Babikoze bacyumva icyorezo cya Coronavirus cyahereye mu Bushinwa ariko ubu kikaba kimaze kugera mu bihugu bitandukanye ku Isi,bitewe n’uko gifite umwihariko wo kuba gikwirakwira vuba.

Imibare y’abamaze kwandura Coronavirus hirya no hino ku isi irazamuka cyane kuko mu gitondo cyo kuri uyu wa gatandatu abanduye iyo ndwara bari bageze kuri 145.885,ikaba imaze guhitana abagera kuri 5.438 mu gihe abayikize ari 72.553.

Mu bihugu bituranye n’u Rwanda, ku itariki 10 Werurwe 2020, nibwo umurwayi wa mbere wa coronavirus yagaragaye muri Repubulika ya Demokarasi ya Congo(RDC), uwo murwayi akaba yari Umubiligi wari uje muri icyo gihugu, ndetse muri Kenya ikaba yamaze kuhagera.

Kugeza ubu, mu Rwanda na ho yamaze kuhagera, Abanyarwanda ndetse n’abaturarwanda muri rusange bakaba basabwa n’inzego z’ubuzima gukomeza kugira isuku muri byose mu rwego rwo kwirinda ikwirakwizwa ry’icyo cyorezo.

Mu mashusho (video) yafatiwe ku nyubako ya Kigali Arena mu Karere ka Gasabo, bamwe mu bagize ihuriro ry’Abanyarwanda bize mu Bushinwa, bagaragaye bahumuriza Abashinwa, babifuriza gukomera no gukomeza guhangana n’icyo cyorezo.

Higaniro Theoneste uhagarariye iryo huriro yagize ati, “Muri iki gihe cy’icyorezo cya Coronavirus, twebwe Abanyarwanda bize mu Bushinwa, turashaka kugaragaza ko twifatanyije n’inshuti zacu z’Abashinwa kandi tubifuriza gukomeza kugira imbaraga zo kurwanya icyo cyorezo.”

“ Twizeye ko Guverinoma y’u Bushinwa ndetse n’Abashinwa bazatsinda urwo rugamba.”

Dr Menelas Nkeshimana na we wize mu Bushinwa ubu akaba ahagarariye ishami rishinzwe kwakira indembe mu Bitaro bya Kaminuza bya Kigali (CHUK) yagize ati, “Muri iki gihe cy’icyorezo cya COVID-19, ndazirikana inshuti zanjye ndetse n’Abarimu banjye bari mu Bushinwa, mbatekereza buri munsi. U Bushinwa bwashoboye kubona iyo ndwara kare, mfite icyizere ko buzanashobora kuyitsinda. Komeza ubutwari China”.

Icyorezo cya Coronavirus kigitangira, abantu mu bice bitandukanye by’u Bushinwa basabwe kudasohoka, bakaguma mu nzu kugira ngo bigabanye ikwirakwira ryacyo.

Nk’uko bisobanurwa na Gakiza Canisius, Umunyamabanga w’ihuriro ry’Abanyarwanda bize mu Bushinwa, iryo huriro rigizwe n’Abanyarwanda bizeyo, n’abakozeyo amahugurwa amara nibura amezi atatu kuzamura.

Iryo huriro ubu rifite Abanyamuryango 650, bakaba bakorana bya hafi na Ambasade y’u Bushinwa mu Rwanda, aho bafatanya mu mishinga itandukanye nk’uko Gakiza abivuga.

Yagize ati, “Dukorana bya hafi na Ambasade y’u Bushinwa mu Rwanda, tugakorana ibikorwa bitandukanye nko gufasha abacitse ku icumu rya Jenoside, gufasha mu gusana inzibutso za Jenoside, n’ibindi byinshi. Muri iyi minsi turafasha abantu kumenya uko basaba serivisi za Leta zitangirwa kuri Interineti”.

Gakiza akomeza agira ati, “Ntabwo buri Munyarwanda wize mu Bushinwa ari umunyamuryango w’ihuriro ryacu, ariko twiteguye kwakira uwo ari we wese wizeyo, akaba yifuza kurizamo.”

Ubufatanye hagati y’u Rwanda n’u Bushinwa mu by’Uburezi, bwatumye umubare w’Abanyarwanda bajya kwiga cyangwa guhugurirwa muri icyo gihugu wiyongera.

Mu 2015, Abanyarwanda 86 bagiye mu Bushinwa mu mahugurwa ajyanye n’imicuringire y’abakozi(Human resource trainings) umubare urazamuka mu 2016 baba 127, mu 2017 bariyongera baba 187.

Mu 2018, umubare wakomeje kuzamuka ugera kuri 248, mu gihe umwaka ushize wa 2019, umubare w’Abanyarwanda bajya kwiga mu Bushinwa wari 400 nk’imibare yatangajwe na Ambasade y’u Bushinwa mu Rwanda mu kwezi k’Ukuboza umwaka ushize wa 2019 ibigaragaza.

Sosiyete y’Indege ya RwandAir izungukira mu gukora ingendo muri ibi bihugu (Ifoto: KT Press)

Yagize ati “Uyu munsi u Rwanda rusinye amasezerano ajyanye n’ubufatanye mu by’ubwikorezi bwo mu kirere, akorwa hagati y’ibihugu bibiri (Bilateral Air Service Agreements “BASA”). Aheruka yasinywe na Minisitiri ushinzwe ubwikorezi n’ibijyanye n’indege muri Somalia, agamije koroshya ubucuruzi, ubukerarugendo n’ubufatanye mu ishoramari”.

Ku itariki 10 Gashyantare 2020, Minisitiri w’Ububanyi n’Amahanga w’u Rwanda Dr. Vincent Biruta yasinye andi masezerano nk’ayo n’igihugu cya Tunisia, mu gihe bari mu nama ya 33 y’Umuryango wa Afurika yunze Ubumwe, yabereye i Addis Ababa muri Ethiopia.

Ayo masezero yose yasinywe, avuze ko u Rwanda rurimo gufungura inzira hirya no hino ku isi, bikarufasha muri gahunda yo kwagura ubucuruzi bwarwo, ubukerarugendo ndetse n’imikoranire myiza mu bya politiki n’ibindi bihugu.

Nk’uko Minisitiri w’ibikorwaremezo abisobanura amasezerano yasinywe ari mu nzego zitandukanye.

Hari ari ku rwego rwo gushyirwaho umukono gusa, hakaba n’ayatangiye gushyirwa mu bikorwa.

Muri ayo masezerano asaga ijana u Rwanda rumaze gusinya, amenshi muri yo rwayasinyanye n’ibihugu bya Afurika. U Rwanda ntirwagarukiye muri Afurika gusa, ahubwo rwaguye imipaka, rusinyana n’ibihugu byo muri Amerika, Asia, Uburasirazuba bwo hagati (Middle East) ndetse n’ibihugu by’i Burayi.

