Yabigarutseho kuri uyu wa Gatatu tariki ya 22 Ugushyingo 2023, ubwo yari mu rukiko rwisumbuye rwa Nyagatare, ku bujurire bw’icyemezo cy’urukiko rw’ibanze rwa Nyagatare rwamusabiye gufungwa iminsi 30 y’agateganyo.

CG Rtd Gasana yaje mu rukiko yambaye umwenda w’abagororwa ugizwe n’ishati y’amaboko magufi n’ikabutura by’ibara ry’iroza, amasogisi n’inkweto by’umukara.

CG (Rtd) Emmanuel K. Gasana (Ifoto yo mu bubiko)

Wabonaga afite intege nke ndetse yanabanje gusaba urukiko kuburana yicaye arabyemererwa uretse ko yanyuzagamo agahaguruka.

Iburanisha rigeze hagati yanasabye kubanza kujya kunywa imiti arabyemererwa, iburanisha rihagarararaho gato, risubukurwa agarutse.

Yaje mu modoka y’igororero isanzwe itwara imfungwa n’abagororwa. Nk’uko byagenze mbere, nta muntu wari wemerewe kwinjirana igikoresho cy’ikoranabuhanga uretse abafite inyungu mu rubanza (abunganizi n’abashinjacyaha).

Umutekano wari ucunzwe cyane n’abacungagereza ku buryo nabwo byagoye abanyamakuru kumufotora asohoka mu rukiko kuko yinjiye kare batarahagera, ndetse icyumba yari arimo gihita kizengurukwa n’abashinzwe umutekano.

Abitabiriye iburanisha bagera kuri 30 harimo abo mu muryango we, abamwishingira ndetse n’abandi baturage. Gusa bari batuje cyane nubwo bahuzaga amaso na we ukabona ko bagize ikiniga ku maso.

Mu mpamvu zagendeweho urukiko rw’ibanze rwa Nyagatare rufata icyemezo cy’uko aburana afunze harimo kuba aramutse afunguwe yabangamira iperereza rigikorwa bitewe n’uko ari umuntu wabaye umusirikare wo ku rwego rwo hejuru ndetse akanayobora Urwego rwa Polisi kandi afite n’ubunararibonye mu kuyobora iperereza kandi akaba ari n’umunyagitinyiro.

Naho kuba yarekurwa kubera uburwayi, urukiko rwasanze nta gaciro bifite kuko no mu igororero bavura, byongeye umugororwa akaba ashobora no kuvurirwa hanze mu gihe bibaye ngombwa.

Nk’uko byagenze mbere, no kuri iyi nshuro kumufotora byari bigoye

Ikindi ni uko urukiko rwasanze atari umuntu wakwishingirwa kubera ko nta ngwate yaboneka yakwishingira umuntu nka we ku buryo atabangamira iperereza.

Hejuru y’ibyo ni uko urukiko rwanzuye ko hari impungenge ko aramutse arekuwe yatoroka Igihugu.

Yisobanura imbere y’urukiko, yavuze atabangamira iperereza kuko abatangabuhamya Ubushinjacyaha bwakoresheje yemeranywa n’imvugo yabo uretse umwe gusa (Karinganire Eric), umurega mu rwego rwo kumwihimuraho.

Naho kuba yarahuriye kuri EPIC Hotel na Karinganire, ngo ntiyaje ku butumire bwe ahubwo yaje ahamusanga amubwira ko yapfushije sebukwe kandi ngo yamusanganye n’umuntu ari we Col (Rtd) Masumbuko bityo na we akaba akwiye kubazwa hakamenyekana ibyo baganiriye aho kugendera ku mvugo za Karinganire.

Yongeye gusaba urukiko guha agaciro ubuzima bwe maze akarekurwa akabasha kwitabwaho neza n’abaganga bamukurikirana.

CG (Rtd) Gasana, yaje mu rukiko afite abamwunganira batatu, bitandukanye na mbere ubwo yari afite babiri.

Abunganizi be bavuze ko kuba urukiko rwarashingiye ku byagaragaye mu isambu ya Gasana bigafatwa nk’impamvu ikomeye ituma akekwaho icyaha atari byo kuko ubwe adahakana ko hari imirimo yakorewemo ahubwo avuga ko bitakozwe mu nyungu ze bwite kuko zari iza rwiyemezamirimo washakaga kwegera ipoto y’amashanyarazi yakamufashije kuzamura amazi mu butaka.

Ikindi ni uko kuba hatagaragazwa ibyaganiriweho igihe ukekwaho icyaha n’umurega bahuraga ubwabyo bituma adakwiye kugikekwaho.

Nanone kandi ngo kuba ashinjwa gukora ubuvugizi ari uko yamaze guhabwa amazi mu isambu ye nk’ikiguzi atari ukuri kuko imirimo yo gushakisha amazi yatangiye mu kwezi kwa Kamena kandi ubuvugizi bwaratangiye muri Gicurasi 2023.

Abamwunganira kandi basabye urukiko gusuzuma ukuntu Karinganire yagombaga gushora Miliyoni 48 mu gushaka amazi kandi atarabona abaturage 700 bazagura telefone ziyakoresha kuko yo ubwayo yari ubuntu, ikiguzi kikaba kwari ukwishyura telefone.

