Ababyeyi be bamusize akiri umwana muto bajya ku rugamba rwo kubohora igihugu

Akiri umwana muto, Thomas Muyombo ntiyagize amahirwe yo kwitabwaho no guhabwa urukundo rwuzuye n’ababyeyi be kuko basize umuryango bakajya ku rugamba rwo kubohora igihugu.
Nubwo yahuye n’ubuzima bugoye akiri muto, Thomas Muyombo yaje gukura, abaho afite intego, ndetse abasha kuyigeraho, nk’uko abigarukaho muri iyi nkuru ishingiye ku buhamya yahaye Kigali Today na KT Press.

Ku izina rye hiyongereyeho andi ashingiye ku byo yize, aba Dr Thomas Muyombo, abifatanya n’umuziki agakoresha izina rya Tom Close.

Ashimira ababyeyi be (batakiriho) kuko batizigamye ahubwo bahisemo kwerekeza ku rugamba rwo kubohora igihugu, bazi neza ko bashobora no kuhasiga ubuzima, ariko bafite intego bashaka kugeraho, yo gusubirana uburenganzira mu gihugu cyabo.
Tom Close avuga ko atakunze kubana na se, ndetse ko yamubonye inshuro eshanu zonyine mu buzima bwe. Se yagiye mu gisirikare Tom Close akiri muto cyane.
Nyina na we yaje kujya ku rugamba, Tom Close arerwa na sekuru na nyirakuru babyara nyina.

Se wa Tom Close

Se wa Tom Close yitabye Imana mu 1995, nyina yitaba Imana mu 1996. Bapfuye urupfu rusanzwe urugamba rumaze kurangira. Se yari Lieutenant Colonel, nyina akaba yari Sergeant.
Nyina ngo ubwo yajyaga ku rugamba mu 1991 yajyanye Tom Close ku mucuruzi w’umunyamahanga bari baturanye i Masindi witwaga Johnson amubwira ko icyo azajya akenera nk’ikayi cyangwa ikindi gikoresho azajya agenda akagifata.

Tom Close avuga ko icyo gihe akiri umwana yakundaga guta amakayi, andi akayibagirwa cyangwa bakayamwiba.

Nyina agenda ngo ntiyamubwiye aho agiye, ahubwo agarutse mu mpera za 1992 amaze umwaka urenga nibwo yamubwiye ibyo yari arimo.

Tom Close yari yaratangiye ishuri mu mashuri abanza ndetse akajya yiga aba mu kigo n’ubwo yari akiri muto cyane, kuko ababyeyi be bari baragiye ku rugamba. Abavandimwe be babiri babanaga na sekuru aho bita Kiboga muri Uganda. Na we ngo yaje kujyayo mu mpera za 1993 no mu ntangiriro za 1994, ni ho bavuye bataha mu Rwanda.

Ababyeyi be bajya ku rugamba kuko bari bazi ko no gupfa bishoboka, basize baguriye sekuru wa Tom Close isambu nini n’inka bamubwira ko nibatagaruka abana babo bazaba aho.

Tom Close (akiri umwana), sekuru, nyina (wambaye ikanzu y’ubururu), abavandimwe babiri ba nyina n’umusirikare wari inshuti y’uwo muryango

Uwo sekuru ni na we batahanye mu Rwanda mu 1994 urugamba rwo kwibohora rwenda kurangira. Ngo bageze mu Rwanda basanga ibintu byinshi bikimeze nabi kuko aribwo Jenoside yari ikirangira. Babanje kujya kuba i Murambi mu Ntara y’i Burasirazuba.

Mu mpera za 1994 nibwo Tom Close yongeye kubonana na nyina, ariko akaba atari azi niba ababyeyi be bari bakiriho.

Ati “Mama yasanze turimo gukina umupira n’abandi bana, ngiye kubona mbona araje, ambonye araturika ararira, nanjye byarandenze nyine numvaga kongera kumubona ari nk’inzozi.”

Tom Close na nyina bahise baza kuba i Kigali ku Gishushu muri uwo mwaka wa 1994. Icyo gihe ngo nibwo nyina yatangiye kumubwira inkuru z’urugamba, amusobanurira impamvu bari barabasize.

