Bashyize indabo ku mva mu Rwibutso rwa Mukamira mu rwego rwo kunamira abaharuhukiye

Nyabihu Survivors Family, ni umuryango ugizwe n’abantu basaga 200, babarizwa hirya no hino mu gihugu no hanze yacyo, barokokeye Jenoside yakorewe Abatutsi mu byahoze ari amakomini ya Nkuri, Karago, Giciye, Nyamutera na Mutura, ayo makomini akaba ari yo yaje guhuzwa, akabyara Akarere ka Nyabihu.

Ngabonziza Louis, uhagarariye uyu muryango yagize ati “Muri aka gace Jenoside yakorewe Abatutsi yagize ubukana bukomeye, bitewe n’uko ahanini benshi mu bategetsi bayiteguye bakanayishyira mu bikorwa, ariho banakomokaga. Kuba twaragize amahirwe akomeye yo kuyirokoka, dushaka gukomeza kuyubakiraho, tunifashisha ibimenyetso bigaragaza neza ayo mateka, tukarushaho kwigisha abana bacu ingaruka byagize ku gihugu cyacu”.

Kuba mu bagize uruhare muri Jenoside yakorewe Abatutsi harimo n’abari urubyiruko, byatewe n’uko abateguye umugambi wa Jenoside, babatoje urwango n’amacakubiri, kuva bakiri bato, bigera ubwo babumvisha ko no kumena amaraso ari ibintu bisanzwe.

Bamwe mu bagize Umuryango Nyabihu Survivors Family basanga kubwira abakiri bato amateka mabi igihugu cyanyuzemo bizabarinda abayababwira mu buryo bugoretse

Urubyiruko n’abakiri bato b’iki gihe ngo icyo bakwiye kwigishwa mu buryo bwimbitse, ni ingaruka byagize ku muryango nyarwanda, no kubakangurira kurangwa n’imyitwarire yo guharanira ko ayo mateka atazasubira ukundi.

Ati “Icyo twifuza ni ukugira ngo ayo mateka nibayamenya neza uko ari, na bo bazakure baharanira ko inyungu iri kurinda ko igihugu cyabo gihungabana, ari na ko barwanya ikintu icyo ari cyo cyose cyabashora mu mutego w’abashaka kongera kucyoreka”.

Ku wa Gatandatu tariki 3 Nyakanga 2021, ubwo hasozwaga iminsi 100 yo kwibuka Jenoside yakorewe Abatutsi, abagize umuryango Nyabihu Survivors Family, bibutse ababo bishwe muri Jenoside yakorewe Abatutsi; umuhango wabereye mu Karere ka Nyabihu ku rwibutso rwa Mukamira, abawitabiriye bunamira banashyirwa indabo ku mva iruhukiyemo imibiri 2202.

Juru Anastase ukuriye Ibuka mu Karere ka Nyabihu

Juru Anastase, umuyobozi wa Ibuka mu Karere ka Nyabihu, yibukije abitabiriye uyu muhango ko bafite umukoro wo gukomeza urugamba rwo kubaka igihugu, nyuma y’amateka mabi cyanyuzemo.

Yagize ati “Dushima Leta yemeye guhuza Abanyarwanda ikanabashyiriraho gahunda zibahuza, hadashingiwe ku moko nk’uko Leta yateguye Jenoside yabigenje. Ubu nta muntu ukibona mugenzi we, mu ndorerwamo y’Ubututsi, Ubuhutu cyangwa Ubutwa. Gusa na none ntitwakwirengagiza ko hari abahora bifuza ko iyo mbuto nziza twabibye y’ubunyarwanda nyabwo irandurwa, bashaka kubiba imbuto mbi y’ingengabitekerezo ya Jenoside”.

Yongera ati “Icyo mbwira urubyiruko nk’imbaraga z’igihugu, nirufatire urugero ku rugamba FPR Inkotanyi yarwanye, baharanire kubaka Ubunyarwanda nyabo, bakunde igihugu cyababyaye, bashyire hamwe kandi baharanira kugikorera batiganda. Ni wo musingi igihugu cy’ahazazakizira amacakubiri kizaba cyubakiyeho”.

Abitabiriye uyu muhango, boroje inka, umubyeyi w’abana bane warokotse Jenoside yakorewe Abatutsi, witwa Nyirafishi Consolée, wo mu Kagari ka Jaba, Umurenge wa Mukamira, akaba yishimiye ko igiye kujya imukamirwa.

Agira ati “Kuba aba bagira neza bantoranyije bakangabira iyi nka nziza gutya, byandenze kandi biranejeje cyane. Ngiye kuyifata neza kugira ngo izabashe kudukamirwa tunywe amata. Ikindi ni uko izaduha ifumbire yo kwifashisha mu buhinzi, umusaruro na wo wiyongere. Muri macye ntewe ishema no kuba norojwe inka”.

Nyirafishi yagabiwe inka

Abarokotse Jenoside yakorewe Abatutsi bakomoka mu Karere ka Nyabihu, ngo ihaye intego y’uko buri mwaka bajya boroza bagenzi babo, mu rwego rwo kubafasha kurushaho kwiyubaka. Umuryango wa Nyirafishi ukaba wiyongereye ku yindi miryango ibiri na yo yorojwe inka, kuri ubu zanatangiye kororoka.

Imibiri y’Abatutsi bishwe muri Jenoside yabonetse mu Karere ka Nyarugenge yashyinguwe mu cyubahiro

Mu Karere ka Nyarugenge hagati ya tariki 24 na 30 Kamena 2021, habonetse imibiri irenga 80 y’abishwe muri Jenoside yakorewe Abatutsi, ishyingurwa mu cyubahiro ku itariki 1 Nyakanga 2021 mu rwibutso rwa Nyanza ya Kicukiro.

Umuyobozi Nshingwabikorwa w’Akarere ka Nyarugenge, Ngabonziza Emmy, wari umushyitsi mukuru bashyingura izo nzirakarengane, yavuze ko tariki ya 1 Nyakanga ubusanzwe ari itariki u Rwanda rwitwa ko rwabonyeho ubwigenge, ariko bukaba ari ubwa nyirarureshwa, kuko bwari ubwigenge bw’igice kimwe cy’abaturage.

Agira ati “Ntabwo bwari kuza ari ubwigenge bw’Abanyarwanda ngo bukurikirwe no gusahura, gutwika no kwica Abatutsi, abandi basigaye barameneshwa, abari bari mu gihugu bahinduka impunzi mu gihugu cyabo, habibwa amacakubiri, cyane ko ubwigenge bwahawe PARMEHUTU, ishyaka ryaharaniraga ukwishyira ukizina n’iterambere ry’umuhutu aho kuba iry’Umunyarwanda”.

Ati “Abaharaniraga ubumwe bw’Abanyarwanda icyo gihe babonaga ko atariyo politike ikenewe, ni na cyo banazize, kandi ni byo byakomeje kuranga politike y’amacakubiri yatuganishije kuri Jenoside yakorewe Abatutsi ihitana abasaga miliyoni”.

Ngabonziza, yaboneyeho gusaba abacitse ku icumu rya Jenoside gukomeza kuzirikana ko habaye ah’abagabo kugira ngo Jenoside ihagarare ku itariki 4 Nyakanga, ari na wo munsi Abanyarwanda baha agaciro nyako, kuko guhera kuri iyo tariki ari bwo u Rwanda rwatangiye kuba igihugu kibereye bose.

Gushaka imibiri yajugunywe hirya no hino mu gihugu ni igikorwa gihoraho, ubuyobozi bwa IBUKA n’abacitse ku icumu rya Jenoside bakabifashwamo n’ubuyobozi bw’uturere.

Igikorwa kimaze imyaka 27 ingana n’ishize habaye Jenoside yakorewe Abatutsi, Leta n’abacitse ku icumu bakomeza kwinginga abafite amakuru kuyatanga ariko bigakorwa n’imbarwa, nk’uko Rutayisire abigarukaho.

Ati “Baricara mu miryango yabo bakavuga bati 94 abantu twari duhari, hari kanaka na kanaka bakamusura bakamubwira bati wowe ntabwo wishe abantu, ariko wibuke ko umwana wawe yavugije induru, nuramuka umennye ibanga, uriya mubiri nugera hejuru amakuru azakurikiranwa n’umwana wawe bamenye ko yavugije induru, bigatuma arushaho kugenda anangira umutima”.

Ati “Impamvu aba bantu kugeza n’ubungugu bakitugora, ni uko turi mu gihugu kigendera ku mategeko, cyigisha ubumwe n’ubwiyunge, nta muntu n’umwe wigeze utubwira ahantu bacu bari ngo abe yabihanirwa. Ahubwo twe tumufata nk’intwari kuko aba aruhuye imitima ya benshi”.

Imibiri yashyinguwe mu cyubahiro ku rwibutso rwa Nyanza ya Kicukiro ni 83 yataburuwe mu bice bitandukanye by’umujyi wa Kigali ariko imyinshi yabonetse mu Murenge wa Rwezamenyo mu byobo biri hafi ya Union bar, indi yabonetse mu Murenge wa Rugenge n’uwa Muhima.

Ikigaragara gusa ni uko igikorwa kigifite igihe kirekire ukurikije n’umubare w’abishwe imibiri yabo ikaba itarabonerwa irengero, no kuba abitwa ko byabaye bareba cyangwa byarakozwe n’abantu bazi neza ariko bakanga kuvugisha ukuri bakeka ko byabakoraho cyangwa se ari ugukingira ikibaba abo mu miryango yabo.

Prof. Elysé Musemakweli

Prof. Elysé Musemakweli, umuyobozi w’ishuri rikuru ry’Abaporotesitanti(PIASS) akaba n’umupasitoro, na we yabigarutseho ku ya 13 Kamena 2021, ubwo muri iryo shuri bibukaga ku nshuro ya 27 Jenoside yakorewe Abatutsi, yongeraho ko kwica umuntu ari ukwigomeka ku Mana.

Yagize ati “Ntawe ufite ububasha n’uburenganzira bwo kwaka undi muntu ubuzima atamuhaye. Ubuzima ni impano Imana iduha, ni na yo ifite ububasha bwo kubusubirana”.

Yunzemo ati “Jenoside yabereye muri iki gihugu yagaragaje ubugome bukomeye abantu bagiriye abandi, ariko yagaragaje n’ubwigomeke ku Mana. Kwambura umuntu ubuzima yahawe n’Imana ni ukuyivuguruza, ni ukuyigomekaho kuko twarenze umurengo cyane, twageze kure aho umuntu atagombaga kugera, twihaye uburenganzira burenze”.

Yashoje agira ati “Sinzi niba Abanyarwanda babona ko Jenoside ari ikintu gikomeye, tugomba kwicuza no gusaba imbabazi igihe cyose”.

Ibi byanashimangiwe n’umwepisikopi wa EAR muri Diyoseze ya Kigeme, Assiel Musabyimana, ubwo mu Murenge wa Cyanika bibukaga ku nshuro ya 27 Jenoside yakorewe Abatutsi.

Yagize ati “Kwica umuntu utaremye, kimwe ni icyaha, ariko ni no kurakaza Imana ndetse no kuyihemukira, bikaba no kuyikoza urutoki mu jisho. Na none kandi kuko twaremwe mu ishusho y’Imana, kwica umuntu ni ukwica ishusho yayo”.

Banashyinguye mu cyubahiro imibiri y’abazize Jenoside

Babigarutseho ku wa 26 Kamena 2021, mu gikorwa cyo kwibuka Abatutsi biciwe kuri Paruwasi ya Cyanika, byanahuriranye no gushyingura mu cyubahiro imibiri irindwi yabonetse muri Cyanika no muri Gasaka, ahakorwaga imirimo yo kubaka.

Mu Kiganiro ku mateka ya Jenoside i Nyamagabe, Remy Kamugire, Visi Perezida wa Ibuka muri ako karere, yavuze ko mu Bufundu no mu Bunyambiriri ari ho hambere hageragerejwe Jenoside yakorewe Abatutsi mu mwaka wa 1963.

Yagize ati “Ku wa 23 Ukuboza 1963, Perefe André Nkeramugaba yakoresheje inama ababurugumesitiri maze bafata umwanzuro ko inyenzi zateye ziturutse i Burundi zigomba gusanga bene wabo b’Abatutsi bari i Gikongoro barashize”.

Urwibutso rwa Jenoside rwa Cyanika rushyinguyemo ababarirwa mu bihumbi 40

Hanyuzemo umunsi umwe gusa, maze k’ukurikiraho ari wo wa Noheri Abatutsi baricwa. Mu gihe Abatutsi bishwe icyo gihe babarirwa mu bihumbi 35, mu Bufundu na Bunyambiriri honyine haguye ibihumbi 20.

Kamugire ati “Abantu bakuru ino aha wasangaga Noheri batayizihiza, kubera ko bibukaga ko mu 1963 bishwe, ukabona kwizihiza Noheri batabiha agaciro kuko batekerezaga ko bashobora kongera kwicwa”.

Ubwo urugamba rwo kubohora u Rwanda mu mwaka w’1990 rwatangiraga, uwari Perefe wa Gikongoro, Dr Celestin Nyabyenda, mu kwezi k’Ukwakira hagati na we ngo yavuze amagambo atanya Abanyarwanda, anagaragaza ko Abatutsi badakwiye kugira ijambo.

Kamugire ati “Yakoresheje inama hano, abwira Abahutu ko Abatutsi ari bo bateje ikibazo, ko n’ibibazo by’intambara u Rwanda rwarimo babifitemo uruhare, agaragaza ko abateye igihugu bafitanye isano, ari abana babo cyangwa abo mu miryango yabo”.

Remy Kamugire, Visi Perezida wa Ibuka mu Karere ka Nyamagabe

Icyo gihe Perefe uwo ngo yaranavuze ngo “Kuva ubungubu Umututsi azire Umuhutu nk’uko imbwa izira umuheha cyangwa mbashumurize ibishimyi byanjye”.

Ibyo ngo byagaragazaga ko Abatutsi nta burenganzira bafite mu gihugu, nta n’ibyiza bikwiye kubageraho, ahubwo ko bikwiye Abahutu”.

Umuyobozi w’Akarere ka Nyamagabe, Bonaventure Uwamahoro, yavuze ko kuri ubu ibintu byahindutse, ko n’imiyoborere mibi y’abashoye Abanyarwanda muri Jenoside yatsinzwe.

Ati “Yatsinzwe igihe Inkotanyi ziyobowe na Nyakubahwa Perezida wa Repubulika, Paul Kagame, zahagaritse Jenoside yakorerwaga Abatutsi, kandi umugambi wo kurimbura Abatutsi ugasimbuzwa umugambi wo kubaka ubumwe bw’igihugu, wo kubanisha Abanyarwanda kandi wo kubaka igihugu n’iterambere ribereye buri wese”.

Umuyobozi w’Akarere ka Nyamagabe, Bonaventure Uwamahoro ati imiyoborere mibi y’abashoye Abanyarwanda muri Jenoside yaratsinzwe

Yaboneyeho gusaba abatuye mu Karere ka Nyamagabe kugira uruhare mu gutanga amakuru y’aho imibiri y’Abatutsi itaraboneka yaba iherereye.

Ku rwibutso rwa Jenoside rwa Cyanika hashyinguye imibiri ibarirwa mu bihumbi 40.

Perezida w’Abafana ba APR FC i Musanze ashyira indabo ahashyinguye imibiri y’abazize Jenoside

Ni mu muhango wabaye kuri iki Cyumweru tariki 27 Kamena 2021, aho abo bafana bakoze urugendo rureshya n’ikirometero berekeza kuri urwo rwibutso rubumbatiye amateka y’igerageza rya Jenoside, dore ko rushyinguwemo imibiri y’Abatutsi 166 bishwe mu mwaka wa 1991.

Mu gusura urwo rwibutso baremeye n’imiryango itatu yacitse ku icumu rya Jonoside aho babageneye ihene, ibiribwa binyuranye birimo umuceri, ibishyimbo amavuta n’ibindi.

Ngabonziza Louis, Perezida wa APR FC Musanze Fan Club, yavuze ko igikorwa cyo gusura urwibutso no kuremera abacitse ku icumu rya Jenoside yakorewe Abatutsi, ari igitekerezo ngarukamwaka aho uyu mwaka bahisemo gusura urwibutso rwa Jenoside rwa Kinigi, mu rwego rwo kurushaho kwiga n’amateka yaranze Jenoside muri ako gace gafatwa nk’akakorewemo igeragezwa rya Jenoside.

Abafana ba APR FC Musanze Fan Club babwiwe amateka ya Jenoside mu cyahoze ari Komini Kinigi

Yavuze ko amateka babwiwe ya Jenoside yabereye mu cyahoze ari komine Kinigi, yagombye kubera urugero buri wese upfobya Jenoside avuga ko itateguwe, yemeza ko bafashe ingamba zo gusobanurira ayo mateka abagipfobya Jenoside, ndetse no guhangana n’abo bashaka guhimba ibinyoma bavuga ko Jenoside itakozwe.

Yagize ati “Tubaye ba Ambasaderi bo guhangana n’abapfobya Jenoside yakorewe Abatutsi, wabonye ko muri Club yacu dufitemo abantu mu ngeri zose, aba Mama, aba Papa ndetse bose bafite abana mu ngo zabo. Hari abakoresha imbuga nkoranyambaga bapfobya Jenoside, ariko natwe iryo koranabuhanga tuzi kurikoresha ni ngombwa ko tubarwanyirizamo duhangana nabo tubereka ibimenyetso nyabyo by’uko Jenoside yabaye kandi yateguwe”.

Arongera ati “Nk’aha kuri uru rwibutso haguye umubare mwinshi w’Abatutsi, ariko hari abagihakana ko Jenoside yabaye mu Rwanda, ni ngombwa ko tudaceceka ngo duterere iyo, twiteguye kubasobanurira babyanga tugahangana nabo twifashisha izo mbuga bakangisha”.

Mukanyandwi Pelagie wari uhagarariye ubuyobozi bw’akarere ka Musanze

Mukamana Clementine, yavuze ko mu bikorwa bakora bitagarukira mu gufana umupira gusa, ahubwo ko bagira n’umutima wa kimuntu wo gusura abafite ibibazo binyuranye no kubaremera, ngo ni yo mpamvu batekereje gusura urwibutso rwa Jenoside rwa Kinigi.

Yagize ati “Kuza twibuka, ni uko twabonye ko ari ngombwa kwifatanya na bagenzi bacu bacitse ku icumu rya Jenoside no kuzirikana Abatutsi bazize uko Imana yabaremye, twabazirikanye kuko na bo ni umuryango wacu. APR ni umuryango mugari kandi ibikorwa byacu ntabwo bigarukira mu gufana APR gusa, no mu buzima busanzwe dutekereza ku bikorwa by’urukundo dufasha bagenzi bacu bababaye”.

Rwabami Charlotte ati “Twarebye, n’ubwo ibi bihe turimo twatewe na Covid-19 bitugoye, ariko twatekereje gusura urwibutso twifatanya na bagenzi bacu bacitse ku icumu rya Jenoside, tunaremera abatagira icyo barya, buri gihe tubatekerezaho kandi tugomba kubaba hafi tunabafata mu mugongo”.

Abafana ba APR FC mu murenge wa Kinigi

Umwe mu borojwe ihene bahabwa n’ibiribwa ati “Kuba mwaje kwibukira hano iwacu ku rwibutso rwa Kinigi, no kuturemera biraturenze, mukomeze urwo rukundo kandi Imana isubize aho mukuye. Ndi umukecuru sinari nzi iby’umupira, ariko kuva uyu munsi menye neza APR ndanayifannye kuva ubu”.

Mugenzi we witwa Mbereyinka Edison ati “Igikorwa mukoze kiratunejeje, mwadusuye mutwereka ko mutwitayeho, muradukomeje muduhaye imbaraga z’umubiri n’iz’imitekerereze”.

Munyarutete Joseph, Umuyobozi wa Ibuka mu Murenge wa Kinigi, wabanje gusobanurira abagize APR FC Musanze Fan Club amateka yaranze Jenoside muri ako gace kahoze ari komini Kinigi, aho intandaro yo kwica Abatutsi yaturutse k’ubuyobozi bubi bw’iyo Komini, nyuma y’igitero cy’Inkotanyi mu Ruhengeri ari bwo abantu banyuranye batangiye gufungwa bitwa ibyitso by’inyenzi. Ku itegeko ngo ryatangwaga na Gasana Thadée wari Burugumesitiri wa Komini Kinigi, Abatutsi batangira kwicwa. Ashimira abo bafana kuba abavugizi b’ayo mateka.

Bacanye urumuri rw’icyizere

Ati “Iyi ni ikipe y’ingabo z’igihugu zatubohoye bahagarika Jenoside yakorewe Abatutsi, birumvikana kuba abafana b’ikipe ya Gisirikare batekereza kuza kudusura ni uko babareze neza, uru rukundo n’ubwitange mutugaragarije murugeze no ku bafana b’andi makipe tufate mu mugongo abacitse ku icumu, aya mateka mugende muyabwire na babandi birirwa bapfobya Jenoside banayihakana”.

Bagarutse ku bihe byiza ikipe yabo irimo, bavuga n’uburyo bakiriye igikombe

Abo bafana bagarutse no ku ikipe yabo iherutse kwegukana igikombe cya Shampiyona 2021, bemeza ko ikipe yabo ikomeye uretse mu Rwanda no ku ruhando mpuzamahanga aho bayitezeho byinshi mu marushanwa mpuzamahanga igiye kuzitabira.

Umufana uzwi ku izina rya Papa Balotelli, wari waje kwifatanya na bo yagize ati “Maze iminsi i Musanze, numvise ko abafana ba APR FC hano i Musanze bafite igikorwa cy’urukundo numva batansiga bitewe n’uburyo umutima wanjye wose nawuhebeye umukara n’umweru. Igikombe byo ni ibyishimo gusa, gufana APR ni ukwibera mu byishimo gusa, nta gakipe kazongera kuduhangara, si mu Rwanda gusa nk’uko ba mukeba babivuga, ariko muzareba ubutaha mu marushanwa ya Afurika aho tuzagarukira, mutwitege”.

Rwabami Charlotte ati “Nakunze APR kuva nkiri umwana none ndi umukecuru, iyo iduhaye igikombe noneho turasara, ubu ni ibyishimo gusa ku mukino wa Rayon nari natitiye ariko birangira tubisoje, mu rugo kuva ku mwana kugeza kuri njye n’umugabo, ni umukara n’umweru gusa”.

Mukamana arongera ati “Mana we! Natangiye gufana APR muri 2005, nabonye abafana bayo babana nk’umuryango, ngize amahirwe umugabo twashakanye nsanga na we imuri mu maraso, mu rugo ni umunezero gusa, ibikombe birinjira buri mwaka, APR nzayigwa inyuma”.

Mukanyandwi Pelagie wari uhagarariye ubuyobozi bw’akarere ka Musanze muri uwo muhango yasabye abo bafana gukomeza urukundo, avuga ko kwegera ufite ubibazo aribwo bunyarwanda bwuzuye, asaba ko urukundo rubaranga rukwira mu makipe yose kandi baharanira kurwanya uwariwe wese uzana ingengabitekerezo ya Jenoside mu banyarwanda.

Habaye n’igikorwa cyo kuremera imiryango itatu yacitse ku icumu rya Jenoside

APR-FC Musanze FAN Club, imaze imyaka ine ishinzwe aho igizwe n’abantu bakabakaba 200.

Igikorwa cyo kwibuka cyabaye hifashishijwe ikoranabuhanga

Abitabiriye uwo muhango bagarutse ku mateka mabi yaranze u Rwanda kuva mu 1959 kugeza kuri Jenoside yakorewe Abatutsi mu 1994, amateka yaranzwe no kwigisha ivangura n’amacakubiri mu Banyarwanda bikozwe n’ubutegetsi bubi uko bwagiye busimburana.

Bagaragaje ko Jenoside yateguwe n’ingengabitekerezo yayo igacengezwa mu Banyarwanda igihe kinini ndetse ikanageragezwa mu bihe bitandukanye, uwo mugambi ugashyirwa mu bikorwa mu 1994, aho abatutsi basaga miliyoni bishwe mu gihe cy’iminsi ijana gusa.

Bagaragaje ko urubyiruko rwagize uruhare rukomeye mu ishyirwa mu bikorwa rya Jenoside yakorewe Abatutsi mu 1994 mu Rwanda kubera inyigisho mbi z’ivangura rwahawe, kandi no muri Jenoside hakaba hari umubare munini cyane w’urubyiruko rwishwe, igihugu kikabura izo mbaraga n’ubwenge byagombye kugiteza imbere.

Amb. Jean Pierre Karabaranga

Abitabiriye gahunda yo kwibuka urubyiruko rwishwe muri Jenoside yakorewe Abatutsi bashimiye urubyiruko rwari mu ngabo zari iza FPR Inkotanyi zari ziyobowe na Nyakubahwa Paul Kagame, Perezida wa Repubulika, rwitanze rutizigama, rugahagarika Jenoside yakorerwaga Abatutsi rukabohora igihugu. Urubyiruko rukaba rwasabwe gufatira urugero kuri ubwo butwari bwaranze izo ngabo.

Ambasaderi w’u Rwanda muri Senegal, Mali, Gambia, Cabo Verde na Guinea Bissau, Jean Pierre Karabaranga yagaragarije urubyiruko ko kwibuka Jenoside yakorewe Abatutsi ari umwanya wo kongera guha agaciro n’icyubahiro abishwe muri Jenoside yakorewe Abatutsi, kuba urubyiruko rwo muri ibyo bihugu rwaratekereje kwibuka by’umwihariko urubyiruko rwishwe bigaragaza ko biyemeje guhangana n’abahakana bakanapfobya Jenoside yakorewe Abatutsi no guharanira ko amateka mabi yaranze u Rwanda ntawe uzemerera abahakana bakanapfobya Jenoside ko Abanyarwanda bayasubiramo.

Indi ngingo yibanzweho cyane mu biganiro ni ugufatanya urugamba rwo kurwanya abahakana n’abapfobya Jenoside yakorewe Abatutsi n’abagikwirakwiza ingengabitekerezo ya jenoside bifashishije imbuga nkoranyambaga.

Hagaragajwe ko abateguye Jenoside yakorewe Abatutsi bateguye n’uko bazayihakana, ubu bakaba bacengeza iyo ngengabitekerezo mu bari bakiri bato mu gihe cya Jenoside yakorewe Abatutsi ndetse n’abavutse nyuma yayo.

Urubyiruko rw’Abanyarwanda aho ruri hose kimwe n’abanyamahanga, basabwe guhangana n’abo bagikwirakwiza ingengabitekerezo ya Jenoside, abayihakana n’abayipfobya, binyuze mu kwandika ibitabo ku mateka ya Jenoside kandi bakifashisha n’ikoranabuhanga. Buri wese akifashisha ubumenyi yungukiye mu biganiro byatanzwe ku mateka ya Jenoside yakorewe Abatutsi mu 1994.

Urubyiruko rwitabiriye ibiganiro rwihaye umukoro wo guhangana n’abagifite ingengabitekerezo ya Jenoside, abayihakana n’abayipfobya, rusaba ko abakomeje gukwirakwiza ingengabitekerezo ya Jenoside, guhakana no gupfobya Jenoside yakorewe Abatutsi bakoresheje ikoranabuhanga bakurikiranwa bakabihanirwa by’intangarugero.

Urubyiruko rusaba kandi ko hakorwa ubuvugizi kugira ngo icyaha cyo gupfobya no guhakana Jenoside yakorewe Abatutsi no gukwirakwiza ingengabitekerezo yayo, gishyirwe mu mategeko y’ibindi bihugu. Ikindi rwasabye ni uko amahanga akurikirana abakidegembya hirya no hino mu bihugu by’amahanga, kandi barasize bahekuye u Rwanda mu 1994.

Jessica Mwiza

Abatanze ubutumwa muri iyo gahunda yo kwibuka urubyiruko barimo Jean Pierre Karabaranga, Ambasaderi w’u Rwanda muri Senegal, Mali, Gambia, Cabo Verde na Guinea Bissau; Dr Jean Damascène Gasanabo, Umuyobozi Mukuru w’Ikigo cy’Ubushakashatsi n’Ububikoshakiro muri Komisiyo y’Igihugu yo kurwanya Jenoside (CNLG), Charles Habonimana, Umuyobozi Mukuru wa Rwanda Airports Company, wayoboye Umuryango w’abari abanyeshuri barokotse Jenoside yakorewe Abatutsi (GAERG), wananditse igitabo «Moi, le dernier Tutsi».

Hari kandi Sandra Shenge, ushinzwe gucunga imishinga ku rwego rw’Akarere mu Muryango w’Abongereza ushinzwe gukumira Jenoside (AEGIS Trust) ukorera ku Rwibutso rwa Jenoside rwa Kigali, Me Richard Gisagara, Umunyarwanda uri mu Rugaga rw’Abavoka mu Gihugu cy’u Bufaransa, Beata Mairesse Umubyeyi, umwanditsi kuri Jenoside yakorewe Abatutsi uba mu Gihugu cy’Ubufaransa; Jessica Mwiza, Umunyamuryango wa Ibuka mu Bufaransa, Thierry Uwizeye, Umunyarwanda uba mu Gihugu cya Cabo Verde, uheruka gusura u Rwanda nyuma y’imyaka 27 aruvuyemo afite imyaka ibiri gusa mu 1994.

Amadou Tidiane Fall

Abandi ni Yolande Mukagasana, warokotse Jenoside yakorewe Abatutsi ariko abo mu muryango we bakarimburwa muri Jenoside, akaba yariyemeje kwandika kuri Jenoside yakorewe Abatutsi, Ismaël Lô, umunyamuziki wo mu Gihugu cya Senegal, Amadou Tidiane Fall, Umunyasenegal wanditse inyandiko zitandukanye zamagana abahakana n’abapfobya Jenoside yakorewe Abatutsi n’abandi benshi barimo Abanyarwanda n’abanyamahanga.

Imibiri 1093 y’abazize Jenoside yakorewe Abatutsi yashyinguwe mu cyubahiro

Imibiri hafi 1000 ikaba yarabonetse mu bitaro bya Kabgayi ahasizwaga ikibanza cyo kubakamo inzu ababyeyi bazajya babyariramo.

Umuyobozi w’Akarere ka Muhanga, Kayitare Jacqueline, yavuze ko ikibabaje cyane iyo mibiri yose yabonetse itigeze itangwaho amakuru ngo ishakishwe mbere, kuko yagiye iboneka kubera ibikorwa byabaga bigiye gushyirwa aho yaboneste.

Agira ati "Imibiri yose yabonetse nta wigeze aduha amakuru, bigaragaza ko abapfobya bakanahakana Jenoside yakorewe Abatutsi bagifite umugambi mubi wo kongera gukora Jenoside".

Kayitare ashima Leta y’u Rwanda yemeye ko nibura imibiri yabonetse ishyingurwa mu cyubahiro kuko biruhura abacitse ku icumu rya Jenoside yakorewe Abatutsi.

Umunyamabanga Nshingwabikorwa wa Komisiyo y’Ihihugu yo kurwanya Jenoside (CNLG), Dr. Bizimana Jean Damascène, mu kiganiro yagejeje ku bitabiriye igikorwa cyo gushyingura iyo mibiri, avuga ko abihaye Imana n’abakoraga kwa muganga bagize uruhare rutaziguye muri Jenoside yakorewe Abatutsi.

Yavuze ko na n’ubu hari abihaye Imana barimo n’abapadiri bo muri Diyosezi ya Kabgayi bagikomeje gupfobya Jenoside, bavuga ko habayeho Jenoside ebyiri.

Dr. Bizimana Jean Damascène

N’ubwo hariho abagikomeje gushegesha Abanyarwanda barokotse Jenoside yakorewe Abatutsi, Dr. Bizimana avuga ko hari intambwe igenda iterwa mu kugaragaza ukuri kuri Jenoside, harimo nko kuba Umushumba wa Kiliziya Gatolika yarasabye imbabazi ku ruhare rwa Kiliziya n’abayoboke bayo.

Abayobozi batandukanye bitabiriye uwo muhango

Mu nama ubuyobozi bw’Umurenge wa Muhima n’ubwa IBUKA mu Karere ka Nyarugenge bwagiranye n’ubuyobozi bw’akarere, baganiriye ku bintu bimwe na bimwe byo kuzirikana kugira ngo icyo gikorwa kizagende neza.

Kimwe muri byo ni ugukomeza kubahiriza amabwiriza yo kwirinda icyorezo cya Covid 19, ikindi ni imiterere y’isanduku ishyirwamo imibiri y’abazashyingurwa mu rwibutso. Umuyobozi wa IBUKA muri Nyarugenge Rutayisire Masengo Gilbert arabisobanura.

Agira ati “Umupfundikizo w’isanduku bashyinguramo abazize Jenoside ntabwo ugomba kuba wiburungushuye, ugomba kuba urambaraye kugira ngo hejuru yayo habashe kujyaho indi, kuko iyo utarambaraye, iri hejuru yayo ishobora guhirima ugasanga birateza ikibazo aho zigomba kuba ziri mu rwibutso”.

Ku rwego rw’Umurenge wa Muhima, igikorwa bagitangiye ku wa kane tariki 24 Kamena 2021, aho bamaze kubona imibiri ine nk’uko byavuzwe n’umuyobozi wa IBUKA mu Murenge wa Muhima, Nizeyimana Olivier de Maurice, wasobanuye ko igikorwa kizakomeza kuko hakiri imibiri myinshi itaraboneka.

Umunyamabanga Nshingwabikorwa w’Umurenge wa Muhima Mukandoli Grace, yashimiye abacitse ku icumu rya Jenoside uburyo babashije kwakira icyifuzo cya Leta y’u Rwanda isaba ko abazize Jenoside bose bagomba gushyingurwa mu cyubahiro mu nzibutso zabigenewe.

Umwe mu mibiri yataburuwe mu Murenge wa Muhima ni uw’umwana witwa Mutangana Germain, wavutse ku itariki 7 Mata 1990, akicwa ku itariki 7 Mata 1994 afite imyaka ine gusa.

Hodali Jean (nyirarume w’umwana) wavuze mu izina ry’ababyeyi ba nyakwigendera batari mu Rwanda, yavuze ko Mutangana Germain yabaye nk’igitambo cy’umuryango we wose.

Hodali ati “Aho bari bihishe mu gisenge cy’inzu y’abaturanyi, interahamwe zasenye igice kimwe aho yari aherereye, arahanuka zihita zimutema arapfa, zijya gusahura zirangije zigenda zitarebye ko muri plafon harimo abandi bantu”.

Abandi bose bo muryango wa Mutangana wari bucura mu muryango w’abana bane na se na nyina bararokotse, Jenoside irangiye bashakisha umubiri we bamushyingura mu itongo, bamaze gusana inzu batunganya imva barahamurekera kuko bifuzaga ko ahaguma nk’igitambo cy’umuryango wose.

Ariko kubera ko Leta y’u Rwanda isaba ko abazize Jenoside yakorewe Abatutsi bose bagomba gushyingurwa mu cyubahiro, umuryango wa Mutangana wageze aho na wo urabyakira, akazashyingurwa mu cyubahiro hamwe n’abandi ku itariki 1 Nyakanga 2021, mu rwibutso rwa Jenoside rwa Nyanza ya Kicukiro.

Reba hano hepfo uko Rutayisire Masengo Gilbert abisobanura

Abanyeshuri n’abarezi bo muri Kaminuza ya Kigali Ishami rya Musanze basobanurirwa amateka ya Jenoside by’umwihariko Abatutsi biciwe mu cyahoze ari Cour d’Appel Ruhengeri

Batangaza ibyo bahereye ku bantu bamaze iminsi bumvikana mu biganiro binyuzwa ku mbuga nkoranyambaga, bahakana Jenoside cyangwa abayivuga bitandukanye n’ukuri nyako. Abakora ibyo bikorwa bafata nk’ibigayitse, hakaba harimo n’abacitse ku icumu rya Jenoside yakorewe Abatutsi.

Mushinzimana Bernard ukuriye Umuryango w’Abanyeshuri barokotse Jenoside yakorewe Abatutsi, muri Kaminuza ya Kigali Ishami rya Musanze yagize ati “Mu bihe bitambutse, twagiye twumva abataye umurongo nyakuri w’amateka yacu, bari mu gihugu cyangwa hanze yacyo, bakayagoreka atari uko bayobewe ukuri nyako, dore ko benshi ari n’injijuke harimo n’izacitse ku icumu rya Jenoside”.

Ati “Nta rwego runaka dukwiye kuba twishingikiriza ko tubarizwamo, cyangwa ko duhagarariye ngo dupfobye amateka yacu. Uwaba abikora ku bw’inyungu ze cyangwa iz’abandi bagamije ko dusubira mu manga, tubafata nk’abasenya indangagaciro z’Abanyarwanda, akaba ariyo mpamvu tubaha ubutumwa bubasaba kureka gutana. Nibave ku izima, dutahirize umugozi umwe mu kubaka igihugu cyacu”.

Urukuta rwanditseho amazina ya bamwe mu biciwe mu cyahoze ari Cour d’Appel Ruhengeri bahashyize indabo mu rwego rwo kubunamira

Mu muhango wo kwibuka ku nshuro ya 27 Jenoside yakorewe Abatutsi, wateguwe na Kaminuza ya Kigali ishami rya Musanze, mu biganiro bigaruka ku mateka abanyeshuri n’abarezi bayo bagejejweho na Nzabonimana Emmanuel, umuhuzabikorwa wa CNLG mu turere twa Musanze na Burera, yibanze ku kubereka ukuntu za Kaminuza zo mu gihe cya mbere ya Jenoside yakorewe Abatutsi, zakoreshejwe mu gucurirwamo imigambi yo koreka igihugu mu mateka mabi.

Ibyo ngo byagizwemo uruhare na bamwe mu rubyiruko rwazigagamo na bamwe mu bari abarezi babo, bemeye gutakaza ubunyabwenge n’ubunararibonye bari bafite, Jenoside iba babirebera kandi banayigiramo uruhare.

Twizerimana Clement, umuyobozi ukuriye ishami ry’imiyoborere myiza mu Karere ka Musanze, ahamya ko nyuma y’imyaka 27 ishize Jenoside yakorewe Abatutsi ihagaritswe, ubu hari icyizere cy’uko baba abanyeshuri biga muri kaminuza n’abarezi, barushaho kubaka imibanire y’abanyarwanda izira amacakubiri binyuze mu bushakashatsi bakora.

Twizerimana yabasabye ko mu bushakashatsi bakora burushaho kwibanda ku mateka y’igihugu

Yagize ati “Za Kaminuza ziba zirimo abantu bize, bakora ubushakashatsi, bushingiye ku bintu byinshi, birimo n’amateka kuri Jenoside zindi zagiye zibaho ku isi. Igishimishije ni uko iyo duhuriye hamwe gutya, twibukiranya na bo umwihariko w’amateka y’igihugu cyacu, n’ukuntu umugambi wo kurimbura Abatutsi wagiye ucurirwa no muri za Kaminuza. Aho abantu bitwaga ko bize ariko bakagira ubumenyi butagira ubumuntu, ari bo bagize uruhare mu kucyoreka”.

Ati “Urubyiruko ruri kuminuza ubu n’abarezi babo, icyizere dufite kuri bo, cyubakiye ku kuba baramaze kwiyumvamo ko icyo bashyize imbere, ari ukurushaho kubaka ubumwe n’imibanire izira umwiryane n’amacakubiri bituma bagendera kure ingengabitekerezo ya Jenoside. Icyo tubasaba ni ugukomeza kongera ingufu mu gukora ubushakashatsi busigasira kwa kuri kw’amateka y’u Rwanda, kugira ngo dukomeze tugamburuza abakomeje kugaragara bacuruza ibinyoma”.

Ku ruhande rw’umuyobozi w’iyi Kaminuza Dr Leoprd Hakizimana, asanga iterambere ritashoboka mu gihe abantu baba bimitse ingengabitekerezo ya Jenoside. Kwibuka Jenoside akaba ari umwanya mwiza wo kugira ngo urubyiruko rusobanurirwe ukuri kw’amateka, bityo bibafashe kubaka ubudasa n’indangagaciro z’abanyarwanda.

Abanyeshuri n’abarezi bo muri Kaminuza ya Kigali, banagejejweho ubuhamya bw’ukuntu abari bahungiye mu cyahoze ari Cour d’Appel Ruhengeri bahizeye ubutabera, bahiciwe mu gihe cya Jenoside yakorewe Abatutsi, bakajyanwa kujugunywa mu byobo byari byaracukuwe ahaje kubakwa urwibutso rwa Muhoza. Aha hombi bahashyize indabo mu rwego rwo kunamira no kuzirikana ubugome bw’indengakamere bw’abakoze Jenoside.

Mu kunamira inzirakarengane z’Abatutsi bazize Jenoside bashyize indabo ku mva iri mu rwibutso rwa Muhoza

Abitabiriye uyu muhango umubyeyi witwa Nyirahabimana Chantal, warokotse Jenoside yakorewe Abatutsi, wo mu Murenge wa Muhoza, bamushyikirije amafaranga ibihumbi 100 mu rwego rwo kumwunganira mu mibereho.

Abitabiriye uwo muhango bunamiye inzirakarengane zazize Jenoside yakorewe Abatutsi

Ubwo butumwa Umuyobozi w’Akarere ka Musanze, Nuwumuremyi Jeannine, yabugarutseho ku wa Kabiri tariki 22 Kamena 2021, mu muhango wo kwibuka abazize Jenoside yakorewe Abatutsi mu 1994, by’umwihariko abari abakozi mu byahoze ari Amakomini yabyaye Akarere ka Musanze.

Abakozi b’ako karere bitabiriye umuhango wo kwibuka Jenoside yakorewe Abatutsi, babanje gushyira indabo ku rukuta rwanditseho amwe mu mazina y’Abatutsi biciwe mu cyahoze ari Cour d’Appel Ruhengeri, nyuma berekeza ku rwibutso rwa Muhoza, bashyira indabo ku mva ishyinguwemo Abatutsi bishwe muri Jenoside.

Muri iki gihe Abanyarwanda bibuka ku nshuro ya 27 Jenoside yakorewe Abatutsi, abakozi b’Akarere ka Musanze ni ubwa mbere bibuka bagenzi babo bishwe muri Jenoside yakorewe Abatutsi, bakoreraga inzego z’ubuyobozi n’ibigo bya Leta bitandukanye, byari mu makomini ya Kigombe, Kinigi, Mukingo, Ruhondo na Nkuri ari na yo yaje kubyara Akarere ka Musanze.

Abitabiriye uyu muhango bacanye urumuri rw’icyizere mu kugaragaza ko aho u Rwanda ruri ari heza

Mukanoheli Josée, ni umwe mu bafite ababo bishwe muri Jenoside yakorewe Abatutsi, akaba ari n’umukozi w’ibitaro bikuru bya Ruhengeri. Avuga ko nyuma y’urugamba rwo guhagarika Jenoside, abayirokotse bafashijwe muri gahunda zitandukanye, zabomoye ibikomere bongera kwiyubaka.

Yagize ati “Jenoside ikirangira twari dufite ibikomere byinshi. Abayirokotse bari bakeneye kuvuzwa, kwiga, kubona amacumbi n’ibindi bitugarurira ihumure n’ubuzima bwari mu marembera. Ibyo byose Ubuyobozi bwacu bwadufashije kubigeraho, butubera aho abacu batari bari, tubasha kwiyubaka. Kuba abakozi b’Akarere ka Musanze bibutse abacu bishwe muri Jenoside, ni ibintu bitwongereye izindi mbaraga zo kubaho twumva dukomeye”.

Mu kiganiro cyatanzwe na Muhire Willington, umwarimu muri Kaminuza ya Kigali ishami rya Musanze, yababwiye uko ubutegetsi bwariho mbere ya Jenoside, bwacuze umugambi wo kuyitegura, burayigerageza, kugeza ubwo buyishyize mu bikorwa muri Mata 1994.

Abakozi b’Akarere ka Musanze bakoze urugendo bazirikana inzira y’inzitane abishwe muri Jenoside yakorewe Abatutsi banyuzemo

Intego yabwo kwari ukugira ngo Abatutsi bose bicwe, hatagize n’uwo kubara inkuru usigara, ariko uwo mugambi mubisha ukaba warahagaritswe n’Ingabo zahoze ari iza RPA, zahagaritse Jenoside yari imaze guhitana Abatutsi basaga miliyoni imwe.

Umuyobozi w’Akarere ka Musanze, Nuwumuremyi Jeannine, yabwiye abitabiriye uyu muhango ko ubu bafite inshingano zo gukumira icyo ari cyo cyose, cyasubiza u Rwanda mu bihe bibi rwanyuzemo.

Ati “Cyane cyane nkatwe b’abakozi tujijutse, dufite uruhare rukomeye, kugira ngo tugaragaze ukuri kw’amateka y’Igihugu cyacu na Jenoside, kugira ngo tuvuguruze abayipfobya. Ikoranabuhanga riri mu byadufasha kumenyekanisha ayo mateka hakiri kare, bidasabye ko dutegereza abaryifashisha bayavangavanga, bayatobanga, bakayavuga uko atari”.

Arongera ati “Ni ahacu rero ho guhakanya abakorera muri uwo murongo, cyane ko uburyo twanyuramo, bwose butwegereye kandi butworoheye, tunaharanira kwirinda icyatuma umwiryano n’amacakubiri bibona aho bimenera”.

Abantu 116 bari abakozi b’ibyahoze ari amakomini yabyaye Akarere ka Musanze, ni bo kugeza ubu bamaze kumenyekana ko bishwe muri Jenoside yakorewe Abatutsi. Mu muhango wo kubibuka hasomwe amazina yabo, abawitabiriye bacana urumuri rw’icyizere.

Mukanoheli Josee warokotse Jenoside yakorewe Abatutsi yemeza ko kuzirikana abayizize bisubiza imbaraga mu bayirokotse

Mu bundi butumwa abo bakozi bahawe ni ugukorana n’inzego zitandukanye n’abaturage, mu gukomeza gushakisha imibiri itaraboneka ngo ishyingurwe mu cyubahiro.

Ibigabiro byahawe abitabiriye uyu muhango byibanze ku kubasangiza amateka y’igihugu

Ndayisaba avuga ko gupfobya Jenoside warayirokotse ari ubuyobe bubi

Umunyambanga Nshingwabikorwa wa NURC, Fidel Ndayisaba, ubwo yatangizaga ukwezi ko kwimakaza ibikorwa by’Ubumwe n’Ubwiyunge mu karere ka Muhanga, yavuze ko gupfobya Jenoside no kuyihakana ari ibyaha bitakwihanganirwa ariko bikaba ubuyobe bukomeye igihe bikozwe n’uwacitse ku icumu.

Yavuze ko gutangiza ukwezi kw’ibikorwa by’Ubumwe n’Ubwiyunge mu Karere ka Muhanga biri mu njyana yo kwibuka ku nshuro ya 27 Jenoside yakorewe Abatutsi mu 1994, kandi ko kwimakaza amahame y’Ubumwe n’Ubwiyunge ari inzira nziza yo kurwanya ingengabitekerezo ya Jenoside no guhangana n’ingaruka zayo.

Agira ati “Aya ni amahitamo meza kuba akarere karahisemo igihe cyihariye nk’uburyo bwo gusoza iminsi 100 yo Kwibuka ku nshuro ya 27 Jenoside yakorewe Abatutsi, biri mu njyana yo kwibuka dushyira imbaraga mu bumwe n’Ubwiyunge kugira ngo tubashe no komorana ibikomere bya Jenoside yakorewe Abatutsi”.

Abapfobya Jenoside yakorewe Abatutsi ni ukubarwanya nta rundi rwitwazo

Hashize igihe abakoresha imbuga nkoranyambaga zitandukanye barimo n’abacitse ku icumu rya Jenoside yakorewe Abtutsi bashinjwe ibyaha byo gukoresha izo mbuga bagakwitakwiza amacakubiri ndetse bagakurikiranwa n’ubutabera ku byaha byo gupfobya Jenoside yakorewe Abatutsi.

Ibikorwa by’ubumwe n’ubwiyunge ni imwe mu nzira yo guhangana n’abahakana bakanapfobya Jenoside

Komisiyo y’Igihugu y’Ubumwe n’Ubwiyunge itangaza ko ibyo ari ibyaha biri mu mujyo wo gushaka gukomeza Jenoside ari na yo mpamvu bigomba kurwanywa kabone n’ubwo uwo bigaragayeho yaba ari uwarokotse Jenoside yakorewe Abatutsi.

Ndayisaba avuga ko uburyo bwiza bwo gufasha guhangana n’ingaruka za Jenoside yakorewe Abatutsi ari ugushyira imbere amahame y’Ubumwe n’Ubwiyunge kuko ayo mahame adahinduka kandi ashyizwe imbere bitanga icyizere cy’uko Abanyarwanda bazakomeza gutsinda Jeoside n’Ingengabitekerezo yayo.

Agira ati “Mu gihe nk’iki twibuka Jenoside ni umwanya wo guhangana n’ingengabitekerezo yayo n’ibifitanye isano na yo birimo guhakana no gupfobya Jenoside yakorewe Abatutsi, ni yo mpamvu tugomba kurwanya uwo ari we wese bigaragayeho akabibazwa n’ubutabera nta kwitwaza ko waba wararokotse Jenoside”.

Yongeraho ati “Ubwo ni ubuyobe bubi cyane igihe uwarokotse Jenoside yakorewe Abatutsi ari we urimo kuyipfobya, uwo bizagaragaraho wese ntawe uzagira icyo yitwaza ahubwo azabihanirwa n’amategeko kuko ni ibyaha bikomeye kandi bihanwa n’amategeko, ni ukwirinda no gutwarwa n’amarangamutima y’uwo yagaragayeho kuko ibyo bigamije gukomeza gukurura ibibi no gukomeretsa abarokotse Jenoside yakorewe Abatutsi”.

Akarere ka Muhanga kashyizeho umwihariko wo gusobanurira abaturage amahame y’Ubumwe n’Ubwiyunge

Bamurange Odette wigeze guhungira i Kabgayi akangirwa kuhinjira akaza kurokokera mu nkengero za Kabgayi avuga ko nawe ababazwa cyane no kubona abacitse ku icumu basigaye bitwaza imbuga nkoranyambaga mu gupfobya Jenoside.

Bamurange avuga ko nyuma yo gusubirana ubuzima Igihugu kimaze kubohorwa ntawe ukwiye kubyibagirwa ngo agarure cyangwa ashyigikire amacakubiri hagamijwe kongera kubuza abarokotse umuteko.

Agira ati “Kabgayi twaharokokeye turi ibihumbi 15 mu bihumbi hafi 60 byari byahahungiye, twasubijwe ubuzima, ndanenga kandi ngasaba ko uwo ari we wese ukomeje guhembera ingengabitekerezo ya Jenoside atareberwa. Ntabwo kuba waracitse ku icumu ari ishema, ntabwo kwitwa uwacitse ku icumu ari Diporome, n’ubwo twarokotse ntawe ukwiye gukomeza kudukomeretsa”.

Umuyobozi w’Akarere ka Muhanga, Kayitare Jacqueline, avuga ko hari bikorwa bitandukanye bigamije kwimakaza amahame y’Ubumwe n’Ubwiyunge nka bumwe mu buryo bwo gukomeza gushimangira ubunyarwanda.

Ibyo bikorwa birimo igicaniro cy’Ubumwe n’Ubwiyunge aho abarinzi b’Igihango bazagabirwa inka, gukomeza kubaka amazu y’ubumwe n’ubwiyunge, gusura abafungiye Jenoside yakorewe Abatutsi, no kuremera abacitse ku icumu rya Jenoside batishoboye.

Avuga ko muri rusange Abanyarwanda bakwiye guhera ku babyiruka babaha amakuru nyayo y’amateka yaranze igihugu kugira ngo bazahore basigasira ubumwe bwagezweho.

Inzu y’Ubwiyunge yubakiwe uwarokotse Jenoside wari umaze imyaka 27 acumbitse

Avuga ko ibikorwa byimakaza amahame y’Ubumwe n’Ubwiyunge bizarushaho gutuma abatuye Akarere ka Muhanga barushaho kunga ubumwe kandi ko abaturage babyumva kuko bagira uruhare muri ibyo bikorwa.

Ibikorwa byo kwimakaza amahame y’Ubumwe n’Ubwiyunge bizamara ukwezi kose kwa Kamena 2021, hatangwa ibiganiro, hakazanashyingurwa mu cyubahiro imibiri y’abazize Jenoside yabonetse hirya no hino mu Karere ka Muhanga.

Minisitiri Busingye yitabiriye igikorwa cyo kwibuka cyabereye ku Mubuga

Ingabire Hilda uhagarariye imiryango y’abaje gushyingura ababo bazize Jenocide, akaba avuka muri paruwase ya Mubuga, avuga ko mu myaka yashize akenshi byagiye bigorana ko bagira icyo bavuga ku munsi wo kwibuka, bitewe n’amateka ndetse n’imiterere y’icyahoze ari perefegitura ya Kibuye.

Avuga ko ukurikije ahandi mu gihugu ako gace batinze gutabarwa maze bakica bakiyongeza ntihagire umukecuru cyangwa umusaza urokoka nk’ahandi.
Ubwo yagezaga ijambo ku bitabiriye igikorwa cyo kwibukaku nshuro 27 Jenocide yakorewe abatutsi, yasobanuye amarangamutima bafite kuba bashyinguye ababo mu cyubahiro.

Ati “Kuri uyu munsi turishimye cyane n’ubwo mutaza kubibona ku maso, ntitwishimye kuko tuje kumvana misa n’abacu nkuko byari bisanzwe, ntidushimishijwe n’uko twaje gutaramana na bo nk’uko kera twataramanaga, ahubwo dushimishijwe n’iki gikorwa cy’indashyikirwa igihugu cyaduhaye”.

Ati “Turashimira cyane Ingabo z’igihugu zadutabaye, twavuye kure cyane, ubu dushobora kuza ku Mubuga amanywa yihangu uko dushaka, tukarara aho dushaka kuko tuzi ko igihugu cyacu gifite umutekano”.

Yongeyeho ko ku Mubuga ari inshuro ya cumi na kabiri bibuka Jenocide yakorewe Abatutsi, kuko mbere bitinyaga, batarabona n’ubushobozi bwo kugira ngo babashe kuhibukira kuko umuhanda wari ukiri mubi cyane.

Yasabye abagize uruhare mu iyicwa ry’abatutsi mu 1994 barimo uwari perezida wa MRND, nk’umuntu wari warize ushoboye kwandika, gutanga abo bafatanyije bityo bababwire aho bashyize ababo.

Ati “Iyi paruwase yagiraga misa eshatu kandi zose zikuzura, iyi misozi murora hariya ni amatongo kandi hari hatuwe n’abacu, iyo urebye ku rutonde rw’abazimye mu cyahoze ari komini Gishyita yari ifite abantu benshi, nta cyakugarurira abawe, nta cyakubuza kuba nyakamwe ngo kikugarurire umuvandimwe, nta cyaguha kugira ngo ubone uwo wereka umwana wabyaye, ariko byibura tumushyingure”.

Arongera ati “Uru rwibutso turarushakamo abacu bose ku buryo ufite icyo yabwiwe n’umubyeyi bwa nyuma baganire, hari imyenda twabonye ni byiza uzajya ayibona azajya yibuka umwenda nyina yakenyeraga aje kumva misa ariko kuhagera ukamuburamo ni akaga gakomeye kandi uzi ko hari umufite ku mutima”.

Minisitiri w’Ubutabera akaba n’Intumwa Nkuru ya Leta, Johnston Busingye, ashimira abagize uruhare bose mu kubaka urwibutso rushya, avuga ko Jenocide yakorewe Abatutsi mu Rwanda ari yo yabaye iy’indengakamere ku isi kuko yabayemo ubugome bwinshi cyane, aboneraho gukomoza ku mateka ya Jenocide yakorewe abari ku Mubuga.

