Binyuze mu ijwi ry’abamwunganira mu mategeko, Nkubili yari amaze iminsi ajuririra icyemezo giherutse gufatwa n’urwo rukiko rwamusabiraga gukomeza gufungwa mu gihe hari irindi iperereza ryagombaga gukorwa ku byaha byo kunyereza umutungo, magendu, gukoresha inyandiko mpimbano, no gushaka kubangamira urubanza aregwamo kuriganya Guverinoma amafaranga y’u Rwanda arenga miliyari ebyiri.

Icyemezo cyo kwigiza inyuma urubanza rw’uwo muherwe ukorera mu Ntara y’Uburasirazuba, cyafashwe mu buryo butunguranye, nyuma y’uko Nkubili ajyanywe mu Bitaro bya Kaminuza bya Kigali (CHUK) kubera uburwayi.

Mbere y’uko Urukiko Rwisumbuye rwa Gasabo rumusabira gukomeza gufungwa, hari amakuru yari amaze iminsi acicikana avuga ko Nkubili wari warajuririye gufungurwa by’abagateganyo kubera ibibazo by’uburwayi ngo yaba yaritabye Imana, ariko ayo makuru yahise abeshyuzwa n’Urwego Rushinzwe Imfungwa n’Abagororwa mu Rwanda (RCS) ndetse n’umuryango we ubinyujije mu itangazo ryanditse, wahise uvuga ko ubabajwe no kumva ayo makuru y’ibinyoma.

Nkubili ashinjwa ibyaha by’uruhurirane birimo kuriganya Guverinoma y’u Rwanda mu gukwirakwiza inyongeramusaruro, guhimba amazina y’abantu ba baringa bagomba kuyihabwa no kubeshya minisiteri ibiciro by’inyongeramusaruro akabihanika.

Mu bindi byaha ashinjwa harimo no gutatira icyizere, gukoresha inyandiko mpimbano no gufatira ibikoresho byifashishijwe mu gukora icyaha.

Nkubili yagerageje no gutanga miliyari icyenda (9.000.000.000 FRW) nk’ingwate kugira ngo arekurwe by’agateganyo, ariko Umucamanza Nubaha Murwanashyaka yavuze ko kumurekura by’agateganyo kwaba ari ukwigerezaho kuko ngo ashobora gutoroka ubutabera.

Umucamanza kandi yagaragaje ko Nkubili ashobora no kugerageza gusibanganya ibimenyetso kandi iperereza ritararangira, ikindi kandi ngo ntiyigeze atanga gihamya yerekana ko arimo kwivuza.

Umucuruzi Nkubili arashinjwa kuriganya Minisiteri y’Ubuhinzi n’Ubworozi akayiba amafaranga abarirwa mu mamiliyari yahawe ntagure ibikoresho n’inyongeramusaruro byagombaga gukoreshwa mu buhinzi.

Urukiko Rwisumbuye rwa Gasabo mu cyemezo rwaherukaga gufata ku itariki 26 Kanama, rwavuze ko rwemera n’icyemezo cyafashwe n’Urukiko rw’Akarere ka Gasabo cyo kuwa 11 Kanama.

Abunganira Nkubili bari bisobanuye bagaragaza ko Abashinjacyaha bari bemeje ko amaperereza yarangiye, bityo ko nta kubangamira iperereza kwashoboraga kubaho; ariko Ubushinjacyaha bwanze kwemera ibyo bisobanuro bushimangira ko amaperereza yari akirimo gukorwa.

Alfred Nkubili ni umugabo wikorera ufite ikigo kitwa ENAS, azwi cyane mu Ntara y’Uburasirazuba; we n’abandi bantu 11 barashinjwa ubufatanyacyaha mu kuriganya Guverinoma bakayiba amamiliyari binyuze mu masoko yo gukwirakwiza inyongeramusaruro.

Ibyaha bashinjwa byabaye hagati ya 2009 na 2013, Nkubili n’abo bareganwa bagashinjwa kuba batarashyikirije inyongeramusaruro abahinzi bagombaga kuyihabwa. Nkubili nta cyaha na kimwe yemera.

Abantu icyenda muri 11 bashinjwa bazakomeza gufungwa, mu gihe abandi batatu barekuwe by’agateganyo ariko bakazakomeza gukurikiranwa. Urubanza rwa Nkubili na bagenzi be ruzatangira ku itariki 27 Ugushyingo 2020.