Tom Close ati “Mama yambwiye ko twagombaga kuza mu Rwanda kubera ko igihugu twari turimo ntabwo hari iwacu, kandi mu Rwanda ntabwo bashakaga ko tuza ku mahoro. Rero byabaye ngombwa ko dukoresha izindi mbaraga. Byibura twifuje ko bakwemera tukaza ku mahoro, byanze dukomeza urugamba.”

Nyina wa Tom Close

Nyina ngo yamubwiye ko icyo barwaniraga kwari ukugira ngo Abanyarwanda bose bagire uburinganire, bishyire bizane, babone amahirwe angana mu gihugu cyabo.

Mu gihe yari akiri ku ishuri yiga muri Uganda, Tom Close avuga ko abana biganaga bamusererezaga bakamukorera ivangura kubera ko ari umunyamahanga, bakamubwira n’amagambo mabi bashingiye ku kuba ari umunyamahanga.

Ati “Ku ishuri iyo nabaga nashwanye n’abandi bana, jyewe baransererezaga bati wa kanyarwanda we!”

Ibyamubagaho ku ishuri n’ibyo nyina yamubwiye ko babaga mu gihugu kitari icyabo ngo Tom Close yambyumvise neza ubwo nyina yabimusobanuriraga nyuma y’urugamba, yumva impamvu bagombaga kujya ku rugamba rwo kubohora u Rwanda.

Mu 1995 Tom Close yahise atangira kwiga mu mashuri abanza mu kigo kiri hafi yo ku Gishushu ahitwa mu Rugando. Ngo yahize igihembwe kimwe ahita ahava ajya mu kigo cya Remera Academy giherereye i Remera aho bita mu Giporoso, naho aza kuhava yerekeza muri La Colombière.

Tom Close ntiyagize amahirwe yo kumarana igihe kirekire n’ababyeyi be ngo bishimire ibihe byiza nyuma y’urugamba rwo kubohora igihugu. Se yahise yitaba Imana mu 1995.

Urugamba rwatumye se wa Tom Close atabona umwanya munini wo kubana n’umuryango we

Icyakora se na nyuma yo kubohora igihugu ngo ntiyakunze kuza kubasura kenshi, kuko ngo yaje kubareba inshuro nk’ebyiri gusa. Ngo kubona uruhushya ntibyamworoheraga, kuko yari n’umusirikare wo ku rwego rwo hejuru (yari Lieutenant Colonel)

Tom Close ati “Mu buzima bwanjye muzi gakeya. Yishwe n’uburwayi, twabimenye nyuma tubibwiwe na Mama.”

Ibyo bintu ngo Tom Close byaramubabaje ariko kubera ibindi bibazo byinshi yabayemo, ibibazo ngo yari yarabimenyereye.

Nyuma y’umwaka umwe, nyina na we yaje kwitaba Imana mu 1996 ndetse baramushyingura mu isambu y’umuryango ariko nyuma ngo umurambo we baje kuwimurira mu irimbi rya Gisirikare i Kigali, naho se we yashyinguwe i Nyamata ku isambu y’iwabo.

Imwe mu mafoto ya Tom Close ya vuba (aha yari kuri KT Radio)

Tom Close avuga ko nyina amaze gupfa, we n’abandi babanaga i Kigali bahise basubira kwa sekuru mu burasirazuba (usibye umwe wasigaye i Kigali ashakisha ubuzima), kuko sekuru we yari akiriho, yitabye Imana nyuma muri 2000, Tom Close akomeza kubana na nyirakuru ubyara nyina (yitabye Imana muri 2019).

Bageze Iburasirazuba basanze i Murambi sekuru yarahavuye yimukira ahitwa i Kibondo. Aho i Kibondo ni ho Tom Close yakomereje amashuri abanza, gusa ngo cyari ikigo kibi kuko byabasabaga kwitwaza intebe zo kwicaraho n’amazi yo gutera mu ishuri kugira ngo batarwara imbaragasa. Ngo hari habi agereranyije no muri La Colombière aho umubyeyi we yari yaramujyanye kwiga, dore ko cyari ikigo kiri mu bya mbere byiza i Kigali. Aho i Kibondo yaharangirije amashuri abanza ari uwa mbere, atsinda ikizamini cya Leta akomereza i Kiziguro mu cyiciro rusange (Tronc Commun), nyuma akomereza icyiciro cya kabiri cy’amashuri yisumbuye i Kigali muri LDK.

