Hashyizwe ibuye ry’ifatizo aharimo kubakwa uruganda ruzakora inkingo i Kigali

Ni ibiganiro byakurikiwe no gushyira umukono ku masezerano y’ibikorwa n’imishinga mu ngeri zitandukanye zirimo ubukungu, ubucuruzi, ubuhinzi n’ubworozi, uburezi, ubuzima n’umubano mu bya politike hagati y’u Rwanda n’amahanga.

Umusaruro wa CHOGM 2022 ku Rwanda ukubiye mu bikorwa umunani bikurikira:

Gushyira ibuye ry’ifatizo aharimo kubakwa uruganda ruzakora inkingo i Kigali

Ku munsi wa kabiri w’inama (23 Kamena 2022), Perezida Kagame ari kumwe n’abandi banyacyubahiro bitabiriye inama, yayoboye umuhango wo gukubita igitiyo (gushyira ibuye ry’ifatizo) aharimo kubakwa uruganda rukora inkingo mu cyanya cy’inganda i Masoro mu Karere ka Gasabo.

Ni uruganda rw’Ikigo cy’Abadage kitwa BioNTech, kabuhariwe mu bijyanye no gukora imiti, mu Rwanda rukazatunganya inkingo za Covid-19, iza Malariya n’iz’igituntu.

Gushyira ibuye ry’ifatizo aharimo kubakwa umuturirwa w’ubucuruzi, Kigali Financial Square

Umukuru w’Igihugu yanashyize ibuye ry’ifatizo mu kibanza cy’inyubako y’ubucuruzi ya ‘Kigali Financial Square’, irimo kubakwa na Equity Group. Ikigo cy’ubucuruzi cyo muri Kenya gifite n’ishami rya banki yacyo mu Rwanda (Equity Bank Rwanda Limited).

Ni umushinga witezweho kumara imyaka ibiri uhereye igihe washyiriweho ibuye ry’ifatizo (23 Kamena 2022), ukazasiga wubatse imiturirwa ibiri iteye kimwe (twin tower) y’amagorofa 20 harimo amacumbi, hoteli, ibyumba byo gukorerwamo akazi, ubucuruzi n’ibindi. Umushinga uzarangira utwaye miliyoni 100$ (asaga miliyari 100Frw).

Inama yitabiriwe n’abayobozi batandukanye bo birya no hino ku Isi

Hemejwe ko Perezida wa FIFA azatorerwa i Kigali

Ubwo inama ya cya CHOGM yaberaga mu Rwanda, Akanama k’Ishyirahamwe ry’Umupira w’Amaguru ku Isi (FIFA), kemeje ko Inama ya 73 ya FIFA izabera i Kigali ku itariki 16 Werurwe 2023, ikazanatorerwamo Perezida mushya w’iryo shyirahamwe.

Uyu mwanzuro wafashwe ku itariki 30 Werurwe 2022, mu nama yahuje Perezida wa FIFA, Giovanni Vincenzo Infantino n’Abayobozi bahagarariye Impuzamashyirahamwe z’Umupira w’Amaguru uko ari esheshatu ku Isi.

U Rwanda rwahawe kwakira iyi nama nk’igihugu kimaze kwerekana ubushobozi bwo kwakira inama mpuzamahanga zo ku rwego rwo hejuru.

Amasezerano y’ubufatanye hagati ya Air Canada na RwandAir

Tariki 25 Kamena 2022, Guverinoma y’u Rwanda n’iya Canada zashyize umukono ku masezerano yo guteza imbere ingendo zo mu kirere, hifashishijwe indege za RwandaAir n’iza Air Canada.

Ayo masezerano yashyizweho umukono na Minisitiri w’Ububanyi n’Amahanga n’Ubutwererane, Dr Vincent Biruta na mugenzi we wa Canada Mélanie Joly.

Icyo gihe kandi ni nabwo Leta ya Canada yemeje ko ifite gahunda yo gufungura ambasade mu Rwanda n’icyicaro cya Ambasaderi mu Mujyi wa Kigali. Minisitiri Mélanie Joly yanavuze ko Canada izohereza uzayihagararira mu Muryango w’Ubumwe bwa Afurika ku cyicaro cyawo i Addis Ababa muri Ethiopia.

Hasinywe amasezerano y’ubufatanye hagati ya Air Canada na RwandAir

Gushyiraho Ishuri rya Commonwealth mu Rwanda

Guverinoma y’u Rwanda yagiranye amasezerano n’ibigo DLA Piper na FTI yo gushyiraho ishuri rya Commonwealth. Intego y’iryo shuri ni ukuzamura urwego rw’ubwumvikane n’imiyoborere muri uwo muryango, kugira ngo ubucuruzi n’ishoramari bizarusheho kugenda neza hagati y’abanyamuryango.

Amasezerano yo gushyiraho iryo shuri yashyizweho umukono ku wa 22 Kamena 2022; rikaba ryitezweho gutanga ubumenyi bw’ingenzi ku bayobozi b’ejo hazaza mu nzego za Leta n’iz’abigenga.

Amasezerano y’ubufatanye mu bukerarugendo hagati y’u Rwanda na Jamaica

Hasigaye umunsi umwe ngo CHOGM 2022 irangire, u Rwanda na Jamaica byashyize umukono ku masezerano y’ubufatanye mu bukerarugendo, akazashyirwa mu bikorwa na Minisiteri y’Ubukerarugendo muri Jamaica ifatanyije na sosiyete y’ubwikorezi bw’indege ya RwandAir, kugira ngo irebe uko yatangira gukora ingendo hagati ya Kigali na Kingston.

Aya masezerano yaje akurikira uruzinduko rwa Perezida Kagame muri Jamaica muri Mata 2022. Icyo gihe u Rwanda na Jamaica bashyize umukono ku masezerano y’ubufatanye arimo ajyanye n’imikoranire mu bya Politiki, ubukerarugendo, ubwikorezi no guteza imbere ibyanya byahariwe inganda.

Perezida Kagame yavuze ko ayo masezerano azatsura umubano w’u Rwanda na Jamaica nta zindi nzira bigombye kunyuramo.

Ishoramari hagati y’u Rwanda na Barbados

Igihugu cya Barbados nacyo kitabiriye CHOGM ya 2022 mu Rwanda, hanyuma ikigo cyabo gishinzwe iterambere ry’ubukungu (Invest Barbados) kigirana ibiganiro n’ikigo cy’Igihugu cy’Iterambere mu Rwanda (RDB), impande zombi zisezerana guteze imbere no gushyira mu bikorwa ishoramari ry’abikorera.

Amasezerano yashyizweho umukono n’Umuyobozi wa RDB, Clare Akamanzi na Kaye-Anne Greenidge uyobora Invest Barbados. Ibikorwa biteganyijwe muri ayo masezerano birimo gutunganya ibikomoka ku buhinzi no kubyohereza ku masoko mpuzamahanga, ubukerarugendo, ubuhinzi, ubucukuzi bw’amabuye y’agaciro, ubwubatsi na serivisi z’imari.

U Rwanda na Zambia byasezeranye guteza imbere ubuhinzi

Mu ntangiriro za CHOGM, Umuyobozi Mukuru wa RDB, Clare Akamanzi ari hamwe n’Umuyobozi Mukuru w’Ikigo cy’iterambere cya Zambia (ZDA), Albert Halwampa, bashyize umukono ku masezerano yo guteza imbere ubufatanye mu buhinzi hagati y’ibihugu byombi.

Ni amasezerano yaje akurikira ibiganiro Perezida Kagame yagiranye na mugenzi we wa Zambia Hakainde Hichilema muri Mata 2022, bakiyemeza guteza imbere ubucuruzi n’ishoramari hagati y’ibihugu byombi.

U Rwanda rwahacanye umucyo mu mpande zose

Inama ya CHOGM ya 26 yagombaga kuba yarabaye mu 2020 ariko yasubitswe ubugira kabiri; kubera icyorezo cya Covid-19, ari nako abanzi b’u Rwanda bakomezaga gushaka kuyibangamira kubera ipfunwe, ariko ruranga ruhacana umucyo mu mpande zose, ari mu kwakira abashyitsi, mu mutekano, mu isuku no mu myidagaduro dore ko abashyitsi bagize n’igihe cyo kwitabira ibitaramo na siporo rusange.

Inama ya CHOGM yagiye kuba mu Rwanda hamaze gutunganywa imihanda 9 mishya irimo uwa Sonatube-Gahanga, mu rwego rwo koroshya urujya n’uruza rw’abaturarwanda n’abashyitsi bifuzaga gutembera.

Inama yitabiriwe n’abantu barenga 4,000 barimo abanyacyubahiro bakomeye ku rwego rw’Isi batashye baseta ibirenge, kubera uburyo bakiriwe n’uko basanze u Rwanda ruteye imbere kandi rutekanye impande zose.

Mu banyacyubahiro bitabiriye CHOGM 2022, harimo Igikomangoma Charles wa Wales n’uwo bashakanye, Minisitiri w’Intebe w’u Bwongereza Boris Johnson, Minisitiri w’Intebe wa Canada Justin Trudeau, Umunyamabanga Mukuru wa Commonwealth n’abandi bakuru b’ibihugu na za Guverinoma biri mu muryango ugizwe n’ibihugu 56, nyuma y’uko Gabon na Togo byinjiriyemo i Kigali mu nama ya 26 yari ibereye mu Rwanda ku nshuro ya mbere.

U Rwanda rwemerewe kwinjira muri Commonwealth mu 2009, ruba igihugu cya kabiri cyakiriye inama ya CHOGM ku mugabane wa Afurika nyuma ya Uganda yayakiriye mu 2007.

Igihugu kibereyemo inama ya CHOGM ni nacyo kijya ku buyobozi bw’umuryango mu gihe cy’imyaka ibiri, indi nama ikabona guterana.

CHOGM 22 yabereye muri KCC

Iya 2022 yateranye ku nsanganyamatsiko yo guharanira ahazaza habereye buri wese binyuze mu ikoranabuhanga, guhanga udushya n’iterambere. Inama yarangiye abakuru b’Ibihugu bemeje ko umwaka wa 2023 ari umwaka wahariwe urubyiruko, bikazahurirana n’isabukuru y’imyaka 50 ishize hagiyeho gahunda y’Urubyiruko muri Commonwealth.

CHOGM itaha iteganyijwe kubera muri Samoa muri 2024.

Perezieda Kagame ubu ni we muyobozi w’Umuryango wa Commonwealth mu myaka ibiri

Ubu butumwa bwagenewe Umukuru w’Igihugu mu Nteko Rusange ya Sena yateranye ku wa Mbere tariki 27 Kamena 2022. Sena igaragaza ko nyuma y’uko abitabiriye Inama ya CHOGM bakiriwe neza kandi igategurwa neza, bigaragaza ubudasa bw’u Rwanda.

Iti: “Imaze kubona ko Inama ya CHOGM yitabiriwe n’abantu barenga ibihumbi bine, bakakirwa neza cyane, inama ikaba yaragenze neza, irangira mu mutekano; ishingiye ku mitegurire nta makemwa n’imigendekere myiza y’Inama ya CHOGM, bikaba byarongeye kugaragaza Ubudasa bw’u Rwanda, kandi byishimirwa n’Abanyafurika bagaragaje ko batewe ishema n’isura nziza ya Afurika u Rwanda rwagaragaje mu nama ya CHOGM.”

Muri ubu butumwa Sena ikomeza ivuga ko ishimira byimazeyo Perezida Paul Kagame, uburyo Inama ya CHOGM yateguranywe ubuhanga, ubushishozi, n’ubufatanye bw’inzego zaba izo mu Gihugu, Ubunyamabanga Bukuru bwa Commonwealth ndetse n’iz’ibihugu byayitabiriye, byatumye intego yayo igerwaho, kandi abayitabiriye n’abayikurikiranye bose bakishimira uko yari iteguye n’uko yagenze.

Iti: “Sena irabashimira ku mugaragaro, Nyakubahwa Perezida wa Repubulika, ku ruhare ntagereranywa mwagize kugira ngo Inama ya CHOGM igende neza kandi igere ku ntego zayo, bigatuma n’izina ry’u Rwanda rirushaho kubahwa, kandi Igihugu cyacu kigashimwa nk’Igihugu kigendwa, gifite umutekano kandi cyakira neza abashyitsi.”

Sena yakomeje ishimira Umukuru w’Igihugu, ku bwo gutorerwa kuyobora umuryango wa Commonwealth mu myaka ibiri iri mbere, kuva mu 2022 kugera mu 2024, kandi ko yiteguye kumushyigikira mu nshingano yahawe.

Ikomeza igira iti: “Nyakubahwa Perezida wa Repubulika, Sena n’Abanyarwanda biyemeje kubashyigikira mu nshingano mwahawe zo kuyobora Umuryango wa Commonwealth.”

Sena yaboneyeho gushimira inzego z’umutekano ndetse n’abandi bantu bose bagize uruhare kugira ngo Inama ya CHOGM igende neza, kugeza irangiye mu mutekano.

Sena y’u Rwanda ivuga ko izirikana ko iyi ntsinzi yagezweho nyuma y’imyaka 13 gusa u Rwanda rwinjiye mu muryango wa Commonwealth.

Inama ya CHOGM ihuza Abakuru b’Ibihugu na Guverinoma bo mu muryango w’Ibihugu bikoresha Icyongereza, yateraniye mu Rwanda kuva ku itariki ya 20 kugera ku ya 25 Kamena 2022. U Rwanda ni rwo ruzayobora uyu muryango kugeza ubu ugizwe n’ibihugu 56.

Ubutumwa bw’ishimwe bwa Sena bwo gushimira Perezida wa Repubulika y’#Rwanda Nyakubahwa Paul Kagame kubera uruhare yagize kugira ngo inama ya #CHOGM2022 igende neza kandi igere ku ntego zayo, n’Abanyarwanda bose bakaba baratewe ishema n’imitegurire n’imigendekere myiza y’iyi nama. pic.twitter.com/n8o5yW0FYW

— Rwanda Parliament (@RwandaParliamnt) June 28, 2022

Mu kiganiro cyiswe ‘7th Intergenerational Dialogue’ cyayobowe na Perezida Paul Kagame, kikanitabirwa na Minisitiri w’Intebe wa Canada, Justin Trudeau ndetse n’Umunyamabanga Mukuru wa Commonwealth, Patricia Scotland, abahagarariye urubyiruko bagaragaje ibyifuzo byabo.

Kim Allen, uyoboye Commonwealth Youth Council ni we wabanje, avuga ko urubyiruko rwo muri Commonwealth rubarirwa muri Miliyari 1.2 kandi ko bashima urubuga bahawe rwo kugaragaza ibibazo bafite nk’urubyiruko, kugira ngo byitabweho n’Abakuru b’Ibihugu na za Guverinoma.

Yagaragaje ko ikibazo cya mbare ari ukubura amikoro, bigatuma iterambere ry’urubyiruko ridindira, bityo asaba ko rwakomeza kujya rushyigikirwa.

Christabel Derby, umuyobozi wungirije wa Commonwealth Youth council ni we wakurikiyeho avuga ibibazo by’urubyiruko ku buryo burambuye, avuga ko bikeneye ibisubizo.

Yagize ati “Ni gute haboneka amahirwe y’akazi menshi ku rubyiruko, ni gute Afurika itakomeza kubura urubyiruko rwayo rukomeza kwimukira ku yindi migabane, ruhunga umutekano muke. Ni iki Abayobozi b’Afurika bakora ngo bafashe urubyiruko?”

Ati “Urubyiruko rwa Commonwealth rushaka kwishingira ahazaza hacu, ariko twabishobora ari uko mudushyigikiye, mukaduha urubuga rwiza dukoreramo nk’urubyiruko.”

Uwitwa Famida Faiza, Uhagarariye urubyiruko rwo muri Aziya ‘Asia Regional Youth Council’ yagize ati “Turashaka ko ejo hazaza hacu hazaba heza, hazira ihohotera, hazira ubukene ndetse n’ibindi bibazo bibangamira urubyiruko”.

Mu gihe urwo rubyiruko rwavugaga ibyo rwifuza, abayobozi barabyumvaga ndetse bagira n’igihe cyo kugaragaza ko babyumva.

Perezida Paul Kagame yatangiye ashima abo bahagarariye urubyiruko, kuba bumva neza ibibazo bihari.

Yagize ati “Biragaragara ko urubyoruko rwumva ibibazo twese duhura nabyo. Biragaragara ko isi yose cyane cyane urubyiruko rwugarijwe n’ibibazo by’imihindagurikire y’ikirere, kubura akazi, kudashobora kubona ubumenyi buhagije, kubura amikoro no kubasha kugera ku ikoranabuhanga…ibyo byose ni ibintu tugomba kwitaho”.

U Rwanda rwumva cyane ibibazo urubyiruko ruhura nabyo, kuko rufite umubare munini w’urubyiruko kandi narwo rukunze kugaragaraza ibibazo rufite, kuko ubu ngo 71% by’abaturage b’u Rwanda ni urubyiruko rufite imyaka 30 gusubiza hasi.

Perezida Kagame yagize ati “Ibyo bibazo byose turabizi, kandi twishimiye gukorana n’ibindi bihugu byo muri Commonwealth, yaba urubyiruko ndetse n’abakuze”.

Justin Trudeau we yagize ati “Iyo turi mu nama nk’izi, zikitabirwa n’urubyiruko, tuba tujyanisha n’ibyo bavuze ko abo ari bo bayobozi b’ejo. Turashaka ko muba abayobozi mwifuza uyu munsi”.

Ati “Ntitubasaba ibyo mushobora kuvuga, ahubwoibyo mushobora gukora, n’Isi ikeneye, ni byo Commonwealth ikeneye.”

Ku ruhande rwa Patricia Scotland, we yashimiye abahagarariye abandi anashima ibyo yabonye ku rubyiruko rw’u Rwanda.

Yagize ati “Ibyo twabonye mu Rwanda ntabwo ari inzozi, ahubwo twabonye inzozi zahindutse impamo”.

Yakomeje ashimira Perezida Kagame umaze guhindura u Rwanda, mu gihe amaze aruyoboye ndetse akazamura n’icyizere mu rubyiruko.

Yagize ati “Ndashaka kubabwira mwe rubyiruko rw’abayobozi, ko ntewe ishema namwe. Ndashaka kubwira buri wese muri mwe ko ntewe ishema namwe, kubera ko uyu munsi mwavuze, muvuga mutivugira ubwanyu gusa, ahubwo muvugira urubyiro rubarirwa muri Miliyari n’abandi batashoboye kuba bari hano, kandi amajwi yanyu yose yumviswe.”

Ni mu butumwa Umukuru w’Igihugu yanyujije kuri Twitter, mu gitondo cyo kuri iki Cyumweru tariki 26 Kamena 2022, avuga ko byari ishema kubakira bose mu Rwanda.

Yagize ati “Ndashimira abitabiriye mwese 4000, mukifatanya natwe muri CHOGM2022. Ku bayobozi bagenzi banjye, byari ishema n’icyubahiro kubakira mwese mu Rwanda kugira ngo dushimangire ko twiyemeje guharanira ejo hazaza heza, hahesha ishema abaturage bo mu Muryango wa Commonwealth. Tubifurije mwese urugendo rwiza musubira mu rugo!”

Perezida Kagame yakomeje ashimira abagize uruhare mu miteguriwe n’imigendekere myiza ya CHOGM, harimo inzego z’umutekano n’Abanyarwanda muri rusange ku bw’ishema bahesheje u Rwanda.

Ati “Ndashimira abagize uruhare mu mitegurire bose, abashinzwe umutekano batumye buri wese yumva atekanye. Abakozi hirya no hino hamwe n’Abanyarwanda bose bagize uruhare mu migendekere myiza ya CHOGM2022! Ndabashimira cyane kuba mwarahesheje ishema Igihugu!”

Mu bayobozi b’icyubahiro bitabiriye iyi nama ya CHOGM, barimo Igikomangoma Charles w’u Bwongereza na Madamu we Camilla, Minisitiri w’Intebe w’u Bwongereza, Boris Johnson, Minisitiri w’Intebe wa Canada, Justin Trudeau, ndetse n’Abakuru b’Ibihugu byo ku mugabane wa Afurika barimo n’Umwami Muswati III wa Eswatini n’abahagarariye Guverinoma z’ibihugu bitandukanye byo mu muryango wa Commonwealth.

Mu bandi banyacyubahiro bitabiriye iyi nama harimo, Umuyobozi w’Ikirenga (Emir) wa Qatar, Igikomangoma Sheikh Tamim bin Hamad Al Thani ndetse na Gianni Infantino, Perezida w’impuzamashyirahamwe y’umupira w’amaguru ku Isi (FIFA).

Minisitiri w’Intebe w’u Bwongereza, Boris Johnson, mbere y’uko ahaguruka mu Rwanda asubira mu Bwongereza ku mugoroba wo ku wa Gatandatu, yavuze ko iminsi yamaze i Kigali yari agatangaza, kuko wabaye umwanya mwiza wo kuganira ibiteza imbere umuryango wa Commonwealth.

Perezida wa Uganda, Yoweri Kaguta Museveni, na we wari witabiriye iyi nama, mu ruzinduko rw’amateka yagiriye mu Rwanda nyuma y’imyaka itanu, ndetse akaba yarahisemo gukoresha inzira y’ubutaka anyuze ku mupaka wa gatuna, yavuze ko ashimira Abanyarwanda urukundo bamugaragarije mu gihe yamaze i Kigali, ndetse no mu nzira yanyuzemo.

Uutumwa bwashyizwe kuri Twitter y’ibiro by’Umukuru w’Igihugu cya Uganda bugira buti: “Nyuma yo kwitabira Inama isoza CHOGM, nasubiye mu rugo nyuze ku mupaka wa Katuna. Ndashimira abavandimwe na bashiki bacu bo mu Rwanda ku bw’urugwiro mwanyakiranye, bitari mu gihe nahamaze gusa ahubwo no kuva i Kigali njya Gatuna.”

Ubu butumwa yabusoje mu Kinyarwanda agira ati “Murakoze cyane, reka urukundo ruganze.”

Twabibutsa ko Inama ya CHOGM ihuza Abakuru b’Ibihugu na za Guverinoma bo mu Muryango wIbihugu bikoresha ururimi rw’Icyongereza, Commonwealth, yatangiye ku wa Mbere tariki 20 igasozwa ku wa Gatandatu tariki 25 Kamena 2022.

Muri iyi nama ni nabwo Perezida Kagame yahawe inkoni yo kuyobora Umuryango wa Commonwealth mu myaka ibiri iri imbere, ndetse mu myanzuro itandukanye yafatiwe muri iyi nama ubwo yasozwaga, irimo ko ibihugu bya Togo na Gabon byakiriwe nk’abanyamuryango bashya, ndetse igihugu cya Samoa akaba aricyo kizakira CHOGM mu 2024.

Ibyo bihugu byombi byinjiye muri Commonwealth nyuma y’u Rwanda, bikaba na byo bitarakolonijwe n’u Bwongereza nk’uko byagendekeye byinshi mu bigize uwo muryango.

Iyo nama y’Abakuru b’Ibihugu yari imaze iminsi ibera mu Rwanda, yanemeje ko inama y’ubutaha izabera muri Samoa, hakaza ari muri 2024, kuko CHOGM iterana buri myaka ibiri, uretse iyabaye uyu mwaka yari yasubitswe inshuro ebyiri kubera icyorezo cya Covid-19.

Inama y’Abakuru b’Ibihugu na za Guverinoma bigize Umuryango wa Commonwealth y’uyu mwaka kandi, isize Perezida Kagame agizwe Umuyobozi w’uwo Muryango, akazamara kuri uwo mwanya imyaka ibiri, akaba asimbuye Minisitiri w’Intebe w’u Bwongereza, Boris Johnson.

Umunyamabanga Mukuru na we w’uwo Muryango, Patricia Scotland, yongerewe igihe cy’imyaka ibiri cyo kuguma kuri uwo myanya.

Perezida Paul Kagame mu kiganiro n’abanyamakuru

Yabigarutseho ku wa Gatandatu tariki 25 Kamena 2022, mu kiganiro we n’abandi bakuru b’Ibihugu ndetse n’Umunyamabanga mukuru wa Commonwealth, Patricia Scotland, bagiranye n’itangazamakuru, nyuma y’aho atorewe kuyobora uwo muryango mu gihe cy’imyaka ibiri iri imbere.

Ku kibazo cy’ubutabera yabajijwe, Perezida Kagame yavuze ko nta bantu bari muri gereza batagakwiye kuba bariyo.

Yagize ati “Hari abantu batari muri gereza ahubwo bagombye kuba bariyo, nta bantu bari muri gereza batagombye kuba bariyo, ariko hari abandi bantu batariyo nyamara bagombye kuba bariyo. Maze igihe mbona abanyamakuru bandika ibintu byinshi, bagafata umuntu bakamushimagiza, bakamugira impirimbanyi y’ibintu bitandukanye, ibyo ntacyo bitwaye, ariko njya nifuza ngira nti iyo babagira impirimbanyi muri gahunda zabo, ariko atari mu mibereho yacu”.

