Abivuze kuri iyi tariki ya 01 Ukwakira, iyi tariki ikaba yibukwa nk’itariki urugamba rwo kubohora igihugu rwatangiriyeho (tariki 01 Ukwakira 1990).

Perezida Kagame abinyujije kuri Twitter, yanditse ubutumwa bugira buti “Ku bantu mwese mwagaragaje ishyaka ryo gukunda igihugu no kucyitangira, mwagenze urugendo rwasaga n’urudashoboka, mwatugejeje aho turi ubu.”

“Byaduteye ishema nk’Igihugu, kandi turabashimira, Dukomereze aho.”

To all Patriots of our Country and friends who walked this seemingly insurmountable journey that put put us where we are today and did us proud today as a Nation We salute you and Thank you!!! Dukomerezaho....!!!

— Paul Kagame (@PaulKagame) October 1, 2020

Paul Kagame wari mu masomo ya gisirikare muri Leta Zunze Ubumwe za Amerika yahise agaruka, ahindura amayeri y’urugamba, maze Ingabo za RPA zongera kwisuganya.

Dutemberane mu duce tw’ingenzi twaranze amateka y’urugamba rwo kubohora u Rwanda, duhereye Kagitumba tugakomeza Gatuna, Rubaya, Kaniga, Ku Mulindi w’Intwari no mu Rugano.

Byinshi kuri aya mateka bikurikire muri iyi Video:

General James Kabarebe

Ibi yabigarutseho kuri uyu wa Gatandatu tariki 11 Nyakanga 2020, ubwo za Ambasade z’u Rwanda zikorera muri Aziya, mu Burasirazuba bwo hagati ndetse n’igice cya Pacifique bizihizaga imyaka 26 ishize u Rwanda rwibohoye, uwo muhango ukaba wabaye hifashishijwe ikoranabuhanga.

Ababohoye igihugu ngo ntabwo bari biteze ibyababayeho, aho ngo bateye tariki ya 1 Ukwakira 1990, nyuma y’iminsi ine gusa Abafaransa barabatera bavuye muri Santarafurika, buracya tariki 5 Ababiligi na bo babagabaho ibitero barabarasa.

Nyuma y’aho, Mobutu wayoboraga RDC yohereje igisirikare cye, ingabo zahoze ari iza RPA nyinshi zihasiga ubuzima kubera intwaro zikomeye ababateye bari bafite. Icyakora ntibyababujije gukomeza urugamba rwo kubohora Igihugu cyari mu bihe bibi by’amacakubiri n’ivangura byagejeje u Rwanda kuri Jenoside yakorewe Abatutsi igahitana abarenga miliyoni.

Mu bitabiriye iki gikorwa cyahuje abahagarariye u Rwanda muri ibyo bihugu, harimo n’abayobozi nka General James Kabarebe wavuze ko kubohora igihugu rutari urugamba rworoshye kandi ku ikubitiro bapfushije benshi ariko ntibemera gutsindwa.

Yagize ati “Twapfushije abasirikare benshi n’abayobozi benshi, ariko ibyo ntabwo byaciye abantu intege kuko twari dufite umutima wo kwitangira igihugu, kugikunda ndetse no kukimenera amaraso.”

General Kabarebe kandi yakomeje avuga ko abari babarangaje imbere bagize uruhare rukomeye rwatumye babasha kubohora igihugu.

Yagize ati “Ikintu cyadufashije cyane ni ubuyobozi. Buriya umuyobozi ni intwaro ikomeye ku rugamba kuri buri muntu wese uri mu rugamba, rwaba urw’amasasu rwaba n’urwo kubaka igihugu, kuko hari intego n’icyerekezo umuyobozi agomba kwereka no kumvisha abo ayoboye.”

Ambasaderi Jean De Dieu Uwihanganye uhagarariye u Rwanda muri bimwe mu bihugu bya Aziya, Uburasirazuba bwo hagati na Australiya yavuze ko Abanyarwanda bafite inshingano zo guteza imbere igihugu cyabo, bafatiye urugero ku bihugu barimo byateye imbere bihereye ku busa.

Yagize ati “tugomba kwigira ku gihugu nka Isirayeli cyaranzwe n’umutekano muke, kikaba gifite ubutayu bwa 60% ariko cyiteje imbere mu buhinzi, ubu kiri mu bihugu bikize cyane ku isi, ibihugu nka Qatar na byo byiteje imbere kandi bifite ubutayu bunini.”

Urubyiruko rukaba na rwo rushishikarizwa gukomeza gusigasira ibyo intwari zaharaniye kugira ngo igihugu gikomeze gutera imbere.

Kibonge ni umwe mu bagize uruhare rukomeye mu rugamba rwo kwibohora

Mbabazi Marie Louise uzwi nka Kibonge cya Musituni ndetse akaniyita Hippopotame (imvubu) avuga ko yakuriye mu muryango w’abana 23 akiga wenyine kuko se yari yarashatse abagore batatu ahahoze hitwa Kiyombe, nyamara ko byatumye amenya ubwenge ndetse akaba ageze kuri byinshi.

Kibonge yatangiye gutanga morale Inkotanyi zikiri ku rugamba rwo kubohora igihugu na n’ubu akaba akibikora ibintu yemeza ko ari impano y’Imana byatumye akundwa na benshi ndetse agakorana n’abantu b’ingeri zitandukanye.

Yagize ati “Sinjya nibagirwa uburyo muri 2003 ari jye jyenyine wari uhari mu gushyushya abantu, nazengurutse igihugu cyose ndi kumwe na RPF twamamaza umukandida wacu, ni amateka. Sinzibagirwa 2007 bafungura itorero ry’igihugu uburyo nazamuye Sitade Amahoro yose ikava hasi ikabyina mu mvura ndi jyenyine ”.

Kibonge cya Musituni avuga ko aka kazi ke kamubyariye umugisha wo gukundwa. Byanatumye ahabwa uburyo bwo kwiga ndetse akaba abayeho neza abikesha gutanga morale akabihemberwa akenshi abicishije mu ndirimbo agira.

Kibonge ngo ntajya arakara mu buzima bwe

Si ibyo gusa kuko mu rwego rwo kwerekana ko igihugu kitagokeye ubusa kimugirira icyizere yemeye guhara umushahara we w’ukwezi kwa Mata 2020 ku bushake kugira ngo yifatanye n’abandi Banyarwanda mu kuzahura ubukungu bwazahajwe na Covid-19.

Yagize ati “Nafashe icyemezo cyo gutanga umushahara wanjye w’ukwezi kwa kane ngo mfatanye n’abandi mu kwigomwa muri ibi bihe igihugu cyazahajwe n’iki cyorezo, ntacyo nabona nshimira igihugu cyanjye cyangize uwo ndi we uyu munsi”.

Akundwa n’abantu benshi bikamushimisha

Umwe mu bafana be witwa Mukagasana aherutse kumukubita amaso, amwakirana ubwuzu kwihangana biramunanira araturika ararira amushimira uruhare agira mu gutera Abanyarwanda morale .

Mukagasana yagize ati “Umuntu nk’uyu w’umutima ukomeye udacika intege uhora yisekera kandi wagize akamaro kanini ku gihugu haba mu kubohora igihugu na n’ubu kumubona imbonankubone byankoze ku mutima”.

Mbonimana Lucien ni umwe mu bahuguwe n’uyu Kibonge akaba amushimira ko ari umuhabuzi w’imitima y’abihebye kandi akaba umwalimu mwiza kuko abafasha mu kumva neza ibyo bigishwa.

Yagize ati “Burya indirimbo n’ubutumwa bwazo tubufata vuba kurusha inyigisho nyirizina, uyu Kibonge namumenye ari kuduhugura akatwigisha indirimbo za morale, mufata nk’umwalimu mwiza kandi ukunda igihugu akanakitangira”.

Kibonge mu buhanzi bwe amaze gushyira hanze indirimbo nyinshi nka ‘Mawe Ninkukunda’ aho aba ashimira umubyeyi (nyina) wamubyaye mu bihe bikomeye, se yarabataye, hari ‘Dimba Hasi’, ‘Wimbaza Mama’ , ‘Ingagi Zibarutse’ n’izindi ndirimbo nyinshi agenda ashyira hanze yerekana ibyiza igihugu kigezeho.

Uwo ni umwe muri iyo mihanda yashyizwemo kaburimbo

Iyo mihanda ya kaburimbo yubatswe mu Mujyi wa Rwamagana, ifite uburebure bw’ibirometero bitatu birenga(3.8Km), ibikorwa byo kubaka iyo mihanda bikaba byaratwaye agera kuri Miliyari ebyiri na Miliyoni magana atanu na mirongo inani n’enye n’ibihumbi magana abiri na mirongo irindwi na bitanu n’amafaranga magana atatu na mirongo inani n’ane(2.584.275.384Frw).

Hari kandi inzu cumi n’eshatu (13) zubakiwe abaturage batishoboye mu Mudugudu wa Gituza mu Kagari ka Nyarukombe mu Murenge wa Muyumbu. Nk’uko bivugwa na Bahati Bonny, Umunyabamabanga Nshingwabikorwa w’uwo murenge, ngo abubakiwe inzu ni abantu bari abakene cyane batagira aho baba, bahora basembereye, cyangwa se bakodesherezwa n’umurenge.

Ni inzu zubatswe ku bufatanye bw’abaturage yaba abatuye mu Karere ndetse n’abagakomokaho baba ahandi, muri gahunda bise ‘tujyanemo’, aho umuturage ufite amafaranga ayatanga, utayafite agatanga ingufu ze, bagahuriza hamwe bakubakira abatishoboye kuko hari ubwo ingengo y’imari itaba ihagije.

Hari kandi amafaranga yatanzwe n’Akarere, andi atangwa n’abafatanyabikorwa bako.Buri muryango muri iyo 13 wahawe inzu ifite ibyumba bibiri n’uruganiriro, hakiyongeraho igikoni, ubwogero n’ubwiherero.

Gusa hari imiryango ibiri muri iyo 13 yahawe inzu z’ibyumba bitatu n’uruganiriro bitewe n’uko ifite abantu benshi, batakwirwa mu y’ibyumba bibiri. Buri imwe muri izo ifite agaciro ka Miliyoni eshatu n’ibihumbi ijana by’amafaranga y’u Rwanda(3.100.000 Frw), kuko inzu zose uko ari 13 zifite agaciro ka Miliyoni mirongo ine n’ibihumibi magana atatu (40.300.000Frw).

Abo bubakiwe mu Murenge wa Muyumbu bafite ivomero rusange(robinet), ku buryo iyo amazi aje bayabona nta kibazo, ariko nta muriro bafite mu nzu zabo, gusa nk’uko Umunyamabanga nshingwabikorwa w’uwo Murenge abivuga, ngo na wo bazawubona, kuko hafi y’aho batujwe hari inkingi z’amashanyarazi, ku buryo igihe amafaranga yaboneka bitagorana kuwubagezaho.

Uwanteye Bernadette ufite imyaka 60 y’amavuko akagira n’abana avuga ko yakodesherezwaga n’umurenge guhera muri 2003, Umurenge wa Muyumbu ukamufasha muri byose no mu byo abana bakenera mu ishuri, nyuma inzu umurenge wamukodesherezaga byaje kugaragara ko iri mu manegeka, bamushyira mu bagomba kubakirwa.

Yagize ati, “Kuba mfite inzu yanjye ntakodesha biranshimishije cyane, ubundi nahoraga nigunze, nzi ko nta mahirwe nzagira hano ku isi, nkibaza mfuye uko abana banjye byagenda.Kuba narabonye inzu byarandenze,numvaga narabaye nk’igitotsi mu bantu ariko ubu ndanezererwe nsabana n’abantu sinkigunga.

Ndashimira Maboko atanga atagabanya,yadukuye ahaga, Perezida wa Repubulika wacu wabonye ko abatishoboye twandagaye aratwegeranya, abashaje twumva twarasubiye i buto, ubu numva mfiute nk’imyaka 20 nubwo mfite 60.Ku Murenge bampaye n’imyambaro yanjye n’iy’abana mbere y’uko nimukira muri iyi nzu.Byose ndabibashimira”.

Zimwe mu nzu zahawe abatishoboye

Nkubiri Pierrre, afite imyaka 76, yari acumbitse mu nzu yakodesherezwaga n’Umurenge wa Muyumbu, nawe ari bahawe inzu mu zizatahwa tariki 3 Nyakanga 2020.

Yagize ati, “Nta muryango wundi ngira, nabaga mu nzu nkodesherezwa n’umurenge, menye ko nanjye nagenewe inzu hano numvise nishimye,gusa hari ikibazo cy’amazi ntayo tubona,hubatse ‘robinet’ariko ntizana amazi, n’umuriro ntawo turacyatahira mu kizima.

Gusa nubwo bimeze bityo, turishimye kuko dufite aho dutuye,kandi dushimira ni umubyeyi wacu Perezida Kagame waduhaye ibi byose ni we duhanze amaso”.

Mukamugema Ruth afite imyaka 33 y’amavuko, avuga ko icyatumye yisanga mu batishoboye bubakiwe na Leta, ngo ni uko yafashwe ku ngufu akiri muto ntiyiga, abyara umwana amurera wenyine nyuma bitangiye kumunanira yegera ubuyobozi bw’umurenge bukajya bumufasha muri byose.

Yagize ati, “Nabayeho nshakisha, ngo ntunge umwana wanjye, nyuma bitangira kunanira negera umurenge wemera kumfasha,ukajya unkodeshereza aho kuba.Nyuma numva ko ndi mu bagiye kubakirwa.

Nkibona inzu numvise nezerewe, kuko kubaho utagira aho ubarizwa utagira umuryango kiba ari ikibazo,ubu ndishimye.Ndashimira muri rusange abanyobozi bacu, ngashimira na Muzehe wacu Perezida wacu wadutekerejeho akaduha aho kuba,ibyo umuntu yamushimira byo ni byinshi.

Bubakiwe inzu zigezweho, zikomeye kandi zujuje ibisabwa

Hubatswe inzu 15 mu midugudu y’icyitegererezo, buri nzu ikajyamo imiryango ine (4 in 1) bivuze ko ari imiryango 60 yatujwe, zikaba zaruzuye zitwaye miliyoni 750 z’Amafaranga y’u Rwanda, hakwiyongeraho ibindi bikenerwa bizafasha abazituyemo akarenga miliyari imwe.

Umuyobozi w’akarere ka Ruhango, Valens Habarurema, avuga ko kubakira iyo miryango byari bikenewe kuko hari abari bafite inzu zishaje cyane.

Ati “Izo nzu twazubatse tugamije gukemura ikibazo cy’abadafite amacumbi, cyane cyane abarokotse Jenoside yakorewe Abatutsi mu 1994 batishoboye. Hari abari barubakiwe inzu kera Jenoside ikirangira zikaba zarashaje cyangwa bari barubakiwe ahantu hataberanye no guturwa, twahisemo rero kububakira bundi bushya”.

Ati “Ubu bagiye mu nzu zikomeye ziri mu midugudu ikeye, buri nzu ifite amashanyarazi n’amazi. Bizatuma bagira imibereho myiza kurushaho, kandi iki gikorwa tuzagikomeza kuko hari imiryango isigaye 128 yo muri icyo cyiciro na yo igomba kubakirwa inzu nziza”.

Yongeraho ko kuri buri mudugudu hashyirwa ikiraro cy’inka zifasha abawutuyemo mu mibereho yabo ndetse bakazahabwa n’imirima yo guhingamo ubwatsi bwo kuzigaburira.

Mu bindi bikorwa byishimirwa muri ako karere byagezweho mu ngengo y’imari ya 2019-2020, ni umuyoboro w’amazi wa Muhama-Nzuki unyura mu mirenge ya Kabagari na Kinihira ufite ibilometero 15, ukaba waruzuye utwaye Amafaranga y’u Rwanda asaga miliyoni magana atanu n’umunani (508,470,385 FRW). Uwo muyoboro uzaha amazi meza abaturage bakabakaba ibihumbi 24.

Hari kandi amaterasi y’indinganire yubatswe ku buso bungana na hegitari 110 mu mirenge ya Kabagari, Mwendo na Kinihira azafasha abaturage kongera umusaruro, akaba na yo yaratwaye miliyoni zasaga magana abiri na makumyabiri n’eshanu (225,224,241 FRW).

Mayor Habarurema avuga ko ibyo bikorwa byose byashyizwemo imbaraga kuko biri mu by’ingenzi abaturage bakenera kugira ngo biteze imbere bibohora ubukene.

Ati “Umuyoboro w’amazi wuzuye ni igikorwa gikomeye tugezeho cyo kwishimira kuko muri kano karere hakiri ikibazo kitoroshye cy’amazi, ubu turacyari kuri 50% by’abaturage bagerwaho n’amazi meza. Muri abo yagezeho rero benshi bavomaga amazi mabi, n’ahari robine amazi agakama kenshi, ubu rero bakize umwanda n’indwara zitandukanye, mbese baribohoye”.

Ati “Amaterasi twayakoze mu gice cy’akarere gifite ubutaka buhanamye butera neza ku buryo wabonaga ntacyo bumariye abaturage. Ubu rero kuva amaterasi yuzuye, dukemuye ikibazo cy’isuri yashoboraga no gusenyera abaturage ndetse n’umusaruro ukaziyongera kuko bituma hera cyane”.

Akomeza asaba abaturage gukora cyane babyaza umusaruro amahirwe bafite mu gihugu kirimo amahoro, kuko ngo intambara y’amasasu yarangiye, hakaba hasigaye iy’iterambere kandi iyo ikaba igirwamo uruhare na buri wese.

Yabasabye kandi ko ibikorwa bitandukanye bagezwaho bagomba kubirinda ababihungabanya, bakabisigasira ndetse bakanabyongera kuko ngo ari ko kwibohora nyako.

Umusozi wa Kabuye ufite amateka akomeye mu kubohora Igihugu

Uwo musozi ufatwa nk’ahantu nyaburanga ho kwigira ubutwari, ufite ubutumburuke bwa metero 2700, aho kuwuzamuka bisaba igihe kingana n’amasaha agera muri atatu.

Uburebure bw’uwo musozi bwemerera buri wese wawuzamutse kwitegereza ibyiza nyaburanga hafi ya byose biri mu Ntara y’Amajyaruguru, ibyo bikaba ari kimwe mu byafashije ingabo za RPA gutsinda urugamba.

Lt Col (Rtd) Ndore Rulinda umwe mu ngabo zarwaniye kuri uwo musozi wa Kabuye, yavuze ko uwo musozi waborohereje gutsinda umwanzi aho babashaga kugenzura ibirindiro byose by’abo bari bahanganye.

Mu kiganiro yahaye urubyiruko rwari rwaje mu bukerarugendo ruzamuka uwo musozi, hizihizwa n’isabukuru yo kubohora igihugu, yarusabye guharanira ubutwari nk’ubwaranze ingabo zabohoye igihugu.

Rtd Lt Col Ndore Rulinda(ufashe ku cyapa) ni umwe mu barwanye urugamba rwo kubohora igihugu

Ati “Umusozi nk’uyu waradufashije kuko twabaga tureba ibirindiro byose by’umwanzi. Amateka wakumva avugwa gusa, birutwa cyane n’iyo wiboneye aho byabereye.”

Ati “Kuzamuka uyu musozi rero, bituma mwumva mugiye mu cyimbo cy’abahaciye icyo gihe, bikabaha ishusho kandi bigatuma mukunda igihugu. Ubwo twazamukaga uyu musozi twanganaga nkamwe uku mungana, twumva ari ryo somo twabaha kandi imbaraga z’urubyiruko zikoreshejwe neza zakora byinshi”.

Bamwe mu rubyiruko rwatembereye kuri uwo musozi, bavuga ko isomo bakuyemo ari uguharanira ubutwari no gukunda igihugu, bagera ikirenge mu cy’abababanjirije.

Umukobwa umwe muri bo ati “Ikintu uru rugendo rumfashije, ni uko ngomba kurushaho gukunda igihugu cyanjye no kumenya gushyira hamwe na bagenzi banjye kugira ngo twishyiremo intego zo gukunda igihugu cyacu no kucyitangira mu gihe bibaye ngombwa”.

Abahatemberera baba bafite amatsiko ku mateka anyuranye

Umwe mu basore baje kwigira amateka kuri uwo musozi ati “Ntabwo ari ibintu byoroshye kuzamuka uyu musozi bisaba ubutwari, noneho twibaze kuba barawuzamukaga batwaye imbunda n’ibindi bikoresho binyuranye. Icyo mpigiye ni uko abatubanjirije bari bafite ubutwari bwo gukunda igihugu, ni byo twese dukwiye kubigiraho duharanira uburwari bwatugeza ku ntera yo kwitangira igihugu cyacu”.

Umusozi wa Kabuye ubumbatiye n’amateka y’ibwami

Uretse kuba uwo musozi wa Kabuye ubumbatiye amateka y’urugamba rwo kubohora igihugu, uwo musozi ni na wo buturo bw’umwami Gihanga Ngomijana aho yaje gutura aturutse Nkotsi na Bikara mu Karere ka Musanze.

Ni amateka Kigali Today ikesha Nzabonimpa Théodore, Umuyobozi wa Kampani ishinzwe gutembereza ba mukerarugendo mu bijyanye n’umuco n’amateka yitwa Beyond Gorillas Experience.

Rtd Lt Col Ndore Rulinda asangiza urubyiruko amateka yaranze urugamba rwo kubohora igihugu ku musozi wa Kabuye

Yagize ati “Umusozi ufite amahumbezi adasanzwe ufite amateka menshi y’u Rwanda kuko hatuye Gihanga Ngomijana wahabaye n’umukobwa we witwa Nyirarucyaba, Gihanga yahageze ari muri ya nzira ye yo kureba uko yagura u Rwanda n’indangagaciro Abanyarwanda bazamukomokaho bazagira.”

Ngo Gihanga akihagera yatuye mu buvumo bwitwa inzira y’umwami afukurira n’umukobwa we Nyirarucyaba iriba rya Nyirarucyaba ryavomwagamo amazi yakoreshwaga mu iyimikwa ry’abami aho bose bahabwaga umugisha wa Gihanga.

