Icyakora bagira Abanyarwanda inama, yo kuzajya bitonda mu gihe bagiye gusaba inguzanyo, ntibigane abandi, ahubwo bakaka inguzanyo babanje kubitegura neza.

Gukora ikintu wiganye abandi, bigira ingaruka ku muntu wabikoze, kuko yisanga akora ibintu kuko abandi babikora, nyamara akirengagiza ibyo we yifuza, yemera cyangwa se ashoboye. Kandi ibyo ni byo byagombye kuza imbere muri gahunda za buri muntu.

Imyitwarire yo gukora ikintu nk’urwiganwa ikunda kugaragara ku bantu batandukanye nk’uko bisobanurwa n’umusesenguzi mu by’ubukungu witwa Mugabo Elia.

Yagize ati, “Kimwe mu bibazo Abanyarwanda bajya bahura na cyo, ni uko hari ubwo bafata imyanzuro ku bintu runaka, bakabikora nk’urwiganwa.”

Inama ya mbere Mugabo agira abantu, ni ukureka kwigana abandi, kuko bigira ingaruka zabyo.

Yagize ati, “Usanga hari umuntu uvuga ati, mugenzi wanjye atuye mu Kagari runaka, nanjye rero ni ho ngomba gutura.Ubwo akirengagiza ko amafanga uwo mugenzi we yinjiza n’ayo akoresha, bitandukanye n’ibye, mbese batabayeho kimwe
Iyo myitwarire kandi, ikunda kugaragara mu bantu bafite amikoro aciriritse mu gihugu”.

Mugabo Elia, avuga ko ubundi umuntu uzi kwigenzura mu bijyanye n’ubukungu, yitwararika cyane, ku buryo adahubukira gufata inguzanyo yo kugura cyangwa kubaka inzu.

Yagize ati, “Abenshi muri abo bantu, bahitamo kubanza bakazigama, bakaba bagera ku byo bifuza, ariko ntibajya bahubukira gufata inguzanyo”.

Aganira na Kigali Today, yifashishije imibare, atanga urugero rw’umuntu ufata inguzanyo ya miliyoni 23 z’amafaranga y’u Rwanda, ku nyungu ya 17.25% , azishyura mu myaka 20.

Yagize ati, “Dutekereze umuntu ahembwa umushahara 700.000 Frw ku kwezi, agasaba inguzanyo ku mushahara ya miliyoni eshanu z’amafaranga y’u Rwanda, ku nyungu ya 19% , akajya yishyura 1/3 cy’umushahara we, ni ukuvuga 233,333 Frw akishyura mu myaka itatu, akagura ikibanza.

Ku bwa Mugabo, nyuma y’imyaka itatu, uwo muntu yasaba indi nguzanyo ya miliyoni eshanu z’amafaranga y’u Rwanda, akongeraho ayo yizigamiye.Wenda yaragiye azigama 100.000Frw ku kwezi.Ubwo yaba afite 1,278,200Frw.

Ubwo mu myaka itatu yaba afite 3.834.600 Frw yazigamye, yakongeraho miliyoni eshanu z’amafaranga y’u Rwanda, akaba agize 8.834.600Frw.Ayo mafaranga yamufasha kubaka inzu mu myaka itandatu.

Icyo gihe noneho, ashobora kwaka inguzanyo yo kubaka inzu, azishyura mu myaka icumi, kugira ngo yuzuze inzu ye.Abikoze atyo, yakuzuza inzu ye ku giciro gito.

Nubwo hari ibyo bibazo bijyanye n’inguzanyo, ariko abatuye isi baracyashishikarizwa gukorana na za banki,kuko umubare w’abazibira ukiri muto.

Nk’uko tubikesha imibare ya banki y’isi “World Bank’s Global Financial Inclusion” mu bushashatsi yakoze ku bihugu , abantu bagera kuri miliyari ebyiri hirya no hino ku isi, ntibakorana na banki.

Iyo banki yatangaje ko, 20% by’abo bantu badakorana na banki, ari abantu bakuru, bahembwa cyangwa bahabwa amafaranga na leta mu ntoki, 55% by’abo bantu batajya bakorana na banki ni abagore.

Banki y’isi ivuga ko umubare w’abantu bafite konti muri banki, ugenda wiyongera kuko wavuye kuri 51% ugera kuri 62% hagati ya 2011 na 2014.

Umujyi wa Kigali ushora 80% by’ingengo y’imari yawo mu kubaka imihanda

Icyo kibuga cy’indege, u Rwanda rwashoyemo menshi kugeza ubu, biteganijwe ko kizajya cyakira abagenzi bagera kuri miliyoni enye n’igice ku mwaka. Ibikorwa byo kubaka igice cya mbere bizatwara agera kuri miliyoni 418 z’Amadorari, kikazaba cyarangiye mu mpera z’ukwezi k’Ukwakira 2019. Gusa umushinga muri rusange uzatwara agera kuri miliyoni 818 z’Amadolari.

