Pasiteri Rick Warren yasabye urubyiruko rw’u Rwanda kurwanirira Igihugu

Pasiteri Warren waherukaga no kuza mu Rwanda mu Ugushyingo 2023, yagarutse kuri izo mpanuro mu butumwa yatanze mu buryo bw’amashusho (video) bugenewe Abanyarwanda, bari bitabiriye umunsi wahariwe u Rwanda uzwi nka Rwanda Day, yaberaga i Washington DC.

Pasiteri Warren muri ubwo butumwa, yashimangiye ko Abanyarwanda, cyane cyane urubyiruko, bakwiye kwiyemeza gushyira imbere umutima wo gushikama bagaharanira ko Igihugu kigera ku iterambere.

Yagize ati “Mu myaka 30 ishize, u Rwanda nicyo gihugu ku Isi cyagize inkuru y’agatangaza mu mateka y’ikinyejana cya 21. Nta kindi gihugu cyigeze kiva kure ngo kigere aho kigeze mu buryo nk’ubu bwihuse. Nagiriwe amahirwe yo guhamya impinduka za sosiyete yari ivuye mu bihe by’amakuba ya Jenoside.”

Uyu muvugabutumwa w’icyamamare akaba inshuti magara y’u Rwanda, yakomeje asaba urubyiruko rw’u Rwanda kurushaho kwimakaza umuco wo gukorera hamwe, mu guteza imbere Igihugu gifite ejo heza hazaza no kukirwanirira.

Ati “U Rwanda rukwiriye kurwanirirwa. Murabizi neza, murasabwa guhora iteka mwiteguye kukirwanirira.”

Yakomeje agira ati “Urebye ingano y’u Rwanda, amateka n’ubusumbane bugaragara ku Isi, mukwiye guhorana umutima wo gushikama mukarwana, muharanira gukora ibyiza, ubutabera ndetse no kwishyira ukizana.”

Pasiteri Warren yahaye urubyiruko urugero kuri Perezida Paul Kagame, umaze imyaka 30 ashikamye mu guharanira kurwanirira u Rwanda, maze abasaba gutera ikirenge mu cye bakazirikana agaciro Igihugu gifite.

Yavuze ko urubyiruko rw’u Rwanda ruri mu mahanga rufite imbaraga zo kugira uruhare mu iterambere ry’Igihugu cyabo, kabone nubwo baba batagituyemo, bagahanga imirimo binyuze mu ishoramari, guteza imbere uburezi, ibikorwa by’ubugiraneza, gusigasira umuco no kuba abavugizi b’Igihugu cyabo.

Ati “Mushobora gushyigikira u Rwanda kandi mukagena ejo hazaza harwo”.

Pasiteri Warren yavuze ko hari inzego nyinshi bashobora kugiramo uruhare mu guteza imbere Igihugu, harimo ubuzima, ibikorwa remezo bakoresheje ubushobozi bwabo cyangwa se no gushaka abafatanyabikorwa.

Ku nshuro ya 11, Rwanda Day yabereye i Washington DC muri Leta Zunze Ubumwe za Amerika, ihuriza hamwe abarenga ibihumbi bitandatu, baturutse mu bice bitandukanye bya Amerika y’Amajyaruguru, u Rwanda ndetse n’ahandi.

Bagaragarijwe uko Ubukungu bw’u Rwanda buhagaze

Iyi nama yagarutse ku mikorere y’urwego rw’abikorera mu Rwanda, n’amahirwe y’ishoramari arurimo.

Umuyobozi Mukuru w’Urwego rw’Igihugu rushinzwe Iterambere, Francis Gatare, yagaragaje ko ubukungu bw’u Rwanda buzamuka neza, ahanini bishingiye ku ishoramari rishyirwa mu bikorwa remezo.

Yavuze ko nubwo Covid-19 yahungabanyije ubukungu bw’u Rwanda, ariko bwongeye kuzahuka ndetse ubu bukaba buhagaze neza.

Abitabiriye iyi nama bahawe ikiganiro ku kubaka ishoramari n’ubushobozi, hagati y’Abanyarwanda baba muri Diaspora n’abo mu Rwanda. Iki kiganiro cyatanzwe n’abayobozi batandukanye barimo Charity Kabango washinze Entrepreneurial Solutions Partners, Pascal Murasira uyobora Norrsken Africa, Jeanne Mubiligi wa PSF na Shawn McCormick uyobora Trinity Metals Rwanda.

