Ni irushanwa ryari rimaze iminsi ribera mu gihugu cya misiri, dore ko ryatangiye tariki 14 Mata risozwa kuri uyu wa Kabiri tariki ya 23 Mata 2024.

Muri iri rushanwa rihuza amakipe yabaye aya mbere iwayo, u Rwanda rwari ruhagarariwe n’amakipe 2 ariyo Gisagara Volleyball Club ibitse igikombe cya shampiyona cya 2023, ndetse na Police Volleyball yo yegukanye umwanya wa 3.

Aya makipe yombi yari mu matsinda atandukanye aho Police VC yari mu itsinda rya kane ririmo Kenya Ports Authority (Kenya), Green Buffaloes Volleyball Club (Zambia), University of Zimbabwe Wolves Club (Zimbabwe) ndetse na Volleyball Club Garde yo muri Congo (DRC).

Muri iri tsinda, ikipe ya Police VC yazamutse ari iya kabiri nyuma ya Kenya Ports Authority byanatumye ibona itike ya 1/8, aho yaje guhura na WATLemcen yo muri Algeria ndetse na yo ntiyaje kuyirebera izuba, kuko yayitse amaseti 3 kuri 2 maze Police VC yerekeza muri ¼.

Mu mu kino wa ¼ aba basore ba Kacyiru ntibahiriwe kuko batsinzwe n’ikipe ya Al Ahly yo mu misiri ndetse akaba ari nay o yari yakiriye iri rushanwa amaseti 3-0. Nyuma yahise ijya guhatanira kuva ku mwanya wa 5-6, ariho yatsindiwe n’ikipe ya ASW Sport de Blida yo mu gihugu cya Algeria, ku iseti ya kamarampaka bivuze ko umukino wakinwe mu ma seti 5.

Ku rundi ruhande, ikipe ya Gisagara Volleyball Club yo wavuga ko itigeze ihirwa n’irushanwa, kuko yatahukanye umwanya wa 18 muri rusange mu makipe 21. Uyu mwanya Gisagara Volleyball Club yasorejeho, ni na wo mwanya wa nyuma mubi waba waragizwe n’amakipe yo mu Rwanda muri iri rushanwa, nyuma ya APR VC yigeze kugira umwanya wa 14.

Biteganyijwe ko amakipe yombi agomba guhaguruka mu gihugu cya misiri ku wa kane agaruka i Kigali, dore ko bazahita bakomeza na shampiyona.