Ubwo yari mu kiganiro n’abanyamakuru nyuma y’inama y’umushyikirano ku itariki 14 Ukuboza 2018, Perezida wa Repubulika Paul Kagame, abajijwe aho umushinga wo kubaka ikibuga ugeze, yavuze ko igishushanyo mbonera cya mbere cyasubiwemo kiravugururwa, hagamijwe kwagura icyo kibuga mu bunini no mu bwiza, kugira ngo kirusheho kujyana n’ibiranga ibibuga mpuzamahanga ku rwego rw’isi.

Yagize ati “Igishushanyo cya mbere cyari cyuzuye kijyanye n’ibyo twashakaga gukora, nyuma haza kubaho impamvu ituma tukivugurura, tugamije kwagura ikibuga no kucyongerera ubwiza”.

Perezida Kagame kandi, yijeje Abanyarwanda ko, ikibuga cyizuzura ku gihe cyateganijwe.

Muri Kamena 2018 Ikibuga cy’indege cya Bugesera ni aha cyari kigeze

Yagize ati “Mu gihe cya vuba turaba dukoresha icyo kibuga. Sinshaka kuvuga igihe ntakuka, ariko si kirekire, sinshaka ko abubaka ikibuga bagendera ku byo navuga, sinshaka kuvuga igihe ntakuka imirimo izaba yarangiye, kuko abo bubaka ikibuga, bazabyitwaza bakavuga bati, twashoboraga kurangiza kubaka ikibuga mu gihe gito, ariko kuko Perezida atekereza ko byagombye gufata igihe kirekire, mureke bikorwe mu gihe kirekire. Ni iyo mpamvu ntaza kuvuga igihe ntakuka. Gusa biri mu nzira nziza, biragenda neza, ubona ari umushinga utanga icyizere”.

Hari kandi indi mishinga umwaka wa 2018 wasize, biteganijwe izarangira muri uyu mwaka wa 2019, hakaba n’indi izakomeza ikazarangira mu 2020. Kigali Today yashatse kumenya aho iyo mishinga igeze, ivugana n’Umunyamabanga wa Leta muri Minisiteri y’ibikorwaremezo, Eng. Jean de Dieu Uwihanganye.

Umuhanda Ngoma – Bugesera - Nyanza

Umuhanda Ngoma - Bugesera - Nyanza uzahurira n’uyu muhanda i Ramiro

Mu mwaka wa 2017, Abataruge b’utwo turere dutatu ari two; Ngoma na Bugesera two mu Ntara y’Uburasirasirazuba na Nyanza yo mu Ntara y’Amajyepfo, bakiriye amakuru meza, avuga ko Banki y’isi n’u Rwanda basinyanye amasezerano agamije kubaka umuhanda w’ibirometero 130 Ngoma - Bugesera - Nyanza, hagamijwe koroshya ubuhahirane hagati y’Intara y’Uburasirazuba n’iy’Amajyepfo.

Minisitiri Uwihanganye avuga aho ibikorwa byo kubaka uwo muhanda bigeze, yavuze ko ibikorwa byo kubaka igice cya Kibugabuga – Shinga - Gasoro bizatangira muri Kanama uyu mwaka, naho ibyo kubaka igice cya Ngoma-Ramir, bikazatangira muri Werurwe 2020.

Uwihanganye yagize ati “Kuri ubu, harakorwa inyigo y’uko ibikorwa bizagenda”.

Umuhanda Kagitumba – Gabiro – Gabiro - Kayonza

Niba waraterambereye mu Burasirazuba muri iyi minsi, nta gushidikanya ko wishimiye kunyura mu muhanda wasanwe, uhera mu Karere ka Kayonza ugana i Kagitumba ku mupaka uhuza u Rwanda na Uganda.

Uwo muhanda wubatswe mu myaka 35 ishize, wari umaze kwangirika ku buryo byari bisigaye biteza impanuka nyinshi.

Ibikorwa byo gusana umuhanda Kagitumba – Kayonza - Rusumo no kuwagura, bizatwara agera kuri miliyoni 376.5 z’Amadolari. Bikaba byaratangijwe ku mugaragaro muri Gashyantare umwaka ushize wa 2018, uwo muhanda ukaba witezweho kuzoshya ubuhahirane hagati y’u Rwanda n’ibihugu bituranye narwo mu gice cy’Uburasirazuba.

Minisitiri Uwihanganye yabwiye Kigali Today ko ibikorwa byo gukora uwo muhanda bizaba byarangiye mu Kwezi k’Ugushyingo uyu mwaka wa 2019.

