Minisitiri Prof. Nshuti Manasseh (iburyo), Misitiri Flemming Moller Mortensen (hagati) na Minisitiri Mattias Tesfaye (ibumoso) muri icyo gikorwa

Amasezerano arebana no kungurana inama mu bya politiki n’ubufatanye mu bijyanye n’imicungire y’impunzi za politiki ndetse n’ibibazo by’abinjira n’abasohoka yasinywe hagati ya Minisitiri Prof. Nshuti Manasseh, Umunyamabanga wa Leta muri Minisiteri y’Ububanyi n’amahanga na Flemming Moller Mortensen, Minisitiri w’iterambere ry’ubuhahirane muri Denmark ari kumwe na Mattias Tesfaye, Minisitiri w’ibijyanye n’abinjira n’abasohoka muri Denmark.

Prof. Manasseh Nshuti yavuze ko u Rwanda rwiteguye kungukira byinshi kuri gahunda nyinshi z’iterambere zo muri icyo gihugu.

Yagize ati “Twagiranye ibiganiro by’ingirakamaro, kandi amasezerano twasinyanye ni agamije gutanga urubuga ibihugu byombi bizajya biganiriraho ku buryo bw’imikoranire mu gucunga impunzi n’abanyapolitiki bahunga ibihugu byabo, ihindagurika ry’ikirere, ubucuruzi ndetse n’ikoranabuhanga”.

Minisitiri wa Denmark ushinzwe iterambere ry’ubuhahirane, yavuze ko bazigira kuri gahunda y’u Rwanda uko rufata impunzi n’abanyapoliti basaba ubuhungiro mu Rwanda, mu nkambi y’agateganyo ya Gashora iherereye mu Karere ka Bugesera.

Mu mpunzi 385 zari zakiriwe muri iyo nkambi y’agateganyo ya Gashora, abagera ku 131 bamaze kujyanwa mu gihugu cya Suwede, 23 bajyanwa muri Canada, 46 bajyanwa muri Norvege, mu gihe abagera kuri 5 bakiriwe n’igihugu cy’u Bufaransa.

Inkambi ya Gashora ifite ubushobozi bwo kwakira impunzi n’abanyapolitiki basaba ubuhungiro mu Rwanda bagera kuri 500.

Mortensen yagize ati “Kugira ngo tubone umuti urambye w’ibibazo, ni ngombwa ko twicara tukaganira ku bibabazo bihari uyu munsi, ariko no mu gihe kizaza. Ni ingenzi cyane kuri twe, kuba twasinye aya masezerano”.

Uko gusinya amasezerano ni kimwe mu bikubiye mu ruzinduko rw’iminsi ine, itsinda ry’abantu 15 baturutse muri Denmark barimo mu Rwanda, urwo ruzinduko ahanini rukaba rugamije gukomeza ubuhahirane hagati y’ibihugu byombi.

Iryo tsinda ry’abantu baturutse muri icyo gihugu, banasuye urwibutso rwa Jenoside yakorewe Abatutsi mu 1994, ruherereye ku Gisozi mu Mujyi wa Kigali, bunamira abarushyinguyemo.

Dr. Uzziel Ndagijimana na Ambasaderi Dr. Thomas Kurz bashyira umukono kuri ayo masezerano

Ayo masezerano yasinywe na Dr. Uzziel Ndagijimana, Minisitiri w’Imari n’igenamigambi na Dr. Thomas Kurz, Ambasaderi w’u Budage mu Rwanda, ku wa Mbere tariki 12 Mata 2021.

Amasezerano agizwe na miliyoni 59 z’Amayero (€59million Euros) yatanzwe binyuze muri sosiyete yo mu Budage yitwa ‘KFW Development Bank ‘ agenewe gushyigikira ibikorwa bitandukanye birimo amashuri y’imyuga n’ubumenyingiro, kongera ibyoherezwa mu mahanga bikorwa n’ibigo bito n’ibiciriritse (SMEs) bikoroherezwa kubona inguzanyo binyuze muri Banki y’u Rwanda y’Amajyambere ‘BRD’, kuzamura imishinga igamije kubungabunga ibidukikije ndetse no gushyigikira ibijyanye n’ikoranabuhanga ‘ICT’.

Miliyoni 19 z’Amayero zisigaye (€19million ), zizanyuzwa muri ‘GIZ’ zikazakoreshwa mu kwegereza abaturage serivisi ‘decentralization’, mu miyobore myiza, gukumira ihohotera rishingiye ku gitsina n’ibindi.

