Madamu Jeannette Kagame mu birori by’isabukuru ya 25 ya Unity Club

Iryo huriro ngarukamwaka rya 14 rya Unity Club Intwararumuri, ryahujwe n’ibirori byo kwizihiza isabukuru y’imyaka 25, uwo muryango umaze ubayeho.

Mu ijambo Madamu Jeannette Kagame yagejeje ku bitariye iryo huriro, yavuze ko isabukuru y’imyaka 25 Umuryango Unity Club umaze yizihizwa uyu munsi, isobanuye byinshi mu mateka y’Abanyarwanda.

Yagize ati “Iyi sabukuru ihatse byinshi mu mateka yacu. Twambaye impumbya, dufatira iry’iburyo abavunyi bacu, batugaruriye u Rwanda rwongera kuba urwa Kanyarwanda”.

Muri iryo huriro ngarukamwaka rya 14 rya Unity Club, nk’uko bigaragara ku rubuga rwa Twitter, hamuritswe ubushakashatsi ku ngaruka zikomeye Jenoside yakorewe Abatutsi mu 1994 yagize ku rubyiruko, no gushaka ingamba zakoreshwa mu gukemura ibibazo byabo, hirindwa ko byaba uruhererekane.

Mu kiganiro mbwirwaruhame kivuga “Uruhare rwa Unity Club mu rugendo rw’imyaka 25 mu gutanga umusanzu wo kubaka ubumwe bw’Abanyarwanda”, cyatanzwe na Minisitiri w’Ubumwe bw’Abanyarwanda n’Inshingano Mboneragihugu, Dr Bizimana Jean Damascène, yavuze ibikorwa uwo muryango wakoze ariko ko hari n’ibigekenewe gukorwa.

Ni igikorwa cyitabiriwe n’abantu banyuranye

Minisitiri Dr Bizimana yagize ati “Mu bikorwa uwo muryango wakoze, twavugamo nko kuba waratangije ibiganiro by’ukuri no kwizerana mu Banyarwanda”.

Ikindi yavuze ni uko hagikenewe gukomeza gutoza abato indangagaciro z’Ubunyarwanda mu muryango no mu mashuri.

Bikurikire muri iyi video:

Bamporiki Edouard ni we dukesha iyi nyandiko

Ubwo ndi aho gutyo ariko, hari undi wicaye i Kigali kapitali mu Rwanda, urimo gutekereza cyane; ararara amajoro adasinziriye yibaza kuri ejo hanjye - nako hacu hazaza, aribaza uko tuzabaho, aribaza uko tuzatura duturanye tukaramba muri iki Gihugu kimaze iminsi 730 kivuye mu icuraburindi rya Jenoside yakorewe Abatutsi mu 1994. Ari mu ntekerezo nyambukiranyabinyejana ngo tuzabe mu Rwanda ruzira umwaga!

Itsa gato! Banza uhumeke. Ibuka uko byari bimeze muri icyo gihe, cyangwa uko umubyeyi yakubwiye byari bimumereye, niba wari uhari humiriza amaso gato umbwire icyo ubonye; niba utari uhari reka nkubwire: U Rwanda rwasaga n’urwari rwapfuye, u Rwanda rwari rwarangiye, nta cyizere cyo kubaho, nta cyizere cy’ubuzima. Byose ni zeru, kuburyo kubona umuntu wicara akajya mu ntekerezo, akajya mu bucurabwenge, agatekereza ko tuzongera kubaho biragoye. Ushobora bene ibi niwe muntu Nyambukiranyabinyejana, ni umwe uboneka mu binyagihumbi.

Uwatekerezaga atyo ariko, si njyewe njyenyine arimo gutekerereza. Si wowe wenyinye! Arimo gutekerereza abandi benshi : Arimo gutekerereza umwana ukirokoka Jenoside yakorewe Abatutsi igatwara abe bose agasigara iheruheru, arimo gutekerereza umwana wabonye iwabo bica bagenzi be biganaga mu ishuri, arimo gutekerereza abapfakazi bigunze, arimo gutekerereza umwana wavukiye ishyanga uje mu Rwanda yakuze babwira ko rutemba amata n’ubuki.

Ibyo yabirenze atekereza cyane kurushaho; arimo gutekereza iby’ikibondo aheruka kumva cyavutse mama we bamukoreye ibya mfura mbi, arimo gutekereza iby’umwana baheruka kumubwira utazi gakondo ye kuko yatandukanye n’abe muri Jenoside yadutwaye abasaga miliyoni; aritsa umutima agatekereza ku mwana ukomoka ku babyeyi baguye ku rugamba rwo guhagarika Jenoside yakorewe Abatutsi. Ihurizo rirakomeye cyane, kurisasanura ntibyoroshye.

Mvuze ibyo ahari wumva ndakuvuze, ariko reka nkubwire ko hari n’ibindi biremeye cyane ntavuze. Simvuze ko wenda yahindukiraga akareba uwo atwaje umutwaro akamubwira iby’abanyagwa b’abacengezi, iby’imyumvire idahuye ya bamwe mu bo bakorana muri guverinoma, iby’abakozi ba leta bahembwa kawunga, patte jaune, ibishyimbo n’amavuta, iby’Igihugu gikora kidafite ingengo y’imari n’ibindi byinshi ntarondora ariko nzi ko twese tuzi, twabonye, twasomye, twabwiwe.

Kera kabaye araryama, dore ko yari amaze iminsi ananiwe cyane kubera ibyo bitekerezo byose, abyutse abwira uwo atwaje ati: “Narose inzozi kandi urabizi ndazikabya; narose wikoreye umutwaro uremereye cyane uza wihuta ungeze hafi urambwira uti: ‘nyakira ndananiwe cyane ntwaza uru ruhembe n’ubundi twasezeranye ubufatanye muri byose, ntera ingabo mu bitugu urugamba ni bwo rutangiye ; kandi aka Kigeli IV Rwabugiri ajya gutera Ankole uru rugamba ntirusaba Imana yeze rurasaba intwari zemye”. Nguko uko Umutwaza w’Umutware yinjiye mu ngamba.

Bidateye kabiri, Unity Club Intwararumuri iravuka. Hari ku wa Gatatu tariki ya 28 Gashyantare 1996.

• Iravuka yo kabyara!
• Iravuka yo gaheka!
• Iravuka yo kagira inka!
• Iravuka ngo ubumwe buganze!
• Iravuka ngo ubwiyunge busage!
• Iravuka ngo urumuri rwongere rwake!
• Iravuka twongera kuganura ubumwe!
• Iravuka twongera kuganura ukuri!
• Iravuka twongera kuganura i Rwanda!
• Iravuka ngo twongere tuganuze uRwanda

Muti se “noneho mbatwaye he? Mbaganishije he? Unity Club n’Umuganura bije bite? Bihuriye hehe?”

Nyemerera ngusogongeze ku Muganura

Mu mateka y’u Rwanda, Umuganura wari umuhango ngarukamwaka usumba iyindi, wubahwaga kandi ugahabwa agaciro ibwami no mu muryango w’Abanyarwanda. Ku rwego rw’Igihugu, Umuganura wayoborwaga n’Umwami afashijwe n’abanyamihango b’Umuganura. Muri uwo muhango, Umwami yamurikirwaga umusaruro unyuranye w’Abanyarwanda uvuye impande zose z’Igihugu, umwihariko wa buri karere nawo ukamurikwa.

Umuganura wari umwanya mwiza wo kuganira ku ntekerezo z’i Rwanda – idewoloji. Yego abantu barateranaga bagasangira, bakagena icyerekezo cy’ahazaza h’Igihugu ariko binjiraga no mu ntekerezo za kure cyane bagacura ubwenge bw’igihe kirekire cy’uko u Rwanda n’abarutuye bazaba babayeho, uko bazaba bitwara n’intekerezo zizaba zibagize.

Ndatekereza ko aha noneho ubyumvise neza, Unity Club Intwararumuri nk’ihuriro ry’abayobozi bari muri Guverinoma, abayihozemo ndetse n’abo bashakanye, ishingwa mu 1996 ku gitekerezo cya Nyakubahwa Jeannette Kagame, Madamu wa Nyakubahwa Perezida wa Repubulika, igitekerezo ngenga cyari ukugarura ubumwe n’ubwiyunge mu Banyarwanda bwari bwarasenyutse biturutse ku mateka y’imiyoborere mibi yabibye urwango n’ivangura bikatugeza kuri Jenoside yakorewe Abatutsi mu 1994.

