Indirimbo “Too much” ya Jay Polly igiye kwigwaho ku buryo ishobora guhagarikwa

Video y’indirimbo “Too Much” ya Jay Polly yakoze afatanije n’abandi bahanzi batandukanye, ikijya hanze abayirebye bagaragaje ko batayishimiye kubera ko igaragaramo ibikorwa bise “iby’urukozasoni”.

Muri iyo Video hagaragaramo abakobwa bambaye utwenda tw’imbere babyina bazunguza amabuno imbere y’abasore, ibintu abantu bamwe bavuze ko biganisha ku busambanyi.

Mu minsi itageze ku cyumweru iyo video imaze igiye hanze, abayibonye ndetse na bamwe mu bahanzi bayiririmbamo barimo Uncle Austin, bifuza ko yasubirwamo cyangwa se igahagarikwa kuko ibirimo bidahuye n’umuco Nyarwanda.

Ibyo byatumye Kigali Today ibaza MINISPOC icyo ibivugaho.

Itangaza ko mbere y’uko iyo ndirimbo yahagarikwa, igakurwa ku isoko, igiye kubanza kuganira na ba nyirayo,nk’uko Karambizi Olivier, umuvugizi wa MINISPOC akaba n’umujyanama wa Minisitiri abivuga.

Agira ati “Iriya ndirimbo nayo mbere yo kuvuga ngo tuyikure ku isoko ive muri “public” turabanza duhure na nyirayo.

N’ubwo byitwa ngo ni iya Jay Polly ariko ntabwo ari we wenyine uyirimo. Tubanze tuganire nawe, tuganire n’abo bayifatanije.”

Mu byo bazaganira harimo kureba icyo abo bahanzi bari bagamije bashyira hanze ayo mashusho.

Ati “Ese iyo ndirimbo izarebwa na ba nde? Ni abakuru? Ni abana? Ni urubyiruko? Kubera uko iteye n’imiterere yayo nibo ubwabo bayikurira ku isoko. Turegera abo bahanzi tuganire na bo, twongere tunabibutse n’iby’icyo gihe.

Tunababwire ngo ariko n’ubwo mwari mwasabye imbabazi, mwongeye gutatira cya gihango nyine.”

Umuhanzi Uncle Austin ntiyishimiye amashusho ari muri video "Too Much"

Umuhanzi Uncle Austin, utarishimiye video ya “Too Much” ashyigikiye icyemezo cy’uko yahagararikwa burundu.

Agira ati “Nta nubwo nabyanga kuko nanjye nanditse ko bayikura kuri Youtube ariko (uwatunganije amashusho) agafunga umutwe akanga kuyikuraho.

Urumva ko, n’ibyo aba avuga aba abeshya ngo barayirebye ni ukubera ko ari umufungamutwe.”

Akomeza avuga ko indirimbo yagiye hanze we na bagenzi be bayikoze batabanje kuyerekwa ngo bemeranye niba yasohoka. Uwafashe amashusho yayo ngo yayishyize hanze batabyemeranije.

Ati “Mbere y’uko ijya hanze ubanza kuyireba n’uwayitunganyije cyangwa se n’abo mwayikoranye kugira ngo murebe ibyiza, ibyo muhindura kugira ngo mbere y’uko indirimbo isohoka urebe ko imeze neza.

Ibyo byose ntabwo byabaye. Kandi hari amashusho nanjye ubwanjye nari nzi neza ko bayashyize muri video bakayashyira mu buryo agenda buhoro cyane (Slow Motion) yagaragara ukundi.”

Jay Polly nawe yifuza ko amashusho ya "Too Much" yasubirwamo ariko ngo uwayatunganyije arabyanga

Nyir’iyo ndirimbo ari we Jay Polly nawe ahamya ko yasabye ko amashusho y’iyo ndirimbo yasubirwamo ariko uwayatunganije, ari we Nameless Campos arabyanga.

Nameless Campos ahamya ko yabanje kwereka iyo video abo bahanzi n’ubwo bo babihakana. Anemeza ko ibyakozwe mu mashusho y’iyi ndirimbo “Too much” atari we wabibahatiye ahubwo babikoze babitekerejeho.

Agira ati “Ibyo bintu ni ukwigiza nkana kuko nibo babikoze kandi nawe urabizi ko mugufata amashusho y’indirimbo umuntu akora ikintu kimurimo, ntabwo wakoresha umuntu ibintu bitamurimo. Ntabwo ari abana ni abantu bakuru, baranduta.

Iyo biba ari ibintu batiyumvamo bari kumbwira mu gihe cyo gufata amashusho ariko nta kibazo video ifite, ntabwo irimo ibintu bidasanzwe ni uko abantu baba babikabirije.”

Nameless Campos wakoze amashusho y’iyo ndirimbo ntakozwa ibyo kuyasubiramo

Iyi ndirimbo “Too Much” iramutse ihagaritswe yaba ikurikiye indi yitwa “Ancilla” ya Urban Boyz yahagaritswe mu mwaka wa 2014 kubera ko video yayo irimo amashusho asa n’ay’urukozasoni.

Bruce Melody avuga ko muri Coke Studio nta gihe cyo guta

Uyu muririmbyi yagiye muri iryo rushanwa ku cyumweru tariki ya 21 Gicurasi 2017. Agezeyo ngo ntacyo bakoze kuko wari umunsi w’ikiruhuko.

Ariko ngo ku munsi wakurikiyeho batangiye gukora ku buryo ngo kugeza ubu atabasha gusobanura mu magambo ibintu byose bijyanye na muzika amaze gukora.

Agira ati “Ntabwo nanabona nk’ibintu maze gukora amagambo nabivugamo kuko ni byinshi cyane, nta mwanya tuba dufite na muke na muke wo kuruhuka.”

Akomeza avuga ko bimwe mu bikorwa bakora harimo gufata amajwi y’indirimbo, gukora imyitozo yo kuririmba, gutegura ibyo bazakora mu bitaramo, guhura n’abazabambika mu bitaramo, gukora ibiganiro n’abanyamakuru n’ibindi.

Agira ati “Dukora ibintu byinshi ku munsi nyine ku buryo nyine bitoroshye ko n’umwanya wo kwitaba telefone uboneka.”

Avuga ko bava kuri hoteli babamo saa kumi n’ebyiri za mu gitondo bakagaruka saa tatu z’ijoro, buri munsi.

Bruce Melody yatangarije Kigali Today ko muri ayo marushanwa ya Coke Studio azaba ahanganye n’umuraperi wo muri Kenya witwa Khaligraph Jones aho kuba umuririmbyi Ali Kiba nk’uko byari byakwirakwijwe ku mbuga nkoranyambaga.

Bruce Melody ari kumwe na Khaligraph Jones wo muri Kenya bazakorana

Coke Studio ni inzu ikomeye ku isi itunganya umuziki, yashinzwe na Coca Cola ikompanyi izwiho gukora no gucuruza ibinyobwa bitandukanye. Ifite amashami atandukanye ku isi nko muri Pakistan, mu Buhinde no muri Afurika.

