Umuvugizi wa Polisi y’u Rwanda, CP John Bosco Kabera yasobanuye itandukaniro hagati y’ibiyobyabwenge n’ibidafatwa nk’ibiyobyabwenge

Ikoreshwa ry’ibiyobyabwenge rigira ingaruka ku mubiri, ku buzima bwo mu mutwe ,ku mibanire mu miryango ndetse no ku kazi umuntu akora ka buri munsi. Mu Rwanda hari abazi ko ibisembuye byose ari ibiyobyabwenge.

Nyamara ngo si ko byose ari ibiyobyabwenge kuko hari urugero ngenderwaho bisaba kugira ngo byitwe ibiyobyabwenge.

Umuvugizi wa Polisi y’u Rwanda, CP John Bosco Kabera, yabwiye Kigali Today ko ibyo umuntu yafata byose biciye mu buryo ubwo ari bwo bwose bikamuhindura intekerezo kandi bikagira ingaruka ku mubiri we ari ibiyobyabwenge.

Yagize ati “Iyo unyweye ikintu icyo ari cyo cyose cyagira uruhare mu mitekerereze yawe cyangwa se ubwonko icyo cyitwa ikiyobyabwenge.”

Yakomeje avuga ko inzoga zicururizwa mu Rwanda atari ibiyobyabwenge.

Ati “Inzoga zose zitarengeje Alcool iri ku gipimo cya 45%, izo si ibiyobyabwenge kuko ziba zujuje ubuziranenge zasuzumwe n’ikigo cy’igihugu gishinzwe ubuziranenge (RSB).”

CP John Bosco Kabera kandi yakomeje asobanura ko iyo umuntu yanyweye inzoga akarenza urugero (gusinda) mu ruhame abihanirwa. Yagize ati “Kuvuga ko umuntu yasinze si ukuvuga ko yanyweye ibiyobyabwenge ahubwo aba yarengeje urugero ariko na byo birahanirwa mu gihe byaba byabereye mu ruhame.”
Uyu muvugizi yakomeje avuga ko akenshi ibiyobyabwenge bivugwa ari Mugo, Urumogi, Marijuwana, Mayirunge, Cocaine, Kanyanga n’ibindi byifashishwa nk’ibinini biribwa ariko bitagamije kuvura indwara.

Yasobanuye na none ko inzoga zose zujuje ubuziranenge kandi zasuzumwe n’ikigo cy’igihugu gishinzwe ubuziranenge (RSB) atari ibiyobyabwe. Izo nzoga zemewe ziba zifite ikirango cy’ikigo cy’igihugu gishinzwe ubuziranenge ( RSB).

Hari abahitamo gupfunyika mu mpapuro zakoreshejwe

I Nyarutarama ahitwa mu Rwimpyisi, ni hamwe mu hakorerwa ubucuruzi buto muri Kigali. Mu nzu z’ubucuruzi higanje ibiribwa birimo imigati, imineke, ibishyimbo bitetse, inyanya nibindi biribwa byo kurya abantu bakenera umusi ku musi.

Ni ahantu haba urujya n’uruza rw’abantu bahaha ibyo kurya, ariko bisanzwe bigurwa bike bike, bakoresha mungo.

Mu masaha ya saa tanu za mu gitondo, uwitwa Gad Niyibizi utuye mu mudugugu wa Cyibiraro ya mbere, aje guhaha ariko ntacyo gupfunyikamo yitwaje.

Mu kiganiro yagiranye na Kigali Today, yavuze ko ibyo abacuruzi babapfunyikiramo babitwaramo ari nko kubura uko bagira.

Agira ati” Ibibintu baduheramo ni ukubura uko ubigenza kuko uba ushaka ikintu, ntabwo wabitwara mu ntoki.”

Bamwe mu bacuruzi baganiriye na Kigali Today, bavuga ko bapfunyikira abakiriya mu mpapuro zakoreshejwe, izanditseho, n’ibindi bitujuje ubuziranenge, kuko impapuro za kaki zisanzwe zemewe gupfunyikwamo ari nkeya ku isoko.

Ati ”Urabona baciye amasashe, nifashisha ibi bipapuro nzi neza ko bitanafite isuku ihagije. Natumije impapuro zemewe ariko narazibuze’’.

Ku rundi ruhande ariko, hari abacuruzi bavuga ko nubwo impapuro zemewe gupfunyikiramo abakiriya ari nkeya ku isoko, badashobora gukora amakosa yo gupfunyikira abakiriya mu mpauro zakoreshejwe kuko baba bakurura indwara.

Hari kandi n’abacuruzi bavuga ko kuba impapuro zo gupfunyikamo zemewe ari nkeya ku isoko bituma zihenda, zikaba zabatera igihombo bigatuma bamwe bahitamo kwikoreshereza iza makeya.

Ubusanzwe urupapuro rumwe rwa kaki rwo gupfunyikamo, rugura amafaranga 100 y’u Rwanda. Kugira ngo umuguzi aruhabwe, bisaba ko yitwaza amafaranga 100 yiyongera ku giciro gisanzwe.

Bivuze ko umucuruzi agiye arupfunyikiramo buri wese uguze ku buntu, yaba amwongereyeho amafaranga 100 umukiriya atishyuye, ari nacyo abacuruzi benshi batinya.

Albert Iyahozeho, umucuruzi mu Rwimpyisi asaba ko Leta yabafasha igashakisha uko yabongerera inganda zikora ambaraje (za kaki) nyishyi zo kwifashisha.

Agira ati “Dore baciye amasashe none nibadushakire ambaraje nziza buri mucuruzi yashobora kugura, zidahenze kuburyo zaba zifite igiciro gito”.

Raymond Murenzi, umuyobozi mukuru w’ikigo cy’igihugu gishinzwe ubuziranenge (Rwanda Standards Board) RSB, ashimangira ko gupfunyika mu mpapuro zakoreshejwe bitemewe, kandi ko ubifatiwemo ahanwa bikomeye.

Ati “Dukora ubugenzuzi kandi ufashwe arahanwa, ndetse ashobora no gufatirwa n’ibicuruzwa.”

Murenzi kandi avuga ko hagikenewe ubukangurambaga ku bufatanye n’inzego z’ibanze, kugira ngo abacuruzi bose bakoreshe impapuro zemewe.
Ku bacuruzi bavuga ko impapuro zemewe zabaye nkeya ku isoko, uyu muyobozi avuga ko ubu mu Rwanda hari inganda 12 zikora impapuro za kaki zo gupfunyikamo, ku buryo nta kibazo cyazo gihari .