Umuhoza Rwabukumba ni umwe mu bamaze igihe kirekire ku mwanya wa ’Gitifu’

Umuhoza yagize amahirwe yo kuba mu Banyamabanga nshingwabikorwa 416 ba mbere bahawe imirenge, kuko uretse ko bari batangiye imiyoberere mishya byasabaga ko bagomba kuba babifitiye ubushobozi.

Umuhoza wari ufite imyaka 28, yari akirangiza amashuri ye mu cyiciro cya kabiri cya kaminuza mu miyoborere muri Kaminuza y’u Rwanda. Yari n’umwe mu rubyiruko rugize umuryango wa FPR-Inkotanyi. Yahise ahabwa kuyobora Umurenge wa Mugunga mu Karere ka Gakenke mu Majyaruguru y’u Rwnda.

Nyuma y’imyaka 10, Umuhoza yayoboye imirenge ine itandukanye yo mu Karere ka Gakenke. Ubu ayobora Umurenge wa Kinyinya mu Karere ka Gasabo.

Yatangarije Kigali Today ko kari akazi katoroshye ariko kubera kwihangana, yashoboye kugumaho bituma kugeza ubu abarirwa muri bamwe muri Gitifu bamaze igihe kirekire kuri uyu mwanya.

Ku munsi wa mbere atangira akazi, yibuka ko nta muntu n’umwe yari azi muri ako gace. Umuyobozi w’akarere ni we wamutwaye kugira ngo amugeze aho azajya akorera.

Yongeraho ati “Umunsi wa mbere ngera ku murenge hari ku cyumweru nyuma ya saa sita. Umuyobozi w’akarere yanyeretse aho nzaba nshinzwe gukorera. Ariko amaze kugenda abasirikare ni bo bafashe iya mbere mu kumfasha kubona aho nzatura.

“Bahamagaye umugore wari ufite inzu ikodeshwa ari nayo yari mu wundi murenge nabwo ugomba kubanza kwambuka umugezi. Aho niho nabaye buri munsi nambuka umugezi uko nazaga ku kazi.”

Bamuhaye imfunguzo z’ibiro byari birimo ibikoresho bike. Harimo intebe ebyiri n’utumeza tubiri duto, nk’uko abitangaza. Gusa Minisiteri y’Ubutegetsi bw’Igihugu (MINALOC) yabemereye kuzabaha ibindi bikoresho abakozi bose bamaze kuhagera.

Agira ati “Mbere y’uko isoko ryo kudukorera ibikoresho byo mu biro ritangwa, twajyaga dutira intebe mu baturage begereye ibiro by’umurenge mu gihe twabaga dufite inama zizitabirwa n’abantu benshi.”

Amavugurura ya 2006 yashyize abagore benshi mu buyobozi

Rwabukumba avuga ko agerageza kurebera kuri nyakwigendera Inyumba uko yabanaga n’abandi mu mahoro

Amavugurura ya 2006 yo kwegereza ubuyobozi abaturage, yagombaga gukorwa n’abantu babisobanukiwe kugira ngo bumve ibibazo by’abaturage.

Icyo gihe byavuye ku ntara 11 hasigara intara enye gusa, biva ku turere 106 bigera ku turere 30, naho imirenge iva ku 1545 igera kuri 416. Ibyo byongereye imbaraga mu mikorere y’inzego z’ibanze no kwegera abaturage.

Ni uko Rwabukumba yisanze mu bakobwa ba mbere bagizwe abayobozi. Ati “Icyo gihe abakobwa benshi barahamagawe nanjye ndimo, twisanga turi kuyobora inzego za leta zari zigishyirwaho. Twagizwe abayobozi dutangira gufasha leta gushyira mu bikorwa gahunda zigamije impinduka.

“Nyinshi muri serivisi zatumaga abaturage bakora ingendo ndende bajya kuri za perefegitura zose zazanywe ku mirenge.”

Nubwo byari bigoye kubera amikoro make izo nzego nshya zatangiranye, kuba umuryango wa FPR abereye umunyango wari wamugiriye icyizere, byatumaga adacika intege.

Inyumba Aloysia ni we yafataga nk’icyitegererezo

Inyumba yari umwe mu banyamuryango bagize uruhare mu rugamba FPR yarwanye rwo kubohora igihugu hagati y’umwaka w’i 1990 na 1994, urugamba rwanahagaritse Jenoside yakorerwaga Abatutsi. Icyo yamukundiraga ni uburyo yakoraga akazi kandi azi no kubana n’abantu bose.

Ati “Nyakwigendera Inyumba yari umuntu w’icyitegererezo kuri njye, yakoreye igihugu yitanga cyane ariko akanicisha bugufi. Nizera ko abagore muri rusange ari abantu baharanira amahoro.

“Iyo duhawe amahirwe dushobora gukoresha iyo mpano mu kuyobora mu mahoro, gutega ugutwi udutuye ibibazo no guhosha imvururu.”

Ntahura n’abamuhutaza kuko ari umugore

Umuhoza avuga ko atibuka igihe aherukira guhutarizwa kubera ko ari umugore. Yizera ko byatewe n’ingamba leta yafashe zo kutihanganira ihohoterwa iryo ari ryo ryose rikorerwa abagore.

Ubwitange bwa Inyumba bwatumye abagore barushaho guhabwa agaciro kugeza n’aho mu itegeko nshinga rya 2013 hashyizwemo ko mu nzego za Leta hari umubare w’abagore utagomba kuburamo. Rwabukumba asanga na byo ari bimwe mu byafunguriye abagore amarembo mu buyobozi.

Ati “Nyuma ya Jenoside yatumye abagore benshi ari bo basigara ari abakuru b’imiryango, FPR yagize neza mu gushyiraho ko mu nzego za leta hatagomba kuburamo abagore bagera kuri 30% bari mu nzego zifata ibyemezo. Ibi byatumye FPR irushaho gukomera kandi igaha abagore ijwi.”

Inteko ishinga amategeko y’u Rwanda ni imwe mu nzego ntangarugero mu Rwanda no ku isi mu guha ijambo abagore, kuko bagize 64% by’imyanya igize inteko. Bitandukanye n’ahandi ku isi aho usanga abagore bakiri ku kigero cya 21%.

Ubushake bwa Politiki mu guteza imbere abagore buracyakenewe

Ubuyobozi bwa FPR bwashyizeho gahunda y’uko mu myanya ifata ibyemezo hagomba kubamo abagore 30% nibura

Raporo ya ‘World Economic Forum’ ya 2014 yashyize u Rwnda ku mwanya wa mbere mu bihugu biteza imbere abagore, irushyira no ku mwanya wa karindwi ku rwego rw’isi mu bihugu 142. U Rwanda rwaniyemeje gushyigikira ubukangurambaga bwo guteza imbere umugore buzwi nka “HeForShe.”

Perezida Paul Kagame na we ari mu bafashe iya mbere mu guharanira iterambere ry’abagore.

Igitanga icyizere ni uko abagore bashyizwe mu myanya ifata ibyemezo, bagiye bagaragaza ko bashoboye, ku buryo bashobora gufasha u Rwanda kugera ku cyerekezo rwifuza.

Ababitsa muri Cogebanque bazoroherwa gukoresha amafaranga yabo kuri Mobile Money

Ibyo bikubiye mu masezerano MTN na Cogebanque bashyizeho umukono kuri uyu wa 26 Ukwakira 2017 mu Mujyi wa Kigali. Ayo masezerano ngo azatuma abafite amafaranga muri banki babasha kuyabikuza no kuyohereza aho bashaka, bifashishije Mobile Money.

Ubwo buryo bwiswe mu Cyongereza “Push and Pull” butuma umukiliya wa banki ukoresha MTN mobile money aba ashobora gukoresha amafaranga ari kuri konti akayakoresha kuri mobile money ndetse n’ari kuri mobile money akayakoresha muri banki uko abishatse.

Ubwo buryo busanzwe bukoreshwa muri banki icyenda zo mu Rwanda, Norman Munyampundu ushinzwe ubucuruzi muri MTN yavuze ko buje gufasha abakiliya b’ibigo byombi kubasha gukoresha amafaranga yabo uko babyifuza igihe baba bayafite kuri mobile money no muri banki.

Yagize ati “Ibi ni ibikorwa bigamije korohereza abakiliya bacu kugira amafaranga yabo hafi yabo, batagombye kujya gutonda imirongo muri banki no ku batanga ubufasha bwa mobile money bita aba agents.”

Norman Munyampundu Ushinzwe Ubucuruzi muri MTN

Muri Cogebanque bo bavuga ko “Push and Pull igamije guha abakiliya uburyo bwo kwishyura no guhaha bwangu kandi bakoresheje telefoni bagendana mu ntoki zabo batagombye kujya gushaka amafaranga muri banki” nk’uko byatangajwe na Mujyambere Louis de Montfort ushinzwe kwiga imishinga y’iterambere rya banki.

Ubwo buryo bwa “Push and Pull” busanzwe bukoreshwa muri Banki ya Kigali BK, Banki y’abaturage BPR Atlas Mara, ikigo cyo kuzigama cya Zigama CSS, I&M bank, Kenya Commercial Bank, Equity Bank, Unguka, Vison Finance na GT Bank.

MTN Rwanda iravuga ko abasanzwe muri ziriya banki bakoreshaga “Push and Pull” mu mezi ashize bajya bishyura bakanahaha ibifite agaciro ka miliyari zisaga ebyiri n’igice z’amafaranga y’u Rwanda (Frw 2.6bn) nibura buri kwezi.

Umukiliya w’izo banki unakoresha MTN mobile money yemerewe kuba yakohererezanya amafaranga ageze kuri miliyoni ebyiri n’abandi ashaka buri munsi, ariko akaba atarenza miliyoni icumi mu kwezi kumwe nk’uko amabwiriza ya banki Nkuru y’u Rwanda BNR abiteganya.

Mujyambere Louis de Montfort ushinzwe kwiga imishinga y’iterambere rya banki ya COGEBANQUE

Ubwo buryo bwo guhanahana amafaranga hagati ya telefoni na konti muri banki buje bwiyongera ku busanzwe bwo guhanahana amafaranga kuri za telefoni bwitwa mobile money, uburyo ngo bukoreshwa inshuro zisaga miliyoni 12 buri kwezi muri MTN gusa, hagahanahanwa amafaranga asaga miliyari 89.

Mujyambere Louis de Montfort yabwiye Kigali Today ko abakiliya ba Cogebanque bakoresha Tigo nabo ngo bahishiwe kuko mu minsi ya vuba nabo bazabasha kujya bakoresha amafaranga yabo kuri Tigo Cash na konti iri muri banki byose kuri telefoni yabo.

Kugera mu mpera z’ukwezi kwa Nzeli, MTN Rwanda yari ifite abafatabuguzi 3,576,352, Tigo ifite 3,387,682 naho Airtel 1,628,510.

Obadiah Biraro, umugenzuzi mukuru w’imari ya Leta

Yabigaragaje mu Nteko Ishinga Amategeko ubwo Ikigo cy’Igihugu cy’Iterambere (RDB), kitabaga ngo gisobanure imikorere yacyo n’amakosa yakigaragayemo, ku itariki ya 29 Nzeli 2017.

Mu bugenzuzi bwakozwe kuri RDB, umugenzuzi mukuru w’imari ya Leta, Obadiah Biraro yatahuye ko hari ingwate zisaga 14 zatanzwe mu mabanki atandukanye ariko buri ngwate igatangwa muri banki zirenze imwe.

Ibi bivuze ko umuntu ufite inzu yayitangagaho ingwate muri banki zinyuranye, izo banki zose zikamuha inguzanyo.
{{}}
Ibyo ntibyemewe kuko iyo nzu iba itagifite agaciro kuko uwayitanze ananiwe kwishyura ayo mabanki iyo ngwate ntiba yakoreshwa mu kwishyura.

Umugenzuzi mukuru w’imari ya Leta yavuze ko mu bugenzuzi bwabo basanze hari ingwate nyinshi zatanzwe mu mabanki atandukanye kandi zikaba zizamara igihe kirekire.

Yatanze urugero avuga ko hari nkaho babonye inzu imwe yatanzweho inguzanyo izishyurwa kugera mu mwaka wa 2030 muri banki imwe, ahandi iyo nzu igatangwaho inguzanyo izamara kwishyurwa mu mwaka wa 2028.

Nyir’iyi nzu aramutse abuze ubwishyu, ubwo banki yamuhaye inguzanyo ubwa kabiri ntabwo yazabona uko imwishyuza.

Abadepite basanga ibyo ari imicungire mibi kuko uwatanze ingwate atishyuye, banki zahomba amafaranga abaturage baba barazibikijemo, abaturage na bo bagahomba utwabo.

RDB yemera amakosa

Emmanuel Hategeka, umuyobozi wungirije wa RDB yavuze ko ibyo babyemera nk’amakosa yabaye.

Ikigo cy’igihugu cy’iterambere cyemera amakosa

Ayo makosa ngo yetewe n’ubufatanyacyaha mu nzego nyinshi, harimo cyane cyane abakozi bo mu ikoranabuhanga batumaga izo ngwate zitagaragara ko zatanzwe ahandi.

Agira ati “Ibyo byatewe n’abakozi bo mu ikoranabuhanga babikoraga babigendereye, ariko aho bigaragariye bamwe bagejejwe mu nkiko.”

Akomeza agira ati “Kandi ubu icyiciro cy’ikoranabuhanga cyahawe abantu b’inyangamugayo bakigenzura barimo abo mu nzego z’umutekano no kubungabunga ubusugire bw’igihugu.”

Iby’iyo mikorere y’amabanki byabajijwe RDB nk’urwego rushinzwe iterambere mu Rwanda, runanengwa kuba mu myaka ibiri ikurikiranye ya 2014-2015 na 2015-2016 rwarahawe raporo y’imikorere igayitse mu gucunga imari, icyitwa “Adverse opinion” mu bugenzuzi.

RDB yagaragaweho imikorere idasobanutse kandi mu bijyanye no kugenzura pariki zo mu Rwanda.

Hari nkaho igenzura ryagaragaje kandi ko hari ibyemezo 784 byo gusura pariki byishyuwe rimwe ariko bikajya bikoreshwa inshuro nyinshi.

Hasobanuwe ko hari uwishyura icyemezo cyo kwinjira muri pariki ariko icyo cyemezo kimwe kigakoreshwa na ba mukerarugendo barenze umwe batandukanye, cyangwa se mukerarugendo umwe ashobora kwinjira muri pariki inshuro nyinshi agendeye ku cyemezo kimwe.

Iri genzura rigaragaramo ibindi nko kuba RDB yarishyuye asaga miliyoni 30RWf kubera imanza yatsinzwe kandi abateje izo manza ntibakurikiranwe.

RDB ngo ifite abayirimo imyenda ikabakaba miliyoni 60RWf ariko itajya yishyuza. Ikaba kandi ngo yaratanze amasoko afite agaciro karenga miriyari 10RWf mu buryo butateganyijwe.

Minisitiri w’Intebe Dr. Ngirente Edouard ahamya ko mu myaka irindwi iri imbere mu Rwanda hazahangwa imirimo irenga miliyoni

Yabitangarije Abanyarwanda ubwo yari mu Nteko ishinga amategeko ku gicamunsi cyo ku wa kabiri tariki ya 26 Nzeli 2017, ubwo yasobanuraga gahunda guverinoma ayoboye izibandaho mu myaka irindwi iri imbere.

Agira ati “Tugiye gushyira imbaraga mu guhanga imirimo itanga amafaranga nibura miliyoni n’igice kandi igomba kuboneka mbere ya 2024.”

Akomeza avuga ko iyo mirimo izahangwa, abo izaba igenewe cyane ari urubyiruko n’abagore, kandi ikazagezwa muri buri mudugudu wo mu Rwanda.

Ati “Muri buri mudugudu, hazashyirwaho gahunda yo guteza imbere guhanga imirimo hashyirwaho nibura umushinga umwe w’icyitegererezo ubyara inyungu.”

Ku buryo bwihariye ngo mu Mujyi wa Kigali hazashyirwaho ahantu hihariye hazafasha Abanyarwanda n’abanyamahanga bafite impano zihariye kurushaho guhanga ibishya.

Aho hantu hihariye muri Kigali hahawe inyito ya "Kigali Innovation City", hazaba haherereye ahagenewe inganda hazwi nka "Kigali Special Economic Zone".

Ikindi ngo hazibandwa ku guteza imbere imijyi yunganira Kigali kandi nayo izashyirwamo ibikorwa bitanga akazi n’amafaranga.

Abayobozi b’inteko ishinga amategeko imitwe yombi bakira minisitiri w’Intebe Dr Ngirente

Imwe mu mirimo izahangwa izaturuka mu nganda

Minisitiri w’Intebe, Dr Ngirente yavuze ko muri uwo mugambi wo kubonera Abanyarwanda akazi hazubakwa inganda.

Yatanze urugero avuga ko hashingwa uruganda rukora imiti, uruganda rukora inzitiramibu n’uruganda rukora ifumbire.

N’izindi nganda zikora ibikoresho by’ubwubatsi nk’amabati, amakaro n’ibyuma, uruganda rukora ibyo gupfunyikamo ibicuruzwa n’izisanzwe zizongererwe ubushobozi.

Ibyo bikorwa byose bikubiye muri gahunda ya Guverinoma y’imyaka irindwi yo kuva muri 2017-2024.

Abagize inteko ishinga amategeko umutwe wa Sena n’uw’abadepite bateze amatwi gahunda za leta

Minisitiri w’Intebe yatangaje ko kugira ngo ibyo bigerweho, bizashingira ku bufatanye bw’inzego zinyuranye, zaba iza Leta, abikorera, imiryango itari iya Leta, Sosiyete Sivile, Amadini n’Amatorero, ndetse n’abaturage ubwabo.

Ambasaderi Arnout Pauwels yakiriwe mu biro na Perezida wa Sena Makuza Bernard

Ibi ambasaderi Arnout Pauwels yabitangaje kuwa 8 Kanama 2017, nyuma yo guhura na perezida wa Sena Bernard Makuza ngo amusezereho kuko asoje ikivi cye mu Rwanda.

Iyi ntumwa y’u Bubiligi mu Rwanda kandi yashimiye Abanyarwanda muri rusange uko bitwaye neza mu matora y’umukuru w’igihugu, aho ngo bihitiyemo uzabayobora mu mutuzo kandi bakaba barahisemo ingirakamaro.

Arnout Pauwels yagize ati “Twese abahagarariye ibihugu by’amahanga mu Rwanda twigabanyijemo amatsinda 40 yakurikiranye uko amatora yagenze hirya no hino mu Rwanda, twiboneye neza ko yaranzwe n’umucyo, ubwisanzure n’umutuzo udasanzwe, utaboneka ahandi henshi ku isi. Abanyarwanda bose bakwiye kubyishimira kandi bakabibumbatira.”

Ambasaderi Arnout Pauwels yavuze ko Abanyarwanda bihitiyemo ku majwi menshi cyane umukandida wari waberetse ko azabafasha gukomeza kugera ku iterambere dore ko yanabiberetse mu gihe amaze ayobora u Rwanda, ubu ngo abafatanyabikorwa bose bakaba bifuza gukomeza gukorana na perezida Paul Kagame kuko yagaragaje ubushobozi mu kuzahura u Rwanda no kurugeza ku iterambere ridashidikanywaho.

Ibi ngo nibyo bituma uyu Arnout Pauwels n’ahandi azajya azakomeza kuba umuvugizi mwiza w’u Rwanda kuko ari igihugu yabayemo akakibonamo ubwiza, amahirwe mu ishoramari, kurwanya ruswa n’ubuyobozi buharanira guteza imbere abaturage.