Paul Rusesabagina yeretswe itangazamakuru ku wa Mbere

Muri icyo kiganiro cyafatiwe i Washington DC, aho yagombaga gukusanya inkunga muri urwo rugamba, yavuze ko bari “ku marembo y’u Rwanda kandi ko bidatinze bari hafi kwinjira bakabohora Abanyarwanda, bakava mu maboko ya (RPF-Inkotanyi)”.

Ntibyatinze kuko muri Kamena 2018, agatsiko k’abarwanyi biyise National Liberation Forces (NLF/FNL), kashyizweho n’umutwe witwa Movement for Democratic Change (MRCD), iki kikaba ihuriro ry’imitwe ya politike ryashinzwe na Rusesabagina afatanyije na Faustin Twagiramungu wigeze kuba Minisitirie w’Intebe mu Rwanda, n’abandi, batangiye kugaba ibitero mu Rwanda mu Ntara y’Amajyefo binjiriye mu Burundi.

Muri Nyakanga 2018, uwari umuvugizi wa FNL Callixte Nsabimana, mu mashusho ya video kuri Youtube, yagaragaye avuga ku mugaragaro ko bacengeye mu Rwanda kandi ko bamaze gufata ibirindiro muri Parike y’Igihugu ya Nyungwe no mu bindi bice by’u Rwanda, ari naho bateganyaga gutegurira ibitero byo guhirika ubuyobozi bw’u Rwanda.

Ibitero bya mbere babigabye mu Murenge wa Nyabimata mu Karere ka Nyaruguru Intara y’Amajyepfo, bica abaturage babiri bakomeretse batatu.

Nk’uko byemejwe na Police y’u Rwanda icyo gihe, mu bakomeretse harimo Umunyamabanga Nshingwabikorwa w’Umurenge wa Nyabimata Vincent Nsengiyumva watwikiwe imodoka, abandi baturage benshi bararashwe abandi batemeshwa imihoro mu ijoro ry’icyo gitero.

Abo bacengezi bagerageje no kugaba igitero ku nyubako ya Sacco ya Nyabimata, ariko basubizwa inyuma n’ingabo z’u Rwanda.

Banagabye igitero mu rusisiro (centre) rw’ubucuruzi rwa Rumenero basahura ibicuruzwa byinshi n’ibiribwa mu maduka y’abaturage.

Ku itariki 10 Kamena 2018, na bwo bari bagabye ikindi gitero mu Kagari ka Mukunge, Umurenge wa Ngera muri Nyaruguru bakomeretse abaturage, basahura n’ibicuruzwa byinshi mu gasantere k’ubucuruzi.

Rusesabagina agezwa ku cyicaro cya RIB ku Kimihurura

Igitero giheruka cy’inyeshyamba za FNL ni icyo mu Ukuboza 2018, ubwo zinjiraga mu Rwanda na none zinyuze mu Burundi, zigatega imodoka z’abagenzi eshatu mu Ishyamba rya Nyungwe, zicamo benshi abandi barakomereka bikomeye.

Nyuma baje gusubizwa inyuma n’Ingabo z’u Rwanda (RDF), ndetse zibasohora mu Ishyamba rya Nyungwe ari na ko inyeshyamba zigenda zitakaza abantu n’ibikoresho muri iyo mirwano; kugeza ubwo Ishyamba rya Nyungwe ryongeye kuba nyabagerwa n’ibikorwa by’ubukerarugendo birasubukurwa.

Kwemera uruhare

Aho yakoreraga muri Leta Zunze Ubumwe za AmeriKa (USA), Rusesabagina wamamaye kubera filime ‘Hotel Rwanda’ ishingiye ku binyoma bye, yiyemereye ubwe ko ari we wateguye ibyo bitero ndetse agaragara no mu biganiro bitandukanye by’amashusho (video) ahamya ko ari we uri inyuma y’ibitero byose byahitanye abaturage batari bake bigakomeretse abandi benshi mu Rwanda.

Muri kimwe muri ibyo biganiro, Rusesabagina yaragize ati “Kuva muri Nyakanga 2018, FLN yatangije urugamba rwo kubohora Abanyarwanda, kugeza ubu muri 2019, turasabwa gushyiramo imbaraga tukihutisha urugamba rwo kwibohora. Abanyarwanda ntibagishoboye kwihanganira ubugome n’ibikorwa by’ubugizi bwa nabi dukorerwa n’ubuyobozi bwa RPF,”

“Igihe kirageze ngo dukoreshe uburyo bwose bushoboka tukazana impinduka mu Rwanda. Niba uburyo bwose bwa politike twagerageje bwaranze, iki ni igihe cyo gukoresha uburyo bwa nyuma bushoboka”, aha Rusesabagina yashakaga kuvuga uburyo bwo gukoresha intwaro.

