Ibi Umukuru w’Igihugu yabigarutseho mu ijambo rye ry’uyu munsi mpuzamahanga wo kwita ku ngagi, umunsi wahuriranye n’uwo kwita izina abana 24 b’ingagi, Kwita Izina bikaba bimaze kumenyerwa haba mu Rwanda ndetse no mu mahanga.

Perezida Kagame yavuze ko ubwitange bw’abo bakozi ari bwo igihugu gikesha kuba haravutse abana b’ingagi 24 biswe amazina kuri uyu wa Kane tariki 24 Nzeri 2020.

Perezida Kagame yashimiye n’ikipe ya Arsenal nk’umufatanyabikorwa mwiza w’u Rwanda, iyi kipe ikaba yongeye kubigaragaza kuri uyu wa Kane ubwo bamwe mu bakinnyi bayo bagiraga uruhare mu kwita amazina abana b’ingagi.

Muri gahunda ya Visit Rwanda iyo kipe ifatanyamo n’igihugu cy’u Rwanda, abasore batatu bakina muri iyo kipe batanze ubutumwa bujyanye n’umuhango wo kwita Izina ari bo Pierre-Emeric Aubameyang, Héctor Bellerin na Bernd Leno.

Perezida Paul Kagame yashimiye abaturiye Pariki uburyo bayibungabunga banakira neza ba mukerarugendo bayigana.

Impamvu zo guha umwanya abakora mu mapariki bakita izina abana b’ingagi kandi yagarutsweho n’Umuyobozi Ushinzwe Ubukerarugendo mu Rwego rw’Igihugu rw’Iterambere (RDB) Kariza Belise.

Yavuze ko imwe muri izo mpamvu ari uburyo bwo kugaragariza Abanyarwanda akazi gakomeye gakorwa n’abakozi ba Pariki badasiba kubungabunga ubuzima bw’inyamaswa zo muri Pariki, indi mpamvu iba iyo kwirinda guteranyiriza abantu benshi hamwe mu rwego rwo kwirinda icyorezo cya COVID-19.

Yagize ati Nk’uko mubizi, abantu benshi ntibashobora kwitabira uyu muhango mu rwego rwo kwirinda ikwirakwira rya COVID-19, ikindi twifuje ko uyu mwaka twagaragaza akazi gakorwa mu ma parike twigisha Abanyarwanda uburyo abakozi ba Pariki babungabunga inyamaswa, ku buryo n’ibyo tumaze kugeraho mu bukerarugendo no kubungabunga ibinyabuzima byo mu gasozi ari bo babigiramo uruhare cyane”.

Abana b’ingagi biswe amazina ku nshuro ya 16 bavuka mu miryango 12, ari yo Agashya, Amahoro, Kuryama, Kwitonda, Migisha, Mafunzo, Muhoza, Musirikare Mutobo, Pablo, Sabyinyo na Urugwiro.

Mu bana 24 biswe amazina, barimo abahungu 15 mu gihe abakobwa ari 9, aho bahawe amazina anyuranye arimo Amabwiriza, Nyiramajyambere, Amarembo, Nkomezamihigo, Kazeneza, Uwacu, Umuyobozi, Umuganga, Ihogoza, Izabukuru, Ubushobozi, Ishya n’andi.

Pariki y’igihugu y’Ibirunga yamamaye kubera ingagi ariko ikaba inakungahaye ku rusobe rw’ibinyabuzima birimo inzovu, imbogo zo mu misozi miremire, inyoni n’izindi nk’uko byatangajwe na Uwingeri Prosper, Umuyobozi wa Pariki y’igihugu y’Ibirunga.

Yavuze ko ingagi ziba muri Pariki y’ibirunga ari 360 aho zibarizwa mu miryango 21, avuga ko n’ubwo kwita izina bibaye mu bihe bikomeye byo kwirinda icyorezo cya COVID-19, ko ntacyo bihungabanya ku mutekano w’ingagi, kuko abakozi bakomeje gutunganya akazi kabo nk’uko bisanzwe, asaba ubufatanye bwa buri wese mu kubungabunga Pariki y’Ibirunga, hafatwa n’ingamba zo gusigasira ibyo ingagi zagejeje ku Banyarwanda.

