Abanyeshuri bitegura gusubira ku ishuri bari mu bashimishijwe no kumanuka kw’ibiciro by’ingendo

Ku ngendo zo mu Mujyi wa Kigali, umugenzi azajya yishyura amafaranga 22 ku kilometero kimwe, mu gihe mbere hari hashyizweho amafaranga 28,9 ku kilometero kimwe.

Abo Kigali Today yasanze muri Gare ya Musanze bagaragaza ko bishimiye igabanuka ry’ibyo biciro ni abiganjemo abanyeshuri bitegura gusubira mu masomo, aho bavuga ko izamuka ry’ibiciro by’ingendo byari byabateye impungenge zabagiraho ingaruka zo kuba basiba ishuri.

Uwitwa Tuyishime Elysée yagize ati “Ubu ngiye gusura abantu i Rubavu, ntanze amafaranga 1,300 avuye ku 1,900 byari ibibazo cyane turishimye Leta yakoze cyane.”

Ati “Twari dutangiye kwibaza uburyo tuzajya ku ishuri kubera izamuka rikabije ry’ibiciro by’ingendo. Nawe reba amafaranga y’ishuri, urebe n’ibindi bikoresho, twari dufite impungenge zikomeye zo kubura uburyo tuzajya ku ishuri”.

Mugenzi we witwa Ntirandekura Elie ati “Amafaranga 600 yagabanutse mu rugendo Musanze-Rubavu ni menshi, nkatwe abanyeshuri bidufitiye akamaro, twibazaga uburyo tuzagera ku kigo nkatwe twiga kure aho dutega na moto kugira ngo tugere ku ishuri bikatuyobera, ariko ubu Leta yadukoreye ibintu byiza imanura ibiciro”.

Uretse abanyeshuri bishimiye icyo cyemezo, n’abagenzi bakora indi mirimo baremeza ko bari babangamiwe n’izamuka ry’ibiciro by’ingendo.

Abagenzi bagaragaye bajya gutega imodoka batijujutira ibiciro kuko byamanuwe

Uwase Cecile ati “Mvuye i Kigali nderekeza i Gisenyi nishyuye amafaranga 3,310 mu gihe byari hejuru y’amafaranga 4000, iki giciro turagikunze twari twabifashe nabi ariko ubu ni byiza ingendo zirakorwa neza”.

Kabonero Charles ati “Uko byagenda kose Abanyarwanda turishimye kubera igabanuka ry’ibiciro by’ingendo, Leta yabikemuye Imana ishimwe”.

Abashoferi na bo baragaragaza ko igabanuka ry’ibiciro by’ingendo bitabateye ikibazo nk’uko umushoferi witwa Manigaba Aphrodis yabitangarije Kigali Today ati “Ni byiza kugabanyiriza abagenzi, twe nta kibazo biduteye kuko inyungu z’abaturage ari zo nyungu zacu, nibatugane tubakirize yombi”.

Umuyobozi Mukuru w’Urwego Ngenzuramikorere (RURA), Lt Col Patrick Nyirishema, yasobanuye igabanuka ry’ibi biciro yifashishije urugero nk’aho yavuze ko umuntu uvuye i Kigali ugiye i Musanze yagombaga kwishyura Amafaranga 2,340 none hakurikijwe ibiciro bishya azishyura amafaranga 1930.

Yatanze urundi rugero rw’aho nka Kigali – Nyagatare yari amafaranga 4,290 none akaba yabaye 3,390. Yasobanuye kandi ko kuva i Kigali ujya i Muhanga yari 1,210 none akaba yabaye 1030.

Gare ya Musanze

Lt Col Patrick Nyirishema uyobora RURA yasobanuye ko amafaranga yagabanutseho ari inyunganizi Leta yashyizemo.

