Ubu bufatanye bwatangijwe ku mugaragaro ku cyumweru tariki ya 23 Gashyantare 2020, ubwo bari mu Karere ka Gasabo kuri Kigali Arena hatangizwa isiganwa mpuzamahanga ry’amagare mu Rwanda (Tour du Rwanda) ku nshuro yaryo ya 12.

Uyu muhango wayobowe na Minisitiri wa Siporo mu Rwanda, Mimosa Aurore Munyangaju, ari kumwe n’umuvugizi wa Polisi y’u Rwanda, Commissioner of Police (CP) John Bosco Kabera, umuyobozi w’ishyirahamwe ry’umukino w’amagare mu Rwanda, Abdallah Murenzi ndetse n’umuyobozi w’ishami rya Polisi rishinzwe umutekano wo mu muhanda CP Rafiki Mujiji.

CP Kabera yavuze ko ubu bufatanye buje bwiyongera ku bwari busanzwe bushishikariza buri wese gukoresha neza umuhanda, by’umwihariko muri iki gihe cy’isiganwa ry’amagare mu Rwanda.

Yagize ati “Kubahiriza umutekano wo mu muhanda ni ingenzi kuri buri wese by’umwihariko muri iki gihe cy’isiganwa ry’amagare, turifuza ko iri siganwa ryazarangira nta mpanuka n’imwe ibaye”.

Ubu bufatanye bwa Polisi y’u Rwanda na FERWACY muri gahunda ya Gerayo Amahoro buje bukurikira ubumaze iminsi bukorwa na Polisi, amadini n’amatorero atandukanye n’abandi bafatanyabikorwa batandukanye.

Umuvugizi wa Polisi y’u Rwanda yaboneyeho gusaba abaturage muri rusange kwihanganira impinduka zizagaragara no kubahiriza amabwiriza agenga iri siganwa.

Yagize ati “Iri rushanwa rizagera mu ntara zose z’igihugu, turasaba abaturage kwihanganira impinduka zabayeho mu mihanda imwe n’imwe izaba ifunzwe muri iki gihe cy’iri siganwa, turabasaba kubyubahiriza kugira ngo umutekano urusheho kugenda neza”.

CP Kabera yasabye abantu gushyigikira (gufana) abasiganwa ariko bakabikora bitonze badahagarara mu muhanda cyangwa ngo bagaragaze indi myitwarire itari myiza yashobora guteza impanuka.

Ati “Tuributsa abakoresha umuhanda bose ko irushwa ry’amagare ku nshuro ya 12 ryatangiye kuri iki cyumweru tariki ya 23 Gashyantare rikazarangira tariki ya 01 Werurwe; iki gihe cyose bazaba bakoresha imihanda ya Kigali n’iyo mu Ntara. Ni yo mpamvu dusaba abafana kuzagaragaza imyitwarire myiza bubahiriza umutekano wo mu muhanda”.

Ati “Birumvikana ko muri iki gihe cy’iri rushanwa ry’amagare imihanda imwe izaba ifunze iri gukoreshwa n’abasiganwa, bishobora gutuma habaho umuvundo w’ibinyabiziga. Turasaba abamotari n’abandi bafite ibinyabiziga kunyura mu y’indi mihanda yunganira iri gukoreshwa n’abasiganwa, cyangwa se ushoboye kwihangana akarindira igihe umuhanda ufungurirwa cyane ko muri iyo mihanda hazajya haba abapolisi bazajya babafasha kubereka aho banyura”.

Umuvugizi wa Polisi yasoje yibutsa abantu bose baza kureba iri siganwa kujya bahagarara kure y’umuhanda cyane ko harimo abishima bakarenza urugero bakaba bakwitura mu muhanda bikaba byateza impanuka, abasaba kwishima mu rugero bibuka ko amagara aseseka ntayorwe.

Polisi yishimiye ubufatanye bw’aba Guide n’Abasukuti mu bukangurambaga bwa Gerayo Amahoro

Ni ubutumwa bwatanzwe na CIP Alexis Rugigana, Umuvugizi wa Polisi mu Ntara y’Amajyaruguru, mu bukangurambaga bwa Gerayo Amahoro bwabaye kuwa kane tariki 20 Gashyantare 2020, bwitabirwa n’urubyiruko rw’umuryango uhuriwemo aba Guide n’Abasukuti mu Karere ka Musanze.

CIP Rugigana, yavuze ko ubwo bufatanye butegerejweho umusaruro ufatika. Agira ati “Kubera ko Abasukuti n’aba Guide bahuriye mu madini n’amatorero atandukanye, kandi bakibanda mu rubyiruko, umusaruro turawubona kuko biyemeje gutanga ubutumwa mu rundi rubyiruko”.

Gahunda ya Gerayo Amahoro ishobora kurenga imbibi z’u Rwanda

Akomeza agira ati “Si urubyiruko rw’u Rwanda gusa, kuko bagira amahuriro anyuranye abahuza n’urundi rubyiruko ruturutse mu bindi bihugu cyane cyane ibya Afurika nka Kongo,Uganda, u Burundi n’ahandi. Ahubwo ubutumwa bwacu bwa Gerayo Amahoro buriho burasakara no mu bindi bihugu”.

Mu rugendo rwakorewe mu Mujyi wa Musanze rugamije ubukangurambaga mu gukoresha neza umuhanda, urwo rubyiruko rw’aba Guide n’Abasukuti rwatangiye inyigisho zinyuranye mu modoka zitwara abagenzi mu rwego rwo kubakangurira kwirinda impanuka.

Bamwe muri urwo rubyiruko baganiriye na Kigali Today, bavuga ko kurwanya impanuka biri mu nshingano zabo kandi ko gahunda ya Gerayo Amahoro biteguye kuyisakaza hose.

Umu Guide Uwineza Belise yagize ati “Aho intego zacu zihurira na gahunda ya Gerayo Amahoro, ni uko umu Guide n’Umusukuti duharanira gusiga isi ari nziza kurusha uko twayisanze”.

Abagenzi basabwe guharanira uburenganzira bwabo bwo kwamagana imyitwarire mibi y’umushoferi

Arongera ati “Abagenzi batinya kubwira abashoferi ko bagomba kubahiriza amategeko y’umuhanda, ariko nkatwe kubibabwira batwumva vuba. Birafasha abagenzi n’abashoferi kugenda bibuka inshingano zabo n’uburenganzira bwabo mu gihe bari mu rugendo. Ni gahunda twifuza ko igera mu bindi bihugu tubigizemo uruhare”.

Umusukuti witwa Batungwanayo Jean Marie ati “Turi mu cyumweru cyahariwe Abasukuti n’aba Guide, twatangiye ku itariki 15 Gashyantare 2020. Twakoze ibikorwa binyuranye twanga kugisoza tutavuze kuri gahunda ya Gerayo Amahoro. Twatangiye mu gitondo tujya mu bigo by’amashuri none tugeze no mu muhanda tuvuga Gerayo Amahoro”.

Akomeza agira ati “Ubundi urubyiruko ni bo bakunze guhura n’ingorane zo mu muhanda, ni bo bambuka umuhanda bambaye ecouteur mu matwi, bari gukoresha telefoni. Ni yo mpamvu tugomba kubegera tubatoza kuba imboni za Leta mu kurwanya impanuka kandi twiteguye no kubitoza bagenzi bacu baturuka mu bindi bihugu”.

Bazengurutse umujyi wa Musanze bigisha gahunda ya Gerayo Amahoro

Ariette Ngoroyimana ufite izina yahawe n’umuryango abamo w’aba Guide rya “La Fauvette Obéissante” akaba n’umuyobozi w’aba Guide mu Karere ka Musanze, avuga ko kuba baganirije abagenzi n’abashoferi ku ikoreshwa ry’umuhanda, ari kimwe mu bifasha abaturage kwirinda impanuka bakoresha neza umuhanda.

Mu cyumweru cyahariwe aba Gude n’Abasukuti, mu Karere ka Musanze bakoze ibikorwa by’ubukangurambaga mu kwirinda inda zidateganyijwe, kwirinda ibiyobyabwenge no kubungabunga umutekano by’umwihariko umutekano wo mu muhanda.

Uwo muyobozi w’aba Guide mu Karere ka Musanze yasabye abaturage, by’umwihariko urubyiruko gukoresha neza umuhanda, birinda gukoresha telefone mu gihe bari mu muhanda, ahubwo bakubahiriza amabwiriza agenga umuhanda nk’uko Polisi y’u Rwanda idahwema kubibakangurira.

Umuyobozi wa Polisi mu Ntara y’Amajyepfo, CP Rogers Rutikanga hamwe na Pasitoro Abidan Ruhongeka, Umuyobozi w’Itorero ry’Abadivantisiti mu Majyepfo

Yabibwiye abizera bo mu Itorero ry’Abadivantisiti b’umunsi wa karindwi bari bateraniye mu rusengero ruri hafi ya Kaminuza y’u Rwanda, i Huye, tariki ya 16 Gashyantare 2020. Hari muri gahunda ya ‘Gerayo Amahoro’ bakoze ku bufatanye na Polisi y’u Rwanda.

Yavuze ko ku isi yose buri kwezi hari abantu ibihumbi 100 bapfa bazize impanuka, naho mu Rwanda hagapfa 500 buri mwaka, hakaba n’abagera ku 2000 impanuka zisigira ubumuga.

Abenshi mu bahitanwa n’impanuka ni abafite hagati y’imyaka itanu na 14, kandi ½ cy’abahitanwa n’impanuka ngo ni abagenza amaguru. Nyamara ngo Polisi y’u Rwanda yasanze kuri ziriya mpanuka 500, izigera kuri 80% zishobora kwirindwa.

Yagize ati “Kwirinda kuki tutabikora kandi Imana yarabiduhereye ubushobozi? Imana yaravuze iti ‘ngushyize ubugingo n’urupfu imbere, uhitemo’. Dukwiye guhitamo kubaho, dukwiye guhitamo kugerayo amahoro. Burya ibirenze ubushobozi bwacu Imana ibyitaho, ariko ibiri mu bushobozi bwacu, dukwiye kubikoresha neza”.

Kwirinda impanuka nk’uko byavuzwe na CP Rogers Rutikanga, Umuyobozi wa Polisi mu Ntara y’Amajyepfo, ku banyamaguru ni ukuzirikana ko umuhanda atari imbuga cyangwa intabire y’iwabo, bakitwara neza mu rwego rwo kwirinda impanuka, n’imirongo yagenewe abanyamaguru bakayikoresha neza.

Yagize ati “Umuntu akwiye kumenya gutandukanya igihe ari iwe mu rugo mu mbuga cyangwa mu ntabire, n’igihe ari mu muhanda ukoresha ibinyabiziga bitandukanye”.

CP Rogers Rutikanga, Umuyobozi wa Polisi mu Ntara y’Amajyepfo

Yunzemo ati “Mu gihe wambukiranya umuhanda, ihute uve mu nzira kabone nubwo waba uri mu mirongo yagenewe abanyamaguru, kuko nta cyizere ko utwaye ikinyabiziga atasinze cyangwa atarangaye, cyangwa ataraye adasinziriye ku buryo afite ibitotsi, ku buryo ushobora kwibwira ko akubona nyamara atari byo, bityo akakugonga”.

CP Rutikanga yanibukije ababyeyi kutareka ngo abana bagende bonyine mu muhanda batabafashe akaboko, kandi ko n’ibyo gupakira abana batatu bane kuri moto bagiye ku ishuri atari byo.

Samson Uwamahoro, umuturage w’i Ngoma mu Karere ka Huye, na we avuga ko ibi ajya abibona kandi ko bidakwiye.

Ati “Aba ashyizeho abantu batuma atabasha gutwara ikinyabiziga neza, bishobora gutera impanuka. Kandi na casque iba igenewe umuntu umwe, ahetse. Birumvikana ko habaye impanuka havuka ikibazo ku batayambaye”.

Abizerabo mu itorero ry’abadivantisiti b’umunsi wa 7 bakiriye ubutumwa bwa Gerayo Amahoro

Abizera bumvise ubutumwa bwa ‘Gerayo Amahoro’ biyemeje kuzabugeza no kuri bagenzi babo. Pasitoro Abidan we yanavuze ko hari inyigisho z’ubuzima basanzwe bagira buri kwezi bazajya babutangamo.

Ibi ngo bizajya bibafasha kugera ku rusengero amahoro, bityo inyigisho no gusenga bahakura kandi bahakorera, bizatume babasha kugera no mu ijuru.

Abadiventiste biyemeje gufatanya na Polisi mu bukangurambaga bwa Gerayo Amahoro

Yabibasabye kuri uyu wa 16 Gashyantare 2020, ubwo yatangizaga ubufatanye muri gahunda ya Gerayo Amahoro n’Itorero ry’Abadiventiste b’umunsi wa karindwi mu Rwanda, igikorwa cyabereye mu rusengero rw’iryo torero ruherereye i Remera mu Karere ka Gasabo.

CP Kabera yavuze ko iyo ubwiye umumotari ngo yirukanke bituma akora amakosa menshi mu muhanda ari byo biteza impanuka yakugiraho ingaruka.

Agira ati “Irinde kwirukansa umumotari bitewe n’impamvu zawe bwite, niba wakererewe ibyo si impamvu yo kwirukanka kuko ushobora kutagera aho ujya. Umuntu akaguhamagara mufitanye gahunda uti ‘nakererewe reka mfate akamoto nihute’, ese iyo moto ifite umuhanda wayo”?

CP Kabera yasabye abatega moto kwirinda kwihutisha abamotari kuko biteza impanuka

Ati “Uwo muhanda ufite ibyapa, urimo ibindi binyabiziga n’abanyamaguru ariko ngo karihuta. Ni hahandi ako kamoto kagenda gakatakata mu binyabiza, uko ni ugushyira ubuzima bwawe mu kaga kandi umuryango wawe ugukeneye n’igihugu muri rusange”.

Yakomeje yibutsa abagenda kuri moto kwambara neza ingofero zabugenewe(casque), bakazifunga neza kuko aribwo zizabarindira umutwe mu gihe habaye impanuka, cyane ko ngo hari benshi bazambara byo kwikiza.

Umuyobozi w’Itorero ry’Abadiventiste mu Rwanda akaba n’umuvugizi waryo, Pasiteri Byiringiro Hesron, yasabye ababyeyi ndetse n’abandi bapasiteri gushyira muri gahunda zabo za buri munsi gahunda ya Gerayo Amahoro.

Pasiteri Byiringiro Hesron

Ati “Babyeyi muri hano, ndagira ngo mu ishami ry’umuryango muzajye muganira kuri iyo gahunda. Mu itorero iyo tugiye gutangira amavuna habanza umuganga wigisha, ndagira ngo azajye abanza yigishe iby’umuhanda hanyuma akomeze, ba pasiteri rero ndagira ngo iyo gahunda ishyirweho”.

Ati “Iyo mwigisha abizera ntimuba mwifuza ko bazagera mu ijuru amahoro! Yazagera mu ijuru ate atageze wenda n’i Nyagatare amahoro? Ntabwo byashoboka”.

Pasiteri Byiringiro yemereye Polisi ko Radiyo y’iryo torero, Ijwi ry’Ibyiringiro, igiye kuzashyiraho umwanya wo kuvuga kuri Gerayo Amahoro. Yanasabye korali ya ‘Ambassadors’ na yo y’iryo torero guhimbira indirimbo gahunda ya Gerayo Amahoro kandi ikazajya iririmbwa no mu gihe cy’amasengesho.

Korali Ambassadors yiyemeje guhimbira indirimbo gahunda ya Gerayo Amahoro

Ndiramiye Steven uririmba muri korali ya Ambassadors, yavuze ko kuba iyo gahunda yigishirijwe mu rusengero ari ingenzi, cyane ko na we akunze gutega moto akihutisha uyitwaye.

Ati “Ni byiza kuba ubu butumwa babutangiye hano, jyewe njya ntega moto wenda nakererewe kuza muri korali nkabwira umumotari ngo yihute. We akora uko ashoboye akabona aho anyura tukihuta ariko mbonye ko ari amakosa kuko ari byo bikunze guteza impanuka, n’abandi babireke”.

Mbere y’uko ubukangurambaga bwa Gerayo Amahoro butangira, mu Rwanda habaga impanuka zisaga 5000 buri mwaka, abantu 500 zikabahitana. Icyakora kuva iyo gahunda yatangira muri Gicurasi 2019, impanuka zagabanutseho 27%, nk’uko CP Kabera yabivuze, akanemeza kandi ko 80% by’impanuka zakwirindwa mu gihe abantu bakurikije amategeko agenga umuhanda.

Ishami ry’Umuryango w’Abibumbye ryita ku Buzima (OMS), ritangaza ko impanuka zo mu muhanda zihitana abantu miliyoni imwe n’ibihumbi 350 buri mwaka ku isi.

Inkuru bijyanye:

Amafoto: Gahunda ya ‘Gerayo Amahoro’ yakomereje mu itorero ry’Abadiventiste

Polisi yatangije ubukangurambaga bwa ’Gerayo Amahoro’ mu itorero ry’Abadventiste b’umunsi wa Karindwi

Mu Mujyi wa Kigali, ubwo bukangurambaga bwatangiwe i Remera ku rusengero ry’Abadiventiste.

