Imyambarire y’abakora mu buvuzi batwaye uwishwe na Ebola

Iyi raporo niyo ruzashingiraho mu gufata umwanzuro wo guhagarika urujya n’uruza hagati y’u Rwanda na DRC nyuma y’iminsi mike havuzwe Ebola.

Birakekwa ko icyorezo cya Eboka cyaba cyaratangiye muri DRC ku wa 22 Mata 2017 muri zone z’ubuzima za Likati mu Ntara ya Bas Uele, agace k’icyaro mu Majyaruguru y’icyo gihugu ku mbibi n’igihugu cya Centrafrique.

Abantu icyenda bagaragaje ibimenyetso byo kuvirirana, bigaragaza virusi ya Ebola ndetse WHO mu cyumweru gishize yatangaje ko batatu muri bo bamaze kwitaba Imana.

Malick Kayumba, Umuyobozi w’Ishami ry’Itumanaho mu by’Ubuzima mu Kigo cy’Igihugu cy’Ubuzima (RBC), aganira na Kigali Today ku wa 25 Mata 2017, yavuze ko bategereje raporo nshya ya WHO.

yagize ati “Si ngombwa guhagarika urujya n’uruza ubu, ariko dutegereje amakuru mashya y’impuguke za WHO.”

Yakomeje agira ati “Nitumara gusoma raporo tugasanga ari ngombwa ko duhagarika ingendo tuzasohora impapuro zibahagarika ariko ntitwabikora mbere y’uko tubona iyo raporo.”

Kuva Ebola yahitana abantu babarirwa mu bihumbi 11 mu bihugu byo mu Burengerazuba bw’Afurika mu myaka ibiri ishize, ubu ni bwo bwa mbere yongeye kumvikana.

Kugeza ubu nta murwayi n’umwe wa Ebola urumvikana mu Rwanda, ndetse WHO ivuga ko yanyuzwe n’ingamba rwashyizeho zo kuyikumira ngo itinjira mu gihugu.

Imwe muri izo ngamba, ni uko kugira ngo umuntu yinjire mu Rwanda yari yarakandagiye muri Guinea, Liberia, Nigeria, na Sierra Leone, iminsi 22 mbere y’uko aza, yagombaga gukurikiranwa no kwitabwaho umunsi ku munsi mu gihe cy’iminsi 21.

Hari kandi itsinda ry’abaganga n’abaforomo ryari ryahuguwe ku cyorezo cya Eboka ryari ryashyizwe ku Kibuga cy’Indege i Kanombe, ndetse abandi benshi bakwirakwizwa hirya no hino mu gihugu mu rwego rwo kuba maso ngo Ebola itabinjirana.

Hari hanateguwe n’ikigo kirimo uburiri 300 ahantu hitaruye hashobora kwifashishwa bita ku barwayi mu gihe Ebola yagera mu Rwanda ndetse hatangwa n’umurongo wa telephone utishyurwa wa 114, kugira ngo ubonye ibimenyetso byayo wese atange amakuru.

Ingabo z’u Rwanda na Polisi y’Igihugu icyo gihe bakoze umukino-shusho ngo barebe uko biteguye guhangana na Ebola mu gihe yagera mu Rwanda.

N’ubwo hari intera ndende hagati ya Kigali na Kinshasa, u Rwanda ruri maso kugira ngo rwirinde ko Ebola yagera mu gihugu, dore ko hari abarwayi bashya bagenda bagaragara muri Congo.

Yves Butera, Umuyobozi w’Itumanaho mu Kigo cy’Igihugu cy’Abinjira n’Abasohoka, we yatangarije Kigali Today ko batangiye kugirana ibiganiro na Minisiteri y’Ubuzima ku ngamba bagomba gufatira Ebola bahereye ku rujya n’uruza rw’abaturage.

Ati “Turimo gukorana na Minisiteri y’Ubuzima kuri iki kibazo ariko nyine ibiganiro biracyari hagati yacu gusa.”

Minisiteri y’Ubuzima, cyakora, ivuga ko ibyo ari byo byose igihugu kiteguye kandi imyitegura yo guhangana na Ebola imaze igihe dore ko icyo cyorezo atari icya vuba kuko kimaze imyaka itatu giteye inkeke.

Abaganga hirya no hino mu gihugu ngo banahawe amabwiriza yo kwitegura icyorezo cya Ebola.

Umwe mu bakora muri laboratwari muri bimwe mu bitaro mu Mujyi wa Kigali, utashatse ko amazina ye agaragazwa, yagize ati “Ntitwemerewe gukora ku murwayi cyangwa kumwegera kandi abarwayi ntibashobora kuryamana ku gitanda.”