Ayo mazi kandi ngo yakoreshwaga mu mihango y’ibwami mu nzira y’ishora, kuri uwo musozi hakaba harubatswe n’indake yafashaga abasirikare mu rugamba rwo kubohora kariya gace nk’uko Nzabonimpa akomeza abivuga.

Agira ati “Umusozi wa Kabuye wakoreshejwe habohozwa aka gace kose k’Amajyaruguru kuko ndibuka nk’igitero cyo ku itariki 08 Mata 1992, bivugwa ko icyo gitero ari cyo cyafunguje imfungwa n’izindi nzirakarengane zari zifungiye muri gereza nkuru ya Ruhengeri, ni umusozi ufasha ingabo kureba aho umwanzi wese yaturuka”.

Mu basura uwo musozi harimo n’abanyamahanga

Uwo musozi wa Kabuye kandi ngo uri mu yifashishijwe mu guhashya Interahamwe zari zaribasiye agace k’Intara y’Amajyaruguru, Abanyarwanda n’abanyamahanga bakaba bakomeje kuwusura biga amateka yo kubohora igihugu n’amateka y’ibwami.

Ubu uwo musozi utangiye kubyazwa umusaruro. Mbere y’uko hashingwa Kampani Beyond Gorillas Experience, abasuraga uwo musozi byarabagoraga kubona aho barara no kubona icyo kurya ibyo bigaca intege abanyamahanga bahakoreraga ubukerarugendo nk’uko Nzabonimpa akomeza abivuga.

Agira ati "Abenshi mu bakoreraga ubukerarugendo kuri uyu musozi ni abataliyani. Mbere y’uko dushinga Kampani ya Beyond Gorillas Experience barazamukaga ntibagire uwo bishyura, ntibagire ubabwira amateka ntibagire ubatwaza igikapu ntibagire ubaha amazi yo kunywa ntibabone ubufasha. Ubu twakoze inzira dushyiraho ibyapa, dushyiraho ubwiherero dushyiraho aho bashyira imyanda mu nzira, twubaka amahema yo kuraramo hejuru twubaka inzu bariramo bananyweramo, ubu nibwo bitangiye gutanga umusaruro.

Kuri uyu musozi haboneka serivisi zitandukanye zihabwa abawusura

Ubu umuntu ukorera ubukerarugendo kuri uwo musozi ashobora kuharara, akabona ibyo kurya byose akeneye, akota umuriro, akisanzura mu buryo bwose.

Ni umusozi ukora ku mirenge itatu igize Akarere ka Gakenke, ari yo Kamubuga, Nemba na Karambo. Uwo musozi kandi uza ku mwanya wa gatatu mu gihugu mu misozi myiza mu Rwanda, aho uza inyuma y’umusozi wa Bigugu wo muri Nyungwe na Muhungwe yo muri Gishwati muri Rubavu.

Kugeza ubu abenshi mu batuye ako gace kegereye umusozi wa Kabuye barishimira ibikorwa remezo bamaze kugezwaho birimo amashanyarazi, amazi meza, ibitaro, amashuri n’imihanda.

Kuri uwo musozi hashyizwe ibikorwa remezo byifashishwa na ba mukerarugendo

Abatemberera kuri uwo musozi bahasanga amafunguro

Abatemberera kuri uwo musozi basobanurirwa amateka yaho

Izi ni zimwe mu nzu bubakiwe

Mu Karere ka Muhanga hubatswe inzu 23 zigezweho, zikaba zarubakiwe imiryango 23 y’abarokotse Jenoside yakorewe Abatutsi mu 1994 itari ifite aho kuba heza.

Izo nzu zatwaye miliyoni 249 z’Amafaranga y’u Rwanda, zubatswe mu mirenge itanu bitewe n’ahari abazikeneye, izo mu murenge wa Rongi zikaba zaratashywe ku mugaragaro ku wa Gatanu tariki 3 Nyakanga 2020.

Umwe mu bahawe inzu, Nyirabazungu Laurence, umukecuru w’imyaka 70, avuga ko inzu yahawe yamushimishije cyane kuko ngo yabaga mu manegeka.

Agira ati “Jenoside yadusize iheruheru, tubura intege zo kwiyubakira ku buryo ntaho kuba nari mfite none Leta y’Ubumwe iratugobotse, dutashye mu nzu nziza. Badusasiye uburiri bwiza, baduha ibyo kwicaraho ndetse n’ibyo kurya, ubu tugiye kuzasaza neza tudafite impungenge kubera gutura mu manegeka”.

Umwe mu bahawe inzu yishimira ko yakuwe mu manegeka

Ati “Sinabona uko mvuga uko nishimye kuko ibi bidasanzwe. Mbere aho nabaga baranyibaga buri munsi, bantwaye ihene, ibishyimbo, radiyo n’ibindi ariko ubu ntibazongera kunyiba kuko negereye abandi, navuye mu bwigunge, uku ni ko kwibohora kuko mvuye mu mibereho mibi”.

Uwo mukecuru yakomeje avuga ko yabaye nk’ubonekewe abwo yahabwaga iyo nzu, kuko ngo muri Leta za mbere atigeze abona aho bafasha abaturage batishoboye, babubakira inzu.

Umukozi w’akarere ka Muhanga ushinzwe abafite ubumuga unakurikirana igikorwa cyo kubakira abacitse ku icumu rya Jenoside, Kamangu Samuel, avuga ko abahawe inzu bari baragizweho ingaruka n’ibiza.

Ati “Abahawe inzu zo guturamo ahanini ni abari barasenyewe n’ibiza, cyane cyane abari batuye mu misozi miremire ya Ndiza, ku buryo hari abari bacumbikiwe mu mashuri. Hari abandi babaga mu nzu z’inkodeshanyo aho bari bacumbikiwe mu murenge wa Nyarusange none na bo babonye inzu zabo, kikaba ari igikorwa twishimira twagezeho”.

Ikindi gikorwa ako karere kishimira ni ibiraro bine byo mu kirere byubakiwe abaturage kuko byabagoraga kwambuka imigezi, bikaba byaruzuye bitwaye miliyoni 325 z’Amafaranga y’u Rwanda.

Umuyobozi w’ishami ry’ibikorwa remezo, ubutaka n’imiturire mu karere ka Muhanga, Onesphore Nzabonimpa, agaruka ku hubatswe ibyo biraro ndetse n’akamaro bifitiye abaturage.

Yagize ati “Twubatse ibiraro bibiri bihuza imirenge ya Muhanga na Cyeza, hari icyitwa Gashyushya n’icyitwa Rupfuha. Byafashije abaturage b’imirenge yombi guhahirana ndetse bifasha abanyeshuri kujya kwiga nta nkomyi kuko bitarubakwa iyo imvura yabaga yaguye batabashaga kwambuka bigatuma basiba ishuri”.

Ibiraro byo mu kirere bizafasha abaturage guhahirana no gutuma abana biga nta nkomyi

Ati “Ibindi biraro bibiri byubatswe mu murenge wa Nyarusange ubu bikaba byaruzuye ndetse byaratangiye gukoreshwa, abaturage bakaba babyishimira cyane kuko bibafasha mu ngendo zabo harimo no kugeza umusaruro ku masoko. Hari n’ibindi biraro nka byo byubatswe mbere, byose bikaba bimaze kuba 10”.

Nzabonimpa avuga kandi ko gahunda yo kubaka ibiraro byo mu kirere izakomeza kuko bifite akamaro, ari yo mpamvu ngo mu ngengo y’imari ya 2020-2021, hazubakwa ibindi bibiri.

Perezida Kagame ni we wayoboye urugamba nyuma y’itabaruka rya Nyakwigendera Maj. Gen Fred Gisa Rwigema kugeza Inkotanyi zitsinze Guverinoma ya Jean Kambanda zikanahagarika Jenoside yakorerwaga Abatutsi ku itariki 4 Nyakanga 2020.

Nubwo atigeze atangaza igihe ateganya kwandika cyangwa ubundi buryo azakoresha mu gusigasira amateka y’urugamba rwo kubohora Abanyarwanda, Umukuru w’Igihugu arizeza ko azatanga umusanzu we mu buryo ubwo ari bwo bwose ariko amateka y’urugamba ntazigere yibagirana.

Mu butumwa yanditse kuri Twitter ku munsi w’isabukuru ya 26 yo Kwibohora, Perezida Kagame yavuze ko buri mwaka mu myaka 26 ishize, ku itariki ya 4 Nyakanga, abantu benshi na we atikuyemo, bazirikana mu buryo bungana ibyatakaye n’ibyagezweho, n’iterambere igihugu kimaze kugeraho kugeza ubu kubera ibitambo byatanzwe n’abagabo n’abagore babaye intwari z’igihugu.

Perezida Kagame ati “Ni yo mpamvu mbona nta kindi nababwira usibye kubaha icyubahiro mukwiye.”

Mu butumwa bwe kuri Twitter, umukuru w’Igihugu akomeze agira ati: “Urugamba n’Amateka y’ibi byose, ni uruhurirane rw’ibikorwa byinshi birenze uburyo abantu bamwe bashaka kubyiyumvisha cyangwa kubisobanura, ari yo mpamvu usanga ibikorwa bitarangwa n’ubutabera bikomeza kwirundanya, kubogama no kudasobanura neza ukuri. Na none ariko, ni twe tugomba gukomeza guhangana na byo.”

Ubu butumwa Perezida Kagame yanditse kuri Twitter, bigaragara ko bugenewe abahora bikoma u Rwanda mu buryo ubwo ari bwo bwose, bagamije kugoreka amateka y’urugamba rwo kwibohora, ari yo mpamvu na we ubwe yiyemeje kuzatanga umusanzu we mu gusigasira amateka y’urugamba wo kwibohora nk’umuntu uruzi mu mizi.

Ni byo Perezida Kagame yanditse muri aya magambo:
“Ndizera kandi maze igihe nihaye isezerano ko nimfatanya na bagenzi banjye bo muri RPF (nk’uko twafatanyije mu byo twakoze byose…), ndizera ko nzabasha kuyasigasira nta na kimwe nsize inyuma kandi mu buryo bufatika, ari mu buryo bwo kwandika igitabo cyangwa mu bundi buryo. Nzabishakira umwanya, kuko ni bwo buryo buzadufasha guha ubutabera impamvu y’urugamba rwo kwibohora.”

“Twahuye n’ibigeragezo birenze ibishoboka ndetse dukura amasomo mu byo twahuye na byo nk’abantu bafatwaga nk’abatari bafite intego yo kwiyubakira ejo hazaza, mu by’ukuri ni nde ufite umwanya wo guterwa ubwoba cyangwa gutsindwa n’ibidutegereje? Abakiri bato bagomba gushyiraho akabo bakagera ku birenze ibyo twagezeho.”

Mbere yo kwandika ubu butumwa kuri Twitter ku itariki 4 Nyakanga, Perezida Kagame yafunguye ku mugaragaro ibikorwa by’iterambere mu Karere ka Nyagatare, nka kimwe mu bikorwa ngarukamwaka biteza imbere abaturage bikamurikwa ku munsi wo kwibohora.

Muri ibyo bikorwa byakozwe hirya no hino mu gihugu bifite agaciro ka miliyari 88 Frw harimo imidugudu 14, amazu 528 yubakiwe abagizweho ingaruka na Jenoside yakorewe Abatutsi, ibiraro 20, imihanda ifite km 401, ibigo nderabuzima 11, amashuri, amasoko, gutanga amazi ndetse n’ibikorwa by’ubuhinzi n’ubworozi.

Ibyo bikorwa byatashywe ku mugaragaro muri iyi minsi mu rwego rwo kwizihiza isabukura ya 26 u Rwanda rwibohoye.

Rutsiro

Umuyobozi w’Akarere ka Rutsiro, Ayinkamiye Emérence, avuga ko hari abaturage basemberaga bubakiwe inzu yubatse ku buryo ibamo imiryango umunani (8 in 1) yanatashywe, yubatswe mu mudugudu w’icyitegererezo wa Karungu, mu kagari ka Bunyunju, Umurenge wa Kivumu, iyo nzu ikazafasha imiryango 8 y’abaturage batari bafite aho kuba.

Inzu umunani muri imwe yubakiwe abaturage basemberaga muri Rutsiro

Akarere ka Rutsiro kandi kegereje abaturage umuriro w’amashanyarazi mu murenge wa Nyabirasi, ingo zose zigize uwo murenge zigera ku bihumbi 37 nta mashanyarazi zagiraga. Ku ikubitiro ingo zizahabwa amashanyarazi ni 6,749, ubu abamaze guhabwa mubazi z’amashanyarazi ni 98, barimo 64 bo mu Kagari ka Ngoma, na 34 bo mu Kagari ka Mubuga.

Rubavu

Umuyobozi w’Akarere ka Rubavu Habyarimana Gilbert avuga ko mu rwego rwo guteza imbere imibereho myiza y’abaturage no gukemura ibibazo bikibangamiye abaturage bagize uruhare mu kubaka amacumbi yo guturamo ku bari batuye mu manegeka huzura asaga 300.

Agakiriro ko mu mudugudu wa Mbugangari icyiciro cya gatatu

Hubatswe kandi amavuriro aciriritse, ibiro by’utugari n’imirenge, by’umwihariko gucanira umujyi wa Gisenyi kuri km 6,2 byatwaye asaga miliyoni 467frw, agakiriro ka Mbugangari icyiciro cya gatatu na cyo kiratahwa gitwaye asaga miliyoni 350frw.

Mu Karere ka Rubavu kandi abaturage bagejejweho amashanyarazi ku ngo zisaga 220 batuye ahitwa Idagaza mu Kagari ka Bisizi mu Murenge wa Cyanzarwe, ahubatswe uwo muyoboro wa km 4,6 ukuzura utwaye Miliyoni 75frw.

Ubuyobozi bw’Akarere ka Rubavu bugaragaza ko nibura buri murenge utaha ibikorwa bishya byagezweho by’indashyikirwa uyu mwaka kandi bugashishikariza abaturage gukomeza kubungabunga ibyo bikorwa begerejwe banabibyaza ubukungu.

Ngororero

Mu Karere ka Ngororero abaturage begerejwe ibikorwa bitandukanye birimo amazi meza, amashanyarazi yo ku muhanda acanira abaturage mu isantere nkuru ya Ngororero, no kubakira abatishoboye.

Mu murenge wa Nyange hatashywe ikusanyirizo ry’amata rizafasha abaturage kongera umukamo no kubonera isoko amata y’inka borora,ryuzuye ritwaye hafi miliyoni 40frw, mu murenge wa Muhanda hari amazu y’abatishoboye yatashywe.

Mu murenge wa Bwira hari ibiro by’akagari byatashywe, mu murenge wa Nyange hari umudugudu ntangarugero wa mutima w’urugo wa Vungu mu kagari ka Nsibo warangije kwishyura mituweli y’umwaka utaha.

Hari kandi umudugudu w’icyitegererezo watashywe mu murenge wa Muhanga wuzuye utwaye asaga miliyoni132frw.

Abahawe amacumbi bashimiye ubuyobozi bubazirikana

Akarere ka Ngororero kari gakunze kubura amazi kubera imiterere yako katashye kandi imiyoboro itandukanye y’amazi yageze ku baturage uyu mwaka. Harimo nk’imiyoboro ya Kivugiza ya 2 ifite uburebure bwa kilometero 20,3 watwaye miliyoni 133frw, umuyoboro wa Kibanda-Bitabage ureshya na kilometero 15,6 watwaye miliyoni 167frw.

Hari kandi umuyoboro wa Mugobati-Mavumo 38km watwaye miliyoni 309frw n’uwa Gataba-Ruhindage 6,7km, Bitare-Rususa 11km, Kaseke-Gataba 3,9km uko ari 3 yatwaye miliyoni 227frw.

Isantere ya Ngororero iri gucanirwa mu nsisiro

Umujyi wa Ngororero warwanyije ikibazo cy’icuraburindi mu nsisiro zawo ahatashywe amatara yo ku mihanda yashyizwe ku burebure bwa 1.8km yatwaye miliyoni zigera muri 33frw.

Karongi

Akarere ka Karongi na ko kageze ku bikorwa byinshi by’indashyikirwa katashye ku mugaragaro bigashyikirizwa abaturage ndetse harimo n’ibyo ubwabo bagizemo uruhare.

Urugero ni mu murenge wa Murambi ahubatswe amazu 17 yubakiwe abatishoboye batagiraga amacumbi. Izo nzu zubatswe mu buryo bw’inzu ebyiri muri imwe, aya mazu akaba yarubatswe ku bufatanye bw’umurenge n’umuganda w’abaturage.

Abaturage bahawe inzu bo mu murenge wa Murambi bagabiwe n’inka

Umuyobozi w’akarere ka Karongi watashye ayo mazu ari kumwe n’izindi nzego z’ubuyobozi n’iz’umutekano banashyikirije imiryango ibiri itishoboye yahawe amazu inka ebyiri.

Umuyobozi w’akarere ka Karongi Mukarutesi Vestine yasabye abaturage kwita ku mazu bubakiwe kugira ngo bakomeze kugira imibereho myiza kandi abizeza kuzakomeza kubaba hafi mu bikorwa byose by’iterambere.

Nyamasheke

Umuyobozi w’akarere ka Nyamasheke agaragaza ko abaturage bagize ururahe mu kubaka amazu y’abatishoboye ndetse n’ibiro by’utugari.

Ibi bikorwa byashyizwe mu mirenge itandukanye amazu 267 akaba ari yo yatashywe mu karere kose yubatswe ku bufatanye n’imiganda y’abaturage kugira ngo barusheho kunoza imiturire.

Hatashywe kandi ibigo nderabuzima n’ibigo by’ubuzima biciriritse, ibiro by’utugari n’imirenge byose byagizwemo uruhare n’abaturage.

Umuyobozi w’akarere ka Nyamasheke avuga ko ibyo bikorwa bitanga urugero rw’ibishoboka mu kwishakamo ibisubizo kandi bigaragaza intambwe u Rwanda rugezeho mu guharanira iterambere, urukundo n’icyizere mu baturage.

Ababyeyi be bamusize akiri umwana muto bajya ku rugamba rwo kubohora igihugu

Akiri umwana muto, Thomas Muyombo ntiyagize amahirwe yo kwitabwaho no guhabwa urukundo rwuzuye n’ababyeyi be kuko basize umuryango bakajya ku rugamba rwo kubohora igihugu.
Nubwo yahuye n’ubuzima bugoye akiri muto, Thomas Muyombo yaje gukura, abaho afite intego, ndetse abasha kuyigeraho, nk’uko abigarukaho muri iyi nkuru ishingiye ku buhamya yahaye Kigali Today na KT Press.

Ku izina rye hiyongereyeho andi ashingiye ku byo yize, aba Dr Thomas Muyombo, abifatanya n’umuziki agakoresha izina rya Tom Close.

Ashimira ababyeyi be (batakiriho) kuko batizigamye ahubwo bahisemo kwerekeza ku rugamba rwo kubohora igihugu, bazi neza ko bashobora no kuhasiga ubuzima, ariko bafite intego bashaka kugeraho, yo gusubirana uburenganzira mu gihugu cyabo.
Tom Close avuga ko atakunze kubana na se, ndetse ko yamubonye inshuro eshanu zonyine mu buzima bwe. Se yagiye mu gisirikare Tom Close akiri muto cyane.
Nyina na we yaje kujya ku rugamba, Tom Close arerwa na sekuru na nyirakuru babyara nyina.

Se wa Tom Close

Se wa Tom Close yitabye Imana mu 1995, nyina yitaba Imana mu 1996. Bapfuye urupfu rusanzwe urugamba rumaze kurangira. Se yari Lieutenant Colonel, nyina akaba yari Sergeant.
Nyina ngo ubwo yajyaga ku rugamba mu 1991 yajyanye Tom Close ku mucuruzi w’umunyamahanga bari baturanye i Masindi witwaga Johnson amubwira ko icyo azajya akenera nk’ikayi cyangwa ikindi gikoresho azajya agenda akagifata.

Tom Close avuga ko icyo gihe akiri umwana yakundaga guta amakayi, andi akayibagirwa cyangwa bakayamwiba.

Nyina agenda ngo ntiyamubwiye aho agiye, ahubwo agarutse mu mpera za 1992 amaze umwaka urenga nibwo yamubwiye ibyo yari arimo.

Tom Close yari yaratangiye ishuri mu mashuri abanza ndetse akajya yiga aba mu kigo n’ubwo yari akiri muto cyane, kuko ababyeyi be bari baragiye ku rugamba. Abavandimwe be babiri babanaga na sekuru aho bita Kiboga muri Uganda. Na we ngo yaje kujyayo mu mpera za 1993 no mu ntangiriro za 1994, ni ho bavuye bataha mu Rwanda.

Ababyeyi be bajya ku rugamba kuko bari bazi ko no gupfa bishoboka, basize baguriye sekuru wa Tom Close isambu nini n’inka bamubwira ko nibatagaruka abana babo bazaba aho.

Tom Close (akiri umwana), sekuru, nyina (wambaye ikanzu y’ubururu), abavandimwe babiri ba nyina n’umusirikare wari inshuti y’uwo muryango

Uwo sekuru ni na we batahanye mu Rwanda mu 1994 urugamba rwo kwibohora rwenda kurangira. Ngo bageze mu Rwanda basanga ibintu byinshi bikimeze nabi kuko aribwo Jenoside yari ikirangira. Babanje kujya kuba i Murambi mu Ntara y’i Burasirazuba.

Mu mpera za 1994 nibwo Tom Close yongeye kubonana na nyina, ariko akaba atari azi niba ababyeyi be bari bakiriho.

Ati “Mama yasanze turimo gukina umupira n’abandi bana, ngiye kubona mbona araje, ambonye araturika ararira, nanjye byarandenze nyine numvaga kongera kumubona ari nk’inzozi.”

Tom Close na nyina bahise baza kuba i Kigali ku Gishushu muri uwo mwaka wa 1994. Icyo gihe ngo nibwo nyina yatangiye kumubwira inkuru z’urugamba, amusobanurira impamvu bari barabasize.

Tom Close ati “Mama yambwiye ko twagombaga kuza mu Rwanda kubera ko igihugu twari turimo ntabwo hari iwacu, kandi mu Rwanda ntabwo bashakaga ko tuza ku mahoro. Rero byabaye ngombwa ko dukoresha izindi mbaraga. Byibura twifuje ko bakwemera tukaza ku mahoro, byanze dukomeza urugamba.”