Ubuyobozi bw’Intara y’Amajyaruguru burishimira iterambere izo ngagi zikomeje kugeza ku baturiye Pariki n’Abanyarwanda muri rusange nk’uko byagaragajwe n’Umuyobozi w’iyo Ntara, Gatabazi JMV.

Ati “Turishimira iterambere ubukerarugendo bwa Pariki bumaze kugeza ku batuye Intara y’Amajyaruguru aho tubara amahoteli asaga 70, amenshi akaba yubatse hano mu ntanzi z’ibirunga, aho yashoboye guha akazi abaturage ibihumbi n’ibihumbi atanga imirimo inyuranye, kandi na ba nyirayo bakaba bafasha n’abaturage mu mibereho myiza yabo.

Arongera agira ati “Urwego rw’igihugu rushinzwe iterambere (RDB), buri mwaka rugena amafaranga asaranganywa abaturage baturiye pariki. Uyu mwaka nyiri izina bakaba barashoboye gutera inkunga imishinga 35 irimo 20 y’ubuhinzi n’ubworozi, ayo mafaranga kandi yagiye yubaka ibikorwa remezo binyuranye birimo amashuri, amavuriro, imihanda n’ibindi.

Abana b’ingagi biswe amazina ni abavutse kuva muri Kamena 2019 kugera muri Nyakanga 2020, aho abise amazina ari abakozi banyuranye bakora muri Pariki y’igihugu y’ibirunga no muri Pariki ya Nyungwe.

Abo ni Hector Bellerin wise umwana w’ingagi IRIZA bivuga umwana wavutse ari uwa mbere, Pierre-Emerick Aubameyang yise umwana w’ingagi IGITEGO, na Bernd Leno wise umwana w’ingagi MYUGARIRO.

Aubameyang yasobanuye ko iyi ngagi yayise Igitego kuko asanga abantu bakwiye gukorera hamwe nk’ikipe kugira ngo babashe gutsinda ibitego byinshi kandi bishya, by’umwihariko mu rugendo rwo kubungabunga ingagi.

Mugenzi we Hector Bellerin yavuze ko ingagi yayise Iriza bisobanuye umwana wa mbere uvutse mu muryango.

Ati "Iyo uri umwana wa mbere mu muryango wiyumvamo inshingano, kandi koko dufite inshingano yo kubungabunga ibinyabuzima byo muri Pariki."

Ati "Agakobwa keza IRIZA bizanshimisha kukubona."

Bernd Leno na we yasobanuye impamvu yise umwana w’ingagi MYUGARIRO. Ati "Uyu mwana mwise myugariro nshaka kwibutsa ko tugomba kurinda ibidukikije cyane cyane muri iki gihe. Bizanshimisha cyane guhura n’uyu mwana w’umuhungu."

Umuhango wo Kwita Izina abana b’ingagi umwaka ushize wari witabiriwe n’ibyamamare bitandukanye, harimo abakina filime, abahoze bakina umupira w’amaguru ndetse n’abahanzi, nk’uko bigaragara muri iyi Video.

Odile Nyirahirwa yashoboraga kuba akora ibindi cyangwa yarabaye umushomeri, ariko yahisemo kuminuza mu rurimi rw’Icyongereza, ubu akaba ayobora ba mukerarugendo baje gusura izi nyamaswa zisa n’abantu zisigaye muri Afurika yo hagati honyine.

Amafaranga y’amahanga (amadolari, amayero,...) azanwa mu Rwanda, yashoboraga kuba ari make kuko hari menshi abanyamahanga baza bitwaje, bakayaha Leta n’abaturage mu rugendo rwo kujya no kuva gusura ingagi.

Icyamamare mu mukino wa Tennis, Maria Sharapova yasuye ingagi mu mwaka wa 2019

Agace k’u Rwanda kegereye ibirunga kashoboraga kuba kazwiho kweza ibirayi gusa, ariko ubu Umujyi wa Musanze uza ku mwanya wa kabiri mu mijyi iteye imbere mu Rwanda, bitewe no kugira amahoteli menshi yakira ba mukerarugendo baza gusura ingagi.

