Perezida Kagame na Perezida Kenyatta berekwa ikoranabuhanga ryifashishwa na BK

Yabivugiye mu nama ya gatanu ku ikoranabuhanga ‘Transform Africa Summit 2019’ iteraniye I Kigali, kuri uyu wa gatatu 15 Gicurasi 2019.

Mu ijambo rye, Perezida Kagame yavuze ko isi yose muri rusange iri mu gihe cy’ikoranabuhanga riteye imbere, avuga ko ikoranabuhanga ritakiri ikintu cyo kwibaza niba twarihitamo kuko ari nyambere.

Yavuze ko bidashidikanywaho ko umugabane wa Afurika witeguye kugendana n’iterambere ry’ikotanabuhanga, kuko ari nacyo Abanyafurika bari barategereje.

Ati ”Afurika yiteguye kwifatanya n’abandi mu mpinduramatwara ya kane y’inganda? Navuga ngo mu by’ukuri, ibi nibyo twari twarategereje”.

Perezida Kagame kandi yavuze ko iterambere ry’ubukungu risaba ko ikoranabuhanga naryo riba riteye imbere, avuga ko iki ari cyo gihe ngo Afurika yubake ibikorwaremezo n’ubumenyi bikenewe muri Afurika.

Kugirango ibi bishoboke kandi byihute, Perezida Kagame avuga ko hakenewe ko Abanyafurika bose bashyira hamwe, hanyuma urwego rw’abikorera narwo rukaba umufatanyabikorwa wa mbere.

Ati ”Iterambere ry’ubukungu risaba ikoranabuhanga riteye imbere. Iki kicyo gihe ku banya Afurika cyo kubaka ibikorwa remezo n’ibumenyi bikenewe. Hari uburyo bworoshye umugabane wacu wakoresha; aribwo kuba ibihugu byose bya Afurika byakwishyira hamwe, bakaba ari bo ba mbere bashyira mu bikorwa Afurika y’ikoranabuhanga, urwego rw’abikorera rukaba umufatanyabikorwa wa mbere”.

Perezida Kagame yavuze ko igihe Afurika iteye imbere ku ikoranabuhanga, ari amahirwe meza ngo habeho kwihuza.

Ati ”Akenshi hakunze kubaho gushaka gusuzugura cyangwa gutatanya umugabane wacu, kubera impamvu nyinshi. Tuzi neza icyatuma tudakomeza gutyo. Afurika ishobora ubwayo kurinda inyungu z’abaturage bacu, tukongera isoko ryacu, binyuze mu kwihuza n’ubufatanye”.

Perezida Kagame kandi yavuze ko kwihutisha ikoranabuhanga muri Afurika bidakwiye kugira uwo bitera impungenge, ko ahubwo bikwiye gufatwa nk’inzira yo kwihuza n’abafatanyabikorwa b’uyu mugabane.

Yavuze ko guteza imbere ikoranabuhanga muri Afurika bidakuraho imigenzo n’imihango isanzwe y’Abanyafurika, ko ahubwo Afurika igomba kurushanwa muri byose.

Perezida Kagame kandi yasabye Abanyafurika kwirinda gukoresha ikoranabuhanga, bareba cyangwa basoma ibitekerezo by’abandi gusa, ko ahubwo nabo bagomba kurikoresha bamenyekanisha ibikorwa byabo.

Ati ”Nanone kandi, mureke tureke kuba nk’ingunguru zirimo ubusa, ngo dukoreshe interineti dusoma tunareba ibitekerezo by’abandi. Turi abavumbuzi, turatekereza, dufite ibyacu twagurisha, dufite ibyo natwe twabwira abandi”.

Perezida Kagame kandi yaboneyeho no kumenyesha abitabiriye Transform Africa Summit ya 2019, ko itaha ya 2020 izabera muri Guinea.

Robo Sophia iti ndi hano i Kigali kandi naje mu ivarisi

Iyi robo yitabiriye inama ya Transform Africa bwa mbere mu mateka y’iyi nama, yaje mu nama yambaye imikenyero ya Kinyarwanda.

Mbere y’uko igeza ijambo ku bitabiriye inama, umuhuza w’amagambo muri iyi nama, yabanje kuganira na Sophia, ayibaza uko yabonye igihugu cy’u Rwanda.

Sophia yabanje kuramutsa abitabiriye inama, ati ”Muraho! Mwarakoze kuntumira”.

