Inzego za Polisi n’Ubuyobozi bw’Akarere ka Ruhango zamusuye Mukamana iwe

Uwo mubyeyi waje gukurwa ku muhanda na Polisi yabuze aho yerekera, arayishimira kuba inamwujurije inzu y’agaciro gasaga miliyoni icyeza z’Amafaranga y’u Rwanda ku ivuko mu Karere ka Ruhango.

Mukamana avuga ko yamaze imyaka 17 mu Mujyi wa Kigali agerageza kwirwanaho ariko ubuzima bugenda burushaho kumukomerera, kuko abo babyaranaye batamufashije kurera abana, ahubwo yahoraga atabwa muri yombi na Polisi kubera ubucuruzi butemewe yakoraga.

Mukamana avuga ko ubuzima bwarushijeho kuba bubi Covid-19 imaze kwaduka kuko byabaye ngombwa ko akazi ko gucuruza agataro gahagarara, amaze kubona ubuzima bwo mu muhanda n’abana bumunaniye yiyemeje kuzerera ashaka aho yakora akazi ko mu rugo, ariko akakabura kuko abantu batari bakeneye abakozi kubera ‘Guma mu rugo’.

Aha bakataga umugozi ngo atahe inzu ye

Ibyago byaje kumuviramo amahirwe atapfa gusekera uwo ari we wese, n’ubundi muri ubwo buzererezi Polisi yaramufashe maze ayisezeranya ko imurekuye yataha iwabo ariko imbogamizi ikaba aho yakinga umusaya, nyuma y’igihe kirekire adakandagira iwabo.

Polisi yamwemereye kumwubakira

Mukamana avuga ko Polisi yamusezeranyije kuzamwubakira igihe yakwitwara neza maze yemera gutaha ava mu mujyi none isezeranyo ryasohoye, kuko ubu yaraye atashye inzu ifite n’ibikenerwa byose ngo umuturage abe abayeho neza.

Agira ati “Kuba mu mujyi byari bimaze kunanira neza ku buryo nazerereye nkabura aho nkura ibiraka nkabura aho ndara maze igihe kimwe nihebye Polisi ni yo yamfashe maze nyibwira ko nabuze aho njya, imenye ko ngiye gusubira mu rugo yiyemeza kunyubakira”.

Polisi yari yashyikirije inzu Mukamana nk’uko yari yarabimusezeranyije

Yongeraho ati “Ndashimira cyane Polisi kuko yankuye ku muhanda ikananyubakira, ubu nkaba ndi mu bandi baturage, abana banjye bari bapfiriye mu Mujyi wa Kigali kuko kuba baranyubakiye ndumva naratuje”.

Umuyobozi w’Umusigire wa Polisi mu Karere, CIP John Muhirwa, yibukije ko Polisi atari iyo gukurikirana no gufunga abakoze ibyaha gusa, ko inabereyeho gukemura ibibazo by’abaturage birimo ibibangamiye imibereho myiza yabo.

Umuyobozi w’Akarere ka Ruhango wungirije ushinzwe iterambere ry’ubukungu, Jean Marie Vianney Rusilibana, yasabye Mukamana gukora akiteza imbere, amugira inama yo gutegura umushinga akazasaba inguzanyo muri VUP izamufasha kwiteza imbere.

Yamusabye kandi gutera abana umwete wo gukomeza kwiga kugeza bageze kure hashoboka, kugira ngo bazabashe kuzavamo Abanyarwanda igihugu gikeneye.

Agira ati “Uyu muturage yubakiwe inzu nziza abanamo n’abana be babiri, yujuje ibisabwa ngo abeho neza nk’abandi, abeho ari Umunyarwanda utekanye kandi ushoboye gukorera urugo rwe, nibyo dushimira Polisi y’igihugu”.

Guverineri w’Intara y’Amajyepfo Kayitesi Alice, avuga ko kuba Polisi y’igihugu irimo kwita ku baturage bitanga icyizere cy’umutekano usesuye n’ubundi isanzwe ifite mu nshingano zayo, kuko kuyobora umuturage utekanye byoroha.

Bamugeneye n’ibiribwa

Hehe no kongera gucana udutadowa

Ubusanzwe akagari kose nta muriro w’amashanyarazi kagira ku buryo abaturage baho bavuga ko bari baramenyereye ubuzima bwo gucana agatadowa, kuko nta cyizere cy’uko bashoboraga kubona umuriro w’amashanyarazi cyangwa imirasire.

Kuri ubu barishimira ko batagicana agatadowa babikesha Polisi y’u Rwanda ibinyujije muri gahunda yayo yo gukorana n’abaturage, y’ukwezi kwahariwe ibikorwa byayo bizwi nka “Police Month”.