Yagize ati, “Umuhanda Kagitumba - Gabiro uzaba wuzuye muri Nzeli 2019, uwa Gabiro - Kayonza uzuzura muri Kanama 2019 naho uwa Kayonza - Rusumo uzarangira mu Kwezi k’Ugushyingo 2019.”

Umuhanda Base – Rukomo – Rukomo – Nyagatare

Mu Kwezi k’Ukwakira 2017, Guverineri w’Intara y’Amajyaruguru Gatabazi Jean Marie Vianney, yashyize ifoto ye kuri twitter agaragaza ko yasuye ibikorwa byo kubaka umuhanda Base – Gicumbi - Rukomo, ufite uburebure bwa kilometero 51.

Uwo muhanda uzahuza Amajyaruguru y’igihugu n’Uburasirazuba, wishimiwe cyane n’abazawukoresha, harimo na Guverineri Gatabazi.

Ariko se ni ryari abakoresha uwo muhanda bazatangira kubona imodoka zigenda muri uwo muhanda mushya? Minisitiri Uwihanganye Jean de Dieu yasobanuye aho iyo mishinga yose.
Minisitiri Uwihanganye yagize ati, “Umuhanda Base - Rukomo uzaba wuzuye muri Kanama 2019, naho umuhanda Rukomo - Nyagatare uzuzura hagati mu mwaka wa 2021”.

Imishinga yo kubaka imihanda yo mu Mujyi wa Kigali

Mu gihe u Rwanda, rugenda ruhinduka ihuriro ry’inama n’ibirori bitandukanye mu Karere, umujyi wa Kigali nawo ugenda wubaka imihanda mishya, kugira ngo ukemure ikibazo cy’umubyigano w’imodoka ugenda wiyongera.

Urugero, nko mu mwaka ushize wa 2018, u Rwanda rwakiriye inama 201, zari zitabiriwe n’abantu barenga 35.000, ibyo bikaba barinjirije u Rwanda, agera kuri miliyoni 52 z’Amadolari.

Muri uwo mwaka wa 2018, hari imihanda wasangaga yafunzwe rimwe na rimwe kugira ngo abashyitsi bava cyangwa bagana ku kibuga cy’indege i Kanombe bagende nta mubyigano w’imodoka bahura nawo. Umuhanda wakunze gufungwa ni uwa Kanombe - Remera - Gishushu.

Iyo uwo muhanda wafungwaga, abandi bafite imodoka basabwaga gukoresha imihanda mishya yagiye yubakwa mu Mujyi wa Kigali.

Kugira ngo Umujyi wa Kigali ushobore kubaka imihanda myinshi, byasabye ko 80% by’ingengo y’imari yawo, bishyirwa muri icyo gice, nk’uko Busabizwa Parfait, Umuyobozi w’Umujyi wa Kigali wungirije ushinzwe iterambere ry’ubukungu yabibwiye Kigali Today.

Busabizwa yavuze ko imihanda irimo kubakwa muri Kigali, ikubiye mu mishinga minini ibiri.

Uwa mbere ni ukubaka imihanda ireshya na kirometero 105 mu bice bitandukanye by’Umujyi wa Kigali harimo, Nyamirambo, Kimironko, Gikondo, Kimihurura na Kibagabaga.

Umushinga munini wa kabiri nk’uko Busabizwa akomeza abisobanura, ni ibirometero 54, harimo umuhanda Nyanza - Rebero ukagera i Nyamirambo n’undi uva mu Kanogo ugana kuri Prince House (iRemera).

Hari kandi umuhanda uzava mu Mujyi – Nyabugogo – Gatsata – Nyacyonga - Batsinda.

Busabizwa yagize ati, “Hari kandi n’umushinga wo kubaka ikiraro cya Gitikinyoni kizaba gifite ibyerekezo bine , uruhande rumwe rwo rukaba rwararangiye ”.

Yagize ati, “ni umushinga uzatwara arenga miliyoni 60 z’Amadolari, akaba azaboneka ku bufatanye bwa leta y’u Rwanda n’Ubushinwa”.

Icyambu cyo ku butaka cya Dubai (Dubai Portland World)

Umwaka wa 2019 kandi, usanze abikorera ku giti cyabo, yaba abo mu gihugu ndetse n’abo hanze bakorera mu Rwanda, babonye icyambu cyo ku butaka, uwo mushinga wo kubaka ishami ry’icyambu cya Dubai mu Rwanda ukaba waratwaye agera kuri miliyoni 80 z’Amadolari. Ibyo bikaba byarakozwe hagamijwe kugabanya amafaranga menshi n’igihe kinini abacuruzi bakoreshaga, bakura ibicuruzwa byabo ku byambu bya Mombasa (Kenya) na Dar-es-Salam (Tanzania).

