Mubazi zo kuri moto zigiye kongera gukoreshwa

Minisitiri w’Ibikorwa Remezo, Dr. Ernest Nsabimana, yagarutse kuri icyo kibazo ubwo yari mu nama y’Igihugu y’Umushyikirano ku munsi wayo wa kabiri tariki 28 Gashyantare 2023, aho byagaragaye ko hari bamwe mu bamotari batari bakizikoresha, avuga ko mu gihe kitarenze ukwezi kumwe ziba zongeye gukoreshwa.

Yagize ati “Bamwe barazikoreshaga ariko hari igice kinini kindi kitazikoresha, ariho haje gufatwa umwanzuro n’inzego zigiye zitandukanye y’uko hagurwa izindi mubazi, izo rero zigeze ku bihumbi 15, zaraguzwe zimaze kugera mu gihugu ndetse n’abamotari bazishyira kuri za moto zabo. Ni igikorwa cyo kwambara mubazi ku bamotari cyari kimaze iminsi kibera hirya no hino mu Mujyi wa Kigali, kikaba kirangirana na kuno kwezi”.

Uwo muyobozi kandi yagarutse ku mpamvu hari abamotari bakuwe mu makoperative bakaba batarayasubizwamo.

Minisitiri Nsabimana yavuze ko mbere hari ibibazo byinshi bitandukanye mu mikorere y’amakoperative y’abamotari, ari nayo mpamvu haje gufatwa umwanzuro w’uko aseswa haba mu Mujyi wa Kigali ndetse no mu gihugu muri rusange.

Yagize ati “Harimo gushyirwaho izindi koperative nshya, zikaba zimaze kujyaho mu Mujyi wa Kigali muri Gasabo, Kicukiro ndetse no muri Nyarugenge naho zamaze kujyaho, kandi zose zikaba zimaze kubona abayobozi bashya ndetse n’uburyo zubatse zikaba zitandukanye na koperative zariho mbere. Mu gihugu hose naho uburyo bwo gushyiraho koperative zindi nshya burakomeje, habanje igikorwa cyo gusesa izari zisanzwe, no kureba imitungo zari zifite n’abari bayifite”.

Mu Mujyi wa Kigali habarirwa moto zikora akazi ko gutwara abantu n’ibintu mu buryo bwa rusange zirenga ibihumbi 20.

Ibiro by’Akarere ka Huye

Abatuye mu Karere ka Huye bavuga ko bazishima neza nibaba aba mbere, kuko n’ubundi mu manota aherutse gushyirwa ahagaragara y’umwaka w’ingengo y’imari 2019/2020, na bwo bari babaye aba kabiri n’amanota 82,8%, ubu bwo bakaba bagize 80,97%.

Uwitwa Jean Paul Ndagijimana wo mu Murenge wa Rwaniro yagize ati “Byari kuba byiza iyo tuba aba mbere, ariko no kuba aba kabiri ntacyo bitwaye. Turishimye, ariko nyine abaturage baravuga bati tuzishima neza ari uko twabaye aba mbere.”

Bernardine Bankundiye ukuriye Inama y’Igihugu y’abagore mu Kagari ka Sovu mu Murenge wa Huye na we ati “Ntabwo byantangaje kuba twabaye aba kabiri, nishimye. Ahubwo nibajije nti ese habuze iki kugira ngo tugire 100%?”

Yunzemo ati “Buriya turi bwegerane, duhamagarane mu masibo, turebe icyatumye tutagira 100%. Ubutaha tuzagira 100%!”

Impamvu atekereza ko bari bakwiye kugira 100% ngo ni ukubera ko mu Murenge atuyemo bakorera mu masibo, bakungurana ibitekerezo ku byo bakora byabateza imbere.

Ati “Ubu turi no kubaka ubusitani ahantu abantu bahurira ari benshi, kugira ngo tuzajye duhurira ahantu hari isuku, mituweli na yo turabikora neza, abana bariga, mbese turi kugenda ibintu tubikora neza tugendeye ku mihigo tuba twahize.”

Pascal Nkundimana na we ati “Buriya bamwe ntabwo twishimye kuko tutabaye aba mbere! Kuba aba kabiri n’aba gatatu byo turabisanganywe.”

Ubundi uretse muri 2017-2018, Akarere ka Huye kaje ku mwanya wa 19 n’amanota 66%, n’uwa 2014-2015 kaje ku mwanya wa mbere n’amanota 83%, guhera mu mwaka w’ingengo y’imari 2013-2014 kamaze kuba aka gatatu inshuro eshatu, n’aka kabiri inshuro ebyiri.

Abantu basabwa kwipimisha bakamenya uko bahagaze

Yabitangaje ku wa Kabiri tariki ya 28 Gashyantare 2023, ubwo yatangaga ishusho y’uko ubuzima bwifashe, mu nama y’Igihugu y’Umushyikirano.

Minisitiri Nsanzimana yavuze ko ubuvuzi bwateye imbere ku buryo mu myaka itanu ishize, abarwayi ba Malariya bageraga kuri Miliyoni eshanu buri mwaka, ariko uyu munsi abarwayi ba Malariya bakaba bari munsi ya Miliyoni ku mwaka.

Igishimishije kurushaho ariko ngo ni uko 70% by’abagaragaweho Malariya basigaye bavurwa n’abajyanama b’ubuzima hafi y’ingo zabo, bigatuma babasha gukora bakiteza imbere.

Yagize ati “Nko mu myaka itanu ishize twagiraga abantu Miliyoni eshanu barwara Malariya buri mwaka, yenda hari n’uwazaga kabiri ariko uyu munsi turi ku bantu munsi ya Miliyoni, abantu 800,000 ku mwaka ariko igishimishije cyane ni uko 70% y’abo bantu barwara Malariya bari kuvurwa n’abajyanama b’ubuzima, bakavurirwa hafi yo mu rugo batagiye kwa muganga.”

Yavuze kandi ko 96% by’abana babona inkingo baba bagenewe, hakirindwa indwara ziba zishobora kubafata.

Izindi ndwara zagabanutse mu bwandu no mu mpfu harimo Virusi itera Sida, Igituntu, impfu z’ababyeyi zagabanutseho 80% naho iz’abana zigabanukaho 60%, indwara y’umwijima wo mu bwoko bwa C igenda icika kubera ingamba zagiye zishyirwaho, zigamije kuyikumira ndetse ubu ngo hakaba hagezweho guhangana na kanseri y’inkondo y’umura.

N’ubwo izi ndwara zishobora guhitana umuntu vuba zagabanutse cyane, ariko ngo hari n’ikibazo cy’indwara umuntu amarana igihe kinini zigenda ziyongera.

Avuga ko ubushakashatsi bwa RBC, umwaka wa 2022, ngo bwagaragaje ko indwara y’umuvuduko w’amaraso ukabije yiyongereyeho 2% mu myaka ibiri gusa, Diyabete igeze kuri 3%, umubyibuho ukabije wikubye kabiri mu mijyi n’izindi.

Ati “Twabonye nk’indwara y’umuvuduko w’amaraso ukabije yazamutse iva kuri 15% igera ku 17% mu myaka ibiri gusa, diyabete ubu iri kuri 3% iriyongera nayo, umubyibuho ukabije mu Banyarwanda cyane cyane mu mijyi wikubye kabiri, indwara za kanseri ubu turabarura hafi 10,000 ziba mu Banyarwanda hafi buri mwaka.”

Minisitiri w’Ubuzima, Dr Sabin Nsanzimana

Bimwe mu bitera izi ndwara zitandura ngo mu bushakashatsi bwakozwe, bagaragaje hari Abanyarwanda 40% batajya bakora siporo ndetse batanayikozwa, kwicara amasaha menshi no kutarya imboga.

Ibi ngo bituma indwara zitandura z’umutima, kanseri na diyabete arizo zirimo guhitana abantu benshi.

Yagize ati “Hari abatubwiye ko barya imboga rimwe mu cyumweru nyamara ahubwo ugasanga bararya ibyangiza umubiri cyane, aribyo bizana bya bibazo turimo kubona kwa muganga twagakwiye kubyirinda hakiri kare, bitujyana mu kibazo turimo kubona, ko indwara zitandura z’umutima, kanseri na diyabete ubu arizo ziza ku mwanya wa mbere mu birimo guhitana Abanyarwanda.”

Ubwo Perezida Kagame yafungura ku mugaragaro Club Rafiki imaze kuvugururwa

Ntwali yavuze ko we nk’umwana wakuriye i Nyamirambo, ahamya ko Club Rafiki yamufashije we na bagenzi we benshi, bagashobora gutsinda ibishuko bitandukanye, ariho yahereye ashimira Perezida Kagame wasubije Club Rafiki ishusho y’ikibuga kigezweho, ndetse asaba ko Club Rafiki zakongerwa zikaba nyinshi mu gihugu aho bishoka, kubera uruhare zigira mu burere bw’abana.

Yagize ati “Munyemerere muri aka kanya nshimire Umukuru w’Igihugu, njyewe nk’umuntu wakuriye i Nyamirambo, impamvu mushimira ni nk’ebyiri; kongera gusubiza Club Rafiki ishusho y’ikibuga kigezweho. Mwarakoze Nyakubahwa Perezida wa Repubulika. Impamvu mbivuga gutyo ni uko nakuruye i Nyamirambo, muri bwa burere navugaga ukura mu rugo n’uburezi ukura ku ishuri, Club Rafiki yaradutabaye turi benshi. Yaradufashije nk’abana nyuma y’ishuri no mu gihe cy’ibiruhuko, twabaga dufite ahantu ho kujya, gukina imikino ifungura ubwonko, imikino idufasha gutekereza,iturinda ibyashoboraga kutugiraho ingaruka nk’abajene”.

