Abafashwe basengera ku musozi wa Kanyarira barimo n’urubyiruko

Abafashwe bavuga ko amabwiriza y’inzego z’ubuyobozi ntaho ataniye n’amategeko y’Imana kuko ngo binanditse muri Bibiliya ko abayobozi batowe n’Imana kandi Imana itegeka abantu kubaha abo yabashyiriyeho ngo babayobore.

Niyigaba Nathan waje gusenga aturutse mu Murenge wa Mbuye mu Karere ka Ruhango avuga ko afite umuvandimwe urwaye Covid-19, ari na cyo cyamuteye kwirengagiza nkana akarenga ku mabwiriza asanzwe yo kwirinda Covid-19.

Agira ati “Nari nje gusenga nsengera Igihugu kubera iki cyorezo cyateye kandi njyewe mfite n’umuvandimwe uri mu bitaro i Kigali urwaye Covid-19 ariko arimo kugenda yoroherwa, natandukiriye amabwiriza ya Leta mbizi neza nanyuranyije n’itegeko rya Leta n’amategeko y’Imana kuko iyo nubashye umuyobozi mba nubashye n’Imana kuko inadutegeka kubaha abo yadushyiriyeho kutuyobora”.

Yongeraho ko Imana itakwakira isengesho ry’umuntu wasuzuguye abayobozi akagira inama bagenzi be kureka kurenga ku mabwiriza yo kwirinda Covid-19 ahubwo bakihangana bagategereza icyorezo kikarangira.

Bavuga ko bari baje gusengera Igihugu n’ababo bugarijwe na Covid-19

Abafatiwe ku musozi wa Kanyarira basenga barenze ku mabwiriza yo kwirinda Covid-19 bavuze ko bari baje gusengera Igihugu ngo icyorezo cya Covid-19 gicogore, hakaba n’abasengeraga ababo barwaye Covid-19.

Hari kandi abafashwe bavuga ko abana babo cyangwa abagize imiryango yabo bari mu turere twashyizwe muri gahunda ya ‘Guma mu Rugo’ by’umwihariko mu mujyi wa Kigali, ari na yo mpamvu yabateye kuza kubasengera.

Uwababyeyi Claudine waje aturutse mu Karere ka Muhanga avuga ko yarenze ku mabwiriza akaza gusenga avuga ko yemera amakosa kuko iyo utubashye abayobozi uba usuzuguye Imana bityo ko bidakwiye ko abantu bahurira hamwe basenga n’ubwo bo babikoze.

Agira ati “Nari naje gusengera Igihugu ku isonga kuko ntabwo ibindi bibazo byakemuka mu gihe Igihugu kidafite amahoro.

Mukamasabo Suzan waturutse ku Buhanda avuga ko we yari yazanywe no gusengera Igihugu ngo Covid-19 ihagarare, no gusaba amafaranga yo gushyira abana mu mashuri.

Mukamasabo avuga ko ari ubwa mbere yari aje gusengera Covid-19 aherekeje abandi akaba ahamya ko yasuzuguye Imana kubera kurenga ku mabwiriza y’Ubuyobozi akaba ashishikariza abandi kutarenga ku mabwiriza yashyizweho kuko n’ubundi Imana itakwakira amasengesho y’abasuzuguye abayobozi.

Uwingeneye Régine avuga ko no mu mpera z’umwaka ushize wa 2020 yazaga gusengera i Kanyarira avuye mu Murenge wa Mwendo, agahamya ko kurenga ku mabwiriza yabitewe n’ibibazo bimuremereye kandi abimarwa no guterera umusozi wa Kanyarira.

Avuga ko Imana ishobora kumva amasengesho mu rugo ariko kumva ko Covid-19 imereye nabi Abanyakigali ari na ho abana be bari yiyemeje kuza kubitura Imana i Kanyarira.

Agira ati “Ubutumwa numvise buransaba kubaha ubuyobozi n’amabwiriza bashyizeho ndagenda nshishikarize abantu kwirinda kugeza igihe Imana izaca inzira Covid-19 ikigirayo”.

Ubuyobozi bw’Akarere ka Ruhango butangaza ko gufata abasengera ku musozi wa Kanyarira bisanzwe bikorwa ariko ubu byakozwe ku buryo bwihariye aho inzego z’umutekano zazindutse zizenguruka umusozi wose kugira ngo zikusanye abasengaga bityo babigishe babicikeho mu gihe icyorezo cya Covid-19 gikomeje kugaragaza ubukana no guhitana benshi mu Gihugu.

Umuyobozi mukuru w’Ikigo cy’Igihugu gishinzwe ubuzima (RBC) Dr. Sabin Nsanzimana yatangarije RBA ko ubusanzwe umuntu wanduye Covid-19 ashobora kugaragaza ibimenyetso birimo kuribwa umutwe ku buryo bukabije n’ibindi bimenyetso birimo no kugira umuriro uri hejuru.

Dr. Nsanzimana avuga ko kugira ngo ibipimo biri gukoreshwa bigaragaze umuntu wanduye bisaba ko nibura aba amaranye ubwandu iminsi iri hejuru y’itatu bityo ko mu bafashwe hashobora kuba harimo n’abandi banduye, kubera ko umunsi umwe ibimenyetso biba bitaragaragara, ari na yo mpamvu hafashwe ingamba zo gushyira mu kato abantu bose bafatiwe ku musozi wa Kanyarira.