Minisitiri Ndagijimana yavuze ko iyo nkunga u Rwanda rwabonye, ruzayikoresha mu bintu by’ingenzi bigamije iterambere ry’igihugu ndetse no guhangana n’ingaruka z’icyorezo cya Covid-19.

Yagize ati “Iyi nkunga ije mu gihe gikwiriye ukurikije ingaruka icyorezo cya Covid-19 cyagize ku iterambere ry’ubukungu n’imibereho yacu. Ubu turashaka kuzamura ibice by’ingenzi bijyanye na gahunda y’igihugu igamije impinduka (National Strategy for Transformation ‘NST’)”.

Ambasaderi Kurz yavuze ko iyo nkunga igamije gukomeza umubano w’ibihugu byombi, no gushyigikira ibyiciro byagezweho n’ingaruka za Covid-19.

Yagize ati “Aya masezerano arerekana umubano uri hagati y’ibihugu byacu, umubano ushingiye ku bucuti n’ubwizerane. U Budage bwiyemeje gushyigikira u Rwanda mu rugendo rwo kongera kuzamura ubukungu bwarwo nko gushyira mu bikorwa ‘NST1’ yarwo, kugira ngo intego z’iterambere rirambye zizagerweho nta n’umwe usigaye inyuma”.

Umucamanza Carmel Agius

Mu butumwa yanyujije kuri Twitter, Umucamanza Carmel Agius, Perezida wa UNIRMCT, bugira buti “Urukiko mpanabyaha rwashyirweho u Rwanda (ICTR), rwanzuye ko iyi Jenoside yabayeho, kandi uko ni kuri kudashobora guhakanwa”.

Ayo magambo Agius yayavuze nyuma y’ubukangurambaga bwatangijwe ku mbuga nkoranyambaga bugamije kurwanya abahakana jenoside yakorewe Abatutsi mu Rwanda mu 1994.

Ubwo bukangurambaga burakoreshwa amagambo y’Ikinyarwanda (hashtag) ‘ #TwiyamyeAbapfobya’ cyangwa se ‘#HaltToDeniers’ mu Cyongereza, bukaba bwaratangijwe mu byumweru bikeya bishize, nyuma y’uko uwitwa Idamange Yvonne avuze amagambo ahakana Jenoside yakorewe Abatutsi abinyujije kuri ‘Youtube’.

Ubu Idamange arafunzwe azira guteza imvururu muri rubanda, urugomo no guteza imyigaragambyo.

Abandi bagaragaye bapfobya Jenoside yakorewe Abatutsi babinyujije mu nkuru zanditse, ni abitwa Judi Rever na Benedict Moran, zikaba zarasohotse mu kinyamakuru kitwa ‘Mail’ na ‘Guardian’ ku itariki 30 Ugushyingo 2020 ndetse no muri ‘The Continent’ ku itariki 28 Ugushyingo 2020.

Komisiyo y’Igihugu yo kurwanya Jenoside (CNLG), ivuga ko iyo nkuru yo kuri ‘Mail’ na ‘Guardian’ yari inkuru ishingiye ku birego bya kera byiganjemo ikinyoma ngo bivugwa ko ari ubuhamya bw’abahoze mu zari ingabo z’u Rwanda, zatsinzwe nyuma yo kugira uruhare muri Jenoside yakorewe Abatutsi.

CNLG ivuga ko inyandiko nk’izo ari mbi cyane, kuko zigamije guhakana Jenoside no gutoneka inkovu z’abarokotse Jenosdie yakorewe Abatutsi muri 1994.

Nyuma y’izo mvugo n’inyandiko z’abahakana Jenoside, nibwo hatangiye ubukangurambaga kuri ‘Twitter’ bwitabirwa n’Abanyarwanda benshi bari mu gihugu ndetse n’abatuye mu mahanga, harimo abacitse ku icumu rya jenoside yakorewe Abatutsi, abayobozi b’imiryango na za Ambasade zitandukanye n’inshuti z’u Rwanda.

Abo bose ibyo bandika kuri ‘Twitter’ bigamije kugaragaza ko ntawe ugomba guhakana ko Jenoside yakorewe Abatutsi yabayeho.

Rugira Amandin uhagarariye u Rwanda muri Zambia no muri Malawi yagize ati “Abahakana Jenoside yakorewe Abatutsi mu 1994, bafite intego eshatu, kubabaza abayirokotse, kugoreka amateka no gutegura jenoside ”.

