General Venance Mabeyo yabwiye Perezida Samia Suluhu Hassan ko bazakomeza kumurinda no kumwubaha

Yabitangarije mu muhango wo gusezeraho bwa nyuma uwari Perezida wa Tanzaniya Dr. John Joseph Pombe Magufuli.

Mu ijambo rye Umugaba w’Ingabo za Tanzaniya General Venance Mabeyo yabwiye Perezida Samia Suluhu Hassan amufitiye ibanga yasigiwe n’uwo asimbuye Dr John Magufuli kandi yifuza kuzarimumenera.

Ati “Hari ibintu ubwe yanyibwiriye nshaka kuzakubwira ariko sinshaka kubivugira hano ahubwo nzaza ku biro byawe.”

Gen Mabeyo yavuze ko Magufuli yahoraga yifuza iterambere ry’ubukungu no kongera imbaraga z’abashinzwe umutekano kuko ngo muri iki gihe isi igezemo, igihugu gikomeye mu bukungu kigomba kuba gifite igisirikare gikomeye.

Yagize ati “Perezida Magufuli yagaragarije abashinzwe umutekano ko adufitiye ikizere kandi yakoraga ibishoboka ibikenewe bikaboneka kuburyo kurinda umutekano w’igihugu byoroha.”

Yavuze ko iki kizere cyagaragariraga mu buryo yigatanyaga n’ingabo mu bikorwa bizamura ubukungu bw’igihugu kubera yemeraga ko nta gisirikare cyakomera nta igihugu kidafite ubukungu buhagaze neza.

Magufuli ngo yavugaga ko batategereza inkunga z’amahanga kugira ngo bubake igisirikare gikomeye ahubwo bagombaga kubanza kubaka ubukungu bw’igihugu hanyuma bakabona uko bazamura ubushobozi bw’igisirikare.

Gen Mabeyo yavuze ko kubera iyo myemerere ariyo mpamvu igisirikare cya Tanzaniya gikunze kugaragara mu bikorwa bizamura ubukungu bw’igihugu, urugero kurinda ahacukurwa amabuye y’agaciro i Mererani no kubaka urukuta ruzengurutse icyo kirombe cy’amabuye y’agaciro.

Yizeje kandi Perezida Samia Suluhu Hassan ko ingabo zimuri inyuma kandi ziteguye kumurinda n’igihugu muri rusange.

Ati “Tuzakomeza kukurinda kandi tuzanakubaha.”

Yanahishuye ko Magufuli yagombaga kuyobora umuhango w’isozwa ry’amasomo ku basirikare b’aba ofisiye (Cadet) wagombaga kuba kuwa 06 Werurwe 2021 ukabera I Dodoma, umuhango wimuriwe kuwa 10 Werurwe ariko nabwo ntukorwe kubera ko Perezida yari arwaye.

Yasabye Perezida Hassan Suluhu kuzitabira uyu muhango kugihe bagiye gutegura.

Dr Magufuli yitabye Imana ku itariki 17 Werurwe 2021, aguye mu bitaro bya Mzena mu Mujyi wa Dar Salaam, aho yavurirwaga indwara y’umutima nk’uko byatangajwe n’uwamusimbuye ku butegetsi, Perezida Samia Suluhu, icyo gihe wari Visi Perezida.

Perezida Magufuli yapfuye nyuma y’uko hari hashize ibyumweru bibiri atagaragara mu ruhame, icyo gihe bamwe mu Banyatanzania barimo umuyobozi utavuga rumwe n’ubutegetsi muri Tanzania, Tundu Lissu, yavuze ko ngo Perezida Magufuli yaba yararwaye Coronavirus.

Nyuma y’urupfu rwa Perezida Magufuli, Abanyatanzania ndetse n’inshuti zabo zo hirya no hino ku isi, bagaragaje urukundo rukomeye bakundaga Magufuli babinyujije ku mbuga nkoranyambaga, bamwe bavuga ko yari umuyobozi ugira umuhate, witangira abaturage, wicisha bugufi kandi wubaha Imana n’ibindi.