Mu bindi ambasaderi Arnout Pauwels yavuze ko amahanga akwiye kwigira ku Rwanda ni gahunda yo guha urubuga abagore n’abakobwa nabo bagatanga umusanzu mu kubaka ibihugu byabo mu iterambere, gahunda yamenyekanye yitwa “HeForshe” ubu irangajwe imbere na perezida Paul Kagame ndetse n’umufasha we madamu Jeannette Kagame.

Ambasaderi Pauwels ngo yashimye gahunda zose zo guteza imbere uburezi bw’umwana w’umukobwa ziyobowe na madamu Kagame ndetse na politiki ya leta muri rusange yo guha abagore ijambo kandi ngo byatanze umusaruro ukomeye mu kubaka u Rwanda.

Nyuma ’ikiganiro bagiranye Perezida wa Sena yamuherekeje

Perezida wa Sena bwana Bernard Makuza yavuze ko ubusanzwe u Rwanda n’Ububiligi bifitanye umubano wari ushingiye cyane ku nkunga zifasha u Rwanda mu nzego z’ubuvuzi no kongera ingufu z’amashanyarazi ariko mu byo baganiriye na ambasaderi Arnout Pauwels ngo harimo ko uzamusimbura na leta y’Ububiligi muri rusange bazongera ingufu mu guteza imberei ishoramari mu bihugu byombi.

Ambasaderi Arnout Pauwels yari amaze imyaka itatu mu Rwanda ahagarariye igihugu cy’Ububiligi, akaba yarasabiwe gusimburwa n’uwitwa Benoît Ryelandt uzatangira imirimo ye nyuma y’ibiruhuko byo mu Mpeshyi benshi mu bihugu by’Uburayi bagira kugeza mu kwezi kwa Nzeli.

Ibyo Senateri Makuza yabivugiye mu Karere ka Nyamasheke aho umukandida wa FPR-Inkotanyi, Kagame Paul yiyamamarije kuri uyu wa gatandatu tariki ya 29 Nyakanga 2017.

Yagaragaje ko amatora ya 2017,Kagame yamaze kuyatsinda igisigaye ngo ni ukureba indi myaka iri imbere.

Agira ati “Indi myaka irindwi iri imbere twayitangiye kabaye! Turanyuramo! Ariko muri bwa bwisanzure, turareba n’indi irenze myinshi, tunahereye kuri ya yindi itanu inshuro ebyiri twashyize mu itegeko nshinga.

Nyabuneka, aho, aho, aho! Ubundi rero dukataze, twikomereze, dukataze mu majyambere kuko tubafite.”

Mu mwaka wa 2015 Abanyarwanda basabye ko itegeko Nshinga ryo muri 2003 rivugururwa kugira ngo hakurwemo ingingo yabuzaga Paul Kagame kongera kwiyamamaza.

Mu gihundura iryo tegeko habaye amatora ya referendumu aho Abanyarwanda batoye ko iryo tegeko rihindurwa ku majwi 98%.

Iryo tegeko ryatowe ryemereye Kagame kwiyamamaza mu 2017 kuri manda izamara imyaka irindwi, ariko rinateganya ko ashobora no kongera kwiyamamaza muri manda ebyiri z’imyaka itanu itanu nyuma ya 2024.

Senateri Makuza, wigeze kuba Minisitiri w’intebe mu Rwanda, yifuje ko Perezida Kagame yakomeza kuyobora muri izo manda zose.

Yemeza ko Kagame adafite undi wamusimbura muri iki gihe kuko kuva mu 1994 yagaragaje ko ari umuyobozi w’ikirenga waruse abandi.

Ahamya ko yaranzwe no kutiharira, kutarobanura, akarangwa kandi no guha buri Munyarwanda umwanya wo gutanga umusanzu mu kubaka igihugu.

Paul Kagame ubwo yafataga ijambo yagarutse ku byo Senateri Makuza yari amaze kuvuga maze avuga ko ari ngombwa kubanza gutegereza ibizava mu matora ateganyijwe ku itariki ya 04 Kanama 2017.

Agira ati "Tube turetse turebe itariki 04 z’ukwa munani (2017) n’imyaka irindwi iri imbere, tuzaba tureba ibyo (Senateri) Makuza yavugaga."

Yabitangaje ubwo yiyamamarizaga mu Karere ka Rusizi kuri uyu wa gatanu tariki ya 28 Nyakanga 2017.

Paul Kagame yavuze ko igihe Abanyarwanda bazaba batora umukandida wa FPR-Inkotanyi, Paul Kagame bagomba kuzirikana ko batoye iterambere.

Agira ati “Uzaba atera igikumwe, usibye kuba azaba agitera iruhande rw’igipfunsi (ikirango cya FPR-Inkotanyi), icyo gikumwe uzaba ugitera ushaka amajyambere, ushaka ubumwe, ushaka umutekano, ushaka ko Abanyarwanda bose babona aho bivuriza, ntibicwe n’indwara zitakica abantu.

Kubagezaho amashanyarazi nk’uko byatangiye turabyifuza! Turashaka ko amashanyarazi agera muri buri muryango. Kandi ibyo mbabwira ni ukuri ntabwo ari ibyo mbasabisha amajwi, ndavuga ibyo jye namwe tuzakora, tukigezaho.”

Kagame yavuze ko politiki ya FPR-Inkotanyi ari iyo kubaka igihugu giha amahirwe buri Munyarwanda wese, ntawe usigaye inyuma kandi buri wese abigizemo uruhare.

Kagame yavuze kandi ko,azateza imbere ubukerarugendo ahitwa mu Mashyuza hari amashyuza menshi ashobora no kubyara amashanyarazi.

Umudepite Bamporiki Edouard, ukomoka muri Rusizi yavuze ko muri ako karere bahoze mu bukene no mu bwigunge, badafite imihanda n’amashanyarazi ariko ubu hakaba harateye imbere.

Umuhinzi usarura Kawa ye

Yabitangaje ubwo yiyamamarizaga mu Karere ka Karongi ku wa kane tariki ya 27 Nyakanga 2017.

Ubucuruzi bwa kawa busanzwe bwinjiriza abahinzi amafaranga make kuko bayigurisha ari ibitumbwe, bakayigeza ku mashini ziyitonora ubundi bakajya kugurishwa mu mahanga.

Iyo Kawa igaruka mu Rwanda itunganyije neza ubundi ba bahinzi n’abandi bayikunda bagatanga akayabo bongera kuyigura ngo bajye kuyinywaho.

Paul Kagame, nubwo ateruye ngo avuge ko muri Karongi hazubakwa uruganda rutunganya Kawa, yavuze ko Kawa ihera izajya itunganywa kuva isaruwe kugeza ku rwego rwo kunyobwa.

Agira ati “Ntabwo ari ugutonora gusa tuzagarukiraho. No kuyitunganya kugeza hahandi h’agaciro ko hejuru.”

Akomeza avuga ko mu Rwanda hari abatangiye kuyitunganya. Aha byumvikana ko yavugaga uruganda rumwe rutunganya Kawa rwafunguwe ku itariki ya 06 Werurwe 2015, ruherereye i Gikondo mu Mujyi wa Kigali.

Imibare igaragaza ko mu mwaka wa 2014 igihugu cy’Ubudage cyaguze mu Rwanda Ikawa ya miliyari imwe na miliyoni 800 z’Amadolari y’Amerika ($). Abadage bayitunganyije neza ubundi bayishyira ku isoko bayigurisha miliyari zisaga 3 z’Amadorari.

Mu mwaka wa 2011 Ubudage bwari bwaguze Ikawa itonoye kuri miliyari 2.3 z’Amadorari , bumaze kuyitunganya buyigarura ku isoko buyigurisha miliyari 3.7 z’Amadorari. Ibi bivuze ko hari amafaranga menshi abahinzi bahomba agatangwa mu mahanga.

Mu mwaka wa 2015 u Rwanda rwinjije miliyoni 75 z’Amadorari yavuye muri toni ibihumbi 26 za Kawa itonoye. Muri 2014 rwari rwinjije miliyoni 59 z’Amadorari, naho mu 2013 zari miliyoni 55 z’Amadorari.

Kagame yabwiye Abanya-Karongi ko Kawa izarushaho guhabwa agaciro

Ibyo bigaragaza ko muri Karongi haramutse hubatswe urwo ruganda rutunganya Kawa ayo mafaranga menshi u Rwanda rutanga mu mahanga yaguma mu bahinzi ba Kawa. Mu Rwanda hose habarurwa abahinzi ba Kawa ibihumbi 355.

Mu gace ka Karongi Kagame yiyamamarijemo, ni agace k’imisozi miremire kera Ikawa n’icyayi byinshi.

Yahiyamamarije mu gihe hatangiye no kubakwa uruganda runini ruzatunganya icyayi.

Uko kwiyamamaza kandi kwahuriranye no kuba hari kuzura umuhanda wa kaburimbo uzahuza uturere twose dukora ku Kiyaga cya Kivu, umuhanda wiswe uwa Kivu Belt ugamije koroshya ubuhahirane hagati y’abaturiye icyo kiyaga n’ahandi mu gihugu.

Aho i Rubavu kandida Kagame yahahuriye n’abamushyigikiye basaga ibihumbi 300, haba aha mbere agize abaturage benshi baje kumushyigikira no kumwamamaza.

Mu ndirimbo abashyigikiye Paul Kagame baririmbaga bamwamamaza bageze aho baririmba indirimbo izwi mu nsengero zimwe ivugwamo ngo “… nta ntambara yantera ubwoba…”

Ubwo yafataga ijambo, Kagame yaberetse ko yabumvise asubiramo agira ati “Nanjye mbafite mungana mutyo nta ntambara yantera ubwoba, twese hamwe nta rugamba tutatsinda.”

Perezida Kagame yavuze ko ari kwiyamamaza ngo bazamutore na we abone uko akomeza gushyira mu bikorwa politiki ya FPR Inkotanyi ishingiye k’ubumwe, amahoro, amajyambere, umutekano.

Kwiyamamaza ku bakandida bose bisigaje iminsi irindwi, umukandida Kagame wa FPR akaba asigaje kwiyamamariza mu ntara y’Iburengerazuba no mu karere ka Gasabo mu mujyi wa Kigali.

Dr. Pierre Damien Habumuremyi yemeje ko abanya-Musanze bakunda FPR-Inkotanyi

Dr Pierre Damien Habumuremyi, wigeze kuba Minisitiri w’intebe w’u Rwanda, ubu akaba ayobora w’urwego rw’Igihugu rushinzwe Intwari z’Igihugu, Imidari n’Impeta z’Ishimwe, yabitangaje ubwo umukandida wa FPR-Inkotanyi, Paul Kagame yiyamamarizaga mu Karere ka Musanze.

Uwo muyobozi uvuka i Musanze, yavuze ko abo muri ako karere bakunda cyane Paul Kagame na FPR, bakaba batamuryarya, bazamutora 100% kuko hari byinshi yabagejejeho.

Agira ati “Nyakubahwa Chairman, mwageze iwacu mu majyaruguru! Mwageze iwacu i Musanze! Turakunda kandi iyo twakunze turakunda. Dukunda FPR-Inkotanyi, ariko by’umwihariko turagukunda.”

Akomeza avuga ko mbere y’ubuyobozi bwa Paul Kagame muri ako gace barangwaga n’ubukene, bwagaragariraga ku maso, ariko kuri ubu ngo bakaba bose bacyeye.

Ikindi kandi ngo n’Umujyi wa Musanze ukaba umaze kuba uwa kabiri mu Rwanda ndetse unakomeje gusatira umurwa mukuru Kigali.

Umukandida Paul Kagame wiyamamazaga na we yabwiye abari aho,ko na we abakunda, akaba kandi abasaba ko bamutora kugira ngo muri manda y’imyaka irindwi iri imbere azakomeze kubageza kuri byinshi.

Mu byo Kagame yavuze harimo kuba mu minsi iri imbere abadafite amashanyarazi muri Musanze bose bagiye kuyagezwaho.

Yabasabye ko batangira gutekereza ibirenze kumurikirwa n’amashanyarazi mu nzu, ahubwo bagatekereza iterambere ririmo inganda n’ibindi bikorwa.

Paul Kagame yongeye gushimangira ko urebye ibyo abamushyigikiye bagaragaza aho yiyamamaza no kuba FPR-Inkotanyi ifite andi mashyaka umunani yiyemeje kumushyigikira, byemeza ko ibizava mu matora ari intsinzi ya FPR-Inkotanyi.

Ibyo Dr Habineza yabibwiye abamushyigikiye mu Karere ka Nyaruguru aho yiyamamarizaga kuri uyu wa 23 Nyakanga 2017, abahamiriza ko nibamutora akaba perezida, azareka caguwa zigakomeza kwambarwa.

Nyamara izo caguwa zitwara u Rwanda akayabo ka miliyoni 15 z’Amadorari ya Amerika buri mwaka.

Muri Gashyantare 2016 ibihugu bigize umuryango wa EAC byemeje ko bigiye gutangira gukumira imyambaro ya caguwa yose, ahubwo hakubakwa inganda zikora imyenda mishya kandi ihendutse n’abaturage bagahabwa akazi muri izo nganda.

Icyo cyemezo cyafashwe hamaze kubarurwa ko mu mwaka wa 2015 wonyine abaturage ba EAC bose hamwe ngo batanze akayabo ka miliyari 124 z’Amanyarwanda (miliyoni 151 z’Amadorari) bagura imyambaro ya caguwa.

Ayo mafaranga ngo abatuye EAC bayatanga ku banyamahanga kandi bakayatanga ku myenda ishaje, itaramba rimwe na rimwe ngo iba irimo udukoko dutera indwara zikomoka ku baba barayambaye mbere.

Izo ngamba ariko ngo bwana Habineza ntazishyigikiye kuko we yabwiye abamwumvaga muri Nyaruguru ko nibamutora imyambaro ya caguwa izakomeza gucuruzwa, abaturage bakajya bayigura uko bashaka.

Habineza yagize ati “Abafashe ibyo byemezo ntabwo babajije abaturage, njye nimuntora caguwa zizakomeza kubageraho neza.”

Habineza Frank arifuza kugarura caguwa

Icyakora ntacyo Habineza yavuze ku bashinja izo caguwa ko zitera n’indwara z’uruhu.

Habineza wiyamamarizaga mu gace ka Kibeho ubu kagendwa cyane n’abakora ingendo nyobokamana, ngo natsinda amatora akaba perezida azahubaka ibikorwa by’ubukerarugendo byiza n’imihanda hakomeze hatere imbere kurushaho.

Aho i Kibeho kandi kandida Habineza yahavugiye ko ku buyobozi bwe azateza imbere indimi z’Ikinyarwanda n’Igifaransa zikigishwa kugera no muri za kaminuza.

Ibi Paul Kagame yabivugiye aho yiyamamazaga mu karere ka Kayonza, aho yavuze ko abishingira ku kuba ishyaka akomokamo rya FPR ubwaryo rikomeye cyane, ubu rikaba rishyigikiwe n’andi mashyaka umunani.

Kagame yagize ati “Ukurikije uko twe abanyamuryango ba FPR dusanzwe dukomeye, ubu tukaba kandi twarunze ubumwe tugahuza imbaraga n’andi mashyaka umunani yose, nta shiti ibizava mu matora byararangiye.”

Mu mashyaka umunani yiyemeje gushyigikira umukandida wa FPR Inkotanyi harimo Parti Social Democrate PSD na Parti Liberal PL afatwa nk’akurikira FPR mu kugira abarwanashyaka benshi kandi akaba mu bihe byashize ari nayo yabaga ahanganye na FPR mu guhatanira umwanya wa perezida wa repubulika.

Uretse aya umunani kandi, kuri uyu munsi irindi shyaka rya UDPR ryemereye Paul Kagame kumushyigikira.

Aha muri Kayonza Paul Kagame yakomeje avuga ko nyuma yo gutsinda amatora hazakurikiraho indi myaka irindwi yo gutera imbere, aho ako gace ka Kayonza kazakomeza kubona ibikorwaremezo birimo imihanda, amashuri n’ibindi.

Muri Kayonza Paul Kagame yahiyamamarije ku gicamunsi ari aha kane nyuma y’ahandi hatatu yiyamamarije muri Nyagatare na Gatsibo.

Abandi bandida bahatanira umwanya wa Perezida wa repubulika muri aya matora bo bari biyamamarije mu ntara y’Amajyepfo.

Dr Habineza Frank wo mu ishyaka rya democratic Green Party of Rwanda yiyamamarije mu Karere ka Nyamagabe na Nyanza, naho Mpayimana Philippe wiyamamaza nk’umukandida wigenga yiyamamariza mu Karere ka Kamonyi asoreza mu mujyi wa Kigali, Kimisagara muri Nyarugenge.

Ibi byagarutsweho mu gikorwa cyo kwamamaza umukandida wa FPR Inkotanyi Paul Kagame i Gatunda mu karere ka Nyagatare mu gitondo cyo kuwa 22 Nyakanga 2017.

Abamwamamaza bagarutse ku miterere yaranze ako gace mbere y’uko Paul Kagame atangira kuyobora u Rwanda, igice kinini kingana na ¾ by’ubuso bw’ako karere cyari pariki y’Akagera, abahatuye babayeho muri nzapfa nzakira kuko inyamaswa zabahohoteraga zibasanze mu nzu zabo.

Muri iki gihe ariko, iyo pariki y’Akagera yagabanyijwemo igice kinini cyahawe abaturage ngo bagituremo bahakorere ibikorwa by’iterambere.

Ahasigaye harazitiwe ku buryo bugezweho butuma inyamaswa zo muri pariki zitagihohotera abaturage nk’uko byemejwe na madamu Uwamariya Odetta wamamazaga Paul Kagame akaba yaranabaye umuyobozi w’iyo ntara.

Paul Kagame wiyamamaza,we yibukije abashyigikiye FPR ndetse n’abandi bazitabira amatora bose ko ubuzima bwiza n’iterambere birangwa muri Nyagatare byose abizi kandi yabigizemo uruhare we bwite n’umuryango wa FPR Inkotanyi ayoboye.

Kagame ati“Aha Nyagatare twarahabaye, twaraharwaniye mu rugamba rwo kubohora igihugu, twarahatsindiye tunesha ubuyobozi bubi bw’ingoma yateguye Jenoside, nyuma yo gutsinda urugamba turahubaka ubu haratera imbere kandi nidukomeza gufatanya tuzakomeza kuhubaka no kuhateza imbere.”

Paul Kagame yizeje abazitabira amatora bo muri ako gace ko azi neza ibibazo byaho, abizeza ko azabanza kuhageza amazi meza.

Abaharanira Ubumwe na Demukarasi bemereye Kagame amajwi ibihumbi 900

Muri icyo gikorwa abo mu ishyaka rya UDPR riharanira Ubumwe bw’Abanyarwanda na Demukarasi bavuze ibigwi bashima Kagame maze bamwizeza ko bazanakora ibishoboka byose, bakamutora ku bwinshi.

Bwana Pie Nizeyimana uyobora iryo shyaka yagize ati “Kuva ishyaka ryacu ryashingwa mu 1991, twakomeje guhuza imyumvire ku bitekerezo byiza byarangaga FPR Inkotanyi.

Kuva icyo gihe ntiturahindura uwo murongo kandi na FPR ntiradutenguha. Ibyo tuyishima ni byinshi birimo imiyoborere myiza, kwimakaza Ubumwe bw’Abanyarwanda ubu bigeze kuri 92.5%.”

Ibyo ni bimwe yahereyeho avuga ko ishyaka rya UDPR ayoboye rizakora ku buryo ryamamaza Paul Kagame akazabona amajwi arenga ibihumbi 900 azaturuka ku bayoboke ba UDPR bonyine, bataretse no kumushakira amajwi mu bandi.

Aho i Gatunda, umukandida wa FPR yiyamamarizaga ni hamwe mu hantu habiri Paul Kagame yiyamamariza mu karere ka Nyagatare ku munsi wa karindwi, aho aza kuva ajya kwiyamamaza mu karere ka Gatsibo mu ntara y’Iburasirazuba.

