Yego, turabyemeranyaho ko no mu Rwanda hambere, ahari umukobwa cyangwa umugore byari bigoye ko utahasanga indabo, ziteye zikikije urugo, cyangwa baziciye bakazitegura. Ariko ibi byo guhabwa indabo kuri buri mugore zivuye kugurwa amafaranga atari na make kuri benshi, ubu nibwo mbona byakataje.

Uko imyaka igenda ihita ni ko mu Rwanda ahakoreshwa indabo hagiye hiyongera, ndetse hamwe rwose wabona nta ndabo zihari, ubwo icyo gikorwa kigafatwa nk’ikitabaye. Aha ndavuga mu bukwe no mu gushyingura.

Bukeye kabiri, haza kwaduka guha indabo umugore wabyaye, akenshi azihawe n’umugabo we, nyuma n’abandi ba hafi bakomerezaho na bo ugasanga bazimuzaniye nk’impano. Nyuma yaho hakurikiraho, kujya kwakira umuntu ku Kibuga cy’indege, na byo biramenyerwa ko ugiye kwakira umuntu uje bamushyira indabo, ibyo na byo biramenyerwa, hazaho guha indabo umugore warangije amasomo ye, cyane cyane aya kaminuza. None ubu aho bigeze, kugira ngo umugore agaragarizwe urukundo igihe icyo ari cyo cyose, biri gusaba ururabo!

Ubu hirya no hino, abagore bari guhabwa indabo, nta n’igikorwa nyirizina cyabaye, cyangwa zimwe na ba nyiri kuzitanga, cyangwa kuzihabwa bakaba batagusobanurira impamvu y’icyo gikorwa. Yego ngo abazihabwa baba bazikunda cyane da! Reka tubyemere. None se ubu umugore wese wiyumvamo ubusirimu akunda indabo?

Ubu umugore urwaye bisanzwe yaba mu bitaro cyangwa mu rugo, acigatira indabo, kugira ngo bigaragare ko ari umusirimu, cyangwa ko aziranye n’abasirimu. Uwagize ibyago, bamusurisha indabo, umwana we atsinze ku ishuri bakamuha ururabo,...Noneho uwiyumvamo ubusirimu cyane we, buri mpera z’icyumweru ( weekend) ahabwa indabo. Ubwo umusore cyangwa umugabo bakundana yaba atabikoze, akitwa ko atari umusirimu cyangwa atazi gukunda no gutetesha.

Ni byo rwose, ntabwo ngiye kuvuga ko indabo atari nziza, wenda koko hari n’abantu bazikunda cyane ku buryo uzimuhaye, aba abona ari impano nziza cyane, nawe urumuhaye ukamenya ko umukoze ku mutima koko. Ariko hari bimwe mba mbona bimeze nk’urwigano rudafite icyo rumaze pe!

Ntabwo mbona ko ururabo ari ngombwa kuri buri muntu, ku buryo hari n’abategura gusura umuntu, bakajyana n’ururabo kugira ngo bagaragaze ko ari abasirimu, wenda uwo banarushyiriye nta gaciro aruha, cyane ko ari n’ikintu kiba kitari bumare igihe, ruhita rwangirika. Ubwo icy’ayo mafaranga aruguze yanakora ibindi, reka yo nyihorere kuko ubwo ababikora baba bafite menshi.

Yego, umuntu ubonye wifotoreje ku ndabo biba bisa neza rwose. Ariko si ibintu numva byaba birebire cyane, ngo buri wese agiye kubyigana, ubwo ngo bitere inkeke n’abantu bawe ba bugufi, ngo ugomba guhabwa indabo kugira ngo ugaragaze ko uri umusirimu.

Noneho ibi bintangaza cyane, iyo ugize utya, ukaba wabaza umugore mugenzi wa wa wundi impano waha mugenzi we, agahera ku ndabo, hari igihe arenzaho n’indi mpano cyangwa akanakumvisha ko indabo zihagije. Ibi bintu byatumye nibaza niba umugore wese akunda indabo bigeze kuri uru rwego n’igihe byatangiriye.

Wowe ubyumva ute?

Iki ni igitekerezo cy’umunyamakuru Mukazayire Immaculée Youyou

Akawunga ni izina ryahawe umutsima w’ifu y’ibigori, Abanyarwanda benshi bayobotse mu myaka yatambutse. Bamwe uretse no kuwurya kuko bawukunze, bawukundira ko utubuka, bityo abafite abantu benshi bagaburira bakawuyoboka batyo hamwe n’ibishyimbo, nabyo bikundirwa akenshi ko bitubuka.

Abakozi batandukanye rero yaba abo mu ngo, mu bigo bitandukanye ndetse n’inganda abakoresha babo babahitiragamo kurya akawunga n’ibishyimbo, kuko aribyo byahazaga umubare munini. Gusa hakaba n’ingo tutahwemye kugaya, bakoresha umukozi wo mu rugo bakumva ko we adakwiriye kuba yarya ku mafunguro ya ba nyirurugo, maze bakamugenera ibishyimbo n’akawunga ku ruhande, yahisha amafunguro yabo nawe akitekera ibyo yagenewe.

Ibi ni bimwe byaje kuntera kwibaza iki kibazo, niba ubu aba bakozi batarishwe n’inzara, cyangwa abakoresha barahise babona ibindi bibakwiriye mu gihe ibi byahenze cyane, bagahita bumwa ko bitagikwiriye abakozi!

Ubu mu Rwanda hirya no hino haravugwa ikibazo cy’izamuka ry’ibiciro ku isoko, aho ibishyimbo biri mu byahenze cyane abantu benshi batakibyigondera, ndetse n’ababiguze bigafatwa nk’amata y’abashyitsi, babirondereza kugira ngo bazabiryeho iminsi myinshi. Ibintu bituma nibaza ba bakozi banyu byari bitunze nk’ibiryo bisuzuguritse kuri mwebwe, ubu murimo kubisangira, cyangwa?

Ubundi iyi Si ni gatebe gatoki, none ibintu bishobora kugaragara nk’ibiciriritse bwacya kabiri bigahinduka iby’agaciro kubera impamvu zitandukanye. Iyo wasangiye ubuzima urimo n’uwo mukozi ugukorera uyu munsi (twese twemera ko badufatiye runini), n’iyo ubuzima buhindutse mwese muba mubibona ko bwahindutse, mukarebera hamwe uko mwitwara, bitewe n’icyahindutse.

Gusa nizere ko aba bavandinwe batabirenganiyemo ngo mufate bya bishyimbo mubibike muri za furigo, mwibagirwe kubashakira ibindi bibatunga, cyangwa muhindure umuvuno mujye musangira ibyo mwariye namwe kuko nabo ni abantu nkamwe.

Iki ni igitekerezo cy’umunyamakuru Mukazayire Immaculée Youyou

Ibi byagarukagwaho cyane ku birori bizwi ku izina rya Bridal shower (brayidoshawa) bikorerwa abakobwa bagiye gushinga ingo. Ukabona umuntu arifashe ati ubwo koko muba mwumva ari iyihe nama nzima yahabwa n’umugore watandukanye n’umugabo!

Ku giti cyanjye mpamya ko urugo rutubakwa n’icyo bamwe bita ubwenge, ahubwo rwubakwa n’ubushake bw’abantu babiri bagahuza umugambi n’icyerekezo cy’ubuzima, ku buryo bose bafatanya kukigeraho, naho mu gihe mwaba mudahuje umugambi n’icyerekezo, ntabwo byakunda ko mwakubakana urugo.

Ibi bivuze ko ushobora kuba ufite icyo bamwe bita ubwenge, ariko ukaba warahuye n’umuntu mudahuje intumbero uwo mushinga wanyu w’umuryango nturame. Ariko ibi bitavuga ko uyu muntu byanze ko akomezanya n’uwo mugenzi we, nta bwenge afite, cyangwa nta nama nziza zubaka yatanga, nk’aho iyo batandukanye ubwenge bwe umugabo aba yabutwaye.

Nimwumva ndi kugaruka ku mugore cyane si uko n’umugabo baba bubakanye na we bataba bahuje amateka, ahubwo ni uko ntakunda kumva umugabo hirya no hino muri sosiyete yimwa ijambo ngo ni uko yatandukanye n’uwo bashakanye (niba binaba ni gake cyane cyane mu madini).

Mu by’ukuri sinumva ukuntu abantu bifata ngo "Nyirakanaka urugo rwaramunaniye" ubwo ibyo bikaba intandaro yo kumwambura ubushobozi yari asanganywe cyangwa n’ubumenyi afite, ndetse bamwe bakarengera bakamwubahuka, kandi batazi icyananiye ikindi. Hari n’igihe wasanga ari urugo rwamunaniye atari we warunaniye.

Yego ndahamya ko gutandukana n’uwo mwashakanye muri iyi minsi ari ugutsindwa gukabije, kuko muba mwarashimanye mwenyine nta n’umuntu wabahuje ku gahato, nk’uko kera abenshi byabagendekeye. Abenshi bakanafata umwanzuro bagatumira abantu bati "Tuzatandukanwa n’urupfu", ubundi ubwo ejo tukabona umwe ari ukwe undi ari ukwe! Ariko rero niba biba byanze ntabwo mpamya ko umuntu yakwamburwa ijambo ngo nta nama nziza yagira abantu.

Ahubwo ku bwanjye mba numva aba bantu baba bafite ijambo rikomeye basangiza abandi, ku by’urugendo rukomeye aba yaranyuzemo bigatuma undi yamenya ahantu runaka mu rushako haba hari amabuye, kugira ngo ayirinde atazayasitaraho nawe kubera kutayamenya (nubwo amabuye ateze mu kwa kanaka ashobora kuba atandukanye n’ari mu kwa kanaka)

Ntanganzwa cyane n’umuntu wakwicara ngo kanaka yananiwe n’urugo, ukumva ko wowe urushoboye kuko mukiri munzu imwe n’uwo mwashakanye, nyamara wasanga uwagutiza urugamba yarwanye wowe wari kunanirwa mbere ye.

Umugore watandukanye n’umugabo afite ubwenge, ubushobozi ndetse n’ibitekerezo bizima. Ashobora kugira undi inama nziza ndetse zakubaka urugo rugakomera, gusa we bikaba byaranze kubera impamvu runaka. Ni yo mpamvu umugore cyangwa umugabo bashobora gutandukana buri wese agashaka undi, bubakana urugo kandi ingo zabo zigakomera.

Iki ni igitekerezo cy’umunyamakuru Mukazayire Immaculée Youyou

Mu Rwanda uko imyaka igenda yicuma ubona hari imyambarire myinshi igenda yaduka, cyane cyane ku gitsina gore, bamwe bagenda bayitangarira, ariko nabwo ukabona nta gikanganye cyane, kuko ari icyita rusange mu bihugu byateye imbere, ndetse ibi ukabona ko biba biri mu mujyo umwe w’iterambere nk’uwo Igihugu kirimo.

Mu myaka yatambutse higeze kuba inkubiri, aho abantu batandukanye bagaragazaga ko abakobwa bo mu Rwanda basigaye bambara imyenda itabereye Umunyarwandakazi, ubwo bavugaga ko bambara imyanya yabo y’ibanga ikagaragara.

Ubwo muri icyo gihe nibwo amenshi mu mashusho y’indirimbo zasohokaga wabonaga, uretse no kwambara icyitwa impenure, hari bamwe bagaragaraga batambaye. Ibi nyamara byaje kuba ibisanzwe, tubyakira dutyo bwaba ubwambure bw’indirimbo z’abahanzi Nyarwanda cyangwa indirimbo z’abahanzi bo mu bindi bihugu, byose tukabishyira ahabona tukabireba, ndetse tukabisakaza no ku bandi mu bana n’abakuru ngo barebe.

Ibi kandi naje kubona ko ntacyo byaba binadutwaye, aho mu birori bitandukanye birimo abakomeye (abo bashinzwe kurengera itegeko ndetse n’umuco), abagore bahabwa uburenganzira bwabo n’amahitamo yabo mu myambarire, aho buri wese yambika ibice by’umubiri ashaka ibindi akabyihorera, bagataramana bagasangira bagahuza urugwiro kandi ubuzima bugakomeza, buri wese mu byiyumviro bye n’amahitamo ye bikamuryohera.

Uyu abarwa mu bakoze ibiteye isoni mu ruhame

Yego tubyemere ko mu mategeko y’u Rwanda mu ngingo ya 135 y’Itegeko riteganya ibyaha n’ibihano, havuga ko umuntu wakoze ibiterasoni mu ruhame abihanirwa. Nonese imyaka yose twahaye intebe iyi myambarire ikicara, igakwizwa mu bakuru n’abato ubu nibwo iri tegeko ryibustwe?

Nonese ubu koko harahanwa nde harekwe nde ko nkurikije uko iri tegeko rivuga, cyangwa risobanurwa n’abashinzwe kurirengera no kurishyira mu bikorwa, Abanyarwandakazi rigonga ari benshi, kandi mpamya ko bahawe rugari kera kose nk’aho ntacyo bangije, kugeza n’aho hagiye hafungurwa uduce dutandukanye duha rugari abifuza kwambara hafi ya ntabyo, bakidagadura!

Iyi ngingo igira iti “Iyo icyaha cy’urukozasoni cyakorewe mu ruhame, uwakoze icyaha ahanishwa igifungo kitari munsi y’imyaka ibiri (2), ariko kitarenze imyaka itatu (3) n’ihazabu y’Amafaranga y’u Rwanda atari munsi y’ibihumbi maganatanu (500), ariko kitarenze miliyoni imwe (1000.000).

Uburyo ibi bishyirwa mu bikorwa byo ntabwo nabimenya, gusa ahubwo ndibaza ugomba guhanwa ubwo yaba yagejeje ku kihe kigero cyane ko mba mbona abenshi bameze nk’abanganya, ndetse n’ugaragaye ko yarushijwe ubutaha agakora ibirushijeho kugira ngo ahige abandi.

Ku bwanjye mbona niba iyi myambarire wenda yarigeze kuba n’urukozasoni kera, ubu ikigaragara twarayakiriye mu yemewe, ndetse itugira abasirimu. Mbona uwari guhanwa yari guhanwa kera ariwe ubyadukanye, naho ubu ahubwo uwambaye agahisha imyanya myinshi niwe uba ari ikibazo mu rungano. Kuko yaba ku mbuga nkoranyambaga, ibinyamakuru bitandukanye, yaba mu nzira imbona nk’ubone, mu birori byo sinakubwira wagira ngo ni itegeko.

Icyakora nabwo niba hamaze gufatwa izindi ngamba zo kugaragara ko bidakwiye, ubwo hashyirwamo imbaraga nyinshi cyane, naho kuba hahanwa umuntu umwe cyangwa babiri batayoboye nibura itsinda runaka, njyewe mbona byaba ari nko gukoza agati mu ntozi.

Abana bato tubatoze ubupfura no kwifatira umwanzuro wo gutandukanya ikibi n’icyiza, kugira ngo nibakura bazifatire umwanzuro uboneye, hagati y’amahitamo menshi bazakura babona hanze aha.

Iki ni igitekerezo cy’umunyamakuru Mukazayire Immaculée Youyou

Ibi ni ibintu bigaragara ku bantu batandukanye ubona binubira uko abo bantu baboza mu mutwe barengera bakagera no ku zindi ngingo z’umubiri abenshi bavuga ko zitari ngombwa ndetse ko bibabangamira.

Yaba abamaze kogoshwa cyangwa abamaze gukoresha umusatsi mu bundi buryo, abenshi bagira umwanya wo koga mu mutwe, hanyuma bakajya kozwamo n’umuntu ubishinzwe. Ikiba cyazanye uwo muntu gukoresha aho biba ari isuku yo ku mutwe, ariko ahenshi ubona barengera bakagera mu ijosi, ku bitugu, mu maso, ku kananwa(ubwo ku mugabo ni mu bwanwa), mu bikanu ndetse hari n’abarengera bagacengeza amaboko mu gituza( ubwo ku bagore aba yageze ku mabere) ngo bari gutanga serivisi nziza.

Ikindi kiba giteye inkeke cyane, ni uko usanga akenshi iyo ari umugabo uri gukaraba mu mutwe usanga akarabywa n’umugore naho byaba umugore ugasanga ari gukarabywa n’umugabo. Ibi bintu uba ubona bikabije ariko abantu benshi ukabona baracecetse bakabangamirwa, aho kubibwira uri kubikora ngo agarukire ku mutwe gusa kuko ibindi bimubangamiye.

Aba babikora aba akumvisha ko ari serivisi nziza ari kuguha, ndetse rimwe na rimwe akakumvisha ko ari n’inyongezo yo kugira ngo agushimishe nk’umukiliya w’imena. Ariko nyamara abenshi namaze kubona bibabangamira bagaceceka ahubwo bimurenze akazafata umwanzuro wo kutazasubira ha handi, ubutaha agahindura aho akoresha imisatsi.

Yego, njya numva hari abagabo bamwe baba bavuga ko ari byiza ngo iyo ari umukobwa ubimukorera koko yumva bimunogeye. Ariko nabwo navuga ko ari igice gitoya, kuko ushaka n’izo serivisi yajya kuzikoresha ahandi, kuko hari inzu zindi zabugenewe zikora ibi twita massage. Naho hariya ni inzu zikora ibijyanye no gutunganya imisatsi.

Ku bwanjye numva aba bantu bagakwiye kwibanda ku mutwe gusa, ndavuga imisatsi, icyakora yagira ahandi akora bikaba ari mu matwi, kuko akenshi imyanda iva mu mutwe hari ijya mu matwi, ariko nabwo atagiye ngo atindeyo ngo wumve ko hari ibindi ari gukora birenze kuba yakura umwanda mu matwi.

Iki ni igitekerezo cy’umunyamakuru Mukazayire Immaculée Youyou

Iyo tuvuga utwenda tw’imbere akenshi ni iyo twita (Amakariso, amasutiye ku bagore n’amasengeri ku bagabo), ni kimwe mu bintu by’ingenzi bigomba kugirirwa isuku cyane. Ariko abantu benshi bakunda kugaragaza ko ari umwambaro ugomba kugirirwa isuku na nyirawo bwite, noneho babona umugabo cyangwa umugore umwe ayimesera mugenzi we bikagaragara ko ari ikibazo.

Nyamara utu twenda nitwo dukunda kugaragazwa ko byaba ari ikibazo, ariko undi mwenda bikagaragara ko byo ntacyo byaba byanginje, (N’ubwo nabyo hari igihe iyo ari umugabo waba uri kumesera umugore we bamwita inganzwa!) Ibi nyuma yo kubyumvana abantu batandukanye, nibajije ukuntu ibintu umuryango wiyumvikaniye ndetse na banyirubwite ntacyo bibatwaye, ariko bikaza kubangamira ba nyiri kubibona gusa.

Akenshi aya ni amakuru atangwa n’abantu bitwa ko ari aba hafi muri uwo muryango, kuko muri rusange ni imyenda ikorerwa isuku ahantu hatari ku karubanda, ubwo abagenda muri urwo rugo cyangwa abarubamo babibonye bakajyana amakuru bati "Umugabo wa hariya ni inganzwa amesera umugore we utwenda tw’imbere, cyangwa umugore wa hariya yaragowe, aratotezwa ni we umesera umugabo we utwenda tw’imbere.

Ubundi buri muryango ugira ubwumvikane bwabo, bagira uburyo bahitamo kubana no gufashanya ndetse no kwubahana, ku buryo kumesa utwenda tw’imbere ku bwanjye yaba umugabo watumesera umugore cyangwa umugore akatumesera umugabo ari ibisanzwe. Nta kiba kidasanzwe ni kimwe n’uko banafashanya mu bindi byose.

Hari nk’abahitamo no kugenda babika utwo twenda mu kantu (Batumbitse mu mazi n’isabune) kubera uko bitegura bihuta mu gitondo bagiye mu mirimo yabo, noneho umunsi wo kuruhuka umwe muri bo akaba yadufata akatumesa mu gihe undi ari gukora ikindi. Ku bwanjye mba mbona ntacyo byanginza pe, ku buryo ababireba baza kubishakamo ikibazo.

Abashakanye uretse n’utwenda tw’ibanga n’iyo myanya y’ibanga baba bayiziranyeho ku buryo numva ntacyo byaba byanginje, cyangwa ngo umwe byitwe kuganzwa mu gihe undi byitwa gutotezwa, gusa kubera gufashanya. Byakwitwa ikibazo mu gihe umwe yaba abikoreshwa ku gahato, naho igikorwa ubwacyo njyewe nta kibazo nkibonamo.

Iki ni igitekerezo cy’umunyamakuru Mukazayire Immaculée Youyou

Ibi ni ibintu bimaze igihe kitari kinini cyane bigaragara cyane cyane mu Mujyi wa Kigali, aho abakobwa benshi n’abagore bambara ikintu kimeze nk’umukandara ariko kigizwe n’amasaro gusa, bamwe bagahitamo kurenzaho imyenda ku buryo undi atayabona, abandi bagakora ibishoboka byose kugira ngo agaragare n’iyo yaba ari agace gato.

Nyuma yo kumva ibisobanuro byinshi bitandukanye by’abayambara ndetse n’ibisobanuro by’ababona abayambara, naje kwibaza ibisobanuro nyabyo mu Rwanda twayaha, cyane ko wenda mu bindi bihugu barebeyeho byo bifite igisobanuro gihuriweho.

Hari ibihugu biba ari umuco ko umwana w’umukobwa wese umaze kuvuka, mu gihe cyo kumwita izina bamwambika amasaro mu nda nuko akazayakurana, akagenda gusa ayasimburanya bitewe n’uko yakuze. Hari ibindi bihugu, bayambika umukobwa wese wagiye mu mihango, kugira ngo bagaragaze ko yavuye mu cyiciro cy’abana, yabaye umuntu mukuru. Hari ibindi bihugu bayambika umukobwa ugiye gushaka umugabo bayatongereyeho amagambo baba bizera ko azatuma umugabo we amukunda wenyine, mbese ngo azahirwe mu rushako anabyare abana benshi. Ni byinshi bitewe n’igihugu n’imico yabo. Gusa naje kugira amatsiko yo kumenya inyito tuza kuyaha nk’Abanyarwanda.

Iyo nibaza inyito tuyaha, ni uko abantu benshi mbona bagenda bafata aba bambara aya masaro uko bishakiye, na bo bitewe n’imyemerere ndetse n’ibyiyumviro bitandukanye. Abenshi bita aba bakobwa indaya abandi bati ni ibirara, abandi bati ni ibigereko by’iwabo buriya bashyizemo imiti, ndetse n’abandi bakemeza ko ubwo uwo nyiri kubyambara akorana n’imyuka mubi.

Ibi byose bivugwa n’ababireba mu gihe ba nyiri kubyambara bavuga ibitandukanye. Bamwe bati "Ni umurimbo nk’indi yose, undi ati njyewe nambara aya masaro kugira ngo njye menya ko nabyibushye cyangwa nananutse, undi ati karyoshya imibonano mpuzabitsina, undi ati njyewe mbona ari agasirimu, n’ibindi byinshi.

Nyuma yo guhuza ibi byose rero ku bwanjye nasanze ibisobanuro byinshi Abanyarwandakazi batanga bituma bambara aya masaro bitandukanye, ariko wabihuriza hamwe ugasesengura ugasanga umwe yarabonye mugenzi we yambaye, na we akiyambarira nta bindi bintu byinshi bibyihishe inyuma.

Ikijyanye rero no kuba abantu babareba bahita babahimbira ibisobanuro bitari byo kandi biganisha mu kubasebya cyangwa no kubatuka, mbona ntaho bihuriye. Kuri njyewe mbona twabifata nk’umurimbo kimwe n’indi yose isanzwe yambarwa n’abagore. Kuba wowe uba ubona atari byiza cyangwa utabyambara ndetse ukumva n’uwo mufitanye isano wamugira inama yo kutabyambara, numva utabiheraho wumva ko ubyambara ari indaya cyangwa icyomanzi.

Mbona ikibazo kinini kiba giterwa no kuba ari ikintu gishyashya abantu babonye vuba. Ni kimwe n’amaherena, ibinigi, ibikomo...Naho kuba umukobwa yitonda, agira ikinyabupfura, akijijwe....Twabirebera mu bindi bitari amasaro yiyambariye mu nda ashaka kurimba, cyane ko ibyinshi byambarwa biba bifite ibisobanuro bitandukanye mu bihugu hirya no hino.

Iki ni igitekerezo cy’umunyamakuru Mukazayire Immaculée Youyou

Abantu bamwe bakunda guhuza umuntu udakunda kugaragara akoresha imbuga nkoranyambaga, nk’umuntu uba ufite ibitekerezo byinshi ndetse byakubaka, ariko kubera ubwenge bwinshi agahitamo kwicecekera ntagire icyo atangaza.

Imbuga nkoranyambaga ni kimwe mu buryo bw’itumanaho ubu, rikoreshwa cyane n’abantu benshi batandukanye. Aho nibaza ko intego nyamukuru w’uzikoresha aba yifuza ko ubutumwa bwe atambukije bugera ku bantu benshi, kandi akenshi usanga iyo ntego igerwaho, kuko ari ikibuga gikinirwaho n’abantu benshi batandukanye.

Aya yaje kuba amahirwe y’abantu benshi bari bafite ubutumwa bashakaga kugeza ku bantu, ariko badafite umuyoboro mwiza babunyuzamo, aho umuntu ku rukuta rwe runaka afata umwanya agatambutsa ubutumwa, akazasanga bwageze ahantu kure cyane na we ubwe atatekerezaga. Aho hari n’ubushobozi cyangwa ubumenyi bw’abantu batandukanye bwagiye buvumburwa cyangwa bumenyekana binyuze ku mbuga nkoranyambaga.

Gusa naje kwibaza ku bantu batinya kugira icyo batambutsa ku mbuga nkoranyambaga, hanyuma akaza kwifata ibi akabihuza n’ubwenge bwinshi. Oya, kuri njyewe ntabwo ibi nabyemera kuko ufite icyo utangaza kandi wiyizeye ko gifite ireme, ntabwo kugira ubwenge ari uko abimira agaceceka ngo ubwo arimo kurebera ibitekerezo by’abandi hariya, ntagire icyo atinyuka kuvuga ngo ubwo acecekanye ubwenge.

Imbuga nkoranyambaga nk’uko nabigarutseho ni umuhanda ugendwamo n’abantu benshi batandukanye, bisobanure ko hari na bamwe bayikoresha mu buryo twavuga ko butari bwiza, aho aba yumva buri kintu cyose kivuzweho na we agomba gutanga igitekerezo n’iyo yaba atabisobanukiwe cyangwa nta gitekerezo gifatika afite. Undi na we akumva ko icyabaye cyose yagitangariza ku mbuga nkoranyambaga.

Gusa hari n’abandi bazikoresha neza cyane, ku buryo buri wese aba afite amatsiko yo kureba icyo kanaka yatangaje, kuko kiba gifite ubwenge. Naho ucecetse ngo ntazakoresha imbuga nkoranyambaga kuko ari umunyabwenge kurusha abandi, ndumva ntakwizera ubwo bwenge bwe, atinya kugaragaza cyangwa gufashisha abandi.

Buri muntu akoresha izi mbuga, arimo gutangaza ibyo abantu bari basanzwe bamuziho, cyangwa akanazikoresha yereka abantu ati “burya na bino ndabizi, cyangwa mbifiteho ubu bumenyi n’ubushobozi”. Bityo rero hari abahisemo kubyaza umusaruro aya mahirwe iterambere ryatuzaniye, wowe ugahitamo kwicecekera ngo uribwira ko bagusomamo ubwenge cyangwa ubushobozi utagaragaje.

Kudatangaza ibyo uzi ngo bimenywe n’abandi yaba mu kubafasha, cyangwa nawe ubwawe kwifasha (Mu buryo bumwe cyangwa ubundi) nta bwenge burimo. Kudakoresha imbuga nkoranyambaga bishobora kuba amahitamo ya muntu bitewe n’impamvu runaka, cyane ko hari na bamwe bazikoresheje nyuma bakaza kubihagarika bitewe n’impamvu zitandukanye. Ariko twibihuza n’ubwenge bwinshi, kuko hari n’ubwo wagenzura ahubwo ugasanga twabyita ubwenge buke.

Iki ni igitekerezo cy’umunyamakuru Mukazayire Immaculée Youyou

Iyo muri Kaminuza barangije amasomo, hari umwambaro Bambara (umeze nk’ikanzu ndende ufite n’ingofero). Uyu mwenda uko bigaragara ntabwo umuntu yawambara nta wundi mwenda ashyizemo imbere. Bisaba ko uwitegura kurangiza amasomo ategura undi mwenda azambariramo imbere. Usanga abagore hafi ya bose bambariyemo imyenda migufi cyane, bintera kwibaza aho bihurizwa n’uyu muhango nyirizina.

