Muri 2017, Lt. Mwiza yoherejwe muri Sudani y’Epfo mu butumwa bw’amahoro bw’Umuryango w’Abibumbye (UNMISS) aho yafatanyaga na mugenzi we gutwara kajugujugu zifashishwaga muri ubwo butumwa.

Lieutenant Ariane Mwiza w’imyaka 25 y’amavuko ubu ari mu butumwa nk’ubwo, akaba amaze koherezwamo inshuro eshatu, kandi avuga ko yumva nta mpungenge afite zo gukora ako kazi.

Muri iki gihe abagore boherezwa mu butumwa bwo kugarura no kubungabunga amahoro hirya no hino ku isi. Bakora akazi katoroshye aho bamwe bakora akazi ko gutwara indege, abandi bakajya ku rugamba rwo kugarura umutekano ku butaka, abandi bagakora mu buvuzi, hakaba n’abakora akazi k’Abapolisi.

Ubushakashatsi bugaragaza ko iyo abagore bahawe umwanya mu butumwa bw’amahoro, umusaruro ugerwaho mu gihe gito kuko bagira ubumenyi bwihariye mu kumvikanisha abahanganye kandi bakagira n’impano mu kumva neza ikibazo kiba cyavutse.

Nyamara imibare y’Umuryango w’Abibumbye igaragaza ko umubare w’abagore mu butumwa nk’ubwo ukiri muto. Iyo mibare igaragaza ko mu bantu ibihumbi 98 bari ahantu 13 hatandukanye ku isi mu butumwa bw’amahoro, abagore bangana na 6%.

U Rwanda rwifatanyije n’Isi kwizihiza Umunsi Mpuzamahanga wahariwe kuzirikana abagore bari mu butumwa bw’Umuryango w’Abibumbye.

Kuri uyu munsi, Ikinyamakuru KT Press cyegereye Lieutenant Ariane Mwiza umaze igihe muri ubwo butumwa, asobanura byinshi byerekeranye n’akamaro k’umugore cyangwa umukobwa mu kugarura amahoro no kumvikanisha impande ziba zihanganye. Yanagarutse ku kamaro yasanzemo katuma abandi bakobwa n’abagore bashishikarira kujya muri ibyo bikorwa byerekeranye n’umutekano.

Lieutenant Ariane Mwiza w’imyaka 25 y’amavuko, yize amashuri yisumbuye muri Lycée Notre Dame de Citeaux. Avuga ko ubu arimo kwiga ibyerekeranye n’imibanire y’Ibihugu (International Relations) muri Kaminuza.

Yize ibijyanye no gutwara indege mu ishuri rya Akagera Aviation riherereye mu Rwanda, akaba yarabyize kuva mu mwaka wa 2014 kugeza muri 2016. Mu mwaka wakurikiyeho yahise atangira kujya mu butumwa bw’amahoro.

Ubwo yajyaga muri ubwo butumwa ku nshuro ya mbere, avuga ko kuri we yabonaga ari ibintu bidasanzwe kandi biteye amatsiko, kuko aribwo bwa mbere yari yoherejwe mu kazi nk’ako hanze y’igihugu.

Ati “Biba bishimishije kwisanga ukorana n’abantu bo mu bihugu bitandukanye. Umenya imico y’ahantu hatandukanye, ukagera no mu bindi nihugu biba bishyushye cyane cyangwa bikonje cyane ugereranyije n’igihugu cyawe cy’amavuko. Imbogamizi zibamo ni uko wisanga ukora akazi kiganjemo abagabo benshi, ku buryo bamwe ndetse batekereza ko ari akazi gakorwa n’abagabo gusa, kuko usanga abagore bakora ako kazi ari bake cyane.”

“Ntiwapfa kumva ijwi ry’umugore uvugira ku maradio abari mu butumwa bakoresha bavugana, ndetse usanga hari abagira impungenge zo kugenda mu ndege itwawe n’umugore. Icyakora izo mpungenge zigenda zishira, kuko hari abo usanga bishimye iyo babonye ko bagiye gutwarwa n’umugore.”

Ku kibazo cy’umubare muto w’abagore bari mu butumwa bwo kugarura amahoro, Lieutenant Mwiza asanga uwo mubare ukwiye kuzamurwa, hagashyirwaho gahunda zikundisha abagore n’abakobwa kujya mu gisirikare no mu gipolisi, ndetse bamwe bakoherezwa muri ubwo butumwa mu rwego rw’amahugurwa, kwiyungura ubumenyi no kwimenyereza.

Mwiza avuga kandi ko abagore bari muri ubwo butumwa bunguka ubumenyi bwo gukemura amakimbirane haba mu bihugu by’amahanga ndetse no mu bihugu byabo bakomokamo, ndetse bikanabafasha no kubera abandi icyitegererezo, bakamenya no kwikorera ubuvugizi bakabukorera n’abandi bagore, cyane cyane baharanira uburenganzira bwabo, dore ko usanga abagore hirya no hino ku isi bagikandamizwa.

Ku kibazo cy’umubare muto w’abagore bari mu butumwa bwo kugarura amahoro, Lieutenant Mwiza asanga uwo mubare ukwiye kuzamurwa, hagashyirwaho gahunda zikundisha abagore n’abakobwa kujya mu gisirikare no mu gipolisi, ndetse bamwe bakoherezwa muri ubwo butumwa mu rwego rw’amahugurwa, kwiyungura ubumenyi no kwimenyereza.

Mwiza avuga kandi ko abagore bari muri ubwo butumwa bunguka ubumenyi bwo gukemura amakimbirane haba mu bihugu by’amahanga ndetse no mu bihugu byabo bakomokamo, ndetse bikanabafasha no kubera abandi icyitegererezo, bakamenya no kwikorera ubuvugizi bakabukorera n’abandi bagore, cyane cyane baharanira uburenganzira bwabo, dore ko usanga abagore hirya no hino ku isi bagikandamizwa.

Abajijwe agaciro yumva guhagararira igihugu cye mu butumwa bw’amahoro mu mahanga bivuze kuri we, Lt mwiza yasubije ko guhagararira igihugu cye mu mahanga ari ishema kuri we.

