Umuyobozi wa IPRC-Huye ashyira indabo ku rwibutso

Umuyobozi w’iryo shuri, Lt. Col. Dr. Barnabé Twabagira, yabwiye abanyeshuri ko iyo mvugo bamwe mu rubyiruko badukanye, bakoresha bari mu tubari idakwiye.

Yagize ati "Bamwe mu rubyiruko rw’ubu, hari igihe rujya mu kabare rukavuga ngo ruri kwibuka rwisana, bakabisanisha no kwibuka biyubaka. Iyo mvugo y’abato b’iki gihe ndagira ngo rubyiruko nk’abanyeshuri mujye muyirwanya kuko ivugitse nabi."

Yunzemo ati "Iyo tuvuga kwibuka twiyubaka, byumvikane ko ari ukwibuka tugakora ibikorwa byiza, bituzamura bikanazamura Igihugu cyacu."

Iyi mvugo n’aho ivugirwa byanamaganywe na Perezida wa Ibuka mu Karere ka Huye, Théodat Sibonyintore.

Yagize ati "Niba umurongo mugari uba watanzwe n’ubuyobozi bwiza bw’Igihugu cyacu twemera, abandi bakabisanisha n’ibindi, ntabwo ari byo, nanjye ndabigaya rwose. Na bwo ni uburyo bwo gupfobya ibiba byagezweho cyangwa n’ibyo abantu baba bicaye bagatekereza, bifite umurongo mugari ureba Igihugu muri rusange.

Eva Masengesho wiga muri IPRC, we avuga ko ubundi imvugo kwisana urubyiruko rukunze kuyikoresha ruvuga cyane cyane kurya.

Perezida wa Ibuka mu Karere ka Huye (wambaye ikote ry’umukara) hamwe n’umuyobozi wa IPRC Huye bacana urumuri rw’ikizere

Akosora urubyiruko rwadukanye iriya mvugo agira ati "Yego inshinga gusana bivuga gusubiranya ibyari byarangiritse, ariko u Rwanda aho rugeze ntabwo ari ukwisana, ni ukwiyubaka."

Abanyeshuri biga muri IPRC banahawe ubutumwa bubashishikariza kwiga bashyizeho umwete, hanyuma bakazanahanga udushya tuzabafasha gutera imbere, n’Igihugu kigatera imbere.

Banibukijwe ko hari amacakubiri batabigeraho, cyangwa banabigeraho bikaba byasenyuka, basabwa kurangwa n’urukundo.

Kwibuka muri IPRC-Huye byanajyaniranye no guha inka uwarokotse Jenoside wo mu Murenge wa Mukura, waherukaga Inka mbere ya Jenoside, nyamara iwabo bari bazitunze. Inka n’ikiraro bikaba byaratwaye Amafaranga y’u Rwanda miliyoni imwe n’ibihumbi 200.

IPRC-Huye yanahaye inka umubyeyi warokotse Jenoside

Ni umuhango wabanjirijwe no gushyira indabo aharuhukiye imibiri isaga ibihumbi 250 ku rwibutso rwa Jenoside rwa Kigali

Yabitangarije ku rwibutso rwa Kigali, ku mugoroba wo ku wa Gatandatu tariki 04 Kamena 2022, mu muhango wo kuzirikana no kunamira Abatutsi bishwe muri Jenoside yakorewe Abatutsi, imiryango yabo mito ikazima.

Imiryango yazimye yibukwaga ku nshuro ya 14 ni 15,593 yari igizwe n’abagabo, abagore ndetse n’abana babo 68,871, bose bishwe urw’agashinyaguro, ntihasigara n’uwo kubara inkuru.

Dimitrie Sissi yavuze ko kuzima kw’iyo miryango ari ikimenyetso simusiga cy’uko abakoze Jenoside bifuzaga kurimbura Abatutsi bose bakazima.

Yagize ati “Imiryango yazimye ni igisobanuro n’ikimenyetso simusiga cy’uko Jenoside yakorewe Abatutsi, abayikoze bifuzaga ko turimbuka maze twese tukazima”.

Dimitrie Sissi avuga ko kuzima kw’imiryango ari ikimenyetso simusiga cy’uko abakoze Jenoside bifuzaga kurimbura Abatutsi bose

Ibi ngo byatumye GAERG yiyemeza gushyiraho insanganyamatsiko ihoraho kuri uyu muhango igira iti “Ntibakazime twararokotse”, kugira ngo bagamburuze abifuzaga kubamara nk’uko Dimitrie abisobanura.

Ati “Kuko tukiriho twiyemeje kutayita imiryango yazimye ahubwo tukayita imiryango itarasize n’umwe wo kubara inkuru mu muryango muto. Umugoroba nk’uyu GAERG iwutegura kugira ngo dufate umwanya wihariye tugamburuze intego nyamukuru y’Interahamwe, impuzamugambi n’abambari bazo, abazitoje n’abazishyigikiye aho bava bakagera”.

Minisitiri w’Uburinganire n’iterambere ry’umuryango, Prof Jeannette Bayisenge wifatanyije n’abanyamuryango ba GAERG na AERG kwibuka imiryango yazimye, yavuze ko nyuma y’amateka mabi yaranze Igihugu, Abanyarwanda bakwiye gufatana urunana bakomorana ibikomere kugira ngo bongere bazahure wa muryango wari washatse kuzima.

Prof Jeannette Bayisenge yavuze ko nyuma y’amateka mabi yaranze Igihugu, Abanyarwanda bakwiye gufashanya komorana ibikomere kugira ngo bongere bazahure wa muryango wari washatse kuzima

Ati “Tuwubake ushoboye kandi utekanye kuko ari yo ntego y’Igihugu cyacu, kuko guhesha agaciro imiryango yazimye, ari uguharanira kubaka uyu muryango ushoboye kandi utekanye. Ni uguharanira ko uba igicumbi cy’ubumwe bw’Abanyarwanda, indangagaciro na kirazira, kwishakamo imbaraga nk’ababyeyi kuko ntabwo byoroshye kugira ngo tubwire amateka abana bacu kandi atagoramye kuko ejo ni bo bazaba bayabara”.

Minisitiri w’Ubumwe bw’Abanyarwanda n’inshingano mboneragihugu, Dr. Jean Damascene Bizimana, yavuze ko kwica Abatutsi bitari impanuka yagwiriye Igihugu ahubwo byavuye kuri politiki mbi na gahunda yagenderaga kuri uwo murongo.

Ati “Kwica Abatutsi kugeza ku rwego rw’imiryango irenga ibihumbi 15, abantu barenga ibihumbi 60 bazimye burundu, barimo abana b’impinja si impanuka yagwiriye Igihugu cyacu, ahubwo ari politiki mbi. Byavuye kuri gahunda igendera kuri uwo murongo, muzahora mushimirwa kuba ari mwe mwabaye ku isonga yo gutangiza igikorwa ngarukamwaka cyo kwibuka Abatutsi kubarinda kuzima n’ubwo batagihari”.

Insanganyamatsiko ihoraho y’uyu muhango ni ’Ntukazime Nararokotse’

Yongeyeho ati “Leta y’u Rwanda ishima kandi ishyigikiye ibikorwa nk’ibi, byo kuzirikana amateka nk’uburyo bwo guhora duhanze ijisho aho u Rwanda rwavuye, ngo biduhe imbaraga zo kurinda ibimaze kugerwaho mu myaka 28 ishize Jenoside yakorewe Abatutsi ihagaritswe”.

Mu rwego rwo kwishakamo ibisubizo GAERG yatangije Aheza Healing and Carrier Center, iherereye i Ntarama mu Bugesera, mu rwego rwo guhashya ingaruka za Jenoside, by’umwihariko izirebana n’ubuzima bwo mu mutwe, aho mu myaka itatu imaze abayigana bari hagati ya 70 na 80 mu kwezi.

Hafashwe umunota wo kwibuka imiryango yazimye muri Jenoside yakorewe Abatutsi

Bacanye urumuri rw’icyizere

Kubibuka byabereye ku cyicaro gikuru cy’Iposita y’u Rwanda giherereye mu Murenge wa Muhima mu Karere ka Nyarugenge, ari na ho hashyizwe ikimenyetso kiriho amazina y’abantu 26 bahoze ari abakozi bayo, bakicirwa mu bice bitandukanye by’Igihugu mu gihe cya Jenoside.

Nk’uko byari bimeze mu nzego za Leta zitandukanye aho Abatutsi batotezwaga mu kazi kabo, ni nako byari bimeze ku bakozi b’Iposita icyo gihe, kuko imibare ya Minisiteri y’Abakozi ba Leta yo mu mwaka wa 1990, igaragaza ko mu bakozi 520 bakoreraga MINITRANSCO, ari na yo iposita yabarizwagamo, muri bo Abatutsi bari 90 gusa, nabwo bagakora akazi k’ubushoferi, amasuku, ku buryo uwabaga akomeye yari sekereteri (Secretary).

Nyuma y’imyaka ibiri iposita yatangiye gukora nk’ikigo kigenga aho kuba ishami rya Minisiteri, ku buryo abakozi bayo bari baziranye cyane, kubera ko bari barakoranye cyane bakibarizwa muri Minisiteri.

Agaruka ku mibereho y’abakozi b’iposita mbere ya Jenoside, Marie Josée Kayirangwa, yavuze ko kuba iposita yarabaye ikigo kigenga ntacyo byahinduye ku itotezwa ry’Abatutsi bayikoreraga, kuko n’ubundi ntawashoboraga kubona umwanya mwiza mu kazi, kwimurwa cyangwa guhabwa amahugurwa, kubera ko bagenderaga cyane ku bwoko.

Yagize ati “Nta Mututsi wahabwaga umwanya w’ubuyobozi, yewe kabone n’uwo kuyobora ishami ry’iposita. Ikindi cyaranze icyo gihe ni ukwimwa icyo gukora kandi uri mu kazi, ngo utamenya amabanga y’akazi ukazayashyira bene wanyu b’Inyenzi. Uko niko Abatutsi bafatwaga mu Iposita”.

Yongeyeho ati “Ikindi ni uguhezwa mu mirimo imwe n’imwe, kuko bavugaga ko umurimo wo kwakira no kubika amafaranga utahabwa Umututsi, kuko bumvaga ko azayatwara akayashyira bene wabo b’Inyenzi”.

Komiseri ushinzwe ubushakashatsi muri IBUKA, Christian Bizimana, wifatanyije n’abakozi b’iposita kwibuka bagenzi babo bazize Jenoside yakorewe Abatutsi, yavuze ko kwibuka Abatutsi ari umwanya ukomeye wo kubazirikana no kubasubiza agaciro bambuwe.

Ubuyobozi bw’Iposita bwaremeye imwe mu miryango y’abarokotse Jenoside itishoboye yo mu Murenge wa Muhima, ihabwa ibiribwa n’amavuta yo gutekesha

Yagize ati “Iyo twibuka dusubiza agaciro Abatutsi bishwe, tukabazirikana, tukibuka abo bari bo, ubutwari bwabo, ubumuntu bwabo, ubupfura bwabo, inzozi n’intego bari bafite mu buzima bwabo, ariko nanone tukazirikana urwibutso badusigiye mu gihe twari kumwe na bo”.

Umuyobozi Mukuru w’iposita Célestin Kayitare, yavuze ko ubusanzwe umuntu agira uko ava ku isi, ariko Abatutsi bishwe muri Jenoside bahavuye mu buryo butari buteganyijwe.

Ati “Ni yo mpamvu tuzahora tubazirikana aho bari, n’ubwo twemera ko tuzongera tukabonana na bo, ariko uyu munsi ni ukugira ngo tubibuke”.

Minisitiri w’Ikoranabuhanga no guhanga udushya, Paula Ingabire, wari umushyitsi mukuru, yavuze ko Jenoside yakorewe Abatutsi ari amateka mabi atagomba kwibagirana mu gihugu, kuko abishwe bari Abanyarwanda kandi ari imbaraga z’Igihugu.

Minisitiri Ingabire Paula avuga ko Jenoside yakorewe Abatutsi ari amateka atagomba kwibagirana

Yagize ati “Ni amateka mabi yaranze Igihugu cyacu, atagomba kwibagirana bitewe n’uburyo Jenoside yateguwe, ikigishwa, igashyirwa mu bikorwa, igasenya Igihugu, kugeza aho u Rwanda rwasigaye rusa nk’aho rutakiri Igihugu, ari amatongo gusa. Abishwe bari Abanyarwanda, kandi zari imbaraga z’Igihugu, ku buryo icyuho basize cyahise kigaragara”.

Muri iki gikorwa kandi ubuyobozi bw’Iposita bwaremeye imiryango 15 itishoboye y’abarokotse Jenoside yakorewe Abatutsi batuye mu Murenge wa Muhima.

Kwibuka imiryango yazimye bikorwa buri mwaka bikagira ahantu runaka bikorerwa hazwi.

Ati “Iyo hibukwa imiryango yazimye bikorerwa hirya no hino mu gihugu ariko kwibuka kuri iyi nshuro ya 28 birakorwa ku itariki ya 4/6/2022 bikorerwe ku rwibutso rwa Gisozi.

Kugira ngo iyi miryango imenyekane ko yazimye burundu hakozwe ibarura mu gihugu hose, hakusanywa amakuru yo kumenya abari bagize iyo miryango yazimye.

Imbogamizi zirimo uko imyaka igenda ishira amakuru agenda yibagirana kuri iyi miryango yazimye cyangwa ugasanga abo bari baturanye bibuka izina rimwe ry’umwe mu bari bagize uyu muryango.

Nsengiyaremye avuga ko kwibuka imiryango yazimye ari ukugira ngo iyo miryango itibagirana burundu kandi hari abana barokotse bagomba kwibuka imiryango yazimye.

Ati “Ntibazimye twararokotse, bariho kubera ko tukiriho, kubibuka ni wo muzuko wabo”.

Nsengiyaremye Fidèle umuyobozi mukuru muri GAERG avuga ko kubarura imiryango yazimye byagize akamaro kuko bajya babona abantu babaza amakuru ku miryango yabo niba baba bakiriho, bareba aho babaruriye iyo miryango bagasanga uwo muryango warazimye.

Ati “Iyo umuntu atubajije niba hari amakuru dufite ku muryango we tugasanga barabaruwe ko bazimye tumuha amakuru agasigara akora urugendo rwo kwakira kubura umuryango we”.

Umulisa Aimée Josiane, inzobere mu mitekerereze ya muntu muri GAERG, avuga ko n’ubwo imiryango yaba yarazimye burundu hagomba kuba igikorwa cyo kuyibuka kuko ari byo biha icyubahiro abishwe muri Jenoside.

Umulisa avuga ko iyo umuntu atigeze ashyingura umuntu we bimutera igikomere cyo guhora yumva ko atapfuye akiriho kandi ko azagaruka.

Ati “Twe nk’abarokotse iyo twibutse imiryango yazimye bituma twumva ko batakiriho ndetse tukumva ko tubahaye icyubahiro tubagomba”.

Ku bana batazi inkomoko yabo kubera kwicirwa imiryango bakiri bato ntibamenye imiryango yabo, GAERG ibitaho ikabaganiriza ikabereka ko bafite igihugu cyiza ndetse bafite n’abamufasha kuba mu buzima butoroshye kandi basangiye amateka yo kurokoka Jenoside yakorewe Abatutsi.

Nsengiyaremye Fidèle avuga ko ubu gahunda ya Ntukazime nararokotse igamije kwibuka no kuzirikana imiryango yazimye muri Jenoside yakorewe Abatutsi, hari ibiganiro byateguwe bivuga akamaro ko gusigasigara amateka ya Jenoside yakorewe abatutsi binyuze mu nyandiko, tariki ya 2/6/2022 hateganyijwe misa yo gusabira abishwe muri jenoside izabera kuri Regina Pacis saa 18h30. Tariki 4/6/2022 hazaba igikorwa cyo kwibuka imiryango yazimye ku rwibutso rwa Kigali ku Gisozi.

Gusura urwibutso ruri ku Gisozi byabafashije kunguka ubumenyi kuri Jenoside yakorewe Abatutsi

Ibi babitangaje nyuma yo gusura Urwibutso rwa Kigali ruherereye ku Gisozi bagasobanurirwa amateka mabi yaranze u Rwanda, bakabona amashusho y’abanyapolitiki bateguye bakanashyira mu bikorwa Jenoside ndetse n’uburyo abana bato bishwe mu 1994.

Umwe muri abo banyeshuri witwa Ingabire Donatha avuga ko kuba basuye Urwibutso rwa Gisozi nk’abato byabafashije kumenya amashusho y’abagize uruhare mu gutegura no gukora Jenoside yakorewe Abatutsi mu 1994.

Ingabire Donatha

Ati: "Ku bwanjye numvaga amateka yewe nkasura inzibutso zitandukanye harimo n’Urwibutso rw’i Nyange ariko amateka ahari ntiyerekana neza amashusho y’abanyapolitiki bakoze Jenoside. Aha ku Gisozi nabashije kubona amashusho y’abakoze Jenoside, videwo zisobanura amateka, ndetse n’uburyo abana bato bagiye bicwa".

Giraneza Gentil, Umuhuzabikorwa wa AERG Icyizere avuga ko gusura Urwibutso byatumye basobanukirwa byimbitse amateka mabi yaranze u Rwanda ndetse ko bagiye no kubisobanurira bagenzi babo basigaye ku ishuri.

Giraneza ashima Leta kuba ibaha amahirwe bagasobanurirwa amateka ndetse ko nk’imbaraga z’Igihugu bagiye gushyira imbaraga nyinshi mu kurwanya abapfobya Jenoside yakorewe Abatutsi.

Ati: "Urubyiruko rwagize uruhare runini muri Jenoside yakorewe Abatutsi, n’ubu rero dufite uruhare rukomeye mu kurwanya Abapfobya amateka yacu. Ikindi kandi tugiye gusangiza bagenzi bacu amateka nyayo dukuye hano haba abo tubana mu muryango wa AERG batabashije kuza hano ndetse n’Abanyeshuri bose muri rusange basigaye mu kigo".

Giraneza Gentil yongeraho ko ubu Abanyarwanda bajijukiwe ku buryo ibyabaye bitasubira ukundi. Ati: "Ubutumwa naha abantu bapfobya ni uko bakwiye kumenya ko kuri ubu Abanyarwanda bumva ndetse bajijutse, mbere bafatiranye urubyiruko, rero ibyo bakora byose bararushywa n’ubusa kuko ubu twasobanukiwe amateka yacu ntihakongera kuba icuraburindi nk’iryabaye mu 1994".

Byimana Eugene, Umuyobozi w’ikigo cya EAV Kivumu

Byimana Eugene, Umuyobozi w’ikigo cya EAV Kivumu wari mu bayobozi baherekeje aba banyeshuri, avuga ko ibikorwa by’urubyiruko mu kumenya amateka yaranze Igihugu bitanga Icyizere. Ati:" Nk’uko aba bana bitwa AERG Icyizere, amateka mabi yaranze Igihugu ntashobora kongera kubaho ukundi. Aba bana bose Jenoside yabaye bataravuka. Kuba rero bagira ishyaka ryo gushaka kumenya amateka mabi yaranze Igihugu byerekana ko ntawe ushobora kugira aho amenera ngo abashuke".

Icyo gikorwa cyabereye kuri icyo kigo cy’amashuri abanza cy’Intwari giherereye mu Murenge wa Rwezamenyo mu Karere ka Nyarugenge mu Mujyi wa Kigali. Cyitabiriwe n’abiganjemo abaturage baturutse mu bice bya Biryogo, Gitega, Nyamirambo, na Rwezamenyo no mu bice bindi byo hafi aho muri Nyarugenge, byiganjemo abiga kuri icyo kigo n’ababyeyi baharerera.

Umunyamabanga Nshingwabikorwa w’Umurenge wa Rwezamenyo, Nirera Marie Rose, yavuze ko kwibuka abishwe muri Jenoside yakorewe Abatutsi ari ngombwa kuko bazize akarengane, kugira kandi ngo bitazasubira.

Abari aho bashimiye Leta y’u Rwanda yashyizeho gahunda yo kwibuka, bashimira n’ingabo zahoze ari iza RPF zahagaritse Jenoside.

Umunyamabanga Nshingwabikorwa w’Umurenge wa Rwezamenyo, Nirera Marie Rose

Umuyobozi w’Umurenge wa Rwezamenyo yibukije abari aho ko bafite inshingano zo kunyomoza abakomeje guhakana Jenoside bakoresheje itangazamakuru n’imbuga nkoranyambaga.

Umuyobozi w’ikigo cy’amashuri abanza cy’Intwari, Sengabo Ayubu, yavuze ko mu bo bibuka harimo abahoze ari abarimu 12, harimo n’uwahoze ari umuyobozi w’ikigo, Ruzigana Alphonse, hamwe n’abanyeshuri 89.

Ati “Kwibuka Jenoside yakorewe Abatutsi mu kigo nk’iki cy’amashuri ni umwanya ukomeye ku barezi, abarimu n’abantu bose muri rusange, wo kuzirikana ko aba twibuka bari bafite intumbero ndetse n’ibyiringiro by’ubuzima byari kuzafasha u Rwanda. Abandi kandi bari amizero y’u Rwanda. Iyo dufata umwanya nk’Abanyarwanda tukibuka, uba ari umwanya mwiza wo kunamira, no gusubiza agaciro Abanyarwanda barenga miliyoni bazize Jenoside yakorewe Abatutsi mu 1994.”

Yavuze ko ari ngombwa ko ababyiruka bagira ibyiringiro n’icyizere cy’ejo hazaza, abarezi bagafasha Leta kwimakaza umuco w’urukundo, ubumwe, ubunyangamugayo, ubutwari, ubudahemuka, abo barera bagasohoka mu mashuri bazi neza ko u Rwanda rugira kirazira, kandi ko ari yo ifasha u Rwanda n’Abanyarwanda gukomeza kwiyubaka.

Yashimiye umuryango w’Abayislamu mu Rwanda kubera ubufatanye ugaragariza icyo kigo kugira ngo cyubake uburezi bufite ireme, ubu ishuri rikaba ryaragiye ryaguka kubera ubuvugizi bw’umuryango w’Abayislamu mu Rwanda, ku bufatanye n’inzego za Leta, by’umwihariko Umurenge wa Rwezamenyo.

Umuyobozi w’Umuryango w’Abayislamu mu Rwanda (Mufti) Sheikh Hitimana Salim, mu ijambo rye, yihanganishije imiryango y’abo bibuka bazize Jenoside yakorewe Abatutsi.

Umuyobozi w’Umuryango w’Abayislamu mu Rwanda (Mufti) Sheikh Hitimana Salim

Ati “Twari tukibakeneye cyane. Mukomere, ntimuheranwe n’agahinda, turi amaboko yanyu, kandi turi imbaraga zanyu. Twese Abanyarwanda twiyemeje kuba umwe, kuko ari wo muco mwiza dutozwa n’imiyoborere myiza y’Igihugu cyacu.”

Depite Ndangiza Madina na we witabiriye icyo gikorwa akaba yari umushyitsi mukuru muri uwo muhango, yabwiye abari bateraniye aho ko abakiri bato bakwiye kwigishwa ukuri ku mateka y’u Rwanda, abasaba kubeshyuza abahakana Jenoside yakorewe Abatutsi, n’abagikwirakwiza ingengabitekerezo ya Jenoside.

Depite Ndangiza Madina yifatanyije n’abitabiriye igikorwa cyo kwibuka abahoze ari abarezi n’abanyeshuri ku ishuri ry’Intwari bishwe muri Jenoside yakorewe Abatutsi

Icyo kigo cy’amashuri abanza cy’Intwari (Ecole Primaire Intwari) kuri ubu kigamo abanyeshuri 2,489 n’abarezi 51 babigisha mu byumba 39.

Ubuyobozi bw’ikigo bushima abarimu bigishije kuri icyo kigo ndetse n’abanyeshuri bahize, hamwe n’umuryango w’Abayislamu mu Rwanda badahwema kubagaragariza ubufatanye mu iterambere ry’icyo kigo.

Abo ni na bo bagize uruhare mu gutangiza icyo gikorwa ngarukamwaka cyo kwibuka, ndetse batanga igitekerezo cyo kubaka urwibutso rw’abarimu n’abanyeshuri bo kuri icyo kigo bazize Jenoside yakorewe Abatutsi.

Minisitiri Uwamariya ashyira indabo ku rwibutso

Mu gihe cya Jenoside yakorewe Abatutsi, iyi Seminari yahungiwemo n’ingeri zitandukanye z’Abatutsi bari batuye muri Ndera no mu bice bihana imbibi naho, nk’ubuhungiro mu bihayimana ndetse bareraga abiteguraga kuyiyegurira.

Uwari umuyobozi w’iyo Seminari, Padiri André Havugimana, kuva mu 1983 kugeza ubwo habaga Jenoside kuri ubu waje kuba Musenyeri, yasobanuye inzira y’umusaraba banyuzemo.

Uru rugendo rwatangiye ku itariki ya 9 Mata, ubwo bagabwagaho igitero cy’Interahamwe zaje zifite urutonde rw’abo zishaka kwica ku ikubitiro. Gusa Padiri Havugimana akomeza kubarwanaho yumvisha uburyo izo nterahamwe ataziha ubushyo ayoboye kandi azi neza ko na we ashobora kubizira.

Musenyeri Havugimana ugeze mu gihe cy’izabukuru, yasabye abasemineri kubiba urukundo n’ukuri mu bandi, kuko ngo icyo ubibye aricyo usarura byanze bikunze.

Gasore Rukundo Bonfils, umwe mu banyeshuri barimo kurererwa muri iyo Seminari ya Mutagatifu Vincent, yasabye urubyiruko bagenzi be kurwanya ingengabitekerezo ya Jenoside n’ibitekerezo bihembera urwango.

Yagize ati “Ni byiza ko twe twiga duhuza ubumenyi dukura ku ishuri n’indangagaciro z’Igihugu, kuko aribyo bihesha isura nziza umuryango mugari kandi nawe wisangamo.”

Minisitiri w’Uburezi, Dr Valentine Uwamariya witabiriye uyu muhango, yasabye urubyiruko rwa none guhaguruka rukarwanya ikibi kandi kukirwanya ari ukunyomoza abagerageza kuyobya amateka y’Igihugu cyabo, gusa nanone yibutsa ababyeyi ko urwo rugamba rutagerwaho mu gihe cyose atari bo bafashe iya mbere mu gusangiza ayo mateka abana babo ndetse bakabikora batayaca ku ruhande.

Yashimye abarokotse Jenoside ukudatezuka kwabaranze mu rugendo rw’ubumwe n’ubwiyunge.

Yasabye kandi abarezi kuzirikana ubutumwa baha abo barera, hakumirwa icyahembera ingengabitekerezo ya Jenoside mu mashuri.

Minisitiri w’Uburezi, Dr Valentine Uwamariya

Yagize ati “Ndasaba abasaseridoti mwe mwahamagariwe kuragira inama za Kristu, kurangwa n’ubutwari bwo kwanga ikibi kandi mukabitoza imbaga y’Abanyarwanda, cyane cyane urubyiruko.”

Semineri nto ya Mutagatifu Vincent i Ndera habarurwa Abatutsi barenga 8,000 bahaguye muri Jenoside barimo abihayimana, abari bahahungiye abakozi ndetse n’abaseminari.

Musenyeri André Havugimana

Reba ibindi muri iyi video:

Inkuru bijyanye:

Yemeye gutakaza ingingo z’umubiri we kubera kwanga gutanga Abatutsi bari bamuhungiyeho

Kwibuka byabimburiwe n’urugendo rwo kuva kuri CHUB kugera ku rwibutso rwa Jenoside rwa Kaminuza y’u Rwanda ishami rya Huye (UR)

Yabigarutseho tariki 20 Gicurasi 2022, mu gikorwa cyo kwibuka abari abaganga, abarwayi n’abarwaza biciwe muri ibi bitaro mu gihe cya Jenoside yakorewe Abatutsi mu mwaka wa 1994.

Yagize ati "Mu gihugu cyose habarurwa abaganga hafi 59 bagize uruhare muri Jenoside. Ariko 1/2 cyabo ni aba hano muri CHUB cyangwa hano mu mujyi wa Butare. Binagaragaza umwihariko mubi abavuzi bagize mu gukora Jenoside yakorewe Abatutsi cyane cyane ahangaha, hari igicumbi cy’abavuzi b’abahanga."

Yaboneyeho gusaba abaganga bafite ubungubu ndetse n’abakiri kubwiga kuzirinda kwitwara nka bagenzi babo bishe ababagana aho kubavura.

Dr. Sabin Nsanzimana, umuyobozi mukuru wa CHUB

Ati "Niba dufite umuhamagaro wo gufasha Imana gukiza umuntu uburwayi n’impanuka, uzatugera mu biganza azatahe yishimye, yakize. Ntihazagire utugwa mu biganza kandi dushobora kumukiza."

Yunzemo ati "Turibuka ibibi byabaye muri uru rugo rwacu, ariko tuniyemeza ko umuntu wese uzajya yinjira aha atazongera kuhasiga ubuzima mu gihe dufite ubushobozi bwo gukora ibishoboka byose agakira."

Abatangabuhamya n’abaganga na bo basaba abaganga kudatatira indahiro

Ildephonse Gasana wari kuri CHUB mu gihe cya Jenoside, yaratemwe mu mutwe no ku maguru ku buryo atanabashaga kugenda, yatanze ubuhamya ku kuntu yahamaze igihe ntawe umwitayeho nyamara yari ababaye, ndetse n’ukuntu Abatutsi bazanwaga ngo bavurwe, bamara gukira bakicwa.

Byamuteye gusaba abaganga kudatoranya ababagana agira ati "Umuganga rwose nabe muganga w’abantu bose."

Isabelle Mukankusi na we wari warahungiye muri ibi bitaro, asobanura ukuntu hari abaganga bagiye bagira uruhare mu kwica abarwayi n’abarwaza. Icyo gihe ngo yari afite imyaka 13.

Agira ati "Nimugoroba, bitangiye kuba nka saa mbili, batwaraga abantu bakajya kubicira hepfo ya maternité. Nigeze guhurira muri corridor n’umuganga, yambaye itaburiya ku manywa, nyamara nari naraye mubonye mu baje gutwara abantu bajya kubica. Icyo gihe narikanze, nsubira inyuma."

Abaganga bo kuri CHUB ubungubu, bagaya imyitwarire ya bagenzi babo batatiye indahiro yabo, mu gihe cya Jenoside.

Albert Busumbigabo ukuriye ishami rya farumasi ati "Ntabwo byumvikana ukuntu umuntu ubundi ushinzwe gutanga ubuzima, aho kuvura umuntu amwica. Ibi biduha isomo rikomeye ry’uko indahiro abaganga bagira idakwiye kuba umuhango wo kugira ngo barangize amashuri, ahubwo bakwiye kubikora babishyizeho umutima, bazi ko bagomba gutanga ubuzima aho gutuma abantu babubura."

Raporo y’Abaganga batagira umupaka bakoreraga kuri CHUB ivuga ko muri CHUB haguye Abatutsi barenga 200, kandi ko abenshi bishwe ku itariki ya 22 n’iya 23 Mata kuko muri iyo minsi ibiri yonyine haguye abasaga 150.

Babanje kujya kunamira abazize Jenoside baruhukiye mu Rwibutso rwa Nyanza

UTB yibutse abishwe muri Jenoside by’umwihariko abari barahungiye muri ETO Kicukiro bagatereranwa n’Ingabo zari iza LONI, bakaba barahunze ariko bageze aho iyo Kaminuza ikorera bagahubirana n’Interahamwe, ngo zahise zibasubiza inyuma zibajyana kubicira i Nyanza.

Ku wa Gatatu tarriki 18 Gicurasi 2022, abanyeshuri n’abakozi ba UTB bagiye ku Rwibutso i Nyanza (ya Kicukiro) kunamira abahashyinguwe, bagaruka ku ishuri kumva ibiganiro n’ubuhamya bibasobanurira amateka ya Jenoside.

Umuyobozi w’Abanyeshuri, Gildas Ngaruyingabo, avuga ko nta wundi muntu uzagaragaza amateka y’ukuri yabo n’aya Jenoside yakorewe Abatutsi muri rusange, "nk’aho twe tudafite iminwa yo guhangana n’abagoreka ayo mateka".

Umuhuzabikorwa w’Umuryango AERG muri UTB, Mushimiyimana Celestin, na we yakomeje agira ati "Hari abantu bakomeje kutugabaho ibitero ku bwenge, ntabwo ari intambara y’amasasu cyangwa imihoro bakoresha, ndagira ngo natwe tugire umukoro wo kuvuga amateka meza y’Igihugu cyacu".

Komiseri muri IBUKA ushinzwe Ubushakashatsi, Christian Bizimana

Asaba abanyeshuri bagenzi be kwirinda imvugo zipfobya icyizere cy’ubuzima bw’ahazaza, aho atanga ingero z’ibyo Urubyiruko ruvuga muri iki gihe ngo "Twirire ubuzima ni buto, nta kurama kudapfa, nta myaka 100".

Umwe mu bayoboye AERG ku rwego rw’Igihugu, Leandre Afurika, avuga ko telefone na mudasobwa urubyiruko rwa UTB rufite, ari amahirwe rwakoresha mu gusoma amateka y’ukuri Abanyarwanda banyuzemo, hamwe no kwandika bavuguruza abapfobya n’abahakana Jenoside yakorewe Abatutsi.

Afurika yagize ati "Uru ni urugamba ariko ntawe ugusabye gufata imbunda n’ubwo na byo twabikora bibaye ngombwa, kuko turacyafite imbaraga".

Komiseri ushinzwe Ubushakashatsi mu Muryango IBUKA urengera inyungu z’abarokotse Jenoside, Christian Bizimana, yatanze ingero z’abapfobya bakanahakana Jenoside yakorewe Abatutsi, ahereye ku bize muri Kaminuza z’icyo gihe zari UNR, ISAE Busogo, AUCA na IPM.

Yavuze n’amashyirahamwe akorera hanze y’Igihugu arimo RDR na Jambo ASBL, abantu ku giti cyabo barimo uwitwa Charles Ndereyehe, Etienne Karekezi na Thomas Kamirindi bakorera Radio Ijwi rya Amerika, ndetse na Ally Yussuf Mugenzi wa BBC.

Umuyobozi Mukuru w’Agateganyo wa UTB, Dr Liliane Umutesi

Bizimana avuga ko hari n’abagize uruhare muti Jenoside baciriwe imanza nabi na bo ngo bari mu bapfobya bakanahakana Jenoside, barimo Protais Zigiranyirazo, ndetse n’abantu ngo bahoze ari inshuti z’uwari Perezida Habyarimana barimo umwanditsi Judi Rever.

Umuyobozi Mukuru w’Agateganyo wa UTB, Dr Liliane Umutesi, avuga ko bibutse Jenoside bagamije guha agaciro abayihagaritse ari bo Ngabo z’Inkotanyi, zarokoye bamwe mu bakozi n’abanyeshuri b’iyo Kaminuza.

Dr Umutesi asaba "ababona ibikorwa bimaze kugerwaho na Leta y’Ubumwe", kunyomoza abapfobya n’abahakana Jenoside yakorewe Abatutsi, avuga ko ari umukoro wahawe buri wese witabiriye igikorwa cyo kwibuka.

Umuyobozi w’Abanyeshuri, Gildas Ngaruyingabo

Bashyize indabo banunamira inzirakarengane ziruhukiye mu rwibutso rwa Jenoside rwa Kigali ruri ku Gisozi

Perezida w’umuryango IBUKA muri uwo Murenge, Usanase Uwera Yvonne, yabitangaje mu muhango wo kwibuka ku nshuro ya 28 Jenoside yakorewe Abatutsi mu 1994.

Yagize ati: “Mu Murenge wa Nyakabanda abarokotse Jenoside turacyafite ibibazo by’ingutu birimo abafite ubumuga batewe na Jenoside batarabasha kubona uko bivuza. Ikindi kibazo dufite ni icy’abantu badafite amacumbi kuko dufite umubare munini w’abarokotse Jenoside kugeza uyu munsi udafite aho kuba”.

Usanase avuga ko kandi bahangayikishijwe no kuba hashize imyaka 28 Jenoside ihagaritswe ariko mu Murenge wa Nyakabanda bakaba badafite urwibutso.

Ni ho ahera asaba ko bafashwa bakubakirwa urukuta rushobora kujyaho amazina yose y’Abatutsi bishwe muri Jenoside yakorewe Abatutsi mu 1994.

Perezida wa IBUKA mu Murenge wa Nyakabanda, Usanase Uwera Yvonne

Ati: “Mbere na mbere twe duhangayikishijwe n’imiryango yacu kuba dukenera kujya kubasura tukajya ku Gisozi ni kure, twe duhangayitse tuzishakamo ibisubizo ariko tunasaba ko badufasha tukabona byibuze urukuta tugashyiraho amazina y’abacu byajya bidufasha kubasura n’ubwo bitabazura ariko byibura twaruhuka”.

Mu bafashe ijambo bose, bagiye bagaruka ku gusaba abaturage gutanga amakuru nyayo y’ahantu hose baba bazi hajugunywe imibiri y’Abatutsi bishwe muri Jenoside kuko abamaze kumenyekana ari bake cyane ugereranyije n’Abatutsi bari batuye muri Nyakabanda.

Perezida wa IBUKA muri Nyakabanda ati: “Tumaze kumenya amazina y’Abatutsi 300 yonyine kandi nyamara n’ubwo nta mubare nyirizina uzwi w’abishwe bivugwa ko ugereranyije hishwe Abatutsi bari hagati y’ibihumbi birindwi n’icyenda”.

Umuyobozi Nshigwabikorwa w’Akarere ka Nyarugenge wungirije, NSHUTIRAGUMA Esperance, na we avuga ko hakiri inzitizi zo kubona amakuru yose y’ahajugunywe Abatutsi bishwe.

Ati: “Muri Nyakabanda turacyafite ikibazo gikomeye cyane cy’abantu badashaka gutanga amakuru y’ahari bariyeri, ibyobo byajugunywemo Abatutsi kugira ngo byibuze bashyingurwe mu cyubahiro. Ubutumwa dutanga mbere na mbere ni uko hatangwa amakuru nyayo abishwe bagashyingurwa mu cyubahiro. Kuri ubu abarokotse bafashwa muri gahunda zitandukanye zibafasha kwiteza imbere, zirimo guhabwa inkunga y’ingoboka, ubuvuzi, kwishyura amashuri, guhabwa amacumbi ndetse no kubaha ubujyanama mu by’ihungabana”.

Ubuyobozi bw’Akarere ka Nyarugenge buvuga ko hari na gahunda nshya yo gufasha abarokotse kwihangira imirimo no kwiga imishinga ibyara inyungu kugira ngo uwarokotse ntahungabane ahubwo arusheho gutera imbere.

Bacanye Urumuri rw’Icyizere

Tariki 9 Gicurasi 1994, wari umunsi ushaririye ku mbaga y’Abatutsi bari batuye mu Murenge wa Nyakabanda, harimo bamwe biciwe ku cyicaro cya Segiteri Nyakabanda bikozwe ku mabwiriza yatanzwe na konseye Nyirimanzi Gregoire wategetse ko Abatutsi bose bihishe basohoka kuko hatanzwe ihumure nyamara yari inzira yo kubatsemba, nk’uko byatangajwe n’Umunyamabanga Nshingwabikorwa w’Umurenge wa Nyakabanda, Ntakontagize Florence.

Babanje gushyira indabo mu rufunzo ahitwa Ku Murago hakaba ari ku gishanga kigabanya Umurenge wa Musenyi n’uwa Nyamata. Aho hantu hazwiho kuba abari barahahungiye baturutse mu bice bitandukanye bihakikije barahahanganiye n’ibitero by’Interahamwe. N’ubwo bagerageje kwirwanaho, imbaraga zagiye zibabana nke, kugeza ubwo benshi mu bahahungiye bahasize ubuzima, abandi bicirwa mu nzira bahunga, harokoka bake.

Kuri ubu iyo misozi ubona ko abayituyeho atari benshi, ku buryo hakigaragara n’amatongo (ahantu hahoze hatuwe ariko ubu hadatuwe).

Iyo misozi yari ituyeho Abatutsi benshi, dore ko ari hamwe mu ho baciriwe mu myaka ya mbere ya Jenoside kugira ngo bazicwe n’inyamaswa, isazi ya Tsetse ndetse n’imiterere mibi yaharangwaga.

Twagirimana Charles Gapfizi uhagarariye abari batuye muri ako gace ka Nyiramatuntu, bakaba ndetse bafite ihuririro bise ‘Nyiramatuntu ku ivuko’ yashimye ingamba zafashwe na Leta zo guhangana na COVID-19 harimo gutanga inkingo ku baturage, kuri iyi nshuro bakaba bashoboye guteranira hamwe mu gihe mu myaka ibiri ishize bitashobotse.

Bibutse by’umwihariko imiryango 20 yo muri ako gace yazimye, ndetse n’indi miryango ibarirwa mu ijana usanga yaragiye isigarana umuntu umwe warokotse.

Mu gihe hari abacyumvikana bahakana bakanapfobya Jenoside, Twagirimana wavuze mu izina ry’abarokotse bo ku musozi wa Nyiramatuntu yasabye ko amateka yaho yabungabungwa mu rwego rwo kugaragaza ibimenyetso bya Jenoside yahakorewe.

Ati “Turi imbuto nziza aho ziguye zigashibuka, zikera izindi mbuto nziza zitari ibihuhwe. Abarokotse Jenoside dufite umukoro ukomeye wo kurwanya no guhangana n’abapfobya Jenoside yakorewe Abatutsi mu 1994.”

Twagirimana yashishikarije urubyiruko by’umwihariko kumenya amateka y’u Rwanda, bakamenya imvo n’imvano ya Jenoside yakorewe Abatutsi, kugira ngo bamenye ukuri bityo ntibagwe mu bishuko by’abapfobya Jenoside, ahubwo bajye babanyomoza.

Twagirimana uhagarariye umuryango witwa Nyiramatuntu ku Ivuko

Yavuze ko bafitanye igihango n’imvura, amasaka n’urufunzo byabahishe, ndetse n’Inkotanyi zari zirangajwe imbere na Paul Kagame.

Ati “Turabashimira cyane kuko iyo mudakora iyo bwabaga, nta n’umwe wari kurokoka.”

Ibi bishimangirwa n’uwitwa Higiro Jean Damascene warokokeye mu rufunzo i Cyugaro aho bitaga muri CND. Avuga ko kurokokera muri ako gace bitari byoroshye kuko barwanye n’Interahamwe mu gihe cy’iminsi itatu guhera ku itariki 11 Mata 1994.

Interahamwe zabarushije ingufu, hanyuma abari bataricwa ku itariki 13 Mata 1994 bahungira i Ntarama, bakomeza kurwana n’abicanyi.

Muri uko kurwana ngo baje kwambura Interahamwe imbunda bayiha uwitwa Habarugira wari uzi kuyikoresha abarwanaho kugera ku itariki 30 Mata 1994, bituma bamwe barokoka, kuri ubu ndetse uwo Habarugira akaba yaragizwe Umurinzi w’igihango, ashimirwa ubwo butwari yagaragaje.

Nyuma yaho ingabo za RPF zaje kugera mu mujyi wa Nyamata, zimenya amakuru ko ku musozi wa Kayumba ndetse no mu rufunzo hakiriyo abantu, zihutira kubarokora.

Higiro Jean Damascene ari mu batabawe n’Inkotanyi tariki 15 Gicurasi 1994 zibasanze mu rufunzo, zibajyana i Nyamata.

Higiro Jean Damascene yashimiye Inkotanyi zabatabaye

Muri ako gace nta misozi miremire n’amashyamba menshi bihagaragara ku buryo byari gufasha abahigwaga kwihisha umwanzi. Higiro avuga ko iyo imvura yagwaga yatumaga babona agahenge kuko Interahamwe zajyaga kugama. Ikindi ngo cyabafashije ni ibihuru, amasaka n’urufunzo byafashije bamwe kurokoka kuko babyihishagamo.

Ati “Ni yo mpamvu tuvuga ko dufitanye igihango n’urufunzo n’amasaka n’ibihuru, ariko tukagirana igihango gikomeye n’ingabo zari iza RPF, kuko iyo zitinda kudutabara nibura hakiyongeraho icyumweru kimwe ukwa gatanu kukarangira, nta muntu n’umwe wari kuba akiriho.”

Abarokotse bo muri aka gace bashima muri rusange Leta yakomeje kubafasha na nyuma ya Jenoside, bamwe bariga, abandi bayoboka ibikorwa by’iterambere, abatishoboye barubakirwa, abari bakiri bato barakura ndetse bashinga imiryango, ubu bakaba bavuga ko bamaze kwiyubaka n’ubwo urugendo rukomeje.

Barasaba ko abari abakozi ba Caisse Sociale batahigwaga bajya batumirwa mu kwibuka

Kuba hari abantu bakoraga mu cyahoze ari Caisse Sociale yaje guhinduka Ikigo cy’igihugu cy’ubwiteganyirize (RSSB), batahigwaga muri Jenoside yakorewe Abatutsi, ariko bakaba badatumirwa mu gihe cyo kwibuka abo bakoranaga bishwe bazira ubwoko bwabo, niho imiryango y’abari abakozi ba Caisse Sociale ihera isaba ko nabo bajya batumirwa, kuko bafite byinshi byiza bazi kuri ba nyakwigendera bavuga nk’abantu bakoranye igihe.

Ubwo tariki 29 Mata 2022 hibukwaga ku nshuro ya 28 abari abakozi ba Caisse Sociale 19 bakoraga mu bice bitandukanye by’igihugu bishwe muri Jenoside yakorewe Abatutsi, Adelaide Gakwaya wari uhagarariye imiryango y’ababuze ababo bakoraga muri icyo kigo, yasabye ko abari abakozi bacyo batahigwaga bajya bahabwa umwanya mu gihe cyo kwibuka kuko hari byinshi bazi.

Yagize ati “Caisse Sociale yarimo abantu b’abagabo bangana na ba data, cyangwa se barumuna babo, ni abantu bakoranye umunsi ku munsi. Igihe mudutumira nibaza ko byaba byiza abo bantu nabo muzajya mubatumira, kuko barahari nanjye hari abo nzi, iyo jyewe mpagaze aha mvuga ababyeyi banjye, mba mvuga uburyo twabanye, mba nibuka ibyiza bankoreye”.

Gakwaya avuga ko abatarahigwaga bafite byinshi bavuga ku bishwe muri Jenoside

Yakomeje agira ati “Ariko abakozi bari aba Caisse Sociale babanye umunsi ku munsi, ibyo aribyo byose hari ubuhamya baba bagomba kutubwira, ntabwo mvuze ngo barabishe, ariko ukavuga imibanire y’umuntu, uko mwabanye, ni nabwo bwiyunge bwiza. Ndabibisabiye ubutaha ni mujya mudutumira nabo mujye mubaha umwanya, aho kugira ngo andebere kure, ngo ndi umwana wa Gakwaya, ahubwo ajye yumva ko hari igikorwa twese tugomba guhuriramo cyo kwibuka”.

Ibi ngo bizarushaho gushimangira inzira nziza y’ubumwe n’ubwiyunge, kuko biba bigaragara ko bafatanye urunana, bitandukanye n’uko bikorwa uyu munsi, kuko abenshi mu bakozi ba RSSB ari bashya batari bahari mu gihe cya Jenoside yakorewe Abatutsi.

Umuyobozi Mukuru wa RSSB, Regis Rugemanshuro, yemera ko bikwiye ko abari abakozi ba Caisse Sociale bakiriho bajya batumirwa mu gihe cyo kwibuka bagenzi babo bakoranaga bishwe.

Ati “Nibyo birakwiye abo bakoraga hano hashize imyaka myinshi, abenshi bagiye mu zabukuru (Retirement), kubabona no kubona umwanya wabo kugira ngo bagere hano cyane cyane nk’abashobora kuba bari mu Ntara, ntibiba byoroshye. Ariko icyo twabemereye ni uko tuzarushaho kubasaba kugira ngo bajye baza bifatanye natwe, niba binasaba ubufasha kugira ngo babashe kugera hano bikorwe, kuko nibwo tuzongera ingufu z’uko abashoboye bajya baza kwifatanya natwe”.

Umuyobozi Mukuru wa RSSB avuga ko bagiye kongera imbaraga muri gahunda yo gushaka abahoze ari abakozi ba Caisse Sociale bakajya batumirwa mu gihe cyo kwibuka

RSSB yanemeye ubusabe bw’imiryango ifite abavandimwe bishwe muri Jenoside yakorewe Abatutsi bakoraga muri Caisse Sociale, bwo kujya batumwaho no mu bindi bihe bitari ibyo kwibuka bakaganirizwa, ndetse n’abana bakiri bato batorohewe n’ubuzima bakagira uko bafashwa.

Iyo gahunda yitabiriwe n’Abanyarwanda n’inshuti zabo harimo na Minisitiri w’Intebe w’Igihugu cya Mali, Dr Choguel Kakola Maiga na Jean Pierre KARABARANGA, Ambasaderi w’u Rwanda mu Gihugu cya Senegal unashinzwe Ibihugu bya Mali, Gambia, Cabo Verde na Guinea Bissau.