Ntwali asabwe kugira icyo avuga ku babyeyi batekereza ko kujya muri Club Rafiki byari uburara, we ahubwo yavuze ko byari amahirwe.

Ati “Ku babyeyi babizi bagize abana banyuze kuri Rafiki, abakinnyi bakomeye twagize muri iki gihugu banyuze kuri Rafiki, barabizi ko ugize Imana ahubwo umwana wawe akajya kuri Rafiki, yaba ari amahirwe. Ni yo mpamvu twanasabaga yuko bishobotse mu gihugu zakongerwa zikaba nyinshi aho bishoboka. Kubera kuba ahantu hamwe muri Club Rafiki, byatumye dutekereza twishyira hamwe, nibwo mu 2012, icyo gihe njyewe na bagenzi banjye twari 19, twashinze Umuryango wa Past”.

Ntwali yasobuye ko bimwe mu byatumye uwo muryango bise ‘Our Past’ ubaho, harimo kwiga no kwigisha urubyiruko amateka y’igihugu, mbere ya Jenoside, mu gihe cya Jenoside na nyuma yayo.

Tariki 8 Kanama 2017, nibwo muri Club Rafiki i Nyamirambo, habereye igikorwa cyo gutaha ku mugaragaro ikibuga cya Basket cyatunganyijwe ku bufatanye n’ishyirahamwe ry’Abanyafurika bakinnye Shampiona ya Basketball muri Amerika (NBA), rizwi ku izina rya ‘Giants of Africa’.

Perezida wa Republika Paul Kagame, wafunguye icyo kibuga gikinirwago Basketball n’indi mikino, yashimiye abagize uruhare mu ivugururwa ryacyo, by’umwihariko abagize itsinda rya Giants of Africa.

Icyo gihe yagize ati “Aba bana bose bari hano bafite impano muri uyu mukino, iyo babonye aya mahirwe yo kwerekana impano zabo biba ari ibyo gushima, kuko hari benshi batabasha kubona aya mahirwe. Amahirwe nk’aya batayabonye ntibabasha kwerekana izo mpano, kuko n’abandi bageze kure hari amahirwe atandukanye bagiye babona”.

“Ndizera ko mu myaka iri imbere muzakomeza kuza gushyigikira ibikorwa nK’ibi, kandi mukanakomeza no kuzana abandi bafite u Rwanda ku mutima, bafite Afurika ku mutima. Sinakwibagirwa kandi gushimira abatoza bafasha aba bana umunsi ku munsi, kuko umusaruro wabo uragaragara, u Rwanda ruzagera kure, Afurika izagera kure”.

Itsinda Giants of Africa riyoborwa na Masai Ujiri wavukiye muri Nigeria, akaba yaranabaye Umunyafurika wa mbere wabaye umuyobozi mukuru w’ikipe yo muri NBA, Masai na we yashimye by’umwihariko Perezida Kagame ku bufatanye agira mu guteza imbere Siporo.

Minisitiri w’Uburinganire n’Iterambere ry’Umuryango, Prof Bayisenge Jeannette

Minisitiri Bayisenge avuga ko mu ibarura ryakozwe mu 2015, ryagaragaje ko abakobwa bafite hagati y’imyaka 15-19 batwaye inda zitateganyijwe bageraga kuri 7%, naho mu mwaka wa 2020 baragabanuka bagera kuri 5%. Ni ukuvuga ko umubare w’abahura n’icyo kibazo wagabanutseho 2% mu gihe cy’imyaka 5.

Kuri aba bana b’abakobwa babyaye imburagihe, Leta yabashyiriyeho gahunda yo kwiga imyuga ndetse abandi bakagirwa inama yo kwirinda gukomeza gutwara inda zitateganyijwe, babifashijwemo n’abajyanama b’ubuzima.

Hashyizweho ahatangirwa serivisi za Isange One Stop Center 48, zifasha aba bana batewe inda guhabwa ubufasha mu bujyanama mu by’ubuzima, ubuvuzi ndetse bagatanga amakuru ku babahohoteye kugira ngo bakurikiranwe.

Minisitiri Bayisenge ati “Gutanga amakuru ni bimwe mu bidufasha gukumira umubare w’abana bakomeza guterwa inda zitateganyijwe, bikanadufasha gukurikirana ababahohoteye”.

Izindi nzititi zibangamiye umuryango harimo amakimbirane aturuka ku mibanire mibi y’abashakanye, agenda akagira ingaruka no ku bana, bamwe bagakurizamo gutwara inda zitateganyijwe abandi bakaba inzererezi.

Mu gukemura iki kibazo ngo hashyizweho inshuti z’umuryango zibarizwa ku midugudu, bagizwe n’umugabo n’umugore bahabwa amahugurwa yo kumenya gukemura amakimbirane, nabo bakegera ya miryango yagiranye ibibazo bakabafasha kubikemura, nk’uko Minisitiri Bayisenge abigarukaho.

Ati “Aba bantu baba ari inyangamugayo, batorwa ku mudugudu bagakurikirana ya miryango ibanye nabi, kugira ngo ifashwe kongera kubana neza bityo birinde abana babo guhura n’ingorane zose zavuzwe, zirimo no guterwa inda”.

Icyegeranyo cyasohowe n’ishami ry’Umuryango w’Abibumbye ryita ku Buzima (OMS) muri Nzeri muri 2022, cyagaragaje ko abana bagera kuri miliyoni 21 baterwara inda zitateganyijwe buri mwaka ku Isi.

Minisitiri Bayisenge avauga ko Leta izakomeza kongera imbaraga muri ibi bibazo byugarije umuryango, birimo n’abangavu baterwa inda, babifashijwemo na ba mutima w’urugo ndetse n’abakorerabushake b’urubyiruko.

Dr Ngirente avuga ko n’ubwo ibiciro bitazasubira uko byahoze bitewe n’impamvu zituruka hanze y’Igihugu nko kubura kw’ibikomoka kuri peteroli, ngo hari icyizere gishingiye ku migendekere myiza y’igihembwe cy’ihinga gishize.

Umwe mu bakurikiranye Inama y’Umushyikirano kuri uyu wa Kabiri, yanditse ku mbuga nkoranyambaga ati "Mudufashe, inzego zibishinzwe zitubwire ingamba zo guhangana n’ibiciro ku isoko bizamuka, ibyo kurya birahenze pe, dukeneye kumenya niba Leta hari icyo iri kubikoraho".

Mu kumusubiza, Minisitiri w’Intebe Dr. Ngirente yavuze ko arimo guhumuriza Abaturarwanda, akavuga ko Leta itigeze ibatererana muri iki kibazo.

Dr. Ngirente yibukije ibyakozwe na Leta mu rwego rwo gukumira ko ibiciro byazamuka ku rugero rukabije kurusha urwo biriho kugeza none, birimo ’nkunganire’ yatanzwe ku bikorwa bitandukanye.

Avuga ko iyo nkunganire itabaho cyane mu ifumbire no mu bucuruzi bw’ibikomoka kuri peterori (mazutu na lisansi), ibiciro ngo byari kuba byarikubye inshuro ebyiri cyangwa eshatu ugereranyije n’uko biteye kugeza ubu.

Dr. Ngirente avuga ko umusaruro w’ubuhinzi wabonetse mu gihembwe cy’ihinga A (Nzeri-Ukuboza 2022) urimo gutanga icyizere, ndetse ko ibiciro by’ibiribwa byatangiye kumanuka bihereye ku bigori.

Minisitiri w’Intebe, Dr. Edouard Ngirente

Yagize ati "Icyizere nabaha ni uko iyo tureba umusaruro wavuye mu gihembwe cy’ihinga A, ubu turimo gusarura, dufite icyizere ko umusaruro w’ibigori wikubye kabiri, uw’ibirayi na wo wikubye hafi kabiri, uw’ibishyimbo wagabanyutseho gato kubera amapfa yari yashatse kuba".

Ati "Ibyo bisobanuye ko muri iyi minsi turimo, twatangiye kubona igiciro cy’ibigori kimanuka kuva ku mafaranga 800Frw kugera kuri 400Frw, ni ukuvuga ngo n’ibindi biragenda biza kumanuka, ni cyo cyizere dufite".

Yavuze ko izamuka ry’ibiciro riterwa n’ibibazo biri ku rwego mpuzamahanga ari cyo gihangayikishije Leta bitewe n’uko idashoboye kubigenzura cyangwa kubikumira.

Guverinoma y’u Rwanda ivuga ko intambara hagati y’u Burusiya na Ukraine ndetse no kuba u Bushinwa bwarabaye muri Guma mu rugo igihe kinini kubera Covid-19, ngo byatumye Igihugu kibura ibiribwa n’ibindi bicuruzwa muri rusange.

Perezida Kagame yasabye abayobozi kureha guhora mu nama

Ibi Perezida Kagame yabigarutseho atanga impanuro zitandukanye ku byavugiwe muri iyi nama, agaruka cyane ku bayobozi bahora mu nama.

Perezida Kagame yibukije abayobozi ko bakwiye kwigira ku byavugiwe muri iyi nama, bakagira n’ibyo bahindura mu kazi kabo ka buri munsi, kugira ngo barusheho kunoza ibyo bakora no kuzuza inshingano zabo.

Ati “Ariko nibwira ko tuba dukwiriye gukomeza kugendera ku nama, ibitekerezo, uko byagenze hano, ari nako izindi nama zikwiriye kuba zigenda, kugira ngo umuco w’inama zidashira ucike burundu”.

Perezida Kagame yabibukije ko inama ikwiye kuba ari ugukurikirana ibikorwa, kugira ngo abayobozi barebe aho ibintu bigeze, no kureba ibyakongerwamo imbaraga ndetse hakaba n’inama yo gusuzuma ibyamaze gukorwa.