Urebye mu mateka y’amasezerano nk’ayo u Rwanda rumaze gusinyana n’ibihugu bitandukanye, ni amasezerano agakorwa hagati y’ibihugu bibiri, agamije kugaragaza ko ibyo bihugu byemeranijwe gukorana mu bijyanye n’ingendo z’indege za gisivili zikora ubwikorezi bw’abantu n’imizigo mu kirere hagati y’ibyo bihugu.

Muri ayo masezerano hanarebwa ibiciro , ubushobozi ndetse n’uko ubucuruzi bwa buri gihugu buhagaze.

Mu mwaka wa 1944, mu gihe intambara ya kabiri y’isi yari igiye kurangira , ibihugu 54 byahuriye mu nama ahitwa i Chicago muri Leta zunze ubumwe za Amerika, biganira ku bikwiye kugenga ubwikorezi mpuzamahanga bukorerwa mu kirere (international aviation).

Inama yarangiye hasinywe amasezerano azwi nka “Chicago Convention” ashyiraho amabwiriza agenga ubwikorezi mpuzamahanga bukorerwa mu kirere.

Ayo masezerano yiswe “Chicago Convention” yashyizeho amabwiriza avuga ko nta ndege ya kimwe mu bihugu byasinye ayo masezerano yemerewe kunyura mu kirere cy’ikindi gihugu cyayasinye, itabanje kubisabira uburenganzira.

Amasezerano yo muri urwo rwego ya mbere yasinywe nyuma y’intambara ya kabiri y’isi, yasinywe mu 1946, asinywa hagati ya Leta zunze Ubumwe za Amerika n’u Bwongereza.

Abo banyamakuru bahasanze umukobwa witwa Ikirenga Mafubo Frida, akaba ari umwe mu bari inyeshyamba za CNRD.

Ikirenga yagiye gushishikariza se gutaha mu Rwanda, ahubwo birangira Se amushoye mu bikorwa bya gisirikare

Ni umukobwa uvuga ko adakunda kuvugana n’itangazamakuru cyane, ariko yagerageje kuvuga urugendo rwe, ava mu mashuri yisumbuye nyuma akisanga mu mashyamba ya Congo.

Yagize ati, “Ubu ndicuza impamvu ndi hano, sinzi icyo umuryango wanjye, inshuti abo twiganye bazavuga nibamenya ko ndi hano”.

Ikirenga Frida ufite imyaka 26 ni umwe mu barwanyi bafashwe n’ingabo za Congo(FARDC), nyuma bashyikirizwa Leta y’u Rwanda.

Nk’uko bitangazwa na Nyamurangwa Fred, Komiseri muri Komisiyo yo gusezerera no gusubiza mu buzima busanzwe abari abasirikare, iyo komisiyo imaze kwakira abarenga 11.000 kuva igiyeho.

Icyiciro cy’abari muri icyo kigo cya Mutobo muri iyi minsi, harimo abasirikare b’imitwe itandukanye, bagizwe n’abagabo n’abagore ubona bakuze, urubyiruko ndetse n’abana bashyizwe mu gisirikare.

Buri wese muri abo, aba afite inkuru yabara ku buzima yabayeho mu mashyamba,ibyo yabonye ijoro n’umunsi.

Hari abavukiye mu mashyamba bagakura bajya mitwe igamije guhungabanya umutekano w’u Rwanda, hari n’abagiye bajyanwa n’abo mu miryango yabo cyangwa se inshuti.

Ikirenga Mafubo Frida, avuga ko yisanze ari umurwanyi mu mashyamba ya Congo. Mu 2017, ngo yagiye mu kazi ko gukora mu birombe by’amabuye y’agaciro muri Uganda abigiriwemo inama n’inshuti.

Yicuza igihe yamaze mu nyeshyamba kuko byamuvukije amahirwe yo kwiteza imbere

Ubundi ngo yabanaga na barumuna be batatu na musaza wabo mu Kagari ka Mumena , Umurenge wa Rwezamenyo , Akarere ka Nyarugenge mu Mujyi wa Kigali.

Yagize ati, “Hari inshuti yanjye yambwiye ko hari akazi mu birombe by’amabuye y’agaciro mu Karere ka Mubende muri Uganda. Twemeranyijwe kwambuka tukajya gukorayo.Nahakoze umwaka.”

Gusa nubwo yari aho muri Uganda, Ikirenga Frida yahoraga atekereza uko yazamenya amakuru ya Se.
Yagize ati, “Hari hashize imyaka myinshi Data yaradusize, nta mahirwe twari twarigeze tugira yo kumenya aho aherereye, ibyo rero byarambabazaga cyane”.

Ahagana mu mpera z’umwaka wa 2018, Ikirenga yiyemeje kuva ku kazi yariho muri Uganda akagaruka mu Rwanda.Gusa mbere y’uko agaruka mu Rwanda, yahuye n’umugore w’umunyarwandakazi, amubwira ko azi amakuru ya Se.

Yagize ati,“Kuri njye iyo yari inkuru nziza.Twemeranyijwe ko tuzakomeza kuvugana n’igihe nzaza ndi mu Rwanda”.

Ikirenga yagarutse iwabo ku Mumena, nyuma hagati mu mwaka wa 2019, yongeye kuvugana na wa muntu wamubwiye ko azi amakuru ya Se, bemeranya kuva mu Rwanda bakanyura i Goma mu Burasirazuba bwa Congo.

Yagize ati, “Ngeze i Goma, uwo mugore yampuje n’undi mugabo anjyana ahantu hitwa Mweso mu mashyamba ya Congo, aho rero niho nasanze Data”.

Ikirenga avuga ko Se yamutengushye cyane, kuko ngo akimubona yahise amubwira ngo “Karibu mu gisirikare”.

Ikirenga yagize ati “Sinahise numva icyo avuze, kuko nkimubona nasanze yarashatse undi mugore ndetse bafitanye abana barindwi.Yabaga mu nzu ya nyakatsi, akanayivuriramo abasirikare barwaye. Namubwiye ko icyanzanye ari ukumubwira agataha mu Rwanda, we icyo yakoze yaransetse gusa”.

Ikirenga Mafubo Frida yamaranye ijoro na Se, bukeye abona abasirikare baje aho mu nzu ya nyakatsi Se yabagamo.

Yagize ati, “Data yambwiye ko ngomba kujya mu gisirikare. Nagerageje kubyanga, ariko ankangisha ko nintakijyamo nzicwa. Abenshi mu bana be na bo bari abarwanyi, ubwo nahise njyanwa mu myitozo ya gisirikare.Imyitozo twayikoze ukwezi kumwe”.

“Umugoroba umwe rero, FARDC yaturasheho, turiruka birangira turushijwe imbaraga. Baradufata ni uko nisanze aha ”.

Ikirenga afatwa, ntiyari kumwe na Se . Ati “Kuva nahatirwa kwinjira mu gisirikare, sinongeye kubona Data, sinzi niba yarishwe”.