Perezida w’Umuryango w’Abanyarwanda baba muri Mali, Madamu Alice Gasarabwe, yagarutse ku bukana Jenoside yakorewe Abatutsi yakoranywe aho yahitanye abantu basaga miliyoni mu minsi ijana gusa. Ubuzima bwabo mu gihe kinini bwari bwarateshejwe agaciro bazizwa gusa ko bavutse bitwa Abatutsi. Yagaragaje ko ubutegetsi bubi bwayoboye u Rwanda mbere ya Jenoside bwaranzwe no gutanga inyigisho mbi z’amacakubiri n’urwango, ari mu miryango, mu mashuri n’ahandi, aho bwateguye Jenoside bukanayishyira mu bikorwa. Abateguye Jenoside bakaba bageze ku cyiciro cyayo cya nyuma cyo kuyihakana, aboneraho gusaba abantu bose kwibuka igihe cyose no kurwanya ihakana n’ipfobya bya Jenoside yakorewe Abatutsi.

Ambasaderi w’u Rwanda muri Senegal, Jean Pierre KARABARANGA, unashinzwe ibihugu bya Mali, Gambia, Cabo Verde na Guinea Bissau, yagaragaje ko kwibuka ari umwanya wo guha icyubahiro inzirakarengane zishwe muri Jenoside yakorewe Abatutsi ukaba n’umwanya wo gufata mu mugongo abarokotse Jenoside yakorewe Abatutsi, aboneraho n’umwanya wo gushima ubutwari n’ubudaheranwa byabaranze. Yerekanye ko abacitse ku icumu babaye aba mbere mu gushyigikira gahunda za Leta harimo na gahunda y’ubumwe n’ubwiyunge byafashije gusana Igihugu no kubaka u Rwanda rushya.

Yagaragaje ko intero y’Abanyarwanda ari imwe ko Jenoside itazongera kubaho ukundi no kugira ishema ryo kuba Abanyarwanda. Yerekanye ko kuba Jenoside yakorewe Abatutsi yarakozwe amahanga arebera, byerekana guteshuka k’Umuryango mpuzamahanga ku nshingano zawo. Inshingano yo kwibuka Jenoside yakorewe Abatutsi ni bumwe mu buryo bwo gukumira Jenoside n’ahandi hose ku isi. Yashimiye ingabo zari iza RPF-INKOTANYI na Perezida Paul Kagame wari uziyoboye bahagaritse Jenoside yakorerwaga Abatutsi bakanabohora Igihugu. Yasabye urubyiruko kwigira ku mateka y’u Rwanda biha intego y’uko Jenoside yakorewe Abatutsi mu Rwanda nta handi yazakorwa.

Umushyitsi mukuru muri gahunda yo Kwibuka ku nshuro ya 28 mu Gihugu cya Mali, Minisitiri w’Intebe wa Mali, Dr Choguel Kakola Maiga yagaragaje ko gahunda yo kwibuka Jenoside yakorewe Abatutsi Igihugu cye cyayigize iyacyo kuko uko umwaka utashye bifatanya n’Abanyarwanda batuye muri Mali. Yagaragaje ko kwifatanya n’Abanyarwanda ari ikimenyetso cy’umubano ukomeye hagati y’ibihugu byombi n’ababituye, bahuriye ku ndangagaciro z’ubutabera, ubwisanzure, kwihesha agaciro n’amahoro. Minisitiri w’Intebe wa Mali yagaragaje ko inzibutso za Gisozi, Murambi, Nyamata, Bisesero, Nyarubuye na Ntarama n’ahandi hose mu Gihugu zigaragaza neza amateka mabi u Rwanda rwanyuzemo no gutsindwa k’Umuryango Mpuzamahanga. Yagaragaje ko magingo aya hakwiye gushyirwa imbaraga mu gukomeza gahunda yo kwibuka, kurwanya ihakana n’ipfobya bya Jenoside, kurwanya umuco wo kudahana, gushimangira ubumwe n’ubwiyunge.

Minisitiri w’Intebe yashimye ubuyobozi bw’u Rwanda agaragaza ko u Rwanda ari ishema rya Afurika bishingiye ku byagezweho muri iyi myaka harimo iterambere ry’ubukungu, imiyoborere myiza, ubwiyunge n’uburinganire hagati y’abagabo n’abagore n’icyerekezo rufite. Yagaragaje ko Abanya-Mali bashima ubudaheranwa bw’Abanyarwanda kuko bugaragaza ibyo Ibihugu bya Afurika bifitiye ubushobozi mu gihe bifite abayobozi beza. Yavuze ko u Rwanda ari urugero rwiza rwo kuzuka no kugira icyerekezo gihamye kuko rwabashije komora ibikomere bya Jenoside no guhangana n’ihungabana byatewe na Jenoside.

Minisitiri w’Intebe wa Mali, Dr Choguel Kakola Maiga, yanatanze ubutumwa yahawe na Perezida wa Mali, Col. Assimi GOITA yageneye mugenzi we w’u Rwanda Paul KAGAME bwo kwifatanya na we n’Abanyarwanda bujyanye no kubafata mu mugongo no kwifatanya na bo muri ibi bihe bikomeye byo kwibuka ku nshuro ya 28 Jenoside yakorewe Abatutsi mu Rwanda mu 1994.

Ni inkuru dukesha Ambasade y’u Rwanda muri Senegal

Bacanye urumuri rw’ikizere

Iyo gahunda yitabiriwe n’abarimu n’abanyeshuri bo muri iyo Kaminuza n’abo mu bigo bituranye bagera kuri 400, n’Abanyarwanda n’inshuti z’u Rwanda batuye muri Senegal, ikaba yaratanzwemo ikiganiro kuri Jenoside yakorewe Abatutsi mu 1994 n’abanditsi barimo Boris Boubacar DIOP wo muri Senegal na Koulsy LAMKO wo muri Tchad.

Ambasaderi w’u Rwanda muri Senegali, Jean Pierre Karabaranga, yasobanuriye abarimu, abanyashuri bari bateranye ko Jenoside yakorewe Abatutsi mu Rwanda, yateguwe igihe kinini inageragezwa mu bihe bitandukanye kugeza ishyizwe mu bikorwa mu 1994.

Yagaragaje ko Jenoside yakorewe Abatutsi yakozwe n’abantu babanaga hafi cyane n’abishwe, kuko ni abo biganaga bari mu kigero cy’abitabiriye ikiganiro, abo bakoranaga mu mirimo isanzwe ya buri munsi harimo ndetse n’abarimu ba Kaminuza.

Amb Karabaranga (hagati) n’abanditsi Boris Boubacar Diop na Koulsy Lamko mu gihe cy’umunota wo kwibuka

Yagaragaje ko muri Jenoside yakorewe Abatutsi hanakozwe amahano atagira uko avugwa, aho umubyeyi yihekuraga akica abana be bwite cyangwa akabicisha cyangwa akabikorera uwo bashakanye. Ibyo bigaragaza uko ubuyobozi bubi bwari bwaracengeje urwango n’amacakubiri mu Banyarwanda.

Ubutegetsi bubi bwo kuri Repubulika ya Mbere n’iya Kabiri bwari bwarahinduye Abatutsi ibicibwa, bamburwa uburenganzira mu Gihugu ndetse kugeza n’aho batagifatwa nk’ikiremwamuntu babita inzoka cyangwa inyenzi.

Urwo rwango n’amacakubiri byabibwe mu gice kimwe cy’Abanyarwanda, nibyo byihutishije Jenoside yakorewe abatutsi aho mu minsi ijana gusa hishwe abasaga miliyoni bazira gusa uko baremwe.

Yashimiye ingabo zari iza RPF-Inkotanyi na Perezida Paul Kagame wari uziyoboye, bahagaritse Jenoside yakorerwaga Abatutsi bakanabohora Igihugu. Yasabye urubyiruko kwigira ku mateka y’u Rwanda biha intego y’uko Jenoside yakorewe Abatutsi mu Rwanda nta handi yazakorwa.

Boris Babacar DIOP, Umwanditsi wo muri Senegal wanditse igitabo ku mateka ya Jenoside i Murambi (Murambi, le Livre des Ossements), yagaragaje ko Jenoside yakorewe Abatutsi yateguwe n’inzego zinyuranye zo mu Gihugu kugeza no ku banyamadini, bikaba biri mu byayihaye ubukana.

Aha yatanze urugero rwa Musenyeri Augustin Misago wagarutsweho n’abarokokeye mu yari Gikongoro, ahayoborwaga n’uwo Musenyeri kuko yari yarabijeje kubarindira umutekano mu rwego rwo kubabuza guhungira mu Gihugu cy’u Burundi, kandi bari bamufitemo icyizere nk’uwihaye Imana.

Boris DIOP yagarutse no ku bakomeje guhakana no gupfobya Jenoside yakorewe Abatutsi. Yerekanye ko yageze mu Rwanda nyuma y’imyaka ine habaye Jenoside, akavugana n’abantu benshi ndetse agakora n’ubushakashatsi kandi ko byose bigaraza ko Jenoside yabaye kandi ko yateguwe hagamijwe kurimbura abatutsi.

Asanga abayihakana n’abayipfobya bidatangaje kuko bayigizemo uruhare kandi abategura Jenoside bayikora kabiri;, ubwa mbere bayishyira mu bikorwa, ubwa kabiri bakayihakana bemeza ko ntayabaye.

Koulsy LAMKO, umwanditsi ukomoka mu Gihugu cya Tchad, na we wabaye mu Rwanda nyuma ya Jenoside yakorewe Abatutsi, yibanze cyane ku mateka y’u Rwanda kuva mbere y’umwaduko w’Abazungu kugera mu 1994. Yagaraje ko Abanyarwanda bagiraga amoko gakondo, ibyiciro byose byari bihuriyeho kandi babanaga neza, bagakorera hamwe, bakemera Imana imwe, bakagira Umwami umwe, bakagira umuco umwe, bakanavuga ururimi rumwe.

Abanyeshuri bahawe impano y’igitabo "Murambi: le livre des Osements"

Ibyo byose byaje guhindurwa n’abakoloni ubwo babacagamo ibice kugira ngo babategeke. Iyo politiki mbi y’ivanguramoko yashimangiwe ndetse irushaho kugira ubukana kuri Repubulika zasimbuye abakoloni, ari nazo zatangije ubwicanyi mu 1959 bukomeza gukorwa mu bihe bitandukanye kugeza mu 1994.

Yves Munana Rwogera, Perezida wa IBUKA Senegal, yashimiye abatanze ikiganiro, anaboneraho gushimira urubyiruko rwari rwahahuriye kuko aribo ejo hazaza ha Afurika, aboneraho no kubatumira mu bikorwa IBUKA Senegal irimo gutegura kugira ngo ibyabaye mu Rwanda bitazongera kuba ukundi.

Yagaragaje ko ibyo byashoboka ari uko urubyiruko rushyize ingufu mu bikorwa byo kwibuka Jenoside yakorewe Abatutsi mu Rwanda mu 1994.

Yves Munana Rwogera, Perezida wa IBUKA Senegal

Umuyobozi wa IBUKA mu Karere ka Rwamagana, Musabyeyezu Dative

Yabitangaje kuri uyu wa Gatanu tariki ya 29 Mata 2022, mu muhango wo kumurikirwa urwibutso rwa Muhazi rwubatswe ku bufatanye bw’abarokotse, Akarere ka Rwamagana n’umufatanyabikorwa Crystal Ventures.

Uru rwibutso ruherereye mu Kagari ka Kabare Umurenge wa Muhazi rukaba rubitse imibiri 9,023 y’Abatutsi bishwe muri Jenoside mu cyahoze ari Komini Muhazi muri za Murambi, Kitazigurwa na Kabare.

Umuyobozi wa IBUKA mu Karere ka Rwamagana, Musabyeyezu Dative, yashimye Crystal Ventures kuba yarahaye agaciro ababo bishwe muri Jenoside ikabubakira urwibutso rutuma baruhukira ahantu heza hasobanura amateka ya Jenoside.

Urwibutso rwa Muhazi rwamuritswe ku mugaragaro

Jenoside ikirangira habayeho igikorwa kitoroshye cyo kwegeranya imibiri y’Abatutsi yari icyandagaye hirya no hino bigizwemo uruhare n’abarokotse n’ubwo bari bagifite ihungabana.

Uyu muyobozi ashima Leta itarabatereranye ahubwo ikabafasha mu rugendo rwo kwiyubaka no gukira ibikomere byaba ibyo ku mubiri no ku mutima.

Urwibutso rwa Muhazi rwaje ruhuza izindi nzibutso ntoya urwa Kitazigurwa, Kabare na Murambi zidakoze neza ku buryo zihesha agaciro ababo ndetse n’indi mibiri yagiye iboneka.

Icyakora abarokotse ngo baracyafite intimba ku babo biciwe ku rusengero rwa EAR Paruwasi ya Nyagatovu (Midiho) kuko babuze imibiri yabo kugira ngo ishyingurwe, nk’uko Musabyeyezu yabisobanuye.

Ati “Sinabura kuvuga ku ntimba ikiri mu mitima y’abarokotse cyane cyane muri iki gice cya Muhazi ugaruka za Kitazigurwa hari abatakarije ababo umubare utari mutoya ahari Kiliziya y’Abaporoso ya Nyagatovu ahitwa Midiho, haguye imbaga igera ku bantu 200 nk’uko tujya tubibwirwa mu buhamya ariko kugeza na n’ubu nta n’umubiri n’umwe wari waboneka ngo ushyingurwe.”

Aho Midiho ngo hiciwe Abatutsi bo mu Murenge wa Muhazi muri Rwamagana n’abandi bari baturutse mu Murenge wa Mukarange mu Karere ka Kayonza. Abahaniwe ibyaha bya Jenoside bahakoreye na bo ngo bakomeje kwinangira banga gutanga amakuru kuri iyo mibiri.

IBUKA muri Rwamagana isaba ubuyobozi kubafasha mu biganiro n’abagize uruhare muri ubwo bwicanyi bwahakorewe (Midiho) bakaba batanga amakuru imibiri ikaboneka igashyingurwa kuko byaruhura imitima y’ababo.

Tariki ya 1 Gicurasi 2022 nibwo ibikorwa byo kwibuka Jenoside yakorewe Abatutsi mu mujyi wa Gisenyi bizakorwa ku rwibutso rwa Komini Rouge rushyinguyemo imibiri y’abazize Jenoside yakorewe Abatutsi 5303 benshi bishwe bavuye muri Komini Rubavu.

Amateka ya Jenoside muri Gisenyi agaragaza ko ubwicanyi no gutoteza Abatutsi byatangiye kuva mu 1990, bijyana n’ibikorwa byo gufunga ibyitso ndetse benshi baburirwa irengero.

Bamwe mu bari bafungiye muri gereza ya Gisenyi bavuga ko hari abishwe bagashyingurwa mu byobo bitazwi biri mu irimbi riri ahashyizwe urwibutso rwa Komini Rouge.

Amateka agaragaza ko tariki ya 7 Mata 1994, mu mujyi wa Gisenyi, Abatutsi batangiye kwicwa mu ijoro ryo ku ya 6 Mata 1994, nyuma y’amasaha y’ihanurwa ry’indege yarimo Perezida Habyarimana.

Mu buhamya Richard Mugenzi yahaye Dupaquier avuga ko mu ijoro ryo ku ya 6 Mata 1994 nka saa tanu z’ijoro Interahamwe ziyobowe na Bernard Munyagishari na Barnabe Samvura zaje mu kigo cyakorerwagamo imyitozo ya gisirikare cya Butotori zihasanga Lieutenant Bizumuremyi na Lieutenant-Colonel Anatole Nsengiyumva.

Mugenzi yatangaje ko Bernard Munyagishari na Barnabe Samvura binjiye mu biro bya Lieutenant Colonel Nsengiyumva bamarana na we umwanya munini, nyuma basohotse basanga izindi Nterahamwe zigera kuri magana abiri bari bazanye.

Mugenzi wari usanzwe akora akazi karebana n’itumanaho avuga ko Lieutenant Bizumuremyi yatanze amabwiriza ku nterahamwe zari hanze.

Agira ati: “Abasirikare bagiye ku kazi kabo ko kurwanya umwanzi, namwe muhite mujya gukora”.

Ubuhamya bwa Mugenzi bukomeza buvuga ko Bizumuremyi ari we watanze amabwiriza ko Abatutsi bazajya bafata bazajya kumwicira kuri Komini Rouge kandi ko bagomba gukora vuba, bagasaka ahantu hose ku buryo nta ‘Nyenzi’ isigara.

Mu mujyi wa Gisenyi, Abatutsi benshi batangiye kwicwa mu ijoro ryo ku itariki 6 rishyira iya 7 Mata 1994, harimo Rwemarika, Bwanafeza na nyiri hoteli yitwa Edelweiss.

Mu gitondo cya kare cyo ku itariki ya 7 Mata 1994, Interahamwe zari zamaze gushyira bariyeri ahantu hatandukanye mu mujyi wa Gisenyi kugira ngo hatagira Umututsi ubacika, harimo bariyeri yashizwe ahitwa « La Corniche » ugana ku mupaka uhuza Goma na Gisenyi, yari ikuriwe n’uwitwa Serushago Omar.

Bariyeri yo kuri “La Corniche” yashyizweho kugira ngo interahamwe zijye zifata Abatutsi bashaka guhungira muri Zayire kandi uwafatwaga bajyaga kumwicira ku irimbi ry’umujyi wa Gisenyi ryaje kumenyekana ku izina rya « Komini Rouge ».

Inyandiko ikubiyemo ibirego ku ruhare rwa Anatole Nsengiyumva muri Jenoside yakorewe Abatutsi, ivuga ko hagati y’ukwezi kwa Mata na Nyakanga 1994 Interahamwe zashyize bariyeri ahantu hatandukanye mu mujyi wa Gisenyi kugira ngo zibone uko zifata Abatutsi n’ibyitso.

Izi nyandiko zivuga ko Lieutenant Colonel Anatole Nsengiyumva yazengurukaga mu mujyi wa Gisenyi, aho yageraga kuri bariyeri, yabazaga Interahamwe uko akazi kameze.

Amatsinda y’Interahamwe cyangwa abasirikare yasimburanaga kuri Komini Rouge uhereye ku ya 7 Mata kugera ku ya 17 Nyakanga 1994, ubwo ingabo za RPF-Inkotanyi zamaraga gufata umujyi wa Gisenyi, Interahamwe zigahunga.

Nsengiyumva Anatole yahamwe n’icyaha cya Jenoside n’ibindi byaha byibasiye inyoko muntu kubera uruhare yagize mu rupfu rw’Abatutsi bo mu Mujyi wa Gisenyi, kuri kaminuza ya Mudende na Paruwasi ya Busasamana.

Mu mujyi wa Gisenyi ahiciwe Abatutsi benshi ni kuri “Komini Rouge”, ahaguye abarenga ibihumbi bitanu (5000) kandi benshi bavanywe muri Rugerero, muri Byahi, muri Nyundo no mu mujyi wa Gisenyi.

Bamwe mu biciwe kuri Komini Rouge bagiye bahambwa batarashiramo umwuka, bakabashyira mu cyobo cyari gihari, cyacukuwe mbere yo kubica gicukuwe n’abagororwa ba gereza ya Gisenyi.

Uwitije Divine ushizwe imiyoborere muri Hot Point yavuze ko batekereje kuza gusura uru rwibutso mu rwego rwo gukomeza gusobanurira abakiri bato ububi bwa Jenoside yakorewe Abatutsi no kubategura kuzaharanira amahoro kandi bagakomeza gusigasira ibyo u Rwanda rumaze kugeraho.

Yagize ati “Muri Hot Point abenshi dukorana ni urubyiruko n’abanyamahanga. Abenshi muri bo bavutse nyuma ya Jenoside, ni byiza rero ko tumenya amateka yabaye kugira ngo tuzamenye n’uko tuzitwara mu gihe kizaza”.

Yakomeje agira ati “Twigiyemo kandi ko tugomba kuba umuntu umwe kuko Imana yaturemye turi umuntu umwe twize kandi ko tugomba kubungabunga ibyo Igihugu cyacu kimaze kugeraho twigira ku mateka mabi yabayemo”.

Uwamahoro Cathia wamamaye mu gukina Criquet na we ni umukozi wa Hot Point. Avuga ko gusura urwibutso rw’amateka ya Jenoside yakorewe Abatutsi bifasha urubyiruko kubona ukuri ku byabaye, bigatuma nta muntu wapfobya Jenoside kandi bariboneye ukuri ku byabaye.

Yagize ati “bidufasha kumenya aho tuvuye n’aho tujya nk’urubyiruko cyane ko abenshi mu bishoye muri Jenoside barimo n’urubyiruko. Uwamaze kwibonera ibyabaye bifasha kudaha amatwi abapfobya n’abahakana Jenoside, bigatuma nta n’uwagushuka ngo agusubize mu macakubiri. Bidufasha kandi kwigisha abakiri bato ngo bakuremo amasomo azatuma amahano nk’ayo atazongera ukundi”.

Uwamahoro Cathia yanongeyeho ko gusura inzibutso bifasha abanyamahanga na bo kumenya neza amateka y’ibyabaye, atari ibyo babwiwe cyangwa basomye.

Bamwe mu bashyitsi bari baje kwifatanya n’Abanyaruhashya kwibuka

Byatangarijwe mu gikorwa cyo kwibuka ku nshuro ya 28 Jenoside yakorewe Abatutsi mu yahoze ari Komine Ruhashya ubu ni mu Murenge wa Ruhashya, aho abarokotse Jenoside bagaragaje ko bifuza ko imibiri y’ababo ishyinguye hirya no hino yakomeza kuzanwa mu nzibutso zitunganyije neza, kandi ahari imva zishobora kwangirika hagakomeza gushyirwa imbaraga mu kuhatunganya.

Umuyobozi w’Umuryango IBUKA uharanira inyungu z’abarokotse Jenoside yakorewe Abatutsi mu Karere ka Huye, asobanura ko n’ubwo barimo gutegura kubaka urwibutso rw’amateka, hari ahandi Abatutsi bagiye bicirwa nko ku musozi wa Rubona hakwiye gushyirwa ikimenyetso cy’amateka.

Avuga kandi ko mu Murenge wa Ruhashya hari imibiri ikwiye gushyingurwa neza ku buryo asanga harebwa uko urwibutso rwa Ruhashya rwagurwa kugira ngo iyo mibiri ishyingurwe neza, ari nako akomeza gusaba abafite amakuru y’ahajugunywe imibiri y’abishwe muri Jenoside kuyatanga na yo igashyingurwa.

Umuyobozi wa IBUKA mu Karere ka Huye asaba ko ku rwibutso rwa Ruhashya hanozwa uburyo bwiza bwo gushyingura imibiri y’abazize Jenoside

Agira ati “Kwibuka tuzabikomeza kugira ngo isano y’abacu dufitanye itazasibangana. Turifuza ko imibiri iri mu rwibutso rwa Ruhashya idashyinguye neza habaho kwagura urwibutso ho gato kugira ngo na yo ishyingurwe neza mu gihe twitegura kugira urwibutso rumwe rw’amateka”.

Umuyobozi w’Akarere ka Huye, Ange Sebutege, avuga ko buri murenge ufite urwibutso rwa Jenoside, ku buryo hari n’ahari izirenze ebyiri bigatuma nibura mu mirenge 14 igize Akarere harimo inzibutso 18, ari zo zigiye guhuzwa kugira ngo amateka yihariye ku habereye ubwicanyi abikwe hamwe, abasura Akarere babashe kuyabona.

Agira ati “Kugeza ubu ntabwo twabuze aho dushyingura imibiri y’abazize Jenoside ahubwo turakomeza gusaba abafite amakuru y’ahari imibiri kuyatanga, ariko mu mwaka utaha w’ingengo y’imari turateganya gutangira umushinga wo kubaka urwibutso rw’Akarere ku buryo ruhurizwamo amateka ya Jenoside mu cyahoze ari Butare”.

Umuyobozi w’Akarere ka Huye avuga ko mu mwaka utaha hatangizwa umushinga wo kubaka urwibutso rw’amateka ku rwego rw’Akarere

Yongeraho ati “Turateganya kandi kugenda tuganira n’abarokotse Jenoside kugira ngo twumvikane uko izo nzibutso zahurizwa hamwe bitewe n’amateka, kandi hakenewe umusaznu wa buri wese kugira ngo urwibutso rw’amateka ruzubakwe mu buryo bunyuze buri wese”.

Senateri Nkurunziza Innocent wari waje kwifatanya n’Abanyaruhashya kwibuka ku nshuro ya 28 Jenoside yakorewe Abatutsi, avuga ko amateka ya Jenoside abitse neza azafasha urubyiruko kubona amakuru rukeneye kuri Jenoside.

Agira ati “Hari amahirwe menshi, imbaraga zirahari, kugira ngo ejo hazabe heza, ntihazagire uwongera kuzira uko yaremwe n’uko yavutse ahubwo Abanyarwanda bashyire imbaraga hamwe bubake Igihugu mu bushobozi buhari tumurikiwe n’amateka yacu”.

Abarokotse Jenoside i Ruhashya bagaragaza ko bifuza ko urwibutso rwa Ruhashya rwagurwa kugira ngo bashyingure neza ababo

Avuga ko aho ingengabitekerezo ya Jenoside yanyura hose buri wese akwiye kuyirwanya kugira ngo ejo habereye u Rwanda hazarusheho kuba heza, buri wese ari umusemburo wa mugenzi we mu iterambere no kubaho neza.

Bashyira indabo ku rwibutso

BashyinguYe imibiri 65 yabonetse

Babisabye ubwo bibukaga ku nshuro ya 28 Jenoside yakorewe Abatutsi, bunamira abasaga ibihumbi 63 baruhukiye mu Rwibutso rwa Ruhango mu Murenge wa Kinazi, aho banashyinguye imibiri 65 yabonetse mu murenge wa Kinazi na Ntongwe.

Abarokotse Jenoside yakorewe Abatusti ku Mayaga bagaragaza ko hakorewe ubwicanyi ndengakamere, kuko ari hamwe mu hicirwaga Abatutsi bakababaga bakabakuramo imitima ikotswa ku mbabura abicanyi bakarya.

Amayaga, ahahoze ari Komini Ntongwe n’inkengero zayo ubu ni mu Mirenge ya Kinazi na Ntongwe. hahoze ari Komini Ntongwe, yayoborwaga na Burugumesitiri Kagabo Charles ukomeje kwihishahisha mu bihugu by’amahanga.

Minisitiri Gatabazi ashyira indabo ku rwibutso rwa Jenoside rwa Ruhango

Kagabo n’interahamwe bishe Abatusti kuva mu ijoro ryo ku wa 20 Mata 1994, ku munsi ukurikiyeho ku ya 21 Mata, biba nk’imperuka ku Batutsi bari bahungiye kuri komini Ntongwe, kuko ari bwo biciwe mu kibaya cya Nyamukumba hakarokoka bake cyane.

Abarokotse ku Mayaga bavuga ko hari ibimeyetso by’amateka ya Jenoside bihari, ariko bidashobora gusurwa cyangwa ngo bifashe kumenya amateka, kuko ntaho bifite bibikwa, ndetse hakaba hari n’ahantu hafite umwihariko wa Jenoside hatarashyirwa ibimenyetso byayo bikaba byatuma bisibangana.

Umuyobozi wa AGSF, Evode Munyurangabo, avuga ko bimwe muri ibyo bimenyetso harimo ibikoresho byifashishwaga mu kwica, imyenda y’abishwe n’amakuru arimo n’ubuhamya bw’abarokotse Jenoside bidashobora gusurwa.

Agira ati “Duhora dusaba ariko noneho mu izina ry’abarokotse Jenoside hano ku Mayaga, mwatwubakira inzu y’amateka kugira ngo tubone aho twigishiriza n’aho tuganiririza urubyiruko amateka yaranze Jenoside hano ku Mayaga”.

Avuga kandi ko hari ibimenyetso byashyirwa ahakorewe Jenoside nko mu kibaya cya Nyamukumba hiciwe Abatutsi benshi, icyobo cya CND kiri ku Rutabo gifatwa nka kimwe mu bimenyetso bigaragaza itegurwa n’ishyirwa mu bikorwa rya Jenoside.

Hari kandi imisozi nka Nyirandunga, Ntungamo ya Kayenzi, Gacuriro ya Nyakabungo n’ahandi habereye ubwicanyi ndengakamere no kwirwanoho ku Batutsi, naho bifuza ko hashyirwa ibimenyetso by’amateka kugira ngo ibyahabereye bitazasibangana.

Ndemezo anagaragaza ko hari ahantu mu masangano y’imihanda hafi y’ikigo nderabuzima mu gasantere, Abarundi bokerezaga imitima y’Abatutsi bishe bakayirya, ariko nta kimenyetso gihari.

Umuyobozi w’Akarere ka Ruhango, Habarurema Valens, nawe agaragaza ko bifuza kubaka inzu y’amateka ikomeye ahahoze komini Ntongwe, akifuza ko Minisiteri y’Ubutegetsi bw’Igihugu yabakorera ubuvugizi ku ngengo y’imari y’akarere umwaka utaha ibikorwa bikaba byatangira.

Minisitiri w’Ubutegetsi bw’Igihugu, Gatabazi JMV, avuga ko kubaka ibimenyetso n’inzu by’amateka ya Jenoside yakorewe Abatutsi ku Mayaga ari intambwe ikwiye guterwa, bikava mu magambo bigashyirwa mu bikorwa, kugira ngo ibyahabereye bibashe kwigisha abandi kandi ibimenyetso bibungabungwe neza.

Minisitiri Gatabazi asaba ko kubaka inzu y’amateka byava mu magambo bigashyirwa mu bikorwa

Asaba ko Akarere ka Ruhango kateganya ku ngengo y’imari yako ibyo kubaka inzu y’amateka n’ibyo bimenyetso bya Jenoside, kandi kagakorana na Minisiteri y’Ubumwe bw’Abanyarwanda bikihutishwa.

Agira ati “Ibyo kubaka ibimenyetso by’amateka n’inzu y’amateka ndasaba ko byava mu magambo bigashyirwa mu bikorwa, kuko ni yo nzira idufasha kubungabunga amateka ya Jenoside, kandi bikadufasha kubika ayo makuru abana bacu n’abazadukomokaho bigireho”.

Minisitiri Gatabazi agaragaza ko kuzura kw’inzu y’amateka kandi ari kimwe mu byafasha ababyeyi gusobanurira abana amateka ya Jenoside yakorewe Abatutsi, bagakura barushaho gukumira no kurwanya ingengabitekerezo ya Jenoside.

Bashyinguye imibiri yabonetse

Babisabye ku wa 24 Mata 2022, mu muhango wo kwibuka ku nshuro ya 28 Jenoside yakorewe Abatutsi mu 1994, ahanashyinguwe imibiri 160 yabonetse.

Umuyobozi w’Akarere ka Ngoma, Niyonagira Nathalie, yavuze ko Umurenge wa Rukumberi ufite amateka yihariye ya Jenoside, kuko ari kimwe mu bice by’u Rwanda byageragerejwemo Jenoside kuva kera, ibi bikaba byaragizwemo uruhare cyane n’abari abategetsi muri ako gace bateguye bakanashyira mu bikorwa Jenoside.

Mu bari ku isonga ngo hari Mutabaruka Sylvain wari Umudepite akaba yarigeze no kuba burugumesitiri w’iyari Komine Sake, Pasiteri Birindabagabo Jean Paul wari uhagarariye impuzamatorero mu yahoze ari Komine Sake, Twahirwa François wigeze kuba burugumesitiri wa wa Sake nyuma akaza kujyanwa gukora muri Perezidansi, Karegeya Augustin wari Perezida w’Interahamwe muri Sake, Rutayisire Ernest wari burugumesitiri mu gihe cya Jenoside n’abandi.

Uwavuze mu izina ry’bashyingura, Kabandana Callixte, yagaragaje ko n’ubwo hari benshi bahanwe kubera Jenoside bakoze muri Rukumberi, hari nanone abari ku isonga bataraboneka.

Avuga ko ababonetse bagacirwa imanza ari Pasiteri Birindabagabo Jean Paul na Twahirwa François.

Mu bataraboneka yavuzemo Mutabaruka Sylvain, Rutayisire Ernest na Karegeya Augustin wari Perezida w’Interahamwe.

Ati “Abantu babiri bonyine na babandi bavuzaga induru n’abavuzaga amafirimbi ariko abayobozi babo ntibaraboneka. Twifuzaga ko byashyirwamo imbaraga kandi turabizeza ko dufatanyije n’abarokotse hari amakuru amwe n’amwe tugenda twumva hirya no hino, ku buryo abo bantu bafatwa.”

Yakomeje agira ati “Bafite imiryango inaha baravugana nayo, aho bari naho harakekwa nasabaga y’uko abo bantu batuzengereje, baduteye agahinda nk’ako mwabonye ahangaha inzego zose bireba twafatanya tukareba uko twakemura icyo kibazo, nk’ayo makuru twumva kuri ba Jean Paul tukayumva no kuri Mutabaruka.”

Umunyamabanga wa Leta muri Minisiteri y’Uburezi, Irere Claudette, yasabye abafite amakuru y’ahajugunywe imibiri gutera intambwe bakahagaragaza, kugira ngo nabo bashyingurwe mu cyubahiro.

Urwibutso rwa Jenoside rwa Rukumberi ruruhukiyemo imibiri y’Abatutsi bishwe muri Jenoside 42,500.

Nk’uko byasobanuwe na Mukarwaka Angelique, yavuze ko abibukwa b’abanyantege nke ari abari abasaza n’abakecuru batabashaga kugenda, ahubwo basindagizwaga n’abuzukuru.

Abandi ni abari bafite ubumuga butandukanye harimo abatabona, abari bafite ubumuga bwo mu mutwe, ubw’ingingo n’ubundi ku buryo batabashakaga kumenya umwanzi ko aje kubagirira nabi cyangwa ngo babashe no guhunga.

Yavuze ko aba bose Interahamwe zabishe urw’agashinyaguro zibambura ubuzima.

Mu buhamya bwe, Xavera Nyinawinkindi yavuze ko ubwicanyi bugitangira Abahutu bari bahunganye n’Abatutsi muri Chapelle banze kwitandukanya maze Interahamwe ziragenda, zigaruka undi munsi Abahutu bamaze kuvamo batashye.

Rukumberi nk’agace kari gakikijwe n’ibiyaga nka Mugesera ndetse n’umugezi w’Akagera ngo byagoye benshi guhunga kuko izindi nzira zose zari zamaze kugotwa n’Interahamwe.

Yavuze ko mu bwicanyi bw’i Rukumberi Interahamwe zari zaratoje n’abana ku buryo na bo hari abijanditse mu bwicanyi.

Undi mwihariko w’ubwicanyi bw’i Rukumberi ngo ni uburyo abantu bishwemo kuko Abarundi bazanye uburyo bushya bwo kwica umuntu babanje kumubabaza cyane.

Ati “Impunzi z’Abarundi zabwiye Interahamwe ngo uwica Umututsi ntahorahoza ako kanya ahubwo amutema uyu munsi ejo akagaruka akongera akamutema nibwo uba umwishe neza.”

Kubera ikiyaga cya Mugesera, Interahamwe ngo zifashishije ubwato zigaturuka mu gace ka Bicumbi (Rwamagana) zikaza kwica Abatutsi i Rukumberi.

Xavera Nyinawinkindi yashimye Ingabo zahoze ari iza RPA zabarokoye mu gihe bumvaga nta cyizere cy’ubuzima basigaranye.

Ni umuhango witabiriwe na Ambasaderi w’u Rwanda muri Suwede, Diane Gashumba, umunyamabanga muri Minisiteri y’ububanyi n’Amahanga ya Suwede Bjorg Sandkjaer, na Chantal Muhigana akaba ari Umuyobozi w’umuryango ‘Urukundo’ ndetse n’abandi batandukanye barimo inshuti y’u Rwanda Terje Osmundsen.

Mu buhamya bwatanzwe n’umwe mu barokotse Jenoside yakorewe Abatutsi mu 1994, yavuze ko Jenoside yakoranywe ubugome bw’indengakamere ndetse asaba ko habaho gukurikirana no guhana abagihakana bakanapfobya Jenoside yakorewe Abatutsi.

Madamu Chantal Muhigana uyobora umuryango ‘Urukundo’ yavuze ko gusaba abantu kureka guhakana Jenoside yakorewe Abatutsi atari ukubabuza ubwisanzure bwo kuvuga.

Yagize Ati: “Gusobanura neza guhakana Jenoside ntabwo bigamije kugabanya ubwisanzure bwo kuvuga ahubwo bigabanya ikwirakwizwa ry’ingengabitekerezo ya Jenoside nyuma ihinduka ibikorwa bya Jenoside.”

Chantal Muhigana yakomeje ashimira ubuyobozi bw’Igihugu cy’u Rwanda burangajwe imbere na Perezida Paul Kagame, ndetse ashimira byimazeyo urubyiruko rwari mu ngabo za RPA batanze ubuto bwabo bagakiza ubuzima bwa benshi.

Terje Osmundsen, wavuze mu izina ry’Inshuti z’u Rwanda, yashimye aho igihugu cy’u Rwanda kiri uyu munsi ndetse ashimangira ko ibikorwa ngarukamwaka byo kwibuka, isi ikwiye kubiheraho yigira ku mateka mabi u Rwanda rwanyuzemo.

Umunyamabanga muri Minisiteri yUbubanyi n’Amahanga ya Norvège, Bjorg Sandkjaer, yavuze ko imiryango mpuzamahanga kuba yarananiwe guhagarika Jenoside yakorewe Abatutsi ari igikomere mu maso y’ikiremwamuntu.

Ati: “Mu 1994, imiryango mpuzamahanga kunanirwa guhagarika Jenoside ni i nkovu mu maso y’ubumuntu. Amahanga arasabwa gufata ingamba zo kurwanya inzangano, n’ibikorwa byibasira abantu cyangwa amatsinda.”

Ambasaderi Diane Gashumba wavuze nk’umushyitsi mukuru, yavuze ko Abanyarwanda bafite inshingano zo gusangiza inkuru z’ibyabayeho yaba ku miryango mpuzamahanga ndetse n’ibisekuruza bizakurikira kugira ngo Jenoside itazasubira ukundi.

Ati “Abanyarwanda bafite inshingano zo gusangiza inkuru zacu, ibisekuruza bizaza, imiryango mpuzamahanga kugira ngo ijambo ‘ntibizongere’ ribe impamo. Ntidushobora kwirara muri iyi nshingano kandi tugomba gucengeza iyi myumvire mu bisekuruza bizaza kuko tugifite ibiteye ubwoba byinshi.”

Yakomeje agira ati: “Twamaganye amagambo atesha agaciro kandi ahakana amateka ya Jenoside yakorewe Abatutsi. Tuvuze ‘Oya’ ku barenga ku kurwanya ukuri.”

Ambasaderi Diane Gashumba

Ambasaderi Diane Gashumba yavuze ko u Rwanda rutazigera rwemera ibikorwa by’abahakana Jenoside yakorewe Abatutsi ko bikomeza.

Yasoje agaragaza ko abahakana bagapfobya Jenoside yakorewe Abatutsi mu 1994 bagamije kubeshya no kugoreka amateka, no kutavuga ibintu uko biri.

Ati: “Tugomba kwiyemeza guhangana n’abahakana kandi tugaharanira ko batazigera babona urubuga.”

Minisitiri w’Ubuhinzi n’Ubworozi, Dr Geraldine Mukeshimana mu gikorwa cyo kwibuka abari abakozi ba MINAGRI n’ibyari ibigo biyishamikiyeho

Minisitiri w’Ubuhinzi n’Ubworozi, Dr Geraldine Mukeshimana yabitangaje
ku wa Gatanu tariki 22 Mata 2022, mu gikorwa cyo kwibuka abari abakozi ba MINAGRI, abakoreraga ibigo byari biyishamikiyeho bya ISAR, OCIR-Thé/Café, ndetse n’ab’imishinga inyuranye.

MINAGRI ivuga ko yiciwe abakozi barenga 800 mu 5,900 bayikoreraga kugeza mu 1994, abenshi bishwe ku kagambane k’abo bakoranaga kuko Jenoside ngo ari ho yateguriwe.

Dr Geraldine Mukeshimana avuga ko ubushakashatsi bakoze kuri Jenoside bwagaragaje ko muri Repubulika ya mbere n’iya kabiri, MINAGRI yatije umurindi politiki y’ivangura, iburizamo uburenganzira bw’Abatutsi harimo no kubambura ubutaka n’amatungo.

Dr Mukeshimana avuga ko muri MINAGRI harimo bamwe mu batangije imitwe yitwara gisirikare mu nganda z’icyayi na kawa, muri ISAR no mu mushinga wa PDH kuko abayobozi babyo bashyize mu myanya Interahamwe mu bice bitandukanye by’Igihugu, mu rwego rwo kumenyera uturere zizakoreramo Jenoside.

Minisitiri w’Ubuhinzi n’Ubworozi yagize ati "Uwo mugambi mubisha wari waratojwe abakozi b’ibyo bigo, ndetse n’ibikoresho byabo(ibyifashishwa mu buhinzi n’ubworozi) byarakoreshejwe".

Umutangabuhamya muri iki gikorwa cyo #Kwibuka abari abakozi ba MINAGRI yari Yves Mugisha ukomoka mu Karere ka Kirehe, akaba yasobanuye uburyo se bamushinjaga gutunga imbunda ntayo agira, ariko impamvu ya nyayo ngo yari uko yari Umututsi.

Mugisha wari ufite imyaka icyenda mu 1994, yarokokanye na bashiki be babiri bamukurikira ariko ababyeyi babo bombi(se yari umukozi wa MINAGRI) barishwe.

Mugisha wafashe inshingano za kibyeyi akiri muto, yaje kurera bashiki be barakura, babifashijwemo na Leta babashije kwiga no kwibeshaho, we kugeza ubu akaba yaranashinze ikigo gifasha Abanyamahanga baza mu Rwanda kumenya uko bakorera mu Muryango wa Afurika y’Iburasirazuba(EAC).

Umukambwe Tito Rutaremara watanze ikiganiro kigira kiti "Twahisemo kuba umwe", avuga ko mu byatuma Abanyarwanda batongera gusubira mu macakubiri ari ukubereka ko bose ari bene Gihanga atari bene Adamu(kuko uyu ngo ari umukurambere w’Abayahudi gusa).

Inzego zitandukanye zirimo na MINAGRI zirashishikariza urubyiruko cyane cyane kwamagana abakomeje gupfobya no guhakana Jenoside yakorewe Abatutsi.

Umuyobozi Mukuru wa Banki ya Kigali, Dr Diane Karusisi yunamiye abakozi 15 bahoze bakorera BK

Nyuma yo gusubiza icyubahiro abahoze ari abakozi ba BK, umuhango wo kwibuka wahise ukomereza ku rwibutso rwa Jenoside rwa Kigali, na ho hashyirwa indabo aharuhukiye imibiri isaga ibihumbi 250 y’Abatutsi biciwe mu bice bitandukanye by’Umujyi wa Kigali.

Umuyobozi wungirije w’umuryango wita ku nyungu z’abarokotse Jenoside yakorewe Abatutsi (IBUKA), Freddy Mutanguha, avuga ko nk’abantu barokotse Jenoside kwibuka babibonyemo ubuzima.

Ati “Twabibonyemo ubuzima kuko iyo wibuka uba uhaye agaciro gakomeye abacu bazize Jenoside yakorewe Abatutsi, bishwe bazira ubusa, bashinyaguriwe, bashyizwe mu nzuzi, mu migezi no mu misarane, ni henshi batahawe ako gaciro, ariko iyo tubibuka gutya, tuba tubasubije agaciro kabo, kuko bakambuwe, bakamburwa ubumuntu”.

Freddy Mutanguha avuga ko kwibuka bifasha abarokotse kudaheranwa n’agahinda

Akomeza agira ati “Kubibuka rero, tukanabibukira no ku rwibutso aho bashyinguye mu cyubahiro cyabo, dushobora kugenda tugashyiraho indabo, tukabunamira, tukabarinda, benshi tukabavugisha, ibyo byose ni byo byubaka ubuzima. Nyuma ya Jenoside iyo tugira ubuyobozi butaduha umwanya wo kwibuka ngo dushobore kuvuga agahinda kacu, abenshi mu barokotse Jenoside ubuzima bwari kuba bwarababihiye”.

Athanase Murengerantwari wari uhagarariye imiryango y’ababuze ababo bakoraga muri BK, avuga ko n’ubwo mu gihugu harimo ibigwari mbere ya Jenoside ariko bishimira ko cyanibarutse intwari zayihagaritse, kandi ngo imbuto zasigaye zarashibutse ku buryo abazishibutseho bazakomeza guharanira ubumwe bw’Abanyarwanda.

Ati “Turishimira ko imbuto zasigaye zashibutse, tunabishimira Imana, kandi bashimishwa n’uko babayeho. Intego yabo ni ukubaka Igihugu. Twese rero, ikigero buri wese arimo twibuke twiyubaka. Igihugu cyacu kidushishikariza kutarobanura abaturarwanda, icyo umuntu asabwa ni uko akorana umwete”.

Umuyobozi Mukuru wa Banki ya Kigali, Dr. Diane Karusisi, avuga ko batibuka gusa abahoze ari abakozi babo, ahubwo banafata mu mugongo abavandimwe n’imiryango basize, babereka ko batari bonyine.

Ati “Tubabwira ko n’ubwo babuze abavandimwe babo turacyariho twebwe, BK yarakuze umusanzu batanze ntabwo wapfuye ubusa, BK iriho kandi twumva ko natwe turi abavandimwe babo, tuba dushaka gufatanya no kubafata mu mugongo”.

Kuba uyu munsi BK yarakuze ikaba ifite abakozi benshi, ngo harimo n’abatari bacye bavutse nyuma ya Jenoside ku buryo iyo umuhango wo kwibuka Abatutsi bayizize ubereye ahantu hari amateka yayo nko ku rwibutso rwa Kigali, hari amasomo menshi bakuramo nk’uko Dr. Karusisi abisobanura.

Ati “Kuza hano ni ahantu hafite amateka aremereye, tukumva ko ari byiza kugira ngo abo bana baze bamenye amateka y’Igihugu cyacu, aho Igihugu cyavuye kugira ngo dukomeze tugire amahitamo meza yo kubaka Igihugu, no kwamagana amacakubiri”.

Mu bahoze ari abakozi ba BK bibukwa uko ari 15, harimo umwe witwa Claver Kayumba hataraboneka umuntu n’umwe bafitanye isano kugira ngo na bo bajye bifatanya n’abandi mu gihe hibukwa abakozi ba BK bazize Jenoside yakorewe Abatutsi mu 1994.

Abakozi ba BK bunamiye abasaga ibihumbi 250 baruhukiye ku rwibutso rwa Kigali

Imiryango yabuze ababo bakoraga muri BK yifatanyije na BK mu muhango wo kubibuka

Dr Bizimana yatangaje ibi ku wa Kane tariki 21 Mata 2022, mu gikorwa cyo kwibuka Abatutsi bakabakaba 50,000 bashyinguwe mu Rwibutso rwa Murambi mu Karere ka Nyamagabe, ndetse n’abarenga 200,000 biciwe mu Ntara y’Amajyepfo ku itariki 21 Mata 1994.

Kuri iyo tariki, Mukakabanda Juliet yibuka ko yari kumwe n’umugabo we n’abana batatu, bakaba bari bahahungiye bizezwa ko bazarindwa, nyamara ngo interahamwe n’abari ingabo za Leta (Ex FAR), bahise bahabatsembera harokoka abatarenga 20 mu bihumbi bibarirwa muri za mirongo.

Minisitiri Bizimana yunamiye inzirakarengane ziruhukiye mu rwibutso rwa Murambo

Mukakabanda waharokokeye n’umwana umwe gusa agira ati "Nakoraga kuri buri mwana, ngahamagara, ngakora ku mutima nibwira ko ubwo bagikanuye wenda bagihumeka ariko si ko byari biri".

N’ubwo ntawe ushira agahinda k’abe bishwe urupfu nk’urwo, Mukakabanda ashimira Inkotanyi zabarokoye, ndetse Leta ikaba yaramufashije kongera kwiyubaka, ubu akaba afite aho atuye, ari umuhinzi mworozi ndetse n’umwana basigaranye akaba yiga muri Kaminuza.

Minisitiri Bizimana na we yibuka ko Jenoside yakorewe Abatutsi mu Ntara y’Amajyepfo yarimbuye benshi (ibihumbi 200 ku munsi umwe), n’ubwo muri iyo ntara ari ho havuka abanyapolitiki benshi barwanyije Jenoside.

Mu b’intangarugero ngo harimo Umwami MutaraIII Rudahigwa, uwari Minisitiri w’Intebe Agathe Uwiringiyimana, Michel Rwagasana na Félicité Niyitegeka.

Dr Bizimana avuga ko abo bose n’ubwo bapfuye batanga urugero rwiza ku babyiruka muri iki gihe, aho kwigira ku bandi bakiriho ngo barimo gupfobya no guhakana Jenoside.