Ati “Kuko icyo nkoze cyose ngikora mu izina ry’Igihugu cyanjye, nitwaje ibendera ry’Igihugu. Iyo ntekereje ko mpagarariye igihugu bintera umwete wo kuzuza inshingano zanjye uko bikwiye.”

Lieutenant Mwiza yasoje ikiganiro yagiranye na KT Press ashishikariza abandi bakobwa n’abagore gukunda akazi kerekeranye n’umutekano, ati “Kuko niba narabishoboye, n’abandi babishobora.”

Abo bashoferi bamaze iminsi bakora ibisa n’imyigaragambyo bakabangamira abashoferi b’amakamyo manini bo mu Rwanda bari ku butaka bwa Tanzania.

Abo bashoferi bo muri Tanzania binubira ingamba Leta y’u Rwanda yafashe zigamije kugabanya ubwiyongere bw’icyorezo cya COVID-19 mu Rwanda, dore ko imibare imaze iminsi igaragaza ko ubwiyongere cw’icyo cyorezo burimo kugaragara mu batwara ayo makamyo hagati y’u Rwanda n’ibindi bihugu.

Hari amashusho (Videos) amaze iminsi azenguruka ku mbuga nkoranyambaga, bikavugwa ko abayagaragaramo ari Abanyatanzania baba bagerageza guhohotera abashoferi b’amakamyo manini b’Abanyarwanda bari muri Tanzania.

Ingamba nshya zo kwirinda ko abashoferi b’ayo makamyo bakwirakwiza Coronavirus hagati y’ibihugu byombi ziteganya ko abashoferi bo muri Tanzania bagera ku mupaka wa Rusumo, imodoka zabo bakaziha abashoferi bo mu Rwanda bakazikomezanya ku butaka bw’u Rwanda kugeza aho imitwaro zikoreye yari igiye.

Icyo cyemezo ngo nticyashimishije abashoferi bo muri Tanzania kuko bagirira impungenge imodoka zabo abandi bashoferi, nyamara ariko Leta y’u Rwanda n’urwego rw’abikorera mu Rwanda (PSF) bakaba bizeza abo bashoferi ko nta mpungenge bakwiye kugira.

Hari bamwe muri abo bashoferi kandi bagaragaza impungenge ko izo ngamba nshya zishobora gutuma baba abashomeri, abandi bakavuga ko inyungu bakuraga muri ako kazi zishobora kugabanuka.

Umunyamabanga wa Leta muri Minisiteri y’Ubuzima, Dr Tharcisse Mpunga, kuri uyu wa kabiri tariki 05 Gicurasi 2020 ubwo yari kuri Televiziyo y’Igihugu yavuze kuri iki kibazo, asobanura ko Guverinoma y’u Rwanda ikizi kandi ko irimo ikorana n’abayobozi bo muri Tanzania kugira ngo bafatanye kugishakira igisubizo.

Yagize ati “Abayobozi ku mpande zombi barimo kuganira kuri icyo kibazo kuko ingamba twashyizeho ni izigamije kurinda abantu kwandura haba ku banyarwanda no ku banyamahanga baza mu Rwanda. Ntabwo ari izibuza ubucuruzi hagati y’ibihugu byombi gukomeza.”

Ati “Rero igihe cyose hagiyeho ingamba zibuza umuntu umwe uburenganzira yari afite bwo gutambuka ariko zijyanye no kwirinda, nta kabuza harimo utabyishimira, ariko dutekereza ko biri buze gukemuka kuko hari abashinzwe kubiganira kandi biratanga umusaruro.”

U Rwanda rwinjiza ibicuruzwa byinshi byinjiriye ku cyambu cya Da-es-Salaam muri Tanzania, bikagera mu Rwanda binyuze ku mupaka wa Rusumo uherereye i Kirehe mu Burasirazuba bw’u Rwanda.

Muri ako gace hamaze iminsi havugwa ubwiyongere bw’abasuzumwa bagasanga bafite icyorezo cya COVID-19 cyane cyane mu bashoferi b’ayo makamyo manini n’abo bakorana, ikaba ari yo mpamvu nyamukuru yatumye hafatwa ingamba zo kugabanya ubwo bwiyongere, nk’uko bimaze igihe bisobanurwa.

Iyi nyubako yakoreyemo inzego zitandukanye iherereye imbere y’ahahoze Cadillac na yo irimo gusenywa

Umuntu waba waragenze muri Kigali mu bihe byakurikiye Jenoside yakorewe Abatutsi mu 1994, agomba kuba yarumvise ahantu hazwi nka ‘Carwash’ hepfo ya Kimihurura ku muhanda uzwi nka ‘Poids Lourds’.

Aho hantu hamenyekanye kubera umwihariko waho w’inyama zizwi nka ‘Nyama Choma’ n’andi mafunguro yamaraga ipfa abahasohokeraga. Nyuma haje kuvugururwa hahindura n’izina hitwa ‘Carwash Bistro & Grill’ ariko hagumana wa mwihariko waho wo gutegurira abahagana inyama zokeje ziherekejwe n’icyitwa ‘Kachumbali’ n’andi mafunguro azwi cyane cyane muri Kenya yitwa ‘Sukumawiki’.

Mu minsi mike ishize, abagabo bitwaje inyundo n’amapiki iyi nyubako barayadukiriye bayishyira hasi mu kanya gato.

Carwash ubu yageze hasi

Inyubako ya Carwash na yo yisanze iri mu zigomba kuvaho kuko aho ziherereye ari mu gishanga. Muri ako gace hari ibindi bikorwa na byo byavuyeho kubera iyo mpamvu y’uko ziri mu bishanga. Muri zo harimo Parking ya NPD Cotraco, inyubako y’umweru izwi nka Bridge 1 yahoze ikoreramo Ikigo cy’Igihugu cy’Imisoro n’Amahoro (RRA) n’ahazwi ku izina rya Mulindi Japan One Love na ho hamamaye kubera imyidagaduro yahaberaga.

Umujyi wa Kigali ni wo watanze amabwiriza yo gukuraho izo nyubako z’ubucuruzi ndetse n’izo guturamo ziherereye ahafatwa nko mu bishanga.

