Mu ntara y’amajyepfo abana bamwe bata ishuri bakajya kurinda inyoni cyangwa bakajya mu mijyi gukora akazi ko mu rugo

Ibyo byatangajwe ubwo hizihizwaga tumunsi mpuzamahanga w’umwana w’umunyafurika tariki 16 Kamena 2017.

Mu Karere ka Huye uwo munsi wizihirijwe mu Murenge wa Rwaniro ukunze kugaragaramo abana bava mu ishuri bagiye kurinda inyoni mu mirima y’umuceri, cyangwa gushakisha amafaranga mu birombe by’amabuye y’agaciro.

Nko mu minsi yashize ibirombe by’amabuye y’agaciro muri uwo murenge byanagwiriye abana babiri bahita bapfa.

Joseph Kagabo, umujyanama wa komite nyobozi y’Akarere ka Huye yahamagariye ababyeyi bo muri uwo murenge kudatuma abana amafaranga bakiri batoya.

Agira ati “Ntabwo mukwiye gutuma abana kubashakira amafaranga kuko igihe cyabo ntikiragera. Abana umurage munini tubaha ni uwo kujya ku ishuri.”

Akomeza abwira abana kudata ishuri bajya gushakisha imirimo bakiri batoya kuko ngo muri uko gushaka imirimo ari ho bahurira n’ababashuka.

Ati “Ntabwo mukwiye kujya gukora mu ngo z’abakire, kwa kundi mubivuga, kandi na bo bafite abana mungana bo bakajya kwiga. Nta n’ubwo umwana akwiye kwifuza ibyo ababyeyi badafite ngo bimujyane kugurishwa.”

Imibare y’abana bavuye mu ishuri mu Karere ka Huye kose ntiratangazwa. Gusa ariko mu Murenge wa Rwaniro, ku bana 5111 batangiye ishuri mu mwaka wa 2016, abamaze kurivamo ni 618.

Muri abo ari ko abagera kuri 482 bamaze kurisubizwamo naho abasigaye 136 baracyashishwa kuko batazi aho baherereye.

Ababyeyi bo mu ntara y’amajyepfo bahamagarirwa kwita ku burere bw’abana babo kugira ngo boye guta ishuri

Ikibazo cy’abana bata ishuri kigaragara kandi Mu Karere ka Muhanga.

Mu murenge wa Rugendabari ukunze kugaragaramo abana bata ishuri bagiye gushakisha amafaranga mu birombe by’amabuye y’agaciro.

Alphonse Hagenimana uhagarariye abarezi muri uwo murenge avuga ko abana bataye ishuri mu mashuri abanza ari 3,5%, na 5% bigaga mu mashuri y’uburezi bw’ibanze bw’imyaka 9 na 12.

Agira ati “Ababyeyi bagira uruhare mu kudakurikirana uburezi bw’umwana bigatuma bajya mu migezi gushaka amabuye ashorwa n’amazi aturuka mu bisimu bikomeye kuko ho batajyayo.”

Hagenimana anavuga ko hari n’abana bata ishuri bagiye gukora mu ngo mu mijyi. Batwarwa na bagenzi babo baba baragiyeyo mbere, bagaruka basa neza n’abandi bakabakurikira.

Abana bo mu Karere ka Nyaruguru nabo bata ishuri bakajya gukora akazi ko mu rugo mu mijyi hakiyongeraho n’abajya gukora mu mirima y’icyayi.

Umuyobozi wungirije w’Akarere ka Nyaruguru ushinzwe iterambere ry’ubukungu, Antoine Bisizi avuga ko mu ngamba zashyizweho harimo guhagurukira rimwe nk’ubuyobozi, abarezi n’ababyeyi bagakurikirana amakuru y’abana mu miryango uwawuvuyemo akamenyekana kugira ngo agarurwe.

Agira ati “Twafashe ingamba zo kugarura abana mu mashuri. Dufatanyije n’abakuru b’imidugudu, buri wese agomba kumenya umwana umaze iminsi atari mu rugo n’impamvu adahari agatanga raporo, abarimu na bo bikaba uko”.

Imibare itangwa n’aka karere igaragaza ko kuva umwaka wa 2017 watangira abana bazwi bari baravuye mu miryango bakajyanwa mu mijyi bari 60.