Kuba hari abaturage bavuze ko uwo mushinga wo kubaha amazi yo kuhira batawuzi ngo ntibikwiye gufatwa nk’impamvu ituma CG (Rtd) Gasana akekwaho icyaha kuko kubimenya nyuma na byo byaba uburyo bwiza bw’ubukangurambaga n’ubwo bo bari babizi ahubwo yenda haba harabaye ikosa ry’Umukuru w’Umudugudu wanditse abagenerwabikorwa bamwe atabanje kubibabwira.

Naho ku buvugizi yakoze, ngo ntibikwiye kwitiranywa no kwaka ruswa kuko yabukoze mbere y’uko imirimo yo gushaka amazi mu isambu ye itangira, byongeye bukaba bwari bwaratangiye gukorwa n’abamubanjirije guhera mu 2016.

Nanone ngo mu batangabuhamya babajijwe nta n’umwe wavuze ko adakeneye amazi cyangwa ngo avuge ko azi akaryo (deal) iri hagati ya Gasana na Karinganire.

Yari azengurutswe n’abacungagereza

Abamwunganira basanga icyemezo cy’urukiko rw’ibanze rwa Nyagatare cyarashingiye ku mvugo y’Ubushinjacyaha gusa kuko nubwo umucamanza yashoboraga kubona impamvu zikomeye zituma uregwa akekwaho icyaha, yagombaga kugira ibyo amutegeka kubahiriza nk’uko yari yabisabwe.

Ikindi ni uko ngo urukiko rwivuguruje nk’aho rwavuze ko abantu bareshya imbere y’amategeko nyuma rusoza ruvuga ko Gasana atakurikiranwa ari hanze kubera imirimo ikomeye yakoze.

Nanone ngo kuba atakwishingirwa bigaragara nk’igihano kibi cy’imirimo myiza yakoreye Igihugu.

Ku ndwara yagaragarije urukiko ngo na byo umucamanza yagombaga kubyitaho cyane kuko akiri umwere, byongeye zikaba zikomeye zisaba indyo yihariye, gukora siporo no guhora hafi ya muganga.

Nanone banenze urukiko kuba rwarahaye agaciro imvugo za Karinganire kandi afite inenge yo kwambura abaturage, byongeye ibyo arega CG (Rtd) Gasana akaba atarabivuze mu gihe yagezwaga mu rukiko bwa mbere ndetse no mu rwisumbuye rwa Ngoma ahubwo yabivuze hashize umwaka afunze, bigaragaza kwihimura.

Abamwunganira basabye urukiko kuzasuzuma aho gucukura amazi mu butaka bwa CG (Rtd) Gasana bihurira no kwaka indonke ndetse n’inyungu ze bwite.

Ubushinjacyaha bwasabye urukiko ko umwanzuro w’urukiko rw’ibanze rwa Nyagatare wagumaho kuko ukekwaho icyaha afite igitinyiro mu bantu ku buryo yabangamira iperereza.

Nyuma yo kumva impande zombi, urukiko rwanzuye ko umwanzuro uzasomwa ku wa Mbere tariki ya 27 Ugushyingo 2023 saa cyenda z’igicamunsi.

Ni urubanza rutegerejwe I saa tatu z’igitondo nabwo rukaza kuba nta munyamakuru wemerewe gufata amajwi n’amashusho mu cyumba cy’iburanisha kuko nta wabisabye.

CG Rtd Gasana, aregwa ibyaha bibiri ari byo gusaba no kwakira indonke no gukoresha ububasha ahabwa mu nyungu ze bwite, ibyaha yaburanye ahakana.

Kuwa 15 Ugushyingo 2023, ni bwo urukiko rw’ibanze rwa Nyagatare, rwafashe icyemezo cy’uko CG (Rtd) Gasana aburana afunze kubera ko ngo aramutse afunguwe yabangamira iperereza rigikorwa kubera ko ari umuntu wabaye umusirikare mukuru ndetse n’umupolisi ufite ipeti risumba ayandi byongeye akaba afite ubunararibonye n’ubumenyi mu kuyobora iperereza.

Ikindi ni uko ingwate yari yatanzwe irenga miliyoni 300, itemewe kuko ngo hataboneka ingwate yakwishingira umuntu uri ku rwego nk’urwe.

Nyamara we (CG Rtd Gasana), yari yasabye urukiko kumurekura by’agateganyo kubera impamvu z’uburwayi amaranye imyaka irindwi (7) kugira ngo yitabweho n’abaganga ndetse ko nk’umuntu wakoreye Igihugu kuva ku rugamba rwo kubohora Igihugu ndetse n’indi mirimo yagiye ashingwa kugeza ubwo akurikiranywe imbere y’ubutabera, atatoroka kuko byaba ari nko kwiha igihano cyo kutanezerwa mu mahoro yaharaniye.

Urukiko rwemeje ko kubera impamvu zikomeye zituma CG (Rtd) Gasana, akekwaho ibyaha yakurikiranwa afunze by’agateganyo iminsi 30, kugira ngo iperereza rikomeze.

Urukiko rusanga kuba CG (Rtd) Gasana yarabaye umusirikare ukomeye akabona n’ipeti risumba ayandi muri Polisi y’Igihugu, hari impungenge ko arekuwe yabangamira iperereza kubera ubumenyi afite mu kuriyobora ndetse n’igitinyiro afite muri rubanda.