Minisitiri Bizimana Jean Damascène

Yagize ati "Hari abari mu mahanga mu mitwe ya FDLR, FDU-Inkingi, bamwe mu bavuga ko bacitse ku icumu bashinze icyitwa ’Igicumbi".

Dr Bizimana avuga ko abo atari abo kwigiraho kurwanya akarengane no guha umutekano n’uburenganzira buri wese, nk’uko Leta y’u Rwanda ibikora, ikaba ari yo ikwiye gushyigikirwa.

Babashyikirije inkunga ya Miliyoni eshatu z’amafaranga y’u Rwanda

Ishyirahamwe AVEGA ryavutse nyuma gato ya Jenoside yakorewe Abatutsi. Ryatangiye mu kwezi kwa 12 mu mwaka wa 1994, ariko ribona ubuzima gatozi tariki 15 z’ukwa mbere 1995, nk’uko ubuyobozi bwaryo bubisobanura.

Ryashinzwe n’abapfakazi b’i Kigali babarirwa muri 50 bishyize hamwe kugira ngo bajye baganira ku bibazo bahuye na byo byatewe na Jenoside. Nyuma y’iryo shami ry’i Kigali, hakurikiyeho andi mashami yo hirya no hino mu Ntara, ku ikubitiro hakurikiraho ishami rya Rwamagana.

AVEGA igamije kwita ku buzima bw’abapfakajwe na Jenoside, kubavuganira, ndetse no kwita ku mpfubyi z’abo babyeyi cyangwa iz’abandi bantu bagiye basigarana nyuma y’uko ababyeyi bazo bitabye Imana.

Impamvu baba bakeneye kwitabwaho ni uko bamwe bafite ibibazo by’ubuzima batewe na Jenoside, hakabamo n’ibibazo by’izabukuru.

Ibyo bibazo bituma bamwe bagenda basaza, dore ko ishyirahamwe ritangira ryari rifite abanyamuryango babarirwa mu bihumbi 25, ariko bavuga ko ibarura bakoze mu myaka nk’itanu ishize ryagaragaje ko abanyamuryango basigaye babarirwa mu bihumbi 19, ubu nabwo bakaba batekereza ko uyu mubare wagabanutse.

Abanyamuryango ba AVEGA bavuga ko n’ubwo bagifite ibibazo bibagora, barashimira Leta y’ubumwe yabafashije kurokoka igakomeza no kubakurikirana mu buzima, ikabafasha kwiyubaka mu mibereho yabo ntibihebe.

AVEGA kandi ishimira abafatanyabikorwa nka SteelRwa bagenda babafasha kongera kwiyubaka. Umuyobozi wa AVEGA wungirije ku rwego rw’Igihugu, Mujawayezu Saverina, yagize ati “Iyo tubonye abavandimwe n’inshuti badusura cyane cyane muri ibi bihe twibuka Jenoside, twumva twongeye kugira imbaraga, tukumva turakomeye kubera ko dufite abantu badukunda.”

Umuyobozi wa AVEGA wungirije ku rwego rw’Igihugu, Mujawayezu Saverina, yasobanuriye ababasuye amateka y’iryo shyirahamwe

Ubuyobozi bw’uruganda SteelRwa bwari burangajwe imbere n’Umuyobozi Mukuru (General Manager), Sandeep Phadnis, bwabihanganishije bubabwira ko n’ubwo batakaje abana babo ndetse n’abo bashakanye, batari bonyine kuko abo baje kubasura bazakomeza kubaba hafi.

Uwavuze mu izina rya SteelRwa yagize ati “Icyatuzanye hano ni ukubabwira ngo mukomere babyeyi bacu, turabazirikana, turabakunda, kandi tuzakomeza kubaba hafi.”

Mu Rwego rwo kubafata mu mugongo, uruganda rwa SteelRwa rwabashyikirije inkunga y’amafaranga y’u Rwanda angana na Miliyoni eshatu, urwo ruganda rukavuga ko n’ubwo iyo nkunga idahagije, bitarangiriye aho kuko ruzakomeza kubazirikana.

Abahawe iyo nkunga na bo bavuze ko bayishimiye kuko izabafasha mu kongera ibikorwa cyane cyane by’ubudozi basanzwe bakora nk’itsinda ry’aho i Rwamagana.

Uruganda rwa SteelRwa rwahuriye mu biganiro n’abo babyeyi ku cyicaro cya AVEGA i Rwamagana, nyuma y’uko bose bari bavuye mu bikorwa byo kwibuka Jenoside yakorewe Abatutsi ku rwibutso rwa Jenoside rwa Sovu mu Murenge wa Kigabiro, mu Karere ka Rwamagana.

Urwibutso rwa Jenoside rwa Sovu ruruhukiyemo imibiri y’Abatutsi 688 bishwe muri Jenoside, abenshi muri bo bakaba bari abagore n’abana.

I Sovu ku mashuri mu gihe cya Jenoside hakusanyirijwe abiganjemo ababyeyi benshi, abakobwa b’inkumi n’abana, babwirwa ko bazaharindirwa, kuko abicwaga ku ikubitiro bari abagabo n’abasore. Icyakora abo bagore n’abana na bo nyuma barishwe.

Umuyobozi wa IBUKA mu Karere ka Rwamagana, Musabyeyezu Dative, avuga ko umwihariko w’ubwicanyi bw’i Sovu ari uko abagore n’abakobwa b’inkumi bishwe babanje gusambanywa no gukorerwa iyicarubozo.

Ikindi ni uko ngo bamaze kubica batwikiye urusenda hafi y’imirambo kugira ugihumeka niyitsamura bamubone bamwice.

Bunamiye inzirakarengane zishyinguye mu rwibutso rwa Jenoside rwa Sovu

Musabyeyezu uhagarariye IBUKA muri Rwamagana yashimye Leta kuko yakoze ibishoboka byose mu gufasha abarokotse no kubasubiza icyizere cy’ubuzima ariko na none avuga hari zimwe mu ngaruka abarokotse Jenoside bagihura na zo harimo abagize uruhare mu gutsemba ababo batagaragaza aho bajugunye imibiri yabo ngo ishyingurwe mu cyubahiro.

Indi ngaruka abarokotse bafite ngo ni iy’ihungabana aho kuva tariki 07 Mata 2022 ubwo hatangiraga icyumweru cyo kwibuka hamaze kuboneka ibibazo by’ihungabana birenga 120 kandi 80% muri bo bakaba atari ubwa mbere, abenshi kandi bakaba ari abagore ariko ikibabaje bikaba ngo bitangiye no kugera mu rubyiruko.

Yifuje ko iki kibazo cyashakirwa umuti kuko gihangayikishije kandi kikaba gifite ingaruka mbi.

Ati “Uko ihungabana rigenda rimugaruka buri mwaka rigenda rurushaho kumwangiza kandi ikirenzeho turasanga 80% ari igitsinagore kandi iyo umugore afite ibibazo mu muryango urahungabana. Turasaba ko bakwitabwaho by’umwihariko tugashakirwa inzobere zijyanye n’ubuzima bwo mu mutwe.”

Akarere ka Rwamagana karimo inzibutso za Jenoside 11 ziruhukiyemo imibiri y’Abatutsi bazize Jenoside 83,729.

Igikorwa cyo kwibuka i Sovu muri Rwamagana cyitabiriwe n’abatuye muri aka gace, abaharokokeye ariko basigaye batuye ahandi, ndetse n’abayobozi mu nzego zitandukanye.

Kayirangwa Anita

Ati: “Bagirira nabi abantu batanu, icumi cyangwa magana abiri, abantu ntibakwiye kubirebera ngo baceceke. N’iyo yaba umuntu umwe wahohotewe azira ko yacitse ku icumu, bikwiye kwitabwaho cyane ko ari n’icyaha gihanwa n’amategeko. N’ubwo navuze ko ari bake bakigaragarwaho n’ibi bikorwa ariko, buriya nta burozi buba buke, kuko abakwirakwiza ingengabitekerezo n’abahohotera abarokotse kandi turacyafite n’abakwirakwiza ingengabitekerezo ya Jenoside bifashishije imbuga nkoranyambaga gusa na bo si benshi. Ariko n’ubwo ari bake bwose, burya nta burozi buba buke, tugomba gukora ibishoboka byose ku buryo ibyo bavuga cyngwa bakora bitazagenda ngo bigere mu bana babo, mu nshuti zabo cyangwa mu baturanyi ngo ejo na bo batazabyigana.”

Mu gihe cy’iminsi 7 y’icyunamo cyo kwibuka ku nshuro ya 28 Jenoside yakorewe Abatutsi, RIB yatangaje ko yakiriye ibirego 53 by’icyaha cy’ingengabitekerezo ya Jenoside n’ibifitanye isano na yo. Muri ibyo birego hakaba hakekwa abantu 68, barimo 43 bafunze, 3 bakurikiranwe bari hanze, 13 bagishakishwa n’abantu 9 batamenyekanye.

RIB kandi yagaragaje ko mu myaka 6 ishize mu cyumweru cy’icyunamo imaze kwakira dosiye z’ibirego by’ibyaha by’ingengabitekerezo ya Jenoside n’ibifitanye isano na yo 1911.

Muri 2017 mu cyumweru cy’icyunamo RIB yakiriye dosiye 358 z’ibi birego, muri 2018 ziba 383, muri 2019 zirazamuka zigera kuri dosiye 404, muri 2020 ziba dosiye 377, naho muri 2021 ni dosiye 383.

RIB yagaragaje ko muri uyu mwaka ibi ibyaha byagabanutse ku kigero cya 53,5%.

Umuyobozi wa IBUKA mu Karere ka Rwamagana, Musabyeyezu Dative (ufite indangururamajwi) yavuze ko ikibazo cy’ihungabana gikwiye kwitabwaho

Yabitangaje kuri uyu wa Gatatu tariki ya 20 Mata 2022, ubwo hibukwaga by’umwihariko abagore n’abana bishwe muri Jenoside yakorewe Abatutsi muri Mata 1994, igikorwa cyabereye ku rwibutso rwa Jenoside rwa Sovu mu Murenge wa Kigabiro, mu Karere ka Rwamagana.

Urwibutso rwa Jenoside rwa Sovu ruruhukiyemo imibiri y’Abatutsi 688 bishwe muri Jenoside, abenshi muri bo bakaba bari abagore n’abana.

I Sovu ku mashuri mu gihe cya Jenoside hakusanyirijwe abiganjemo ababyeyi benshi, abakobwa b’inkumi n’abana, babwirwa ko bazaharindirwa, kuko abicwaga ku ikubitiro bari abagabo n’abasore. Icyakora abo bagore n’abana na bo barishwe, bikozwe cyane cyane n’igitero cyari kimaze kwica abari bahungiye i Mwulire.

Umuyobozi wa IBUKA mu Karere ka Rwamagana, Musabyeyezu Dative, avuga ko umwihariko w’ubwicanyi bw’i Sovu ari uko abagore n’abakobwa b’inkumi bishwe babanje gusambanywa no gukorerwa iyicarubozo.

Ikindi ni uko ngo bamaze kubica batwikiye urusenda hafi y’imirambo kugira ugihumeka niyitsamura bamubone bamwice.

Mu Karere ka Rwamagana hakorewe ubwicanyi bukabije kuko hari abishwe bakajugunywa mu biyaga nka Muhazi na Mugesera.

Musabyeyezu uhagarariye IBUKA muri Rwamagana yashimye Leta kuko yakoze ibishoboka byose mu gufasha abarokotse no kubasubiza icyizere cy’ubuzima ariko na none avuga hari zimwe mu ngaruka abarokotse Jenoside bagihura na zo harimo abagize uruhare mu gutsemba ababo batagaragaza aho bajugunye imibiri yabo ngo ishyingurwe mu cyubahiro.

Indi ngaruka abarokotse bafite ngo ni iy’ihungabana aho kuva tariki 07 Mata 2022 ubwo hatangiraga icyumweru cyo kwibuka hamaze kuboneka ibibazo by’ihungabana birenga 120 kandi 80% muri bo bakaba atari ubwa mbere, abenshi kandi bakaba ari abagore ariko ikibabaje bikaba ngo bitangiye no kugera mu rubyiruko.

Yifuje ko iki kibazo cyashakirwa umuti kuko gihangayikishije kandi kikaba gifite ingaruka mbi.

Ati “Uko ihungabana rigenda rimugaruka buri mwaka rigenda rurushaho kumwangiza kandi ikirenzeho turasanga 80% ari igitsinagore kandi iyo umugore afite ibibazo mu muryango urahungabana. Turasaba ko bakwitabwaho by’umwihariko tugashakirwa inzobere zijyanye n’ubuzima bwo mu mutwe.”

Minisitiri w’Uburinganire n’Iterambere ry’Umuryango, Prof. Bayisenge Jeannette, yihanganishije abarokotse abizeza ko Jenoside itazongera ukundi.

Yasabye abaturage kurandura amacakubiri n’ingengabitekerezo ya Jenoside kuko hacyumvikana imitungo y’abarokotse yangizwa mu gihe cyo kwibuka.

Minisitiri w’Uburinganire n’Iterambere ry’Umuryango, Prof. Bayisenge Jeannette yitabiriye igikorwa cyo kwibuka i Sovu muri Rwamagana

Yasabye abafite amakuru ku hajugunywe imibiri y’Abatutsi bishwe muri Jenoside kugira ubupfura bwo gutanga amakuru hakamenyekana aho iri igashyingurwa mu cyubahiro.

Yasabye ababyeyi kubwiza abana ukuri amateka y’Igihugu kugira ngo bazayubakireho bubaka Igihugu kizira Jenoside.

Yagize ati “Babyeyi ntitugatinye kuganiriza abana bacu ukuri ku mateka y’Igihugu cyacu, mu mashuri bikigishwa, mu bikorwa rusange bikagarukwaho kugira ngo dufate ingamba zo kubakira ku mateka y’ukuri.

Akarere ka Rwamagana karimo inzibutso za Jenoside 11 ziruhukiyemo imibiri y’Abatutsi bazize Jenoside 83,729.

Umwamikazi Rosalie Gicanda yishwe muri Jenoside yakorewe Abatutsi mu 1994

Umwamikazi Gicanda wari utuye mu Ntara y’Amajyepfo, i Butare (Akarere ka Huye uyu munsi) yishwe ku itariki 20 Mata 1994, ahitanwa n’igitero cyagabwe n’agatsiko k’abasirikare kari katumwe ku itegeko ry’uwitwa Capt. Idelphonse Nizeyimana.

Bivugwa ko yishwe ku munsi wakurikiye ijambo Théodore Sindikubwabo wari Perezida wa Guverinoma y’Abatabazi yari yaraye avugiye i Butare, maze agashishikariza Abahutu kwica Abatutsi.

Nk’uko bivugwa n’abazi amateka ya Jenoside i Butare, ngo ku itariki ya 20 Mata 1994, abasirikare bakuye Umwamikazi Gicanda mu nzu yari atuyemo mu mujyi wa Butare, bamujyana mu ishyamba riri hafi y’Ingoro y’umurage w’u Rwanda y’i Huye kimwe n’abo babana mu nzu, maze bose barabarasa.

Iyo nzu yari yayitujwemo nyuma yo gukurwa mu Rukari, aho yabanaga n’Umwami Mutara wa III Rudahigwa mbere y’uko atanga.

Umubiri w’Umwamikazi Gicanda ubu uruhukiye i Mwima mu Karere ka Nyanza, ari na ho Umwami Rudahigwa na we yatabarijwe.

Rosalie Gicanda yibukwa nk’Umwamikazi wazize Jenoside yakorewe Abatutsi mu 1994, ariko abari bamuzi banagendaga iwe, bakanamwibuka nk’umukirisitu kandi nk’umubyeyi wabakiranaga urugwiro.

Abonye ko ashobora kuhasiga ubuzima, yafashe icyemezo cyo gutorokana n’umwana we muto wari ufite imyaka itatu ari nawe wari umuhererezi icyo gihe.

Mu gihe cya Jenoside, interahamwe zishe abagabo bose bo ku musozi yari atuyeho harimo n’umugabo we, hanyuma zikusanya abagore n’abakobwa bose zibashyira mu rugo rwe, harimo na nyina n’umwisengeneza we.

Abicanyi bababeshyaga ko ntacyo bazabatwara kubera ko ari abagore, ariko kutagira icyo babatwara byari ukutabica gusa.

Mu buhamya yahaye ikinyamakuru The New Times, Uwimana aragira ati “Buri joro, bazaga ari agatsiko k’abagabo benshi bakantwarana n’umwisengeneza wanjye bakajya kudutesha agaciro mu ishyamba. Batujyanaga ahantu hatandukanye, barangiza kudukorera ubugome bakatugarura mu rugo”.

Uwimana icyo gihe yari afite imyaka 37 ari n’umubyeyi w’abana bane, umwisengeneza we yari afite imyaka 16.

Uwimana akomeza agira ati “Iyo badutwaraga, sinumvaga ko nashoboraga kugaruka mu rugo kuko ibyo badukoreraga byari birenze kwihanganirwa. Hari igihe babaga ari batanu cyangwa barenzeho. Benshi ntabwo nari mbazi”.

Mbere gato y’uko interahamwe zimushimuta, Uwimana yari yabanje kujyanwa n’indi nterahamwe yitwa Mazimpaka, imubeshya ko izamurinda, ariko nawe nta kindi yari agamije usibye kumusambanya ku gahato.

Umunsi umwe, iyo nterahamwe irimo gusukura inzu yagiraga ngo imucumbikiremo n’umwana we, Uwimana ahita ayica mu rihumye aratoroka kugira ngo arebe ko yakize ubuzima bwe.

Ariko se yari kujya he? Ni he yari kubona ubuhungiro? Ni inde wari kumwakira atagamije ubugome?

Ibi ni bimwe mu bibazo byinshi yibazaga akabura ibisubizo, ni ko gutangira gutekereza kwiyambura ubuzima.

Ya nterahamwe Mazimpaka nayo itangira kumuhigisha uruhindu, aho inyuze hose ikarahira ko nimufata izamwica urubozo, Uwimana yabitekereza akumva nawe ubwe ariyanze. Ubwo ajya mu rutoki gushakisha ibirere ngo abohe umugozi wo kwinigisha, ariko arabibura.

Uwimana akomeza agira ati “Mu bwenge bwanjye, numvaga ngomba kwiyahura kuko ni rwo rupfu rwiza rwari rusigaye kuri njye. Nagerageje no kuzirika igitenge cyanjye mu giti cya avoka ngo nimanike ariko biranga kuko igiti cyari kigufi. Ubwo niyemeza gusubira mu rugo rwanjye kuko n’ubundi nta kindi nari ntegereje kitari urupfu”.

Mu gusubira iwe ariko, ntabwo yari azi ko ibyo ahunze kwa Mazimpaka ari byo agiye asanga, ariko n’iyo aza kubimenya, nta yandi mahitamo yari afite.

Nyuma y’icyumweru cyose we n’abe bakorerwa ubwo bugizi bwa nabi, Uwimana yafashe umwanzuro wo gutoroka ari mu gicuku, bukeye za nterahamwe zimubuze zibyuka zica ba bantu zari zarashimuse barenga icumi zibajugunya mu rwobo rw’ubwiherero.

Ya nterahamwe Mazimpaka yari yizeye ko Uwimana nawe yari mu biciwe aho, ndetse hashize iminsi aza nawe kubyemeza ko Uwimana bamwishe, akabivuga muri aya magambo “Nabonye amatako ye y’inzobe mu rwobo hamwe n’abandi”.

Uwimana yari yahungiye mu rundi rugo rwa mwene wabo wa kure, ariko n’ubwo ubuzima bwe bwari butakiri hagati y’urupfu n’ubuzima, uburyo yakiriwemo muri urwo rugo nabwo ntibwamworoheye. Yafashwe nk’umukozi wo mu rugo abuzwa epfo na ruguru, ku bw’amahirwe ahakurwa n’Ingabo za RPA Inkotanyi zari zimaze kubohora u Rwanda.

Ukuri kugoye kwakira

Hashize amezi make, Uwimana yaje gusanga atwite umwana wa gatanu.
Uwimana ati “Byaranshenguye numva simbashije kwakira kuba ntwite umwana w’interahamwe! Usibye n’ibyo, nari nshonje, ntagira epfo na ruguru, mbayeho nabi cyane, numva narihebye”.

Yabashije kubyihanganira aramubyara, ariko byamutwaye imyaka ibiri kugira ngo abashe gutangira gukunda uwo mwana w’umuhungu, abasha kwishyiramo ko atari ikosa rye kandi ko ari umwana mwiza ugomba gukundwa n’umubyeyi we.

Bidateye kabiri, mu gihe yageragezaga kubana n’ubumuga yatewe no gukorerwa iyicarubozo ryo gufatwa ku ngufu, no kurera umwana mu buryo bugoye, Uwimana asanga yarandujwe agakoko gatera SIDA.

Hagati aho n’ubwo Ishyirahamwe ry’Abapfakazi ba Jenoside (AVEGA Agahozo) ryamufashije mu burwayi bwe, yakomeje kugira impungenge z’umuhungu we.

Uwimana ati “Kari kananutse cyane bikantera impungenge nibaza ko nawe ashobora kuba yaravukanye ubwandu. Ubwo njya kumupimisha, ngize amahirwe nsanga nta bwandu afite”.

Uwo mubyeyi akomeza avuga ko umuhungu we yajyaga amubaza inshuro nyinshi mu ijwi rikakaye agira ati ese mama, nta kibazo mfite? Uwimana ibi yabivugaga aseka, agakomeza avuga ko umwana we atari azi n’icyo ibyo bizami byari bigamije.

Ubuhamya bw’umuhungu we

Umuhungu we twise Hakizimana muri iyi nkuru (izina ritari irye), agize imyaka 12 nibwo yaje kumenya ko yavutse ku mubyeyi wafashwe ku ngufu. Icyo gihe nyina yari amaze gutanga ubuhamya ku rwibutso rwa Jenoside, aho yavuze ko umugabo we wishwe yamusigiye abana bane.

Hakizimana, ari nawe mwana wa bucura, yari asanzwe azi ko ari umwana wa gatanu, ariko mu bitekerezo bye, akumva ko byanze bikunze adasangiye se n’abo bandi bane.

Ntiyigeze atinyuka kubaza nyina aho se aherereye kubera ko, ku mpamvu runaka, yakekaga ko atari inkuru nziza. Ariko nanone ntiyibazaga ko yaba ari inkuru y’incamugongo bigeze aho.

Hakizimana ati “Abavandimwe banjye banyeretse urukundo ruhebuje. Mama amaze kumbwira uko byagenze, ni bwo namenye ko batigeze bifuza na rimwe kumfata nk’umwana wavutse mu buryo buteye kwiheba. Ntibigeze bifuza kumbabaza”.

Nyuma yo kunamira abishwe muri Jenoside, Hakizimana yicaranye na nyina bonyine, ubundi amubwira byose uko byakabaye. Ku bw’amahirwe yari yarigishijwe uko umuntu ashobora kubwira umwana inkuru imeze ityo ariko atamukomerekeje.

Hakizimana akomeza agira ati “Sinumva ukuntu yabashije kundera ankunze aka kageni! Byonyine no kwiyemeza kungumana ni ibintu ntarabasha kwiyumvisha kugeza ubu, ariko ndamushimira byimazeyo”.

Mu gihe anashimira imiryango itandukanye nka SEVOTA, yamufashije kwiga no kumubonera ibindi yari akeneye birimo n’ubuvuzi bwo mu mutwe, Hakizimana avuga ko akeneye guhura na se, kuko hari ibibazo afite bikeneye ibisubizo.

Hakizimana mu ijwi ririmo ikiniga n’amaso yuzuyemo agahinda ati “Kuki yambabarije mama? Ese aba he? Ko iyi Guverinoma yababariye abakoze Jenoside benshi, kuki we atarerekana isura ye? Ibi ni bimwe muri byinshi nifuza kumubaza”.

N’ubwo Hakizimana atarabona ibyo bisubizo, nyina yakoze uko ashoboye amuha ibyo akenera byose nk’umwana. Abavandimwe be bose barashatse, ubu asigaye abana n’umwe muri bo.

Nyina Uwimana ubu yasubiye ku ivuko, abayeho ubuzima butari bubi kubera inkunga yahawe n’imiryango AVEGA, SEVOTA n’indi. Mu butunzi afite harimo inka ebyiri, ahabwa ingoboka ya buri kwezi imufasha mu mirimo y’ubuhinzi, kandi yakomeje kujya ahura akaganira n’abandi bagore basangiye ibibazo kugira ngo bomorane.

Uwimana asoza ubuhamya bwe agira ati “Twiyemeje kurekeraho kurira no guherenwa n’ihungabana, dutangira kwiremamo ibyishimo. Ibyo twabigezeho tubinyujije mu kwiteza imbere dukora imirimo y’ubworozi n’ibindi bikorwa bibyara inyungu”.

Itsinda ry’abagore bagenzi be ryatangije igikorwa cyo guhemba impfubyi za Jenoside zibarutse, bikamufasha gukomeza kugira umunezero.

Uwimana ni umwe mu bagore barenga 2,500 babashije kumenyekana, mu bafashwe ku ngufu muri Jenoside yakorewe Abatutsi mu 1994.

Uyu mwaka wabaye impurirane ku minsi n’amatariki yabereyeho Jenoside, dore ko abakoraga muri CIMERWA ubwo bicwaga hari ku wa Gatandatu tariki 16 Mata 1994. Muri urwo ruganda hiciwemo abantu 57, ndetse n’abandi basaga 100 biciwe mu gace ruherereyemo, bose bajugunywa muri Rubyiro, ariko ababajugunyemo bakomeza kwanga gutanga amakuru.

Ni ku nshuro ya mbere bari bibukiye kuri uwo mugezi, amakuru y’aho abo bantu bajugunywe akaba yaratinze kumenyekana kuko ababigizemo uruhare bakomeje kubiceceka. Icyakora umwe mu babishe wireze akemera icyaha, ngo ni we uherutse kujya kwerekana aho abiciwe muri CIMERWA bajugunywe muri uwo mugezi wa Rubyiro.

Kuba amakuru y’aho abo bantu bari barajugunywe atari yaramenyekanye, ngo byarushagaho kubabaza abarokokeye muri CIMERWA ndetse n’abafite ababo bahaguye, kuko mu gihe cyo kwibuka bibukiraga ahantu hatandukanye ku migezi kuko batari bazi neza aho ababo bishwe bajugunywe.

Uwitwa Bapfakurera Jean yagize ati “Ubu nibwo bwa mbere bikozwe kuko kuva Jenoside yahagarikwa bahoraga basaba abagororwa kubereka aho bashyize abo bantu ariko ntibahavuge. Icyakora umwe mu bafunguwe yaje kubohoka yerekana aho bajugunye abo bamaze kwica muri uyu mugezi mu gihe cya Jenoside. Kuva twaramenye aho babajugunye ubu turabohotse ku mutima kuko buri gihe twahoraga twibaza aho babashyize.”

Uwitwa Kayitare Clement na we yagize ati “Imyaka 28 yari ishize tutazi aho abacu bajugunywe kubera ko ababishe bari baranze gutanga amakuru. Byagize ingaruka mu ihungabana ku babuze ababo. Iyo twajyaga kwibuka, twibukiraga ku migezi yose mu Gihugu. Uyu munsi rero kuri twebwe kuba tumenye aho bajugunywe hari icyo bitugaragarije mu komora imitima yacu n’ubwo tutabashyinguye ariko tuzajya tumenya aho tubibukira.’’

Abaje kwibukira kuri uwo mugezi wa Rubyiro, basabye ko aho hantu hashyirwa urwibutso cyangwa ikimenyetso cy’amateka yaho mu rwego rwo kuzirikana abajugunywemo.

Basabye ko hakwandikwa n’amazina y’abajugunywemo, hagakorwa n’umuhanda worohereza abaza kuhibukira.

Dr Kibiriga Anicet uyobora Akarere ka Rusizi, na we yavuze ko aho hantu hakwiye kwitabwaho, inzego zibishinzwe zikaba ziteganya kubanza kubiganiraho.

Ni byo yasobanuye ati “Ibyo bavuze koko ubona hari ibintu bimwe byo gukosorwa kandi twanatangiye ariko hariya kuri Rubyiro hakwiye kujya ikimenyetso. Birasaba ko twavugana na Minisiteri y’Ubumwe bw’Abanyarwanda n’Inshingano Mboneragihugu kugira ngo babe baduha uburenganzira cyangwa ikimenyetso tugomba kuhashyira.”

Mu rwego rwo gukomeza gufata mu mugongo abarokotse Jenoside yakorewe Abatutsi baburiye abantu babo muri CIMERWA no muri ako gace, uruganda rwa CIMERWA rwashyigikiye ibikorwa byo kwibuka byahabereye, ndetse rworoza inka imiryango ibiri.

Ikipe ya APR FC abakinnyi n’abatoza bayo bagiye baherekejwe n’ubuyobozi bw’ikipe buhagarariwe n’umunyamabanga w’ikipe Masabo Michel, ushinzwe ibikorwa by’ikipe(Team manager) Lt Colonel Guillaume Rutayisire, n’abandi barimo n’abahagarariye abakunzi bayo.

Umutoza mukuru wa APR FC Adil Mohamed (uri hagati) na we yajyanye n’ikipe

Abakinnyi n’abakozi b’ikipe ya APR FC ku rwibutso rwa Kigali ruri ku Gisozi basobanuriwe amateka ya Jenoside yakorewe Abatutsi mu 1994, bunamira ndetse banashyira indabo ku mva rusange ishyinguyemo imibiri y’abazize Jenoside yakorewe Abatutsi muri Mata 1994.

Basobanuriwe amateka yaranze Jenoside yakorewe Abatutsi mu 1994

Ibi ikipe ya APR FC ibikoze mu gihe Abanyarwanda basoje icyumweru cy’icyunamo cyatangiye tariki ya 7 Mata kigasozwa ku ya 13 Mata 2022 ariko bakaba bakiri mu bihe by’iminsi 100 yo kwibuka inzirakarengane zazije Jenoside yakorewe Abatutsi mu 1994.

Buregeya Prince na Manishimwe Djabel bashyira indabo ku mva ishyinguyemo abazize Jenoside yakorewe Abatutsi mu 1994 ku rwibutso rwa Gisozi

Umunyamabanga wa APR FC Masabo Michel ni we wari uhagarariye ubuyobozi bwa APR FC

Babitangaje ku Cyumweru tariki ya 18 Mata 2022, mu muhango wo kwibuka ku nshuro ya 28 Jenoside yakorewe Abatutsi MU 1994, mu Murenge wa Ruramira Akarere ka Kayonza, ahanashyinguwe imibiri itandatu yabonetse.

Urwibutso rwa Jenoside rwa Ruramira ruruhukiyemo imibiri 1280 y’Abatutsi bishwe muri Jenoside.

Umuyobozi wa Ibuka mu Karere ka Kayonza, Ndindabahizi Didace, avuga ko Abatutsi ba Ruramira bahuriweho n’Interahamwe z’ahitwa i Gasetsa mu Murenge wa Remera, Akarere ka Ngoma zari ziyobowe na Col Rwagafirita, iza Kabarondo zari ziyobowe na Burugumesitiri Ngenzi Octavien na Barahira Tito.

Avuga ko Abatutsi benshi bagiye kwihisha hafi n’ikiyaga gihangano cya Ruramira cyifashishwaga mu kuhira umuceri, ariko interahamwe zigenda zibakura mu bihuru zirabica abandi bajugunywa mu kiyaga ari bazima babanje kuzirikwa imigozi kugira ngo batikuramo.

Avuga ko iki kiyaga cyagomorowe kugira ngo hashakishwemo imibiri, ariko igikorwa cyahagaze badashize agahinda kuko harimo isayo ryinshi.

Yifuza ko hashyirwa ikimenyetso ndangamateka ya Jenoside nk’ahantu habereye ubwicanyi ndengakamere.

Ati “Gushakisha imibiri dusa n’ababisubitse ntabwo twabisoje, twajyanyeyo imashini zirananirwa harimo isayo ryinshi zararigitaga. Twifuza ko hashyirwa ikimenyetso nk’ahantu haguye abacu benshi bityo tujye duhora tuhibukira.”

Ikiyaga gihangano cya Ruramira kimaze kubonekamo imibiri 283, ndetse n’iyashyinguwe itandatu ikaba ariho yakuwe.

Senateri Bideri John Bonds avuga ko kwibuka ari uguha icyubahiro Abatutsi bishwe muri Jenoside no gukomeza abarokotse.

Avuga ko gushakisha imibiri y’abajugunywe mu kiyaga gihangano bizakomeza kugira ngo abafite ababo bajugunywemo baruhuke imitima n’akababaro kagende kagabanuka.

Yongeyeho ko amateka y’ubwicanyi bwakorewe cyuzi cya Ruramira akwiye kwandikwa akabungabungwa kugira ngo urubyiruko n’abandi batazi ubwicanyi bwahabereye bayamenye, anabafashe kwirinda icyabashora mu bikorwa bibi nk’ibyabaye 1994.

Yifuje ko abagihembera ingengabitekerezo ya Jenoside baba abari mu Rwanda no mu mahanga, ko bafatwa bakagezwa imbere y’ubutabera.

Yanashishikarije urubyiruko kwifashisha imbuga nkoranyambaga mu kunyomoza abagoreka amateka y’Igihugu.

Yasabye ariko by’umwihariko abatarakoze icyaha cya Jenoside kwitandukanya n’ingengabitekerezo yayo.

Yagize ati “Tugomba no gushishikariza abatarakoze icyaha cyangwa bakekwaho icyaha cya Jenoside yakorewe Abatutsi, kwitandukanya n’ingengabitekerezo yayo.”

Ubwo yari yitabiriye umuhango wo kwibuka Abatutsi bazize Jenoside bashyinguwe mu rwibutso rwa Kibumbwe, ku wa 16 Mata 2022, Kanamugire, yashimye ko abazize n’abarokotse Jenoside yakorewe Abatutsi babonye ubutabera, abayikoze bagahanwa n’inkiko zirimo Gacaca.

Gusa yavuze ko ubu hakiri ikibazo cy’abakatiwe ibihano n’inkiko zirimo Gacaca, ariko ubu bacyidegembya.

Yagize ati “Ariko n’ubu turacyafite ikindi kibazo kijyanye n’ubutabera, cy’uko hari abantu bakoze ibyaha bya Jenoside batarakora ibihano byabo.”

Afatiye urugero mu Murenge wa Kibumbwe, Kanamugire yagize ati “Hano mu Murenge wa Kibumbwe dufite abagera kuri 32. Igihugu cyacu kigomba guca umuco wo kudahana. RIB idufashe ibyo bibazo birangire. Abantu niba barakoze ibyaha bagahanwa n’Inkiko Gacaca, bakore ibihano byabo kuko no kudakora igihano, uwo muntu hano muri sosiyete rwose arabangamye. Ntabwo yaza ngo atange ituze, ni wa wundi ushobora gusanga yateza n’ibibazo by’umutekano muke.”

Kanamugire kandi yasabye ko abakoze Jenoside bari mu nzego z’ubuyobozi bakurwamo. Ati: “Ikindi, izi nzego zitorwa yaba komite nyobozi y’imidugudu, ba mutwarasibo, abajyanama b’ubuzima, abantu bahamwe n’ibyaha bya Jenoside ntabwo bakwiye kujya muri ziriya nzego, ntabwo bagombye gutorwa”.

Kanamugire Remy wavuze mu izina rya IBUKA

Ati “Yenda bashobora gutora ariko bo ntibatorwa kuko bafite ubusembwa. Dufatanye rwose abari muri ziriya nzego bazivemo, hari abandi Banyarwanda badafite ibyaha bya Jenoside bagenda bagakora kariya kazi kandi bagakora neza.”

Umuyobozi w’Inama Njyanama y’Akarere ka Nyamagabe, Uwamahoro Clothilde, mu ijambo rye yahaye icyubahiro abazize Jenoside, yihanganisha imiryango y’abarokotse, agira n’icyo avuga ku bahakana n’abapfobya Jenoside yakorewe Abatutsi.

Ati “Uyu munsi hari inzira irimo gukoreshwa cyane, y’imbuga nkoranyambaga. Ubutumwa bwinshi bamwe muri twe turabubona buciye kuri izo mbuga, bupfobya ndetse bunahakana Jenoside yakorewe Abatutsi, ubutumwa bwuzuyemo ingengabitekerezo ya Jenoside, buharabika Umukuru w’Igihugu cyacu ndetse n’igihugu muri rusange.”

Yakomeje asaba by’umwihariko urubyiruko rukoresha imbuga nkoranyambaga kwamagana abo bantu.
Ati “Ibyo byose dufatanye tubyamagane kandi tubirwanye. Rubyiruko bana bacu, ibyo mwirinde ko byabayobya, ahubwo mugire uruhare rugaragara mu kubyamagana kuko ni namwe benshi mukoresha izo mbuga nkoranyambaga kandi ni mwe Rwanda rw’ejo, ni mwe mizero y’igihugu cyacu.”

Naho ku bahamijwe uruhare muri Jenoside yakorewe Abatutsi batarangije ibihano nk’uko byasobanuwe na Kanamugire, hamwe n’ibindi bibazo birimo ibikibangamiye abarokotse, Uwamahoro yavuze ko akarere kabigize umukoro, kiyemeza kubishakira igisubizo, anaboneraho gusaba ko ababafiteho amakuru batungira agatoki abayobozi.

Ati “Mbonereho gusaba ko aho umuntu afite amakuru twajya tuyatanga, tukayashyikiriza inzego z’ubuyobozi bwite bwa Leta cyangwa iz’ubutabera, cyane cyane kuri ibi bijyanye n’abantu bacyidegembya, abantu bakatiwe, abatararangije ibihano, kugira ngo twese dufatanye kuko aribwo tuzubaka ejo heza h’abazadukomokaho kandi tugafatanya kubaka u Rwanda twifuza.”

Dusabe Christine

Muri uyu muhango kandi, humvikanyemo ubuhamya bwa Dusabe Christine, wari uhagarariye imiryango y’abashyinguwe mu rwibutso rwa Kibumbwe, ku itegurwa, ishyirwa mu bikorwa n’ihagarikwa rya Jenoside yakorewe Abatutsi.

Dusabe yashimiye ubutwari bwaranze abarokotse Jenoside, anaboneraho gusaba abafite amakuru y’aho abishwe bataraboneka kuyatanga, kugira ngo bashyingurwe mu cyubahiro.

Ati “Hari ikintu nisabira abantu bo muri Kibumbwe, njya mbona kuri televiziyo ahandi hantu, abakoze Jenoside basaba imbabazi abo bayikoreye. Banyakibumbwe, mwatwegereye ko imbabazi tuzifite, mukaduha amateka nyayo, tukamenya aho abacu baguye, tukamenya uko twiyunga ariko byibuze ntitwiyungire ku kinyoma!”

Urwibutso rwa Kibumbwe rushyinguwemo imibiri irenga 380.

Perezida wa Njyanama ya Nyamagabe, Uwamahoro Clotilde

Umuryango uharanira inyungu z’abarokotse Jenoside yakorewe Abatutsi (IBUKA), uravuga ko uhangayikishijwe n’abafite amakuru y’ahari imibiri itarashyingurwa badashaka kuyatanga, ahubwo akaba asigaye atangwa n’urubyiruko rubyumvana ababyeyi.

Bimwe mu bibazo bikomeye abarokotse Jenoside yakorewe Abatutsi bafite muri iyi minsi, harimo ikibazo cy’imibiri y’abavandimwe n’inshuti bazize Jenoside yakorewe Abatutsi, ariko ikaba itarashyingurwa mu cyubahiro kubera ko nta makuru y’impamo aramenyekana y’aho yajugunywe nyuma yo kwicwa.

Umunyamabanga Nshingwabikorwa wa IBUKA, Naphtal Ahishakiye, avuga ko n’ubwo hari imibiri y’abishwe yagiye iboneka igashyingurwa mu cyubahiro, ariko hari itaraboneka kandi habayeho ubufatanye byashoboka ko iboneka.

Ati “Imibiri tutarabona icyo nemera ni uko hari abantu bazi aho iri, Jenoside yakozwe ku manywa ari n’uwishe nijoro yarabivugaga, ku buryo ahantu imibiri iri harazwi, naho tuyikura uyu munsi bishimangira ko n’ahandi isigaye hazwi. Abantu babishatse Leta y’Ubumwe bw’Abanyarwanda ifite ubushake n’ubushobozi, no mu cyumweru kimwe iyi mibiri yatunganywa igashyingurwa, iki kintu tukakivaho tukajya ku kindi”.

Akomeza agira ati “Ubu imibiri tubona ahanini tuyerekwa n’urubyiruko n’abana bato, iwabo babona amaze kuba mukuru, bagatangira kujya babivuga, ryamugwa mu gutwi akaza akakubwira ati rwose ntimuzabakurikirane ariko iwacu hari imibiri, mwagenda koko mugasanga irahari”.

Urubyiruko rurakomeza gushishikarizwa gutanga amakuru y’ahari imibiri itarashyingurwa mu cyubahiro, bakomeza gukurikirana ababyeyi babo kugira ngo bamenye neza amakuru y’impamo, ariko n’imiryango ikabigiramo uruhare kugira ngo ishakishwe ishyingurwe, icyo gikorwa kirangire.

Uretse ikibazo cy’imibiri itarashyingurwa mu cyubahiro, Ibuka ivuga ko n’ubwo ubukana bw’ingengabitekerezo ya Jenoside bugenda bugabanuka, ariko hakiri aho ikigaragara nk’uko Ahishakiye abisobanura.

Ati “Ingengabitekerezo ya Jenoside iracyahari, ubukana bwayo bugenda bugabanuka ariko ushingiye ku miyoborere igihugu gifite, nyuma y’imyaka 28 niyo haboneka urugero rumwe, ntidukwiye gusinzira, narwo ntirukwiriye, nta mpamvu yarwo. Dukwiye kurukurikirana tukarandura ingengabitekerezo, tukumva y’uko ishize”.

Umunyamabanga nshingwabikorwa wa Ibuka, Naphtal Ahishakiye

Akomeza agira ati “Uyu munsi muracyabibona ku ma gurupe ya WhatsApp buri mwaka, ingero 300 cyangwa 400, uyu mwaka harimo kugenda haboneka iziremereye, aho uwacitse ku icumu yakubishwe agakomeretswa bikabije, aho amatungo y’abantu yishwe, umuntu w’umucecuru akabyuka ihene ebyiri cyangwa eshatu bazikase ijosi, hagati y’imiryango tumaranye imyaka 28, dutegura, twigisha ariko ugasanga ibintu byabaye”.

Abarokotse Jenoside yakorewe Abatutsi bashima amahirwe yo kwibuka ababo Leta y’Ubumwe yabahaye, kubera ko batigeze bayabona kuri Leta zayibanjirije, kandi Abatutsi batarishwe gusa mu 1994, bityo bikaba ari igikorwa cy’ingenzi kibafasha guhura bagasubiza amaso inyuma, bagatekereza, bakareba inkomoko ya Jenoside, uko yakozwe, ingaruka yagize, hakanarebwa ingamba zo kubaka u Rwanda rwiza ruzira Jenoside.

Simugomwa yunamira inshuti n’abavandimwe bakoranaga muri Minisiteri y’Ubuzima

Simugomwa avuga ko yatangiye gukora muri MINISANTE mu 1982 ari umushoferi, asanga muri iyo Minisiteri abakoragamo bose bahuriye ku mugambi w’ivangura n’irondakarere, ndetse n’amadini, ku buryo bari barigize ibyigomeke guhera kuri Minisitiri Dr. Casimir Bizimungu wayiyoboraga kugera ku mukozi wo hasi.

Ati “Wasangaga umusilamu batamwumva ngo ni umuswayile, umuntu w’indyadya, w’umujura, utagomba kuja aho abandi bari, ngo ugomba guhitana icyo abonye cyose akacyiba. Ni muri iyo shusho babonagamo umusilamu, yaratotezwaga na we, ntiyari yemerewe kwiga”.

Avuga ko yagiye gukorera muri MINISANTE azi ko ari ahantu haba abantu batanga ubuzima, ariko aza gutungurwa n’uko yasanze bihabanye kuko bo bamburaga abantu ubuzima aho kubutanga.

Simugomwa avuga ko muri icyo gihe gukora muri MINISANTE bitasabaga gukora ikizami cy’akazi, kuko na we yahinjijwe n’umuntu wahakoraga.

Ati “Ni umuntu wari ufite agatuza wiyemeraga cyane akomeye, anzanamo ku bushake bwe, yari anyizeyeho ko namubera umukozi mwiza, kubera ko icyo gihe kubahana ntibyabagaho, kuko jye nabonye aho umushoferi asaba Minisitiri w’Ubuzima ibisobanuro, nta bwubahane bwabagamo ahubwo habagamo ubumwe bwabo n’ikimenyane cyabo”.

Kwigomeka kw’abari abakozi ba MINISANTE ngo byatumye mu gihe cya Jenoside yakorewe Abatutsi mu 1994, iyo Minisiteri itandukira inshingano zayo ahubwo ikijandika mu bikorwa byo kwica no guhiga Abatutsi, kugeza n’aho imodoka zayo zifashiswaga mu bikorwa bitandukanye byo guhiga no kwica Abatutsi.

Ati “Twari dufite umushoferi witwaga Alphonse Ingabire Alias Katumba, yakoraga tagisi muri gare, baramuzana kubera ko bari bazi ko ashoboye kwanga Abatutsi no kubica. Bamuhaye Hilux y’umutuka n’ubu ndayibuka, muri buwate (Boite) agashyiramo gerenade na pisitori (imbunda nto), yakwinjira muri Minisiteri akavuga ngo hano haranuka Abatutsi”.

Simugomwa avuga ko imodoka za MINISANTE zifashishijwe mu gushyira za bariyeri ahantu hatandukanye, zikajyanwa gukoreshwa imyigaragambyo zirimo abakozi, bakagaruka babyigamba nyuma bakabishimirwa n’ubuyobozi bwa Minisiteri.

Kuba Minisiteri y’Ubuzima yarakoragamo ibyigomeke ngo ntabwo byoroheye Simugomwa kuba yahunga, kuko yahigwaga cyane na bagenzi be bakoranaga, ku buryo yabuze uko ahungira muri CND ari ho hari hafi ahubwo akoroherwa no guhungira i Kabgayi.

Ati “Ni ibintu byari bikomeye, ntabwo jyewe nakiriye muri Kigali iyi ngiyi mureba, nahise ntoroka kubera ukuntu nari nzwi cyane, njya i Kabgayi aho guhungira kuri CND, byarananiye kuhagera ahubwo binyorohera kugera i Kabgayi, byari imitego ikomeye, ntabwo nifuzaga kubona umuntu tuziranye cyangwa unzi”.

Akomeza agira ati “Nabashije kwibonera imyenda y’abaganga ndambara, nshyiramo za masike (Mask), n’inkweto zanjye nzivanamo nambara sabo zo mu cyumba cy’ibagiro (Salle d’operation), ntangira kurongotana nshaka uko nasohoka muri Kigali, aho banzi cyane naho bagenzi banjye bashoboraga kuza banshaka”.

Mbere y’uko ajya i Kabgayi ngo yabanje guhungira kwa Gisimba, nyuma yo kubona ibitero bitandukanye byahagabwaga, yigira inama yo kuhava, nk’uko akomeza abisobanura.

Ati “Ngiye guhungira kwa Letitia kuri Stade mbona burende iraje itunzeyo umunwa, nibwo nigiriye inama yo kuhava njya CHK mbamo, mvamo mpita mbona uburyo bwo kugera i Kabgayi”.

Minisitiri Ngamije acanira urumuri rw’icyizere Simugomwa mu muhango wo kwibuka abari abakozi ba MINISANTE

Ibikorwa by’iyicarubozo byakorerwaga Abatutsi Simugomwa yaboneye muri CHK, ngo byari birenze ubwenge bwa muntu kuko yiboneye aho abari bashinzwe gutanga ubuzima babwamburaga abantu.

Ati “Abaganga aho gutanga ubuzima babwambuye abantu, gusura abarwayi kwari ukuza bareba borosora Abatutsi batemaguwe, abarashwe noneho bakabarangiriza, hakaba hari n’abakozi b’interahamwe bato bashinzwe gukurura, umuntu agafata ukuboko cyangwa ukugura, bakagenda bamukurura, barunze imirambo igera hejuru. Bicwaga n’abakozi bo mu bitaro CHK n’abasirikare”.

Tariki 12 Mata 2022 nibwo MINISANTE yibutse abahoze ari abakozi bayo 41, hamwe n’abandi bakoraga mu rwego rw’ubuzima bishwe mu gihe cya Jenoside yakorewe Abatutsi. Muri uwo muhango kandi hanagawe abari abaganga 56 hamwe n’abaforomo 73 bijanditse mu bikorwa byo bwica Abatutsi mu 1994.

Yabitangaje kuri uyu wa Gatanu tariki ya 15 Mata 2022, ubwo hibukwaga Abatutsi bishwe muri Jenoside muri Mata 1994, mu Murenge wa Gishari Akarere ka Rwamagana.