Ati “Jenoside yakorewe Abatutsi muri Kibuye ifite inkomoko ya kure guhera mu 1959 na 1992 ku Mubuga habere ubwicanyi ku Batutsi, bukozwe na Leta ndetse inakingira ikibaba abayikoze, burangajwe imbere na perefe Kayishema. Abo bantu ni na bo muri 1994 bagiye ku isonga yo gutangiza no kuyobora Jenocide muri Kibuye, amahirwe ni uko abenshi muri bo bageze imbere y’ubutabera bagahanirwa ibyaha bakoze. Iki ni kimwe mu bimenyetso byerekana ko Jenocide yateguwe na Leta ikaba ari na yo iyobora ikorwa ryayo”.

Ministre Busingye avuga ko Guverinoma y’ u Rwanda mu nshingano zayo zo kubanisha Abanyarwanda nyuma ya Jenocide yakorewe Abatutsi, yafashe umurongo wo kongera kubaka ubumwe bw’Abanyarwanda ishingiye ku ndangagaciro zo mu muco ari na ko yimakaza ubutabera nk’inkingi yo kubaka igihugu.

Minisitiri Busingye avuga ko inzego z’ubutabera zizakomeza gukurikirana abakoze Jenoside aho bari hose, no gushakisha abakatiwe n’inkiko ku byaha bya Jenoside batarakora ibihano byabo bakidegembya hirya no hino mu Rwanda no mu mahanga.

Yabivuze ubwo yasobanuraga ko ubutabera bw’u Rwanda burimo gukorana n’inzego zibishinzwe mu Bufaransa, kugira ngo Padiri Hitayezu Marcel na Sikubwabo Charles bari mu bicishije Abatutsi ku Mubuga muri Karongi, bafatwe bashyikirizwe ubutabera niba bakiriho, kuko bivugwa ko uwitwa Sikubwabo yapfuye ariko nta gihamya bityo ibikorwa byo gushakisha bigomba gukomeza.

Urwibutso rushya rwo ku Mubuga ruherereye mu Karere ka Karongi, Intara y’Iburengerazuba mu cyahoze ari perefegitura ya Kibuye, rushyinguyemo imibiri 8660.

Umuyobozi Nshingwabikorwa w’Akarere ka Nyarugenge ashyikiriza imfunguzo z’iyo nzu umubyeyi Sengarama

Kompanyi ikusanya ikanatwara imyanda mu Mujyi wa Kigali no mu turere dutandukanye tw’igihugu turimo Muhanga na Kayonza Agruni Company LTD, ni umufatanyabikorwa w’Umurenge wa Rwezamenyo, Umugenzuzi muri iyo kompanyi, Rutabayiro Alex, aganira na Kigali Today yavuze ko uruhare rwayo mu kubakira uwo muturage, yatanze isakaro rigizwe n’amabati 60.

Ni inzu yuzuye urubyiruko rugize uwo Murenge na rwo rubigizemo uruhare, kuva yatangira kubakwa kugeza yuzuye igatahwa ku itariki 6 Kamena 2021, abari bitabiriye icyo gikorwa ngaruka mwaka cyo kwibuka Jenoside yakorewe abatutsi 1994, na bo bakaba baraherekeje uwo mubyeyi watashye inzu.

Umukozi ushinzwe ububiko rusange ndetse no gusana ibyangiritse mu ishuri rya St Joseph Nyamirambo, Ngeri Benjamin, avuga ko icyo kigo cy’Abafurere bafashije mu buryo butandukanye kugeza inzu yuzuye.

Ati "Tukimenya ko inzu Sengarama yari asanzwe akoreramo yari imutunze yasenyutse kubera ibiza by’imvura, nk’abafatanyabikorwa b’Umurenge twatanze umusanzu wo gukora fondasiyo y’inzu ikabakaba hafi ibihumbi magana atandatu. Nyuma twarayikurikiranye yubakwa ku buryo ibyo twatanze byose ugereranyije byatwaye akabakaba miliyoni yose hamwe".

Sengarama wasazwe n’ibyishimo ubwo Umuyobozi Nshingwabikorwa w’Akarere ka Nyarugenge, Emmy Ngabonziza, yamuhaga imfunguzo z’inzu yubakiwe, yavuze ko atabona icyo avuga usibye amarira yatembye ku maso ye, gusa yarihanganye ashimira abamugobotse.

Ati "Ndabashimira mbikuye ku mutima abamfashije bose, Imana izabampere umugisha. Mu by’ukuri nkirokoka nkasigarana na mama umbyara nabonaga isi iturangiriyeho, aho tuboneye akazu twacuruzaga tukabona ikidutunga, kaje guhirima kubera imvura nyinshi ntangira kwibaza icyo nasigariye. Bakoze cyane abagize uruhare nkabona iyi nzu, njye ku bwanjye si nari kuzigera nyigezaho".

Akomeza avuga ko azayibyaza umusaruro akayicururizamo kandi akita no ku bandi bakeneye ubufasha, kuko yagiriwe ubuntu atabitekerezaga, na we ubwe akiyubaka.

Asaba bagenzi be barokotse Jenoside yakorewe Abatutsi gukomera kuko hari impamvu Imana yabyemeye, maze ntibaheranwe n’agahinda ahubwo bagashakisha uko biyubaka bakagendana n’iterambere rigezweho.

Umunyamabanga Nshingwabikorwa w’Umurenge wa Rwezamenyo, Nirere Marie Rose, ashima abo bafatanyije bagasanira Meya inzu, ndetse abasaba gukomeza kurangwa n’umutima ufasha bagenzi babo bafite ibibazo.

Yongeyeho ko nk’Umurenge batabona icyo baha abafatanyabikorwa usibye kubagenera Seritifika z’ishimwe.

Iyo nzu irimo urumuri

Inzu yubakiwe Sengarama ifite agaciro gakabakaba miliyoni esheshatu (6,000,000) harimo n’urumuri (umuriro w’amashanyarazi) yashyiriwemo kugira ngo ntazigere aba mu icuraburindi ukundi, ahubwo urumuri ruhore rumuyobora.

Inzu yabagamo yari yarasenyutse kubera ibiza

Bashyize indabo ahashyinguwe imibiri y’abazize Jenoside

Ni urwibutso rudasanzwe, kuko rufatwa nk’ikimenyetso gikomeye cy’amateka y’igihugu kuri Jenoside yakorewe Abatutsi aho imibiri 166 irushyinguwemo yose ari iy’Abatutsi bishwe mbere ya 1994.

Ku itariki 26 Gicurasi ni bwo abaturage bajya kuri urwo rwibutso rwa Kinigi bibuka kandi bunamira inzirakarengane z’Abatutsi barushyinguyemo, kuko umututsi wa mbere yishwe kuri iyo tariki mu 1991.

Ku wa Gatatu tariki 26 Gicurasi 2021, hateraniye abaturage n’abayobozi banyuranye mu buryo bwubahirije amabwiriza yo kwirinda Covid-19, mu kwibuka inzirakarengane 166 zihashyinguwe.

Mu butumwa bwa bamwe barokotse Jenoside bafite ababo bashyinguye muri urwo rwibutso, bwaranzwe no kwishimira ko mu myaka 27 ihise ari bwo bibutse babona aho ababo bashyinguye nta mazi ahinjira, bavuga ko byabashimishije cyane, bitandukanye n’uko bibukaga mu myaka yahise.

Gahunda yo kwibuka yabimburiwe n’urugendo

Nzamukosha Olive ati “Dukurikije uko urwibutso twarubonye biratanga icyizere, ntabwo bimeze nk’uko twajyaga twibuka hameze ubu nta mazi azongera kwinjira ahashyinguwe abacu kuko harasakaye, hari n’amakaro. Ni ubwa mbere twibutse abacu twishimye, turanezerewe cyane, mbere twarababaraga agahinda kakahadufatira ariko ubu turishimye”.

Mukashema Esperence ati “Urwibutso rumaze igihe rutubatse kandi tubisaba mu myaka yose, ubu twishimye cyane n’ubwo bitabaye nk’uko twabyifuzaga ariko bakoze twishimye cyane, ni na bwo bwa mbere twibutse tunezerewe, twifuzaga ko bakuramo imibiri tukayigira neza kuko dukurikije igihe imaze inyagirwa ubu yarangiritse, nubwo bitakunze ariko badusakariye turishimye cyane, hameze neza pe”.

Munyarutete Joseph, Umuyobozi wa Ibuka mu Murenge wa Kinigi nk’umwe mu bakomeje gusaba ko urwo rwibutso rwubakwa nyuma y’uko yabonaga imibiri ikomeza kwangizwa n’amazi, avuga ko bishimye nyuma y’imyaka 27 bibuka ababo bashyinguye ahantu habi none hakaba hasakawe.

Ati “Nk’ahantu hageragerejwe Jenoside tukibuka iyo myaka yose tubabaye abacu banyagirwa, kuri uyu munsi twibuka ku nshuro ya 27 Jenoside ikorewe Abatutsi turanezerewe, kuko twibutse urwibutso rutarangaye nk’uko byahoze, ubu rurasakaye ntabwo imibiri irimo kunyagirwa”.

Avuga ko n’ubwo hatewe intambwe urwibutso rugasakarwa, urugendo rukiri rurerure nk’ahantu hageragerejwe Jenoside, aho yasabye ko ubuyobozi bwakomeza gutekereza kuri urwo rwibutso hakubakwa urujyanye n’igihe ku buryo abantu bajya bahagera bagasobanukirwa amateka ya Jenoside yakorewe Abatutsi n’uburyo yateguwe, bahereye kuri urwo rwibutso rushyinguwemo abazize Jenoside bicwa mbere ya 1994.

Ubuyobozi bw’Umurenge wa Kinigi bwanayoboye imirimo yo gusana urwo rwibutso, buvuga ko n’ubwo bidahagije, ariko bunezerewe kuba abazize Jenoside barushyinguwemo batakinyagirwa nk’uko bivugwa na Twagirimana Innocent, Umunyamabanga nshingwabikorwa w’uwo murenge, wayoboye ibikorwa byo gusana urwo rwibutso, byatwaye miliyoni 10 z’Amafaranga y’u Rwanda.

Yagize ati “Turishimira ko uyu munsi twibuka abacu bari aho twumva twifuza n’ubwo atari heza cyane nk’uko tubiteganya, ariko byibura harimo intambwe yatewe n’urwego rw’akarere kacu ka Musanze, aho ubuyobozi bwadufashije ko dusakara aho abacu baruhukiye. Tuzi neza ko bataruhukiye aho dushaka ku kigereranyo nyacyo, ariko byibura hari intambwe yakozwe n’ubuyobozi bw’akarere n’ubu dushimira”.

Arongera ati “Imirimo yakozwe kuri ruriya rwibutso yo kurusakara no gushyiraho amakaro arinda amazi kwinjira aho imibiri iruhukiye, bihagaze miliyoni 10 n’amafaranga 300 y’u Rwanda, ariko iriya ni intangiriro kuko mu ngengo y’imari y’akarere ya 2021-2022 urwego rw’akarere rwemereye komite y’abarokotse Jenoside ko bazakora inyigo y’urwibutso, mu ngengo y’imari ya 2022-2023 hakazubakwa urwibutso rujyanye n’igihe turimo”.

Ni umuhango witabiriwe n’abayobozi banyuranye barimo inzego z’umutekano

Rwasibo Pierre, Umuyobozi wa Ibuka mu Karere ka Musanze, avuga ko ikibazo gikomeye gisigaye ari abantu badashaka kwerekana aho imibiri y’abazize Jenoside yajugunwe ngo ishyingurwe mu cyubahiro.

Agaruka kuri urwo rwibutso, yishimiye ibikorwa byarukozweho imibiri ikaba idakomeje kunyagirwa, ariko asaba Leta gushyiramo imbaraga urwo rwibutso rukubakwa neza nk’urwibutso rugaragaza uko Jenoside yateguwe, kuko abarushyinguwemo bose ari abishwe mbere ya 1993.

Umuyobozi w’intara y’Amajyaruguru, Munyarugero Dancilla, yavuze ko gusakara urwo rwibutso imibiri ikaba itarimo kunyagirwa ari uburyo bwo kuyirinda kwangirika, yemeza ko igikorwa cyo kurwubaka mu buryo bujyanye n’igihe ari cyo kigiye gukomerezaho.

Abaterankunga b’Akarere ka Musanze baremeye inka abarokotse Jenoside

Mu gukomeza gufata mu mugongo abarokotse Jenoside yakorewe Abatutsi, abafatanyabikorwa b’Akarere ka Musanze baremeye imiryango ibiri y’abarokotse Jenoside yakorewe Abatutsi inka ebyiri n’amafaranga ibihumbi 400 FRW byo kubafasha.

Kuri ADEPR Kayenzi hiciwe Abatutsi benshi

Nk’uko byasobanuwe na Pasiteri Nteziryayo Vianney, ngo wanakoranye na Uwinkindi Jean mu itorero rya ADEPR, ibyo yakoze mu gihe cya Jenoside yakorewe Abatutsi mu 1994 ngo ntibyamutangaje cyane, kuko n’ubundi ngo inyigisho ze mu rusengero zabaga zirimo ivangura, urwango n’ibindi. Ku bari abapasiteri b’Abatutsi bo, ngo yarabatotezaga ariko bakihangana kuko yari umuyobozi wabo.

Uwinkindi ngo yoherejwe kuyobora itorero rya ADEPR ry’i Kayenzi (mu cyahoze ari Komini Kanzenze) aturutse i Gicumbi mu 1975, ariko we ngo akaba yaravukaga mu cyahoze ari Kibuye, ubu ni Rutsiro muri iki gihe.

Mu gihe cya Jenoside hari abantu benshi cyane cyane abo mu itorero rya ADEPR bahungiye ku rusengero rwa Kayenzi aho Uwinkindi yayoboraga bizeye kuhabona ubuhungiro, ariko si ko byagenze, ahubwo ngo yarabatanze barabica.

Rutagarama Eugene, Umuvugizi wungirije w’Itorero ADEPR

Aho ku rusengero rwa ADEPR Kayenzi ngo hari harashyizwe inkambi z’interahamwe, aho zaruhukiraga, zikagabana ibyo zasahuye, zigahabwa amabwiriza y’aho bazajya kwica ku munsi ukurikiraho, nyuma n’uwo Pasiteri Uwinkindi agatanga raporo muri Komini y’abishwe kuko ngo yakoranaga bya hafi na Leta na yo yariho yica muri icyo gihe.

Uwo Pasiteri Uwinkindi, nyuma y’uko igihugu kibohowe n’inkotanyi, yahungiye muri Repubulika Iharanira Demokarasi ya Congo, nyuma aza gufatwa ashyikirizwa ubutabera. Ubu urukiko rwamuhamije ibyaha bijyanye n’uruhare yagize muri Jenoside, rumuhanisha igifungo cya burundu, ubu akaba afungiye muri Gereza ya Mpanga.

Umuyobozi w’Akarere ka Bugesera, Mutabazi Richard, yunamiye abiciwe i Kayenzi

Kuza kwibukira aho i Kayenzi, ngo ni uko ’aho umupira warengeye ari ho urengurirwa’ nk’uko byasobanuwe na Rutagarama Eugene, umuvugizi wungirije wa ADEPR, n’ubwo imibiri y’abiciwe aho i Kayenzi yashyinguwe mu rwibutso rwa Nyamata na Ntarama, ariko ngo ni ngombwa kwibukira aho abo bantu biciwe, n’amateka yabo akamenyekana.

Yagize ati "Mu bize siyansi bose n’abahanga batandukanye, ntawashobora kuvanaho ibiri mu mitima y’abakorewe Jenoside uretse Imana, kuko uwo Imana yomoye iramukiza".

Rutagarama yongeyeho ko ibyo Uwinkindi yakoze ari ugutandukira inshingano, kuko ubundi iyo umuntu yambaye umusaraba akitwa Umushumba aba ashinzwe gushaka intama no kuziyobora neza, iyo hajemo kuzirya ngo aba atandukiriye inshingano.

Uwo muyobozi kandi yavuze ko n’ubwo itorero ADEPR ryatinze gutangira gutegura ibikorwa byo kwibuka kubera ibintu bitandukanye, harimo kuba bamwe barabifataga nk’icyaha abandi bakabyangira kubera ibyo bahishira, ariko ngo guhera mu 2015 ADEPR yatangiye ibikorwa byo kwibuka kandi ngo bizakomeza n’ubwo bagenda babikorera ahantu hatandukanye mu gihugu.

Abayobozi batandukanye bitabiriye icyo gikorwa

Mu rwego rwo kuzirikana no gufasha abarokotse Jenoside yakorewe Abatutsi, ngo guhera mu 2008 iterero ADEPR ryashyizeho ishami rishinzwe ihungabana, isanamitima n’ubuzima muri rusange. Iryo ngo ni ryo rifasha abahuye na Jenoside gukomeza biyubaka ku mubiri no ku mutima.

Ni muri urwo rwego itorero ADEPR ryagabiye inka abacitse ku icumu babiri, umwe wo mu Murenge wa Nyamata n’undi wo mu Murenge wa Rukumberi.

Rutagarama ati "Inka mubona dutanze si izisaba umugeni, ni izo duhaye bariya bantu mu rwego rwo kubafasha gukomeza kwiyubaka".

Umuyobozi w’Akarere ka Bugesera, Mutabazi Richard, yashimiye itorero ADEPR ryateguye icyo gikorwa cyo kwibuka kuko kwibuka ari uguhamya ko Jenoside yabayeho kandi ko hariho n’abantu bagomba kuyibuka, mu rwego rwo kurwanya abayipfobya.

Yagize ati "Nta Jenoside ibaho nk’impanuka nk’uko ikamyo yarenga umuhanda bitunguranye. Jenoside irategurwa kandi iyo irangiye abayikoze bakurikizaho kuyihakana. Kwibuka bifasha mu kurwanya abapfobya Jenoside".

Meya Mutabazi yaboneyeho gusaba abafite amakuru ajyanye n’ubwicanyi bwabereye aho i Kayenzi kuyatanga kuko ngo imibiri 633 yabonetse ntaho ihuriye n’abaguye aho i Kayenzi.
Gutanga amakuru ajyanye n’aho umuntu yaguye, uko yishwe, ibyo yavuze bwa nyuma n’ibindi, ngo birababaza ariko biraruhura kuko umuntu utarashyingiye uwe ntaruhuka mu mutima, aba yumva azongera kumubona.

Hari babiri barokotse Jenoside batishoboye bagabiwe inka

I Tumba hashyinguwe imibiri 48 harimo 47 yakuwe mu musarane

Yabigarutseho tariki 15 Gicurasi 2021, ubwo mu Murenge wa Tumba ho mu Karere ka Huye bibukaga ku nshuro ya 27 Jenoside yakorewe Abatutsi mu 1994, byanajyaniranye no gushyingura imibiri 48.

Muri iyo mibiri harimo 47 yakuwe mu cyobo cy’umusarane mu minsi yashize muri uwo Murenge wa Tumba, ndetse n’undi mubiri umwe wakuwe mu Murenge wa Ngoma.

Muri iyo mibiri 47 yabonetse mu Murenge wa Tumba, hamenyekanyemo 8. André Martin Kalongozi, avuga ko mu yamenyekanye harimo murumuna we, mushiki we na babyara be.

Mu mibiri 47 hamenyekanyemo 8

Yashimiye ubuyobozi kuba bwarabafashije gushyingura ababo mu cyubahiro maze agira ati “Nshimye ko baduhaye urubuga rwo gushyingura abacu n’ubwo turi muri Coronavirus, ubu ndaruhutse”.

Bagaragaje ko uwaranze aho iyo mibiri 47 yari iri atigeze ashaka kumenyekana ku bwo kwanga kurebwa nabi n’abaturanyi na bo bari bazi ko ihari nyamara bakabiceceka, ariko Perezida wa IBUKA mu Karere ka Huye, Théodat Siboyintore, yaramushimye.

Yagize ati “Igihe nk’ikingiki ni icyo gushimira n’ababa batanze amakuru. Uwayatanze birumvikana ntiyashatse kumenyekana, ariko turamushimira cyane. Iyaba n’abandi babikoraga nk’ukunguku. Turashishikariza n’abandi bazi ahaherereye imibiri kubitubwira, kugira ngo abantu baruhuke.”

Senateri Espérance Nyirasafari

Senateri Espérance Nyirasafari na we wari waje muri icyo gikorwa cyo kwibuka, yagaye abari abayobozi b’u Rwanda mu gihe cya Jenoside, ahereye k’uwari Perezida w’u Rwanda, Théodore Sindikubwabo, bateguye Jenoside bakanashishikariza Abanyarwanda kwica bagenzi babo, kuko ubundi umuyobozi aberaho gushakira abo ayobora ibibateza imbere, aho kubashakira ibibica.

Yagaye kandi Pauline Nyiramasuhuko wari Minisitiri w’umuryango, maze aho kuwuteza imbere agashishikariza abantu kwica.

Yagize ati “Kumva umubyeyi nk’uyunguyu ushishikariza umuhungu we kwica, hari n’aho ubuhamya butugaragariza ko yanamushishikarizaga gufata abagore n’abakobwa ku ngufu, ni igisebo gikomeye”.

Yunzemo ati “Ni na yo mpamvu nk’abagore tugomba kwitandukanya n’iyi migirire, abana tubyara tukabatoza imico myiza, tukabatoza kubaha ikiremwa muntu”.

Yanibukije ko hakiriho abahembera ingengabitekerezo ya Jenoside maze asaba ababyeyi gutoza abana babo ubumwe, gukunda igihugu, ubupfura n’umurimo, kuko ari byo bizatuma batabona aho bamenera.

Madamu Jeannette Kagame yifatanyije n’abandi kwibuka imiryango yazimye

Mme Jeannette Kagame yavuze ko abo bari abagabo, abagore n’abana bambuwe ubuzima, babuzwa amahirwe yo kugira ejo hazaza.

Yagize ati "Kubibuka biduhe imbaraga z’umutima, bidutere n’ishyaka ryo kurwanya ingengabitekerezo n’ipfobya rya Jenoside, mu rugendo rwo gukira ibikomere no gukomeza kunga Abanyarwanda".

Minisitiri w’Ubutabera akaba n’Intumwa Nkuru ya Leta, Johnston Busingye hamwe na Karidinali Antoine Kambanda bitabiriye igikorwa cyo kwibuka imiryango yazimye cyabereye ku rwibutso rwa Jenoside i Nyanza ya Kicukiro.

Icyo gikorwa cyateguwe n’Umuryango w’abahoze ari abanyeshuri barokotse Jenoside yakorewe Abatutsi mu 1994 GAERG, kigamije kwibuka ingo zigera ku 15,593 zari zigizwe n’abantu 68,871.

Minisitiri Johnston Busingye avuga ko kwibuka abari bagize imiryango yazimye bikwiye kujyana no gutekereza gukora ibyari mu migambi yabo.

Yagize ati "Uwatumye bazima iyo abona turi hano amenya ko batazimye, tukibwira ibyo batekerezaga tukabikora, ni ko kubaha agaciro".

Abayobozi batandukanye bitabiriye umuhango wo kwibuka imiryango yazimye mu 1994

Umuyobozi wa GAERG, Egide Gatari, avuga ko akamaro ko kwibuka imiryango yazimye ari ukugira ngo batange ubutumwa ko ubuzima butazimye.

Gatari yagize ati "Twumva ko twebwe abarokotse Jenoside n’abandi bose, iyi miryango yazimye tuyifitiye umwenda wo guhora tuyibuka iteka ryose".

Gatari yakomeje avuga ko uretse imiryango yazimye hari n’ababyeyi (abamama) babaye incike barenga 900 hamwe n’urubyiruko 35,000 rwarokotse Jenoside rugikeneye gusindagizwa (bakeneye ubujyanama mu by’ihungabana n’ubujyanye n’imibereho myiza).

Perezida wa GAERG avuga kandi ko uyu muryango ukomeje kubanisha neza ibyiciro byose by’Abanyarwanda, baba abari barahunze mu 1959, abarokotse Jenoside yakorewe Abatutsi mu 1994 ndetse n’abayikoze barangije igihano ubu bakaba barasubiye mu muryango nyarwanda.

Umuyobozi w’Umuryango Ibuka, Nkuranga Egide na we yashimiye imiryango yose igira ibikorwa byo kwibuka nka Dukundane Family wibuka abajugunywe mu mazi na Imena family wibuka abatazwi aho baguye.

Rurangirwa agaragaza imwe mu miryango yazimye aho yari ituye

Ni imiryango yishwe mu turere twose tw’u Rwanda mu gihe cya Jenoside yakorewe Abatutsi mu minsi ijana, ariko imiryango myinshi yazimye ikaba yari iherereye mu bice ingabo z’Inkotanyi zitabashije kugeramo vuba mu gihe cy’urugamba rwo guhagarika Jenoside.

Ni imiryango yari mu bice byari birinzwe mu buryo bukomeye n’ingabo z’amahanga zitwaga ko zaje mu butumwa bwo kubungabunga amahoro.

Ubushakashatsi bwakozwe n’umuryango GAERG uhuza abahoze ari abanyeshuri barokotse Jenoside yakorewe Abatutsi, bugaragaza ko imiryango myinshi yazimye yari iherereye mu turere twa Karongi na Nyamagabe, tukaba ari tumwe mu turere twari tugize agace kiswe ‘Zone Turquoise’.

N’ubwo Akarere ka Rutsiro katari muri Zone Turquoise, hari abatutsi benshi bayihungiyemo bizera kuzarengerwa n’ubuyobozi ariko ntibashobora kubigeraho, benshi bakaba bariciwe muri Stade Gatwaro na Home Saint Jean biri mu Murenge wa Bwishyura ubu.

Akarere ka Rutsiro kari ku mwanya wa 11 mu kugira umubare w’imiryango myinshi yazimye aho gafite 621 igizwe n’abantu 2983, kandi imiryango 214 yazimye iri mu Murenge wa Boneza.

Iyo bavuze umuryango wazimye, baba bavuze umuryango wishwe ntihagire ushobora kurokoka, haba umutware w’urugo, umugore n’abana.

Umudugudu wa Muyange ni umwe mu midugudu yaguyemo abantu benshi ndetse habonekamo imiryango 25 yazimye, harimo umuryango wa Ndekezi Tharicisse Uziya wishwe tariki ya 8 Mata 1994, bapfa barimo gusenga.

Umuryango wa Ndekezi wizeye gusenga utsembwa n’interahamwe

Ndekezi Tharicisse Uziya yavutse mu 1951 mu muryango w’Abahanga, Jenoside yakorewe abatutsi yabaye ari umudiyakoni mu itorero ADPR muri Segiteri Busanza, afite abana umunani barimo abakobwa batanu n’abahungu batatu ndetse yitegura kubona umwuzukuru kuko umwe mu bakobwa be "Mutesi" bamwishe atwite.

Ndekezi wari ufite imyaka 45 ubwo Jenoside yakorewe Abatutsi yatangiraga, yari asanzwe yitwa Magorwa kubera kugirirwa nabi n’insoresore za CDR na MRND bamuhora ko ari Umututsi.

Bamwe mu bamuzi bavuga ko yari yarabaye igikange kuko iyo yabonaga abantu benshi yanyuraga mu bisambu atinya kugirirwa nabi.

N’ubwo yari umudiyakoni yigisha abantu kugira imyitwarire myiza no gukunda Imana babihereye kuri begenzi be, ni umwe mu bantu batigeze berekwa urukundo kuko interahamwe zamusangaga iwe zikamusahura ibyo atunze agakomeza gutuza.

Jenoside itangira muri Busanza

Tariki ya 7 Mata 1994, inkuru y’urupfu rwa Perezida Habyarimana yatumye nta muturage wemererwa kuva mu rugo, ndetse mu gitondo muri uwo murenge wo mu cyaro kegereye ikiyaga cya Kivu bariyeri zari zamazwe gushyirwaho, maze abari abayobozi b’interahamwe na CRD n’abandi babiyunzeho batangira gukora inama zo kwica Abatutsi.

Eric Rurangirwa yari umusore w’imyaka 24, avuga ko abantu babujijwe kuva mu ngo mu gihe interahamwe zakoraga inama y’uburyo Abatutsi bagomba kwicwa.

Agira ati "Mu gihe ubwoba bwari bwatashye abantu, Ndekezi n’umuryango we ntibigeze bava mu rugo kuva tariki ya 7 Mata, ahubwo bari batangiye ibikorwa byo gusenga".

Mu murenge wa Busanza Jenoside yatangijwe na konseye wa segiteri Kinunu wahereye ku Batutsi bari baturanye kimwe n’abari bahungiye iwe bizera ko ntacyo bazaba.

Tariki ya 8 Mata 1994, ni bwo Abatutsi batuye i Muyange yegeranye na Kinunu babonye nta bundi buhungiro, bamwe bagerageza kwishyira hamwe ngo birwaneho muri selile ya Muyange ndetse bashobora gusubiza inyuma ibitero bagabwaho n’interahamwe zifite intwaro gakondo inshuro ebyeri, ariko ku nshuro ya gatatu hazamo abafite imbunda na grenade bayobowe na Sgt Kambanda Alexandre wari umusirikare aba mu kigo cya gisirikare cya Mukamira ariko ubwo indege ya Habyarimana yagwaga, bwakeye yageze i Kinunu kuyobora ubwicanyi.

Bizimungu Ernest, umwe mu bahungiye i Muyange, avuga ko igitero cya mbere cy’interahamwe cyatangiye saa yine z’amanywa, gisubizwa inyuma hakoreshejwe amabuye, ikindi cyagarutse saa tanu na bwo gisubizwa inyuma maze bajya gushaka abafite imbunda bavuga ko harimo Umututsi "Nyambwana Dominique", wabaye umusirikare, badashobora kubatsinda badafite imbunda.

Igitero kiyobowe na Sgt Kambanda, Ndagijimana Emmanuel wari warabaye umusirikare ariko agirwa umurinzi w’ishyamba ndetse akajya no gutoza interahamwe mu Gishwati, Abudoni Kabanda wari warabaye umusirikare akivamo ariko atahana ibikoresho bya gisirikare birimo grenade yakoresheje mu kwica abatutsi.

Hari Nyirimanzi Desire wari ufite imodoka yakoreshwaga mu kujugunya Abatutsi bishwe mu ishyamba rya Magaba, hitwa Nyiramusambi ndetse kugeza n’ubu hari imibiri yaburiwe irengero.

Hari Kagoyi Antoine wari umwarimu, Nyamujugunya Daniel wari umupolisi wa Komini kayove hamwe na Burigadiye wa Komini, Turimungando Yolamu.

Abo bose bari bafite imbunda na grenade bafatanyije n’interahamwe zifite intwaro gakondo, ku isaha ya saa saba bashoboye gutatanya impunzi z’abatutsi babarirwa mu magana bari bishyize hamwe maze batangira kubica umugenda baberekeza inzira igana ku kiyaga cya Kivu, urugendo rureshya na 1,5km.

Ndekezi Tharicisse n’umuryango we bari mu nzu basenga Imana bavuga ko nta yandi mahungiro nk’uko byemezwa na Rurangirwa Eric bari kumwe.

Ati "Yambwiye ko twasenga tugapfa twihannye kuko ntaho guhungira, mubwira ko nzapfa niruka, nahise ngenda, yinjiza mu nzu abo mu muryango we batangira amasengesho kugeza interahamwe zibasenyeho inzu".

Urupfu rwa Ndekezi n’umuryango we

Ubwo interahamwe zari zimaze kwica Abatutsi bari bagiye bahunga umugenda bagana ku kiyaga cya Kivu, bazamutse umusozi bataha basanga umugabo Harindintwari Epaphra arimo guhinga imirima y’Abatutsi yari yamaze kubohoza, maze interahamwe zimubaza impamvu ataje kubafasha gukora ababwira ko arimo kubanekera.

Harindintwari yemeye icyaha atanga n’amakuru mu rukiko Gacaca rwarimo Bizimungu Ernest ugira ati "yatanze ubuhamya ko ari we warangiye interahamwe kwa Ndekezi azibwira ko ari Abatutsi zikagenda zikabica".

Interahamwe zasanze Ndekezi n’umuryango we mu nzu barimo gusenga zirabatemagura, harimo umuhungu wa Ndekezi witwa Nshimyuwera zakuyeho amaboko ku ntugu zombi, Murebwayire umukobwa wa Ndekezi wari urangije amashuri yisumbuye n’abandi bana bose, maze zirangije kubatemamgura zibasenyeraho inzu.

Urupfu rwa Nshimyuwera na Murebwayire

Nshimyuwera n’ubwo yari yatemaguwe ndetse yakuweho amaboko yashoboye kuva mu binonko by’inzu ariko abura kitabwaho kuko yirirwaga atabaza kubera uburibwe harabuze uwamufasha, ndetse n’interahamwe zanga kumwica ngo azicwe n’ububababare.

Ahahoze inzu ya Ndekezi

Abaturage bavuga ko igihe cyose Nshimyuwera yamaze isazi zimutumaho ku bisebe harabuze uwamuha imiti, yahoraga atabaza maze abaturage basaba interahamwe yitwa Hinda kubakiza urusaku ibona kumwica.

Murebwayire watemanywe n’abo mu muryango we, ntiyashoboye guhita apfa, ahubwo yakomeje gutabariza mu binonko yarunzweho, maze umwe mu baturanyi, Kubwimana Antoine, wasenganaga na Ndekezi aza kumukuramo.

Ati "Kubwimana ntiyarafite aho kumujyana kuko na we interahamwe zari zimumereye nabi, gusa yashoboye kuza amukuraho ibinonko by’inzu, agerageza kumwomora ibisebe, ubundi akajya amuzanira ibyo kurya ariko atamukuye aho".

N’ubwo Kubwimana yagerageje kumushyiraho imiti gakondo, ntiyashoboraga kuvura ibikomere by’imihoro yari yatemaguwe hiyongeraho imbeho byaje kuviramo Murebwayire gupfa, maze umuryango wa Ndekezi uzima utyo.

Ubwicanyi ndengakamere muri Muyange bwahitanye imiryango 25 yazimye, gusa buri nkuru igira kibara, ariko imisozi ya Muyange ni yo ibitse amabanga y’uburyo Abatutsi bari bayituyeho bishwe, ubu hamwe hakaba ari amatongo ahandi hakaba haribagiranye ko hari hatuye imiryango kuko ntakimenyetso cyagaragaza ko hari hatuwe.

Buri mwaka hibukwa Abatutsi bo ku Mayaga bazize Jenoside barimo n’abishwe n’Abarundi hagasabwa ubutabera

Yabitangaje mu gikorwa cyo Kwibuka ku nshuro ya 27 Abatutsi bazize Jenoside bashyinguye mu rwibutso rw’Akarere rwa Ruhango, ku wa 09 Gicurasi 2021, bamwe mu bibukwa ku Mayaga bakaba barimo n’abishwe n’’mpunzi z’Abarundi zari zarahungiye mu Rwanda muri icyo gice cy’Amayaga.

Abatanga ubuhamya ku mpunzi z’Abarundi zari zaracumbikiwe ku Mayaga bavuga ko zitabajwe nk’abantu bari basanzwe bazwiho kwica kubera ibibazo by’ubwicanyi iwabo mu Burundi, kandi bakaba barabwirwaga ko gutera inkunga muri Jenoside ari kimwe mu bizazifasha kwirindira umutekano no kwihorera ku baziteje ubuhunzi.

Bavuga kandi ko izo mpunzi zigishije Interahamwe ubwicanyi bukoranye ubugome kugeza ku gipimo cyo kurya imibiri y’Abatutsi bamaze kwicwa ibyo ngo bikaba byarabaye ku manywa y’ihangu, nyamara ubwo Inkotanyi zari zimaze kubohora Igihugu abo Barundi basubiye iwabo, ubutabera bubura butyo kuri Jenoside bakoze ku Mayaga.

Umwe mu babyeyi bazi ubugome bw’Abarundi avuga ko bagize uruhare mu gutinyura no kwigisha Interahanwe uburyo bwo kwica vuba kandi nabi.

Agira ati "Abarundi bagendaga imbere y’Interahamwe bakazigisha uko zica Abatutsi nabi kuko bo bari bamenyereye kwica aho iwabo mu Burundi, nta mbabazi bagiraga, impiri zabo zabagaho imisumari, bicishaga ibisongo n’amacumu nkatwe twizera Imana twemera ko izabibabaza ariko n’inzego z’ubutabera zikwiye kubibaryoza".

Uhagarariye umuryango uhuje Abarokotse Jenoside ku Mayaga, (AGS) na we ahamya ko Abarundi bakoze Jenoside mu buryo bw’indengakamere kandi hakomeje gusabwa ko Leta z’ibihugu byombi zaganira uko bakurikiranwa kuko Jenoside ari icyaha kidasaza.

Nyuma y’uko umubano w’u Rwanda n’u Burundi ujemo agatotsi, ibyo gukurikirana abo Barundi na byo bisa nk’ibyatakaje icyizere ku butabera bwakomeje gusabwa, ariko ubu ngo gishobora kongera kubyuka ukurikije uko ibihugu by’u Rwanda n ’u Burundi biri kugerageza kongera gutsura umubano.

Umuyobozi w’Akarere ka Ruhango, Habarurema Valens, yizeza Abanyarwanda by’umwihariko abarokotse Jenoside ku Mayaga ko amakuru ava mu bayobozi bakuru b’Igihugu ku mibanire myiza y’ibihugu byombi agaragaza ko ikomeje kuzahuka kubera ibiganiro byatangiye, kandi bikomeje gukorwa ku mpande zombi, bikaba byanatanga icyizere cyo kuzakurikirana n’Abarundi bakoze Jenoside mu Rwanda.

Agira ati "Abayobozi bakuru b’Igihugu cyacu bari mu biganiro ku buryo u Burundi n’u Rwanda bakongera gutsura umubano mwiza kandi bizeza ko bigeze ahashimishije, natwe rero nta gushidikanya ko kongera kubana neza byatuma byoroha no gusaba gutanga ubutabera kuri abo banyamahanga basize bakoze Jenoside bakirukira iwabo kandi turabyizeye kuko Jenoside ari icyaha kidasaza uko byagenda kose abakiriho bazamenyekana bazakurikiranwa".

Nyuma ya Jenoside hakomeje gukusanywa amakuru ku myitwarire y’Abarundi bakoze Jenoside ku Mayaga ariko hakaba imbogamizi ku kumenya amazina yabo nyakuri ngo dosiye zabo zibe zategurwa, ariko ubu ngo hari bake bamaze kumenyekana ku buryo kubageraho byatanga icyizere cyo kumenya na bagenzi babo bafatanyije gukora Jenoside ku Mayaga.

Iyo gahunda yitabiriwe n’abantu bagera kuri 30 barimo na Jean Pierre Karabaranga, Ambasaderi w’u Rwanda muri Senegal unashinzwe Ibihugu bya Guinea Bissau, Mali, Cabo Verde na Gambia.

Iyo gahunda yaranzwe no gucana urumuri rw’icyizere, umunota wo kunamira inzirakarengane zisaga miliyoni zishwe muriJenoside yakorewe Abatutsi n’ubuhamya n’ubutumwa bwa bamwe mu bitabiriye iyo gahunda.

Abana biga mu ishuri “Ecole Française” muri Guinea Bissau batanze ubutumwa bwihanganisha abacitse ku icumu rya Jenoside. Umuyobozi w’iryo shuri, mu ijambo rye yagaragaje ko Jenoside yakorewe Abatutsi ari icyaha ndengakamere kandi ko yemejwe n’Umuryango Mpuzamahanga.

Perezida w’Umuryango w’Abanyarwanda baba muri Guinea Bissau, Moise SANDE, yahamagariye abantu bose kwamagana abahakana n’abapfobya Jenoside yakorewe Abatutsi n’abakwirakwiza ingengabitekerezo ya Jenoside aho baba bari hose.

Umwe mu Banyarwanda baba muri Guinea Bissau Ndorimana Mubiligi, mu buhamya bwe yagarutse ku mateka mabi y’ivangura yagejeje u Rwanda kuri Jenoside yakorewe Abatutsi, agaragaza ko n’ubwo Jenoside yabaye afite imyaka 12, nk’utarahigwaga muri icyo gihe yabonye uko Abatutsi bishwe bazira uko baremwe.

Yagaragaje ko ingengabitekerezo y’urwango yabibwe mu Banyarwanda harimo n’abana bato bo mu mashuri abanza. Yashimye ingabo zari iza FPR Inkotanyi zahagaritse Jenoside yakorerwaga Abatutsi zari ziyobowe na Paul Kagame, anashishikariza Abanyarwanda gukomeza inzira y’ubumwe n’ubwiyunge no guharanira guteza imbere igihugu.

Ambasaderi Jean Pierre Karabaranga, mu butumwa bwe, yashimiye Abanyarwanda baba muri Guinea Bissau uko bateguye gahunda yo Kwibuka ku nshuro ya 27 Jenoside yakorewe Abatutsi. Yagarutse ku mateka mabi y’ivanguramoko yaranze u Rwanda kuva mu 1959 kugeza mu 1994. Yasobanuye ukuntu Abatutsi bishwe urw’agashinyaguro muri Jenoside yakorewe Abatutsi mu 1994.

Yagaragaje ko n’ubwo amahanga yatereranye Abanyarwanda mu gihe cya Jenoside yakorewe Abatutsi, ingabo za FPR Inkotanyi zaranzwe n’ubutwari zari ziyobowe na Perezida Paul Kagame, zayihagaritse. Yahamagariye Abanyarwanda n’inshuti z’u Rwanda kurwanya mu buryo bwose bushoboka, imvugo n’ibikorwa byose bijyanye n’ihakana n’ipfobya bya Jenoside yakorewe Abatutsi n’ingengabitekerezo ya Jenoside aho iva ikagera. Yahamagariye by’umwihariko urubyiruko gukomeza gusigasira ubumwe bw’Abanyarwanda no guharanira ejo heza h’u Rwanda.

Ubwo muri RAB bibukaga Jenoside yakorewe Abatutsi, hashyinguwe imibiri 13

Yabigarutseho ku wa 27 Mata 2021, ubwo mu kigo ayobora bibukaga Jenoside yakorewe Abatutsi mu 1994.

Mu ijambo rye yagarutse ku kuba hari abagiye bahungira mu cyari ISAR, ari yo ubu yitwa RAB, bibwira ko ubwo ikigo gikorwamo n’abanyabwenge ahari bo babasha kumva agaciro k’umuntu ntibabice, nyamara ku itariki ya 26 n’iya 27 Mata hakagwa benshi, harimo n’abahakoraga.

Yagize ati “Kuba cyari ikigo cy’intiti bigaragara ko bitahagije kugira ngo abantu babashe kugaragaza itandukaniro, bashyiramo ubwenge. Ubukana bwa Jenoside bwari bwarageze ku rugero rw’uko n’umuntu ibyo yize abyibagirwa, agafata umuhoro afite amashuri y’ikirenga, akajya kuri bariyeri. Ni ibintu byari bigayitse, n’iyo abantu babisesenguye birabarenga”.

Abiciwe mu cyari ISAR ubu bamwe bashyinguye mu rwibutso rwa Jenoside rwa Rubona rushyinguyemo imibiri 182, abandi mu rwibutso rwa Jenoside rwa Songa, ubu rushyinguyemo imibiri 43,267.

Dr. Patrick Karangwa, umuyobozi mukuru wa RAB

Kwibuka Jenoside yakorewe Abatutsi muri RAB, byajyaniranye no gushyingura mu cyubahiro imibiri 13 yabonetse mu tugari tune two mu Murenge wa Rusatira, ari na wo urimo icyicaro cya RAB.

Mu bashyinguwe harimo umuryango w’umugore n’umugabo n’abana babiri babonywe mu murima, ababo babamenya barebeye ku myenda bari bambaye, kuko ngo bayibukaga.

Vestine Mukamugema, umwe mu bo muri uyu muryango wabashije kumenyekana yagize ati “Twari kumwe hano muri ISAR, ari ho twari twahungiye, biba ngombwa ko dutandukana ariko twebwe turasigara. Biratunejeje kuba tubashyinguye”.

Innocent Rwandekwe na we wo muri uyu muryango, yavuze ko kuba babashije kubashyingura bibakuriyeho urujijo rw’uko bibwiraga ko bashyinguwe mu yindi mibiri yagiye ibonwa mbere.

Yagize ati “Iyo umaze gushyingura uwawe, bimwe mu bikomere uba ufite bisa n’aho byoroshye kuko ubona uburyo bwo kujya uza ku rwibutso, ukibuka uzi neza ko washyinguye uwawe. Biratwubaka”.

Kuri we kandi ngo kubona hari imibiri iboneka bigaragaza ko hari abandi batarashyingurwa, bityo agasaba abazi aho baherereye kuhavuga.

Ati “Bapfuye ku manywa, kandi n’ubwo byaba nijoro, ibyo ari byo byose bishwe n’abantu, barahazi rero. Bakwiye kugaragaza ahari iyo mibiri, igashyingurwa, ni byo byafasha uwasigaye kwiyubaka”.

Imibiri 20 yabonetse mu bitaro bya Gitwe yashyinguwe mu cyubahiro

Ubuyobozi bw’Akarere ka Ruhango butangaza ko gushyingura iyi mibiri mu cyubahiro bigaragaza intambwe imaze guterwa mu bumwe n’ubwiyunge aho abatanze amakuru bari barambiwe guhishira ikibi dore ko iyo mibiri yabonetse nyuma y’imyaka 26 Jenoside ibaye.

Abacitse ku icumu rya Jenoside mu Karere ka Ruhango na bo bavuga ko bishimiye kuba iyo mibiri yashyinguwe mu cyubahiro hamwe n’indi yagiye iboneka hirya no hino ku makuru atangwa n’abaturage.

Minisitiri w’Ubuzima Dr. Daniel Ngamije ari mu bari baje kwibukira mu Ruhango

Nkurunziza Jean Marie utuye mu Mujyi wa Kigali uhagarariye imiryango yashyinguye ababo mu Ruhango avuga ko kuba imibiri y’abishwe igikomeje kutagaragara ngo ishyingurwe mu cyubahiro bikomeje kubangamira gahunda y’Ubumwe n’Ubwiyunge bityo ko iyabonetse igashyingurwa mu cyubahiro ari ibintu bishimishije.

Agira ati “Iyo tumenye amakuru y’ahajugunywe abacu ni ikimenyetso kigaragaza ko ingengabitekerezo ya Jenoside izajya igenda igabanuka, birashimishije kuba twari tumaze imyaka 27 tukaba dushyinguye imibiri yabonetse hirya no hino no mu bitaro bya Gitwe yabonetse tubifitiye amakuru ariko bikaba bitari byarabaye”.

Imwe mu miryango y’abacitse ku icumu n’abaturage bari bitabiriye igikorwa cyo kwibuka hubahirizwa amabwiriza yo kwirinda COVID-19

Umuyobozi w’Akarere ka Ruhango, Habarurema Valens, avuga ko kuba hagishyingurwa imibiri iboneka hirya no hino mu Gihugu, ari ikimenyetso cy’uko Jenoside yakoranywe ubugome ndengakamere kandi ko hari abadashaka kugaragaza ahajugunywe imwe mu mibiri ikomeje kubura kugira ngo igikorwa cyo gushyingura mu cyubahiro kibe cyasozwa.

Agira ati “Ubu uyu munsi twashyinguye mu cyubahiro imibiri 100, hano muri uru rwibutso haruhukiye indi mibiri isaga ibihumbi 20 ni ikimenyetso cy’uko ibi atari imikino, tukaba dusaba abagihakana n’abapfobya Jenoside yakorewe Abatutsi kwisubiraho kandi Abanyarwanda bakagira uruhare mu kubagaragaza bagahanwa”.

Habarurema avuga ko kuba hari imibiri ikomeje kuboneka kandi biterwa no kuba hari Abanyarwanda bamaze kurambirwa guhishira ikibi bakiyemeza kuvugisha ukuri ari na yo mpamvu imibiri yo mu bitaro bya Gitwe yabonetse.

Abayobozi b’akarere ka Ruhango bashyize indabo ku rwibutso

Agira ati “Birashimishije kuba Abanyarwanda benshi bariyemeje kwitandukanya n’ikibi bakavugisha ukuri kuri iriya mibiri igashyingurwa mu cyubahiro kuko ni ikimenyetso cy’uko kuvugisha ukuri n’ubumwe n’ubwiyunge bigenda bigerwaho”.

Habarurema avuga kandi ko ingengabitekerezo ya Jenoside ubu yabaganutse cyane mu Karere ka Ruhango kuko muri iki gihe cyo kwibuka ku nshuro ya 27 Jenoside yakorewe Abatusti hagaragaye imwe gusa mu gihe wasangaga hagaragara izirenze 10, agasaba abaturage gukomeza kurangwa n’ukuri no gusigasira amahoro kugira ngo bakomeze gufasha abarokotse Jenoside kwibuka banarushaho kwiyubaka mu nkingi zitandukanye.

Inzego z’umutekano na zo zitabiriye

Abaje Kwibuka bari bitwaje n’amafoto y’ababo bashyinguye mu Rwibutso rwa Ruhango

Hanashyinguwe imibiri yimuwe mu mva itari ishyinguye neza

Abo mu muryango wa Disi Dieudonné bashyinguye ababo mu cyubahiro

Abagize uyu muryango bavuga ko bashimishijwe no kubasha gushyingura abavandimwe babo, Uwayezu Deny, Ufiteyezu Ramond bari bamaze imyaka isaga itatu barabonetse mu musarane w’abaturanyi.

Kayisire Devotha, umwana wa kabiri mu muryango wa Disi Didace, yagize ati “Imbere y’Imana ihoraho ndishimye! Mu gihe cy’imyaka itatu tubakuye mu musarane, duhirimbana, intsinzi ya mbere n’iyi kuba tubashije kubashyingura mu cyubahiro”.

Yungamo ati “Iyo ubonye uwawe umukuye aho yari azirikiye mu mashitingi, ukabona uramushyinguye wumva uruhutse. Rwose ndaruhutse”.

Kayisire yavuze ko ashimira Perezida wa Repubulika wahagaritse Jenoside, agashimira kandi abaturage bo mu Murenge wa Kibilizi muri Nyanza bagumye ku kuri bakitandukanya n’ibyo yita amakuru y’ibinyoma yatanzwe n’uwari Umunyamabanga Ushingwabikorwa w’uwo murenge kuri iyo mibiri, byanatumye kuyishyingura mu cyubahiro bitinda.

Devotha Kayisire avuga ko kuba babashije gushyingura abavandimwe babo bibaruhuye

Ni iki cyatumye gushyingura iyo mibiri bifata imyaka irenge itatu?

Depite Eutalie Nyirabega uvuka mu Murenge wa Kibilizi ndetse akaba n’umuturanyi wo kwa Kaberuka ahakuwe abana bo kwa Disi Didace, avuga ko gushyingura mu cyubahiro biruhura imitima y’abarokotse Jenoside.

Ku bijyanye no gutinda gushyingura iyo mibiri, bishingiye ku makuru yayitanzweho, Depite Nyirabega avuga ko iki kibazo ubu kiri mu nkiko, agasaba ko hategerezwa icyo ubutabera buzanzura.

Umuyobozi ushinzwe imirimo rusange mu Karere ka Nyanza, Nkurunziza Enock, avuga ko kuba umuyobozi wavuzweho gutanga amakuru avuguruzanya ku mibiri y’abana bo kwa Disi Didace, akiri mu nshingano z’akazi atari ukwirengagiza icyo kibazo kuko uwo muyobozi n’ubu akiri gukurikiranwa.

Ati “Nagira ngo mbizeze kandi tumare n’impungenge umuryango wa Disi Didace ko mu by’ukuri nta burangare ubwo ari bwo bwose buhari, kuko twizera ko dufite ubutabera bushoboye kandi buzafasha kugira ngo hatangwe ubutabera”.

Bishimiye ko ababo bashyinguwe mu cyubahiro

Iki ni ikibazo kandi Disi Dieudonné, aherutse kugeza kuri Minisitiri w’Ubutegetsi bw’Igihugu, Gatabazi Jean Marie Vianney, amusaba kugira igikorwa ku muyobozi uvugwaho gutanga amakuru atari ukuri ku mibiri y’abazize Jenoside yakorewe Abatutsi mu 1994.

Mu butumwa yanyujije kuri Twitter, ku wa Gatanu tariki 02 Mata 2021, Disi yagize ati “Nyakubahwa Minisitiri Gatabazi, nabasabaga ko muri iki gihe twitegura kunamira inzirakarengane zakorewe Genocide yakorewe Abatutsi, mwaba muhaye ikiruhuko HABINEZA J BAPTISTE, gitifu w’Umurenge wa Nyagisozi (Nyanza), kubera igikorwa gipfobya Jenocide yakoze ubwo yari gitifu w’Umurenge wa Kibirizi, agahisha imibiri y’abacu yari yabonetse mu musarane, akajya gutanga ubuhamya butari bwo bigatuma abatwiciye bagirwa abere.
Nyuma twitabaje Nyakubahwa Perezida wa Repubulika ngo adufashe kugarura iyo mibiri kandi byarakozwe yose uko ari 4 ubu iri ku Murenge wa Busasamana i Nyanza”.

Disi Dieudonné, avuga ko yahisemo kwandikira Minisitiri Gatabazi kugira ngo agaragaze akababaro batewe na Gitifu Habineza nk’umuryango wa Disi, ariko na none nk’umuryango mugari w’Abanyarwanda.

Ati “Nyakubahwa Minisitiri Gatabazi akwiye kubimenya, akamenya ko Gitifu Habineza yaduhemukiye, agahemukira umuryango Nyarwanda muri rusange”.

Depite Nyirabega Eutalie

Minisitiri Gatabazi yabwiye Kigali Today ko ikibazo yacyakiriye, kandi ko inzego zibishinzwe ziri kugikurikirana, kandi yizeza uyu muryango ko ubwo yabimenye agiye kubikurikirana hakagaragara ukuri.

iyahoze ari Kaminuza Nkuru y’u Rwanda iranengwa kuba itaramaganye Jenoside

Yabigarutseho kuri uyu wa 22 Mata 2021, ubwo mu ishami rya Kaminuza y’u Rwanda ry’i Huye bibukaga ku nshuro ya 27 Jenoside yakorewe Abatutsi.

Mu ijambo rye yavuze ko mu gihe cya Jenoside yakorewe Abatutsi mu mwaka w’1994, abanyeshuri n’abarimu basaga 400 baguye muri Kaminuza Nkuru y’u Rwanda, kandi ko ibyo umuntu abirebeye mu ishusho rusange, akagereranya n’ahandi Abatutsi babaga bahungiye nyuma bakahicirwa, uyu mubare wari munini cyane.

Yakomeje agira ati “Noneho byakwiyongeraho ko Motto ya Kaminuza Nkuru y’u Rwanda yari: Urumuri n’agakiza bya Rubanda, ukibuka ko nta tandukaniro ryabaye kuri uyu musozi, wumva ari akumiro”.

Yunzemo ati “Kuba ari nta gukiza, cyangwa nibura kugerageza guhisha Abatutsi kwigeze kuvugwa ahangaha, kuba ari nta jwi ryamagana ubwicanyi rirengera abari bibasiwe ryahaturutse, biragorana kwemera. Mbese habagaho imvugo itagira aho ihuriye n’ingiro”.

Kuri we ngo amagambo yari meza, ariko kuba mu mitima hari harabibwemo urwango, byatumye nta gakiza nta n’urumuri rujyana ku cyiza ruturuka muri NUR.

Ati “Kandi birazwi ko bamwe mu bacengeje urwango mu mitima y’Abanyarwanda baje kuzavamo abajenosideri bahekuye u Rwanda, na Ferdinand Nahimana, wari uw’iyi Kaminuza, abarimo”.

