Hashize imyaka 24 u Rwanda n’u Bufaransa bitarebana neza, ahanini bishingiye ku ruhare u Rwanda rushinja iki gihugu ku ruhare cyagize muri Jenoside yakorewe Abatutsi mu 1994.

Perezida Kagame yashimye uruhare rwa Perezida Macron mu kuzura umubano w’ibihugu byombi

Habayeho guterana amagambo ku mugaragaro, ndetse n’uwari uhagarariye u Bufaransa mu Rwanda arahambirizwa.

Benshi mu babikurikiranira hafi ntibizeraga ko hari uburyo bwo gukemura ibyo bikomere hagati y’ibihugu byombi, uretse kuba u Bufaransa bwakwerura bugasaba imbabazi ku ruhare rutaziguye rwagize muri Jenoside.

Gusa kuri ubu Perezida Kagame yatangaje ko aho ibihe bigeze, u Rwanda rurajwe ishinga no kureba ahazaza kurusha uko rwakwibanda ku mateka y’ahashize.

Abajije n’umunyamakuru wa TV5 Monde niba kuba u Bufaransa bwarashyigikiye kandidatire ya Mushikiwabo bitaratanze umurongo mushya w’imibanire hagari y’ibihugu byombi, Perezida Kagame yagize ati “Nta kabuza ubwumvikane hagati y’u Rwanda n’u Bufaransa buri ku rwego rwisumbuyeho.”

Perezida Kagame yavuze ko uruhare runini ari urwa Perezida Emmanuel Macro, yemeza ko kuba akiri muto byamufashije kugira imyumvire ijyanye n’igihe isi igezemo kandi ikanagira uruhare mu guhindura byinshi mu Bufaransa.

Ati “Ibyabaye rero ni umusaruro w’iyo mitekerereze mishya yo kuvuga ngo ibintu ntago byakomeza kuguma uko byahoze kandi ibihe byo byarahindutse kuko hariho imbogamizi nshya ariko hakanabaho n’andi mahirwe mashya.

Umuntu wese utekereza gutyo nta kabuza akora ibijyanye n’ibitandukanye n’ibyo abantu bibwiraga, kuko twamenyereye kuba mu isi aho abantu batekereza ko uko byahoze mu myaka 30 cyangwa 40 ishize ni ko bizakomeza kugenda.”

Perezida Kagame yemeje ko kandi ibyo bihita bisobanura ko u Bufaransa bugiye kongera kugira ambasaderi mu Rwanda, ndetse akizera ko hazabaho n’ibindi byinshi abantu bakwiye kwitega.

Mushikiwabo yatorewe kuba Umunyamabanga Mukuru wa OIF

Mushikiwabo yatowe ku bwiganze bw’amajwi y’ibihugu bigize OIF, kuri uyu wa Gatanu tariki 12 Ukwakira 2018.

Ni amatora yasaga nk’aho yari yitezwe ikizavamo kuko ubwo yatangizaga kandidatire ye ku mugaragaro, ibihugu byose bya Afurika bigize OIF byahise bitangaza ko bimushyigikiye, hakiyongeraho n’u Bufaransa bukomeye muri uyu muryango na bwo bwamushyigikiye izuba riva.

Mu kiganiro yahaye abanyamakuru nyuma yo gutorwa, yatangaje ko uburyo ibihugu byinshi byamugiye inyuma bigaragara ikizere bifitiye u Rwanda mu bijyanye no kwishakamo ibisubizo.

Yagize ati “Abayobozi bagiye bavuga bati turifuza umuntu uzaza kuzamura uyu muryango ariko by’akarusho akanawubaka, rero kuba warabaye Umunyarwanda uzana iyo nararibonye yo kubaka igihugu.”

Perezida Kagame yishimiye intsinzi ya Mushikiwabo

Yavuze ko by’umwihariko nka Minisitiri w’ububanyi n’amahanga yagiye akurikirana uko u Rwanda rwagiye rwubaka politiki zarwo zigatanga umusaruro, ndetse akanakurkirana uburyo u Rwanda rwagiye rwubaka umubano n’ibindi bihugu.