Ines Muhoza agaragariza umushinga wa App ya Vuga TV Mobile abashoramari

Icyo gikorwa cyabaye kuri uyu wa 11 Gicurasi 2017,mu nama yiga ku iterambere rya Afurika binyuze mu ikoranabuhanga "Transform Afrika".

Ubwo bamwe bari bakurikiranye inama ya Transform Africa 2017 ibaye ku nshuro yayo ya 3 mu Rwanda, urubyiruko rufite imishinga mishya y’ikoranabuhanga rwari ruri mu kindi kiganiro kiswe “Face The Gorilla” cyabahuzaga n’abashoramari ngo barebe ko bayitera inkunga ikabyazwa umusaruro.

Mu mwaka wa 2015 mu kiganiro nk’icyo, abana babiri b’abavandimwe b’Abanyarwanda bagaragaje umushinga wabo w’ikoranabuhanga ryo kohereza no kwakira amafaranga (Mobile Money) nta kiguzi.

Umushinga wabo warakunzwe cyane wemererwa inkunga ya miliyoni y’Amadorari muri Silicon Valley, agace ko mu Majyaruguru ya San Fransisco muri USA kateye imbere mu ikoranabuhanga.

Mu mishinga mishya y’ikoranabuhanga yerekanywe muri uyu mwaka igashimwa, ba nyirayo bazerekeza muri Israel mu minsi iri mbere, bahabwe amahugurwa yo kunononsora iyo mishinga, kugira ngo igezwe ku isoko iteguye neza.

Muri iyo mishinga harimo itsinda “Ibaze Group” ryakoze ikoranabuhanga ryo kurwanya Nkongwa “Army Worm”, yibasiye cyane amahegitari y’ibigori muri iki gihembwe cy’ihinga aho byasabye ko RDF nayo yinjira mu rugamba rwo guhashya iyo Nkongwa.

Iryo tsinda ryaraye rihawe Amadorari y’Amerika ibihumbi 35 muri “Face the Gorillas”.

Arsene Simbi, umwe mu bakoze iyo Application, nyuma y’uko umushinga wabo uterwa inkunga, yagize ati “Kompanyi yacu yari yarashoboye gukora imodoka igenda hifashishijwe ingufu z’imirasire y’izuba mu mwanya w’ibikomoka kuri peteroli.

Iyo nkongwa ije rero, twahise dutekereza uburyo bwo gutera umuti mu myaka hifashishijwe ingufu zituruka ku mirasire y’izuba.”

Kugira ngo bashobore kubona umuti umwe, nk’uko akomeza abivuga, ngo bisaba ibihumbi 50Frw, kandi barateganya gutangirana n’abahinzi ibihumbi 8 na 277 bo mu Ntara y’Amajyaruguru.

Abo banyeshuri bakoze uwo mushinga babwiye abashoramari ko bakeneye nibura ibihumbi 50$ (ni ukuvuga miliyoni 41Frw) kugira ngo bakore imiti ibarirwa mu bihumbi umunani (8,000 units).

Ruzibiza na Simbi bari kumwe n’izindi kompanyi umunani, zose ni iz’abanyeshuri biga ibijyanye n’amashanyarazi.

Mu gihe kitarenze iminota ibiri bakurikirana uyu mushinga wo gutera imiti mu bihingwa hifashishijwe ingufu zikomoka ku mirasire y’izuba, abantu batanu bari bayoboye icyo kiganiro bahamije ko bumvisemo imishinga ikomeye yabyara ubucuruzi.

Itsinda ryiyemeje kuzarwanya nkongwa idasanzwe rikoresheje ingufu zikomoka ku mirasire y’izuba

Yariv Cohen, Umuyobozi wa Kompanyi Kaenat yo muri Israel, agira ati “Sinari nakabonye umushinga nk’uyu kandi mba mu bijyanye n’ingufu z’amashanyarazi.

Tuzabafasha mu gukwirakwiza iyo miti dushyira ingufu mu kureba uburyo bwatuma iyo serivisi ishoboka.”

Umunyemari Eugene Nyagahene, ushora imari ahanini mu ikoranabuhanga, yemeye gutanga ibihumbi 35$ muri uwo mushinga ariko agafatamo imigabane ingana na 25%, ariko nyuma y’ibiganiro byarangiye yemerewemo 20% by’imigabane.Kompanyi ya Kaenat, yo yahise ishyiramo ibihumbi 10$.

Abayoboraga ikiganiro banakurikiye umushinga wiswe VugaTV, wa kompanyi ishaka gukora ibijyanye na televiziyo.

Undi mushinga wari HelloJob, umushinga ugamije guhuza abashomeri n’abatanga akazi.