Hari n’abavuze ko Dr Magufuli yari intwari ya Tanzania kuko yakoze ibintu bikomeye harimo kuzamura ubukungu bw’igihugu cye ndetse no kuzamura imibanire n’imiryango Tanzania ihuriramo n’ibindi bihugu nka ‘EAC’ na ‘SADC’, abakuru b’ibihugu biri muri iyo miryango bahamije ko Perezida Magufuli azahora yibukwa nk’umuntu wagize uruhare rukomeye mu izamuka ry’ubukungu bw’iyo miryango ndetse aharanira guhuza abaturage b’ibyo bihugu.

Mu bikorwa byo gusezera ku murambo wa Nyakwigendera Pombe Magufuli bimaze hafi icyumweru kuko byabereye ahantu hatandukanye, wasangaga byitabiriwe n’abantu benshi cyane ku buryo nko muri Dar Salaam hari n’umuryango wapfushije abantu bane (4), baguye mu mubyigano w’abantu benshi baje gusezera kuri Perezida Magufuli.

Muri icyo gihe cyo kumusezeraho kandi nibwo abantu benshi batekereje ku magambo Magufuli ubwe yivugiye ati,” Ndabizi umunsi umwe muzanyibuka, kandi muzanyibuka ku byiza si ibibi”.

Dr Pombe Magufuli ushyingurwa none, yabaye Perezida wa Tanzania guhera mu 2015, yongera gutererwa kuyiyobora muri manda ya kabiri mu 2020, akaba yaratabarutse akiri Perezida wa Tanzania.

Itegeko Nshinga rya Tanzania riteganya ko iyo Perezida wa Repubulika apfuye akiri ku butegetsi, nta matora abaho, ahubwo uwari Visi Perezida niwe uhita amusimbura akayobora mu gihe cyose manda yari isigaje ngo irangire.

Uko ni ko byagenze, Samia Suluhu wari Visi Perezida wa Tanzania guhera mu 2015, ni we wahise urahirira kuyobora Tanzania muri manda Perezida Magufuli yari asigaje.

Uyu munsi tariki 26 Werurwe 2021, Perezida Magufuli arashyingurwa ahitwa Chato, mu Ntara ya Geita aho akomoka, ubu hakaba harimo kuba misa yo kumusabira bwa nyuma.

Minisitiri w’Intebe Edouard Ngirente ari mu banyacyubahiro bagiye gusezera ku murambo wa Magufuli

Ibi kandi ni na byo bikubiye mu butumwa bwatanzwe na Minisitiri w’intebe Dr. Eduard Ngirente mu muhango wo gusezera Magufuli ku wa Mbere tariki ya 22 Werurwe 2021 i Dodoma.

Yagize ati “Mu izina rya Perezida Paul Kagame, mu izina ry’abaturage no mu izina rya Guverinoma y’u Rwanda, nagira ngo nihanganishe abaturage ba Tanzaniya kubera kubura Perezida wabo w’intwari Dr. Pombe Magufuli. U Rwanda rwagize amahirwe yo gukorana bya hafi na Magufuli, bitri uguhurira mu muryango wa Afurika y’Iburasirazuba gusa, ahubwo yagize uruhare runini mu mibanire y’u Rwanda na Tanzaniya. Umurage we uzahora wibukwa.”

Mu bitabiriye umuhango wo gusezera kuri Magufuli harimo Perezida Félix Antoine Tshisekedi wa Repubulika Iharanira Demokarasi ya Congo akayobora n’umuryango wa Afurika yunze Ubumwe ndetse na Uhuru Kenyatta uyobora Umuryango wa Afurika y’Iburasirazuba (EAC) n’abandi.

Mu ijambo rye, Perezida Uhuru Kenyatta yashimagije Magufuli witabye Imana aho yavuze ko yari Umunyafurika muzima (Panafricanist) waharaniye ubwigenge bwa Afurika abishakishiriza mu byo Afurika itunze aho gutegereza inkunga z’abanyamahanga.

Perezida wa Kenya yavuze ko Magufuli yagaragaje ko ibihugu bya Afurika bishobora kwitunga bishingiye ku mitungo yabyo bwite aho gutegereza ibituruka ahandi.

