Ni isiganwa ritanga akazi kenshi kandi gatandukanye cyane cyane nk’aho usanga abafatanyabikorwa baryo batanga akazi ku bakobwa b’uburanga bamamaza ibikorwa by’abo bafatanyabikorwa muri Tour du Rwanda cyangwa bagakora muri serivisi no kwakira ababagana.

Abanyamakuru ba Kigali Today bafotoye abasiganwaga ariko baterera n’akajisho mu mpande z’umuhanda kuri abo bakobwa bari hafi aho na bo, dore ko bagize uruhare mu migendekere myiza y’isiganwa.

Amafoto: Plaisir Muzogeye

Aba basore bakora akazi ko gutwara abantu ku magare bavuga ko bumva bifitemo impano zo gusiganwa ku magare ariko bakabura amikoro

Bamwe ngo baricaye babuze icyo bakora, abandi ngo bagannye umwuga w’ubunyonzi kandi ngo ibyo bakora bitari mu nzozi zabo ahubwo ngo biyumvamo ubuhanga bwo gusiganwa ku magare.

Abaganiriye na Kigali Today tariki 27 Gashyantare 2020, ubwo bari mu Mujyi wa Musanze bitegura kwakira bagenzi babo bari mu isiganwa ry’amagare agace ka Rubavu-Musanze, bavuga ko bababazwa no kuba batabona amahirwe yo kugaragaza ibyo bazi mu gutwara igare.

Abenshi muri abo ngo iyo babonye ubatiza igare bakora imyitozo, abandi ngo bahisemo gukora umwuga w’ubunyonzi kugira ngo babone ikibatunga, nyuma y’uko ngo babuze amikoro yabafasha kujya mu mwuga wo gusiganwa ku magare.

Bavuga ko baramutse bagize amahirwe yo gufashwa, ngo abanyamahanga batakabaye bikubira ibihembo byinshi muri Tour du Rwanda, kuko biri muri bimwe mu bikomeje kubababaza.

Umwe muri bo witwa Ngabo Manzi Aloys yagize ati “Nakomeje gukurikirana iri rushanwa ariko ikiri kumbabaza ni uko mfite ubumenyi n’ubuhanga bwo kuba nahagararira igihugu mu mikino y’amagare kandi nkitwara neza, ariko ikibazo ni amikoro.

Akomeza agira ati “Nakuze ndi umwana ukunda gutwara igare, ariko ubushobozi bwanjye bwagarukiye kuri iri gare rya Pine baro niguriye, ni na ryo nitorezaho. Mbonye inkunga y’igare, ndizera ko nahagararira igihugu kandi nkabasha kugihesha ishema”.

Mugenzi we witwa Maniranzi Emmanuel wo mu Karere ka Nyabihu ati “Muri aka gace ni ho havuka impano nyinshi, navuga nka Munyaneza na Mugisha, nakuze nigana ibyo bakora ngerageza kwigurira igare rya Pine baro nshya, ariko ntaho ryangeza. Nabuze ubushobozi bw’igare rizima ngo nerekane ubuhanga mfite. Ndabizi bariya basore baduhagarariye ni abahanga ariko nabarusha”.

Urwo rubyiruko ruremeza ko rutajya ruhabwa amahirwe ngo rwerekane impano rufite. Ibyo bigatuma bihitiramo kugana iy’ubunyonzi ngo babone uko babaho, ariko bagasaba ko impano zabo zidakwiye gupfukiranwa.

Munyemana Fabrice ati “Nkora akazi k’ubunyonzi ni ugucungana n’icyo giceri cy’ijana ngo ndebe ko nabaho. Nabuze amikoro, nakagombye kuba ndi muri ariya masiganwa. Birambabaza cyane, abanyamahanga baragenda badutwara etape umutima ukandya. Uwantera inkunga nkabona igare, njye ndabizi neza ko mpfanye impano ikomeye, ndashaka guhesha igihugu cyanjye ishema ariko ubushobozi bwarabuze”.

Urwo rubyiruko rurasaba Leta ubufasha, byaba na ngombwa bakajya bashyiraho amarushanwa yo gushakisha impano zo gutwara amagare.

Mu gihe urwo rubyiruko rukomeje kugaragaza imbogamizi zo kubura amikoro n’aho bagaragariza impano zabo, ari na byo ngo bikomeje gutuma impano zabo zipfa ubusa, barasabwa kujya bitabira amarushanwa abera mu turere twose tw’igihugu yo gushaka impano mu gutwara amagare nk’uko bivugwa na Rouben Habarurema, Umuyobozi w’ikigo gitoza abakinnyi b’ikipe y’igihugu (Africa Rising Cycling Center) giherereye mu Karere ka Musanze.

Rouben Habarurema, Umuyobozi wa Africa Rising Cycling Center ya Musanze

Yagize ati “Kugaragaza impano bikorwa n’ama clubs yo mu turere mu rwego rwa Talent detection, kandi mu turere twose ayo marushanwa yo gutoranya abafite impano agerayo, twabasaba kujya bitabira amarushanwa ategurwa yo gushaka impano mu turere bavukamo.”

Yakomeje agira ati “Abana batsinda ayo majonjora baza hano muri iki kigo, hari imashini tubanyuzamo mu kureba ubushobozi bwabo. Nk’ubu mu Rwanda hari ama clubs 11 ari gutorezwamo abana basaga 100 bagiye bagaragariza impano zabo mu marushanwa abera hirya no hino mu turere”.

Amwe mu ma Clubs yakira abana bitoza umukino w’amagare, harimo nka Les Amis Sportifs y’i Rwamagana, Benediction y’i Rubavu, Nyabihu Cycling team, CCA (Cycling Clubs for All) y’i Huye, Kayonza Cycling team, Fly Cycling team yo mu mujyi wa Kigali, Kigali Cycling team, Bugesera Women Cycling team, Muhanzi Cycling team n’andi.

Mu gufasha abana bitegura kuzajya mu marushanwa yo gusiganwa ku magare mu myaka iri imbere, icyo kigo cyatangije amahugurwa yo kwigisha abo bana ururimi rw’icyongereza, ahari guhugurwa abana 20.

Tariki ya 26 Gashyantare 2020 abatuye mu Mujyi wa Gisenyi no ku nkengero z’umuhanda winjira mu Mujyi wa Gisenyi bari benshi ku muhanda bategereje kureba irushanwa ry’amagare rizwi nka Tour du Rwanda.

Ni irushanwa ririmo abakinnyi baturuka mu Karere ka Rubavu, abaturage bo mu Karere ka Rubavu bakaba barashakaga kubereka ko babashyigikiye.

Umusaza witwa Nyamirambi uvuga ko afite imyaka ijana, kuva saa yine z’amanywa yari yicaye ku muhanda amagare anyuramo, avuga ko ategereje kwirebera abasore b’Abanyarwanda banyonga igare, akavuga ko ari amajyambere we yamusize.

Yagize ati "Ku gihe cyacu ibi ntibyabagaho, nubwo ndi umusaza, biranshimisha kubibona binyura mu maso."

Nyamirambi n’akabando ke, yananirwaga akajya mu rugo kunywa amazi akagaruka, ubundi akabaza abakiri bato kumubwira igihe gisigaye ngo basesekare mu mujyi wa Gisenyi.

Aho yari ahagaze si we wenyine kuko hari abandi baje gushyigikira abari mu irushanwa ry’amagare cyane cyane Abanyarwanda.

Nyamirambi ati "Rubavu ni umujyi w’amagare, twakundaga umupira ariko warabishye ntugikunzwe, ariko mu magare nta ruswa, mbese binyura mu kuri tukishima, amagare ntatubabariza imitima."

Umusore ukiri muto witwa Kageruka, aho yari ategereje amagare ku bitaro bya Gisenyi ngo arebe uko amagare yinjira mu mujyi yatangarije Kigali Today ko yahagaritse akazi kugira ngo abanze arebe uko amagare atambuka.

Agira ati ; "Ntabwo njya nsiba kureba irushanwa ry’igare ryaje mu Karere ka Rubavu, n’iyo mfite akazi nsaba uruhushya ariko nkayareba."

Kageruka avuga ko amagare iyo yaje mu Karere ka Rubavu bibasigira inyungu kuko uretse ibyishimo, ngo n’ubucuruzi buriyongera.

Ati "Nk’ubu urabona ko hari abantu benshi biyongereye mu mujyi, kandi uko baza ni ko bakenera serivisi zitandukanye zirimo kurya, kunywa no kuruhuka, abafite utubari barinjiza, abatwara abagenzi na bo barinjiza, ibi ni ibintu byiza ku batuye Umujyi wa Gisenyi."

Abandi baganiriye na Kigali Today bavuga ko Akarere ka Rubavu gafite ubunararibonye mu gukunda amagare kuko habarizwa ikipe ikina irushanwa ry’amagare yitwa Benediction, abaturage bakavuga bagomba kuza kuyishyigikira.

Bamwe mu bafite amahoteli mu Mujyi wa Gisenyi bavuga ko irushanwa ry’amagare risiga ribinjirije kuko abari mu irushanwa n’abariherekeza babarirwa mu magana bakenera aho kuruhukira, ibyo kurya no kunywa.

Kwakira irushanwa ry’amagare mu Mujyi wa Gisenyi bijyana no kwamamaza serivisi zitandukanye, abantu benshi bakaza kureba amagare no kureba serivisi zigezweho.

Mu irushanwa ry’amagare rya 2020 mu Mujyi wa Gisenyi habaye n’ibikorwa byo gupima ku buntu indwara y’umwijima no gutanga udukingirizo, aho kuva iyo serivisi yatangira mu gitondo, saa sita yari imaze gupima indwara y’umwijima abantu 200, benshi bakavuga ko ari amahirwe batari kubona iyo bataza kureba irushanwa ry’amagare.