Iyo studio yahamagaye Bruce Melody nk’umwe mubahanzi yabonyeho impano. Biteganijwe ko azamarayo icyumweru.

Coke Studio aho ikorera hose ku isi, izamura abahanzi bahagaze neza mu bihugu byabo, ikabashyira ku rwego mpuzamahanga, ikabaha n’amasezerano yo kwamamaza ibinyobwa byayo.

Ishami ry’iyi Studio riri muri Kenya ryatumiye Bruce Melodie, ryakoranye n’abandi bahanzi batandukanye muri Afurika barimo Vanessa Mdee wo muri Kenya, Patoranking wo muri Nigeria, Flavor wo muri Nigeria na Yemi Alade wo muri Nigeria.

Hiyongeraho Eddy Kenzo wo muri Uganda, Sauti Sol yo muri Kenya, Bahati Umunya-Kenya uririmba indirimbo zaririmbiwe Imana, Kiss Daniel, n’abandi.

Iyi Studio, ni nayo iherutse gutumira abaririmbyi bakomeye bo muri Amerika ari bo Ne-Yo, Chris Brown, Trey Songz bose baheruka muri Kenya.

Daddy Cassanova ahamagarira abahanzi bo mu Rwanda kuririmba ku bintu bitandukanye bitari urukundo gusa

Uyu muhanzi w’umunyarwanda ariko uba muri Canada, yamenyekanye cyane mu Rwanda mu myaka yashize kugeza nko muri 2008, ubwo yajyaga gutura muri icyo gihugu.

Ahamya ko kuri ubu, agendeye ku bihe bye akiba mu Rwanda, abona umuziki wo mu Rwanda umaze gutera intambwe ariko ngo uracyafite urundi rugendo.

Mu mpera za Werurwe 2017, uyu muhanzi yaje mu Rwanda gusura umuryango n’inshuti. Umunyamakuru wa KT Radio, Gentil Gedeon Ntirenganya barahuye bagirana ikiganiro kirambuye.

Yamutangarije byinshi ku buzima bwe kuva avuye mu Rwanda kugeza ageze muri Canada, aho atuye, afite abana babiri ariko atabana na nyina ubabyara.

Ikiganiro kirambuye:

Kigali Today (KT): Daddy uraho neza?

Daddy: Yego ndaho.

KT: Ikaze mu Rwanda, ikaze kandi no muri Kigali Today.

Daddy: Yego urakoze cyane.

KT: Wari usanzwe uba mu bintu bya “showbiz” uri umuhanzi; mu 2008 abantu bumva ngo uri muri Canada. Byagenze bite?

Daddy: Muri Canada nahatuye kubera abantu twari tuziranye, ubundi nabanje gutura muri Leta ya California hagati ya Los Angeles na San Francisco umwaka n’amezi nk’angahe, nahakoraga projet (umushinga) hamwe n’umwubatsi w’umuhanzi yubaka amashuri ya muzika.

Yashakaga gukora amashuri amwe n’amwe muri East Africa biba ngombwa ko dukorana njye nkamukorera nk’umugenzuzi.

Twubaka ishuri rimwe muri Kenya. Hari n’irindi yashakaga kubaka i Burundi no mu Rwanda ariko ntabwo nzi neza ahantu byaherereye. Uwo sasa niwe wampuje n’abatunganya umuziki bo muri Toronto ariko bo bakoraga injyana ya Funk. Nageze hariya njya mu njyana ya Funk.

KT: 2008 ujya muri Canada, abantu basa n’aho bakubuze. Kubera ko wari ugiye hanze y’u Rwanda. Wabyumvaga ute wowe?

Daddy: Urebye ukuntu naje kubura nk’uko bavuga, ni ukubera ko ngeze hariya ni nk’aho nasanze undi muziki; ni ahantu ugera ukagomba kubanza gufata icyemezo; nashakaga gufata icyemezo ngo ndebe nimba nshobora kubifatanya byombi nkakora indirimbo nke zijya mu Rwanda cyangwa izindi za hariya.

Ariko usanga iyo uri gutangira muri “industry” nk’iriya ikomeye uba ugomba guhatiriza cyane, gushyiramo imbaraga nyinshi cyane, nsanga ntabifatanya neza neza. Biba ngomba ko mba mfashe ikiruhuko gato ku miziki nohereza mu Rwanda nkabanza kwimenyekanisha hariya.

Yashinze itsinda (band) y’abaririmbyi muri Canada

Naje gushinga band (itsinda ry’abaririmbyi), naje gukomeza guhura n’abandi bantu benshi baduhuza n’ibitaramo, ikintu twe twarwanaga nacyo cyane ni ukubona ukuntu twakina amaserukiramuco menshi ashobotse abera hariya.

Kuri ubungubu zose tuzikinamo buri mwaka tuba dufite amaserukiramuco dukinamo. Byaje kumpira, urebye nicyo gituma naje kubura muri muzika y’ino ahangaha ho gatoya kuko nashakaga gushyiramo ingufu kugira ngo izina ryanjye rifate hariya.

KT: Ubwo ni ukuvuga ko monde ya muzika hariya muri Canada irakuzi?

Daddy: Monde ya funk. Uvuze monde y’umuziki ni nini cyane. Umuziki ugiye uri mu twiciro twinshi cyane hariya. Uvuze monde ya Funk ndazwi cyane hariya. Mbese amaserukiramuco yose ya Jazz, Funk n’ibintu byose bijyanye n’ibintu dukora byose
dukinaho.

Daddy Cassanova yashinze Band y’abaririmbyi muri Canada

KT: Ubwo ni nabyo bigutunze?

Daddy: Yego ni nabyo bintunze.

KT: Akazi kaba gateye gate?

Daddy: Urebye dufata nk’igihe cyo gusubiramo, twebwe dukina amaserukiramuco cyane. Nicyo kintu twe twibandaho cyane. Kandi muri Amerika ya ruguru hari nyinshi cyane.

Nk’ubungubu kuva muri Nyakanga kugeza muri Kanama (2017) hari izigeze nko kuri eshanu cyangwa se esheshatu. Kandi buri imwe uyigenera nk’iminsi nk’itanu, indi itatu, gutyo.

Mbese kuva muri Nyakanga kugera muri Kanama buri kwezi mfite nk’ibitaramo umunani. Ni kuriya urebye mpanga nkamenya umusaruro wanjye w’uyu mwaka ukuntu uzaba umeze bigatuma menya neza ayo ninjije, ayo nshobora kwinjiza umwaka utaha.

KT: Hari igihe rero cyageze utangira kohereza indirimbo zimwe na zimwe mu Rwanda. Icyo gihe byari bigenze bite?