Gukuraho inyubako ya Carwash n’iya Mulindi Japan One Love byakozwe bikurikira izimira ry’Akabyiniro ka Cadillac na Resitora ya Mama Africa, ibi bikaba byo bitaragarutse nyuma y’inkongi y’umuriro yabyibasiye mu Gushyingo 2012, ndetse nyirabyo witwa Eugene Habimana uzwi nka ‘Cobra’ akamara igihe ari mu manza na sosiyete y’ubwishingizi yagombaga kubimwishyura.

Aha ni ahahoze Cadillac

Nyuma yo kwishyurwa nabwo ntibyari bikimushobokeye kongera kuhavugurura, kuko Ikigo cy’Igihugu gishinzwe kubungabunga ibidukikije (REMA) cyari cyamaze kuhashyira mu cyiciro cy’ibishanga.

Eugene Habimana ‘Cobra’ yabwiye KT Press ko koko aho hantu bakoreraga ari mu gishanga, kandi ko uburyo hagiye gutunganywa n’ibigiye kuhashyirwa ari ingirakamaro ku baturage, gusa akavuga ko abantu bazakumbura ibirori byahaberaga n’amateka yaho muri rusange.

Yagize ati “Buri gihe iyo imvura yagwaga ari nyinshi, aha hantu hose hazaga umwuzure, tugakoresha amafaranga menshi turwana no gukumira ayo mazi yashoboraga guteza n’impanuka. Ibyo Leta irimo gukora ni ukureba kure kuko ari igikorwa cy’ingenzi kizamara igihe kandi kivana ubuzima bw’abantu mu kaga, n’ubwo abacuruzi bo batabura kubona ko harimo igihombo ku ruhande rwabo.”

Kuri Mulindi Japan One Love hakoreraga Gatera Rudasingwa uzwi nka ‘Rasta’ n’umugore we Mami Rudasingwa Yoshida, na ho hamenyekanye nk’ahamaze imyaka 23 hakorerwa insimburangingo z’abafite ubumuga, hakaba n’igice cyari kigenewe imyidagaduro cyane cyane ijyanye n’imyemerere y’Aba Rasta.

Ni ahantu haberaga ibitaramo bya muzika, ubukwe, n’ibindi byabaga ari iby’abantu bakunda ahantu hatoshye mu busitani.

Imvura nyinshi yaguye kuri Noheli y’umwaka wa 2019 yangije mu buryo bukomeye One Love. Iyo mvura yaguye nyuma y’iminsi mike yari ishize Leta ishishikarije abatuye mu bishanga n’abahafite ibikorwa by’ubucuruzi kwimuka mu rwego rwo kurengera ubuzima bwabo no kubarinda imvura nyinshi yaranze impera z’umwaka.

Amatongo y’ahahoze Mulindi Japan One Love

Iyo mvura yo kuri Noheli yahitanye abantu batari munsi ya 12 yashyize iherezo ku bikorwa by’iyo nyubako ya One Love na yo yari iri mu cyiciro cy’inyubako ziri mu gishanga.

Umuyobozi w’Umujyi wa Kigali wungirije ushizwe imiturire n’ibikorwaremezo, Dr. Ernest Nsabimana, yabwiye KT Press ko ba nyiri izo nyubako baburiwe mbere ndetse basabwa kwimura ibikorwa byabo, kandi ko abenshi muri bo nta ngurane cyangwa ubwishyu bagombaga guhabwa kuri ibyo bikorwa.

Yagize ati “Twabasabye mbere y’uko igihe kigera ko bashaka ahandi bimukira. Mu bimuwe mu bishanga harimo abahawe ingurane y’ibyabo byangijwe, hari n’abataragize icyo bahabwa kuko bahubatse mu buryo budakurikije amategeko, bakaba nta n’ibyangombwa bigeze bahabwa bibemerera kuhubaka.”

“Nk’uko Perezida yabisobanuye, abadafite ibyangombwa bibemerera kuhubaka cyangwa bakaba barahabonye mu buryo bw’uburiganya, nta ngurane bahabwa, mu gihe abafite ibisabwa bahabwa ingurane.”

Mulindi Japan One Love bahoze bakorera aha Umujyi wa Kigali wabahaye ikibanza ahandi kuri Rebero bakwimurira ibikorwa nk’ibyo gukora insimburangingo z’abafite ubumuga

Umuyobozi w’Umujyi wa Kigali wungirije ushizwe imiturire n’ibikorwaremezo, Dr. Ernest Nsabimana, avuga ko aho hantu hazatunganywa hagaterwa ubusitani, hakarimbishwa hakaba ahantu nyaburanga abantu bashobora kuruhukira no kwidagadurira.

Uyu muyobozi mu Mujyi wa Kigali avuga ko abakoraga ibikorwa biri mu nyungu za rubanda nk’umushinga wa Mulindi Japan One Love wo gukora insimburangingo z’abafite ubumuga, Umujyi wa Kigali ngo wabahaye ahandi muri Rebero ho gukomereza ibyo bikorwa kugeza igihe bazabona ahandi bakorera.

REMA ivuga ko ibikorwa 7,222 byabaruwe bikaba bigomba kwimurwa aho bikorera hafatwa nko mu bishanga mu Mujyi wa Kigali, birimo inganda nk’urwa Kabuye rukora isukari, n’urwa UTEXRWA rukora imyenda.

Umujyi wa Kigali uvuga ko iyi gahunda itareba ibikorwa by’abikorera gusa, ahubwo ko harimo n’ibya Leta.

Amafoto: Roger Marc Rutindukanamurego

Aho ni ho yahereye ashishikariza ibindi bihugu bya Afurika kwitabira ikoreshwa rya Drones mu bikorwa biteza imbere imibereho y’abaturage n’iterambere ry’ibyo bihugu muri rusange.

Ibi Umukuru w’Igihugu yabivuze kuri uyu wa gatatu tariki 05 Gashyantare 2020 ubwo yafunguraga ku mugaragaro inama ya mbere ibayeho ku rwego rwa Afurika yiga ku guteza imbere ikoranabuhanga rishingiye kuri utwo tudege duto twa Drones (Africa Drone Forum - ADF).