Umuvugizi wa Polisi y’u Rwanda, CP John Bosco Kabera, watangije ubufatanye muri gahunda ya Gerayo Amahoro n’itorero ry’abadiventiste b’umunsi wa karindwi kuri uyu wa 14 Gashyantare 2020, yasabye abakiristu ko ubutumwa buyikubiyemo babugira ubwabo kuko impanuka itarobanura, bityo bakabugeza no ku bandi Banyarwanda.

Yibanze cyane ku batega moto bakererewe gahunda zabo bagategeka umumotari kwirukanka, ko bakwiye kubicikaho kuko ari ukwishyira mu kaga gashobora guhitana ubuzima bwabo.

CP John Bosco Kabera, Umuvugizi wa Polisi y’u Rwanda

Rubavu

Mu Karere ka Rubavu, Umuvugizi wa Polisi mu Ntara y’Iburengerazuba CIP Twizere Karekezi, ni we witabiriye gutanga ubutumwa mu rusengero.

CIP Twizere Karekezi avuga ko Gerayo Amahoro igamije gukumira impanuka zo mu muhanda, aho mbere yayo mu mwaka wa 2018 habaye impanuka zibarirwa mu bihumbi bitanu, ariko mu mwaka wa 2019 hakaba harabonetse izibarirwa mu bihumbi bine.

Avuga ko abanyamaguru bagomba kubahiriza inzira bagenewe mu ruhande rw’ ibumoso rwabo batabangamiye abakoresha umuhanda, kuko ugendera ibumoso bwe ikinyabiziga kimusanga akireba cyajya kumugonga akakibererekera.

Yibukije abanyamaguru ko ugendera mu ruhande ikinyabiziga kimuri inyuma, aba agenda mu nzira itari yo, naho ku bashaka kwambuka umuhanda bakaba bagomba gushishoza iburyo n’ibumoso mbere yo kwambuka.

CIP Twizere Karekezi kandi yibutsa abatwara ibinyabiziga kutavugira kuri telefone kuko bitera uburangare.

SP Roger Muhodali, uyobora Police mu Karere ka Rubavu, avuga ko nubwo babwiriza abantu kwirinda impanuka zo mu muhanda, ababyeyi bakwiye kwita ku buzima bw’abana barindwa imirimo ivunanye.

Abitabiriye gahunda ya Gerayo Amahoro muri aka Karere ka Rubavu bavuga ko Polisi igomba gufasha abanyamagare kugabanya umuvuduko kuko habamo n’abatagira ubwisungane mu kwivuza.

Musanze

Mu Karere ka Musanze, gahunda ya Gerayo Amahoro yabereye mu itorero ry’Abadventiste b’umunsi wa karindwi rya Kigombe.

ACP Revelien Rugwizangoga, Umuyobozi wa Polisi mu Ntara y’Amajyaruguru ni we wagejeje ku bakirisitu b’iri torero ubutumwa bujyanye no kubungabunga umutekano wo mu muhanda.

Yabasabye kuba ab’imbere mu kuwubungabunga bubahiriza amategeko, kurangwa n’imyitwarire irimo kutavugira kuri telefoni igihe hari utwaye ikinyabiziga, kwambara umukandara, kwirinda kurenza ibipimo byagenwe by’umvuduko w’ikinyabiziga no kwirinda ubusinzi.

ACP Rugwizangoga kandi yibukije abo mu itorero ryAbadventiste b’umunsi wa karindwi ko bari mu bakoresha umuhanda bagenda n’amaguru.

Yabasabye kwirinda uburangare, no kugendera mu nzira zashyizweho z’abanyamaguru, ababyeyi basabwa gutoza abana bato kutarangara no kudakinira mu muhanda igihe bajya ku mashuri.

Huye

Gahunda ya Gerayo Amahoro i Huye yabereye mu rusengero rwo kuri Kaminuza y’u Rwanda.

Umuyobozi wa Polisi mu Ntara y’Amajyepfo yagize ati “Banyamaguru, mujye muzirikana ko mu muhanda atari mu ntabire iwanyu. Babyeyi, gupakira abana batatu bane, ntibikwiye kuri moto”.

Pasitoro Ruhongeka Abidan, uyobora Abadivantisiti mu Turere twa Huye, Nyamagabe, Gisagara, Nyanza na Nyaruguru, na we yahaye umuyobozi wa polisi n’umuvugizi wayo mu Majyepfo impano z’ibitabo ‘Rengera ubuzima’ na ‘Kugana Yesu’, kuko ngo utashyika amahoro utarengeye ubuzima kandi na none ngo “ubuzima bwiza tubugezwaho no kugana Yesu tukamwisunga”.

Inkuru bijyanye:

Irinde ‘Nakererewe reka mfate akamoto’ - CP Kabera

Sheikh Gabiro (hagati utambaye ingofero) avuga ko ibivugiwe mu nzu ntagatifu bijya mu mitima y’Abayisilamu kandi bakabyubaha

Yabitangaje ku wa 31 Mutarama 2020, ubwo ku bufatanye n’Umuryango w’Abayisilamu mu Rwanda na Polisi y’Igihugu mu misigiti yose mu gihugu hatangirwaga ubukangurambaga bwa Gerayo Amahoro bugamije gushishikariza Abayisilamu kwirinda impanuka.

Sheikh Shafi Gabiro avuga ko kimwe n’abandi banyarwanda, Abayisilamu bafite uruhare runini mu gukumira impanuka kuko zihitana ubuzima bwa benshi.

Avuga ko kuba ubukangurambaga bwa Gerayo Amahoro bwatangiwe mu nzu ntagatifu bitanga icyizere ko buzubahirizwa cyane ko abayinjiyemo bubaha bakanaha agaciro ibiyivugiwemo.

Ati “Umusigiti ni ikintu cyubashywe ku bayisilamu, ubutumwa buciye mu musigiti mu by’ukuri bugera ku mitima y’Abayisilamu, iyo ubutumwa buciye mu nzu ntagatifu bubaha cyane na bwo burubahwa kandi twizera ko babuzirikana.”

Abayisilamu ba Nyagatare biyemeje gufasha Polisi kurwanya impanuka

Umuvugizi wa Polisi y’Igihugu mu Ntara y’Iburasirazuba, CIP Hamdoun Twizeyimana, yavuze ko gutangira ubukangurambaga bwa Gerayo Amahoro muri Kiliziya, insengero n’imisigiti hagamijwe ko bugera kuri benshi kuko bashishikariza abahayobora guhora babikangurira abayoboke babo kugira ngo bahindure imyumvire kuko ari yo ikurura impanuka nyinshi.

Agira ati “Kubicisha mu nzu z’Imana ni ukugira ngo tugere kuri benshi, abayobora amadini n’amatorero babigire ibyabo bajye bahora babikangurira abayoboke babo, duhindure imyumvire kuko ari yo iteza impanuka.”

Abagore b’i Kirehe na bo biyemeje gufasha Polisi kugabanya impanuka cyane bita ku bana igihe bagenda mu muhanda

Bisangwa Sadam ukora akazi ko gutwara abantu n’ibintu kuri moto mu Mujyi wa Nyagatare ashima Polisi y’Igihugu kuko ikora ibishoboka ngo impanuka zicike.

Ariko nanone yifuza ko Polisi ikwiye by’umwihariko gukangurira abantu kwirinda kugenda bambaye ibyuma bumviramo imiziki mu matwi kuko uretse abanyamaguru ngo hari n’abayobozi b’ibinyabiziga batwara babyambaye kandi bikaba bisigaye bikurura impanuka nyinshi.

Ati “Polisi turayishima ariko nanone bigishe abantu hari ibyateye ugasanga umuntu aragenda yambaye ekuteri (Ecouteur) mu matwi, yaba atwaye cyangwa agenda n’amaguru, uvuza ihoni ahubwo ukabona akuguyemo.”

Abayobozi b’umusigiti wa Nyagatare bashimiye Polisi ku bw’ubutumwa bugamije kubarinda urupfu

Mu musigiti wa Nyagatare, ubukangurambaga bwa Gerayo Amahoro bwatanzwe n’Umuyobozi wa Polisi mu Karere ka Nyagatare, SSP Claude Bizimana, naho ku rwego rw’intara ubukangurambaga bwa Gerayo Amahoro bukaba bwabereye mu musigiti wa Kirehe aho umuyobozi wa Polisi mu Ntara y’Iburasirazuba, ACP Emmanuel Hatari, yasabye Abayisilamu kubahiriza amategeko y’umuhanda birinda gutwara banyoye dore ko kinazira ku muyisilamu ndetse no kudatwara bavugira kuri telefone.

ACP Emmanuel Hatari avuga ko Gerayo Amahoro imaze kugabanya impanuka ku kigero cyiza ariko bifuza ko zacika burundu

ACP Emmanuel Hatari uyobora Polisi mu Ntara y’Iburasirazuba yasabye abayisilamu ba Kirehe kudatwara banyoye kuko kinazira ku muyisilamu kunya inzoga

Mufti w’u Rwanda, Sheihk Saalim Hitimana yemereye Polisi y’u Rwanda ko idini ya Islam ifite igihe gihagije cyo kwigisha gahunda ya ’Gerayo Amahoro’ igamije gukumira impanuka zibera mu muhanda.

Kuri uyu wa gatanu (witwa ijumaa), umunsi ukomeye ku Bayisilamu kuko ari wo bakoreraho amasengesho arambuye, Polisi y’u Rwanda yagiye mu misigiti itandukanye yo mu Rwanda kwigisha ’Gerayo amahoro’.

Ubwo yari amaze kwakira Umuvugizi wa Polisi mu musigiti wa Madinat mu Mujyi wa Kigali, Sheihk Saalim Hitimana, yavuze ko mu nyigisho bagira buri munsi gahunda ya ‘Gerayo amahoro’ itazaburamo.

Sheihk Hitimana agira ati "Iki ni igikorwa dutangije kandi kizakomeza, dufite umwanya uhagije cyane kuko tugira inyigisho rimwe na rimwe nyuma y’amasengesho, muzi ko dusenga gatanu ku munsi.

Icyo twemeranyijwe na Polisi ni uko izi nyigisho tuzakomeza kuzibwira abantu mu misigiti, idini ya Islam nk’uko mubizi ni idini ibungabunga ikiremwa muntu, ntabwo yemera ko umuntu yagira ikintu cyose cyamuhutariza ubuzima nk’izo modoka n’amagare.Buri muntu wese iyo hari ahantu agiye, aba afite intego yo kugerayo amahoro”.

Ku rundi ruhande, Umuvugizi wa Polisi y’u Rwanda, CP John Bosco Kabera, yakomeje kwigisha Abayisilamu ko Abanyarwanda ubwabo bafite uruhare rugera kuri 80% mu kwirinda ibitera impanuka.

Muri byo hari uburangare n’umuvuduko ukabije by’utwaye ikinyabiziga cyangwa ugenda n’amaguru, ubusinzi ndetse no kutagira ubumenyi buhagije ku buryo bwo kugendera mu muhanda.

CP John Bosco Kabera agira ati "Nyuma y’ibyumweru 38 tumaze dukora ubu bukangurambaga, ikigereranyo cya 17% cy’impanuka kimaze kugabanuka, ariko noneho ku bijyanye n’impamvu bwite zahitanaga ubuzima bw’abantu, zo zimaze kugabanuka ku gipimo cya 42%.

Turumva ko uko tugenda tugera ku bantu benshi, bituma bagenda babiganiraho kugera n’aho Polisi itari ngo itange ubwo butumwa, turumva umusaruro uzagenda uboneka”.

Kiliziya gatolika na ADEPR byamaze gukorerwamo ubukangurambaga bwa ’Gerayo Amahoro’, bivuga ko Abanyarwanda bagana insengero zabo batari munsi ya miliyoni 10, bose ngo bazagezwaho ubutumwa bukubiye muri iyo gahunda nk’uko abayobozi b’ayo madini babyizeza Polisi.

Sheihk Saalim avuga ko bafite igihe gihagije cyo kwigisha ’Gerayo Amahoro’ kuko bo basenga gatanu ku munsi

Mu musigiti wa Madinat mu Mujyi wa Kigali, aho Mufti w’u Rwanda yakiririye gahunda ya ’Gerayo Amahoro’

Umutekano wo mu muhanda ntugiharirwa abapolisi gusa

Gahunda ya ’Gerayo Amahoro’ yageze muri Islam

Umuyobozi wa Polisi mu Karere ka Muhanga Spt. Bahire, aratangaza ko kuva gahunda ya ’Gerayo Amahoro’ yatangira byatumye abaturage bamenya ko umutekano wo mu muhanda utareba abapolisi gusa.

Sheihk Ismael Kajeguhakwa, uyobora abayisiramu mu Karere ka Muhanga, avuga ko ubutumwa bwa ’Gerayo Amahoro’ bwabafashije, kuko wasangaga hari aba Islam bagiye bacikanwa na bimwe mu biganiro bitangirwa ahandi, ubu bakaba babashije kugerwaho n’ubwo butumwa.

Agira ati "Wasangaga hari ibyo batazi basobanukiwe muri ibi biganiro, uko wakwambutsa umwana umuhanda kuko bamenye byinshi batari bazi turashimira iyi gahunda polisi y’Igihugu yatugejejeho.

Nyagatare

Mu musigiti wa Nyagatare, SSP Claude Bizimana, Umuyobozi wa Polisi mu Karere ka Nyagatare yasabye Abayisilamu kwitwararika igihe bakoresha umuhanda.

Yasabye abanyamaguru kwambukiranya umuhanda babanje kureba ko nta kinyabiziga kibari inyuma cyangwa imbere. Yasabye abatwara ibinyabiziga kubahiriza amategeko y’umuhanda.

CIP Hamdoun Twizeyimana, Umuvugizi wa Polosi mu Ntara y’Iburasirazuba, avuga ko gutanga ubukangurambaga bwa ’Gerayo Amahoro’ mu nsengero ari mu rwego rwo kubugeza kuri benshi kugira ngo abantu bahindure imyumvire, kuko ari yo iteza impanuka.

Ikindi ngo ni ukugira ngo abayobora amadini n’amatorero bajye bahora babikangurira abayoboke babo.

Kirehe

ACP Emmanuel Hatari, Umuyobozi wa Polisi mu Ntara y’Iburasirazuba watangiye ubukangurambaga bwa ’Gerayo Amahoro’ mu musigiti wa Kirehe, we yasabye Abayisilamu gufasha Polisi mu gukumira impanuka babikangurira abayoboke babo buri munsi mu isengesho.

Rubavu: Abayisilamu bizeye impinduka mu kwirinda impanuka no kurinda abana

Abayisilamu bo muri Rubavu batangaza ko bizeye impinduka nyuma y’ibiganiro bagejejweho na Polisi y’u Rwanda mu kwirinda impanuka zo mu muhanda no kurinda abana imirimo ivunanye.

ACP Kajeguhakwa Jean Claude, ukuriye Polisi mu Ntara y’Uburengerazuba, atangaza ko bari bihaye ibyimweru 52 kandi bigiye kurangira hari umusaruro ugezweho mu kwirinda impanuka.

ACP Kajeguhakwa avuga ko Abanyarwanda bamenye ububi bwo gutwara ibinyabiziga banyoye ibisindisha, gutwara uvugira kuri telefoni, no kugendera ku muvuduko mwinshi, cyakora hakaba hagikenewe ko abantu bigishwa amategeko yo mu muhanda no kwigengesera mu gihe bari mu muhanda.

Ari mu musigiti mukuru wa Rubavu uherereye mu mujyi wa Gisenyi, yahamagariye abayisilamu kwirinda gutwara ibinyabiziga n’umuvuduko mwinshi no gutwara ibinyabiziga bavugira kuri telefoni.

Yagize ati “Mwe simbabwira kwirinda inzoga kuko n’ubundi ntimuzemera, ariko mufite inshuti zitwara ibinyabiziga kandi zinywa inzoga, ntibyemewe gutwara wanyoye inzoga, ndabashishikariza kwirinda gutwara ibinyabiziga muvugira kuri telefoni”.

ACP Kajeguhakwa avuga ko nk’ababyeyi bagomba kurinda abana gukinira mu muhanda, ati “Hari abana bagenda mu muhanda bakina, ndetse bagacukuramo igisoro abandi bakaryama, ntibyemewe, mubabwire ko mu muhanda atari aho gukinira”.

Uretse Gahunda ya ’Gerayo Amahoro’, Polisi y’u Rwanda itangaza ko yatangije indi gahunda ya ’Rengera Umwana’ asaba abayisilamu kugira uruhare mu kurwanya imirimo ivunanye ikoreshwa umwana, hamwe n’icyatuma umwana ita ishuri.

Mu Karere ka Rubavu abana bata amashuri kubera amakimbirane mu miryango bakajya gushaka akazi mu mujyi, abayisilamu bakaba basabwa kugira uruhare mu gusubiza mu ishuri abana baba baritaye.

Sheihk Mutarogera Godrah, uyobora Idiia ya Islam mu Ntara y’Uburengerazuba avuga ko amasomo bagejejweho na Polisi hari impinduka azatanga.

Agita ati “Turizera ko hari impinduka bizatanga kuko abayisilamu barumva kandi barumvira, impanuro zatanzwe zizashyirwa mu bikorwa, tubwirize abantu kwirinda gutwara ibinyabiziga banyoye ibisindisha, naho kubirebana no gahunda ya rengera umwana dusanzwe tuyifite, inama baduhaye tugiye gukomeza kuzitanga kandi zizagira umurimo”.