Perezida Kagame yagarutse ku biganiro byatanzwe ku muryango asaba abayobozi kuva mu magambo bakajya mu bikorwa.

Ati “Ibiganiro byatanzwe kare byose nabyumvise, ibijyanye no kugwingira mu bana bigatuma batakaza ireme ryabo, ndetse bagatakaza n’ubuzima. Abayobozi mwari mukwiye kumva uburemere bw’ibyo bintu”.

Perezida Kagame yahaye umurongo ikibazo cya rumwe mu rubyiruko, rufite imyifatire yo kwishora mu businzi kuko ari ikibazo gikwiye kuba gikemuka.

Yasabye abayobozi gufata umwanya wo kwigisha abakiri bato b’urubyiruko, babagira inama bakabubaka mu bitekerezo, babafasha kumva ko ubuzima bwabo bushingiye ku kuba buri mu maboko yabo.

Ati “Icyo gice cyo kwigisha abana no kubinginga ntabwo tugikora, kuko birakwiye ko umuntu abwira undi ati ibyo ukora ntabwo aribyo, no muri twe barimo icyo kintu turakibura kuba twabwira bagenzi bacu ngo iki kireke ni kibi”.

Aha niho Perezida yahereyeho asaba abayobozi gukeburana igihe umuntu abonye mugenzi we yakoze ikosa.

Kuri iki kibazo cy’imyitwarire ya rumwe mu rubyiruko, Perezida Kagame yasabye abantu bakuru kwirinda gusangira inzoga n’abana bato kandi bakabarinda kubibashoramo.

Ati “Iyo byagenze gutyo hagomba kubaho ubundi buryo bwo gukurikiza amategeko ugahana uhereye ku babyeyi, ugahera no kuri ba nyiri ako kabari hanyuma uwo mwana we ndabibarekera muzabyige uko bahana umwana w’imyaka 14 hakurikijwe amategeko, ariko mutibagiwe no kubagira inama”.

Ni umuhango wabereye muri Kigali Convention Centre, ubwo hasozwaga inama y’Igihugu y’Umushyikirano, ukayoborwa na Minisitiri w’Intebe Dr. Edouard Ngirente, watangaje amanota y’uko uterere ndetse n’intara byagiye birushanya.

Bimwe mu byagendeweho ni uko nta wagombaga guhigira umuhigo w’igice, kuko icyahigiwe cyose cyagombaga gukorwa kikarangira, ikindi ni uko imihigo yahizwe yose yagombaga gukorwa neza kandi yose ikarangira, kuko nk’Igihugu hakenewe imihigo y’ibyakozwe kandi bikarangira neza.

Ibyibanzweho cyane ni ikemura ry’ibibazo bibangamiye abaturage (Human Security Issues), hamwe n’ishyirwa mu bikorwa rya gahunda za buri mwaka buri karere kaba kariyemeje (Action Plan).

Ku bijyanye n’uburyo inzego zitandukanye zesheje imihigo muri za Minisiteri n’ibigo bizishamikiyeho, imihigo yo mu iterambere ry’ubukungu (Economic Transformation) yeshejwe ku kigero cya 78%, iyo mu miyoborere myiza (Transformational Governance) yeshejwe ku kigero cya 73.6%, naho iyo mu nkingi y’iterambere ry’imibereho myiza y’abaturage (Social Transformation) yeswa ku kigero cya 74%.

Minisitiri w’Intebe Dr Ngirente ashyikiriza Umuyobozi w’Akarere ka Nyagatare igikombe

By’umwihariko uko uturere twesheje imihigo twageze ku mpuzandengo ya 66% mu mihigo ikemura ibibazo bikibangamira abaturage, hamwe n’iterambere rirebane n’uruhare rw’ubuyobozi mu guhindura imibereho y’umuturage.

Minisitiri w’Intebe Dr Ngirente, yavuze ko ibi bigaragaza ko abayobozi bakwiye kongera kwegera abaturage.

Yagize ati “Igipimo cya 66% kijyanye n’ibibazo bibangamiye abaturage ni igipimo kidashimishije, kirasobanura ko kwegera abaturage bikwiye kongerwamo imbaraga, ubutaha tukazahura igipimo cyabaye nka 80%”.

Intara y’Iburasizuba niyo yahize izindi kuko yagize amanota 79%, ikurikirwa n’Amajyepho n’amanota 78%, Iburengerazuba n’amanota 76%, Umujyi wa Kigali n’amanota 75% mu gihe ku mwanya wa nyuma haza Amajyaruguru n’amanota 70%.

Mu turere twahize utundi harimo dutandatu twa mbere twakoze neza cyane, kubera ko twarushanyijwe amanota atari hejuru ya 2.5.

Akarere kahize utundi ni Nyagatare gafite amaonota 81.64%, aka kabiri ni Huye n’amanota 80.97%, aka gatatu ni Rulindo n’amanota 79.8%, aka kane ni Nyaruguru 79.5%, Rwamagana 79.5, Rusizi 79,2%, Ruhango 79.1%, Gatsibo 79%, Kamonyi 79.002%, Ngoma 79%, Karongi 78.97% Muhanga 78.90%, Rubavu 78.74%, Kirehe 78.68%, Gisagara 78.55%, Nyabihu 78.41%, Kayonza 78.15%, Ngororero 77.76%, Nyanza 77.66%, Bugesera 77.26%.

Hari n’uturere dutandatu twagiye musi cyane y’utundi turimo Nyamasheke yagize amanota 76.6%, Nyamagabe ifite 71%, Gakenke 70.9%, Gicumbi 70.8%, Musanze 67.65%, Rutsiro 66.27% na Burera ifite amanota 61.7%.

Reba ibindi muri iyi video:

Minisitiri w’Ubuzima, Dr Sabin Nsanzimana

Ku munsi wa kabiri w’Inama y’Igihugu y’Umushyikirano, mu kiganiro cyerekanaga uko Igihugu gihagaze mu rwego rw’ubuzima, Minisitiri w’ubuzima Dr. Sabin Nsanzimana, yavuze ko kimwe mu bibazo byibasiye umuryango nyarwanda, harimo igwingira ry’abana bato, kuko ureste kukibona nk’indwara, banakibona nk’icyorezo kubera ko ari ikibazo gikomeye cyane.

Dr. Nsanzimana avuga ko impamvu ari ikibazo gikomeye, ari uko iyo umwana arengeje imyaka ibiri biba nta garururiro, ahubwo abana no kugwingira ubuzima bwe bwose, nyuma akazagira n’ibyago byo guhura n’indwara zitandura kurusha abandi bose, kuko aba ashaka kurya kubera ko umubiri we uba ushaka kubona ibyo utabonye kandi ntacyo byahindura.

Ati “Impamvu tukibona ko ari indwara ni ukubera ifite ikiyitera, biraterwa n’indyo ituzuye akenshi binaturuka ku mubyeyi umwana akimutwite, icya kabiri ni inzoka abana bakura mu mazi yanduye banywa, tubatekeshereza ibiryo, zagera mu nda na duke tugiyemo za nzoka zikaba arizo zitwirira umwana akagwingira. Ikindi gitera kugwingira ni ibibazo abana bagira kubera amakimbirane mu ngo, kuko ubwonko bwabo ntabwo bwihanganira ibintu bibi bibabuza kwisanzura”.

Zimwe mu ngaruka abana bagwingiye bashobora guhura nazo, harimo kuba bashobora kurwara indarwa zitandukanye zirimo diyabete, umutima ariko kandi ngo n’ubwonko bwabo ntabwo bukura neza, nk’ubwa bagenzi babo batagwingiye.

Ati “Ubwonko bwabo ntabwo bukura nk’ubw’abandi bana batagwingiye, bagera mu ishuri bakananirwa kwiga bagatsindwa. Aba bana nibo bazaba ari abayobozi b’ejo b’Igihugu cyacu, niyo mpamvu tugomba kubarinda iri gwingira hakiri kare, ntidushake kubikora byaramaze kuba ikibazo”.

Imibare ya MINISANTE igaragaza ko mu myaka 10 ishize abana bagwingiye bagabanutseho 5%, ku buryo bakomeje kugendera kuri uwo muvuduko byazasaba imyaka 33, kugira ngo ikibazo cy’abana bagwingiye kiranduke burundu mu Rwanda.

Dr. Nsanzimana ati “Uyu munsi umwana umwe kuri batatu aragwingiye mu Rwanda, ni kimwe no muri Afurika niko bimeze 30% by’abana baragwingiye mu bihugu biri mu nzira y’amajyambere, ariko wareba ku bindi u Rwanda rwakoze bikomeye mu kurwanya Malaria n’ibindi, usanga u Rwanda ruri imbere cyane aho ruri inyuma ni mu kibazo cy’igwingira”.

Minisiteri y’Ubuzima ivuga ko igiye gukora ibintu bisa nk’aho bidasanzwe mu gihe cy’imyaka ibiri mu kurwanya igwingira, ku buryo bizatanga umusaruro kurusha ibyakozwe byose mu gihe cyashize.

Birimo gushyira imbaraga mu gutanga igi rimwe kuri buri mwana, kugabura indagara kuko ari kimwe mu biribwa byagaragaye ko birwanya igwingira, hakiyongeraho imboga n’imbuto.

Ibi biziyongeraho amazi asukuye, hamwe no kuvugurura no gushyira imbaraga mu bice byateganyirijwe kuvurirwamo abana bafite ikibazo cy’imirire mibi.

Bamwe mu batanze ibitekerezo bagaragaje ko ahari ingo mbonezamikurire hakwiye kongerwamo imbaraga mu mikorere yazo, ndetse aho zitari bakazubakirwa kugira ngo bakomeze guhangana n’ikibazo cy’igwingira.