Ati “Mu gihe gito Perezida Magufuli yagaragaje ko twebwe nk’abanyafurika twakwigenga aho gutegereza inkunga z’amahanga kandi dufite byose dushingiye ku mutungo kamere dufite kandi abaturage bacu bakabona iby’ingenzi byose bakenera mu mibereho yabo”.

Perezida Kenyatta yavuze ko usimbuye Magufuli ari we Samia Suluhu Hassan afite ikivi agomba kusa cyasizwe na Perezida Magufuli ariko amwizeza ubufasha buturutse ku bayobozi b’umuryango wa Afurika y’Iburasirazuba kugira ngo abashe gukomereza aho uwo asimbuye agarukiye.

Ati “Tuzakomeza gukora ibyo twakoraga kugira ngo abaturage ba Afurika y’Iburasirazuba barusheho kubana neza. Ndakwizeza ko tuzafatanya mu rugendo kugira ngo duhuze abaturage b’Akarere n’umugabane muri rusange.”

Ngirente yitabiriye umuhango wo guherekeza Magufuli

Ku wa Gatatu tariki ya 17 Werurwe 2021 nibwo byatangajwe ko Perezida Magufuli yitabye Imana. Biteganyijwe ko azashyingurwa ku wa Gatanu tariki 26 Werurwe 2021 aho avuka hitwa Chato mu gace ka Geita.

Perezida Suluhu akaba yaratangaje icyunamo cy’iminsi 21 abaturage ba Tanzaniya bunamira Perezida wabo Magufuli.

Mu ijambo rye, Perezida Suluhu, yahishuye ko Magufuli mbere y’uko yitaba Imana, atigeze yita ku buzima ahubwo yitaye ku mishinga yari afitiye abaturage be.

Ati “Samia, wigira ikibazo ku buzima bwanjye, ahubwo jya kureba imishinga twemereye abaturage, ubampere indamutso yanjye kandi ubabwire ko mbakunda.”

Samia ngo yahise ajya mu ruzinduko rw’akazi i Tanga ndetse anahamagara Magufuli amumenyesha urwo ruzinduko.

Kuri uyu wa Kabiri tariki ya 23 Werurwe 2021, umubiri wa Magufuli urajyanwa mu kirwa cya Zanzibar abaturage bawusezereho, ku wa 24 ujyanwe i Mwanza aho uzarara hafi n’ikiyaga cya Victoria abaturage bagikomeza kumusezeraho.

Ku wa 25 Werurwe 2021 umubiri uzajyanwa mu Ntara avukamo ya Geita asezerweho n’umuryango we ndetse n’abagize Guverinoma, ku wa 26 Werurwe 2021 ashyingurwe mu cyubahiro.

Minisitiri w’Intebe wa Tanzania Kassim Majaliwa yavuze ko kuza kw’abo bayobozi baje kwihanganisha Tanzania, ariko kandi ngo bikaba binagaragaza uko Perezida Magufuli yari akunzwe.

Yagize ati “Urutonde rurerure rw’abayobozi baturutse mu bihugu 17, baje kudufata mu mugongo. Gutabarwa n’abaturanyi bacu turabyishimiye cyane. Tanzania ni igihugu cy’inshuti kandi ni umuturanyi. Turabakunda, kubona Abakuru b’ibihugu batandatu(6), ba Visi Perezida babiri baturutse mu bihugu byabo si ikintu gito. Abaje bahagarariye abakuru b’ibihugu byabo bo mu bihugu duturanye, turishimye cyane.”

Majaliwa yasabye Abanyatanzaniya kuzirikana ibyaranze ubuyobozi bwa Perezida Magufuli.