Yongeyeho ati “Fata urugero kuri uyu mugore witwa Ingabire Victoire, buri gihe BBC ihora iririmba imushyira mu batavuga rumwe na Leta, ni we navugaga, ubu ntabwo ari muri gereza, ariko mu by’ukuri yagombye kuba ari muri gereza. Yari muri gereza kuko yakoze ibyaha yakurikiranyweho mu rukiko ndetse akaza no kubihamywa, agakatirwa akajyanwa muri gereza, ariko kubera ububasha Perezida ahabwa n’itegeko, mu by’ukuri uyu mugore yaje gufungurwa mbere y’uko asoza igihano”.

Nk’umuyobozi mushya wa Commonwealth, Perezida Kagame, yavuze ko azashyira imbaraga mu gushimangira umubano w’ibihugu biwuhuriyemo, kuko ari umuryango ufite amahirwe menshi.

Agaruka ku bakomeza gushyira igitutu ku Rwanda, Umukuru w’Igihugu yavuze ko ntawe ukwiye gushyira igitutu ku Rwanda, avuga ko hari indangagaciro rudafite kuko ntawe ukwiye kunenga uko zikwiye kuba zimeze.

Yagize ati “Bamwe babaye intandaro y’ibibazo dufite uyu munsi, fata urugero rwa Jenoside aho abantu barenga miliyoni bishwe. Ndibuka kandi ibiganiro mpaka byabaye muri UN, byari bimeze nk’aho ibi bihugu bikomeye ari byo bihitamo gushyiraho indangagaciro, babifashe mu buryo bworoshye bagira bati, aba ni Abanyafurika barimo kwicana”.

Yakomeje agira ati “Ibi biganiro byabaga ku mugaragaro, ariko se ucyeka ko ibi byari ukuri, wibwira ko ugutandukana kw’Abanyarwanda kwahimbwe nabo, ahubwo si abo bantu bo mu majyaruguru y’Isi batanyije iki gihugu! Babwira abantu kwibona mu gihande kimwe cy’ubwoko n’abandi kwibona mu kindi, bakica abantu nk’aho gutandukana bidahagije, ahubwo bagahitamo kwica abandi”.

Umunyamabanga Mukuru wa Commonwealth Patricia Scotland, avuga ko uyu muryango kimwe n’ibindi bihugu, byahuye n’ibibazo bitandukanye byatewe n’icyorezo cya Covid-19, ariko ku bufatanye n’ibihugu binyamuryango bashoboye guhangana nacyo.

Biteganyijwe ko mu mwaka wa 2030 Umuryango wa Commonwealth uzaba ubarizwamo abaturage barenga miliyari eshatu, mu gihe kuri ubu mu bihugu 54 biwugize, bituwe n’abarenga miriyali 2.5.

Perezida Kagame ni we ugiye kuyobora Commonwealth mu myaka ibiri iri imbere

Ibyo yabigarutseho mu kiganiro yagiranye n’itangazamakuru kuri uyu wa Gatandatu tariki 25 Kamena 2022, cyakurikiye umwiherero w’Abakuru b’ibihugu wafatiwemo imyanzuro izagenderwaho mu myaka ibiri iri imbere.

Iki kiganiro cyitabiriwe na Perezida Kagame ari nawe ugiye kuyobora Commonwealth mu myaka ibiri iri imbere, Umunyamabanga Mukuru wa Commonwealth, Patricia Scotland, Perezida wa Sierra Leone, Julius Maada Bio, Perezida wa Guyana, Irfaan Ali na Minisitiri w’Intebe wa Samoa, Fiamē Naomi Mataʻafa.

Perezida Kagame yavuze ko rimwe na rimwe iyo abantu bavuze indangagaciro, usanga hari igice kimwe cy’Isi gisa nk’ikigena indagagaciro, ku buryo abandi ntazo bafite ahubwo bakwiye guhora bazigiraho.

Ati “Iyo abantu bavuga indangagaciro, rimwe na rimwe usanga igice kimwe cy’Isi cyarafashe inshingano cyonyine zo kwiharira no kugena indangagaciro. Abandi twese nta ndangagaciro tugira, tugomba guhora twigira kuri abo bandi bazigena.”

Umukuru w’Igihugu yakomeje avuga ko igiteye inkeke ari uko igihe cyose wafata wiga izo ndangagaciro, nta na rimwe ushobora kuzatsinda.

Ati “Ikibazo gikomeye ni uko igihe cyose wamara wiga nta na rimwe uzigera utsinda. Uzahora ugaragara nk’umuntu utagira indangagaciro cyangwa uturutse ahantu hataba indangagaciro.”

Perezida Kagame yakomeje avuga ko abantu bo mu Majyaruguru y’Isi, aho BBC ituruka, bahora bibwira ko ari bo ba mbere bafite indangagaciro, abandi bakwiye gukurikira.

Ati “Abo bo mu Majyaruguru ari na ho BBC ituruka, batekereza ko ari bo ba mbere mu kugira indangagaciro, abasigaye bagomba kuzikurikiza, ni ikosa rikomeye. Ntabwo ari ukuri. Natwe dufite indangagaciro, twebwe, hano, mu Rwanda, muri Afurika, turazifite. Nta kibazo kibirimo.”

Perezida Kagame aha niho yagarutse ku kuba ibi bibyara ikibazo mu gihe nyamara bamwe mu biha kugenzura ibyo byose, harimo n’ibigo bikomeye byagakwiye kwizerwa bimenyesha amakuru ku baturage ndetse n’Isi yose.

Mu mwiherero wabanjirije iki kiganiro n’itangazamakuru, hafatiwemo imyanzuro itandukanye irimo ko ibihugu bya Togo na Gabon byakiriwe nk’abanyamuryango bashya ba Commonwealth, ndetse igihu cya Samoa aricyo kizakira inama ya CHOGM mu 2024.

Iyi nama izwi nka Intergenerational dialogue, yabaye kuri uyu wa Gatandatu tariki 25 Kamena 2022, ibaye ku nshuro ya karindwi, ikaba kandi yitabiriwe n’Umunyamabanga mukuru w’Umuryango wa Commonwealth, Minisitiri w’Intebe wa Canada na Perezida wa Seychelles.

Perezida Kagame yashimiye abayobozi b’ibihugu batandukanye bitabiriye iyo nama, ndetse ashima n’urubyiruko rwaje kugaragaza bimwe mu bibazo n’imbogamizi, bikibangamiye iterambere n’imibereho myiza yabo.

Yijeje urwo rubyiruko ko bimwe mu bibazo bagaragaje birimo ubusumbane ku kugera ku ikoranabuhanga, ikibazo cy’ihindagurika ry’ikirere, ubushomeri n’ibindi, byose bigomba gushyirwamo imbaraga n’Abakuru b’Ibihugu byo muri Commonwealth, bagakorera hamwe mu gushaka ibisubizo.

Yagize ati “Ikintu cy’ingenzi kurusha ibindi ni ugukorera hamwe, yaba abato n’abakuru. Ntabwo bigomba kuba buri gihe ibibazo by’urubyiruko gusa cyangwa abakuze, hari bimwe twese duhuriyeho. Ni yo mpamvu ari ingenzi ngo dukorere hamwe.”

Umukuru w’Igihugu yakomeje avuga ko ibibazo urubyiruko rwo muri Commonwealth rwagaragaje abyumva cyane, kuko 71% by’abatuye u Rwanda ari urubyiruko, bituma ibibazo byose bavuze afite icyo abiziho.

Minisitiri w’Intebe wa Canada, Justin Trudeau, nawe wari witabiriye iyo nama, yashimangiye ko urubyiruko rugomba kugira uruhare rutaziguye muri politiki n’imyanya ifata ibyemezo muri Commonwealth.

Ati “Dukeneye ko mukora kugira ngo mubigereho, natwe tugomba kumenya neza ko tubashyigikiye, tukabatera imbaraga uko dushoboye”.

Perezida Wavel Ramkawalan wa Seychelles, yavuze ko urubyiruko kugeza uyu munsi rutariyumva muri Politiki, bigatuma rugenda rwitandunya nayo.

Ati “Impamvu iroroshye, ntibumva ko hari ikintu muri politiki kibareba, ntibabasha kumva ko ibyo abayobozi bavuga bababwira, bigatuma benshi bumva ko batatekerejweho”.

Umunyamabanga mukuru wa Commonwealth, Patricia Scotland, yashimiye abahagarariye urubyiruko rwo muri Commonwealth, bagaragaje impungenge zitandukanye kuri bagenzi babo, anabizeza ko uwo muryango wiyemeje guhindura ejo hazaza habo.

Biteganijwe ko Pakisitani ariyo izakira inama ya 10 y’Abaminisitiri b’urubyiruko muri Commonwealth, muri Mutarama 2023.

Uko kwerekana imideri itandukanye, wabaye umwanya wo kugaragaza ibikorerwa mu gihugu, muri ‘Commonwealth’ ndetse uba n’umwanya wo kwigaragaza ku banyamideri.

Mu banyamideri bo mu Rwanda berekanye ibyo bakora harimo Haute Baso, Sonia Mugabo, Inzuki, Rwanda Clothing, Uzi Collection, Izubaa ndetse na Amike.

Mu banyamahanga baje kumurika imideri bakora harimo Pichulik yo muri Afurika y’Epfo, Kiko Romeo, Amu Clothing bo muri Kenya, Keneea Linton George baturutse Jamaica, Pepper Row na Dye Lab bo muri Nigeria, Larry Jay bo muri Ghana ndetse na Georgia Hardinge na Maximilian Raynor bo mu Bwongereza.

Muri iryo murikamideri ryateguwe mu gihe cya CHOGM, abaryitabiriye barenze ibyo kwerekana ubwiza bw’imideri bakora, ahubwo baganira ku buryo imideri yaba isoko yo guhangana n’imihindagurikire y’ikirere n’ibindi.

Precious Moloi Motsepe, Umuyobozi mukuru wa ‘Africa Fashion International’, yasabye ko hazajya habaho gukorana mu rwego rwo kugira ngo imideri ya Afurika ikomeze gutera imbere, cyane cyane hitabwa ku kintu cy’uko ibikoresho byinshi bikoreshwa mu mideri bituruka muri Afurika, ariko byamara gutunganywa bikagaruka bihenze cyangwa se ntibyungure cyane abo byagombye kungura.

Motsepe ati “Dushobora kandi dusabwa gukora ku buryo tuzamura urubyiruko n’abagore bakora mu bijyanye n’imideri muri Afurika, kugira ngo buri wese ukora muri urwo rwego abone imibereho ikwiye kandi babikore babyishimiye”.

N’ubwo inganda zikora imyenda ari nazo zikoreshwa ahanini n’abo banyamideri, ngo zigira uruhare mu iterambere ry’ubukungu, ariko kandi ngo abashakashatsi b’Umuryango w’Abibumbye ku bidukikije no mihindagurikire y’ikirere, bavuga ko izo nganda zigira uruhare rukomeye mu gutuma ikirere gishyuha, kuko zisohora 10% y’umwuka uhumanya ikirere (carbon) ku rwego rw’Isi muri rusange.

Mu gihe mu Bwongereza urwo rwego rw’imideri rwakoze ku buryo rugira uruhare mu gukemura ibibazo biriho nk’imihindagurikire y’ikirere, rukabungabunga ibidukikije, bifashisha ibikoresho byakoreshwa kenshi (recyclable material), nk’uko byasobanuwe na Caroline Rush, Umuyobozi mukuru w’inama y’imideri mu Bwongereza (British Fashion Council). Gusa muri Jamaica na ‘Caribbean’, uko ibintu bimeze ubu, ni byo Moloi- Motsepe ashaka kubona bihinduka.

Keneea Linton-George, ari we muyobozi wa Keneea Linton Boutique, akaba yari ahagarariye Jamaica fashion designers, yavuze ko Caribbean igihura n’ibibazo bitandukanye biri muri urwo rwego rw’imideri.

Yagize ati “Twe turareba abategura guhunda za Leta (policy makers), kuko hari gahunda zimwe na zimwe usanga zidusigaza inyuma. Ugusanga turagira uruhare rukomeye mu gushaka ibikoresho byifashishwa mu guhanga imideri, ariko byagera aho byongererwa agaciro kurushaho, ugasanga nta nyungu biduha”.

Ni ibirori byateguwe n’Igikomangoma Charles w’u Bwongereza, mu gihe Inama ya CHOGM ikomeje kubera i Kigali.

Kuri uwo munsi kandi muri Kigali Convention Centre, nibwo habaye umuhango wo gufungura ku mugaragaro Inama y’Abakuru b’Ibihugu na za Guverinoma, bihuriye mu Muryango w’Ibihugu bikoresha Ururimi rw’Icyongereza (CHOGM 2022).

Iyo nama yafunguwe ku mugaragaro, mu gihe yagiye ibanzirizwa n’uruhererekane rw’izindi nama, zahuje abayobozi batandukanye bo mu bihugu 54 bigize Commonwealth.

Tariki 24 Kamena 2022 yabaye itariki y’amateka ku muryango wa Commonwealth, byumwihariko ku Rwanda, kuko Perezida Kagame ari we wahawe inkoni yo kuyobora uyu muryango mu myaka ibiri iri imbere.

Perezida Kagame yasimbuye Minisitiri w’Intebe w’u Bwongereza, Boris Johnson, wari ufite izi nshingano kuva mu 2018, akaba yaragombaga kuzishyikiriza u Rwanda mu 2020, gusa icyo gihe inama y’uyu muryango ntiyaba kubera icyorezo cya Covid-19. Minisitiri w’intebe w’u Bwongereza, akaba yifurije ishya n’ihirwe u Rwanda, ashimangira icyizere uyu muryango ufitiye Perezida Kagame.

Hashize imyaka 13 gusa u Rwanda rwinjiye muri Commonwealth, kuko rwakiriwe mu 2009 muri uyu muryango ubarizwamo abaturage barenga Miliyali 2.5 bo mu bihugu 54 byo ku migabane yose igize Isi.

Muri iyo nama ba Minisitiri babonye umwanya wo kuganira birambuye ku bijyanye n’inama ya CHOGM.

Umunyamabanga mukuru wa Commonwealth, Rt Hon. Patricia Scotland, yagize ati “Ni ibyishimo bikomeye cyane kuba twongeye guhurira hamwe muri CHOGM nyuma y’imyaka myinshi. Guhera muri CHOGM 2018 y’i London, twakomeje gukora ubutaruhuka kugira ngo dufashe ibihugu by’ibinyamuryango kubona ibyo byifuza no kureba ibyihutirwa kurusha ibindi mu byo bisaba. Twazanze ubufasha ndetse n’ubuvugizi buhanitse ku rwego mpuzamahanga”.

Ati “Muri iki cyumweru hano i Kigali, dufite amahirwe akomeye yo kongera guhurira hamwe amaso ku maso. Mu guhindura Isi, dukeneye kugira ubumwe n’icyerekezo bijyanye n’amateka ya Commonwealth, indangagaciro zayo n’ubushobozi yifitemo, kugira ngo tugere ku ntego duhuriyeho ndetse dushobore no gushyira mu bikorwa ibiri mu bushobozi bwacu”.

Abo ba Minisitiri baganiriye ku bibazo biriho n’uko Commonwealth irimo kubikemura, none no mu gihe kizaza.

Banagariye ku bibangamira iterambere rirambye, harimo imihindagurikire y’ikirere, ibijyanye n’ibidukikije n’inyanja, ibijyanye n’ingufu zirambye, ndetse n’ibijyanye n’urubyiriko n’udushya.

Abo ba Minisitiri baganiriye ukuntu ibyo bibazo bitandukanye byakemurwa, hitabwa cyane cyane ku byifuzo by’ibihugu bito n’ibitaragera ku iterambere cyane.

Banarebeye hamwe ingaruka zikomeye z’icyorezo cya Covid-19 ku nzego z’ubuzima, ku bucuruzi, ku bijyanye n’ikoranabuhanga, n’uko Guverinoma zashobora kongera kubaka inzego zifite ubushobozi bwo guhangana n’ibindi byorezo, bishobora kubaho mu gihe kizaza.

Abo ba Minisitiri basobanuriwe uko Commonwealth ishobora kuzamura inzego z’ubuzima, gushyigikira urwego rw’ubucuruzi cyane cyane mu bihugu bikiri mu nzira y’amajyambere, no kongera amahirwe aganisha ku guhangana n’ingaruka za nyuma y’icyorezo cya Covid-19, ku buryo burambye kandi nta wusigaye inyuma.

Baganirijwe kandi na n’Umunyamabanga mukuru wungirije wa UN, Amina Mohammed, ndetse na Dr Tedros Adhanom Ghebreyesus, Umuyobozi mukuru w’Ishami rya UN ryita ku Buzima ‘WHO’ bari bahagarariye imiryango bayoboye muri iyo nama, basobanura uko iyo miryango ikorana mu gukemura ibyo bibazo byaje nk’ingaruka z’icyorezo cya Covid-19.

Yagize ati “Nishimiye kuba ngiye gukora umurimo wa nyuma mu rwego rw’uhagarariye u Bwongereza, bwari buyoboye umuryango wa Commonwealth, ngashyikiriza Perezida Kagame inkoni y’uboyobozi ndetse nkanamwifuriza ishya n’ihirwe, ku buyobozi bw’uwo muryango wacu ufite umwihariko (Unique association)”.

Minisitiri w’Intebe, Boris Johnson, yakomeje asobanura ko umuryango wa Commonwealth ubu ugizwe n’abanyamuryango 54, ariko hakaba hari n’abandi bifuza kuwinjiramo.

U Rwanda nirwo ruheruka kwinjira muri uwo muryango, none rurahabwa inkoni yo kuwuyobora mu gihe cy’imyaka ibiri.

U Bwongereza buratanga inkoni y’ubuyobozi bw’uwo muryango wa Commonwealth, nyuma y’uko bwari hafi kumara imyaka ine buwuyoboye, guhera mu 2018.

Minisitiri w’Intebe Boris Johnson, yavuze ko kuba hari ibihugu bindi bikomeje kwifuza kwinjira muri Commonwelth, ari ibigaragaza imikorere myiza n’ubuzima bw’uwo muryango, kuko ibihugu biwugize bihujwe na byinshi.

Yakomeje avuga ko nyuma gato y’uko u Bwongereza bufata ubuyobozi bw’Umuryango wa Commonwealth mu 2018, nta wari uzi ko hagiye gukurikiraho icyorezo cya Covid-19 cyahitanye ubuzima bw’abatari bakeya, ariko Guverinoma y’u Bwongereza ifatanye na Kaminuza ya Oxford University, bakoze urukingo rwa Covid-19 ruzwi nka AstraZeneca.

Ibi kandi biremezwa n’Igikomangoma cy’u Bwongereza Prince Charles washimiye Abanyarwanda uburyo biyubatse kandi ngo barimo guharanira kugira icyerekezo kimwe.

Perezida Kagame yagejeje ijambo ku bitabiriye umuhango wo gufungura Inama y’Abakuru b’Ibihugu na za Guverinoma byo mu muryango wa Commonwealth

Aba bayobozi babitangaje mu ibiganiro byahuje Abakuru b’Ibihugu na za Guverinoma zigize Umuryango Commonwealth, mu nama yiswe CHOGM irimo kubera i Kigali.

Abakuru b’ibihugu bagera kuri 30 hamwe n’Abaminisitiri b’Ububanyi n’Amahanga muri Commonwealth bahuriye mu Rwanda mu nama ya CHOGM yashyize Perezida Kagame ku buyobozi bw’uyu muryango mu gihe cy’imyaka ibiri iri imbere.

Perezida Kagame yasobanuye uburyo u Rwanda rwiyubatse muri iyi myaka 28 ishize habaye Jenoside yakorewe Abatutsi mu 1994, aho avuga ko kugeza ubu igihugu cyahindutse.

Yagize ati “Iki gihugu cyacu cyashenywe na Jenoside n’amacakubiri mu myaka ishize, ariko ubu turi igihugu cyahindutse mu mutima, mu bwenge no mu mubiri”.

Perezida Kagame avuga ko ¾ by’abaturage b’u Rwanda ari urubyiruko rutazi amateka y’ibyabaye, ariko ko ibintu byose byakozwe birimo no kujya mu muryango Commonwealth mu mwaka wa 2009, bigamije kwagurira amarembo Abaturarwanda hirya no hino ku Isi.

Perezida Kagame avuga ko Inama ya CHOGM yubatse ubushuti n’icyizere by’igihe kirekire, bishingiye ku rurimi rumwe, kubahiriza amategeko, guharanira uburenganzira bwa muntu no gushakira ibisubizo hamwe.

Igikomangoma cy’u Bwongereza Charles wahagarariye Umwamikazi ElizabethII mu nama ya CHOGM ibera i Kigali, yashimiye Perezida Kagame n’Abanyarwanda muri rusange kuba barihanganye bagakora ibishoboka byose mu kwitegura CHOGM mu bihe byari bigoye by’icyorezo Covid-19.

Igikomangoma Charles yakomeje ashimira Abanyarwanda agira ati “Naje mu Rwanda ku nshuro ya mbere nsura inzibutso za Jenoside, nganira n’abarokotse, nashimishijwe cyane n’uburyo Abanyarwanda bakeye, biyubatse kandi bafite icyerekezo”.

“Kuri ubu u Rwanda rugeze kure ruhanga udushya, ruyoboye Isi mu kubakira Abagore ubushobozi, rukaba n’igicumbi cy’ubukungu burengera ibidukikije, kandi rwiyemeje kubaka ejo hazaza hasangiwe.”

Igikomangoma Charles yasabye Abayobozi bahuriye muri CHOGM i Kigali gutekereza no gushaka uburyo bwo kubaka intego ihuriweho igamije ineza kuri bose.

Avuga ko umuryango Commonwealth umaze imyaka 70 wubaka ubushuti, ukaba ngo uzakomeza kuba Umuryango wigenga kandi ugizwe n’ibihugu byiyobora, ariko ukaba uhujwe no gusangira ubunararibonye buharanira ineza y’abawutuye ndetse n’Isi muri rusange.

Igikomangoma Charles akomeza avuga ko ubushake bw’Umwamikazi ElizabethII w’Ubwami bw’u Bwongereza, bukomeje kuba ubwo kubaka ubushuti mu muryango, ubumuntu n’agaciro ku bawutuye.

Minisitiri w’Intebe w’u Bwongereza, Boris Johnson yifurije amahirwe Perezida Kagame ugiye kumusimbura ku buyobozi bw’Umuryango Commonwealth, akavuga ko hari ibihugu byinshi ku Isi birimo kugaragaza ko byifuza kuwinjiramo.

Ibi Johnson yabivugaga hari Umukuru w’igihugu cya Qatar, Tamim bin Hamad Al Thani wabereye CHOGM umushyitsi. Qatar na yo yakoronijwe n’u Bwongereza ariko ntiraba umunyamuryango wa Commonwealth.

Minisitiri w’Intebe w’u Bwongereza avuga ko Leta ye izakomeza gutanga inkingo za Covid-19 ku banyamuryango ba Commonwealth, ndetse ko ikomeje gufatanya n’Umuryango w’Abibumbye(UN) kugira ngo babohore ibiribwa byaheze ku byambu byo muri Ukraine.

Perezida Kagame ubwo yakiraga abakuru b’Ibihugu na za Guverinoma bo mu muryango w’ibihugu bikoresha ururimi rw’Icyongereza, Commonwealth, yagaragaje ko icyorezo cya Covid-19 cyatumye ibice byinshi by’isi bibaho nabi ariko nanone kigaragaza ko hakenewe ubufatanye no gushyira hamwe.

Ati “Muri 2020 twanyuze muri byinshi, muri buri gihugu, buri karere no muri Commonwealth muri rusange. Icyorezo cya Covid-19 cyabaye igihe kibi mu mateka ariko nanone cyatweretse agaciro k’ubufatanye no gukorera hamwe n’umuryango. Ntidushobora gutera imbere tudakoreye hamwe.”

Perezida Kagame muri uyu muhango yashimiye abanyacyubahiro bose bitabiriye Inama ya CHOGM, avuga ko ari iby’agaciro gakomeye nk’u Rwanda kuba barakoze urgendo mu bilometero byinshi baje kwitabira iyi nama, ndetse abashimira kuba barakomeje kuguma ku ntego kimwe nk’u Rwanda, n’ubwo bitari byoroshye kubera icyorezo cya Covid-19. Ndetse ashimira n’ikizere bagiriye igihugu cy’u Rwanda ngo cyakire umuryango mugari wa Commonwealth.

Yagize ati “Hejuru ya byose ndabashimira ku bw’ikizere mwagiriye u Rwanda, ngo rwakire umuryango w’Ibihugu bya Commonwealth ndetse n’ubuyobozi bwawo mu bihe biri imbere.”

