Akarere ka Kamonyi kisobanuye imbere ya PAC ku ikoreshwa nabi ry’umutungo w’Igihugu

Komisiyo ya PAC yagaragaje ko hari amafaranga miliyoni 17 FRW yishyuwe imiti yari yatumijwe ariko bikaba bigaragara ko ayo mafaranga yarengeye kuri konti y’umuntu ku giti cye mu mazina y’uwo mukozi.

Ubuyobozi bw’Akarere ka Kamonyi bwisobanuye ko umukozi ushyirwa mu majwi kwiba amafaranga miliyoni hafi 7 FRW yabikoze yohereza amafaranga yo kwishyura imiti koko ariko akabikora yishyura amafaranga kuri konti y’ikigo gicuruza imiti cyahoze cyitwa (CAMERWA) ubu cyabaye (MPPD) amaze guhindura nomero ya Konti y’icyo kigo akuzuza ho nomero ye aho gushyiraho iya Kompanyi yatanze imiti.

Ubuyobozi bw’Akarere ka Kamonyi butangaza ko bwamenye ko umukozi wa Farumasi yibye amafaranga kuri iyo konti y’impimbano yari amaze gukuraho 6,900,00 FRW maze agera kuri miliyoni 10 FRW akagaruzwa atarakurwaho.

Umunyambanga Nshingwabikorwa w’Akarere ka Kamonyi, Emmanuel Bahizi, yabwiye PAC ko nyuma yo kuvumbura ko umubaruramutungo w’Akarere yashyize amafaranga kuri konti ye ahinduye imibare ya konti yari igenewe ayo mafaranga yafashwe akabiryozwa ahanishwa igifungo cy imyaka itatu kandi ategekwa kuyagarura.

Umunyamabanga Nshingwabikorwa w’Akarere ka Kamonyi avuga ko hashize imyaka ine barananiwe kugaruza ayo mafaranga ku buryo hanabayeho gufatira umutungo w’uwari ushinzwe ibaruramutungo ari na ho Inama Njyanama y’Akarere yahereye imenyesha ko iryo deni rihari kandi rikwiye kugaruzwa.

Umwe mu badepite bagize PAC, Jeanne d’Arc Uwimanimpaye, utanyuzwe n’ibisubizo by’Akarere yabajije ukuntu umubaruramutungo yemeje kwishyura miliyoni nk’izo kuri konti mpimbano kandi abikora yifashishije impapuro zibyemeza zasinyweho n’ushinzwe imari mu Karere maze Umunyamabanga Nshingwabikorwa w’Akarere ka Kamonyi avuga ko ibyo byasuzumwe n’urukiko bigahama nyiri ukubikora, ko nta wundi mukozi ufite aho ahuriye n’imari wagaragaweho ubufatanyacyaha.

Umuyobozi wa PAC, Valens Muhakwa, na we utanyuzwe n’ibisobanuro by’Akarere ka Kamonyi yabajije niba koko nta bufatanyacyaha bwabayeho maze abaza impamvu inama njyanama y’Akarere yihutiye kugaragaza no gusaba kugaruza amafaranga yibwe itagishije inama Minisiteri y’Imari no gukurikiza amabwiriza y’Umugenzuzi mukuru w’Imari ya Leta.

Yagize ati, "Twe nk’Inteko Ishinga Amategeko turabona iki ari igihombo kidashobora kugaruzwa ngo amafaranga akoreshwe icyo yari agenewe, tukibaza impamvu mwafashe iki cyemezo cyo kuyishyuza umuntu umwe mu gihe nyamara bigaragara ko hari abantu benshi bari babishinzwe bagize uruhare mu inyerezwa ryayo".

Umuyobozi w’Inama Njyanama y’Akarere ka Kamonyi Emilien Nyoni ndetse n’Ubuyobozi bw’akarere bakomeje kugaragaza ko ntaho bahuriye n’amakosa yakozwe n’umubaruramari ariko PAC ibamenyesha ko igihe umukozi muto ateshutse ku nshingano hakabura gikurikira umukuriye ari we ubazwa ibyakozwe nabi kandi bamenyeshwa ko bakwiye kwitegura ko inkiko zizongera gukurikirana iby’ayo mafaranga akagaruzwa vuba.