Muri uyu mwaka Polisi irizihiza imyaka 21 y’ubufatanye mu bikorwa byo kubungabunga umutekano no guteza imbere imibereho myiza y’abaturage, ni muri urwo rwego ku wa Kabiri tariki 28 Ukuboza 2021, mu Karere ka Bugesera hatashwe ibikorwa birimo inzu yubakiwe umuturage utishoboye yuzuye itwaye Amafaranga y’u Rwanda miliyoni icyenda hamwe n’imirasire y’izuba yahawe imiryango 177 yatwaye miliyoni esheshatu.

Inzu yayubakiwe na Polisi kandi ni iye, aha bamushyikirizaga imfunguzo zayo

Consolate Mukashefu ni umwe mu baturage bahawe imirasire, avuga ko mbere batahaga ahatabona.

Ati “Agatadowa twaragasezeye turacana amatara rwose, mbere twatahaga ahatabona, twinjira ahatabona, mbega tugenda ducana udutadowa tukazima rimwe tukararira aho, ariko ubu turacana rwose nta kibazo. Icyo nabwira Polisi y’u Rwanda ni uko yakoze igikorwa gikomeye, Imana yarakoze kubashoboza”.

Faina Nyirabanani ni umubyeyi w’abana bane utari ufite aho aba, yishimira ko muri uku kwezi kwahariwe ubufatanye bwa Polisi n’abaturage yubakiwe inzu.

Ati “Ndashimira Polisi yanyubakiye inzu, ndabashimira rwose mbasabira umugisha ku Mana kuko jye mu mutima wanjye byandenze, abari bunshyikirire Perezida Paul Kagame muzamunkorere mu kiganza mu mubwire muti Nyirabanani Faina aragushimira kuko wamukuye mu icumbi kandi agufatiye iry’iburyo uragahora ku ngoma”.

Arashimira polisi yamutekerejeho ikamuha inzu inarimo amatara y’umurasire

Umuyobozi w’Akarere ka Bugesera, Richard Mutabazi, avuga ko kuba hatanzwe imirasire ku miryango isaga 170 ari ikintu cyo kwishimira kuko harimo inyungu nyinshi.

Ati “Agatadowa ntigashobora gucanira mu byumba birenze kimwe, ariko imirasire wabicanira yewe no hanze. Agatadowa gasaba petoroli na yo igahora igurwa, mu gihe imirasire ifata imbaraga z’iri zuba ikaryiriranwa nijoro ikarivunjamo urumuri ntacyo wishyuye, agatadowa kagira imyotsi, kandi si myiza ku buzima cyane cyane ubw’abana, kandi ni bo bagakeneye ngo bagasomereho amakayi bavanye mu ishuri”.

Akomeza agira ati “Iyo kavuyeho kagasimburwa n’amatara basoma neza bakarengera amaso yabo, ariko na ya myotsi ntabwo ibageramo ngo bazagire indwara z’ubuhumekero uko bagenda bakura, inyungu rero ni nyinshi kumva hari imiryango 177 ku bufatanye na Polisi n’abaturage yabonye imirasire, ni ikintu cyo kwishimira”.

Yashyiriweho n’ikigega cy’amazi kikanafasha abaturanyi be

Muri uku kwezi kwahariwe ibikorwa bya Polisi ku bufatanye n’abaturage mu Ntara y’Iburasirazuba hubatswe inzu 7, hatangwa imirasire y’izuba 1458, hatangwa mituweri 1000, hubakwa ubwogero bw’inka 13 abantu bane borozwa inka.

Ibikorwa byose byakozwe na Polisi muri uku kwezi kwahariwe ibikorwa byayo mu gihugu hose, byatwaye akayabo k’Amafaranga y’u Rwanda 997.000.000.

Inzego z’ubuyobozi zamusezeranyije kuzakomeza kumuba hafi

CP Rumanzi na Guverineri Kayitesi baganiriye na Rwihandagaza nyuma yo kumumurikira inzu yubakiwe

Babivuze ubwo Polisi y’Igihugu yabashyikirizaga amashanyarazi akomoka ku mirasire y’izuba, n’inzu yabubakiye bakongera kugira icyizere cy’ubuzima.

Umwe mu babyeyi bahawe imirasire avuga ko yari atuye mu rugo rurangwamo umwijima kuko abaturanyi be 30 ari bo gusa bari bafite amashanyarazi, bigatuma imirimo ye idindira kubera kuryama kare n’abana ntibabone uko basubiramo amasomo, ariko akimara guhabwa umurasire ubu amaso n’ubwonko byose ngo birakeye.