Aba bagore na bo bahoze ari abarwanyi barimo guhugurirwa i Mutobo hamwe na Ikirenga Frida

Ikirenga ava mu Rwanda ajya gukora muri Uganda, yari arangije amashuri yisumbuye afite n’impamyabushobozi (Diploma) mu ibaruramari (Accounting).

Ati “Nabanje kwiga kuri St. Aloys i Rwamagana nyuma nkomereza kuri St. Patrick Secondary mu Karere ka Kicukiro ari na ho nakuye impamyabushobozi mu ibaruramari. Iyo ntekereje ubuzima bubi nagiriye mu mashyamba ya Congo nicuza icyatumye nkunda Data”.

“Yanyangirije ahazaza, kuko yaburijemo inzozi zanjye zo kwiga.Icyampa gusubira kuri kaminuza nkarangiza amasomo”.

Ikirenga narangiza amasomo bahabwa mu Kigo cya Mutobo, azahabwa amafaranga ashobora no kuzamufasha kwiga iyo kaminuza yifuza.

Nyamurangwa avuga ko nyuma y’amezi atatu bamara mu kigo cya Mutobo, Ikirenga we na bagenzi be bazahabwa amafaranga y’u Rwanda (280.000 FRW) azabafasha mu minsi ya mbere bagisubira mu buzima busanzwe.

Yagize ati, “Ubwa mbere tubaha 60.000 Frw iyo bavuye mu kigo. Ubwa kabiri tubaha 120.000 Frw tukayabashyirira kuri konti zabo, nyuma tukabashyiriraho andi 100.000 Frw. Igituma duhitamo kuyabaha mu byiciro bitandukanye ni ukugira ngo tubafashe kubona umwanya uhagije wo gutegura imishinga y’iterambere bayakoresha.”

Amafoto: Roger Marc Rutindukanamurego

Abenshi muri abo bataha, bafatirwa mu bitero bigabwa n’ingabo za Congo(FARDC),bigamije kurwanya imitwe yitwara gisirikare muri icyo gihugu.

Kigali Today yifuje kumenya uko ubuzima bw’abo Banyarwanda buba bumeze iyo bageze mu bigo bibakira nubwo batabimaramo igihe kirekire cyane.

Muri gahunda yateguwe na Komisiyo y’igihugu yo guserera no gusubiza mu buzima busanzwe abari abasirikare, Kigali Today na yo yajyanye n’ibindi bitangazamakuru byo mu Rwanda no mu mahanga mu rugendo rugamije kumenya imibereho y’abo Banyarwanda batahuka bava mu mashyamba ya Congo.

Ni urugendo rwatangiye ku itariki ya 29 rugeza kuri 31 Mutarama 2020, basura inkambi y’agateganyo ya Nyarushishi mu Karere ka Rusizi, ikaba igenewe kwakira abaturage b’abasivili batahutse.

Basuye kandi n’ikigo cya Mutobo mu Karere ka Musanze cyagenewe kwakira abari abasirikare batahutse. Muri urwo rugendo rero Kigali Today yarebye ubuzima abo Banyarwanda mu ngeri zitandukanye babayemo, inagirana ikiganiro na bamwe muri bo.

Muri ibyo bigo byombi muri rusange habarurwa abagera kuri 341 bafashwe n’ingabo za Congo bashyikirizwa u Rwanda, nyuma boherezwa i Mutobo. Muri abo 341, harimo abagabo n’abagore 273 bahoze mu mitwe itandukanye yitwara gisirikare.

Aba bagore na bo bahoze ari abarwanyi barimo guhugurirwa i Mutobo

Hari kandi abana 66 bari barashowe mu bikorwa bya gisirikare (child soldiers), abasivili 131 ndetse n’abana bagera kuri 26.

Muri abo bahoze ari abasirikare, harimo umwe ufite ipeti rya “Brigadier General”, 4 bafite ipeti rya “Colonel”, 3 bafite ipeti rya “Lt Colonel”, 2 bafite ipeti rya “Major”, 4 bafite ipeti rya “Captain”, 1 ufite ipeti rya “Lieutenant” n’abandi 9 bafite ipeti rya “Sous Lieutenant”.

Inkambi ya Nyarushishi icumbikiye abagera kuri 1991, barimo imiryango y’abo bahoze ari abasikare bari i Mutobo. Muri abo 1991 harimo abagabo 122, abagore 784 ndetse n’abana bagera ku 1085 .

Musonera Frank, umuyobozi w’inkambi ya Nyarushishi yasobanuriye abanyamakuru uko abo batahuka bakirwa iyo bageze mu Rwanda n’ibyo bahabwa bitandukanye.

Yagize ati, “ Iyo bakiriwe n’u Rwanda,boherezwa mu Nkambi ya Nyarushishi, bagapimwa indwara zitandukanye, nyuma bagahabwa ibyo kurya by’ibanze, bagahabwa aho baba, imiti ndetse n’imyambaro”.

“Hari kandi n’ibindi bahabwa nk’ibikoresho by’isuku, kuganirizwa n’abajyanama (counselors) babafasha mu kumenya kwikemurira ibibazo bitandukanye, ibyo byose bikorwa mbere y’uko boherezwa mu bice bitandukanye bakomokamo”.

Nk’uko Musonera akomeza abisobanura, abo bakirwa n’inkambi ya Nyarushishi, bayimaramo amezi atatu, bigishwa ibijyanye no gukunda igihugu, ndetse na gahunda za Leta zitandukanye zigamije iterambere ry’abaturage kugira ngo bizaborohere mu gihe bageze aho bakomoka.

Yongeyeho ati “Hari kandi no kumenya amakuru yabo uko bitwaye mu gihe cya Jenoside mbere yo kubohereza aho bakomoka. Iyo umuntu akekwaho kuba yaragize uruhare muri Jenoside, ashyikirizwa inzego z’ubutabera, bugakora akazi kabwo uko biteganywa”.

Abeshi muri bo bahunze mu 1994, kandi muri icyo gihe cyose hari ibintu byinshi byahindutse , harimo n’amazina y’uturere bakomokamo, ubwo rero baba bagomba gusubira mu midugudu bakomokamo kugira ngo binjire neza mu muryango nyarwanda basanze”.

Musonera yavuze ko bigishwa ibijyanye n’icyerekezo cya Leta y’u Rwanda.

Yagize ati “Abakiriwe mu nkambi bose bigishwa gukunda igihugu, banabwirwa gahunda nziza zacyo harimo ubumwe n’ubwiyunge, gahunda ya ndi “Ndi Umunyarwanda”, bakanasobanurirwa izindi gahunda z’iterambere zashyizweho kugira ngo twubake igihugu dushaka”.

Ati “Ibyo bibafasha kumenyera vuba, cyane cyane ko baba basobanuriwe ubuzima bw’igihugu mu bice bitandukanye ” .

