”.

Ubwo yafunguraga iri murikabikorwa ku mugaragaro, Minisitiri w’Ubucuruzi Prof. Jean Chrysostome Ngabitsinze, na we yashimangiye ko intego ari uko imurikabikorwa ryitabirwa cyane cyane n’abanyamahanga, kandi bakajya boroherezwa.

Minisitiri Ngabitsinze avuga ko Abanyamahanga bazakomeza koroherezwa

Icyo gihe yagize ati “Turifuza ko rwose abanyamahanga baza ari benshi kandi bagahabwa agaciro, kuko kuva mu mahanga ukazana imari yawe hano ukayicuruza, ni ikintu gikomeye cyane”.

Kimwe n’abandi bose bitabiriye iri murika rya 2024, uru rubyiruko na rwo rwagaragaje imbogamizi ku giciro cyo kwinjira mu imurikabikorwa, aho ubu umuntu mukuru asabwa kwishyura amafaranga 1000, na ho umwana agasabwa kwishyura amafaranga 500.

Abitabiriye iri murikabikorwa, basaba ko mu myaka izakurikira, igiciro cyasubizwa ku mafaranga 500 ku muntu mukuru, naho abana bakajya binjirira ubuntu.

Biteganyijwe ko iri murikabikorwa rya 2024 rizasozwa ku wa Kane tariki 15 Kanama 2024.

Mu gihe abantu amabuye bamwe bayafata nk’ayifashishwa mu kubaka ndetse no mubindi bikorwa bitandukanye we ayakoramo imitako akayigurisha amafaranga atubutse.

Nsengiyumava Beatrice LTD Umuyobozi wa Giti Buye Art ni umunyabugeni witabiriye imurikagurisha ry’uyu mwaka avuga ko ibihangano bye abikora mu mabuye no mu biti.

Ati “ Si amabuye yose dukoramo ibi bihangano bisaba ko tubona amabuye y’urugarika kuko ariyo duconga tukayakoramo imitako itandukanye”.

Nsengiyumva avuga ko kubona igihangano kivuye mu ibuye bitoroha kuko bisaba igihe kirekire kugitunga.

Ati“Igihangano gito byibura gitwara iminsi 30 kuko imirimo myinshi tuyikoresha amaboko imashini zibikora ziracyari nke”.

Nsengiyumva avuga ko agaseke gakoze mu ibuye ry’urugarika akagurisha ibihumbi 210frw, inyoni 450frw, indege ya Rwanda Air akayigurisha ibihumbi 120frw, inzu ya kinyarwanda yo ayigurisha ibihumbi 750frw.

Ibi bihangano ariko ntibyitabirwa kugurwa n’abanyarwanda kuko usanga abenshi bavuga ko bihenzi ahubwo usanga bigurwa n’abanyamahanga.

Ati “ Amahoteri ndetse n’abanyamahanga nibo bakunze kutugurira igihe baje mu Rwanda niyo mpamvu abatugana usanga bakiri bake”.

Uretse kuba akora imitako mu mabuye arimo aramurika n’ibihangano bikoze mu biti aho arimo amaurika igitanda cya miliyoni 1 .500.000frw.

Icyo gitanda iyo ukitegereje n’amaso ubona kimeze nk’icyakozwe n’umuntu utari umufundi ariko iyo uganiriye n’umunyabueni Nsengiyumva akubwira ko aribwo buryo baba bahisemo kugikora kugira ngo kibinjirize menshi.

Ati “ Buriya nubwo ubona gikoze gutya usanga abantu benshi batakitugurira ariko amahoteri yakira ba mukererugendo baraza bakaba bakigura.

Nsengiyumva avuga ko iyo umuntu ari umunyabugeni agerageza gukora ibitandukanye n’ibisa n’ibyabandi kugira ngo agire umwihariko we akaba ariyo mpmvu yahisemo kubyaza imitako mu mabuye no mu biti.