Tariki 10 Ugushyingo 2023, nibwo yagejejwe mu Rukiko aburana ifunga n’ifungura ry’agateganyo, ku byaha bibiri akurikiranyweho byo kwaka no kwakira indonke n’icyo kwitwaza ububasha ahabwa mu nyungu ze bwite.

Ubushinjacyaha bumushinja ibyaha bibiri aribyo, icyaha cyo kwaka no kwakira indonke no gukoresha ububasha ahabwa mu nyungu ze bwite, ibyaha byose yahakanye.

Ubushinjacyaha bwabwiye Urukiko ko ibyaha akekwaho yabikoze mu mwaka wa 2022, ubwo yari Guverineri w’Intara y’Iburasirazuba, aha akazi rwiyemezamirimo Karinganire Eric, nyiri kompanyi Akagera BTC, akazi ko kumushakira amazi yo kuhira umurima we uherereye mu Mudugudu wa Rebero, Umurenge wa Katabagemu.

Uyu ngo yakoze imirimo ihanywe n’Amafaranga y’u Rwanda Miliyoni 48 (48,000,000) ariko ntiyishyurwa.

Mu kwiregura, CG (Rtd) Gasana, yavuze ko atigeze amuha akazi ahubwo uwo wari umushinga w’abaturage b’Umudugudu wa Rebero, ahubwo yashakiye amazi mu isambu ye kubera ko ariho yabonye hegereye ipoto y’umuriro w’amashanyarazi yari kwifashishwa, mu kuzamura amazi mu butaka.

Ubushinjacyaha bwamusabiraga gufungwa iminsi 30 y’agateganyo kubera ko ngo aramutse arekuwe yabangamira iperereza rigikorwa, kuba ibyaha ashinjwa birengeje igihano imyaka ibiri (2) y’igifungo no kuba yatoroka Igihugu.

Ni mu gihe abamwunganira, bavugaga ko umukiriya wabo atakwiha igihano cyo guhunga Igihugu n’imirimo yakoze kuva ku rugamba rwo kubohora Igihugu. Ikindi babwiye Urukiko ni uko kuba arwaye byasuzumwa nk’impamvu ikomeye ituma adafungwa, hagamijwe kurengera ubuzima bwe ndetse banasaba ko harebwa ku ngwate yatanzwe n’umuryango wa Dr. Kamugundu David nk’umwishingizi.

Naho kuba yabangamira iperereza, basabye ubushinjacyaha gushyiraho amabwiriza y’ahantu atagomba kurenga ariko akaburana ari hanze.

Uregwa ntiyagaragaye mu rukiko, ariko nk’uko byagenze ubwo yagezwaga mu rukiko bwa mbere aburana ifungwa n’ifungurwa by’agateganyo, abantu bari benshi mu cyumba cy’iburanisha ndetse bakimara gusoma umwanzuro benshi wabonaga babaye bigaragara ko batishimiye icyemezo cy’urukiko.

Ni mu iburanisha ryabereye mu rukiko rw’ibanze rwa Nyagatare rugatangira saa tatu za mu gitondo, aho umutekano wari wakajijwe mu buryo bugaragarira amaso.

CG Gasana, wari wunganiwe n’abanyamategeko babiri, yageze ku rukiko hagati ya saa kumi n’ebyiri na saa kumi n’igice z’igitondo ariko nta wamubonye aza yewe n’imodoka yamuzanye ntizwi uretse ko ku rukiko hari haparitse imodoka ya RIB hamwe n’iya Polisi.

Ahageze yashyizwe mu cyumba kihariye ku buryo yinjiye mu cyumba cy’iburanisha habura iminota nk’itatu ngo iburanisha ritangiye.

Yari yambaye ishati yenda kuba umweru irimo uturongo duhagaze, ikote n’ipantalo byirabura n’inkweto z’umukara.

Ku maso wabonaga ananiwe ku buryo yageze n’aho asaba urukiko kuba yicayeho akanya ariko nanone wabonaga nta bwoba afite ndetse yanageragezaga gusobanura mu mvugo ituje ariko yemeza.

Mu rukiko abantu bari benshi barenga nka 50 ariko nanone bitonze uretse ko hari abacishijemo bararira bigeze aho uregwa asabirwa ibihano.

Abanyamakuru kwinjira mu cyumba cy’iburanisha babanje gusabwa kutinjirana ibikoresho bifata amajwi n’amashusho uretse ikaramu n’ikaye yo kwandikamo.

Hanze y’icyumba cy’iburanisha umutekano wari wakajijwe uhereye ku irembo ry’inyubako y’urukiko kugera ku muryango w’icyumba kugera aho Perezida w’iburanisha yahagaritse iburanisha asaba ko batanga umwanya abaturage bakinjira.

Nk’uko ntawamuciye iryera yinjira ku rukiko ninako kumureba neza ataha byari ikizamini gikomeye kuko yari agoswe n’abapolisi wabonaga bikwije ku buryo kumufata ifoto agaragara neza byari ikidashoboka.

Yinjijwe mu modoka ya RIB yagenewe gutwara imfungwa imodoka yose igoswe n’abapolisi ku buryo ntaho wanyuza ijisho rya Camera. Agenda imbere hari imodoka y’abashinzwe umutekano ndetse n’inyuma ye hari indi.