Rusesabagina yakomeje agira ati “Nzakomeza kwitanga uko nshoboye ntere inkunga urubyiruko rwacu”, aha yavugaga inyeshyamba za FNL avuga ko zirwanya ‘ingabo za Kagame’ kugira ngo zibohore Abanyarwanda – nk’uko yabyivugiye mu magambo ye.

Rusesabagina ati “Nk’Abanyarwanda, tugomba kumva ko ubu ari bwo buryo bwonyine bwo kuzana impinduka mu gihugu. Ni yo mpamvu mpamagarira Abanyarwanda bose, imitwe n’amashyirahamwe ya politike yose, gushyigikira uru rubyiruko rw’abasore n’inkumi bafashe iya mbere muri uru rugamba n’ubukangurambaga”.

Hashize amezi make Rusesabagina avuze ayo magambo, uwari umuvugizi wa FNL Nsabimana yatawe muri yombi yoherezwa mu Rwanda mu mpera za Mata 2019, ashyikirizwa ubutabera ku byaha by’uruhurirane 16 ashinjwa, birimo iterabwoba n’ubugambanyi. Urubanza rwe na n’ubu ruracyaburanishwa.

Mu biganiro byinshi yagiye atanga ahantu hatandukanye, Rusesabagina ntiyigeze yemera ko Nsabimana yatawe muri yombi, kandi yari yaracakiriwe mu birwa bya Comores/Comoros.

Ni byo Rusesabagina yavuze muri aya magambo, ati “Icyo nababwira ni uko ‘Sankara’ ameze neza kandi ari ahantu hatekanye. Azajya ahagaragara igihe nikigera”. Aha Rusesabagina yari mu kiganiro na VOA ku itariki 22 Mata, ubwo yemezaga ko FLN iri ku butaka bw’u Rwanda kandi ko izahaguma kugeza ivanyeho ubuyobozi buriho.

Ku itariki 30 Mata hashize icyumweru, Minisitiri w’Ububanyi n’Amahanga wariho icyo gihe, Dr. Richard Sezibera, yemeje ko Nsabimana ari mu Rwanda kandi ko agomba gushyikirizwa ubutabera kugira ngo aryozwe ibyaha yakoze.

Nsabimana Callixte yafashwe muri Mata 2019

Gutabwa muri yombi no koherezwa mu Rwanda kwa Nsabimana, byahungabanyije bidasubirwaho imitwe yitwara gisirikare n’abarwanya u Rwanda bakorera mu mahanga, mu gihe leta y’u Rwanda na yo yari imaze gufata icyemezo cyo guta muri yombi no kugeza mu butabera uwo ari we wese ufite umugambi wo kwica Abanyarwanda no guhungabanya umudendezo w’igihugu.

Mu Ugushyingo 2019, nyuma y’ibindi bitero byagabwe ku Rwanda mu Ukwakira k’uwo mwaka mu Turere twa Musanze na Burera bigahitana abaturage 14, Perezida Paul Kagame yaburiye umuntu uwo ari we wese uzishora mu bikorwa byo guhungabanya umutekano w’u Rwanda, avuga ko uzabifatirwamo azabiryozwa ku rwego rwo hejuru.

Ubwo yari mu muhango wo kurahiza Abaminisitiri bashya muri Guverinoma n’abayobozi bashya muri RDF, Perezida Kagame yaragize ati “Tugiye kuzamura igiciro ku muntu uwo ari we wese wifuza kuduhungabanyiriza umutekano”.

Kagame yarongeye ati “Bazabiryozwa ku buryo buhanitse by’umwihariko abo bose bashaka guhungabanya igihugu cyacu, igiciro kigiye kuba kinini cyane, ni ukuri pe. Ndabibabwiye, kandi nzi neza ko mwumva neza icyo nshaka kuvuga”.