Meya Dusengiyumva yasuye aho Umujyi wa Kigali urimo kumurikira

Mu kiganiro Umuyobozi w’Umujyi wa Kigali Dusengiyumva Samuel yagiranye na KT Radio kuri uyu wa Kabiri tariki 6 Kanama 2024 yasobanuye ko mubyo Umujyi urimo umurika ari serivise batanga ku baturage.

Ati “Hano tumurika serivise ubona ijyanye nibyo abaturage bakunda kudukeneraho n’ibijyanye n’imyubakire ndetse n’ubutaka ariko tunasobanura n’andi makuru ajyanye na serivise dutanga”.

Meya Dusengiyumva Samuel avuga ko umuturage ubagannye akeneye icyangombwa cy’ubutaka ashobora kugihabwa bitewe nuko basanze imiterere y’ikibazo afite giteye ndetse bashobora no kumubwira uburyo yakibonamo kandi vuba.

Umuyobozi w’Umujyi wa Kigali, muri icyo kiganiro yavuze kandi ko abaturage bawutuye abakundira ko bitabira gahunda za Leta kandi usanga abenshi ari abasirimu mu bintu bitandukanye.

Ati “Umuntu wese burya iyo akora icyo akunda biramushimisha iyo aririmba biramunezeza ndetse n’iyo areba ababyina aranezerwa ni abasirimu muri Rusange bazi kunezerwa mu byiza bafite”.

Umujyi wa Kigali wegeranye na serivise y’ubutaka kugira ngo ababagana bahite bakirwa bakemurirwe ikibazo

Gusa nubwo Meya Dusengiyumva abashima abanenga ko batita ku kuvugurura inyubako zabo ku gihe byibura rimwe mu gihembwe kandi ubundi ariko byagombye kugenda.

Meya mu bindi yabajijwe birimo no kuba akora siporo yasubije ko akunda kujya muri ‘Gymnastics’ kandi akunda gukuza impano z’abana be akurikije ibyo bakunda. Ati “Umubyeyi akwiye guha umwana we umwanya wo kwidagadura kandi akamenya kumufasha gukuza impano ye”.

Muri iki kiganiro yanasobanuye aho izina ‘Big Sam’ bamuhamagara ryavuye, avuga ko ryaturutse k’uwari umukoresha we.

Ati “Hari serivise imwe nakozemo nkorana n’undi witwa Samuel umuyobozi yatubaza kugira icyo tuvuga ku bitekerezo byacu tukavugira rimwe nibwo yavuze ati, ‘wowe uri Big Sam’ undi akamuhamagara Samuel, ni aho byaturutse”.

Meya Dusengiyumva yahaye ubutumwa ababyeyi muri ibi bihe by’ibiruhuko, avuga ko bakwiye kwegera abana bagatemberana ndetse aho bishoboka bagakorana siporo, yibukije kandi abatuye Umujyi wa Kigali kurangwa n’Isuku kuko mu minsi iri imbere bazaba bafite abashyitsi bagomba kubitegura bagasanga umujyi usukuye usa neza.

Ati “Tuzita ku gutunganya imihanda, ibiraro no gutunganya ibishanga bitanu biri mu mujyi wa Kigali bikamera nka kiriya dufite Nyandungu kugira ngo bizahindure isura y’umujyi ikindi ni amazu azubakwa kandi meza dushimira abashoramari bakomeje kwizera no gukorana n’Umujyi wa Kigali bagashora imari yabo mu nyubako zigezweho kandi nziza”.

Meya Dusengiyumva avuga ko igishanga kizahindurwa ari igiherereye hagati ya Kicukiro na Gasabo munsi ya UNILAK ugakomeza ukagenda ukagera Nyabugogo,Ikindi n’igishanga kiri hagati ya Kicukira na Nyarugenge cyiri ahitwa Rwampara no mu bindi bice bitandukanye hakazaba harimo inzira z’abanyamaguru, n’ibyanya byo kwidagaduriramo.

Meya w’umujyi wa Kigali yamaze impungenge abaturage bakunze kuvuga ko umujyi wa Kigali mu gihe cy’imyaka itanu uzasigara udatuwe n’umuntu uciriritse avuga ko mu mivugururire y’umujyi bizakorwa bafasha ibyiciro byose kwibona muu miturire y’umujyi.