Aho igitekerezo cyo kwiga ubuganga cyaturutse

Tom Close avuga ko akimara kubonana na nyina yasanze asigaye arwara igifu akaremba cyane ntajye ku kazi.

Tom Close ati “Namuhaye isezerano ko ninkura nzaba umuganga nkazamuvura. Icyo gihe rero nahise ngira iyo ntego. Ni ikintu nagombaga gukora mu buzima bwanjye nkakigeraho.”

Akirangiza amashuri yisumbuye yahise ajya kwiga muri Kaminuza i Butare, ndetse yiga ibyerekeranye no kuvura nk’uko yari yarabisezeranyije umubyeyi we.

Icyakora mbere y’uko ajya kwiga i Butare ngo yagerageje inshuro ebyiri kujya mu gisirikare ariko ntibyamukundira, akavuga ko ubwo ari ko Imana yabishatse kugira ngo abe akora ibyo akora ubu. Ngo yumvaga ashaka kujya mu gisirikare agakomereza aho ababyeyi be bari bagejeje mu gukorera igihugu.

Kugeza ubu Tom Close ni umuganga wabyigiye akaba n’umwe mu bafite izina rikomeye mu muziki mu Rwanda.

Tom Close na Madamu

Avuga ko muri ubwo buzima bwose yaciyemo, ikintu yumva kimuha imbaraga kikanamufasha gutera imbere, gishingiye ku biganiro yakundaga kugirana na nyina. Ngo ntabwo yamuganirizaga nk’umwana ahubwo yamuganirizaga nk’umuntu mukuru amubwira icyo barwaniye, akamubwira uko urugamba rwagenze. Nyina ngo ntiyakundaga kuba ari imbere ku rugamba kuko yabaga mu by’amafaranga ari na byo yize (Finance) akaba yaranabikozemo muri Minisiteri y’Ingabo (MINADEF) mbere y’uko yitaba Imana.

Ati “Ikimpa imbaraga ni uko ibyo mama yambwiye barwaniye byose njya mbibona. Abasigaye barimo kubishyira mu bikorwa. Yajyaga ambwira ko bifuza ko igihugu gitera imbere, ko barwaniye kugira ngo bazane Amajyambere.”

“Rero ibyo yatubwiye barwaniye byose, uyu munsi ndamutse mpfuye nkamusanga ahantu ari namubwira nti ibyo mwarwaniye byagezweho, n’ibitaragerwaho birimo kugerwaho cyangwa bizagerwaho kandi hari icyizere.”

Tom Close ubu ni umugabo wubatse afite umugore n’abana babiri, akagira n’abavandimwe be babiri, mukuru we na mushiki we. Avuga ko byari kuba bibabaje iyo ababyeyi be barwanira igihugu uyu munsi kikaba ari kibi nk’uko cyahoze mbere.

Imwe mu mafoto meza y’iri rushanwa yafatiwe mu muhanda Kigali - Musanze

Ni isiganwa rihuruza abanyamahanga bakabasha kwirebera ibyiza bitatse u Rwanda biboneka hirya no hino mu gihugu.

Iri siganwa mpuzamahanga ryatangiye muri 2009 rigiye kuba ku nshuro ya 12 rikaba ndetse ryarazamuwe mu ntera rishyirwa ku rwego rwa 2,1 riba rimwe mu masiganwa akomeye ku mugabane wa Afurika. Kurizamura mu ntera kandi bijyana no kuzamura ibihembo ku baryitabira.

Mu gihe iri siganwa riba usanga abantu ari benshi ku mihanda bashaka kwirebera uko abasiganwa barushanwa kunyonga igare.

Biteganyijwe ko kuri iyi nshuro yaryo ya 12 rizaba guhera tariki 23 Gashyantare 2020 kugeza tariki 01 Werurwe 2020, bivuze ko rizamara icyumweru kimwe, abaryitabiriye bazenguruka hirya no hino mu gihugu.