Musanze

Umuvugizi wa Polisi y’ U Rwanda mu Ntara y’Amajyaruguru yabwiye Kigali Today ko kimwe n’andi matorero n’amadini, abagize idini ya Islam na bo barebwa n’iyi gahunda, kuko mu mubare munini w’abakoresha umuhanda batwaye ibinyabiziga cyangwa bagenda n’amaguru abagize idini ya Islam na bo barimo.

Yagize ati "Turabaha ubutumwa nk’ubu bwo kwirinda nyirabayazana w’impanuka, kugira ngo murusheho kumva uburemere bw’ingaruka zibaho iyo umutekano wo muhanda wahungabanyijwe na zo. Igisobanuro cy’ibi ni cya gihe uzumva ngo ikinyabiziga iki n’iki gihitanye cyangwa gikomerekeje ubuzima bw’abantu. Ibikurikiraho ni icyuho mu miryango mu buryo bw’imibereho, ubukungu n’ibindi".

Polisi y’ u Rwanda ivuga ko mu Ntara y’Amajyaruguru kuri uyu wa Gatanu ubutumwa bwa ’Gerayo Amahoro’ bwatangiwe mu misigiti 32 mu turere twose.

Ubuyobozi bw’itorero bwaganiriye na Polisi y’Igihugu kuri Ggerayo Amahoro

Polisi y’u Rwanda imaze ibyumweru 37 yigisha abantu batandukanye imigendere yo mu muhanda yabarinda impanuka muri gahunda yise ‘Gerayo Amahoro’, ndetse ikaba yaratangiye kwifashisha amadini n’amatorero kugira ngo abikangurire abayoboke bayo.

Kiliziya gatolika yatangiriyemo iyi gahunda, ivuga ko izageza ubu butumwa ku Banyarwanda bakabakaba miliyoni zirindwi bitabira misa, ADEPR na yo ikavuga ko yatangiye kubugeza ku baza kuyisengeramo bagera kuri miliyoni enye.

Kuri uyu wa mbere abayobozi b’Abadiventisite b’umunsi wa karindwi mu Rwanda, na bo bakiriye abahagariye Polisi kugira ngo bategure uburyo ubukangurambaga bwa ‘Gerayo Amahoro’ buzigishwa Abadivantisite n’inshuti zabo barenga miliyoni imwe ku itariki 08/2/2020.

Umuyobozi w’Abadivantisite b’umunsi wa karindwi mu Rwanda, Pasiteri Hesron Byiringiro, yagize ati “Burya ikigaragaza ubujiji kigaragarira mu ntambuko, iyo umuntu akubona mu muhanda uburyo uri kugenda abona ko uturutse mu cyaro.

Abanyamahanga bavuye mu bihugu bisobanutse bahita bagira bati ‘bariya ni injiji, ndagira ngo ibyo dukora muri gahunda z’igihugu tugaragaze ko Umunyarwanda atandukanye n’abandi bantu, (abo banyamahanga) bazajye batwibazaho.

Pasiteri Hesron Byiringiro (uhagaze) yijeje Polisi y’u Rwanda ko bagiye guhindura imigendere y’Abanyarwanda mu muhanda

Mu buryo bwo gutwara imodoka abo bantu bagomba kugira bati ‘Abanyarwanda batwara imodoka neza’, babona dutambuka mu muhanda bati ‘Abanyarwanda bubahiriza amategeko’, ibi byagerwaho biturutse mu bufatanye bwa twese”.

Umunyamabanga nshingwabikorwa w’Itororo ry’Abadivantisite b’umunsi wa karindwi mu Ntara yo hagati mu Rwanda, Pasiteri Shadrak Nsengimana, we yizeza ko agiye guhuza gahunda ya ‘Gerayo Amahoro’ n’urugendo rw’umukirisitu ujya mu ijuru.

Avuga ko azajya yigisha kuri iyi gahunda abwira Abadivantisite b’umunsi wa karindwi ko urugendo rujya mu ijuru bagomba kurutangira birinda impanuka zibera mu muhanda.

Mu bigize gahunda ya ‘Gerayo Amahoro’ Polisi yigisha abantu, harimo ikijyanye n’ubworoherane bugomba kuranga abantu bose bavuga ko ari abakirisitu.

Umuvugizi wa Polisi y’u Rwanda, CP John Bosco Kabera agira ati “Usanga umuntu utwaye ikamyo asagarira akamodoka gato, utwaye ivatiri agasagarira umunyegare, abamotari bose bavuga binubira abatwaye imodoka, umuntu utwaye ‘jeep’ we agutera amahoni cyangwa amatara maremare, ibi ntabwo ari byo, reka tugire ihame ry’ubworoherane.

Umuntu ugenza amaguru mu muhanda, ugenza igare, uri kuri moto, ugenda mu ivatiri, ugenda mu ikamyo cyangwa se muri ‘jeep’, yumve ko mugenzi we afite agaciro kandi agomba kumuha uburenganzira bwo guhita, kandi ntuzavuge ko utarebaga kuko iyo ugenda mu muhanda ugomba kuba ureba”.

Polisi y’u Rwanda ngo irashaka ko kugenda neza mu muhanda byava ku kubahiriza amategeko bikagirwa umuco mu Banyarwanda.

Abayobozi b’Abadiventisite bavuga ko bazigisha abayoboke babo n’abandi Banyarwanda muri rusange gahunda ya ‘Gerayo Amahoro’, hifashishijwe amatangazo mu nsengero bateraniramo, inyigisho mu mashuri yose ashamikiye kuri iri dini ndetse na radio.

Nyuma ya siporo rusange, abayobozi batandukanye batanze ibiganiro kuri Gerayo Amahoro

Ibyo kandi binemezwa n’umuyobozi wa Polisi mu Karere ka Muhanga aho na we agaragaza ko kuva iyi gahunda yatangira mu kwezi kwa Gicurasi 2019, imibare y’impanuka zabaga yagiye igabanuka kandi n’ubukana bwazo bukaba butakimeze nka mbere itaratangira.

Kimwe n’ahandi mu gihugu, abafite ubumuga mu Karere ka Muhanga bagaragaramo ababutewe n’impanuka akenshi bakuye mu mihanda haba ku batwara ibinyabiziga cyangwa abanyamaguru.

Abatewe ubumuga n’impanuka bahamya ko ubukangurambaga bwa Gerayo Amahoro bukomeje kumvikana neza, byagira uruhare mu kugabanya ubwo bumuga benshi baba bataravukanye.

Impanuka ni kimwe mu bitera ubumuga bwo kubura ingingo

Irihose Aimable watewe ubumuga n’impanuka ku buryo agendera mu igare, avuga ko Gerayo Amahoro ishakira abafite ubumuga umutekano mu muhanda kuko bibagora kuwukoresha kubera imbaraga nkeya zabo.

Agira ati, “Turashimira Polisi y’igihugu kuko iyi gahunda ya ‘Gerayo Amahoro’, idushakira umutekano mu muhanda, usanga benshi muri twe bakora impanuka kubera kugongwa no kugonga kubera gukoresha nabi umuhanda, urumva ko iyi gahunda iha abafite ubumuga umutekano”.

Irihose kandi avuga ko abakoresha umuhanda bakwiye kubahana kuko usibye gukora impanuka bikabaviramo impfu, no kwangiza ibintu, abarokotse impanuka bakurizamo ubumuga ubundi bwakabaye bwirindwa.

Agira ati, “Ubundi ubumuga umuntu yakagize ibyago akabuvukana ntiyakabutewe no kuvugira kuri telefone, umuvuduko ukabije ku batwara ibinyabiziga no kutubahiriza amategeko y’umuhanda, turumva iyi gahunda ya ‘Gerayo Amahoro’ tuyitezeho kugabanya imibare y’abaterwa ubumuga n’impanuka”.

Irihose avuga ko ubumuga umuntu yavukana nta kundi, ariko ko ubuterwa n’impanuka bukwiye guhagarara

Umuyobozi wa Polisi mu Karere ka Muhanga Spt. Bahire Anastase avuga ko gahunda ya Gerayo Amahoro yagize uruhare mu kugabanya impanuka kuva muri Gicurasi umwaka wa 2019 ushize nk’uko biherutse gutangarizwa mu Nama y’Igihugu y’Umushyikirano mu kwezi k’Ukuboza 2019 n’umuyobozi mukuru wa Polisi y’igihugu.

Agira ati, “Imibare yagabanutse ku bice byose, no ku rwego rw’akarere, ariko gahunda y’ubukangurambaga irakomeje kandi natwe twemera ko izagabanya ubumuga buterwa n’impanuka ku buryo ndetse abantu mu minsi iri imbere babaho bazira ubwo bumuga”.

Ubukangurambaga bwa gahunda ya Gerayo Amahoro buteganyijwe kumara ibyumweru 52 ubu bukaba buri gukorerwa hirya no hino mu nsengero, ndetse n’ahahurira abantu benshi nko muri siporo rusange.

Muri siporo rusange ni hamwe mu hatangiwe ubutumwa bujyanye n’ubukangurambaga bwa Gerayo Amahoro

Abafite ubumuga bizeye ko Gerayo Amahoro izagabanya ubumuga buterwa n’impanuka

Polisi y’u Rwanda iravuga ko ubukangurambaga bwiswe ‘Gerayo Amahoro’ bwigisha abantu kwirinda impanuka zibera mu muhanda, ngo buzagera ku Banyarwanda bose hifashishijwe amadini n’amatorero atandukanye.

Abayobozi b’amatorero y’Abapantekote mu Rwanda(ADEPR) bakiririye ubwo bukangurambaga mu nsengero zabo z’i Remera na Nyarugenge mu mujyi wa Kigali kuri iki cyumweru tariki 19 Mutarama 2020.

Ku cyumweru gishize Polisi y’u Rwanda yari yatanze ubutumwa bwa ‘Gerayo Amahoro’ muri Kiliziya Gatolika zitandukanye hirya no hino mu gihugu.

Mu gihe Kiliziya na ADEPR ubwabo bonyine baramuka bigishije ubu bukangurambaga mu nsengero zabo zose mu gihugu, bwagera ku bazisengeramo batari munsi ya miliyoni 10 nk’uko imibare ibigaragaza.

Ikigo cy’ibarurishamibare (NISR) kivuga ko Kiliziya gatolika ubwayo iganwa n’Abanyarwanda bakabakaba miliyoni zirindwi(56.9%), hakiyongeraho abagera hafi kuri miliyoni enye bajya gusengera muri ADEPR, nk’uko bisobanurwa n’Umuvugizi wayo, Rev Pasiteri Ephrem Karuranga.

Rev Karuranga yagize ati “Iyi gahunda ya ‘Gerayo amahoro’ ni iyanjye kandi ni iya buri wese, buri munsi mu nsengero zacu mu gihugu cyacu, ubutumwa bwa ‘gerayo amahoro’ bugomba kujya butangwa.

Tugomba guhora twibutsa abantu ko bagomba kujya bagendera mu mihanda ariko barengera ubuzima bwabo, twifuza ko umukristu yaza ku rusengero ariko agasubirayo amahoro, cyane cyane abana kuko twe turi mu matorero afite abana benshi, kandi baba bakora urugendo ruri hagati ya kirometero imwe n’ebyiri baza ku rusengero bongera gusubira iwabo.

Usanga umwana wo mu giturage yambuka umuhanda uko abonye, nta biranga umuhanda bihari, imihanda y’ibitaka yo usanga nta n’aho kuyambukira hahari, habera impanuka kuko hakorerayo za moto, amagare,… aho ni ho tuzashyira imbaraga, twe turi henshi kurusha aho Polisi yakagombye kuba iri”.

Umuvugizi wa Polisi y’u Rwanda, CP John Bosco Kabera yavuze ko kujya mu madini n’amatorero bizabafasha kugera ku Banyarwanda bose, ku buryo ngo kubahiriza amategeko y’umuhanda bitazaba bigifatwa nk’itegeko ahubwo ngo bizaba umuco.

Ati “Turashaka ko kubahiriza amategeko yo mu muhanda byava ku kubahiriza amategeko bikagera ku mahitamo, ndetse bikazageraho bikaba umuco.

Imbaraga z’amadini turazizeye kuko abakirisitu ni abantu bumva, niba bashobora gusoma bibiliya ya paje zingana kuriya(amagana n’amagana), ntabwo bananirwa kumenya ibintu nk’ 10 byatuma ubuzima bwabo bugenda neza”.

Mu byo Polisi isaba abagenzi, nk’utega moto, birimo kwirinda gutegeka umumotari kwihuta, kwirinda kugenda umuntu avugira kuri telefone cyangwa yandika, agomba kwambara neza ingofero yabugenewe kandi agasaba umumotari kugenda gahoro, akanagenzura niba uwo mumotari atanyweye ibisindisha.

Polisi isaba uwateze imodoka nawe kugenzura niba adatwawe n’umuntu wanyweye ibisindisha, akamusaba kubahiriza amategeko harimo iryo kutarenza umuvuduko wanditse ku byapa byo ku muhanda, kandi agomba kwambara umukandara.

Umuntu ugenda n’amaguru ategekwa kugendera ibumoso bw’umuhanda kugira ngo ajye abisikana n’imodoka ahura nazo azireba.

Ni mu gihe umushoferi w’imodoka we asabwa kugendera iburyo bw’umuhanda igihe cyose, keretse ashaka guca ku kindi kinyabiziga kiri imbere ye.

Polisi y’u Rwanda ivuga ko mbere yo gutangiza ubukangurambaga bwa ‘Gerayo Amahoro’ mu kwezi kwa Gicurasi k’umwaka ushize, ngo yabaruraga impanuka zirenga ibihumbi bitanu buri mwaka, zahitanaga abantu batari munsi ya 500.

Mu Karere ka Nyagatare, ubukangurambaga bwa ‘Gerayo Amahoro’ bwatangiwe muri EAR Paruwasi ya Nyagatare. CSP Alphonse Businge, Umuyobozi wa Polisi wungirije mu Ntara y’Iburasirazuba ni we watanze ubutumwa, aho yasabye abatwara ibinyabiziga kwirinda gucungana na Polisi, ahubwo bagatwara baharanira kurengera ubuzima bwabo.

Ati “Murabona hari camera ahantu hatandukanye kubera ko bamaze kuhamenya, baza bacungana na ho iyo bahageze wagira ngo imodoka ntigenda yaharenga imodoka ikava hasi kandi ibyo ntibihagarika impanuka.

Umuntu ntakwiye gukorera ku jisho, ukwiye gutwara ikinyabiziga utareba Polisi, utareba ibyuma biri ku muhanda (camera) ahubwo ureba wowe n’ahazaza hawe”.

CSP Alphonse Businge kandi yasabye ababyeyi kuba hafi y’abana babo igihe bagenda iruhande rw’umuhanda kandi bakibuka kwambukiranya umuhanda igihe bageze aho byagenwe (Zebra Crossing).

Abakirisito ba EAR Diyosezi Shyira bakanguriwe kubungabunga umutekano wo mu muhanda

Muri gahunda yubukangurambaga bw’umutekano wo mu muhanda ya “Gerayo amahoro” yateguwe na Polisi y’u Rwanda yabereye muri Katederari Yohani Umubatiza wera mu itorero Angilikani Diyosezi ya Shyira kuri iki cyumweru tariki 19 Mutarama 2020, abakirisito basabwe kwitwararika no kubahiriza amategeko yashyiriweho gukumira impanuka, kugira ngo bitume basigasira ubuzima bwabo.

CIP Alex Rugigana, Umuvugizi wa Polisi y’u Rwanda mu Ntara y’Amajyaruguru ubwo amateraniro yari ageze hagati yahawe umwanya atanga ubutumwa burebana n’uruhare rw’abakirisito mu kubungabunga umutekano wo mu muhanda no gukumira impanuka.

Yagize ati “Muri mwe hari abatwara ibinyabiziga bakwiye kwirinda uburangare, umuvuduko ukabije n’indi myitwarire ituma habaho impanuka. Ku banyamaguru na bo, hari inzira zabashyiriweho zo kwambukiramo mu mihanda(Zebra crossing), iyo wambuka ukwiriye kwirinda kurangarira telefoni cyangwa ibindi bintu kuko bituma utabona uko wigengesera mu gihe wambuka; tuributsa buri wese ko afite uruhare mu kwitwararika igihe ari mu muhanda yaba atwaye cyangwa agenda n’amaguru”.

Mu bindi yakomojeho birimo kwirinda kuvugira kuri telefoni umuntu atwaye ikinyabiziga, kwambara umukandara wabugenewe no gukoresha isuzuma ry’ibinyabiziga. Ku banyamaguru bo bibukijwe kugendera mu gice cy’umuhanda i bumoso aho imodoka iza bayireba, yaba igenda nabi bakaba kuyihunga.

Mu Ntara y’Amajyaruguru mu Ugushyingo n’Ukuboza umwaka ushize nta mpanuka zigeze zihitana ubuzima bw’abantu uretse abakomeretse gusa. Yagize ati: “Impamvu ibi twabigezeho ni ubufatanye bwa Polisi n’abaturage mu guhagurukira ibikorwa byo kuzikumira binyuze muri iyi gahunda ya Gerayo amahoro, twifuza ko mutagoheka muri uru rugamba turimo rwo kurwanya mpanuka”.