Umunyamabanga mukuru w’ishyirahamwe ry’umukino w’amagare ku isi Amina Layana yakiriwe n’abayobozi b’ishyirahamwe ry’umukino w’amagare mu Rwanda hamwe na Guverineri w’Amajyaruguru

Ubwo yasuraga ikigo cy’igihugu gitorezwamo abakinnyi b’umukino w’amagare (Africa Rising Cycling Center) giherereye mu Karere ka Musanze ku itariki 28 Gashyantare 2020, yishimiye ubushobozi yasanganye icyo kigo, avuga ko ari igipimo cyiza cyo kwiga ku busabe bw’u Rwanda bwo kwakira irushanwa ry’isi ryo gusiganwa ku rwego rw’amagare.

Yagize ati “Nkuko byateganyijwe ko irushanwa ry’umukino w’amagare ku rwego rwisi rizakinirwa muri Afurika, uyu munsi dufite ubusabe bw’ibihugu bibiri, u Rwanda na Maroc.

Naje rero kugira ngo mbonane n’abantu bose barebwa n’iki kibazo, ariko kandi iri siganwa rizenguruka u Rwanda ndetse n’iki kigo cyigisha umukino w’amagare guteza imbere impano z’Abanyarwanda ndetse na Afurika muri rusange, ibi byombi ni igipimo cyo kwifashisha mu kwiga kuri iyi candidature(ubusabe) ”.

Umunyamabanga mukuru w’ishyirahamwe ry’umukino w’amagare ku isi Amina Layana na Murenzi Abdallah uyobora ishyirahamwe ry’umukino w’amagare mu Rwanda

Uwo muyobozi woherejwe na Perezida w’ishyirahamwe ry’umukino w’isiganwa ry’amagare ku isi, yakomeje kugaragaza icyizere cy’uko u Rwanda rufite amahirwe menshi yo kwakira iryo rushanwa nyuma yo kwishimira ibikorwa remezo yasanze mu Rwanda.

Agira ati “Ndizera ko mu mwaka wa 2025, abigira hano amagare bazaba bamaze kugera ku rugero rwiza. Nkigera ku kibuga cy’indege nashimishijwe no kwakirwa neza, urabona ko Abanyarwanda bashyira umutima ku cyo bakora, nashimishijwe kandi n’imihanda myiza nabonye mu gihugu”.

Murenzi Abdallah, Umuyobozi w’ishyirahamwe ry’umukino w’amagare mu Rwanda, avuga ko urugendo rw’Umunyamabanga mukuru w’ishyirahamwe ry’umukino w’amagare ku isi Amina Layana mu Rwanda, ari intambwe nziza itewe yo kuba u Rwanda rwakwakira iryo siganwa.

Umunyamabanga mukuru w’ishyirahamwe ry’umukino w’amagare ku isi Amina Layana mu biro bya Guverineri Gatabazi JMV

Yagize ati “Kuba rero yaza akagira icyo abona ku myiteguro y’aho tugeze n’uburyo Abanyarwanda bakunda igare, Abanyarwanda bafite ibikorwa byiza byatuma ayo masiganwa tuyakira, birongera amahirwe. Ni irindi jwi ryiyongera ku busabe bwacu mu kwakira iryo siganwa”.

Akomeza agira ati “Icyo twakwizeza Abanyarwanda n’abandi banyamahanga, ni uko kwakira iryo siganwa bitatunanira. Dufite ubwo bushobozi, dufite ubuyobozi bukuru bw’igihugu cyacu, ibyaba bibura cyangwa se ibyaba biteganywa byose bishobora kuboneka, ku buryo ayo mahirwe natwe tuyahawe twayabyaza umusaruro”.

Umuyobozi w’Intara y’Amajyaruguru, Gatabazi JMV, ubwo yari yakiriye uwo munyamabanga mukuru w’ishyirahamwe ry’umukino w’amagare ku isi, yamwijeje ubushobozi buhagije bw’u Rwanda bwo kwakira iryo rushanwa ku rwego rw’isi, anerekwa umuco uranga u Rwanda aho yatemberejwe mu kigo ndangamuco cyitwa Iby’iwacu giherereye mu kinigi yishimira urugwiro yakiranywe.

Muri Nzeri 2020, nibwo hazatangazwa igihugu kizakira iryo siganwa.

Amina Layana yeretswe ibikoresho binyuranye byifashishwa mu marushanwa y’amagare

Umunyamabanga mukuru w’ishyirahamwe ry’umukino w’amagare ku isi Amina Layana yatanze icyizere cy’uko u Rwanda rushobora kwakira umukino w’isiganwa ry’amagare ku rwego rw’isi

Yahawe impano zinyuranye

Yahawe ikimenyetso cy’urwibutso

Amina Layana na we yatanze impano

Amina Layana yishimiye ubushobozi yasanganye ikigo gihugura abakinnyi b’amagare

Yanditse mu gitabo cy’abashyitsi

RESTREPO VALENCIA Jhonatan yatanze abandi ku murongo w’umweru basorejeho i Muhanga

Ni isiganwa ryatangiye saa tatu zuzuye mu Mujyi wa Musanze, aho abakinnyi bahise bafata inzira ya Mukamira, bakata umuhanda wa Muhanga-Ngororero.

Isiganwa rigitangira abakinnyi bahise batangira gutoroka barimo Munyaneza Didier, Henttala wa Novo Nordisk na Hailemichael (Nippo Delko Marseille).

Nyuma igikundi cyaje kubashyikira, nyuma haza itsinda rishya ry’abakinnyi 8: Schelling (Israel), Diaz (Nippo), S.Mugisha (Rwanda), Munoz (Androni), Tesfazion (Erythrée), Restrepo (Androni), Ravanelli (Androni), Quintero (Terengganu), M.Mugisha (Skol), Mulueberhan (Erythrée) na Andemeskel (Israel), aho bari bashyizemo amasegonda 28.

Aba na bo ntibatinze imbere, kuko itsinda ririmo Mugisha Samuel na Quintero (Terengganu) na Schelling (Israel) bahise batangira kuyobora isiganwa kugera basatira Umujyi wa Muhanga aho bari basize abandi umunota urenga.

Mugisha Samuel wapfushije igare mu bilomtero bya nyuma ntiyabashije gukomezanya n’itsinda rya mbere, maze umunya-Colombia RESTREPO VALENCIA Jhonatan akora ibisa n’ibitangaza, dore ko ari we wari wegukanye agace ka gatanu ari na ko kaherukaga, kava i Rubavu kerekeza i Musanze, akaba yari yaranegukanye agace ka gatatu k’isiganwa kavaga i Huye mu Majyepfo kerekeza i Rusizi mu Burengerazuba.

Umunya-Eritrea Tesfazion Natnael akomeje kuza imbere ku rutonde rusange, akaba akurikiwe n’Umunyarwanda Mugisha Moise uri ku mwanya wa kabiri.

Mugisha Moise uyu munsi bava i Musanze baza i Muhanga yagaragaje gukora cyane kuko yagabanyije ibihe uwa mbere yamurushaga, akuraho umunota umwe n’amasegonda atatu hasigaramo umunota umwe n’amasegonda umunani nk’uko bigaragara kuri uru rutonde rusange.

Urutonde rw’uko bakurikiranye mu gace Musanze-Muhanga, ibihe bakoresheje (Ighe basizwe n’uwa mbere)

1 RESTREPO Jhonatan Androni Giocattoli - Sidermec, 3:09:32
2 SCHELLING Patrick Israel Start-Up Nation, 3:09:32
3 QUINTERO Carlos Terengganu Inc. TSG Cycling Team, 3:09:32
4 DÍAZ José Manuel NIPPO DELKO One Provence 1:27
5 GEBREMEDHIN Awet Israel Start-Up Nation ,,
6 RAVANELLI Simone Androni Giocattoli - Sidermec ,,
7 HAILEMICHAEL Mulu Kinfe NIPPO DELKO One Provence ,,
8 MUGISHA Moise SKOL Adrien Niyonshuti Academy 1:43
9 MAIN Kent ProTouch 1:45
10 SHTEIN Grigoriy Vino - Astana Motors 2:35
11 MANIZABAYO Eric Benediction Ignite XL 2:43
12 MUGISHA Samuel Rwanda ,,
13 ARERUYA Joseph Rwanda 2:45
14 MULUBRHAN Henok Eritrea 2:46
15 GHIRMAY HAILU Biniam NIPPO DELKO One Provence ,,
16 TESFATSION Natnael Eritrea ,,
17 HOLLER Nikodemus Bike Aid 3:20
18 HAILU Hailemelekot Ethiopia 6:01
19 MUÑOZ Daniel Androni Giocattoli - Sidermec 7:31
20 OVETT Freddy Israel Start-Up Nation 9:13

Urutonde rusange nyuma y’agace ka Gatandatu (Ibihe barushwa n’uwa mbere), imyanya abanyarwanda ndetse n’abafite amazina azwi bariho