I Rubavu ku murongo usoza isiganwa

Imibare igaragaza ko buri gace kagize inzira abasiganwa banyuramo gahuruza ababarorwa muri miliyoni eshatu. Ni umubare munini ugereranyije n’ibihumbi 25 biteranira muri Sitade Amahoro iyo habereyemo umukino ukomeye, urugero wahuje nk’amakipe yo mu mupira w’amaguru mu Rwanda akunze guhangana ya APR na Rayon Sports.

Iri siganwa rizaba mu mpera z’uku kwezi kwa kabiri biteganyijwe ko rizazenguruka mu bice umunani mu gihe cy’iminsi umunani, abasiganwa bakazazenguruka ku ntera ingana n’ibirometero 882,9.

Abanyakigali by’umwihariko ni bamwe mu bazaryoherwa cyane n’iri siganwa, dore ko uduce twaryo tune tureshya n’ibirometero 324.9 abazadusiganwa bazajya bahagurukira i Kigali.

Abasiganwa mu muhanda wa Nyabugogo berekeza i Musanze

Utwo ni:

Agace ka mbere: Kigali – Kigali (114.4km),

Agace ka kabiri: Kigali – Huye (120.5km),

Agace ka karindwi : Nyamirambo – Mur de Kigali hazwi nko Kwa Mutwe (4.5km),

Agace ka munani kongewemo katari gasanzwemo: Kigali (Expo Ground) – Kigali (Rebero) (89.3km).

Aka gace gashya kazafasha abari muri iryo siganwa n’abandi bazaryitabira kwirebera umujyi wa Kigali wose uko wakabaye.

Icyakora ni agace kazamuka cyane, dore ko karimo umusozi wa Rebero, aka gace kakazagaragaramo abahanga mu kuzamuka ku igare.

Rubavu

Uzi kuzamuka cyane ni we uhabwa amahirwe yo kuzatsinda aka gace ka nyuma gasimbuye ako kwa Mutwe abasiganwa bajyaga bazamuka ari aka nyuma.

Muri Kigali hari uduce dukunze guteraniramo abafana benshi baba bashaka kwirebera isiganwa ry’amagare. Aba na bo nta kabuza kuri iyi nshuro bazaryoherwa. Abo ni nk’abazaba bari kuri Stade Amahoro i Remera hafi y’inyubako ya Kigali Arena, kuri Kigali Convention Centre, no mu gace ka Nyabugogo gafatwa nk’amarembo magari yinjira muri Kigali.

Mu muhanda uva i Huye werekeza i Rusizi, abazitabira isiganwa ry’amagare bazaryoherwa no kwirebera amagare mu misozi ya Nyamagabe, mu ishyamba rya Nyungwe no mu bice bya Nyamasheke bibereye ijisho kubera icyayi cy’u Rwanda gihinze ku misozi yaho, mbere y’uko bagera i Kamembe hafi y’u mupaka w’u Rwanda na Repubulika Iharanira Demokarasi ya Congo.

Rubavu - Musanze

Abazasiganwa kandi kuri iyi nshuro bazerekana koko niba bashoboye, hamwe mu hazapimirwa ubushobozi bwabo hakaba ari mu gace kava i Rusizi kerekeza i Rubavu ahari intera y’ibirometero 206,5. Ni intera na yo iryoheye ijisho ku mihanda yo ku nkengero z’ikiyaga cya Kivu, ahazwi nka Kivu Belt.

Muri ibi bice haboneka ikawa nziza nk’iya Kinunu, n’imirima myiza y’icyayi muri ibyo bice by’Uburengerazuba bw’u Rwanda.

Ni ibice bibonekamo ibiribwa n’ibinyobwa bitandukanye nk’isambaza, amata, icyayi, inanasi, ibirayi, amagi, n’ibindi bitandukanye byanyura abahagenda.

Rubavu

Ni urugendo rwerekeza mu bice by’Uburengerazuba bw’Amajyaruguru mu bice bya Nyabihu bisatira Ibirunga iwabo w’ingagi.
Muri ibyo bice bya za Mukamira muri Nyabihu kandi ni iwabo wa Samuel Mugisha wamamaye mu magare akaba ari na we wegukanye iryo siganwa rizenguruka u Rwanda muri 2018.