Imishinga 698 iteza imbere abaturage baturiye za pariki, yari kuba ari mike cyangwa ari ntayo, bitewe n’uko amafaranga Leta ikoresha mu kuyiteza imbere, amenshi akomoka ku madevize yavuye mu gusura ingagi.

Iyi mishinga itezwa imbere na 10% by’umusaruro ukomoka ku bukerarugendo buri mwaka, mu kubaka amashuri, amavuriro, inzu z’abatishoboye, gutanga amazi meza ndetse no kongera umusaruro w’ubuhinzi n’ubworozi.

Ikigo gishinzwe Iterambere(RDB) gikomeza kigaragaza ko iyo ingagi ziza kuba zidahari mu Rwanda, 10% ni ukuvuga amafaranga angana na miliyari imwe na miliyoni 400 atari kuba yarabonetse mu mwaka ushize wa 2019 ngo ateze imbere abaturiye za pariki z’u Rwanda.

Kuva mu mwaka wa 2005 kugeza kuri uyu wa kane tariki 24 Nzeri 2020 ubwo u Rwanda ruza kuba rwizihiza ku nshuro ya 16 isabukuru yo kwita izina abana b’ingagi 24, RDB ivuga ko izaba imaze guteza imbere abaturiye za pariki, hakoreshejwe amafaranga y’u Rwanda angana na miliyari eshanu na miliyoni 340.

Iyo ingagi ziza kuba zidahari mu Rwanda, abantu b’ibyamamare ku isi nka Amb Amina Jane Mohammed (wungirije ku buyobozi bwa UN), Louis Van Gaal watoje ikipe ya Manchester, umuririmbyi w’Umunyamerika Ne-Yo, Umunyamideri Naomi Campbell n’abandi, bashoboraga kuba bataramenye u Rwanda cyangwa icyayi n’ikawa byaho.

Ibi byamamare, ni bamwe mu baje mu Rwanda mu mwaka ushize wa 2019 kwita izina abana b’ingagi, kimwe mu bikorwa bisanzwe bihuriza imbaga y’abantu mu Kinigi buri mwaka.

Umuyobozi w’agashami k’Ubumenyi, Ikoranabuhanga no guhanga udushya muri Komisiyo y’u Rwanda (CNRU) ikorana n’Ishami ry’Umuryango w’Abibumbye rishinzwe Ubumenyi, Uburezi n’Umuco(UNESCO), Eng. Dominique Mvunabandi, avuga ko ingagi n’izindi nyamaswa ziba muri pariki z’u Rwanda zifite uruhare ruziguye mu gutuma habaho kurengera ibyanya bikomye by’u Rwanda.

Enjeniyeri Mvunabandi yagize ati "Hajyaga habaho kwangiza ririya shyamba ry’ibirunga ari bwo buturo bw’ingagi, ariko ubu turashima Leta y’u Rwanda ko hamaze kubakwa urukuta rw’amabuye ruritandukanya n’ibice abaturage bahingamo, ndetse no kuhakikiza ibikorwa by’iterambere bibuza abantu gukenera ibiri muri pariki".

Eng. Mvunabandi avuga ko ubushakashatsi CNRU ikora buri myaka 10 muri gahunda yiswe Man and Biosphere(MaB), bugaragaza ko ingagi n’ubuturo bwazo kugeza ubu nta kibazo cyo kwibasirwa bifite, ariko ko ubufatanye bw’ibihugu mu kuzirinda indwara, ba rushimusi, ibikorwa by’ubuhinzi ndetse n’intambara, bugomba kongerwamo imbaraga.

Ishyamba ry’ibirunga n’ibindi byanya bikomye bya Nyungwe na Gishwati-Mukura, ni byo bituma hatabaho ubutayu mu gihugu, bikaba inkomoko y’amazi u Rwanda na Afurika muri rusange bakoresha.

Ni mu gihe uyu muhango wari usanzwe uhuriza abantu benshi mu Kinigi mu Majyaruguru y’u Rwanda ahaherereye izo ngagi zo mu Birunga.

Uyu muhango ugiye kuba ku nshuro ya 16 ukaba uteganyijwe kuba ku wa Kane tariki 24 Nzeri 2020 ku munsi Isi yose yahariye kuzirikana ingagi.