Muri iyo ntara y’Iburasirazuba kandi Paul Kagame azakomeza kwiyamamaza mu turere twa Kayonza, Kirehe, Ngoma na Rwamagana ku munsi w’ejo kuwa 23 Kanama 2017.

Dr Frank Habineza umukandida w’ishyaka Democratic Green Party of Rwanda

Izi mpanuka zabaye mu gitondo, imodoka ebyiri zari zitwaye abanyamuryango zaguye, abantu 31 barakomereka.

Imwe muri izo modoka yo mu bwoko bwa Toyota Land Cruiser V8 yari itwaye visi perezida wa FPR bwana Bazivamo Christophe yarenze umuhanda ahitwa mu Rukomo muri Nyagatare igwa mu mukingo, ariko abari muri iyi modoka ntacyo babaye.

Indi modoka nini ya Bus yari itwaye abandi bayoboke ba FPR yaguye, abantu 31 barakomereka, barimo batandatu bakomeretse cyane, ubu bakaba bari kuvurirwa mu bitaro nk’uko umuvugizi wa polisi (traffic Police) yabitangarije Kigali Today.

Amaze kumenya ayo makuru, Frank Habineza wari wazindutse ajya kwiyamamaza mu Karere ka Nyamagabe, yatangaje ko yababajwe n’iyo mpanuka, avuga ko yihanganishije abakomerekeye muri iyo mpanuka bose kandi akaba abifuriza koroherwa vuba.

Abo bakoze impanuka, ni bamwe mu bashyigikiye FPR Inkotanyi bazindutse bajya mu Ntara y’Iburasirazuba aho FPR Inkotanyi biyamamarije mu turere twa Nyagatare, Gatsibo na Kayonza.

Biteganyijwe ko ku cyumweru tariki ya 23 Nyakanga 2017, Paul Kagame umukandida wa FPR aziyamamariza mu turere twa Kirehe, Ngoma na Rwamagana.

Dr Frank Habineza watanzwe n’ishyaka abereye perezida rya Democratic Green Party of Rwanda we ari kwiyamamaza mu turere twa Nyamagabe na Nyanza two mu Ntara y’Amajyepfo.

Abanyamadini bari kuganirizwa ku gutanga imisoro

Babitangaje ubwo ikigo cy’igihugu cy’imisoro n’amahoro (RRA) cyagiranaga ibiganiro n’abanyamadini ku ruhare rwabo mu kubaka umuco wo gusora mu Rwanda, ku wa kabiri tariki 13 Kamena 2017.

Nyuma yo kumvikana n’abahagarariye amadini ku kamaro k’imisoro mu kubaka ibihugu byose ku isi, RRA yabasabye ko bakwemera ikazajya itanga ibiganiro mu gihe cy’inyigisho mu nsengero zabo.

Bamwe babyemeye banasaba ko hategurwa “Videos” zizajya zerekanwa mu nsengero mu gihe cy’inyigisho ndetse ayo mashusho akazajya yunganira ubutumwa bushishikariza abanyamadini gusora; nk’uko Pasteur Straton, wari uhagarariye idini rya “Eglise Vivante” yabivuze.

Pastor Theresa Mukamakuza wo muri EPR yavuze ko nta kizabuza idini rye kubwiriza abayoboke baryo gutanga imisoro neza kandi ngo bazabyumva.

Agira ati “Dusanzwe twigisha abayoboke bacu ko gusambana ari bibi binanduza indwara bakabireka, twabigisha kwirinda Malaria bakabyumva.

Rwose na RRA ikomeze ijye yongerera umwanya abanyamadini ibanyuzemo ubutumwa nk’ubu bwiza twese tuzashishikaze abayoboke ko gutanga imisoro neza byubaka igihugu cyacu bikanaduteza imbere kandi nta shiti abakirisitu bazabyumva banabyubahirize.”

Mugiraneza Robert wari uhagarariye idini rya Anglican we ati “Bibiliya irabitubwira ngo ibya Kayizari mubihe Kayizari kandi n’abasoresha mubahe imisoro. Tuzakomeza rero kwibutsa abakirisitu ko kudatanga imisoro ari icyaha kandi bakwiye kubikomeza.”

Umuvugizi wa ADEPR, Karuranga Ephrem yahamagariye abarokore bo muri ADEPR kwibuka ko nta cyaha gito byose ari ibyaha ku Mana.

Yahereye aho abashishikariza kujya batanga imisoro batayigabanije kuko ari bwo bazaba babaye abayoboke beza bakora ugushaka kw’Imana.

Ubwoko bw’imisoro ya RRA mu Rwanda

Padiri Gasana Vincent wari uhagarariye umuvugizi wa Kiliziya Gatulika yavuze ko ubwo butumwa bazabubwira abakiristu ariko ngo ntibabutambutsa mu isengesho rya misa ntagatifu.

Agira ati “Kiliziya izashaka uburyo bwihariye bwo gushishikariza abayoboke gusora mu mbuga zitandukanye bahuriramo zitari misa kandi bizashoboka.”

Aba banyamadini baboneyeho gusaba RRA ko abakozi bayo bareka kujya bitwara nabi ku basoreshwa babahutaza. Basaba ko bajya babaganiriza, bakabubaha nk’abenegihugu kandi bafite inshingano zo kubaka igihugu.

Minisiteri y’imari mu Rwanda yatangaje ko mu mwaka w’ingengo y’imari utaha wa 2017/2018 hagomba kuzinjizwa imisoro ingana na miliyari 1,200RWf na miliyoni 300RWf.

Ruganintwari Pascal, Komiseri mukuru wungirije wa RRA

RRA ivuga ko hari ibyiciro by’abagomba gusora bagikwepa imisoro, bakaba ngo bakoresha amayeri menshi arimo gukoresha imibare itariyo mu misoro hagamijwe kugabanya umusoro basabwa.

Bene nkabo kandi ngo bakoresha inyandiko mpimbano, abadakoresha n’abakoresha nabi imashini ya EBM itanga fagitire, abanyura mu bikorwa bya magendu, abacuruza batanditse mu misoro (informal sector) hakiyongeraho n’umuco wo gutanga umusoro ngo ukiri hasi mu Banyarwanda.

Minisitiri Claver Gatete ubwo yajyaga gutangariza Abanyarwanda ingengo y’imari y’umwaka wa 2017/2018

Bigaragarira mu ngengo y’imari ingana na miliyari ibihumbi 2094RWf na miliyoni 910RWf, Minisitiri w’imari n’igenamigambi Gatete Claver yagejeje ku Banyarwanda mu nteko ishinga amategeko kuri uyu wa kane tariki ya 08 Kamena 2017.

Isukari yasoreshwaga 100% z’amafaranga yabaga yaguzwe, ubu izajya isoreshwa 25%, umuceri wasoreshwaga 75% usoreshwe 45% naho ingano zakurirweho imisoro yose mu gihe zasoreshwaga 35%.

Ibi bishobora kuzatuma abacuruza ibyo biribwa nabo bagabanya igiciro kuko batazajya babitangaho imisoro nk’iyo batangaga mu mwaka wa 2016/17 uri kurangira.

Minisitiri Gatete yavuze kandi ko amafaranga yagenewe urwego rw’ubuhinzi angana na miliyari 110RWf na miliyoni 500RWf azakoreshwa cyane cyane mu guteza imbere ubuhinzi bw’indabyo n’imboga n’ubworozi bugamije gutanga inyama nyinshi.

Byose kandi bizashakirwa amasoko mu gihugu imbere no mu mahanga. Bikaba bivuze ko abahinzi-borozi bazaba babifite ku bwinshi bazagerwaho n’ayo mafaranga.

Muri rusange, ingengo y’imari y’u Rwanda yazamutseho miliyari 140RWf, iva kuri miliyari 1954.2 zakoreshejwe mu 2016/17 igera kuri miliyari 2094.9 ziteganirijwe 2017/18.

Abadepite bemeje ingengo y’imari y’umwaka wa 2017/2018

U Rwanda rurateganya ko agera kuri 66% y’aya mafaranga yose azatangwa n’abatuye imbere mu gihugu.

Inkunga u Rwanda rutegereje ku mahanga ingana na 17% naho 27% akazaturuka mu nguzanyo.

Kubera ibikorwa by’amatora n’imishahara y’abakozi bashya bazabona akazi ka leta mu mwaka wa 2018, bizatuma amafaranga menshi arenga kimwe cya kabiri (54%) akoreshwa mu bikorwa bisanzwe, bitarimo imishinga y’iterambere.

Ibikorwa bindi bizajyamo amafaranga mu Rwanda mu mwaka wa 2017/18 birimo kongera umusaruro w’ibicuruzwa byoherezwa mu mahanga byagenewe agera kuri miliyari 52.9RWf.

Hiyongeraho ingufu zitanga amashanyarazi zagenewe miliyari 84RWf, gutwara abantu n’ibintu byagenewe miliyari 248.5RWf, gukwirakwiza amazi meza byagenewe miliyari 30.4RWf, ubuvuzi no kwirinda indwara byagenewe miliyari 193.6RWf naho uburezi buzatwara angana na miliyari 248.5RWf.

Abadepite mu nteko ishingamategeko y’u Rwanda baganira ku mushinga w’iryo tegeko rishya

Tariki ya 05 Kamena 2017 nibwo ibi byamenyekanye ubwo Guverinoma yagezaga ku Badepite umushinga w’itegeko rigena uko byazakorwa,ibasaba kuryemeza rikazatangira gukurikizwa mu minsi iri imbere.

Uyu mushinga w’itegeko ugamije kuvugurura itegeko No 35/2012 ryari risanzweho.

Iryo risanzwe rikaba rinengwa kuba ryateganyaga kurinda uwatanze amakuru gusa ariko ritavuga uko arindirwa umutekano n’ihohoterwa igihe amenyekanye ndetse n’uko uwatanze amakuru ashimirwa.

Umushinga w’itegeko rishya ugaragaza ko uzajya atungira leta agatoki akayiha amakuru ku bashaka gukora ibyaha by’iterabwoba, ibya ruswa, iby’umutekano no guhutaza ubukungu bw’igihugu n’ibindi bizarebwa muri iryo tegeko, azajya acungirwa umutekano kandi anahembwe.

Abadepite benshi ariko bagaragaje impungenge kuri iryo tegeko, abenshi bahuriza ku kuba rigiye guha urwaho abashaka kubeshya bagamije kwishakira indonke.

Abadepite bagaragaza ko bamwe mu baturage bashobora kuzajya babiheraho bakajya babeshyera bagenzi babo mu manzaganya kandi nyamara igihe babeshye bakanabihemberwa,nk’uko Depite Edouard Bamporiki abisobanura.

Agira ati “Mwo kabyara mwe ko muri twese ntawe utarabeshyerwa, ubu iri tegeko noneho ntirishaka kongera ababeshyi kandi noneho bakajya banabihemberwa?

Umva amajwi y’impaka z’abadepite

Ko Abanyarwanda basanzwe bazi gushimira uwitwara neza agafatwa nk’inyangamugayo, abandi tukabafata nk’intwari, abandi ubu ari abarinzi b’igihango kandi ko iryo shimwe riruta ayandi, kuki ubu noneho leta ishaka no kuzajya itanga amafaranga kandi ubundi kugaragaza amakuru afitiye igihugu akamaro ari inshingano za twese abaturage?”

Depite Jean Marie Vianney Gatabazi na we yunzemo asaba ko iryo tegeko ryagenzwa buhoro kuko nta mpamvu abona yo guhemba umuntu watanze amakuru yo kurengera igihugu cye.

Agira ati “Bisanzwe ari inshingano za buri wese muri twe abaturage gutanga amakuru agamije kurinda igihugu ibyago byose.

Nta mpamvu rwose yo kugenera agahimbazamusyi abantu batanga amakuru, ahubwo ibi bizatuma abantu benshi batangira kujya bahimbahimba ibinyoma banabeshye bashaka ayo mafaranga.”

Depite Theobald Mporanyi we yasabye ko iryo tegeko ryakwitonderwa kuko ngo ritanasobanura umubare w’agahimbazamusyi uwatanze amakuru azajya ahabwa, akaba we yumva byazajya bibamo akarengane no gutonesha.

Agira ati “Nonese koko ubu hazajya hemezwa ko kanaka ahabwa amashimo hagendewe ku ki? Ni inde uzajya wemeza ko amakuru runaka yatanzwe ari meza kurusha ayandi, ko akwiye guhembwa menshi kurusha ayatanzwe na kanaka wundi?

Ubundi se iyo ngengo y’imari yo guhemba abatanze amakuru izajya igenwa ite ko ntawe ushobora guteganya ngo mu mwaka wose hazatangwa amakuru angana atya?”

Hari n’abadepite babajije niba inzego z’umutekano n’iperereza zarananiwe kuko ari zo zisanzwe zifite inshingano zo kumenya amakuru zikanabiherwa amafaranga mu ngengo y’imari.

Mu Nteko yose habonetse Abadepite batatu gusa bashyigikira iryo tegeko mu buryo bweruye, aho ba Bepite Juliana Kantengwa, Théoneste Karenzi na John Ruku Rwabyoma bavuze ko bikwiye gutegura uko utanze amakuru yajya agenerwa ibihembo.

Umunyamabanga wa Leta muri Minisiteri y’Ubutabera, Evode Uwizeyimana niwe wari uhagarariye Guverinoma mu gusobanura iryo tegeko.

Me Uwizeyimana Evode Umunyamabanga wa Leta muri Minisiteri y’Ubutabera

Yavuze ko niriramuka ryemejwe ngo Perezida w’u Rwanda azashyiraho irindi tegeko rigena uko uwatanze amakuru ahembwa, uko arindirwa umutekano ndetse n’abagize umuryango we ba hafi bose bashobora guhohoterwa bakazajya barindirwa umutekano.

N’ubwo Abadepite benshi bagaragaje impungenge mu kujya impaka kuri iri tegeko, mu gihe cyo gutora ireme n’ishingiro ry’iryo tegeko abagera kuri 44 baje gutora bemeza ko iryo tegeko rwakwakirwa rikazigwaho neza.

Abandi babiri bahakana cyane ko iryo tegeko ryahabwa agaciro, abandi 14 barifata banga kuvuga niba bumva iryo tegeko rifite ireme cyangwa nta reme rifite.

Uyu mushinga w’itegeko uteganya uko uwatanze amakuru arindwa guhohoterwa iyo amenyekanye, rikavuga ko ahabwa ibihembo, kuba uwakwakira amakuru ayatangaje na we yabihanirwa n’ibindi.

Abahagarariye ibitangazamakuru bitandukanye basabye abasenateri kubakorera ubuvugizi

Ibi abahagarariye ibitangazamakuru babisabye Abasenateri ubwo bahuraga nabo ku itariki ya 29 Gicurasi 2017, mu Nteko ishinga amategeko ngo baganire ku mahame y’imiyoborere myiza no gusaranganya ubutegetsi agenwa n’ingingo ya 10 y’Itegeko Nshinga.

Abasenateri n’Abanyamakuru baganiriye ku ngingo nyinshi zigamije gushaka umuti w’ibibazo binyuze mu nzira y’ibiganiro n’ubwumvikane busesuye hagamijwe kwimakaza demokarasi.

Banunguranye ibitekerezo ku buryo bwateza imbere imibereho y’itangazamakuru n’iy’ubuzima busanzwe bw’igihugu mu byiciro byose.

Abanyamkuru bagaragaje ko baterwa ipfunwe no kumva hari abahora bavuga ngo itangazamakuru ryagize uruhare muri Jenoside na nyuma y’imyaka 23 ishize Jenoside ihagaritswe kandi ubu na Leta, igisirikari n’abapolisi batakireberwa mu ndorerwamo y’abakoze Jenoside.

Mazimpaka Magnus uyobora igitangazamakuru cya Taarifa yagaragaje ipfunwe abanyamakuru bahorana.

Agira ati “Hahoraho ipfunwe ryo guhora twumva ngo itangazamakuru ryagize uruhare muri Jenoside. Ibyo bintu byanze kutuvaho twe abanyamakuru ndetse n’umwuga wacu w’itangazamakuru muri rusange kandi mu zindi nzego ntibikivugwa bityo.

Iyo bigeze ku itangazamakuru twumva benshi bavuga ngo itangazamakuru ryagize uruhare muri Jenoside, bikaba byarabaye nk’inkende ihora ku rutugu rw’abanyamakuru igenda ibashwaratura buri gihe.”

Abandi Banyamakuru bagenzi be bakomeje kugaragaza ko ubu itangazamakuru ryiyubatse ndetse rikaba rinafite uruhare rukomeye mu kubaka igihugu kuko rinyuzwamo ubutumwa bwiza na gahunda za leta zigamije iterambere n’ubumwe n’ubwiyunge.

Niho bahera basaba ko batakomeza kureberwa muri iyo ndorerwamo y’abagize uruhare muri Jenoside yakorewe Abatutsi.

Abasenateri bemereye itangazamakuru ko bazarikorera ubuvugizi

Abasenateri bavuze ko bidakwiye gukomeza kureba umwuga w’itangazamakuru mu ndorerwamo ya Jenoside, nk’uko Senateri Sindikubwabo Jean Nepomuscene ukuriye Komisiyo ya Politiki n’Imiyoborere myiza abivuga.

Agira ati “Inzego zagize uruhare muri Jenoside ni nyinshi ariko mu kubaka ubumwe bw’Abanyarwanda n’iterambere igihugu kimaze kugeraho, mu bwuzuzanye, zose ni gahunda itangazamakuru rigiramo uruhare rugaragara kandi naryo rizakomeze kugira uruhare mu mikorere myiza.

Ubu rwose nta muntu ukwiye kuba akireba itangazamakuru ry’u Rwanda mu ndorerwamo y’abanyamakuru nka ba Kantano na Ngeze Hassan.”

Muri ibi biganiro kandi Abanyamakuru n’Abasenateri bagiye inama ku ngingo nyinshi zirimo imiyoborere myiza, mu iterambere n’ishoramari mu Rwanda, by’umwihariko kubona amikoro mu itangazamakuru.

Baganiriye kandi ku buryo hashyirwaho umurongo mwiza itangazamakuru ryakoreramo, gutara no gutangaza amakuru abaturage bo mu Rwanda bumva ko ari ayabo kandi abafitiye akamaro.

Abahagarariye ibitangazamkuru bemereye inteko ishinga amategeko gukomeza gukora umwuga wabo uko bikwiye

Muri ibyo biganiro, abagize Inteko ishinga amategeko bemereye Abanyamakuru ko bazabakorera ubuvugizi bwa ngombwa.

Abanyamakuru na bo biyemeza gukomeza gukora umwuga wabo mu buryo bwubahiriza amategeko kandi bufasha abaturage gukomeza kujijuka bamenya amakuru nyayo ku gihugu baharanira iterambere rusange.

Umutwe wa Sena mu Nteko ishinga amategeko mu Rwanda ni wo wasabye ko wahura n’Abanyamakuru ngo baganire ku mahame remezo akubiye mu ngingo ya 10 y’itegeko nshinga, igena ibijyanye n’imiyoborere myiza no kwishakamo ibisubizo.

Mu mezi icumi irimbi rya Rusororo rizaba ryuzuye

Nkusi Anselme ukuriye ikigo cy’ubucuruzi CONS TECH ltd cyahawe gucunga iryo rimbi n’akarere ka Gasabo riherereyemo, yabwiye Kigali Today ko buri minsi ibiri muri iryo rimbi hashyingurwamo byibura abantu batatu.

Aha bakaba abantu 45 baba bahashyingurwa buri kwezi, bashyingurwa ku butaka burenga hegitari imwe n’igice.

Akarere ka Gasabo ko kavuga ko mu kwezi kwa Nyakanga kazatangira kwimura abatuye mu mbibi z’iryo rimbi, ubundi butaka bungana na hegitari eshanu bukazongerwa ku irimbi rya Rusororo.