Nk’uko bitangazwa n’abashinzwe gukurikirana ibikorwa by’iyubakwa ry’icyo cyambu mu Rwanda, bavuga ko icyambu cyuzuye, hategerejwe kugitaha ku mugaragaro.

Iyi nyubako y’akarere ka Gasabo ihagaze Miliyari zirenga eshanu z’amanyarwanda

Muri iyi nkuru igizwe ahanini n’amafoto, turagereranya inyubako tumwe mu turere twakoreragamo ubwo twabaga 30, ndetse n’uko bimeze ubu. Tumwe twakoreraga mu nyubakozo zahoze ari iz’amakomini, utundi tugakorera mu nzu zinkodeshanyo, hakaba na duke twaritwarubatse inyubako ziri ku rwego rwo hasi zitajyanye n’igihe igihugu kigezemo.

Mu turere 30 twinshi twamaze kubaka inyubako nshya, utundi turi kubaka mu gihe hari utugifite ibyo kubaka mu bitekerezo.

Gasabo: Akarere ka Gasabo karacyakorera mu nyubako itajyanye n’igihe gusa bari kubaka inzu nziza cyane ku Gishushu.

Inyubako ishaje y’akarere ka Gasabo

Akarere ka Gasabo kavuga ko kazimukira muri iyi nyubako ifite etaje zirindwi bitarenze ukwezi kwa Kamena 2019. Ubuyobozi bw’aka karere buvuga ko izuzura ifite agaciro ka Miliyari 5,5 z’amafaranga y’u Rwanda.

Nyarugenge:

Aho akarere ka Nyarugenge kahoze gakorera

Aka karere gakorera mu nzu ikorerwamo n’ibiro by’umujyi wa Kigali (Kigali City Hall). Ni inzu ifite etaje esheshatu, ikaba ihagaze miliyari 8.8 z’amafaranga y’u Rwanda.

Inyubako Kigali City Hall, ikorerwamo n’ibiro by’umujyi wa Kigali ndetse n’akarere ka Nyarugenge ihagaze amafaranga miliyari 8.8

Kicukiro:

Ibi ni ibiro by’akarere ka Kicukiro bya kera. Izindi nyubako zarasenywe hubakwa ibishya

Ni kamwe mu turere twubatse mbere kakaba karatashwe tariki 01 Kamena 2013, kakaba karuzuye gatwaye amafaranga agera kuri 726,295,752. Ni inzu yubatswe mu murenge wa Kagarama.

Ibiro by’akarere ka Kicukiro bishya byuzuye bitwaye asaga miliyoni 700

Nyamagabe:

Aka karere gakorera mu nyubako nziza yatashywe tariki 19 Gashyantare 2016. Iyi nyubako yuzuye itwaye amafaranga asaga miliyoni 788.

Ibiro bishya by’Akarere ka Nyamagabe byatashywe muri 2016

Kamonyi: Inyubako yahoze ikorerwamo n’ ahahoze Akarere ka Kamonyi ubu ni ibiro by’Umurenge wa Rukoma.

Aha ni ho ibiro by’akarere ka Kamonyi byahoze bikorera

Inyubako nshya y’akarere ka Kamonyi igeretse kabiri. Ni inyubako yatashwe muri Mutarama 2016, ikaba yaruzuye itwaye amafaranga miliyari imwe. Imirimo yo kuyubaka yatangiye mu 2014.

Ibiro bishya by’akarere ka Kamonyi byuzuye bitwaye amafaranga Miriyari imwe

Ruhango:

Aha ni ho akarere ka Ruhango kahoze gakorera

Ibiro bishya by’akarere ka Ruhango Byatangiye gukorerwamo mu mpera z’ Ukuboza 2015. Bifite ibiro 24, icyumba cy’ikoranabuhanga, n’icyumba cy’inama. Buri etage igife umwanya w’ ubwiherero bw’abagore n’ubw’abagabo.

Ibiro bishya by’Aka karere byuzuye bitwaye amafaranga 601,671,380.

Muhanga :

Ibyahoze ari ibiro by’akarere ka Muhanga

Gusana ibiro by’Akarere, byatwaye amafaranga agera kuri miliyoni 455 frw. Ni ibiro byatashwe muri Mutarama 2016.

Aho akarere ka Muhanga gakorera haravuguruwe

Uwari umuyobozi w’Akarere ka Muhanga Yvonne Mutakwasuku yavuze ko hari impavu eshatu zatumye Akarere kavugururwa harimo kuba inyubako ya mbere yari isakaje amabati yo mu bwoko bwa Fiburosima afite uburozi, kunoza isuku no kwagura ibyumba byari bitoya.