Gutabwa muri yombi

Amakuru yageze kuri Kigali Today aravuga ko urupapuro rwo guta muri yombi Rusesabagina binyuze muri Polisi Mpuzamahanga (Interpol), rwasohotse muri Werurwe 2019. Ni rumwe mu mpapuro zirindwi (7) zatanzwe n’ubuyobozi bw’u Rwanda zisaba guta muri yombi abayobozi b’udutsiko tw’iterabwoba dukorera mu karere, by’umwihariko mu Burasirazuba bwa Repubulika ya Demukarasi ya Kongo (DRC).

Icyo gihe, Umuyobozi Mukuru wa Police (IGP) Dan Munyuza yemeje ko u Rwanda rurimo gukorana na Interpol mu gushakisha no guta muri yombi bamwe mu bantu bari inyuma y’ibitero byo guhungabanya umutekano w’u Rwanda.

Umushinjacyaha Mukuru wariho icyo gihe, Jean Bosco Mutangana, yemeje ko u Rwanda rwatanze impapuro zirindwi zibasabira gutabwa muri yombi, ariko ntiyigeze atangaza amazina yabo, kuko byari kubangamira iperereza ryakorwaga.

Amakuru ya mbere yabonetse yavugaga ko Rusesabagina, umuyobozi wa MRCD/FLN na Kayumba Nyamwasa, wemejwe nk’umuyobozi w’icyiswe ‘P5 Coalition’ muri raporo y’itsinda ry’impuguke z’Umuryango w’Abibumbye, bombi bari mu bashakishwaga.

Rusesabagina (ibumoso) ari kumwe na Faustin Twagiramugu

P5 ni ihuriro ry’imitwe ya politike itanu (5) irimo uwitwa Amahoro People’s Congress (AMAHORO-PC), Forces Démocratiques Unifées-Inkingi (FDU INKINGI), People’s Defence Pact-Imanzi (PDP-IMANZI), Socialist Party-Imberakuri (PS IMBERAKURI) na Rwanda National Congress (RNC) iyobowe na Kayumba Nyamwasa.

Nsabimana na we yari mu bashakishwaga, ndetse aza gufatwa yoherezwa mu Rwanda muri Mata 2019.

Ifatwa rya Rusesabagina, igihirahiro muri bagenzi be

Nyuma y’uko umuvugizi wa FLN/NLF Nsabimana atawe muri yombi, Rusesabagina ku itariki 1 Gicurasi 2019, yavuze ko gutabwa muri yombi k’umuvugizi w’abarwanyi be bitaciye intege umugambi wabo. Ntibiteye kabiri na we (Rusesabagina) aba yisanze i Kigali, aho ndetse bitegerejwe ko bombi bashobora kuzahurira mu cyumba kimwe cy’urukiko.

Kuwa mbere Tariki 31 Kanama, Urwego rw’Igihugu rw’Ubugenzacyaha (RIB), ni bwo rwerekanye akanya gato Rusesabagina w’imyaka 66 imbere y’itangazamakuru, RIB isobanura ko yatawe muri yombi binyuze mu bufatanye mpuzamahanga, ariko ntiyavuze ibihugu byagize uruhare mu gufatwa kwe.

RIB yasobanuye ko “Rusesabagina akekwaho gushinga, kuyobora, gutera inkunga no kwifatanya n’udutsiko tw’abagizi ba nabi b’abahezanguni bakora iterabwoba barimo MRCD na PDR-Ihumure, bakorera mu bice bitandukanye by’akarere no mu mahanga”.

RIB kandi yavuze ko Rusesabagina yashakishwaga n’ubutabera mpuzamahanga, akaba agomba gushyikirizwa ubucamanza ku byaha ashinjwa birimo iterabwoba, guteza inkongi y’umuriro, ubushimusi n’ubwicanyi, byakorewe abaturage b’inzirakarengane b’Abanyarwanda badafite intwaro ku butaka bw’u Rwanda, birimo ibyabereye i Nyabimata mu Karere ka Nyaruguru muri Kamena 2018, no muri Nyungwe mu Karere ka Nyamagabe mu Ukuboza 2018.

Umuvugizi w’Umusigire wa RIB Dr. Thierry Murangira, yavuze ko ibihugu byagize uruhare mu guta muri yombi Rusesabagina amazina yabyo adashobora gutangazwa ubu ku bw’impamvu z’iperereza rikirimo gukorwa.