Mugenzi we uhagarariye u Rwanda mu Buholandi, Ambasaderi Olivier Nduhungirehe, we yagize ati “Guhakana no gupfobya Jenoside yakorewe Abatutsi, ni ukugerageza gusiba amwe mu mateka y’ikiremwamuntu, no gushyigikira abayikoze. Ni ugukomeretsa abayirokotse, ni ugusubiza inyuma Ubumwe n’Ubwiyunge bw’Abanyarwanda no gushaka gusubiza u Rwanda muri Jenoside”.

Ubwo bukangurambaga bukorwa n’abarwanya abapfobya Jenoside bakoresheje imbuga nkoranyambaga, bwanitabiriwe n’inshuti z’u Rwanda, ari abarusuye baje mu kazi cyangwa se baje gutembera.

Uwitwa Ralf Hesse, yashakanye n’Umunyarwanda warokotse jenoside, avuga ko yamaganye abahakana Jenoside kuko baba bashaka gusiba amateka y’abahitanywe nayo.

Abinyujije kuri twitter Hesse yagize ati “Njyewe biranshimisha gushyira indabo ku mva zishyinguwemo imibiri yabo. Mureke turinde izo nzibutso, kuko ni bwo buryo bwonyine dusigaranye bwo kwegerana n’abacu twakundaga”.

Ku barokotse Jenoside yakorewe Abatutsi, abahakana jenoside icyo baba bakora uretse kuba ari icyaha gihanwa n’amategeko, ngo ni no kutagira umutima.

Uwitwa Kayirangwa Anita wacitse ku icumu rya Jenoside yagize ati “Ni nko kwambura icyubahiro abishwe muri Jenoside no gushaka kuyibagiza abayirokotse. Ni ukubica ubugira kabiri, kandi bigomba kurwanywa buri wese abishyizemo imbaraga”.

David Toovey

Muri abo batanu bahawe ubwenegihugu bw’u Rwanda, harimo uwitwa David Toovey umaze igihe akora muri sosiyete yitwa ‘Spruik’ ikora ibijyanye n’imibanire y’abantu n’itumanaho, akaba umuntu ukoresha imbuga nkoranyambaga cyane (social media influencer) ndetse akaba yamamaza cyane ubukangurambaga buhamagarira abantu gusura u Rwanda ( #VisitRwanda campaign).

Kuri urwo rutonde kandi hariho Yann Gwet ukomoka muri Cameroun akaba ari umwalimu wigisha ibijyanye n’itangazamakuru muri Kaminuza y’u Rwanda, na Dale Dawson umushoramari ndetse n’umuyobozi mukuru w’umuryango witwa ‘Bridge2Rwanda’. Uwo muryango yashinze wafashije abanyeshuri b’Abanyarwanda bashaka kwiga mu mahanga ndetse uzana abanyamahanga gushora imari yabo mu Rwanda.

Abashakanye n’abo bahawe ubwenegihugu bw’u Rwanda,na bo bahise babubona, harimo Yann umugore wa Yann witwa Sidonie Kouam Gwet ndetse n’umugore wa Dale witwa Judith Dawson.

Nyuma yo gutangaza ibyemezo by’Inama y’Abaminisitiri, ku rubuga rwa Twitter, Toovey yagize ati “Ntewe ishema rikomeye no kwitwa Umunyarwanda! Ni iby’agaciro gakomeye guhabwa ubwenegihugu bw’igihugu nkunda n’umutima wanjye wose. Ndanezerewe bitavugwa. Murakoze cyane kunyakira imuhira!”

Ubwenegihugu bw’u Rwanda buboneka mu buryo butandukanye nko kuba waravukiye ku butaka bw’u Rwanda, ubwenegihugu bw’inkomoko, ubwenegihugu buturuka ku gushyingiranwa, n’ubuturuka ku kugirwa Umunyarwanda. Hari kandi ubwenegihugu buturuka ku kugira umwana utabyaye uwawe (adoption).

Uhereye mu 2009, u Rwanda rumaze gutanga ubwenegihugu bw’u Rwanda ku bantu bagera hafi ku gihumbi(1000) babusabye. Nubwo ububasha bwo gutanga ubwenegihugu bw’u Rwanda bufitwe n’Inama y’Abaminisitiri, ariko iyo mibare ishobora kuba yarazamutse mu kwezi k’Ukuboza 2020, nyuma y’uko inteko ishinga amategeko y’u Rwanda, itoye itegeko rishya rigenga ubwenegihugu bw’u Rwanda, risimbura iryo mu 2008.