Daddy: Icyo gihe urabona...igihe cya mbere kwari uguhatiriza kugira ngo umuziki wanjye ufate hariya. Nyuma bimaze gufata sasa rero niho byatangiye kunshobokera gufata akaruhuko rimwe na rimwe nkakora n’ibyo mu Rwanda nkakora n’ibyo nohereza ahangaha.

KT: Byari byoroshye?

Daddy: Yego biroroshye. Byose kuko ni Studio zimwe nkoreramo hamwe ni uko njyamo nkaririmba ikinyarwanda ahandi nkaririmba icyongereza.

Gusubiramo indirimbo "Ishiraniro" yabisabiye uburenganzira

KT: Hari indirimbo wakoze mu minsi ishize yitwa “Akanyoni”, abantu benshi barayizi ariko mbere yaho muri 2015 ubwo wazaga mu Rwanda wakoze “Ishiraniro”, wakoze indirimbo abantu bakunze cyane “Ishiraniro” uyisubiramo. Ni ‘cover’ wakoze?

Daddy: Ntabwo ari ‘cover’. Iyo ni remix. Mbese nayisubiyemo. Cover na Remix biratandukanye. Remix ni iyo u recordinze version yawe. Cover ni iyo uri kuririmba gusa ibyo undi yaririmbye. Urebye nayihinduriye ibicurangisho, amagambo gusa niho nakoresheje aya Fashaho Phocas.

KT: Iriya ndirimbo uyikora ntabwo wari ufite impungenge z’umuryango wa nyiri iriya ndirimbo?

Daddy: Oya. Twaravuganye.

KT: Nibyo?

Daddy: Yego. Navuganye na Fashaho ni nawe wampaye uburenganzira bwo kuyikora ni nawe wanyandikiye amagambo ntabwo nari nzi amagambo yayo.

KT: Ok! wari ugamije iki?

Daddy: Nari ngamije gukora indirimbo Abanyarwanda benshi bakwisangamo. Ni indirimbo yakinwaga cyane kuri Televiziyo y’u Rwanda. Urebye nta n’ubwo nari natekereje iyo ngiyo. Nari natekere indirimbo za Kamaliza, na Rodrigue Karemera, mbese nashakaga gukora indirimbo abantu benshi twakwisangamo.

Nk’urungano rwanjye twakuze tureba Televiziyo y’u Rwanda ariyo televiziyo yonyine ibaho. Indirimbo zose zacaga aho ngaho, urumva ko abenshi twabaga tuzizi; abenshi twari tuzifitiye amarangamutima; twari tuzifitiye urukundo cyane.

Ahubwo naje kubura ukuntu mpuzwa n’abantu bampa uburenganzira bwo gukora indirimbo za Kamaliza cyangwa Rodrigue Karemera, binyorohera sasa kubona Fashaho Phocas aba ariwe tuganira, ampereza uburenganzira ndayikora.

Daddy Cassanova ahamya ko afite abana babiri ariko ntabana na nyina ubabyara

KT: Nyuma yaho ushyira hanze na none Akanyoni hanyuzemo igihe byibura cy’imyaka ibiri. Biba bigenze bite?

Daddy: Urebye njyewe imbaraga ndi gukoresha ni ugukomeza umuziki wanjye hariya. Hari ukuntu nakubwiye, hari ukuntu bigorana kubivanga. Nicyo gituma njya mara imyaka ingahe...ndatinda ariko ntabwo mpera. Ndatindaho gato ariko ntinda mpugiye mu bindi.

Nabona akanya nkakora indi. Hari ukuntu wohereza indirimbo ukamenya ko ikirimo gukora. Ndabikurikirana; ukamenya ko ikirimo iragenda. Ariko wasanga bitangiye kumanukaho gato ukohereza indi. Ni kuriya mbese mbikora.

Urebye imbaraga ndi gushyiramo cyane hariya kugira ngo ibintu bifate. Niho ndi buri munsi, ntabwo binshobokera kuza cyane mu bitaramo ino aha, ariko hariya ibintu byose, niho ndi mbese.

Urebye imbaraga nshyiramo ni hariya kuko mbonye ibitaramo, ni hariya mbibona. Ibyo mu Rwanda byamfata kuza ino aha, kandi kubipangira igihe, ni ibintu birebire cyane.

KT: Ubwo iyo ukoze ziriya ndirimbo ukazohereza mu Rwanda, hari ikintu biba bivuze cyane? Hari igisobanuro ku muziki wawe muri rusange?

Daddy: Igisobanuro ku muziki wanjye ni uko izina ryanjye rikomeje gukora ino aha.

KT: Bikubyarira iki?

Daddy: Bimbyarira ko iyo nje ino aha nkomeza kuba umuhanzi uzwi, umuhanzi w’umunyarwanda, abantu ntibakeke ko nabaye umunyamahanga cyangwa ibintu nk’ibyongibyo. Ahangaha niho natangiriye umuziki.

Aho nagera hose hariya, numva ko ari ingenzi cyane ko izina ryanjye riguma ahangaha. Hari n’abana benshi duhura bari mu muziki bansaba inama, ibintu nk’ibyongibyo.

Ni ikintu kinshimisha ko n’ahangaha mpafite izina. So kugira ngo rihagume nabyo ni ibintu bimfitiye akamaro.

Abona muzika nyarwanda iri gukura

KT: Tujye kuri monde ya muzika yo mu Rwanda; hagiye gushira imyaka byibura hafi icumi uri hanze yayo, ushobora kuba uyireba mu yindi ndorerwamo twe tutabona. Uyibona ute aho uri hanze?

Daddy: Iri gukura. Iri gukura, ariko haracyari urugendo rurerure. Urareba mu iterambere nta mupaka uhaba; ukomeza gukura ubundi ukomeza kwiga, ukomeza kwivugurura, mbese ugomba kuba mwiza kurusha uko wari umeze.

Ikintu navuga ni uko umuziki w’aha ngaha uri gukura kuko ugereranyije n’ukuntu wakorwaga mu gihe cyacu, n’ukuntu usigaye ukorwa ubungubu, hari utuntu tumwe na tumwe twahindutse twinshi.

Ariko hari na byinshi nanone tuzageraho, tukiri mu nzira tuzageraho; muri make navuga ko uri gukura, ariko ugifite urugendo.

Daddy Cassanova ngo aharanira kuririmba indirimbo zisiga ubutumwa

KT: Iyo uri mu Rwanda birashoboka ko ushobora gukenera abanyamuziki, wenda kugira ngo bagufashe ibintu runaka; wenda nk’abatunganya umuziki, wenda nk’abahanzi, wenda nk’abacuranzi, wenda nk’abanyamakuru, abantu runaka. Ninde uba ukeneye kurusha undi?

Daddy: Ok. Bose. Urabona bariya bantu bose bagaragara mu myidagaduro bose bafite akamaro umwe nk’uwundi.

Ntawe ufite akamaro kurusha undi. Urebye guhura n’abanyamakuru nimwe mutugeza kuri rubanda. Nk’ibingibi mvuze ntabwo nabivugira ahantu mugasalon ngo hazagire ababyumva.