Umukuru w’Igihugu Kandi yashimiye Umunyamabanga mukuru wa Commonwealth ndetse n’itsinda bakoranye kugira ngo bategure imigendekere myiza y’iyi nama ya CHOGM, ashimira n’abashyitsi bicyubahiro baturutse hirya no hino ngo batange umusanzu wabo.

Ati “Ndashimira abashyitsi bose b’icyubahiro baturutse hirya no hino, aho baje kugira ngo dusuzumire hamwe ibitekerezo byacu. Kuba muri hano ndetse n’uruhare rwanyu bigaragaza ko Commonwealth ifite igisobanuro n’uruhare runini mu gushyiraho gahunda y’Isi.”

Perezida Kagame yaboneyeho gushima by’umwihariko abashyitsi bihariye b’imena barimo Umuyobozi w’Ikirenga (Emir) wa Qatar, Igikomangoma Sheikh Tamim bin Hamad Al Thani ndetse na Gianni Infantino, Perezida w’Impuzamashyirahamwe y’umupira w’amaguru ku Isi, bitabiriye Inama ya CHOGM2022.

By’umwihariko Perezida Kagame yashimiye Gianni Infantino ukunda kuvuga ko umupira w’amaguru ari yo siporo yonyine, ndetse ko bashobora kubyemeranya ko umupira w’amaguru cyo kimwe na Cricket, ufite ubushobozi bwihariye bwo guhuriza abantu hamwe.

Ati “Binyuze mu mupira w’amaguru, abantu bashobora kuvugana bagahana ibitekerezo, Igikombe cy’Isi ubwacyo kigira uruhare mu guhuza abantu barenga Miliyali baturutse mu bice byose by’Isi.”

Perezida Kagame yashimiye kandi Umuyobozi w’ikirenga wa Qatar, Sheikh Tamim bin Hamad Al Thani ku bwo kwitabira ubutumire bwe, kuko igihugu cye gisanzwe gifitanye umubano w’amateka n’ibihugu biri mu muryango wa Commonwealth.

Ati “Qatar iyobowe na we, iri ku isonga mu gushakira igisubizo ibibazo bimwe na bimwe byihutirwa by’umunsi, guhera ku mutekano w’ingufu, kugeza ku bikorwa by’ubutabazi mu burasirazuba bwo hagati no kurwanya ruswa ku isi.”

Avuga ko nta wundi mushyitsi w’imena wa Commonwealth yumvaga yashoboraga gutumira nka Emir wa Qatar.

Ubwo abayobozi bageraga i Gahanga ku kibuga mpuzamahanga cya Cricket

Ni umukino wari uryoheye ijisho ndetse wanitabiriwe n’abantu benshi bijyanye n’ibihangange byari byitabiriye uyu mukino birimo nka David Andrew Seaman wakiniye ikipe y’umupira w’amaguru ya Arsenal kuva muri 1990 kugeza muri 2003.

Si David Andrew Seaman gusa wari witabiriye uyu mukino kuko hari n’abandi nka Hamilton Masakadza wabaye kapiteni w’ikipe y’igihugu ya Zimbabwe, Elton Chigumbura na we wakiniye Zimbabwe, Tendai Mtawarira, ukomoka muri Zimbabwe akaba yaranakiniye ikipe y’igihugu ya Afurika y’Epfo mu mukino wa Rugby bose bari mu ikipe y’abatoranyijwe muri Afurika baje no kwegukana intsinzi batsinze ikipe ya Commonwealth Select.

Ikipe y’Abatoranyijwe muri Afurika (Africa Select) yegukanye itsinzi na runs 25 nyuma yo gutangira ikubita udupira (batting) ikaza gutsinda amanota 154 muri Overs 20 mu gihe Commonwealth Select yasohoye abakinnyi 3. Ikipe ya Commonwealth Select yatsinze amanota 129 muri overs 20 mu gihe hasohowe abakinnyi 7.

Minisitiri Munyangaju atangiza umukino yabaje kujugunya agapira (bowling)

Uyu mukino kandi watangijwe ku mugaragaro na Minisitiri wa Siporo, Mimosa Aurore Munyangaju, ndetse na Louise Martin uyobora Ishyirahamwe ry’imikino ihuza ibihugu bikoresha ururimi rw’icyongereza (Commonwealth Games Federation).

Umunyamabanga Uhoraho muri Minisiteri ya Siporo, Shema Maboko Didier, yavuze ko siporo ari bimwe mu bikorwa bya Commonwealth ndetse ko n’u Rwanda n’ubu rugomba kuzitabira iyi mikino izabera i Birmingham mu Bwongereza muri Kanama uyu mwaka.

Intoranywa za Afurika (Africa Select)

Yagize ati “Siporo ni kimwe mu bikorwa bya Commonwealth, ngira ngo muranabizi ko hari imikino tugomba kuzitabira izabera i Birmingham, ni umwanya mwiza rero wo guhura tukaganira ndetse no kwerekana ko siporo yacu na yo imaze gutera imbere ndetse ko tunayikoresha kugira ngo ibyarire inyungu Igihugu. Twahisemo Cricket nk’umwe mu mikino ifite aho ihurira na Commonwealth, bihurirana n’uko natwe dufite sitade mpuzamahanga ya Gahanga ifite n’aho ihurira cyane n’Igihugu cy’u Bwongereza. Ngira ngo murabizi ko no mu kuyubaka habayeho gufatanya n’abafatanyabikorwa bo mu Bwongereza, rero ibyo byose tukaba ari byo twagendeyeho tugira ngo tubihuze abantu baze baganire basabane barebe uko uyu mukino ukinwa ndetse n’uko umaze gutera imbere”.

David Andrew Seaman wari ugeze mu Rwanda bwa mbere asanga Cricket imaze gutera imbere ariko avuga ko hakenewe abatoza bagomba gukurikirana abana bakiri bato.

Intoranywa za Commonwealth ( Commonwealth Select) bifotozanya na Minisitiri wa Siporo mu Rwanda ndetse n’umuyobozi w’ishyirahamwe ry’imikino muri Commonwealth

Ati “Aya ni amahirwe nabonye yo gusabana, ni inshuro yanjye ya mbere hano kandi ndimo gukunda u Rwanda. Mukeneye abatoza bagomba gukurikirana abana bakiri bato. Mbere na mbere haboneke abatoza noneho abakinnyi bazakura neza”.

Biteganyijwe ko bamwe mu bashyitsi bitabiriye CHOGM bakomereza ibikorwa bya siporo ku kibuga mpuzamahanga cy’umukino wa Golf Nyarutarama (Kigali Golf Resort and Villas) kuri uyu wa Gatanu aho na ho bahakomereza ubusabane n’ibiganiro, ari nako baryoherwa n’umukino wa Golf.

David Andrew Seaman yasize umwambaro wa Arsenal nk’urwibutso muri Federasiyo ya Cricket mu Rwanda

David Andrew Seaman yitegura gukubita agapira (batting)

Wari umukino urimo ihangana n’ubwo wari uwa gicuti

Umunyamabanga uhoraho muri Minisiteri ya Siporo, Shema Maboko Didier, ahemba abitwaye neza

Minisitiri Munyangaju na Madamu Louise Martin mu kibuga cya Cricket hagati

Umuhanda uva ku kibuga cy’indege - Giporoso - Kisimenti - KCC - Kimihurura - Sopetrade - Payage - Serena Hotel.

Umuhanda uva ku kibuga cy’indege - Kabeza - Giporoso - Kisimenti - KCC - Kimihurura - Sopetrade - Payage - Serena Hotel.

Serena Hotel - Sopetrade - Kimihurura - KCC.

Serena Hotel - Yamaha – Urwibutso rwa Jenoside rwa Kigali (Gisozi).

Umuhanda KG48 St (Kacyiru) - MINAGRI ujya kuri Kigali Golf Resort.

Amahuriro y’imihanda ashobora gukoreshwa mu kwambukiranya imihanda yavuzwe haruguru yerekanwa n’inyuguti ya ‘C’ iri mu ibara ry’ubururu ku ikarita ari yo; Payage, Gishushu, Kisimenti no kuri Prince House.

Indi mihanda mushobora gukoresha ni iyi ikurikira:

Abava i Kabuga cyangwa mu ntara y’Iburasirazuba banyura ku Mulindi - Ku Mushumba Mwiza - Kwa Rwahama - Kimironko - Controle technique - Nyabisindu - Gishushu - Mu Kabuga ka Nyarutarama - TV1 - Minubumwe - Ambasade ya America/ Rond Point - Kacyiru ahahoze Akarere ka Gasabo - Kanserege - Kinamba - Poid Lourds - Nyabugogo - Yamaha - Onatracom - Kuri 40.

Mulindi - Kanombe – Ikigo Nderabuzima cya Nyarugunga -Busanza - Itunda/Rubirizi - Kabeza - Niboye - Kicukiro centre - Sonatubes cyangwa kwa Gitwaza - Rwandex - Kanogo - Rugunga - kuri 40.

Gasozi - ULK - Beritwari - kwa Gaposho - Gakinjiro - Kinamba - Kacyiru cyangwa Utexrwa.

Kinamba - Nyabugogo - Yamaha - Gereza - Onatracom.

Turasaba abakoresha umuhanda kwihanganira izi mpinduka no kwirinda amakosa yateza umuvundo w’ibinyabiziga n’impanuka. Abapolisi bazaba bari ku mihanda kugira ngo babayobore.

Ugize ikibazo waduhamagara kuri 9003 na 0788311155.

Ni inkuru dukesha Polisi y’u Rwanda

Aba bayobozi bombi baganiriye ku bufatanye buri hagati y’u Rwanda n’u Bwongereza, harimo n’amasezerano y’ubufatanye bwo kwakira abimukira n’abasaba ubuhungiro, ndetse n’ubufatanye mu iterambere ry’ubukungu.

Minisitiri w’Intebe w’u Bwongereza, yageze mu Rwanda mu gitondo cyo kuri uyu wa Kane, mu ruzinduko rwe rw’amateka, aho ku Kibuga cy’indege mpuzamahanga cya Kigali, yakiriwe na Ambasaderi w’u Bwongereza mu Rwanda Omar Daair, ndetse n’Umunyamabanga wa Leta muri Minisiteri y’Ububanyi n’Amahanga n’ubutwererane, Prof Nshuti Manasseh.

Akigera mu Rwanda, mu butumwa yanyujije kuri Twitter, yatangaje ko yahageze amahoro, aje kwitabira CHOGM ndetse kugira ngo atange umusanzu mu gukemura ibibazo byugarije Isi, birimo inzara, imihindagurikire y’ikirere, kongera imbaraga z’ubucuruzi na bimwe mu bice bifite ubukungu bukomeye ku Isi.

Yakomeje agira ati “Hamwe n’indangagaciro dusangiye, amateka n’ururimi, Commonwealth ni ishyirahamwe ryihariye kandi ry’ingenzi.”

Imodoka z’amashanyarazi zifasha mu kugabanya ibyuka bihumanya ikirere

Minisiteri y’Ibidukikije yatangarije Inama yigaga ku mihindagurikire y’Ikirere, hamwe n’imishinga yita ku bidukikije mu bihugu bigize Commonwealth ku wa Gatatu tariki 22 Kamena 2022, ko ubu harimo gukoreshwa imodoka zisaga 100 zikoresha amashanyarazi mu gutembereza abitabiriye CHOGM.

Abitabiriye iyo nama kandi barimo kururuka indege bafashwa kugendera muri za bisi nini za rusange, mu rwego rwo kwirinda ko buri wese agendera mu modoka ye irekura imyuka ihumanya.

Guverinoma y’u Rwanda ivuga ko iri muri gahunda yo gukoresha imodoka (bisi) zitwara abantu mu buryo bwa rusange zikoreshwa n’amashanyarazi, mu rwego rwo kwirinda kohereza mu kirere amatoni y’ibyuka bihumanya ikirere.

Baganiriye ku ibungabungwa ry’umutungo kamere

Itangazo ryatanzwe na Minisiteri y’Ibikorwaremezo (MININFRA) ifite ingufu mu nshingano, rivuga ko u Rwanda rwashyizeho uburyo bworohereza ishoramari mu binyabiziga bikoresha amashanyarazi, ibyuma bisimbura ibishaje ndetse no kubyongerera umuriro (charging).

Mu rwego rwo korohereza iryo shoramari, abatumiza n’abakoresha ibyo binyabiziga n’ibibigize, bakuriweho imisoro ku nyungu ndetse n’imisoro ku byacurujwe.

Bamwe mu bashoramari n’abandi bafatanyabikorwa muri iyi gahunda babiganirijweho, mu nama yabayemo gusangira ifunguro rya mu gitondo ku wa Gatatu, yari iyobowe na Minisitiri w’Ibidukikije mu Rwanda, Dr Jeanne d’Arc Mujawamariya, hamwe n’Umunyamabanga Mukuru w’Umuryango Commonwealth, Patricia Scotland.

Minisitiri w’Ibidukikije, Dr Jeanne D’Arc Mujawamariya

Ni inama yari igamije kungurana ibitekerezo ku ishyirwa mu bikorwa ry’inyandiko yiswe “Commonwealth Living Lands Charter” isobanura uko ibihugu binyamuryango bikwiye kwita ku mikoreshereze myiza y’ubutaka, amazi n’urusobe rw’ibinyabuzima.

Dr Mujawamariya avuga ko gushaka ubushobozi mu guhangana n’imihindagurikire y’ikirere, ndetse no kubukoresha uko bikwiye, ari byo bizahindura imiterere y’ikirere itifashe neza mu bice byinshi by’Isi.

Umunyamabanga Mukuru wa Commonwealth, Patricia Scotland na we avuga ko mu byumba by’inama za politiki, imihindagurikire y’ibihe ngo idahabwa agaciro cyane nk’ikibazo gikomeye, nyamara abatuye Isi bahangayitse.

Patricia Scotland, Umunyamabanga Mukuru wa Commonwealth

Scotland avuga ko mu baturage imihindagurikire y’ibihe ipimirwa mu mibereho yabo, mu buzima, mu bukungu, mu buryo bumva bamerewe ndetse no mu bushobozi bwabo.

Scotaland avuga ko mu baturage barenga miliyari ebyiri na miliyoni 500 batuye mu bihugu bigize Umuryango Commonwealth, 60% bugarijwe n’ingaruka z’imihindagurikire y’ikirere.

Aba ngo bategereje ibyemezo by’ababahagarariye muri CHOGM irimo kubera i Kigali, kugira ngo bababwire uburyo bakwifata ku ngaruka mbi z’ikirere kitifashe neza, inkongi z’imiriro, kubura amazi n’ibiribwa ndetse no kuba abaturiye inyanja zirimo kubasatira aho batuye zenda kubarengera.

Scotaland ati “Ni inshingano zacu kubatega amatwi no kumva ubuhamya bwabo tukabahoza ku mutima mu byo turimo hano, ndetse no kugira icyo tubikoraho”.

U Rwanda rwo rurakomeza kureshya abafatanyabikorwa muri gahunda zo kurengera ibidukikije, mu nama ya CHOGM iterana kuri uyu wa Kane, ikaba iza gusuzuma ingamba z’Isi zo kugabanya iyoherezwa mu kirere ry’imyuka ihumanya kandi yangiza akayunguruzo k’izuba.

Hari umuhanda wa Serena Hotel - Payage - Sopetrade - Kimihurura - Gishushu - Kisimenti- Giporoso - Ku Cya Mitsingi - Nyandungu - Mulindi - Inyange - Intare Arena.

Umuhanda uva ku kibuga cy’indege - Giporoso - Kisimenti - KCC - Kimihurura - Sopetrade - Payage - Serena Hotel.

Umuhanda uva ku kibuga cy’indege - Kabeza - Giporoso - Kisimenti - KCC - Kimihurura - Sopetrad - Payage - Serena Hotel.

Umuhanda uva Serena Hotel - Sopetrad - Kimicanga - Kacyiru - Kigali Public Library.

Umuhanda Kigali Public Library - Telecom House - KCC.

Umuhanda wa Kisimenti - BK Arena.

Umuhanda wa Prince House - Sonatube - Kicukiro Centre - Nyanza - Gahanga Cricket Ground.

Abakoresha umuhanda baragirwa inama yo gukoresha indi mihanda yo mu byerecyezo bikurikira:

Abava i Kabuga cyangwa mu ntara y’Iburasirazuba bakoresha umuhanda wa Musambi - Umuhanda uca inyuma ya Parking ya Intare Arena - Mulindi - Gasogi - Musave - Special Economic Zone - Kwa Nayinzira - Kimironko - Controle technique - Nyabisindu - Gishushu - Kabuga ka Nyarutarama - Utexrwa - Kinamba.

Mulindi - Kanombe - Ikigo Nderabuzima cya Nyarugunga - Busanza - Itunda/Rubirizi - Kabeza - Niboye - Kicukiro Centre - Kwa Gitwaza - Rwandex - Kanogo - Kinamba.

Kinamba - Yamaha - Gereza - Onatracom.

Nyanza - Rebero.

Abakoresha imodoka bashobora kwambukira mu mahururo y’imihanda ahari inyuguti ya ’C’ ku ikarita igaragaza uko imihanda ikoreshwa ari ho kuri Payage, Gishushu, Kisimenti, Prince House, Nyandungu, kuri 15 no ku Mulindi.

Polisi y’u Rwanda irasaba abakoresha umuhanda kwihanganira izi mpinduka no gukomeza kubahiriza amategeko n’amabwiriza agenga imikoreshereze y’umuhanda mu rwego rwo kwirinda impanuka.

Abapolisi bazaba bari ku muhanda kugira ngo babayobore.

Ugize ikibazo wahamagara kuri 9003 (ku buntu) cyangwa 0788311155.

Ni inkuru dukesha Polisi y’u Rwanda

Ibyo byatewe n’uko icyorezo cyatunguranye cyane, ariko iterambere ry’ikoranabuhanga ryihuse, ryagaragaje ko hari byinshi bishobora gukorwa mu gihe hari ingengo y’imari ikwiye ndetse n’ubushake bwa politiki.

Perezida w’Inteko ishinga amategeko mu Rwanda, Mukabalisa Donatille yagezaga ijambo ku bitabiriye iyi nama

Ku itariki 21 Kamena 2021,ubwo Perezida w’Inteko ishinga amategeko mu Rwanda, Mukabalisa Donatille yagezaga ijambo ku bitabiriye inama y’iminsi ibiri ya ‘Commonwealth People’s Forum’ yaberaga mu Mujyi wa Kigali, yitabiriwe n’abantu basaga 250, yasobanuye uko icyorezo cya Covid-19 cyatunguranye.

Yagize ati “Icyorezo cya Covid-19, cyagaragaje intege nke ziri mu nzego z’imiyoborere mu bijyanye no guha abaturage ibyo bakeneye”.

“Icyorezo cyagaragaje ubusumbane mu bihugu bigize umuryango wa Commonwealth mu bijyanye no kubona inkingo ndetse n’ibindi bikoresho byari bikenewe mu guhangana n’icyo cyorezo”.

Iyi nkuru dukesha The New Times ivuga ko Mukabalisa Donatille yavuze ko iyo nama ari umwanya mwiza wo kureba uko ibibazo bihari byakemurwa neza kurushaho.

Dr Ines Hassan, Umushakashatsi kuri gahunda ya ‘Global Health Governance Programme’ mu kigo cya ’Usher Institute’ yagize ati “Hari ibibazo byari bihuriweho n’ibihugu biteye imbere n’ibihugu bikiri mu nzira y’Amajyambere. Mu bibazo bihuriweho birimo kubura abakozi bahagije mu nzego z’ubuzima, ubusumbane, ubumenyi buke ku cyorezo, ndetse no kudashobora kubona serivisi zimwe na zimwe z’ubuzima”.

Mukuralinda aganira na Teveliziyo y’u Rwanda, yavuze ko Abanyarwanda baba bahomba mu gihe ibikorwa bamaze kubaka byabyazwa umusaruro muri iki cyumweru cya CHOGM gusa, ubundi bikazima.

Atanga ingero z’ahamaze kumenyerwa ko hakorerwa imyidagaduro hitwa muri ‘Car free zone’ mu Biryogo, ku Gisimenti, mu Mujyi ndetse n’ahandi hazabera ibitaramo, by’umwihariko nka Gahanga muri Kicukiro, kuri Tapis Rouge i Nyamirambo na Rugende muri Rusororo ku wa Gatanu no ku Cyumweru kuva saa cyenda z’igicamunsi.

Mukuralinda akomeza avuga ko utubari n’utubyiniro tuzakomeza gukora amanywa n’ijoro mu mpera z’icyumweru, ku buryo ngo hari abashobora kumva bitari ngombwa kujya kuryama.

Ibi abitangaza mu gihe Umujyi wa Kigali na wo wafunguye Inzu yitwa ‘Agaseke Center i Rebero’, ikaba yaragenewe guteza imbere Umuco nyarwanda, ikaba imurikirwamo ibijyanye n’ubugeni, ubukorikori n’ubudozi, imbyino n’ibindi biranga umuco wa kera w’Abanyarwanda.

Aha hose, nk’uko Umuvugizi wa Guverinoma abisobanura, abantu binjiramo ku buntu bakagura amafunguro n’ibyo kunywa, barabyina bakaririmba, ahandi habera imikino itandukanye, ahandi habera imurika ry’imideri n’imurikagurisha ry’ibicuruzwa, cyane cyane ibikorerwa mu Rwanda.

Ati “Ibi bintu ntibizajyanye na CHOGM, bigomba gukomeza. Niba tugaragaza ko dushobora kwidagadura mu mutekano, abantu bagahurira ahantu bakahava nta kibazo kibaye, ibyo byose ni imyiteguro turimo twiga, rwose nongere mbisabe ntibizajyane na CHOGM”.

Minisitiri wa Siporo, Aurore Munyangaju Mimosa avuga ko muri iki gihe cya CHOGM, muri BK Arena harimo kubera icyumweru cyo kumurika imideri cyitabiriwe n’Abanyarwanda hamwe n’Abanyamahanga bagera kuri 16 bavuye hirya no hino muri Afurika.

Iyi nyubako kandi izakira igitaramo cy’umuziki kizaberamo kuri uyu wa Gatanu, kikazitabirwa n’abazaba barangije Inama ya CHOGM mbere y’uko basubira mu bihugu byabo.

Perezida Kagame na Prince Charles, bagiranye ibiganiro byibanze ku bufatanye n’umubano hagati y’u Rwanda n’u Bwongereza.

Igikomangoma Charles cy’u Bwongereza, ari mu Rwanda kuva ku mugoroba wo ku wa Kabiri, aho yahageze aje kwitabira Inama ya CHOGM, ihuza Abakuru b’Ibihugu na za Guverinoma bo mu Muryango wa Commonwealth, aho ahagarariye Umwamikazi Elizabeth II.

Abinyujije kuri Twitter, Prince Charles yashimiye Perezida Kagame na Madamu Jeannette Kagame, ku bw’ikaze n’urugwiro babakiranye.

Igikomangoma Charles cy’u Bwongereza na Madamu Camilla, mu masaha ya mbere ya saa sita babanje gusura Urwibutso rwa Jenoside yakorewe Abatutsi rwa Kigali ku Gisozi, aho bagiye kunamira inzirakarengane zihashyinguye.

Aherekejwe na Bizimana Jean Damascène, Minisitiri w’Ubumwe bw’Abanyarwanda n’inshingano mboneragihugu, Prince Charles n’umugore we Camilla, batambagijwe ibice bigize urwo rwibutso ndetse basobanurirwa amateka ya Jenoside yakorewe Abatutsi, ingaruka zayo ndetse n’ubudasa bw’Abanyarwanda mu kwishakira ibisubizo byabagejeje ku bumwe n’ubwiyunge no kongera kwiyubaka mu myaka 28 ishize. Yanashyize indabo ku mva.

Ni urugendo rwareshyaga n’ibirometero bine na metero magana ane (4.4km). Abari bitabiriye iyo siporo bageze imbere y’inyubako ya BK ARENA nk’ahari hateguwe gutangirira ku isaha ya saa kumi n’ebyiri z’umugoroba (6pm) maze babanza kwishyushya biherekejwe n’umuziki w’indobanure wabafashaka kwinanura bitegura kwiruka.

Ku isaha ya saa moya nibwo aba mbere bahagurutse mu marembo ya BK ARENA barangajwe imbere na Minisitiri wa Siporo Madamu Munyangaju Aurore Mimosa, maze biruka berekeza ahazwi nko kuri MTN bakata umuhanda werekeza Kimironko. Bakigera ku iguriro ry’ibintu bitandukanye rya Simba Supermarket, bakase mu kuboko kw’ibumoso maze batunguka ahagenzurirwa ubuziranenge bw’ibinyabiziga hazwi nka Controle Technique bagaruka kuri BK ARENA ari na ho bakomereje imyitozo ngororamubiri ari na yo yaje gusoza iyi Kigali Night Run.