Umuhuza w’amagambo yabajije Sophia niba azi aho ari, undi asubiza ati”Ndahazi rwose, ndi mu mujyi mwiza wa Kigali, mu Rwanda muri Afurika y’Uburasirazuba”.

Sophia kandi yasubije ibindi bibazo yabazwaga n’umuhuza w’amagambo, birimo kumenya indimi abasha kuvuga,
Ahawe umwanya wo kugira icyo abwira abitabiriye inama, Sophia yavuze ko anejejwe cyane no kuba yitabiriye Transform Africa Summit ya 2019, yabereye I Kigali mu Rwanda.

Sophia yavuze ko mu Rwanda yashimishijwe n’uburyo kwishyura amafaranga y’ingendo mu modoka zitwara abantu mu mujyi wa Kigali mu buryo rusange bikorwa hakoreshejwe ikoranabuhanga rizwi nka (TAP&Go).

Yavuze kandi ko ashimira uburyo mu Rwanda abaturage boroherezwa kubona serivizi zinyuranye za Leta, bifashishije ikoranabuhanga, aha akaba yashakaga kuvuga uburyo bwa ‘Irembo’.

Ati”Mu Rwanda hari uburyo bwo kwishyura ingendo hadakoreshejwe amafaranga, ni ikintu kiza cyane. Hari kandi uburyo abaturage babona serivisi za leta, bakoresheje ikoranabuhanga, nabyo ni byiza cyane”.

Irobo Sophia yavuze ko ku bufatanye bw’ibihugu byose bya Afurika, iterambere ry’ikoranabuhanga rizagera hose, umugabane wose ukarushaho gutera imbere.

Mafikizolo mu muhango wo kwita izina uheruka mu Kinigi

Hari kandi n’umuhanzi w’Umurundi witwa Kidumu uzwi cyane mu Rwanda nawe uzasusutsa abitabiriye inama ya “Transform Africa” yatangiye uyu munsi ikazasoza ku itariki 17Gicurasi.

Kidumu kandi yanakoranye n’Abahanzi bo mu Rwanda nka Frankie Joe n’itsinda ryitwa “3hills group”.

Kidumu azwi mu ndirimbo nka “Mapenzi”, “Kwetu”, “Kimbia” na “Haturudi nyuma” yaririmbye afatanije n’Umuhanzi Juliana Kanyomozi wo muri Uganda.

Itsinda “Mafikizolo” si rishya mu Rwanda , kuko ryaje no mu muhango wo “Kwita Izina” mu 2018, icyo gihe banita umwana umwe w’ingagi izina.

Indirimbo za Mafikizolo zikunzwe cyane mu Rwanda harimo, “Khona”, “Love portion”, “Ofana Nawe” n’izindi.

Abo baririmbyi batangiye kugaragara mu ruhando rwa muzika mu 1997, icyo gihe bazwi nka “a kwaito group”, bari kumwe na mugenzi wabo nyakwigendera Tebogo Madingoane,waje kwitaba Imana ku itariki 14 Gashyantare 2004.

Nyuma y’impanuka ikomeye yatumye Nhlanhla Nciza amara igihe kinini mu bitaro, basohoye alubumu yitwa “Sibongile” mu 2002, aho bafatanije n’umuhanzi ku giti cye witwa Ndihamba Nawe , iyo Alubumu ikaba nubu igikunzwe nubwo hashize imyaka itari mike.

Inama ya “Transform Africa” ni imwe mu mahuriro akomeye cyane ku mugabane w’Afurika, iy’uyu mwaka ikaba ifite insanganyamatsiko igira iti , “Boosting Africa’s Digital Economy”, ugenekereje mu Kinyarwanda, ni ukuvuga kuzamura ubukungu bw’Afurika hifashishijwe ikoranabuhanga.

Iyo nama yitabiriwe n’abantu 4000 ,harimo Abakuru b’ibihugu na za Guverinoma, Abagore b’Abakuru b’ibihugu (First ladies), abahagarariye imiryango mpuzamahanga, abashakashatsi, abashoramari n’abandi.

Minisitiri w’intebe Dr Edouard Ngirente

Iyi nama ibera i Kigali, yahuje abagera ku 4,000 barimo abayobozi, abakora mu byo guhanga udushya, abashoramari, ibihangange mu ikoranabuhanga n’abandi, ikaba iri kurebera hamwe uko ikoranabuhanga ryafata iyambere mu guhindura ubukungu bwa Afurika.