CG Emmanuel Gasana wayoboye intara y’amajyepfo n’iy’uburasirazuba, Ubushinjacyaha bumurega ibyaha bibiri aribyo icyaha cyo kwakira indonke no gukoresha ububasha ahabwa mu nyungu ze bwite, ibyaha byose yateye utwatsi ubwo yahabwaga umwanya wo kugira icyo avuga ku byo aregwa.

Ubushinjacyaha buvuga ko tariki ya 28 Gicurasi 2022, mu muganda rusange usoza uko kwezi, guverineri Gasana n’abandi bayobozi basuye ibikorwa bya Karinganire Eric yakoreraga mu Murenge wa Karenge anabagaragariza imbogamizi z’umuriro w’amashanyarazi.

Mu byo yifuzaga kuri guverineri ni ukumukorera ubuvugizi akabona umuriro w’amashanyarazi ahagije ariko akabona n’abagenerwabikorwa benshi (Abaturage), bafata serivisi ze.

Ubushinjacyaha kandi bukomeza buvuga ko nyuma y’iminsi itatu ngo Karinganire yahuriye na CG Rtd Gasana kuri EPIC Hotel, baganira ku kuntu uyu mushinga we wagera kuri benshi binyuze mu buvugizi.

Icyo gihe ngo Guverineri Gasana, yamusabye kubanza kumukorera uwo mushinga mu isambu ye hanyuma nawe akamukorera ubuvugizi.

Tariki ya 04 Kanama 2022, Karinganire yatwaye umutekenisiye Ngenzi Emmanuel mu isambu ya Gasana iri mu Mudugudu wa Rebero Umurenge wa Katabagemu gushakamo amazi ngo barayabona ndetse bamukorera na raporo ibigaragaza.

Icyo gikorwa bakoze icyo gihe ngo cyari gifite agaciro ka miliyoni 48 frw ariko guverineri ntiyigeze abishyura ahubwo mu kumuzanira ayo mazi ngo bakoze mu mafaranga bari barahawe n’abaturage ba Karenge angana miliyoni 136 frw.

Tariki ya 04 Nyakanga 2022, amazi ngo yari amaze kuboneka bituma tariki ya 28 Kanama 2022, Guverineri Gasana, amukorera ubuvugizi aho yasabye abayobozi b’Uturere twa Gatsibo na Rwamagana gushishikariza abaturage uyu mushinga ndetse anabisaba COPRORIZ Ntende kuko umuceri ukenera amazi menshi kandi uwo mushoramari akaba yari kubibafashamo.

Ubushinjacyaha buvuga ko kuba mu ibazwa rye yaremeye ko Karinganire yapimye amazi akanayazamura kandi ntanamwishyure bigaragaza indonke kugira ngo amukorere ubuvugizi.

Ikindi kuba mu ibazwa rya Gasana yaremeye ko ubwo buvugizi yabukoze kuko byari mu nshingano ze bigaragaza icyaha akekwaho cyo kwitwaza ububasha ahabwa n’itegeko kugira ngo agere ku nyungu ze bwite.

Ibi kandi ngo bikagaragarira mu butumwa bugufi umugore wa CG Rtd Gasana, yagiranye na Karinganire ko yasoje imirimo, bigaragaza ko ari igikorwa cy’umuryango atari icy’abaturage.
Mu kwiregura ku byaha aregwa, CG Rtd Emmanuel Gasana, yavuze ko Karinganire yamuhamagaye amubwira ko afite amikoro yakorera umushinga mu Ntara yose nawe agenda amuhuza n’abayobozi b’Uturere.

Kuba yaragiye gushakira amazi mu isambu ye ngo byatewe n’uko irimo ipoto y’umuriro w’amashanyarazi wa Tri Phase kandi ariwo wifashishwa mu kuzamura amazi mu butaka, ibi ngo n’abaturage barabizi barabihamya kuko wari umushinga wabo.

Yavuze ko ibirego aregwa bikomoka ku ifungwa rya Karinganire kuko ngo hari inama y’umutekano yaguye y’Intara, aho abayobozi b’Uturere bagaragaje ikibazo cy’abaturage bambuwe na Karinganire.

Yagize ati “Ngoma ni bo bagaragaje ikibazo bwa mbere, n’abandi bavuga ko bagifite nka Gatsibo ndetse na Rwamagana twari twarasuye. Twasanze yishyuzwa Miliyoni zisaga 300 z’abaturage bo mu Mirenge icyenda. Ibi ngo byatumye asaba inzego z’ubutabera kumukurikirana.”

Cyakora ngo yongeye gufungwa ubu akaba yarakatiwe iminsi 30 y’agateganyo.
Nanone ariko yibukije inshingano z’Intara zikubiye mu itegeko ngenga rigena imikorere y’Intara cyane mu ngingo ya gatatu (3), aho yavuze ko ishinzwe guhuza inzego za Leta mu kwihutisha iterambere ry’Igihugu, gukora ubuvugizi ku mishinga, ibikorwa, ubucuruzi, ishoramari n’ibindi.

Hari kandi ubujyanama mu kwihutisha iterambere ndetse n’umutekano.

Yasoje asaba urukiko kumufungura agakurikiranwa ari hanze kubera uburwayi burimo indwara zidakira amaranye imyaka irindwi harimo diyabete n’umuvuduko w’amaraso byongeye akaba afite n’umutungo wamubera ingwate.

Abunganizi be na bo bavuze ko urukiko rudakwiye guha agaciro ibyavuzwe na Karinganire kuko atizewe cyane ko ari nko kwihimura kuko yamufungishije.