Nyanza:

Ahahoze hakorera akarere ka Nyanza

Ibiro bishya by’akarere ka Nyanza bifite ibiro byo gukoreramo bigera kuri 34, bikagira ibyumva by’inama bibiri, ahabikwa inyandiko hamwe.

Ibiro bishya by’akarere ka Nyanza

Byatangiye gukorerwamo tariki 25 Kanama 2017. Byuzuye bitwaye amafaranga asaga miliyari imwe na miliyoni 100. Ibi biro kandi bifite umwanya w’inama hejuru ku nyubako wakwakira abantu 500. Ahari ihema hakwakira abantu 200 naho ahadatwikiriye hakakira abantu 300.

Kayonza:

Ibyari ibiro by’akarere ka Kayonza

Iyi nyubako yatashwe muri Kamena 2017, ikaba yaruzuye itwaye miliyoni 750 z’amafaranga y’u Rwanda.

Ibiro bishya by’akarere ka Kayonza

Gatsibo:

Ibiro bishya by’akarere ka Gatsibo

Inyubakako nshya ibiro by’aka karere bikoreramo byuzuye bitwaye amafaranga y’u Rwanda miliyoni 900.

Rwamagana:

Ibyahoze ari ibiro by’akarere ka Rwamagana

Aka karere gakorera mu nyubako inakorerwamo n’intara y’Uburasirazuba, mu murenge wa Kigabiro. Ni inyubako ishobora gukorerwamo n’abakozi bagera ku 140, ikagira icyumba cy’inama cyakwakira abantu 300, ikanagira na parikingi yakwakira imodoka zisaga 100.

Iyi nyubako inakorerwamo n’ibiro by’Intara y’Uburasirazuba niyo ikorerwamo n’akarere ka Rwamagana ubu

Kirehe:

Iyi niyo nyubako ikorerwamo n’akarere ka Kirehe ubu ariko ngo barateganya kubaka inzu nyir’izina y’akarere

Kirehe n’ubwo ngo bimutse bakava mu nzu bakoreragamo mbere ngo ntibyakwitwa inyubako y’akarere nshya kuko yari yarubakiwe ibiiro by’ubutaka mu 2011. Ngo baracyabuze ingengo y’imari yo kubaka akarere.

Nyagatare: Akarere ka Nyagatare ntabwo karubaka ibiro by’akarere bigezweho. Kuri ubu gakorera mu nyubako eshatu zitandukanye.

Bugesera:

Inyubako yahoze ari akarere ka Bugesera

Inyubako nshya y’akare ka Bugesera yatangiye gukorerwamo mu 2014, ikaba yaruzuye itwaye amafaranga miliyari 1 na miliyoni 50.

Inyubako nshya y’akarere ka Bugesera

Nyamasheke:

Ibyahoze ari ibiro by’akarere ka Nyamasheke

Ibiro by’akarere ka Nyamasheke bishya byuzuye bitwaye amafaranga agera kuri miliyari 1,5. Ni ibiro byatashwe mu Gushyingo mu 2017.

Ibiro bishya by’akarere ka Nyamasheke

Rutsiro:

Aka ni ko kahoze ari akarere ka Rutsiro

Inyubako nshya y’akarere ka Rutsiro, ni inyubako igeretse kabiri, ikaba yaruzuye itwaye amafaranga miliyori 750. Yatashwe muri Kamena 2016.

Inyubako nshya y’akarere ka Rutsiro

Nyabihu:

Ahahoze hakorera akarere ka Nyabihu

Akarere ka Nyabihu gakorera mu nyubako igeretse kabiri, ihagaze amafaranga miliyoni 800.

Ibiro bishya by’akarere ka Nyabihu

Ngororero:

Ibi ni byo byari ibiro by’akarere ka Ngororero

Inyubako akarere ka Ngororero gakoreramo iravuguruye. Yatwaye amafaranga miliyoni 150 ngo ivugururwe.

nyuma yo kuvugurura uku ni ko akarere ka Ngororero kameze

Intara y’Amajyaruguru yihariye umwihariko wo kuba idafite akarere na kamwe muri dutanu tuyigize kajyanye n’igihe. Uturere twose turacyakora mu nyubako zishaje, uretse rurindo yagerageje kwagura, yubakiraho izindi nyubako ariko nazo zitari ku rwego rw’uturere nka Gasabo cyangwa Nyamagabe dufite inyubako zifite agaciro ka za miliyoni magana.