Prof. Alexandre Lyambabaje, Umuyobozi mukuru wa Kaminuza y’u Rwanda

Yasabye rero abarimu ba kaminuza y’u Rwanda ko mu gihe bigisha, barushaho kujya bibutsa urubyiruko ko iyicwa ry’Abatutsi ryaje kuvamo Jenoside yabakorewe mu gihugu cyabo mu mwaka wa 1994, abari urubyiruko icyo gihe ari bo bari ku ruhembe mu rugamba kwica izo nzirakarengane.

Yagize ati “Maze rero n’ubwo ishyano ryagwiriye u Rwanda tutenda kurihindura, cyangwa ngo abapfuye tubagarure, ikidashidikanwaho ni inshingano ikomeye twe nk’abarimu hamwe n’abanyeshuri dufite, n’uruhare rwisumbuye twagira, mu gukomeza kubaka u Rwanda rw’Abanyarwanda barangwa n’ubwuzuzanye”.

Abanyeshuri biga muri Kaminuza y’u Rwanda bari bitabiriye iki gikorwa cyo kwibuka, bavuze ko nk’urubyiruko biteguye guharanira ko Jenoside itazasubira ukundi, cyane cyane barwanya abayipfobya.

Ange Umwali Mukashyaka wiga mu mwaka wa 4 mu ishami ry’amategeko yagize ati “Dufite inshingano ikomeye cyane yo guhindura ibyo urubyiruko rwakoze, tugakoresha ubumenyi dufite turwanya abapfobya Jenoside kugira ngo itazasubira”.

Ibi ngo bazabikora bifashishije imbuga nkoranyambaga zikunze kugaragaraho ubutumwa bupfobya Jenoside yakorewe Abatutsi kandi bandika ibitabo, bo bagaragaza ko yabaye kandi ko idakwiye gusubira.

Vénuste Mutijima, umuhuzabikorwa wa AERG muri UR/Huye na we ati “Izo mbuga nkoranyambaga abapfobya Jenoside bifashisha natwe nk’urubyiruko turazikoresha. Ndashishikariza bagenzi banjye kutazijyaho tugiye gusubiza abapfobya Jenoside gusa, ahubwo no kubatanga tukaba ari twebwe dutanga ubutumwa nyabwo, bw’amateka atagoretse”.

Umuyobozi w’ishuri Daniel Hollinger

Umuyobozi mukuru w’iryo shuri, Daniel Hollinger, yibukije abanyeshuri ko ibyatumye Jenoside ishoboka bigihari kandi ko ari umukoro w’abakiri bato kuyirwanya n’ingengabitekerezo yayo.

Yagize ati “Inyigisho mbi zuzuye urwango, ingengabitekerezo ya Jenoside n’amacakubiri ni bimwe mu byatumye habaho Jenoside kandi igashoboka. Ni yo mpamvu aho mubibonye mugomba kubirwanya mwivuye inyuma.”

Hollinger yabwiye aba banyeshuri ko bafite amahirwe ndetse n’ubushobozi bwo kubaka isi nziza kurusha uko iri ubu bakoresheje ubumenyi butandukanye bahabwa. Yaba ubwo mu ishuri ndetse no mu buzima bwa buri munsi bacamo.

Irma Ihumure wavutse mu 1991 yatanze ubuhamya bwe avuga uko muri Jenoside bishe se, nyina na musaza we, agakura atabazi, yita uwamureraga nyina ndetse anasobanura inzira yo gukira ibikomere yatewe na Jenoside kubera kubura umuryango.

Irma Ihumure yatanze ubuhamya

Yasabye abanyeshuri kumenya amateka y’u Rwanda uko ari, ati “Mugomba gukoresha uburyo bwose buhari mukamenya ukuri kw’amateka yaranze u Rwanda, hanyuma mukayakoresha mu kubaka u Rwanda rwiza kurushaho.”

Ku ruhare rw’abarezi muri Jenoside, Freddy Mutanguha, umuyobozi wa AEGIS ikigo kirwanya Jenoside ku isi, yasobanuye uburyo Abanyarwanda bigishijwe amacakubiri bihereye hasi no mu ishuri aho bavugaga ko abatwa baturutse muri Congo mu gace ka Ituri, Abahutu muri Tchad naho Abatutsi muri Ethiopia, bakaba barabishe bamwe babajugunya muri Nyabarongo ngo basubire aho bavuye.

Yabwiye abanyeshuri ko uyu munsi u Rwanda rwahindutse kandi ruteze byinshi ku bakiri bato mu kurwubaka.

Umwe mu banyeshuri biga kuri Green Hills Academy witwa Serena Saro Birasa w’imyaka 16 y’amavuko, yavuze ko kwibuka ari ingenzi kuko bifasha kumva amateka no kwirinda gusubira mu byakozwe.

Ati “Mu ishuri twiga amateka y’igihugu, uburyo abantu bishwe nabi urupfu rw’agashinyaguro. Iyo twibuka ni uburyo bwo kubaha agaciro no kuvuga ko bitazongera ukundi.”

Ku bahakana Jenoside, Saro yavuze ko bigendana no kutamenya, ati “Burya umuntu yibagirwa vuba kuko ari ko aremye, rero iyo utazi uwo uri we n’amateka akuranga arimo n’ay’Igihugu uturukamo wisanga wasubiye mu byaranze amateka mabi. Dukeneye guhora twibuka ngo ibyabaye ntibizongera ukundi.”

Nsengiyaremye Fidèle, Umunyamabanga Nshingwabikorwa wa GAERG avuga ko Covid-19 yakomye mu nkokora ibikorwa bari bateguye.

Agira ati "Covid-19 yarabihagaritse ubu turimo gukusanya ubushobozi, icyo twashoboye gukora ni ibikorwa by’ibanze. Ubundi duteganya gukora ibikorwa bitatu birimo gushaka amakuru ku miryango 15 yazimye, hari ukwandika igitabo hamwe no gukora filime mbarankuru".

Nsengiyaremye avuga ko uretse kubangamirwa na Covid-19 kubera amabwiriza yo kuyirinda asaba kudahuza abantu ndetse hamwe ingendo zikaba zaragiye zihagarikwa, ngo Covid-19 yatumye batabona ubushobozi.

Ati "Biriya bikorwa twateguye bisaba nibura miliyoni 96 kandi nta yahari, birasaba ko tubanza kuyashakisha naho mu bihe bya Covid-19 ntibyari koroha kuyabona".

Nsengiyaremye avuga ko babonye ubushobozi bagasubukura ibikorwa byamara nibura iminsi 80, hakibandwa ku miryango 15 ihagarariye iyindi, iri mu turere dutandukanye nabwo ihagarariye iyindi mu bikorwa bitandukanye nk’ abavuzi, abakinnyi, abanyamakuru, abahinzi, aborozi, abanyapolitiki, abihayimana n’abandi.

Umuryango wa GAERG urateganya gukoresha ingengo y’imari nini y’Amafaranga y’u Rwanda muri uwo mushinga.

Harimo azakoreshwa mu gukora no gukwirakwiza igitabo cy’amapaji 140, naho andi mafaranga akazakoreshwa muri filime mbarankuru (documentary film), mu gihe hari andi azakoreshwa mu gukora uburyo bw’ikoranabuhanga (database) bwo kubika amakuru y’iyo miryango yazimye.

Ubushakashatsi bwakozwe bugaragaza ko mu Rwanda hari imiryango 15,593 yazimye yari igizwe n’abantu 68,871.

Imyinshi ikaba yari iherereye mu turere twa Karongi na Nyamagabe twari tugize agace kiswe ‘Zone Turquoise’ mu gihe cya Jenoside yakorewe Abatutsi.

Ako gace kagizwe n’ibice by’Uburengerazuba n’Amajyepfo by’u Rwanda, ni ko kahungishirijwemo bamwe mu bayobozi bari ku isonga mu gutegura Jenoside no kuyishyira mu bikorwa, abari abasirikare, ndetse n’interahamwe, kugira ngo babone inzira n’uburyo bwo guhungira muri Repubulika Iharanira Demokarasi ya Congo.

Mu gihe ahandi Jenoside yari yahagaritswe n’Inkotanyi, muri ako gace ho bakomeje kuyikora bituma amahirwe yo kurokoka ku bahigwaga agabanuka.

Ubushakashatsi bwakozwe n’umuryango GAERG uhuza abahoze ari abanyeshuri barokotse Jenoside yakorewe Abatutsi bugaragaza ko Akarere ka Karongi, imiryango 2,839 yari igizwe n’abantu 13,371 yazimye, Akarere ka Nyamagabe kaza ku mwanya wa kabiri ku rutonde rw’ahari imiryango myinshi yazimye, habarurwa imiryango 1535 yazimye, ikaba yarabagamo abantu 5790.

Akarere ka Ruhango hazimye imiryango 1136 yari igizwe n’abantu 5245, Kicukiro hazimye imiryango 849 y’abantu 3787, Gasabo imiryango 815 y’abantu 3660, Nyaruguru 804 y’abantu 3589, Bugesera 732 y’abantu 3540, Ngoma 704 y’abantu 2915, Nyanza 662 y’abantu 2871, Huye 626 y’abantu 2634, Rutsiro 621 y’abantu 2983, Nyamasheke 570 y’abantu 2124, Gisagara 541 y’abantu 2620 mu gihe muri Musanze hazimye imiryango 484 yari igizwe n’abantu 1994.

Uturere nka Burera nta muryango wazimye kubera hari harafashwe n’inkotanyi, naho Gicumbi ni imiryango 19.

Ubushakashatsi bwagaragaje ko mu bice Inkotanyi zagezemo mbere hari umubare muto w’imiryango yazimye.

Nyagatare habonetse umuryango umwe wonyine wazimye, imiryango 71 muri Kayonza n’imiryango 86 muri Gatsibo mu Burasirazuba bw’u Rwanda, hakaba ari hamwe mu hatangiriye urugamba rwo kubohora igihugu mu 1990.

Bashyinguye imibiri 61 y’Abatutsi biciwe i Kaduha muri Jenoside

Fidèle Rwamuhizi wasobanuye amateka ya Bunyambiriri mbere ya Jenoside no muri Jenoside, yavuze ukuntu Abatutsi bo muri ako agace batangiye gutotezwa kuva 1963 kubera ubutegetsi bwariho.

Yavuze ko mu 1965 yagiye kwaka ibyangombwa akabyimwa kubera gusa ko ari Umututsi akaza kubyakirwa n’umuturanyi wari inshuti ya se bataramwica. Yakomeje avuga ko n’ubwo abacitse ku icumu iyo batanga ubuhamya basoza bashimira Inkotanyi kuko zabarokoye, ariko ko n’abakoraga Jenoside na bo bakwiye gushimira Inkotanyi kuko zafashe igihugu, imiryango y’abakoraga Jenoside iyo inkotanyi zitinda yari gusubiranamo.

Ati “Inkotanyi iyo ziza kwihorera bitewe n’uko ibintu byari byifashe icyo gihe nta muntu wari gusigara”.

Rwamuhizi yashimiye bamwe mu bapadiri bahishe abatutsi muri 1963 nka Padiri Janssens i Kaduha na Dejambline mu Cyanika, na ho mu 1994 Padri Leodomir yahishaga Abatutsi, Rwamuhizi akaba yanagaye cyane abandi bapadiri batereranye abatutsi bakicwa.

Uwo mugabo yagaye abantu bubakiye umusarani ku mibiri 48 yari mu cyobo kandi ngo byakozwe vuba.

Ati “Ni agashinyaguro kubona abantu babubakiraho hagakoreshwa kandi bazi ko harimo abantu, turasaba inzego kubakurikirana kugira ngo baryozwe icyo gikorwa kibi cy’ubushinyaguzi bakoze”.

Yashimye kandi ubuyobozi bw’akarere bwabateye ishyaka ryo kugaruka iwabo none bakaba bahinga bakeza. Yabwiye Ingabo ko ba bana bavanye mu mibyuko y’amasaka bakuze na bo barimo ingabo zizagera ikirenge mu cyabo.

Abayobozi batandukanye bitabiriye icyo gikorwa

Guverineri w’Intara y’Amajyepfo, Kayitesi Alice witabiriye icyo gikorwa, yashimiye abarokotse Jenoside yakorewe Abatutsi muri Mata 1994 ku bw’umutima wo gutanga imbabazi, ubu bakaba babanye neza n’ababiciye.

Guverineri Kayitesi avuga ko kuri iyi nshuro ya 27 yo kwibuka Jenoside yakorewe Abatutsi muri ako gace k’Ubunyambiriri, hakigaragara abafite ingengabitekerezo ya Jenoside ko ariko kubarwanya na byo bikomeje.

Uwo muyobozi yavuze ko Abanyarwanda babanye neza, bazi aho bavuye, ko kubatanya byagorana. Yashimiye Ingabo zari iza FPR-Inkotanyi zahagaritse Jenoside mu bwitange bwinshi kuko zari zifite umutima w’ubumuntu.

Imibiri yashyinguwe yakuwe mu bice bitandukanye bigize Umurenge wa Kaduha, muri GS Kaduha hakuwe imibiri y’abantu 48, bakurwa mu rukuta rw’amashuri, mu cyobo wa WC abanyeshuri bakoreshaga.

Imibiri 5 yakuwe ahandi muri GS Kaduha imibiri 4 yakuwe ahitwa i Mugote mu mirima y’abaturage umubiri 1 wakuwe ahitwa i Runyinya mu murima w’umuturage, umubiri umwe wakuwe ahitwa i Joma undi umwe ukurwa mu Murenge wa Mugano. Urwibutso rwa Kaduha rusanzwe rushyinguwemo imibiri irenga ibihumbi 47.

Icyahoze ari Gikongoro ubu ni mu turere twa Nyamagabe na Nyaruguru, mu gihe cya Jenoside yakorewe abatutsi mu 1994, amatariki ya 21 na 23 Mata ku barokotse, bavuga ko ari amatariki batazibagirwa mu buzima kuko yari imperuka ku Batutsi.

Bamwe mu bagize uruhare Mu gutsemba Abatutsi b’i Kaduha no mu bindi bice bigize Ubunyambiriri harimo Col. Simba Aloys ndetse n’uwari Perefe wa Gikongoro, Bucyibaruta Laurent.

Guverineri w’Intara y’Amajyepfo, Kayitesi Alice

Abasaga ibihumbi 50 bashyinguye mu Rwibutso rwa Ruhango biciwe mu kibaya cya Nyamukumba

Nyamukumba ni ikibaya kinini kiri nko mu birometero bibiri uvuye ahari ibiro bya Komini Ntongwe ugana mu Ruhango, hitiriwe imperuka y’Abatutsi bari bahungiye kuri Komini Ntongwe kubera ubwicanyi n’umubare w’Abatutsi bahaguye.

Aha Nyamukumba hiciwe Abatutsi bari bashoboye gucika grenades, amasasu, n’imihoro byo mu gitero cyo kuri Komini cyo mu ijoro ry’uwa 20 rishyira nyine 21 Mata 1994, aho bamwe bari bakomeretse cyane mu buryo bw’ubugome.

Abasirikare n’abajandarume bashyize imbunda ku misozi ikikije Nyamukumba, ku buryo aho wahungira hose baza kuba bakureba kuko ari ikibaya kinini, maze babamishamo amasasu menshi mbere y’uko interahamwe zinjiramo zigenda zisonga abari bagihumeka.

Icyo gihe abari baticiwe kuri Komini babahindiye muri icyo kibaya, izindi nzira zihunga barazifunga, ubwo kandi i Kinazi ku maduka hagiye interahamwe ziganjemo abarundi, i Nyagahama hari naho abarundi, interahamwe za Bugesera n’abasirikare n’abajandarume babarasa umugenda babahindira muri Nyamukumba.

Bose bageze Nyamukumba, abari ku misozi bari biteguye kubarasa bose n’imbunda barasiye rimwe, interahamwe zifite imihoro, impiri, n’amacumu, zikagenda zirangiza abataranogoka.

Hacuze imiborogo, hagwa abantu benshi ari naho haturutse izina hahawe ‘Imperuka ya Nyamukumba’.

Ikibaya cya Nyamukumba gikikijwe n’udusozi nicyo cyagotewemo abari bahungiye kuri Komini Ntongwe barahicirwa

Abarundi bicaga Abatutsi bakabakuramo imitima bakayotsa bakayirya

Umuyobozi w’Ishyirahamwe ry’abarokotse Jenoside ku Mayaga (AGSF), Evode Ndemezo, avuga ko n’ubwo iyi tariki ya 21 Mata 1994 yari mbi cyane mu Majyepfo, ku Mayaga ho byari birenze kuba bibi kuko byageze ubwo imibiri y’Abatutsi iribwa ku manywa y’ihangu.

Kurya imitima y’Abatutsi byadukanywe n’interahamwe zirimo n’Abarundi bari barahungiye muri Ntongwe, aho zateye imbabura ubundi yotswaho inyama z’amatungo, zikayisimbuza imitima y’Abatutsi zikahuka zikarya.

Agira ati “Ni wo mwihariko ntigeze mbona ahandi aho interahamwe zafataga Abatutsi zishe zikabakuramo imitima zikayotsa zikayirya, ni ibintu by’amahano byabaye umwihariko wa Jenoside hano ku Mayaga”.

Ndemezo avuga ko kugeza ubu ubutabera butaratangwa kuri bamwe mu bagize uruhare muri Jenoside barimo na Burugumesitiri Kagabo n’abo Barundi ubu bisubiriye iwabo, ariko bakomeje gusaba ko bazakurikiranwa kugeza igihe ubutabera butangiwe.

Ndemezo avuga ko n’ubwo Abatutsi bo ku mayaga bibasiwe bikomeye dore ko abasaga ibihumbi 60 bashyinguye mu rwibutsa rw’Akarere rwa Ruhango, ibihumbi 50 byose biciwe muri Nyamukumba, cyakora abarokotse bakomeje kwitabwaho bafashijwe na Leta no kuba barakomeje kwishyira hamwe bagaharanira kubaho.

Umuyobozi wa AGSF avuga ko kuri iyi tariki nta bikorwa bihambaye biribube kuko usibye kuba hari itsinda rito riza gushyira indabo ku Rwibutso, igikorwa nyirizina cyo Kwibuka no kunamira Abazize Jenoside ku Mayaga, giteganyijwe ku wa 09 Gicurasi 2021 ahazanashyingurwa imibiri yabonetse mu Karere ka Ruhango.

Ndemezo asaba abarokotse Jenoside bo ku Mayaga mu Ntara y’Amajyepfo no mu Gihugu muri rusange gukomera kandi bakarushaho Kwiyubaka kuko bafite ubuyobozi bwiza buharanira ko nta Jenoside izongera kubaho ukundi.

Abatutsi bo ku Mayaga babanje kwirwanaho mbere y’uko Burugumesitiri abashukisha kubarindira kuri Komini

Ku misozi yo muri Ntongwe Tariki 18-19 kugeza kuri 20/04/1994 hari Abatutsi bagiye ku misozi bagerageza kwirwanaho.

Imwe mu misozi bageragerejeho kwirwanaho harimo nka Nyiranduga, ahahuriye Abatutsi benshi baturukaga i Gisali na Kibanda, Mbuye, Ndetse na Mukinga mu yahoze ari Komini Mugina, aho birwanyeho bakamara iminsi ine barwanya ibitero byabateraga bakabinesha.

Umusozi wa Nyiranduga ni umwe mu yo Abatutsi ba Gisali na Kibanda bageragerejeho kwirwanaho

Interahamwe zimaze kubona ko Abatutsi bakomeje kwihagararaho, haje Burugumesitiri Kagabo Charles wari uwa Komini Ntongwe n’uwari Superefe wa Superefegitura ya Ruhango witwaga Placide Koroni ndetse n’Abajandarume, babwira Abatutsi ko bajya kuri Komini bakabona uko babarinda neza ariko uwo wari umugambi wo kubona uko babicira hamwe.

Akandi gasozi Abatutsi birwanyeho ni aka Gacuriro ya Nyakabungo, nabo bahavanwa na Burugumesitiri Kagabo ababwiye ko bajya kubarindira kuri Komini, na none ari amayeri yo kugira ngo babice hari tariki ya 19/4/1994.

Ahandi Abatutsi bari bahungiye ni ku musozi wa Ntungamo ya Kayenzi muri Nyabitare, aho barwanye n’interahamwe bakoresha amacumu, imiheto cyane cyane amabuye, nyuma haza ibitero by’izindi nterahamwe zivuye Nyakabungo no muri Segiteri ya Ntongwe zibakwiza imishwaro, bamwe bakomeza Tambwe na Ruhango abandi zigenda zibica umugenda.

Ubwicanyi bwakorewe Abatutsi ahahoze ibiro bya Komini Ntongwe, Abatutsi batangiye kuhahungira kuva ku italiki ya 10/4/1994 kuko bari batangiye kubatwikira, kubica no kurya inka zabo.

Ku dusozi tumwe Abatutsi batangiye kwirwanaho ariko uwari burugumesitiri wa Komini Ntongwe Kagabo Charles na Superefe Placide Koloni bifashishije aba konseye b’amasegiteri babohereza kuri Komini bababeshya ko babarindirayo.

Abatutsi ba nyuma bageze kuri Komini tariki ya 19 na 20/4/1994, n’abari bihishe ahandi, bagiye kuri Komini bagendeye ku karimi keza ka burugumesitiri Charles Kagabo na Superefe Placide Koloni batazi ko ari umugambi wo kubarimburira hamwe wateguwe kare.

Kuva tariki 17-18 na 19/04/1994 Abatutsi bari bahungiye kuri Komini babanje kwirwanaho uko bashoboye bakoresha amabuye bagasubizayo ibitero byabateraga kugeza ku itariki 20/04/1994.

Burugumesitri Kagabo na Superefe Kolini, uko bakusanyirizaga Abatutsi kuri Komini Ntongwe ni ko bakusanyaga n’abicanyi.

Interehamwe zambutse Bugesera, Abarundi bava mu nkambi i Nyagahama ndetse n’abaturage n’abajandarume Kagabo yari yagiye gusaba i Nyanza.

Bose bahuriye kuri Komini Ntongwe mu ijoro ryo ku wa 20/4/1994 rishyira 21/04/1994 bagaba igitero ku Batutsi barabarimbura. Icyo gitero cyateguriwe mu nama zabereye i Mutima hagati y’italiki 17 na 19/4/1994 zari ziyobowe n’abajandarume, harimo na burugumesitiri Kagabo n’abarundi b’impunzi.

Bashatse ahantu banyura hihishe kugira ngo bagere ku Batutsi bari kuri komini batababonye

Baciye ahitwa Gako aho kunyura Nyakabungo kugira ngo Abatutsi batumva urusaku rw’imodoka bagahunga, bageze Mutima, bahagaritse imodoka bagenda n’amaguru bayobowe na Kagabo.

Mu ijoro ryo ku wa 20/4/1994 ibitero byose byahuriye kuri komini nijoro kugeza kuri 21/04/1994 Abasirikare n’abapolisi barashe mu kivunge amasasu menshi batera na grenades, abageragezaga guhunga bagasanga abari bahagaze n’imihoro n’izindi ntwaro gakondo bakabica ku buryo bigaragara ko ubwicanyi bwari bwateguwe neza muri ya nama ya Mutima.

Ubwicanyi bwakorewe aho bitaga kuri CND ku Rutabo-Ruhango, icyo cyobo bise CND ni kinini cyane cyacukuwe mu mwaka wa 1992 kikaba cyari inyuma y’amashuri abanza yo ku Rutabo A. Hiciwe Abatutsi benshi cyane ku buryo bw’indengakamere ndetse bajugunyamo n’abo biciye ahandi.

CND yiswe iri zina kubera kuri CND i Kigali, aho ingabo za FPR zaje kurinda abayobozi ba FPR bagombaga kwinjizwa muri Guverinoma yaguye y’inzibacyuho zabaga, mu yandi magambo, kujyanayo Abatutsi kubicirayo kwari ukubasangisha abo bitaga bene wabo muri CND Kigali.

Igitero cyari kuri icyo cyobo cyari gikuriwe na Nsabimana Jacques wayoboraga CDR muri Ntongwe wari uzwi ku izina rya Pilato kuko uwajyaga kwicirwa kuri icyo cyobo cya CND yabanzaga gushinyagurirwa n’uwo Nsabimana Jacques.

Icyobo bitiriraga CND nicyo cyacukuwe n’umukuru wa CDR ni cyo cyajugunywemo abiciwe muri Nyamukumba

Amwe mu mazina ya ba Ruharwa mu kwica Abatutsi ku Mayaga

Inyandiko ya Komisiyo y’Igihugu yo kurwanya Jenoside CNLG ikubiyemo amatariki y’ingenzi yiciweho Abatutsi igaragaza amwe mu mazina ya ba ruharwa bagaragaye cyane muri ubwo bwicanyi ku Mayaga barimo Kagabo Charles wari burugumesitiri wa Komini Ntongwe na Placide Koroni wari Superefe wa Superefegitura ya Ruhango.

Hari kandi ba konseye bayoboraga Segiteri zose uko ari 13 zari zigize Komini Ntongwe, Abasirikare nka Hitabatuma, Rucyeragabiro w’i Nyabusinzu kwa Kamugunga, Visenti wo kwa Birara Vianney na we w’i Nyabusinzu.

Hari kandi umuturage witwa Ntitanguranwa watwitse umwana w’uruhinja ku mbabura i Gishari ya Kareba, Konseye wa Kareba Kanyandekwe Zefaniya na resiponsabure Kageruka Aristarque, Mwalimu Nsabimana Jacques (Wari wariyise Pilato), Umucuruzi w’i Kareba witwaga Simoni Munyentama hamwe na mukuru we, Nahayo Florent.

Hari kandi Abarundi batazwi amazina yabo bari batuye mu nkambi i Nyagahama bishe Abatutsi bamara kubica bakabakuramo imitima bakayotsa ku mbabura barangiza bakayirya.

Abarokotse Jenoside yakorewe Abatutsi bo mu yahoze ari Komini Ntongwe ubu ni mu Karere ka Ruhango mu Mirenge ya Kinazi na Ntongwe, bavuga ko tariki 21 Mata 2021 ari yo tariki y’imperuka ku Batutsi bahigwaga.

Samuel Dusengiyumva wa gatatu mu bateruye isanduku imbere (Ifoto ya mbere ya COVID-19)

Mu buhamya bwa Samuel Dusengiyumva, umwe mu bahakomoka baharokokeye, agaragaza amabi yakozwe n’uwari Burugumesitiri wa Komini Ntongwe witwa Kagabo Charles, cyane ko yari n’imwe mu makomini yari afite umutwe w’Interahamwe n’aba CDR bari bakomeye cyane kuva mu 1991 hakaba kandi hari hanakambitse impunzi z’Abarundi zari zifite inkambi ahitwa i Nyagahama. 

Ubwo indege y’uwari Perezida Habyarimana yahanurwaga tariki ya 06 Mata 1994 bukeye bwaho kuri 07 kimwe nk’ahandi hose mu gihugu muri Komine Ntongwe hashyizweho za bariyeri mu masegiteri yose n’amaserire, izo bariyeri zahita zitangira kugenzurwa n’Interahamwe n’aba CDR.

Nyuma yaho Burugumesitiri Kagabo yatangiye kugenda mu masegiteri agize Komini agira inama Abatutsi guhungira kuri Komini Ntongwe kuko yababwiraga ko ari bwo buryo bwiza bwo kubacungira umutekano, ababwira ko yahawe abasirikare n’abajandarume bo kubarinda ibitero by’Interahamwe n’aba CDR, ariko si ko byagenze ahubwo byaje kugaragara ko bwari uburyo bwiza bwo kubegeranya kugira ngo umugambi wo kubica uzaborohere. Muri iyo minsi kandi Burugumesitiri Kagabo Charles yicishije Burugumesitiri mugenzi we wa Komini Mugina wageragezaga gukumira ubwicanyi. 

NYAMUKUMBA:

Aha mu kibaya cya Nyamukumba haguye Abatutsi benshi cyane nyuma y’igitero gikaze cyarimo amasasu na za gerenade. Burugumesitiri Kagabo Charles yegereye abari bakuze mu mpunzi z’Abatutsi abagira inama yo guhungira kuri Superefegitura ya Ruhango ababeshya ko aho mu Ruhango bahazanye abasirikare bahagije bo kubarinda. Hahise haza igitero kinini kivuye ahitwa kuri Adento ndetse n’ibindi bitero byaturukaga ahitwa i Nyagahama mu nkambi y’Abarundi n’Inyarugenge. Ibi bitero byose byagabwe ku Batutsi barimo berekeza mu Ruhango, bibasanga mu gico bari baciriwe muri Nyamukumba, maze bamaze umwanya munini baraswa n’abasirikare n’abajandurume, Interahamwe n’aba CDR babiraramo bahorahoza abari bagihumeka. Aha muri Nyamukumba haguye Abatutsi benshi. 

Uruhare impunzi z’Abarundi zagize mu kwica Abatutsi b’i Ntongwe

Izi mpunzi z’Abarundi zari zarahungiye mu Rwanda muri 1991 maze Leta yariho izishakira inkambi muri Ntongwe. Izi mpunzi ariko zagize uruhare rukomeye muri Jenoside kuko ziri mu batinyutse kurya imibiri y’Abatutsi babaga bamaze kwicwa. Izi mpunzi zari zaratujwe ahitwa i Nyagahama ariko byaje kugaragara ko zari zarajyanywe Intongwe kugira ngo zizafashe Interahamwe mu mugambi wo kurimbura Abatutsi. Izi mpunzi nyuma yo kwica Abatutsi b’Intongwe zisubiriye iwabo i Burundi ku buryo kugeza ubu nta n’umwe muri bo wigeze agezwa imbere y’ubutabera. 

Burugumesitiri Kagabo Charles wabaye Umucurabwenge ndetse n’umuhuzabikorwa muri Jenoside mu mugambi wo kurimbura Abatutsi muri Gicurasi 1994 abonye bikomeye yarahunze ava i Nntongwe ahungira mu cyahoze ari Zaire (ubu ni muri Repubulika Iharanira Demokarasi ya Congo) bikekwa ko n’ubu ariho akiri. 

Urwibutso rw’Akarere ka Ruhango ruri i Kinazi rushyinguwemo imibiri irenga ibihumbi mirongo itandatu na bitatu (63,150). Ku bahaburiye ababo n’abaharokokeye, itariki ya 21 Mata 1994 ni itariki y’umutuku.

Tariki ya 21 Mata 1994 henshi mu Ntara y’Amajyepfo habaye ubwicanyi burenze urugero harimo ubwabereye i Nyanza ya Butare; i Nyaruguru n’ahandi henshi.

Kuri iyo tariki kandi, Abatutsi bari bahungiye kuri Kiliziya ya Kaduha mu yahoze ari Superefegitura ya Kaduha mu gice cyitwa Ubunyambiriri bagabweho ibitero by’abasirikare n’Interahamwe zirabica. Ubu mu rwibutso rwa Kaduha hashyinguyemo imibiri irenga ibihumbi 47. Iyi tariki ya 21 Mata 1994 kandi ni itariki y’umutuku ku Batutsi bari barahungiye i Murambi ya Gikongoro bavuye mu bice bitandukanye by’Ubufundu n’Ubunyambiriri aha i Murambi hakaba hashyinguye ibihumbi birenga 50. 

Amafoto: Jean Paul NKUNDINEZA

Inkuru bijyanye:

Ntongwe: Burugumesitiri yicishije Abatutsi, Abarundi batoza Interahamwe ubugome ndengakamere

Hashize imyaka 27 Umwamikazi Rosalie Gicanda yishwe

Uyu mwamikazi yakomeje gutura mu Majyepfo, cyane cyane mu Karere ka Huye aho benshi bamuziho umutima mwiza ndetse no gukunda abantu, aho buri wese wamusuraga yamwakirizaga amata meza y’inka yari yoroye, kugeza ubwo yicwaga tariki 20 Mata 1994.

Mu Kwibuka Jenoside yakorewe Abatutsi, ku itariki ya 20 Mata i Huye hibukwa ko umwamikazi Rosalie Gicanda aribwo yishwe.

Yishwe ku munsi wakurikiye ijambo Théodore Sindikubwabo wari Perezida wa Guverinoma y’Abatabazi yari yaraye avugiye i Butare, maze agashishikariza Abahutu kwica Abatutsi.

Nk’uko bivugwa n’abakurikiranye iby’uko Jenoside yagenze i Butare (ubu igice kinini cya perefegitura ya Butare kigizwe n’Akarere ka Huye) bavuga ko tariki ya 20 Mata 1994 abasirikare bakuye Umwamikazi Gicanda mu nzu yari atuyemo mu mujyi wa Butare.

Iyo nzu yari yayitujwemo nyuma yo gukurwa mu Rukari, aho yabanaga n’Umwami Mutara wa III Rudahigwa mbere y’uko atanga.

Hamwe n’abo babanaga mu nzu, Gicanda bamujyanye mu ishyamba riri hafi y’Ingoro y’umurage w’u Rwanda y’i Huye, maze bose barabarasa. Icyakora icyo gihe nyina babanaga we bari bamusize, ariko na we nyuma y’iminsi ibiri yarishwe.

Bisabwe n’umupadiri, Umwamikazi Gicanda yashyinguwe mu rugo rw’aho yari yaratujwe, ariko kuri ubu umubiri we wimuriwe i Mwima mu Karere ka Nyanza, ari na ho umwami Rudahigwa na we yatabarijwe.

Kwica umwamikazi Rosalie Gicanda hamwe n’abo babanaga byabaye nk’intangiriro y’ubwicanyi mu buryo bugaragara kandi bukomeye mu mujyi wa Butare, kuko bukeye bw’uko yishwe, ku itariki ya 21/4/1994, aribwo abantu benshi batangiye kwicwa.

Rosalie Gicanda yibukwa nk’Umwamikazi wazize Jenoside yakorewe Abatutsi mu 1994, ariko abari bamuzi banagendaga iwe bakanamwibuka nk’umukirisitu kandi nk’umubyeyi wabakiranaga urugwiro.

Mu Kinigi Umututsi wa mbere yicishijwe amabuye mu 1991

Ngo bwari uburyo bwo kubakanga babereka ko nta bushobozi bafite, ko basuzuguritse, dore ko ngo uwo bahereyeho bica witwa Bagayindiro Ndagijimana Samuel, ngo yari umugabo w’urubavu ruto, interahamwe zanga kumwica ngo ntizamutaho igihe kubera ubuto bwe zimuteza abagore bamwicisha amabuye.

Ubwo bicaga uwo Mututsi, Mukamugema Immaculée wo mu Murenge wa Kinigi mu Karere ka Musanze, umwe mu biciwe umugabo, avuga ko yabyiboneye abagore bica Ndagijimana wari muramu we, aho ngo abo bagore bafashe amabuye bayakubita uwo mugabo kugeza ubwo ashizemo umwuka.

Ati “Mu mwaka wa 1991 mu kwezi kwa mbere ku itariki 26, ni bwo Umututsi wa mbere yishwe hano mu Kinigi, uwo mugabo bamwiciye ahitwa muri Bisate yicwa n’abagore aho bamwicishije ibisongo n’amabuye, yari muramu wanjye. Icyo gihe abagabo bariho barebera turavuga tuti bya bintu byakomeye kuba abagore barimo kwica”.

Arongera ati “Twatunguwe no kubona abagore aribo bakubita amabuye uwo Mututsi kugeza bamumazemo umwuka, ni ibintu tutiyumvishaga kubona abagore bagenzi bacu bakora ibyo, wenda impamvu ari bo batangije Jenoside Ni uko bari bazi ko uwo mugabo atabarwanya. Icyakora babaga bahagarikiwe n’abagabo ariko aba ari bo bakora igikorwa cyo kwica, ari nabwo Abatutsi batangiye kwicwa umusubirizo”.

Mukamugema Immaculée warokokeye Jenoside mu Kinigi atanga ubuhamya bw’ibyahabereye

Rwasibo Jean Pierre, Umuyobozi wa IBUKA mu Karere ka Musanze, avuga ko ako gace kari muri tumwe twatangirijwemo igeragezwa rya Jenoside yakorewe Abatutsi mu 1994.

Avuga ko ubwo bwicanyi bwatewe n’ubuyobozi bubi bwaranze iyahoze ari Komini Kinigi, burangajwe imbere na Burugumesitiri Gasana.

Ati “Uru ni urwibutso rw’umwihariko, nta Mututsi numwe ushyinguye hano wishwe muri 1994, bose bishwe mbere yaho, hari Burugumesitiri Gasana, yari umuntu wanga Abatutsi cyane. Rimwe na rimwe bavugaga ko yabyawe n’umuntu w’Umututsi, kugira ngo agaragaze ko atabyawe nawe, ni we wabarimbuye cyane”.

Rwasibo avuga ko Umututsi wa mbere yishwe mu mwaka wa 1991, afunguwe n’Inkotanyi mu bari bafungiye muri Gereza ya Ruhengeri bafatwaga nk’ibyitso.

Avuga ko yishwe n’abagore nyuma y;uko interahamwe zari zamusuzuguye kubera ko yari afite igihagararo gito, zimushumuriza abagore bamwicisha amabuye.

Ati “Umututsi wa mbere yishwe ku itariki 26 Mutarama 1991, yitwaga Bagayindiro Ndagijimana Samuel, yari umugabo mugufi, muto muto”.

Arongera ati “Yari amaze gufungurwa mu byitso by’Inkotanyi, ataha ajya kwa muramu we, interahamwe zanga kumwica kuko yari muto, ngo ntibashaka gukoresha intoki zabo ku muntu muto nk’uwo, bamushumuriza abagore ngo abe ari bo bamwica”.

Akomeza agira ati “Abagore bamuteraniyeho bamwicisha amabuye, kugeza ashizemo umwuka”.

Mu gihe ubuyobozi bwa IBUKA mu Murenge wa Kinigi bukomeje gusaba ko hubakwa urwibutso rugezweho kuko aho imibiri ishyinguye ikomeje kunyagirwa, Ubuyobozi bw’Umurenge wa Kinigi buremeza ko mu ngengo y’imari y’Akarere ka Musanze bateganya ko mu mwaka wa 2021/2022 hazakorwa inyigo yo kubaka urwo rwibutso, ku buryo mu mwaka wa 2023 urwo rwibutso ruzaba rwamaze kuzura.

Ubuyobozi n’imiryango y’abiciwe muri Caraes Ndera babibutse

Abahungiye kuri ibyo bitaro byahoze ari iby’abazungu b’abafurere gatolika ngo bakekaga ko bashobora gukizwa n’uko abo Banyaburayi bari barinzwe n’Ingabo z’Umuryango w’Abibumbye (MINUAR).

Byabaye nko guhungira ubwayi mu kigunda, kuko ingabo za MINUAR ngo zahise zibasiga aho mu maboko y’interahamwe n’abaparakomando (abasirikare kabuhariwe mu kurwana) bo mu ngabo za Habyarimana.

Umuyobozi Mukuru w’ibitaro bya Caraes Ndera, Frère Charles Nkubili avuga ko mu 1994 ku itariki 17 Mata, ari bwo abasirikare n’interahamwe bagabye ibitero bakica abantu bose batagiriye imbabazi abarwayi bo mu mutwe.

Frère Nkubili ati "Interahamwe zishe abantu hano zafashijwe n’aba parakomando’ babaga i Kanombe, tukigera hano twabonaga inzu zaratobowe n’amasasu.
Twe biraturenga ntabwo twumva ukuntu umuparakomando yica uwitwaga umusazi, ubundi twavuga ko uwo muparakomando na we yari yasaze".

Ubuyobozi bwa Caraes Ndera n’abarokotse bavuga ko abari abarwayi bo mu mutwe bishwe n’abaparakomando

Frère Nkubili yavuze ko adashobora kumenya umubare w’abaguye muri ibyo bitaro bose kuko ngo bamaraga kwicwa bakajugunywa ahantu hatandukanye, ndetse amafishe y’abarwayi na yo akaba yarahise atwikwa.

Mu rwibutso rwaho hashyinguwe imibiri irenga 21,000 ariko abenshi ngo ni abataraboneka kugira ngo bashyingurwe mu cyubahiro, ndetse nta n’ubwo baramenya imyirondoro yose y’abamaze kuboneka.

Frère Nkubili avuga ko ibitaro bya Caraes Ndera birimo gutegura kwandika amateka y’uburyo Jenoside yakorewe Abatutsi muri ibyo bitaro, akaba ari bwo hazamenyekana imyirondoro y’abishwe n’ibice birimo imibiri itaraboneka.

Umwe mu barokokeye ku bitaro by’i Ndera, Nadine Uwamahoro wari ufite imyaka icyenda y’ubukure, avuga ko yabonye ababyutse mu mirambo bakiri bazima batarenga batanu.

Ati "Aha haje igitero cy’abasirikare bakuru b’i Kanombe ntabwo bari abantu boroshye, hari umugabo wari wambaye ishati y’umutuku nibuka ari Dr Fidèle wingingaga abazungu ngo babahungishe ariko ntibabyumva. Abasirikare rero baraje baramushinyagurira bamucuza amafaranga n’isaha, baramukubita".

Hari amazina make y’Abatutsi biciwe i Ndera, abandi ngo ntabwo baramenyekana

Umwahoro avuga ko muri ibyo bitero yahaburiye umuryango we ugizwe n’umubyeyi (nyina), abo bavukanaga n’abo mu miryango y’ababyeyi be, kandi se na we akaba yari yaritabye Imana mbere yaho.

Ubuyobozi bw’Ibitaro bya Caraes Ndera buvuga ko kuri ubu ibikomere byo mu mutwe n’ihungabana bituma imibare y’abarwayi bo mutwe yiyongera, ku buryo ngo buri mwaka bakira abarwayi batari munsi ya 75,000.

Frère Nkubili akavuga ko bacumbikiye abarwayi bakabakaba 400, ariko hakaba n’abaza kwivuza bataha batari munsi ya 250 ku munsi.

Umuyobozi Mukuru wa Unity Club abitangaje mu gihe u Rwanda rwibuka ku nshuro ya 27 Jenoside yakorewe Abatutsi.

Mu butumwa bwe, Madamu Jeannette Kagame yibukije abakuru ko umurage bakwiye gusigira ababakomokaho ari ukubigisha amateka y’ukuri y’u Rwanda.

Ati “Dukomeze twubake igihugu kizira ivangura iryo ari ryo ryose kandi dukomeze turwanye ihakana n’ipfobya bya Jenoside yakorewe Abatutsi, n’ingengabitekerezo yayo kuko tuzi ingaruka zayo.
Twibuke Twiyubaka."

Nubwo habereye ubwicanyi bw’indengakamere, i Nyarubuye barakataje mu Bumwe n’ubwiyunge

Uwo murenge uraza ku mwanya wa mbere, nyamara mu gihe cya Jenoside ni ho hiciwe inzirakarengane z’Abatutsi basaga ibihumbi 50 bahavuka n’abari bahahungiye.

Muri uwo murenge ni ho hubatse Paruwasi Gatolika ya Nyarubuye yiciwemo imbaga y’Abatutsi baje kuyihungiramo bavuga ko mu nzu y’Imana bahabonera amakiriro, biranga ahubwo bicwa urw’agashinyaguro.

Ni ahantu hubatse urwibutso rwa Jenoside rubitse imibiri isaga ibihumbi 59, hakaba amateka akomeye ya Jenoside agaragaza uburyo Abatutsi bishwe.

Muri ibyo bimenyetso ndangamateka birimo imivure yifashishwaga n’Ababikira mu kwenga inzoga zo mu ntoki zabo, ariko interahamwe ziyifashisha zitema Abatutsi zigatega amarazo ngo zirashaka kumenya uko amaraso y’Umututsi asa.

Urwibutso rwa Jenoside rwa Nyarubuye rushyinguyemo imibiri isaga ibihumbi 59

Iyo ugeze muri urwo rwibutso, urahabona n’ibisongo bicishaga abana b’abakobwa ubwo babaga bamaze kubafata ku ngufu, hakaba utwuma interahamwe zakoreshaga zisya inyama z’imibiri y’Abatutsi ndetse n’izindi bakazirya zidaseye, hakaboneka n’amabuye manini batyarizagaho imihoro yo kwica Abatutsi.

Uretse ibyo, kuri urwo rwibutso urahasanga n’ishusho ya Bikiramariya baciye umutwe bavuga ko yari afite isura y’Abatutsi, ni urwibutso rubitse amateka akomeye ya Jenoside yabeye muri ako gace.

Itariki 14 Mata ni yo Akarere ka Kirehe n’inshuti zako ziturutse hirya no hino mu gihugu zibukiraho imbaga y’Abatutsi biciwe i Nyarubuye, dore ko ngo ari yo tariki biciyeho Umututsi wa mbere.

Umuyobozi w’Akarere ka Kirehe Muzungu Gerald yunamira abashyinguye mu rwibutso ra Nyarubuye

Tariki 14 Mata 2021, uwo muhango wo kwibuka warabaye ariko uba mu buryo budasanzwe ahitabiriye abantu bake cyane mu rwego rwo kwirinda Covid-19, uba hifashishijwe imbuga nkoranyambaga zinyuranye mu gihe mu myaka yashize wabaga ukitabirwa n’abantu batari munsi y’ibihumbi bine.

Ni umuhango witabiriwe n’ubuyobozi bw’Akarere ka Kirehe, inzego z’umutekano n’abahagarariye Abarokotse Jenoside yakorewe Abatutsi muri ako karere, bunamira kandi bashyira indabo ku mva zishyinguwemo inzirakarengane zisaga ibihumbi 59 zazize Jenoside zishyinguwe muri urwo rwibutso.

Rwakayigamba Ferdinand wavuze mu izina ry’imiryango yaburiye ababo muri Jenoside i Nyarubuye, ubwo yashimiraga Inkotanyi zabarokoye ashimira na Leta ikomeje kubitaho, yavuze ko icyo babona bashatse kwitura Leta ari ukwimakaza gahunda y’Ubumwe n’ubwiyunge kugeza ubwo baza ku isonga mu Karere ka Kirehe.

Yagize ati “Turashimira Leta y’Ubumwe bw’Abanyarwanda, ntabwo Nyarubuye twasigaye inyuma mu nzego zinyuranye zaba uburezi n’izindi. Dushima ko Abarokotse Jenoside, nubwo bitaragera kuri bose ariko twarubakiwe, ikindi dushima ni uru rwibutso rwubatswe abacu twabuze bakaba bashyinguye mu cyubahiro”.

Arongera ati “Twe abatuye Umurenge wa Nyarubuye ntitwasigaye inyuma muri gahunda Leta yifuza, twe twabuze ikindi twatera inkunga Leta y’Ubumwe yaturokoye, ariko ku bufatanye twabona hafi, ni uko uyu munsi tuvugira imbere yanyu, umurenge wacu wa Nyarubuye ni wo wa mbere mu karere ka Kirehe mu bumwe n’ubwiyunge, nitwe dufite igikombe cy’ubumwe n’ubwiyunge, ni yo nkunga twabonye twatera Leta”.

Umuyobozi w’Akarere ka Kirehe Muzungu Gerald wari witabiriye uwo muhango wo kwibuka Abatutsi biciwe i Nyarubuye, yashimiye abahatuye avuga ko ari urugero rwiza mu kwimakaza gahunda y’Ubumwe n’ubwiyunge nyuma yuko Jenoside yabasize iheruheru, agaruka no ku buyobozi burangajwe imbere na Perezida Paul Kagame.

Yagize ati “Uyu munsi, ibyo dushima turabikesha ubuyobozi bwiza burangajwe imbere na Perezida wa Repubulika n’umuryango wa RPF-Inkotanyi watangiye ufite intego yo kugarura ubumwe bw’Abanyarwanda no guhagarika ivangura ari na ryo ntandaro ya Jenoside yakorewe Abatutsi mu 1994. Abo twibuka uyu munsi ni abazize imiyoborere mibi, ariko ubu icyo twishimira ni uko hari Leta nziza yahagaritse Jenoside n’ivangura iryo ari ryo ryose”.

Arongera ati “Turabashimira by’umwihariko, ntabwo wabona imibiri y’Abatutsi ishyinguye muri uru rw’ibutso n’indi mibiri iri ku misozi tutazi aho yiciwe, ngo utekereze ko abantu bacitse ku icumu batera intambwe yo kumva mbere y’abakoze Jenoside ko hari akamaro k’ubwiyunge no kubabarira. Akarere kacu kabaye aka mbere mu gihugu mu mwaka ushize muri gahunda zo kwimakaza ubumwe n’ubwiyunge, ariko by’umwihariko umurenge wa Nyarubuye uba uwa mbere mu karere ka Kirehe turabashimira”.

Mayor Muzungu yashimiye urugendo abarokotse Jenoside bo mu Murenge wa Nyarubuye bakomeje rwo kubabarira no gukomeza kubaka ubumwe n’ubwiyunge, asaba ko abataratera intambwe yo guhindura imyumvire bahinduka bakagana inzira nziza Leta yashyizeho yo kwimakaza ubumwe n’ubwiyunge, abantu babana mu mahoro kandi birinda icyagarura ibibazo igihugu cyanyuzemo kugeza ubwo haba Jenoside yakorewe Abatutsi mu 1994 itwara ubuzima abasaga miliyoni.

Rwakayigamba, yagarutse no ku kibazo cy’imanza za Gacaca zitararangira ndetse na bamwe mu basahuye muri Jenoside imitungo y’Abatutsi bataratanga indishyi z’ibyo basahuye, ndetse n’abandi bahawe igihano n’inkiko kijyanye n’imirimo y’amaboko aho hakigaragara abanze kukirangiza.

Ubuyobizi bw’Akarere buvuga ko ari ikibazo bugiye gukurikirana, kugira ngo kibe cyakemuka vuba.

Uretse urwibutso rwa Jenoside rwa Nyarubuye, mu Karere ka Kirehe hari izindi nzibutso nto za Jenoside zirimo urwa Nyabitare ruherereye mu Murenge wa Nyarubuye rushyinguyemo imibiri y’Abatutsi isaga 4000, urwibutso rwa Rugarama mu Murenge wa Mushikiri rushyinguyemo imibiri isaga 160 aho ubuyobozi buri muri gahunda yo kuyimurira mu zindi nzibutso zujuje ibisabwa.

Hari kandi n’urwibutso rwa Nyakarambi rugeze ku kigero cya 94% rwubakwa, rukaba ruteganya kwakira imibiri 9,500 bari bashyinguye mu rwari rushaje, aho byagaragaye kenshi ko imibiri yangirika.

Izo nzibutso zose zasuwe n’ubuyobozi bw’Akarere ka Kirehe mu cyumweru gishize cyo kwibuka ku nshuro ya 27 Jenoside yakorewe Abatutsi, mu rwego rwo kunamira no guha icyubahiro abazishyinguwemo.

Ahandi hasuwe ni ku kiraro cya Rusumo, aho ku itariki 12 Mata 2021, ubuyobozi bw’Akarere hamwe n’inzego z’umutekano n’abahagarariye Abacitse ku icumu rya Jonoside bitabiriye umuhango wo gushyira indabo mu mazi y’Akagera, mu rwego rwo kunamira no kwibuka Abatutsi bajugunywe mu migezi inyuranye.

Ba visi meya b’akarere ka Kirehe bashyira indabo ahashyinguye imibiri y’abazize Jenoside bashyinguye mu rwibutso rwa Rugarama

Abakinnyi ba APR BBC bashyira indabo ahashyinguye imibiri y’abishwe muri Jenoside mu 1994

Ni igikorwa cyabaye kuri uyu wa Gatatu tariki ya 14 Mata 2021, aho abakinnyi bose b’iyo kipe ndetse n’abatoza bakoze icyo gikorwa mu rwego rwo kugira ngo bamenye amateka ya Jenoside ndetse n’uruhare ingabo za RPF zagize mu kubohora igihugu no kurokora Abatutsi bicwaga

Umukinnyi mushya wa APR BBC, Enock Isezerano mu kiganiro yagiranye na Kigali Today, yavuze ko bahavanye ubutumwa bwo kwigisha barumuna babo.

Yagize ati “Batubwiye amateka y’uru rwibutso ndetse banatubwira uko ingabo zahoze ari iza RPA zarokoye abantu benshi. Batwibukije ko tugomba gufata iya mbere tukigisha barumuna bacu amateka y’igihugu kugira ngo Jenoside itazongera kubaho ukundi”.

APR BBC ni imwe mu makipe y’ubukombe mu Rwanda ikaba inifuza gutwara igikombe cya shampiyona uyu mwaka. Ibi byatumye izana umutoza Cliff Uwor ukomoka muri Kenya , igura abakinnyi barimo Enock Isezerano bavanye muri IPRC Kigali BBC , Kubwimana Kazingufu Ally bavanye muri REG BBC n’abandi.

Abatoza ba APR BBC na bo bitabiriye icyo gikorwa

Aganira n’ikinyamakuru the New Times ku wa 13 Mata 2021 mu muhango wo kunamira abishwe muri Jenoside bari abakozi ba perefegitura ya Kibungo, Bucyeye yavuze ko abari bakiri abana nyuma gato ya Jenoside nta ngaruka nini baterwaga no kwibuka, ariko nyuma yo gusobanukirwa n’uburemere bwa Jenoside, ngo abona bigenda bibagiraho ingaruka.

Bucyeye akomeza avuga ko bashyizeho umuryango wo gufasha abahura n’ihungabana kandi ngo bamaze kugera ku rwego rushimishije mu kugarurira icyizere abacitse ku icumu rya Jenoside yakorewe Abatutsi n’ubwo bitari byoroshye.

Mu Ntara y’Iburasirazuba ku itariki 13 Mata 2021 ni bwo bunamiye abari abakozi ba Prefecture ya Kibungo bishwe muri Jenoside yakorewe Abatutsi mu 1994, mu muhango witabiriwe n’abayobozi batandukanye, ab’inzego zishinzwe umutekano n’imiryango yiciwe ababo bashyira indabyo ku rwibutso rwa Rwamagana.

Abantu 19 barimo Godfroid Ruzindana wari prefet wa perefegitura ya Kibungo ni bo bamaze kumenyekana mu bari abakozi ba prefecture Kibungo bishwe muri Jenoside yakorewe Abatutsi.

Umunyamabanga wa Leta muri Minisiteri y’Urubyiruko n’Umuco ushinzwe urubyiruko n’umuco, Edouard Bamporiki, yibukije abari baje kwifatanya mu kwibuka, ko bagomba gukomeza gushyira imbaraga mu bikorwa byo kurwanya abahakana Jenoside, ndetse agaragaza akababaro aterwa no kuba abari urubyiruko mu bihe byashize batarigeze batozwa gukunda igihugu nyabyo.

Ari yo mpamvu ubuyobozi bw’iki gihe bwashyizeho gahunda y’itorero rigamije kubiba imbuto z’urukundo no kwitangira igihugu mu bakiri bato.

Guverineri w’Intara y’Iburasirazuba, Emmanuel K. Gasana, yahumurije abacitse ku icumu ababwira ko bafite Guverinoma ibahoza ku mutima, ndetse aboneraho kubashimira uburyo bakomeje guharanira kubaho bakemera gutanga imbabazi kugira ngo u Rwanda rukomeze kugira ubuzima.

Mu mazina y’abantu 19 bishwe muri Jenoside ari ku rwibutso rwa Rwamagana, harimo n’abari abakozi ba sous-perefegitura ya Kanazi na Kirehe muri perefegitura ya Kigali-Ngari n’iya Kibungo.

Ubuyobozi bw’Intara buracyakusanya amazina y’abandi bishwe muri Jenoside bo mu zindi sous-perefegitura.