Ubu bumwe n’ubwiyunge yatuganuje ubwe kandi agatuma Intwararumuli kujya kuganuza Abanyarwanda bose iyo mbuto y’ubumwe, ni byo byatumye twongera kubaho nk’Igihugu, nibyo byatumye njye nawe twibazaga niba ejo hacu hazagira isura ubu dususurutse, ni bwo bwatumye wa mwana wari ukirokoka Jenoside yakorewe Abatutsi, ba bapfakazi bari bigunze, wa mwana wavukiye ishyanga, cya kibondo cyavutse ku mubyeyi bakoreye ibya mfura mbi, wa mwana utazi inkomoko ye, wa mwana ukomoka ku babyeyi baguye ku rugamba rwo guhagarika Jenoside yakorewe Abatutsi na wa wundi wari ufite uwe ufungiye ibyaha bya Jenoside ndetse na bamwe bibohoye ingoyi y’ishyamba bagatsinda ikinyoma, bongera kumva u Rwanda, bakumva icyanga cyo kubaho no kugira Igihugu; muri macye twongeye kuganura kubaho, nibwo twongeye kuganura urumuri rwo kubaho nyako.

Bwari ubwiru buhambaye!

Nkivuga ku Muganura, nyemerera nkubwire ko mu gikorwa cyawo nyirizina habimburaga umuhango wo kwaka amasuka ibwami, byakorwaga mu kwezi kwa Kanama kanamira Nzeri ari ko kwa munani, hagakurikiraho umuhango wo guturutsa imbuto, aho babibaga zimwe mu mbuto nkuru z’i Rwanda ari zo uburo n’amasaka; bigakorwa mu kwezi kwa Nzeri. Hakurikiragaho kujyana umurorano – uburo cyangwa amasaka byabaga bigenewe kuzavamo umutsima w’umuganura w’ibwami, mu mpera za Mutarama. Nyuma y’umurorano, hakurikiragaho kujya kuzana igitenga ibwami, bigakorwa mu mboneko za Gashyantare. Icyiciro cya nyuma cy’Umuganura kwari Ukuganuzwa n’umwami intekerezo ngari yo kuba umwe, kurwanira ishyaka u Rwanda, bigakurikirwa no kwakira amasaka n’uburo, kuvuga umutsima no kuganura. Bakongera bagahabwa imbuto kandi bagahanurwa kutayirya. Nta Munyarwanda urya imbuto arayibiba!

Iyo ibirori by’Umuganura byahumuzaga ibwami, buri mutware bamuhaga ibyuhagizo byo kuhagira (gutanga umugisha) inka, imirima n’abantu yayoboraga, na we akajya gucyura ibirori by’umuganura. Yishimanaga n’abaturage ku musozi ayoboye ari nako abagezaho umugisha w’umwami. Abayobozi basabanaga n’abayoborwa mu gitaramo cy’imihigo. Ni muri icyo gitaramo hamurikwaga ibikorwa by’indashyikirwa (inka nziza, umusaruro ushimishije…) maze abakoze neza bagashimwa, ibigwari bikagawa.

Imiryango na yo yarateranaga, umutware w’umuryango akayobora umuhango n’ibirori byakurikiraga. Cyaraziraga kugira uwo wima cyangwa uheza kuri uwo munsi w’umuganura, kuko buri wese yagombaga kugira umuturanyi asura. Ibirori by’Umuganura byizihizwaga ku mwero w’amasaka. Iyo umwana yezaga amasaka, yaragendaga akaganuza umubyeyi we. Na we akamubwira ati: “nuko ugende uhinge weze”.

Umuganura n’icyo Unity Club yaganuje u Rwanda

Kuva mu mwaka w’1996 ubwo hajyagaho Unity Club Intwararumuri, Abanyarwanda batangiye kuganura ku Bumwe n’Ubwiyunge nyuma ya Jenoside yakorewe Abatutsi yari imaze guhitana abasaga miliyoni imwe.

Nk’uko Umuganura wari ugamije kunga ubumwe bw’Abanyarwanda, guhera mu muryango kugeza mu nzego z’imiyoborere, ukaba n’umwanya wo kwishimira umusaruro no gusabana hagati y’abayobozi n’abaturage, niko byangenze no kuri Unity Club Intwararumuri.

Umukuru w’u Rwanda yaganuje ubumwe n’ubwiyunge abagize Guverinoma, abayihozemo n’abo bashakanye nabo baganuza abandi bayobozi, abo nabo baragenda baganuza n’umuturage w’i Shangi na Shagasha, uw’i Ruhanga na Mbandazi, uw’i Sovu na Sibagire, uw’i Zaza na Janja, uw’i Fumbwe na Janjagiro, uw’i Kibugabuga na Ngeruka, uwa Rwempasha na Katabagemu, uwa Buranga na Vunga, uwo ku Gasoro na Mutende, uwo ku Nkombo no ku Ntenyo, uw’i Rutunga na Gasabo n’ahandi hose mu Gihugu.

Nta washidikanya ko igitekerezo cyo kongera kubaka Ubumwe n’Ubwiyunge bw’Abanyarwanda kirangajwe imbere n’Umuyobozi Mukuru wa Unity Club Intwararumuri cyaje ari Igitekerezongenga ndetse gihatse ibindi kuko cyongeye gushimangira isano-muzi “Ubunyanyarwanda” dukomora iyo kwa Gihanga, ariwe watangije Umuganura mu Rwanda. Kuba Umuyobozi Mukuru wacu yarabitekereje, yagaruye intekerezo zari zaratakaye, yagaruye intekerezo zari zarashenywe, yagaruye intekerezo zari zarazimye.

Muri uru rugendo rw’imyaka 25 Unity Club Intwararumuri imaze, Umuyobozi Mukuru wayo Nyakubahwa Jeannette Kagame arangaje imbere Intwararumuri zose, baganuje u Rwanda n’Abanyarwanda ibikorwa byinshi birimo: Gushimangira gahunda ya Ndi Umunyarwanda nk’Isano-muzi iduhuza nk’Abanyarwanda ndetse n’Igihango cy’Urungano by’umwihariko mu bato.

Muri iyi myaka 25 ya Unity Club Intwararumuri kandi twabonye byinshi cyane;

• Twabonye abarokotse Jenoside Yakorewe Abatutsi mu 1994 bongera kubaho;
• Twabonye ababyeyi b’intwaza bongera gukomera baratwaza;
• Twabonye ababuze amacumbi bongera kubona aho kuba;
• Twabonye abana batagiraga epfo na ruguru bongera kwiga ;
• Twabonye ba bana bareze abandi bongera gukomera, barashinga barahamya ;
• Twabonye abarokotse bomorwa ibikomere bavuga ubuhambya ndetse baragenda bakira;
• Twabonye abagize uruhare muri Jenoside bemera icyaha basaba imbabazi;
• Twabonye abakomoka ku bakoze Jenoside biyambura ipfunwe baterwaga n’abo bakomokaho;
• Twababonye bavuga, baganira, ndetse bakangurira abandi kuvuga.
• Yewe, twabonye byinshi byiza cyane!

Nyamara ariko, n’ubwo kuva mu 1996, Unity Club yaganuje Abanyarwanda Umurage w’Ubumwe n’Ubwiyunge watumye tugera kuri byinshi, hari Abanyarwanda bamwe barumbije – kuko bakibangamira ubumwe n’ubwiyunge, hari Abanyarwanda barumbije bakigaragaza guhakana no gupfa Jenoside yadutwaye abacu, aba bakwiye gukeburwa; niyo mpamvu twe abaganujwe dukwiye gukomeza kuganuza abarumbije bitarindiriye ko izuba rirenga. Dukwiye kubaganuza ngo basubire ku isoko muzi iduhuza nk’Abanyarwanda. Mvuga ibi kandi ndazirikana ko abato bakwiye gukomeza guhabwa imbuto y’ubumwe kugira ngo bazabibe mu murima mwiza bityo bazasarure urumuri rw’ibyiza.

Muri iyi sabukuru y’imyaka 25 rero ni ngomba ko nk’Abanyarwanda twongera kugaruka ku bikorwa binini cyane Unity Club Intwararumuri yaganuje Abanyarwanda (kuko umuganura atari ibiryo) tukarebera kure cyane mu myaka 25 iri imbere no kurenza tukibaza tuti: “Tuzaba twaraganuje iki u Rwanda?”

Ni umukoro mpaye buri wese, ariko kugira ngo hatagira ugirango ndamusiganyije reka nshyireho itafari ryange muri iki gitekerezo: Mubona bidakwiye ko hatekerezwa Ikigega cy’Umuganura, muri icyo kigega buri wese akajya ashyiramo nke ku mbuto yejeje mu rwego rwo kuganuza Igihugu n’Umuryango Nyarwanda nk’uko kera byahoze? Hanyuma ku ntekerezo y’ubumwe buri wese agahigira u Rwanda ko azahora arutamika abato bagakurana iyo mbuto y’ubumwe?

Ntekereza ko Umuntu wese aramutse aganuje u Rwanda uko umwaka utashye, imbuto ye ikabikwa neza mu kigega ahatagera imungu kuko kizira kurya imbuto, yazongera kubibwa ndetse ikera nyinshi kurushaho! Ntekereza kandi ko buri mubyeyi wese agiye atamika umwana ibere akanamutamika u Rwanda nk’uko Cyilima yabisabye, yaba atanze umusanzu ukomeye cyane!

