Polisi yavuze ko nyuma yo kubabaza ibibazo, yabaherekeje bagasubira mu rugo rwabo.

Diane Rwigara yari yajyanywe ku biro bya Polisi bishinzwe iperereza (CID) ari kumwe na nyina Adeline Rwigara na mukuru we Anne Rwigara, kugira ngo babazwe ku bibazo byo kunyereza imisoro bakurikiranyweho.

Ku rundi ruhande, Diane Rwigara we yari akurikiranyweho ikibazo kijyanye no gukoresha inyandiko mpimbano ashaka abamusinyira. Ngo yabikoze ubwo yageragezaga kwiyamamaza mu matora y’umukuru w’igihugu aheruka ariko bikarangira akuwe mu bahatanaga kubera kutuzuza ibisabwa.

Polisi yabasanze mu rugo ku mugoroba wo kuri uyu wa mbere tariki 04 Nzeri 2017, nyuma yo kwinjira ku ngufu, kuko bari bamaze umwanya utari muto bagerageza kubasaba gukingura bakanga.

Polisi yafashe icyemezo cyo kujya kubifatira nyuma y’uko banze kuyitaba ngo bisobanure ku birego bashinjwa, ahubwo bagahitamo gukoresha bimwe mu bitangazamakuru bavuga ko bashimuswe.

Umuvugizi wa Polisi y’igihugu ACP Theos Badege, yavuze ko ibibazo bagombaga kubazwa ari byo n’ubundi bari kubazwa iyo bitaba Polisi mbere.

Diane Rwigara ubwo yatabwaga muri yombi. Aha yinjiraga mu modoka ya Polisi

Polisi y’u Rwanda yahise ita muri yombi Diane Rwigara, Uwamahoro Anne n’umubyeyi wabo Adeline Rwigara nyuma y’uko bahamagajwe ku bugenzacyaha ariko ntibitabe.

Abapolisi bagiye aho umuryango wa Diane Rwigara utuye mu Kiyovu mu ma saa kumi n’imwe z’umugoroba kuri uyu wa mbere tariki ya 04 Nzeli 2017, barakomanga babura ubakingurira

Nyuma abapolisi baje kujya mu gipangu imbere bakoresheje ingufu, basangamo Diane Rwigara n’abandi bari mu nzu imbere mu gikari.

Bahise babereka impapuro zibata muri yombi uko ari batatu, bahita babajyana
ku biro bishinzwe iperereza (CID) kugira ngo bazahatwe ibibazo.

Umuvugizi wa Polisi y’u Rwanda ACP Theos Badege

Umuvugizi wa Polisi y’Igihugu, ACP Theos Badege avuga ko umuryango wa Rwigara uregwa kunyereza imisoro kubera ikompanyi y’uwo muryango itarayishyuye.

Diane Rwigara we akurikiranyweho kuba yarakoresheje impapuro mpimbano ubwo yashakaga kwiyamamariza kuba Perezida w’igihugu.

Ibi bikaba bijyanye n’ibyo Komisiyo y’amatora yagaragaje ivuga ko Diane Rwigara yatanze imikono y’abantu bashyigikiye kandidatire ye irimo n’abapfuye.

ACP Badege akomeza avuga ko abo bose batumijweho kuri Polisi inshuro eshatu zose ngo bajye kubazwa ibibazo ariko ntibitaba.

Agira ati "Iyo bigenze gutyo umuntu agasuzugura amategeko, hatangwa urupapuro rundi rutuma Polisi izana umuntu ku gahato.

Ni ingingo ya 48 y’igitabo cy’imiburanishirize y’imanza nshinjabyaha. Nicyo cyakozwe uyu munsi."

Akomeza avuga ko ibibazo bazabazwa ari ibyo n’ubundi bari kubazwa iyo bitaba Polisi mbere

Abapolisi buririye ku rwego babona kugera imbere kuko bari babuze ubakingurira

Aha abapolisi bari babuze ubakingurira

Aha abapolisi bari bamaze kwinjira mu rugo

Ubwo bagezwaga ku biro bishinzwe iperereza

Augustin Rudahara wasinyiye Diane Rwigara ashyinguye mu irimbi rya Busanza mu mva zitubakiye

Ku mugoroba wo ku itariki ya 07 Nyakanga 2017 nibwo NEC yatangaje abakandida batatu ntakuka bemerewe kwiyamamariza umwanya wa Perezida w’u Rwanda.

