Uru rwibutso rwa Ndera rushyinguyemo abarenga ibhumbi 21

Ubwo ubwicanyi bwatangiraga muri Jenoside, mu kigo cya Caraes cyakira abarwayi bafite ibibazo byo mu mutwe giherereye mu Murenge wa Ndera ni hamwe Abatutsi bari bizeye ubuhungiro kuko hari hakambitse ingabo za UN.

Icyo kigo cyabagamo cy’abihayimana bakoraga muri Caraes mu bikorwa by’ubuvuzi. Jenoside itangira cyari kinarinzwe n’abasirikare b’Umuryango w’Abibumbye.

Ubwicanyi bugitangira abaturage bari bahaturiye bagiye kuhashaka ubuhungiro ariko ibyo batekerezaga siko byagenze kuko izo ngabo zabonye interahamwe zitangiye kugota ikigo, zitangira guhungisha abo bihaye Imana.

Icyashenguye abari bahahungiye ni uburyo ingabo za UN zagiye ariko zikaza kwibuka ko zasize imbwa yabo, zigahita zigaruka kuyitora.

Zikikihakura ikirenge ni ho ubwicanyi bwatangiye nk’uko bitangazwa na Murenzi Telesphore umwe mu baharokokeye.

Agira ati “Barinze abaturage babo, abaturage [bacu] bakibeshya ko bari baje kubarinda [ariko] barabatererana, kugeza nubwo bibagiwe imbwa yabo baza kuyifata maze baha urwaho abicanya bica abantu.”

Murenzi yasobanuye uburyo Abatutsi b’i Ndera bateranywe n’abari bashinzwe kubarinda

Avuga ko Abatutsi bari bahungiye kuri Caraes bashatse no kwirwanano ariko bakaza gucibwa intenge n’abasirikare benshi bahoherejwe.

Ati “Abasirikare baraje barabarasa barabamara cyane ko kiriya kigo gikikijwe n’aho abasirikare bakuru bari bari.”

Ni bumwe mu buhamya yahaye itsinda ry’abanyeshuri barangije kwiga mu Bushinwa bari baje kuhakorera igikorwa cyo kwibuka.

Urwibutso rwa Ndera rushyinguwemo abrenga ibihumbi 21 by’Abatutsi bishwe muri 1994, biciwe muri iki kigo nyuma y’uko ingabo za UN zibatereranye.

Kugeza uyu munsi haba UN cyangwa uwari uyiyoboye Koffi Annan ntibakozwa ko ingabo z’uyu muryango zagize ubugwari muri Jenoside.

Ahubwo bemeza ko nta bikoresho bihagije zari zifite ngo zibashe gutabara ibihumbi n’ibihumbi by’Abatutsi zatereranye.

Abize mu bushinwa ubwo berekezaga ku rwibutso rwa Ndera

Umuhanzi Ngabonziza Augustin arwariye mu bitaro bya Kigabagaba

Uyu mugabo uzwi nka Ngabo, waririmbye muri Orchestre Les Citadins n’Irangira, arwariye mu bitaro bya Kibagabaga nyuma yo gukomereka gato ku kirenge, ukuguru kukabyimba bigatuma uko kuguru bakubaga.

Yicaye ku gitanda, n’igipfuko ku kuguru, avuga ko icyo gihe cyose amaze mu bitaro yabonye ari ngombwa cyane kwita ku barwayi n’abandi bantu babaye, basurwa kandi bakanafashwa mu buryo butandukanye.

Agira ati “Byanteye gutuma nibaza cyane ko umuntu agomba gutekereza ko hari ahandi hantu hari n’abantu babara. Ndetse byanashoboka umuntu agiye abona akanya akahaca, agasuhuza cyangwa agafasha abantu, abarwayi.”

Akomeza avuga ko nyuka yo gukira, naramuka agize ubushobozi yakora ibishoboka akajya ajya gusura ababaye n’abandi batagira kivurira bari mu bitaro n’ahandi.

Ngabo akomeza avuga ko abantu nabo bakwiye kwiyoroshya kuko igihe runaka nabo bashobora kwisanga babaye.