Itegeko rishya ryongereye ibyashingirwaho batanga ubwenegihugu bw’u Rwanda ku muntu wabusabye, nko kuba afite ubuhanga bwihariye mu bintu runaka cyangwa se afite impano runaka ( talent) ndetse no kuba afite ibikorwa bijyanye n’ishoramari mu Rwanda.

Urugero, mu itegeko rishya rigena ibyerekeye ubwenegihugu bw’u Rwanda, umuntu ashobora guhabwa ubwenegihugu, bidasabye ko aba amaze imyaka itanu atuye mu Rwanda, nk’uko byari bimeze mu itegeko ryavuguruwe.

Umuntu ufite ubumenyi bwihariye mu bintu runaka, kandi agira uruhare mu iterambere ry’igihugu, kugira ngo abone ubwenegihugu bw’u Rwanda, agomba kuba afite ibikorwa by’ishoramari rirambye akorera mu Rwanda, n’ibaruwa (a recommendation letter).

Tariki 28 Nzeri umwaka ushize wa 2020, ubwo yari mu nama y’Umuryango RPF-Inkotanyi, Perezida Kagame yavuze ko u Rwanda, rufunguye ku bantu basaba ubwenegihugu bw’u Rwanda, bafite umutwaro wo kugira uruhare mu iterambere ry’igihugu.

Yagize ati “Hashize imyaka, twakomeje kubona abantu basaba kugirwa Abanyarwanda. Nkomeza kubwira Abayobozi, ndizera ko bemeranya nanjye, ko uwo ari we wese ushaka kuba umwe muri twe, yahabwa ayo mahirwe, mu gihe cyose ashaka kugira umusanzu atanga mu kubaka igihugu cyacu”.

Ntewe ishema rikomeye no kwitwa Umunyarwanda! Ni iby’agaciro gakomeye guhabwa ubwenegihugu bw'igihugu nkunda n’umutima wanjye wose. Ndanezerewe bitavugwa.

Murakoze cyane kunyakira imuhira! 🇷🇼 https://t.co/aVvVVfSeXb

— David Toovey (@DavidToovey) February 2, 2021

Uko guhindura imikorere byatangajwe n’umuyobozi w’iyo gahunda Dr. Anita Asiimwe, nyuma y’uko raporo yatwanzwe n’Umugenzuzi Mukuru w’Imari ya Leta y’umwaka w’ingengo y’imari wa 2018-2019, yasubiwemo n’abagize Komisiyo y’Inteko Ishinga Amategeko ishinzwe kugenzura imikoreshereze y’imari ya Leta (PAC), yagaragaje ko NECDP yatanze 50% gusa by’ibiribwa byongewemo intungamubiri bigenewe abana n’abagore batwite.

Ku wa gatatu tariki 16 Nzeri 2020,wari wo munsi wa mbere w’igenzura ry’imikorere ya NECDP, uko ikoresha amafaranga ndetse n’uko ikora muri rusange, kuva yabaho guhera mu myaka itatu ishize.

Gusa raporo y’Umugenzuzi Mukuru w’Imari ya Leta, ivuga ko nubwo u Rwanda rwashora amamiliyari y’amafaranga muri gahunda y’imbonezamikurire, iyi gahunda ikeneye kuvugururwa niba koko rwifuza kugabanya ikibazo cy’igwingira.

Imibare iheruka yagaragazaga ko abafite ikibazo cy’igwingira gikabije mu Rwanda ari 38.4%, iyo ikaba ari yo mpavu ikomeye yatumye Leta y’u Rwanda ishyiraho gahunda yihariye yo gukemura icyo kibazo, kuko ubu ari kimwe mu bibazo bikomeye Leta ihanganye na byo.

Umwe mu bayobozi b’urwego rw’Umugenzuzi Mukuru w’Imari ya Leta, avuga ko imibare NECDP yakoresheje itumiza ifu y’igikoma izwi nka ‘Shisha Kibondo’, itandukanye n’imibare y’abagenerwabikorwa iri mu nzego z’ubuzima mu turere.

Uwo Mugenzuzi w’Imari ya Leta yagize ati “Ibi bituma bigorana cyane kumenya umubare nyawo w’abagenerwabikorwa b’iyo gahunda, hari kandi n’ikibazo cy’ubukeya bw’ibigezwa mu turere, hakiyongeraho kubikwa nabi no gucungwa nabi”.

Nk’uko PAC yabigaragaje, ibyo bituma habaho ibura ry’iyo fu y’igikoma, rimwe na rimwe ingano y’ibyaje ikaba itajyanye n’umubare w’abana bagombaga kuyibona ku rwego rw’uturere.