Minisitiri wa Siporo, Aurore Mimosa Munyangaju na we yitabiriye iyi siporo

Minisitiri wa Siporo mu Rwanda, Madamu Munyangaju Aurore Mimosa, yavuze ko bishimiye uko Kigali Night Run yagenze ndetse ko yagenze nk’uko bari bayiteguye.

Yagize ati “Yego byagenze nk’uko twari twabiteguye kubera ko iyi gahunda ya Kigali Night Run yari iyo kugira ngo twakire abashyitsi bitabiriye CHOGM tubagaragarize uburyo siporo iri ku isonga, imibereho myiza y’abaturage, ariko nanone mu buryo bwo kubakira kandi babyishimiye.”

Yakomeje avuga ko batunguwe n’ubwitabire bw’abantu ko bigaragaza uburyo Abanyarwanda bakunda siporo ndetse banakiramo abashyitsi.

Ati “Mu by’ukuri ubwitabire bwari hejuru cyane, ibi bigaragaza uburyo Abanyarwanda bakundamo siporo ndetse banakiramo abashyitsi. Ubundi twari tumenyereye ko Kigali Night Run iba ari mu mpera z’icyumweru, ariko n’ubu yabaye mu mibyizi urabona ko ubwitabire bwari hejuru cyane.

Bamwe bacishagamo bagafata udufoto

Ubusanzwe Kigali Night Run yabaga rimwe mu mwaka aho akenshi iba mbere gato y’isiganwa mpuzamahanga rya Kigali ryitiriwe amahoro (Kigali International Peace Marathon) ndetse bavuga ko ifatwa nk’integuza.

Si Kigali Night Run gusa ihuza abantu benshi bagakora siporo cyane cyane mu Mujyi wa Kigali kuko hari na Car Free Day aho ibinyabiziga bya moteri biba byakuwe mu mihanda imwe n’imwe maze abantu bagakora siporo mu masaha ya mu gitondo, iyo Car Free Day ikaba ikorwa kabiri mu kwezi.

N’abana na bo ntibasigaye

Umunyarwenya Nkusi Arthur yari mu b’imbere

Minisitiri wa Siporo ubwo yari ageze aho basorezaga

Reba ibindi muri iyi video:

Amafoto: Shema Innocent
Video: Ruzindana Eric

Ku Kibuga cy’indege mpuzamahanga cya Kigali i Kanombe, Igikomangoma Charles n’umugore we bakiriwe n’abayobozi batandukanye barimo Ambasaderi w’u Bwongereza mu Rwanda, Ambasaderi w’u Rwanda mu Bwongereza Omar Daair, Ambasaderi w’u Rwanda mu Bwongereza Busingye Johnston, ndetse n’Umuyobozi Mukuru w’Ikigo gishinzwe Mine, Peteroli na Gaz mu Rwanda (RMB), Ambasaderi Yamina Karitanyi.

Muri Werurwe uyu mwaka, Prince Charles Philip Arthur George nibwo yatangaje ko ari we uzitabira Inama y’Abakuru b’Ibihugu na za Guverinoma bikoresha Icyongereza (CHOGM) izabera i Kigali mu Rwanda, akaba yayitabiriye nk’umushyitsi mukuru, ndetse ahagarariye Umwamikazi Elizabeth II usanzwe ari umuyobozi wa Commonwealth.

Igikomangoma Charles yagiranye ibiganiro na Busingye Johnston, Ambasaderi w’u Rwanda mu Bwongereza

Icyo gihe yagize ati: “Njye n’umugore wanjye twishimiye ko tuzitabira inama y’abakuru b’ibihugu bigize Umuryango wa Commonwealth i Kigali, mu Rwanda, muri Kamena.”

Igikomangoma Charles ubwo aheruka guhagararira Umwamikazi hari mu birori byabereye muri Sri Lanka mu 2013, mu gikorwa cyagaragaye nko kwitegura imirimo ye nk’uzasimbura wa nyina ku ngoma.

Iyo mihanda ni uva ku Kibuga cy’indege Mpuzamahanga cya Kigali-Giporoso-Kisimenti-KCC-Kimihurura-Sopetrade-Payage-Serena Hotel.

Umuhanda uva ku kibuga cy’indege Mpuzamahanga cya Kigali-Kabeza-Giporoso-Kisimenti-KCC-Sopetrade-Payage-Serena Hotel.

Sopetrad - Kanogo - Cercle Sportif - Park Inn Hotel - Choose Kigali Hotel.

Mu gihe waba usanze umuhanda urimo gukoreshwa n’abitabiriye inama, ushobora kwitabaza indi mihanda ikurikira.

Abava i Kabuga cyangwa mu ntara y’Iburasirazuba bakwifashisha umuhanda wa Nyandungu unyura Kimironko cyangwa ku Mushumba Mwiza – Kwa Rwahama - MIC - Gishushu – Mu Kabuga ka Nyarutarama - UTEXRWA - Kinamba - Yamaha - Gereza - ONATRACOM.

Abaturutse i Kanombe bashobora kunyura; Busanza - Rubirizi - KK 266 st - Kabeza - Niboye - Sonatubes - Rwandex - Gikondo – Kuri 40 cyangwa mu Kanogo - Kinamba - Nyabugogo.

Abakoresha umuhanda aho bashobora kwambukiranyiriza hagaragazwa ku ikarita n’inyuguti ya ‘C’ ari ho kuri Payage, ku Gishushu, Kisimenti no mu mahuriro y’imihanda yo kuri Prince House.

Abapolisi bazaba bari ku muhanda mu rwego rwo kubayobora. Polisi y’u Rwanda irasaba abakoresha umuhanda kwihanganira impinduka no kubahiriza amategeko n’amabwiriza agenga imikoreshereze y’umuhanda kugira ngo hirindwe umuvundo n’impanuka.

Ukeneye ibindi bisobanuro wahamagara kuri 9003 cyangwa 0788311155.

Ni inkuru dukesha Polisi y’u Rwanda

Umuturirwa wa mbere mu burebure wari usanzweho mu nyubako zose zigize Kigali ntabwo urenza amagorofa 20.

Imiturirwa ya Kigali Financial Square, umwe uzaba ugizwe n’amagorofa 24 undi ugizwe n’amagorofa 20, ikaba izubakwa iruhande rw’Ibiro by’Umujyi wa Kigali (ahahoze Minisiteri y’Ububanyi n’Amahanga).

Kigali Financial Square ni umushinga wa Banki y’Abanyakenya yitwa Equity Bank isanzwe ikorera mu Rwanda, ukaba uzarangiza kubakwa mu gihe cy’imyaka ibiri iri imbere, hakoreshejwe amafaranga angana na miliyoni 100 z’Amadolari ya Amerika (ahwanye n’amanyarwanda miliyari 100).

Perezida Kagame atangiza iyubakwa ry’iyo miturirwa

Equity Bank izashyira ibiro byayo muri izo nyubako, ahasigaye hakorere impuguke zitandukanye mu bijyanye n’imari, zitezweho kuzana abashoramari bifuza gukorera mu Rwanda.

Umuyobozi Mukuru wa Equity Bank, Dr James Mwangi avuga ko kugeza ubu Sosiyete Equity Group (igizwe na banki hamwe n’ikigo cy’imari n’imigabane), ifite amadolari ya Amerika miliyari esheshatu irimo guha abifuza gushora imari muri Afurika.

Aya mafaranga akaba ari yo yavuyemo ayubatse Hotel Marriot, ariko ngo bumvise batarekera aho, bahitamo kuza kubaka Kigali Financial Square (KFS).

Dr Mwangi agira ati “Ni iyo mpamvu twumvise twakunganira u Rwanda muri gahunda zarwo zigamije kurugira igicumbi cy’Isi mu bijyanye n’imari turushyiramo ibikorwaremezo, turi hano kugira ngo dutangize iyubakwa ry’imiturirwa ibiri izubakwa mu buryo bubana neza n’ibidukikije.”

Dr mwangi avuga ko Equity Group ari iya mbere muri Afurika y’i Burasirazuba no Hagati mu kugira imari shingiro nyinshi ingana na miliyari 13 z’amadolari ya Amerika, hamwe n’abakiriya bagera kuri miliyoni 17.

Dr Mwangi ngo yizeye ko na Banki Nyafurika Itsura Amajyambere BAD izashyira ibiro byayo by’aka Karere u Rwanda ruherereyemo muri Kigali Financial Square.

Perezida wa Repubulika, Paul Kagame yashimiye Equity Group avuga ko ishoramari izanye mu Rwanda ari umushinga munini uzafasha kongera kuzamura ubukungu bw’u Rwanda.

Perezida Kagame yagize ati “Iki kigo cy’ubucuruzi kizateza imbere umugambi w’u Rwanda wo kurugira igicumbi cyizewe cya serivisi z’imari”.

Umukuru w’Igihugu avuga ko mu myaka ibiri ishize icyorezo Covid-19 cyari cyasubije inyuma ubukungu, ariko mu gihe kiri imbere ngo yizeye ko u Rwanda, Akarere ndetse na Afurika muri rusange ubukungu bugiye kongera gutera imbere.

Perezida Kagame yiteze ko Kigali Financial Square izabigiramo uruhare ishingiye ku mutekano hamwe n’uburyo u Rwanda rworoshya ishoramari, kandi ko ayishyigikiye nk’umufatanyabikorwa wizewe.

Perezida Kagame yafunguye Kigali Financial Square ari kumwe n’abayobozi bitabiriye Inama ya CHOGM irimo kubera i Kigali muri iki cyumweru.

Reba ibindi muri iyi video:

Perezida Kagame ubwo yaganiraga n’abitabiriye inama ku bukungu

Yabitangarije i Kigali kuri uyu wa Kabiri tariki 21 Kamena 2022, ubwo hatangizwaga ihuriro ry’iminsi itatu ry’ubukungu mu nama ya CHOGM, rifite insanganyamatsiko igaruka ku kugira imikoranire mu kubaka ejo hazaza.

Mu kiganiro yatanze, Perezida Kagame yavuze ko hari byinshi umuryango wa Commonwealth uhuriyeho, yaba ururimi, cyangwa uburyo imiyoborere yubatse, nko mu bukungu bibafasha gushora imari mu bihugu bitandukanye, kugura no gucuruza mu bindi bihugu cyangwa bakabikorera hamwe.

Yagize ati “Hari intangiriro nziza, ariko dukwiye gukomeza gukora ku buryo birushaho kuba byiza, ku buryo igisobanuro cy’ijambo Commonwealth kigendana n’ijambo ubwaryo, ntihagire bamwe batera imbere ngo abandi basigare inyuma. Ni akazi gakomeye cyane, dukwiye gukomeza gukorera hamwe, tugomba kureba icyakorwa kugira ngo buri wese uyu muryango awiyumvemo nta wusigaye, ibyo nibyo tugomba kongeramo imbaraga”.

Yakomeje agira ati “Nk’ibihugu biri mu nzira y’amajyambere ntibyumve ko byasigaye inyuma, tugomba kuzuza iyo nshingano, mu bucuruzi, mu bukungu, mu ishoramari n’ibindi, nko mu bibazo twagiye tuvugaho byaba iby’iterambere mu burezi, ubuzima. Twagize icyorezo cya Covid-19, inkingo zirabura, hari ubwo zabonwaga n’ibihugu bimwe kandi bike, ibindi bikamara igihe ntazo bifite”.

N’ubwo hari aho byageze zigatangira kuboneka, ariko ngo uburyo ibintu bikorwamo bukwiriye kwihutishwa, kugira ngo barusheho guha agaciro kamwe abagize uyu muryango n’ibyiyumviro byabo.

Perezida wa Repabulika y’u Rwanda asanga n’ubwo Isi ifite imyumvire itandukanye, ariko buri wese na buri gihugu bafite icyerekezo kimwe ku hazaza.

Ati “Twabikora kandi tukabigeraho mu gihe twaba twumva ko ahazaza hahuriweho kuri twese ariho dushaka, ni akazi gakomeza kuko buri wese azakomeza kwerekana ibitandukanye n’ibyo dutekereza, ibyakorwa, uko abona ahazaza n’ibyo dukwiriye kubona muri aho hazaza”.

Akomeza agira ati “Icyiza ni uko dufite imyumvire ihuye ku cyo twese tugomba gukora kugira ngo tugire ahazaza hamwe, igisigaye ni ugukora ibishoboka byose tukabigeraho. Isi ifite imyumvire itandukanye ariko buri wese na buri gihugu dufite icyerekezo kimwe kuri aho hazaza”.

Umunyamabanga Mukuru wa Commonwealth, Patricia Scotland, avuga ko uyu muryango ugizwe n’urubyiruko rwinshi bigaragaza ko ejo hawo ari heza.

Ati “Umuryango wacu ukomeje kwaguka, ugizwe n’ibihugu 54, iwabo wa 1/3 cy’abatuye Isi, abarenga miliyari 2.5 bagizwe na 60% bari munsi y’imyaka 30, bivuze ko tukiri bato”.

Nyuma y’Umuryango w’Abibumbye, Umuryango wa Commonwealth niwo wa kabiri ku Isi ufite abanyamuryango benshi, kuko ugizwe n’ibihugu 54, bifite uruhare runini mu iterambere ry’Isi, kuko umusaruro mbumbe wabyo ugizwe na miliyali ibihumbi 13 by’Amadolari y’amerika.

Minisitiri w’Intebe w’u Bwongereza, Boris Johnson

Mu kiganiro n’itangazamakuru, Omar Daair uhagarariye u Bwongereza mu Rwanda, yavuze ko mu ntumwa z’u Bwongereza zije mu Rwanda harimo Liz Truss, Umunyamabanga wa Leta ushinzwe ububanyi n’amahanga n’ibiro bya Commonwealth bishinzwe iterambere, abadepite n’abahagarariye abakora mu yindi mirimo itandukanye (societé civile).

Abandi bayobozi bo mu Bwongereza bategerejwe i Kigali barimo Alok Sharma, Perezida w’Inama ya 26 y’Amashyaka, Conference of Parties (COP 26) na Lord Tariq Ahmad wa Wimbledon, Minisitiri w’u Bwongereza ushinzwe Commonwealth.

Mu butumwa yanditse kuri Twitter, Daair yagize ati “Birumvikana, Nyiricyubahiro Umwamikazi azaba ari kumwe natwe, kuko Igikomangoma cya Wales [Prince Charles], ari we ugomba kumuhagararira mu bubasha bwe nk’uzamusimbura ku buyobozi bwa Commonwealth.”

Mu ntangiriro z’uku kwezi, Prince Charles, imfura mu bahungu akaba ari na we uzasimbura Umwamikazi Elizabeth II ku ngoma, mu itangazo yashyize ahagaragara, yavuze ko hamwe n’umugore we, ari na we Muyobozi wa Cornwall, ashishikajwe no kuza i Kigali agahura n’Abakuru b’Ibihugu bya Commonwealth.

Inama y’Abakuru b’Ibihugu bya Commonwealth ibereye i Kigali, nyuma y’imyaka ine CHOGM ya 26 isubitswe ubugira kabiri kubera icyorezo cya Covid-19.

Intumwa zirenga 5.000 zirimo Abakuru b’Ibihugu 35 zatangiye kugera mu murwa mukuru w’u Rwanda, nyuma y’imyaka 13 ishize u Rwanda rwinjiye muri uyu muryango uhuza za Guverinoma z’ibihugu bikoresha Icyongereza.

Ku nsanganyamatsiko igira iti “Delivering a Common Future: Connecting, Innovating, transforming,’ inama ya CHOGM ya 26 izanzura imirimo yayo ku itariki 26 Kamena. Ugenekereje insanganyamatsiko mu Kinyarwanda ni: Gutegura ejo hazaza hahuriweho: Guhuza, Guhanga Udushya no Guhindura.
Gutangiza inama ku mugaragaro ni ku wa Gatanu tariki 24 Kamena 2022, bikazakurikirwa n’inama nyamukuru z’Abakuru b’Ibihugu zizaba guhera ku wa Gatanu tariki 24 kugeza kuri 25 Kamena.

Izo nama nyamukuru zibanzirizwa n’amahuriro ane, inama z’Abaminisitiri, ibirori n’ibindi bikorwa bibera rimwe ahantu hatandukanye.

Abakuru b’Ibihugu bya Commonwealth baje mu Rwanda kongera gushimangira indangagaciro rusange, no kwemeza ibikorwa na gahunda za politiki bigamije kuzamura imibereho y’abaturage babyo bose.

Afganistani nicyo gihugu rukumbi ku isi, gifite itegeko rikumira abana b’abakobwa kujya ku ishuri, kubera amahame bita ko ari ay’idini ya Islam bagenderaho.

Ku munsi wa mbere w’ihuriro ry’abagore mu muryango wa Commonwealth ryatangiye ku ya 20 Kamena 2022, mu ijambo yagejeje ku bitabiriye inama, Shaban Basij-Rasikh, yavuze ko aturuka mu gihugu aho kwiga ku mwana w’umukobwa bibujijwe n’amategeko.

Yagize ati “Iyo turebye mu buryo bw’imibare usanga mu bana basaga miliyoni 250 barimo n’abakobwa ntabwo biga, kubera impamvu zitandukanye zishobora gukemurwa, ariko bitandukanye cyane n’iyo tuvuze ko hari igihugu ku isi, aho umwana w’umukobwa atemererwa kwiga byemewe n’amategeko”.

Yakomeje agira ati “Uyu munsi abakobwa bo muri Afganistani bashoboye kwiga mu mashuri yisumbuye byemewe n’amategeko, bari hano mu Rwanda, kandi ndabishimira ubuyobozi bw’u Rwanda n’Abanyarwanda kuba baratwakiriye neza guhera muri Nzeli umwaka ushize, ubwo Abatalibana bafataga ubutegetsi, ubwo kwiga ku mwana w’umukobwa byahise biba ibidashoboka”.

Shaban Basij-Rasikh ukomoka muri Afganistani

Kuba abana b’abakobwa bo muri Afganistani biga mu Rwanda, barimo gukora neza mu masomo yabo, nibyo Shaban aheraho asaba ko icyo gihugu kitabera urugero ibindi, rwo gutuma abana b’abakobwa bavutswa uburenganzira bwo kwiga.

Ati “Ntabwo dushobora kumera neza mu gihe igihugu n’ubuyobozi batemerera abana b’abakobwa kwiga. Niba hari ikintu cy’ingezi nshaka gushyira imbere niba mbishoboye, kuri mwe mwese muri hano, no ku bayobozi ba Commonwelth, ni uko mwakwamagana mu ijwi riranguruye, mugasaba impinduka”.

Yongeraho ati “Ntabwo twakomeza guta umwanya, kubera ko twifuza ko abana b’abakobwa biga, dufite imibare, dufite ubushakashatsi bwakozwe imyaka n’imyaka bugaragaza ko kwigisha umwana w’umukobwa ari ukurwanya ubukene, imihindagurikire y’ikirere n’ibindi”.

Yongeyeho ko bafunguye amarembo ku mwana wese ukomoka muri Afganistani uri hirya no hino ku Isi mu nkambi z’impunzi wifuza kwiga, bakazatangira mu mwaka w’amashuri utaha mu Rwanda hifashishijwe iyakure, ariko ngo kubera amabwiriza n’amategeko akomeye yo mu gihugu cyabo, ntibashoboye kwakira abana b’abakobwa baturuka muri icyo gihugu muri uyu mwaka.

Ngo hari ababyeyi benshi bamaze kumuvugisha bamubwira ko mu gihe abana babo baramuka bemerewe kwiga, bakwemera kuba impunzi mu bihugu by’abaturanyi ariko bagafashwa kwigisha abana babo hifashishijwe iyakure.

Kuri ubu ngo hari imiryango itandukanye yibumbiyemo abagabo yo mu gihugu cya Afganistani, yatangiye gusaba ko uburenganzira bw’umwana w’umukobwa bwakubahirizwa muri icyo gihugu.

Imihanda izakoreshwa n’abitabiriye CHOGM ni: Serena Hotel - Payage - Sopetrad - Kimicanga - Kimihurura - Gishushu - Gisimenti - Giporoso - Nyandungu - Kuri 15 - Mulindi – Ku ruganda ‘Inyange’ - Intare Arena.

Ikibuga cy’indege - Giporoso - Gisementi – Kigali Convention Centre - Serena Hotel.

Ikibuga cy’indege - Kabeza - Giporoso - Gisementi – KCC - Serena Hotel.

Abazaba bakoresha umuhanda baragirwa inama yo gukoresha ibindi byerekezo:

1.Abaturuka i Kabuga no mu Ntara y’Iburasirazuba berekeza mu Mujyi wa Kigali bazanyura ku Musambi - inyuma ya parking ya Intare Arena - Mulindi - Gasogi - Musave - Special Economic Zone - Kwa Nayinzira - Kimironko - Controle Technique - Nyabisindu - Gishushu - Mu Kabuga ka Nyarutarama - Utexrwa – Kinamba.

2.Mulindi - Kanombe ukomeza mu Kajagali – Ikigo Nderabuzima cya Nyarugunga -Busanza - Itunda/Rubirizi - Kabeza - Niboye - Kicukiro centre – Kwa Gitwaza -Rwandex - Kanogo – Kinamba.

3. Kinamba - Yamaha - Gereza – Onatracom.

Imihanda wakoresha wambukiranya mu gihe uhawe uburenganzira n’abapolisi ni: Payage-Gishushu - Gisimenti - Prince house -Kuri 12 - Kuri 15 - Mulindi.

Iyi mihanda ntabwo ifunze burundu ku rujya n’uruza rw’ibinyabiziga. Hazabaho igihe gito itazaba ikoreshwa mu buryo bwa rusange mu gihe izaba irimo gukoreshwa n’abitabiriye CHOGM ariko mu gihe bamaze gutambuka izajye yongera ikoreshwe uko bisanzwe.

Abakoresha umuhanda barasabwa kwihanganira impinduka no kwirinda amakosa yateza umuvundo w’ibinyabiziga n’impanuka kandi bagakurikiza amabwiriza bazahabwa n’abapolisi bazaba bari ku mihanda kugira ngo babayobore.

Ugize ikibazo wahamagara Polisi kuri 9003 (ku buntu) cyangwa kuri 0788311155 ugahabwa ubufasha.

Ni inkuru dukesha Polisi y’u Rwanda

Madamu Jeannette Kagame ashyigikiye ko abagore bo muri Commonwealth bajya mu myanya ifata ibyemezo

Madamu Jeannette Kagame aremeranywa na gahunda z’Umuryango w’Ibihugu bikoresha ururimi rw’Icyongereza (Commonwealth), zijyanye no guha ubushobozi abagore n’abakobwa mu bijyanye n’ubukungu hamwe no kubashyira mu myanya ifata ibyemezo ku bibazo byugarije Isi.

Madamu Jeannette Kagame hamwe n’Umunyamabanga Mukuru wa Commonwealth, Patricia Scotland, ni bo bafunguye Inama y’Ihuriro ry’Abagore bo mu Muryango Commonwealth (CWF) kuri uyu wa Mbere, baje kwitabira Inama ya CHOGM iteraniye i Kigali muri iki cyumweru.

Iyi nama izafata imyanzuro yo gushyira abagore n’abakobwa mu buyobozi cyangwa mu myanya ifata ibyemezo, kubaha ubushobozi mu bijyanye n’ubukungu, guca burundu ihohoterwa ribakorerwa ndetse no kugera ku buringanire hamwe no guhangana n’ihindagurika ry’ibihe.

Madamu Jeannette Kagame agira ati “Tugomba kwiyemeza kuvuga ngo ‘Yego dufite abagore benshi mu myanya ifata ibyemezo, Yego, tuzagera ku bushobozi bw’abagore mu bijyanye n’ubukungu. Yego dufite uruhare mu guhangana n’imihindagurikire y’ibihe cyane cyane abagore n’abakobwa, kandi twese hamwe dushoboye, tugomba kandi tuzatsinda ihohoterwaa rikorerwa abagore n’abakobwa!”

Madamu wa Perezida wa Repubulika avuga ko bizagerwaho mu gukomeza ingamba z’iterambere, itangwa rya serivisi zinoze, guteza imbere imikoranire, kurwanirana ishyaka no gukora ubuvugizi, kwiga no gukora ubushakashatsi, byose bikajyana no kurwanya ubusumbane bushingiye ku gitsina.

Madamu Jeannette Kagame avuga ko hari imibare iteye inkeke igarukwaho muri iyi nama, harimo ikibazo cyo gushyingira abangavu no kubasambanya kugeza ubu cyibasiye ¾ (cyangwa 75%), by’abagore bari mu bihugu bigize umuryango Commonwealth.

Avuga ko Ihuriro ry’Abagore bagize uwo muryango riteranye mu gihe Isi yugarijwe n’ingaruka z’icyorezo cya Covid-19, ndetse n’izamuka rikabije ry’ibiciro, ahanini ryatewe n’intambara hagati ya Ukraine n’u Burusiya.

Madamu Jeannette Kagame avuga ko kuba u Rwanda rwarabayemo Jenoside yakorewe Abatutsi mu 1994, ngo byasabye ababohoye Igihugu kubanza kuvura abagore ibikomere biterwa n’ihungabana.