Hari kandi imishinga ibiri yombi ikora ku bijyanye n’ubuzima bw’imyororokere. Iyo mishinga “Tantine na Umbrella, abari bayoboye ikiganiro basabye ko yakwihuza kugira ngo irusheho kugira ingufu no gukurura abashoramari dore ko Tantine yonyine yavugaga ko ikeneye Amadorari ibihumbi 25.

Ines Umuhoza, umwe mu bakoze App ya VugaTV, na we yatezwe amatwi cyane n’abashoramari birangira bemeye gushoramo ibihumbi 100$ mu gihe uwo mushinga wanozwa neza kandi ukagaragaza uko uzacuruza.

Abadipolomate bo muri Ambasade ya Israel mu Rwanda bemereye umuntu umwe muri buri mushinga kuzajya gukurikira amahugurwa muri Israel yo kureba uko bateza imbere imishinga yabo bakayibyaza ubucuruzi.

Abaturage bo mu Karere ka Kayonza bifuza kubaza ibibazo Perezida Kagame ubwo aheruka kubasura mu mwaka ushize

Mu biganiro Perezida Kagame yagiye agirana n’abaturage muri 2016 mu ntara zose no mu Mujyi wa Kigali, bamugejejeho ibibazo byinshi ariko ahanini bishamikiye ku kuba abahabwa akazi badahemberwa igihe ndetse no gukoresha nabi amafaranga aba yagenewe gukura abaturage mu bukene.

Kuri ibyo hiyongeraho kandi ikibazo cyo kudahabwa ingurane ku bimurwa ahaba hagomba kubakwa ibikorwa by’inyungu rusange, ndetse no kuba abahesha b’inkiko bagenda biguru ntege mu kurangiza imanza.

Ibi byose bakavuga ko bituruka ku kutita ku nshingano, ruswa n’imikoranire itari myiza hagati y’inzego z’ubuyobozi.

Muri izo ngendo, Perezida Kagame yababajwe cyane n’abayobozi batatira inshingano zabo bikavangira imiyoborere myiza, gahunda zo gukura abaturage mu bukene, bakananadindiza ishyirwa mu bikorwa rya politiki za guverinoma.

Yagize ati “Kuki murindira ko nzaza ngo abe ari njye ukemura ibi bibazo!”

Byatumye Minisiteri y’Ubutegetsi bw’Igihugu (Minaloc) itangiza gahunda yo kwakira no gukemura ibibazo by’abaturage ibasanze iwabo mu turere, no kugenzura imikorere y’abayobozi mu nzego z’ibanze.

Ba guverineri b’intara zose n’Umujyi wa Kigali na bo bahise batangira ubu buryo, bamanuka mu baturage kumva ibibazo byabo no kubikemura, bituma umubare munini mu bayobozi b’inzego z’ibanze uryozwa ayo makosa.

Guverineri w’Intara y’Amajyepfo Rose Mureshyankwano mu baturage akemura ibibazo byabo

Mu bucukumbuzi bwa Kigali Today, yasanze iyi nkundura yatangiye umwaka ushize wa 2016 imaze gutuma abayobozi mu nzego z’ibanze 561 begura. Cyakora, bamwe muri bo babikoze nyuma yo kugirwa inama n’inzego zabakoreye isuzuma.

Abeguye bari mu byiciro bitandukanye birimo abanyamabanga nshingwabikorwa b’imirenge n’ab’utugari, abakozi bashinzwe amakoperative, abashinzwe ubuhinzi (agronomists), abashinzwe imibereho myiza y’abaturage ndetse n’abashinzwe irangamimerere.

Cyakora inkundura yibasiye ahanini abakozi bo mu tugari, hagakurakiraho abo mu mirenge n’ubwo hari na bamwe mu bayobozi b’uturere yatwaye.

Urebye yatangiye muri 2015, kuko icyo gihe heguye abayobozi b’uturere batanu ndetse haba n’abagezwa mu nkiko. Byari bibaye inshuro ya mbere hegura umubare munini w’abayobozi mu myaka 22 Leta y’Ubumwe imaze iyobora u Rwanda.

Nyuma yaho muri 2016, hagaragaye kwegura kwa hato na hato kw’abayobozi ku buryo nko mu Burengerazuba heguye abagera ku 183 mu tugari na 28 mu mirenge mu gihe mu Burasirazuba abeguye bose hamwe mu tugari no mu mirenge ari 166 naho babiri bagahindurirwa inshingano. Muri iyi ntara ho hanirukanwemo umwe bu bashinzwe uburezi.

Mu Ntara y’Amajyaruguru ho mu tugari heguye abagera ku 114 mu mirenge hegura 14 ndetse n’umunyamabanga nshingwabikorwa w’akarere umwe, bose hamwe baba 132 beguye muri 2016.