Yagize ati “Twese twifuzaga kugumana nawe, ariko urupfu ni ikintu kitamenyerwa, ariko nta kindi twakora kuko byose ni ko Imana yabishatse, ubumwe ni ingufu, kwitandukanya ni ugutsindwa, dufatane urunana, dukomeze kuba bamwe no gukundana kurushaho kandi dukomeze kumusabira Imana imuhe kuruhukira mu mahoro. ”

Perezida Kenyatta yakoze agashya

Uhuru Kenyatta wa Kenya ni umwe bayobozi bitabiriye umuhango wo gusezera bwa nyuma ku murambo wa Dr Pombe Magufuli wari Perezida wa Tanzania. Mu gihe Kenyatta yariho ageza ijembo rye ku Batanzania n’abandi bitabiriye umuhango wo gusezera kuri Dr Magufuli, ijwi ry’umuntu warotaga ‘adhana’ mu musigiti wegereye Sitade Uhuru ya Dodoma aho umuhango wabereye,ryatangiye kumvikana.

Perezida Kenyatta yumvise iryo jwi rivugira mu musigiti ubundi ngo riba ryibitsa Abayisilamu ko ari umwanya wo gusenga ugeze, ahita aharika imbwirwaruhame mu gihe cy’umunota urenga, ategereza ko ‘adhana’ irangira, abona gukomeza ijambo rye. Ibyo ngo byashimishije abantu ibihumbi bari bateraniye muri iyo Sitade bamukomera amashyi menshi.

Uwo umuhango wanitabiriwe n’abandi bayobozi batandukanye baturutse hirya no hino ku isi baje kwifatanya na Tanzania muri harimo Perezida Felix Tshisekedi wa Repubulika iharanira demokarasi ya Congo, wavuze ko Perezida Magufuli yari umuntu uharanira ubwigenge mu by’ubukungu.

Hari kandi Perezida Edgar Lungu wa Zambia, wavuze ko yababajwe cyane n’urupfu rwa Perezida Magufuli, ariko yongeyeho ko asize ibintu byinshi azibukirwaho muri Tanzania ndetse no ku byo yakoze mu iterambere ry’ibihugu bihurira mu Muryanyo wa SADC.

Perezida Lazarus Chakwera wa Malawi nawe yitabiriye umuhango wo gusezera bwa nyuma kuri Nyakwigendera Dr Pombe Magufuli, akaba yasabye Abayobozi b’Afurika gukurikiza ibyiza bya Magufuli.

Mu bandi bitabiriye uwo muhango harimo Emmerson Mnangagwa wa Zimbabwe wavuze ko umusanzu wa Dr Pombe Magufuli wari Perezida wa Tanzania utazibagirana mu gihugu cya Zimbabwe.

Hari kandi Perezida wa Mozambique Nyusi Filipe, wavuze ko atazibagirwa ibyaranze Perezida Pombe Magufuli nubwo ngo yapfuye bitunguranye.

Yagize ati “Kuba agiye bitunguranye bidusigiye inzibutso zitazasima na rimwe, ahubwo nikuzibungabunga, tugahora twibuka Magufuli. Yajyaga ampamagara kuri telefoni mu gitondo saa kumi n’ebyiri(6h), akavuga ati byuka muvandimwe wanjye ukore akazi..., Tanzania ibuze umuyobozi mwiza w’umwizerwa ndetse n’umugabane wa Afuriki ubuze umuntu w’ingirakamaro n’umujyanama muri byinshi.”

Hari kandi Perezida Cyril Ramaphosa wa Afurika y’epfo,nawe waje mu muhango wo gusezera kuri Perezida Magufuli,akaba yavuze ibintu bigera kuri bitatu ashimira Dr Magufuli harimo kuba yaramusobanuriye akamaro k’ururimi rw’Igiswahili, ndetse kigatangira kwigishwa muri Afurika y’Epfo.

Muri ibyo bintu bitatu yamubwiye, ngo harimo kubahiriza indangagaciro nziza, kurwanya ruswa no gukuza ururimi rw’Igiswahili.

Yagize ati “Ndashaka kumushimira ku muhate we, yizeraga ko twese twarinda umuco wacu n’ibituranga.Ndashaka no kumushimira ukuntu yabonaga ko dukwiye kubaha indimi zacu.Magufuli yumvaga buri Munyafurika yamenya Igiswahili, aza kunsura muri Afurika y’Epfo yanzaniye igikarito cyuzuye ibitabo by’Igiswahili, ambwira ko azanyigisha Igiswahili, ariko agiye ataranyigisha Igiswahili cyiza nagombye kuba ndimo kuvugira hano uyu munsi”.

