Perezida Kagame ageza ijambo ku bitabiriye inama Nyaburayi ku Iterambere

Perezida Kagame avuga ko kuba abagore ari bo baharirwa imirimo yo kwita ku muryango, kurera abana no gukurikirana gahunda zose z’umuryango, bidindiza iterambere ryabo ryo mu mwuga.

Agira ati “Turacyafite urugendo rurerure ngo duhe abagore uburinganire n’icyubahiro bakwiye. Ibyo bigira ingaruka mu gutuma basigara inyuma. Ibi tubirebera ku bibera mu bice byose byo ku isi kandi twese bitugiraho ingaruka.

“Mu kazi cyangwa mu bayobozi, usanga abagabo bareberwa k’uko bateye cyangwa ibyo bashoboye. Kandi ugasanga bo bifata uko bishakiye. Kandi ni ko bikwiye kumera. Ariko ubwo bwisanzure ntibuhabwa abagore.”

Yabitangarije mu ijambo yagejeje ku bitabiriye inama Ngarukamwaka yiga ku iterambere ry’Uburayi, izwi nka ‘European Development Days’, inama yafunguwe kuri uyu wa Kabiri tariki 5 Kamena 2018.

Inama y’uyu mwaka iribanda ku kamaro k’abari n’abategarugori mu kugera ku ntego z’iterambere rirambye, cyane cyane bahabwa amahirwe angana n’ay’abandi mu nzego zifata ibyemezo.

Iyi nama iriga ku ruhare rw’umugore mu iterambere

Yavuze ko ihezwa ry’abagore rigenda rikagera n’aho umugore aba agomba kwitwara mu buryo runaka kugira ngo ashimishe abagabo, haba mu migendere cyangwa mu mivugire kandi atabyubahiriza bikaba byamuviramo kudatera imbere.

Ati “Umuco wo kudahana ihohotera rishingiye ku gitsina ubangamiye bikomeye uburenganzira bw’abagore, kandi dukomeza kumva ko bigenda bizamuka.”

Perezida Kagame ariko asanga umuti w’iki kibazo ari uguhindura imyumvire yo kumva ko umugore ari ikiremwa kitagira intege.

Yatanze urugero ku Rwanda rwageregaje gukuraho amategeko yabangamiraga abagore, rugashyiraho andi atuma bajya ku rwego rumwe n’abagabo.

Rumwe mu ngero yatanze ni uko hari itegeko ryemerera abagore babyaye umushahara no gukomeza guhembwa kandi kera ritarabagaho.

Perezida Kagame azahura n’Umwami w’u Bubiligi

Nyuma yo kugeza ijambo ku bitabiriye iyi nama, ni ho azahura n’Umwami Philippe w’u Bubiligi, nyuma agirane ibiganiro na Minisitiri w’Intebe w’iki gihugu Charles Michel.

Iyi nama izaba tariki 5 kugera kuri 6 Kamena 2018, izibanda ku kamaro k’abari n’abategarugori mu kugera ku ntego z’iterambere rirambye, bahabwa amahirwe angana n’ay’abandi mu nzego zifata ibyemezo.

Itangazo Perezidansi yashyize ahagaragara, rivuga ko ari umwanya mwiza ku Rwanda wo kuganira ku mubano n’ibindi bihugu, ku birebana n’akarere ruherereyemo n’isi muri rusange.

Perezida wa Repubulika kandi azagirana inama n’abayobozi b’Umuryango w’Ubumwe bw’u Burayi batandukanye.

Perezida Kagame yaherukaga guhura na Minisitiri w’Intebe w’iki gihugu Charles Michel muri Nzeri 2017, ariko banahuriye mu Bubiligi muri Kamena uwo mwaka

Bamwe muri bo barimo Perezida w’Inama Nyobozi y’uyu Muryango, Donald Tusk na Komiseri ushinzwe umubano mpuzamahanga n’iterambere muri uyu Muryango, Neven Mimica.

Azanahura n’uhagarariye Ihuriro ku Bubanyi n’Amahanga n’Umutekano akaba yungirije Umukuru w’uyu Muryango, Federica Mogherini; Perezida wa Komisiyo y’uyu Muryango, Jean-Claude Juncker; na Perezida w’Inteko Ishingamategeko y’u Burayi, Antonio Tajani.

Perezida yaherukaga guhura n’Abanyarwanda baba mu Bubiligi umwaka ushize

Perezida Kagame uyoboye umuryango wa Afurika yunze Ubumwe (AU) ategerejwe muri iyo nama guhera ku itariki 5-6 Kamena 2018.

Mu itangazo umuryango w’Abanyarwanda baba mu Bubiligi washyize ahagaragara, bagize bati "Muze duhure tumugaragarize (Kagame) ko dushyigikiye ibikorwa yakoreye igihugu (u Rwanda), agaciro yasubije Abanyarwanda no kwimika ubumwe bwa Afurika."

Perezida Kagame yaherukaga muri icyo gihuhu mu 2017, aho yari yitabiriye inama nk’iyo.Icyo gihe yayivuyemo yitabira igikorwa kizwi nka "Rwanda Day" cyari cyateguwe n’Abanyarwanda baba i Burayi,aho yaganiriye n’Abanyarwanda n’incuti z’u Rwanda bagera ku 2.700.

Itangazo rihamagarira Abanyarwanda kuzaza kwakira Perezida Kagame