Umuvugizi w’umusigire wa RIB Dr Thierry Murangira

Dr. Murangira ati “Icyo twavuga kugeza ubu ni uko uwo ari we wese ushaka guhungabanya umutekano w’u Rwanda atazigera aca mu rihumye ubutabera. Bazakomeza bafatwe no mu bihe biri imbere. Dufite ubushobozi n’ubushake bwo kubikora dufatanyije n’amahanga kubera ko nta gihugu na kimwe gishobora gushyigikira ubwicanyi bukorerwa abaturage b’ikindi gihugu. Ntawe ushobora kwica Abanyarwanda ngo birangirire aho”.

Gutabwa muri yombi kwa Nsabimana kwatunguye benshi, ariko ifatwa rya Rusesabagina ryo ni agahebuzo; dore ko na bagenzi be ba hafi cyane nka Twagiramungu batazi uko byagenze. Ibihugu byinshi n’imijyi byaravuzwe, ariko nta muntu n’umwe - yewe n’umuhungu we Trésor Rusesabagina - , ntazi uko byagenze.

Mu butumwa burebure yanyuje kuri Facebook, Trésor Rusesabagina yatabarije se n’ubwoba bwinshi, ariko ntiyasobanura aho yaba yaraherereye cyangwa icyo yari arimo gukora ubwo yatabwaga muri yombi.

Twagiramungu, inkoramutima ya Rusesabagina, mu kiganiro n’itangazamakuru na we yavuze ko atigeze amenya igihe n’ahantu Rusesabagina yazindukiye, asobanura ko ashobora kuba wenda yari yagiye muri gahunda ze bwite zidafite aho zihuriye n’ibikorwa by’imitwe yabo ya politike.

Hagati aho ariko Twagiramungu yemeje ko hari undi muntu wamuhaye amakuru avuga ko Rusesabagina yari yakoreye urugendo muri Afurika, ariko ngo ntiyabashije kumenya igihugu yagiyemo n’impamvu. Twagiramungu yavuze ko mu mezi atandatu ashize, Rusesabagina yarari muri Leta Zunze Ubumwe za Amerika, ariko anemeza ko yari arimo gukorwaho iperereza mu Bubiligi nk’igihugu yigeze kubamo.

Aganira na BBC, Twagiramungu yaragize ati “Icyo nababwira ni ibirebana n’ibyabereye mu Bubiligi. Hari abantu baje baturutse mu Rwanda muri RIB baza guhata ibibazo Rusesabagina. Icyo gihe banasatse inzu ye ariko ntibamuta muri yombi”.

Muri icyo kiganiro na BBC, Twagiramungu yavuze uburyo yabonaga ko Rusesabagina yari agiye gutabwa muri yombi ariko ntibyabaho kubera ko yari afite ubwenegihugu bw’Ababiligi.

Twagiramungu ndetse yavuze ko nyuma yaho ngo amaze kubona ko batamutaye muri yombi, yibajije ko iperereza na ryo ryari rirangiriye aho. Ibi kandi ngo byabaye mu mezi arindwi (7) ashize nk’uko yabyemeje.

Mu majwi byumvikana ko ari ay’abambari ba Rusesabagina akomeje gusakazwa ku mbuga nkoranyambaga, harimo abavuga ko gutabwa muri yombi kwe ari nko gukubitwa n’inkuba kuko batigeze babitekereza habe na mba, dore ko n’abamuteraga inkunga, abamushyigikiye n’abo bakorana bose nta n’umwe wamenye uko byagenze.

Kwifatira Abanyaburayi

Abasesenguzi bavuga ko Rusesabagina yamaze imyaka hafi 20 yifatira amahanga abeshya ko ari ‘intwari’ yatabaye Abatutsi barenga 1,200 kuri Hotel des Mille Collines, aho yakoraga nk’umuyobozi w’abakozi mu gihe cya Jenoside yakorewe Abatutsi (1994), hashingiwe kuri filime y’ikinyoma ya ‘Hotel Rwanda’ yakinwe mu izina rye muri 2004, batitaye ku byavugwaga n’abarokotse Jenoside babeshyuzaga ishingiro ry’iyo nkuru.

Tom Ndahiro, umushakashatsi akaba n’umusesenguzi kuri Jenoside, avuga ko Rusesabagina yifatiye amahanga igihe kirekire abasha kuyobya uburari abamuteraga inkunga ntibigera na rimwe bamenya ibindi bikorwa yari ashyizeho umutima, ahubwo bakomeza kumubona nk’umuturage usanzwe wabashije gutabara amagana y’abahigwaga.