Ariko ngo 20 muri bo bamaze kugarurwa mu miryango no mu mashuri. Haracyashakishwa amakuru yahoo abandi baherereye kugira ngo na bo bagarurwe.

Polisi y’u Rwanda yahaye inzu imiryango yahuye n’ihohoterwa

Aba bana b’abakobwa ni abo mu karere ka Nyamagabe naho uyu muryango ufite umwana wahohotewe na musaza we akamutera inda afite imyaka 13, ni uwo mu karere ka Kamonyi.

Aba bana babiri basambanyijwe na se, amakuru y’iri hohoterwa ngo yamenyekanye mu kwezi kwa gatatu uyu mwaka wa 2016.

Nyina ubabyara avuga ko akibyumva yumvise ari amahano akabije, ubuyobozi buramufasha umugabo ashyikirizwa ubutabera.

ACP Gilbert Rwamungu Gumira uhagarariye Police mu Ntara y’Amajyepfo avuga ko iyi nzu yubakiwe uyu muryango mu rwego rwo kuwufasha kugira imibereho myiza, cyane ko bari bacumbitse.

Amazu yatanzwe yubatswe kimwe kandi anafite agaciro kamwe

Umuryango wo mu karere ka kamonyi nawo ufite umwana wahohotewe na musaza we, uvuga ko utagiraga aho kuba, ubushobozi nabwo ari buke, bigatuma bacumbika mu nzu y’icyumba kimwe.

Ibi ngo ni nabyo byatumye uyu mwana w’umukobwa ararana na musaza we, kugera ubwo amusambanyije akamutera inda afite imyaka 13.

Umuyobozi w’ishami rya Polisi rishinzwe guhuza ibikorwa bya yo n’abaturage “community policing”, ACP Twahirwa Celestin, avuga ko inzu bahawe, ari iyo kubafasha kugira uburyamo buhagije.

Yagize ati “Iyi gahunda yatekerejwe mu rwego rwo gushaka icyakorwa kugira ngo ibibazo nk’ibi bitazongera kuba, kandi n’uwahohotewe agire ubuzima bwiza”.

Yongeraho ko ukekwa guhohotera uyu mwana ari gukurikiranwa n’ubutabera.

Avuga kandi ko ku bufatanye n’inzego za Leta zirimo akarere na Minisiteri y’umuryango, bakaba bagomba guhangana n’ingaruka ihohotera ryateje.

Ku bufatanye bw’inzego za leta abahura nihohoterwa bazajya bitabwaho

Iyi miryango yahawe inzu zifite agaciro ka miliyoni 8 RWf buri imwe, n’ibikoresho by’ibanze, kandi ikazanakomeza gufashwa n’uturere aho ubushobozi bubaye buke.

Igikorwa cyo guha abahohotewe amazu yo guturamo, cyabereye mu turere twa Kamonyi, Gatsibo, Kayonza na Nyamagabe.

ACP Twahirwa arasaba ababyeyi kwita ku burere bw’abana kuko ngo abenshi mu bana bakorerwa ihohoterwa rishingiye ku gitsina kubera uburangare bw’ababyeyi.

Abatuye mu Karere ka Gisagara bifuza ko muri iyi nama hakwigwa uburyo bagezwaho umuhanda wa Kaburimbo, nk’uko Augustin Bagarirayose wo mu Murenge wa Kansi abitangaza.

Bagarirayose Augustin arasaba ko akarere kabo kabona umuhanda wa kaburimbo

Yagize ati “Nta hantu na hamwe muri Gisagara hagera kaburimbo kandi nta n’akagari nibura kayikoraho.

N’iyo wagezwa gusa no ku biro by’akarere, byatuma ubuhahirane bworoha, kandi akarere kakarushaho kugendwa.”

Abaturage bo mu Karere ka Nyamagabe nabo bagaruka ku bikorwa remezo, bavuga ko muri iyi nama hakwigwa uburyo umuhanda Gasarenda-Gisovu n’uwa Nyamagabe - Mugano wakorwa, kandi amashanyarazi akagezwa no mu mirenge itatu isigaye itarayagezwamo.