Ati “Aho umunyarwanda agiye gukora hose babibonamo ko tuzanye ikintu gifatika twakuye mu mateka y’igihugu cyacu, twakuye mu kazi twakoze gituma turushaho kuba twazamura n’ibindi bihugu.”

Yashimiye Abanyarwanda n’abandi bantu bose bamubaye hafi mu gihe yiyamamazaga. Yavuze ko kubera uko yizeye ko Abanyarwanda bamuri hafi bizamuha ingufu zo gukorera ibihugu 88 agiye kuyobora.

Mushikiwabo yemejwe nyuma y’ijambo rya Perezida Kagame rimushyigikira nk’umukandida w’u Rwanda na Afurika muri rusange.

Mushikiwabo yasaga nk’aho ari umukandida rukumbi, kuko kuva yatangira ibikorwa byo kwiyamamaza yahise agaragarizwa ko ashyigikiwe n’amahanga.

Mushikiwabo agiye kuyobora manda y’imaka ine ariko ishobora kongerwa naramuka akomeje kugirirwa ikizere.

Louise Mushikiwabo yatowe ku bwiganze busesuye bw’ibihugu

Min Mushikiwabo aramukanya na Dr Christine Nina Niyonsavye Ambasaderi w’ u Burundi mu Bufaransa

Madame Louise Mushikiwabo ni umukandida ushyigikiwe n’ibihugu byose byibumbiye mu muryango wa Afurika yunze ubumwe.

Ashyigikiwe kandi n’ibihugu by’u Burayi birimo cyane cyane u Bufaransa, ndetsa na Canada ikomokamo Michaelle Jean bahanganye.

Iki kikaba ari ikimenyetso gikuru kigaragaza ko nta kabuza Min Mushikiwabo ari bwegukane umwanya w’Umunyamabanga mukuru wa OIF, kuko ibyo bihugu bimushyigikiye birenze kimwe cya kabiri cy’ibihugu 84 bigize uyu muryango.

Nyuma y’itangizwa ry’ihuriro ry’abakuru b’ibihugu na za Guverinoma kuri uyu wa Kane, akaba ari naryo riri buberemo amatora kuri uyu wa gatanu, Madame Louise Mushikiwabo yagaragarijwe urugwiro na benshi rwashimangiye ko intsinzi ishobora gutaha mu Rwanda.

Uru rugwiro kandi rwakomereje mu mugoroba wo gusangira amafunguro witabiriwe n’abari muri iri huriro rya 17 rya OIF riri kubera i Erevan muri Armenie

Amatota y’Umunyamabanga mukuru wa OIF akaba ari bube i saa sita z’amanywa muri Armenie, bikaza kuba ari 10h00 z’amanywa za Kigali.

Irebere Urugwiro mu mafoto Urugwiro Louise Mushikiwabo yagaragarijwe ubwo hatangizwaga inama y’abakuru b’ibihugu na za guverinoma

Inama rusange ngarukamwaka ya OIF yatangijwe kuri uyu wa Kane

Babisabye mu muhango wo gufungura ku mugaragararo inama ya 17 y’uyu muryango iri kubera mu mujyi wa Erevan muri Armenia.

Perezida wa Niger Mahamadou Isoufou yavuze ko mu bibazo bikomeye isi na Afurika by’umwihariko harimo icy’ibitero by’iterabwoba mu gace ka Sahel, asaba ko uyu muryango wagira icyo ukora mu guhangana na byo.

Ati “Bimwe mu bihugu bigize uyu muryango byugarijwe n’ibitero by’iterabwoba. Ibyo bihugu bikeneye ubufasha bwa bw’umuryango w’abibumbye n’ubw’umuryango w’ibihugu bikoresha Igifaransa by’umwihariko.