Tom Ndahiro ati “Bamaze igihe kinini baranze kwemera ko Rusesabagina ahakana akanapfobya Jenoside yakorewe Abatutsi ari na yo yamugize icyamamare ayikoresha mu magambo yavugaga n’ibikorwa yakoraga. Ni ibintu byagaragariraga buri wese. Yabikoze ku mugaragaro bose barebera, ntihagira n’umwe ugerageza kubimuryoza,”

“Igiteye urujijo kurusha ibindi ni ukubona Rusesabagina yariyemereye ku mugaragaro ko arwanya ubuyobozi bwemewe bw’u Rwanda, ndetse akemera ko ari we uri inyuma y’ibitero byitwaje intwaro byahitanye abaturage b’inzirakarengane mu Karere ka Nyaruguru, benshi bikabasiga nta ngingo, ariko agakomeza kwifatira amahanga na yo akomeza kumubonamo intwari”.

Ndahiro avuga ko cyari ikibazo cy’igihe gusa kugira ngo u Rwanda n’amahanga azi agaciro k’ubutabera, bahagurikire Rusesabagina kugira ngo aryozwe ibyo yakoze, kandi asigeho gukomeza kwidegembya nk’uko yari amaze imyaka yidegembya.

Ibinyoma bya Rusesabagina byanamuhesheje ibihembo bitandukanye kubera uruhare yagize muri filime ya ‘Hotel Rwanda’, birimo Umudari w’Ubwigenge utangwa na Perezida wa USA ‘Presidential Medal of Freedom’ yambitswe na Perezida George W. Bush muri 2005.

Ibi ariko ntibyamubujije kunengwa imyaka irahita indi irataha kubera kugoreka amateka, by’umwihariko abarokotse Jenoside yakorewe Abatutsi batahwemye kugaragaza uburyo yiyitiriye ibikorwa by’ubutwari atigeze akora.

Igitabo cyamuritswe muri 2015 na Edouard Kayihura, umwe mu barokokeye muri Hotel des Mille Collines, ni cyo cyashyize hanze ibinyoma bya Rusesabagina, kigaragaza ubuhamya bw’abarokotse bemeza ko Rusesabagina atari umuyobozi mukuru wa hoteli nk’uko bivugwa muri ‘Hotel Rwanda’, ndetse ko yishyuzaga abantu babaga bahahungiye.

Muri icyo gitabo, abatangabuhamya basobanuye uburyo utarabashaga kwishyura Rusesabagina, yajugunywaga hanze aho abicanyi b’interahamwe n’abasirikare batagira ingano babaga bategeye Abatutsi.

Rusesabagina yabashije kujijisha amahanga imyaka n’imyaniko

Icyo gitabo cya Edouard Kayihura yise “Inside the Hotel Rwanda: The Surprising True Story…and Why It Matters Today” ugenekereje mu Kinyarwanda: Imbere muri Hoteli Rwanda: Inkuru y’Ukuri Itangaje…n’impamvu ari ikibazo uyu munsi, gisobanura byimbitse ibikorwa bitavugwa muri filime ‘Hotel Rwanda’, uburyo Rusesabagina yafatiranaga abantu babaga bari mu kaga bahunga abicanyi bamaraga abantu mu mihanda, mu ngo n’aho babasangaga bihishe.

Inkuru ziri mu gitabo cya Kayihura zemezwa n’akaga abarokokeye kuri Mille Collines bahuye na ko, barimo ndetse n’abantu bari bakomeye nka Bernard Makuza waje kuba Minisitiri w’Intebe, Ambasaderi Wellars Gasamagera na nyakwigendera Bertin Makuza wari umucuruzi; abo bose muri 2011 bamaganiye kure inkuru ya Rusesabagina.

Umusesenguzi Tom Ndahiro avuga ko kuba Rusesabagina agiye kugezwa imbere y’ubutabera ari amahirwe yari ategerejwe kuva kera, kugira ngo ibinyoma bye bishyirwe ku mugaragaro nyuma y’imyaka hafi 20, bityo ikirura cyari kimaze imyaka hafi 20 kiyambitse uruhu rw’intama, isura yacyo nyayo ijye ahagaragara.

Minisitiri w’Ububanyi n’Amahanga, Dr. Vincent Biruta, avuga ko umubano w’u Rwanda na Zambia ari nta makemwa

Uyu Nsabimana aherutse kuvugira imbere y’ubucamanza ko umutwe w’iterabwoba yari abereye umuvugizi, waterwaga inkunga na Perezida wa Zambia, Edgar Lungu.