Iyo nama irimo kubera i Kigali, ku nkunga ya Banki y’Isi, Ikigega cy’Abongereza gishinzwe Iterambere Mpuzamahanga (DFID) n’abandi bafatanyabikorwa batandukanye.

Perezida Kagame yavuze ko u Rwanda rushishikajwe no guteza imbere gahunda yo guhanga udushya no kwihangira umurimo. Yavuze ko iyo ari inkingi y’ingenzi mu iterambere ry’igihugu, ikaba n’inkingi ikomeye yakwihutisha iterambere ry’umugabane wa Afurika.

Yagize ati “Twatangiye kubona inyungu, kandi hari izindi nyinshi tuzabona mu minsi iri imbere. Ubu Drones mu Rwanda zifashishwa mu gutwara imiti n’amaraso ku mavuriro ari mu bice bya kure mu gihugu. Icyo ni ikintu mu Rwanda twishimira twagezeho ku bufatanye n’ikompanyi ya Zipline.”
Perezida Kagame yakomoje no ku yindi kompanyi yitwa Charis UAS irimo gufasha abahinzi mu kwita ku bihingwa mu rwego rwo guteza imbere umusaruro ukomoka ku buhinzi.

Akivuga ku kamaro ko gukoresha utudege duto tuzwi nka ‘Drones’ , Perezida Kagame yanavuze ko hari ubundi buryo bwatangiye gukoreshwa mu Rwanda bwo kugenzura ikoreshwa ry’umuriro w’amashanyarazi kugira ngo bufashe mu mikorere myiza y’imiyoboro itwara amashanyarazi.

Umukuru w’Igihugu yavuze ko hari n’undi mushinga urimo kwiga uburyo bwo gukoresha ‘Drones’ mu gutera umuti wica imibu itera Malaria, agaragaza ko hari byinshi bishobora kugerwaho hifashishijwe iri koranabuhanga rya Drones, avuga ko inama yiga ku iterambere rya Drones muri Afurika iziye igihe.

Perezida Kagame yasobanuye ko kugira ngo ikoreshwa rya Drones rigirire akamaro Afurika, bisaba ko ibihugu bya Afurika bishyiraho Politiki ihamye yo guhanga udushya no gushyiraho amategeko yo kurengera ibyo bihangano no kubiteza imbere.

Hari ibihugu bya Afurika bifite amategeko avuga ko Drones zigomba gukoreshwa n’inzego z’umutekano gusa, ibyo bikabangamira ibindi bikorwa by’iterambere Drones zakwifashishwamo. Perezida Kagame yasobanuye ko ku isonga Drones zifashishwa mu bikorwa by’umutekano, ariko ikirenzeho, zikanifashishwa mu bindi bikorwa by’iterambere kandi ko nta mpungenge bikwiye gutera abantu ko bimwe byabangamira ibindi kuko biba bisobanutse mu mategeko agenga imikoreshereze ya za Drones.

Perezida Kagame yanasobanuye ko ibihugu bya Afurika bidakwiriye kugarukira ku gukoresha Drones, ahubwo ko bagomba no kugera ku rwego rwo gukora Drones zikorewe ku mugabane wa Afurika. Ibyo Perezida Kagame yavuze ko bishoboka nk’uko byagaragarijwe mu ihuriro ririmo kwiga ku iterambere rya Drones muri Afurika.

Izo Drones zikorewe muri Afurika ngo zagira akamaro kanini kuko zakorwa hagendewe ku bibazo zigomba gukemura byugarije umugabane wa Afurika.

Umukuru w’Igihugu yasobanuye ko kugira ngo ibyo bigerweho hakenewe n’ubufatanye bw’ibihugu mu rwego rwo gusangira ubunararibonye. Yifashishije urugero rw’amarushanwa yo kugurutsa Drones yabanjirije iyi nama, abera i Karongi mu Burengerazuba bw’u Rwanda.

Yavuze ko ayo marushanwa yagaragaje ko hari inyungu mu gukorera hamwe mu rwego rwo guteza imbere ikoranabuhanga rya Drones muri Afurika.

Andi mafoto:

Kureba andi mafoto menshi, kanda HANO

Amafoto: Plaisir Muzogeye

Abari barafashwe bugwate n’imitwe y’abarwanya u Rwanda barimo kwitabwaho mu nkambi ya Nyarushishi i Rusizi mbere yo kwerekeza mu miryango yabo

Abo barwanyi ngo babwiraga abo bangaga kurekura barimo n’imiryango yabo ko mu Rwanda nibahagera bazicwa n’Abatutsi, bakababwira ko ari abantu babi, ndetse ko amajwi bumva y’abavuga ko ari Abahutu baba mu Rwanda ari amajwi yabo bafashe mu byuma by’ikoranabuhanga, ariko abavuga bo bakaba barapfuye.

Bamaze imyaka isaga 20 muri ayo mashyamba bafite ubwoba bwo kugaruka iwabo mu Rwanda bitewe n’ibyo bihuha babaga babwirwa.

Hari abagerageje gutaha ariko bafatwa bugwate n’abo mu miryango yabo bo mu mutwe wa FDLR na CNRD.

Mu buhamya butangwa n’abo bantu bacumbikiwe mu Rwanda mu nkambi y’agateganyo ya Nyarushishi mu Karere ka Rusizi, humvikanamo ubuzima bugoye babayemo muri ayo mashyamba guhera mu 1995.

Bageze mu Rwanda nyuma yo kugenda ibirometero byinshi n’amaguru bahunga ibitero by’ingabo za Leta ya Congo. Ibyo bitero byatumye batakaza ibintu byose bari batunze muri ayo mashyamba. Muri bo ngo hari abatiyumvisha ko ubu aho bari ari mu Rwanda, batekanye, bavurwa n’indwara zitandukanye bakuye muri ayo mashyamba, harimo n’ikibazo cy’imirire mibi. Ikibatangaza cyane ngo ni uburyo barimo kwitabwaho na Guverinoma bari bazi ko ishaka kubica.

