Perezida Kagame na Pereziza Macron baganira n’itangazamakuru

Perezida Kagame uri mu ruzinduko rw’akazi mu Bufaransa yavuze ko nyuma y’ubwo busabe u Rwanda rutigeze ruzuyaza mu gutanga umukandida uzahatanira kuzayobora umuryango w’ibihugu bivuga Igifaransa.

Mu matora ateganijwe ku baziyamamariza kuyobora uyu muryango, u Rwanda ruhagarariwe na Minisitiri w’Ububanyi n’Amahanga Louise Mushikiwabo.

Perezida Kagame yemeza ko kuba u Rwanda rwaratanze umukandida, ari ikimenyetso cy’uko rwiteguye gutanga umusanzu warwo muri uwo muryango w’ibihugu bivuga Igifaransa.

Agira ati “U Rwanda ntirwigeze rureka kuba umunyamuryango wa ‘Francophonie’. Ubwo twasabwaga kugira uruhare rwacu dutanga (muri uyu muryango) twahise dutanga Mushikiwabo mu gihe yaba ashyigikiwe n’abanyamuryango.”

Yabitangarije mu kiganiro we na Perezida w’u Bufaransa Emmanuel Macron bagiranye n’abanyamakuru, nyuma y’uko bombi bagiranye ibiganiro ku mibanire y’ibihugu byombi.

Perezida Kagame yavuze ko nta kabuza u Rwanda n’u Bufaransa bigomba kubaka umubano ugamije kureba ahazaza, wungukira ibihugu byombi kandi buri gihugu kikabigiramo uruhare.

Perezida Kagame yakiriwe na Emmanuel Macron

Uru ruzinduko ni rumwe mu ziba zitegerejwe, bitewe n’amateka ibihugu byombi bihuriyeho.

U Rwanda rushinja u Bufaransa kugira uruhare rutaziguye muri Jenoside yakorewe Abatutsi mu 1994.

Gusa ku butegetsi bwa Macron hari icyizere ko umubano ushobora kongera kuba mwiza, ibintu byaherukaga ku buyobozi bwa Nicolas Sarkozy.

Nyuma yo kubonana Perezida Kagame aritabira inama mpuzamahanga ku ikoranabuhanga iki gihugu cyakiriye ya VivaTech.

Muri iyo nama Perezida Kagame aratangamo ikiganiro, nk’umwe mu bayobozi bayobora igihugu gihagaze neza kandi gitanga icyizere mu ikoranabuhanga.

Nyuma yo kwakirwa bafashe ifoto y’urwibutso

Abayobozi bombi n’ababaherekeje baganira

Uruzinduko rwa Perezida Kagame mu Bufaransa rufatwa nk’urudasanzwe

Perezida Kagame yitabiriye inama mpuzamahanga yiga ku ikoranabuhanga no ku iterambere ry’Ibigo biciriritse yiswe VivaTech.

Urugendo rwa Perezida Kagame mu Bufaransa buri gihe ruba ruteye amatsiko, kubera umubano w’ibihugu byombi utarigeze umera neza. Uru rugendo ari na rwo rwa gatanu mu myaka 16.

U Bufaransa bwari nk’umubyeyi mukuru wa Leta yateguye ikanashyira mu bikorwa Jenoside yahitanye Abatutsi barenga miliyoni imwe.

U Bufaransa bwagiye bushinjwa kenshi kugira uruhare mu gutoza no guha ibikoresho umutwe w’Interahamwe washyize mu bikorwa Jenoside yahitanye Abatutsi barenga miliyoni imwe.

Perezida Kagame wanayoboye urugamba rwo guhagarika Jenoside, ntiyigeze arya iminwa mu kugaragaza uruhare rutaziguye rw’icyo gihugu muri Jenoside yakorewe Abatutsi.

Mu ba perezida bane bayoboye u Bufaransa kuva Jenoside yahagarikwa, harimo Jacques Chirac, Nicolas Sarkozy, François Hollande na Emmanuel Macron uriho ubu, Sarkozy ni we wagerageje kugarura umubano n’u Rwanda ariko abandi bose ntibigeze bacana uwaka na rwo.

Perezida Kagame yaherukaga mu Bufaransa mu 2011, aho yakiriwe na Sarkozy mu Ngoro ya Élysée

Macron ufatwa nk’ishami rishya mu miyoborere y’u Bufaransa,akaba yitezweho kongera kugarura umubano ugenda ukendera n’amahanga cyane cyane mu bihugu bya Afurika byakolonejwe n’icyo gihugu.

Bimwe mu byo Perezida Macron agomba kuva ku izima agakora ni ukwemera uruhare rw’igihugu cye mu itegurwa rya Jenoside, nk’uko raporo nyinshi zabigaragaje.

Agomba kandi kongera kuzura umubano mu Rwanda cyane cyane ko kugeza ubu iki gihugu nta ambasaderi gifite mu Rwanda, kuva uwari uhari yakwirukanwa mu myaka itatu ishize.

Gusa ababikurikiranira hafi bemeza ko hari ibimenyetso bigaragara, bitanga icyizere cy’imibanire mishya myiza ishobora kugaruka hagati y’ibihugu byombi.

Babyemeza babishingiye ku kuba hari amakuru avuga ko u Bufaransa bwifuza ko Minisitiri w’Ububanyi n’Amahanga w’u Rwanda Louise Mushikiwabo ayobora umuryango w’Ibihugu bivuga Igifaransa.

U Bufaransa butekereza ko guha Umunyarwanda akayobora uyu muryango na wo udahagaze neza, bidashimangira icyizere icyo gihugu gifitiye u Rwanda muri dipolomasi gusa,ahubwo binagaragaza gucisha make hagashakwa umurongo mushya mu mibanire.