“Ikindi kibazo ni icy’abimukira bimuka mu buryo butemewe. Uyu muryango ugomba guhagarika impfu z’abimukira mu butayu no mu nyanja ya Méditerranée.”

Uretse ibi bibazo hanavuzwe icy’ubwiyongere bukabije bw’abaturage mu bihugu bimwe bya Afurika, usanga kikiri imbogamizi ku iterambere ry’ibyo bihugu. Hanavuzwe ikibazo cy’ihindagurika ry’ikirere riri gutuma ubushyuhe bw’isi bwiyongera.

Minisitiri w’intebe wa Vanuatu, Charlot Salwai, yavuze ko icyo kibazo kitareba umuryango wa OIF gusa, ahubwo n’umuryango w’abibumbye ukwiye kugihagurukira mu maguru mashya kugira ngo urengere ibihugu by’ibirwa kuko ari byo bigeramiwe cyane.

Ati “Ingaruka z’ihindagurika ry’ikirere zikomeje kuba imbogamizi ikomeye by’umwihariko ku bihugu bikiri mu nzira y’amajyambere biri rwagati mu nyanja, kandi ingaruka za byo bishoboka ko abantu batazibona uko bakwiye kuba bazireba.”

Akomeza agira ati “Kwiyongera k’urugero rw’amazi y’inyanja mu bujy’ejuru kugaragagaza ahazaza habi ha muntu by’umwihariko ku bihugu biri rwagati mu nyanja, kandi biri mu bishobora kugerwaho vuba n’ingaruka zo kwiyongera k’ubushyuhe bw’isi. Nitutabona ibisubizo vuba tuzisanga mu isi itagira amahoro arambye n’umutekano.”

Mu bindi byavuzwe bigomba kwitabwaho muri iyi nama ni uguteza imbere abagore n’urubyiruko, by’umwihariko abana b’abakobwa bagahabwa uburenganzira bwo kwiga.

Perezida Emmanuel Macron w’u Bufaransa afungura iyi nama yavuze ko urugamba rwa mbere OIF ishyize imbere, ari ugushakira umuti ibibazo by’imibereho mibi y’urubyiruko muri Afurika.

Iyi nama irasoza imirimo ya yo kuri uyu wa Gatanu hatorwa umunyamabanga mukuru mushya uzayobora Francophonie mu myaka ine iri imbere. Minisitiri w’Ububanyi n’amahanga Louise Mushikiwabo afite amahirwe menshi yo gutorwa.

Habanje kuba ibikorwa bitandukanye mbere y’uko inama itangira

Ku murongo w’ibiteganyijwe gukorwa muri iyo nama izamara iminsi ibiri hategerejwe cyane amatora y’umunyamabanga mukuru w’uwo muryango aho u Rwanda rufitemo umukandida, Louise Mushikiwabo.

Umuhango w’amatora uzaba ejo kuwa kane amahirwe menshi akaba ahabwa umukandida w’u Rwanda ushyigikiwe n’ibihugu byinshi bya Afrika. Uwo bahanganye kuri uwo mwanya, madame Michèle Jean, ukomoko muri Canada afite amahirwe make nyuma y’uko n’igihugu akomokamo kiyemeje kuzashyigikira Louise Mushikiwabo.

Perezida Paul Kagame na we ni umwe mu bakuru b’ibihugu bitabiriye inama ya 17 n’abakuru b’ibihugu bivuga igifaransa.

U Rwanda narwo ruhagarariwe n’ikipe nini, irimo Belise Kariza ukuriye ubukerarugendo muri RDB

Madame Louise Mushikiwabo n’Inyamibwa Icakanzu Contante mu gitaramo

Madame Louise Mushikiwabo wari muri iki gitaramo ni umwe mu bakandida bafite amahirwe menshi yo kuzegukana umwanya w’Umunyamabanga mukuru wUmuryango w’ibihugu bikoresha ururimi rw’igifaransa aho ahanganye na Michaelle Jean ukomoka muri Canada.