Gutamika abato u Rwanda, ni ukubakundisha u Rwanda, ni ukubatamika Ndi Umunyarwanda; iyi Ndi Umunyarwanda nayo ikaba kwemera kuba uw’u Rwanda, rukaba urwawe ukarubamo narwo rukakubamo, ukarugendamo, rukakugendamo, ukarukunda, ukarurera, ukarurinda, byaba na ngombwa ukarwitangira, iyi sano ikaba igihango kizira gutatirwa ubuziraherezo.

Umuyobozi Mukuru wa Unity Club yarebye kure cyane atuganuza intekerezo zishingiye ku kubaka UBUMWE bwacu nk’Abanyarwanda, abo yaganuje twese nk’Abanyarwanda turahari kandi dukwiye kumva ko uwo muganura uzamara imyaka ibihumbi n’ibihumbi; ibi bivuze ko twe twawuhawe dukwiye gukomeza kuganuza abacu, abacu bakaganuza abandi bityo tukazakomeza kuganura ubumwe ingoma ibihumbi.

Ararekwa ntashira, reka mpfundike, mbe ndambitse ikaramu gato.
U Rwanda twimana kandi tuzimana iteka n’iteka ni rweme!

Hon. BAMPORIKI Edouard
Umunyamabanga wa Leta muri Minisiteri y’Urubyiruko n’Umuco

Mu maganya avanze no kwiheba, ababyeyi Jenoside yari isize ari incike bari basigaye bareba hepfo na ruguru bakabura icyerecyezo.

Jenoside yakorewe abatutsi yatwaye ubuzima bw’abantu ariko by’umwihariko isiga abayirokotse inkingi z’imitima zarashegeshwe!

Ababyeyi bapfushije urubyaro rwose n’abo bashakanye ntihagire n’umwe urokoka, ni ikimenyetso cy’ubukana bwa Jenoside yakorewe abatutsi.

Ni igitanganza kumva ko abantu nk’abo bakomeje ubuzima, bagakomeza umutsi, bakagendana n’igihugu, bagatwaza na magingo aya.

Gutsinda ukwiheba, kunesha amaganya, kubabarira no guhanga amaso ahazaza ni zimwe mu ntwaro bitwaje mu rugendo rwabo rwo gutwaza .

Bari bafite inzozi z’abazusa ikivi cyabo, bahoraga batekereza amashami bari barashibutse, kandi abo bose bari bamaze kubabura.

Bagahungabana ariko bagatwaza, ngo aho none hari icyatumye barokoka; kizavubura ubuzima nyuma y’iyo ntimba!

Bakomeza gutwaza, ngo bafatanye urugendo n’abandi twese, urugendo rwo gusana imitima yashegeshwe ngo hato ibindi nk’ibyo bitazasubira.

N’intege nke z’umubiri bafite, ntibyababujije gufasha mu kugarura indangagaciro mu bantu, bicara muri gacaca bagacyaha abahemutse, bunga imiryango ngo ubuhemu nk’ubwo bucike burundu, bakanifuza ko bitanasubira n’ahandi ku isi!

Mu Kinyarwanda ngo gusaba imbabazi bisaba imbaraga, ariko kuzitanga bisaba ubutwari! Abo babyeyi babaye intwari, imbabazi barazitanze, cyane cyane ngo babohoke, babone imbaraga zongera gukomeza umurunga uduhuza, ubunyarwanda yo njishi ijishe u Rwanda!

Gutwaza kwabo kwakoze ku mitima ya benshi, ari abaturanyi ari aba kure, ari abato n’abakuru, ubwo erega batubera abarimu b’ubwiyunge, ubumwe bwacu burazanzamuka, batwibutsa shenge ubwo banatuje, ko icyo dupfana kiruta icyo dupfa!

Mu kureba kure kw’igihugu hazirikanywe ko abo ari ababyeyi buje impanuro n’imigisha myinshi ku banyarwanda.

Biturutse kuri Nyakubahwa Madame wa Perezida wa Repubulika, Jeannette Kagame, hamwe n’umuryango yashinze Unity Club Intwararumuri, aba babyeyi bahinduriwe ubuzima, bahindurirwa izina.

Unity Club Intwararumuri yakoze ibikomeye, aba babyeyi bagombaga gutsindirwa ubwigunge, ari nawe wari umwanzi ukomeye wabo waganishaga ku kwiheba.

Ubwo Unity Club Intwararumuri zikabasura aho hose bari batatanye, bakitwaza inkangara zirimo imbuto y’urukundo, ubwo igihu kiri ku mitima yashegeshwe kikeyuka buhoro buhoro, ya mitima yari isobetse amaganya itangira gusobanura amagambo, ndetse mu kumwenyura bakakubwira akari ku mutima, ukabahumuriza bagashira impumu, ikizere cyo kubaho kikiyongera!

Ubwo indi ntambwe iraterwa, yo kubegeranya kugirango basusuruke, bagire ubutwari bwo kubaho kandi babeho neza, begerezwe ibikorwaremezo nk’abandi banyarwanda bose.

Urugendo rurakomeza, intambwe imwe ku yindi, buhoro buhoro, batuzwa neza kandi heza, Unity Club Intwararumuri ibahindurira amateka ibubakira imidugudu ifite iby’ibanze mu buzima bwa muntu, izo nzu zose zitamirizwa urumuri rw’ubuzima, izina ryiza rirazihabwa ari ryo IMPINGANZIMA!

Uko bukeye uko bwije Unity Club Intwararumuri igashakashaka icyagirira neza abo babyeyi, kwihangana kw’abo babyeyi bikomeza gukora ku mitima ya benshi, uburyo batwaje mu bikomeye ngo twongere tubane neza, ubwo biba ngombwa ko bahindurirwa inyito, izina incike ubwo riracika, izina ryabo ubu ni INTWAZA!

Habaho ibikorwa byo gusura INTWAZA mu MPINGANZIMA za Bugezera, Huye na Rusizi; kenshi ndetse ku minsi mikuru nka Noheli n’Ubunani, gusangira ibyo byishimo n’aba babyeyi bigeze kubaho bumva ko batazongera kunezerwa, Unity Club yabigize igikorwa ngarukamwaka.

Unity Club izirikana buri munsi ko abo babyeyi ari bo soko y’indangagaciro abanyarwanda tugenderaho, ishimangira ko Intwaza ari igicaniro cy’ibyishimo by’u Rwanda kandi ko bagomba kwitabwaho, kuko ari n’isomero ry’amateka yaranze u Rwanda!

Mu minsi yo kwibuka Jenoside yakorewe abatutsi mu 1994, ni ibihe biba bitaboroheye na busa, aha Unity Club Intwararumuri isura ababyeyi bakongera gukomezwa kandi bakibutswa ko Igihugu kibakunda ndetse kibatekereza amanywa n’ijoro.

Muri serivise zabegerejwe, harimo n’ababitaho umunsi ku wundi, abajyanama b’ubuzima, aba babyeyi kandi baraganirizwa muri ibyo bihe biba bibaremereye, bagahumurizwa bakomorwa ibikomere kandi bagasabana n’abakiri bato bakongera bakababonamo abana n’abuzukuru bavukijwe imburagihe.

Mu bihe bya COVID-19 aba babyeyi bakomeje kwitabwaho barindwa kwandura iki cyorezo kandi bahumurizwa mu buryo butandukanye. Barakingiwe mu kubongerera ubudahangarwa bw’umubiri, kandi bakomeza gukurikiranwa dore ko bari mu cyiciro cy’abanyantege nke z’umubiri.

Unity Club Intwararumuri ihora kandi izirikana ko kwita ku babyeyi nk’aba ari igihango ifitanye n’igihugu kuko abanyarwanda bagomba guhorana indangagaciro yo gufashanya no gutabarana mu bihe bikomeye, dore ko ariho umuntu aba akeneye inshuti nyanshuti koko.

Ibi byose kandi birashimangira intego za Unity Club zo kwimakaza umuco w’ubumwe n’amahoro byo nkingi y’iterambere rirambye. Unity Club yiyemeje kubera Intwaza mu Mpinganzima urumuri n’akabando kabasindagiza.

Ng’uko uko urugo rw’impinganzima rubasindagije mu byishimo.

Impinganzima ni iwabo w’Ineza

Aba babyeyi mu Mpinganzima basubijwe ubuzima, basubiza agatima impembero!
Mu Mpinganzima aba babyeyi barasusurutse bikwiye abatwibarutse,
Mu Mpinganzima basangiye amateka, ineza n’inseko byabo ukabibona ubasuye,
Mu Mpinganzima basuwe n’abato babibutsa ko u Rwanda rwibarutse abandi bavunyi kandi ko rutazongera kugera ahabi habahekuye.

Mu Mpinganzima bahaboneye Ubuzima. Kuri ubu ntibakibaza abazusa ikivi cyabo kuko bafite u Rwanda n’ubuyobozi bwiza.