1 TESFATSION Natnael Eritrea 3 20:31:59
2 MUGISHA Moise SKOL Adrien Niyonshuti Academy 1:08
3 QUINTERO Carlos Terengganu Inc. TSG Cycling Team 2:07
4 SCHELLING Patrick Israel Start-Up Nation 2:10
5 MAIN Kent ProTouch 2:21
6 RAVANELLI Simone Androni Giocattoli - Sidermec 2:32
7 RESTREPO Jhonatan Androni Giocattoli - Sidermec 2:48
8 ARERUYA Joseph Rwanda 3:52
9 GEBREMEDHIN Awet Israel Start-Up Nation 4:04
10 HAILEMICHAEL Mulu Kinfe NIPPO DELKO One Provence 4:26
11 GHIRMAY HAILU Biniam NIPPO DELKO One Provence 4:41
17 MUGISHA Samuel Rwanda 10:33
22 DEBESAY Mekseb Bike Aid 14:33
23 FEDOROV Yevgeniy Vino - Astana Motors 15:10
29 BYUKUSENGE Patrick Benediction Ignite XL 26:04
34 LAGAB Azzedine Groupement Sportif des Pétroliers 33:29
35 NSENGIYUMVA Shemu SKOL Adrien Niyonshuti Academy 34:39
36 MUNYANEZA Didier Benediction Ignite XL 35:27
42 GAHEMBA Barnabé Rwanda 40:54
43 HABIMANA Jean Eric SKOL Adrien Niyonshuti Academy 44:06
44 TAARAMÄE Rein Team Total Direct Energie 46:36
46 UWIZEYE Jean Claude Rwanda 52:20
55 HAKIZIMANA Seth SKOL Adrien Niyonshuti Academy 1:01:50
59 NSENGIMANA Jean Bosco Rwanda 1:07:55
60 ANTÓNIO Dário BAI - Sicasal - Petro de Luanda 1:19:33
61 BYIZA UHIRIWE Rnus Benediction Ignite XL 1:19:42
63 NZAFASHWANAYO Jean Claude Benediction Ignite XL 1:28:47
65 DUKUZUMURENYI Fidel SKOL Adrien Niyonshuti Academy 1:51:26

Amwe mu mafoto yaranze isiganwa

Nyuma y’isiganwa hakurikiraho gutanga ibihembo

Andi mafoto kuri aka gace kanda HANO

Kuri uyu wa Gatandatu isiganwa rirakomeza aho abasiganwa baza gusiganwa umuntu akina ku giti cye (Course contre la montre/Individual Time trial), isiganwa ribera mu bice bya Nyamirambo, abakinnyi bakajya bahaguruka EP Intwari-Tapis Rouge_Nyakabanda-Kwa Mutwe-Kuri 40, aho baza gukora intera ya Kilometero 4.5

Amafoto: Muzogeye Plaisir

RESTREPO VALENCIA Jhonatan ni we wegukanye agace ka Rubavu - Musanze

Abasiganwa bahagurutse i Rubavu saa tanu z’amanywa, berekeza i Musanze bahagera mu ma saa saba n’iminota 15.

Umunyarwanda Patrick Byukusenge yari yakomeje kuyobora isiganwa mu gace k’uyu munsi, hakaba nk’aho yasize uwitwa Buru Temesgen wari umuri hafi umunota n’amasegonda 25, agasiga igikundi iminota ibiri.

Icyakora abandi bakinnyi bakomeje kumusatira, ubwo hagati ye na bo hari hasigayemo amasegonda 30 mu bilometero 10 bya nyuma, baramushyikira banamucaho, birangira Restrepo Valencia abatanze gukandagira mu murongo w’umweru.

Abasiganwa kuri uyu wa kane tariki 27 Gashyantare 2020 bagendaga agace ka gatanu kareshya n’ibirometero 84,7 kakaba kari kagufi ugereranyije n’utundi duce bamaze kugenda.

Kugeza ubu nta munyarwanda uratwara agace na kamwe mu irushanwa ry’uyu mwaka. Ni mu gihe n’iry’umwaka ushize ryarangiye nta gace babashije gutwaramo.

Isiganwa rirakomeza ejo ku wa gatanu, aho abasiganwa baba bageze ku gace k’isiganwa ka gatandatu bakazava i Musanze berekeza i Muhanga, ahareshya na kilometero 127,3.

Irebere uko Restrepo Valencia yegukanye aka gace#TdRwanda pic.twitter.com/iV3ONKYamf

— Kigali Today (@kigalitoday) February 27, 2020

Amwe mu mafoto yaranze iri siganwa

Andi mafoto menshi kanda HANO

Amafoto: Muzogeye Plaisir

Ni agace kagaragaramo amashyamba kimeza ya Nyungwe, Mukura na Gishwati, icyayi, ikiyaga cya Kivu umuhanda mushya wa kaburimbo, n’imisozi itandukanye, byose hamwe bikaba biri mu byaryoheje amafoto yafatiwe muri iryo siganwa.

Dore amwe muri ayo mafoto yafashwe n’umunyamakuru wa Kigali Today, Plaisir Muzogeye.

Kureba andi mafoto menshi, y’aka gace ka Rusizi-Rubavu, kanda HANO

Amagare ubwo yavaga i Huye kuwa kabiri tariki ya 25 Gashyantare yerekeza i Rusizi. Kurara i Huye ku bayitabiriye byazaniye amafaranga abafite amacumbi n’uburiro

Ni na ko byagenze kuwa mbere tariki 24 Gashyantare 2020, ubwo abari mu marushanwa y’amagare bararaga muri aka Karere.

Dominique Ngoga, umucungamutungo wa Hoteli Boni Concilii, agira ati “Tugira ibyumba 98, kandi byose byaruzuye. Igihe amagare yaje hano i Butare, ni ukuri nta muntu ufite hotel urara ibyumba bituzuye. Kandi baba bakeneye n’izindi serivise nko gufungura. Kandi n’amafaranga baba bafite cash. Ntabwo baba bikopesha.”

Jean de Dieu Kamanzi, umucungamutungo w’ahacumbikira abagenzi bita kuri OASIS na we ati “Ibyumba byose kuwa mbere saa cyenda byari byashize, kandi ubusanzwe abakiriya bagenda baza umwe umwe, nijoro. Iyo amagare yaje tuba tubizi ko uwo munsi amafaranga ahari.”

Hasani Nsengimana, umucungamutungo wa Motel Gratia, na we avuga ko babonye abakiriya bakabyishimira, akanifuza ko ibikorwa bibazanira abakiriya byahoraho.

Ati “Ni uko wenda nyine badatinda, ariko uwajya ahora atuzanira ibirori bizana abantu benshi byarushaho kuba byiza. Ubundi iyo abanyeshuri ba kaminuza basezerewe (Graduation) n’amagare ni byo bikunze kutuzanira abakiriya tukanezerwa.”

Kimwe n’abandi banyehuye bafite inzu zicumbikira abagenzi zo ku rwego rudahanitse, yongeraho ko kugeza ubu imikino yabazaniye abakiliya bakanezerwa ari iyahuje ibigo by’amashuri yisumbuye yo muri Afurika y’i Burasirazuba, yabaye guhera tariki 16 kugeza ku ya 24/08/2015.

Kamanzi ati “Feassa ni yo ya mbere. Abantu bari bayitabiriye bari benshi cyane, kandi bamaze iminsi. ”

Icyakora, abacururiza mu isoko ndetse n’abatanga serivise z’ikoranabuhanga, urugero nko gucuruza amainite ya telefone, babikorera ahantu hitaruye aho amagare yanyuze, bo bavuga ko ahubwo gushungera amagare byatumye nta bakiriya babageraho.

Ni irushanwa rizabera mu mirenge ikora ku gishanga cy’Urugezi. Intera ya Kilometero 54 ni yo abasiganwa bazagenda kuri uwo munsi, aho bazahaguruka ku murenge wa Kivuye barekeze muri Santere ya Butaro bagaruke ku biro by’umurenge wa Bungwe.

Kigali Today yaganiriye n’Umuyobozi w’Akarere ka Burera wungirije ushinzwe imibereho myiza y’abaturage Manirafasha Jean de la Paix asobanura ibijyanye n’iri rushanwa, ati "Ni irushanwa ryateguwe mu rwego rwo gushaka impano z’abana bakiri bato mu mukino w’amagare dore ko hari gahunda yo gutangiza ikipe y’uyu mukino."

Umuyobozi w’Akarere ka Burera wungirije ushinzwe imibereho myiza y’abaturage, Manirafasha Jean de la Paix

Yakomeje avuga ko abashaka kwiyandikisha bakwegera ku biro by’akarere ku mukozi ushinzwe urubyiruko na Siporo ndetse no ku biro by’umurenge n’akagari bibegereye .

Iri rushanwa ryo gusiganwa ku magare i Burera ryabaye ku nshuro ya mbere umwaka ushize wa 2019 aho ryegukanywe na Shemaryabasore Alexis ukomoka mu Murenge wa Nemba.

Inzira y’umwaka ushize yari Kidaho- Butaro basoreza ku mupaka wa Cyanika.

Ntagisanimana Jeannine ni we mukobwa rukumbi wasiganwe umwaka ushize

Shemaryabasore Alexis yegukanye irushanwa umwaka ushize

Dore Amwe mu mafoto agaragaza uburyo iyi nzira itohagiye.

Biraryoshye gusiganirwa muri aya mahumbezi

Muri iyi nzira hagaragayemo abafana b’amagare b’ingeri zitandukanye

RESTREPO VALENCIA Jhonatan ni we wegukanye agace Huye-Rusizi

Ni isiganwa ryatangiye ku i Saa tatu n’igice, rihagurukira ku nzu mberabyombi y’Akarere ka Huye, aho abakinnyi 75 ari bo babashije gutangira isiganwa, kuko Edwin Avila wa Israel Start-up nation na Eyob Metkel wa Terengganu batabashije gusiganwa kubera uburwayi.

Isiganwa rigitangira ubwo abasiganwa barengaga mu Gahenerezo, Buru Temesgen yagerageje gusiga abandi ndetse anashyiramo intera y’amasegonda 50, gusa ntibyatinze kuko ku kilometero cya 18 abandi abakinnyi bari bamaze kumugarura.

