Abadepite ba EALA bagiye impaka ku itegeko rica amasashe mu karere birangira ridatowe

Hari mu mpaka zabaye higwa ku itegeko rirebana n’ibikoresho bya pulastike byangiza ibidukikije mu karere, ku wa gatatu tariki 15 Werurwe 2017.

Ubwo bari bageze ku itegeko ry’imikoreshereze y’ibikozwe muri pulastike, bibanze cyane cyane ku kureba uko amasashe akwiye gukoreshwa muri EAC.

Benshi mu badepite batanze ibitekerezo bashimangira ko ibihugu bya EAC byakwemeza ko amasashe ahagarikwa gukoreshwa nkuko mu Rwanda yaciwe burundu kandi bikaba byarahagize ahantu heza, hubahiriza ibidukikije kandi hasigasira ubuzima bw’abahatuye.

Depite Dora Byamukama, ukomoka muri Uganda yagize ati “Njye iyo mvuye muri Uganda nkambuka umupaka nkinjira mu Rwanda bihita byigaragaza ko bateye intambwe mu kwita ku bidukikije no kubungabunga ubuzima bw’abaturage.”

Yakomeje avuga ko icibwa ry’amasashe ryazamuye cyane isuku mu Rwanda, agira ati “Nimureke twese hamwe dufatanye duce amasashe mu bihugu byacu, araduteza umwanda n’indwara.”

Muri izi mpaka depite Mike K. Sebbalu we yabanje gusaba ko mu mpaka bajya izo ari zo zose bakwiye kubanza kwemeranya ko nta mudepite n’umwe muri bo ukwiye kuzigera agaragara akoresha amasashe iwe mu rugo, mu ngendo ze n’ahandi hose kugira ngo babere n’abandi urugero.

Yagize ati “Ibibi by’amasashe abahanga barabitugaragarije twese. Atera umwanda kuko abayakoresha bayata aho babonye hose kandi anatera indwara mu buryo bwinshi ntarondora kugera no ku bana abagore baba bagitwite.”

Mu ndwara zashyizwe mu majwi ko zishobora guturuka ku ikoreshwa ry’amasashe harimo kanseri, asima, diyabete ndetse n’ibibazo ku babyeyi babyara.

Uretse ibyo, banavuze ko atera ubutaka kurumba kuko abuza amazi kubucengeramo kandi ngo akaba anica amatungo.

Hon Sebbalu ati “Atuma umusaruro w’ibiribwa uba muke bigatuma n’ubukungu buhungabana. Nimureke amasashe tuyace burundu rwose.”

Perezida w’Abadepite ba EALA, Hon Dan Fred Kidega avuga ko kugeza uyu munsi igihugu cya Tanzaniya gisa n’icyifashe mu guca amasashe

Abandi badepite batanze ibitekerezo kuri uyu mushinga w’itegeko bakomeje gushimangira umurongo wo guhagarika ikoreshwa ry’amasashe ariko birangira itegeko ridatowe.

Tanzaniya na bamwe mu bikorera baracyatseta ibirenge

Nubwo abenshi ari abagaragaje ko bashyigikiye guca amasashe, mu nteko ya EALA hagaragajwe ko igihugu cya Tanzaniya kitaragira icyo kivuga kuri iri tegeko kandi cyarahawe umwanya wo gutangaza aho gihagaze nk’ibindi bihugu bya EAC.

Perezida w’Abadepite ba EALA, Hon Dan Fred Kidega yavuze ko kugeza uyu munsi igihugu cya Tanzaniya gisa n’icyifashe kuko bakomeje gutegereza ko cyohereza umwanzuro wacyo kuri iri tegeko amaso agahera mu kirere.

Hemejwe ko bagiye kongera kwibutsa icyo gihugu, mu mirimo y’inteko izaterana muri Gicurasi bakazabifataho umwanzuro.

Mu bagaragaje ingingimira kuri iri tegeko bandi harimo ihuriro ry’abikorera basabye ko bongererwa igihe cyo kuganira kuri iri tegeko no kuritangaho ibitekerezo.

Urugaga rw’abanyenganda bo muri Kenya na rwo rwagaragaje ingingimira ko batahawe umwanya wo gutanga ibitekerezo kuri iri tegeko riri gutegurwa kandi ari bo bakora amasashe, ndetse bazanasabwa gukora ibiyasimbura igihe byaramuka byemejwe burundu ko amasashe acibwa muri EAC.

Mu gihe muri EAC ari bwo bagishaka gutora itegeko rikumira amasashe, u Rwanda rwaciye amasashe ku butaka bwarwo tariki 04 Ukwakira 2004.

Kugeza ubu usanga rufatwa nk’ikitegererezo mu isuku no kubungabunga ibidukikije muri Afurika.

Abadepite ba EALA bari mu nteko i Kigali basaba ko amasashe yacika mu karere

Hon. Patricie Hajabakiga, umudepite wa EALA ukomoka mu Rwanda, ni we wasabye ko EAC yatora itegeko rirengera ibidukikije ryibanda ku kugenzura ikoreshwa ry’ibikoresho bya pulasitike by’umwihariko amasashe.