Bamwe mu bakirisito babwiye Kigali Today ko ubutumwa bahawe bwabakanguye, biyemezaa gukaza ingamba zo gukumira imyitwarire igira uruhare mu guteza impanuka zo mu muhanda, bubaha uburenganzira bw’abatwara ibinyabiziga n’ubw’abanyamaguru.

Nizeyimana Jean Baptiste yagize ati “Ubu butumwa bwankebuye, hari ibintu ntahaga agaciro, nko kugendera mu gice cy’ibumoso numvaga atari ngombwa ku banyamaguru, hari igihe nageraga muri zebra crossing nkigendera uko nshatse, hari n’igihe nigeze kubihanirwa na Polisi ntwaye imodoka. Kuba Polisi yongeye kutwibutsa ibyo dusabwa bitumye ntahana umugambi wo kwigengesera igihe cyose”.

Umushumba w’Itorero Anglicani Diyosezi ya Shyira Rev. Samuel Mugiraneza Mugisha, yashimiye iki gikorwa anemeza bagiye kurushaho kwifashisha ivugabutumwa mu gukumira impanuka zo mu muhanda, by’umwihariko bakangurira ababyeyi kwigisha abana uburyo bwo kwitwararika mu muhanda mu gihe bajya cyangwa bava ku mashuri.

Yagize ati “Turashimira Polisi yafashe iya mbere ikwigisha abakirisito imyitwarire yabafasha gukumira impanuka. Hari impanuka zabaga inaha muri Musanze ariko zaragabanutse, ariko turacyafite urugamba rukomeye rwo kuzirinda abana, kuko hano muri Musanze usanga hari amagare menshi yirirwa abisikana n’abana bajya cyangwa bava ku mashuri, izo mpanuka zikigaragara usanga zibera ahari abana bataragera ku rwego rwo gusobanukirwa byimbitse uko bitwara mu mihanda. Turakora iyo bwabaga ngo dufatanye dukwirakwize ubutumwa bwibutsa abantu bose kugira uruhare mu gusigasira umutekano wo mu muhanda”.

Gahunda y’Ubukangurambaga bwa “Gerayo amahoro” imaze ibyumweru 36 itangijwe mu gihe biteganywa ko izasozwa yujuje ibyumweru 52. CIP Alex Rugigana avuga ko kuyigisha abakiristo mu nsengero bidakwiye kubabera amasigaracyicaro, ahubwo ari umwanya wo kuyisakaza mu bandi, kugira ngo umubare munini w’abantu bamenye ibyo basabwa mu kubungabunga umutekano wo mu muhanda.

‘Gerayo Amahoro’ mu kiliziya no mu nsengero si ukwivanga- Musenyeri Gasatura

Musenyeri Nathan Gasatura, umushumba wa Diyosezi ya Butare mu itorero ry’abangirikani mu Rwanda, avuga ko kuba polisi itangira ubutumwa bwa Gerayo Amahoro mu kiliziya no mu nsengero atari ukwivanga.

Yabitangaje nyuma y’uko polisi yatangiye ubu butumwa muri katedarari y’abangirikani y’i Butare, tariki 19 Mutarama 2020.

Yagize ati “Aba bakiristo, ni bo baturage b’u Rwanda, ni bo Leta yacu y’ubumwe iyobora, ni bo musenyeri ayobora, ni bo Meya na Guverineri bayobora. Ni bo baturage polisi n’igisirikare [bakorera]. Ntitubahuriyeho”?

Yunzemo ati “Nta kwivanga rero. Keretse iyo biba ku gahato kandi nta karimo. Kandi ni rwa rubuga twese duhuriyeho”.

Musenyeri Gasatura kandi yavuze ko n’ubundi basanzwe bigisha amahoro, bityo na Gerayo Amahoro bakazakomeza kuyivugaho kuko na yo ireba ubuzima.

Kandi ngo nk’uko basanzwe bavuga no ku zindi gahunda za Leta, na Gerayo Amahoro bigiye kuba uko.

Ati “Twibutsa abantu gutanga umusoro, gushaka mituweri, kujyana abana mu ishuri,… ibyo byose ni ibintu tubibutsa kandi tukabisengera. Ubu rero badutije umubyizi, kandi tuzakomerezaho”.

Kuba polisi yatangiye ubutumwa bwa Gerayo Amahoro mu rusengero, hari n’abakirisito bo mu itorero ry’abangirikani bavuze ko ntacyo bitwaye, ahubwo ari byiza.

Eric Nkurunziza ati “Mu nsengero haba harimo abantu benshi bakoresha umuhanda. Haba harimo abana, haba harimo abashoferi ndetse n’abazaba abashoferi. Bose baba bakeneye kumenya uko umuhanda ukoreshwa”.

Anafite icyizere ko iyi Gerayo Amahoro mu nsengero no muri za kiliziya izatanga umusaruro ufatika mu kugabanya impanuka.
Umuvugizi wa polisi mu Ntara y’Amajyepfo, CIP Sylvestre Twajamahoro, avuga ko iki cyumweru ari icya 36 kuva Gerayo Amahoro yatangira. Kimwe na Nkurunziza kandi yizeye ko izatanga umusaruro.

Ati “Ubu nta mibare mishyashya mfite, ariko mu nama y’umushyikirano iheruka umuyobozi wa polisi mu Rwanda yari yavuze ko Gerayo Amahoro yagabanyije impanuka ho 14%”.

Tugarutse ku butumwa bwa Gerayo Amahoro nyir’izina mu rusengero rw’Abangirikani kuri uyu wa 19 Mutarama 20220, Umuyobozi wungirije wa polisi mu Ntara y’Amajyepfo, Athanase Nshuti, yibukije abagenda n’amaguru kudashyira écouteurs mu matwi bari mu muhanda no kwitodera ibinyabiziga banyura ahabugenewe.

Yanibukije abatwara ibinyabiziga kwirinda impanuka batwara batanyoye batanavugira kuri terefone, kudatwara abana imbere mu modoka no kutabemerera guhagarara mu modoka igihe imodoka iri kugenda, kuko byateza impanuka.

Abatwara ibinyabiziga basabwe kureba ubuzima bwabo kurusha gucunga Polisi na Camera

Yabibasabye kuri uyu wa 19 Mutarama 2020, mu bukangurambaga bwa ‘Gerayo Amahoro’ yatangiye mu itorero EAR Paruwasi ya Nyagatare.

CSP Alphonse Businge, avuga ko yabwiye abakirisitu ko impanuka nyinshi zituruka ku burangare bw’abayobozi b’ibinyabiziga n’ikoreshwa ry’ibisindisha.

Yavuze ko ubukangurambaga bwa ‘Gerayo’ bugamije guhwitura Abanyarwanda bakibuka ko ubuzima bwabo bukomeye budakwiye gutwarwa n’ibyishimo bivamo impanuka.

Yasabye abatwara ibinyabiziga kwirinda kunywa ibisindisha ngo batware, ahubwo ko mugihe banyoye bakwiye kwifashisha abandi bashoferi “Abasare”.

Yasabye kandi abatwara ibinyabiziga gutwara badacunga ahari ibyuma bifata amashusho (camera) cyangwa Polisi, ahubwo ko bakwiye kugenda batekereza ku buzima bwabo.

Ati “Murabona hari camera ahantu hatandukanye kubera ko bamaze kuhamenya, baza bacungana na ho iyo bahageze wagira ngo imodoka ntigenda yaharenga imodoka ikava hasi kandi ibyo ntibihagarika impanuka.

Umuntu ntakwiye gukorera ku jisho, ukwiye gutwara ikinyabiziga utareba Polisi, utareba ibyuma biri ku muhanda (camera) ahubwo ureba wowe n’ahazaza hawe”.

CSP Alphonse Businge kandi yasabye ababyeyi kuba hafi y’abana babo igihe bagenda iruhande rw’umuhanda kandi bakibuka kwambukiranya umuhanda igihe bageze aho byagenwe (Zebra Crossing).

Archdeacon Bernald Rushamba, uyobora ubudiyakoni bwa Nyagatare mu itorero EAR ,mu isengesho yageneye Polisi yasabye ko Imana yabafasha bagakora akazi kabo badashaka amakosa ku bayobozi b’ibinyabiziga ahubwo bayakumira.

Yagize ati “Turagushima kuri uru rwego rw’abapolisi ishami ry’umutekano wo mu muhanda, turabasabira amahoro n’umugisha ku kazi kabo kandi Uwiteka Imana nyiringabo, turabingingira kugira ngo ako kazi bagakorane umurava, cyane cyane badashaka amakosa ku bantu ahubwo bakumira amakosa”.

CIP Hamdoun Twizeyimana, umuvugizi wa Polisi y’Igihugu mu Ntara y’Iburasirazuba, avuga ko gutangira ubu bukangurambaga bwa ‘Gerayo Amahoro’ mu madini n’amatorero bijyanye no kugera ku Banyarwanda benshi kuko babarizwa mu matorero n’amadini.

Avuga ko mu cyumweru kimwe gishize ubutumwa bwa Gerayo Amahoro butangiwe muri Kiliziya Gatolika nta mpanuka iragaragara mu Ntara y’Iburasirazuba.

CIP Hamdoun Twizeyimana avuga ko 80% by’impanuka ziterwa n’imyumvire, bityo bagomba kwigisha Abanyarwanda benshi kugira ngo bahindure imyumvire birinde icyo ari cyo cyose cyatera impanuka.

Ababyeyi basabwe gufasha abana kwambukiranya umuhanda babanyuza ahemewe kwambukira abanyamaguru (Zebra crossing)

Ati “Ikigaragara ni uko kuva mu cyumweru gishize nta mpanuka iragaragara, aho duteze umusaruro cyane ni uguhindura imyumvire kuko hafi 80% by’impanuka zikomoka ku myumvire, tuzakomeza kwigisha kandi abantu benshi kugira ngo bahindure imyumvire impanuka zigabanuke”.

CIP Hamdoun Twizeyimana avuga ko inshingano za Polisi ari ugukumira ibyaha, bityo ubutumwa bugamije kubikumira bugomba gutangirwa ahantu hose hahurira abantu benshi.

Ubukangurambaga bwa Gerayo Amahoro mu matorero ya EAR na UEBR mu Ntara y’Iburasirazuba bwatangiwe mu nsengero esheshatu z’aya matorero, ku rwego rw’Intara bukaba bwatangiwe muri EAR Paruwasi ya Kabarore.

Yabitangaje kuri uyu wa 12 Mutarama 2020, ubwo ubukangurambaga bwa Gerayo Amahoro bwatangizwaga muri Kiliziya Gatolika, Paruwasi ya Nyagatare.

Umuyobozi wa Polisi y’igihugu wungirije mu Ntara y’Iburasirazuba, CS Alphonse Businge, yibukije abakirisitu ko impanuka nyinshi zo mu muhanda ziterwa n’uburangare bw’abayobozi b’ibinyabiziga ndetse n’abakoresha umuhanda.

Avuga ko kenshi impanuka ziterwa n’abayobozi b’ibinyabiziga batwara banyoye ibisindisha, gutwara bavugira kuri telefoni ndetse n’abakoresha umuhanda bambuka bambaye ‘écouteurs’ mu matwi no kwambukiranya umuhanda batabanje kureba ko hari ikinyabiziga kiri hafi.

Abakirisitu biyemeje gufatanya na Polisi gukumira impanuka

Umuvugizi wa Polisi y’Igihugu mu Ntara y’Iburasirazuba, CIP Hamdoun Twizeyimana, avuga ko gutangira ubutumwa bwo gukoresha neza umuhanda muri kiliziya bigamije kugera ku Banyarwanda benshi.

Avuga ko nyuma ya Kiliziya Gatolika bazakomereza mu yandi madini kugera ngo umutekano wo mu muhanda ugera ku muryango wose.

Avuga ko kuva ubukangurambaga bwa Gerayo Amahoro bwatangira mu ntara y’iburasirazuba impanuka zo mu muhanda zimaze kugabanukaho 11 kandi hari icyizere ko uyu mubare uzakomeza kugabanuka.

Ati “Turishimira ko impanuka zimaze kugabanukaho 11% kandi Abanyarwanda bose nibagira umutekano wo mu muhanda uwabo, impanuka zizagabanuka kuko turifuza ko abagenzi badakomeza kurebera abashoferi bakora amakosa.”

CS Alphonse Businge avuga ko impanuka zo mu muhanda nyinshi ziterwa n’uburangare ahanini buturuka ku gukoresha ibisindisha

Nshimiyumugisha Jean d’Amour, umwe mu bakirisitu, avuga ko kuba ubutumwa bwa Gerayo Amahoro butangirwa mu madini n’amatorero ari uburyo bwiza bwo gufasha Abanyarwanda benshi kumenya gukoresha umuhanda n’uburenganzira bwabo igihe bari ku rugendo.

Agira ati “Jyewe ibi bintu nabikunze kuko muri kiliziya haba hari ingeri nyinshi z’abantu, kumenya gukoresha umuhanda nibigera kuri twese impanuka zizagabanuka icyizere kirahari.”

Ubukangurambaga bwa Gerayo Amahoro bumaze ibyumweru 35 butangijwe. Nyuma yo kubutanga ku bayobozi b’ibinyabiziga bukaba bwakomereje mu nsengero hagamijwe ko bugera ku Banyarwanda bose.

Ubu bukangurambaga bwa ‘Gerayo Amahoro’ ni gahunda Polisi imazemo ibyumweru 35 (kandi ngo irakomeje), ikaba igamije gukangurira Abaturarwanda kwirinda impanuka zo mu muhanda.

Kiliziya zitandukanye hirya no hino mu gihugu zakiriye mu misa abayobozi ba Polisi, mu rwego rwo gusakaza ku bantu benshi bashoboka amabwiriza yo kwirinda impanuka zo mu muhanda no kurinda abana ihohoterwa.

Ikigo cy’ibarurishamibare(NISR) kivuga ko Abanyarwanda hafi miliyoni zirindwi ari abayoboke ba Kiliziya Gatolika, bakaba bari ku rugero rwa 56.9% by’abaturage bose mu gihugu.

Padiri Mukuru wa Katederali Saint Michel i Kigali, Innocent Konsolateri yabwiye Umuvugizi wa Polisi y’u Rwanda, CP John Bosco Kabera ko bemeye gushyira mu bikorwa gahunda ya ‘Gerayo Amahoro’ kuko ngo iri mu mahame ya Kiliziya.

Yagize ati “Gerayo Amahoro tuyibonyemo igikorwa cy’urukundo gikomeye, ubundi nta muntu uza hano wari uhagaze (kuri Alitari), ni uko ibyo uvuga ari amahame ya Kiliziya, ’mugende amahoro ya Kristu".

Yahindukiriye abayoboke ba Kiliziya ati "Kirazira zose yavuze muzandike ku mitima yanyu, nibwo muzabasha kuzubahiriza, mu ngo mu miryango remezo, mu makoraniro atandukanye ndagira ngo twibukiranye izi nshingano".

Mu mwaka ushize wa 2019, Minisiteri y’Ibikorwa remezo(MININFRA) yagaragaje ko Abanyarwanda babiri byibura ku munsi bahitanwa n’impanuka zo mu muhanda kandi ko zimugaza abatari munsi ya batatu ku munsi.

Polisi y’u Rwanda yo ikomeza ivuga ko habaruwe impanuka zo mu muhanda zingana na 4,661 mu mwaka ushize wa 2019, ariko ko ugereranyije n’uwawubanjirije wa 2018, izi mpanuka ngo zagabanutse kuko zari 5,611.

Umuvugizi wa Polisi y’u Rwanda, CP John Bosco Kabera avuga ko bahuje na Kiliziya Gatolika gahunda zo kubungabunga amahoro n’ubuzima, ndetse ko bombi bemera ubufatanye n’ubworoherane.

Ati "Izi ni indangaciro duhuriraho na Kiliziya Gatolika. Ntabwo nzi ngo misa ya mbere, iya kabiri cyangwa iya gatatu zisomwa ryari, ariko icyo nizera ni uko ubu bukangurambaga buzigishwa".

Umuvugizi wa Polisi yigishije abagenda n’amaguru ko bagomba kugendera ibumoso bw’umuhanda kugira ngo ikinyabiziga kijye kiza bakireba, ndetse no kwirinda kwambukiranya umuhanda umushoferi w’imodoka atababonye.

Abatwaye ibinyabiziga na bo basabwa kugabanya umuvuduko, kwirinda gutwara banyoye ibisindisha, ndetse bakitoza kugendera mu kuboko kw’iburyo bw’umuhanda, keretse ushaka kunyura ku kindi kinyabiziga agira ngo ajye imbere yacyo.

CP Kabera avuga ko ubukangurambaga bwa ‘Gerayo Amahoro’ ngo buzajya bukorwa icyumweru kimwe, ikindi hakorwe ubwiswe ’Rengera umwana’, bukazabamo ibikorwa byo guhiga abatera inda abangavu.

Polisi y’u Rwanda ivuga ko nyuma ya Kiliziya Gatolika, ngo igiye kuganira n’andi madini n’amatorero muri gahunda yo kwigisha gahunda za ’Gerayo Amahoro’ na ‘Rengera Umwana’.

