Imiryango ibarirwa muri 15 ni yo igaragaza iki kibazo cyo kubura ubutaka bari basanzwe bakoreraho ibikorwa by’ubuhinzi mu mudugudu wa Bisizi mu Kagari ka Busigari mu Murenge wa Cyanzarwe, aho tariki 22 Gicurasi 2021 mu masaha y’ijoro Ikirunga cya Nyiragongo cyarutse amahindure y’umuriro akaruhukira mu mirima yabo.

Rutagara na Bisizi ni ubutaka bukora ku mupaka wa Congo. Ni agace karinzwe cyane n’inzego z’umutekano, n’iyo uhagiye utazwi ubazwa aho uva n’aho ujya, ibi bigafasha gukumira abajya muri Congo gutunda magendu, kwambukiranya umupaka bitemewe hamwe no kwirinda abakwinjira mu Rwanda bagamije guhungabanya umutekano.

Utu duce, ni hamwe hakunze kumvikana harasiwe abinjiza magendu mu Rwanda cyane cyane ikiyobyabwenge cy’urumogi cyangwa ibicuruzwa bya caguwa.

Kugira ngo ugere muri aka gace karengewe n’amahindure utari umuturage waho bigusaba guhura n’inzego z’umutekano cyangwa guhura n’umuyobozi akahagutembereza.

Maniriho Isaka ni umuturage mu mudugudu wa Rutagara ndetse akaba ayobora uyu mudugudu wegereye ubutaka bwarengewe n’amahindure, ndetse akaba ari we watembereje umunyamakuru wa Kigali Today ahari ubutaka bwarengewe n’amahindure kuko atari buri wese wemerewe kugera muri kariya gace kubera ko kegereye umupaka wa Congo.

Avuga ko ubwo amahindure yavaga mu kirunga batamenye ko yerekeje mu Rwanda. Icyakora ngo babonye ikirere gihinduka umutuku maze bahitamo guhunga.

Agira ati “Byari mu masaha y’umugoroba, nta mitingito twumvise cyangwa ikindi kitubwira ko ikirunga kiri buruke, ahubwo twatunguwe no kubona ikirere gitukura, tugiye ahirengeye tubona umuriro uramanuka dutangira guhunga.”

Ubusanzwe hagati y’u Rwanda na Congo habamo ikibaya kigabanya ibihugu byombi, ndetse benshi bibwira ko ikirunga kirutse amahindure atagera mu Rwanda kuko atarenga imisozi ikikije umupaka, gusa tariki ya 22 Gicurasi 2021 si uko byagenze kuko amahindure yamanutse, yegera umusozi ukikije u Rwanda kugeza awurenze ameneka mu Rwanda, naho ayandi akomereza muri Congo aho yakomeje agana mu bice bitandukanye agasenyera abaturage baho.

Maniriho avuga ko amahindure yaje mu Rwanda atageze kure kubera umuvuduko muto yari afite. Icyakora yoroshe ubutaka bw’abaturage bugera kuri hegitari enye bwariho imyaka yeze.

Maniriho ati “Kubera ko twari twahunze, ntitwabonye uko yageze mu Rwanda, ahubwo mu gitondo umuriro wahagaze, abaturage bagiye mu mirima yabo basanze itagihari yarenzweho n’amahindure.

Ubutaka bwarengewe n’amahindure nta muturage wari ubutuyeho, ahubwo bwari ubutaka bukorerwaho ubuhinzi n’ubworozi.

Ababuze ubutaka bavuga iki?

Abo mu miryango 15 ituye mu murenge wa Cyanzarwe yabuze ubutaka bwabo kubera amahindure bavuga ko babayeho nabi kandi basabye Leta ku bagoboka.

Amahindure yatwitse ibyo yasanze mu nzira

Nzeyimana Aloys w’imyaka 50, avuga ko yari afite imirima ibiri ihinzemo ibishyimbo, urutoki n’ibijumba byeze ariko ntiyabisarura kubera amahindure.

Nzeyimana avuga ko abaturage bari bafite ubutaka ahangijwe n’amahindure ubu badashobora kumenya neza aho ubutaka bwabo bugarukira kuko amahindure yaburenzeho.

Abafite ubutaka bwarenzweho n’amahindure, bamwe bari bafite ibyangombwa by’ubutaka, abandi bafite impapuro z’ubugure batarabwiyandikishaho, bavuga ko ubutaka bwabo batazi icyo bazabukoresha ngo bushobore kubatunga kubera ko bwahindutse ibibuye.

N’ubwo ikirunga cya Nyiragongo cyarutse amahindure y’umuriro, uko agenda ahura n’ubukonje arafatana agahinduka ibibuye. Icyakora ntakomeye nk’andi bakoro amaze imyaka myinshi kuko amahindure ari hejuru yumye adapima ibiro byinshi mu gihe amakoro asanzwe aremereye.

Tuyisenge Mariya wari ufite imirima yangijwe n’amahindure, avuga ko akomerewe no kubona igitunga umuryango.

Ati “Hariya ni ho hari hadutunze dukura ibitunga umuryango, twishyura ubwisungane mu kwivuza ndetse n’abana bakabona ibikoresho by’ishuri. Ubu rero byaratuyobeye, twategereje ubufasha ntiburaza kandi twarabaruwe.”

Tuyisenge avuga ko batazi icyo amahindure bayakoresha, agasaba ko abayobozi bareba icyakoreshwa amahindure abaturage bakabona ikibatunga.

Ni byo yasobanuye ati “Nk’abaturage ibi bibuye twabikoresha iki? Kereka nibura Leta ishatse imishinga ikoreshwa amabuye tukayabagurisha, mbese nk’abakora imihanda, abayasyamo garaviye bakoresha mu kubaka cyangwa abakora sima bakatubera abaguzi.”

Imirima yangijwe n’amahindure ntacyarokotse uretse ubutaka amahindure yagiye asiga ntabugereho, ariko ikindi kinyabuzima cyose harimo n’ibiti byari bihagaze byarahiye abirengaho.

N’ubwo abaturage bavuga ko amahindure yahoze, impumuro idasanzwe yari isanzwe ahari ayo mahindure yaragabanutse ndetse abaturage babwiye umunyamakuru wa Kigali Today ko iyo imvura yaguye babona imyotsi izamuka mu mahindure ariko yahita bigashira.

Ni umwanzuro utanzwe nyuma y’ibyumweru bibiri abaturage basabwe n’Ubuyobozi kuva mu byabo kugira ngo batagirwaho ingaruka n’ikirunga cya Nyiragongo byavugwaga ko gishobira kongera kuruka ndetse kikarukira mu mujyi wa Goma no mu kiyaga cya Kivu.

Guverineri wa Kivu y’Amajyaruguru Lt Gen Ndima avuga ko ashimira abaturage bumvise ubusabe.

Agira ati; " kuva 27 Gicurasi 2021, umujyi wa Goma ufite abaturage bagera kuri 40%. Ndashaka gushimira abaturage bose ku nkunga bashyigikiye guverineri w’ingabo, mbasaba gusubira aho bari batuye, cyakora abari batuye ahangijwe n’iruka bagomba gutegereza gushakirwa ahandi bafashirizwa."

Minisitiri w’Intebe Sama Lukonde aherekejwe n’Ubuyobozi bwa Gisirikare bwashyizweho muri Kivu y’Amajyaruguru bwasuye inkambi z’impunzi z’abanyekongo bahunze iruka ry’ibirunga ndetse bavuga ko hari icyizere ko ibirunga bitakigize ingaruka ku mujyi wa Goma utuwe na miliyoni y’abaturage.

iki cyizere kibonetse nyuma yuko raporo ya OVG "ikigo gukurikirana ibirunga mu mujyi wa Goma" ivuga ko amahindura yavubuwe n’ikirunga cya Nyiragongo arimo gukomera mu gice cyo hejuru cy’ibice by’ibirunga bya Nyiragongo.

Minisitiri w’intebe Jean Michel Sama Lukonde, yagize ati; "igihe kirageze ngo guverineri wingabo ategeke gutahuka abimuwe bava muri Goma batuye ahantu hatandukanye barimo Sake, Minova, Nyiragongo, Rutshuru, u Rwanda, n’ibindi. Nyuma yo kwakira ubutumwa, abaturage n’imiryango yabo bakomeje kumererwa neza gusubira mu ngo zabo. Nubwo bimeze bityo ariko, batakaje inyungu zabo n’umutungo wabo ariko bagomba kwitabira gahunda yo gutaha buhoro buhoro, ndetse n’ubuyobozi bw’intara."

Abaturage basabwe gutaha kuva tariki 8 Kamena 2021 aho abanyura inzira Goma-Sake kugeza 09 Kamena 2021, abanyura Nyiragongo-Goma bazatangira gutaha kuva tariki ya 10 Kamena 2021, Rutshuru-Goma batahe tariki ya 11 kugeza ku ya 12 Kamena 2021, naho abanyura inzira ya Bukavu-Minova-Goma batahe kuva tariki ya 15 kugeza ku ya 17 Kamena 2021.

Abahungiye Butembo -Beni- Lubéro- Goma basabwe gutaha kuva tariki 16 kugeza ku ya 17 Kamena 2021 naho abahungiye mu Rwanda-Goma batahe kuva ku ya 18 kugeza ku ya 20 Kamena 2021.

Ikirunga cya Nyiragongo cyarutse tariki 22 Gicurasi 2021 gukurikirana n’imitingito yatumye ibihumbi mu mujyi wa Goma na Gisenyi bava mu byabo.

Mu Rwanda hahungiye Abanyekongo babarirwa mu bihumbi 14 ariko benshi bamaze gusubira mu gihugu cyabo uretse 693 basigaye mu Rwanda mu nkambi ya Busasamana mu Karere ka Rubavu.

Ubuyobozi bwasabye ko itariki iteganijwe yo gusubukurwa amasomo mu mashuri makuru na kaminuza ari 14 Kamena 2021.

Bishimiye ubufasha bahawe

Umuyobozi wungirije ushinzwe imibereho myiza y’abaturage mu Karere ka Rubavu, Ishimwe Pacifique, avuga ko ashimira abafatanyabikorwa uburyo bakomeje kwitanga mu kugoboka abaturage bahuye n’imitingito mu mirenge ya Gisenyi, Rugerero, Rubavu na Nyamyumba.

Minisiteri Ishinzwe Ibikorwa by’Ubutabazi (MINEMA), kuva tariki 30 Gicurasi 2021 ifatanyije n’abafatanyabikorwa, batangiye gushyikiriza ubutabazi imiryango ibabaye kubera ko yangirijwe n’imitingito yakurikiye iruka ry’ikirunga cya Nyiragongo kuva tariki 22 Gicurasi 2021.

Abaturage bategereje guhabwa ubufasha

Abafatanyabikorwa batandukanye mu Karere ka Rubavu bakomeje gutanga ubutabazi bufasha abaturage, ubu imiryango 2,504 ikaba ibarurwa kuba yarahawe ubutabazi bugizwe n’ibiribwa, ibikoresho by’isuku, ibiryamirwa ndetse n’amahema kubera amazu yasenyutse.

Ubuyobozi bw’Akarere ka Rubavu bugaragaza ko imirenge yari ikeneye ubufasha yari 2,393 ariko umubare uza kwiyongera.

Imirenge yabonetsemo abantu bari bakeneye gufashwa harimo Rugerero yari ifite abantu 856, Gisenyi 563, Rubavu 359, Nyamyumba 294, Nyakiriba 189, Cyanzarwe 71, Nyundo 49 naho Busasamana ni imiryango 11.

Akarere ka Rubavu gakomeje kwakira imfashanyo yo kugoboka abangirijwe n’imitingito

N’ubwo abaturage bahawe ubutabazi, bavuga ko bagikeneye gufashwa na Leta haba mu kubona ibibatunga no kubona amacumbi nyuma y’uko imitingito ishyize hasi amacumbi yabo, ndetse n’ubukungu kuri benshi bugahungabana.

Ibitaro bya Gisenyi byongeye gutanga serivisi

Umuyobozi mukuru w’ibitaro bya Gisenyi, CSP Dr Tuganeyezu Oreste, avuga ko bongeye kugarura serivisi batanga mu bitaro kuko imitingito yari ibangamiye abarwayi n’abaganga yarangiye.

Yagize ati "Imitingito yagize ingaruka ku nyubako z’ ibitaro, hari zimwe tutazongera gukoresha, hari izo turimo gusana ariko serivisi zose zagarutse kuko imitingito yari ibangamiye abarwayi n’abaganga itacyumvikana".

Akomeza avuga ko bakora ibishoboka bagashaka aho gukorera, nyuma y’uko hari inyubako zangiritse.

Ati "Twakoze uko dushoboye ngo serivisi zakoreraga mu nyubako zangiritse tuzishyira mu yandi mazu, turimo turimura ababyeyi twari twarajyanye Rugerero ku buryo serivisi zongera gukora nk’ibisanzwe".

Abashinzwe umutekano barayobora abarwayi

CSP Dr Tuganeyezu ashimira Imana kuba nta muntu wakomeretse cyangwa hagire igikoresho cy’ibitaro cyangirika, uretse inyubako zangiritse kubera umututu wanyuze mu mujyi wa Gisenyi ukangiza amazu menshi.