Ati “Ni ukuvuga ngo ikinyuranyo hagati ya 25,9 na 21 ni inyunganizi Leta y’u Rwanda yashyizemo, nkaba ngira ngo dushimire Leta y’u Rwanda uburyo yorohereza umuturage cyane cyane muri ibi bihe bitoroshye bya COVID-19, mu by’ukuri icyo kinyuranyo ni inyunganizi Leta y’u Rwanda yahaye wa muturage igihe yagiye mu rugendo”.

Mu muhango w’irahira ry’abasenateri bashya uherutse kuba, Perezida Paul Kagame yagarutse ku kibazo cy’izamuka ry’ibiciro cyari kimaze iminsi kivugwa, avuga ko intambwe yo kuba abaturage batemberera aho bashaka hirya no hino mu gihugu, ari ibyo kwishimira nyuma y’igihe bari bamaze batemerewe kuva mu rugo mu rwego rwo kwirinda COVID-19, avuga ko ikibazo cy’ibiciro by’ingendo cyigwaho kikabonerwa umuti.

Kanda HANO urebe ibiciro bishya by’ingendo

Ibyo biciro biratangira kubahirizwa guhera kuri uyu wa Gatanu tariki ya 23/10/2020. Icyakora hari ahagiye hagaragaramo ko hatangajwe imibare itari yo, RURA ikaba yarasobanuye ko hagiye habamo kwibeshya, kandi ko birimo kunozwa.

Dore uko ibyo biciro bihagaze:

Kanda HANO urebe ibiciro byari byashyizweho mbere bitavuzweho rumwe

Perezida wa Repubulika yagarutse ku kibazo cy’ibiciro by’ingendo aho abantu bamaze iminsi bavuga ko ingendo mu modoka zitwara abantu mu buryo bwa rusange zihenze, na we koko avuga ko ari ikibazo gifite ishingiro.

Ati "Maze iminsi mbona abantu batakamba ku kibazo cy’ingendo ko bibahenda iyo bava ahantu bajya ahandi. Icyo ni ikibazo kubera ko na none nyine umuntu akurikije amateka y’iki cyorezo duhanganye na cyo, uko tugenda tugisohokamo, dutera intambwe, ntabwo ibintu byose byahera ko bisubira uko byari bimeze."

Perezida wa Repubulika akomeza agira ati "Ni nako icyo usaba abantu na cyo cyaba kiganisha muri uko kwiyubaka, gutera intambwe kurusha guhera imbere, ugahera aho ugeze ukagerageza gutera imbere."

Perezida wa Repubulika yijeje ko ibyo bibazo biri bwigweho harebwe ibishoboka. Ariko na none yavuze ko n’ubwo abantu binubira ibiciro by’ingendo, kuba bagenda ahubwo ari indi ntambwe yatewe kubera ko mbere ntawagendaga.

Ati "Ariko na none bivuze ko aho abantu kumva ko kugenda bibahenda bibabangamiye ubwo na yo ni intambwe twateye kubera ko aho tuva ni uko ahubwo ntawari ukwiye kuba agenda. Ubu twavuye aho tutagendaga, tugeze aho tugenda ariko bikatuvuna ubwo turashaka ikibazo aho kiri kugira ngo abantu bashobore kugenda hanyuma na cyo dushake umuti wacyo ariko icyo kiroroshye kurusha uko twicaraga mu rugo ntìtugire aho tujya ahubwo."

Inkuru bijyanye:

Perezida Kagame yakiriye indahiro z’Abasenateri bashya (Amafoto)

Itangazo RURA yashyize ahagaragara ku mugoroba wo kuri uyu wa Gatatu tariki 21 Ukwakira 2020 riravuga ko muri iki gihe Leta izatanga ubwunganizi ku giciro cy’ingendo, mu rwego rwo kunganira abagenzi kubera ingaruka z’ihungabana ry’ubukungu ryatewe n’icyorezo cya Coronavirus.

RURA kandi yatangaje ko ibiciro by’ingendo rusange byahinduwe, ibiciro bishya bikazatangira gukurikizwa guhera ku wa Gatanu tariki ya 23 Ukwakira 2020.