Umurenge wa Gishari ufite inzibutso za Jenoside ebyiri, urwa Gishari ruruhukiyemo imibiri y’Abatutsi bishwe muri Jenoside 1,084 harimo umubiri umwe wabonetse washyinguwe uyu munsi, ndetse n’urwibutso rwa Ruhunda ruruhukiyemo imibiri 5,081.

Musabyeyezu avuga ko mu cyahoze ari Komini Muhazi imibiri myinshi itaraboneka, kubera ko bamwe bishwe bakajugunywa mu kiyaga cya Muhazi n’ahandi hatandukanye.

Yavuze ko hakenewe amakuru ku ho Abatutsi biciwe muri Jenoside kugira ngo bashyingurwe mu cyubahiro, kuko byaruhura imitima y’abarokotse.

Yasabye ubuyobozi bwite bwa Leta kubafasha bukabahuza n’abagize uruhare muri Jenoside kugira ngo babahe amakuru ku mibiri y’ababo itaraboneka.

Ariko nanone yamaze impungenge abagize uruhare muri Jenoside kutabatinya, ahubwo ngo babegera bakabasaba imbabazi kuko babuze abo baziha.

Ati “Reka mbamare ubwoba, mwe kudutinya ubu twarakize twabaye abantu twiteguye gutanga imbabazi, twaranazirekuye rwose ariko ziri aho mu kirere zitegereje abazakira. Turifuza ko mwazakira, mukatugana, mukatuganirira urupfu rw’abacu kuko ibihano mwarabirangije ariko hari amakuru mukibitse.”

Yasabye ko abarangiza ibihano bakatiwe n’inkiko baza biteguye kubana neza n’abo bahemukiye kuko hari ingero z’abamaze gutaha ariko usanga bidoga kubo bahemukiye.

Yashimye by’umwihariko Inkotanyi zabarokoye kandi zikabaha umutekano usesuye.

Umuyobozi w’Akarere ka Rwamagana, Mbonyumuvunyi Radjab yihanganishije abarokotse kandi abizeza ko Leta izakomeza kubafasha mu bibazo bahura nabyo, mu buzima no kubateza imbere.

Yasabye abantu bakuru kubwira abana babakomokaho amateka ya Jenoside batayagoretse, kugira bamenye gutandukanya ikibi n’icyiza no kwamagana ikibi.

Yavuze ko Leta yahisemo kubanisha Abanyarwanda bose kandi ubumwe bwabo bukaba ikingi ikomeye, ndetse no gushyira imbere Ubunyarwanda.

Meya Mbonyumuvunyi yasabye abazi ahaharereye imibiri y’Abatutsi bishwe muri Jenoside kuhagaragaza kugira ngo bashyingurwe mu cyubahiro, kuko bizafasha abarokotse ndetse abasaba no kubegera bakabasaba imbabazi kuko utazabikora Imana itazamubabarira.

Ati “Nk’abasenga Imana tuzi ko ibyaha umuntu akora biri mu byiciro bibiri, hari icyaha ukora kiri hagati yawe n’Imana yenda wifuje niba ukoze iki n’iki kiri hagati yawe n’Imana aho uri hose wayisaba imbabazi, ariko nk’abantu basenga Imana tuzi ko icyaha kiri hagati y’umuntu n’undi nushaka uzasenge cyangwa uzarorere, uzajye mu musigiti, mu Kiliziya, mu ikanisa cyangwa uzarorere. Igihe ugifite icyaha kiri hagati yawe na mugenzi wawe utaramusaba imbabazi ngo abe ariwe ukubabarira ngo ubone gusaba Imana ubwa kabiri, ntabwo kiriya cyaha uzakibabarirwa.”

Yasabye abakoze ibyaha kwegera abo babikoreye babasabe imbabazi kugira ngo bikiranure n’Uwiteka Imana.

I Ruhanga hashyinguwe imibiri y’abantu batatu kuri uyu wa Gatanu

Ingabire yabitangarije ku Rwibutso rw’i Ruhanga mu Murenge wa Rusororo w’Akarere ka Gasabo kuri uyu wa Gatanu tariki 15 Mata 2022, hakaba hashyinguwe imibiri y’abantu batatu yiyongera ku mibiri 37,759 y’Abatutsi biciwe mu turere twa Gasabo, Rwamagana na Kicukiro.

Abarokotse Jenoside hamwe n’inzego z’ubuyobozi bakomeje kuvuga ko hakiri imibiri myinshi y’Abatutsi bazize Jenoside itaraboneka kandi nta cyizere, kuko ngo abakagombye kuyigaragaza batabitinyuka.

Gatete Alphonse yavuze ko umubiri wa mushiki we wagaragajwe na Caterpillar yarimo isiza ikibanza

Uwitwa Alphonse Gatete uri mu bashyinguye ababo ku rwibutso rw’i Ruhanga kuri uyu wa Gatanu, avuga ko umubiri wa mushiki we bari barawubuze ariko mu byumweru bibiri bishize ngo wabonetse i Mbandazi ugaragajwe n’imashini(caterpillar) yarimo gusiza ikibanza.

Umuyobozi w’Umujyi wa Kigali, Pudence Rubingisa, yanenze ababonye Abatutsi bicwa ariko ntibabivuge, imibiri yabo ikaba irimo kugaragazwa n’uko imashini zihacukuye, cyangwa biturutse ku bantu bagiranye amakimbirane hakavamo ushaka gushyira hanze mugenzi we.

Rubingisa yagize ati "Mu byumweru bibiri bishize twabonye indi mibiri 89 mu Bitaro bya CHUK bitewe na ’Caterpillar’ yarimo yubaka. Mu mwaka ushize nabwo twabonye indi mibiri i Nyamirambo hafi ya Cyivugiza, na yo ntabwo yagaragajwe n’umutima mwiza cyangwa se kwihana ahubwo ni amakimbirane yabaye hagati y’abantu babiri, umwe avamo undi ati ’iyi nzu wayubatse hejuru y’imibiri y’abantu".

Pudence Rubingisa uyobora Umujyi wa Kigali yitabiriye iki gikorwa

Meya(Mayor) Rubingisa avuga ko kuba imibiri irenga ibihumbi 84 yaragaragaye mu myaka ya 2018-2019 mu Gahoromani(mu mirenge ya Rusororo na Masaka) na yo ngo bitaturutse ku muntu wavuze aho iherereye, ahubwo byatewe n’imirimo yahakorerwaga.

Umunyamabanga wa Leta muri MINALOC ushinzwe imibereho myiza y’Abaturage, Assumpta Ingabire, asaba uwaba atinya kugaragaza ahajugunywe imibiri mu gihe cya Jenoside wese, gushaka uburyo bumurindira umutekano yabivugamo ariko ntabiceceke.

Umunyamabanga wa Leta muri MINALOC, Assumpta Ingabire

Ingabire yemera ko n’inyandiko zitagaragaza umwirondoro w’uwazanditse(tract) zatabwa ku mihanda aho abantu bashobora kuzitoragura, ariko bakamenya aho imibiri y’Abatutsi bicwaga iherereye.

Yagize ati “Ntabwo ari ibintu bigoye gufata urupapuro n’ikaramu ukavuga uti ‘Naka ari hano’, warangiza ukakajugunya aho rwose, za ‘tracts’ z’abapfobya cyangwa z’abatuka Igihugu zo ntizemewe ariko ‘tract’ yo kuvuga ngo ‘murebe uyu mubiri uri aha’, ukayishyira ku murenge, ku kigo nderabuzima,… nawe ubwawe wumva uruhutse, mubikore mu buryo bwa ‘tracts’ byo biremewe ntacyo bidutwaye”.

Ingabire yasabye urubyiruko kurwanya ipfobya n’ihakana rya Jenoside yakorewe Abatutsi rwifashishije gusoma ibitabo biri ku nzibutso no mu nzego za Leta zitandukanye ndetse na za disikuru z’abayobozi, kugira ngo rubone ibitekerezo byarufasha kunyomoza amakuru atangazwa n’abitwa ‘abajenosideri’.

Urwibutso rw’i Ruhanga rwahoze ari urusengero rw’Abangilikani

Mu gikorwa cyo kwibukira ku rwibutso rw’i Ruhanga kuri uyu wa Gatanu, imbaga y’abantu yumvise ubuhamya bwa Gatama Marie-Grâce waharokokeye avuye i Gahengeri muri Rwamagana, akaba avuga ko barwanye n’Interahamwe bakoresheje imiheto n’amabuye, ariko baza kurushwa imbaraga n’uko haje abasirikare ba Ex-FAR babarashe bakoresheje indege.

Imibiri isaga 800 y’Abatutsi biciwe mu cyahoze ari Cour d’Appel Ruhengeri yashinguwe mu cyubahiro

Yabigarutseho kuri uyu wa Gatanu tariki 15 Mata 2022, mu Karere ka Musanze, mu muhango wo gushyingura mu cyubahiro imibiri isaga 800, y’inzirakarengane z’Abatutsi, biciwe mu cyahoze ari Urukiko rw’Ubujurire rwa Ruhengeri (Cour d’Appel Ruhengeri).

Iyo mibiri ishyinguwe mu rwibutso rwa Musanze, nyuma y’imyaka isaga 28 yari ishize, abarokotse Jenoside yakorewe Abatutsi basaba ko ababo bashyingurwa mu buryo bubasubiza icyubahiro bambuwe, ari nako basabaga ko amateka y’ubwicanyi bwakorewe Abatutsi muri urwo rukiko arushaho gusigasirwa.

Kuba inyubako z’icyahoze ari Cour d’Appel Ruhengeri, zimaze igihe gito zivuguruwe, hagahindurwa urwibutso rwa Musanze, abafite ababo bahiciwe n’abarokotse Jenoside yakorewe Abatutsi, babifata nk’intambwe ikomeye bateye, nyuma y’igihe kinini gishize.

Nzitabimfura Immaculée, warokotse wenyine mu muryango w’abantu umunani, akaba yari anahagarariye imiryango ifite ababo biciwe muri Cour d’Appel Ruhengeri, yashimye icyo gikorwa.

Yagize ati “Uru rwibutso turubonye twari turubabaye, bitewe n’intimba twaterwaga no kuba imibiri y’abacu, yari imaze imyaka 28 inyagirirwa mu byobo bajugunywemo, ubwo bari bamaze kwicirwa muri iyi nzu yahoze ari iy’ubutabera bari bahungiyemo bizeye kuhakirira. Turashimira ubuyobozi bwacu bwumvise ubusabe twari tumaranye icyo gihe cyose, bw’uko bakurwa muri ibyo byobo, bagashyingurwa mu cyubahiro mu rwego rwo gusigasira amateka y’uburyo abacu bishwemo, no kwirinda ko asibangana. Turishimye cyane kuba abacu tubashyinguye neza, bakaba baruhukiye muri uru rwibutso”.

Mu kiganiro cyatanzwe na Minisitiri w’Ubumwe bw’Abanyarwanda, Dr Bizimana Jean Damascène, cyagarutse ku mateka y’umwihariko y’icyahoze ari Perefegitura ya Ruhengeri, agaragaza ko urwango ku bwoko bw’Abatutsi, rwigishijwe runashyirwa mu bikorwa kuva no mu myaka yo mbere ya Jenoside yakorewe Abatutsi.

Dr Ntezilyayo yasabye abaturage gukumira umuco wo kudahana

Ahanini bitewe n’uko benshi mu bakomokaga muri aka gace b’abategetsi bo hejuru, abakozi ba Leta n’ibigo byigenga b’ibikomerezwa, abasirikari bakuru n’ibindi byiciro binyuranye, bari mu bagize uruhare rukomeye mu gutangiza ingengabitekerezo ya Jenoside, kuyikwirakwiza no kuyishyira mu bikorwa; nyamara ubutabera bwariho icyo gihe, bukaba nta n’umwe bwigeze bubiryoza.

Minisitiri Dr Bizimana, ashimangira ko iyo mitegekere yahemukiye igihugu, inangiza bikomeye indangagaciro z’Abanyarwanda, kuko usibye kuba imbaga y’Abatutsi bagiye bicwa, abandi bagakorerwa iyicarubozo, ihohoterwa n’itotezwa kuva mbere no mu gihe cya Jenoside; na nyuma yayo kugeza n’ubu, igihugu kigihanganye n’ingaruka byagize ku mibanire y’Abanyarwanda, ubukungu bw’igihugu n’Abarokotse Jenoside yakorewe Abatutsi.

Yagize ati “Leta yo hambere ya Jenoside yari ifite ubugome bukomeye, yica Abatusti, ikabatoteza kandi yarimakaje ingengabitekerezo mbi ya Jenoside, urwango n’akarengane. Amateka y’iyo myaka yose, kuva mu 1959 kugeza mu 1994, agenda agaragaza ingero nyinshi z’Abatutsi bagiye bicwa, abasigiwe ubumuga, abahunze iyo mitegekere mibi ndetse na bamwe mu batari Abatutsi batari bashyigikiye imitegekere idahwitse, bagiye bicwa urubozo abandi bagafungwa”.

Minisitiri Bizimana ahamya ko mu cyahoze ari Perefegitura ya Ruhengeri Abatutsi bicwaga kuva na cyera ntihatangwe ubutabera

Mu gihe cya Jenoside, Abatutsi bagiye bavanwa mu cyahoze ari sous-perefegitura ya Busengo, mu makomini ya Nyarutovu, Gatonde, Ndusu, Kigombe n’ahandi, bakazanwa mu ma bisi babeshywa n’ubutegetsi bwariho, ko bubarindira ahahoze ari Cour d’Appel Ruhengeri.

Ariko ngo siko byaje kugenda, kuko ku itariki 15 Mata 1994, aribwo interahamwe zahabasanze, zibicisha amasasu n’intwaro gakondo, hanyuma zibajugunya mu byobo byari byaracukuwe muri metero nkeya uturutse aho inyuba z’urwo rukiko ziri.

Perezida w’Urukiko rw’Ikirenga, Dr Faustin Ntezilyayo, yavuze ko kwicirwa mu cyumba cy’ubutabera, nta handi byigeze biba mu mateka y’Isi.

Yagize ati “Kwicira inzirakarengane z’Abatutsi mu rukiko, ahantu ubundi bagombye kuba baraboneye ubutabera, nta handi hantu byigeze biba ku Isi. Ibi ubwabyo ni ikigaragaza ubukana n’umwihariko bya Jenoside yakorewe Abatutsi. Ni muri urwo rwego ahantu nk’aha hagaragaza ayo mateka, ubuyobozi bwicaye bubona koko hakwiye guhindurwa urwibutso; ikigamijwe ahanini ni ukugira ngo bidufashe kuzirikana amateka ya Jenoside, duharanira ko itazongera kubaho ukundi”.

Yasabye abaturage guhamya ingamba zo guca umuco wo kudahana, kuko ariwo woretse u Rwanda.

Yagize ati “Ni ngombwa ko dukomera ku rugamba rwo kubaka igihugu kigendera ku mategeko, kandi kiyubahiriza kuri buri muturarwanda wese, nta vangura rw’amoko cyangwa icyo ryaba rishingiyeho cyose”.

Ati “Biragaragara ko muri kiriya gihe cya Politiki y’imitegekere mibi, umuco wo kudahana wakuririjwe urimakazwa, ku buryo n’uwicaga wese cyangwa agahohotera undi nta butabera bwatangwaga. Iyo rero haba harabayeho kumva neza ko umuntu wavukije mugenzi we ubuzima agomba kubihanirwa n’amategeko nk’uko bigenda ubu; ntabwo tuba twarageze ku icuraburindi rya Jenoside yakorewe Abatutsi. Niyo mpamvu tugomba kwimakaza ibituma twubahiriza uburenganzira bw’umuntu bw’uko atavutswa ubuzima, cyangwa ngo buhungabanywe n’uwo ari we wese”.

Dr Ntezilyayo, yibutsa abaturage ko icyaha cya Jenoside kidasaza, bityo ko buri wese akwiye kugira uruhare mu gushyigikira ko inzira y’ubutabera ikomeza, binyuze mu gutanga amakuru n’ubuhamya bituma ubutabera bugerwaho, cyane cyane ku barokotse Jenoside yakorewe Abatutsi.

Ubuyobozi bw’Akarere ka Musanze, buhamya ko kuba imibiri y’abiciwe mu cyahoze ari Cour d’Appel Ruhengeri ishyinguwe mu cyubahiro, ari intambwe ikomeye igezweho nyuma y’imyaka 28.
Ramuli Janvier uyobora ako Karere, yashimye by’umwihariko Leta y’u Rwanda ibinyujije muri Minisiteri y’Ubutabera, yemeye ubusabe bw’uko inzu yahoze ari iy’Ubutabera ivugururwa, ikagirwa Urwibutso rw’Akarere ka Musanze.

Ahamya ko bikuyeho ipfunwe ubuyobozi n’abarokotse Jenoside bahoranaga, bitewe n’uko imibiri y’ababo, yari ishyinguye mu buryo butayihesha icyubahiro. Icyakora ariko n’ubwo inyubako z’uru rwibutso zuzuye, ngo haracyari urugendo rukeneye ubuvugizi n’ubufatanye, kugira ngo uru rwibutso rubone abakozi nkenerwa, n’ibikoresho bituma rugera ku rwego rw’izindi nzibutso zo mu gihugu.

Ikigamijwe ngo ni ukugira ngo amateka rusigasiye, azabe kimwe mu by’ingenzi mu kugaragariza abaturuka impande zose z’isi bagana ako Karere, ubukana Jenoside yokorewe Abatutsi yakoranywe.

Yabivuze mu buhamya yatangiye i Kibeho ku wa 14 Mata 2022, mu gikorwa cyo kwibuka Abatutsi bahiciwe, cyane cyane ku itariki ya 14 n’iya 15 Mata 1994.

Mu buhamya bwe, yavuze ko Kiliziya ya Kibeho yayihungiyeho hamwe n’ababyeyi be, baturutse iwabo i Rwamiko, kandi ko bari bahahungiye bizeye kuharokokera nk’uko byari byaragenze mu mu 1959.

Icyizere cyaraje amasinde ubwo imbaga y’Abatutsi yari yahahungiye, yarashwe ikanaterwa grenade, hanyuma abaturage na bo bakabirohamo bakabica.

Icyo gihe abe barapfuye, we ahungira mu bihuru byari hepfo ya Kiliziya, kandi ku bw’amahirwe ntiyari yanakomeretse.

Yakomeje kwihishahisha hafi aho maze ku itariki ya 16 Mata, agira amahirwe yo kujyanwa na Musenyeri Augustin Misago ku bitaro bya Kigeme n’ubwo we atari yakomeretse.

Icyo gihe ngo yari kumwe n’abandi 10 bari babashije kwikura cyangwa bakuwe mu mirambo, bari bakomeretse, kandi umwe muri bo yahise agwa kwa muganga.

Jérôme Rugema atanga ubuhamya

Nyuma yaho ngo yaje gukorera abasirikare baje gushyira intwaro hasi bagasanga Inkotanyi, maze azana na bo i Kigali, ni uko asubira mu mwaka wa gatanu w’amashuri abanza ariga, ku buryo ubu yize na kaminuza kandi ngo yariyubatse, afite n’umugore n’abana.

Iyo atekereje kuri Jenoside n’uko yayibayemo, avuga ko yatunguwe akanababazwa no guhemukirwa n’abaturanyi, ariko akanatangazwa no guhura n’ababahigaga bashaka kubica batakibifitiye imbaraga.

Ati "Baravuga ngo Interahamwe zishe abantu, ariko njyewe nta n’imwe nabonye. Numvaga Interahamwe ari abantu batojwe banafite umwambaro ubaranga, bicaga abantu. Twebwe twahutswemo n’abaturanyi twari dusanzwe tubanye neza."

Akomeza agira ati "Natunguwe no kubona umuntu mwari musanzwe muziranye ashaka kukwica, akica abantu 10, akageza kuri 20 no kuri 50."

Yungamo ati "Natunguwe no kubona umugabo wari ufite umugore w’Umututsikazi atera ahari sebukwe n’abandi bo mu muryango we, akica. Nanatunguwe no kubona abaturanyi baraje kutwica, tutarigeze tumenya ibyo bategura kandi twari tubanye neza."

Yakomeje agira ati “Ikindi cyantangaje ni ukubona abaduhemukiye bari barahungiye i Burundi no muri Congo duhurira i Muhanga, batashye n’amaguru, hanyuma bagashyirwa imbere y’ubutabera, bagahanwa”.

Perezida wa Ibuka mu Karere ka Nyaruguru, Bertin Muhizi, avuga ko Abatutsi biciwe i Kibeho ubu banahashyinguye babarirwa mu bihumbi 30.

Ngo bari bahahungiye baturutse mu Mirenge ya Rwamiko, Kivu, Mudasomwa ndetse na Mubuga, ari yo yari irimo Kiliziya ka Kibeho.

Abicanyi bagerageje kubica ku itariki ya 12, babananiye bagarukana n’abasirikare bari bafite imbunda na grenade.

Abakozi b’Ibigo bya Leta bihuriye mu nyubako imwe na MYCULTURE na MIGEPROF bashyize indabo aharuhukiye imibiri y’Abatutsi bazize Jenoside ku rwibutso rwa Kigali

Ni umuhango wabereye ku rwibutso rwa Jenoside rwa Kigali, kuri uyu wa Kane tariki 14 Mata 2022, witabirwa n’abakozi barenga 250. Wabimburiwe no gushyira indabo aharuhukiye imibiri irenga ibihumbi 250 y’Abatutsi bishwe bazira ubwoko bwabo mu 1994.

Ibiganiro byose byagarukaga ku mateka na Politiki mbi by’icuraburindi ry’urwango byagiye biranga u Rwanda guhera mu 1959, aho Abatutsi bagiye batotezwa, bameneshwa ndetse bakanicwa kugera mu 1994 ubwo Jenoside yakorewe Abatutsi yashyirwaga mu bikorwa hakicwa abarenga Miliyoni mu gihe cy’iminsi 100 gusa.

Umunyamabanga Nshingwabikorwa w’umuryango IBUKA wita ku nyungu z’abarokotse Jenoside, Naphtal Ahishakiye, avuga ko kwibuka bituma bagira imbaraga zo kongera kubaho, kuko abo bibuka babibukiraho byinshi, gusa ngo haracyari ibibazo birimo n’iby’abantu badashaka kugaragaza aho imibiri y’Abatutsi bishwe iri.

Ati “Imibiri tutarabona icyo nemera ni uko hari abantu bazi aho iri. Jenoside yakozwe ku manywa ari n’uwishe nijoro yarabivugaga, ku buryo ahantu imibiri iri harazwi, n’aho tuyikura uyu munsi bishimangira ko n’ahandi isigaye harazwi, abantu babishatse Leta y’Ubumwe bw’Abanyarwanda ifite ubushake, n’ubushobozi, no mu cyumweru kimwe iyi mibiri yatunganywa igashyingurwa, iki kintu tukakivaho tukajya ku kindi”.

Akomeza agira ati “Ubu ngubu imibiri tubona ahanini tuyerekwa n’urubyiruko, ni abana bato, iwabo babona amaze kuba mukuru, bagatangira kujya babivuga, ryamugwa mu gutwi akaza akakubwira ati rwose ntimuzabakurikirane ariko iwacu hari imibiri, mwagenda koko mugasanga irahari”.

Minisitiri w’Urubyiruko n’Umuco Rosemary Mbabazi, avuga ko mu bihe byaranze itegurwa n’ishyirwa mu bikorwa rya Jenoside yakorewe Abatutsi mu 1994, urubyiruko rwigishijwe n’ubutegetsi bubi urwango no kwica ku buryo ibikorwa byarwo byaranzwe n’urwango ndengakamere.

Ati “Hari ubushakashatsi twakoze nka Minisiteri y’Urubyiruko Umuco na Siporo bikiri kumwe mu 2019, bwagaragaje ko n’uwari Minisitiri w’urubyiruko n’amashyirahamwe mu 1989 kugera mu 1994, Callixte Nzabonimana yagize uruhare rukomeye muri Jenoside yakorewe Abatutsi, anahanwa n’urukiko mpanabyaha rwashyiriweho u Rwanda, ku buryo yahawe igihano cyo gufungwa burundu”.

Minisitiri Rosemary Mbabazi n’abandi bakozi ba Minisiteri y’Urubyiruko n’Umuco bunamiye imibiri y’Abatutsi bazize Jenoside iruhukiye ku rwibutso rwa Kigali

Akomeza agira ati “By’umwihariko muzi ko uwari Minisitiri w’Umuryango n’Iterambere ry’abagore kuva mu 1992 kugera mu1994 Pauline Nyiramasuhuko na we yagize uruhare rukomeye muri Jenoside ubu arafunze, za Minisiteri dushinzwe dufite uruhare rukomeye cyane, rwo gutoza urubyiruko umuco n’indangagaciro, kubarinda ikibi, kubagaragariza ikibi, bituruka mu muryango bikagera ku rubyiruko”.

Minisitiri w’Uburinganire n’Iterambere ry’Umuryango, Prof Jeannette Bayisenge, avuga ko umuryango ari wo rukundo n’ishingiro by’umuryango mugari w’Abanyarwanda, ukaba igicumbi cy’indangagaciro na kirazira by’umuco nyarwanda.

Ati “Kandi kugira ngo Jenoside ishoboke ni uko uyu muco wabanje kujanjagurwa, umuryango urajanjagurwa, bivuze ko uruhare dufite nka Minisiteri ni urwo kugarura uyu muco, kongera kubaka umuryango, bityo turakomeza gukangurira buri wese kubaka umuryango utekanye, aho amacakubiri n’ingengabitekerezo bitarangwa, twirinde guha abana bacu amateka agoramye, turwanye ingengabitekerezo yo ku ishyiga”.

Minisitiri Prof Bayisenge n’abakozi ba MIGEPROF bashyize indabo aharuhukiye imibiri y’Abatutsi bazize Jenoside ku rwibutso rwa Gisozi

Hacanwe urumuri rw’icyizere

Imibiri ine y’Abatutsi bazize Jenoside yashyinguwe mu cyubahiro

Ibi yabigarutseho ku wa Gatatu tariki 13 Mata 2022, mu Karere ka Nyabihu, mu muhango wo gusoza icyumweru cyo kwibuka ku nshuro ya 28 Jenoside yakorewe Abatutsi, umuhango wabereye ku rwibutso rwa Mukamira, ahanashyinguwe mu cyubahiro imibiri ine y’inzirakarengane z’Abatutsi bishwe muri Jenoside.

Muri iyi myaka 28 ishize Jenoside yakorewe Abatutsi ibaye, Murekatete Diane wayirokotse, yari ayimaranye intimba ituruka ku kuba atari yakabonye bamwe mu bagize umuryango we, ngo abashyingure mu cyubahiro.

Kuri ubu bisa n’aho iyo ntimba yatangiye gucogora, nyuma y’aho imibiri itatu ya babyara be, ibonetse aho yari yarajugunywe; bakaba ari bamwe mu bashyinguwe mu Rwibutso rwa Mukamira.

Yagize ati “Imyaka 28 yari ishize tugishakisha imibiri yabo, twarayibuze. Mu gihe aho yari yarajugunywe ba nyiri amasambu bo bayihingiragaho, bakayirohaho itaka, twe tugahorana imitima ihagaze, twibaza irengero ryabo byaratuyobeye. Nyuma yo kubabone ubu bakaba banashyinguwe mu cyubahiro hamwe n’abandi, umutima wanjye ndumva wururutse, ndishimye cyane, kuko ubu noneho baruhutse imvura yahoraga ibanyagirira mu bisambu. Ubu igisigaye ni ukujya tuza kubibuka, tubazaniye indabo tuzi neza ko baruhukiye mu mahoro”.

Abarokotse Jenoside yakorewe Abatutsi bo mu Karere ka Nyabihu, bagaragaza ko bagishengurwa no kuba hari abagitsimbaraye ku kudatanga amakuru y’ahajugunywe imibiri y’Abatutsi bazize Jenoside; n’aho iyo mibiri igenda iboneka, hakaba abayitirira ukundi kuntu, gutandukanye no kuba ari iy’Abatutsi bishwe muri Jenoside.

Ibi abarokotse Jenoside, babifata nko kuyobya uburari ku babikora, no kuba baba bagamije gusibanganya ibimenyetso. Ibi bakabifata nk’ibyabangamira inzira y’ubumwe n’ubwiyunge.

Juru Anastase, Perezida wa IBUKA mu Karere ka Nyabihu agira ati “Tumaze iminsi tugira imbogamizi zo kuba hari abantu bagira ubushake bwo kuduha amakuru y’ahajugunywe imibiri y’abacu bishwe muri Jenoside, tukayishakisha, yamara kuboneka, bamwe bakayitirira ukundi kuntu. Aho usanga hari n’abatinya kuyitirira iy’abo mu gihe cy’abacengezi. Ibi tubibona nk’ibishobora kudusubiza inyuma mu ntambwe twari twaratangiye y’ubumwe n’ubwiyunge”.

Juru atanga ingero z’imibiri 19 yabonetse mu Murenge wa Karago, ariko ikaba imaze hafi imyaka ibiri itarashyingurwa mu cyubahiro, kubera izo mbogamizi.

Minisitiri Mujawamariya yabwiye abaturage ko komora ibikomere nyako ku barokotse Jenoside binajyana no kubaha amakuru y’ahajugunywe imibiri y’ababo

Innocent Tuyizere, na we warokotse Jenoside ati “Hari abacu bazimiye burundu, bitewe n’uko babaga bishwe bakaribwa n’imbwa zo mu mashyamba harimo n’irya Gishwati; ariko hakaba n’abo tutazi iyo abicanyi bagiye babajugunya. Nyamara bamwe mu babigizemo uruhare, barimo abo twari duturanye dusangira akabisi n’agahiye, babireberaga bikorwa, abandi banabyijandikamo, ariko kugeza uyu munsi bakaba bakomeje kutwima amakuru y’aho abacu bari ngo tubashyingure mu cyubahiro”.

Ati “Abo nk’uko twateye intambwe yo kubababarira, na bo tubasaba tubinginze ko batwereka aho abacu bari, tubavaneyo, tubazane bashyingurwe mu cyubahiro”.

Ubuhamya bwatangiwe muri uwo muhango bwagarutse ku buzima bushaririye Abatutsi babayemo mbere ya Jenoside no mu gihe yakorwaga, ariko kandi by’umwihariko, bashima Ingabo za RPF Inkotanyi zunamuye icumu, zikagahagarika Jenoside, ubu Abanyarwanda bakaba babayeho batekanye.

Murekatete Diane ufite abe bashyinguwe muri uru rwibutso ashima Inkotanyi zabarokoye

Murekatete ati “Ingabo za RPF Inkotanyi zunamuye icumu ryari ritumereye nabi, zihagarika Jenoside yakorewe Abatutsi, none ubu turatekanye. Ese ubu iyo zitabaho, ngo zongere kubaka amashuri abana bari kwiga gute koko? Iyo zitabaho ngo ziduhe amacumbi, abari batwikiwe amazu abandi basenyewe, ubu baba batuye hehe?”

Ati “Ko zatugabiye inka zidukamirwa mu gihe izacu zari zarasahuwe, izindi barazitemaguye, ubu tuba tunywa amata dukuye hehe? Ya majoro twararaga mu bigunda, imvura itunyagira, benshi muri twe twaratemaguwe, tutagira udutabara, iyo zitahaba twari kuba aba nde? Turazishimira ukuntu zitangiye ubuzima bwacu n’igihugu, zigaharanira ko Abarokotse Jenoside bongera kugarura icyizere cy’ubuzima”.

Minisitiri w’Ibidukikije, Dr Mujawamariya Jeanne d’Arc, akaba n’imboni y’Akarere ka Nyabihu muri Guverinoma, yagaye abagitsimbaraye ku kudatanga amakuru y’ahajugunywe imibiri y’Abatutsi bazize Jenoside.

Yagize ati “Ntabwo ari ibintu byoroshye kwiyubaka, mu gihe hari abagifite ababo bakinyagirirwa hirya no hino, aho bamwe banyagirwa n’imvura abandi banatembanwa n’amasuri. Twibutsa buri Munyarwanda wese, ko kubaka uwacitse ku icumu rya Jenoside, bitagarukira gusa mu kumuha inzu, ifunguro, kumurihira ishuri cyangwa kumuha amafaranga; ahubwo binajyana no kumumenyesha aho abe bajugunywe, kugira ngo bashyingurwe mu cyubahiro. Ababyirengagiza nkana, ni abo kugawa. Tubasaba ko bishyira mu mwanya w’abarokotse Jenoside. Nibatange amakuru yafasha kumenya ahakiri imibiri itarashyingurwa mu cyubahiro”.

Imibiri ine yashyinguwe mu cyubahiro mu rwibutso rwa Mukamira, yiyongera ku yindi mibiri 2202 y’Abatutsi bazize Jenoside, isanzwe iruhukiye muri uru rwibutso.

Ni mu gihe muri ako Karere kari mu tugize icyahoze ari Komini Nkuri, habarurwa Abatutsi 7,645 bishwe mu gihe cya Jenoside. Kugeza ubu imibiri igera ku 1216, ikaba ariyo itaraboneka ngo ishyingurwe mu cyubahiro.

Juru Anastase, Perezida wa IBUKA mu Karere ka Nyabihu

Mu mugezi wa Nyabarongo hajugunyemo Abatutsi benshi

Ni ikiraro cy’abanyamaguru gihuza imirenge ya Rongi mu Karere ka Muhanga na Ruri muri Gakenke, kikaba gifite amateka mabi nyuma y’uko cyifashishijwe cyane muri Jenoside yakorewe Abatutsi mu 1994, abatabarika bishwe bajugunywa muri Nyabarongo.

Ni muri urwo rwego, ku itariki 11 Mata 2022, Akarere ka Gakenke kunamiye inzirakarengane zajugumywe muri uwo mugezi ku kiraro cya Gahira, hanatangirwa ubutumwa bunyuranye ku baturage bitabiriye icyo gikorwa.

Uhagarariye Ibuka mu Karere ka Gakenke, Dunia Sa’adi, yasabye abaturage gukomeza kwirinda ivangura n’ingengabitekerezo ya Jenoside, anasaba urubyiruko guharanira kumenya amateka mabi yaranze igihugu cy’u Rwanda, no gusigasira ibyiza kimaze kugeraho.

Ni ubutumwa bwashimangiwe n’Umuyobozi w’Akarere wungirije ushinzwe Imibereho myiza y’abaturage, Uwamahoro Marie Thérèse, wasabye abaturage kwirinda ikintu cyose cyagarura umwuka mubi mu Banyarwanda, kirimo amacakubiri n’ingengabitekerezo ya Jenoside, abasaba guharanira gutanga amakuru y’aho imibiri itarashyingurwa mu cyubahiro iri, kugira ngo nayo ishyingurwe.

Uhagarariye Ibuka mu Karere ka Gakenke, Dunia Sa’adi

Gahira ni ikiraro cyakomeje kugaragaza amateka mabi, aho no mu mezi make ashize cyangijwe n’abagizi ba nabi, imigenderanire hagati y’Akarere ka Gakenke na Muhanga yari yarahagaze, kikaba cyongeye gusanzwa inzira iba nyabagendwa.

Visi Meya Uwamahoro Marie Thérèse aganiriza abitabiriye icyo gikorwa

Evariste Bizimana ashima kuba ubu Abarokotse Jenoside bemererwa kwibuka ababo bishwe

Yabigarutseho mu gikorwa cyo gusoza icyumweru cy’icyunamo cyo kwibuka abazize Jenoside yakorewe Abatutsi mu 1994, tariki 13 Mata 2022, mu Murenge wa Mbazi mu Karere ka Nyamagabe.

Yahereye ku kuba abishe Abatutsi mu Bufundu n’u Bunyambiriri 1963 batarakurikiranywe, ariko n’ababo ntibahabwe uburyo bwo kubibuka, bakabika agahinda mu mitima yabo, byanabaviriyemo kutaruhanya ubwo bicwaga mu 1994.

Ubundi, nyuma y’igitero cy’inyenzi muri Nshili, abagabo bo muri utwo turere twombi kimwe n’abana b’ingimbi ngo barishwe, ariko bikomera cyane cyane ahari muri Komine Rukondo, ari ho Murenge wa Mbazi ubungubu, hayoborwaga na Grégoire Munyarubindo, wari muramu wa Perefe André Nkeramugaba.

Muri Komine Rukondo, batwara Abagabo b’Abatutsi hamwe n’abana b’ingimbi babo, ngo abagabo babwiye abagore babo ko bagiye gukubitwa, banabasaba gusigara bashyuhije amazi yo kuza kubakanda.

Barabategereje barababura kuko babiciye ahitwa i Manwari, hafi ya Rukarara, bamwe babajugunya mu mugezi abandi bashaka aho babashyira ku gasozi.

Bizimana ati “Nta mutima bari bakigira. Byabaye nko kwica intama kuko ari yo ujyana ukayica ijosi, igapfa itanishye.”

Ba bagore bapfakajwe bakanahekurwa ngo baje gusabwa kwenga inzoga yo gusangira n’ababiciye, nk’uburyo bwo kwikuraho umwaku, kugira ngo amaraso bamennye atazabakurikirana.

Bizimana ati “Ibaze umuntu yakwiciye, bakagusaba gushaka inzoga yo kugira ngo musangire! Basigaranye agahinda abo babyeyi.”

Icyo gihe abo bagore ngo banashinyaguriwe na Perefe wa Gikongoro, ubwo yari yaje gutanga ihumure akababwira ngo “ese murantunurira muntunurira iki? Abagabo banyu twabohereje muri LONI kubavuganira.”

Ibyo kandi ngo yabibabwiye hari abantu benshi bashungereye, harimo n’abana, ari na bo bakomeje umurimo w’ubwicanyi wari waratangiwe na ba se, mu gihe cya Jenoside yakorewe Abatutsi mu 1994.

Abo babyeyi bapfakajwe bakanahekurwa kandi ngo ntibigeze babwira abana akaga bahuye na ko. Bari barahisemo guceceka, bakabika agahinda mu mitima yabo kuko nta ruvugiro bari bafite.

Bizimana uvuga iby’aya mateka, se yicwa mu 1963 ngo nyina yari amutwite, ariko na we yabyumvise bwa mbere bari mu gikorwa cyo kwibuka Jenoside yakorewe Abatutsi mu 1994.

Ati “Nabyirutse mbona tuba mu miryango itagira abagabo. Iyo wahirahiraga ukabaza, baravugaga ngo turi inkunguzi. Ibi ni ukubera ko bakwiciraga, bakagushinyagurira, bakakubuza no kwibuka.”

Yungamo ati “Abo bakecuru mu 1994 ntabwo bigeze baruhanya, ahantu kure bihishe ni munsi y’urugo. Bari barimereye nk’udutama dutegereje ko baduca amajosi.”

Iki kiganiro cyateguwe n’umuryango mpuzamahanga uharanira amahoro binyuze mu gukumira no kurwanya Jenoside (AEGIS Trust), umuryango w’urubyiruko rwibumbiye mu muryango w’Abasakaza amahoro n’ urukundo (Peace and Love Proclaimers- PLP) ndetse na Imbuto Foundation.

#KuGicaniro ni igikorwa cyatangijwe muri 2017 n’umuryango w’abasakaza amahoro n’urukundo mu rwego rwo gushishikariza urubyiruko kumenya amateka n’ingaruka za Jenoside, uruhare rw’urubyiruko mu gukumira no kurwanya ingengabitekerezo ya Jenoside, no kwirinda ko bitazongera ukundi.

Iki kiganiro kikaba gifite insanganyamatsiko igira iti: “Uruhare rw’Urubyiruko mu gukumira Jenoside no kubaka u Rwanda twifuza’”. Ni ikiganiro cyitabiriwe n’abarenga 450 batuye mu Rwanda ndetse n’ababarizwa mu mahanga (Diaspora).

Kureba andi mafoto menshi, kanda HANO

Kurikira ubutumwa Madamu Jeannette Kagame yatanze muri iyi video:

Ubwo bibukaga ku nshuro ya 28 Jenoside yakorewe Abatutsi mu Rwanda mu 1994, tariki 12 Mata 2022, iyo Komisiyo yasabye buri wese kwamaganira kure ingengabitekerezo ya Jenoside no guharanira ko Jenoside itazongera kubaho ukundi.

Komisiyo y’Igihugu y’Uburenganzira bwa muntu yifatanyije n’Inama y’Igihugu y’abantu bafite ubumuga, Ikigega cyihariye cy’Ingoboka, hamwe n’urwego rwa MINALOC rushinzwe imipaka.

Babikoreye hamwe ku cyicaro cy’iyo Komisiyo i Remera mu Mujyi wa Kigali, kugira ngo barusheho gutekereza ku nshingano zabo n`uburyo buri wese yaharanira kuzuzuza neza.

Biyemeje kandi kugira uruhare mu kubaka umuryango nyarwanda urangwa n’amahoro, ubumwe, ubwiyunge, iyubahirizwa ry’uburenganzira bwa muntu n’imiyoborere myiza.

Perezida wa Komisiyo y’Uburenganzira bwa muntu, Mukasine Marie Claire, yanenze abateguye n’abakoze Jenoside yakorewe Abatutsi, kuko muri icyo gihe ihame ry’ingenzi ryo kubahiriza agaciro ka muntu ritubahirijwe.

Yagize ati “Igihe Jenoside yakorerwaga Abatutsi mu 1994, ihame ry’ingenzi ryo kubahiriza agaciro ka muntu riteganywa n’Itegeko Nshinga rya Repubulika y’u Rwanda tugenderaho, hamwe n’amasezerano mpuzamahanga u Rwanda rwemeje burundu, kandi bishimangira ko ubuzima bw’umuntu ari ntavogerwa, ko nta muntu n’umwe ukwiye kuvutsa undi ubuzima bwe, ntiryitaweho kuko inzirakarengane z’Abatutsi zavukijwe ubuzima bwazo.”

Mukasine Marie Claire uyobora Komisiyo y’Uburenganzira bwa muntu, yavuze ko iki ari igihe cyo kwisuzuma no kurebera hamwe uko buri wese mu mirimo ashinzwe yagira uruhare mu kurengera iyubahirizwa ry’agaciro ka muntu, gukumira no kurwanya ikintu cyose cyahutaza uburenganzira bwa muntu, cyane cyane Jenoside n’ingengabitekerezo yayo.

Ati “Dufite inshingano zo kunamira no gusubiza agaciro abazize Jenoside yakorewe Abatutsi mu 1994 ndetse no gukora ibindi bikorwa bigamije guhangana n’ingaruka zayo, kurwanya ingengabitekerezo no guharanira ko Jenoside itazongera kubaho ukundi. Dufite kandi inshingano zo kurushaho kumenya neza amateka mabi twanyuzemo yatumye Jenoside ishoboka, tukamenya aho twavuye, aho tugeze n’aho tugana.”

Komisiyo y’Igihugu y’uburenganzira bwa muntu yibukije abantu bose, ko bagomba kubaha agaciro ka muntu, kuzirikana ko abantu bose bafite uburenganzira bungana, kandi bugomba kubahirizwa, kumva ko ntawe ukwiriye kuvutsa undi ubuzima bwe, guharanira gukumira no kurwanya Jenoside n’ingengabitekerezo yayo mu muryango nyarwanda, guha abantu amakuru y’ukuri kuri Jenoside yakorewe Abatutsi kandi agamije ejo habo heza, abarinda amacakubiri n’ivangura, guharanira gutanga umusanzu ugaragara mu kubaka Igihugu cyabo cyane cyane mu kwishakamo imbaraga zituma hubakwa ejo hazaza heza, no kubumbatira ibyo u Rwanda rumaze kugeraho mu myaka 28 ishize Jenoside yakorewe Abatutsi ibaye.

Mukasine yashimiye abitabiriye icyo gikorwa cyo kwibuka Jenoside yakorewe Abatutsi mu mwaka wa 1994.

Ati “Mwakoze kwitabira kugira ngo dufatanye guhumiriza abavandimwe bacu, tubafate mu mugongo kugira ngo badaheranwa n’agahinda muri ibi bihe ahubwo barusheho kugira ikizere cyo kubaho. Mu izina ry’abagize Komisiyo no mu izina ryanjye bwite, ndangira ngo mpumurize kandi nkomeze abarokotse Jenoside yakorewe Abatutsi bose, by’umwihariko abo turi kumwe hano.”

Abaje kwibuka bagaragaza ko kongera guhura bakunamira ababo

Babitangaje kuri uyu wa 12 Mata 2022, ubwo bibukaga Abatutsi baguye mu cyahoze ari Komini Runda n’inkengero zayo bari bahungiye ku kigo nderabuzima cya Kigese muri Komini Runda, batewe n’interahamwe bakicwa ndetse benshi muri bo bakaba baragiye kurohwa muri Nyabarongo.

Tariki ya 07 Mata 1994 ni bwo Umututsi wa mbere yishwe mu Kagari ka Kigese, bikaba bivugwa ko ari na we wa mbere wazize Jenoside muri Kamonyi, uwo akaba ari umucuruzi wari uvuye kurangura, agatemerwa hafi y’iduka rye kuri iyo tariki.

Imibare igaragaza ko nibura ababarirwa mu 3.000 bajugunywe muri Nyabarongo abandi mu birombe byacukurwagamo amabuye y’urugarika, ari naho abarokotse Jenoside yakorewe Abatutsi bahera bifuza ko hashyirwa ibimenyetso by’ayo mateka, kuko byafasha mu kunoza ibikorwa byo Kwibuka.

Abaje kwibuka baganirijwe ku mateka y’itegurwa n’ishyirwa mu bikorwa rya Jenoside yakorewe Abatutsi

Umuyobozi w’Umuryango Ibuka mu Murenge wa Rugarika, Higiro Pierre Céléstin, asaba akarere ko kubera ko imibiri yajugunywe muri Nyabarongo itabonetse ngo ishyigurwe mu cyubahiro, hakwiye gushyirwa ikimenyetso cy’ayo mateka kugira ngo atazasibangana.

Agira ati “Hajugunye Abatutsi benshi bari bahungiye ku kigo nderabuzima cya Kigese, bagera mu bihumbi bitatu, ubu iyo tugiye kubibuka usanga tujugunya gusa indabo mu mazi nta kimenyetso cy’amateka gihari, kandi haraguye Abatutsi benshi bakomeje kurohwamo igihe kirekire”.

Higiro avuga ko kubera gahunda ya Leta ishyiraho itegeko rigenga ishyirwaho ry’ibimenyetso bya Jenoside, bari barasabye uburenganzira mu yahoze ari komisiyo y’Igihugu yo kurwanya Jenoside (CNLG), kandi yari irimo kubisuzuma.

Higiro avuga ko ahajugunywe Abatutsi hakwiye guhyirwa ibimenyetso by’amateka

Agira ati “Mu biharabuye naho hajugunywaga Abatutsi benshi, imibiri yakuwemo ishyirwa mu Rwibutso ariko ubu iyo tugiye kuhibukira dushyira indabo ku kasozi. Turifuza ko naho badufasha tukahashyira ikimenyetso cy’amateka, kuko inzego zibishinzwe zari zarabitwemereye”.

Higiro anavuga ko bahawe inkunga bagira uruhare mu gushyiraho ibyo bimenyetso, nko kwandika amazina y’abajugunywe muri Nyabarongo ku nkuta zabugenewe, no kubakira hamwe mu hafite amateka yihariye nk’uko byakozwe ahavanywe imibiri, imbere y’ikigo nderabuzima cya Kigese.

Umuyobozi w’Akarere ka Kamonyi, Dr Nahayo Sylvère, buvuga ko icyifuzo cy’abarokotse Jenoside kizasubizwa haba ku ngengo y’imari y’akarere cyangwa bikanyuzwa mu mikoranire n’izindi nzego, kugira ngo ibyo bimeyetso bishyirwe aho bikenewe.

Umuyobozi w’Akarere ka Kamonyi avuga ko gushyiraho ibyo bimenyetso bigiye gukurikiranwa

Agira ati “Birumvikana gushyiraho ibimenyetso bya Jenoside bigamije gukomeza gushimangira Kwibuka no gutanga amakuru ku byabaye kugira ngo bitazibagirana, tuzakomeza kubishyira mu bikorwa kuko ni ingenzi kandi ni ibintu byumvikana”.

Muri rusange abarokotse Jenoside bo ku Rugarika bishimiye intambwe bamaze gutera mu myaka 28 ishize Jenoside yakorewe Abatutsi ihagaritswe, by’umwihariko mu bumwe n’ubwiyunge aho abaturage bose bahurira mu bikorwa byo Kwibuka, bitandukanye n’imyaka yabanje byasaga n’ibiharirwa gusa abarokotse Jenoside yakorewe Abatutsi.

Abarokotse Jenoside bishimira ko basigaye bibukira hamwe n’abandi baturage

Ahakuwe imibiri imbere y’ikigo nderabuzima cya Kigese harazitiwe ariko ntiharuzura neza nigo bashyira

Yabitangaje kuri uyu wa Gatatu tariki ya 13 Mata 2022, mu gikorwa cyo kwibuka ku nshuro ya 28 Jenoside yakorewe Abatutsi, ku rwibutso rwa Musha mu Karere ka Rwamagana, ahashyinguwe imibiri 21 yabonetse.

Urwibutso rwa Jenoside rwa Musha rusanzwe ruruhukiyemo imibiri y’Abatutsi bishwe muri Jenoside 23,240, aba bakaba bariciwe muri Kiliziya Gatolika ya Musha, Fumbwe n’ahandi.