Abana n’abagore mu nkambi y’agateganyo ya Nyarushishi

Kigali Today yaganiriye n’uwitwa Nzahoramvuga Madeleine ufite imyaka 50, watangiye avuga ko akomoka muri Komine Kigombe. Yagize ati, “ Nkomoka ahitwa muri Komine Kigombe”. Bamwibukije ko icyahoze ari Komine Kigombe ubu ari mu Karere ka Musanze.

Nzahoramvuga yabyimbye ibirenge, we akavuga ko byatewe n’urugendo rurerure yakoze aza mu Rwanda.

Kigali Today igera mu Nkambi ya Nyarushishi, yasanze abana bagera nko kuri 50 bari mu ishuri biga kuko byari mu masaha yo kwiga.

Abo bana batari barigeze bakandagira mu ishuri na rimwe ry’Icyongereza, ubu babara mu Cyongereza bakageza kuri 50.

Umwarimu wabo Mukamurenzi Esther, yagize ati “Iyo bakiza usanga bafite imyitwarire idasanzwe, ariko nyuma y’igihe gito bigashira, nk’abana bose nyine biga vuba”.

Abana mu nkambi ya Nyarushishi bahabwa amasomo atandukanye arimo n’isomo ry’Icyongereza

Musonera yongeyeho ko abo bana bigishirizwa mu Nkambi ya Nyarushishi, bakurikiranwa nyuma bakoherezwa mu bigo by’amashuri muri gahunda y’uburezi busanzwe bitewe n’urwego rwa buri mwana mu gukurikira mu ishuri.

Abana bafite ikibazo cy’imirire mibi, bitabwaho byihariye bahabwa amafunguro yujuje intungamubiri zikenewe.Iyo saa tanu zigeze ababyeyi n’abana bajya gufata igikoma n’amata bakagaburira abana, nyuma bagakomerezaho bafata n’andi mafunguro asanzwe.

Musonera avuga ko Leta y’u Rwanda ikora ibishoboka byose ngo abo Banyarwanda bagire ubuzima bwiza, butandukanye n’ubwo babagamo mu mashyamba.

Yagize ati, “Dufite ivuriro rito hano mu nkambi. Iyo umurwayi afite ikibazo gikomeye cyane, yoherezwa ku bitaro bya Gihundwe, hari na gahunda yihariye yo kwita ku bana bari munsi y’imyaka 6, kugira ngo bahabwe ibyo abandi bana bari muri icyo kigero bahabwa”.

Mu kigo cya Mutobo, Kigali Today yaganiriye na Brig Gen David Mberabahizi, avuga ukuntu nyuma yo kugera mu Rwanda yasanze barabayeho mu isi ebyiri zitandukanye.

Brig Gen David Mberabahizi ni we mukuru mu mapeti ya gisirikare mu bo bari kumwe aho i Mutobo. Mu myaka 34 ishize, Mberabahizi yarangije kwiga mu ishuri rikuru rya gisirikare (Ecole Superieur Militaire “ESM”), ahabwa ipeti rya Lieutenant, nyuma akora n’andi mahugurwa ya gisirikare mu Bubiligi mbere y’uko ahungira muri Congo mu 1994.

Ubundi mu gisirikare “Brigadier General” ni ipeti rikomeye rijyana n’icyubahiro n’ibindi bintu byinshi urifite agenerwa, ariko Brigadier General Mberabahizi abivuga ukundi.

Brig Gen. David Mberabahizi (uri imbere hagati) ni umwe mu baherutse gutaha mu Rwanda bavuye mu mashyamba ya Congo

Brig.General Mberahahizi yabaye umujyanama mu bya gisirikare muri “CNRD-Ubwiyunge” iyobowe na Twagiramungu Faustin ubarizwa mu Bubiligi na Paul Rusesabagina.

Iyo CNRD-Ubwiyunge yavutse nyuma yo gucikamo ibice kwa FDLR ikaba igizwe ahanini n’abantu bahunze u Rwanda nyuma ya Jenoside yakorewe Abatutsi mu 1994.

Brig.General Mberabahizi yagize ati, “Mu mapeti n’imidari bya gisirikare nabonye byose, nababajwe n’ikintu kimwe gusa, kumva buri gitondo mbyukana isuka ku rutugu njya guhingira ibyo kurya. Ikintu nari ntunze mu mashyamba ya Congo ni ingurube nkeya gusa.”

Yagize ati, “Ubu ngiye kuzuza imyaka 57. Mfite abana n’umugore, ariko nta kintu mfite kimfasha kubitaho. Nk’umugabo, ibyo birambabaza cyane . Icyampa icyo nkora kimfasha kwita ku muryango wanjye.”

Nubwo Brig.Gen Mberabahizi ahangayikishijwe n’ubwo buzima bumuteye ubwoba, Nyamurangwa Fred, Komiseri muri Komisiyo yo gusezerera no gusubiza mu buzima busanzwe abari abasirikare amufitiye amakuru meza we n’abandi bagenzi be bahoze mu mashyamba.

Nyamurangwa Fred

Nyamurangwa avuga ko nyuma y’amezi atatu bamara mu kigo cya Mutobo, Brig.Gen Mberabahizi na bagenzi be bazahabwa amafaranga y’u Rwanda ibihumbi 280 (280.000 FRW) azabafasha mu minsi ya mbere bagisubira mu buzima busanzwe.

Yagize ati, “ubwa mbere tubaha ibihumbi mirongo itandatu (60.000 FRW) iyo bavuye mu kigo . Ubwa kabiri tubaha 120.000 FRW tukayabashyirira kuri konti zabo, nyuma tukabashyiriraho andi 100.000 FRW. Duhitamo kuyabaha mu byiciro bitandukanye kugira ngo tubafashe kubona umwanya uhagije wo gutegura imishinga y’iterambere bayakoresha.

Kuva mu 1994, impunzi z’Abanyarwanda zirenga Miliyoni eshatu n’igice (3.5 Million) zimaze gutahuka mu Rwanda.

Abakenera ubuvuzi na bo barabuhabwa. Aba bari ahagenewe ubuvuzi mu nkambi ya Nyarushishi

Icyakora bagira Abanyarwanda inama, yo kuzajya bitonda mu gihe bagiye gusaba inguzanyo, ntibigane abandi, ahubwo bakaka inguzanyo babanje kubitegura neza.

Gukora ikintu wiganye abandi, bigira ingaruka ku muntu wabikoze, kuko yisanga akora ibintu kuko abandi babikora, nyamara akirengagiza ibyo we yifuza, yemera cyangwa se ashoboye. Kandi ibyo ni byo byagombye kuza imbere muri gahunda za buri muntu.

Imyitwarire yo gukora ikintu nk’urwiganwa ikunda kugaragara ku bantu batandukanye nk’uko bisobanurwa n’umusesenguzi mu by’ubukungu witwa Mugabo Elia.

