Ibiro by’Umukuru w’Igihugu (Village Urugwiro) byatangaje ko iki gikorwa cyabeye kuri uyu wa Gatandatu tariki 22 Nyakanga 2023.

Perezida Nguesso, ari mu Rwanda kuva ku wa Gatanu mu ruzinduko rw’iminsi itatu rugamije gushimangira umubano mwiza hagati y’u Rwanda na Repubulika ya Congo.

Perezida Kagame agabiye mugenzi we wa Congo nyuma yo kumwambika umudali w’icyubahiro ‘Agaciro’ mu rwego rwo kumushimira kubera imiyoborere ye idasanzwe no guharanira ko Afurika iba umugabane uhamye kandi uteye imbere.

Yabitangaje kuri uyu wa Gatandatu tariki 22 Nyakanga 2023 ubwo ba Perezida bombi bari mu kiganiro n’itangazamakuru i Kigali.

Mu ijambo rye, Perezida Denis Sassou-Nguesso yashimiye Perezida Paul Kagame ubushake yagize mu kugarura amahoro n’umutekano mu Rwanda nyuma ya Jenoside yakorewe Abatutsi ndetse ubu u Rwanda rukaba ari kimwe mu bihugu bifasha ibindi bihugu bya Afurika kubungabunga amahoro.

Ati “Ndashimira Perezida Kagame uburyo yubatse Igihugu nyuma ya Jenoside yakorewe Abatutsi, ubumwe bw’Abanyarwanda bukaba bwaragezweho ndetse u Rwanda rukaba rwarubatse umubano ufatika n’ibindi bihugu hirya no hino mu Isi. U Rwanda na Repubulika ya Congo Brazzaville bizakomeza gushimangira umubano binyuze mu masezerano y’ibihugu byombi”.

Perezida Denis Sassou-Nguesso yashimiye Perezida Kagame ku ruhare akomeje kugira mu gushaka amahoro hirya no hino binyuze mu masezerano u Rwanda rugirana n’ibindi bihugu.

Ati “Navuga nko mu gihugu cya Sudani mu Ntara ya Darfur no muri Repubulika ya Santarafurika mu butumwa bw’Umuryango w’Abibumbye, navuga no kugarura amahoro muri Mozambique”.

Perezida Sassou-Nguesso yavuze ko ibihugu bya Afurika bigomba gushyira hamwe mu gushaka amahoro kuri uyu mugabane kuko nta terambere ryagerwaho nta mahoro bifite.

Perezida Sassou-Nguesso yatanze urugero ubwo yayoboraga umuryango wa Afurika yunze Ubumwe mu mwaka wa 2006 hari ibibazo muri Darfur u Rwanda rwabaye urwa mbere mu koherezayo ingabo muri iki gihugu kugira ngo zibungabunge amahoro.

Perezida Sassou-Nguesso

Ibibazo byabajijwe n’itangazamakuru byagarutse ku mubano w’u Rwanda na Congo Brazzaville aho umunyamakuru wo muri Congo Brazzaville yabajije Perezida Paul Kagame ku ruzinduko aherutse kugirira muri icyo gihugu, rugakurikirwa n’urwa Perezida Denis Sassou-Nguesso icyo bisobanuye ku bihugu byombi.

Perezida Paul Kagame yamusubije ko kugenderanira kw’abayobozi b’ibihugu byombi gushingiye ku mubano mwiza ariko cyane cyane bishingiye mu gukomeza gushyira mu bikorwa, ibikorwa ibihugu byombi bihuriyeho no gusuzuma ibyamaze kugerwaho.

Ati “Uruzinduko twembi twagiye tugirana hagati yacu rugamije kubaka umubano w’ibihugu byombi ariko cyane cyane kureba ishyirwa mu bikorwa ku masezerano ibihugu byombi byagiye bigirana n’uburyo abaturage b’ibihugu byombi bakwagura ibikorwa byabo muri ibi bihugu”.