Musabyeyezu yashimye ubwitange bw’Inkotanyi zabarokoye, asaba abarokotse Jenoside gukomeza kuba intwari no guhora bazirikana ineza bagiriwe kuko yababereye icyomoro.

Yavuze ko ijambo humura babwiwe n’Inkotanyi batazaryibagirwa, kuko ariwo muti uvura wa mbere babonye kuko wababereye nka serumu ya mbere ihabwa umurwayi urembye.

Agira ati “Inkotanyi zadukuriyeho urupfu twerekwa urukundo, ineza yanyu yaraduherekeje, iyo humura yaraduherekeje na n’uyu munsi turacyayizirikana. Leta yacu y’ubumwe yakomeje kuba ariyo ishyira imbere iranayitwigisha (ineza), n’ubwo hari abadashaka kuyakira no kuyumva, birirwa batubuza amahwemo. Baratwicira amatungo, baraturatuza abacu bababwira amagambo mabi ariko nibasubize amerwe mu isaho, kuko ya neza yaduherekeje n’ubu iracyaturiho."

Yakomeje agira ati “Tuzi neza kandi duhumurizwa n’uko Leta yacu idashobora kubirebera, kuko yahagaritse Jenoside mu mbaraga nke bari bafite nkaswe ubungubu, aho twese twabaye Inkotanyi kandi tugamije kwimika ineza tukayisimbuza inabi twabonye.”

Minisitiri w’Ikoranabuhanga na Inovasiyo, Ingabire Paula, yihanganishije abarokotse Jenoside yakorewe Abatutsi mu mwaka wa 1994, abasaba gukomera.

Avuga ko Jenoside yakorewe Abatutsi yabaye ndengakamere, ariko Abanyarwanda bagomba kwibuka kugira ngo basubize agaciro abavukijwe ubuzima bazira uko baremwe, ndetse hanazirikanwa inzira itoroshye abacitse ku icumu rya Jenoside yakorewe Abatutsi 1994, banyuzemo ariko bakiyubaka bakongera kubaho.

Yungamo ko ikizere cyo kubaho cyabonetse, abarokotse Jenoside yakorewe Abaturage bafite inshingano zo kubakira kuri icyo kizere.

Ati “Ikizere cyo kubaho cyarabonetse, ubwo cyabonetse dufite inshingano zo kucyubakiraho tugakomeza kwiyubaka. Mu rwego rwo gukomeza kwiyubaka no gusigasira ibyagezweho, ndabasaba gukomeza gusigasira ihame ry’Ubumwe bw’Abanyarwanda; gukomeza kwiyubaka no kwihesha agaciro dushyira imbere Ubunyarwanda”.

Yakomeje agira ati “Turasabwa kurandura amacakubiri n’ingengabitekerezo ya Jenosode; guharanira amahame y’imiyoborere myiza na demokarasi; guharanira umuco wo gukora umurimo unoze; kuba hafi abarokotse Jenoside yakorewe Abatutsi no kurwanya ibyaha bya ruswa n’akarengane.”

Yasabye abaturage gufatanya gutanga amakuru y’ahari imibiri y’abishwe muri Jenoside yakorewe Abatutsi, kugira ngo iboneke ishyingurwe mu cyubahiro, kuko ari bimwe mu bifasha mu rugendo rwo gukira no kubaka igihugu.

Muri uwo muhango, abaturage ba Rwamagana bifatanyije n’abaturanyi babo b’Akarere ka Gicumbi, kuko bagize uruhare mu kurokora bamwe mu batutsi b’i Rwamagana.

Senateri Bizimana Jean Baptiste wabaye n’umuyobozi w’inkambi ya Rutare, yahurizwagamo Abatutsi bakuwe mu bice bitandukanye yavuze ko ku itariki 10 Mata 1994, icyahoze ari Komini Rutare cyafashwe n’Inkotanyi bituma Abatutsi benshi bo mu Murenge wa Fumbwe mu Karere ka Rwamagana bahungirayo.

Avuga ko ubwo babaga bagerageza kwambuka Muhazi ngo bajye i Rutare, ngo Interahamwe zarabakurikiye ariko ubuyobozi bwa Rutare burahagoboka bubatwara mu modoka abandi baraherekezwa n’amaguru.

Yongeraho ko na nyuma Abatutsi benshi barokorwaga mu bice bya Rwamagana, Inkotanyi zabambutsaga bakajyanwa mu nkambi ya Rutare, kuko ariho hari hizewe umutekano usesuye.

Byatangajwe na Minisitiri w’Ubumwe bw’Abanyarwanda n’Inshingano Mboneragihugu, Dr Jean Damascene Bizimana, hamwe na Perezida wa Sena Dr Augustin Iyamuremye, mu muhango wo gusoza Icyumweru cy’Icyunamo, wabereye ku Rwibutso rw’abanyapolitiki i Rebero mu Mujyi wa Kigali, kuri uyu wa 13 Mata 2022.

Urwo rwibutso rushyinguwemo imibiri isaga ibihumbi 14 y’Abatutsi biciwe mu bice bitandukanye by’Umujyi wa Kigali, hamwe n’Abanyapolitiki 12 bashimirwa kuba batarashyigikiye Politiki y’amacakubiri n’ivangura yaranze Leta zayoboye u Rwanda, kuva ku bwigenge (1962) kugera muri 1994.

Dr Bizimana avuga ko aba banyapolitiki barimo uwari Minisitiri w’Ububanyi n’Amahanga mu gihe cy’imishyikirano ya Arusha (1991-1994), Boniface Ngurinzira, ngo bagiye bitambika umugambi w’amashyaka ‘y’abajenosideri’ ari yo MRND na CDR.

Dr Bizimana avuga ko MRND yashyizeho amashyaka mato mato yo kwanga imishyikirano y’amahoro afatanyije na CDR, kuko ngo batashakaga gusaranganya ubutegetsi n’abandi, harimo abo bitaga Abatutsi bayobowe n’Inkotanyi.

Dr Bizimana avuga ko CDR ubwayo ngo yashakaga kurengera ibyavuye mu Mpinduramatwara (Revolution) yo mu 1959 yari igamije guharira ubutegetsi Abahutu, ndetse no kwiharira ubuyobozi bw’inzego zikomeye mu Gihugu.

CDR ngo yashakaga ko igihe Ngurinzira azajya mu mishyikirano y’amahoro i Arusha, agomba guharanira ko iryo shyaka ryemererwa kuyobora Guverinoma (Minisitiri w’Intebe akaba ari ho akomoka), Minisiteri y’Ingabo, Minisiteri y’Ububanyi n’Amahanga n’Ubutwererane, ndetse na Minisiteri y’Uburezi, yaba atabikoze akazirengera ingaruka zizaterwa n’ikizakurikiraho.

Dr Bizimana akomeza agira ati “Ikizakurikiraho mwarakimenye, ni uko Ngurinzira yishwe na n’ubu tukaba tutazi aho umurambo we uri ngo tumushyingure mu cyubahiro cyangwa se tumuherekeze nk’uko tubikorera aba banyapolitiki bandi, ariko turimo kuvugurura urutonde rw’Abanyapolitiki bashyinguwe i Rebero, ku buryo n’abandi beza nka Ngurinzira tuzabashyiramo bakajya bibukwa”.

Perezida wa Sena, Dr Iyamuremye yahise yibuka n’abandi barimo Dr Gafaranga Theoneste wari mu Ishyaka PSD akaba yarazize gusaba ko urubyiruko rwakoherezwa mu Nkotanyi, Maharangari Augustin wayoboraga BRD, Ntazinda Charles wari muri MDR, Magorane Ignace, Mbaguta Jean Marie-Vianney, Perefe Jean Baptiste Habyalimana n’abandi.

Dr Iyamuremye yagize ati “Hari benshi batavugwa bazize kwitandukanya n’abicanyi, bakaba bashyinguwe mu bice bitandukanye by’Igihugu. Hari n’abatazwi aho imibiri yabo yajugunywe, abo bose baranzwe no gukunda u Rwanda kugeza aho bashyira ubuzima bwabo mu kaga kugira ngo bakize Abatutsi, mureke tubibuke kandi tubunamire.”

Perezida wa Sena yamaganye abakwirakwiza ibinyoma bisebya Leta y’u Rwanda n’ibitekerezo, avuga ko bihembera ingengabitekerezo ya Jenoside yakorewe Abatutsi, barimo n’abavuga ko habayeho Jenoside ebyiri.

Icyumweru cy’icyunamo kirarangiye ariko Ubuyobozi busaba ko ibikorwa byo kwibuka byakomeza, kugeza ubwo iminsi 100 izarangira mu kwezi kwa Nyakanga k’uyu mwaka.

Kureba amafoto menshi, kanda HANO

Kurikira ibindi muri iyi video:

Ibi byatangajwe n’urubuga rwa Twitter y’urwibutso rwa Jenoside rwa Kigali, mu butumwa bugira buti: “Kare uyu munsi, Reed Hastings Umuyobozi akaba n’uwashinze Netflix, yasuye urwibutso mu guha icyubahiro inzirakarengane zazize Jenoside yakorewe Abatutsi.”

Netflix, ni ikigo cy’Abanyamerika cyerekana amashusho binyuze kuri internet. Kikerekana n’ibiganiro byo mu bihugu bitandukanye biciye kuri internet birimo nka filime mbarankuru n’iz’ubundi bwoko, ariko bigasaba kubanza kuba umufatabuguzi.

Uru rubuga rwa Netflix rurebwa mu bihugu 190 hirya no hino ku isi, aho rufite abakiliya basaga miliyoni 182. Uru ni urubuga rwatangijwe na Reed Hastings na Marc Randolph mu 1997.

Kuva ku wa Kane tariki 7 Mata 2022, nibwo hatangiye icyumweru cy’icyunamo ndetse n’iminsi 100 yo Kwibuka ku nshuro ya 28 Jenoside yakorewe Abatutsi. Ni muri urwo rwego Isi yose yifatanyije n’Abanyarwanda mu bikorwa byo gufata mu mugongo abagizweho ingaruka na Jenoside yakorewe Abatutsi.

Emmanuel Nkomeza (ubanza ibumoso)

Emmanuel Nkomeza ukora mu muryango IntraHealth International, yabwiye Kigali Today ati “Twagize igitekerezo cyo guhuza imbaraga nk’abantu bakorera mu Rwanda, kandi tuzi amateka yo mu Rwanda kugira ngo twifatanye n’abandi Banyarwanda guha icyubahiro inzirakarengane zazize Jenoside, ndetse tunakomeze abagezweho n’ingaruka za Jenoside yakorewe Abatutsi.”

Bamwe mu bakora muri iyo miryango ni abanyamahanga. Nkomeza asanga na bo kwibuka bibareba kuko Jenoside igomba kwamaganwa ku rwego rw’isi, dore ko n’Umuryango w’Abibumbye washyizeho gahunda yo kuyibuka no kuzirikana ububi bwayo.

Karamuzi Dennis, Umuyobozi w’umuryango Land O’Lakes Venture37

Karamuzi Dennis, Umuyobozi w’umuryango Land O’Lakes Venture37, umuryango wibanda ku bikorwa byerekeranye n’ubuhinzi n’ubworozi, avuga ko bateguye iyi gahunda mu rwego rwo kumva ko bose bafite uruhare mu kubaka u Rwanda bifuza.

Ati “Iyi ni imiryango ikorera mu Rwanda, kandi ikorana n’Abanyarwanda mu bikorwa by’iterambere, byumvikana rero ko tubana na bo umunsi ku wundi. Bamwe muri bo baba bagendana ibikomere harimo n’ibyo batewe na Jenoside yakorewe Abatutsi. Natwe rero tugomba kubisobanukirwa, kwifatanya na bo, no kugira uruhare mu isanamitima aho bishoboka. Rero ni ngombwa ko iyi gahunda yo kwibuka natwe tuyigiramo uruhare.

Umunyamabanga wa Leta muri Minisiteri y’Urubyiruko n’Umuco, Bamporiki Edouard

Umunyamabanga wa Leta muri Minisiteri y’Urubyiruko n’Umuco, Bamporiki Edouard, mu kiganiro yagejeje ku bitabiriye icyo gikorwa, yababwiye ko abantu bose bakwiye kwita ku bibahuza kuruta ibibatandukanya.

Yagaragaje ko ibyo abantu bashingiyeho by’amoko yatumye bamwe bica abandi nta shingiro bifite kuko mu bakoze Jenoside n’abayikorewe, iyo ugiye mu mateka yabo yo hambere usanga inkomoko yabo ari imwe.

Bamporiki yanashimye abakora muri iyo miryango barimo abanyamahanga, kuba bafata igihe na bo bakibuka Jenoside yakorewe Abatutsi, kuko wasangaga mu bihe byahise iyo gahunda hari abayifataga nk’aho itabareba, bamwe igihe cyo kwibuka cyagera bagafata indege bakigira mu bindi bihugu.

Imiryango mpuzamahanga 13 yahuriye muri icyo gikorwa cyo kwibuka ni Arrow Capital, Plan International, IntraHealth International, Girl Effect, CBM, TearFund, Heifer International, Land O’Lakes Venture37, Help A Child, Cordaid, Y-Labs, CCHUB, AgroFocus na Resitora ikoreramo yitwa Golden Plate, ndetse na ba nyiri iyo nzu.

Mu minsi iri imbere barateganya gutegura ibindi bikorwa byo kuremera abagizweho ingaruka na Jenoside yakorewe Abatutsi.

Ibikorwa nk’ibi byo guhurira hamwe bakibuka ngo basanzwe babikora, usibye ko mu myaka ibiri ishize byabaga hifashishijwe ikoranabuhanga bitewe n’icyorezo cya COVID-19.

Andi mafoto:

Bacanye urumuri rw’icyizere bahamya uruhare rwabo mu gutuma Jenoside itazongera kubaho ukundi

Bifuza ko uru rwibutso rwagurwa

Urwo rwibutso rubitse imibiri isaga 1800 y’abazize Jenoside yakorewe Abatutsi mu 1994, ngo ni ruto hagendewe ku mibiri itaraboneka y’abiciwe muri ako gace, bakaba basaba ko rwongererwa n’ibindi bikorwaremezo, birimo urukuta rwandikwaho amazina y’abarushyinguwemo, nk’uko bivugwa na Dunia Sa’adi, Umuyobozi wa Ibuka mu Karere ka Gakenke.

Yavuze ati “Uru rwibutso ni urw’Akarere ka Gakenke, muri standard z’urwibutso hari icyo amategeko n’amabwiriza agena, hari icyumba ndangamateka y’abacu baba baruhukiye hano, ntacyo dufite. Hari amafoto, hari igikuta kigaragaza amazina y’abaruhukiye hano, ntacyo rufite, ariko noneho n’ikindi gikomeye cyane murabona nk’urwibutso rw’akarere turacyashyingura, kubera ko uko imyaka itashye tugenda tubona imibiri hirya no hino, ariko ikigaragara ni uko urwibutso rwenda kuzura”.

Arongera ati “Izo ni zimwe mu mpamvu zikomeye cyane, dutekereza ko ku bufatanye n’ubuyobozi bw’akarere nk’uko twabisabye, uru rwibutso rwiza dufite hakwigwa gahunda yo kurwagura, dore ko rufite n’umwihariko wo kuba rwubatse ahantu hagutse, aho kurwagura bishoboka”.

Uwo muyobozi yavuze ko n’ubwo urwo rwibutso rubereye abazize Jenoside barushyinguyemo kandi rukaba rujyanye n’icyerekezo, aravuga ko mu gihe ruzaba rwaguwe kandi rukongererwa ibindi bikorwa remezo, ari kimwe mu bizarushaho kuruha agaciro.

Ni icyifuzo cyakiriwe neza n’ubuyobozi bw’Akarere ka Gakenke, bwemeje ko gahunda y’icyiciro cya kabiri mu kwagura urwo rwibutso rwa Jenoside rwa Buranga, bitarenza mu mwaka wa 2023, nk’uko byavuzwe n’Umuyobozi w’ako karere, Nizeyimana Jean Marie Vianney.

Ati “Iyubakwa ry’urwo rwibutso ruri mu byiciro bitatu, aho icyiciro cya mbere cyuzuye, icya kabiri cyo kurwubaka tukazagikora mu mwaka ukurikiyeho, niturangiza icyiciro cya kabiri birashoboka ko abaruhukiye mu zindi nzibutwo nk’urwa Muhondo na Ruli, nabo dushobora kubazana mu rwibutsio rwa Buranga”.

Dunia Sa’adi, Umuyobozi wa Ibuka mu Karere ka Gakenke

Arongera ati “Ni uburyo bwo kugira ngo barushyeho kwitabwaho, ndetse binaduhe uburyo bwo gukomeza gukurikirana no gufata neza ibindi bimenyetso ndangamateka, byari bisanzwe muri izo nzibutso ebyiri, ibyo byiciro bitatu nibirangira, twasigarana urwibutso rumwe rwitaweho rucunzwe neza”.

Hashize imyaka 28 mu Rwanda habaye Jenoside yakorewe Abatutsi, itwara ubuzima bw’abantu, yangiza ibikorwa remezo ndetse n’ibindi byinshi.

Kugeza ubu benshi baracyagendana ibikomere batewe na Jenoside, ari nako hari bamwe bagerageza kubyomora hifashishijwe uburyo butandukanye.

By’umwihariko, Jenoside yakorewe Abatutsi yagize ingaruka ku basportifs batandukanye, gusa bamwe kugeza ubu bahamya ko Siporo yababereye umuti, bakira ibikomere.

Mu baganiriye na Kigali Today, ndetse banatanze ubuhamya ahantu hatandukanye barimo Disi Dieudonné ukina umukino wo gusiganwa ku maguru, Adrien Niyonshuti ubarizwa mu mukino wo gusiganwa ku magare, Maitre Sinzi Tharcisse mu mukino wa Karate, ndetse na Cathia Uwamahoro ukina umukino wa Cricket. Bahamya ko Siporo yatumye biyubaka nyuma ya Jenoside.

Iterambere rya Adrien Niyonshuti mu magare: Hari uwo yashakaga kumara agahinda yatewe na Jenoside

Adrien Niyonshuti warokotse Jenoside yakorewe Abatutsi mu mwaka wa 1994 ni umwe bakinnyi bakoze amateka muri siporo mu Rwanda aho yabaye umukinnyi wa mbere wabigize umwuga mu mukino w’amagare mu Rwanda, akanaba Umunyarwanda wa mbere wakinnye imikino Olempike muri uyu mukino.

Se wabo, ni we watumye atangira gukina umukino w’amagare

Adrien Niyonshuti, avuga ko imbaraga za mbere zo gukunda umukino w’amagare, yazikuye kuri se wabo na we wahoze akina uyu mukino mbere ya Jenoside yakorewe Abatutsi, agashyira imbaraga mu kuwumwigisha ngo azamumare agahinda yatewe no kubura abana harimo n’uwari waratangiye kwitoza uyu mukino.

Agira ati “Imbaraga za mbere nazikuye kuri Data wacu witwa Turatsinze wakinaga umukino w’amagare, yabuze umuryango we wose, yari umugabo wubatse wari ufite umugore n’abana batandatu, bapfanye na mukuru wanjye umwe.”

Igare rya mbere Adrien Niyonshuti yakinanye arikesha Se wabo

“Turatsinze amaze kurokoka yagize ikintu nakwita nk’ihungabana kubera kubura umuryango we wose, akumva ko nta cyizere cyo kubaho, ariko mu biruhuko akajya ashyira imbaraga mu kuntoza igare.”

Ati “Ngomba kugutoza ukazaba umunyonzi mwiza, ukazankiza agahinda nagize ko kubura umuhungu wanjye Matene, nifuzaga kuzabasigira uyu mwuga wo gutwara igare.”

Adrien Niyonshuti avuga ko kuva icyo gihe gukina umukino w’amagare byari bivuze byinshi birenze gukina gusa kuko yumvaga ari uburyo bwo guhesha ishema se wabo no kusa ikivi cy’abavandimwe be se wabo yifuzaga ko bazakina umukino w’amagare ahubwo bakaza kwicwa muri Jenoside yakorewe Abatutsi.

Uruhare rwa siporo mu kwiyubaka kwa Adrien Niyonshuti

Mu kiganiro twagiranye na Adrien yakomeje agira ati “Kera mu mikino myinshi itandukanye bakoresheje siporo mu buryo butari bukwiye wasangaga abantu bayifashisha ngo banacemo abantu ibice, ariko ishusho y’uyu munsi siporo ni ikintu gihuza abantu benshi, iyo urebye abantu bitabira Tour du Rwanda babona ko u Rwanda ruri mu ishusho nshya, iyo urebye abantu amagana baba bari ku mihanda bishimye, nyamara abandi barakoresheje ayo magana mu kubiba urwango mu bantu, ubu ubona ari ikintu cy’agaciro.”

Avuga kandi ko ari intambwe ikomeye kuba rwa Rwanda abantu bamenye mu isura mbi, ruri kwakira amarushanwa, rukaba ruteganya no kwakira nka Shampiyona y’isi muri 2025, ari ibintu byaharaniwe, aho u Rwanda rwihaye icyerekezo cyiza.

Disi Dieudonné wabuze ababyeyi n’abavandimwe 7, gusiganwa ku maguru byamugaruriye icyizere cy’ubuzima

Disi Dieudonné warokotse Jenoside yakorewe Abatutsi ni umwe mu Banyarwanda bafite ibigwi byinshi mu mukino wo gusiganwa ku maguru ku ntera ndende.
Avuga ko umukino wo gusiganwa ku maguru wamugaruriye icyizere cy’ubuzima ukamufasha kwiyubaka.

Disi Dieudonné ni umwana wa gatanu mu muryango wa Disi Didace. Ababyeyi bombi ba Disi n’abavandimwe barindwi bishwe muri Jenoside yakorewe Abatutsi.

Disi yaganiriye na KT Radio atanga ubuhamya ku rugendo yanyuzemo arokoka Jenoside yakorewe Abatutsi mu mwaka wa 1994, uko yaje kujya ku rugamba rwo kubohora igihugu, ndetse n’uburyo yaje kwiyubaka by’umwihariko abifashijwemo n’umukino wo gusiganwa ku maguru.

Disi Dieudonné mu mukino wo gusiganwa ku maguru

Disi Dieudonné yasobanuye uko yinjiye mu mukino wo gusiganwa ku maguru, agatangira urundi rugendo rwamufashije kwiyubaka.

Yagize ati “Kugira ngo njye kwiga, mushiki wanjye yari kumwe n’umwarimu w’ahitwaga GS Kigombe i Musanze witwa Honoré. Baje gusura murumuna we wari umusirikare wakoreraga aho Camp Kigali, arambwira ati ‘uzaze kwiga muri iki kigo nigishamo’, na we yari n’umwarimu wa siporo, byahise bimbera byiza anangira kapiteni w’abakina uwo mukino wo gusiganwa mu kigo, nabonaga ameze nk’umuvandimwe wa hafi cyane.”

“Naje gukomeza gukora athlétisme, gahoro gahoro nza kuba umukinnyi ukomeye, athlétisme navuga ko ari yo yatumye niga ariko ituma naniyubaka, kuko mbere ntarajya muri siporo numvaga ubuzima butameze neza nka mbere, nkumva butazanaba bwiza nka mbere”

“Umugabo witwaga Charles wari Umuyobozi wa ESTB Busogo nabaye uwa mbere mu gusiganwa mu marushanwa ahuza amashuri, aransuhuza ambaza ubuzima bwanjye n’imibereho, arambaza ati ushobora kuza kwiga i Busogo, ndamubwira nti rwose naza”

Disi Dieudonné avuga ko umukino gusiganwa ku maguru wamufashije kwiyubaka nyuma ya Jenoside yakorewe Abatutsi

Disi Dieudonné yakomeje gukina uyu mukino muri iki kigo, uyu muyobozi w’ikigo akomeza kumufasha ndetse akajya anahabwa amasaha ahagije yo gukora imyitozo, ahabwa icumbi mu macumbi y’abarimu ndetse akajya anafashwa no kujya kwitabira amarushanwa mu mujyi wa Kigali.

Disi yakomeje ati “Nyuma yo kurangiza amashuri yisumbuye nahamagaye uwari ushinzwe ishami rya siporo muri Kaminuza, ubu ni Ambasaderi Jean Pierre Karabaranga uhagarariye u Rwanda mu Buholandi, arambwira ngo nze nige muri Kaminuza y’u Rwanda i Butare.”

Mu rugendo rwe muri siporo Disi yahuye n’umutoza Rwabuhihi, amubera nk’umubyeyi, nuko Disi atangira gutera imbere mu mukino wo gusiganwa ku maguru.

Disi ati “Nyuma yaho Rwabuhihi Innocent mfata nk’umubyeyi wanjye na we yahise ampamagara ambaza niba nzajya nkinira Kaminuza nkongera nkanakinira ikipe ya RDF, aza kumfasha kubona ishuri muri KIST, ariko icyo gihe nari maze kugera ku rwego rukomeye muri Athlétisme ku buryo byansabaga gufata kimwe, ntibyari byoroshye ko niga ndi n’umukinnyi, aho nari nsigaye nkora imyitozo gatatu ku munsi kandi ikomeye, kandi nabaga ngomba no kuruhuka.”

“Ni bwo naje gusanga gukomeza muri KIST bidashoboka, nza kwicara ndareba nsanga siporo ndimo ishobora kungirira akamaro, nareba abakinnyi bakomeye urwego bariho nkabona ndi kubasatira, nyuma muri 2002 haza umutoza uturutse i Burundi witwa Adolphe Rukenkanya adukoresha imyitozo.”

Nyuma y’igihe gito Disi yatangiye guhagararira igihugu mu marushanwa mpuzamahanga ari nako agihesha ishema yitwara neza mu marushanwa akomeye.

Yabisobanuye muri aya magambo ati “Muri 2003 naje kwitabira shampiyona y’isi mu Bufaransa yahuzaga abasirikare, aho buri gihugu ku isi cyari gihagarariwe n’abasirikare barindwi, maze mba uwa mbere, icyo gihe twari kumwe na Gen Albert Murasira ubu ni Minisitiri w’Ingabo nk’umuyobozi w’ikipe ndetse n’umutoza Rwabuhihi, umwaka wakurikiyeho mba uwa kabiri.”

“Muri 2007 ni ho nabaye umukinnyi ukomeye cyane, n’indi myaka nari umukinnyi ukomeye nko hagati ya 2003-2009, aho nahoraga byibura ndi mu bakinnyi 25 beza ku isi, ariko 2007 ho nari ku mwanya wa gatandatu ku isi.”

Icyo asaba abakiri bato

Mu butumwa yageneye abakiri bato, Disi Dieudonné yagize ati “Nk’ukuntu narokotse Jenoside ni ibintu bitoroshye, iyo nanjye mbitekereje numva nari mfite umutima ukomeye, mu buzima bwanjye nabayeho ngerageza guhatana, sinigeze nemera gupfukiranwa ngo nicwe n’agahinda k’ibyababaye manike amaboko, abakiri bato na bo nabasaba kujya bumva ko bashoboye.”

Cathia Uwamohoro, Uko Jenoside yatumye aba umwana w’ikinege, umukino wa Cricket wamubereye undi muryango

Cathia Uwamahoro ni umunyarwandakazi wamamaye cyane kubera umukino wa Cricket, nyuma yo gukora amateka atarakorwa n’undi wese ku isi.

Cathia Uwamahoro yasigaranye na Mama we gusa, anamuba hafi no mu mukino wa Cricket

Muri Jenoside yakorewe Abatutsi mu 1994, yari afite amezi atandatu gusa igihe, Papa we umubyara aza kwicwa muri Jenoside n’abandi bo mu muryango we, aho Cathia ari we wari imfura iwabo.

Cathia Uwamahoro na Mama we bagize amahirwe barokoka Jenoside, nyuma yo kubura abavandimwe be yaje gukura ari umwana umwe iwabo, ibintu byamugoye kubyakira.

Ati: “Gukura nk’umwana wenyine rimwe na rimwe byarambabaje cyane, cyane cyane kubona indi miryango ifite abana benshi. Uretse ibyo, nifuzaga cyane no kubona ishusho ya papa n’urukundo rwe, ibintu bitari byoroshye kwihanganira nkiri umwana. "

N’ubwo kuba adahari byasize amateka atazibagirana mu buzima bwe muri rusange, Uwamahoro agaragaza ko byanamuteye imbaraga arebye uburyo nyina yakoze cyane kugira ngo babeho.
kwitanga kwa nyina, byatumye ashyira imbaraga mu gukora cyane ngo yiteze imbere

“Kureba mama akora cyane ubudahwema byanteye gukora ibishoboka byose mu byo niyemeje. Ntabwo nigeze ntekereza ko hari ikidashoboka mu gihe ukomeje kugerageza. Buri gihe nifuza gutanga byinshi muri njye uko nshoboye.”

Umukino wa Cricket wamubereye umuryango mushya

Muri Gashyantare 2017 Izina rya Cathia Uwamhoro ni bwo ryamenyekanye cyane, ni nyuma yo gushyiraho agahigo ko kumara amasaha 26 agarura udupira mu mukino wa Cricket, bituma yandikwa mu gitabo cya Guinness World Records cyandikwamo abakoze ibidasanzwe ku isi.

Kwandikwa mu gitabo cya Guinness World Records ntabwo byazamuye gusa umukino wa Cricket mu Rwanda, ahubwo byafashije Uwamahoro kugera ku nzozi ze.

Avuga ko siporo yagize ingaruka nziza ku buzima bwe mu buryo bwinshi harimo no kubona umuryango mushya, wamuhumurije ukamwereka urukundo n’ubumwe cyane cyane mu mukino wa Cricket.

Uretse ibyo, umukino we wateye imbere, ndetse no kwigirira icyizere ikintu avuga ko ari ingenzi mu buzima.

Ati: “Igihe ninjiraga muri cricket, nashituwe n’ubumwe n’urukundo biba muri siporo. Kuri njye, ibi byari nko kubona umuryango wa kabiri; byamfashije kugira icyizere no kwibanda ku kubaka ejo hazaza heza aho gusubizwa hasi. Ubu sinkiri njyenyine. ”

Maitre Sinzi Tharcisse afite amateka yihariye, yifashishije umukino wa Karate arokora Abatutsi 118

Umukino wa Karate kuri Maitre Sinzi watangiye kumufasha mu gihe cya Jenoside yakorewe Abatutsi, ubwo yabashaka kurikoka kubera uyu mukino ariko bib akarusho nyuma yo gufasha abandi 118 kurokoka.

Yakoresheje umukino wa Karate arwanya interahamwe n’abasirikari ba Ex-FAR, abasha kurokora abantu 118 mu bari bahungiye muri ISAR –SONGA mu cyahoze ari Butare, abasha no kubambutsa abageza i Burundi mu buryo butoroshye ariko abasha kubarikora.

Maitre Sinzi Tharicisse wabashije kurokora Abatutsi 118

Maitre Sinzi avuga ko kugeza ubu uyu mukino awufata nk’ubuzima bwe bwa buri munsi dore ko n’ubu ku myaka ye akiwukina kandi akanawutoza, aho ndetse afite n’umwana w’umukobwa ubu umaze kuba umukinnyi ukomeye muri uyu mukino

Bishimiye umuriro bagejejweho mu rwego rwo kubafata mu mugongo muri iki gihe cyo Kwibuka

Abahawe umuriro ni abo mu midugudu yegereye ishuri, mu Kagari ka Taba, Umurenge wa Tumba mu Karere ka Rulindo, banabagenera ibiribwa birimo umuceri, kawunga, amavuta n’ibindi.

Ni umuhango wabimburiwe n’urugendo rwakozwe n’abo banyeshuri, ubuyobozi n’abarezi, rwerekeza ku rwibutso rwa Jenoside rwa Rusiga, bunamira inzirakarengane ziruruhukiyemo.

Bamwe mu bahawe umuriro bagaragaje imbamutima zabo, bashimira urwo rubyiruko rubakuye mu kizima, bemeza ko ubuzima bwabo bugiye guhinduka.

Kasine Immaculée ati “Kubera urumuri rw’amashanyarazi tubonye twishimye, tuva mu bwigunge twarimo, aba bana barakoze cyane badufashe mu mugongo, twari mu icuraburindi pe njye nacanaga ibishishimuzo. Nari naraguze n’agatoroshi niko kamfashaga nk’iyo ngiye kuryama, uru rubyiruko Imana iruhe umugisha, bampaye umuriro n’ibyo kurya ndanezerewe”.

Byari ibyishimo ku banyeshuri biga muri IPRC-Tumba no mu bo bafashije

Nyirabarima Marie Chantal ufite imyaka 99, ati “Bariya bana bacu bakoze twabashimiye, nacanaga agatara none barancaniye bokabaho. Mushimire na Nyakubahwa Perezida wacu wadufashije atuvana kure, muti warakoze”.

Ni umuriro uturuka ku mirasire y’izuba, ufite agaciro ka 2,700,000 z’Amafaranga y’u Rwanda, aho ubwabo aribo bikoreye ibikorwa byo kugeza umuriro muri izo ngo, dore ko mu byo baminuzamo birimo n’amashanyarazi.

Ni igikorwa ngarukamwaka bakorera mu Karere ka Rulindo, batangiye muri 2019 bageza umuriro mu ngo 20, mu 2021 bakaba baragejeje umuriro nanone mu ngo 20 z’abarokotse Jenoside.

Ikibatera gukora ibyo ngo ni mu rwego rwo kwita ku buzima bw’abo Jenoside yagize incike, babafata mu mugongo, ariko banarushaho kwiga amateka yayo mu rwego rwo guhangana n’abakomeje kuyipfobya.

Isingizwe Marie Joselyne, ati “Ni mu buryo bwo kubereka ko tubari hafi, tukanarushaho gusobanukirwa amateka ya Jenoside tugendeye ku buhamya baduha. Biratwigisha kandi binatubera isomo ridufasha guha ubutumwa abahakana Jenoside n’abayipfobya, tugamije kubaka u Rwanda ruzira Jenoside”.

Karenzi Innocent ati “Icyo bivuze ni ugufasha abarokotse no kwifatanya nabo tunasobanukirwa amateka, tunabereka ko batari bonyine bari kumwe natwe mu kusa ikivi cy’abacu bazize Jenoside. Ibi bitanga n’isomo ku bapfobya Jenoside bahakana ko itabayeho, ni no gufasha Leta muri gahunda zinyuranye”.

Uwo bagezagaho umuriro uturuka ku mirasire, bamugeneraga n’ibiribwa

Murwanashyaka Dieudonné ati “Intambwe dutera yo kuza kwegera abakecuru tubaha umuriro, turi mu gihe cya Ndindamwana, ni igihe abarokotse Jenoside ari bato cyangwa abavutse nyuma yayo, tubasha gutera ingabo mu bitugu abo bakecuru bacu, mu rwego rwo kusa ikivu cy’abakagombye kubafasha batakiriho”.

Arongera ati “Isomo tuhakura ni uko Jenoside yabayeho, ikindi amateka y’u Rwanda ni magari, iyo nk’umukecuru atubwira ubuhamya bwe, twumva ari amateka dukeneye kumenya. Ni muri ubwo buryo dushishikariza abantu bose n’urubyiruko muri rusange gukotana, turwanya abapfobya Jenoside twifashishije cyane cyane imbuga nkoranyambaga”.

Ni ibikorwa bishimwa cyane byahinduriye abarokotse Jenoside imibereho, nk’uko Umuyobozi wa Ibuka muri ako karere, Murebwayire Alphonsine abivuga.

Agira ati “Bari babayeho mu kizima ntabwo bacanaga, ariko ku bufatanye na IPRC-Tumba, bahawe imirasire ndetse na telefone zibafasha kuvugana n’inshuti, bari mu mwijima none bagiye ahagaragara”.

Arongera ati “Ibigo by’amashuri byose byagombye gufatira urugero kuri IPRC-Tumba, bafasha abaturage mu bikorwa binyuranye banabahumuriza. Aba banyeshuri ntabwo tubibahatira ni urukundo bifitiye, gufata ingo 20 bakabagezaho umuriro, bakabaha ibiribwa ni ikintu cyo gushimira, amashuri yose mu karere afite umukoro wo gufasha abatishoboye”.

Ni ibikorwa birimo gufasha Akarere ka Rulindo kugera ku ngamba kiyemeje, nk’uko Umuyobozi wako wungirije ushinzwe imibereho y’abaturage, Mutaganda Théophile abivuga.

Ati “Ibikorwa by’aba banyeshuri bivuze ikintu kinini cyane mu iterambere n’imibereho myiza y’abaturage mu Karere ka Rulindo. Dufite abarokotse Jenoside bakeneye ubufasha burimo ibiribwa, ariko noneho bakabona n’urumuri bagacana bakava mu mwijima nk’uko biri mu cyerekezo cy’igihugu, ko mu mwaka wa 2024 abantu bose bazaba bacana. Aba banyeshuri rero baradufasha kwinjira neza mu cyerekezo cya Perezida wa Repubulika”.

Nyuma y’icyo gikorwa, muri iryo shuri rya IPRC-Tumba hakomereje umuhango wo kwibuka Jenoside yakorewe Abatutsi, ahatanzwe ibiganiro birimo igifite insanganyamatsiko ivuga ku ruhare rw’ingengabitekerezo ya Jenoside mu gusenya ubumwe bw’Abanyarwanda, n’inshingano za buri wese zo kububumbatira.

Ni mu gikorwa cyanatangiwemo ubuhamya bw’abarokotse Jenoside ndetse n’abayobozi barimo Umuhuzabikorwa wa AERG ku rwego rw’igihugu, uhagarariye Ingabo muri Rulindo n’abandi bayobozi, batanga ubutumwa bujyanye no kurwanya Ingengabitekerezo ya Jenoside, hubakwa ubumwe bw’Abanyarwanda.

Ibi yabibasabye, ku wa Kabiri tariki 12 Mata 2022, ubwo yifatanyaga na bo mu muhango wabereye muri iryo shuri, wo kwibuka ku nshuro ya 28 Jenoside yakorewe Abatutsi.

Abawitabiriye bagejejweho ubuhamya ndetse n’ibiganiro bigaruka ku mateka y’u Rwanda mbere, mu gihe na nyuma ya Jenoside yakorewe Abatutsi, nk’uburyo bwo kuyibukiranya no kuyungukiramo amasomo mashya, baheraho bagira uruhare mu kubaka igihugu, na n’ubu kigihanganye n’ingaruka za Jenoside yakorewe Abatutsi.

Eng. Emile Abayisenga, Umuyobozi wa IPRC Musanze, avuga ko kuganiriza abanyeshuri n’abarimu ibyerekeranye n’amateka ya Jenoside yakorewe Abatutsi, ari imwe mu mbarutso y’ingenzi mu kubumbatira ubumwe bw’Abanyarwanda.

Yagize ati “Umuntu utazi aho ava ntiyabasha kumenya n’iyo agana. Turasobanurira urubyiruko rw’ubu binyuze mu kwibuka Jenoside, uko bagenzi babo bo hambere bashyize mu bikorwa Jenoside yakorewe Abatutsi, nanone abayihagaritse, bakaba bari urubyiruko rwa RPF Inkotanyi rwitangiye abandi, akaba ari narwo rwafashe igihe rugashakisha uko cyongera kwiyubaka”.

Akomeza agira ati “Ni na yo mpamvu urubyiruko rw’uyu munsi rukwiye gufata ibyo byiciro byombi, rugashyira ku munzani, rukagira amahitamo y’umurongo ukwiriye rugenderamo, ari nawo wo kugera ikirenge mu cy’urubyiruko rwahagaritse Jenoside, kugira ngo rukomereze mu njyana yo kubaka igihugu”.

Mu butumwa Guverineri Nyirarugero, yagejeje ku bitabiriye uyu muhango, yibukije urubyiruko ko bafite umukoro wo kwirinda no kwamaganira kure abapfobya Jenoside yakorewe Abatutsi n’abafite ingengabitekerezo yayo, mu ntego yo kubaka u Rwanda rwifuzwa.

Yagize ati “Ingengabitekerezo ya Jenoside ikibase abantu bamwe na bamwe, bayigaragariza mu bitangazamakuru n’imbuga nkoranyambaga. Mwe rubyiruko dufite uyu munsi, kuberako mugenda musobanukirwa inkomoko n’ububi bw’iyo ngengabitekerezo, ni ngombwa ko mufata iya mbere mugatesha abayigiramo uruhare, munyomoze abagoreka amateka y’igihugu kandi abagihembera ingengabitekerezo mubamaganire kure”.

Ati “Mpereye ku mahirwe igihugu cyahaye urubyiruko rw’ubungubu, by’umwihariko no kuba mwiga hano muri IPRC Musanze, nimuhugire ku kubyaza umusaruro amasomo mwiga, muhange udushya mu kubaka u Rwanda twifuza, ariko kandi mubijyanishe no gukomera ku muco wo gukunda igihugu. Muharanire gukumira no kurwanya ikintu cyose n’uwo ari we wese, wakwifuza kugihungabanya. Aho ni ho koko tuzashingira tuvuga ko igihugu cyacu gitekanye kandi gikomeje inzira yo kwiyubaka”.

Urubyiruko n’abarezi na bo basanga hari umwenda ukomeye bafitiye Igihugu, wo gukora ibinyuranye n’imyitwarire yaranze bamwe mu rubyiruko n’abarezi bo hambere, batatiye indangagaciro z’uburere mboneragihugu, baragisenya.

Rukundo Jean Pierre, umwarimu wigisha muri IPRC Musanze ati “Hari bagenzi bacu bari abarimu bitwaye nabi mu gihe cya Jenoside yakorewe Abatutsi, bafashe iya mbere mu kugambanira no kwica bagenzi babo n’abo bigishaga. Twe abarimu b’ubu, dufitiye igihugu umwenda wo gukora ibinyuranye n’uko abo batubanjirije bitwaye, tukagerageza kuziba icyuho bateje, tubinyujije mu gutoza no kwigisha amasomo y’uburere mboneragihugu; ku buryo buri wese yiyumvamo kudatatira ibiri mu murongo mwiza igihugu cyacu cyihaye”.

Ku ruhande rw’abanyeshuri bo, ngo bagiye gushyira imbaraga mu gukangurira abandi kumenya ububi bw’ingengabitekerezo ya Jenoside.

Kagabo Emmanuel ati “Turacyabona abantu bakora ibikorwa bihungabanya abacitse ku icumu rya Jenoside, nko kubatemera imyaka, kwica amatungo yabo no kubahohotera mu buryo bunyuranye, kandi ugasanga rimwe na rimwe ari n’urubyiruko rugaragara muri ibyo bikorwa, kikaba ikigaragaza uburyo ingengabitekerezo ikibase abantu bamwe na bamwe, harimo n’ababa barayigishirijwe ku mashyiga. Nk’urubyiruko rero, dufite umukoro wo kwegera bagenzi bacu ndetse n’ababyeyi, tugashyira imbere kwiyumvamo ubunyarwanda kuruta guhora twirebera mu ndorerwamu y’amoko”.

IPRC Musanze iteganya ko mu minsi 100 yo kwibuka Jenoside yakorewe Abatutsi, abanyeshuri n’abarimu bazagira uruhare mu bikorwa birushaho gutuma abatishoboye bacitse ku icumu rya Jenoside bagarura icyizere cy’ubuzima, binyuze mu kubaremera, gusura inzibutso zo hirya no hino mu gihugu, hagamijwe kurushaho gusobanukirwa amateka ndetse n’ibindi bikorwa binyuranye.

Minisitiri Dr. Ngamije na Dr. Tharcisse Mpunga bunamiye Abatutsi bakoraga muri iyo MINISANTE bazize Jenoside

Ni mu muhango wabereye ku cyicaro cya MINISANTE mu Mujyi wa Kigali, kuri uyu wa Kabiri tariki 12 Mata 2022, witabiriwe n’abakozi batandukanye b’iyo Minisiteri n’ab’Ikigo cy’Igihugu cyita ku Buzima (RBC), hamwe n’abafatanyabikorwa babo, aho bibukaga abahoze ari abakozi ba MINISANTE bagera kuri 41, n’abandi bakoraga mu rwego rw’ubuzima bishwe mu 1994 bazira ubwoko bwabo.

Hanagawe abari bashinzwe kubungabunga ubuzima bw’abantu no kubitaho barimo abaganga (Doctors) 56, hamwe n’abaforomo (Nurses) 73, bagize uruhare muri Jenoside yakorewe Abatutsi, bakavutsa ubuzima abantu, kandi nyamara bari bafite inshingano zo kububungabunga no kuburinda.

Minisitiri Ngamije acana urumuri rw’icyizere

Mu buhamya bwatanzwe na Stanislas Simugomwa watangiye gukora muri MINISANTE mu 1982, akaza kurokoka Jenoside yakorewe Abatutsi mu 1994, yavuze ko abantu bakoragamo bose bari bahuriye ku mugambi w’ivangura n’irondakarere.

Ati “Rwose imiyoborere mibi muzajye muyirwanya aho muzayisanga hose, kuko niyo ntandaro y’ibikorwa bibi byose bibaho, kuko muri Minisiteri y’Ubuzima bari barigize ibyigomeke kuva kuri Minisitiri kugera k’uwo hasi, kandi bose bavuga rumwe kubijyanye n’ibintu by’inzangano”.

Akomeza agira ati “Bagize uruhare rukomeye cyane muri Jenoside, kugeza n’aho imodoka za MINISANTE arizo zirirwaga zizenguruka aha hose, zitwara interahamwe mu bwicanyi no kujya gushakisha abantu mu ngo zabo. Bageze aho batanga amatangazo kuri radio, ngo imodoka za MINISANTE aho bazibona hose bazifate, kuko bari bamaze kubona ko icyo bashakaga bakigezeho, Abatutsi babamaze, ahubwo ba bandi bari bazifite barazambukanaga bazihungana. Minisiteri yarasahuwe nta kintu yasigaranye”.

Abakozi bo mu rwego rw’ubuzima bavuga ko ntawifuza ko ibyabaye byakongera ukundi, ariko kandi ngo bazabifashwamo no kuba umwe birinda icyabatandukanya.

Dr. Nepomuscène Sindikubwabo, ushinzwe ibikorwa by’imbangukiragutabara muri RBC, avuga ko byamaze kubagaragarira ko kuba umwe ari intwaro ikomeye.

Ati “Bimaze kutugaragarira ko kuba umwe ari intwaro ikomeye, nicyo kibungabunga iterambere, iyo tutari hamwe n’iterambere tugeraho turarisenya, dushobora kwishimira ko twateye imbere ariko tutari hamwe, umwe yarisenya. Ubuyobozi bubi bwatugejeje ahabi, uyu munsi dufite ubuyobozi bwiza, duharanire ko buri wese mu nshingano ze, bwa bumwe ntitukazabutezukeho”.

Minisitiri w’Ubuzima, Dr. Daniel Ngamije, avuga ko kwibuka abazize Jenoside yakorewe Abatutsi, ari umwanya wihariye wo kubasubiza agaciro.

Ati “Kwibuka abazize Jenoside yakorewe Abatutsi ni umwanya wihariye wo kubasubiza agaciro no guharanira ko Jenoside itazongera kubaho ukundi. Abakozi ba Minisiteri y’Ubuzima n’ibigo biyishamikiyeho, dushyigikiye gahunda z’ubuyobozi bwa Leta y’u Rwanda”.

Akomeza agira ati “Dufata umugambi wo kuba kw’isonga mu kwiyubaka, mu kubaka agaciro k’ubuzima n’uburenganzira bwo kubaho kwa buri wese, mu kurwanya ingengabitekerezo ya Jenoside aho iva ikagera. By’umwihariko dukomeza kuba hafi y’abarokotse Jenoside yakorewe Abatutsi tunabafata mu mugongo”.

Mu gihe cya Jenoside yakorewe Abatutsi Minisitiri w’ubuzima yari Dr. Casimir Bizimungu, ushinjwa n’abatari bacye kuba umwe mu bayigizemo uruhare mu 1994.

Minisiteri y’Ubuzima ikaba yiyemeje gutangira gushaka amakuru ku bahoze ari abakozi bayo, bagize uruhare mu kurokora Abatutsi bahigwaga, kugira ngo bazamenyekane bashimirwe.

Stanislas Simugomwa

Avuga ko n’ubwo babuze imiryango yabo kubera abicanyi ariko nanone ngo abasore b’Inkotanyi babuze ubuzima bwabo kugira ngo babarokore.

Yasabye abakuze gusobanurira urubyiruko amateka y’Igihugu kugira ngo hatazagira uyagoreka kugira ngo bazakure baharanira gukora ibyiza kuko ari bo bayobozi b’ejo.

Imibiri yashyinguwe ku wa 12 Mata 2022 mu rwibutso rwa Mukarange harimo imibiri irindwi yabonetse vuba n’indi itatu yari ishyinguwe ahantu hazwi.

Uwonkunda avuga ko bibabaje kuba nyuma y’imyaka 28 hari imibiri y’ababo itaraboneka ngo ishyingurwe mu cyubahiro agasaba abazi aho iherereye kuhagaragaza kuko na bo ubwabo bibaruhura.