Yevgeniy Fedorov wa Vino-Astana Motors ni we wegukanye agace ka mbere ka Tour du Rwanda 2020

Rein Taaramae

Ku mwanya wa mbere haza umunya Esitoniya Rein Taaramae, ukinira ikipe ya Total Direct Energie akaba umwaka ushize yaraje ku mwanya wa kabiri akurikiye Merhawi Kudus wo mu gihugu cya Eritereya wanatwaye Tour Du Rwanda 2019.

Uyu mukinnyi ntazabura kwigaragaza ashaka gutwara Tour Du Rwanda 2020 kuko afite ibigwi mu marushanwa yagiye yitabira dore ko yambaye umwenda w’umuhondo inshuro eshanu.

Rein Taaramae

Rein Taaramae yambaye umwambaro w’umuhondo mu isiganwa rya Vuelta a Burgos, irya Arctic Race yose yo mu gihugu cy’Ubuholandi mu mwaka wa 2015, yatwaye umwenda w’umuhondo muri Tour de l’Ain muri 2009, ndetse anawutwara muri Tour de Slovénie muri 2016.

Rein Taaramae yagiye atsinda uduce (Etapes), mu marshanwa akomeye ku mugabane w’Uburayi harimo n’isiganwa rikomeye rimara ibyumweru bitatu rya Tour de France, Giro d’Italia na Vuelta a Espana

Taaramae ni umwe mu bakinnyi bazi gucunga neza ibihe bakoresha mu marushanwa nk’uko byagiye bigaragara mu marushanwa atandukanye yagiye yitabira mu makipe atandukanye agera kuri 14 yakinnyemo kuva mu mwaka wa 2007.

Rein Taaramae yabaye uwa 11 muri Tour de France 2011, aba uwa kabiri mu irushanwa rya Vuelta a Andalucia muri 2012, yabaye uwa gatanu muri Tour de Romandie, Volta a Catalunya na Criterium International mu mwaka wa 2011, aba uwa kane muri Tour de Paris-Nice muri 2011.

Joseph Areruya

U Rwanda rufite abakinnyi batandatu muri Team Rwanda barimo na Areruya Joseph w’imyaka 24 na Mugisha Samuel bafite amateka akomeye mu mukino w’amagare ku mugabane wa Afurika ku buryo bazaba bahanzwe amaso muri iyi Tour du Rwanda 2020.

Areruya Joseph

Ugereranyije n’imibare, Areruya Joseph afite amateka mu mukino w’amagare ku mugane wa Afurika kuko yatsinze amasiganwa akomeye atatu arimo no kurangiza yambaye umwenda w’umuhondo muri Tour du Rwanda inshuro ebyiri zikurikiranya muri 2017, na 2018, yanatwaye kandi isiganwa rya La Tropicale Amissa Bongo ndetse na Nations de l’Espoir Blue Line.

Areruya uri ku mwanya wa cyenda ku rutonde rusange rw’isiganwa mu gace ka mbere ka tour du Rwanda 2020, azwiho kigira imbaraga mu kuzamuka cyane nka Mugisha Samuel akaba yarigaragaje cyane mu gace ka karindwi kazamuka ka km 4.5 k’isiganwa Kigali Nyamirambo muri Gashyantare 2019.

Biniyam Ghirmay Hailu

Biniyam Ghirmay Hailu wo mu gihugu cya Eritereya ukinira ikipe ya Nippo Delko One Provence, ni umwe mu basore bakiri bato uri mu ikipe y’igihugu ya Eritereya.

Biniyam Ghirmay Hailu

Muri Tour du Rwanda yabashi gutsinda agace ka gatanu aza ku mwanya wa gatatu mu gace ka kabiri umwaka ushize, ubu ari ku mwanya wa gatatu mu gace ka mbere ka Tour du Rwanda 2020.

Mu marushanwa yitabiriye yagiye atangaza abantu aho muri 2018 yabaye uwa mbere mu babashije gutsinda Remco Evenepoel umuhungu wa Patrick Evenepoel wakanyujijeho mu mukino wo gusiganwa ku magare, icyo gihe Ghirmay yamutsindiye mu irushanwa ry’abakiri bato rya Aubel-Thimister-Stavelot mu gihugu cy’Ububirigi.