Ndayisaba Fidele asaba Abanyarwanda gufatana mu mugongo mu Kwibuka ku nshuro ya 27 Jenoside yakorewe Abatutsi

Umunyamabanga Nshingwabikorwa wa NURC, Fidèle Ndayisaba, avuga ko muri iki gihe Abanyarwanda bagira umwanya wo kongera kwibuka ibihe by’amage bya Jenoside yakorewe Abatutsi, kwibuka ari ngombwa kugira ngo baharanire ko Jenoside itazongera kubaho ukundi.

Amwe mu mahame y’Ubumwe n’Ubwiyunge azibandwaho mu kwibuka harimo ihame ryo Kwibuka haharanirwa ko Jenoside itazongera kubaho ukundi, no kurwanya Jenoside n’ingengabitekerezo yayo.

Umunyamabanga Nshingwabikorwa wa NURC Fidèle Ndayisaba avuga ko Abanyarwanda n’inshuti zabo, izizi u Rwanda, basabwa kurwanya ingengabitekerezo ya Jenoside, n’ibijyanye nayo hirindwa amagambo apfobya n’amagambo asesereza abarokotse Jenoside kuko ijambo rirema ku buryo iyo rikoreshejwe neza rifasha mu gihe iyo rikoreshejwe nabi risenya. “Ntawe ukwiriye guhirahira yongera kudusubiza mu kibi, nta kintu cyatuma Abanyarwanda bongera gusubira inyuma, reka Abanyarwanda twubakire ku kuri kugira ngo kutubere imibereho yacu n’abana bacu”.

Avuga ko n’ubwo kwibuka ku nshuro ya 27 bibaye mu bihe bidasanzwe byo kwirinda Covid-19 abantu bakwiriye gutegura imitima ngo bibuke, hirindwa ko bagwa mu byaha bihanwa n’amategeko igihe hagaragaye ingengabitekerezo ya Jenoside.

Ati “Kimwe mu biranga ubumwe ni ugufatanya, kubahana, koroherana, gufatana mu mugongo ni ngombwa. Ibyo bisaba ko twinjira muri icyo gihe kidasanzwe twiteguye neza kuko ari igihe gikora ku mitima y’abantu”.

Kwibuka ni igihe cyo guha agaciro abishwe muri Jenoside bakambuwe

Abanyarwanda barasabwa gushyigikirana no gufatanya mu kwibuka kugira ngo inzirakarengane zishwe muri Jenoside zunamirwe, kuko bishwe badashobora gushyingurwa, ariko igihe cy’icyunamo no kwibuka kikaba ari umwanya wo gufatanyiriza hamwe guha agaciro abishwe muri Jenoside.

Mu kwibuka, ababyiruka bahamenyera akaga umuryango nyarwanda wahuye nako mu mateka ya vuba, kwitabira ibikorwa byo kwibuka akaba ari bumwe mu buryo bwo kurwanya Jenoside kuko kuva Jenoside yakorewe Abayahudi ikorwa mu myaka ya 1940, yongeye kuba nyuma y’imyaka itari myinshi mu Rwanda mu 1994.

Avuga ko ibyo byagaragaje ko isi n’abayituye bari bibagiwe ko biyemeje ko Jenoside itazongera kubaho, Umunyarwanda uzi ayo masomo rero we akaba akwiye kureka gupfobya Jenoside ahubwo agashyigikira ibikorwa byo Kwibuka kugira ngo Jenoside itazongera kubaho ukundi.

Imbuga nkoranyambaga zikwiye kwifashishwa mu Kwibuka ariko bidakomeretsa Abarokotse.

Umunyamabanga Nshingwabikorwa wa NURC ati “Uretse no guhana abantu turanababurira tubasaba kwirinda ibyabagiraho ingaruka ziteganywa n’amategeko, tureke kurangazwa n’abagifite imigambi mibisha, twe kubatiza umurindi, tureke guhererekanya ibidafite akamaro kuri izo mbuga nkoranyambaga kuko ni ko kubitiza umurindi”.

Yongeraho ati “Urugamba rwo kubohora u Rwanda rwaduhaye icyizere cy’uko Abanyarwanda dufite umurage mwiza wo gutsinda Jenoside kandi tuzi ko Jenoside yica, isenya umubiri n’ibikorwa. Ntidukwiriye guhirahira twongera guha umwanya ikintu cyamamaza Jenoside kuko ibyo byaba ari uguhakana ibindi bikaba ari ugupfobya”.

Yongeraho ko Abanyarwanda bafite umuti ukomeye wo gushyira imbere Ubunyarwanda kuko Jenoside yabaye kubera ko ikinyoma cyakuye ukuri kikimura Ubunyarwanda mu mitima yabo. Abanyarwanda bagomba kugarukira ukuri kuko ari ko komora ibikomere, bikabera buri wese ingabo imukingira kandi igakingira abana b’Abanyarwanda ntibazaheranwe n’ikibi.

Fideli Ndayisaba atangaza ko n’ubwo hari bimwe mu bikibangamiye Ubumwe n’Ubwiyunge hari n’intambwe nziza imaze guterwa mu myaka 27 Jenoside ihagaritswe.

Ati “Haracyagaragara abakirangwa n’ibikorwa n’imvugo bitanya abantu ndetse bigashyirwa hanze na bamwe badashaka ko Abanyarwanda bakomeza kunga ubumwe n’ubwo atari benshi. Abanyarwanda bakwiye gukomeza kurwanya ikibi no kwirinda kurangazwa n’ibivugwa cyangwa ngo bibace intege kuko igitotsi ari igitotsi kandi kigomba kwigizwayo”.

Abafatanyabikorwa ba NURC biteguye gutanga umusanzu mu kwibuka ku nshuro ya 27

Umuryango wita ku isanamitima AMI (Association Modeste et Innocent), wibanda ahanini ku bikorwa byo gufasha abagizweho ingaruka za Jenoside ugaragaza ko ufite gahunda eshatu z’ingenzi uzibandaho mu gihe cyo kwibuka, harimo no guhuza abafungiye icyaha cya Jenoside yakorwe Abatutsi n’imiryango bahemukiye.

Umukozi wa AMI ushinzwe ibikorwa byayo mu baturage, Gilbert Kubwimana, avuga ko ibyo bikorwa bifite uruhare runini mu kwibuka hagamijwe gushimangira ubumwe n’Ubwiyunge.

Agira ati “Muri gahunda dufite tuzahuza abafungiye icyaha cya Jenoside n’abo bahemukiye, tuzakoresha uburyo bwo gusoma amabaruwa abafunze banditse basaba imbabazi kuko batemerewe gusohoka kubera icyorezo cya Covid-19”.

Yongeraho ko hari na gahunda z’ibiganiro bizahabwa imiryango y’abarokotse Jenoside n’imiryango y’abayikoze mu byiciro bitandukanye, kugira ngo harebwe intambwe bamaze gutera n’ibibazo bibangamiye ubumwe n’ubwiyunge.

Mu gihe cyo kwibuka nyirizina, hakunze kugaragara ikibazo cy’ihungabana nk’imwe mu ngaruka zikunze kwibasira abacitse ku icumu rya Jenoside.

Kubaba hafi no kubegera ni kimwe mu byo umuryango CBS Rwanda bazitaho ubu bakaba baramaze guhugura abantu 600 mu Mirenge itandukanye bazatanga ubufasha igihe hagaragaye uwahungabanye.

Umunyamabanga Nshingwabikorwa wa CBS Rwanda, Madamu Nzaramba Lucie, avuga ko uwo ari we wese ashobora gufasha umuntu wahungabanye, amwegera kandi bagakorana ibikorwa bituma atitekerezaho cyane.

Agira ati “Mushobora gukorana siporo, kuririmba indirimbo akunda, igihe ubonye umuntu adashaka kurya, adasabana kandi asanzwe aganira, icyo gihe ugomba kumenya ko yasubijweyo, aba akeneye kwitabwaho byaba ngombwa ugahamagara abo twahuguriye gufasha abahungabanye”.

Abanyarwanda bayobowe neza kandi bahagaze neza mu rugendo rw’Ubumwe n’Ubwiyunge

Bwana Ndayisaba Fidèle, avuga ko Abanyarwanda bahagaze neza kandi bayobowe neza mu rugendo rw’Ubumwe n’ubwiyunge kuko ubundi akaga k’amacakubiri kaje kubera kuyoborwa nabi, aho abantu binjijwemo urwango rukaza no kugeza igihugu kuri Jenoside yakorewe Abatutsi.

Abanyarwanda rero bakaba ubu bafite imiyoborere myiza irangajwe imbere na Perezida wa Repuburika, Paul Kagame, na we urahirira ko azashyira imbere ubumwe bw’Abanyarwanda kandi akaba ari we murinzi ukomeye w’ubumwe bwabo.

Abandi bayobozi nabo barahirira guteza imbere ubumwe bw’Abanyarwanda, bakabishyira mu ngiro kandi imiyoborere nk’iyo ni yo ituma ubushake bwo kwanga ivangura n’amacakubiri babigeraho.

Ati “Abakigaragara mu bikorwa by’amacakubiri ni bake n’ababikora bakigaragara ni uko hari ababyanga bakabarega bikagaragara. Abanyarwanda kandi bafite umuhate wo komorana ibikomere kandi birasaba kudatezuka kuko bakomerekejwe n’amateka bigasaba ko hari ibyo kwihanganira kugira ngo bakomeze gufatanya”.

Yongeraho ati “Ubushake bwa Politiki, mu Bayobozi, ukwihangana kw’Abanyarwanda gushaka no gukomeza umuhate wo kwihangana ni bimwe mu bituma urugendo rw’Ubumwe n’Ubwiyunge rukomeza”.

Komisiyo y’Igihugu y’Ubumwe n’Ubwiyunge kandi isanga abafatanyabikorwa bayo bakwiriye gufasha Abanyarwanda kwitegura kwibuka mu cyumweru cy’icyunamo n’iminsi 100 yo Kwibuka Jenoside yakorewe Abatutsi mu 1994.

NURC itangaza ko imyiteguro yo kwibuka ku nshuro ya 27 mu Turere yabereye mu Ihuriro ry’Ubumwe n’Ubwiyunge kandi ko ubufatanye ari ngombwa kugira ngo umuryango nyarwanda uyoborwe neza kandi n’inzego bireba zikomeze guhana amakuru no kujya inama, buri wese mu nshingano ze ngo amahame akomeye mu rugendo rwo kubaka Ubumwe n’Ubwiyunge bafatanyirize hamwe kuyashyira mu bikorwa muri iki gihe cyo Kwibuka ku nshuro ya 27 Jenoside yakorewe Abatutsi.

Abarangije igifungo nyuma y’ibyaha bya Jenoside batuye mu Gatenga barimo kubakira abo bahemukiye

Abagiye kubakira Mukagatera Apollinaria utuye mu mudugudu wa Kabeza wo mu Kagari ka Nyarurama, barimo abishe n’abasahuye umuryango w’iwabo.

Mukagatera w’imyaka 62, yarokokeye ku musozi wa Rebero mu Karere ka Kicukiro, akavuga ko avuka mu muryango w’abana icyenda, ariko muri abo bavandimwe ndetse n’ababyeyi be bose ngo ni we wenyine wasigaye.

Jenoside yakorewe Abatutsi mu 1994 yasanze Mukagatera kandi ari umubyeyi ufite umugabo n’abana bane, baza kwicwa hasigara we n’abana babiri gusa.

Avuga ko afite ubumuga yatewe n’Interahamwe ngo zamukubise zikamutemagura ahantu hatandukanye ku mubiri, ubu akaba yibana kuko umwana umwe akiri mu ishuri undi akaba yarubatse urugo rwe.

Inzu ye irashaje, inka ebyiri afite mu rugo zimusaba guhora yifuza amafaranga yaha umuntu wo kuzitaho no kumufasha imirimo itandukanye y’urugo.

Mu miryango 45 y’abarokotse bo mu Gatenga igiye guhabwa ubufasha, Mukagatera ni we umuganda w’abakoze Jenoside wahereyeho, bakaba batangiye kumusanira inzu n’ubwiherero, ndetse no kumukorera akarima k’imboga, bafatanyije n’ubuyobozi ndetse n’urubyiruko rwo muri uwo murenge.

Mu bo Mukagatera yabonye baje kumwubakira kandi ngo azi neza ko bakoze Jenoside, harimo Safari Ramazani, Uwimana uzwi nka Kagondo, Mutungirehe, Ntaganda Jean Claude ndetse na Habimana Kasim (murumuna wa Safari).

Mukagatera yavuze ko n’ubwo baje kumwubakira, nta bwiyunge buraba hagati ye na bo mu gihe bataramubwira aho abantu be biciwe.

Yagize ati "Ubu se twakwiyunga dute kandi batarambwira aho bagiye batsinda ababyeyi n’abavandimwe banjye! Ndagira ngo nanjye umutima wanjye ubohoke, hari n’igihe mbabona (aba bakoze Jenoside) nkumva agahinda karaje".

Mukagatera yifasha imirimo yose mu rugo n’ubwo yatewe ubumuga muri Jenoside yakorewe Abatutsi

Mukagatera yakomeje avuga ko ibi bitamubuza gushimira abaje kumuha umuganda bose, agakeka ko abamuhemukiye mu gihe bazaba bamaze kumenyera kuza iwe, ngo bashobora kuboneraho akanya ko gusaba imbabazi no kumurangira aho abantu be biciwe.

Avuga ko mu barangije igihano bafunguwe, Safari wenyine ari we waje kumusaba imbabazi ndetse akishyura imitungo yari yarasahuye, ariko umubyeyi we witabye Imana ndetse na murumuna we ukiriho, ngo ntacyo bigeze bamubwira.

Safari Ramazani yabwiye Kigali Today ko yafunguwe amaze kwihana kandi umutimanama ukamusaba kwiyunga na Mukagatera hamwe no kwishyura ibyo yari yarasahuye, ariko abandi ngo bafunguwe kuko barangije igihano.

Yagize ati "Ikibazo ni uko murumuna wanjye kubera ko tutigeze dukorana, ntabwo nzi gahunda ze, ntabwo yigeze yirega ahubwo yarangije igihano cye (imyaka 19), ntabwo nzi niba yaba yaramenye aho abantu ba Apollinaria baherereye".

Ntaganda Jean Claude na we warangije igifungo, avuga ko atahemukiye Mukagatera Apollinaria, ariko ubuyobozi ngo bukwiye kumutegura we na bagenzi be kugira ngo batangire ibiganiro by’ubumwe n’ubwiyunge hamwe n’abo bahemukiye.

Umunyamabanga Nshingwabikorwa w’Umurenge wa Gatenga, Mugisha Emmanuel avuga ko nyuma y’umuganda wo kubakira abarokotse Jenoside uzajya ukorwa n’abayikoze, ngo hazajya habaho ibiganiro byo kubwizanya ukuri hagamijwe ubumwe n’ubwiyunge.

Mugisha yagize ati "Tuzabaganiriza kugira ngo amakuru baba bataratanze y’ahari imibiri bahagaragaze, ibe yashyingurwa mu cyubahiro, ibyo bizarushaho gukomeza kubaka ubumwe n’ubwiyunge ndetse n’ubusabane hagati y’impande zombi".

Mugisha avuga ko mu bikorwa by’umuganda wo gusana inzu z’abatishoboye barokotse Jenoside hamwe no mu biganiro bigamije ubumwe n’ubwiyunge (mu gihe Covid-19 yaba irangiye), urubyiruko rutagomba kuburamo kugira ngo rutegure ejo hazaza hatagira amacakubiri n’ivangura.

Uretse kubakira abarotse Jenoside batishoboye bo mu murenge wa Gatenga, Mugisha avuga ko hari n’abafatanyabikorwa babahaye imyambaro n’ibiribwa.

Mu Kinigi Umututsi wa mbere yicishijwe amabuye mu 1991

Urwo rwibutso rushyinguyemo imibiri y’Abatutsi bishwe mu mwaka wa 1991 gusa, mu gihe mu mwaka wa 1994 nta Mututsi wari ukibarizwa aho hahoze ari muri Komini Kinigi, aho bose bari barishwe abandi bahungira mu tundi duce tunyuranye tw’igihugu.

Mu gushaka kumenya neza amakuru yimbitse kuri Jenoside yakorewe Abatutsi muri iyo Komini, Kigali Today yanyarukiye mu Murenge wa Kinigi aho urwo rwibyutso ruherereye hanatuye abenshi mu barokotse Jenoside banyuze muri ayo mateka.

Sekaneza Jean Pierre warokokeye Jenoside muri iyo Komini na Munyarutete Joseph, Umuyobozi wa IBUKA mu Murenge wa Kinigi, mu buhamya bavuga ko ako gace kahoze ari Komini Kinigi bagafata nk’ahantu habitse amateka y’igeragezwa rya Jenoside yakorewe Abatutsi mu 1994, kuko ari ho yatangiriye ubwo Abatutsi bari bahatuye bicwaga urw’agashinyaguro.

Munyarutete ati “Aha hantu hafite amateka yihariye mu Rwanda, uretse Abanyakibirira mu cyahoze ari Gisenyi, ariko aha hafite amateka yihariye aho Umututsi wa mbere yishwe kuri 26 Mutarama 1991, mu gihe uwishwe nyuma ari Umubyeyi wanjye witwaga Akumwami wishwe ku itariki 23 Gashyantare 1991”.

Arongera ati “Mu cyahoze ari Komini Kinigi nta Mututsi wishwe mu 1994, kuko bari barabamaze abari barasigaye batishwe mu 1991, Inkotanyi zibarokora zibakuye muri Komini Mukingo, aho bari bahungiye zibajyana mu gice zari zarafashe muri Butaro. Abapfobya Jenoside bavuga ko indege ya Habyarimana ari yo bahanuwe Abahutu bakagira umujinya bakica Abatutsi, gusa ntabwo ari byo kuko twebwe hano nta Mututsi wapfuye mu 1994, bose bari barabamaze”.

Munyarutete avuga ko intandaro yo kwica Abatutsi ari ubuyobozi bubi bw’iyo Komini, aho nyuma y’igitero cy’Inkotanyi mu Ruhengeri aribwo abantu banyuranye batangiye gufungwa bitwa ibyitso by’inyenzi, ku itegeko ryatangwaga na Gasana Thadée wari Burugumesitiri wa Komini Kinigi.

Ngo muri uko gufunga abantu banyuranye, ni ko bagendaga babicamo aho yagiye kwisanga yibona asigaranye na murumana we muri gereza ariko ku munsi wo kubica ngo ni bwo Burugumesitiri yasabye ko bamurekura, ariko akagenda avuga ko ibyo byitso byishwe n’Inkotanyi.

Ati “Ubwo havugwaga ko imiryango ishinzwe uburenganzira bwa Muntu yenda gusura Komini Kinigi mu kureba ikibazo cy’abantu bakomeje kwica, Burugumesitiri Gasana ubwe ni we waje kunyikurira muri Gereza ari kumwe n’umupolisi witwa Semateke”.

Ati “Icyo gihe nari kumwe na murumuna wanjye witwa Gapesa, bati mwe tugiye kubafungura ariko abazaza kubabaza iby’abantu biciwe aha, muzavuge ko ari inyenzi zabishe. Ubwo baramperekeza bangeza ku rugabano rwa Musanze na Kinigi, nanjye nkimara kuva aho nibwo naraye ntorotse nsanga Inkotanyi”.

Uwitwa Sekaneza Jean Pierre warokokeye aho muri Komini Kinigi nawe avuga ko ubutegetsi bubi ari bwo nyirabayazana ya Jenoside muri ako gace, aho bari barabibye ingengabitekerezo yayo mu bato n’abakuru.

Ati “Ibyo bavuga ngo indege ya Habyarimana ibyo ni ibinyoma, ingengabitekerezo ya Jenoside yatojwe kuva kera ihera mu bana mu rubyiruko no mu bakuru, n’ikimenyimenyi muri 1994 bene wacu bari batuye aha bari barashize. Aha habaye mu turere tumwe na tumwe twabayemo igerageza kugira ngo barebe ko Jenoside bateguye izagerwaho”.

Imibiri ishyinguye mu rwibutso rwa Kinigi ikomeje kunyagirwa

Abenshi mu bafite ababo bashyinguye muri urwo rwibutso rwa Jenoside rwa Kinigi, ntibishimiye uburyo iyo mibiri ikomeje kunyagirwa nyuma y’igihe kinini bagaragaza ko urwo rwibutso rutitaweho.

Munyarutete Joseph Umuyobozi wa Ibuka mu murenge wa Kinigi

Ni urwibutso rudasakaye, aho bigaragara ko isima irwubatse yagiye isatagurika mu gihe cy’imvura amazi akinjira, ku buryo impungenge ari nyinshi ku mibiri ishobora kwangirika dore ko no kuba hafunze imibiri ikaba itagerwaho n’umwuka, bishobora nabyo kwangiza iyo mibiri nk’uko babivuga.

Sekaneza ati “Twasabye inshuro nyinshi ko uru rwibutso rwakubakwa, murabona ko iki gisenge cyo hejuru kigizwe na beto cyamanyutse hacika imitutu, twakomeje gusanasana ariko biranga imvura iragwa amazi agacengeramo ku buryo dufite impungenge y’abacu bashyinguwemo”.

Arongera ati “Ushobora gusanga n’amateka asibanganye bitewe nuko uru rwibutso rutubatse neza, tubisaba uko umwaka utashye, dusaba tuti urwibutso rufite amateka yihariye bitewe nuko Jenoside yakorewe hano n’igihe yatangiriye noneho hakaba no mu gace k’ubukerarugendo, kugira ngo bigaragarire n’amahanga ndetse byereke n’abayipfobya ko Jenoside itatangiye ku ihanurwa ry’indege ya Habayarimana nk’uko abenshi babivuga, ahubwo ko yateguwe kuva kera”.

Munyarutete ati “Nk’uko twabigaragaje kandi ko kano kace kagira ubukonje budasanzwe, turatekereza ko amasanduku ashobora kuba yarangiritse, iyo yangiritse rero n’imibiri irangirika, tukavuga tuti rero ntidushaka ko ibimemyetso by’ayo mateka bisibangana. Ubu mfite imyaka 53 ayo mateka ndayazi neza, ariko ntabwo yanditse, iyo tuba dufite urwibutso rwubatse mu buryo bugezweho ayo mateka aba yanditse, ubu nshobora kuva mu mwuka agasibangana”.

Avuga ko kuba aho hantu ariho Jenoside yageragerejwe ari kimwe mu gisubizo ku bibazo by’abapfobya Jenoside bavuga ko yatewe n’ihanurwa ry’indege ya Habyarimana.

Ati “Turamutse dufite urwitso rugezweho ayo mateka akandikwa, abanyamahanga badusura barushaho kuyasoma andi tukayabasobanurira, ariko uyu munsi kubera ko ntaho yandikwa nta n’ibimenyetso bifatika, ushobora no kuhanyura ntumenye ko hari urwibutso kandi hari amateka akomeye”.

Abo baturage kandi baravuga ko hari imibiri itaraboneka, aho basaba abakoze Jenoside muri ako gace kwirinda kunangira, ahubwo bakagaragaza aho imibiri iri igashyingurwa mu cyubahiro nkuko Munyarutete abivuga.

Munyarutete ati “Murabona turibuka ku nshuro ya 27 Jenoside yakorewe Abatutsi, ariko turacyafite imibiri itaraboneka ngo ishyingurwe mu cyubahiro kandi ababigizemo uruhare barahari baranabyiyemerera, ariko ntibatwereka aho imibiri iri ngo ishyingurwe mu cyubahiro. Icyo rero nacyo ni ikibazo kidutera intimba ndetse kibangamira ubumwe n’ubwiyunge”.

Icyo ubuyobozi buvuga kuri icyo kibazo

Mu kumenya icyo Leta ivuga kuri icyo kibazo, Kigali Today yegereye Umunyamabanga Nshingwabokorwa w’Umurenge wa Kinigi, Twagirimana Innocent, avuga ko hari umushinga wo kubaka urwo rwibutso.

Yagize ati “Nk’urwibutso rusigasiye amateka y’umwihariko nk’ahantu bageragereje Jenoside mbere aho abashyinguwemo bose bishwe mu 1991, iyo ubonye ari urwibutso rwo gusigasira amateka rukaba rutarubakwa bitera impungenge, cyane cyane abafite ababo bashyinguwemo. Ariko na none wasubira inyuma ugasanga Leta idashobora kwirengagiza gushyingura abacu mu buryo bukwiye ahubwo ari ubushobozi no kureba icyo urwibutso rukwiye bisaba”.

Ati “Mu Karere ka Musanze hagiye kubanza kubakwa urwibutso rwa Muhoza, hakurikireho uru rwa Kinigi, ariko mu gihe dutegereje kubaka urwibutso nyirizina Akarere ka Musanze kamaze kuduha amafaranga n’uburenganzira bwo kugira ngo tube dusakaye urwibutso mu rwego rwo gukumira ko amazi yinjiramo akaba yakwangiza imibiri y’abacu. Mu ngengo y’imari y’akarere 2021/2022 barateganya gukora inyigo y’urwibutso, 2022/2023 rukazaba rwuzuye rukurikira urwa Muhoza”.

Kuri urwo rwibutso isima yagiye imenagurika amazi akinjira ahashyinguye imibiri

Nyamara iyi misa yaje gusubukurwa ku itariki nk’iyi ya 13/04/2021 iba mu mutekano ndetse irasozwa.

Abatutsi barokokeye muri iki kigo bashima cyane Padiri Uwimana Chrisostome kubera uburyo yababaye hafi mu bihe bitari biboroshye bya Jenoside yakorewe Abatutsi.

Padiri Uwimana Chrisostome ashimwa ubumuntu yagaragaje ubwo yarengeraga Abatutsi Interahamwe zashakaga kwica

Padiri Chrisostome yinginze Interahamwe azibuza kumena amaraso y’abantu bari bamuhungiyeho, Ati “Ndabaha amafaranga, mfite inka z’imbyeyi ndazibaha ariko ntimumene amaraso y’aba bantu.”

Nyamara Interahamwe ntizamwumviye, zaranze zirabica.

Padiri Chrisostome tariki nk’iyi 13/04/1994 yarimo asomera Missa Abatutsi bari bahungiye mu Kiriziya ya Karoli Lwanga iherereye i Nyamirambo muri Saint Andre. Iyi Missa ntiyasoje kuko barashweho igisasu bakwira imishwaro. Uyu munsi dusoza icyumweru cyo #Kwibuka27 Misa irasoje. pic.twitter.com/92QfGgOM6H

— Kigali Today (@kigalitoday) April 13, 2021

Ambasaderi Dr Ron Adam yifatanyije n’Abanyarwanda mu gusoza icyumweru cy’icyunamo

Yabitangaje kuri uyu wa Kabiri tariki 13 Mata 2021, ubwo hasozwaga icyumweru cy’icyunamo, mu Karere ka Nyagatare bikaba byabereye ku rwibutso rwa Jenoside rwa Rwentanga mu Murenge wa Matimba.

Ambasaderi Dr. Ron Adam yavuze ko yifatanyije n’abaturage b’Akarere ka Nyagatare mu kwibuka ku nshuro ya 27 Jenoside yakorewe Abatutsi mu 1994, kuko asanga isa n’iyakorewe Abayahudi muri Israel, igihugu ahagarariye na cyo cyibuka.

Ati "Abantu barishwe, baratwikwa, bitwa amazina abatesha agaciro kubera ko gusa ari Abayahudi cyangwa Abatutsi".

Ambasaderi Adam yavuze ko yakunze intego ya Perezida Paul Kagame yo kubaka u Rwanda rufite abaturage bafite ubuzima bwiza mu cyerekezo gishya nyuma ya Jenoside yakorewe Abatutsi, anaboneraho gufata mu mugongo imiryango yabuze ababo muri Jenoside yakorewe Abatutsi.

Umuyobozi w’Akarere ka Nyagatare, Mushabe David Claudian, yashimye Ambasaderi Dr. Ron Adam kuba yifatanyije n’Abanyarwanda kwibuka no kunamira inzirakarengane zabuze ubuzima muri Jenoside bazizwa uko batiremye.

Yavuze ko n’ubwo icyumweru cyo kwibuka gisojwe ariko hazakomeza ibikorwa byo gukomeza kwegera abacitse ku icumu kugira ngo bafashwe.

Yagize ati “Ndashimira Ambasaderi wa Israel mu Rwanda n’abandi mwifatanyije natwe uyu munsi tuzirikana abavandimwe bacu bashyinguye hano mu rwibutso rwa Jenoside rwa Rwentanga. Uyu munsi ni uwo gusoza icyumweru cy’icyunamo ariko Kwibuka ku nshuro ya 27 Jenoside yakorewe Abatutsi biramara iminsi 100. Ndabasaba kandi gukomeza kuba hafi y’imiryango ifite ababo bazize Jenoside”.

Mayor Mushabe kandi yavuze ko uyu mwaka hagiye kubakwa urwibutso rwa Jenoside rw’Akarere kandi rumeze neza ku buryo buhesha agaciro inzirakarengane zambuwe ubuzima muri Jenoside.

Yanavuze ko ubuyobozi bw’Akarere buzakomeza kuba hafi abarokotse Jenoside kugira ngo imibereho yabo irusheho kuba myiza.

Urwibutso rwa Jenoside yakorewe Abatutsi rwa Rwentanga ruruhukiyemo imibiri y’Abatutsi 66 bishwe bitwa ibyitso by’Inkotanyi nyuma y’uko zitangije urugamba rwo kubohora u Rwanda.

Kubera uburyo abari bahatuye bishwemo aho bicirwaga ku gasozi ngo hari imibiri itaraboneka ngo ishyingurwe mu cyubahiro.

Kubera amabwiriza yo kwirinda ikwirakwira rya COVID-19, umuhango wo gushyira indabo ku rwibutso rwa Jenoside rwa Rwentanga witabiriwe n’abagize Inama y’Umutekano Itaguye y’Akarere, uhagarariye IBUKA, uhagarariye urubyiruko n’uhagarariye abafite ababo bahashyinguye.

Inzu ya François Ndatabaye yamaze kugwa uruhande rumwe

Abo ni abatuye mu Mudugudu wa Shuni, mu nzu bubakiwe mu 1995 na 1996. Ni inzu zidakomeye zubatswe nta fondasiyo, ubu zinariho amabati yamaze gusaza ku buryo zisigaye ziva.

François Ndatabaye, ni umwe mu batuye muri uwo mudugudu. Inzu ye imaze hafi icyumweru iguye uruhande rumwe, nyamara aracyayituyemo, ubu arimo kuba mu byumba bibiri biyigize.

Iyo nzu ayibanamo n’abana be babiri, kuko umugore we yapfuye, ariko n’abo bana bari kumwe umwe akaba afite uburwayi bwo mu mutwe.

Ku kibazo cyo kumenya niba adafite ubwoba bw’uko n’ahasigaye hazabagwira asubiza agira ati “Ubwoba nta kuntu ntabugira. Iyo ngira ubushobozi nari kureba aho nkodesha, ariko ntabwo kuko nta kazi mfite, ibihumbi 15 by’amafaranga y’ubukode nsabwa sinayabona”.

Beata Nyirimbabazi hamwe n’umugabo we n’abana babo na bo, batuye mu nzu yiyashije, ku buryo bigaragara ko iri hafi kugwa.

Avuga ko abayobozi baherutse kubasura bakabasaba kuyivamo, ariko ngo byarabananiye kuko babuze amafaranga y’ubukode. Amafaranga bakura mu guca inshuro ngo ntibayakuramo ibihumbi 15 babaca ku bukode bw’inzu bari babonye.

Agira ati “Twahisemo kuba tuyirimo mu gihe dutegereje ko nibaza kudusanira tuzafata amabati yari ayiriho, tukubaka ikibandahori tuzaba turimo mu gihe iyacu itaruzura”.

Umunyamabanga Nshingwabikorwa w’Umurenge wa Huye, Prosper Rwamucyo, avuga ko muri rusange abarokotse Jenoside bubakiwe ikirangira bakeneye gusanirwa inzu ari benshi mu Murenge ayobora.

Hari n’imiryango 20 yri ituye mu nzu zishaje kurusha izindi ubu yamaze gutuzwa mu nshyashya zubatswe muri uyu mudugudu.

Ati “N’abasigaye Akarere kari gushakisha uko na bo bubakirwa, ariko na none ab’abagabo basabwa kwirwanaho bakisanira, harimo na François Ndatabaye.”

Inzu zubakiwe abarokotse Jenoside ikirangira, mu Mudugudu wa Shuni, zikeneye gusubirwamo

Icyakora, Joséphine Nibakure na we utuye muri uyu mudugudu, we avuga ko hari n’abasabwa kwirwanaho bakisanira kuko ngo bafite imbaraga, nyamara batabishoboye kubera ubuzima banyuzemo.

Agira ati “Hari abafatwa nk’abagabo bakwirwanaho bari abana bato nyuma ya Jenoside, barera imfubyi nyinshi, none ubu bafite abana babo bagomba kwitaho ndetse na za mfubyi bareze, nta n’imbaraga bakibifitiye. Abandi na bo ni abapfakazi badafite abo kuzibasubiriramo”.

Théogène Kabandana uhagarariye Ibuka mu Kagari ka Nyakagezi umudugudu wa Shuni uherereyemo, avuga ko kugeza ubu mu Mudugudu wa Shuni hari inzu 41 zikeneye isakaro rishyashya, na 24 zikeneye gusanwa, hatabariyemo iriya imwe yamaze gusenyuka.

Ku gicamunsi cyo ku wa Mbere tariki 12 Mata 2021, abakinnyi, abatoza, abayobozi n’abandi bakozi ba Kiyovu Sports barangajwe imbere na Perezida w’iyi kipe, Mvukiyehe Juvenal, basuye urwibutso rwa Kigali rushyinguyemo abarenga ibihumbi 250.

Byari mu rwego rwo Kwibuka ku nshuro ya 27 Jenoside yakorewe Abatutsi mu mwaka wa 1994, aho abagize iyi kipe basobanuriwe amateka ya Jenoside, bunamira inzirakarengane zihashyinguye ndetse banashyira indabo ku mva zishyinguyemo Abatutsi bishwe muri Jenoside.

Aya ni amafoto yaranze iki gikorwa

Abakinnyi ubwo bari ku Rwibutso

Umunya-Nigeria Samson Babua ku rwibutso rwa Gisozi

Bakurikiranye amateka kuri Jenoside yakorewe Abatutsi mu mwaka wa 1994

Bashyira indabo ahashyinguye abarenga ibihumbi 250

Kapiteni wa Kiyovu Sports Kimenyi Yves areba amafoto y’abishwe muri Jenoside yakorewe Abatutsi

Minani Hemed uhagarariye abafana ba Kiyovu Sports

Munyengabe Omar umunyamabanga wa Kiyovu Sports

Perezida wa Kiyovu Sports Mvukiyehe Juvenal ubwo yasinyaga mu Gitabo cy’abashyitsi

Uwari uhagarariye Ibuka mu karere ka Nyarugenge

Mfitimfura mbere no mu gihe cya Jenoside yakorewe Abatutsi mu 1994 yari umwalimu ku ishuri ribanza rya Rwimishinya mu cyahoze ari komini Rukara ari na ho avuka.

Avuga ko mu mwaka wa 1990, urugamba rwo kubohora igihugu rutangiye, Abatutsi bafashwe bajya gufungirwa kuri komini ndetse harimo n’abavandimwe be.

Avuga ko icyo gihe babujijwe kugenda ku magare bajya mu kazi kuko ngo agendwaho n’Inyenzi. Ikindi ni uko mu nzira ngo hashyizwe bariyeri yari iriho abahutu b’i Rwimishinya uhanyuze akabazwa ibyangombwa.

Ati “Hagati ya Rwimishinya na Rukara hari bariyeri yabagaho abahutu ba Rwimishinya, warahageraga bakakubaza ibyangombwa Umututsi agashyirwa ku ruhande, byakorwaga buri munsi nkibaza nti ese ubu irangamuntu yajye bazi ko yahindutse cyangwa jye nahindutse Umuhutu?”

Akomeza agira ati “Kudushyira ku ruhande kandi bazi ko tujya kubigishiriza abana babaga bashaka kubanza kutubwira amagambo mabi adutesha agaciro ariko nyine turabimenyera kuko twabibwiwe kera tukiga natwe”.

Muri icyo gihe ngo mu barimu hatangiye kuzamo urwikekwe kuko ngo amasaha y’akaruhuko gato, hari abarimu b’abahutu wasangaga baremye agatsiko ariko ngo hakaba n’abandi ubona badahuje na bo ibitekerezo.

Mfitimfura avuga ko ku itariki ya 06 Mata 1994 baraye bamenye ko indege ya Habyarimana yaguye ariko ngo bumva ntacyo bivuze kuko batumvaga ko gupfa kwe byatuma hari abicwa.

Nyamara ariko ngo ku itariki 07 Mata 1994 bakomeje kugira ubwoba bituma barara hanze bicungira umutekano ariko icyo gihe ngo hari bamwe mu Bahutu bararanye.

Tariki ya 08 Mata 1994 ngo nibwo yabonye abantu baturuka hirya no hino harimo abavaga i Murambi bajya kuri Kiliziya ya Karubamba kuhashaka ubuhungiro.

Itariki ya 09 Mata ngo nibwo abo mu muryango we nabo bari baragiye ku Kiliziya bamutumyeho kubasangayo kugira ngo aticwa kuko we yari yarasigaye mu rugo.

Uwo munsi ngo nibwo uwari Burugumesitiri wa komini Rukara, Jean Mpambara, yaje kuremesha inama izo mpunzi zari kuri Kiliziya ngo arabahumuriza ababwira ko abarindira umutekano.

Agira ati “Nka saa saba nibwo yaje ari kumwe n’abapolisi n’abajandarume atubwira ko duhumura aturindira umutekano. Abari bahunganye amatungo bamusabye ubufasha bw’amazi y’inka ababwira ko mu kanya ibibazo byose dufite bikemuka aragenda”.

Uwo mugabo avuga ko Burugumesitiri akigenda ngo Interahamwe zahise ziza na bo bagenda bazisatira kugira ngo zitagera mu bana n’abagore. Ngo zahise zibateramo gerenade abantu 12 bahita bahagwa ndetse Mfitimfura nawe arakomereka.

Avuga ko Interahamwe zahise zitwara ya matungo cyane inka n’indi mitungo zijya kuyarya no kugabana imitungo bituma iminsi ibiri yakurikiyeho zitagaruka kubica.

Yongeraho ko ku mugoroba wa tariki ya 12 Mata 1994 ari bwo ngo haje uwari Burigadiye wa komini ararasa bisa nko guhamagara Interahamwe kuko zahise ziza zitangira kwica abantu bari bihishe muri Kiliziya n’ahandi mu kigo cy’abapadiri.

Avuga ko uretse abatemaguwe, gukubitwa impiri bitaga ntampongano y’umwanzi, guterwa amacumu, ngo Abatutsi bari barahungiye muri Kiliziya ya Karubamba banatwikishijwe lisansi.

Itariki ya 13 Mata 1994 ngo interahamwe zagiye kwica abari kwa muganga i Karubamba harimo abarwayi n’abandi bari bahahungiye kimwe n’inkomere zari zakomerekeye mu Kiliziya.

Ku itariki ya 14 Mata 1994 nibwo ngo Interahamwe ziri kumwe n’abasirikare bagarutse ku manywa kurangiza abasigaye hifashishwa imbunda na gerenade kuko urugi rwa Kiliziya rwari rwafungishijwe imibiri y’abishwe mbere babura uko binjiramo.

Itariki ya 15 Mata 1994 na none ngo interahamwe zagarukanye n’abasirikare, bazifasha gukingura urugi, Abatutsi bari bakiri bazima batwarwa hanze ya Kiliziya.

Mfitimfura ngo interahamwe zaramubonye zibwira abasirikare ko ari we uvugana n’Inkotanyi bituma abasirikare bamutwara ku ruhande kubimubaza ariko bisoza batamwishe ahubwo bigendeye kuko batinye kurasa.

Ati “Baje nka saa munani, nijye wasohotse mbere interahamwe zari zinzi kuko nari mwalimu ziriyamirira ngo mfite Radio mvuganiraho n’Inkotanyi. Abasirikare banshyize ku ruhande bambajije ndabahakanira, umwe agiye kundasa mugenzi we amubwira ko atarasa kuko byakumvikana, bansigira interahamwe baragenda”.

Interahamwe ngo yagiye kumukubita umuhoro mu ijosi arawukwepa ufata ubusa asubira mu Kiliziya nazo zigira ubwoba ziragenda kuko ngo zari nkeya izindi zari zamaze guhunga byongeye abari bakiri bazima ngo bazirwanyije bakoresheje amabuye.

Bukeye bwaho ku wa 16 Mata 1994 mu gitondo ngo nibwo babonye Inkotanyi zirabahumuriza, zibizeza ko batagipfuye, inkomere zijyanwa kwa muganga i Gahini.

Avuga ko umwihariko wa Jenoside i Rukara ari uko Abatutsi barenga 8,000 mu minsi itatu gusa ndetse no kuba barishwe n’interahamwe ziturutse i Gahini zikaza gutanga ubufasha ku z’i Rukara no kuba mu babishe harimo abasikare, abapolisi n’abajandarume.

Intwaro zakoreshejwe harimo imihoro, ntampongano y’umwanzi, amacumu, imyambi, gerenade n’amasasu.

Mfitimfura Emmanuel avuga ko n’ubwo babonye ubutabera nyuma ya Jenoside ariko na none bababazwa no kuba abari ku isonga mu bwicanyi bw’i Rukara batarabonetse ngo nabo bahanwe.

Agira ati “Ubutabera bwarabonetse Gacaca yarakoze bamwe baracyafunze abandi barangije ibihano barataha turabanye neza. Hari abemeye ibyaba babisabira imbabazi ariko na none abari ku isonga batorotse ubutabera bari mu bihugu byo hanze biratubabaza kuko batabonetse nabo ngo bahanwe”.

Abari ku isonga mu bwicanyi bw’i Rukara by’umwihariko i Karubamba ni Burugumesitiri Mpambara Jean wagizwe umwere mu mwaka wa 2006 n’urukiko mpanabyaha rwashyiriweho u Rwanda ICTR.

Hari Mujyambere Paul mwene Birame wari umubaji bikekwa ko yaba ari muri Kenya cyangwa Uganda.

Nyirahuku François wari ukuriye CDR muri komini Rukara, Ngabonziza Frédéric wari asisita Burugumesitiri, Rujiguri wari Burigadiye n’abandi batazwi iyo baherereye.

Urwibutso rwa Jenoside yakorewe Abatutsi muri Mata 1994 rw’i Rukara ruruhukiyemo imibiri y’Abatutsi 8,703.

Benshi mu banyapolitiki bishwe Jenoside yakorewe Abatutsi igitangira tariki 7 Mata 1994, ni ababarizwaga mu mashyaka ataravugaga rumwe n’ingoma y’uwahoze ari Perezida Habyarimana Juvénal n’ishyaka ryari ku butegetsi bw’icyo gihe MRND. Kigali Today ikaba yifuje kugaruka ku buzima bwabo.

Ndasingwa Landouard

Uyu munyapolitiki wari uhagarariye ishyaka riharanira ukwishyira ukizana PL Parti Libérale), yabifatanyaga n’ubucuruzi, kuko yari nyiri Hotel Chez Lando, benshi bamuzi ku izina rya Lando.

Ndasingwa wari warize mu Rwanda, agakomeza na Kaminuza zitandukanye zo mu gihugu cya Canada, nyuma yo kurangiza yagarutse mu Rwanda, ashingwa imirimo inyuranye. Ariko ubutegetsi bwariho ntibwahwemye kumushinja kuba icyitso cy’Inkotanyi, aho yanabifungiwe mu mwaka w’1990.

Ubwo yari Minisitiri w’umurimo n’imibereho myiza muri Guverinoma y’inzibacyuho ya Habyarimana, yashyizweho nyuma y’amasezerano ya Arusha, ni we mututsi wenyine wayibarizwagamo.

Yakunze kurangwa no kurwanya akarengane, aharanira ko habaho ukwishyira ukizana kw’Abanyarwanda bose nta vangura.

Jenoside igitangira tariki ya 7 Mata 1994, ingabo zarindaga umukuru w’igihugu zamukuye mu rugo iwe, hamwe n’umugore we Hélène Pinski wari umunya Canada bari barabyaranye abana babiri, bose hamwe zirabica.

Agathe Uwilingiyimana

Agathe Uwilingiyimana wari waravukiye i Butare mu mwaka w’1953, akiga amashuri atandukanye harimo na Kaminuza y’u Rwanda, yakoze imirimo itandukanye ifite aho ihuriye n’Uburezi, akora no muri za Minisiteri zitandukanye aho nko mu mwaka wa 1992, yagizwe Minisitiri w’Uburezi wa mbere uturuka mu bataravugaga rumwe n’ubutegetsi, muri gahunda yo kugabana ubutegesti yari yumvikanweho hagati ya Perezida Habyarimana n’amashyaka atanu ataravugaga rumwe n’ubutegetsi.

Muri izo nshingano yahawe, yagize uruhare mu gukumira itonesha ryariho mu mitsindire y’abanyeshuri no gutanga za buruse zo kwiga, ashyiraho imirongo yo guha bose amahirwe angana hatitawe ku kuba umututsi cyangwa umuhutu.

N’ubwo iyo myitwarire ye itari ishyigikiwe n’ubuyobozi bwariho, ntibyamubujije kugirwa Minisitiri w’intebe mu Rwanda mu mwaka w’1993, bituma yandika andi mateka yo kuba ari we mugore wa mbere wahawe iyi mirimo mu Rwanda.

Mu mikorere n’imyitwarire ye, yakunze gushyira imbere kurwanya icyenewabo, ruswa no kudashyigikira ivanguramoko mu banyarwanda.

Mu gitondo cy’itariki ya 7 Mata 1994, umunsi Jenoside yatangiriyeho, nyuma y’amasaha macye indege ya Perezida Habyarimana Juvénal ihanuwe, urugo rwa Agathe Uwilingiyimana witeguraga kujya gutanga ubutumwa bw’ihumure kuri Radio y’igihugu, rwagoswe n’ingabo zarindaga umukuru w’igihugu, yicwa hamwe n’umugabo we.

Icyakora abana babo uko ari batanu, n’ubwo byari bigoranye, babashije kurokoka bigizwemo uruhare n’umusirikari w’umunya Sénégal wari mu ngabo za MINUAR, bahungishirizwa ku mugabane w’u Burayi ari naho babarizwa kugeza ubu.

Kavaruganda Joseph

Kavaruganda wavukiye ahitwa i Tare mu Burundi mu 1935, ni naho yize amashuri abanza. Ayisumbuye ayakomereza mu Rwanda, aho yavuye ajya kwiga muri Kaminuza mu gihugu cy’u Bubirigi, ahakura impamyabumenyi y’ikirenga muri filozofiya.

Mu mwaka w’1967, yagarutse mu Rwanda, aba umuyobozi w’icyohoze ari Ikigo cy’imari cyitwaga, Caisse d’Epargne.

Kuva mu mwaka w’1974 yagirwa Perezida w’Urukiko rurinda ubusugire bw’Itegeko Nshinga, akaba ari na we wari ushinzwe kurahiza umukuru w’igihugu. Kavaruganda yagiranye amakimbirane na Perezida Habyarimana Juvénal, ashingiye ku bibazo by’amategeko, ndetse bigera n’ubwo ashinja Habyarimana kudaha uburenganzira bwa Politiki amashyaka ataravugaga rumwe n’ubutegetsi bwe. Ibyafatwaga nk’agasumbane hagati y’ayo mashyaka n’ishyaka ryari ku butegetsi rya MRND.

Kavaruganda yarwanyije ingengabitekerezo y’ivangura yiswe Hutu Power. Nk’umuntu wakoraga mu bijyanye n’amategeko, yaharaniraga ko abantu bose bagira uburenganzira ku gihugu cyabo, by’umwihariko Abatutsi bari baramenesherejwe mu buhungiro, yifuza ko bagaruka mu gihugu cyabo, ku bw’imishyikirano hagati ya Guverinoma yariho na FPR.

Ibyo byatumye abatari bashyigikiye ibitekerezo bye, kimwe n’itegurwa ry’amasezerano ya Arusha yagizemo uruhare, yo guhagarika intambara hagati ya Guverinoma yariho na FPR, bitishimirwa na bamwe mu bayobozi, bamwotsa igitutu, kivanze n’uko muri iyo myaka yabanjirije Jenoside, bagerageje kumwica inshuro nyinshi akarusimbuka.

Icyakora itariki ya 7 Mata 1994, ho ntiyabashije kurusimbuka, kuko ingabo zarindaga umukuru w’igihugu, zinjiye mu rugo rwa Kavaruganda, zihamukura zimwizeza ko zimujyanye ahantu hafite umutekano wizewe.

Ntibyatinze, kuko zamujyanye zikamwicira mu kigo cy’igisirikari ku Kimihurura, zikumira ko atabangamira irahira rya Guverinoma nshya y’abatabazi, yashyizweho mu buryo bunyuranyije n’amasezerano y’amahoro ya Arusha, nyuma gato y’urupfu rw’uwahoze ari Perezida Habyarimana.

Rucogoza Faustin

Yabarizwaha mu Ishyaka rya MDR, ari Minisitiri w’Itangazamakuru. Ubwo Radio RTLM yari ikomeje umugambi wayo wo gucamo Abanyarwanda ibice, no kubabibamo urwango, Rucogoza mu mwaka w’1993, yamaganye imvugo zanyuzwaga kuri iyi Radio, kandi n’ubwo yari iy’abayobozi bari bakomeye muri icyo gihe, ntibyamubujije kuyihanangiriza, no kuyisaba kudakomeza gukora inkuru n’ibiganiro byari mu murongo wo gutiza umurindi amacakubiri.

Rucogoza n’umugore we n’abana, indege ya Habyarimana igihanurwa tariki 6 Mata 1994, barafashwe, bajyanwa mu kigo cy’ingabo zarindaga umukuru w’igihugu, ari naho biciwe bukeye bwaho.

Nzamurambaho Frédérique

Yari Minisitiri w’Ubuhinzi akaba na Perezida w’Ishyaka rya PSD. Yavutse mu mwaka w’1942 mu Karere ka Nyamagabe. Ishyaka PSD yari ahagarariye, ni rimwe mu mashyaka yahanganye bikomeye n’ingoma ya Habyarimana, ndetse agira n’uruhare mu mishyikirano yaberaga i Arusha yo kugarura amahoro. Jenoside yakorewe Abatutsi igitangira, abasirikari barindaga umukuru w’igihugu, bamwicanye n’umuryango we.

Ngango Félicien

Yari umuyobozi wungirije w’ishyaka PSD ari n’umwe mu mpirimbanyi zikomeye zaryo. Yari no ku rutonde rw’abanyapolitiki b’iryo shyaka bagombaga gushyirwa muri Guverinoma hakurikijwe amasezerano y’amahoro yo muri Arusha mu gihe cy’igabana ry’ubutegetsi.

Ibitekerezo byakunze kumuranga, bishyira imbere ubumwe bw’Abanyarwanda no kurwanya irondabwoko, ubuyobozi bwariho, bwarabirwanyije kugeza ubwo yicwa tariki ya 7 Mata muri Jenoside.

Mushimiyimana Jean Baptiste

Na we yari mu ishyaka PSD ari no mu bayobozi bakomeye mu yahoze ari MINITRAPE. Yavukiye mu Karere ka Ruhango mu wa 1954. We n’umugore we n’abana babiri bakuwe mu rugo rwabo rwari ku Kimihurura, bicwa n’abasirikari barindaga umukuru w’igihugu.

Kameya André

Uyu mugabo wari waravukiye mu Karere ka Gisagara mu mwaka w’1946, ni umwe mu bashinze Ishyaka PL, aba no mu bayobozi bakuru baryo, akaba yarabaye umunyamakuru wa ORINFOR, akanashinga ikinyamakuru cyitwa Rwanda rushya, cyahanganaga n’ibindi binyamakuru byari bishyigikiye ubutegetsi bwariho.

Ibitekerezo bye byo kurwanya urwango n’amacakubiri mu Banyarwanda yarabizize, kugeza ubwo muri Kamena 1994, yishwe akuwe muri St Paul, aho yari yahungiye muri Jenoside yakorewe Abatutsi.

Venantie Kabageni

Yavukiye mu cyahoze ari Komini Kayove, ubu ni muri Rutsiro mu mwaka w’1944. Yari mu ishyaka rya PL anaribereye Visi Perezida wa mbere, akaba yari no ku rutonde rw’abagombaga guhagararira iryo shyaka mu nteko ishinga amategeko. Yiciwe i Butamwa mu gitero cy’abicanyi bamurashe amasasu muri Mata 1994.

Charles Kayiranga

Yari umuyobozi mukuru muri Minisiteri y’Ubutabera, akaba no mu ishyaka rya PL. Yavutse mu w’1949 mu Karere ka Nyanza. Jenoside igitangira, Ingabo zarindaga umukuru w’Igihugu zamwicanye n’umuryango we ku Kimihurura

Maître Niyoyita Aloys

Yavukiye mu cyahoze ari Komini Nyamutera mu mwaka wa 1954. Yari mu ishyaka rya PL abifatanya n’umwuga wo kunganira abantu mu by’amategeko (Avocat), akaba ari na we wari kuzaba Minisitiri w’Ubutabera muri Guverinoma y’inzibacyuho itarigeze ibaho, kubera ishyirwa mu bikorwa ry’umugambi wo gutsemba Abatutsi. Na we yishwe muri Mata 1994, azizwa ko atigeze ashyigikira na rimwe imikorere idahwitse ku butegetsi bwa Habyarimana.

Augustin Rwayitare

Yavukiye mu cyahoze ari Komini Rukara, ubu ni mu Karere ka Kayonza mu mwaka w’1956. Yabaye umuyobozi muri Minisiteri y’umurimo n’imibereho y’Abaturage, akaba yari mu ishyaka PL, aho yarwanyije ingoma ya Habyarima. Muri Jenoside, Interahamwe n’abasirikari bamukuye iwe tariki 20 Mata 1994, bajya kumurasira mu muhanda wari ruguru y’aho yari atuye.

Jean de la Croix Rutaremara

Mu mwaka w’1958 nibwo yabonye izuba mu Karere ka Karongi. Na we yari umurwanashyaka wa PL, utarigeze anezezwa na Politiki yo kwimika urwango, bituma muri Jenoside yakorewe Abatutsi na we yicwa tariki 9 Mata 1994.

Mu banyapolitiki bishwe 13 Kigali today ibagejejeho, bamwe bazize ko bari Abatutsi abandi bazira ko barangwaga n’imikorere yo kurwanya imitegekere idahwitse y’ubuyobozi bwariho. Ubwo Jenoside yakorewe Abatutsi muri Mata 1994 yabaga, bicwa ku ikubitiro, ngo batabangamira ishyirwa mu bikorwa ryayo.

Muri abo uko ari 13 uretse Uwilingiyimana Agathe wari Minisitiri w’Intebe ushyinguwe mu gicumbi cy’Intwari z’u Rwanda i Remera, abandi uko ari 12 bashyinguwe mu rwibutso rwa Rebero, ruherereye mu Karere ka Kicukiro, rukaba ruruhukiyemo imibiri isaga ibihumbi 14 y’Abatutsi biciwe mu bice bitandukanye byo mu mujyi wa Kigali.

Abanyapolitiki bishwe muri Jenoside, bibukwa buri mwaka kuva mu mwaka wa 2006. Umuhango ukaba ubera ku rwibutso rwa Rebero tariki 13 Mata buri mwaka hanasozwa icyumweru cy’icyunamo.

Aba ari umwanya wo kubunamira no kuzirikana ubutwari bwabaranze, bwo kwitandukanya n’ikibi, kurwanya amacakubiri n’akarengane, ukaba n’umwanya wo kuzirikana ubwitange bw’abahagaritse Jenoside yakorewe Abatutsi, kwimakaza ubumwe no kurushaho gushyira imbere intego y’uko Jenoside itazongera ukundi.