Ibiciro bishya biteye ku buryo bukurikira:

Ku ngendo zihuza Intara, umugenzi azajya yishyura amafaranga y’u Rwanda 21 ku kilometero kimwe,

Ku ngendo zo mu Mujyi wa Kigali, umugenzi azajya yishyura amafaranga 22 ku kilometero kimwe.

Ibiciro RURA yari yatangaje tariki 14/10/2020 byavugaga ko ku ngendo zihuza Intara, umugenzi azajya yishyura amafaranga y’u Rwanda 25,9 ku kilometero kimwe, naho ku ngendo zo mu Mujyi wa Kigali, umugenzi akaba yari yashyiriweho ko azajya yishyura amafaranga 28,9 ku kilometero kimwe.

Umuyobozi Mukuru wa RURA, Lt Col Patrick Nyirishema, yasobanuye igabanuka ry’ibi biciro yifashishije urugero nk’aho yavuze ko umuntu uvuye i Kigali ugiye i Musanze yagombaga kwishyura Amafaranga 2,340 none hakurikijwe ibiciro bishya azishyura amafaranga 1930.

Yatanze urundi rugero rw’aho nka Kigali – Nyagatare yari amafaranga 4,290 none akaba yabaye 3,390.

Yasobanuye kandi ko kuva i Kigali ujya i Muhanga yari 1,210 none akaba yabaye 1030.

Lt Col Patrick Nyirishema uyobora RURA yasobanuye ko amafaranga yagabanutseho ari inyunganizi Leta yashyizemo.

Mu kiganiro bagiranye na RBA, Minisitiri w’Ubutegetsi bw’Igihugu Prof. Shyaka Anastase yasobanuye ko ibiciro byari byashyizweho byahagaritswe nyuma yo gusuzumwa na Guverinoma, ndetse bikaba byahinduwe mu rwego rwo kubahiriza ibyifuzo by’abaturage.

Iki cyemezo gifashwe nyuma y’uko abantu batandukanye bari bakomeje kwinubira ibi biciro by’ingendo byari byazamutse, bakinubira ko hirengagijwe amikoro adahagije ya benshi muri iki gihe ubukungu bwahungabanyijwe n’icyorezo cya COVID-19. Abandi bibazaga impamvu ibiciro by’ingendo byazamuwe nyamara ibiciro by’ibikomoka kuri Peteroli ku rwego mpuzamahanga byaramanutse, ahandi ndetse Leta zikorohereza abaturage mu bijyanye n’ingendo.

Ubutumwa bwanyujijwe ku rukuta rwa Twitter rw’ibyo biro buravuga ko Minisitiri w’Intebe hamwe n’inzego zibishinzwe bazabifataho umwanzuro mu gihe cya vuba.

Twakiriye ibibazo by’abaturage birebana n’izamuka ry’ibiciro byo gutwara abantu. Minisitiri w’Intebe hamwe n’inzego zibishinzwe bazabifataho umwanzuro mu gihe cya vuba.

— Office of the PM | Rwanda (@PrimatureRwanda) October 20, 2020

Ubu butumwa bw’Ibiro bya Minisitiri w’Intebe bikomeje kugaragara ko bwakiriwe neza n’abatari bake, dore ko kuva ibiciro bishya byashyirwa ahagaragara abantu batahwemye kubyinubira no kubyamagana bagaragaza ko bitari mu nyungu z’umuturage.

Ni ibiciro bigaragaza ko ikiguzi cy’urugendo cyiyongereye ugereranyije n’uko cyari gihagaze mu bihe bya mbere ya COVID-19, benshi mu babyamaganye bakaba baragaragaje ko bitari bikwiye ko ibiciro bizamurwa muri iki gihe abantu bugarijwe n’ibihombo byatewe n’icyorezo cya COVID-19.

Kanda HANO urebe uko ibiciro bishya by’ingendo mu modoka za rusange bihagaze

Hari imwe mu mihanda yo muri Kigali yongerewe ibiciro by’ingendo aho kubigabanaya

Ibyo bisobanuro byatanzwe nyuma y’aho abaturage bagaragarije ko batishimiye iryo zamuka ry’ibiciro by’ingendo, ahubwo bakifuza ko byasubira uko byari bimeze imbere ya Covid-19.