Ati “Birababaje kuba nyuma y’imyaka 28 tukibaza aho abacu baherereye. Iki gikorwa cyakabaye cyararangiye. Twongeye rwose gusaba abazi aho abacu baherereye kugira ubutwari bwo kuhatugaragariza kugira ngo nabo bashyingurwe mu cyubahiro kuko ibyo birabohora ku rwego rwacu no kubabishe.”

Umuyobozi w’Akarere ka Kayonza Nyemazi John Bosco avuga ko muri aka Karere hishwe Abatutsi benshi bigizwemo uruhare na ba Burugumesitiri harimo uwa Komini Rukara, Burugumesitiri Senkware Celestin wa Komini Kayonza, Ngenzi Octavien wayoboraga Komini Kabarondo afashijwe na Barahira Tito ndetse na Col Rwagafirita muri Komini Cyarubare washinze umutwe witwa Simba Batallion wari ugizwe n’abahoze mu gisirikare n’izindi nterahamwe ukaba warishe Abatutsi benshi mu bice bitandukanye.

Kuri Kiliziya ya Mukarange Interahamwe zirimo abakoze igisirikare, Burugumesitiri Senkware Celestin na Komanda wa Jandarumuri baje bitwaje gerenade n’izindi ntwaro babanza kwica barashe Padiri Munyaneza Jean Bosco nyuma yo kwanga gutanga abantu bamuhungiyeho.

Avuga ko mu karere ka Kayonza harimo imibiri myinshi itaraboneka ngo ishyingurwe mu cyubahiro kuko amakuru y’aho yajugunywe ababigizemo uruhare banze kuyatanga.

Agira ati “Muri Paruwasi ya Angilikani ya Nyagatovu ubwicanyi bwari buyobowe na Kanyangoga Thomas naho hiciwe Abatutsi barenga 200 ndetse imibiri yabo ikaba itaraboneka ngo ishyingurwe mu cyubahiro. Hari kandi Abatutsi bahungiye muri Pariki y’Akagera bagira ngo berekeze Tanzaniya Interahamwe zibasangayo zirabica abandi bicwa n’inyamanswa.”

Avuga ko mu rwego rwo guha agaciro Abatutsi bishwe muri Jenoside no kugira amateka atazazimangana, ubu ngo harimo kubakwa urwibutso rw’Akarere i Mukarange ndetse n’inzu y’amateka yaranze Jenoside yakorewe mu Karere ka Kayonza.

Avuga ko harimo no kwandikwa igitabo cy’amateka kizashingira ku buhamya bugenda bitangwa bikazafasha kubumbatira amateka mu gihe kinini kiri imbere.

Avuga ko zimwe mu mbogamizi zigihari harimo kuba hari abagifite ingengabitekerezo ya Jenoside, kuba hari imibiri y’abishwe itaraboneka ngo ishyingurwe, kuba abakoze Jenoside hari abataraboneka ngo bacirwe imanza ndetse kuba hari abakibona mu ndorerwamo z’amoko n’ubwishishanye.

Perezida wa Ibuka, Egide Nkuranga wari ku rwibutso rwa Nyanza ku wa Mbere

Nkuranga avuga ko iyo filime izavana icyasha kuri Leta y’u Bubiligi yashinjwe koshya ingabo za MINUAR kuva mu butumwa bw’amahoro zarimo mu Rwanda, bigatuma zitererana Abatutsi mu maboko y’Interahamwe na Ex FAR (ingabo zari iza Leta icyo gihe).

Nkuranga yatangarije ibi ku rwibutso rwa Nyanza ya Kicukiro ku wa Mbere, nyuma yo kumva ubuhamya bw’umwe mu baharokokeye witwa Hodari Marie-Rose.

Nkuranga avuga ko hari urubanza rwabereye mu Bubiligi, aho Leta y’icyo gihugu yaregwaga guhatira Umuryango w’Abibumbye gucyura ingabo zawo za MINUAR, kuko ngo Ex FAR yabahozaga ku nkeke ibashinja guhanura indege yari itwaye Perezida Habyalimana.

Agira ati “Amakuru twari dufite ni uko (Ex FAR n’Interahamwe) bashyize igitutu kuri UN koko abo basirikare baragenda, ariko urwo rubanza rwarabaye bisa nk’aho Leta y’u Bubiligi yatsinze, kuko yagaragazaga ko ari MINUAR yabacyuye atari yo”.

Ati “Aha rero nkabamenyesha ko hari itsinda ry’Ababiligi barimo n’abashakashatsi, rikaba riyobowe n’umuprofeseri witwa Joel Kotek, barimo gukora filime mbarankuru izagira ingaruka ku cyemezo cyafashwe n’urukiko, cyakuye icyaha kuri Leta y’u Bubiligi”.

Perezida wa Ibuka avuga ko iryo tsinda ry’abashakashatsi riherutse mu Rwanda rije kwegeranya ibyo abatangabuhamya batandukanye bavuga, akaba yizeye ko ibizavamo hari icyo bizamara.

Abitabiriye icyo gikorwa bunamiye imibiri iharuhukiye

Nkuranga avuga ko kuva mu myaka ya 1959, 1961, 1963 kugera mu 1994, Abatutsi ngo bari basanzwe bahungira muri ETO Kicukiro kuko habagamo abapadiri b’aba Seliziyani babahungisha itotezwa kuko bitwaga Inyenzi, hakwiyongeraho n’uko ingabo za MINUAR zahacumbitse muri 1994 bajyayo bafite icyizere gisesuye.

Perezida w’Inteko Ishinga Amategeko, Umutwe w’Abadepite, Donatille Mukabalisa yavuze ko Urwibutso rwa Nyanza ari ikimenyetso cy’ubugwari bw’ingabo z’Umuryango w’Abibumbye mu Rwanda (MINUAR), zitatabaye Abatutsi bicwaga nyamara ari yo gahunda yari yabazanye.

Imibiri ine yashyinguwe ni iyabonetse kubera amakuru yagiye atangwa n’abaturage

Yabibasabye ku ya 11 Mata 2022, mu gikorwa cyo kwibuka ku nshuro ya 28 Jenoside yakorewe Abatutsi mu 1994, mu Karere ka Gatsibo kikaba cyabereye ku rwibutso rwa Jenoside rwa Kiziguro, ahashyinguwe mu cyubahiro imibiri ine yabonetse vuba.

Minisitiri Nyirahabimana avuga ko imibiri yashyinguwe mu cyubahiro yabonetse kubera amakuru abaturage batanze, bityo asaba abatarahigwaga kugaragaza ahandi imibiri yaba iri kugira ngo ishyingurwe mu cyubahiro kuko biruhura abacitse ku icumu.

Ati “Ntabwo abarokotse bashobora kumenya aho imibiri y’ababo bishwe yajugunywe kuko barahigwaga, bari bihishe, bari muri purafo, munsi y’ibitanda, mu nzina bataramo ibitoki n’ahandi. Icyo gihe abatarahigwaga barimo n’abari babakurikiranye ngo babice, nibo bazi abishe abantu n’aho imibiri yabo bayijugunye.”

Akomeza agira ati “Muri iki gihe twibuka nongere nkangurire Abanyarwanda muri rusange, cyane cyane abatarahigwaga babonye Jenoside uko yagenze. Kuba twarahisemo kuba umwe inkunga yabo bayitange yo kwerekana aho imibiri y’abishwe muri Jenoside iri, nibura tubashe kubashyingura mu cyubahiro.”

Yavuze ko nta muntu uzazizwa y’uko yagaragaje aho imibiri yajugunywe, kuko kuba ahazi bitavuze ko yagize uruhare mu kubica.

Urubyiruko rwasabwe kwigirira ikizere cy’ubuzima kuko bafite ubuyobozi bwiza

Mu buhamya bwa Manzi Aloys, yavuze ko iwabo wari umuryango munini w’abana 11 n’ababyeyi babo ariko basigaye ari babiri gusa.

Avuga ko ise yiciwe muri Kiliziya ya Kiziguro ndetse ajugunywa mu rwobo ubu rwasijwe imibiri igakurwamo, igashyingurwa mu cyubahiro naho nyina we akaba yarishwe atwikiwe mu nzu n’abavandimwe be bari bato icyo gihe.

Avuga ko akirokoka yagumanye ibikomere ariko kubera inyigisho yagiye ahabwa n’imiryango itandukanye, ndetse n’ubuyobozi bwite bwa Leta yabashije kubikira.

Agira ati “Jye icyo nari niyiziho kijyanye n’ihungabana numvaga nta muntu ufite ababyeyi waba inshuti yanjye, sinisanzuraga ku bantu bose. Umuntu ufite ababyeyi nkumva atari Umututsi kuko barabishe, impamvu babashigaje ni uko batari Abatutsi niko natekerezaga ariko ndashima Imana ko byaje gushira.”

Manzi wari wihishe hafi n’urugo ngo yaje kuhava bigoranye ajya i Kiziguro ariko umutima umubuza kwinjira imbere muri Kiliziya aho abandi bari bari, ahubwo akomeza kwihisha mu baturage bari bari bayituriye ari naho Inkotanyi zamurokoreye.

Amb. Nyirahabimana avuga ko abari bihishe badashobora kumenya aho ababo bajugunywe uretse ababahigaga n’abatarahigwaga

Umuyobozi wa Ibuka mu Karere ka Gatsibo, Sibomana Jean Nepomscène, ashima Ingabo zari iza RPA zabarokoye ndetse n’ubu bakaba bafite umutekano usesuye n’imibereho myiza.

Yasabye abagize uruhare muri Jenoside gusaba imbabazi no kubabarira ku bacitse ku icumu, kuko aribwo ubumwe butajegajega bwagerwaho.

Ati “Ya mpano ikomeye tugomba guha Igihugu ni ukubabarira nta kindi twatanga. Ku banya-Gatsibo bagize uruhare muri Jenoside n’imiryango yabo, gusaba imbabazi ni indi mpano abantu bashobora guha Igihugu kandi ikomeye.”

Akomeza agira ati “Ntimugire ngo iyo uhagurutse ugasanga uwacitse ku icumu imbabazi uba ubaye umunyantege nke, oya, nawe uba utanze umusanzu ukomeye, namwe nimubikore. Turi mu nzira yo kubaka ubumwe butajegajega kandi nta muntu umwe wakubaka ubumwe.”

Mu byo abarokotse bashimira Leta n’Umukuru w’Igihugu harimo kuba mu Karere ka Gatsibo gusa abana barokotse barenga 1,500 barishyuriwe amashuri, abacitse ku icumu batishoboye 400 bubakirwa inzu, abarenga 600 bahabwa inkunga y’ingoboka, imiryango y’abarokotse 144 ihabwa inka.

Hari kandi amatsinda 28 yahawe inkunga y’amafaranga kugira ngo yiteze imbere, ubu ngo hakaba hari miliyoni 75 nayo yo gutera inkunga imishinga ku miryango itishoboye ngo yiteze imbere.

Sibomana avuga ko abarokotse bakunda Perezida wa Repubulika na Leta kuko yabitayeho mu buryo bwose

Mu gihe cyo kwibuka abarokotse mu Karere ka Gatsibo bavuga ko badashobora kwibagirwa ubugome bwa Gashugi, wicaga abantu avuga ko arasa ibishuhe, na Gatete Jean Baptiste wateguye Jenoside mu cyahoze ari Komini Murambi ndetse n’Interamwete Nyirazamani.

Urwibutso rwa Jenoside rwa Kiziguro ubu ruruhukiyemo imibiri y’Abatutsi bishwe 20,124 ubariyemo iyashyinguwe mu cyubahiro uyu munsi.

Ubuyobozi bw’Akarere ka Gatsibo buvuga ko umwaka utaha urwo rwibutso, ruzaba rurimo ibimenyetso ndangamateka bya Jenoside yakorewe mu cyahoze ari Komini Murambi, ndetse n’andi Makomini yahujwe bikaba Akarere ka Gatsibo.

Bunamiye imibiri iharuhukiye banashyira indabo ku mva

Depite Mukabalisa yabitangaje amaze kumva ubuhamya bwa Hodari Marie-Rose warokokeye mu mivu y’amaraso, mu rugendo rugereranywa n’inzira y’umusaraba, aho bagiye bicwa kuva ahahoze ari ETO Kicukiro kugera i Nyanza ahari urwibutso.

Hodari avuga ko umuryango we wahoze utuye muri Komini Shyorongi (hagati ya Rulindo na Nyarugenge), uza guhungira mu Gatenga mu mwaka wa 1991 kubera itotezwa ry’abitwaga ibyitso.

Ku itariki 07 Mata 1994 abasirikare barindaga Perezida bitwa aba GP ngo baje kwica se, nyina n’abavandimwe be bava aho bari batuye batangira kurara ku gasozi, ariko bumvise ko Ingabo za MINUAR (zari iza LONI) zikambitse mu Ishuri ry’Imyuga rya ETO Kicukiro (IPRC-Kigali), ngo bahungiyeyo.

Hon Mukabalisa avuga ko Nyanza ya Kicukiro ari ikimenyetso cy’ubugwari bwa Loni

Ku itariki ya 11 Mata 1994 Abatutsi bari bahungiye kuri MINUAR muri ETO barimo Hodari n’umuryango we, batunguwe no kubona izo ngabo zibataye aho, zifata indege zitaha iwabo zidakoze ubutumwa bw’amahoro bwari bwazizanye.

Hodari na bagenzi be bararize barihanagura, nyuma bahitamo gushaka inzira yabageza kuri Sitade Amahoro cyangwa kuri CND (ku Nteko Ishinga Amategeko), ahari Ingabo z’Inkotanyi zari zaje kurinda Abanyapolitiki ba FPR bari baje kugirana amasezerano y’amahoro na Leta ya Habyalimana.

Hodari avuga ko nta nzira babonye kuko Ingabo zari iza Leta hamwe n’interahamwe, ngo bari babatangiririye kuri Sonatube barabahindukiza baberekeza Nyanza ya Kicukiro, ahari ikimoteri cy’Umujyi wa Kigali, barababwira ngo "imyanda ijye mu yindi".

Hodari avuga ko Interahamwe na Ex FAR babashoreye babica umugenda, icyo gikorwa cy’ubwicanyi bagisoreza i Nyanza ya Kicukiro, aho babarundanyije bakabarasa, babateramo za gerenade, babakubita imihoro n’ibindi, ari na ko babacuza amafaranga n’imyambaro.

Hodari yari yarasabye kwicwa n’isasu ashingiye ku rupfu yita rwiza yari yarabonye se yapfuye, baza kurimurasa ariko rifata murumuna we wa bucura witwaga Cadette.

Yari azi ko yapfuye kuko nawe yari yarakubiswe ikintu mu bitugu, aryama mu mirambo ariko akumva, akanabona abarimo kwica, maze hamwe n’abandi batapfuye bahamagara abicanyi bati "Nimuze muturase n’ubundi twapfuye, ariko umusirikare wa Habyalimana aratubwira ati ’amaraso yanyu ntazambazwe".

Interahamwe na Ex FAR ngo baragiye, hashize umwanya Inkotanyi ziraza, zibajyana i Rebero aho zari zashinze ibirindiro, hashira iminsi mike zibajyana kubavurira ibikomere i Byumba, nyuma mu mwaka wa 1995 baza kugaruka gushyingura ababo biciwe i Nyanza.

Aha ni ho Depite Donatille Mukabalisa, ahera yamagana Jenoside yakorewe Abatutsi hamwe n’abayikoze, ariko akanenga izari Ingabo za LONI by’umwihariko, kuba zaraje mu butumwa bw’amahoro ntizibusohoze kuko zataye abantu mu maboko y’abicanyi.

Depite Mukabalisa agira ati "Iyo batabara twari kuba tuvuga ibikorwa byabo by’ubutwari, ariko si byo bahisemo, ntituzarambirwa kubivuga, uru rwibutso (rwa Nyanza) ni ikimenyetso kitwibutsa ubugwari bw’izo ngabo za LONI, ndetse n’amahanga yatereranye Abanyarwanda mu gihe twari tubakeneye, ni imyitwarire igayitse".

Avuga ko ibi bitanga isomo rikomeye ryatumye Ubuyobozi bw’u Rwanda bushyiraho gahunda yo kwigira, mu rwego rwo kurinda Abanyarwanda guhora bahanze amaso amahanga.

Mu mugoroba wo Kwibuka no kunamira Abatutsi bashyinguwe mu Rwibutso rwa Nyanza ya Kicukiro ku wa 11 Mata 2022, Umuryango IBUKA washimiye Ingabo zahoze ari iza FPR-Inkotanyi kuba zararokoye Abatutsi bicwaga, ari na ko zirwanya ingabo zahoze ari iza Leta n’interahamwe.

Kurikira ibindi muri iyi video:

Ni nyuma y’ibiganiro byahuje Abadipolomate bakorera mu Rwanda na MINUBUMWE hamwe na Minisiteri y’Ububanyi n’Amahanga y’u Rwanda (MINAFFET), kuri uyu wa Mbere tariki 11 Mata 2022, hagamijwe kurebera hamwe uruhare rw’imiryango mpuzamahanga mu iterambere ry’u Rwanda nyuma ya Jenoside yakorewe Abatutsi.

Guhera mu Kuboza 2003 Umuryango w’Abibumbye washyizeho Umunsi Mpuzamahanga wahariwe kuzirikana Jenoside yakorewe Abatutsi mu Rwanda, aho buri tariki ya 07 Mata ibihugu byose n’imiryango mpuzamahanga muri rusange bazajya batekereza ku byaranze Jenoside yakorewe Abatutsi, harebwa amakosa yakozwe, inshingano zitubahirijwe kugira ngo bakuremo amasomo.

Mu kiganiro yagiranye n’itangazamakuru, Minisitiri wa MINUBUMWE, Dr. Jean Damascene Bizimana, yavuze ko hari ibyemezo mpuzamahanga byafashwe birimo ibisaba ibihugu byose bigize Umuryango w’Abibumbye gukurikirana abagize uruhare muri Jenoside yakorewe Abatutsi babihungiyemo.

Dr. Bizimana avuga ko igihe ibihugu by’amahanga bizafatanyiriza hamwe n’u Rwanda mu guhasha no kurwanya ingengabitekerezo ya Jenoside ibibazo byose bihari bizakemuka

Ati “Ibihugu bidafite amategeko ahana Jenoside na byo bikayashyiraho, hanyuma no kugira ubufatanye mu guhana icyaha cyo gupfobya no guhakana Jenoside yakorewe Abatutsi hagashyirwaho amategeko. Icyo ni kimwe mu byo twifuza ko ibihugu byashyiraho amategeko ahana icyo cyaha”.

Akomeza agira ati “N’iyo kitaza cyitwa icyaha cyo gupfobya Jenoside yakorewe Abatutsi yonyine, ariko kikaba ipfobya rya Jenoside yose yemewe n’Isi. Umuryango w’Abibumbye, n’inkiko mpuzamahanga, mu Bufaransa bararifite, Ababiligi barishyizeho n’ubwo iryo mu Bubiligi dusanga rikwiye kunoga neza, ariko igihugu nka Luxemburg, u Butaliyani, u Busuwisi bararifite. Ibyo rero nibikomeza turizera ko ibibazo bihari bizakemuka”.

Agaruka ku ruhare rw’Umuryango w’Abibumbye mu gihe cya Jenoside yakorewe Abatutsi, Umuhuzabikorwa w’Amashami y’Umuryango w’Abibumbye mu Rwanda, Fodé Ndiaye, yavuze ko umuryango ahagarariye mu Rwanda wagaragaje intege nke mu gihe cya Jenoside yakorewe Abatutsi, kuko Ambasaderi Ibrahim Gambari wari uhagarariye Nigeria mu Muryango w’Abibumbye, yasabye ko ingabo zari mu Rwanda zakongerwa ariko ntibyakorwa.

Fodé Ndiaye yagaragaje intege nke z’Umuryango w’Abibumbye mu gihe cya Jenoside yakorewe Abatutsi

Ngo aho kugira ngo Umuryango w’Abibumbye wongere ingabo nk’uko wari wabisabwe na Gambari, ahubwo akanama gashinzwe umutekano muri uwo muryango katoye umwanzuro w’uko ingabo zawo zigabanywa zikava ku bihumbi bibiri n’ijana (2,100) hagasigara gusa abasirikare 270, bikorwa mu gihe cy’icyumweru kimwe gusa, muri Kigali hamaze kwicwa Abatutsi basaga 1,000.

Mu kiganiro Ambasaderi w’u Bufaransa mu Rwanda Antoine Anfré, yagejeje ku bari bitabiriye ibiganiro, yavuze ko igihugu cye cyagize uruhare runini mu guhakana Jenoside yakorewe Abatutsi, ariko baza gusanga ko bidakwiye ko bakomeza kugendera muri uwo murongo, aribwo Perezida Emmanuel Macron yashyizeho itsinda kugira ngo rigenzure neza uruhare rw’u Bufaransa muri Jenoside yakorewe Abatutsi.

Antoine Anfré avuga ko nyuma y’igihe kirekire u Bufaransa buhakana uruhare rwabwo muri Jenoside yakorewe Abatutsi basanze badakwiye gukomeza kugendera muri uwo murongo

Ati “Iyo komisiyo yasoje yemeza uruhare rukomeye u Bufaransa bwagize muri Jenoside yakorewe Abatutsi, kandi ubumenyi kuri Jenoside buzatuma hakomeza kurwanywa ipfobya n’ihakana ryayo bidakozwe n’abayirokotse gusa, ahubwo ni ngombwa, ni n’inshingano kuri Leta zagize uruhare muri iyo Jenoside”.

Mu mwaka wa 2018 Inteko rusange y’Umuryango w’Abibumbye yagaragaje inyito ikwiye kujya ikoreshwa ku bijyanye na Jenoside yakorewe Abatutsi mu Rwanda, aho bemeje ko “Tariki ya 07 Mata ari Umunsi Mpuzamahanga wo gutekereza kuri Jenoside yakorewe Abatutsi mu Rwanda muri 1994”.

Inama ihuza Abadipolomate bakorera mu Rwanda iba buri mwaka, kugira ngo abahagarariye ibihugu byabo mu Rwanda barusheho gufatanya n’u Rwanda, gutekereza ku masomo bakura kuri Jenoside yakorewe Abatutsi, ariko hanarebwa ejo hazaza, hirindwa amakosa yakozwe agatera Jenoside yakorewe Abatutsi mu Rwanda.

Kureba andi mafoto menshi, kanda HANO

Amafoto: Niyonzima Moise/Kigali Today

Minisitiri Dr Uwamariya Valentine

Yabitangaje ku Cyumweru tariki ya 10 Mata 2022, ubwo ku biro by’Intara y’Iburasirazuba hibukwaga abari abakozi ba Perefegitura ya Kibungo, Superefegitura ya Kanazi, Rusumo na Ngarama ndetse n’amakomini yahujwe bikabyara Akarere ka Rwamagana.

Muteteri Grace umwe mu batanze ubuhamya yagaragaje ukuntu na mbere ya Jenoside, abana b’Abatutsi bavangurwaga ku buryo imbere ya buri muryango w’ishuri habaga lisiti y’abanyeshuri n’amoko yabo, bituma batangira kugirana urwikekwe.

Uyu yaje kwirukanwa mu kazi mu 1981 nyuma y’umwaka umwe akabonye, kubera ko ngo politiki y’iringaniza ititaweho mu kigo yakoragamo.

Ati “Nabonye akazi aho bacukuraga amabuye y’agaciro ndetse mpabwa ibaruwa y’amasezerano y’akazi ya burundu. Ariko Burugumesitiri Bisengimana Paul yaje gusaba umuzungu wampaye akazi kunyirukana undi arabyanga, ariko ushinzwe abakozi muri Superefegitura ya Rwamagana witwaga Gatare, yaje kunyirukana anyandikiye ibaruwa ivuga ko muri ‘Secteur Minier’ ya Musha nta ringaniza ry’amoko ririmo ndataha.”

Muteteri yamaze imyaka itandatu yarahebye akazi, ariko nyuma aza kukabona muri Minisiteri y’Ubutabera mu rukiko rwa Kanto ya Gikoro, ariko naho aza kwirukanishwa na Burugumesitiri Bisengimana bari baturanye.

Agira ati “Jye n’undi musaza witwa Zimurinda Damascène wari veterineri twirukanywe kubera Burugumesitiri, yaraje abwira Perezida w’Urukiko ko atanshaka ndetse aranabimbwira nirukanwa gutyo.”

Muteteri Grace wirukanywe mu kazi azira uko yaremwe

Minisitiri Uwamariya avuga ko Intara y’Iburasirazuba iri mu zageragerejwemo Jenoside, kuko hari Abatutsi bakuwe ahandi mu Gihugu bakazanwa muri Bugesera na Rukumberi ngo bicwe n’isazi ya Tsetse, ubwicanyi bwo muri 1959, 1963, 1973, 1982 ndetse n’igihe cy’ibyitso hagati y’umwaka wa 1990 na 1994.

Avuga ko abari abakozi ba Leta bishwe muri Jenoside bagambaniwe na bagenzi babo bakoranaga, ndetse ko ishyirwa mu bikorwa ry’umugambi wa Jenoside ryakozwe n’abari abakozi nkabo.

Yongeraho ko ishyirwa mu bikorwa rya Jenoside ryihuse cyane kuko abayobozi babicengeje mu baturage basanzwe, bituma bivanga mu mugambi w’abacuze Jenoside, bemera gucengerwa n’amatwara y’urwango n’amacakubiri.

Avuga ko iyo umuyobozi adafite intego yo guharanira ibyiza ku bo ashinzwe, n’akamaro ko kubaho kwabo ntacyo biba bimubwiye.

Ati “Ubundi iyo umuyobozi adafite intego yo guharanira ibyiza ku bo ashinzwe, n’akamaro ko kubaho kwabo ntacyo kaba kamubwiye no kubica yabica.”

Akomeza avuga ko abaharanira ibibi batarama, agatanga urugero ku kuntu Repubulika zasimburanye ariko zose ntizigire amateka meza zisiga, uretse ayo guharanira kurimbura Abatutsi.

Minisitiri Uwamariya yungamo ko amaherezo y’abateguye Jenoside yabaye ubuhunzi, gukurikiranwa n’inkiko mpuzamahanga no guhora babundabunda.

Avuga ko abakibitse ingengabitekerezo ya Jenoside basabwe kubicikaho bakihana, bagafata umurongo mwiza wo kuba ingirakamaro ku muryango nyarwanda, bakazasiga umurage mwiza.

Abakozi ba Perefegitura na Superefegitura bibukwa ni 19 naho abari abakozi b’Amakomini yahujwe bikabyara Akarere ka Rwamagana ni 22.

Amazina n’amafoto ya bamwe mu Batutsi biciwe i Ruhanga hamwe n’imyamabaro yabo bizabungabungwa mu gihe kirambye

Leta y’u Rwanda ifite gahunda yo gutera imiti ku mibiri n’ibindi bimenyetso byasizwe n’abishwe muri Jenoside yakorewe Abatutsi kugira ngo bibashe kumara imyaka myinshi bitarangirika, ariko hari imibiri idashobora kubikwa ngo ijye igaragaza amateka y’ibyabaye, harimo iyo mu rwibutso rw’i Ruhanga.

Umuyobozi wungirije wa Ibuka mu Karere ka Gasabo, Claude Runihangabo yabwiye Kigali Today ko imibiri y’abiciwe i Ruhanga yangiritse bikomeye bitewe n’uko babamennyeho lisansi bakabatwika, bityo ikaba idashobora kujya yereka abantu amateka y’ibyabaye.

Claude Runihangabo

Urwibutso rw’i Ruhanga kuri ubu rushyinguwemo imibiri hafi ibihumbi 38 rwahoze ari urusengero rw’Abangilikani, hakaba hari hahungiye abantu baturutse hirya no hino mu mirenge imwe n’imwe igize uturere twa Gasabo, Rwamagana na Kicukiro.

Runihangabo avuga ko abo Batutsi baje bafite intwaro za gakondo zo kwirwanaho, bazi ko nta muntu uhungiye i Ruhanga ushobora kwicwa, ariko izari Ingabo z’u Rwanda (Ex FAR) zifatanyije n’Interahamwe, ngo zaraje zirabarasa zikoresheje indege, zinabatwikisha lisansi imibiri irangirika bikomeye.

Avuga ko ibi bikorwa by’iyicarubozo byanakorewe abagera mu bihumbi barimo kuboneka mu byobo rusange byo mu Gahoromani mu mirenge ya Rusororo na Masaka ya Kicukiro.

Bimwe mu bikoresho bari bafite

Yagize ati "Ibimenyetso dufite kugeza uyu munsi ni iyi myenda (bari bambaye). Inteko Ishinga Amategeko irimo kwiga uburyo imibiri imwe n’imwe n’ibindi bimenyetso byazaramba bikajya byerekwa abana n’abuzukuru bazavuka, amateka agakomeza gusigasirwa, ariko hano i Ruhanga ntibyoroshye".

Runihangabo avuga ko imva z’urwibutso rw’i Ruhanga zizatwikiirwa atari uko imibiri yangiritse gusa, ahubwo ari ukugira ngo imva zinarindwe abantu bashobora kwinjiramo bakazangiza.

Imva zimwe na zimwe z’inzibutso za Jenoside zizapfundikirwa

Urukuta rwanditseho amazina y’abishwe bose ni rwo ruzubakwa mu minsi ya vuba(n’ubwo itaramenyekana), hamwe n’imyambaro na bimwe mu bikoresho byari bifitwe n’abishwe, bikaba bibitswe mu tubati tw’ibirahure.

Umudepite mu Nteko Ishinga Amategeko y’u Rwanda, Manirarora Annoncée avuga ko uburyo bwo gushyira imiti ibuza imibiri y’abishwe muri Jenoside kwangirika bwatangiye gukoreshwa mu nzibutso zimwe na zimwe nka Nyamata, Nyarubuye n’ahandi , ari na ko abantu bigishwa ibijyanye no kuyibika neza mu buryo burambye.

Umwanditsi warokotse Jenoside yakorewe Abatutsi akaba n’umurinzi w’Igihango ku rwego rw’Igihugu, Gasore Serge, yanditse igitabo kivuga ku munsi we yagombaga kwicirwaho (My day to die), avuga ko hakwiye kubaho uburyo bwo kwandika ibitabo byigisha abana amateka ya Jenoside, butandukanye n’ubwandikirwagamo ha mbere.

Avuga ko hanakwiye kubaho uburyo bwo gushyira izo nyigisho mu ikoranabuhanga urubyiruko rushobora kugeraho byihuse, kuko usanga akenshi ubu rusigaye ruhugiye ku mbuga nkoranyambaga, aho naho bakaba bahasanga ubutumwa kuri Jenoside.

Agira ati “Uburyo twanditsemo ibitabo byacu byinshi ni ibibwira abantu bakuze, ariko hari umuntu wambwiye ko agiye gutangira uburyo bwo kwandikira abana mu bishushanyo, ku buryo byarushaho kuborohereza kumenya amateka mu cyiciro cyabo”.

Yongeraho ko ku rubyiruko hakwiye kurebwa uko narwo rubona ibitabo cyangwa imfashanyigisho zihagije, ku kugera ku makuru yuzuye mu mateka ya Jenoside, kuko ari bwo rukura rwirinda ingengabitekerezo ya Jenoside.

Agira ati ‘Ibyigishwa abana ni bike kuko bigira muri za nkuru zishushanyije, ibitabo byinshi byanditswe hagamijwe kuruhura imitwe y’abanditse no kumenyesha abanyamahanga ukuri kwa Jenoside, ariko ntawanditse agamije kubwira abana. Inzego zibishinzwe ndakeka ko zibigeze kure harebwa uko ayo mateka yazigishwa mu mashuri”.

Gasore Serge

Nsengimana Albert wanditse igitabo yise ‘Ma mère m’a tué’, kivuga uko nyina umubyara ari we wamushyiraga interahamwe ngo zimwice, avuga ko uburyo bwo kwandika buhari kandi ko hari abandika bagamije kumenyesha icyiciro runaka cy’abantu.

Urugero atanga ni ukuba yaranditse igitabo ashaka ko abazungu n’abantu bahunze Igihugu basobanukirwa n’ukuri, kuko harimo abagoreka amateka ya Jenosiude kandi bikaba byangiza urubyiruko igihe rutasobanukiwe, nk’uko yitangaho urugero rw’ibyamubayeho.

Avuga ko kuva yiga mu mwaka wa kabiri w’icyiciro rusange cy’amashuri yisumbuye, yatangiye kwandika amateka ye, y’uko nyina yamushyiraga Interahamwe ngo zimwice, ariko agatangazwa kandi akanababazwa no kumva ko hari abahakana ko Jenoside yakorewe Abatusti yabaye, cyangwa habayeho Jenoside ebyiri harimo n’iy’Abahutu.

Yongeraho ko abana bakomoka ku bakoze Jenoside bakeneye kumenya amakuru y’impamo kandi yanditswe na ba nyir’ubwite, ari nayo mpamvu yanditse icyo gitabo ngo atange ubutumwa bw’umwimerere kandi byagezweho.

Asobanura ko impamvu urubyiruko rushobora kwishora mu byaha byo gupfobya Jennoside, ari uko baterwa ipfunwe no kumva ibyo ababyeyi babo bakoze, bagaterwa ipfunwe ryo kubyumva bagahitamo kubihakana kuko havugwamo ababeyi babo.

Nsengimana avuga kandi ko hari n’abahakana Jenoside kubera ko aho baherereye ariyo makuru akwirakwizwa, akaba ari yo mpamvu inyandiko zikwiye kuba zifata ibyiciro byose, kugira ngo amakuru atangwe mu buryo bumwe kandi bwizewe.

Nsengimana Albert

Ikindi ngo n’ubwo hakiri ikibazo cy’ubushobozi buke ku bifuza gusohora ibitabo, hanakwiye kubaho uburyo bwo kuganira n’abandi bahanzi bandika bateye iyo ntambwe, kugira ngo bafashwe gusohora ibitabo byabo.

Agira ati “Dufite inzira zitandukanye AERG, GAERG na Leta muri rusange, izo nzego zose zishobora gufasha umuntu, ndakeka uwashaka kwandika natwe twabitangiye yatwegera kuko bisaba ubufatanye, ndumva ntawabura burundu uko asohora igitabo cye”.

Abo banditsi bagaragaza ko n’ubwo ibitabo byabo byanditswe mu ndimi z’amahanga kubera ubutumwa burimo n’abo bwari bugenewe, ubu barimo gushaka uko ibitabo byabo byashyirwa mu Kinyarwanda kugira ngo bisomwe n’ingeri zitandukanye.

Urwibutso rwa Gahanga rushyinguyemo imibiri y’abantu bishwe cyane cyane ku itariki ya 10 Mata 1994 basaga 6,711 ndetse n’abandi bashyinguye mu rwibutso rwa Nunga 7,564 hakaba n’abashyingiye mu rwibutso rwa Karembure 2,522.

Emmanuel Rutubuka uyobora Umurenge wa Gahanga ati “Ibi ni umusaruro wa Politiki mbi y’ivangura ry’amoko ryamamajwe rigacengezwa mu Banyarwanda muri Repubulika ya mbere ndetse n’iya Kabiri.”

Emmanuel Rutubuka uyobora Umurenge wa Gahanga yashimiye abaje kwifatanya na bo Kwibuka

Yashimye Ingabo zahoze ari iza FPR Inkotanyi zahagaritse Jenoside zirangajwe imbere na Perezida Paul Kagame, zikarema ubuzima bushya ahari amacakubiri hagasimbuzwa Ndi Umunyarwanda, Abanyarwanda bakunga ubumwe.

Umwe mu barokokeye ahubatse urwibutso rwa Kagasa kuri Paruwasi ya Gahanga, witwa Kalisa Emmanuel, yavuze uburyo bahahuriye n’akaga gakomeye, benshi mu bahahungiye barahicirwa ariko abasha kwihisha mu muvu w’amaraso, abicanyi bamaze gutaha avamo arahunga.

Kalisa uhagaze iruhande rw’inzu bari bihishemo avuga ko bahahuriye n’ingorane zikomeye, icyakora we abasha kurokoka

Kalisa yashimiye abaturanyi b’iwabo yahungiyeho bakamuhisha kugeza ubwo Inkotanyi zamugeragaho zikamurindira umutekano hamwe n’abandi bari barokotse. Ashima Leta y’u Rwanda yabafashije bakabasha kwiga ndetse bagakora n’imirimo itandukanye ibafasha kwibeshaho no kwiteza imbere.

Perezida wa IBUKA, Egide Nkuranga

Perezida wa IBUKA ku rwego rw’Igihugu, Egide Nkuranga, yavuze ko n’ubwo hari intambwe imaze guterwa, urugamba rwo kurwanya Jenoside n’ingengabitekerezo yayo rutararangira.

Yamaganye abakomeje gukwirakwiza inyigisho mbi bifashishije cyane cyane imbuga nkoranyambaga, asaba abazi ukuri kutarebera. Ati “Uburyo bakoresha baturogera abana, natwe tubukoreshe tubarogora. Hari ababikora batukana, ariko twebwe ntituzatukana, ahubwo tuzakoresha ubundi buryo bw’ikinyabupfura ariko tubasubize. Baratsinzwe ni uko batabyemera.”

Egide Nkuranga uyobora IBUKA yasabye kandi inzego z’umutekano n’inzego z’ibanze gukurikirana abagihohotera abarokotse Jenoside yakorewe Abatutsi, kuko bakomeje kugaragaza ibikorwa n’amagambo byibasira abarokotse, cyane cyane mu gihe nk’iki cyo kwibuka.

Umuyobozi Nshingwabikorwa w’Akarere ka Kicukiro, Umutesi Solange, yavuze ko nk’ubuyobozi bazakomeza kuba hafi abarokotse Jenoside yakorewe Abatutsi.

Umuyobozi Nshingwabikorwa w’Akarere ka Kicukiro, Umutesi Solange

Ati “Ni inshingano yacu gukomeza kubitaho mu buryo bw’ubuzima ndetse n’imibereho. Nimuhumure, nimukomere, Jenoside ntabwo izongera kubaho ukundi.”

Uyu muyobozi w’Akarere ka Kicukiro kandi yashimye ingamba zafashwe na Leta y’u Rwanda zo guhangana n’icyorezo cya COVID-19 zikaba zaratumye ubu abantu babasha guterana bakibuka, mu gihe hari hashize imyaka ibiri bidashoboka kubera icyo cyorezo. Yasabye abantu gukomeza kwirinda no kubahiriza ingamba zo kucyirinda.

IBUKA na yo ivuga ko iyi myaka ibiri yagize ingaruka kuri bamwe mu barokotse Jenoside yakorewe Abatutsi, bituma ibibazo by’ihungabana byiyongera kuri bamwe ndetse n’indwara ziterwa n’iryo hungabana kimwe n’ingaruka za Jenoside ziriyongera. Perezida wa IBUKA asaba abafite ibyo bibazo kwegera ubuyobozi ndetse n’inzego zibareberera kugira ngo bitabweho.

Karidinali Kambanda Antoine na we yaje kwifatanya n’abaturage b’Umurenge wa Gahanga Kwibuka

Urubyiruko rwasabwe kwirinda abaruyobya bakoresha cyane cyane imbuga nkoranyambaga

Umuhanzi Bonhomme yaririmbye zimwe mu ndirimbo ze zijyanye no kwibuka Jenoside yakorewe Abatutsi

Imibiri 315 y’abazize Jenoside yashyinguwe mu cyubahiro

Muri iyo mibiri harimo 301, yari ishyinguwe mu buryo butanoze mu rwibusto rwa Rushashi, imibiri ibiri iherutse kuboneka mu Murenge wa Muhondo, umubiri wabonetse mu Murenge wa Minazi undi uboneka mu Murenge wa Janja.

Imibiri 10 y’umuryango umwe yari iri mu Murenge wa Cyuve mu Karere ka Musanze, nayo yimuriwe muri urwo rwibutso, nyuma y’uko umukozi wakoreraga ibitaro bya Nemba ukomoka mu Karere ka Gakenke, asanze umuryango we wose bawishe, biba ngombwa ko iyo mibiri yari mu Karere ka Musanze, ijyanwa gushyingurwa mu cyubahiro mu Karere ka Gakenke ku ivuko.

Ni umuhango udasanzwe aho witabiriwe n’imbaga y’abaturage bo mu mirenge inyuranye igize Akarere ka Gakenke, bari baherekeje inshuti n’abafandimwe biciwe ababo muri Jenoside yakorewe Abatutsi, mu rwego rwo gushyingura izo nzirakarengane mu cyubahiro.

Ni umuhango witabiriwe n’abayobozi banyuranye barimo Umunyamabanga wa Leta ushinzwe amashuri abanza n’ayisumbuye, Twagirayezu Gaspard, Guverineri w’Intara y’Amajyaruguru, Abadepite, Umuyobozi w’Akarere ka Gakenke n’umuyobozi w’akarere ka Musanze, abakuriye inzego z’umutekano mu Ntara y’Amajyaruguru no mu Karere ka Musanze, abahagarariye amadini n’amatorero n’abandi.

N’ubwo habonetsemo ikibazo cy’ihungabana, abenshi mu babuze ababo muri Jenoside bishimiye ubwitabire bwaranze abatuye Akarere ka Gakenke, babifata nk’intambwe nyayo igeza igihugu ku bwiyunge nyabwo, dore ko ikibuga gikikije urwibutso rwa Buranga cyari cyuzuye abantu, baganirijwe ku mateka yaranze Jenoside bumva n’ubuhamya bwa bamwe mu bayirokotse.

Bashyinguye ababo mu cyubahiro

Mu ijambo rye, Umuyobozi wa Ibuka mu Karere ka Gakenke, Dunia Sa’adi, yavuze ko kwimurira imibiri mu rwibutso rushya rw’akarere, biri muri gahunda ya Leta mu rwego rwo kubungabunga amateka ya Jenoside no guha icyubahiro inzirakarengane zishwe, aho yashimangiye ko biruhura bikanomora ibikomere by’ababuze ababo, mu gihe babonye ko bashyinguye mu buryo bubahesha icyubahiro bakwiye.

Umuyobozi wa Ibuka yagarutse ku mibereho y’Abarokotse Jenoside mu Karere ka Gakenke, ati “Ku bufatanye bw’ubuyobozi bw’Akarere na Ibuka, imikoranire ni myiza, tujya inama igikwiye tukakiganiraho ahari ikibazo kibangamiye abarokotse Jenoside kigashakirwa umuti. Leta y’u Rwanda iyobowe na Nyakubahwa Paul Kagame ihora hafi abarokotse Jenoside”.

Mu kiganiro cyatanzwe na Depite Bitunguramye Diogène, ku ruhare rw’ingengabitekerezo ya Jenoside mu gusenya ubumwe bw’Abanyarwanda n’inshingano za buri wese zo kububumbatira, yasabye abitabiriye uwo muhango kwirinda ingengabitekerezo ya Jenoside, baharanira kubumbatira Ubumwe bw’Abanyarwanda, hagamijwe kubaka igihugu kizira amacakubiri.

Muri uwo muhango, abatanze ubuhamya bagaragaje inzira ndende banyuze kugira ngo barokoke, bashimira cyane Ingabo zari iza FPR-Inkotanyi zabarokoye, na Leta ikomeza kubitaho ubu bakaba bameze neza. Icyakora bagaragaza ikibazo basigaranye cy’imibiri y’abishwe itaraboneka, bakomeza gusaba ababa bazi aho iherereye kuhagaragaza mu rwego rwo kuyishyingura mu cyubahiro.

Yaba Umuyobozi w’Akarere ka Gakenke, Nizeyimana Jean Marie Vianney, yaba na Guverineri w’Intara y’Amajyaruguru Nyirarugero Dancille, bombi mu butumwa bwabo basabye abaturage kwirinda ingengabutekerezo ya Jenoside, baba hafi abarokotse Jenoside mu rwego rwo kubafata mu mugongo.

Bagarutse cyane ku bakomeje kwinangira mu gutanga amakuru y’aho imibiri y’abatutsi bishwe iherereye, aho basabwe kuva ku izima bakayigaragaza igashyingurwa mu cyubahiro mu rwibutso, dore ko byakunze kuvugwa ko hakiri imibiri myinshi itaraboneka.

Umunyamabanga wa Leta muri MINEDUC, Twagirayezu Gaspard

Umunyamabanga wa Leta muri Minisiteri y’Uburezi ushinzwe amashuri abanza n’ayisumbuye, Twagirayezu Gaspard, imboni ya Guverinoma mu Karere ka Gakenke, yasabye abaturage by’umwihariko urubyiruko kwiga amateka y’igihugu, no kumenya uko ubuyobozi bubi bwabibye ingengabitekerezo ya Jenoside mu baturage, ariko bakamenya n’uko abanyarwanda b’intwari bahagaritse Jenoside u Rwanda rukaba rugeze aheza.

Yakanguriye n’ababyeyi gukomeza kwigisha urwo rubyiruko amateka batayagoretse, banabereka icyerekezo cy’igihugu, babasobanurira ingamba nziza Leta ibafitiye muri gahunda zinyuranye, zirimo kwitabira gahunda y’uburezi kuri bose.

Depite Bitunguramye Diogène

Urwibutso rw’Akarere ka Gakenke rwa Buranga, rushyinguwemo imibiri 1886 y’abazize Jenoside yakorewe Abatutsi biciwe muri ako karere, hakaba hari umushinga wo kuvugurura urwo rwibutso, hongerwamo ibikorwaremezo, birimo urukuta rugaragaza amazina y’abarushyinguyemo.

Guverineri Nyirarugero Dancille

Guverineri Emmanuel K. Gasana mu gikorwa cyo Kwibuka

Yabitangaje ku Cyumweru tariki ya 10 Mata 2022, ubwo habaga umuhango wo kwibuka abari abakozi ba Perefegitura ya Kibungo, Superefegitura ya Kanazi, Ngarama na Rusumo ndetse n’amakomini yahujwe bikabyara Akarere ka Rwamagana.

Abari abakozi ba Perefegitura na za Superefegitura bishwe muri Jenoside ni 19, naho abari abakozi b’Amakomini yahujwe bikabyara Akarere ka Rwamagana ni 22.

Guverineri Gasana avuga ko muri rusange ibikorwa byo kwibuka bigenda neza, ariko nanone hatabura ba kidobya bakigaragarwaho ingengabitekerezo ya Jenoside.

Ati “Turimo kubona ibimenyetso by’Ingengabitekerezo ya Jenoside haba mu bikorwa, mu mvugo, imigirire n’ibindi kandi bisesereza cyangwa bikomeretsa imitima y’abarokotse. Ubu dufite amadosiye amaze kugera kuri atanu ari kuri RIB.”

Bunamiye abazize Jenoside yakorewe Abatutsi

Zimwe mu ngero zikubiye mu mvugo ziri muri ibi bikorwa by’Ingengabitekerezo ya Jenoside, zirimo aho ngo hari abavuga ko iturufu yo kwibuka itakigezweho n’ibindi.

Agira ati “Buri bucye ibikorwa byo kwibuka bigatangira hari uwavuze ngo muzarira ejo natwe amarira yacu tuzayarira ikindi gihe, undi akavuga ati jya kwibuka wowe wabuze abantu jyewe ntacyo njya kwibuka.”

Avuga ko Jenoside ari icyaha gihanwa n’amategeko ku buryo bisaba ko abaturage bazamurirwa imyumvire bagacika ku ngengabitekerezo ya Jenoside.

Muteteri Grace wirukanywe mu kazi inshuro ebyiri azira kuba ari Umitutsi

Intara y’Iburasirazuba ifite inzibutso za Jenoside 38 zibitse imibiri y’Abatutsi bishwe muri Jenoside isaga ibihumbi 360.

Uwo muyobozi avuga ko Intara y’Iburasirazuba yageragerejwemo Jenoside, nk’Abatutsi bicirwaga mu mashyamba ya Bugesera na Rukumberi, mu Mutara, Nyarubuye no mu mugezi wa Nyabarongo.

Minisitiri w’Uburezi, Dr. Valentine Uwamariya na we yitabiriye uwo muhango

Umuyobozi Mukuru w’Urwibutso rwa Jenoside rwa Kigali, Freddy Mutanguha avuga ko mu babyeyi no barimu harimo kubura abaganiriza urubyiruko ku mateka nyakuri ya Jenoside yakorewe Abatutsi mu 1994.

Mutanguha avuga ko mu rubyiruko hari inyota yo kumenya amateka ya Jenoside ariko ko ababyeyi batinya kuyaganiraho bitewe n’ihungabana bamwe bahita bagira.

Yagize ati “Mperutse kuganira n’umubyeyi umwe wafashwe ku ngufu muri Jenoside afite imyaka 12, musaba kubwira abana ibyamubayeho arambwira ati ‘fata ubuhamya bwanjye uzabubabwire ntagihari’, ntekereza ko uwo mwana uzumva video umubyeyi atakiriho bitazamubera byiza.”

Mutanguha avuga ko yanagiye mu mashuri agasanga 80% by’abarimu baravutse nyuma ya Jenoside yakorewe Abatutsi, bakamubwira ko iyo bageze ku isomo ry’amateka y’iyo Jenoside baha abanyeshuri umukoro wo mu rugo kugira ngo ababyeyi babe ari bo bayabaganirizaho.