Ubundi abantu basoza amashuri yabo, bivuga ko baba barahuriye mu ishuri, baturutse mu bice bitandukanye, imico itandukanye, amadini atandukanye, mu miryango itandukanye n’ibindi byishi bibatandukanya. Ariko nza gutangazwa n’ukuntu umunsi wo gusoza amasomo mu birori, bagaragara abenshi bahuriye ku myambaro migufi.

Ibi kandi ubona hari n’uwiga kwambara umwenda mugufi uwo munsi gusa, cyangwa undi na we wari usanzwe yambara umwenda mugufi, uwo munsi agakabya ku buryo akubwira ngo mu buzima busanzwe uyu mwenda sinazongera kuwambara kubera ukuntu ureshya. Ibi kandi ntugire ngo biterwa n’uko navuze ngo icyo gikanzu barenzaho kiba ari kirekire, Oya si byo kuko kiba kirangaye imbere hose, umuntu yirebera gusa ako kenda k’imbere. Akenshi n’iyo bagiye kwifotoza bakuraho icyo gikanzu bagasigarana ingofero n’ako kenda k’imbere.

Mvuze ngo ni abagore hafi ya bose, ntihagire unyumva ukundi, kuko nko mu bagore icumi baba bambaye uwo munsi (niko babyita abantu bakoze umuhango wo kugaragaza ko basoje amasomo yabo ya Kaminuza) usanga nk’icyenda baba bambaye imyenda migufi, igenda irutanwa bitewe n’ingano y’umuntu ku wundi ariko icyo ihuriyeho ari ubugufi.

Noneho igitangaje, hari uwambara ako kenda kagufi kubera kutabimenyera, ukabona yabangamiwe burundu, agenda yimunyamunya, uko agenda arwana no kuwumanura ukagira ngo yagiye kuwambara ari itegeko.

Numva atari byiza ko umuntu yigana ibyo abandi bakora, cyangwa na we akabikorera gusa ko byakozwe n’umubare munini nta bisobanuro byabyo afite. Ku bwanjye ntekereza ko uyu aba ari umunsi umuntu aba yakagombye kwambara akaberwa mu buryo bumwe cyangwa ubundi bitewe n’ibyo akunda, cyangwa ibimubera bitewe n’imiterere ye.

Mu buzima busanzwe, igitsina gore ni abantu bakunda kurimba no kwambara bakaberwa, bivuze ko na mbere hose ibyo aba yambara ari ibyo aba yarabonye bimubera. Gusa ku munsi udasanzwe nk’uyu, agashaka umwenda urushije indi mu bwiza, cyangwa ugaragaza itandukaniro runaka, ariko udatandukanye n’ibyo akunda n’ibimubera.

Hari n’abishimira kwifotoza uwo munsi, ariko nyuma yaho akaba nta muntu yakwemerera kureba ayo mafoto, ndetse na we ubwe yayareba aho kumutera ishema, isoni zikamwica, kuko yari yakoze ibintu bitamurimo yarabikoze gusa yigana abandi.

Ku bwanjye mbona umwenda wiyubashye umuntu yakwambara muri iriya kanzu byaba bisa neza, bitewe n’ibibera uwo muntu. Aho kugira ngo ujye kwigana abandi ngo ugomba kwambara umwenda mugufi kuko wawubonanye ba nyirakanaka.

Birashoboka ko wakwambara ibigufi bikakubera nawe ukumva urishimye, kimwe n’uko nawe wakwambara ibirebire bikakubera kandi nawe ukishima, na nyuma ukazajya ureba amashusho y’urwibutso akakunezeza aho kugutera isoni.

Abantu benshi iyo bahuriye kuri iki kiganiro usanga banenga abantu bakora ndetse n’abareba aya masusho, bakerekana ko nta burere bafite, ndetse bamwe bayakubita amaso bari kumwe n’abandi ukumva baracyashye ngo “Toka satani”, mbese berekana ko ari ibintu bidakwiye kurebwa, ndetse no gushyirwa ahagaragara.

Ariko nyuma y’iyi myifato yose n’uburyo ayo mashusho bigaragara ko arebwa cyane, mpita nibaza mu by’ukuri abantu bayareba abo ari bo.

Ubundi ku mbuga nkoranyambaga zitandukanye, bagira uburyo bagaragaza abantu barebye amashusho yashyizweho. Ayo mashusho rero iyo aba yashyizwe hirya no hino umubare w’abayarebye uba uri hejuru cyane, unakurikije n’abareba andi asanzwe. Icyakora naho uba ubibona ko mu bayarebye nta washatse ko hari uwamenya ko yayarebye, kuko abenshi ntibagira icyo bavugaho (Yaba likes, dislike, comments), cyakora gake hari ubwo ubona hari uwayasangije abandi.

Hari n’umubare muto ushobora kugaragaza ko uyareba, bitewe n’imbuga bahuriyeho n’abandi bantu, bakaba bazana ayo mashusho bakayabasangiza, ibintu bikurura ahanini amakimbirane, abantu bari gucyaha uwo wazanye ayo mashusho ahongaho, ndetse bamwe binabaviramo kwirukanwa kuri izo mbuga bagasiba n’ayo mashusho.

Nyamara urebye neza usanga n’abasiba ayo mashusho akenshi baba bamaze kuyareba, kuko iyo uhise ureba umubare w’abayarebye mbere y’uko ashyirwa kuri urwo rubuga n’umubare uhise wiyongeraho muri ako kanya, usanga wenda kungana n’abari kuri urwo rubuga.

Ibi kandi sinavuga ko hari umuntu ujya gufungura aya mashusho ngo ayarebe atamenye ibyo aribyo, kuko amashusho ahita agaragara aba yerekana ibirimo. Ikindi n’umutwe w’amagambo baba bahaye ayo mashusho uba ugaragaza neza ibiyarimo bakangurira umuntu kuyafungura akayareba. Ibi bisobanuye rero ko ujya gufungura ngo ayarebe aba yabihisemo akabifatira umwanzuro, n’ubwo abenshi bataba bashaka kubyemera ko bayareba.

Numva rero abantu benshi bari bakwiye kwicecekera, ntibirirwe bacyaha cyangwa banenga abarebye ayo mashusho kuko bo babyemeye, cyangwa babigaragaje ko bayareba kuko abayarebera mu bwihisho aribo benshi.
Kuba amatsiko yawe yakubwira kureba ibiri mu mashusho runaka, ndumva ari ibintu bisanzwe, cyane ko abenshi banayareba kubera impamvu zitandukanye, bamwe harimo no kugira ngo babone aho bahera bigisha abantu, ariko bazi ibiri hanze aha.

Yego birashoboka ko byatera umuntu isoni kuba yavuga ko yarebye ayo mashusho bitewe n’impamvu iyo ari yo yose yaba yatumye ayareba. Ariko numva aho kugira ngo ujye hariya uvuge ngo nta muntu muzima wareba aya mashusho, kandi nawe uzi neza ko iyo uri ahiherereye uyareba, ibyiza wakwicecekera ku kijyanye n’iyi ngingo ntugire icyo uvuga.

Reka nsoze nvuga ko ku bwanjye mbona aya mashusho arebwa n’abantu benshi bo mu ngeri zitandukanye, gusa abenshi bayarebera ahiherereye kuko bataba bivuza ko hari uwamenya ko bayareba.

Iki ni igitekerezo cy’umunyamakuru Mukazayire Immaculée Youyou

Ibi kandi bigenda bifata indi ntera aho mbona hari n’ababyishyuza abandi cyangwa umuntu agahezwa mu bintu runaka bamutesha agaciro ngo ni uko atari yashaka umugabo cyangwa umugore. Bamwe bakakumvisha ko utarashaka nta jambo rizima yaba afite, mbese bakwereka ko ubutwari bwa mbere yari kuba yarakoze ari uko yari kuba yarashatse.

Ibi byaje kuntera kwibaza impamvu umuntu bamuhoza ku nkeke ngo ntarashaka, kandi muri bose ntawe uzi neza gahunda afite ndetse n’icyo aha agaciro kurusha ikindi, ku buryo bamutondekera ku murongo ikibanza n’igiheruka. Kandi nyamara ibindi bikorwa umuntu agenda abigeraho babibonesha amaso gusa, ntawigeze amwishyuza ikintu runaka ngo ko ataragikora kuko bataba bazi gahunda ze ndetse n’icyo yashyize imbere y’ikindi. Ariko bigeze mu gushaka ukagira ngo abantu ni bo bamenyera umuntu ko igihe kigeze cyangwa cyarenze.

Hari n’abatangira kubarira umuntu ngo imyaka yarengejeho mu gihe yari kuba yarashatse, cyangwa bagahita bakubarira ngo wari kuba ufite umwana ungana gutya na gutya, cyangwa umubare w’abana runaka. Ubwo bamwe ngo baba bahereye ku myaka yemewe n’itegeko yo kuba umuntu yashaka. Nyamara nkabibutsa ko habaho itariki umuntu yemerewe kuba yashaka, ariko nta gihe ntarengwa.

Ubundi umuntu wese mukuru aba afite ibyo yifuza kuzageraho mu buzima ndetse n’icyerekezo yihaye. Uko abishyira mu bikorwa cyangwa uko abikurikiranya bigenda bitandukana bitewe n’umuntu ku wundi.

Numva umuntu atari akwiye guhora yishyuzwa gushaka, keretse wenda bigaragara ko atifitemo ubushobozi bwo kwifatira imyanzuro. Ariko niba ari uko bimeze numva uwo banamwihorera kuko n’ubundi n’urugo ubwo ntiyaba afite ubushobozi bwo kurwubaka.

Singiye kuvuga ngo gushaka si byiza cyangwa se ngo si ngombwa...Oya. Ni byiza ndetse ni ngombwa ndetse cyane, ariko byose biterwa n’ugiye kubikora n’icyo agiye kubikorera ndetse n’igihe ashaka kubikorera.

Reka nsoze nifuriza abashatse kuzazubaka zigakomera mukagera ku ntego mwihaye. Abatarashaka namwe bitewe na gahunda mwihaye ubwo nimubona biri ngombwa ko mushaka muzashaka kandi namwe bizabahire nimufata umwanzuro.

Iki ni igitekerezo cy’umunyamakuru Mukazayire Immaculée Youyou

Ibi ni ibintu bihurirwaho n’abantu benshi yaba abakuru ubwabo cyangwa bamwe mu batoya, aho baba bakumvisha ko inama y’umuntu mukuru iba ariyo yo gukurikizwa, kuko bahita babihuza n’ubwenge, bati” Ni mukuru inama akugira nizo zo”. Nyamara njyewe namaze kubona ko ibi ntaho bihuriye kuko umuntu niba yarabyirukanye ubwenge buke ntabwo buzaza ngo ni uko yagize imyaka myinshi.

Ibi kandi bigaragara cyane, aho umuntu mukuru ashobora kuba arimo kuganira n’uwo arusha imyaka cyane cyane urubyiruko, uyu yamubwira nawe uko abyumva rimwe na rimwe bitandukanye n’ibyo uwo mukuru arimo kumubwira, ukumva arimo kumwumvisha ko ibye aribyo bifite ishingiro agendeye gusa ko amurusha imyaka, cyangwa bamwe bakamucecekesha bati “Umukuru ni umukuru, aba azi ibyo arimo kuvuga kandi nibyo biba ari byo.”

Ubusanzwe mpamya ko habaho abantu bagira ubwenge butari bwinshi, cyane cyane iyo bigeze mu gusesengura cyangwa kugira undi muntu inama, mbese si impano ya buri muntu, ariko hari aho bigera ukumva iri kamba baryambitse buri muntu gusa bagendeye ku myaka, nyamara wajya gusesengura neza, ugasanga uyu muntu arushwa ibitekerezo n’inama nzima n’umuntu muto, rwose badafite aho bahuriye mu myaka.

Mpamya ko umuntu uko yavutse n’uko yabyirutse iyo akomeza kwiyongera imyaka, ibyo afite agenda akurana nabyo. Ahubwo numva uwabyirutse afite ubwenge buke noneho bukomeza kuba buke cyane, ku buryo uko imyaka igenda yiyongera noneho bihuhukira rimwe bukaba buke kurushaho. Numva nta muntu bari bakwiye kumva ko ibyo avuga byose aribyo bifite ishingiro, gusa kuko ari mukuru.

Njyewe numva ubukuru ari kimwe noneho n’ubwenge kikaba ikindi. Umuntu muto ashobora kuba yagira umuntu inama kandi nziza, cyangwa agasesengura ibintu ku buryo bwumvikana cyane rwose, kurusha umukuru ufite imyaka myinshi udafite ubwo bushobozi. Icyakora wenda ari ugusangiza abantu ubunararibonye noneho buri wese akaba yakwihitiramo ibyo afata n’ibyo areka birashoboka, bitewe n’imyaka amaze ku isi. Naho kujya inama no gukora isesengura bijyana n’ubushobozi ntibihwana n’imyaka gusa.

Iki ni igitekerezo cy’umunyamakuru Mukazayire Immaculée Youyou

Ibi ba nyiri kubivuga baba bagaragaza ko uwo muntu utwaye urufunguzo mu ntoki, abikora mu rwego rwo kwirata, ashaka kugaragariza abateraniye aho ari ko afite imodoka. Ba nyiri kubangamirwa rero, bakabivuga bagaragaza ko yagombaga kureba ahandi abika urufunguzo ntarutware rugaragara, ko bitari ngombwa ko buri muntu amenya ko afite imodoka.

N’ubwo ibi bigaragara ku hahuriye abantu batandukanye, ariko nabwo sinatinya kuvuga ko, akenshi umubare munini ari abagore bakunda kubikora kandi babivuga ku bandi bagore bagenzi babo, aho baba bagaragaza ko nyirakanaka urufunguzo arutwaye mu ntoki, mu rwego rw’ubwirasi, ndetse no kuratira abandi ko atunze imodoka.

Ibi kandi hari n’igihe ubona bifata indi ntera, ku buryo nyirakanaka bamuhimba akazana ka “Wawundi utwara urufunguzo rw’imodoka mu ntoki”. Aho umwe agiye kumurangira mugenzi we, wumva avuga ati ntiwibuka wa wundi ugenda atwaye infunguzo z’imodoka mu ntoki!

Ibi byaje kuntera kwibaza icyo aba ba nyiri kubangamirwa biba bibatwaye, kuba nyiri imodoka atwara urufunguzo rwe aho ashaka cyangwa aho yumva bimworoheye kurutwara.

Gusa nyuma yo kugenzura akenshi ababikora naje gusanga ari ukutanyurwa n’uko bameze, ndetse abenshi baba bifuza kuba nabo batunga imodoka, noneho bakabivuga bumva ko ugaragaza ko ayitunze aba arimo kubabyina ku mubyimba ndetse abirataho.

Ikigaragaza kandi ko biba harimo akantu kameze nk’ishyari, ni uko bivugwa ku muntu bari basanzwe baziranye, naho undi batazi we ntacyo biba bibatwaye, kuko byo baba babona ari ibisanzwe.

Ibi kandi bigenda bigiraho abantu ingaruka, aho n’uyiguze nyuma ariko azi ibyavugwaga, cyangwa nawe yari ari muri abo bantu babangamirwa n’abatwara urufunguzo mu ntoki, ukabona arabangamirwa cyangwa akitwararika cyane no guhisha urufunguzo kure. Ndetse hari n’abahita biha ihame ry’uko banga gutwara urufunguzo rw’imodoka mu ntoki, kandi nta yindi mpamvu uretse ibikomere.

Nyamara nyiri gutwara uru rufunguzo mu ntoki urebye neza, wasanga nta n’imibare myinshi abanza gukora, uretse kuba nyine yakinze akabangukirwa no kurusigarana mu ntoki, abandi bifitiye ibibazo byabo bwite mu mutima no mu mutwe, bikababera umutwaro.

Hari na bamwe bibaviramo intandaro yo kudakunda uwo muntu, kandi nyamara iyo urebye neza usanga uyu afite n’ibindi bintu mu ntoki, ariko urufunguzo akaba arirwo ruba ikibazo.

Mbona iyi ari kamere mbi, ndetse ni no kuba umuntu atekereza hafi anafite n’umutima mubi. Umuntu niba yaragutanze kubona ikintu nawe wifuza gutunga, si ngombwa ko ubangamirwa n’intambwe ariho. Mu buzima buri muntu akora urugendo rwe kandi n’abahuje icyerekezo ntibagererayo rimwe, kuko intambwe zitangana ndetse n’amahirwe atangana.

Buri wese agiye agirira mugenzi we ishyari, cyangwa umujinya ngo ni uko hari icyo atunze undi atarabona kandi nawe agishaka, ntaho twazagera kuko buri muntu burya aba afite icyo arusha mugenzi we, kandi utarakibona nawe nyamara yifuza kuzakigira.

Naho ubundi umuntu aho yatwara urufunguzo hose ntacyo byagakwiye kubangamira nyiri kubireba, kuko aba ari amahitamo ye ndetse unashyize mu gaciro nta na kimwe biba bibangamiye n’abo bari kumwe, kuko nyine ruba ruri mu ntoki ze.

Iki ni igitekerezo cy’umunyamakuru Mukazayire Immaculée Youyou

Abantu benshi bagaragaye bakwena abo bakobwa, bamwe banagaragaraza ko ari igikuba cyacitse kuba umukobwa w’Umunyarwandakazi atazi ibisobanuro by’ijambo ry’Ikinyarwanda.

Ibyo babivuga abenshi bagaragaza ko abo bakobwa bakabije cyane, cyangwa bigize abanyamujyi, ndetse bamwe bakabyitiranya no gushaka kwigira abasirimu ku rwego rurenze.

Hari n’abo mbona barengera cyane bagaragaza ko abo badakwiriye kuba bahabwa ikamba ry’ubwiza ngo bahagararire Abanyarwanda, ibi bitewe n’uko hari ijambo ry’Ikinyarwanda babajijwe rikabayobera.

Igitangaje kandi muri ibyo biganiro abo bakobwa bagaragajwemo, byose byabaga biteguye ndetse byanakozwe mu Kinyarwanda. Ni ukuvuga ko babaga bamaze umwanya w’iminota yose abazwa anisobanura mu Kinyarwanda.

Ibi bisobanuye ko abo bakobwa ari Abanyarwandakazi kandi bazi Ikinyarwanda, ariko hagira ubajijwe ijambo rimwe ry’Ikinyarwanda, kuko mu buzima yabayeho ntaho yahuriye naryo ngo arimenye, ubwo inkuru ikaba ibaye iyo, ngo nta Kinyarwanda azi!

Njyewe mpamya ko kumenya Ikinyarwanda cyangwa urundi rurimi urwo ari rwo rwose birenze cyane kuba wabazwa ijambo rimwe, ukarimenya cyangwa rikakunanira. Icyo si igipimo cy’uko umuntu azi ururimi. Ahubwo mu gihe mushobora kuganira n’umuntu mukumvikana mu rurimi burya uba uruzi.

Ubundi hari ijambo umenya bitewe n’aho utuye, ibyo ukora, abo mubana, cyangwa imyaka ufite n’ibindi. Naho kumenya amagambo agize ururimi rwose, ndahamya ko ntawe uyazi. N’abitwa ko ari abahanga mu rurimi runaka, hari ijambo wamubaza ntarimenye bitewe n’imibereho runaka abayemo yatumye adahura n’iryo jambo, kandi bitabujije ko riri muri urwo rurimi.

Ururimi ni ikintu kirekire kandi kigari cyane, ntawe ukwiye gusekwa ngo ni uko hari ijambo yabajijwe ryaba rizwi wenda n’abantu benshi we akaba atarizi.

Hari n’abavuga ngo ni ijambo ry’ibanze ryoroshye kumenya, ariko burya iby’ibanze byose bariya bakobwa barabizi, ni yo mpamvu bakora ibiganiro bitandukanye mu Kinyarwanda. Naho ibindi byose, ijambo urimenya cyangwa rikaba iry’ibanze bitewe n’ubuzima bwa buri munsi umuntu abayemo.

Usanga umukobwa n’iyo yaba yakunze umuhungu ate, we agomba kwiyumanganya agategereza ko umuhungu ari we uzatera intambwe akamusaba urukundo. Akenshi umukobwa agaragaza ibimenyetso byakwereka umuhungu, cyangwa n’abandi bose ko umukobwa yaba akunda uwo muhungu. Ariko akaba atatinyuka ngo amwegere abimubwire.

Kuba umukobwa atabwira umuhungu ko yamukunze kandi bigarukwaho n’ingeri zose, aho ubona bahurira mu kuba bidafite igisobanuro ndetse bigaragara nabi, kubona umukobwa ari we usanze umusore bwa mbere akamubwira ko amukunda, ndetse akanamusaba na we ubushuti, bugamije ko bazabana nk’umugabo n’umugore.

Ibi wumva binafata intera ndende aho abantu bakuze bo bakumvisha ko ibyo bintu byaba ari ubukunguzi, kubona umukobwa asanze umuhungu, ndetse n’abahungu benshi bakakumvisha ko n’iyo mu busanzwe yabaga yaranabonaga uwo mukobwa ko yamukunda, ateye intambwe ya mbere yamuhungira kure kuko yaba yumva hari ikindi kibyihishe inyuma atari urukundo gusa. Bati “Ese ubwo tugeze mu rugo uwaba umugabo yaba nde hagati yacu twembi?”
Mu by’ukuri njye numva bishoboka cyane ko umukobwa na we yakunda umuhungu, akanabimubwira nyuma uwo muhungu na we akabyakira kandi urukundo rwabo rukazakomera rugashora imizi.

Urukundo ubundi rushobora guhera mu muntu umwe noneho uwo rwahereyeho akaba ari we urusangiza mugenzi we. Uko iminsi igenda ishira, urukundo rwabo rugakomera. Rero ntaho numva ihame ry’uko mu muhungu ari we urukundo rugomba gutangiriraho iteka. Mu gihe kandi rwahereye ku mukobwa, sinumva impamvu yakwiyumanganya ngo ntiyemererwe gusaba umuhungu urukundo.

Ese ubwo uwo mukobwa akunze uwo muhungu akicecekera, uwo muhungu noneho yakunda akikundira undi mukobwa akaba ari na we abibwira, uwo mukobwa koko ntahora yicuza icyamuteye kutabwira uwo muhungu ko amukunda? Kandi nyamara ugasanga iyo amusangiza mbere ko amukunda bari kugirana ibihe runaka noneho uwo muhungu na we akamukunda noneho uwo mukobwa akagira ibyo byishimo byo kubana n’uwo yakunze.

Ubundi njye nemera ko urukundo rugira imbaraga nyinshi. Kandi no kuruhisha akenshi ntibyoroha. Ku bw’izo mpamvu rero bituma rugutamaza n’ubundi umuhungu ukunda akajya abibona ko umukunda, kandi utarafashe umwanya ngo ubimubwire ko umukunda.

Numva njye ku giti cyanjye kuba twemera ko umukobwa ari ikiremwa gishobora gukunda. Numva no gufata iya mbere yakunze umuhungu akaba yabimubwira ntacyo byaba byangije.

Kandi mpamya ko kuba umukobwa ari we wasaba umuhungu urukundo, ari urukundo nyakuri amufitiye, atari izindi nyungu runaka amushakaho, ndahamya ko bitazagira ingaruka mbi mu muryango wabo, ahubwo bazagira urukundo ruhamye, cyangwa byanakwanga, bikanga ubwo bafite ibindi bananiranywe kumvikanaho, ariko bidafite aho bihuriye n’uko ari umukobwa wateye intambwe ya mbere ngo abwire umuhungu ko amukunda.

Reka nsoze mbifuriza umunsi mwiza w’abakundana ku baba bizihiza umunsi witiriwe Mutagatifu Valentin (Saint Valetin).

Umunyamuziki akaba n’umunyamideri Eudoxie Yao ukomoka muri Côte d’Ivoire n’uwari umukunzi we Moussa Sandiana Kaba wamamaye ku izina rya Grand P. na we akaba ari umunyamuziki ukomoka muri Guinea, ni bamwe mu bavuzweho ko batari bajyanye

Ubusanzwe iyo ibi bivugwa, baba baganisha ku miterere y’aba bombi, wenda bagaragaza ko umwe ari mubi undi ari mwiza, cyangwa rimwe na rimwe bagahuza imyaka aba bombi barutanwa, ubwo bagahera aho bati "Bariya bashakanye ntibajyanye, cyangwa abari kwitegura kubana" ntibajyanye. Bikantera no kwibaza uko abajyanye baba bameze n’ushinzwe kubireba akabyemeza.

Ubundi urukundo ni ikintu gisobanurwa na buri muntu mu buryo bwe butandukanye na mugenzi we. Ibyo umwe akunda bishobora cyane gutandukana n’ibyo mugenzi we akunda, nubwo baba banafitanye isano rya bugufi. Bityo n’ibintu abantu babibona mu buryo butandukanye. Ubundi iyo umuntu agiye kubana na mugenzi we nk’umugabo n’umugore, ni bo bonyine baba bazi ibyo bashaka ndetse ni na bo bonyine baba bazi ibijyanye n’ibitajyanye kuri bo.

None wowe uba uri muntu ki uvuga ngo ba kanaka ntibajyanye? Usanga bigera n’aho inshuti n’abavandimwe bashobora rwose kubuza umusore cyangwa inkumi uwo yari aje kubereka bateganyaga kubana mu minsi ya vuba, impamvu ikaba abo bantu bamubwira ko batajyanye.

Uyu mugore witwa Eudoxie Yao ngo ntiyitaga ku banenga igihagararo cy’umugabo we

Ubundi ntekereza ko ikintu cy’ingenzi umuntu yanenga ku wundi ari ikijyanye n’imico ya kanaka ndetse n’imyifatire, kuko ari byo bishoboka ko umuntu yaba ataramenye mu gihe ari gukundana na mugenzi we, noneho agahura n’uwaba amuzi kumurusha, akaba yamubwira wenda ati, kanaka ndamuzi ateye atya…Naho ibyo ku miterere , indeshyo, ibara ry’uruhu …aba yarabyiboneye na we. Umuntu ajyanisha uko ashaka bitewe n’ibyo akunda cyangwa ashaka.

Nta tegeko ririho ry’abagiye kurushinga, ngo tujye tugendera ku ngingo runaka isobanura abantu bajyanye n’abatajyanye. Ibindi biba ari amahitamo ya ba nyiri ubwite. Niba ukunda umugabo muremure usumba umugore, wenda undi akunda umugore muremure gusumba umugabo, niba ukunda umugabo uruta umugore mu myaka, wenda undi akunda ko umugore ari we mukuru kurusha umugabo….

Abantu bonyine ni bo bamenya ko baberanye barangiza bagafata imyanzuro yo kubana. Ntekereza ko abandi icyo tuba dusabwa ari ukubashyigikira uko dushoboye, naho ibyo kujora ngo barajyanye cyangwa ntibajyanye, baraberanye cyangwa ntibaberanye, ndumva ibyo ntacyo biba biri bwungure, kuko baba barahisemo ibyo babona ko ari byiza.

Ubundi njyewe mbona umugabo n’umugore bahisemo kubana bagejeje imyaka y’ubukure, nta gahato bashyizweho, iteka baba bajyanye.

Inkuru bijyanye:

Umugabo n’umugore bafite igihagararo kidasanzwe batandukanye biturutse ku gucana inyuma

Ibi ni ibintu bigaragara cyane, ku buryo yaba abareba uko uyu mugabo n’umugore babanye, abenshi baba bishyiramo ko byanze bikunze buriya bakora imibonano mpuzabitsina. Yaba n’uyu musore umukobwa aganiriza neza, ahita yiyumvisha ko ubwo n’imibonano mpuzabitsina igihe azayishakira biba ari ibintu byoroheje.

Birashoboka cyane ko umugabo n’umugore cyangwa umusore n’inkumi baba bafite ahantu bahurira, bagahuza imico yabo ku buryo umugore yakwiyumvanamo n’umugabo, baba bari kumwe akisanzura akamuganiriza neza ubona afite akanyamuneza, ku buryo binabaye ngombwa yanamusura bitewe n’impamvu imwe cyangwa iyindi, nyamara ibi akabikora yumva ari ubushuti busanzwe. Ariko ikibabaje ni uko abagabo benshi ibi bahita bumva babihuje n’imibonano mpuzabitsina. Niyo yaba ataratinyuka ngo amusabe ko bayikora, aba yumva abiha amahirwe arenga 90% yuko namusaba undi azahita yemera.