Mu Mujyi wa Kigali icyo gikorwa cyabereye kuri Katederali Mutagatifu Mikayire (Saint Michel) mu Kiyovu.

Umuvugizi wa Polisi y’u Rwanda, CP John Bosco Kabera, yigishije Abakirisitu Gatolika muri Kiliziya ya Saint Michel

Kwigisha ‘Gerayo Amahoro’ mu Kiliziya ntaho bibangamira ijambo ry’Imana - Padiri Hakuziyaremye

Padiri Hakuziyaremye Celce wo muri Diosezi ya Kabgayi aravuga ko gahunda ya ‘Gerayo Amahoro’ yatangiye kwigishwa mu nsengero no mu kiliziya ntacyo ibangamiyeho kwigisha ijambo ry’Imana kuko n’ubundi Abakirisitu bakwiye kumenya uko birinda impanuka zo mu muhanda.

Yabivuze kuri uyu wa 12 Mutarama 2020 ubwo yatangaga ubutumwa kuri Gerayo Amahoro muri Bazilika ya Kabgayi, ubutumwa bwari buhagarariwe n’umuyobozi wa Polisi mu Karere ka Muhanga.

Nyuma y’amatangazo asanzwe ya Kiliziya, mbere y’uko umusaseridoti asoza igitambo cya Misa ya mbere muri Bazilika ya Kabgayi nibwo hatanzwe ubutumwa bwa Polisi y’igihugu bwa ‘Gerayo Amahoro’, bwa mbere buhagarariwe n’inzego z’umutekano.

Padiri Hakuziyaremye wari wayoboye igitambo cya misa, yavuze ko nyuma yo kuganira hagati y’inzego za Polisi y’igihugu n’Abepisikopi, hemejwe ko kuri iki cyumweru mu gihugu hose hatangwa ubwo butumwa mu rwego rwo gukangurira Abanyarwanda kwirinda impanuka zo mu Muhanda.

Padiri Celce Hakuziyaremye avuga ko na we hari ibishya yungukiye muri iyi gahunda ku buryo n’abakirisitu bakwiye kubyitwararikaho nko ku bagenda n’amaguru bashaka kubisikana n’ibinyabiziga.

Yagize ati “Nanjye ubwanjye hari ibyo nungutse ko iyo imodoka iri imbere yawe mu mukono w’iburyo, ugendera mu gice uyireberamo i bumoso aho ugenda uyireba uko na yo iza”.

Padiri Celce Hakuziyaremye avuga ko gutangira ubutumwa mu Kiliziya nta kibazo biteye ku mirimo isanzwe ihakorerwa, kuko byabanje kumvikanwaho n’inzego za Kiliziya na Polisi y’Igihugu kandi ko umwanya watanzwe ntacyo ubangamiyeho ijambo ry’Imana risanzwe ritangirwamo.

Agira ati “Polisi yaganiriye n’Abepisikopi bemeranya ko Abakirisitu bose barebwa n’umutekano wo mu muhanda ku buryo bagera amahoro aho bajya, bemeranya ko ubwo butumwa bwatangirwa ahagera abantu benshi”.

“Birumvikana ni imikoranire n’ubundi abakirisitu bumva ibyo tubabwiye, kandi n’ubundi ubutumwa turabutanga, n’ibindi byose bijyanye n’umutekano turabibibutsa nta kibazo kirimo”.

Umuyobozi wa Polisi mu Karere ka Muhanga Superintendent of Police (SP) Bahire Anastase, avuga ko kuba ubutumwa bwagejejwe ku mbaga y’abakirisitu kandi butanzwe na Padiri byongera icyizere ko burushaho kumvikana kurusha gutegereza kuzabutangira mu miganda, n’izindi nama ntoya zigenda ziba hirya no hino, iki gikorwa kikaba kizakomeza.

Agira ati “Kubona ubutumwa bwageze ku mbaga y’abantu ingana gutya biratanga icyizere kuko babwiherewe n’umuntu usanzwe abaha ubutumwa kandi bakabwumva, turizera ko hamwe n’iyi gahunda impanuka zizakomeza kugenda zigabanuka”.

Abasengera kuri Bazilika ya Kabgayi mu Mujyi wa Muhanga bavuga ko hari n’ubumenyi bungutse bwo gukoresha umuhanda ku banyamaguru kuko bapfaga kugenda bazi ko gukoresha inzira y’abanyamaguru bihagije.

Nyirabagenzi Clemence w’imyaka 65 asanzwe abona impanuka z’ibinyabiziga mu muhanda, ariko ngo ni ubwa mbere yumvise gahunda ya ‘Gerayo Amahoro’, bityo ko ashimira polisi y’igihugu yabagejejeho ubutumwa.

Agira ati “Numviyemo ko abantu bagomba kwirinda mu kwambukiranya umuhanda batabanje kureba hirya no hino. Ni ubwa mbere numvise iyi gahunda, nko muri Rondpoint ya Gitarama mu mujyi usanga abantu baba bivanga n’ibinyabiziga, numvise kandi ko abana bato tugomba kubafata akaboko tukabambutsa cyangwa tukanabaherekeza”.

Yankurije Cecile avuga ko ashimira Polisi y’igihugu kuba yaje kubibutsa ibyo bari basanzwe bafiteho ubumenyi buke, ku buryo umuntu atahoraga abizirikana.

Agira ati, “Nanjye nungutse ikijyanye no kugenda mu muhanda ureba umukono imodoka iturukamo ugereranyije n’aho werekeza, nta mpanuka irambaho ku myaka 63, ariko abantu bakwiye kubanza gushishoza kugira ngo na bo bazarambe”.

Yankurije anasaba Polisi ko gahunda ya ‘Gerayo Amahoro’ yakwita no ku batwara abagenzi buriza ibiciro binyuranyije n’ibyagenwe kuko usanga bihereranwa n’abashoferi, by’umwihariko mu gihe cy’iminsi mikuru n’igihe cy’abanyeshuri bava cyangwa bajya kwiga kuko ari ho habera akarengane.

Musanze:

Muri Diyosezi Gatolika ya Ruhengeri, ubutumwa burebana n’ubukangurambaga bwa Polisi y’igihugu bwa Gerayo Amahoro bwabimburiwe n’igitambo cya Misa yaturiwe muri Paruwasi Gatolika Katedarali ya Ruhengeri aho Kiliziya yakira abagera mu bihumbi bitanu by’abakirisitu yari yakubise yuzuye abandi bumvira Misa hanze.

Mu gusoza igitambo cya Misa ya mbere, ubwo abakirisitu bari bategereje ko Padiri Dr Hagenimana Fabien wasomye iyo Misa abaha umugisha bagataha, babonye Umukuru wa Polisi ahawe ijambo atanga ubutumwa bwa Gerayo Amahoro bakiranye ibyishimo.

Umuyobozi wa Polisi mu Ntara y’Amajyaruguru, ACP Rugwizangoga Révelien, mu ijambo rye, yatangiye ageza ubutumwa ku bakirisitu bujyanye na gahunda y’umutekano wo mu muhanda.

Yavuze ko kubungabunga umutekano wo mu muhanda biri mu nshingano za buri mukirisitu, avuga ko ari yo mpamvu Polisi y’u Rwanda muri gahunda ya Gerayo Amahoro ku bufatanye n’inama y’Abepisikopi gatolika b’u Rwanda bakangurira abakirisitu bose ubutumwa bwa Gerayo Amahoro.

Ati “Icya mbere, abanyamaguru bagomba kugendera mu gice cy’ibumoso bw’umuhanda aho ibinyabiziga biza bituruka babireba, kwambukira mu mirongo yagenewe abanyamaguru kandi batambaye ekuteri mu matwi, ukambuka kandi wihuta ariko utiruka”.

Kubireba abashoferi, ACP Rugwizangoga na bo yabahaye ubutumwa agira ati “Ku mushoferi, irinde kuvugira kuri telefoni utwaye ikinyabiziga, irinde gutwara ikinyabiziga wanyoye ibisindisha, irinde kurenza umuvuduko wateganyijwe, ubaha uburenganzira bw’abanyamaguru”.

Abamotari n’abo batwara na bo yababwiye ati “Igihe uri kuri moto, ambara ingofero yabugenewe neza, kandi nawe mugenzi wirinde kwirukansa umumotari bitewe n’impamvu zawe bwite. Wirebera amakosa y’ugutwaye, haba mu modoka cyangwa kuri moto. Iri tangazo ryasinyweho na Musenyeri Servilien Nzakamwita, Umushumba wa Diyosezi Gatolika ya Byumba”.

ACP Rugwizangoga kandi yamenyesheje abakirisitu ko Polisi igiye gutangiza indi gahunda yitwa Rengera Umwana ku itariki 21 Mutarama 2020, aho ubwo bukangurambaga buzakorwa ku nsanganyamatsiko yitwa ‘Rengera Umwana’ bukazakorwa mu gihugu hose, muri gahunda yo guca no guhana abahohotera abana.

Bamwe mu bakirisitu baganiriye na Kigali Today nyuma y’igitambo cya Misa, bavuze ko ubukangurambaga bwa Polisi muri gahunda ya Gerayo Amahoro bubakanguye, kandi ko burabafasha kurwanya impfu zikomoka ku mpanuka zo mu muhanda.

Kanyabuzige Denys yagize ati “Ibi bahora babivuga ku maradiyo rimwe na rimwe ntitubihe agaciro, ariko tubonye Afande ahagurutse mu Kiliziya aratubwiriza twumva ko bya bintu nta mikino irimo. Baradukanguye cyane ni byiza pe, twiteguye gufatanya na Polisi gukumira impanuka zo mu muhanda”.

Rubangura Jean Nepomsene w’imyaka 77 ati “Tubyakiriye neza cyane, batwibukije ko ubuzima bukomeye. Ni yo mpamvu tugomba gukumira ikintu cyose cyabuhungabanya. Ntibisanzwe ko Polisi iza kutubwiriza mu Kiliziya birashimishije cyane. Abapolisi ni abacu bashinzwe umutekano wacu kandi bashinzwe n’umutekano w’Abakirisitu, ni yo mpamvu twabyakiriye neza”.

Guverineri Gatabazi

Iyo gahunda ya Gerayo amahoro mu Kiliziya yitabiriwe kandi na Guverineri Gatabazi JMV wavuze ko kuba Polisi yahawe umwanya wo gutanga ubutumwa mu Kiliziya, ari kimwe mu buryo bwo guha abantu benshi bari hamwe ubutumwa mu buryo bworoshye.

Agira ati “Burya Abakirisitu bemera Misa cyane, kandi amakuru menshi bakura mu Misa bayafata nk’ihame. Ubu ni uburyo bwo guha abantu benshi ubutumwa tutabasha kubonera hamwe, ubu butumwa hari inyongeragaciro buzanye mu bukangurambaga Polisi yatangiye. Ikindi kidushimishije ni uko Polisi igiye gutangiza ubukangurambaga bwo kurengera umwana”.

Emmanuel Ndagijimana, Padiri mukuru wa Paruwasi Gatolika Katedarali ya Ruhengeri, yavuze ko abakirisitu badakwiye kumva ko kurwanya impfu zikomoka ku mpanuka bireba Polisi gusa, avuga ko na Kiliziya ifite inshingano zo kwigisha abakirisitu kwirinda impanuka.

Avuga ko hari abantu benshi abapadiri bajya guherekeza bishwe n’impanuka akabona ko ari ikibazo giteye inkeke ati “Ni kenshi duherekeza abitabye Imana bazize impanuka ugasanga amarira ni menshi mu miryango, hakagira impfubyi zisigara, hakagira imiryango igira ibibazo.

Dufite abakirisitu bacu baba bagenda mu mihanda, bagahura n’impanuka bamwe bakitaba Imana abandi bakahakura ubumuga bukomeye. Ibi byose biri mu nshingano za Kiliziya, biri no mu butumwa bwayo. Murumva ko bifite aho bihurira n’iki gikorwa Polisi irimo cya Gerayo Amahoro”.

Gahunda ya Gerayo Amahoro muri Diosezi Gatolika ya Ruhengeri yabereye muri Paruwasi Gatolika Katedarali ya Ruhengeri. Guverineri Gatabazi n’Umuyobozi wa Polisi mu Ntara y’Amajyaruguru bayitabiriye

Iyi gahunda ya Gerayo Amahoro inyujijwe muri Kiliziya Gatolika mu gihe igeze mu cyumweru cya 35 mu byumweru 52 izamara.

Ubuyobozi bwa Polisi buvuga ko Impamvu iyo gahunda yigishijwe mu Kiliziya ari uko ari ahantu hahurira abaturage benshi.

CIP Alexis Rugigana Umuvugizi wa Polisi mu ntara y’Amajyaruguru, avuga ko iyi gahunda yo kwigisha Gerayo Amahoro mu Kiliziya izatanga umusaruro aho izagabanura impanuka, ngo biteguye ko iyo gahunda izava mu rwego rwa Diyosezi ikagera mu miryango remezo byaba na ngombwa ikagera no mu yandi madini n’amatorero.

Rubavu:

Mu Karere ka Rubavu, Kiliziya Gatolika yijeje ubufasha Polisi y’u Rwanda mu kurwanya ibyaha n’ubujiji.

Igisonga cya Musenyeri Nsengumuremyi Jean Marie Vianney n’Umuyobozi wa Polisi mu Burengerazuba ACP Kajeguhakwa Jean Claude bitabiriye ubukangurambaga bwa Gerayo Amahoro

Ni ibikorwa bigiye gutangirira muri gahunda ya ‘Gerayo amahoro’, aho ubutumwa bushishikariza abakirisitu kwirinda kwica amategeko yo mu muhanda bwasomewe muri Kiliziya hose, naho abatwara ibinyabiziga bya Kiliziya bakazajya bahabwa amabwiriza yo kubahiriza gahunda ya Gerayo Amahoro.

Mu Ntara y’Iburengerazuba byatangiriye mu Karere ka Rubavu muri Kiliziya ya Nyundo mu misa ya mbere. Nsengumuremyi Jean Marie Vianney, igisonga cya Musenyeri, yavuze ko babishyigikiye kubera ko barwanya icyagirira nabi ikiremwa-muntu bagashyigikira ikimugirira akamaro.

Yagize ati “Ikintu cyose kireba muntu cyaba ikireba umuyoboke wacu n’utari we, cyaba kiza tukagishyigikira naho ikibi tukirwanya twivuye inyuma, icya kabiri dufite gahunda yo kurwanya ubujiji aho buturuka hose, no guhugura abantu ibyo bagomba gukora. Polisi yadusabye kuba abafatanya bikorwa kandi turabyemera, kuko tubibwira abantu bikabageraho, duhereye ku bana n’abakuru ndetse n’abashoferi badutwara.”

Igisonga cya Musenyeri kivuga ko bazigisha abantu kumenya amategeko y’umuhanda no kwirinda icyahutaza umutekano w’abantu birinda ibisindisha n’uburangare. Ati “Tuzabyigisha mu makoraniro kandi ntituzabihagarika kugeza igihe abantu bamenye inyungu yo gukoresha umuhanda neza.”

Umuyobozi wa Polisi mu Ntara y’Iburengerazuba ACP Kajeguhakwa Jean Claude avuga ko gahunda ya Gerayo Amahoro imaze ibyumweru 35 kandi yagiye itanga umusaruro, bakaba bari kugeza ubumenyi ku Banyarwanda bwo gukoresha umuhanda no kubahiriza amategeko y’umuhanda.

ACP Kajeguhakwa avuga ko Kiliziya nk’umufatanyabikorwa yatanze ubutumwa bwa gahunda ya Gerayo Amahoro mu kiliziya hose mu gihugu, kandi bakaba bafite ubundi bufatanye bagiye gutangiza tariki 21 Mutarama.

Yagize ati “Tariki 21 Mutarama 2020 tuzatangira gahunda ya Rengera Umwana izamara ibyumweru 52. Turasaba Kiliziya ko yadufasha kurengera umwana arindwa imirimo imuvunisha, arindwa kujyanwa mu tubari, guta amashuri no gucuruzwa kuko umwana w’umunyarwanda ni we muyobozi w’ejo hazaza.”

Ubutumwa bwa Gerayo amahoro ku bufatanye bwa Polisi na Kiliziya gaturika bwatangiwe mu Kiliziya abakirisitu basabwa kumenya kubahiriza amategeko y’umuhanda no kwirinda guteza impanuka.

Umuvugizi wa Polisi, CP John Bosco Kabera, hamwe n’Umuyobozi w’Ishami rya Polisi rishinzwe Umutekano wo mu muhanda, CP Rafiki Mujiji bagiranye ikiganiro n’abanyamakuru kuri uyu wa gatanu

Polisi yabwiye Itangazamakuru kuri uyu wa gatanu ko igiye kurushaho gukaza iyi gahunda ya ‘Gerayo Amahoro’ muri 2020, ndetse ko izayifatanya n’indi yitwa ’Rengera Umwana’ igamije gukumira ihohoterwa ribakorerwa.

Polisi yishimira kuba u Rwanda rushoje umwaka wa 2019 runatangiye uwa 2020 rufite umutekano uhagije muri rusange.

Umuyobozi w’Ishami rya Polisi rishinzwe Umutekano wo mu muhanda, CP Rafiki Mujiji, yasobanuye ko muri 2019 hagaragaye impanuka 4,661, mu gihe umwaka wawubanjirije wa 2018 wagaragayemo impanuka 5,611.