Ubushinjacyaha bwasabiye CG Rtd Gasana gufungwa iminsi 30 kuko arekuwe yabangamira iperereza rigikorwa, kuba ibyaha ashinjwa birengeje imyaka ibiri (2) y’igifungo no kuba yatoroka Igihugu.

Abunganira Gasana, bavuze ko umukiriya wabo atakwiha igihano cyo guhunga Igihugu n’imirimo yakoze kuva ku rugamba rwo kubohora Igihugu, bwasabye ko kuba arwaye byasuzumwa nk’impamvu ikomeye ituma adafungwa hagamijwe kurengera ubuzima bwe, banasabye kandi ko harebwa ku ngwate y’ubutaka yatanzwe n’uwamwishingiye.

Naho kuba yabangamira iperereza, basabye ubushinjacyaha gushyiraho amabwiriza y’ahantu atagomba kurenga ariko akaburana ari hanze.

Nyuma yo kumva impande zombi, Urukiko rwapfundikiye iburanisha ruvuga koumwanzuro ku ifungwa n’ifungurwa by’agateganyo uzatangwa tariki ya 15 Ugushyingo 2023 saa cyenda z’igicamunsi.

Ku ruhande rw’abunganira CG Gasana, bwagaragaje ko umukiriya wabo ibyo ashinjwa atabikoze ndetse banongeraho akwiye kuburana ari hanze kubera ko afite uburwayi budakira nka Diyabeti n’umuvuduko w’amaraso.
Aha banongeyeho ko hari n’ingwate biteguye ndetse mu rukiko bavuga ko iyo ngwate ari ubutaka ariko ntibagaragaza agaciro kabwo.

Urukiko rw’ibanze rwa Nyagatare rurimo kuburanisha uru rubanza, rumaze kumva impande zombi rwatangaje ko isomwa ry’urubanza ku ifungwa n’ifungurwa rizaba tariki 15 Ugushyingo 2023 saa cyenda z’amanywa.

CG Emmanuel Gasana CG (Rtd) Emmanuel Gasana yageze ku rukiko hagati ya saa kumi n’ebyiri na saa kumi n’ebyiri n’igice z’igitondo. Imodoka yamuzanye ntizwi n’ubwo ku rukiko hari hari iya RIB isanzwe ijyana abafungwa ndetse n’imodoka zirenze ebyiri za Polisi.

Mu gusohoka mu rukiko wabonaga umutekano urinzwe kuko yari aherekejwe n’abapolisi batandatu babiri imbere, babiri inyuma n’abandi babiri ku mpande ku buryo n’uwashakaga gufata ifoto ye bitari bimworoheye.

CG (Rtd) Emmanuel Gasanakurikiranyweho ibyaha bibiri, ari byo gusaba no kwakira indonke hamwe no gukoresha ububasha ahabwa n’amategeko mu nyungu ze bwite.

CG (Rtd) Emmanuel Gasana yafunzwe nyuma y’aho ahagaritswe mu mirimo yo kuyobora Intara y’Iburasirazuba, amakuru yamenyekanye biciye mu itangazo ryavuye mu biro bya Minisitiri w’Intebe, ryo ku wa Gatatu tariki 25 Ukwakira 2023.

CG (Rtd) Emmanuel Gasana yabaye Guverineri w’Intara y’Iburasirazuba muri Werurwe 2021, mbere yaho akaba yarayoboraga Intara y’Amajyepfo. Yabaye kandi Umuyobozi Mukuru wa Polisi y’u Rwanda, kuva ku wa 19 Ukwakira 2009 kugeza ku wa 18 Ukwakira 2018.

CG (Rtd) Gasana Emmanuel wahoze ayobora Intara y’Iburasirazuba

CG (Rtd) Emmanuel Gasana yageze ku rukiko hagati ya saa kumi n’ebyiri na saa kumi n’ebyiri n’igice z’igitondo.

Imodoka yamuzanye ntizwi n’ubwo ku rukiko hari hari iya RIB isanzwe ijyana abafungwa ndetse n’imodoka zirenze ebyiri za Polisi. Witegereje ku rukiko, umutekano wakajijwe cyane haba mu mbuga z’urukiko no hanze yarwo.

Hashyizwe itangazo rireba abemerewe kwinjira mu cyumba cy’iburanisha, rinabibutsa ko batemerewe kwinjirana ibyuma bifata amajwi n’amashusho.

Urubanza turakomeza kurubakurikiranira.

CG (Rtd) Emmanuel Gasana araburana kuri uyu wa Gatanu

Ni nyuma y’aho ku itariki 30 Ukwakira 2023, Ubushinjacyaha bwatangaje ko dosiye ye bwamaze kuyakira, ndetse ko tariki ya 06 Ugushyingo 2023 yashyikirijwe Urukiko.

Umuvugizi w’Ubushinjacyaha, Nkusi Faustin, avuga ko CG (Rtd) Emmanuel Gasana, akurikiranyweho ibyaha bibiri, ari byo gusaba no kwakira indonke hamwe no gukoresha ububasha ahabwa n’amategeko mu nyungu ze bwite.