Mukamugema yifuza guha imbabazi uwamuhemukiye ariko ngo aramubona agakizwa n’amaguru

Uwo mubyeyi aganira na Kigali Today ku wa mbere tariki 12 Mata 2021, yagaragaje agahinda kenshi aho atangazwa no kuba yifuza gutanga imbabazi ku wamuhemukiye ariko we akamuhunga mu gihe bahuriye mu nzira cyangwa se ahandi hantu hanyuranye.

Ni umubyeyi wavutse mu mwaka wa 1972, avuga ko icyahoze ari Komine Kinigi, ayifata nk’umwihariko, w’ahantu igeragezwa rya Jenoside yakorewe Abatutsi mu 1994 ryatangiriye ubwo hari mu 1990.

Ngo mu mwaka wa 1994 nta mututsi n’umwe wari ukiriho muri ako gace, kuko bamwe bari barabishe abandi bahungira mu zindi komine.

Avuga ko mu mabyiruka ye yakuze abona ibimenyitso byo kwica Abatutsi, aho mu ishuri bize bahagurutswa babwirwa amagambo mabi nk’uko byari bimeze hirya no hino mu gihugu, ibyo bikabaca intege mu kwitabira amasomo yo ku ishuri.

Ati “Mu mikurire yanjye, ntabwo nabayeho neza kuko twajyaga ku ishuri abarimu bakavuga ngo Abatutsi bahagurike, tugahaguruka ariko tutazi ikigambiriwe, twagera no mu nzira abanyeshuri bagenzi bacu bakadutangira batwita Abatutsi bakadukubita, ntitwamenyaga ibyari byo. Twagera mu rugo twabwira abyeyi uko byatugendekeye tukavuga ko tutongera gusubira ku ishuri kuko badukubise, ababyeyi nabo babura uko babigenza bati mube muretse icyumweru nigishira musubireyo”.

Arongera ati “Twarabibagizaga icyumweru cyashira tugasubirayo bakongera kudutoteza kugeza ubwo njye ishuri ndivuyemo burundu. Mu bwangavu mu myaka 16 byageze aho ndashaka, hari mu 1990 nibwo Jenoside yatangiye muri aka gace ka Kinigi batangira gufunga abantu bari bakomeye babita ibyitso by’inyenzi, abarimu, abakozi ba Leta n’abandi, n’ubwo nari mukuru ntabwo namenyaga icyitso bavuga icyo ari cyo”.

Mukamugema avuga ko mu mwaka wa 1991 habayeho gufungura abo bari bafunzwe, kuri we yumva ko amahoro agarutse ku batutsi, gusa ngo uko yari abyiteze siko byagenze aho ku itariki 26 Mutarama 1991 Umututsi wa mbere yiciwe muri Bisate, bumva ko amazi atari yayandi batangira kugira ubwoba.

Uwo wishwe ngo ni muramu we, aho yishwe n’abagore bamuteye amabuye, ngo akimara kwicwa Abatutsi bose bahise bahigwa bukware ari nako bicwa umusubirizo, ku ikubitiro ngo basaza be babiri bahise bicwa.

Ngo muri Werurwe 1990, umugabo we yarishywe aho bamufashe yihishe hafi y’urugo yegereye aho umugore we yari yihishe.

Mukamugema ati “Icyo gihe twaje kubona ko ibintu bihindutse, dutangira guhunga twegera ishyamba duteganya ko ni bikomera duhungira muri Congo. Abagabo hafi ya bose muri ako gace bari bashize, basaza banjye babiri bari bamaze kwicwa”.

Ati “Umugabo wanjye twari twaratatanye ngeze aho ndamubona, nti wahunze ko bari gushakisha abagabo cyane?, ati ntaho njya ngusize, ndamubwira nti ushaka wahunga ukagenda ntabwo bari kwica abagore ahanini bari kwica abagabo, ati ntaho njya dukomeza kwihisha nyuma abari abagaride baramufata bamutwarana n’abandi basore batatu. Bageze inyuma y’urugo babarasa ndeba, babanogonoka ndeba na n’ubu abo bamwishe barahari”.

Uwo mubyeyi akimara kubona ko mu bishwe barimo n’umugabo we, ngo bwarakeye yinginga umugabo w’umuturanyi wari umuhutu amutekerereza aho umugabo we bamwiciye, amusaba ko bajya kumukura ku gasozi bakamushyingura arabimwemerera, nibwo ngo bacukuye akobo bamushyiramo barenzaho agataka”.

Nyuma y’urupfu rw’umugabo we, ngo mu 1992 Inkotanyi zibasanga ahahoze hitwa Mukingo zikabarokora abasore bafite imbaraga ngo bajyanye n’inkotanyi, abandi biganjemo abagore n’abana bahungira mu kandi gace ahitwa muri Butaro mu Karere ka Burera.

Ngo aho muri Butaro interahamwe zarabateye ariko ntizamenya ko ari Abatutsi, kugeza ubwo igihugu kibohowe n’inkotanyi mu mwaka wa 1994, bagaruka aho bari batuye mu murenge wa Kinigi muri Musanze.

Abamwiciye umugabo ngo nubwo bamubona bakamuhunga yiteguye kubaha imbabazi

Mukamugema uharanira kuva mu mibereho yo kuba mu bikomere yatewe na Jenoside agaharanira kwiyubaka, intimba asigaranye ngo ni ukuba abishe umugabo we bahura, aho kumwegera ngo bamusabe imbabazi bakamuhunga kandi we yiteguye kuzitanga, agasaba Leta gushyira imbaraga muri gahunda y’Ubumwe n’ubwiyunge muri ako gace.

Ati “Kuva icyo gihe natwe nk’abantu bacitse ku icumu twagerageje kujya twifasha kwiyubaka, na Leta ikaduha inkunga aho twubakiwe amazu, bamwe batishoboye kurusha abandi bakaba bahabwa inkunga y’ingoboka. Abana bacu nabo bakaba barigishijwe na Leta, gusa natwe tugerageza gutwaza kugira ngo abatwiciye abacu batazabona tubasabiriza”.

Arongera ati “Abishe umugabo wanjye barahari, barafunzwe nyuma yaho barafungurwa, nta misabanire yanjye nabo kuko barambona bakampunga, njye hari ubwo umwe muri bo duhuye agakizwa n’amaguru ariko rwose njyewe ambabariye yanyegera kuko ibyabaye byarabaye ntibizongera no kubaho, Yihaye akato ndetse mba nshaka kugira ngo nibura anyegere ansabe imbabazi kandi niteguye kuzimuha, nabuze uko mbaha imbabazi rwose”.

Uwo mubyeyi avuga ko bizamushimisha mu gihe uwamwiciye umugabo bazahura bakaganira, nubwo atazamushaka ngo amuhatire kumusaba imbabazi ngo we ahora yiteguye kumubabarira.

Ati “Uburyo bizarangira ntabwo mbizi, ntacyo na mutwara ahubwo mba nshaka kugira ngo anyegere ansabe imbabazi kandi mba niteguye kuzimuga, gusa ntabwo nzajya kumushaka kandi ampunga, ngo mubwire ngo aze ansabe imbabazi. Rimwe namusanze mu iduka arimo kugura ibintu arabita ariruka kubera kumpunga, ni ipfunwe afite ndamwumva ariko ntabwo nzamushaka ngo aze mubabarire ntegereje ko ari we unshaka akambwira ati mbabarira kandi njye niteguye kumubabarira”.

Mukamugema avuga ko abana babo nta kibazo bafitanye, ngo barahura bagakina bakaganira aho bo nta pfunwe bigeze bagira ryo kuba babura gusabana, mu gihe ababyeyi bo batavuga rumwe.

Mukamugema yagize icyo asaba Leta ati “Reka ngutume nk’umunyamakuru, twumva ku maradiyo iyo Iburengerazuba, mu Majyepfo n’ahandi gahunda y’Ubumwe n’ubwiyunge ko igeze kure, aho abishe biyunga ku bo biciye, ariko hano mu Kinigi ntabwo birakorwa harasabwa inyigisho zimbitse. Dukeneye kwigishwa Ubumwe n’ubwiyunge kuko ahandi twumva bafata Abahutu n’Abatutsi, abiciwe n’abishe bakabahuriza ahantu hamwe bakabigisha”.

Ati “Twe ino ibyo bintu ntitubizi, tukibaza tuti ese ni ukutagira abatuvugira, ese ni ukumva ko tubeshya ubyo bintu bitabayeho, ibyo bikatubera urujijo. Turifuza Ubumwe n’ubwiyunge”.

Umunyamabanga Nshingwabikorwa w’Umurenge wa Kinigi, Twizerimana Innocent, na we aremeza ko hakiri abishe bagira ipfunwe ryo gusaba imbabazi abo biciye mu gihe barangije igihano bahawe, avuga ko bagiye kubishyiramo imbaraga mu guhuza abishe n’abiciwe mu rwego rwo kwimakaza umuco w’Ubumwe n’ubwiyunge.

Ati mu gihe cy’umwaka maze muri uyu murenge ni ikintu nabonye ko kiriho, niba uno mwanya yinjira muri butike yabona uwo yiciye agasohoka kandi bizwi neza ko yaje baramubabariye, yaraciye muri gacaca cyangwa se byaraciye mu bundi butabera yamubona agasohoka, biracyari ikibazo, kuko ubundi yari intabwe y’Ubumwe n’ubwiyunge yo kubohoka mu mutima. Ni byo rero buriya Kinigi isa naho yihariye usanga abenshi mu bafunguwe nyuma yo gufungirwa icyaha cya Jenoside batuye mu mirenge yo hirya cyangwa ihana imbibi na Kinigi”.

Arongera ati “Uyu ni umukoro nyawo tugiye gukora, kandi nkeka ko bizaduha umusaruro ugaragara, ngiye gukorana na bagenzi banjye turebe ko twahuza abarokotse Jenoside yakorewe Abatutsi, turusheho kumenya uko twabahuza mu nzego zindi zitandukanye barimo abakoze Jenoside, ari usaba imbabazi azisabe, ariko nkeka ko ubundi intambwe y’imbabazi nta muntu wakabaye ayigiramo imbaraga, intambwe y’imbabazi ni iy’umuntu ku giti cye. Ni umuntu umenya ko yakosheje agasaba imbabazi, kandi ni bwo umutima uhambuka ukanaruhuka”.

Sibomana Jean Nepomuscene yagarutse ku mateka ya Jenoside muri aka gace kahoze ari Komini Murambi

Umuyobozi wa Ibuka mu Karere ka Gatsibo, Sibomana Jean Nepomuscene, avuga ko mbere ya Jenoside Abatutsi batotejwe ndetse benshi barafungwa mu byitso, bamwe bicirwa i Byumba batwitswe.

Mu mwaka wa 1991 ngo muri Segiteri ya Rwankuba Interahamwe zaratojwe, ziyongeraho Interamwete, batoteza Abatutsi ku mugaragaro, bakabafunga, bakanabakubita.

Uwo mwaka kandi ngo aho i Rwankuba bagerageje kwica Abatutsi baho ariko Imana ikinga ukuboko, icyakora benshi baratemwa, bica umukecuru Mukacyoya, bafata abagore n’abakobwa ku ngufu, basenya amazu, barya imyaka n’amatungo y’Abatutsi.

Sibomana ati “Urumva bahereye icyo gihe bitoza ku buryo mu 1994 hageze bafite imyitozo ihambaye ku buryo byaboroheye kwica vuba mu gihe gito kandi bica nabi.”

Sibomana avuga ko Jenoside yateguwe, batoza Interahamwe, bazitoza kwica Abatutsi vuba kandi nabi agatanga urugero rw’ahitwa i Nyabisindu mu Murenge wa Kiramuruzi n’ubu hakiri ibigunguru bigishirizagaho Interahamwe kurasa.

Avuga ko mbere y’umwaka wa 1994, Abatutsi b’icyahoze ari Komini Murambi ngo babwirwaga amagambo mabi, ko ari inzoka, inyenzi n’ibindi.

Icyo gihe ngo Interahamwe zari zarihaye izina ‘Imbuma’ (ibinini byica inyenzi), abanyeshuri b’Abatutsi baratotezwa aho bahagurutswaga mu ishuri bakabarwa, bagakomerwa, bakabuzwa epfo na ruguru.

Interahamwe kandi ngo zashishikarijwe gufata ku ngufu abagore, gukubita no gukomeretsa Abatutsi, kubafunga no kubabuza amahoro.

Sibomana avuga ko byose byari byarateguwe kuko na lisiti z’Abatutsi bagombaga kwicwa zari zarakozwe ndetse bazwi neza.

Mu gukora izi lisiti ngo ni ho banamenyeye ko hari Abatutsi bafite indangamuntu z’Abahutu ku buryo na bo batabasize ahubwo babishe.

Abari imbere mu bwicanyi mu yahoze ari Komini Murambi ni Jean Baptiste Gatete, wasaga n’uyobora komini ku ngufu, kuko mu gihe cya Jenoside yari umukozi muri Minisiteri. Gatete yakatiwe imyaka 40 y’igifungo nyuma y’uko urukiko mpanabyaha rwashyiriweho u Rwanda (ICTR) rumuhamije ibyaha bya Jenoside akaba afungiye i Arusha.

Hari uwari Burugumesitiri Mwange Jean de Dieu, uyu we akaba afungiye muri gereza ya Rwamagana akaba yarakatiwe gufungwa burundu.

Harimo Onesphore Rwabukombe wari Burugumesitiri wa Komini Muvumba (Nyagatare), wayoboraga impunzi z’urugamba bari barahungiye muri Murambi bavuye i Kiyombe na Muvumba bakaba baragize uruhare rukomeye mu kwica Abatutsi bari bahungiye muri Kiliziya ya Kiziguro no mu nkengero z’aho bari batujwe.

Harimo kandi ba Konseye mu masegiteri yose, bamwe bakaba barafunzwe, abandi baratoroka nka Konseye Bizimungu Jean wayoboraga Rwankuba aho Gatete avuka, abandi bakaba barapfuye.

Ubwicanyi mu yahoze ari Komini Murambi kandi bwagizwemo uruhare n’abasirikare, interahamwe, abajandarume, abapolisi, abagore n’urubyiruko.

Umuyobozi wa Ibuka mu Karere ka Gatsibo Sibomana Jean Nepomuscene avuga ko ikibabaje ari uko hari abakoze ubwicanyi ariko bakaba bataraciriwe imanza kubera kutamenyekana.

Ati “Hari abasirikare, abajandarume, abapolisi ndetse n’impunzi zahunze urugamba mu Mutara zayoborwaga na Rwabukombe, abo ntibaciriwe imanza kuko ntibigeze bamenyekana kuko batari abaturage bazwi i Murambi.”

Akarere ka Gatsibo, kagizwe n’izahoze ari amakomini atandukanye, nko mu zahoze ari amasegiteri ya Murambi, Kiramuruzi, Rwankuba, Ndatemwa n’andi yose hagiye habera ubwicanyi.

Ahandi bwabereye cyane ni i Remera muri Bugarura ku buryo ho hakiri n’urwibutso ruto, mu Murenge wa Gitoki aho bita Cyabusheshe mu cyahoze ari Komini Gituza n’ahandi henshi imisozi myinshi yaguyeho inzirakarengane z’Abatutsi.

Sibomana Jean Nepomuscene avuga ko umwihariko w’ubwicanyi mu cyahoze ari Komini Murambi ari uko bwakozwe mu gihe gito hagati ya tariki ya 07 Mata na 11 Mata 1994.

Kiliziya ya Kiziguro yaguyemo Abatutsi benshi muri Jenoside

Undi mwihariko ni uko mu yahoze ari Komini Murambi, ari ho hatangirijwe icyo bise Ntampongano y’umwanzi, iyi ikaba yari impiri nini yatewemo imisumari ku buryo uwayikubitwaga atashoboraga kubaho.

Sibomana avuga ko mu gihugu cyose i Murambi ari ho hamenyekanye izina ‘Interamwete’ ryahawe abagore b’Abahutukazi bafashaga basaza babo kugira ngo badacika intege ku mugambi wo gutsemba Abatutsi.

Agira ati “I Murambi hari umwihariko ukomeye cyane kurusha ahandi mu gihugu kuko ni ho hari ihuriro ry’abagore b’Abahutukazi biyise Interamwete ryateraga ingabo mu bitugu basaza babo n’abagabo babo kugira ngo badacika intege ku mugambi wo gutsemba Abatutsi.”

Umwihariko w’undi ni uwa Gatete Jean Baptiste wari warahigiye gutsemba Abatutsi kuko yabagiriye urwango guhera kera.

Hari uwa Burugumesitiri Mwange Jean de Dieu ndetse n’Abanyarwanda bari barahunze igice cy’imirwano yaberaga mu Mutara (Nyagatare y’ubu),bari bayobowe n’uwitwaga Onesphore Rwabukombe wari Burugumesitiri wa Komini Muvumba ku buryo Komini Murambi yari Komini imwe ariko ikoreramo na Komini ebyiri.

Ikindi ni uko ngo Interahamwe z’i Murambi zari zaratojwe bikomeye, abaturage b’Abahutu barakanguriwe kwitabira umugambi wa Jenoside, abasirikare, abajandarume n’abapolisi bifatanya n’abicanyi na bo bakora Jenoside.

Umuyobozi wa Ibuka mu Karere ka Gatsibo, Sibomana Jean Nepomuscene, avuga ko ubwicanyi bw’i Murambi kwihuta byatewe n’uruhare rukomeye rwa Gatete Jean Baptiste kuko Jenoside yakozwe mu cyumweru kimwe ndetse ngo mu kwica bakaba batarababariye abana n’abagore.

Abagore kandi ngo bafashwe ku ngufu, Abatutsi bicirwa ku misozi ndetse abasigaye bicirwa muri Kiliziya.

Avuga ko Jenoside ya i Murambi nta kibi kitakozwe kuko imirambo yashinyaguriwe ndetse bigera n’aho abasirikare, abajandarume n’abapolisi nabo bakoresha intwaro gakondo ngo batangiza amasasu.

Amatariki akomeye mu cyahoze ari Komini Murambi atazibagirana ni ku wa 07 Mata 1994, aho amasegiteri hafi ya yose yaraye yakamo imirimo batwitse ingo z’Abatutsi ndetse benshi baricwa.

Indi ni ku wa 09 Mata 1994, i Kiramuruzi, abari impunzi barahunze imirwano yaberaga mu Mutara bagiye gukubura no kumaraho burundu Abatutsi muri ako gace.

Itariki ikomeye cyane ni iya 11 Mata 1994, aho imbaga y’Abatutsi bari bahungiye i Kiziguro muri Kiliziya, bishwe urw’agashinyaguro bakajugunywa mu mwobo wa metero 24.6 ndetse no ku gasozi aho hose, bagafata abagore ku ngufu, icyo gihe ngo amarira n’imiborogo byari byinshi.

Mu yahoze ari Komini Murambi, Abatutsi baho bose ngo bari bazi ko bazicwa ariko icyo batari bazi wari umunsi gusa.

Kwibuka ku nshuro ya 27 Jenoside yakorewe Abatutsi mu Karere ka Gatsibo bihuriranye n’uko umwobo uri Kiziguro wajugunywemo abarenga 5,000 wacukuwe imibiri yabo ikurwamo.

Umuyobozi wa Ibuka mu Karere ka Gatsibo Sibomana Jean Nepomuscene avuga ko imibiri yakuwe mu mwobo wa Kiziguro ikirimo gutunganywa ari na ko imirimo yo gusoza kubaka urwibutso rwa Kiziguro ikomeza ndetse no gushaka ibikoresho bizifashishwa bayishyingura kuko ari myinshi.

Urwobo ruri i Kiziguro rwakuwemo imibiri

Avuga ko itazashyingurwa muri iki cyumweru cy’icyunamo kuko hari ibigikorwa.

Agira ati “Twifuza kubihuza n’igihe tuzaba dutaha urwibutso, bivuze ko hakirimo amezi hagati y’atatu ndetse n’ane ngo iyo mirimo isozwe, tuzamenyesha abantu igihe cyo gushyingura iyo mibiri kandi nk’uko bizakorwa hakurikijwe amabwiriza yo kwirinda COVID-19.”

Avuga ko nk’uko byagenze mu mwaka ushize, igikorwa cyo kwibuka Abatutsi bazize Jenoside kizakorwa ariko hubahirizwa amabwiriza yo kwirinda COVID-19.

Avuga ko bazashyira indabo ku mva z’ababo bishwe, ari abashyinguye mu rwibutso i Kiziguro n’ i Remera ndetse n’ahandi hakiri imibiri itarimurirwa mu nzibutso, bikazakorwa mu matsinda mato kugira ngo hubahirizwe ingamba zo kwirinda COVID-19.

Hazatangwa ibiganiro bitandukanye ku maradio, hatangwe ubuhamya, hasurwe imiryango y’abacitse ku icumu rya Jenoside hagamijwe kubakomeza ndetse no gukomeza kubakorera ubuvugizi ku bibazo byabo bya buri munsi.

Umuyobozi wa Ibuka mu Karere ka Gatsibo Sibomana Jean Nepomuscene avuga ko abacitse ku icumu babanye n’abandi banyarwanda neza, basabana, bahurira mu mirimo itandukanye ndetse akanavuga ko bikwiye ko ubumwe n’ubwiyunge bwimakazwa kugira ngo Jenoside itazagaruka ukundi.

Mu byifuzo abacitse ku icumu rya Jenoside bafite harimo kuba bakomeza kwitabwaho cyane cyane ko bamwe bagenda basaza, ndetse n’inkunga y’ingoboka ku bayihabwa ikaba yakwiyongera.

Hari gufashwa kwandika amateka y’ibyo babayemo muri Jenoside kugira ngo bibikwe neza, kuzuza urwibutso rwa Kiziguro, amateka akandikwa mu buryo bwa gihanga.

Hari kandi gushyira ibimenyetso ahantu hose mu Karere ka Gatsibo hiciwe Abatutsi muri Jenoside.

Ibi babitangarije ku rwibutso rw’i Mageragere kuri uyu wa Mbere tariki 12 Mata 2021, ubwo bibukaga Abatutsi biciwe mu cyahoze ari komini Butamwa, akaba ari na ho iwabo wa Victoire Ingabire Umuhoza.

Dusabe (umubyeyi wa Ingabire) yahoze ayobora Ikigo Nderabuzima cya Butamwa, akaba ashinjwa guhamagarira interahamwe n’abasirikare kwica Abatutsi bari bahungiyeyo ku matariki ya 11-13 Mata 1994.

Kugeza ubu Dusabe Thérèse ari mu Buholandi, nyamara inkiko z’u Rwanda zamukatiye igifungo cya burundu y’umwihariko.

Umuyobozi Nshingwabikorwa w’Akarere ka Nyarugenge, Emmy Ngabonziza asaba ubuyobozi bw’u Rwanda gufatanya na Leta y’u Buholandi kugira ngo Dusabe ashyikirizwe ubutabera.

Yagize ati "Turasaba ko abantu bose bagize uruhare muri Jenoside yakorewe Abatutsi bafatwa, barimo n’uwo mubyeyi wa Ingabire Victoire wari warakatiwe igifungo cya burundu y’umwihariko".

Umunyamabanga nshingwabikorwa w’Umurenge wa Mageragere, Ntirushwa Christophe, ndetse na Perezida wa Ibuka muri uwo murenge, Murangwa Jean Bosco, bavuga ko nta wakwihanganira ko Ingabire Victoire akomeza gukorera politiki mu Rwanda.

Murangwa yagize ati "Ntabwo Abanyarwanda aho tugeze ari aho kuyoborwa n’umuntu nka Ingabire Victoire, amateka yabo arazwi ntabwo ari meza, kandi urabizi ko umuntu ayoborwa n’uwo azi neza".

Perezida wa Ibuka i Mageragere avuga ko Abatutsi b’i Butamwa hafi ya bose boherejwe muri Nyabarongo kuko nta mibiri yabo myinshi yigeze iboneka.

Mu rwibutso rw’i Mageragere haruhukiyemo igera ku 1,200 mu bihumbi bibiri yari yarahashyinguwe, kuko indi ingana na 800 yajyanywe mu rwibutso rwa Kigali ku Gisozi.

Ubuyobozi bw’Akarere ka Nyarugenge busaba ubufatanye bwa buri muntu kugira ngo amakuru ku Batutsi biciwe i Butamwa barenga 8,000 amenyekane, ndetse n’abiciwe muri ako karere muri rusange bakabakaba 10,000.

Umuyobozi Nshingwabikorwa w’Akarere ka Nyarugenge yakomeje avuga ko hariho ubufatanye bw’inzego zitandukanye kugira ngo barangize imanza zigera kuri 50 z’imitungo y’abarokotse Jenoside yibwe cyangwa yangijwe mu cyahoze ari Butamwa.

Ngabonziza yijeje kandi ko abarokotse Jenoside batarabona amacumbi yo kubamo barimo kubakirwa bitarenze uyu mwaka wa 2021.

Disi Dieudonné

Disi Dieudonné ni umwana wa gatanu mu muryango wa Disi Didace. Ababyeyi bombi ba Disi n’abavandimwe barindwi bishwe muri Jenoside yakorewe Abatutsi.

Disi yaganiriye na KT Radio atanga ubuhamya ku rugendo yanyuzemo arokoka Jenoside yakorewe Abatutsi mu mwaka wa 1994, uko yaje kujya ku rugamba rwo kubohora igihugu, ndetse n’uburyo yaje kwiyubaka by’umwihariko abifashijwemo n’umukino wo gusiganwa ku maguru.

Mbere ya Jenoside yakorewe Abatutsi, Disi yabonaga babanye neza n’abaturanyi nta kibazo.

Ni byo yasobanuye agira ati “Nakuze mbona nta kibazo iwacu dufite, twari dufite inzu eshatu, abana bo mu rugo n’abaturanyi twari tubanye neza mu Mayaga aho mvuka, na Papa wanjye abanye neza n’abandi, kubera umubare munini w’abantu yigishije ndetse n’abo yabyaye muri Batisimu.”

“Mbere ya Jenoside, ku ishuri wasangaga haba icyitwa nk’iringaniza, gusa tukiri bato ntitwahitaga tubibona ariko uko twagendaga twigira imbere wagendaga ubibona, ariko hanze mu baturage aho dutuye ukabona nta kibazo kidasanzwe gihari.

Ijambo ry’uwari Perezida Sindikubwabo “ryakongeje Butare” ubwo yayisuraga

Muri icyo kiganiro Disi Dieudonné yagiranye na KT Radio, yakomeje ati “Ubwo Habyarimana yapfaga ntitwahise tubimenya, twaje kubimenya mu gitondo tubibwiwe na Papa amaze kubyumva kuri Radio y’Abafaransa RFI. Bwarakeye abaturage ubona bafite ubwoba ariko ukabona ko nta gikuba cyacitse cyane, ariko ukajya kumva kuri radio ngo Minisitiri runaka yishwe, utavuga rumwe n’ubutegetsi runaka yishwe, nkajya nyuzamo nkabwira mu rugo nti twahunze tukajya i Burundi, Papa akatubwira ati ‘ntacyo muzaba hano nta ntambara ihari.’”

“Tariki 19 zigeze nibwo Sindikubwabo wari umaze kuba Perezida yamanutse i Butare batangiza Jenoside ku mugaragaro, ijambo yavuze Papa yaryumvise kuri Radio, aratubwira ati ‘Sindikubwabo akongeje Butare, ejo tuzajyane inka ku isoko ubundi duhunge.’ Papa asaba abazituragiriraga ko twazijyana,zari eshanu, tuhageze inka yaguraga ibihumbi 30 bakajya baduha igihumbi cyangwa 1500, Papa arabyanga azirekera ba bandi bazituragiriraga dutaha zitagurishijwe.”

“Twaje gupanga gahunda yo guhunga ku mugoroba, Papa atuma umuntu wo kudushakira umusare utwambutsa Akanyaru, baramubona atubwira ko aduca ibihumbi bibiri, tugiye tugeze mu nzira duhura na bariyeri iriho abantu tuzi, bati murajya he ko ku Kanyaru abajandarume bahari kandi ko uhageze bamwica cyangwa bakajya kubafungira i Nyanza, ubwo turakata turagaruka.”

Nyuma, Disi n’umuryango we bakomeje kwihisha, ariko nyuma bari mu rugo n’abandi baturanyi bari bahabasanze ngo bafatanye gusenga, baje kugabwaho igitero. Igitero cyaje Disi Dieudonné yari yamaze kujya kwihisha hafi y’urugo, ariko cyinjiye iwabo abareba aho yari yihishe.

Nyuma yo kubona umuryango we bawujyanye ngo bawice, ndetse umubyeyi we (nyina) bamwicira hafi aho areba.

Disi mu buryo bugoranye yahungiye i Burundi ahita asanga Inkotanyi ku rugamba

Disi yaje kongera gufata umwanzuro wo gushaka uko ahungira i Burundi, umunsi wa mbere aragenda arayoba ashiduka yagarutse iwabo, ariko mu ijoro ryakurikiyeho arongera aragenda yihisha mu rufunzo rw’Akanyaru.

Aha yaje kumva ijwi ry’Abarundi bababwira ko ari abasirikare b’abarundi basaba niba hari Abatutsi bari mu rufunzo ko baza bakabambutsa, aha yafashe umwanzuro aragenda aravuga ati “nibashaka banyice” ku bw’amahirwe abona barabambukije ari benshi bagera i Burundi.

Yageze i Burundi yumva bamwe mu rubyiruko bari kumwe barapanga gahunda yo kujya mu Nkotanyi, na we abatega amatwi maze igihe cyo kugenda kigeze bakajya basoma amazina, yumva we ntarimo ariko yurira iyo kamyo ajyana n’abandi, baramwakira akora amasomo yinjira mu gisirikare ubwo, maze afatanya n’abandi urugamba.

Uko Disi yagaruye icyizere agahura na mushiki we yari azi ko yapfuye ndetse agasubira mu ishuri

Mu mwaka wa 1996 yaje kugira igitekerezo cyo kongera gusubira mu ishuri, ari na wo mwaka yaje guhura na mushiki we amusanze muri Camp Kigali, amubwira ko yageze iwabo agasanga nta n’umwe warokotse banamubwira ko na Disi Dieudonné yapfuye, gusa aza kumenya amakuru mu 1995 abibwiwe n’undi musirikare bahunganye i Burundi, bajyana no mu gisirikare.

Disi avuga ko yaganiriye na mushiki we na we amugira inama yo gusubira mu ishuri, anamubwira ko hari undi mushiki we uriho, akaba yarigaga muri Congo ariko ahagarika amasomo mu 1992 ajya mu ngabo za RPF Inkotanyi.

Disi Dieudonné mu mukino wo gusiganwa ku maguru

Disi Dieudonné yasobanuye uko yinjiye mu mukino wo gusiganwa ku maguru, agatangira urundi rugendo rwamufashije kwiyubaka.

Yagize ati “Kugira ngo njye kwiga, mushiki wanjye yari kumwe n’umwarimu w’ahitwaga GS Kigombe i Musanze witwa Honoré. Baje gusura murumuna we wari umusirikare wakoreraga aho Camp Kigali, arambwira ati ‘uzaze kwiga muri iki kigo nigishamo’, na we yari n’umwarimu wa siporo, byahise bimbera byiza anangira kapiteni w’abakina uwo mukino wo gusiganwa mu kigo, nabonaga ameze nk’umuvandimwe wa hafi cyane.”

“Naje gukomeza gukora athlétisme, gahoro gahoro nza kuba umukinnyi ukomeye, athlétisme navuga ko ari yo yatumye niga ariko ituma naniyubaka, kuko mbere ntarajya muri siporo numvaga ubuzima butameze neza nka mbere, nkumva butazanaba bwiza nka mbere”

“Umugabo witwaga Charles wari Umuyobozi wa ESTB Busogo nabaye uwa mbere mu gusiganwa mu marushanwa ahuza amashuri, aransuhuza ambaza ubuzima bwanjye n’imibereho, arambaza ati ushobora kuza kwiga i Busogo, ndamubwira nti rwose naza”

Disi Dieudonné yakomeje gukina uyu mukino muri iki kigo, uyu muyobozi w’ikigo akomeza kumufasha ndetse akajya anahabwa amasaha ahagije yo gukora imyitozo, ahabwa icumbi mu macumbi y’abarimu ndetse akajya anafashwa no kujya kwitabira amarushanwa mu mujyi wa Kigali.

Disi yakomeje ati “Nyuma yo kurangiza amashuri yisumbuye nahamagaye uwari ushinzwe ishami rya siporo muri Kaminuza, ubu ni Ambasaderi Jean Pierre Karabaranga uhagarariye u Rwanda mu Buholandi, arambwira ngo nze nige muri Kaminuza y’u Rwanda i Butare.”

Mu rugendo rwe muri siporo Disi yahuye n’umutoza Rwabuhihi, amubera nk’umubyeyi, nuko Disi atangira gutera imbere mu mukino wo gusiganwa ku maguru.

Disi ati “Nyuma yaho Rwabuhihi Innocent mfata nk’umubyeyi wanjye na we yahise ampamagara ambaza niba nzajya nkinira Kaminuza nkongera nkanakinira ikipe ya RDF, aza kumfasha kubona ishuri muri KIST, ariko icyo gihe nari maze kugera ku rwego rukomeye muri Athlétisme ku buryo byansabaga gufata kimwe, ntibyari byoroshye ko niga ndi n’umukinnyi, aho nari nsigaye nkora imyitozo gatatu ku munsi kandi ikomeye, kandi nabaga ngomba no kuruhuka.”

“Nibwo naje gusanga gukomeza muri KIST bidashoboka, nza kwicara ndareba nsanga siporo ndimo ishobora kungirira akamaro, nareba abakinnyi bakomeye urwego bariho nkabona ndi kubasatira, nyuma muri 2002 haza umutoza uturutse i Burundi witwa Adolphe Rukenkanya adukoresha imyitozo.”

Nyuma y’igihe gito Disi yatangiye guhagararira igihugu mu marushanwa mpuzamahanga ari nako agihesha ishema yitwara neza mu marushanwa akomeye.

Yabisobanuye muri aya magambo ati “Muri 2003 naje kwitabira shampiyona y’isi mu Bufaransa yahuzaga abasirikare, aho buri gihugu ku isi cyari gihagarariwe n’abasirikare barindwi, maze mba uwa mbere, icyo gihe twari kumwe na Gen Albert Murasira ubu ni Minisitiri w’Ingabo nk’umuyobozi w’ikipe ndetse n’umutoza Rwabuhihi, umwaka wakurikiyeho mba uwa kabiri.”

“Muri 2007 niho nabaye umukinnyi ukomeye cyane, n’indi myaka nari umukinnyi ukomeye nko hagati ya 2003-2009, aho nahoraga byibura ndi mu bakinnyi 25 beza ku isi, ariko 2007 ho nari ku mwanya wa gatandatu ku isi.”

Icyo asaba abakiri bato

Mu butumwa yageneye abakiri bato, Disi Dieudonné yagize ati “Nk’ukuntu narokotse Jenoside ni ibintu bitoroshye, iyo nanjye mbitekereje numva nari mfite umutima ukomeye, mu buzima bwanjye nabayeho ngerageza guhatana, sinigeze nemera gupfukiranwa ngo nicwe n’agahinda k’ibyababaye manike amaboko, abakiri bato na bo nabasaba kujya bumva ko bashoboye.”

Muri 2018 Disi Dieudonné yongeye kugira ibikomere n’ubu agihangana na byo

Disi Dieudonné avuga ko kimwe mu bijya byongera kumubabaza, ari igikomere yongeye kugira mu mwaka wa 2018, ubwo yaje kumenya amakuru y’aho abavandimwe be biciwe ndetse bakajugunywa mu musarani y’uwo bari baturanye, ariko nyuma yo kubona imibiri ikaza kongera kurigiswa, kugeza ubu bakaba bagitegereje ubutabera.

Ati “Ikintu cyatubabaje, buri wese yifuza kumenya aho abe baguye akanabashyingura, twari tugize amahirwe yo kumenya aho abacu baguye n’imibiri ibonetse, ariko nyuma mu kuyijyana ku murenge barayirigisa, hasigaye umubiri umwe kandi mu musarani harakuwemo imibiri ine, ndetse aho abaturage bemeza ko imibiri ine ari yo yakuwe mu musarani, twareze gitifu gutanga ubuhamya butari bwo no gusibanganya ibimenyetso bya Jenoside.”

Ni umukinnyi ufite ibigwi kurusha abandi benshi muri uyu mukino wo gusiganwa ku maguru mu Rwanda

Kugeza ubu Disi Dieudonné utuye muri Leta zunze ubumwe za Amerika, ni umwe mu bakinnyi mu gusiganwa ku maguru mu Rwanda bakoze amateka, aho yabaye uwa mbere ku isi mu marushanwa ahuza ibihugu bikoresha ururimi rw’igifaransa, mu mwaka wa 2005 i Niamey muri Niger, ndetse na 2009 abera Beirut, Lebanon, hose mu gusiganwa metero ibihumbi 10.

Muri shampiyona y’isi kandi mu mwaka wa 2008 yabereye i Rio de Janeiro muri Brazil, yaje ku mwanya wa Gatandatu, akaba ari na we munyarwanda wenyine mu bagabo wabashije kwegukana isiganwa rya Kigali International Peace Marathon mu mwaka wa 2006, mu gice cya Marathon (21kms).

Abenshi bashinze amashyirahamwe abafasha kubona uburyo babaho, n’ubwo bagiye bakomwa mu nkokora na COVID-19 imishinga yabo yari imaze gutera imbere itangiye no kubatunga ikadindira.

Bavuga ko nyuma ya Jenoside, n’ubwo Leta yabafashije muri byinshi ikabubakira, abandi bakavuzwa bagahabwa n’ubundi bufasha butandukanye, ngo na bo basanze bagomba gushyiraho akabo bagakora bashakisha uburyo imibereho yabo yarushaho kugenda neza.

Abaganiriye na Kigali Today bo mu Karere ka Musanze na Gakenke, baravuga ko ubuzima bwabo bwamaze guhinduka, bava mu bwigunge bajya mu iterambere babikesha kwibumbira mu mashyirahamwe.

Abakecuru 14 b’intwaza biciwe abagabo muri Jenoside yakorewe Abatutsi mu 1994 bibumbiye mu Ishyirahamwe “Abisunganye” bo mu Murenge wa Kinigi n’uwa Nyange, bakora ubworozi bw’inkoko mu murenge wa Kinigi mu karere ka Musanze, bavuga ko nubwo ubwo bworozi bwadindijwe n’icyorezo cya COVID-19 ngo hari byinshi bwabagejejeho.

Mukamusoni Phoïbe ukuriye iryo shyirahamwe, avuga ko bagira igitekerezo cyo gutegura uwo mushinga, babagaho mu bibazo byo kwihugiraho, n’ubukene bwatumaga batabaho mu buzima bifuza.

Yagize ati “Ni umushinga tumaze imyaka irindwi dutangiye, twahereye ku nkoko 200 zigenda ziyongera ku buryo twari dutangiye kunguka cyane kugeza uwbo nta kintu na kimwe twajyaga tubura, ndetse na konti yacu igahoraho amafaranga menshi”.

Arongera ati “Kuva twatangira uwo mushinga wadukuye ahabi aho twari twigunze, tumeze nabi tudahura, buri wese ari mu rugo iwe ugasanga tumeze nk’abahungabanye kuko twahoraga twihugiyeho, ariko nyuma yo kubona uwo mushinga tukajya duhura tukaganira tukungurana ibitekerezo biradukomeza cyane, twari tumeze neza uretse COVID-19 yabiciyemo ibintu birazamba, nta kibazo twari dufite”.

Uwo mukecuru avuga ko mbere y’uko icyorezo cya COVID-19 gitera, ngo bari bamaze kugira inkoko nyinshi ku buryo ku munsi basaruraga amagi atari munsi ya magana ane.

Ni umushinga baterwagamo inkunga na SACOLA, Umuryango nyarwanda utegamiye kuri Leta ushinzwe kubungabunga Pariki y’Ibirunga n’ibidukikije muri rusange, no kuzamura imibereho myiza y’abaturage baturiye Pariki y’igihugu y’ibirunga kugira ngo babashe gusobanukirwa neza n’ibyiza nyaburanga bibarizwa muri iyo Pariki”.

Bibumbiye mu ishyirahamwe bagamije gufashanya gutera imbere

Nyuma y’uko COVID-19 ikomeje umurego, ngo uwo mushinga wahagaritse inkunga kubera ko aho wakuraga amafaranga hari hahagaze kubera COVID-19, nuko iryo shyirahamwe ry’abo bapfakazi ba Jenoside risa n’irisubiye inyuma aho bemeza ko nubwo baguye mu bihombo batigeze bacika intege, nk’uko Mukamusoni Phoïbe akomeza abivuga.

Ati “Ni umushinga dufashwamo na Sacola, ariko aho COVID-19 iziye Sacola yahise ihagarika inkunga kubera ko nayo aho yakuraga hari hahagaze, gusa ntabwo twacitse intege twarakomeje turwana ku mushinga wacu mu bushobozi twari dufite dukomeza guhanyanyaza n’ubwo ibyo kurya by’amatungo biduhenda, murumva kuba buri kwezi dusohora amafaranga ibihumbi bisaga 450 si make”.

Uwo mubyeyi yavuze ko mu bindi byabakomye mu nkokora ari igihombo batewe n’uwabagurishije inkoko zisaga 350 zitujuje ubuziranenge aho yazibagurishije abahangitse kuko zari zidakingiwe, bazigejeje mu rugo zose zirapfa zirashira.

Ati “Tugeze igihe cyo gusazura tugurisha izishaje tukazisimbuza izikiri nto, twagiye i Rubavu tugura inkoko zisaga 350 twishyura asaga miliyoni imwe y’amanyarwanda tugeze mu rugo zose zirapfa zirashira tugwa mu gihombo gikomeye, gusa twakomeje kwirwanaho twirinda ko umushinga udutunze usenyuka aho ubu bafite inkoko zisaga 250”.

Mukamusoni avuga ko mbere yuko COVID-19 itera ngo uwo mushinga wari warabateje imbere, aho bajyaga bazigama umuntu akabona n’icyo atahana cyo gufasha umuryango we, aho buri wese afite amatungo agera muri atatu yakuye muri uwo mushinga ukaba unatunze n’umuryango wabo.

Nsengiyumva Pierre Célèstin uhagarariye umushinga SACOLA ufasha abo babyeyi, avuga ko mu gutekereza iryo shyirahamwe ry’abo babyeyi bwari mu buryo bwo kubegera, kubahumuriza no kubateza imbere.

Ati “Tujya kubatekerereza uwo mushinga nuko twabonaga batandukanye, bamwe batuye mu murenge wa Kinigi abandi mu murenge wa Nyange batabona uburyo bahura, dusanga dukwiye kubigira umushinga wo korora inkoko mu rwego rwo kubafasha guhura kandi baniteza imbere, nabo baritanga uko bashoboye umushinga bawukora neza utangira kubahindurira imibereho”.

Uwo mugabo avuga ko COVID-19 yakomye mu nkokora imishinga ya Sacola, aho bakuraga ubufasha harahagarara biba ngombwa ko imfashanyo bageneraga iryo shyirahamwe ry’abo bakecuru ihagarara.

Mu Karere ka Gakenke naho abarokotse Jenoside bakomeje kwishakamo ibisubizo, bakora imishinga inyuranye ibakura mu bwigunge bajya mu iterambere.

Abagize ishyirahamwe “Icyizere” bagera kuri 35, nyuma yo gusharirirwa n’ibikomere batewe na Jenoside, bigiriye inama yo kwihuza biga umushinga w’iterambere aho bahawe inkunga na World Vision y’icyuma gisya ibinyampeke.

Munyaneza Célestin uhagarariye iryo shyirahamwe avuga ko uwo mushinga wabateje imbere aho buri wese mu bagize iryo shyirahamwe bafite amatungo bawukomoyeho, inka, ihene n’ibindi, kandi ngo ukeneye amafaranga yo kumufasha akayabona vuba akamugoboka akazayishyura ibibazo birangiye.

Ngo mbere y’uwo mushinga bari mu buzima butari bwiza Ati “Mbere twari tubayeho nabi mu bukene, ntaho twakuraga agafaranga ko kwikenura, ariko aho dukoreye uwo mushinga tukabona iyo mashini isya, tumeze neza twavuye mu bwigunge turanahura tukagira icyo tuvugiraho twungurana ibitekerezo, ubu nta munyamuryango w’iri shyirahamwe udafite amatungo yaba inka cyangwa amatungo magufi”.

Bavuga ko imbogamizi bahuye nazo ari COVID-19, aho imashini itakibona akazi kuko utubare twafunze mu gihe abenshi mu bakiriya babo ari abazaga gusesha amasaka yo kwenga imisururu, izindi mbogamizi ni izo kuba bagitanga imisoro inyuranye n’ubukode bwaho iyo mashini ikorera kandi COVID-19 yarahagaritse imikorere, ibyo bigakomeza kubagusha mu bihombo.

Gahunda bafite ngo ni iyo kugura imashini nshyashya kuko iyo bafite imaze gusaza, aho igenda ipfa umunsi ku wundi ikabahombya, ubu bakaba bafite kuri konte yabo amafaranga ibihumbi 500 aho basaba inkunga yo kongera kuri ayo mafaranga bakagura indi mashini nshyashya itabateza ibibazo.

Mu murenge wa Kivuruga naho hari ishyirahamwe ry’abarokotse Jenoside ry’ubworozi bw’inzuki ryitwa “Tuzamurane” ryatangiye mu mwaka wa 2003, ribafasha kuva mu bukene bahozemo.

Ngo bigiriye inama yo kwishakamo ibisubizo na Leta irabunganira, aho batangiriye ku mitiba 15 mu mafaranga bari bamaze gukusanya aho umutiba umwe muri icyo gihe waguraga 3000 FRW, na FARG ibonye ko umushinga wabo uri gutera imbere ngo ibaha inkunga y’amafaranga y’u Rwanda miliyoni imwe.

Nizeyimana Gisa ukuriye iryo shyirahamwe, avuga ko bagiye bunguka ku buryo bagitangira ku mwaka babonaga ubuki busaga ibiro 80 ku mwaka muri icyo gihe ikiro kigura amafaranga asaga 3000, ku mwaka bakabona amafaranga ngo atari munsi y’ibihumbi 200, ibyo ngo bibatera ishyaka bongera imitiba bava kuri 15 bagera kuri 80.

Ngo baguye mu gihombo gikomeye, nyuma yuko Minisiteri ifite ubworozi bw’inzuki mu nshingano na World Vision babahaye amahugurwa ku bijyanye n’ubworozi bw’inzuki, babasaba kuva ku mitiba ya gakondo bakajya ku mitiba ya kijyambere.

Nizeyimana ati “Bakimara kuduhugura badusaba kuva mu mitiba ya gakondo tukajya mu ya kizungu, nyuma y’amahugura abantu bo muri Minisiteri baraje badufasha kwimurira za nzuki mu mitiba ya kizungu, bukeye mu gitondo dusanga inzuki zacu zose zagiye ubutagaruka, turahomba mu buryo bukomeye kugeza na nubu tugihura n’ingaruka z’icyo gihombo”.

Ngo iyo mitiba ya kijyambere yamaze kubahombya uretse ko batacitse intege aho bongeye kubyutsa umushinga bifashishije imitiba ya gakondo bari basanganwe ubu bakaba biteguye kongera kubona umusaruro bari barabonye mbere.

Ati Turebye kuva muri 2003 kugeza ubu twarahombye kuva muri 2007 batuzanira imitiba ya kijyambere, byaraduhombeje cyane gusa tugiye kongera kwagura umushinga wacu kuko niwo mushinga twabonye utworoheye kuko ishyirahamwe ryacu ririmo abakecuru benshi, ntabwo twakora umushinga usaba ingufu”.

Mu turere twose tugize Intara y’Amajyaruguru haragaragara ibikorwa bitandukanye by’Abarokotse Jenoside, aho biyemeje kwishyira hamwe bakora ibikorwa bibateza imbere, ngo ni mu rwego rwo kwirinda kubana n’ibikomere batewe na Jenoside ahubwo baharanira kwiteza imbere biyubaka.

Kayitaramirwa Sylvia

Abarokotse Jenoside barimo Kayitaramirwa Sylvia, mu buhamya bwabo, bagaruka ku bugome ndengakamere bwakozwe muri Jenoside yakorewe Abatutsi, dore ko byinshi babyiboneye, ndetse na bo bakaba bararokotse ku bw’amahirwe.

Kayitaramirwa Sylvia avuka ahahoze ari muri Segiteri Gasogi, ubu ni mu Murenge wa Nyamirama mu Karere ka Kayonza mu Ntara y’Iburasirazuba.

Ubwo Jenoside yatangiraga, Kayitaramirwa Sylvia yari afite imyaka 18 y’amavuko, akaba yari uwo mu muryango w’abana 19.

Ubwo ubwicanyi bwarushagaho gufata intera yo hejuru by’umwihariko mu gace bari batuyemo mu matariki 13 Mata 1994, abo mu muryango we baratatanye, bamwe bahungira ku musozi wa Nkamba witegeye icyuzi cya Ruramira.

Icyuzi cya Ruramira

Icyo cyuzi cyubatswe hagati mu myaka ya 1983-1987, kugira ngo gifate amazi yo kwifashisha mu kuhira imyaka cyane cyane umuceri.

Nyamara Interahamwe zo zakibonye nk’ahantu hazifasha kwihutisha umugambi wazo wo kumaraho Abatutsi.

Mbere yo guhunga, Kayitaramirwa avuga ko yari asigaranye na musaza we mukuru ndetse na murumuna we. Ngo babanje kujya kwa Konseye wayoboraga Segiteri witwa Paul Gakwavu, bamusaba ko yabafasha akabahisha akanabacungira umutekano.

Ati “Nyamara aho kudufasha, yaduhaye umuhungu we wari umwalimu aramubwira ati Jyana uwo mwanda aho ugomba kujya.”

Uwo mwalimu ngo yarabajyanye, bageze ku muhanda munini bahura n’igitero kinini cy’Interahamwe, arabawira ngo nibasange izo Nterahamwe zibafashe.

Abavandimwe babiri bari kumwe na Kayitaramirwa ntibabashije kurokoka icyo gitero, ariko ku bw’amahirwe Kayitaramirwa we yarirutse arabacika ahungira ku musozi wa Nkamba asanga abandi bavandimwe be bari bahahungiye.

Muri icyo gihe bari kuri uwo musozi ngo bari bitegeye icyuzi cya Ruramira bigaragara ko nta bikorwa byo kwicirayo abantu byari byatangira kuhakorerwa.

Nyuma yo kumara iminsi ine kuri uwo musozi nta biribwa bafite, ngo barashonje, umubyeyi wabo (se) yiyemeza kuhava asubira ku icumbi gushakayo ibyo barya, ariko ngo ntiyagarutse.

Nyuma yo kumara iminsi irindwi kuri uwo musozi, nyina wa Kayitaramirwa yasanze bagomba kuva kuri uwo musozi bagasubira iwabo aho bari batuye baramuka bapfuye bakaba ari ho bagwa kuko nta yandi mahitamo bari bafite.

Bamwe mu baturanyi babo na bo bari bahungiye kuri uwo musozi bashyigikiye icyo gitekerezo, biyemeza kuva kuri uwo musozi.

Bakigera hpfo y’umusozi ngo bahuye n’igitero cy’Interahamwe zibasaba kubaha amafaranga zikabareka bakagenda, cyangwa se zikabica.

Izo Nterahamwe ngo zafashe abakecuru babiri batabashije kubona amafaranga yo kuziha babajugunya munsi y’ikiraro.

Kayitaramirwa avuga ko umubyeyi we yahaye izo Nterahamwe amafaranga 800 yari afite kugira ngo zibareke bakomeze. Icyakora muri icyo gihe Kayitaramirwa we ngo yahise abacika ariruka asubira kuri wa musozi.

Amatariki ntayibuka neza kubera ihungabana yahuye na ryo biturutse kuri ibyo bihe bikomeye, gusa yibuka ko ku munsi wakurikiyeho wari uwo guhiga bukware Abatutsi.

Umubyeyi we (nyina na bamwe bo mu muryango we bajyanywe ku cyuzi cya Ruramira, Interahamwe zizamuka hejuru ku musozi zivanayo abandi batutsi bari bihisheyo zibazana kuri icyo cyuzi, Kayitaramirwa na we zimuvanayo hamwe n’abandi.

Kayitaramirwa avuga ko yabonye nyina yicirwa kuri icyo cyuzi cya Ruramira, hanyuma we agezweho, Interahamwe zimuha amahitamo atatu.
Ziti “Urahitamo abagabo babiri bafate amaguru yawe bagutanyuremo kabiri, cyangwa se tuguteme, cyangwa se tugusambanye kugeza upfuye.”

Kayitaramirwa ngo yabuze icyo ahitamo muri ibyo bitatu, mu gihe agitakambira izo Nterahamwe, ngo zifata umwanzuro wo kumujugunya muri icyo cyuzi ari muzima.

Icyakora ku bw’amahirwe yaje kurokoka, ubu akaba ari umubyeyi w’abana babiri.

Ati “Baramboshye, banjugunya mu cyuzi, bankurikiza n’ibiti bisongoye. Icyakora nagerageje koga mvamo, barongera baramboha babanje kunyambura imyenda yose nari nambaye kugira ngo bankoze isoni.

Interahamwe zakomeje kumukorera urugomo rwo kumujugunya mu mazi zibanje kumuboha yavamo zikongera zikamusubizamo, zibikora inshuro zirindwi zose, ariko ku nshuro ya karindwi, zimukorera ibibabaje kurusha ibya mbere.

Ati “Ku nshuro ya karindwi banjugunyemo mpambiriye amaboko n’amaguru bampambiraho amabuye rimwe mu gituza irindi mu mugongo, kugira ngo ntongera kwivana mu mazi.”

Kayitaramirwa ngo yagerageje gukoresha imbaraga nke yari afite kugira ngo atibira munsi ahubwo agerageza kuzamuka hejuru, agize amahirwe ibuye rimwe rimuvaho bituma umutwaro wari umuremereye usa n’uworoshye.

Ati “Haje Interahamwe yari ikuriye izindi ivuye kwica Abatutsi ahandi, ihageze iravuga iti kuki mwishe umuzungu? aroga ankuramo arampambura ankandagira ku nda nduka amazi nari nasomye.”

“Nari umukobwa w’inzobe cyane mfite n’uruhu rukeye, iyo Nterahamwe itekereza ko naba ndi umuzungu, antwara iwe ndahaba kugeza Inkotanyi zihageze.”

Kayitaramirwa avuga ko byamugoye kuba mu rugo rw’uwo mugabo witwaga Iyakaremye kuko yari Interahamwe ikomeye ndetse iwe akaba ari ho Interahamwe zazaga kurira zigamba ibyo zimaze gukora.

Avuga ko ngo uwo Iyakaremye yavugaga ko Kayitaramirwa namara gukura bazamugira umugore akabyara abana b’Abahutu.

Kayitaramirwa avuga ko kuri uwo munsi yahuye n’akaga gakomeye kuko kuri icyo cyuzi batangiye kuhatoterezwa kuva mu gitondo nka saa kumi n’ebyiri, ahava saa kumi n’ebyiri z’Umugoroba.

Iyo nterahamwe yagiye kumucumbikira ngo yamuhaye ijaketi yo kwambara ahisha ubwambure, abagore babiri baramusindagiza kuko we atabashaga kugenda.

Mu nzira bagenda, Kayitaramirwa yibuka ko yabonye Interahamwe zica Umututsi zirangije zinywa amaraso ye.

Ngo yagumye mu rugo rw’iyo nterahamwe iminsi mike, akomeza kubabara ku bw’ibikomere yari afite, kugeza ubwo Inkotanyi zahageraga zigafata Kayonza, ziramurokora.