Mu Rwanda habarirwa amarerero asaga ibihumbi 30, agera kuri 70% muri ayo akaba ari akorera mu midugudu ari nayo akeneye cyane kongerwamo imbaraga.

Minisitiri Bizimana avuga ko ubwicanyi bukorerwa Abatutsi muri Congo bubangamiye Ubumwe bw’Abanyarwanda

Minisitiri Bizimana avuga ko Ingengabitekerezo ya Jenoside irimo gukoreshwa mu kwica Abanyekongo bavuga Ikinyarwanda, isa neza n’iyakoreshejwe mu kwica Abatutsi mu Rwanda, hagati ya 1992 na 1994, ibyo bikorwa bikaba bikwiye guhwitura Abanyarwanda mu kurengera ukuri kw’Igihugu.

Minisitiri Bizimana ashingiye ku ngero z’ibikorwa by’urwango byo mu Rwanda mu gihe cya Jenoside, birimo gukwirakwizwa mu Karere u Rwanda ruherereyemo, asanga neza bigamije gusubiza inyuma Ubumwe bw’Abanyarwanda, kuko nabyo bihembera Ingengabitekerezo ya Jenoside.

Agira ati “Uko u Rwanda rutera intambwe mu Bumwe n’Ubwiyunge, bikomwa mu nkokora n’ibikorwa by’urwango birimo kubera muri Congo, ku bavuga ururimi rw’Ikinyarwanda cyane cyane Abatutsi”.

Yongeraho ati “Imvugo z’ibinyoma n’urwango byigishwa Abanyekongo bigashyigikirwa n’abanyamahanga, bibangamiye Ubumwe bw’Abanyarwanda n’imibanire n’abaturanyi, kuko ikinyoma iyo gihora gisubirwamo hari abagifata nk’ukuri”.

Atanga ingero z’amwe mu magambo abiba urwango arimo gukoreshwa kugira ngo Abatutsi b’Abanyekongo bicwe, hari nk’ijambo ryakoreshejwe mu Rwanda ryamburaga ubumuntu Abatutsi babitaga ‘inzoka’.

Agira ati “Hari ijambo bakoresha ngo ‘Nyoka asikuume’, bishatse kuvuga ngo inzoka ntikakurume, iryo rikaba ari ijambo ryakoreshejwe muri Jenoside aho Abatutsi bitwaga inzoka, kugira ngo bamburwe ubumuntu”.

Avuga kandi ko Abanyekongo bakwirakwiza amagambo agaragaza ko Abanyarwanda ari abanyabinyoma n’uburyarya, ko badakwiye kwizerwa ibyo bakora byose, bigashyigikirwa no kubeshya ko abagize umutwe wa M23 ari Abanyarwanda, kandi bizwi neza ko ari Abanyekongo.

Ibikorwa by’Urwango kandi bishingira ku kuba byose bikorwa, hari ingabo z’Umuryango w’Abibumbye zishinzwe kugarura amahoro muri Kongo, na Leta ikabishyigikira bituma neza ibirimo kubera mu baturanyi ba Kongo, bisa nk’ibyabaye mu Rwanda mu gihe cya Jenoside yakorewe Abatutsi.

Urubyiruko rukwiye guhabwa ubumenyi ku mateka kugira ngo ruhangane n’ikinyoma

Minisitiri Bizimana avuga ko kugira ngo imvugo z’urwango zihashywe, bikwiye ko abazi ukuri basubiza abavuga ibyo binyoma, ariko bikaba bitakorwa hatabayeho gutanga ubumenyi bushingiye ku kuri kw’amateka.

Yongeyeho ko urubyiruko rukwiye gusobanurirwa, ko u Rwanda rwagabanyijwemo imipaka mu biganiro bya Berlin mu 1884, bimwe mu bice byarwo bya Goma, Masisi, Rucuru n’ikirwa cy’Ijwi byari iby’u Rwanda, bikomekwa kuri Congo nyuma yo kwemezwa mu 1910 hagati y’u Bubiligi n’u Budage, nyamara ibyo bice byari iby’u Rwanda kuva mu myaka ya 1500.

Avuga kandi ko hari Abanyarwanda bimuwe bajyanwa muri Congo kubera ibikorwa by’ubukoloni, byari bigamije kubakoresha mu bikorwa by’ubuhinzi n’ubucukuzi bw’amabuye y’agaciro, bagatuzwa muri Congo ababakomokaho bakaba ari Abanyekongo buzuye n’ubwo bavuga Ikinyarwanda.

Asanga kandi urubyiruko rukwiye kumenya uko Abasize bahekuye u Rwanda muri Jenoside yakorewe Abatutsi, bahungiye ku butaka bwa Congo bakarema indi mitwe irimo na FDLR, igamije gukomeza umugambi wa Jenoside kandi ibihugu by’amahanga birebera, na Congo ikabaha rugari.

Minisitiri Bizimana avuga ko zimwe mu ngamba zatuma Ubumwe n’Ubudaheranwa bw’Abanyarwanda bukomeza, hakwiriye gukomeza ibiganiro bya ‘Ndi Umunyarwanda’ mu Rwanda no mu Mahanga.

Hakwiye kandi gushyirwa imbaraga mu itorero ry’Umudugudu, gutegura abarimu b’amateka n’uburere mboneragihugu mu mashuri makuru na za Kaminuza, ku buryo abaharangije bajya bigisha abandi.

Hakenewe kandi gukomeza gukorana n’amadini n’amatorero mu kwigisha amateka yo mu Karere, ndetse imiryango yose ikihatira ku kubwiza abana ukuri ku mateka, hubakirwa ku muco Nyarwanda.

Byatangarijwe mu kiganiro cyatanzwe mu nama y’Igihugu y’Umushyikirano ku nshuro ya 18, aho byakunze kugarukwaho ko ubumenyi buke buri mu bidindiza serivisi zikenewe mu kazi, by’umwihariko bitewe n’uko hari abarangiza amashuri yisumbuye na za Kaminuza, ariko badafite ubushobozi bwo gukora ibyo bize.

Denys Karera, umwe mu bikorera avuga ko iyo bagiye gutanga akazi ku barangije amashuri yisumbuye na Kaminuza, usanga nibura umuntu umwe ku icumi mu bakora ikizamini ari we utsinda, kandi na we agatsindira ku manota makeya dore ko benshi ngo baba batanazi kwandika ibaruza isaba isaba akazi.

Karera asaba ko ubwo havugwa gushyira abana mu mashuri, hakwiye no gutekerezwa cyane ku ireme ry’uburezi, we asanga ntaryo arebeye mu buryo abaza gusaba akazi batsindwa ibizamini.

Agira ati “Mu bantu 10 duha ikizamini mvugo (Interview) , usanga umwe ari we utsindira nko ku manota 60%, ndibaza ahantu ireme ry’uburezi ryagiye kuko n’abafite impamyabumenyi z’icyiciro cya gatatu cya Kaminuza, ubaha urupapuro n’ikaramu n’ikibazo basubiza, bakabura ibyo bandika, ndibaza ahantu ireme ry’uburezi ryagiye ku buryo twajya tubona abantu bafite ubumenyi duha akazi”.

Minisitiri w’Uburezi, Dr. Uwamaliya Valentine, avuga ko ireme ry’uburezi rihari ariko yenda ridahagije, kuko hari abantu bashoboye kandi bakora akazi neza, icyakora ngo riracyari hasi hakaba hakiri akazi kenshi karimo no kongera umubare w’abarimu no kubafasha kwigisha, hagendewe ku nteganyanyigisho zikoze neza n’imfashanyigisho zihagije.

Agira ati “Ireme ry’uburezi rirahari n’ubwo ritari ku kigero gishimishije, niyo mpamvu habayeho kubaka ubushobozi bwa mwarimu, kumushyiriraho ibikorwa remezo bikenewe no kwita ku mwarimu”.

Avuga ko ku kijyanye no kwimenyereza umwuga, bigoye ngo abikorera bakire abanyeshuri kandi ari kimwe mu byatuma igihe bagiye mu bizamini by’akazi babitsinda, ariko ugasanga hakirimo ikibazo, agasaba ko habaho ubufatanye ngo haboneke ireme ry’uburezi ryifuzwa.

Asobanura ko mwarimu wafashijwe byinshi ngo agire ubushobozi bwo gutanga ireme ry’uburezi rifatika, kandi ko Leta yashyizeho gahunda yo kwishyurira icya kabiri cy’ikiguzi cy’uburezi abanyeshuri biga uburezi muri za (TTC), kugira ngo habashe no kuzamo abanyeshuri bafite amanota yo hejuru, kuko mbere wasangaga abasaba kwiga uburezi bafite amanota make.

Asobanura ko kwiga uburezi ufite amanota makeya, byumvikana ko nawe urangiza kwiga nta byinshi ufite watanga, ari nayo mpamvu abiga uburezi muri za kaminuza bo bahabwa buruse itazishyurwa, mu rwego rwo gukomeza gushaka abarimu bafite ubumenyi buhagije.

Agira ati “Hari igihe cyageze bikumvikana ko abiga uburezi ari ababonye amanota macye, ibyo byatugizeho ingaruka kuko biradusaba guha abarimu amahugurwa menshi atandukanye, kugira ngo bazamure igipimo bagezeho”.

Avuga ko ibiri gukorwa ngo mwarimu atange ireme ry’uburezi rikenewe bizagenda neza igihe hazakomeza kubaho ubufatanye mu kongerera abarimu ubushobozi.

Perezida wa Repuburika, Paul Kagame, wari witabiriye ikiganiro yavuze ko na we hari ibyo anenga mu bayobozi badafite ubumenyi buhagije, ariko akizera ko ubwo Abanyarwanda bakomeje kwiyongera bishoboka kuzagera aho hakabonekamo abantu bazi ubwenge, kandi bihatira gushyira mu bikorwa ibikenewe ngo Igihugu gikomeze gutera imbere.