Inama ya CHOGM isanze u Rwanda rugeze kure gahunda yo kubakira abagore n’abakobwa ubushobozi, ndetse no kubashyira mu myanya ifata ibyemezo, aho 61.4% by’abagize Inteko Ishinga Amategeko ari abagore, 55% bakaba bagize Guverinoma.

Aha ni ho Umunyamabanga Mukuru wa Commonwealth, Patricia Scotland, ahera ashimira Leta y’u Rwanda kuba yarashyizeho Politiki ishingira iterambere ku buringanire n’ubwuzuzanye bw’abagore n’abagabo.

Scotland na we ashimangira ko Ihuriro ry’Abagore muri Commonwealth, rigomba kwiga ku iterambere, Demokarasi no kubaka amahoro, byose bishingiye ku gushyira abagore n’abakobwa mu myanya ifatirwamo ibyemezo.

Yakomeje agira ati “Tugomba gushyira hamwe mu kurwanya ihohoterwa rigaragara mu rwego rw’imibanire na politiki. Tugomba twese hamwe guharanira gushyira bakuru bacu na barumuna bacu mu myanya ikwiriye yo kurwanya ingaruka ziterwa n’imihindagurikire y’ibihe, tugomba kandi guharanira turi hamwe, kubonera amahirwe nk’abagore n’abakobwa bo muri Commonwealth.”

Ihuriro ry’Abagore n’Abakobwa bo mu bihugu bigize Commonwealth riteraniye i Kigali kugira ngo ryegeranye ibyifuzo, bihita bigezwa ku bakuru b’Ibihugu na za Guverinoma bikoresha ururimi rw’Icyongereza, bazitabira inama ya CHOGM.

Reba ibindi muri iyi video:

By’umwihariko ku bijyanye n’ingendo, urwo rwego ruravuga ko imihanda isanzwe ifunguye kuri buri wese, bityo ko abantu bayikoresha bagakomeza ibikorwa byabo.

Icyakora imwe mu mihanda minini ni yo ifungwa akanya gato mu gihe imodoka zitwaye abashyitsi zitambuka, hanyuma abagenzi bagakomeza bakayicamo nk’ibisanzwe.

Ibi bivuze ko nta mihanda ifunze, ko abagenzi bemerewe gukomeza kuyikoresha bajya aho ari ho hose muri gahunda zabo zisanzwe.

Kuri uyu wa Mbere tariki ya 20 Kamena 2022, imihanda ikoreshwa n’abitabiriye inama ya CHOGM ni: Serena Hotel - Payage - Sopetrad - Kimicanga - Kimihurura -Gishushu - Gisimenti - Giporoso - Nyandungu - Kuri 15 - Mulindi - Ku ruganda rw’Inyange - Intare Arena.

Abakoresha iyi mihanda baragirwa inama yo gukoresha indi

Abava i Kabuga cyangwa mu Ntara y’Iburasirazuba bashobora kunyura ku Musambi - inyuma ya parking ya Intare Arena - Mulindi - Gasogi - Musave - Special Economic Zone - Kwa Nayinzira - Kimironko - Controle technique - Nyabisindu - Gishushu - Mu Kabuga ka Nyarutarama - Utexrwa - Kinamba.

Undi muhanda uzaba ufunguye ku rujya n’uruza rw’ibinyabiziga ni uva ku Mulindi - Kanombe ugakomeza mu Kajagari - Nyarugunga Health Center -Busanza - Itunda/Rubirizi - Kabeza - Alpha Palace - Sonatubes - Rwandex - Kanogo - Kinamba.

Umuhanda wa Kinamba - Yamaha – Gereza - Onatracom na wo uzaba ufunguye.

Abakoresha umuhanda barasabwa kwihanganira izi mpinduka no kwirinda amakosa yateza umuvundo w’ibinyabiziga n’impanuka.

Abapolisi bazaba bari ku mihanda kugira ngo babayobore.

Ugize ikibazo wahamagara Polisi kuri 9003 (ku buntu) cyangwa kuri 0788311155 ugahabwa ubufasha.

Ushobora gukurikira amabwiriza ajyanye n’imikoreshereze y’imihanda muri iki gihe cya CHOGM unyuze ku rubuga rwa Polisi (Website), kuri Twitter (@Rwandapolice) na Facebook.

Ni inkuru dukesha Polisi y’u Rwanda

Amabendera y’Ibihugu bigize Commonwealth

Ibi byatangajwe tariki 17 Kamena mu kiganiro n’abanyamakuru mbere y’inama iteganyijwe kwakirwa n’u Rwanda nyuma yo gusubikwa inshuro ebyiri kubera icyorezo cya COVID-19. Umunyamabanga wa Leta muri Minisiteri y’Ububanyi n’Amahanga n’Ubutwererane Prof Nshuti Manasseh, agaruka ku myiteguro ibanziriza CHOGM 2022, yavuze ko byose byamaze gushyirwa ku murongo mu kwitegura iyo nama izitabirwa n’abasaga 5,000 bazaba bahagarariye ibihugu 54.

Ati: “Intumwa zatangiye kuhagera ariko twari twizeye ko abantu benshi baza. Muri rusange, iyi nama izitabirwa n’abantu barenga 5.000 baturutse mu bihugu 54 bigize Umuryango wa Commonwealth. Igihugu kimwe gusa, Nauru, cyariseguye kuko gifite amatora.”

Prof. Nshuti yakomeje agira ati: “Turateganya Abakuru b’ibihugu 35 n’abandi bashyitsi bakomeye bahagarariye ibihugu n’imiryango. Tuzakira kandi Abadamu b’abakuru b’ibihugu, muri rusange turateganya abantu barenga 5.000.”

Prof. Nshuti, yavuze ko mu mahuriro atandukanye y’iyi CHOGM, hazibandwa ku buryo abagize umuryango wa Commonwealth bashobora gufatanyiriza hamwe mu guhanga udushya, guhuza no guhindura, bigamije kugana ku ntego zimwe na zimwe zikomeye z’uyu muryango, harimo kurinda umutungo kamere no kurushaho zamura ubucuruzi.

“Ibintu byose birateguwe. Ahazabera inama, amacumbi no kwakira abashyitsi, ibirori na siporo byose byarateguwe kandi byateguwe kugirango CHOGM 2022 abazayitabira batazibagirwa ibihe bayigiriyemo. Turashishikariza Abanyarwanda gukoresha ayo mahirwe no guha ikaze abashyitsi bacu no kuzirikana ko bagomba kubakira no kubaha serivisi nziza.

Umuyobozi w’Umujyi wa Kigali, Pudence Rubingisa nawe wari muri iki kiganiro yavuze ko umujyi washyizeho ibikenewe byose kugira ngo CHOGM 2022 igende neza. Yagaragaje ko imihanda izakoreshwa mu gihe cya CHOGM yarangiye, kandi n’isigaye iri mu mirimo yanyuma.

Nta bwoba bwa Covid-19

Umunyamabanga wa Leta muri Minisiteri y’Ubuzima, Dr. Tharcisse Mpunga yakuyeho impungenge n’ubwoba bw’uko ishobora kuba ikibazo, mu gihe mu Rwanda hamaze iminsi hagaragara ubwandu bwa COVID-19.

Ati: “Mu by’ukuri COVID-19 iracyahari ariko hari byinshi twakoze kugirango tuyirwanye. Turimo kwitegereza uko byifashe, turacyafite igipimo kiri hasi. Iyo turebye ingamba zitandukanye dukoresha kugirango tumenye niba hari ubwoba cyangwa nta buhari, ntacyo gutinya ku buryo wavuga ko ubuzima bwahagarara.”

Dr. Mpunga akomeza agira ati: “Igipimo cy’abantu 1.6/100,000 ntabwo biteye impungenge. Hariho ibintu bitari bike tureba, harimo kugira ijanisha ryiza ry’abantu bakingiwe inshuro ebyiri kandi dufite umubare mwiza wabafashe urukingo rushimangira.”

Yagaragaje ko kugeza ubu imibare y’abandura abenshi ari abatagaragaza ibimenyetso kuburyo bidasaba uburyo bwihariye bwo kubakurikirana.

Dr Mpunga, yongeyeho ko kuri ubu mu gihugu abarwayi bane (4), aribo bari mu bitaro mu baturage miliyoni 14. “Kuva mu muri Werurwe, nta muntu turapfusha. Ibi biraduha ikizere ko icyorezo kiri ku murongo.”

Dr. Mpunga yavuze ko intumwa zose zizabanza gupimwa nizigera mu gihugu ariko yahamagariye n’abaturarwanda kurushaho gufata inshingano no kwikingkza byuzuye ndetse bakambara n’agapfukamunwa aho biri ngombwa, nubwo leta yavuze ko katakiri itegeko.

Umunyamabanga wa Leta muri Minisitiri w’ubuzima yavuze ko urwego rw’ubuzima rwiteguye CHOGM 2022. Ndetse ko hashyizweho ibigo byiteguye kuzatanga serivisi ku bibazo byihutirwa, mu gihe n’inzego z’ubutabazi ziteguriye kuzita ku bibazo byose bifitanye isano n’ubuzima.

Umutekano urabumbatiwe

Prof. Nshuti yavuze ko umutekano w’u Rwanda ubumbagiwe kandi ko nta kintu kizahungabanya CHOGM 2022, agaragaza ko ikibazo cya DRC kitazigera kigira ingaruka ku nama u Rwanda rumaze imyaka irenga 3 rwitegura kwakira.

Ubwo yavugaga ku kibazo cya DRC byumwihariko ku musirikare wayo wishwe arashwe ubwo yavogeraga umupaka w’u Rwanda, Umuvugizi wa Guverinoma, Yolande Makolo, ikibazo cya DRC kiri gukurikiranwa n’abayobozi ndetse n’inzego zitandukanye bireba, kuburyo ntakintu na kimwe bishobora kugiraho ingaruka kubibera mu Rwanda.

Ati: “Abanyarwanda n’abashyitsi bacu tubizeje umutekano wabo”, akomeza avuga ko nta kibazo cy’umutekano kizabera i Kigali cyangwa mu bindi bice by’Igihugu.

Perezida Kagame yagiranye ibiganiro na Umaro Sissoco Embaló wa Guinea-Bissau

Umukuru w’Igihugu na mugenzi we bagiranye ibiganiro byagarutse ku bibazo bireba ibihugu byombi ndetse no ku mugabane wa Afurika. Nk’uko urubuga rw’ibiro by’Umukuru w’Igihugu rwabitangaje.

Perezida Kagame yakiriye kandi Ramtane Lamamra, Minisitiri w’ububanyi n’amahanga wa Algeria akaba n’intumwa yihariye ya Perezida Abdelmadjid Tebboune.

Perezida Kagame yakiriye Ramtane Lamamra

Ku ya 7 Werurwe 2022, nibwo Perezida Umaro Sissoco Embaló wa Guinea-Bissau yaherukaga mu Rwanda mu ruzinduko rw’iminsi itatu.

Nyuma y’ibiganiro yagiranye na mugenzi we w’u Rwanda byabereye mu muhezo, bombi bakurikiranye umuhango wo gushyira umukono ku masezerano y’ubufatanye hagati y’ibihugu byombi mu nzego zitandukanye zirimo ibijyanye n’ubukungu, ubucuruzi, uburezi, kubungabunga ibidukikije ndetse n’ubukerarugendo.

Ni amasezerano yashyizweho umukono na Minisitiri w’Ububanyi n’Amahanga n’Ubutwererane, Dr Vincent Biruta na mugenzi we wa Guinea-Bissau, Suzi Barbosa.

MINAFFET itangaza ko ibihugu 54 bigize umuryango w’ibihugu bikoresha ururimi rw’icyongereza (Commonwealth) bizitabira iyi nama, byose bizahagararirwa usibye Igihugu kimwe kiri mu bikorwa by’amatora, abandi bose bamaze kwemeza ko bazitabira inama kandi imyiteguro yo kubakira ihagaze neza.

Mu kiganiro n’abanyamakuru ku myiteguro ya CHOGM, Umunyamabanga wa Leta muri Minisiteri y’Ububanyi n’Amahanga n’Ubutwererane, Prof Nshuti Manasseh, yavuze ko imyiteguro y’inama ihagaze neza, haba mu bijyanye no gutwara abantu, abazayobora abantu bamaze gutegurwa ndetse n’ibijyanye n’itumanaho ku bazitabira inama na byo biri ku murongo.

Yasabye Abanyarwanda muri rusange kuzarangwa n’umutuzo no kwitonda bakira abashyitsi bazamara igihe kirenze icyumweru mu Gihugu, aho basabwa gufasha abashyitsi kugubwa neza.

Prof Nshuti Manasseh asobanura ko usibye inama nyirizina, hari n’ibindi bikorwa bitandukanye abashyitsi bazajya bahuriramo birimo nk’imyidagaduro, ibitaramo n’imikino nka Cricket na Golf.

Avuga ko umuryango w’ibihugu bikoresha ururimi rw’icyongereza ugizwe n’abantu basaga miliyari ebyiri, kandi buri cyiciro kikazaba gihagarariwe haba mu rubyiruko, abagore, abikorera, ndetse hakaba n’icyiciro cy’imyidagaduro kuri politiki n’imibanire hagati y’ibihugu binyamuryango, ibyo byose bikaba bifitiye akamaro u Rwanda nk’Igihugu kigiye kuyobora uyu muryango mu gihe cy’imyaka ibiri.

Umuyobozi w’Umujyi wa Kigali, Pudence Rubingisa, avuga ko nta bindi bikorwa biteganyijwe kuba byafunga, nk’uko bimeze ku mashuri abanza n’ayisumbuye azaba afunze icyumweru cyose mu mujyi wa Kigali, kuko abashyitsi baje bazakenera ibindi bahaha, amahoteli abacumbikiye na yo akagira ibyo abategurira.

Agira ati, “Abantu ahubwo ni ugukora kurushaho, abantu bazaza bazasiga amafaranga menshi, amahoteli, amaresitora abakora iby’ubukorikori, ni ukubareshya kugira ngo bagire ibyo badusigira”.

Avuga ko ku kijyanye n’imihanda ishobora gufungwa kugira ngo abashyitsi boroherwe kugera ahabera inama no ku mahoteli, nta mbogamizi bizagira ku batuye n’abagenda mu mujyi wa Kigali kuko n’ubundi bijya bibaho ko rimwe na rimwe imihanda ifungwa kandi ubuzima ntibuhagarare.

Naho ku bijyanye n’imihanda n’ibindi bikorwa remezo bikiri kubakwa, Rubingisa avuga ko hari ibizaba byuzuye koko nk’uko biteganyijwe n’ibindi bizakomeza kubakwa kuko bitareba gusa inama ahubwo binajyanye na gahunda yo gukomeza gusukura umujyi wa Kigali.

Serivisi mu mahoteli zizaba zinoze

Ku kijyanye n’amahoteli n’imyiteguro ku gutanga serivisi nziza, umuyobozi mukuru wungirije wa RDB avuga ko iyi nama ije mu gihe ubukungu bw’Igihugu bwazamutse, kandi ko no mu by’amahoteli n’amaresitora, hazamutseho 80% ugereranyije n’umwaka ushize.

Agira ati, “Ntabwo mu gihembwe cya mbere cya 2022 ibikorwa by’amahoteli byahagaze, ubu hoteli zimaze iminsi zakira abakiriya mu bikorwa bitandukanye, ubu turi kureba ibizakenerwa. Iyi nama ifite umwihariko wayo, nk’u Buhinde ntabwo twabagaburira inka kuko iwabo hari icyo ivuze, mu byo amahoteli ategura hari abashinzwe kureba ibizakenerwa”.

Avuga ko Guverinoma yashyizeho itsinda rikorana n’inzego zose kandi ahagaragaye ko hari ibitaboneka mu Rwanda hashyizweho abantu bashinzwe kubishaka, naho ku kijyanye n’ibintu byari byarabuze ku isoko kubera icyorezo cya Covid-19 hari ibyamaze gutumizwa.

Naho ku mitangire ya serivisi mu mahoteli, RDB igaragaza ko hanogejwe ibijyanye no gutanga serivisi nziza, kuko hari n’abakozi benshi bahawe akazi, guhugura abakozi no kongeramo ba nyakabyizi kandi bahuguwe mu bijyanye no kwakira abantu batandukanye mu mico.

Agira ati, “Twakoranye n’amashami y’amahoteli yo hanze akorera mu Rwanda kugira ngo atange abakozi bunganira abasanzwe, naho ku bijyanye n’ibyo amahoteli n’amaresitora yaburaga, ngo yuzuze ibisabwa mu kwakira abantu neza, hari aho Leta yagiye yishyura ibyo bikorwa bikongerwamo kugira ngo hatagira ibibura”.

Ku kijyanye n’ubushobozi bwo guhahira abazitabira inama ku buryo bazabona ibikenewe byose, RDB isobanura ko hoteli ari kimwe mu gice giherutse guhabwa inkunga n’ikigega nzahurabukungu kugira ngo zikemure ibibazo zari zifite.

RDB kandi igaragaza ko ubugenzuzi ku by’ubuziranenge nabwo bwakozwe ku gutunganya ibiribwa n’ibinyobwa, uburyo bwo kubibika no kubitegura neza, ku buryo nta mpungenge zihari ku buzima bw’abazitabira inama.

Reba ibindi muri iyi video:

Polisi yatangaje ko kuri uyu wa Gatanu tariki ya 17 Kamena, umuhanda uva kuri Hoteli Serena kugera kuri Sitasiyo ya essence ya SP ukoreshwa n’abashyitsi gusa.

Polisi yasabye abasanzwe bakoresha uwo muhanda gukoresha indi mihanda kugira ngo bakore gahunda zabo uko bisanzwe, aho bashobora gukoresha umuhanda uva kuri SP ugakomeza kuri Imbuga City Walk, ukanyura ku bitaro bya CHUK.

Umuvugizi wa Polisi y’u Rwanda, CP John Bosco Kabera, yavuze ko Polisi y’ u Rwanda isaba abakoresha umuhanda kwihanganira izi mpinduka kandi bagakomeza kubahiriza amategeko n’amabwiriza agenga imikoreshereze y’umuhanda. Yasobanuye ko abapolisi baba bari ku mihanda mu rwego rwo kubayobora aho bagomba kunyura, hagamijwe kubahiriza umutekano wo mu muhanda.

Polisi yavuze ko uwashaka kumenya amakuru agendanye n’impinduka z’ikoreshwa ry’imihanda yasura imbuga nkoranyambaga za Polisi y’u Rwanda ari zo, Twitter, Facebook, ndetse no ku rubuga rwa Internet rwa Polisi y’ u Rwanda, akabona impinduka zabaye ku mikoreshereze y’imihanda buri munsi, bityo bikamufasha gupanga ingendo ze, cyangwa agahamagara kuri nimero itishyurwa 9003 cyangwa 0788311155.

Perezida Kagame na Justin Trudeau

Perezida Kagame, ibi yabitangarije mu butumwa yashyize kuri Twitter, avuga ko uretse ibiganiro bagiranye, ashimishijwe no kumwakira mu nama ya CHOGM u Rwanda rwitegura kwakira.

Yagize ati: “Nagiranye ikiganiro cyiza kuri telefone na Minisitiri w’Intebe Justin Trudeau, ku bibazo bibangamiye ibihugu byombi n’Isi ku nyungu rusange. Nejejwe no kumwakira muri CHOGM 2022 mu cyumweru gitaha hamwe n’abandi bayobozi, kandi ntegereje kwagura ibiganiro byacu n’ubufatanye.”

Minisitiri w’Intebe wa Canada, Justin Trudeau, ni umwe mu bakuru b’ibihugu na za guverinoma bazitabira inama ihuza ibihugu bikoresha ururimi rw’icyongereza mu muryango wa Commonwealth, izwi nka CHOGM.

Iyi nama izitabirwa n’igikomangoma Charles w’u Bwongereza, aho azaba ahagarariye Umwamikazi Elizabeth II. Iyi nama itegerejwe kubera i Kigali mu Rwanda mu cyumweru gitaha kuva tariki 20 kugeza tariki 25 Kamena 2022.

Umuryango wa Commonwealth ubarirwamo abaturage bagera kuri miliyari 2.4 mu bihugu 54 byo hirya no hino ku Isi.

Had a good telephone conversation with Prime Minister @JustinTrudeau about bilateral and global issues of common interest. I am happy to be welcoming him to #CHOGM2022 next week along with other leaders, and look forward to broadening our discussion and our cooperation.

— Paul Kagame (@PaulKagame) June 16, 2022

Bakomeje gusukura imihanda

Akarere ka Musanze nako gakomeje imyiteguro nk’ahantu hari umujyi uzakira bamwe mu bashyitsi bitabiriye iyo nama, ndetse hari n’ibyiza nyaburanga bikurura ba mukerarugendo benshi, birimo Ingagi ziba mu birunga.

Imyiteguro irakomeje mu bice binyuranye bigize uwo mujyi no mu nkengero zawo, cyane cyane hitabwa ku mahoteli anyuranye agize uwo mujyi, aho hari gukorwa isuku, uretse no mu mahoteri kandi imyiteguro ikaba irimo gukazwa mu mihanda cyane cyane iya kaburimbo, mu nyubako zikoreramo inzego z’ubuyobozi, ku kibuga cy’indege cya Ruhengeri n’ahandi.

Muri iyo suku harimo gusiga amarangi hasiburwa imirongo yo mu mihanda ya kaburimbo, gusukura ubusitani bukikije iyo mihanda, ndetse no mu marembo y’umujyi hakaba hakomeje kurimbishwa, hubakwa urukuta ruzitije ibyapa byanditseho ’Visit Rwanda’.

Mu mihanda igize umujyi wa Musanze isuku ni yose

Ntabwo ari mu mujyi gusa hitaweho, kuko no mu nkengero zawo ubukangurambaga bwo gukora isuku burakomeje, aho amarangi akomeje gusigwa ku nzu zo mu dusantere tunyuranye, bubaka ubwiherero n’ibindi.

Mu mirenge inyuranye yitegura kwakira abashyitsi bazasura ibyiza nyaburanga muri Pariki y’Ibirunga, irimo uwa Nyange, Kinigi na Shingiro, abaturage bakomeje umuganda wo gusukura imihanda basibura n’inzira z’amazi ava mu birunga.

Mu muganda wakozwe mu ntangiro z’iki cyumweru muri iyo Mirenge, basuwe n’abayobozi batandukanye mu nzego nkuru za Leta, barimo Minisitiri w’Ubutegetsi bw’Igihugu, Gatanazi Jean Marie Vianney, wabasobanuriye ko kuba u Rwanda rugiye kwakira inama ya CHOGM biri mu nyungu za buri Munyarwanda, abasaba kuzakirana yombi abashyitsi.

N’ubwo ubuyobozi bw’Intara y’Amajyaruguru n’ubw’Akarere ka Musanze bukomeje gusura abaturage mu mirenge imwe n’imwe, basobanurira abaturage gahunda zinyuranye za Leta zirimo n’inama ya CHOGM, hari bamwe aho ubuyobozi bw’akarere butaragera batunga agatoki ba gitifu na ba Mudugudu, batabasobanurira neza inama ya CHOGM, ikaba igiye gutangira ntacyo bayiziho.

Abenshi batayisobanukiwe ni abiganjemo abo mu duce tw’ibyaro, ariko hakaba n’abemeza ko CHOGM bayizi kandi bazi n’inyungu rusange bayitegerejemo.

Mukandekezi Euphrasie wo mu Murenge wa Gacaca ati “Iyo nama tuyumva gutyo, ariko tukumva ko ari abayobozi bazava ahandi bagateranira mu Rwanda tukabishima, tuti Imana isingizwe ibarinde baze iwacu, none se abashyitsi baza iwanyu ukababara ko ahubwo ari ibyishimo gusa! Mbyumva kuri radiyo ko abo bategetsi bazaza bagateranira hano iwacu mu Rwanda, ndetse ngo bazagera na hano i Musanze, ubu amasuku twayakajije abakecuru tuzajya tugenda twambaye neza, twasukuye imihanda twakondoye, ngo ni ku wa mbere ku itariki 20”.

Undi wo mu Kinigi ati “Abayobozi ntabwo babitumenyejeje twe abo mu byaro, nta radio ngira ngo menye ayo makuru. Gusa turabategereje kandi tuzabakira neza, nzi ko ari inama izahuza ibihugu bivuga ururimi rw’icyongereza”.

Kabera Felicien wo mu murenge wa Shingiro n’ubwo atuye mu cyaro, ariko we aremeza ko yamaze gusobanukirwa neza iby’iyo nama.

Ati “CHOGM ndayizi igizwe n’abaturage barenze miliyari ebyiri, ni umuryango ugizwe n’ibihugu bivuga Icyongereza, kandi u Rwanda nicyo gihugu cyinjiyemo nyuma none turayakiriye, twakoresheje imbaraga nyinshi ngo twemererwe kuyakira, ni ubushake n’ishema ku Banyarwanda no ku bayobozi bacu”.