Ni mwe muduhuza n’abantu bumva umuziki wacu. Kandi n’abantu bumva umuziki baba bashaka kumenya n’amakuru cyangwa utuntu dutandukanye nk’utu ngutu, ukuntu wanditse indirimbo, mbese abagaragara bose mu myidagaduro yaba itangazamakuru, yaba abatunganya indirimbo mwese mudufitiye akamaro kangana ntawe urusha undi cyangwa uri hasi y’undi.

Ariko urebye iyo ndi ino aha kenshi, akenshi iyo ngarutse maze gukorana n’umu producer umwe urebye ni Clement (KINA MUSIC).

KT: Clement ni inshuti yawe kuva cyera?

Daddy: Yego ni mugenzi wanjye. Mbese urebye iyo ngiye gukora indirimbo akenshi ni Clement tuyikorana ariko bitavuze ko mba ntemereye abandi bakora indirimbo ni uko tuba tutabonye uwundi mwanya wo gukorana.

KT: Uba ufite igihe gito iyo uri ino mu Rwanda?

Daddy: Akenshi nkunze kuza nk’ukwezi kumwe, amezi abiri, ariko urumva ko mba nje kureba umuryango n’inshuti, kandi mfite umuryango munini ahangaha, mfite n’inshuti nyinshi ahangaha.

Urebye kuri njye ibyo biba bimfitiye akamaro cyane kuko mba maze nk’imyaka itatu! Ubungubu ntabonye umuryango wanjye, ntabonye abagenzi mbese nabyo biba bimfitiye akamaro cyane kuburyo nabyo mbiha umwanya.

Mfata umwanya wo gukora ibiganiro n’abanyamakuru, mfata umwanya wo kuganira n’abandi bahanzi ariko njyewe ikiba kimfitiye akamaro cyane ni ukubona abantu nkumbuye kandi nshobora kutazabona nyuma y’indi myaka mikeya.

KT: Daddy umuntu ukumva bwa mbere cyangwa wifuza kukumenyaho utuntu twinshi ariko ari ubwa mbere ni iki yakumenyaho ushobora kubwira umuntu?

Ngo ni umuntu utuje nubwo agaragara nk’ugira amahane

Daddy: Ahhh! Iki kibazo kirakomeye sana! (Aseka cyane) Ntabwo mbizi hashobora kuba hari byinshi. Ndi umuntu utuje bya hatari, akenshi apparence yanjye (uko ngaragara) ishobora kwerekana ko ndi umuntu wenda utitonze ariko ubusanzwe ndi umuntu utuje.

KT: Ni ukuvuga ngo uko ugaragara bishobora kubeshya?

Daddy: Hari nk’abantu bagira ngo wenda ngira amahane, kubera ko mfite dreads, ndi umu type muremure bya hatari, ariko iyo tuvuganye usanga ntujeho gatoya.

KT: Wowe uko wiyumva wumva ufite gaciro ki muri sosiyete y’abantu basanzwe?

Daddy: Abantu? Cyangwa abanyarwanda?

KT: Abanyarwanda.

Daddy: Ok! Agaciro mfite mu Banyarwanda ni uko ndi umuhanzi, abahanzi turi entertainers (dushimisha abantu). N’abahanzi akazi kacu ni ugufasha abantu kwisanzura.

Niko kamaro njye numva mfite muri sosiyete y’abanyarwanda ni urugero, ndi umuntu ushimisha abantu, ndi umuntu uvuga akariho wenda katavugwa n’abandi, nkakavuga mu kuntu kuri artistique (kwa gihanzi), bigatuma wenda umuntu atega amatwi atari ugutega amatwi umuntu avuze ijambo gusa; urumva niko kamaro atari njyenyine, niko kamaro abahanzi dufite muri sosiyete.

KT: Niyo mahitamo yawe? Cyangwa byaje gutyo?

Daddy: Umuziki?

KT: Kuba Entertainer.

Daddy: Nari entertainer kuva ndi umwana. Nari wa mwana washoboraga kwicara mu cyumba n’abantu atari ukuririmba gusa, nkatera story (udukuru)!

Afite abana babiri ari nta bana n’uwo bababyaranye

KT: Mu buzima busanzwe urubatse? Status (Irangamimerere) yawe iteye ite?

Daddy: Ntabwo nashatse. Ndi celibataire (Ingaragu).

KT: Nta mwana?

Daddy: Mfite babiri.

KT: Umuntu ashobora kwibaza, abana ubafite, abamama babo barihe?

Daddy: Mama wabo arahari ariko ntabwo tubana.

KT: Ni amahitamo yawe nabyo?

Daddy: Ni amahitamo yacu.

KT: Hanyuma utekereza iki ku kuba ufite abana, warahisemo kuba utari kumwe na mama wabo?

Daddy: Ntabwo turi aba mbere, ntabwo turi n’abanyuma, kandi abana nta kintu bibatwaye, nta kintu bibatwaye baratubona twembi hamwe, turi abagenzi twese. Nta kintu bidutwaye nabo nta kintu bibatwaye kabisa.

Daddy Cassanova abona umuziki wo mu Rwanda warateye intambwe ariko ngo uracyafite urugendo

KT: Ndashaka kukubaza utubazo twanyuma ku ndirimbo Akanyoni. Amagambo arimo ni Ikinyarwanda ijana ku ijana ariko biragoye kuyumva. Biragoye cyane. Amagambo, iyo nibera akanyoni, nkajya nguruka, nkaba mu giti, ute?

Daddy: Mu buhanzi hari ukuntu tuvuga, sinzi ukuntu babyita mu Kinyarwanda ariko hari ukuntu uvuga ikintu gifite ibisobanuro byinshi cyane.Njyewe akanyoni navugaga, gashushanya ubwigenge. Kuko niba hari akantu kagira ubwigenge ni inyoni.

Iyo igurutse mu kirere ishobora kujya muri aho ishatse. Mu kanyoni navugaga, ni akanyoni kagomba gutekereza no guha umwanya ubwigenge bwose gafite.

Niba uri nk’umuhanzi ugomba kureba ku bwigenge bwose ufite ubw’ibintu byinshi ushobora kwandika yewe n’urwo rukundo ukarwandika mu kuntu kwinshi kwa gihanzi. Ntitugume mu bintu bimwe gusa! Akanyoni gafite ubusobanuro bwinshi cyane.

KT: Usa n’uhwituye abahanzi bo mu Rwanda ko baririmba ibintu bimwe?

Daddy: Si ukwibanda ku bahanzi gusa, ni ukwibanda kuri byinshi, ni ukwibanda ku bwigenge mbese. Ikintu cyampaye igitekerezo ni uko nibazaga indirimbo nzaririmba nyuma y’ishiraniro, ntabwo nashakaga kuririmba indirimbo y’urukundo.
Kuko numvaga hari nyinshi ziri kuri radiyo.