Abo bakandida ni Paul Kagame w’umuryango FPR-Inkotanyi, Frank Habineza w’ishyaka Democratic Green Party n’umukandida w’igenga Philippe Mpayimana nawe yaremerewe nyuma yo kuzuza ibisabwa birimo gusinyirwa n’abantu 600 bo mu turere 30 tugize igihugu.

Ibyo bisabwa nabyo byarebaga abandi bakandida bigenga aribo Gilbert Mwenedata, Barafinda Sekikubo Fred na Diane Shima Rwigara.

Abo uko ari batatu ntibemerewe kandidatire kubera ko hari byinshi babura mu byobasabwaga ariko Diane Rwigara we yatangaje abantu.

Yatanze imikono y’abantu 572 bamusinyiye ndetse NEC yatahuye ko mu bamusinyiye bo mu Karere ka Gasabo harimo abantu batatu bapfuye mu gihe gishize.

Abo ni Innocent Maniraguha, Desiré Byiringiro na Augustin Rudahara; nkuko Perezida wa NEC, Prof. KALISA MBANDA yabitangaje.

NEC ikomeza ivuga ko uwitwa Augustin Rudahara yapfiriye mu bitaro bya Kibagabaga ku itariki ya 16 Mata 2016, ashyingurwa mu irimbi rya Busanza, mu mva zitubakiye.

Rudahara ni nimero ya 471 mu gitabo cyo ku irimbi rya Busanza. Ashyinguye iruhande rw’uwitwa Murereyimana Athanasie wapfuye ku itariki ya 22 Mata 2016, afite imyaka 30 y’amavuko.

Augustin Rudahara ni nimero 471 mu gitabo cyo ku irimbi rya Busanza

Umuntu ukora mu irimbi rya Busanza riri mu Karere ka Kicukiro, wavuze ko yitwa Bartazar avuga ko ubwo yari ari mu kazi ku itariki ya 23 Mata 2016 yabonye umugabo waje amusaba kumufasha gushyingura umuntu we wapfuye.

Agira ati “Yari arimo ashaka abantu ngo bamufashe gukusanya amafaranga yo kugura isanduku. Mu bushobozi buke bwabonetse yishyuye aho gushyingura umuntu we haciriritse.”

Akomeza agira ati “Nyuma yo kumushyingura umuryango wa Rudaharara wazanye umusaraba ukoze mu giti bawusiga irangi ritukura bawutera kumva ye. Banditse izina rye kuri uwo musaraba bakoresheje ikara, imvura iguye rirasibama.”

Uwitwa Jean Damascene Mujyambere, utuye i Remera mu Karere ka Gasabo, wayoboye umuhango wo gushyingura Rudahara akanagura isanduku yo kumushyinguramo avuga ko bishyuye imva ibihumbi 15RWf.

Irimbi rya busanza rifite ibiciro biri mu byiciro bibiri. Hari imva y’ibihumbi 15RWf n’imva y’ibihumbi 250RWf, bitewe nuko umuntu yifite ahitamo ahamunogeye.

PS Imberakuri igiye gukurikirana Diane Rwigara

Umuyobozi wa PS Imperakuri Christine Mukabunani (iburyo) avuga ko bazakurikirana Diane Rwigara (ibumoso)

Ishyaka PS Imperakuri naryo rivuga ko Diane Rwigara yakoresheje imikono y’abayoboke baryo 34; nkuko umuyobozi wa PS Imperakuri Christine Mukabunani abivuga.

Agira ati “Shima Rwigara yibye urutonde rw’abatangije ishyaka ubu bari kutubaza uburyo yabonye urwo rutonde. Turi gutegura inama idasanzwe yo kumukurikirana.”

Akomeza avuga ko ishyaka rye ritazi uburyo Diane Rwigara yabonye urutonde rw’abo bantu.

PS Imberakuri mu kiganiro n’abanyamakuru