Nyina wa Tom Close

Nyina ngo yamubwiye ko icyo barwaniraga kwari ukugira ngo Abanyarwanda bose bagire uburinganire, bishyire bizane, babone amahirwe angana mu gihugu cyabo.

Mu gihe yari akiri ku ishuri yiga muri Uganda, Tom Close avuga ko abana biganaga bamusererezaga bakamukorera ivangura kubera ko ari umunyamahanga, bakamubwira n’amagambo mabi bashingiye ku kuba ari umunyamahanga.

Ati “Ku ishuri iyo nabaga nashwanye n’abandi bana, jyewe baransererezaga bati wa kanyarwanda we!”

Ibyamubagaho ku ishuri n’ibyo nyina yamubwiye ko babaga mu gihugu kitari icyabo ngo Tom Close yambyumvise neza ubwo nyina yabimusobanuriraga nyuma y’urugamba, yumva impamvu bagombaga kujya ku rugamba rwo kubohora u Rwanda.

Mu 1995 Tom Close yahise atangira kwiga mu mashuri abanza mu kigo kiri hafi yo ku Gishushu ahitwa mu Rugando. Ngo yahize igihembwe kimwe ahita ahava ajya mu kigo cya Remera Academy giherereye i Remera aho bita mu Giporoso, naho aza kuhava yerekeza muri La Colombière.

Tom Close ntiyagize amahirwe yo kumarana igihe kirekire n’ababyeyi be ngo bishimire ibihe byiza nyuma y’urugamba rwo kubohora igihugu. Se yahise yitaba Imana mu 1995.

Urugamba rwatumye se wa Tom Close atabona umwanya munini wo kubana n’umuryango we

Icyakora se na nyuma yo kubohora igihugu ngo ntiyakunze kuza kubasura kenshi, kuko ngo yaje kubareba inshuro nk’ebyiri gusa. Ngo kubona uruhushya ntibyamworoheraga, kuko yari n’umusirikare wo ku rwego rwo hejuru (yari Lieutenant Colonel)

Tom Close ati “Mu buzima bwanjye muzi gakeya. Yishwe n’uburwayi, twabimenye nyuma tubibwiwe na Mama.”

Ibyo bintu ngo Tom Close byaramubabaje ariko kubera ibindi bibazo byinshi yabayemo, ibibazo ngo yari yarabimenyereye.

Nyuma y’umwaka umwe, nyina na we yaje kwitaba Imana mu 1996 ndetse baramushyingura mu isambu y’umuryango ariko nyuma ngo umurambo we baje kuwimurira mu irimbi rya Gisirikare i Kigali, naho se we yashyinguwe i Nyamata ku isambu y’iwabo.

Imwe mu mafoto ya Tom Close ya vuba (aha yari kuri KT Radio)

Tom Close avuga ko nyina amaze gupfa, we n’abandi babanaga i Kigali bahise basubira kwa sekuru mu burasirazuba (usibye umwe wasigaye i Kigali ashakisha ubuzima), kuko sekuru we yari akiriho, yitabye Imana nyuma muri 2000, Tom Close akomeza kubana na nyirakuru ubyara nyina (yitabye Imana muri 2019).

Bageze Iburasirazuba basanze i Murambi sekuru yarahavuye yimukira ahitwa i Kibondo. Aho i Kibondo ni ho Tom Close yakomereje amashuri abanza, gusa ngo cyari ikigo kibi kuko byabasabaga kwitwaza intebe zo kwicaraho n’amazi yo gutera mu ishuri kugira ngo batarwara imbaragasa. Ngo hari habi agereranyije no muri La Colombière aho umubyeyi we yari yaramujyanye kwiga, dore ko cyari ikigo kiri mu bya mbere byiza i Kigali. Aho i Kibondo yaharangirije amashuri abanza ari uwa mbere, atsinda ikizamini cya Leta akomereza i Kiziguro mu cyiciro rusange (Tronc Commun), nyuma akomereza icyiciro cya kabiri cy’amashuri yisumbuye i Kigali muri LDK.

Aho igitekerezo cyo kwiga ubuganga cyaturutse

Tom Close avuga ko akimara kubonana na nyina yasanze asigaye arwara igifu akaremba cyane ntajye ku kazi.

Tom Close ati “Namuhaye isezerano ko ninkura nzaba umuganga nkazamuvura. Icyo gihe rero nahise ngira iyo ntego. Ni ikintu nagombaga gukora mu buzima bwanjye nkakigeraho.”

Akirangiza amashuri yisumbuye yahise ajya kwiga muri Kaminuza i Butare, ndetse yiga ibyerekeranye no kuvura nk’uko yari yarabisezeranyije umubyeyi we.

Icyakora mbere y’uko ajya kwiga i Butare ngo yagerageje inshuro ebyiri kujya mu gisirikare ariko ntibyamukundira, akavuga ko ubwo ari ko Imana yabishatse kugira ngo abe akora ibyo akora ubu. Ngo yumvaga ashaka kujya mu gisirikare agakomereza aho ababyeyi be bari bagejeje mu gukorera igihugu.

Kugeza ubu Tom Close ni umuganga wabyigiye akaba n’umwe mu bafite izina rikomeye mu muziki mu Rwanda.

Tom Close na Madamu

Avuga ko muri ubwo buzima bwose yaciyemo, ikintu yumva kimuha imbaraga kikanamufasha gutera imbere, gishingiye ku biganiro yakundaga kugirana na nyina. Ngo ntabwo yamuganirizaga nk’umwana ahubwo yamuganirizaga nk’umuntu mukuru amubwira icyo barwaniye, akamubwira uko urugamba rwagenze. Nyina ngo ntiyakundaga kuba ari imbere ku rugamba kuko yabaga mu by’amafaranga ari na byo yize (Finance) akaba yaranabikozemo muri Minisiteri y’Ingabo (MINADEF) mbere y’uko yitaba Imana.

Ati “Ikimpa imbaraga ni uko ibyo mama yambwiye barwaniye byose njya mbibona. Abasigaye barimo kubishyira mu bikorwa. Yajyaga ambwira ko bifuza ko igihugu gitera imbere, ko barwaniye kugira ngo bazane Amajyambere.”

“Rero ibyo yatubwiye barwaniye byose, uyu munsi ndamutse mpfuye nkamusanga ahantu ari namubwira nti ibyo mwarwaniye byagezweho, n’ibitaragerwaho birimo kugerwaho cyangwa bizagerwaho kandi hari icyizere.”

Tom Close ubu ni umugabo wubatse afite umugore n’abana babiri, akagira n’abavandimwe be babiri, mukuru we na mushiki we. Avuga ko byari kuba bibabaje iyo ababyeyi be barwanira igihugu uyu munsi kikaba ari kibi nk’uko cyahoze mbere.

Ikisanyirizo ry’amata rya Musha rizajya ryakira litiro 2,500 ku munsi

Iri kusanyirizo ry’amata ryubatswe mu mwaka ushize w’ingengo y’imari wa 2019-2020, ubu rikaba ryaruzuye, ribaye irya Kabiri ryubatswe muri aka karere kuko irya mbere ryari mu Murenge wa Ndora, ari na wo wubatsemo ibiro by’akarere.

Dominique Karanganwa utuye hafi y’ikusanyirizo ry’i Musha, afite inka enye zimuha byibura litiro 40 ajyana ku isoko. Avuga ko n’ubwo umurenge batuyemo uhana imbibi n’uwa Ndora, kugezayo amata hari igihe byabahombyaga.

Agira ati “Hari igihe imvura yabyukiraga ku muryango tukabura uko tugeza amata yacu ku ikusanyirizo, ubundi twayagemura tukayagezayo yapfuye kubera izuba. Ibi ntibizongera kuko noneho dufite ikusanyirizo ritwegereye. Amafaranga twatakazaga kubera izo mbogamizi zombi noneho azinjira mu ngo zacu.”

Ikindi kizatuma babona amafaranga aruta ayo bajyaga babona, ni uko kugemura amata ku ikusanyirizo rya Ndora byatumaga babona amafaranga 170 cyagwa 180 kuri litiro, ariko irya Musha rikaba ryariyemeje kubaha amafaranga 200 kuri litiro.

Ibyo Karanganwa avuga bishimangirwa na Laurence Nibagwire na we utuye i Musha, akanongeraho ko amata yo mu ikusanyiriza agirirwa icyizere kurusha ayo abantu baguze ahandi.

Ati “Nk’udafite inka yajyaga kugura amata mu makantine, ariko azava mu ikusanyirizo buri wese azaba ayafitiye icyizere ko ari amata asukuye, kandi ko atagira ingaruka ku buzima.”

Umuyobozi w’Akarere ka Gisagara, Jérôme Rutaburingoga, avuga ko ikusanyirizo rya Musha barikesha Perezida wa Repubulika y’u Rwanda. Rifite ubushobozi bwo kwakira litiro 2,500 ku munsi. Anavuga ko amakusanyirizo abiri mu Karere kose akiri makeya.

Ati “Ubu turi gukorana n’uruganda rwa Nyanza kugira ngo amata atakoreshejwe ino yose abashe kujyanwayo. Birumvikana ko agace ka Kansi, Kigembe na Nyaruteja, ndetse n’aka Mugombwa, Mukindo na Muganza na ho hakenewe andi makusanyirizo .”

Ubundi biteganyijwe ko ikusanyirizo rya Musha rizajya rikusanya amata yo muri Musha, Mamba, Gikonko, n’igice cya Gishubi. Irya Ndora ryo rikusanya aya Ndora, Kibirizi, Gishubi n’igice cya Save.

Icyakora na none, ngo uko ubworozi buzagenda butera imbere, n’amata akaba ahagije, bazagera aho buri murenge ugira ikusanyirizo ryawo, nk’uko bikwiye.

Batashye ku mugaragaro umuyoboro uzaha amazi meza abaturage ibihumbi 25

Uwo muyoboro wasanwe ni uwa Mbizi ufite ibirometero 55 ukaba ufite isoko mu murenge wa Rukoma, ugaca mu yindi mirenge ari yo ya Karama, Ngamba na Gacurabwenge, ukaba uha amazi abaturage bagera ku bihumbi 25 bo muri iyo mirenge.

Ibikorwa byo gusana uwo muyoboro byatwaye Amafaranga y’u Rwanda angana na 1,311,083,924, hakaba hashize amezi ane kuwusana birangiye ndetse amazi meza agera ku baturage.

Abaturage bishimira icyo gikorwa kuko ngo hari hashize igihe kinini bavoma amazi mabi bikabagiraho ingaruka none ngo barasubijwe, bagashimira Leta y’u Rwanda nk’uko Tugirimana Emmanuel wo mu Murenge wa Rukoma abisobanura.

Agira ati “Twebwe kubera duturiye akabande twavomaga mu dusoko ariko tudaha amazi hasi, ni ukuvuga ko twakoreshaga amazi mabi bikatugiraho ingaruka kubera umwanda, turwaza abana inzoka. Ubu rero amazi mabi twarayasezereye, tukaba tubikesha Perezida wa Repubulika tunashimira cyane”.

Ati “Aya mazi tuyaboneye igihe kuko muri iyi minsi hari icyorezo cya Coronavirus, dukenera amazi menshi kandi meza yo gukaraba ngo tucyirinde. Turishimye cyane kuko twibohoye umwanda wari utwugarije, tukagira ubuzima bwiza butuma dukora tukiteza imbere”.

Abayobozi birebeye niba amazi aza neza aho abaturage bavomera

Umuyobozi w’Akarere ka Kamonyi, Kayitesi Alice, avuga ko uwo muyoboro uje ari igisubizo ku baturage benshi kuko bakoraga ingendo ndende bajya gushaka amazi meza.

Ati “Uyu muyoboro uva ku isoko yari isanzwe iriho ariko ubu twayongereye ubushobozi, unyura mu mirenge irimo n’uwa Ngamba utarigeze ugira amazi meza. Abaturage bishimiye ayo mazi kuko hari abakoraga ibirometero 10 bajya kuvoma, ibyo byatumaga abana bata amashuri ndetse n’ababyeyi bikababuza gukora imirimo yabo ya buri munsi”.

Uwo muyoboro watashywe ku mugaragaro tariki 2 Nyakanga 2020, kikaba ari igikorwa cyishimirwa muri iki gihe cyo kwizihiza ku nshuro ya 26 isabukuru yo Kwibohora.

Ikindi gikorwa cyishimirwa ni inzu zubakiwe abacitse ku icumu rya Jenoside yakorewe Abatutsi mu 1994 batagiraga aho baba, ni inzu 24 zubatswe ku buryo imwe yakira imiryango ibiri (2 in 1), zikaba zubatswe mu mirenge ya Nyamiyaga na Nyarubaka.

Abaturage batishoboye bubakiwe inzu zigezweho

Kayitesi uyobora Akarere ka Kamonyi avuga ko iyo ari intambwe nziza bagezeho kuko ari ikibazo gihangayikishije akarere kuba hari abatarabona aho batura.

Ati “Abatishoboye bagizweho ingaruka na Jenoside bakabura ibyabo n’imiryango yabo baraduhangayikishije nk’ubuyobozi kuko umuntu atatekana adafite aho aba. Hari rero imiryango 48 tugiye gutuza, hakaba n’indi 301 twatuje mbere. Ni igikorwa twishimira kuko iyo umuntu atuye neza ari nabwo atangira gutekereza iterambere”.

Aha Mayor Kayitesi yaganiraga n’abitabiriye gahunda yo gutaha ibi bikorwa ku mugaragaro

Ati “Ibyo byose ni ibikorwa turimo kwishimira mu kwizihiza ku nshuro ya 26 Kwibohora. Urugamba rwo kubohora igihugu rwararangiye, uruhare rwacu rero nk’abaturage n’abayobozi ni ugukomeza kwibohora ibindi bibazo bibangamiye imibereho myiza n’iterambere by’abaturage, kandi turakomeje kuko tutaragera aho twifuza”.

Akomeza asaba abaturage kubungabunga ibyo bikorwa kugira ngo bitangirika ndetse bakabibyaza umusaruro muri ya nzira yo kwiteza imbere.

Imashini zohereza amazi mu muyoboro

Ibigega bibika amazi meza

Ni nyuma y’ikibazo yari abajijwe n’uwitwa Appolinnaire Bizimana, ubwo yari amaze kubaha ikiganiro.

Icyo kibazo cyagiraga kiti “Tuzi ko ku rugamba ingabo z’u Rwanda zifata igihugu, hari intama bagendanaga. Ese iriya ntama yavugaga iki cyangwa yabafashaga iki ku rugamba”?

Mu kumusubiza, Gen. Kabarebe yagize ati “Intama, hari ifoto ijya igaragaramo. Nta gitangaza cyari muri iriya ntama, nta n’ubwo yari umupfumu wacu nta n’ubwo yaraguraga”.

Iyo ntama ngo yari yatoraguwe n’Inkotanyi zo muri batayo ya 101, yayoborwaga n’uwitwaga Kayitare.

Gen. Kabarebe ati “Ako gatama iyo abasirikare bakoraga parade (imyiyereko) na ko kayikoraga nka bo, bahindukira na ko kagahindukira, kandi batayo yakwimuka na ko kakimuka, abasirikare baba bavanze, ntigatakare kakamenya batayo yako kakayigendamo”.

Iyo ntama ngo yagaragaye ubwo abari mu mashyaka anyuranye bajyaga gusura FPR Inkotanyi, bagakora umunsi mukuru.

Ati “Icyo gihe habayeho imyiyereko, na ko kayikora neza nk’abasirikare. Ariko tugiye guhagarika Jenoside intambara itangiye, igisasu kiragakubita kirakica. Ntabwo rero kahagaritse Jenoside”.

Yabitangaje kuri uyu wa Gatandatu tariki 04 Nyakanga 2020 ubwo Umukuru w’Igihugu yasuraga bimwe muri ibyo bikorwa byubatswe mu Karere ka Nyagatare, hanizihirizwa ku rwego rw’Igihugu umunsi mukuru wo kwibohora.

Muri ibyo bikorwa harimo imidugudu 14, amazu 528 yubakiwe abasizwe iheruheru na Jenoside yakorewe Abatutsi, ibiraro 20, ibirometero 401 by’imihanda, ibigo nderabuzima 11, amashuri, amasoko, gutanga amazi ndetse n’ibikorwa by’ubuhinzi n’ubworozi.

Lt Col. Innocent Munyengango avuga ko imidugudu 14 y’icyitegererezo yubatswe ku mafaranga y’u Rwanda Miliyari 8 na miliyoni 82.

Imidugudu y’icyitegererezo uko ari 14 yahaye icumbi imiryango 318 mu turere 14 mu ntara zitandukanye.

Hubatswe amazu 286 yubakiwe abasizwe iheruheru na Jenoside akaba acumbitsemo imiryango 651, aya mazu akaba yaruzuye atwaye amafaranga y’u Rwanda miliyari 6 na miliyoni 990.

Hubatswe kandi ibiraro 20 mu turere twa Ngorero, Burera, Muhanga, Karongi, Ruhango na Nyabihu. Ibyinshi ngo byubatswe hagamijwe gukemura ingaruka zatewe n’ibiza byibasiye utwo duce.

Iyubakwa n’isanwa ry’ibi biraro ngo ryatwaye amafaranga y’u Rwanda miliyari 17 na miliyoni 233.

Umuvugizi w’ingabo z’u Rwanda Lt Col. Innocent Munyengango avuga ko imihanda yubatswe ku burebure bwa kilometero 401 byatwaye amafaranga y’u Rwanda miliyari 36 na Miliyoni 167.

Uyu mwaka kandi hubatswe ibitaro 2 ari byo bya Gatonde mu karere ka Gakenke na Gatunda muri Nyagatare abaturage bemerewe n’umukuru w’igihugu ndetse n’ibigo nderabuzima 9.

Mu rwego rwo kugabanya ubucucike mu mashuri ku bufatanye n’Inkeragutabara (Reserve Force) hubatswe ibyumba by’amashuri.

Inkeragutabara kandi ngo zafatanyije n’izindi nzego mu buhinzi harwanywa isuri, abaturage borozwa amatungo.

Mu bikorwa byatashywe mu karere ka Nyagatare harimo umudugudu w’icyitegererezo wa Gishuro, inzu mberabyombi iri mu mudugudu w’icyitegererezo, ikigo nderabuzima cya Tabagwe, ishuri ryisumbuye rya Tabagwe ndetse n’ibindi bikorwa bifasha mu batuye mu mudugudu w’icyitegererezo.

Ishuri ryisumbuye rya Tabagwe rizacumbikira abahungu n’abakobwa 903, rikagira n’ibyumba by’abarimu bagorwaga no kugera ku ishuri.

Umuvugizi w’ingabo z’u Rwanda Lt Col. Innocent Munyengango avuga ko ibikorwa byakozwe hagamijwe guteza imbere abaturage byatwaye amafaranga y’u Rwanda miliyari 88 kubera ko byakozwe mu bufatanye n’inzego zitandukanye.

Avuga ko iyo biza gukorwa binyuze mu masoko asanzwe byari butware amafaranga y’u Rwanda miliyari 96.5 bifasha Leta kwizigamira amafaranga y’u Rwanda miliyari 8.5. ibi bikorwa byakozwe mu gihe kiri hagati y’amezi 3 n’umwaka umwe.

Lt Col Munyengango avuga ko ibi bikorwa bizafasha cyane abaturiye imipaka no kuzamura imibereho y’Abanyarwanda.

Ati “Dusesenguye dusanga ibikorwa byagezweho, twumva ko hari byinshi abaturiye imipaka bashobora kuba barabonye nka serivise, imibereho y’Abanyarwanda na yo ikazamuka, ireme ry’uburezi bw’abana, guhahirana n’ibijyanye n’ubuzima byose bikaba byariyongereye.”

Yabitangaje kuri uyu wa 04 Nyakanga, ubwo Perezida wa Repubulika Paul Kagame yasuraga ibikorwa byubatswe mu Murenge wa Tabagwe ari na wo RPA yashinzemo ibirindiro mbere.

Perezida Kagame akaba n’umugaba w’ikirenga w’ingabo z’u Rwanda, ni na we wari umugaba w’ingabo za RPA zabohoye igihugu.

Gikoba ni umwe mu midugudu igize akagari ka Shonga, gahana imbibi n’akagari ka Gishuro. Umudugudu byegeranye wa Nyakigando ni wo wari urimo indake (aho umugaba mukuru wa RPA) yabaga.

Iyi ndake ubu yatangiye kubakwa n’ubusitani bwayo hakaba hasigaye kuhashyira inzu ndangamateka.

Umuvugizi w’Ingabo z’u Rwanda, Lt Col Innocent Munyengango, avuga ko Gikoba itazibagirana mu mateka yo kubohora igihugu kubera ko ari ho habereye ivugurura ry’ingabo za RPA.

Ati “Aha ni ho RPA yabereye umutwe w’ingabo nyawo, wubatswe neza ufite n’ibikoresho bigaragara. Ikindi cyabaye ni uburyo bushya bwo guhangana n’umwanzi, aha ni ho Afande mwahinduriye imirwanire ya RPA iva mu bitero shuma yari imazemo iminsi ahubwo abasirikare bajya mu birindiro.”

Akomeza agira ati “Afande aha ni ho mwongeye kwerekana ubushishozi n’ubuhanga bwanyu mwigisha abayobozi kubaka indake, munabashishikariza kujya kubyereka n’abo bayoboraga.”

Umuvugizi w’ingabo z’u Rwanda Lt Col Innocent Munyengango avuga ko kwigisha abayobozi b’ingabo kubaka indake cyari ikimenyetso gikomeye ko gusubira inyuma ari umuziro kandi ko inkotanyi zafashe ubutaka bwitwaga santimetero (Centimeter) buri mu Rwanda, bukaba ubutumwa bukomeye kuri bose ko Inkotanyi zarutashye.

Lt Col Munyengango avuga ko aha muri Gikoba ingabo za RPA zakomeje kuhahanganira n’umwanzi kuva muri Werurwe 1991 kugera mu mpera za Gicurasi 1992.