Birashoboka cyane ko umukobwa cyangwa umugore yakwiyumvamo, cyangwa akisanzura k’uwo badahuje igitsina, nyamara ibi bikaba ari mu buzima busanzwe cyangwa mu kazi gasanzwe, iby’imibonano mpuzabitsina bitarimo.

Aha ni ho ugira utya ukumva abantu bari inshuti koko buzuzanya mu buzima busanzwe bitewe n’aho bahurira cyangwa n’ikibahuje, umugabo kubera ukuntu yahoraga yitiranya uku kwisanzura ku mukobwa no kumuganiriza neza akabihuza no kuba yakwemera ko bakora imibonano mpuzabitsina byoroheje, undi yamuhakanira ugasanga aratunguwe bikanabangamira undi mubano bari bafitanye mbere, kuko aba yarihaye wenyine icyizere kiri hejuru.

Ku bwanjye numva ikintu kijyanye n’imibonano mpuzabitsina ari ikintu kigari cyane, ndetse abantu badahuje ibitsina ntabwo kumenyana kwabo biba biganisha gusa ku mibonano mpuzabitsina.

Abantu hanze aha bagira ibintu byinshi bibahuza, kandi uwagira Imana yakorana n’umuntu bahuza kuko bitanga umusaruro mwinshi. Numva nta mpamvu umuntu yakwimunyamunya kugira ngo atisanzura ku wundi, ngo hato badahita babihuza n’imibonano mpuzabitsina.

Erega hari n’abo wumva, ngo ese ubwo umugore wa kanaka cyangwa umugabo wa kanaka ubwo ni gute buzura n’uriya muntu cyangwa bari inshuti! Ibi ni ibintu bisanzwe ntabwo kwiyumvanamo cyangwa gusabana na kanaka cyangwa nyirakanaka bihita bisobanura ko bikurikirwa n’imibonano mpuzabitsina.

Nemera ko imibonano mpuzabitsina ari ikintu gitegurwa mukabyumvikanaho nk’abantu bakuru bitewe n’impamvu mwembi mwumvikanyeho. Ariko rwose ntabwo ugomba kwiyumvamo ko nyirakanaka byanze bikunze bitewe n’ukuntu ubona mubanye neza bihita bihuzwa no kukwemerera imibonano mpuzabitsina.

Wazatungurwa cyane ndetse bikanangiza umubano wanyu, utinyutse kumusaba ko mwagirana imibonano mpuzabitsina akagukurira inzira ku murima akubwira ko agufata nk’inshuti isanzwe cyangwa musaza we, iby’imibonano mpuzabitsina bitashoboka.

Iki ni igitekerezo cy’umunyamakuru Mukazayire Immaculée Youyou

Ibi byagiye bigaragara mu minsi yatambutse, maze biza gutizwa umurindi ubwo hari umuturage wari wasabye umwe mu baminisitiri maze na we akamuha amafaranga akoresheje Mobile Money, noneho n’abandi benshi baboneraho, basaba abandi bayobozi batandukanye.

Uyu muntu usabye kandi, ntabwo aba agaragaje wenda ubukene bwe ngo umuntu ufite ubushake amufashe niba koko ari n’ukwiriye gufashwa! Oya, uyu asaba avuze amazina y’umuyobozi runaka asabye ndetse akenshi banavuga n’ikintu nyirizina ari kumusaba, aho njyewe mba mbona bisa nabi ndetse harimo no kwisuzuguza ndetse no kubangamira uwo muyobozi mu buryo bumwe cyangwa ubundi.

Simpamya ko uyu muntu koko aba akennye ku rwego aba yabigaragaje ari gusabiriza mu nyandiko. Abenshi babikora bazi ko ntawubamenya kuko baba bihinduranyije amazina n’amafoto, nyamara burya uko uzi ko uzi guhisha inyirondoro yawe, hari n’abandi bazi kuvumbura bakamenya nyiri uwo mwirindoro nyakuri, ibintu mpamya ko bitubahishije nyiri kubikora. Ndetse mpamya ko bamwe bibaye ko bashyirwa ku mugaragaro bakamenyekana byabatera ipfunwe.

Ibi bintu kandi bigenda bifata indi ntera aho hari n’uwo nabonye yarenze ku kubyandika ku mbuga nkoranyambaga, yandika ibaruwa nini ngo yandikira umuyobozi w’ikigo runaka ababwira ko ari umukiliya wabo none amufashe amuhe amafaranga! Ibi ku bwanjye nkaba mbona ari ingeso mbi abantu batangiye kwimakaza.

Yego singiye kwanga ko koko umuntu atakena, cyangwa ngo anasabe umuntu. Ariko mpamya ko ubu buryo biri gukorwamo butanoze. Umuntu koko umusaba ubibabaye uramwegera ukamubwira mwiherereye, ntabwo ujya kubishyira ku mbuga nkoranyambaga, cyangwa ngo numara kwandika ibaruwa umugeneye uyikwirakwize hirya no hino ugaragaza ko wasabirije. Umuntu burya ujya gusaba aba ari amaburakindi byamushobeye, ku buryo atari ibintu ajya kwirata ku mbuga nkoranyambaga nk’aho ari igikorwa cy’indashyikirwa yakoze.

Uyu we yanditse asabiriza abinyujije mu ibaruwa yakwirakwiriye ku mbuga nkoranyambaga

Ikigaragaza ko ibyo uyu muntu aba akoze bidahabwa agaciro uretse kumushyira mu cyiciro cy’abantu bafite imitekerereze iciriritse ni uko abenshi babihorera. Kandi simpamya ko ibihumbi 20 cyangwa 50 uba usabirije Minisitiri cyangwa undi muyobozi runaka aba ayabuze ku buryo wabikoze mu kinyabupfura cyangwa mu bwenge atayaguha.

Mbona ibyabaye byarabaye kuko ntitwabisubiza inyuma, ariko nibura mureke birangirane n’umwaka wa 2021. Ababikora bigira nk’aho ari ugutebya, mbona nta gutebya birimo kuko bisa nabi.

Twese hamwe tuzagire umwaka mwiza w’amahoro wa 2022.

Ibi nabyumvanye abantu benshi batandukanye babyinubira ndetse bamwe bakaniyama abatarabikora ngo ntibibeshye ngo babifurize umwaka mwiza, kandi bari bamaze igihe kinini batabavugisha, nza kwibaza icyo byaba binatwaye aribwo abikoreye.

Ubusanzwe hari abantu baba baziranye, ariko badakunda kuvugana kenshi wenda bitewe n’uko nta bintu byinshi bibahuza, ariko ibyo bitavuga ko baba bataziranye ku buryo haba ikintu kidasanzwe nko gusoza umwaka akibuka ko na mugenzi we yawusoje akabyishimira, ndetse akanamwifuriza kuzasoza amahoro undi bagiye gutangira.

Ubundi abantu bose bigirira ibibazo bigiye bitandukanye, ku buryo kujya ubona umwanya wo kuvugisha abantu bose muziranye cyane cyangwa buhoro bitakorohera umuntu.

Ibi bigatuma hari abo bavugana kenshi n’abandi bavugana gahoro bibaye ngombwa. Ariko kuba abantu bagiye gusoza umwaka biba ari ikintu kinini ku buryo umuntu wafashe umwanya akakwibuka mu bo yishimira ko basozanyae umwaka amwifuriza kuzasoza no kuzahirwa mu wundi ukurikiyeho, biba ari igikorwa cyiza undi yakwishimira.

Ikindi gihari, iyo uvuze ngo mwari mumaze igihe mutavugana, ubwo bisobanuye ko nawe utaba waramuvugishije, ariko ubwo umwe akaba ari we ubaye mubi nibura unakwibutse muri izo mpera z’umwaka, akanakwifuriza ishya n’ihirwe mu mwaka utangiye.

Gusoza umwaka ugatangira undi ni ibidasanzwe, kandi ibyo abantu babifatira umwanya nyine iyo umwaka urangiye, kuko nibwo uba umenye ko muwusoje, rero umuntu kuba yarakuvugishije kenshi cyangwa gake, numva bitaba imbogamizi yo kuba agutekereje akakwifuriza kuzagira umwaka mwiza ukurikiyeho.

Hari n’ababisanisha n’amasano bafitanye, cyangwa umumaro runaka yumva kanaka yari kumumarira, ku buryo iyo atabikoze uko we yumva yari kubikora aba yumva adakwiriye kumwifuriza umwaka mushya muhire, cyangwa gushimishwa n’uko ari muzima basozanye umwaka. Nyamara kwishimira ko uriho, ni iby’agaciro kuko ubuzima buzima ni cyo gishoro cya mbere.

Yaba amagambo nyiri ubwite yiyandikiye, yaba amagambo y’undi yabonye ahantu akayakunda akaba ariyo yifashisha akwifuriza umwaka mushya muhire, numva yose ari meza umuntu yakagombye guha agaciro. Naho utahetukaga kukuvugisha akakwibuka umwaka urangiye, ubwo nibura numva unamugaye, wamugaya gutinda ariko ntumugaye guhera.

Burya aba yabikoze neza kuko aba ari igihe cy’umuntu cyo kwicara agasuzuma. Ubwo kuba uza mu rutonde rw’abantu azi atekereje, n’ubundi uba uri uw’agaciro kuri we.

Reka nsoze nifuriza abakunzi bacu, Umwaka mushya muhire wa 2022, cyane cyane abakunda inkuru nandika. Uzababere uw’ibyiza.

Iki ni igitekerezo cy’umunyamakuru Mukazayire Immaculée Youyou

Nifashishije igitabo “Umuco mu Buvanganzo” cyanditswe na Nsanzabera Jean de Dieu, inzobere mu Muco, Amateka n’Ubuvanganzo, agaragaza ko Umuhango wo guterekera mu Rwanda rwo hambere wakorwaga mu ngeri enye, aho mbona izi ngeri zose Abanyarwanda batari bake muri iki gihe bazikurikiza.

Muri ibyo bikorwa byakorwaga harimo nko kwita umwana izina ry’ umukurambere wabayeho, harimo ibyo kuganira no kuvuga amateka y’ibikorwa bya nyakwigendera. Ndetse hanabagamo kwizihiza isabukuru runaka ya nyakwigendera (isabukuru yo kuvuka, gushyingirwa, kugabirwa, gupfa n’iyindi).

N’ubwo n’ubundi ibi byose bikorwa, none nifuje kwibanda ku kijyanye no gushyiraho umunsi ngarukabihe, ushyirwaho n’abanyamuryango runaka bagahura bakibuka nyakwigendera.

Umugenzo wo gufata igihe runaka abantu bumvikanyeho, bakajya aho nyakwigendera ashyinguye, bakahakorera isuku, bagashyira indabo ku gituro, bagasa n’abamuganiriza bamubwira uko ubuzima bumeze guhera igihe yapfiriye, yaba ibyiza cyangwa ibibi byabaye, ni ibintu mbona bigenda bifata indi ntera mu bantu benshi cyane cyane abifite( abakire) ariko icyo maze kubona ni uko abenshi ubabwiye ko bari guterekera mwagirana ibibazo, kandi njyewe mbona ari wo muhango baba barimo gukora.

Ibi bigenda bigaragara hirya no hino mu Rwanda, aho abantu bakusanya ubushobozi bwinshi, bagateka bakegeranya n’ibyo kunywa byinshi inshuti n’abavandimwe bagaterana ngo bari mu muhango wo kwizihiza no kwibuka kanaka umaze igihe runaka yarapfuye. Ibi bigahura n’ibikorwa n’imiterere y’umuhango wo guterekera mu mateka y’u Rwanda, usanga ari ijambo ry’impine ryunze amuga abiri ari yo “Guteka” no “Gutereka”.

Ibi kandi bikorwa n’abantu benshi batandukanye mu bice n’amadini atandukanye, bafata umwanya bakavuga ku buzima ndetse n’amateka n’imigirire ya nyakwigendera, aho n’umuntu uba utabyitabiriye bamufata nk’utari umunyamuryango. Nyamara aba bantu bakora ibi ariko bumvise ngo kwa kanaka baraterekeraga bakumva ari abantu bateye ubwoba bakorana n’imyuka mibi. Ibi bintera kwibaza niba abakora ibi bintu bo baba bazi igisobanuro cyabyo mu muco nyarwanda.

Uko hagiye haza imyemerere itandukanye, abantu benshi bumva kuvuga ngo: Baraterekera ari ibintu bihabanye, cyane cyane ab’iki gihe cyangwa abo mu mujyi. Nyamara wajya kureba ugasanga ubu guterekera biri no mu Mijyi kurusha mu cyaro. Iyo wise umwana izina ry’umukurambere kanaka wabayeho ku isi, burya uba umuterekereye, kwicara abantu bakarya bakanywa baganira ibikorwa, ibigwi n’amateka ya nyakwigendera, burya biba ari ukumuterekera.

Buriya buryo bwo guterekera uko ari bune, mu Rwanda rwo hambere ndetse na n’ubu buracyakurikizwa, ariko cyane cyane ubwagaragariraga buri wese ni buriya bwa kane. Aho umuryango wahuraga ku munsi wagenwe, bagategura amafunguro n’ibinyobwa nyakwigendera yakundaga. Aha ni ho mpuriza no kuba abantu benshi baterekera wenda gusa bamwe cyane cyane abakiri bato ntibamenye ko baba baterekera, cyangwa abandi bakaba badashaka gusa kubihuza n’ibya kera kugira ngo bititwa guterekera.

Sinjya kuvuga ngo guterekera ni bibi nk’uko bamwe babivuga ngo ni ugukorana n’imyuka mibi, gusa nabwo sindi bunavuge ngo ni byiza, cyane cyane ko burya umuntu wese ajya gukora uyu muhango yawutekereje neza azi n’impamvu zabyo. Gusa icyo nari ngendereye ni ukugira ngo mpuze imihango dukorera abacu bapfuye, tuyihuze n’inyito yabyo mu Kinyarwanda. Umuntu wese ukora buriya buryo yaba bumwe muri bwo cyangwa bwose uko ari bune, amenye ko aba ari Guterekera. Hato hatazagira n’uwakubaza ukabura ibisobanuro bw’ibyo uri gukora ukamwara.

Iki ni igitekerezo cy’umunyamakuru Mukazayire Immaculée Youyou

Hirya no hino mu tubari, hoteri na za resitora uhabona abagabo bahohotera abana b’abakobwa bakora muri iyo mirimo, kandi bakabikora bagaragaza ko byaba biri mu burenganzira bwabo gusa bitwaje ko bicaye aho kandi bishyuye ibyo kunywa n’ibyo kurya.

Ibi birababaza cyane aho umukobwa aza kumwakira undi agatangira kumukorakora ku bibero n’ikibuno, kandi akabikora yishimye nta n’icyo yishisha yumva biri mu burenganzira bwe, nk’aho mu byo yishyuriye na byo birimo.

Ikindi uyu mukobwa iyo yihagazeho, mbese yiyubaha akabwira uyu muntu ko bimubangamiye adashaka ko amukorakora ku mubiri, amwereka ko icyo yemerewe ari ibyo yaguze undi na we akaba afite inshingano zo kubimugezaho neza, ubona uwo mugabo umujinya umwishe, ngo uyu mukobwa arasuzugura, koko bikaba hari n’ubwo bihurirwaho n’abagabo benshi ngo uwo mukobwa arasuzugura, gusa kuko yababwije ukuri ko abangamirwa n’iryo korakora ryabo.

Ibi ntibigarukira aho, cyane ko usanga abo bagabo b’abakire baza kenshi aho baba baziranye na boss (nyiri iyo hoteli), rwose bakamuhamagara bamuregera uwo mukobwa ngo asuzugura abakiriya ku buryo akenshi birangira bamwirukanye kugira ngo abakiliya batazacika aho.

Mbona abagabo mukwiye kwiyubaha, ndetse mukaba mwanakorakora uwo mwabanje kuvugana mukanabyemeranyaho, ntabwo amacupa angahe y’inzoga wishyuye n’isahani y’ibiryo wumva ko wabariyemo n’umubiri w’umukobwa. Oya rwose. Ibi nta no kwiyubaha birimo.

Umukobwa ari aho kuko ari mu kazi, ntabwo yaje kumurika umubiri we kugira ngo uze uwukorakoreho. Ari aho kugira ngo ashake imibereho. None cyangwa ejo nawe uwo mufitanye isano yaza kuhakora, yaba mushiki wawe cyangwa umugore wawe. Ibyo ukorera uwo mwana w’umukobwa ubonye babikorera abawe wibaze niba byakunezeza.

Ikindi abagabo babaswe n’ingeso yo kutiyubaha, n’unabikora ubikore uzi ko bigayitse nta n’uburenganzira na buto ufite bwo kubikora witwaza utwo dufaranga uba wishyuye tutanagura n’ikindi kintu cy’agaciro kanswe umubiri w’umuntu.

Wibuke kandi ko ikirenze no ku bandi bantu biyubashye baba bakugaye n’ubwo batanabikubwira ko bigayitse, ariko wibuke ko ari n’icyaha gihanwa n’itegeko n°59/2008 ryo ku wa 10/09/2008 rikumira kandi rihana ihohoterwa iryo ari ryo ryose rishingiye ku gitsina.

Iki ni igitekerezo cy’umunyamakuru Mukazayire Immaculée Youyou

Ukabona umuntu yabayeho mu buzima bwa gikene, buri muntu agakomeza ubuzima bwe nk’aho ubw’uwo mukene butamureba. Bakamufata nk’utagize icyo yishe cyangwa icyo akijije. Nyamara yatera intambwe igana imbere, ukabona inama zitangiye guterana zibaza ku kibazo cy’uko yakize ndetse hanibazwa aho yaba akuye amafaranga!

Ubusanzwe kuba umuntu ari umukene, hari ibintu by’ingenzi atabasha kwikorera kubera ubushobozi buke. Iki ni cyo kibazo gikomeye ku buryo inshuti, umuryango n’abavandimwe bagakwiye kwicara bagakora inama bibaza icyo kibazo kiri ku muvandimwe inkomoko yacyo ndetse n’igihe akimazemo hagashakwa n’icyakorwa kugira ngo agisohokemo.

Nyamara abantu benshi usanga ibi bisa nk’aho ntacyo bibatwaye bakikomereza ubuzima nk’aho ntacyabaye, cyane cyane iyo uyu muntu yabaye intwari akabihorera ntabasabe. Nyamara iyo amaze kugira intambwe atera ari kugenda abasanga mu cyiciro barimo ndetse na bagenzi be bari mu cyiciro kimwe agenda abasiga, inama zitangira guterana bibaza aho ubutunzi yabukuye n’igihe bimutwaye ngo abugereho.

Igitangaje muri ibi kandi, ni uko ibisubizo byinshi biza biganisha mu kuba uyu muntu ubutunzi yarabubonye mu nzira zitemewe. Bashaka kumvikanisha ko bitari gukunda ko yaba ageze aho agera, ari ubwenge bwe akoresheje n’imbaraga ze kandi mu bikorwa byiza. Hari n’abakabya iyo babuze ibimenyetso bibaganisha mu bikorwa bibi yaba yarayakuyemo, bakavuga ko yayakuye kwa shitani.

Ibi iyo mbibonye bintera kwibaza niba biterwa no kuba Abanyarwanda baba bibona mu ishusho y’ubukene, bakumva ko ukennye adateje ikibazo, ahubwo ukize ari we kibazo, cyangwa bikaba biterwa n’amashyari adatuma Abanyarwanda batifurizanya gutera imbere.

Iyo bibaza ngo "Ubu se akize mwanya ki?" Nibaza igihe ubundi abantu baba bumva umuntu akwiye kumara kugira ngo akire. Cyangwa usaziye muri ubwo bukene ni we uba udateje ikibazo?! Uko umuntu aba yarakennye agaceceka kuko ntawe ubyitayeho, ni ko anarwana n’ubuzima bwe bucece agakora yiteza imbere, mukazisanga yaravuye muri ya mibereho mwari mumumenyereyeho.

Nta muntu waremewe gukira ngo undi aremerwe ubukene, kandi Abanyarwanda baravuga ngo « iby’isi ni gatebe gatoki » None urakira ejo n’undi agakira mwembi mugakirana cyangwa nawe ukaba ukennye mu gihe na we akize. Ni uko isi iteye. Rero umuntu mu gihe imibereho ye mibi itbashishikaje mugakomeza nk’aho ntacyabaye, n’ubundi yahinduye ubuzima na we agakira mujye mukomeza ntibibaraze inshinga mwibaza aho yabikuye, kuko mutari mwaranibajije aho yabiburiye.

Si ngombwa ko umuntu intambwe yose agenda ageraho ayimenyekanisha kugira ngo mutazamwibazaho ngo akize mwanya ki! Ahubwo akora ibyo agomba gukora igihe cyagera mukabibona. Gukira bishobora kuza byihuse cyangwa bikaza bitinze. Icyangombwa ni uko umuntu agomba gukora icyo yakagombye gukora mu gihe nyacyo. Kandi si ngombwa ko uburyo umuntu umwe yakizemo cyangwa yabonyemo amafaranga ari bwo na kanaka agomba kuyabonamo byanze bikunze.

Tureke gutakaza umwanya twibaza uko kanaka akize n’umwanya byamutwaye kandi uko yakennye ntacyo byakubwiye, kandi nyamara burya mbona umuntu wese aberewe no kubaho neza. Ahubwo niba dufite umwanya wo kwiga kuri bagenzi bacu tujye twiga ku bakene, abo byemeye bagakira tureke kubibazaho ahubwo twishimire ko baryoherwe no guhindura ubuzima.

Ni byo koko hirya no hino mu miryango itandukanye, ugenda wumva amakimbirane yabaye mu ngo, ndetse bamwe bakagaragaza ko ingo zo muri iyi minsi nta reme zifite, aho abenshi banavuga ko abubatse ari abubatse kera, naho ubu akaba ari ukubura uko umuntu agira, bagaragaza ko bazubakira kuzisenya, ndetse abanyamadini bamwe bemeza ko imperuka izaba bakagaragaza ko ari ibimenyetso by’imperuka.

Ariko njyewe nsanga akenshi ibiba ubu byaranabagaho na kera gusa ntibisakazwe hirya no hino ahubwo bikaguma mu muryango.

Ibi iyo mbivuga ahanini nshingira ku kuba ibiza ku isonga mu bitera amakimbirane mu miryango nshingiye ku bigaragazwa n’ubushakashatsi butandukanye harimo gucana inyuma mu bashakanye ndetse n’ibindi byaha bifitanye isano n’ubusambanyi. Nyamara iyo ndebye hirya no hino usanga n’ubwo ibi bitasakuzaga ngo bimenywe n’umuhisi n’umugenzi byarakorwaga ku rwego rwo hejuru, ubwo ubu usanga abana benshi bavukana kuri se gusa, umugabo yari atunze abagore benshi mu buryo buzwi, ariko ntibisakuzwe bigafatwa nk’ibisanzwe.

Hirya no hino mu Rwanda wumva mu bantu bakuru baba bafite abavandimwe bahuriye kuri ise ubabyara, ariko ba nyina batandukanye, ugenda wumva umugore ukwereka ubumuga cyangwa inkovu yatewe n’umugabo. Iyo muganiriye n’abagore bakuze akenshi bakubwira ibikorwa by’indengakamere bakorewe n’abagabo bashakanye, yaba bo bwite cyangwa imiryango bashatsemo. Gusa akakubwira ko nyine ari uko zubakagwa yacecekaga cyangwa bigacocerwa mu miryango yabo ntibimenywe n’abandi bantu ba kure. ( Ngaruka ku bagore cyane bahohoterwaga kuko byaba ubu na kera n’ubwo n’abagabo bahohoterwa ubushakashatsi bugaragaza ko abagore ari bo benshi).

Mu bigaragara rero njyewe mbona n’ubwo hari n’izindi mpamvu nyinshi muri iyi minsi zituma bigaragara ko amakimbirane mu miryango agenda yiyongera (ahari nk’umuco batozaga abagore ngo ni uko zubakwa, kutamenya uburenganzira n’inshingano za muntu,…) mbona itumanaho n’isakazamakuru kuba ryaroroshye ari bimwe mu bigaragaza ko ingo zo muri iyi minsi zidakomeye mbese iminsi y’imperuka yazigezemo.

Ingo mbi zahozeho, gusa ni uko nta bikoresho by’ikoranabuhanga byari bihari cyangwa buri muntu akaba yari ataraba umumenyeshamakuru, ngo ikibaye cyose gifatwe cyoherezwe hirya no hino, abantu bose bamenye ibyabaye irunaka kuri ba runaka kubera impamvu runaka…

Amakimbirane mbona atagomba kurebwa nk’ibintu by’inzaduka cyangwa bitabayeho mu ngo za kera. Hoya ingo nziza kera zabayeho ariko n’imbi cyane zaranzwe n’ihohoterwa zirahari, ni kimwe n’ubu kandi. Nta byacitse cyangwa inzaduka ku bwanjye mbona. Abantu bikumva ko ibihe byahindutse ari byo bijya mu ngo bikazisenya.

Abanyarwanda baciye umugani ngo ahari abantu ntihabura urunturuntu, kandi ngo ntazibana zidakomanya amahembe. Iyi migani ni iya kera kandi yaganaga akariho. Abagiranye ikibazo mu rugo bagikemure, ubundi bakomeze bubake umuryango wabo mu mahoro. Ntibumve ko ari uguhebera urwaje kuko ari iminsi mibi turimo. Oya, iyi minsi turimo yahozeho kandi izahoraho.

Ibi bivugwa hirya no hino, yaba mu bantu bakuru cyangwa se abakiri bato, aho baba bumvikanisha ko kuba umugabo ntacyo aha benewabo biba byatewe n’umugore we. Ariko ibi bintera kwibaza impamvu byitirirwa umugore kandi umugabo ari umuntu mukuru ufite ubwenge ndetse unafata imyanzuro itandukanye.

Igitangaje ni uko hari n’igihe akenshi uyu mugabo umeze utya, akenshi na mbere atarashakana n’uyu mugore ariko aba yari asanzwe ameze, wenda ntibanabyiteho, nyamara yamara gushaka bikitwa ko umugore ari we mubi.

Birasanzwe ko kugira ngo hagire imyanzuro imwe n’imwe yafatwa mu rugo bisaba ko umugabo n’umugore baganira bakagira ibyo bumvikanaho. Ariko ibi ntibikuraho ko buri muntu aba afite uko yumva ibintu kandi hakaba n’imyanzuro imwe n’imwe afata ku giti cye. Rero kuba uyu mugabo adafasha benewabo siniyumvisha ukuntu bijya bihuzwa n’umugore, nk’aho ari we ugomba gufatira umugabo imyanzuro, cyane ko hari n’indi umugabo aba asanzwe afata ku giti cye.

Ubusanzwe n’ubwo imiryango ibanye neza, iby’ubukungu babihuriza hamwe kugira ngo barebe iterambere ry’urugo rwabo, ntitwabihakana ko hari amafaranga menshi umugabo akoresha yewe n’umugore atabimenyeshejwe cyangwa ngo anabimenye, n’umugore ndetse bikaba bityo. Bisobanuye ko umugabo yashatse kugira icyo afasha benewabo n’iyo umugore atabimenya yabikora, ariko ntibyitirirwe umugore buri gihe mu gihe atabafashije.

Njyewe ibi mbifata nko kuba rimwe na rimwe umugore arenganywa muri sosiyete, aho hari n’ibyo bamushinja nta n’icyo afite yabikoraho. Ku buryo umugabo amafaranga yo kujyana nko mu kabari, kugura ibintu bitandukanye, guha abandi bantu batari abo mu muryango we abikora uko abishatse umugore ntibimugereho, ariko kudaha ubufasha umuryango we, ibi byanze bikunze bikitirirwa umugore!

Ibi bivugwa nta n’ubizi ko wenda baba banabiganiriyeho mu rugo ngo wenda umugore abe ari we ubyanga, kuko hari n’igihe umugore abivuga, umugabo ntabyemere kandi umugore akaba atabikora batabyumvikanye kuko aba ari amafaranga azwi babariye hamwe. Nyamara ibi bikitirirwa umugore ngo ni we mubi.

Umugabo ni umuntu mukuru ndetse unafata imyanzuro itandukanye. Yaba iyo afashe izwi n’umugore cyangwa umugore atayizi. N’iyo yaba yarashatse koko uwo mugore w’ubugugu yashatse kubikora, mbese afite umutima wo gufasha iwabo yabikora ndetse neza kandi ubuzima bw’urugo rwabo bugakomeza. Utabikoze rero numva byagakwiye kumubarwaho aho kuba buri gihe bihita byitirirwa umugore kandi wanareba neza ugasanga n’ubundi nta nama ajya amugisha mu byo akora.