Basatira akarere ka Nyamagabe, abakinnyi umunani bari bamaze gucika abandi, ari bo 8 Areruya Joseph (Rwanda), Samuel Mugisha (Rwanda), Yemane (Erythrée), Munyaneza Didier (Benediction), Buru Temesgen(Ethiopie), Debay (Ethiopie), Kruger (Pro Touch) na Jurado (Terengganu).

Aba bakinnyi banyuze mu bice byose bya Nyamagabe bayoboye isiganwa, baza no kwinjira mu ishyamba rya Nyungwe bakiri imbere y’abandi, aho ndetse kandi baje no gushyiramo ikinyuranyo cy’iminota itatu n’amasegonda 50.

Nyuma yo gusohoka ishyamba rya Nyungwe, abanyarwanda batangiye gusigara, isiganwa riza gusigara riyobowe na Schelling na Andemeskel ba Israel, Restrepo (Androni), Mulueberhan, Tesfazion et Yemane (Erythrée), Biniam Girmay Hailu et Mulu Kinfe Hailemichael (Nippo) ndetse na Quintero (Terengganu).

Mu birometero bya nyuma by’isiganwa bagana mu mujyi rwagati wa Rusizi aho isiganwa ryasorejwe, abakinnyi batatu barimo umunya-Colombia Restrepo ndetse n’umunya-Eritrea Hailu Biniam bahise bongera gucika abandi, baza kugera ku murongo bahanganye, ariko RESTREPO VALENCIA Jhonatan aza kuba ari wegukana aka gace, akoresheje amasaha atatu atatu, iminota 47 n’amasegonda 39.

Umunyarwanda waje imbere ni Areruya Joseph wasoje ku mwanya wa 16, akaba yakoresheje amasaha atatu, iminota 49 n’amasegonda 10, Mugisha Moise aza ku mwanya wa 18, naho Munyaneza Didier aza ku mwanya wa 20.

GHIRMAY Biniyam ubu ni we wahise ufata umwambaro w’umuhondo utangwa na Rwanda Tea

Kuri uyu wa Gatatu, haraba hakinwa agace ka kane k’iri siganwa, aho abasiganwa bahagaruka Saa mbili zuzuye berekeza i Rubavu, bakazakora urugendo rungana na Kilometero 206.3, ari narwo rugendo rusumba izindi zose muri Tour du Rwanda 2020.

.@tour_du_Rwanda : Uku niko Restrepo yageze ku murongo usoza irushanwa akoresheje 03h47’39” @cyclingrwanda @Ferwacy #TdRwanda pic.twitter.com/3E7Aqu5me9

— Kigali Today (@kigalitoday) February 25, 2020

Umurusiya Yevgeniy Fedorov wari wambaye umwenda w’umuhondo wambarwa n’uri ku mwanya wa mbere ku rutonde rusange na we yawutakaje, ufatwa n’umunya-Eritrea HAILU Biniam, waje ku mwanya wa kabiri kuri uyu munsi, no ku mwanya wa mbere ku rutonde rusange nk’uko bigaragara kuri iyi shusho ikurikira:

Agace ka kane k’irushanwa karakomereza mu Burengerazuba. Abasiganwa barahaguruka i Rusizi ku wa gatatu tariki 26 Gashyantare 2020 saa mbili za mugitondo, berekeze i Rubavu ahari intera ya kilometero 206,3 aho biteganyijwe ko bazahagera mu ma saa saba n’iminota 15.

Yemane Dawit uri imbere y’abandi mu kuzamuka

Eritrea ni yo yahembwe n’uruganda rw’Inyange nk’ikipe nziza uyu munsi

Umunya-Ethiopia Mulu Hailemichael Kinfe ukinira ikipe yitwa NIPPO DELKO yo mu Bufaransa ni we wegukanye agace Kigali-Huye.

Saa yine zuzuye nibwo abakinnyi 79 bahagurutse mu Mujyi wa Kigali rwagati ku nyubako ya MIC, berekeza i Huye ku ntera ya Kilometero 120.5.

Aba bakinnyi bageze ku ngoro ndangamurage y’u Rwanda iri Huye, Munyanze Didier agerageza gucika abandi ngo abe yasoza ari uwa mbere, ariko ntibyamukundira kuko umunya-Ethiopia yaje gutanga abandi bose kwambuka umurongo.

Umunyarwanda Munyaneza Didier ni we waje ku mwanya wa hafi, aba uwa Kane ariko akaba anganya ibihe n’uwaye aka gace kuko bahagereye rimwe.

Umurusiya Yevgeniy Fedorov ukinira ikipe ya Vino-Astana Motors, yo muri Kazakistan wari wegukanye agace ka mbere ka Tour du Rwanda 2020, kavuye mu Mujyi wa Kigali kerekeza mu Karere ka Rwamagana, abasiganwa basoreza ku Kimironko mu Mujyi wa Kigali, ku muri w’ejo ku wa mbere yaje ku mwanya wa 33, ariko akomeza kwambara umwenda w’umuhondo wambarwa n’uri ku mwanya wa mbere kurutonde rusange.

Kuri uyu munsi waryo wa gatatu, abasiganwa bahagurutse i Huye saa tatu n’igice za mugitondo, berekeza i Rusizi, ahari intera ya kilometero 142, bikaba biteganyijwe ko bahagera ahagana saa saba n’iminota 25.

Dore mu mafoto uko umunsi wa kabiri wagenze kuva i Kigali kugera i Huye:

Kureba andi mafoto menshi ya Kigali-Huye, kanda HANO

Amafoto: Plaisir Muzogeye

Yevgeniy Fedorov wa Vino-Astana Motors ni we wegukanye agace ka mbere ka Tour du Rwanda 2020

Rein Taaramae

Ku mwanya wa mbere haza umunya Esitoniya Rein Taaramae, ukinira ikipe ya Total Direct Energie akaba umwaka ushize yaraje ku mwanya wa kabiri akurikiye Merhawi Kudus wo mu gihugu cya Eritereya wanatwaye Tour Du Rwanda 2019.

Uyu mukinnyi ntazabura kwigaragaza ashaka gutwara Tour Du Rwanda 2020 kuko afite ibigwi mu marushanwa yagiye yitabira dore ko yambaye umwenda w’umuhondo inshuro eshanu.

Rein Taaramae

Rein Taaramae yambaye umwambaro w’umuhondo mu isiganwa rya Vuelta a Burgos, irya Arctic Race yose yo mu gihugu cy’Ubuholandi mu mwaka wa 2015, yatwaye umwenda w’umuhondo muri Tour de l’Ain muri 2009, ndetse anawutwara muri Tour de Slovénie muri 2016.

Rein Taaramae yagiye atsinda uduce (Etapes), mu marshanwa akomeye ku mugabane w’Uburayi harimo n’isiganwa rikomeye rimara ibyumweru bitatu rya Tour de France, Giro d’Italia na Vuelta a Espana

Taaramae ni umwe mu bakinnyi bazi gucunga neza ibihe bakoresha mu marushanwa nk’uko byagiye bigaragara mu marushanwa atandukanye yagiye yitabira mu makipe atandukanye agera kuri 14 yakinnyemo kuva mu mwaka wa 2007.

Rein Taaramae yabaye uwa 11 muri Tour de France 2011, aba uwa kabiri mu irushanwa rya Vuelta a Andalucia muri 2012, yabaye uwa gatanu muri Tour de Romandie, Volta a Catalunya na Criterium International mu mwaka wa 2011, aba uwa kane muri Tour de Paris-Nice muri 2011.

Joseph Areruya

U Rwanda rufite abakinnyi batandatu muri Team Rwanda barimo na Areruya Joseph w’imyaka 24 na Mugisha Samuel bafite amateka akomeye mu mukino w’amagare ku mugabane wa Afurika ku buryo bazaba bahanzwe amaso muri iyi Tour du Rwanda 2020.

Areruya Joseph

Ugereranyije n’imibare, Areruya Joseph afite amateka mu mukino w’amagare ku mugane wa Afurika kuko yatsinze amasiganwa akomeye atatu arimo no kurangiza yambaye umwenda w’umuhondo muri Tour du Rwanda inshuro ebyiri zikurikiranya muri 2017, na 2018, yanatwaye kandi isiganwa rya La Tropicale Amissa Bongo ndetse na Nations de l’Espoir Blue Line.

Areruya uri ku mwanya wa cyenda ku rutonde rusange rw’isiganwa mu gace ka mbere ka tour du Rwanda 2020, azwiho kigira imbaraga mu kuzamuka cyane nka Mugisha Samuel akaba yarigaragaje cyane mu gace ka karindwi kazamuka ka km 4.5 k’isiganwa Kigali Nyamirambo muri Gashyantare 2019.

Biniyam Ghirmay Hailu

Biniyam Ghirmay Hailu wo mu gihugu cya Eritereya ukinira ikipe ya Nippo Delko One Provence, ni umwe mu basore bakiri bato uri mu ikipe y’igihugu ya Eritereya.

Biniyam Ghirmay Hailu

Muri Tour du Rwanda yabashi gutsinda agace ka gatanu aza ku mwanya wa gatatu mu gace ka kabiri umwaka ushize, ubu ari ku mwanya wa gatatu mu gace ka mbere ka Tour du Rwanda 2020.

Mu marushanwa yitabiriye yagiye atangaza abantu aho muri 2018 yabaye uwa mbere mu babashije gutsinda Remco Evenepoel umuhungu wa Patrick Evenepoel wakanyujijeho mu mukino wo gusiganwa ku magare, icyo gihe Ghirmay yamutsindiye mu irushanwa ry’abakiri bato rya Aubel-Thimister-Stavelot mu gihugu cy’Ububirigi.

