Perezida Kagame yambitswe imyenda y’umuco w’Abanya-Cote d’Ivoire

Perezida Kagame usoza uru ruzinduko kuri uyu wa Kane tariki 19 Ukuboza 2018, yagiriye ibihe bikomeye muri Côte d’Ivoire, aho u Rwanda rwasinyiye amasezerano atandukanye y’ubufatanye mu bucuruzi no mu bwikorezi bwo mu kirere.

Perezida Kagame kandi yanateguriwe umuhango wo gusangira ku meza udasanzwe, aho we na Madame Jeannette Kagame bambitswe imidali yo kubagira abanyagihugu b’icyubahiro ba Côte d’Ivoire.

Mbere y’uko asoza uruzinduko rwe yitabiriye umuhango yatumiwemo na Guverineri w’Umujyi wa Abidjan wamushyikirije imfunguzo zimwemerera kuba umuturage waho ku mugaragaro.

Perezida Kagame yabyishimiye agira ati “Iki cyubahiro mpawe ni ishema kuri njye, ku mugore wanjye no ku baturage b’u Rwanda nkorera. Ngifashe kandi nk’ubushake Umujyi wa Abidjan ugaragaza wo guha ikaze Abanyafurika bose aho bari hose kuri uyu mugabane.”

Perezida Kagame kandi yagiranye ibiganiro n’abikorera muri uyu mujyi kugira ngo barebere hamwe amahirwe y’ubucuruzi bahererekanya ku mpande zombi.

Perezida Kagame avuga ko umudali yambitswe ari uw’Abanyarwanda

Perezida Kagame hamwe na Madame Jeannette Kagame baraye bashyizwe mu bantu b’indashyikirwa muri Côte d’Ivoire, mu muhango wabateguriwe aho Perezida Kagame yahawe umudali wiswe “Grand-Croix de l’Ordre National de Côte d’Ivoire", Madame Jeannette Kagame we ahabwa ipeti ryiswe "Grade de Commandeur de l’Ordre National de Côte d’Ivoire."

Perezida Kagame yashimye Abanyarwanda bamuherekeje mu rugendo, agira ati “Dutuye iri shimwe abaturage b’u Rwanda, twafatanyije mu rugendo rwo kubaka igihugu gishize hamwe kandi giteye imbere.”

Madame Jeannette Kagame na we yambitswe undi mudali

Perezida Kagame kandi yagereranyije ukudacika intege kwa Côte d’Ivoire n’uk’u Rwanda, byanyuze mu bihe bibi ariko igihe cyose bikabasha kubyikuramo.

Ati “Tuboneyeho n’umwanya wo gushimira mwebwe abaturage ba Cote d’Ivoire ku kuba mwarashoboye kwikura mu mbogamizi mukagarura Côte d’Ivoire k’umurongo nk’ igihugu gikomeye mu bukungu mu karere giherereyemo.”

Agendeye ku masezerano yasinywe mu bufatanye mu by’ubucuruzi, Perezida Kagame yavuze ko ubucuti u Rwanda rufitanye na Côte d’Ivoire ari ubw’inyungu ku baturage b’ibihugu byombi kandi akizeza ko iyo mikoranire izarushaho kuba myiza.

Perezida Kagame yizeje Perezida Ouattara ko ibihugu byombi bizakomeza gukorana neza mu kwiteza imbere

Perezida Alassane Ouattara ni we wakiriye Perezida Kagame akigera i Abidjan

Ku gicamunsi cyo kuri uyu wa Gatatu tariki 19 Ukuboza 2018, ni bwo bageze i Abidjan mu ruzinduko rw’iminsi ibiri ruje rukurikira urwo Perezida Alassane Ouattara na we yagiriye mu Rwanda muri Mata uyu mwaka.

Uretse kuba urwo rugendo rugamije gukomeza umubano ibihugu byombi bifitanye, Perezida Kagame arahabwa igihembo gikomeye muri Cote d’Ivoire kiswe "Grand-Croix de l’Ordre National de Côte d’Ivoire", mu gihe Madame Jeannette Kagame we ahabwa ipeti ryiswe "Grade de Commandeur de l’Ordre National de Côte d’Ivoire."

Mu rugendo rwe kandi, Perezida Kagame azagirana ikiganiro n’abanyamakuru ndetse anahure n’abakora muri bizinesi aho bazagirana ibiganiro bigamije kureba ibijyanye no gukuraho imbogamizi mu bucuruzi muri Afurika, guteza imbere iby’inganda ndetse no gusangiza abanya-Côte d’Ivoire ubunararibonye bw’u Rwanda mu by’inganda.

U Rwanda rusanzwe rufitanye amasezerano y’ubufatanye mu by’ingendo zo mu kirere (BASA) yatumye sosiyete nyarwandaya RwandAir itangira ingendo zayo muri iki gihugu mu Ukwakira 2016.

Perezida Alassane Ouattara na we yaherukaga mu Rwanda muri Mata uyu mwaka

Perezida Kagame na Madame Jeannette Kagame baraza guhabwa ibihembo bikomeye muri iki gihugu