Abo bagore bagiye bagaragara mu bitangazamakuru bitandukanye ndetse n’imbuga nkoranyambaga, aho bitambika mu bukwe bw’abagabo babanye cyangwa babyaranye, yaba ubukwe bwo mu Murenge cyangwa mu nsengero zitandukanye, aho abo baba bagaragaza ko aba bagabo babataye bakajya gusezerana n’abandi bagore, aho baba bagaragaza ko hari inshingano uyu mugabo aba atubahirije yaba ku mugore babanye/babyaranye ndetse no ku bana.

Aha ariko bintera kwibaza niba umugore ibi yabyiyemeje (n’ubwo nabyo ku bwanjye nta bishima), nibura atagenda ngo ibi abikore ariko arengera abana be, cyane ko n’ubundi baba bakiri bato, ibyo nyina yavuga byanumvikana batari kumwe.

Mu Rwanda hashyizweho itegeko n°71/2018 ryo ku wa 31/08/2018 ryerekeye kurengera umwana, ryasohotse mu Igazeti ya Leta ya Repubulika y’u Rwanda yo n° 37 bis yo ku wa 10/09/2018. Iryo tegeko ryashyizweho risimbura itegeko ryari risanzweho n° 54/2011 ryo ku wa 14/12/2011 ryerekeye uburenganzira bw’umwana n’uburyo bwo kumurinda no kumurengera.

Itegeko ryo kurengera umwana ryashyizweho hashingiwe ku Itegeko Nshinga rya Repubulika y’u Rwanda no ku masezerano mpuzamahanga anyuranye u Rwanda rwashyizeho umukono, afite aho ahurira no kurengera umwana no kumurinda ihohoterwa.

Muri iryo tegeko guhoza umwana ku nkeke bisonurwa nko gukorera umwana igikorwa icyo ari cyo cyose gifite cyangwa gishobora gutera ingaruka ku buzima bwe, haba ku mubiri cyangwa ku mitekerereze cyangwa kimuvutsa uburenganzira bwe. Ibi nkabishingiraho nibaza impamvu umugore ahitamo gufatanya n’uyu mugabo yita ko yamutanye abana, na we akabahohotera abajyana ku karubanda ngo bagiye gutambamira ubukwe bwa se.

Iri tegeko ritareba gusa umwana w’Umunyarwanda, ahubwo rireba n’umwana w’umunyamahanga uri mu Rwanda, mu ngingo ya 4 rivuga ko umwana afite uburenganzira ku mikurire iboneye. Buri mubyeyi afite inshingano yo kwita ku mwana kuva agisamwa kugira ngo agire imikurire iboneye.

Ariko mbona yaba umugabo wataye abo bana wenda anabatanye nyina utishoboye akajya gusezerana n’undi mugore, yaba nyira wabo ubajyanye kubonwa n’isi yose ngo bagiye guhangana na se, ku bwanjye mba mbona nta n’umwe uba ubarengeye, ahubwo gusa ni uko baba babahohoteye wenda mu buryo butandukanye.

Ubusanzwe ku giti cyanjye mbona nta mpamvu umugore yagakwiye kwirukanka ku mugabo wamutaye ngo ni uko yagiye gusezerana n’undi mugore. Umugabo aba ari mukuru yumva mu mitekerereze ye ariko abigenje, ubusobanuro yabiha ubwo ari bwo bwose, numva umugore atagakwiye kwiha isi yose ngo agiye kugaragaza ko ibintu byacitse, agaragaza nk’aho abona ko ubuzima bwe burangiye, oya rwose.

Umuntu yagaragaje ko atagushaka njyewe numva nawe wagombye kumwereka ko ushoboye kubaho no kwibeshaho (Ibyo twita kwigira), gusa nabwo ibyo itegeko rikwemerera ukabihabwa mu buryo bwemejwe n’itegeko.

Ariko nabwo kuko buri muntu agira imyumvire ye ndetse n’uburyo bwe bwo gukemura ibibazo, nibura umugore ugiye kujya mu Rukiko cyangwa mu Rusengero akibuka gusiga abana, ndetse akanabarinda mu buryo bushoboka kugira ngo ibyo agiyemo bitazabagiraho ingaruka mu buzima bwabo bwose. Aho wasanga ibyo yita kubagirira neza bibabereye ikintu kibi kizabagiraho ingaruka mbi mu buzima bwabo bwose.

Ayo mashusho bakwirakwiza hirya no hino azaguma gukurana n’abo bana uko imyaka yicuma, agenda abateza isoni n’ibimwaro, cyane ko utanamenya niba uwo mwana aba afite ubwenge bwo guhitamo icyo akora yagishyigikira muri ibyo bikorwa byawe.

Umwana ni umutware, kandi uburyo burahari bwashyizweho umuntu aharaniramo uburenganzira bwe, atarinze kuba akabarore. Yego birashoboka ko wenda n’ubwo buryo wahisemo bwatuma ukemurirwa ikibazo mu buryo bwihuse, nyamara ukazaba mu ngaruka zabyo imyaka myinshi.

Umwana wimwangiriza ubuzima bwe ujya kumwerekana hirya no hino ku bintu bitari na byiza, utazisanga anakuze akaba ari wowe yanze kuko wamuhemukiye no kurusha uwo se uvuga wamusize mu rugo atamutangaje mu isi yose.

Iki ni igitekerezo cy’umunyamakuru Mukazayire Immaculée Youyou

Ubundi nomero za telefone ni kimwe mu biranga umuntu, abantu benshi badakunda guha uwo biboneye, batabanje kumwizera ndetse no gusobanukirwa impamvu akeneye izo nomero. Hanyuma nyiri kuzitanga yakumva abyemeye akayimuha. Ndetse mu bantu b’abasirimu nta muntu utanga nomero z’undi muntu atabiherewe uburenganzira na nyirazo. Ibi bigaragaza ko ari ikintu gikomeye. Ariko kubera ihererekanya ry’amafaranga hifashishijwe ubu buryo bw’ikoranabuhanga kimwe mu ngamba zo kwirinda Covid-19, byatumye n’umuntu utari ngombwa ko abona nomero z’umuntu runaka, azibona mu buryo bworoshye.

Iyi kandi yaje ari ingamba nk’izindi zose zo kwirinda icyorezo cya Covid-19, bivuze ko ubirenzeho ahanwa nk’undi wishe irindi bwiriza ryo kwirinda Covid-19 . N’ubwo abantu benshi bemera ko kwirinda Covid-19 ari ngombwa ariko banagaragaza ko hari aho bikemura ikibazo kimwe cyo kwirinda ndetse no kubahiriza ingamba zo kwirinda Covid-19, ariko bakagaragaza ko gutanga nomero zabo hari aho bagiye babangamirwa mu buryo bumwe cyangwa ubundi bitewe na nyiri guhabwa izo nomero.

Hari bamwe bagiye bagaragaza ko hari igihe bishyura bakoresheje telefone zabo, hanyuma wa muntu nyuma akaza kumuhamagara amwibwira ko yabonye nomero ze, igihe yamwishyuraga, ibyo benshi bafata nko kubatesha umutwe kuko bahamagarwa kenshi kandi bajya kwishyura ibyo guhana nomero bitari biri muri gahunda. Ibi nkabiheraho nibaza niba nta buryo abahanga mu ikoranabuhanga bareba uko abantu bakomeza kwishyurana ariko bidakemura ikibazo kimwe ngo biteze ikindi.

Iki kibazo n’ubwo akenshi umubare munini ugaragara ubangamiwe ari uw’abagore, aho bavuga ko aba babahamagara akenshi babatereta, bamwe bikaba binabaviramo ibibazo n’abo bashakanye, hari n’abagabo babigarukaho bahamagarwa n’abantu b’abatekamutwe kandi nomero zabo barazikuye muri iryo hererekanya ry’amafaranga.

Ibi kandi bifata indi ntera aho umwe ashobora gusaba mugenzi we nomero z’umuntu runaka kuko we azi ko akunda gukorana n’uwo muntu, ku buryo babitegura akamubwira ngo nagaruka uzamubwire yishyure akoresheje uburyo bw’ikoranabuhanga uzampe nomero ze, ku buryo undi na we abikorera icyo, niba yari no kwakira amafaranga mu ntoki akamubwira ko atabona ayo amugarurira cyangwa ko agomba kwishyura akurikije ingamba zo kwirinda covid-19, kugira ngo akunde abone nomero ze za telefone.

Mu by’ukuri njyewe si ndi umuhanga mu by’ikoranabuhanga, ariko nizera ko mu Rwanda hari abahanga ndetse banifashisha n’abandi bibaye ngombwa bakareba uburyo iki kibazo cyabonerwa igisubizo, ku buryo umuntu yakomeza kwirinda Covid-19, cyane ko n’ubwo ubu imibare y’abayandura mu Rwanda iri hasi, ariko igihari. Ariko umuntu akabikora adaha nomero ze umuhisi n’umugenzi kugira ngo umutekano we ube wuzuye, ndetse yirinze impande zose.

Mu miryango hirya no hino yo mu Rwanda uhasanga ipusi zibana n’abantu mu nzu. Imibare iva mu Kigo gishinzwe iterambere ry’ubuhinzi n’ubworozi (RAB), yerekana ko mu Rwanda habarurwa injangwe 8,787, ariko hari abarokore benshi iyo bageze mu rugo bakahasanga iryo tungo bahita bahuza urwo rugo n’abantu bafitanye isano n’imbaraga z’ikuzimu, mbese n’imyuka mibi.

Ubusanzwe imiryango myinshi, uretse wenda kuba baba bikundira iryo tungo bakaba bumva babana naryo mu nzu, ubundi abantu benshi bakubwira ko baritunga kugira ngo bahangane n’imbeba kuko abenshi bazanga kubera kubangiriza no kubabangamira, ariko nkibaza muri iyi mimaro yose iyaba ihuzwa no kuba ipusi yakwitiranywa na shitani!

Ubundi mu Rwanda iryo ni itungo ryahamijwe ubwiza, aho barikoresha bashaka kuvuga ko nta mwiza wabuze inenge, bagira bati "Nta mwiza wabuze inenge na Nyirahuku igira amabinga", aha baba bumvikanisha ko ukuntu ipusi ari nziza ariko ikagira amabinga, bisobanura ko n’umuntu uko yaba mwiza atabura inenge.

Hanyuma iryo tungo ryahamijwe ubwiza nkomeza kwibaza aho rihurizwa n’imbaraga z’ikuzimu nk’uko bigarukwaho kenshi n’aba bavandimwe.

Ubundi ibi ubimenyera aho abo bantu iyo bakubitanye n’ipusi ahita acyaha ati "Mu izina ry’Imana ndagutsinze, toka shitani, abazimu bashye mu izina rya Yesu, Nabanje Imana...." Aya ni amwe mu magambo avugwa n’abarokore ngo batsinda ipusi kugira ngo imbaraga ifite z’abadaYimoni zitamufata.

Dore bumwe mu busobanuro batanga:

Iyo ubajije abo bavandimwe aho bahuriza ibyo bintu bibiri nta busobanuro bufatika baguha, kuko abakubwira ko babifitiye gihamya ni bake cyane, abenshi bavuga ko ari ko babyumva. Bamwe bavuga ko unarebye ipusi ubwayo ubona ireba nka shitani (kandi nyamara akakubwira ko shitani atarayibona).

Undi akakubwira ngo iyo igukanuriye ubonamo ishusho y’umuntu (aha akakumvisha ko nta nyamaswa yagombye kugira ishusho y’umuntu uretse ikoreshwa n’imyuka mibi).

Gusa hari n’abandi bavuga ko muri kimwe mu bihugu by’abaturanyi abacuraguzi n’abarozi bajya bihinduranya bagasa nk’ipusi, kugira ngo bajye guhemukira abantu (ibi bamwe bakivugira ko babyumvanye abantu batabyiboneye, icyakora bake muri bo bakavuga ko babyiboneye n’amaso yabo).

Gusa ku bwanjye mbona ipusi/ injangwe/ Nyirahuku, ni inyamaswa kimwe n’izindi, buri wese ashobora kuyitunga nk’uko yanatunga irindi tungo bitewe n’umumaro ayibobamo cyangwa urukundo ayikunda. Kuyihuza n’imyuka mibi mbona nta busobanuro bitanga, cyane ko igitabo gitagatifu (Bibiliya) cyifashishwa n’abemera bo muri ayo matorero ntaho bakwereka ko handitse ko ipusi ari igikoresho cya shitani ku isi.

Singiye kwanga cyangwa ngo nemeze ko nta bantu bakorana cyangwa b’ibikoresho bya sekibi ku isi, gusa niba banakoresha amatungo, numva uko yakoresha rimwe ari ko yakoresha irindi, aho kubifata bikagirwa umwihariko w’ipusi ku buryo umuntu yanatinya kwinjira mu rugo bayifite ngo harimo shitani cyangwa imigenzo y’imyuka mibi.

Iki ni igitekerezo cy’umunyamakuru Mukazayire Immaculée Youyou

Mu miryango imwe itandukanye yaba minini, cyangwa mito hari aho usanga bafite umukozi ukora akazi ko ku manywa, nyamara nijoro hagera akaba umuzamu. Bivuga ko uyu urebye neza ubwo aba akora amasaha 24 kuri 24, ukurikije akazi umukoresha we amuha.

Ubundi amasaha umuntu mukuru aba agomba kuryama abarirwa hagati y’atandatu (6) n’umunani (8) buri munsi. Ariko ubona abakoresha bamwe ibi batabyibazaho, gusa akumva ko we agomba kuyubahiriza, ariko umukozi we kuruhuka bitamureba kandi ikibabaje akumva ko yizeye ko umutekano w’ibyo yamurindishije usesuye, nyamara akirengagiza ko n’uwo mukozi we ari umuntu ufite umubiri nk’utwe na we aba agomba kuruhuka.

Ujya kubona ukabona uwo mukoresha yirirwanye n’uwo mukozi we, amukoresha n’indi mirimo yose ya ku manywa, iyo aho akorera Atari ho ataha ukumva nka 16h cyangwa 17h aramusezeye ngo uramuke ndarushye ndatashye kuruhuka. Agasiga amubwiye ati "ujye ucunga ibi bintu neza utazasinzira bakatwiba."

Ibi kandi abivuga akomeje, kuko iyo agize nk’ibyago abajura bakamucunga agatotsi kamutwaye agasinzira, ashyikirizwa inzego z’umutekano akaryozwa ibyibwe ngo yari asinziriye baramwiba ndetse akenshi bikitwa ubufatanyacyaha.

Aha bintera kwibaza aba bakoresha niba baba bumva iki kiremwa kigizwe n’inyama n’amaraso cyazabaho gikora ubutaruhuka, kandi we iyo yakabije akageza saa kumi n’ebyiri z’umugoroba yinubira akazi ngo yananiwe atashye kuruhuka.

Nyamara uyu asize ngo amuraririre ibikoresho, aba yabyutse mbere ye, akora amasuku kugira ngo umukoresha aze hasa neza, amanywa yose akirirwa amukoresha, ati "Kora aka na kariya ubundi umpereze kano, nyuma ujye hariya kuzana bya bindi unakore isuku...." Nyuma we yataha kuruhuka agasiga amubwiye kurarira ibikoresho bye!

Iyi ni imirimo akenshi ikorwa n’abagabo, ushobora kubona inyuma ukagira ngo arakomeye, kubera umubiri wabo ugaragaza imbaraga, ariko byanze bikunze kuko ari uko umuntu aremye, bigera aho akananirwa , kuko biba ari ibintu byisubira, umubiri we ugacika intege burundu.

Akenshi aba bantu iyo baje gusaba akazi abakoresha babo babereka ko ku manywa ari utuntu duke bazajya bakora wenda nk’amasuku ya mugitondo ubundi bakaryama kugira ngo baze kubona uko barara ijoro. Nyamara uzasanga bamukoresha ku manywa no kurusha nijoro, bamara gutaha bakamwereka ko ahubwo akazi ke aribwo gatangiye!

Aba bakozi akenshi baba binuba ndetse bagaragaza ko bagowe (hirya umukoresha we atamwumva). Ariko kubera imibereho iri hanze aha, agatinya gusezera mu kazi bitewe n’inshingano abenshi baba bafite, akumva yapfa gukomeza guhanyanyaza, akenshi akazahava ari indembe umubiri we nta mbaraga ugifite nta n’icyo agishoboye kuba yakwikorera.

Ariko se niba ubuzima bwe butanareba wa mukoresha wenda, cyane cyane ko iyo yamaze kugira ubumuga agenda ukishakira undi mukozi, ariko se nibura kuki mu gihe akigukorera utakwibaza imbaraga yaba afite ku buryo yakora amanywa n’ijoro kandi ukiringira umutekano w’ibikoresho byawe?

Umuntu ni umuntu, Imana yamuremanye imbaraga zo gukora, ariko bisaba igihe cyo gukora no kuruhuka kugira ngo n’umunsi ukurikiyeho atangirane imbaraga nshya. Uyu muntu utamuhaye umwanya wo kuruhuka ntumwizereho uburinzi bw’ibyawe, cyangwa umurimo unoze, kuko byanze bikunze umubiri uzamwereka ko unaniwe kandi ukeneye kuruhuka. Rero kuko akenshi ibi biba nijoro. Ubwo utashye uzi ko mwiriwe mukorana umunsi wose, utahe wizeye neza ko nta mutekano usize inyuma kandi mugize ibyago bikangirika cyangwa bikibwa, uzibuke imbaraga z’umuntu wahasize ngo abirindire umutekano.

Iyo ibi babigarukaho, akenshi baba bavuga umugabo cyangwa umugore wubatse, ariko waciye inyuma uwo bashakanye akajya gusambana n’undi mugabo cyangwa undi mugore. Ariko bamwe bakagaragaza ko guca inyuma uwo mwashakanye nibura byakorwa n’abagabo naho abagore batari bakwiye kubikora kuko bigaragara nabi, mbese ku mugore biba ari umwanda.

Aha bintera kwibaza ibi bintu aho bitandukaniye, ku buryo umugabo wafashwe asambana bifatwa nk’aho ari ikosa riciriritse yakoze ndetse ari bimwe mu bigize umugabo, nyamara yaba umugore ufashwe yasambanye agafatwa nk’uwakoze amahano, kandi bombi ari icyaha kimwe bakoze.

Mu Rwanda, itegeko Ngenga N° 01/2012/OL ryo kuwa 02/05/2012 rishyiraho igitabo cy’amategeko ahana, ku ngingo ya 244 y’umutwe twavuze haruguru, ubusambanyi buhabwa igisobanuro cy’uko ari “Imibonano mpuzabitsina ikozwe n’uwashyingiwe ku buryo bwemewe n’amategeko, akayikorana n’uwo batashyingiranywe.”

Ku ngingo ya 245, havugwamo ko umuntu wese uhamwe n’icyaha cy’ubusambanyi, ahanishwa igifungo kuva ku mezi atandatu (6) kugeza ku mwaka umwe (1). Iri tegeko ntiritandukanya umugabo n’umugore. Ariko iyo bigeze muri sosiyete usanga abantu babitandukanya bakagaragaza ko ubusambanyi bw’umugabo butandukanye n’ubw’umugore, kandi nyamara byose ari ubusambanyi.

Ibi bintanganza cyane iyo abagabo n’abagore bicaranye, ukabona bose baremeranywa bati "burya wabona umugabo asambana ariko ntukabone umugore wasambanye biba ari umwanda" Ni gute ibi bitandukanywa kandi byose ari igikorwa kimwe?

Nta muntu wemerewe gusambana yaba umugabo cyangwa umugore. Uwahisemo kubikora ni uko aba yumva we yemeye gukora iyo ngeso mbi. Niba rero sosiyete yemera ko ari icyaha ndetse binasa nabi muri sosiyete, bivuze ko ari umugabo wabikoze ndetse n’umugore wabikoze, bose bafatwe kimwe.

Ku bwanjye mbona ibi byagakwiye gufatwa kimwe nta kubatandukanya. Umusambanyi wese ni umusambanyi. Ntawe usambana ngo bibe isuku, hanyuma undi nabikora bibe umwanda.

Ibi abantu babivuga baba bumvikanisha ko uwo mukobwa wahisemo gutunga inzara ndende aba ari zo arera gusa nta kindi kintu yakwishoborera. Njyewe ibi sinemeranya na byo kuko akenshi umukobwa uhitamo gutunga inzara ndende ari uko aba azikunze agahitamo kuzitunga, ariko bitabangamiye akazi ke ka buri munsi.

Ujya kumva ngo "Uriya se na ziriya nzara yahata igitoki? Yakuba isafuriya se? Yafura se... Ibi bikantera kwibaza niba ako ari ko kazi ubundi kabaho gusa! Uretse ko ari na ko kazi akora buriya yaba azi ko izo nzara zitazamubangamira mu kazi ke.

Mbona gufata umukobwa ngo ni uko umubonanye inzara ndende uhite umushyira mu banebwe ntaho bihuriye. Ajya guhitamo gutereka izo nzara azi ko ntacyo zimubangamiyeho, kuko zimubuza gukora akazi afite mu nshingano cyangwa kamutunze, yabyihorera kuko byose bikorwa n’amahitamo y’umuntu.

Si no kugira inzara ndende gusa, hari n’abahita babihuza n’umukobwa ufite inzara zisa neza yasizeho verini (vernis) y’amabara basiga ku nzara, agahita yumva ko nta kintu ashoboye, ukagira ngo kugira ngo umukobwa abe ashoboye akazi bisaba kuba asa nabi atiyitaho!

Gutereka cyangwa guca inzara ni amahitamo y’umuntu bitewe n’icyo yumva akunze kurusha ikindi. Inzara ni kimwe n’ibindi bigize umuntu nk’uko umwe yatereka umusatsi undi akawogosha kandi buri wese agakora akazi ke.

Hari n’imiryango imwe ngo ibenga umukazana kuko babonye inzara afite atavamo umugore! Aha numva biba bikabije aho ubugore baba babugereranyije n’akantu gato cyane. Umugore n’inzara ntaho bihuriye rwose.

Hari n’abatagira amahirwe y’uko inzara zabo karemano zidakura ngo zibe ndende ku rugero yifuza agahitamo kujya kwitereshaho izindi kugira ngo zigere ku rugero rumushimishije. Ariko ibi byose mpamya ko ujya kubikora aba yarebye ko ntaho bibangamira imirimo ye ya buri munsi, cyane ko harimo abatunga izo nzara kandi bibana bonyine kandi imirimo yose bakayikorera.

Niba wowe ubonana umuntu izo nzara ndende ukumva ko ntacyo wowe wabasha kuzikoresha, wowe uri wowe na nyiri kuzigira ni we. Nyabugenge n’ubugenge bwayo. Wimucira urubanza ngo uhite umushyira mu bantu badafite akazi bashoboye.

Hari n’ababikabiriza bati "Uriya n’akenda k’imbere ntiyakimesera" Burya nta muntu wahitamo kwiha ubumuga kandi ari muzima. Burya baba babihisemo kandi bazi ko ntacyo bibangamira ku mirimo yabo n’ubuzima bukabaryohera.

Iki ni igitekerezo cy’umunyamakuru Mukazayire Immaculée Youyou

Ibi bivugwa no ku bagabo ngo nyirakanaka yatwaye umugabo wa nyirakanaka, ariko ubu nahisemo kuvuga ku bagore kuko ari bo bakunda kuvugwa cyane ko batwawe.

Iyo bavuga iyi mvugo baba bashaka kuvuga ko uyu mugore asigaye akundana n’undi mugabo, cyangwa yaba ari umugore wari usanzwe yubatse akaba yahukanye akajya ku wundi mugabo cyangwa akanajya kubana na we burundu. Nyamara urebye neza aba yaraganiriye n’uyu mugabo wundi akagera aho afata umwanzuro wo gusiga uwo wa mbere agasanga uwo mushya. Aha ni ho mpera mvuga ko agenda, ko ntawe umutwara.

Umugore ni umuntu ufite ubushobozi muri we bwo gufata umwanzuro wo gukora iki akareka kiriya. Rero si itungo cyangwa umutwaro ngo umuntu araza kumutwara uko yiboneye. Kandi ibi biramutse bibaye ubwo njyewe numva byakwitwa gushimutwa aho kuvuga ko bamutwaye. Ubwo byumvikane ko haba habayemo imbaraga z’umurengera ku buryo yatabaza ko yatwawe bunyago.

Ni gute umuntu ufite ubwenge agenda akava aho yari ari cyangwa agasiga umuntu bakundanaga, cyangwa umugabo babanaga akajya kubana n’undi akicecekera agatuza, mwarangiza ngo baramutwaye? Biba ari amahitamo ye ntawe uba yamutwaye aba yagiye bitewe n’impamvu imwe cyangwa nyinshi zituma arutisha umugabo runaka undi bari basanganywe.

Icyakora ku bwanjye umuntu waba ufite ubumuga bwo mu mutwe nabyemera ko bamutwara, kuko akenshi akora ibyo atazi neza kubera iki kibazo, ku buryo umuntu yanamukoresha icyo ashaka kuko ataba afite ubushobozi bwo guhitamo. Ariko undi wese aba abizi neza ibyo arimo ku buryo ntabivuga ngo bamutwaye.

Iyi mvugo ijya igaruka kenshi, itanakoreshejwe na banyirubwite gusa, ahubwo no muri rubanda ukumva bari kuvuga ngo uriya mugabo yatwaye umugore wa kanaka, ku buryo ubona anafatwa nabi muri sosiyete nk’uwakoze amahano. Ku bwanjye numva uwo mugabo aba arengana kuko icyo aba yarakoze wenda koko niba ari na we uba waratangiye ibi biganiro, aganiriza umugore kugeza aho amuhaye ingingo zimwemeza ko agomba gusiga umugabo bari basanganywe akajya kubana na we. Ubundi nyamugore agafata umwanzuro wo kubigenza uko babyumvikanye.

Umugore azi ubwenge rero ku buryo akora icyo yahisemo mu gihe ashaka. Ku bwanjye ntawe utwara umugore wa mugenzi we ku buryo igikorwa kiba cyabaye kivaho cyitirirwa umugabo, cyangwa n’amakosa akaba ari we ashyirwaho. Ahubwo aramwemeza ku buryo umugore afata umwanzuro wo kugenda. Arijyana rero ntawe umutwara.

Kugira ngo umukobwa n’umuhungu bagere aho bategura umushinga wo gushyingirwa bagasezerana kubana akaramata, mpamya ko ari urugendo runini cyane ndetse ntatinya ko ruhera kuri zero. Ariko ikigaragara ubanza ababyeyi baba bifuza ko abana babo cyane cyane ab’abakobwa baza bababwira gusa ko bafite ubukwe ariko batirigeze bakora urwo rugendo rwose.

Muri urwo rugendo rwo kumenyana kugera aho bazagera aho bemezanya kubana akaramata, habamo gusohoka bagasangira, gusurana, kujyana hirya no hino, guhamagarana no kwandikirana kenshi n’ubundi buryo butandukanye bw’itumanaho. Ariko ibi byose ubona bibangamira ababyeyi benshi, ku buryo babifata nko kunanirana cyangwa kugira umuco mubi.

Bamwe ndetse banarenga ko bibabangamiye gusa bucece bakanavuga, bamwe biyama umukobwa wabo ku byo bise gukururana n’abasore. Ndetse abenshi bakanumvisha umukobwa wabo ko uwo musore ari kumushuka agira ngo amwangirize ubuzima, abandi bakamwereka ko ntakindi uwo musore agendereye uretse kumutera inda. Abandi bagafatirwa imyanzuro ikomeye mu gihe bamenye ko bari kumwe n’uwo musore.

Ibi nkunda kubyibazaho bikanyobera kandi mu gihe uwo mubyeyi aba yifuza ko umukobwa we azazana inkuru ibabwira ko ku tariki runaka afite ubukwe. Yego kugira impungenge ku mubyeyi birumvikana. Ariko na bwo sinabishyigikira bigeze aho, buri musore wese uvugishije umukobwa wawe uba wumva ikimugenza ari ukumugirira nabi, akenshi utanamuzi, rimwe na rimwe wanasanga akomoka mu muryango barera neza no kurusha uwanyu cyangwa kimwe n’uwanyu.

Numva umukobwa utari umwana wujuje imyaka y’ubukure, cyangwa nidushaka dufate imyaka 21 kuko mu Rwanda ariyo amategeko yemerera umuntu kuba yashinga urugo. Ariko na bwo nibaza uwaba yifuza kuzashinga urugo ku myaka 21, ubwo yaba yaratangiye urwo rugendo rw’urukundo mu myaka 18 nibura cyangwa wenda 19.

Yaba ari umuntu mukuru rero, ku buryo umubyeyi cyangwa umurezi yaba yaramaze kumutegura akamubwira uburyo bwiza umukobwa yakwitwara ageze mu gihe cyo kurambagizwa, bityo bimurinda impungenge nyinshi no guhagarika umutima mu gihe abonye umukobwa we ari kumwe n’umuhungu, kandi nyamara akaba ategereje ko azaza kumubwira ko afite ubukwe.