Umwaka ushize wa 2019 yitwaye neza mu isiganwa rya La Tropicale Amissa Bongo, aho yatsinze uduce dutatu akanahigika Umudage André Greipel amutsindiye ku murongo basorezaho mu gace ka gatanu k’isiganwa, akaba aza ku mwanya wa 11 ku rutonde rwa UCI.

Patrick Schelling

Uyu musore wo mu gihugu cy’Ubusuwisi waje ku mwanya wa gatandatu mu gace ka mbere ka Tour du Rwanda 2020 nawe azaba yitonderwa kuko yatwaye Tour du Loir na Cher E Provost muri 2016, akaba ari umwe muri batanu bahagarariye ikipe ya Isiraheri, Israel Cycling Academy, akaba ari ubwa kabiri yitabira Tour du Rwanda.

Patrick Schelling

Yabaye uwa kane inshuro ebyiri mu irushanwa rya Tour of Hainan mu mwaka wa 2016 na 2018, akaba yagiye aza mu 10 ba mbere mu masiganwa nka Tour de Suisse mu 2019, Tour of Austria muri 2018 na, Tour de Hongrie muri 2018, na Tour of Hainan muri 2017.

Mulu Hailemichael

Uyu musore wo mu gihugu cya Etiyopiya w’imyaka 21 nawe ari mu ikipe ya Nippo Delko One Provence ni ubwa gatatu yitabira Tour du Rwanda akaba aza ku mwanya wa 15 ku rutonde rusange rw’iri siganwa.

Mulu Hailemichael

Yazamutse kuri Poidum mu mwaka wa 2018, akaba yarabaye uwa 15 muri rusange muri 2018, uyu musore ukiri muto yaje ku mwanya wa 13 ndetse no ku mwanya wa gatanu mu isiganwa ry’abakiri bato rya Tour de La Provence akaba akunze kwigaragaza mu gusoza uduce mu masiganwa.

Urugero ni nko muri Tour du Rwanda 2018 aho yaje ku mwanya wa gatatu mu gace ka kabiri k’isiganwa, yabaye uwa gatandatu mu gace ka karindwi, ndetse aba uwa gatanu mu gace ka munani muri Tour du Rwanda 2019.

Artem Ovechkin

Uyu musore wo mu gihugu cy’Uburusiya ukinira ikipe ya Terengganu Inc. TSG Cycling Team yabaye uwa gatatu mu 2019 muri Tour de Langkawi yanambayemo umwenda w’umuhondo muri 2018.

Artem Ovechkin

Yanambaye umwenda w’umuhindo muri Tour of Antalya mu 2018, akaba ari ubwa mbere yitabiriye Tour du Rwanda akaba azaba atoroshye muri iri siganwa kuko amenyerewe mu masiganwa yo hanze nko mu gihugu cy’Ubushinwa, Silovaniya na Ositarariya.

Yevgeniy Fedorov

Yevgeniy Fedorov

Uyu musore ufite ubwene gihugu bwa Kazakisitani ari mu Rwanda ku nshuro ye ya mbere, akaba akinira Vino – Astana Motors, akaba yaritwaye neza muri Tour de Langkawi aho yaje ku mwanya wa kabiri, ku rutonde rusange rw’iri siganwa, ndetse akaba yaratsinzemo agace ka mbere, aba uwa 13 mu gace ka gatandatu, n’uwa cyenda mu gace karyo ka kane.

Temesgen Buru

Temesgen Buru

Uyu musore w’imyaka 25, akomoka mu gihugu cya Etiyopiya ari kumwe n’ikipe ya ProTouch, akaba ari ubwa gatatu yitabira Tour du Rwanda , akaba yaragiye aza mu myanya icumi ya mbere mu myaka ya 2014 na 2016 ku rutonde rusange rw’isiganwa rya Tour du Rwanda, aho yanaje ku mwanya wa kabiri mu gace ka kane k’iri siganwa.

Daniel Muñoz

Ni uwo mu gihugu cya Korombiya akaba ku myaka ye 23 akinira ikipe ya Androni Giocattoli – Sidermec, akaba azwiho kuzamuka cyane, muri iri siganwa akaba azaba ashaka kwigaragaza hamwe na mugenzi we nawe unyonga cyane ahazamuka Jhonatan Restrepo.