Minisitiri w’intebe Ngirente yagaragaje imibare y’urubyiruko muri Afurika, yagakwiye kuba intandaro y’ahazaza heza ha Afurika mu bijyanye n’iterambere ry’ikoranabuhanga.

Yavuze ko Afurika ifite urubyiruko rwiyongera kurusha ahandi, aho kuri ubu habarurwa abagera kuri miliyoni 140 bayongereye mu myaka icumi ishize. Bitarenze mu 2028, umugabane wa Afurika uzaba ubarura abaturage bagera kuri Miliyari batarengeje imyaka 25.

Ngirente avuga ko aya ari amahirwe aho kuba umutwari ku mugabane wa Afurika.

Ati “Uru rubyiruko dufite ni amahirwe yo kuba twakwisanga cyane mu ikoranabuhanga kuko abakiri bato baba bafite ubushake bwo kwakira ibishya byihuse.”

Ati “aha ni ho tubonera agaciro ka sosiyete zigitangira, umumaro wazo ukagera no ku rwego rw’isi mu bijyanye n’iterambere ry’ubukungu.”

Ku isi yose, Minisitiri Ngirente yavuze ko sosiyete zigitangira nyinshi ziyobowe n’urubyiruko, ruhugiye mu guhanga imirimo ndetse no guhindurira amateka ibihugu byabo. Uru rubyiruko ruzana ibitekerezo bishya, biba akenshi bikenewe ngo hahangwe udushya ndetse habeho no kurushanwa.

Mu Rwanda, ibitekerezo byinshi by’urubyiruko biri kuzana ibisubizo by’ ibibazo igihugu gifite.

Aha yatanze urugero rwa tap and go app, ikoranabuhanga rifasha kwishyura udakoresheje amafaranga mu ngendo zitandukanye abakoresha imodoka zitwarira abantu hamwe bifashisha muri Kigali. Umwaka ushize iri koranabuhanga ryanagejejwe muri Cameroun.

Mu myaka mike ishize, u Rwanda rwatangije Miss Geek Award, irushanwa rihuza ba rwiyemezamirimo b’abakobwa bafite imishinga irimo udushya mu ikoranabuhanga dushobora kuzanira ibisubizo bimwe mu bibazo igihugu gifite.

Iri rushanwa rya Miss Geek Rwanda ryaje kwaguka ubu rigeze ku kuba Miss Geek Africa.
Abatsinda iri rushanwa bahembwa ibihembo birimo amafaranga, amahirwe yo guhabwa amahugurwa ndetse no kuba babona abandi bafatanyabikorwa bagura imigabane mu mishinga yabo.
Ku bwa minisitiri wIntebe Ngirente, ikoranabuhanga ni ingirakamaro cyane kuko ari ryo musingi uzahuza Afurika mu buryo busobanutse kandi bwihuse.

Kuri iki kintu Minisitiri Ngirente yerekanye aho u Rwanda ruhagaze agira ati “Guverinoma y’u Rwanda, binyuze mu ngamba z’igihugu z’impinduka mu iterambere hagati ya 2017 -2014, zigamije guhugura urubyiruko rwose (kuva ku myaka 16 kugeza ku myaka 30) mu bijyanye n’ikoranabuhanga bitarenze 2024.

Asobanura ibi, yavuze ko ibi bizashoboka binyuze muri gahunda y’igihugu yo kwigisha ikoranabuhanga igamije gutuma abakuze bamenya ikoranabuhanga bazaba bari byibura kuri 60% bitarenze mu 2024.

Mu biganiro bya mugitondo kandi, abari aho bagaragaje ko Afurika ikeneye rwose gukoresha ikoranabuhanga kugirango irenge imbogamizi zayo.

Fatoumata Ba, umuyobozi mukuru wa Janngo, sositye yo muri Cote d’Ivoire y’ikoranabuhanga, yagize ati “Afurika ni yo iza imbere y’iyindi migabana mu gukoresha cyane telefone zigendanwa, kandi ikomeje kuza imbere mu bijyanye no gukoresha ikoranabuhanga mu bucuruzi (e-commerce) nyamara igakomeza gusigara inyuma.”

Abitabiriye iyi nama bemeranyijwe ko kugirango umugabnae ugire iterambere rirambye mu by’ubukungu, guverinoma n’abakora ubucuruzi bagomba gukora ku buryo ikoranabuhanga rikora ku buryo bworoshye kugirango abikorera bagire uruhare rufatika mu kugabanya ubukene ari nako bazamura ubukungu.
Inama ya Transform Africa Summit yatangiye kuri uyu wa kabiri tariki 14 Gicurasi 2019, ikazasozwa tariki 17 Gicurasi 2019, ikaba iri kubera muri Kigali Convention Center.