Mu ntambwe zo kurambagizanya kugira ngo umukobwa n’umuhungu bagere mu gihe cyo kujyanana kwerekana mu miryango yombi, ni uko baba bageze kure mu rukundo rwabo. None se babyeyi mwaretse abana banyu bakubaka urukundo rwabo ko umunsi nugera bazabagaragariza aho bigeze!

Ikindi ibi njyewe mbifata nk’ikimenyetso cy’intege nkeya cyangwa gutsindwa, ko umubyeyi aba ataraganirije umwana we ngo amutegure mu buzima buri imbere cyane ko aba abizi neza ko ari ibihe azageramo. Yego hari igihe ubona ko umwana yaba ari kumwe n’umuntu ubona inzira barimo atari nziza ukaba wamwereka ingaruka ukaba wanamubuza gukomeza. Ariko ntimukumve ko abasore bose ari ibiremwa bibi bigambiriye kugirira abakobwa nabi.

Iki ni igitekerezo cy’umunyamakuru Mukazayire Immaculée Youyou

Ubundi n’ubwo ibi byitwa imbuga nkoranyambaga, biba ibya rusange ari uko nyiri ubwite yahisemo kubisangiza imbaga (abantu bnshi), kuko bitangira ari urubuga rwe yitangirije, nyuma akajya ahitamo ko ibyo ashyizeho bibonwa n’imbaga cyangwa akabigenera itsinda ry’abo ashaka kubyereka.

Ibi rero biba ari amahitamo y’umuntu y’ibyo ashaka kwerekana bitewe n’impamvu ze. Ariko ukabona irindi tsinda ry’abantu runaka rirabijyaho impaka ngo ntabwo ibyo yashyizeho byari bikwiye nk’aho ari bo bashinzwe kumuhitiramo ibikwiye n’ibidakwiye.

Ibi ndabigarukaho cyane ntavuga ku mbuga nini nka Twitter na Instagram cyangwa Facebook n’izindi. Ndagaruka kuri Whatsap akenshi ikoreshwa mu matelefone ngendanwa y’abantu. Aho umuntu ashyiraho sitati (status) ikabonwa n’abantu bamufitiye nomero kandi na we abafitiye izabo. Ni ukuvuga ko aba ari abantu baziranye mu buryo bumwe cyangwa ubundi.

Ugasanga abantu bahora bavunwa n’ibyo mugenzi wabo ashyira kuri sitati ye, ngo aba yakabije, ararengera abenshi bakanabihuza n’imyaka, inshingano n’ibindi byinshi. Ariko se ko nyiri ubwite ari we ufite uburenganzira bwo kwihitiramo ibyo abona ashaka gushyiraho, muri make aba azi ibikwiriye kuri we n’ibidakwiriye. Abandi bibavunira iki ?

Ibi bintu n’ubwo byashyirwaho na nyiri ubwite agasigira uburenganzira buri muntu umufitiye nomero ko yabibona, ntibiba bivuze ko ubireba ku gahato. Ni amahitamo nawe uba wagize kujya kureba kuri sitati ze. None se kuki ubihitamo kubireba ubundi bikakubera umutwaro ? Mba numva harimo kudakura mu mutwe no kutamenya nawe ubwawe icyo ukunze n’icyo wanze.

Hari abantu bakunze kunengwa n’inshuti zabo cyangwa abavandimwe n’amatsinda runaka bahuriyemo ngo ashyira ibintu bidahuye kuri sitati ye, ngo agaragaza ubuzima bwe, abandi bakanabihuza n’ubwirasi cyangwa ubwibone... Ibi kandi bigarukwaho hirya no hino. Ariko bintera kwibaza mu byukuri ugomba kumenyera nyiri ubwite ibikwiriye n’ibidakwiriye kuri sitati ye. Kandi na we ari umuntu mukuru ukuze.

Igitangaje uyu muntu unengwa n’abantu benshi bamutaramanye ngo ashyiraho ibintu bidakwiriye, ni we usurwa n’abantu benshi ku buryo ntawutuza atarajya kureba ibyo yashyizeho. Bamara kubireba bakiciraguraho ngo ibyo ni ibiki aba yashyizeho. Ibi bigatuma nibaza niba koko aba baba babyanze cyangwa baba babikunze.

Ku bwanjye numva abantu bakagombye kurenga ibintu nk’ibyo bibavuna mu mutwe kandi ntacyo bibamariye. Umuntu aba ari mukuru wo guhitamo ibyo ashyira ku mbuga nkoranyambaga ze. Nawe uba uri mukuru wo guhitamo kubireba cyangwa ukabireka, ubundi ugakomeza ubuzima n’ibintu bifite icyo bikumariye binakungura. Aho guhora muvuga kanaka ngo ashyira ibi kuri sitati kandi we yabishyizeho akikomereza ubuzima bumuryoheye kuko yakoze ibyo yumva ashaka.

Izi ni impaka zagiye zigarukwaho kenshi mu bihe bitandukanye, yaba ba Nyampinga batandukanye bagiye bagaragara baserukiye u Rwanda, yaba abakinnyi mu mikino itandukanye cyane cyane abakobwa, aho bamwe bagaragaza ko bambara bakurikije umuco nyarwanda, abandi bati Abanyarwanda basigaye inyuma ntibisanisha n’igihe,… Ariko aha bintera kwibaza ngo ubundi imyambaro yo mu myidagaduro ijyanye n’umuco nyarwanda twayita ko ari iyihe?

Miss Uwase Hirwa Honorine wamamaye ku izina rya Igisabo yanze kwambara utwenda tw’imbere twonyine mu marushanwa ya Miss Earth 2017

Irushanwa mpuzamahanga ry’umukino w’amaboko ukinirwa ku mucanga (Beach Volleyball) waberaga mu Rwanda wongeye gukurura izi mpaka, aho Abanyarwandakazi bagaragaye bambaye imyenda miremire, nyamara bagenzi babo bakinanaga bo bambaye amakariso n’utwenda dufashe amabere. Bamwe bati Abanyarwandakazi bari bambaye neza bakurikije umuco, abandi bati ntakigenda cyabo ntabwo ibyo bari bambaye bijyanye n’umukino bakinaga n’aho bakiniraga,…Ariko njyewe bintera kwibaza koko n’iyo bahitamo kwambara ikariso n’utuntu dufashe amabere umuco bari kuba bishe, cyane ko turi mu bihe by’ubushyuhe ahubwo byabafasha gukina neza bisanzuye.

Ubundi iyo abantu bavuga kwica umuco, bintera kwibaza aho bahera kuko kera kose mu muco nyarwanda umuntu yatangiraga kwambara afite imyaka 10, ni bwo yatangiraga kwambara imyambaro ikagenda itandukana bitewe n’ikigero umuntu agezemo. Imyambaro yari ikozwe mu biti ndetse n’impu z’inyamaswa. Abangavu bambaraga inshabure ndetse n’imyambaro bitaga indengera, abagore bo bakambara inkanda n’ibicirane, ariko iyi myambaro wabonaga ari iyo guhisha ubwambure gusa kuko ibice binini by’umubiri byasigaraga bigaragara. Aha bintera kwibaza aho byaba bitandukaniye n’uwaba yambaye ikariso agahisha ubwambure n’amabere ubundi agakina yisanzuye.

Iyi myambaro kandi si mu Rwanda ikunda kugarukwaho gusa, kuko hari n’abandi bantu bakunda kubijyaho impaka bibaza impamvu umukobwa yajya gukina igice cye kinini kitambaye. Abenshi biterwa n’umuco cyangwa n’idini baherereyemo. Ariko ku bwanjye mbona bitewe n’impamvu yo kugira ngo umukinnyi yiyumve ko yisanzuye bimufasha gukina neza abohotse, kwambara iyo myenda ntacyo byaba bitwaye ndetse nta n’umuco aba yishe.

Hari abavuga ko kwambara muri ubu buryo bituma abakinnyi birekura cyane ko baba bari no ku mucanga ahantu hashyushye

Mu Rwanda tugira amahirwe tugira ahantu hitwa ku mucanga abantu bajya kuruhukira cyane cyane mu bihe nk’ibi by’izuba, ariko buri wese iyo ari kwitegura kujya ku mucanga, ategura utwenda tworohereye cyane, akenshi duhisha ubwambure gusa n’amadarubindi y’izuba kugira ngo agere ku ntego ze, zo kuruhuka yota n’ako kazuba ko ku musenyi. Ibyo kandi byo tubyita ubusirimu. Kuki rero umukobwa we uri no mu irushanwa unakeneye ibihembo n’intsinzi yambaye ibimuha amahoro ngo atsinde byo tutabyita ubusirimu?

Sindi bushimangire kuri njyewe ngo kwambara imyenda minini ni byo byiza cyangwa kwambara ayo makariso ni byo byiza. Gusa ku bwanjye mbona icyo bahitamo kwambara bitewe n’ibyo bumva byabafasha kugera ku ntego zabo, nta muco nyarwanda baba bishe. Wenda byabanza gutonda bamwe kuko bitamenyerewe, ariko nyuma byamenyerwa.

Hari abavuga ko abakobwa bo hambere bambaraga gutya kandi bakagira umuco

Wowe ubyumva ute ? Tubwire hepfo mu mwanya wagenewe ibitekerezo

Ubona ibi bigenda bimenyerwa gukoreshwa n’abantu benshi, ku buryo bamwe iyo agihura n’umukobwa yumva afite gahunda yo kumutereta ahita amubwira mu Cyongereza, ku buryo hari n’abo ubanza gukeka ko nta Kinyarwanda yari azi. Nyuma ukaza gusanga ni mugenzi wawe, unazi Ikinyarwanda cyinshi.

Ibi kandi bigaragara nabi cyane, ubwo usanga hari utangiza ibyo biganiro n’Icyongereza atakizi ari amagambo make azi nk’ayo gusuhuzanya, cyangwa kubwira umukobwa ko wamukunze unamusaba ko mwaba inshuti, cyangwa mwazasohokana gusangira, ku buryo uwo musore agize ibyago uwo mukobwa akaba azi Icyongereza cyinshi nyamusore atakara ntanamenye ibyo amubwira.

Ibi byanteye kwibaza cyane, impamvu abasore bahisemo kujya bakoresha Icyongereza mu gihe batereta, atanabanje kubaza uwo agiye gutereta niba Icyongereza akizi.

Ubundi ururimi wabwira umukobwa w’Umunyarwandakazi ukaba ufite nibura icyizere 98% ko ari bukumve ni Ikinyarwanda. Kuki utabanza gutereta mu Kinyarwanda noneho mukabanza mukamenyana neza ukamenya n’indimi azi, cyangwa akunda gukoresha, mbere yo guhita umusomamo ko byanze bikunze yaba azi Icyongereza?

Simvuze ngo kuvuga indimi ni bibi, oya ni byiza kuko buri muntu anagize amahirwe yamenya inyinshi zishoboka. Ariko kwifata ukumva ko buri mukobwa w’Umunyarwandakazi kandi uri mu Rwanda agomba kuba azi icyongereza, byo numva ntabibonera ubusobanuro.

Mu Rwanda hari indimi enye (4) zemerewe gukoreshwa, bivuze ko rero wasanga wenda ku Kinyarwanda hari n’urundi rurimi azi ariko atari icyo Cyongereza. Hari n’igihe numva hirya bavuga ngo hari indimi ziryoshya urukundo, yego reka na byo tunabyemere ko bishoboka, ariko se umuntu yaryoherwa n’ibyo atumva!

Numva ku bwanjye nagira inama umuntu ugiye gutereta wahera nibura ku rurimi waba wizeye neza ko uwo muntu ari bwumve, kuko ushobora no kumutera ipfunwe utangiye kumuvugisha icyo cyongereza ugasanga ntacyo azi, kimwe nawe ko ushobora kwitera ipfunwe utangizanye ikiganiro ya magambo yawe angahe wafashe mu mutwe yo gutereta, ugasanga umukobwa azi cyinshi ku buryo uhita wibura.

Nibwira ko mu Kinyarwanda hari amagambo meza aryoheye amatwi, umuntu yaheraho atereta umukobwa w’Umunyarwandakazi, ubundi mwazamenyana mugasanga mukunze gukoresha izo ndimi zindi mwese mubyumvikanyeho, mukajya muzikoresha uko mubishaka.

Iki ni igitekerezo cy’umunyamakuru Mukazayire Immaculée Youyou

Iri ni itanganzo Umujyi wa Kigali wasohoye ku itariki 26 Kamena 2021 muri gahunda ya « Nta kudohoka » aho ryaje mu zindi ngamba nyinshi zo gukomeza guhangana n’ubwandu bwa Covid-19, bugenda bwiyongera ku rwego rwo hejuru muri uyu Mujyi ugereranyije n’izindi ntara.

Ibi ni ibintu usanga abantu batandukanye bagenda bagaragaza ko izi nomero zaje guteza umwiryane mu baturanyi kuko uwaba yareze mugenzi we warenze ku mabwiriza yo kwirinda baba babaye abanzi bidasubirwaho. Ariko aha nkibaza mu by’ukuri uwaba yakoze amakosa kurusha undi.

Icyorezo cya Covid-19 kimaze gufata indi ntera aho abantu bari kwandura ku rwego rwo hejuru, bityo inzego z’ubuyobozi zose zigerageza gushyiraho ingamba zikomeye zo gukumira iki cyorezo, nyamara ugasanga hari bamwe bagikerensa izi ngamba bakumva ko bakora ibyo bashaka byose, ariko nyamara bakumva ko uwaba atangarije ubuyobozi amakuru ko barenze ku mabwiriza ari we ukoze amahano.

Hirya no hino mu Mujyi wa Kigali hagenda hagaragazwa abantu benshi bakirenga ku mabwiriza yo kwirinda Covid-19 ndetse rimwe na rimwe hagafatirwamo n’abarwaye Covid-19, kandi nyamara aba bakumva ko gukomeza gukwirakwiza ubwandu byaba atari icyaha gikanganye nk’uwaba yababonye we, agahamagara ubuyobozi ababwira ko hari abari kurenga ku mabwiriza.

Sinumva impamvu umuntu atabanza kwitekerezaho mbere y’uko ategura cyangwa yitabira ibikorwa bibuzanyije kandi na we azi neza iby’icyorezo igihugu ndetse n’Isi bahanganye na cyo, we akumva yakomeza gukora ibikorwa byo koreka imbaga, ariko akumva ko yiteguye guhangana n’umuntu wabimenyesheje ubuyobozi.

Bamwe bati" ajye njye" abandi bati "yorore inkoko norore uduca...." ibi babivuga bagaragaza ko biteguye guhangana cyangwa kuzahangana n’umuturanyi watanga amakuru. Kandi ikibabaje aho gufata nibura ingamba ko atagikoze ibikorwa bibuzanyijwe kugira ngo batazabivuga mu buyobozi, niba yumva umutimanama we ntacyo umubuza, nibura akabireka kuko bibujijwe. We akumva umugambi wo gukora ibikorwa bibujijwe urimbanyije gusa akaba aniteguye guhangana n’uzamurega.

Njyewe mbona ikibazo atari uwatanze amakuru, nk’uko abenshi babyita kuregana. Ahubwo ikibazo ni wowe urenga ku mabwiriza nkana kandi uzi ko ari ikibazo gihangayikishije ndetse kinatwara ubuzima bwa benshi. Wasanga uwo wita ko anakureze aba akumira ibyago byanaba ku wo mufitanye isano, kuko nyuma yo kwandura ntabwo ugena abo bari buhure na bo.

Uramutse wumva ibyo ukora byamenyekana bikaguteza ibibazo, icyiza numva ari uko wabyihorera aho kugira ngo utangire no kugirana ibibazo n’abaturanyi bawe kandi wenda unakeka uwatanze amakuru wenda atari na we. Ikindi numva wababazwa n’uwaba atanze amakuru akubeshyera, naho hagize utanga amakuru y’ukuri koko warenze ku mabwiriza, aho kurakarira nyiri kubivuga, ahubwo nawe wakwicara ukigaya ko utabaye inyangamugayo ubundi ukicuza ukanisubiraho. Naho uwatanze amakuru aba atanze umusanzu we, anarengeye benshi.

Iki ni igitekerezo cy’umunyamakuru Mukazayire Immaculée Youyou

Ubundi mu busanzwe mu muco nyarwanda, umuntu ukuruta cyangwa wubashye, iyo ugiye kumuvugisha umuvuga mu bwinshi, mu rwego rwo kumwubaha. Ariko umugabo ufite ubuhehesi muri we, abifata nk’ikimenyetso cyo kumushyira kure yawe, mbese udashaka ko akwisanzuraho.

Tugenekereje “ubuhehesi” twavuga ko ari ukugira irari ryinshi riganisha ku kwifuza uwo mudahuje igitsina hagamijwe kugirana na we imibonano mpuzabitsina, cyangwa se kugambirira gukora imibonano mpuzabitsina n’ubonetse wese, ntabwo aba ari umukunzi cyangwa uwashakanye n’undi.

Akenshi umugabo iyo aje asanga umugore ashaka ko bakora imibonano mpuzabitsina, iyo asanzwe ari umuntu ukomeye (ndavuga umuntu usanzwe wubashywe) cyangwa umuyobozi runaka, uwo mugore agerageza kumufata mu isura asanzwe azwimo cyangwa mu cyubahiro cyari kimukwiriye n’ubusanzwe.

Ariko uwo mugabo ikintu cya mbere yiyambura ni icyubahiro, ku buryo n’iyo umuhaye icyubahiro ashobora kukwuka inabi nk’aho ari igitutsi. Ukaba wamubwira uti “Mwebwe” nawe ati “njyewe na nde? ” Cyangwa akaba yabifata nabi, hari n’ababwira abagore ngo barirata cyangwa bariyemera kandi ari nta kidasanzwe bakoze uretse kumwubaha gusa.

Ubundi hari bamwe bahita babibwira uwo mugore bati “ibyo kunyubaha ubishyire ku ruhande ubu ndi mugenzi wawe”. Aha akenshi aba yari umukoresha w’uwo ari gusaba ko bakora imibonano mpuzabitsina, cyangwa akaba ari umuntu wari usanzwe akomeye atanamwegera.

Ugira utya ukabona aba bamaze umwanya munini, umwe (umugore) ari kwitoza ukuntu yakwubahuka uyu mugabo waje amugana. Undi nawe (umugabo) arimo kumutoza ukuntu yamwubahuka! Iyo bigeze aha umugabo aba anamwereka ko nta kintu kidasanzwe amurusha ndetse ko nta n’ikintu gihambaye akora. Mbese akagerageza kwitesha agaciro mu buryo bwose bushoboka.

Ibi kandi ntabwo abikora wenda mu rwego rwo kwicisha bugufi, oya, ahubwo aba amwereka ko ntacyo ari cyo, mbese ko rubanda rumukabiriza. Ibi kandi na bamwe mu biyita ko bihaye Imana ni ko bigenda ku buryo wamwita mu izina ry’idini runaka mu cyubahiro agaragaza muri rubanda, ukumva akwutse inabi nk’aho ari igitutsi umututse. Ati “Ibyo se ubizanye ute hano, ni iki bidufasha? ”

Ibi kandi uyu mugabo abitangira mu minsi ya mbere atangiye kujya avugana n’uyu mugore afiteho gahunda yo kuzamusaba ko bagirana imibonano mpuzabitsina, aho aba amwereka ko mu byo bavugana hatagaragaramo icyubahiro na gike yaba kuvugana kuri telephone cyangwa kumwandikira ku mbuga zitandukanye, aba ashaka ko hatagaragaramo icyubahiro na gike.

Akenshi ibi abagabo bafata ko kumuha icyubahiro akwiye ari nk’uburyo bwo kumwigiza hirya, kugira ngo atazagira aho ahera, kandi umugore na we akareba icyubahiro uyu mugabo asanganywe akabura aho yahera akimwambura ku rwego uwo mugabo aba abyifuza.

Sinzi niba nta buryo bwaba buhari umugabo yakwisabira umugore ko bakorana imibonano mpuzabitsina ariko atitesheje agaciro, cyane ko aba asanzwe amuzi neza, cyangwa akamuha icyubahiro akwiriye bitewe n’aho bahuriye.

Ikigoranye kandi muri ibi byose, ni uko iyo uwo mugabo yitesheje agaciro ku rwego rwose rushoboka, iyo yabashije kugera ku ntego bakaba baryamana na wa mugore, aba ashaka ko bahita bamusubiza icyubahiro cye yarasanganywe cyangwa yarakwiriye!

Mbona ntacyo byaba bitwaye kujya gusaba umugore ko mwakorana imibonano mpuzabitsina (Na ko mwakundana! Niko mubyita), kandi utiyambuye icyubahiro cyawe, ukagenda uko uzwi n’uko uri. Ahubwo nibaza ko ari byo byanashimisha uwo mugore kuba yarifujwe n’umuntu ukomeye batari bari ku rwego rumwe yumvaga nta n’aho bazahurira!

Iki ni igitekerezo cy’umunyamakuru Mukazayire Immaculée Youyou

Aha babivuga bakumvisha ko aya makara ari ayo batekesha ibintu bikomeye nk’ibishyimbo, isombe, imvungure/impungure....Ukumva ni icyita rusange ku bantu benshi batekesha Gaz, basobanura ko ibintu bikomeye bitinda gushya bigomba gutekeshwa amakara cyangwa inkwi, n’iyo waba ufite Gaz ingana ite.

Gaz yatangiye gukoreshwa mu Rwanda mu myaka ya 2009, ariko bizamuka cyane mu 2012, aho byiyongereye ku kigero cya 25%. Kuva mu 2012 kugeza muri 2020, ubwitabire bumaze kwiyongeraho ibirenga 50%. Ariko n’ubundi abenshi baracyabivanga kuko mu mitwe ya benshi bumva ko bagomba kugumana amakara ku ruhande, n’iyo yaba make. Aya kandi si ayo aba ateganya ko yazamugoboka mu gihe wenda Gaz yaba imushiranye ntabone uko ahita agura indi. Oya, aba ayabikiye kuyatekesha ibintu bimwe na bimwe.

Ukumva umuntu ari kuganiriza abandi ngo amafanga ajya mu bicanwa kuri we yaragabanutse kuko asigaye acana ibiro runaka bya Gaz wenda n’igice cy’umufuka w’amakara mu kwezi. Wamubaza icyo ayo makara ayagurira, ngo ateka isombe n’ibishyimbo. Ukibaza niba byo bitekewe kuri Gaz bitashya.

Sosiyete y’u Rwanda ishinzwe ingufu (REG) ivuga ko Abanyarwanda bagenda barushaho kwitabira gukoresha Gaz mu guteka binyuze mu bukangurambaga bakoze ku bufatanye n’izindi nzego za Leta, kugira ngo habungabungwe ibidukikije hagabanywa icanwa ry’inkwi n’amakara. Ariko niba amakara n’inkwi agiteka ibintu bikomeye, nibaza ko byanze bikunze ubwo agikoreshwa ari menshi.

Ku bwanjye numva ibi bijyana n’imyumvire y’abantu ikiri ku rwego runaka. Gaz yateka ibintu byose n’ibishyimbo n’isombe birimo. Niba wowe Gaz y’iwawe uyitekeraho utuntu tworoshye gusa naho ibikomeye ukabishyira ku makara cyangwa inkwi, ni ikibazo cy’imyumvire yawe cyangwa cy’ubushobozi bwawe, si ngombwa rero ko ujya kumvikanisha ibijyanye n’ibicanwa ukoresha iwawe ngo uhite ubifatanya ko ufite amakara ateka ibishyimbo n’isombe…nk’aho ari ihame ko ari ko bigomba kugenda. Ubwo kandi mu gihe bakubajije icyo utekesha ntukibare mu bakoresha Gaz, ahubwo jya usubiza uti « Njyewe mbitekeraho byombi. »

Nimureke abakoresha Gaz bakomeze abe ari yo bakoresha gusa, kuko abenshi babikora batyo usanga yarabyumvanye abandi ko ari ko babikora. Niba tubyemera ko Gaz ihendutse nibaza ko itetse n’ibyo twita ibikomeye yabiteka kandi bikoroshya igiciro n’ubundi kurushaho, kuko yo yahita ibihisha vuba bidatwaye amasaha menshi nk’akoreshwa n’amakara cyangwa inkwi.

Iki ni igitekerezo cy’umunyamakuru Mukazayire Immaculée Youyou

Ibi ni ibintu nyiri kubivuga aba yumvikanisha ko abagore atari abantu beza bo kugira inshuti. Ibi akabivuga yaba avugana n’abagabo cyangwa abandi bagore bagenzi be, ashaka ko bumva ko we n’ubwo ari umugore adafite imico nk’iy’abagore ari yo mpamvu atagira n’inshuti z’abagore.

Ibi kandi bisigaye byarabaye imvugo rusange aho abagore benshi iyo bagiye kumvikanisha ko bafite imico myiza, akubwira ko nta bagore b’inshuti agira, we yigirira inshuti z’abagabo gusa!

"Ni yo mpamvu nyirakanaka nta nshuti z’abagore ngira..." Ibi ukabona abiteruye mu kiganiro akenshi barimo kuvuga mugenzi wabo, cyangwa basubiramo ibyo undi Nyirakanaka yavuze, ariko we akavuga ko yahisemo kwigirira inshuti z’abahungu kugira ngo we yizerwe ko ari umuntu mwiza. Akenshi baba bagaragaza ko abagore bagira ingeso yo kunegurana.

Yego koko hari abagore bikundanira n’abagabo, bakumva ni bo biyumvamo bitewe n’uko yavutse cyangwa ubuzima yabayemo, akaba yiyumvamo abahungu kurusha abakobwa.

Hari n’uwiyumvamo ubuhungu kurusha ubukobwa. Ariko rero si numva ko kutagira inshuti z’abagore nawe uri undi bihita bikugira umuntu w’umwizerwa, ugasanga umuntu ikiganiro kimaze nk’isaha iyo nteruro yayivuzeho nk’inshuro zirenga eshanu.

Igitangaje ni uko iyo akenshi umugore arimo kuvuga ibyo bintu na we aba ari mu nkuru zimeze nka zazindi arimo kuvuga yangira abagore, zigatuma atanifuza kugira inshuti z’abagore.

Ibi kandi abenshi babivuga ari ukwigana abandi, gusa kugira ngo na we yumvikanishe ko ari umuntu mwiza, nyamara wazitegereza ukazasanga ahubwo wenda uretse abagabo baziranye ari abo bafitanye isano runaka atari abo bamenyanye ku bw’ ubushuti gusa.

Mpamya neza ko abagore bose batagira amazimwe cyangwa badafite indangagaciro zo kuba bataba inshuti nziza. Niba hari n’umwe cyangwa babiri uziho ibyo, wibagira rusange, cyangwa niba warahuye n’abagore babi wikumva ko abagore bose ari babi ku buryo kugira ngo wumvikanishe ko uri umuntu mwiza ari uko ugomba kumvikanisha ko nta mugore mufitanye isano.

Niba hari umugore mwahuye utarakubereye mwiza uzahindure ushake undi wakubera inshuti kuko barahari ndetse benshi. Na ho niba wigana abandi imvugo gusa kugira ngo wumvikanishe ubwiza bwawe ntaho bihuriye.

Uko hariho abagabo babi umuntu atakwifuza kugira inshuti, ni ko hari n’abagore beza bakubera inshuti nziza cyane ukumva nta n’indi nshuti wayisimbuza mu buzima.

Iki ni igitekerezo cy’umunyamakuru Mukazayire Immaculée Youyou

Akenshi uzasanga utari usanzwe azinywa agerageza kunywa izitwa umuvinyo ‘wine’ mu rurimi rw’Icyongereza cyangwa ‘vin’ mu Gifaransa ( ngo izi ni zo batoranyirizamo umuntu wiga kunywa inzoga) dore ko ngo izi ari na zo z’abasirimu cyane, kugira ngo na we agerageze kwisanisha n’abiyita abasirimu kuko banywa inzoga.

Ndetse hari n’abo ubuzima busekera bahindura icyiciro cy’imibereho, akajya ku cyisumbuye ku cyo yari asanzwe abayeho, bikaba ngombwa ko yishyiramo ubushake bwo kunywa inzoga akenshi ikanamunanira cyangwa ikamugwa nabi, nyamara bagakomeza kumwumvisha ko agomba guhindura ubundi bwoko ashakisha ubwo bashobokana, kugira ngo akunde yitwe umusirimu.