Perezida Kagame na we yashimye umubano uri hagati y’u Rwanda na Congo Brazzaville anavuga ko uruzinduko rwa Perezida Denis Sassou-Nguesso rugaragaza ubushake bwo gukorera hamwe bikaba umusingi mu bikorwa bitanga umusaruro ku mpande zombi ndetse no gufatanya kuvanaho inzitizi izo ari zo zose zagaragara muri uwo mubano.

Perezida Paul Kagame yavuze ko ibi bikwiye kuba bigaragaza uko ibihugu bya Afurika na byo bikwiye kuba bikorana bishyira hamwe mu guteza imbere umugabane wa Afurika.

Perezida Paul Kagame

Ku bijyanye n’imikoranire, Perezida Kagame yavuze ko ibihugu byombi bigomba kuba ku isonga ku ishyirwa mu bikorwa ry’isoko rusange rya Afurika kugira ngo ubuhahirane hagati y’ibihugu burusheho gutera imbere n’umugabane utere imbere.

Ati “ Uru si uruzinduko gusa ahubwo ni ibikorwa biva ku bayobozi bikagera no ku baturage, tuzakomeza ubu bufatanye kandi nk’abayobozi dukeneye gukomeza gukora ibyiza kuri twe, mu bihugu byacu, ndetse tunakora ibishoboka byose hamwe nk’abavandimwe, nk’abaturanyi”.

Ibindi biganiro Perezida Kagame yagiranye na mugenzi we wa Congo Brazzaville, Denis Sassou-Nguesso byibanze ku gushimangira ubufatanye bw’ibihugu byombi mu nzego zirimo ubucuruzi n’ishoramari, ubuhinzi, serivisi zo mu kirere, visa n’ibindi.

Abakuru b’ibihugu byombi kandi bayoboye umuhango wo gushyira umukono ku masezerano y’ubufatanye mu nzego zitandukanye harimo kwihutisha ishyirwa mu bikorwa ry’amasezerano y’isoko rusange rya Afurika.

Ibihugu byombi byavuguruye amasezerano y’ubufatanye

Minisitiri Denis Christel yavuze ko ubufatanye hagati ya Congo n’u Rwanda, bushingiye ku masezerano arimo ayasinywe mu 2015 i Kigali ndetse n’andi yasinywe mu 2022.

Amasezerano amaze gusinywa hagati y’ibihugu byombi ni 33. Umunani muri yo yasinywe mu ruzinduko rwa Perezida Kagame muri Congo mu Gushyingo 2022.

Muri ayo masezerano, harimo agendanye n’imishinga itanu irimo n’uwo kubaka icyanya cy’inganda mu gace ka Maluku ahazajya hakorerwa ibikoresho bitandukanye.

Kurikira ikiganiro abayobozi b’ibihugu byombi bagiranye n’itangazamakuru:

Perezida Sassou-Nguesso ari mu Rwanda mu ruzinduko rw’akazi rw’iminsi itatu yatangiye ku wa Gatanu tariki 21 Nyakanga 2023.

Akigera muri RICA, Perezida Nguesso yakiriwe na Minisitiri w’Ubuhinzi n’Ubworozi Dr. Ildephonse Musafiri, wamubwiye byinshi ku mikorere y’iyo Kaminuza, byiganjemo imirimo y’ubuhinzi ndetse n’Ubworozi ihakorerwa.

Minisitiri w’Ubuhinzi n’Ubworozi yabwiye Perezida Sassou Nguesso ko iyi Kaminuza yagiyeho, hagamijwe kugira ngo bafashe urubyiruko kurushaho kugira ubumenyi mu buhinzi n’Ubworozi, mu rwego rwo kugira ngo bafashe Leta kugera ku ntego zayo zo kwihaza mu biribwa.

Perezida Sassou-Nguesso wari uherekejwe na Minisitiri w’Ububanyi n’Amahanga n’Ubutwererane w’u Rwanda, Dr. Vincent Biruta, yeretswe uko inka zikamwa mu buryo bw’ikoranabuhanga, ndetse n’aho amata amaze gukamwa abyarizwa umusaruro, agakorwamo Foromaje, ndetse na za Yawurute (Yogurts), ndetse n’andi wakwita ko ari mu buhunikiro, hanakorerwa ibiryo by’amatungo, yashimiye imikorere y’iyi kaminuza.