Avuga ko yizera ko ubuyobozi bw’igihugu buzafasha umujyi wa Gisenyi n’abawutuye gusana ibyangijwe n’imitingito ndetse n’ibitaro bya Gisenyi bigasanwa, kimwe no kongerwamo inyubako zihangana n’imitingito yibasira uwo mujyi mu gihe cy’iruka ry’ikirunga cya Nyiragongo.

Ibitaro bya Gisenyi ni bimwe mu bitaro bifite inyubako zishaje mu Rwanda, zashegeshwe n’imitingito yakurikiye iruka ry’ikirunga cya Nyiragongo ku itariki 22 Gicurasi 2021.

Inyubako zimwe zirabonekamo gusaduka, nk’irwariramo inkomere, inzu y’ababyeyi, inzu y’abana, inyubako ikorerwamo serivisi za gaz zikoreshwa mu bitaro, inzu ishyirwamo abapfuye, inzu ikorerwamo serivisi zo kubika amakuru hamwe n’izindi nyubako zitandukanye zangijwe n’imitingito.

Ibyo byatumye ibitaro byimura abarwayi, ariko kubera ari ibitaro byakira abarwayi benshi barimo abo mu Karere ka Rubavu, Rutsiro na Nyabihu, byabaye ngombwa ko bigaruka.

Zimwe mu nyubako z’ibitaro byangijwe n’umututu

Ku i saa tanu z’amanywa kuri uyu wa Kane tariki ya 3 Kamena 2021, ni bwo imodoka zarimo zigeza ibikoresho mu nzu z’ababyeyi, na ho inyubako zimwe nta barwayi bazirimo, uretse ahari abarwayi bivuza bataha.

Ahandi hari abarwayi ni nko muri serivisi za urgence, ahavurirwa amaso, inzu y’ababyeyi ndetse n’inzu zivurirwamo abana.

Amashyuza yagarutse

Umunyamabanga Nshingwabikorwa w’Umurenge wa Nyamyumba, Kazendebe Hertier, ni we wemeje aya makuru ndetse agaragaza amafoto y’amazi y’amashyuza yongeye kuzura.

Kazendebe yagize ati "Inkuru nziza, amazi y’amashyuza yongeye kugaruka yose nyuma y’icyumweru yarabuze."

Mu cyumweru gishize Kigali Today yari yatangaje inkuru y’ibura ry’amashyuza ndetse igaragaza amafoto y’ahahoze amashyuza humagaye.

Ahahoze amashyuza hari harumagaye

Ubu ahari humagaye hongeye kuzura amazi akunzwe na benshi cyane cyane abayakenera mu kwivura indwara zitandukanye.

Ayo mazi yazimiye kuva tariki ya 27 Gicurasi 2021 ku isaha ya saa saba n’iminota 54 z’ijoro, ubwo humvikanye umutingito mu Karere ka Rubavu ufite igipimo cya 3.9 wakubitiye aha isoko y’amashyuza iherereye.

Kuva tariki ya 22 Gicurasi 2021 ubwo ikirunga cya Nyiragongo cyatangiraga kuruka, umubare w’Abanyekongo bahungira mu Rwanda warushijeho kwiyongera bitewe n’amakuru y’ubuyobozi bw’Intara ya Kivu y’Amajyaruguru bwatangaje ko hari amahindure yanyuze munsi y’ubutaka ashobora kugera mu kiyaga cya Kivu bikaba byagira ingaruka ku batuye Umujyi wa Goma n’abawegereye.

Mu Rwanda habaruwe impunzi zibarirwa mu bihumbi 14 byageze mu Rwanda ariko abageze mu nkambi babarirwa mu bihumbi 5, mu gihe abandi bakiriwe n’imiryango, abandi bishakira ibyumba mu mahoteli.

Uko iminsi igenda ishira ni ko Abanyekongo bahungiye mu Rwanda bagenda basubira mu gihugu cyabo, nyuma yo kubona ko ingaruka z’iruka rya Nyiragongo zitakiriho.

U Rwanda nyuma yo kwakira impunzi z’Abanyekongo rukaba na rwo rurimo kwita ku baturage barwo harimo abasenyewe n’imitingito.

Ubuyobozi bw’Akarere ka Rubavu butangaza ko imitingito yabaye muri aka Karere yangije amazu abarirwa mu bihumbi bibiri kandi imibare ikomeje kwiyongera.

Ubu abaturage basenywewe amazu barimo kurara mu mahema, abandi bakarara mu bibanza byasenyutse, ariko ubuyobozi burimo kugenda bubafasha mu mirenge kugira ngo ubuzima bugaruke.

Nyiragongo yatumye abantu 415,700 bava mu byabo

Ishami ry’Umuryango w’Abibumbye ryita ku bimukira (OIM) ritangaza ko Abantu babarirwa mu bihumbi 415 bavuye mu byabo bahunga iruka ry’ikirunga cya Nyiragongo kuva tariki ya 22 Gicurasi 2021 berekeza mu bice bya Bukavu, Idjwi, Minova, Kabare, Sake, Rutshuru, Nyiragongo, Lubero, Goma na Butembo, mu gihe abandi bahungiye mu Rwanda.

OIM igaragaza ko muri iyi mibare y’abahunze, ibihumbi 56 bahungiye i Sake-Bweremana bagana i Masisi.

Ikiyaga cya Kivu ngo kimeze neza n’ubwo giheruka kwibasirwa n’imitingito ifitanye isano n’iruka rya Nyiragongo

Iri tsinda ryakomeje gukurikirana ikiyaga cya Kivu mu matariki y’iruka rya Nyiragongo no mu bihe by’imitingito imaze igihe mu Karere ka Rubavu ndetse imwe igakubitira mu kiyaga cya Kivu no ku nkombe zacyo.

Hagendewe ku igenzura ryakozwe n’ubushakashatsi bw’ikigo cya REMA, ibyagendeweho bigaragaza ko ibidukikije byakomeje kubaho neza mu mazi nyuma yo kuruka kwa Nyiragongo.

Iri tsinda ryakoze ibipimo by’amazi birimo ubushyuhe, ubwikorezi, umwuka uhumekwa "oxygen", chlorophyll, na pH.

REMA itangaza ko ibisubizo byerekana ko ikiyaga kigifite umutekano, kandi nta mpinduka zigeze zigaragara kuva ku ya 22 kugeza ku ya 27 Gicurasi 2021.

REMA yagize iti “Mu gihe cyo guturika kwa Nyiragongo, abantu benshi bakomeje kwerekana impungenge z’ingaruka iruka rya Nyiragongo ryagira ku kiyaga cya Kivu, ariko amahindure y’ikirunga ntiyatembaga yerekeza mu kiyaga."

Ikomeza itanga icyizere ko ingaruka z’iruka ritazagira uruhare runini mu gutuza kw’ikiyaga.

Imitingito myinshi yumvikanye mu Karere ka Rubavu yagiye ikubitira ku nkengero z’ikiyaga cya Kivu, ndetse ikaba yaratumye n’amazi y’amashyuza agenda.

Icyakora nta zindi ngaruka ziraboneka haba mu kwangirika kw’ibinyabuzima biri mu Kivu cyangwa ku bikorwa bihakorerwa.

Umwuka w’ikirere ntiwahumanye

Ubusanzwe iruka ry’ibirunga rijyana n’imyotsi yoherezwa mu kirere, iyi myuka iyo igeze mu kirere igahura n’ubukonje ihinduka umucanga ugaruka ukagwa ku isi ku bintu bitandukanye harimo imboga, imbuto, ubwatsi bw’amatungo ariko abahanga mu buzima bagira inama abatuye hafi kubisukura n’amazi meza kuko kubirya bitogeje byabagiraho ingaruka bitewe n’ibigize iyo misenyi.

Naho kubera imyotsi iba iri gukwirakwira, abantu basabwa kwambara udupfukamunwa ngo batayihumeka cyangwa ikabajya mu maso.

REMA igaragaza ko ibipimo byafashwe kuva tariki ya 27 kugeza ku ya 29 Gicurasi 2021 n’ itsinda ryaturutse muri REMA gukurikirana imyuka ihumanya ikirere ijyanye no guturika kwa Nyiragongo ryasanze ibipimo bimeze neza.

Ibipimo bya RAMPS na ATMOTRACK byakoreshejwe mu myitozo yo kugenzura yakorwaga amanywa n’ijoro hifashishwa imirasire y’izuba nk’isoko y’ingufu.

Imyuka ihumanya nka SO2, CO2, CO, O3, NO2, PM2.5, PM10, PM1, NH3 n’urusaku hamwe n’ibipimo byose by’ikirere birimo ubushyuhe, ubuhehere, umuvuduko w’umuyaga.

Ibyavuye mu bushakashatsi byerekana ko ibyangiza ubuziranenge bw’ikirere bigenda bigabanuka mu buryo bwemewe.

Imitingito yibasiye inkengero z’ikiyaga ndetse imwe igakubitira no mu kiyaga

Itsinda rishinzwe gukurikirana ikiyaga cya Kivu rikomeje gukorana hamwe n’ikigo cy’Igihugu gishinzwe Mine, peteroli na gazi (RMB) hamwe n’abahanga mpuzamahanga kugira ngo barebe niba hari ingaruka zikomeye zishobora guturuka ku bikorwa by’ibiza byibasiye urusobe rw’ibiyaga bigari.

Ububi bw’ikiyaga cya Kivu bushobora kubyazwa inyungu

Ikiyaga cya Kivu ni kimwe mu biyaga binini byo muri Afurika y’Iburasirazuba, giherereye ku mupaka uhuza Repubulika y’u Rwanda na Repubulika Iharanira Demokarasi ya Kongo (DRC).

Amazi yo hejuru y’ikiyaga cya Kivu yitwa "biozone" kuko abamo ibinyabuzima, naho amazi maremare yikiyaga arimo metani nyinshi iri ku ngano iri hagati ya 55-60 km3, harimo kandi CO2 "dioxyde de carbone" nyinshi ku bunini bwa 300 km3.

Iyi myuka iboneka mu kiyaga cya kivu ifatwa nk’igisasu gishobora guhungabanya ubuzima bw’amamiliyoni igihe hagize ikiyihungabanya kuko iyi myuka ishobora guturika ikaba yahitana ubuzima bw’abantu benshi.

Abahanga bavuga ko n’ubwo bishobora kuba ariko bisaba imbaraga zidasanzwe nk’umutingito uri hejuru y’igipimo cy’umunani (8) wazamura ibiri mu ndiba y’ikiyaga cya Kivu, cyangwa amahindure y’ikirunga akaba yajya mu kiyaga ari menshi kugera mu ndiba n’ubwo bavuga ko hari amahirwe menshi ko bitashoboka.

Abashakashatsi ariko bagaragaza ko hari amahirwe ku Rwanda na DRC mu gihe bikoresheje iyi myuka mu kuyibyaza umusaruro.

Gaz méthane yatangiye kubyazwa ingufu zo gucana, ishobora gukoreshwa mu gutwara imodoka byoroshye, u Rwanda rugatandukana n’izamuka ry’ibiciro bya peteroli bya hato na hato. Yakoreshwa mu guteka ikarengera ibidukikije n’ibiciro bya gazi ituruka hanze.

CO2 ikoreshwa mu nganda zitandukanye, naho azote N3 ikaba ingenzi mu gukora amafumbire bikaba byafasha Abanyarwanda kongera umusaruro w’ibikomoka ku buhinzi.

H2S na yo yafasha mu gukora H2SO4 iyi ikaba ari acide ikenerwa mu nganda no mu butabire butandukanye.

U Rwanda rushoboye kubyaza umusaruro iyi myuka rwagera kuri byinshi rusanzwe rutumiza hanze, kandi bikajyana no kwirinda ingaruka za gaz yateza ikibazo ikomeje kwiyongera mu kiyaga cya Kivu.

Abo inzu zabo zasenyutse bifuza kubona ahandi ho kuba

Abaganiriye na Kigali Today bavuga ko bakomeje kubaho mu buzima bubi kuko abari basanzwe batunzwe no guca inshuro ubu batabona aho bayikura.

Abandi bavuga ko babangamiwe no kuba inyubako bari bacumbitsemo zasenyutse bakaba birirwa iruhande rw’ibyo bari batunze bakabura ibyo batungisha imiryango yabo.

Tabu Daphrose ni umubyeyi w’imyaka 62 akaba atuye mu kagari ka Gisa mu Murenge wa Rugerero, avuga ko yagize amahirwe yo guhabwa shitingi n’umukeka kugira ngo abone aho akinga umusaya.

Agira ati "Ndashima ubuyobozi bw’igihugu cyacu budutekereza n’abafatanya na bwo kutubonera ibyo dukeneye muri aya makuba turimo. Inzu yanjye yaguye hasi, n’ubwo mpawe isaso na shitingi nkeneye n’icyo gushyira mu nda, turi benshi dukeneye gufashwa, ariko abayobozi bazirikane ko ntaho dufite dukura".

Benshi mu basenyewe ubu baba mu mashitingi bakavuga ko imbeho itaboroheye

Uwimana umubyeyi w’abana babiri ati "Twari dutunzwe no guca inshuro, none uyu munsi abo twakoreraga barahunze, twirirwa twigungiye iruhande rw’abana bacu, ntidufite icyo kubaha. Ababarura abahombejwe n’imitingito bareba banyiri amazu twe twari dukodesheje ntibatureba, Leta nitwibuke".

Uwera Jeannine avuga ko mu gihe ubuzima bumeze nabi, abafite amafaranga muri Sacco ya Rugerero yahombye bayahabwa akaba arimo kubafasha.