CG (Rtd) Emmanuel Gasana yafunzwe nyuma y’aho ahagaritswe mu mirimo yo kuyobora Intara y’Iburasirazuba, amakuru yamenyekanye biciye mu itangazo ryavuye mu biro bya Minisitiri w’Intebe, ryo ku wa Gatatu tariki 25 Ukwakira 2023.

CG (Rtd) Emmanuel Gasana yabaye Guverineri w’Intara y’Iburasirazuba muri Werurwe 2021, mbere yaho akaba yarayoboraga Intara y’Amajyepfo. Yabaye kandi Umuyobozi Mukuru wa Polisi y’u Rwanda, kuva ku wa 19 Ukwakira 2009 kugeza ku wa 18 Ukwakira 2018.

Dosiye ya Emmanuel Gasana yashyikirijwe ubushinjacyaha

Ni amakuru Kigali Today ikesha Umuvugizi w’Ubushinjacyaha bwana Nkusi Faustin aho yagize ati: “Dosiye ye, Ubushinjacyaha bwayishyikirijwe n’Urwego rw’Igihugu rw’Ubugenzacyaha (RIB), tariki 30 Ukwakira 2023, ikaba igomba gushyikirizwa urukiko uyu munsi tariki 6 Ugushyingo 2023".

Umuvugizi w’Ubushinjacyaha yakomeje avuga ko Emmanuel Gasana akurikiranyweho ibyaha bibiri ari byo; gusaba no kwakira indonke hamwe no gukoresha ububasha ahabwa n’amategeko mu nyungu ze bwite.

Emmanuel Gasana yafunzwe nyuma y’aho ahagaritswe mu mirimo yo kuyobora Intara y’Iburasirazuba, amakuru yamenyekanye biciye mu itangazo ryavuye mu biro bya Minisitiri w’Intebe, ryo ku wa Gatatu tariki 25 Ukwakira 2023.

Emmanuel Gasana yabaye Guverineri w’Intara y’Iburasirazuba muri Werurwe 2021, mbere yaho akaba yarayoboraga Intara y’Amajyepfo.

Gasana yabaye kandi umuyobozi Mukuru wa Polisi y’u Rwanda kuva ku wa 19 Ukwakira 2009 kugeza ku wa 18 Ukwakira 2018.

Emmanuel Gasana wayoboraga Intara y’Iburasirazuba yafunzwe

Umuvugizi wa RIB, Dr Murangira B Thierry, yatangaje ko Emmanuel Gasana yari amaze igihe akorwaho iperereza ku cyaha akekwaho cyo gukoresha ububasha ahabwa n’itegeko, ubwo yari umuyobozi w’Intara y’Iburasirazuba.

CG (Rtd) Emmanuel Gasana afunzwe nyuma y’aho ahagaritswe mu mirimo yo kuyobora Intara y’Iburasirazuba, amakuru yamenyekanye biciye mu itangazo ryavuye mu biro bya Minisitiri w’Intebe, ryasohotse ku wa Gatatu tariki 25 Ukwakira 2023.

Dr Murangira yavuze kandi ko iperereza rigikomeje, andi makuru akazatangazwa hagendewe ku byo iperereza rizagenda rigaragaza.

Itangazo rigira riti: "CG (Rtd) Gasana Emmanuel wari Guverineri w’Intara y’Iburasirazuba yahagaritswe ku mirimo kubera ibyo agomba kubazwa akurikiranyweho."

CG (Rtd) Emmanuel Gasana yabaye Guverineri w’Intara y’Iburasirazuba muri Werurwe 2021, mbere yaho akaba yarayoboraga Intara y’Amajyepfo, umwanya yahawe yari asanzwe ari Umuyobozi Mukuru wa Polisi y’u Rwanda.

CG Emmanuel K. Gasana

Perezida Kagame kandi yanashyize mu kiruhuko cy’izabukuru abandi bapolisi bo ku rwego rwa Ofisiye Bakuru batanu, abo ku rwego rwa Ofisiye bato 28 n’Abapolisi bato 60. Hanasezerewe kandi Abapolisi barindwi ku mpamvu z’uburwayi ndetse n’abandi batandatu ku mpamvu zitandukanye.

Aba bapolisi bagiye mu kiruhuko cy’izabukuru bakoze imirimo igiye itandukanye mu gipolisi no mu zindi nshingano bamwe bakirimo. Harimo CG Emmanuel K. Gasana wigeze kuyobora Polisi y’u Rwanda kuva muri 2009 kugeza muri 2018, kuri ubu akaba ari Guverineri w’Intara y’Iburasirazuba kuva muri Werurwe 2021.

Hari kandi CP Emmanuel Butera wari Komiseri ushinzwe ibikorwa bya Polisi y’u Rwanda no kugarura ituze ndetse akaba yaranabaye umuyobozi ushinzwe ibikorwa bya Polisi mu butumwa bw’amahoro bwa ONU muri Sudani y’Epfo (UNMISS). Yanabaye kandi umuyobozi w’ Ikigo cya Polisi y’u Rwanda gitangirwamo Amahugurwa yo kurwanya iterabwoba (CTTC) cya Mayange muri Bugesera tutibagiwe ko yabaye umuyobozi w’ikipe ya Polisi FC kuva mu 2005 ndetse yanagize izindi nshingano zinyuranye muri iyi kipe.