Umuyobozi wa Ibuka mu Karere ka Kayonza Ndindabahizi Didace avuga ko icyo gice cyo muri Kayonza Inkotanyi zakibohoye hagati y’amatariki ya 17-20 Mata 1994.

Kayitaramirwa yahise atangira kuvurwa, akira ibikomere byagaragaraga ku mubiri, ariko agakomeza kugira ikibazo gikomeye cy’ihungabana, igihe yabaga yibutse ibihe bigoye yanyuzemo.

Yagize amahirwe yo kongera guhura na basaza be babiri, nyuma ya Jenoside yakorewe Abatutsi yibanda ku bikorwa by’ubuhinzi bimufasha mu mibereho.

Kayitaramirwa ubu ni umuhinzikazi, akabifatanya no gukora umwuga w’ubudozi. Icyakora avuga ko yumva afite inzozi zo gukora ubuhinzi bw’umwuga.

Avuga ko yahawe n’inka muri Girinka irapfa, ariko akaba yizeye ko azahabwa indi.

Amazi yari muri iki cyuzi yakuwemo mu rwego rwo gushakisha imibiri

Igikorwa cyo gushakisha imibiri y’Abatutsi bishwe muri Jenoside yakorewe Abatutsi muri Mata 1994 bakajugunywa mu cyuzi cya Ruramira cyatangiye muri Nyakanga umwaka wa 2019 gisubikwa ku wa 05 Gicurasi 2020 kubera icyondo cyinshi cyaterwaga n’imvura.

Icyo gihe hari hamaze kubonekamo imibiri 218. Iyo mibiri ubu iri ku rwibutso rwa Jenoside rwa Ruramira aho yamaze gutunganywa hakaba hategerejwe ko igikorwa cyo gushakisha iyindi kirangira hagategurwa uburyo bwo kuyishyingura mu cyubahiro.

Tom Ndahiro Umushakashatsi kuri Jenoside waganiriye na Shabakaka Vincent

Iyi nyandiko ya Shabakaka, twamenyanye tukaganira kenshi, yayanditse hari Jenoside yakorwaga mu karere k’Ubugesera.

Ako kababaro yavuze ko gahari ni akahe? Ati :

•Ni ukuvuka i Rwanda abo muva inda imwe bakagutoteza;
•Ni ukuba nyiramukubitwa utagira uwo yitabaza;
•Ni ugukubitwa ibirenge kugeza aho inzara zivamo;
•Ni ugukubitwa ikamba umubiri wose;
•Ni ugukubitwa imigeri mu ruhago ukituma indubaruba;
•Ni ugukubitwa inyundo ahari ingingo hose;
•Ni ugukubitwa imihini bakakuvuna ruseke;
•Ni ugukubitwa mu matwi ntuzongere kwumva;
•Ni uguta igihugu cyawe ukagana ishyanga;
•Ni ugufatwa ugafungwa utazi icyo uzira;
•Ni ugushingwa ibikwasi ku bugabo bwambaye ubusa;
•Ni uguterwa ipasi ku nda no ku mugongo;
•Ni ugutanga umubiri wawe bakawushanyaraza;
•Ni ukumenya kunywesha igikoma inkweto;
•Ni ukwambarira ubusa amaso y’abashinyaguzi;
•Ni ugukurura izuru bakaritema ntutake;
•Ni ugutega ijosi bakarigesa nk’intama igiye mu ibagiro;
•Ni ukujombwa inshinge mu moko y’ibere;
•Ni ukwihanganira gukandwa ubugabo ugahinduka inkone;
•Ni ukumeneka amaso ngo utabona ibibi bakora;
•Ni ugukambakamba nk’igitambambuga;
•Ni ukuba ifunguro ry’ibiheri n’imbaragasa;
•Ni ukuba nduhirabandi ukamenya ko ibyo utunze ugomba kubita ugahunga;
•Ni ugutanga umwari wawe bakamwambika ubusa ureba;
•Ni ukubona inka zawe bazitera imirwi;
•Ni ukurohwa mu ruzi uziritse ikibuye ku ijosi;
•Ni ukubona bagutwikira inzu ntushobore kuyizimya;
•Ni ukubona bagutemera abana bakabata mu musarani;
•Ni ukubona usahurwa ntusobanukirwe;
•Ni ukwifuza ubugumba kandi uri umubyeyi;
•Ni ukubona Fiancee wawe bamwica urw’agashinyaguro;
•Ni ukubona inka zawe bazitera imirwi;
•Ni ugutanga umwari wawe bakamwambika ubusa ureba;
•Ni ukubona umugabo wawe bamushahura ugashinyiriza;
•Ni ukurara butunda, utabuze icyo wiyorosa;
•Ni ukurara rwantambi utabuze iwawe;
•Ni ukwambara ubusa kandi utabuze umwenda;
•Ni ukwicwa n’inzara kandi warahinze nk’abandi;
•Ni ukurota nabi bukarinda bucya;
•Ni ukwishimira uko wavutse kubera ko nta kundi byagenda;

Ni uguhorwa inzigo utazi inkomoko yayo.

Twibuke Vincent Shabakaka wanditse ibi bintu. Ni ibintu byari byarabaye, kandi bigikomeza. Hari iyicarubozo ryakorewe Abatutsi babita ibyitso by’inyenzi.

Vincent Shabakaka

Abagogwe n’Abatutsi bo mu Cyingogo, bari barishwe mu mpera z’umwaka wa 1990 n’intangiriro za 1991. Kangura yari yarasohoye amategeko 10 y’abahutu, irya 8 ribategeka kutagirira impuwe Umututsi.

Abangara bo bari benshi mu mahanga guhera mu mwaka wa 1959. Na bo kandi babayeho nabi cyane igihe kirekire.

Abahakana n’abapfobya Jenoside, ntibagira isoni zo kuvuga ko Jenoside yakorewe Abatutsi mu mwaka wa 1994, yatewe n’ihanurwa ry’indege ya Perezida Habyarimana.

Shabakaka yanditse uko Abatutsi bari babayeho, imyaka ibiri n’ibyumweru nka bibiri mbere y’ihanuka ry’indege. Nk’uko Shabakaka yabyanditse icyo gihe, muri make Umututsi yari yarapfuye ahagaze.

Gupfa uhagaze ni ukwitwa ko uriho, ukabaho nta burenganzira. Uburenganzira ubuvutswa na Leta yakakurengeye nta kindi uzira uretse kuba uri icyo uri cyo. Uzira uko wavutse.

Iyi nkuru yateguwe na Tom Ndahiro, Umwanditsi akaba n’Umushakashatsi kuri Jenoside yakorewe Abatutsi ndetse n’izindi Jenoside zabayeho ku isi.

Mu buhamya bwe, Dusengiyumva avuga ko yavukaga mu muryango w’abana batanu, abo bavukana uko ari bane ndetse n’ababyeyi babo bakaba barishwe muri Jenoside, arokoka wenyine binyuze mu nzira ndende kandi igoye.

Nubwo ababyeyi be bishwe muri 1994, ariko na mbere yaho baratotezwaga mu buryo butandukanye. Avuga ko se yari umushumba w’itorero (Pasiteri), naho nyina akaba yari umuganga, ayobora ikigo nderabuzima.

Akenshi ngo se yababwiraga ko kuva muri 1973, yari ageze mu mwaka wa gatanu w’amashuri yisumbuye, ariko nubwo atigeze ahagarika kwiga, yarinze yicwa muri 1994, atarangije iyo myaka ibiri ngo abone impamyabumenyi ye.

Dusengiyumva avuga ko kuba se atarabonaga impamyabumenyi, bitaterwaga n’uko yari umuswa, kuko ngo bajyaga babona indangamanota ze, bakabona atsinda neza, gusa ngo iyo umwaka w’amashuri wajyaga kurangira, ntibaburaga ibyo bamushinja, rimwe na rimwe akanafungwa, bityo akadindira.

Nyina na we, nubwo yari umuganga bahoraga bamutumiza kuri parike (ubushinjacyaha), bamushinja ko ahungabanya umutekano w’igihugu kandi ngo ntabyo yabaga yakoze.

Mu gihe cya Jenoside muri 1994, indege y’uwari Perezida w’u Rwanda icyo gihe imaze guhanuka, ku itariki ya 07 Mata, ngo nta kintu kidasanzwe cyabaye aho bari batuye, keretse amarondo yatangiye gukorwa, ku buryo umuntu yari gutekereza ko hari ikintu kibi kigiye kuba.

Mu minsi mike yakurikiyeho, batangiye kubona abantu bahunga baturuka mu Bugesera, batemaguwe, abandi batwikirwa. Kugeza ku itariki ya 12 Mata, ngo nibwo ibitero byatangiye kwica Abatutsi no kubatwikira aho muri Komini Ntongwe.

Umunsi wakurikiyeho nibwo uwari Burugumesitiri wa Komini Ntongwe witwaga Kagabo yagiriye inama abaturage bo muri za segiteri zose yo guhungira kuri Komini, ngo kuko bazaharindirwa.

Uko birwanyeho

Dusengiyumva, avuga ko umutekano bari bijejwe kubona kuri Komini ntawo babonye, kuko ngo intego yari ukubakusanyiriza hamwe, kugira ngo babone uko babica. Ngo hari hateraniye abantu benshi bagera nko ku bihumbi ijana, ariko nta mazi yari ahari, nta cyo kurya, mu by’ukuri ngo bwari ubuzima bugoye cyane.

Samuel Dusengiyumva (umwana wambaye agapira karimo ibara ritukura, useka) hamwe na se na nyina n’abavandimwe be n’abashyitsi bari babasuye

Nyuma y’iminsi ibiri, ibitero by’interahamwe byatangiye kubasanga kuri Komini, bagerageza kwirwanaho nubwo nta ntwaro babaga bafite, kuko Umututsi wageraga aho kuri Komini, Burugumesitiri n’abapolisi bahitaga bamwambura icyo yabaga yitwaje cyose, yaba inkoni cyangwa umuhoro, bikabikwa.

Birwanyeho rero bakoresheje amabuye, abana n’abagore bakayarunda, abagabo n’abasore bakayatera. Iminsi ibiri ibanza basubijeyo ibitero, ku munsi wa gatatu igitero cyaje kirimo n’abasirikare bica abantu batanu, mu bageragezaga kwirwanaho, bahita batangira kubona ko ibintu bikomeye.

Nyuma y’icyo gitero byagaragaye ko batazashobora kubatsinda aho kuri Komini, kuko hari ahantu ku musozi, igitero kikaza bakibona, bakitegura. Burugumesitiri Kagabo yahise atumiza abandi basirikare n’abajandarume ndetse n’abapolisi kuri Superefegitura ya Nyanza n’iya Ruhango, icyo gihe arangije abwira Abatutsi bari bahungiye kuri Komini ko kuhabarindira bitagishobotse.

Uwo Burugumesitiri Kagabo yabagiriye inama yo guhungira kuri Superefegitura ya Ruhango, ariko wari umutego, kuko inzira iva aho kuri Komini igana kuri Superefegitura yanyuranga ahantu hari ikibaya cyitwa Nyamukuma kiri hagati y’imisozi, aba ari ho babategera igico, kuko ntibashoboraga kwirwanaho.

Ku itariki 20 Mata, Abatutsi bavuye kuri Komini bagerageza kujya kuri Superefegitura bageze muri icyo kibaya, basanga bahabategeye, barabarasa babatera za gerenade, ku buryo nko mu minota mirongo itatu bamaze barasa, Abatutsi bari bahunze, hafi ya bose bari baryamye hasi, abenshi bapfuye.Nyuma interahamwe ziraza zirabatemagura kuko ntibashoraga kwirwanaho.

‘Mujyane, hari igihe ari we wazarokoka!’

Dusengiyumva avuga ko aho ari ho yatandukaniye n’umuryango we, icyakora ajyana na murumuna we umwe na Nyirarume, bagenda bahunga baza kugera i Shyogwe, Nyirarume amushyira mu muryango wari inshuti z’iwabo, na murumuna we bamuhisha mu wundi muryango baturanye,naho uwo Nyirarume akomereza i Kabgayi aho yaje kwicirwa na we.

Nyina wa Dusengiyumva na we yaje kugera aho i Shyogwe, we yihisha mu cyumba cy’ishuri, nyuma igihe cyo guhunga kigeze, kuko ingabo za RPF, zagendaga zisatira aho i Shyogwe, umugore wo mu rugo rwari ruhishe Dusengiyumva yagiye kubaza nyina ati, “Ese uyu mwana ko nari muhishe tukaba tugiye guhunga muguhe cyangwa se tujyane?”

Samuel Dusengiyumva

Nyina wa Dusengiyumva ngo yamusubije ijambo rikomeye ryamuherekeje mu buzima bugoye yanyuzemo nyuma ya Jenoside. Ngo yaramubwiye ati, “Uwo mwana n’ubundi ni wowe wari umuhishe mujyane, hari igihe ari we wazarokoka.”

Uko ni ko byagenze kuko murumuna we wari warahishwe n’undi muryango w’aho i Shyogwe, mu gihe cyo guhunga bageze i Kaduha ku Gikongoro, yahuye n’abana biganaga bamuzi bamwereka interahamwe ziramwica.

Abandi bana babiri bavukanaga bahunganye na se, agerageza kugera ku ishuri rya paruwasi kuko yari Umupasiteri, ariko ntabyamukundira kuko yageze kuri bariyeri baramwica, abana bari kumwe na we basubira inyuma, ariko Burugumesitiri Kagabo arabafata, abohereza aho bakomoka na bo barabica.

Nyina na we yagerageje guhunga ari kumwe n’umwana w’umuhererezi bari kumwe, bageze ahitwa i Mushubati, ahasanga interahamwe zimuzi zimwicana n’uwo mwana bari kumwe.

Ku Gikongoro, Dusengiyumva yagarukiye hejuru y’icyobo

Dusengiyumva n’umuryango wamuhishe bageze ku Gikongoro, yibwiye ko ari kure y’aho akomoka, ko nta kibazo, ngo ajya mu isoko ari kumwe n’umwana wo mu muryango wari umuhishe. Agezeyo, ahura n’umwana biganaga, abwira interahamwe ati, ‘mbonye umwana wo kwa Ruhamya’.

Icyo gihe ngo bamukozeho uruziga bagiye kumwica, bamwegereza icyobo, bamukuramo imyenda, ariko umwe muri bo abwira bagenzi be ko se w’uwo mwana yari Pasiteri, ngo bareke abanze asenge, gusa umwana wo mu muryango wari umuhishe, yabonye bamufashe ajya kubwira ababyeyi be.

Nyuma umubyeyi wo muri urwo rugo, yahise yitabaza umupolisi wari hafi aho, ati ‘bagiye kunyicira umwana’ uwo mupolisi ahita aza arahamukura asubira mu muryango wari umuhishe, ariko atangira kubona ko aho atazahakirira ashakisha uko yahava’.

Dusengiyumva yaje kubona Abasirikare b’Abafaransa, abasaba kumukura aho, bashaka kumwangira, ariko arakomeza arahatiriza birangira bamushyize mu ikamyo yabo bamujyana aho bari bafite ibirindiro i Murambi.
Ahageze nabwo yabonye ko nta mutekano uhari kuko interahamwe zajyaga ziza zigatwara abantu cyangwa zikabicira ku irembo ry’icyo kigo cya Murambi Abafaransa barebera ntibagire icyo bakora, ikindi kandi ngo yabonaga Abasirikare ba Habyarimana bahora baza aho, bakaganira n’abo Bafaransa.

Ibyo byatumye rero ashaka uko yazagera mu gice cyari cyarafashwe n’Inkotanyi, ni ukuvuga icyari Butare icyo gihe. Nubwo byari bigoye cyane kuhagera kuko hari n’abandi bagendaga basubira mu gice cyafashwe n’Inkotanyi, na we yarabigerageje birakunda, arahagera yakirwa neza, anahasanga bamwe mu bo bari kumwe i Murambi.

Abana be bose yabise izina rya se ‘Ruhamya’

Kimwe mu bintu Dusengiyumva avuga ko byamugoye kubyumva ni ukuntu uwigishije ingengabitekerezo ya Jenoside yabigenje ku buryo igera no mu bana bato, kuko ngo bahunga hari aho banyuze basanga abana bari hagati y’imyaka 5-10, babatera amabuye, na we ubwe rimwe rimukomeretsa mu mutwe ariko arakomeza, akibaza ukuntu byari byarinjiye no mu mitwe y’abana bato ko Abatutsi bagomba gupfa.

Nyuma yo kurokoka, Dusengiyumva yakomeje amashuri ye, arangiza kaminuza muri 2005, kuko yumvaga ashaka kugira umuryango kugira ngo izina rya se ritazazima, yahise ashinga urugo muri 2008. Ubu afite abana bane, akaba bose yarabise izina rya sekuru ari ryo ‘Ruhamya’, bityo akaba yizeye ko mu minsi izaza hazabaho umuryango witwa ‘Abahamya’, abo bana be kandi yanabise amazina y’abavandimwe be bishwe.

Gusa ikindi Dusengiyumva avuga, ni uko yababariye abo bose bamuhemukiye. Avuga ko hari bamwe muri bo baje kumusaba imbabazi, arazibaha. Ashimangira ko gutanga imbabazi bitavuze ko ari umunyantege nke, ahubwo ngo ni amahitamo yakoze.

Reba Video y’ubuhamya bwa Dusengiyumva

Adrien Niyonshuti

Mu kiganiro yagiranye na KT Radio, avuga ku rugendo rwe rwo kwiyubaka nyuma ya Jenoside yakorewe Abatutsi, yishimira intambwe u Rwanda rwagezeho mu kwiyubaka bikamuha imbaraga zo gutera imbere muri uyu mukino.

Se wabo, ni we watumye atangira gukina umukino w’amagare

Adrien Niyonshuti, avuga ko imbaraga za mbere zo gukunda umukino w’amagare, yazikuye kuri se wabo na we wahoze akina uyu mukino mbere ya Jenoside yakorewe Abatutsi, agashyira imbaraga mu kuwumwigisha ngo azamumare agahinda yatewe no kubura abana harimo n’uwari waratangiye kwitoza uyu mukino.

Agira ati “Imbaraga za mbere nazikuye kuri Data wacu witwa Turatsinze wakinaga umukino w’amagare, yabuze umuryango we wose, yari umugabo wubatse wari ufite umugore n’abana batandatu, bapfanye na mukuru wanjye umwe.”

“Turatsinze amaze kurokoka yagize ikintu nakwita nk’ihungabana kubera kubura umuryango we wose, akumva ko nta cyizere cyo kubaho, ariko mu biruhuko akajya ashyira imbaraga mu kuntoza igare.”

Ati “Ngomba kugutoza ukazaba umunyonzi mwiza, ukazankiza agahinda nagize ko kubura umuhungu wanjye Matene, nifuzaga kuzabasigira uyu mwuga wo gutwara igare.”

Adrien Niyonshuti avuga ko kuva icyo gihe gukina umukino w’amagare byari bivuze byinshi birenze gukina gusa kuko yumvaga ari uburyo bwo guhesha ishema se wabo no kusa ikivi cy’abavandimwe be se wabo yifuzaga ko bazakina umukino w’amagare ahubwo bakaza kwicwa muri Jenoside yakorewe Abatutsi.

Adrien avuga ko ikindi cyamubabaje ari ukuba se wabo yaritabye Imana atabonye intsinzi ye muri uyu mukino.

Ati “Nababajwe no kuba naratangiye gukina uyu mukino muri 2003 amaze kwitaba Imana muri 2001/2002, mfata inshingano zo kumwereka ko ibyabaye mu 1994 bigatwara umuryango wose, ko nshobora kumugarurira icyizere”

“Ko umukino yakunze , yaheshaga ishema mu Rwanda rwa kera, ko nshobora kongera kumwereka ko bishoboka, ariko ntibyakunze ko abona ibyo nagezeho nyuma y’aho u Rwanda rwacu rwaje kuba rwiza, rugendwa kandi ruzira amacakubiri, nifuzaga ko abona bya byishimo atabashije kubona mbere ya Jenoside aho yatsindaga ntabone abamwishimira.”

Amateka asharira y’igare rya mbere Adrien yakinishije

Igare yatangiriyeho umukino w’amagare rifite amateka akomeye kuko ari cyo kintu cyonyine abishe umuryango wa se wabo Turatsinze basize nyuma yo gusahura ibindi byose.

Ni byo yasobanuye ati “Igare natangiriyeho ni igare uwitwa Rusirare yaguriye Oncle muri za 85, yarimuguriye mu Bufaransa, ni ryo natangiriyeho nkina uyu mukino, ni ryo nakinishije agace ka mbere kavaga Kigali-Rubavu muri 2003 nkina bwa mbere Tour du Rwanda, ndikinisha uduce tubiri, nyuma mukuru wanjye aza kumpa irindi.”

“Igitangaje ni ukuntu iryo gare, basahuye byose batwika inzu barayisenya, igare bararitwara, baravuga ngo bazi ko umuryango wa Turatsinze wapfuye ngo bazarishyira hariya ribe amateka bazajya bibukiraho Abatutsi, ngo ukuntu umugabo witwa Turatsinze yajyaga atwara igare.”

Byabaye nk’igitangaza, igare riraboneka arishyikirizwa n’ingabo zari iza RPA Inkotanyi.

Ati “Ku bw’amahirwe ingabo za RPF zigeze i Rwamagana hari abantu baje kumva amateka y’iryo gare, abantu bari bazi amateka yaryo n’abari bazi Turatsinze banamenya ko yarokotse, baza kumushaka bararimuzanira mu modoka, bati igare ryawe twararibonye.”

Turatsinze wari umaze kubura abana be yifuzaga ko bazakina umukino w’amagare, yahaye rya gare Adrien.

Ati “ yarambwiye ati ‘abana banjye barashize ariko sinzabura umwe mu bana barokotse cyangwa abandi bazavuka nyuma’ iryo gare naje kuritangiriraho nkina uyu mukino, sinakwibagirwa ingabo za RPF zabigizemo uruhare kugira ngo nongere ndibone.”

Uyu mukino w’amagare, waje kumufasha mu rugendo rwe rwo kwiyubaka, uburwayi yahoranaga buragenda burundu, atangira kwitabira amarushanwa mpuzamahanga, ahura n’ikibazo cy’uko aho yajyaga hanze benshi bamubonaga mu isura y’igihugu cya Jenoside, ariko aza kubyitwaramo neza.

Agira ati “Ikintu ntazibagirwa nkiga kuri ASPEJ nahoraga ndwara umutwe, mpora ndwaragurika, ndwara igifu aho banambaze inshuro ebyiri, gusa nyuma nza gukomeza kunyonga mba umukinnyi wabigize umwuga, ntangira no kujya gukina hanze, inshingano za Turatsinze nkumva ngomba kuzigeraho, umukino umpindurira ubuzima bwa burwayi buvaho.”

“Hanze aho najyaga biba ikibazo gikomeye, abantu bumvaga u Rwanda nk’igihugu cyabayemo Jenoside gusa kubera Jenoside bambaza ngo ya mateka, igihugu cyabayemo Jenoside, 2007 njya California aho namaze amezi ane ndi kwiga ibijyanye n’umukino w’amagare, umuntu wese wambonaga yazaga ambaza ibijyanye na Jenoside, nyuma yaho njya muri Afurika y’Epfo abantu bose bambaza Jenoside, bati ese uri Umututsi,umuhutu, umutwa, nkababwira nti ndi Umunyarwanda, nkina umukino w’amagare mube ari wo mumbazaho.”

“Mba umunyarwanda wa mbere wabonye itike yo kujya mu mikino Olempike mu mukino w’amagare, intego yanjye byari ukuzamura ibendera ry’igihugu, abantu bakamenya u Rwanda mu yindi isura , idafite ishusho y’ubututsi, ubuhutu cyangwa ubutwa.”

Uruhare rwa siporo mu kwiyubaka

Muri icyo kiganiro, Adrien yakomeje agira ati “Kera mu mikino myinshi itandukanye bakoresheje siporo mu buryo butari bukwiye wasangaga abantu bayifashisha ngo banacemo abantu ibice, ariko ishusho y’uyu munsi siporo ni ikintu gihuza abantu benshi, iyo urebye abantu bitabira Tour du Rwanda babona ko u Rwanda ruri mu ishusho nshya, iyo urebye abantu amagana baba bari ku mihanda bishimye, nyamara abandi barakoresheje ayo magana mu kubiba urwango mu bantu, ubu ubona ari ikintu cy’agaciro.”

Avuga kandi ko ari intambwe ikomeye kuba rwa Rwanda abantu bamenye mu isura mbi, ruri kwakira amarushanwa, rukaba ruteganya no kwakira nka Shampiyona y’isi, ari ibintu byaharaniwe, aho u Rwanda rwihaye icyerekezo cyiza.

Icyo Adrien yisabira urubyiruko

Muri iki kiganiro, yagiriye inama urubyiruko kuko ari zo mbaraga z’igihugu, anasaba kandi abarokotse Jenoside yakorewe Abatutsi gukomeza gushyira hamwe bagakomeza kwiyubaka kuko nta Jenoside izongera kubaho ukundi.

Ati “Abarokotse ni ugushyira hamwe tukibuka abacu, Jenoside ntizongera kubaho ukundi, hari benshi babigerageje nyuma ariko nta mahirwe bigeze babona, nta n’ayo bazigera babona, twibuke twiyubaka by’umwihariko urubyiruko ruri gukura ubu rubona itandukaniro, amateka mabi yaranze u Rwanda mbere ya Jenoside tuyigireho duhindure ubuzima bw’igihugu cyacu kuko ni twe dufite imbaraga, kandi dufite n’ubuyobozi bwiza."

Kugeza ubu Adrien Niyonshuti afite ikipe yitwa SACA (Skol Adrien Cycling Academy) yanakinnye Tour du Rwanda 2020 ikaba izanakina iya 2021, akagira kandi n’ikigo i Rwamagana kigisha abakiri bato umukino w’amagare cyitwa Adrien Niyonshuti Cycling Academy, ikigo cyafashije abatari bake kuzamuka muri uyu mukino barimo nka Valens Ndayisenga na Areruya Joseph bagiye begukana Tour du Rwanda.

Rugamba Sipiriyani

Ni amagambo yakoze ku mitima ya benshi ndetse azamura imbamutima ku basanzwe bazi iyi ndirimbo igaragaza icyizere cyo gukomera ku Mana.

Muri iyo ndirimbo, umuhanzi Rugamba Sipiriyani agaragaza ishyaka yari yifitemo ryo gusanga Umwami we.

Aya ni amagambo y’iyo ndirimbo ya Rugamba:

Nzataha yeruzalemu nshya,
Aho umwami antagereje
Mana yanjye ndaje
Mana yanjye iyo nibutse ko wivugiye uti ;
Njyewe ndi umushumba ukuragiye
Nzohereza Roho yanjye akumvishe ibyo navuze
Akumare ubwoba umbere umuhamya
Ndishima nkanogerwa kuko nzataha

Yeruzalemu nshya,
Aho umwami antagereje

Umushumba wanjye andagira mu rwuri rwiza,
Ntabwo nikanga,
Ibirura biraza akabihinda
Inkuyo yekandi imuhora mu biganza ankenura

Nzataha Yeruzalemu nshya, aho umwami antagereje
Mana yanjye ndaje
Mana yanjye iyo nibutse ko wivugiye uti
Njyewe ndi umushumba ukuragiye
Nzohereza Roho wanjye akumvishe ibyo navuze, akumare ubwoba umbere umuhamya
Ndishima nkanogerwa kuko nzataha Yeruzalemu nshya aho umwami antagereje

Iyo navunitse atabarana ubwungo ankiza
iyo nakomeretse aranyomora
Nkaba muzima
No mu rugendo ntabwo ndi njyenyine, ntansiga
Nzataha yeruzalemu nshya aho umwami antagereje

Mana yanjye ndaje
Mana yanjye iyo nibutse ko wivugiye uti Njyewe ndi umushumba ukuragiye nzohereza Roho yanjye akumvishe ibyo navuze akumare ubwoba umbere umuhamya
Ndishima nkanogerwa kuko nzataha Yeruzalemu nshya aho umwami antagereje

Yanshyize mu zindi ntama ze akunda ndishima...

Iyi ni yo ndirimbo Rugamba Sipiriyani yashoboye gutoza no kuririmba bwa nyuma mu buzima bwe, imwe mu ndirimbo ikunzwe ndetse yakunzwe kurebwa na benshi n’ubwo batazi amateka yayo.

Kigali Today yavuganye na Rugamba Olivier, umwana wa Rugamba, yemeza ko iyi ndirimbo ari yo yanyuma umubyeyi we yahimbye, agatoza itorero rye.

Agira ati "Ni byo ni yo ndirimbo yahimbye ndetse atoza itorero rye Amasimbi n’Amakombe kuko bayiririmbye tariki ya 6 Mata, bukeye baramwica."

Olivier avuga ko atari kumwe n’umubyeyi we ubwo yaririmbaga iyi ndirimbo kuko yari i Butare kwa Nyirasenge.

Ati "Njye na murumuna wanjye yari yaratwohereje kwa Masenge wari urwaye kugira ngo tumube hafi mu gihe cya Pasika ndetse tumuherekeze mu misa. Umubyeyi wanjye twaravuganaga cyane ndetse akatubwira gahunda ze. Icyo nibuka ni uko iyi ndirimbo yari yayitoje."

Olivier avuga ko iyi ndirimbo itari imaze igihe yanditswe kuko umubyeyi we atari asanzwe atindana igihangano.

Ati "Umubyeyi wanjye iyo yabaga afite igihangano yaracyandikaga ndetse akagitoza ntiyakundaga gutindana ibihangano."

Olivier avuga ku buzima bwa nyuma bw’umubyeyi we, agira ati:
"Ndabyibuka umubyeyi wacu yaduhamagaye kuri telefoni nka saa moya za mu gitondo tariki ya 7 Mata 1994, atubwira ko Perezida Habyarimana yapfuye aguye mu ndege kandi yapfanye na Perezida w’igihugu cy’u Burundi. Twumva bitabaho ko abaperezida babiri bapfira rimwe. Mu byo nibuka yatubwiye ni uko bitari bugende neza, atubwira ko naramuka apfuye ngomba kuzaba umugabo nkazita ku bavandimwe banjye. Nibwo nari numvise umubyeyi wanjye ahangayitse cyane. Nyuma yo kuvugana ansaba kumuha murumuna wanjye twari kumwe na we baravugana aradusezera. Yongeye kuduhamagara saa tatu atubwira ko abicanyi bamuteye, natwe twumvaga muri telefoni urusaku bahonda urugi, atubwira ko barimo guhonda imbunda ku rugi bashaka kwinjira nibwo yadusezeyeho. Nyuma y iminota mikeya twaje kongera guhamagarwa na murumuna wacu washoboye kurokoka atubwira ko mu bavandimwe bose bari kumwe bapfuye ari we ushoboye kurokoka kuko aguye bakagira ngo yapfuye. Na we ababwira ko yuzuye amaraso."

Rugamba Cyprien ni umusizi, umwanditsi w’ibitabo, umuririmbyi w’umuhanga u Rwanda rwagize mu bihe bya vuba. Benshi bafata ibihangano bya Rugamba nk’umurage ukomeye yasigiye Abanyarwanda.

Rugamba yavukiye mu yahoze ari Komine Karama, ubu ni mu Karere ka Nyamagabe, avuka mu mwaka wa 1935. Rugamba yize amashuri ye mu Rwanda, mu Burundi ndetse no mu Bubiligi, aho yakuye impamyabumenyi y’ikirenga mu by’amateka.

Rugamba yaje gukunda umukobwa witwa Mukangiro Saverina, akaba yaramuhimbiye imitoma myinshi amurata imico n’uburanga. Uretse ko uyu mukobwa yaje kwicwa aroshywe mu mazi mu mwaka wa 1963, ibi bikaba byaramubabaje cyane, ariko yishumbusha Mukansanga Daforoza wari nyina wabo wa Mukangiro.

Amateka avuga ko izo nshuti ze zabaye intangiriro yo guhimba ibisigo.

Rugamba yaje gushakana na Mukansanga Daphrose mu 1965 babyarana abana 10. Muri Jenoside yakorewe Abatutsi bapfanye n’abana babo 6, ubu hasigaye abana bane.

Uretse kwandika ibitabo, ubuvanganzo, kwandika indirimbo no kuririmba, Rugamba yakoze imirimo itandukanye muri Leta, ariko akurwa mu kazi igihe kitageze, kubera ko atihanganiraga akarengane ako ari ko kose, akabyamagana abicishije mu nganzo ye nk’uko byumvikana mu ndirimbo yagiye ahimba zirimo “Ntumpeho”, “Inda nini”, “Jya umenya gusaza utanduranyije cyane”, “Agaca” n’izindi nyinshi.

Mu byaranze Rugamba Cyprien harimo gushishikariza Umunyarwanda kuba inyangamugayo no kugira indangagaciro nyazo zikwiriye u Rwanda ndetse akaba umwe mu bahanzi bakomeye u Rwanda rwagize kuko yari afite indirimbo zigera kuri 400.

Uretse kuba inyangamugayo no guharanira amahoro, Kiliziya Gatolika n’abandi bakristu yabasigiye ibihangano by’indirimbo zisingiza Imana zirimo ubuhanga buhanitse.

Mu mwaka wa 2015 nibwo Kiliziya Gatolika yatangiye igikorwa cyo kwemeza ubutagatifu bw’umuhanzi nyakwigendera Rugamba Cyprien n’umugore we Daphrose Rugamba kubera ibikorwa byaranze ubuzima bwabo babinyujije mu muryango bashinze "C&D Rugamba" wakira abana bo mu muhanda n’imfubyi.

Ni ibikorwa byatangiye tariki 18 Nzeri 2015, kuri katedarale ya Saint Michel nk’uko itangazo umuryango Communauté de l’Emmanuel yabagamo washyize ahagaragara ribivuga.

François-Xavier Ngarambe, umuyobozi w’umuryango Communauté de l’Emmanuel muri 2015 yatangaje ko igitekerezo cyo kumugira umuhire atari icya vuba, ahubwo cyaturutse kuri Papa Yohani Paul wa II ubwo yari mu Rwanda.

C&D Rugamba ni umuryango Rugamba yashinze tariki 22 Nzeri 1990, ugamije kwakira abana bo mu muhanda.

Umva hano indirimbo ‘Nzataha Yeruzalemu Nshya’

CP Kabera asaba abafite ingengabitekerezo kubireka kuko batazihanganirwa

CP Kabera yavuze ko mu Mujyi wa Kigali hagaragaye ingero z’ibyo bikorwa eshanu, mu Ntara y’Iburasirazuba hagaragara birindwi, mu Majyepfo bitanu, mu Majyaruguru bitatu naho Iburengerazuba hagaragara bibiri.

Ati "Muri rusange hagaragaye ibikorwa 22 byose bigizwe n’amagambo asesereza yumvikanamo ingengabiterezo ya Jenoside. Abaturage uko bagomba kwitwara barakuzi bakwiye kureka ibyo bikorwa bisesereza."

Mu kiganiro yagiranye na RBA ku wa Gatanu tariki ya 10 Mata 2021, CP Kabera yavuze ko nta bikorwa byangiza imitungo y’abacitse ku icumu byari byagaragara, ariko anavuga ko atari ngombwa kuko ari ibyaha kandi bihanwa n’amategeko.

Abantu 18 ngo ni bo bari kuri sitasiyo za Polisi mu turere dutandukanye bakurikiranyweho ibyo bikorwa by’ingengabitekerezo ya Jenoside.

Abandi bane ngo ntibarafatwa ariko na bo baracyashakishwa.

CP Kabera yasabye abaturage kubireka kuko atari byiza ahubwo bagakomeza imirimo ibateza imbere.

Agira ati "Turasaba Abanyarwanda gukurikirana gahunda z’igihugu zo kwibuka, bakirinda COVID-19 batekanye, bagakora imirimo yabo bakurikije uko ibihe byifashe."

Avuga ko igikenewe atari umubare mwinshi w’abakora ibikorwa bigaragaramo ingengabiterezo ya Jenoside ahubwo ko abaturage bakwiye kubireka kuko bazi ko ababifatiwemo babihanirwa.

Perezida Kagame yakiriye Raporo ya Duclert

Avuga ko n’ubwo Komisiyo yari ayoboye mu gukora iyo raporo yashyizweho na Perezida w’u Bufaransa, yashingiye ku nyandiko zari zibitse kandi na zo zishobora kubonwa n’abandi bityo ko ntaho we n’ikipe yari ayoboye bari guhera babogama.

Mu kiganiro n’abanyamakuru, Prof. Duclert yatangaje ko yaganiriye na Perezida Kagame n’itsinda ry’Abaminisitiri n’abajyanama be bakungurana ibitekerezo kuri iyo Raporo kandi akanashimira Perezida w’u Bufaransa Emmanuel Macron washyizeho Komisiyo yo kuyikora.

Agira ati “Perezida Kagame yashimye iki cyemezo cy’ingenzi cya Perezida w’u Bufaransa Emmanuel Macron ku gitekerezo yagize cyo gutangiza ubu bushakashtsi bw’amateka akomeye mu mibanire y’ibihugu byombi. Perezida Kagame yashimiye akazi twakoze kuri iyi Raporo”.

Yongeraho ati “Twaganiriye mu buryo bwimbitse kandi njyewe nabonye yabyishimiye pe! Njyewe nahagarariye ikipe twakoranye ubushakashatsi kandi twaganiriye kuri bimwe mu bigize iyi Raporo n’ibishobora kuba bitarimo kuko twashingiye ku nyandiko zari zibitswe ariko ndemeza ko ikubiyemo ibintu biteye amatsiko bitari bizwi”.

Minisitiri w’Ububanyi n’amahanga w’u Rwanda, Vincent Biruta, avuga ko iyi Raporo yerekanye uruhare rutaziguye rw’abayobozi b’u Bufaransa muri Jenoside yakorewe Abatutsi hagati y’umwaka wa 1990-1994, kandi ko izatuma ibihugu byombi bibanira ku mateka ashingiye ku kuri, kandi ikaba izuzuzanya na Raporo iri gukorwa n’u Rwanda n’ubundi ku ruhare rw’u Bufaransa muri Jenoside yakorewe Abatutsi.

Agira ati “Iyi ni raporo ikomeye cyane ku mibanire y’ibihugu byombi kuko imibanire ishingiye ku kuri abantu bose babyumva kimwe ni byo byiza, cyane cyane ko igaragaza ko urwo ruhare rwabayeho ubwo bivuze ko ibihugu byombi byanoza umubano ushingiye ku kuri kwagaragajwe n’iyi Komisiyo”.

Prof. Duclert avuga ko nasubira mu Bufaransa azabwira Umukuru w’Igihugu Emmanuel Macron kunoza imikoranire n’abashakashatsi b’u Rwanda n’ubundi bari gukora ku ruhare rw’u Bufaransa muri Jenoside yakorewe Abatutsi kandi ko yizeye ko bizemerwa cyane ko hari inyandiko nshya ziherutse gushyirwa ahagaragara zivuga ku ruhare rw’uwahoze ari Perezida w’icyo Gihugu muri Jenoside yakorewe Abatutsi.

Ni ryari itegeko rivuga ko habayeho icyaha cy’ingengabitekerezo ya Jenoside?

Umuntu ukorera mu ruhame igikorwa, byaba mu magambo, mu nyandiko, mu mashusho cyangwa ku bundi buryo, kigaragaza imitekerereze yimakaza cyangwa ishyigikira kurimbura abantu bose cyangwa bamwe muri bo bahuriye ku bwenegihugu, ubwoko, ibara ry’uruhu cyangwa ku idini aba akoze icyaha cy’ingengabitekerezo ya Jenoside .

Nk’uko biteganywa n’itegeko ryerekeranye n’icyaha cy’ingengabitekerezo ya Jenoside n’ibyaha bifitanye isano na yo ryasohotse mu 2018, Umuntu ukurikiranyweho iki cyaha iyo abihamijwe n’urukiko, ahanishwa igifungo kitari munsi y’imyaka itanu (5) ariko kitarenze imyaka irindwi (7) n’ihazabu y’amafaranga y’u Rwanda atari munsi y’ibihumbi magana atanu (500.000 FRW) ariko atarenze miliyoni imwe (1.000.000 FRW).

Ku bijyanye n’icyaha cy’ingengabitekerezo ya Jenoside n’ibyaha bifitanye isano na yo, iri tegeko rireba: Jenoside yakorewe Abatutsi, Jenoside iyo ari yo yose yemewe n’Umuryango w’Abibumbye cyangwa inkiko mpuzamahanga, ndetse n’ibindi byose biganisha kuri Jenoside.

Abantu bamwe bajya bajya impaka bibaza icyo ijambo mu ruhame rishatse kuvuga n’aho umuntu yakorera iki icyaha hakitwa mu Ruhame.

Mu ngingo ya 2 y’itegeko ryerekeranye n’icyaha cy’ingengabitekerezo ya Jenoside n’ibyaha bifitanye isano na yo, itegeko ryakuyeho urujijo risobanura mu buryo bukurikira igihe byitwa ko iki cyaha cyakorewe mu ruhame.

Muri iri tegeko, “uruhame” ni ahantu hateraniye abantu barenze babiri (2). Ibikorwa bikurikira na byo bifatwa nk’ibikorewe mu ruhame:

Ibitangajwe ku rubuga nkoranyabuhanga (Website), Ibitangajwe ku rubuga nkoranyambaga (Social Media), Ibitangajwe mu bitangazamakuru (Radio, Television…), ubutumwa bwohererejwe umuntu (SMS), amajwi yafashwe hakoreshejwe ibyuma byabugenewe ibyo ari byo byose cyangwa amashusho yafashwe hakoreshejwe icyuma gifata amashusho agenda n’ ibindi byose bitangajwe hifashishijwe ikoranabuhanga mu itangazabumenyi n’itumanaho.

Aha nk’uko itegeko ribivuga nukora ibikorwa, byaba mu magambo, mu nyandiko, mu mashusho cyangwa ku bundi buryo, bugaragaza imitekerereze yimakaza cyangwa ishyigikira kurimbura abantu bose cyangwa bamwe muri bo bahuriye ku bwenegihugu, ubwoko, ibara ry’uruhu cyangwa ku idini ukabunyuza muri ziriya nzira itegeko ryita “Uruhame” cyangwa “Public” icyo gihe uzaba ukoze icyaha cy’ingengabitekerezo ya Jenoside, amategeko azagukurikirana.

Urugero utambukije ubutumwa bugaragaza imitekerereze yimakaza cyangwa ishyigikira kurimbura abantu bose cyangwa bamwe muri bo bahuriye ku bwenegihugu, ubwoko, ibara ry’uruhu cyangwa ku idini ukabunyuza kuri Facebook, muri Groupe ya Watsapp, kuri Twitter , YouTube cyangwa ku zindi mbuga nkoranyambaga icyo gihe uzaba ubutambukirije aho itegeko ryita mu ruhame bityo ntibizakuraho ko udakurikiranwa. Uruhame si abantu barenze 2 gusa bateraniye ahantu runaka ahubwo itegeko rinateganya ko ibikorwa bikozwe bikanyuzwa mu muyoboro twabonye hejuru na byo bavuga ko byakorewe mu Ruhame.

Menya ibindi byaha bifitanye isano n’ingengabitekerezo ya Jenoside n’uko bihanwa imbere y’amategeko

1.Guhakana Jenoside (Denial of Genocide)

Umuntu ukorera mu ruhame igikorwa kigamije: kuvuga cyangwa kugaragaza ko Jenoside atari Jenoside; kugoreka ukuri kuri Jenoside agamije kuyobya rubanda, kwemeza ko mu Rwanda habaye Jenoside ebyiri (2), kuvuga cyangwa kugaragaza ko Jenoside itateguwe aba akoze icyaha.

Iyo ahamijwe n’urukiko gukora kimwe mu bikorwa byavuzwe hejuru, ahanishwa igifungo kitari munsi
y’imyaka itanu (5) ariko kitarenze imyaka irindwi (7) n’ihazabu y’amafaranga y’u Rwanda atari
munsi y’ibihumbi magana atanu (500.000 FRW) ariko atarenze miliyoni imwe (1.000.000 FRW).

2. Gupfobya Jenoside (Minimization of Genocide)

Umuntu ugaragariza mu ruhame kandi ku bushake, imyitwarire igamije kugabanya uburemere cyangwa ingaruka za Jenoside, koroshya uburyo Jenoside yakozwemo, kugaragaza imibare itari yo y’abazize Jenoside, aba akoze icyaha.

Iyo ahamijwe n’urukiko gukora kimwe mu bikorwa byavuzwe hejuru, ahanishwa igifungo kitari munsi
y’imyaka itanu (5) ariko kitarenze imyaka irindwi (7) n’ihazabu y’amafaranga y’u Rwanda atari munsi y’ibihumbi magana atanu (500.000 FRW) ariko atarenze miliyoni imwe (1.000.000 FRW).

3. Guha ishingiro Jenoside (Justification of Genocide)

Umuntu ukorera mu ruhame kandi ku bushake igikorwa kigamije gushimagiza Jenoside; gushyigikira Jenoside, no kwemeza ko Jenoside yari ifite ishingiro aba akoze icyaha.

Iyo ahamijwe n’urukiko gukora kimwe mu bikorwa bivugwa ahanishwa igifungo kitari munsi y’imyaka itanu (5) ariko kitarenze imyaka irindwi (7) n’ihazabu y’amafaranga y’u Rwanda atari munsi y’ibihumbi magana atanu (500.000 FRW) ariko atarenze miliyoni imwe (1.000.000 FRW)

4. Kuzimiza cyangwa gutesha agaciro ibimenyetso cyangwa amakuru byerekeye Jenoside.

Umuntu, ku bushake, uhisha, wangiza, usibanganya cyangwa utesha agaciro ibimenyetso cyangwa amakuru byerekeye Jenoside, aba akoze icyaha.
Iyo ahamijwe n’urukiko gukora kimwe mu bikorwa byavuzwe, ahanishwa igifungo kitari munsi y’imyaka irindwi (7) ariko kitarenze imyaka icyenda (9) n’ihazabu y’amafaranga y’u Rwanda atari munsi y’ibihumbi magana atanu (500.000 FRW) ariko atarenze miliyoni imwe (1.000.000 FRW).

5. Kwiba cyangwa kwangiza imibiri y’abazize Jenoside

Umuntu ukoze kimwe mu bikorwa bikurikira : kwiba imibiri y’abazize Jenoside , gutesha agaciro cyangwa kwangiza ku bushake, imibiri y’abazize Jenoside aba akoze icyaha.
Iyo ahamijwe n’urukiko gukora kimwe mu bikorwa byavuzwe hejuru, ahanishwa igifungo kitari munsi y’imyaka icumi (10) ariko kitarenze imyaka cumi n’itanu (15) n’ihazabu y’amafaranga y’u Rwanda atari munsi ya miliyoni imwe (1.000.000 FRW) ariko atarenze miliyoni ebyiri (2.000.000 FRW).

6. Gusenya, konona cyangwa gutesha agaciro urwibutso rwa Jenoside cyangwa ahashyinguye imibiri y’abazize Jenoside

Umuntu ukora ku bushake kimwe mu bikorwa bikurikira: gusenya cyangwa konona urwibutso rwa Jenoside cyangwa ahashyinguye imibiri y’abazize Jenoside, gusenya cyangwa konona ibimenyetso by’urwibutso rwa Jenoside cyangwa ahashyinguye imibiri y’abazize Jenoside, gutesha agaciro urwibutso rwa Jenoside cyangwa ahashyinguye imibiri y’abazize Jenoside aba akoze icyaha.

Iyo ahamijwe n’urukiko gukora kimwe mu bikorwa byavuzwe hejuru , ahanishwa igifungo kitari munsi y’imyaka icumi (10) ariko kitarenze imyaka cumi n’itanu (15) n’ihazabu y’amafaranga y’u Rwanda atari munsi ya miliyoni imwe (1.000.000 FRW) ariko atarenze miliyoni ebyiri (2.000.000 FRW).

7. Guhohotera uwacitse ku icumu rya Jenoside

Umuntu ugira imyitwarire cyangwa ukora igikorwa kigamije gutoteza, gutera ubwoba, gutesha agaciro, kwigamba, gushinyagurira, gutuka cyangwa kwangiza umutungo w’umuntu bishingiye ko ari uwacitse ku icumu rya Jenoside, aba akoze icyaha.

Mu bihe byo kwibuka inzego z’umutekano n’izishinzwe iperereza zijya zakira ibibazo by’abacitse ku icumu batemewe amatungo, imyaka n’ibindi bijyanye n’imitungo yabo yangijwe. Abakoze ibyo iyo bigaragaye ko babikoze ku bushake bashaka kubababaza cyangwa kumusesereza (Animus Nocendi) baba bakoze icyaha.

Ukurikiranyweho icyaha cyo guhohotera uwacitse ku icumu iyo ahamijwe n’urukiko kimwe mu bikorwa byavuzwe hejuru ahanishwa igifungo kitari munsi y’imyaka itanu (5) ariko kitarenze imyaka irindwi (7) n’ihazabu y’amafaranga y’u Rwanda atari munsi y’ibihumbi magana atanu (500.000 FRW) ariko atarenze miliyoni imwe (1.000.000 FRW).

Guhana icyaha cy’ingengabitekerezo ya Jenoside n’ibyaha bifitanye isano na yo ntabwo bireba abantu gusa, binareba ibigo, imitwe ya politiki cyangwa indi miryango.
Ibyaha bivugwa iyo babikoze bihanishwa ibihano by’ihazabu, iseswa cyangwa kubuzwa gukorera mu Rwanda.

Prof. Ibrahim Gambari

Prof. Ibrahim Gambari, ubu uyobora abakora mu biro by’Umukuru w’igihugu cya Nigeria Muhammadu Buhari, mu 1994, yari ahagarariye igihugu cye cya Nigeria mu kanama ka LONI gashinzwe umutekano ku buryo budahoraho, nyuma aza no kukayobora.

Mu gihe inama ya LONI yari iteranye bariho bajya impaka niba bakwiye kugabanya umubare w’abasirikare boherejwe na LONI barinda amahoro mu Rwanda, ndetse bakanahindura ubutumwa bafite mu Rwanda. Prof. Gambari yabwiye abari muri iyo nama ko uwo mwanzuro bagiye gufata uzateza ingaruka zikomeye cyane.

Prof. Gambari ahora ashimirwa kubera ibyo yakoze we na Colin Keating wo muri New Zealand, na Karel Kovanda wo muri Czech Republic, kuko batahwemye gusaba ko hagira igikorwa n’ubwo ibihugu bikomeye nk’u Bwongereza, Amerika byari bifite ubushobozi bwo kuba bagira icyo bakora ariko bagakomeza kwinangira.

Mu Ijambo Perezida wa Repubulika y’u Rwanda, Paul Kagame, yavugiye kuri Kigali Arena tariki 7 Mata 2021, ubwo yatangizaga kwibuka ku nshuro ya 27 Jenoside yakorewe Abatutsi mu 1994, yagarutse kuri Prof. Gambari n’igihugu cye cya Nigeria, avuga ko u Rwanda rutazibagirwa umusanzu wabo mu guhagarika Jenoside yakorewe Abatutsi.

Perezida Kagame yavuze ko mu bari bafite ikibazo cyo kwita ibyaberaga mu Rwanda Jenoside, harimo n’uwari Umunyamahanga Mukuru wa LONI muri icyo gihe. Ariko ibihugu bimwe ndetse n’ababihagarariye muri LONI barahaguruka basaba ko ibirimo kuba byakwitwa uko bikwiye kwitwa.

Yagize ati, “Kimwe muri ibyo bihugu, ni igihugu cyo muri Afurika tuzahora twishimiye kukita inshuti nziza, icyo gihe cyari gihagarariwe n’Umugabo nibuka witwa Ibrahim Gambari wa Nigeria. Nigera yarahagurutse iravuga iti, Oya, hari ikibazo, kandi tugomba kukita uko kiri”.

Perezida Kagame yongeyeho ati “Prof.Gambari yari ahari kandi tuzahora dushimira igihugu cya Nigeria”.

Perezida Kagame aherutse gushima Prof. Gambari

Prof. Gambari wasimbuye Keating wa New Zealand ku buyobozi bw’akanama ka LONI gashinzwe umutekano, yibukwa nk’umuntu wasabye LONI kuba yagira icyo ikora ku byaberaga mu Rwanda.

Gambari na Keating bari bahuriye ku kibazo cyo kubabazwa no kubona nta cyo LONI ikora, nk’uko Keating yabivuze tariki 20 Mata 1994, mu gihe ubwicanyi bwari bukabije, ati “Birakomeye gusobanura uguceceka kw’akanama gashinzwe umutekano".

Gambari, Keating n’abandi bifuzaga ko LONI yatabara mu Rwanda, bisanze bahanganye n’abagize ako kanama k’umutekano bahoraho kandi abo ni bo bafataga ibyemezo. Uwari uhagarariye u Bwongereza muri LONI ku buryo buhoraho, Sir David Hannay yavuze ko kurinda Abasivili mu Rwanda “bidashobora kugerwaho gusa.” Uwo mudipolomate w’u Bwongereza, yavuze ko LONI idafite ubushobozi bwo gutabara mu Rwanda.

Mu kiganiro Prof.Gambari yatanze mu 2004, ubwo yari Umunyamabanga wungirije, akaba n’umujyanama wihariye w’Umunyamabanga Mukuru wa LONI ku bijyanye na Afurika, Prof. Gambari yavuze ko icyo gihe, abagize akanama ka LONI ku buryo budahoraho (non-permanent members) akenshi bafatwaga nk’abashyitsi, ku buryo n’ibitekerezo batangaga bitahabwaga agaciro nk’ibya ba bandi batanu bahoraho mu kanama ka LONI gashinzwe umutekano.

Prof. Gambari yagaragaje ko muri icyo gihe u Rwanda rutari ku rutonde rw’ibyo Amerika ihaye agaciro, kuko uwari uyihagarariye icyo gihe ari we Madeleine Albright, yari arangamiye cyane ibyaberaga muri Iraq no mu Burasirazuba bwo hagati.

Prof. Gambari yagaragaje ko icyo gihe bimwe mu bihugu byari bishyize imbere inyungu zabyo bwite, ku buryo u Rwanda ntacyo rwari ruvuze kuri byo.

N’ubwo abagize akanama ka LONI gashinzwe umutekano ku buryo budahoraho nta jambo rikomeye babaga bafite, ariko Prof. Gambari yasobanuye ko ibimenyetso bihari ndetse n’ubutumwa (Fax) bwoherejwe n’uwari uyoboye Ingabo z’Umuryango w’Abibumbye zari mu Rwanda (UNAMIR) General Dallaire, bigaragaza ko hari ubwoko burimo kwicwa kandi ku buryo bwateguwe.

Byafashe ibyumweru ndetse n’amezi kugira ngo ibyo bihugu bikomeye, byicare byige uko ibyaberaga mu Rwanda bikwiye kwitwa, niba byakwitwa Jenoside cyangwa se bitakwitwa gutyo, ariko n’ubwo byari bimeze nabi ubwicanyi bukomeje, ntibashatse kugira icyo bakora ngo bahagarike ubwicanyi.

Prof. Gambari abajijwe impamvu igihugu cye kitatabaye mu Rwanda n’ubwo ibindi bihugu byari byanze, yavuze ko nta bushobozi igihugu cye cyari gifite bwo gutabara ku buryo bwihuse nk’uko byari bikenewe. Gusa ubu ngo iyo asubije amaso inyuma asanga Afurika hari icyo yari gukora mu guhagarika Jenoside, itanagombye gutegereza LONI cyangwa ibihugu bikomeye.