Umuyobozi w’akarere ka Gasabo wunirije ushinzwe imari n’ubukungu, bwana Mberabahizi Raymond Chrétien yemereye Kigali Today ko koko irimbi rya Rusororo riri kuzura, ariko ngo akarere kafashe ingamba zo kuryagura.

Yagize ati “Ni koko buri munsi hari abavandimwe bacu bakomeza kuhashyingurwa hakagenda huzura ariko kuva muri Nyakanga twateguye miliyoni 350 z’amafaranga y’u Rwanda azakoreshwa mu kwimura abari batuye hafi y’irimbi, ubutaka bazimukaho tukazabwongera ku buso bw’irimbi.”

Uyu muyobozi mu karere ka Gasabo yavuze ariko ko muri ako karere hari n’andi marimbi mato mato hirya no hino mu mirenge, kuko n’ubusanzwe ngo abantu bapfa mu mbibi z’umujyi wa Kigali bose badashobora gukwirwa mu irimbi rya Rusororo.

Abashyingurwa muri iryo rimbi rya Rusororo bashyirwa mu byiciro bitatu, bijyanye n’ubushobozi bwa buri wese. Hari imva zifite ikiguzi cy’amafaranga y’u Rwanda ibihumbi Magana atandatu, izindi ibihumbi Magana abiri, hakaba n’icyiciro gishyingurwamo abishyuriwe ibihumbi 15.

Mu kwezi kwa Nyakanga 2015 u Rwanda rwemeje itegeko ryemerera ababishaka kujya bashyingura abantu babo batwitswe, ivu rivuye mu mirambo yabo rikaba ryabikwa ahabugenewe.

Uko iryo tegeko No 001/MINISPOC/2015 ribiteganya, umurambo utwitswe uvamo ivu rishobora kujya mu gikoresho gito, kitasaba umwanya munini wo gushyingurwamo.

Nkusi Anselme ukuriye ikigo CONS TECH ltd gishinzwe irimbi rya Rusororo ariko yabwiye Kigali Today ko kuva bahabwa gucunga iryo rimbi ngo nta muturage n’umwe urasaba ko umurambo w’abe bashyingurwa watwikwa.

Yavuze ariko ko bo biteguye, uwashaka guhabwa iyo serivisi wese bamufasha umurambo ugatwikwa agahabwa ivu akarishyingura mu buryo yifuza.

Ingingo ya 2 y’itegeko No 001/MINISPOC/2015 rigena ibyo gutwika imirambo ivuga ko gusaba “…ko umurambo utwikwa bikorwa n’umuntu ku giti cye cyangwa undi yabihereye uburenganzira mbere y’urupfu.

Ubusabe bukorwa mu nyandiko cyangwa mu mvugo hari abatangabuhamya nibura babiri bafite imyaka y’ubukure. Cyakora, umuyobozi w’Akarere k’aho umurambo uherereye ashobora kwemeza ko umurambo utwikwa igihe nta muntu uwusaba.

Umunyamategeko Laurent Nkongoli ukorera Komisiyo ishinzwe uburenganzira bw’ikiremwamuntu y’u Rwanda yabwiye Kigali Today ko n’ubwo u Rwanda rwemeje iryo tegeko ngo byakozwe n’abashingamategeko ariko batabajije abaturage icyo babivugaho.

Aha akemeza ko biri no mu bituma kugeza ubu nta muturage urasaba ko umurambo we bwite uzatwikwa, ndetse n’abandi bantu ngo bakaba batarasaba ko uwabo bagiye gushyingura yashyingurwa atwitswe.

Perezida wa Komisiyo y’amatora mu Rwanda, Professor Kalisa Mbanda n’Umunyamabanga Nshingwabikorwa wayo, Munyaneza Charles mu kiganiro n’abanyamakuru

Byatangajwe na Perezida wa Komisiyo y’amatora mu Rwanda, Professor Kalisa Mbanda ubwo yahuraga n’ibitangazamakuru bikorera mu Rwanda kuri uyu wa kane tariki ya 25 Gicurasi 2017.

Abanyamakuru babajije perezida wa Komisiyo y’amatora niba byemewe gutanga amafaranga kuri abo bashaka ababasinyira maze abasubiza ko bitemewe.

Agira ati “Abo bantu twabahaye amabwiriza asobanutse ababuza gutanga amafaranga ku bo bashaka ko babasinyira kandi turizera ko inzego za polisi n’abashinzwe kurwanya ruswa bose babakurikirana ngo bamenye ko badakora ayo makosa.

Uwatanga ayo mafaranga kimwe n’uwayakira bose baba bijanditse mu byaha bya ruswa kandi amategeko yabahana.”

Mu kwitegura aya matora ngo abashaka kwiyamamaza ku giti cyabo basabwa kuba basinyiwe n’Abanyarwanda 600, barimo byibura 12 bakomoka muri buri karere k’u Rwanda.

Kandi ngo abantu batatu bamaze gusaba uruhusa rwo gutangira gushaka ababasinyira hirya no hino mu gihugu. Komisiyo y’amatora rero ikaba iburira abaturage bose ko bakwiye kwirinda ayo mafaranga.

Amategeko y’u Rwanda asanzwe ateganya ko uhamwe n’ibyaha byo gutanga cyangwa kwakira ruswa ahanishwa igihano cyo gufungwa hagati y’imyaka ibiri n’itanu, akanacibwa amafaranga akubye inshuro kuva kuri ebyiri kugera ku icumi agaciro k’ibyatanzwe muri ruswa.

Muri icyo kiganiro n’abanyamakuru kandi umuyobozi wa Komisiyo y’amatora wari kumwe n’Umunyamabanga Nshingwabikorwa wayo, Munyaneza Charles basobanuye aho imyiteguro igeze.

Muri rusange ngo ibikorwa byose bizatuma amatora ashoboka biri kugenda neza kandi bigeze ku gipimo cya 90% mu gihe hasigaye iminsi 75 ngo igikorwa nyirizina kibe.

Munyaneza agira ati “Amafaranga azakoreshwa twarayabonye, ubu dufite miliyari eshanu na miliyoni 200RWf, kandi Leta izatwongera andi miliyari imwe na miliyoni 400RWf mu mwaka w’ingengo y’imari uzatangira mu kwezi kwa Nyakanga.”

Abanyamkuru bari bitabiriye ikiganiro bagiranye na Komisiyo y’Amatora

Abakandida bose hamwe bazahatana ngo bazaba bamenyekanye tariki ya 07 Nyakanga 2017, nyuma y’icyumweru batangire kwiyamamaza.

Abazaba bujuje ibisabwa baziyamamaza igihe cy’ibyumweru bitatu babisoze tariki ya 03 Kanama 2017 imbere mu Rwanda, naho ku bazaba biyamamaza cyangwa bafite ababamamaza mu bihugu byo hanze ahari Abanyarwanda bazatora, bisozwe tariki ya 02 Kanama 2017.

Amatora nyirizina azaba ku matariki ya 03 na 04 Kanama 2017 kandi ngo nibura tariki 04 Kanama 2017, saa cyenda z’amanywa Komisiyo y’Amatora izatangaza ibyavuye mu matora by’agateganyo, hanyuma mu minsi itarenze irindwi hazatangazwe burundu ibizaba byavuye mu matora.

Abaguraga imodoka zakoze, zivuye hanze, bakomeje gucibwa intege n’amategeko mashya yazongereye imisoro.

Kuva tariki 21 Mata 2016, u Rwanda n’ibihugu byo mu karere byashyizeho amabwiriza ategeka gusoresha amafaranga menshi imodoka zimaze igihe kinini zikozwe.

Imibare iva mu Kigo cy’Ikihugu gishinzwe imisoro (RRA), ari nacyo kibarura imodoka yose iri ku butaka bw’u Rwanda, igaragaza ko ubu mu kwezi hinjira imodoka 562 ugereranije na 697 zinjiraga mbere y’uko ayo mabwiriza ashyirwaho.

Aya mabwiriza yemerejwe mu nama y’Abaminisitiri b’ubucuruzi bo mu bihugu by’Umuryango w’Afurika y’Iburasirazuba (EAC), yateraniye Arusha muri Tanzaniya kuwa 22 Gicurasi 2015.

Imbonerahamwe igaragaza uko imodoka zisoreshwa.

Uko amabwiriza mashya abiteganya ubu, buri modoka ibarirwa imisoro ibanje guhabwa agaciro. Bagendera ku mwaka yakozwemo, kuko imodoka igenda itakaza agaciro uko imara igihe ikozwe, hatarebwe kuba yaba ikora/igenda cyangwa yari ibitse ahantu.

Nk’imodoka ya Carina E yakozwe mu 1997, uruganda ruyigurisha Amadorari ya Amerika ibihumbi 20 ($20,000/ Frw 16,400,000). Ubu amabwiriza mashya avuga ko nyuma y’imyaka 10 iyo modoka yatakaje agaciro ka 80%, ubu isigaranye 3,280,000Frw.

Kuba imaze icyo gihe izacibwa imisoro ingana na 2,624,000Frw. Ibi bizatuma iyo modoka itangwaho amafaranga y’u Rwanda akabakaba miliyoni esheshatu (Frw 5,904,000).

Iyo modoka ibaye yarakozwe mu 2015, itararenza imyaka ibiri, amategeko avuga ko yasoreshwa hagendewe ku guta agaciro kwa 30%.

Ubwo yaba ifite agaciro ka Frw 11,480,000, bayisoresha 3,444,000Frw. Ubwo iyi modoka ikiri nshya yazatangwaho amafaranga 14,924,000Frw. Ibi bivuze ko abagura imodoka zakoze bazitangaho n’amafarannga menshi mu misoro.

Abakurikirana iby’ubu bucuruzi babwiye Kigali Today, ko gufata icyo cyemezo ngo byaba byaratewe n’uko ibihugu bya EAC byabonaga ababituye benshi bagura imodoka zishaje kandi uko gusaza gutuma moteri zazo zikoresha amavuta menshi.

Ayo mavuta kandi akanohereza ibyotsi byinshi mu kirere, ibivugwaho kuba bibangamiye ibidukikije kandi ngo binatera indwara zikomeye n’ibindi bibazo mu mihindagurikire y’ikirere. Ibi byose bikaba bibangamiye ubuzima bw’ikiremwamuntu mu gihe kirambye.

Umugwaneza Lilliane ukora akazi ko gufasha abantu gutumiza imodoka zakoze mu mahanga, yabwiye Kigali Today ko kuva ayo mategeko yashyirwa mu bikorwa abamusabaga kubafasha gutumiza imodoka baragabanutse cyane ku buryo agereranya ku gipimo cya 60%.

Agira ati “Ushaka kugura imodoka itari nshya wese araza akabanza akakubaza uko bazabara imisoro agendeye ku giciro azayigura. Abenshi ubu iyo tubabariye barikanga, abandi bakabyihorera.”

Gilbert Mugabo usanzwe ugura imodoka zakoze akazigurishiriza imbere mu gihugu, avuga ko abaguzi bagabanutse, baza bakareba, bakanazishima ariko abenshi ntibagure.

Ati “Cyera aya mategeko ataratangira nashoboraga kugurisha imodoka nka 25 cyangwa 30 mu cyumweru, ariko ubu rwose nshobora kumara icyumweru ngurishije imodoka eshatu, zaba nyinshi zikaba eshanu gusa.”

Kuba u Rwanda rubarwa mu bihugu bifite umuturage winjiza Amadorari 800 (660,000Frw) ku mwaka, bituma abashobora kugura imodoka zikiri nshya baba bakeya kuko n’ubwo zisoreshwa ku gipimo gito ariko ziba zaguzwe amafaranga menshi.

Uwo niwe mu Pasitoro wo muri Zimbabwe ubwo yari arimo ahamagara Imana ayibaza ibyo akorera uwo mugore umupfukamye imbere

Muri icyo kiganiro yagiranye n’Imana yayibajije icyo agomba gukorera umugore wari upfukamye imbere ye atakamba.

Abari aho bafashe amashusho (video) y’uwo mupasitoro agendagenda mu rusengero yumvikana avuga amagambo ameze nk’ayo mu kiganiro gisanzwe umuntu agirana n’undi kuri telefoni.

Ubwo yakoraga icyo kiganiro abayoboke bo bari batwawe bakurikiye, baririmba banikiriza mu majwi ibyo pasitoro wabo yavugaga.

Ikiganiro cya Sanyangore yumvikanye avuga ati:

–  Hello, ni mu ijuru tuvugana?

–  Uyu mugore uri hano Mana Data uramuntumaho iki?

–  Ahh, ese? Yego, reka mubaze…

Hari n’aho uwo pasitoro Sanyangore yageze yumvikana abaza ngo:

–  “Nonese Mana Data, dukore iki kindi?”

Amashusho yafatiwe muri urwo rusengero agaragaza uwo mugabo avuga amagambo menshi nk’ayo mu kiganiro gisanzwe.

Akagera aho avuga ko Imana imubwiye indwara abana be barwaye, bikarangira avuga ko Imana ngo ihinduye amateka y’uwo mugore.

Amakuru dukesha ikinyamakuru Bulawayo24 avuga ko uwo mupasitoro Sanyangore yatangaje ko afite nimero ya telefoni y’Imana kandi ngo mu minsi ya vuba akaba azayitangariza n’abandi babishaka bose bakaba babasha kwivuganira n’Imana.

Reba iyo Video igaragaza uwo mupasitoro avugana n’Imana kuri telefoni

Fatuma Ndangiza umwe mu bakandida batanzwe na RPF batowe

Aba badepite batowe mu gitondo cyo kuri uyu wa Gatanu tariki ya 19 Gicurasi 2017, bagomba gusimbura bagenzi babo basoje manda muri iyi nteko, barimo bamwe batemerewe gusubira muri iyi nteko kuko basoje manda ebyiri ziteganywa n’amategeko.

Muri aba badepite batowe harimo bane batanzwe n’umuryango wa RPF Inkotanyi, mu ishyaka rya P L riharanira ukwishyira ukizana ndetse na PSD riharanira Demokarasi, hatorwa umukandida umwe umwe kuri buri shyaka.

Muri aya matora kandi batoye abandi bakandida batatu bagomba guhagararira Urubyiruko, Abagore, ndetse n’abagomba guhagararira abafite ubumuga muri EALA.

Oda Gasinzigwa, Martin Ngoga, Rwigema Pierre Celestin, na Fatuma Ndangiza nibo bakandida batanzwe n’Umuryango wa RPF inkotanyi, batorewe guhagararira u Rwanda muri EALA.

Oda Gasinzigwa yatorewe gusubira mu Nteko ya EALA

Muri aya matora Kandi Rutazana Francine ukomoka mu ishyaka riharanira ukwishyira ukizana (PL) niwe watowe, hanatorwa Francois Xavier Kalinda watanzwe n’ishyaka rya PSD riharanira demokarasi.

Francine Uwumukiza niwe watorewe guhagararira Abagore muri iyi nteko, mu bafite ubumuga hatorwa Bahati Alex naho Jean Claude Barimuyabo w’imyaka 27 atorerwa kuuzahagararira urubyiruko.

Martin Ngoga wahoze ari umushinjacyaha mukuru nawe yatorewe gusubira muri iyi Nteko ya EALA

Uwumukiza Francine yatorewe guhagararira Abagore

Jean Claude Barimuyabo niwe watorewe guhagararira Urubyiruko

Aba badepite batorewe manda y’Imyaka itanu yongerwa inshuro imwe, bakazemezwa nk’Abadepite ba EALA nyuma yo kurahirira imbere y’Inteko ishinga amategeko ya EALA.

Iyi nteko ya Kane y’Umuryango wa Afurika y’Uburasirazuba itowe, mu gihe mu minsi ishije EALA yagaragaje imbogamizi y’amikoro adindiza idindiza ibikorwa byayo bya buri munsi.

Buri gihugu kigize umuryango wa Afurika y’Uburasirazuba, gisabwa kuba cyatanze umusanzu wa EALA ungana n’Amadolari ya Amerika 8,378,108 mbere ya tariki 31 z’Ukuboza kwa buri mwaka, kugira ngo ibikorwa bya EALA bibashe gutungana.

Ariko mu Nteko rusange y’uyu muryango iherutse kubera mu Rwanda muri Werurwe 2017, hagaragajwe ko mu Ngengo y’Imali yayo ya 2016-2017, igihugu cy’u Burundi kitigeze kiyigiramo uruhare, ndetse kikaba cyari gifite ibirarane by’imyaka yashize bingana n’ amadolari y’Amerika 771, 037.

Muri iyi nteko kandi hanagaragajwe ko no mu bihugu byatanze umusanzu nta na kimwe cyari cyuzuza umusanzu wacyo w’uyu mwaka kuko Uganda yamaze kwishyura 91.53%, Kenya 52.4%, Rwanda 48.07%, na Tanzania 30.47%.

Kubera iki kibazo cy’amikoro cyugarije EALA, mu myanzuro bafashe muri iyi nteko rusange bemeje ko bagiye kuzajya bifashisha iyakure mu nama zimwe na zimwe zibahuza, buri wese akayigiramo uruhare atavuye aho ari, (video conferencing), kugira ngo babashe guhangana n’icyo kibazo cy’ubukene kibugarije.

Abadepite barasaba ko ibihugu bitohereza impunzi z’Abanyarwanda byafatirwa ibihano

Ibyo babisabye Minisitiri Louise Mushikiwabo ushinzwe ububanyi n’amahanga n’ubutwererane mu Rwanda, ubwo yari mu Nteko ishinga Amategeko kuwa 18 Gicurasi 2017 asaba ko Minisiteri ayobora yahabwa amafaranga izakoresha mu mwaka utaha wa 2017/18.

Mu bikorwa iyo minisiteri ifite harimo no gutsura umubano mwiza hagati y’ibihugu by’amahanga n’u Rwanda, akaba ari aho Depite Theobald Mporanyi yahereye abaza Minisitiri Mushikiwabo igikorwa iyo hari igihugu cyanze kohereza Abanyarwanda.

Aha abo badepite bavuga ko ibihugu bitabyubahirije byafatirwa ibihano.

Depite Mporanyi yagize ati “Nk’igihugu gicumbikiye Abanyarwanda bahunze kikaba cyitabohereza ngo batahe kandi twebwe mu Rwanda dushaka ko abantu bacu bataha ngo twiyubakire igihugu, kuki ibyo bihugu bidafatirwa ibihano cyangwa ngo hagire ikindi gikorwa ariko abo bantu batahe?”

Minisitiri Mushikiwabo yavuze ko ubu byemewe ku isi yose ko mu Rwanda ari amahoro ariko ashimangira ko gucyura impunzi habamo izindi nyungu zikomeye kandi ziharanirwa n’abantu benshi ku buryo bitoroshye ngo impunzi zose zitahe.

Mu mvugo ijimije, Minisitiri Louise Mushikiwabo yagize ati “Burya rero niwumva imiryango yitwa ko igamije kurwanya ubukene, ujye umenya ko ubukene buramutse burangiye burundu abakorera iyo miryango baba babuze akazi.”

Minisitiri Mushikiwabo yakomeje avuga ko no mu gucyura impunzi habamo abatabyifuza kuko baba bafite inyungu muri ubwo buhunzi, ndetse hakabamo n’ababa bafite ibyaha bahunze bumva bakomeza guca intege n’abandi bifuza gutaha.

Akomeza avuga ko, ubu hari Abanyarwanda benshi bamaze gusobanukirwa ko mu gihugu cyabo ari amahoro, ndetse bamwe muri bo bakaza mu Rwanda gutembera no gusura imiryango yabo ariko bakongera bagasubira aho bahisemo gutura.