Agira ati ‘Iyo utekerereza mu mwijima n’ubwonko buba buri mu mwijima, ariko iyo utekerereza ahabona n’ubwonko buracya, bivuze ko iyo ufite amashanyarazi ugira umwanya wo kuganira n’abagize umuryango mugatekereza neza kuko mufite umwanya wo kubonana, ibyo mutakoraga mbere”.

Yongeraho ko ashimira Perezida wa Repubulika Paul Kagame washinze Polisi y’Igihugu n’abapolisi bemeye gukurikira umurongo w’ubuyobozi bwiza, bikaba ari icyivugo iwabo kuko basabira umugisha ubuyobozi bw’Igihugu.

Rwihandagaza yashyikirijwe inzu yo mu zabukuru ku myaka 80 akaba yari asanzwe atuye mu manegeka

Umuryango washyikirijwe inzu na wo urashimira Polisi y’Igihugu kuko wahuraga n’ibibazo byinshi bishingiye ku kuba ubuzima bwawo buri mu kaga kubera gutura mu manegeka.

Umukecuru washakanye na Rwihandagaza Fidèle avuga ko iyo imvura yagwaga bicwaga n’ubwoba ku buryo nta muntu wasinziraga kandi bakaba bari barabuze ubushobozi bwo kubaka kuko bageze mu zabukuru.

Rwihandagaza Fidèle w’imyaka 80 we avuga ko icyamuteraga ubwoba atari ukuba yapfa kubera gutura nabi, ahubwo yibaza ukuntu azapfa nabi yabuze umukiza inkangu yaramuka imugwiriye ikamufata amaguru ntimuhitane.

Agira ati “Nararanaga ubwoba ariko atari ubwo gutinya urupfu ahubwo nibaza ukuntu igikangu kizamanukira kikamfata amaguru nkabura untabara ngapfa nabi, none nabonye Nyagasani mu buyobozi burangajwe imbere na Perezida Kagame anyoherereza abapolisi baranyubakira”.

Yongeraho ati, “Nk’ubu njyewe ndwara umuvuduko w’amaraso bigatuma iyo ngize nk’ibyo bitekerezo uburwayi burushaho kumerera nabi ariko, ubu ntabwo nzongera kuremba kuko ntabwo nzongera gutekereza ibinkura umutima kuba mbonye inzu uburwayi buzagabanuka”.

Inzu yahawe Rwihandagaza n’umuryango we mu Murenge wa Mushishiro

Guverineri w’Intara y’Amajyepfo Kayitesi Alice avuga ko ibikorwa bya Polisi ifatanyamo n’abaturage bifasha kubungabunga imibereho myiza y’abaturage by’umwihariko ku badafite amacumbi kuko usanga hari abaturage batagira aho bataha namba ariko hakaba n’abandi bagituye mu manegeka.

Agira ati, “Ubu hasigaye imiryango isaga 200 itarubakirwa ariko iyo bibaye ngombwa tubacumbikishiriza mu bundi buryo bakava mu manegeka ku buryo ubuzima bwabo butajya mu kaga, Polisi rero idufasha mu kurinda abo baturage kuko iyo babayeho nabi nibwo bibakururira no kugwa mu byaha”.
Umuvugizi wa Polisi y’Igihugu CP John Bosco Kabera atangaza ko umutekano w’abaturage ugaragarira mu mibereho myiza cyane cyane iyo batuye neza ari na yo mpamvu kububakira amazu no kubagezaho amashanyarazi ari ukubarindira umutekano na bo bakumva ko bakwiye kuwurindira abandi.

Agira ati “Iyo ubonye aho uba ubonye umutekano nawe ugomba kuwushakira abandi n’aho wumvise hari ikibazo ugatangira amakuru ku gihe”.

Amafaranga y’u Rwanda angana na Miliyoni 997 ni yo yakoreshejwe mu bikorwa by’ukwezi Polisi y’Igihugu igeza ku baturage kugira ngo bafatanye kurwanya ibibazo byugarije imibereho myiza y’abaturage.

Yatunguwe n’abapolisikazi bamutuye ibiseke

Ni igikorwa cyabaye mu gihugu hose, mu Karere ka Musanze kibera mu Murenge wa Nyange, ahamuritswe ibikorwa binyuranye birimo inzu yubakiwe umukecuru wabaga mu kirangarizwa, imitiba 40 yahawe koperative y’Abavumvu n’imirasire mu ngo 109.

Nyuma yo gufungurira uwo mukecuru iyo nzu yubakiwe na Polisi, yayishimiye cyane, ariko by’akarusho atungurwa no kubona abapolisikazi bambaye impuzankano y’akazi binjira iwe, bamutuye ibiseke birimo ibiribwa binyuranye.