RICA ni kaminuza y’icyitegererezo mu kwigisha ikoranabuhanga rigezweho mu buhinzi n’ubworozi. Yashinzwe ku bufatanye bwa Guverinoma y’u Rwanda n’umuryango Howard G. Foundation.

Iherereye mu Murenge wa Gashora, Akagari ka Mwendo, Umudugudu wa Gaharwa mu Karere ka Bugesera, ikaba yarafunguye imiryango mu 2019, buri mwaka ikaba yakira abanyeshuri 84, aho imfura zayo 78 zizajya ku isoko ry’umurimo mu ntangiriro za Kanama uyu mwaka.

Iyi Kaminuza Perezida wa Congo Brazzaville asuye, iri ku buso bwa hegitari 1 300 ziriho inyubako, imirima ikoresha mu buhinzi n’ubworozi n’ibindi bijyanye n’amasomo ayitangirwamo, ikaba iri hagati y’ibiyaga bibiri, icya Kirimbi na Gaharwa.

Ifite inshingano zo kwigisha urubyiruko rwitezweho kuzana impinduka mu buhinzi bw’u Rwanda, ikaba ifite abanyeshuri 250 b’Abanyarwanda kandi bose bishyurirwa bakanitabwaho, 50% muri bo ni abakobwa, abandi 50% bakaba abahungu.

Muri porogaramu y’imyaka itatu, uwiga muri RICA ahavana impamyabumenyi y’icyiciro cya kabiri cya Kaminuza muri siyansi mu buhinzi n’ubworozi (Conservation Agriculture).

Ashobora kandi guhitamo kuba inzobere mu bworozi (Animal Production,) cyangwa ubuhinzi (Crop Production), gukoresha imashini mu buhinzi (Mechanization) ndetse no gutunganya ibikomoka ku buhinzi (Food Processing).

Integanyanyigisho z’iyi kaminuza zikoze mu buryo bufasha umunyeshuri kwiga, gukora ubushakashatsi no kwitoza ibyo yiga hagendewe ku miterere y’umuryango nyarwanda. Yigishwa kandi ibijyanye n’ubucuruzi, imiyoborere, kwihangira umurimo no gukoresha itumanaho.

Bitandukanye n’izindi kaminuza muri Afurika zigisha ubuhinzi, iri shuri rifite umwihariko wo kwigisha ibijyanye n’ubuhinzi n’ubworozi mu rurimi rw’Icyongereza.

Reba ibindi muri iyi Video:

Amafoto: Moise Niyonzima/Kigali Today

Video: Eric Ruzindana/Kigali Today

Iki gikorwa cyabereye muri Kigali Convention Centre ubwo Perezida Kagame yakiraga ku meza mugenzi we Denis Sassou-Nguesso uri mu ruzinduko rw’iminsi itatu mu Rwanda.

Perezida Nguesso yageze ku Kibuga cy’Indege Mpuzamahanga cya Kanombe, yakirwa na Perezida wa Repubulika Paul Kagame mu cyubahiro kigenerwa Abakuru b’Ibihugu.

Uyu mudali w’icyubahiro ‘Agaciro’ Nguesso yambitswe na Perezida Kagame ni mu rwego rwo kumushimira kubera imiyoborere ye idasanzwe no guharanira ko Afurika iba umugabane uhamye kandi uteye imbere.

Perezida Kagame na Nguesso bagiranye ibiganiro byabereye mu muhezo, ibizwi nka tête-à-tête muri Village Urugwiro.

Perezida Sassou-Nguesso yasuye kandi Urwibutso rwa Jenoside rwa Kigali ruri ku Gisozi, yunamira abishwe muri Jenoside yakorewe Abatutsi mu 1994, ndetse anashyira indabo aho bashyinguye.

Perezida Sassou-Nguesso yasobanuriwe amateka ya Jenoside, uburyo yateguwe n’uko yashyizwe mu bikorwa.

Perezida Nguesso yagejeje ijambo ku mitwe yombi y’Inteko Ishinga Amategeko y’u Rwanda, nk’uko byari kuri gahunda y’uru ruzinduko rwe.