Intwaza mu Mpinganzima, zongeye kubona urumuri rw’ineza, hirya y’igihogere cy’umwijima,
Impinganzima ni iwabo w’ineza, aho Intwaza zituye zituje,
Intwaza zacu zitanga urumuri zitamba ineza, zisusurutsa abazisanze!
Intwaza mu Mpingazima, turyohewe n’imbuto mwatwereye!
Unity Club-Intwararumuri, imyaka yawe 25, ubyirukanye ibigwi!
Unity Club-Intwararumuri wakoze ibikomeye, ukiza ibikomere!
Komeza utwaze, utwaze Intwaza mu Mpinganzima!

Hon. Dr. Mujawamariya Jeanne d’Arc

Ni inyandiko dukesha Dr. Jeanne d’Arc Mujawamariya
Umunyamuryango wa Unity Club Intwararumuri

Dr. Jean-Chrysostome Ngabitsinze, Umunyamabanga wa Leta muri Minisiteri y’Ubuhinzi n’Ubworozi, ni we dukesha iyi nyandiko

Amateka yacu nk’Abanyarwanda yashavuje benshi kandi atonesha benshi, bamwe barateteshwa, baratona bagirwa ibitangaza, abandi barakubiswe, boherezwa i Mahanga arabahanda, ababuza amajyo n’amaza, birukanwa hano no hakurya, impande zose ziba induru, abana b’u Rwanda bacirwa ishyanga, ishyano rihabwa intebe, Ubunyarwanda buhinduka ubwoko, Gahutu araganza, Gatutsi arandagazwa, Gatwa abura aho ashyirwa, u Rwanda amarira avamo imiborogo, imisozi y’u Rwanda isingiza intero ya “Turatsinze ga ye” imvugo y’Abanyuramatwi ihabwa intebe.

Imyaka iricuma, amategeko ashyirwaho, amwe ahabwa amazina azira icyubahiro, amategeko icumi y’Imana ahindurwamo icumi ry’Abahutu, abonsa aho konsa Ubuyarwanda, bonsa amacakubiri, urubyiruko mu Gihugu rumwe ruhabwa kwiga urundi ruhabwa akato. Icyari amahirwe kuri bose bamwe baracyivutswa bangirwa kwiga, akazi barakimwa, inka ziranyagwa.

Ikitakwishe kiragukomeza, reka ndeke amatage ngaruke mu mahoro, amahirwe yongeye gusekera u Rwanda, abakiri bato bafashe imiheto bafora nta guhusha, u Rwanda rusubizwa Abanyarwanda, Ubunyarwanda bugarura akuka, none Rubyiruko twakora iki ngo Ubunyarwanda burambe kandi bumurikire u Rwanda none, ejo n’ejo bundi ndetse na kera hazaza?

Reka dusubize imyaka inyuma mu ntangiriro za 90, burya ababaye amahanga barabizi ko amahanga ahanda, kuko kutagira Igihugu biragatabwa iteka, nyuma y’imyaka itabarika, Ababyeyi baruha, abana batiga, Inka zidakamwa akwiye, urubyiruko rutazuyaje rwanogeje gahunda, imbunda zijya ibitugu, amaboko araterura, imitwe irikorera batabarira u Rwanda n’Abanyarwanda. Ntabwo byari byoroshye kuko abo banganyaga imyaka nabo imihoro bayishyize hafi, maze ikinani nacyo kirahira kubaha icyo bashatse cyose maze imihana y’u Rwanda irakabona, utishwe yarakomeretse, utarakomeretse ku mubiri, umutima na roho byaraviriranye.

Muri 94, Urubyiruko rw’ingabo za RPF Inkotanyi zihagarika Jenoside yakorerwaga Abatutsi, abicanyi bahata inzira ibirenge, nabo bagana amahanga, ariko ntawe ugira ukundi agize, Nyakubahwa “Afande PC” ati ntihagire Umunyarwanda uhera i Mahanga, urubyiruko rw’Igihugu rusingira imbunda rusubira ku rugamba, barasanira gutahana abana b’u Rwanda, UBUNYARWANDA butangira indi nzira ifite ireme, Abanyarwanda turiga turigishwa, gahunda y’Ubumwe n’Ubwiyunge igera hose, ndetse hashyirwaho by’umwihariko n’abayishinzwe, ariko ntibyarangirira aho, Nyakubahwa Jeannette Kagame ati hakenewe imyumvure ihamye kandi inoze mu Bayobozi bakuru b’Igihugu, maze ‘Unity Club Intwararumuri” nayo ibona izuba n’ubu ritararenga kuko rigomba kumurika iteka ryose.

Rubyiruko nshuti z’u Rwanda n’Ubunyarwanda, amaboko yanyu ntagacogore, ururimi rwanyu ntirugahweme kuvuga ibyiza twagejejweho na “FPR INKOTANYI n’Ingabo zayo za RPA” ndetse n’abandi bose bahisemo igikwiye bakemera gufatanya nabo kuva yayobora Igihugu, kubisigasira ni ukwanga ikibi, kabone n’iyo cyaba gituruka ku mashyiga iwanyu, kabone niyo cyaba gikorwa n’Ababyeyi banyu. Uruhare rwanyu ni ntagereranywa, u Rwanda rwiza ruzira amacakubiri nimwe rureba, muzirikane ko kizira kikaziririzwa kugambanira u Rwanda, kirazira kikaziririzwa kutambamira ubumwe bw’Abanyarwanda no kugenzwa n’inyungu bwite, inda nini muyime amayira, gusambira ikije no kwimika ikinyoma mu byamagane.

Igihugu cyacu cyiza cy’u Rwanda kuva kera na kare cyagize Urubyiruko rwagize ubutwari bukomeye, nta kurangazwa n’ababaye ibigwari ahubwo ni ugushikama mu itorero tukubaka Ubunyarwanda, abato kuri mwe mu batoze, abakuru kuri mwe mubasange muganire, nta gutatira igihango cy’Inkotanyi, nta gutatira Umuryango w’Abanyarwanda.

Nyakubahwa Jeannette Kagame ati: “Ubunyarwanda ni urumuri rudususurutsa, si ikibatsi kidutwika” Rubyiruko muhere aho mukomeze mukwirakwize urwo rumuri maze Abanyarwanda bose dususuruke, muhere aho mugabe amashami mukomeze imbaraga murwanye ingengabitekerezo ya Jenoside maze Ubumwe n’Ubwiyunge bikomeze bicengere imitima na roho z’Abanyarwanda bose.

Reka nsonze iyi nyandiko ngira icyo mbisabira Rubyiruko: u Rwanda ni rweme kubera mwebwe, u Rwanda ni rwogere kubera mwebwe, bavuga ko urugerero rugira Imana, Imana y’i Rwanda ni ikomeze ibamurikire kandi namwe mumurikire abandi, muzire gusobanya mu minwe no mu ntambuko, muzire kugwa mu Nka mutanguranwa ahubwo muyigwemo icyarimwe imigara itendera mu bitugu, maze Ubumwe mu Banyarwanda busakare imisozi igihumbi mu myaka ibihumbi n’ibihumbi.

Dr. Valentine Uwamariya, Minisitiri w’Uburezi ni we dukesha iyi nyandiko

Muri uko kongera imbaraga mu kubaka inzego z’Uburezi, hashingiwe ku guha amahirwe angana ku Banyarwanda bose bitandukanye n’ibyakorwaga mbere ya 1994 aho kubona umwanya mu ishuri iryo ari ryo ryose byashingiraga ku ivangura ry’amoko ndetse no ku Karere k’aho umuntu akomoka. Ibi kandi binashimangirwa n’ibikorwa by’ivangura moko byagaragaraga mu mashuri atandukanye mu Gihugu, ndetse bamwe bakirukanwa abandi bakicwa bazira ko ari abatutsi. Urugero rumwe ni itotezwa n’iyirukanwa mu mashuri makuru n’ayisumbuye mu mwaka wa 1973 aho abanyeshuri b’Abatutsi birukanywe hirya no hino mu gihugu. Ibi bigaragara mu buhamya bwakusanijwe na Komisiyo y’Igihugu yo Kurwanya Jenoside (CNLG) mu gihe hibukwaga Jenoside yakorewe abatutsi ku nshuro ya 22, 23 na 24. Icyo gihe bamwe ibyo kwiga barabihagaritse, abandi bashaka uko bakomeza kwiga mu bihugu bahungiyemo.