Kuri iyi nshuro abana 24 b’ingagi ni bo bazitwa amazina bakazayahabwa n’ababungabunga Pariki n’ibinyabuzima biyibamo barimo abaveterineri, abarinda Pariki, abayobora ba mukerarugendo, abashyitsi bihariye, n’abandi.

Bamwe mu bana b’ingagi bazahabwa amazina barimo:

Umuhungu wa Aheza

Ni ingagi y’ingabo yavutse tariki 30 Nzeri 2019, nyina akaba yitwa Aheza mu muryango wa Muhoza.

Umukobwa wa Inyungu

Ni ingagi y’ingore yavutse tariki 27 Mutarama 2020 ibyarwa n’ingagi yitwa Inyungu yo mu muryango wa Agashya.

Umuhungu wa Icyeza

Iyi ni ingagi y’ingabo yavutse tariki 17 Ukuboza 2019 ibyarwa n’iyitwa Icyeza yo mu muryango wa Igisha.

Umuhungu wa Iriba

Ni ingagi y’ingabo yavutse tariki 03 Mata 2020, ibyarwa na Iriba yo mu muryango wa Muhoza.

Umukobwa wa Inyenyeri

Iyi ngagi y’ingore yavutse tariki 27 Ukwakira 2019, ibyarwa na Inyenyeri yo mu muryango wa Agashya.

Umukobwa wa Urukerereza

Iyi ngagi y’ingore yavutse tariki 04 Kanama 2019 ibyawe na Urukerereza yo mu muryango wa Igisha.

Umukobwa wa Urwunguko

Yavutse ku itariki ya 27 Gashyantare 2020. Nyina yitwa Urwunguko ikaba ari iyo mu muryango wa Kwitonda.

Umukobwa wa Igihembo

Iyi ngagi y’ingore yavutse tariki 11 Ukwakira 2019 ibyawe na Igihembo na yo yo mu muryango wa Kwitonda.

Umwana wa Ishyaka

Iyi ngagi yavutse tariki 21 Kamena 2020 ibyawe na Ishyaka yo mu muryango wa Mutobo.

Umuhungu wa Akaramata

Yavutse ku itariki ya 12 Nzeri 2019 ibyawe n’iyitwa Akaramata na yo yo mu muryango wa Mutobo.

Umwana wa Isangano

Yavutse ku itariki 27 Gicurasi 2020 abyawe na Karamata yo mu muryango wa Pablo.

Umuhungu wa Mudakama

Iyi ngagi y’ingabo yabyawe na Mudakama tariki 11 Gicurasi 2020 ivukira mu muryango wa Urugwiro.

Umuhungu wa Pasika

Yavutse tariki 05 Nyakanga 2019 ibyarwa n’iyitwa Pasika yo mu muryango wa Mafunzo.

Umwana wa Kanama

Iyi ngagi yavutse tariki 21 Ukwakira 2019 ibyawe na Kanama yo mu muryango wa Kuryama.

Umwana wa Ubufatanye

Iyi ngagi yavutse tariki 11Gicurasi 2020 ibyawe n’iyitwa Ubufatanye yo mu muryango wa Musilikale.

Umukobwa wa Isaro

Yavutse tariki 08 Kanama 2019 ibyawe na Isaro yo mu muryango w’iyitwa Musilikale.

Umwana wa Faida

Yavutse tariki 21 Kanama 2019 ibyawe n’iyitwa Faida yo mu muryango wa Kuryama.

Umwana wa Mahirwe

Iyi ngagi iri mu zihabwa izina kuri uyu wa Kane yavutse tariki 21 Nzeri 2019 ibyawe n’iyitwa Mahirwe yo mu muryango wa Kuryama.

Muri rusange abana bahabwa amazina ku wa Kane tariki 24 Nzeri 2020 bose hamwe ni 24. Hari izo amafoto yazo atabashije gufatwa kuko kuzifotora bitari byoroshye, cyangwa se zikaba zitabonetse hafi mu gihe cyo kuzifotora, nk’uko umwe mu bakozi muri RDB yabisobanuriye Kigali Today.

Amafoto: RDB