Ati “ Mwabonye nk’amazu Leta irimo yubaka kuri Mpazi ni uburyo bwo kuvugurura umujyi ndetse no kugirango abantu bubatse amazu mu buryo butateganyijwe abashe kuhatura”.

Meya avuga ko mu gice cy’ahitwa Nyabisindu, Nyagatovu ndetse na Mpazi hose bari kuhatunganya bakahakora imihanda kugira ngo umugi use neza ndetse hakorwe n’imihanda itandukanye.

Mu nyubako zubakwa na Leta Meya yasobanuye ko abantu b’ibyiciro bitandukanye bazibonamo kuko barimo bubaka n’amacumbi ku bantu baciriritse kugira ngo babone aho bacumbika ndetse babe mu mujyi aho babasha kubona akazi bagakora bakiteza imbere.
Umuyobozi w’umujyi wa Kigali yagarutse ku mbogamizi bakunze guhura nazo ku ishyirwa mu bikorwa rya gahunda z’iterambere.

Imbogamizi yagaragaje nuko asanga ibikenerwa mu mujyi ari byinshi cyane ukurikije n’ubushobozi buhari.

Ati “ Dushyira mu bikorwa ibyihutirwa ariko bidufasha kugera no ku bindi ariko kandi abikorera nabo bagira uruhare mu bikorwa byo guteza umujyi imbere haba mu mihanda, inyubako.

Indi mbogamizi ya kabiri n’ishyirwa mu bikorwa ry’igishushanyo mbonera aho usanga hakiri abantu bubaka mu buryo bw’akajagari kandi haragenewe ibindi bikorwa.

Ati “ Muri iyi myaka itanu tuzubaka amacumbi nka kimwe mu gisubizo ku bantu bubaka badakurikije igishushanyo mbonera no kubandi badafite ubushobozi bwo kubaka inzu muri uyu mujyi. Tuzanashyira imbaraga muri gahunda za Leta mu gushyira mu bikorwa ibyo amategeko adusaba ”.

Izindi mbogamizi zibangamira iterambere ry’umujyi n’imihindagurikire y’ikirere aho usanga hari uruhare ry’umuturage rudakorwa neza kuko Leta ubwayo itafata amazi y’imvura yose umuturage atabigizemo uruhare nawe.

Ati “ Turimo turashyira imbaraga muri gahunda y’imiturire duhangana n’imihindagurikire y’ikirere tureba uko twafata amazi y’imvura dufatanyije kuko ntabwo umujyi wafata amazi hatabayeho ubufatanye n’abaturage.

Meya Dusengiyumva avuga ko umujyi wa Kigali urimo gushyira imbaraga gukorana n’abikorera kugira ngo uruhare rwabo rutume umujyi utera imbere kandi use neza.
Ibyo bizakorwa bibanda ku bikorwa bitaragerwaho ndetse bagakomeza no guhanga udushya.

Ati “ Ni byiza ko umuntu atura mu mujyi usa neza ariko akabona naho kuruhukira no gufatira ifunguro heza”.

Munyemana akora imitako n’ibikoresho mu bisigazwa by’ibiti abandi babona nk’ibidafite akamaro

Munyemana Albert ni umunyabugeni wo mu Karere ka Kicukiro ukora ibihangano mu bisigazwa by’ibiti. Iyo urebye ibihango bye usanga bifite ishusho y’inyamaswa ndetse ugasanga hari ibikozemo intebe n’ameza.

Munyemana avuga ko we agenda agafata igitsinsi cy’igiti bamwe batwara bajya gucana akagitunganya akakivanamo igihangano cy’intebe cyangwa ishusho y’inyamaswa.

Mu bintu uyu musaza w’imyaka 67 arimo kumurika usanga hari ibiti bifite amasura y’inyamaswa zirimo ingagi, n’ingona ndetse ibindi bikozemo ibikoresho bitandukanye.

Munyemana ukora ibihangano mu biti bifatwa nk’ibidafite akamaro

Umuntu iyo akibireba ntahita asobanukirwa ibyo aribyo bisaba kubyitegereza kugira ngo umenye icyo giti akamaro kacyo n’ishusho y’inyamaswa ikozemo.