Umuyobozi Mukuru wa RDB, Francis Gatare

Kuri uyu wa Gatandatu tariki 3 Gashyantare 2024, ni umunsi wa kabiri wa Rwanda Day. Saa sita z’amanywa za Washington DC, nibwo ibirori biba bitangiye, hari ibiganiro bitatu mbere y’uko Umukuru w’Igihugu Perezida Paul Kagame, aganiriza abitabiriye Rwanda Day.

Kimwe muri ibyo biganiro ni ikigaruka ku busugire n’umutekano by’Igihugu no mu karere muri rusange.

Ikindi kiganiro ni ikigaruka ku bijyanye n’ubukungu cyangwa ubushabitsi, hari n’ikigaruka ku mahirwe ari muri siporo n’ibindi.

Nyuma yo kwakira ijambo ry’Umukuru w’Igihugu, hateganyijwe umwanya wo kubaza ibibazo cyangwa kuganira n’Umukuru w’Igihugu.

Abatanze ibiganiro byibanze ku bukungu

Nyuma y’inama cyangwa ibiganiro, hateganyijwe umwanya wo gusabana no gutarama. Nyuma yaho, hari ibirori byateguwe bigamije gususurutsa abitabiriye Rwanda Day, bagasusurutswa n’abahanzi batandukanye.

Aya ni amagambo Karirima Ngarambe yadusubije ubwo twamubazaga icyo Rwanda Day imubwiye nk’umunyamakuru witabiriye nyinshi muri zo, akazandikaho inkuru nyinshi ndetse akanaba umwe mu Banyarwanda batuye ibwotamasimbi. Uyu munyamakuru kandi atembera mu bihugu byinshi aho ahura n’Abanyarwanda bahatuye akanakora inkuru zirebana n’ubuzima n’imishinga bakora nka ‘communities’ zisangiye Igihugu.

Bwana Karirima asangiye imbamutima na benshi mu baduhaye ibitekerezo kuri iri huriro, banatwibukije ko Rwanda Day atari iy’Abanyarwanda gusa kuko n’inshuti z’u Rwanda ziyitabira zirimo n’abashaka gushora imari cyangwa gutembera mu Rwanda.

Mu butumwa Perezida Kagame agenera Abanyarwanda n’inshuti z’u Rwanda zitabira Rwanda Day, Umukuru w’Igihugu yibutsa Abanyarwanda kenshi ko buri wese agomba gutanga umusanzu we mu kubaka Igihuggu atizigamye. Ubwo yagezaga ijambo ku bari bitabiriye Rwanda Day ku nshuro ya 6 i Atlanta muri Leta ya Georgia muri Amerika ku wa 20 Nzeri, Perezida Kagame yagize ati: “Uhinga mu murima we ntasigana”.

Mu rwego rwo kwitegura Rwanda Day yo ku wa 2-3 Gashyantare, 2024 i Washington muri Leta Zunze Ubumwe za Amerika, Ishami rishinzwe Abanyarwanda baba mu mahanga muri Minisiteri y’Ububanyi n’Amahanga n’ubutwererane ryatwibukije ko iri huriro rigamije guhuza Abanyarwanda baba imahanga n’abayobozi b’u Rwanda. “Rwanda Day ni indorerwamo y’isura y’u Rwanda rudaheza: Ni umwanya mwiza wo kongera kunga no kunoza ubumwe ku Banyarwanda batuye mu Gihugu n’abatuye amahanga no kwizihiza umuco w’u Rwanda.

Abitabiriye Rwanda Day bahabwa imbonankubone amakuru nyayo y’ibyagezweho mu nzego zirimo ubukungu, ibikorwaremezo, uburezi, ubuzima. Muri Rwanda Day, twishimira ibyagezweho, tukaganira ku nzira dusigaje gutera n’uruhare rwa buri wese, by’umwihariko Abanyarwanda batuye mu mahanga.

Ku rubyiruko ruvukira cyangwa rugakurira mu mahanga, Rwanda Day ni umwanya abo bana b’u Rwanda bihera amaso imbonankubone ibibera iwabo, bakabaza, bagasubizwa, bagashira amatsiko ibi bikabatera ishyushyu ryo gushaka gusura cyangwa gusubira mu Gihugu cy’ababyeyi babo. No ku bantu bakuru ariko, Rwanda Day ni umwanya wo kwibukiranya iby’i Rwanda no gusabana dore ko hari n’abaheruka mu Rwanda mbere ya Jenoside yakorewe Abatutsi mu 1994.