Umwe muri bo witwa Christine Bashyitsi w’imyaka 50 y’amavuko, yagize ati “Baratubeshye badukoresha ibidakwiye. Benshi muri twe turicuza imyaka tumaze mu mashyamba ya Congo, tukaba twaratakaje ibyo twari dufite byose.”

Bashyitsi ukomoka muri Gahengeri ahahoze ari muri Komini Bicumbi, ubu ni mu Karere ka Rwamagana, avuga ko atashoboraga kwizera ko telefoni zajyaga zimuhamagara zari iz’abana be batatu bari baratashye mbere mu Rwanda, bakaba baramubwiraga ko bishimira ibyiza u Rwanda rwabagejejeho birimo no kubafasha kwiga.

Bashyitsi ubwo yari afite imyaka 15, yarongowe n’umusirikari wahoze mu ngabo za EX-FAR, uwo musirikari akaba ari na we washishikarije Bashyitsi ko bahungana bakajyana muri Congo, n’ubwo bombi batigeze bijandika mu bwicanyi.

Christine Bashyitsi

Bashyitsi avuga ko n’ubwo yari yarashatse umugabo, yari akiri muto akaba yarigaga mu mwaka wa gatanu w’amashuri yisumbuye. Avuga ko icyo gihe bahunga yari atwite inda ya mbere. Ngo hari amakuru y’ibihuha yabagezeho ko ingabo zari iza FPR zari zifite gahunda yo kwica Abahutu n’abasirikari bari mu Rwanda icyo gihe, bituma we n’umugabo we wari umusirikari bahungira muri Congo.

Bagezeyo, umugabo we kimwe n’abandi bahoze ari abasirikari bagiye mu mitwe y’abarwanya ubutegetsi bw’u Rwanda, ariko aza gupfa mu mwaka wa 2001 azize uburwayi.

Bashyitsi Christine ngo yahereye mu 1997 ashishikariza umugabo we n’abana gutaha mu Rwanda, ariko bakabwirwa ko nibagera mu Rwanda bazahita bicwa.

Umwana we mukuru yagarutse mu Rwanda mu 1997, azana n’abandi bo mu muryango, ahita atangira ishuri, kuri ubu akaba yiga muri Kaminuza ku nkunga ya Guverinoma y’u Rwanda.

Mu nkambi y’agateganyo ya Nyarushishi bahabwa ubuvuzi

Bashyitsi avuga ko ubwo umwana we mukuru yatahaga mu Rwanda, na we yari afite amahirwe yo kuzana na we, ariko ngo muri Congo yari yarashatse undi mugabo wo mu mitwe y’abarwanyi, bimubera inzitizi yo guhita ataha mu Rwanda.

Umwana wa kabiri yabyaye ni umukobwa. Na we yagarutse mu Rwanda ariga ku nkunga ya Leta y’u Rwanda, ubu akaba aba i Nairobi.

Ashima Leta y’u Rwanda kuko abana be ngo ntacyo bigeze bimwa ubwo bari bageze mu Rwanda.

Mu mwaka wa 2017, Bashyitsi Christine yagarutse mu Rwanda kureba uko imibereho yaho ihagaze, asubirayo yiboneye neza ko ibyo yabwirwaga byari ibinyoma. Yasanze u Rwanda rwarateye imbere, hari umutekano, ndetse asanga abana be babayeho neza. Yanahawe urwandiko rw’inzira (Laissez Passer) rumwemerera gukora ingendo mu Rwanda no hanze y’u Rwanda nta nkomyi.

Urwo rupapuro rw’inzira rwamushoboje gusubira muri Congo, asaba umugabo we n’abana ngo batahe, ariko umugabo we arabyanga. Abashakaga gutaha ngo babwirwaga ko bagomba kuba baretse kuko bagiye gukuraho ubutegetsi buriho mu Rwanda noneho bakazaza mu Rwanda batsinze urugamba. Ngo n’abageragezaga gutaha abo barwanyi bakabimenya barababuzaga.

Bashyitsi yabaga muri Congo akora akazi k’ubuhinzi, kugeza muri 2018 ubwo ingabo za Congo zotsaga igitutu imitwe yitwaje intwaro.

Imirwano hagati y’ingabo za Congo n’inyeshyamba yatumye ubuzima burushaho kuba bubi kuri Bashyitsi na bagenzi be, bituma yifuza kugaruka mu Rwanda azanye n’umugabo we n’abana.

Ibyo ngo byatumye yongera kwicuza impamvu atitahiye mbere kuko yabonye ko ibyo babwirwaga n’inyeshyamba ndetse n’abanyepolitiki babi byari ibinyoma bishingiye ku ngengabitekerezo ya Jenoside.

Ubwo ingabo za Congo zarushagaho kwegera agace bari batuyemo ka Rutare muri Teritwari ya Kalehe muri Kivu y’Amajyepfo, Bashyitsi n’abo babanaga bakomeje guhunga, berekeza kure cyane muri Congo mu mashyamba ya Kahuzi Biega muri Pariki iherereye muri Kivu y’Amajyaruguru.

Ati “Twagenze ibirometero byinshi n’amaguru ijoro n’amanywa. Amaguru yanjye yari yarabyimbye. Benshi muri twe twari twaracitse intege, abandi barwaye, abana inzara irabica bakarira cyane. Twafashe icyemezo cyo kwishyira mu maboko y’ingabo za Congo, ziradufata zidusubiza i Bukavu, zidushyikiriza MONUSCO.”

Icyakora izo ngabo za Congo ngo mbere yo kubashyikiriza MONUSCO, zabanje kubiba ibintu byose by’agaciro bari bafite birimo imyenda n’amafaranga, basigarana imyenda bari bambaye yonyine.

Theoneste Gakwaya

Uwitwa Theoneste Gakwaya w’imyaka 68 we yavuze ko ubwo yagezwaga i Bukavu agashyikirizwa u Rwanda yari afite intege nke ku buryo yajyanywe kwa muganga agahabwa serumu mu gihe barimo berekezwa mu nkambi ya Nyarushishi.

Gakwaya wavukiye muri Komini Rusatira i Butare, ubu ni mu karere ka Huye, we ngo ntiyigeze ajya mu mitwe y’inyeshyamba, ahubwo we ngo yakoraga ubuhinzi.