Kugira ngo abashe kugera ku gihangano yifuza ngo atunganya icyo giti igihe cy’amezi atatu, ni ukuvuga kugikura aho kiri kugikuramo imyanda ndetse no kugikoramo ishusho y’ikinyabuzima yumva ashaka cyangwa gukuramo ikindi gihangano.

Mu bihangano arimo amurika uretse ibikoze mu ishusho y’ibisimba harimo ibitsinsi by’ibiti yakozemo intebe n’ameza.

Akora ameza afite amaguru ameze nk’inzovu

Iyo umubajije niba abona abaguzi avuga ko Abanyarwanda badakunze kubigura ahubwo byitabirwa no kugurwa n’abanyamahanga.

Ati “Ameza uri kureba ntabwo nayagurisha munsi ya Miliyoni imwe n’igice ndetse nta gihangano cyange kiri hano nagurisha munsi y’ibihumbi 500frw".

Munyemana avuga ko nubwo ibihangano bye bimutwara umwanya munini cyane kugira ngo abitunganye neza, binamutwara amafaranga atari make kugira ngo igiti kibashe kuvamo igihangano yagurisha.

Imitako ye ibamo amoko y’inyamaswa

Iyo arimo atunganya igihangano cye avuga ko ari we ubwe utekereza icyo ashaka kuvanamo maze agafata igihe cyo kubikora.

Ati “Nta muntu umfasha ni jyewe ubitekereza, mu gihe abandi ababona ko igitsinsi cy’igiti ari inkwi ndetse abandi bakakijugunya, jyewe nkibyazamo ibintu bitandukanye birimo imitako ndetse n’ibikoresho".

Munyemana avuga ko ibihangano bye bitarabona isoko ryagutse gusa akurikije imyaka 30 amaze abikora byabashije kumufasha kwiteza imbere binyuze mu bindi bikorwa yagiye akora mu muryango we birimo kwishura amashuri y’abana, ndetse no gukora indi mishanga iciriritse ibyara inyungu.

Abyaza bihangano mu biti bifatwa nk’ibitagira akamaro

Ameza akoze mu gitsinsi

Mu imurikagurisha ry’uyu mwaka hari kumurikwa amasafuriya ahisha ibishyimbo mu minota 40 ku muriro wa 55Frw

Umwe mu bamurika twasanze akaranga inyama mu mashini (Isafuriya) avuga ko ihisha ibishyimbo nyuma y’iminota itarenga 40, kandi igakoresha inite imwe y’amashanyarazi igurwa amafaranga y’u Rwanda 250 mu gihe kirenze amasaha atatu (Iminota 180).

Shema Albert warimo kumurika ibikoresho bikorerwa mu Budage, avuga ko kuba ibishyimbo bihira iminota 40, bivuze ko umuriro w’amashanyarazi iyo mashini yakoresheje mu kubiteka utarenza amafaranga 55.

Shema agira ati "Uwabimenya ntabwo yakongera guhendwa n’amakara cyangwa gaz, kuko biteza imyotsi n’umwanda, bigatuma umuntu akenera ahantu hanini ho gukorera (Igikoni), kandi hano wibereye muri salon wateka kandi ibiryo bigashya vuba."

Ni isafuriya (Imashini) igaragaza igihe ikintu cyose gitetswe kiza guhira, ku buryo iyo minota igera ya nkono ikihagarika kugira ngo amafunguro adashirira, ikaba igurwa amafaranga y’u Rwanda ibihumbi 120.

Shema na bagenzi be bafite n’imashini zishobora gukata imboga n’imbuto, guhata ibirayi cyangwa ibitoki, hakaba n’izisya ibiribwa bitandukanye mbere yo gutekwa, ku mafaranga ibihumbi 30 umuntu akagura imashini isya buri kiro kimwe cy’ibigori cyangwa icy’ubunyobwa bikavamo ifu, hakoreshejwe umuriro w’amashanyarazi utarenga amafaranga 20Frw.