Mu byo yavugiye mu Nteko Ishinga Amategeko, yagaragaje ko u Rwanda rufatwa nk’urugero rw’Igihugu cyateje imbere abagore, by’umwihariko ahereye ku mubare w’abagize Inteko Ishinga Amategeko kubera uburinganire buyigaragaramo.

Perezida Sassou Nguesso ageza ijambo ku Nteko Ishinga Amategeko imitwe yombi

Yabitangaje kuri uyu wa Gatanu tariki 21 Nyakanga 2023, mu ruzinduko rw’iminsi ibiri arimo mu Rwanda, ubwo yagezaga ijambo ku bagize imitwe yombi y’Inteko Ishinga Amategeko y’u Rwanda.

Perezida Sassou Nguesso yashimye uburyo Abanyarwanda bataheranywe n’agahinda, ahubwo bagashyira hamwe bagasenyera umugozi umwe nyuma ya Jenoside yakorewe Abatutsi, ubu Igihugu kikaba gikataje mu rugamba rwo kwiteza imbere, ari naho yahereye avuga ko ari ngombwa ko ibikorwa by’urugomo bihagarara, abatuye Afurika bagaharanira amahoro.

Yagize ati “Guteza imbere Afurika biri mu maboko yacu, ariko bidusaba buri munsi guharanira amahoro, ni ngombwa ko ibikorwa by’urugomo n’intambara bihagarara, amahoro akaganza muri Afurika. Ni yo mpamvu buri gihe hakwiye gutezwa imbere imibanire myiza hagati y’abaturanyi, no kubana mu mahoro hagamijwe kwishyira hamwe kuzuye, kandi kudasubirwaho hagati y’abatuye Afurika.”

Perezida wa Congo Brazzaville yanavuze ko igihe umugabane uzaba ufashe neza ahazaza hawo mu buryo bwuzuye, bizatuma umubare munini w’abatuye Afurika babaho neza.

Ati “Igihe umugabane uzaba ufashe mu biganza ahazaza hawo mu buryo bwuzuye, bizatuma umubare munini w’abagize Afurika biganjemo urubyiruko, bagaburirwa neza, bivuze neza, babe abantu bafite ubushobozi bwo guhatana mu ruhando mpuzamahanga, ndetse n’ibikorwa remezo bigezweho, bitume Afurika iba ishema kuri beneyo, ibe umugabane uzira imvururu n’intambara, ahubwo wisanisha n’ibishya, kandi ushishikajwe n’iterambere.”

Perezida wa Sena y’ u Rwanda Dr. François Xavier Kalinda, yavuze ko yashimiye cyane imibanire n’ubufatanye bw’ibihugu byombi, ndetse ko kuba basuwe na Perezida wa Congo Brazzaville ari amateka atazibagirana, hakazakomeza gushimangirwa umubano hagati y’ibihugu byombi.

Perezida wa Sena y’ u Rwanda, Dr François Xavier Kalinda

Perezida Denis Sassou Nguesso yayoboye bwa mbere igihugu mu 1979 ageza mu 1992, yongera kuyobora icyo gihugu kuva mu mwaka wa 1997 kugeza uyu munsi.

Umubano w’ibihugu byombi umaze igihe kirekire kuko watangijwe mu mwaka 1976, urushaho gukomera muri 2010, ubwo Perezida Paul Kagame yagiriraga uruzinduko rwe rwa mbere muri Congo Brazzaville, nyuma yaho mugenzi we Sassou Nguesso, na we asura u Rwanda.

Igihugu cya Congo Brazzaville, giherereye muri Afurika yo hagati, kikaba gifite ubuso bungana na kilometero kare 342000, aho gikuba ubuso bw’u Rwanda ishuro zirenga gato 12.

Perezida w’Umutwe w’Abadepite, Mukabalisa Donatille

Nubwo ariko gifite ubuso bunini ugereranyije n’u Rwanda, ntabwo gituwe cyane, kubera ko gituwe gusa n’abaturage barenga miliyoni esheshatu, ariko kandi kikaba ari igihugu gikungahaye cyane ku mutungo kamere, kubera ko gifite peteroli, amabuye y’agaciro hamwe n’ibikomoka ku mashyamba, gusa peteroli ikaba ariyo ifite umwanya w’ibanze mu bukungu bw’icyo gihugu, kuko yihariye hafi 80% by’ibyo bohereza mu mahanga.