Zimwe na zimwe ukumva hari n’amagambo agenda agaruka. Birarambirana rimwe na rimwe. Ukumva iyo wumvise nka radiyo umunsi wose ushobora kumva indirimbo z’urukundo gusa.

Aharanira guhimba indirimbo zisiga ubutumwa

Nashakaga kugira ngo ntagwa muri ako gatego nanjye, urumva nashakaga kugira ngo ndirimbe akantu gatandukanye ariko nanone gafite isomo. Indirimbo zanjye nyinshi zigira isomo. Nkunda indirimbo itagendeye ubusa gusa. Nkunda indirimbo ifitemo isomo ho gatoya.

Wumvise indirimbo zanjye nyinshi harimo akantu k’isomo. N’igituma nahisemo Ishiraniro ni isomo ririmo nayo. Ubutumwa nashakaga guhereza abandi bahanzi, reka tugerageze kwigenga, tuguruke, dukore ubushakashatsi bwimbitse.

Ibyo guhangaho biri hanze aha ni byinshi cyane. Tubikoreshe, tugire umuziki wacu mwiza cyane.

KT: Ubundi nanone nasomye inkuru ejo bundi bavuga yuko ngo ibyo waririmbye mu ishiraniro ari ubuzima wabonye ugeze muri Canada. Yego?

Daddy: Oya. Nk’uko navuze, ishiraniro ni indirimbo ntanditse. Ni indirimbo yanditswe na Fashaho Phocas. Nayiririmbye kubera ko ari indirimbo Abanyarwanda benshi bari bakunze nanjye nari nkunze. Nta kindi cyari kiri inyuma kweli.

KT: Daddy ndagushimiye cyane.

Daddy: Yego! Murakoze cyane.

Reba indirimbo ye yitwa Akanyoni

Iyi ndirimbo ya Cassanova yitwa "Ohhh!" iri muri zimwe ze zamenyekanye, agikorera umuziki mu Rwanda.

Umuririmbyi Christopher yifuzaga ko abagize akanama nkemurampaka muri PGGSS bahindurwa ariko ntiyabyemererwa

Umuririmbyi Christopher ari mu bahanzi 10 bahatanira igihembo cya Primus Guma Guma Super Star (PGGSS) 2017.

Amakuru agera kuri Kigali Today ahamya ko uyu muhanzi mbere yo gusinya amasezerano n’abategura iryo rushanwa, yasabye ko abagize akanama nkemurampaka b’iryo rushanwa bahindurwa bose kuko ngo byazana impinduka muri iryo rushanwa.

Akanama nkemurampaka ka PGGSS kagizwe na Tonzi, Aimable Twahirwa na Lion Imanzi.

Mushyoma Joseph uzwi nka Boubou, umuyobozi wa EAP itegura PGGSS yatangarije Kigali Today ko uko abaririmbyi bose bifuza ko abapemurampaka bahindurwa, bitashoboka.

Agira ati “Nta muhanzi n’umwe ufite uburenganzira bwo kutubwira umukemurampaka dukuramo n’uwo tudakuramo kuko ni irushanwa. Ntabwo buri muhanzi yajya avuga ngo nimushyiremo uyu nimukuremo uyu.

Ntabwo byakunda uretse ko twanamusubije yuko atakwiriye kugira impungenge izo arizo zose kuko bagumye ari bariya. Abahinduka abo aribo bose ntabwo yagombye kugira impungenge izo arizo zose. Niko twamusubije.”

Akomeza avuga ko, usibye umuririmbyi Christopher, nta wundi muhanzi wigeze agira ikindi kintu asaba ko cyahindurwa muri PGGSS.

Abahanzi bari mu irushanwa rya PGGSS bose uko ari icumi, ngo bazatangira guhembwa guhera muri uku kwezi kwa Werurwe 2017.

Boubou avuga ko kuba barahisemo ko ibitaramo byose bizaba mu buryo bw’inyumvankubone (live) ari icyifuzo bifuje kuva na cyera, kandi ngo bizakorwa no mu yandi marushanwa azakurikizaho.

Depite Bamporiki yemereye amafaranga Rwanda Movie Awards ahabwa abandi

Mu birori bya Rwanda Movie Awards byo muri 2014 nibwo Depite Bamporiki yemeye ko umukinnyi mwiza wa filime w’umugabo n’uw’umugore azajya abagenera Amadorali y’Amerika 1000 (abarirwa mu bihumbi 800RWf) buri umwe.

Yagombaga kuyatanga muri Rwanda Movie Awards yo muri 2015. Icyo gihe cyarageze arayatanga ariko abo yagombaga guhabwa ntiyabageraho.

Jackson Mucyo, umuyobozi wa Rwanda Movie Awards avuga ko ayo mafaranga bari baremerewe ntayo yabonye.

Agira ati “Depite Edouard yatwemereye nyine amafaranga muri iyo Movie Awards, nyuma ntabwo twayabonye.

Kuva igihe yayemereye kugeza na n’ubu njye ntabwo nigeze nyabona kandi ninjye muyobozi wa Rwanda Movie Awards, abakinnyi bagombaga kuyabona ntayo babonye sinzi ko yari kubageraho bitanyuzeho cyangwa ntabizi.”

Akomeza avuga ko ayo mafaranga yaba yaragiye mu bandi bantu bategura ibihembo byo guha abakinnyi ba filime bo mu Rwanda bitwaye neza.

Jackson Mucyo avuga ko ayo mafaranga bari baremerewe ntayo yabonye.

Depite Bamporiki avuga uko yatanze amafaranga

Depite Bamporiki avuga ko muri 2015 ubwo yagomba gutanga ayo mafaranga muri Rwanda Movie Awards, yahise ahabwa inshingano zo kujya mu butumwa mu mahanga.

Icyo gihe yahise yitabaza uwitwa John Kwezi, amuha ayo mafaranga ngo ayamushyikirize abateguye ibirori byo guhemba abitwaye neza mu gukina filime.

Depite Bamporiki ariko avuga ko uwo yatumye yashyikirije ayo mafaranga abo atari agenewe. Yayahaye abitwa ‘A Thousand Hills Academy Awards’ nabo bategura ibihembo bihabwa abakinnyi ba filime bo mu Rwanda bitwaye neza.

Ahamya ko ibyo nta kibazo byari gutera iyo ayo mafaranga angokreshwa neza uko byari byagenwe, agahabwa umukinnyi wa filime w’umugore n’uw’umugabo bitwaye neza kurusha abandi.

Ariko ngo siko byagende kuko abo yahawe bayagabanyije abantu bagera kuri 30.

Agira ati “ Noneho mbyumvise ndavuga nti ‘ibi ntawigeze abintegeka, cyari igitekerezo cyanjye, kugira ngo mu gihe ntari nasubirayo, ntazasubirayo baranyibagiwe.