Agira ati “Iyo abantu bari hanze bagenda mu madoka ntibamenya ko ibi bibaho ko hari abantu bababaye mu bitaro. Abantu bagakwiye kwiyoroshya kuko byanyeretse ko buri wese ashobora kwisanga ari ahantu nk’aha.

Ni byiza ko ujya utekereza ko hari abantu bababaye ukaba wajya ahantu nk’aha ugasura abantu bahari.”

Bamubaze akaguru nyuma yo gukomereka ku kirenge, akaguru kakabyimba

Umuhanzi Ngabonziza Augustin avuga ko kuri ubu ari kworoherwa nubwo akiri mu bitaro. Akizeza abakunzi be ko ubwenge n’ijwi bigihari nubwo bari bamaze igihe batamubona kubera uburwayi.

Akomeza kandi ashimira abaganga bakoze uko bashoboye bagatuma adacika akaguru kuko nabyo ngo byashobokaga.

Ngabonziza Augustin ni umwe mu bahanzi bo hambere bafite ibihangano bicurangwa mu maradiyo na Televiziyo bitandukanye.

Mu ndirimbo ze zamamaye harimo Ancilla, Sugira Usagambe Rwanda Nziza, Yewe Mwari warekeye aho. Ni umwe mu bahanzi bakuze bakitabazwa mu bitaramo bikomeye agacuranga akanaririmba.

Indirimbo "Ancilla" yaririmbwe na Ngabonziza Augustin

Bihoyiki Deo wahanze indirimbo “Akabura Ntikaboneke” avuga ko nta muhanzi n’umwe w’ubu umwemeza

Uyu musaza ufite imyaka 66 y’amavuko, ubwo twamusangaga aho yigisha mu mashuri y’incuke mu Karere ka Rulindo, yadutangarije byinshi ku buhanzi bwe.

Ku bijyanye n’ubuhanzi muri rusange, ahamya ko muri iki gihe nta muhanzi urakora ibihangano bye ngo amwemeze cyane ko nta numwe arabona imbone nkubone.

Gusa akavuga ko uko bagendana n’iterambere bazagenda bakura mu buhanzi bakagera ku rwego nyarwo rukwiriye umunyamuziki.

Agira ati “Nta numwe unyemeza, sindi umucamanza umuntu agira ibyo akunda. Mwitenawe hari indirimbo yahanze ivuga ngo “Menya ko ntawihata inganzo”.

Bafite ibyabo twita iby’abubu, sinavuga ngo ni bibi kuko naba mbise babi kandi bitemewe n’amategeko, gusa uko iterambere rizamuka bazazamuka nk’uko umuntu aterera ingazi.”

Bihoyiki avuga ko ibijyanye n’ubuhanzi yabitangiye akiri umwaka ariko buza gukomera, ubwo yahimbaga indirimbo “Akabura Ntikaboneke” yamamaye ikanakundwa n’abatari bake mu Rwanda.

Kuririmba “Akabura Ntikaboneke” byaturutse he?

Bihoyiki akomeza avuga ko icyatumye ahanga iyo ndirimbo ariko uko yari amaze kubura nyina umubyara.

Avuga ko yabuze nyina akiri umwana muto cyane agasigarana na se umubyara. Ibyo ngo byatumye se ashaka abandi bagore.

Yongeraho ko ba mukase bamufashe nabi kugeza ubwo batanamugaburiraga, banamugaburira bakabimuhera ku rujyo cyangwa se bakabimuhera ku isahani yapfumutse.

Agira ati “Sinjya mpimba ndirimba ibyambayeho, hari amagambo nashyize muri iriya ndirimbo nk’ishyiga mu gutsindagira igitekerezo.

Isahani mukadata yampaga nagombaga kuriraho, rimwe na rimwe yapfumutse n’urujyo najyaga nduriraho.”

Bihoyiki avuga ko hari umugore se yigeze kuzana akajya ashyira ibiryo ku rusenge kugira ngo atahagera ariko aza kuba incakura akajya yurira akabisangayo akabirya.

Nyamara kubera urukundo yakundaga umwana we, se umubyara iyo yabaga avuye gupagasa muri Uganda, yamutekererezaga ibyo yaciyemo byose bigatuma yirukana umugore yari afite.

Byatumye ajya kurerwa na nyirakuru. Uwo ngo niwe afata nka nyina umubyara.