Umwe mu mishinga ye ni ubworozi bw’inkoko

Nk’uko yanabibwiye abari bakurikiye inama y’Umushyikirano ku wa 27 Gashyantare 2023, ashaka kugaragaza ko gukira bidasaba gushaka akazi igihe cyose, kandi ko no mu cyaro umuntu yahakirira, Munyankindi ubu afite impamyabushobozi ya Masters mu bijyanye n’ubutaka n’amazi.

Iyi mpamyabushobozi yayibonye muri 2021, nyuma yo kwiga mu ishami rya Kaminuza y’u Rwanda ry’i Nyagatare.

Kuba rwiyemezamirimo ngo yabitangiye arimo gukora ubushakashatsi bujyanye no kwandika igitabo gisoza amasomo ye muri kaminuza, ari na bwo yakoze ikiraka cyo gukora amaterasi iwabo i Gisagara.

Agira ati “Hari mu 2019. Amafaranga ibihumbi 200 nakuyemo sinayapfushije ubusa kuko nari mfite intego yo kuba rwiyemezamirimo. Icyo gihe nashakaga igishoro. Naguze inkoko z’amagi 50 n’ibiryo byazo.”

Muri gahunda yo guha urubyiruko igishoro cy’amafaranga ibihumbi 300 mu Karere ka Gisagara, na we yabonye kuri ayo mafaranga, maze yegeranya n’andi yari amaze kwegeranya ayakuye mu magi, ni ko kuzana noneho inkoko 500.

Inyungu yagiye akura muri izo nkoko yagiye ayigura imyaka akayisubiza, aza kugera aho ashinga kampani akajya agemurira ibigo by’amashuri ibiryo, ku buryo ubu yiguriye imodoka yifashisha mu kazi ke harimo ak’ubworozi bw’inkoko no kugemura ibijyanye n’amasoko agenda atsindira, ndetse no kugurira moto bagenzi be batanu, bamwishyura buke bukeya banamwungukira.

Abraham Munyankindi ageze kure mu iterambere ku myaka 30

Uretse bariya bamotari batanu, ngo yanahaye akazi abandi bantu bane, anakura mu muhanda abana batatu ku buryo ubu abafasha mu myigire yabo.

Ati “Ku myaka 30 ubu ndi rwiyemezamirimo, sintinya n’amasoko ya miliyoni 50. Ubu ndi gukorana n’ibigo birenga 10 by’amashuri abanza byo muri Gisagara na Huye, kandi nkora n’andi masoko ajyanye n’ibyo nize harimo n’ubujyanama mu by’ubuhinzi.”

Kuri ubu ngo ari kuganira na NIRDA ashaka ukuntu yashinga uruganda rutunganya amavuta ya avoka, yizeye kandi ko nabigeraho azabasha guha akazi abantu bagera kuri 80.

Arateganya kandi kuzagera kuri uru ruganda yaramaze kurushinga, kuko ubu akiri umusore ariko ufite fiyanse.

Ati “Ndateganya ko mu myaka icumi iri imbere ngomba kuba ndi umwe mu bakire icumi bo muri iki gihugu.”

Abo Munyankindi yahaye akazi bamubona nk’umusore uzi gukora wagerageje kwiteza imbere kandi uzagera ku ntego yihaye.

Eramu Bayiringire w’umumotari, ni umwe muri bo. Na we afite imyaka 30. Ngo yari asanzwe ari umumotari, hanyuma moto ye ayigurisha ari kubaka kugira ngo na we ajye ataha iwe.

Ati “Nabonye nta bushobozi bwo kugura indi mfite, ndamwegera, ahita ampa iyo yari afite imuhira. Yayimpaye mu kwezi kwa 12 k’umwaka ushize wa 2022, kandi twagiranye amasezerano y’uko nzagenda mwishyura.”

Théogène Nsanzimana, Umunyamabanga Nshingwabikorwa w’Umurenge wa Ndora, avuga ko Abraham Munyankindi ari urugero rw’uko bishoboka ko urubyiruko rushobora kwiteza imbere, rutarindiriye kujya gushaka akazi mu mujyi.

Yifuza ko n’abandi bamureberaho, kandi ngo nk’ubuyobozi biteguye kumufasha mu bishoboka byose yabakeneraho, kugira ngo azabashe kugera ku ntego yihaye.

Ni muri urwo rwego Karera Denis wo mu rugaga rw’abikorera (PSF) yatanze igitekerezo cy’ibyo abona byakorwa hagamijwe gufasha Abikorera bo mu Rwanda kwinjira mu bucuruzi bureba Afurika yose, aho yagaragaje ko u Rwanda rukwiye gushyiraho uburyo bworoshye bwihutisha serivisi.

Yagize ati “Kuri ubu, ngira ngo duherutse kubivuganaho na Minisiteri y’Ubucuruzi, hari ahantu hatanu hatangirwa impapuro zituma ujya muri ubwo bucuruzi. Icyo nakwifuza ni uko, kuko hatabaho ‘one stop center’ ya vuba mu gihe cya vuba cyane, Leta igafasha mu kugira one stop center, kuko hari urupapuro rwemeza gukora ubwo bucuruzi, hari urupapuro rwemeza ‘standards’ kuba ibicuruzwa bizifite, hari kandi Kashe ituruka i Masaka, hari ‘certificate of origin’ na yo ituruka ahandi, hari ahantu nka hatanu umuntu agomba kuzenguruka, kugira ngo abone uburyo bwo gutwara ibintu. Rero nkaba nsaba ko Leta yafasha mu buryo bushoboka, ibintu byose bigakorerwa hamwe muri one stop center hakaba harimo n’Ikigo cy’Igihugu cy’Imisoro n’Amahoro (RRA), n’ibindi kugira ngo ibintu byoherezwe hanze kuko haracyarimo imbogamizi”.

Mu kugira icyo avuga kuri icyo gitekerezo, Minisitiri w’Ubucuruzi n’Inganda, Dr Ngabitsinze Jean Chrysostome, yavuze ko hashyizweho itsinda rigamije gufasha muri urwo rwego, gusa yongeraho ko muri iyi minsi bari bari mu bukangurambaga bwo kugira ngo abantu bamenye uko iby’isoko rusange muri Afurika rikora.

Yagize ati, “… ni byo, ibyo avuga ni byo, ariko binyuze muri RDB, ubu hari itsinda rihuriwemo n’inzego zitandukanye harimo RICA,RRA, NAEB n’ abandi, kugira ngo bafashe, icyo cyangombwa kijye kibonekera ahantu hamwe kandi mu buryo bwihuse”.

Kuri icyo kibazo cyo gushyiraho one stop center, cyangwa se ahantu hamwe hatangirwa serivisi nyinshi zifite aho zihuriye, Perezida Kagame yavuze ko kitagombye kuba kigaruka muri uyu mushyikirano wa 2023, kuko kimaze igihe kivuzweho ndetse byemejwe ko RDB igomba kuyishyiraho mu rwego rwo korohereza abikorera.

Yagize ati “Ubu ikibazo cya one stop center kije aha gite? Kigarutse aha gite? Imyaka ibaye ingahe”?

Clare Akamanzi, Umuyobozi mukuru w’Urwego rw’Igihugu rw’Iterambere (RDB), yasubije ko kugeza ubu, hari one stop center ihuriweho n’inzego za Leta zigera kuri makumyabiri (20), zihagarariwe muri RDB uhereye mu ntangiriro y’uyu mwaka wa 2023, gusa asobanura ko hari imikorere itari yanozwa neza kuko hari serivisi zimwe na zimwe zigitangirwa ahandi.

Perezida Kagame yavuze ko ubundi mu byatumye ikigo RDB kijyaho, mu myaka kimaze gishinzwe, harimo no kugira ngo gishyireho one stop center, bityo ko bitumvikana ukuntu ikibazo n’ubu kikigaruka. Nyuma yo gutanga ibisobanuro by’uko politiki yo gushyiraho iyo one stop center itashyizwe mu bikorwa neza, Clare Akamanzi yavuze ko bigiye gukosorwa.

Yagize ati, “Nyakubahwa Perezida wa Repubulika, byumvikanye neza, ndisegura kuri ibyo, kandi mbizeza ko bigiye kugenda neza ku buryo bushoboka”.

Perezida Kagame yasabye ko ibyo by’inzego zikorera ahantu hatandukanye, bigasaba ko abantu bashaka serivisi zagombye kuba ziboneka muri one stop center muri RDB bihagarara.

Ati “Ndibwira ko bikwiye guhagarara cyangwa ubwanyu mugahagarara.”

Abaguzi bavuga ko ubushobozi bwo guhaha ari buke bitewe n’ibiciro bihanitse

Ku masoko yo hirya no hino mu Gihugu, abayarema bakomeje kugaragaza ko batorohewe n’uburyo ibiciro, byaba iby’ibiribwa n’ibindi bintu bisanzwe, bidasiba kwiyongera umunsi ku wundi.

Mu isoko ry’ibiribwa rya Musanze rizwi nka Kariyeri, ryo mu mujyi wa Musanze, abo Kigali Today yaganiriye na bo, barimo Ahishakiye Denyse wagize ati: "Ibintu bikomeje guhenda ku masoko byaba ibiribwa n’ibindi dukenera mu buzima bwa buri munsi, biraduhangayikishije. Hano muri iri soko ubu ikilo kimwe cy’Ibirayi biragura amafaranga ari hejuru ya 550, umuceri 1700 kuzamura ukageza ku 2000, ibishyimbo byo udafite hejuru ya 1500 ntacyo yavugana n’umucuruzi. Turasaba inzobere zitabiriye iyi nama, kwicara zigasesengurira hamwe ikibazo cy’ibiciro ku masoko, bakagishakira umuti urambye, kuko kiduhangayikishije".