Arongera ati “Ni byinshi izadusigira, icya mbere abo bantu baturutse mu bihugu 54 bazaba bari hano mu Rwanda, harimo umutungo utabarika kuko ababaga muri CHOGM batatuzi bagiye kutumenya. Ikindi abo bantu bagiye kuva hanze barazana Amadorari n’Amayero, kandi bazayasiga mu Rwanda, mu minsi itanu bazamara mu Rwanda bazaba bari kurya banacumbika mu mahoteri, urumva iyo atari inyungu, kandi ni tujya kurangura hanze ayo Madorari baradusigira niyo tuzajyana. Hari n’ibyo bazagura bajyana iwabo byose ni mu nyungu zacu, ubu turabiteguye mu minsi mike isigaye turimo kunogereza amasuku”.

Iyo nama biteganyijwe ko izitabirwa n’abasaga 6000.

Abanyeshuri bahize abandi muri aya marushanwa, bahawe ibikoresho by’ishuri n’ibindi bizabafasha kunoza impano zabo zo gushushanya.

Umunyamabanga wa Leta muri Minisiteri y’Uburezi ushinzwe amashuri abanza n’ayisumbuye, Twagirayezu Gaspard, yashimiye abanyeshuri babashije kugera mu cyiciro cya nyuma cy’aya marushanwa.

Twagirayezu ubwo bahembaga abahize abandi yagize ati “Uyu ni umusozo w’amarushanwa twatangiye mu minsi ishize mu rwego rwo kuzamura imyumvire y’abanyeshuri bacu kuri Commonwealth, tugendeye kuri iyo myitozo yakozwe mu marushanwa”.

Aya marushanwa yari yateguwe mu byiciro bibiri, aho icya mbere cyari icyo gukora igishushanyo kigaruka ku nsanganyamatsiko za CHOGM, icyo cyiciro kikaba cyari kigenewe abanyeshuri bo mu mashuri abanza.

Icya kabiri kijyanye n’ibiganiro mpaka cyo cyari kigenewe abanyeshuri bo mu mashuri yisumbuye.

Aya marushanwa yatangiye tariki 10 Gicurasi 2022, akaba yaritabiriwe n’abanyeshuri bo mu mashuri abanza (P1-P6) bangana na 1,298 mu gihugu hose.

Cyuzuzo Ngabo Glory wo mu Karere ka Gatsibo w’imyaka icyenda y’amavuko, yashushanyije ishusho y’agacuma kazwi mu muco nyarwanda nk’igikoresho cy’ingenzi. Asobanura ko igice cyako cyo hasi kigaragara mu ishusho y’isi bisobanuye uburyo umuryango wa Commonwealth ugera ku isi hose. Hagaragaraho kandi ibisa n’intebe 54 bisobanuye ibihugu byose bigize uwo muryango. Hagaragaraho n’inyubako izwi nka Kigali Convention Centre izakira iyo nama, mudasobwa igaragaza guteza imbere ikoranabuhanga n’ubumenyi muri uwo muryango. Hejuru hariho ishusho y’ikamba ivuga umuyobozi w’uwo muryango ari we Umwamikazi w’u Bwongereza, Elisabeth II, ku mpande hakaba n’amashusho y’urubyiruko rufite amabendera ya Commonwealth, bisobanuye imbaraga z’urubyiruko muri uyu muryango

Minisiteri y’Uburezi yatangaje ko abahembwe ari abanyeshuri 30 baturutse mu turere 30 tugize Igihugu, bakaba bari baherekejwe n’ababyeyi babo.

Kureba andi mafoto, kanda HANO

Reba ibindi muri iyi video:

Bigaragara ko imirimo iri ku musozo

Hirya no hino mu Mujyi wa Kigali by’umwihariko mu turere twa Gasabo na Kicukiro, harimo kubakwa imihanda itandukanye izifashishwa n’abagenda ndetse n’abatuye muri Kigali, kuko imwe mu yisanzwe ikoreshwa izifashishwa n’abayobozi bakuru bazitabira inama ya CHOGM.

N’ubwo hari abareba imirimo yo kubaka iyo mihanda aho igeze bagashidikanya ko ishobora kuba yaruzuye mu gihe cya CHOGM, siko ubuyobozi bw’Umujyi wa Kigali bubibona kuko bwemeza ko inama izajya gutangira iyo mirimo yararangiye.

Mu kiganiro Umuyobozi w’Umujyi wa Kigali, Pudence Rubingisa yagiranye na RBA, ku mugoroba wo ku wa 14 Kamena 2022, yemeje ko imirimo yo gukora imihanda izifashishwa hirya no hino mu Mujyi wa Kigali izaba yarangiye, igihe cy’inama ya CHOGM.

Ni umuhanda byitezwe ko uzagabanya umubyigano w’ibinyabiziga muri Kicukiro

Yagize ati “N’ubundi mu Mujyi wa Kigali dusanzwe tugira gahunda y’ibikorwaremezo, muri gahunda yo guteza Umujyi imbere, hari imihanda yari yarubatswe muri gahunda isanzwe y’Umujyi, hari n’indi twubatse ishobora kuzajya ifasha abaturage batandukanye kuba bayikoresha, mu gihe umwe cyangwa undi waba urimo gukoreshwa n’abashyitsi”.

Yongeraho ati “Birimo kwihutishwa, turi mu bice bya nyuma bisoza, ku buryo tuzajya kugera igihe cyo kwakira abashyitsi, imihanda yarangiye ari nyabagendwa nta kibazo”.

Ubuyobozi bw’Umujyi wa Kigali buvuga ko hari izindi gahunda zitandukanye zateguwe zitari inama, abantu bazitabira CHOGM bashobora kuzajyamo nyuma y’inama, mu rwego rwo kwidagadura no kuruhura umutwe, nk’uko umuyobozi w’uyu Mujyi abisobanura.

Ati “Hateganyijwe n’ibindi bikorwa bihujwe na CHOGM, ariko by’abaje mu nama bashobora gukora bitari inama. Hari ibyateganyijwe mu byanya by’imyidagaduro mu Mujyi wa Kigali, yaba ari ahazwi nka Car Free Zone, hazaba harimo imurikagurisha, ibice byo kwidagaduriramo, imikino iteganyijwe izajya ikorwa n’abitabiriye inama”.

Akomeza agira ati “Hari na siporo rusange izakorwa nijoro izwi nka night run, aho abanyakigali biruka bagakora siporo kugira ngo bagire ubuzima bwiza, ariko noneho hajemo n’abashitsi. Hari ibikorwa bitandukanye by’imyidagaduro kugira ngo n’abanyakigali babonereho no kwishimira Umujyi wakiriye iyi nama, babyishimire ariko by’umwihariko tunabivanemo n’amahirwe”.

Ibi ngo abanyakigali barabiteguriwe ari naho abashitsi bazacumbika, ibyo bazafungura, imurikagurishwa bazitabira, kugira ngo bagure ibikorerwa mu Rwanda, Abanyarwanda bazabyaze aya mahirwe umusaruro.

Biteganyijwe ko inama ya CHOGM izatangira tariki 20 kugera 26 Kamena, izitabirwa n’abantu batandukanye bazaturuka imihanda yose bagera ku 6000, bazitabira inama zitandukanye zizakorwa muri iyo minsi.

Igice kimwe cy’umuhanda wa Kicukiro Centre ni uko kimeze

Umuyobozi wa RDB, Clare Akamanzi, avuga ko hafashwe ingamba zitandukanye mu kwitegura abashyitsi.

Ati “Twafashe ingamba kugira ngo tubashe kwitegura abashyitsi, zirimo gushyira abagenzuzi muri hoteli zose z’ingenzi kugira ngo badufashe kugenzura imirimo ya buri munsi ikorwa. Muri hoteli zimwe na zimwe twashyizemo abagenzuzi batandatu ahandi dushyiramo babiri”.

Si ibyo gusa kuko Akamanzi avuga ko hashyizweho n’uburyo bwo guhugura abakozi.

Ati “Twahaye akazi ikigo cya Vatel Hospitality kugira ngo gihugure abakozi bose basanzwe batigeze babasha gukora akazi mu nama iri ku rwego nk’uru, kandi twizeye ko ayo mahugurwa arangira asize abantu bari hagati ya 700 na 1.000 biteguye kwakira neza abazitabira CHOGM”.

Amahoteli ngo ariteguye bihagije

Muri iyo myiteguro kandi yakozwe, hari amahoteli yategetswe kugira ibyo ahindura ku buryo aba anogeye ijisho.

Akamanzi ati “Twategetse amahoteri yose cyane cyane afite inyenyeri eshatu kugeza kuri eshanu, kongera amahugurwa no kuvugurura abakozi babo kugira ngo barebe ko byose bigenda neza. Icyakurikiyeho twakoze kwari ukugenzura no kureba neza ko amahoteri yose, ibikorwaremezo bigomba gusanwa byasanwe, ibikenewe gusiga irangi byasizwe, ibikeneye kuvugururwa byavuguruwe neza mu rwego rwo kwakira abashyitsi”.

Umuyobozi wa RDB kandi avuga ko bakoranye na Minisiteri y’Ubuzima mu kugenzura ubushobozi bwo kubika ibiribwa muri hoteli zose z’ingenzi, kugira ngo bamenye neza ko amahoteli yiteguye. Ikindi kandi mu kurushaho kwitegura neza basabye amahoteli mpunzamahanga, nka Marriott cyangwa Serena, kuzana abakozi babo beza babizobereyemo baturutse mu bindi bihugu, kugira ngo baze bafashe kuko azakenera abakozi benshi mu gihe cy’icyumweru cya CHOGM.

Akamanzi avuga ko kugeza ubu abenshi muri bo bamaze kuzana abo bakozi, kugira ngo bunganire abahari, bamwe muri bo bakaba bamaze kuzana abari hagati ya 30 na 40, urugero ngo ni Serena.

Nta kibazo cy’abakozi bake kizagaragara mu kwakira abashyitsi, nk’uko byemejwe na Akamanzi.

Ati “Dufite umubare mwiza w’abakozi bazanywe n’amahoteli nka Radisson, izi rero zikaba zimwe mu ngamba twashyizeho. Twakoranye kandi n’abazanira aya mahoteli ibikenewe, cyane cyane ibinyampeke, inyama na vino, kugira ngo tumenye neza ko bibitse muri kiriya cyumweru kugira ngo hatabura ibyo kurya kuko imibare y’abantu igiye kuba myinshi ugereranije n’abo twahoze twakira, cyane cyane usubije amaso inyuma mbere y’icyorezo cya Covid-19”.

Yongeraho ko hashyizweho Abaminisitiri n’abayobozi bakuru kugira ngo bakore igenzura kuri hoteli z’ingenzi, bahabwa inshingano kugira ngo bamenye ko ibintu byose bimeze neza.

Izi ngamba zose zongereye ubushobozi muri hoteli no mu rwego rwo kwakira abashyitsi bazitabira inama ya CHOGM.

Akamanzi yahaye ubutumwa amahoteli, ati “Turashaka gufata umwanya wo kwibutsa amahoteli n’abayobozi bayo gukomeza gukora ibyo bintu byose kugira ngo dukomeze umurongo twiyemeje kandi bitagarukiye kuri CHOGM gusa, n’ubwo ariho dushaka kubona intsinzi ako kanya, ariko ibi twifuza kubigira umuco mu rwego rwo kwakira abashyitsi. Iyo niyo ntego nyamukuru kuri twe mu rwego rwo guhindura imitangire ya serivisi”.

Umuyobozi wa RDB, Clare Akamanzi

Umunyamabanga Nshingwabikorwa wa Kicukiro, Hidaya Mukandahiro, avuga ko mu gihe u Rwanda rwibuka ku nshuro ya 28 Jenoside yakorewe Abatutsi mu 1994, muri uwo murenge bamaze kwakira abakoze Jenoside bafunguwe nyuma yo kwemera no kwihana ibyaha bagera kuri 15.

Aba baje basanga 26 barokotse Jenoside, bakaba barishyize hamwe bakora itsinda ry’Ubumwe n’Ubwiyunge rigamije gufashanya, ubu ngo barashyingirana ndetse banakorera hamwe imirimo ibateza imbere.

Uwitwa Murangira Pierre wafunguwe nyuma yo kurangiza igihano yari yarakatiwe kubera Jenoside, avuga ko nta bibazo afitanye n’abo yahemukiye, kandi ko na we yamaze kwakira imbabazi yahawe.

Ati "Muri iryo tsinda ry’Ubumwe n’Ubwiyunge (Intwazarumuri za Kicukiro), icyiza cyose turafatanya iyo umuntu agize ikibazo, uwo inzu yasenyutse muha ubufasha (umusada), yagira ikindi kibazo ndamutabara vuba cyane".

Mugenzi we warokotse Jenoside, yitwa Helène Mukabagambake, na we avuga ko yababariye abo yabonye bamuhemukiye n’ubwo ngo hari abataraje kumusaba imbabazi.

Mukabagambake agira ati "Narababariye kandi n’ubu ndacyababarira, n’uwo tuba twavuganye nabi ndamubabarira, ntabwo njya ngira uburakari, turi umwe, turi kumwe mbana na bo, abandi nta bahari."

Ihuriro ry’Imiryango ishingiye ku myemerere (RIC) muri Kicukiro hamwe n’Ubuyobozi bw’uwo murenge, bahurije mu giterane izo mpande zombie (abakoze Jenoside n’abayikorewe), ndetse n’abandi baturage, bababwira ko ibindi bitagomba kubatanya, ari amadini cyangwa amatorero basengeramo.

Perezida wa RIC muri uwo Murenge, Pasiteri Joas Mukiza avuga ko bose bahuriye ku kuba ari
abaturage b’u Rwanda, kandi RIC ikaba igomba gukorana n’inzego za Leta mu kubaka imibiri na roho by’abaturage.

Muri icyo giterane habayeho kuremera ibiribwa imiryango 12 y’abarokotse Jenoside, ndetse n’abagera kuri 200 bakaba barishyuriwe ubwisungane mu kwivuza (Mituelle de Santé), kandi mu babaremeye harimo n’ababahemukiye.

Umuyobozi Nshingwabikorwa wungirije w’Akarere ka Kicukiro, Adalbert Rukebanuka, asanga imiryango ishingiye ku Kwemera hamwe n’Ubuyobozi bw’Igihugu, bose bagomba gukorera mu bumwe nk’uko ngo ibitabo by’amategeko agenga izo mpande zose (Bibiliya, Korowani n’Itegeko Nshinga) bibisaba.

Rukebanuka yagize ati "Imirongo yose yo muri Bibiliya dusomye, yaba no mu kirango cy’Igihugu harimo Ubumwe, insanganyamatsiko ni ’Njyewe nawe tube umwe’, abemera ko ijuru ribaho, ukoze utya ntabwo wazirirwa ukomanga, wasanga urugi rukingiye".

Abayobozi bitabiriye iocyo giterane

Iki giterane cyabayemo no gusengera igihugu bagisabira Ubumwe n’Ubwiyunge, Umutekano, ndetse n’imigendekere myiza y’Inama y’Abakuru b’Ibihugu bigize Umuryango wa Commonwealth (CHOGM), igiye guteranira i Kigali.

Minisitiri Gatabazi Jean Marie Vianney

Kuba CHOGM ari inama idasanzwe by’umwihariko ku Rwanda nk’Igihugu giheruka kuba umunyamuryango wa Commonwealth, ikaba isigaje iminsi itarenze icyumweru kimwe ngo ibe, Abanyarwanda barasabwa kumenya ko hari abantu benshi bamaze kugera mu gihugu, baje gutegurira abayobozi bazayitabira, ku buryo abasigaye kuhagera ari abayobozi bakuru n’abandi bazaba bitabiriye inama.

Aha niho Minisitiri Gatabazi ahera asaba Abanyarwanda gufata iyo nama nk’ireba buri Munyarwanda wese, kuko abazaza bazakenera serivisi zitandukanye bazahabwa n’abantu batandukanye.

Ati “Turabwira abantu ko twamaze kuyinjiramo, tuyirimo, icya mbere bisaba ni ugufata CHOGM nk’inama ireba buri Munyarwanda wese. Hari igihe ushobora kuvuga ngo inama irareba RDB, Minisiteri cyangwa abayobozi bakuru, irareba buri Munyarwanda wese kuko abazaza bazakenera kugera ku kibuga cy’indege, kugenda, gusura, hari abagenda bakoresheje uburyo busanzwe, bazajya mu buzima bwacu bwa buri munsi”.

Ibi kandi ntibivuze ko serivisi Abanyarwanda basanzwe bakenera zizahagarara, kuko ubuzima buzakomeza nk’ibisanzwe nta gihungabanye, nk’uko Minisitiri Gatabazi abisobanura.

Ati “Ikiriho twamenya ni uko ubuzima bugomba gukomeza nk’uko bisanzwe, ugomba kwivuza azajya kwivuza, ujya gushaka ikibazo kigomba gukemurwa kizakemuka, ujya kuri Bank zizakomeza zitange serivisi n’abasanzwe bajya muri resitora nabo bazajyamo, turi muri CHOGM twese nk’Abanyarwanda”.

Kuba hari benshi bifuza kandi biteguye kuza mu Rwanda, birasaba ko abarutuye bitegura inama ya CHOGM nk’ubukwe nk’uko Gatabazi abisobanura.

Ati “Birasaba kugira ngo dushyiremo imbaraga zose, isuku turimo gusaba hirya no hino, nk’uwiteguye ubukwe, kuko iyo ubukwe bwabaye mu muryango n’abaturanyi b’umuryango mugari buri wese agira icyo azana. Birasaba kugira ngo buri wese abigire ibye”.

Akomeza agira ati “CHOGM nimara kurangira tuzagira imyaka ibiri umukuru w’Igihugu cyacu ayoboye Umuryango wa Commonwealth, hari serivisi zizaza gukorera hano, imirimo izakorerwa hano, hari imirimo izaboneka n’ibindi bizakomeza gukorwa, kubera ko tuzaba twinjiye mu kuyobora Umuryango wa Commonwealth”.

Abanyarwanda barasabwa kumera neza bagasa neza, bakarimbisha aho batuye, aho bakorera, kugira ngo koko bizabe bigaragara ko biteguye CHOGM nk’ubukwe, kuko ari inama idasanzwe yaba ku Rwanda cyangwa ibihugu bihuriye muri Commonwealth.

Biteganyijwe ko inama ya CHOGM izahuza Abakuru b’ibihugu n’abandi bayobozi bakuru, izabera i Kigali guhera tariki 20 kugera 26 Kamena 2022, ikazasiga Perezida Paul Kagame, ari we muyobozi mukuru w’Umuryango uhuza ibihugu bivuga ururimi rw’Icyongereza, ugizwe n’ibihugu 54, biri ku migabane itandukanye y’Isi, akazawuyobora mu gihe cy’imyaka ibiri.

Umujyi wa Kigali urimo kubaka ubwiherero rusange ahantu hatandukanye

Ukurikiranye utwo tuyira ngo urebe amaherezo yatwo, usanga duhinira hafi cyane hari ibisogororo, biterwa n’uko abantu bahihagarika ndetse n’abadatinya kwitabara mu buryo bukomeye.

Iyo myanda yose iratemba ikajya mu mazi yuhirwa urusobe rw’ibinyabuzima bigize icyo gishanga cyagizwe Pariki, hamwe mu hantu hatangiye gukurura ba mukerarugendo baza gusura Umujyi wa Kigali.

Umwe mu batwara abagenzi kuri moto muri uyu Mujyi ari mu bakoresha ubwo bwiherero butemewe, ariko ngo ni ku bw’amaburakindi kuko nta bundi buri hafi aho.

Uwo mumotari yagize ati “Aka kayira ntabwo ari akambuka igishanga ahubwo abahanyura ni ababa bagiye kwiherera kubera ko nta bundi bwiherero babona hafi. Iyo umuntu ahageze akubwe ahita ahanyura, ntabwo bitanga isura nziza ku Gihugu kuko hano hateganywa kujya Pariki”.

Mu bice bya Nyabugogo n’ubwo hari ubwiherero rusange ku marembo ya Gare, benshi mu bahagera ndetse n’abahakorera, ntabwo batekereza kujyayo ahubwo bahinira hafi mu bikari cyangwa inyuma y’inzu zihari.

Uwo twasanze yihagarika muri ruhurura imbere y’amarembo ya Gare yagize ati “Mbwira niba ari ikosa nakoze wenda nisubireho, ariko buriya numvaga nta kundi byagenda kuko ntabwo byari kunkundira, nturi umugabo! Ni ko byagenze kandi n’iyo haza kuba hari ubwiherero hafi ntabwo mba nagiyeyo”.

Hari aho abaturage bihereraga mu bihuru bakangiza ibidukikije

Ubuyobozi bw’Umujyi wa Kigali buvuga ko hari ahantu henshi bugiye gushyira ubwiherero rusange, mu rwego rwo gufasha abagenda muri uyu Mujyi kwirinda kwituma ahabonetse hose.

Mu ntango z’iki cyumweru Umuyobozi wungirije w’Umujyi wa Kigali ushinzwe Imiturire n’Ibikorwaremezo, Dr Mérard Mpabwanamaguru, yatangarije kuri Televiziyo y’u Rwanda ko ubwiherero buzashyirwa aho abagenzi binjirira mu Mujyi wa Kigali, aho bategera ari benshi cyane, ndetse no mu mihanda bidagaduriramo(Car Free Zone) i Remera no mu Biryogo.

Dr Mpabwanamaguru avuga ko ubwiherero muri za ‘Car Free Zones’ bwo bwatangiye kubakwa, ku buryo Inama y’Abakuru b’Ibihugu bigize Umuryango Commonwealth (CHOGM), izateranira i Kigali muri uku kwezi izasanga bwararangije kubakwa.

Dr Mpabwanamaguru avuga ko ubundi bwiherero buzubakwa ahari ibyapa bitegeraho abantu benshi mu Mujyi, ndetse no ku bwinjiriro bwawo, bukazatangira kubakwa muri uyu mwaka w’Ingengo y’Imari ugiye gutangira (2022/2023) guhera muri Nyakanga.

Agira ati “Umushinga mugari wo kubaka ubwiherero urahari cyane cyane aho abantu bategera imodoka, ndetse n’ahantu abagana Umujyi batungukira”.

Inzira igana aho bajya kwiherera hatemewe

Ingero z’ahazubakwa ubwiherero bw’abinjira i Kigali nk’uko uyu muyobozi abisobanura, ni i Kabuga kugira ngo hazajye hafasha abava i Rwamagana, i Masaka ahahingukira abava i Nyakaliro, mu Nzove ku baturuka mu Majyaruguru ndetse na Kigali ku baturuka hirya y’i Nyamirambo.

Uretse ubwiherero Umujyi wa Kigali urimo no kubaka ubwugamo bushya bw’abagenzi, ku byapa byose bakunda gutegeraho imodoka rusange.

Iyo myiteguro irakorerwa mu mujyi wa Musanze no mu nkengero zawo, mu kurushaho kumenyekanisha iyo nama mu baturage, ahakomeje ubukangurambaga hifashishijwe inteko z’abaturage, itangazamakuru, ibiganiro mu mashuri, mu mikino, ndetse hakorwa amasuku nk’uko Umuyobozi w’akarere wungirije ushinzwe iterambere ry’ubukungu, Rucyahana Mpuhwe Andrew yabitangarije Kigali Today.

Uwo muyobozi yavuze ko hari amahoteli y’inyenyeri kuva kuri eshatu kugera kuri eshanu, yiteguye kwakira abashyitsi, avuga ko hatangiye ubugenzuzi bw’isuku muri ayo mahoteli no mu mujyi wose muri Rusange.

Ati “Musanze nk’akarere ka kabiri kunganira umujyi wa Kigali mu bikorwa bitandukanye, kari kwitegura kwakira abashyitsi, aya mahoteli yose mubona ari ku rwego rw’inyenyeri eshanu, eshatu azaba afite abantu, kandi yatangiye kwemeza booking zayo”.

Arongera ati “Gukora isuku ku bikorwa remezo binyuranye, mu mihanda, gusiga amarangi mu masantere, ibikorwa bitandukanye bijyanye n’isuku biragenda bikorwa. Twakoze igenzura mu mahoteli icyenda, kandi icyo gikorwa kirakomeje mu kunoza isuku hose”.

Riderman yasusurukije Abanyamusanze bari bitabiriye ibitaramo bibera muri car free zone

Uwo muyobozi yavuze ko hari imihanda mu mujyi wa Musanze igiye kugirwa car free zone, mu matariki yegereye CHOGM, mu kurushaho gufasha abantu kwidagadura hifashishijwe n’ibitaramo, siporo n’ibindi.