Yagize ati, “Kimwe mu bibazo Abanyarwanda bajya bahura na cyo, ni uko hari ubwo bafata imyanzuro ku bintu runaka, bakabikora nk’urwiganwa.”

Inama ya mbere Mugabo agira abantu, ni ukureka kwigana abandi, kuko bigira ingaruka zabyo.

Yagize ati, “Usanga hari umuntu uvuga ati, mugenzi wanjye atuye mu Kagari runaka, nanjye rero ni ho ngomba gutura.Ubwo akirengagiza ko amafanga uwo mugenzi we yinjiza n’ayo akoresha, bitandukanye n’ibye, mbese batabayeho kimwe
Iyo myitwarire kandi, ikunda kugaragara mu bantu bafite amikoro aciriritse mu gihugu”.

Mugabo Elia, avuga ko ubundi umuntu uzi kwigenzura mu bijyanye n’ubukungu, yitwararika cyane, ku buryo adahubukira gufata inguzanyo yo kugura cyangwa kubaka inzu.

Yagize ati, “Abenshi muri abo bantu, bahitamo kubanza bakazigama, bakaba bagera ku byo bifuza, ariko ntibajya bahubukira gufata inguzanyo”.

Aganira na Kigali Today, yifashishije imibare, atanga urugero rw’umuntu ufata inguzanyo ya miliyoni 23 z’amafaranga y’u Rwanda, ku nyungu ya 17.25% , azishyura mu myaka 20.

Yagize ati, “Dutekereze umuntu ahembwa umushahara 700.000 Frw ku kwezi, agasaba inguzanyo ku mushahara ya miliyoni eshanu z’amafaranga y’u Rwanda, ku nyungu ya 19% , akajya yishyura 1/3 cy’umushahara we, ni ukuvuga 233,333 Frw akishyura mu myaka itatu, akagura ikibanza.

Ku bwa Mugabo, nyuma y’imyaka itatu, uwo muntu yasaba indi nguzanyo ya miliyoni eshanu z’amafaranga y’u Rwanda, akongeraho ayo yizigamiye.Wenda yaragiye azigama 100.000Frw ku kwezi.Ubwo yaba afite 1,278,200Frw.

Ubwo mu myaka itatu yaba afite 3.834.600 Frw yazigamye, yakongeraho miliyoni eshanu z’amafaranga y’u Rwanda, akaba agize 8.834.600Frw.Ayo mafaranga yamufasha kubaka inzu mu myaka itandatu.

Icyo gihe noneho, ashobora kwaka inguzanyo yo kubaka inzu, azishyura mu myaka icumi, kugira ngo yuzuze inzu ye.Abikoze atyo, yakuzuza inzu ye ku giciro gito.

Nubwo hari ibyo bibazo bijyanye n’inguzanyo, ariko abatuye isi baracyashishikarizwa gukorana na za banki,kuko umubare w’abazibira ukiri muto.

Nk’uko tubikesha imibare ya banki y’isi “World Bank’s Global Financial Inclusion” mu bushashatsi yakoze ku bihugu , abantu bagera kuri miliyari ebyiri hirya no hino ku isi, ntibakorana na banki.

Iyo banki yatangaje ko, 20% by’abo bantu badakorana na banki, ari abantu bakuru, bahembwa cyangwa bahabwa amafaranga na leta mu ntoki, 55% by’abo bantu batajya bakorana na banki ni abagore.

Banki y’isi ivuga ko umubare w’abantu bafite konti muri banki, ugenda wiyongera kuko wavuye kuri 51% ugera kuri 62% hagati ya 2011 na 2014.

Umujyi wa Kigali ushora 80% by’ingengo y’imari yawo mu kubaka imihanda

Icyo kibuga cy’indege, u Rwanda rwashoyemo menshi kugeza ubu, biteganijwe ko kizajya cyakira abagenzi bagera kuri miliyoni enye n’igice ku mwaka. Ibikorwa byo kubaka igice cya mbere bizatwara agera kuri miliyoni 418 z’Amadorari, kikazaba cyarangiye mu mpera z’ukwezi k’Ukwakira 2019. Gusa umushinga muri rusange uzatwara agera kuri miliyoni 818 z’Amadolari.

Ubwo yari mu kiganiro n’abanyamakuru nyuma y’inama y’umushyikirano ku itariki 14 Ukuboza 2018, Perezida wa Repubulika Paul Kagame, abajijwe aho umushinga wo kubaka ikibuga ugeze, yavuze ko igishushanyo mbonera cya mbere cyasubiwemo kiravugururwa, hagamijwe kwagura icyo kibuga mu bunini no mu bwiza, kugira ngo kirusheho kujyana n’ibiranga ibibuga mpuzamahanga ku rwego rw’isi.

Yagize ati “Igishushanyo cya mbere cyari cyuzuye kijyanye n’ibyo twashakaga gukora, nyuma haza kubaho impamvu ituma tukivugurura, tugamije kwagura ikibuga no kucyongerera ubwiza”.

Perezida Kagame kandi, yijeje Abanyarwanda ko, ikibuga cyizuzura ku gihe cyateganijwe.

Muri Kamena 2018 Ikibuga cy’indege cya Bugesera ni aha cyari kigeze

Yagize ati “Mu gihe cya vuba turaba dukoresha icyo kibuga. Sinshaka kuvuga igihe ntakuka, ariko si kirekire, sinshaka ko abubaka ikibuga bagendera ku byo navuga, sinshaka kuvuga igihe ntakuka imirimo izaba yarangiye, kuko abo bubaka ikibuga, bazabyitwaza bakavuga bati, twashoboraga kurangiza kubaka ikibuga mu gihe gito, ariko kuko Perezida atekereza ko byagombye gufata igihe kirekire, mureke bikorwe mu gihe kirekire. Ni iyo mpamvu ntaza kuvuga igihe ntakuka. Gusa biri mu nzira nziza, biragenda neza, ubona ari umushinga utanga icyizere”.

Hari kandi indi mishinga umwaka wa 2018 wasize, biteganijwe izarangira muri uyu mwaka wa 2019, hakaba n’indi izakomeza ikazarangira mu 2020. Kigali Today yashatse kumenya aho iyo mishinga igeze, ivugana n’Umunyamabanga wa Leta muri Minisiteri y’ibikorwaremezo, Eng. Jean de Dieu Uwihanganye.

Umuhanda Ngoma – Bugesera - Nyanza

Umuhanda Ngoma - Bugesera - Nyanza uzahurira n’uyu muhanda i Ramiro

Mu mwaka wa 2017, Abataruge b’utwo turere dutatu ari two; Ngoma na Bugesera two mu Ntara y’Uburasirasirazuba na Nyanza yo mu Ntara y’Amajyepfo, bakiriye amakuru meza, avuga ko Banki y’isi n’u Rwanda basinyanye amasezerano agamije kubaka umuhanda w’ibirometero 130 Ngoma - Bugesera - Nyanza, hagamijwe koroshya ubuhahirane hagati y’Intara y’Uburasirazuba n’iy’Amajyepfo.