Mutanguha Freddy ukorera Umuryango Aegis Trust akaba n’Umuyobozi w’Urwibutso rwa Kigali ku Gisozi

Igisubizo Mutanguha atanga, ni uko urubyiruko rujijutse rwatangira kwishakishiriza amateka y’ukuri kuri Jenoside rwifashishije ibitabo, ariko rugashungura kuko ngo hari ibyanditswe n’abapfobya bahakana Jenoside, cyane cyane abanyamahanga batazi ukuri kw’ibyabaye.

Mutanguha atanga ingero z’ibitabo bikwiye gusomwa birimo ibya Musenyeri Alexis Kagame wanditse Inganji Karinga hamwe n’ubuhamya bw’abarokotse Jenoside bugiye buri mu nzibutso, hanyuma rugatangira kuvuguruza amateka ayipfobya.

Dimitrie Mukanyiligira na we yaganirije Urubyiruko

Undi waganirije Urubyiruko rwabarirwaga mu magana rwahuriye ku Gisozi, ni Madame Dimitrie Sissi Mukanyiligira wanditse igitabo “Do not Accept to Die (Ntuzemere gupfa)”, akaba yabwiye urubyiruko ko igihe ari iki cyo kwandika mu ikoranabuhanga amazina y’Abatutsi bishwe muri Jenoside.

Mukanyiligira yagize ati “Umuntu wanjye nshobora kumushyira muri Google nkamurinda kuzima, mureke abacu tubandikeho, rubyiruko mubimenye ko umwana w’Umunyarwanda uri muri Pologne(ni urugero), azasoma ibyo mwanditse akavuga ati ‘hari agasozi kitwa Rukumberi’, kuko iyo yicaye hariya i Burayi areba filime, bishobora kumuzamo agahakana Jenoside kuko ibyo kuyivugaho ntabyo afite”.

Mukanyiligira na we asaba ababyeyi gutinyuka kuganiriza abana kuko ngo babonye byinshi bitazamenywa n’ibisekuru by’Abanyarwanda bagenda bavuka uko imyaka ishira.

Ibiganiro byahawe urubyiruko ku rwibutso rwa Kigali ku Gisozi byasimburanaga n’imivugo n’ikinamico, na byo bivuga kuri Jenoside yakorewe Abatutsi mu 1994.

Uwitwa Manzi Ntare Nkaka w’imyaka 24 y’ubukure yanditse ikinamico yitwa ‘Ntwaza’, akaba avuga ko kudashyira amateka ya Jenoside mu bihangano urubyiruko rukunda, ngo ashobora kuzimira burundu.

Umuyobozi w’Umuryango Our Past, Ntwali Christian avuga ko bazarinda amateka y’u Rwanda kugira ngo atazimira, bakaba bariyemeje guhuriza urubyiruko mu bikorwa ngarukamwaka bijyanye no gufasha abarokotse Jenoside, hamwe no kuruganiriza binyuze mu mivugo amakinamico n’ibiganiro.

Kurikira ibindi muri iyi Video:

Kureba andi mafoto menshi, kanda HANO

Amafoto: Niyonzima Moise/Kigali Today

Senateri Mureshyankwano avuga u Rwanda rwagize ubuyobozi bubi mbere ya Jenoside, bushora urubyiruko mu bikorwa by’amacakubiri yagejeje u Rwanda kuri Jenoside.

Agira ati; "Ndasaba urubyiruko rwacu kwitandukanya n’ibikorwa nk’ibyo kuko bavukiye mu gihugu gifite ubuyobozi bushyize imbere ubumwe bw’Abanyarwanda, Igihugu kitavangura, ahubwo urubyiruko rurwanye abafite ingengabitekerezo ya Jenoside n’amacakubiri, baba ababivuga beruye n’ababikorera ku ikoranabuhanga."

Senateri Mureshyankwano avuga ubuyobozi bwabayeho mbere ya Jenoside bwakoresheje urubyiruko mu kwica abatutsi, kandi abigishijwe ingengabitekerezo ya Jenoside n’ubu hari abakiyifite bahakana Jenoside, asaba urubyiruko kubarwanya.

Akomeza avuga ko abantu bakoresha imbuga nkoranyambuga mu gukwirakwiza ingengabitekerezo ya Jenoside bagomba kumenya ko batazihanganirwa.

Yagize ati "Hari uburyo bwo gukurikirana bariya bakoresha imbuga nkoranyambaga mu gukwirakwiza ingengabitekerezo ya Jenoside mu Rwanda, ndetse n’abari hanze bakoresha ziriya mbuga hari ibiganiro n’abazifite kugira ngo hakumirwe ibikorwa byo gupfobya no guhakana Jenoside kuko ari icyaha mpuzamahanga."

Mureshyankwano avuga ko abana bavutse nyuma ya Jenoside bakwiye kumenya ukuri kandi akaba ariko bashyira imbere. Ati "Ukuri ku byabaye kurahari bagukura mu buyobozi bw’Igihugu, bagukura ku mateka yandikwa n’Abanyarwanda, birinde ibihuha bikwirakwizwa n’abantu bari hanze."

Avuga ku bana bavuka ku bagize uruhare muri Jenoside, yagize ati "Ndisabira abana bavutse ku babyeyi bakoze Jenoside yakorewe Abatutsi kwitandukanya n’ibikorwa ababyeyi babo bakoze, cyangwa abafite ababyeyi bafite ingengabitekerezo ya Jenoside kwitandukanya n’iyo ngengabitekerezo ahubwo bakabafasha gukira."

Urubyiruko rwo mu Karere ka Rubavu ruvuga ko rutazihanganira abafite ingengabitekerezo ya Jenoside ahubwo ngo rwiteguye kubamagana.

Hakizimana warokotse Jenoside yakorewe abatutsi ndetse akayiburiramo umuryango wose avuga ko nta mwanya yaha abafite ingengabitekerezo.

Agira ati "Ibyatubayeho turabizi, amashuri bize twarayize, ibitabo basoma turabisoma, twiteguye kubanyomoza."

Ubuyobozi bwa IBUKA mu Karere ka Rubavu busaba urubyiruko kwima amatwi abagoreka amateka ya Jenoside ahubwo rukabahinyuza rwandika ibyabaye.

Iyo mibiri ishyinguye muri Ggolo Memorial Site isaga ibihumbi bine ni iy’Abatutsi bishwe bakajugunywa mu migezi yo mu Rwanda ya Nyabarongo, Akagera n’indi, mu gihe cya Jenoside yakorewe Abatutsi, nyuma igakomereza muri Uganda iciye mu mazi, igatunguka ku nkombe z’ikiyaga cya Victoria.

Ggolo Memorial Site ni rumwe mu nzibutso eshatu za Jenoside yakorewe Abatutsi zubatse muri Uganda ari zo Ggolo ruri mu Karere ka Mpigi, urwa Kasensero ruri mu Karere ka Rakai n’urwibutso rwa Lambu ruri i Masaka.

Abagize Humura Family mbere yo kwerekeza muri Uganda babanje kunamira abazize Jenoside yakorewe Abatutsi bashyinguye mu rwibutso rwa Gikondo i Kigali banashyira indabo ku mva rusange zibitse imibiri y’Abatutsi isaga 500.

Abagize Humura Family bakomereje ku mugezi wa Nyabarongo gushyira indabo kuri uyu mugezi nk’ikimenyetso cyo gusubiza agaciro abajungunywemo bishwe cyangwa ari bazima muri Jenoside yakorewe Abatutsi, ari na bo bavuyemo abo amazi yatwaye muri Uganda.

Ku mugezi wa Nyabarongo hubatse ikimenyetso kiriho amazina 755 y’abamenyekanye ko bajugunywemo muri Jenoside yakorewe Abatutsi.

Abaturage bari bateze amatwi ubuhamya bw’ibyabereye ku musozi wa Muhungwe

Muhungwe ni umusozi uzwi mu mateka y’u Rwanda. Uretse kuba wigwa nk’umusozi muremure, ni umusozi ubitse amateka ababaje y’Abatutsi bawiciweho mu gihe cya Jenoside, babura gishyingurwa ndetse n’ubu imibiri yabo ikomeje kuburirwa irengero.

Mbarushimana Gerard, Umuyobozi wa IBUKA mu Karere ka Rubavu avuga ko agace ka Yungwe mu Musozi wa Muhungwe kari kagizwe n’ishyamba rya kimeza ryitaruye ahatuwe, maze abahigwa bahagana bakeka kuharokokera.

Mbarushimana, avuga ko abahahungiye batarokotse kuko batewe n’Interahamwe n’abasirikare bavuye mu kigo cy’abakomando cya Bigogwe bakicwa, abashoboye kurokoka bahungira mu cyahoze ari Zaire.

Mbarushimana avuga ko igikomeje gutera agahinda ari uko abiciwe Yungwe ku musozi wa Muhungwe baburiwe irengero, akaba asaba ubuyobozi bw’Akarere ka Rubavu kuhashyira ikimenyetso kiranga amateka y’ibyahabereye.

Ubuhamya bw’abahahungiye buvuga ko bari abantu babarirwa mu bihumbi bitatu kuzamura kandi abenshi barahaguye ariko imibiri yabo yaburiwe irengero.

Amateka ya Yungwe mu gihe cya Jenoside yakorewe Abatutsi mu 1994

Uwitwa Hakizimana Gaspard avuga ko Jenoside yakorewe Abatutsi mu 1994 yabaye afite imyaka 14, akaba avukana n’abavandimwe 8.

Ubwo Jenoside yari itangiye, iwabo muri Komini Kanama, umuryango wabo wahungiye kuri Yungwe. Abantu benshi tariki 8 na 9 bakomeje kwiyongera bahunga ibitero by’Interahamwe z’abaturanyi babo n’abasirikare barimo babafasha, maze berekera ku musozi wa Muhungwe batekereza ko ntawe uzabakurikirana bakaba bahakirira.

Bashyize indabo ahiciwe Abatutsi ku musozi wa Muhungwe

Icyakora Hakizimana avuga ko atari ko byagenze kuko ku itariki ya 10, Interahamwe ziyobowe n’abayoboraga amasegiteri yari akikije ishyamba rya Gishwati zabateye inshuro eshatu bakazisubiza inyuma kugera n’aho bazambuye imbunda zari zifite.

Agira ati; “Kuri uyu musozi nta mabuye yari ahari, ubwo twari dusatiriwe n’Interahamwe zari zazamutse imisozi idukikije abasore bamwe bagiye kuzitegera mu nzira zizamuka bazibuza kutugeramo, twari dufite abana n’abagore bananiwe n’abakomeretse.”

Akomeza agira ati; “Twakoresheje ibisuti, abandi bakoresha imitanga, dusubiza ibitero inyuma inshuro eshatu, ndetse hari n’abo twatse imbunda ariko kubera kutamenya kuzikoresha tukazitemagura. Interahamwe zibonye tuziganje ziyambaje abasirikare mu kigo cya Bigogwe, ntituzi uko batugezemo kuko baje bakoresha ibyuma, maze si ukuturasa dukwira imishwaro.”

Hakizimana avuga ko umusozi wari wuzuye abantu benshi, nubwo atabaze abari bahahungiye avuga ko batari munsi y’ibihumbi 3, kandi benshi bahaguye barashwe.

Agira ati “Hariya bashyize indabo ni ho twashyiraga inkomere, naho hariya handi hashyirwa abagore n’abana, kwirwanaho byaranze, umugabo umwe w’intwari twari dufite witwa Rudasumbwa, asaba buri muntu wese guhunga, gusa abenshi bari bahiciwe.”

Urugendo rwo guhunga rwaratangiye amahitamo ari ukwerekeza muri Zaire. Icyakora Hakizimana avuga ko uko bajyanye ari 70 abashoboye kugerayo ari batatu abandi biciwe mu nzira n’Interahamwe.

Hakizimana wari wahunganye n’umuryango we avuga ko nyina n’abavandimwe batandatu baguye aho, ariko aho bahungukiye nta mibiri yabo babonye.

Agira ati; “Abaguye aha ntibashyinguwe kuko n’abicirwaga mu ngo batabwaga ari ukwikiza umunuko, ab’aha rero ntawabashyinguye kuko bari ku musozi ahantu hadatuwe, dukeka ko bariwe n’inyamaswa, kuko aho tugarukiye ntabo twabonye.”

Umuyobozi w’Akarere ka Rubavu, Kambogo Ildephonse, avuga ko amateka ya Yungwe azakomeza kuzirikanwa ndetse ahiciwe Abatutsi hagashyirwa ikimenyetso kiranga amateka y’ibyahabereye.

N’ubwo muri Mata 1994 umusozi wa Yungwe wari amashyamba kimeza, nyuma ya Jenoside waje guhingwa, ariko kubera kubungabunga ishyamba rya Gishwati hashyizwe amaterasi n’inzuri, gusa abafite ababo bahiciwe, bavuga ko bakomeje gushakisha imibiri y’abahiciwe n’ubwo ikomeje kuburirwa irengero.

Gahunda yo kwibuka ku nshuro ya 28 Jenoside yakorewe Abatutsi yabimburiwe no gushyira indabo no kunamira inzirakarengane zazize Jenoside kuri ‘Place du Souvenir Africain’ muri Dakar, ahari ikimenyetso cyo kwibuka inzirakarengane za Jenoside yakorewe Abatutsi mu Rwanda mu 1994, ikomereza kuri Musée des Civilisations Noires. Gahunda yitabiriwe n’abantu bagera kuri 250 barimo abahagarariye ibihugu byabo n’Imiryango Mpuzamahanga muri Senegal n’inshuti z’u Rwanda.

Sidiki KABA, Minisitiri w’Ingabo z’Igihugu cya Senegal wari uhagarariye Guverinoma ya Senegal muri gahunda yo Kwibuka, mu izina rya Perezida wa Senegal, Macky Sall na Guverinoma, yagaragaje ko Senegal yifatanyije n’Abanyarwanda mu kunamira inzirakarengane zazize Jenoside, binashimangira umubano mwiza hagati y’Ibihugu byombi by’umwihariko umubano w’ubucuti n’ubuvandimwe hagati y’Abayobozi b’ibyo Bihugu byombi, Perezida Paul KAGAME na Perezida Macky SALL.

Minisitiri Sidiki KABA

Yagaragaje ko u Rwanda ubu ari Igihugu cy’intangarugero mu bumwe bw’abagituye no mu iterambere n’imibereho y’abaturage, anashimangira uruhare rw’u Rwanda ku rwego mpuzamahanga by’umwihariko uruhare ntagereranywa rwa Nyakubahwa Paul KAGAME mu mavugururwa y’Umuryango w’Ubumwe bwa Afurika. Yongeye kwibutsa n’igihango cy’amateka y’umusirikare wa Senegal, Capitaine Mbaye DIAGNE wabaye intwari akagerageza gukiza bamwe mu bahigwaga, akanahasiga ubuzima afatanyije na bagenzi be bo muri Senegal barimo na Gen. Babacar FAYE watanze ubuhamya.

Ambasaderi w’Igihugu cya Gabon muri Senegal, Regis ONANGA NDIAYE wavuze mu izina ry’Abahagarariye Ibihugu n’Imiryango Mpuzamahanga muri Senegal, yagarutse ku mwanzuro w’Inteko Rusange y’Umuryango w’Abibumbye yemeje ko itariki ya 7 Mata 2022 ya buri mwaka ari umunsi mpuzamahanga wo kuzirikana Jenoside yakorewe Abatutsi mu Rwanda mu 1994 ndetse anashima ko Umuryango w’Abibumbye wamaganye bidasubirwaho ihakana n’ipfobya bya Jenoside yakorewe Abatutsi mu Rwanda mu 1994. Yashimye cyane Nyakubahwa Perezida w’u Rwanda, Paul KAGAME wayoboye urugamba rwahagaritse Jenoside yakorerwaga Abatutsi no guteza imbere Igihugu bishingiye ku kugarura amahoro na gahunda y’ubwiyunge mu Banyarwanda. Yagaragaje ko kwibuka ari umwanya ukomeye wo gukomeza guha agaciro abakambuwe muri Jenoside ariko ko ari n’umwanya wo kurushaho gutuma isi imenya ayo mateka asharira kugira ngo atazongera ukundi.

Ambasaderi Karabaranga

Ambasaderi w’u Rwanda muri Senegal, Jean Pierre KARABARANGA yasobanuye ko Jenoside atari impanuka ko ahubwo ari umugambi utegurwa kugeza ushyizwe mu bikorwa. Yagaragaje uko ingengabitekerezo y’ivangura rishingiye ku moko yigishijwe ku mugaragaro mu miryango, mu mashuri ndetse hakanifashishwa itangazamakuru kugeza kuri Jenoside yari igamije kurimbura Abatutsi. Yanagaragaje ko Jenoside yagiye igeragenzwa hirya no hino mu Gihugu kugeza mu 1994 hicwa abantu basaga miliyoni, bashyira mu bikorwa umugambi watangiye mu 1959.

Yifuje ko kwibuka ari umwanya wo kugaragariza amahanga ko Jenoside idakwiye kongera kubaho ukundi kuko amahanga yakuye isomo rikomeye mu kuba hatarabaye gutabara inzirakarengane. Ari na yo mpamvu abayikoze, abayihakana n’abayipfobya bakwiye gukurikiranwa kuko bagikurura urwango. Yagaragaje ko Jenoside yarangiye ari uko ingabo zari iza FPR zari ziyobowe na Perezida Paul Kagame, zatsinze ingabo z’abajenosideri, Ingabo za FPR zigahagarika Jenoside, umwanya wo kwibuka rero ukaba ari umwanya wo gushima izo ntwari.

Yanibukije kandi ko abarokotse Jenoside yakorewe Abatutsi bashimirwa kuba barabaye mu ba mbere mu kwitabira gahunda za Leta zo kubaka Igihugu, harimo n’abatuye muri Senegal.

Bwana Adama DIENG

Muri gahunda yo kwibuka Jenoside yakorewe abatutsi habaye n’ikiganiro kirambuye cyagarutse ku mateka ya Jenoside yakorewe Abatutsi cyarimo Adama DIENG wahoze ari Umunyamabanga Mukuru Wungirije w’Umuryango w’Abibumbye yagaragaje ko ihakana n’ipfobya bya Jenoside bigenda bifata indi ntera kubera ko hari amakuru menshi atariyo asigaye atangazwa hifashishijwe ikoranabuhanga. Yasabye ko hagomba gukorwa ubuvugizi amateka ya Jenoside akigishwa mu mashuri anasaba ko urubyiruko rw’abanyeshuri rwihatira kumenya amateka nyayo kuri Jenoside yakorewe Abatutsi. Yasabye ko abantu bose bakwiye kwamagana abahakana, bakanapfobya Jenoside kuko kuyihakana niko gukomeza kuyikora.

Gen. El Hadji Babacar FAYE

Generali El Hadji Babacar FAYE wari ufite ipeti rya Kapiteni mu gihe cya Jenoside yagaragaje ko inshingano yabo yari iyo kugarura amahoro kuko bageze mu Rwanda mu gihe hasinywaga amasezerano y’amahoro ya Arusha. Baza mu Gihugu ntabwo bigeze batekereza ko hari Jenoside yahakorerwa, ariko uko iminsi ihita babona ibimenyetso ko hari Jenoside iri gutegurwa kuko baje gusanga hari urwango rukabije rufitiwe Abatutsi kandi abicanyi barabigaragazaga ko bazatsemba Abatutsi bakanabifata nk’ibisanzwe. Kuri za bariyeri bahasangaga abicanyi b’Interahamwe kandi ubona bafite n’ababayobora mubyo bakora bigaragaza uko ubwicanyi bwari bwarateguwe.

Ambasaderi Karabaranga asuhuza umugore wa Cpt Mbaye Diagne ari kumwe na Col. Mamadou Adje na we wari mu ngabo za MINUAR

Ibyo babonye byatumye bafata icyemezo cyo kurenga ku mabwiriza bahabwaga n’abayobozi babo, biyemeza kugira abo barokora, banakura bamwe mu Batutsi bari muri Hotel Mille Collines babajyana mu gice cyagenzurwaga na FPR-Inkotanyi. Cyari igikorwa cyasabaga ubwitange bukomeye kuko bashoboraga kuhasiga ubuzima kuko na bo bagabwagaho ibitero n’abicanyi.

Umwanditsi Boubacar Boris Diop

Boris Boubacar DIOP, Umwanditsi wo muri Senegal wanditse igitabo ku mateka ya Jenoside i Murambi (Murambi, le Livre des Ossements) yagaragaje ko Jenoside yakorewe i Murambi igaragaza ubukana Jenoside yakoranywe kimwe n’uruhare rw’abayobozi ndetse n’uruhare rw’abanyamahanga bamwe.

Yagaragaje ko Musenyeri Augustin MISAGO yabujije abatutsi guhungira mu Gihugu cy’u Burundi abizeza ko bazacungirwa umutekano ahubwo bakarundwa mu ishuri aho baje kwicirwa. Aho kandi ni naho ingabo z’Ubufaransa zari muri « opération turquoise » zari zikambitse. Yagaragaje ko Jenoside yakorewe Abatutsi yateguwe igihe kirekire, ko hari uguheza Abatutsi mu bice byose by’ubuzima bw’Igihugu. Akaba asanga isi yose hari isomo yakuye muri Jenoside yakorewe Abatutsi.

Yves Munana RWOGERA, Perezida wa Ibuka Sénégal

Bwana Yves MUNANA RWOGERA, Perezida wa IBUKA Senegal yagaragje ko kwibuka bigomba kuba iby’igihe cyose kandi ni inshingano kuri buri wese kuko kubyibagirwa byaha icyuho abafite gahunda yo gukomeza umugambi wa Jenoside. Kwibuka akandi bituma hakomeza guharanirwa ubutabera, kuko byibutsa buri wese ibibi byakozwe kandi bigomba guhanwa.

Yanagarutse ku nshingano yo kurwanya ingengabitekerezo yayo kimwe n’ihakana ryayo. Yagaragaje ko ari ngombwa kwigisha amateka nyayo ya Jenoside yakorewe Abatutsi kugira ngo hatagira abakomeza kuyagoreka. Kwibuka binaca intege abateguye bakanashyira mu bikorwa umugambi mubi wabo kuko bibagaragariza ko batageze ku ntego yabo.

Jessica Kabandana wayoboye ibiganiro

Madame Solange Zuba BURABYO wari umusangiza w’amagambo (MC)

Ni inkuru dukesha Ambasade y’u Rwanda muri Senegal

Minisitiri Bizimana yabigarutseho tariki 07 Mata 2022 mu muhango wo gutangiza icyumweru cy’icyunamo cyo kwibuka ku nshuro ya 28 Jenoside yakorewe Abatutsi mu 1994, cyatangirijwe ku rwibutso rwa Kigali ku Gisozi, ruruhukiyemo imibiri isaga ibihumbi 250 y’Abatutsi bazize Jenoside.

Mu ijambo rye, Minisitiri Dr. Jean Damascene Bizimana, yavuze ko ijambo rya Junenal Habyarimana ryo mu 1969 akiri Minisitiri w’Ingabo, ari imwe mu mbarutso za Jenoside yakorewe Abatutsi mu 1994.

Yagize ati “Tariki 23 Nzeri 1969, Juvenal Habyarimana wari Minisitiri w’Ingabo yoherereje ba Burugumesitiri amabwiriza y’uko bazakemura ikibazo yise igaruka ry’impunzi, yandika ko igaruka ry’impunzi mu Rwanda rinyuranyije n’amategeko, asaba kuzigenzura babyitayeho kugira ngo iryo yinjira ryonona amategeko rihagarare burundu”.

Habyarimana ngo yakomeje agira ati “Witondeye ibarura ry’abanyamahanga bari muri Komine yawe byatuma ubigeraho neza. Tangira kubabarura ukibona uru rwandiko, igisubizo cyawe nzakibone bidatinze.”

Minisitiri Bizimana yavuze ko ubukana bw’aya mabwiriza ya Habyarimana yita impunzi z’Abanyarwanda abanyamahanga, akanemeza ko kugaruka mu gihugu kwazo binyuranyije n’amategeko, ari imwe mu ntandaro za Jenoside yakorewe Abatutsi mu Rwanda.

Minisitiri Dr. Jean Damascene Bizimana

Mbere yaho kandi hari impunzi n’imiryango yabo, bakomeje guhanyanyaza bagana inkiko basaba imitungo yabo, bituma tariki 26 Gashyantare 1966, Perezida Kayibanda ashyiraho iteka ryagiraga riti “Umuntu wese wahunze ntashobora kuregera amasambu ye, niba ayo masambu yarahawe abandi baturage cyangwa hari ikindi Leta yayageneye, mu gihe basigaga ibintu byabo ni bo batumye byandagara, nta wishingiye guhunga kwabo, abategetsi ntibashobora kwishingira ingaruka z’uko guhunga”.

Inzego za Leta zategetswe gukurikiza iri teka, ba Perefe babihabwamo inshingano, uruhererekane rurakomeza kugeza kuri Repubulika ya kabiri, aho tariki 25 Ukwakira 1973 Habyarimana yasohoye iteka risubiramo irya Kayibanda, rikumira impunzi ku gihugu no ku mitungo yazo.

Bizimana yavuze ko iyo ugiye kureba usanga ihezwa muri gahunda nyinshi zitandukanye ryaratangiye mu gihe cy’ubukoloni, kuko nko mu mwaka wa 1924 u Bubiligi bwasinye amasezerano n’Umuryango w’Abibumbye (ONU), yateganyaga gushyiraho ingabo z’u Rwanda, bitangira gukorwa mu Kuboza 1959.

Icyo gihe Col. Guy LOGIEST wari Umutegetsi Mukuru uhagarariye u Bubiligi mu Rwanda, yemeje ko hajyaho ingabo z’Abanyarwanda ku kigero cya 86% mu Bahutu, na 14% mu Batutsi, nubwo nta shingiro gifite ariko ntabwo cyigeze cyubahirizwa.

Tariki 29 Nzeri 1960, habaye inama yahuje Col. François VANDERSTRAETEN wari ushinzwe ishyirwaho ry’ingabo na Col LOGIEST, bafata icyemezo cyo kwigizayo Abatutsi nk’uko inyandiko mvugo y’iyo nama ibivuga.

Yagiraga iti “Ingabo z’Igihugu zizaba zigizwe n’Abahutu gusa, ntidushaka kwitwaza impamvu zo kutabogama n’iza demokarasi, ngo twinjizemo Umututsi n’umwe. Abatutsi bazajya bashaka kwinjiramo, tuzajya ako kanya twemeza ko badashoboye, n’ubwo iyi mikorere irimo akarengane, ntidushaka kuvanga ihene n’ishu ngo twinjize mu ngabo zacu abantu bazadutera ibibazo”.

Gushyiraho ingabo z’Igihugu hagakumirwa Abatutsi, ni imwe mu mpamvu zatumye kuva mu 1959 ubwicanyi bwarabakorerwaga, abasirikare ntibabukumire ahubwo bakagira uruhare mu kwica.

Abakoloni babonye kare ingaruka z’iyi politiki n’ubwo banze bakayitsimbararaho, kuko tariki 30 Mata 1961 inzego z’iperereza z’u Bubiligi zanditse inyandiko ibyerekana.

Yagiraga iti “Mu Rwanda itoranywa ry’Ingabo z’Igihugu ryakurikije kwinjizamo Abahutu bonyine, iyo zigiye mu kazi zishyira imbere ko ari Abahutu kurusha inshingano za kinyamwuga zigomba kuranga umusirikare cyangwa umupolisi. Kubera iyi mpamvu dusanga bidakwiye kubohereza mu kazi ko kurinda umutekano igihe habaye ibibazo bishingiye kuri politiki”.

Igitangaje ni uko abakoloni babonaga ko ingabo bashyizeho zizakora ubwicanyi bo ubwabo bise Jenoside, ariko baranga babitsimbararaho nk’uko bigaragarira muri raporo yo ku wa 27 Ugushyingo 1961, General wayoboraga ingabo z’u Bubiligi yageneye Minisitiri w’Ingabo amugira inama.

Yagize ati “Gutsimbarara kuri politiki yo gushinga ingabo z’u Rwanda uburinzi bw’imipaka, no kuzishinga kurinda umutekano imbere mu gihugu ni ugutera ikibazo cy’uko mu gihe ingabo zizakora ubwicanyi, Loni ishobora kuzita Jenoside, tuzahura n’ingorane zo gushinjwa ubufatanyacyaha”.

Icyo gihe mu Rwanda hari ubwicanyi bwatangiye mu 1959, kandi ubwicanyi bwose bwarangwaga no gukoresha inama zibutegura, hagakurikiraho ibarura ry’abishwe, bikanashyirwa muri raporo za Leta kandi ntihabeho inkurikizi ku babukoze.

Byageze n’aho Leta ishyiraho iteka ryo kudahana kuko tariki 20 Gicurasi 1963, Kayibanda yashyizeho iteka ritegeka kudakurikirana abagize uruhare mu bwicanyi abyita ko ari ukwirengera kwa rubanda, rikanategeka ko abarwanyije Parimehutu bazahanwa.

Uburezi nabwo bwabaye imwe mu nzira zifashishijwe muri politiki y’urwango yagejeje kuri Jenoside yakorewe Abatutsi, kuko tariki 26 Ukwakira 1972, wari umunsi ngarukamwaka bitaga uwa Guverinoma, icyo gihe Kayibanda yatangaje ko Abatutsi bagomba kwigizwayo.

Yagize ati “Baca umugani mu Kinyarwanda ngo bagarira yose, jye ndababwiye ngo nimuvangure urumamfu n’ururo hakiri kare”.

Icyo gihe yasabaga kuvana Abatutsi mu mashuri no mu mirimo, kuko byahise bitangira gukorwa muri Gashyantare 1973, ubwo Leta yashyiragaho icyo yise komite z’ubucunguzi bwa rubanda zayoborwaga n’itsinda ryakoreraga mu biro bya Perezida wa Repubulika, rigizwe n’Umunyamabanga Mukuru muri Perezidansi, Umuyobozi Mukuru wari ushinzwe Politiki n’ubutegetsi, ba Minisitiri batatu, uwari ushinzwe Politiki, uw’Ubutegetsi bw’Igihugu, n’uw’urubyiruko.

Bafatanyije n’abo mu nzego z’umutekano, bashyiraho gahunda yo kwirukana Abatutsi mu mashuri no mu kazi, aho mu rwego rwo kugira ngo batibeshya bagiye muri Minisiteri y’abakozi ba Leta, basuzuma ifishi ya buri mukozi, hakorwa urutonde rw’Abatutsi, hakurikiraho kumanika lisite zabo kuri buri kigo, bategekwa kwibwiriza bagataha.

Tariki 23 Werurwe 1973, Minisitiri w’ubutegetsi bw’igihugu yandikiye ba Burugumesitiri abasaba raporo ku banyeshuri birukanywe kuri buri shuri, ikandikwa mu Kinyarwanda ikanyuzwa kuri Perefe mu ntoki, kandi bigakorwa mu ibanga rikomeye.

N’ubwo Juvenal Habyarimana afata ubutegetsi yabeshye ko agaruye amahoro bigatuma Abatutsi batahunze bagira icyizere, ariko si ko byagenze kuko tariki 01 Kanama 1973 Habyarimana yatangaje politiki y’uburezi ikumira Abatutsi mu mashuri.

Yagiraga iti “Abategetsi b’u Rwanda basanze ari ngombwa gusubira muri politiki yerekeye uburezi. Politiki nshya igamije mbere na mbere kwigisha no kujijura rubanda nyamwinshi. Kwemererwa kwinjira mu mashuri yisumbuye, bizajya bikurikiza ubwoko n’uturere”.

Nyuma yo kwemezwa bikanashyigikirwa n’inzego n’amashyaka bitandukanye, byaje gushyirwa muri politiki y’uburezi mu Rwanda mu mwaka wa 1985.

Kurikira ibindi muri iki kiganiro:

Perezida wa IBUKA mu Karere ka Nyaruguru, Muhizi Bertin

Yabigarutseho tariki 7 Mata 2022, ubwo hamwe n’ubuyobozi bw’Akarere ka Nyaruguru bifatanyaga n’abatuye mu Ruramba mu gikorwa cyo gutangiza icyunamo cyo kwibuka Jenoside yakorewe Abatutsi mu mwaka wa 1994.

Jean Népomuscène Murindahabi, mu buhamya bw’uko Jenoside yagenze muri aka gace, yavuze ko ahitwa i Gisorora mu Ruramba, hahoze ari muri Komini Mubuga, ari ho Jenoside yatangiriye mu duce twahujwe tukaba Akarere ka Nyaruguru.

Yagize ati "Byatangiriye ku musaza bita Nyakaberege. Bamutwikiye inzu, tujya kureba, igihe tukibaza uko byagenze baba bimukiye ku Mujago, ku musaza bitaga Segatwa, na ho baba barahatwitse, n’umusaza baramutema. Mu gihe bamujyanye kwa muganga, noneho Jenoside iratangira imbonankubone."

Icyo gihe Abatutsi bagerageje guhungira ahitwa mu Iramba, Interahamwe n’abasirikare barahabatera, barabarasa banabateramo gerenade, hanyuma noneho bahungira i Karama (ni mu Karere ka Huye), na ho hiciwe imbaga yari yahahungiye.

Aha ni ho Perezida wa Ibuka mu Karere ka Nyaruguru yahereye agira ati "N’urubyiruko rujye rubisobanukirwa, ibi bigaragaza ko Jenoside yakorewe Abatutsi yari yarateguwe. Kuko ntiwavuga ukuntu indege yaguye i Kigali, bagatekereza gutwika urugo rw’Umututsi mu Ruramba. Mwumve intera iri hagati ya Kigali na Ruramba!"

Avuga kandi ko kuba mu Ruramba ari ho Jenoside yatangiriye binafite inkomoko, kuko ari ho ishyaka CDR ryari rifite imbaraga mu makomine yahurijwe mu Karere ka Nyaruguru.

Ati "Tujya twumva abariyoboraga bitwaga ba Muriro. Kandi muri kino gice, nk’uko dukurikira amateka, kuva muri za 1960 iyicwa ry’Abatutsi ryagiye rihageragerezwa, uturutse muri za Mudasomwa na Bunyambiriri."

Muhizi yanavuze ko Jenoside yashobotse kubera ubuyobozi bubi bwananiwe kwigisha abaturage ibibateza imbere ahubwo bukabatoza amacakubiri no kwicana, maze yifuza ko Abanyarwanda babirenga, bagaharanira ubumwe.

Yagize ati "Ibidutanya byabayeho ku buryo buhagije. Uyu munsi dufite icyo twigiye ku bumwe, ku rukundo, ku buyobozi bwiza bwigisha kubana, butigisha gutandukana."

Umuyobozi w’Akarere ka Nyaruguru, Emmanuel Murwanashyaka

Umuyobozi w’Akarere ka Nyaruguru na we yasabye abatuye muri Nyaruguru kwirinda ingengabitekerezo ya Jenoside, anabibutsa ko abazabirengaho bazabikurikiranwaho mu buryo bw’amategeko.

Yunzemo ati "Ndasaba kandi buri wese gukomeza gushyigikira gahunda y’ubumwe n’ubwiyunge bw’Abanyarwanda, gufata mu mugongo abacitse ku icumu rya Jenoside, barindwa amagambo abasesereza n’ibindi bikorwa byose bibasubiza mu icuraburindi, mu gahinda no kwiheba."

Yanavuze ko ahubwo hari hakwiye kubaho gufatanya mu komorana ibikomere, n’abatishoboye bakarushaho gufashwa.

Abitabiriye Kwibuka ku nshuro ya 28 mu Ruramba batahanye ubutumwa bwo kwirinda ingengabitekerezo ya Jenoside

Guverineri Kayitesi ashyira indabo ku mva

Byatangarijwe mu gikorwa cyo gutangiza Icyunamo cyo kwibuka ku nshuro ya 28 Jenoside yakorewe Abatutsi, i Nyarusange mu Karere ka Muhanga ku wa 07 Mata 2022, ahatangirijwe icyo gikorwa ku rwego rw’Intara y’Amajyepfo.

Umuyobozi w’Umuryango IBUKA uharanira inyungu z’abarokotse Jenoside yakorewe Abatutsi, Rudasingwa Jean Bosco, yavuze ko iyo hatabaho politiki y’Ubumwe, abarokotse Jenoside bari kwisanga baraheranwe n’ibikomere byayo, aho gushyira imbere imibanire myiza n’abandi.

Rudasingwa avuga ko n’ubwo icyorezo cya Covid-19 hari byinshi cyasubije inyuma mu kwiyubaka, ariko hari byinshi byakozwe birimo kuvuza abarokotse Jenoside, kububakira inzu, uburezi no kubafasha mu mishinga itandukanye, byatumye ubuzima bukomeza.

Musenyeri Mbonyintege yahaye umugisha abaruhukiye mu rwibutso rwa Nyarusange

Avuga ko kuba Leta y’u Rwanda yarahisemo Ubumwe, ari amahitamo meza yatumye abarokotse Jenoside barenga amarangamutima bakabaho kurenza ibyari byitezwe, bifasha gutsinda imbogamizi ku ndoto zabo, iryo rikaba ari isomo rya mbere.

Agira ati “Natwe abarokotse byatumye tureka ishavu twari dufite dushyigikira ubwiyunge kugira ngo tubeho, kandi nidukomeza guharanira kurenga ibikomere tuzabaho mu bisubizo, aho kubaho mu buzima bw’inzitane n’ibibazo”.

Isomo rya Kabiri Rudasingwa avuga abarokotse Jenoside bakuye muri politiki y’Ubumwe, ni uko impinduka nziza ziharanirwa kandi zidakwiye gutegerezwa mu bakuze gusa, bikaba biva mu bagize uruhare mu kubohora Igihugu.

Basobanuriwe amateka y’Urwibutso rwa Nyarusange rwubatswe n’abaturage

Agira ati “Abazanye impinduka nziza abenshi bari urubyiruko babohoye Igihugu, kandi biha isura nziza urubyiruko rw’uyu munsi kugira ngo ruzagere ikirenge mu cy’abababanjirije”.

Rudasingwa yasabye ko kugira ngo ibyagezweho bikomeze gufasha Abanyarwanda, hari n’ibyifuzo byakorerwa ubuvugizi, birimo no kurushaho kubungabunga ibimenyetso bya Jenoside yakorewe Abatutsi, kubishyira mu nzibutso zitandukanye, no kurangiza imanza zasizwe na Gacaca.

Kuri izo ngingo Guverineri w’Intara y’Amajyepfo, Kayitesi Alice, yijeje ko Leta izakomeza gukora ibishoboka byose ngo ibyatangiye bikomeze gukorwa kandi byiyongere, ari nako bikomeza abarokotse Jenoside.

Rudasingwa avuga ko hari amasomo abiri akomeye abarokotse Jenoside bigiye kuri Politiki y’Ubumwe

Avuga ko abarokotse Jenoside basabwe ibikomeye birimo no kubabarira ababahemukiye, kandi ko mu manza nyinshi z’imitungo, batanze imbabazi ku babuze ubwishyu, ku buryo nko mu karere ka Muhanga hasigaye imanza 18 gusa.

Yongeraho ko Kwibuka ari umwanya wo gukomeza abarokotse Jenoside, kuko n’ubwo babuze ababo bafite igihugu cyiza kitakwihanganira ko Jenoside yakongera kubaho ukundi, kuko gifite politiki nziza.

Agira ati “Turanagaya imiyoborere mibi na politiki mbi byaranze Igihugu cyacu mbere ya Jenoside, uruhare rwacu twese rurakenewe ngo turusheho kubaka ubuvandimwe n’ubumwe muri iki gihe dutangiye ibikorwa byo kwibuka. Mukaba mukwiye kurangwa n’ituze, kwirinda ibihuha mukitabira ibikorwa byo kwibuka, no gutanga amakuru ku gihe ku cyashaka guhungabanya umutekano w’Igihugu”.

Kayitesi avuga ko ibyagezweho bitazasubira inyuma ahubwo bizakomeza gutezwa imbere

Guverineri Kayitesi yibukije ko ingengabitekerezo ya Jenoside n’ibiyishamikiyeho, ari ibyaha bikomeye bihanwa n’amategeko, abasaba kwirinda ibikorwa bibi byabakururira ibyo bihano.

Kwibuka ku rwego rw’Intara byabereye mu Murenge wa Nyarusange mu Karere ka Muhanga

Igikomangoma Charles yakoze iki gikorwa ku wa Kane tariki 7 Mata 2022, ubwo hatangizwaga igikorwa cyo kwibuka abazize Jenoside yakorewe Abatutsi mu 1994. Yari aherekejwe na Murangwa Eugene wabaye umukinnyi w’umupira w’amaguru mu Rwanda mbere ya Jenoside.

Mu butumwa Igikomangoma Charles cy’u Bwongereza yashyize ku rubuga rwe rwa Twitter, yavuze ko Kwibuka ku nshuro ya 28, bisobanuye kuzirikana inzirakarengane zazize Jenoside yakorewe Abatutsi mu 1994.

Yagize ati: “Kwibuka ku nshuro ya 28 ni ukuzirikana no gusubiza amaso inyuma ku nzirakarengane za Jenoside yakorewe Abatutsi mu 1994 mu Rwanda.”

Eugène Murangwa, wari uherekeje Igikomangoma Charles, yarokotse Jenoside yakorewe Abatutsi, akaba yaramenyekanye mu mupira w’amaguru nk’umunyezamu wa Rayon Sports ndetse n’umunyezamu w’ikipe y’igihugu, Amavubi.

Muri 2017 yahawe umudari w’ishimwe n’umwamikazi w’u Bwongereza Queen Elisabeth, umudari uzwi nka ‘Member of the British Empire’ kubera ibikorwa by’indashyikirwa yakomeje gukora yaba mu Bwongereza ndetse no mu Rwanda harimo kumenyekanisha Jenoside yakorewe Abatutsi ku batayizi ndetse no gufasha bamwe mu bayirokotse.

Muri Santrafurika, umuhango wo kwibuka wateguwe ku bufatanye n’Abadipolomate b’u Rwanda bari muri icyo gihugu, ubera mu murwa mukuru Bangui. Ni umuhango witabiriwe n’Umukuru w’icyo gihugu, Faustin Archange Touadera.

Mu ijambo rye, Olivier Kayumba, ukuriye intumwa z’Abadipolomate b’u Rwanda muri Santrafurika, yashimiye Perezida Touadera kuba yarifatanyije n’Abanyarwanda baba muri icyo gihugu, mu muhango wo kwibuka ku nshuro ya 28 Jenoside yakorewe Abatutsi mu Rwanda mu 1994.

Yashimangiye ko amateka y’u Rwanda mbere ya 1994 yaranzwe n’inzangano, amacakubiri ndetse no kwamburwa ubumuntu, byavuyemo gutakaza inzirakarengane z’Abatutsi zirenga miliyoni muri Jenoside yabakorewe mu 1994.

Minisitiri w’Ububanyi n’amahanga, Madam Sylvie Baïpo-Temon, yashimye imbaraga zakoreshejwe na Guverinoma y’u Rwanda n’Abanyarwanda mu bwiyunge n’ubumwe bw’Igihugu, nk’ikimenyetso cy’umurimo ukomeye n’ubushake bwa politiki bwa Perezida Kagame, uhora yibanda ku miyoborere myiza n’iterambere ry’ubukungu.

Muri Sudani y’Epfo, ibikorwa byo kwibuka byabereye mu kigo cya Tomping, aho Ingabo z’u Rwanda zifite ibirindiro i Juba.

Ni umuhango kandi witabiriwe n’abanyacyubahiro batandukanye barimo Minisitiri w’ibikorwa by’inama y’Abaminisitiri muri Sudani y’Epfo, Dr Martin Alia Lomuro, Minisitiri w’Ububanyi n’amahanga, Deng Dau Deng, umugaba mukuru wungirije w’Ingabo, Lt Gen Thoi Chany na Komiseri wa Polisi muri UNMISS, Madamu Christine Fossen n’abandi.

Mu izina rya Guverinoma ya Sudani y’Epfo, Minisitiri Lomuro yashimiye ubuyobozi bw’u Rwanda kuba bwarakomeje ubumwe, nyuma ya Jenoside yakorewe Abatutsi mu 1994.

Bunamiye imibiri iruhukiye mu rwibutso rwa Jenoside yakorewe Abatutsi rwa Busogo

Ibi umuyobozi w’Akarere ka Musanze, Ramuli Janvier, yabigarutseho ku wa Kane tariki 7 Mata 2022, mu muhango wo gutangiza icyumweru cyo kwibuka ku nshuro ya 28 Jenoside yakorewe Abatutsi.

Ni umuhango wabimburiwe n’igikorwa cyo gucana urumuri rw’icyizere, no gushyira indabo ku rukuta rwanditseho amazina ya bamwe mu biciwe mu cyahoze ari Cour d’Appel Ruhengeri, ndetse n’urukuta rwanditseho amazina y’abahoze ari abanyeshuri n’abari abarimu, biciwe mu cyahoze ari ISAIE-Busogo.

Hanashyizwe indabo ku mva yo mu rwibutso rwa Jenoside yakorewe Abatutsi rwa Busogo, ruruhukiyemo imibiri yiganjemo iy’Abatutsi biciwe mu cyahoze ari Komini Mukingo.

Meya Ramuli yahamagariye abaturage gukomera ku mahitamo y’Ubumwe

Meya Ramuli yifashishije izina ry’ubutore ry’Abanyamusanze ari ryo “Inyangakugoma za Musanze”, asaba abaturage kutagomera igihugu na bo ubwabo, birinda kwijandika mu ngengabitekerezo ya Jenoside.

Yagize ati “Guhembera ingengabitekerezo ya Jenoside ni urugomo ndengakamere. Turashaka ko izina abaturage ba Musanze bitoranyirije ry’ubutore ry’Inyangakugoma za Musanze, duharanire gukomera kuri iryo zina n’indangagaciro zaryo, zo kwanga kugoma; ahubwo dushikame ku bumwe bwacu mu buryo budahinduka, yaba muri ibi bihe ndetse n’ibizaza. Buri wese aho ari, yumve ko arebwa no kwirinda imigirire, imitekerereze n’ibindi byose bifite aho bihuriye n’ingengabitekerezo ya Jenoside”.

Ubuhamya bw’abarokokeye mu cyahoze ari Komini Mukingo, harimo Kamashazi Dyna na Mberabagabo Pierre, bushimangira ko Abatutsi bo muri ako gace banyuze mu nzira y’umusaraba kuva mu mwaka 1990, ahanini binaturutse ku kuba ari ahantu hari hatuwe n’abanyapolitiki benshi. Abo barimo Kajerijeri wari Burugumesitiri w’iyo Komini, Zigiranyirazo Protasi wari muramu wa Perezida Habyarimana, Ntirivamunda wari umukwe we, Nzirorera Joseph wari Perezida wa MRND; aba bategetsi bakaba bamwe mu bari ku isonga mu kubiba urwango, amacakubiri n’ingengabitekerezo ya Jenoside.

Abatanze ubuhamya bagaragaje ukuntu Abatutsi batotejwe bakanicwa kuva mu 1990

Ngo ibi byagiye bituma benshi mu batutsi baho bicwa, abandi bagafungirwa mu magereza atandukanye bitwa ibyitso by’Inkotanyi, nk’uko Kamashizi na Mberabagabo baharokokeye babihamya.

Kamashizi ati “Ababyeyi bacu bahoraga bakubitwa ubutitsa, bagatotezwa kugeza bishwe abandi bagafungwa ibyacu bigasahurwa, tugatwikirwa inzu n’ubundi bugome bw’indengakamere. Iryo totezwa ryabayeho guhera mu 1990”.

Mberabagabo ati “Abicanyi ntibasibaga mu ngo z’Abatutsi b’ahangaha, aho bazaga kudusaka, aho basanze abagabo n’abasore bakabajyana kubicira mu bisambu no mu mashyamba. Uwo batajyanaga babaga bamukubise bakamusiga ari intere, hakaba abo biviriyemo gupfa abandi bagasigarana ubumuga, tudafite umuntu dutakira cyangwa ngo turegere. Abagiraga amahirwe yo gutoroka iki gihugu, banyuraga iy’iy’ishyamba ry’ibirunga, bakamenengarira mu mashyamba ya Kongo. Abandi Batutsi bacye cyane bari basigaye ahangaha, ubwo Jenoside yatangiraga tariki 7 Mata 1994, Interahamwe zarabishe zibamaraho”.

Bamwe mu bayobozi bafatanyije gucana urumuri rw’icyizere

Abarokotse Jenoside yakorewe Abatutsi, bavuga ko nyuma y’aho Ingabo za RPF Inkotanyi zihagarikiye Jenoside, ubu bongeye kugarura icyizere cy’ubuzima, bakaba bakomeje urugamba rwo kwiteza imbere.

Gusa ariko, bifuza ko abazi ahari imibiri y’Abatutsi yagiye ijugunywa hirya no hino, batanga amakuru kugira ngo ishyingurwe mu cyubahiro.