Ibi bikunda kuntera urujijo aho inzoga iza guhurira n’ubusirimu ahubwo aho njya mbona utayitondeye yakwambura n’icyubahiro ndetse n’ubusirimu wenda wari wisanganiwe. Cyane cyane aba biga kuyinywa biganye abandi bazimenyereye cyangwa zinaryohera bo bumva nta kindi kinyobwa bapfa kunywa.

Ntibijya binyorohera guhuza ibi bintu cyane cyane ko ahantu hacururizwa inzoga byanze bikunze haba hari n’ibindi binyobwa bidasindisha, uko haba hiyubashye kose. Bisobanure ko abacuruza baba barabihuje n’uko hari abandi basirimu bazabagana batanywa inzoga, kandi ibyo bacuruza bidasindisha na byo biragurwa.

Hari n’abenshi badatinya kubona umuntu ari kunywa ikindi kinyobwa kitari inzoga ukumva batangiye kugukwena bati: "N’ubwo busirimu bwawe koko ntunywa inzoga?" Ukumva undi ari gushishikariza mugenzi we ati "Ubu rero ugomba kuva mu buturage ugahindura icyo kunywa." Erega uwo na we utanywaga inzoga bakamuremamo icyo kintu cy’uko hari icyo abura kugira ngo abarwe mu basirimu. Hari ndetse n’ukumvisha ko mutasohokana ngo ugire icyo unywa utanyoye inzoga ko waba uri kumusebya.

Ibi bintu njyewe ngerageza kubihuza bikanyangira, cyane ko burya abantu bakunda ibintu mu buryo butandukanye ndetse n’ubusirimu buratandukanye. Ikintu kimwe cyakorwa n’abantu batandukanye ariko bikagaragara mu buryo butandukanye. Ibigaragara rero nk’ubusirimu kuri wowe si ngombwa ko binaba ubusirimu ku wundi.

Ibinyobwa byose ni ibinyobwa bitewe n’impamvu wahisemo kunywa ibyo unywa n’undi akanywa biriya anywa. Ikintu kiba igisirimu cyangwa icy’agaciro bitewe n’agaciro wowe nyiri ukugikora wagihaye.

Kuri njyewe nta busirimu mbona bwo kunywa inzoga. Inzoga ni ikinyobwa nk’ibindi byose umwe ahitamo kunywa bitewe n’uko kimuryoheye cyangwa indi mpamvu runaka. Ni kimwe n’uko umwe ahitamo kunywa umutobe undi agahitamo icyayi, undi agahitamo amata…nta mpamvu yo kwigana abandi ngo ahubwo zizagukoreshe amahano n’ubwitwa ubusirimu wari ufite ubutakaze ngo washakaga kuba umusirimu urenze.

Iki ni igitekerezo cy’umunyamakuru Mukazayire Immaculée Youyou

Ibi mbyibaza cyane ku bakobwa bari mu kigero cy’imyaka 18 kuzamura, abenshi baba barangije amashuri yisumbuye aho umubare munini baba bafite telefone zihenze ziri hejuru y’Amafaranga y’u Rwanda ibihumbi 500.

Abo bakobwa akenshi baba bagizwe n’abarangije amashuri yisumbuye cyangwa ari bwo atangiye kaminiza, ntibivuga ko baba bafite akazi kabahemba neza, oya. Bamwe muri bo baba bagafite ariko kabahemba amafaranga make cyane, abandi na bo ugasanga nta ko bafite ariko badatana na telefone zihenze.

Ugasanga umwana akomoka mu muryango uciriritse ariko nyamara acigatiye telefone igura hafi amafanga Miliyoni y’Amanyarwanda. Akenshi iyo ubonye ubuzima bamwe muri abo bakobwa babayemo iwabo mu rugo, uba ubona ari ubuzima butanamworohera ko bamugurira na telefone y’ibihumbi 50. Cyangwa ugasanga uwitwa ko ari we ufite akazi atunze urugo afite telefone iciriritse ariko umwana w’umukobwa afite telephone ku buryo urebye mu nzu yose wasanga ari cyo kintu cy’agaciro kanini batunze.

Akenshi iyo ubajije umubyeyi cyangwa abafite inshingano zo kurera uwo mwana bakubwira ko batazi aho yakuye iyo telefone, cyangwa bakakubwira ibihabanye n’amakuru y’umukobwa bitewe n’ibyo yahisemo kubabwira. Ndetse umukobwa utunze telefone iciriritse ihwanye n’ubushobozi bwe, ukabona afite ipfunwe akifata nk’ikigwari.

Amakuru nfite ni uko akenshi aba bakobwa izi telefone bazigurirwa n’abagabo ndetse hari n’igihe usanga uwayimuguriye we afite iciriritse, iyo yaguriye uwo mukobwa yaba ikubye nka kabiri karenga agaciro k’iyo uwo atunze. Ukaba wakwibaza icyo uwo mukobwa aba yamukoreye ku buryo yakwikura amafaranga angana atyo akagurira umuntu ikintu nawe adatunze!

Gufasha ndetse n’urukundo rubaho. Ariko na bwo byaba bibabaje cyane, aho umukobwa yahitamo kugira ibikorwa bitamuhesheje icyubahiro cyangwa byanashyira ubuzima bwe mu kaga ngo ni ukugira ngo atunge telefone ihenze nk’iyo yabonanye nyirakanaka.

Icya mbere mu buzima si ugutunga ibihenze byazatuma ejo hawe hataba heza ngo utakaze intumbero yawe ku buryo n’iyo telefone utazagira ubushobozi bwo kuyigurira mu minsi iri imbere, bigatuma uwo muntu agufata nk’igikoresho cye kuko aba yarakuguriye ikintu bigaragara ko kucyigurira ubwawe bitari kugushobokera.

Kugira intumbero n’amagara mazima ni cyo gishoro kiruta ibindi. Naho telefone nawe wazayigurira igihe cyawe kigeze ndetse ukanigurira n’indi irenze iyo, bitewe n’umwanzuro wafashe mu buzima.

Iki ni igitekerezo cy’umunyamakuru Mukazayire Immaculée Youyou

Izi ni imvugo zihabanye, nyamara ukunda gusanga mu biganiro by’abasore batari bake, bigatuma wibaza niba koko baba bafite amahitamo y’umukobwa bazashakana. Akenshi bakunda kuganira bagasoza nta mwanzuro. Wumva ari ukutagira amafaranga babigize ikibazo, noneho kuyagira bikaba bibi kurushaho.

Rimwe ukumva aravuze ati “Umukobwa udafite amafaranga muri iyi minsi ntawe nashaka”, bwacya kabiri ati “Umukobwa ufite amafaranga asuzugura umugabo agahinduka inganzwa ntawe nashaka” Ubwo wakumva uwaba ari mwiza muri aba bombi, ugasanga na we ubwe nta mahitamo afite niba umukobwa wazavamo umugore mwiza ari ufite amafaranga cyangwa ari utayafite.

Muri iyi minsi ugenda ubona ikintu kijyanye n’umutungo w’umuntu kiza ku isonga mu bari kwitegura gushinga urugo. Yaba umusore ndetse n’umukobwa. Ariko igiteye urujijo ni uko usanga abasore bamwe na bamwe bagaruka yego mu kuba umukobwa mwiza ukenewe muri iyi minsi ari uwaba afite amafaranga, ariko bagatsindagira cyane ko nabwo umukobwa ufite amafaranga ahita akugira inganzwa ku buryo nta jambo uba ufite mu rugo rwanyu.

Ntabwo nzi ubushakashatsi bwakozwe kugira ngo byemezwe ko koko, umugore ufite amafaranga kurusha umugabo we, ahita amuhindura inganzwa, icyo nzi ni uko ari ibintu bihurizwaho n’abatari bake.

Icyo nemera neza ni uko umukobwa wese ashobora kuvamo umugore mwiza bitewe n’uko ateye, bitagendeye mu kuba afite amafaranga cyangwa atayafite. Naho ukugira umugabo inganzwa (ku bemera ko bibaho), ubwo na byo nibwira ko biterwa n’imiterere y’uwo mugabo ndetse na kamere y’uwo mugore.

Nibwira ko umuntu ugiye gushaka uwo bazabana amafaranga atariyo yashyira ku isonga, ngo areberemo umugore bakwubakana urugo rugakomera cyangwa ntirukomere. Amafaranga ni umushyitsi none asura umwe bwacya agasura n’undi.

Ariko nabwo kandi, umuntu ugiye kubaka urugo aba afite nibura ibintu nka bingahe aha umwanya wa mbere uwo bazashakana agomba kuba yujuje. Niba wowe amafaranga arimo, bihagarareho ubihitemo, nabwo niba atarimo ubwo ubihagarareho, aho kwerekana ko waba nawe ubwawe utazi uwo ushaka uwo ari we, ugaragaza ko umukobwa udafite amafaranga ari mubi, ariko n’uyafite na we ari mubi.

Ibi ni ibisanzwe ikintu cyose kigira uruhande rwiza n’uruhande rubi. Bisobanure ko kugira amafaranga ku mukobwa no kutayagira, byaba bifite izo mpande zombi bitewe n’ubireba. Ariko iyo ushaka kugira icyo uhitamo ureba ahari ibyiza kuruta ibibi bitewe nawe, ubundi ukaba ari cyo uhagararaho, aho kwerekana ko nawe ubwawe utazi icyo ushaka.

Wowe ubyumva ute? Washaka ufite amafaranga, cyangwa utayafite?

Iyo mvugo y’uko abakobwa bose baba i Kigali batakaje ubusugi sinzi aho yaba yaraturutse, gusa mpamya ko nta bushakashatsi bwakozwe ngo tubugendereho, ariko na bwo ntitwareka kubyemeranya ko iyo mvugo ihurirwaho n’abantu batari bake, cyane cyane abagabo cyangwa abantu bakuze muri rusange, uretse ko hari n’abakobwa ubwabo usanga babivuga bitewe n’uko we aba yiyizi akumva ko n’abandi bose bameze nka we.

Twagarutse muri Kigali cyane kuko ari ho bakunda kwibanda ba nyiri kubivuga, ariko bakagaragaza ko no mu Rwanda hose byakugora kubona umukobwa ukiri isugi. Abandi bavuga ibi bintu baba bashaka kumvikanisha ko abakobwa bose basigaye ari abasambanyi, nta n’ugera mu myaka 20 akiri isugi, na ho abakobwa bo babivuga, ni ababa barahisemo iyo nzira y’ubusambanyi, ndetse bakakumvisha ko umukobwa waba ugejeje imyaka muri 20 akiri isugi, muri iyi myaka yaba ateye isoni kuko bitajyanye n’igihe (Hari n’ababigarukaho bati “Ubwo iwabo baba baroga”).

Mu muco Nyarwanda ubundi tuzi ko ubusugi umwana w’umukobwa yabutakazaga ari uko agejeje igihe cyo gushaka, iwabo bakamuherekeza noneho umugabo we akaba ariwe umwambura ubwo busugi (kumukura mu bukobwa amugira umugore). Mpamya ko kandi n’ubu hari bamwe bakomera gukurikiza uwo muco, ku buryo ubusugi bazabutakaza ari uko bagejeje igihe cyo gushaka, bakabana n’abagabo babo.

Ibyo ababigarukaho rero baba bumvikanisha ko ubusambanyi bwiyongereye ku buryo abakobwa bamenya gusambana bakiri bato noneho bakazajya gukura nta ukiri isugi wabona. Ibi sindi bubyange wenda ko koko ubusambanyi bwiyongereye ugereranyije n’imibare ihora igaragazwa y’abana b’abangavu bafashwe ku ngufu, abatwise ndetse n’abandi banasambana ku bushake n’abandi bana bangana, ariko na bwo bitatuma nshyigikira abavuga ko nta mukobwa w’isugi ukibaho.

Abantu bose bagira amahitamo atandukanye, ku buryo hari abakobwa bahitamo gukomera ku busugi bwabo kuzagera abanye n’uwo bemeranyijwe kubana nk’umugabo n’umugore.

Igitanganza mu bahungu barenze umwe ushobora kubaza aho ahera avuga ngo nta mukobwa w’isugi ukiba i Kigali, we ari bangahe amaze kwambura ubusugi bwe, akubwira ko nta n’umwe, wabaza undi nawe bikaba bityo ukaba wakwibaza ahubwo niba abo bakobwa basigaye bavuka baratakaje ubusugi!

Hari abandi bahuza ibyo no kuba abana benshi basigaye bakunda kwambara utwenda tugufi cyangwa tubafashe, ukumva umuntu yakwihandagaza ngo "uriya mukobwa ntabwo byashoboka ko yaba ari isugi", ukaza kwibaza aho imyenda ihuriye no kwambura umuntu ubusugi.

Abakobwa bahisemo kutagira umugabo n’umwe bazakorana imibonano mpuzabitsina atari uwe w’isezerano barahari kandi batari bake, mu gihe hari abandi bitaba bigize icyo bitwaye bakumva ko bakora imibonano mpuzabitsina uko bashaka. Ariko ikibi ni ugufata abakobwa bose bakabashyira mu gatebo kamwe.

Amahitamo ya bamwe n’iyo yaba menshi ntayagombye kuba umwanzuro wa bose. Abakobwa b’amasugi bahozeho, bariho kandi bazahoraho.

Iki ni igitekerezo cy’umunyamakuru Mukazayire Immaculée Youyou

Kuvuga ko batabyemerewe ntabwo bivuga ko batabikora, ahubwo ni uko babikora bihishe kuko itegeko ritabibemerera. Bityo, bigatuma babikora bihishe ndetse mu ibanga rikomeye kugira ngo hatagira undi urenze kuri bo babiri wamenya ko babana nk’umugabo n’umugore, bityo akazabavamo, bikagira ingaruka mbi ku miryango yabo.

Itegeko no32/2016 ryo ku wa 28/08/2016 rigenga abantu n’umuryango mu ngingo yaryo ya 166, rivuga ko ugushyingiranwa kwemewe ari uk’umugabo umwe n’umugore umwe gukorewe mu butegetsi bwa Leta ku bushake bwabo, kukaba ari ko konyine kwemewe n’itegeko. Ariko n’ubwo ibi babizi, usanga rwose hari umugabo cyangwa umugore ushimishwa no gufata izindi nshingano zo gukundana n’undi mugabo cyangwa umugore, akabigira umutwaro wo kujya akundana bucece, no kuzuza inshingano zo muri izo nkundo zindi mu ibanga.

Icyo nagarutseho mvuga ngo uwabibemerera ko batekana, iyo muganiriye n’umwe muri bo, akwereka ko nta kibazo kibirimo, ahubwo gusa ari itegeko ribabangamira kuba babishyira ku mugaragaro. Ndetse bamwe bakanabyemeranyaho ngo n’ubwo imbere y’amategeko bitemewe uzirikane ko ndi umugabo wawe nawe ukaba umugore wanjye, n’umugore kandi akabigenza gutyo ku mugabo.

Mu minsi yashize ibi byakorwaga cyane n’abagabo kuko ari bo bateraga intambwe ya mbere basanga abagore cyangwa abakobwa babasaba ko bakundana kandi bafite urugo rusanzwe ruzwi. Ariko uko iminsi igenda yicuma ni ko n’abagore bagenda bimakaza iyi ngeso, aho usanga umugore wubatse urugo rwe ruzwi ajya gushakisha abahungu bato cyangwa ndetse n’abagabo bandi bubatse akabasaba ko bakundana kandi bakabana nk’umugore n’umugabo mu ibanga.

Iyi ngeso kandi ihuriweho n’abantu b’ingeri zose, yaba abitwa ko ari abakristo ndetse n’abandi banyamadini batandukanye, n’iyo bigeze mu bwenge busanzwe butari ubw’iyobokamana, bakwereka ko ibyo bakora nta kibazo kirimo ndetse ko ari byiza, gusa bagakomwa mu nkokora no kubigaragaza ku mugaragaro kuko bitemewe n’Itegeko Nshinga ryo mu Rwanda.

Usigaye ubona bifatwa nk’urundi rwego rw’ubusirimu bugezweho, bityo bakamera nk’ababuzwa uburenganzira bwabo, kuko n’iyo bigaragajwe n’uwo bashakanye bifatwa nk’icyaha gihanwa ndetse bikaba binemewe kuba mwahita muhabwa gatanya, kuko aciye inyuma uwo bashakanye. Nyamara ba nyiri kubikora bo ubona bumvikanisha ko nta cyaha kirimo, kuko umuntu aba ari mukuru ku buryo yahitamo uburyo akundana ndetse n’abo bakundana.

Ku bwanjye rero nkurikije uko aba bantu bikundira kugira inshingano zirenze iz’urugo rumwe, bakishimira kugira umugore/umugabo urenze umwe, kandi ikigaragara bikaba bidafite gahunda yo guhagarara kuko uwabikoze ntarekera aho ngo abivemo, ahubwo araryoherwa agakomeza, bityo n’uwari atunze urugo rumwe anyuzwe n’umugabo/umugore we w’isezerno akaba abona asa n’uwacikanywe na we agatangira gushaka undi ku ruhande. Mbona uwabihera umudendezo noneho bakabikora byemewe byabaha umutekano kuko kubireka byo ndabona ntabirimo.

Iki ni igitekerezo cy’umunyamakuru Mukazayire Immaculée Youyou

Ubusanzwe ijambo ndagukunda ni ijambo ryiza rituruka mu nshinga “Gukunda” ndetse abantu bose ntawutifuza urukundo yaba gukunda cyangwa gukundwa, ariko nibaza impamvu iyo Umunyarwanda uribwiye mugenzi we, uribwiwe yumva nk’aho ari ijuru rimuguyeho akabura n’icyo asubiza.

Iryo ni ijambo riremerera cyane abantu badahuje igitsina, cyane ko abenshi bahita babihuza no gushakana bakabana nk’umugabo n’umugore, abandi na bo bagahita babihuza n’imibonano mpuzabitsina.

Iyo bigeze noneho ku bubatse bahita babifata nk’aho agusenyeye urugo kabaye, bityo bigatuma nyiri kubwirwa iryo jambo ryiza abura igisubizo atanga.

Hari n’abandi bahita bafata nyiri kubivuga ko ari indaya cyangwa yubahuka. Akenshi yaba anabivugiye mu ruhame cyangwa hari n’abandi bamwumvise bakamutaramiraho ngo ni umuhehesi cyangwa ashiruka isoni.

Iryo jambo ubundi rikomerera Abanyarwanda cyane, ku buryo hari n’igihe nk’apasiteri cyangwa Padiri arimo kwigisha abakirisitu, yababwira ngo hindukirira mugenzi wawe umubwire ngo ndagukunda bamwe ukabona byabakomereye, cyangwa umugabo yabibwira umugore (cyane kuko ni bo bakunda kugira ubu butwari bwo kubivuga), ukabona undi arisekeye ntamusubije.

Urukundo ubundi ni ijambo rituranye n’amahoro mu muco nyarwanda, ku buryo ibi byombi iyo umuntu abitunze aba atekanye, ariko iyo umuntu akubwiye ngo ndagukunda sinibaza impamvu abura igisubizo akamera nk’ugwiriwe n’ijuru nyamara wamubwira ngo nkwifurije amahoro ibisubizo bikaza vuba na bwangu.

Umuntu wese ukubwiye ngo Ndagukunda mudahuje igitsina ntabwo biba bisobanuye ko aganisha ku mibonano mpuzabitsina, kuko umuntu ushobora kumukundira ibintu byinshi bitandukanye, ahubwo umuntu ukubwira ko agukunda ni uko aba akwifuriza ibyiza, ni ko njyewe mbitekereza.

Nyamara n’ubwo mbivuga ntyo nanjye ubwanjye nibaza igisubizo nyacyo umuntu asubiza, cyuje ubupfura umuntu yasubiza uwo badahuje igitsina waba umubwiye ati “Ndagukunda” aho baba bahuriye hose.

Ariko ibyo ari byo byose nibaza ko umuntu ukubwiye ngo ndagukunda ni uko aba ari umuntu mudahuye ku nshuro ya mbere, kuko iyo ari uwo muhuye bwa mbere yakubwira ko “agukunze”, bityo rero uwo ukubwiye ko agukunda yaba afite ibyo agukundira n’impamvu akwifuriza ikintu cyiza nk’urukundo.

Nkumva rero wamusubiza ngo “Nanjye ndagukunda” hanyuma ibindi birenze kuri ibyo biramutse binahari mukazabifatira umwanya (Ukamubaza urukundo agukunda), cyane ko hari n’ababivuga nta n’ikindi kirenzeho gusa ari kimwe n’uko yakubwira ngo “Gira amahoro”, “Ramba” “Sugira” cyangwa Sagamba.

Ubundi ijambo ndagukunda ntirigomba gukurikirwa n’imibare myinshi ku wo ribwiwe. Ni ijambo risanzwe ry’Ikinyarwanda uba wereka uwo uribwiye ko umwifuriza ibyiza, n’uwabura igisubizo numva atananirwa nibura no kumubwira ati” Urakoze, nanjye ndagukunda”.

Iki ni igitekerezo cy’umunyamakuru Mukazayire Immaculée Youyou

Ibi sindabasha kumenya icyaba kibitera, gusa icyo nabonye bikorwa n’abantu benshi, kandi ingeri zitandukanye. Aho ushobora no kugira amatsiko bitewe n’ibyo yanditse ukaba wamubaza andi makuru ajyanye n’urupfu rwa nyakwigendera cyangwa ushaka kumubwira amagambo amukomeza bitewe n’umubabaro uba ubona yagaragaje mu magambo yanditse, ukumva arakubwiye ngo ntabwo twari tuziranye cyane ni inshuti yanjye kanaka imuzi, cyangwa ibindi byenda gusa nabyo.

Hari n’undi uterura amagambo uwari uzi nyakwigendera yanditse, undi nawe akayeterura atyo akayashyira ku mbuga nkoranyambaga ze nkaho ariwe uri kuyavuga harimo agira ati” Tuzagukumbura, icyuho uduteye ntawuzagisibanganya, sinzibagirwa cyagihe….” Wamubaza ukumva ngo ni kanaka wari umuzi njyewe ntabwo narimuzi.

Hari ubwo n’uwigira wenda ko adashaka kuvuga amagambo menshi kuko ntacyo yumva anamuziho yamuvuga, gusa ariko kuko yabibonanye abandi ko yapfuye.

Ukabona afashe ifoto yanditseho ngo “Urupfu rurarya koko, Urupfu ntirugira isoni, abeza baragenda, ugiye vuba, cyangwa akishyiriraho ijambo rigira riti” RIP (Risobanura mu cyongereza ngo Ruhukira mu mahoro), ibi akabikora gusa nawe agira ngo ajye mu mubare w’abamenye uwapfuye. Ibi nibyo bintera kwibaza icyo aba ari bwunguke.

Wenda abakora umwuga w’ubunyamakuru tuvuge ko bwaba nabwo ari uburyo bwo gutangaza amakuru, kuko imbuga nkoranyambaga zose z’umunyamakuru abantu bazivomaho amakuru, kandi umunyamakuru nyawe nawe ujya gushyiraho iyo foto aba azi amakuru nibura y’ingenzi yo kuri uwo nyakwigendera, umubajije anakubwira inkuru iri inyuma y’urupfu rwe. Naho se undi wese ushimishwa no kugaragaza ko aziranye n’uwapfuye kandi mu by’ukuri nta n’ahantu baba baziranye bimumarira iki ubwo!

Yego buri muntu akoresha aderesi ze uko ashaka n’icyo ashaka, no mu gihe ashaka ariko nabwo nibura byaba byiza umuntu agiye akora ibyo afitiye ubusobanuro ku buryo haramutse hagize n’umubajije yabibonera ubusobanuro burenze kuvuga ngo nabibonanye kanaka cyangwa nabyumvanye kanaka nanjye ndabikora.

Oya, kwerekana ko umuntu yari uwa bugufi cyane kuri wowe kandi ari uko wamwumvanye abandi, wamubonye ku mbuga nkoranyambaga, cyangwa gusa ko wabibonanye abandi kandi mu buzima busanzwe ntaho wari umuzi, cyangwa wari unamuzi bisanzwe, ntacyo yari agutwaye nta n’icyo yari akumariye akiri muzima yapfa ukagaragaza ko yari agufatiye runini mu buzima.

Iki ni igitekerezo cy’umunyamakuru Mukazayire Immaculée Youyou

Icyorezo cya Covid-19 kimaze umwaka hemejwe umuntu wa mbere wakirwaye mu Rwanda cyatumye ibintu bimwe na bimwe byari bisanzwe bikorwa bibuzwa. Muri ibyo harimo uburyo bwo kuramukanya bwari busanzwe bumenyerewe abantu bahana ikiganza. Uburyo bwo gusuhuzanya bwahindutse hagamijwe kwirinda ikwirakwizwa rya Covid-19. Kuva ubwo hagiye hagaragara abantu benshi bakoresha guhuza ibipfunsi bizwi ku izina rya « Censi » cyangwa « Guhana amacensi ».

Nubwo indamukanyo yagaragaye yigishwa cyane n’ibigo bitandukanye ku Isi harimo n’Ikigo gishinzwe ubuzima ku Isi(OMS ) ari ugusuhuzanya bakozanyaho inkokora cyangwa igice cy’ukuboko kiri hagati y’inkokora n’igipfunsi, njyewe nabonye mu Rwanda abenshi barahisemo kujya basuhuzanya bahuje igipfunsi cyangwa guhana amacensi, yaba abantu bakuru ndetse n’abato. Ubanza ari byo babonye biboroheye.

Ubusanzwe iyi ndamukanyo ntabwo ije ari uko na Covid-19 yageze mu Rwanda, kuko mu muhanda hirya no hino twari dusanzwe tubona urubyiruko rutandukanye ruyikoresha( Hari n’indirimbo zagiye ziririmbwa kuri iyi ndamukanyo, ariko ifatwa nk’iy’ibirara n’abana bo mu muhanda bananiranye mbese badafite uburere. Ndibuka ko hari n’amatorero amwe byafatwaga nk’icyaha ndetse ufashwe yabikoze akanahagarikwa mu Itorero ngo yakoze icyaha. None tumaze umwaka twese ari indamukanyo dukoresha. None se ubu nyuma y’aha tuzongera tubiharire barya bo mu muhanda cyangwa natwe tuzakomeze tubikoreshe ntacyo bitwaye?

Njyewe mbona hari ibintu abantu bafata bakabigira ibizira nyamara wajya kureba neza ugasanga nta n’icyo byari bitwaye cyangwa byangiza. Uretse ko yego wenda byanazanywe n’icyorezo, twavuga ngo bamwe banabikoze ari amaburakindi, ariko se nyuma yo kubikora hari icyo mwabonye byanginje ku buryo uwabikoze yafatwa nk’ufite uburere buke cyangwa umunyabyaha?

Njyewe mbona nta bubi bw’iriya ndamukanyo, icyorezo kiramutse kinagiye burundu twakomeza tukanayikoresha mu buryo busanzwe, ku babonye ari uburyo bubabangukiye, kandi bwabafasha no kwirinda n’izindi ndwara ziterwa no guhana ibiganza. Mbona ntacyo byangiza, N’ababyita icyaha mbona ntaho bihuriye. Gusa kubera ko imyemerere y’abantu itandukanye abazongera bakabifata bushya nk’icyaha ubwo bazabanze bajye imbere bihane bose, ubundi bongere babigire icyaha kuko niba ari icyaha abenshi baragikoze.

Iki ni igitekerezo cy’umunyamakuru Mukazayire Immaculée Youyou

Ubusanzwe sinzi niba mu muco hari aho badohorera umuntu kuba yakwihinduranya bitandukanye n’uko yavutse byo bikaba nta kibazo kirimo, noneho uwahoze ari umusore witwaga Lionel akaza guhitamo kwihindura umukobwa akitwa Lilly Tronn, we yaba yararengereye ku buryo agarukwaho n’abantu benshi ngo yishe umuco Nyarwanda.

Inteko Nyarwanda y’Ururimi n’Umuco ivuga ko umuco ari isangano ry’ibimenyetso byihariye biranga umuryango runaka w’abantu bikagaragarira mu mitekerereze, imikorere, imyifatire mu bumenyi no mu mvugo by’imbaga igize uwo muryango.

None se niba bamwe bihindura ku rwego bumva rubanogeye tukabifata nk’ibisanzwe mu muco, ni uruhe rugero ntarengwa kugira ngo ururengeje tujye tumenya ko uwo yatangiye kwica umuco nyarwanda?

Ubusanzwe mu Rwanda mpabona abantu benshi bihinduye imibiri bitandukanye n’uko bavutse cyangwa uko bakuze bazwi, aho ubona umwe yari igikara ejo mwahura ugasanga yabaye inzobe icanye, undi ukaba umuzi afite amabere manini ejo mwahura ugasanga utubere yaradukoresheje tumeze nk’utwumwana ukidupfundura, undi ugasanga yari afite amenyo ateye ukuntu ejo mwahura ugasanga yayakoresheje ukundi kuntu, undi ugasanga ugutwi cyangwa izuru ndetse n’ururimi byuzuyeho intoboro.