Minisitiri Uwihanganye avuga aho ibikorwa byo kubaka uwo muhanda bigeze, yavuze ko ibikorwa byo kubaka igice cya Kibugabuga – Shinga - Gasoro bizatangira muri Kanama uyu mwaka, naho ibyo kubaka igice cya Ngoma-Ramir, bikazatangira muri Werurwe 2020.

Uwihanganye yagize ati “Kuri ubu, harakorwa inyigo y’uko ibikorwa bizagenda”.

Umuhanda Kagitumba – Gabiro – Gabiro - Kayonza

Niba waraterambereye mu Burasirazuba muri iyi minsi, nta gushidikanya ko wishimiye kunyura mu muhanda wasanwe, uhera mu Karere ka Kayonza ugana i Kagitumba ku mupaka uhuza u Rwanda na Uganda.

Uwo muhanda wubatswe mu myaka 35 ishize, wari umaze kwangirika ku buryo byari bisigaye biteza impanuka nyinshi.

Ibikorwa byo gusana umuhanda Kagitumba – Kayonza - Rusumo no kuwagura, bizatwara agera kuri miliyoni 376.5 z’Amadolari. Bikaba byaratangijwe ku mugaragaro muri Gashyantare umwaka ushize wa 2018, uwo muhanda ukaba witezweho kuzoshya ubuhahirane hagati y’u Rwanda n’ibihugu bituranye narwo mu gice cy’Uburasirazuba.

Minisitiri Uwihanganye yabwiye Kigali Today ko ibikorwa byo gukora uwo muhanda bizaba byarangiye mu Kwezi k’Ugushyingo uyu mwaka wa 2019.

Yagize ati, “Umuhanda Kagitumba - Gabiro uzaba wuzuye muri Nzeli 2019, uwa Gabiro - Kayonza uzuzura muri Kanama 2019 naho uwa Kayonza - Rusumo uzarangira mu Kwezi k’Ugushyingo 2019.”

Umuhanda Base – Rukomo – Rukomo – Nyagatare

Mu Kwezi k’Ukwakira 2017, Guverineri w’Intara y’Amajyaruguru Gatabazi Jean Marie Vianney, yashyize ifoto ye kuri twitter agaragaza ko yasuye ibikorwa byo kubaka umuhanda Base – Gicumbi - Rukomo, ufite uburebure bwa kilometero 51.

Uwo muhanda uzahuza Amajyaruguru y’igihugu n’Uburasirazuba, wishimiwe cyane n’abazawukoresha, harimo na Guverineri Gatabazi.

Ariko se ni ryari abakoresha uwo muhanda bazatangira kubona imodoka zigenda muri uwo muhanda mushya? Minisitiri Uwihanganye Jean de Dieu yasobanuye aho iyo mishinga yose.
Minisitiri Uwihanganye yagize ati, “Umuhanda Base - Rukomo uzaba wuzuye muri Kanama 2019, naho umuhanda Rukomo - Nyagatare uzuzura hagati mu mwaka wa 2021”.

Imishinga yo kubaka imihanda yo mu Mujyi wa Kigali

Mu gihe u Rwanda, rugenda ruhinduka ihuriro ry’inama n’ibirori bitandukanye mu Karere, umujyi wa Kigali nawo ugenda wubaka imihanda mishya, kugira ngo ukemure ikibazo cy’umubyigano w’imodoka ugenda wiyongera.

Urugero, nko mu mwaka ushize wa 2018, u Rwanda rwakiriye inama 201, zari zitabiriwe n’abantu barenga 35.000, ibyo bikaba barinjirije u Rwanda, agera kuri miliyoni 52 z’Amadolari.

Muri uwo mwaka wa 2018, hari imihanda wasangaga yafunzwe rimwe na rimwe kugira ngo abashyitsi bava cyangwa bagana ku kibuga cy’indege i Kanombe bagende nta mubyigano w’imodoka bahura nawo. Umuhanda wakunze gufungwa ni uwa Kanombe - Remera - Gishushu.

Iyo uwo muhanda wafungwaga, abandi bafite imodoka basabwaga gukoresha imihanda mishya yagiye yubakwa mu Mujyi wa Kigali.

Kugira ngo Umujyi wa Kigali ushobore kubaka imihanda myinshi, byasabye ko 80% by’ingengo y’imari yawo, bishyirwa muri icyo gice, nk’uko Busabizwa Parfait, Umuyobozi w’Umujyi wa Kigali wungirije ushinzwe iterambere ry’ubukungu yabibwiye Kigali Today.

Busabizwa yavuze ko imihanda irimo kubakwa muri Kigali, ikubiye mu mishinga minini ibiri.

Uwa mbere ni ukubaka imihanda ireshya na kirometero 105 mu bice bitandukanye by’Umujyi wa Kigali harimo, Nyamirambo, Kimironko, Gikondo, Kimihurura na Kibagabaga.

Umushinga munini wa kabiri nk’uko Busabizwa akomeza abisobanura, ni ibirometero 54, harimo umuhanda Nyanza - Rebero ukagera i Nyamirambo n’undi uva mu Kanogo ugana kuri Prince House (iRemera).

Hari kandi umuhanda uzava mu Mujyi – Nyabugogo – Gatsata – Nyacyonga - Batsinda.

Busabizwa yagize ati, “Hari kandi n’umushinga wo kubaka ikiraro cya Gitikinyoni kizaba gifite ibyerekezo bine , uruhande rumwe rwo rukaba rwararangiye ”.

Yagize ati, “ni umushinga uzatwara arenga miliyoni 60 z’Amadolari, akaba azaboneka ku bufatanye bwa leta y’u Rwanda n’Ubushinwa”.

Icyambu cyo ku butaka cya Dubai (Dubai Portland World)

Umwaka wa 2019 kandi, usanze abikorera ku giti cyabo, yaba abo mu gihugu ndetse n’abo hanze bakorera mu Rwanda, babonye icyambu cyo ku butaka, uwo mushinga wo kubaka ishami ry’icyambu cya Dubai mu Rwanda ukaba waratwaye agera kuri miliyoni 80 z’Amadolari. Ibyo bikaba byarakozwe hagamijwe kugabanya amafaranga menshi n’igihe kinini abacuruzi bakoreshaga, bakura ibicuruzwa byabo ku byambu bya Mombasa (Kenya) na Dar-es-Salam (Tanzania).

Nk’uko bitangazwa n’abashinzwe gukurikirana ibikorwa by’iyubakwa ry’icyo cyambu mu Rwanda, bavuga ko icyambu cyuzuye, hategerejwe kugitaha ku mugaragaro.

Ubusanzwe, ikinyejana kijyana n’imishinga myinshi mu mijyi yose, ibyo bikajyana n’imvugo igira iti,”Roma ntiyubatswe mu munsi umwe”.