Mu Majyepfo, heguye ababarirwa muri 77 ariko abandi benshi bihanangirizwa ku mafuti yabo.

Naho mu Mujyi wa Kihali mu turere uko ari dutatu imibare dufite kugeza ubu yerekana ko heguye 20 barimo abanyamabanga nshingwabikorwa 19 b’imirenge n’umuyobozi w’akarere umwe.

Perezida Kagame aganiriza abaturage bo mu Murenge wa Ndera mu mwaka ushize

Hitezwe isuzuma rikaze muri 2017

Uyu mwaka, mu kugenzura imikorere y’abayobozi hazibandwa ku kureba uko gahunda zigenewe abaturage zishyirwa mu bikorwa. Minaloc ikaba ivuga ko yiteze ko hari abandi bayobozi benshi bazabigenderamo.

Ladislas Ngendahimana, Umuvugizi wa Minaloc, agira ati “Uyu mwaka ni nk’ikiraro cyambutsa igihugu gahunda y’imbaturabukungu (EDPRS) ya kabiri. Niba abayobozi badatanze umusaruro tubitezeho, mwitege ko hari abandi bazegura.”

Ngendahimana akavuga ko nubwo hari abeguye kubera izindi nshingano, abenshi bagiye begura nyuma yo gushyirwa mu majwi n’abaturage muri gahunda zigira ingaruka ku mibereho yabo.

Ati “Hagaragara kutita ku nshingano ku bayobozi benshi ariko abaturage bari maso mu kugaragaraza ibi bizabo. Abenshi mu beguye bari baragiriwe inama ngo bisubireho ariko ntibumva.

Hari n’abasabwe kwirengera amakosa yabo, bo bahitamo kwegura kubera ubwoba ko byazabagaruka.”

Kubera ibi bibazo, abadepite 79 ku wa 12 Mutarama 2017 batangiye ingendo z’iminsi 10 mu baturage zigamije gukora isuzuma rya gahunda za Leta na gahunda zigenewe abaturage.

Ni isuzuma rya gatatu abadepite bakoze rigamije kureba ibyo inzego z’ibanze zikora no kugenzura aho gahunda za Leta zigeze zishyirwa mu bikorwa.

Uru ruzinduko, nubwo rusa n’izo basanzwe bakora, rwo rurihariye kuko runagamije kuryoza abayobozi ibyo batubahirije mu nshingano zabo.

Abbas Mukama, Visi Perezida w’Umutwe w’Abadepite, avuga ko izi ngendo zigamije gushimangira ko hari imiyoborere myiza no gusaba abayobozi bateshutse ku nshingano zabo kwegura.

Mbere y’uko batangira izo ngendo, Depite Mukama, yagize ati “Kwegura k’umuyobozi wananiwe inshingano ze n’intambwe nziza mu miyoborere myiza. Dukeneye abayobozi batanga umusaruro gusa, abadashoboye akazi nta cyo baba bamara.”

Depite Mukama Abbas avuga ko kwegura wananiwe inshingano ari intambwe mu miyoborere myiza

Hagati aho, abayobozi begujwe ngo ntibizarangirira mu gusinya inyandiko z’ubwegure gusa, kuko Minisitiri w’Ubutegetsi bw’Igihugu, Francis Kaboneka avuga ko bakwiye gukurikiranwa ku makosa yose bakoze mu izina ry’ubuyobozi bakabiryozwa mu nkiko.

Leta yatakarije miliyoni 99 mu manza yatsinzwe hagati ya 2015-2016 dore ko yatsinzwe 24% mu manza 515, inyinshi zikaba zari zishingiye ku kwica amategeko agenga umurimo.

Inteko Ishinga Amategeko y’u Rwanda ikaba irimo gusaba ko abayobozi bashoye Leta mu manza bagatuma amafaranga aturuka mu misoro y’abaturage akoreshwa nabi nk’uko Umugenzuzi w’Imari ya Leta yabigaragaje muri raporo y’umwaka ushize, bagezwa imbere y’ubutabera bakabiryozwa.

Evode uwiringiyimana, Umunyamabanga wa Leta muri Minisiteri y’Ubutabera ushinzwe Itegeko Nshinga n’andi mategeko, m’Ukuboza 2016 yavuze ko guverinoma itazirengera igihombo giturutse ku makosa akorwa n’abakozi ba Leta.

Yagize ati “ Ntituzemera ko Leta yishyura kubera amakosa yakozwe n’abakozi bayo. Tuzafatira imitungo ya buri wese uzagaragaraho amakosa mu kazi, kugira ngo abiryozwe”.

Byakunze kugaragara ko abaturage babaza ibibazo byinshi igihe Perezida Kagame yabasuye