Minisitiri Mushikiwabo yashimangiye ko impunzi zose zitagomba gutaha

Mu gusobanura uko ikibazo cy’impunzi giteye, Minisitiri Mushikiwabo yanaboneyeho abwira Abadepite ko ku rundi ruhande atari ngombwa ko Abanyarwanda bose batura imbere mu gihugu.

Minisitiri Louise Mushikiwabo avuga ko Abanyarwanda aho bari hose bajya bibuka ko mu Rwanda ari amahoro

Yagize ati “Muri abo bagiye bahunze harimo bamwe ubu bamaze gutangira ibikorwa by’ubucuruzi, harimo abiga n’abubatse ingo mu bihugu by’amahanga bumva badakeneye gutaha iwabo.”

Yongeyeho ko abo, u Rwanda rubafasha kubona ibyangombwa bakeneye ngo bagume muri ibyo bihugu mu buryo bwemewe n’amategeko kandi ngo abahagarariye u Rwanda hirya no hino bakomeza gukurikirana ko nta mwenegihugu ubuzwa umutekano.

Minisitiri Mushikiwabo avuga ko n’igihe hari uhohotewe u Rwanda ruhagoboka bwangu rukamurwanirira nk’uko byakozwe ubwo bamwe mu Banyarwanda baba muri Zambiya bahohoterwaga muri Mata 2016.

Ati “Uko byagenda kose Abanyarwanda bahora bazirikana ko iwabo ari mu Rwanda kandi iyo bagize ikibazo bitabaza igihugu cyabo.

Ubwo bahohoterwaga muri Zambia abenshi baje bahungira kuri Ambasade y’u Rwanda kandi twabakiriye neza, turabahisha, tubitaho ndetse n’abashatse gutaha twabashakiye indege zibacyura kandi hatashye benshi ubu baratuje mu gihugu.”

Muri ibi bikorwa byo gusaba amafaranga ibigo bya leta bizakoresha mu mwaka w’ingengo y’imari wa 2017/2018, Minisiteri ishinzwe Ibiza no gucyura impunzi yavuze ko iteganya kwakira Abanyarwanda ibihumbi 12 bazahunguka.

Kugeza ubu,habarurwa abagera ku bihumbi ijana babarwa nk’impunzi z’Abanyarwanda hirya no hino ku isi.

Minisitiri Gashumba yasabwe n’Abadepite ko haterwa ibiti bya Gelanium bizwiho kwirukana imibu itera Malaria

Ibi abadepite babisabye Minisitiri w’ubuzima, Diane Gashumba ubwo yari mu nteko ishinga amategeko tariki ya 11 Gicurasi 2017, asaba ko Minisiteri ayoboye yahabwa ingengo y’imari izakoresha mu bikorwa byayo mu mwaka utaha wa 2017/18.

Mu mushinga usaba ingengo y’imari hagaragayemo amafarangna azakoreshwa mu bikorwa byose byo kurwanya indwara.

Abadepite basaba ko mu buryo bwo kurwanya Malaria iyo minisiteri yanashakira Abanyarwanda ibiti bya Gelanium bakabitera iwabo aho batuye kuko icyo gihe ngo nta mubu utera Malaria wazongera kuhakandagira, bityo icyorezo cya Malaria kigacika burundu.

Minisitiri Gashumba yabwiye Kigali Today ko ibyo biti babizi, ubu ngo Minisiteri ikaba igiye kubyigaho bikaba byazifashishwa kurinda Abanyarwanda Malaria mu minsi iri imbere.

Agira ati “Ibyo biti koko bivugwaho kuba byirukana imibu n’utundi dukoko. Ubu natwe nka minisiteri tugiye kubyigaho tunarebe ahandi byaba byarakoreshejwe, umusaruro byatanze n’uburyo babikoresha neza, nibiduha icyizere buzaba ubundi buryo tuzakoresha mu guhashya Malaria.”

Ibiti bya Gelanium bimeze nk’ibi biterwa nk’indabo. Bizwi ho kwirukana udusimba tuguruka turimo n’imibu

Ibi biti bya Gelanium ubusanzwe bikoreshwa nk’imitako kuko bifatwa nk’indabyo kandi abahanga bemeza ko aho bitewe hose byirukana udukoko tuguruka hafi aho turimo n’imibu itera Malaria.

Minisitiri Gashumba avuga ko ariko ibyo biti atari bwo buryo bwonyine bwo kurwanya Malaria, yongera kwibutsa Abanyarwanda kwitabira uburyo bwose bwo kurwanya Malaria burimo kuryama mu nziritamubu iteye umuti, gukumira ibihuru n’ibidendezi birekamo amazi hafi y’aho abantu batuye.

Abanyarwanda kandi bahamagarirwa kujya bakinga amadirishya n’inzugi buri gihe ku isaha ya saa kumi kuko ari bwo imibu itangira kwinjira mu nzu ndetse no kujya bisuzumisha hakiri kare igihe bumva bafite ibimenyetso bya Malaria.

Biteganyijwe ko mu mwaka w’ingengo y’imari wa 2017-2018 u Rwanda ruzatanga inzitiramubu miliyoni esheshatu ku baturage batishoboye, abafite ubushobozi ariko bakaba bashobora kuzigurira ahandi ziboneka mu mafarumasi.

Uretse gutanga inzitiramubu, Leta y’u Rwanda isanzwe ikoresha uburyo burimo gutera imiti yirukana imibu mu nzu, mu turere turangwamo Malaria.

Abanyarwanda ariko basabwa kuryama mu nziriramibu iteye umuti

Mu mwaka ushize wa 2016 Leta yari yanafashe ingamba zo gusakaza ubwoko bw’amafi yitwa tilapia hirya no hino mu biyaga by’u Rwanda kuko ayo mafi nayo ngo arya imibu itera Malaria.

Mu mwaka wa 2015 Abanyarwanda basaga miliyoni imwe n’ibihumbi 900 barwaye Malaria ihitana abantu 424, nyamara mu 2012 Malaria yari yafashe abantu imihumbi 300.

Abadepite baremeza ko siporo yaba kimwe mu bisubizo byo kugira ubuzima bwiza

Uretse kuba umuti kandi aba badepite banifuza ko gukora no kugenzura siporo bizajya mu nshingano za minisiteri y’ubuzima kuko siporo ishobora kuba umuti n’urukingo ku ndwara nyinshi.

Ibi byasabwe minisitiri w’ubuzima mu Rwanda, Dr Diane Gashumba ubwo yari mu Nteko ishinga amategeko kuwa 11 Gicurasi 2017 asaba ko minisiteri ayoboye yahabwa ingengo y’imari izakoresha mu bikorwa byo kubungabunga ubuzima mwaka w’ingengo y’imari utaha wa 2017-2018.

Mu byo minisiteri w’ubuzima yasabiraga amafaranga, harimo n’ayo kugura imiti n’inkingo by’indwara zinyuranye, ndetse hakaba n’andi yo gukoresha mu bukangurambaga buhamagarira Abaturarwanda ibyo bakwiye kwitwararika ngo bagire ubuzima bwiza.

Aha ariko depite Rwaka Pierre Claver yabajije minisitiri w’ubuzima impamvu ahubwo iyo minisiteri idakoresha siporo nk’uburyo bukaze bwo kuvura no gukumira indwara zitandukanye.

Ibi ngo yabibajije kuko ngo impuguke zemeza ko gukora siporo bivura indwara zitandanye kandi bikanakumira izindi mbere y’uko zigera mu mubiri w’umuntu.

Yagize ati “Ko gukora siporo byemejwe n’impuguke ko birinda indwara bikanakumira izindi, kuki ahubwo guverinoma itafasha Abanyarwanda kwirinda indwara ishyira ingufu muri siporo, ndetse na minisiteri y’ubuzima ikaba ari yo ihabwa inshingano za siporo yose ikava muri minisiteri bisanzwemo nk’imyidagaduro?”

Uyu mudepite yasabye ko leta yashyira mu ngamba, ibijyanye no gukora siporo byose bikazajya mu nshingano za minisiteri y’ubuzima, bikajya bikurikiranwa n’abaganga mu kuvura abantu no gukumira indwara nyinshi zitajya zifata abakora siporo.

Umuganga wize ubugororangingo Rutamu Patrick yabwiye Kigali Today ko koko muri ibi bihe siporo isigaye ari umuti ku ndwara nyinshi ndetse n’abaganga bakaba basigaye bayandikira abarwayi nk’umuti wemewe wo kubavura.

Ati “Rwose imibereho y’abantu iki gihe isigaye ibatera indwara zikomeye nyamara zivurwa na siporo.”

Aha yatanze ingero avuga ko abakora akazi nk’ako muri za banki cyangwa akandi gatuma abantu birirwa bicaye mu biro ubu basigaye barware ibirwara bikomeye nk’umutima, diyabeti, umugongo n’izindi.

Minisitiri w’ubuzima Diane Gashumba

Abo ubu iyo bagiye kwivuza muganga ashobora kubaha imti igabanya ububabare baba bumva ako kanya ariko umuti wa nyawo muganga abategeka ngo ni ugukora siporo.

Minisitiri Gashumba we yabwiye abadepite ko leta yari yaragerageje gushyiraho ingamba zo gusaba abaturage gukora siporo ndetse n’abakozi ba leta bakaba barahawe umunsi wo kuwa gatanu nyuma ya saa sita ngo bajye bakora siporo.

Hashyizweho kandi umunsi wo kwitabira siporo rimwe mu kwezi abantu birinda kugendera mu modoka uzwi nka “Car Free Day”.

Minisitiri Diane Gashumba ariko ntacyo yavuze ku kuba minisiteri ayoboye yafata inshingano zose zo gukoresha abaturage siporo ndetse no gukurikirana ibikorwa bya siporo byose.

Minisitiri Nsengimnana imbere y’inteko ishinga amategeko asobanura iby’ingengo y’imari itaha.

Byatangajwe na Minisitiri w’Urubyiruko n’ikoranabuhanga, Jean Philbert Nsengimana ubwo yitabaga abadepite mu Nteko ishinga amategeko kuri uyu wa kabiri tariki 9 Gicurasi 2017.

Yasobanuraga impamvu Minisiteri ayoboye ishaka gukoresha amafaranga y’u Rwanda akabakaba miliyari enye yari isanzwe ikoresha.

Minisitiri Nsengimana yasobanuye ko ayo mafaranga azashyirwa mu kubaka ikigo kigamije guhangana n’ibitero mu ikoranabuhanga byagabwa ku Rwanda cyangwa ibyo u Rwanda rwategura kugaba hanze igihe umutekano w’igihugu waba uhungabanijwe.

Ubu mu mwaka wa 2017/18, MYICT irasaba miliyari 14Frw, amafaranga make ugereranyije na miliyari 17,8Frw yari yatse mu mwaka ushize w’ingengo y’imari.

Asobanura ko ayo yagabanutseho, bifuza ko azakoreshwa mu Kigo gishinzwe Iterambere (RDB) ari na cyo kizashyira mu bikorwa ikigo gishinzwe ubwirinzi n’umutekano mu ikoranabuhanga.

Icyo kigo kizitwa National Cyber Security Authority (NCSA) ubu nacyo kiri gutegurwa, ndetse mu cyumweru gishize inteko ishinga amategeko yize umushinga w’itegeko rigishyiraho n’uburyo kizajya gikora.

Minisitiri Nsengimana yabwiye abadepite ko icyo kigo kizategura uburyo bwose bwo guhangana n’ibitero mu ikoranabuhanga, kikazajya gitegura abahangana n’ibitero bigabwa ku Rwanda cyangwa se kikanategura ibitero u Rwanda rwagaba ku bigo byo hanze mu rwego rwo kurinda ubusugire bw’igihugu n’umutekano.

N’ubwo iyi ngengo y’imari itaremezwa ngo ibe itegeko, abadepite bemeje ishingiro ryayo, bikaba bishoboka ko guverinoma yazabona ayo mafaranga kandi akazakoreshwa mu gutegura ubwirinzi no kugaba ibitero mu ikoranabuhanga.

Icyo kigo National Cyber Security Authority, NCSA kandi ngo kizanatanga akazi ku Banyarwanda bazakora muri ibyo bikorwa by’ikoranabuhanga dore ko biri no mu ntego za guverinoma, guhanga imirimo mishya nibura ibihumbi 200 buri mwaka kandi idashingiye ku buhinzi n’ubworozi.

Obadiah Biraro, umugenzuzi mukuru w’imari ya Leta

Ibi byamenyekanye ku gicamunsi cyo kuwa 03 Gicurasi 2017 ubwo umugenzuzi mukuru w’imari ya leta (auditor general), Obadiah Biraro yagezaga ku Nteko ishinga Amategeko icyegeranyo cy’uko inzego zinyuranye zakoresheje amafaranga zihabwa mu misoro y’abaturage mu mwaka wa 2015/2016.

Ubucukumbuzi bwakozwe n’umugenzuzi bwatahuye ko buri mwaka Ikigo cy’Igihugu gishinzwe gukwirakwiza amazi, Isuku n’Isukura (WASAC) gisakaza amazi ku bafatabuguzi banyuranye, ariko kikaba hari abo cyishyuza ayo mazi n’abandi batishyuzwa.

Abo batishyuzwa bose hamwe bakoresha 42% by’amazi yose WASAC iba yatunganije, bityo akayabo ka miliyari zikabakaba icyenda (8,600,000,000RWf) abo bafatabuguzi bakayaryamaho uko umwaka utashye.

Icyegeranyo cy’umugenzuzi mukuru w’imari ya leta kigaragaza kandi ko no mu bigo bishinzwe ingufu n’amashanyarazi (EUCL na EDCL bya Rwanda Energy Group) harimo uburangare, gupfusha ubusa no gusesagura ibikoresho n’umutungo bifite agaciro ka miliyari 18RWf.

Aha harimo 17% by’amashanyarazi yose EUCL ifite ariko ngo akaba ahombera mu miyoboro iyageza ku bafatabuguzi kubera uburangare bwa EUCL.

Ayo akaba afite agaciro ka miliyari 16.2RWf ndetse n’ibikoresho bifite agaciro ka miliyari imwe na miliyoni 500RWf bimaze imyaka itanu bibitse kandi hari aho bikenewe gukoreshwa.

Ibi byose ngo uretse kuba ari ibiteza igihombo kandi abaturage baba batanze amafaranga ngo bitunganywe, Obadiah Biraro avuga bifite n’izindi ngaruka zitarabarirwa agaciro.

Izo ngaruka zishingiye ku kuba abaturage batabona serivisi baba bakeneye kandi batanzeho amafaranga yabo binyuze mu ngengo y’imari ya leta igenera ibyo bigo.

WASAC, REG, Kaminuza y’u Rwanda na RAB bari ku isonga mu guhombya leta

Ubucukumbuzi bw’umugenzuzi mukuru w’imari ya leta bwageze mu nzego za leta 139, bwasanze ibigo bya WASAC, REG ishinzwe iby’ingufu, Kaminuza y’u Rwanda n’ikigo cy’igihugu gishinzwe ubuhinzi n’ubworozi (RAB) ari bo bari ku isonga mu gukoresha nabi umutungo no gusesagura.

Umugenzuzi mukuru w’imari ya Leta yagejeje ku nteko ishingamategeko raporo y’ibyavuye mu bugenzuzi

Mu gihe mu Rwanda hari inganda z’amashanyarazi 33, ubu ngo zirindwi muri zo ni zo zikora zonyine kandi nazo zikoreshwa ku gipimo cya 50%, bivuze ko zitanga amashanyarazi angana na kimwe cya kabiri cy’ayo zagombaga gutanga.

Ibi byose ariko ngo bikaba REG irebera, na bimwe mu bikoresho byagombaga gukoreshwa ngo izo nganda zikore bikaba bimaze imyaka myinshi bibitswe mu bubiko, bimwe byaratangiye kwangirika.

Kaminuza y’u Rwanda yo yavuzweho gukorera mu kajagari kandi yarahurijwe hamwe ngo ibibazo bigabanuke.

Nk’ubu ngo iyo kaminuza yahurijwe hamwe kugira ngo abiga bimwe bajye baba hamwe, nyamara hari miliyoni 764RWf zihabwa abarimu zitwa ko ari iz’ingendo igihe bava hamwe bajya kwigisha ahandi kandi ngo amashami yigisha bimwe yarahurijwe hamwe.

Hari kandi miliyoni 201RWf zihabwa abarimu ngo baba bigishije amasaha y’ikirenga kandi hari abandi barimu 116 bakora amasaha make ugereranyije n’ateganijwe kuri buri mwarimu.

Iyi kaminuza kandi ngo ntabwo irabasha kwereka umugenzuzi uko yakoresheje amafaranga asaga miliyari 64RWf kuko uburyo ibisobanura ngo butizewe burimo ibihimbano.

RAB yagaragaje kurangarana imbuto

Muri RAB ho hagaragajwe ibibazo birimo kurangarana ibikoresho, imbuto n’amafumbire, kurigisa ibiribwa no gutonesha.

Umugenzuzi mukuru w’imari y’igihugu yavuze ko hari toni 694 z’imbuto zifite agaciro ka miliyoni 347RWf zahawe abantu batazwi.

Hari kandi imbuto z’ibigori n’ibihwagari n’ingano bifite agaciro ka miliyoni 314RWf ngo zatangiye kubora kuko zimaze imyaka itanu ziteretse ahantu hamwe, bisa no kuba ntacyo zateganirijwe gukoreshwa.

Umugenzuzi yavuze kandi ko hatahuwe abacuruzi RAB yahaye inguzanyo ya miliyoni 250RWf ngo bajye kurangura imbuto hanze y’igihugu, bazigeza muri RAB ikongera ikabishyura nk’aho bayigemuriye.

Kugeza na n’ubu abo bantu ntirabishyuza, hamwe na miliyari 11RWf zatanzwe mu mafumbire zikaba zitarishyuzwa.

Icyegeranyo cy’Umugenzuzi mukuru w’imari ya Leta, cyibanze ku bigo 14 ari byo WASAC, REG (EUCL & EDCL), RAB, RDB, REB, RBC, RTDA, WDA, UR, RGB, RRA, RURA, RCS na NAEB, ibyo bigo byonyine byakoresheje amafaranga angana na 60% by’ ingengo y’imari ya Leta.

Imodoka yakozwe n’abanyeshuri b’abanyarwanda ikoresha imirasire y’izuba

Iyi modoka yakozwe n’abanyeshuri 12 biga muri kaminuza yitwa Singhad Technical Education Society (STES)-Rwanda yamurikiwe ibitangazamakuru kuwa gatanu tariki ya 28 Werurwe 2017.

Bagaragaje uko iyo modoka ikora, ndetse bamwe bayigendamo banamenyeshwa ko mu minsi ya vuba ishobora kuzashyirwa ku isoko ababishaka bakajya bayigura bakayikoresha nk’izindi modoka zisanzwe.

Iyi modoka igendeshwa n’ingufu zikomoka ku mirasire y’izuba ziba zabitswe mu byitwa batiri (batterie/battery) bibiri, zaba zuzuye neza iyo modoka ikaba yagenda amasaha ane idahagaze.

Ubwo ariko igihe ibyuma bihindura imirasire y’izuba iyo modoka ikoranywa byaba bikora neza, imodoka yakomeza kugenda na nyuma y’amasaha ane, kimwe n’uko bibaye ngombwa izo batiri bazongeramo ingufu bazicometse ku mashanyarazi asanzwe.

Ibi ni ibitangazwa na Nzitonda Kiyengo uyobora kaminuza ya Singhad Technical Education Society (STES)-Rwanda.

Nzitonda ati “Imodoka rwose iragenda neza, ishobora kumara amasaha ane igenda igihe batiri zaba zuzuye kandi biranashoboka kongera ingufu muri izo batiri, utwaye imodoka akagenda urugendo rurenze amasaha ane.”

Kevin Kabera umwe muri aba banyeshuri yabwiye Kigali Today ko igitekerezo cyo gukora imodoka cyakomotse ku marushanwa abiga muri STES-Rwanda bagiyemo mu gihugu cy’Ubuhinde mu kwezi gushize kwa Werurwe.