Nubwo bimeze bityo, imyaka 25 ishize u Rwanda ruvuye muri Jenoside yakorewe Abatutsi, ni nk’ikinyejana, ukurikije imiturirwa imaze kuzamurwa, ikaba yarahinduye isura y’Umujyi wa Kigali.

Imyinshi muri iyo miturirwa, yubatswe guhera muri 2012. Niba waratembereye mu Mujyi wa Kigali muri Nyarugenge no mu nkengero zaho, nta kabuza wabonye iyo miturirwa kuko iragaragara cyane.

Kigali Today yinjiye muri iyo miturirwa igamije kumenya uko ubuzima bwa buri munsi muri iyo miturirwa buhagaze, gusa yibanze cyane ku miturirwa yubakiwe gukorerwamo ubucuruzi butandukanye.

Kigali Today yasuye iyo miturirwa umwe ku wundi, yamamaza ibikorwa byabo ku buntu, ariko igitangaje ni ukuntu hari ba nyir’imiturirwa bamwe batitabiriye kubyaza umusaruro ayo mahirwe bari babonye.

Ubundi intego kwari ugusura imiturirwa 10 itangirwamo serivisi zinyuranye, Kigali Today ihisemo, ariko kuko hari abataremeye gutanga amakuru ajyanye n’imiturirwa yabo, yaje kwanzura ko isura kandi ikavugisha abemera kuganira na yo.

M-Peace Plaza

Umuturirwa witwa MAKUZA PEACE PLAZA uherereye mu gace k’ubucuruzi ko mu Mujyi rwagati. Ni umwe mu miturirwa igaragara cyane mu Mujyi wa Kigali.

Uwo muturirwa ukorerwamo serivisi n’ubucuruzi bunyuranye harimo, ibyumba by’ibiro kuri metero kare 10.000, n’ahakorerwa ubucuruzi kuri metero kare 20.000 .Iyo nzu kandi, ifite n’amacumbi y’icyumba kimwe cyangwa bibiri, afite ibyangombwa byose.

MAKUZA PEACE PLAZA, yatashywe ku mugaragaro na Perezida wa Repubulika Paul Kagame muri 2015, ubu ukorerwamo n’ibigo n’imiryango bitandukanye harimo ’Ernest & Young’, Smart Africa, FEDEX, ikigo cy’ubwishingizi cya MAYFAIR Insurance, n’ibindi.

Umutekano w’uwo muturirwa ucungwa na sosiyete ikora kinyamwuga, kandi ikoresha uburyo bw’ikoranabuhanga bwa za camera zifotora ibihabera byose, zikora amasaha yose n’iminsi yose.

Muri uwo muturirwa kandi hari amatsinda y’abantu bashinzwe gukora isuku mu bice byose biwugize, ku buryo hahora isuku ku manywa na nijoro. Hari kandi moteri enye nini (4 generators of 2,000 KVA) zitanga umuriro mu gihe usanzwe ubuze, hari n’ibigega bibika amazi agera kuri metero cube 80.000.

Uwo muturirwa kandi ufite parikingi nini (Makuza Peace Plaza Parking Complex), ikoreshwa n’abakodesha muri uwo muturirwa bose ndetse n’abashyitsi.

Alliance Tower (BPR- Atlas)

Umuturirwa witwa ‘Alliance Tower (BPR-Atlas)’, ni uwa banki yitwaga “Banki y’Abaturage”, uherereye mu gace k’ubucuruzi mu Mujyi wa Kigali rwagati.

Umuturirwa wa Alliance Tower, ubona utandukanye n’indi urebye ubusitani bwawo bwiza bihebuje, ndetse n’amatara yawo afite urumuri rwihariye. Nta mugenzi utambuka yaba ku manywa cyangwa nijoro, atarebye uwo muturirwa, bitewe ahanini n’ubwiza bw’amatara yawo yo yanze, afite urumuri rwiza cyane.

Uwo muturirwa wubatswe na sosiyete yitwa “The Perfect City Developers (R) Ltd” ukaba uzakoreramo icyicaro gikuru cya BPR-Atlas.

Ni umuturirwa ufite etaje 15, etaje 11 zigizwe n’ibiro, izindi etaje ebyiri zigakoreshwa mu bijyanye n’ubucuruzi. Hari kandi ahari za resitora, hakiyongeraho parikingi iri munsi y’ubutaka (a basement Parking).

Etaje ya mbere ifite urubaraza runini rwiza, ku buryo abakodesha muri uwo muturirwa iyo bashatse gufata akayaga keza, bajya kuri urwo rubaraza, banirebera ubwiza bw’umujyi.

Iyo etaje ya mbere kandi iriho ibiro birimo ibikoresho bikenewe byose, ku bantu bashaka gutangiza amaduka mu Mujyi, abashaka gukorera inama ahantu heza kandi hiyubashye, ndetse n’abafite imishinga izamara igihe gito.

Abubatse uwo muturirwa bitaye cyane ku bwiza,umutekano, n’ibindi byose byakurura abashaka gukora ubucuruzi bunyuranye.

Ni umuturirwa ufite uburyo bwo gutanga umwuka ukonje mu gihe hashyushye cyane (A centralised air conditioning system), ufite interineti, ufite uburyo bwikoresha bwo kumenya ko hagiye kuba inkongi no kuyikumira.

Hari kandi ibyuma bibiri bikoresha amashanyarazi, bifasha abantu kuzamuka no kumanuka byihuse muri za etaje, kimwe kikaba cyatwara abantu 12 icyarimwe. Hari n’ikindi cyuma kimwe gikora gityo, ariko cyo gifite ubushobozi bwo gutwara umuntu umwe gusa.

Uwo muturirwa kandi ufite amadirishya manini akoranye ubuhanga, ku buryo ashobora kugabanya ubushyuhe. Imiryango minini yaho, yashyizweho ikoranabuhanga rigenzura abahinjira, hakaba na camera kuri iyo miryango zibika amashusho.Hari n’imiryango yagenewe kuba yakoreshwa mu gihe habaye inkongi.

Muri buri biro, harimo igikoni gito (a kitchenette in every office). Kuri uwo muturirwa kandi, hashyizweho n’uburyo bwo korohereza abamugaye. Hari kandi moteri nini yatanga umuriro uramutse ubuze, hakaba ibigega bibika amazi agera kuri metero cube 170 zikoreshwa ku munsi, hakaba na metero cube 400 ziba ziteganyijwe gukoreshwa mu kurwanya inkongi iramutse ibayeho.

Nubwo uwo muturirwa ufite ibyiza byinshi, abawubatse bashyizeho ibiciro byo gukodesha bidakanganye cyane. Intego yabo ngo ni ugukodesha abantu b’ingeri zose kugira ngo habeho ubwuzuzanye muri bizinesi. Ubu uwo muturirwa urakorerwamo na bimwe mu bigo bikomeye mu Rwanda, hakaba hari n’izindi sosiyete zikomeye zatangiye kuwusabamo ibiro byo gukoreramo.