Aha ni hamwe mu haba abafana benshi b’amagare, dore ko hari benshi bahaturuka bazwi mu kunyonga igare.

Kigali

Ahandi hitezwe uburyohe bw’igare ni ku muhanda Musanze – Muhanga, ahaba abafana b’amagare batari bake, nk’uko bigaragarira amaso y’abanyura muri uwo muhanda mu gihe cy’isiganwa.

Dore uko gahunda y’isiganwa rya Tour du Rwanda 2020 iteye:

Stage 1 Kigali Arena - Rwamagana - Kigali Kimironko 114,4 Km

10h30-13h15

Stage 2 Kigali - Huye, 120.5 Km

10h00-13h15’

Stage 3 Huye - Rusizi, 142Km

9h30-13h25’

Stage 4 Rusizi - Rubavu, 206,3 Km

8h00-13h45’

Stage 5 Rubavu - Musanze, 84,7 Km

11h00-13h15’

Stage 6, Musanze - Muhanga, 127,3 Km

9h00-12h30’

Stage 7 Kigali Nyamirambo, 4.5 Km

1er coureur: 14h00

Dernier coureur: 15h20

Stage 8 Kigali Gikondo - Kigali Rebero, 89,3 Km

10h30-12h55’

Kanda HANO kugira ngo umenye byinshi ku miterere y’uduce tuzaba tugize Tour du Rwanda 2020.

Ku muhanda Rubavu - Musanze

Muri 2018 Samuel Mugisha yageze i Huye ari uwa mbere

Rubavu

Rwamagana - Kayonza

Ku kiraro cyo ku Kinamba mu mujyi wa Kigali werekeza i Nyabugogo

Nyabugogo hafi yo kwa Mutangana

Kigali - Rwamagana

Kwa Mutwe

Nyabihu

I Rwamagana mu Kabuga ka Musha. Itungo ririnda urugo na ryo ryari ryaje kwihera ijisho

Muhanga

Rwamagana

Muri Nyabugogo abantu baba ari benshi bamwe bakurira ku modoka ngo babashe kwirebera amagare

Amafoto: Plaisir Muzogeye

Pasiteri Antoine Rutayisire yatanze inyigisho ku bwiyunge bugamije amahoro n’iterambere birambye

Ubwo yigishaga ijambo ry’Imana mu masengesho ngarukakwezi yo gusabira igihugu n’abayobozi bacyo ku wa gatandatu tariki 10 Kanama 2019, Pasiteri Rutayisire yatanze ubuhamya bukomeye bugaragaza impamvu Abanyarwanda bakwiye kunga ubumwe.

Yifashishije ingero z’ibyamubayeho, rumwe muri izo ngero rukaba ari ivangura ryakorwaga mu ishuri mu gihe yigaga, urundi rukaba ari ikiganiro yagiranye n’umugore wo muri Amerika.

Uwo mugore ngo yagaragarije Pasiteri Antoine Rutayisire ko atumva impamvu mu Rwanda hariho politiki y’Ubumwe n’Ubwiyunge.

Uwo mugore ngo yari mu nama imwe na Rutayisire nuko mu gihe cy’akaruhuko amujyana ku ruhande aramubaza ati “Kubera iki muhatira abarokotse Jenoside kwiyunga n’ababiciye ababo? Mwakagombye kubaha umwanya bakababazwa n’ibyababayeho.”

Pasiteri Rutayisire yasubije uwo mugore ko abarokotse badahatirwa kwiyunga n’ababiciye ababo, ahubwo ko babagira inama yo kwiyunga n’ababahemukiye kuko nta kindi basanga cyakorwa usibye kubababarira no kubana nk’abavandimwe.

Ati “Igihugu cyasanze nta yandi mahitamo usibye kunga Abanyarwanda nyuma ya Jenoside yakorewe Abatutsi.”