Uwera avuga ko Leta yagombye korohereza abafite ibibanza bashaka kubaka kubikora badasabwe amafaranga y’ibyangombwa kugira ngo abantu bashobora kuba mu mahema no mu bisambu.

ActionAid Rwanda ku bufatanye na Minisiteri ishinzwe ibikorwa by’ubutabazi (MINEMA), yatanze ubufasha ku miryango yagizweho ingaruka n’imitingito.

Ubufasha bwatanzwe bugizwe n’ibiribwa, ibiryamirwa n’imyambaro, ibikoresho by’isuku n’igikoma cy’abana, byose bifite agaciro ka 14,652,000 z’Amafaranga y’u Rwanda.

Action Aid Rwanda yagobotse abagizweho ingaruka n’imitingito ibaha ibiribwa n’ibindi

Uwamariya Josephine uhagarariye action aid Rwanda avuga ko gufasha ababaye ari inshingano z’uwo muryango.

Ati "Nk’umuryango wita ku bahuye n’ibiza tugomba kubafasha, twatekereje ko abagizweho ingaruka n’imitingito bafashwa mu buzima bw’ibanze, mu byo kurya, isuku, kuryamira no kwiyorosa. Gusa twatekereje n’abana bakenera intungamubiri, imyenda n’isuku n’isukura ku bagore ndetse tubazanira n’imyenda bikingaho".

Uwamariya avuga ko batekereza ko imitingito yasize iheruheru abangirijwe, bityo ko bakeneye gufashwa byihuse.

Ati "Dutekereza ko iyi mitingito yabasize iheruheru, kandi bakeneye ubufasha byihutirwa ni yo mpamvu twazanye ibiribwa, ibyo kwambara, ibikenerwa mu isuku n’ibifasha abana".

Ubuyobozi bw’Akarere ka Rubavu bumaze gutangaza ko harimo gukorwa ibarura ku mazu yangijwe n’imitingito kandi amaze kiboneka ari 1800, abenshi bakaba barimo kurara mu mahema abandi bakarara mu bibanza baribwa n’imibu bakavuga ko bakeneye gufashwa mu buryo butandukanye.

Nzabonimpa Deogratias, umuyobozi w’Akarere ka Rubavu wungirije ushinzwe ubukungu n’iterambere, avuga ko imibare y’abakeneye gufashwa ikomeje kwiyongera ariko hagafashwa abababaye kurusha abandi.

Ahakorerwa imirimo itandukanye hamaze iminsi hafunze, ubuyobozi burasaba ko hafungurwa ubuzima bugakomeza

Mayor Habyarimana yabitangarije umunyamakuru wa Kigali Today, mu gihe abatuye umujyi wa Gisenyi basaba ko isoko ryafungura ndetse n’amabanki akongera gukora kuko hari ikibazo cy’amafaranga.

Ibyo biraterwa n’uko abafite amafaranga muri banki badashobora kuyabona kuko zafunze imiryango, na ho abashaka ibicuruzwa mu masoko manini ntibabibone kuko na yo yafunze ubwo ubuyobozi bwasabaga ko isoko rya Gisenyi ryaba rifunze kubera umutekano w’abarikoreramo.

Umuyobozi w’Akarere ka Rubavu avuga ko yamaze gusaba ubuyobozi bw’Umurenge kugenzura ko ntabyangijwe n’imitingito.

Agira ati "Nasabye ubuyobozi bw’Umurenge kugenzura niba ntabyangiritse cyangwa byagira ingaruka ku baturage ubundi bagafungura isoko".

Kuva ku itariki ya 27 Gicurasi 2021 ni bwo humvikanye imitingito myinshi iremereye ndetse yangiza amazu menshi n’ibikorwa remezo.

Ni umunsi abantu benshi bahisemo kuva muri Gisenyi bahungisha ababyeyi n’abana batinya ko hari inyubako zabagwaho, cyangwa bikagira ingaruka ku buzima bw’abana.

Icyakora uko iminsi yahise, ni ko imitingito yagiye igabanya ubukana, bituma bashobora kugira icyizere cyo gukomeza kuba muri Gisenyi.

Kubera ko isoko rifunze abantu bakorera hanze yaryo, ubuyobozi bukavuga ko rigomba guhita rifungurwa

Ubuyobozi bw’Akarere ka Rubavu butangaza ko ibikorwa byose byari byarafunze nk’amasoko, amabanki, amaguriro y’imiti, byongera gukora hamwe n’amavuriro atarangijwe n’umututu.

Mayor Habyarimana ati "Ku wa mbere nta na mokimwe kijyanye na banki kizaba kitari gukora, na ho isoko n’ubu bafite uburenganzira bwo gukora rwose. Reka mvugane na gitifu, ku mugoroba nari nabahaye amabwiriza y’uko bakora, niba hari ikibazo reka numve".

Akomeza avuga ko ibikorwa byemewe gusubira gukora, mu gihe ikirunga kikiruka basabaga abaturage kwirinda kujya mu mazu.

Ati "Ibikorwa byose byemerewe gukora, na ho kuri buri nyubako hari itsinda rizisura harebwa uko zihagaze bakagira inama umuturage, cyane iziri ku muhora, abantu bose basubire mu bikorwa".

Uwo muyobozi avuga kandi ko abaturage bagira uruhare mu masuku no gusana ibyangiritse kuko n’Akarere katangiye gusana ibikorwa remezo.

Ati "Abantu basubire mu bikorwa bitandukanye ndetse bagire uruhare mu gukora amasuku no gusana ibintu bitandukanye, nk’uko turimo gusana ibikorwa remezo".

Imitingito yatangiye kumvikana mu ijoro rya tariki ya 22 Gicurasi 2021 iherekeje iruka ry’ikirunga cya Nyiragongo, yasize yangije ibintu byinshi bitandukanye mu Karere ka Rubavu harimo ibikorwa remezo nk’amazi, imihanda, amashuri, ibitaro bya Gisenyi, sitasiyo ya lisansi n’inyubako zibarirwa mu 1500.

Inyubako zaangiritse kubera imitingito. hagiye kurebwa icyo kuzikorera

Ubukana bw’imitingito bwatumye serivisi zitandukanye zihagarara ndetse n’abantu benshi bahunga umujyi bitewe n’umututu wacitse mu mujyi wa Gisenyi, wavuye mu kirunga cya Nyiragongo kugera ku mazi y’ikiyaga cya Kivu, ndetse uko iminsi ishira na wo ugenda wiyongera, ukaba uzagira uruhare mu gusenya inyubako nyinshi ziri aho wanyuze.

Icyakora kuva imitingito yagabanya ubukana, ubuyobozi bw’akarere burimo gusaba abaturage gusubira mu bikorwa, umujyi wa Gisenyi ukongera ukaba nyabagendwa.

Aha ni ho hahoze amashyuza none yaburiwe irengero kubera umutingito

Ayo mazi azimiye nyuma y’uko ku wa 27 Gicurasi 2021 ku isaha ya saa saba n’iminota 54 z’ijoro, humvikanye umutingito mu Karere ka Rubavu ufite igipimo cya 3.9 wakubitiye aha isoko y’amashyuza iherereye.

Amafoto agarahaza ko amasoko y’amashyuza yamaze gukama, uretse ahogera abagore, nabwo amazi yaragabanutse ku buryo ntawajyamo uretse kuyavoma.

Kigali Today ivugana n’Umunyamabanga Nshyingwabikorwa w’Umurenge wa Nyamyumba, Kazendebe Hertien, yavuze ko amashyuza yagiye ariko hari ahandi babonye mu Kivu hacumba imyotsi bagakeka ko inzira yaba yayobeyemo.

Agira ati "Amazi yagiye ntiwabona ayo koga, kereka ahari isoko yogerwamo n’abagore ni ho haboneka makeya nabwo utakwicaramo, uretse kuyavoma".

Icyakora Kazendebe avuga ko hari ahandi bayakeka, ati "Ntitwabihamya niba isoko yimukiye mu mazi y’ikiyaga cya Kivu, kuko muri metero nkeya uvuye ahasanzwe isoko ubona imyotsi mu mazi y’Ikivu"

Amazi y’amashyuza mu Karere ka Rubavu aboneka ku nkombe z’ikiyaga cya Kivu ndetse agatemba ajya mu Kivu, ubu ahazwi nk’amasoko nta mazi ahari hamaze kuma.

Yari amazi akunzwe kandi benshi bavuga ko agira akamaro mu kuvura indwara z’imitsi. Ntiharamenyekana niba koko yimukiye mu kiyaga cya kivu, niba nta ngaruka bizagira cyangwa niba ashobora kuzagaruka.

Imodoka za Gisirikare n’iza Polisi ni zo zirimo gufasha izo mpunzi kugera ku mupaka

Kugera ku isaha ya saa yine n’igice (10h30) zo ku itariki ya 29 Gicurasi 2021, Abanyekongo babarirwa mu 1,200 ni bo bari bamaze kurira imodoka zibageza ku mupaka.

Muri izo mpunzi, abatashatse guhita bataha bajyanwe mu nkambi ya Busasamana irimo abandi banyekongo 800 bavuye muri territoire ya Nyiragongo.

Abagera ku 1,200 ni bo bazindutse basubira iwabo

Mu Rwanda habarurwa ko hinjiye Abanyekongo babarirwa mu bihumbi 14, ariko abajyanywe mu nkambi ntibarenga ibihumbi bitanu.

Ubuyobozi bw’Akarere ka Rubavu butangaza ko Abanyekongo bahungiye mu Rwanda bafashwa guhabwa ibiryamirwa n’ibyo kwiyorosa, ibiribwa, abarwayi bakavurwa hamwe n’imodoka zitwara impunzi.

Imitingito ikomeje kugabanya ubukana nk’uko bigaragazwa n’imibare, ku itariki 24 Gicurasi 2021 ni bwo humvikanye umutingito uri ku gipimo cya 5.1, ndetse iminsi yakurikiyeho yakomeje kwiyongera kugera ku gipimo cya 5.3, kugera tariki 28 Gicurasi 2021 imitingito yari itangiye kugabanya ubukana haboneka itarenza 3.9 kandi itaza buri kanya.

Imihanda yatangiye gusanwa muri Rubavu

Bimwe mu bikorwa byatangiye gusanywa byangiritse harimo imihanda ya kaburimbo, itiyo igemura amazi mu mujyi wa Gisenyi, wari ubayeho utayafite mu bice byinshi.

Guverineri Habitegeko avuga ko ibikorwa by’imihanda n’amazi byaciwe n’imitingito byatangiye gusanwa, icyakora umujyi wa Gisenyi uri mu bwihunge kuko isoko rigifunze, amazu y’ubucuruzi na yo amenshi arakinze ndetse ba nyirayo bavuye muri Gisenyi.

Amabanki menshi ntakora ku buryo n’abafite amafaranga bitaborohera kuyabona, kuko no kubyuma bimwe bitanga amafaranga ntayarimo.

Icyakora uko iminsi igenda hari icyizere ko abantu bashobora kugaruka mu mujyi, inzu zicuruza imiti zigakora kimwe n’amavuriro kuko mesnhi yafunze imiryango.

Ibitaro bya Gisenyi byo byimuriye serivisi mu bitaro bya Ruhengeri, Shyira na Rugerero, uretse serivisi z’abivuza bataha.

Kimwe mu bibazo bikomeye ni abahabwa serivisi zo kuyungurura amaraso na zo zitangirwa mu bitaro, abaganga bazikoresha bavuga ko batazibonye byagira ingaruka ku buzima bwabo.

Amazi n’ikirere bya Rubavu bimeze neza

Abinyujije ku rubuga rwa twitter, Guverineri Habitegeko yagize ati "Kugeza ubu impuguke za @REMA_Rwanda ziri @RubavuDistrict ziremeza ko umwuka n’amazi byo muri Rubavu biri ku bipimo bisanzwe . Measurements indicate there no air and water pollution in @RubavuDistrict".

Ayo ni amagambo ahumuriza abatuye mu Karere ka Rubavu bari babonye amakuru yatanzwe n’abayobozi b’Intara ya Kivu y’Amajyaruguru, bavuga ko ikirunga cya Nyiragongo kirimo kuruka binyuze mu nzira ziri munsi y’umujyi wa Goma kandi bikaba bishobora kugera mu kiyaga cya Kivu bikaba byagira ingaruka ku buzima bw’abantu.

Umwe mu mpugucye yavuganye na Kigali Today, avuga ko amakuru yatanzwe ku kiyaga cya Kivu n’amazi akirimo atari ukuri.

Agira ati "ubusanzwe ubudahungabana bw’ikiyaga cya Kivu bureberwa ku munyu uri mu mazi na ‘densité’, kandi turebye ku bipimo turimo dufata ntaho bitandukaniye n’ibisanzwe, bigaragaza ko nta mpinduka zabaye ku kiyaga cya Kivu".

Iyo mpugucye ivuga ko abantu bavuze ko amazi yaturikiye hafi y’uruganda rukora amashanyarazi mu mujyi wa Gisenyi mu mazi y’ikiyaga cya Kivu bitatewe na Gaz.

Ati "Hari abavuga ko amazi yabize, kandi hariya amazi yabiriye ntiharenze metero 50 uvuye ku nkombe, bivuze ko hariya hataba Gaz kuko iba mu kiyaga hagati. Icyo twatekereje ni uko ku nkombe habamo ibinogo, niba harabaye umutingito ibuye rinini rikava mu mwanya waryo rikitura hasi, byaba impamvu yo gusimbuka kw’amazi bitewe n’ingano yaryo".