N’impundu nyinshi yagize ati “Ubu ndumva ari inzozi, ndumva meze nk’urimo kurota ariko byabaye. Ntacyo navuga uretse gushimira Ubuyobozi bukuru bw’igihugu buyobowe n’umubyeyi Paul Kagame, nari mu mwijima anshyira mu mucyo”.

Inzu yafunguwe ku mugaragaro na Ramuli Janvier, Umuyobozi w’Akarere ka Musanze

Arongera ati “Sinabona uko nshimira n’aba bapolisi bantekerejeho, nari mu nzu y’ikirangarira aho imyenge yayo nayihomeshaga ibigutiya bishaje kugira ngo igisimba kitandya, ariko ubu ndi mu nzu nziza ndaryama nsinzire. Police muri abana beza, ubutumwa Paul Kagame yabatumye mwabungejejeho, nari incike ariko ubu ndi umubyeyi kubona aba bapolisi hano, Imana ikomeze ibarinde bana banjye, nararaga nikanga kubera ikizu nabagamo, ngiye gusaza neza, ntabwo nzasabiriza, ubu n’uwansuzuguraga aranyubaha”.

Mu butumwa bw’umuyobozi wa Polisi mu Karere ka Musanze, SSP J. Paul Kanobayire, ku bikorwa byakozwe mu kwezi kwahariwe ibikorwa bya Polisi mu mwaka wa 2021 muri ako karere, birimo ukubakira uwo mukecuru utagiraga aho acumbika, gutanga imitiba 40 kuri Koperative y’abavumbu no gutanga imirasire mu ngo 109.

Yahawe n’ibikoresho binyuranye

Ashimira buri wese watanze umuganda kugira ngo ibyo bikorwa bigende neza, anongera kwibutsa abaturage ubufatanye bukwiye kubaranga mu gukumira, kurwanya ibyaha no guhangana n’ibibangamira imibereho myiza y’abaturage”.

Ramuli Janvier, Umuyobozi w’Akarere ka Musanze, yashimiye Polisi y’u Rwanda, ku bikorwa yakoreye abaturage, asaba ababihawe kubifata neza no kubirinda kwangirika, abibutsa no kugira isuku muri byose baharanira iterambere kandi barwanya ubukene.

Meya Ramuli Janvier na SSP J. Paul Kanobayire baganiriza uwo mukecuru wari umaze kubona inzu ye

Iyo nzu irimo ibitanda byiza

Uwo mukecu yashimiye abamwubakiye

Guverineri Habitegeko na DIGP Jeanne Chantal Ujeneza bashyikiriza inzu umwe mubaturage

Ni ibikorwa Polisi yamuritse mu gusoza ukwezi kwahariwe ibikorwa byayo, mu gihe yizihiza imyaka 21 ikorana n’abaturage.

DIGP Jeanne Chantal Ujeneza, Umuyobozi Mukuru Wungirije wa Polisi y’u Rwanda ushinzwe ubutegetsi n’imari wifatanyije n’abaturage bashyikirijwe ibikorwa, avuga ko umufatanyabikorwa wa mbere bafite ari umuturage, ari yo mpamvu bahisemo kumufasha kugera ku iterambere.

Ati "Inshingano za Polisi ni ukurinda umutekano w’abaturage n’ibyabo, kandi twifuza ko umuturage uwo mutekano awugiramo uruhare, ni yo mpamvu twibanze ku bikorwa bibagirira akamaro."

Bafashijwe mu mushinga wo korora ingurube

Guverineri w’Intara y’Iburengerazuba, Habitegeko François, ashimira Polisi ibikorwa byakozwe, agasaba abagenerwabikorwa kubifata neza bikazabateza imbere, abasaba kwirinda kubiryaniramo.

Mu Ntara y’Iburengerazuba Polisi yubakiye inzu imiryango irindwi itari ifite aho gutura, harimo n’umuryango wa Nyirasafari Jocelyne utuye mu Karere ka Rubavu uvuga ko bashimye inzu bahawe kuko batari kuyiyubakira.

Ati "Twari dusanzwe tuba mu mujyi wa Gisenyi tugorwa no kubona amafaranga y’ubukode, baduhaye inzu nziza ijyanye n’igihe harimo ubwiherero n’aho gukarabira twishimye cyane."

Ikiraro cy’ingurube Polisi yubakiye abo baturage

Polisi nk’urwego rushinzwe gukumira ibyaha rusanzwe ruhanganye n’abaturage bakora ibikorwa byo kwinjiza ibicuruzwa (Gucora) mu Rwanda binyuranije n’amategeko, ikaba yakuye abagore barenga 157 muri ibi bikorwa ibafasha guhurira muri Koperative zibaganisha ku iterambere.