Reba ibindi muri iyi video:

Perezida Sassou Nguesso yashimye uko ibirori byo kumwakira byateguwe, ndetse n’urugwiro bamugaragarije.

Abinyujije ku rubuga rwe rwa Twitter yagize ati “Ni ibyishimo byinshi kongera kugera ku butaka bw’u Rwanda kuri uyu wa 21 Nyakanga 2023. Ndashimira umuvandimwe wanjye akaba n’inshuti, Perezida Paul Kagame ku butumire yampaye. Ndanashimira byimazeyo abavandimwe, Abanyarwanda ku buryo bateguye bwo kunyakira neza.”

Nyuma yo kwakirwa na Perezida Kagame, bakagirana ibiganiro mu muhezo muri Village Urugwiro, Perezida Sassou Nguesso yasuye Urwibutso rwa Jenoside rwa Kigali ruri ku Gisozi, yunamira abishwe muri Jenoside yakorewe Abatutsi mu 1994, ndetse anashyira indabo aho bashyinguye.

Perezida Sassou Nguesso yasobanuriwe amateka ya Jenoside, uburyo yateguwe n’uko yashyizwe mu bikorwa.

Perezida Denis Sassou Nguesso yashimye urugwiro yakiranywe mu Rwanda

Biteganyijwe ko Perezida Sassou Nguesso uruzidnuko rwe ruzakomeza ejo ku wa Gatandatu tariki ya 21 Nyakanga 2023, akazasura ishuri rikuru ry’ubuhinzi n’ubworozi ritangiza ibidukikije rya RICA riherereye mu Bugesera.

Uru ruzinduko rwa Perezida wa Perezida wa Congo Brazaville, rushimangira umubano n’ubutwererane bw’u Rwanda n’icyo gihugu, bimaze igihe kirekire kuko byatangijwe mu mwaka wa 1976.

Umubano hagati y’ibihugu byombi warushijeho gukomera guhera mu 2010, ubwo Perezida Kagame, yagiriraga uruzinduko rwe rwa mbere muri icyo gihugu.

Nyuma yaho Perezida Denis Sassou Nguesso na we yasuye u Rwanda. Muri 2022 kandi Perezida Kagame yongeye gusura Congo-Brazzaville.

Mu gushimangira umubano hagati y’ibihugu byombi, Congo-Brazzaville n’u Rwanda byasinyanye amasezerano menshi y’ubufatanye mu nzego zinyuranye zirimo umuco, uburezi, ibidukikije, ishoramari, imyuga, n’ubukungu.

Kuri ayo masezerano kandi haje kwiyongeraho ayerekeye ubuhinzi, ubucukuzi bw’amabuye y’agaciro, ubucuruzi, inganda n’ibindi.

Ku Kibuga cy’Indege Mpuzamahanga cya Kigali yakiriwe na Perezida wa Repubulika y’u Rwanda, Paul Kagame.

Mu bikorwa biteganyijwe harimo ko aza gusura urwibutso rwa Jenoside rwa Kigali ruherereye ku Gisozi, akaza kugirana ibiganiro n’Inteko Ishinga Amategeko ndetse akaza kugirana ikiganiro n’itangazamakuru.

Ibihugu byombi bisanzwe bifitanye umubano n’ubufatanye mu bya Dipolomasi na Politiki, kuko muri Kanama 2016, u Rwanda rwafunguye Ambasade muri Congo-Brazzaville ari nayo ikurikirana ikanareberera inyungu z’u Rwanda mu Muryango wa Afurika yo Hagati (CEEAC).

Si ibyo gusa kuko mu 2022, Perezida Kagame yagiriye uruzinduko rw’iminsi itatu i Brazzaville mu Murwa Mukuru wa Repubulika ya Congo, yitabiriye ubutumire bwa mugenzi we, Denis Sassou Nguesso.