Iyo mpugucye yagize icyo ivuga ku isambaza zabonetse zapfuye mu kiyaga cya Kivu, ati "Izapfuye ni indugu kandi ni amafi y’amanebwe, ntakunda urusaku, kuba harabaye urusaku rutunguranye, byatuma apfa kandi si menshi ni na ho byabaye nta handi".

Icyakora ikibazo cy’imitingito mu mujyi wa Gisenyi cyasize icyuho mu buzima bw’abawutuye harimo kuba itiyo nkuru ijyana amazi mu mujyi yaracitse abantu bakabura amazi meza, kuba isoko ryo mu mujyi rufunze, ifungwa rya banki, kwimurwa kwa serivisi zo mu buvuzi bitewe n’umututu waciwe n’iruka rya Nyiragongo, byatumye umujyi ukonja.

Bitangajwe mu gihe imitingito ikomeye imaze iminsi mu Karere ka Rubavu ikumvikana mu gihugu hose ikaba yarateye amazu gusenyuka, ndetse imihanda ikaba yarasadutse harimo n’iya kaburimbo, amazu menshi akaba yarasadutsemo imyobo mu bujyakuzimu.

Ubuyobozi bw’Ikigo cy’Igihugu gishinzwe Mine, Peteroli na Gaz buvuga ko ubushakashatsi bwagaragaje ko mu myaka 100 iri imbere imiterere y’ibirunga n’imitingito igaragara mu Karere ka Afurika y’Iburasirazuba, bizatuma ubutaka bw’ako gace burushaho kwitandukanya amazi ya Tanganyika akaba yahura n’ay’ikiyaga cya Kivu n’ikiyaga cya Lac Edouard.

Twagira Shema Yvan wo mu kigo gishinzwe Mine, Peteroli na Gaz avuga ko hakwiye kurebwa uko ishoramari rikorerwa bene aho hantu ryarushaho gukorwa hanateganywa uko bizaba bimeze icyo gihe ariko ridakwiye guhagarara kuko hakiri igihe mu gihe nibura buri mwaka uwo muhora ugenda wiyongeraho Santimetero eshatu.

Agira ati, “Nk’ubu turi gukuramo Gaz metane, turi no kureba uko twacukura peteroli iri mu Kivu, ni ngombwa ko byakorwa vuba hateganywa uko bizaba bimeze muri iyo myaka 100 iri imbere, hakwiye kongerwa ishoramari ritoya ku iteganyagihe ku buryo ibizajya biba bitazajya bitungura abantu ahubwo byaba bizwi ko ari ko bimeze ndetse bikanigishwa mu mashuri abantu bakabimenya”.

Si igihe cyo kwimura imijyi ya Goma na Rubavu

Impuguke zikomeza zigaragaza ko n’ubwo imijyi ya Goma na Rubavu iri mu hantu hari imitingito myinshi ikomeza guteza ibibazo, atari igihe cyo guhunga iyo mijyi kuko n’ubundi byagiye bibaho kandi bikomeye kurushaho.

Ingero ni izo mu mwaka wa 1933 ubwo Nyiragongo yarukaga igikoma cyayo gifite umuvuduko munini wa km 60, ngo cyongeye no kuruka mu 1942 no mu 1977 kandi ko ikirunga cyagiye kigaragaza ko kiruka mu myaka nibura 15 na 16 kuzamura kuba rero cyongeye kuruka nyuma y’imyaka 19 ngo nta kidasanzwe kuko ni ko gisanzwe kiruka.

Dr. Havugimana ushinzwe gufasha abahuye n’ibiza muri MINEMA avuga ko imyuka ya Soufre iri kunuka nk’ibinono by’inka batwitse, iba ari myinshi igihe ikirunga cyarutse kandi ishobora kwangiza imyanya y’ubuhumekero, abantu bakaba bagomba kwitwararika igihe batunganya imboga zo kurya zihinze hafi n’aho ikirunga cyarukiye ariko ngo nta burozi bukaze buba burimo.

Avuga ko nta kibazo cyo kuba imijyi ya Goma na Gisenyi yubatse hejuru y’umworera (Faille) uva muri Nyiragongo ugera mu kiyaga cya Kivu ku ruhande rw’u Rwanda, ariko ngo ibyo ntbivuze ko iyi mijyi yombi igiye guhita yangirika.

Dr. Twagira Shema Yvan amara impungenge abavuga ko ikiyaga cya Kivu gishobora guturika kubera iruka rya Nyiragongo n’imitingito ishobora gutuma Gaz yacyo iturika nk’uko byagenze muri Cameroun ubwo ibiyaga byaho byaturikaga.

Avuga ko ikiyaga cya Kivu kiri mu kibaya mu gihe ikiyaga cyigeze guturika muri Cameroon cyo cyari kiri hejuru y’ikirunga cyari cyarazimye kikaza kongera kuruka cya kiyaga kigashyuha kigaturikira mu baturage bari bazi ko cyazimye.
Avuga ko kuba ikirunga cyarutse bidashobora kubangamira peteroli na Gaz byo mu Kivu kuko ikirunga gifite aho kirukira mu gihe ikiyaga cya Kivu na cyo gifite aho giteretse.

Agira ati “Icyatumye abantu bagira ubwoba bwinshi ni imbuga nkoranyambaga ziri gutangaza ibintu birimo n’ibihuha, ariko ibyabaye muri 2002 byo byari bikomeye cyane kurusha imyaka yabanje kuko byo byamenywaga gusa n’abari hafi aho, ariko ubundi ntabwo ibyabaye bikomeye gusumbya ibyabanje”.

Amazu akomeje kwangirika: Ni gute imijyi ya Goma na Rubavu yakubakwamo?

Ku bijyanye no kuba hari amazu akomeje gusenyuka no kwiyasamo imitutu, ikigo kibishinzwe kiratangaza ko abo amazu yangiritse baba bavuyemo bakaba bacumbitse ahandi mu gihe harebwa uko amazu yasanwa cyangwa yakongera kubakwa hagendewe ku mabwiriza yo kubaka ahantu h’imitingito.

Ubushakashatsi bwigeze gukorwa ku bufatanye na Minisiteri ishinzwe ibikorwa by’ubutabazi (MINEMA) n’ikigo cy’igihugu gishinzwe imiturire (RHA) bugaragaza ko uduce twa Rubavu na Rusizi hakwiye kwitabwa ku kubaka hinjizwamo ubwirinzi bw’imitingito kugira ngo hirindwe ko amazu yajya asenyuka, byaba ngombwa hakanubakishwa imbaho kuko zo zitaremereye cyane.

Dr. Havugimana ukora muri MINEMA avuga ko mu bindi bihugu inzego z’igenamigambi ku myubakire zita cyane ku myubakire kubera imitingito, urugero akaba ari mu gihugu cy’u Buyapani aho bubaka amazu yoroshye ku buryo asenyukiye ku bantu ntacyo yabatwara cyane.

Ubu muri icyo gihugu hakaba hari ikoranabuhanga ryo kubaka amazu ku buryo iyo imitingito ibaye inzu idashobora gusenyuka ahubwo usanga yinyeganyeza yageraho igahagarara, ibyo na byo bikaba byarebwaho mu Rwanda igihe hagiye kubakwa amazu akomeye.

Umuyobozi mukuru wungirije w’ikigo cy’igihugu gishinzwe ibya Mine, Peteroli na Gaz, Dr.Twagira Shema, avuga ko ishoramari rikorerwa hafi y’ahari ikirunga cya Nyiragongo mu mijyi ya Goma na Rubavu ryakomeza abantu bitwararika imiterere yaho kuko ikirunga ntawakibuza kuruka.

Mu mujyi wa Gisenyi inzu zisaga 1,500 zangijwe n’imitingito

Ibyo ni ibitangazwa mu gihe abayobozi batandukanye bakomeje kureba uko abaturage bo muri ako karere kibasiwe n’imitingito yakomotse ku iruka rya Nyiragongo bafashwa, bityo ntihagire abahasiga ubuzima.

Guverineri w’Intara y’Iburengerazuba, Habitegeko François, yasabye abaturage kwirinda ibihuha kuko biri mu bibahungabanya kandi ubuyobozi burimo kugenzura ikiba mu kurinda ubuzima bwabo.

Agira ati "Mwirinde ibihuha hagize icyo tubona cyenda kubahungabanya kindi atari ingaruka z’imitingito turabamenyesha. Abafite amazu yagizweho ingaruka agashegeshwa n’imitingito barasabwa kuyavamo kugira ngo atabagwira".

Mu gitondo cyo ku itariki ya 28 Gicurasi 2021, imitingito iracyumvikana mu Karere ka Rubavu ariko harimo impinduka ugereranyijwe n’uko yatangiye, ikirunga cya Nyiragongo cyari cyahishwe n’ibyotsi cyongeye kugaragara kuva cyatangira ku ruka.

Umujyi wa Gisenyi urabonekamo abaturage, bavuga ko kuba ikirunga cyarutse kitazongera kuruka, abandi bakavuga ko bizeye ko Leta y’u Rwanda, hagize impinduka yababwira.

Uretse kuba hari abaterwa ubwoba n’imitingito, mu kirere cya Goma na Gisenyi ikirunga kikiruka habonetsemo imikungugu kandi igenda igira ingaruka ku buzima bw’abantu.

Impugucye z’ikigo cy’igihugu cyita ku Buzima (RBC) ziri mu Karere ka Rubavu zikaba zihamagarira abantu kwambara neza udupfukamunwa birinda ko iyo mikungugu yabinjiramo kuko igira ingaruka ku buzima bw’abantu.

Mu matsinda y’impugucye ari mu Karere ka Rubavu harimo n’abakorera ikigo cy’igihugu gishinzwe ibidukikije REMA, ndetse bafite akazi ko kugenzura ubudahungabana bw’ikiyaga cya Kivu, bavuga ko nta kibazo barabona ku mazi y’icyo kiyaga, mu gihe Abanyekongo babuzwa kuyanyuramo ngo badahumanywa n’imyuka ikirimo.

Abaturage bo mu mujyi wa Goma barimo guhunga iruka n’imitingito yatewe n’ikirunga cya Nyiragongo banyuze inzira zishoboka mu gukiza ubuzima bwabo.

Harabarurwa ibihumbi byahungiye mu Rwanda bakirwa ku mupaka berekezwa mu Murenge wa Rugerero, ahashyizwe inkambi yo kubacumbikira, abandi banyuze inzira ya Sake barangiwe n’Ubuyobozi bwa Kivu y’Amajyaruguru.

Inzira y’amazi ku bashaka kujya i Bukavu bangiwe kuyinyuramo kubera gutinya ko habaye kuruka kw’ikirunga cya Nyiragongo biciye mu nzira yo munsi y’ubutaka, byahinguka mu kiyaga cya kivu bikaba byahungabanya amatoni n’amatoni y’imyuka ikirimo ikagira ingaruka ku buzima bwabo.

Guverineri wa Kivu y’Amajyaruguru, LT Gen Constant Ndima, yasabye abaturage kunyura inzira ya kibumba bahungira i Rutshuru.

Umujyi wa Goma utuwe n’abaturage barenga miliyoni, kubabwira kuwuvamo byihuse akaba ari ihurizo rikomeye, gusa inzira ya Kibumba isaba abaturage kunyura aho Nyiragongo yatangiriye kuruka hazwi nka Kilimanyoka, mu bice bya Munigi.

Guverineri LT Gen Ndima, aboneka mu modoka aganiriza abaturage ababwiriza kunyura inzira ya Goma-Kibumba.

Ati "Tuje kubabwira ko inzira Goma- Kibumba ifunguye, turabona ko inzira ya Sake irimo abantu benshi, turabagira inama yo gukoresha iriya nzira kuko ari ahantu heza, kandi hari amazi n’amavuriro. Turi mu bikorwa byo kuva mu mujyi wa Goma kuko abaturage bagomba kuva mu mujyi bakajya mu bwihisho, twabonye imitingito myinshi, kandi hari inzira z’ibikorwa by’ikirunga zinyura munsi y’ubutaka.Tugomba kwirinda".

Nubwo abanyekongo bakomeje guhunga ndetse u Rwanda rukabakira, abanyagisenyi bakomeje gusabwa gutuza, ahubwo bakirinda ingaruka z’imitingito irimo ku mvikana cyane ndetse yagize uruhare mu gusenya amazu menshi.

Ikirunga kirekura ibyuka bihumanya

Kigali Today ivugana n’impuguke mu birebana n’ubuzima bw’imyanya y’ubuhumekero akaba n’umukozi w’ikigo cy’igihugu cyita ku buzima (RBC), Dr. Menelas Nkeshimana, avuga ko hari ibintu birimo gutumuka kandi birimo kugira ingaruka ku buzima bw’abantu.

Agira ati "Biraryana mu maso abantu bakibyiringira. Hari abasanganywe indwara nka Asima batangiye kugira ibibazo mu guhumeka nabi kubera ikirunga cyarutse. Ubu ni cyo gihe cyo kwibutsa abantu ko kwambara agapfukamunwa ari ngombwa cyane. Babishyiremo ingufu, birinde ingaruka z’igihe gito ariko banirinda ingaruka z’igihe kirekire".