Hari n’amasafuriya apfundikirwa agurwa guhera ku bihumbi 60Frw kuzamura, aho uteka ashyiramo ibiribwa by’amoko atandukanye, ibidatekwa mu mazi bigashyirwa mu cyumba cyo hejuru, ibitogoswa bikajya mu cyo hasi, ayo masafuriya agakoresha umwuka ahanini mu guhisha amafunguro, agaterekwa ku muriro cyangwa ku makara yapimwe ku mashyi.

Minisitiri Ngabitsinze yasuye abamurika batandukanye

Kubona ibicanwa ni kimwe mu bibazo bikomereye ingo zo mu Rwanda, kuko amashyamba avamo inkwi n’amakara birimo kugabanuka cyane, bigateza ihumana ry’umwuka n’ikirere, ndetse n’amazi mu mariba akagabanuka kubera imisozi yambaye ubusa.

Expo 2024 kandi yajemo inkweto n’imyenda by’amoko atandukanye, ibiryamirwa, ibikoresho by’ikoranabuhanga, ibijyanye n’ubwubatsi, za resitora ziteka amafunguro atandukanye, ibikinisho n’iminyenga y’abana.

Haje kandi n’ibigo by’imari, iby’itumanaho, inzego za Leta hamwe n’iz’abikorera zishinzwe gutanga serivisi zitandukanye, kugira ngo ziruhure abantu bajyaga bavunika bajya gushaka ko zibakemurira ibibazo.

Hari abanyamahanga bitabiriye iri murikagurisha batangarije Kigali Today ko batazasiba kuza, bitewe n’amahoro n’umutekano u Rwanda rwubatse mu myaka 30 ishize.

Minisitiri w’Ubucuruzi n’Inganda, Dr Jean Chrysostome Ngabitsinze, yafunguye ku mugaragaro Imurikagurisha Mpuzamahanga rya Kigali.

Atangiza Expo2024 kuri uyu wa Mbere tariki 30 Nyakanga 2024, Minisitiri w’Ubucuruzi n’Inganda, Dr Jean Chrysostome Ngabitsinze, yahaye ikaze abamurika agira ati "Turifuza rwose ko abanyamahanga baza ari benshi kandi bagahabwa agaciro, kuko kuva mu mahanga ukazana imari yawe hano ukayicuruza ari ikintu gikomeye cyane."

Umuyobozi w’Urugaga Nyarwanda rw’Abikorera (PSF), Jeanne-Françoise Mubiligi, avuga ko imurikagurisha rigamije guteza imbere ibikorerwa mu Rwanda, ariko rikaba n’amahirwe ku bamurika yo kugaragaza impinduka mu byo bakora.

Uyu mwaka Expo2024 yitabiriwe n’abamurika 448, barimo 329 bo mu Rwanda na 119 baturutse mu mahanga, ikaba kugeza ubu irimo kwitabirwa n’abaguzi cyangwa abaza gusura babarirwa mu 5,000 ku munsi.

Minisitiri Ngabitsinze yagaragarijwe zimwe muri serivisi zimurikwa muri Expo 2024

Hari n’ibikoresho bitegura amafunguro mu buryo butandukanye

Abantu bashobora no kuhigira uburyo ubuhinzi bw’imyaka itandukanye bukorwa

Aho abaguze amatike bakoresheje MTN Mobile Money binjirira

Urugaga rw’Abikorera (PSF) ku bufatanye n’ibigo by’itumanaho, rwashyizeho uburyo abitabira iri murikagurisha bagura amatike yo kwinjira bakoresheje telefoni zabo zigendanwa.

Ubwo buryo bufasha ushaka kwinjira mu imurikagurisha kugura itike, yagera ku marembo akerekana ubutumwa bugufi bwemeza ko yishyuye itike hanyuma agahita yinjira.

Bamwe mu baturage baganiriye na Kigali Today bagaragaje ko ubu buryo bw’ikoranabuhanga ari bwiza cyane, ndetse ko bworohereza abaturage kwinjira nta mubyigano.