Ati “Mu minsi iri imbere, muraza kubona dufite ibitaramo bitandukanye mu mujyi wa Musanze bizajya bihera ku wa gatanu kugeza ku cyumweru twegera iminsi ya CHOGM, muraza kubona imihanda imwe izafungwa ikagirwa Car Free zone, ahazakorerwa ibitaramo n’imyidagaduro guhera ku wa gatanu kugeza ku cyumweru. Ibyo byose birimo gukorwa mu rwego rwo kunoza imyiteguro ya CHOGM, ikindi navuga ni ukurushaho gushishikariza abantu kuzagira umuco wo kwakira abashyitsi neza, barangwa n’isuku ku mubiri n’aho batuye”.

Ibyo bitaramo n’imyidagaduro muri car free zone byatangiriye imbere y’isoko rikuru rya Goico, ku wa gatanu kugeza ku Cyumweru, aho abaturage bitabiriye iyo gahunda ari benshi, baranzwe n’akanyamuneza, bishimira iyo gahunda batari bamenyereye.

Umwe waganiriye na Kigali Today yagize ati “I Kigali bari baraducuze ibyiza byinshi, hano muri car free zone twaruhutse, twidagaduye twasohokanye n’imiryango yacu turiyakira. Iyi gahunda yadushimishije izahoreho”.

Ku bufatanye n’inzego z’umutekano, ubuyobozi bw’akarere bugiye kwiga ku mihanda izafungwa ikagirwa car free zone, ndetse iyo gahunda bakazayitangariza abaturage kugira ngo ibyo bikorwa bitegurwe neza nta mbogamizi.

Inama ya CHOGM iteranira muri kimwe mu bihugu bigize Commonwealth buri myaka ibiri, igafatirwamo imyanzuro ikomeye irebana na demokarasi, iterambere ridaheza, kubaka inzego n’imiyoborere, ubutabera n’uburenganzira bwa muntu.

Ubuyobozi bw’Akarere ka Musanze bukomeje ubugenzuzi mu mahoteli n’ahantu hakira abantu benshi

Ni inama kandi ifatirwamo imyanzuro yo guteza imbere ubukungu no kwagura ubucuruzi bushingiye ku kwigira, guteza imbere urubyiruko ndetse no kungurana ibitekerezo ku birebana n’imihindagurikire y’ibihe n’ibindi.

Commonwealth ihuza ibihugu 54 byo hirya no hino ku Isi bituwe n’abaturage barenga miliyari ebyiri na miliyoni 500, muri miliyari zisaga umunani zituye Isi.

Ubugenzuzi bw’isuku burakomeje

Abaturiye imihanda irimo gukorwa barasabwa kuvugurura inzu zabo

Mu kiganiro Dr Mpabwanamaguru yahaye Televiziyo y’Igihugu ku wa Mbere tariki 06 Kamena 2022, yavuze ko imihanda yose n’ibiraro birimo gutunganywa bizakoreshwa n’ubwo hasigaye igihe gito.

Yagize ati "Harabura iminsi 13, ibikorwa bimwe na bimwe nk’ibigendanye no kubaka imihanda, gushyiramo kaburimbo, amatara, imihanda myinshi dufite yaba uwa Kacyiru (hepfo y’aho RBA ikorera) yaba uva kuri Ambasade ya Amerika uhinguka ku Kimicanga, biri mu cyiciro cyo kurangira hasigaye gushyiramo kaburimbo, bizakoreshwa, ni yo mpamvu dukora amanywa n’ijoro".

Dr Mpabwanamaguru yizeza ko ibyo bikorwaremezo bizakoreshwa bitunganyije neza, harimo amatara ku mihanda n’ubusitani bw’indabo.

Mu bizaba bikoreshwa harimo n’ikiraro cyo haruguru cya Nyabugogo (kuri Mpazi), n’ubwo kizaba kitararangira gukorwa neza, nk’uko Umuyobozi wungirije w’Umujyi yabitangaje.

Dr Mpabwanamaguru asaba ko mu gihe inzego za Leta zishishikariye kwitegura abashyitsi bazaza muri CHOGM, abaturage na bo basabwa gukora isuku, cyane cyane abaturiye imihanda irimo gukorwa.

Ati "Umuhanda iyo urimo ukorwa hari ivumbi ritumuka, hari inyubako zigenda zigaragara kubera ko twagiye twagura umuhanda, ba nyiri ibyo bikorwa na bo twagiye tuganira kugira ngo bavugurure inzu zabo, n’udafite amafaranga biroroshye cyane ko yakwisunga SACCO na banki zikamuha amafaranga kuko ya nzu iba igize agaciro".

Ku rundi ruhande, umuturage wo ku Kacyiru witwa Niyonshuti Paul, avuga ko uko umuhanda urimo guhita umara gukorwa abawuturiye na bo bahita bakora isuku yo gusiga amarangi no kuvugurura ibisenge by’inzu, bakabikingiriza ku buryo bitagaragara.

Niyonshuti yagize ati "Inzu ziri kuvugururwa ni iz’ubucuruzi ntabwo ari izituwemo, icyo ziri kuvugururwaho ni uko zimwe zari zifite ibisenge bishaje, hakaba n’utuzu tugufi, bakababwira bati ’nimuzigize hejuru mushyireho Konoshi n’urubaraza, bamwe na bamwe banasiga n’amarangi".

Umuyobozi wungirije w’Umujyi wa Kigali yakomeje asobanura ko hari n’ubwugamo bw’abagenzi na bwo burimo gushyirwa ku byapa aho imodoka zihagarara, buzaba burimo murandasi.

Ubu bwugamo bugera kuri 20 mu minsi iri imbere ngo buzaba burimo n’Ikoranabuhanga ryerekana imodoka iri hafi aho igeze n’umubare w’imyanya irimo, nk’uko Dr Mpabwanamaguru yakomeje abisobanura.

Ikinyamakuru cyitwa "Nation State" Journal of International Studies mu nimero yacyo ya 01, Volume 04 cyo muri Kamena 2021, cyasobanuye ko u Rwanda mu kwinjira mu muryango w’ibihugu byakoronijwe n’u Bwongerenza Commonwealth, rwari rugamije kuva mu bwigunge no kwagukira hirya no hino ku Isi.

Umuryango Commonwealth ugizwe n’ibihugu 54 bituwe n’abaturage barenga miliyari ebyiri na miliyoni 500(bakaba bangana na 1/3 cy’abatuye Isi), ndetse uyu muryango ukaba ari uwa kabiri ku Isi mu bunini nyuma y’Umuryango w’Abibumbye UN.

Umuryango Commonwealth uyobowe n’Umwamikazi w’u Bwongereza, Elizabeth II, ukaba ugendera ku mahame ahora avugururwa buri myaka ibiri mu Nama yiswe CHOGM(Commonwealth Heads Of Governments Meeting), yitabirwa n’Abakuru b’ibihugu 54 biwugize.

U Rwanda rwasabye kwinjira muri Commonwealth mu mwaka wa 2007, nyuma yo kubyemererwa muri 2009 rwahise rutangira kwigisha mu rurimi rw’Icyongeza guhera mu mashuri abanza kugera muri Kaminuza.

Kwinjira muri Commonwealth k’u Rwanda byatewe n’umubano rufitanye n’u Bwongereza nk’igihugu cyarufashije kwiyubaka no gukira ibikomere bya Jenoside yakorewe Abatutsi mu 1994.

U Rwanda na rwo rwifuzaga gutanga uwarwo musanzu mu guharanira amahoro ku Isi, ndetse no kubona inyungu ziva mu muryango mugari wa Commonwealth.

Iterambere ry’u Rwanda rishingiye kuri Politiki y’Ububanyi n’Amahanga

Nyuma y’imyaka 28 Igihugu kimaze kivuye muri Jenoside yakorewe Abatutsi, Leta y’u Rwanda yageze ku buryo bureshya ishoramari, yubaka ububanyi n’amahanga bushingiye ku butwererane n’ubuhahirane, ndetse no kugarura amahoro mu bihugu bitandukanye biri mu ntambara.

Banki y’Isi ishyira u Rwanda ku mwanya wa kabiri muri Afurika mu kugira uburyo bworohereza ishoramari, ndetse rukaba rushimirwa kuba rwamaze guharura inzira z’abantu n’ibicuruzwa byambukiranya imigabane, hakoreshejwe ingendo zo mu kirere zikorwa n’indege z’i Kompanyi Rwandair.

Kugeza ubu indege z’u Rwanda zibasha kugera mu byerekezo 19 byo muri Afurika, zifite ibyerekezo bibiri i Burayi na bitatu ku mugabane wa Aziya, ndetse Leta ikaba irimo gushaka n’ahandi yakwagurira ubuhahirane ku mugabane wa Amerika y’Amajyepfo.

Indege z’u Rwanda ziri mu birufasha kubaka umubano n’ubutwererane n’amahanga, aho rumaze gufungura za Ambasade 39 zishinzwe ubutumwa mu bihugu 147 byo hirya no hino ku Isi.

Izi ndege kandi zirufasha kubaka amahoro ku Isi aho u Rwanda rufite abasirikare 5,335 bahora basimburana mu butumwa bw’Umuryango w’Abibumbye(UN) mu bihugu bya Sudan, Repubulika ya Santrafurika(RCA) na Sudan y’Epfo, hakiyongera n’abagiye muri Mozambique na RCA ku bwumvikane bw’ibihugu.

U Rwanda ruza ku mwanya wa kabiri ku Isi mu kugira ingabo nyinshi zagiye mu butumwa bwo kubungabunga Amahoro mu bihugu birimo intambara n’imvururu.

Iterambere ry’u Rwanda rishingiye kuri Politiki y’Imbere mu gihugu

Politiki y’Ububanyi n’Amahanga y’u Rwanda yaje yunganira Politiki y’imbere mu gihugu, na yo imaze kurugeza ku mpinduka mu nzego zose no mu byiciro bitandukanye, hashingiwe ku mwimerere w’Abanyarwanda.

Minisiteri y’Ubutabera ivuga ko iyo hatabaho inkiko Gacaca nk’igisubizo gikomoka ku bakurambere, ngo byari gutwara imyaka ibarirwa mu magana kugira ngo Leta ice umuco wo kudahana ku bari bakurikiranyweho Jenoside.

Perezida w’Urukiko rw’Ikirenga, Dr Faustin Nteziryayo yashimangiye ko u Rwanda ruzakomeza uyu murongo, ubwo yari yitabiriye igikorwa cyo gushyingura mu cyubahiro imibiri isaga 800 y’Abatutsi biciwe mu cyahoze ari Urukiko rw’Ubujurire rwa Ruhengeri (Cour d’Appel Ruhengeri), hari mu kwezi gushize Mata.

Uretse kurwanya ivangura, Jenoside n’ingengabitekerezo yayo, u Rwanda ruvuga ko ruzahana rutajenjetse ibyaha bitajya byihanganirwa muri Commonwealth, bijyanye na ruswa no kunyereza umutungo w’Igihugu, ihohotera rishingiye ku gitsina ndetse n’icuruzwa ry’abantu.

Ubushobozi bwo kurwanya ibi byaha Leta ivuga ko ibukesha inzego zegerejwe abaturage muri gahunda yiswe ’descentralisation’, bakaba ari bo bihitiramo ababayobora binyuze mu matora nk’ikimenyetso cy’uko Igihugu kigendera kuri Demokarasi.

Ibyiciro byose by’abaturage harimo ibyihariye nk’Urubyiruko, Abagore n’Abafite ubumuga, biba byatekerejweho, kuva ku rwego rw’Umudugudu kugera rw’Igihugu, ndetse no mu nzego zihariye zirimo iz’Abikorera.

Iyi gahunda iteza imbere kudaheza kandi yunganirwa n’Ihame ry’ubunganire n’ubwuzuzanye bw’abagore n’abagabo, abahungu n’abakobwa kuva ku rwego rw’Umuryango kugera ku rwego rw’Igihugu.

Urugero ni uko Inteko Ishinga Amategeko y’u Rwanda, Umutwe w’Abadepite ari iya mbere ku Isi ifite umubare munini w’abagore kuko igizwe n’abagera kuri 61.4%, muri Giverinoma na ho hakaba abatari bake bagera kuri 55%.

Ku rwego rw’Umuryango, Itegeko riwugenga riha amahirwe angana abagore n’abagabo ku mutungo utimukanwa, ku burezi no ku murimo ndetse no kuzuzanya kw’abashakanye.

Amashanyarazi kuri buri rugo cyangwa izindi ngufu zigezweho, gukoresha ikoranabuhanga n’imashini, ni ingenzi mu bintu birimo guhindura imyumvire ku nzitizi zatumaga umugabo cyangwa umuhungu yakwinubira imirimo ifatwa nk’iya kigore.

Ni n’uburyo burimo gufasha abagore n’abakobwa guhindura imyumvire yatumaga bavuga ko badashoboye imirimo ifatwa nk’iya kigabo.

Ntabwo ari igitangaza kubona umugabo arimo gusya imyumbati ikavamo ifu kuko akoresha imashini mu mwanya w’isekuru, cyangwa se arimo guteka kuko akoresha gazi aho kunama mu ziko atekesheje inkwi.

Ntabwo ari igitangaza kubona umugore cyangwa umukobwa ari hejuru y’inzu asakara kuko yamaze kwigishwa no gutinyuka, kandi iterambere ryazanye ibisarubeti n’amapantaro bituma asa n’uwambaye kigabo, ndetse ko umugabo na we aba yasigaranye abana mu rugo.

Tukivuga ibijyanye n’ingufu, Leta y’u Rwanda yihaye intego y’uko mu mwaka wa 2024 buri rugo rwose mu Gihugu ruzaba rufite amashanyarazi, yaba akomoka ku mirasire, ku ngomero, kuri nyiramugengeri no kuri gazi metane yo mu Kivu.

Ku bijyanye n’ingufu zo guteka na bwo gazi irimo kugenda isimbura ikoreshwa ry’inkwi n’amakara mu ngo cyane cyane izo mu mijyi, mu cyaro hakabaho icanwa ry’inkwi cyangwa amakara mu buryo burondereza, ndetse hamwe na hamwe bakaba bakoresha ingufu za biyogazi.

Intego ni uko ingo zo mu Rwanda zakoreshaga inkwi ku rugero rwa 83,3% by’ingufu zikenerwa mu gihugu, rugomba kugabanuka hagasigara hakoreshwa ingufu zikomoka ku biti zitarenga 42% mu mwaka wa 2024.

Ibi bijyana na gahunda yo guteza imbere ibintu bidasohora imyotsi, nko kuba imodoka na moto zitwarwa n’amashanyarazi bizajya bigera mu Rwanda Leta ikirinda kubisoresha, kugira ngo abantu bitabire kubikoresha.

Tugarutse ku kubungabunga amashyamba, uyu ni umugambi wo kugarura ku Isi imyuka ya karubone n’indi irimo kwangiza akayunguruzo karinda Isi kwibasirwa n’ubushyuhe, bigateza imihindahurikire y’ibihe.

By’umwihariko amashyamba cyimeza agize ibyanya bikomye, akaba ubuturo bw’inyamaswa n’indiri y’urusobe rw’ibinyabuzima, ni kimwe mu bihesha u Rwanda kuba igihugu gitoshye, akaba amasoko y’inzuzi za mbere nini kandi ndende muri Afurika, ari zo Nili na Congo.

Ibi byanya bikomye mu Rwanda birimo Pariki ya Nyungwe, Ibirunga, Akagera, n’amashyamba ya Mukura, Gishwati, ibiyaga nka Kivu, Ruhondo, Muhazi, Mugesera, Cyohoha na Rweru, ibishanga nka Rugezi, ubusitani bwa Nyadungu ni bimwe mu bigize ubwiza nyaburanga abazitabira CHOGM baza bafitiye amatsiko.

Itegeko rigenga ibidukijije mu Rwanda rikomeza rigaragaza uburyo ubutaka n’amazi bikwiye kurindwa isuri n’ibintu bihumanya nk’amasashi ubu yamaze kuba amateka, amavuta, amazi mabi n’irangi bikomoka mu nganda, uducupa n’ibindi bikoresho bya pulasitiki bikoreshwa inshuro imwe, na byo kubishyira ahabonetse hose ni sakirirego.

Amahoteli y’u Rwanda yo yatangiye gukoresha amacupa, ibirahure cyangwa inkongoro z’ibyuma mu guha abantu ibinyobwa n’ibiribwa, aho gukoresha uducupa, amasahane, udukombe n’imiheha bikoreshwa inshuro imwe.

Tukivuga ku binyobwa n’ibiribwa mu Rwanda byari bimenyerewe ko icyayi na kawa ari byo bigurishwa hanze bikazanira igihugu amadevize, ariko ubu byarahindutse.

Gahunda ni iyo guhuza ubutaka no guhinga imyaka ihuriweho, bikaba byarafashije abahinzi kutongera guhingira ingo zabo zonyine(kandi na byo bitabahagije).

Ubu ibihingwa hafi ya byose byahindutse ngengabukungu guhera ku muceri, ibigori, ibishyimbo, imyumbati, ibirayi, ibitoki, imiteja, avoka, imyembe, ndetse n’ibikomoka ku bworozi, ubu bisigaye bijyanwa mu mahanga ya kure n’aya hafi.

Ibicuruzwa mu gihugu imbere na byo bibasha kugezwa ku baturage bose hifashishijwe imihanda ya kuburimbo kugeza ubu igera mu turere twose tw’igihugu.

Imihanda ya kaburimbo ni kimwe mu bikorwaremezo Leta yiyemeje ko izaba ireshya n’ibirometero 14,100 bitarenze umwaka wa 2024, mu rwego rwo koroshya urujya n’uruza n’ubuhahirane hagati y’imijyi n’icyaro.

Iyi mijyi igomba kuba yubatswe mu buryo bw’inzu zigeretse kandi zigerwaho n’imihanda zose, izubatswe mu buryo bw’akajagari zigakurwaho.

Icyaro na cyo kigomba kuba kigizwe n’inzu zubatswe mu midugudu kandi zimwe zigatuzwamo imiryango myinshi(nk’izo bita eight in one) mu gace kadashobora kubateza ibiza, kugira ngo ahasigaye hose habashe gukoreshwa imirimo isaba ubutaka bugari cyane cyane iy’ubuhinzi.

Uku kuba hamwe kw’abaturage bituma Leta ibagezaho ibyo yifuza mu buryo bworoshye, birimo amazi, amashanyarazi, amasoko, amashuri n’amavuriro, byose bikazajya byubakwa iruhande rwabo nta kongera gukora ingendo ndende.

Ntawakwibagirwa ko ubukanguramba kujijura abantu kuri gahunda za Leta buzagera kuri bose mu buryo bworoshye, harimo kubasaba kwishyira hamwe bagashinga ibigo by’imari bibateza imbere, gukusanya imisanzu y’ubwisungane mu kwivuza kugira ngo buri wese abone serivisi z’ubuzima adahenzwe.

Ntawabivuga ngo abirangize ariko ibi byaba iby’ingenzi biranga icyerezo 2035 kizaba gishyira u Rwanda mu bihugu bifite ubukungu buciriritse(Middle income countries), ndetse n’icyerekezo 2050 cyo kizaba gishyira u Rwanda mu bihugu bifite ubukungu bwateye imbere.

Minisitiri Biruta abajijwe uko imyiteguro ya CHOGM ihagaze, yasubije ko imeze neza, kandi igihugu cyabyiteguye neza kuko u Rwanda rumaze kumenya abazitabira inama, kandi rukaba rwaramaze gutegura ibintu byose kuko inama izatangira vuba muri Kamena.

Ati “Tumaze kumenya abakuru b’ibihubu bazitabira iyi nama kandi hari izindi nama zishamikiye kuri iyi y’Abakuru b’ibihugu, hari inama y’urubyiruko, inama y’abagore, irebana n’ubucuruzi, irebana n’imiryango yigenga idashamikiye kuri Leta, rwose nta gushidikanya izi nama zose zibanziriza CHOGM zizagenda neza”.

Minisitiri Biruta avuga ko mbere ya CHOGM nanone hari indi nama ijyanye n’itumanaho, nayo iri ku rwego rw’Isi izaba ku va ku itariki ya 6 kugeza ku ya 16 Kamena 2022.

Iyo myiteguro niyo u Rwanda rurimo na n’ubu kandi biragaragara ko rwiteguye neza kwakira iyi nama, nk’uko inzego zitandukanye z’ubuyobozi ndetse no mu bikorera bagize iminsi bita ku bijyanye no kuzakira abashyitsi benshi.

Minisitiri Gatabazi yabitangaje ku wa Gatatu tariki 01 Kamena 2022 amaze kubonana n’abayobozi mu Mujyi wa Kigali barimo ab’Uturere n’ab’Imirenge 35 iwugize, akaba yabasabye kutirara no kutarangara kuko iminsi isigaye ari mike.

Inama ya CHOGM ihuza abakuru b’ibihugu na za Guverinoma byahoze bikoronijwe n’u Bwongereza hamwe n’ibikoresha uririmi rw’Icyongereza, bikaba bigize Umuryango Commonwealth.

Minisitiri Gatabazi yagize ati "Mu bintu nk’ibi byo gutegura ikintu gikomeye cyane cyane nk’iki cy’imbonekarimwe, ntabwo ari byiza kugira icyizere 100% ko ibintu byose byarangiye. Imihanda iri kubakwa igomba kuba yarangiye ifite isuku, ariko se mu mpande zayo abaturage bayituriye bazaba baharangije?"

Ati "Buri wese ave mu byo yari arimo babanze batunganye kino gikorwa, ni igikorwa gikomeye cy’imbonekarimwe, hanyuma n’abaturage bakeneye serivise na bo nibabona imbaraga zashyizwe mu gutegura CHOGM, ntibumve wenda ko hari abayobozi babarangaranye".

Minisitiri Gatabazi yavuze ko na bo (nk’Ubuyobozi bukuru) Inama bakoreshaga zo ku rwego rw’Igihugu zihuza abantu benshi zigatwara umwanya, ngo baza kuzihagarika kugira ngo abantu babanze batunganye igikorwa gikomeye cyo kwitegura CHOGM.

Yavuze ko kwakira CHOGM ari amateka y’u Rwanda azakomeza kwandikwa no guhesha Igihugu isura nyayo "nk’uko Perezida Kagame ahora abisobanura hirya no hino ku Isi".

Umuyobozi w’Umujyi wa Kigali, Pudence Rubingisa, avuga ko imyiteguro ya CHOGM yagiye idindizwa n’imvura yabujije imwe mu mirimo gukorwa, ndetse ngo hari n’ibyari byarakozwe imvura yashenye bakongera kubyubaka.

Rubingisa yakomeje agira ati "Ntabwo imyiteguro irarangira, ubu ababishinzwe bari gukora amanywa n’ijoro kugira ngo birangire bijye mu buryo, kandi turabizeza ko bizaba byagenze neza".

Iyi nkuru dukesha RBA ivuga ko Inama ya CHOGM izitabirwa n’abaturutse mu mahanga barenga ibihumbi bitandatu, bazaza baherekeje abakuru b’ibihugu bigize Umuryango Commonwealth.

Mu kiganiro n’abanyamakuru ku wa Kabiri tariki 31 Gicurasi 2022, Minisitiri w’Ububanyi n’Amahanga w’u Rwanda, Dr Vincent Biruta yavuze ko Abakuru b’Ibihugu 40 bamaze kwemeza ko bazitabira CHOGM mu Rwanda, ariko bishoboke ko hari n’abandi batarabitangaza.

Babisabwe n’umuyobozi w’Urwego rw’Igihugu rw’imiyoborere (RGB), Dr Uster Kaitesi, ahereye k’uko mu Karere ka Nyarugenge hazabera inama enye zizabanziriza CHOGM, zirimo iy’abagore izabera kuri Hoteli Serena, iy’abacuruzi muri Camp Kigali, n’izindi zizabera ahandi.

Izo nama zizaba zifite abarenga 1000, agasaba abantu ko bagomba gutanga serivisi nziza ku bashyitsi bazaba bacumbitse muri za hoteri zitandukanye.

Ati “Muzi ko Abanyarwanda dufite intego ivuga ngo Ubumwe bwacu imbaraga zacu, ndasaba inzego z’ubucuruzi ziri mu Karere ka Nyarugenge ubufatanye muri ibi bikorwa byo kwakira no kwitegura iyi nama kandi bigakorwa neza.”

Yashimiye ubuyobozi bw’akO Karere igikorwa cyiza cyo guhuriza hamwe inzego zitandukanye zikamurika ibikorwa byabo, ariko bakanaganirizwa ku nama u Rwanda rwitegura kwakira.

Ati “Ibikorwa dukora bihindura ubuzima bw’umuturage wacu umunsi ku wundi, niyo mpamvu tugomba kwerekana ko dutanga servisi nziza kandi yihuse ku baza batugana.”

Dr Kaitesi yishimiye uburyo iryo murikabikorwa ryakozwe kuko harimo n’inzego zitandukanye, zirimo n’iz’ubuzima, zaje abaturage bakaziyoboka bareba uko ubuzima bwabo buhagaze.