Kwambara agapfukamunwa mu Rwanda bisanzwe bikorwa mu kwirinda Covid-19, ariko i Rubavu kukambara birimo kurinda imyuka yangiza ibihaha".

Dr. Nkeshimana avuga ko iyo mikungugu yireka mu bihaha bikaba byazamo inkovu, indwara zikunze gufata abantu bari ahantu hari ibintu bitumuka nk’abajya mu buvumo.

Ati "Bibagiraho ingaruka bigatuma ubushobozi bw’ibihaha bugenda bugabanuka. Uwarembye cyane ni wawundi ujya kuri oxygen ubuzima bwe bwose. Abaturage rero kwambara agapfukamunwa bagomba kubiha agaciro, ingaruka zigaragara bakazirinda ntibishyire mu byago kandi hari uburyo bwo kubyirinda nko kwambara agapfukamunwa neza".

Akomeza avuga ko abadashobora kubona agapfukamunwa hari ubuyobozi bubegereye kandi bwiteguye kubafasha.

Ati "Icyangombwa ni imyumvire, nibabanze bumve ko bagomba kwambara agapfukamunwa kugira ngo barinde ubuzima bwabo, batakambara kuko umuyobozi yabivuze, kugura agapfukamunwa ka 500 no kujya kuri oxygen imyaka 20 urumva igihenze ni ikihe?"

Uretse guhumeka imyuka iva mu kirunga cya Nyiragongo cyarutse iba irimo uburozi, Dr. Menelas Nkeshimana ahamagarira abantu kwirinda kurya imboga n’imbuto zitaronze neza n’amazi meza. Gusa avuga ko hataramenyekana uburyo ikirere cyanduyemo ngo hafatwe ingamba.

Inzego zitandukanye ziri mu Karere ka Rubavu mu kureba uburyo abaturage bahuye n’imitingito bafashwa.

Ikigo cy’igihugu gyita ku bidukikije (REMA) kirimo gufata ibipimo kugira ngo cyerekane ikigero amazi, ibimera n’ikirere byahumanyeho.

Ni ibintu byabayeho bitunguranye kandi bimara umwanya muto kuko uretse abari mu mazi na hafi yaho byabereye babibonye byahise birangira.

Uwitwa Issa ni umwe mu barobyi bakorera mu kiyaga cya Kivu babibonye. Avugana na Kigali Today, yasobanuye ko nta bantu benshi babibonye kuko uburobyi mu kiyaga cya Kivu bumaze iminsi buhagaze.

Yagize ati "Nanjye amashusho nayabonye ariko sinashoboye gusobanukirwa kuko tumaze iminsi tutajya mu mazi."

Mukasekuru Mathilde, Umuyobozi muri Minisiteri y’Ubuhinzi n’Ubworozi ushinzwe ubworozi bw’amafi avuga ko ayo makuru bayabonye bayahawe n’inzego z’umutekano zikorera mu mazi.

Ati "Umuyobozi wa Marine (ingabo zicunga umutekano wo mu mazi) ni we waduhaye amafoto, nyuma y’uko habaye umutingito mu mazi akazamuka ashyushye, hashize umwanya hahita haza isambaza hejuru zapfuye."

Mukasekuru avuga ko zitari nyinshi kuko zahise ziribwa n’inyoni n’abashakashatsi bagiye kureba izo bakoreraho Ubushakashatsi bareba icyazishe basanze zamazwe n’inyoni.

Imitingito ikomeje kubera mu Karere ka Rubavu no mu mujyi wa Goma igaragara ko ari myinshi kandi ivanzemo iyoroheje n’ikomeye irimo guteza ibyago mu mijyi yombi ibana nk’impanga.

Imirongo y’Abanyekongo ni miremire mu mujyi wa Gisenyi, bamwe baragenda n’amaguru, abandi bakagenda n’imodoka bitewe n’uko bifite.

Umunaniro n’agahinda biraboneka ku maso y’abahungiye mu Rwanda, harimo abana n’abagore buri wese afite icyo atekereza ko kizamuramira.

Imodoka zitwara abagenzi za kompanyi nka Ritco na Volcano zihagaze ku mupaka munini uhuza umujyi wa Goma na Gisenyi, kugira ngo zitware abagenzi bagana i Kigali, mu gihe abandi banyekongo benshi berekeje ahitwa i Sake, kuko babwiwe n’Ubuyobozi bwa Kivu y’Amajyaruguru ko bashobora kuharindirwa mu buryo bwizewe.

N’ubwo Abanyekongo bahungira mu Rwanda, mu mujyi wa Gisenyi na ho ubwoba ni bwose, ndetse ab’inkwakuzi bamaze guhungisha imiryango yabo bayerekeza aho bizeye bazabona umutekano.

Imitingito ikomeye kwiyongera ari ko yangiza kubera ubukana ifite, cyane ko iza buri kanya ari na byo bitera abantu ubwoba.

Minisitiri ushinzwe ibikorwa by’ubutabazi, Kayisire Marie Solange, yasabye abatuye muri metero 200 uturutse umututu kandi inzu zabo zatangiye kwangirika basabwe kuhava, abandi baturage bagirwa inama yo kwirinda kujya mu nzu igihe hari imitingito, kimwe no kujya munsi y’ibiti cyangwa ibiraro bitabagwira.

Muri RDC ubuyobozi bwa Kivu y’Amajyaruguru bwagaragaje abaturage bagomba kuva mu mujyi wa Goma, kubera batinya ko ikirunga kiramutse kirutse cyaza kunyura muri utwo duce, ubuyobozi buvuga ko hari n’ubwoba ko gishobora kugera mu kiyaga cya Kivu.

Ku mupaka munini, imodoka zagiye gutwara abambuka

Abatuye umujyi wa Gisenyi bakomeje kugira inkeke z’umututu waciwe n’imitingito ukomeje kugenda wiyongera, ndetse hakaba hari n’indi mitutu yatangiye kuboneka.

Leta y’u Rwanda ikaba yarateguye ahantu hagomba kwakira impunzi zizahunga iruka ry’ikirunga, aho bahisemo mu Murenge wa Rugerero hafi y’ishuri rya Inyemeramihigo.

I Goma bafite impungenge z’uko Nyiragongo yakongera kuruka

Mu itangazo ryasomwe na Guverineri Ndima mu ijoro ryakeye, yatangaje ko abaturage batuye mu bice bishobora kunyuramo igikoma cy’ikirunga cya Nyiragongo igihe yakongera kuruka, bahita batangira kwimurwa bakerekeza mu mujyi wa Sake kugira ngo bakize ubuzima bwabo.

Guverineri Ndima yavuze ko abaturage bagomba kwimurwa byihutirwa ari abatuye mu bice bya Majengo, Mabanga ya ruguru n’iy’amajyepfo, Virunga, Mujovu, Murara, Kahembe, Miteno, na Mapendo.

Inkuru y’ikinyamakuru Politico yatangajwe mu ma saa sita z’ijoro, ivuga ko Leta ishyiraho uburyo bwo guhungisha abaturage bo muri biriya bice kandi abaturage bagomba kwitwaza ibintu bike bishoboka kugira ngo buri wese yoroherwe n’urugendo hatagize usigara.

Muri iryo tangazo kandi Guverineri Ndima yavuze ko inzego z’umutekano zikomeza kurinda imitungo y’abaturge isigaye kandi igihe cyo kuzagaruka kikazatangazwa n’ubundi na Leta, abaturage bakaba basabwa gukomeza gukurikiranira hafi amakuru y’inzego za Leta ku biza gukurikiraho.

Agira ati “Abaturage bagomba kwitwaza ibintu bike bishoboka kugira ngo kubatwara byorohe, barasabwa gufunga neza amazu yabo, inzego z’umutekano zigakomeza kurinda aho abaturage baba bavuye berekeza mu mujyi wa Sake, gahunda yo kugaruka na yo izatangazwa na Leta”.

Guverineri Ndima avuga ko abahanga mu by’iruka ry’ibirunga batangaza ko mu mujyi wa Goma hagaragara ibimenyetso by’uko ikirunga gishobora kuruka biciye mu nzira isanzwe ku butaka cyangwa kikaba cyananyura mu kiyaga cya Kivu.

Yavuze ko Gaz yo mu kiyaga cya Kivu idatuje, bityo ko ibikoma by’ikirunga bihuye n’iyo Gaz n’indi myuka yo mu kirunga byateza ibyago bikomeye ku baturage.

Yavuze ko izo nzira zose zishobora guteza ibyago bikomeye ku batuye mu nzira cyaruka cyerekezamo, bityo ko abaturage bahita bimukira mu mujyi wa Sake kugira ngo harebwe igikurikiraho kandi ko amakuru akomeza kugezwa ku baturage ku mpinduka zaramuka zibaye.

Abaturage b’i Goma Leta igiye kubimura

Umuryango w’Abibumbye na wo wafashe umwanzuro wo kuvana umubare munini w’abakozi bawo mu mujyi wa Goma nyuma y’umutingito wakurikiye iruka ry’ikirunga cya Nyiragongo, wakomeje kwangiza ibintu kuva ku wa 22 Gicurasi 2021.

Ku wa 26 Gicurasi 2021 Leta y’u Rwanda yafashe umwanzuro wo kwimura abaturage bose batuye kuri 200m hirya no hino y’umututu wiyashishije kubera imitingito ikomeje mu mujyi wa Rubavu kugira ngo hirindwe impanuka zatezwa no gusenyuka kw’amazu akomeje kwangizwa n’imitingito, abagomba guhita bimuka akaba ari abo inzu zabo zatangiye kuzana imitutu.

Ibikorwa by’ubuvuzi mu bitaro bya Gisenyi na byo byimuriwe mu bindi bitaro n’ibigo nderabuzima, abaturage bakaba basabwa kwirinda kujya mu mazu yiyashije kugira ngo atabagwaho.

Minisitiri ushinzwe ibikorwa by’ubutabazi, Kayisire Marie Solange

Minisitiri Kayisire yabitangarije abanyamakuru mu Karere ka Rubavu kuri uyu wa Gatatu tariki 26 Gicurasi 2021, nyuma yo gusura ahangijwe n’imitingito no gukorana inama n’impugucye zamuherekeje kwiga ku bibazo byatewe n’imitingito.

Uwo muyobozi yasabye ko abantu bafite ubushobozi bahimuka na ho abatishoboye bakaza kuhimurwa, ahita atangaza ko hari isesengura ririmo gukorwa harebwa abagomba kwimuka, ndetse hakaba hari abanyeshuri biga mu bigo by’amashuri nka ESSA Gisenyi, bagomba kwimurwa na ho abarwayi n’abaganga bakorera mu bitaro bya Gisenyi hanyura umututu bakaba bamaze kwimurwa.

Imitingito ikomeje kwangiza

Minisitiri Kayisire yavuguruje amakuru avuga ko iruka ry’ibirunga ryageze mu kiyaga cya kivu, abyita ibihuha.

Yasabye Abanyarwanda cyane cyane abari mu Karere kegereye ahabereye imitingito, kwirinda ibihuha bagakurikira amakuru atangwa n’itangazamakuru.

Yasabye abantu bose bafite amazu ashobora kuba yangiritse kwirinda kuyararamo kubera kwanga ko habaye umutingito yabagwaho.

Yasabye kandi abantu kwirinda kujya munsi y’ibiti, munsi y’ibiraro ndetse avuga ko abafite imodoka na bo bagomba kuziparika ahitaruye zitagwirwa n’ibiti cyangwa inzu ndende.

Minisitiri Kayisire yasuye kandi impunzi z’Abanyekongo bahungiye mu Rwanda, avuga ko n’abandi bashobora kuza u Rwanda rwiteguye kubakira.

Mu karere ka Rubavu imitingito imaze kwangiza inzu 859 na ho izimaze gusenyuka i Burundi ni 267.

Iyi nyubako yangijwe n’umutingito

Abaturage babibonye biba bavuga ko batunguwe no kubona inzu bari bazi ko ikomeye umutingito uba igahita yangirika.

Iyo nzu yangiritse isanzwe ikorerwamo n’ivuriro rya la Croix du Sud "kwa Nyirinkwaya" hamwe n’iguriro. Ababibonye bavuga ko nta muntu wayikomerekeyemo ariko bigaragara ko kongera kuyijyamo bihangayikishije.

Minisitiri Kayisire Marie Solange uyobora Minisiteri ishinzwe ubutabazi hamwe n’itsinda rinini rihuriweho n’impugucye mu buzima, ubumwe bw’ibirunga n’amabuye y’agaciro, ibidukikije, barimo barabera icyakorwa kugira ngo abaturage bugarijwe n’ibibazo bikomoka kuri iyo mitingito bafashwe.

Mu ishuri rya ESSA Gisenyi yasuye abanyeshuri baryigamo bahungabanyijwe n’imitingito yaciye inzira ya rift valley mu kigo cyabo, yabasezeranyije ko harimo kwigwa aho bajyanwa bakiga bashyize umutima hamwe, ariko abasaba gukomeza kwambara agapfukamunwa neza kuko karimo kurinda imyuka yarekuwe n’ikirunga, ariko bagakomeza no kwirinda icyorezo cya Covid-19.

Minisitiri Kayisire yasuye inyubako z’ibitaro bya Gisenyi zashegeshwe n’imitingito, ndetse akomeza urugendo mu nkambi y’impunzi z’abanyecongo 654 bahungiye mu Rwanda imitingito n’ingaruka zayo bikomeje kwiyongera.