Muñoz yagiye yigaragaza cyane ku myanya y’imbere mu mwaka wa 2019 mu marushanwa yitabiriye, aho yaje ku mwanya wa mbere muri Tour of Bihor – Bellotto, yabaye uwa kabiri muri Sibiu Cycling Tour, yaje ku mwanya wa munani muri Tour de Hongrie, uwa cyenda muri Adriatica Ionica Race, aba n’uwa 23 muri Vuelta a Burgos.

David_Lozanomtb

Uyu musore ukinira ikipe yo mu gihugu cya Espagne ya Novo Nordisk azwiho kwanikira abandi ahazamuka, akaba aje mu Rwanda nyuma yo gutsinda isiganwa rya Tour of Taiyun ryo mu misozi ribera mu gihugu cyo mu Bushinwa umwaka ushize.

David Lozanomtb

Yaje ku mwanya wa gatanu n’uwa gatandatu muri Tour du Rwanda 2018 na 2019, aza ku mwanya wa gatanu ku rutonde rusange rwa Tour of Estonia mu 2018, yabaye uwa 17, na 18 muri Korowasiya na Siloveniya mu myaka ya 2018 na 2019.

N’ubwo ubutumburuke bw’u Rwanda bushobora kutazamworohera muri iri siganwa, ni we wegukanye umwanya wa mbere mu isiganwa riheruka ry’amagare yo mu misozi mu gihugu cya Esipanye.

Kuzamura ibipimo by’abakoresha ikoranabuhanga byafashweho umwanzuro mu nama mpuzamahanga y’ibihugu ku ikoreshwa rya Interineti (IGF) yabereye i Kigali muri uyu mwaka wa 2019, bikaba byanagarutsweho mu nama nk’iyi yabereye i Berlin mu gihugu cy’u Budage kuri uyu wa kane tariki ya 29 Ugushyingo 2019.

N’ubwo bigaragara ko mu Rwanda habayeho kongera ibikorwa remezo by’ikoranabuhanga rya Interineti, ndetse no guhanga udushya mu ikoranabuhanga, u Rwanda ntiruragera ku ntego yarwo rwari rwihaye yo kuba nibura muri 2020, abakoresha ikoranabuhanga rya Interineti bazaba bageze kuri 11,8%.

Bimwe mu bikorwa by’ingenzi byakozwe ngo ikoranabuhanga rya Interineti rizamuke ni nko gutangiza gahunda y’ubukangurambaga mu ikoranabuhanga yiswe (DAP) kuva mu mwaka wa 2017, aho abakangurambaga 150 muri iyo gahunda babashije kugera ku baturage ibihumbi 41 babahugura kuri iryo koranabuhanga.

Mu bijyanye no kongera ibikorwa remezo by’ikoranabuhanga rya Interineti, u Rwanda rwabashije kugeza hirya no hino umuyoboro wa Fibure Obutike (Fibre Optique) ku burebure bwa km 7000 aho nibura habonetse 96% bya Interineti yihuta ya 4G.

U Rwanda kandi rwanabashije gutangiza uruganda rukora telefone zigezweho zikorerwa mu Rwanda ( Mara Phone).

U Rwanda kandi rwabashije kwinjiza 98% bya serivisi za Leta mu ikoranabuhanga, 52% byazo bikaba byifashisha Interineti mu kugeza serivisi ku baturage, Abanyarwanda 74,8% bakaba bakoresha Telefone ngendanwa, mu gihe ikoranabuhanga ryo guhanahana amafaranga rizwi nka (Mobile Money) hifashishijwe Telefone rigeze kuri miliyoni 10.

U Rwanda kandi rwashoye miliyoni eshanu z’amadorari ya Amerika mu gushyiraho ibyumba by’ikoranabuhanga mu mashuri yisumbuye kuva mu mwaka wa 2016, kugeza ubu hakaba hamaze gushyirwaho ibigo 60, birimo Mudasobwa 3000 mu gihugu hose ni ukuvuga ko buri kigo nibura gifite Mudasobwa 50.