Rwasibo Pierre, Umuyobozi wa IBUKA mu Karere ka Musanze agira ati “Hari abantu bacu bagiye bicirwa mu mashyamba no mu buvumo n’ahandi hantu hatandukanye, mu gihe babaga barimo guhunga, bakabajugunyayo. Kugeza ubu ntiturabona imibiri yabo ngo tuyishyingure mu cyubahiro. Akaba ariyo mpamvu dusaba ababigizemo uruhare cyangwa ababa bafite amakuru, kugira umutima wo kugaragaza aho imibiri y’abacu iherereye, kugira ngo tuyishyingure mu cyubahiro”.

Urwibutso rwa Busogo, ahabereye ku rwego rw’Akarere ka Musanze umuhango wo kwibuka ku nshuro ya 28 Jenoside yakorewe Abatutsi, ruruhukiyemo imibiri isaga 280. Abazi neza amateka ya Jenoside yakorewe Abatutsi muri ako gace na mbere yayo, bahamya ko iyi mibiri ikiri micye cyane, ugereranyije n’iy’Abatutsi benshi bagiye bicirwa mu bice binyuranye, guhera muri za 1990, kugeza ubu itaraboneka ngo ishyingurwe mu cyubahiro.

Sibomana Jean Nepo

Sibomana Jean Nepo yarokotse Jenoside. Mu buhamya yatanze mu muhango wo gutangiza icyunamo ku nshuro ya 28, Sibomana yagarutse ku mateka ya Jenoside mu cyahoze ari Komini Murambi, ubu ni mu Karere ka Gatsibo.

Sibomana avuga ko mu gihugu cyose, i Murambi ari ho hamenyekanye izina ‘Interamwete’ ryahawe abagore b’Abahutukazi bafashaga basaza babo (Interahamwe) kugira ngo badacika intege ku mugambi wo gutsemba Abatutsi.

Bikurikire muri ubu buhamya:

Nyiratamu atanga ubuhamya bw’ibyo yanyuzemo ariko akaba agenda yiyubaka

Uwo mubyeyi avuga ko nyuma ya Jenoside yakorewe Abatutsi yize, yarangiza agakora umwuga w’uburezi, akaba abifatanya no gutegura ubukwe, kororo no guhinga bya kijyambere ku buryo ashobora gusarura za miliyoni mu mirima ye.

Nyiratamu avuga ko inshuti zo mu muryango ari zo zahuruje ibitero byabahize bikanabicira ababo, ariko akaza gukomeza kwihishahisha mu misozi ya nzaratsi, Kibanda na Nyiranduga, kugeza ubwo arokowe n’izahoze ari Ingabo za RPA Inkotanyi, aho yari yihishe na murumuna we ku witwa Balthazar.

Amaze kurokoka yisanze abo mu muryango we benshi barishwe muri Jenoside, ariko atangira urugendo rwo kwigira ku bikomere byinshi, dore ko ibyamubayeho mu mezi atatu y’inzira y’umusaraba, yibuka gusa ibyabaye ijoro ry’itariki ya 6 na 7 Mata 1994, kuko ibindi yibuka atazi amatariki byagiye biberaho kuko yari akiri muto cyane.

Nyiratamu ntabwo yaheranwe n’ibikomere ahubwo arimo kwiyubaka

Avuga ko mu bikomeje kumubabaza ari ukuba mu muryango yashatsemo nta n’umwe yigeze amenya usibye umugabo we, ubu abana bakaba bamubaza nyirakuru na sekuru kuko basa, akabura icyo abasubiza kuko nawe atabazi.

Agira ati “Buri gihe ntanga itangazo nyuma yo gutanga ubuhamya nsaba uwaba azi umuryango nashatsemo, yaba databukwe cyangwa mabukwe kuba yambabarira akanyereka yenda agafoto kabo nkajya mbona uko nsobanurira abana, kandi uzabinkorera nzamugororera ntacyo nzamutwara nk’uko babikeka”.

Amaze kugera kuri byinshi n’ubwo afite ibikomere bya Jenoside

Nyiratamu asaba abarokotse Jenoside yakorewe Abatutsi kwihangana bagakora bakiteza imbere, kuko nawe yabishoboye ku mwuga we w’ubwarimu akaba anabyaza umusaruro amasambu ye, akanorora kandi bikamuteza imbere.

Bacanye urumuri rw’icyizere

Avuga ko ashobora gusarura toni ebyiri z’ibishyimbo, toni y’imyumbati, kuko ku manywa aba ari mwarimu, nijoro akaba umukozi mu yindi mirimo nko gutegurira abafite ibirori imitako no kurimbisha aho bakorera ubukwe.

Agira ati “Byose mbikorana ibikomere, n’ubwo mbifite ndakomeye ntabwo nihebye ngo bimperane. Nakomeje gukora cyane abana banjye mbarihira amashuri yisumbuye kandi bishyura atari make, ntabwo nifuza ko hari uwazansuzugura, nkora amanywa n’ijoro n’abandi batinyuke bakore kugira ngo turusheho kwiyubaka”.

Ubwo hatangizwaga icyumweru cy’icyunamo n’iminsi 100 yo Kwibuka ku nshuro ya 28 Jenoside yakorewe Abatutsi, Umuyobozi w’Akarere ka Ruhango Habarurema Valens, yavuze ko nyuma yo guhagarika Jenoside hari byinshi byakozwe ngo ubuzima bw’Abarokotse Jenoside n’Abanyarwanda muri rusange babashe kugaruka mu buzima.

Bashyize indabo ku mva ziruhukiyemo Abazize Jenoside ku rwibutso rwa Kinazi

Habarurema avuga ko Abarokotse Jenoside bagize uruhare runini mu gukira ibikomere, ubu bakaba babanye neza n’ababahemukiye, ibyo bikaba bimwe mu bituma bongera gutera intambwe mu bikorwa bigamije kubateza imbere kandi bizakomeza.

Avuga ko nyuma y’imyaka 28 Jenoside ihagaritswe, hakozwe byinshi mu kubaka u Rwanda n’Abanyarwanda, kandi ko nk’abazi aho bava n’aho bageze bakwiye gukomeza gukora cyane kugira ngo Abatutsi bishwe bahabwe agaciro.

Agira ati “Hakozwe byinshi biganisha ku kubaka u Rwanda n’Abanyarwanda, hari byinshi twagezeho, nk’abazi aho bava n’aho bageze biradusaba gutekereza cyane tugakora cyane, kuko mu Batutsi bishwe ni ho dukwiye gukura imbaraga zitubashisha kubaka Igihugu”.

Meya Habarurema avuga ko hari ibyakozwe ngo ubuzima bw’Abanyarwanda bwongere kuba bwiza

Avuga ko ubumwe bw’Abanyarwanda buzafasha Abanyaruhango gukomeza gukorera hamwe, kandi ubuyobozi bukababa hafi kugira ngo bakomeze inzira y’iterambere.

Umwe mu bayobozi mu muryango IBUKA urengera inyungu z’Abarokotse Jenoside yakorewe Abatutsi mu 1994, ari mu babwiwe ko urugo rw’umuturage witwa Twagira rwatewemo igisasu cya grenade kigakomeretsa umuntu umwe wo muri rwo.

Ngo yabwiwe ko ari abagizi ba nabi bateye gerenade kwa TWAGIRA, igakomeretsa umwana we w’umukobwa, ubu akaba arimo kuvurirwa mu bitaro bya Kaminuza CHUK.

Iki gikorwa cy’ubugizi bwa nabi cyabereye mu Mudugudu witwa Indakemwa, mu Kagari ka Nyakabanda mu Murenge wa NIBOYE w’Akarere ka Kicukiro.

Uwo muyobozi avuga ko bahise batangira kubaza iwabo wa Twagira(mu Karere ka Huye) niba atararokotse Jenoside yakorewe Abatutsi, kugira ngo hamenyekane niba icyo gitero kidafitanye isano n’ibikorwa by’ingengabitekerezo ya Jenoside, ariko nyuma ngo byaje kumenyekana ko atari mu barokotse.

Kigali Today yabajije Umuvugizi wa RIB, Dr Murangira Thierry iby’icyo gitero ku rugo rwa Twagira, avuga ko hakirimo gukorwa iperereza.

Umuryango IBUKA uvuga ko mu gihe u Rwanda ruba rwegereza cyangwa ruri mu bihe byo Kwibuka Jenoside yakorewe Abatutsi mu 1994, abayirokotse bajya basagarirwa bakagirirwa nabi mu buryo butandukanye, kugira ngo bagire ubwoba bareke gutanga ubuhamya bw’ibyababayeho n’ababigizemo uruhare.

Icyakora inzego z’Ubuyobozi mu Rwanda zivuga ko zitazihanganira uwo ari we wese wagerageza gusubiza u Rwanda mu bihe bibi rwanyuzemo.

Guverineri Nyirarugero n’abayobozi batandukanye muri Rulindo bacanye urumuri rw’ikizere

Ahenshi uwo muhango wabereye ku nzibutso zishyinguwemo Abazize Jenoside, aho nyuma yo kunamira inzirakarengane zazize uko zavutse, habaye ibiganiro byatangiwemo ubutumwa bujyanye n’icyo cyumweru.

Rulindo

Akarere ka Rulindo niko katangirijwemo icyumweru cy’icyunamo ku rwego rw’Intara y’Amajyaruguru, aho Guverineri Nyirarugero Dancille, yifatanyije n’abaturage bo mu Murenge wa Murambi, umuhango ubera ku Rwibutso rwa Jenoside rwa Mvuzo, ahashyinguwe imibiri 6700 y’Abatutsi bishwe muri Jenoside.

Nyuma yo kunamira inzirakarengane zishyinguwe muri urwo rwibutso no gucana urumuri rw’icyizere, hatanzwe ubuhamya bw’abarokokeye Jenoside muri ako gace, hanatangwa ikiganiro gifite insanganyamatsiko igira iti “Twahisemo kuba Umwe" cyatanzwe na Habiyaremye Oswald.

Mu Karere ka Rulindo aba ni abitabiriye umuhango wo kwibuka ku nshuro ya 28 Jenoside yakorewe abatutsi

Mu ijambo rye, Guverineri Nyirarugero yihanganishije abarokotse Jenoside yakorewe Abatutsi mu 1994, abasaba kudaheranwa n’agahinda, ahubwo bagaharanira gukomeza kubaho neza.

Yasabye kandi ubufatanye mu kwamagana abagifite ingengabitekerezo ya Jenoside, abapfobya n’abayikana Jenoside, abibutsa ko mu gihe bakomeje kwinangira hari ibihano bikomeye bibateganyirijwe.

Uwo muyobozi kandi, yasabye abitabiriye iyo gahunda kuba hafi abarokotse Jenoside yakorewe Abatutsi, kubafata mu mugongo no kubungabunga inzibutso, kandi bigakorwa iminsi yose atari mu bihe byo kwibuka gusa.

Gakenke

Bunamiye abashyinguye mu rwibutso rwa Ruli mu Karere ka Gakenke

Mu gutangiza icyumweru cy’icyunamo hibukwa ku nshuro ya 28 Jenoside yakorewe Abatutsi mu 1994, mu Karere ka Gakenke uwo muhango witabiriwe na ba Depite Bitunguranye na Murebwayire Christine, wabereye ku nzibutso ebyiri, urwa Buranga mu Murenge wa Kivuruga no ku rwa Ruli mu Murenge wa Ruli.

Kuri izo nzibutso zishyinguyemo inzirakarengane zazize Jenoside yakorewe Abatutsi mu 1994, naho hatangiwe ikiganiro mu nsanganyamatsiko igira iti “Twahisemo kuba umwe”.

Abayobozi batandukanye mu Karere ka Gakenke bitabiriye uwo muhango

Muri uwo muhango hunamiwe inzirakarengane zishyinguwe muri urwo rwibutso, hacanwa urumuri rw’icyuzere hanatangwa n’ubutumwa bugenewe abaturage.

Burera

Umuhango wo gutangiza icyumweru cyo kwibuka Jenoside yakorewe Abatutsi, bashyinguye mu rwibutso rwa Rusarabuye

Umuhango wo gutangiza icyumweru cyo kwibuka ku nshuro ya 28 Jenoside yakorewe Abatutsi mu 1994, mu Karere ka Burera wabereye mu Midugudu, ariko ku rwego rw’akarere umuhango ubera ku rwibutso rwa Jenoside rwa Rusarabuye mu Murenge wa Rusarabuye, ahunamiwe inzirakarengane zishyinguwe muri urwo rwibutso hashyirwa indabo.

Ni gahunda yakomereje mu cyumba mberabyombi cy’Akarere ka Burera, aho ubuyobozi bwaganirije abaturage ku bijyanye n’amateka ya Jenoside yakorewe Abatutsi mu 1994, banagirwa inama ku myitwarire ikwiye kubaranga.

Urwibutspo rwa Jenoside rwa Rusarabuye mu Karere ka Burera

Gicumbi

Umuhango wo gutangiza icyumweru cyo kwibuka ku nshuro ya 28 Jenoside yakorewe Abatutsi mu 1994, mu Karere ka Gicumbi wabereye ku Rwibtuso rwa Mutete, ruruhukiyemo imibiri 1045 y’Abatutsi bishwe mu 1994. Abitabiriye uwo muhango bunamiye abashyinguye muri urwo rwibutso hanacanwa urumuri rw’icyizere.

Meya wa Gicumbi afatanyije n’abayobozi banyuranye bacanye urumuri rw’icyizere

Mu ijambo rye, Umuyobozi w’Akarere ka Gicumbi Nzabonimpa Emmanuel, yavuze ko uku kwezi kwa Mata 1994 kwiyanditse ku buryo budasibangana mu mateka y’u Rwanda, ubwo rwagwaga mu icuramburindi rya Jenoside yaranzwe n’ubugome n’ubwicanyi bw’indengakamere bwaruhekuye.

Yibutsa abaturage ko iki cyumweru cy’icyunamo kibabera gutekereza bagasubiza agaciro Abatutsi bazize Jenoside, no gukora ibindi bikorwa bigamije guhangana n’ingaruka zayo.

Musanze

Gahunda yo gutangiza icyumweru cyo kwibuka ku nshuro ya 28 Jenoside yakorewe Abatutsi mu 1994, mu Karere ka Musanze yabereye ku Rwibutso rwa Busogo, ibimburirwa n’umuhango wo gucana urumuri rw’Icyizere kuri ‘Monument’ iri ku Rwibutso rushya rw’Akarere, ruruhukiyemo imibiri isaga 800 y’abazize Jenoside. Biteganyijwe ko urwo rwibutso ruzatahwa ku mugaragaro muri iyi minsi yo kwibuka ku nshuro ya 28 Jenoside yakorewe Abatutsi.

Bacanye urumuri rw’icyizere

Ni umuhango wabimburiwe n’urugendo rwo kwibuka, hanatangwa ibiganiro binyuranye bivuga ku mateka yaranze Jenoside muri rusange, no mu Karere ka Musanze by’umwihariko.

Mu Karere ka Musanze umuhango wo Kwibuka nshuro ya 28 Jenoside yakorewe Abatutsi wabimburiwe n’urugendo

Abayobozi mu Karere ka Gasabo bunamiye abishwe muri Jenoside baruhukiye mu rwibutso rw’i Ruhanga

Umuyobozi Nshingwabikorwa w’aka Karere, Umwali Pauline, yabisabye mu muhango wo gutangiza Icyunamo ku rwego rw’Akarere, ukaba wabereye ku rwibutso rw’i Ruhanga mu Murenge wa Rusororo kuri uyu wa Kane tariki 07 Mata 2022.

Mu midugudu yose yo mu Rwanda kuri uyu munsi abaturage bahuriye mu gikorwa cyo #Kwibuka ku nshuro ya 28 Jenoside yakorewe Abatutsi mu 1994, mu gihe ubuyobozi bw’uturere na bamwe mu biciwe ababo bahuriye ku nzibutso bashyira indabo ku mva.

Umwali Pauline na Depite Murumunawabo (inyuma) barimo gusura urwibutso rw’i Ruhanga

Umuyobozi Nshingwabikorwa w’Akarere ka Gasabo avuga ko n’ubwo inzibutso zo muri aka karere zishyinguwemo ibihumbi by’Abatutsi bishwe muri Jenoside, ngo hakiri abandi bataramenyekana aho bagiye bajugunywa.

Umwali yagize ati “Kuba hashize imyaka 28 hari imibiri abantu bazi aho iherereye ariko ntibabivuge, ibyo ntabwo ari ubumuntu, nkaba nshishikariza umuntu wese ufite amakuru rwose ko yayatanga”.

Umuyobozi wungirije wa Ibuka mu Karere ka Gasabo, Claude Runihangabo, avuga ko kuba mu bice bitandukanye nka Kimironko hari icyobo cyabonetsemo imibiri kikirimo gucukurwa, ndetse no mu Kagari ka Kabuga y’Umujyi hakaba harabonetse imibiri isaga ibihumbi 84 mu myaka ya 2018 na 2019, ari ibimenyetso by’uko hakiri imibiri myinshi itaraboneka ngo ishyingurwe mu cyubahiro.

Nk’urugero uwitwa Nyiramana Fatuma w’imyaka 48, iwabo bari batuye i Ruhanga bose barishwe asigarana abavandimwe babiri mu bana umunani bavukanaga, kandi bose bakaba bari barashatse bafite abana n’abuzukuru.

Nyiramana avuga ko kugeza ubu yabashije kubona umubiri wa se hamwe n’abuzukuruza b’uwo musaza bane bonyine. Nyina yari yaritabye Imana mbere ya Jenoside.

Nyiramana yagize ati “Data yari afite abagore babiri, twari abana bagera mu munani ariko bafite imiryango, Data yapfanye n’abana, abuzukuru n’abuzukuruza, ariko abo twabashije kubona kugeza ubu ni Data wenyine hamwe n’abuzukuruza be bane, abandi bose ntabwo turamenya aho baherereye”.

Uwitwa Antoine Mudogo na we avuga ko hari abo mu muryango we bamaze kuboneka ariko hakiri n’abandi benshi atarabasha kumenya irengero, akaba abaheruka mbere ya tariki 15 Mata mu 1994.

Abayobozi bo muri Gasabo bibukiye i Ruhanga

Abarokotse Jenoside batarabona imibiri y’ababo bishwe mu myaka 28 ishize bavuga ko bahora bikanga ko bakiriho, n’ubwo ayo matsiko ngo bagakwiye kuyamarwa n’abagize uruhare muri Jenoside, ariko bakaba ntacyo bababwira.

Nyiramana Fatuma warokotse avuga ko uretse kwiyakira, kwihangana no kugira umutima ubabarira, nta kindi cyabahesha kubana n’abaturanyi babiciye ababo.

Urwibutso rwa Ruhanga rwibukiweho kuri uyu wa Kane rushyinguyemo imibiri igera hafi ku bihumbi 38 y’abari bahungiye mu Rusengero rw’Abangilikani ruhari, bizeye ko ntawatinyuka kuhabicira.

Depite Murumunawabo Cecile wari mu bayobozi bagiye kunamira imibiri iruhukiye muri urwo rwibutso, ashimira ingabo zahoze ari iza FPR-Inkotanyi kuba zarahagaritse Jenoside zigatuma imiryango ya benshi itazima burundu.

Perezida Kagame yavuze ko kwibuka ari umwanya abantu babura icyo bavuga, atari uko babuze uburenganzira bwo gutanga ibitekerezo, ahubwo bitewe n’ubukana bwa Jenoside yakorewe Abatutsi, aho abantu bahigwaga bukware bitewe n’abo ari bo.

Yagize ati “Ibaze iyo bamwe muri twe bari bafite intwaro, iyo twemera bakihorera natwe tukica abantu bishe abacu aka kageni, uko byari kugenda! Icya mbere twari kuba dufite ukuri iyo tubikora, ariko ntitwabikoze twarabaretse. Bamwe muri bo bari mu ngo zabo, mu midugudu yabo, abandi bari muri Guverinoma, abandi barakora ubucuruzi”.

Ubuhamya n’amateka byagarutsweho muri uyu muhango, byagaragaje ko Politiki mbi y’amacakubiri yagejeje u Rwanda kuri Jenoside yakorewe Abatutsi, gusa ngo n’ubwo yakoranywe ubugome ndengakamere, ubuhamya bwagaragaje ko abayirokotse bamaze kwiyubaka babikesha imiyoborere myiza yimakajwe n’ubuyobozi bushyize imbere ubumwe bw’Abanyarwanda.

Jean Nepomuscène Sibomana warokokeye mu Karere ka Gatsibo, watanze ubuhamya muri uwo muhango, yagaragaje inzira y’umusaraba yanyuzemo guhera mu 1990 kugeza 1994 ubwo Jenoside yashyirwaga mu bikorwa, ariko kandi anashimira Leta y’u Rwanda yababaye hafi.

Yagize ati “Leta y’Ubumwe yaraturihiye turiga, nsoza amashuri yisumbuye. Hari ibintu bitatu nakundaga cyane; hari kwiga kuko mama yajyaga abimbwira, nkakunda gukina umupira kuko byatumaga numva nduhura umutwe no gusenga. Naje gutsinda njya muri KIST, nyuma naje gushaka dufite abana babiri, tuza gufata icyemezo gikomeye cyo gusubira ahari iwacu”.

Akomeza agira ati “Twahatangije ikigo cyigisha ibijyanye n’ubuhinzi n’ubworozi, ubu twateye intambwe dushirayo ishuri ry’incuke, harimo n’ibindi bikorwa by’imyuga. Icyo twashakaga ni ukugira ngo ba bantu barazwe urwago tubature ineza, twarabikoze birakunda, uyu munsi abari interahamwe n’abana babo bakorana n’abacitse ku icumu, natwe ku mutima tukumva turanezerewe”.

Mu butumwa yageneye Isi n’Abanyarwanda by’umwihariko, Umunyamabanga Mukuru w’umuryango w’abibumbye (UN) Antonio Guterres, yibukije abatuye Isi guhitamo ubumuntu aho guhitamo urwango.

Yagize ati “Jenoside yakorewe Abatutsi ntabwo yari impanuka, kuko yashoboraga gukumirwa. Yateguwe mu bwisanzure bwose ndetse inashyirwa mu bikorwa izuba riva, nta muntu n’umwe mu bakurikiraga ibibera ku Isi, cyangwa uwarebaga amakuru, wigeze wamagana ibikorwa by’indengakamere byarimo kuba, ni bacye cyane bagize icyo bavuga cyangwa bakora. Hari byinshi byagombye kuba byarakozwe, nyuma y’iki gihe cyose bibaye biracyateye ikimwaro”.

Yakomeje agira ati “Mu gihe twibuka kumeneka kw’amaraso kwabaye mu myaka 28 ishize, tuzirikane ko buri gihe dufite amahitamo, guhitamo ubumuntu aho guhitamo urwango, guhitamo impuhwe aho kurangwa n’ubugome. Kugira ubutwari tukirinda kwirara, no guhitamo kwiyunga aho guheranwa n’uburakari”.

Buri mwaka tariki 07 Mata mu Rwanda hatangizwa gahunda y’iminsi 100 yo kwibuka Jenoside yakorewe Abatutsi, isozwa tariki 04 Nyakanga.

Yabitangaje kuri uyu wa 07 Mata 2022, ubwo hatangizwaga icyumweru cyo kwibuka ku nshuro ya 28 Jenoside yakorewe Abatutsi no kubunamira, igikorwa cyabereye mu Ntara y’Iburasirazuba kikaba cyatangirijwe ku rwibutso rwa Jenoside rwa Kibungo.

Ngutegure Claudine warokokeye mu bitaro bya Kibungo, yavuze ko indege ya Habyarimana Juvenal igihanurwa, abaturanyi baje iwabo bababwira ko bashaka iyo bajya.

Ku itariki ya 09 Mata 1994, ngo inka zari zatangiye kuribwa, we n’umuryango we bahungira mu bitaro bya Kibungo bakomeza kwihishahisha mu byumba bitandukanye by’abarwayi.

Avuga ko ku itariki 14 ariwo abicanyi batangiye kuza bahiga Abatutsi aho bihishe, ariko we aza kwihisha mu musarane ahetse umwana w’iminsi ine gusa.

Ngutegure Claudine warokokeye mu bitaro bya Kibungo

Ashima Ingabo z’Inkotanyi kuko zamurokoye zikamwitaho, ahubwo akababazwa no kuba abasirikare bamurokoye atakibabona ngo abashimire n’ubwo yari amaze gupfusha abandi bana.

Ati “Ndashima cyane ingabo z’Igihugu, ndabashimira, ndashima cyane cyane nabuze abana bankarabije uwo mwanda ntibagire isesemi, bakarabya uwo mwana, banshakira icyo nambara. Iyo ngeze aho sindizwa n’abana banjye bapfuye, ndizwa n’ibyishimo nkongera kurizwa n’uko ntabona abo bana bantabaye n’ubwo ntabona icyo mbaha, ariko nkajya mbabwira ngo muraho bana banjye. Niba babaho niba batabaho ntabwo mbizi ariko uwabanyereka.”

Ashima Leta yabafashije nyuma ya Jenoside kugira ngo biyubake, ariko by’umwihariko Ingabo z’Igihugu zabarokoye.

Umuyobozi wa Ibuka mu Karere ka Ngoma, Musafiri Jean Pierre, yavuze ko ntako Igihugu kitafashije abacitse ku icumu, ariko hari abakibiba ingengabitekerezo ya Jenoside binyuze ku mbuga nkorambaga no mu magambo.

Avuga ko nyuma y’imyaka 28 Jenoside ibaye, abacitse ku icumu bagifite ibikomere ku mutima no ku mubiri. Yifuje ko abantu 47 batarabona inzu zo kubamo bazihabwa kuko badafite aho baba.

Ati “Hari abana b’incike batwawe n’imiryango y’abagiraneza baba mu bigo by’impfubyi, ariko burya igihe kiragera umuntu agasubira iwabo, baraza bagasanga ni amatongo. Hari abana bari abasore bafatanya n’Ingabo zabohoraga Igihugu, igihe kiragera bagaruka mu buzima busanzwe bishobotse bafashwa bakabona amacumbi.”

Yasabye ko umutekano w’abacitse ku icumu wabungabungwa by’umwihariko muri iki cyumweru cy’icyunamo, kuko uretse mu karere kabo n’ahandi mu gihugu hakunze kumvikana ihohoterwa ku bantu ndetse no ku mitungo yabo.

Umuyobozi wa Ibuka muri Ngoma, Musafiri Jean Pierre

Guverineri Gasana yavuze ko kwibuka ari ugusubiza icyubahiro Abatutsi bishwe bazira uko bavutse, ndetse n’inzira igoye banyuzemo bicwa urw’agashinyaguro.

Yavuze ko kwibuka ari ukugaya abahemukiye Abanyarwanda bagenzi babo, no gukomeza abacitse ku icumu kubera ibikomere bagendana.

Yongeyeho ko ubutabazi bwihuse n’umuvuduko udasanzwe w’Inkotanyi, ari byo byatumye hagira Abatutsi barokoka.

Ati “Mu mateka y’icyahoze ari Kibungo cyane cyane hano mu mujyi wa Ngoma, Jenoside yagize ubukana bwinshi, cyane ko harimo abayobozi bayishyigikiye kandi banafashije abicanyi bagatanga amabwiriza n’ibikoresho hirya no hino. Twavuga nka Col. Rwagafirita, Burugumesitiri ndetse na Mugiraneza wari Minisitiri, abitwa ba Cyasa n’abandi. Iyo hatabaho ubutabazi bwihuse n’umuvuduko udasanzwe w’Inkotanyi nta Mututsi uba wararokotse i Ngoma.”

Urwibutso rwa Jenoside rwa Kibungo ruruhukiyemo imibiri y’Abatutsi basaga 25,000 bo mu mirenge ya Kibungo, Remera na Rurenge.

Yabigarutseho mu ijambo yavugiye ku rwibutso rwa Jenoside rwa Kigali ruherereye ku Gisozi kuri uyu wa Kane tariki 07 Mata 2022, ubwo yatangizaga icyumweru cy’icyunamo hibukwa ku nshuro ya 28 Jenoside yakorewe Abatutsi mu 1994.

Muri uwo muhango, Perezida Kagame na Madamu Jeannette Kagame bunamiye inzirakarengane zisaga ibihumbi 250 zishyinguye muri urwo rwibutso, ahashyizwe indabo ku mva baruhukiyemo, hanacanwa urumuri rw’icyizere.

Perezida Kagame yagarutse ku buhamya bwatanzwe na Jean Nepo Sibomana umwe mu barokokeye Jenoside mu Karere ka Gatsibo, wagaragaje inzira y’inzitane yanyuzemo ahigwa ndetse akaza no kuhaburira ababyeyi be bishwe n’abakoraga Jenoside, we arokorwa n’Inkotanyi.

Agarutse kuri ubwo buhamya, Perezida Kagame, yavuze ko ibyo byagakwiye kubera isomo abantu birirwa bavuga ibyo batazi kuri Jenoside yakorewe Abatutsi mu Rwanda, igatwara inzirakarengane zisaga Miliyoni, nyamara ntihabeho kwihorera kandi bari babifitiye ubushobozi.

Ati “Mutekereze ku buhamya tumaze kumva bw’uriya musore, abantu babayeho bahigwa amanywa n’ijoro bazira uko bavutse, tekereza iyo bamwe muri twe bari bafite intwaro, iyo twemera ko bihorera byari kugenda bite?”

Arongera ati “Icya mbere, twari kuba dufite ukuri iyo twihorera, ariko ntitwemeye ko bikorwa, ubu bamwe mu bagize uruhare muri Jenoside baracyariho bari mu ngo zabo mu byaro, abandi bari mu nzego z’ubuyobozi muri Guverinoma, abandi mu bucuruzi, bose bafite inyungu n’uburenganzira ku gihugu cyabo”.

Perezida Kagame yavuze ko n’ubwo u Rwanda ari Igihugu gito, ariko ko ari Igihugu kinini mu gutanga ubutabera, aho yanenze abakomeje kuyobya abantu babumvisha ko Igihugu cy’u Rwanda kidatanga ubutabera, n’umwanya wo gutanga ibitekerezo.

Ati “U Rwanda turi Igihugu gito ariko kinini mu butabera, abakomeza kuvuga ko u Rwanda rudatanga ubutabera n’umwanya wo gutanga ibitekerezo, barirengagiza ukuri bazi”.

Agaruka na none ku buhamya bwa Jean Nepo Sibomana, yavuze ko kuba Ingabo zari iza FPR-Inkotanyi nyuma yo gufata Igihugu zitarishe abakoze Jenoside, zikabareka, ari icyemezo cyafashwe hatagendewe ku gitutu cy’abanyepolitiki bafite ubutegetsi yise ‘Hypocrisy’ (uburyarya).

Yavuze ko nyuma ya Jenoside mu Rwanda hakuweho igihano cy’urupfu, anenga abo birirwa bashinja u Rwanda kutagira Demokarasi isesuye, ko bo mu itegeko nshinga ryabo bagifitemo igihano cy’urupfu aho bacyica abantu, avuga ko Abanyarwanda bazi guhitamo ikibakwiriye n’ikibabereye.

Mu gusoza ijambo, yagize ubutumwa agenera abarwanya u Rwanda, ati “Ushobora gukora ibyo ushaka aho uri hose ariko hano kuri ubu butaka bw’u Rwanda ntabwo ushobora kuzana ibitandukanya Abanyarwanda ngo bakwemerere, abana b’u Rwanda bari maso biteguye kurengera Igihugu cyabo”.

Kureba amafoto menshi, kanda HANO

Amafoto: Niyonzima Moise/Kigali Today

Kurikira ibindi muri iyi Video:

Dr. Odette Nyiramilimo

Dr. Odette Nyiramilimo wabyiboneye icyo gihe ndetse akaba no mu bahigwaga, yaganiriye na Kigali Today, asobanura mu buryo burambuye uko ubutegetsi bwatije umurindi urwango rwagejeje Igihugu kuri Jenoside.

Bikurikire muri iki kiganiro:

Kuri uyu wa Kane tariki 07/04/2022, mu Rwanda hatangiye icyumweru cyo kwibuka Jenoside yakorewe Abatutsi mu mwaka wa 1994.

Ikipe ya Arsenal binyuze mu bakinnyi bayo ni bamwe mu bantu batandukanye bifatanyije n’u Rwanda mu kwibuka Jenoside yakorewe Abatutsi, ndetse no gufata mu mugongo ababuze ababo mu mwaka wa 1994.

Ku butumwa banditse kuri Twitter ikipe ya Arsenal yagize iti “Twifatanyije n’u Rwanda Kwibuka ku nshuro ya 28 Jenoside yakorewe Abatutsi “

Ubu butumwa bw’inyandiko buherekejwe n’ubundi butumwa bw’amashusho bugaragaramo abakinnyi batatu ba Arsenal barimo kapiteni w’iyi kipe Alexandre Laccazette, rutahizamu Eddie Nketiah ndetse na myugariro Rob Holding.

Muri ubu butumwa butangira Alexandre Lacazette agira ati “Duhaye icyubahiro abarenga miliyoni bishwe tunaha agaciro imbaraga n’umuhati w’abarokotse Jenoside”

Nketiah na Holding barakomeza bati “Nyuma y’imyaka 28, u Rwanda ni ikimenyetso cy’uko ikiremwamuntu gifite imbaraga zo kwihangana no guhinduka kandi gishobora kuvuka bundi bushya nyuma y’ibyago bikomeye.”

Si ubwa mbere abakinnyi, abatoza ndetse n’abandi bayobozi muri Arsenal bifatanya n’u Rwanda mu gihe cyo Kwibuka Jenoside yakorewe Abatutsi mu mwaka wa 1994, nyuma y’aho iyi kipe itangiye imikoranire n’u Rwanda muri Gahunda ya Visit Rwanda.

‘Kwibuka’ means to ‘remember’.

We stand together with Rwanda to mark the 28th commemoration of the genocide against the Tutsi.

Remember. Unite. Renew.#Kwibuka28 pic.twitter.com/jvUZ66fOYl

— Arsenal (@Arsenal) April 7, 2022

Inzibutso zibitse ibimenyetso bya Jenoside yakorewe Abatutsi

Iyo Minisiteri itangaza ko mu rwego rwo gukomeza kubungabunga ibimenyetso bya Jenoside yakorewe Abatutsi, byatangiye kubikwa hakoreshejwe ikoranabuhanga kugira ngo hatazagira ibyangirika uko imyaka igenda ishira.

Umukozi ushinzwe kwibuka no kubungabunga ibimenyetso bya Jneoside yakorewe Abatutsi muri MINUBUMWE, Muhoza Valentin, atangaza ko ibimenyetso bya Jenoside bigizwe n’ibyiciro bibiri birimo ibifatika n’ibidafatika, ariko byose birimo kubungwabungwa hakoreshejwe ikoranabuhanga.

Akomeza asobanura ko ibimenyetso bifatika ari ibigizwe n’inzibutso za Jenoside, imibiri y’abazize Jenoside n’ibikoresho byakoreshejwe muri Jenoside, birimo intwaro gakondo, nk’imihoro, amacumu n’amahiri, ndetse n’ibikoresho birimo nk’imbunda, naho mu bimenyetso bidafatika hakaba harimo amashusho n’amajwi.

Asobanura ko ibimenyesto bifatika birimo imibiri y’abazize Jenoside n’inzibutso, bikomeje kubungabungwa ku buryo bizaramba igihe kirekire, urugero ni nk’imibiri yo mu Rwibutso rwa Murambi rubitse ifatika yatunganyijwe neza, kandi inabitse ku buryo bwiza butanga ikizere cyo kuzamara iminsi myinshi itangiritse.

Yongeraho ko iyo mibiri yari ibungabunzwe hifashishijwe ishwagara, ariko ubu hari ikoranabuhanga ririmo kwifashishwa mu kuyikuraho ishwagara igasigara igaragara neza, uko Abatutsi bishwe n’uko bari bamerewe icyo gihe bicwa.

Ibyo kandi ngo biri no gukorwa ku mibiri iri hirya no hino mu nzibutso hagamijwe ko itakwangirika, nk’ikimenyetso gifatika kandi kigaragara ndetse n’imyenda bari bambaye igihe bicwaga, na yo irimo gukurwamo ivumbi maze ikabikwa neza irindwa ubukonje n’ubushyuhe bwinshi, kuko nay o igaragaza ubwicanyi bw’indengakamere bwakorewe Abatutsi bishwe muri Jenoside.

Agira ati “Nk’imyenda wasangaga bayifungirana mu mva ikaba yahura n’ubushyuhe n’ubukonje, nyamara ubu twatangiye kuyibungabunga kuko ni imwe mu bigararagaza ubukana bwakoranwe Jenoside yakorewe Abatutsi kuko usangamo imyenda y’abana bishwe, igaragaza uwari uyambaye uko yatemwe, iyashwanyagujwe na za Gerenade n’ibyiciro by’Abatutsi bicwaga icyo gihe”.

Ibimenyetso by’amateka ya Jenoside bifite akamaro mu kwigisha ababyiruka

Imyenda y’abishwe muri Jenoside ni ibimenyetso bigomba kwitabwaho

Muhoza asobanura ko abavutse nyuma ya Jenoside yakorewe Abatutsi bakeneye kumenya amakuru yose y’uko yateguwe, uko yashizwe mu bikorwa n’ingaruka zayo mu rwego rwo kubigisha kwirinda ko itazongera kubaho ukundi, ibyo byose bikaba bibitswe mu bimenyetso byose usanga mu nzibutso.

Bimwe mu byo abana baba bafitiye amatsiko ni ukubona imibiri y’abishwe, amafoto, ibikoresho byifashishwaga n’uko byakoreshwaga, ndetse bakanashaka kumenya bo uruhande barimo, ariho bahera bagaragarizwa ububi bw’amacakubiri n’ivangura rishingiye ku moko, ahubwo bagakomeza kwiyumvamo Ubunyarwanda.

Agira ati “Nta handi amakuru ashobora guturuka, ababyiruka bagomba kuyamenya bayabwiwe cyangwa bakajya kuyirebera mu nzibutso. Kubungabunga ibimentetso bya Jenoside rero ni ukubikira amateka ababyiruka, nk’ubu muri Kaminuza y’u Rwanda harimo ishami ryigisha Jenoside uko itegurwa n’uko yakumirwa, amakuru yifashishwa mu kwigisha yose ava muri ibyo bimenyetso bibunganzwe neza”.

Avuga ko usibye mu Rwanda, hari n’ibindi bimenyetso bya Jenoside yakorewe Abatutsi bibungabungiwe mu mahanga nko muri Uganda, ahari inzibutso zishobora gusurwa, hakaba hagenda hubakwa n’ibindi nko mu Bufaransa, ahari umuhanda witiriwe Birara wafashije benshi kwirwanaho mu Bisesero, ahahoze ari muri Perefegitura ya Kibuye.

Avuga kandi ko hari ibimenyetso bikomeje gukusanywa biva mu mahanga nk’amafoto yafashwe n’abanyamakuru, amafoto abistwe mu miryango itandukanye, amajwi n’amashusho bigenda bitangwa n’abarokotse ndetse n’ibyo bafite babitse.

Agira ati “Hari amafoto n’amajwi n’amashusho tugenda duhabwa n’ibihugu, icyakora hari ibyo dukomeje gusaba birimo nk’amafoto afite ba nyirayo atemewe gutangwa (Copy right), amafoto yafashwe n’ibitangazamakuru mu gihe Jenoside yakorerwaga Abatutsi, ibi byose tukaba turimo kubikurikirana kugira ngo tubibike mu buryo bw’ikoranabuhanga bitazasa”.

Akandi kamaro kanini mu kubungabunga ibimenyetso bya Jenoside, harimo gufasha Kwibuka Jenoside yakorewe Abatutsi, guharanira ko itazongera kubaho ukundi no guhamiriza Isi ko Jenoside yabaye kandi yagize ingaruka ku Banyarwanda.

Ku bijyanye n’ibimenyetso n’amafoto agaragaza abantu muri Jenoside ugasanga abayagaragaramo bavuga ko batarimo bayikora, asobanura ko ibyo ari ibyo kwitondera kuko bishobora kubamo n’ugupfobya cyangwa guhakana Jenoside.

Ibyo kandi ngo binatanga isura ku bashobora kuba bagifite ingengabitekerezo ya Jenoside, kuko bashobora kubyuririraho batesha agaciro n’ibindi bimenyetso, cyangwa bagoreka amateka ya Jenoside yakorewe Abatutsi.

Agira ati “Nibyo hari abagiye bavuga ko amafoto abagaragaza batakoraga Jenoside ukibaza niba uwabafotoye yarabakinishaga filime, cyangwa hari izindi nyungu yabaga akurikiye. Ibyo ni ibyo gushishozwaho kuko utabyitondeye havamo amakosa arimo no gupfobya Jenoside”.

Imwe mu mibiri ishinguye mu rwibutso rwa Nyamata.

Mu bindi birimo gukorwa ngo ibimenyetso bya Jenoside bibungabungwe neza by’igihe kirekire, harimo kubaka inzu z’amateka, gushaka ibikoresho biramba byifashishwa mu gushyirwa ahantu habereye ubwicanyi ndengakamere.

Hari kandi gushyiraho uburyo bwo kubika inyandiko zirimo n’amadosiye y’ababuranye mu nkiko gacaca, kuko nazo zibitse amakuru kuri Jenoside yakorewe Abatutsi, aho ubu zamaze gushyirwa mu ikoranabuhanga hakaba hari kwigwa uko zarindwa igihe zizaba zatangiye gusurwa n’uburyo zisohokamo.

Hari kandi kuba buri karere kagiye kubaka Urwibutso rwa Jenoside rwujuje ibisabwa, aho bizajya bifasha ushaka amakuru kuri Jenoside yakorewe Abatutsi, ahantu runaka wayasanga nibura muri urwo rwibutso ruri ku rwego rw’Akarere.

Amateka agaragaza ubukana bwa Jenoside yakorewe Abatutsi mu Karere ka Gatsibo azashyirwa mu rwibutso rwa Jenoside rwa Kiziguro ruruhukiyemo imibiri 20,123 y’Abatutsi bishwe muri Jenoside mu 1994.

Inzu izashyirwamo ayo mateka yamaze kuzura ikaba yaratwaye amafaranga y’u Rwanda angana na Miliyoni 629.

Umuyobozi w’Akarere ka Gatsibo, Gasana Richard, avuga ko hatangiye gukorwa inyigo ku hazandikwa amateka agaragaza ubukana bwa Jenoside mu makomini yahujwe akabyara Akarere ka Gatsibo.

Ati “Inyigo turimo turayikora, ibizajyamo turasa nk’aho tubifite byose, ariya mateka y’urwobo, amateka yose yo kwimura imibiri yari mu zindi nzibutso twagiye tuyafata amashusho turayafite, ubu igisigaye ni ukugira ngo iyo nyigo izatwereke aho azandikwa. Mu byumba biri hejuru ni ho amateka azagenda ajya agaragaza mu by’ukuri ubukana bwa Jenoside mu Karere kose ka Gatsibo.”

Mu kwibuka ku nshuro ya 27 Jenoside yakorewe Abatutsi, imibiri yari yarajugunywe mu rwobo rwa Kiziguro nibwo yashyinguwe mu cyubahiro nyuma yo gukurwamo.

Iyi mibiri isaga 5,000 yakuwe muri metero 24.6 z’ubujyakuzimu ndetse kubera imiterere y’urwobo imyinshi ikaba yari yarangiritse.

Gasana Richard avuga ko kuba iyo mibiri yarabashije gukurwa mu rwobo igashyingurwa mu cyubahiro byaruhuye abacitse ku icumu kuko bahoraga bifuza ko yakurwamo igashyingurwa mu cyubahiro.

Agira ati “Byaruhuye abacitse ku icumu kuko buri mwaka igihe cyo kwibuka imyaka maze muri aka Karere bahoraga basaba ko yakurwamo babyitaga guhabwa ubutabera, byaragoranye byadutwaye hafi ukwezi kuko umwobo wari muremure ariko byarakozwe ndetse hari n’abamenyemo ababo kubera imyambaro, abacitse ku icumu bararuhutse kandi natwe nk’ubuyobozi twararuhutse kuko twasubije ibyifuzo by’abaturage.”

Ku wa 11 Mata 1994, nibwo Abatutsi bari bahungiye muri Kiliziya Gatolika ya Kiziguro bishwe, bamwe biciwe mu Kiliziya abandi mu mbuga zayo, mu kibuga cy’umupira ndetse imibiri ya bamwe mu bishwe ikajya kujugunywa mu rwobo rwari rwaracukuwe ngo hashakishwa amazi.

Abarokokeye muri Kiliziya ya Kiziguro bahora bifuza ko na yo yashyirwaho ikimenyetso kigaragaza amateka ya Jenoside yahakorewe.

Umuyobozi w’akarere ka Gatsibo Gasana Richard avuga ko iki kibazo cyaganiriweho kandi Kiliziya yabyemeye hasigaye ko bishyirwa mu igazeti ya Leta, imirimo yo kubaka icyo kimenyetso igatangira.

Ati “Ikimenyetso kuri Kiliziya bisa n’aho byemejwe igisigaye ni ugusohoka mu igazeti ya Let anta n’ubwo ari Kiliziya ya Kiziguro gusa, ahantu hose hagiye hagaragara ko hafite amateka ya Jenoside yakorewe Abatutsi hazashyirwa ikimenyetso kigaragaza ayo mateka.”

Avuga ko Kiliziya Gatolika yabyemeye ko muri Kiliziya ya Kiziguro hacuriwe umugambi wo kwica Abatutsi bari bahahungiye.

Avuga ko n’ahitwa Bugarura mu murenge wa Remera hahoze urwibutso imva zitazasenywa n’ubwo imibiri yakuwemo igashyingurwa mu rwibutso rw’Akarere rwa Kiziguro kuko habitse amateka ya Jenoside.

Imibiri irenga 100 y’abishwe muri Jenoside yakorewe Abatutsi muri Mata 1994 yataburuwe mu byobo biri ahubatse ibitaro bya CHUK ku wa 10 Mata uyu mwaka, ubwo abubatsi basizaga ikibanza cy’ahagomba gushyirwa inyubako nshya.

Umuyobozi Nshingwabikorwa w’Akarere ka Nyarugenge, Emmy Ngabonziza, yabwiye itangazamakuru ko basabye abaturage kujya ku Rwunge rw’Amashuri rwa Kivugiza aho imibiri yashyizwe by’agateganyo, kugira ngo baze kureba ko hari ababo bashobora kumenyamo, guhera ku ya 01 kugeza kuya 06 Mata.

Claudine Uwera, Umunyamabanga Nshingwabikorwa w’Umurenge wa Nyamirambo, aho iyo mibiri yari irimo kozwa no gushyirwa mu masanduku, yabwiye itangazamakuru ko hari abaturage bahageze babasha kumenyamo ababo, ariko nta makuru yisumbuyeho yatanze.

Hagati aho hari indi mibiri 12 yabonetse bikekwa ko ari iy’abishwe muri Jenoside yabonetse mu Murenge wa Gitega mu Karere ka Nyarugenge.

Iyo mibiri yataburuwe mu butaka bw’umuturage wo mu mudugudu wa Nyenyeri, nyuma yo kubonwa n’abari mu gikorwa cy’umuganda hafi y’umuyoboro w’amazi wa Mpazi, ku nkengero z’umugenzi wa Nyabugogo, nk’uko byatangajwe na The New Times.

Umunyamabanga Nshingwabikorwa w’Umurenge wa Gitega, Etienne Mugambira, yavuze ko batangiye iperereza rigamije gushakisha andi makuru kuri iyo mibiri n’aho yataburuwe.

Amabwiriza yo Kwibuka ku nshuro ya 28 yatanzwe ku wa Mbere tariki 04 Mata 2022, avuga ko gushyingura mu cyubahiro imibiri iheruka gutabururwa hirya no hino, bizakorwa mu gihe cyo kwibuka nyuma y’amagambo, ubuhamya n’ubutumwa bizatangwa kuri uwo munsi.

Icyumweru cyo kwibuka kizatangira ku ya 07 Mata saa mbiri (8:00) za mugitondo, ku rwego rw’akarere gitangirire ku nzibutso za Jenoside z’uturere, mu gihe ku rwego rw’igihugu kizatangirizwa ku rwibutso rwa Jenoside rwa Gisozi mu mujyi wa Kigali.

Gusoza icyunamo bizakorwa ku ya 13 Mata 2022, ku rwego rw’igihugu mbere ya saa sita z’amanywa ku rwibutso rwa Jenoside rwa Rebero mu Murenge wa Kicukiro, aharuhukiye imibiri y’abanyapolitike bishwe muri Jenoside.

Amabwiriza yo kwibuka kuri iyi nshuro, avuga ko bizanakorwa ku rwego rw’umudugudu ahazabera ibiganiro bizajya bitangira saa mbiii za mu gitondo (8:00am) mu gihugu hose, hubahirizwa amabwiriza yo kwirinda Covid-19.

Ibiganiro bizakorwa ku nsanganyamatsiko igira iti: “Kwibuka, Twahisemo kuba umwe”.

Ku mugoroba wo ku ya 07 Mata 2022, guhera saa kumi n’ebyiri kugeza saa mbiri (18:00 -20:00) hateganyijwe ijoro ryo kwibuka, icyo gikorwa kikazanyuzwa kuri Radiyo na Televiziyo by’u Rwanda, kugira ngo bikurikirwe mu gihugu hose.