Iri gabanuka ringana na 17% ngo riterwa n’imbaraga yashyize muri gahunda yiswe ‘Gerayo Amahoro’ yatangiye mu kwezi kwa Gicurasi kugera mu Kuboza mu mwaka ushize wa 2019.

Polisi ivuga ko ikomeje korohereza abantu gukora ibizamini by’impushya zo gutwara ibinyabiziga hakoreshejwe ikoranabuhanga, aho yatanze impushya 137,811 muri 2019.

Ivuga ko n’ubwo itanga izi mpushya ngo itazajenjekera abakora amakosa, ndetse ikaba yarafatiye mu makosa abagera ku 309, 636 bahawe ibihano byo gucibwa ihazabu (contraventions).

CP Mujiji avuga ko impanuka zagabanutse cyane kuva mu kwezi kwa cyenda k’umwaka ushize kugera mu Kuboza 2019, ndetse ko kuva ku itariki 31 y’ukwezi gushize kugeza ubu ngo hamaze kuba impanuka imwe gusa yatewe n’umuntu wagonze umwana wo mu muryango we".

Ati"Dufite icyizere ko impanuka zizagabanuka muri uyu mwaka wa 2020, tuzakomeza ubukangurambaga cyane cyane ku batwara amagare bataragira amategeko abagenga".

Umuvugizi wa Polisi y’u Rwanda, CP John Bosco Kabera akomeza avuga ko muri gahunda ya ‘Rengera umwana’ bazagerageza kumenya abasambanya abana kugira ngo ‘bahigwe bukware’, ndetse n’ababakoresha imirimo ivunanye.

Polisi y’u Rwanda izizihiza muri Kamena 2020 isabukuru y’imyaka 20 imaze ishinzwe, ikaba yishimira ko kugeza ubu ifite ubushobozi bwo gukumira ibyaha birimo ibiyobyabwenge, ubujura, guhutazanya n’ubwicanyi mu muhanda, n’ahandi hose ndetse no kurinda inyubako n’ibikorwa bya Leta.

Ni ubukangurambaga buzarangwa no kohereza ubutumwa abagenzi n’abashoferi birinda ibyatera impanuka nko kuvugirira kuri telefoni, umuvuduko urengeje igipimo no kwirinda ibisindisha igihe batwaye ibinyabiziga.

Mu Ntara y’Uburengerazuba ni igikorwa cyatangirijwe aho abagenzi bategera imodoka, abagenzi basabwa kugira uruhare mu ngendo bakora, bibutsa abatwara ibinyabiziga kutavugira kuri telefoni, kutarenza umuvuguduko wagenwe.

Umuvugizi wa Polisi mu Ntara y’Uburengerazuba, CIP Kayigi Emmanuel, avuga ko abatwara ibinyabiziga bagomba kwirinda gucomokara utwuma tugabanya umuvuduko (speed governor).

Ati “Hari imvugo maze iminsi numva ngo umunyonzi ntapfa aba yatashye, ntabwo ari byo amagara araseseka ntayorwa. Iyo umuntu acomoye speed governor akagenda akagonga igiti n’umushoferi ahasiga ubuzima. Iyo ugenze neza ukubahiriza amategeko ugera iyo ujya amahoro. Turifuza ko abantu bose bakoresha umuhanda, kubahiriza amategeko y’umunda turangize umwaka neza, kuko umwaka urashira undi ukaza”.

Uretse kuba ubukangurambaga bwibanda ku batwara ibinyabiziga nk’imodoka zitwara abagenzi, CIP Kayigi avuga ko abanyamaguru n’abatwara amagare kubahiriza amategeko y’umuhanda na bo bibareba mu kurinda ubuzima bwabo.

Jeff Madali umuyobozi wa Airtel mu Ntara y’Uburengerazuba, avuga ko bahisemo ukwezi k’Ukuboza, kuko kugira ingendo nyinshi kandi bifuza ko abazikora bagera iyo bajya amahoro.

Ati “Ukwezi k’Ukuboza kugira ingendo nyinshi abantu bajya gusura imiryango yabo, nk’ikigo cy’itumanaho twifuza ko abagenzi bagera iyo bajya amahoro kuko iyo hagize upfa igihugu kiba gihombye natwe tugahomba umufatanyabikorwa”.

Madali, avuga ko mu kwezi koze bazibanda mu kugenda batanga ubutumwa bwo kwirinda impanuka mu modoka zitwara abagenzi, bazohereza ubutumwa ku banzi n’abatwara ibinyabiziga, ariko ngo bateganya no gukora ibiganiro kuri radiyo kuko hari abadasoma ubutumwa bohererezwa.

Polisi y’igihugu yihaye ibyumwe 52 bigize umwaka mu bukangurambaga bwiswe “Gerayo amahoro” kugira ngo igabanye impanuka zo mu muhanda.

Ku cyumweru cya 31 abatwara ibinyabiziga bavuga ko ingamba za Polisi zigenda zitanga umusaruro.

Umushoferi utwara imodoka yo muri sosiyete ya Ritco waganiriye na Kigali Today, avuga ko kubahiriza amabwiriza bituma badakora impanuka kandi ngo ntibakivunika cyane bashaka gukora ingendo nyinshi ngo barinjiza amafaranga.

Mu kwezi kwa Nzeri 2019, umuvugizi wa Polisi y’u Rwanda, CP John Bosco Kabera, yavuze ko impanuka zo mu muhanda ziri ku mwanya wa cumi mu mpamvu zitera urupfu mu Rwanda, avuga ko buri mwaka nibura abantu basaga 500 baburira ubuzima mu mpanuka zo mu muhanda naho abarenga 3,000 bagakomereka bikomeye, mu gihe ibigo by’ubwishingizi bitanga nibura miliyari 20 Frw nk’impozamarira.

Yagaragaje ko uhereye muri Mutarama ukageza muri Kanama uyu mwaka habaye impanuka 3,241, cyakora ni nkeya ugereranyije n’impanuka 3,864 zabaye mu mezi umunani ya 2018.

CP John Bosco Kabera yagaragaje ko muri izo mpanuka 3,241 izatewe n’abantu baba batwaye ibinyabiziga banyoye inzoga ari 85, mu gihe muri 2018 hari habaye 91 zatewe n’ubusinzi, naho mu mukwabu wo gufata abatwara ibinyabiziga banyoye inzoga barengeje igipimo cya alukolo (Alcol) cya 0.08, abafashwe ni 1,179.

Ubwo bukangurambaga bugamije gufasha abakoresha umuhanda kugera iyo bajya amahoro. By’umwihariko muri iyi minsi isoza umwaka wa 2019, hongewemo amaboko mashya kugira ngo impanuka zizagere kuri 0% nk’uko polisi ibyifuza.

Ni muri urwo rwego Polisi irimo gufatanya n’ikigo cy’itumanaho cya Airtel Rwanda n’abandi bafatanyabikorwa barimo RURA na RTFC.

Bamwe mu bagenzi baganiriye n’abayobozi bitabiriye gahunda ya Gerayo Amahoro, baturutse mu Ntara y’Amajyepfo batangarije Kigali Today uko byari byifashe ubwo batangiraga urugendo ruva mu Karere ka Huye berekeza mu Mujyi wa Kigali.

Umwe muri abo bagenzi yagize ati “Njyewe nahageze isa n’aho ihagurutse, ntabwo nabashije kumva ibyo shoferi yabwiye abagenzi bagezemo mbere ariko nshingiye uko uyu mushoferi yatuzanye nabonye rwose yatuzanye neza ibintu byose yabyubahirije”

Undi mugenzi yagize ati “ Nkunda gukora ingendo cyane, kandi iyo tugiye guhaguruka umushoferi atubwira uko urugendo tugiye gukora rureshya, n’umuvuduko aza kugenderaho, akatubwira ko tuza kugerayo amahoro, ariko icyo nasaba ni uko habaho ibikorwa byinshi byo kumenyesha abagenzi n’abaturage muri rusange iyi gahunda kugira ngo bayisobanukirwe, hakabaho n’imirongo ya telefoni ushobora kwiyambaza mu gihe ubonye ko umushoferi atarimo yubahiriza iyi gahunda.”

Gahunda ya Gerayo Amahoro yatangirijwe muri Gare ya Nyabugogo kuri uyu wa gatatu tariki ya 4 Ukuboza 2019, itangizwa n’umuvugizi wa Polisi y’igihugu, CP John Bosco Kabera.

Yagize ati “Ndakubwira ko mu gihugu hose muri gare 30 cyangwa zirenga ubu bukangurambaga bwabaye, burakomeza kugeza uku kwezi gushize. Turabwira Abanyarwanda uko bakwiye kwitwara mbere y’iminsi mikuru, mbere y’uko izo mpanuka ziba. Abatwara ibinyabiziga bakirinda umuvuduko urenze, gutwara uvugira kuri telefoni, uburangare mu muhanda, kugenda wandika ubutumwa kuri telefoni, kudaha uburenganzira abanyamaguru, gusuzumisha ikinyabiziga cyawe kugira ngo utware ikinyabiziga cyujuje ubuziranenge…”

CP Kabera yakomeje agira ati: “Ariko ikindi gikomeye ni uko noneho tubwira n’abagenzi, twagiye mu modoka kandi turakomeza kwigisha n’abanyamaguru muri uku kwezi kose tubabwira na bo ibyo bagomba kwirinda, kandi bizakomeza uyu mwaka uzajya gushira Abanyarwanda bamaze kumva ko nta mpanuka dukeneye.

Ubu bukangurambaga Polisi y’u Rwanda irimo kubukorera mu gihugu hose ifatanyije na Airtel.

Umuyobozi mukuru wa Airtel Rwanda, Amit Chawlas yasobanuye umusanzu wa Airtel muri Gerayo Amahoro, ati: “Ubusanzwe twababwiraga ngo: Mukomeze muvuge, mukomeze muvuge igihe cyose, ariko uyu munsi turababwira tuti ubu noneho ntimukomeze kuvugira kuri telefone cyangwa ngo mwandike ubutumwa igihe mutwaye cyangwa mwambuka umuhanda.”

Imibare ya polisi igararagaza ko kuva mu kwezi kwa mbere impanuka zikorerwa mu muhanda zagabanutse zikava kuri 400 mu mwaka wa 2018 zikagera ku 180 muri uyu mwaka wa 2019.

Kuva gahunda ya Gerayo Amahoro yatangira, impanuka zagabanutseho 24%.

Ambasaderi wa Airtel, Niringiyimana Emmanuel, wakoze igikorwa cy’indashyikirwa cyo gukorera umuhanda abaturage b’aho atuye, ari gufatanya na Polisi y’u Rwanda mu bukangurambaga bwa Gerayo Amahoro.

Amafoto: Nyirishema Fiston

Uyu muganda wabereye mu kagali ka Kibare mu mudugudu wa Inyange witabirwa n’abayobozi b’ikipe ya Police FC, abakinnyi ndetse n’abaturage batuye muri uyu mudugudu.

Ubwo aba bakinnyi batangiraga uyu muganda, bawukoranye umurava mwinshi bishimira gufatanya n’abaturage bo muri uyu mudugudu wa Inyange mu kwiyubakira igihugu.

Abaturage na bo bashimishijwe n’igikorwa cya Police FC ariko cyane cyane kwibonera imbona nkubone bamwe mu bakinnyi ba Police FC bajyaga babona ku ma televiziyo.

Umuyobozi wa Police FC Assistant Commissioner of Police (ACP) Bosco Rangira, yavuze ko Police FC ikina mu kibuga ariko ntiyibagirwa iterambere ry’igihugu kuko na bo ari Abanyarwanda, kandi nabo iterambere ry’igihugu rirabareba.

Yagize ati “Uyu munsi twifatanyije n’aba baturage dukora umuganda wo gutema ibihuru, ubutaha tuzasibura imigenda y’amazi kandi tuzakomeza dukora n’ibindi bitandukanye kugira ngo tugume kubaka igihugu cyacu gihorane umucyo”.

Yakomeje avuga ko ibihuru batemye ari byo byihishagamo imibu igatera abantu malariya, ikindi gikomeye cyane kikaba ko iyo bidatemwe ari byo byihishamo amabandi, abahanywera ibiyobyabwenge ndetse n’abahakorera izindi ngeso mbi zishobora guhungabanya umutekano w’abaturage.

ACP Rangira yakomeje abwira abaturage bari bitabiriye umuganda ko atari ubwa mbere cyangwa ubwa nyuma Police FC yifatanyije na bo ko ahubwo bazagaruka n’ikindi gihe.

Yagize ati “Mu gihe muzaba mwumva mukeneye ingufu zacu muzadutumeho tuzagaruka kuko natwe twishimira kugira uruhare mu kubaka iterambere ry’igihugu tugiteza imbere”.

ACP Rangira yibukije abari bitabiriye uyu muganda kubahiriza amategeko y’umuhanda birinda gutwara banyoye ibisindisha birengeje ibipimo, kugira ngo umuturage ufashe urugendo agere aho ajya amahoro.

Ati: “Buri wese uri hano yumve ko gukumira impanuka zo mu muhanda bimureba kuko zitwara ubuzima bw’abaturage abandi zikabamugaza. Murasabwa kugeza ubu butumwa ahantu hose, aho mugenda n’aho mukorera kugira ngo tubashe gukumira impanuka zo mu muhanda”.

Yakomeje ababwira ko ubu bukangurambaga bwa ‘Gerayo Amahoro’ buri wese akwiye kubugira ubwe ntibiharirwe Polisi y’u Rwanda yonyine.

Nshuti Sam, umuyobozi w’umudugudu wa Inyange yashimiye ubuyobozi bwa Police FC kuba baratekereje kuza kwifatanya na bo muri uyu muganda rusange usoza ukwezi, maze abizeza kubabera umufana wabo mu gihe bakinnye.

Uyu muganda Police FC yakoreye mu mudugudu wa Inyange wibanze ku gutema ibihuru byari bibangamiye abaturage.

Iyi nama yabereye muri imwe muri Hoteli ziherereye mu Murenge wa Kimihurura mu Karere ka Gasabo, yateguwe n’ikigo cy’igihugu gishinzwe iterambere(RDB) ku bufatanye na Polisi y’u Rwanda.

Umuvugizi wa Polisi y’u Rwanda yabwiye abitabiriye inama ko uruhare rwabo mu kubungabunga umutekano wo mu muhanda ari ngombwa kandi rukenewe kugira ngo impanuka zihitana abantu kubera gutwara banyoye ibisindisha birenze igipimo cyagenwe zikumirwe.

Yabwiye ba nyiri amahoteli, utubari, utubyiniro n’amacumbi ko ubukangurambaga bwa Gerayo Amahoro butareba Polisi yonyine abagaragariza ko iyo umukiriya wabo atashye agatwara imodoka yanyoye inzoga ziregenje ibipimo agakora impanuka bashobora kumubura ndetse n’amafaranga yabazaniraga ntibongere kuyabona.

Yagize ati: “Ntabwo bikwiye ko ari Polisi yahora ibakangurira kubungabunga ubuzima bw’abakiriya banyu, namwe mukwiye kumva ko ari inshingano zanyu, mukabafasha kugera iyo bajya amahoro. Mukabibutsa ko gutwara ikinyabiziga wanyoye inzoga zirenze igipimo cyagenwe cya 0.08 bya Alukolo bitemewe kandi ko bihanirwa n’amategeko, ikindi kandi mukirinda gukomeza kumuha izindi nzoga mu gihe mubona yasinze.”

CP Kabera yakomeje ababwira ko bakwiye gushyira ibyapa aho bakorera byibutsa abakiriya babagana ko bibujijwe gutwara ikinyabiziga wanyoye ibisindisha birenze igipimo cyagenwe. Yanagarutse kandi no ku bajyana abana mu tubari cyangwa mu macumbi, amahoteri n’ahandi, kimwe n’ababaha inzoga, abibutsa ko bihanwa n’amategeko. Aba bacuruzi bibukijwe ko bagomba kwirinda urusaku rubangamira abandi.

Umuyobozi w’ishami rishinzwe ubukerarugendo mu kigo cy’igihugu gishinzwe iterambere(RDB), Kariza Belise yasabye banyiri amahoteri, utubari, amacumbi n’utubyiniro kumva ko umutekano w’ababagana ubareba mbere y’undi muntu uwo ari we wese.

Yagize ati: “Polisi ishinzwe kubahiriza no gushyira mu bikorwa amategeko yashyizweho na Leta, ikanafasha Abanyarwanda kwidagadura mu mudendezo no kubarindira umutekano wabo n’ibyabo ntabwo ikwiye kubibutsa buri gihe ko mukwiye kubwira ababagana ko gutwara ikinyabiziga wanyoye ibisindisha bitemewe kuko bitwara ubuzima bw’abantu abandi bikabasigira ubumuga.”

Umuyobozi w’ishyirahamwe ry’abafite amahoteli mu Rwanda, Nsengiyumva Barakabuye yavuze ko gucuruza bigendana n’umutekano, asezeranya ko we na bagenzi be bagiye gushakira hamwe igisubizo kirambye impanuka zo mu muhanda cyane cyane izikomoka ku businzi zigakumirwa.