Umuhango wo gusezera ku murambo wa Perezida Magufuli wari urimo kubera muri Sitade ya ‘Uhuru Stadium’, ariko umubare w’abaza gusezera wabaye mwinshi cyane kuko ngo hari abinjiriraga mu marembo yemewe abandi bakanyura ahatemewe bose bakinjira muri sitade, bituma umubare uzamuka cyane, abantu barabyigana habamo n’abakomereka.

Uwitwa Lazaro Mambosasa uhagarariye Polisi muri ako gace, yavuze ko kugeza ubu bataramenya umubare nyawo w’abashobora kuba bakomerekeye muri uwo mubyigano, ariko yemeza ko umubare ushobora kuba ari munini.

Kuri uyu wa Mbere tariki 22 Werurwe 2021, umurambo wa Dr Magufuli urasezererwa mu Mujyi wa Ddoma, bikaba biteganyijwe ko bahindura uburyo bwo gusezera ku murambo, kugira ngo birinde umuvundo nk’uwabaye mu Mujyi wa Dar es Salaam.

Abayobozi batandukanye bo muri icyo gihugu, ndetse n’abaturuka mu mahanga bageze mu Mujyi wa Dodoma baje gusezera bwa nyuma ku murambo w’uwahoze ari umuyobozi wa Tanzania Dr Mafuguli.

Uburyo bwo gusezera ku murambo bwahinduwe, ubu ngo abasezera ku murambo ntibanyura iruhande rw’isanduku irimo umurambo wa Perezida Magufuli, ahubwo abari muri sitade imbere barawusezera uri mu modoka iza kuzenguruka inshuro eshanu muri sitade kugira ngo abantu bamusezere uko bikwiye.

Uyoboye uwo muhango yatangaje ko abari hanze ya sitade basubira mu ngo zabo, bagategereza kuzateranira mu midugudu yatangajwe, aho umurambo uzanyuzwa uri mu modoka bagashobora kuwusezeraho bwa nyuma.

Abakozi b’umuryango utabara imbabare ‘Red Cross’ bo baravuga ko muri iyi minsi bafite akazi gakomeye ko kwita ku bantu basezera ku murambo bakagira agahinda kenshi bakagwa hasi, bigasaba ko bajya kwitabwaho.

Ariko nubwo bimeze bityo, Abanyatanzaniya ntibagiye gutora undi Perezida, kuko Itegeko Nshinga rya Repubulika yunze ubumwe ya Tanzania mu ngingo yaryo ya 37(5), rivuga ko iyo umwanya wa Perezida wa Repubulika ubuzemo umuntu, bitewe n’urupfu rwa Perezida wa Repubulika,Visi Perezida ahita amusimbura, akayobora muri manda yari isigaye.

Muri iki gihe, Visi Perezida wa Tanzania ni uwitwa Samia Suluhu Hassan, ubwo akaba agomba kurahizwa, akaba Perezida wa Tanzania mu gihe cy’imyaka itanu ya manda Perezida Magufuli yari agiye kuyobora Tanzania.

Nk’uko bivugwa mu itegeko Nshinga rya Tanzania kandi, Madamu Suluhu Hassan, agomba kurahizwa mu masaha makumyabiri n’ane (24), nyuma agahita aba Perezida wa Tanzania akarangiza manda y’imyaka itanu Perezida Magufuli yari yatorewe kuyobora, guhera mu kwezi k’Ugushyingo 2020.

Samia Suluhu namara kurahirira kuyobora Tanzania, araba abaye Perezida wa mbere w’umugore uyoboye icyo gihugu.

Uwitwa Cleopa Msuya, wahoze ari Minisitri w’Intebe wa Tanzania, yavuze ko urupfu rwa Perezida Magufuli rwatunguranye cyane ku gihugu, ariko anasaba Abanyatanzania kwikomeza imitima, kugira ngo bazabone umuyobozi uzagera ikirenge mu cya Perezida Magufuli.