Ayo matora azabera muri iri huriro ry’abakuru b’ibihugu na za guverinoma, rizatangira kuri uyu wa Kane rigasoza ku wa gatanu tariki ya 12 Ukwakira 2018.

Iki gitaramo cyari kiyobowe n’Abahanzi Nyarwanda barimo Miss Shanel wamenyekanye cyane mu Rwanda ubu akaba akorera umuziki mu gihugu cy’Ubufaransa.

Umuhogo wa Miss Shanel wahogoje amahanga muri iki gitaramo

Cyagaragayemo kandi Munyanziza Francis umwe mu bahanga u Rwanda rufite mu gucuranga inanga ndetse na Icakanzu Contente umwe mu babyinnyi b’abahanga itorero ry’Igihugu Urukerereza rifite, akaba umubyinnyi n’umutoza w’Itorero Inyamibwa rya AERG ya Kaminuza y’u Rwanda.

Munyanziza Francis umwe mu bakirigita Nanga n’Abahanga u Rwanda rufite

Madame Louise Mushikiwabo afatanyije n’Inyamibwa Icakanzu Contente, baherekejwe n’amajwi meza y’abahanzi b’Abanyarwanda, basusurukije abantu mu mbyino, berekana koko ko Umuco wa Kinyarwanda ukomeje kuza ku isonga, kandi ari uw’Agaciro.

Irebere mu mafoto uko iki gitaramo cyaberaga ku gicumbi cya Francophonie mu Mujyi wa Erevan cyari kimeze

#Africa n'Amerika, Aziya n' Uburayiiii weeee na ho uzahasanga #Rwanda @LMushikiwabo @LMFrancophonie #RwOT pic.twitter.com/83QoIBO1Uo

— Rutindukanamurego (@rutindukanamure) October 10, 2018

Perezida Kagame yakirwa muri Armenie

Ayo matora azabera mu nama y’iminsi ibiri y’Abakuru b’Ibihugu na za Guverinoma bikoresha ururimi rw’Igifaransa ateganijwe ku wa Kane no ku wa gatanu tariki ya 12 Ukwakira 2018.

Muri ayo matora umukandida watanzwe na Afurika yunze ubumwe ari we Louise Mushikiwabo afite amahirwe hafi 100% yo gutorerwa uwo mwanya.

Ni nyuma y’uko yemejwe n’ibihugu byinshi bigize uwo muryango, hakiyongeraho u Bufaransa ndetse na Canada, igihugu Michaelle Jean bahanganye akomokamo.

Madame Louise Mushikiwabo naramuka atsindiye uwo mwanya azaba ari we Munyafurika wa mbere w’umutegarugori uyoboye uwo muryango.

Madame Louise Mushikiwabo amaze amezi abiri ari mu bikorwa byo kwiyamamaza

Kuba Canada itazashyigikira Michaelle Jean wifuzaga manda ya kabiri ku bunyamabanga bukuru bwa Francophonie, byashimangiye ko Minisitiri w’Ububanyi n’amahanga Madame Louise Mushikiwabo afite amahirwe hafi 100% yo gutorerwa uwo mwanya.

Amatora y’umunyamabanga mukuru wa Francophonie ateganijwe ku wa kane no ku wa gatanu tariki 12 Ukwakira 2018.

Minisitiri ushinzwe ibikorwa bya Francophonie muri Canada, Melanie Joly, yatangaje ko Canada izashyigikira umukandida wemejwe na benshi, aho gushyigikira Michaelle Jean ukomoka muri icyo gihugu.

Uko gushyigikira umukandida wumvikanyweho n’ibihugu byinshi byahise bishimangira ko Madame Louise Mushikiwabo unashyigikiwe n’igihugu cy’u Bufaransa agana ku ntsinzi y’Ubunyamabanga bukuru bw’Umuryango w’Ibihugu bikoresha ururimi ra’Igifaransa (OIF).