Abanyeshuri 12 bamuritse imodoka bikoreye

Kaminuza nkuru ya Singhad Technical Education Society (STES)-India yari yateguye amarushanwa mu gukora imodoka zakoreshwa n’ingufu z’imirasire y’izuba.

Icyo gihe ngo abanyeshuri b’Abanyarwanda bitwaye neza bakora imodoka yegukanye igihembo, batashye mu Rwanda biyemeza kuvugurura igitekerezo cyabo, bagatangira gukora imodoka nziza kandi zisumbuye mu kugira ingufu.

Kabera ati “Ubumenyi duhabwa bwatumye tubona ko hari icyo dushoboye bitwongerera imbaraga. Twiyemeje rero gukomeza tukazanabasha gukora imodoka nziza kandi ikoranye ubuhanga kurushaho”

Kabera akomeza avuga ko igihe imodoka yabo izashyirwa ku isoko igashimwa, bazakomeza gushakisha ubushobozi bagakorera imodoka abanyarwanda, kandi nabo bakabigira umwuga wabateza imbere.

Ubu ngo iya mbere bakoze ifite agaciro kari hagati ya miliyoni ebyiri n’eshatu z’amafaranga y’u Rwanda (Frw 2,000,000 – 3,000,000).

Nzitonda umuyobozi wa STES-Rwanda ati “Iyi modoka iruzuye, iri gukorwaho imirimo ya nyuma ngo inoge neza ubundi tuyimurikire inzego z’ubushakashatsi n’ubuziranenge yemerwe nk’iyakorerwa mu gutwara ibintu n’abantu ku buryo bwemewe.

Imirimo ya nyuma yo kuyinoza neza nirangira tuzaganira n’abandi tuyishakire n’izina, imodoka Nyarwanda itwarwa n’imirasire y’izuba tuyishyire ku isoko ubishaka wese ayigure ajye ayikoresha mu ngendo ze.”

Iyi modoka yakozwe hifashishijwe ibyuma biboneka mu Rwanda n’ubwo bimwe biba byarakorewe hanze, ariko ngo mu kuyikora hifashishijwe ibikoresho biri ku masoko yo mu Rwanda gusa.

Ngo bibanda ku gusuzuma ubuziranenge bwabyo ku buryo imodoka bakoze ikomeye bihagije nk’izindi zikorerwa mu nganda zo mu bihugu bisanzwe bikora imodoka.

Nzitonda Kiyengo umuyobozi wa Kaminuza ya STES Rwanda

Nzitonda avuga ko afite icyizere ko imodoka zikorwa n’abanyeshuri be zizakundwa kandi zikagirira Abaturarwanda akamaro mu minsi iri imbere.

A“Nitumara kubona icyangombwa cy’ubuziranenge tuzakora imodoka nyinshi ku buryo twe ubwacu nidutangira kuzigenderamo n’abandi bazatangira kuzirambagiza cyane cyane ko zizaba zidahenze nk’izindi ziri hanze ku isoko.”

Ikindi kizatuma zidahenda cyane ni uko zizakorerwa mu Rwanda, bikaba nta kiguzi cy’ubwikorezi mu kuzizana mu Rwanda ndetse n’abazazikora bakaba ari abanyarwanda.

Abadepite ba EALA bavuga ko bahangayikishijwe n’u UBurundi budatanga imisanzu muri EAC kandi ibindi bihugu buyitanga

Uwo mwenda urenga miliyoni icyenda z’Amadorali y’Amerika niwo musanzu u Burundi bugomba gutanga mu muryango w’ibihugu bya Afurika y’Uburasirazuba.

Mu mirimo y’inteko ya EALA yaberaga i Kigali niho hagaragarijwe ko igihugu cy’u Burundi kitarishyura arenga miliyoni icyenda z’amadolari y’Amerika ($ 9,149,145) y’imisanzu, arimo n’ayo mu mwaka ushize wa 2015/16 ibindi bihugu byose bya EAC byamaze kwishyura.

U Burundi kandi bwatunzwe agatoki ko mu mwaka w’ingengo 2016/17 butarishyura ifaranga na rimwe mu misanzu ya miliyoni umunani z’Amadolari y’Amerika ($ 8,378,108) busabwa gutanga nk’ibindi bihugu.

Icyegeranyo kivuga iyi myenda cyateguwe na depite Nancy K. L. Abisai wo muri Kenya, cyagaragaje ko n’ibihugu byose bya EAC bigiye bifite imyenda bitarishyura.

Ubusanzwe buri gihugu gitegetswe gutanga imisanzu ingana na miliyoni umunani z’Amadolari y’Amerika ($ 8,378,108) muri EAC.

U Rwanda rwamaze gutanga miliyoni enye ( $ 4,027,316) zingana na 48% mu gihe Uganda yatanze miliyoni indwi ($ 7,668,419 = 91.5%), Kenya igatanga enye ($ 4,395,707 = 52%) naho Tanzaniya ikaba yaratanze miliyoni ebyiri n’igice ($ 2,553,203 = 30.5%).

Kuri iyi misanzu yose ariko u Burundi ntiburatanga ifaranga na rimwe ku misanzu busabwa mu mwaka 2016/17.

Bukaba ahubwo bukirimo n’imyenda yo mu mwaka washize wa 2015/16 ingana n’ibihumbi bikabakaba magana inani by’Amadolari y’Amerika ($ 771,037).

Muri EAC haratutumba umwuka wo gusenyuka

Abadepite ba EALA bari bari mu mirimo y’inteko i Kigali bagaragaje ko kuba imisanzu itishyurwa uko bikwiye atari ibyo kujenjekwa kuko ngo biteje ibibazo bikomeye, ndetse bamwe bavuga ko bitanga umwuka wo kuba umuryango wa EAC wasenyuka.

Depite Patricia Hajabakiga ukomoka mu Rwanda yagize ati “Uburyo ibihugu bimwe bya EAC biri kugenda biguru ntege muri iyi minsi sinigeze mbibona mu myaka ikabakaba icumi ishize.

Umwuka uhari muri iyi minsi uragaragaza kudaha agaciro ibikorwa bya EAC kandi nibikomeza bityo birerekeza umuryango ku gusenyuka.”

Depite Nancy K. L. Abisai wo muri Kenya niwe wateguye icyegeranyo kivuga imyenda u Burundi bubereyemo EAC

Depite Dora Kanabahita Byamukama ukomoka muri Uganda na we asanga ubwitabire buke muri EAC hari ikindi buhishe.

Agira ati “Ni gute igihugu gishobora kuba kitari gutanga imisanzu gisabwa mu muryango wacu ariko tukumva kiri kwitabira ibindi bikorwa kandi bisaba amafaranga mu yindi miryango?”

Akomeza avuga ko hari ibihugu azi biri kujya mu miryango yindi nka SADC, COMESA n’ahandi hanyuranye, bikaba bijyayo bikanahatanga imisanzu bisabwa ariko muri EAC bikaba byariturije bishyize amaboko mu mifuka.

Hagiye gukurikiraho ibihano

Amajwi y’abadepite basaba ko ibihugu bya EAC byafatirwa ibihano yabaye menshi kandi bose mu nteko bakomeje gushyigikira iki cyifuzo.

Depite Valeria Nyirahabimana ukomoka mu Rwanda yagize ati “Mu mikorere yo mu Rwanda, iyo warengeje igihe cyo gutanga umusoro usabwa baguca ibihano kandi na wa musoro ukawutanga.

Ntidukwiye kujenjeka rero, mureke natwe dusabire ibihano ibihugu byose bikiri inyuma mu gutanga imisanzu.”

Depite Yves Nsabimana ukomoka mu Burundi na we ntiyabereye igihugu akomokamo kuko yunze mu rya bagenzi be asaba ko hafatwa ibihano ku bihugu bitubahiriza amasezerano byasinye byinjira muri EAC.

Agira ati “Ntabwo twakomeza kurebera gusa mu gihe ibi bihugu bidatanga imisanzu biri kudukoresha amakosa. Ubu abakozi bamwe bo mu nzego za EAC ntibari guhembwa neza, abandi bacitse intege kuko batabona ibikoresho igihe babikeneye.

Mu gihe abacuruzi baduhaye ibikenewe mu kazi tutarishyura bo bashobora kutujyana mu nkiko mu minsi ya vuba aha. Nimuhaguruke dushyireho ibihano.”

Muri izi mpaka zari zishyushye ariko umuyobozi w’inteko ya EALA nyakubahwa Daniel Fred Kidega yibukije ko amategeko ya EAC atemerera inteko ishinga amategeko kuba yasezerera igihugu kitubahirije amasezerano yo gutanga imisanzu bitabanje kugezwa imbere y’abakuru b’ibihugu bya EAC.

Perezida w’inteko ya EALA Daniel Fred Kidega

Depite Kidega yasabye ko iyi ngingo yakwigwaho neza, abadepite bagakusanya ibitekerezo ndetse bakanagisha inama abanyamategeko maze bakazabiganiraho mu mirimo y’inteko izaba Arusha muri Tanzaniya muri Gicurasi 2017.

Depite Kidega yakoresheje amatora ngo barebe abashyigikiye ko hakwigwa ku bihano, abadepite bemeza uwo mugambi ku bwisanzure bw’amajwi, ubu bakaba bagiye gutegura ibihano byazafatirwa ibihugu bitubahiriza amasezerano.

Imirimo y’iyi nteko yari yitabiriwe kandi n’abaminisitiri bashinzwe ibikorwa bya Afurika y’Iburasirazuba muri buri gihugu, uretse uw’u Burundi.

Abo baminisitiri nabo banenzwe ko bashobora kuba badashikama ngo basabe bemye leta zabo gushyigikira ibikorwa bya EAC.

Ibi bikubiye mu mushinga w’itegeko wagejejwe ku bagize inteko Ishinga Amategeko kuwa 13 Werurwe 2017 na Minisiteri y’Ubutabera isaba ko nibemeza uwo mushinga gutanga ubwo bufasha byazatangira gushyirwa mu bikorwa mu minsi ya vuba.

Evode Uwizeyimana usanzwe ari Umunyamabanga wa Leta muri Minisiteri y’Ubutabera ni we wari waserukiye Guverinoma mu gusobanurira abadepite iby’iryo tegeko leta ishaka ko ryakwemezwa.

Minisitiri Uwizeyimana yavuze ko Itegeko Nshinga rigenga u Rwanda, Abanyarwanda batoye mu ngingo yaryo ya 29 (1) rivuga ko “Umunyarwanda wese afite uburenganzira bwo guhabwa ubufasha mu by’amategeko.“

Bityo iryo tegeko rishya rikaba rizagenera buri Munyarwanda utishoboye uburyo bwo kubona abamwunganira mu nkiko kandi bishyuwe na leta n’abafatanyabikorwa bayo.

Minisitiri Uwizeyimana yavuze ko ibi guverinoma yabiteguye igendeye ku kuba muri iki gihe abasanzwe bunganira abantu mu nkiko basaba ikiguzi gihanitse ku muturage usanzwe, kuko abenshi bishyuza make ngo bahera ku bihumbi 400 RWf.

Mu buryo rusange abadepite bagaragaje ko bashyigiye uwo mushinga w’itegeko nabo bavuga ko iri itegeko rizafasha abatari bake guhabwa ubutabera bunoze.

Ibi bishingirwa ku kuba ngo hari Abanyarwanda bakennye batsindwaga mu manza, abandi bagatinya kuregera ibyo bafitiye uburenganzira kuko batabashaga kwishyura ababafasha mu buryo bwa kinyamwuga.

Abadepite ariko bagaragaje impungenge zirimo kumenya uburyo hazajya hamenyekana abakwiye ubwo bufasha nyabo ndetse no kumenya ubufasha bazajya bahabwa uko bungana.

Depite Yuvenali Nkusi yagize ati “Iby’ubu bufasha bikwiye gusobanuka neza kuko mu gufasha umuntu uburana, habamo no kumufasha kubona abatangabuhamya, kubageza aho imanza zibera no kubatunga, bitabujije ko hari n’abasaba insimburamubyizi.”

Minisitiri Evode yagaragaje umushinga w’itegeko rizafasha abatishoboye mu manza zabo

Minisitiri Uwizeyimana yavuze ko hazakoreshwa uburyo bunyuranye Abanyarwanda basanzwe bakoresha mu gufasha no kuremera bagenzi babo batishoboye nk’uko byagiye bikorwa muri gahunda zinyuranye.

Muri uyu mushinga naho ngo harateganywa ko hazashyirwaho ikigega, leta n’abikorera ndetse n’abandi bafatanyabikorwa bose bakazajya bashyiramo amafaranga yo kwishyura ababuranira abantu n’ababafasha mu nkiko.

Leta yashakaga gufasha abagore, abana n’abarwayi gusa

Ubwo yasobanuraga iri tegeko, Minisitiri Evode Uwizeyimana yavuze ko rigenewe gufasha cyane ibyiciro by’Abanyarwanda batishoboye n’abanyantege nke, barimo abagore abana n’abarwayi ariko abadepite bamutera utwatsi.

Minisitiri Julienne Kantengwa yagize ati “Ntabwo rwose dushaka ko abagore bakomeza kwitwa ko ari icyiciro cy’abanyatenge nke n’abatishoboye.

Iri tegeko rizite ku Banyarwanda bose ariko kwita ku bagore by’umwihariko ntidukwiye kubishyigikira. Ni imvugo ishaje itaduhesha agaciro nk’abagore.”

Depite Jean Marie Vianney Gatabazi na we yungamo ati “Ntabwo iri tegeko rikwiye guteganya ko abana, abagore n’abarwayi bakwitabwaho byihariye kuko hari abarwayi baba barwaye indwara nka SIDA ariko bakaba bafata imiti, bafite imbaraga bakora rwose, mbese bafite ubushobozi.

Hari n’abitwa abana ariko bakaba bafite ababyeyi n’ababareberera bishoboye. Nk’umwana wanjye depite ntabwo rwose akwiye kwitabwaho ukundi kwihariye.”

Aba bose mu kubamara impungenge, Minisitiri Uwizeyimana yavuze ko hazarebwa uburyo bwo guhitamo abatishoboye mu buryo bwagutse, Abanyarwanda bazasanga bubereye.

Abanyarwanda bakunda imanza bashobora kujya baregera n’ibidafite ishingiro

Ubwo bajyaga impaka kuri iri tegeko, abadepite banagaragaje impungenge ko Abanyarwanda nibaba bizeye guhabwa ababafasha kuburana babizobereyemo ngo nta shiti abenshi bazirukira inkiko bakajya baregera n’ibidafite ishingiro.

Uwari uhagarariye Guverinoma yabasubije ko ibyo nabyo bishobora kuzaba ikibazo, ariko avuga ko leta izategura uburyo bwo kujonjora ibirego bidafite ishingiro bikazajya bivanwa mu byo leta yatangaho inkunga.

Aha yavuze ko nko mu manza mbonezamubano ibirego bifite agaciro katagejeje kuri Miliyoni eshatu z’Amafaranga y’u Rwanda bizakomeza kujya bikiranurwa n’abunzi.

Bwana Evode Uwizeyimana kandi yasobanuye ko no mu bazajya bahabwa akazi ko kunganira abaturage hazabamo ijonjora ako kazi kakajya gahabwa ababishoboye kandi bagaragaje ko babifitemo ubunararibonye.

Ati “Ntabwo ubundi byumvikana uburyo hari umuntu umwe uburana mu rubanza ruvuga ku bujura kuwa mbere, kuwa kabiri ukamusanga mu rubanza rusaba gatanya mu bashakanye, kuwa kane akaba aburana ibyo mu bikorwa by’iterabwoba, bityo bityo…

Uwo muntu aba abeshyabeshya abaturage, ntabwo umuntu umwe yaba inzobere muri ibyo byose.

Abazajya bahabwa akazi ko kuburanira abatishoboye bazajya bagomba kuba babisobanukiwe kandi babifitiye gihamya.”

Iri tegeko niryemezwa rizatangira gushyirwa mu bikorwa vuba

Muri iki gihe abaturage basanzwe bahabwa ubufasha mu by’amategeko mu nzego zigenga, mu miryango itegamiye kuri leta.

Muri yo harimo Haguruka, urwego rw’Abunzi ndetse n’abitwa MAJ (Maison d’acces a la Justice) ariko bo babikoraga nk’abagira umuturage inama ariko batazamuherekeza mu rukiko.

Mboweni avuga ko umutetsi wo muri Hoteli yaririyemo i Kigali yamuhaye urusenda rwinshi.

Tito Mboweni usanzwe ari n’umuntu ukomeye muri Afurika y’Epfo, kuko yayoboye Banki igenzura ubukungu bwa Afurika y’Epfo, ku ifoto yashyize kuri Twitter agaragara amarira ashoka mu maso, akavuga ko byatewe n’urusenda yagaburiwe i Kigali mu cyumweru gishize.

Yanditse kuri Twitter, mu buryo bwo gutebya, avuga ibyo byamubayeho ubwo yari mu nama i Kigali mu cyumweru gishize aho yari yitabiriye inama yari yatumiwemo.

Si icyo cyamuteye amarangamutima gusa, kuko yanavuze ko iyo aje mu Rwanda ari ho honyine yumva atekanye kandi ahawe ikaze. Akifuza ko n’ibindi bihugu byagira uwo muco wo kwakira abandi banyafurika neza ntibababonemo ubunyamahanga.

Uru rusenda ruzwi nka "Kamurari" mu Rwanda.

Yabivuze mu gihe iwabo havugwaga imvururu n’ibikorwa by’urugomo n’ubwicanyi no gusahura byakorerwaga abikorera, cyane cyane abacuruzi batari Abenegihugu bo muri Afrika y’Epfo. Muri izo mvururu bamwe mu Banyafurikayepfo basahura bakanahohotera abanyamahanga babaziza ko babakiranye.

Urusenda rw’u Rwanda rufite isoko mu nganda za gisirikari

Uru rusenda rwitwa kamurari ruzwi ko rugira ubukana cyane kandi mu Rwanda rurahera nubwo rutaraba rwinshi kugirango ruhaze isoko rihari.

Uru rusenda kandi rwageze aho rushimwa ubukana cyane, kuri ubu rukaba rukoreshwa mu nganda zikora ibyuka biryana mu maso bita tear-gas.

Ibi byuka bishyirwa mu bisasu byifashishwa cyane cyane n’inzego zishinzwe umutekano mu gihe cy’imvururu n’imyigaragambyo, aho babikoresha bagamije gutatanya abigaragambya bagakwira imishwaro kubera ko ibyo byuka biryana mu maso cyane.

Mboweni (hagati) yari muri Kigali mu nama mpuzamahanga.

Kuri ubu inganda zo mu gihugu cya Esipanye nizo zigura uru rusenda rw’u Rwanda, buri cyumweru barangura urusenda rungana na toni ebyiri bakoresha mu gukora ibyo byuka biryana mu maso.

Uretse uru rusenda rwa kamurari, mu Rwanda hera n’ubundi bwoko bubiri bw’urusenda, harimo urwitwa green chili na hot pepper mu ndimi z’amahanga.

Tito Mboweni yayoboye icyitwa Reserve Bank muri Afurika y’Epfo, ikaba ari banki nkuru y’icyo gihugu, igenzura ubukungu n’agaciro k’ifaranga muri Afurika y’Epfo, kuva mu 1999 kugera mu 2009.

Bwana Mboweni kandi yabaye minisitiri ushinzwe umurimo n’abakozi muri Afurika y’Epfo kuva mu 1994 kugera mu 1998.

Bernard Debré umujyanama wa François Fillon (photo internet )

Ibi byavuzwe na Bernard Debré, wahoze ari minisitiri ushinzwe ubutwererane mu Bufaransa muri 1994 na 1995, ubu akaba ari umujyanama wa François Fillon mu birebana na politiki ya Afurika.