Uturere tumwe nka, Rubavu, Kayonza, Karongi, Ngororero ndetse na Burera twabonye 50% by’ifu y’igikoma ku bana, mu gihe utundi turere 12 twabanye 50% by’ifu y’igikoma kigenewe abagore batwite.

Depite Izabiriza Marie Mediatrice yagize ati “ Mwumva twarwanya dute imirire mibi mu bagore batwite n’abana, niba hari uturere tubona kimwe cya kabiri gusa cy’ibyo dukeneye? Ikibazo cyabaye ikihe? Ni ukubigeza aho bikwiye kujya byagoranye, byarabuze cyangwa ni imikorere mibi gusa”!

Dr. Asiimwe Anita, Umuyobozi Mukuru wa NECDP, yavuze ko ikibazo cy’ingano y’ibyo bageza mu turere cyatewe n’uko hari ingengo y’imari ya miliyoni zirindwi z’amadorari igenewe kugura iyo fu y’igikoma mu kigo kitwa ‘Africa Improved Foods (AIF)’, ariko nta buryo bw’ubwikorezi bwayo burimo.

Dr Asiimwe yagize ati “Twagize ikibazo kijyanye n’ubwikorezi, dukoresha imodoka za Farumasi z’uturere, ziba ari zo zibijyana ariko nyine, zigatwara bike bike”.

Asiimwe yongoyeho ko icyo kibazo kigiye gukemuka, ingengo y’imari yegejejwe kuri Minisiteri y’imari n’igenemigambi guhera 2019, yaremejwe kandi ivuga ko muri izo miliyoni zirindwi z’amadorari zitangwa na Banki y’Isi itera inkunga iyo gahunda, habariwemo n’ibiciro by’ubwikorezi.

Gusa nubwo hari icyo cyizere ko hari ibigiye gukemuka, Abadepite bagaragaje ikindi kibazo ko NECDP yishyuye AIF amafaranga y’inyongera ahwanye na 56,000 by’amarori, imibare itandukanye y’amafaranga yagiye yishyurwa mu myaka itatu ishize, ndetse no guhindura amasezerano hagati ya NECDP, Minisiteri y’Ubuzima, Minisitiri y’Uburinganire n’Iterambere ry’Umuryango ndetse n’abandi bafatanyabikorwa.

Kuri ibyo bibazo, Dr. Asiimwe yavuze ko raporo y’umwaka w’ingengo y’imari 2017-2018 yatinze kubera ko hari ibyari bitarumvikanwaho hagati y’impande zari zihuriye kuri ayo masezerano, iyo akaba ari yo mpavu yatumye Umugenzuzi Mukuru w’Imari ya Leta atabona raporo.

Yagize ati “Ibi byarakemutse, ubu dufite raporo y’uwo mwaka w’ingengo y’imari wabanje, tukagira n’iy’uwa 2019-2020”.

Ibiro by’Umugenzuzi Mukuru w’Imari ya Leta, byagaragaje ko nta raporo ya gahunda ya ‘Inkongoro y’Umwana’, iyo ikaba ari guhunda, aho umwana wiga mu mashuri abanza abona nibura litiro y’amata mu cyumweru.

Abadepite babwiwe ko amata atagera ku bana biga mu mashuri abanza hirya no hino mu turere, nk’uko biteganyijwe muri iyo gahunda ya Inkongoro y’Umwana (One Cup of Milk per Child Program).

Mu rwego rwo gukemura icyo kibazo muri gahunda ya NECDP, Dr. Asiimwe yavuze ko bafite gahunda yo gukorana n’abakozi b’imirenge mu gutanga ayo mata mu mashuri, bakagira na gahunda yo koroza imiryango bayiha amatungo muri gahunda ya ‘Shisha Kibondo’, kuri ibyo ngo hakaziyongeraho amafaranga y’u Rwanda ibihumbi birindwi azajya ahabwa umugore utwite buri kwezi.

Ku bijyanye n’amafaranga kandi, Inteko Ishinga Amategeko, yabwiwe ko hari amafaranga y’u Rwanda agera kuri miliyoni 80 z’amafaranga y’u Rwanda, yakoreshejwe mu kubaka ibigo mbonezamikurire 12 (ECDs), ariko bine muri byo ntibikoreshwa, ibindi bitanu byo mu Karere ka Nyaruguru ntibyuzuye.