Icyo gihe kirenga umwaka ngo habaye imirwano myinshi ikomeye ingabo za Leta zishaka kuvana iza RPA mu birindiro byazo ariko ntibyashoboka.

Agira ati “Muri izo ntambara zikomeye, amateka atwibutsa intambara zabereye Nkana, aho mwabanje ibirindiro byanyu bya mbere, hari Kabuga, Shonga, Gikoba, Gasheshe, Bushara, Mutojo, Muraha, Gikagati, Nyabihara, Gashenyi, Rurenge, Kentarama, Nyarurema, Gatsirima, Gatunga, Cyagaju n’ahandi mu bitero FAR yise Rukokoma.”

Umuvugizi w’Ingabo z’u Rwanda kandi avuga ko Gikoba ari ho RPA yahinduriye uburyo bw’imirwano burimo ubuhanga harimo gushyira ibirindiro inyuma y’umwanzi akabura ubufasha ubwo ari bwo bwose.

Muri aka gace kahinduriwemo uburyo bw’imirwanire ubu ingabo zahubakiye abaturage ibikorwa by’iterambere

Avuga ko ayo mayeri ari ubuhanga bw’intambara busaba ubutwari n’ubwitange nk’ubw’Inkotanyi ari na byo byatumye FAR itakaza agace kiswe santimetero ikajya gushinga ibirindiro ahandi.

Avuga ko ubwo butwari n’ubwitange bwagaragaye bwatumye RPA ifata igice kinini kandi byose ngo bikaba byarateguriwe i Gikoba.

I Gikoba kandi ngo ni ho hateguriwe igitero cya Byumba cyo ku wa 05 na 06 Kamena 1992, kirangira RPA igize ubutaka bunini urugamba rwo kubohora igihugu ruhindura isura.

Lt Col Munyengango yasobanuye ko nyuma yo gufata uduce twinshi twa Byumba no kwagura ubutaka bwa RPA mu Mutara na Ruhengeri, aribwo ibirindiro by’umugaba mukuru wa RPA yabyimuriye ku Mulindi wa Byumba tariki ya 07 Kamena 1992.

Ibyo bihe ngo byarangiye RPA ibaye umutwe w’ingabo ukomeye, wubashywe kandi wifitiye icyizere na morali nyinshi ndetse iyo sura iba ari yo ijyanwa mu mishyikirano ya Arusha.

Akarere ka Nyagatare kizihirijwemo ku rwego rw’Igihugu umunsi mukuru wo Kwibohora, kuri ubu gafite Stade nshya ya Nyagatare, imwe mu ma sitade mashya yubatswe mu rwego rwo guteza imbere imikino n’imyidagadro mu turere dutandukanye tw’igihugu.

Muri iyi myaka 26 ishize, Leta y’u Rwanda yashyize imbaraga mu kubaka no kuvugura ibikorwa remezo bigezweho bya siporo. Ibi byatumye igihugu kigirirwa icyizere cyo kwakira bwa mbere mu mateka amarushanwa mpuzamahanga akomeye arimo CHAN, Igikombe cya Afurika cy’ibihugu ku batarengeje imyaka 17 na 20, amarushanwa nyafurika muri Basketball n’ibindi.

N’ubwo urugamba rw’iterambere rugikomeza, hari ibikorwa remezo bigaragaza intambwe igihugu kimaze gutera mu bijyanye na siporo n’imyidagaduro.

Kigali Arena, mu nyubako nziza za siporo muri Afurika

Mu mujyi wa Kigali, akarere ka Gasabo mu murenge wa Remera, huzuye inzu y’imikino izwi nka Kigali Arena.Ni inyubako iteye amabengeza imbere n’inyuma kandi ijyanye n’igihe.

Kigali Arena ifite ubushobozi bwo kwakira abantu ibihumbi 10 bisanzuye ikaba iri no ku rwego rwo kwakira amarushanwa abera mu nzu (indoor) yo ku rwego rw’isi.

Iyi nyubako iheruka kwakira imikino y’ijonjora ry’ibanze ry’igikombe cy’Afurika cya Basketball (BAL), ikaba igomba no kuzakira imikino ya nyuma y’iki gikombe.

Kigali Arena ni inyubako inogeye ijisho, abafana bicaramo batuje kandi yujuje ibyangombwa byose ngo yakire amarushanwa mpuzamahanga

Stades ziringaniye zarubatswe mu turere two mu Rwanda

Ku nkunga ya Perezida wa Republika, mu turere twa Bugesera, Nyagatare na Ngoma hubatswe Stade nziza zigezweho aho buri Stade yakira byibura abantu 3500, zikaba ndetse zaratangiye no kwakira imikino ya shampiyona n’andi marushanwa atandukanye.

Izi sitade zifite ubwatsi bw’ubukorano, zikagira igice gitwikiriye ndetse n’ahandi hadatwikiriye ariko abafana bakabasha kwicara neza, ndetse zikagira n’amatara azajya acanwa nijoro.

Stade y’akarere ka Ngoma yuzuye itwaye miliyoni 9 z’amadorali y’Amerika, yamaze gushyirwaho n’amatara

Stade ya Nyagatare nayo izakira abantu 3500 yamaze kuzura

Abatuye i Nyagatare bishimiye kubona stade nziza izajya inaberaho imikino ngoramubiri

Stades zindi zaravuguruwe, izari ibitaka zashyizweho ubwatsi bugezweho, zinahabwa inyongera y’ibibuga by’imyitozo …

Abakiniye ku bibuga byo mu Rwanda hambere aha ntibakwibagirwa imikingo yabagamo, ivumbi ritumuka, gusa ubu bene ibyo bibuga biri kuba amateka, ukinira kuri Stade Huye na Kamena z’ubu, ntiyamenya uko abahakiniye mu myaka ishize bari babayeho nk’uko bitangazwa na Nshimiyimana Canisius wakiniye kuri ibi bibuga byombi hambere.

Nshimiyimana Canisius wahoze akinira Mukura mu kiganiro twagiranye mu mwaka ushize ubwo twamusangaga kuri Stade Kamena iyo yibutse ibibuga bahoze bakiniraho, akibuka imvune za hato na hato kubera kutareshya kw’ikibuga, ashima Perezida Kagame wabafashije kubona ibibuga bigezweho.

Yagize ati “Iki kibuga cya Kamena cyahozemo imikingo, umupira waridundaga nkatwe twakinaga inyuma ugashiduka ukoze penaliti, benshi bagiye bavunikira aha, ariko ubu abana barakina bisanzuye bagakina umupira usukuye, nabigereranya n’aho twe twahoze dukinira ngashima Perezida Kagame waduhaye izi mpano z’ibibuga bigezweho”

“Nta bushobozi twari dufite bwo kwakira umupira wa nijoro, ariko ubu abantu na nyuma y’akazi barakina, ubona ko nka Huye Stade yahoze yicaramo abantu nka 1500 nyuma yo kuvugururwa yanahinduye isura y’umujyi.”

Uko Stade Kamena yari imeze mbere n’uko imeze ubu

Aha kuri Stade Kamena mu myaka ishize, ikibuga ubu cyaravuguruwe

Kuri Stade Kamena ubu harasa neza, hanabera imyitozo y’amakipe atandukanye

Imvune ziterwa n’ibibuga bibi zaragabanutse

“Ndibuka nk’umukinnyi bita Ngendakumana Djuma Saidi wigeze gukukira iryinyo kuri iki kibuga, nanjye hari inkovu mfite ku kuboko mpita nibuka Kamena ya kera ubwo twari twakinnye n’Intare, iyo rero mbonye iki kibuga abana bari gukiniraho nta n’umwe unyerera nanjye numva nishimye, kuko iyo twajyaga gukina twabanzaga kumenamo vidange ngo imiswa igende” Canisius aganira na Kigali Today

Musanze, ubu naho ikibuga cya Stade Ubworoherane cyaravuguruwe

Sitade Ubworoherane yo mu karere ka Musanze yakirirwaho imikino y’ikipe y’akarere Musanze FC.Gusa iki kibuga cyananiwe kwakira imikino myinshi bitewe n’uko cyari cyarangiritse.

Stade Ubworoherane ubu nayo yashyizwemo ubwatsi bwiza

Iyo imvura yagwaga imikino yarasubikwaga ariko ibi byabaye amateka nyuma y’aho iyi sitade ivururiwe aho igashyirwamo ubwatsi bwiza buri ku rwego nk’urwa Sitade Amahoro, ni sitade yatashywe tariki 9 Gashyantare 2017, ikaba ifite igice gitwikiriye, urwambariro rujyanye n’igihe ndetse n’ubwiherero,Imirimo yo kuvugurura iyi sitade yatwaye miliyoni 170RWf.

I Rubavu baruhutse gukinira mu makoro

Mu karere ka Rubavu, habarizwa Sitade Umuganda, igizwe n’ikibuga cy’imyitozo cy’ubwatsi bw’ubukorano kizitiwe gifite urwambariro, ubwogero n’ubwiherero, hatarimo icyo kibuga cy’imyitozo stade Umuganda igizwe n’igice gisakaye n’ikidasakaye, ibyumba by’urwambariro bine, ubwogero ndetse n’ubwiherero.
Isanzwe yakira abafana ibihumbi 6000, nayo ifite umwihariko wo kuba mu masitade afite ubushobozi bwo kwakira imikino ku manywa na nijoro.

Nduhirabandi AbdulKharim uzwi nka Coka, yarahakiniye, arahatoreza, nawe ubu yumva ashimishijwe no kubona umwana atanga umupira ibuye ntiriwugarure, nawe yaratuganirije

Yagize ati “Ubu urabona ko iki ari ikibuga kigezweho, urigisha umupira hano umupira ukabona gutembereza umupira birakunda, mbere ntiwari kumenya niba kuba umupira utagenda ari ikosa ry’umukinnyi, ariko ubu umwana aratembereza umupira bigaragara, habagamo amabuye,amakoro,imikingo, kabisa ubu turashimira ubuyobozi bwadufashije kubona ibintu twafataga nk’inzozi”

Stade zo mu Ntara zakira imikino y’ikipe y’igihugu

Ubusanzwe hari hamenyereweho ko imikino n’amarushanwa bikomeye bibera mu mujyi wa Kigali, ariko mu rwego rwo kwegereza ibyiza n’abandi baturage, kugeza ubu mu karere ka Huye mu ntara y’Amajyepfo, na Rubavu mu ntara y’u Burengerazuba bakiriye amarushanwa nka CHAN, igikombe cya Afurika cy’abatarengeje imyaka 17 na 20, ndetse n’imikino y’ikipe y’igihugu y’u Rwanda Amavubi.

Abatuye mu karere ka Huye no mu nkengero babashije kwirebera amarushanwa ya CHAN

Stade Rubavu ubu nayo yashyizwemo ubwatsi bw’ubukorano

Mbere umupira ahenshi wakinwaga ku manywa gusa

Usibye Sitade Amahoro yahozeho amatara yatumaga hashobora kuba imikino ya nijoro, ubu ku bibuga bya Rubavu, Huye, Stade ya Kigali i Nyamirambo, hashobora kubera imikino yo mu masaha akuze, aho ibyo bibuga byose byashyizweho amatara.

Ubu mu Rwanda harabarirwa Sitade 10 zifite ubwatsi bugezweho bw’ubukorano ari zo Stade ya Kigali I Nyamirambo, Stade Mumena, Stade ya Kicukiro, Stade Umuganda i Rubavu, Stade Huye, Stade Kamena, Stade ya Muhanga, Stade ya Ngoma, Stade ya Bugesera, Stade ya Nyagatare.

Hari kandi ibibuga by’imiyitozo nabyo bifite ubwo bwatsi ari byo ikibuga cya Shyorongi, ikibuga cy’imyitozo cya Rubavu, hakaba Sitade zifite ubwatsi busanzwe kandi butunganyije neza harimo Sitade Amahoro na Stade Ubworoherane y’i Musanze.

Gymnase ya Gisagara yakuye abaturage mu bwigunge

Byari bimenyerewe ko ibikorwa bya siporo byinshi biherereye mu mujyi wa Kigali, ibindi bicye bikaba mu yindi mijyi mito igize u Rwanda, gusa mu karere gafatwa nk’icyaro ka Gisagara, bababashije kwiyubakira inzu y’imikino, izwi nka Gymnase, ahashobora gukinirwa imikino irimo Basketball, Volleyball, Sitting Volleyball, Sitball n’imikino njyarugamba ndetse n’impande zayo hakaba hari ikibuga cya Beach volleyball.

Ni inyubako ibereye ijisho, ibereye abafana, aho bagera ku 1500 bayijyamo bakicara neza, ikaba ari nayo nzu y’imikino ifite uburebure busumba izindi mu kujya hejuru mu Rwanda, ikaba yaruzuye itwaye akayabo ka miliyoni 922 frw.

Ubwo twayisuraga, twasanze hari kubera imyitozo y’abafite ubumuga bakina Sitting volleyball, umwe mu bo twaganiriye yatubwiye ari igikorwa cy’indashyikirwa , badutangariza ko ibi babikesha imiyoborere myiza, by’umwihariko ikaba ari n’ikipe irimo abamugariye ku rugamba barimo abo mu ngabo z’ubu RDF ndetse n’iza kera (Ex-FAR).

“Iyi nyubako yaradufashije cyane, ibikomere bya buri munsi, hano turakina twisanzuye, nkatwe abafite ubumuga twarasubijwe, turashimira Ubuyobozi bw’u Rwanda na Perezida Kagame, ubu twari kuba turi gukinira mu zuba, abacitse amaguru inkovu zikongera zigakomereka, ariko hano nta mvura nta zuba, muri make turishimye”

Aha ni muri Gymnase y’akarere ka Gisagara, ubu abafite ubumuga bishimira kuba bahakinira

Iyi nyubako yubatse ku buryo bwa Etage aho ushobora kureba umukino uyiberamo wicaye mu myanya yo hasi cyangwa hejuru, ikaba ifite ibyumba by’urwambariro, ahakorerwa Gymtonic , ubwiherero, ibyumba 4 bikoreshwa mu buvuzi bw’ibanze, ifite na cave cyangwa inzu zo hasi zifashishwa nk’ububiko bw’ibikoresho by’imikino.

Africa Rising Cycling Center, kimwe mu bigo bibiri bikomeye by’imyitozo muri Afurika

Uyu ni umwe mu mikino imaze kuba ubukombe mu Rwanda, ukunzwe n’abantu benshi, by’umwihariko abawukina bakaba banitwara neza haba mu marushanwa mpuzamahanga akinirwa mu Rwanda ndetse no hanze y’u Rwanda, aho ubu ndetse u Rwanda runafite abakinnyi bakina nk’ababigize umwuga hanze y’u Rwanda.

Ikigo cyitwa Africa Rising cycling Center ni kimwe mu bigo by’imyitozo bibiri bikomeye muri Afurika kikagira igaraje ry’amagare rya mbere muri Afurika.Iki kigo kiri ku rwego mpuzamahanga kimaze kwakira amakipe aturutse mu bihugu bitandukanye ku isi aza gukoreramo imyitozo harimo na Direct Energie yo mu Bufaransa,Team Novo Nordisk yo muri Leta Zunze Ubumwe za Amerika.

Perezida w’impuzamashyirahamwe y’umukino w’amagare ku isi (UCI) David Lappartient aherutse gusura iki kigo atangaza ko kigiye kuzafatwa na UCI kikaba kimwe mu bigo byemewe kizajya cyitorezwamo n’abakinnyi baturutse mu bihugu bitandukanye by’Afurika.

Iki kigo kandi kimaze kwakira amakipe y’ibihugu ibitandukanye byo muri Afurika birimo Eritrea, Ethiopia, Nigeria, Zambia, u Burundi, Burkina Faso ndetse kuri iyi tariki ya kane Nyakanga u Rwanda rwizihirizaho umunsi wo kwibohora ku nshuro ya gatanu, muri iki kigo hari abakinnyi 25 b’ikipe y’igihugu ya Repuburika Iharanira Demokarasi ya Congo baje kuhakorera imyitozo yimbitse bitegura isiganwa rya Tour de la RDC.

Harimo igaraje ry’amagare riri ku rwego rwa mbere muri Afurika, icyumba cy’igororamitsi (massage) amacumbi y’abakerarugendo aho hafite ubushobozi bw’ibyumba bya kwakira abakerarugendo 12 ku ijoro, ibyuma bifite igikoni,ubwogero n’Ubwiherero, Interineti, hakabamo ndetse n’amacumbi y’abakinnyi n’abayobozi, iduka rishobora kwifashishwa mu kugurisha imyenda ya Team Rwanda, aho abakinnyi barira, ndetse n’icyumba gikorerwamo igeragezwa ry’Ubuzima bw’abakinnyi.

Mu bindi iki kigo gishinzwe uretse kwita ku buzima bw’abakinnyi harimo guteza imbere ubukerarugendo muri aka gace aho gifasha abakerarugendo ku babakodesha amagare yo kugendaho, aho ku masaha atatu igare rikodeshwa amadollars 75 y’abanyamerika naho ku munsi rigakodeshwa $135.

Muri iki kigo kandi harimo kubakwa ikibuga cyagenewe amagare bakinisha bayasimbutsa BMX Extreme Sports, inzira y’uyu mukino ikaba yaramze gutunganwa nk’uko mubibona hasi ku mafoto agaragaza udukingo ayo magare azajya asimbuka.

Sitade mpuzamahanga ya Cricket iri i Gahanga

Uwo ni umukino wa Cricket, benshi mu Banyarwanda ntibarawumenya cyane, gusa batangiye kugenda bawumenya bitewe n’uduhigo abanyarwanda bawukina bagiye bakora, ku ikubitiro Eric Dusingizimana yakoze amateka yo kumara amasaha 51 agarura udupira dukoreshwa muri uyu mukino, ahita yandikwa mu gitabo cyandikwamo abakoze ibidasanzwe ku isi (Guiness World records).

Byatumye mu Rwanda hubakwa Stade y’akataraboneka muri uyu mukino

Mu karere ka Kicukiro, ahitwa i Gahanga, ubu hubatse Stade ya mbere muri
Afurika utabariyemo igihugu cy’Afurika y’Epfo, ikaba iri kubakwa bivuye ku nkunga zitandukanye, zahereye kuri Leta y’u Rwanda yatanze ubutaka bwo kubakamo iyi Stade bungana na Hegitari 4.5, ndetse inabasonera imisoro isanzwe itangwa ku bikorwa nk’ibi ingana na 18% by’ingengo y’imari y’uyu mushinga.

Iyi Stade yubatse i Gahanga, ifite uburebure bwa metero 124, ubugari bwa metero 137, aho ifite ikibuga cy’ubwatsi, aho abafana bicara (Tribune nto) igizwe n’urwambariro, na Club aho umuntu yafatira icyo kunywa,

Nyuma yo kubaka iyi Stade byiswe phase ya mbere, hanateganyijwe phase ya kabiri yo kubaka ikibuga kindi cya cricket, gishobora kuzajya cyifashishwa nk’ikibuga cy’imyitozo.

Stade y’i Gahanga yatashywe ku mugaragaro na Perezida Kagame (Amafoto)

Stade ya Gahanga yafunguwe ku mugaragaro na Perezida Kagame

Perezida Kagame yavuze ko kwizihiza uyu munsi bibaye mu bihe bigoye kubera Covid-19, bityo akibutsa abantu ko ari ngombwa gukomeza guhangana na yo.

Ati “Turizihiza uyu munsi mu bihe bikomeye, duhanganye n’icyorezo cya Covid-19. Iki cyorezo ni ikigeragezo, uko tukirwanya bigaragaza uburyo twiteguye guhangana n’ibindi byose byagerageza guhungabanya ubuzima bwacu n’ibyo tumaze kugeraho. Nk’uko rero twiteguye kwirinda no kurinda iby’abaturarwanda bose, ni nako tugomba kurwanya Covid-19 kandi tukayitsinda”.

Ati “Isi yose yahuye n’iki cyorezo, abazacyivanamo neza ni abazaba bafite ingamba n’ibikorwa bihamye, n’abenegihugu barangwa n’imiterere n’imico yubaka. Uru ni urundi rugamba na rwo tugomba gutsinda, bityo tugakomeza mu nzira nziza twahisemo”.

Perezida Kagame yagarutse kandi ku bikorwa by’iterambere byatashywe hirya no hino mu gihugu n’icyo bimariye Abanyarwanda.

Ati “Uyu munsi twatashye ibikorwa by’amajyambere hirya no hino mu gihugu, bigeza serivisi ku Banyarwanda aho batuye, bigamije kandi kuzamura imibereho ya buri wese no guha agaciro buri muturarwanda”.

Ati “Nyuma y’imyaka myinshi ya politiki mbi, y’ubusambo, y’urwango, tumaze kongera kubaka igihugu cyacu twese, kitari icya bamwe gusa. Ni igihugu aho buri wese yita ku wundi, ubu Abanyarwanda dufite ubwigenge n’ubushobozi bwo gukora no kugera ku byo twifuza nta nkomyi”.

Yavuze kandi ko kwibohora ari urugendo rugikomeje ndetse ko binareba n’umugabane wa Afurika muri rusange.

Ati “Kwibohora ni urugendo rugikomeza kandi dusangiye n’abandi Banyafurika, ibikenewe byose kugira ngo tuzarusoze tugeze Afurika aho twifuza birahari. U Rwanda rero ruzakomeza gutanga umusanzu warwo mu kwibohora kuri uyu mugabane wacu wa Afurika”.

Ati “Twishimiye ko tumaze kubaka igihugu gishya, cyiza, kandi kibereye Abanyarwanda bose. Dukomeze muri iyo nzira, twese hamwe abagore n’abagabo, abakuze n’abakiri bato, ariko cyane cyane urubyiruko rufite ejo hazaza hacu mu maboko yarwo”.

Yakomeje avuga ko Guverinoma ikora ibishoboka byose kugira ngo ibyo bigerweho, ko icya ngombwa ari uko amategeko akurikizwa, umutungo w’igihugu ntukoreshwe nabi cyangwa mu nyungu z’abantu bwite.

Yabitangaje kuri uyu wa 04 Nyakanga ubwo hatahwaga ibikorwa byakozwe mu rwego rwo kwizihiza imyaka 26 ishize urugamba rwo kubohora igihugu rurangiye.