Kabera Steven na we agira ati: "Ubuzima bukomeje kudukomerera bitewe n’ibintu byahenze, aho noneho tugeze aho kurya rimwe ku munsi nabwo kandi ibidahagije. Urajyana amafaranga ibihumbi nk’icumi ku isoko, ugatahana ibitahaza abantu bane mu nzu. Turasaba ziriya nzobere mu bukungu ziteraniye mu Mushyikirano, guhuza ibitekerezo, zikajya inama zikadukemurira ikibazo cy’ibiciro ku masoko kuko turarembye".

Inama y’Igihugu y’Umushyikirano irabera i Kigali, ariko n’abari ahandi mu Gihugu no mu mahanga bashyiriweho uburyo bwo kuyikurikira no gutangamo ibitekerezo

Inama y’Umushyikirano iteranye ku matariki ya 27 na 28 Gashyantare 2023, nyuma y’imyaka itatu yari ishize yarasubitswe kubera icyorezo cya Covid-19.

Abaturage bagaragaza ko iziye igihe, kandi ngo bari bayisonzeye, bitewe n’ingingo zinyuranye, abayitabira bo mu nzego zinyuranye zaba izo mu Rwanda no mu mahanga basesengurira hamwe, zireba ubuzima bw’abaturage.

Umuhanda uhuza uturere twa Ngoma, Bugesera na Nyanza

Yabitangaje kuri uyu wa 27 Gashyantare 2023, mu nama y’Igihugu y’Umushyikirano, ubwo yagaragazaga ibimaze gukorwa mu gufasha Abanyarwanda kugenderana ndetse n’ibindi bikorwa bibafasha mu iterambere n’imibereho myiza.

Yavuze ko ibarura rusange ry’abaturage n’imiturire, ryagaragaje ko u Rwanda rwateye intambwe mu bikorwa remezo ariko nanone inzira ikiri ndende.

Minisitiri Uwase yavuve ko mu myaka 20 ishize, mu Rwanda abantu bagerwagaho n’amashanyarazi bari kuri 5%, ubu Abanyarwanda 61% bakaba aribo bagerwaho n’amashanyarazi.

Yavuze ko ibi bitanga ikizere ko ni 100% bizagerwaho, hagamijwe ko Abanyarwanda babasha kwiteza imbere binyuze mu kwihangira imirimo bahereye ku muriro w’amashanyarazi.

Yagize ati “Uru ni urugendo tuzabasha gukora kubera urwo tumaze kugenda rubitwereka. Kuva mu kwezi k’Ukuboza 2020, Imirenge yose uko ari 416 twayigejejemo amashanyarazi ndetse turakataje ngo tubigeze no ku rwego rw’Umudugudu.”

Ikindi ni uko ngo imihanda migari yose ireshya na kilometero 629 yamaze gucanirwa. Yunzemo ko u Rwanda rutakibarizwa mu bihugu birimo umwijima nk’uko bigaragazwa n’amafoto afatwa n’ibyogajuru.

Yavuze ko mu myaka 10 imihanda y’igitaka ya kilometero 475 yose yashyizwemo kaburimbo, ikaba ari ihuza Uturere hagati yatwo ndetse n’Umujyi wa Kigali, ari byo byatumye u Rwanda ruza ku mwanya wa gatatu muri Afurika.

Ati “Uturere hafi ya twose duhuzwa na Kigali ndetse no hagati yatwo, twavanye imihanda ya kilometero 475 mu mihanda y’igitaka tuyishyiramo kaburimbo mu myaka 10 gusa ishize. Iyo mihanda tunayifata neza, byadushyize ku mwanya wa gatatu muri Afurika nyuma ya Namibia na Afurika y’Epfo.”

N’ubwo ibyo byakozwe ariko ngo hari ahandi hagikenewe imbaraga, nko mu bijyanye no kwegereza abaturage amazi meza, aho Abanyarwanda hagati ya batatu na bane bagikora urugendo rurenze iminota 30 kugira ngo bagere aho bakura amazi.

Minisitiri Uwase yavuze ko harimo gukorwa byinshi kugira ngo abaturage begerezwe amazi hafi yabo.

Ati “Twamaze kubaka inganda nini mu Gihugu hose zitanga amazi, harimo uruganda rwa Nzove rutanga Metero kibe 120,000 ku munsi ari narwo runini dufite mu Gihugu, hakaba urwa Gihira mu Karere ka Rubavu rutanga Metero Kibe 15,000 ku munsi n’urwa Mwoya mu Karere ka Rusizi n’ahandi, ndetse hakaba hari n’umushinga mugari wo kubaka imiyoboro y’amazi.”

Naho ku bijyanye n’ingendo zo mu kirere aho RwandAir ngo yajyaga mu byerekezo 14 mu myaka 10 ishize nabwo ari mu bihugu by’Afurika na Dubai gusa, ubu ngo ikora ingendo mu byerekezo hafi bine by’ingenzi, harimo Afurika, u Burayi, Aziya n’Uburasirazuba bwo hagati, bityo ngo uyu mwaka uzarangira RwandAir igenda mu byerekezo 30.

Umukuru w’Igihugu yongeye gukebura abayobozi bibera mu yindi si, kubera kudakurikirana ibikorwa byagombaga gukorwa kugira ngo bizamure ubuzima bw’abaturage.

Perezida Kagame yavuze ko usanga hari abayobozi badakurikira ibikorwa bigomba gukorerwa abaturage ku buryo n’iyo ubibabajije usanga batabizi ahubwo ugasanga abaturage ari bo babyikurikiranira.

Yagize ati “Abayobozi mudakurikirana ibikorwa byagombaga gukorwa kugira ngo bizamure ubuzima bw’abaturage, mwibera mu Isi yindi ntazi iyo ari yo, aho ufata umuyobozi uwo ari we wese ukamubaza uti ariko ibya cya cyemezo cyagombaga gukorwa aha kigeze he? Ni we ubishinzwe, ugasanga ntaheruka, nta makuru afite y’ibyo akwiriye kuba akurikirana, byaba bikorwa, byaba bidakorwa, byaba byarapfuye, ntabyo azi, ariko igihe utabizi byabuzwa n’iki gupfa ari wowe wagakwiye kuba ubikurikirana?”

Akomeza agira ati “Ahubwo ugasanga abaturage bakaba ari bo bikurikiranira, ukajya kubona ukabona ku mbugankoranyambaga baratabaza, bakavuga bati ariko mwadutabaye, ukamubaza uti wowe uba hehe ati mba aha, nta bayobozi bahari ati barahari ariko ntitubabona, ntaho duhurira, ahubwo ati mudutabare, abaturage barinda gutabaza buri munsi kuri buri kintu muba muri hehe bayobozi, ntimujya kubakemurira ibibazo, mwikemurira ibyanyu bikarangirira aho”.

Uretse kudakurikirana no kutamenya ibigomba gukorerwa abaturage, Umukuru w’Igihugu yavuze ko n’abagerageje kubikora usanga bakora biciriritse bitagendanye n’amafaranga bahawe.

Ati “Ibikorwa byagombaga gukorwa ntibikorwe, amafaranga agatangwa uwitwa ko agomba kubikora agakora ibintu biri aho biciriritse bitajyanye n’amafaranga azahabwa cyangwa yahawe, we akigendera abandi akabasigira ubusa, ndetse rimwe na rimwe ari uwakoreshaga ari uwakoraga bakigabanira bakimererwa neza, abaturage ibikorwa bikarangirira aho”.

Yongeraho ati “Abakoresha mwebwe mukwiye kuba mubikurikirana mukabijyamo bikaba inyungu zanyu n’abo mukoresha ariko abo mukorera ntibagire icyo bavanamo, abantu bahora muri ibi buri munsi, nk’ubu ba Minisitiri cyangwa abandi mwabuze akazi, kababanye gake ku buryo mwishakira akanyu katari ako mwagombaga gukora, bishoboka bite, muba muri hehe, muba mu biki, mumbwire ibindi bintu mubamo bindi birenze iby’akazi mukwiriye kuba mukora”.

Perezida Kagame yavuze ko imikorere nk’iyo bidakwiye ko yihanganirwa kandi ko nta gihe izigera yihanganirwa kandi ko bazakomeza guhangana n’abitwara batyo.

Imodoka zitwara abagenzi zigiye kongerwa

Iki kibazo cy’imodoka zitwara abagenzi cyabajijwe n’uwitwa Habarurema Aloys utuye mu Bubiligi ariko akaba yitabiriye uyu mushyikirano uri kubera mu Rwanda, avuga ko hagikenewe imodoka zo gutwara abagenzi mu mujyi wa Kigali.

Mu gusubiza iki kibazo, Eng. Uwase yavuze ko bari basanzwe bakizi ariko mu kugikemura ubu bamaze gutumiza izi modoka zikaba zizaza zigahabwa abafite mu nshingano gutwara abagenzi.

Ati “Izi modoka zatumijwe na Leta ariko hazabaho ubufatanye n’abikorera kugira ngo zibunganire mu byo basanzwe bakora”.

Umunyamabanga wa Leta muri Minisiteri y’Ibikorwa Remezo avuga ko iki kibazo bari baragihawe ho umurongo na Perezida Kagame ko kigomba gukemuka vuba kandi kikabonerwa igisubizo.

Eng. Uwera avuga ko impamvu iki kibazo bihutiye kugishakira ibisubizo ari ukubera igihe abantu bamara bategereje imodoka bigasaba ko cyakemuka vuba.

Ati “Ubu twatangiye gushaka aho tuzigura, ndetse n’ingengo y’imari izigura yarabonetse ku bufatanye na Minisiteri y’Imari, twese dufite ayo mafaranga, hasigaye kuzitumiza, hanyuma zaza zigakoreshwa n’urwego rushinzwe gutwara ibintu n’abantu."