Theoneste Gakwaya

Avuga ko babwiwe kenshi ko nibagaruka mu Rwanda bazicwa. Yahunze u Rwanda ahungana n’umuryango we n’ubwo ngo nta Jenoside bakoze.

Francis Musoni, Umunyamabanga mukuru muri Komisiyo yo gusezerera no gusubiza mu buzima busanzwe abavuye ku rugerero, avuga ko abo bantu bageze mu Rwanda tariki 21 Ukuboza 2019.

U Rwanda rwabashyikirijwe na Repubulika ya Demokarasi ya Congo n’Ingabo z’Umuryango w’Abibumbye ziri mu butumwa bw’Amahoro muri Congo (MONUSCO).

Barimo abagabo 125, abagore 784 n’abana 1,086 bamwe muri abo bana bakaba baraje batari kumwe n’abo mu miryango yabo.

Bagomba kumara iminsi 21 mu nkambi y’agateganyo ya Nyarushishi, aho barimo kwitabwaho cyane cyane bahabwa ubuvuzi, ari nako hakomeje ibikorwa byo gushakisha imiryango bakomokamo.

Benshi muri bo bafite ibibazo by’uburwayi n’imirire mibi, abarembye cyane bakaba barajyanywe mu bitaro bya Gihundwe.

Musoni avuga ko abaturage basanzwe batandukanyijwe n’abarwanyi b’imitwe y’inyeshyamba bafatiwe ku rugamba n’ingabo za Congo.

Abarwanyi babarirwa muri 400 bo muri FDLR na CNRD bafashwe, bajyanywe mu kigo cya Mutobo cyakira abavuye ku rugerero na bo bakaba barimo guhabwa amasomo abagenewe, kimwe n’andi masomo y’uburere mboneragihugu, bakazayahabwa mu gihe cy’amezi atatu mbere yo gusubira mu buzima busanzwe no mu miryango yabo.

Mu bindi barimo kubakorera, harimo kubaha indyo ibafasha kongera kugira ubuzima bwiza kuko abenshi muri bo bafite ibibazo by’uburwayi, inzara n’imibereho mibi bakuye muri Congo.

Reba ubuhamya bw’abavuye mu mashyamba ya Congo

Hakoreshejwe amagare arimo n’asanzwe ataragenewe isiganwa ry’amagare

Igikorwa nyamukuru cyo kwita izina abana b’ingagi 25 giteganyijwe i Musanze mu Kinigi mu Majyaruguru y’u Rwanda, tariki 06 Nzeri 2019 ari na ho haherereye Pariki y’ibirunga ibamo ingagi.

Umuhango wo Kwita Izina ugiye kuba ku nshuro ya 15 ukaba uzabanzirizwa n’ibikorwa bitandukanye birimo isiganwa ku magare ryitiriwe inkura (Akagera Rhino Velo Race) ryabereye i Burasirazuba ku itariki 24 z’uku kwezi kwa Kanama 2019.

Icyo gikorwa cyo gusiganwa ku magare kiba buri mwaka, aho kiba kigamije gushishikariza abantu kubungabunga urusobe rw’ibinyabuzima, biciye muri Siporo.

Niyibizi Callixte wabaye uwa mbere mu bihembo yahawe hiyongereyeho n’umwambaro w’ikipe ya Arsenal

Umuhango wo Kwita Izina, muri uyu mwaka uzitabirwa n’abantu bafite amazina akomeye bazaturuka hirya no hino ku isi barimo Umuhanzi Ne-Yo wo muri Amerika wamamaye mu njyana ya RnB.

Ni umuhango kandi uzitabirwa na Tony Adams wahoze akinira ikipe ya Arsenal yo mu Bwongereza, na Luis van Gaal wamamaye mu gutoza amakipe atandukanye akomeye.

Umuhanzi w’Umunyarwanda Meddy na we yatumiwe muri uwo muhango, bikaba biteganyijwe ko n’umukobwa ukomoka mu Rwanda witwa Sherrie Silver wamamaye mu kwigisha abantu kubyina na we azaba ahari.

Mu bitabiriye gusiganwa ku igare, barindwi baje mu myanya ya mbere bahawe ibihembo bitandukanye birimo amagare, amatara akoresha urumuri rukomoka ku mirasire y’izuba, telefoni zigezweho (smart phones), abandi bahabwa ibigega by’amazi.

Abantu 142 barimo ab’igitsina gabo n’ab’igitsina gore ni bo bitabiriye iryo siganwa ku magare, hakaba hari higanjemo abafite amagare asanzwe atamenyerewe mu marushanwwa yo gusiganwa ku magare.
Uwitwa Bihoyiki Callixte wabaye uwa mbere, ku bihembo yahawe hiyongereyeho n’umupira w’ikipe ya Arsenal wanditseho ‘Visit Rwanda’.

Umuyobozi Mukuru w’Ishami rishinzwe Ubukerarugendo no Kubungabunga Ibidukikije, Ariella Kageruka, yashimiye abaturage b’i Kayonza kubera uruhare rwabo mu kubungabunga ibidukikije by’umwihariko Pariki y’Akagera.

Yagize ati “Uruhare rwanyu mu kubungabunga Pariki z’Igihugu rwatumye amafaranga yinjira aturuka mu bukerarugendo yiyongera. Namwe inyungu zibageraho kuko kimwe cya cumi cy’ayo mafaranga yinjira gikoreshwa mu gutera inkunga imishinga iteza imbere abatuye mu nkengero za Pariki.”

Ni muri urwo rwego RDB ku wa gatanu tariki 23 Kanama 2019 yatanze inka 729 zihabwa imiryango itishoboye ituye mu nkengero za pariki y’Igihugu y’Ibirunga. Igikorwa cyo gushyikiriza imiryango izo nka cyabereye mu Karere ka Nyabihu mu Burengerazuba bw’u Rwanda.