Mu kiganiro Umuyobozi Mukuru wa RURA, Lt Col Patrick Nyirishema, yagiranye na RBA ku wa 18 Ukwakira 2020, yasobanuye ko kuba ibiciro byariyongereye kuri iyo mihanda byatewe n’uko uburebure bwayo butari buhuye n’ubwabazwe mbere.

Ati “Mu Mujyi wa Kigali hari ‘lignes’ 57, muri zo hari eshanu aho ibiciro byiyongereye, bikaba byaratewe n’uko ibirometero by’iyo mihanda byiyongereye kandi hari hakigenderwa ku biciro bya 2018. Habayeho rero gusubiramo gupima imihanda”.

Ati “Urugero nk’umuhanda Nyacyonga-Nyabugogo, twawubariraga Km 10 ariko dusubiyeyo kugenzura dusanga ufite Km 14 na metero 100. Hari kandi n’umuhanda Kimironko-Nyabugogo wabarirwaga Km 12 dusanga ufite Km 13 na metero 500. Hari n’umuhanda Batsinda-Nyabugogo n’uwa Kanombe-Remera unyura Kibaya, iyo na yo hari icyiyongereyo, ariko mu Ntara ntaho byazamutse”.

Akomeza avuga ko icyo kibazo cy’imihanda itari ijyanye n’ibiciro yahawe cyari kizwi, gusa ngo hari hataragera ko bihindurwa.

Ati “Abatwara abagenzi bari barabitubwiye ariko tubasaba kwihangana kugera igihe ibiciro bizasubirirwamo muri rusange. Ikibazo twari tukizi ariko twashakaga kubihuza n’iri hinduka ry’ibiciro tunakosora aho twari twibeshye ku burebure bw’iyo mihanda”.

Ku kijyanye n’uko hari abavuga ko RURA yaba irengera abashoramari mu gutwara abagenzi kurusha abaturage, uwo muyobozi avuga ko atari byo kuko impande zombi zitabwaho.

Ati “Byaravuzwe ariko si byo, turebye nko mu gihe cya Covid-19, bisi yari isanzwe itwara abantu 30 ntiyarenzaga 15, kuki igiciro kitikubye inshuro ebyiri? Ni uko tuba tuzirikana umuturage ngo tutamuremereza cyane. Nyuma y’amezi hafi atanu bakora gutyo, twahinduye ibiciro twitaye ku bushobozi bw’umuturage ariko tunareba ko utanga serivisi atazagera aho ahagarika”.

Lt Col Patrick Nyirishema, Umuyobozi Mukuru wa RURA

Ati “Iyo udashyizeho igiciro gikwiye, tugera aho ushinzwe gutanga serivisi bimunanira akaba yahagarika ntituyibone, burya serivisi ihenze kurusha izindi zose ni itaboneka. Ni yo mpamvu twita ku muturage kugira ngo habe igiciro kiri hasi bishoboka, ariko kandi kitari hasi cyane ku buryo utanga serivisi bimunanira”.

Lt Col Nyirishema yavuze kandi ko ubuyobozi bwumva uburemere bw’ibibazo byatewe na Covid-19 bituma abaturage bagira ubushobozi buke, ari yo mpamvu ngo bashakisha icyakorwa kugira ngo umuturage adakomeza kuremererwa, ariko ngo barakomeza kubiganiraho n’izindi nzego, gusa ngo ibiciro ntibyahita byongera kuvugururwa kuko biba byarizweho.

Ibiciro bishya byo gutwara abagenzi mu gihugu hose byasohotse ku wa 15 Ukwakira 2020, benshi mu baturage bakaba bari bizeye ko bizasubizwa ku bya mbere ya Covid-19 ariko si ko byagenze.