Ni ibikorwa byatashywe ku mugaragaro na Perezida wa Repubulika Paul Kagame.

Yabanje gutambagira ahubatswe ibyo bikorwa no gusobanurirwa uburyo byubatswe. Muri ibyo bikorwa yasuye birimo Umudugudu w’Icyitegererezo wa Gishuro, ishuri ryisumbuye rya Tabagwe, umuhanda wa kaburimbo Nyagatare-Tabagwe na Karama.

Minisitiri w’Ubuzima Dr. Daniel Ngamije avuga ko mu bikorwaremezo 11 byubatswe harimo ibitaro bya Gatonde n’ibya Gatunda ndetse n’ibigo nderabuzima 9 harimo icya Tabagwe cyasuwe.

Dr. Daniel Ngamije avuga ko ibitaro bya Gatunda byuzuye bitwaye amafaranga y’u Rwanda miliyari 5 na miliyoni 600 bikazita ku baturage ibihumbi 160.

Avuga ko abakozi bazabikoramo bamaze kuboneka ndetse batangiye kuvura indwara zoroheje. Kuba bitaratangira gukora uko bikwiye ngo byatewe n’icyorezo cya COVID-19.

Ati “Uyu munsi ntibaratangira gukora kubera ikibazo twagize cy’ibikoresho byari byaraguzwe ariko kubera COVID-19, mu gihe cy’ukwezi kwa gatatu n’ukwa kane hari Guma mu Rugo ahantu henshi nko mu Butaliyani aho twaguraga ibikoresho no mu Bushinwa. Ibikoresho bizatinda kugera mu gihugu kuko kuri Lots 18 z’ibikoresho byo kwa muganga twaguze, 15 zizagera ino aha tariki 31 Nyakanga izindi 3 zisigaye zigere ino aha mu kwezi kwa munani.”

Minisitiri w’Ubuzima Dr. Daniel Ngamije yavuze ko ibitaro bizatangira gukora ku itariki 30 z’ukwezi kwa munani 2020.

Minisitiri w’Ubuzima yavuze ko abakozi bamaze kugera mu bitaro n’ibikoresho bimwe na bimwe bikaba bihari. Yavuze ko abarwayi barwaye indwara zoroheje bakirwa harimo nk’ababyeyi babyara.

Mu bikorwa by’ubuzima kandi hari ikigo nderabuzima cya Tabagwe cyaguwe ku gaciro ka miliyari 1 na miliyoni 200.

Ni ikigo nderabuzima cyubatswe ku bufatanye na Minisiteri y’Ubuzima ndetse na Imbuto Foundation.

Dr. Daniel Ngamije avuga ko ibikoresho byose n’abakozi bihari hasigaye kubishyiramo kugira ngo ku wa mbere w’icyumweru gitaha ikigo nderabuzima kizatangire gukora.

Naho ivuriro ry’ibanze rya Gishuro riri mu mudugudu w’icyitegererezo ngo rizafasha imiryango 64 yatujwe muri uyu mudugudu ndetse n’abaturage basaga ibihumbi 3 umudugudu wubatsemo.

Muri serivise zizatangwa muri iri vuriro rito ngo ni ugusuzuma abantu, kubaha imiti, kubakorera ibizamini bya Laboratwari, kubagira inama zo kwa muganga no kuboneza urubyaro.

Minisitiri w’Ubuzima avuga ko kwegereza abaturage ibikorwa remezo by’ubuzima bigamije kugabanya impfu z’ababyeyi n’abana.

Amafoto: Plaisir Muzogeye

Kureba andi mafoto menshi y’uru ruzinduko rwa Perezida Kagame i Nyagatare, kanda HANO

Kayirangwa Anita yifuje kunyuza ubutumwa bwe mu muvugo yahimbye ujyanye n’isabukuru yo Kwibohora. Uwo muvugo yawugejeje kuri Kigali Today ukaba ari uyu ukurikira:

Kayirangwa Anita

Impundu zitashye i Butahwa

Ntere akabyino nshoze uruyange
Mbabwire amajya ndetse n’amaza
Nanjye nunge mu rya Nyarusaza
Ati “Bahiriwe n’Urugendo”

Inkuba n’ingoma mu marembo
Bamwe bati uwo muriri uzabe uwa nde
Bati ni bamwe barutaye batarwanze
Abandi bati reka ntibakaruture

Uko zitwegera dutega yombi
Tuti nyamara uwo murishyo turawuzi
Ni nk’uwa Cyihabugabo mu Badahemuka
Mumuhe rugari ashore Inyambo
Mwagure amarembo dore yaje!

Muhumure yakamiwe ayera
Azira ubwiko akazira urwango
Nimumukundira murarutamba
Murutambagire mugeze n’ejo!

Umurishyo urakunda uranihira
Abo bakaraza ntubumve ingendo
Mwendo wa pole ni ko babyita
Ariko bihuta bati nyamaraaa
Hatuwezi kuludi nyuma!

Mbe Ntwazakurinda wabundiye u Rwanda
Ko ijisho ryawe ryatukuriye ishyanga
Aho ntiwaba uje uduteye
Ngo dutore utwangushye dutahe ishyanga?
Ati oya naba ntatiye igihango cya
“Kibabarira wa Mwami,
Watugirira ibambe avuye iw’abandi,
Na we musenge musagurire,
Muhe urubanza mureke abanze.
Nabanze Gacamukanda,
Bicuba muci w’inzigo, Nyabuzima
Umuzimurura w’ibyazimiye
Umuzahura w’ibyo asanze.
Azanye Cyubahiro,
Yitwa Cyiha-Bugabo”.

Umurishyo ukomeza kunihira
Tuwumva hino mu Murera
Impundu zivugira iyo mu mbere
Abari mu ihaniro bati ng’izo zaje
Bashima Inkotanyi n’Iyazihanze
Dore ko yaziharaze kutaneshwa!
Ubwo ingoma zisukira ku Munyarutsi
Zihaca ibikumba zikumbura ingamba
Bati iri kotaniro ntiryimirwa
Agatsinda turajya i Butahwa
Niruze rwande kandi rweme!

Bakora mu ruge bararenza
Ingamba nyinshi zimisha imituku
Ariko nako baca akabogi ngo imituku ihoshe!

Hirya y’I Butahwa bahaca ingando
Bati reka tuganire kumwe byahoze
Maze amahanga aturirimbe
Bati “urwa Gasabo rubaye urugero”!
Bajya mu mimaro barayinoza
Bamwe bati iyi mpigi iratuza
Abandi bati iyi ni imperuka
Reka nyandike nyitoze benshi!
Akabi ni umurozi wo mu kirambi!

Biteye kabiri imperuka iratera
Idutera ubwoba irukora munda
Bene Gihanga barora iyo mpinga
Bati ya mimaro itewe icyasha
Dore igihango kiraturembuza
Nimuhaguruke rudatemba!

Igihugu kirataka kiratakamba
Amarira menshi ahaca inkora
Abahungu barihuta
Ntibatinya imvura y’amahindu
Ntibatinya ijoro rijigije
Bahaba intwari bitijanwa
Bagaba ibitambo bizira inenge
Bagarura u Rwanda bokaruhorana!
Impundu nyinshi zivuga urwunge
Baturwa impakanizi bacyura inganji
Bacyura ubuhoro mu rwa Gasabo
Inzira y’ishora ibona abashumba
Narwo rurakunda ruranda
Iyaruhanze iruha umugisha
Na ya maraso ashibuka amasaro!

Umuyobozi w’Ikigo nderabuzima cya Nyamata, Musine Gilbert, yavuze ko ari igikorwa bifuje gukora mu rwego rwo kwizihiza ku nshuro ya 26 umunsi mukuru wo Kwibohora. Ni igikorwa bakoze ku nshuro ya mbere, ariko ngo bifuza kuzajya bagikora buri mwaka.

Musine yavuze ko icyatumye bahitamo kugabira inka uwamugariye ku rugamba, ntibamuhe ibindi bintu bisanzwe, ngo ni uko inka ari ikintu kiranga urukundo mu muco nyarwanda.

Yagize ati “Twabiganiriyeho nk’abakozi b’Ikigo Nderabuzima cya Nyamata, twemeza ko hari icyo dukwiye gukora mu rwego rwo kwizihiza umunsi wo kwibohora ku nshuro ya 26, twiyemeza kugabira umwe mu bamugariye ku rugamba rwo kwibohora.”

Ati “Twe nk’Ikigo, ntitwari kumenya uwo dukwiriye kugabira muri iyo gahunda, ariko twakoranye n’ubuyobozi bw’Umurenge wa Nyamata, budufasha kubona umugenerwabikorwa ukwiriye kugabirwa iyo nka. Ni uko twamenye Twagirayezu Jean Damascène”.

Twagirayezu Jean Damascène

Twagirayezu Jean Damascène (uzwi cyane ku izina rya Mupenzi), w’imyaka 52 y’amavuko, ni umugabo wubatse ufite n’abana 4. Ubu atuye mu Mudugudu wa Gahembe, Akagari ka Maranyundo,Umurenge wa Nyamata mu Karere ka Bugesera.

Ni umwe mu barwanye urugamba rwo kubohora igihugu, kugeza ubwo kibohowe, akomeza kukirinda kuko n’ubundi urugamba ntirwarangiriye mu 1994, kuko hakurikiyeho intambara z’abacengezi bateraga u Rwanda baturutse mu bihugu bahungiyemo. Ni muri icyo gihe yamugaye kuko yamugaye mu 1996.

Icyo gihe yararashwe akomereka amaguru yombi ariko kumwe guhita gucika. Ubu afite ukuguru kumwe, akaba agendera ku mbago. Kuri we nk’umuntu wari umusore muri icyo gihe ngo yumvise ubuzima buhindutse akibaza uko bizagenda nyuma y’aho.

Yagize ati “Nk’umuntu wari umusore muri icyo gihe, numvise ubuzima buhindutse, nkajya nibaza uko bizagenda, nibaza uko nzagira umuryango, nibaza nti uzankunda meze ntya azava he, mbese numvaga ntawankunda.”

Ati “Icyo gihe abamugariye ku rugamba bashyirwaga mu kigo i Kanombe, ariko rimwe na rimwe mugasohoka hanze y’ikigo, ni aho nahuriye n’umukobwa arankunda, tubyarana umwana, nyuma turashakana, ubu tumaranye imyaka 15 dufitanye abana bane(4),kandi tubana neza nta kibazo”.

Ubundi ngo iyo bavuze kwibohora, Twagirayezu we ngo ahita atekereza ubuzima yabagamo na mbere yo kujya mu gisirikare uko bwari bumeze.

Yagize ati, “Njyewe iyo bavuze kwibohora, ntekereza ubuzima na mbere yo kujya mu gisirikare uko bwari bumeze ino aha, ku buryo numva no kumugara ari ishema kuri jye, kuko nakoreye igihugu cyanjye n’umuryango wanjye ndetse n’igihugu, kuko Abanyarwanda baca umugani ngo ‘wanga kumenera igihugu amaraso imbwa zikayanywera ubusa.”

Ati “Kuba bangabiye inka, mbifata ko ari uko dufite ubuyobozi bwiza, nkumva bampa agaciro, nkumva banyibutse, nkumva binshimishije. Si jye jyenyine wamugariye ku rugamba, turi benshi, ariko igikorwa nk’iki kinyereka ko abantu baha agaciro igikorwa twakoze”.

“Mu by’ukuri mbere yo gushimira abangabiye, ndashimira Perezida wa Repubulika, ni we wadushyize imbere ati, nimubohore igihugu, turamwumvira, bamwe turamugara, abandi barapfa ariko igihugu kirabohoka. Ndashimira ubuyobozi bw’Umurenge wa Nyamata n’ubw’Ikigo Nderabuzima cya Nyamata bampisemo bakangabira, kuko abamugariye ku rugamba turi benshi. Ndishimye n’umuryango wanjye, nshimye inka nziza mumpaye, abana banjye babone amata, batazarwara bwaki. Ndabashimiye cyane”.

Umwe mu baturanye na Twagirayezu wari uhari agabirwa witwa Butera, yagize icyo avuga ashimira abakoze icyo gikorwa.

Yagize ati “Iyo tubonye ko muzirikana abamugariye ku rugamba rwo kwibohora n’abaruguyeho, biduha icyizere ko icyatumye urugamba rubaho kitazongera. Turishimye ko mwamwibutse, buriya nanaryama, araba atekereza ko ari kumwe n’abantu bamukunze. Afite ukuguru kumwe, ariko buriya arumva afite amaguru yombi kubera mwebwe”.

Umuyobozi w’Umurenge wa Nyamata na we wari waje muri icyo gikorwa cyo kugabira Twagirayezu.Yavuze ko bamushimira we n’umuryango we kandi ko yizeye ko inka yagabiwe azayifata neza.

Twagirayezu nta nka yagiraga, kuko nk’uko bivugwa n’umuturanyi we, ngo yigeze kuyihabwa muri gahunda ya ‘Girinka’, ariko icyo gihe yari umuyobozi w’Umudugudu wabo, kandi amabwiriza ya Girinka atemera ko umuyobozi ayihabwa,icyo gihe iyo yari yahawe bayiha undi. Nyuma yaje kubona indi nka ariko agira ibyago irapfa.

Gusa abaturanyi be, bamugiriye inama y’uko iyo nka yagabiwe yayishyira muri gahunda y’ubwisungane (mituweli). Iyo ni gahunda ibaho umuntu akishyura amafaranga y’ubwisungane ku mwaka, inka ye yarwara akayifatira imiti ku buntu, yapfa bakamushumbusha indi bitewe n’ikigero yari igezemo.

Twagirayezu na Madamu

Madamu Jeannette Kagame

Mu butumwa bwe, yagize ati “Nubwo urugamba rwo kubohora igihugu twarutsinze, ntitwakwirengagiza ko urugendo rugikomeza. Ibi bisobanuye ko n’ubwo Umunyarwanda yabohowe, ariko agomba kubaho neza, akagira aho aba, akivuza neza, agatura heza, kandi byose akabigiramo uruhare."

"Nubwo urugamba rwo kubohora igihugu twarutsinze,ntitwakwirengagiza ko urugendo rugikomeza,ibi bisobanuye ko n'ubwo Umunyarwanda yabohowe, ariko agomba kubaho neza, akagira aho aba, akivuza neza, agatura heza, kandi byose akabigiramo uruhare."- Nyakubahwa Madamu Jeannette Kagame pic.twitter.com/fW9gseaO61

— First Lady of Rwanda (@FirstLadyRwanda) July 4, 2020

U Rwanda muri uyu mwaka wa 2020 rurizihiza isabukuru yo Kwibohora rugendera ku nsanganyamatsiko igira iti “Kwibohora Twubaka u Rwanda Twifuza.”

Nyuma y’urugamba rwo kubohora igihugu, muri iki gihe urugendo rukaba rukomereje mu kwibanda ku bikorwa by’iterambere ry’Igihugu muri rusange, ndetse n’iry’abaturage by’umwihariko.

Ni muri urwo rwego muri iki cyumweru hirya no hino mu gihugu hakomeje gutahwa ku mugaragaro ibikorwa by’indashyikirwa muri buri karere, bimurikirwa abaturage bigenewe.

Biteganyijwe ko mu rwego rwo kwirinda COVID-19 biteganyijwe ko nta nama zihuriza hamwe abaturage benshi zibaho kuri uyu munsi, ahubwo ibiganiro bikaba bikomeza gutangwa hifashishijwe itangazamakuru n’imbuga nkoranyambaga.

Aminimungu Phocas

Uwo mugabo utuye mu Murenge wa Muhoza mu Karere ka Musanze, avuga ko yari mu ngabo zarwanye urugamba rwo kubohora igihugu, aho yinjiye mu gisirikare mu mwaka wa 1990.

Avuga ko nyuma yo gukomereka bikamutera ubumuga bukomeye, yarwaye igihe kirekire ariko igihugu cyimwitaho kiramuvuza, aho ubu yumva ameze neza.

Agira ati “Nkimara gukomereka urumva byarangoye, nararwaye ngira amahirwe banyitaho ndavurwa, ibice by’umubiri byakomeretse ni mu isura, ibyinshi byavuyeho urabona urwasaya rwose rwaragiye”.

Uwo mugabo ufite abana batatu n’umugore, avuga ko nyuma yo kugira ubwo bumuga, bitamuteye ipfunwe no kwiheba, aho yemeza ko ubwo bumuga abufata nk’ishema ry’uko yakomeretse arwanira ubusugire bw’igihugu.

Agira ati “Nkimara kubona ibimbayeho ko isura yanjye ijemo agatotsi, nta kibazo nabigizeho kuko ibi mbifata nk’ishema ryo gukorera igihugu, ubu nta kibazo mfite igihugu kinyitaho, ni yo mpamvu ngikunda kandi nkacyubaha”.

Avuga ko kuva asubijwe mu buzima busanzwe mu mwaka wa 2001, abayeho neza kuko Komisiyo ishinzwe gusubiza mu buzima busanzwe abahoze ku rugerero, imufasha umunsi ku wundi ndetse akaba yaramaze kubakirwa n’inzu.

Agira ati “Mbere yo kunyubakira inzu, Komisiyo ya ‘Demobilisation’ yabanje kunsezerera impa n’amafaranga nifashisha mu buzima busanzwe nari ngiyemo.

Ayo mafaranga yaramfashije nkodesha imirima mpinga ibirayi, Komisiyo ikomeza kudusura ireba imibereho yacu inyubakira inzu mbamo, ndetse bampa n’amafaranga ahoraho angana n’ibihumbi 50 mbona buri kwezi, kandi ndanizigamira”.

Aminimungu ashimira uwari umukunzi we mbere utarigeze amwanga

Uwo mugabo avuga ko ubwo yajyaga ku rugamba yasize umukunzi we, ari na we ubu babana nk’umugore we. Akaba amushimira ubutwari yagize bwo kwemera ko babana mu gihe bakundanye ataragira ubumuga, nyuma y’urugamba akagaruka yaratakaje ibice bigize isura ye.

Yagize ati “Nyuma yo gukomereka, nari mfite ubwoba ko fiyanse wanjye azanyanga akishakira undi, nza gutungurwa n’uko ambwiye ko akinkunda. Yahise anyemerera ko dupanga gahunda yo kubana, kuko yari anzi ntarakomereka ntarajya mu gisirikare”.

Arongera ati “Umukunzi wanjye aravuga ati ‘kuba warabaye uku, si wowe wigize ko ndacyagukunda kandi n’ubwo wari kuba ari uku wavutse, Imana igira uko igena sinari kubura kugukunda, njye ndacyagukunda ndizera ko nawe ukinkunda, niba rero ari ubumuga ugize tuzabufatanya nta kibazo’. Ubu umugore wanjye tubanye neza turaharanira iterambere ry’urugo rwacu”.

Aminimungu (izina ryo mu rurimi rw’Igiswahili risobanura ‘izere Imana’) avuga ko akomeje gushaka icyamuteza imbere akaba ari umwe mu bagize umuryango RECOPDO, uhuza abakomerekeye ku rugamba n’abandi bantu bafite ubumuga bunyuranye mu rwego rwo gukomeza kwishakamo ibisubizo, aharanira iterambere rye n’iry’igihugu cye.

Asaba abafite ubumuga kudacika intege ngo bigunge, ababwira ko bashoboye, ko bakwiye gukura amaboko mu mufuka bashaka icyabateza imbere.

Ati “Abafite ubumuga twese turashoboye ntidukwiye kwiheba, tugomba kwigirira icyizere. Nubwo mfite ubumuga, igihugu cyanjye ndagikunda kandi ndacyubaha ngomba kugikorera, iyo niteje imbere mba nteza igihugu cyanjye imbere, igihugu cyanjye ngifata nk’ubutunzi bukomeye”.

Mu rwego rwo gukomeza gushaka icyamuteza imbere n’umuryango we, uwo mugabo yatangiye kwiga umwuga wo gukora inkweto ku nkunga ya Leta ibinyujije mu muryango RECOPDO, aho yemeza ko aramutse abonye ubufasha bwisumbuyeho yagira ibikorwa byinshi akora byamufasha kurushaho gutera imbere.

Hagati mu mudugudu harimo umuhanda wa kaburimbo

Ni umudugudu wubatswe mu Kagari ka Gicuro mu Murenge wa Tabagwe ukaba uzatuzwamo imiryango 64 irimo abagize uruhare mu kubohora igihugu, abasirikare bamugariye ku rugamba n’abandi baturage batishoboye mu mirenge yose igize Akarere ka Nyagatare.

Ibikorwa birimo ni inzu zo guturamo, inzu mberabyombi, ivuriro ry’ibanze, irerero (ECD), ibibuga by’imikino, ubworozi bw’inka, ubuhinzi bw’ubwatsi bw’amatungo, ubuhinzi bw’imbuto, n’ubundi busanzwe, n’ubworozi bw’inkoko.

Uwo muyobozi yabwiye Kigali Today ati “Ibikorwa birimo ni byinshi gusa harimo ubuhinzi bw’inanasi n’imyembe, inka 64 zamaze kugeramo n’ubwatsi bwazo burahari, inkoko zirimo, bafite ubutaka bazahinga n’indi myaka nk’ibishyimbo, aho abana bigira ndetse n’aho iyo miryango izivuriza.”

Umudugudu w’icyitegererezo wa Tabagwe uri ku buso bwa hegitari 76.

Aho abana bazajya bakinira imikino itandukanye

Amashuri abana bazigiramo

Zimwe mu nzu zo mu mudugudu w’icyitegererezo wa Gicuro

Inzu bazaturamo

Inzu mberabyombi yo gukoreramo ibiganiro, inama n’ibindi

Bimwe mu bibuga by’imikino

Imbere mu irerero ry’abana b’incuke

Ibiraro by’inka

Nyarugenge

Ubuyobozi bw’aka karere bubifashijwemo n’Ikigo gishinzwe Ubwiteganyirize mu Rwanda (RSSB) batanze inzu y’urwunge yubatswe mu Murenge wa Mageragere mu Kagari ka Kankuba mu mudugudu wa Rugendabare.