Melanie Joly yagize ati "Turashima byimazeyo uruhare rwa Michaelle Jean mu iterambere ry’uyu muryango by’umwihariko mu guteza imbere uburezi bw’umwana w’umukobwa.

"Mu mahitamo y’Umunyamabanga Mukuru utaha, Canada iziyunga ku bitekerezo rusange nk’uko ari amahame y’umuryango.”

Kandidatire ya Madame Louise Mushikiwabo yemejwe n’Inteko rusange idasanzwe y’Umuryango wa Afurika yunze Ubumwe yateranye ku itariki ya 30 Kanama 2018.

Uwo muryango w’Ibihugu bikoresha ururimi rw’Igifaransa (OIF) ugizwe n’ibihugu 84 bigizwe n’abaturage bagera kuri miliyoni 274.

Madame Louise Mushikiwabo naramuka atowe, azaba ari we Munyafurika wa mbere w’umutegarugori uyoboye uwo Muryango.

Kuva mu ntangiriro za Nyakanga yatangiye urugendo ava mu gihugu kimwe kivuga Igifaransa ajya mu kindi akavuga imigabo n’imigambi y’ibyo azakorera OIF naramuka ayibereye Umunyamabanga mukuru mu gihe cy’imyaka ine.

Mbere y’uko atangira kampanye ye, Inama nshingwabikorwa y’Umuryango wa Afurika yunze Ubumwe (AU) na yo yari yamwemereye kuzamushyigikira.

Iyo nama igizwe n’Abaminisitiri bahagarariye ibihugu byabo mu gushyira mu bikorwa imyanzuro ya AU. Ibyo byahaye amahirwe Mushikiwabo yo kuba yahigika Michaëlle Jean wari usanzwe ayiyobora, ariko wifuzaga gukomeza kuyiyobora.

OIF igizwe n’ibihugu na Leta 84, ariko abanyamuryango bahoraho ni ibihugu 58 n’ibihugu by’indorerezi 26.

Kigali Today yabateguriye amwe mu mafoto yaranze urwo rugendo, mu gihe hasigaye icyumweru kimwe ngo ayo matora abe, ni amatora azabera mu Mujyi wa Everan, Umurwa mukuru wa Armenia.

Mauritania

Urugendo rwa Mushikiwabo rwatangiriye i Nouakchott muri Mauritania, aho abakuru b’ibihugu na za Guverinoma muri Afurika bamwemereye kumushyigikira 100%

Madagascar

Mushikiwabo yakomereje urugendo i Antananarivo muri Madagascar, aho yagejeje imigabo n’imigambi ye kuri Perezida Hery Rajaonarimampianina

Muri Madagascar kandi Mushikiwabo yabonanye na Minisitiri w’Ububanyi n’amahanga Dovo Eloi Maxime

Tchad

I N’Djamena, Mushikiwabo yaganiriye na Perezida Idriss Deby anamwemerera kumushyigikira

Congo - Brazzaville

Mushikiwabo yakurikijeho kugirana ibiganiro na Perezida wa Congo - Brazzaville Denis Sassou Nguesso

Senegal

Uwo munsi Mushikiwabo yakomereje i Dakar, aho yahuye na Perezida Macky Sall na we amugezaho ibya kandidatire ye

I Dakar kandi yanabonanye na mugenzi we ushinzwe Ububanyi n’Amahanga muri Senegal, Sidiki Kaba

Repubulika iharanira Demokarasi ya Congo

Mushikiwabo yakomereje urugendo rwe i Kinshasa aho yabonanye na Perezida Joseph Kabila

Mbere yo kuva muri icyo gihugu yanabonanye na Minisitiri w’Ububanyi n’amahanga Léonard She Okitundu

Gabon

Mushikiwabo yakomereje urugendo rwe rwo kwiyamamaza i Libreville, aho yabonanye na Perezida Ali Bongo Ondimba