Amagambo ya Callixte Nsabimana, ushinjwa ibyaha 16 bifitanye isano n’iterabwoba, yatunguye benshi, ubwo yihandagazaga akavuga ko Perezida Lungu yahaye inkunga y’amafaranga umutwe wa ‘National Liberation Forces (FLN)’, ugizwe n’abantu bitwaje intwaro washinzwe na Rwandan Movement for Democratic Change (MRCD).

MRCD ni umutwe wa politike washinzwe na Paul Rusesabagina afatanyije n’abandi Banyarwanda bafite intego yo gupfobya Jenoside yakorewe Abatutsi, no guteza umutekano muke mu karere u Rwanda ruherereyemo.

Ku itariki 13 Nyakanga 2020, ubwo yitabaga urukiko rukuru urugereko rwa Nyanza ruburanisha ibyaha byambukiranya imipaka, Nsabimana yavuze ko FLN yahawe $150, 000 (asaga miliyoni 144FRW) ngo atanzwe na Perezida Lungu muri 2017 nk’inkunga yo kurwanya ubuyobozi bw’u Rwanda.

Ibinyoma bya Nsabimana byababaje Perezida wa Zambia bikomeye, ndetse icyo gihe yahise yandika itangazo abyamaganira kure nk’ibinyoma bidafite ishingiro.

Ku itariki 16 Nyakanga 2020, Perezida Lungu yohereje Minisitiri w’Ububanyi Joe Malanji i Kigali, kuza kubonana na Perezida Kagame kugira ngo baganire kuri icyo kibazo, nyuma y’uko abatavuga rumwe n’ubuyobozi muri Zambia bateye hejuru basaba ko guverinoma itanga ibindi bisobanuro.

Mu kiganiro n’itangazamakuru kuwa gatatu tariki 12 Kanama, Minisitiri w’Ububanyi n’Amahanga n’Ubutwererane, Dr. Vincent Biruta, yagarutse kuri icyo kibazo ndetse avuga ko cyaganiriweho byimbitse hamwe na Zambia, kugira ngo bamenye ukuri kw’amagambo ya Nsabimana, Dr. Biruta yongeraho ko u Rwanda na rwo rwabyumvise bwa mbere rubyumvanye Nsabimana mu rukiko.

Dr. Biruta ati “Twabyumvise nk’uko n’abandi bose babyumviye mu rukiko, ariko Perezida wa Zambia yahise yohereza Minisitiri w’Ububanyi n’Amahanga nk’intumwa yihariye, azanira ubutumwa Perezida wa Republika y’u Rwanda.

Icyo twavuga ni uko ibyo yavuze yabivugiye mu rukiko kandi uwabivuze na we arahari. Twahaye rugali Zambia ngo yohereze intumwa zayo zize kuganira na we zicukumbure isoko y’ibyo birego ubundi barebe icyo gukora”.

“Nta kabuza intandaro y’ibyavuzwe igomba kurushaho gusobanuka, ku ruhande rwacu natwe twabyumviye mu rukiko kandi ntacyo byigeze byangiza ku mubano wacu na Zambia. Tuzakomeza dukorane dushakishe intandaro yabyo”.

Hagati aho ariko Minisitiri Biruta yagaragaje ko imitwe y’abagizi ba nabi bashishikajwe no guhungabanya umutekano w’u Rwanda ikorera mu bice byinshi byo ku mugabane no ku isi, harimo ndetse na bamwe baba muri Zambia bakorana n’iyo mitwe kandi ubuyobozi bw’icyo gihugu bukaba bubazi.

Nsabimana arashinjwa ibyaha 16 birimo iterabwoba, kugambanira igihugu, kurema umutwe witwara gisirikare binyuranyije n’amategeko, kwishora mu bikorwa by’iterabwoba agamije inyungu za politike, gushishikariza abantu gukora iterabwoba, ubwicanyi n’ibindi.

Uyu mugabo aranashinjwa ubushimusi, gusakaza ibinyoma bigamije kwangisha amahanga ubuyobozi bw’u Rwanda, guhakana Jenocide yakorewe Abatutsi, ubujura bwibisha intwaro, gutwika, gukorana n’amahanga agamije gushoza intambara, gukoresha inyandiko mpimbano n’ibindi byaha byinshi.