Mu 2011, u Rwanda na Congo-Brazzaville byagiranye amasezerano y’ubuhahiharane n’ubufatanye mu bijyanye n’ingendo zo mu kirere, guteza imbere ubukerarugendo, ingufu, umutekano, ubutabera ibidukikije n’uburobyi.

Ni mu gihe kompanyi y’indege y’u Rwanda, RwandAir, yo isanzwe ikorera ingendo hagati ya Kigali na Brazzaville guhera mu 2011. Kuri ubu RwandAir ikorera ingendo i Brazzaville gatatu mu cyumweru.

Perezida Denis Sassou Nguesso yakiriwe na mugenzi we Perezida Paul Kagame

Mu Ugushyingo 2021, ibihugu byombi byagiranye amasezerano y’ubutwererane mu bya gisirikare, ubufatanye mu kuzamura imyigire n’imyishirize muri za Kaminuza, ubutaka, ubufatanye mu iterambere rirambye, kubungabunga ibidukikije, guteza imbere ubucuruzi hagati y’ibihugu byombi no gukomeza kwagura ubufatanye mu guteza imbere ingendo zo mu kirere.

Ni amasezerano yashyizweho umukono na Minisitiri w’Ububanyi n’Amahanga n’Ubutwererane w’u Rwanda, Dr Biruta Vincent na Minisitiri w’Ububanyi n’Amahanga no guteza imbere ubufatanye hagati ya Leta n’abikorera, Denis Christel Sassou Nguesso.

Abakuru b’Ibihugu byombi basanganywe umubano mwiza

Perezidansi ya Repubulika ya Congo ibinyujije ku rubuga rwa Twitter, yatangaje iby’uru rugendo ku mugoroba wo ku wa Kane tariki 20 Nyakanga 2023.

Aya makuru avuga ko Perezida Sassou Nguesso yatumiwe na mugenzi we w’u Rwanda, Paul Kagame.

Umwaka ushize muri Mata, Perezida Kagame na we yagiriye uruzinduko rw’iminsi itatu muri Congo Brazzaville kuva ku ya 11 Mata 2022.

Ku munsi wa kabiri w’uruzinduko rwe, Perezida Kagame na mugenzi we Denis Sassou Nguesso, bagiranye ibiganiro byabereye mu muhezo, ndetse bakurikirana umuhango w’isinywa ry’amasezerano y’ubufatanye, yashyizweho umukono na ba Minisitiri b’Ububanyi n’Amahanga ku mpande zombi.

Aya masezerano akaba azibanda ku bucukuzi bw’amabuye y’agaciro, guteza imbere ubucuruzi buto n’ubuciriritse, ubukorikori, umuco n’ubuhanzi.

U Rwanda na Congo bifitanye umubano mwiza uhereye mu 1982. Mu rwego rwo kwagura uwo mubano, hagiye haterwa intambwe n’impande zombi mu bihe bitandukanye binyuze mu bikorwa bitandukanye.

Ni umudali yambwitswe na Perezida wa Congo Brazzaville Denis Sassou Nguesso ku wa Kabiri tariki 28 Werurwe 2023, mu ruzinduko Madamu Mushikiwabo arimo i Brazzaville.

Mbere yo kwambikwa uyu mudali, Madamu Mushikiwabo yabanje kugirana ibiganiro na Perezida Denis Sassou Nguesso, byibanze ku bufatanye bwa OIF na Congo Brazzaville ndetse no ku myiteguro y’Inama izahuza abahagarariye ibyogogo bitatu by’amashyamba (Congo/Amazonie/Mekong Bornéo) izabera i Brazzaville muri Kamena 2023.

Mushikiwabo yongeye gutorerwa kuyobora OIF, n’Abakuru b’Ibihugu na za Guverinoma zihuriye muri uyu muryango ku ya 19 Ugushyingo 2022, i Djerba muri Tunisie, ahaberaga inama ya 18 ya OIF.

Kuri iyo nshuro ni we wari umukandida rukumbi kuri uyu mwanya. Abakuru b’ibihugu na za Guverinoma bemeje ko akomeza ku kuyobora, ku bwumvikane busesuye.