Minisiteri y’Ububanyi n’Amahanga ivuga ko Rwanda Day yatanze umusaruro ushimishije uhereye ku yabaye bwa mbere mu mwaka wa 2010. Mu byagezweho harimo: Kongera guhuza ubuyobozi bukuru n’abatuye mu mahanga, gukangurira abatuye hanze y’Igihugu kugira uruhare mu kubaka u Rwanda byaba mu gutanga umusanzu mu bumenyi cyangwa mu gushora imari mu Gihugu.

Umusanzu Abanyarwanda batanga wagiye uzamuka kuko umwaka wa 2023, Abanyarwanda batuye n’abakorera mu mahanga bohereje amadevise mu Gihugu yageze kuri miliyoni 470 ya Amerika avuye kuri miliyoni 65.1 mu mwaka wa 2010.

Usibye ubutumwa Umukuru w’Igihugu ageza ku bari muri Rwanda Day, abayitabiriye bageza ku Mukuru w’Igihugu ibyifuzo, ibitekerezo n’ibibazo bafite. Kimwe mu bibazo byagiye bibonerwa ibisubizo cyangwa bigahabwa umurongo muri Rwanda Day zabanje, ni ikibazo cy’ubutaka n’umutungo abari mu mahanga basize mu Gihugu.

Rwanda Day iheruka yabaye mu 2019 mbere y’iyaduka ry’icyorezo cya Covid-19, yabereye mu Budage yaganiriye ku ngingo zitandukanye. By’umwihariko yibanze ku guhuza abatanga akazi n’abagashaka mu Gihugu hagamijwe guhuza abafite ubumenyi butandukanye nk’ikorabuhanga, uburezi, icungamari n’ibindi.

Ihuriro Rwanda Day rimaze kuba inshuro icumi, ryatangiye tariki ya 4 Ukuboza 2010 mu Bubiligi ku mugabane w’Uburayi. Ryakomereje Chicago muri Amerika, i Paris mu Bufaransa, i Londres mu Bwongereza, Toronto muri Canada, Atlanta muri Amerika, Dallas muri Amerika, Amsterdam mu Buholandi, San Francisco muri Amerika, Ghent mu Bubiligi na Bonn mu Budage.

Uyu mwaka, Rwanda Day ibera i Washington D.C. iraganira ku nsanganyamatsiko igira iti “U Rwanda: Umurage wacu twese aho turi hose”.

Rwanda Day igiye kuba ku nshuro ya 11 iteganyijwe ku itariki ya 2 n’iya 3 Gashyantare 2024, ikazabera mu nyubako ya Gaylord National Resort & Convention Centre.

Rwanda Day igiye kubera i Washington DC itegerejwe n’abantu benshi by’umwihariko Abanyarwanda baba mu mahanga n’inshuti z’u Rwanda kuko hari hashize imyaka ine itaba kubera impamvu zitandukanye zirimo n’icyorezo cya COVID-19.

Muri Rwanda Day zatambutse, abantu benshi bagiye bagaragaza icyifuzo cy’uko iri huriro ry’Abanyarwanda batuye mu mahanga ryajya rimara iminsi ibiri. Icyifuzo cyabo cyahawe agaciro, ku buryo Rwanda Day Washington izamara iminsi ibiri.

Ku wa Gatandatu tariki 3 Gashyantare 2024, ni wo munsi nyamukuru kuko ari bwo Perezida wa Repubulika Paul Kagame azaganira n’abasaga ibihumbi bitanu bazaba bitabiriye iki gikorwa.

Rwanda Day yaherukaga kubera i Bonn mu Budage mu mpera za Kanama 2019

Mbere y’uko umukuru w’Igihugu aganiriza abitabiriye Rwanda Day, hazaba ibiganiro bitandukanye kimwe no ku munsi wa mbere, bigaruka ku nsanganyamatsiko zinyuranye.

Kimwe muri ibyo biganiro ni ikizagaruka ku “Iterambere ry’Ubukungu binyuze mu mikino n’imyidagaduro” - Economic Development through Sports and Entertainment. Ni ikiganiro kizagaragaramo umuhanzi Bruce Melodie, umaze gutera imbere muri muzika, haba mu Rwanda no hanze yarwo.

Biteganyijwe ko Bruce Melodie azaganiriza abazaba bitabiriye Rwanda Day ibijyanye n’urugendo rwe muri muzika, iterambere amaze kugeraho abikesha umuziki, n’uburyo imyidagaduro ikomeje kubyazwa umusaruro binyuze muri business kuruta uko yaba iyo gushimisha abantu gusa.