Dr. Asiimwe yavuze ko hari ECDs zimwe zidakoreshwa kuko nta bukangurambaga ku rwego rw’umurenge bwabayeho kugira ngo abantu bitabire kuzana abana.

Icyogogo cy’umugezi wa Sebeya cyatangiye kubungwabungwa

Ni umushinga w’ubufatanye hagati ya Guverinoma y’u Rwanda, Ihuriro Mpuzamahanga rigamije kwita ku bidukikije (International Union for Conservation of Nature - IUCN) n’Umuryango w’Abaholande ugamije Iterambere (Netherlands Development Organization - SNV). Watangiye umwaka ushize muri Nzeri, ufite agaciro ka miliyari 22 z’amafaranga y’u Rwanda, ukaba uzamara imyaka itatu.

Ni umushinga ugamije kubungabunga icyogogo ‘landscape’ cy’umugezi wa Sebeya no kubungabunga umutungo kamere aho ku nkengero z’umugezi wa Sebeya. Ibyo bikorwa byo kungabunga icyogogo cya Sebeya bikorerwa kuri kilometero kare 286 mu Turere twa Rutsiro, Ngororero, Nyabihu na Rubavu.

Gusa uwo mushinga wari wabaye uhagaze kubera icyorezo cya Coronavirus. Ni umushinga ushyirwa mu bikorwa n’Ikigo cy’Igihugu gishinzwe guteza imbere amazi n’amashyamba.

Ni umwe mu mishinga 21 Guverinoma y’u Rwanda iherutse kwemerera gukora no muri iki gihe cyo kuguma mu rugo kubera kwirinda ikwirwakwira ry’icyorezo cya Covid-19.

Ibyo byakozwe mu rwego rwo kugabanya ingaruka zabaho mu gihe ibikorwa by’iyo mishinga bidakozwe ngo birangire ku gihe.

Ngabonziza Prime, Umuyobozi w’Ikigo cy’igihugu gishinzwe guteza imbere amazi n’amashyamba, yavuze ko ibikorwa bigomba guhita bitangira bibanda ahanini ku gucukura ibyuzi bifata amazi, gucukura imiringoti, gutera amashyamba n’ibindi mu rwego rwo kwirinda ingaruka zaterwa n’imyuzure muri iki gihe cy’imvura.

Yagize ati “Ibikorwa uyu mushinga uteganya gukora bigamije gukemura ibibazo bibangamira abaturage kuko abaturage babigiramo uruhare, twe tubereka uko bakwiye kubikora cyangwa se tukabunganira mu bya tekinike aho bibaye ngombwa”.

Hakizimana Frederic, ushinzwe gahunda yo gutunganya umutungo kamere w’amazi ari mu butaka mu Ihuriro mpuzamahanga rishinzwe kubungabunga ibidukikije, agira ati “Ubu tugiye gutangira ibikorwa kuri site eshanu mu Karere ka Rubavu, dukurikira ibijyanye n’amaterasi arinda ubutaka gutwarwa n’amazi, dutera ibiti, gusibura inzira z’amazi no kureba ko hari ibyobo bijyamo amazi”.

Izo site eshanu ni Yungwe, Nyanshundura na Bambiro mu Murenge wa Kanama ndetse na Murambi na Byiniro mu Murenge wa Nyundo, aho biteganyijwe ko bazakoresha abantu bagera kuri 500 ku munsi.

Abaturage baturiye Sebeya bavuga ko mu myaka 20 ishize, abantu bakunze kwangirizwa n’amazi y’umugezi wa Sebeya, iyo akaba ari yo mpamvu ituma hasigaye hakorerwa ubuhinzi bukeya, hakaba nta mashyamba ahagije ndetse nta n’abahakora ubucukuzi bw’amabuye y’agaciro.

Kuwa Gatatu w’iki cyumweru, umugezi wa Sebeya waruzuye biteza umwuzure bitewe n’imvura nyinshi imaze iminsi igwa mu Karere ka Ngororero.

Abaturage bavuga ko uwo mushinga wo kubungabunga uyu mugezi wa Sebeya ubafitiye akamaro.

Imvura imaze iminsi igwa hirya no hino mu gihugu, imaze guhitana abantu 12 mu gihe yakomerekeje abandi 18. Yanasenye inzu 32, isenya umuhanda yangiza n’imyaka kuri hegitari zigera kuri 12 nk’uko bivugwa na Minisitiri w’Ibikorwa by’Ubutabazi, Marie Solange Kayisire.