Ufashe Festival, umuntu wa mbere bahaye amashyi menshi tukamuha amadolari y’Amerika 1000, uba uhaye agaciro festival kurusha kujya gukuraho lisansi n’ubundi itazakugeza ejo.”

Ibi bigaragaza ko we yari aziko ubutumwa yatanze bwageze kubo yabugeneye ariko ntibukoreshwe uko byagombaga.

John Kwezi ahamya ko abo yahaye amafaranga aribo yari azi

Kwezi yemera ko koko Depite Bamporiki yamuhaye amafaranga ngo ayashyikirize abategura ibihembo bihabwa abakinnyi ba filime mu Rwanda.

Agira ati “Umunsi yari afite akazi hanze y’igihugu byabaye ngombwa ko antuma kugira ngo mutumikire.

Abo nzi rero ni ‘A Thousand Hills Academy Awards’. Ubwo aho yemereye ayo mafaranga njye ntabwo nahakurikiranye. Nyashyikiriza rero abari bahagarariye iyo ‘Awards’ kugira ngo bayahe abo bagomba kuyaha."

John Kwezi we yemeza ko abo yashyikirije ayo mafaranga aribo yari azi

Ubuyobozi bwa ‘A Thousand Hills’ ari nayo yahawe ayo mafaranga bwemera ko yagombaga guhabwa umukinnyi umwe ari ngo bayasaranganyije benshi kuko ngo basanze batahemba umuntu umwe ngo abandi bagendere aho.

Senderi avuga ko abantu bamubeshyera bamusebya agiye kubahagurukira

Uyu muririmbyi uzwi mu ndirimbo zitandukanye no gukora udushya ahamya ku myaka ye 40 amaze ku isi yahuye na byinshi birimo guharanira kwandika izina. Abashaka kurisenya ngo ntazabihanganira.

Nubwo ariko mu gihe gitambutse yumvikanaga cyane mu bitangazamakuru, muri iki gihe bisa nkaho acecetse.

Gentil Gedeon Ntirenganya, umunyamakuru wa KT Radio, Radio ya Kigali Today, yagiranye ikiganiro nawe, amutangariza ibyo ahugiyemo n’ibindi byinshi byerekeye ubuzima bwe.

Avuga ko kuba adashaka umugore muri iki gihe ari muganga wabimutegetse. Ndetse ngo kuba acecetse atakirangwa n’udushya ngo ni Imana yabimubwiye.

Avuga kandi ko umuziki we uri ku rwego rw’abahanzi batwaye Primus Guma Guma Super Star n’ubwo we atari yayitwara.

Senderi yakunze kurangwa n’udushya (Photo Internet)

Ikiganiro kirambuye:

Kigali Today (KT): Senderi uraho?

Senderi: Yego ndaho!

KT: Uritonze cyane, hari ikibazo ufite!

Senderi: Muri iyi minsi niko nabaye, Imana yarambwiye ngo njye ncisha make nivugire gakeya.

KT: Uhugiye mu biki muri iyi minsi?

Senderi: Ndi kwandika indirimbo zivuga ku Kwibuka ku nshuro ya 23, ndi gutegura indirimbo ivuga ku butwari bwa Perezida wa Repubulika, muri iyi minsi narindi gutegura amashusho y’indirimbo ya Convention Center. Ni ibyo nibereyemo.

KT: Igihe umaze ku isi ni iki kintu cyagutangaje, ni irihe somo rikomeye ku myaka ufite wize?

Senderi: Mfite isomo ry’isi, isi yaranyigishije, abantu baranyigishije, mfite ubunararibonye ku isi kuko nayizengurutse ngenda ndeba imico y’abantu itandukanye ndumva mu by’ukuri mfite ubunararibonye buhagije kuri iyi si.

KT: Urumva ugiye gukabakaba imyaka 40, umuntu atekereza ko umuntu aba ari mukuru bihagije. Niko nawe ubyumva?

Senderi: Ok! Uba ukuze ariko uhita utekereza ko hari abafite za 80, uhita utekereza ko hari abafite 90, abafite 50. Ahubwo mba nibaza ngo nzageza 50 ryari, 60 ryari! Iyo ndebye imyaka ishize se insigiye iki! Yansigiye iki! Ni ibyo ntekereza ariko bikampa ingufu zo gukora cyane.

KT: Wifuza ko indi myaka 40 iri imbere waba umeze gute?

Senderi: Nifuza mu by’ukuri ko naba mfite ibyo nakoze bituma bimfasha mu mibereho naba ndiho. Ni ukuvuga ngo ese ibyo nakoze cyangwa se ibikorwa mfite biranyemerera kuba ntasaba umuntu ngo ngurira icyayi!

Ese n’umwana wanjye yagombye kuba yarize afite ibintu bifatika! Ese igihugu cyanjye hari icyo nakimariye muri ya myaka kuburyo cyaba kimeze neza kiri ahantu hatekanye! Ntekereza ko haba ari heza; nibyo bintu mba ntekereza.

Senderi avuga ko kuba afite imyaka 40 y’amavuko atarashaka umugore nta kibazo bimuteye ariko ngo hari n’ibyo yategetswe na muganga (Photo Internet)

KT: Ku myaka ufite hari abantu benshi mwavukiye rimwe ubungubu bafite ingo, bashatse bafite abana, hari abahisemo kudashaka, hari abahisemo kwiyegurira Imana bitewe n’uguhitamo kwa muntu.

Kugeza ubu, Senderi abantu benshi bazi ko nta mugore ufite, amahitamo nk’ayo yaje gute?

Senderi: Ntawanga aheza, uretse ko ahabura. Nta n’ubwo mu by’ukuri iyo uhisemo inzira imwe! Ntabwo nakubwira ngo narahabuze kuko aho ndi niheza cyane kuko ndahishimira.

KT: Wishimira kuba udafite umugore?

Senderi: Ntacyo bintwaye! Ariko kuba ntafite umugore ntabwo bimbuza kubakunda. Ndabakunda cyane abagore kandi nta muntu udakunda abagore kuko abagore ni abantu beza kandi mu by’ukuri bafite ijambo, bafite icyerekezo cyiza.

Ni uko gusa ntarahitamo ngo mfate umwanzuro, hari ibyo nabanje gutegura kugira ngo nkomeze gushaka umugore cyangwa gushaka abo bagore.

KT: Uri kubivuga nkaho uzashaka benshi, uti gushaka abo bagore.

Senderi: Urumva umushaka muri benshi uba waratoranyije. Ujya kubona nk’amadini amwe afite abagore benshi! Kuba mfite abana hanze burya naryo ni idini.

KT: Ufite abana bangahe?

Senderi: Abana ni babiri.

KT: Abagore mwababyaranye ubafata ute? Ubu ni abantu ki kuri wowe?

Senderi: Barashatse kandi ndabubaha. Ntabwo nkunda kubonana nabo. Ibindi byo nzaza mbibaganirize birambuye ni uburyo bwiza bwo kuganira n’abafana banjye.