Umuyobozi mukuru w’Ikigo cy’ikoranabuhanga mu Rwanda (RICTA) Alex Ntale avuga ko n’ubwo ibyo byose byakozwe, impuguke mu ikoranabuhanga zigaragaza ko bikigoye kwegereza no gukoresha ikoranabuhanga hose.

Agira ati, “Turatera imbere ariko ku muvuduko muto ugereranyije n’ukenewe, dukeneye gushyira imbaraga nyinshi mu ikoranabuhanga kugira ngo dukemure ibibazo bigihari, inzira ishoboka ikaba ari ukwegereza ikoranabuhanga mu mashuri.

Nk’uko byatangarijwe muri iyo nama y’ibihugu ku ikoreshwa ry’ikoranabuhanga rya Interineti, Umuyobozi w’Ikigo cyita ku by’ikoranabuhanga rya Interineti mu Rwanda Grace Ingabire yavuze ko u Rwanda rufite umushinga mugari ugera muri 2020 mu kuzamura ibipimo by’abarikoresha.

Agira ati, “Guhera muri 2020 tuzahera ikibazo mu mizi aho duteganya kujya mu bigo by’amashuri abanza n’ayisumbuye tugatangira kubigisha ikoreshwa rya Interineti”.

“Iyo ni yo nzira ya mbere tuzifashisha kandi twizeye ko izatanga umusaruro mwiza mu kuzamura ibipimo by’abakoresha ikoranabuhanga rya Interineti.”

Ingabire avuga ko u Rwanda rufite abanyeshuri babarirwa muri Miliyoni eshatu mu mashuri abanza n’ayisumbuye bazagerwaho n’ikoranabuhanga rya Interineti, bigakorwa abagenerwabikorwa bahabwa urubuga mu gutanga ibitekerezo by’uko bifuza iryo koranabuhanga ryabyazwa umusaruro hanyuma bigatangwaho ibitekerezo n’inzego zibishinzwe.

Agira ati, “Tuzakusanya ibitekerezo byabo, tubishyikirize inzego zibishinzwe muri Minisiteri y’Ikoranabuhanga. Ibyo byifuzo bizaganirwaho mu nama ngarukamwaka y’Igihugu yiga ku bijyanye n’ikoranabuhanga rya Interineti (IGF), kugira ngo bihabwe umurongo byakoreshwamo hagamijwe kuzamura ibipimo by’ikoranabuhanga ku baturage bacu.”

Kugira ngo ibyo bizagerweho kandi ngo hakenewe ko inzego zisanzwe zitanga serivisi z’Ikoranabuhanga zegerezwa aho rikenewe bitarenze umwaka wa 2020.

Urugero ni nko kuba ikigo cy’igihugu gishinzwe uburezi REB kigiye gutangiza umushinga wo kugeza Interineti ya Satellite mu bigo 20 by’amashuri yo mu cyaro, ibyo bikazakorwa muri Mutarama 2020.

Umuyobozi mukuru w’umushinga w’ikoreshwa ry’Umuyoboro mugari wa Interineti, Broadband System Corporation (BSC) Christian Muhirwa avuga ko bagiye kuvugurura ibijyanye no kunoza uburyo Interineti yageraga mu bigo by’amashuri 700 wakoreragamo, ibyo bikazatuma imyigishirize gakondo icika ahubwo hakajya hanakoreshwa ikoranabuhanga ryo kwigishiriza ku byuma kabuhariwe.

Agira ati, “Iryo koranabuhanga rizafasha abanyeshuri kwiga amasomo atandukanye akenera ikoranabuhanga rihanitse, nk’abiga ibijyanye no kwihangira imirimo, ubukungu no guhanga udushya, bifashishije iryo koranabuhanga rya Interineti yihuse bikazatuma barangiza amasomo bafite ubumenyi bubafasha guhangana ku isoko ry’umurimo.

Impuguke mu kigo cy’Igihugu cy’ikoranabuhanga rya Interineti zigaragaza ko Leta ikwiye kandi kureba uko igiciro cya Interineti kigabanuka kuko abayikenera bazakomeza kwiyongera, urugero ni nko mu nzego za Leta aho zisigaye zikoresha 10G ku isegonda mu gihe mu mwaka wa 2006 izo nzego zakoreshaga 10mgb ku isegonda.