Ubuyobozi bw’Akarere ka Rubavu ntiburatangaza ibimaze kwangizwa n’imitingito yatangiye kumvikana mu Karere ka Rubavu ku va ku itariki 22 Gicurasi 2021.

Kubona imodoka ziva i Rubavu zijya i Kigali byabaye ingorabahizi

Kuva muri uwo mujyi kw’abantu ku bwinsi biraterwa n’imitingito yaherekeje iruka ry’ikirunga cya Nyiragongo isenya inzu z’abaturage n’ibindi bikorwa remezo kandi n’ubu ikaba itaratuza, abantu rero bahisemo kuba bavuye muri uwo mujyi.

Umunyamakuru wa Kigali Today wageze muri Gare ya Gisenyi saa yine z’amanywa, yasanze abantu benshi barimo gushaka imodoka.

Imodoka za twegerane zirimo guca Amafaranga y’u Rwanda 5,000 ndetse abagenzi bari bahari ejo bavuga ko uko amasaha akura ari ko ibiciro byiyongera kubera ubwinshi bw’abakeneye kugenda.

Icyakora imodoka z’ama Agence asanzwe atwra abagenzi ibiciro ntibyahindutse n’ubwo zibonwa n’umugabo zigasiba undi.

Uwimana Solange wari waje wabonye itike ya saa yine, avuga ko yayiguze n’undi wahazindukiye, itike ijya Kigali iragura amafaranga y’u Rwanda nk’uko bisanzwe 3,350. Gusa ku isaha ya saa yine imodoka zijya i Kigali kuri agence batangaga amatike ya saa cyenda (15h30).

Imodoka zitwara abagenzi bajya i Kigali zirimo kugenda zuzuye 100% kuko abashaka kugenda ari benshi.

Ubusanzwe imodoka z’abigenga zitwara abagenzi (Taxi voiture) zaka amadolari y’Amerika 80 (Hafi ibihumbi 80 by’Amafaranga y’u Rwanda), gusa ubu biragoye kuzibona kuko abafite izo modoka na bo barimo gutwara imiryango yabo.

Mu mujyi wa Gisenyi imitingito ikomeje kumvikana ari ko yangiza ibintu byinshi, abantu na bo bakomeje kwibaza igihe bishobora kuzarangirira.

Imihanda imwe yafunzwe kuko yangijwe n’imitingito

Ibyo birajyana no gusaba abakorera mu nyubako zo mu mujyi na bo gufunga kubera ubukana bw’imitingito ikomeje kwangiza ibintu harimo inyubako n’imihanda, imwe muri yo na yo ikaba ifunze.

Inyubako ndende zimwe zatangiye kwangirika bikomeye ibice bimwe bigahanuka, abantu bamwe bakaba batangiye kuva mu mujyi wa Gisenyi wibasiwe n’imitingito.

Ukwiyasa k’umurongo ukora ikizwi nka ‘rift valley’, urimo kugenda hiyongera ndetse hakaboneka n’ahandi hashya hiyasa.

Uretse gusaba abaturage kuva mu nyubako bakoreramo, ishuri rya TTC Gacuba abanyeshuri baryigamo hari amakuru yo kubimura kuko ryegeranye n’uwo mututu wiyashije.

Abarwayi mu bitaro bya Gisenyi na byo binyuramo uwo mututu na bo bimuriwe mu bindi bitaro kuko inyubako zabyo zangijwe n’uwo mututu, uturuka mu kirunga cya Nyiragongo, ugaca ahitwa mu byahi hafi ya kaminuza ya UTB, ugakomeza unyura hafi ya Paruwasi Muhato, ugaca ahitwa Majengo n’ishuri rya TTC Gacuba, ukamanuka mu mazu y’abaturage kugera mu mujyi wa Gisenyi ahazwi nko mu Gacuriro hagurishirizwa ibikoresho byo kubaka bishaje.

Uwo murongo ukomeza kwiyongera unyura mu nyubako ziri munsi ya Banki ya Kigali mu mujyi ndetse bikambukiranya imihanda ya kaburimbo bikomeza ahari inzu izwi nka Auberge na sitatiyo ya esanse ya Kobil.

Ukomereza kandi mu nyubako zibika ibicuruzwa, ukambukiranya umuhanda wa kaburimbo ujya kuri Paruwasi Stella n’Akarere ka Rubavu, ugakomeza mu ishuri rya ESSA Gisenyi no mu bitaro bya Gisenyi.

Mu bindi bikorwa byafunze imiryango harimo Banki izwi nka COGEBANK, ishami rya Rubavu, itangazo iyo Banki yaraye isohoye rikavuga ko izongera gukora ari uko imitingito irangiye, abakiriya bayo basabwa kugana andi mashami.

Ikindi kibazo cyatewe n’iyo mitingito ni uko itiyo nini ijyana amazi mu mujyi wa Gisenyi yaraye icitse.

Ubuyobozi bw’AKarere ka Rubavu busaba abaturiye uyu mututu kutaba mu mazu mu gihe imitingito irimo kwiyongera hirindwa ko yabagwaho.

Icyakora aho uwo mututu munini unyura harimo kugenda hashamikiraho indi mitutu iboneka kandi igenda yaguka uko imitingito yiyongera.

Abarwayi bo mu bitaro bya Gisenyi bimuriwe mu bindi bitaro kugira ngo ubuzima bwabo bukomeze kwitabwaho nta nkomyi z’imitingito

Abarwayi 44 ni bo bagejejwe mu bitaro bikuru bya Ruhengeri. Bari batwawe mu modoka zo mu bwoko bwa Coaster, zahabagejeje mu byiciro hagati ya saa kumi n’imwe na saa yine z’ijoro ryo ku wa Kabiri tariki 25 Gicurasi 2021, kugira ngo abe ari ho bakomeza gukurikiranirwa.

Ni icyemezo cyafashwe nyuma y’aho imitingito ikomeje kumvikana yibasiriye Akarere ka Rubavu, ari na ho bari barwariye. Kugeza ubu iyo mitingito ikomeje kumvikana ikaba irimo kwangiza ibikorwa remezo nk’imihanda, inzu z’abaturage, amashuri n’ibindi.

Umwe mu barwayi waganiriye na Kigali Today akimara kugezwa mu bitaro bikuru bya Ruhengeri yagize ati “Aho twari turwariye i Rubavu, umurwayi yabaga aryamye ku gitanda umutima utari hamwe, ushikagurika, bitewe n’imitingito ifite ubukana ikubita buri kanya. Wakubitaga turyamye mu igorofa ry’ibitaro, ngashaka iyo ndigitira nkahabura. Iki gikorwa Ubuyobozi bw’Igihugu cyacu bukoze, cyo kutwimurira mu bindi bitaro ni cyiza kuko nibura turagira agahenge. Muri macye baraturokoye”.

Undi mubyeyi uheruka kwibaruka umwana w’uruhinja rw’amezi arindwi, yagize ati “Nkimara kubyara umwana bahise bamushyira mu cyuma (Couveuse), ubu amazemo hafi icyumweru. Imitingito yakubitanga ubwoba bukantaha nibwira ko ibyo byuma bicomoka cyangwa se bikaba byamugiraho izindi ngaruka. Nkimara kumva ko bagiye kutujyana kuvurirwa ahandi nibwo niruhukije. Iki gikorwa turacyishimiye”.

Umuyobozi w’Ibitaro bikuru bya Ruhengeri, Dr Muhire Philibert, avuga ko muri ibi bihe biteguye gukora mu buryo budasanzwe, mu kurushaho gukurikirana ubuzima bw’aba barwayi baje biyongera ku bandi basanzwe bakurikiranwa n’ibi bitaro.

Yagize ati “Abarwayi twakiriye twiteguye gukora ibishoboka byose ngo dukurikirane ubuzima bwabo. Abanganga n’abaforomo nk’abantu bafite inshingano zo gutabara ubizima bw’abarwayi, byabaye ngombwa ko bose barara mu kazi muri iri joro, ubu bose barimo gukora bunganira abaraye ku izamu, kugira ngo serivisi zijyanye no kwakira abarwayi zihute kandi zirusheho kugenda neza”.

Uyu muyobozi akomeza avuga ko ubushobozi bwaba ubw’ibikoresho n’ibindi byangombwa nkenerwa, bituma ibitaro bibasha guhangana n’ibibazo by’ibihe bidasanzwe buhari. Bityo ko ntawe ukwiye kugira impungenge z’uko abarwayi bari bwitabweho.

Yagize ati “Igihugu cyacu gihora cyiteguye gutabara abantu bari mu kaga nk’ibi byabaye. Iki gikorwa ni urugero cyane cyane kuri twe nk’abaganga, ruduha umukoro wo gukora mu buryo budasanzwe, twakira abarwayi mu bwitange bwose bushoboka kandi neza. Turakomeza gukurikirana ubuzima bwabo, tunamenye ibibazo byihariye bafite, atari iby’uburwayi gusa, ahubwo n’iby’imibereho, hanyuma dukorane n’inzego bireba, tubiteho by’umwihariko”.

Mu barwayi bakiriwe mu bitaro bikuru bya Ruhengeri, barimo ababyeyi babyaye bari kwakirirwa muri serivisi ya Matérnité, abarwayi b’inkomere biganjemo abafite imvune z’amagufwa bakiriwe muri serivisi ya Chirurgie abana bakuru barwaye bakiriwe muri serivisi ya Pédiatrie, n’impinja zavukanye ibibazo bitandukanye zikurikiranirwa muri serivisi ya Néonatologie.

Mu bandi bari barwariye mu bitaro bya Gisenyi barimo abimuriwe mu Bitaro bya Shyira no ku kigo nderabuzima cya Rugerero.

Umubare w’abamaze kumenyekana bagizweho ingaruka no kuruka kwa Nyiragongo nturashyirwa ahagaragara ariko imwe mu mibare y’agateganyo yari imaze kumenyekana kuri uyu wa Kabiri tariki 25 Gicurasi 2021 igarahaza ko abantu 32 bapfuye.

N’ubwo imibare ishobora kwiyongera, abamaze kumenyekana harimo
7 batwitswe n’amazuku ubwo ikirunga cyarukaga. Batanu bishwe n’imyotsi iva mu mazuku yarutswe n’ikirunga, naho 14 baguye mu mpanuka z’imodoka ahitwa Rwasama, bandi 4 ni abagororwa bazize umubyigano bashaka gutoroka gereza ya Munzenze ubwo ikirunga cyarimo kuruka, mu gihe babiri bishwe n’ibiryo bariye byahumanye.

Ingaruka z’iruka ry’ikirunga zishobora gukomeza kwiyongera mu gihe abaturage badafashe ingamba zo kwirinda harimo kujya hejuru y’amazuku akigurumana mu nda zayo.

Hari abaturage benshi bajya kuyarebana no kuyotsamo imyaka bishimira uyu muriro nyamara ukaba ushobora kubatwara ubuzima.

Jean Claude Kawaya, umuyobozi wa sosiyete sivile ya territoire ya Nyiragongo avuga ko iruka ry’ikirunga cya Nyiragongo ryageze mu dusantere twa Bugarura, Buhima, Janga, Bushara, Kasenyi, Kabaya, Ngangi 1, Ngangi 2, Rukoko, na Byungo.

Uyu muyobozi avuga ko ubwo bagenzuraga ibyangiritse basanze hari abaturage bahiriye mu mazu batabashije guhunga, abazize impanuka, n’imyuka ihumanye.

Akomeza avuga ko hari ibikorwa remezo byangiritse aho iruka ryanyuze harimo, inyubako z’abaturage, amashuri, ibikorwa remezo by’amajyambere nk’umuhanda uhuza Goma na Rutshuru, imiyoboro y’amazi n’amashanyarazi hamwe n’amatungo atabashije guhungishwa.

Uyu mututu ngo uzakomeza ku buryo uzashyira igice kimwe cya Afurika ku ruhande bigatandukanywa n’inyanja

Dr Rwabuhungu ari mu bagaragaza ko igice cya Afurika y’Iburasirazuba kirimo kwiyomora kuri uyu mugabane wose, ku buryo kizaba ikirwa cyangwa umugabane ukwawo mu myaka myinshi iri imbere, nk’uko yabitangarije mu kiganiro yahaye Radio Rwanda kuri uyu wa Kabiri tariki 25 Gicurasi 2021.

Umututu utandukanya ibice byombi bya Afurika urahera kuri Somaliya ukarangirira muri Mozambique, aho bigaragara ko ibihugu nka Somaliya, igice kimwe cya Etiyopiya, Kenya, Uganda, Rwanda, Burundi, Tanzania hamwe n’igice cya Mozambique, bizaba ari ikirwa gitandukanye n’umugabane wa Afurika.

Ifoto igaragaza uko bizaba bimeze. Icyakora si vuba aha ahubwo bizafata imyaka myinshi cyane ibarirwa muri miliyoni (Ifoto: Horn of Africa)

Dr Rwabuhungu avuga ko mu myaka ibarirwa muri za miliyoni iri imbere, hagati y’u Rwanda na Congo (kimwe n’ahandi harimo gucika umututu), hazaba hari inyanja nini.

Yagize ati "Umugabane wa Afurika urimo gucika, hari igitare cya Somali kirimo gutandukana n’igitare (igice) gisigaye cya Afurika, u Rwanda na Congo turimo turatandukana, hagati hazavuka inyanja nyuma ya miliyoni y’imyaka".