Ariko nzi neza ko bitewe nuko muganga yambwiye n’icyo yantegetse ubu ntegereje igisubizo cya muganga.

KT: Cyo kudashaka?

Senderi: Yego

KT: Wowe ubifata ute? Ibi bintu ni ukuri? Hari uburwayi ufite butuma udashaka umugore?

Senderi: Yego ariko iri hafi gukira kuko ndi ku miti.

Senderi yakunze kurangwa n’udushya mu bitaramo bya Guma Guma (Internet Photo)

KT: Hari ibyo wajyaga uvuga muri Guma Guma ko umunsi wayitwaye uzashaka umugore. Abenshi bumvaga ari ugutebya. Wari ukomeje buriya?

Senderi: Yego nari nkomeje. Kuko ntabwo nazana umugore nzi ngo araburara kuko njye ntunzwe no kuririmba. Aho kugira ngo nzane umuntu w’abandi aburare ariko iyo uri muri Guma Guma uba ufite amafaranga.

Ari wowe wayitwaye uba ufite amafaranga. Ni uburyo numvaga ndamutse nyitwaye nakora ubukwe ngakwa n’ibindi byose.

KT: Ubukene nibwo butumye ugeza imyaka 40 uri ingaragu?

Senderi: Ntabwo ndi ingaragu kuko mfite abana.

KT: Urukundo rwigeze kuvugwa hagati yawe na Gaby Kamanzi umuhanzikazi ukora indirimbo zihimbaza Imana. Byagenze bite?

Senderi: Mu by’ukuri ni babandi bagenda basebya izina ryanjye cyangwa bagasebya irya Gaby, bitwaje ibyo bamwe bandika! Ndanabazi abagenda babyandika kugira ngo bareme icyo kintu kibe ahongaho.

Akenshi usanga umubyeyi witwa Mpyisi na Nyakubahwa Robert Mugabe nanjye Senderi usanga mu by’ukuri twaragowe. Abantu baricara bamara guhaga bakavuga ngo Senderi yavuze ibi n’ibi, Mugabe yavuze ibi n’ibi, Senderi yandikiye Trump, Mpyisi yavuze ibi n’ibi.

Mu by’ukuri abantu baba babeshya. Baricara bagahaga bakanyandikaho ibyo bishakiye. Ntabwo mfite umwanya wo kubataho n’ubwo baba bansebya.

KT: Ni ukuvuga ngo ntabwo wigeze ugirira urukundo Gaby?

Senderi: Rwose Gaby ni umuntu nkunda indirimbo ze! Nk’indirimbo ye “Amahoro” iyo mbyutse ndayumva. Narayumvise mbyandika kuri “Instagram” ngo nkunda indirimbo yawe.

Nagiye kubona mbona abantu banditseho ibintu byinshi bitarabaho bavuga ko ngo mukunda, dukundanye kandi mu by’ukuri ntaho ndahurira na Gaby.

Kuba nkunda indirimbo ze ntabwo bivuze kumukunda. Gaby ni umuntu nubaha ni umuntu nemera, ashobora no kuba anifitiye inshuti ugasanga bamuteranyije n’inshuti ze.

Abandika ibyo ni haduyi ndazimenyereye, ni abantu bagenda bansebya ibyo bashaka hasi bakandika ngo ni Mpyisi, hasi bakandikaho ngo ni Senderi. Ibyo bintu rero sinzi uburyo inzego z’umutekano zizabikemura.

KT: Turiya tuntu ariko turuhura n’abantu ku ruhande?

Senderi: Ok! Ndiho kugira ngo ndirimbire abantu baruhuke. Ariko nanone nanariho kugira ngo abantu mbaruhure ntasebejwe. Sinzi umuntu uzifata akansebya akamvugaho ibintu ntavuze, bipfuye kugira ngo arye kandi mu by’ukuri ntabyo nanditse!

Nicyo kibazo nshaka kubaza “avocat” wanjye menye icyaha gihana abo bantu. Radio zirahari zimfite amajwi yabo, bakajya mu makomedi yabo bakansebya, akandika iyo nyandiko akayipfunyika akavuga ko arinjye!

Senderi ahamya ko abandika ibyo atavuze ari abanzi be baba bashaka kumusebya (Photo Internet)

KT: Uvuze ibyo bya Trump mpita nibuka ko mu minsi ishize mu gitaramo cya Atome uzwi nka Gasumuni imbere y’imbaga irimo n’abantu banakomeye mu Rwanda arimo asetsa yasomye ibaruwa wandikiye Trump.

Senderi: Narabibonye. Ubundi Gasumuni ni umuntu nubaha nanemera kimwe n’abandi. Ariko muri uko gutebya cyangwa gusetsa bagiye bagenekereza ntibasebye umuntu uburyo bishakiye kugira ngo uburyo bwabo bwo gukorera amafaranga butungane. Ariko hari uburyo bwo gutebya udasebeje umuntu.

Ni akantu banditse mu gitondo cyuko Trump atorwa. Nanjye kansanze kuri WhatsApp. Nka bariya bakora biriya bintu icya mbere bagombye kubaha umuntu. Ntabwo ari byiza kuvogera ubusugire bwanjye, ubusugire bw’ibimbeshejeho kuburyo bankasa bigeze hariya.

KT: Ubwo uravuga iki kuri Atome mbese ubundi?

Senderi: Atome icyo namubwira, ndamushaka kwanza tukabanza tugahura tukaganira nkamubaza impamvu, ntabwo mubuza kumvuga ariko namvuge mu buryo butansenye.

KT: Hari n’abavuga ngo wiyise Miss Igisabo, ngo amazina yawe wongeraho Trump, abandi ngo wongeyeho Magufuri, warabyumvise byinshi.

Senderi: Ndabyumva nkanabibona, n’umwanya wo kubisubiza ubundi mba mbihaye agaciro ndabyihorera. Iyo ugiye kureba usanga abantu batukwa cyane mu isi ni abantu baba bazwi. Noneho nta mwanya babona wo gusubiza ibyongibyo.

Icyo nabwira abantu gusa bakora ibyo banabyandika ndabasaba kudakomeza kumvuga bansebya ibyo ntavuze. Byibura barebe mubyo navuze bahimbe bongera kubyo navuze mu by’ukuri.

Nubatse izina ryanjye ringoye bimpangayikishije, uburyo nirirwa ndwana n’itangazamakuru ntirinyoroheye, uburyo nirirwa ndwana n’abafana banjye ngo mbahe ibishya ntibinyoroheye!

Ugasanga n’undi araje atangiye gusenya ibikorwa byanjye n’izina ryanjye nubatse mu myaka yaje anasanga aho. Hari igihe ntazabamerera neza kandi uzabibona vuba.

KT: Urakoze cyane Senderi.

Senderi: Murakoze namwe.