Abaturiye Pariki y’Ibirunga batishoboye borojwe inka mu rwego rwo gusangira ku byiza bituruka ku kubungabunga Pariki

Abakobwa n’abagore na bo ni bamwe mu bitabiriye iri siganwa

Abanyamahanga barimo abaje gusura Pariki y’Akagera na bo bari bemerewe kwitabira isiganwa

Emmanuel HATEGEKA agiye guhagararira u Rwanda muri Leta zunze ubumwe z’Abarabu

Abo ba Ambasaderi bashya icumi bari muri 15 baherutse gushyirwaho na Perezida wa Repubulika Paul Kagame.

Komisiyo ya Sena ishinzwe ububanyi n’amahanga, Ubutwererane n’umutekano yavuze ko muri abo icumi harimo Wellars Gasamagera ugiye guhagararira u Rwanda muri Angola, Emmanuel Hategeka ugiye guhagararira u Rwanda mu bihugu byunze ubumwe by’Abarabu (UAE) na Maj. Gen. Charles Karamba, Ambasaderi mushya w’u Rwanda muri Tanzania.

Maj. Gen. KARAMBA Charles ni we Ambasaderi mushya w’u Rwanda muri Tanzania

Muri abo ba Ambasaderi 10 bemejwe na Sena kandi harimo
Jean de Dieu Uwihanganye ugiye guhagararira u Rwanda muri Singapore, François Nkurikiyimfura, Ambasaderi w’u Rwanda muri Qatar, Yasmin Amri Sued ugiye guhagararira u Rwanda muri Korea y’Epfo, na Dr Aissa Kirabo Kakira ugiye muri Ghana.

Hari na James Kimonyo ugiye guhagararira u Rwanda mu Bushinwa, Higiro Prosper ugiye guhagararira u Rwanda muri Canada, na Marie Chantal Rwakazina wayoboraga Umujyi wa Kigali akaba agiye guhagararira u Rwanda mu Busuwisi.

RWAKAZINA Marie Chantal agiye guhagararira u Rwanda mu Busuwisi

Itegeko Nshinga rya Repubulika y’u Rwanda ryo muri 2003, ryavuguruwe muri 2015, ingingo yaryo ya 86 iha Sena y’u Rwanda ububasha bwo kwemeza bamwe mu bayobozi bakuru baba bashyizwe mu myanya, barimo na ba Ambasaderi.

YASMIN Amri Sued yagizwe Ambasaderi w’u Rwanda muri Koreya y’Epfo

Komisiyo ya Sena ishinzwe ububanyi n’amahanga, Ubutwererane n’umutekano ifite inshingano zo gusuzuma no kugenzura abo bayobozi bashya baba bashyizwe mu myanya kugira ngo koko irebe niba baba babifitiye ubushobozi.

Wellars Gasamagera agiye guhagararira u Rwanda muri Angola

Icyakora mu myaka ishize, nta Ambasaderi wigeze ushyirwaho na Perezida wa Repubulika ngo abe yabuzwa amahirwe yo kujya kuri uwo mwanya n’iyo komisiyo.

Uwihanganye Jean de Dieu agiye guhagararira u Rwanda muri Singapore

Senateri Rugema Michel uyobora iyo komisiyo yabwiye abitabiriye umuhango wo kwemeza abo ba Ambasaderi ko Komisiyo yasanze bose bujuje ibisabwa kugira ngo bahagararire u Rwanda mu mahanga.

HIGIRO Prosper agiye guhagararira u Rwanda muri Canada

Senateri Rugema yasobanuye ko abandi batanu baherutse gushyirwaho na Perezida Kagame Sena itiriwe ibakorera isuzuma kubera ko bari basanzwe ari ba Ambasaderi, icyabaye kikaba ari ukubahindurira ibihugu bari bahagarariyemo u Rwanda.

Aissa Kirabo Kakira agiye guhagararira u Rwanda muri Ghana

Abo ba Ambasaderi bahinduriwe ibihugu ni Eugene Segore Kayihura wavuye muri Tanzania ajya guhagararira u Rwanda muri Afurika y’Epfo asimbuye Vincent Karega, naho Vincent Karega we ajya guhagararira u Rwanda i Kinshasa muri Repubulika ya Demokarasi ya Congo.

KIMONYO James, Ambasaderi w’u Rwanda mu Bushinwa

Dr Francois Xavier Ngarambe yavuye i Geneva mu Busuwisi yerekeza i Paris mu Bufaransa, naho Sheikh Saleh Habimana avanwa mu Misiri yerekeza muri Maroc. Ni mu gihe Alfred Kalisa we yavuye i Luanda muri Angola, yerekeza i Cairo mu Misiri asimbura Sheikh Saleh Habimana.

Nkurikiyimfura François ni we Ambasaderi mushya w’u Rwanda muri Qatar

Kuva muri Gashyantare 2019, ibiciro bishya by’amazi byazamutse bikomeje guteza impaka cyane cyane muri Kigali

Ibi bituma bamwe binubira ikigo cya WASAC gishinzwe gukwirakwiza amazi mu Rwanda , abandi bakagishinja kuba kidafite ubushobozi bwo gutanga serivisi nziza, ahubwo kigashaka amafaranga y’umurengera mu baturage.

Uwitwa Linda Kiberinka yashyize ahagaragara agapapuro kanditswe na WASAC imwishyuza 371, 956 Frw, mu gihe hari undi witwa Camilla Abatoni, we watangajwe no kubona WASAC imwishyuza Amafaranga 342, 790.

Kiberinka yibaza ukuntu urugo rw’abantu bane rushobora kwishyuzwa akayabo k’amafaranga asaga ibihumbi 371 bakoresheje y’amazi mu gihe cy’amezi abiri gusa.

Izo Fagitire ebyiri zatumye abantu bavuga amagambo atandukanye, bamwe babiteramo urwenya bibaza niba abazihawe baba bafite urwogero (piscine/ swimming pool) rutagaragara mu ngo zabo, abandi bakabavugiraho ko wenda bashobora kuba bafite inganda mu ngo.

Amafoto y’izo Fagitire yahererekanyijwe n’abantu benshi, bamwe babihuza n’icyemezo Guverinoma iherutse gufata cyo kuzamura ibiciro by’amazi, na byo bitavuzweho rumwe.

Ikigo cya WASAC n’Ikigo Ngenzuramikorere (RURA) byasezeranyije abahawe izo nyemezabwishyu ko ikibazo cyabo kigiye kwigwaho mu rwego rwo kumenya impamvu yatumye basabwa kwishyura amafaranga angana gutyo (asaga ibihumbi 300).