Agira ati “Nyogukuru ni we wambereye mama! Ni ko gahenge nagize papa yahisemo kunderesha kwa nyogokururu.”

Bihoyiki avuga ko agahinda yatewe n’abagore ba se ariko katumye abyutsa inganzo ye, aririmba avuga ko “Akabura Ntikaboneke” ari nyina w’umuntu.

Bihoyiki asanga indirimbo ye zaratanze ubutumwa bukomeye kugeza ubwo bayishyira no mu bisakuzo ndetse ikaba imvugo ikebura abantu bashobora gusugura ababyeyi babo.

Amaze guhanga indirimbo 260

Akomeza avuga ko azi gucuranga ibikoresho bitandukanye nka Piano, Guitar, Inganga gakondo n’ibindi, akaba yarabimenye yiga mu mwaka wa kane w’amashuri abanza, akabikuriza mu iseminari i Byumba.

Avuga ko amaze guhanga indirimbo zirenga 260. Izigera kuri 13 zikaba ari zo zakozwe, zikaba ziri kuri Radio Rwanda. Gusa ariko ngo ntaramenya ko izisigaye zizasohoka kuko nta bikoresho afite.

Bihoyiki Deo amaze guhanga indirimbo 260

Bihoyiki Deo avuka ko atigeze yifuza kujya mu itsinda ry’abahanzi nk’Impala nubwo babimusabye, kuko yakundaga kwigisha akumva atareka abanyeshuri be.

Gusa ariko ngo yari afite inshuti z’abahanzi banamufashaga byinshi nka Sebanani Andre, Karemera Rodrigue, Soso Mado, Kari Wanjenje, Makanyaga Abdul, Munyambuga Deo n’abandi.

Bihoyiki Deo, mu mashuri yisumbuye, yize mu iseminari ariko ntiyayirangiza ahita ajya gukomereza muri College Christ-Roi y’i Nyanza. Afite abana bane n’umugore.

Umuririmbyi Oda Paccy ubu ari muri Tanzaniya aho yakoreye indirimbo ye muri Wasafi Records

Oda Pacy yatangarije Kigali Today ko yagiye muri icyo gihugu tariki ya 03 Mutarama 2017.

Akaba amaze gukorerayo indirimbo yitwa "Nobody" iri mu ndimi ebyiri, Igiswayire n’Icyongereza. Ngo yanamaze gufata amashusho yayo.

Oda Paccy avuga ko inzu y’umuziki ya Wasafi Records iri ku rwego rwo hejuru ndetse bikaba ari iby’agaciro gakomeye kuba indirimbo ye izasohoka ari ho yakorewe.

Paccy avuga ko nyuma yo gukora indirimbo yahise akorerwa amashusho yayo n’umuhanga uzwi mu gihugu cya Tanzaniya witwa Halfan.

Uyu muririmbyikazi avuga ko iyo ndirimbo yakoreye muri Wasafi Records yitwa Nobody

Ntavuga neza igihe azagarukira mu Rwanda ariko ahamya ko azagaruka mu cyumweru gitaha kizatangira tariki ya 30 Mutarama 2017, ari nabwo azashyira hanze iyo ndirimbo.

Uyu muririmbyikazi kandi avuga ko afite abantu benshi ateganya gukorana nabo indirimbo.

Akomeza avuga ko Abanyatanzaniya bazi ko mu Rwanda hari umuziki ariko bawufata nk’ukiri hasi utahangana n’uwabo.

Umuhanzi Buhigiro avuga ko atangazwa no kumva indirimo z’ubu zuzuyemo amaganya n’amarira

Umuhanzi Buhigiro ufite imyaka 73 y’amavuko, azwi mu ndirimbo nka Nyirabihogo, Amafaranga, Agahinda karakanyagwa, Sinkunda bituga n’izindi.

Mu kiganiro yagiranye na KT Radio, mu ntangiriro za Mutarama 2017, avuga ko atangazwa no kubona ukuntu injyana z’ibyuma usanga ziganza mu ndirimbo z’ubu kurusha ijwi.

Biramugora kandi kwiyumvisha uburyo indirimbo nyinshi z’abahanzi b’iki gihe aho gutanga ubutumwa, usanga harimo amaganya n’amarira.