Umwaka ushize wa 2019 yitwaye neza mu isiganwa rya La Tropicale Amissa Bongo, aho yatsinze uduce dutatu akanahigika Umudage André Greipel amutsindiye ku murongo basorezaho mu gace ka gatanu k’isiganwa, akaba aza ku mwanya wa 11 ku rutonde rwa UCI.

Patrick Schelling

Uyu musore wo mu gihugu cy’Ubusuwisi waje ku mwanya wa gatandatu mu gace ka mbere ka Tour du Rwanda 2020 nawe azaba yitonderwa kuko yatwaye Tour du Loir na Cher E Provost muri 2016, akaba ari umwe muri batanu bahagarariye ikipe ya Isiraheri, Israel Cycling Academy, akaba ari ubwa kabiri yitabira Tour du Rwanda.

Patrick Schelling

Yabaye uwa kane inshuro ebyiri mu irushanwa rya Tour of Hainan mu mwaka wa 2016 na 2018, akaba yagiye aza mu 10 ba mbere mu masiganwa nka Tour de Suisse mu 2019, Tour of Austria muri 2018 na, Tour de Hongrie muri 2018, na Tour of Hainan muri 2017.

Mulu Hailemichael

Uyu musore wo mu gihugu cya Etiyopiya w’imyaka 21 nawe ari mu ikipe ya Nippo Delko One Provence ni ubwa gatatu yitabira Tour du Rwanda akaba aza ku mwanya wa 15 ku rutonde rusange rw’iri siganwa.

Mulu Hailemichael

Yazamutse kuri Poidum mu mwaka wa 2018, akaba yarabaye uwa 15 muri rusange muri 2018, uyu musore ukiri muto yaje ku mwanya wa 13 ndetse no ku mwanya wa gatanu mu isiganwa ry’abakiri bato rya Tour de La Provence akaba akunze kwigaragaza mu gusoza uduce mu masiganwa.

Urugero ni nko muri Tour du Rwanda 2018 aho yaje ku mwanya wa gatatu mu gace ka kabiri k’isiganwa, yabaye uwa gatandatu mu gace ka karindwi, ndetse aba uwa gatanu mu gace ka munani muri Tour du Rwanda 2019.

Artem Ovechkin

Uyu musore wo mu gihugu cy’Uburusiya ukinira ikipe ya Terengganu Inc. TSG Cycling Team yabaye uwa gatatu mu 2019 muri Tour de Langkawi yanambayemo umwenda w’umuhondo muri 2018.

Artem Ovechkin

Yanambaye umwenda w’umuhindo muri Tour of Antalya mu 2018, akaba ari ubwa mbere yitabiriye Tour du Rwanda akaba azaba atoroshye muri iri siganwa kuko amenyerewe mu masiganwa yo hanze nko mu gihugu cy’Ubushinwa, Silovaniya na Ositarariya.

Yevgeniy Fedorov

Yevgeniy Fedorov

Uyu musore ufite ubwene gihugu bwa Kazakisitani ari mu Rwanda ku nshuro ye ya mbere, akaba akinira Vino – Astana Motors, akaba yaritwaye neza muri Tour de Langkawi aho yaje ku mwanya wa kabiri, ku rutonde rusange rw’iri siganwa, ndetse akaba yaratsinzemo agace ka mbere, aba uwa 13 mu gace ka gatandatu, n’uwa cyenda mu gace karyo ka kane.

Temesgen Buru

Temesgen Buru

Uyu musore w’imyaka 25, akomoka mu gihugu cya Etiyopiya ari kumwe n’ikipe ya ProTouch, akaba ari ubwa gatatu yitabira Tour du Rwanda , akaba yaragiye aza mu myanya icumi ya mbere mu myaka ya 2014 na 2016 ku rutonde rusange rw’isiganwa rya Tour du Rwanda, aho yanaje ku mwanya wa kabiri mu gace ka kane k’iri siganwa.

Daniel Muñoz

Ni uwo mu gihugu cya Korombiya akaba ku myaka ye 23 akinira ikipe ya Androni Giocattoli – Sidermec, akaba azwiho kuzamuka cyane, muri iri siganwa akaba azaba ashaka kwigaragaza hamwe na mugenzi we nawe unyonga cyane ahazamuka Jhonatan Restrepo.

Muñoz yagiye yigaragaza cyane ku myanya y’imbere mu mwaka wa 2019 mu marushanwa yitabiriye, aho yaje ku mwanya wa mbere muri Tour of Bihor – Bellotto, yabaye uwa kabiri muri Sibiu Cycling Tour, yaje ku mwanya wa munani muri Tour de Hongrie, uwa cyenda muri Adriatica Ionica Race, aba n’uwa 23 muri Vuelta a Burgos.

David_Lozanomtb

Uyu musore ukinira ikipe yo mu gihugu cya Espagne ya Novo Nordisk azwiho kwanikira abandi ahazamuka, akaba aje mu Rwanda nyuma yo gutsinda isiganwa rya Tour of Taiyun ryo mu misozi ribera mu gihugu cyo mu Bushinwa umwaka ushize.

David Lozanomtb

Yaje ku mwanya wa gatanu n’uwa gatandatu muri Tour du Rwanda 2018 na 2019, aza ku mwanya wa gatanu ku rutonde rusange rwa Tour of Estonia mu 2018, yabaye uwa 17, na 18 muri Korowasiya na Siloveniya mu myaka ya 2018 na 2019.

N’ubwo ubutumburuke bw’u Rwanda bushobora kutazamworohera muri iri siganwa, ni we wegukanye umwanya wa mbere mu isiganwa riheruka ry’amagare yo mu misozi mu gihugu cya Esipanye.

FEDEROV Yevgeniy wegukanye isiganwa

Isiganwa mpuzamahanga ku magare rya ‘Tour du Rwanda 2020’, ryatangiye kuri iki cyumweru tariki ya 23 Gashyantare 2020, aho abasiganwa bahagurutse mu Mujyi wa Kigali, kuri Kigali Arena, berekeza mu Karere ka Rwamagana, bakaza kongera bakagaruka mu Mujyi wa Kigali.

Abasiganwa bahagurukiye kuri Kigali Arena saa yine n’igice zuzuye

Ni isiganwa ryahagurukiye imbere ya Kigali Arena Saa yine n’igice zuzuye, hahaguruka abakinnyi 80 baturuka mu makipe 16, arimo atatu yo mu Rwanda.

Isiganwa rigitangira, Uhiriwe Byiza Renus wa Benedictin Ignite yagerageje gucomoka mu gikundi inshuro ebyiri ariko bamugarura.

Ubwo bari bamaze kugenda Kilometero 16, abakinnyi batatu barimo Fedorov (Vino), Uhiriwe Byiza Renus (Benediction) na Batmunkh (Terengganu) bahise basiga abandi ndetse bashyiramo ikinyuranyo cy’iminota ibiri n’amasegonda 20.

Aba ni bo bakinnyi bari imbere

Aba bakinnyi bakomeje gusiga abandi ndetse bashyiramo ikinyuranyo cy’iminota itatu.

Kuri Kilometero 30 z’isiganwa aho bari bageze mu kabuga ka Musha, abakinnyi b’imbere bakomeje kongera ikinyuranyo kigera ku minota itanu.

Nyuma yo kugera i Rwamagana, abakinnyi bakase bagaruka i Kigali, banyura n’ubundi inzira bari banyuzemo berekeza Kimironko ari naho isiganwa ryasoreje.

Reba uko byari byifashe mu muhanda Kigali-Rwamagana:

Ubwo isiganwa ryageraga i Rwamagana, abakinnyi batatu bari bakomeje kuyobora isiganwa, aho bari bashyizemo ikinyuranyo cy’iminota irindwi n’amasegonda 15.

Muri kilometero 20 za nyuma, Uhiriwe Renus na Batmukh baje gusigara, Fedorov wa Vino asigara imbere wenyine.

Hasigaye kilometero 13, igikundi cyakomeje gusatira cyane Fedorov aho bageze Kimironko hasigayemo iminota 3 n’masegonda 33, aha bari basigaje kuzenguruka Kimironko inshuro imwe.

Umurusiya Fedorov yakomeje kuyobora isiganwa ubwo bazamukaga kuri Kigali Parents, ariko abakinnyi b’inyuma ye bakomeza kumusatira, ariko aza gusoza isiganwa ari uwa mbere akoresheje amasaha, iminota 44 n’amasegonda 59.

Umunyarwanda waje ku mwanya wa mbere ni Byukusenge Patrick wari wasizwe amasegonda 21, Areruya Joseph aza ku mwanya wa munani asizwe amasegonda 26, naho Mugisha Moise aza ku mwanya wa 13 asizwe amasegonda 29.

Kuri uyu wa Mbere, abasiganwa bazaba bakina agace ka kabiri, aho bazahagurukira mu mujyi rwagati ku i Saa ine zuzuye, berekeza mu karere ka Huye aho bazakora urugendo rureshya na Kilometero 120.5

Uko bakurikiranye:

Amafoto: Plaisir Muzogeye

Tour du Rwanda iratangira kuri iki cyumweru

Aya marushanwa aratangira kuri iki cyumweru tariki 23 Gashyantare kugera ku ya 01 Werurwe 2020, aho abasiganwa ku magare baturutse hirya no hino ku isi barenga 100 bazaba baherekejwe n’abagera ku 1,500 bashinzwe kubafasha cyangwa gucuruza ibintu na serivisi.

Munyankindi avuga ko hari amafaranga arenga miliyoni 350 FERWACY ubwayo yishyura abacuruzi batandukanye, ariko ko hari andi madolari n’amanyarwanda ataramenyekana umubare agurwa ibintu na serivisi by’u Rwanda.