Muri ibi bice bya Gasarenda na Gisovu hari inganda z’icyayi nk’urwa Gisovu, Mushubi na Kitabi, hakaba umusaruro w’ibikomoka ku biti nk’amakara, ndetse n’ibirayi n’ingano.

Ibi ngo bigora cyane aba baturage ku bigeza ku batuye mu Mujyi wa Nyamagabe no mu tundi duce duhana imbibi na wo, kubera ikibazo cy’imihanda idatunganyije.

I Mugano ho ubu ngo hari kubakwa umudugudu Perezida Kagame yemereye abatuye i Nyamagabe, ariko umuhanda ujyayo uranyerera cyane, ku buryo abagiye guhahira i Kaduha akenshi bararayo iyo imvura ibasanzeyo.

Amashanyarazi nayo ngo nagezwa muri utu duce, ngo azatuma barushaho gutera imbere, nk’uko François Sekabwa, Perezida w’Inama Njyanama y’Akagari ka Nyarwungo abitangaza.

Ati “Mu Mirenge ya Nkomane Musange na Mugano, hasigaye inyuma mu iterambere kubera kutagira amashanyarazi. Kuyabona ni ingirakamaro ku baturage bahatuye.”

Mu bindi byifuzo bifuza ko byaganirwaho ngo ni uburyo hagabanywa amafaranga atangwa ku byangombwa by’ubutaka.

Bavuga mu gutanga amafaranga yo guhinduza ibyangombwa by’ubutaka, byakwigwaho hagatandukanywa atangwa mu mijyi no mu byaro kuko ubutaka bwose butanganya agaciro.

Urubyiruko rwo muri iyi Ntara rusaba ko muri iyi nama haganirwa ku buryo inkunga zigenerwa urubyiruko rukora ibikorwa by’imyidagaduro, zagezwa no mu mirenge, nk’uko Anne Marie Umuraza w’ i Kinazi mu Karere Huye abivuga.

Ati “Ndabizi hari inkunga zigenerwa urubyiruko rukora ibikorwa bijyanye n’imyidagaduro nk’iby’amatorero abyina n’ akina amakinamico. Izo nkunga nizimanuke zigere mu mirenge zireke kwigumira mu turere.”

Anne Marie Umuraza ati inkunga zigenerwa urubyiruko mu bikorwa by’imyidagaduro zongerwe

Abaturage bo muri iyi Ntara banavuga ko mu myanzuro y’iyi nama, hashyirwamo ko ibikorwa byo gufasha abakennye cyane nko muri gahunda ya Gira inka, VUP no kububakira, bikwiye gukurikiranirwa hafi n’inzego zo hejuru, kuko ngo hari igihe bitagezwa kubo bigomba, bikagezwa ku bifite kubera ruswa.

Assoumpta Yambabariye utuye i Kinazi mu Karere ka Huye agira ati “Ubuyobozi bwisumbuyeho bujye bumanuka igihe bene ibyo bikorwa bigiye kuba, bamenye koko ko byagejejwe ku bo byari bigenewe.”

Assoumpta Yambabariye ati ubuyobozi bwo hejuru bukurikiranire hafi itangwa ry’inka za Girinka n’itangwa ry’amabati ku bakene

Politiki y’uburezi na yo ngo ikwiye kunononsorwa muri iyi nama, amafaranga Leta iba yabushoyemo akabyazwa umusaruro.

Eugène Manirarora umurezi mu Karere ka Huye, agira ati “ Amafaranga Leta ishora mu mashuri yayo nibayakoreshe bazamura ireme ry’uburezi.

Amashuri ya Leta bigaragara ko abantu bagenda bayavaho bakagana ayigenga, kubera ko adatanga umusaruro wifuzwa kandi atabura ubushobozi”.

Eugene Manirarora ati harebwe niba amafaranga Leta ishora mu burezi atanga umusaruro wizewe

Inama ya 14 y’umushyikirano iteganyijwe guhera ku wa Kane tariki ya 15 kugeza ku ya 16 Ukuboza 2016. Insanganyamatsiko y’uyu mwaka ikaba igira iti “Dufatanyije twubake u Rwanda twifuza”.

Izabera muri Kigali Convention Center, iyoborwe na Perezida wa Repubulika Paul kagame.