Agira ati “Hari abato wumva bafite umuziki w’umwimerere ariko ukumva iteka baganya ukumva n’ukunze aba aganya n’uwishimye aba arira.

Urugero ati ‘ayi we ayiwe mbega umunyenga, wumva ari umunyenga cyangwa ari ukurira? n’urukundo narwo rukazamo amarira!”

Buhigiro avuga ko hari abahanzi bagerageza nka Kitoko kuko indirimbo ze ziba zifite umwimerere wazumva ukumva ko zituruka ahantu baragiye inka.

Ikindi ngo kimutangaza ni ukubona ababyinnyi babyina ibihozo ku manywa y’ihangu kandi ubundi byararirimbwaga nijoro mu gitaramo.

Abahanzi bo hambere ngo bibandaga ku butumwa

Buhigiro avuga ko yatangiye guhimba indirimbo mu mwaka wa 1965. Indirimbo ze ngo zatangiye gucurangwa kuri Radio Rwanda mu mwaka wa 1971, ndetse zirakundwa cyane.

Akomeza avuga ko imihimbire n’imicurangire ya kera yibandaga cyane ku magambo n’ubutumwa buyirimo. Bakibanda mu bifite icyo bifasha sosiyete abantu batuyemo.

Agira ati “Twashakaga kugira icyo tubwira abantu, ikintu gifite ireme, cyibagira inama, amagambo yari ngombwa kuri twe kuko twumvaga uyasize yonyine yagira icyo avuga agahora atanga ubutumwa.”

Akomeza avuga ko ibihangano bye byatumye umupadiri w’inshuti ye babanye muri Bubiligi, Kinshasa no mu Rwanda amukorera, agatabo karimo ibihangano bye kugira ngo bitazazimira.

Ati “Padiri Mupagasi twabanye yarambwiye ati ‘ibi bintu wandika, uririmba dukwiye kubishyira ahantu. Niwe wankoreye aka gatabo kitwa “Akari ku Mutima” karimo ibisigo, ibisingizo, indirimbo n’ibindi.”

Uyu muhanzi avuga ko bitamukundiye ko abigeza kuri benshi kuko bisaba umwanya no kubishakira abaterankunga.

Buhigiro aha ubutumwa abakiri bato bwo guharanira kugira umwihariko no kugumana gakondo Nyarwanda kuko bizabahesha agaciro.

Ati “Ntitugatakaze gakondo yacu, tugomba kugira ikintu kiranga umuziki wacu nk’uko ujya mu bindi bihugu ukamenya ngo iyi ndirimbo n’iyo muri iki gihugu.”

Buhigiro ahamagarira abakibyiruka kubika amateka

Umuhanzi Buhigiro asanga igihe cyabo baragikoresheje uko bikwiye ndetse bakaba barasize ibintu bishobora kuzagirira u Rwanda n’Abanyarwanda akamaro.

Ahamagarira abakiri bato kwamamaza ayo mateka bakayabika bakazayabyaza umusaruro.

Ati “Ibyo ni ibyanyu mwebwe abakiri bato muzashake uko mubigaragaza, mukaza kuvoma kuri ayo mariba atarakama.

Mwabasha kumenyekanisha ibintu kurenza abasaza, mugashaka abaterankunga kugira ibi bintu bizagumeho ni mwe bifitiye akamaro.”

Buhigiro kuri ubu ni umuganga w’amakipe y’igihugu atandukanye akaba avura abayagize abagorora ingingo (physiotherapy)

Buhigiro ahamagarira abarimu ba muzika gufata inshingano zabo, bagafasha abakibyiruka kumenya gutandukanya injyana gakondo yabo n’izindi njyana kugira ngo umwimerere wabo utazacika burundu.

Buhigiro Jacques ni umwe mu babyirukanye n’abahanzi bazwi nka Makanyaga Abdul , Musoni Evariste , Mushabizi, Kirusu Thomas.

Kuri ubu ni umuganga w’amakipe y’igihugu atandukanye akaba avura abayagize abagorora ingingo (physiotherapy). Ibyo yabyigiye mu Bubiligi. Akorera kuri Stade Amahoro i Remera.