Uwo mututu usenya icyo usanze cyose mu nzira yawo

Umunyamakuru wa Kigali Today uri i Rubavu, Sylidio Sebuharara yagaragaje ko umututu wa Rift Valley watewe n’imitingito ya buri kanya, ukomeje kwiyongera ukaba wageze n’ubwo usatura inzu n’imihanda.

Sebuharara agira ati "Ni umututu umwe ukomeje nk’uko umuntu yaca umuhanda cyangwa inzira, kandi inzu bihuye yaba irimo isima imeze ite uwo mututu urayisatura ndetse ntunakangwa n’umuhanda wa kaburimbo".

Mu nzu nyinshi zasenyutse kubera kunyurwamo n’uwo mututu wa Rift Valley harimo n’ibitaro bya Gisenyi, inyubako z’amashuri ya ESA ndetse n’inzu nyinshi z’abaturage.

Impuguke mu bumenyi bw’isi zikomeza zivuga ko iyo mitingito ijyana no kuruka kw’ibirunga, izajya ikomeza kubaho i Goma na Rubavu mu gihe ibitare bibiri Afurika iteretseho (Somali na Afurika nini) bitarasaduka neza ngo bitandukane.

Kwisegura:

Ibyari byatangajwe ku musozo by’icyo Dr Rwabuhungu asaba inzego gukora kuri iki kibazo twasanze atarabivuze nk’uko byari byanditswe mu nkuru, duhitamo kubikuraho.

Hari n’aho twari twatangaje ko mu byasenyutse harimo na Hotel Nyiramacibiri, ntabwo ari byo, ntiyasenyutse.

Hotel Nyiramacibiri biragaragara ko ntacyo yabaye

Inzu zirimo kuriduka ari nyinshi bitera ubwoba abaturage batangira guhunga umujyi wa Gisenyi

Ibi birimo guterwa n’uko umurongo (umututu) ejo waciwe n’imitingito urimo gukomeza kwiyongera, waguka uko imitingito irimo kugenda yongera ubukana.

Amaduka yafunze, amashuri amwe n’amawe yafunze abana barataha, abatega ngo bave mu mujyi wa Gisenyi bahagaze ku mihanda ariko imodoka zabuze kubera ubwishi bw’abagenzi.

Amazu menshi mu mujyi wa Gisenyi yazanye imitutu, biboneka ko hari agomba kujya hasi, mu gihe ayubatse ahari umurongo waciwe n’umutingito w’ejo, amwe yatangiye kuriduka.

Winifred ni umwe mu baturage batuye mu Byahi, inzu atuyemo yitse ajya gucumbikirwa n’abaturanyi.

Barimo kuva mu ngo zabo

Imihanda ikomeje gucikamo imitutu, Polisi y’u Rwanda ikaba yafunze imihanda imwe n’imwe mu mujyi kugira ngo inyubako ziyashije kubera gushegeshwa n’imitingito zitagwa ku bantu cyangwa imihanda yariduka ntigire abo itwara ubuzima.

Imirongo yaciwe ejo n’umutingito, irimo kwaguka biboneka ko imitingito ikomeye niyoroshye irimo kungikanya, ishobora gusiga umwonga munini utandukanya ibice bibiri.

Imihanda imwe yafunzwe kuko yangijwe n’imitingito

Ubuyobozi bwatangiye gusaba abantu kuva mu nzu, ndetse bubabuza kunyura ahacitse uwo murongo ugenda waguka uko amasaha akura kuko imitingito itarimo gutuza.

Ubuyobozi kandi burimo kubwira Abacururiza n’abahahira mu isoko rya Gisenyi kurivamo rigafungwa mu rwego rwo kwirinda impanuka zishobora guterwa n’imitingito.

Inzu zikomeje kuriduka

UNICEF irabitangaza mu gihe yashyizeho itsinda rifasha abana n’ababyeyi batandukanye gusubirana, aho abana 150 barimo gushaka imiryango yabo naho abana 170 bakaba bashakishwa n’ababyeyi bababuze.

UNICEF ivuga ko ibura ry’abana ryatewe n’uko ababyeyi n’abana batatanye mu guhunga bamwe bakerekeza mu Rwanda, mu gihe abandi berekeje mu bice bya Sake.

Ubuyobozi bwa UNICEF bugira buti "Abantu barenga 5,000 bambutse umupaka binjira mu Rwanda bava i Goma, abandi bagera ku 25,000 bavanywe mu byabo bahungira i Sake, mu birometero 25 mu Majyaruguru y’Iburengerazuba bwa Goma, nyamara, abantu benshi barimo kugenda buhoro buhoro basubira mu rugo kuva amazuku yahagarara gutemba ari ko bashakisha n’imiryango yabo."

Itangazo rya UNICEF rivuga ko hariho impungenge ku bantu babarirwa mu magana basubira mu ngo zabo bagasanga amazu yangiritse, nta mazi n’amashanyarazi.

UNICEF ivuga ko abana benshi mu bice byegereye ikibuga cy’indege cya Goma basigaye batagira aho baba kandi batishoboye mu duce twangijwe n’iruka ry’ibirunga turimo Buhene, Kibati na kilimanyoka.

Mu duce tumwe kubona aho ukura umuriro wa telefoni ngendanwa ni ihurizo aho bamwe batangiye akazi ko gushyiraho utumoteri tubafasha kubona umuriro.

N’ubwo ubuyobozi bw’Intara ya Kivu y’Amajyaruguru bwasabye ko abaturage bari batuye ahangijwe n’amazuku bajyanwa gucumbikirwa ahandi, ntiharamenyekana ingo zangijwe n’aya mazuku yanyuze mu bice bitandukanye agatwika ibyo asanze kugeza aho umuntu adashobora kumenya aho yari atuye.

Leta ya RDC yashyizeho itsinda ririmo n’abaminisitiri batandukanye ryavuye i Kinshasa kugenzura ibyangiritse no gufasha abaturage bahuye n’iruka ry’ibirunga.

Abahunze babaye bacumbikiwe mu rusengero

Abahungiye mu Rwanda nu gitondo cyo kuri uyu wa Kabiri tariki 25 Gicurasi 2021, bavuga ko bafite ubwoba bw’imyotsi ikomeje kuva mu mazuku atarazima neza, bigatuma abayegereye babura ubuzima.

Umwe mu bageze mu Rwanda avuga ko abantu icyenda bamaze kwicwa no kubura umwuka "oxygen" bitewe n’ayo mazuku bakuma.

Kuva kuu itariki ya 23 ikirunga cya Nyiragongo kikimara kuruka, bamwe mu baturage ba Congo bagaragaye bifotoreza ku mazuku bayagenda hejuru, abandi bayotsamo ibigori.

Icyakora ahazwi nka Kilimanyoka aho amazuku yapfupfunutse agaca umuhanda wa kaburimbo uhuza umujyi wa Goma na Rutshuru, mu bantu bahifotoreje habonetse amafoto y’abahaguye bishwe n’iyo myuka ikizamuka.

Kigali Today ivugana na Mvano Etienne, umunyamabanga Nshingwabikorwa w’Umurenge wa Busasamana, avuga ko abahunga ngo batinya imyotsi irimo kuva mu mazuku.

Ati "Kubera imvura yatangiye kugwa imyotsi ikazamuka muri biriya byarutswe n’ikirunga, baravuga ko ababihumeka bapfa, tukaba twabakiriye biyongera ku basanzwe".

Abageze mu Rwanda biyongereye ku bandi 354 bamaze kugezwa muri uwo murenge wa Busasamana.

Ubu bacumbikiwe mu rusengero mu gihe hategerejwe ko basubira iwabo, cyangwa bikemezwa ko bazaguma mu Rwanda bagashakirwa aho bajyanwa.

Minisitiri w’Ubutegetsi bw’Igihugu, Jean Marie Vianney Gatabazi, avuga ko inzego zitandukanye mu Rwanda zikorana kugira ngo zifashe Abanyecongo bahuye n’iruka ry’ibirunga, bakaba bahungiye mu Rwanda.

I Rubavu inzu zikomeje gusenyuka

Inzu zimwe zatangiye kugwa, abana bamwe ku mashuri barataha mu gihe abarimo kwiga bigira hanze batinya ko inyubako zabagwira kubera imitingito.

Imitingito yumvikana nk’ikubitira munsi y’ubutaka bwa Gisenyi, kuko igaragara nk’ifite ubukana kandi iri ku bipimo bya gatatu na kabiri.

Ikigo cy’igihugu gishinzwe gucunga imitingito kigaragaza ko imitingito aho yakubitiye, yahakubitiye n’ubukana bwinshi.

Amazu menshi yagize imitutu kandi uko imitingito yiyongera ni ko no kwangirika kw’ibintu kwiyongera.

Ejo Minisitiri Gatabazi yasuye ahangijwe n’umutingito wa 5.1 avuga ko hari impugucye zaje kubikurikirana.

Abaturage basabwe kwirinda kuguma mu nzu zabo kugira ngo zitabagwaho, Minisiteri ishinzwe gucunga ibiza ikaba ikomeje gutanga inama z’uko abantu bagomba kwitwara kugira ngo hatagira abahasiga ubuzima.

Abaturage batangiye kujya kureba ibyabo byangiritse birimo n’amazu yasenyutse nyuma y’iruka ry’ikirunga cya Nyiragongo, benshi baka bagerageje gushakisha abo mu miryango yabo babuze.

Ku wa Gatandatu tariki 22 Gicurasi 2021 nibwo ikirere cy’aho Nyiragongo iherereye cyahindutse umutuku maze mu masaha make gitangira gusohora ibyotsi bidasanzwe, mu kanya gato gitangira kuruka, cyohereza igikoma cy’umuriro cyahagarariye hafi ya Goma, umujyi utuwe na miliyoni ebyiri ukaba uherereye mu majyepfo y’icyo kirunga.

Kugeza ku wa Mbere tariki 24 Gicurasi 2021 habarurwaga abantu 15 bapfuye, ariko umubare ushobora kwiyongera kuko abayobozi bari bategereje kugera mu turere twibasiwe cyane, dore ko byari bikigoranye bitewe n’uko hataramenyekana niba ikirunga cyahagaritse kuruka.

Icyenda mu bapfuye bazize impanuka yo mu muhanda mu mubyigano n’umuvundo mu gihe abantu bahungaga.

Ku cyumweru tariki 23 Gicurasi 2021, umuvugizi wa Guverinoma ya Congo, Patrick Muyaya, yatangaje ko abandi bane bishwe ubwo bageragezaga gutoroka gereza mu gihe babiri batwitswe n’ikirunga kugeza bapfuye.

Ishami ry’Umuryango w’Abibumbye ryita ku bana (UNICEF) rigaragaza impungenge z’uko abana barenga 170 bashobora kuburirwa irengero naho abandi 150 bakaba bagaragaye baburanye n’imiryango yabo.

Igikoma kigizwe n’amazuku kiva mu kirunga mu gihe cyo kuruka cyashegeshe bikomeye ibice by’Akarere ka Buhene, mu nkengero za Goma, gitaba inzu nyinshi harimo into n’inini, aho bivugwa ko kongera kuzubaka bishobora gufata amezi menshi.

Innocent Bahala Shamavu yabwiye ibiro ntaramakuru by’Abanyamerika, Associated Press, ati: "Amazu menshi mu byaro byo mu gace ka Buhene yatwitswe ndetse anyurwaho n’igikoma cy’amabuye y’umuriro asohoka mu kirunga."

Amazuku y’ikirunga yatwitse ndetse arengera amazu y’abaturage

Ahandi, aya mabuye yirema mu gikoma gishyushye ava mu kirunga yafunze umuhanda umwe uhuza Goma n’umujyi wa Beni. Byafunze inzira y’ingenzi yari kwifashishwa mu kugeza ubutabazi ku bice byibasiwe. Icyakora, ikibuga cy’indege cy’umujyi ntikigeze kigerwaho, n’ubwo hari amakuru yari yavuzwe mbere ko hari igice cy’ikibuga cyahiye.

Ikirunga giherereye mu birometero 10 uvuye i Goma, giheruka kuruka mu mwaka wa 2002, gihitana abantu 250 gisiga abantu ibihumbi 120 batagira aho baba.

Abaturage batangiye kuva mu ngo zabo na mbere y’uko Guverinoma itangaza gahunda yo kwimuka. Ikirunga kigitangira kuruka mu masaha y’ijoro, abantu benshi bagaragaye barimo bahunga n’amaguru hamwe na matela n’ibindi bintu.

Icyakora ku Cyumweru bamwe batangiye gusubira iwabo muri Congo n’ubwo hari abandi bagumye mu Rwanda batinya ko imitingito ishobora guteza ibindi bibazo bikomeye, dore ko bari bafite n’impungenge z’uko ikirunga gishobora kongera kikaruka.

Umuriro wa Nyiragongo wari ufite ubukana

Ni imyanzuro yafashwe mu nama yabaye ku itariki 23 Gicurasi, yahuje Guverineri w’Intara ya Kivu y’Amajyaruguru, ubuyobozi bwa Monusco hamwe n’imiryango itandukanye itabara imbabare ikorera mu majyaruguru ya Kivu, muri Repubulika Iharanira Demokarasi ya Congo.

Imwe mu myanzuro yafashe irimo gufasha abaturage no kubarinda muri iki gihe cy’ibibazo, ari na yo mpamvu amashuri yabaye afunzwe kugira ngo ababyeyi bagumane n’abana babo, kuko ngo imitingito ikomeje kwiyongera ikaba yateza izindi mpanuka.