Ikigamijwe ni ukugira ngo ahategerwa imodoka cyane muri za Gare no ku mihanda ahahurira abagenzi benshi hatazongera kugaragara iki kibazo cy’abamara umwanya munini bategereje imodoka.

Minisitiri w’Intebe, Dr Edouard Ngirente

Mu rwego rw’ubuzima, Minisitiri w’Intebe Dr Ngirente, yavuze ko ubu Abaturarwanda bagera kuri 78% bamaze guhabwa nibura doze ebyeri z’inkingo za Covid-19, aho akaba ari ho yahereye ashimira uko Abaturarwanda bitabiriye iyo gahunda yo gukingira.

Hari kandi gahunda yo kongera umubare w’ibitaro, ibigo nderabuzima ndetse n’amavuriro mato ya ‘health post’. Muri urwo rwego Minisitiri w’Intebe Dr Ngirente yavuze ko mu bitaro bishya byubatswe harimo ibya Nyarugenge, ibitaro bya Gatunda muri Nyagatare, ibya Gatonde, Nyabikenke ndetse n’ibitaro bya Munini byavuguruwe.

Yagize ati “Kugeza ubu, mu gihugu hose hari ibigo nderabuzima bigera kuri 512, amavuriro mato 1200 n’ibitaro 56. Hari gahunda yo kongera serivisi zitangirwa kuri ayo mavuriro mato, abaturage bakajya bahabonera serivisi ubundi zitangirwa ku bitaro by’Akarere”.

Ku bufatanye n’abafatanyabikorwa kandi, Guverinoma y’u Rwanda yatangije uruganda rukora inkingo za Covid-19, iza Malaria ndetse n’iz’igituntu.

Mu rwego rwo kongera umubare w’abakozi bashoboye mu mavuriro, Minisitiri w’Intebe yavuze ko Guverinoma yashyizeho ikigo gishinzwe guteza imbere imyigishirize n’amahugurwa y’abakora mu mavuriro, bagahabwa ubushobozi buhanitse ‘Human Resources for Health’, kandi ubu ngo birakora neza bikagenda byongera umubare w’abakora mu mavuriro mu gihugu.

Minisitiri w’Intebe, Dr Ngirente yavuze ko muri urwo rwego, hari abaganga b’inzobere baza mu gihugu kwigisha abakora mu mavuriro, ariko hakaba n’abanyeshuri bajya kwiga mu muhanga, aho bakura ubumenyi buhanitse mu rwego rw’ubuvuzi. Kugeza ubu ngo hamaze gutangwa porogaramu 13 guhera mu 2020.

Hari kandi ibigo byihariye by’ubuvuzi n’ubushakashatsi mu buvuzi, harimo ikivurirwamo indwara z’umutima ndetse n’ikivurirwamo indwara ya kanseri.

Guverinoma y’u Rwanda kandi nk’uko Minisitiri w’Intebe yakomeje abivuga, ikomeje gahunda yo gushyigikira Abajyanama b’ubuzima bazamurirwa ubushobozi, bagakomeza kwegera abaturage, ariko bongerewe n’ubumenyi.

Minisitiri w’Intebe Dr Ngirente yavuze ko ibi bizakorwa mu rwego rwo guteza imbere uburezi.

Ati “Ni muri urwo rwego dukomeje kongera amashuri y’imyuga n’ubumenyingiro. Guverinoma yafashe gahunda yo kubaka nibura ishuri rimwe ry’ubumenyingiro muri buri murenge mu gihugu. Intego dufite ni uko mu mwaka w’amashuri utaha, 60% by’abanyeshuri basoje icyiciro cya mbere cy’amashuri yisumbuye bazajya mu mashuri y’ubumenyingiro”.

Mu rwego rwo kugira ngo iyi ntego igerweho, Minisitiri w’Intebe, Dr. Ngirente yavuze ko harimo kubakwa amashuri yisumbuye y’imyuga n’ubumenyingiro 90 ku 114 mu Mirenge yari isigaye itarubakwamo ayo mashuri.

Minisitiri w’Intebe yavuze ko hagamijwe gufasha abanyeshuri biga imyuga n’ubumenyingiro gukomeza muri kaminuza (Career path development), mu kwezi gutaha kwa Werurwe 2023, hazatangizwa gahunda y’amasomo yo mu cyiciro cya kabiri cya kaminuza (Bachelor’s of Technology) muri IPRC/Kigali na Huye.

Guverinoma ikomeje kandi gushyira imbaraga mu guteza imbere inyigisho zijyanye n’ubumenyingiro ndetse no kuvugurura ireme ry’uburezi muri rusange, ibi bizafasha urubyiruko kugira ubumenyingiro bukenewe ku isoko ry’umurimo ndetse no kwihangira imirimo.

Hagamijwe gufasha abanyeshuri biga imyuga n’ubumenyingiro gukomeza muri kaminuza (Career path development), Minisitiri Dr Ngirente yavuze ko mu kwezi gutaha kwa Werurwe 2023, hazatangizwa gahunda y’amasomo yo mu cyiciro cya kabiri cya kaminuza (Bachelors of Technology) muri IPRC/Kigali na Huye.

Guhera muri Nzeri 2023, iyi gahunda y’icyiciro cya kabiri cya kaminuza izakomereza no mu yandi mashuri makuru (IPRCs) ndetse hanatangizwe gahunda y’icyiciro cya gatatu cya Kaminuza (Masters of Technology).

Hateganyijwe kandi gushyirwaho uburyo bunoze bw’imikoranire hagati y’amashuri n’inzego zitandukanye za Leta n’abikorera, mu rwego rwo gufasha abiga imyuga n’ubumenyingiro muri gahunda y’imenyerezamwuga (Industrial attachment).

Gukorera ifumbire mvaruganda mu Rwanda byitezweho kuzamura umusaruro w’ubuhinzi

Yabitangaje kuri uyu wa Mbere tariki ya 27 Gashyantare 2023, mu nama y’umushyikirano yateranye ku nshuro ya 18.

Agaruka ku byagezweho nyuma y’inama y’umushyikirano iheruka yo ku wa 19 kugeza ku wa 20 Ukuboza 2019, Minisitiri w’Intebe, yavuze ko Guverinoma yafashe ingamba zijyanye no kongera umusaruro w’ubuhinzi n’ubworozi aho hegitari zisaga 760,000 z’ubutaka bwahujwe hagamijwe kongera ubuso bw’ubutaka buhingwa.

Izi hegitari zihingwaho ibihingwa biri kuri gahunda yo kongera umusaruro w’ibihingwa byatoranyijwe.

Hagamijwe kandi kubungabunga ubutaka buhingwaho no kongera umusaruro, hashyizweho gahunda yihariye yo kurwanya isuri, ikaba igenda neza mu Gihugu cyose, ndetse ikaba inafasha kongera umusaruro ariko harindwa ibidukikije.

Kurwanya isuri ngo Guverinoma yabishyizemo imbaraga nyinshi ndetse ikaba inakangurira abaturage kurwanya isuri ku butaka batunze.

Yagize ati “Guverinoma ikomeje gushyira kandi imbaraga muri iyi gahunda yo kurwanya isuri, dusaba buri wese ko yabigiramo uruhare ufite ubutaka wese akarwanya isuri ku butaka bwe.”

Minisitiri w’Intebe, Dr. Ngirente yavuze ko mu guhangana n’ihindagurika ry’ikirere hakomeje gahunda yo kongera ubuso bwuhirwa aho muri uyu mwaka w’ingengo y’imari, ubuso bwuhirwa bugomba kwiyongeraho hegitari 2,000.

Mu rwego rwo korohereza abahinzi kubona ifumbire ku giciro cyoroheje no kongera ingano y’ifumbire ikoreshwa, Guverinoma yongereye ingano ya nkunganire nyuma y’uko ibiciro ku isoko mpuzamahanga byakomeje kwiyongera.

Ati “Muri uyu mwaka w’ingengo y’imari 2022-2023, hatanzwe nkunganire ikabakaba Miliyari 31 z’amafaranga y’u Rwanda, bingana n’ubwiyongere bwa 93% uhereye umwaka wari ushize.”

Ibi ngo byatanze umusaruro kuko mu gihembwe cy’ihinga 2023 A, kuko hashobora kuboneka umusaruro mwinshi ugereranyije n’igihembwe nk’iki cy’umwaka wabanjirije uyu.

Mu rwego rwo guhangana n’ingaruka z’amapfa, abahinzi bafashijwe kubona imbuto z’ibihingwa byera vuba nk’ibishyimbo, imboga ndetse n’ibyihanganira izuba birimo ibijumba n’imyumbati bituma hatabaho ibura ry’ibiribwa mu baturage.

Yavuze ko mu duce tw’Igihugu twazahajwe n’amapfa, abaturage bafashijwe kubona ibikoresho byo kuhira.

Mu rwego rwo kugabanya itumizwa ry’ifumbire mvaruganda mu mahanga, ubu mu Karere ka Bugesera harimo kubakwa uruganda ruyitunganya ruherereye mu Karere ka Bugesera, rukazatangira gukora muri Kanama 2023.

Yavuze ko hamaze kubakwa ubwanikiro burenga 1,470 mu Gihugu cyose hagamijwe kugabanya umusaruro wangirika nyuma y’isarura ndetse ubu hakaba harimo kubakwa ubundi buhunikiro 525, hanagurwa imashini zumisha umusaruro zirenga 40.

Hanubatswe ububiko bukonjesha ibiribwa n’indabo (Cold rooms), burimo 50 bwubatswe na Leta na 27 bwubatswe n’abikorera hagamijwe kubungabunga ubuziranenge bw’umusaruro woherezwa ku masoko y’imbere mu Gihugu no mu mahanga.