Uyu Bernard Debré yabwiye ikinyamakuru Jeune Afrique ko ntawe ukwiye gushinja Ubufaransa uruhare na rumwe muri Jenoside yakorewe Abatutsi mu Rwanda kubera ko nta kibi Ubufaransa bwakoze mu bihe bya Jenoside.

Muri icyo kiganiro na Jeune Afrique, Bernard Debré yavugaga ko hari ibyo mu mateka y’Ubufaransa na Afurika abantu badakwiye gutindaho, kuko byataye igihe.

Umunyamakuru wa Jeune Afrique ati « Mu mateka ya vuba aha ariko hari ibyo Ubufaransa bwagizemo uruhare kandi bikiri bibisi. Ku bwawe hari uruhare ubona leta y’Ubufaransa yaragize muri Jenoside yakorewe Abatutsi mu Rwanda?”

Atajijinganyije, bwana Bernard Debré yagize ati “Ntabyo. Nta byaha Ubufaransa bwakoze muri Jenoside, nta n’ubwo bishoboka ko ingabo z’Ubufaransa zari mu Rwanda zaba zarafashije uruhande rw’Abahutu bakoraga Jenoside. Ibyo ntabyo nemera.”

Ingabo z’Ubufaransa zivugwa, ni izoherejwe mu Rwanda mu gikorwa bise “Operation Turquoise” bavugaga ko zije mu bikorwa byo gutabara abicwaga muri Jenoside, nyamara zikaba zarijanditse mu bikorwa byo gutiza umurindi abakoraga Jenoside, ndetse bamara no gutsindwa izo ngabo zikabakingira ikibaba bahunga bajya hanze y’igihugu.

Bernard Debré wemera ko mu Rwanda habaye Jenoside, yagaragaye muri icyo kiganiro nk’uwemera ko mu Rwanda habaye Jenoside ebyiri kuko yavuze ko “… Abahutu bishe Abatutsi, ariko nyuma, Abatutsi nabo bakaba barishe Abahutu mu bikorwa byo kwihorera…”

Debré afite icyemeza ko Jenoside itatewe n’ihanurwa ry’indege ya Habyarimana

Muri iki kiganiro, Debré yemereye Jeune Afrique ko na mbere ya Jenoside perezida Yuvenali Habyarimana ubwe yamubwiye ko mu Rwanda hategurwaga “amahano”.

Aha Bernard Debré yagize ati “Ubwo nahuraga na Perezida Habyarimana yambwiye ko mu gihugu cye hari hagiye kuba ibintu by’amakuba byategurwaga n’uruhande rumwe rw’abahezanguni kandi Habyarimana yambwiraga ko atari agishoboye kubuza abo bantu umugambi wabo mubisha.”

Kuva ingabo zari iza FPR Inkotanyi zihagaritse Jenoside yakorerwaga Abatutsi mu 1994, hakomeje kugaragazwa ibimenyetso bishinja ingabo z’Ubufaransa kuba zaragize uruhare mu gushyigikira leta yateguye Jenoside ikanayishyira mu bikorwa. Ubufaransa ariko buhora bubihakana n’ubwo hari bamwe mu basirikari bari mu Rwanda icyo gihe bajya batanga amakuru y’ibikorwa bimwe na bimwe bishimangira urwo ruhare.

Mu mwaka ushize wa 2016, Komisiyo y’u Rwanda ishinzwe kurwanya Jenoside yashyize ahagaragara urutonde rw’abayobozi 22 bakomeye muri politiki no mu gisirikari cy’Ubufaransa bagize uruhare muri Jenoside yakorewe Abatutsi. Aba ngo bashobora kuzagezwa imbere y’ubutabera igihe icyo ari cyo cyose.

Bernard Debré wize iby’ubuvuzi akaba ari umuganga wazobereye mu kuvura indwara z’imitsi, yabaye minisitiri ushinzwe ubutwererane bw’Ubufaransa n’ibindi bihugu hagati ya 12 Ugushyingo 1994 na 11 Gicurasi 1995. Kuri ubu ni umudepite mu nteko ishinga amategeko y’Ubufaransa akaba ari n’umujyanama wihariye wa François Fillon wiyamamariza kuyobora Ubufaransa.

François Fillon wiyamamariza kuyobora Ubufaransa (photo internet )

Amatora François Fillon yiyamamariza azaba kuwa 23 Mata no kuwa 7 Gicurasi uyu mwaka, akaba ari umwe mu bahabwa amahirwe yo kuzatsinda akaba perezida w’Ubufaransa muri manda itaha izamara imyaka itanu.

Minisitiri Louise Mushikiwabo yavuze ko abatuye mu mahanga bakwiriye kwegerezwa ibiro batoreraho

Ubu ambasade y’u Rwanda muri Canada yamaze kumenyesha Komisiyo ishinzwe Amatora mu Rwanda ko yategura ibyumba by’itora mu ntara za Ottawa, Montréal, Toronto na Edmonton, Abanyarwanda bahatuye bakazatorera hafi mu matora ya perezida wa Repubulika ateganyijwe kuba kuwa 03/08/2017.

Mu nama y’igihugu y’Umushyikirano ku nshuro ya 14 yateranye ku matariki ya 15-16 Ukuboza 2016 i Kigali, benshi mu Banyarwanda bayitabiriye bari bagaragaje ikibazo c’ingendo ndende bakora kugira ngo bagere ahari za ambasade z’u Rwanda mu bihugu batuyemo.

Icyo gihe Minisitiri Mushikiwabo yavuze ko hazakorwa ibikwiye byose ariko Abanyarwanda bashaka gutora umukuru w’igihugu bakazabikora mu buryo butabagoye.

Muri iyo nama y’Umushyikirano Minisitiri Mushikiwabo yagize ati “Rwose mubimenyeshe n’abandi Banyarwanda batuye mu mahanga ko dufatanije na Komisiyo y’Igihugu y’Amatora, twahagarukiye ikibazo cy’abakora ingendo ndende kugira ngo bashobore gutora ,tukaba tugiye kongera ibiro by’amatora.

“Turabizeza rwose ko turimo gukora ibishoboka byose ngo mu matora ari imbere Umunyarwanda wese uri mu mahanga wifuza gutora azabashe gutora bitamuruhije cyane.”

Abanyarwanda bari muri Canada bifuza gutorerayo ariko hari ibyo basabwe kuzuza ngo bazabashe gutora nk’uko ubutumwa Ambasade y’u Rwanda yabageneye buvuga.
Abanyarwanda bujuje ibisabwa ngo bagomba kugenzura kuri interineti ko bari ku rutonde rwa Komisiyo ishinzwe amatora mu buryo bukoresheje ikoranabuhanga, ndetse mu gihe babyifuza bagahindura n’aho bifuza kuzatorera.

Abifuza gutora ariko bataruzuza ibisabwa, cyane cyane abadafite indangamuntu bo bahawe igihe ntarengwa, ni ku itariki ya 24 Werurwe 2017 ngo babe bamaze kugeza kuri ambasade ibyangombwa birimo imyirondoro yabo, bityo nabo bazasabirwe ibyangombwa byuzuye kugira ngo bazitabire amatora ya perezida wa Repubulika.

Komisiyo ishinzwe amatora mu Rwanda iramutse yemeye ubu busabe, Abanyarwanda baba muri Canada baba boroherejwe gutorera hafi y’aho batuye, dore ko kugera ahubatse icyicaro cya Ambasade muri icyo gihugu gifite ubuso bukubye ubw’u Rwanda inshuro zisaga 380 (9.985 million km²) byari kuzagora benshi.

Komisiyo y’amatora mu Rwanda iravuga ko bahawe umukoro wo gutegura uko Abanyarwanda bose babishaka kandi bujuje ibisabwa bazoroherezwa gutorera hafi y’aho batuye mu mahanga.

Moise Bokassa ushinzwe itangazamakuru muri Komisiyo y’Amatora yabwiye Kigali Today ko ubu barimo gukorana na Minisiteri y’ububanyi n’amahanga ngo bamenye imibare nyayo y’abifuza gutorera mu mahanga n’aho baherereye.

Bwana Moise Bokassa yavuze kandi ko, muri iki gikorwa bari bafatanya n’umushinga w’igihugu ushinzwe indangamuntu mu Rwanda ngo abo bashaka gutora bazabe banafite ibyangombwa bisabwa nk’indangamuntu n’indi myirondoro ikenerwa mu kubarura abemerewe gutora.

Abagaragaje izi mpungenge barimo Abanyarwanda batuye mu Butaliyani, Espagne, muri Leta Zunze Ubumwe za Amerika, n’ahandi hatandukanye.

Mu nama y’umushyikirano, Minisitiri Louise Mushikiwabo yemeje ko mu matora aherutse hari Abanyarwanda bakoraga ingengo ndende bajya gutora kandi bikabavuna.

Madamu Mushikiwabo yavugaga ko, nko muri Leta Zunze Ubumwe za Amerika uko zingana zose ngo habagamo ibiro by’itora bibiri gusa, ahitwa New York na Washington.

Icyo gihe ariko yari yiyemeje ko u Rwanda ruzavugana na Ambasade z’ibihugu bicumbikiye Abanyarwanda zose bakemeranywa ku mikorere izatuma borohereza Abanyarwanda bose bifuza gutora kubona aho batorera kandi hafi.

Umunyamabanga wa Leta muri MINAGRI, Fulgence Nsengiyumva avuga ko mu myaka itatu mu Rwanda hazaba huzuye uruganda rutunganya ifumbire n’imbuto z’indobanure

Byatangajwe n’umunyamabanga wa leta muri MINAGRI, Fulgence Nsengiyumva ubwo yari ari mu kiganiro "Ubyumva ute ?" cyatambutse kuri KT Radio ku wa kane tariki ya 23 Gashyantare 2017.

Yavuze ko Leta iri mu biganiro byenda kurangira n’abashoramari bo mu gihugu cya Maroc bazubaka uruganda rutunganya ifumbire n’imbuto z’indobanure.

Agira ati "Rwose imbogamizi zikomereye abahinzi mu Rwanda mu kubona amafumbire mvaruganda n’imbuto z’indobanure ntibizarenza imyaka itatu, nibitinda izaba ine.

Ariko bizabonerwa igisubizo cya burundu kuko muri iyo myaka hano mu Rwanda hazaba haruzuye uruganda rutunganyiriza hano iwacu amafumbire akenewe ndetse n’imbuto zikenerwa kurusha izindi."

Umunyamabanga wa Leta muri MINAGRI, Nsengiyumva avuga ko Ikigo cy’Igihugu gishinzwe ubuhinzi n’ubworozi (RAB) gisanzwe gitunganya zimwe mu mbuto zihingwa mu Rwanda, ariko hakaba n’izindi zikenerwa zitumizwa hanze y’u Rwanda.

Ibi rero ngo byatera ubukererwe kuko abatunganya izo mbuto ngo baba bakorera ibihugu byinshi, bigatuma rimwe na rimwe izo u Rwanda rwabasabye ziboneka zitinze, kimwe ndetse n’amafumbire mvaruganda.

Ibi byose ngo biri mu nzira zo kubonerwa umuti wa burundu kuko urwo ruganda rugiye kubakwa ruzajya rutunganya ibyo byose, rukabikorera hafi kandi n’ababikeneye bakabikoreshereza ku ruganda rubegereye.

Amasezerano yo gushyiraho uru ruganda ngo yagezweho mu mpera z’umwaka ushize wa 2016, ubwo umwami wa Maroc yasuraga u Rwanda.

Yashoje uruzinduko rwe u Rwanda na Maroc basinyana ayo masezerano akubiyemo no kubaka inganda zitunganya imiti n’inyongeramusaruro.

Mbere y’icyo gihe ariko ngo Leta iracyakomeza kugura mu mahanga inyongeramusaruro zikenewe kandi zigahabwa abahinzi bose mu buryo bubegereye banyuze kuri buri murenge muri 416 igize igihugu.

Ifumbire y’imborera niyo y’ibanze

Muri icyo kiganiro umunyamabanga wa Leta muri MINAGRI, Nsengiyumva yibukije abahinzi ko mu gushaka kongera umusaruro bakwiye gukomeza kwita ku ifumbire y’imborera.

Umunyamakuru wa KT Radio, Anne Marie Niwemwiza mu kiganiro "Ubyumba Ute?" ari kumwe n’umunyamabanga wa Leta muri MINAGRI, Fulgence Nsengiyumva

Ahamya ko ariyo y’ibanze mu gutuma ubutaka bugumana ubushobozi bwabwo, ifumbire mvaruganda ikazaba iyo kubunganira.

Agira ati "Mu buhanga bwo guhinga neza, ifumbire y’imborera niyo y’ibanze n’ubwo dukeneye amafumbire mvaruganda ngo tweze umusaruro mwinshi ariko ubwiza bw’ibihingwa bukomoka mbere na mbere ku ifumbire y’imborera."

Akomeza yibutsa ko hari amasoko amwe n’amwe yo ku mugabane w’Uburayi ashaka gusa ibiribwa biba byarahinzwe nta fumbire mvaruganda ikoreshejwe.

Aha akaba yaboneyeho gushishikariza abafite ifumbire y’imborera ihagije kuyikoresha neza bakabona umusaruro mwinshi ushobora no kugurishwa ku masoko mpuzamahanga.

Muri iki kiganiro hagarutswe kandi ku bibazo bigaragara mu kwita ku musaruro w’ibiribwa, mu gihe cy’isarura no guhunika neza umusaruro, kubigeza ku isoko no gushyiraho ibiciro bibereye abahinzi, ndetse no kubona ubwishingizi mu bikorwa by’ubuhinzi.

Visi perezida w’u Buhinde yizeje u Rwanda amashanyarazi.

Uyu mushinga ni umwe muri myinshi visi perezida w’Ubuhinde Shri Hamid Ansari uri mu ruzinduko mu Rwanda azasiga ibonye icyerekezo cyo gutangira vuba aha.

Hari kandi n’indi mishinga iri mu rwego rw’ikoranabuhanga, gutwara abantu n’ibintu, kongera amazi mu gihugu no kwimakaza umubano hagati y’abatuye ibihugu byombi.

Umushinga wo kongera amashanyarazi akomoka ku mugezi wa Nyabarongo ngo uzatwara Miliyoni 98 z’Amadorari y’Amerika, hakazubakwa urugomero rutanga megawati 17 z’amashanyarazi ya 17.

Perezida Kagame yakiriye Visi Perezida Ansari mu Rugwiro.

Ibi bikazakorwa n’ibigo Bharath Heavy Electrical Ltd (BHEL) na Angelique International Ltd (AIL) byo mu Buhinde.

Si ubwa mbere Ubuhinde bufasha u Rwanda mu mishinga y’amashanyarazi kuko n’icyiciro cya mbere cyo kubyaraza umugezi wa Nyabugogo amashanyarazi angana na megawati 28 cyatashywe mu 2015, cyatewe inkunga na banki y’Ubuhinde.

Cyanubatswe kandi n’ibigo by’Abahinde hagendewe ku masezerano y’ubufatanye u Rwanda n’Ubuhinde bari basinyanye muri Nyakanga 2008.

Nikobisanzwe Claude, Umunyamabanga uhoraho muri minisiteri y’ububanyi n’amahanga y’u Rwanda, wari mu biganiro perezida Kagame yagiranye na Visi Perezida Ansari yabwiye Kigali Today (KT Press) ko abayobozi bombi bumvikanye ko uyu mushinga w’amashanyarazi uzatangira vuba.

Ubwo Perezida w’u Rwanda yatangiraga manda ye, yijeje Abanyarwanda ko mu mpera za 2017 u Rwanda ruzaba rufite amashanyarazi angana na 563MW.

Birashoboka ko kongera amashanyarazi biri muri gahunda yo gusohoza isezerano Perezida Paul Kagame yagiranye n’Abanyarwanda.

Mu minsi ishize kandi, u Rwanda rwatangije gahunda yo kongera umuriro w’amashanyarazi hifashishijwe gazi yo kiyaga cya Kivu, iyo gazi ikazatanganga megawati 200 (MW), haracyari n’indi mishinga myinshi igamije kongera ingufu z’amashanyarazi.

Imibare itangwa n’ikigo cy’u Rwanda gishinzwe iterambere igaragaramo ko ibigo bikomoka mu Buhinde n’abaturage b’Ubuhinde bashoye akayabo ka Miliyoni 318 z’Amadorari y’Amerika mu bikorwa binyuranye mu Rwanda mu myaka itandatu ishize.

Visi Perezida w’Ubuhinde Shri Hamid Ansari ari mu Rwanda mu ruzinduko rw’iminsi itatu, bikaba biteganyijwe ko we n’itsinda ry’abashoramari ayoboye baza gusangira ku meza n’abashoramari bakomeye mu Rwanda, bakanarebera hamwe izindi nzego z’ubucuruzi bafatanyamo bagahuza imbaraga.

Abadepite batoye itegeko ngenga rishyiraho Igiswahili nk’ururimi rwemewe mu butegetsi mu Rwanda

Ibi byemejwe nyuma y’amatora yakozwe n’Abadepite, kuri uyu wa gatatu tariki ya 08 Gashyantare 2017.

Iri tegeko nirimara gushyirwaho umukono na Perezida wa Repubulika rizatangazwa mu igazeti ya Leta hanyuma ritangire gushyirwa mu bikorwa.

Nubwo hataramenyekana neza aho Igiswahili kizakoreshwa mu buzima bwa buri munsi, abakuru b’ibihugu bigize Umuryango wa Afurika y’Iburasirazuba (EAC), bamaze gusaba ko inyandiko z’inzira ku baturage ba EAC zose zaba zirimo ururimi ry’Igiswahili.

Kuba uru rurimi rukoreshwa na benshi mu nzego z’abikorera n’ubucuruzi mu bihugu binyuranye bya Afurika, birashoboka ko Igiswahili cyazagezwa mu byiciro byose by’ubuzima mu Rwanda, haba mu nzego za Leta, mu mashuri, mu bapiganira akazi, mu bushakashatsi n’ahandi.

Julienne Uwacu, Minisitiri ushinzwe umuco na siporo mu Rwanda wasobanuriye Abadepite iby’itegeko ryishyira Igiswahili mu ndimi zikoreshwa mu butegetsi mu Rwanda, yavuze ko Perezida wa Repubulika azashyiraho iteka rizasobanura mu buryo bwimbitse imikoreshereze y’ururimi rw’ Igiswahili mu Rwanda.

Igiswahili nigitangira gukoreshwa, kizaba kibaye ururimi rwa kane mu zemewe gukoreshwa mu Rwanda.

Ingingo ya gatanu y’Itegeko Nshinga rya Repubulika y’u Rwanda ryo mu mwaka wa 2003 nk’uko ryavuguruwe muri 2015, ivuga ko ururimi rw’igihugu ari Ikinyarwanda. Naho indimi zikoreshwa mu butegetsi ni Ikinyarwanda, Igifaransa n’Icyongereza.”

Africa Report mu 2013 yatangaje ko abaturage bavuga Igiswahili babarirwa hagati ya Miliyoni 50 na 100.

Muri Tanzania, Kenya, na Repubulika iharanira Demokarasi ya Congo barugize ururimi rw’ibanze rukoreshwa mu burezi n’ibindi bikorwa by’ingenzi mu gihugu.

Ibara ryijimye riza ku mafiriti rishobora gutera indwara ya kanseri

Food Standards Agency, ikigo gishinzwe gukurikirana ubuziranenge bw’amafunguro mu Bwongereza cyasohoye amabwiriza ahamagarira abaturage kwirinda kurya amafiriti n’imigati byijimye.

Iki kigo kivuga ko mu bushakashatsi cyakurikiranye, byagaragaye ko gufungura ibirimo acrylamide igihe kirekire bitera indwara ya kanseri.