Ibikorwa birivugira

Ibarura ryo mu burezi “Education Statistics” ryo mu mwaka wa 2019 ritwereka ko umubare w’abanyeshuri ku byiciro byose by’Uburezi mu Rwanda wari 3,753,366, uw’abakozi ukaba 97,954 na ho amashuri yose akaba 13,466. Mu cyegeranyo kiri gukorwa muri uyu mwaka wa 2021, umubare w’amashuri uziyongeraho amashuri 608 mashya yahanzwe mu rwego rwo kugabanya ubucucike n’ingendo ndende abanyeshuri bakora. Umubare w’abarimu na wo uziyongeraho abagera 31930, bihwanye n’inyongera ya 30% mu mwaka umwe gusa. Uwabona iyi mibare yakeka ko ariko byahoze mbere ya 1994 ariko si ko biri kuko kuva mu 1994 umubare w’abanyeshuri mu mashuri abanza n’ayisumbuye wiyongereyeho 62.7%; umubare w’abarimu wiyongeraho 77.4%. Amashuri Makuru na Kaminuza na yo yavuye kuri 7 agera kuri 40 harimo na Kaminuza Mpuzamahanga; abanyeshuri bayarimo bava ku bihumbi bitatu na magana abiri na makumyabiri n’umunani (3228) bagera ku bihumbi mirongo irindwi na bibiri n’ijana na makumyabiri n’umunani (72,128) bihwanye n’ubwiyongere bwa 94.8%. Ibi ntibyabaye ku bw’impanuka ahubwo ni uko Ubunyarwanda bwarushize agaciro ivangura rishingiye ku moko n’Uturere byari byarahawe icyicaro mu Burezi bw’u Rwanda hagamijwe guheza bamwe no kwikubira ku bandi.

Usibye kandi kwiga mu mashuri y’imbere mu Gihugu, hashyizweho gahunda yo korohereza Abanyarwanda bafite ubumenyi kwiga mu Bihugu by’Amahanga kugira ngo bajye guhaha Ubumenyi baze gufatanya n’Abandi Banyarwanda kongera kubaka igihugu cyari cyasenyutse ndetse no kwihutisha iterambere ryacyo. Ibi kandi byashingiraga ku bushobozi bw’Umuntu hatitawe ku bwoko cyangwa Akarere; ahubwo bishingira ku bushobozi. Bamwe muri twe twahawe ayo mahirwe turi abahamya babyo kandi dutewe ishema n’Igihugu cyaduhaye amahirwe yo kwiga ndetse no kugikorera. Byose nta kindi byashingiyeho, ni Ubunyarwanda bwashyizwe imbere n’Abatabaye ndetse bakanabohora Igihugu, turabashimira.

Gahunda ya Ndi Umunyarwanda mu mashuri

Nk’uko bikorwa mu zindi nzego zitandukanye z’igihugu, gahunda ya Ndi Umunyarwanda yahawe intebe mu nzego zose z’Uburezi. Ni yo mpamvu mu mashuri yose ndetse n’ibigo bishamikiye kuri Ministeri y’Uburezi hari gahunda ihoraho yo kuganira ku Bunyarwanda, isano iruta izindi twese dusangiye, hashingiwe ku nsanganyamatsiko tugezwaho na Komisiyo y’Igihugu y’Ubumwe n’Ubwiyunge ku bufatanye na Unity Club-Intwararumuri.

Iyi gahunda yatanze umusaruro kuko Ibibazo by’ivangura iryo ari ryo ryose bigenda bihinduka amateka mu mashuri, bitandukanye n’Uko byahoze kuko imvururu n’imyivumbagatanyo yaheraga buri gihe mu mashuri. Ibi bitanga ikizere ku gihugu cy’ejo hazaza kuko Urubyiruko ruri mu mashuri ari wo mubare munini w’Abanyarwanda. Ibi biganiro kuri Ndi Umunyarwanda bishimangirwa kandi n’Umuco w’Ubutore mu mashuri aho abanyeshuri bashishikarizwa kuba Umwe, Gukunda igihugu no kukitangira bibaye ngombwa. Ibi byose bijyana no kwigisha amateka nyakuri urubyiruko ruri mu mashuri, kugira ngo bamenye neza ibyabaye birinde ko hari uwakongera kubasubiza inyuma. Amacakubiri yigishijwe igihe kinini mu mashuri, ni ngombwa rero ko gahunda ya Ndi Umunyarwanda iba imwe mu masomo y’ingenzi yigishwa mu mashuri mu rwego rwo kubaka ubumwe mu banyeshuri n’abarezi babo.

Umusozo

Ndi Umunyarwanda ni inkingi ya mwamba yo kubaho kwacu nk’Abanyarwanda. By’umwihariko, ikwiye kuba intero ya buri wese uri mu rwego rw’Uburezi mu Rwanda kuko ni ho hategurirwa Abanyarwanda bazakomeza kureberera ubusugire n’iterambere rirambye ry’Igihugu. Urubyiruko nirusobanukirwa n’abo ruribo, rukamenya ko ibirutanya biruta ibirutandukanya, nta kabuza ruzakomeza gusigasisira ibyagezweho no gukomeza gushakisha icyateza u Rwanda imbere. Aho guta umwanya mu bidusubiza inyuma, dushyire ingufu mu kuzamura ireme ry’uburezi budaheza, butajegajega, kandi bwubakiye kuri “Ndi Umunyarwanda, igitekerezo-ngenga cy’ ukubaho kwacu”.

Prof. Jeannette Bayisenge, Minisitiri w’Uburinganire n’Iterambere ry’Umuryango (MIGEPROF) ni we dukesha iyi nyandiko

Umwana aremerwa kandi akarererwa mu muryango, agatozwa indangagaciro z’umuco Nyarwanda zo gukunda igihugu n’umurimo, ubumwe n’ubupfura nk’ipfundo rikubiyemo imico myiza iranga Umunyarwanda wese (ubunyangamugayo, ubudahemuka, kwiyubaha no kubaha abandi, kwicisha bugufi, kuba umwizerwa n’umunyakuri).

Hari byinshi byakomye mu nkokora imibereho n’imibanire y’Abanyarwanda, harimo ubukoloni, politiki yakurikiye ubwigenge yaranzwe no guca ibice mu Banyarwanda, byatugejeje kuri Jenoside yakorewe Abatutsi mu 1994; yagize ubukana ndengakamere mu gusenya imibanire y’Abanyarwanda muri rusange, ndetse n’iy’abagize umuryango by’umwihariko.

Inzira ndende yo kongera kubaka ubumwe bw’Abanyarwanda yasabye ko Abanyarwanda twese tubigiramo uruhare, tugaruka ku ndangagaciro z’umuco wacu. Ni uko Igitekerezo-Ngenga cya ‘Ndi Umunyarwanda’ cyavutse kandi giha Umunyarwanda kongera kubaka ihame ry’Ubunyarwanda, ashingiye cyane mu kwibona no kwiyumva nk’Umunyarwanda mbere y’ibindi byose, kubana nta rwicyekwe no gushyira inyungu rusange n’iz’igihugu mbere y’inyungu bwite.

Mu Kinyarwanda, twemera ko “Ntawe utanga icyo adafite”. Ni ngombwa ko abagize umuryango cyane cyane ababyeyi bahuriza hamwe, bakisuzuma, bakaganira ku bikomere no ku mateka yacu n’uburyo adakwiye kuba imbogamizi mu gutanga uburere buboneye ku bana b’u Rwanda.

Uburere buboneye ni uburyo bwo kurera umwana hagamijwe imikurire ye ikwiye no kubasha kumufasha ku myitwarire ye mu buryo bumwubaka kandi bumufitiye akamaro. Imwe mu nzira ikoreshwa kugira ngo ubwo burere bugerweho ni ukurema ubushobozi mu mwana bwo kubasha kuganira no kumvikana n’abandi, kurinda amarangamatima ye, kwigira no kwikemurira ibibazo.

Ubu bushobozi nta handi bwaturuka atari mu muryango uganira, ukosora uwakosheje utamuhutaje kandi wita kuri buri wese bitewe n’imyaka n’ibyo akeneye muri icyo cyiciro arimo.

“Igihe kirageze ngo hashyirweho uburezi bufite uruhare mu kubaka umuryango Nyarwanda wunze ubumwe kandi ufatanya kugira ngo ugere ku mibereho myiza ya buri wese”

Kugira ngo iyi ntumbero tuyigereho, umuryango Nyarwanda urasabwa guhuza gahunda ya ‘Ndi Umunyarwanda’ n’uburere buboneye aho umuryango muto (ababyeyi n’abana) ubasha kuganira ku mateka wisanzuye, ukavugisha ukuri, ugashingira ku muco n’indangagaciro z’Abanyarwanda; ugasoza wemeranyije ku nshingano zo kurerera no gukorera u Rwanda.

Ibi bizafasha abana gusobanukirwa bakiri bato ko n’ubwo abantu bagira ibyo batumvikanaho, cyangwa badahuriyeho bitagomba kubatanya cyane cyane nk’abantu basangiye igihugu, ururimi, umuco n’icyerekezo.

“Umuryango utaganiriye urazima!’’. Nk’ababyeyi dukwiye kwiyegereza abana, tukongera umwanya wo kuganira na bo, aho batorezwaga “Ingengabitekerezo y’ivangura ku ishyiga”, hagasimbuzwa “indangagaciro zubaka ubumwe” maze umuryango ukaba umusemburo nyawo wa “Ndi Umunyarwanda” duhereye iwacu mu rugo.

