Uyu mubyeyi Mukamana yatoranyijwe nk’umupfakazi utishoboye maze yubakirwa iyi nzu yo kubamo ayihabwa irimo n’ibikoresho birimo intebe n’igitanda na matora.

Mukamana Annonciate umubyeyi wahawe iyi inzu nshya yashimiye Nyakubahwa Perezida Paul Kagame wamutekereje, n’ingabo z’u rwanda kuba baramwibutse bakamufasha guhindura ubuzima bwe bakamuha inzu nshya irimo n’ibikoresho.

Ati: "Ndashaka gushimira Perezida wa Repubulika n’ingabo z’u Rwanda kuba bampaye inzu nshya. Iyi nzu impindurirye ubuzima bwanjye cyane kuko mbere nari mu bihe bitoroshye hamwe n’abana banjye, ariko ubu nishimiye kubona inzu nshya ifite amashanyarazi, ibitanda, n’intebe. Nishimiye rwose inkunga yanyu inkuye mu kiciro inshyira mu kiciro cy’abantu bishoboye.

Mukamana Marceline, umuyobozi w’akarere ka Gatsibo wungirije ushinzwe imibereho myiza y’abaturage, yashimiye ingabo z’u Rwanda (rdf) ndetse n’abandi bafatanyabikorwa bagize uruhare muri gahunda yo kwegera abaturage ikorwa n’ingabo z’u Rwanda igamije kuzamura imibereho y’abaturage.

Ati “Iyi gahunda yatangijwe muri werurwe 2024 igamije kuzamura imibereho myiza y’abaturage mu gihugu hose kandi ubuyobozi bw’akarere bwiyemeje gukomeza ubwo bufatanye hagamijwe guhindura ubuzima bw’abatishoboye bavanwa mu kiciro binjira mu kindi”.

Iyi nzu yashyikirijwe uyu mubyeyi iri mu bikorwa birimo gukorwa muri gahunda yatangijwe muri Werurwe yiswe Defence and Security Outreach Programme aho inzego z’umutekano zegereje abaturage ibikorwa bitandunye birimo iby’iterambere n’ubuvuzi.