Iyi ni inzu y’icyitegererezo yubakiwe imiryango umunani muri Mageragere

Uyu mugududu usanzwe wubatswe mu buryo bw’icyitegererezo utuwe n’indi miryango 72 yiganjemo abaturage barokotse Jenoside yakorewe Abatutsi mu 1994.

Ikigo RSSB kivuga ko iyo nzu igezweho yubatswe hatanzwe amafaranga y’u Rwanda miliyoni 228, kikaba cyarayigeneye abari abaturanyi bacyo mu murenge wa Muhima batagiraga aho kuba.

Umuyobozi Nshingwabikorwa w’Akarere ka Nyarugenge, Ngabonziza Emmy avuga ko muri rusange ku isabukuru ya 26 yo kwibohora, hari imiryango 36 yamaze gutuzwa mu nzu nshyashya, ariko hakiri n’indi 37 izatuzwa muri uku kwezi kwa karindwi.

Uyu muyobozi yagaragaje kandi ibitaro bishya byubatse i Nyamirambo, bikaba biteganyijwe kuzunganira ibya Muhima kuko bifite ubushobozi bwo kwakira abarwayi bavurwa bataha nibura 300 ku munsi, ndetse n’abashobora kurara barenga 120.

Ibitaro by’icyitegererezo birimo kubakwa i Nyamirambo, bikaba bizunganira ibya Muhima

Agira ati “Ni ibitaro bifite serivisi zihambaye zirenze izatangwaga n’ibitaro bya Muhima, kandi iki ni icyiciro cya mbere kuko hari ibindi byiciro byo kubigira ivuriro ryo ku rwego rufasha Igihugu muri rusange”.

Akarere ka Nyarugenge kandi kamuritse amarerero arimo iryo ku Muhima rizafasha abana b’abahoze bacururiza mu muhanda kubona aho birirwa mu rwego kubarinda gukubaganira ababyeyi mu gihe barimo gucururiza mu isoko bubakiwe.

Irerero ry’abana b’abahoze bacururiza mu mihanda ubu basigaye barahawe isoko

Abahoze ari abazunguzayi bavuga ko iryo rerero ryari rikenewe cyane kuko abana badatuma bacuruza

Gasabo

Aka karere kahaye imiryango 42 inzu zo guturamo mu mirenge itandukanye, ndetse n’inzu zirindwi (7) z’icyitegererezo zatashwe mu Murenge wa Bumbogo, zo zikaba zatujwemo imiryango 14 y’abarokotse Jenoside yakorewe Abatutsi.

Inama y’igihugu y’abagore ifatanyije n’Urugaga rw’abagore rushamikiye ku muryango FPR-Inkotanyi, baremeye abagizweho ingaruka na gahunda ya “Guma mu Rugo” hamwe n’abamugariye ku rugamba batuye mu mirenge ya Jabana na Gikomero, aho babashyiriye ibiribwa n’ibikoresho by’isuku.

Akarere ka Gasabo katashye inzu kubakiye abaturage, amasoko, amavuriro, ibiro by’umudugudu by’icyitegererezo

CNF n’Urugaga rw’abagore rushamikiye kuri FPR-Inkotanyi bahaye ibiribwa imiryango ikennye

Muri aka karere kandi hatashywe ibikorwa birimo ibiro by’icyitegererezo by’umudugudu w’Akaruvusha mu kagari ka Gacuriro i Kinyinya, byatwaye amafaranga y’u Rwanda miliyoni 9.8, imihanda, isoko ryubatswe hakoreshejwe miliyoni 83, hamwe n’ikigo cy’ubuvuzi mu mudugudu wa Byimana, mu Kagari ka Musezero mu Murenge wa Gisozi.

Kicukiro

Ku rwego rw’Akarere hatashywe Ikigo cy’ishuri ry’icyitegererezo (School of Excellence) G.S Karembure mu Murenge wa Gahanga, rikaba ryari ryatangijwe na Perezida wa Repubulika Paul Kagame mu muganda yahakoreye mu mwaka wa 2017.

Akarere ka Kicukiro kamuritse ishuri ry’icyitegererezo

Ni ishuri ryuzuye ritwaye Miliyari 2,5Frw, rikaba ryubatswe mu buryo bugeretse kandi rifite ibyangombwa byose bikenerwa n’abanyeshuri. Rifite ibyumba byigirwamo 36, rikaba rifite ubushobozi bwo kwakira abanyeshuri 2,160.

Ababyeyi baturiye iryo shuri bavuga ko rije kuruhura abana urugendo rukabakaba ibirometero bitatu (3km) bakoraga bajya ku yandi mashuri asanzwe.

Jules Rutarihire ni we dukesha iyi nyandiko

Jenoside yakorewe Abatutsi yasize imfubyi n’abapfakazi, bose bafite imitima ishengutse. Yasize kandi igihugu cyuzuye amatongo. Nta n’umuntu n’umwe wari ufite icyizere cy’ejo hazaza. Igihugu cyari gikuwe mu maboko y’abanzi, ariko urugamba nyakuri rwo kwibohora nibwo rwari rutangiye: Urugamba rwavanye igihugu mu matongo, uyu munsi kikaba gihagaze uko tukireba uyu munsi.

Urugamba rwo kubohora igihugu rwatangiye muri 1990, ni urugamba rutari rworoshye kuko rwajemo ibintu byinshi bitari byiteguwe, ndetse umuntu atanatinya kwita ibyago. Gupfusha ku ikubitiro umugaba w’urugamba Nyakwigendera Maj. Gen. Gisa Fred Rwigema, hamwe n’abandi bayobozi benshi b’ingabo baguye ku rugamba uko imyaka yagiye ihita; amananiza mu mishyikirano yazanwaga na Leta ya Habyarimana kugera ubwo bita amasezerano ya Arusha ibipapuro; hamwe n’ibindi byinshi byari urucantege ku Nkotanyi zari ku rugamba. Ariko kubera ko barwaniraga ukuri, ntibigeze bateshuka ku ntego ndetse biza kurangira bayigezeho, igihugu barwaniye.

Njya nkunda kumva aho iz’amarere zatubohoye ziganira ku rugamba rwo guhagarika Jenoside. Inkuru zabo zigisha urubyiruko kwihangana no kwitanga tutizigama. Babayeho mu buzima bugoye: imbeho yo mu rugano, izuba ry’igikatu, inzara no gukora urugendo rurerure n’amaguru, hakiyongeraho guhangana n’umwanzi ubarusha ibikoresho ndetse n’ubwinshi. Ntabwo ariko ibyo byose byabaciye intege kubera ko bari bazi icyo barwanira. Hejuru yo kurwanira intego, bari bafite gukunda igihugu ari na byo byatumye bitanga batizigamye ku rugamba, kugera ubwo hari n’abahasize ubuzima baharanira kurokora Abatutsi bicwaga, maze u Rwanda rurongera rubaho.

Uwo muco wo gukunda igihugu barawukomeje ndetse bawuhaho umurage urubyiruko rwa nyuma ya Jenoside by’umwihariko, n’Abanyarwanda bose muri rusange. Nguko uko twatojwe kwishakamo ibisubizo tutarinze gutegereza ak’i muhana; nguko uko twatojwe umuco wo kwigira; ngibi ibituma tugeze aho turi uyu munsi, kandi urugendo ruracyakomeje.

Uyu munsi, Kwibohora bikorwa mu isura nshya irenze iy’ibirori: Buri tariki 4 Nyakanga tubona Nyakubahwa Perezida wa Repubulika Paul Kagame ataha ku mugaragaro ibikorwaremezo ingabo z’u Rwanda zubakiye abaturage hirya no hino mu gihugu. Abo baturage bakurwa mu manegeka bagatuzwa aheza, bakegerezwa amashuri n’amavuriro, hamwe n’indi mishinga ibafasha gukomeza kwiteza imbere. Tariki ya Kane Nyakanga buri mwaka izana umucyo mu buzima bw’abaturage.

Urugamba rwo kwibohora rurakomeje. Nk’uko Nyakubahwa Perezida wa Repubulika Paul Kagame akunze kubivuga, umwanzi uhari uyu munsi ni ubukene. Iyo tubona ibikorwa bitandukanye byo kwiteza imbere mu rubyiruko; guhanga udushya mu mishinga itandukanye igamije kuzamura imibereho y’abaturage ari na ko itanga imirimo mu rubyiruko, kuri ubu rwahagurukiye gukura amaboko mu mifuka rugakora; urwo na rwo ni urugamba rwo kwibohora rukomeje, twibohora ubukene. Ni umucyo ukomeje gusakara i Rwanda.

Twaribohoye. Umuhanzi yararirimbye ati “U Rwanda ruragendwa ijoro n’amanywa.” Ahari umutekano iterambere ntirihatangwa, bikomeje kwigaragaza. Ntabwo tuzatatira igihango cy’abagendeye ku bimene by’amacupa kugira ngo uyu munsi tugendere ku bimene by’ibicuma.

Harakabaho Inkotanyi

Inkotanyi ni Ubuzima

Mwarakoze Inkotanyi

Umuhanda wa kaburimbo uzoroshya ubuhahirane hagati ya Karama, Tabagwe na Nyagatare

Mahoro Samuel uhagarariye abikorera mu Kagari ka Kabuga mu Murenge wa Karama avuga ko bari bakeneye isoko, kuba baribonye ngo bikazabafasha kwiteza imbere.

Ati “Isoko twari turishonje cyane, ubundi twacururizaga ahantu hasi hadasakaye, imyenda ikuzura ivumbi, imvura yagwa ikanyagirwa ikangirika. Isoko ni igisubizo kuri benshi, tuzarushaho kwagura ubucuruzi bwacu kuko dukorera ahasakaye.”

Umucuruzi witwa Harabatibaza Elias wo mu Mudugudu wa Gikoba mu Kagari ka Gishuro mu Murenge wa Tabagwe avuga ko atabona uko avuga ku gikorwa cyo kubona isoko iwabo byongeye ryubakiye.

Avuga ko mbere bacururizaga mu gihugu cya Uganda ahitwa Mukarere. Uretse kuba byari bibangamye ngo byanatezaga imbere ikindi gihugu aho kuba icyabo.

Isoko rito rya Kabuga ryatumye abacuruzi bacika ku gucururiza mu isoko ryo muri Uganda

Agira ati “Sinabona uko mbivuga byarandenze, isoko twagiraga ryari iryo Mukarere (Uganda) tukaba ari ho dusora, tukubaka igihugu cyabo icyacu kigahomba. Nabibonye aho turekeye kujyayo tukemera gucururiza iwacu hasi, batari batwubakira iri soko. Mu isoko rya Mukarere hameze ibyatsi ntirigikora bivuze ngo ni twe twahacururizaga, tukabaha n’umusoro.”

Harabatibaza Elias avuga ko isoko ryabo bazarifata neza kandi bazajya basorera igihe kuko babonye ko imisoro ari yo ituma haboneka amasoko n’ibindi bikorwa remezo.

Abo muri Tabagwe bishimira kaburimbo izabafasha kugeza umusaruro wabo ku isoko

Uwitwa Nkubito Emmanuel wo mu Kagari ka Tabagwe mu Murenge wa Tabagwe avuga ko uyu muhanda ugiye koroshya ingendo ndetse n’imihahiranire kuko ubundi ngo imyaka yabo yaburaga uko igera ku isoko.

Agira ati “Nawe iki cyaro urakizi, mu nzozi zanjye sinigeze ndota ko hano hazagera kaburimbo. Iyi ni imiyoborere myiza, ababyeyi byananiranaga kubyarira hano ku kigo nderabuzima boherezwaga i Nyagatare, kubera imikuku hari abageragayo ubuzima bwabaye bubi.”

Yongeraho ati “Hano duhinga ibigori, ibishyimbo, intoki n’ibindi, kubona imodoka iza gupakira umusaruro wacu byari ikibazo, n’uwazaga yaduhendaga tukemera nta kundi twakagize. Umusaruro wacu ugiye kugera ku isoko byoroheje, ntituzongera guhendwa.”

Nkubito Emmanuel avuga ko kaburimbo izananye n’amazi meza, ikigo nderabuzima cyabo kiragurwa, umudugudu w’icyitegererezo ariko akarusho ngo ni ishuri ry’inzu igerekeranye abana bazajya biga banararamo ku babyeyi babyifuza.

Nkubito avuga ko icyo Kigali ibarusha ari uko ari umurwa mukuru w’igihugu gusa.

Yifuza ariko ko bahabwa n’uruganda rwa Kawunga kugira ngo hatazongera kubaho urwitwazo rwo kujya kugahaha muri Uganda.

Ati “None se Gasa (Umunyamakuru) ubu hari icyo Kigali iturusha uretse kuba ari Capital (Umurwa mukuru), amashanyarazi arahari, amazi, ivuriro, kaburimbo, Etage (inzu igerekeranye) yahageze n’izindi zizaza. Ahubwo turabura uruganda rwa kawunga ukareba ko hari uzongera kubona urwitwazo rwo kujya hakurya (Uganda). Keretse abananiranye bazajya bajyayo kunywa kanyanga.”

Umuhanda wa kaburimbo werekeza muri Tabagwe

Umuhanda wa kaburimbo yoroheje Nyagatare-Tabagwe-Karama uzuzura utwaye amafaranga y’u Rwanda abarirwa muri miliyari zirindwi na miliyoni 18 (7,018,458, 223).

Naho amasoko mato Rwempasha, Musheri, Shonga na Kabuga akaba yuzuye atwaye amafaranga y’u Rwanda asaga miliyoni magana inani (806,030,439).

Umuyobozi w’Akarere ka Nyagatare wungirije ushinzwe ubukungu avuga ko amasoko mato yubatswe hagamijwe gufasha abaturage gucuruza neza ibicuruzwa byabo bitanyagirwa.

Ikindi ngo mu mirenge ihana imbibi na Uganda bagira ngo barinde abaturage kujya guhahira muri Uganda umutekano wabo ukaba wahungabana.

Ati “Wabonaga abaturage akenshi na kenshi bajya kurema amasoko yo mu baturanyi kandi akenshi bakagirirayo ibibazo, hatekerezwa kubaha amaso meza kugira ngo babone aho bahahira kandi bakarindirwa umutekano.”

Naho ku muhanda wa kaburimbo uhuza Nyagatare-Tabagwe na Karama avuga ko gahunda ya Leta ari ugufasha abaturage guhahirana ndetse ngo uko ubushobozi buzaboneka izakomezwa uturere duhuzwe n’utundi.

Ikindi ariko ngo ni ingendo z’abaturage zagoranaga ikiguzi kikaba cyinshi. Kuba uzanye n’ibindi bikorwa nk’ikigo nderabuzima cya Tabagwe cyaguwe, ikigo cy’ishuri na cyo cyaguwe aho abanyeshuri bazajya bacumbika bizafasha abaturage.

Ngo imodoka zizawukoresha abaturage babona aho bagurisha umusaruro wabo no kubona aho barangura biboroheye.

Ati “Nk’ubu turimo kubaka uruganda rwa kawunga, urumva ntibazongera kujya kuyishaka muri Uganda. Ikindi abashoramari bazahitabira n’inganda nk’izo ziboneke.”

Ibi bikorwa remezo ni bimwe mu byo aba baturage bishimira ko bagezeho bagashimira Leta y’u Rwanda, by’umwihariko bakayishimira ko yababohoye ndetse ikomeje no kubabohora ibazanira iterambere.

Umuhango witabiriwe n’Umuyobozi w’Umujyi wa Kigali Pudence Rubingisa ari kumwe na Arikiyepisikopi wa Arikidiyosezi ya Kigali Musenyeri Antoine Kambanda n’Umuyobozi w’inkeragutabara mu Mujyi wa Kigali Col. Alexis Kayumba.

Ishuri ry’icyitegererezo rya Groupe Scolaire Karembure rifite ibyumba bibiri by’ikoranabuhanga bigezweho (Smart Classrooms) na murandasi (internet) ikoresha umurongo wihuta, bizafasha abanyeshuri gukora ubushakashatsi no kurahura ubumenyi butandukanye hirya no hino ku isi.

Ataha ku mugaragaro iri shuri, Umuyobozi w’Umujyi wa Kigali Pudence Rubingisa yasabye abaturage n’abarezi gufata neza iri shuri no kuribyaza umusaruro uryitezweho.

Bwana Rubingisa yagize ati: “Mugomba gukomeza gushyigikira ibyagezweho mu iterambere no kubyitaho uko bikwiye”.

Umwe mu babyeyi barerera muri iri shuri rigezweho yashimiye ubuyobozi bukuru bw’igihugu bwatanze inkunga yo kuryubaka. Yagize ati: “Ubusanzwe abana bacu bakoraga urugendo ruri hagati y’ibirometero bine na bitanu (4-5 km) bajya ku ishuri bigatuma batiga neza, iri shuri rije ari igisubizo ku bana bacu bagiye kwiga hafi”.

Ishuri ry’icyitegererezo rya Karembure mu Karere ka Kicukiro ryubatswe mu buryo bugezweho rikaba rifite ibyumba byigirwamo 36 n’ubushobozi bwo kwakira abanyeshuri 2,160.

Rifite Laboratwari 2 z’Ubutabire, ibinyabuzima n’ubugenge, Isomero, ibibuga by’imikino n’ibindi. Ibikorwa byo kuryubaka byatangijwe na Perezida wa Repubulika Paul Kagame mu muganda yahakoreye mu mwaka wa 2017.

Muri iki gihe cyo kwizihiza Isabukuru yo Kwibohora, hari bamwe mu bagize uruhare mu rugamba rwo kwibohora badakunze kumvikana. Muri bo twavuga nk’abaganga n’abaforomo bavuraga abasirikare babaga bakomerekeye ku rugamba.

Ku myaka 27, Agnes Uwayezu wakoraga nk’ umuforomokazi ku Bitaro bya Nsambya mu gihugu cya Uganda yibuka ku wa 4 Ukwakira 1990 yibona mu nama ku buryo butunguranye mu cyumba cy’ubuyobozi bw’ibitaro.

Bari bafite uburyo gakondo bwifashishwaga bwabaga bufite isuku kandi nta ngaruka ku buzima bw’umurwayi

Ngo nta gatekerezo na gato yari afite ku byari bigiye kuba yewe n’ibyo bari bagiyemo muri iyo nama, nyamara ariko iyo ni yo yari itariki ye yo kwinjira urugamba rwari rwatangiye ku wa 1 Ukwakira 1990.

Muri icyo cyumba, Uwayezu yasabwe n’abantu atari azi kwegura ku kazi yakoraga akifatanya n’ingabo za RPA (Rwanda Patriotic Front) mu rugamba rwo kubohora u Rwanda.

Inama ngo yagiye kurangira amaze kumva neza ibyo asabwa ndetse ahita abemerera ko agiye kwifatanya na bo ariko abasaba umwanya wo kubanza kubitekerezaho neza.

Iyo nama ngo yarangiye ku buryo bw’amayobera buri wese aca iye nzira bameze nk’abantu bataziranye batigeze banagira aho bahurira mu buzima.

Nyuma uwo munsi ngo abandi bantu batatu baje kongera kumubaza igihe azatangirira kwifatanya n’abandi ku rugamba ariko yongera kubasaba akandi kanya kugira ngo afate icyemezo yatekerejeho neza.

Uwayezu yatangarikje KT Press ko muri icyo gihe atasinziraga yibaza ku byo asabwa ari nabwo ku wa 9 Ukwakira 1990 yahise afata umwanzuro uhamye. Ngo yumvaga yasimbuka agahita agera aho Inkotanyi zari ziri ariko na none akumva afite ubwoba ku buryo umutima wateraga inshuro nyishi gusa akiyumvamo ubutwari n’umurava.

Asobanura ukuntu yumvise igishyika mu nda ariko akavuga ko umurava yiyumvagamo watsinze ubwoba kandi ugategeka ubwenge bwe gufata icyemezo.

Uwayezu atangiye urugendo rutari ruhire

Ku wa 9 Ukwakira 1990, Uwayezu yuriye ikamyo yari yuzuyemo ingimbi n’abangavu ngo bishimye kandi ubona biyemeje kwitangira igihugu ariko ngo batazi ikibategereje (iherezo ryabo). Ngo ntibumvaga na gato ibyo bari bagiyemo naho urugamba rumisha imituku ngo ni rwo rwari rubategereje.

Mu ijoro ryo ku wa 10 Ukwakira 1990 ngo nibwo Uwayezu n’izo ngimbi n’abangavu basezeye ku butaka bwa Uganda bambuka umupaka binjira mu Rwanda.

Avuga ko binjiriye ku Mupaka wa Kagitumba babanza gusogongera ku mafu meza aturuka mu mukenke wo mu Mutara (ubu mu Karere ka Nyagatare) mu Burasirazuba bw’u Rwanda. Bari batangiye inzira izakura u Rwanda ku ngoyi ibihe byose.

Uwayezu n’urwo rubyiruko ngo bahise batangira akazi katoroshye nta kugoheka bavura inkomere z’intambara zari zarashwe ku ikubitiro ku munsi wa mbere muri urwo rugamba rwo kubohora u Rwanda. Iyo yari ibaye intangiriro y’ inzira y’umusaraba ya Uwayezu yo gusubira mu gihugu cye.

Ntibyari ukwezi kwa buki

Amateka ya Uwayezu mu rugamba rwo kubohora igihugu ateye agahinda. We kimwe n’abandi benshi bari kumwe, ngo cyari igitambo cy’ubuzima batanze ubwo bemeraga kwifatanyaga n’Inkotanyi ku rugamba.

Agnes Uwayezu ngo ntazicuza na rimwe urugamba yarwanye. Nubwo yaruburiyeho musaza we areba ariko yarokoye benshi mu basirikare bashoboraga kuba bararuguyeho kandi bageze ku ntsinzi.

Agnes Uwayezu ngo ntazicuza na rimwe urugamba yarwanye. Nubwo yaruburiyeho musaza we areba ariko yarokoye benshi mu basirikare bashoboraga kuba bararuguyeho kandi bageze ku ntsinzi

Igitangaje ni uko Inkotanyi icyo gihe nta masomo ahagije ya gisirikare zari zarahawe. Mu by’ukuri abenshi mu basirikare b’inkotanyi bahugurwaga umunsi umwe bagahita boherezwa ku rugamba guhangana n’umwanzi.