Ibiro by’akarere ka Gicumbi

Imirimo yo kubaka inyubako nshya y’ibiro by’akarere ka Gicumbi igeze kuri 84%

Ibiro by’akarere ka Gakenke ntabwo biravugururwa

Akarere ka Burera nako ntikarubaka ibiro bishya

Igishushanyo mbonera cy’ibiro by’akarere bigiye kubakwa cyamaze gushyirwa ahagaragara

Ahahoze hakorera perefegitura ya Ruhengeri ni ho akarere ka Musanze kagikorera

Ubusanzwe, ikinyejana kijyana n’imishinga myinshi mu mijyi yose, ibyo bikajyana n’imvugo igira iti,”Roma ntiyubatswe mu munsi umwe”.

Nubwo bimeze bityo, imyaka 25 ishize u Rwanda ruvuye muri Jenoside yakorewe Abatutsi, ni nk’ikinyejana, ukurikije imiturirwa imaze kuzamurwa, ikaba yarahinduye isura y’Umujyi wa Kigali.

Imyinshi muri iyo miturirwa, yubatswe guhera muri 2012. Niba waratembereye mu Mujyi wa Kigali muri Nyarugenge no mu nkengero zaho, nta kabuza wabonye iyo miturirwa kuko iragaragara cyane.

Kigali Today yinjiye muri iyo miturirwa igamije kumenya uko ubuzima bwa buri munsi muri iyo miturirwa buhagaze, gusa yibanze cyane ku miturirwa yubakiwe gukorerwamo ubucuruzi butandukanye.

Kigali Today yasuye iyo miturirwa umwe ku wundi, yamamaza ibikorwa byabo ku buntu, ariko igitangaje ni ukuntu hari ba nyir’imiturirwa bamwe batitabiriye kubyaza umusaruro ayo mahirwe bari babonye.

Ubundi intego kwari ugusura imiturirwa 10 itangirwamo serivisi zinyuranye, Kigali Today ihisemo, ariko kuko hari abataremeye gutanga amakuru ajyanye n’imiturirwa yabo, yaje kwanzura ko isura kandi ikavugisha abemera kuganira na yo.

M-Peace Plaza

Umuturirwa witwa MAKUZA PEACE PLAZA uherereye mu gace k’ubucuruzi ko mu Mujyi rwagati. Ni umwe mu miturirwa igaragara cyane mu Mujyi wa Kigali.

Uwo muturirwa ukorerwamo serivisi n’ubucuruzi bunyuranye harimo, ibyumba by’ibiro kuri metero kare 10.000, n’ahakorerwa ubucuruzi kuri metero kare 20.000 .Iyo nzu kandi, ifite n’amacumbi y’icyumba kimwe cyangwa bibiri, afite ibyangombwa byose.

MAKUZA PEACE PLAZA, yatashywe ku mugaragaro na Perezida wa Repubulika Paul Kagame muri 2015, ubu ukorerwamo n’ibigo n’imiryango bitandukanye harimo ’Ernest & Young’, Smart Africa, FEDEX, ikigo cy’ubwishingizi cya MAYFAIR Insurance, n’ibindi.

Umutekano w’uwo muturirwa ucungwa na sosiyete ikora kinyamwuga, kandi ikoresha uburyo bw’ikoranabuhanga bwa za camera zifotora ibihabera byose, zikora amasaha yose n’iminsi yose.

Muri uwo muturirwa kandi hari amatsinda y’abantu bashinzwe gukora isuku mu bice byose biwugize, ku buryo hahora isuku ku manywa na nijoro. Hari kandi moteri enye nini (4 generators of 2,000 KVA) zitanga umuriro mu gihe usanzwe ubuze, hari n’ibigega bibika amazi agera kuri metero cube 80.000.

Uwo muturirwa kandi ufite parikingi nini (Makuza Peace Plaza Parking Complex), ikoreshwa n’abakodesha muri uwo muturirwa bose ndetse n’abashyitsi.

Alliance Tower (BPR- Atlas)

Umuturirwa witwa ‘Alliance Tower (BPR-Atlas)’, ni uwa banki yitwaga “Banki y’Abaturage”, uherereye mu gace k’ubucuruzi mu Mujyi wa Kigali rwagati.

Umuturirwa wa Alliance Tower, ubona utandukanye n’indi urebye ubusitani bwawo bwiza bihebuje, ndetse n’amatara yawo afite urumuri rwihariye. Nta mugenzi utambuka yaba ku manywa cyangwa nijoro, atarebye uwo muturirwa, bitewe ahanini n’ubwiza bw’amatara yawo yo yanze, afite urumuri rwiza cyane.

Uwo muturirwa wubatswe na sosiyete yitwa “The Perfect City Developers (R) Ltd” ukaba uzakoreramo icyicaro gikuru cya BPR-Atlas.

Ni umuturirwa ufite etaje 15, etaje 11 zigizwe n’ibiro, izindi etaje ebyiri zigakoreshwa mu bijyanye n’ubucuruzi. Hari kandi ahari za resitora, hakiyongeraho parikingi iri munsi y’ubutaka (a basement Parking).