Abayobozi muri RURA basobanuye impinduka zabaye mu biciro byo gutwara abagenzi mu modoka mu buryo bwa rusange

Byasobanuwe na Dr Benjamin Rutimirwa, umuyobozi ushinzwe ibiciro muri RURA ndetse na Anthony Kulamba, ushinzwe serivisi yo gutwara abantu n’ibintu muri RURA, ubwo bari mu kiganiro Ubyumva Ute cya KT Radio ku wa 15 Ukwakira 2020, aho bagarutse ku ihinduka ry’ibiciro byo gutwara abagenzi muri rusange.

Inama y’Abaminisitiri iheruka yemeje ko imodoka zitwara abagenzi bicaye gusa zongera gutwara 100% by’umubare w’abantu zemererwa gutwara. Naho ku modoka zifite imyanya y’abagenda bicaye n’abagenda bahagaze, zemerewe gutwara 100% by’umubare w’abantu bicaye, na 50% by’abagenda bahagaze. Ni icyemezo abaturage bakiriye neza ariko bagumana amatsiko yo kumenya niba ibiciro by’ingendo na byo bitazagabanuka bigasubira ku bya mbere ya Covid-19, cyane ko n’ibiciro by’ibikomoka kuri peteroli byagabanutse.

Asobanura iby’iryo hinduka ry’ibiciro ku buryo abaturage batari biteze, Dr Rutimirwa yavuze ko ibyo biciro n’ubundi byari bigejeje igihe cyo kuvugururwa.

Agira ati “Icya mbere ni uko igiciro cyari kiriho mbere ya Covid-19 cyatangiye gukurikizwa muri 2018, byari biteganyijwe ko cyongera gusuzumwa nyuma y’imyaka ibiri hagamijwe kureba ko ibiciro by’ibyo abatwara abagenzi bakenera ku isoko bitazamutse. 2019 irangiye byakozweho inyigo kugira ngo turebe ko abatwara abagenzi bakora badahomba”.

Ati “Bahombye twabura imodoka dutega bityo n’imirimo igahagarara. Muri iyo nyigo rero byagaragaye ko ibiciro bigomba kuzamuka, aho hari imbere ya Covid-19. Bivuze ko n’iyo icyo cyorezo kitari kuza ibiciro n’ubundi byari kuvugururwa bikamera nk’uko byashyizweho uyu munsi, icyabaye ni uko hakuweho ibiciro byazamuwe kubera Covid-19, hajyaho ibyari biteganyijwe”.

Indi mpamvu ngo ni uko gutwara abagenzi bitahagaze igihe kinini muri Covid-19, aho itangiriye bagatwara 50%, nk’uko Dr Rutimirwa abisobanura.

Ati “Urwego rwo gutwara abagenzi rwakomeje gukora muri Covid-19 ariko imodoka zitwara abantu kuri 50% mu gihe igiciro cyari cyiyongereyeho 45%, bivuze ko bakoraga bahomba. Gusa ibyo byose ntitwabishyira mu giciro kiriho ubu kuko twabangamira umugenzi, ariko na none yakwishimira ko cyagabanutse”.

Indi mpamvu yatumye habaho izamuka ry’ibiciro ngo ni nk’aho imihanda yavuguruwe ikaba yakongerwa uburebure ndetse n’imishya yahawe imodoka zitwara abagenzi.

Ikindi ngo kuba igiciro cy’ibikomoka kuri peteroli cyaragabanutse, ngo ntibihagije kugira ngo ibiciro by’ubwikorezi bigabanuke, ibyo umuturage yavugaga ko hashyirwamo ‘imiyaga’, Dr Rutimirwa na byo yagize icyo abivugaho.

Ati “Muzi ko kilometero imwe yo mu cyaro yavanywe ku mafaranga 21 igashyirwa kuri 25.9, ni ukuvuga ko kuba lisansi yaragabanutse bidahagije kuko abakora ubwikorezi basora, bagura amapine, guhemba abakozi n’ibindi. Ibyo abantu bavuga rero, ntiwashyira imiyaga mu modoka ngo igende nta lisansi, ntiwahuhamo imiyaga ngo igende nta pine, byose bigomba kugurwa”.