Mu myaka ine ya manda ye ya mbere muri izo nshingano hakozwe byinshi birimo amavugura y’uyu muryango yari agamije gutuma ugera ku bisubizo bihamye by’ibibazo byugarije isi birimo umutekano mucye, iyangirika ry’ibidukikije riterwa n’iterambere ry’ikoranabuhanga n’ibindi.

Ibiro by’Umukuru w’Igihugu wa Congo-Brazzaville, byatangaje ko Dr Biruta yashyikirije Perezida Sassou-N’Guesso ubwo butumwa mu biganiro bagiranye, byabereye mu rugo rwa Perezida wa Congo mu murwa mukuru Brazzaville.

Gusa ibikubiye muri ubwo butumwa Perezida Kagame yoherereje mugenzi we Denis Sassou-N’Guesso ntibiratangazwa kugeza ubu.

Sassou-N’Guesso, umuturanyi wa hafi wa Tshisekedi, ni umwe mu bayobozi mu karere bagiye bagaragaza ubushake mu gukemura amakimbirane.

Perezida Denis Sassou-N’Guesso, mu mwaka ushize yagiriye uruzinduko muri Repubulika ya Demokarasi ya Congo (RDC), kuganira na Perezida Felix Tshisekedi ku bibazo by’umutekano muke mu Burasirazuba bwa DRC.

U Rwanda na Congo-Brazzaville bisanganywe umubano mwiza mu nzego zitandukanye zirimo ubukungu, ubucuruzi n’ibindi.

Umukuru w’Igihugu, Paul Kagame, umwaka ushize yagiriye uruzinduko rw’iminsi itatu I Brazzaville, ku butumire bwa mugenzi we, Denis Sassou Nguesso.

Umukuru w’Igihugu yageze muri Congo Brazzaville ku ya 11 Mata 2022, ku kibuga cy’indege yakirwa na mugenzi we, Dennis Sassou Nguesso.

Ku munsi wa mbere w’uruzinduko rwe, Perezida Kagame yagejeje ijambo ku bagize Inteko Ishinga Amatageko y’icyo gihugu, aho yababwiye ko igihe kigeze kugira ngo Afurika ishake ibisubizo ku bibazo bikiyibangamiye.

Perezida Kagame yakiriwe kandi na mugenzi we wa Congo Brazzaville, Denis Sassou Nguesso, mu musangiro, aboneraho gushima mugenzi we wamutumiye, avuga ko mu myaka myinshi ishize, hubatswe umusingi ukomeye mu mubano w’ibihugu byombi.

Ku munsi wa kabiri w’uruzinduko rwe, Perezida Kagame na mugenzi we Denis Sassou Nguesso, bagiranye ibiganiro byabereye mu muhezo, ndetse bakurikirana umuhango w’isinywa ry’amasezerano y’ubufatanye, yashyizweho umukono na ba Minisitiri b’ububanyi n’amahanga.

Aya masezerano akaba azibanda ku bucukuzi bw’amabuye y’agaciro, guteza imbere ubucuruzi buto n’ubuciriritse, ubukorikori, umuco n’ubuhanzi.

Umukuru w’Igihugu yakomereje uruzinduko rwe muri Leta ya Oyo, ari naho Perezida Sassou Nguesso akomoka. Yatambagijwe bimwe mu bice bitandukanye biherereye muri iyo Leta, birimo uruganda rutunganya amata, ibagiro rya kijyambere ndetse n’urwuri rw’inka.

Biteganyijwe ko Perezida Kagame akomereza muri Jamaica mu rundi ruzinduko rw’akazi rw’iminsi itatu, rutangira kuri uyu wa Gatatu tariki 13 kugeza ku wa Gatanu tariki 15 Mata 2022, nk’uko byatangajwe n’ibiro bya Minisitiri w’Intebe wa Jamaica.

Aba bayobozi bombi nyuma y’ibyo biganiro, bayoboye umuhango wo gusinya amasezerano y’ubufatanye mu nzego zitandukanye.