Munyankindi agira ati “Abo bantu bose baba bagendera icyarimwe bakinjira mu mujyi bakawusohokamo, ubwo rero ubucuruzi bwo ni bwinshi, duhereye ku mahoteli.

Aho amagare anyura ibirori biba ari byose, ari na ko abantu bagura ibyo bakeneye byiganjemo ibiribwa n’ibinyobwa

Nka Nyagatare, Kayonza, n’ahandi ntitwajyayo kuko nta macumbi ahagije twahabona, iyo bamwe barayeyo abandi tubagarura i Kigali, hoteli zo ziba zuzuye kuko dushaka n’ibyumba tukabibura”.

Avuga ko mu bacuruzi bungukira kuri iyi mikino izenguruka mu gihugu hose ari abafite utubari, abafite ibiribwa byokeje cyangwa bitetse, ikawa n’icyayi ngo bikaba bikundwa n’abanyamahanga cyane.

Munyankindi agira ati “Iyo tugezeyo usanga mu tubari ibitaramo bihita bivuka kandi inzoga zikagurwa cyane, iyo bagiye guhaguruka bagenda, usanga bagura ikawa, icyayi n’urusenda cyane cyane bariya banyamahanga.

Usanga n’iyo bageze iwabo baduhamagara bakatubwira bati ‘mutwoherereze kuri bya bindi’, inyama zo ziba zashize urumva ahantu hari abantu 1,000, aho abantu basoreza urugendo usanga botsa za ‘brochettes’ n’ibigori, haba hari amaresitora acuruza ibyo kurya bipfunyikwa byitwa ‘take away’ kandi bikagurwa cyane.

Amafaranga asigara mu gihugu ntabwo aba ari munsi ya miliyoni 350, ayo akaba ari atangwa ako kanya n’ishyirahamwe (FERWACY) gusa, ariko ubariye hamwe n’abandi baterankunga batanga amafaranga, ushaka wahita uyakuba”.

Aho amagare asoreza abantu baba ari benshi, kandi ibicuruzwa na byo bihari

Akomeza agira ati “Nk’uruganda Skol rushobora kuba rwatanze nka miliyoni 100, ni ukuvuga ngo ruba rwazanye abantu benshi, ba bandi bagenda bamamaza imihanda yose basengerera abantu (inzoga), bacuruza.

Rwanda tea (icyayi cy’u Rwanda), Kipharma (icuruza imiti), Rwanda Foam icuruza imifariso (matelas), Ameki color (bacuruza amarangi), bagenda bacuruza umuhanda wose, haba hari nk’imodoka nka 40 zigenda mbere zikajyana ibicuruzwa baranguza cyangwa bacuruza kuri detaye.

Muri Tour du Rwanda abacuruzi b’u Rwanda binjiza amafaranga menshi cyane ku buryo utashobora kuvuga ngo twayabara gute”.

Munyankindi akomeza avuga ko Kigali Today yamuhaye igitekerezo azatanga muri FERWACY, cyo kuzakora isuzuma ry’amafaranga asigara mu gihugu kubera amarushanwa ya Tour du Rwanda.

Ku rundi ruhande ariko, hari umukozi wa Hoteli imwe mu ziri i Muhanga mu Ntara y’Amajyepfo uvuga ko amahoteli y’i Kigali yikubira abakiriya.

Agira ati “Iyo tubonye amahirwe nk’ariya ya Tour du Rwanda bituma hari abantu barara muri uyu mujyi kuko ubusanzwe kubona abakiriya biragoranye bitewe n’uko hano ari hafi ya Kigali.

Byaba byiza hagiye haba igice basoreza i Muhanga kugira ngo ibyo byiza bitugereho tutabireba bitambuka gusa, ahubwo bagire n’icyo basiga mu mujyi wa Muhanga”.

Bamwe mu bacuruzi bakorera aho abasiganwa ku magare bakunze gusoreza urugendo, na bo bavuga ko iyo imikino yabaye hari igihinduka mu gucuruza byinshi birushijeho, ariko ngo nta gitekerezo bari bagira cyo kubara ibyo bacuruje ngo barebe itandukaniro.

Amarushanwa mpuzamahanga yo gusiganwa ku magare azazenguruka mu ntara zose z’igihugu, aho bazajya baruhukira mu Mujyi wa Kigali no mu Turere twa Rwamagana, Musanze, Rubavu, Rusizi, Huye na Muhanga.

Aya ni amwe mu mazina y’Abanyarwanda babaye ibyamamare biturutse kuri iri rushanwa.

Adrien Niyonshuti

Adrien Niyonshuti ubu ufite imyaka 33 y’amavuko, yatangiye ibyo gusiganwa ku magare akiri muto ku myaka 16 y’amavuko asiganwa nk’utarabigize umwuga.

Impano ye mu gusiganwa ku magare yavumbuwe na Jonathan Boyer wabaye umutoza w’ikipe y’igihugu y’u Rwanda ndetse akaba ari na we wazamuye uyu mukino mu Rwanda.

Yitabiriye isiganwa rizenguruka u Rwanda muri 2004 arigaragaza cyane yegukana umwanya wa gatandatu w’isiganwa ryose muri rusange.

Adrien Niyonshuti yakomeje kwamamara mu gusiganwa ku magare, abasha no kwegukana iryo siganwa muri 2008.

Adrien Niyonshuti yatangiye kujya gusiganwa ku rundi rwego rwisumbuyeho. Muri 2009 yitabiriye isiganwa rizenguruka igihugu cya Ireland, aba umunyarwanda wa mbere wagiye gusiganwa ku mugabane w’i Burayi agahatana n’ibindi bihangange byamamaye mu gusiganwa ku magare.

Adrien Niyonshuti

Niyonshuti yahagarariye u Rwanda mu mikino ya Olempike yabereye i London mu Bwongereza muri 2012, akaba ari na we wari utwaye ibendera ry’u Rwanda ubwo iyo mikino yafungurwa ku mugaragaro.

Niyonshuti Adrien yongeye guhagararira u Rwanda muri 2016 mu mikino ya Olempike yabereye i Rio de Janeiro muri Brazil. Icyakora ntiyabashije gusoza isiganwa.

Muri 2009, Niyonshuti Adrien yabaye umunyarwanda wa mbere wagiye mu ikipe ya Dimension Data for Qhubeka yo muri Afurika y’Epfo izwi cyane ndetse ikaba initabira amarushanwa akomeye yo ku rwego rw’isi.

Kuri ubu Adrien Niyonshuti yiyemeje gutanga umusanzu we mu iterambere ryo gusiganwa ku magare, atangiza umushinga wo gutoza abana bato gusiganwa ku magare. Ni umushinga akorera i Rwamagana mu Burasirazuba bw’u Rwanda ari na ho akomoka.

Uwo mushinga yawise izina ashingiye ku mazina ye, awita Adrien Niyonshuti Cycling Academy. Ibikorwa bye bimaze gutera imbere, dore ko kuri ubu afite n’ikipe izitabira isiganwa ry’uno mwaka. Iyo kipe ifitanye n’amasezerano n’uruganda rwa SKOL, bituma ifata izina rya SACA (team Skol Adrien Cycling Academy).

Abraham Ruhumuriza

Izina Abraham Ruhumuriza ryaramamaye cyane cyane guhera mu Majyepfo y’u Rwanda aho akomoka.

Abraham Ruhumuriza(iburyo) na Nathan Byukusenge

Abraham Ruhumuriza ubu afite imyaka 41 y’amavuko akaba yarahoze atwara abantu n’ibintu ku igare mu mujyi wa Huye, abo bita Abanyonzi. Ari mu bantu bane ba mbere binjiye mu ikipe y’igihugu y’abasiganwa ku magare.

Ruhumuriza yegukanye Tour du Rwanda kuva muri 2002 kugeza muri 2005 itarashyirwa ku rutonde rw’amarushanwa mpuzamahanga, yongera kuryegukana muri 2007, mu gihe muri 2006 ryari ryegukanywe n’umunya-Kenya witwa Peter Kamau.

Yegukanye andi marushanwa atandukanye yategurwaga imbere mu gihugu arimo iryiswe Kwita Izina Cycling Tour. Ruhumuriza yakomeje kugaragara mu bijyanye no gusiganwa ku magare, ubu akaba ndetse akora mu bashinzwe kwita ku ikipe y’igihugu y’amagare, ubu akaba ari umwe mu baherekeza ikipe y’igihugu ari kuri moto mu gihe cyo gusiganwa.

Nathan Byukusenge

Izina Nathan Byukusenge na ryo riri mu mazina yamamaye kubera umukino w’o gusiganwa ku magare.

Byukusenge uzwi ku izina rya Rukamba, ni umwe mu ba mbere bagiye mu ikipe y’igihugu yo gusiganwa ku magare, akaba ibyo gusiganwa ku igare yarabikomoye mu Karere ka Kamonyi aho yahoze akora akazi k’ubunyonzi.

Nathan Byukusenge

Nathan Byukusenge afatwa nk’umukinnyi w’ibihe byose mu gusiganwa ku magare mu Rwanda, ariko ntiyigeze aryegukana.

Byukusenge w’imyaka 40 y’amavuko, umwanya wa hafi yegukanye ni uwa kane muri 2011, yegukana n’umwanya wa munani muri 2015.

Mu mwaka wa 2016 Byukusenge yitabiriye imikino ya Olempike yabereye i in Rio de Jeneiro muri Brazil, ahabwa n’amahugurwa mu cyigo nyafurika cyigisha ibijyanye n’amagare (African Continental Cycling Centre) giherereye ahitwa Potchefstroom muri Afurika y’Epfo.