Ibiciro bishya byatangiye gukurikizwa kuri uyu wa Kane tariki 15 Ukwakira 2020, henshi bikaba byagabanutse gato ugereranyije n’ibyari byashyizweho kubera Covid-19, ariko hari n’aho byagiye hejuru yabyo.

Kanda HANO urebe uko ibiciro bishya by’ingendo mu modoka za rusange bihagaze.

Kuri uwo mwanzuro, Inama y’Abaminisitiri yongeyeho ko amabwiriza arambuye kuri iyi ngingo azatangwa n’Urwego Ngenzuramikorere (RURA). Ico gihe RURA na yo yahise itangaza ko amabwiriza ajyanye n’iyo ngingo azasohoka ku wa Kane tariki 15 Ukwakira 2020.

Ayo mabwiriza yasohotse ndetse atangira kubahirizwa mu gitondo tariki 15 Ukwakira 2020. Ku bijyanye n’ibiciro, hari aho abagenzi bavuga ko bishimye kuko borohewe n’ibiciro byagabanutse, mu gihe bamwe mu batwara abagenzi mu buryo bwa rusange bo bavuga ko barimo guhomba cyane ku buryo biramutse bidasubiwemo bashobora no kureka gukomeza gutwara muri icyo cyerekezo.

Urugero rw’ibiciro bishya byashyizweho na RURA, ni nk’aho ubu urugendo kuva i Nyamata mu Bugesera ugana i Nyanza mu Karere ka Kicukiro ari 560Frw, mbere ya Covid-19 yari 500Frw, mu gihe yari 750Frw mu gihe cya Covid-19.

Abagenzi bavuga ko icyo giciro bo bakishimiye kuko bari bamaze no kumenyera 750Frw, ariko ikibazo ngo gifitwe n’abakata amatike. Kubona ibiceri 40Frw byo kugarura mu gihe umuntu yishyuye 600Frw ngo birimo kubagora, bikaba byabateranya n’abagenzi, nibura ngo iyo RURA yuzuza 600Frw.

Uwitwa Muligande Fidele ushinzwe gukata amatike muri imwe mu makompanyi atwara abagenzi yagize ati “Ubu ibi biceri 40Frw birazana ibibazo hagati yacu n’abakiriya kuko biragoye kubibona. Nk’ubu twavunjishije ibihumbi ijana, uwatuvunjiye adukata ibihumbi bine by’iyo serivisi, ariko ibyo biceri byose nka saa mbili byari bishize kandi kubona ibindi ni ikibazo, gusa ibyiza ni ku bakiriya bishyura na ‘Momo pay’ bo bishyura ayo 560 Frw nta kibazo kindi”.

Nshuti Alphonse ushinzwe ibijyanye n’ingendo mu yindi sosiyete itwara abagenzi we avuga ko ibiciro bishya byashyizweho na RURA byabashyize mu gihombo kuko nko kuva i Nyamata ujya ku Ruhuha, ngo ni 740Frw, mbere ya Covid-19 byari 900Frw naho mu gihe cya Covid-19 kuko imodoka zitabaga zuzuye itike yo kuva i Nyamata kugera ku Ruhuha byari 1330 Frw. Yongeyeho ko n’abagenzi bagana ku Ruhuha, abenshi bavuga ko 900 Frw cyari igiciro gikwiriye kuko ari umuhanda w’igitaka kandi ubona utari mwiza.
Umwe mu bagenzi bagana ku Ruhuha wari muri Gare ya Nyamata, we yavuze ko yumva bimushimishije kuba bagabanyije igiciro cy’itike, ati “Twe twishimye, ubundi twumvaga twararenganye,bakatubwira ko baduca menshi kubera umuhanda udakoze kandi atari amakosa yacu, ahubwo abagabanyije ibiciro bakoze twe twumvaga twararenganye.”