Yagize ati: “Ducuruza ari uko hari umutekano, ni yo mpamvu tugiye gukora uko dushoboye natwe tukagira uruhare mu gukumira impanuka ziterwa no gutwara umuntu yanyoye ibisindisha birenze igipimo.”

Iyi nama ihuza Polisi y’u Rwanda n’abantu bafite ubucuruzi bw’inzoga mu tubari, amaresitora n’amahoteri yari icyiciro cya gatatu kuko hari izindi nama zabanjirije iyabaye uyu munsi. Iyi yari yitabiriwe n’abantu bagera kuri mirongo itanu (50).

Umuyobozi mukuru wungirije muri Polisi y’ u Rwanda ushinzwe abakozi n’imiyoborere DIGP/AP Juvenal Marizamunda afatanyije na Perezida w’ishyirahamwe ry’umupira w’amaguru mu Rwanda rtd Brig Gen Jean Damascene Sekamana ni bo batangije ku mugaragaro ubu bukangurambaga.

Mbere y’uko umukino nyirizina utangira, Stade Amahoro yari itatsemo ibyapa bya Polisi y’u Rwanda biriho ubutumwa bukangurira abantu kwirinda no kurwanya impanuka zo mu muhanda. Hari ubutumwa bwabwiraga abantu kwirinda gutwara ibinyabiziga banyoye ibisindisha, kubahiriza umuvuduko wagenwe no kubahiriza uburenganzira bw’abanyamaguru. Hari kandi ubutumwa bukangurira abantu kwirinda kuvugira kuri telefoni igihe batwaye ibinyabiziga ndetse hari n’umunyamakuru wagendaga atambutsa ubutumwa bukangurira abantu kwirinda ikintu cyose cyateza impanuka zo mu muhanda.

Umukino ugitangira abayobozi b’abakinnyi (Capitains) ku ruhande rwa Gasogi United na Rayon Sports binjiye mu kibuga bafite icyapa kiriho ubutumwa bukangurira Abanyarwanda guharanira kugera iyo bajya amahoro (#Gerayo Amahoro). Ba kapitene kandi banasomye ubutumwa bukangurira Abanyarwanda kurwanya impanuka.

Eric Rutanga, kapiteni w’ikipe ya Rayon Sport, ubutumwa bwe bwagiraga buti: “Irinde gucomokora akagabanyamuvuduko, mugenzi gira uruhare mu gutanga amakuru igihe hari umushoferi ubona atwaye ikinyabiziga nabi, mureke twubahe amategeko n’amabwiriza y’umuhanda mu rwego rwo kwirinda impanuka zo mu muhanda zica zikanakomeretsa abantu.”

Ni mu gihe kapiteni wungirije mu ikipe ya Gasogi United witwa Nshimiyimana Maurice, ubutumwa bwe bwagiraga buti: “Munyamaguru gendera mu kuboko kw’ibumoso bw’umuhanda aho ugenda ureba ikinyabiziga kiguturutse imbere. Irinde kwambuka umuhanda uvugira kuri telefoni cyangwa ufite utwuma wumvisha radiyo, ambara ingofero zabugenewe igihe cyose ugendera kuri Moto. Gerayo Amahoro”.

Umukino ukirangira habaye ikiganiro n’abanyamakuru aho umuvugizi wa Polisi y’u Rwanda Commissioner of Police (CP) John Bosco Kabera yavuze ko iki gikorwa cy’ubufatanye n’ishyirahamwe nyarwanda ry’umupira w’amaguru(FERWAFA) mu bukangurambaga bwa Gerayo Amahoro ari indi ntambwe itewe mu kwegera umubare munini w’abantu bakoresha umuhanda.

Yagize ati: “Umupira w’amaguru ukundwa kandi ugashyigikirwa n’abantu benshi kandi bakoresha umuhanda cyane nk’abagenzi, abashoferi ndetse n’abanyamaguru. Abakinnyi na bo ni uko bakoresha umuhanda. Ubu bufatanye na FERWAFA ni intambwe nziza itewe izadufasha kugera ku bantu benshi tukabigisha umutekano wo muhanda n’uko ukoreshwa.”

Yakomeje avuga ko Polisi y’u Rwanda ishaka ko abakinnyi n’abafana babo bazajya bagera iyo bajya amahoro dore ko akenshi iyo amakipe yabo yatsinze usanga bidagadura cyane bikaba byabaviramo gukora impanuka.

Ati: “Ntabwo tubuza abantu kwidagadura ariko niba wanyoye ibisindisha wiba ikibazo cy’umutekano ku bandi bakoresha umuhanda. Shaka ubundi buryo bwatuma ugera iwawe amahoro ndetse n’ikinyabiziga cyawe nta kibazo cyagize.”

Umunyamabanga mukuru wa FERWAFA Uwayezu Regis yavuze ko nka federasiyo y’umupira w’amaguru bishimiye ubufatanye na Polisi y’u Rwanda mu bukangurambaga bwo kurwanya impanuka zo mu muhanda.

Yagize ati: “N’ubusanzwe Polisi y’u Rwanda ni umufatanyabikorwa wacu wa mbere kuko umutekano ni inkingi ya mwamba ahabera umupira w’amaguru hose. Twishimiye kuba tugejeje ku yindi ntera ubu bufatanye bugamije gutuma abakunzi b’amakipe babasha kujya bagera iyo bajya amahoro igihe baherekeje amakipe yabo ndetse n’umutekano w’Abanyarwanda muri rusange.”

Yongeho ko binyuze muri ubu bufatanye, ahantu hose ku bibuga bizajya biberaho umukino wa shampiyona y’uyu mwaka hazajya hatambuka ubutumwa bukangurira abantu kubungabunga umutekano wo mu muhanda.

Ubu bukangurambaga bwa Gerayo Amahoro burimo kwibanda mu bafana b’abakipe, buje gushimangira gahunda ya Polisi y’u Rwanda yatangiye muri Gicurasi tariki ya 13 uyu mwaka ubwo hatangizwaga ku mugaragaro ubukangurambaga bwiswe Gerayo Amahoro.

Impanuka zibera mu mihanda akenshi usanga ziterwa n’uburangare bw’abakoresha umuhanda, nyamara 90 ku ijana yazo zishobora kwirindwa, byose bisaba ko abantu bahindura imyumvire ku mikoreshereze y’umuhanda bakubahiriza amategeko awugenga.

Gerayo Amahoro yakomereje mu nsengero

Ubwo yaganirizaga abakirisito b’iri torero, umuvugizi wa Polisi y’u Rwanda mu mujyi wa Kigali Chief Inspector of Police (CIP) Marie Gorette Umutesi, yibukije aba bakirisito ko nk’abantu bakoresha umuhanda mu buryo butandukanye nko gutwara ibinyabiziga, ndtese n’abawugendamo n’amaguru, bafite uruhare mu gushimangira umutekano wawo.

Yagize ati “Buri gihe mujye mugira amacyenga igihe murimo gukoresha umuhanda, waba uri umushoferi cyangwa umunyamaguru, ugomba kumenya kubahiriza amategeko y’umuhanda kandi ukawugendamo neza mu rwego rwo kwirinda impanuka”.

Yakomeje abakangurira kujya bagendera mu gice cy’ibumoso bw’umuhanda, aho ikinyabiziga kibaturuka imbere bakireba.

Yagize ati “Igihe murimo kugenda mu muhanda, mujye mugendera ku ruhande rw’ibumoso aho ibinyabiziga bibaturuka imbere mubireba, mwirinde gukoresha telefoni igihe murimo kwambuka umuhanda”.

CIP Umutesi akomeza avuga ko ikigamijwe ari uko abantu bahindura imyitwarire igihe barimo gukoresha umuhanda, akanasaba abakirisitu ko ibyo bakangurirwa babishyiramo imbaraga bakarengera ubuzima barwanya impanuka zo mu muhanda.

Umuvugizi wa Polisi y’u Rwanda mu mujyi wa Kigali yabwiye abakirisito b’itorero rya Restoration Church ko Polisi ihora ikangurira abantu guhindura imyumvire iganisha ku guteza impanuka zikomeye zihitana ubuzima bw’abantu, harimo gutwara basinze cyangwa banyoye ibindi bisindisha, umuvuduko ukabije ndetse no kwica amwe mu mategeko yo mu muhanda.

CIP Umutesi yasabye aba bakirisito kugenda bakaba intumwa kuri bagenzi babo, abavandimwe babo basize mu ngo ndetse n’umuryango Nyarwanda muri rusange.

Yagize ati “Abakirisito mugomba kwitwara neza, mukirinda ibibujijwe, umukirisito nanone afite inshingano zo kurwana ku buzima bw’abandi bantu.Muzigishe abaturanyi banyu, abana banyu, mbese mube abambasaderi ba Polisi y’u Rwanda mu kurinda ubuzima bw’Abaturarwanda”.

Abakirisito banaganirijwe ku kurwanya ibyaha by’ihohotera rishingiye ku gitsina, ihohotera rikorewa abana harimo kubaha inzoga no kubakoresha imirimo ivunanye.

Basabwe no gufatanya na Polisi bakajya bayiha amakuru mu kurwanya ibyo byaha.

Umuyobozi w’itorero rya resitoration Church, Intumwa Joshua Masusa, yashimiye Polisi y’u Rwanda ku mbaraga ikoresha mu kurwanya impanuka zo mu muhanda .

Yagize ati “Tugomba kubaha amategeko y’umuhanda, ubuzima bwacu burahenda, nitwubaha Imana tukubaha na Leta tuzaba abakirisito b’ukuri. Ariko ubu hari umwihariko wo kurinda ubuzima bw’inzirakarengane zihitanwa n’impanuka zo mu mihanda buri munsi”.

Ubukangurambaga bwa ‘Gerayo Amahoro’ bugamije guhindura imyitwarire n’imyumvire y’abakoresha umuhanda kugira ngo impanuka zihitana ubuzima bw’abantu zigabanuke.

Ibikorwa byaranzwe no gusibura inzira z’abanyamaguru

Ubu bukangurambaga bwa ‘Gerayo amahoro’ bumaze amezi abiri butangiye, bikaba biteganyijwe ko buzamara ibyumweru 52.

Gahunda yo kubungabunga ibikorwa remezo, yatangirijwe mu ntara y’Amajyaruguru mu karere ka Rulindo, aho abaturage bibukijwe ko ubu bukangurambaga ari ngombwa, ko buri wese akwiye kugira uruhare kugira ngo intego yo kwirindwa impanuka zo mu muhanda igerweho.

Umuyobozi w’intara y’Amajyaruguru Gatabazi Jean Marie Vianney ari kumwe n’umuyobozi wa Polisi muri iyi ntara Assistant Commissioner of Police (ACP) Jean Baptiste Ntaganira babwiye abaturage ko uku kwezi Polisi n’abafatanyabikorwa baguhariye kubungabunga ibikorwaremezo byo ku muhanda.

Gatabazi agira ati “Impanuka zo mu muhanda zitwara ubuzima bw’abantu benshi, niyo mpamvu Polisi y’u Rwanda yahisemo gutegura iki gikorwa kugira ngo buri muntu wese ukoresha umuhanda amenye uburyo ukoreshwa yubahiriza ibimenyetso biwugize kugira ngo impanuka zibashe kwirindwa no kugabanuka.”

ACP Ntaganira yavuze ko muri iki cyumweru cya munani (8) ubu bukangurambaga buzibanda mu gusibura inzira z’abanyamaguru hanaterwa ibyapa ku mihanda mu rwego rwo kurushaho kubungabunga umutekano wo mu muhanda.

Yakomeje avuga ko bidakwiye ko abantu bambukira ahariho hose kuko haba hari inzira zabugenewe zo kwambukiramo.

Ati “Uku kwezi dutangiye ni uko gusibura inzira z’abanyamaguru ndetse no gushyira ibyapa aho bitari. Izi nzira ziri mu mabara y’umweru n’umutuku kugira ngo umushoferi mu gihe ahageze ahabone hakiri kare abashe kumenya ko ageze ahantu hagenewe abanyamaguru agabanye umuvuduko."

Polisi kandi yibutsa abanyamaguru ko nubwo bemerewe kwambukira muri iyo mirongo, bitavuze ko bayinyuramo barangariye kuri telefoni cyangwa ngo bibagirwe kureba hirya no hino niba nta kinyabiziga cyabatanze kuyigeramo kimwe n’ibindi byateza impanuka.

Umupolisi yigisha abanyeshuri imikoreshereze y’umuhanda

Uretse mu ntara y’Amajyaruguru, mu mujyi wa Kigali iki gikorwa cyabereye mu bigo by’amashuri bya Camp Kigali, Ecole Primarie Ntwari na Ecole Primaire d’Application(EPA).

Umuyobozi ushinzwe ibikorwa mu ishami rya Polisi rishinzwe umutekano wo mu muhanda, Senior Superintendent (SSP) Emmanuel Manimba nawe yavuze ko ari byiza ko umunyamaguru amenya ko nawe afite uruhare mu kubahiriza amategeko y’umuhanda, yambukira ahabugenewe ndetse anabungabunga ibikorwa remezo biri mu muhanda.

Umuyobozi w’ikigo cya Camp Kigali Niyonsenga Jean de Dieu, yavuze ko ari byiza kubona Polisi y’u Rwanda yigisha abaturage uburyo bwo gukoresha umuhanda kugira ngo impanuka zirindwe.

Niyonsenga yavuze ko mu gufatanya na Polisi, ubu kuva mu mwaka wa mbere kugeza mu mwaka wa gatatu w’amashuri abanza, bigisha ibimenyetso byo mu muhanda ndetse n’ibyapa, bikaba bifasha abanyeshuri kugendera ahabugenewe kuko abana iyo babibonye bamenya icyo bisobanuye bityo bikabafasha kurinda no kwirinda impanuka.

Ibi bikorwa bikaba byatangiye kuri uyu wa 2 Nyakanga 2019, bitangirira mu mujyi wa Kigali no mu ntara y’Amajyaruguru bikazagera no mu gihugu hose.

Ubusanzwe bizwi ko nta munyamaguru ugira ikosa, gusa hari ibintu by’ingenzi umunyamaguru ukoresha umuhanda agomba kwitaho kugira ngo agere iyo ajya nta kimuhungabanyije.

Kugira ngo umunyamaguru abashe kugerayo amahoro, hari ibimenyetso byo mu muhanda agomba kubahiriza, nk’uko umupolisi wabahuguraga, ACP Murenzi Sebakondo yabibabwiraga.

Yagize ati “Icya mbere, hari inzira zabugenewe kugira ngo umunyamaguru yambukiremo, kandi nubwo haba harabugenewe, hari ibyo agomba kubahiriza kuko nko muri ‘feu rouge’ agomba kureba ko umutuku watse uhagarika imodoka akagenda nabwo atirukanka.”

Yakomeje avuga ko hari n’ahandi habugenewe hatari za ‘feux rouges’ ariko hafite ibimenyetso biyobora abanyamaguru aho yagize ati “Aho ngaho na ho, ni ho agomba kureba ati ‘ese nta modoka zambukiranya?’ Iyo zitambukiranya akaba yahageze, yatangiye kugenda, n’abanyabiziga na bo twarabigishije kandi no mu gitabo cy’amategeko y’umuhanda birimo. Iyo umunyamaguru yatangiye kugenda, ubwabo baribwiriza bagahagarara.”

Kwirinda ibyarangaza umunyamaguru ni kimwe mu byo ACP Murenzi Sebakondo yababuriye. Ati “Ikindi ni uko umunyamaguru akwiye kwirinda kwambuka ahabugenewe avugira kuri telefone cyangwa se yambaye twa tu ekuteri(écouteurs) twabo! Byamutera uburangare! Ni byinshi rero bakwiye kwirinda , kugira ngo badahura n’impanuka,kandi banyuze ahabugenewe.”

Harerimana Aphrodis, umwe mu banyamaguru bahabwaga ubwo bukangurambaga,yatanze icyifuzo ko hagenwa icyapa kibuza abanyamaguru gukora ayo makosa babwiwe.

Abamotari kimwe n’abatwara ibindi binyabiziga barasabwa kubahiriza uburenganzira bw’abanyamaguru

Ati “Nyuma y’ibyo mutubwiye,ndatekereje nti ahari uwashyiraho utwapa twanditse mu magambo n’iyo yaba make ariko atuburira, ku buryo n’iyo yaba nta muntu uhari wo kutuyobora, umuntu yabisoma akamenya uko yitwara cyane muri feux rouges.”

Uwitwa Gatera Guido we yavuze ko hari amwe mu makosa abanyamaguru bakora bayatewe n’abatwaye ibinyabiziga, asaba ko na bo babibabuza. Yasabye abashoferi n’abanyamaguru kandi kubahiriza ikoreshwa ry’umwanya urimo imirongo wagenewe abanyamaguru ubafasha kwambukiranya umuhanda(zebra crossing).

Ibi abihera ku kuba bamwe mu banyamaguru n’abatwaye ibinyabiziga batubahiriza uburyo uwo mwanya ugomba gukoreshwa. Ngo hari aho usanga nk’abanyamaguru bahuriramo bagatangira guhoberana ntibihute ngo bave mu nzira, cyangwa se ugasanga utwaye ikinyabiziga ageramo ntahagarare mu gihe nyamara hari abanyamaguru barimo kwambuka.