Ibyo Prof. Gambari yagiye akora mu bihe bitandukanye

Prof. Gambari, ubu afite imyaka 76. Afatwa nk’umuntu ukomeye bitewe n’imyanya yagiye akoraho mu bihe bitandukanye. Yabaye Minisitiri w’Ububanyi n’Amahanga hagati mu myaka ya 1984-1985, ni we Munya-Nigera wahagarariye Nigeria muri LONI igihe kirekire mu 1990-1999.

Prof. Gambari yavukiye mu Burengerazuba bwa Nigeria (Kwara State). Prof. Gambari kandi ni igikomangoma kuko akomoka mu muryango wa ‘Ilorin Emirate ruling house’.

Prof. Gambari kandi yabaye umuyobozi mukuru w’icyitwa ‘The Nigerian Institute of International Affairs (NIIA)’ n’ibindi byinshi bitandukanye yabereye umuyobozi mu rwego rwa Politiki y’ububanyi n’amahanga.

Mukanoheli Josée ashima Leta y’Ubumwe yamwomoye ibikomere

Ni umugore ugaragara nk’aho akiri muto ndetse bamwe bagakeka ko ari umukobwa, gusa bagatangazwa n’uko afite umwana w’imyaka14 aho avuga ko ubuzima bwiza afite abikesha Leta y’u Rwanda yamukuye mu bwigunge, imufasha gukira ibikomere yatewe na Jenoside.

Uwo mubyeyi w’abana babiri (Umuhungu n’umukobwa), yavukiye mu Murenge wa Busogo mu Karere ka Musanze mu 1984, ubu atuye mu kagari ka Kigombe mu Murenge wa Muhoza muri ako karere n’ubundi.

Avuga ko nubwo yari akiri muto cyane yiga mu mashuri abanza, mu mwaka wa1993 ngo nibwo yatangiye kubona itotezwa ry’Abatutsi, aho mu ishuri buri wese yabaga afite ifishi igaragaza ubwoko, Abatutsi bakagirirwa nabi.

Ati “Impamvu natangiye kubona ko ubwoko bw’Abatutsi bufite ikibazo, twigaga dufite amafishi y’ubwoko bwacu, rimwe mbere yo kwiga mwarimu agahagurutsa buri bwoko, Abahutu nibo bahagurukaga mbere kubera ko bari benshi”.

Arongera ati “Mu ishuri ryacu nta Mutwa wari urimo, Abatutsi twari batatu tugahaguruka dufite ipfunwe kuko turi bake, ariko tukibaza impamvu baduhagurutsa bikatuyobera”.

Avuga ko uko iminsi yagendaga ihita bakorerwaga ivangura n’iyicarubozo, ndetse mbere y’icyo gihe ngo ubwo Rwigema yaraswaga ngo ku ishuri bakoraga urugendo rwo kujya kumushyingura, aho bafataga isanduku yuzuye imitumba y’insina bakayikorera abana b’Abatutsi.

Ati “Ikindi nibuka, hari ikintu bitaga kujya guhamba Rwigema, nitwe bakoreraga isanduku yuzuye imitumba abandi bakadushorera tugakora urugendo rurerure twikoreye iyo sanduku. Ni umuhango wabagaho kenshi, rimwe twamenya ko bikorwa tugasiba, babona ko twasibye bagahindura umunsi bakongera bakadukorera ya sanduku ari naho badushoreraga bagenzi bacu badukubita”.

Mukanoheli avuga ko batigeze bahabwa agahenge aho n’abana biganaga bakomeje kubaha akato bababwira amagambo y’ivangura.

Ati “Waratambukaga abanyeshuri mwigana bati dore Umututsi, dore Umututsi, cyangwa se mwarimu akavuga ati inyenzi nihaguruke ijye ku kibaho gukosora, tukajyayo nyine ukabona ko bari kugutoteza, ntabwo twari tuzi impamvu yabyo”.

Avuga ko ubwo bakomezaga gutotezwa ku ishuri ngo hari ubwo yageraga mu rugo akabaza ababyeyi be icyo Abatutsi bazira, rimwe akababwira ko atazasubira ku ishuri ariko ababyeyi be ngo bakamusubiza ko agomba kwihangana bakamusobanurira ko ntaho ataniye n’abandi ko bose ari Abanyarwanda.

Avuga ko batangira guhigwa muri uwo mwaka wa 1993, ngo bagiye kubona, babona Burugumesitiri witwaga Kajerijeri ari kumwe na Burigadiye bari baturanye, aho ngo bavuze ko bashaka abantu bavukana na Se wari ku kazi aho yari umuganga mu kigo Nderabuzima cya Busogo.

Ngo icyo gihe batwaye abagabo babiri bavukanaga na se, ariko ngo abaturanyi bakababwira ko uwo batwaye atagaruka, nibwo koko ngo bababuze burundu, aho ngo babwiwe ko bishwe bajugunywe mu mugezi.

Ngo muri icyo gihe bakomeje guhigwa ariko ngo bahurizwa ahantu hamwe i Busogo aho barindwaga na MUNUAR bari kumwe n’Abatutsi bari baturutse muri Kinigi na bo bahigwaga.

Nyuma ngo umutekano wabo wakomeje kuba muke, bajyanwa mu kigo cya ISAE, aho bakomeje guterwa n’abagizi ba nabi batazi, babonye bikomeye basubizwa i Busogo aho barindirwaga mbere.

Muri uwo mwaka wa 1993, ngo bamwe mu baturanyi babo b’Abahutu bababazwaga n’ibyo bakorerwaga ngo babahaga amakuru bababwira ko bihisha kuko bagabwaho igitero, uko bagendaga bihisha ngo icyo gitero koko cyabagabweho n’abari bagambiriye kubasahura, ari nako babatera ibyuma.

Ngo ku ikubitiro bateye icyuma umugore umwe wari nyinawabo mu muryango, baramuhusha gifata akaboko n’umwana yari ahetse, uwo mwana ahita apfira mu mugongo, batema mu mutwe n’undi mukobwa ari naho babonye bikomeye bagahunga bakubitwa ibibatira by’imihoro.

Ati “Badukubita ibibatira by’imihoro twahunze tuvuga tuti mutubabarire ntabwo tuzongera kuba Abatutsi, ntabwo tuzongera kuba Abatutsi, nibwo babonye tugiye bahita bajya gusahura, ndebye ku ruhande mbona Mama wacu uko bakamuteye icyuma ku kaboko cyagakase ndetse bamwicira n’umwana mu mugongo. Nibwo nahise muzirika agatambaro kuri ako kaboko kari kenda gucika, twururutsa na wa mwana bari bamwiciye mu mugongo duhungira mu masaka”.

Mukanoheli avuga ko bigiriye inama yo kujya mu ivuriro rya Busogo aho Se yakoraga, bitabwaho bavura inkomere, ariko uwo mubyeyi wari wakomeretse cyane ku kaboko ajya kuvurirwa ku Nyundo abifashijwemo na Nyirasenge wari umubikira.

Avuga ko uwo mwaka wa 1993 wamubereye mubi, ku buryo ngo nta cyiza yigeze awubonamo, gusa ku bw’amahirwe ngo mu ntangiro z’umwaka wa 1994, ngo uwo nyirasenge wari umubikira yamujyanye ku Nyundo (Rubavu) aba ariho ajya kurererwa.

Ku itariki ya 07 Mata 1994 saa yine z’igitondo umuryango we wose warishwe

Mukanoheli avuga ko nyuma y’amasaha make indege ya Habyarimana ihanuwe, ngo umuryango we wose w’abasaga 20 bari bamaze kuwica, aho ayo makuru yayabwiwe aba ku Nyundo.

Avuga ko ubwo yabaga ku Nyundo yabashije guhungira mu gihugu cya Kongo aba ari we wenyine urokoka mu muryango hamwe n’uwo nyirasenge w’umubikira.

Atahutse ava mu buhungiro, ngo nta handi yari kuba kuko iwabo hari harahindutse amatongo, nibwo ngo yagiye kurererwa mu kigo cy’imfubyi cyashinzwe mu Karere ka Musanze n’uwo nyirasenge.

Avuga ko aho bari batuye ubu nta kimenyetso na kimwe kigaragaza ko higeze gutura abantu, kuko inzu zose zari zashenywe nyuma y’uko umuryango we wose bawica.

Ati “Nakurikiraga basaza banjye bane, bose barabishe na Papa na Mama. Mu muryango wanjye bishemo abantu 20, njye byabanje kungora kubyumva ko abantu bose bakwicwa umuryango wose ugatikira”.

Arongera ati “Amasambu yacu yose aracyahari naratashye ngeze muri ayo matongo, ngenda mbaza abaturanyi nti harya hano hari kwande? Kuko inzu zose bari bazisenye, ubu ni imirima ntiwamenya ko higeze inzu”.

Ati “Nyuma ya Jenoside amsenge wacu w’umubikira, Christine Faïda na we wari warokotse, yashinze ikigo cy’imfubyi ashakisha abamukomokaho barokotse bose ambonye hamwe n’izindi mfubyi anshyira mu kigo cy’imfubyi, nyuma y’uko ibigo by’imfubyi byahagaritswe adushakira inzu nini aba ariyo tubamo araturera turiga”.

Avuga ko uko yagendaga akura yagiye agarura icyizere cy’ubuzima, nyuma y’uko yari amaze kubura umuryango we wose yitabwaho na nyirasenge.

Ngo nibwo yihaye intego ati “Nahise numva ko ngomba kuba mukuru nkiga ngatsinda ngashimisha masenge wadusigaranye”.

Yakomeje amashuri yisumbuye, ayasoreza muri APICUR, ku bw’amahirwe ahita abona akazi mu bitaro bya Ruhengeri.

Muri 2009, nibwo yashakanye na Karisa Afazadhi, ariko yiyemeza gukomeza amashuri ye muri Kaminuza ya INES-Ruhengeri aho yize yirihira, ati “Nagombaga kwiga byanze bikunze kandi nkaniyishyurira, numvaga nshaka gutera imbere vuba”.

Mu butumwa bw’uwo mubyeyi arashimira Imana yamufashije agakira ibikomere, aho ashimira n’Ubuyobozi bwiza bwitaye ku barokotse Jenoside.

Ati “Leta ntacyo itadukoreye, hari ubwo mpura n’ikibazo nakwibuka ababyeyi banjye nti barihuse, Leta turayishimira ni umubyeyi, iyo tugira ubuyobozi bubi ntabwo twari kuba abantu twari guhora mu gahinda no mu maganya. Ndasaba Abarokotse Jenoside bagifite ibikomere kwiremamo icyizere bakumva ko bagomba kubaho kandi iyo tubayeho tumeze neza, duseka, ababyeyi bacu bibageraho bakishima”.

Kugeza ubu Mukanoheli, ni umukozi w’ibitaro bya Ruhengeri ushinzwe itumanaho no guhuza abaturage n’ibitaro (Public Relations Officer).

Umuhango watumiwemo abahagarariye abandi mu rwego rwo kubahiriza ingamba zo kwirinda icyorezo cya Koronavirusi waranzwe no gucana urumuri rw’icyizere, gushyira indabo ahari ikimenyetso cyo kwibuka inzirakarengane zazize Jenoside yakorewe Abatutsi, ubuhamya n’ubutumwa bwa bamwe mu bayobozi bitabiriye iyo gahunda.

Perezida w’Umuryango w’Abanyarwanda baba muri Senegal, Patrick Karamaga watanze n’ubuhamya nk’uwacitse ku icumu rya Jenoside yakorewe Abatutsi, yagarutse ku mateka mabi yo gukwirakwiza urwango mu Banyarwanda banahereye mu mashuri y’abana bato, ashima by’umwihariko ingabo zari iza FPR Inkotanyi zahagaritse Jenoside yakorerwaga Abatutsi, zikabohora Igihugu, anasaba ko Abanyarwanda bakomeza gutahiriza umugozi umwe mu guteza imbere igihugu, kandi bagakomera ku bumwe bwabo.

Ambasaderi w’Igihugu cya Gabon muri Senegal, Michel Regis ONANGA NDIAYE wavuze mu izina ry’Abahagarariye Ibihugu n’Imiryango Mpuzamahanga muri Senegal, yagarutse ku mwanzuro w’Inteko Rusange y’Umuryango w’Abibumbye mu 2018 yemeje ko itariki ya 7 Mata ya buri mwaka ari umunsi mpuzamahanga wo kuzirikana Jenoside yakorewe Abatutsi mu Rwanda mu 1994.

Abagize uruhare muri Jenoside yakorewe Abatutsi bakihishahisha hirya no hino bakurikiranwa n’ibihugu bihishemo kimwe n’abahakana n’abapfobya Jenoside yakorewe Abatutsi. Yagaragaje ko nyuma y’imyaka 27 Jenoside ihagaritswe, Abanyafurika bose batewe ishema n’ibyiza u Rwanda rwagezeho muri icyo gihe, muri gahunda yo kubaka ubumwe bw’Abanyarwanda na gahunda z’iterambere muri rusange. Yagarutse ku ijambo rya Nyakubahwa Perezida Paul KAGAME yavuze mu gihe hibukwagwa ku nshuro ya 25 Jenoside yakorewe Abatutsi aho yagize ati : « Mu 1994 nta cyizere cyariho, hari umwijima gusa, ariko uyu munsi hari urumuri, twapfutse ibikomere, ibyo byatumye turushaho kuba umwe kandi ku buryo buhoraho. U Rwanda rwabaye umuryango umwe ».

Mu bandi batanze ubuhamya harimo Abanyasenegal barimo Mabousso THIAM, washakanye n’Umunyarwandakazi wagaragaje uko na we itotezwa ry’Abatutsi na Jenoside yabakorewe byamugizeho ingaruka zikomeye kuko Jenoside yahitanye benshi mu bo mu muryango yashatsemo n’inshuti nyinshi. Yagaragaje ko ubu u Rwanda ari Igihugu cyubashywe, kihesheje agaciro kandi cyagaruriye Abanyarwanda icyizere cyo kubaho.

Undi watanze ubuhamya ni Eugénie Rokhaya AW N’DIAYE, wabaye mu Rwanda akaba yagarutse ku kababaro n’agahinda abagore batewe na Jenoside yabagize abapfakazi ndetse ikanahitana abana babo. Yagarutse ku butwari bwabo ndetse n’uruhare rwabo mu kubaka umuryango nyarwanda nyuma ya Jenoside yakorewe Abatutsi.

Uhagarariye Guverinoma ya Senegal muri gahunda yo Kwibuka ku nshuro ya 27 Jenoside yakorewe Abatutsi, HABIB Leon NDIAYE, Umunyamabanga Mukuru muri Minisiteri y’Umuco n’Itangazamakuru yagaragaje ko Guverinoma ya Senegal yifatanyije n’Abanyarwanda muri iki gihe bibuka Abanyarwanda b’inzirakarengane basaga miliyoni bishwe muri Jenoside yakorewe Abatutsi kubera ubuyobozi bubi. Yashimye uko Abanyarwanda bishatsemo ibisubizo nyuma ya Jenoside yakorewe Abatutsi kandi agaragaza ko Senegal izakomeza gushimangira umubano mwiza uri hagati y’ibihugu byombi.

Ambasaderi w’u Rwanda muri Senegal, Jean Pierre Karabaranga, yashimye cyane umubano uri hagati y’u Rwanda na Senegal, anashima ko icyo gihugu cyanahaye ahari ikimenyetso cyo kwibuka abishwe muri Jenoside yakorewe Abatutsi. Yasabye abantu bose gukomeza kwamagana abakirangwa n’imvugo n’ibikorwa byo guhakana no gupfobya Jenoside yakorewe Abatutsi kimwe n’abakwirakwiza ingengabitekerezo ya Jenoside barimo bamwe mu Banyarwanda basize bahekuye u Rwanda na bamwe mu Banyamahanga babibafashamo.

Ni igikorwa cyabereye ku rwibutso ruri ku cyicaro cya REG kiri mu Karere ka Nyarugenge mu Mujyi wa Kigali.

Ni igikorwa cyabimburiwe no gushyira indabo kuri urwo rwibutso rw’abari abakozi ba Electrogaz bazize Jenoside, aho abayobozi ba REG na WASAC bafashe umwanya wo kubunamira.

Umuyobozi wa WASAC Eng. Alfred Dusenge Byigero, yavuze inzira y’umusaraba Abatutsi banyuzemo mu gihe cya Jenoside.

Yanibukije abitabiriye uyu muhango ko Abanyarwanda bazakomeza kwibuka no kunamira inzirakarengane zasize ubuzima muri Jenoside yakorewe Abatutsi mu 1994.

Eng. Byigero yanavuze ko buri mwaka WASAC izakomeza kugenera inkunga abarokotse Jenoside yakorewe Abatutsi.

Ati “Uyu mwaka by’umwihariko Umudugudu w’abacitse ku icumu mu Karere ka Ruhango wahawe amazi meza kandi tuzakomeza gufasha imiryango y’abacitse ku icumu buri mwaka mu rwego rwo kubaha agaciro bambuwe n’abicanyi.”

Umuyobozi w’inama y’ubutegetsi muri REG, Dr. Didacienne Mukanyiligira, yatangaje ko ibyabaye mu Rwanda mu gihe cya Jenoside yakorewe Abatutsi atabona amagambo abivugamo kuko biteye agahinda ariko na none akizera ko Jenoside itazongera kubaho ukundi.

Yihanganishije imiryango y’abishwe muri Jenoside yakorewe Abatutsi mu 1994 ndetse anashimira ubuyobozi bwa REG kubera uruhare bugaragaza mu kwimakaza umuco wo kunga ubumwe by’umwihariko mu bakozi.

Dr. Mukanyiligira yasabye buri wese ariko kurwanya ingengabitekerezo ya Jenoside ahubwo bakimakaza indangagaciro z’ubumwe n’ubwiyunge.

Agira ati “Ndasaba buri wese guhora arwanya ingengabitekerezo ya Jenoside, ahubwo muharanire kugira indangagaciro y’ubumwe n’ubwiyunge. Twiteguye gutanga inkunga yacu mu gutera inkunga abacitse ku icumu mu rwego rwo kubafasha gukira ibikomere basigiwe na Jenoside.”

Mu kwibuka ku nshuro ya 27 Jenoside yakorewe Abatutsi, REG yagejeje amashanyarazi ku buntu ku batujwe mu mudugudu w’icyitegererezo wa Muhanga watujwemo abacitse ku icumu, mu gihe WASAC yo yatanze amazi meza ku ngo 45 mu mudugudu wubakiwe abacitse ku icumu mu Karere ka Ruhango.

Ibi bigo byombi kandi bikaba byashyikirije umuryango IBUKA amafaranga y’u Rwanda Miliyoni enye (Frw 4,000,000) azafasha mu bikorwa byo kwibuka Jenoside yakorewe Abatutsi mu minsi 100.

Moussa Faki Mahamat yayoboye ibikorwa byo kwibuka ku cyicaro cy’Umuryango wa Afurika yunze Ubumwe

Perezida wa Komisiyo y’Umuryango wa Afurika yunze Ubumwe, Moussa Faki Mahamat, yatangaje itangira ry’igihe cy’icyunamo mu rwego rwo kwibuka ku nshuro ya 27 Jenoside yakorewe Abatutsi mu Rwanda.

Yagize ati “Afurika yunze Ubumwe, hamwe na Guverinoma y’u Rwanda, uyu munsi turibuka Jenoside yakorewe Abatutsi nk’uko dusanzwe tubikora guhera muri 2010. Turashaka kwibutsa Abanyafurika ndetse n’Isi yose, ikintu kibabaje cyane cyabaye mu Rwanda, kandi ko bitagomba kuzibagirana.”

Umunyabanga Mukuru w’Umuryango w’Abibumbye (UN), António Guterres, yavuze ko Jenoside yakorewe Abatutsi mu Rwanda iri mu bintu biteye ubwoba byabaye mu mateka ya muntu mu myaka ya vuba aha.

Yagize ati “Mu rwego rwo gukumira ko ayo mateka mabi yazisubiramo, tugomba kurwanya inzangano, ahubwo tugaharanira ko habaho kubaha ku buryo bwuzuye abagize umuryango w’abatuye Isi bose.”

Josep Borrell Fontelles, Visi Perezida wa Komisiyo y’Ubumwe bw’Ibihugu by’u Burayi yasabye Abanyarwanda gukomeza kurwanya ingaruka za Jenoside yakorewe Abatutsi mu 1994.

Yagize ati “Turashimira u Rwanda n’abaturage barwo ku muhate wo kungera guhaguruka bahereye ku busa, bakubaka igihugu, bagaharanira ubwiyunge byose bigamije kugera ku bumwe bw’Abanyarwanda.”

Ambasaderi w’u Butaliyani mu Rwanda, Massimiliano Mazzanti na Madamu, bashyize indabo ku rwibutso rwa Jenoside yakorewe Abatutsi rwa Kigali ruri ku Gisozi

Umunyamabanga Mukuru w’Umuryango w’Ibihugu bivuga Igifaransa (OIF ), Louise Mushikiwabo, na we mu izina ry’uwo muryango ahagarariye yagize ubutumwa atanga mu rwego rwo kwifatanya n’abarokotse Jenoside yakorewe Abatutsi.

Mushikiwabo yavuze ko mu myaka 27 ishize, azirikana imiryango y’ababuze ababo muri Jenoside yakorewe Abatutsi kuko bibuka ibyaye nk’ibyabaye ejo.

Yagize ati “Uyu mwaka, ndashimira ibikorwa byose hagamijwe ko ukuri kumenyekana, kuko bidufasha gukomeza kunamira abacu… reka dukomeze twibuke, ariko turanarwanye uburyo ubwo ari bwo bwose bwo kuyihakana. Imyaka irahita indi igataha, ariko ukuri gukomeza kuba ukuri, kandi ntikuzakurwaho n’ikintu icyo ari cyo cyose cyashaka gusibanganya ayo mateka ”.

Anne Hidalgo, Umuyobozi w’Umujyi wa Paris mu Bufaransa, yavuze ko abazize Jenoside yakorewe Abatutsi mu 1994 batazibagirana.

Yagize ati “Uyu munsi mu gitondo, mu busitani bwahariwe Kwibuka (Jardin de la Mémoire) muri ‘Parc de Choisy’, twibutse Jenoside yakorewe Abatutsi mu myaka 27 ishize. Paris ntizibagirwa abagore, abagabo, abana bishwe kuko bavutse ari Abatutsi .”

Intumwa ya Suwede mu Rwanda, Amb Johanna Teague yagize ati “Twunamira abazize Jenoside yakorewe Abatutsi binyuze mu kwibuka no kwigira ku mateka. Ntituzibagirwa. Twifatanyije n’u Rwanda uyu munsi n’igihe cyose, twibuka tuniyubaka.”

Sophie Wilmès, Minisitiri w’Intebe w’u Bubiligi wungirije akaba na Minisitiri w’Ububanyi n’Amahanga, yavuze ko igihugu cye kifatanyije n’u Rwanda ku munsi mpuzamahanga wo kuzirikana Jenoside yakorwe Abatutsi.

Yagize ati “U Bubiligi bwunamiye inzirakarengane zishwe muri Jenoside. Igihugu cyacu giharanira ko ibyo byabaye bitazongera kubaho ukundi. Kurwanya umuco wo kudahana ni ikintu cy’ingenzi cyane”.

Massimiliano Mazzanti, Intumwa y’u Butaliyani yagize ati “ Ni ikintu kimwe mu biteye ubwoba mu mateka y’imvururu zishingiye ku moko kandi kiba ku buryo bwihuse cyane”.

Ambasaderi wa Leta zunze ubumwe za Amerika mu Rwanda, Peter Vrooman, abinyujije kuri Twitter yavuze ko Ambasade ya Amerika yibuka umukozi wayo wishwe muri Jenoside ndetse n’umugore we.

Yagize ati “Turibuka Marc Bizimungu wakoraga muri Ambasade ya USA i Kigali, akora nk’umushoferi, akanasudira guhera mu 1985 kugeza mu 1994. Marc yishwe kuko yari Umututsi ndetse n’umugore we Devote Mukamana, ariko abana babo babiri icyo gihe bari bato, barayirokotse”.

Umunyamabanga Mukuru w’Umuryango wa Afurika y’Iburasirazuba (EAC), Peter Mathuki, na we yohereje ubutumwa bwo kwifatanya n’Abanyarwanda.

Yagize ati “Twifatanyije n’Abanyarwanda n’ubuyobozi bw’u Rwanda mu Kwibuka ku nshuro ya 27 Jenoside yakorewe Abatutsi. Ibi bizatuma duharanira u Rwanda ndetse n’Akarere ka EAC byiganjemo amahoro n’uburumbuke”.

Ubuhamya bwanditse mu bitabo, ubw’amajwi cyangwa amashusho bwose busigasira amateka ya Jenoside

CNLG ivuga ko yatangiye gahunda yo gukusanya ubutumwa bunyuranye, bwaba ubw’abarokotse cyangwa abagize uruhare mu gutegura no gushyira mu bikorwa Jenoside, kuko bwose buba bubitse amateka n’ibimenyetso bikomeye.

Donatien Nikuze, Umushakashatsi muri CNLG, mu kiganiro na Kt Radio yavuze ko ubuhamya bushobora gutangwa n’abarokotse cyangwa n’abagise uruhare muri Jenoside.

Yagize ati “Ubuhamya kuri Jenoside bushobora gutangwa n’impande zombi. Abarokotse bavuga uko byagenze, aho bihishe, ababo babuze n’ibindi, ariko kandi n’abagize uruhare, batinyutse gutanga ubuhamya ku buryo bitwaye mu gihe cya genoside, ni ikimenyetso n’amateka bikomeye, byafasha n’abahakana ko Jenoside yabayeho, kujya babyisomera mu buhamya bw’abayikoze”.

Kuri ubu hamaze gukorwa ibitabo byinshi birimo bumwe mu buhamya bagiye bakusanya, ndetse buri mwaka CNLG ikaba isohora igitabo cy’ubuhamya.

Nikuze avuga ko buri muturage wese ufite ubuhamya yumva ashaka gutanga kuri Jenoside, yabikora.

Ati “Aha ntawe uhejwe mu gutanga ubuhamya. Umuntu yabikora ku buryo bumworoheye, inyandiko, amajwi, amashusho, akabigeza ku bakozi ba CNLG bakorera hirya no hino mu turere, nabo bakabukusanya, bukabikwa neza”.

Yakomeje avuga ko uko imyaka ihita, ari ko abantu babonye Jenoside bagenda basaza, bityo hakaba hakenewe ubuhamya bwabo kuko bizafasha n’abazavuka nyuma kumenya neza uko Jenoside yagenze, babyumva ababibonye babyivugira.

Ibitabo birimo inyandiko n’ubuhamya bwa bamwe kuri Genoside, bishobora gusomwa na buri wese ndetse abakeneye gukora ubushakashatsi kuri Genocide bakaba babyifashisha. Ibi bitabo, biboneka mu isomero rusange rya CNLG, kandi kubisoma nta kiguzi bisaba.

Urwibutso rushya rwa Nyundo

Umuyobozi w’Akarere ka Rutsiro, Emmerance Ayinkamiye, avuga ko icyo gikorwa kizaba tariki ya 9 Mata 2021, aho imibiri 147 yari mu rwibutso rwa Kivumu izimurwa ikajyanwa mu rwibutso rwa Nyundo.

Niyonsenga Philipppe ukuriye Ibuka mu Karere ka Rutsiro avuga ko kwimura iyo mibiri ivanwa mu Rutsiro ikajyanwa i Rubavu byasabwe n’abarokotse Jenoside yakowe abatutsi batuye mu cyahoze ari Komini Nyamyumba, ibyo bikaba byiyongeyeho gahunda ya Leta yo gushyira mu nzibutso ziteguye neza kandi zikurikiranwa.

Agira ati "Twahisemo kuyijyana mu Rwibutso rwa Nyundo kuko rutunganyije, ikindi abarokotse Jenoside yakowe abatutsi batuye i Kivumu na Nyamyumba ni bo babyifuje kuko biborohera mu gihe Akarere ka Rutsiro katarabona urwibutso rwako rutarubakwa, bagasanga imibiri yimuriwe ahazubakwa urwibutso rw’Akarere hababera kure".

Niyonsenga avuga ko urwibutso rwa Kivumu rufite amateka kandi ko hazashyirwa urwibutso rw’amateka nubwo imibiri izaba yahakuwe.

Niyonsenga avuga ko Kivumu ifite amateka kubera ubwicanyi bwahakorewe bitewe na bariyeri zari zihari.

Ati "Hariya hantu hafite amateka, niho hari umuhanda uva ku Kibuye uza ku Gisenyi, hari Abatutsi bawukoresheje mu guhunga barahafatirwa kuko hari bariyeri zikomeye bakahicirwa. Ikindi hari abapadiri bahigwaga biciwe kuri Paruwasi ya Kivumu, barimo Padiri Gatore Thadée na Padiri Nsengiyumva Venuste, bose baguye kuri paroisse gatorika ya Kivumu".

Akomeza avuga ko hari bariyeri yiciweho abantu, ariko hari n’izindi bariyeri eshatu zari kuri paruwasi, na ho hiciwe abantu benshi.

Amwe mu mazina y’interahamwe zayoboye abandi mu kwica abatutsi harimo abazwi ku mazina ya Zabumwana, Mayere na Gisupu.
Niyonsenga avuga ko ibikorwa byo gusukura imibiri izimurwa byatangiye muri Werurwe uyu mwaka, ubu ibikorwa byarangiye ndetse irimo gushyirwa mu masanduku mashya igashyingurwa.

Yongeraho ko icyo gikorwa kizajyana no kubahiriza ingamba zo kwirinda icyorezo cya Covid-19 kuko kizitabirwa n’abantu bakeya.

Urwibutso rwa Kivumu ruri mu Karere ka Rutsiro ariko rwegereye Akarere ka Rubavu rukaba rwari mu cyahoze ari Komini Nyamyumba.

Mu nyubako ya Kigali Arena ni ho hari hateguwe, hahurira abitabiriye ibiganiro byo kwibuka, ariko hakaba hahuriye Abayobozi bakuru b’Igihugu, abahagarariye ibihugu byabo n’imiryango mpuzamahanga, ndetse n’abayobozi b’ibyiciro bitandukanye by’Abanyarwanda.

Uku guterana byakozwe hubahirijwe amabwiriza yo kwirinda Covid-19, nk’uko bigaragara mu mafoto.

Video: Richard Kwizera
Amafoto: Muzogeye Plaisir

Kureba andi mafoto menshi, kanda HANO

Iyo raporo yiswe Raporo Duclert yakozwe n’inzobere z’abashakashatsi n’abanditsi b’u Bufaransa bisabwe na Perezida w’u Bufaransa Emmanuel Macron kugira ngo ukuri ku ruhare rw’Abafaransa muri Jenoside yakorewe Abatutsi rugaragare.

Ku wa 07 Mata 2021 mu muhango wo gutangiza icyunamo cyo Kwibuka ku nshuro ya 27 Jenoside yakorewe Abatutsi, Perezida wa Repubulika Paul Kagame yatangaje ko ashima kuba iyo Raporo yarakozwe kandi ikaba hari ibyo igaragaza nk’ukuri ku ruhare rw’u Bufaransa muri Jenoside yakorewe Abatutsi.

Umukuru w’Igihugu yavuze ko iyo ari intambwe nziza igenda iterwa na bimwe mu bihugu byakunze guhakana Jenoside yakorewe Abatutsi n’u Bufaransa burimo, kandi ahamya ko u Rwanda ruzakomeza intambwe rugezeho yo kugaragaza ukuri ku byabaye muri Jenoside.

Agira ati “Twishimiye iyi raporo kuko ari intambwe y’ingenzi iganisha ku kumva kimwe ko hari ubushake bw’abayobozi b’u Bufaransa bashaka kureba imbere bakajya imbere bajyanye n’imyumvire ikwiriye kandi turabishima, tuzasaba ko iyo raporo itugeraho kandi ni ikintu cyiza ko yasohotse kandi u Rwanda ruzagira icyo ruvuga mu minsi ya vuba nko mu cyumweru cya gatatu cya Mata 2021.

Perezida Kagame yavuze ko ibyavuye muri raporo zakozwe n’abantu b’inzobere ku byerekeranye n’ibyo zakoze, kuri iyo komisiyo y’Abafaransa bisa nk’ibijya mu cyerekezo kimwe kandi ko u Rwanda ruzakorana n’ababishaka kugira ngo handikwe amateka ashingiye ku kuri.

Iyo raporo ya Komisiyo y’inzobere mu mateka yashyizweho n’u Bufaransa igaragaza ko Jenoside yarimo itegurwa yo kurimbura Abatutsi kandi ko yategurwaga bigizwemo uruhare n’uwahoze ari Perezida w’u Bufaransa François Mitterrand n’inshuti ze zo mu Rwanda.

Nyamara ngo Perezida Miterrand yahisemo gukomeza gutera inshuti ze inkunga kubera kumva ko u Bufaransa bukwiye kurinda inyungu za politiki yabwo maze ubuzima bw’Abanyarwanda buba ikintu gikinirwaho ngo ni ukurengera inyungu za Politiki.

Perezida Kagame yavuze ko ibyakozwe byo guhisha uruhare rw’u Bufaransa muri Jenoside byagize ingaruka zirimo no kuvuga ko habayeho Jenoside ebyiri no gushoza imanza ku bayobozi b’u Rwanda.

Kwemera Jenoside byaragoranye cyane kandi u Bufaransa bwabigizemo uruhare

Perezida Kagame avuga ko nta mubare w’Abanyarwanda bagomba gupfa mbere y’uko rwemererwa kugira icyo rubikoraho kandi gikwiye, agashingira ku kiganiro umunyamakuru yagiranye n’umuyobozi ukomeye cyavuzwe cyane mu 1994 igihe abantu bari bafite ibibazo bibaza uko bakwiye kuba bita ibyarimo bikorwa icyo gihe.

Yavuze ko icyo gihe abantu bagundaguranaga no kwemera ko ari Jenoside yakorewe Abatutsi ahubwo bagashaka kubyita ko ari ibikorwa biganishaa kuri Jenoside, hakibazwa umubare w’ibyakwitwa ko ari ibyaha biganisha kuri Jenoside ngo ikunde yitwe Jenoside, igitangaje akaba ari uko imyumvire nk’iyo ikiriho.

Agira ati “Abiyita abahanga n’abaharanira uburenganzira bwa muntu baraceceka ngo hato batemeranya n’ibyo u Rwanda na Leta yarwo bavuga bakumva ko nta cyiza cyaturuka mu Rwanda bigaragarira mu makuru abogamye nk’ayo ni akumiro, si twe twenyine kuko biba no mu bindi bihugu ku mugabane wa Afurika, ariko ntibikwiye nta n’ubwo tuzabyemera”.

Perezida Kagame avuga ko u Rwanda rwakomeje kandi gusaba ko abakoze Jenoside boherezwa mu Rwanda ngo bacirwe imanza ariko ubwo busabe bwimwa amatwi aho wasangaga hari nk’abakekwaho gukora Jenoside bakorewe n’amadosiye kandi yuzuye ariko ibihugu bibacumbikiye bikanga kubatanga.

Ahanini ngo wasangaga bitwaza ko ngo nta masezerano inkiko z’ibyo bihugu zifitanye n’inkiko zo mu Rwanda mu mikoranire, ibyo ngo bigatuma batemera ko inkiko zo mu Rwanda zishoboye, u Rwanda rwanasaba ibyo bihugu ngo biburanishe abo bantu ntihagire igikorwa.

Agira ati “Abantu nk’abo usanga batanemera kuvuga ko ari Jensoide yakorewe Abatutsi nyamara si twe twahimbye iryo jambo bwa mbere kuko ryanavuzwe mbere y’uko ibi byago bitugwira ariko ugasanga umuntu avuga ko atari Jenoside yakorewe Abatutsi kuko ngo n’abandi bantu bapfuye, nawe nyumvira”.

Yongeraho ati “Ntabwo nshidikanya ko abo bantu bafite ubushobozi bwo kumva ibintu nyamara nzi ko babufite, mbese ni nko kuvuga ngo ibindi tube tubyihoreye tubyibagirwe. Haracyari inzira ndende rero”.

Avuga ko iyo abakurikiranyweho ibyaha bya Jenoside bakingiwe ikibaba bigira ingaruka mu buryo butaziguye kandi bikajyana n’ubwiyongere bwo guhakana no gupfobya Jenoside kandi ko bizafata umwanya ngo bihinduke.

Agira ati “Nk’ubu hari abavuga ko FPR ubwayo yateguye Jenoside ngo ibone uko igera ku butegetsi, igiteye impungenge ni uko abazi ukuri benshi bicecekeye ntibagire icyo bavuga”.

Atanga urugero rw’Igihugu giherutse gusohora itangazo kiryoherereza u Rwanda mu gihe cy’Icyunamo, ngo ryari itangazo ryo gufata mu mugongo Abanyarwanda, nyamara ngo muri iryo tangazo hongewemo n’ibindi bitari bikwiye kujyamo, birimo ko u Rwanda rwakwita no ku bijyanye n’uburenganzira bwa muntu bitubahirizwa, imiyoborere kandi ngo ryari itangazo ryo gufata mu mugongo Abanyarwanda.

Agira ati “Narababwiye nti kuri iyi tariki ya 07 Mata twibuka ni umunsi umwe gusa muri 365 igize umwaka mbasaba ko nibura baturekera uwo munsi wonyine noneho indi isigaye bakajya bandika ibyo bashaka, badutuka baduharabika n’indi minsi yose uretse uyu munsi wonyinye kandi ndakeka ko babyumvise batangira kumenya gutandukanya iminsi ariko hari n’abatumva ngo bumve isomo bagakomeza kwandika ibintu kugeza aho bashakiye hose ariko ibyo turabyakira tukamenya uko tubitwara”.

Umuryango w’Abibumbye wemeje ko habaye Jenoside yakorewe Abatutsi

Akomeza n’ijambo yagezaga ku bitabiriye Kwibuka ku nshuro ya 27 Jenoside yakorewe Abatutsi, Perezida Kagame yavuze ko habaye icyemezo cy’ubwiganze bwa benshi cyemeje ko habayeho Jenoside yakorewe Abatutsi muri iyo nteko rusange, ariko hari ibihugu nka bibiri byakomeje kwanga gukoresha ijambo Jenoside.

Ngo bamwe babyemeye baratinze kuko bakekaga ko babyemeje byabashinja kugira inshingano zo kuyihagarika bitakoze.

Agira ati “Sintekereza ko dukwiye guterana amagambo na bo kuri ayo mahame twe twemera kuko hari urubyiruko rw’Abanyarwanda baba mu mahanga n’ubwo ari bake batagize uruhare mu byabaye ariko bagashingira kuri izo nkuru bagahembera ingengabitekerezo ya Jenoside nk’aho ari ukunenga imiyoborere n’uburenganzira bwa muntu mu gihugu”.

Yongeraho ati, “Twe turajya imbere nta n’ikidutandukanya kinini gihari ni uko Abanyarwanda tumeze ni na ko amateka yacu yatwigishije. Imbabazi zishingira ku kuri, ntabwo twarambirwa kuvugisha ukuri ibyo twanyuzemo kuri uyu munsi ukomeye mu minsi yose. Nagira ngo nsoze nongera gushimira Abanyarwanda kudatezuka ku bumwe n’ubwiyunge bwabo kandi tubishimira inshuti zacu hirya no hino zakomeje kwifatanya natwe muri iyi myaka yose”.

Perezida Kagame avuga ko hari n’abandi bakomeje gutsimbarara ku kwita Jenoside icyo ari cyo no mu Muryango w’Abibumbye kandi bamwe muri abo harimo n’uwari umunyamabanga mukuru w’uwo muryango, ariko hari ibihugu birimo nka Nigeria yahagurutse irahagarara isaba ko ukuri kuri Jenoside ari ko kugomba gushingirwaho.

Ubwo abasportifs batandukanye bunamiraga inzirakarengane zishyinguye mu rwibutso rwa Kigali ku Gisozi, hari umwaka ushize wa 2020

Mu batanze ubu butumwa harimo Minisiteri ya Siporo mu Rwanda, amakipe y’umupira w’amaguru nka APR FC, Rayon Sports, Kiyovu Sports, AS Kigali, Musanze ndetse n’izindi.

Harimo amashyirahamwe y’imikino nka Komite Olempike y’u Rwanda, Ferwafa, Ferwaba, FRVB, NPC, Ishyirahamwe ry’abanyamakuru ba Siporo mu Rwanda (AJSPOR), ndetse n’abandi basportifs ku giti cyabo.

Ubutumwa bwatanze n’amashyirahamwe, amakipe n’abasportifs

The Ministry of Sports joins all Rwandans in Commemoration of the 1994 Genocide Against Tutsi.

Minisiteri yifatanyije n'Abanyarwanda bose mu Kwibuka ku Nshuro ya 27 Jenoside yakorewe Abatutsi mu 1994 @AuroreMimosa @Kwibuka27 @RwandaRemembers pic.twitter.com/MSzVHlFh3L

— Ministry of Sports|Rwanda (@Rwanda_Sports) April 7, 2021

7th April, #Rwanda and the world begin the 100 days of commemoration of 1994 Genocide against the Tutsi.

𝗥𝗲𝗺𝗲𝗺𝗯𝗲𝗿 - 𝗨𝗻𝗶𝘁𝗲 - 𝗥𝗲𝗻𝗲𝘄 #Kwibuka27 pic.twitter.com/hUaoMLeH8k

— #TdRwanda2021 🇷🇼🚴🏾 (@tour_du_Rwanda) April 7, 2021

FERWACY yifatanyije n’Abanyarwanda kwibuka ku nshuro ya 27 𝐉𝐞𝐧𝐨𝐬𝐢𝐝𝐞 𝐲𝐚𝐤𝐨𝐫𝐞𝐰𝐞 𝐀𝐛𝐚𝐭𝐮𝐭𝐬𝐢 𝐦𝐮 𝟏𝟗𝟗𝟒

𝐓𝐰𝐢𝐛𝐮𝐤𝐞, duharanira ko Jenoside itazongera ukundi

𝐓𝐰𝐢𝐲𝐮𝐛𝐚𝐤𝐚, tugire u Rwanda twifuza

𝙷𝚞𝚖𝚞𝚛𝚊 #𝚁𝚠𝚊𝚗𝚍𝚊 #Kwibuka27 pic.twitter.com/SQdfs3Euj3

— #Rwanda2025 🇷🇼🚲 (@cyclingrwanda) April 7, 2021

AJSPOR joins all Rwandans in Commemoration of the 1994 Genocide Against Tutsi.

AJSPOR yifatanyije n'Abanyarwanda bose mu Kwibuka ku Nshuro ya 27 Jenoside yakorewe Abatutsi mu 1994 #Kwibuka27 pic.twitter.com/W8I7r1xGPQ

— Rwanda Sports Journalists Ass. (@AJSPOR_official) April 7, 2021

#Kwibuka27 : Twibuke Twiyubaka. #MporeRwanda pic.twitter.com/sdcFtQS7zd

— Rayon Sports Official (@rayon_sports) April 7, 2021

Ishyirahamwe ry'umupira w'amaguru mu Rwanda( FERWAFA) ryifatanyije n'abanyarwanda mu kwibuka ku nshuro ya 27 abazize Jenoside yakorewe abatutsi muri Mata 1994. Duharanire kwibuka twiyubaka. #KwibukaRwanda #Kwibuka27 pic.twitter.com/nyxNrYeECa

— Rwanda FA (@FERWAFA) April 7, 2021

Today marks the 27th commemoration of the 1994 Genocide against the Tutsi. We cannot bring back more than one million lives that were lost but what we can do is to honor them by working harder together for a brighter and prosperous future for many generations to come. #Kwibuka27 pic.twitter.com/8odbVDZquH

— FERWABA 🏀🇷🇼 (@ferwabaRW) April 7, 2021

#NewProfilePic pic.twitter.com/Nb6BS7icRU

— FRVB | RWANDA VOLLEYBALL FEDERATION (@RwandaVolleybal) April 7, 2021

#Kwibuka27 pic.twitter.com/zEVu65wetF

— Rwanda Paralympics (@npcrwanda) April 7, 2021

Umuryango wa Kiyovu Sports wifatanyije n' Abanyarwanda ku nshuro ya 27 mu Kwibuka Jenoside yakorewe Abatutsi mu 1994. #Kwibuka27 pic.twitter.com/Ia1I6icnj1

— Kiyovu Sports (@SCKiyovuSports) April 7, 2021

#Kwibuka27 #TwibukeTwiyubaka pic.twitter.com/1OKHkytzkE

— AS KIGALI (@AS_KigaliFC) April 7, 2021

Musanze fc yifatanyije n'Abanyarwanda muri iki gihe twibuka ku nshuro ya 27 jenoside yakorewe Abatutsi muri 1994. Twibuke Twiyubaka #Kwibuka27 pic.twitter.com/W6DEqXEaDw

— Musanze fc (@musanzefc) April 7, 2021

Umuryango mugari wa @Gasogiunited Twifatanyije n'abanyarwanda n'isi yose kwibuka ku nshuro ya 27 Jenoside yakorewe abatutsi.
#TwibukeTwiyubaka pic.twitter.com/DMj2Y4VWm8

— Gasogi United (@gasogiunited) April 7, 2021

Umuryango mugari wa @BbcEspoir wifatanyije n'abanyarwanda bose by'umwihariko abarokotse Genocide yakorewe Abatutsi kwunamira abacu bazize genocide yakorewe Abatutsi. #Kwibuka27 pic.twitter.com/xbhlqeyeRm

— ESPOIR BBC (@BbcEspoir) April 7, 2021

Umuryango mugari wa @BbcEspoir wifatanyije n'abanyarwanda bose by'umwihariko abarokotse Genocide yakorewe Abatutsi kwunamira abacu bazize genocide yakorewe Abatutsi. #Kwibuka27 pic.twitter.com/xbhlqeyeRm

— ESPOIR BBC (@BbcEspoir) April 7, 2021

Ni igikorwa cyabereye mu bice bitandukanye ahari abapolisi b’u Rwanda aho bari mu bikorwa byo kurinda impunzi z’abasivili mu nkambi zo mu gihugu cya Sudani y’Epfo.

Igikorwa cyabaye hanubahirizwa amabwiriza yo kwirinda COVID-19. Bakurikiranaga televiziyo y’u Rwanda bicaye bahanye intera hagati y’umuntu n’undi, bambaye agapfukamunwa kandi babanje gukaraba intoki n’amazi meza n’isabune.

Igikorwa cyabanjirijwe n’umunota wo kunamira abazize Jenoside yakorewe Abatutsi mu 1994.

Chief Superintendent of Police Carlos Kabayiza, umuyobozi w’itsinda ry’abapolisi bari Sudani y’Epfo (FPU-2) yavuze ko n’ubwo bari mu butumwa bw ’umuryango w’abibumbye bwo kubungabunga amahoro bitababuza kwifatanya n’abandi banyarwanda n’inshuti z’u Rwanda kunamira inzirakarengane z’abatutsi bazize Jenoside muri Mata 1994.

Yagize ati "Tuzakomeza kwibuka kandi tunakora inshingano zacu zo kubungabunga amahoro. Uyu munsi abapolisi batagiye mu kazi bahuriye hamwe twibuka kandi tunakurikiza inama za Nyakubahwa Perezida wa Repubulika y’u Rwanda Paul Kagame aho atugira inama yo kunga ubumwe n’amahoro ari nayo mpamvu turi muri iki gihugu cya Sudani y’Epfo nk’abanyarwanda babungabunga amahoro mu baturage b’abasivili."

Hari kandi irindi tsinda ry’abapolisi b’u Rwanda, itsinda ryiganjemo abagore riri mu murwa mukuru wa Sudani y’Epfo i Juba. Aba nabo bakurikiye umuhango wo gutangiza icyumweru cyo kunamira inzirakarengane z’abatutsi bazize Jenoside muri Mata 1994, babikurikiraniye kuri televiziyo y’u Rwanda.

Senior Superintendent of Police (SSP) Jeanette Masozera , umuyobozi w’iryo tsinda (FPU-3) yavuze ko n’ubwo bari mu bihe bigoye byatewe n’icyorezo cya COVID-19 bitababuza kwibuka.

Ati " Turi mu bihe bigoye byatewe na COVID-19 aho tugomba kubahiriza amabwiriza yo kwirinda iki cyorezo, ariko ntibitubuza kwibuka inshuti n’abavandimwe bazize Jenoside yakorewe abatutsi muri Mata 1994. Tuzakomeza gukurikira imihango yose kuri televiziyo y’u Rwanda , twunamire inzirakarengane, dusengere abarokotse ari nako dukomeza kuzuza inshingano zacu hano mu butumwa bwo kubungabunga amahoro."

Mu Ntara ya Upper Nile mu gace ka Malakal hari abapolisi b’u Rwanda (FPU-1) bayobowe na Chief Superintendent of Police (CSP) Fabian Musinguzi yibukije abapolisi ko bagomba gukomeza gufatikanya bagashyigikirana muri ibi bihe by’akababaro.

Ahari aba bapolisi b’u Rwanda, hahagaritswe ibikorwa byose bijyanye n’imyidagaduro mu gihe cy’icyumweru cyo kwibuka.

Mu butumwa bw’umunyamabanga mukuru w’umuryango w’abibumbye Antonio Guterres yavuze ko Isi yose yabonye ibyabaye mu Rwanda mu 1994 ndetse n’ingaruka zabyo asaba abatuye Isi gukomeza kwirinda urwango.

Ati "Twabonye ibyabaye mu Rwanda mu 1994 kandi tunazi ingaruka zo kwimakaza urwango. Kugira ngo twirinde ko amateka nk’aya yazongera kuba ukundi ni uko twarwanya ibihembera urwango byose bikomeje kuba imbogamizi ku Isi."

Guterres yakomeje avuga ko abantu bagomba kubungabunga uburenganzira bwa muntu tugakomeza gushyira imbaraga muri politiki zubaha abantu bose.

Ni inkuru dukesha Polisi y’u Rwanda

Dr Bizimana avuga ko kwibuka ari ngombwa kuko bifasha Abanyarwanda biyubaka

Mu ijambo Dr Bizimana Jean Damascène yagejeje ku bari bitabiriye uwo muhango wari uyobowe na Nyakubahwa Perezida wa Repubulika Paul Kagame, yavuze ko kwibuka ari ngombwa kuko bifasha mu kwiyubaka no mu kurwanya abapfobya Jenoside bitewe n’uruhare bo n’ababo bayigizemo.

Yagize ati “Nk’uko abakurambere babivuga ko umuryango utibuka uzima, kwibuka ni ngombwa kugira ngo dushobore kwiyubaka, tugomba kwibuka amateka ya Jenoside yakorewe Abatutsi bikadufasha kurwanya abayapfobya n’abayagoreka nkana kubera uruhare bo n’ababo bayagizemo”.

Dr Bizimana yasobanuye uko mu bihe bitandunye abategetsi baba abo muri Repubulika ya mbere n’iya Kabiri bashyigikiye ubwicanyi bwakorerwaga Abatutsi, iryo yicwa ry’Abatutsi cyane cyane iryo muri 1963, abanyamahanga bakoreraga mu Rwanda barifashe nka Jenoside.

Nk’uko ngo bigaragara mu mwanzuro wa Leta y’Ababiligi wo ku ya 7 Gashyantare 1964, wavugaga ko bitewe n’ibibazo biri mu Rwanda cyane cyane ibirego bishinjwa Guverinoma y’u Rwanda y’icyo gihe, ngo bikwiye ko babinyujije muri Ambasade yabo mu Rwanda bashyiraho amabwiriza bagomba gukurikiza, arebana n’ibikorwa bibera mu Rwanda byo kumaraho Abatutsi.

Ibyahaberaga byafashe isura nini ku rwego mpuzamahanga, ngo Ababiligi bakaba baragombaga gukumira icyatuma Ububiligi bushobora kuzashinjwa kugira uruhare muri Jenoside.

Abantu bagombye kwibuka ubutwari bw’abagerageje kurwanya ikibi

Dr Bizimana yashimye ko nta kibi kiganza cyonyine, kuko hari Abanyarwanda n’abanyamahanga barwanyije uko bari bashoboye ibibi byakorerwaga mu Rwanda.

Muri 1959, ngo hari Abahutu bafatanyaga n’Abatutsi mu kurwanya ‘Parmehutu’, ibyo ngo bikerekana ipfundo ry’ubumwe Abanyarwanda bari bafite iyo batavangirwa n’ubutegetsi bubi.

Mu banyamahanga yatanze ingero z’Abapadiri babiri b’Abazungu umwe wari mu Cyanika ku Gikongoro, warwanye ku bicwaga icyo gihe, ubu ngo hakaba hari benshi bamukesha ubuzima, n’undi wari i Nyamirambo wafashije abapfakazi n’abana b’abayoboke ba UNAR bari barishwe, ibyo bituma agiye mu kiruhuko iwabo mu Bubiligi, u Rwanda rumwangira kugaruka rumuhoye ibyo gusa.

Hari kandi padiri wayoboraga ETO Kicukiro ndetse n’uwayoboraga Seminari ntoya ya Saint Paul Kigali, bose ngo barwanye ku banyeshuri b’Abatutsi banga ko birukanwa mu mashuri.

Hari kandi Musenyeri Yozefu Sibomana wayoboraga Seminari yanze ko Abanyeshuri b’Abatutsi birukanwa mu iseminari ndetse yakira n’abari birukanywe mu yandi mashuri cyane cyane mu iseminari ya Kabgayi.

Yagize ati “Izo ni ingero nziza zikwiye kujya zibutswa mu mateka ya Jenoside yakorewe Abatutsi, ntiduhamane ibibi gusa, bityo ku munsi nk’uyu wo kwibuka, tukanashima ubutwari bw’abo bantu”.

Dr Bizimana ashingiye ku ngero zitandukanye avuga ko nta rwego na rumwe rutagize urahare mu itegurwa n’ishyirwa mu bikorwa rya Jenoside, ni yo mpamvu ngo ari ngombwa ko no mu kubaka igihugu no guhangana n’ingaruka za jenoside, inzego zose zigomba kubigira ibyazo.

Dr Bizimana yavuze ko nubwo abafite ingengabitekerezo ya jenoside n’abayihakana bakora byinshi birimo kwifashisha itangazamakuru ribogamye, imbuga nkoranyambaga n’ibindi, kugira ngo ikinyoma cya Jenoside ebyiri no gusebya ubuyobozi bw’u Rwanda bibe ari byo bihabwa intebe gusa, ngo batazabigeraho na gato.

Ibyo ngo ntibazabigeraho kuko ubu hari umubare w’abarokotse Jenoside bandika ibitabo by’amateka yabo ugenda wiyongera kandi hari n’ibimenyetso byinshi byivugira.

Ambasaderi Jean Pierre Karabaranga

Ni ibyo yatangarije kuri Televisiyo y’u Rwanda, mu muhango wo gutangiza gahunda yo kwibuka ku nshuro ya 27 Jenoside yakorewe Abatutsi mu 1994.

Avuga ko ubwo muri Jenoside yakorerwa Abatutsi mu mwaka wa 1994, mu ngabo zari zigize umutwe wa L’ONU zari mu Rwanda harimo n’izo mu gihugu cya Senegal, aho ndetse muri 11 bahasize ubuzima harimo n’umusirikare ukomoka muri icyo gihugu.

Yagize ati “Senegal ni igihugu gifite umwihariko mu bijyanye na Jenoside yakorewe Abatutsi mu Rwanda, kuko muri Jenoside, hari abasirikare b’intumwa za l’ONU bari mu Rwanda, kandi by’umwihariko harimo umwe witwa Diagne yishwe arwanirira Abatutsi, ahangana n’Interahamwe n’abasirikare bashakaga gukora Jenoside, ariko yarinze kwicwa agerageza gutabara Abatutsi bahigwaga”.