Igitekerezo-ngenga cya “Ndi Umunyarwanda”, gikwiye kuba ubuzima bw’abagize umuryango bwa buri munsi, kubana neza n’abandi, kubaha isano bafitanye ry’Ubunyarwanda, birinda gukomeretsanya, ahubwo bafashanya mu rugendo rwo gukira ibikomere byasizwe n’amateka dusangiye nk’Abanyarwanda.

Ese hari uwasubiza ibihe inyuma ngo ibyadutanije kugera kuri Jenoside yakorewe Abatutsi bihinduke inzozi tutabana nazo buri munsi? Ese nk’abakuru babonye ubukana bwa Jenoside yakorewe Abatutsi mu 1994, ni uwuhe murage twaha abato? Twe tuzi neza ko nta cyiza cy’urwango no kudashyira hamwe! Ese iki gihugu ko ari icyacu twese nk’Abanyarwanda, twirenge turahire ko hari Abanyarwanda bakirushaho abandi uburenganzira, bityo bakaba bakibamo bonyine?

Reka nkabye inzozi! Isano muzi y’Ubunyarwanda izaduhame, gukunda igihugu no kugiteza imbere bibe umurage duha abato maze abakurambere batetse Ijabo, baterwe ishema n’uko u Rwanda rwemye kandi buri Munyarwanda, umuto, umukuru, uri ku butaka bw’u Rwanda n’utuye hanze yarwo… twese turajwe ishinga no guteza imbere igihugu cyacu, twubaka umuryango mwiza, uzira amacakubiri n’urwango !

Twese duterwe ishema no gutoza abato bacu Ubunyarwanda!

Hon. Charles Muligande ni we wateguye iyi nyandiko

Mu gutegura iyi nyandiko ku “Uruhare rw’Abarinzi b’Igihango mu kubaka Ubunyarwanda” twaganiriye n’abantu batandukanye barimo Nyakubahwa Musenyeri Rucyahana Yohani, Perezida wa Komisiyo y’Ubumwe n’Ubwiyunge ishyira mu bikorwa gahunda ya “Ndi Umunyarwanda” igamije kongera kubaka Ubunyarwanda nyuma y’ibihe by’amage u Rwanda rwaciyemo; Nyakubahwa Bamporiki Eduwaridi, Umunyamabanga wa Leta muri Ministeri y’Urubyiruko kandi akaba yarayoboye Itorero ry’Igihugu rigira uruhare runini mu kwigisha Ubunyarwanda, Profeseri Petero Rwangabwoba Rwanyindo, umusaza w’imfura y’u Rwanda kandi uzi amateka menshi yarwo. Twaganiriye kandi na bamwe mu Barinzi b’Igihango tubabaza igihango barinze icyo aricyo n’uruhare ibikorwa byabo byagize kandi bikomeza kugira mu kubaka ubunyarwanda.

Abo twaganiriye twababajije icyo kuri bo Ubunyarwanda bisobanuye, bose bagiye bahuriza kukuvuga ko Ubunyarwanda ari ikirango cyangwa ikivugo rusange cy’Abanyarwanda twarazwe n’abakurambere, kiranga abanyarwanda aho bari hose, kikagaragarira mu muco w’abanyarwanda ugizwe n’indangagariro na kirazira biyobora imitekerereze, imyumvire, imyitwarire, imibanire, imivugire, inshingano biranga Abanyarwanda. Muri izo ndangagaciro harimo gukunda u Rwanda n’Abanyarwanda no kurushakira ineza ndetse no kuba witeguye kurinda, kurwanirira no guteza imbere u Rwanda n’abarutuye bose, byaba ngombwa ukaba warwitangira.

Ubunyarwanda kandi ni igitekerezo ngega igihugu cyacu cyubakiyeho, ni ingabo ikingira u Rwanda n’Abanyarwanda, ni amasezerano y’ubudakemuka n’ubudahemukirana, ni ikintu kiba muri twe kituranga nk’Abanyarwanda (the Rwandan spirit)), ku buryo ukoze ibitandukanye nacyo, bavuga bati “si uw’i Rwanda yo gatsindwa!”. Iyo uri Umuryarwanda, uba ufitanye igihango n’abandi Banyarwanda bose kitwa “Ubunyarwanda” gikwiriye kugenda kigukuriramo kigushoramo imizi, gikubiyemo ibyo byose tumaze kuvuga byerekana Ubunyarwanda icyo ari cyo.

Mu mibanire n’abandi Banyarwanda ndetse n’abantu muri rusange, Umunyarwanda ufite Ubunyarwanda muri we arangwa no kuba imfura n’inyagamugayo izira guhemuka no kugamburuzwa n’ibihe, kandi akarangwa n’ukuri, ubworoherane, kwicisha bugufi, gutega amatwi, gutabara no gutabarana.

Mu Mwiherero wa Unity Club wo muri 2020 Madamu wa Perezida wa Repubulika, Nyakubahwa Jeannette Kagame, yatanze igisobonura cyiza cy’Ubunyarwanda gikubiyemo ibyo bose abandi bavuze agira ati: “Ubunyarwanda ni isoko tuvomamo isano-muzi yacu. Ni urumuri rudususurutsa, si ikibatsi kidutwika! Ni urumuri rutumurikira, maze abarwose rukabarinda gutsikira no kuyoba, mu rugendo rwiza twiyemeje. Ni urukingo ruhora ruzamura ubudahangarwa bwacu kugira ngo tudatatira igihango cya Ndi Umunyarwanda”.

Jenoside yakorewe Abatutsi muri 1994 yajegeje kandi ishegesha umusingi u Rwanda rwubatseho ariwo “Ubunyarwanda”, cyakora nanone ntabwo yashoboye kuwusenya ngo ruhere nk’uko turi bubigarukeho, kuko hari bamwe mu Banyarwanda banze gutatira icyo gihango cy’Ubunyarwanda bafitanye n’u Rwanda n’Abanyarwanda, biyemeza kukirinda ndetse bamwe baranagipfira, banga kuba ba mpemuke ndamuke. Ijabo ry’abo Banyarwanda banze gutatira igihango cy’Ubunyarwanda mu gihe cy’amahina n’amage nk’ayo u Rwanda rwaciyemo muw’1994 niryo ryagaruriye u Rwanda n’Abanyarwanda icyizere cyo kubaho, bagiheraho bongera kubaka igihugu gifite ijambo n’icyubahiro mu ruhando mahanga kandi gihesha ishema abagikomokaho bose aho bari hose.

Kuva muri Mata kugeza muri Nyakanga 1994, mu gihe cy’iminsi 100 yonyine u Rwanda rwapfushije abana barwo barenze miliyoni. Birumvikana ko gupfusha abantu bangana batyo mu gihe cy’amezi 3 gusa, byashegeshe u Rwanda, birusigira agahinda, intimba, n’umubabaro. Iyo u Rwanda ruza gupfusha abantu bangana gutyo bishwe n’umushyitsi w’Isi (earthquarke), cyangwa iruka ry’ibirunga (volcani eruption), cyangwa imyuzure (floods) nabwo byari gusigira Abanyarwanda umubabaro n’agahinda byinshi no kurakarira Imana yemeye ko ibyo yaremye byivumbagatanya bikatwicira abantu bikanadusenyera.

Cyakora byo byari kwihanganirwa, agahinda n’umubabaro bikaba byashira vuba, abanyarwanda bakiyegeranya bakongera kwiyubaka, bakubaka n’Igihugu cyabo vuba. Ndetse n’iyo u Rwanda ruza kuba rwaratewe n’ikindi gihugu, kikaza gifite ubugome bw’indengakamere, kikatwicira abantu bagera kuri miliyoni nabyo byari kutubabaza cyane, ariko ahari byo twari gushobora kubyumva no kubyihanganira tuvuga tuti abantu baduteye si “abantu b’i Rwanda bo gatsindwa”, ni inyamaswa z’inkazi zitagira ubumuntu na bucye muri zo. Nabwo byari kutworohera kwisuganya no kongera kwiyubaka.

Icyashegeshe kigashengura imitima y’abanyarwanda ndetse n’iy’abandi bantu bagira ubumuntu muri bo, nuko abo bantu barenze miliyoni bishwe urupfu rw’agashinyaguro bikozwe n’abari abaturanyi, abanvandimwe, abo bakoranaga, abo biganaga, ababavuraga kwa muganga ndetse n’ababayoboraga mu nzego zitandukanye z’ubuzima bw’igihugu, harimo no mu matorero n’amadini. Abakoze ubwo bwicanyi bari bataye ubunyarwanda n’ubumuntu kuburyo kuribo nta Mututsi wagombaga kugirirwa imbabazi yaba igitambambuga, umwana, umusore, inkumi, umugabo, umugore, umusaza, umukecuru, yewe ndetse n’ukiri mu nda ya nyina. Yewe n’umuhutu utarashakaga kwifatanya n’abo bicanyi cyangwa washakaga guhisha abatutsi baramwicaga.