Umwe ati “Polisi yaduteye inkunga turoroye ndetse twatangiye kubona umusaruro, ubu turi mu nyungu. Baduhaye ingurube 2 zihaka n’amashahi 3 n’ikigabo, ubu zarabwaguye dufite ibyana 19 kandi turimo gushima Polisi. Turashima umukuru w’igihugu, Imana imwongerere iminsi yo kubaho kandi bakomeze kugira gukunda abaturage".

Vugayushaka Hamida ni umwe mu bagore bahawe korora ingurube bari basanzwe bakora ibikorwa byo kwinjiza ibicuruzwa mu Rwanda binyuranije n’amategeko, avuga ko bitandukanyije n’ibi bikorwa ahubwo bashyira imbere kwikorera no kwiteza imbere.

Ati "Mbere twaracoraga, ariko ubu twigabanyijemo amatsinda abiri, rimwe rijyana imbuto i Goma rizitwaye mu modoka kugira ngo twitandukanye no gucora, abandi bagasigara bita ku matungo. Ibi byaduhumuye amaso, bitwereka inzira yo kwiteza imbere kandi twubashye amategeko y’igihugu".

Hari abafashijwe korora inkoko, ngo byatumye bareka ubucoracora

Niyoyubu Rehema umwe mu bagore bashyizwe hamwe borora inkoko, avuga ko Polisi yabafashije kuva mu bikorwa byo gucora.

Agira ati "Polisi ni yo yatwinjije mu bworozi bw’inkoko, mbere twari abazunguzayi n’abacoracora, ariko ubu twabaye aborozi ndetse twatandukanye na biriya bikorwa. Twizera ko mu minsi iri imbere tuzatangira kubona umusaruro."

Niyoyubu ashima ubuyobozi bwatekereje kubakura mu bikorwa bakora batishimira ahubwo ari ugushaka amaramuko, akizeza ababahaye inkoko 1000 ko bazazitaho kandi zikabateza imbere.

Mu bikorwa Polisi yakoreye mu Ntara y’Iburengerazuba harimo guha Ingo 1,379 amashyanyarazi akomoka ku mirasire y’izuba, harimo 88 yahawe abaturage ba Karongi, Rusizi 123, Rubavu 346, Nyamasheke 335, Rutsiro 100, Nyabihu 277 hamwe na Ngororero 110.

Umuyobozi w’Akarere ka Nyagatare, Gasana Stephen, ari kumwe n’Umuyobozi wa Polisi ku rwego rw’Akarere ka Nyagatare, bashyikirije Habumugisha Theogène inzu yubakiwe

Muri uku kwezi kw’ibikorwa bya Polisi kandi mu turere turangwamo ubworozi cyane cyane Nyagatare, Gatsibo na Kayonza hubatswe ubwogero bw’inka 13, abatishoboye 1,000 bishyurirwa ubwisungane mu kwivuza ndetse n’imiryango ine yorozwa inka.

Muri uku kwezi kandi hakozwe ubukangurambaga bwo gukumira no kwirinda ibyaha.

Umuvugizi wa Polisi mu Ntara y’Iburasirazuba CIP Hamdun Twizeyimana avuga ko kuba abaturage barahawe imirasire y’izuba bizatuma babasha gucana mu nzu bakava mu kizima, abana bakabona uko basubiramo amasomo yabo ndetse bakabasha no kumva radiyo.

Abahawe inzu ngo bizatuma baba heza hari isuku bityo babashe gukora biteze imbere kuko mbere bagorwaga n’icumbi.

Ikindi ariko ngo urwikekwe bamwe mu baturage bagiraga ko Polisi ishinzwe gufunga gusa ruzavaho bumve ko igamije no kubateza imbere bityo bayitinyuke babashe kujya bayiha amakuru ku cyahungabanya umutekano.

Ati “Bizatuma abaturage bumva ko Polisi atari ugufunga gusa ahubwo bumvemo kubateza imbere barusheho gutanga amakuru ku gihe y’icyahungabanya umutekano wabo.”

Agaruka kuri ibi bikorwa, umuvugizi wa Polisi y’Igihugu CP John Bosco Kabera yavuze ko umutekano utagerwaho mu gihe hari abaturage badafite uko babayeho.

CP John Bosco Kabera

Avuga ko hitezwe umusaruro ukomeye cyane ku gutangira amakuru ku gihe ku bijyanye n’umutekano ariko n’iterambere ry’abaturage.

Ati “Muri ibyo bikorwa byose twakoze ubukangurambaga bujyanye no kugira ngo dufatanye kurwanya ibyaha batangira amakuru ku gihe, ikintu cyose cyateza umutekano muke bacyamagane baha Polisi amakuru.”