Miss Huye Campus, Umutoni Annet (wicaye) akikijwe n’ibisonga bye. Bamwe mu bahawe akazi mu gikorwa cyo gutora uyu Nyampinga bahamya ko batarahembwa

Nyampinga wa Kaminuza y’u Rwanda ishami rya Huye (Miss Huye Campus) yatowe tariki 18 Gashyantare 2017, nyuma y’imyaka itatu icyo gikorwa cyitarongera kuba muri iyo kaminuza.

Abantu batandukanye bahawe akazi muri icyo gikorwa, bavuga ko bari bijejwe ko nikirangira bazahita bahembwa,nyamara ngo kugeza ubu barategereje baraheba.

Danton Gasigwa, umunyeshuri muri iyo Kaminuza yatangarije ikiganiro KT Idols gihita kuri KT Radio ko yahawe akazi ko kwamamaza icyo gukorwa anaba umushyushyarugamba ariko ngo ntabwo arahembwa.

Agira ati “Guhembwa byo byagombaga kubaho kuko barambwiraga ngo rwose nk’umuntu wacu igikorwa nikirangira, hazaba harimo n’amafaranga, abantu bazishyura, hazabamo n’abaterankunga humura tuzaguhemba.

Urumva nk’abanyeshuri bagenzi banjye nk’abantu twiga muri kaminuza imwe nagombaga kubaha icyo cyizere.”

Akomeza avuga ko akurikije ibyo yakoze yagombaga guhembwa ibihumbi 100RWf.

Uwitwa Alphonse Mpendwanzi, wakoze akazi k’isakazamajwi mu gikorwa cya Miss Huye Campus 2017 (Sound System) nawe avuga ko yagiranye amasezerano n’abateguye icyo gikorwa. Nubwo adatangaza ibijyanye n’ayo masezerano nawe avuga ko atarahembwa.

Yves Rugira usanzwe ari umunyamakuru, avuga ko yari mu kanama nkemurampaka ariko nawe ngo ntarishyurwa.

Agira ati “Nta kintu barampa ariko uwari wampaye akazi yamaze kumpamagara arambwira ngo nimwihanganire tuzavugana muri iki cyumweru (cyatangiye ku wa mbere tariki ya 06 Werurwe 2017).

Jye nabikoze mu rwego rwo kubafasha kuko nari ngiye kwitarira amakuru nyine nsanga abakemurampaka batinze bahita bambwira ngo nze mbafashe, hanyuma rero ambwira ko tuzavugana akampemba.”

Miss Huye Campus n’ibyegera bye bakikijwe na bamwe mu bakemurampaka

Si abo gusa kuko n’uwitwa Mufora Ezéchiel watozaga abakobwa bahataniraga Miss Campus Huye gutambuka, avuga atarishyurwa kandi bari bamwemereye kumuhemba ibihumbi 100RWf.

Miss Huye Campus nawe ntiyahawe ibihembo byose

Ikindi ngo ni uko n’ibihembo byari bigenewe uwambitswe ikampa rya Miss Campus Huye, hari ibyo atabonye.

Gusa ariko uwambitswe iryo kamba ariwe Miss Umutoni Annet yemeza ko byose yabibonye uretse ibihumbi 500RWf yagombaga guhabwa.

Ahamya ko yagombaga guhabwa sheki isinyeho, iriho ayo mafaranga ariko ngo uwagombaga kuyisinyaho ntiyari ari mu Rwanda, bituma atayihabwa.

Agira ati “Ibihembo byanjye barabimpaye usibye wenda ariya mafaranga ibihumbi 500RWf. Ndayategereje ubwo naza nzayabona.”

Akomeza avuga ko ibindi bihembo birimo telefoni, ibikoresho by’ubwiza no kujyanwa muri Salon gutunganya umusatsi, yabibonye.

Abateguye Miss Huye Campus babivugaho iki?

Hodali Bizimungu, umwe mubateguye icyo gikorwa, yemeza ko abantu bose bakoreshejwe bagombaga kwishyurwa, bishyuwe.

Agira ati “Nibwo nabyumva, gusa nta muntu nzi twavuganye ko tugomba kumwishyura tutishyuye, ntawe nzi.

Twakoze iki gikorwa mu byiciro bibiri. Guhitamo abajya mu kiciro cya nyuma, n’umunsi nyirizina twatoye Nyampinga. Mu kiciro cya mbere twakoresheje umunyeshuri ntabwo twigeze tugirana amasezerano yo kubaha amafaranga runaka.”

Akomeza avuga ko umushyushyarugamba n’uwari ushinzwe isakazamajwi bose bishyuwe. Ikindi ngo n’abatoje abakobwa ntibagombaga guhembwa kuko ngo bo ubwabo bari bazi ko ari abakorerabushake.

Bamwe mu bitabiriye itorwa rya Miss Huye Campus banenze abakemurampaka b’icyo gikorwa

Abakemurampaka nabo bifashishijwe mu gutora Miss Campus Huye ngo bamaze kubahemba. Undi mukemurampaka uvuga ko atarahembwa ngo ntawe azi.

Agira ati “Kubijyanye n’abakemurampaka twarabashakishije ku materefoni tuvugana amafaranga turayemeranya, twabahaye avance, bamaze gukora akazi tubaha ayari asigaye. Uwo mukemurampaka uvuga ko tutamuhembye ntabwo nzi uwo ariwe kuko bose barishyuwe.”

Akomeza avuga ko n’amafaranga yagombaga guhabwa uwambitswe ikamba rya Miss Huye Campus, yahawe igice cyayo.

Agira ati “Amafaranga Miss yemerewe ibihumbi 500RWf yagombaga guhabwa ako kanya, tubivunjamo akazi. Yahawe na avance ayandi azayabona muri ako kazi.”

Abakemurampaka banenzwe imikorere

Bamwe mu bakurikiranye itorwa rya Miss Huye Campus bahamya ko abakemurampaka bahawemo akazi nta burambe bari bafite mu bijyanye no gutora ba Nyampinga.

Umwe mu bakobwa bahataniraga iryo kampa uzwi nka Miss Gisele, avuga ko nawe yanenze abakemurampaka.

Agira ati “Tuzi yuko akenshi abantu bakora muri biriya bintu by’abakemurampaka ari abantu baba babifitemo ubunararibonye.

Niyo yaba ari Nyampinga baba bazanye ubona ko ari Nyampinga ubimazemo igihe. Bariya bazanye nabo baratsinze barashoboye ariko ntabwo bari bakwiriye kuba abakemurampaka kuko nta n’igihe bari bamara batorewe kuba banyampinga."

Hodali Bizimungu avuga ko abasebya igikorwa cyo gutora Miss Huye Campus ari ba nta munoza.

Agira ati “Comments (ibyo abantu bavuga) ntabwo zabura, twabajije abantu benshi uko byagiye bigenda batubwira ko byagenze neza. Ni n’igikorwa kimaze igihe kitaba, hari byinshi bitaratungana, nta byera ngo de.”