Muri uwo murava wo kurimbura abatutsi, n’Umuhutu wananirwaga kwerekana ko ari umuhutu, baramwicaga kugirango batibeshya hakagira umututsi urokoka. Ndetse n’Umunyarwanda wavukaga k’Umuhutu n’Umututsi baramwicaga bavuga ngo ntabwo ari umuhutu nyawe, keretse iyo yabaga yafashe uruhande rw’abicanyi, agafatanya nabo guhiga abatutsi. Ibi tubivugiye kugirango twibutse ko umuntu wese, yaba Umunyarwanda cyangwa Umunyamahanga, warebaga ubukana bw’ibyabaye mu Rwanda yageze aho yibaza niba koko Abanyarwanda ari abantu, bagira ubumuntu muri bo.

Hari benshi, baba Abanyarwanda cyangwa Abanyamahanga bageze aho babona ko bitazashoboka ko Abatutsi n’Abahutu bashobora kongera kubana mu gihugu kimwe, gisangiye icyerekezo kimwe, bagasubira gusangira gupfa no gukira. Ndetse bamwe nka Nyakwigendera Koloneri Kadhafi wategekaga Libya na George Moose wari Umuyobozi Wungirije muri Minisiteri w’Ububanyi n’Amahanga ya Leta Zunze Ubumwe z’Amerika, bavugiye ku mugaragaro ko babona u Rwanda rukwiriye gucibwamo kabiri hakabaho “Hutuland” izatuzwamo Abahutu na “Tutsiland” izatuzwamo Abatutsi.

Cyakora iki gitekerezo cyo guca u Rwanda mo Hutuland na Tutsiland, FPR-Inkotanyi yacyamaganiye kure kuko yo yemeraga ko icyo abana b’u Rwanda bapfana kandi basangiye aricyo “Ubunyarwanda n’u Rwanda” gikomeye cyane kandi kirusha imbaraga ibibatandukanya byose, ko n’ubwo abateguye n’abakoze Jenocide yakorewe Abatutsi biyambuye Ubumuntu n’Ubunyarwanda ndetse bakifuza gusenya Ubunyarwanda, bishoboka kongera kubwubaka, bukongera bukatubera umusingi cyangwa ibuye rikomeza imfuruka y’inzu yacu “Rwanda”, mu gihe u Rwanda rwagira abayobozi barukunda kandi bakunda Abanyarwanda bose ntavangura.

Muri iryo joro ry’umwijima w’icuraburindi abateguye Jenocide yakorewe abatutsi baroshyemo u Rwanda, habonetsemo inyenyeri nkeya zuzuyemo uwo mucyo Madamu wa Perezida, Nyakubahwa Jeannette Kagame, yavugaga ariwo “Ubunyarwanda”, zagize abo ziboneshereza muri iryo joro ndetse na n’ubu zikituboneshereza, kuko nizo zashubije Abanyarwanda Ubumuntu, Agaciro n’Icyizere cy’ejo hazaza. Izo nyenyeri zabonesheje muri uwo mwijima w’icuraburindi ni Ingabo z’Umuryango FPR-Inkotanyi zitanze zitizigama zigahagarika Jenoside yakorewe abatutsi zikagira abo zirokora.

Izo nyenyeri kandi ni Abarinzi b’Igihango, banze gutatira Igihango Abanyarwanda bafitanye aricyo Ubunyarwanda, banga guhemukira Umunyarwanda uwo ariwe wese, baba bamuzi cyangwa batamuzi, banga kwifatanya n’abamuhiga ngo bamwice ahubwo bitangira kumutabara no kumukiza n’ubwo kubikora kwari uguhara amagara yabo. Ni koko kandi benshi mu Ngabo z’Inkotanyi no mu Barinzi b’Igihango, bapfuye bariho batara abanyarwanda. Bari bafite guhitamo gutatira igihango, ntibagerageze gutabara Abatutsi bahigagwa bukware, maze bakibera ba “mpemuke ndamuke”, cyakora bo bahisemo kutagamburuzwa n’ibihe. Abo Barinzi b’Igihango n’izo Ngabo z’Inkotanyi bakoze ibyo Umwami Yuhi V Musinga yigeze kuvuga agira ati: “Aho gutatira u Rwanda cyangwa kurutanga mu maboko y’abatindi batagira umutima, uzemere urwitangireho igitambo na mbere wari kuzagenda utabihisemo. Wowe uzazima ariko u Rwanda rwo ntiruzazima kandi kutazima kwarwo niwo muzuko wawe nk’Umunyarwanda”.

Impamvu mvuga ngo izo nyenyeri zatse muri iryo joro ry’umwijima w’icuraburindi, arizo Ngabo z’Inkotanyi n’Abarinzi b’Igihango, zadushubije Ubumuntu, Agaciro n’Icyizere cyo kubaho by’ejo hazaza Jenoside yakorewe Abatutsi yari yatwambuye twese nk’abanyarwanda n’izi:

Abanyarwanda tujye dutekereza uko tuba tumeze iyo Jenoside yakorewe Abatutsi iza guhagarikwa n’abanyamahanga boherejwe n’Umuryango w’Abibumbye (UNO) cyangwa Umuryango w’Afurika Yunze Ubumwe (OAU/AU) cyangwa se ikindi gihugu cyose cyari kuba cyarafashe icyemezo cyo kuza gutabara Abanyarwanda. Ubu twari kuba tubaho dufite ikimwaro n’isoni birenze ubwenge, kuko kugeza na n’ubu twari kuba tukibaza niba koko Abanyarwanda turi abantu buntu.

N’ubwo abateguye bakanakora Jenoside yakorewe Abatutsi biyambuye Ubumuntu n’Ubunyarwanda ndetse bakagerageza no gusiga icyo cyasha Abanyarwanda benshi bashoboka, kuba na none harabonetse Abanyarwanda bishatsemo imbaraga zo kurwanya no gutsinda ayo mahano, byasubije Abanyarwanda ubumuntu. Byerekanye ko Abanyarwanda turi abantu nk’abandi bose kw’isi (nations), ko tubamo abeza n’ababi, dushobora gukora ibikorwa bibi n’ibyiza nk’andi moko yose, ko Jenoside atari urugingo karemano (genetic trait) rw’Abanyarwanda, ko yatewe n’ubuyobozi bubi kandi hari Abanyarwanda banze icyo kibi, bakakirwanya kandi baragitsinda, ubu bakaba baharanira kubaka u Rwanda rurangwa n’ubumwe, ubwiyunge, amahoro, umutekano n’iterambere ry’abarutuye bose ntavangura.

Ni mugerageze kandi gutekereza uko Abanyarwanda tuba tumeze iyo Jenoside yakorewe Abatutsi iza guhagarikwa na FPR-Inkotanyi nk’uko yabikoze cyangwa se n’ikindi gihugu cyangwa umuryango mpuzamahanga, maze tugasanga nta Munyarwanda n’umwe wigeze ugerageza gutabara no guhisha undi Munyarwanda mugenzi we, yaba umuturanyi we, umunyeshuri we, uwo basengana, uwo bakorana cyangwa se atanamuzi akamutabarira gusa ko ari Umunyarwanda cyangwa umuntu nkawe. Byari kuba ari amahano y’agahomamunwa kuko ntaho twari kuzavana imbaraga zo kongera kubana no kwizerana nk’Abanyarwanda.

Kuba rero harabayeho Abanyarwanda bitangiye gutabara no guhisha Abanyarwanda bahigwaga, bagasangira ibyabo byose kandi byarashoboraga kubaviramo gupfa nk’uko byagenze kuri bamwe, byahaye Abanyarwanda icyizere cy’uko “nt’abapfira gushira” kandi ko “ntarwamaze abatabazi”. Mu Rwanda habonetsemo abantu banze gutatira Igihango cy’Ubunyarwanda, banga kugamburuzwa n’ibihe bikomeye u Rwanda rwarimo, aho ubutegetsi bwariho bwategekaga Abahutu kwica Abatutsi, utabikora nawe ukaba wabizira, biyemeza gupfa bakora icyiza aho gukizwa no kubeshwaho no gukora ikibi no guhemuka. Abo Banyarwanda bahawe izina ryiza ry’Abarinzi b’Igihango kuko barinze Igihango duhuriyeho aricyo “Ubunyarwanda”. Badusubije agaciro ko kuba abo turibo, Abanyarwanda, bafite indangagaciro na kirazira bikwiriye kubaranga mu bihe byose byaba iby’amahoro cyangwa iby’amage. Mu by’ukuri n’Ingabo z’Inkotanyi zitangiye guhagarika Jenoside yakorewe Abatutsi n’ubwo zihagarariwe n’Umusirikare Utazwi (Unknown soldier) mu Ntwari z’u Rwanda, nazo ni Abarinzi b’Igihango, uwo Musirikare Utazwi akwiriye no kubahagarira mu Barinzi b’Igihango. Bose berekanye icyo kuba Umunyarwanda ari cyo, mu gihe bitari byoroshye kuba Umunyarwanda, ndese byasabaga kubyitangira.

