Mu ijambo risoza uwo mwiherero, Perezida Paul Kagame, yasabye abayobozi guhindura imyumvire n’imyitwarire bagaharanira gushyira mu bikorwa ingamba nziza baba biyemeje.

Yagize ati “Ntibikwiye ko duhora tuza hano gusaba imbabazi z’ibyo tutagezeho. Dukwiye gusobanura impamvu tutagera ku ntego twiyemeje.”

Perezida Kagame yibajije icyakorwa kugira ngo imigambi myiza abo bayobozi batahana ihure n’umusaruro batanga.

Ati “Ni gute twagaragaza impinduka mu byo dukora, tukareka guhora dutanga ibisobanuro bimwe n’impamvu zatumye hari ibyo tutageraho?”

Umukuru w’igihugu yasabye abo bayobozi kureka imyumvire yo kumva ko ibintu bidashoboka na mbere y’uko batangira kugerageza kubishyira mu bikorwa, mu gihe nyamara hari ibimenyetso bigaragaza ko ibyo bintu byashoboraga gukoreka.

Ati “Ntimugatangirire ku gutekereza ko ibintu bidashoboka, ahubwo mujye mutekereza ko bishoboka. Nimugera hagati bikabakomerera, ibyo nta kibazo bizagaragara ko mwagerageje.”

Perezida Kagame yashimiye abo bayobozi ku bw’ibitekerezo n’ubushake bagaragaje bwo gukora ibyiza, kuko ari byo igihugu kizubakiraho kigatera imbere.

Umukuru w’igihugu yababwiye ko badakwiye guhungabanywa n’inkuru zitandukanye bazumva nibava muri uwo mwiherero.

Ati “Nimuryama, muzagire ibitotsi byiza. Nimubyuka mu gitondo, mwitegure mujye mu kazi kanyu uko bikwiye. Igihugu kimeze neza, kiratekanye.”

Perezida Kagame yabibukije kuzirikana ibyo bemeranyijweho bigomba gushyirwa mu bikorwa no kwihutisha iterambere ry’igihugu, haba mu kuzamura ubukungu, ubushobozi, kunoza itangwa rya serivisi, n’ibindi.

Umukuru w’igihugu yasoje abwira abo bayobozi ko bagomba gukorera hamwe kugira ngo babashe kwesa imihigo.

Ati “Mureke dusenyere umugozi umwe, Imana ibahe umugisha.”

Twavuganye ambwira ko muri mu mwiherero, nanjye mu bwira ko nk’inshuti, umuvandimwe n’umuturanyi, nifuza kuza nkareba uko mukora gahunda z’igihugu.

Mu by’ukuri birashimishije kandi nanjye ngiye kubyigana.

Ariko kandi reka mbabwire ko umubano dufite hagati y’ibihugu byacu ni umwe mu mibano myiza dufite nka Kenya.

Hari byinshi twabashije gukorana mu rwego rwo koroshya urujya n’uruza rw’abantu, guhuza ibikorwa mu ikoranabuhanga n’itumanaho, dufite abanyakenya benshi baba ndetse bakora hano mu Rwanda, muri Kenya naho hari abanyarwanda benshi babayo banakora, ibi rero byerekana ko turi abavandimwe bafatanye urunana.

Natwe rero nk’abayobozi tugomba gukomeza gushyira imbaraga muri uwo mubano, kandi uko mbitekereza, nidukomeza…yego ibibazo ntibibura, ariko ndemera ko ahari ubushake kandi turabufite, nta bibazo bizatunanira.

Icya kabiri, nagiraga ngo mbabwire ko tunezezezwa n’uburyo u Rwanda rumaze kwiyubaka nyuma ya jenoside, igihugu cyari cyaracitse umugongo none ubu ni imwe mu nyenyeri zimurikira Afurika kandi mu gihe gito cyane.

Ibi rero birerekana ko hari icyerecyezo gisobanutse guhera hejuru kugeza mu nzego zose, mwishyize hamwe inzozi z’u Rwanda muzigira impamo, ubuzima bwarahindutse, mwageze ku iterambere mu buvuzi, mu ikoranabuhanga, nawe reba ukuntu Kigali imeze uyu munsi.

Njya mbwira umuvandimwe wanjye ko tugerageza gukora ibishoboka ngo duce ku Rwanda mu koroshya business nawe akambwira ati komereza aho.