Umuyobozi mukuru wa WASAC, Eng. Aimé Muzola yabwiye KT Press ko ingano y’amafaranga abo bantu basabwe kwishyura atari ikibazo cya rusange kandi ko ntaho bihuriye n’izamuka ry’ibiciro by’amazi riherutse gutangazwa.

Yavuze ko ibyo ari ibibazo byihariye by’abantu ku giti cyabo kandi ko harimo gukorwa igenzura kugira ngo impamvu zituma basabwa kwishyura amafaranga menshi zisobanuke.

Bwana Muzola yasobanuye ko hari nk’aho basanga abakoresha amazi bari bamaze igihe kirekire batishyura, hakiyongeraho n’amande, bigatuma Fagitire izamuka.

Indi mpamvu babonye nko ku Gisozi ahari umuntu wishyuzwaga amafaranga menshi ngo ni uko mu miyoboro y’amazi hari ahantu harimo akabazo katumaga amazi ameneka ku ruhande, ba nyiri inzu ntibabibona amazi ameneka ari menshi, bituma bishyuzwa Fagitire nini.

Muzola yasobanuye ko aho umukozi wa WASAC yakoze ikosa akishyuza amafaranga menshi, babikosora, bagahindura inyemezabwishyu (Fagitire). Naho mu gihe ikibazo kiri ku ruhande rw’uwishyura, urugero yaragize nk’uburangare amazi akajya ameneka, anyuze ahantu hadafunze neza, icyo gihe umukiliya ngo ni we uba ugomba kwishyura.

WASAC ivuga ko uko kumeneka kw’amazi ari byo byabaye kuri Kiberinka utuye ku Gisozi mu Mujyi wa Kigali. WASAC yamumenyesheje ko igenzura ryakozwe ryagaragaje ko inyubako abamo ari yo ifite ikibazo cyo kumena amazi bitewe n’imiyoboro y’amazi iyirimo. WASAC yihanganishije Kiberinka imubwira ko nta kundi byagenda, imusaba kwishyura ayo mafaranga (371, 956 Frw), imugira n’inama yo gukosora imiyoboro y’amazi muri iyo nyubako.

Icyakora Kiberinka, ndetse n’abandi bafite ibibazo bisa n’icye ntibanyuzwe n’igisubizo WASAC yatanze kuko hari n’abavuga ko n’iyo amazi yabuze, WASAC yo iza ikishyuza amafaranga menshi nyamara ntayo abaturage bigeze babona ngo bayakoreshe.

Umuyobozi mukuru wa WASAC, Eng. Aimé Muzola avuga ko hari abadakurikiranira hafi uko amazi akoreshwa mu ngo zabo bagatungurwa no kwishyuzwa amafaranga menshi. Agira inama abaturage kujya bagenzura ikoreshwa ry’amazi rya hato na hato kugira ngo bamenye impamvu zituma bishyuzwa amafaranga menshi.

Atanga urugero rw’aho basanze urugo rufite ubwiherero mu nzu budakora neza, bugahora burekura amazi.

Ati “Dusaba abantu kutubwira mu gihe bagize ikibazo. Abatekinisiye bacu bahora biteguye kubaha ubufasha kandi nta kiguzi.”

Mubazi z’ikoranabuhanga zitezweho gukemura bimwe mu bibazo by’amazi

Umuyobozi mukuru wa WASAC avuga ko icyo kigo kirimo kurangiza umushinga wo gukwirakwiza mubazi z’ikoranabuhanga (Smart Meters) zizakemura mu buryo burambye ibibazo byajyaga bivuka mu gihe cyo kwishyuza amazi.

Izo mubazi zizasimbura izari zisanzwe zizajya zibika amakuru yose yerekeranye n’uko umukiliya akoresha amazi. WASAC kandi izajya ibimenya bitabaye ngombwa ko umukozi wa WASAC aza kureba muri mubazi y’umukiliya.

Muzola ati “Abakozi ba WASAC bazajya banyura hafi y’urugo bamenye amakuru y’ikoreshwa ry’amazi bitabaye ngombwa ko binjira mu rugo kubera ikoranabuhanga izo mubazi zizaba zifitemo.”

Muzola kandi asobanura ko nyuma y’uko amakuru agaragaza ingano y’amazi yakoreshejwe azajya aba amaze kugera kuri WASAC, iryo koranabuhanga rizajya rihita ryohereza ubutumwa bugufi kuri telefoni y’umukiliya, ubutumwa bumwereka amafaranga agomba kwishyura.

Muzola ati “Abazajya bagira ibibazo ni bo bazajya bajya ku biro aho dukorera kugira ngo babafashe, ariko uburyo bushya bw’ikoranabuhanga buzagabanya guhura kwajyaga kubaho hagati y’umukiliya n’umukozi wa WASAC.”

Muzola ntatanga igihe nyacyo ubu buryo bushya buzatangira gukoreshwa, ariko avuga ko ari vuba.

Ubu buryo kandi bwitezweho kuzajya bugaragaza aho amazi ageze mu bigega bya WASAC n’ahari ikibazo cy’amazi ameneka bityo WASAC yihutire kugikemura.

Kumenya aho amazi ageze mu bigega bya WASAC bitabaye ngombwa kujyayo na byo ngo bizatuma amazi atazongera kujya abura mu gace runaka mu buryo butunguranye.

Ubuyobozi bw’ikigo cya WASAC buvuga ko burimo bwitegura no gutangiza uburyo bushya bw’ikoranabuhanga umukiliya ushaka guhabwa amazi azajya akoresha, akuzuza inyandiko isaba (online application) atiriwe aza ku cyicaro cya WASAC.

Muzola ati “Abantu bazajya bohereza ubusabe bwabo baba bari I Nyagatare, baba bari i Rubavu, noneho buhite butugeraho, hanyuma mubazi ihite ibageraho. Turashaka kugabanya inzira nyinshi abakozi bacu n’abakiliya bahuriragamo, kuko rimwe na rimwe zakururaga itangwa rya ruswa.”