CP Vianney Nshimiyimana asanzwe ari Umuyobozi w’Ishami rishinzwe Intwaro Ziciriritse n’Ubutwererane Mpuzamahanga muri Minisiteri y’Umutekano mu Gihugu kuva muri Mutarama uyu mwaka. Mu 2016 yabaye kandi Umuyobozi w’ibikorwa bya polisi zo mu bihugu binyuranye byari mu Butumwa bw’Umuryango w’Abibumbye bwo kugarura amahoro muri Côte d’Ivoire (UNOCI) ndetse anayobora Ishuri Rikuru rya Polisi (NPC) riri i Musanze n’izindi nshingano zinyuranye yagize.

CP Bruce Munyambo we yabaye Umuyobozi w’ibikorwa bya Polisi y’u Rwanda mu Butumwa bwa Loni bwo Kugarura Amahoro muri Sudani Y’epfo (UNAMISS) ndetse aba na Komiseri muri Polisi y’Igihugu ushinzwe ibikorwa no kugarura ituze tutibagiwe no kuba Umuyobozi mu Ishuri ry’Amahugurwa rya Polisi y’u Rwanda rya Gishari.

Mu bibazo Guverineri Gasana azahura na byo harimo inzoga ya kanyanga n’abamamyi b’imyaka bahenda abaturage

Mu ihererekanyabubasha ryabaye ku wa Mbere tariki ya 22 Werurwe 2021 ku kicaro cy’Intara y’Iburasirazuba, Guverineri w’iyo Ntara ucyuye igihe, Mufulukye Fred, yagaraje ibyagezweho ariko na none agaragariza umusimbuye bimwe mu bibazo bimutegereje.

Muri ibyo bibazo harimo icy’imitungo y’abaturage mu Karere ka Bugesera yangijwe mu ikorwa ry’umuhanda Ngoma-Bugesera-Nyanza yabazwe ariko abaturage bakaba batarabona ingurane.

Imihigo y’Uturere isigaje amezi arenga atatu gato ngo ihigurwe, hakwiye kuzifashishwa gahunda ya Tujyanemo kugira ngo igerweho 100%.

Umwihariko wo gusoza imirimo yo kubaka ibyumba by’amashuri, no gufata ingamba ku kibazo cy’imyenda (amadeni) buri Karere kabereyemo abayede, abafundi n’abatanze ibikoresho byo kubaka ayo mashuri.

Ati “Hari ikibazo tumaze iminsi tubona aho ba rwiyemezamirimo, abayede n’abafundi batarishyurwa. Gusa icyo twari tugezho buri karere kakoraga igenzura, twari twabahaye iki cyumweru kuba basoje bakareba amadeni y’ukuri n’atari ay’ukuri”.

Akomeza agira ati “Nyakubahwa Guverineri ubwo amadeni y’ukuri muzabafasha kuyishyura, muzi ko igihe twagombaga gukoresha cyagendaga cyongerwa bitewe n’igihe twaboneraga ibikoresho. Ibyo rero byatumye abafundi bamwe baguma kuri site bituma n’iminsi bagombaga gukora yiyongera”.

Imishinga minini harimo uwa Gabiro Agribusiness Hub (5,600Ha kuri 16,000Ha ziteganyijwe kuzahingwa), umushinga wa IFAD muri Ndego (2,000Ha) n’indi Mirenge mu Karere ka Kayonza yajyaga yibasirwa n’amapfa kubera izuba.

Gukurikirana iyubakwa ry’uruganda rw’ibigori mu Karere ka Nyagatare, uruganda rwararangiye, harimo gushyirwamo imashini.

Kubaka uruganda rw’amata y’ifu mu Karere ka Nyagatare, ku bufatanye n’abafatanyabikorwa ubutaka bwaraguzwe hasigaye gutangira kubaka.

Gukurikirana iyubakwa ry’imihanda yemeranyijweho na RTDA (Kageyo-Mucucu, Rwamagana-Karembo, Rugende-Karenge, Ryabega-Nyagatare-Rwempasha, Rwamagana- Flower Park n’indi yatangiye kubakwa hirya no hino mu Turere).

Gufasha abaturage batuye mu manegeka, cyane cyane muri Nyagatare ku nkengero z’umugezi w’Akagera (Kibati, Busoro aho imiryango 436 kuri 626 igomba kubakirwa) na Bugesera (Sharita/Rweru ahari imiryango 131 igomba kwimurwa, na Karera/Rilima izengurutswe n’ikibuga cy’indege).

Gusana inyubako y’Intara ku bufatanye n’ikigo cy’imiturire RHA, hakaba hakenewe 250,000,000 z’Amafaranga y’u Rwanda.

Mu rwego rw’imiyoborere, haracyari ibibazo by’abaturage bimwe bishingiye ku kwimurwa ku nyungu rusange (expropriation) bikeneye ubuvugizi ku nzego bireba, ikibazo cy’abangamvu bahohoterwa ndetse n’icy’abana bata ishuri.

Gushyira imbere gushyingura mu cyubahiro imibiri y’Abatutsi bishwe muri Jenoside yabakorewe muri Mata 1994, imibiri 226 yakuwe mu cyuzi cya Ruramira mu Karere ka Kayonza ndetse n’indi iri hagati ya 15,000 na 20,000 yabonetse i Rukumberi muri Ngoma itarashyingurwa n’indi isaga 5,000 yakuwe mu cyobo cya Kiziguro muri Gatsibo.