Ambasaderi Karabaranga avuga ko amateka ya Jenoside yakorewe Abatutsi mu Rwanda mu mwaka wa 1994 azwi cyane muri Senegal, aho abatuye icyo gihugu bayakurikirana ndetse bakaba bayatangira ubuhamya.

Ati “Amateka ya Jenoside yakorewe Abatutsi mu mwaka wa 1994, ayo mateka hano muri Senegal arazwi, arazwi cyane, Abasenegalais nk’uko tubita barayakurikirana, hari ababaga mu Rwanda ndetse n’abasirikare batatabarutse bagiye bavuga, basobanura, banatanga ubuhamya”.

Ambasaderi avuga ko ibyo ari kimwe mu bitanga icyizere, cyane cyane mu bijyanye no kurwanya abahakana n’abapfobya Jenoside, aho muri Senegal hatavuga gusa Abanyarwanda barokotse Jenoside baba muri icyo gihugu, ahubwo ngo n’Abasenegalais ubwabo bari bari mu Rwanda ngo basobanura Jenoside nk’abantu babifitemo ubumenyi kandi babibayemo kuko Jenoside itegurwa inakorwa bari bahari.

Abajijwe niba muri Senegal hari abagipfobya n’abahakana Jenoside, Karabaranga yavuze ko nta tsinda ry’abantu bapfobya Jenoside arabona muri icyo gihugu, gusa ngo abona abihishe bataratinyuka, ku buryo batinya no kwitabira ibikorwa byo kwibuka.

Avuga ko guhakana Jenoside babitinya ati “Guhakana Jenoside byo barabitinya kuko ibihano barabizi, ariko kandi Abanyarwanda baba hano, bakora ibishoboka byose kugira ngo amateka ya Jenoside yakorewe Abatutsi amenyekane”.

Mu bikorwa bateganya muri gahunda yo kwibuka, Ambasaderi Karabaranga avuga ko uyu munsi ku itariki 07 Mata bajya ahantu hubatse inzu ndangamurage ya Afurika igaragaza ibimenyetso bya Jenoside, aho bifatanya n’abadipolomate n’inshuti z’u Rwanda ziba muri icyo gihugu, ariko kandi bubahiriza n’ingamba zo kwirinda COVID-19.

Avuga ko ibindi bikorwa byo kwibuka bizaba ku wa Gatandatu w’iki cyumweru, ahazabaho igikorwa cyo kwibuka kizahuriza Abanyarwanda banyuranye ku mbuga nkoranyambaga bari mu bihugu bitanu bya Afurika birebererwa na Ambasaderi Karabaranga.

Ariko no mu ntangiro z’ukwezi kwa Gicurasi 2021, ngo harategurwa ikiganiro kizibanda ku guhangana n’abapfobya Jenoside nk’uko Ambasaderi Karabaranga akomeza abivuga.

Ati “Mu kwa gatanu gutangira, mfite ikiganiro kizibanda by’umwihariko ku guhangana n’abapfobya Jenoside baba hirya no hino ku isi, ni ukugira ngo cyane cyane tumenyeshe amahanga nubwo bitarahagera cyane, ariko bishobora kuhagera kuko abapfobya Jenoside bafite umurongo ukomeye cyane ku buryo ushobora gukwira isi, ibyo biganiro kandi bikomeje kunonosorwa bizaba byitabiriwe n’abahanga benshi batandukanye, barimo abo mu Rwanda n’abo mu miryango mpuzamahanga”.

Karabaranga Jean Pierre ni Ambasaderi w’u Rwanda muri Senegal, ariko kandi Ambasade ahagarariye ikaba ari na yo ireberera n’ibihugu binyuranye birimo Mali, Cap Vert, Guinée-Bissau n’ibindi.

Avuga ko n’ubwo hakiri intege nke z’ubushobozi, Abanyarwanda bazi na none uko bahangana n’ibibazo byabo kandi, bafite imbaraga kandi batatezuka ku ntego yo kwiteza imbere kuko ibimaze kugerwaho byivugira.

Urugero umukuru w’Igihugu yatanze ni ibikorwaremezo by’ubuzima birimo ibitaro amazi n’amashanyarazi no kwakira abashyitsi neza, hakaba n’ibindi bitagaragarira amaso bihindura imibereho myiza y’Abanyarwanda biri mu mitima y’abaturage.

Ibyo ngo byatumye Abanyarwanda bakomeza gutera intambwe uko imyaka iza indi igataha kugeza ubu icyizere hagati y’abayobozi n’abaturage ikaba imeze neza, mu myumvire myiza no guhanga udushya no guharanira kwigira.

Perezida Kagame yavuze ko ishema ryo kubona amateka u Rwanda rwanditse ritera Abanyarwanda kwiyukaba kugeza no hanze y’imbiri z’Igihugu, kandi icyizere kuri bose kikaba ari cyo gitera imbaraga zo gukomeza gukora.

Umukuru w’Igihugu yavuze ko Abanyarwanda bamaze kugera kuri byinshi kandi by’agaciro bagomba kurinda, ibyo bigasaba guhora bari maso, kwisuzuma no kuba inyangamugayo.

Yavuze kandi ko n’ubwo amajyambere yaba amaze imyaka myinshi igera no mu 100 ashobora guhanagurika mu mwanya muto kandi ko hari ingero mu bihugu byinshi byagaragayemo kandi byari byarateye imbere.

Agira ati “Abanyarwanda twiteguye kurinda ibyo twubatse nta kuzuyaza, kandi ntawe twiseguraho kimwe n’ibindi bihugu byose, u Rwanda rufite uburenganzira bwo gukoresha uburyo bwose bwemewe, mu guhangana n’ibitero byibasira abaturage bacu”.

Yongeraho ati “Igihe cyose bishoboka abashaka kuduhungabanyiriza amahoro bazajya bashyikirizwa ubutabera kandi kugendera ku mategeko ni ingingo itagibwaho impaka”.

Yavuze ko ubu hari imanza ziri mu nkiko zo mu Rwanda ziburanisha bamwe bagize udutsiko tw’iterabwoba ritandukanye, ariko ugasanga hari bamwe muri bo bavuga ko bafashwe mu buryo budakurikije amategeko.

Perezida Kagame yavuze ko ntawe uzongera kwemera ko Ubumwe bw’Abanyarwanda buhungabanywa

Perezida kagame yavuze ko Niba hari abibaza uko bamwe mu bahungabanyije umutekano w’u Rwanda bafashwe bagashyikirizwa ubutabera, ibyo byazasuzumwa ukwabyo kuko ikiruta ikindi ari ukubageza mu butabera, n’ubwo baba baraje mu bundi buryo.

Agira ati “Abanyarwanda baziko ko igihugu cyacu kidashobora kwemera ko ibikorwa nk’ibi by’iterabwoba bitazongera gukorerwa ku baturage bwacu, iyo umurongo uganisha ku bugizi bwa nabi urenze nabyo bigira umuti wabyo”.

Umukuru w’Igihugu avuga ko benshi mu bagize ayo matsinda y’ubugizi bwa nabi batekereza ko bazagira agaciro mu mahanga ari uko bahungabanyije ubukungu bw’igihugu bakanica abaturage, ibyo bikaba bibabaje n’ubwo bisa n’aho uwo mugambi wabo bawugezeho.

Agira ati “Murabizi ko bamwe muri abo bantu bari hirya no hino baba bari ahantu bumva ko bafite amasomo menshi batwigisha ku bijyanye na demokarasi n’ubwisanzure n’ibindi byinshi bijyanye na Politi n’uburenganzira bw’abaturage”.

Perezida Kagame avuga ko usanga abahungabanya umutekano w’u Rwanda bakingirwa ikibaba n’abanyobozi b’ibihugu bibabarengera bibabavugira byitwa ko ari abantu bashaka guhindura u Rwanda bakarugeza kuri rwa rwego igihugu kitarageraho.

Umukuru w’Igihugu avuga ko usanga n’ibihugu bicumbikiye abo bagizi ba nabi bitemera ko ari abagizi ba nabi koko.

Agira ati “Twabwiye abacumbikiye abo bagizi ba nabi ko ni abagizi ba nabi bishe abaturage, bibye, bakoze amabi menshi ariko ababacumbikiye bakadusubiza ko abo ari abantu batavuga rumwe n’ubutegetsi bw’u Rwanda, kandi baharanira uburenganzira bw’abaturage”.

Nyamara ngo igitangaje ni uko bidafata igihe kinini ngo ukuri kumenyekane bamenye ukuri, kuko bamwe muri abo bagizi ba nabi usanga bafungiye muri ibyo bihugu bazira ko ari abagizi ba nabi hari n’ibimenyetso by’ibyaha bakoze ariko bagakomeza kuvuga ngo ni Perezida Kagame wohereza abantu bamukorera na ba maneko be ngo bakoreshe abo bantu.

Perezida kagame avuga ko hari abafatwa kubera ubugizi bwa nabi ariko ugasanga amahanga aribaza ngo abo bantu bageze mu butabera gute bafashwe bate, ariko nyamara ngo niba hari ibintu ubazwa n’ubuyobozi bw’u Rwanda ugomba kubibazwa, kabone n’ubwo abo bacuti babo batabyumva.

Agira ati “Mperutse kubyumva ubwo hari umuntu wazanywe hano agakomeza kuvuga ngo ikibazo ni uburyo yageze aha aho kubazwa uko yakoranye n’abagizi ba nabi. Umva rero nshuti zanjye mushobora kumbeshyera ibyo mushatse byose, za toni z’ibinyoma ariko ntacyo bizampinduraho nta n’icyo bizahindura kuri iki Gihugu, ibyo wakora byose uko wabikora kose ibyo ndabikubwiye”.

Perezida Kagame avuga ko abagizi ba nabi banihisha mu binyamakuru bakandika inkuru kubera aho baturuka hirya no hino ibyo bavuze bigafatwa nk’ukuri, gusa kubera aho bavukiye n’aho bakomoka ibyo bavuze byose bigafatwa nk’ukuri kandi ntacyo bihuriyeho n’ukuri uretse kuba uwo muntu aba avukira ahantu aha n’aha.

Avuga ko atazihangana abona ibinyoma bihinduka ukuri, inzirakarengane zigahinduka abanyabyaha, ibikorwa by’iterabwoba bigahinduka uburyo bwo guhangana muri Politiki noneho ibikorwa byo kubirwanya bikanengwa.

Agira ati. “Twebwe twakwemera kunengwa bishingiye ku kuba turimo gukora ibyo tugomba gukora kuko tubyemera mu kurwanya ibyo bikorwa navuze bigamiie kutugirira nabi, ubu se koko abo ni bo bantu navuga ko bahagarariye indangagaciro tugenderaho, ibyo sibyo rwose ntabwo bikwiye”.

Ibyo Perezida Kagame yabivugiye mu muhango wo gutangiza gahunda zo kwibuka ku nshuro ya 27 Jenoside yakoerewe Abatutsi mu 1994, kuri uyu wa Gtatu tariki 7 Mata 2021.

Amb Nduhungirehe avuga ko amashuri yo mu Buholandi agiye kwigisha amateka ya Jenoside yakorewe Abatutsi

Mu kiganiro yahaye RBA kuri uyu wa 07 Mata 2021, Olivier Nduhungirehe yavuze ko mu Burayi ndetse no mu Buholandi by’umwihariko, hakigaragara abapfobya n’abahakana Jenoside yakorewe Abatutsi mu 1994, n’ubwo abakurikiranyweho kuyikora ngo bacitse intege.

Yavuze ko mu biheruka kugaragara vuba harimo imyigaragambyo no gukwirakwiza inyandiko zipfobya zikanahakana Jenoside yakorewe Abatutsi "kubera umudamu wafunzwe mu Rwanda".

Amb Nduhungirehe yagize ati "Hari ukwigisha amateka ya Jenoside mu mashuri ndetse no gutanga inyandiko za ngombwa kugira ngo ayo mateka arusheho kumenyekana neza, tuzabiganiraho na Leta kugira ngo bishyirwe mu nteganyanyihisho".

Mu bindi Ambasade y’u Rwanda mu Buholandi ivuga ko izakorana na Leta y’icyo gihugu hamwe n’Umuryango Ibuka-Hollande, harimo ikijyanye no kubaka urwibutso rwa Jenoside mu mujyi wa La Haye, nk’uko mu yindi mijyi y’i Burayi izo nzibutso zamaze kubakwa.

Amb Nduhungirehe yavuze kandi ko agiye kuganira na Leta y’u Buholandi kugira ngo hashyirweho itegeko rihana abapfobya n’abahakana Jenoside yakorewe Abatutsi, nk’uko mu Bufaransa no mu Bubiligi iryo tegeko rihari.

N’ubwo ariko iryo tegeko ritaratorwa muri icyo gihugu, Amb Nduhungirehe ashima ko Leta y’u Buholandi ikomeje guhana abahunze inkiko z’u Rwanda bakurikiranyweho ibyaha bya Jenoside.

Yavuze ko uwitwa Mpambara Joseph wari warakatiwe igifungo cya burundu hamwe na Basebya Yvonne wahanishijwe igifungo cy’imyaka itandatu n’amezi umunani, bombi bapfiriye muri gereza zo mu Buholandi.

Hari Munyaneza Jean de Dieu, Mugimba Jean Baptiste na Iyamuremye Jean Claude bita Nzinga, boherejwe mu Rwanda mu mwaka wa 2016, hakaba na Mugenzi Joseph ndetse na Rutunga Vénant na bo bafunzwe ariko ngo bategereje kuzohererezwa inkiko z’u Rwanda.

Hari n’abandi Banyarwanda bane Amb Nduhungirehe avuga ko bakomeje gukorwaho iperereza, barimo Ndereyehe Charles uri mu bayobora ishyaka FDU-Inkingi.

Amb Nduhungirehe avuga ko aba ari bo bagize uruhare mu gukwirakwiza ingengabitekerezo ya Jenoside mu rubyiruko, ku buryo ngo hari abo imaze kugaragaraho bafite imyaka hagati ya 20-30.

Amb Nduhungirehe avuga ko abaturage b’igihugu cy’u Buholandi benshi na bo batazi amateka ya Jenoside yakorewe Abatutsi mu Rwanda, ahanini bitewe n’uko inyandiko nyinshi ziyivugaho ziri mu ndimi z’Icyongereza n’Igifaransa.

Perezida Kagame avuga ko Abanyarwanda bunze ubumwe uyu munsi kurusha ibindi bihe byose byabayeho.

Yabitangarije mu muhango wo gutangiza icyunamo cyo kwibuka ku nshuro ya 27 Jenoside yakorewe Abatutsi mu 1994, ubwo yagezaga ijambo ku Banyarwanda kuri uyu wa 07 Mata 2021.

Yavuze ko kugira ngo u Rwanda rwongere kubaho nk’Igihugu ari uko hari Abanyarwanda beza bemeye bakanga kuba ibikoresho by’ubuyobozi bubi kandi amahirwe yabo yo kubaho bayabonye bayafatishije amaboko yombi, iyo ikaba inkingi ikomeye mu bigize imbaraga z’Abanyarwanda.

Perezida Kagame avuga ko no mu bihe by’ibibazo bikomeye n’abifuzaga kurangaza no gutesha igihe Abanyarwanda, ari bwo bubwo barushijeho gukomeza kunga ubumwe kurusha ibindi bihe byose byabayeho.

Agira ati “Nta kindi gihe u Rwanda rwaranzwe n’Ubumwe no kureba imbere nk’ubu, aha ndavuga cyane cyane urubyiruko ari narwo rugize umubare munini w’abaturage b’igihugu cyacu. Ni nayo mpamvu abashaka gutesha umurongo u Rwanda n’Abanyarwanda bananiwe kandi bazakomeza kunanirwa”.

Perezida Kagame kandi ashimira ibihugu byakomeje kwifatanya n’Abanyarwanda mu kurwanya abapfobya bakanahembera ingengabitekerzo ya Jenoside yakorewe Abatutsi, kandi avuga ko abo ari bo bakwiye kumvwa n’iyo baba badakomeye cyane.

Avuga ko hari ibihugu bikomeye byifuza ko u Rwanda rwemera ibyifuzo byabyo ngo bibone kwemera no kumva ibyo u Rwanda rwifuza, ariko ngo igikenewe ni uko Abanyarwanda benshi bakomeza gushyira hamwe ubumwe aho gukurikira iby’abashakaga kugoreka amateka ya Jenoside yakorewe Abatutsi.

CP John Bosco Kabera, arasaba Abanyarwanda Kwibuka banazirikana ko n’icyorezo cya COVID-19 gihari

Yabitangaje kuri uyu wa Gatatu tariki ya 07 Mata 2021, ubwo Abanyarwanda n’inshuti z’u Rwanda batangira icyumweru cyo kwibuka ku nshuro ya 27 Jenoside yakorewe Abatutsi muri Mata 1994.

Yavuze ko ibihe abanyarwanda binjiyemo bikomeye aho abantu bibuka bakanaha icyubahiro inshuti n’abavandimwe babo bakundaga babuze ubuzima mu mwaka wa 1994, mu gihe cya Jenoside yakorewe Abatutsi.

CP Kabera yasabye Abanyarwanda gufatanya bakarwanya uburyo bwose bugamije guhembera ingengabitekerezo ya Jenoside ndetse no kuyipfobya.

Yabasabye kurwanya no gutanga amakuru aho bumvise cyangwa babonye ibikorwa bijyanye n’ingengabitekerezo ya Jenoside, gutera ubwoba abarokotse, kurwanya abahakana cyangwa bagapfobye Jenoside n’abakora ibikorwa bigamije gutiza umurindi urwango n’amacakubiri.

Yagize ati “Haramutse hagize ibibazo cyangwa ikindi kibazo kijyanye no kwibuka turimo, bakwiye kubwira inzego zibegereye zirimo Polisi ibe yatabara, turabizi ko hari abantu bagira ihungabana, turabizi ko hari abantu bakora ibyaha byo gupfobya no guhakana Jenoside byagiye bigaragara imyaka ishize, ingamba ni zazindi ni ukubwira inzego zibegereye, ni ukubwira Polisi ikabikurikirana.”

Yasabye abaturage kwirinda ibyaha bijyanye no gupfobya no guhakana Jenoside kuko abazabifatirwamo bazabihanirwa hakurikijwe amategeko.

Yavuze ko Polisi idahugiye mu kureba ko ingamba zo kwirinda COVID-19 zubahirizwa gusa, ngo n’umutekano w’abaturage uracunzwe neza.

Yibukije abaturage ko n’ubwo bagiye mu bihe bikomeye byo kwibuka no kunamira inshuti n’abavandimwe bazize Jenoside yakorewe Abatutsi 1994, bagomba no kuzirikana ko COVID-19 ihari bagakomeza ingamba zo kuyirinda.

Ati “Tugiye mu bihe bikomeye byo kwibuka no kunamira inshuti zacu n’abavandimwe ariko na none birahurirana n’uko igihugu kikirimo kurwana n’icyorezo cya COVID-19. Iki cyorezo kiradusaba kubahiriza amabwiriza yo kukirinda ku rwego rwo hejuru, tukabikora twubahiriza neza ayo mabwiriza”.

CP Kabera yavuze ko bitewe no kwirinda COVID-19, imihango yo kwibuka abantu bazayikurikirana kuri Radio na Televiziyo ndetse no ku mbuga nkoranyambaga bari mu ngo zabo.

Kuri uyu munsi mu Rwanda Abanyarwanda n’Isi muri rusange batangiye kwibuka ku nshuro ya 27 Jenoside yakorewe Abatutsi mu mwaka wa 1994, abakinnyi, abatoza n’abayobozi muri Arsenal ndetse na Paris Saint-Germain batanze ubutumwa bwo kwifatanya n’Abanyarwanda muri ibi bihe.

Ku ruhande rw’ikipe ya Arsenal mu butumwa batanze babunyujije mu buryo bw’amashusho, hagaragaramo abakinnyi barimo kapiteni wayo Pierre Emmerick Aubameyang, Umusuwisi Granit Xhaka, umufaransa Alexandre Lacazette, umutoza Mikel Arteta ndetse n’abayobozi b’iyi kipe.

Babimburiwe na Pierre Emmerick Aubameyang, bagize bati “Twifatanyije n’u Rwanda n’Abanyarwanda aho bari hose, Xhaka mu kwibuka Jenoside yakorewe Abatutsi, yagize ati “Twunamiye inzirakarengane zirenga Miliyoni zazize Jenoside”.

💬 "By being open about the past, we can build a brighter future."

We stand with Rwanda to mark the 27th commemoration of the genocide against the Tutsi.

Remember. Unite. Renew. 🕯️#Kwibuka27 | @visitrwanda_now pic.twitter.com/VNh7mFzqwQ

— Arsenal (@Arsenal) April 7, 2021

Umutoza Arteta wakurikiranye n’abayobzi ba Arsenal bakomeje bagira bati “Turashimira imbaraga n’ubutwari by’abarokotse Jenoside. Dusubije amaso inyuma, dushobora kubaka ejo hazaza heza”.

Barakomeza bati “Nyuma y’imyaka 27, u Rwanda ni ikimenyetso cy’uko ikiremwamuntu gifite imbaraga zo kwihangana no guhinduka kandi gishobora kuvuka bundi bushya nyuma y’ibyago bikomeye.”

Paris Saint-Germain na yo ibinyujije ku rubuga rwayo rwa Twitter yanditse iti “Twifatanyije n’abavandimwe b’Abanyarwanda mu kwibuka Jenoside yakorewe Abatutsi mu mwaka wa 1994”.

Mu butumwa bw’amashusho kandi bwatanzwe n’abakinnyi barimo Kylian Mbappé, Mauro Icardi, aba bakinnyi na bo bagaragaje ko bifatanyije n’Abanyarwanda mu gihe bibuka ku nshuro ya 27 Jenoside yakorewe Abatutsi.

Abakinnyi barindwi ba Paris Saint-Germain batanze ubutumwa ni Juan Bernat ,Moise Kean, Rafinha Alcantara, Danilo Pereira, Abdou Diallo, Colin Dagba ndetse na Kylian Mbappé.

Nous nous unissons à nos frères et sœurs rwandais pour commémorer le génocide de 1994 contre les Tutsi.

Remember. Unite. Renew. #Kwibuka27 @visitrwanda_now pic.twitter.com/ii42NHBv8x

— Paris Saint-Germain (@PSG_inside) April 7, 2021

Reba Video yerekana uko iki gikorwa cyagenze

Amafoto: Roger Marc Rutindukanamurego

Umushakashatsi kuri Jenoside, Tom Ndahiro

By’umwihariko nibanze ku kintu gitera abantu kugwa ikinya. Byanyibukije inyandiko ya Shabakaka Vincent yanditse mu 1992 akayita “…Kuba Umututsi ni ubutwari buhambaye”

Politiki n’Ingengabitekerezo bya Jenoside byabujije ba nyiramukubitwa kuba abantu

Ingengabitekerezo ya Jenoside ifite amateka maremare mu buzima bw’igihugu cy’u Rwanda. Utamenye ayo mateka ntiwamenya uburyo urwanya iyo ngengabitekerezo. Muri ibyo twibuka bikanandikwa mu itegeko-nshinga ni icyaha cyakozwe, abagikorewe n’amateka yuje ubugome yabiteye. Ayo mateka akaba ari na yo soko y’ingengabitekerezo ya Jenoside.

Ububi bw’ingengabitekerezo ya Jenoside ni uko ari yo yica. Iby’imihoro, amasasu na za grenade ni ibikoresho gusa. Mbere yo kwica abantu benshi mu buryo butangaza isi, mu Rwanda kimwe n’ahandi hose hakozwe icyo cyaha cy’ubugome, ingengabitekerezo ya Jenoside ibanza kwica ba nyiramukubitwa. Ikibica ni politiki y’igihugu ishingiye kuri iyo ngengabitekerezo kirimbuzi, ni imvugo n’ibikorwa byayo bibica bahagaze. Iyo ngengabitekerezo ni nayo irema ikanatoza abicanyi, kuko nta muntu uvukana umugambi wa Jenoside.

Abakora Jenoside, n’ubwo baba bagaragaza ubuzima bw’umuntu usanzwe, baba bafite uko bapfuye mu myumvire n’imitekerereze. Ibi ni ukuri, cyane cyane iyo urebye uko byagenze mu Rwanda aho abicanyi bishe abo bafitanye isano ya hafi, inshuti magara zabagiriye akamaro, n’abaturanyi bababaniye neza bakabatabara muri byose mu gihe bibaye ngombwa.

Mu gihe cyose cyo kwibuka, n’igihe cyose, ni byiza kwibuka ko Ingengabitekerezo ya Jenoside mu Rwanda yishe u Rwanda, ikica Ubunyarwanda, ikanica Umunyarwanda. Yashenye igihugu cy’u Rwanda rutarabona ingirwa bwigenge, bikomeza na nyuma y’iyo ngirwa bwigenge.

Iyo ngengabitekerezo yararudindije, irutesha agaciro imbere y’amahanga kuko abanyapolitiki ba PARMEHUTU babaye aba mbere ku mugabane wa Afrika kugaragaza ko bakeneye gukomeza gutegekwa n’umukoloni. Ibuka kandi wibaze ya “VIVE LA BELGIQUE” ya PARMEHUTU, mu gihe ahandi bavugaga ngo Umukoloni n’abavire mu bihugu!

U Rwanda rwaradindiye cyane kubera ivangura no gucinyiza bamwe mu bana barwo ngo ni politiki y’iringaniza cyangwa yo kurengera rubanda nyamwinshi. Ntako u Rwanda rwari kureka kudindira, n’abantu barwo gucupira, mu gihe umwana yaburaga ishuri atabuze ubwenge. Umuswa akabona ishuri agendeye ku butoni bushingiye ku bwoko cyangwa akarere aturukamo. Umukuru akabura akazi atabuze ubushobozi. Umunyarwanda wakubatse u Rwanda akarwirukanwamo cyangwa akangara, yabujijwe aho akwirwa mu gihugu cye.

Ubunyarwanda bwarabuze hasigara icyiswe ubwoko. U Rwanda rwakabonye ubwigenge nyabwo, rwaheze mu bwiko bwa “Gahutu Ganza — Rwanda ni iyawe” Indirimbo iba “Turatsinze ga ye”! Iyi ntsinzi itari yo, ntaho itaniye n’umuntu wataye ubwenge agashimishwa no kwivuruguta mu mwanda n’inzarwe nk’ingurube y’ishyamba mu gihe cy’impeshyi.

Ubutegetsi bwa PARMEHUTU n’ubwabusimbuye bwa MRND-CDR bwahinduye igihugu kiba icya bamwe gusa abandi bagituramo nk’abacakara. Abatutsi baba mu gihugu cyabo nk’abahashyi, ndetse bakibamo bitwa abanzi! Politiki iba iyo kwita Umuhutu Umunyarwanda, Umututsi akitwa inyangarwanda. Umuhutu yitwa Sebahinzi, Umututsi yitwa Inyenzi, kuko atari kwitwa Sebatunzi nta matungo agira ntanagire n’aho atungira. Hagati aho Abatwa bo babura aho babarizwa!

Iyo hataba kwisuganya kw’abanyarwanda bibumbiye mu mutwe witwa Inkotanyi ngo wange ayo mateshwa atanya abana b’u Rwanda, u Rwanda rwari kubaho ku ikarita y’isi gusa atari igihugu!

Iyo ngengabitekerezo navuze, yishe umunyarwanda ari byo nshaka gutindaho. Tujyane mu rugendo nanyuze! Urwo rugendo ntirugarukira mu 1994 ahubwo ni ibyo nibajije nshingiye kubyo nabonye, nasomye nkanabyumva mbere na nyuma y’uwo mwaka.

Umututsi yagaragaraga ko ariho kandi yarishwe ahagaze

Reka nkomereze ku kwicwa kw’umunyarwanda wiswe UMUTUTSI! Wishwe ahagaze kugeza ubwo umugambi ubaye uwo kumurimbura ku isi! Natekereje ku kintu cyitwa amarira. Kurira n’amarira ni ikimenyetso cy’bumuntu n’umuntu muzima.

Reka mvuge amarira. Kuvuga iby’amarira si uburondogozi. Ndabitindaho kuko Abatutsi bari barabuze amarira. Abana benshi iyo bakivuka bararira. Kurira bikaba bifasha uruhinja rukivuka gufungura ibihaha ngo rubone uko ruhumeka neza. Aho umubyeyi bategereje ko abyara, iyo bumvise umwana arize bavuza impundu kuko aba abyaye umwana muzima.

Kimwe mu byereka umubyeyi ko umwana arwaye, ni uko arira umwanya muremure nta kintu kigaragara abuze cyangwa akeneye. Icyo bivuze, ni uko amarira atari ibitembamubiri bisanzwe. Umwana ntaba azi ko arira nk’uburyo bwo kuvuga ikimuri ku mutima, kuko umutima we uba utarabasha gusobanura amagambo.

Ku mwana, kurira ni imvugo. Amarira ni ijambo ryuzuye kandi risobanutse! Kurira by’umwana ni nk’aho umukuru yagafashe ijambo akavuga ati “nyamuneka mbabajwe n’iki, ndashaka iki n’iki cyangwa mwamfashije iki”.

Umwana arira aho yakavuze, amarira agatemba kugeza ubwo ayatangiriza ururimi nk’umureko, akumva akunyu karimo. Rimwe na rimwe ayo marira akamuhoza. Akenshi hari ubwo umwana arira yabona ntawe umwitayeho ngo amuhoze akibwiriza agahora.

Umwana arizwa n’uko hari ikimubabaje ashaka kugaragaza cyane ko yakwitabwaho. Ayo marira akagabanuka uko umuntu agenda akura, kuko kurira atari imvugo yumvikana, ahubwo kuvuga icyo ashaka ari byo byumvikanisha ikimubabaje cyangwa ikimushimishije.

Uko umwana akura iyo akomeje kujya arira babyita kwiriza. Abantu baba babona ko nk’aho yagakoresheje imvugo ngo asobanure icyo ashaka, akoresha kurira. Naho ku mwana muto ntibabyita kwiriza kuko biba bimukwiriye. Gukura kw’umuntu rero bitandukana no kwiriza.

Umukuru iyo abonye umwana arira aratabara akamubaza ikimuriza. Ibyo bigaterwa n’impuhwe zo kudashaka ko umwana arira agahogora. Umunyarwanda wise umwana we Mudahogora, ni ukumutongera ko narira atazabura umuhoza. N’andi mazina nk’Umuhoza, afitanye isano no guhoza uwababaye cyangwa urira. Umwana ararira, abamuri hafi bati ihorere.

Amarira y’ibyishimo

Ku bakuru naho, nibura amarira abunga mu maso n’ubwo adatemba ku matama ngo umuntu ayarekeshe ururimi nk’umwana. Kenshi umuntu arwana no kuyahanagura ngo atamugera mu kanwa akamusubiza i bwana.

Hari amarira y’amarangamutima. Mu bantu benshi, hari abishima cyane amarira agashoka nta rutangira. Ikiniga kikajwigiriza umuhogo mu ijosi kubera ibyishimo. Inshuti zitaherukanaga hakaba ubwo zirira ugasanga umuntu yarigase amarira ya mugenzi we. Ayo ni amarira y’ibyishimo yo gahoraho.

Amarira y’ibyishimo abaho cyane. Tuyabona nko mu bukwe bw’Abanyarwanda, cyane cyane iyo bariza abageni b’abakobwa. Umukobwa bakamuririmbira uturirimbo tumwibutsa urungano, tukamwibutsa ko agiye ahandi atamenyereye, ataye abo yabyirukanye nabo.

Ugira utya ukabona umugeni araturitse ararize, umugabo we n’umuranga we bamushagaye bagafata agatambaro bakamuhoza biturutse ku uri hafi ye cyangwa uwabibonye mbere. Ni mu muco wa kinyarwanda usanzwe.

Ntabwo wamenya ko kurira kw’uwo mugeni biterwa no kubabazwa n’abo asize, cyangwa ari ugushimishwa n’aho agiye. Ibyo ari byo byose ari abarilimbira umugeni, ari umugeni ubwe, ntawe uba yanga undi. Igihe cyose ayo marira akurikirwa n’ibitwenge.

Ku bageni ba kera twumva ko hari ubwo umugeni bamushyingiraga ku muntu atanazi. Umugeni bikamutera ubwoba ndetse amarira agashoka n’induru akayidehera. Bamuhozaga bamubwira bati urakuze ntukiri umwana, wirira wihogora ufite umugabo na nyokobukwe bazaguhoza. Bakanamuhoza bagira bati ihorere uzabyara nawe ubone abo uhoza. Ubwo butumwa yarabwumvaga urugo akarwubaka akabyara akuzukuruza.

Ubuhamya butarimo amarira

Muri iyi myaka 24 ishize Igihugu n’isi bimaze twibuka Jenoside yakorewe Abatutsi, numvise ubuhamya bwinshi bw’abacitse ku icumu ry’iyo Jenoside. Muri ubwo buhamya, abacitse ku icumu, nka ba nyiramukubitwa, bavuga ubugome bwabakorewe harimo kwicwa urupfu rukabanga. Bakavuga ibyababayeho n’ibyabaye ku babo harimo kwicwa, ahanini bishwe nabi. Ubuhamya bw’abakuru muri bo, ahenshi buhera kure kugeza muri cya gihe cy’iminsi ijana.

Icyo nitegereje nkabona muri ubwo buhamya, ntaho wumva umuntu akubwira ibyamubayeho, ibyamukorewe, cyangwa ibyo yabonye, ngo wumve avugamo ko hari igihe yarize cyangwa umuntu bari hamwe ahigwa warize.

Yewe, ni na gake cyane wumva mu buhamya ko n’abana barize. Mwibaze impinja zifite ababyeyi bahigwaga, ukumva ko batarariraga! Bakaruca bakarumira kandi hari impamvu nyinshi zagatumye barira. Ari inzara ari inyota ari no kurara rwantambi!

Nta mubyeyi wonsa wabona amashereka yo konsa azi ko kubaho kwe bigenwa n’Interahamwe. Honsa umubyeyi ufite ibyishimo n’icyizere. N’impinja zonkaga ba nyina bapfuye ntibariraga kubera ko babuze icyo bakura mu ibere ryumye! HARI ABANA BABAYEHO BARABAYE MURI UBWO BUZIMA! Jenoside yari yarabateye ikinya kitari ingusho.

Harya, mu gihe cyo kwibuka Jenoside yakorewe Abatutsi, abanyarwanda bibuka ko ari Umunyarwanda wicwaga yicwa n’undi batagira icyo bapfa uretse icyiswe ubwoko bwazanywe na kavantara bugahabwa ikuzo na PARMEHUTU n’byayikomotseho? Ibyo ni byo byatumaga abantu batarira. Barire se baririra he baririra nde?

Ibyo numvise muri ubwo buhamya, kandi bwinshi, ari mu buzima busanzwe butarimo Jenoside, ni agahinda n’intimba byariza umuntu umunsi ukira ugahereza n’undi. Benshi muri abo batanga ubuhamya, ntibarira. Abarira ni ababwumva bishyira mu mwanya w’abahigwaga n’abishwe. Baba bagifite cya kinya.

Ese byumvikana bite ko uwabaye muri ubwo buzima bubi bikabije hatabamo kurira? Rimwe ukumva uwacitse ku icumu asobanura uburyo yarokotse, birimo no gukizwa no kuryamirwa n’imirambo. Ukibaza uti ni kuki adahuza akababaro ke ngo gaturitse imitsi y’amaso ngo izane amarira? Impamvu irahari.

Ubuhamya bwa ba nyiramukubitwa barokotse Jenoside, buba buremereye ku buryo n’amarira asanzwe atari yo yashoka, ahubwo niba hari igitemba kiva mu maso, hakwiye kuba haza amarira avanze n’amaraso! Siko bigenda ariko. Uko kutarira ku bagize agahinda n’intimba ntagereranywa byatumye nibaza byinshi byanshubije kure.

Harya ubundi amarira ni iki?

Baca umugani ngo ‘amarira y’umugabo atemba ajya mu nda’. Muri uyu mugani umugabo si igitsina ahubwo ni uwihangana, akarira make agahora. Cyangwa, ntanarire rwose.

Ariko Rwanda, aho uzi AMARIRA ahera mu bantu bapfushije ababo batagira ingano nabo bakabaho batariho? Abanyarwanda bibuka ko hari igihe mu Rwanda amarira y’Abatutsi yakamye? Ayo marira yaheze mu bantu ni ayo kwibukwa kuko ubwayo ni ubuhamya bwihariye.

Mu Rwanda, uwitwaga Umututsi, guhera ku wa 7 Mata 1994, yabonye abe bicwa urubozo ntiyarira araceceka. Umubyeyi akabona bamutemera ikibondo/ibibondo imbere ye ntarire, kuko nta jwi yabashaga kubona ryarenga umuhogo.

Harya amarira adasesekaye aho ngaho, ni urukundo ruke, cyangwa ni agahinda kadasanzwe? Niba akababaro na ko kazana amarira, akababaro karenze kwicirwa umubyeyi ubireba, umwana wawe agatabwa mu cyobo cyangwa mu mugezi akiri muzima ubireba, nturire, amarira aba ari he? Amarira yagiye he koko?

Amarira nasanze ari ay’ibyishimo kurusha agahinda. Amarira akabamo urukundo kurusha urwango. Amarira abamo icyizere kurusha kwiheba! Nta marira y’agahinda n’intimba bikabije.

Amarira aratemba umuntu yapfushije uwe yarwaje, akamwitaho, akanamwihambira. Ariko, uwo muntu ntarizwe no kwicirwa abe mirongo ine, mirongo itanu, ijana n’amagana mu gihe gito cyane. Uwiciwe benshi muri Jenoside mu minsi ibiri, akabimenya, amaso ye yarumye! Ese agahinda karakabya kagakamya amaso? Igisubizo cyaba ari yego! Erega umutima n’amaso biba byarahuye na cyumya!

Ubusanzwe amarira ahambura umutima, akanahuza imitima y’abantu. Icyo kikaba ari cyo gituma ubona hari urizwa no kubona undi arira. Ariko ubundi uwicwaga n’uwiciwe muri Jenoside bari kurira bigashoboka?

Politiki ishingiye ku ngengabitekerezo ya Jenoside yakamije amarira

Umuntu arira hari uwo aririra. Mu byago bisanzwe umuntu ararira akabona abamuhoza. Babyita gufata mu mugongo. Muri icyo gihe cya Jenoside, uwahigwaga ngo yicwe abakamuhojeje babaga bishwe, abandi ari abamukoba cyangwa nawe bashaka kumwica. Umututsi wagiraga amahirwe akabona umuhisha, kubw’umutekano w’umuhishe ntiyifuzaga kubona no kumva amarira ye. Nta nayo ga!

Icyo kintu cyakamije amarira y’Abanyarwanda nasanze kiremereye cyo gatsindwa! Uwarokotse kubera ko yari munsi y’imirambo, ntiyarize. Yari kurira se ngo imirambo y’abe imwumve? Ngo mugenzi we wihishe se amutabare? Umukobwa wasambanyijwe n’ubonetse wese ntiyarize. Nanze kubyita “ku ngufu” kuko ingufu bivuga imbaraga. Nta mukobwa wari utegereje kwicwa wagiraga imbaraga. Abamukoreraga ibya mfurambi babikoreraga uwapfuye mu bitekerezo, n’icyizere, ariko agihumeka gusa.

Hari uwo baciye intoki, ibiganza cyangwa izindi ngingo ntiyarira. Yewe na nyuma yo kurokoka Jenoside nta marira yari ahari kuko ubuzima bwari buriho ntibwari ubwo kurira! Umuntu wisuganya mu bihe nk’ibyo bibi nta marira amubamo! N’ababasha kurira ubu ni uko bafite gihoza.

Iyo Inkotanyi zidatsinda, uwacitse ku icumu watorongeye mu mahanga yari kuririra nde ngo amwumve mu gihe umujenosideri ari we ufite ijambo mu Rwanda? Ibyo abantu bajya babyibaza koko? Uretse ko kubyibaza ubwabyo, no kubirota ubwabyo byaba nta nzozi mbi nk’izo!

Kwamburwa Ubumuntu

Uwababazwaga ntiyagombaga gutaka kuko ingengabitekerezo ya Jenoside yari yaramwambuye ubwo burenganzira bwo kugaragaza ko ababaye. Uhereye mu gihe cya PARMEHUTU Leta yari yarambuye Abatutsi ubumuntu. Kimwe mu byiciro by’ibanze bya Jenoside ni ukwambura ba nyiramukubitwa ubumuntu (dehumanization). Ibyo ni intambwe ya mbere yo kwica itsinda rya ba nyiramukubitwa bahagaze. Mu Rwanda byamaze imyaka igera kuri mirongo itatu n’itanu.

Umututsi yambuwe ubumuntu yitwa amazina y’indwara. Yiswe umufunzo yitwa umusonga! Umututsi yiswe ndarusuma yitwa umwaku! Ibyo nta marira byasiga mu muntu! Umututsi yiswe inzoka kandi inzoka ntirira. Yiswe inyenzi, yitwa umusundwe kandi ibyo nta marira bigira. Umututsi yiswe n’inda (iyi yo mu myenda cg mu mutwe) ubivuze ntiyabihanirwa kandi inda nta marira yayo nzi! Yaniswe n’ikirumirahabiri ye!

Ibyinshi muri ibi byigishijwe mbere y’uko u Rwanda rubona icyiswe ubwigenge na nyuma gato y’aho rububoneye. Mu mategeko icumi y’urwango ikinyamakuru Kangura cyigeze kwandika mu Ukuboza 1990, harimo irya munani iryihariye ribuza Umuhutu uwo ariwe wese kugirira impuhwe Umututsi! Waririra uwabujijwe kukugirira impuhwe ngo bigende bite? Mbere y’amategeko cumi ya Hassan Ngeze, hari harabanje aya Joseph Habyarimana Gitera.

Uririye utagomba kumugirira impuhwe bimutera umujinjya, kuko atangira kwibaza ibyo urimo. Abona ari ugukabya ubutesi cyane ko bigishaga ko n’amazina Umutesi ari amatutsi! Ni bibi kurusha ibya wa mugani ngo ‘Ubyinira Umwami utagushaka akakwita umusazi.’

Iryo tegeko ribuza Abanyarwanda bamwe kutagirira impuhwe abandi ryaje ryuzuza ibyo kubatesha agaciro bitwa ubukoko n’indwara hiyongeraho n’amategeko yigisha ko umubano hagati y’Umuhutu n’umwanzi we Umututsi udashoboka kubera kamere mbi y’Umututsi by’umwihariko ubushukanyi n’ibindi bisa nabyo.

Ubwicanyi ndengakamere bwakorewe Abatutsi bwanibasiye n’Abahutu bishe itegeko ribabuza kutagirira impuhwe Umututsi. Jenoside yakorewe Abatutsi mu Rwanda muw’1994, hari hashize imyaka hafi mirongo itatu, umuPARMEHUTU Anastase Makuza abwiye Abatutsi ngo nibahunge cyangwa bahore nibibananira bahore. Abakuze bazi ibyo ntawari kurira agomba guhora cyangwa kuruca akarumira agahebera urwaje.

Munyarwanda w’ubu n’uw’ejo, menya kandi wibuke ibyo, ufate icyemezo. Icyo cyemezo si ikindi, ni ukurwanya Jenoside!

Iyi nkuru yanditswe n’Umushakashatsi kuri Jenoside : Tom Ndahiro

Iyo gahunda ikubiyemo gukoresha imirongo ya telefoni itishyurwa nk’uko byatangajwe ku wa Mbere tariki 5 Mata 2021, icyo kikaba ari kimwe mu bikorwa bijyanye no kwitegura icyunamo ku rwego rw’igihugu kizatangira tariki 7– 14 Mata 2021.

Dr. Yvonne Kayiteshonga

Dr. Yvonne Kayiteshonga uhagarariye Ishami ryita ku buzima bwo mu mutwe muri ‘RBC’ yabwiye itangazamakuru ubu ari inshuro ya kabiri bagiye gukoresha ubwo buryo bwo gufasha abahura n’ihungabana mu gihe cyo kwibuka, bigakrwa bifashihije telefoni,kubera icyorezo cya COVID-19.

Ubushakashatsi bwakozwe mu 2018, kureba uko ikibazo cy’uzima bwo mu mutwe gihagaze mu Rwanda, bwasanzwe abacitse ku icumu rya Jenoside yakorewe Abatutsi, ari bo bafite icyo kibazo ‘Post-Traumatic Stress Disorder (PTSD)’. 27.9% by’Abarokotse Jenoside yakorewe Abatutsi nibo bafite ibibazo b’ubuzima bwo mu mutwe biturutse ku ihungabana mu 3.6% by’abaturage mu rusange, ari bafite ibyo bibazo.

Kubera icyorezo cya COVID-19, iyo mibare ishobora nk’uko bigaragazwa n’imibare itangwa n’ishami ry’ubuzima bwo mu mutwe muri ‘RBC’,kuko ubu nubwo imibare y’abajya kwa muganga kubera ibibazo bishingiye k ubuzima bwo mu mutwe yagabanutseho 20%, ariko ibibazo bijyanye n’ubuzima bwo mu mutwe byariyongereye.

Urugero, abagabo bagerageje kwiyakura bariyongereye bava kuri 54.8% mu 2019, bagera kuri 60.07% 2020, hari kandi ibibazo bishingiye ku cyorezo cyahunganije ubukungu n’imibanire hagati y’abantu byatumye umubare w’abafite ibibazo by’agahinda gakabije (depression) uzamuka bava ku 1431 muri Werurwe 2019, bagera ku 3036 muri Werurwe 2020.

Kubera iyo mibare y’abafite ibibazo bitandukanye ikomeza kwiyongera kandi bikaba ari ngombwa gukomeza kwirinda icyorezo cya COVID-19, Dr. Kayiteshonga, yavuze ko uburyo bwakoreshejwe bwo gufasha abuhuye n’ihungabana hifashijwe telefoni bwakoreshejwe umwaka ushize mu gihe Kwibuka ku nshuro ya 26 Jenoside yakorewe Abatutsi,bikagaragara ko bishoboka, nubu ngo nibwo buzakoreshwa.

Dr Kayiteshonga yagize ati, “COVID-19 yatweretse ubuvuzi bushobora gutangwa binyuze kuri telefoni. Dutanga imiti mu gihe bibaye ngombwa, kandi akenshi usanga ikiba gikenewe (ku muntu wabihuguriwe) ari ugushobora gutega amatwi uwahuye n’ikibazo,kandi ibyo bishobora gukorwa kuri telefoni”.

Gufasha abahuye n’ihungabana hifashishijwe telefoni bikorwa bite?

Dr Claire Nancy Misago, Umuyobozi ushinzwe ubuzima bwo mu mutwe ku rwego rw΄ibanze muri RBC, yavuze ko hari abajyanama n’impuguke mu by’ubuzima bagera ku 55.000 bahuguwe mu bijyanye no guhangana n’ihungabana mu gihe cyo Kwibuka.

Abo ngo bazakorana n’imiryango y’abacitse ku icumu rya jenoside mu gufasha abahuye n’ihungana, nubwo yaba ari iwe mu rugo, cyangwa muryango, mu gihe uburyo bwo kumufasha butagize icyo butanga, bazajya bahamagara kuri numero itishyurwa 114, kugira ngo uwo wahuye n’ikibazo abe yajyanwa gufashwa ku bitaro by’Akarere.Mu gihe bitagize icyo bitanga, nabwo umutu agakomeza kumererwa nabi, nk’uko Dr. Misago abivuga, azajya yoherezwa ku bitaro bikuru (referral hospital), yitabweho n’inzobere mu by’ubuzima bwo mu mutwe (psychiatrists) n’abaforomo bize iby’ubuzima bwo mu mutwe (mental health nurses) cyangwa se n’inzobere mu by’imitekerereze y’umuntu (psychologists).

Imibiri 10 y’abazize Jenoside yakorewe Abatutsi yabonetse mu Murenge wa Ntongwe na Kinazi mu Karere ka Ruhango ubwo yashyingurwaga mu cyubahiro mu rwibutso rwa Ruhango ku wa 19 Ukuboza 2020

Umunyamabanga wa Komisiyo y’Igihugu yo kurwanya Jenoside (CNLG), Dr. Bizimana Jean Damascene, yavuze ko kubera ko icyorezo cya COVID-19 kigihari, kwibuka ku nshuro ya 27 Jenoside yakorewe Abatutsi bizakorwa hubahirizwa amabwiriza yo kwirinda ikwirakwira ryacyo nk’uko byagenze umwaka ushize.

Avuga ku bijyanye no gushyingura mu cyubahiro imibiri yabonetse, Dr. Bizimana yagize ati “Mu turere dutandukanye n’imirenge hari imibiri yagiye iboneka, kuyishyingura biremewe ariko iteka hashingiwe ku mabwiriza uko ateye, gushyingurwa bizakorwa ariko hageyo umubare wemewe, hazanakorwa n’isuku ku nzibutso, ariko turashishikariza abazitabira gahunda zo gushyingura ababo kubanza no kwipimisha kuko ubu byarorohejwe”.

CNLG kandi itangaza ko mu minsi 100 yo kwibuka noneho gahunda yo kugeza ku bantu uko ubwicanyi bwagiye bukorwa umunsi ku munsi n’urugamba rwo kubohora Igihugu byashyizwe mu buryo bw’amajwi kandi bikazahererekanywa mu buryo butandukanye bw’ikoranabuhanga ririmo na telefone.

Ibyaha by’ipfobya n’ihakana rya Jenoside byaragabanutse kandi abakibikomeje bateganyirijwe ibihano

Komisiyo y’Igihugu yo kurwanya Jenoside itangaza ko imibare igaragaza ko ibyaha by’ipfobya no guhakana Jenoside bigenda bigabanuka nk’uko bigaragazwa n’imibare y’abahanirwa ibyo byaha, impamvu ikaba ari uko abantu bakomeje gusobanurirwa ibijyanye n’ibyo byaha kandi ibihano ku babikora bikaba byarakajijwe kugeza ku gifungo cy’imyaka 15.

Imiyoborere myiza n’izindi ngamba zikaba na zo ngo zaratumye ibyo byaha bigabanuka n’ubwo hari abagikomeje kubikora bake ahanini bifashishije imbuga nkoranyambaga bapfobya Jenoside bakaba bibutswa kubyirinda kuko nta mpaka zagakwiye kubaho zo gushaka kuvuga ko hanabayeho Jenoside ebyiri.

Perezida Kagame na Madamu Jeannette Kagame ubwo bunamiraga Abatutsi bashyinguye mu rwibutso rwa Jenoside rwa Kigali, banacana urumuri rutazima mu rwego rwo gutangiza Icyumweru cyo Kwibuka ku nshuro ya 26 Jenoside yakorewe Abatutsi

Umunyamabanga Nshingwabikorwa wa CNLG, Dr Jean Damascene Bizimana, yabwiye RBA ko guhera ku itariki 07 Mata 2021 hirya no hino ku isi no mu Rwanda by’umwihariko, hazatangira ibikorwa byo kwibuka Abatutsi bishwe muri Jenoside mu 1994.

Kuri iyo tariki nk’ibisanzwe igikorwa kizatangirizwa ku rwego rw’Igihugu ku rwibutso rwa Jenoside rwa Kigali(ku Gisozi) ahazacanwa urumuri rw’icyizere.

Mu nyubako ya Kigali Arena ni ho hazaba hateguwe guhurira abitabira ibiganiro byo kwibuka, ariko hazajya Abayobozi bakuru b’Igihugu, abahagarariye ibihugu byabo n’imiryango mpuzamahanga, ndetse n’abayobozi b’ibyiciro bitandukanye by’Abanyarwanda.

Dr Bizimana yagize ati "Abazaza (muri Kigali Arena) bamaze kugezwaho ubutumire. Abaturage bazaba bari mu ngo babikurikire kuri televiziyo, kuri Radio no ku rindi koranabuhanga".

Yavuze ko nta rugendo rwo kwibuka n’umugoroba w’icyunamo bizabaho nk’uko byari bisanzwe bikorwa, kandi ko mu cyumweru cy’icyunamo na nyuma yaho nta hantu abantu bateganyije guhurira mu ruhame.

Ku itariki ya 09 Mata 2021 nibwo hazabaho ikiganiro kizahuza urubyiruko ruri mu bice bitandukanye by’Igihugu hifashishijwe ikoranabuhanga.

Itariki ya 13 Mata 2021 izaba ari iyo gusoza icyunamo hibukwa abanyapolitiki batari bashyigikiye umugambi wo gukora Jenoside, hakazabaho ikiganiro mu bitangazamakuru cyo gutekereza ku mateka ya politiki y’ivangura.

Umunyamabanga Nshingwabikorwa wa CNLG yakomeje asobanura ko mu minsi 100 yo kwibuka, imiryango y’abishwe muri Jenoside ishobora kuzaba ijya gusura inzibutso no kunamira ababo, ariko bigakorwa hubahirizwa amabwiriza ajyanye no gushyingura muri ibi bihe bya Covid-19.

Yasabye inzego z’umutekano n’izishinzwe ubuzima kuzagira uruhare mu kurinda abaje gushyira indabo ku mva z’ababo, kugira ngo bajye birinda kuhatinda.

Dr Bizimana yavuze ko hazabaho gushyingura imibiri irimo kuboneka hirya no hino mu gihugu, aho ubuyobozi bw’uturere n’imiryango y’abishwe bazajya bajyayo ariko hubahirizwa ingamba zo kwirinda Covid-19, harimo no kubanza kwipimisha.

Yavuze ko abaturage badafite ikoranabuhanga rya televiziyo hari amajwi bazajya bahererekanya ku matelefone, avuga mu ncamake uko Jenoside yagiye ikorwa hirya no hino mu gihugu.

Icyuzi cya Ruramira ni cyo cyajugunywagamo abicwaga muri Jenoside, imibiri iherutse kuvanwamo 226 igiye gushyingurwa mu cyubahiro

Ku wa 20 Kamena 2020 ni bwo imirimo yo gushakisha imibiri y’Abatutsi bishwe muri Jenoside yabakorewe mu 1994 ikajugunywa mu cyuzi cya Ruramira yasojwe, hakaba hari hamaze kubonekamo imibiri 226.

Ubusanzwe urwibutso rwa Jenoside yakorewe Abatutsi rwa Ruramira ruruhukiyemo imibiri 1,260.

Umuyobozi wa Ibuka mu Karere ka Kayonza ,Ndindabahizi Didace, avuga ko hatabayeho izindi mbogamizi iyo mibiri 226 yakuwe mu cyuzi yashyingurwa mbere y’itariki abanya Ruramira basanzwe bibukiraho.

Ati "Ubundi i Ruramira twibuka ku itariki 18 Mata, twifuzaga ko imibiri yabonetse mu cyuzi twayishyingura nibura tariki 10 Mata 2021, hanyuma ziriya tariki zikazagera ari ukwibuka gusa, kuko binashoboka ko nta bantu benshi bazajyayo kubera Covid-19".

Ndindabahizi avuga ko bategereje rwiyemezamirimo ubakorera amasanduku hanyuma bagashyingura.

Mu Karere ka Kayonza hari inzibutso za jenoside yakorewe Abatutsi zirindwi, urwa Mukarange, Rukara, Ruramira, Nyamirama, Kabarondo, Rwinkwavu na Nyakanazi ziruhukiyemo imibiri 26,699 y’Abatutsi bishwe muri Jenoside yabakorewe muri Mata 1994, hatabariwe izashyingurwa i Ruramira 226.

Izo nzibutso ariko ngo hari gahunda yo kuzihuza hagasigara eshatu, urwa Ruramira, urwa Rukara n’urwa Mukarange ruherutse kubakwa neza rukuzura rutwaye asaga miliyoni 293 z’Amafaranga y’u Rwanda.

Urwibutso rwa Mukarange rwubatswe bushya, rwuzura rutwaye asaga miliyoni 293