Iki gikorwa cy’ ubukangurambaga cyatangiye mu kwezi kwa gatanu, kikaba kizamara ibyumweru mirongo itanu na bibiri(52),ari na byo bingana n’umwaka . Ni igikorwa cyo kumenyesha abakoresha umuhanda ibyo bagomba kwirinda kugira ngo impanuka zitabatwara ubuzima, cyangwa se ngo zibakomeretse.

Abayobozi bari bitabiriye iki gikorwa bagaragarije abatwara ibinyabiziga n’abagenzi ubutumwa bugamije kwirinda impanuka

Muri iki gikorwa cyabereye muri gare ya Huye, abatwara ibinyabiziga bashishikarijwe kwirinda uburangare igihe batwaye, bakirinda gutwara basinze, bakirinda n’umuvuduko ukabije. Abatwara imodoka bo banibukijwe kwirinda gucokoza akuma kabibutsa kutarenza umuvuduko (Speed Governor).

Abagenzi na bo basabwe kwirinda imyitwarire yateza impanuka nko gusakuriza abashoferi, bakambara umukandara igihe bari mu modoka. Abagenzi bibukijwe kandi ko bashobora guhamagara polisi cyangwa RURA igihe babona nta mutekano bizeye.

Guverineri w’Intara y’Amajyepfo, CG Emmanuel Gasana, wari waje gutangiza ubu bukangurambaga, yibukije ko abagenzi bakenera ibinyabiziga ari benshi, bityo bakaba bakwiye kubungabungirwa umutekano.

Yagize ati “Mu Mujyi wa Huye honyine, abagenzi bakenera imodoka, moto cyangwa amagare, barenga ibihumbi 30 kugira ngo bagere aho bagera. Iyo serivise turayikeneye, ariko na none hakenewe ko twumva ko dufite umutekano.”

Guverineri w’Intara y’amajyepfo hamwe n’abandi bayobozi bari kumwe bashyize ku binyabiziga ubutumwa bushishikariza ababitwara kwirinda impanuka

Umuyobozi wa Polisi mu Ntara y’Amajyepfo, ACP Claude Kajeguhakwa, we yibukije abari muri gare ya Huye, baba abatwara ibinyabiziga ndetse n’abagenzi ko ubu bukangurambaga bwatekerejweho nyuma yo kubona ko mu mwaka ushize wa 2018 hari abantu bagera kuri 400 bapfuye bazira impanuka mu Rwanda.

Mu Ntara y’Amajyepfo honyine, kuva mu kwezi kwa kabiri kugera mu kwa kane ko muri uyu mwaka wa 2019, hamaze kuba impanuka 203, zitwara ubuzima bw’abantu 35.

Ati “Ubukangurambaga bw’umutekano mu muhanda bwo mu gihe cy’icyumweru (police week), twagiye dukora bwagiye bugabanya impanuka ku rugero ruri hagati ya 35 na 40%. Twararebye dusanga habayeho ubukangurambaga bw’igihe cy’umwaka, ibyumweru 52, byanze bikunze tuzafasha Abanyarwanda.”

Abatwara ibinyabiziga bagejejweho ubu butumwa bavuze ko nubwo ibyo babwiwe basanzwe babizi, ari ingirakamaro kuko akenshi babirengaho.

Nsengiyumva w’umumotari avuga ko ubundi impanuka baziterwa no gukunda amafaranga bakibagirwa ko kutitonda byabakururira urupfu

Jean Marie Vianney Rutagengwa, umushoferi wa RITCO ati “Buriya kwigisha ni uguhozaho. Hari ukuntu umuntu agenda asa n’uhuga ho gake, ariko iyo habaye ubukangurambaga bituma n’ibyo umuntu yasaga nk’aho yirengagiza yongera kubitekerezaho, bityo akagira ibyo yirinda.”

Romuald Nsengiyumva ukora umurimo w’ubumotari avuga ko akenshi impanuka baziterwa no gukunda amafaranga, bakaba bakwambuka umuhanda batabanje kureba ko nta muntu cyangwa ikindi kinyabiziga bashobora kugonga.

Ati “Ibyo batubwiye tutabyitayeho natwe twaba tutikunda. Kuko iyo utwaye umugenzi neza ukamugezayo amahoro, arakwishyura, ugatunga umuryango. Ariko iyo muguye akazi kaba gahagaze mu gihe utazi.”

Ubu bukangurambaga bw’igihe cy’umwaka ngo ntibuzagarukira ku batwara ibinyabiziga cyangwa babigendamo, ahubwo buzagera no ku banyamaguru.

ACP Kajeguhakwa ati “Twebwe nka polisi y’igihugu, cyane cyane bakorera mu Ntara y’Amajyepfo, tuzegera abanyamaguru, tubambutse imihanda, tunabigishe amategeko: bambuka ryari, bahagarara ryari, bihuta ryari.”

Abatwara ibinyabiziga n’abagenzi bari muri gare ya Huye bagejejweho ubutumwa bujyanye n’ubukangurambaga ’Gerayo amahoro’

Abamotari na bo bari bahari

Abatwara abantu n’ibintu ku magare na bo bitabiriye kumva impanuro zo kwirinda impanuka

Ubukangurambaga bwatangijwe, buzamara umwaka wose

Agira ati “Abenshi usanga bagenda barangaye bibereye kuri za WhatsApp.”

Cyakora, Uwamahoro akavuga ko n’ubwo yabonaga ko iyo myitwarire yabateza impanuka, ari we ari n’abandi bagenzi bari muri iyo modoka nta n’umwe wigeze akebura uwo mushoferi.

Guhera kuri uyu wa 13 Gicurasi 2019, buri mushoferi utwaye abagenzi mu buryo bwa rusange arasabwa kujya abanza gusobanurira abagenzi ko bamufiteho uburenganzira, akanabasobanurira ibyo abujijwe ndetse na bo akabasobanurira ibyo bemerewe n’ibyo babujijwe.

Ibi biri mu gahunda ya “Gerayo amahoro”, ubukangurambaga bw’ibyumweru 52 (umwaka wose) Polisi y’Igihugu, Ishami rishinzwe Umutekano wo mu Muhanda, n’abafatanyabikorwa bayo barangajwe imbere na Minisiteri y’Ibikorwaremezo, batangije none bugamije kugabanya impanuka zo mu muhanda ku kigero nibura cya 30%.

Umunyamabanga wa Leta muri Minisiteri y’Ibikorwaremezo (MININFRA) ushinzwe ubwikorezi, Ing. Jean de Dieu Uwihanganye, akaba asaba abagenda mu binyabiziga bitwara abantu mu buryo bwa rusange, gufata iya mbere mu kwirindira umutekano wo mu muhanda biyama imyitwarire yabateza impanuka, ariko na bo bakitwararika ibyo basabwa.

Umunyamabanga wa Leta muri Minisiteri y’Ibikorwaremezo (MININFRA) ushinzwe ubwikorezi, Ing. Jean de Dieu Uwihanganye

Muri Gare ya Nyabugogo, aganiriza abagenzi bari bari mu modoka ya Ritco bari berekeje i Nyamagabe, Minisitiri Uwihanganye yagize ati “Niba umushoferi atangiye kuvugira kuri terefone ntimukagire mutya ngo umwe namubuza kuvugira kuri terefone ngo muvuge ngo arashyanuka.”

Ibi Uwihanganye yabivugiraga ko, ngo yigeze kubona imodoka igendera ku muvuduko munini arayihagarika agiye gukuramo umushoferi abagenzi batangira kumubwira ko bihuta.

Agira ati “Icy’ingenzi ni uko mukwiye kumenya ko mugomba kugera iyo mujya amahoro. Muri ababyeyi, muri urubyiruko, imiryango irabakeneye ntabwo mukwiye gutakariza ubuzima mu mpanuka. Turifuza ko rero mugira uruhare mu mutekano wo mu muhanda.”

Yakomeje agira ati “Niba uri kuri moto, niba uri mu mudoka, nawe ufite uruhare mu gutuma ugerayo amahoro,…umushoferi utwaye na we turamukeneye nk’Umunyarwanda, niyumve ko ashaka kugerayo amahoro ariko igikomeye cya gatatu ni ukugira ngo umurinzi w’umutekano mu muhanda abanze abe umuntu utwawe.”

Umuyobozi wa Polisi wungirije DCG Juvenal Marizamunda

Muri ubwo bukangurambaga, buri modoka itwara abagenzi mu buryo rusange yashyizwemo ijwi umushoferi agomba gushyiriramo abagenzi mbere yo guhaguruka kugira ngo bumve uburenganzira bamufiteho, kandi na bo bumve inshingano zabo mu kwirinda impanuka ngo bagere iyo bajya amahoro.

Mu butumwa buri muri iryo jwi, abagenzi basabwa kwirinda kunywera itabi mu mudoka, kwicarana ku ntebe imwe ari babiri, kujugunya mu modoka ibisigazwa by’ibiribwa bibangamira abagenzi, kwicarana n’imizigo ibabangamira, gukorakoranaho bibangamiye umwe mu bagenzi n’izindi ngeso mbi zabangamira abandi bari mu kinyabiziga.

Naho umushoferi we, ubwo butumwa bumubuza kwishyuza amafaranga y’urugendo hadakoreshejwe ikarita yabugenewe, gukoresha terefone atwaye, gutwara yanyweye ibisindisha, kurenza umuvuduko wateganyijwe, kwirengangiza kwambara umukandara w’imodoka no gukubaganya akagabanya muvuduko.

Umushoferi kandi, abujijwe guhagarara ahatemewe agashyiramo abagenzi no gushyiramo imiziki isakuza ku buryo ibangamira abagenzi, ndetse iryo jwi rikanaha abagenzi numero bahamagaraho mu gihe ibyo byose bitubahirijwe kugira ngo Polisi n’izindi nzego zibishinzwe zibatabare.

Umuvugizi wa Polisi y’u Rwanda, CP John Bosco Kabera, avuga ko kuba umushoferi azajya abanza kubwira abagenzi ibyo abujijwe n’ibyo na bo babujijwe mbere yo guhaguruka ari igihango kizajya gituma bagenda neza bakagera iyo bajya amahoro.

CP Kabera ati “Turumva ari nk’igihango baba basinye kuko iyo ubabwiye ibyo bemerewe, na bo ukababwira ibyo babujijwe n’ibyo bemerewe byumvikana ko ari ubwumvikana ku buryo iyo umwe arenze ku nshingano ze undi ashobora kumukebura cyangwa akaba yabibwira inzego zibishinzwe.”

Abagenzi nabo biteguye kugira uruhare muri ubu bukangurambaga

Imibare ya Polisi y’Igihugu igaragaza ko kuva uyu mwaka watangira abantu babarirwa mu 180 bamaze guhitanwa n’impanuka zo mu muhanda, mu gihe umwaka ushize abarenga 400 na bo bahitanwe n’impanuka zo mu muhanda.

CP Kabera akaba avuga ko nta gushidikanya ubukangurambaga “Gerayo amahoro” buzatuma impanuka zo mu muhanda zigabanuka kuko ngo byagaragaye ko ubukangurambaga bwo kwirinda impanuka bajyaga bakora icyumwe kimwe buri mwaka bwasigaga impanuka zo mu muhanda zigabanutse ku kigero cya 46%.

Bishop Kehangire, Umunyamabanga Nshingwabikorwa wa RFTC (kimwe mu bigo bitwara abagenzi), avuga uruhare runini mu kwirinda no kurinda abandi impanuka ari umushoferi, bityo umushoferi wabo uzarenga ku mabwiriza bahabwa muri ubwo bukangurambaga azajya abiryozwa.

Abatwara ibinyabiziga nabo bazagira uruhare runini muri ubu bukangurambaga buzamara umwaka

Agira ati “Niba abujijwe kuvugira kuri telefone ni kimwe mu biteza impanuka, niba abujijwe kurenza umuvuduko ni kimwe mu biteza impanuka, niba abujijwe kugenda nabi ni kimwe mu bitera impanuka, tukumva rero ko umushoferi niyumva ko ari we shingiro ry’ibikorwa byose bituma tugabanya impanuka, impanuka zizagabanuka.”

Ubu bukangurambaga buzamara ibyumweru 52 (umwaka wose) ku rwego rw’igihugu bwatangirijwe muri Gare yo mu Mujyi izwi nka “Downtown” bukomereza muri Gare ya Nyabugogo aho Minisitiri Uwihanganye n’abayobozi ba Polisi y’Igihugu binjiraga mu modoka bagasobanurira abagenzi n’abayobozizi b’ibinyabiziga uko bagomba kwitwara ngo birinde impanuka.

Ubwo bukangurambaga ’Gerayo amahoro’ buzamara umwaka bukaba bwitezweho kugabanya impanuka ho 30%.

Mu izina ry’abamotari, Théoneste Ndungutse, yasabye bagenzi be bakoresha umuhanda batwara ibinyabiziga gufata ingamba ebyiri z’ingenzi zirimo kwirinda impanuka ziterwa n’ibinyabiziga batwara no kwirinda ruswa.

Yagize ati "Nk’iyo uha umupolisi ruswa ni uko hari ikosa uba wishinja. Iyo ugiye gukoresha controle technique ugatanga ruswa ni uko uzi ikibazo ikinyabiziga cyawe kiba gifite kandi gishobora guteza impanuka yahitana abantu."

Umuyobozi wa Polisi Wungirije ushinzwe Ibikorwa bya Polisi, CP Felix Namuhoranye, yavuze ko muri 2018, mu Rwanda impanuka zahitanye abantu 465 zikomeretsa 654 mu gihe impanuka zo mu muhanda ku isi zahitanye abasaga miliyoni.

CP Namuhoranye na we yavuze ko mu biza ku isonga mu guteza impanuka harimo ruswa, yaba ihabwa abapolisi ku muhanda no muri controle technique.

Ati "Ruswa uhawe ugatanga icyangombwa ku kinyabiziga kitujuje ubuziranenge iteza impanuka zihitana ubuzima bw’abantu."

CP Felix Namuhoranye

Mu ngamba yavuze harimo kongera imbaraga mu mutekano wo mu muhanda na camera zigenzura imikoreshereze y’umuhanda.

Ati "Bizadufasha kugabanya impanuka n’ubwo namwe iryo koranabuhanga rizabafasha mu zindi serivisi."

CP Namuhoranye yavuze ko bagiye kongera amahugurwa mu bakoresha imihanda, kongera imihanda aho ari mito ariko by’umwihariko hakabaho ingamba zo kurandura ruswa.

Yavuze kandi ko mu mwaka ushize abapolisi 77 bo mu ishami ryo mu muhanda birukanywe bazira ruswa, mu gihe abakoresha ibinyabiziga 160 na bo batawe muri yombi bafatiwe mu cyuho baha abapolisi bo mu muhanda ruswa.

Ati "Impanuka ibaye ihitana ubuzima bwawe wowe utwaye ikinyabiziga, ihitana ubuzima bw’uwo utwaye, cyangwa igahitana ubuzima bw’uwo mufitanye isano."

CP Namuhoranye yavuze ko kubera ko bagenzuye bagasanga icyumweru kimwe cy’ubukangurambaga bw’umutekano wo mu muhanda bugabanya impanuka hejuru ya 40%, biyemeje gutangira ubukangurambaga bw’ibyumweru 52 (umwaka wose) kugira ngo bashobore kurangiza ikibazo cy’impanuka zo mu muhanda.

Iki cyumweru Mpuzamahanga cyo kuzirikana umutekano wo mu muhanda gifite insanganyamatsiko igira iti "Ubuyobozi bwimakaza umutekano wo mu muhanda."

Jean de Dieu Uwihanganye ushinzwe ubwikorezi muri MININFRA

Umunyamabanga wa Leta muri Minisiteri y’Ibikorwa remezo (MININFRA) ushinzwe ubwikorezi, Jean de Dieu Uwihanganye, yavuze ko mu Rwanda hafi umuntu umwe ku munsi ahitanwa n’umpanuka abagera hafi muri bane ku munsi bakamugazwa n’impanuka.

Ati "80% by’impanuka mu Rwanda ziterwa n’imyitwarirere y’abatwara ibinyabiziga."

Minisitiri Uwihanganye yavugaga ko akenshi biterwa n’ibinyabiziga bifite ibibazo, abatubahiriza amategeko yo mu muhanda, kurenza umubare w’abo batwaye, n’ibindi.

Yavuze ko ibyumweru 52 biyemeje by’ubukangurambaga bw’umutekano wo mu muhanda byazarangira bugeze ku ntego yo kugabanya impanuka zo mu muhanda ku kigero cya 30% nibura.

Ati "Turabasaba ubufatanye kugira ngo tuzagabanye impanuka zo mu muhanda ku kigero cya 30% uyu mwaka."

Icyegeranyo cya OMS cyo muri 2015 kigaragaza ko buri mwaka ku isi ababarirwa muri miliyoni imwe n’ibihumbi 200 buri mwaka bahitanwa n’impanuka mu gihe ababarirwa muri 50 bazikomerekeramo.

Mu myitwarire iteza impanuka Minisitiri Uwihanganye yavuze harimo kutubahariza inzira z’abanyamaguru, no kunyuranaho kw’ibinyabiziga nta gushishoza.

Yavuze ariko ko imyitwarire y’abanyamaguru na yo iri mu mpamvu biyemeje ubukangurambaga bw’ibyumweru 52.

Ubukangurambaga bwitabiriwe n’abatwara ibinyabiziga biganjemo abamotari