Uretse ibyo ibibazo, hari n’ibindi ijisho ry’umunyamakuru ribona bizamugora

Mu bibazo Guverineri mushya CG Emmanuel K. Gasana azahura nabyo harimo igisanzwe kitajya gicika, cyane cyane mu karere ka Nyagatare ndetse n’utundi kijyanye n’ikoreshwa ry’ibiyobyabwenge nka Kanyanga.

Imirenge itandatu kuri 14 igize Akarere ka Nyagatare ihana imbibe n’igihugu cya Uganda ari naho izo nzoga zituruka.

Inzoga ya kanyanga ntifatwa nk’ikiyobyabwenge muri icyo gihugu kandi umupaka n’akagezi gato abantu bambuka n’amaguru bikaborohera kwambuka kuzana kanyanga ikinjira mu Rwanda.

Tariki 12 Werurwe 2021, mu Karere ka Nyagatare hamenwe hanatwikwa ibiyobyabwenge byafashwe guhera muri Mutarama 2021, birimo inzoga ya kanyanga litiro 759 zabariwe agaciro ka 6,720,000Frw, soft gin ikorerwa muri Uganda amacupa 5,598 zifite agaciro ka 2,239,200Frw ndetse n’urumogi.

Impamvu icyo kibazo gikomeye ni uko nta muyobozi yaba uyobora akarere n’Intara utaza arwanya kanyanga ndetse n’abayifatanywe haba uyicuruza ndetse n’uyinywa barafatwa bagakatirwa n’inkiko ariko abaturage ntibayicikaho.

Hakwibazwa umwihariko wa Guverineri Gasana, cyane ko yahoze ayobora urwego rw’umutekano runagira uruhare runini mu kurwanya ibiyobyabwenge n’ibindi byaha.

Gusa abayobozi mu isibo babigizemo uruhare kanyanga yacika burundu kuko icururuzwa aho bayobora.

Ikindi kibazo gitegereje Guverineri w’Intara y’Iburasirazuba kikiri ingorabahizi ni icya magendu nayo ituruka mu gihugu cya Uganda.

Ariko na none afite akazi katoroshye mu guhangana n’ikibazo cy’abana basambanywa aho uturere twa Nyagatare, Gatsibo, Kirehe na Bugesera tuza mu twa mbere mu gihugu mu kugira abana benshi bahura n’icyo kibazo.

Umwaka wa 2016 kugeza 2018, abana batewe inda mu gihugu cyose bari 55,048, harimo 19,838 bo mu turere tugize intara y’Iburasirazuba ku isonga hakaza aka Nyagatare.

Mufulukye ku wa 20 Ugushyingo 2019 yafashe icyemezo ko umukozi wese uzajya uhabwa akazi muri iyo ntara azajya abanza kugirana amasezerano n’akarere ko atazasambanya umwana.

Yagize ati “Twasanze bariya bantu baba bahawe akazi, dukwiye kubegera tukagira ibyo twemeranya nabo kuko akazi bahawe gakwiye kubatunga aho guteza ibibazo, aho usanga bamwe bahembwa aho kugira ngo amafaranga abafashe mu iterambere ahubwo bakayashora mu busambanyi no gushuka abana”.

Ati “Twasanze rero tugomba gufata izindi ngamba zo kujya dusinyana nabo, iriya mishinga yose itanga akazi ko abakozi babo nabo batagomba kuba bamwe bateje biriya bibazo”.

Guverineri Gasana we azayisinyana na bande ko ikibazo kigihari?

Guverineri w’Intara y’Iburasirazuba CG Emmanuel K. Gasana icyakora aje ibibazo by’amazi meza ku baturage bigenda bigabanuka kimwe no mu nzuri ariko biracyahari ndetse hari n’aho ukwezi gushira nta mazi mu nzuri aboneka.

Mu Kagari ka Kabare, umurenge wa Rwempasha bahawe amazi mu nzuri ariko abaturage bavuga ko bayabonye rimwe gusa ahandi bakajyana amatungo yabo ku mugezi w’Umuvumba.

Ubwo Guverineri Gasana n’uwo yasimbuye bahererekanyaga ububasha

Ikindi kibazo gitegereje Guverineri mushya, ni ikijyanye n’isoko ry’umusaruro w’ibigori. Minisiteri y’Ubucuruzi n’inganda iherutse gushyiraho igiciro fatizo cy’amafaranga 226 ku kilo ku bigori bihunguye na 204 ku bidahunguye (Amahundo).

Abaguzi barimo RGCC, AIF n’abandi barahari ariko se kuki igiciro ku muturage ari amafaranga y’u Rwanda hagati ya 150 na 170?

Ijisho ry’umunyamakuru risanga ikibazo ari uburyo bikorwa, ibigo binini byiyemeje kugura umusaruro bifite abandi bantu basanga umuturage ku murima we (abamamyi) bakamugurira ku giciro gito nabo bakajya kugurisha wa mucuruzi munini kuko we atigerera ku muhinzi ahubwo atuma.

Hari kandi abaturage (abahinzi) bamarabanye igihe kinini n’umuguzi mu gace batuyemo ku buryo ikibazo bahuye nacyo akibakemurira, bityo igiciro abaguriraho ntibacyanga bitewe n’uburyo abafasha.

Inzego z’ibanze zisa nk’aho zitarebwa n’icyo kibazo kuko imodoka z’abamamyi zipakira umusaruro w’abaturage zirebera.