Etaje ya mbere ifite urubaraza runini rwiza, ku buryo abakodesha muri uwo muturirwa iyo bashatse gufata akayaga keza, bajya kuri urwo rubaraza, banirebera ubwiza bw’umujyi.

Iyo etaje ya mbere kandi iriho ibiro birimo ibikoresho bikenewe byose, ku bantu bashaka gutangiza amaduka mu Mujyi, abashaka gukorera inama ahantu heza kandi hiyubashye, ndetse n’abafite imishinga izamara igihe gito.

Abubatse uwo muturirwa bitaye cyane ku bwiza,umutekano, n’ibindi byose byakurura abashaka gukora ubucuruzi bunyuranye.

Ni umuturirwa ufite uburyo bwo gutanga umwuka ukonje mu gihe hashyushye cyane (A centralised air conditioning system), ufite interineti, ufite uburyo bwikoresha bwo kumenya ko hagiye kuba inkongi no kuyikumira.

Hari kandi ibyuma bibiri bikoresha amashanyarazi, bifasha abantu kuzamuka no kumanuka byihuse muri za etaje, kimwe kikaba cyatwara abantu 12 icyarimwe. Hari n’ikindi cyuma kimwe gikora gityo, ariko cyo gifite ubushobozi bwo gutwara umuntu umwe gusa.

Uwo muturirwa kandi ufite amadirishya manini akoranye ubuhanga, ku buryo ashobora kugabanya ubushyuhe. Imiryango minini yaho, yashyizweho ikoranabuhanga rigenzura abahinjira, hakaba na camera kuri iyo miryango zibika amashusho.Hari n’imiryango yagenewe kuba yakoreshwa mu gihe habaye inkongi.

Muri buri biro, harimo igikoni gito (a kitchenette in every office). Kuri uwo muturirwa kandi, hashyizweho n’uburyo bwo korohereza abamugaye. Hari kandi moteri nini yatanga umuriro uramutse ubuze, hakaba ibigega bibika amazi agera kuri metero cube 170 zikoreshwa ku munsi, hakaba na metero cube 400 ziba ziteganyijwe gukoreshwa mu kurwanya inkongi iramutse ibayeho.

Nubwo uwo muturirwa ufite ibyiza byinshi, abawubatse bashyizeho ibiciro byo gukodesha bidakanganye cyane. Intego yabo ngo ni ugukodesha abantu b’ingeri zose kugira ngo habeho ubwuzuzanye muri bizinesi. Ubu uwo muturirwa urakorerwamo na bimwe mu bigo bikomeye mu Rwanda, hakaba hari n’izindi sosiyete zikomeye zatangiye kuwusabamo ibiro byo gukoreramo.

KBC

KBC ni izina ryahawe inyubako y’ubucuruzi, yubatswe muri 2003, ikaba iherereye ku Kimihurura hafi ya Kigali Convention Center na Radisson Blu Hotel. Muri 2016, KBC yaravuguruwe, baranayongera, yongera gufungura imiryango yayo muri Kanama 2018.

KBC ifite ahantu ho gukorera hangana na metero kare 10.000. Kugeza ubu ahangana na 68%, hafite abahakorera, harimo abanyamahanga n’ibigo byo mu Rwanda binyuranye. Hatangirwa kandi serivisi za banki eshatu zitandukandaye. Muri iyo nyubako kandi hanatangirwa izindi serivisi zijyanye n’ibyo kurya no kunywa, hari kandi n’aho banywera ikawa.

Inyubako ya KBC yanahawe igihembo cy’inyubako ihiga izindi kuba yakwitabazwa mu buryo bworoshye, mu bihembo bigenerwa inyubako zubatse neza mu mwaka w’2018, mu ihuriro Africa Property.

Hari kandi na salon zitunganya imisatsi n’ibindi, za farumasi, ahavurirwa amaso, ibigo by’ubukerarugendo, amaduka acuruza imyenda, inkweto n’abacuruza ibijyanye n’ubwiza (cosmetics).

KBC ni inyubako ihorana umwuka mwiza, ku buryo idakeneye ibyuma byifashishwa mu gihe hashyushye cyane (Air Conditioners), Ikaba inafite ibiro bingana na metero kare 4000 biri kuri etaje eshanu. Etaje ebyiri zikorerwamo n’ibigo mpuzamahanga nka Prime Energy Group na Choice International Forwarding co.ltd.

Iyo nyubako kandi ifite igisenge cyiza cyane ku buryo umuntu uri hejuru yacyo aba areba Kigali yose neza, aho hakaba hazakorera resitora igezweho.

KBC ifite uburyo bw’ikoranabuhanga bwo kugenzura imikorere y’abakodesha ibiro byayo, kandi ifite abacunga umutekano b’abanyamwuga bakora amasaha 24 kuri 24, iminsi yose.