Umwe mu baturage yagize ati “Iyo umaze kwishyura baguha message, wagera hano ukayerekana ugahita winjira. Ntabwo bitinda kandi nta mubyigano. Ubu buryo ni bwiza cyane rwose”.

Aho abaguze amatike bakoresheje Airtel Money binjirira

Uwitwa Serge Banganikunda na we yabwiye Kigali Today ati “Uragera hano bagahita bareba muri system ko wishyuye, ugahita winjira. Nta mananiza arimo”.

Ku rundi ruhande ariko hari n’abaturage bari kuza muri iri murikagurisha bataguze amatike ku ikoranabuhanga, ndetse nta n’amafaranga bafite kuri telefoni zabo, na bo bagafashwa kwinjira.

Umukecuru waganiriye na Kigali Today, yavuze ko yaje nta mafaranga afite kuri telefoni ye ariko ayafite mu ntoki, abafasha abantu kwinjira bamugurira itike bakoresheje telefoni zabo hanyuma abasha kwinjira.

Yagize ati “Naje nta mafaranga mfite kuri telefoni ahubwo nari nyafite mu ntoki. Ngeze hariya ku muryango bahita bangurira itike ndinjira. Bitwaye nk’umunota umwe gusa”.

Icyakora abaturage baganiriye na Kigali Today bagaragaje ko igiciro cy’itike yo kwinjira muri iri murika cyazamutse, aho mu mamurika yabanje kwinjira byari amafaranga 500 y’u Rwanda, none ubu bikaba byarabaye amafaranga 1000 muntu mukuru, ndetse na 500 ku bana.

Kuri bamwe basanga uku kuzamura igiciro bishobora kubera imbogamizi bamwe mu baturage bifuzaga kwitabira iri murikabikorwa.

Serge Banganikunda ati “Urumva niba nk’umubyeyi afite abana batanu, akifuza kubazana muri expo, birasaba ko umugabo n’umugore bishyura 2000, hanyuma bakishyura na 2,500 y’abana ubwo yose hamwe akaba 4,500. Ubwo kandi ni ukwinjira gusa, kandi bagomba kugira ibyo bagura imbere, ndetse n’ibyo bagurira abana. Igiciro rwose ni imbogamizi”.

Imurikagurisha ryitabiriwe n’urubyiruko cyane

Winjiye imbere ahamurikirwa ibikorwa, ikintu cya mbere ubona ni umubare munini w’abantu bakiri bato.

Bamwe mu baturage twaganiriye, bavuga ko impamvu ari uko mu minsi y’imibyizi abantu bakuru abenshi baba bajyiye mu mirimo, ku buryo batabona umwanya wo kwitabira imurikabikorwa.

Icyakora nanone, hari abasanga impamvu y’umubare munini w’urubyiruko mu imurikabikorwa, ari uko abenshi bari mu biruhuko, bakaba baje gushakisha imirimo muri iri murikagurisha.

Urubyiruko ruba rwaje ku bwinshi gushaka akazi muri Expo

Umwe mu rubyiruko twaganiriye, yabwiye Kigali Today ati “Kuva bafungura ku wa Gatanu buri munsi ndaza. Mba naje gushaka akazi ariko sindabasha kukabona”.

Abitabiriye imurikagurisha bavuga ko mu mpera z’icyumweru ari bwo abantu baza ari ibyiciro byose, abakuru, abana ndetse n’urubyiruko.

Kubona ikibanza (Stand) cyo gukoreramo biragoye

Serge Banganikunda yabwiye Kigali Today ko kuva ku wa Gatanu yaje gushaka ikibanza cyo gukoreramo, ariko akaba yakibonye kuri uyu wa Mbere.

Yavuze ko yasanze hari umubare munini w’abantu bashaka ibibanza, ku buryo bisaba ko ababishinzwe babanza kubashyira ku rutonde, hanyuma hagira ikibanza kiboneka bakaguhamagara.

Ati “Biragoye kubera abantu benshi bashaka aho gukorera. Maze iminsi ine mpashaka, nahabonye uyu munsi ubu nib wo ngiye gutangira”.