Minisitiri Kayisire yavuze ko Minisiteri ayoboye irimo gukorana n’abayobozi b’inzego z’ibanze kugira ngo harebwe uburyo bwo gufasha imiryango yagizweho n’ingaruka z’ibyo biza.

Bamwe mu baturiye umugezi wa Sebeya bagerwaho n’ingaruka z’imyuzure iterwa n’uwo mugezi, bavuga ko kuba uwo mushinga wongeye gutangira akazi byabagaruriye icyizere.

Bizimana Boniface, umuturage wo mu Murenge wa Kanama, Akarere ka Rubavu, amazi y’umugezi wa Sebeya yamusenyeye inzu ebyiri muri 2015.
Yagize ati “Umugezi ukomeje kwangiza, kuko utwara imyaka, ibigori , ibishyimbo, ibijumba, ndetse ugatwara n’ubutaka bwacu bwera. Ubu rero turumva twizeye ko bigiye kurangira, ntuzongere kwangiza”.

Ambasade y’u Rwanda muri Mozambique

Mu byatumye iyo ngengo y’imari yiyongera, harimo gufasha za Ambasade nshya u Rwanda rwafunguye, ubwisungane mu kwivuza, gushyigikira gahunda yo guha abana amata mu rwego rwo kurwanya imirire mibi, ndetse no gushyigikira ibikorwa bya siporo mu rwego mpuzamahanga.

Ikindi cyatumye ingengo y’imari ya 2019-2020 yiyongera nk’uko Minisitiri w’Imari n’Igenamigambi yabisobanuye, harimo imishahara y’abakozi bashya bo mu rwego rw’ubuzima ndetse n’abazamuwe mu ntera muri Minisiteri y’Ubuzima.

Vuba aha, u Rwanda rwafunguye Ambasade muri Maroc, Ghana, Mozambique na Angola, hari kandi n’ibikorwa byo kwagura Sitade Amahoro y’i Remera birimo gukorwa kugira ngo ijye yakira imikino itandukanye.

Uko kwiyongera kw’ingengo y’imari, bikorwa hashingiwe ku ngingo ya 41 y’Itegeko Ngenga N° 12/2013/OL ryo kuwa 12/09/2013 ryerekeye imari n’umutungo bya Leta.

U Rwanda ruritegura kwakira amarushanwa mpuzamahanga atandukanye harimo nka, ‘Basketball All Africa games’ izaba umwaka utaha, hakaba ‘CAF Champions League’ rukaba ruzanakira irushanwa rya ‘Union Cycliste Internationale (UCI)’ n’andi atandukanye.

Minisiteri y’Ibikorwa Remezo iri mu zigomba gutanga ibisobanuro, aho igomba gusobanura ingamba zo gufata amazi y’imvura no kubungabunga ibikorwa remezo (Photo:Internet)

Uwo mwanzuro wafashwe hashingiwe kuri raporo yakozwe nyuma y’ingendo Abadepite bagiriye hirya no hino mu gihugu, hagati y’ukwezi k’Ukuboza 2019 na Mutarama 2020.

Minisitiri w’Ibikorwa Remezo azatumizwa asobanure ikibazo cy’imihanda yubakwa bikagaragara ko itujuje ibisabwa, harimo imwe y’amabuye yubatse mu Mujyi wa Kigali bigatuma imwe muri yo yangirika vuba, ndetse ikaba ikeneye gusubirwamo, n’ingamba zihari zo kubikemura.

Azanasobanura ingamba zihari zo gukemura ikibazo cy’amazi y’imvura yangiza ibikorwa remezo, amazi arenga za ruhurura akisuka mu mihanda, amazi aturuka mu mihanda ya kaburimbo yubatswe akangiza ibikorwa by’abaturage, bigakorwa hatitawe ku miterere y’imiturire yegereye umuhanda, ibikorwa remezo byihariye n’iteganyabikorwa rirambye.

Azanavuga ku kibazo cy’amateme n’imihanda byangiritse ariko kubisana bikaba birenze ubushobozi bw’uturere.

Gusana no gusimbuza imiyoboro y’amazi n’amashanyarazi yubatswe kera, hagamijwe kwirinda igihombo kiyiturukaho, ingamba zihari zo gusana amavomo adakora neza ndetse n’atagikora kugira ngo agirire abaturage akamaro n’ibindi.

Inteko Ishinga Amategeko ivuga ko iyo Minisiteri igaragaza ko umubare w’abagerwaho n’amashanyarazi wiyongereye, nyamara mu turere bakagaragaza imibare itandukanye n’iyo Minisiteri igaragaraza.