Ubu bushakashatsi bwakorewe ku nyamaswa zagaburiwe igihe kirekire amafiriti n’imigati byijimye, biba byiganjemo acrylamide, biza kugaragara ko zose zanduye indwara ya kanseri, bituma abashakashatsi batahura ko bene ayo mafunguro ari ayo kwirindwa.

Ngo iyo mu gihe cyo guteka hakoreshejwe ubushyuhe buri hejuru cyane, hari impinduka ziterwa n’uko imisemburo yitwa amidon iba mu biribwa by’ibinyamafufu byose ihindukamo acrylamide.

Dr Guy Poppy ukuriye abajyanama b’abahanga muri icyo kigo gishinzwe gukurikirana ubuziranenge bw’amafunguro mu Bwongereza Food Standards Agency avuga ko bikwiye kwirindwa.

Yagize ati « Gufata amafunguro arimo acrylamide igihe kirekire byongera cyane ibyago byo kurwara indwara ya kanseri ku buryo budashidikanywaho. »

Kwirinda iyi ndwara abantu bagirwa inama yo kurya ibitogosheje cyangwa ibitahinduye ibara

Kuri ubu Food Standards Agency yamaze gutanga amabwiriza asaba abaturage bo mu Bwongereza kwihatira gufata amafunguro yatetswe mu buryo budakoresha ubushyuhe buri hejuru cyane.

Abashaka gukumira iyi ndwara ngo bakwihatira kujya bafata amafunguro yatetswe mu mazi n’ayatekeshejwe umwuka ushyushye (boiled, steamed and mashed food).

Bashobora no kurya ibyatetswe mu mavuta n’ibyuma bishyushya cyane bajye babifata bitarahindura ibara ngo usange byijimye cyane.

Aha niho inzobere za Food Standards Agency ziburira n’abakunda kotsa imigati yahiye, bakongera kuyumutsa cyangwa kuyotsa ngo ihindure ibara kandi yumuke cyane.

Ngo ibyagize ibara ryijimye byose ni ibyo kwirindwa, ushaka gufungura ibitamuteza ibyago akwiye kubirya bigisa n’umuhondo ucyeye.

Abanyura mu Rwunge rw’Amashuri rwa Nyange barasabwa kurangwa n’umuco w’ubutwari nk’uwaranze bakuru babo.

Ahagana saa mbiri z’ijoro kuwa kabiri tariki ya 18 Werurwe 1997 ni bwo abanyeshuri bari bamaze gufata ifunguro ry’umugoroba mu Rwunge rw’Amashuri rwa Nyange, baguwe gitumo n’Abacengezi, havuka amateka y’abakiri bato bagaragaje ishyaka ryo kwanga kwitandukanya.

Abacengezi bagenzwaga no gukomeza umugambi wo gutsemba Abatutsi, bageze muri icyo kigo, bategeka abanyeshuri kwitandukanyamo Abahutu n’Abatutsi, ngo babone uko babica. Mujawamahoro Marie Chantal yahise abasubiza ko bose biyizi nk’Abanyarwanda batari bwitandukanye.

Abacengezi batunguwe n’icyo gisubizo, barasohoka basiga abana mu ishuri, hanyuma babateramo igisasu cya gerenade mu idirishya, gikomeretsa bamwe.

Mujawase Vestine, mushiki wa Bizimana bari bararokokanye.

Bamaze gukomereka barongera barinjira basaba ko Abahutu bitandukanya n’Abatutsi. Nibwo Sylvestre Bizimana yabasubije agira ati “Nta Muhutu nta Mututsi muri twe, twese turi Abanyarwanda.”

Aha niho Abacengezi babonye ko umugambi wabo ubapfubanye, batangira kurasa urufaya mu bari mu ishuri bose, Mujawamahoro Marie Chantal na Bizimana Sylvestre bagwa aho, kimwe n’abandi batanu abandi 19 basigara ari inkomere.

Kigali Today yasuye abasigaye bo mu muryango wa Bizimana Sylvestre, aho batuye mu mujyi wa kigali, mu Murenge wa Kagarama mu Karere ka Kicukiro. Bavuga ko bamwibuka nk’umuvandimwe wabaye intwari kandi bafatiyeho urugero rwiza rw’urukundo no kwitanga.

Imva aba banyeshuri bagizwe intwari bashyinguyemo.

Yari umusore ukiri muto, ugira ishyaka ryo gutera imbere

Muri iryo joro ryo muri Werurwe 1997, Bizimana wari mu mwaka wa gatandatu yari ataruzuza imyaka 22. Abavandimwe be ariko bamwibuka nk’uwari yarababereye umubyeyi dore ko ari we wari imfura mu bana b’iwabo kandi ababyeyi bari barishwe imyaka itatu mbere yaho muri Jenoside yakorewe Abatutsi.

Murumuna we Valens Nsekanabo avuga ko bamaze gusigara bonyine nyuma ya Jenoside, abahungu batatu n’abakobwa batatu, mukuru wabo Sylvestre Bizimana yarwanye uko ashoboye ngo babashe kwiga baziteze imbere.

Bose bagiye mu ishuri, ariko mu ntangiriro birabananira kubera ubushobozi buke baza kugobokwa n’Ikigega gifasha abarokotse Jenoside batishoboye cyashyizweho mu 1998, icyo gihe cyari kikiri NDLR.

Bizimana ngo yabanje gukora uko ashoboye kugira ngo abavandimwe be bige, akajya ashaka uturimo twinjiza amafaranga akora, ari nako yiga, ariko abona biri kunanirana, akoranya abavandimwe be, bumvikana ku cyari gukorwa ngo bose babashe kugira intambwe batera.

Avuga ko Bizimana wari umaze kwimuka mu mashuri atatu mu mwaka umwe, anyuze i Kagogo, i Shyira na Rilima, hose biterwa no gushakisha aho yakwiga akanabasha gukora utundi turimo, yicaje abavandimwe be, bafata umwanzuro wo guhindura icyerecyezo.

Yagize ati “Yatugiriye inama ko twakwemera guhangana n’ubuzima bubi, njye nkaba mpagaritse amashuri nkashaka akazi kaba gafasha abavandimwe kubaho, hanyuma Bizimana we wari ugeze kure agakomeza amashuri y’ubwarimu akazarangiza ashaka akazi, akazadufasha twese kwiga no kubaka inzu twari kubamo nk’umuryango.”

Nibwo yagiye kwiga ku kigo cya Nyange, aho Abacengezi baje kumusanga, we na bagenzi be babica babahoye kurwanya ingengabitekerezo mbi itanya Abanyarwanda.

Yapfuye yari aherutse kuza kudusezera- Nsekanabo

Nsekanabo avuga ko iminsi itatu mbere y’uko Abacengezi batera ishuri rya Nyange, Bizimana yari aherutse kubasura ubwo yari mu baherekeje umunyeshuri urwaye kwivuza muri Kigali.

Nsekanabo yibuka ko mukuru we yabasabye gukomera bakaba intwari, hanyuma agasiga abandikiye ibaruwa rusange ya bose.

Yanditse agira ati “Muzakomeze mube intwari kandi mubeho mufatanya, buri wese amenya umuvandimwe we.

Ndateganya kujya gusura bucura bw’iwacu aho yiga i Rambura, ariko mbaye mbigusabye muvandimwe Nsekanabo ubeho uzi ko ari wowe mukuru w’umuryango. Ndabakunda kandi mfite ku mutima kubaka inzu nziza idukwiriye twese.”

Kubwa Nsekanabo, ngo mukuru wabo yahoraga ababajwe no kuba badafite inzu nziza babamo, agahorana ku mutima kuzayibubakira. Ngo yari yaramaze kuyishushanya uko yari kuzaba iteye, ariko abokamwe n’ingengabitekerezo y’urwango n’amacakubiri ntibamwemereye gusohoza uwo mugambi.

Umugambi Nsekanabo agifite kugeza ubu, kuko avuga ko we n’abavandimwe basigaye bagifite intego yo kubaka inzu iwabo babasigiye, aho muri Kicukiro.

Bamwibukira ku mufariso yaryamagaho

Bizimana Sylvestre ni umwe mu ntwari u Rwanda rwibuka buri tariki ya mbere Gashyantare, akaba ari mu cyiciro cy’Imena.

Ashyinguwe mu irimbi rya Kicukiro, ariko mu nzu abavandimwe be batuyemo nta rundi rwibutso rwe bafite uretse umufariso yaryamagaho ku ishuri, ubu urimo ibizinga by’amaraso kuko ari wo bamuryamishijeho mu ijoro ryo kuwa 18 Werurwe 1997 Abacengezi bamaze kumurasa.

Mushiki we witwa Mujawase Vestine mu mvugo yuzuye agahinda ati “Uyu mufariso ni rwo rwibutso rwe twasigaranye, ibyari ibye bindi byose byatakaye ku ishuri aho yigaga muri ibyo bihe.”

Umufariso wa Bizimana na wo ngo bawuzaniwe n’abiganaga na we, ariko ngo nta muntu n’umwe uzabatandukanya na wo.

Aho Bizimana ashyinguye i Gahanga muri Kicukiro, kimwe n’aho abandi bane bashyinguwe n’imiryango yabo ubwo bicwaga mu 1997, hose hazashyirwa ibimenyetso kandi hubakwe neza ku buryo hazaba igicumbi gikwiye intwari z’igihugu nk’uko urwego rw’igihugu rushinzwe Intwari rubitangaza.

Abandi babiri bashyinguwe ku gicumbi cy’intwari i Nyange, naho uwa karindwi ashyinguwe mu irimbi ry’abazize Jenoside i Nyanza ya Kicukiro.

Ikibuga cy’indege cya Bugesera ni imwe mu mishinga itegerejwe na benshi.

Mu kiganiro Ubyumva ute? cyaciye kuri KT Radio cyo kuwa kane tariki 26 Mutarama 2017, umuyobozi w’aka karere wungirije Mukunde Angelique, yavuze ko abafite imari bashaka gushora bakwiye kuyerekeza muri Kicukiro mu minsi iri imbere.

Yavuze ko igishushanyo mbonera kigaragaza ko kazaba amarembo y’umurwa mukuru Kigali mu minsi mike, ubwo ikibuga cy’indege mpuzamahanga cya Bugesera kizaba cyuzuye, kuko ngo abazaba baza mu mujyi bose bazajya batungukira muri Kicukiro.

Yagize ati “Abanyamahanga n’abenegihugu, abashoramari n’abakerarugendo bazajya bahagera bazaba bafite ibyo bakenera byihariye, urwego rw’abikorera rukwiye kwigaho neza, abashoramari bagatangira kubyubaka nabo bakazasarura inyungu muri ibyo bikorwaremezo n’isoko rizagendana nabyo.”

Mukunde Angelique, ubwo yari kuri KT Radio mu Kiganiro "Ubyumva ute?"

Yavuze ko mu nzego akarere ka Kicukiro kamaze gutera imboni ngo harimo ubucuruzi bujyanye no kwakira abantu mu byiciro binyuranye nk’amacumbi n’amafunguro n’imyidagaduro, kuko aho Kicukiro hazaba haranubatswe sitadi ikomeye y’imikino ahitwa i Gahanga.

Aha ngo hazaba hanakenewe uburyo bw’imyidagaduro bushamikiye ku bikorwa bibera muri sitadi n’ibyo abayigana bakenera bindi.

Ibi ngo akarere kabibonamo amahirwe akomeye mu ishoramari, ababifitiye ubushake bashobora kwigaho neza bakabibyaza imishinga yunguka amafaranga.

Mukunde yagaragaje ko muri Kicukiro harimo n’ibindi bikorwa by’ubucuruzi no gutanga serivisi zinyuranye mu duce tuzwi cyane kandi dutuwe na benshi nk’ahitwa Kicukiro Centre, Kagarama na Gikondo.

Akarere ka Kicukiro ni kamwe mu turere dutatu tugize umujyi wa Kigali, kakaba gatuwe n’abaturage basaga ibihumbi Magana atatu.

Izi mpuguke zizaza mu Rwanda kwiga uko bongera umusaruro

Izo mpuguke zizaturuka mu bihugu bya Benin, Burkina Faso, Burundi, Cameroon, Ethiopia, Ghana, Senegal, Sudani y’Epfo, Repubulika ya Sudan n’u Rwanda. Zizaza mu Rwanda mu kwezi kw’Ugushyingo 2016.
Zigiye kuza mu Rwanda nyuma y’amezi atanu zari zimaze mu kigo kita ku buhinzi cyo mu Misiri kitwa Egyptian International Centre for Agriculture, ziga guhinga umuceri. Ubwo zari ziri muri icyo gihugu nibwo ababigishaga bemeje ko icyiciro gitaha bazacyigira mu Rwanda.

Uhagarariye u Rwanda mu gihugu cya Misiri, Ambasaderi Sheikh Saleh Habimana yabwiye Kigali Today ko abigishaga inzobere zo muri biriya bihugu, basabye ko u Rwanda rwakwakira icyiciro gikurikiraho.

Bakazasesengura uko ubuhanga mu guhinga umuceri bahawe mu Misiri bwahuzwa n’ubunararibonye bw’u Rwanda mu kubyaza ingufu nke umusaruro mwinshi nk’uko rwabigaragaje muri gahunda zitandukanye z’iterambere rwakoresheje nyuma ya Jenoside yakorewe Abatutsi mu 19994.

Izo mpuguke zagiye mu Misiri kwiga kunoza tekiniki zo guhinga umuceri ku buryo bwa kijyambere kandi butanga umusaruro mwinshi, muri gahunda iterwa inkunga n’ikigega cy’Ubuyapani gishinzwe iterambere mpuzamahanga kitwa JICA. Zagiye muri Mata 2016 zisoza muri Nzeli 2016.

Abitabiriye ayo mahugurwa bo mu Rwanda ni Randagiye Laetitia na Ntirenganya J Bosco, basanzwe bakora mu kigo cy’u Rwanda gishinzwe guteza iimbere ubuhinzi (RAB).

Abanyarwanda bagiye mu Misiri kwiga guhinga umuceri bya kijyambere bari kumwe na Ambasaderi w’u Rwanda mu Misiri

Ambasaderi Sheikh Saleh Habimana avuga ko ikigo cyo mu Misiri cyita ku buhinzi gishima cyane intambwe u Rwanda rutera umunsi ku wundi rurangajwe imbere na Perezida Paul Kagame.

Minisitiri w’Ubuhinzi n’Ubworozi, Dr Geraldine Mukeshimana, yeruye asaba imbabazi.

Kigali Today yamenye ko abitabiriye iyi nama babangamiwe no kubura amafunguro ahagije mu gihe gikwiye, kuyabona bigoranye igihe yabaga ahari, ndetse no kutagira ababayobora bahagije mu gihe babaga bakeneye kugira ibyo bamenya ku mirimo y’inama.

Ubwo bari mu birori byo kwishima no gusoza inama mu ijoro ryo kuri uyu wa Gatatu, Minisitiri Mukeshimana yasabye imbabazi abashyitsi n’abandi batanogewe n’ibyo babonye mu nama, avuga ko yemeye kwirengera amakosa yakozwe n’abo bari bafatanyije gutegura iyo nama.

Minisitiri Mukeshimana yagize ati "Hari ibitaranogeye abashyitsi bacu n’abandi bitabiriye inama. Ni amakosa twemera ku ruhande rwacu nk’abateguye inama, by’umwihariko muri Minisiteri y’Ubuhinzi n’Ubworozi yateguraga iyi nama ku buryo bwihariye.”

Ikibazo cy’amafunguro adahagije ku bitabiriye inama cyatumye Minisitiri w’Ubuhinzi n’Ubworozi asaba imbabazi.

Yakomeje agira ati "U Rwanda rusanzwe rwakira abashyitsi neza ndetse abakurambere bacu badutoje kumenya ko umushyitsi ari umwami, bityo tukaba tutanezejwe n’ibitaratunganiye abashyitsi n’abitabiriye inama bose. Gusa uwo si umuco w’i Rwanda, ndetse turizera ko abazatugenderera ubutaha tuzabakira neza uko Umunyarwanda nyawe yabitojwe."

Aha bari mu biganiro bya FARA.

Inama mpuzamahanga ku buhinzi bukoreshwa ikoranabuhanga yaberaga mu Rwanda, yateguwe n’Ihuriro FARA (Forum for Agricultural Research in Africa) rifite icyicaro muri Ghana, bayitegura ku bufatanye na Leta y’u Rwanda binyuze muri Minisiteri y’Ubuhinzi n’Ubworozi y’u Rwanda (MINAGRI).

Abitabiriye iyi nama bagera ku bihumbi bine baje baturutse imihanda yose ku isi, bashaka kwigira hamwe uko urwego rw’ubuhinzi rwakwitabirwa n’abakiri bato, abanyemari n’impuguke, ariko rugatanga umusaruro uhagije mu kugaburira abaturage ba Afurika.

Wari umuhango wari ushyushye banasusurutsa abashyitsi mu kadiho k’umuco nyarwanda.

Ibyo kuba abitabiriye iyi nama bataranyuzwe na bimwe birimo amafunguro make kandi atabonekera igihe, bibaye nyuma y’iminsi mike Perezida Paul Kagame anenze bamwe bakora mu mirimo yo kwakira abashyitsi kuko no mu nama yiswe "World Economic Forum Africa" havuzwe ko abayitabiriye batanyuzwe n’ingano y’amafunguro bazimaniwe.

Minisitiri w’Intebe Anastase Murekezi arimo gusubiza ibibazo bitandukanye kuri Twitter.

Uhereye isaa yine kugeza isaa tanu z’iki gitondo, ku murongo we wa twitter @amurekezi, Minisitiri w’Intebe arimo kugirana ikiganiro n’ababishaka, aho baganira kuri gahunda za guverinoma y’u Rwanda, bamubaza ibibazo bitandukanye.

Abashaka kuganira na Minisitiri w’Intebe barakoresha uburyo bwo kwinjira mu kiganiro bwa #TalkToPMRwanda, abakoresha twitter bita “hashtag”.

Iki kiganiro kiba gifunguye kuri buri muntu wese Minisitiri w’intebe Murekezi ajya agikora rimwe na rimwe ku wa Gatanu, akaganira kuri gahunda zinyuranye n’ibikorwa bireba u Rwanda.

Minisitiri w’Intebe arimo gusubiza abamubaza ibibazo.

Kuganira na Minisitiri w’Intebe w’u Rwanda kuri twitter byatangiye kuwa 01 Kamena 2012 bitangijwe na Dr Pierre Damien Habumuremyi wari Ministre w’Intebe w’u Rwanda icyo gihe. Dr Habumuremyi yatangiraga kwakira ibibazo n’ibitekerezo ku isaha ya saa munani.

Icyo gihe uwari Minisitiri w’Intebe Habumuremyi yavugaga ko icyo kiganiro kimara isaha imwe, ariko byaje kugaragara ko afata umwanya urenze isaha imwe agasubiza ibiba byabajijwe byose.

Abandi baminisitiri mu Rwanda bajya bafata umwanya bakaganira n’ababyifuza ariko ku buryo budahoraho barimo Minisitiri w’Ubuzima, Agnes Binagwaho, Minisitiri w’Ubucuruzi n’Inganda, Kanimba Francois na Minisitiri w’Umutungo Kamere, Vincent Biruta.

Minisitiri w’Intebe Anastase Murekezi yararikiye ababishaka bose kumubaza icyo bifuza kuri guverinoma ayoboye.

Perezida w’u Rwanda Paul Kagame na we ajya yakira ibitekerezo akanasubiza ibibazo binyuze ku rubuga rwa Twitter, ariko we ntabwo agira igihe cyihariye gihoraho cyo gukora iki kiganiro.

Imikorere ya Twitter yemerera abantu bose bari kuri Twitter babishaka gukurikirana ibivugwa mu biganiro nk’ibi no kubigiramo ijambo.