Biteganyijwe ko kuri uyu wa Kabiri tariki 30 Nyakanga 2024, ari bwo iri murikagurisha rizafungurwa ku mugaragaro.

Reba amafoto yose yo kuri uyu wa Mbere: https://www.flickr.com/photos/kigali-today/albums/72177720319190314/

Kigali Today Ltd na yo ifite ikibanza (stand) giherereye neza ku muryango winjira muri iri murikagurisha, by’umwihariko ibiganiro bya KT Radio bikaba birimo biratambukira i Gikondo ahari stand ya Kigali Today Ltd.

Ibitangazamakuru bya www.kigalitoday.com, KT Radio, www.ktpress.rw n’imbuga nkoranyambaga zabyo, na byo birahari kugira ngo bifashe uwashaka kwamamaza wese ibyo akora.

Kigali Today iragutembereza mu bice bitandukanye byaryo, kugira ngo wihere ijisho uko byifashe, binyuze muri aya mafoto.

Stand ya Kigali Today muri Expo i Gikondo

Kureba andi mafoto, kanda HANO

Amafoto: Freddy Rwigema/Kigali Today

Abazitabira Expo 2024 barasabwa kugura amatike yo kwinjira hakiri kare

Umuvugizi wa PSF, Hunde Walter, mu kiganiro yahaye KT Radio yagize ati "Uwifuza kugura itike yo kujya muri Expo akoresheje MTN akanda *182*3*3# agakurikiza amabwiriza, yaba akoresha Airtel agakanda *182*3*4# nabwo agakurikiza amabwiriza."

Hunde avuga ko iyo umuntu amaze kubona ubutumwa bumwereka ko aguze itike, ahita abubika akazabwerekana ku marembo aho yinjirira ajya muri Expo 2024 igihe cyose azagirayo bitarenze tariki 15 Kanama 2024, ubwo iryo murikagurisha rizaba rirangiye.

Umwana ufite imyaka y’amavuko kuva kuri ine (4) kugeza kuri 16, yishyura itike y’amafaranga 500Frw, mu gihe umuntu mukuru yishyura amafaranga 1,000Frw.

Hunde avuga ko kugura itike mbere yo kugera aho umuntu ayisabwa bituma azahagarara umwanya muto bamurebera niba ari iya nyayo, kuruta uko umuntu yabanza guhagarara ku marembo arimo kugura, igikorwa gishobora gutuma abantu baba benshi ku marembo bigateza umubyigano no gutinda kwinjira.

Hunde avuga ko Expo 2024 ishobora gusurwa n’ababarirwa mu bihumbi 15 na 20 ku munsi mu minsi y’imibyizi, hamwe n’ibihumbi bibarirwa hagati ya 40 na 45 ku munsi mu mpera z’icyumweru (Weekend).

Ibi abishingira ku mubare munini w’abacuruzi baturutse hirya no hino mu Gihugu no mu mahanga kugeza ubu bamaze kurenga ikigero cya 100% mu gihe habura amasaha make ngo Expo 2024 itangire kuri uyu wa Kane tariki 25 Nyakanga 2024.

Avuga ko ibibanza by’abamurika byose uko ari 795 byamaze kwishyurwa, ndetse hakaba hari n’abamaze kurengaho bagera kuri 40 basabye guhangirwa ibibanza bishya.

Umuvugizi wa PSF avuga ko mu gihe COVID-19 yari imaze kugenza make ibibanza byishyurwaga byari nka 15%, nyuma yaho muri 2023 hafatwa ibingana na 65%, none ubu kuba hafashwe hose ngo ni ikigaragaza ko ubukungu bumaze kuzahuka ku buryo n’abakiriya bazaba benshi.

Hunde avuga ko igihe ibibanza byafatwaga ku kigero cya 15%, abaguzi na bo babaga bagera kuri 8000, ubu rero akaba ateganya ko bashobora kwikuba inshuro zirenga eshatu.

Asaba ko abafite umwanya bajya baza hakiri kare aho gutegereza nimugoroba kugira ngo bitabagora gutaha cyangwa kugenda nijoro mu kavuyo kenshi.