Mukabagwiza Edda, Visi Perezida w’Inteko Ishinga Amategeko yagize ati “Urugero ni mu Karere ka Nyaruguru. Minisiteri y’Ibikorwa Remezo yagaragaje ko abagera kuri 74% ari bo babonye amashanyarazi, ariko Akarere ko kagaragaza ko abafite amashanyarazi ari 84.7%.

Mu Karere ka Ngororero, Minisiteri yagaragaje ko abagerwaho n’amashanyarazi ari 34.9% mu gihe Akarere kagaragaza ko ari 38.3%.

Mu Karere ka Gatsibo, Minisiteri igaragaza ko ababona amashanyarazi ari 32.3%, mu gihe Akarere kavuga ko ari 43.6%”.

Aho ngo ni hamwe muri henshi hagaragara kunyuranya imibare.

Depite Mukabagwiza yavuze ko nubwo ikwirakwizwa ry’amashanyarazi ryiyongereye rikava kuri 51% muri Kamena 2019 rikagera kuri 67% mu mpera za 2019, urugendo rukiri rurerure kugira ngo ibice byose by’igihugu bizabe bifite umuriro muri 2024.

Mukabagwiza yanabwiye Inteko ko Minisiteri y’Ibikorwa Remezo izanasobanura impamvu kugeza amazi meza mu bice bimwe na bimwe by’Uturere twa Bugesera, Nyagatare na Gatsibo bikiri ikibazo.

Indi Minisiteri igomba kwitaba Inteko Ishinga Amategeko ni Minisiteri y’Ibidukikije.

Minisitiri azatumizwa kugira ngo agaragaze ingamba zirebana n’umutungo kamere w’amazi akomoka ku masoko, ku mvura n’akoreshwa mu ngo, na gahunda yo kuyabyaza umusaruro ukwiye ndetse no kugaragaza ingamba z’imicungire y’amashyamba ya Leta mu gihugu.

Minisiteri ya gatatu izatumizwa imbere y’Inteko Ishinga Amategeko, ni Minisiteri y’imari n’igenamigambi.

Minisitiri azasabwa kugaragaza impamvu abaturage badahabwa ingurane ku gihe nk’uko biteganwa n’itegeko, n’ingamba zo kwishyura ibirarane bimaze igihe nk’uko byakomeje kugezwa ku Badepite mu ngendo bakoze mu myaka yashize kugeza ubu.

Azanasabwa kugaragaza impamvu ikibazo cy’ibirarane RSSB ifitiye amavuriro n’ibigo nderabuzima gikomeje kugaragarizwa Abadepite mu ngendo bakora n’impamvu kidakemuka.

Minisiteri y’Ubutegetsi bw’Igihugu ntiri mu zizatumizwa, ariko irasabwa kugaragaza ingamba zihari muri gahunda y’imirimo y’amaboko (VUP), yo gukora neza imihanda hagatunganywa inzira z’amazi zigatuma iyo mihanda itangirika.

Iyo Minisiteri izanasabwa kugaragaza ingamba zihamye zo gukumira igwingira mu bana bato. Izanagaragaza aho gahunda yo kuvugurura ibyiciro by’ubudehe igeze.

Iyo Minisiteri izanasabwa kugaragaza ingamba ubuyobozi bw’inzego z’ibanze bufite zo gukemura ibabizo bireba umuryango Nyarwanda, harimo amakimbirane mu ngo, ibiyobyabwenge, inda ziterwa abangavu n’ibindi.

Ikindi ni ukugaragaza ingamba zihari ku kibazo cy’abakozi badashyirwa mu myanya uko bikwiye, imyanya ikamara igihe irimo abakozi ku buryo bw’agateganyo.

Hari kandi n’ikibazo cy’ikiguzi umuturage asabwa kugira ngo hakosorwe amakosa yakozwe mu itangwa ry’indangamuntu, kandi umuturage atarabigizemo uruhare.

Muri Minisiteri zigomba gutumizwa imbere y’Inteko Ishinga Amategeko, harimo na Minisiteri y’Uburezi, nubwo itagaragara muri raporo y’Abadepite kuko ubugenzuzi bugikomeje.

Ibiro bya Minisitiri w’Intebe na byo byasabwe guha Komisiyo y’Imibereho Myiza y’Abaturage mu Nteko Ishinga Amategeko, raporo igaragaza uko izo Minisiteri zashyize mu bikorwa iyo myanzuro. Iyo raporo ngo igomba kuba yashyikirijwe iyo komisiyo mu mezi atatu.