Inteko ya EALA iteraniye mu Rwanda yemeje ko komisiyo yateguye iryo tegeko yakongeramo ibitekerezo biburamo nkuko byasabwe n’abadepite, hanyuma rikazafatwaho umwanzuro mu Nteko ya EALA itaha izateranira i Arusha muri Tanzaniya.

Amafoto: Muzogeye Plaisir

Abadepite bo Muri Tanzaniya, Kessy na Rosy nibo bari bitabiriye bonyine

Imirimo yari iteganyijwe yari iyo kwiga kuri raporo ivuga uko aborozi bo ku mipaka ya Tanzaniya na Kenya bibona mu mishinga y’ubucuruzi mu muryango w’Ibihugu by’Afurika y’Iburasirazuba (EAC Common Market).

Muri iyo raporo hibanzwe ku kibazo cy’abana bo muri Tanzaniya bata ishuri bakajya kuragira amatungo muri Kenya.

Abaturage bo mu duce twa Longido muri Tanzaniya ku mupaka uyigabanya na Kenya bafite ikibazo cyo kuba abana babo bata amashuri bakajya kuragira amatungo y’abaturanyi babo bo muri Kenya ahitwa Kajiado.

Komisiyo y’Ibibazo byo mu karere no gukemura amakimbirane y’Inteko y’Umuryango w’Ibihugu by’Afurika y’Uburasirazuba (EALA), kuva ku wa 19-22 Gashyantare 2017 yagiye kureba uko aborozi bo ku mupaka wa Tanzaniya (Longido) na Kenya (Kajiado) bahabwa mu isoko rusange rya EAC (EAC Common Market).

Ubwo bari bagiye kwemeza iyo raporo, byagaragaye ko umubare w’abadepite bagomba gufata ibyemezo utuzuye, biba ngombwa ko bahamagara abakomoka muri buri gihugu, birangira abadepite ba Tanzaniya babuzemo abakwiye ngo imirimo ikomeze.

Imirimo y’inteko rusange ya EALA yasubitzwe kubera ibura ry’Abadepite ba Tanzaniya

Kugira ngo hafatwe umwanzuro bisaba ko nibura haba hari 1/3 cy’abadepite baturuka muri buri gihugu mu bigize EAC.

Gusa riko basanze muri bari bahari, hari umunani baturuka mu Rwanda, umunani baturuka muri Uganda, batandatu baturuka muri Kenya, bo mu Burundi na babiri ba Tanzaniya.

Ni mu gihe ubusanzwe buri gihugu kiba gifite abadepite icyenda mu Nteko Ishinga Amateko ya EAC.

Byabaye nk’ibitungurana kuko Tanzaniya ari yo ifite ikibazo kuko ishinja Abanyakenya gutuma abana babo bata ishuri bakajya kubaragirira amatungo.

Hon. Mike K.Sebalu, uyobora Komisiyo yakoze iyo raporo, yagize ati “Ku ruhande rwa Tanzaniya usanga amashuri arimo ubusa kuko abana barambutse umupaka bajya kuragira amatungo muri Kenya, ariko ku ruhande rwa Kenya nta kibazo.”

Yakomeje avuga ko ababyeyi bo muri Tanzaniya babatakambiye basaba gukorerwa ubuvugizi abana babo bakagaruka ku ishuri, ndetse anavuga ko no ku ruhande rwa Kenya ababyeyi bemeje ko koko iki kibazo cy’abana b’Abatanzaniya bata ishuri bakajya kuragira amatungo muri Kenya gihari.

Babiri mu badepite ba Tanzaniya Shy-Rose Sadrudin Bhanji na Kessy Nderakindo ni bo bari mu nteko.

Twashatse kubasobanuza impamvu bagenzi babo batitabiriye imirimo y’inteko bigatuma isubikwa, Hon. Shy-Rose Sadrudin Bhanji avuga ko ntacyo yatangaza kuko atari umuvugizi w’Abadepite ba EALA bakomoka muri Tanzaniya.

Perezida w’inteko ya EALA, Daniel Fred Kidega

Amakuru Kigali Today yamenye ni uko abo badepite bo muri Tanzaniya bari bagiye mu gihugu cyabo mu mpera z’icyumweru kuko muri icyo gihugu hegereje amatora y’abadepite.

Ndetse no kwiyamamaza byanatangiye, bityo bakaba bari bagiye mu bikorwa by’amashyaka ya politiki bakomokamo.

Ku wa mbere w’iki cyumweru (cyatangiye tariki ya 13 Mutama 2017) ariko mu mujyi wa Dodoma haguye imvura yateje imyuzure igafunga imwe mu mihanda.

Bikaba kugeza ubu hatazwi icyaba cyabujije abo badepite kwitabira imirimo y’Inteko ya EALA i Kigali kuko umuyobozi wayo yavuze ko atazi aho baherereye.

Imibare igaragaza ko abana babarirwa muri miliyoni 5.5 muri Afurika bakoreshwa imirimo ivunanye mu gihe bagombye kuba bari mu ishuri.