Benshi mu bazwi cyane mu ikoranabuhanga ku isi bazabona umwanya wo kuganirira abitabiriye iyi nama, barimo Dr Donald Kaberuka, wahoze ari perezida wa Banki Nyafurika Itsura Amajyambere, ubu akaba ayoboye inama ya Global Fund, Strive Masiyiwa, umuyobozi nshingabikorwa akaba n’uwashinze Econet Wireless n’abandi.

Ku ruhande rwa Transform Africa Summit, hari kuba kandi inama nyinshi ku iterambere ry’ikoranabuhanga, zigamije gushakira ibisubizo ibibazo byinshi biboneka hirya no hino ku isi.

Marty ni robot ishobora kwifashishwa mu nzu zagutse zikorerwamo ubucuruzi

Iyo robo ntoya, umuntu yanatwara mu ntoki ikozwe ku buryo ishobora kugenda, no gukoresha amakuru aba abitswe muri za mudasobwa, igafasha abana, abanyeshuri, ndetse n’abarimu mu buryo bwo kwiga butagoranye .

Iyo kandi yitezweho kuzakundisha urubyiruko ibijyanye na siyansi,ikoranabuhanga, imibare na tekiniki.

Ubuyobozi bwa Transform Afurika bwagize buti, “Marty the Robot, yakundisha urubyiruko rw’ejo hazaza gukora za robo, gukora za porogaramu zo muri mudasobwa no guhimba utundi dushya tujyanye n’ikoranabuhanga ” .

U Rwanda rwahisemo guteza imbere ireme ry’uburezi muri siyansi, ikoranabuhanga, tekiniki n’ imibare kuko ari byo bikenewe ku rubyiruko rw’ejo hazaza ruzakurira mu ikoranabuhanga.

Ni muri urwo rwego, ‘Marty the Robot’ yakoreshejwe mu kwigisha abanyeshuri ibijyanye na za robo, bakabyiga irobo nyayo ibari imbere nk’imfashanyigisho.

Kugeza ubu, abanyeshuri 40, bavuye mu mashuri 20 hirya no hino mu gihugu, bamaze gukora amahugurwa y’ibyumweru bitatu, ku nkunga ya kaminuza y’ikoranabuhanga ya Massachusetts muri Amerika ku bufatanye n’abagize ishami rya Tekiniki muri Banki ya Kigali.

Iyo bakoresheje iyo robo ya ‘Marty’ abanyeshuri bashobora kwiga gukora porogaramu z’amarobo, bifashishije imibare n’ibimenyetso by’ibanga (code), ituma irobo igenda, ibyina, cyangwa se itera umupira.

Robot yitwa Sophia na yo izaba ihari

Iyo robo ifasha abanyeshuri kwiga ibijyanye n’imikorere ya za robo muri rusange, uko zihagarara, uko zikoresha ibiganza, uko zikora ibimenyetso bitandukanye, n’ibindi.
Uretse amasomo iyo robo ya ‘Marty’ izatanga, abazitabira Inama ya Transform Africa bashobora no kuzifotozanya na yo.

Iyo nama ya Transform Africa izabera i Kigali guhera ku itariki 14 kugeza kuri 17 Gicurasi 2019.

Iyo nama kandi izitabirwa n’indi robo yitwa Sophia, ikaba ari yo robo ya mbere yakozwe ku buryo ifite imyitwarire nk’iy’umuntu, aho biteganyijwe ko izaganiriza abitabiriye inama mu ijwi ryayo bwite.

Eugene Kaspersky yarangije mu ishuri ry’ikigo cy’ubutasi cyo mu Burusiya cyitwa ‘KGB’ atangira gukora porogaramu ya mbere ya antivirusi mu 1990. Mu nama ya Transform Africa, azatanga ikiganiro kivuga uko ikoranabuhanga rishobora guhindura isi y’abakoresha interineti.

Kaspersky yatangiye kwiga uko yarinda umutekano wa za mudasobwa mu 1989, ubwo mudasobwa ye yari yafashwe na virusi yitwa ‘Cascade’. Virusi ya Cascade ni imwe muri za Virusi zibasira imbuga zifite ikirango cya .com

Uwo muhanga mu ikorangabuhanga Eugene Kaspersky yahise ashinga laboratwari yo gukora ‘Kaspersky’ mu 1997, akaba ari na we wari uhagarariye iyo sosiyete ikora ubushakashatsi ku bijyanye na antivirusi.