Yakomeje agira ati “Ni ibikorwa biteza imbere abaturage, twiteze ko bizabateza imbere ndetse bakabera imbuto n’abandi, mu bikorwa bitaha bazaba bafite aho bageze n’abandi bakazabareberaho.”

Avuga ko ikindi ari uko ibikorwa bakoze biri muri gahunda y’Igihugu yo guteza imbere umuturage no kuzamura imibereho myiza ye.

Avuga ko bizarushaho guhuza Polisi n’abaturage ndetse n’abafatanyabikorwa babo babona ko ibyo bakora bizateza imbere umuturage bakarushaho gukomeza gukorana na bo.

Ubwogero bw’inka mu Murenge wa Kiziguro buzafasha abarozi koza inka zabo bityo zirusheho kubaha umukamo

Yasabye abaturage gufata neza ibikorwa bahawe kandi bakagira imbaraga zo kwegera Polisi, gutanga amakuru ku cyahungabanya umutekano wabo ndetse n’uw’abandi.

Yabasabye kubibyaza umusaruro kugira ngo batere imbere ubwabo ariko bakazamura n’abandi.

Ibikorwa byose hamwe Polisi yashyikirije abaturage hirya no hino mu gihugu byatwaye amafaranga y’u Rwanda angana na Miliyoni 997.

Guverineri w’Intara y’Iburasirazuba Emmanuel K. Gasana yashimiye Polisi n’izindi nzego bafatanyije kugira ngo ibi bikorwa bigerweho

Sebudandi Stephen umworozi uhagarariye abandi mu murenge wa Murundi: turashimira @Rwandapolice ku bikorwa itugezaho biduteza imbere, by'umwihariko iki gikorwa remezo kizatuma turwanya indwara zikomoka ku burondwe, bityo inka ntago zizapfa ahubwo zizagwira, aborozi dutere imbere. pic.twitter.com/ZYoUaXStIZ

— Kayonza District (@KayonzaDistrict) December 28, 2021

Imodoka yahawe Umurenge wa Bumbogo

Umunyamabanga Nshingwabikorwa w’Umurenge wa Bumbogo, Deo Rugabirwa, yavuze ko mu dushya twatumye baba aba mbere harimo ‘Camera’ bashyize ahantu hatandukanye zifasha gukurikirana uko bantu bubahiriza amabwiriza, ndetse no gukorana bya hafi n’inzego nk’amadini n’amatorero, amashuri n’abandi muri ubwo bukangurambaga.

Gitifu Rugabirwa ni we washyikirijwe iyo modoka

Akarere ka Kicukiro kifashishije indege ya Kajugujugu ndetse n’ubundi buryo butandukanye muri ubwo bukangurambaga bwo kurwanya Covid-19, akaba ari ko kabaye aka mbere mu turere tugize Umujyi wa Kigali muri iryo rushanwa, bityo kegukana igikombe.

Igikombe cyatwawe n’Akarere ka Kicukiro

Imidugudu yitwaye neza kurusha iyindi muri ubwo bukangurambaga na yo yahembwe, aho umudugudu wabaye uwa mbere muri buri karere mu Mujyi wa Kigali, wahawe ibihembo bihwanye na miliyoni 2.5 z’Amafaranga y’u Rwanda, hahembwe kandi imidugudu yabaye iya kabiri n’iya gatatu.

Umuyobozi w’Umujyi wa Kigali, Pudence Rubingisa, yasabye abantu bose kutadohoka ku kwirinda Covid-19

Ibyo bihembo byatanzwe kuri uyu wa Kabiri tariki 28 Ukuboza 2021, Umuyobozi w’Umujyi wa Kigali, Pudence Rubingisa wari witabiriye icyo gikorwa, akaba yasabye inzego zose gufatanya n’abaturage, bakongera imbaraga n’ubukangurambaga mu gukomeza kurwanya Covid-19.

Igikorwa cyitabiriwe n’abayobozi batandukanye

Ayo marushanwa yatangiye ku ya 13 Nzeri 2021, buri karere kakaba karagerageje gushaka udushya kifashisha muri iryo rushanwa ryo guhashya Covid-19, bikaba biri no mu byagendeweho mu gutanga ibihembo.