Agira ati “Ibipimo dukoresha ntibishobora kubona umuntu wanduye ako kanya cyangwa umaze umunsi umwe yanduye, ni yo mpamvu dukeka ko muri abo banduye bashobora kuba banduje abandi ari na yo mpamvu twafashe umwanzuro w’uko bamara iminsi itanu bakurikiranwa kugira ngo turebe niba nta bwandu bushya bubarimo”.

Umuvugizi wa Polisi y’Igihugu CP John Bosco Kabera atangaza ko abafashwe biganjemo abo mu turere twa Muhanga na Ruhango kandi bahuriye mu bikorwa bitemewe barenze ku mabwiriza yo kwirinda Covid-19, agasaba abantu kumva ko amabwiriza abereyeho kubarinda kandi agomba kubahirizwa uko ari.

Agira ati “Amabwiriza yafashwe agamije kurinda abaturage. Iyo rero uyarenzeho uba ushaka kugorana, turasaba abantu gukomeza kwirinda Covid-19, abari mu rugo bakaguma mu rugo, abakora ingendo zitari ngombwa bakabireka, abasenga na bo bagasengera mu ngo zabo”.

Abantu babiri muri abo basengaga basanganywe ubwandu bwa COVID-19 ni bo bari bafite ibimenyetso byo kuribwa umutwe, mu gihe uwa gatatu we yari afite umuriro uri hejuru, abandi basigaye nta bimenyetso bagaragazaga ari na yo mpamvu bikekwa ko hari ababa banduriye aho basengeraga bityo batahita boherezwa mu miryango yabo hatamenyekanye niba nta bundi bwandu bubarimo.

Abafashwe bose bajyanywe mu kigo cy’imyuga cya TVET Mpanda kiri mu Murenge wa Byimana ari na ho bagiye kumara iminsi itanu mu kato bakurikiranwa ngo barebe niba nta bwandu bushya bafite.

Bafatiwe mu ishyamba rya Kanyarira mu karere ka Ruhango basenga barenze ku mabwiriza yo kwirinda Covid-19

Aba bantu biganjemo abagore n’abagabo n’urubyiruko bafashwe barenze ku mabwiriza yo kwirinda COVID-19 baza gusenga, mu gihe uturere twose turi muri gahunda ya guma mu karere, utundi turi muri guma mu rugo.

Umuyobozi wa Polisi mu karere ka Ruhango yabwiye abafashwe ko butabujijwe gusenga ariko abantu basabwa gusengera mu ngo kugira ngo badahura bakanduzanya Covid-19.

Yababwiye ko gusengera i Kanyarira bitemewe mu gihe amabwiriza yo kwirinda Covid-19 abasaba gutegereza icyorezo kikagabanuka.

Abafashwe bemera ko bakoze icyaha cyo kurenga ku mabwiriza ya Leta kandi baje gusenga Imana, bakavuga ko basaba imbabazi ariko ubuyobozi bwo bukavuga ko bacibwa amande bakabareka bagasubira mu ngo.

Umuyobozi w’akarere ka Ruhango Habarurema Valens avuga ko abafashwe bahanwa hakurikijwe amakosa bakoze bitewe n’uko basuzuguye ibyemezo by’Inama y’Abaminisitiri.

Umuvugizi wa Polisi y’Igihugu mu Ntara y’Amajyepho SP Theobald Kanamugire avuga ko abafashwe barenze ku mabwiriza yo kwambuka uturere nta ruhushya bafite, kandi bakaba banarenze nkana ku mabwiriza yo kwirinda Covid-19.

Avuga ko inzego z’umutekano zikomeza gukaza ingamba zigafata abarenze ku mabwiriza kandi abantu basabwa kwibuka ko kwirinda ari byo byiza kurusha gucengera mu nzira zitemewe.

Agira ati, "Inzego z’umutekano turakaza ingamba kandi buri wese ushashaka kurenga ku mabwiriza ava mu karere ajya mu kandi ntibyemewe twafatiyemo n’abavuye muri Kamonyi kandi bari muri gahunda ya guma mu rugo urumva ko bashobora gukwirakwiza ubwandu".

Umuyobozi wa Polisi mu Karere ka Ruhango yabagejejeho ubutumwa bwo kwirinda kuza gusengera kuri uyu musozi

Umuyobozi w’Akarere ka Ruhango Habarurema Valens avuga ko abafashwe bari harimo abari basanzwe baza gusengera Kanyarira kandi bitemewe kuko hatarashyirwa ibya ngombwa bifasha abaza gusenga.

Avuga ko abafashwe bacibwa amande y’ibihumbi 10frw ahanishwa abanyuranyije n’amabwiriza ya Leta, abatayabona bakaba barara mu kigo cy’imyuga cya MPANDA TVET School bigishwa.

Akarere ka Ruhango kamaze gupfusha abantu 17 bahitanywe na Covid-19, abarwayi na bo bakomeje kwiyongera kuko bashobora kubona abarenze batanu ku munsi.