Abarinzi b’Igihango ni urugero rufatika rw’Umunyarwanda nyawe urangwa n’Ubunyarwanda bugaragarira mu ndangagaciro na kirazira by’umuco nyarwanda, harimo gukunda no kurwanira ineza y’u Rwanda n’Abanyarwanda, kudahemukira u Rwanda n’Abanywaranda uko byaba bimeze kose ukaba wahitamo kwitanga ugapfa aho guhemukira u Rwanda n’Abanyarwanda, kwanga no kurwanya akarengane gakorerwa Umunyarwanda uwo ariwe wese, kurwanya Jenoside n’ingengabitekerezo yayo by’umwihariko amacaburi, kutubaha ubuzima no gutesha agaciro undi muntu, kuba inyangamugayo ukarangwa n’ubupfura bugaragarira mu gukunda no guharanira ukuri, kwicisha bugufi no korohera bagenzi bawe uretse abagizi ba nabi. Abarinzi b’Igihango bigisha mu buryo bufatika icyo kuba Umunyanrwanda aricyo kandi berekana ko bishoboka kuba Umunyarwanda urangwa n’Ubunyarwanda nk’uko abakurambere babyifuje.

Igishimishije kandi gitera ibyiringiro bizima byo kuzagira u Rwanda rwiza rurangwa n’Abanyarwanda nyakuri, batewe ishema ryo kuba Abanyarwanda, ni uko mu Barinzi b’Igihango harimo Abanyawaranda b’ingeri zose, urubyiruko, abagore, abagabo, abasaza n’abakecuru, abize n’abatize, abakene n’abakire byerekana koko ko “Ubunyarwanda” ari ikirango cyangwa ikivugo rusange gikwiriye kuranga buri Munyarwanda wese. Urugero rwiza twatanga rwerekana ko n’umwana ukiri muto yaba Umunyarwanda wuzuye Ubunyarwanda ni urw’Uwamahoro Grace wari umwana w’imyaka 11 muri 1994, wafashe uruhinja arukuye kuri nyina bari bamaze kwica kandi atabazi, araruhungana arujyana muri Zaire, arwitaho asangira narwo utwo nawe yabaga abonye kugeza aho arutahukaniye. Uwo mwana yaramureze arakura, amushyira mw’ishuri ariga arangiza amashuri yisumbuye.

Abarinzi b’Igihango babereye u Rwanda n’Abanyarwanda urugero rwiza rw’Umunyarwanda u Rwanda rwifuza uwo ariwe, babaye igisobanuro gifatika cy’Ubunyarwanda, kigaragarira buri wese kitari amagambo gusa umuntu ashobora kwibaza ko ari ikifuzo cyangwa inzozi umuntu adashobora kugeraho. Ibyo Abarinzi b’Igihango bakoze mu bihe by’amage nk’ibyo twaciyemo muri Jenoside yakorewe Abatutsi ndetse no mu buzima bukakaye kuri benshi u Rwanda rwisanzemo nyuma ya Jenoside byigishije kandi bikomeza kwigisha icyo “Ubunyarwanda” aricyo ndetse bikanubaka “Ubunyarwanda”; byigisha abana, urubyiruko ndetse n’abanyarwanda b’ingeri zose muri rusange icyo Ubunyarwanda cyangwa “Ndi Umunyarwanda” aricyo mu buryo bufatika.

Rumwe mu ngero zifatika z’uburyo Abarinzi b’Igihango bigishije ndetse bakubaka Ubunyarwanda ni Abanyeshuri b’i Nyange babigiyeho, bituma bemera gupfa aho kwihakana Ubunyarwanda, bemera gupfa nk’Abanyarwanda aho gukira nk’Abahutu bitandukanije na bagenzi babo b’Abatutsi, ubwo baterwagwa n’abacengezi muri 1997. Urundi rugero rwiza rw’uburyo Abarinzi b’Igihango bigisha kandi bakubaka Ubunyarwanda n’urw’Abarinzi b’Igihango nka Mukankaka Rosa wagizwe umupfakazi agapfusha n’abantu bo mu muryango we benshi cyane ariko akitangira kurera no gufasha abana b’abanyarwanda batagira kivurira abo aribo bose ntakubatandukanya, harimo ndetse n’abana b’abantu bafungiwe kuba baragize uruhare muri Jenoside yakorewe Abatutsi. Abera abanyarwanda urugero rwiza n’ikitegererezo cyo kubabarira no kunga ubumwe byubaka Ubunyarwanda.

Abarinzi b’Igihango bagira uruhare runini hirya no hino mu gihugu muri gahunda zitandukanye z’Igihugu zigamije kubaka Ubunyarwanda nk’iy’Ubumwe n’Ubwiyunge, iya Ndi Umunyarwanda, iy’Itorero ry’Igihugu aho batangamo ubuhamya bwabo bagamije kwimakaza indagagaciro z’urukundo, ubwitange, ubutwari no kwanga guhemuka; kwanga no gukumira ivangura iry’ariryo ryose, kwironda n’amacakubiri; kugira umutima wo gufasha n’impuhwe no kudatatira isano dusangiye cyangwa igihango cy’Ubunyarwanda byose bifatanyiriza hamwe kubaka Ubunyarwanda. Hatari hatera iki cyorezo cya COVID-19, Abarinzi b’igihango bakundaga kujya kuganiriza urubyiruko mu mashuri kuri gahunda ya Ndi Umunyarwanda bagatanga n’ubuhamya bwabo bwerekana icyo Ubunyarwanda aricyo, ko kandi kubwubaka no kuburinda bishobora no gusaba kubwitangira.

Abarinzi b’Igihango twaganiriye bavuga ko icyabateye gukora ibikorwa by’ubumuntu n’ubutwari aruko ababyeyi babo babareze babakangurira gukunda u Rwanda n’Abanyarwanda bose batavanguye, kudahemuka no kugira umutima w’impuhwe, kugira ubutwari no kutagamburuzwa n’ibikomeye bazahura nabyo mu buzima ngo babe bahemuka, ariko cyane cyane benshi bavuze ko babitewe no kwemera no kubaha Imana, bumva ko hejuru yo gusangira Ubunyarwanda n’abo batabaye cyangwa se bagerageje kugirira umumaro muri Jenoside yakorewe Abatutsi cyangwa se nyuma yayo, bumvaga ari n’abavandimwe kuko bose ari abana b’Imana. Hafi ya bose bavuga ko bumva ari Imana yabibashoboje kandi ariyo ikomeza kubashoboza no mubyo bakora bigamije kubaka Ubunyarwanda.

Ntabwo byoroshye gushyira imibare aho tugeze mu rugendo rwo kongera kubaka Ubunyarwanda nyuma y’aho abateguye bakanashyira mu bikorwa Jenoside yakorewe Abatutsi babusigiye aharindimuka, ariko iyo urebye aho igipimo by’ubumwe n’ubwiyunge kigeze, ukareba uko Abanyarwanda babanye kandi bafatanyiriza hamwe ibikorwa byo kwiteza imbere, uko Abanyarwanda basigaye bafite ishema ryo kuba Abanyarwanda ndetse n’agaciro biha kandi n’ako amahanga abaha, ukareba ubushake n’ubutwari Abanyarwanda bafite byo kurwanira igihugu cyabo no kukitangira, birerekana ko tumaze gutera intambwe ishimishije mu kongera kubaka Ubunyarwanda, abakurambere bahanze u Rwanda baturaze.

Nk’uko Nyakubahwa Perezida wa Repubulika yabivuze ku wa 04 Nyakanga 2014 ubwo twizihizaga ku nshuro ya 20 Kwibohora kw’Abanyarwanda, kubaka Ubunyarwanda twabishobojwe n’uko Abanyarwanda twahisemo ibintu bitatu bikomeye: i) Kubaka Ubumwe bw’Abanyarwanda ubwo ibyari bimaze kuba ndetse n’amajwi menshi hirya no hino kw’isi yatubwiraga ko bidashoboka; ii) Kugira imiyoborere myiza iha agaciro buri Umunyarwanda wese ariko kandi akabazwa ibyo ashinzwe; no iii) Kwigirira icyizere gikomeye n’indoto ndende z’aho u Rwanda n’Abanyarwanda bakwiye kugera mu kwiteza imbere.

Ntawashidikanya ku rukundo, ubwitange n’ibikorwa byiza by’Abarinzi b’Igihango n’Ingabo z’Inkotanyi byabaye urugero rwiza n’urufatiro rukomeye mu kubaka Ubunyarwanda no kudushoboza gushyira mu bikorwa ayo mahitamo atatu akomeye yayoboye u Rwanda muri iyi myaka 27 ya nyuma ya Jenoside yakorewe Abatutsi.