Aganira n’ikinyamakuru Mwananchi, Msuya yagize ati “Ni ikintu cyaje gitunguranye ku gihugu, kuko yatangiye neza manda ye ya mbere, abantu benshi bagira icyizere ko azakomeza atyo, cyane ko bari bamufitiye icyizere gikomeye”.

Msuya yongeyeho ati “Abanyatanzania benshi bari bafitiye icyizere gikomeye Perezida Magufuli, none Imana yamuhamagaye, ubu icyo twashobora gukora ni ukwihanganisha umuryango we ndetse n’Abanyatanzania bose”.

Abantu batandukanye bakomeje kwihanganisha Abanyatanzaniya

Abatanze ubutumwa, barimo abahanzi, abanyaplitiki n’abandi ariko bakanagaragaza uko bakozwe ku mutima n’urupfu rw’uwo muyobozi, bamwe muri ni aba bakurikira:

Raila Odinga

Mu batanze ubutumwa harimo Raila Odinga, Umuyobozi utavuga rumwe n’ubutegetsi bwa Kenya.

Odinga yohereje ubutumwa bwo kwihanganisha umuryango wa Perezida Magufuli ndetse n’Abanyatanzania muri rusange, avuga ko yababajwe n’urupfu rwa Dr John Magufuli, asobanura ko yamugaragarije ubufatanye bukomeye ndetse akanamufasha mu gihe yari amukeneye.

Odinga yagize ati “ Nababajwe cyane no kumva inkuru y’urupfu rwa Perezida John Magufuli. We n’umuryango we, bari abantu ba hafi cyane kuri njye by’igihe kirekire. Perezida Magufuli yabanye nanjye mu bihe bigoye mu buzima bwanjye, nihanganishije umuryango we ndetse n’Abatanzania muri rusange”.

Cyril Ramaphosa

Undi watanze ubutumwa bwo kwihanganisha Tanzania ni Cyril Ramaphosa, Perezida wa Afurika y’Epfo. Abinyujije kuri Twitter yavuze ko amaze kuvugana na Visi Perezida wa Tanzania, Samia Suluhu Hassan, kugira ngo amwihanganishe.

Perezida Ramaphosa yagize ati “Igihugu cya Afurika y’Epfo cyifatanyije na Guverinoma ya Tanzania n’Abanyatanzania bose mu kababaro batewe n’urupfu rwa Perezida John Magufuli. Navuganye na Visi Perezida wa Tanzania Samia Suluhu Hassan, ntanga ubutumwa bwo kubihanganisha muri iki gihe gikomeye barimo”.

Boris Johnson

Minisitri w’Intebe w’u Bwongereza, Boris Johnson, yagize ati “ Nababajwe cyane n’urupfu rwa Perezida wa Tanzania, Dr John Magufuli, nifatanije n’umuryango we, abantu be ba hafi, ndetse n’Abanyatanzania bose muri iki gihe gikomeye”.

Bobi wine

Mu bandi batanze ubutumwa bwo kwihanganisha Tanzania harimo Umunyapolitiki wo muri Uganda uherutse kwiyamamariza kuyobora icyo gihugu ahagarariye ishyaka rya ‘National Unity Platform’, Robert Kyagulanyi uzwi cyane ku izina rya Bobi Wine.

Abinyujije kuri twitter yagize ati “Umutima wanjye wakozweho cyane n’inkuru y’urupfu rwa Perezida wa Tanzania John Magufuli, nihanganishije Abanyatanzania bose kubera ibi byago bikomeye”.

Zitto Kabwe

Hari kandi Zitto Kabwe, Umuyobozi w’ishyaka ryo muri Tanzania rya ‘Chama cha ACT- Wazalendo’. Abinyujije kuri Twitter nawe yihanganishije Abanyatanzania kubera urupfu rwa Perezida Magufuli.

Yagize ati “Kuri telefoni, navuganye na Visi Perezida wa Tanzania, Mama Samia Suluhu Hassan, ndamwihanganisha kubera urupfu rw’uwahoze ari Perezida wa Tanzania, John Magufuli”.