KBC kandi ifite moteri ebyiri nini zikoreshwa mu gihe umuriro ubuze (Generators of 500KVA each), ikagira abakora isuku babishoboye, ku buryo usanga inyubako yose ihora icyeye.

Kigali Heights (KH)

Umuturirwa wa Kigali Heights, uteganye neza neza na Kigali Convention Center, ukaba wubatse ku buso bwa metero kare 31.150.

Uyu muturirwa wanatsindiye igihembo cy’inyubako ihiga izindi mu kuba yakorerwamo ibintu bitandukanye mu birori Africa Property Investment (API) , byabereye i Sandton muri Afurika y’Epfo muri Kanama 2017.

Inzu y’ubucuruzi yo muri Kigali Heights ni imwe mu zikurura abakiriya cyane muri Kigali, aho yakira nibura abantu 9,000 ku munsi mu mibyizi, naho mu mpera z’icyumweru umubare ukazamuka, ikaba yakwakira abantu 11.000 ku munsi.

Parikingi ya Kigali Heights yakira imodoka zigera ku 2,500 mu minsi y’akazi, naho mu mpera z’icyumweru(Weekends), umubare ukiyongera, ikakira imodoka zigera ku 3,500.

Kigali Heights ifite ahantu ho gukorera ubucuruzi bwo kudandaza. Harimo ahagurirwa ikawa, ahagurirwa imboga n’imbuto, ahavunjirwa amafaranga, ahatangirwa serivisi za Banki,ahatunganyirizwa inzara n’imisatsi, ahagurirwa ibyo kurya no kunywa, harimo ahagurirwa pizza.

Ahagenewe ibiro byo gukoreramo muri Kigali Heights hangana na metero kare 12.500. Ibyo biro hafi ya byose bifite ababikoreramo kuko bigeze ku kigero cya 97%. Kigali Heights ikorerwamo n’ibigo n’imiryango mpuzamahanga n’abandi.

CHIC Ltd

Abahoze bahahira cyangwa batembera muri Kigali ahitwa muri Karitsiye Matewusi, ubu batungurwa no gusanga itakimeze uko yahoze kuko abahoze bahacururiza bagiriwe inama yo kuhimuka, bakimura n’ibikorwa byabo mu muturirwa witwa (Champion Investment Corporation “CHIC” Ltd).

Ibikorwa byo kubaka uwo muturirwa byatwaye, agera kuri miliyari 25 z’Amafaranga y’u Rwanda, ukaba wubatse mu Karere ka Nyarungege, ukaba utangirwamo serivisi zinyuranye harimo; kuba wahabona serivisi za banki umunani zitandukanye, ahantu hatanu hatangirwa serivisi zo kuvunja amafaranga no kuyohererezanya kandi ibyo bifite akamaro ku bacuruzi.

Kubera ko abenshi mu bacuruzi bakorana na banki zitandukanye, biborohera kubikuza amafaranga kuri imwe bakayashyira ku yindi bashatse, ibyo rero bigakorerwa mu nzu imwe, kandi bafite umutekano wizewe 100% .

Ikindi kandi muri CHIC haboneka n’izindi serivisi zitandukanye, harimo ahagurirwa ibyo kurya no kunywa , za farumasi, salon zo gutunganya imisatsi n’inzara n’ibindi. Hari kandi aho banywera ikawa, ahagurirwa imyenda n’inkweto, amaguriro supermarket, amavuriro mato (clinics), na za farumasi,n’ibindi.

Umutekano mu muturirwa wa CHIC ucungwa n’abantu bizewe bakora kinyamwuga, bakora amasaha 24 kuri 24 kandi iminsi yose, bakanifashisha za camera zigenzura ibibera mu nyubako byose.

CHIC ifite abantu bakora isuku, babishoboye basukura iyo nyubako imbere no hanze, ikagira na moteri (Generators) nini eshatu, zunganira amashanyarazi iyo abuze.

CHIC ifite parikingi ihagije kandi ifite umutekano amasaha yose. Abayobozi b’uwo muturirwa basobanura ko kuba ibiro byo gukodesha bihendutse ugereranyije no mu yindi miturirwa, ngo biri mu bya mbere byabakururiye abakiriye benshi.

Amaserano y’ubukode muri CHIC, aba yizewe, akamara igihe kirekire kandi akubahirizwa. Abenshi mu bakodesha muri CHIC bahisemo kujya bibumbira hamwe, aho kugira ngo umuntu ajye gukora amasezerano y’ubukode na CHIC ari umuntu umwe ku giti cye, kandi ashobora no guhindura igitekerezo igihe icyo ari cyo cyose, ntakomeze gukorera muri iyo nyubako.