Nubwo batari bafite ubunararibonye n’ibikoresho bihagije by’intambara ariko ngo hari ikintu bari bakizeho kurusha ibindi. Icyo ni abaganga. Ariko na none kugira umubare munini w’abaganga b’abahanga badafite ibikoresho na byo ngo byari ikindi kibazo.

Mu by’ukuri Inkotanyi nta bikoresho bihagije ngo zigeze zigira kugeza zifashe igihugu. Udutero shuma no guhanga udushya ku rugamba ariko ngo ni byo zari zikizeho. Uwayezu agira ati “Twakoreshaga abantu mu gusimbura imashini (ibyuma) tutari dufite.”

Ngo hari abaganga b’abarakare

Col (Rtd) Dr Karenzi wayoboraga Ibitaro bya Gisirikare bya Kanombe mu minsi ishize, icyo gihe yari umuyobozi w’abaganga ku rugerero rwo mu Mutara. Avuga ko nta yandi mahitamo bari bafite usibye ubunararibonye bari bafite mu kiganga bwo gukora akazi bijyanye n’ibihe barimo.

Col (Rtd) Karenzi, umwe mu baganga bavuraga abasirikare bakomerekeye ku rugamba rwo kubohora igihugu

Icyakora avuga ko bitari igisubizo kirambye ku bibazo bari barimo. Agira ati “Twakoze byinshi nta bikoresho ariko na none ibyo ni bike mu byo twashoboraga gukora dufite ibikoresho.”

Uwayezu yibukana agahinda kenshi ko bari bafite umuganga umwe ushobora kubaga mu mutwe ku buryo nta kundi bagombaga kubyifatamo ku nkomere zagize ibikomere bigera ku bwonko. Agira ati “Inkomere nyinshi nk’izo zarapfuye.”

Mu gihe bavuriraga ahantu hatajyanye n’igihe kandi bamwe bavuga ko byashoboraga no kugira ingaruka ku nkomere, Col Karenzi we yatangarije KT Press ko gukoresha ubu buryo byari byiza kubwifashishiriza mu ishyamba kuruta uko wabikorera mu nzu cyangwa ahandi hantu hafatika.

Agira ati “Inzu zari mbi cyane inkomere zishobora kuhandurira izindi ndwara.” Ati “Twari tumeze neza mu bihuru no mu ntoki munsi y’amakoma kuko nta dusimba tundi twari duhari twakwanduza inkomere.”

Icyakora muri ubu buryo, ku karubanda, na none ngo hari ibindi bibazo kuko babaga bitegeye umwanzi. Ati “Ariko twagombaga kwihisha kuko twari inyeshyamba.”

Inkomere bazitwikizaga amababi y’ibiti, amahema bakayabika neza ahantu hasukuye bakazihakura igihe bibaye ngombwa ko bimuka.

Igihe cyo kwimuka iyo cyageraga ngo byabaga ari ibindi bibazo kuko abaganga bitwazaga ibyo bakeneye byose. Agasanduku bifashisha mu buvuzi ndetse n’imiti.

Ngo hari ubwo wasangaga bata bimwe mu bikoresho kuko nta modoka bagiraga yo kubibatwaza kandi nta gihe cyo gutakaza babaga bafite.

Bageze aho bifashisha ingamiya

Mu rugamba rwo kwibohora ibikoresho ngo byagiye biba ikibazo gikomeye cyane. Abasirikare ngo babaga bagomba gukora ingendo ndende cyane n’amaguru kandi nyamara ngo n’aho bagendaga hatoroshye kubera imisozi yo mu Rwanda. Ibikoresho na byo ngo byabaga bigomba kwikorerwa ku mutwe n’abantu.

Urugamba aho rwimukiye mu Majyaruguru y’u Rwanda, bamwe mu basirikare bananiwe kurira imisozi miremire y’ibirunga nka Muhabura na Gahinga. RPA ngo byabaye ngombwa ko ishaka ingamiya zo kwikorera ibikoresho by’urugamba zibyuriza iyo misozi.

Ngo hari aho byageraga n’ingamiya zikananirwa bakazisiga ziruhuka bikaba ngombwa ko abasirikare nubwo babaga bananiwe babyikorera kugeza bageze hejuru kuri iyo misozi.

Nyamara ariko n’ibyo ngo ntibyari bihagije kuko hiyongeragaho n’ikibazo cy’ubukonje bwinshi cyane bwo mu muri iyo misozi yo mu Majyaruguru y’u Rwanda. Kubera ibibazo byinshi byari bihari, abasirikare benshi b’inkotanyi ngo batikiriye muri iyo misozi.

Umunsi umwe, abaganga ngo babyutse bahura n’ikibazo gikomeye aho abenshi mu basirikare bafashwe n’indwara yo gucibwamo. Nubwo bitatinze ariko Col (Rtd) Dr Karenzi avuga ko byateje ibibazo bikomeye cyane.

Ngo byabaye ngombwa ko abaganga bakoresha ubunararibonye bwabo mu gukumira uko gucibwamo ariko ngo byarabahenze cyane nk’uko Col Dr Karenzi abivuga.

Mu by’ukuri RPA ngo yarwanaga intambara ebyiri icyarimwe. Mu gihe urugamba rwabaga rumisha imituku, abaganga bagombaga kuba bari aho ngaho ntabyo kuhakura ukuguru. Ngo biragoye ko bakwibuka umubare w’abasirikare babaguye mu biganza, nta n’ubwo babara abasirikare babaguye imbere bategereje ubufasha. Ariko na none ngo ntibabara abo bavuye bagakira.

Intambara y’urugamba rwo kwibohora ntawayivuga atavuze izi ntwari z’abaganga n’abasirikare bakoze akazi katoroshye ko kuvura inkomere ndetse n’abasirikare babaga barwaye.

Mu myaka ishize, unyamakuru wa Kigali Today/KT Press, mu kiganiro na Denis Karera umusirikare wari umuganga muri Batayo imwe na Dr Richard Sezibera, yamutangarije ko Dr Sezibera yari umwe mu baganga b’abahanga cyane RPA yari ifite. Yagize ati “Ni umuganga w’impirimbanyi, ukunda akazi cyane, bigoye kubona ahandi.”

Dr Sezibera yanabayeho umuganga wa Maj Gen Paul Kagame muri icyo gihe.

Karera yabwiye uyu umunyamakuru ko adashobora kuzibagirwa ubuhanga n’ubwitange bwa Dr Sezibera mu kuvura inkomere kuri urwo rugamba.

Avuga ko Dr Sezibera yabahaga icyizere cy’ubuzima kuko no mu bihe bikomeye aho bumvaga ntawe uri busigare ubuzima bwabo bwabaga buri mu biganza bye.

Ubuyobozi bukuru bwa RPA bugabwaho igitero simusiga

Col Dr Karenzi avuga ko hari ibihe batazibagirwa mu ntambara yo kubohora igihugu. Icy’ingenzi muri ibyo bihe ngo ni igihe Ibiro bikuru by’Ubuyobozi bwa RPA bwari buyobowe na Maj Gen Kagame byashyizwe ahegeranye n’aho bavuriraga inkomere. Avuga ko mu buryo butunguranye umwanzi yaje kubinjirana muri byo birindiro byombi.

Kimwe mu bihe bitazibagirana ngo ni igihe begeranyije ibirindiro by’Ubuyobozi Bukuru bwa RPA n’aho bavuriraga inkomere umwanzi akabatungura akabatera hakaba urugamba rwaguyeho benshi

Col Dr Karenzi agira ati “Ubuzima bwarabishye! Byari ibicika! Byari bimeze nk’imvura y’amabombe!”

Uwayezu na we ngo yari ahari ubwo bahuraga n’aka kaga. Agira ati “Ubwoba bwaradutashye! Twarahababariye!”

Bamwe mu barwanye urugamba rwo kubohora igihugu bavuga ko byari byaturutse ku ikosa RPA yari yakoze ku rugamba ariko ngo ibyabayeho ni inkuru na n’ubu itarabarwa.

Muri ibyo bihe buri wese yarwanaga ashaka aho yihisha ngo abaganga n’abaforomo bo baguye mu muriro batari biteguye. Bagombaga byanze bikunze kugera kuri buri nkomere bakayitaho.

Dr Karenzi agira ati “Sinzi uko narokotse ariko amahirwe ya nyuma twagize ni uko ubuyobozi bukuru bwa RPA bwatangiye kuhimuka.”

Aganira na KT Press, Col Dr Karenzi akomeza agira ati “Uwo munsi abasirikare batabarika baguye kuri urwo rugamba abandi bagwa aho twavuriraga turimo kubitaho. Byabaye ngombwa ko tuhimuka.”

Icyakora ariko, kimwe mu byo abaganga bagombaga kumenyera ngo harimo kubona abasirikare bapfa mu buryo bubi cyane. Ngo nta buryo abaganga bari bafite bwo gutabara inkomere zimerewe nabi ku buryo bwihuse. Col Dr Karenzi yibuka bamwe mu baganga bitanga kugira ngo bagire abo barokora.

Uwayezu muri uru rugamba ngo yiboneye n’amaso musaza we apfa nyuma y’uko umwanzi ngo amurashe mu gifu. Icyakora intwari nka Uwayezu yarokokeye kubyina intsinzi igihugu kimaze kubohorwa.

Uwayezu ngo akiva i Kampala yaragize ati “Tuzarwana kugeza dupfuye cyangwa dutsinze tukabaho.”

Ni ukuri koko kuko intsinzi yayigezeho, kuko nyuma y’urugamba rwo kubohora igihugu, Uwayezu yakomeje imirimo y’ubuvuzi nko mu Bitaro by’Umwami Fayisali (King Faisal Hospital) akaba yaranakuriye Inama y’Igihugu y’Abaforomo n’Ababyaza (NCNM).

Impamvu ni uko ngo amashuri abana babo bigaho ari hakurya y’umugezi wa Mwogo, ku buryo kujya ku ishuri byabasabaga kuzenguruka aho bagendaga ibirometero bigeze kuri bitatu, nyamara wambutse umugezi ugenda urugendo rutarenze ikilometero kimwe, nk’uko bivugwa na Tharcisse Ntijyinama, uhatuye.

Agira ati “Nawe urabyumva, umwana uko yiga kure ni ko akererwa, ariko uko yiga hafi ni ko abasha kugera ku ishuri kare, agatangirana amasomo n’abandi atanananiwe, bityo akunguka ubumenyi. Ikirenze kuri ibyo, ni uko iyo imvura yagwaga ari nyinshi, abana basibaga, kandi uko umwana asiba ni ko aba ari mu nzira yo guta ishuri.”

Iri teme ryo mu kirere rihuza utugari twa Kamegeri, Rususa na Nyarusiza, ngo rizafasha n’abahinga mu nkengero za Mwogo kuko bazajya babasha kugera mu mirima yabo bitabagoye. Kimwe n’abanyeshuri, ufite umurima hakurya byabaga ngombwa ko ajya kuzenguruka, yashaka kunyura iya hafi hakaba igihe aguye muri uyu mugezi.

Ntijyinama ati “Iyo Mwogo yuzuraga yatwaraga abantu benshi. Harimo n’abagiye babura burundu, cyane cyane abagore n’abana. Urebye ku mwaka yatwaraga abari hagati ya bane na batandatu.”

Umuyobozi w’Akarere ka Nyamagabe ushinzwe ubukungu, Lambert Kabayiza, avuga ko mu karere kose ka Nyamagabe ubu hubatswe ibiraro byo mu kirere bitatu, harimo icyo mu Murenge wa Kamegeri, igihuza Umurenge wa Uwinkingi n’uwa Buruhukiro, n’igihuza imirenge yaMushubi na Mugano.

Icyakora ngo bateganyaga kubaka birindwi, mu mwaka w’ingengo y’imari 2019-2020, ariko bakomwe mu nkokora n’ibiza ndetse na Coronavirus.

Agira ati “Hari bamwe mu bagombaga kubyubaka bari bagiye hanze y’u Rwanda, imipaka ifungwa bataragaruka. Hari n’aho amazi yuzuye gukora birananirana.”

Ibitarubatswe ni bibiri byo mu Murenge wa Musange, kimwe cyo muri Tare, n’ikindi kimwe cyagombaga guhuza Kaduha na Mbazi. Byose hamwe byagombaga gutwara ingengo y’imari ya miriyoni 350, abaterankunga babyubaka bakishyura 50%, akarere na ko kakishyura asigaye. Kugeza ubu ayo akarere kamaze kwishyura ni aya biriya bitatu byarangiye.

Na none kandi, ibi ngo si byo biraro byonyine bari guhagarariraho, kuko biturutse ku misozi miremire yo muri aka karere, batekereza kuzubaka n’ibindi, aho babona bikwiye mu rwego rwo gufasha abaturage kugenderanirana.

Hubatswe n’amashuri ku Kigeme

Muri iyi minsi Abanyarwanda bizihiza isabukuru y’imyaka 26 y’Ukwibohora, i Nyamagabe bamwe bakishimira ibiraro byo mu kirere, ubuyobozi bw’aka karere bwo bunishimira ibyumba by’amashuri 16 yubatse mu buryo bw’igorofa, bwubatse ku bufatanye na HCR.

Hamwe n’ibindi byumba 18 akarere gateganya kubaka, byose bikazigirwamo muri Nzeri 2020, bizafasha kugabanya ubucucike mu mashuri.

Visi Meya Kabayiza anavuga ko hari n’ibindi bikorwa bishimira bitaruzura neza, ariko bigeze ku rugero rushimishije.

Muri byo harimo isoko rya kijyambere riherereye mu mujyi i Nyamagabe ryari rimaze igihe kirekire ryarananiranye kuzura, ibirometero bibiri bigana ku rwibutso rwa Jenoside rwa Murambi byashyizwemo kaburimbo, imiyoboro y’amazi n’inzu 400 zubakiwe abatishoboye batagiraga aho kuba.

Ku munsi w’itariki 4 Nyakanga 2020 ubwo u Rwanda ruba rwizihiza umunsi wo kwibihora, nibwo Cyusa akora iki gitaramo yise “Inkera yo kwibohora” akaba aririmbamo indirimbo zizwi na benshi zahoze ziririmbwa mu gihe cy’urugamba rwo kwibohora.

Mu guhuza izi ndirimbo, Cyusa yibanze cyane ku ndirimbo za Isamaza, indahemuka, iza Muyango n’iz’abandi bagiye baririmba indirimbo zongereraga ingufu (Morale) abari ku rugamba, ariko na we ngo yahimbye indirimbo imwe yihariye yageneye Umukuru w’Igihugu cy’u Rwanda Paul Kagame nk’uwari uri ku isonga ry’uru rugamba.

Ni byo Cyusa yasobanuye ati “Hari n’indirimbo y’umwihariko nahimbiye Nyakubahwa Paul Kagame, kuko ni we wari uyoboye uru rugamba, iyo na yo nzayiririmba uwo munsi.”

Cyusa avuga ko afite impamvu nyinshi zatumye ashima inkotanyi muri iki gitaramo, ariko imwe muri izo ngo ni ukuba zaramufashije kubona ubuzima nyuma yo kurokoka.

Yagize ati “Hari umuntu wandokoye wari mu batarahigwaga, kuko rero yabaga yagiye gushaka imibereho, iyo yagendaga yansigaga mu kigo cya Gisirikare abasirikare b’Inkotanyi rero barankunze cyane ku buryo byatumye nanjye nkura nkunda Inkotanyi.”

Iki gihe Cyusa yari afite imyaka ine gusa, ariko abasha kwibuka ibyiza yakorewe n’Inkotanyi muri icyo gihe ubwo yirirwaga mu nkambi ya gisirikare.

Iki gitaramo cyateguwe na Cyusa, kizatambuka ku rubuga rwa YouTube rwe rwitwa Cyusa Ibrahim, kikazatangira ku isaha ya saa moya z’umugoroba kugeza saa tatu tariki 04 Nyakanga 2020.

Ni umudugudu wubatswe ku bwitange bw’abaturage bafatanyije n’ubuyobozi

Aho bubatse uwo mudugudu wa Nengo, ni mu butaka bw’amakoro, ku musozi ugizwe n’ubutaka budahingwa, aho bemeza ko kuba barakoze icyo gikorwa bafata nk’indashyikirwa binyuze mu muganda, birindaga gukomeza kubona bagenzi babo banyagirwa.

Umwe muri bo witwa Nzabahimana Gerald ati “Ni umuganda twakoresheje, ducukura amabuye dusiza ibibanza tubumba amatafari turubaka. Ni igikorwa twatekereje ku bushake bwacu, nyuma y’uko twabonaga ko hari bamwe mu baturage babayeho mu buzima bubi”.

Arongera ati “Iyo tubonye abantu batuye mu mazu twubatse biradushimisha, aha hakwiye kuba urugendo shuri abaturage b’ahandi bakaza kutwigiraho, mu rwego rwo kwishakamo ibisubizo”.

Umukecuru witwa Ntamfurayishyari, umwe mu batujwe muri izo nzu avuga ko yabagaho mu buzima bubi anyagirwa, nyuma y’uko umuyaga urimo imvura bisenye inzu ye yari ishaje.

Avuga ko ubu abayeho mu buzima bwiza aho agira ati “Ntacyo nari nishoboje umuyaga unsenyera inzu, dukora umuganda twubaka izi nzu ubu tumeze neza”.

Nzitabakuze Siperansiya umaze imyaka itatu avuye muri Congo aho yabaga, agatuzwa muri uwo mudugudu, yagize ati “Nari mbayeho nabi mu bukene, kutarya no kutagira aho mba, Imana iba iradufashije baba bampaye inzu, Kagame arakabyara, ubu sinyagirwa ndara ngaramye neza ngasinzira nanjye ndi mu bateruye amatafari mu muganda wo kubaka izi nzu, tugomba gufasha Leta”.
Mu kubaka uwo mudugudu, Leta yatanze ubufasha bw’isakaro, sima n’inzugi, ibindi bikorwa n’abaturage aho buri nzu ihagaze amafaranga agera kuri miliyoni ebyiri, izo nzu zubatse muri uwo mudugudu zikaba zifite agaciro k’amafaranga agera kuri miliyoni 40.

Umunyamabanga Nshingwabikorwa w’Umurenge wa Busogo Nsengimana Aimable, arashima igikorwa cyakozwe n’abaturage ayoboye, avuga ko biteguye gutaha uwo mudugudu mu minsi iri imbere, ari nabwo hazabaho uburyo bwo gushimira ku mugaragaro abo baturage kubera ubwitange n’urugero rwiza batanze.

Yagize ati “Ni igikorwa dufata nk’indashyikirwa muri bimwe mu bikorwa biri muri uyu murenge wa Busogo. Ni igikorwa kigaragaza ubufatanye bw’abaturage ariko cyane cyane uruhare rwabo rwo kwishakamo ibisubizo, murabona ko ari inzu zimeze neza, abaturage bakaba baragize uruhare mu gushaka amatafari yo kubaka bakoresha n’imbaraga zabo binyuze mu muganda”.

Arongera ati “Ni ibikorwa bikomeza, hari imirimo imwe n’imwe itararangira ikinozwa, ariko ubu zicumbikiye imiryango 19 yabagaho mu buzima bubi. Turateganya gutaha uyu mudugudu nyuma y’uko imirimo ikinozwa tuzaba twayisoje, gusa nibura aho bigeze turahashima”.

Iki ni kimwe mu bikorwa aba baturage bishimira ko bagezeho bafatanyije n’ubuyobozi muri iki gihe cyo kwizihiza ku nshuro ya 26 isabukuru yo Kwibohora.

Aya magare bayashyikirijwe n’umuyobozi w’Ingabo z’u Rwanda mu Ntara y’’Amajyepfo, Major General Emmy Ruvusha, wababwiye ko bayagenewe n’Umukuru w’Igihugu kubera uruhare bagize mu rugendo rwo kwibohora.

Yaboneyeho kubasaba gukomeza gukora neza umurimo wabo, batanga amakuru ku bidasanzwe babonye byose, bakanabitoza abo bayobora, mu rwego rwo kubungabunga umutekano w’aho batuye.

Yagize ati "izo modoka z’amapine abiri muzajye muzifashisha mu kugera henshi hashoboka, kandi namwe hagati yanyu mujye munafatanya. Ni byo bizatuma mubasha kurinda neza umutekano w’abo muyobora, kandi ni cyo abayobozi baberaho."

Umuyobozi w’Ingabo mu Ntara y’Amajyepfo ati "Ni ishimwe mwohererejwe na Perezida wa Repubulika"

Yagarutse no ku kuba kuwa gatandatu ushize tariki ya 27 Kamena 2020, abatuye mu Mudugudu wa Yanza baraye batewe n’abaturutse i Burundi, hari abaturage ubwabo bifatiye umwe mu bari bateye wari ukihishe mu giturage, ashima ubufatanye bagaragaje.

Ati "Byagaragaje ko mukora. Nimureke duashyire hamwe, twongere tuzamure amarondo. Si irondo rihangana, ahubwo iritungira agatoki inzego z’umutekano ngo ngaba. Si irondo risinzira, ahubwo irigaragaza ibidasobanutse byose, inzego z’umutekano zikikurikiranira."

Abahawe amagare bashimye ishimwe bagaragarijwe na Perezida w’u Rwanda, banavuga ko ribateye ishyaka ryo kurushaho gukora neza.

Emmanuel Nubahimana, umukuru w’umudugudu wa Nyacyonga mu Murenge wa Ruheru, yagize ati "Tugiye kurushaho kugera kure, dukora byinshi bitanga umusaruro."

Josephine Kaminani uyobora Umudugudu wa Nyagisenyi mu Murenge wa Muganza, afite imyaka 42. Ntazi igare, ariko ngo agiye kuryiga ku buryo azajya aryifashisha, haba mu kugenderera bagenzi be ngo bajye inama ndetse no kujya mu nama zinyuranye.

Amagare nk’ayatanzwe mu mirenge ine y’i Nyaruguru, yatanzwe no mu yindi mirenge ikora kuri Nyungwe yo mu Ntara y’Amajyepfo no mu y’Uburengerazuba. Ayatanzwe muri rusange ni 589.