Bimwe mu byo ashimira abikorera ni uko batagamburujwe n’icyorezo cya Covid-19 bagakomeza bakagira umuhate wo gukora biturutse ku bumwe bw’Abanyarwanda.

Yongeyeho ko iri murikabikorwa rigaraza serivisi nziza ziri mu mujyo w’aho abaturarwanda bagana, haba mu bukungu, mu mibereho myiza, ndetse no muri serivisi zirebana n’imiyoborere myiza.

Abitabiriye iryo murikabikorwa bavuga ko bungukiyemo byinshi birimo gucuruza ibyo bakora, ndetse no gusobanura serivisi baha abaturage uko zikorwa.

Nduwumukiza Bernard akora inkweto za Made in Rwanda, avuga ko ibikorwa bye bimaze kumuteza imbere ariko akishimira ko muri iri murikabikorwa yabashije gukorera abamfaranga asaga ibumbi 500 y’u Rwanda, ayavanye mu nkweto yamurikaga ariko cyane cyane yagiye ahura n’abantu bamusaba numero kugira ngo azabafashe nabo bamenye gukora inkweto za made in Rwanda.

Ati “Twashimira abateguye iri murikabikorwa kuko ryatugiriye akamaro kanini ko kumenyekanisha ibikorwa byacu, ndetse no kubasha kuribyaza umusaruro ducuruza tukabona amafaranga”.

Ku bijyanye n’Inama ya CHOGM, avuga ko nk’umucuruzi azayikurikira akungukiramo byinshi ndetse kuri we yifuza ko yazamurikira abazaba baturutse mu bindi bihugu, bimwe mu byo akora birimo inkweto n’imyenda bya Made in Rwanda.

Umuyobozi w’Umujyi wa Kigali, Pudence Rubingisa, avuga ko guhuza abikorera n’inzego za Leta mu bikorwa by’ubucuruzi ariko cyane cyane abibumbiye muri JADF, ari uburyo bwo kugaragaza ibyo bakora mu kubaka Umujyi wa Kigali, by’umwihariko Akarere ka Nyarugenge.

Yashimiye cyane abakora ibya Made in Rwanda anabasaba kubishyiramo imbaraga, kuko aribyo bigaragaza iterambere abaturarwanda bagenda bageraho.

Rubingisa avuga ko n’ubwo biteganywa n’itegeko guhuza abafatanyabikorwa, ariko ni inshingano no kubahuza kugira ngo humvwe impumeko y’abahabwa serivisi, uburyo babyishimira no kumva ibyo bifuza byahinduka kugira ngo binozwe neza.

Ati “Ni byiza ko hagaragazwa na bimwe mu bikorwa buri wese yifuza ko byakongerwamo imbaraga, kugira ngo umuturage akomeze ahabwe serivisi inoze”.

Yungamo ko ibyamaze kugerwaho buri Munyarwanda wese afite inshingano zo gukomeza kubisigasira, ndetse no kubyubaka kurushaho, ariko hagashyirwa imbere imibereho myiza y’umuturage.

Ikigamijwe muri iri murikabikorwa ni ukwiteza imbere nk’igihugu ariko no guhindura imibereho y’umuturage bikamugirira akamaro mu buryo bufatika, ndetse n’umuryango we.

Ati “Nk’umuyobozi w’Umujyi wa Kigali, turashimira Leta yacu yashoboye gushyiraho iyi gahunda ikabinyuza muri RGB, ikatugaragariza uburyo buhoraho nk’indorerwamo ishingiye ku bipimo by’uburyo abaturage bishimira ndetse bakamenya serivisi zibagenerwa, no kumenya uburyo zahinduka kandi neza mu buryo bunoze”.

Muri iri murikabikorwa hazirikanywe n’uruharwe rwa JADF mu iterambere ry’Akarere ka Nyarugenge, kuko iterambere ry’Umujyi wa Kigali ariho rishingiye.

Iri murikabikorwa ryatangijwe tariki ya 25 Gicurasi 2022 mu mbuga ya City Walk (Car free zone) risozwa tariki ya 27 Gicurasi 2022.

Reba ibindi muri iyi video:

Biganye uko abahagarariye ibihugu 54 baganira mu nama ya CHOGM

Babitangaje nyuma y’ibiganiro byahuje ibigo by’amashuri yisumbuye 54 byo mu turere twose tw’Igihugu, aho baganiraga ku ngingo zitandukanye ziganisha ku kurebera hamwe iterambere ry’ibihugu bihuriye mu muryango wa Commonwealth.

Muri ibi biganiro byabereye i Kigali mu nyubako ya Convention Centre ku wa Gatandatu tariki 21 Gicurasi 2022, urubyiruko rw’abanyeshuri rwari rwishyize mu mwanya w’abakuru b’ibihugu 54 bihuriye mu muryango wa Commonwealth, buri wese agatanga ibitekerezo nk’umukuru w’igihugu nk’uko bikorwa neza mu nama ya CHOGM.

Abayobozi barimo Minisitiri w’uburezi, Umunyamabanga wa Leta muri Minisiteri y’ububanyi n’amahanga, Umuyobozi Mukuru wa REB, n’Umuyobozi Mukuru wa NESA bari baje kwirebera uko abana bitwara mu biganiro bateguriwe

Bamwe mu rubyiruko rwaganiriye na Kigali Today nyuma y’ibiganiro, bayitangarije ko guhabwa amahirwe nk’ayo bahawe bagashyirwa mu mwanya w’Abakuru b’Ibihugu, hari byinshi byabafashije kwiyungura ku bijyanye n’inama ya CHOGM.

Jean Pierre Ngoga, umwe mu banyeshuri bitabiriye ibiganiro aturutse mu Karere ka Rwamagana, avuga ko kujya mu mwanya w’abakuru b’ibihugu byaberetse neza ko baba bafite akazi katoroshye ko gukemura ibibazo by’abaturage.

Ati “Iyo bahagaze hariya kugira ngo babishakire ibisubizo, bitwereka ko ari ikintu gikomeye, twebwe nk’urubyiruko tubyigiraho, tukavuga tuti natwe ahazaza ni ahacu, dufite byinshi byo gukora kugira ngo natwe tube mu mwanya w’abakuru b’ibihugu, tubashe kuba twakemura ibibazo byinshi byugarije isi, ariko by’umwihariko ibihugu biri mu muryango wa Commonwealth”.

Banyuzwe no kwisanisha n’abakuru b’ibihugu ariko banakuramo amasomo akomeye

Mugenzi we witwa Liza Umubyeyi Ineza, avuga ko kuba baratumiwe kugira ngo baze mu nama ariko bakisanisha n’abakuru b’ibihugu hari byinshi byabigishije.

Yagize ati “Ni ikintu cyiza cyane kandi ni iby’agaciro, kuko byatumye tumenya byinshi ku muryango wa Commonwealth, abenshi muri twe ntabwo bari basanzwe bawuzi ariko byatumye tuwumenyaho byinshi”.

Uwitwa Abi Benny Umwali yagize ati “Ni ibintu byiza bituma wiyumva bitandukanye, kuko bwa mbere mu mateka uba urimo kuvuga utivugira, ariko urimo kwimenyereza ukumva uko bimera kuba wavugira abantu benshi n’igihugu muri rusange, byatwigishije byinshi”.

Minisitiri w’Uburezi Dr. Valentine Uwamariya avuga ko urubyiruko ruri mu mashuri, ruri ku rugero rwiza ku bumenyi bujyanye n’ibihugu bihuriye mu muryango wa Commonwealth.

Yagize ati “Ubumenyi barabufite bariteguye bakora n’ubushakashatsi kuko baraturuka mu gihugu cyose. Buriya mu turere twose bavuyeyo, bakoze n’ubushakashatsi bamenya uko inama itegurwa, ibitekerezo bitangwamo, bafite amakuru ahagije kuri CHOGM, kugera no kumenya uko inama y’abakuru b’ibihugu iba ihagaze, uko ifata ibyemezo. Birashimishije kuko bari ku rugero rwiza.”

Ibi biganiro byari byitabiriwe n’urubyiruko rusaga 100 rwaturutse ku mashuri yisumbuye yo mu bice bitandukanye by’Igihugu.

Minisitiri w’uburezi avuga ko urubyiruko ruri mu mashuri ruri ku rugero rwiza ku bijyanye na CHOGM

Abitabiriye amarushanwa bose bahembwe

Imihanda izifashishwa yose izaba yaruzuye

Ibi ni ibyagarutsweho na Minisitiri w’Intebe, Dr Edouard Ngirente, mu kiganiro yagiranye n’abanyamakuru ku wa Gatatu tariki 18 Gicurasi 2022. Ni ikiganiro cyibanze ahanini ku ihindagurika ry’ibiciro n’ishusho y’ubukungu bw’igihugu.

Ubwo yagarukaga ku kibazo cy’ibikorwa remezo bizifashishwa mu kwakira Inama ya CHOGM, Minisitiri w’Intebe, Dr Ngirente yavuze ko hakomeje kwagurwa no kuvugurura imihanda izafasha mu ngendo z’abazitabira iyo nama, bityo ko nta bwoba buhari bwo kwakira abashyitsi bagera ku 5000 bazayitabira.

Yavuze ko Guverinoma vuba aha izatangaza ikarita y’imihanda abaturage bazifashisha mu gihe cy’iyo nama iteganyijwe kuva tariki 20 kugeza 25 Kamena, ku buryo abashyitsi bazakoresha imihanda nta nkomyi, kandi n’abaturage ntibazabangamirwe muri gahunda zabo zitandukanye.

Ati “Tugeze mu cyiciro gishimishije. Twagiye twubaka imihanda muri Kigali, kandi vuba cyane, tuzatangaza ikarita y’imihanda izerekana aho intumwa za CHOGM zizanyura, n’aho abatuye akarere runaka nabo bazanyura. Tuzerekana inzira zindi zitabangamira urujya n’uruza rw’abantu.

Mu rwego rwo kugabanga umuvundo w’ibinyabiziga ushobora kuzabangamira urujya n’uruza mu mihanda y’Umujyi wa Kigali mu gihe cya CHOGM, imihanda itandukanye irimo kubakwa, harimo umuhanda wa Kicukiro, agace gato kawo kakazajya kanyura hejuru ndetse n’umuhanda wa Kacyiru-Kimicanga urimo kwagurwa.

Minisitiri w’Intebe kandi yongeyeho ko u Rwanda rwiteguye kwakira izo ntumwa, harimo n’uburyo zizakirwa.

Guverinoma y’u Rwanda yatangaje ko urwego rw’amahoteli rwiteguye kwakirana ubwuzu n’ubunyamwuga abashyitsi bazaba bitabiriye Inama ya CHOGM, ndetse mu Mujyi wa Kigali, hamaze gutangazwa hoteli n’ahandi hantu hatandatu h’ingenzi, hatoranyirijwe kwakira amahuriro n’ibikorwa by’iyi nama izamara iminsi itandatu muri Kigali.

Aho ni kuri Kigali Convention Center, Intare Conference Arena, Serena Hotel-Kigali, M Hotel-Kigali, Kigali Village & Exhibition Centre na Marriott Hotel.

Minisitiri w’Intebe, Dr Edouard Ngirente

Mu ntangiriro z’uku kwezi, Umunyamabanga mukuru wa Commonwealth, Patricia Scotland, yavuze ko kimwe cya kabiri cy’ibihugu 54 bigize uyu muryango byemeje ko bazitabira iyo nama. Yongeyeho ko u Rwanda rwateye intambwe zose mu kwakira CHOGM.

Minisitiri Gaspard Twagirayezu

Byatangajwe n’Umunyamabanga wa Leta ushinzwe amashuri abanza n’ayisumbuye muri Minisiteri y’Uburezi, Gaspard Twagirayezu, mu kiganiro ‘Ubyumva ute’ cyatambutse kuri KT Radio tariki ya 16 Gicurasi 2022.

Minisitiri Twagirayezu yavuze ko iyo nama irimo yitegurwa mu byiciro bitandukanye, ko no mu mashuri naho ari uko.

Abanyeshuri bahawe imfashanyigisho zibasonurira umuryango Commonwealth icyo ari cyo, kuba u Rwanda ruri muri uwo muryango icyo bisobanuye, kandi abanyeshuri bagasobanurirwa ibyiza byo kuwubamo.

Irushanwa ryateguwe n’ikigo gishinzwe ibizami n’ubugenzuzi (NESA), rikaba ari irushanwa ryo gushushanya rireba abana bo mu mashuri abanza n’ayisumbuye.

Ati “Icyo dusaba umwana ni ugukora igishushanyo kivuga kuri Commonwealth, gisobanura uko umwana ayumva hanyuma bakazashushanya ku ndagagaciro duhuriyeho nk’Abanyarwanda zikubiyemo imibereho myiza, iterambere ry’abaturage, urubyiruko, ikoranabuhanga ndetse no guhanga udushya”.

Uko bizakorwa ngo umwana azajya ashushanya icyo gihangano cye ku rupapuro, hanyuma bakabiha abayobozi b’amashuri bakazahitamo igihangano cya mbere.

Umwana uzaba yatsinze mu kigo azajya gupiganwa ku rwego rw’umurenge akomeze arushanwe no ku rwego rw’akarere hanyuma ibihangano 30 bya mbere bikazagera ku rwego rw’igihugu.

Impamvu bahaye abana aya marushanwa yo gushushanya, bagendeye ku byifuzo byabo kuko nibo babisabye ariko nanone icyo Minisitere y’Uburezi igenderaho, ishaka kubona ubumenyi abana bafite kuri Commonwealth.

Ati “Abana iyo bakoresheje ubugeni nibwo bashobora kukubwira neza ibyiyumvo byabo ukamenya n’uko bumva ibintu n’uko babibona”.

Minisitiri Twagirayezu avuga ko abana bagenda basobanurirwa akamaro ko guhurira muri ibi bihugu, ubwabo tukabasaba gukora ubushakashatsi bakamenya na bimwe mu bigize uwo muryango wa Commonwealth.

Abana bazatsinda bateganyirijwe ibihembo bizabafasha mu myigire yabo, ariko hanateganyijwe ko bazakurikira ibizabera mu nama ya CHOGM.

Abana bo mu mashuri yisumbuye nabo bafite ibikorwa bateguriwe, bahisemo abana 108 bazakora ibiganiro mpaka ku kiganiro kirebana na Commonwealth.

Abo bana bazahurira hamwe ubundi batangire kwitoza ibyo biganirompaka, nibirangira bazicara hanyuma bakore ayo marushanwa.

Ati “Ibyo biganiro mpaka bizaba bishushanya nk’aho abo bana bahagarariye ibihugu byabo, hanyuma babiganireho bigana abayobozi bazaba bahuriye muri iyo nama”.

Ibi biganiro mpaka bituma abana batinyuka kuvugira mu ruhame, bibaha kandi gutanga ibitekerezo byabo.

Indi nyungu uburezi bufite muri Commonwealth, ngo ni uko abanyeshuri bakomoka mu bihugu bigize uwo muryango, bashaka kujya kwiga za kaminuza zitandukanye ziri muri ibyo bihugu biborohera kujyayo nta mananiza, ndetse n’abanyamahanga babikenera bakaza kwiga mu Rwanda.

Ibikorwa byo gutunganya umuhanda ugana ku kibuga cy’indege cya Ruhengeri birakomeje

Mu bikomeje kwitabwaho cyane, harimo ikibuga cy’indege cya Ruhengeri kirimo gukorerwa isuku, ahubakwa inzu igenewe kwakira abashyitsi baharuhukira, hubakwa n’uburyo bw’ihuzanzira buzafasha abazakoresha icyo kibuga.

Iyo nzu yo ku kibuga cy’indege yamaze kuzura, ikirimo gukorwa ni ugushyiramo uburyo bwo gukoresha ikoranabuhanga, umuhanda wa Kaburimbo ujyayo no kuzitira icyo kibuga.

Umuyobozi w’Akarere ka Musanze, Ramuli Janvier, yabwiye Kigali Today ko imirimo yo gusukura icyo kibuga ikomeje kugenda neza, kandi ko abashyitsi bazitabira inama ya CHOGM, bazakirirwa mu Karere ka Musanze n’abazasura ibyiza nyaburanga by’ako karere bazishima.

Yagize ati “Iriya mirimo irimo gukorwa, ni imirimo mito ijyanye no kwitegura CHOGM, iriya nzu iri kubakwa izaba irimo ICT, ni inzu igenewe abashyitsi aho bazaruhukira akanya gato, mu gihe bazaba basuye Pariki y’ibirunga n’ibindi byiza nyaburanga biboneka muri ako gace”.

Ikibuga cy’indege cya Ruhengeri gikozwe n’ibyatsi, kirimo gukorerwa isuku

Uretse kuba harimo gukorwa imirimo itandukanye muri icyo kibuga cy’indege, Meya Ramuli yavuze ko hari n’umushinga wo kubaka icyo kibuga mu buryo burambye, yemeza ko mu gihe icyo gikorwa remezo kizaba kirimo kubakwa, bizongera iterambere ry’umujyi wa Musanze n’iry’abaturage muri rusange, kuko bazahabwa akazi.

Ati “Umushinga wundi wo kubaka icyo kibuga cy’indege tuwitezeho byinshi, icya mbere uzatanga imirimo y’igihe gito ku baturage, abazakoramo uretse ibisaba ubundi buhanga, abandi bakozi basanzwe bazaba ari abanyamusanze. Icyo kibuga ni kimara kuzura kizongera urujya n’uruza rw’abashyitsi i Musanze, iyo abashyitsi batugana amahoteri arakora, uretse n’amahoteri n’abatanga serivisi z’ubukerarugendo bakira abashyitsi bavuye ku kibuga barunguka, cyongere n’ubwiza mu mujyi wa Musanze”.

Uwo muyobozi yijeje abaturage batarahabwa ingurane z’ahazagurirwa icyo kibuga cy’indege ko biri hafi.

Abaturage bahawe akazi, barubaka uruzitiro rw’ikibuga cy’indege

Uretse ikibuga cy’indege kirimo gutunganywa, mu rwego rwo kwitegura neza abashyitsi bazitabira Inama ya CHOGM, hari no gusanwa imihanda ya kaburimbo yagiye yangirika, irimo umuhanda Musanze-Cyanika-Kisoro.

Dieudonné Mabete Niyonsaba, umuyobozi wa PSF mu Karere ka Rubavu, avuga ko ibikorwa byo kwitegura abazitabira inama ya CHOGM bigeze kure, birimo kuvugurura inyubako, kongerera ubushobozi abakozi bakora mu kazi ko kwakira abashyitsi, kuvugurura ibikoresho byifashishwa mu kwakira abashyitsi no kongera isuku.

Aganira na Kigali Today yagize ati "Imirimo tuyigeze kure kandi abasura umujyi wa Gisenyi barabibona haba gusiga amarangi, kongera isuku mu mujyi, ibiganiro n’abakora muri serivisi zakira abashyitsi harebwa ko twiteguye neza."

Mabete atangaza ko abatuye mu Karere ka Rubavu bizeye kwakira abazitabira inama ya CHOGM, kuko hari ibyiza byinshi bagomba kuhabona.

Ati "N’ubwo inama zitazabera i Rubavu, twizera ko hari abashobora kuhasura inama zirangiye cyangwa ikindi gihe, ni byiza ko twitegura."

Ubuyobozi bw’Akarere ka Rubavu tariki ya 10 Gicurasi 2022, bwagiranye inama n’abakora muri serivisi z’amahoteli n’ubukerarugendo, kugira ngo harebwe uko biteguye.

Abakunze gusurwa kurusha abandi ni abafite amahoteli na za Resitora zikora ku nkombe z’ikiyaga cya Kivu, nka hamwe hakunda gusurwa ku bwinshi n’abakerarugendo, abahakora bavuga ko imyiteguro yo kwakira inama ya CHOGM bayigeze kure.

Imihanda yerekera i Rubavu ku mazi iratunganywa

Ubuyobozi bw’Umurenge wa Gisenyi bwongereye isuku mu mujyi, haba iboneka ku mihanda, ibibanza bitubatse n’ahandi hahurirwa n’abantu benshi.

Inama Njyanama y’Akarere ka Rubavu yateranye mu mpera za Mata 2022, yasabye ko inyubako zivugururwa mu kurimbisha umujyi, harimo n’inyubako za Leta.

Dr Kabano Ignace, Perezida w’Inama Njyanama y’Akarere ka Rubavu, yabwiye Kigali Today ko ibikorwa byo kurimbisha umujyi bigomba no kujyana n’abafite sitasiyo za lisansi kuko umujyi wose ugomba gusa neza.

Inkombe z’ikiyaga cya Kivu zongerewe isuku

Ati "Twasabye ko inyubako zivugururwa, haba iz’abaturage, inyubako za Leta na sitasiyo za Esansi".

Uretse amapariki asurwa na ba mukerarugendo benshi mu Rwanda, Akarere ka Rubavu kari mu hantu hasurwa kubera inkengero z’ikiyaga cya Kivu, no gusura ubucuruzi bwambukiranya imipaka.

Urugendo Kigali-Rubavu abarukora rubafasha kumenya imiterere y’u Rwanda, harimo kugenda witegeye umugezi wa Nyabarongo, imisozi ya Shyorongi na Gakenke, uruhererekane rw’ibirunga, gusimburanya ibihe by’ubukonje n’ubushyuhe, kureba ahandi hantu nyaburanga nko kunyura ku buvumo muri Musanze, imisozi ya Gakenke, ibere rya Bigogwe, imva z’abarwanye intambara ya mbere y’Isi, bigasorwa n’umucanga ku nkengero z’ikiyaga cya Kivu aho benshi bakunda amazi y’amashyuza n’isambaza.

Hamwe mu hakunzwe hakirirwa abasura Gisenyi

Biyemeje gushyira imbaraga mu myiteguro ya CHOGM

Ni muri urwo rwego, mu mpera z’icyumweru gishize, izi nzego zose zahuriye mu nama igamije kwiga ku myiteguro y’iyi nama, ndetse n’izindi ngingo zirimo umutekano, iterambere n’izindi.

Umuyobozi Nshingwabikorwa w’akarere ka Kicukiro, Umutesi Solange, avuga ko izi nzego zose zahuye ngo zisuzume ingingo zitandukanye zireba imibereho n’iterambere ry’abaturage, ariko batibagiwe no kureba ku myiteguro y’inama ya CHOGM.

Yagize ati “Ntitwakwibagirwa no kuvuga ku myiteguro y’inama ya CHOGM ari na ho twakuye umwanzuro w’uko tugiye kugaragaza ubudasa mu midugudu mu gukemura ibyo bibazo”.

Uretse ibyo kandi, uyu muyobozi yongeraho ko umuturage wa Kicukiro akwiye kugira umutekano kugira ngo n’abashyitsi bazitabira iyo nama na bo bazabe bizeye umutekano.

Umuyobozi Nshingwabikorwa w’Akarere ka Kicukiro Solange Umutesi, asaba abaturage bose gufatanya mu myiteguro ya CHOGM

Ati “Nk’abantu tuzaba dufite abashyitsi, tugomba gushyiramo akarusho. Iyi nama iradusaba gukomeza kunoza ibyo n’ubundi Umunyarwanda yari akeneye ariko no mu muco nyarwanda baravuga ngo umushyitsi akurisha imbuto”.

Arongera ati “Ibyo bisobanuye ko niba dufite abashyitsi, ibyo twakoraga twebwe ubwacu tugomba gushyiraho akarusho kugira ngo twitegure neza, bityo n’Abanyarwanda babyungukiremo”.

Umuyobozi w’Umudugudu wa Bigo mu Kagari ka Karembure mu Murenge wa Gahanga, Ngendahimana Jean Damascene, na we avuga ko basanze ibyo basabwa gukora, n’ubundi bisanzwe biri mu nshingano zabo za buri munsi.

Akavuga ko mu gihe u Rwanda rugiye kwakira inama ya CHOGM, abakuru b’imidugudu basabwa gushyira imbaraga zidasanzwe mu myiteguro kugira ngo iyi nama izagende neza.

Ati “Tugiye kwakira iyi nama ya CHOGM, biradusaba imbaraga kugira ngo tugire byinshi duhindura bityo izagende neza natwe abaturage tubigizemo uruhare”.

Abayobozi mu nzego zose biyemeje gufatanya kwakira neza abazitabira CHOGM

Mu bikorwa Ngendahimana avuga ko abakuru b’imidugudu bagiye gushyiramo imbaraga, harimo amasuku mu midugudu aho batuye, kugenzura neza ko umutekano w’abantu n’ibyabo wubahirizwa, bakanita kuri serivisi nziza bageza ku baturage.

Akarere ka Kicukiro karimo gushyira imbaraga mu bikorwa remezo kugira ngo abaturage bazagire imihanda yindi bakoresha yunganira isanzwe.

Umuyobozi Nshingwabikorwa w’Akarere ka Kicukiro Umutesi Solange, akaba asaba abaturage bose kugira uruhare muri iyi myiteguro, kandi bakumvira abayobozi babo kugira ngo bajyanemo.