Kureba amafoto menshi y’iki gikorwa, kanda HANO

Kurikira ibindi muri iyi video:

Abayobozi batandukanye barimo CP John Bosco Kabera(hagati) wari unahagarariye ubuyobozi bwa Polisi muri iki gikorwa, ari kumwe n’Umuyobozi w’Ingabo na Polisi mu Ntara y’Amajyaruguru na Guverineri (wa kabiri ibumoso) ndetse n’uwahawe inzu

Mu bikorwa bitandukanye Polisi y’u Rwanda yegereje abaturage, birimo kubakira imiryango itishoboye amazu yo guturamo, indi ishyikirizwa amashanyarazi aturuka ku mirasire y’izuba, ubwisungane mu kwivuza, Koperative z’ubuhinzi n’ubworozi zihabwa ibikoresho bizifasha kunoza ibyo zikora, n’ibindi bitandukanye byatwaye miliyoni 997 z’amafaranga y’u Rwanda.

Mu Karere ka Burera ahabereye umuhango wo gushyikiriza abaturage ibyo bikorwa ku rwego rw’Igihugu, ku wa Kabiri tariki 28 Ukuboza 2021, abaturage baho, bashimiye Polisi y’u Rwanda, kuba ibunganiye mu bituma biteza imbere.

Uwamahoro Angélique wo mu Kagari ka Gisovu, Umurenge wa Cyanika, nyuma yo gushyikirizwa inzu yubakiwe na Polisi y’u Rwanda, irimo n’ibikoresho bigizwe n’intebe, ibitanda n’ibiryamirwa; yavuze ko we n’abana be bane baruhutse kubaho mu buzima bwari bubakomereye, bitewe no kutagira aho bakinga umusaya.

Yagize ati: “Njye n’abana banjye, twariho mu buzima bwo gucumbika bya hato na hato mu bagiraneza. Nahoranaga umutima uhagaze, nibaza uko ahazaza hacu hazamera tutagira icumbi. Iyi nzu nubakiwe na Polisi y’u Rwanda nziza gutya, ifite n’ibikoresho byose; nayakiranye ubwuzu”.

Uwamahoro Angelique n’abana be bishimiye kuba babonye inzu yabo

Yongera ati: “Ubu njye n’abana, ntituzongera kwicara ku bijerekani n’amabuye kuko muri iyi nzu twubakiwe badushyiriyemo n’intebe zigezweho zo kwicaraho. Abana ntibazongera kwigira ku bishishimuzo, bitewe n’uko harimo amashanyarazi. Nshimishijwe n’uko iyi nzu, ishyize iherezo ku maganya yose nahoranaga. Muri make byandenze cyane! Ubu noneho ngiye kujya njya guca inshuro, mfite ahantu hafatika nsize abana banjye. Ni igitangaza ntabona uko nsobanura. Harakabaho Perezida Paul Kagame, na Polisi yacu bakomeje kudufasha muri iri terambere”.

Ibi byishimo Uwamahoro abisangiye n’abanyamuryango 26 bagize Koperative Abakundinzuki, yororera inzuki mu Murenge wa Rugarama mu Karere ka Burera, ikaba yashyikirijwe imizinga ya kijyambere 40. Aba ngo bari bamaze imyaka myinshi mu bwigunge, baterwaga no kutabona umusaruro uhagije w’ubuki, kubera korora mu buryo bwa gakondo. None ngo kuba bahawe iyi mizinga igezweho, izo nzitizi bagiye guca ukubiri na zo.

Koperative y’Abavumvu ikorera mu Murenge wa Rugarama yahawe imitiba ya kijyambere igiye kubafasha kongera umusaruro w’ubuki

Nsabimana Deus, Umuyobozi w’iyi Koperative, yagize ati: “Kuva Koperative yabaho, twororaga mu buryo bwa gakondo, dukoresheje imizinga ya kera mito, ku buryo umuzinga umwe, wajyaga uvamo umusaruro w’ubuki uri hagati y’ibiro bitanu n’icumi ku mwaka. Ibi bikoresho bya kijyambere Polisi y’u Rwanda iduhaye, bigiye kudufasha mu buvumvu dukora, twongere umusaruro mu bwiza no mu bwinshi, aho tuzajya dusarura nibura ibiro biri hagati ya 30 na 40 ku muzinga umwe. Ubu tugiye guhaza isoko, ifaranga ryiyongere ubukungu n’Iterambere ryacu birusheho kwihuta”.

Inzu zigera kuri 30 zubatswe mu turere twose tw’igihugu, ni zo Polisi y’u Rwanda yashyikirije imiryango itishoboye mu gihugu hose. Ziyongeraho amashanyarazi akomoka ku mirasire y’izuba yashyikirijwe ingo ibihumbi 4578, abantu 1600 bahabwa ubwisungane mu kwivuza ndetse Umurenge wa Bumbogo, wahize indi yo mu Mujyi wa Kigali mu marushanwa yo gukumira ikwirakwizwa rya Covid-19 ushyikirizwa imodoka.