Mushikiwabo yageze no ku mugabane wa Aziya, mu Murwa mukuru wa Vietnam, Hanoi, kugira ngo ageze gahunda ye kuri Perezida Tran Dai Quang

Cambodge

Ku munsi wa kabiri w’uruzinduko yagiriraga muri Aziya, Mushikiwabo yakiriwe na mugenzi we ushinzwe Ububanyi n’amahanga n’Ubutwererane, Prak Sokhonn

Armenia

Mushikiwabo yakurikijeho umugabane w’u Burayi aho yanyarukiye mu Murwa mukuru wa Armenia, Everan, ari na wo uzaberamo amatora ya OIF, abonana na Minisitiri w’Intebe Nikol Pachinian

Mushikiwabo yakoze umuhango wo gutera igiti, igikorwa gifite icyo gisobanuye mu mateka ya Armenia

Yanasuye urwibutso rwa Jenoside yakorewe Abanya-Armenia, ruherereye ahitwa Tsitsernakaberd

Roumanie

Mu Murwa mukuru Bucharest, Mushikiwabo yaganiriye na mugenzi we ushinzwe Ububanyi n’Amahanga n’Ubutwererane, Teodor Meleșcanu

Liban

Mushikiwabo yanageze mu Murwa mukuru Beyrouth abonana na Perezida wa Liban Michel Aoun

Tuniziya

i Tunis muri Tuniziya , Mushikiwabo yakiriwe na Perezida w’icyo gihugu Béji Caïd Essebsi

Mushikiwabo aganira na mugenzi we wa Tuniziya Khemaies Jhinaui

Niger

Mushikiwabo yagarutse muri Afurika yerekeza i Niamey, aho yabonanye na Perezida Issoufou Mahamadou

Burkina Faso

Mu Murwa mukuru Ouagadougou, Mushikiwabo yahuye na Perezida wa Burkina Faso Roch Marc Christian Kaboré

Côte d’Ivoire

Mushikiwabo yakomereje mu Murwa mukuru Abidjan, ageza ibya kandidatire ye kuri Perezida Alassane Ouattara

U Bufaransa

Mushikiwabo yakiriwe kuri Televiziyo ya TV5 Monde

New York, Mushikiwabo yabonanye n’abayobozi b’ibihugu bitandukanye atashoboye kugeramo

Yaganiriye na Minisitiri w’Ububanyi n’amahanga wa Albaniya, Ditmir Bushati

Yanagiranye ibiganiro na Minisitiri w’Ububanyi n’amahanga wa Moldaviya, Tudor Ulianovschi

Yanaganiriye na Minsitiri w’Ububanyi n’amahanga wa Vanuatu, Ralph Regenvanu

Mu gihe cy’Inama rusange y’Umuryango w’Abibumbye (UN), bamukoreye ibirori byo kumwereka ko bamushyigikiye

Luxembourg

Mushikiwabo yakomereje mu Murwa mukuru Luxembourg City, aho yabonanye na Minisitiri w’Ububanyi n’Amahanga, ean Asselborn

Minisitiri Mushikiwabo yakiriwe na Perezida wa RDC Joseph Kabila

Perezida Kabila yabitangaje kuri uyu wa 25 Nyakanga 2018, ubwo Minisitiri Mushikiwabo aherekejwe na Dr Donald Kaberuka bagiriraga uruzinduko muri Repubulika iharanira Demokarasi ya Congo.

Urwo ruzinduko Minisitiri Mushikiwabo wiyamamariza umwanya w’umunyamabanga mukuru w’Umuryango w’ibihugu bikoresha Ururimi rw’Igifaransa, OIF, yarukoze mu rwego rwo kwegera ibihugu bikoresha urwo rurimi, akagaragaza gahunda afitiye uwo muryango.

Amatora y’umunyamabanga mukuru w’uwo muryango ateganijwe mu kwezi k’Ukwakira 2018, akazabera mu Mujyi wa Erevan mu gihugu cya Armenia.