Ariko rero, ibi byose ni byo tugerageza gukora kugira ngo ibikorwa by’iterambere bikomeze byiyongere, ubuzima bube bwiza kurushaho, twubake ibikorwa remezo, dushyikirane hagati yacu, kuko n’ubundi u Rwanda rwonyine ntirwabyishoboza Kenya yonyine ntiyabyishoboza.

Ariko dushyize hamwe, imbaraga n’ubushobozi turabifite kugira ngo tuzamure ubukungu bw’abaturage bacu n’ubw’ibihugu byacu.

Muvandimwe rero nifuzaga kongera kugushimira kuba wakiriye icyifuzo cyanjye cyo kuza ngutunguye nkitumira…nkaganira n’aba bantu beza…ariko ndibaza ko ibi bigaragaza ko uko turushaho guhura no kuganira, bituma tudakenera kunyura mu nzira ndende
Umuntu yagombye kubyuka mu gitondo akava i Nairobi akajya i Kigali, nimugoroba agataha, uko ni ko tugomba kubana kandi twese tukumva ko turi iwacu muri iyo mijyi yombi.

Ndabifuriza imigisha y’Imana, mugire ibiganiro byiza, kandi ndizera ndetse ndanabisengera, ngo umwaka wa 2019 ukomeza kubera u Rwanda umwaka mwiza.
Murakoze cyane.

Perezida Kenyatta yabwiye abitabiriye umwiherero ko umwiherero ari mwiza cyane ndetse yifuza kuwutangiza mu gihugu cye.

Yagize ati “Naje hano kugira ngo nirebere uko mukora. Narabishimye cyane kandi nifuza kubyigana”.

Perezida Kenyatta yagarutse kandi ku buvandimwe n’umubano hagati y’ibihugu byombi avuga ko umeze neza cyane ndetse ko yifuza ko warushaho kumera neza.

Yagize ati “Turi abavandimwe, kandi nk’abayobozi, uruhare rwacu ni ugushaka uburyo warushaho kuba mwiza.”

Perezida Kenyatta yavuze kandi ko hari ibibazo, ariko kuko hari ubushake, nta kabuza ibyo bibazo bigomba gukemuka.

Yagize ati “Ni byo hari ibibazo, ariko ndizera ntashidikanya ko kuko hari ubushake, hakaba hari n’umutima ushaka byanze bikunze tuzabikemura.”

Perezida wa Kenya, yashimye kandi intambwe u Rwanda rwateye nyuma y’imyaka 25 rusohotse muri Jenoside yakorewe Abatutsi.

Yagize ati “Dushima cyane uburyo u Rwanda rwabashije kwivana mu bibazo bikomeye rwarimo, ubu rukaba ubu ari kimwe mu bihugu by’ikitegererezo muri Afurika.”

Ati “Mpora mbwira umuvandimwe wanjye ko ndi gukora cyane ngo mbashe kumucaho mu bijyanye no koroshya ubucuruzi maze na we akambwira ati komereza aho.”

Kenyatta yavuze kandi ko ikibaraje inshinga ari ukoroshya imigendereranire y’abaturage b’ibihugu byombi, bafatanyije n’u Rwanda kuko nta wabishobora wenyine.

Ati “U Rwanda rwonyine ntirwabishobora, Kenya yonyine ntiyabishobora, ariko dufatanyije, dufite amahirwe y’ubukungu burambye ku bw’abaturage bacu n’ibihugu byacu.”

Yashoje avuga ko yizera kandi ko asengera u Rwanda ngo ruzagire umwaka mwiza wa 2019.

Perezida Kenyatta asuye u Rwanda nyuma y’uko kuri iki cyumweru Perezida Paul Kagame yakiriye Tibor Nagy, umuyobozi wungirije Umunyamabanga wa Leta muri Leta zunze ubumwe za Amerika (US) ushinzwe ibibazo bya Afurika.

Ni nyuma y’uko mu cyumweru gishize, Perezida Kagame yasuye Tanzania, aganira na perezida John Pombe Magufuli ku bibazo bitandukanye harimo n’ibireba akarere.

Ibi byose bibaye kandi mu gihe hari umwuka utari mwiza hagati y’u Rwanda na Uganda, bitewe n’uko Uganda yahisemo gufatanya n’umutwe RNC urwanya u Rwanda, bigatuma Abanyarwanda bari muri Uganda bakomeza guhohoterwa no gukorerwa iyicarubozo kuko batari muri uwo mugambi mubisha.

Kureba andi mafoto menshi kanda hano