Bruce Melodie

Mu bandi bazatanga ikiganiro kuri iyi nsanganyamatsiko, harimo Clare Akamanzi, Umuyobozi Mukuru wa NBA Africa, Masai Ujiri washinze umuryango wa Giants of Africa ndetse n’umushoramari Eugene Ubalijoro, akaba ari Visi Perezida w’ikigo cya Molson Coors, cyenga ibinyobwa.

Hari n’ibindi biganiro bizaba birimo nk’ikizagaruka ku bucuruzi hagati y’Abanyarwanda babarizwa mu mahanga n’imbere mu Gihugu (Business and Careers, between Diaspora and Home).

Hari n’ikindi kizibanda ku rugendo rw’imyaka 30 ishize u Rwanda rwibohoye; n’isura y’u Rwanda mu ruhando mpuzamahanga.

Ibi biganiro kimwe n’ibindi byose biteganyijwe ndetse n’Ijambo rya Perezida wa Repubulika muzabikurikira ku bitangazamakuru n’imbuga nkoranyambaga bya Kigali Today, kuko ihababereye.

Rwanda Day Washington ifite insanganyamatsiko igira iti “U Rwanda: Umurage wacu twese aho turi hose”.

The Ben azataramira abazitabira #RwandaDay

Tariki ya 2 na 3 Gashyantare 2024 nibwo i Washington DC hazabera #RwandaDay, izahuza Abanyarwanda baturutse impande n’impande muri Amerika, aho biteguriye kuzahura bakaganira na Perezida wa Repubulika n’abandi bayobozi bakuru b’Igihugu.

Uretse kuba #RwandaDay ifatwa nk’umunsi w’imbonekarimwe ku Banyarwanda batuye mu mahanga, abigayo, abahakorera imirimo itandukanye n’inshuti zabo, biba n’umwanya mwiza wo kongera gusabana n’abandi baba baturutse mu Rwanda.

Iki gikorwa kizitabirwa n’abarenga 7000, uretse ibiganiro bitangirwamo no kungurana ibitekerezo ku ngingo zitandukanye, ntigisigana no gutarama aho abahanzi batandukanye bagira uruhare mu gususurutsa abacyitabira, ndetse n’uyu mwaka kikazaba kirimo abahanzi batandukanye.

Uretse Umuhanzi The Ben wamaze kwerekeza muri Amerika, biteganyijwe ko n’abandi bahanzi bakomeye barimo Bruce Melodi, Masamba Intore, Ruti Joel na Teta Diana, bazataramira abazitabira #RwandaDay.

Mu mashusho yashyize ku mbuga nkoranyambaga ze, The Ben yagaragaje ko yamaze guhaguruka mu Rwanda ndetse yageze i Chicago, mu bilometero hafi 1000 uvuye Washington DC.

The Ben ni umwe mu bahanzi bafite izina rikomeye ndetse ukunze gutumirwa mu bikorwa bitandukanye, aho yari mu bitabiriye Umushyikirano wabaga ku nshuro ya 19.

Agiye muri Amerika muri #RwandaDay, nyuma y’uko mu Ugushyingo 2023, yatumiwe muri Rwanda Youth Convention yabereye muri Canada.

Benshi barashaka kwitabira Rwanda Day izabera muri Amerika

Umuvugizi wungirije wa Guverinoma, Alain Mukuralinda, yabwiye Kigali Today ko bakirimo gutegura neza ibisobanuro birambuye ku myiteguro y’uyu munsi mukuru, bakaba baza kubitangariza abantu bose babikeneye.

Mukuralinda yagize ati "Rwanda Day irimo gutegurwa, abantu batangiye kwiyandikisha, ariko ibijyanye na gahunda, gushaka visa, abiyandikisha, ibyo bibazo byose barimo kubishakira uko byaza gusubirizwa hamwe".

Yakomeje agira ati "Biri kubazwa n’abantu benshi, abanyamakuru n’abatari abanyamakuru, abantu ku giti cyabo, ikigaragara ni uko abantu benshi bashaka kujyayo."

Itangazo rya Rwanda Day ryashyizwe ku rubuga X rwahoze ari Twitter rwa MINAFFET, rirahamagarira abifuza kwitabira ibyo birori kwiyandikisha banyuze ku rubuga rwandaday.rw, mu rwego rwo kuba bafashe imyanya.

Urubuga X rwa Rwanda Day ruvuga ko iyi gahunda yari yarasubitswe, bitewe n’icyorezo cya Covid-19, ikaba ngo igarutse yari itegerejwe cyane.