Yewe n’ayo mabuno basigaye bayakoresha bitewe n’ingano basha, n’ibindi. Nyamara abo abenshi ubona abantu banabafata nk’abasirimu. Ariko nibajije icyatumye Lilly afatwa nk’umuntu wakoze ibidakorwa.

Ubusanzwe umuntu ujya gufata umwanzuro wo guhindura umubiri we, buriya biba bitewe n’ibyo yumva akunda, ibyo yiyumvamo kurusha ibindi, cyangwa ndetse bamwe bakabikora binatewe n’intumbero y’akazi bashaka kuzakora.

Ubwo rero buri wese agahitamo bitewe n’ibyo abona bizamubera uko abishaka. Sinibaza rero ukuntu umwe akora igikorwa kimwe na mugenzi we bose ari uguhindura, kugabanya, cyangwa kwongera uko umuntu yavutse, umwe bigafatwa nk’ibisanzwe undi bigafatwa nko kwica umuco.

Ubundi sinavuga ngo kwihindura ni byiza cyangwa ni bibi, cyane ko biterwa na nyiri kubikora. Ariko nibaza ko uwaba wese yahisemo kubikora ku bushake bwe, we aba yabonye ko ari byiza. Naho icyo twita Umuco Nyarwanda ni ishingiro ry’ituze mu muryango w’Abanyarwanda, kuko uhuza Abanyarwanda mu mikorere, mu mihango, mu migenzo, mu mitekerereze, mu bihangano byabo kuko bawusangiye kandi ukabaranga.

Ubwo dusanze iyo migirire cyangwa imigenzo yo kwihindura uko tutavutse bihabanye, twahera kuri barya bose. Burya bishobora kwitwa bito, ariko n’ibikura cyangwa ibigaragara ko bikabije biba byaratangiye nabyo ari bito.

Numva mu gihe nta rugero fatizo rwashyizweho rw’ingingo umuntu yahindura bikitwa ko yishe umuco nyarwanda, ubwo twabigaya byose hamwe, cyangwa tukabyemera byose hamwe, tugasigira umuntu amahitamo ye, wowe wajya no kumugaya, ukavuga ko yagize amahitamo mabi, ariko bitavuze ko byishe umuco Nyarwanda.

Iki ni igitekerezo cy’umunyamakuru Mukazayire Immaculée Youyou

Nibajije ko byaba ari muganga, kuko niba hari umuntu uba ufite ijambo rikomeye cyane ku mugore utwite ni muganga, ku buryo aba akeneye kumva ijambo amubwiye, rero mu gihe amuhaye amabwiriza runaka yitwararika kuyubahiriza mu buryo bwose, kugira ngo akomeze kubungabunga ubuzima bw’umwana we. Aha bivuze ko amubwiye kwambara akenda kagufi yagerageza koko akabikurikiza cyane.

Ibi ni ibigaragarira abantu benshi, yaba mu Mujyi wa Kigali, cyangwa mu tundi duce ubona turimo gutera imbere, aho usanga abagore benshi batwite bambaye imyenda migufi, ndetse bamwe twayita migufi cyane ugereranyije n’iyo aba yari asanzwe yambara ataratwita kandi ukabona aratekanye nta cyo bimutwaye.

Ibi kandi ubona abagore benshi barabihigiye, aho ashobora kujya kugura umwenda akawukunda ariko yawambara akabona ni mugufi cyane, akagira ati « Uyu sinatinyuka kuwambara keretse wenda ntwite» ubwo akawugura ngo azawutwitiramo( iyo ari guteganya gutwita vuba). Hari n’undi witegura gukora ubukwe akabwira umudodera imyenda gushyiramo utugufi ngo azatwitiramo.

Sinzi niba ibi twavuga ko biterwa no kwigana bamwe bakunda kwiyambarira n’ubusanzwe imyenda migufi akumva noneho gutwita bimuha amahirwe yo gukabya, niba ari bamwe babonana abandi ibintu bakabona birababereye cyangwa bakabyifuza bakabura uko babyadukana muri sosiyete bakazategereza batwite ubwo bakitwaza ko ari impinduka zibabayeho, cyane ko mu muco wacu abagore batwite babubaha cyangwa babitwararika, bityo akumva ko ntawuzamuvugisha cyangwa uzamunenga bakabyakira batyo, simbizi neza ikibibatera.

Sindi buvuge ngo ni byiza cyangwa ni bibi kwambara imyenda migufi umuntu atwite cyane cyane ko ari uburenganzira bw’umuntu kwambara ibyo ashaka, ariko ku giti cyanjye umuntu udasanzwe yambara umwenda mu gufi, akabigambirira mu gihe azaba atwite mbona bidasa neza pe. Hari n’ukubwira ngo aba yumva ubushyuhe nyamara ugasanga yambaye umupira w’imbeho ubona ko yasheshe n’urumeza ku maguru ariko akihangana, cyangwa bikagutera no kwibaza niba yari abizi na mbere ko azatwita akonja kuko yayiguze kera ataratwita.

Ahubwo ku bwanjye mbona n’uwari usanzwe yambara migufi, mu gihe atwite yagerageza akambara umuremure gusumbaho, kuko noneho n’inda iwuterura ukabona n’uwari usanzwe utari mugufi cyane wakabije. Hari n’abavuga ko umuntu utwite wambaye umwenda muremure ataba ari umusirimu cyangwa atanaberwa. Ariko nabwo umugore utwite byaba ngombwa ko yicara akabura uko yicara kubera umwenda yambaye sinzi ubusirimu yaba afite cyangwa ikigero cyo kuberwa yaba ariho.

Nyamara burya niba ari na byo, ubusirimu buratandukanye no kuberwa na byo biratandukanye. Nyirakanaka ntuzamubone yiyambariye ibintu bimubereye ngo wumve ko nawe byanze bikunze bizakubera cyangwa ugomba kubyambara. Kugaragaza ubwambure mbona bisa nabi, kereka nibura ari wo mwuga wahisemo tukagufata dutyo. Naho nujya kwigana yigane n’ibifite umumaro cyangwa afitiye n’ibisobanuro atari uko gusa yabibonanye abandi.

Iki ni igitekerezo cy’umunyamakuru Mukazayire Immaculée Youyou

Abana bageze mu bugimbi n’ubwangavu baba bakeneye kuganirizwa n’ababyeyi babo, yaba abababyaye cyangwa ababarera, ariko usanga ibyo bidakorwa cyane muri ibi bihe, bitwaje ko abana b’ubu byose babizi.

Abo bana usanga akenshi baba bakeneye kuganirizwa ku buzima muri rusange, ndetse n’ubuzima bw’imyororokere by’umwihariko, iterambere, iyobokamana n’ibindi, kugira ngo bamenye uko bazahangana n’ubuzima ndetse no gushira amatsiko y’ibyo baba bibaza. Ariko bigaragara ko abo bana batakibona abantu babaganiriza, abenshi bagatanga ibisobanuro, cyangwa bakibwira ko abo bana nta kintu batazi muri ibyo byose.

Ukajya kumva umubyeyi runaka ati “Ubu se ni iki naba muganiriza ko abana b’iki gihe ntacyo baba batazi” ! Iyo ugerageje gusobanuza uwo mubyeyi, ujya kumva akubwiye ngo ibintu byose babisoma kuri Internet cyangwa babireba kuri televiziyo.

Nyamara ukomeje kumusobanuza usanga nta n’umunsi n’umwe yabonye umwana abireba cyangwa ngo amwibwirire ko koko yaba areba ibyo amutekerereza.

Ujya kureba ugasanga ababyeyi b’iki gihe, bafata abana bakabatekerereza ibintu, barangiza bakabifata bakabihimba bakabishyira aho, hanyuma bakabigira ihame.

Umubyeyi afata aho ikoranabuhanga rigeze, umwana akamutekerereza, kandi atarigeze anamuzanira ibyo ashaka kumwigisha nibura, niba byaramunaniye kubimwigisha imbona nkubone akoreshe n’iryo koranabuhanga, kugira ngo azabone kubivuga koko abifitiye gihamya.

Hari abana benshi bagwa mu mitego runaka, cyangwa bakagwirwa n’ibibazo bitandukanye nk’inda zitifuzwa ku bangavu, cyangwa abana bato b’abahungu bateye bagenzi babo inda kubera kutagira ubumenyi ku myifatire y’umwana ugeze mu myaka yabo.

Abandi nabo bagakora amakosa atandukanye bitewe n’ibyo babonye batamenye kuvangura icyiza n’ikibi. Kimwe n’uko hari n’undi ubigwamo atabizi kuko nta n’ibyo yigeze amenya, uretse n’ibyo byinshi ngo bimunanire kubyivangurira, kandi ugasanga umubyeyi ari aho, ngo abana b’iki gihe ntacyo baba batazi. Hari n’ababyeyi badatinya kuvuga ngo “Namwigisha iki se ahubwo buriya byose ntabindusha?”

Babyeyi, nimufate umwanya muganirize abana banyu, niba unakeka ko hari ibyo yakuye aho hose ku mbuga nkoranyambaga mwegere akubwire ibyo ari byo, aho yaba yarabyumvise nabi umusobanurire, ariko wabanje kumenya ko binahari, kuko wasanga nta na kimwe mu byo wari ukeneye kumubwira yabonye.

Ikindi niba ubona warananiwe kuganiriza umwana wawe n’ubwo nta wabigushimira, ariko nibura unakoreshe iryo koranabuhanga mu kumwigisha kuko n’amasomo yigisha abana ku mbuga zitandukanye wayabona noneho ukajya uvuga ibyo uzi neza uhagazeho, aho kuvuga ko byose abizi.

Ubwo nabwo ntibyaba ari byose ibyo washakaga kumubwira kuko n’ubusanzwe tuzi ko nta muntu umenya byose, kanswe n’abo bana muba mubeshyera b’imyaka cumi n’ingahe.

Iki ni igitekerezo cy’umunyamakuru Mukazayire Immaculée Youyou

Hari abakobwa bakoresha imbaraga nyinshi kugira ngo batazakora imibonano mpuzabitsina n’umusore kugeza bamaze gusezerana kubana nk’umugabo n’umugore. Nyamara abasore benshi na bo batsimbaraye mu gukora imibonano mpuzabitsina na mbere y’uko babana bamaze kuvumbura amayeri bavuga ko ashobora abakobwa batari bake binangiye mu kuba bakora imibonano mpuzabitsina mbere y’ubukwe.

Aya mayeri akoreshwa rero n’abasore batari bake namaze kumva ko bagira batya bagateguza umukobwa ko bazajya kwiyerekana iwabo ngo azateguze umuryango. Umusore akikora n’itsinda ry’inshuti ze zimuherekeje bakazakirwa kwa sebukwe nk’umuntu ufite umushinga mu minsi iri imbere yo kuzabana n’umukobwa wabo. Ahubwo hari n’abiyemeza gukora umuhango wo gufata irembo kugira ngo yemeze umukobwa ko yamaramaje.

Aya mayeri kandi ntabwo anakoreshwa n’umusore gusa ufite gahunda yo kuzabana n’uyu mukobwa. Oya, n’undi musore ufite umukobwa watsembye ko batasambana, abenshi babifatira umwanya bagategura umuhango wa baringa kugira ngo azabone uko agera ku ntego. Ugasanga umusore yafashe irembo aharenze hangahe, yamara gusambana n’umukobwa umwe akazajya no gufata irindi rembo gutyo gutyo....

Ibi iyo umusore amaze kubikora, aba afite ijambo rikomeye kuri uyu mukobwa ry’uko gukora imibonano mpuzabitsina ahubwo binaje mu nshingano, kuko aba amwumvisha ko nta gisibya ari we bazabana nk’umugabo n’umugore, rero nta mpamvu yaba amwima kandi n’ubundi ari we abibikiye. Aha bikantera kwibariza uyu mukobwa nti "Mbese kwiyerekana iwanyu cyangwa gufata irembo, ni byo witaga ubukwe mbere hose?"

Umukobwa ashobora guhitamo kudakora imibonano mpuzabitsina kugeza abanye n’uwo bakundanye. Yaba abikoze akiri isugi, cyangwa yarigeze no kubikora nyuma agafata umwanzuro w’uko atazongera.
Ariko se kuki umusore akurusha amayeri akagukura ku mwanzuro wawe ngo ni uko wamwerekanye mu muryango? Aha hanze hari abantu badatinya umugayo. Uretse no kuba wamwerekanye mu muryango ushobora no kumwerekana mu gihugu ariko ntibimubuze guhemuka!

Hari abakobwa benshi bafashwe irembo n’abasore batandukanye nyamara n’ubu bakiri abakobwa. Hari n’abasore bafashe irembo rirenze rimwe kandi na bo bakiri abasore. Nyamara ugasanga abo bose nyuma yo gufatwa irembo barahitaga bakora imibonano mpuzabitsina bakaza gutandukana ariko barageze ku ntego, kuko bene aba basore baba bagenzwa no kugera ku ntego y’uko yifuje gusambana n’uyu mukobwa akamubera ibamba, nyuma yo kugera ku ntego ye kandi akagenda yigamba ati se kanaka kera kose yigiraga ibiki ko ubu twaryamanye !

Numva icyaba cyiza niba koko wowe mukobwa warafashe umwanzuro w’uko ugomba kuzakora imibonano mpuzabitsina ari uko mumaze gukora ubukwe. Wikangwa no kuba umusore waramwerekanye iwanyu cyangwa yarafashe irembo. Iyo ni imihango itangirira ubukwe ariko si bwo bukwe. Wumva utazakomera ku mwanzuro wawe kugeza ku iherezo, byarutwa ko wakwiyemerera umunsi agusabye ko mubikora, aho kugira ngo nyuma uzabikore umusore agende yigamba ko yakoresheje ubwenge bwinshi burusha ubwawe agatuma uva ku izima.

Iki ni igitekerezo cy’umunyamakuru Mukazayire Immaculée Youyou

Iki ni ikintu abantu benshi bahuriraho, aho baba bemeza ko abagore bo mu Rwanda bambara imyenda migufi, abandi bakakumvisha ko ahubwo bambara migufi cyane. Ariko aha uhita wibaza aho umwenda mugufi uhera kugira ngo koko twemere ko ari migufi, binatume tunemeranya ko koko imwe yaba ari migufi cyane, dukurikije uko bamwe babivuga.

Impamvu nibaza ibi ni uko ushobora kubona itsinda ry’abakobwa cyangwa abagore batambutse ku bantu runaka, wajya kumva ukumva ngo ndebera uko abakobwa basigaye bambara imyenda migufi, hari n’ababikabiriza bati bambara ubusa. Nyamara wakwitegereza ugasanga abo bakobwa imyenda bambaye ntabwo igera hamwe (mbese na yo ntireshya) nyamara ukumva bose babashyira mu gatebo kamwe bati « Bambaye imyenda migufi. » Byatumye nibaza nti « Mbese ubwo ubundi umwenda uba ugera hehe kugira ngo witwe mugufi ? »

Aho ibi ubonera ko bidafite igipimo runaka ni uko na ba nyiri kuyambara, umwe koko ashobora kukwemerera ko we akunda imyenda migufi akaba koko anayambara, ariko undi yakumva bamuvuze ngo yambaye umwenda mugufi, bikamuyobera akikanga akubwira ati « Reka reka ntabwo uyu mwenda ari mugufi namba » Ibi bigaragaza rero ko umwe ashobora kubibona ukwe undi akabibona ukwe kuko nta gipimo cyashyizweho cy’aho umwenda wagakwiye kugera, noneho ku buryo uharenze abantu bose bahita babyemeranya ko koko uwo muntu yambaye umwenda mugufi.

Icyakora hari amatorero n’amadini amwe n’amwe, aba yarashyizeho urugero ntarengwa umuntu atakwambara umwenda uri hejuru y’urwo rugingo, ubwo yabirengaho akaba yambaye umwenda mu gufi, kuko baba barashizeho urwo rugero, bakabyumvikana batyo cyangwa bakabyizera batyo. (Urugero hari abavuga ko umugore atagakwiye kwambara umwenda uri hejuru y’amavi, abandi bati umwenda ugaragaza agatsintsino uba ari mugufi) nyamara hari n’undi wiyambarira uwo ashatse bitewe n’uburebure akunda. Icyakora hari n’imiryango imwe ishyiraho itegeko ry’imyenda runaka abantu bagize uwo muryango bagomba kwambara. Abo kuko baba bafite ibyo bemeranyije ubirengaho, afatwa nk’uwambaye umwenda mugufi.

Mbona umuntu yambara umwenda kuko yumva ari byo akunze, ndetse ari bwo burebure yakunze bitewe n’igihe cyangwa n’aho agiye. Kuba ari mugufi cyangwa ari muremure biterwa n’umuntu uri kubireba. Numva rero icyo kwanzura ko abagore b’Abanyarwandakazi bambara imyenda migufi, tutabigira iteka, kuko mu Rwanda nta kigero twumvikanyeho ku buryo umuntu ukirengeje twaheraho twemeza ko yambaye umwenda mugufi.

Ariko na none kuko umuntu afite uburenganzira bwo kuvuga uko abona ibintu. Numva ibyiza ari uko yavuga ati «Ku bwanjye ndabona uriya mukobwa cyangwa umugore yambaye umwenda mugufi »

Ni ku giti cyawe wowe ubireba kuko nta cyita rusange mu Rwanda dufite cyo kuvuga ko umwenda ari mugufi.

Iki ni igitekerezo cy’umunyamakuru Mukazayire Immaculée Youyou

Abantu benshi iyo bari kuganira cyangwa bamwe banajya impaka cyane cyane abagabo, bakumvisha ko byanze bikunze umugore aba azi umugabo wamuteye inda ku buryo atagira gushidikanya kuri se w’umwana. Nyamara njyewe nubwo ntabiha amanota ku ijana, ariko nemera ko harimo umubare runaka byashoboka ko umugore na we ubwe atamenya uwamuteye inda.

Ubusanzwe tuzi ko umugabo asohora intanga nyinshi icyarimwe kandi zose zitavamo umwana, ahubwo iyihuse muri zo igenda igahura n’intanga ngore bikaba ari byo bizavamo igi rizaba umwana. Iyo ntanga rero mpamya ko nta mwihariko iba ifite ngo mu gihe igeze mu mugore arahita amenya ngo ya yindi ivamo inda irinjiye. Niba haba hari n’itandukaniro runaka ryaba ribaho, byaba bizwi n’ababyigiye bafite ubumenyi buhanitse budafitwe n’umugore wese bityo n’umugore akaba yakwitiranya cyangwa agashidikanya ku muntu bakoranye imibonano mpuzabitsina akaba ari we umutera inda.

Hari n’abagabo bamwe wumva bavuga ngo iyo uri mu gikorwa cy’imibonano mpuzabitsina agatera inda ahita abyumva, bityo umugore we abyumva cyane kuko ari na we uba usamye, nyamara njyewe numva ntabyemera ntyo, kuko intanga yateye inda ntaho iba itandukaniye na za zindi ibihumbi bingahe wayisohoranye na yo, ku buryo wahita uvuga ngo ya yindi yaje inda yinjiye.

Mpamya ko umugore ashobora gukorana imibonano mpuzabitsina n’abagabo batandukanye mu gihe gito cyane ari mu gihe cy’uburumbuke, bityo kubera ko imibonano mpuzabitsina yabonetsemo umusaruro wo kurema umwana(gutwita) nta mwihariko uba urenze ku yindi bakoze, nyuma yo gusama ukazasanga umugore afite gushidikanya yibaza muri ba bagabo baryamanye kuri wa munsi atekereza yaba yarasamiye uwaba yaramuteye inda. Bamwe rero bagahitamo uwo bakwitirira uwo mwana bitewe n’impamvu zitandukanye.

Ibi kandi mbishimangiraho cyane, turetse n’abantu baba bashobora kuba bakora imibonano mpuzabitsina n’abantu batandukanye, ari umugore ubana n’umugabo we wenda batanacana inyuma, ujya kumva ukumva inda imaze kugira igihe runaka ngo baratunguwe kuko batari bazi ko umugore yasamye. Abenshi bakabimenya ari uko babuze imihango cyangwa yatangiye kubona ibindi bimenyetso. Ibi bisobanure ko yaba umugabo wateye inda, yaba umugore wasamye, bose ntawigeze abimenya, kuko ari imibonano mpuzabitsina iba yakozwe mu buryo busanzwe.

Icyakora nemera ko umugore ufite umugabo umwe, udacaracara ngo akorane imibonano n’undi, uwo rwose byanze bikunze se w’umwana aba amuzi 100%. Naho undi wese, mu gihe yaba yakoze imibonano mpuzabitsina n’abagabo batandukanye na we ubwe yayoberwa se w’umwana, umwana akabaho yaritiriwe se utari nyakuri kubera ko na nyina umubyara atamuzi bitewe n’impamvu zitandukanye.

Iki ni igitekerezo cy’umunyamakuru Mukazayire Immaculée Youyou

Nyiri ugukora ibi, afotora ifoto cyangwa agafata akavidewo gatoya bimworohera gushyira ku mbuga nkoranyambaga, agaragaza ibiryo agiye kurya, ubundi rimwe na rimwe aya mashusho bakayaherekezanya utugambo tuvuga uko ibyo biryo biryoshye, cyangwa rimwe na rimwe ukumva ari no gushimira uwabimugaburiye (Aha akenshi bavuga uwo basohokanye bakajya gusangira).

Ibi bintu bihuriweho n’abagabo ndetse n’abagore n’ubwo urebye neza abiganje ari abagore. Abantu benshi bakunda kubivugaho, bamwe babinenga, ndetse hari n’abandi banavuga ko bibabangamira ngo aho bageza ibyo kurya ku meza umuntu mbere y’uko barya, we akabanza gufotora. Ariko ba nyiri kubikora bo bakubwira ko bumva ari uburenganzira bwabo kandi bumva babikunze ndetse binabashimishije ubundi bakavuga ko babona ibyo biryo bisa neza, biryohewe no kubishyira ku mbuga nkoranyambaga.

Abenshi muri aba cyane cyane abakobwa iyo bashyize ibyo kurya ku mbuga nkoranyambaga zitandukanye, ubundi bakanishyiraho n’amafoto yabo bari kubirya, baba bakwereka ko ari bwo buzima biberamo mbese ari yo ndyo barya buri gihe. Ariko igitangaje ubu ntabyo bacyerekana niba batakirya simbizi.

Ni kenshi abantu bagiye banenga ibi byo kugaragaza ibiryo, aho bagiye bavuga ko babishyira ahagaragara atari uko bakunda kugaragaza ibyo kurya byose, ahubwo abenshi babikora kuko baba babonye ibiryo byiza batamenyereye, kuko biramutse ari umuco bifitiye wo kugaragaza ibyo kurya bariye, bari kuba bagaragaza n’imvange bariye iwabo mu rugo.

Ibi ariko nanjye naje kubyitegereza muri iyi minsi ya Guma mu Rugo ku mbuga nkoranyambaga zitandukanye nza gusanga koko haba harimo ukuri kwinshi mu kuba bagaragazaga ibiryo byiza gusa bariye iyo muma resitora na za Hoteli. None se koko niba mwabigaragazaga kuko mubikunda, ubu ntabwo mukirya? Ko se ubu mudafotora ngo mutwereke ibyo mwariye?
Ikigaragara ni uko aba bakunda kugaragaza ibyo bariye mu maresitora n’amahoteli atandukanye baba basohokeyemo, ariko ibiryo by’iwabo mu muryango biciriritse bakaba bataterwa ishema no kubigaragaza. Muri make rero ntabwo ibi mubikorera kubikunda ngo muragaragaza ibyo mwariye, ahubwo wa mugani biba ari uburyo bwo kwirata no kwiyemera ko murira ahantu hasobanutse cyangwa murya ibiryo bisobanutse.

Ku bwanjye mbona uwaba akora ibi bintu kuko abikunze, n’ubundi yaterwa ishema no kugaragaza n’ibyo yaririye iwabo mu rugo, nibura tukabimumenyeraho ko ari umuco we, dore ko wenda ari n’uburenganzira bwe bwo gushyira ku mbuga nkoranyambaga ibyo yariye. Ariko uzategereza ko azongera kubigaragaza ari uko Amahoteli n’Amaresitora afungurwa, ubwo uwo ntazirarire ngo yumva akunda gushyira ku mbuga nkoranyambaga ibiryo yariye, ahubwo azavuge ko mu gihe agize amahirwe yo kubona ibiryo byiza ahita abishyira ku mbuga nkoranyambaga kugira ngo abantu babibone.

Iki ni igitekerezo cy’umunyamakuru Mukazayire Immaculée Youyou

Hari abatekereza ko umuntu ufite amafaranga menshi aba yarageze ku bukire

Iyi ni imvugo umuntu cyangwa itsinda ry’abantu bakunda kuvuga ku muntu, akenshi bari bafite ikintu bahuriyeho cyo mu buzima busanzwe, nko kuvuka mu gace kamwe, kwigana, gusengana, gukorana...Mbese bari bafite ubuzima bufite aho buhuriye cyane, ariko yagira atya agatera imbere mu by’ubukungu ukumva abo bagenzi be bati "Erega kanaka yagezeyo ntabwo akiri mugenzi wacu !"

Rimwe na rimwe babivuga mu ishusho yo kumunenga wenda bagaragaza ko atagisabana na bo cyangwa atagihura na bo nk’uko byari bimeze mbere, abandi bakabivuga bameze nk’abishimira intambwe mugenzi wabo yagezeho n’ubwo ari bo bake. Bati "Kanaka yagezeyo"

Aho hantu baba bavuga yageze ni hehe ?

Ubuzima bwo kuri iyi si ni urugamba umuntu kuva yayigeraho, aba arwana ava ku ntambwe imwe ajya ku yindi. Nyamara n’abageze ku byaba bigaragarira abantu ko yageze aho yagombaga kwiyicarira akadamarara akanyurwa n’ibyo yamaze kugeraho, aba agishakisha na we kugera ku byisumbuyeho. Warangiza wowe ukavuga ngo "kanaka yagezeyo" Aho uba uvuga ni hehe ? Ni nyiri ubwite se uba wakubwiye ngo ubundi ni aha najyaga none narahageze?

Ku bwanjye mbona nta muntu ukiri muzima ugerayo, kuko urebye neza na we ntaba azi aho ari kujya. Umuntu ararwana cyangwa agashakisha icyisumbuye ku cyo afite kugeza apfuye. Icyakora ni uko ntabizi neza nyuma y’ubu buzima uko biba bimeze, ariko wenda nibaza ko aribwo umuntu yavuga ngo yageze iyo ajya.

Umuntu wese ukiri muri ubu buzima turimo none aba akiri mu rugendo, na we atazi neza iyo rumuganisha. Mu kinyarwanda baravuze ngo "Bucya bucyana ayandi" barongera bati "iby’ejo bibara ab’ejo" bashaka kugaragaza ko umunsi umuntu aba yizeye ibyawo ari uwo arimo none. Uretse ko na wo akenshi uguhindukana uko wawutangiye ntube ariko uwusoza. None ngo kanaka kuko yaguze imodoka cyangwa yubatse inzu wowe ntabyo ufite ukumva ko yagezeyo!

Ntawagezeyo kuko twese turi mu rugendo. Gusa wasanga hari abagenze mbere ya bagenzi babo kuko wenda bagendeye ku muvuduko utangana, cyangwa barahiriwe kubarusha ariko ntawugerayo. Umuntu ararwana kugeza ashizemo umwuka ni uko Isi iteye. Ntuzavuge rero ngo kanaka yagezeyo kandi utari unazi iyo yajyaga.

Iyi nkuru ni igitekerezo cy’umunyamakuru Mukazayire Immaculée Youyou

Ibi ndetse hari abantu benshi babihuza n’isenyuka ry’ingo rya hato na hato rimaze gufata indi ntera aho mu Rwanda imibare y’inkiko igaragaza ko gatanya zizamuka ubutitsa kuko kugeza mu Gushyingo 2018, hari hamaze gucibwa imanza za gatanya 1311, ni ukuvuga ko zikubye inshuro 19 ugereranyije n’umwaka wa 2017.

Iyo bavuga ibi akenshi ahantu baba bavuga ngo ahantu umuntu atakura umugeni cyangwa umugabo ni nko mu : kabari, mu kabyiniro, ku mbuga nkoranyambaga, mu modoka cyangwa mu ndege mugenda... ibi byaje gutuma nibaza ubundi ahantu habugenewe umuntu yagombye kuba yahurira n’uwo bazubakana urwabo rugakomera.