Ayo masomo yatumye aba umunyarwanda wa kabiri ufite ubumenyi buhanitse mu byerekeranye no gutoza mu magare, undi akaba ari Felix Sempoma, umutoza wungirije w’ikipe y’igihugu (Team Rwanda).

Nathan Byukusenge yatangiye gusiganwa ku magare mu gihe kimwe na Adrien Niyonshuti muri 2003, abihagarika muri 2016, ni ukuvuga nyuma y’imyka 13 yari abimazemo.

Kuri ubu, ubumenyi afite mu magare abukoresha nk’umutoza w’ikipe y’abagore no gutoza ikipe y’abakiri bato y’igihugu (Junior National Cycling team) yitoreza i Musanze.

Jean Bosco Nsengimana

Nsengimana w’imyaka 27 y’amavuko yatangiye na we akoresha igare mu gutwara abagenzi mu mihanda yo mu Karere ka Nyabihu.

Jean Bosco Nsengimana

Ni umwe mu banyarwanda bamenyekanye cyane mu isiganwa ry’amagare, nk’aho mu mwaka wa 2013 yegukanye umwanya wa gatandatu ku rutonde rusange rw’iryo rushanwa.

Yakomeje gutera imbere, mu mwaka wa 2014 aza ku mwanya wa kabiri, naho muri 2015 yegukana iryo rushanwa.

Kuva ubwo, yakomeje kuza mu myanya ya hafi, yitabira amarushanwa atandukanye, afatanya n’abandi kwegukana intsinzi yo hirya no hino cyane cyane muri Afurika(African games muri Congo Brazaville, Tour de Blida, tour du Cameroon na Grand Prix Chantal Biya muri Cameroon, na the GP de la Ville d’Oran muri Algeria).

Valens Ndayisenga

Ni umwe mu bakinnyi b’Abanyarwanda b’uyu mukino bakoze ibyo benshi bafashe nk’ibitangaza. Izina rye ryaravuzwe biratinda, ndetse bituma Abanyarwanda batari bake barushaho gukunda no gukurikira umukino wo gusiganwa ku magare.

Valens Ndayisenga yabaye Umunyarwanda wa mbere wegukanye Tour du Rwanda muri 2014 nyuma y’uko iri siganwa ryari rimaze gushyirwa ku ngengabihe igaragaza urutonde rw’amasiganwa yemewe ku rwego mpuzamahanga (UCI calendar). Nyuma y’igihe gito, yongeye gukora amateka, yegukana iryo rushanwa mu mwaka wa 2016.

Yitabiriye amarushanwa atandukanye yo ku rwego mpuzamahanga nka GP de la Ville d’Oran, Tour de Blida, Circuit d’Alger, akinira n’amakipe atandukanye yabaga yamubonyemo ubushobozi buhambaye.

Ndayisenga ubu ntakigaragara mu byo gusiganwa ku magare, akaba yaranimutse ava mu Rwanda ajya kuba muri Amerika, mu rwego rwo gushakisha ubuzima n’imibereho myiza.

Hadi Janvier

Hadi Janvier na we yahoze atwara abagenzi ku igare muri Nyabihu. Yamamaye cyane ubwo yegukanaga umwanya wa mbere mu duce tuzwi nka ‘Prologues’ tubanza tw’isiganwa rya Tour du Rwanda yikurikiranya mu mwaka wa 2013 na 2014.

Hadi Janvier

Ako gace ka prologue buri wese akagendamo ukwe, noneho bakareba uwakoresheje igihe gito, akambara umwambaro w’umuhondo, akazagenda mu nzira awambaye ku munsi ukurikiyeho.

Hadi Janvier yitabiriye amarushanwa mpuzamahanga atandukanye arimo All Africa games muri Brazaville, Tour d’Annabas muri Algeria, Tour of Alberta muri Canada, n’ahandi.

Akurayo imidali itandukanye harimo n’umudali wa zahabu. Muri 2017, Hadi Janvier yagiye gukinira ikipe yo mu Budage yitwa Stradalli-Bike Aid.

Uwo mwaka wamubereye mwiza kuko yegukanye umwanya wa kabiri mu isiganwa ryiswe Tour de Côte d’Ivoire, aba uwa gatandatu mu isiganwa ryiswe Challenge des phosphates – Grand Prix de Khouribga, yegukana n’umwanya wa cyenda muri Tour de Blida ibera muri Algeria.

Hadi Janvier yanegukanye isiganwa rya Rwanda Cycling Cup 2016 ‘Race for Culture’. Kimwe na Valens Ndayisenga, Hadi Janvier na we asigaye aba muri Amerika aho yagiye gushaka ubundi buzima.

Joseph Biziyaremye, bakunze kwita Igisamagwe (Cheetah)

Uyu na we yahoze atwara abagenzi ku igare mu muhanda. Muri 2011 yaciye agahigo ko kuba umunyarwanda wa mbere wegukanye agace ka nyuma gasoza isiganwa ko kuva i Karongi berekeza i Kigali, ahareshya na Kirometero 130. Ni nyuma y’uko isigawa ku magare rya Tour du Rwanda rishyizwe ku rutonde mpuzahanga.

Joseph Biziyaremye

Yongeye gukora ibisa nk’ibyo muri 2012 ku gace ka gatatu ka Tour du Rwanda, aho abasiganwaga bavaga i ubavu.

Yitabiriye gahunda yo gusiganwa mu muhango wiswe Kwita Izina Cycling Tour, aba uwa gatatu.

Yakomeje kwerekana ubuhanga mu gutwara igare, kuko yanitabiriye isiganwa rizenguruka Repubulika Iharanira Demokarasi ya Congo muri 2013, yegukana umwanya wa mbere ubwo iryo siganwa ryari rigeze ku munsi waryo wa gatandatu.

Joseph Biziyaremye muri Tour du Rwanda ya 2014 yaje ku mwanya wa mbere ubwo isiganwa ryari rigeze ku munsi waryo wa gatanu, bituma nyuma y’isiganwa ryose aza ku mwanya wa kane ku rutonde rusange.
Ukwamamara kwe kwatangiye kugabanuka muri 2016 ubwo yakoraga impanuka ari mu isiganwa i Musanze, ajya muri Coma (ata ubwenge) ayimaramo ibyumweru bitanu, akanguka asa n’aho agitwaye igare.

Kuva icyo gihe yahise ahagarika ibyo gusiganwa ku magare, atangira umurimo wo gutwara abagenzi kuri moto, umurimo avuga ko yishimira kuba awukora muri iki gihe kuko umutunze.

Areruya Joseph

Areruya yakundishijwe umukino wo gusiganwa ku magare na se na we wakinaga uwo mukino. Izina Areruya ryarushijeho kwamamara mu mwaka wa 2017 ubwo yegukanaga Tour du Rwanda y’uwo mwaka, yongera kwandika amateka muri 2018 yegukana La Tropicale Amissa Bongo.

Areruya Joseph

Uwo musore uzwiho kugira imbaraga nyinshi iyo ari mu isiganwa, kuva icyo gihe yitabiriye amarushanwa atandukanye harimo La Tropicale Amissa Bongo, Circuit International de Constantine, Tour International de Blida na African Continental Championships – Road Race.

Areruya mu mwaka ushize yatowe nk’umukinnyi wahize abandi bose ku mugabane wa Afurika nyuma yo kwegukana intinzi mu marushanwa atandukanye arimo Tour du Rwanda, La Tropicale Amisa Bongo ryo muri Gabon na Tour de l’Espoir muri Cameroon mu mwaka wa 2018.

Mugisha Samuel

Mugisha Samuel ubu ni we uyoboye bagenzi be mu ikipe y’u Rwanda y’amagare (Captain).

Icyo abantu bibuka ni uburyo yaje mu byo gusiganwa ku magare akiri muto aturutse mu Karere ka Nyabihu, yinjira mu ikipe ya Benediction, abantu batungurwa n’ubuhanga yagaragaje muri uwo mukino.

Yageze mu bihe bye byiza cyane cyane mu mwaka wa 2018 ari nabwo yegukanaga Tour du Rwanda y’uwo mwaka.

Ku itariki 18 Gashyantare 2020, Mugisha yatangaje ko yamaze kugirana amasezerano n’ikipe yitwa lmp-La Roche Vendée Cycling yo mu Bufaransa, akazayijyamo nyuma ya Tour du Rwanda itangira kuri iki cyumweru ikazamara icyumweru.

Ikiraro cyo mu kirere muri Pariki ya Nyungwe

Ibyo kureba no gusura ni byinshi ku bazitabira Tour du Rwanda ndetse n’abazasura u Rwanda muri iyi minsi.

Uhereye ku Ngagi zo mu Birunga, n’amahoteli ari muri icyo gice yagenewe kwakira ba mukerarugendo, ukagera ku kiraro cyo mu kirere (canopy walkway) giherereye muri pariki ya Nyungwe, ndetse n’ahandi henshi hari ibyiza bitegereje abafana ba Tour du Rwanda.

Ku munsi wa mbere w’isiganwa, abasiganwa bazahaguruka mu Mujyi wa Kigali berekeza i Rwamagana, bongere bagaruke i Kigali.

Rwamagana hafi ya Paruwasi

Mu guhaguruka bazahagurukira mu gace kahariwe imikino, ahabarizwa inyubako y’imyidagaduro yamamaye ari yo Kigali Arena, hakabarizwa kandi Sitade Amahoro na yo iri hafi kuvugururwa ikagezwa ku bushobozi bwo kwakira abantu 40,000 bavuye kuri 25,000 bicaye neza.