Kugira ngo uwo mugore arusheho kubyumva, Pasiteri Antoine Rutayisire yakomeje kumusobanurira yifashishije urundi rugero aho muri Amerika iyo hari umuntu urwaye ahamagara imbangukiragutabara (ambulance), bikaba bitandukanye no mu Rwanda ho iyo umuntu arwaye, ku ikubitiro yihutira guhamagara umuturanyi. Urwo rugero yarutanze agaragaza impamvu ubwiyunge ari ingenzi mu Banyarwanda, dore ko hari n’umugani ugira uti “Abishyize hamwe nta kibananira.”

Ibyo yabijyanishije n’ijambo ry’Imana aho muri Bibiliya mu Itangiriro 11:1- 6 bavuga ku bishyize hamwe bakubaka umunara w’i Babeli.

Pasiteri Rutayisire yagarutse kandi ku mateka y’u Rwanda, asobanura uburyo muri Repubulika ya mbere n’iya kabiri Abanyarwanda bahoraga bibutswa ko batandukanye.

Yabisobanuye yifashishije urugero rw’ibyabaye mu ishuri ryabo ubwo yigaga mu mashuri abanza.

Ati “ Icyo gihe mwalimu yasabye Abahutu guhaguruka barabikora, asaba Abatutsi guhaguruka na bo barabikora, noneho asabye Abatwa guhaguruka, umukobwa umwe arahaguruka.”

“Mwalimu yatubajije niba hari uwasangira ku isahani imwe n’uwo mukobwa, twese tuvuga ko tutasangira na we. Uwo mukobwa ntiyagarutse ku ishuri.”

Pasiteri Antoine Rutayisire avuga ko ivangura risa n’iryo na we ryamubayeho ubwo yigishaga muri kaminuza. Ngo yagize amahirwe yo gutsindira kujya kwiga PhD muri kaminuza yo muri Leta zunze Ubumwe za Amerika, ariko Minisiteri y’Uburezi imwohereza kwigisha mu ishuri ryisumbuye ryo mu cyaro, ivuga ko adakwiye kujya kwiga icyo cyiciro cy’amasomo yo ku rwego rwa PhD.

Pasiteri Rutayisire ati “Nabajije muri Minisiteri y’Uburezi impamvu bankoreye ibyo, umuyobozi wari ufite dosiye yanjye ambwira ko igihe cyacu cyarangiye.”

Iryo vangura ngo ryatumye Antoine Rutayisire abihirwa n’ubuzima, kuko yarebaga ahazaza he, akahabura.

Nubwo muri iki gihe Pasiteri Antoine Rutayisire ari umwe mu bigisha Ijambo ry’Imana bamamaye kandi bakunzwe na benshi kubera inyigisho ze zifasha abazumva, avuga ko na we gukizwa bya nyabyo byamugoye kuko byamutwaye igihe kirekire kugira ngo abashe kubabarira abitwaga Abahutu bamutoteje nk’uko batotezaga Abatutsi bose muri rusange cyane cyane bababuza amahirwe yo kwiga.

Ati “Ubwo nakiraga agakiza, Yesu yambwiye kureba ku musaraba, ndabyemera ariko mubwira ko ntashobora gusubiramo amagambo agira ati ‘Ubababarire kuko batazi ibyo bakora.’”

Pasiteri Rutayisire avuga ko akimara kwakira Yesu nk’Umwami n’Umucunguzi, yatangiye kwigisha Ijambo ry’Imana ariko akigisha nabi kugeza ubwo yakizwaga bya nyabyo.

Ati “Ndibuka umunsi umwe mvuga nti ‘Ngiye kwigisha ijambo ry’Imana bariya Bahutu, bazajye mu ijuru ariko sinzigera mbemera mu mutima wanjye.”

Icyakora muri iki gihe, Pasiteri Rutayisire atanga ubuhamya bw’uko yahindutse, akaba yizera ko n’ubwo yabayeho nabi mu myaka ye y’ubuto n’igihe yari amaze kuba mukuru, afite icyizere cy’uko azasaza ari mu buzima bushimishije.

Ibyo abikesha inzira nziza igihugu cy’u Rwanda cyahisemo yo kubanisha Abanyarwanda, urukundo amahoro n’umutekano bigasimbura ivangura n’akarengane byahozeho mbere y’imyaka 25 ishize.