Ubundi n’ubwo bigaragara ko gutandukana kw’abashakanye kugenda kwiyongera cyane mu Rwanda, burya njyewe mbona Abanyarwanda benshi baba barabanye intego ari ukuzabana akaramata, ku buryo bamenye aho bazahurira n’uwo bazabana akaramata ari ho bakwerekeza bagategereza kugeza bahuye. Kuko hari n’ababona abagize ibyago bagatandukana kimwe n’abandi bose ukumva baravuze ngo « Ubundi se umukobwa n’umuhungu bahuriye hariya…bari kubaka uruhe rugo? » None se abavuga ibyo muba mugira ngo kare kose bahurire hehe?

Akenshi abantu bumva ko hari ahantu runaka haba abantu b’inyangamugayo ku buryo uhakuye uwo mwazabana urwo rugo rwazaramba ugasanga abantu banafite amatsiko y’ahantu abitegura kurushinga bahuriye kugira ngo bumve ko urugo rwabo rufite amahirwe yo kuzaramba.

Bamwe bagaragaza ko umuntu mwahuriye mu rusengero, mu kigo runaka gikomeye, mu rugo rw’inshuti zawe, mu mirimo itandukanye ikomeye... biba bisobanuye ko ari umuntu uhabwa amahirwe menshi yo kuba ari inyangamugayo. Nyamara njyewe mbona ntaho biba bihuriye kuko birashoboka ko mwahura n’umujura wagiye gusenga kandi inyangamugayo yagiye mu kabari.
Mu Kinyarwanda baravuga ngo inshuti uyikura ku nzira. Ibi bisobanura ko ahantu hose ubundi wahahurira n’umuntu w’imfura mwarushinga rugakomera, kuko n’iyo haba ari ha hantu hakorerwa amabi gusa ntiwamenya impamvu yatumye ahaba.

Ahantu hose icyaba kihakorerwa cyose mpamya ko haba hahuriye abantu beza n’ababi ku buryo bitakubuza kuhahurira n’umuntu muzima kandi mwahuza mukubaka urugo rugakomera. Kuko umuntu ni umutima ndetse na kamere ye. Wibihuza n’ahantu umubonye cyangwa muhuriye utanamenye impamvu ari aho hantu.

Ubuzima bugira ukuri kwinshi ku buryo hari igihe umuntu yisanga aho atakagombye kuba kandi nta mahitamo afite. Ariko icyo mpamya ni uko umuntu akomeza kuba uwo ari we aho yaba ari hose. Birashoboka ko wasanga intama yayobeye mu ihene ukayitiranya n’ihene nyamara burya iba ikiri intama yisanishije n’ihene kuko ari zo biri kumwe.

Ahantu hose ushobora kuhahurira n’umukobwa cyangwa umusore mwiza mwakundana kandi mugashinga urugo rugakomera mukazarambana ndetse mukazatandukanywa n’urupfu nk’uko abenshi babirahirira mu madini ku munsi wabo w’ubukwe. Bati "Icyo Imana yafatanyije ntihakagire ugitandukanya." Niba wemera ko Imana ibera hose icyarimwe, bivuga ko na ha handi bamwe batekereza ko hatava umuntu muzima aba ahari kandi n’Imana iba ihari.

Iyi nkuru ni igitekerezo cy’umunyamakuru Mukazayire Immaculée Youyou

Ibi ni ibintu biharawe, ndetse ubu indirimbo hafi ya zose cyane cyane izigezweho cyangwa izakunzwe kurusha izindi, usanga zifite amashusho agaragaramo abakobwa bambaye ubusa. Nimvuga kwambara ubusa kandi ntihagire ukeka ko ari ukurengera kuko imyamya yose y’ibanga iba iri hanze n’ubwo uba ubona hari utuntu dukinzeho, ndetse abitwa ko bateye imbere bo n’ubusa buriburi barabwambara.

Igitangaje muri aya mashusho ariko ni uko ari abakobwa baba bambaye ubusa kuko abasore cyangwa abagabo baba bari kumwe bo baba bambaye bakikwiza kugeza aho banambara ingofero ndetse n’umukandara. Nyamara ukabona umukobwa yambaye ubusa kandi bombi ukabona barizihiwe.

Ibi byaje kuntera kwibaza impamvu niba aba ba nyiri indirimbo baba babona izaba nziza ari uko hagaragayemo ubwambure bw’abantu, impamvu n’abahungu batabwambara ubwo twese tukamenya ko ari indirimbo igizwe n’amashusho y’abantu bambaye ubusa, bagaragaza ubwambure bwabo.

Ikindi naje kwibaza impamvu aba bakobwa bo bemera kwambara ubusa hanyuma bakajya gukorakorwaho n’abahungu bambaye bakikwiza! Niba se ibisobanuro babiha ari ukugira ngo amashusho abe meza, kuki batabasaba ngo na bo biyambure hanyuma bagakora amashusho agaragaramo abantu bose bahisemo kwambara ubusa.

Ntabwo rwose navuga ko hari indirimbo nzi zirimo abasore bambaye ubusa, kuko n’uba yakabije ubwo yambura mu gatuza n’aho ahandi hose ukabona arikwije, nyamara ukabona bari mu mashusho amwe n’umukobwa umwe cyangwa abakobwa benshi bambaye ubusa bari kumwe n’abahungu benshi bambaye bakikwiza. Hari n’igihe ubona umusore ari umwe mu ndirimbo yambaye yikwije ugasanga ashagawe n’itsinda ry’abakobwa bo bambaye ubusa!

Ese ubu twavuga ko biterwa n’uko abasore ari bo bafite ikigero kiri hejuru cyo kugira isoni zo kugaragara mu ruhame bambaye ubusa kurusha abakobwa? None se biramutse ari nako bimeze ubwo abakobwa byaba byaratewe n’iki kuba bafite ikigero cyo hasi cyo kugira isoni zo kugaragaza imyanya yabo y’ibanga mu ruhame? Icyaba kibitera icyo ari cyo cyose njyewe ku bwanjye mbona bisa nabi ndetse binatesha igitsinagore agaciro.

Reka wenda mbyemere ko ari iterambere da, simbizi. Ariko bibaye ari iterambere ryo gukora amashusho abantu bambaye ubusa, abakobwa babwiwe cyangwa bishyuriwe kwambara ubusa bakabafata amashusho azakwirakwizwa hirya no hino bari bakwiye kubwira abo basore bazagaragarana mu mashusho na bo bakiyambura kugira ngo aya mashusho yabo azaze asa. Naho ubundi uba ubona harimo kwitesha agaciro ku mukobwa ndetse no gufatwa nk’igikoresho runaka.

Iyi nkuru ni igitekerezo cy’umunyamakuru Mukazayire Immaculée Youyou

Imibare ya Minisiteri y’Imari n’Igenamigambi igaragaza ko kugeza mu gihembwe cya kabiri cya 2020, ubukungu bw’u Rwanda muri rusange bwagabanutseho 12,4% ugereranyije n’uko bwari bwifashe mu 2019, bitewe n’icyorezo cya COVID-19. Ariko nyamara Abanyarwanda benshi bagaragazaga ko ibi babishidikanyaho, kuko abenshi muganiriye bagaragazaga ko n’ubwo nta bushakashatsi bakoze ariko bo babona ubukungu bwaba bwarahungabanye nko kuri 80% ndetse no kuzamura.

Ubusanzwe igice kinini cy’Abanyarwanda cyizihiza iminsi mikuru isoza umwaka ari yo "Noheli n’Ubunani" abenshi bari batewe amatsiko no kureba uko iyi minsi izaba isa, cyane cyane ko uyu mwaka wa 2020 abantu bawufata nk’umwaka mubi cyane mu myaka abenshi bariho babayeho. Ndetse abenshi bavugaga ko umunsi wa Noheli, itabaye ahubwo ari umunsi wa Gatanu nk’indi yose, akenshi bagaragaza ko nta bushobozi bazagira wo kuwizihiza nk’uko byari bisanzwe.

Noheli ni umunsi mukuru abakristo bizihiza nk’itariki y’ivuka ry’umucunguzi wabo "Yesu Kristo" aho uyu mwaka hizihizwa imyaka ibarirwa muri 2020 amaze avutse. Uyu munsi wizihizwa abantu bambara neza, barya, bananywa neza, batanga banakira impano zitandukanye ndetse banabyina, baririmba. Mbese buri wese agaragaza ibyishimo uko abyumva. Uyu munsi rero icyagaragaye uretse wenda imyidagaduro yabangamiwe kubera ibihe turimo byo gukumira icyorezo cya Covid-19, ibindi byagenze nk’uko byari bisanzwe bigenda ahubwo ahandi ukabona byanarushijeho, ku buryo ku bwanjye mbona nta gikuba cyacitse mu bijyanye n’ubukungu nk’uko byavugwaga. Yego umwaka wabaye mubi muri rusange ibyo turabyemeranywaho ariko nabwo ntibiri ku rwego cyangwa ku buremere twabihaga.

Dore bimwe mu bigaragaza ko nta gikuba cyacitse :

–  Ahategerwa imodoka zijya zinava mu Ntara zitandukanye z’u Rwanda hari umubyigano udasanzwe abantu bajya mu miryango yabo gusangira iminsi mikuru. Nyamara mbere yaho wumvaga ari amaganya gusa ukagira ngo nta n’umuntu uzabona itike yamugeza iwabo. Kandi ibi ni ku bantu bafite ubushobozi buke twabonye kuko abafite ubushobozi bwisumbuyeho bagiye mu modoka zabo.

–  Ahagurishwa ibiribwa n’ibibyobwa hari umubyigano udasanzwe cyane cyane ahagurishwa inyama n’amafi nka bimwe mu mafunguro y’imena mu minsi mikuru yo mu Rwanda. Wabonaga urujya n’uruza rw’imiryango itandukanye buri wese ku bushobozi bwe nk’uko byari bisanzwe, buri muntu ahahira umuryango we iby’iminsi mikuru.

–  Hari abagaragaye bambaye imyambaro mishyashya. Hirya no hino mu miryango cyane cyane abana bagaragaye bambaye imyenda ya Noheli yiganje mu mabara y’umweru n’umutuku yitiriwe Père Noël, kandi iyi myenda ntabwo ihendutse irahenze kandi yambarwa kuri Noheli gusa bigaragara ko uyigurira umwana nta byacitse biba byaramubayeho. Ibi kandi biherekejwe n’imitako itandukanye kandi iyi mitako ijyanye n’iminsi mikuru iba ihenze.

–  Abandi benshi bahisemo gukora indirimbo zitandukanye z’imiryango yabo yaba iz’amajwi cyangwa amashusho, yaba izihimbaza Imana cyangwa indirimbo zisanzwe zo kwifurizanya iminsi mikuru myiza.

Covid-19 yahungabanyije ibintu byinshi, ariko bigaragara ko Abanyarwanda n’umeze neza agendera ku bandi uko barira na we agataka, bigatuma ibintu bihabwa ubundi buremere. Uyu mwaka hari abo wabereye mubi cyane, ariko hari n’abo wabereye mwiza cyane kandi ni kimwe n’indi myaka yose.

Ibi byose navuze haruguru ntibivuze ko habuze imiryango runaka yabuze ubushobozi bwo kwizihiza iyi minsi mikuru, ariko ni ibisanzwe n’indi myaka byabayeho kandi n’indi iri imbere ni ko bizamera, isi ni uko iteye. Umwaka muri rusange wabaye mubi ariko Nyagasani yaduciriye akanzu. Abanyarwanda nidukomeza gukurikiza amabwiriza yo kwirinda Covid-19 imyaka iri imbere bizagenda neza cyane kurusha ubu.

Ibi kandi koko ugenzuye neza ahakunze guhurira abantu benshi, nko mu mujyi ahazwi ku izina ryo kwa Rubangura, ndetse n’aho bategera imodoka hatandukanye, usanga ibi bivugwa bifite ishingiro kuko usanga muri rusange abakobwa n’abagore benshi ari inzobe. Kandi akenshi ugasanga ari inzobe bashakiye mu byo bisize kuko ibi biragaragara, aho ureba umuntu mu maso ugasanga inzobe iracanye rwose ariko wakwibeshya ukareba nko kubirenge bye ukagira ngo ni iby’undi muntu bamuteyeho ugasanga byo birirabura cyane pe. Byaje no kuntera kwibaza ahubwo impamvu badahitamo kwisiga ayo mavuta umubiri wose ngo uhinduke.

Aha naje kwibaza niba koko byarakorewe ubushakashatsi bikagaragara ko umukobwa cyangwa umugore w’inzobe ari we ugaragara neza cyangwa ari we wambara akaberwa cyane cyane ko ari yo mpamvu nyamukuru iba igenderewe. Icyo kibazo ariko sinabashije kukibonera igisubizo cyane cyane ko abantu bakunda mu buryo butandukanye.

Ariko nkanjye mbona rwose umukobwa cyangwa umugore ufite igikara bitamubuza kugaragara neza cyangwa kwambara ngo aberwe, no kubemera Imana burya iba ifite impamvu yahisemo kukurema uri igikara mugenzi wawe ikamurema ari inzobe. Buriya ni byo yakoze ibona ni byiza. Kuko nawe ushyize mu gaciro ukareba iyo Imana irema abantu bose turi inzobe nta tandukaniro rihari bitari kuba byiza rwose.

Numva umukobwa cyangwa umugore yagakwiye kureba ubundi buryo bwo kwiyitaho agasa neza ariko butari guhindura uruhu rwabo, cyane ko burya uko umeze kose hari umuntu wagukundira uko usa. Witangira gutekerereza umuntu runaka ngo yagukunda ari uko wihinduye mu buryo runaka, kandi nta muntu wanabikubwiye.

Ubundi kwihindura uruhu uretse kuba binafite ingaruka mbi ku mubiri. Mu by’ukuri no kureba umukobwa cyangwa umugore mu maso inzobe icanye wareba intoki cyangwa ibirenge ugasanga ntacyo bipfana no mu maso he, nukuri mbona bigaragara nabi pe.

Mbona kunyurwa n’uko umeze ari byo byiza kuko kuba ikintu cyarakozwe n’abantu benshi ari kibi ntibituma bigihindura kuba cyiza. Uko usa hari uwaguhitamo mu bandi benshi mudasa akanyurwa na byo. Gusa neza no kugaragara neza, rwose ni rimwe mu mahame y’igitsina gore aho cyava kikagera. Ariko gusa neza no kugaragara neza ntibisobanura kuba uri inzobe. Nubwo rero bavuga muri rusange ngo nta mukobwa cyangwa umugore w’igikara ukiba i Kigali. Barahari bake bagifite imibiri yabo Imana yabaremanye kandi wababona ukabona barasa neza cyane kurusha wa wundi ufite amabara avanze kandi ari umuntu umwe. Terwa ishema n’uko Imana yakuremye kandi wumve ko uko usa hari ubireba akabona ari byiza, wikwihutira gushaka icyatuma usa na kanaka.

Mutamuliza Annonciata uzwi nka Kamaliza, benshi mu baririmba kinyarwanda bavuga ko bamufatiraho urugero

Ibi naje kubyibazaho, niba koko ari ukuri cyangwa, ari bya bindi by’abantu bamwe banga gushima umuntu ukiriho, bakazavuga ibyiza bye, ari uko atakiriho.

Buri mukobwa uririmba Kinyarwanda ujya kumva ukumva aravuze ati: “Rwose Kamaliza ni we mfatiraho urugero, uko yaririmbaga narabikundaga cyane”

Naje kongera kubyibazaho cyane, aho umunyamakuru umwe yabajije umukobwa mushya muri muzika umunyarwanda yaba afata nk’icyitegererezo mu miririmbire ye, na we ati “ Ni Kamaliza” Ariko naje gutungurwa n’uko yamubajije indirimbo imwe ya Kamaliza azi imufasha cyane, abura n’imwe yibuka…arangije ati: “Ndi kuyibagirwa ariko ya yindi bajya baririmba muri bridal shower (ibirori bakorera umukobwa uri kwitegura gushyingirwa)”.

Urebye neza wabonaga nta n’ikintu kinini yaba aziho Kamaliza. Mbese yarabyumvanye undi muntu cyangwa gusa azi ko hari umuhanzikazi wabayeho mu Rwanda ariko utakiriho.

Ubundi umuntu ufataho urugero (Role model) akenshi ubona ibyo akora biba bifitanye isano n’ibyo uwo akora, cyangwa uwo muntu yakoraga. Ariko ujya kubona ukabona uwo muntu uvuga ngo ni Kamaliza afataho urugero nyamara wajya kureba, ugasanga akora ibimeze nk’iby’undi muntu runaka neza neza uriho, ariko akaba adashaka kugaragaza ko ari we afataho urugero.

Nkurikije ibyo nagenzuye nkareba, ndahamya ko abantu benshi bavuga ngo bafata urugero kuri Kamaliza iyo aba akiriho na we ntabwo bari kuba bamuvuga gutya. Ahubwo wagira ngo kirazira kuba wafata umuntu ukiriho ukavuga ko ari we ufataho urugero mu Banyarwanda benshi.

Ikindi naje gusanga ko baba bivugiye ibintu badakuye ku mutima, ahubwo hari ikindi kintu kiba kibyihishe inyuma yumva atavuga umuntu runaka bakora umwuga umwe. Ubwo uwo muntu iyo abajijwe mu Rwanda umuhanzi afatiraho urugero avuga Kamaliza gusa, nyamara yabazwa abo hanze akavuga benshi kandi bakiriho.

Simpamya ko kuvuga ngo kanaka mufataho urugero, ari mugenzi wawe ukiri muzima hari icyo bitwaye. Ndacyanibaza niba hari ikintu kinini bimwongerera cyangwa wowe ubivuze bikugabanyaho kandi ari ko kuri.

Reka nsoze mbagira inama abashaka gukomeza kuzajya bivugira Kamaliza, muzafate umwanya nibura musome, mubaze, ku buryo mumenya amakuru ye menshi ashoboka ndetse n’indirimbo ze nyinshi,…ku buryo unagerageza gukora ibintu bimeze nk’ibye, umuntu yakubona cyangwa akakubaza ukamusubiza udategwa impamvu ari we wahisemo.

Ariko kuvuga n’undi wese waba waragutanze mu kintu runaka ko umufataho urugero, numva ntacyo bitwaye cyane ko bitaba bisobanuye ko akurusha. Ushobora gufatira urugero ku muntu kandi ugakora byiza kumurusha.

Abafata urugero koko kuri Kamaliza, mukomereze aho ndetse n’abasubiramo indirimbo ze yaririmbye bakomere cyane. Kamaliza Imana ikomeze kumuha iruhuko ridashira.

Amabere kimwe n’ikibuno ni zimwe mu ngingo zigize umubiri w’umuntu, ariko siniyumvisha impamvu rumwe( amabere) kuba ari runini rwatera umuntu ipfunwe, nyamara ku rundi ruhande (ikibuno) rwaba runini rugatera umuntu ishema.

Ubundi buri rugingo Imana yaremye ruba rufite umumaro warwo. Ngenekereje nkashyira mu bwenge bwanjye, ubundi numva kugira amabere manini ari byo byagakwiye kuba ishema ku mugore, kuko umumaro w’ingenzi wayo, ari ukwonsa umwana kandi iki akaba ari ikintu cyihariwe n’umugore gusa, kuko ikibuno n’umugabo akigira kandi nta wundi mumaro wihariye ku mugore. Mbese byaba bigaragaza ko ufite ibikwiye byo konsa umwana. Ariko nibaza impamvu ibi bitera umuntu ipfunwe, ndetse akamera nk’umuntu wakoze ikosa runaka kugira ngo abe afite amabere manini.

Ubundi nzi ko "amabere" ari ikinyarwanda ndetse kinasobanutse. Ariko kubera umugore ufite amabere manini agaragaza ko bimuteye ipfunwe, hari abo usanga bagerageza kubihindurira izina.

Aho kuvuga ngo kanaka ufite amabere manini bakavuga bati "kanaka ufite igituza kinini". Nyamara kuvuga ngo "wa mugore kanaka ufite ikibuno kinini" bakumva ari ibintu bitagize icyo bitwaye.

Ibi kandi bigera aho ukabona bisa n’ibifashe iñdi ntera, kuko binafatwa nk’igitutsi cyangwa gushira isoni, aho umuntu wamubwira cyangwa ukavuga ko afite amabere manini ukumva uracyahwa nk’umuntu utukanye. Cyangwa na nyirubwite yabyiyumvira mukamera nk’aho mugiranye ikibazo.

Nyamara ikibuno uko cyaba kingana kose, n’iyo wamubwira ko ari kinini, ntawe bibangamira n’iyo akwereka ko yifuza ko yananuka na cyo kikagabanuka, abikubwira ariko ubona nta pfunwe ndetse atanakurakariye.

None se ubu tuvuge ko akamaro k’ikibuno karuta ak’amabere da? Simbizi. Gusa sinanamenya igitera iri tandukaniro ry’amarangamutima, ariko kandi mbihagazeho neza ko ari ikintu gihuriweho n’Abanyarwandakazi benshi.

Uyu munsi nagarutse ku Banyarwandakazi cyane kuko ari bo mbana na bo kenshi, kandi bakaba ari na bo benshi bumva uru rurimi nanditsemo ariko ibi ni ibintu bihuriweho n’abagore benshi kuko n’abafite uburyo bwo kujya kwihindura ingingo, abenshi usanga bagabanyisha amabere bakongeresha amabuno. Keretse ibihugu bimwe na bimwe bifite umwihariko wo gukunda amabere manini.

N’ubwo ibi mbyibaza simbone igisubizo neza, nyamara mbona ntacyo bitwaye umuntu Nyagasani yihereye amabere manini ko yamutera ipfunwe, akumva ko undi ku ruhande Nyagasani yahisemo kumuha ikibuno kinini amurusha amahirwe cyangwa ubutoni.

Ingingo zose Imana yaremye ni magirirane, uko yahisemo kuziha abantu n’ingano yabyo ni ubushake bwayo, kandi ubudasa bwacu ni bwo bugira Isi nziza, cyane cyane ko abantu tutanakunda kimwe. Ikibuno n’amabere byose ni ingingo ku buryo ntarwari rukwiye gutera umuntu ishema ngo urundi rumutere ipfunwe. Ahubwo ibyiza numva ari uguterwa ishema n’uko Imana yabiguhereye ubuntu.

Hari abantu benshi biyumvisha ko igihe umusore cyangwa inkumi bamaze gushinga urugo, nta muntu uba ukibona ibyiza cyangwa ubwiza bw’uwo mugabo cyangwa umugore, cyangwa yanabibona akaba atemerewe kuba yabimubwira.

Ugasanga ndetse mu gihe undi muntu yaba abonye ubwiza bw’uwo mugabo cyangwa umugore akanabivuga, bifatwa nko kurengera.

Ariko aha nibaza igitangaza kiba kibaye, kubwira umugabo w’undi mugore ngo ni mwiza, cyangwa umugore w’undi mugabo ngo ni mwiza!

Kuba umuntu yarashatse ntibivuga ko undi muntu atabona ubwiza bwe, ndetse no kubimubwira mba numva nta kurengera biba birimo, cyane cyane ko burya ikintu umuntu yemera akavuga mu ruhame wa mugani azi ko uwo muntu yanashatse, buriya aba ari ibintu bigaragara bidasaba gushishoza.

Hari abo njya numva ngo banabipfuye, ndetse bigakurura intonganya ngo babwiye umugabo/umugore we ko ari mwiza. Ibyo bigatuma niba ari ahantu bari bajyanye bataha batavugana ngo bavuze ko mugenzi we ari mwiza!

Ibi kandi ntibiba gusa kuri ba nyir’ubwite, kuko no muri sosiyete ubona umuntu uvuze ngo uriya mugore/mugabo wa kanaka ni mwiza, bahita bamufata nk’umuhehesi cyangwa umuntu utagira ikinyabupfura, mbese nk’umuntu warengereye cyane.

Hari n’abatinyuka kumubaza ngo “Ubwiza bw’umugabo/umugore w’abandi ububona ute”? Nk’aho uyu nyir’ukubivuga afite ubumuga bwo kutabona!

Nyamara njyewe mba mbona nta gitangaza yakoze nta n’amakosa aba agize. None se niba koko ubwo bwiza abufite, uba uzi ko agenda abusize mu rugo? Cyangwa se gushaka umugabo/umugore, bituma amaso y’abandi ahuma iyo bigeze ku kureba umugore/umugabo wubatse?

Kandi igitangaje, ni uko iyo uwo muntu ari mwiza cyangwa afite ingingo runaka ubona koko ari nziza, na mugenzi we barambagizanya wabona ari byo yabonaga cyane, wenda akanahora abimubwira, cyangwa biri no mu bintu yamukundiye. Nyamara yamugeza mu rugo akumva ko ubwo abandi badafite amaso yo kureba ku buryo na bo babibona!

Abandi bitiranya kubwira umuntu ko ari mwiza no kuba umuhehesi!

Kubwira umuntu ko ari mwiza, cyangwa urugingo runaka rwe ari rwiza, ntaho bihuriye n’ubuhehesi kuko hari n’igihe uwo muntu aba abimubwiye ari ahantu bahuriye atanateganya ko bazongera guhura, ahubwo akabimubwira kuko afite umuco wo gushima ibyo abona ari byiza akanabibwira nyirabyo.

Ibi njyewe numva aho kubabaza umuntu ahubwo byanamushimisha, yaba nyir’ubwite cyangwa uwo bashakanye. Wari ukwiye kubyishimira ko ufite umuntu w’agaciro ufite ubwiza runaka n’undi muntu utari umugabo/umugore we abona.

Itangazo ritangazwa buri munsi mu masaha y’umugoroba, na Minisiteri y’Ubuzima mu Rwanda, riba rigaragaza uko ibipimo bya Covid-19 bihagaze mu Rwanda. Indimi zikoreshwa ni Ikinyarwanda, Igifaransa ndetse n’icyongereza.

Baba bamenyesha ibipimo byafashwe uwo munsi, abakize uwo munsi, abamaze gukira bose muri rusange, abarwaye uwo munsi, abamaze kurwara bose muri rusange, abapfuye uwo munsi, abo icyo cyorezo kimaze guhitana kuva cyagera mu Rwanda ndetse n’abakirwaye bose.

Ibi byose byandikwa muri izo ndimi 3. Iyo hagize umuntu cyangwa abantu bahitanywe n’icyo cyorezo, basoza itangazo bihanganisha imiryango yabuze ababo, ariko utungurwa no gusanga ibyo babyandika mu ndimi 2 ari zo Ikinyarwanda n’Icyongereza, Igifaransa kikaburizwamo.

Ibi byatumye nibaza niba nta miryango y’abavuga Igifaransa ijya ibura ababo bahitanywe n’icyorezo cya Covid-19, cyangwa se mu gifaransa batajya bihanganisha imiryango yagize ibyago.

Nibaza ntashidikanya ko kuba abashinzwe gutanga aya makuru barahisemo gukoresha indimi 3 byari ukugira ngo bafashe Abanyarwanda ndetse n’abandi bose bifuza kumenya amakuru ajyanye na Covid-19 uko ahagaze mu Rwanda, utumva ururimi runaka akabyumva mu rundi. Kandi ni byiza ndetse bifite n’akamaro kanini kuko iki ari ikibazo gikurikiranwa n’abantu bose ku rwego rw’Isi.

Ibi bisobanura ko hari umenya aya makuru yumva ururimi rw’Igifaransa gusa. None se kuki uyu we bahisemo kumuha amakuru y’igice? Bisobanuye ko asoma yagera ku musozo w’urupapuro mu gihe hari uwahitanywe na Covid-19, ntamenye ibyo bavuze.

Ibi mbifata nk’ikosa mu itumanaho. Sinavuga ko biba byabaye byinshi ku buryo babura aho bandika.

Ibyiza mbona ari uko baha abantu amakuru yuzuye kuva mu ntangiriro kugeza ku musozo. Cyangwa hagakoreshwa indimi 2 gusa, ubwo bikamenyekana ko hamenyeshwa abantu bakoresha indimi 2 gusa, aho gutanga amakuru igice, kandi ku rupapuro rumwe.

Reka nsoze nihanganganisha imiryango yose y’abamaze kubura ababo bahitanywe na Covid-19.

Icyakora nyuma y’uko iyi nkuru isohotse, ku mugoroba wo ku Cyumweru hasohotse itangazo rigaragaza uko icyorezo cya COVID-19 gihagaze mu Rwanda, harimo uwapfuye ndetse hongeweho n’Igifaransa mu butumwa bwo kwihanganisha umuryango we. Kanda HANO urebe itangazo rishya ririho n’Igifaransa..