Amasezerano yasinywe hagati y’u Rwanda na Repubulika ya Congo Brazzaville, yasinywe na ba Minisitiri b’Ububanyi n’amahanga, akaba azibanda ku bucukuzi bw’amabuye y’agaciro, guteza imbere ubucuruzi buto n’ubuciriritse, ubukorikori, umuco n’ubuhanzi.

Umukuru w’Igihugu yakomereje uruzinduko rwe muri Leta ya Oyo, aho yasanganiwe n’abaturage baje kumwakira.

Leta ya Oyo niyo Perezida Dennis Sassou Nguesso akomokamo. Akaza gutemberezwa urwuri ndetse akaza kwakirwa ku meza na mugenzi we Sassou Nguesso.

Perezida Kagame ari mu ruzinduko rw’iminsi 3 muri Congo Brazaville, yatangiye ejo ku wa Mbere akazarusoza ku wa Gatatu tariki 13 Mata 2022.

Ku munsi wa mbere w’uruzinduko rwe, Perezida Kagame yagejeje ijambo ku bagize Inteko Ishinga Amatageko ya Congo Brazaville, aho yababwiye ko igihe kigeze kugira ngo Afurika ishake ibisubizo ku bibazo biyikibangamiye.

Umukuru w’igihugu yavuze ko abaturage b’u Rwanda na Congo Brazzaville bahujwe n’intego yo kubaka iterambere rirambye kandi rigera kuri bose.

Perezida Kagame yakiriwe kandi na mugenzi we wa Congo Brazzaville, Denis Sassou Nguesso, mu musangiro. Yashimiye mugenzi we wamutumiye, avuga ko mu myaka myinshi ishize, hubatswe umusingi ukomeye mu mubano w’ibihugu byombi, ndetse n’amasezerano y’ubufatanye, azashimangira umubano mwiza uri hagati y’u Rwanda na Congo.

Ibihugu byombi bisanzwe bifitanye umubano n’ubufatanye mu bya dipolomasi na politiki kuko muri Kanama 2016, u Rwanda rwafunguye Ambasade muri Congo ari nayo ikurikirana ikanareberera inyungu z’u Rwanda mu Muryango wa Afurika yo Hagati.

Mu 2011, u Rwanda na Congo-Brazzaville byagiranye amasezerano y’ubuhahiharane n’ubufatanye mu bijyanye n’ingendo zo mu kirere, guteza imbere ubukerarugendo, ingufu, umutekano, ubutabera ibidukikije n’uburobyi.

Ibiro by’Umukuru w’Igihugu cy’u Rwanda byatangaje ko Perezida Kagame akigera muri Repubulika ya Congo, yakiriwe na Perezida w’icyo gihugu, Denis Sassou Nguesso.

Kuri gahunda y’uru rugendo harimo ko agirana ibiganiro na mugenzi we, nyuma bakaza guhagararira umuhango wo gusinya amasezerano atandukanye y’ubufatanye hagati y’u Rwanda na Congo Brazzaville. Ndetse biteganyijwe ko aza kugeza ijambo ku bagize Inteko Ishinga Amategeko y’iki gihugu.

Perezida Kagame aranagirana kandi ibiganiro n’abayobozi batandukanye mu nzego za Leta bibera mu Mujyi wa Oyo.

Umukuru w’Igihugu yaherukaga muri Congo Brazzaville muri Nzeri 2019 igihe yari yitabiriye inama ihuza abakuru b’ibihugu bitandukanye igamije kwigira hamwe uko hakongerwa ishoramari ku Mugabane wa Afurika (Invest in Africa Forum-IAF).

Perezida Kagame muri 2016 nabwo yagiriye uruzinduko muri Congo Brazzaville, uru rugendo rukaba rwarakurikiraga urwo Sassou Nguesso n’umufasha we Antoinette Sassou Nguesso bagiriye mu Rwanda tariki 16 Ukuboza 2015.

Uruzinduko rwe rwa mbere muri icyo gihugu akaba yararukoze mu mwaka wa 2004.

U Rwanda na Congo-Brazzaville bikorana mu nzego zitandukanye zirimo ubucuruzi n’ubwikorezi bwo mu kirere.