Kuva i Nyamata ujya ahitwa i Rilima itike ni 680Frw mbere ya Covid-19 yari 740 Frw naho mu gihe cya Covid-19 byari 1100 kuko abantu babaga batuzuye imodoka. Umugenzi witwa Uwimana Agnes waganaga i Rilima aturutse iI Nyamata yavuze ko bo bishimiye cyane igabanuka ry’igiciro cy’itike.

Abatwara abagenzi bagana ahitwa Ramiro bo ngo batangajwe n’uko igiciro gishya ari 330 Frw kuva i Nyamata ugera aho Ramiro. Ubundi ngo mbere ya Covid-19 itike yari 500 Frw, mu gihe cya Covid-19 biba 750 Frw, kuko ngo urebye urugendo rwaho rujya kureshya no kuva i Nyamata ugera i Nyanza none ngo babigize 330Frw.

Ibyo rero ngo ni byiza ku bagenzi,kuko bo igiciro kiraboroheye cyane, ariko ngo biragoye cyane ku batwara abagenzi, kuko ntacyo bakuramo ngo na mazutu ntiyavamo.

Umwe muri abo bashoferi utashatse kuvuga amazina ye yagize ati “Guhera mu gitondo twari twaziparitse,uribaza kujya Ramiro kuri 330 Frw ukumva bitazahura, kuko yaba Mazutu irahenda, ubwishingizi burahenze ndetse na ‘Controle technique’yariyongereye,mu by’ukuri ntibyoroshye gukora igiciro kigumye gutyo, ariko ndibaza ko abayobozi bacu na bo babyumva bakatuvuganira bigahinduka, naho ubundi nta kintu kirimo”.

Kanda HANO urebe uko ibiciro bishya by’ingendo mu modoka za rusange bihagaze

RURA ivuga ko kuri iyo tariki ya 15 Ukwakira 2020, ari bwo hazanatangazwa amabwiriza avuguruye yo kwirinda no gukumira COVID-19 muri serivisi zo gutwara abantu mu buryo bwa rusange.

Ibi bivuze ko imodoka zitwara abagenzi mu buryo rusange, zikomeza gutwara 50% y’abo zagenewe gutwara kugeza ku wa kane tariki ya 15 Ukwakira 2020.

Inama y’Abaminisitiri yo ku wa 12 Ukwakira 2020, yanzuye ko ingendo mu modoka zitwara abantu mu buryo bwa rusange (public transport) zizakomeza.

Ku modoka zifite imyanya y’abagenda bicaye gusa, zemerewe gutwara 100% by’umubare w’abantu zemererwa gutwara. Ku modoka zifite imyanya y’abagenda bicaye n’abagenda bahagaze, zemerewe gutwara 100% by’umubare w’abantu bicaye, na 50% by’abagenda bahagaze. Amabwiriza arambuye kuri iyi ngingo azatangwa n’ikigo cya RURA.

Nyuma y’uyu mwanzuro, mu gitondo cyo kuri uyu wa Kabiri tariki 13 Ukwakira 2020, hari bamwe mu bagenzi bavugaga ko niba imodoka zemerewe gutwara umubare ungana n’imyanya zagenewe, bikwiye no kujyana no kugabanya igiciro.

Urugero, nko mu modoka ziva i Nyamata mu Karere ka Bugesera zijya mu Mujyi wa Kigali, hari abagenzi babwiraga abashoferi ko badashobora kwishyura amafaranga 750 Frws bajyaga bishyura mu gihe mu modoka hagendamo ½ cy’abo yagenewe gutwara, bakavuga ko bakwiye kwishyura amafaranga 500 Frws bari basanzwe bishyura mbere y’izi ngamba.

Abashoferi bo bavugaga ko bagitegereje icyo RURA iza kugena ku bijyanye n’igiciro cy’urugendo, kuko imashini bakoresha batanga amatike zari zikibereka ko igiciro cy’urugendo (Nyamata- Nyanza ya Kicukiro) ari amafaranga 750Frws.