Uwo muhanda wose kunyura ahitwa kuri Cumi na Kabiri- Kabuga-Rwamagana, umuhanda wose amaso agenda yitegeye ibyiza binyuranye birimo inyubako nshya zo guturamo mu bice bya Masaka, Kabuga na Gasogi.

Muri make, abafana ba Tour du Rwanda bazirebera n’ikiyaga benshi mu batuye Kigali batazi, giherereye munsi gato y’Uruganda rwa Inyange, ahazwi cyane nko kuri Cumi n’Icyenda.

Ukiva mu Mujyi wa Kabuga werekeza mu Ntara y’Uburasirazuba, abantu bashobora guhita bifuza kuba abahinzi-borozi. Hari inzuri nziza cyane zikwereka ko ako ari agace k’aborozi, ugakomeza ukarinda ugera muri Rwamagana.

Bitewe na gahunda y’abasura, bashobora guhitamo kwirarira mu Mujyi wa Rwamagana, mu mahoteli meza ahari nka ‘Hotel Dereva’.

Dereva Hotel i Rwamagana

Tariki ya 23 gashyantare 2020, byaba byiza abantu bakomezanyije n’amagare bakagarukana i Kigali, kugira ngo bazinduke bakomezanya umuhanda wa kabiri Kigali-Huye.

Uyu muhanda (etape) ni ingenzi, kuko uzava muri Kigali ukanyura mu mijyi ibiri muri itandatu yunganira uwa Kigali.

Umujyi wa Muhanga, umwe mu Mijyi yunganira Kigali hakurya ya Nyabarongo urenze ahitwa ku Kamonyi, agace Papa Yohani Paul wa Kabiri yasuye mu 1990 ubwo yasuraga u Rwanda, agakangurira urubyiruko gukora cyane.

U Rwanda ruri gushyira imbaraga mu Mijyi yunganira uwa Kigali, ari yo Muhanga, Huye, Musanze, Nyagatare, Rubavu na Rusizi.

Umujyi wa Muhanga uri gutera imbere mu buryo bwihuse. Uretse kuba ari ho, Basilica ya Kabgayi ibarizwa, uyu mujyi unagaragaramo ibikorwa by’ubucuruzi biteye imbere, bitewe n’uko ubarizwa mu birometero bike uvuye mu murwa mukuru, Kigali.

Abantu benshi bakorera muri Kigali bataha mu Mujyi wa Muhanga, hakaba n’abakorera muri Muhanga bagataha i Kigali. Uburyo bwo kugenda buroroshye hagati y’iyi mijyi.

Umujyi wa Musanze

Urenze i Muhanga, hari indi Mijyi ibiri ari yo Ruhango na Nyanza, ariko reka tuvuge kuri Nyanza.

Nyanza yahoze ari Umurwa Mukuru w’ubwami mu Rwanda rwo hambere. Ni wo mujyi ugaragaza ubukire n’umurage ugaragaza ibigwi by’ubwami mu Rwanda rwo hambere.

Umwami wa nyuma yavuye mu Rwanda mu myaka ya za 1960, mbere y’uko ubwami bukurwaho.

Mu Rukali

Mu Karere ka Nyanza, aya mateka yose akubiye mu nyandiko ushobora gusanga mu Ngoro Ndangamurage iherereye mu Rukali.Iyo Ngoro yahoze ari iy’Umwami Mutara III Rudahigwa yubatswe mu myaka ya za 1930, mu giye indi iherereye ku Rwesero na yo yubatswe n’Umwami Rudahigwa, mbere y’uko atanga (apfa) urupfu rw’amayobera aguye i Bujumbura mu Burundi.

Ingoro y’Umwami Mutara III Rudahigwa iri mu Rukali

Umwami Mutara III Rudahigwa yatangije uburyo bwo guhunika. Iyo bavuze ‘i Nyanza ku Bigega’ baba bashaka kwerekana inzu z’ubuhunikiro (ibigega) zifite ubushobozi bwo guhunika amatoni menshi y’umusaruro, zikaba ziherereye ku muhanda Nyanza-Huye.

Ku Bigega

Ukomeje, werekeza muri Huye, yahoze yitwa ‘Astrida’, ikaba ikungahaye ku mateka cyane cyane arebana na kiliziya Gaturika ndetse n’Umwami.

Huye ni ho Umwamikazi wa nyuma w’u Rwanda, Rosarie Gicanda yari atuye, akaba yaraje kwicwa muri Jenoside yakorewe Abatutsi mu 1994.

Umugabo we, Umwami Mutara III Rudahigwa wari uzwiho gukunda igihugu cyane, bivugwa ko yakubise urushyi umuzungu w’umukolini washakaga kuvangura abantu aagendeye ku ibara ry’uruhu muri Hoteli Faucon iri muri aka karere.

Huye kandi ifite Ingoro Ndangamurage y’amateka, ari na ho hari icyicaro gikuru cy’Ikigo cy’Ingoro Ndangamurage z’u Rwanda, mu nyubako nziza zubatswe n’Ababiligi mu myaka ya za 1980.

Abasiganwa, kuri uyu munsi bazarara muri Huye. Muri uyu mujyi uharaye wahitamo kurara aho ushaka hagati y’amahoteli menshi ahari harimo Hotel Mater Bonni Concilii, Gallileo Hotel, Hotel Credo , Four Steps Hotel yahoze yitwa Petit Prince Hotel, Barthos Hotel y’umunyabugenzi uzwi cyane witwa Jean Baptiste Sebukangaga ndetse na Casa Hotel.

Casa Hotel

Mu gitondo cy’umunsi uzakurikiraho, abasiganwa bazerekeza mu Karere ka Rusizi (Huye-Rusizi), banyuze muri Pariki ya Nyungwe.

Nta gushidikanya, uyu ni umwe mu mihanda igoye ku basiganwa, w’ibilometero 142, ariko ukaba unaryoshya ibirori ku bafana ba Tour du Rwanda.

Icya mbere gishimishije ni ukubona uburyo Nyamagabe, umujyi wari ufite inzu imwe y’igorofa kugeza mu myaka ya za 2000, ubu ari umujyi uri gutera imbere.

Ku Kitabi winjira muri Nyungwe

Mbere yo kwinjira muri Nyungwe, abantu baba bihera ijisho ubuhinzi bw’icyayi n’ingano wavuga ko ari nk’umwihariko w’aka gace. Uretse ibyo ariko, aka gace ni isoko y’imbaho n’amakara bikoreshwa mu gihugu.

Unyuze muri iyi nzira kandi, ntiwakwibagirwa no kugura ubuki bw’umwimerere usanga ku Kitabi, hafi neza y’amarembo y’ishyamba rya Nyungwe.

Ibikorwa bya muntu bigamije gususurutsa ba mukerarugendo birimo ikiraro cyo mu kirere kiri muri Nyungwe, ndetse n’amacumbi agezweho. Amacumbi azwi cyane aherereye aho umuntu asohokera iri shyamba mu Karere ka Nyamasheke.

Aho abasiganwa bazasoreza mu Karere ka Rusizi, uba ureba neza urujya n’uruza ku mupaka wa Kamembe mu Rwanda, na Bukavu muri Kongo Kinshasa, unitegeye ubwiza bw’ikiyaga cya Kivu.

Kurara muri aka gace nta ko bisa, ukongeraho amafunguro yahoo yihariye, agizwe n’isambaza n’ubugali.

Tariki ya 26 Gashyantare, abasiganwa bazakora intera ndende cyane muri iri siganwa (Rusizi-Rubavu), ireshya n’ibilometero 206. Ni intera izarangizwa n’uwitoje bihagije, ariko kandi ni inzira irimo byinshi byiza byo kureba, mu mihanda ya Nyamasheke- Mu Ityazo-Karongi, izwi cyane nk’umukandara wa Kivu (Kivu belt), igizwe ahanini n’amakorosi.

Abasiganwa bazarara mu Karere ka Rubavu, undi mujyi na wo uhana imbibe n’igihugu cya Kongo Kinshasa, ku mipaka ya petite barrier na La Corniche.

Rubavu kandi ni umujyi w’iganjemo ibikorwa by’ubucuruzi cyane cyane ku biribwa n’ibinyobwa.

Ni akarere kandi kiganjemo ibikorwa by’imyidagaduro. Serena Hotel ni yo nini ihari yakira abantu, ikaba ifite inyenyeri enye.

Ku bijyanye n’umwiherero, ikiruhuko cyangwa ukwezi kwa buki, Rubavu ni hamwe mu hagendwa cyane.

Abasiganwa bazahaguruka i Rubavu berekeza mu Karere ka Musanze, intera ngufi urebye yashyizweho mu rwego rwo gufasha abasiganwa kuruhuka.
Iyi ntera y’ibilometero 84 izinjiza abantu mu Mujyi w’ubukerarugendo (Musanze).

Uhagaze muri Parike y’Ibirunga uyu mujyi ugira isura nziza. Kurara mu Birunga byo ni ibindi bindi.

Muri aka gace hari amacumbi menshi yagenewe kwakira abantu b’amikoro aciriritse, ariko no ku bifite, Musanze hari amacumbi yabo.

Byagorana ko wagera i Musanze, ntuvuge ko ari agace kiganjemo igihingwa cy’ibirayi, birimo ibyamamaye mu Rwanda ku izina rya ‘Kinigi’.

Bitewe nuko ari agace k’imisozi miremire, muri Musanze ni ho hari ikigo cy’imyitozo ku basiganwa ku magare (Africa Rising Cycling Academy).

Izindi ntera eshatu za nyuma, abasiganwa bazasubira mu turere twa Musanze-Muhanga, nyuma bagaruke mu Mujyi wa Kigali, ahakunze kugaragara ibirori by’iri siganwa rya Tour du Rwanda.