CP Kabera Umuvugizi wa Polisi y’u Rwanda yavuze ko iyi gahunda ije gushimangira ubufatanye bw’abaturage na Polisi y’u Rwanda mu gukumira ibyaha no kubungabunga umutekano

Mu bindi ni uko Koperative 11 zo mu Turere dutandukanye, zafashijwe kwiteza imbere, hubakwa ubwogero 13 bw’inka bugezweho ndetse imiryango ine yorozwa inka za kijyambere.

Umuvugizi wa Polisi y’u Rwanda CP John Bosco Kabera yasobanuye ko umusaruro witezwe muri ibi bikorwa, ari ubufatanye bwa Polisi n’abaturage mu kwamagana icyo ari cyo cyose cyabateza umutekano muke, kurwanya ibyaha, kandi batangira amakuru ku gihe.

Yagize ati: “Icya mbere ni uko umutekano uhera ku muntu ku giti cye. Udafite aho uba, umutekano wawe ntabwo uba wizewe. Ariko iyo uhabonye nk’uku byagendekeye iriya miryango itishoboye yahawe amazu, ubu bagize umutekano usesuye kandi bizaborohera no kuwushakira abandi, yewe n’icyagerageza kuwuhungabanya bagitangire amakuru hakiri kare. Muri rusange, ibi bikorwa tubigeneye abaturage, ngo bibabere intangiriro yo kugira imbaraga zo kwegera Polisi no kuyiha amakuru hakiri kare y’ibyahungabanya umutekano wabo”.

CP Kabera yongera ati: “Nibafate neza ibyo bahawe, babibyaze umusaruro kugira ngo byaguke, byere imbuto bizagere no ku bandi benshi ku buryo ubutaha tuzaba tubona inzu bahawe uyu munsi ziva kuri 30 zikiyongera. Ari ubwogero bw’inka, imiryango yorojwe, abahawe mituweli, byose bizikube kenshi no mu hazaza tuzabe twishimira imbuto nziza byabibye kandi ku baturage benshi”.

CP John Bosco Kabera ashyikiriza ubuyobozi mu nzego z’ibanze n’izishinzwe umutekano mu Ntara y’Amajyaruguru ibikorwa bitandukanye harimo n’ubwisungane mu kwivuza Polisi yageneye imiryango ihabarizwa

Guverineri w’Intara y’Amajyaruguru Dancille Nyirarugero, na we ahamya ko iterambere ry’abashyikirijwe ibi bikorwa, rigiye kurushaho kwihuta. Nk’ubuyobozi, ngo icyo bazakora, ni ugukurikirana umunsi ku wundi uko babibyaza umusaruro.

Yagize ati: “Icyo dusaba abaturage ni uko ibi bikorwa babigira ibyabo, bakabirinda. Abahawe amazu nibayafate neza, bayasukura kugira ngo azarambe. Abahawe imirasire y’izuba ubu basezereye icuraburindi, aho abana babo bazajya bigira ahabona. Abahawe mituweli ntibazongera kurembera mu ngo, kuko bazaba bafite uburyo bunoze kandi buborohereza kwivuza. Ni inyungu ikomeye ku baturage b’Intara y’Amajyaruguru, kandi natwe nk’ubuyobozi, tuzakomeza kubaba hafi dukurikirana uko babibyaza umusaruro n’uko bibagirira akamaro”.

Yasabye abaturage gukomeza kugira uruhare mu gukumira icyaha kitaraba no kujya batangira amakuru ku gihe, kuko ubu noneho ibiborohereza babibonye hafi.

Inzu Uwamahoro Angelique yashyikirijwe imuruhuye amaganya yaterwaga no kutagira icumbi

Iki gikorwa cyo gusoza icyumweru cyahariwe ibikorwa bya Polisi, cyanabereye mu zindi Ntara n’Umujyi wa Kigali, aho Polisi yifatanyije n’ubuyobozi bwaho gushyikiriza abaturage ibikorwa bitandukanye bibafasha kwihutisha iterambere.

Muri uku kwezi, Polisi y’u Rwanda, yibanze ku bukangurambaga mu kurwanya ibyaha mu baturage bo mu gihugu hose no kubegereza ibikorwa remezo biborohereza kwihutisha iterambere.

Inzu zashyikirijwe abaturage zirimo n’ibikoresho byose nkenerwa

By’umwihariko kuri uyu munsi hirya no hino mu Gihugu, habaye gahunda yo gushyikiriza ibyo bikorwa abaturage, muri uyu mwaka hakaba hizihizwa imyaka 21 y’ubufatanye bwa Polisi n’abaturage mu kubungabunga umutekano no guteza imbere imibereho myiza y’abaturage.

Ibikorwa Polisi yamuritse byatwaye amafaranga y’u Rwanda angana na Miliyoni 997.