KBC

KBC ni izina ryahawe inyubako y’ubucuruzi, yubatswe muri 2003, ikaba iherereye ku Kimihurura hafi ya Kigali Convention Center na Radisson Blu Hotel. Muri 2016, KBC yaravuguruwe, baranayongera, yongera gufungura imiryango yayo muri Kanama 2018.

KBC ifite ahantu ho gukorera hangana na metero kare 10.000. Kugeza ubu ahangana na 68%, hafite abahakorera, harimo abanyamahanga n’ibigo byo mu Rwanda binyuranye. Hatangirwa kandi serivisi za banki eshatu zitandukandaye. Muri iyo nyubako kandi hanatangirwa izindi serivisi zijyanye n’ibyo kurya no kunywa, hari kandi n’aho banywera ikawa.

Inyubako ya KBC yanahawe igihembo cy’inyubako ihiga izindi kuba yakwitabazwa mu buryo bworoshye, mu bihembo bigenerwa inyubako zubatse neza mu mwaka w’2018, mu ihuriro Africa Property.

Hari kandi na salon zitunganya imisatsi n’ibindi, za farumasi, ahavurirwa amaso, ibigo by’ubukerarugendo, amaduka acuruza imyenda, inkweto n’abacuruza ibijyanye n’ubwiza (cosmetics).

KBC ni inyubako ihorana umwuka mwiza, ku buryo idakeneye ibyuma byifashishwa mu gihe hashyushye cyane (Air Conditioners), Ikaba inafite ibiro bingana na metero kare 4000 biri kuri etaje eshanu. Etaje ebyiri zikorerwamo n’ibigo mpuzamahanga nka Prime Energy Group na Choice International Forwarding co.ltd.

Iyo nyubako kandi ifite igisenge cyiza cyane ku buryo umuntu uri hejuru yacyo aba areba Kigali yose neza, aho hakaba hazakorera resitora igezweho.

KBC ifite uburyo bw’ikoranabuhanga bwo kugenzura imikorere y’abakodesha ibiro byayo, kandi ifite abacunga umutekano b’abanyamwuga bakora amasaha 24 kuri 24, iminsi yose.

KBC kandi ifite moteri ebyiri nini zikoreshwa mu gihe umuriro ubuze (Generators of 500KVA each), ikagira abakora isuku babishoboye, ku buryo usanga inyubako yose ihora icyeye.

Kigali Heights (KH)

Umuturirwa wa Kigali Heights, uteganye neza neza na Kigali Convention Center, ukaba wubatse ku buso bwa metero kare 31.150.

Uyu muturirwa wanatsindiye igihembo cy’inyubako ihiga izindi mu kuba yakorerwamo ibintu bitandukanye mu birori Africa Property Investment (API) , byabereye i Sandton muri Afurika y’Epfo muri Kanama 2017.

Inzu y’ubucuruzi yo muri Kigali Heights ni imwe mu zikurura abakiriya cyane muri Kigali, aho yakira nibura abantu 9,000 ku munsi mu mibyizi, naho mu mpera z’icyumweru umubare ukazamuka, ikaba yakwakira abantu 11.000 ku munsi.

Parikingi ya Kigali Heights yakira imodoka zigera ku 2,500 mu minsi y’akazi, naho mu mpera z’icyumweru(Weekends), umubare ukiyongera, ikakira imodoka zigera ku 3,500.

Kigali Heights ifite ahantu ho gukorera ubucuruzi bwo kudandaza. Harimo ahagurirwa ikawa, ahagurirwa imboga n’imbuto, ahavunjirwa amafaranga, ahatangirwa serivisi za Banki,ahatunganyirizwa inzara n’imisatsi, ahagurirwa ibyo kurya no kunywa, harimo ahagurirwa pizza.

Ahagenewe ibiro byo gukoreramo muri Kigali Heights hangana na metero kare 12.500. Ibyo biro hafi ya byose bifite ababikoreramo kuko bigeze ku kigero cya 97%. Kigali Heights ikorerwamo n’ibigo n’imiryango mpuzamahanga n’abandi.

CHIC Ltd

Abahoze bahahira cyangwa batembera muri Kigali ahitwa muri Karitsiye Matewusi, ubu batungurwa no gusanga itakimeze uko yahoze kuko abahoze bahacururiza bagiriwe inama yo kuhimuka, bakimura n’ibikorwa byabo mu muturirwa witwa (Champion Investment Corporation “CHIC” Ltd).

Ibikorwa byo kubaka uwo muturirwa byatwaye, agera kuri miliyari 25 z’Amafaranga y’u Rwanda, ukaba wubatse mu Karere ka Nyarungege, ukaba utangirwamo serivisi zinyuranye harimo; kuba wahabona serivisi za banki umunani zitandukanye, ahantu hatanu hatangirwa serivisi zo kuvunja amafaranga no kuyohererezanya kandi ibyo bifite akamaro ku bacuruzi.

Kubera ko abenshi mu bacuruzi bakorana na banki zitandukanye, biborohera kubikuza amafaranga kuri imwe bakayashyira ku yindi bashatse, ibyo rero bigakorerwa mu nzu imwe, kandi bafite umutekano wizewe 100% .

Ikindi kandi muri CHIC haboneka n’izindi serivisi zitandukanye, harimo ahagurirwa ibyo kurya no kunywa , za farumasi, salon zo gutunganya imisatsi n’inzara n’ibindi. Hari kandi aho banywera ikawa, ahagurirwa imyenda n’inkweto, amaguriro supermarket, amavuriro mato (clinics), na za farumasi,n’ibindi.

Umutekano mu muturirwa wa CHIC ucungwa n’abantu bizewe bakora kinyamwuga, bakora amasaha 24 kuri 24 kandi iminsi yose, bakanifashisha za camera zigenzura ibibera mu nyubako byose.

CHIC ifite abantu bakora isuku, babishoboye basukura iyo nyubako imbere no hanze, ikagira na moteri (Generators) nini eshatu, zunganira amashanyarazi iyo abuze.

CHIC ifite parikingi ihagije kandi ifite umutekano amasaha yose. Abayobozi b’uwo muturirwa basobanura ko kuba ibiro byo gukodesha bihendutse ugereranyije no mu yindi miturirwa, ngo biri mu bya mbere byabakururiye abakiriye benshi.

Amaserano y’ubukode muri CHIC, aba yizewe, akamara igihe kirekire kandi akubahirizwa. Abenshi mu bakodesha muri CHIC bahisemo kujya bibumbira hamwe, aho kugira ngo umuntu ajye gukora amasezerano y’ubukode na CHIC ari umuntu umwe ku giti cye, kandi ashobora no guhindura igitekerezo igihe icyo ari cyo cyose, ntakomeze gukorera muri iyo nyubako.