Jose Chameleon

Umuhanzi w’icyamamare wo muri Uganda uzwi nka Jose Chameleon nawe yihanganishije Abatanzaniya.

Yagize ati “Nifatanyije n’abandi kwisi mu kunamira Perezida wa Tanzaniya John Pombe Magufuli witabye Imana. Aruhukire mu mahoro y’iteka ryose. Nihanganishije Abanyatanzaniya bose”.

Perezida Kagame yavuze ko inkuru y’urupfu rwa Magufuli ari incamugongo, dore ko yamufataga nk’umuvandimwe we ndetse akaba inshuti ye ikomeye.

Perezida Kagame ati “Uruhare rwe mu iterambere ry’Igihugu cyacu n’iry’Akarere muri rusange ntiruzibagirana.”

Yihanganishije umuryango we n’abaturage ba Tanzania, avuga ko u Rwanda rwifatanyije na Tanzania muri ibi bihe bikomeye.

We are saddened by the loss of my brother and friend, President Magufuli. His contribution to his country & to our region will not be forgotten. My deepest condolences to his family and the people of Tanzania. The people of Rwanda stand with Tanzania during this difficult time.

— Paul Kagame (@PaulKagame) March 18, 2021

Perezida Kagame yashyizeho igihe cy’icyunamo mu gihugu hose guhera kuri uyu wa 18 Werurwe 2021 kugeza ku munsi Perezida Magufuli azashyingurirwa.

Itangazo ryashyizweho umukono na Minisitiri w’Intebe, Dr. Edouard Ngirente, rivuga ko amabendera y’u Rwanda n’ay’Umuryango wa Afurika y’Iburasirazuba yururutswa kugeza hagati, mu Rwanda hose ndetse no muri Ambasade zarwo.

Perezida Kenyatta yababajwe n’urupfu rwa Magufuli

Perezida Uhuru kandi nk’uko byavuzwe n’Ikinyamakuru Mwananchi, kuri uyu wa 18 Werurwe 2021, yatanze ubutumwa bwo kwihanganisha Tanzania nyuma y’urupfu rwa Perezida Magufuli, waguye mu Bitaro bya Mzena mu Mujyi wa Dar es Salaam, aho bivugwa ko yari arimo kuvurirwa.

Muri ubwo butumwa Perezida Kenyatta yatanze, yasobanuye umubano we na Dr Magufuli mu gihe yari akiriho, avuga ko Tanzania ibuze inshuti n’umuyobozi mwiza wari ufite intego yo guhuza ibihugu byose bigize Umuryango wa Afurika y’Iburasirazuba.

Yagize ati “Ndibuka ko akenshi uko twahuraga twaganiraga ku iterambere ry’ibihugu byacu byombi, urugendo rwe rwa nyuma yakoreye muri Kenya, twafunguye umuhanda anampa icyubahiro gikomeye tujyana gusura Mama wanjye. Yanantumiye kujya kumusura muri Tanzania nanjye nza kujyayo, tujyana n’ahitwa Chato gusura Mama we, turara aho iwe, turara tuganira ku bijyanye n’umubano wacu nk’Abanyamuryango ba EAC”.

Perezida Kenyatta yasezeranyije ko azakora ibikwiriye byose, bijyanye no kugira ngo uwo muyobozi ashyingurwe neza, kandi ko azakomeza umubano mwiza usanzwe hagati ya Tanzania na Kenya.

Yagize ati “Muri iki gitondo navuganye na Visi Perezida wa Tanzania, Samia Suluhu Hassan, ndamwihanganisha, ariko nanamwizeza ko tuzakomeza gufatanya na Guverinoma ya Tanzania tugashyingura inshuti yacu, kandi tugakomeza gahunda ye yo guhuza abaturage ba Afurika y’Iburasirazuba”.

Hari hashize iminsi atagaragara mu ruhame, abantu bibaza aho yaba aherereye, bikaba byaravuzwe ko yaba yari arwaye COVID-19, ariko bamwe mu bayobozi muri Tanzania bakavuga ko ari muzima nta kibazo afite usibye akazi kenshi ahugiyemo.