Mu rwego rwo kugabanya igihombo gikomoka ku buhinzi n’ubworozi giterwa n’ihindagurika ry’ikirere, hashyizweho gahunda y’ubwishingizi mu buhinzi n’ubworozi harimo na nkunganire ya Leta ingana na 40%.

Muri uyu mwaka w’ingengo y’imari, inka zishingiwe zisaga 43,500 naho amatungo magufi ari muri gahunda y’ubwishingizi hamaze kwishingirwa asaga 236,000.

Naho mu buhinzi, hegitari zirenga 31,000, zihinzweho umuceri, ibigori, ibirayi, imiteja n’urusenda na zo ngo ziri mu bwishingizi.

Yavuze kandi ko haguwe ibigega by’ingoboka by’ibinyampeke ndetse ngo bakaba bateganya gukomeza kubyagura kugera kuri toni 100,000 mu Gihugu cyose hagamijwe kugoboka abaturage bahuye n’amapfa ndetse bikaba byaranafashije mu kugoboka ababuze amikoro igihe cya COVID-19.

Yavuze ko hateganyijwe kandi imishinga minini yo kuhira hagamijwe guhangana n’imihindagurikire y’ikirere nk’uwa Gabiro-Agri Business Hub mu Karere ka Nyagatare na Gatsibo ndetse n’uw’ubworozi bw’inka zitanga inyama wa Gako Beef Project.

Iyi mishinga yitezweho gufasha mu kwihaza mu biribwa imbere mu Gihugu no kohereza ibiribwa hanze.

Perezida Kagame yihanangirije abashaka gukira vuba binyuze mu bujura

Umukuru w’Igihugu yabitangarije mu ijambo yagejeje ku bitabiriye Inama y’Igihugu y’umushyikirano 2023, aho yagarutse ku bibazo biri mu nkiko byatewe n’abantu bashaka gukira vuba, bakitwikira isura ya tombora bakiba abaturage.

Perezida Kagame yavuze ko ntawe Leta izongera gutaho amafaranga, ngo afashwe kubera ko yahombejwe na tombora.

Agira ati “Ugasanga mwataye umutwe, byamara kumera nabi ugasanga abantu baraza bavuga ngo bafashwe bararengana. Gute se wagiye mu bintu by’ubujura none ngo urarengana, gute? Biriya ni nk’ubujura”?

Yongeraho ati “Ibyo bintu ukabisangamo abayobozi bose, wowe wabeshwaho na tombora, ubuzima bwawe wabushyira muri tombora, ni nko kuvuga ngo ndaramuka cyangwa sindamuka. Ngaho biri mu Baminisitiri, biri mu bapolisi biri mu bajenerali”.

Perezida Kagame na Minisitiri w’Intebe mu gutangiza Umushyikirano 2023

Yihanangirije abamara guhomba bagatakira Leta ngo ibafashe, ko ibyo bitazongera kubaho, mu gihe abantu bishoye mu bibatwara amafaranga kubera gushaka gukira vuba, aho gukora ngo biteze imbere buhoro buhoro.

Yagize ati “Niba ushaka gufasha abaturage ayo mafaranga iyo uyabaha, izo tombora mujyamo ni iz’iki ? Abayobozi mwicaye aha ni mwe mbwira, ni mwe mujya kubikora, mwabuze ibindi mukora mujya muri tombora”?

Yongeraho ati “Umuntu afata miliyoni 10Frw akazijyana ngo bamuhe 20, mwagenze buhoro, mwakoze muriruka mujya he ? Mwakoze ejo ukabona imwe, ejo ebyiri, eshatu, ukagera kuri miliyoni 20Frw, ujye umenya ngo bijyana no kuba na ya yandi wari ufite uyabura, hanyuma ukaza ngo ufashwe na Leta”.

Perezida Kagame yasabye Minisitiri w’Intebe kutazigera aha icyuho abamaze guhombera muri izo tombora, bitwaje ko bagamije gufasha abaturage bahombye kuko abayobozi bamwe babyinjiyemo, ari bo n’ubundi baba bagiye kwifasha.

Ati “Bariya nibo baba bagiye kwifasha, iyo aba ari bo barwaraga bwaki bakabyumva aho kuba abana b’Abanyarwanda babayeho nabi. Sinzumve n’ifaranga na rimwe rya Leta ryagiye muri ibyo bintu”.

Umukuru w’Igihugu yavuze ko abantu ba tombora bakwiye gufungwa ahubwo, haba uwashutse abantu ngo bajye muri tombora, ndetse n’uwagiye muri izo tombola ko bose baba bakwiye kujyanwa mu igorororero, bagahurirayo bakabyikemurira.

Reba ibindi muri iyi Video:

Uyu mwanzuro wari uwa mbere ugira uti "Kwihutisha igikorwa cyo kwimura abatuye mu bishanga, mu manegeka n’ahandi hatemewe guturwa, bagatura neza kandi impamvu z’icyo gikorwa zikarushaho gusobanurirwa abaturage ko ikigamijwe ari uko abantu batura ahantu hadashyira mu kaga ubuzima bwabo".

Twaganiriye n’abasesenguzi, Joseph Hakuzwumuremyi ufite Ikinyamakuru cyitwa Umuryango, hamwe na Oswald Mutuyeyezu (Oswakim) ukorera TV&Radio 10, bavuga ku byakozwe ndetse n’icyakorwa kugira ngo Abaturarwanda muri rusange babashe kubaho neza.

Hakuzwumuremyi yibuka ko muri 2019 abari baturiye ibishanga muri Kigali nk’ahitwa Kiruhura, Rwampara, Gitega na Bannyahe (Kangondo na Kibiraro), ndetse n’inganda zahoze mu gishanga cya MAGERWA, bari bari ku gitutu cyo kwimuka.

Icyo gikorwa cyaje kugerwaho nk’uko cyari giteganyijwe, ndetse n’abahavuye ubu batuye cyangwa bakorera mu bindi bice, nk’uko biteganywa mu Gishushanyo mbonera cy’Umujyi wa Kigali.

Hakuzwumuremyi arabishima ndetse agasaba Umushyikirano w’uyu mwaka kuzafata umwanzuro wo gutuza Abaturarwanda bose, hagendewe ku rugero rw’abajyanywe i Busanza (Kicukiro) na Karama (Norvège muri Nyarugenge).

Agira ati "(Leta) bakwiye guhagarika ibyangombwa byo kubaka abantu tukajya mu midugudu, hakabaho abantu bubaka inzu tubamo, washaka inzu yawe ukaba ari yo ugura".

Ati "Inzu nka ziriya za Busanza na Norvège ni imidugudu ikwiye kubaho hirya no hino mu Gihugu, abantu tukabona ubutaka bwo gukoreraho ibindi bikorwa, ziriya nzu zose ubona mu giturage zikwiye kuvamo".

Kwita ku musaruro nyuma yo kuva mu murima

Umwanzuro wa gatatu w’Umushyikirano uheruka wagiraga uti "Gukemura imbogamizi ba rwiyemezamirimo bagihura nazo, cyane cyane abakizamuka (SMEs), zirimo kutabona ibyo bapfunyikamo/packaging, imbuto, ifumbire, ibyumba bikonjesha n’inganda zitunganya umusaruro bidahagije, no gushaka igisubizo ku musaruro ukomoka ku bworozi cyane cyane uw’amata".

Mutuyeyezu ndetse n’Umuyobozi w’Urugaga rw’Abahinzi rwitwa Imbaraga mu Ntara y’Iburengerazuba, François Hakuzimana, twakomeje tuganira kuri uyu mwanzuro.

Mutuyeyezu avuga ko hakiri umusaruro mwinshi w’inyanya, ibitoki, ibitunguru n’ibindi utarabonerwa uburyo bwo gutunganya, ndetse ko ibyumba bikonjesha byageragejwe gushyirwaho ariko bikaba bidakora neza.

Hakuzimana asaba Inama y’Umushyikirano itangira kuri uyu wa mbere, kwiga kuri icyo kibazo hamwe n’ibindi bijyanye n’inyongeramusaruro zihenze cyangwa zabuze.

Abaganiriye na Kigali Today bakomeza basaba Inama y’Umushyikirano kutazasozwa idafashe umwanzuro ku kibazo cy’itumbagira ry’ibiciro, bimaze kwikuba kabiri uhereye igihe Umushyikirano uheruka waberaga.

Ni kimwe mu byemezo byafatiwe mu nama y’Abaminisitiri yateraniye muri Village Urugwiro ku wa Mbere tariki 30 Mutarama 2023, iyoborwa na Perezida wa Repubulika, Paul Kagame.

Inama y’Igihugu y’Umushyikirano igiye guterana nyuma y’imyaka itatu itaba, bitewe n’icyorezo cya Covid-19, cyari kimaze iminsi cyugarije Isi.

Inama y’Igihugu y’Umushyikirano yari iheruka kuba mu mpera z’umwaka wa 2019, nyuma y’uko iyari iteganyijwe kubera muri Kigali Convention Center kuva ku itariki 16 kugeza ku itariki 17 Ukuboza 2020 yasubitswe.

Ni mu itangazo rya Guverinoma y’u Rwanda, ryavugaga ko impamvu iyo nama y’Igihugu y’Umushyikirano irusha izindi gukomera yasubitswe, itewe n’uko ubwandu bwa Covid-19, bwari bukomeje kugenda bwiyongera ku muvuduko uhanitse mu gihugu hose.

Inama y’Igihugu y’Umushyikirano itumizwa na Perezida wa Repubulika, igahuza Abanyarwanda bose, baba abari mu gihugu n’abaturuka hanze yacyo, kandi ikitabirwa n’inzego zose z’ubuyobozi bw’Igihugu.