HE The President of the Republic of Rwanda and Commander-in-Chief of RDF donates 589 bicycles to village leaders in appreciation for their support to security https://t.co/2forB7meSv pic.twitter.com/vlfJsi9UAr

— Rwanda Defence Force (@RwandaMoD) July 2, 2020

Barizihiza #Kwibohora26 bishimira umuhanda wa kaburimbo bujuje

Uwo muhanda uzatahwa ni uwubatswe mu mujyi wa Nyanza, ari wo wa Maranatha-Gihisi-Mugonzi, ufite ibirometero 3.9 ukaba waratwaye asaga miliyari imwe na miliyoni 700 z’Amafaranga y’u Rwanda.

Ubuyobozi bw’ako karere buvuga ko uwo muhanda watumye mu mujyi wa Nyanza bagera ku birometero 17 by’imihanda ya kaburimbo, ngo iyo mihanda ikaba ari yo igize igice kinini cy’iyiri muri uwo mujyi.

Ngo ni igikorwa cyishimiwe cyane n’ubuyobozi ndetse n’abaturage b’ako karere kuko cyongera ubwiza bw’umujyi wa Nyanza usigaye ugendwa cyane kubera amateka ubumbatiye, ari na yo mpamvu bahisemo ko uwo muhanda utahwa muri iki gihe cyo kwizihiza isabukuru kwibohora igiye kuba ku nshuro ya 26.

Ikindi ngo mbere y’uko iyo mihanda yubakwa, uwo bagiraga wa kaburimbo ni uwanyuraga muri ako karere wa Kigali- Huye-Akanyaru gusa, kandi na wo ukakanyuramo ku gice gito.

Mu bindi byishimirwa ni inzu zubakiwe abatishoboye, aho inzu imwe iba igenewe kwakira imiryango ine (4 in One). Hubatswe inzu zo muri ubwo bwoko zirindwi (7) mu mudugudu w’icyitegererezo wa Muyira (IDP Model Village).

Buri imwe muri izo nzu ifite agaciro ka miliyoni 55 z’Amafaranga y’u Rwanda, zose zikaba zaratwaye miliyoni 385 z’Amafaranga y’u Rwanda, zikaba zararangiye neza zirimo n’ibikoresho byose bikenerwa mu nzu.

Ikindi gikorwa kiri mu bigomba gutahwa ni ubwanikiro bwa kijyambere bw’imyaka, aho bwubatswe muri buri murenge w’ako karere ndetse hakaba n’iyubatswemo uburenze kamwe mu rwego rwo guteza imbere ubuhinzi hafatwa neza umusaruro kuko ngo bari bafite imbogamizi zo kubona aho kwanika imyaka heza hatuma itangirika.

Ubwanikiro bwa kijyambere buzabafasha gufata neza umusaruro

Ubwanikiro bwubatswe bwose hamwe ni 19, bumwe bukaba bufite agaciro ka miliyoni zisaga gato cumi n’eshanu (15,235,409) z’Amafaranga y’u Rwanda, naho bwose bukaba bwaratwaye miliyoni zisaga magana abiri na mirongo inani n’icyenda (289,472,785) z’Amafaranga y’u Rwanda.

Umwaka w’ingengo y’imari wa 2019-2020 usojwe Akarere ka Nyanza kageze kuri 97.4% mu gukoresha ingengo y’imari kagenewe.

Abatishoboye bubakiwe inzu zigezweho

Mu Karere ka Bugesera baritegura kwizihiza umunsi wo Kwibohora hatahwa umuyoboro w’amazi meza, umuhanda ndetse n’inzu zubakiwe imiryango 28 itishoboye, byose bikazabera mu Mudugudu wa Kibaza, Akagari ka Gatanga, Umurenge wa Ruhuha.

Nk’uko bisobanurwa na Umwali Angelique, Umuyobozi w’Akarere ka Bugesera wungirije ushinzwe ubukungu, umuyoboro w’amazi wubatswe, ureshya na Kilometero ebyiri, ukaba warubatswe ku bufatanye bw’abaturage na ‘Water Aid – Rwanda’ nk’umufatanyabikorwa w’Akarere ka Bugesera mu bijyanye no gukwirakwiza amazi meza,isuku n’isukura mu bigo by’amashuri.

Ubundi ngo uwo muyoboro w’amazi wubatswe ahanini uje gufasha ikigo cy’ishuri cya Butereri kuko nta mazi meza cyagiraga, nyuma n’abaturage baturanye na cyo baboneraho. Uwo muyoboro w’amazi uzatahwa ku munsi wo kwibohora, uje ari igisubizo cy’amazi meza ku kigo cy’ishuri cya Butereri ndetse n’abaturage bo mu midugudu ya Rwanika, Kibaza na Butereri bawuturiye kuko ubundi bavomaga amazi y’ikiyaga, usanga ashobora kubatera indwara zitandukanye kuko atagenewe kunyobwa cyangwa gukoreshwa mu rugo.

Uwo muyoboro w’amazi wubatswe ufite agaciro ka Miliyoni umunani z’amafaranga y’u Rwanda(8.000.000Frw), habariwemo agaciro k’ingufu z’abaturage bawucukuye ndetse n’ibihumbi magana ane (400.000FRW) bakusanyije kugira ngo bikemurire ikibazo cyo kutagira amazi meza.

Inzu zubakiwe imiryango cumi n’umunani(18) itishoboye,zubatswe muri gahunda ya Leta yo gukemura ibibazo bibangamiye imibereho myiza y’abaturage. Abubakirwa inzu ni abantu babarirwa mu cyiciro cy’abakennye kurusha abandi, batangiye kugera mu zabukuru, ubona ko ntacyo bafite mbese batunzwe no guca inshuro.

Izo ni inzu zubakiwe abatishoboye mu Murenge wa Ruhuha, ni ebyiri muri imwe (2 in 1)

Kugira ngo hakorwe urutonde rw’abakeneye inzu zo kubamo kandi batishoboye, hakozwe ibarura ku bufatanye bw’Akarere ndetse na LODA, itsinda ry’abakozi bavuye mu Karere no muri LODA bakajya mu midugudu , kureba bene abo bantu bakennye cyane, kandi batagira aho baba, nyuma urutonde rwanyuzwaga mu nteko rusange y’abaturage mu midugudu bakemeza niba koko abo bantu bakwiriye kubakirwa inzu.

Muri uyu mwaka w’ingengo y’imari wa 2019-2020, Akarere ka Bugesera kagombaga kubakira imiryango 710 itari ifite aho iba, hirya no hino mu mirenge 15 igize ako Karere. Umurenge wa Ruhuha wari ufite imiryango 59 idafite inzu zo kubamo, 28 muri yo, ikaba ari yo yubakiwe inzu 14 mu Kagari ka Gatanga mu mudugudu wa Kibaza, zizatahwa tariki 4 Nyakanga 2020.

Ni inzu cumi n’enye (14) zubatse mu buryo bw’inzu ebyiri muri imwe(two in one), ku buryo imiryango ibiri isangira inzu imwe. Buri muryango ufite inzu y’ibyumba bibiri n’uruganiriro, ukagira igikoni ndetse n’ubwiherero. Inzu imwe yuzuye iba ifite agaciro kari hagati ya Miliyoni ebyiri n’igice n’eshatu z’amafaranga y’u Rwanda(2.500.000-3.000.000Frw)

Nk’uko byemezwa n’Umuyobozi w’Akarere wungirije ushinzwe ubukungu, imiryango 710 yagombaga kubakirwa muri uyu mwaka w’ingengo y’imari wa 2019-2020, yarubakiwe hirya no hino mu mirenge, bitwara amafaranga y’u Rwanda agera kuri Miliyoni magana inani na mirongo itanu (850.000.000Frw), ariko Akarere ka Bugesera ubwako katanze Miliyoni magana atanu na makumyabiri (520.000.000Frw) asigaye agaturuka mu bafatanyabikorwa b’Akarere ndetse n’ibikorwa by’amaboko by’abaturage batanga umuganda mu rwego rwo kwikemurira ibibazo.

Hari kandi Umuhanda uzatahwa tariki 4 Nyakanga 2020, ufite uburebure bwa kilometero umunani(8),ukaba uhuriweho n’imidugudu itanu (5) yo mu Murenge wa Ruhuha ndetse ugahuza Umurenge wa Ruhuha n’uwa Ngeruka bahana imbibi. Ni umuhanda uzoroshya ubuhahirane hagati y’abaturage.

Ni umuhanda wubatswe n’Akarere ndetse n’abaturage kuko abaturage ubwabo bahoraga bawusaba bavuga ko ukenewe, kugira ngo uzajye ubafasha kugera ku muhanda wa Kabarimbo urimo kubakwa uturuka mu Karere ka Ngoma ukazagera mu Karere ka Nyanza(Kibugabuga-Shinga-Gasoro),bityo ukabazanira iterambere ku buryo butandukanye.

Abaturage bagezweho n’ibyo bikorwa bagaragaza ibyishimo. Habineza Ignace,yagize ati, “Ubundi nabaga ahitwa mu Mudugudu wa Cyindama, mfite umugore n’abana 2, nari maze imyaka 12 ncumbika mu nzu nakodeshaga amafaranga (3000Frw),nayabura tukayavunjamo imibyizi yo kumuhingira."

“Byari ibintu bigoye kujya guca inshuro ngo ugaburire umuryango, kandi utagira n’aho uba. Umunsi umwe numva ku Murenge mu nama y’abaturage, basomye ko ndi mu bazubakirwa inzu, numvise binshimishije cyane, ubwo Leta itanga inkunga yayo natwe tukajya gukora umuganda tubumba amatafari."

“Ubu tumaze hafi ukwezi tuzituyemo, ubu njya guhahira urugo nizeye ko nta kibazo, nataha ngasanga abana mu rugo bameze neza, nyamara mbere twabonaga n’ibyo kurya bigoranye.Turashimira abayobozi bacu badufashije”.

Musabyimana Clementine afite imyaka 40 y’amavuko, ni umupfakazi yabaga mu mudugudu wa Kimikamba, mu nzu y’umuntu wamusabaga imibyizi 3 buri cyumweru nk’ubukode bw’inzu, ariko ubu ari mu nzu ye.

Yagize ati, “Twumvise ku Murenge baduhamagara ngo tuze, batujyana aho mu Kibaza batwereka aho tuzaba, byarandenze sinabona uko mbikubwira, ubu nazanye n’umubiri ubundi nahoraga mpangayitse, ariko ubu abana ntibaburara, ndashimira Perezida Kagame, mwe muhagera mumumpere amashyi n’impundu, Imana imuhe umugisha, kuba adutegekeza”.

Mukagasana Suzana w’imyaka 45 y’amavuko, akaba afite umugabo n’abana 8, na we yavuze ibyishimo batewe no kubona umuyoboro w’amazi hafi yabo.

Begerejwe amazi meza

Yagize ati,”Twavomaga amazi bitugoye kuko yaba ikiyaga cya Cyohoha ni kure, ndetse n’irindi riba ni kure, turishimye ko tugiye kujya tuvoma hafi, Leta yatuzaniye amazi, turashimira Perezida Kagame n’abayobozi bacu batuvuganiye Imana ibahe umugisha”.

Umunyamabanga Nshingwabikorwa w’Akagari ka Gatanga, Ariho Moses, avuga ko amazi bahawe azajya yishyurwa ariko ni amafaranga make, kandi ngo abaturage ntibazayabura.

Yagize ati “Twamaze gushyiraho umuntu uzajya ayishyuza, umuturage azajya yishyura amafaranga hagati y’icumi na makumyabiri (10-20 Frw) ku ijerekani imwe. Ayo mafaranga si menshi abaturage bacu ntibayabura kuko si abakene bikabije, ikindi kandi ntawagereranya ayo mafaranga n’indwara zaterwa n’amazi y’ibirohwa bamwe bavomaga, kuko biratandukanye rwose”.

Mu gihe u Rwanda rwizihiza ku nshuro ya 26 isabukuru yo kwibohora, Ntawunezarubanda na we arifatanya na FPR-Inkotanyi, avuga ko yabohoye igihugu ikamuha kugenda amahanga, none aramurika umusaruro yakuyemo.

Ntawunezarubanda wo muri Rutsiro

Ntawunezarubanda Schadrack avuka mu Murenge wa Mukura mu Kagari ka Kagusa muri Rutsiro mu Burengerazuba bw’u Rwanda. Yabyawe n’umucuruzi witwaga Nkurikiyimfura Edouard mu mwaka wa 1979, yiga amashuri abanza kugera mu wa gatanu gusa, ubundi atangira gufasha se gucuruza ariko anifitiye icyokezo cy’inyama ku ruhande.

Ntawunezarubanda avuga ko amafaranga yungukiraga mu kotsa inyama yirinze kuyaha abakobwa n’abagore bamurebaga ijisho ryiza bamuryarya, ahubwo ngo yari yarafunguje konti muri banki akajya ayabitsaho.

Ntawunezarubanda yotsaga inyama mbere y’umwaka wa 1994

Ati "Ibanga ryo kunguka mu bucuruzi bwanjye nk’uko data yari yarabimbwiye, ni ukwirinda abagore n’inzoga, yambwiraga ko nimbyishoramo nzahita mpfa, twasengeraga mu idini ry’abaporoso (Abaporotestanti)".

"Buriya iyo mbonye umwana w’umusore unywa inzoga birambabaza cyane, ariko reka nikomereze,..!"

Mu mwaka w’i 1997 abacengezi ngo bateye iwabo wa Ntawunezarubanda bica se baranabasahura ibintu, ariko amafaranga ye kuri banki ngo yari amaze kugera kuri miliyoni imwe n’ibihumbi magana atandatu (1,600,000Frw).

N’ubwo umubyeyi we yari agiye Ntawunezarubanda akiri muto (agifite imyaka 18), Ntawunezarubanda avuga ko yari amaze kumenya gucuruza, atangira kujya aza i Kigali kurangura ibintu akajya kubicururiza iwabo.

Ntawunezarubanda Schadrack i Kigali

Umunsi umwe yaje i Kigali muri uwo mwaka w’1997 yiyemeza kudasubira i Rutsiro, ahitamo gukodesha akazu gato kitwa ’Kiosk’ kubatswe mu mbaho i Nyabugogo (Kiosk ni bwo bwoko bw’inyubako zari ziganje ahitwa ku Mashyirahamwe muri Nyabugogo).

Ntawunezarubanda atangiye gucururiza i Kigali muri Nyabugogo

Ati "Aha hantu hari habi ku buryo wasangaga ari ibihuru gusa ukarinda ugera i Gikondo, hari inyubako nke cyane, ndashimira Leta yacu yatubohoye ikadufasha kuhava".

Ntawunezarubanda avuga ko yakomeje gucuruza ya mafaranga arenga miliyoni n’igice, arangura ibikoresho bikenera amashanyarazi birimo amaradio, televiziyo n’amadarubindi (amataratara).

Muri 2002 uyu mucuruzi ngo yarashyingiwe abona umufasha barafatanya, ubucuruzi bumaze kwaguka bava muri "Kiosk" y’imbaho bimukira mu nzu z’ubucuruzi ahitwa muri ’Karitsiye Mateus’ i Kigali.

Ntawunezarubanda mu ndege

Mu mwaka wa 2008 Ntawunezarubanda wategerezaga kurangura ibicuruzwa bivuye i Dubai, yatangiye kwigirayo, ndetse amenye ko biba byavuye ku ruganda mu Bushinwa yiyemeza kuba ari ho yerekeza.

Ati "Ikibazo nari nsigaranye ni itike y’indege muri Kompanyi y’Abanyakenya yari ihenze cyane, kuko kuva mu Rwanda werekeza i Dubai yari amadolari ya Amerika 940".

Amaze gusirimuka

Ati "Ndashimira Leta yacu yazanye indege za RwandAir, kuko ubwo yari imaze gutangiza ingendo zerekeza i Dubai (muri 2016) igiciro cyari Amadolari ya Amerika 500 gusa, kandi nta na hamwe duhagaze mu nzira".

Ntawunezarubanda avuga ko iyi nyungu yaheshejwe na RwandAir yaje kuyegeranya agura ikibanza cyo kubakamo i Nyabugogo iruhande rw’inyubako nini z’Amashyirahamwe muri uwo mwaka wa 2016.

Nyuma y’imyaka ibiri(muri 2018) Ntawunezarubanda ugicururiza muri ’Mateus’ ibikoreshwa n’amashanyarazi (electronics), yatangiye kubaka muri cya kibanza kiri i Nyabugogo, ubu akaba yizihiza isabukuru yo kwibohora wa muturirwa we umaze kubakwa no kubona abawucururizamo.

"Amagorofa atatu ya mbere azakodeshwa n’abacuruzi b’ibintu bitandukanye, abiri ya nyuma azaba hoteli, kandi aho hose hamaze kubona abantu bahakorera uretse ibyumba bitanu gusa mu birenga 71 bigize iyi nyubako".

Yicaye mu muturirwa we amaze kuzuza i Nyabugogo

Mu mafaranga arenga miliyari imwe na miliyoni 53 yubakishije iyo nzu y’igorofa, Ntawunezarubanda ngo yasabye banki inguzanyo ya miliyoni 700 kandi uburuzi bwe ntibwahagaze.

Avuga ko ibi byose abikesha gutanga neza umusanzu n’imisoro asabwa, kandi akishimira ko iyo amaze gusora ngo ahita abona ubutumwa bw’Ikigo Rwanda Revenue Authority bumubwira buti "Turagushimira umusanzu wawe mu kubaka igihugu".

Ntawunezarubanda aratanga igisobanuro cyo kwibohora, avuga ko kuzigama bigomba kuba umuco mu bantu, buri wese akirinda uburangare, agakunda ibyo akora, ariko yagera ku bacuruzi ho akabasaba gufata neza ababagana.

Lt (Rtd) Joseph Sabena uyobora umuryango w’abamugariye ku rugamba rwo kubohora igihugu

Lt(Rtd) Joseph Sabena uyobora umuryango uhuza abamugariye ku rugamba rwo kubohora Igihugu, yabitangaje mu kiganiro yahaye Televiziyo Flash ku cyumweru tariki 28 Kamena 2020.

Muri icyo kiganiro cyavugaga ku ruhare rw’urubyiruko mu kubohora igihugu, Lt Sabena yari kumwe n’Umuyobozi w’Umuryango urwanya ruswa n’akarengane, Transparency International-Rwanda, Ingabire Marie Immaculée hamwe na Depite Maniriho Clarisse uhagarariye urubyiruko mu Nteko ishinga Amategeko.

Lt(Rtd) Sabena avuga ko mu mwaka wa 1990 na we yari urubyiruko rungana nk’urwo yabwiraga, ariko we na bagenzi be ngo bari barahunze igihugu ari bato cyane abandi baravukiye mu nkambi z’impunzi mu bihugu bituranye n’u Rwanda.

Yagize ati "Ababyeyi bacu bakomeje kudukundisha u Rwanda kuko iyo habaga hari nk’ikintu cyiza kibaye wumvaga bagira bati ’iyo biba turi iwacu i Rwanda, bahoraga bifuza gutaha".

Ati "Ikindi navuga,....burya amahanga arahanda, twaryaga incyuro mu mahanga, uwaduhezaga hanze na we yitwazaga ko afite igisirikare".

"Icyakora urugamba twarwanye ntiruteye kimwe nk’urwo urubyiruko rw’iki gihe rurimo kurwana, twe twari dufite intego yo kumena kugira ngo tuze mu gihugu, ni nko kwinjira mu nzu umena urugi, ariko iyo wamaze kugera mu nzu (mu gihugu) ntabwo uba ukirwana urugamba rwo kumena ahubwo urigengesera kugira ngo hatagira ibyo umena".

Lt(Rtd) Sabena avuga ko mu rubyiruko rw’iki gihe na ho ahabonamo Inkotanyi nyinshi zishoboye urugamba nk’urwo yarwanye, ariko ko bakeneye abababa hafi, ati nk’uko "natwe ababyeyi bacu bahoraga batubwira ngo "u Rwanda mubura, u Rwanda rurakenewe".

Imitwe irwanya u Rwanda, ubushomeri mu rubyiruko, ibiyobyabwenge n’inda mu bangavu, ni zimwe mu mpamvu ngo zatuma urubyiruko rutekereza kubohora igihugu, nk’uko Ingabire Marie Immaculée yakomeje abisobanura.

Ingabire avuga ko habayeho kwibeshya ku bijyanye n’uburenganzira bwa muntu bituma urubyiruko rugira uburere bubi ndetse n’ababyeyi baradohoka.

Yagize ati "Iyo usubiye mu mibare y’abangavu uyu munsi barimo kubyara ugira ubwoba, iyo ugiye mu tubari turi mu mujyi wa Kigali usanga ari urubyiruko rwibereyemo, mu biyobyabwenge ni bo barimo, uburere bw’umwana uyu munsi sinzi ubushinzwe".

"Twagiye mu kintu cyo kwitiranya uburenganzira! Kwambara ubusa ngo ni uburenganzira, jyewe ubwo turi mu kintu cyo kwibohora navuga nti ’toza umwana kumenya ko uru Rwanda rumukeneye!"

Ingabire akomeza agira ati "Urubyiruko rw’abazungu turimo kwigaana, bo ntabwo bafite imitwe y’iterabwoba ituruka iyo za Burundi, Uganda na hehe, nta n’ubwo bafite ikibazo cy’ibiza nk’ibyo tubona!"

"Jyewe nunyereka umwana wakoze ikosa umubyeyi akamuhana, ibyo bizaba ari byiza kuko mu gihe cyanjye hari igitsure cy’ababyeyi, ariko ubu ababyeyi twavuye mu birindiro".

Umunyamakuru yabajije Depite Maniriho Clarisse uhagarariye urubyiruko mu Nteko Ishinga amategeko niba biteguye urugamba, avuga ko biteguye.

Depite Maniriho yagize ati "Twebwe twavutse urugamba rurese, nitwitegure dukame rero, jye navuga ngo ’turiteguye’, hari politike nziza, ikoranabuhanga, mu nzego zitandukanye, hose turahari".

Lt(Rtd) Sabena avuga ko byaba bibabaje kuba baratakaje ingingo z’imibiri yabo mu rugamba ariko abo babohoye ntibabihe agaciro.