Guverineri Ngima yategetse ko ikigo gishinzwe iby’ibirunga cya Goma (OVG) gikomeza kugenzura uko iruka ry’icyo kirunga ryagenze kugira ngo hamenyekane umuvuduko n’icyerekezo cy’igikoma.

Yasabye ko ibikorwa byo kwimura abantu bari mu gace kahuye n’iruka ry’ikirunga bikomeza, bakajya ahantu hizewe.

Iyo myanzuro isaba ko kwimura abaturage bihera ku batishoboye, barimo abagore batwite, abana, abarwayi n’abasaza.

Ikindi cyasabwe muri iyo nama ni ukongera umutekano aho abaturage bimuwe bagiye gucumbikirwa ndetse no mu nzira banyuramo.

Muri iyo nama batangajwe ko abantu 13 ari bo bapfuye bari mu bikorwa byo guhunga, harimo icyenda (9) bazize impanuka na ho bane bapfa barimo guhunga.

Icyenda bazize impanuka zo mu muhanda na ho abagororwa bane bapfa barimo kubyigana bashaka gusohoka muri gereza ya Munzenze.

Mu Murenge wa Busasamana mu Karere ka Rubavu abantu 110 bahageze ku mugoroba tariki ya 23 Gicurasi 2021 bavuga ko batewe impungenge n’imitingito ikomeje kwiyongera.

Aya makuru yemejwe n’Umunyamabanga Nshingwabikorwa w’Umurenge wa Busasamana wabakiriye, aba bakaba baje nyuma y’uko abandi 600 uyu murenge wari wakiriye bari basubiye iwabo bavuga ko iruka ry’ikirunga ryarangiye. Icyakora bamwe bumvise imitingito ikomeje kwiyongera bahitamo kugaruka gusaba ubuhungiro.

Kuva mu rukerera tariki ya 23 Gicurasi mu Karere ka Rubavu harimo kumvikana imitingito yikurikiranya.

Ntiharabarurwa imitingito imaze gutambuka n’ubushobozi bwayo, ariko icyashoboye kumenyekana ni uko amwe mu mazu mu Karere ka Rubavu yatangiye gusaduka.

Bimwe mu bice by’u Rwanda na Congo byibasiwe n’imitingito ya hato na hato guhera mu ijoro ryo ku wa Gatandatu

Umutingito ufatwa nka kimwe mu bimenyetso bikomeye bitera impungenge abaturage, kuko uwo mutingito ukomeza ugaruka uba ugaragaza ko hashobora kuba iruka ry’ikirunga mu gihe icyo ari cyo cyose haramuka habonetse inzira ibiri mu nda y’isi bisohokeramo.

Kuba ikirunga cya Nyiragongo cyarutse, ntibikuraho ko habonetse indi nzira itewe n’imitingito cyaruka.

Ubuyobozi bw’Akarere ka Rubavu ndetse no mu mujyi wa Goma basabye abaturage kuba maso kugira ngo birinde ingaruka z’imitingito.

Imwe mu nzu zangijwe n’umutingito

Iruka ry’ikirunga cya Nyiragongo giherereye mu Burasirazuba bwa Repubulika Iharanira Demokarasi ya Congo hafi n’umupaka w’u Rwanda ndetse n’imijyi ya Goma na Gisenyi ryabaye guhera ku mugoroba wo ku wa Gatandatu tariki 22 Gicurasi 2021, ariko mu masaha y’urukerera uko kuruka birahagarara.

Icyakora muri icyo gihe ndetse na nyuma yaho hakomeje kumvikana imitingito ya hato na hato by’umwihariko mu bice by’Iburengerazuba bw’u Rwanda ndetse no mu Majyaruguru y’Igihugu.

Umutingito wari ufite ingufu wumvikanye hafi mu gihugu hose mu masaa moya z’umugoroba kuri iki Cyumweru, nk’uko abantu bari mu bice bitandukanye by’igihugu bahise babitangaza ko bawumvise.

Uyu mutingito wa hato na hato urafatwa nk’ikimenyetso cy’uko iruka ry’ibirunga rishobora kuba rikomeje cyane cyane ikirunga cya Nyiragongo. Abagituriye bavuga ko bakomeje kubona imyotsi izamuka iva muri icyo kirunga ijya mu kirere, abantu bakaba bakomeje kubikurikiranira hafi.

From the seismic data being recorded, small earthquakes are occuring and being felt in @RubavuDistrict after the #NyiragongoEruption of 22 May 2021. Some earthquakes are being felt in other Districts as well. We are following up the situation. pic.twitter.com/VO3rTavCJe

— Rwanda Seismic Monitor (@Earthquakes_Rwa) May 23, 2021

Ku mugoroba wo ku itariki ya 22 Gicurasi 2021 nibwo abatuye mu mijyi ya Goma na Gisenyi batunguwe n’imyotsi yakwiriye ikirere iherekeje igikoma gisohoka mu kirunga cya Nyiragongo binyuze mu rubavu ahazwi nka Kanyanja na Kirimanyoka.

Byateje imiryango ibihumbi kurara bahunga, abatuye umujyi wa Goma mu masaha ya saa sita z’ijoro bambuka umupaka bahungira mu Rwanda.

Icyo kibazo cy’umutekano cyatumye imiryango isiga byose ikiza ubuzima bwabo, mu masaha y’ijoro abana batoya bagenze ibirometero n’amaguru, ababyeyi batwite kugenda birabananira, abarwayi bicara ku nzira, ubuyobozi mu Rwanda bushyiraho imodoka zo kubatwara, abarembye bajyanwa kwa muganga.

Papa Francis na we yagaragaje ko ahangayikishijwe n’ubuzima bw’abatuye muri aka gace, maze abinyujije ku rukuta rwa Twitter asaba abizera gusengera abatuye i Goma.

Yagize ati "Mureke dusengere abatuye mu mujyi wa Goma muri Repubulika Iharanira Demokarasi ya Congo, bahunze kubera iruka ry’ikirunga cya Nyiragongo."

Ikirunga cya Nyiragongo cyagize amateka mabi akomeye mu myaka ishize. Aheruka ni iruka rya 2002 ryahitanye abantu 250, naho ababarirwa mu bihumbi 120 bava mu byabo.

Kuri iyi nshuro, abantu batanu ni bo bamaze kumenyekana ko batakaje ubuzima, naho amazu menshi yarenzweho n’igikoma cy’ibirunga ahitwa Buhene muri Territoire ya Nyiragongo.

Nubwo abari bahungiye mu Rwanda basubiye mu gihugu cyabo, Guverineri wa Kivu y’Amajyaruguru yasabye abaturage kuba maso, ibi akabiterwa n’uburyo imitingito ikomeje kwiyongera mu gace gaherereyemo ikirunga cya Nyiragongo no mu nkengero zaho.

Abanyekongo bahungiye mu Rwanda babarirwa mu bihumbi umunani harimo abaciye ku mipaka izwi n’abandi banyuze mu nzira zitemewe bakiza ubuzima bwabo.

Mu mujyi wa Gisenyi habarurwa ibihumbi 7 byakiriwe, bajyanwa muri stade ya Rubavu. Hari abahungiye mu Murenge wa Busasamana wegereye ikirunga cyarutse, hari n’abandi bambutse bacumbikirwa mu mashuri ya Nyarubande ahegereye umupaka wa Congo.

Mu masaha ya mu gitondo benshi bari basubiye iwabo nyuma yo kubona ko umuriro utakomeje mu mujyi wa Goma ndetse wahagaze, ariko hari abandi bagumye mu Rwanda batinya ko basubirayo ikirunga kikaba cyakongera kuruka.

Abo bagumye mu Rwanda ni bo basuwe na Minisitiri Gatabazi aherekejwe na Guverineri w’Intara y’Iburengerazuba Habitegeko François.

Iyi miryango 40 yari icumbikiwe mu Mudugudu wa Nyarubande, Akagari ka Mbugangari mu Murenge wa Gisenyi bahawe ubufasha bw’amafunguro ndetse bahabwa n’imodoka zibageza ku mupaka ariko bizezwa gufashwa mu gihe bahitamo kuguma mu Rwanda.

Ubwo bahungaga, hari ababyeyi 3 batwite bagize ikibazo, bajyanwa mu bitaro bya Gisenyi, bitabwaho n’abaganga.

Iruka ry’ikirunga cya Nyiragongo ryabateye ubwoba barahunga

Haracyabarurwa ibyangijwe n’iruka ry’ikirunga cya Nyiragongo. Muri byo harimo abantu batanu bapfuye.

N’ubwo haje agahenge, abatuye mu mujyi wa Gisenyi i Rubavu bakomeje kugira impungenge ziterwa n’imitingito ya buri kanya ikomeje kwiyongera, abari mu Murenge wa Busasamana bakavuga ko ikirunga kinyuzamo kikongera kikazamura imyotsi, nk’igishobora kongera kuruka.

Binjiye mu Rwanda banyuze ku mupaka uhuza Goma na Gisenyi, bashyirirwaho aho kubakirira, harimo kuri Stade ya Rubavu izwi nka Stade Umuganda.

Hari n’abandi benshi bishoboye bahise bajya mu mahoteri baracumbika, mu gihe ubuyobozi bw’Akarere ka Rubavu bwari bwashyizeho imodoka zitwara abanyantege nke, ndetse n’abafite ibibazo by’ubuzima bakitabwaho.

Icyakora uko amasaha yagiye akura ni ko umuriro wari wateye benshi ubwoba wagiye ugabanuka, ndetse bamwe bagira icyizere cyo gusubira mu gihugu cyabo.

Mu Karere ka Rubavu na Goma abaturage baratekanye nubwo bakomeje kumva imitingito mito mito yisukiranya buri kanya, icyakora ikaba ntacyo yahise yangiza ako kanya bitewe n’ubukana bwayo.

Umunyamakuru wa Kigali Today ubwo yazengurukaga Umujyi wa Gisenyi, yabonye abantu bikoreye ibyo bari bahunganye, berekeza ku mupaka basubira muri Congo.

Ubuyobozi bw’Akarere ka Rubavu buvuga ko bwakiriye abaturage bahungiye mu Rwanda babarirwa mu bihumbi birindwi, icyakora abagera kuri 90% bamaze gusubira iwabo.

Kubera uburyo abahungiye mu Rwanda baje biruka nyuma y’igihe bategereje gufungurirwa umupaka na Congo yari yabangiye, habonetsemo abantu batanu bagize ikibazo cy’uburwayi, bitabwaho n’abaganga.

Bamwe mu bahungiye mu Rwanda bavuga ko bahunze kubera gutinya ingaruka z’iruka ry’ikirunga cya Nyiragongo batinya ko cyagera mu mujyi wa Goma.

Icyakora nticyashoboye kuhagera nk’uko babikekaga kuko cyagarukiye muri territoire ya Nyiragongo ahazwi nka Buhene ndetse kikaba cyasenye amazu n’ibindi igikoma cyaka umuriro cyahuye na byo.

Nyuma y’uko iruka ry’icyo kirunga rirangiye, abaturage bagaragaye batemberera mu duce cyarutsemo, bigaragara ko hamwe umuriro w’igikoma cyarutse wari ucyaka.

Ubu imyotsi yaka iraboneka ihereye mu kibaya gihuza u Rwanda na Congo.

Abaturage bakegereye bakavuga ko igikoma kirimo kwerekeza i Goma.

Kuva ikirunga cyatangira kuruka nta mutingito urumvikana.

Gusa abaturage mu mujyi ya Goma na Gisenyi batashywe n’ubwoba ndetse imodoka zimwe zatangiye kuva mu mujyi basa n’abahunga bagana muri Rugerero batinya ko byaza kubasanga mu mujyi wa Gisenyi.

Bamwe mu baturage bahunze baravuga ko bahisemo guhunga kuko bumvise bigeze mu kibaya cyegereye u Rwanda.

U Rwanda rwafunguye imipaka ngo rutangire kwakira abanye-Congo bahungiye iruka rya Nyiragongo mu Rwanda. Abakozi ba Croix Rouge bihutiye kugera ku mupaka w’u Rwanda na Congo baje gufasha kwakira abo baturage.

🔴Abanye Congo bari kwakiranwa ubwuzu🔴

Nyuma yo guhura n’ikiza cyo kuruka kwa Nyiragongo bagahungira mu #Rwanda Abanyarwanda bamaze kwakira abanye Congo basaga 3500 nkuko bitangazwa na @RwandaEmergency @ktpressrwanda @ktradiorw #RwOT pic.twitter.com/VgUORYqCvR

— Kigali Today (@kigalitoday) May 22, 2021

Perezida Félix-Antoine Tshisekedi Tshilombo, wari uri mu ruzinduko rw’akazi i Burayi yahisemo kurusubika bitunguranye, kugira ngo aze gukurikiranira hafi iki kibazo kiri kubera mu Majyaruguru y’igihugu ayobora.

Abanyekongo bashimiye Perezida Kagame wasabye ko imipaka ifungurwa kugira ngo abagizweho ingaruka n’iruka ry’iki kirunga babashe kubona ubuhungiro mu Rwanda.

Merci au peuple Rwandais! Merci au Président @PaulKagame d'avoir ordonné l'ouverture de la frontière pour laisser passer la population paniquée. pic.twitter.com/dPk4OFwUIh

— Dominique MPUNDU (@Dompundu) May 22, 2021