Abaje gusura, n’iyo umuntu atashye nta kintu aguze, ubutaha ngo ni we uhinduka umuguzi akigira ku ruganda kuko yahuriye na ba nyirarwo mu imurikagurisha.

Hunde yizeye ko abamurika bazakatura ibiciro ku rugero rwa 10%-20% nk’uko ngo basanzwe babikora, ndetse bagasabwa kuzana ibicuruzwa byinshi ku buryo abakiriya batabishaka ngo babibure.

Ahabera imurikagurisha hitabirwa n’abantu b’ingeri nyinshi kuko babasha kuhabonera ibimurikwa bitandukanye byahurijwe hamwe

Umuvugizi wa PSF, Hunde Walter, yaganiriye na KT Radio, agaragaza umwihariko wa Expo y’uyu mwaka igiye kuba ku nshuro ya 27, ikazitabirwa n’abamurika bavuye mu bihugu 20 birimo 12 bya Afurika, 7 byo ku mugabane wa Aziya hamwe na kimwe cyo ku mugabane w’u Burayi, ari cyo Turukiya.

Ibihugu bya Afurika bizitabira iryo murikagurisha ni u Rwanda, Uganda, Kenya, Tanzania, Misiri, Mozambique, Togo, Sénégal, Benin, Nigeria, Niger, na Ghana.

Abo ku mugabane wa Aziya bazaza baturutse muri China, India, Pakistan, South Korea, Singapore na Syria.

Hunde avuga ko iri murikagurisha ari umwanya wo kumenyekana kw’ibikorerwa mu Rwanda, aho umushoramari uturutse i Rusizi(ni urugero) azagaragariza mugenzi we w’i Gicumbi ibyo akora, bose bakabasha kwigiranaho.

Hunde avuga ko kandi iyo Expo ari umwanya wo kurushanwa kw’ibikorerwa mu Rwanda n’ibivuye mu bihugu bitandukanye byo hirya no hino ku Isi, cyane cyane ibikorwa n’Abanyafurika.

Yagize ati "Ni isoko rusange, turifuza ko abantu bahura bakamenyana (connection), ni umwanya mwiza wo kugira ngo ibikorerwa muri Afurika bihangane, tukifuza n’iryo koranabuhanga rivuye cyane cyane mu bihugu by’Abarabu, kuko bazi gukora, ni abashabitsi."

Kwinjira muri iri murikagurisha ku mwana w’imyaka 4-18 ni Amafaranga 500 Frw, mu gihe umukuru azajya yishyuzwa amafaranga 1000Frw.

Iri murikagurisha rizajya ritangira saa mbili(8h00) za mu gitondo kugera saa yine z’ijoro mu minsi y’imibyizi, mu gihe mu mpera z’icyumweru (weekend) rizajya rigeza saa tanu z’ijoro.

Hunde avuga ko abadakunda akavuyo n’umubyigano byaba byiza bagiye baza mbere ya saa sita z’amanywa, kuko amasaha y’umugoroba n’ijoro ngo atuma benshi bahura n’imbogamizi zo gutaha.

Hunde avuga ko ibibanza hafi ya byose kugeza ubu byamaze gufatwa, aho Umunyarwanda yishyuye stand ye (ikibanza) amafaranga ibihumbi 600, umunyamahanga akishyura Amadolari ya Amerika 1350(ni amafaranga y’u Rwanda asaga miliyoni 1 n’ibihumbi 700).

Ibitangazamakuru bya www.kigalitoday.com, KT Radio, www.ktpress.rw n’imbuga nkoranyambaga zabyo, biraba bihari kugira ngo bifashe uwashaka kwamamaza wese ibyo akora.

"Yoo Wassup ma People!!" - Uwo ni MC Tino

Umaze igihe wumva ijwi gusa, none Germaine, MC Tino, Rusakara, Anne Marie, Ben Nganji, Ines, Shyne n'abandi bose ugiye guhura nabo imbonankubone (LIVE) muri EXPO 2024 pic.twitter.com/YSftDYBG61

— Kigali Today (@kigalitoday) July 24, 2024