Kugeza ubu, abantu barenga miliyoni 400 bakoresha ikoranabuhanga rya antivirusi ya Kaspersky, mu rwego rwo kurinda umutekano wa za mudasobwa zabo.
Inama ya Transform Africa y’uyu mwaka izaba urubuga rwiza ku Banyarwanda bashoye mu bijyanye n’ikoranabuhanga, aho bazaganira na Eugene Kaspersky uko bakora neza kugira ngo bagere ku musaruro bifuza mu ikoranabuhanga.

Inama ya ‘Transform Africa’ ya gatanu izaba ku matariki ya 14 na 17 Gicurasi ,ni imwe mu nama zikomeye zijyanye n’ikoranabuhanga ku mugabane wa Afurika, bikaba biteganyijwe ko izitabirwa n’abantu 4500. Muri bo harimo abakuru b’ibihugu na za Guverinoma, n’abaminisitiri, abatanga ibiganiro ku rwego mpuzamahanga, abavuga rikumvikana n’abandi. Ibihugu birenga 90 bizaba bihagarariwe’

Nk’uko ari inama ikomeye ku ikoranabuhanga ku mugabane wa Afurika, izitabirwa n’abakora mu ikoranabuhanga batandukanye kandi bakomeye, harimo na Katharina Bochert, uhagarariye ikigo cy’ikoranabuhanga cyitwa ‘Mozilla’ na we biteganyijwe ko azatanga ikiganiro mu nama ya Transform Africa” ya gatanu izabera i Kigali.

Iyi Robot ishobora kuganirizwa igasubiza kimwe n’umuntu

Iyo robo, yakozwe hagendewe ku miterere y’inyuma y’umuntu, ku buryo uba ubona ifite umubiri, ibyo bikaba bituma isa n’abantu.

Umunyamabanga wa “Smart Africa”yagize ati,”twishimiye cyane gutangaza ko Sophia, irobo ya mbere imeze nk’abantu, izitabira inama ya “Transform Africa 2019”

Ni ukuvuga ko iyo robo, ifite igihimba, umutwe, amaso, amaguru n’amaboko, umunwa,ku buryo ishobora gukora ibimenyetso ikoresheje isura “facial features’.

Mu 2017 Sophia yagiriye ikiganiro kuri televiziyo yitwa “CNBC” avuga ashobora guseka mu gihe hari ikintu gishimishije, akaba yanababara mu gihe bihindutse.

Iyo robo Sophia imeze nk’abantu, yagarageye bwa mbere mu ruhame mu 2016, muri “festival” yabereye Austin, Texas, muri Werurwe 2016.

Sophia ni yo robo ya mbere yabonye ubwenegihugu, kuko yahawe ubwenegihugu bwa (Saudi Arabia) mu 2017. Yabonye igihembo cya mbere cyagashya kabayeho bwa mbere mu mateka (first ever Innovation Champion), ikaba inafite konti ya twitter, aho ikurikirwa n’abantu barenga 93,000 .

Ni irobo y’ingore, ishora gukora ibimenyetso birenga 50 ikoresheje isura yayo, ikaba yaranditsweho inkuru mu binyamakuru bitandukanye.

Mu nama ya Transform Africa y’uyu mwaka, ubwo hazaganirwa ku nsanganyamatsiko igira iti ”Kuzamura ubukungu bw’Afurika hifashishijwe ikoranabuhanga “Boosting Africa’s Digital Economy” kandi biteganijwe ko Perezida Paul Kagame azatanga ikiganiro mu gihe cyo kuyifungura ku mugaragaro.

Transform Africa izaba hagati ya tariki 14 kugeza kuri 17 Gicurasi 2019, nyuma y’aho hazakurikiraho irushanwa rya “Golf” rimara umunsi umwe. Ubwo rikazaba ribaye ku nshuro ya kabiri.

Inama ya Transform Africa yakomotse ku kitwa “Smart Africa Initiative” ikaba yaratangijwe n’Abapererezida b’ibihugu birindwi mu 2013.

Iryo huriro ryaje gukura, ku buryo ubu rigeze ku bihugu 24 by’ibinyamuryango, ibigo by’abikorera bigera kuri 12, ndetse n’abandi bashakashatsi ku giti cyabo bahisemo kuba abanyamuryango kugira ngo byihutishe iterambere ry’umugabane, bawufasha kugera ku ikoranabuhanga.